::
Home » Verbatim » Verbatim - Third Term 2012 » Tuesday 13th November, 2012

Tuesday 13th November, 2012

NATIONAL ASSEMBLY OF SEYCHELLES

Tuesday13th November 2012

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal, bonzour Minis ek son delegasyon.  O non Lasanble Nasyonal mon oule osi swet labyenveni dan galeri bann manrmay P5 lekol Anse Aux Pins primer.  Alor ozordi nou bezwen et tre egzanpler pou donn legzanp nou bann zanfan e parmi nou ozordi se Minis pou Lanvironnman ek Lenerzi Profeser, Doctor Rolph Payet ki pe vin reponn bann kestyon.  Avek sa mon oule swet tou bann dimoun dan lakour bonzour e mon envit Onorab Alderic Bristol pou demann kestyon 134.  Onorab Bristol.

 

HON ALDERIC BRISTOL

Mersi Mr Speaker.  Bonzour Mr Speaker, Minis ek ou delegasyon.  Mr Speaker, eski Minis i kapab enform sa Lasanble si zot ankor antreprann koupayaz pye dibwa, brans e feyaz danzere lo bann fil elektrik, sirtou dan rezyon ki en pe retire avek semen?  Mersi.

 

MINISTER ROLPH PAYET

Bonzour Mr Speaker, bonzour tou bann Manm Lasanble.  Wi, koupayaz pye dibwa lo laliny PUC i en legzersis kontinnyel, menm dan rezyon ki en pe retire avek semen.  PUC i annan en progranm netway pye dibwa lo lalinny par son prop lekip e osi par bann kontrakter prive.  Ler PUC i remarke ki i annan okenn vezetasyon ki pe apros son laliny, zot asire ki netwayaz i ganny fer pou garanti sekirite dan servis elektrisite.  PUC i kont touzour lo korperasyon manm piblik, espesyalman bann propriyeter prive, ler zot pe antreprann sa bann legzersis.  Me par kont, sa bann vezetasyon i ganny trouve ki i pa en danze pou laliny elektrisite, PUC i asiste piblik an metan sa laliny ater pou nanryen e la sa endividyel i kapab koup sa bann brans ki poz en danze pou lezot lenfrastriktir.  Dimoun ki bezwen sa servis i kapab telefonn PUC Servis Breakdown lo nimero 4678910.  Okenn endividi ki netway obor laliny i ganny demande pou retir tou bann debri e osi depoz li dan landrwa apropriye.

I annan 2 lezot servis kominikasyon ki antreprann netwayaz dibwa lo laliny osi.  Sa se Cable and Wireless avek Intelvision.  Zot laliny i sitie anba difil elektrisite, lo poto ki pour PUC.  Alors, avan ki zot fer okenn travay netwayaz, zot bezwen enform PUC kwa ki zot annan lentansyon fer e kote.

Finalman nou osi pran sa lokazyon pour rapel tou manm piblik pou pa les bann pye dibwa parey albizya pous lo zot later, obor bann fasilite parey difil elektrik akoz sa i koz en kantite problenm pou sa Lazans.  Si zot bezwen koup bann pye dibwa proteze, fer sir zot ganny bann permi neseser avek Minister Lanvironnman ek Lenerzi.  Mersi Mr Speaker.

 

MR SPEAKER

Onorab Bristol, okenn siplemanter?

 

HON ALDERIC BRISTOL

Mr Speaker, mersi.  An relasyon avek son larepons, eski Minis i kapab enform sa Lasanble si PUC pe mazin travay etrwatman avek Lotorite distrik pou monitor e asire ki sa bann travay koupayaz i vreman ganny fer e i ganny fer byen?  E dezyenmman, eski PUC pe mazin involve plis bann pti kontrakter dan bann distrik respektiv, pou ede antreprann sa bann tel louvraz koupayaz?  Mersi bokou.

 

MINISTER ROLPH PAYET

Mersi Mr Speaker.  Mon krwar nou annan en bon legzanp.  Si nou get bann travay ki LWMA i fer, Land Waste and Management, se i travay pre avek kominote distrik, i osi involve bann pti kontrakter.  Presizaman, kekfwa travay PUC i involve en serten spesyalizasyon e mon pou vwar avek PUC kimannyer nou kapab fer sa travay vin pli efikas ankor e vwar kimannyer nou kapab travay plis avek kominote distrik.  Selman nou deza annan en legzanp ek en model ki marse, so mon pa vwar okenn problenm akoz nou pa kapab aprann e swiv sa model.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Bonzour tou dimoun.  Bonzour Minis, bonzour tou bann ki alekout.  Mr Speaker, eski Minis i kapab dir nou si en sitiasyon i arive, kot par egzanp en brans ki ti’n devret ganny koupe, ki pa’n ganny koupe i andomaz en laliny ki an retour i koz en koupman dan elektrisite dan en serten distrik oubyen en rezyon e kot sa koupman dan elektrisite an retour i andomaz serten propriyete en dimoun, tel ki par egzanp en fridge, en cooker elektrik eksetera, eski PUC i pran responsabilite pou sa e i pey domaz?  Si wi, eski i kapab eksplik sa Lasanble an prensip, ki fason sa i ganny fer?  Mersi Mr Speaker.

 

MINISTER ROLPH PAYET

Mersi bokou Mr Speaker.  Bonzour Onorab.  Sa kestyon i annan serten lenplikasyon legal.  Mon pa’n prepare pou reponn sa kestyon alors mon ti a demande ki mon ganny letan pou mwan kapab reponn sa kestyon….

 

(Interruption)

 

MR SPEAKER

Mon dakor antyerman avek ou, an prensip mon ti dwatet rule sa out of order. Annou pa abiz the rule akoz nou annan nou 10 kestyon ozordi, plus an Urgent Question silvouple.  Onorab Souris.

 

HON MIRENA SOURIS

Mersi Mr Speaker.  Bonzour Minis e tou ou delegasyon e enkli nou bann envite.  Mr Speaker, an vi ki lakantite feyaz danzere i souvandfwa andomaz lenfrastriktir litilite piblik, eski Minis i kapab dir ek sa Lasanble si son Minister pe konsider alavenir pou antreprann koupayaz feyaz danzere ase regilye koman en mwayen prevansyon?  Mersi.

 

MINISTER ROLPH PAYET

Mersi bokou Mr Speaker.  Parey zot konnen, nou pei i en pei ki ver, i bwaze en kantite e i pa toultan fasil pou nou met lanmen lo tou lenstans ki arive e definitivman mon pou travay avek PUC pou fer sir ki son sistenm sirveyans i pli efikas ki i ete ozordi, pou fer sir ki bann pye dibwa ki poz en danze avek bann lenfrastriktir i ganny maintain.  Me parey mon’n mansyonnen dan mon larepons, PUC son manda i zis pou proteksyon bann lenfrastriktir elektrisite.  Pou lezot lenfrastriktir, travay i bezwen ganny fer atraver distrik pou vwar kimannyer, ek sa bann propriyete prive, kimannyer zot kapab redwir sa risk ki en pye dibwa i kapab annan.  Mersi Mr Speaker.

 

MR SPEAKER

Onorab Jacqueline.

 

 

HON SULTANE JACQUELINE

Mersi Mr Speaker.  Eski Minis i kapab enform sa Lasanble konbyen i kout son Minister pou antreprann koupayaz pey dibwa obor bann fil dan en lannen e eski Minis i permet en dimoun prive pou koup pye dibwa anba laliny lo propriyete Gouvernman, avek kondisyon ki sa dimoun i donn sa servis e an retour i ganny sa dibwa?  Mersi Mr Speaker.

 

MINISTER ROLPH PAYET

Mersi bokou Mr Speaker.  Mon napa sa sif egzakt devan mwan bomaten.  ki mon kapab dir se wi, PUC parey mon’n mansyonnen dan mon larepons i donn permisyon bann endividi prive pou zot kapab koup pye dibwa.  Kot i konsern propriyete Gouvernman, sa konsiltasyon i bezwen ganny fer avek Minister Later pou asire ki tou bann permisyon i ganny fer.  I annan de ka dan lepase wi, kot kontrakter ki’n koup pye dibwa in ganny donnen sa dibwa koman en form konpansasyon pou sa travay ki’n ganny fer.  Selman tousala i ganny fer avek bann diferan permisyon, avek bann diferan lotorite konsernen.  Mersi Mr Speaker.

 

 

MR SPEAKER

Kestyon 135, Onorab Esther.

 

HON NATASHA ESTHER

Mersi Mr Speaker, bonzour Minis, tou envite e tou dimoun alekout.  An vi ki i annan en gran logmantasyon dan ka vol koko-de-mer, ki’n ganny raporte dernyenman, eski Minis i kapab enform sa Lasanble ki son Minister pe fer pou ede konbat sa bann ka vol?  mersi.

 

MINISTER ROLPH PAYET

Mersi Mr Speaker.  Pandan sa bann dernyen lannen, in annan en logmantasyon dan demann pou koko-de-mer.  Sa in koz en logmantasyon dan pri koko-de-mer isi lokalman e aletranze.  In osi ede pou annan plis vol koko-de-mer, sirtou lo Praslin e lo Curieuse.  Serten businessmen malonnet ti pe menm aste koko-de-mer avek sa bann voler pou zot eksporte pou vann avek touris.  Ti menm annan serten endividi ki ti pe fer bann fo papye pou siport ouswa bann tag pou siport zot tranzaksyon ilegalman.  Tou sa bann aktivite ilegal ti pe menas legzistans sa lespes lo nivo long term.  Se sa ki’n pous mon Minister pou pran serten mezir ki pou ede kontrol e redwir sa bann aktivite legal.  I annan bann mezir ki’n ganny met an plas depi tou sa letan e sa i konpri premyerman, se an 1978 ki premye Lalwa koko-de-mer ti ganny met an plas, me avek bann diferan weaknesses ki ti annan dan sa Lalwa, set an 1994 ki sa Lalwa ti ganny revwar e revize e la ti ganny met an plas bann nouvo mezir pou kontrol tranzaksyon dan koko-de-mer.  Sa Lalwa ti demande ki tou bann propriyeter pye koko-de-mer ti bezwen deklar zot bann pye koko-de-mer e koko dan zot stok toulezan.  Dezyenmman, tou koko-de-mer ti bezwen annan en tag lo la, menm bann ki dimoun in ganny kado, ki annan dan lakour.  tou bann transportasyon koko-de-mer ti bezwen annan sa ki nou apel en transportation permit. Tou dimoun ki fer biznes dan koko-de-mer ti bezwen annan en license e bann zofisye lanvironnman ti bezwen al verifye sa bann lenformasyon toulezan.  Sa i dan Lalwa depi 1994.

Dezyenmman e pli resaman, lanwa koko-de-mer ti osi ganny liste anba appendix 3 dan sa Konvansyon enternasyonal ki apel International Trade and Dangered Species of Wild Flora and Fauna ki nou apel cities, ouswa cites e sa ti ganny fer le 14 Oktob 2010.  Sa Konvansyon i ede pou anpes bann marse ilegal dan bann lespes ki an danze disparisyon ant bann diferan pei dan lemonn.  Gouvernman ti pran desizyon pou met lanwa koko-de-mer lo sa lalis lespes ki’n ganny proteze.  Sa i vedir kou eksportasyon lanwa koko-de-mer lo sa lalis i bezwen ganny akonpannyen avek en permi cites ki’n ganny donnen par Minister Lanvironnman ek Lenerzi pou li kapab sorti Sesel e antre dan sa lot pei.  Travayer Ladwann isi sesel e aletranze, kot sa lanwa i ganny eksporte i bezwen verifye e sertifye si sak lenportasyon i annan en permi si wi, ki son validite.  Si sa bann lanwa koki-de-mer napa sa permi cites, sa kargezon i ganny konfiske e lotorite Sesel i ganny enformen e lanket i ganny fer dan sa bann ka.  Mon oule zis fer rapel ki nou ganny bokou lenformasyon avek sa bann diferan Ladwann, sirtou bann Ladwann Lazi avek Mwayenn Orian.

Trwazyenmman, Gouvernman in pran lezot mezir pli sever, kot en ban tanporer lo leksportasyon lanwa koko-de-mer.  I pe aprezan reviz sa Lalwa koko-de-mer pou retir ankor plis lezot loop holes e ranforsi li pou vwar e osi azout nouvo prosedir e bann penalti pli eleve e bann santans prizon pli long.  I osi pou etablir en Tribinal Lanvironnman ki pou ganny etablir pou li ziz bann lofans lanvironnman e sa i pou enkli bann lofans koki-de-mer.  E sa i pou ede pou fer bann ki’n komet sa bann lofans pou ganny zize pli vit posib.  Minister Lanvironnman ek Lenerzi pe osi travay ansanm avek bann lezot lotorite lentelizans sekirite e osi eksportasyon enportasyon, konsernan amelyorasyon sirveyans lo bann aktivite koko-de-mer isi Sesel e a leksteryer.  Minister pe osi travay lo en plan daksyon pou sa lespes ki pou enkli en plan ranforsi proteksyon lo bann diferan propriyete e osi bann diferan lafore ki tonm anba zirisdiksyon Gouvernman e osi ankouraz bann nouvo plantasyon koko-de-mer lo nou teritwar.

Dan sa 2 dernyen lannen, nou’n annan 2 Seselwa ki’n ganny kondannen pour bann ka vol koko-de-mer e nou annan en serten kantite ka ki either zot kot Biro Atorni Zeneral ouswa dan lanmen lapolis.  Bann ka kot dimoun in ganny kondannen i annan 1 an 2011 e en lot an 2012.  I osi annan 2 ka devan Lakour Mazistra, 1 kot Atorni Zeneral ki pe ganny met Ankour e 5 ki kot lapolis, ankor pe fer investigation.

Lanket pe osi ganny fer kot diferan boutikye avek traders ki’n ganny trouve an posesyon koko-de-mer san permi ouswa tag e ouswa, san license.  Byento nou pou donn plis lenformasyon lo sa kanpanny anrezistreman koko-de-mer ki nou’n fek lanse.  Minister pou donn en peryod pandan 1 mwan, kot dimoun ki’n ganny kado ouswa ki’n resevwar koko-de-mer dan lepase, ki zot kapab anrezistre zot koko-de-mer a en kou ki pli ba ki ozordi i R350.  Mon pe ankouraz tou dimoun, tou Seselwa ki annan koko-de-mer pou anrezistre akoz Lalwa i egziste depi 1994 ki anpes en dimoun annan en koko-de-mer san en tag. Pou arive kontrol e redwir sa bann aktivite ilegal, mon Minister pou bezwen sipor tou dimoun.  Koko-de-mer i nou leritaz e nou tou nou devret konsernen avek sa bann aktivite destriktiv ki pe ganny komet kont sa lespes.  Mon ti a voudre lans en lapel avek tou dimoun pou ed nou aret sa bann aktivite ilegal.  Zot kapab ankor enn fwa telefonn Lanvironnman ek Lenerzi lo greenline nenport ler si zot okouran okenn aktivite ilegal ki pe pase.  Mersi Mr Speaker.

 

MR SPEAKER

Onorab Esther.

 

HON NATASHA ESTHER

Mersi Mr Speaker.  Eski Minis i kapab dir avek sa Lasanble ki travay kolaborativ ki zot antreprann avek SIF pou adres sa sitiasyon e ki kalite kontrol ki pe ganny mete lo lezot sit kot i annan koko-de-mer?  Mersi.

 

MINISTER ROLPH PAYET

Mersi Mr Speaker.  SIF i enn nou bann partener pres parey lezot lorganizasyon parey SNPA avek Fondasyon Fon Ferdinan.  Nou travay avek SIF ek sa bann lezot lorganizasyon se zot travay avek nou lo nivo sa revizyon legal akoz se zot ki pe deal avek sa bann tranzaksyon toulezour, zot pe travay avek nou osi lo nivo pou ranforsi sekirite lo sa bann sit.  Mon anvi fer resorti parey mon’n mansyonnen avan, dan nou nouvo revizyon Lalwa, pou annan bann nouvo mezir ki pou met an plas pou asire ki sa bann plantasyon koko-de-mer i ganny proteze.  Parey zot deza konnen, bokou dimoun ki pou vizit sa bann plantasyon, Vale-de-Me, Fon Ferdinan avek Curieuse, koko-de-mer i ganny nimerote e sak pye koko-de-mer nou konnen ki kantite koko i annan lo la e i annan en estimasyon ki ganny fer lo kan sa koko i sipoze pare pou tonbe.  Avek sa bann lenformasyon ki nou annan, i pa vreman konplike pou nou konnen e detekte letan i annan serten aktivite ilegal.  Mon konsern se bann lenformasyon i bezwen ganny kolekte meticulously e savedir sa bann lenspeksyon ki mon Minister i ganny fer i bezwen ganny fer azour toultan e sa bann data i bezwen ganny analize e aksyon i ganny pran letan nou detekte i annan serten deviasyon dan sa bann data.  E sa nou ppou ranforsi li atraver sa Proze de Lwa ki nou pou met devan Gouvernman ek sa Lasanble.  Mersi Mr Speaker.

 

MR SPEAKER

Kestyon 136, Onorab Meggy Marie.

 

HON MEGGY MARIE

Mersi Mr Speaker.  Bonzour Minis ek ou delegasyon.  Eski Minis responsab pou Lanvironnman i kapab dir nou Lasanble ki aksyon imedya pe ganny pran pou adres problenm degradasyon kot lakot dan rezyon Anse Aux Pins?  Mersi.

 

MINISTER ROLPH PAYET

Mersi Mr Speaker.  Mon pa pour kapab reponn sa kestyon larezyon lakot Anse Aux Pins san ki mon met sa kestyon dan konteks nasyonal.  An plizyer repriz mon’n koz isi devan sa Lasanble e lo medya lo sa problenm lerozyon lakot ki pe vin plizanpli grav.  Ozordi, parmi bann landrwa ki pe ganny afekte i annan North East Point, Au Cap, Anse Gaulette, Anse Kerlan, Grand Anse Praslin e La Passe La Digue.  Sa lannen, mon Minister in depans R1.2 milyon lo proze Anse Marie-Louise, R2.4 milyon lo proze Anse La Mouche e R1.5 milyon lo proze Mare Anglaise.  Anba proze Jaika, Gouvernman Zaponnen, mon ekspekte ki nou pou bezwen depans ankor R1 milyon lo proze North East Point e R1 milyon lo proze La Passe La Digue tre byento.

Sa 2 dernyen lannen, nou’n vwar nou’n bezwen envestir plis ki R5 milyon dan bann proze proteksyon lakot lo Mahe, Praslin e La Digue.  Sa i enkli travay ki nou’n fer Anse La Mouche, Anse Marie-Louise, Bovalon, North East Point e La Passe La Digue.  Tou sa bann ka ti vreman grav e si Gouvernman pa ti’n pran aksyon vitman, ozordi nou ti pou’n perdi bann lenfrastriktir e lezot propriyete dan sa bann landrwa.  Mon ti a voudre fer resorti ki i pa’n fasil pou nou adres tou sa bann problenm dan en pti peryod letan, avek Bidze ki nou gannyen avek Gouvernman.  Pandan sa dernyen 2an, bann eksper Zaponnen in etidye an detay bann lakot ki pe ganny afekte e sa i enkli lakot Anse Aux Pins.  Pou fer sa letid, zot in servi bann vye map ki demark lakot depi 1960, zimaz aerial 1984, plan GIS ou auto photo an 1998, e bann nouvo auto photo ki fek ganny pran 2an pase.  E osi bann portre google earth e bann portre ki’n ganny pran par helicopter an 2011.  An servan sa bann zimaz in montre bann sanzman dan lalinnyman lakot pandan sa bann peryod letan.  E sa bann ekspert in kapab dedwir ki lefe lenpakt lerozyon dan sa bann landrwa ki mon’n mansyonnen.

Lakot Anse Aux Pins ti pe ganny afekte, kote komans Anse Faure ziska balizaz distrik Au Cap dan sid.  Apard L’il Soleil, i osi annan en break water ki ti ganny konstrir an 2003 dan sa rezyon pour protez lakot Anse Aux Pins.  E i enportan note ki sa break water ti premye zefor Gouvernman pou konbat problenm lerozyon dan sa landrwa.  Sa in ganny swiv par en travay ki’n ganny fer pour protez sa lakot sa landrwa kot bazar.

Pour lavenir e baze lo lenformasyon ki’n ganny kolekte, mon Minister pe propoze ki en plan entegre i ganny fer kot bann propriyeter prive e Gouvernman a travay ansanm avek zot pou adres sa problenm lerozyon lakot Anse Aux Pins.  Sa i akoz sa landrwa, laplipar propriyete i prive e polisi Gouvernman i dir ki si sa propriyete i prive, sa travay i devret ganny fer le neseser, sa propriyeter i devret fer sa travay pou protez son propriyete.  Rezon i senp pou sa polisi akoz ler nou konsider lakantite propriyete prive e piblik obor lanmer ki pe ganny afekte atraver Mahe, Praslin e La Digue, i pa posib pou Gouvernman finans tou sa bann propriyete.  En lapros parey i deza pe ganny met an plas Anse Kerlan lo Praslin kot Gouvernman pe travay ansanm avek sa bann propriyeter prive pou adres sa problenm lerozyon.  La mon ti a voudre felisit bann zabitan Anse Kerlan, espesyalman bann propriyeter prive ki’n travay avek Gouvernman e fer en gran zefor pou zot protez zot propriyete.  Souvandfwa, bann tel proze proteksyon lakot i kapab ganny finanse osi atraver bann fon lanvironnman enternasyonal ki ed bann kominote.  Me pou sa, i bezwen annan en lasosiasyon kominote ki ganny idantifye o nivo distrik e la sa lasosiasyon kominoter i kapab fer en demann avek sa bann mekanizm ki annan an plas ozordi, parey nou fek vwar detrwa semenn pase dan ka distrik Les Mamelles.  Dan lepase, distrik Anse Boileau avek distrik Anse Royale in benefisye avek bann proze proteksyon lakot anba proze reco-map ki ganny finanse par Linyon Eropeen.  Mon pou demann mon bann zofisye pou organiz en meeting byento avek distrik Anse Aux Pins pou vwar ansanm kimannyer nou kapab siport zot pou antre dan en tel demars.  Mersi Mr Speaker.

 

MR SPEAKER

Kestyon 137, Onorab Meggy Marie.

 

HON MEGGY MARIE

Mersi Mr Speaker.  Eski Minis responsab pou Lanvironnman i kapab eksplik nou Lasanble ki son Minister pe fer pou rezourd sa problenm degradasyon e inondasyon kot sa bann fanmiy ki baliz avek lanmar e kot Onezime Estate? Mersi Mr Speaker.

 

MINISTER ROLPH PAYET

Mersi Mr Speaker.  Mon ti a voudre fer resorti ki sa problenm degradasyon kot Onezime Housing Estate ki enkli inondasyon kot bann fanmiy ki baliz ek sa lanmar i enn ase difisil e konpleks, ki demann en lenvestisman ase signifikan pou rezourd.  Bann fanmiy ki pe ganny afekte avek linondasyon, en kenzenn antou i depi kot gran pon, obor grann rout, kot laboutik ex-Ahmeng ziska kot lot laboutik Vinoud Shopping Centre.  Antou i kouver en zistans 170 met.  Tandis ki problenm degradasyon i komans depi kot Onezime Flats dan larivyer gran basen ziska kot pon, deryer laboutik Vinoud Shopping Centre.

Plan mon Minister pou rezourd sa problenm linondasyon e lerozyon se pour retir gravye e lezot sediman ki’ akimile dan lanmar e osi fer rock armoring kot i annan lerozyon bordaz larivyer ek lanmar.  Vi ki lakantite travay ki bezwen ganny fer i bokou e koute, mon Minister pou bezwen fer sa travay an diferan faz.

Premye faz i pou enkli retir gravye e lezot sediman dan lanmar e depoz sa bann later lo bordaz lanbar pou elev son nivo pou protez bann propriyete kont linondasyon.  Sa travay pe ganny enplimante tre byento avan lafen Desanm 2012, pou en kou R360 mil.

Dezyenm faz sa travay pou enkli retir gravye lot kote pon, deryer laboutik Vinoud Shopping Centre ziska deryer Onezime Flats a en zistans 200 met e pou enplimant sa travay rock armoring pou protez larivyer gran basen.  Travay rock armoring pou osi ganny enplimante apre pon kot Vinoud Shopping Centre ziska deryer laboutik ex-Ahmeng, pou en zistans 170 met e sa 2 travay pou kout anviron R1.2 milyon.

Depandan lo finansman ki Minister Lanvironnman ek Lenerzi i gannyen dan Bidze, nou ava konsider sa faz an 2013.  Antretan, mon Minister pou kontinnyen netway sa larivyer ek lanmar par retir tou salte, debri e bann plant ki pous ladan.  Sa pe ganny fer par en kontrakter ki fer sa louvraz lo en baz tou le mwan e ki pe kout Gouvernman 15 mil 550 par mwan.  Mon demande ki bann rezidan sa distrik i fer en zefor spesyal akoz mwan osi personnelman mon’n vizit sa sit e mon vwar ki sa bann dimoun i zet bokou salte dan sa bann landrwa.  I fasil pou nou demann Gouvernman pou fer tou sa bann travay me selman i enportan osi ki nou pran nou responsabilite koman bann zabitan sa rezyon, pou fer sir ki nou lanmar, nou bann sistenm drenaz i reste prop a toultan akoz in ganny montre ki bokou bann problenm linondasyon i osi koze par bann salte e bann debri ki akimile dan tou sa bann diferan landrwa.  Alor mon pe demann en zefor spesyal i ganny fer par bann zabitan bann distrik, bann rezyon ki nou gard nou bann landrwa prop e retir bann salte ki bann lapli Desanm i gard nous en e sof.  Mersi bokou Mr Speaker.

 

MR SPEAKER

Okenn siplemanter Onorab Marie?

 

HON MEGGY MARIE

Mersi Mr Speaker.  Eski Minis i kapab dir nou ki Gouvernman pe fer, oubyen si i annan okenn provizyon pou asiste bann dimoun oubyen bann fanmiy ki ganny afekte ek sa degradasyon, sirtou bann lakaz ki’n crack or whatever? Mersi Mr Speaker.

 

MINISTER ROLPH PAYET

Mr Speaker, mon senpatiz avek sa bann dimoun ki fer fas avek sa bann sitiasyon.  Malerezman i pa tonm dan manda mon Minister pou bann diferan konpansasyon ki arive avek bann diferan lenfrastriktir kominoter e lakaz.  Mersi Mr Speaker.

 

MR SPEAKER

Onorab Valmont.

 

HON SYLVIANNE VALMONT

Mersi Mr Speaker, bonzour Mr Speaker, bonzour Minis.  Eski Minis i kapab dir sa Lasanble ki polisi son Minister kot i konsern pye dibwa ki baliz obor sa lanmar, anlinny avek sa kestyon presedan, anmenmtan pou kapab kree oubyen anpes si oule sa bann dezas parey ou konnen i arive parler kot lakour sa bann fanmiy dan sa rezyon?

 

MINISTER ROLPH PAYET

Mr Speaker, mon pou reponn sa kestyon dan en fason zeneral.  Parey zot konnen, nou lanvironnman i en lanvironnman dinamik.  Parler nou fer bann lenfrastriktir avek beton e nou ekspekte li i pa pou dinamik.  Me nou viv dan en lanvironnman ki vivan, ki pouse, ki delo ki pase ki bann lefe ziolozik, biolozik i annan lenpakt lo bann abitasyon imen.  Definitivman, lo sa bann lenpakt nou prezan, akoz nou’n fer bann abitasyon imen dan bann zone lanvironnman, i demann en serten sirveyans, maintenance e osi zestyon e se pour sa rezon ki i pa toultan posib pou Gouvernman annan lizye partou.  E osi, i pa toultan posib osi pou koup tou pye dibwa pou ki nou avoid sa bann sitiasyon.  Alor, i annan en serten nivo zesyon ki bezwen ganny fer lo tou nivo.  Lo nivo Gouvernman, lo nivo distrik, lo nivo endividyel, ki nou tou nou vwar en rol pou nou zwe akoz nou lanvironnman i en lespas ki vivan e pye dibwa pe pouse toultan.  Alor, pou nou rezourd problenm, i pa zis fasil pou nou zis koup pye dibwa e eklersi landrwa.  Alor i enportan ki nou vwar kimannyer pli bon fason nou kapab zer sa bann kalite lespas lanvironnman akoz si zis nou koup pye dibwa partou, i annan son lenpakt ki i annan lo nou premyerman balans delo, kalite delo, kalite lanvironnman, lezot lespes ki depan lo sa bann pye dibwa.  I annan en kantite enteraksyon.  Alor i enportan ki nou vwar kimannyer nou kapab zer byen sa lenteraksyon imen avek bann ekosistenm natirel.  Mersi Mr Speaker.

 

MR SPEAKER

Kestyon 138, Onorab Volcere.

 

HON MARC VOLCERE

Mersi Mr Speaker.  Bonzour Minis, bonzour tou dimoun alekout.  Mr Speaker, mon ti a kontan demann Minis si son Minister i annan plan pou fer en travay netwayaz mazer lo sa 2 lanmar ki trouve dan sant Grand Anse Praslin?  Mersi.

 

MINISTER ROLPH PAYET

Mersi Mr Speaker.  Mon Minister i annan plan pou kontinnyen avek son bann proze netwayaz e retir later ki’n akimile dan bann lanmar ek larivyer lo Mahe, Praslin ek La Digue, an pran konsiderasyon lakantite Bidze ki nou ganny allocate tou le lannen.  Malerezman i pa toultan fasil pou nou ki permet Minister enplimant tou proze en sel kou akoz parey mon’n mansyonnen avan, sa kontrent bidzeter.  Alor nou bezwen fer bann travay lo en nivo priyorite e osi par faz.

An 2010, mon Minister ti depans R200,010 an konzwentman avek Lazans Lagrikiltir, pou netway e retir labou ek later ki ti’n akimile dan lanmar, deryer landfill ek erport Lamitie.

An 2011, nou ti osi depans R200,09 pou netway La Pointe Grand Anse Praslin.

Sa lannen nou’n vwar li neseser netway e retir later dan lanmar Anse La Blague e La Pointe, sa i Baie Ste Anne kot linondasyon in afekte bann zabitan ek fermye, sak fwa gro lapli i vini.

Sa 2 proze drenaz ki pou ganny fer dan sa 2 landrwa pou kout Minister plis ki R700 mil.  E sa in pran gran parti Bidze ki mon Minister i annan pou enplimant bann proze pou drenaz lanmar pou sa lannen, ki en sonm zis R1.5 milyon.  Alor, proze pou amelyor drenaz dan sa 2 lanmar Grand Anse Praslin pou bezwen ganny enplimante en pe pli tar, posibleman lannen prosenn.  Antretan, koman prekosyon pou redwir risk linondasyon kot bann lakour, bann zabitan vilaz Tamatave e Koko Rouz Housing Estate, mon Minister pou antreprann travay ki sa 2 lanbousir i desarz delo sorti dan sa 2 lanmar i reste ouver.  Mon ti a voudre fer resorti ki anba en kontra ki en kontrakter in sinnyen avek Minister Lanvironnman ek Lenerzi.  Sa bann lanmar pe kontinnyelman ganny netwaye pou retir salte ek bann debri.  Anba sa 2 kontra, sa kontra ki pe kout Gouvernman R28 mil par mwan, ouswa R336 mil par an, sa kontrakter i bezwen retir salte, debri e bann plant ki’n pouse dan sa 2 lanmar tou le mwan.  Alors, mon demann ankor pou bann rezidan pou pa zet salte, pou donn en koudmen en osi stand pou sa distrik.  Mersi bokou Mr Speaker.

 

MR SPEAKER

Okenn siplemanter, Onorab Volcere?

 

HON MARC VOLCERE

Mersi Mr Speaker.  Mr Speaker, mon ti a kontan, avek bann konplent sirtou par bann viziter ki vizit Praslin lo kalite loder ki annan kot sa 2 lanmar, eski son Minister pe konsidere pou omwen tir bann plant ki blok kot larantre sa lanmar, ki delo sale i kapab antre sorti, ki a ede pou netway sa bann lanmar e dezyenmman, eski son Minister i anvizaze pou fer okenn tes lo sa bann delo pou vwar si zot ase prop pou kapab devid dan delo sale?  Mersi.

 

MINISTER ROLPH PAYET

Mersi bokou Mr Speaker.  Si nou vwar fonksyonnman en lanmar, si nou kit en lanmar, son lanbousir ouver toultan, i pou annan menm lefe ki nou vwar pe arive dan distrik Anse Aux Pins kot i annan lerozyon entern e degradasyon entern, ki arive.  Apre osi si nou drain lanmar, i annan son bann lezot lenpakt ankor ki annan lo ekosistenm entern sa lanmar.  Lot kote se si nou gard lanmar ouver, i osi afekte kalite sa lanmer ki bann diferan touris i servi pou zot benny ladan.  Alor, zestyon lanbousir lanmar i en travay enportan akoz ou bezwen balans konteni sa lanmar ki delo ek lezot lespes ladan e osi sa problenm linondasyon.  So, i enportan, parey mon’n ranforsi avan ki sa travay i ganny fer an kolaborasyon avek distrik e osi sa bann zabitan e ki zot pa vwar ki i annan zis en solisyon se zis pou drain lanmar akoz nou pe esey rezourd problenm linondasyon.  Sa problenm i bezwen ganny fer dan en fason entegre e balanse, ki tou sa bann fakter i ganny prezerve.  E parey mon’n mansyonnen avan, nou reste dan en lanvironnman ki dinamik e ki bezwen ganny manage on a day to day, on a weekly, on a monthly basis e napa en solisyon ki pou rezourd sa problenm ki pou satisfer tou bann bezwen.

Lo kote spesifik Grand Anse, mon Minister parey mon’n mansyonnen pou asire ki nou retir sa bann pye dibwa ki pe pouse me osi asire ki lanbousir i ganny ouver a sa frekans ki i bezwen ganny ouver.

Dezyenmman, mon’n konstate osi wi ki i annan en problenm loder e bann tes pou ganny fer e mon pou kominik avek distrik bann diferan rezilta sa tes pou determinen si i annan okenn kontaminasyon, okenn lezot keksoz ki pou kekfwa demande ki i annan serten restriksyon lo sa lanmer ki touris i servi dan sa rezyon.  Mersi Mr Speaker.

 

MR SPEAKER

Onorab Arnephy.

HON BERNARD ARNEPHY

Mersi Mr Speaker, bonzour tou dimoun.  Mr Speaker, eski Minis i kapab enform nou Lasanble, vi ki nou pe al antre dan gro peryod lapli, ki bann mezir prevantif ki pe ganny pran, eski son Minister pe fer vizit otour bann low lying areas pou vwar ki bann lanmar ki merit ganny debouse i ganny debouse, pou fer ki ler gro lapli i vini an Desanm/Novanm nou pa taye pou fer damage control? Mersi.

 

MINISTER ROLPH PAYET

Mersi bokou Mr Speaker.  Sa travay in fini komans ganny fer, i annan 1 mwan/1 mwan edmi, mon Minister ki osi enkli prevansyon dezas, DRDM pe fer sa travay o nivo distrik.  Mon ti a kontan demann bann distrik ki kekfwa zot vizit pankor ganny fer kot zot pou les mon Minister konnen e la nou ava activate sa bann vizit o pli vit posib.  Selman sa legzersis in deza komanse e mon bann zofisye pe bouz from distrik to distrik pou vwar bann diferan landrwa kot nou kapab fer serten travay pou ede minimiz problenm linondasyon, sirtou pandan lepok lapli ki pe vini.  Mon ti a kontan ganny korperasyon parey mon’n dir avan, distrik me osi bann rezidan akoz bokou bann problenm linondasyon i cause par bann diferan salte ki ganny zete par very poor konportman bann diferan landrwa rezidansyel dan sa bann landrwa.  Mersi Mr Speaker.

 

MR SPEAKER

Onorab Vangadasamy, kestyon 139.

 

HON SHERYL VANGADASAMY

Mr Speaker, eski Minis i kapab dir ek sa Lasanble si sa proze sanz tiyo delo atraver bann distrik pe kontinnyen e ki tyenm distrik Mont Buxton i ete pou benefisye ek en el proze?  Mersi.

 

MINISTER ROLPH PAYET

Mersi Mr Speaker.  PUC i annan en progranm kontinnyel ki apel en pipeline replacement programme o nivo Mahe, ki ganny enplimante toulezan.  Sa progranm i liste bann diferan lalinny ou seksyon tiyo ki annan plis ki 20an e ki dan en move leta, setadir ki kase tanzantan.  Kriter alor ki ganny servi i enkli laz sa tiyo, kalite sa tiyo e lakantite maintenance ki ganny rikorde lo sa lalinny.  Alor i pa en priyorite o nivo distrik.  Sa lalis i ganny priyoritize baze lo sa bann kriter ki mon’n mansyonnen.  PUC i servi son sistenm GIS pou rikord tou bann lenstans kot tiyo i kase e lenteripsyon ki ganny fer dan diferan lalinny tiyo e servi sa pour priyoritiz son progranm ranplasman tiyo akoz son Bidze i limite.  Sa progranm ranplasman tiyo i ganny fer baze lo resours finansye ki PUC i gannyen tou le lannen.  An 2011, PUC ti sanz 2 seksyon tiyo pou en valer R10.5 milyon.  Sa ti lalinny Sans Soucis ek Pascal Village.

An 2012 vi ki sitiasyon lasesres ti enn ki ti en pe grav, PUC ti konsantre en pe plis zefor lo bann pti proze pou amelyor sistenm distribisyon e pa ti antreprann okenn ranplasman tiyo.  PUC pou definitivman kontinnyen avek sa progranm ranplasman tiyo akoz i form par son plan pou moderniz son bann lenfrastriktir e pou minimiz lenteripsyon dan son bann servis.  PUC li osi, i fek ganny en loan avek European Investment Bank ouswa EIB e ladan i konpri en proze pou ranplasman bann diferan lalinny tiyo mazer, sirtou dan nor Mahe.

Kote bann tiyo pou ganny ranplase atraver sa loan pou ganny determinen par en letid ki en eksper pou fer tre byento, ansanm avek PUC.  PUC i okouran bann diferan tiyo ki fodre ganny ranplase Mont Buxton.

Sa bann tiyo pou ganny ranplase an konsiderasyon avek sa bann kriter e priyorite ki mon’n mansyonnen avan.  Anba finansman PUC, lalis aktyel pou ranplasman tiyo i konpri sa bann landrwa swivan:-

Plaisance ziska Le Rocher, Dan Zil Belombre, Cascade ziska Pointe Larue, Corgate Estate, La Louise, Sorento ziska Machabee, La Retraite, Pointe Larue kot Nageon Estate, Bovalon ziska Pascal Village, tiyo ki sorti depi kot stasyon Le Niole ziska kot Le Niole junction, tiyo ki dan semen Latanier, Rochon, serten lalinny dan Victoria, Hermitage ziska New Port, upper Mont Buxton, tiyo ki sorti Le Niole ki pas par Belonie, Mont Bixton, tiyo ki sorti Hermitage.  Mersi Mr Speaker.

 

MR SPEAKER

Okenn siplemanter Onorab?

 

HON SHERYL VANGADASAMY

Yes Mr Speaker.  Eski Minis i kapab dir ek sa Lasanble konbyen letan e ki garanti ki sa proze water replacement pipeline Mont Buxton pou ganny antreprann?  Mersi.

 

MINISTER ROLPH PAYET

Mersi bokou Mr Speaker.  Parey mon’n mansyonnen, sa i dan progranm PUC ki pou antreprann sa bann proze lo baz sa bann kriter ki mon’n mansyonnen avan.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble, dan zot plan, an relasyon avek sa pipeline replacement project, dan Sesel an zeneral, konbyen egzakteman proze, an term nimero, konbyen proze zot in idantifye e kan ki zot pe prozekte ki zot pou fini termin the whole project isi Sesel?  Mersi Mr Speaker.

 

MINISTER ROLPH PAYET

Mersi bokou Mr Speaker.  Proze ranplasman tiyo i pa en pti proze.  I en proze ase mazer akoz nou annan premyerman nouvo landrwa ki’n ganny fer abitasyon, alor i pa pou zis ranplasman tiyo me osi ranplasman groser tiyo.  Nou annan bann tiyo ki vye e sa i koz en kantite pert dan kantite delo, nou annan ………….. accounted for water. Dezyenmman i annan demann ki’n ogmante.  Alor, PUC pe travay parey nou dir toultan, kont sa rate of development.  Savedir, osito ki nou devlop bann nouvo housing estate, osito ki nou devlop bann diferan landrwa kot i ouver, osito ki nou devlop bann nouvo lotel, i annan bann nouvo demann ki ganny mete lo lenfrastriktir PUC. Alor, mon pa vwar sa travay pe ganny konplete desito me selman travay pe ganny fer alamezir ki nou annan sa resours finansman pou fer li, nou pe kontinnyen sa travay e parey mon’n mansyonnen la, sa i bann priyorite, sa i lalis bann diferan priyorite ranplasman tiyo ki nou pou fer dan sa bann lannen ki pe vini e definitivman, letan nou pou revwar nou progranm, pou annan nouvo landrwa ankor ki pou antre dan sa lalis.  Mersi bokou Mr Speaker.

 

MR SPEAKER

Onorab Samson.

 

HON DEREK SAMSON

Mersi Mr Speaker, bonzour.  Bonzour Minis.  Eski Minis i kapab dir nou Lasanble Mr Speaker, an vi ki lamazorite sa bann proze i ganny sub contract par PUC avek bann kontrakter prive, lekel ki responsab pou sirvey dat komansman sa bann proze e dat ki i sipoze terminen e kalite sa bann tel proze, an vi ki bokou fwa nou vwar ki i kree danze pou pyeton e transpor lo diferan landrwa kot sa bann proze i egziste e si i annan okenn penalti ki egziste against sa bann kontrakter ki mal fer bann proze parey kot i konsern sanzman tiyo?  Mersi.

 

MINISTER ROLPH PAYET

(Technical problems) …… ki sa bann proze i ganny sa (-).  Nou’n vwar dan serten distrik ki i annan bokou kontrakter ki pa menm konsilte avek bann propriyeter, ki pa menm met bann lansenny lo semen e osi pa menm restore sa bann sit e sa i en travay mon krwar ki nou bezwen fer ongoing avek bann diferan kontrakter pou ensure ki zot pran zot responsabilite.  Mon annan ka Bel Ombre par egzanp kot i annan bokou konsern ki ganny express par Manm Lasanble me osi par bann manm piblik kot i annan bokou fristrasyon lo travay ki’n ganny fer.  Dan konteks sa kontrakter par egzanp, sa kontrakter in ganny retire lo sa proze.  E parey zot konnen, letan nou tir en kontrakter lo en proze i annan serten retar osi ki ganny mete avek sa proze, i annan osi serten reabilitasyon ouswa i annan en serten travay ki bezwen ganny fer.  Alor, osito posib nou esey travay ek sa kontrakter pou fer sir i comply akoz letan nou tir en kontrakter lo proze, i annan serten lenplikasyon legal ki ganny met an kou, mon pa pe koz Lakour la, mon pe koz in process konmsi, ki nou bezwen swiv akoz demen, menm PUC i kapab ganny met an kour par aksyon ki’n ganny pran.  So, i annan en serten lenplikasyon la ki mon konpran, ki pa toultan ki piblik i konpran pou dir akoz travay in ganny arete lo serten proze, i annan serten diskisyon i bezwen ganny fer, serten negosiasyon i bezwen ganny fer e osi parler ou annan entervansyon en lot Minister parey menm mon Minister Lanvironnman ek Lenerzi, ouswa Minister Planning, ouswa Planning Authority ki entervenir, ouswa menm i annan serten injunction ki ganny fer par sa propriyeter limenm.  Alor i annan en serten travay ki bezwen ganny fer, preparasyon e mwan mon vwar preparasyon avan serten travay i ganny fer, i bezwen ganny plis detay i bezwen ganny mete, plis planning i bezwen ganny fer avan ki sa travay i komanse.  E pa toultan ki i fasil akoz ou annan bokou presyon osi ki ganny mete pour PUC fer sa travay deswit e desito, alor nou bezwen balans tou sa bann fakter ki ede parler ki nou end up avek sa bann problenm ki nou annan me selman mon apresye ki i annan problenm e mon Minister pe travay dir pou redwir e pou minimiz sa bann fristrasyon ki annan avek sa bann proze.  Mersi Mr Speaker.

 

MR SPEAKER

Kestyon 140, Onorab Vangadasamy.

 

HON SHERYL VANGADASAMY

Mersi Mr Speaker.  Eski Minis i kapab dir ek sa Lasanble si PUC pe kontinnyen antreprann proze koneksyon sewage dan bann sou distrik ki sa sistenm pankor ariv kot zot?  Mersi.

 

MINISTER ROLPH PAYET

Mersi bokou Mr Speaker.  PUC i annan plan pou agrandir son sistenm sewage dan sa bann landrwa swivan.  Seksyon dan Union Vale, upper Mont Buxton Dan Lenn, Pointe Larue, Plaisance, Pascal Village, Foret Noire, Belvedere, La Louise.  Sa bann landrwa i ganny priyoritize, prenan kont bann problenm desarz ki egziste e sa bann proze pou ganny finanse par Gouvernman atraver PUC. PUC in propoze pou met dan Bidze pou lannen 2013, en sonm R2 milyon pou fer serten sa bann proze.  Proze ki PUC ava fer i pou depan lo kantite larzan ki ganny donnen dan Bidze 2013.  Alor, i pou selman posib pou donn plis lenformasyon lo sa apre Bidze in ganny aprouve par sa Lasanble.  Mersi Mr Speaker.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.  Eski Minis i kapab dir ek sa Lasanble ki’n arive avek sa R200 milyon ki Gouvernman ti envestir dan PUC lannen pase, ki koneksyon sewage ti form parti en konponan dan sa Bidze?  Mersi.

 

MINISTER ROLPH PAYET

Mersi bokou Mr Speaker.  Si mon ganny sa kestyon dan en fason direk mon ava prezant ek sa Lasanble en depans detaye lo sa 200 mil ki PUC ti gannyen sa lannen e sa mon ava fer Lasanble ganny en bilan detaye lo sa size.  Mersi Mr Speaker.

 

MR SPEAKER

Onorab Jeannevol.

 

HON BEGITTA JEANNEVOL

Mersi Mr Speaker, bonzour.  Bonzour Minis ek ou delegasyon.  Minis, dan bann ka kot koneksyon sewage fek ganny fer, eski zot monitor e evalye bann travay ki’n fer pou anpese ki sa problenm desarz i resirfas ankor.  Mersi.

 

MINISTER ROLPH PAYET

Mersi Mr Speaker.  Wi, menm parey avek bann proze ranplasman tiyo, i annan bann monitoring ki sipoze ganny fer pou asire ki bann travay ki ganny fer i pa koz okenn problenm apre sa.  Mon konstate ki i annan problenm ki arive, i annan osi serten ka kot sa travay lenspeksyon i pa ganny fer byen.  PUC pou met lanmen lo sa bann sitiasyon e fer sir ki nou kapab redwir sa bann lenstans kot bann travay i ganny fer e sa sertifikasyon ki travay i ganny fer byen, pa ganny fer lo sa nivo ki nou pe demande.  Nou pe met an plas en sistenm standardizasyon lo nivo PUC pou fer sir ki travay i ganny monitor e i ganny fer byen.  Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Bonour Minis.  Mr Speaker, eski Minis i kapab enform sa Lasanble konbyen poursantaz nou lakaz dan Sesel ki konekte avek sewage? Mersi.

 

MINISTER ROLPH PAYET

Mr Speaker, mon napa sa lenformasyon devan mwan ozordi.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, Minis in mansyonn en R2 milyon pou Bidze 2013, eski Minis i kapab dir avek sa Lasanble konbyen proze i ekspekte konplete avek sa 2 milyon e ki tyenm La Louise i ete lo sa lalis priyorite, an vi ki i annan en kantite problenm ki pe arive dan La Louise?  Mersi Mr Speaker.

 

MINISTER ROLPH PAYET

Mr mon napa sa lalis devan mwan, kou sa bann diferan proze e osi mon pa konnen ki tyenm La Louise pou tonbe.  Mersi Mr Speaker.

 

MR SPEAKER

Kestyon 141, Onorab Vangadasamy.

 

HON SHERYL VANGADASAMY

Mersi Mr Speaker.  Eski Minis i kapab dir sa Lasanble si PUC i enstal poto elektrik lo later prive san demann permisyon bann propriyeter e apre i bezwen fer sa bann propriyeter peye pou retir sa bann menm poto?  Mersi.

 

MINISTER ROLPH PAYET

Mersi bokou Mr Speaker.  Lalwa PUC 1991 i donn PUC pourvwar pou devlop bann lenfrastriktir neseser, enkli met poto elektrik lo bann propriyete prive si i neseser.  Sa i neseser akoz parey nou tou nou konnen, pei e bann lakour prive pa pou kapab devlope e fonksyonnen san elektrik ek delo.  Menm si PUC i annan pourvwar anba Lalwa, i polisi PUC pou touzour ganny konsantman propriyeter sa bann later prive avan i met okenn poto elektrik lo sa bann later.  Dan laplipar ka, se sa menm propriyeter ou son vwazen ki pe rod en koneksyon avek PUC.  La ki i annan bann diskisyon ki’n ganny fer ant PUC ek sa propriyeter, normalman sa bann poto i ganny mete dan balizaz ouswa dan kwen semen kot dimoun i pase, ouswa kot sa propriyeter in dir mete.  An dizan tou sa, i pa toultan leka ki sa in arive akoz mwan menm mwan, mon’n ganny diferan propriyeter ki’n vin vwar mwan e zot in eksplik zot konsern avek mwan e mon pe personnelman angaze pou esey rezourd sa bann problenm.

Tan ki posib, PUC i esey met tou sa bann poto kot landrwa kot i pa pou anbaras sa propriyeter, later pli tar osi.  Me parfwa ki arive se ki later i ganny sub-divide, ouswa sa propriyeter i deside met en lot lenfrastriktir lo son propriyeter, alors ki fer ki sa poto i ganny trouve dan en landrwa ki pa akseptab pou sa propriyeter.  E dan sa ka, PUC i normalman demann sa dimoun pou kontribye 50 a 60 poursan sa kou pou li bouz sa poto dan en lot landrwa.  Sa i neseser akoz i kout PUC ase ser pou bouz bann poto elektrik e sak fwa i bezwen sanz pozisyon en poto, i vedir ki lezot travay i bezwen ganny anvoye akoz parey mon’n mansyonnen avan, i bezwen sorti dan son Bidze pou li re-locate sa bann poto elektrik.  Mersi Mr Speaker.

 

MR SPEAKER

Onorab Vangadasamy, okenn siplemanter?

 

HON SHERYL VANGADASAMY

Mr Speaker, eski Minis i kapab dir ek sa Lasanble ki pe arive alor dan bann ka kot PUC pa’n ganny konsantman ek bann propriyeter e ki bann propriyeter pe ganny demande par PUC pou zot peye pou ganny sa bann poto elektrik re allocate. Ki pe arive avek sa bann pou sa bann dimoun?  Mersi Mr Speaker.

 

MINISTER ROLPH PAYET

Mr Speaker, parey mon’n mansyonnen, sa bann ka pe ganny vwar par mwan menm e si kekfwa ou konn okenn ka ki pankor ganny konsidere par biro, mon ti a envit ou pou fer sa bann ka vin kot mon biro e la mon ava vwar e sey medye pou vwar si i annan en solisyon akoz i enportan ki PUC i kapab fer son travay byen, me i osi enportan ki bann propriyeter osi zot santi zot kapab ofer PUC akse avek zot propriyete, ki nou kapab kontinnyen fasilit devlopman e osi akse elektrisite dan tou kwen nou bann zil.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Mersi.  Bonzour Mr Speaker, bonzour tou dimoun alekout.  Mr Speaker, an vi serten danze bann poto elektrik avek bann bwat transformer lo bann later prive ki ase pros avek zot lakaz, eski Minis i kapab konsidere, atraver son Minister, PUC pou zot tir sa bann transformer ouswa poto elektrik a en kou meyer marse pou sa bann endividi, an vi danze?  Mersi.

 

MINISTER ROLPH PAYET

Mersi Mr Speaker.  Tou sa bann ka nou pran li lo en case by case basis e mon krwar PUC a fer evaliasyon.  I annan serten sitiasyon dan lepase kot PUC in siport lokasyon, me in annan osi sitiasyon kot nou’n vwar i pa rezonnab e i pa apropriye pou fer serten relokasyon e mon krwar, ki mon a demande se PUC i bezwen get sa bann case on a case by case basis, rather ki mwan mon pronons en larepons iniversel lo la bomaten.  Mersi Mr Speaker.

 

MR SPEAKER

Onorab Aglae.

 

HON ROMA AGLAE

Mr Speaker, eski Minis i kapab enform sa Lasanble si i annan okenn lenstans kot en propriyeter in pourswiv PUC pou enstal poto lo son propriyete?

 

MINISTER ROLPH PAYET

Mr Speaker, mon pa aware mwan menm mwan personnelman okenn lenstans ki sa in arive.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, an vi larepons Minis kot i pe vwar tou sa bann sitiasyon case by case basis, eski Minis i kapab konsider revwar sa polisi an sa ki konsern peyman pou retir oubyen enstal poto elektrik lo bann propriyete prive.  Baze lo sa bann case ki i vwar e alavenir, konsider etablir en polisi kler e net e ki an faver PUC me osi bann dimoun ki annan propriyete prive ki bezwen fer zot devlopman?  Mersi.

 

MINISTER ROLPH PAYET

Mersi bokou Mr Speaker.  Sa polisi wi, pe ganny revwar e parey zot konnen, pou annan en nouvo Proze de Lwa ki pou ganny mete devan zot byento ki pou apel Bill Lenerzi e ladan pou annan provizyon e regilasyon ki pou adres sa sitiasyon.  Mersi bokou Mr Speaker.

 

MR SPEAKER

Bon, kestyon 142, Onorab David Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab enform sa Lasanble si ti annan okenn konsiltasyon avek zabitan Cascade, an relasyon ek sa proze ponp delo desalinasyon pou anvoy dan danm Cascade ki’n fini ganny fer?  Mersi Mr Speaker.

 

MINISTER ROLPH PAYET

Mersi Mr Speaker.  PUC a plizyer repriz dan sa bann leksplikasyon in fer remarke ki bann larivyer Cascade i parmi bann premye larivyer lo Mahe pou redwir pandan letan lasesres.  I bon note ki PUC pe anmas delo dan tou le 4 sa bann larivyer prensipal dan leo Cascade e travay pe ganny fer avek MNA Cascade e distrik Cascade pou idantifye ankor lezot sours delo ki kapab ganny eksplwate lo nivo distrik Cascade.  Inevitableman, PUC napa lot opsyon me pou li transfer delo desalinasyon melanze avek delo larivyer Cascade pou garanti ki bann zabitan i annan delo pou servi, sirtou pandan lasesres.  Depi 2001, pandan letan lasesres, en gran parti konsomater ki reste Cascade pe ganny delo sorti dan sistenm Hermitage, ki konpri delo desalinasyon melanze avek delo larivyer e menm a moman ekstrenm, sa delo sorti Hermitage ti pe ganny donnen ziska Pointe Larue.  Ler sa ti pe fer an 2001, PUC ti fer sir tou dimoun ti ganny enformen.

Sa ki PUC fek fer resaman se senpleman pran sa delo desalinasyon ki sorti Providence e fer li al direkteman Cascade pou melanz avek delo larivyer avan distribisyon, olye anvoy li direkteman Hermitage.  Sa ki enportan pou note se ki kalite delo limenm pa’n sanze avek sa nouvo sanzman.  PUC a plizyer repriz pandan lannen 2011 e 2012 ti eksplik manm piblik bann rezon akoz proze desalinasyon pe ganny antreprann dan bann diferan rezyon.  Sa ti enkli proze Cascade.  Bann leksplikasyon ti ganny donnen atraver SBC e leksplikasyon ti ganny donnen avan proze ti komanse e osi pandan ler travay ti pe ganny fer.  mersi bokou Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek zabitan Cascade, eski sa proze ki’n fek ganny fer, eski bann zabitan Cascade permanently ganny sa delo ki melanze, oubyen eski pou annan bann lenstans kot sa i ganny kontrole kot nou dir non, la nou pou arete akoz i annan ase delo normal and therefore, kalite delo ki bann dimoun i gannyen i ganny kontrole lo en serten basis? Mersi Mr Speaker.

 

MINISTER ROLPH PAYET

Avan mon reponn ou kestyon Onorab mon ti a kontan fer resorti ki kalite delo ki PUC i donnen dan son tiyo i sa bon kalite, menm si i sorti dan larivyer e menm si i sorti dan desalinasyon.  Dezyenmman parey mon’n eksplike, da letan lasesres ki nou bezwen operate nou bann stasyon desalinasyon.  Dan bann letan kot nou’n annan lapli, bann diferan stasyon desalinasyon i ganny tennyen, ouswa zot run at a very, very low stream pou asire ki nou stasyon i marse letan nou bezwen.  Alor pa toultan ki zabitan Cascade e presizaman lezot distrik pou ganny delo desalinasyon.  I zis dan bann letan kot nou vwar nou, nou napa ase delo larivyer ouswa delo danm pou nou donn bann manm piblik.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, eski Minis i kapab asir nou Lasanble ki sa sistenm transfer ki PUC in enstale dan rezyon Cascade i meyer sistenm ki zot ti kapab enstale e ki tou konsiderasyon in ganny pran avan ki en tel proze ti ganny antreprann?  Mersi.

 

MINISTER ROLPH PAYET

Mersi Mr Speaker.  In dan plan PUC pou nou konekte tou nou network dan en fason entegre, koumsa demen, si en serten rezyon pe donn nou plis delo ki en lot rezyon, nou kapab fasilman transport delo sorti dan en rezyon pou al dan en lot.  Mon konpran kekfwa ki serten distrik i anvi konsonm son prop delo, me ozordi nou annan en bezwen nasyonal, alor i enportan ki nou konekte nou sistenm tiyo o nivo nasyonal pou fer sir ki nou distribye sa delo dan en fason ekitab e osi ki tou dimoun i kapab benefisye akoz i annan parey zot in konstate, i annan serten landrwa ki ganny plis lapli ki lezot, i osi annan serten landrwa ki son demann delo pa parey avek lezot rezyon ki pe devlope.  Sa ki mon kapab fer sa Lasanble konnen se tou bann proze ki PUC i antreprann i fer sir ki i fer li a en standar o nivo, malgre ki nou annan defi parfwa lo sipervizyon, lo monitoring, me selman mon asir zot ki travay pou kontinnyen ganny fer lo sa nivo e nou pou kontinnyen met an plas mezir e striktir pou fer sir ki kalite travay e kalite network ki nou met an plas i lo sa nivo ki demande.  Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Mr Speaker, eski Minis i kapab enform sa Lasanble konbyen in kout PUC pou sa proze ponp delo sorti Providence pou anvoy dan danm Cascade e konbyen distrik ki pou benefisye direkteman apard Cascade, ek sa proze?  Mersi.

 

MINISTER ROLPH PAYET

Mr Speaker, mon napa sa lenformasyon spesifik devan mwan ozordi.  Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Bonzour tou dimoun.  Mr Speaker, eski Minis i kapab eksplik nou Lasanble ki zistans ki PUC pe pran sa delo sale pou desalinen e anvoy dan sa dezyenm basen, sa nouvo basen Cascade avek sa tiyo sewage dan delo sale Providance ki’n kase e ki pankor ganny repare ziska konmela?  Mersi bokou.

 

MINISTER ROLPH PAYET

Mersi bokou Mr Speaker.  Sa tiyo desarz sewage i baze en kilomet dan lanmer e mon pa okouran okenn tiyo ki’n kase dan sa desarz.  I annan en problenm kot sa overflow pump, me menm sa pankor ganny determinen si i sorti dan sistenm PUC.  Sa i dan lagon ki en problenm ki nou fer fas avek de tanzaot.  Landrwa kot nou pe ponp delo pou fer desalinasyon, parey mon’n mansyonnen i en zistans ki vreman lwen avek desarz sewage.

Dezyenm pwen, parey zot konnen, teknolozi desalinasyon i servi river osmosis.  I en sistenm tretman ki i pa posib pou sa bann kalite bakteri ek sa banan keksoz pou li pas through.  Sa premye keksoz e dezyenm keksoz se sa delo i ganny ankor trete e klorinen pou ganny fer konsomasyon o nivo nasyonal.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker, an vi ki bokou distrik i annan konsern vizavi sa delo desalinasyon ki pe ganny servi, ki pe ganny melanze avek delo larivyer, eski Minis i kapab enform sa Lasanble si okenn travay pe ganny fer ansanm avek Minister Lasante pou vwar ki lenpakt sa bann delo i annan lo lasante dimoun, sirtou avek logmantasyon dan ka bann kanser ki nou pe detekte ozordi?  Mersi.

 

MR SPEAKER

Minis ou oule esey reponn sa?

 

MINISTER ROLPH PAYET

Mersi bokou Mr Speaker.  Mon pou dir ki i annan tes ki ganny fer lo nou kalite delo, i ganny fer toultan e mon’n deza fer sa dan sa Lasanble, mon’n deza prezant sa devan sa Lasanble pou dir nou delo ki nou donn manm piblik i a nivo World Health Organisation.  Nou’n fer sorti sa o nivo piblik e nou’n fer sorti devan sa Lasanble.  Dan mon kapasite koman Minis Lanvironnman ek Lenerzi e mon responsabilite pou fer sir ki sa standar i ganny maintain e mon travay etrwatman avek Minister Lasante.  in annan de ka dan lepase kot in annan problenm kontaminasyon dan delo e Gouvernman in pran aksyon neseser pou deal avek sa bann kontaminasyon.

Konsernan ou dezyenm pwen, i annan serten pei dan lemonn ki konsonm delo desalinasyon 24 lo 24, 7 lo 7, 365 zour lo 365 zour.  E sa bann pei i bann landrwa kot nou kapab fer letid pour vwar si i annan okenn lenpakt medikal lo konsonpsyon desalinasyon.  E mon envit, pou zot fer resers si i annan okenn lenpakt medikal dan sa bann pei kot zot consume delo desalinasyon 7 lo 7, 24 lo 24 e 365 zour lo 365 zour.  I enportan e mon pe repet ankor, i enportan ki nou pa servi sa bann loportinite pou nou senm mis-lenformasyon akoz mon krwar bann rezon ki dimoun i ganny kanser ozordi, i annan en lalis, par egzanp konsonpsyon lalkol an bonnavini, konsonpsyon sigaret an bonnavini, pa fer legzersis, pa pran swen avek nou lasante.  Mon krwar sa i bann rezon ki mwan mon’n ganny donnen ki koz kanser.  I annan lezot lefe ankor parey radyoaktivite lezot laspe ankor, me sa mon pou kit en dokter medikal pou donn en prezantasyon lo bann lakoz mazer kanser dan Sesel e osi lezot landrwa dan lemonn.  Me selman i enportan ki nou vwar sa bann lenformasyon dan nou konteks e pa esey senm fo lenformasyon ki kree panik dan nou sosyete.  Mersi bokou Mr Speaker.

 

MR SPEAKER

Bon, avek sa nou remersye Minis pou pas sa bomaten avek nou e osi ekskiz li parmi nou.  Nou pou pran nou lot kestyon ki en Urgent Question.  Mon ava demande ki Minis Laporte i vin pran son plas.  Thank you Minister.

Bon, pou antretan nou annan 2 First Reading. E mon ava demann Clerk pou fer sa 2 First Reading.

 

MADAM CLERK

This Act may be cited as the Companies Amendment Ordinance 2012.

This Act may be cited as the Energy Act 2012.

 

MR SPEAKER

Ok. Nou annan sa Urgent Question. Avan sa petet Minis ou ava zis entrodwir ou teknisyen.  Minister. Ou pe swiv mwan Minis?  Pou entrodwir ou delegasyon.  Request Minister.  Mon krwar nou ava al direk, Minis pa tro oule entrodwir son delegasyon.  Nou ava al direk lo kestyon, Onorab Wilby Lucas.

 

HON WILBY LUCAS

Mersi Mr Speaker.  Bonzour Minis avek ou delegasyon e e bonzour tou dimoun ki alekout.  Mr Speaker, pou demann Minis.  Baze lo sa progranm ki ti pase lo lasenn televizyon Al Jazeera Vandredi le 10 Novanm 2012, ki ti dekrir Sesel koman enn sa bann pei dan Lafrik kot i fasil atraver tranzaksyon offshore, pou fer larzan sal oubyen larzan ki annan koneksyon avek bann aktivite kriminel aletranze pou antre dan pei, pou eksplik nou Lasanble premyerman:-

SIBA koman sa regilater ki siperviz tranzaksyon bann konpannyen offshore, ki bann mekanizm ki annan an plas pou ki bann tel sitiasyon pa arive?  dezyenmman,

Eski SIBA in deza sanksyonn okenn lakonpannyen offshore ki pa tonm an konformite avek nou Lalwa?

Trwazyenmman, etan donnen ki sa progranm in ganny televize lo en lasenn televizyon enternasyonal, ki lefe sa pou annan lo lendistri offshore? Mersi.

 

MINISTER PIERRE LAPORTE

Mr Speaker, Manm Lasanble Nasyonal, bonzour tou dimoun.  Mr Speaker, Lotorite Biznes Enternasyonal Sesel, SIBA ki reprezante isi ozordi avek mwan par Ms Wendy Pierre son CEO, i kontinnyelman ranforsi bann Lalwa e regilasyon pou asire ki repitasyon Sesel koman en offshore jurisdiction i reste entakt.  Ase resaman Mr Speaker, sa bann lamannman swivan ti ganny fer avek International Corporate Service Providers Act ICSP Act, sa morso Lezislasyon ki gouvernm bann konpannyen ki anrezistre bann IBC’s.  premyerman, en lakonpannyen avek en license anba ICSP Act i devret konstaman soumet ek lotorite bann dokiman ki demontre ki zot pe swiv bann diferan Lalwa ek regilasyon.  En lakonpannyen ki fer en fo deklarasyon lo sa bann form compliance, letan i konnen ou kan i ti devret rezonnableman konnen ki sa bann deklarasyon i fo, i komet en lofans e i kapab pey en lanmann ziska R300 mil.

Dezyenmman Mr Speaker, bann nouvo rezon ti ganny entrodwir anba ki SIBA i kapab retir, setadir revoke parey nou dir an angle, en license.  Kan sa lakonpannyen ki annan en license, en Direkter sa lakonpannyen ouswa en manm lo management sa lakonpannyen in deza ganny vwar koupab par en Lakour, pou en lofans ki konsern frod, vol, en aksyon malonnet ouswa in ganny vwar koupab par Lakour, anba Lalwa lo blansisaz larzan, finansman terorizm, sa license i kapab ganny revoke.

Trwazyenmman, nouvo seksyon 17(a) ti ganny entrodwir, nenport aksyon ki Lotorite Biznes Enternasyonal Sesel SIBA i pran konsernan en license pa afekte drwa lotorite SIBA pou pran okenn lezot aksyon kont sa menm lakonpannyen ki annan en license.

Katriyenmman Mr Speaker, nouvo provizyon dan Code of Ethics pou bann lakonpannyen ki annan license. Bann provizyon, Know Your Customer, KYC parey nou konnen pli souvan, kot sa lakonpannyen i bezwen konn tou zot bann kliyan vreman byen.  I osi dir ki en lakonpannyen avek en license i devret reazir ouvertman, onnetman e devret donn Lotorite Biznes Enternasyonal tou zot korperasyon.

Mr Speaker, Manm Lasanble Nasyonal, SIBA i osi konstaman fer bann vizit lo bann ICSP’s.  Pandan sa bann compliance review visit ou lenspeksyon parey nou kapab dir, SIBA i fer sir ki tou bann prosedir ki pe ganny adopte par sa bann ICSP’s i anlinny avek bann diferan Lalwa e regilasyon ki an plas.  Sa bann lenspeksyon i normalman ed SIBA pou fer sir ki i fer son mye pou ki aksyon bann ICSP’s i pe ganny swiv o pli pros ki posib.  I enportan dir ki sa bann zefor ki’n ganny pran par SIBA in ganny rekonnet par diferan lorganizasyon enternasyonal tel ki OECD, FATF, Financial Action Task Force ki ganny menm rekonnet par World Bank ek IMF.

Mr Speaker, SIBA i konstaman bezwen fer sir kantmenm ki Sesel i swiv bann standar ki ganny set par bann lorganizasyon enternasyonal.  Ansemoman, andeor SIBA i annan bann lezot linisyativ ki pe gann pran par egzanp kot Financial Inteligeance Unit pe fer demars pou li join Edmond Group ki en regroupman enternasyonal pou bann FIU’s. I enportan pour note ki sa lensidan ki Onorab in koz lo la pa neseserman arive akoz en mank Lalwa apropriye ou regilasyon apropriye, me akoz malerezman, serten konportman imen ki Lalwa pa toultan kapab anpese.  Mr Speaker, sa i tre enportan pou piblik rekonnet akoz parey diferan keksoz dan lavi, otan ki ou annan ou Lalwa e regilasyon an plas, otan ki sa i byen, i mars anlinny avek standar enternasyonal, i toultan annan 1 ou 2 ki pou zot rezon personnel i met zot lekor avan nou pei.  Mersi Mr Speaker.

Mr Speaker, pou dezyenm kestyon, SIBA i toultan pran en lapros ferm kan i konsern bann sitiasyon kot bann Lalwa e regilasyon pa ganny respekte.  Depi 2007, SIBA in aras license 5 lakonpannyen, SIBA in osi sispann license bann ICSP’s a bokou lokazyon e dan lezot ka, SIBA in donn bann ICSP’s bann direktiv spesifik pou swiv ler sa bann compliance inspection in ganny vwar poudir i annan serten defayans dan sa bann loperasyon bann CSP’s.  I enportan note ki i annan bokou ka kot SIBA in menm ganny akize ki parfwa i tro strikt ou tro ferm lo sa bann lakonpannyen ler sa bann regilasyon oubyen Lalwa pa ganny swiv.  In menm annan sirkonstans ki serten dimoun malerezman byen plase dan lotorite, diferan lotorite in les SIBA konpran ki SIBA i devret les dimoun, parey nou’n dir leve debrouye akoz SIBA i pran serten aksyon.

Mr Speaker, mon krwar i enportan pou lepep konpran, ensi ki bann dimoun dan bann lotorite enportan par egzanp Gouvernman, menm Lasanble Nasyonal e lezot ki leve debrouye pa vedir leve fer nenport kwa.  Ler Prezidan Michel i koz lo leve debrouye, i koz avek en lentansyon byen pou dimoun ganny loportinite pou travay pou bann lanvironnman an plas me i pa vedir ki nou kapab fer nenport kwa zis lo non leve debrouye.

Mr Speaker, sa ka i montre nou osi ki nou pa kapab devret reakte dan en fason ki pa rezonnab, fas a bann reportaz, par egzanp ki Al Jazeera in fer zis akoz serten minorite.  Me nou devret pran bann aksyon ferm kont nenport sitiasyon ki kapab met repitasyon Sesel a risk.

Mr Speaker, pou larepons trwazyenm kestyon, nou toultan dir ki lendistri offshore i enn ki frazil e ki sa bann aki ki’n ganny fer pandan sa bann lannen presedan i kapab fasilman ganny efase a bann lensidan parey ki nou’n vwar resaman akoz i kapab afekte repitasyon sa lendistri dan en fason tre rapid.  Koman en legzanp, en resers ki’n ganny fer par lakonpannyen offshore Incorporations Limited, sa study i apel bann loportinite e challenge ki pe afekte lendistri offshore, sa resers in dir ki bokou zirisdiksyon offshore pe fer fas ek problenm e abesman reveni akoz bann move kondisyon ekonomik e bann lensertitid biznes.  Sa resers i demontre Mr Speaker, par egzanp ki Moris reveni in tonm par 35 poursan an 2010/2011 e lopinnyon bann serser i montre ki bann pei tel ki British Virgin Islands, Caiman Islands, Bahamas pe fer fas avek en rediksyon dan reveni.  Ler nou met ansanm bann aksyon ki’n ganny ekspoze dan sa dokimanter ki annan potansyel pou afekte nou repitasyon, avek sa lensertitid ekonomik ki nou pe pas ladan ozordi, nou devret vreman konsernen par lavenir.

Pour lemoman Mr Speaker, i tro boner pou mwan ou pour SIBA kalkil dan en fason presiz, ki kantite zirisdiksyon ki pe ganny afekte, me sa ki nou kapab dir se ki i tre fasil avek en senp pti aksyon ki repitasyon en pei i kapab ganny detri si lotorite i pa alert, si bann dimoun ki pe travay avek sa bann lendistri pa zwe zot rol pou balans bezwen pou zot fer biznes avek de lot kote pour afekte repitasyon nou bann zirisdiksyon.  Mersi Mr Speaker.

 

MR SPEAKER

Onorab Lucas.

 

HON WILBY LUCAS

Mersi Mr Speaker.  Minis, sa lartik pe tous katriyenm pilye nou lekonomi.  Eski Gouvernman pe komisyonn en lanket detaye dan sa zafer e si wi, dan ka ki lanket i etablir okenn konpannyen oubyen lendividi ki’n enplike ou ki’n kas Lalwa, eski zot pou ganny sanksyonnen?  Mersi.

 

MINISTER PIERRE LAPORTE

Mr Speaker, larepons i byensir wi.  Mon kapab enform Lasanble ki deza, SIBA avek FIU in komans lanket lo sa bann konpannyen ki involve dan sa reportaz.  Mon pa kapab donn plis detay pou rezon legal me byensir Onorab, parey mon’n dir taler, dan bann ka kot license i ganny revoke ou license in ganny sispann ou lezot mezir disipliner i ganny pran, absoliman, dan sa ka osi, i pa pou en leksepsyon.  I pa pou fair ki bann dimoun dan lepase in ganny pini, apropriye ou noun, Lakour ki deside, me selman i pa zis sa ki la devan nou ozordi.  Nenport lezot dan lavenir ki pare pou pran sa risk, aksyon apropriye pou bezwen ganny pran.  Si nou oule prezerv kredibilite SIBA, kredibilite nou lenstitisyon nou pei, aksyon i bezwen ganny pran avek nenport ki, ki ou ete, ki ou fer dan lasosyete, ou bezwen ganny menm tretman parey lezot.  Mersi.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, dan sa progranm televize nou vwar klerman sa 2 parti an kestyon i koupab dan sa zafer.  Etan donnen larepons Minis, akoz ki parey ti fer ek LOTUS 3an pase, zot ti sispann license pending investigation e ki ozordi an Dominica, owners Zen Offshore osi pe ganny investigate deswit la e ki akoz SIBA ek Minister Finans i swazir pou pa kennsel license sa 2, Mr Lucas avek Zen offshore pending investigation? Sa anmezir ki nou, nou krwar ti devret pe ganny fer, akoz zot pa pe fer li?  Mersi bokou.

MINISTER PIERRE LAPORTE

Mr Speaker, avek tou respe pou Onorab De Commarmond, mon krwar nou bezwen fer atansyon.  Mwan mon pa pare pou etablir ziz en dimoun si i koupab or not.  Nou tou nou annan nou lenpresyon lo la, trwa kar dimoun i dir ou, petet 99.99 poursan dimoun, even mwan si mon annan en lopinyon, mon dir ou bannla i koupab.  Mon pa krwar i apropriye pou mwan dir wi, en dimoun i koupab or not ziska investigation.

Mr De Commarmond, mon kapab dir ou par egzanp ki parey mon’n dir taler, pardon, Onorab De Commarmond … (interruption)

 

MR SPEAKER

Non, non Onorab.  Yes Minister.  But next time address the Chair.

 

MINISTER PIERRE LAPORTE

Sa ki ou pe dir i ongoing, fodre rekonnet ki sa lartik in sorti dan wikenn, ozordi 2 zour apre.  Parey mon’n dir ou, aksyon i ganny pran SIBA ek FIU i lo site anmezir ki nou pe koze ozordi, zot pe al lo site e mon krwar i apropriye ki nou pa zis sot anler, nou retir en license akoz, ….  Nou tou nou vwar, lo video i annan serten lendikasyon.  Me i annan prosesis Mr Onorab De Commarmond, i annan prosesis.  SIBA pou sorti avek en statement in the next couple of days, pou dir ou ki zot in fer.  mon kapab dir ou ki SIBA in fer, Me i pa apropriye pour mwan pre-empt zot travay.  Lenformasyon pou sorti tre byento e mon krwar tou Onorab ki la, i pou vwar poudir sa aksyon ki zot pe demande, si SIBA i vwar apropriye i pou fer tre byento.  Selman mon pa oule la dan sa Lasanble ganny trennen dan en deba ki lezot lotorite i annan zot drwa e zot sa pou fer.  Onorab De Commarmond ou pou ganny lenformasyon petet pli vit ki ou ekspekte.  Mersi.

 

MR SPEAKER

Onorab David Pierre.

 

HON DAVID PIERRE

Mersi Mr Speaker.  Bonzour Minis.  Mr Speaker, an vi reperkisyon negativ ki sa i kapab annan lo nou lendistri offshore, eski Minis i kapab enform sa Lasanble si i annan okenn sanzman oubyen Lamannman dan Lalwa ki gouvern sa lendistri ki i santi i devret ganny fer, pou fer nou Lalwa pli morde e pou fer sir ki bann tel lensidan i ganny deal avek efektivman e kestyon, mon pou dakor.  E lot kestyon enportan i se ki akoz imedyatman apre sa sitiasyon, pending investigation, sa 2 lakonpannyen, zot license pa’n ganny sispann imedyatman Minis, pending investigation? Mersi Mr Speaker.

 

MR SPEAKER

Kestyon in fek ganny adrese ou dezyenm parti.  Minis ou a reponn dezyenm parti.

 

MINISTER PIERRE LAPORTE

Wi.  Mr Speaker, konsernan Lalwa ki morde, mon krwar bann Manm ki la, detrwa fwa ki mon’n vin la zot pou dakor ek mwan ki mwan osi mon en dimoun an faver ki ler i annan Lalwa, fodre morde.  Fodre nou pa bliye, parey mon’n dir taler ki zis resaman an Zen sa lannen, Sesel ti al devan OACD, apre sa ki nou apel en peer-review of offshore jurisdiction, kot bann dimoun ti vin isi, ti regard tou nou bann Lalwa ki konsern offshore, Companies Act, ICFP’s, Financial Institutions Act, Revenue Administrations Act kot sa peer-review ti montre serten defayans dan serten areas e tou sa bann Lalwa Mr Speaker, ti ganny amande resaman par Lasanble Nasyonal, ti ganny aprouve lamannman.  Savedir as far ki nou konsernen, as far ki OACD i konsernen, bann lamannman neseser in deza ganny fer e se pourkwa an Zen sa lannen ler nou ti al devan zot, SIBA, Minister Finans ti ale e zot clear Sesel koman en jurisdiction ki meet bann standar.  Zisteman detrwa semenn pase mon ti annan reprezantan ki ti al Sid Afrik kot en rankont konsernan sa bann kestyon exchange of information pou bann offshore jurisdiction e ankor, Sesel ti ganny praise par lefe ki nou’n bouz vitman apre OACD pou nou fer bann Lamannman.  Mon kapab dir ou ki par egzanp FIU, detrwa fwa nou tou nou konnen ki i annan presyon lo FIU, mwan osi mon krwar poudir toultan i annan area pou amelyore.  Me selman fodre nou rekonnet ki FIU i ganny vwar dan larezyon koman model ki World Bank i feel i pe rekomande pou adopte.  I vre ki nou bezwen annan en balans ant pou pa tro dir osi kote FIU pou les biznes marse.  Be nou vwar par egzanp osi ler lotorite pa morde ki arive.  Lala legzanp i la devan nou.  Mr Speaker i enportan pou nou fer en analozi parey mon’n fer dan bann dernyen zour.  Dan en pei ou kapab annan ou Lalwa pli strikt, pli bon, pli byen.  Ou kapab annan ou pli bon Lalwa par egzanp kont speeding lo semen.  Ou pa sipoze speed, ou pa sipoze pe dray sou.  Ou kapab annan ou pli bon Lalwa pli for, pli dir, mord pli for si oule.  Be toultan i annan 1 ou 2 dimoun, kantmenm i konnen i annan camera, i konnen i annan lalimyer rouz, i seye i sey pase.  Si i ganny atrape, i ganny pini.  Be ler i ganny i ganny en sans, petet 1 dan 100 i pase.  E parey tou keksoz, pa toultan ou kapab ganny san poursan.  Me Mr Onorab Pierre, Onorab De Commarmond parey nou’n dir, SIBA pe fer son travay e lanons konsernan sispansyon sa bann dimoun or not pou ganny fer tre, tre, tre byento.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, baze lo larepons Minis i kler ki possible cases of corruption pa ariv zis dan Gouvernman, i ariv dan sekter prive e Minis in dir nou i annan bann Lalwa ki’n vin devan nou Lasanble me i annan en bout Lalwa ki byento pou ariv devan nou Lasanble ki apel Legal Practitioners Bill, eski Minis i kapab dir nou ki baze lo sa leksperyans si son Minister pe konsider byen regard the Legal Practitioners Bill pou fer sir ki sa leksperyans parey pa ariv ankor e si i arive i annan tou mekanizm neseser pou severman deal avek bann case parey?  Mersi.

 

MR SPEAKER

Onorab, mon krwar ou pe al dan anticipation ki pa permet anba nou Standing Order.  En Bill ki pe vin devan dan Lasanble pa kapab ganny diskite a sa staz.  Onorab Vidot.

 

HON KEVIN VIDOT

Thank you Mr Speaker.  Mr Speaker, eski Minis i kapab eksplik nou si en endividi ouswa en konpannyen offshore i koronpi, eski sa i vedir ki lakonpannyen offshore antye i koronpi, ouswa Sesel antye i koronpi?  Mersi.

 

MINISTER PIERRE LAPORTE

Larepons i klerman non.  Parey mon’n dir taler, si i annan 10 move drayver lo semen ki dray sou, ki i annan i touy dimoun ladan, i pa vedir ki larestan 80 drayver Sesel i bann move dimoun, bann move drayver, bann soular.  Mon krwar nou devret met keksoz an konteks e larepons mon krwar ou pe reponn to en extent wi, en dimoun ki koronpi i pa vedir ki nou pei i koronpi.  En konpannyen ki deside al fer bann keksoz malonnet, bann keksoz mal ou kapab dir, i pa vedir ki nou tou nou parey zot.  Mersi.

 

MR SPEAKER

Bon, nou’n ariv alafen Question Time.  Mon ava remersye Minis e ekskiz li parmi nou.  e nou pou adjourn ziska 11.15 kot nou pran Statement.

 

(BREAK)

 

MR SPEAKER

Bon, nou al lo dezyenm pwen lo nou Order Order Paper e sa i en Statement ki pou ganny fer par Minis responsab pou Transpor, Minis Morgan.  An term prosedir, Minis Morgan pou fer en deklarasyon lo sa Statement, en deklarasyon polisi, apre sa i pou annan en prezantasyon ki mon’n konpran i pou ase teknik e sa pe ganny pran par son teknisyen e an tan ki son teknisyen i en stranger in the House, i pa kapab adres Lasanble Nasyonal, mon pou bezwen ganny en Mosyon pou nou kapab konstitie nou lekor dan en Komite pou li kapab fer sa prezantasyon.  So, vwala fason ki nou pou ale e letan prezantasyon in fini ganny fer, nou a retourn dan nou sesyon plener e Minis Morgan ava pran bann kestyon ki zot pou annan lo sa size devan nou.  so, mon ava envit Minis alors pou fer son Statement. Minister.

 

MINISTER JOEL MORGAN

Mersi Mr Speaker.  Mr Speaker, Manm Lasanble Nasyonal bonzour e mersi pou akey nou ozordi pou nou annan sa loportinite prezant avek zot plan management trafik dan Lavil e osi en pe bann plan ki nou annan pou lavenir, an sa ki konsern devlopman lakot les, an relasyon avek lenfrastriktir pou transpor dan nou pei.

Mr Speaker, sa problenm konzesyon dan Lavil in deplizanpli vin enn ki serye e ozordi, avek apepre 15,000 loto dan nou pei, i annan en nesesite pou rapidman adres serten keksoz ki nou kapab fer dan limedyat.  I annan serten keksoz ki nou bezwen adrese dan mwayen term e answit dan pli lon term, koman en Gouvernman pou nou kapab metriz sa problenm e met li anba kontrol pou kapab kontinnyen asire ki i annan sa lespas pou trafik sirkile, pou bann veykil kontinnyen servi nou bann larout san sa problenm konzesyon grav ki nou pe fer fas avek ozordi.

Ozordi zot a dakor avek mwan ki dan Victoria, preski tou nou bann semen dan nou Lavil, dan nou Kapital, i annan konzesyon lo la, apard ki enn de ki nou’n deza fer serten improvements parey Lari Alber, Lari Kensi, Lari Larevolisyon, me i annan ankor travay pou nou fer pou nou kapab anmenn sa pli devan.  Mazorite bann lezot larout ki antre sorti dan Victoria i bloke.  I bloke non selman pandan bann peak hours ki ti leka oparavan me ozordi si nou fer en tournen dan Lavil, nou pou vwar ki a pratikman, nenport ki moman pandan lazournen, i annan pa mal, an term konzesyon trafik e blokaz e sa i ganny fer pli grav par lefe ki nou annan bokou devlopman ki pe arive dan Lavil, nou annan bokou lenvestisman ki pe ganny fer dan bann rezyon Lavil, nou annan en nouvo vilaz natirelman ki’n ganny kree Perseverance kot i annan en gran popilasyon ki’n bouz laba e ki bezwen annan sa mobilite pou zot sorti laba pou al dan bann diferan landrwa e osi nou’n vwar bann nouvo building ki’n monte dan Lavil, parey mon’n dir, bann devlopman ki atrakte plis trafik dan nou Kapital.  E nou, nou’n reponn a sa bann kontrent, sa bann problenm e sa bann demann pou plis sirkilasyon dan Lavil atraver en propozisyon pou manage trafik e pou annan en bon plan zestyon pou trafik dan Lavil limenm li e osi dan bann koridor trafik, bann traffic corridors parey nou dir, kot i annan bokou bezwen pou konekte en landrwa avek en lot.  Mon a donn zot en legzanp.

Pou sorti nor ver lo kote Anse Etoile pou al sid ziska kot erport an desandan pou al Anse Royale sa i enn, dezyenm pou sorti lo kote lakot les pou al lo kote lakot was, prensipalman pou sorti meton lo kote Roche Caiman, Perseverance, bann landrwa koumsa pou al lo kote Beau Vallon, Bel Ombre, Glacis.  So, la nou annan ankor bann bottle necks ki nou bezwen esey metrize, esey tackle e sa plan i pou koz en pti pe lo sa bann keksoz.

En lot issue ki nou annan ozordi, se i annan en mank bann alternativ an term bann larout pou bann loto servi.  Tou loto i bezwen konsantre direkteman ver lavil si zot pe al dan nor sorti dan sid, ouswa si zot pe al sorti dan sid pe al dan nor, i menm zafer e otomatikman osi sa i aplike pou les, was e was pou al les atraver Lavil.

Parey mon’n dir Mr Speaker, nou annan nou ozordi apepre 15,000 transpor ki pe servi nou bann semen, mazorite sa bann transpor i lo Mahe, ou annan bokou mwens lo La Digue e en serten nonm lo Praslin me mazorite bann transpor ki nou annan dan nou pei ozordi, sirtou bann transpor lour i bann transpor parey loto, bis, lamazorite i lo Mahe.  Sa problenm konzesyon i pe afekte nou pei, i pe afekte nou lekonomi.  Prensipalman i afekte nou pei dan term perdi letan, setadir prodiktivite nou popokasyon kot zot perdi letan pri dan bis, perdi letan pri dan loto akoz problenm konzesyon e osi i afekte nou lekonomi an term prodiktivite parey mon’n dir, me osi akoz i kout nou bokou plis an term nou Fuel Bill.  Nou national Fuel Bill i ogmante ler en kantite loto i pri pou en kantite letan, ouswa bann bis i pri pou en kantite letan an term espere e zot bril bennzin ouswa dyezel zis dan lalinny datant, dan bann queu, akoz konzesyon.

Mr Speaker, an preparan sa plan ki nou pou prezant devan Lasanble Nasyonal ozordi, in annan plizyer konsiltasyon ki’n ganny fer.  Konsiltasyon in ganny fer par Departman Transpor lo plizyer nivo including Chief Executive’s Forum avek Minister Litilizasyon Later ek Lakaz, avek National Project Monitoring Unit, avek Singapore Land Transport Authority e osi avek Abu Dhabi Ministry of Transport pou nou kapab ganny zot input e zot lasistans pou nou kapab travay lo nou plan pou nou.

Sa ki nou vwar ozordi se ki nou bann lenfrastriktir semen non selman dan Lavil me osi en pe partou lo Mahe e osi lo Praslin a en serten nivo, i nepli annan sa kapasite pou cope avek sa volim trafik ki nou pe fer fas avek.  E sa volim trafik pe kontinnyen ogmante zour an zour.  Pou sa lannen nou’n vwar en pti diminisyon, en pti bes dan lakantite loto ki pe ganny enporte dan nou pei.  I annan apepre 300 an mwens ki lannen pase me kantmenm sa i still annan en inflow enportan transpor ki pe antre dan nou pei depi bann transpor lour, bis limenm li pou nou transpor piblik, bann omnibus, bann taxi e loto prive pou bann endividi.

Nou’n vwar ki nou lenfrastriktir Mr Speaker, i pa azour e ki en gran lenvestisman in demande par Gouvernman lo en peryod letan ki natirelman pou bezwen abordab pou Gouvernman kapab fer li pou nou kapab re-envestir dan nou lenfrastriktir transpor dan nou pei e la mon pe koz prensipalman elarzi nou bann semen e moderniz nou bann fasilite ki nou annan dan sa bann landrwa kot i annan konzesyon.

Ozordi mon prezantasyon anver zot i konsantre prensipalman lo Lavil Victoria limenm e i konsantre lo nou bypass nor sid ki nou pou koz lo la, ki form parti en pli gran plan ki nou annan, ki enkli agrandir bann semen lo lakoz was ki a lot moman done, mon a prezant sa devan Lasanble Nasyonal pou zot konsiderasyon e envit zot pou donn mwan bann komanter lo la.

Mr Speaker, nou’n koz en pe lo bann semen ki annan problenm konzesyon e mon pou nonm detrwa la ozordi.  Nou annan nou Central business district dan Victoria limenm, dan nou zone santral Victoria, nou annan konzesyon lo semen St Louis ki vin Victoria, nou annan konzesyon lo semen Bel Air dan Victoria kot round about Le Chantier, nou annan konzesyon osi kot Beau Vallon kot kordgard santral la, i annan serten konzesyon ki arive, nou annan depi Les Mamelles ziska Le Chantier round about, lo semen Mont Fleuri i annan bokou konzesyon osi la, nou annan Providence Industrial Estate, nou annan semen sorti dan direksyon Larivyer Anglez, Ma Joie pou vin dan Victoria, semen Bel Eau e depi Eden round about ziska Le Chantier i tou bann landrwa kot nou annan bokou problenm trafik.

Premye letid ki nou ti fer ti en letid ki ti ganany fer par lakonpannyen GIBBS.  An 2005 sa letid ti ganny fer e i ti terminen an 2007 e zot ti apel sa The Victoria Management Traffic Management Study e sa premye letid ti vin avek serten propozisyon ki ti ganny met devan Gouvernman pou konsiderasyon e dan sa letid GIBBS Mr Speaker, plizyer zot bann propozisyon in deza ganny enplimante dan Lavil pou amelyor en pe kondisyon trafik.  Serten sa bann propozisyon in ede, mon pe koz la Lari Alber par egzanp, mon pe koz Independence Avenue, Quincy Street e lezot landrwa ankor kot nou’n fer serten lenplimantasyon parey Francis Rachel kot in ed en pe.  Me sa letid limenm li pa’n marse pou anmenn nou pli devan fas a sa volim trafik ki nou pe fer fas avek.  In deza osi annan en plan ki ti ganny prepare par Victoria Harbour Development Corporation an 2008, kot zot ti propoz serten bypass, serten propozisyon pou bypass trafik dan Lavil e pou annan en semen alternativ ki anpes trafik vin ver Lavil, sirtou bann ki pa bezwen al dan Lavil ler zot pe sirkile otour Victoria.  Nou ti osi fer en lakonpannyen Sid Afrik ki apel Trafficon an 2008 ed nou avek en study inikman focus ver sant Lavil pou vwar ki bann problenm nou annan e kimannyer nou kapab fer bann pti keksoz pou amelyor sitiasyon e sa bann keksoz osi in ganny enplimante ofir e anmezir ki nou’n progrese.

Mr Speaker, a sa moman osi mon oule highlight ki i annan en propozisyon ki pe ganny fer par en lakonpannyen prive, swit a en lapel dof ki Gouvernman ti lanse lo east coast lipe rail, en transit system, en monorail ki pe ganny enplimante par en lakonpannyen ki’n ganny formen swit a sa lapel dof parey mon’n dir.  E la travay i ongoing e nou pe zwenn zot regilyerman, plizyer Minister pe zwenn zot, enkli natirelman Departman Transpor, kot nou pe esey finaliz sa larout ki zot pou pran e lafason ki zot pou operate pou kapab prezant e donn en nouvo alternativ nou bann comuters, nou bann pasaze pou kapab dekonzesyonn en pe nou Lavil.  E donn en sistenm rapid koneksyon nor depi Anse Etoile kot bazar i ete ziska sid kot erport i ete.  So, i ava annan sa proze lipe rail, kimannyer monkonpran Mr Speaker, i deza annan bokou envestiser ki enterese dan sa proze, i annan plizyer zot in deza komans prepar zot finansman pou lans dan sa proze.

An term bann proze limenm li ki nou annan Mr Speaker, a sa moman donnen, mon ti a kontan al lo sa plan teknik ki nou anvi prezant avek Lasanble Nasyonal bomaten e demann ou permisyon pou bouz dan sa letap.  Mersi.

 

MR SPEAKER

Bon, parey mon’n deza dir, nou pou bezwen al dan staz komite, so mon ava envit Leader of Government Business pou prezant en Mosyon pou nou al dan Committee Stage.

 

HON MARIE-ANTOINETTE ROSE

Mr Speaker, anba Order 79(1) mon move ki nou Lasanble i konstitye son lekor koman en komite.

 

MR SPEAKER

Ok, okenn ki segonde ki nou konstitye nou lekor dan en komite?

 

HON CHARLES DE COMMARMOND

Mr Speaker, Motion is seconded.

 

MR SPEAKER

……..

HON MARIE-ANTOINETTE ROSE

Mr Speaker anba 45(1) mon ti a kontan raise en point. Mon ti pe regarde si mon kapab servi ou diskresyon pou petet les SBC filmen, etan donnen ki i annan lentere nasyonal e zot annan lentansyon repas sa prezantasyon an antye.  Mersi.

 

MR SPEAKER

……… mon ti pe al koze se nou pe servi rules anba nou Rules of Procedures for Committees ki permet nou kapab les SBC filmen.  Si napa okenn lobzeksyon lo par komite, then nou ava permet SBC pou kontinnyen filmen.  Mon pa vwar okenn lobzeksyon, alor nou ava al dan Committee Stage. E Komite i en pti pe pli dezord parey nou konnen.  Pa tou Lalwa ki aplike dan sesyon plener ki aplike dan Komite.  Mon ava envit Mr CEO, STLA, son non i en pti pe difisil, pou li fer son prezantasyon.  Ankor enn fwa, kimannyer nou pe mazin fer sa?  I ok kot ou pe asize la?  Minister, ou teknisyen i ok kot i pe asize?  Mon’n ganny enformen ki pou swiv from son laptop.  I pa bezwen vwar la anler?  Wi akoz SBC pa’n, sa problenm ki i en problenm ki nou pa’n ganny lakord ek SBC, Clerk in enform mwan, so i ava swiv from son laptop e nou, nou ava swiv, mwan osi mon pou swiv from mon laptop e larestan ava swiv from la anler.  I ok sa, napa problenm?  Ok, so proceed.

 

MR PARINDA HERATH

Mr Speaker, Manm Lasanble Nasanble Nasyonal, bonzour.  Avek sa lentrodiksyon ki Minis in fer, mon ava al direk dan sa prezantasyon.  Ok.  Parey zot vwar la, sa plan ki’n ganny montre la i montre tou sa bann propozisyon, en pe ki Minis in koz lo la, ki’n ganny propoze avek konsiltasyon tou bann stake holders e osi bann konsiltan enternasyonal.

Pour komanse, nou komans Roche Caiman, dan direksyon sid avek Victoria e sa i sa round about Roche Caiman, propozisyon se pou enlarge li e convert li pou fer li vin en dual lane round about.  Toulede son approaches avek son bann exit pou annan 2 lane e osi son central median osi pou annan 2 lane.  I pou en pe parey sa round about ki egziste Providence.  Si zot kapab remarke, i annan sa link ki nou’n deza ouver ki komans lo semen Ste Therese ki join avek semen Bois De Rose e sa enn ki la, nou’n realize ki in improve en pe sitiasyon konzesyon ki pe arive dan round about Roche Caiman limenm e osi dan sa rezyon an zeneral.  Komansman kot round about ziska Anvil lo semen Bois De Rose, propozisyon i pou enlarge li pou fer li vin en dual lane, two way semen parey Highway Providence ki egziste e la kot Maison Malavois i ete, PUC e osi pre avek Building ……….., round about ki’n ganny propoze ki pou join semen Bois De Rose avek semen Mont Fleuri la.  I pou osi zis devan junction Foret Noire.  I pou osi konekte avek en pti semen deryer lekol International School ki tou bann trafik ki vin kot lekol actually i kapab pas par deryer, join lo sa bout semen e vin dan sa round about e fer zot semen swa direksyon sid oubyen nor.

I annan sa semen ki al kot Bodco osi ki pou ganny upgrade e osi sa enn ki al kot Coast Guard avek SIBA, spesifikman pou ganny servi plizoumwen par bann gro trailer e osi bann container carriers eksetera ki servi sa semen.  Ok.  Pou kontinnyen sa semen ki vin ziska kot Le Chantier round about pou ganny upgrade two way, parey nou’n koze avan e la devan kot Discotheque Flamboyant ti ete ki sa north/south bypass pou komanse.  I pou annan en seksyon ki overhead, ki pou pas par lao round about Le Chantier, sa i en opsyon, i annan en lot opsyon ki en bridge ki pou pas drwat lo water front ki pou join sa round about drwat, me sa enn ki la i annan en seksyon ki overhead pou pas anler apre pou re-merge lo semen la, at grade savedir nivo semen e i pou pas dan carpark kot Marine Charter i ete e osi la par deryer kot Amusement Centre, pou join avek en round about lo sa junction ki al kot IOT.  Ok, apre sa semen i kontinnyen dan direksyon nor, pas par Ile Du Port e i pou join avek sa round about ki egziste lo Ile Du Port, actually sa site ki la kot building JJ Spirit pe ganny konstrir presently.

Pour retourn dan direksyon Lavil, sa i semen round about Le Chantier.  Nou annan en propozisyon pou amelyor sa bann entrance e inprove son safety e osi sirkilasyon trafik dan sa landrwa.  Lo semen Senk Zen, komansman lo round about Le Chantier, nou pe propoz pou fer en nouvo lane. Savedir i annan sa 2 lane ki egziste e pou annan sa 1 nouvo e direksyon sa lane i pou dan direksyon nor.  Sa 2 lane ki egziste i pou dan direksyon sid, nou pankor finalize si sa semen pou pas lo kote borlanmer oubyen lo kote montanny, nou pe sey ganny sa propozisyon ki pli byen actually, ki pa pou distrupt bann striktir e lanvironnman egziste.  Sa nouvo lane i pou pas kot round about Independence e i pou al toudilon ziska kot larantre SPTC i ete.  Sa junction parey zot vwar i sa enn Palm Street signalized, pou annan traffic light e osi la kot Manglier, li i pou ganny signalized.

Pou al lo lot kote lo semen Francis Rachel, nou pe propoze pou fer en lot nouvo lane, depi kot round about kot lorloz i ete toudilon ziska dan round about Le Chantier.  Sa 2 lane ki egziste, traffic pou flow dan direksyon Lavil e sa enn nouvo, traffic pou flow dan direksyon kot Le Chantier.  Independence Avenue pou napa okenn sanzman, i pou reste parey e osi en propozisyon se pou fer en multi-storey car park dan car park ki egziste kot Stad Popiler.  Son larantre pou la devan lo Francis Rachel e pu annan en sorti lo Francis Rachel limenm e osi en sorti lo Independence Avenue.

Pou bouz dan direksyon was, nou vin la lo Revolution Avenue, la kot kord gard santral i ete, sa i Quincy Street e osi Revolution Avenue ki mont St Louis.  Propozisyon se pour konstrir en lane lo kote drwat letan ou pe monte.  Sa i pou en proze ki ase difisil avek bann batiman, bann devlopman ki deza la lo sa kote.  Sa lane pou komans la kot Quincy Street e i pou pas through junction Bel Air, toudilon ziska kot junction Labourdonnais Street. Sa i Labourdonnais Street ki letan ou pe desann kot Marie-Antoinette Restaurant la, propozisyon se pou enlarge li pou upgrade avek foot path e osi enlarge li pou kapab ganny servi avek bann transpor ase larz e menm bis dan bann sirkonstans emergency e semen Lari Angar pou ganny upgrade, nou pou fer li convert into one way, toudilon depi Labourdonais ziska kot semen Mont Buxton i ete.  Sa bout ki la, nou pou bezwen kit li two way pou bann bis e bann lezot transpor ki mont Mont Buxton.

Sa bout ki la i semen Olivier Maradan e i pas devan legliz.  Nou propozisyon i pou konstrir en trotwar toudilon ziska junction kot Castor Road i ete.  Castor Road pou reste parey pour lemoman, son direksyon trafik osi pou reste parey.  Pou al en pti pe andeor Lavil pou montre en pti pe bann nouvo link, bann nouvo koneksyon ki’n ganny propoze, nou annan sa link Stevenson Delhomme pou vin join avek Bel Air, sa i sa bout semen ki pou bezwen ganny konstrir, en nouvo bout semen.  Semen Stevenson Delhomme i deza arive ziska la e osi nou annan semen Curio Road ki nou pe propoze pou upgrade li pou plis trafik kapab servi, i annan sa 2 kontour, parey zot vwar la, nou pou bezwen resanz lalinny mas ant sa semen pou vin en pe pli drwat.

Lot semen ki’n ganny propoze i semen FIBA ki join Foret Noire avek Sans Souci, sa semen ki la, li osi nou propoze pou upgrade li pou ki trafik i kapab ganny servi safely.  Pou lemoman i pa en motorable road, i pe ganny servi par pyeton.  Mon krwar mon’n kouver preski tou, mon ava  al dan ………….

Ok, sa i montre tou bann major junctions dan Lavil limenm ki nou pe propoze pou ganny signalized pou met bann traffic lights.  I annan Palm Street avek Fifth June, Manglier Street avek Fifth June, Independence round about, Le Chantier round about, Liberation road and Mont Fleuri road, Bel Eau, kot clocktower limenm, Bel Air e osi junction Castor Road, Olivier Maradan avek Palm Street.  E sa i montre sa nouvo flow trafik, kimannyer i pou ete letan nou convert sa 2 lane egziste lo Senk Zen pou vin dan en sel direksyon avek sa nouvo lane ki mont dan direksyon nor e osi Francis Rachel Street ki nou pe propoz sa 2 lane ki egziste, pou antre dan Lavil e en nouvo lane pou sorti pou vin kot Le Chantier.  Sa i montre en pe an detay sa link Bois De Rose avek Mont Fleuri ok.  Bon, sa i andeor Lavil limenm, me selman li osi, vi ki i dan sa east coast corridor, nou krwar i en proze tre enportan pou nou undertake en pe pli vit posib.  I en round about ki nou pe propoze kot Ros Torti Moniman i ete e akse egziste pou erport pou bezwen fermen e nou pou ganny en nouvo akse par sa direksyon la.  E sa i en seksyon semen lo Senk Zen, en lot seksyon lo Francis Rachel.

Ok.  Sa i en lot scheme ki nou pe propoze, i apel park and ride.  Nou ekspekte launch li tre byento koman en pilot project.  Pou annan 2 landrwa parking, enn lo Ile Du Port lo kote nor e osi lo kote sid, kot Stadium Stad Linite e SPTC pou provide bann shuttle buses ki pou vin dan Lavil, ki pou fer bann stop dan serten landrwa e pou fer en circular service pou retourn dan menm landrwa.  Bann motoris, zot kapab vin dan zot loto, park dan sa 2 parking ki ganny provide e i pou anba sekirite.  Apre zot kapab pran sa shuttle bus pou zot vin dan Lavil, pou zot kapab al dan zot landrwa travay eksetera.  Sa i montre kot sa parking pou ete lo kote sid kot Stad Linite.  Sa i lo kote nor kot compound SPTC i ete lo Ile Du Port.

Bon, sa latab i montre bann propozisyon, bann proze avek son estimated cost e nou’n klasifye li an 3 faz.  Short term, medium term avek long term.  Bann proze short term ki nou pe propoze i dirasyon 1 a 2an.  Parey zot vwar i annan nimero 1 ziska 6 ki nou pe propoze e bann medium term i pou apre sa, 2an a 5an e bann long term, 5an e plis.

Taler mon’n eksplik zot, i annan en propozisyon, sa north/south bypass.  En opsyon sete pou pas parey nou ti’n eksplike avan, son lot opsyon i pou fer en pon, basically pou pas through Ile Odoul e join avek semen kot New Port e osi plitar pou join avek Bois De Rose Avenue.  Sa i sa lalinnyman south point, si i ganny konsidere.  Mersi.

 

MR SPEAKER

Bon, Minis in pare pou reponn bann kestyon, pou pran bann kestyon la alafen sa prezantasyon teknik.  So i pou neseser ki nou retourn dan nou sesyon plener.  Mon mazinen i a zis en formalite, nou pa bezwen pran okenn vot akoz nou bezwen retourn laba.  Sergeant At Arms.  E nou ava komans pran kestyon.  Onorab Volcere.

 

HON MARC VOLCERE

Mersi Mr Speaker.  Bonzour Minis.  Minis, ler mon pe get sa plan ek son kou finansyel, i vreman well nou bezwen en kantite larzan pou nou kapab enplimant sa plan.  Minis mon ti a kontan demann ou ki lenpakt sa plan pou annan lo lenfrastriktir semen lo Praslin?  Mersi.

 

MINISTER JOEL MORGAN

Mersi Mr Speaker.  Mr Speaker, sa plan, parey Onorab in mansyonnen i reprezant en lenvestisman tre, tre enportan pou Gouvernman nou pei dan lavenir.  Son total i ariv en pe plis ki R1 bilyon lo en peryod 5an anmontan e natirelman nou pou bezwen vwar kimannyer Gouvernman e bann bayer de fon enternasyonal ki annan bann proze pou ed bann pei an devlopman lo nivo Lafrik i kapab ed nou pou finans nou lenfrastriktir ki nou bezwen pou lavenir.  E la mon pe koz Mr Speaker lo par egzanp sa infrastructure trust fund ki i annan anba SADC ki ganny larzan Linyon Eropeen ki ganny mete ladan pou ede amelyor lenfrastriktir dan bann pei Lafrik e i annan lezot fon ankor ki nou kapab esey akse avek, par egzanp i annan fon Abu Dhabi kot nou pou osi eseye pou nou kapab ganny en pe finansman pou ed nou avek sa.

Lo lenpakt sa plan lo Praslin.  Mr Speaker, ozordi sitiasyon konzesyon lo Praslin i pa grav.  Nonm veykil ki annan lo zil Praslin ozordi i pankor ariv sa nivo kot nou komans eksperyans bann konzesyon signifikan, par egzanp dan Baie Ste Anne ouswa dan Grand Anse, bann sant Baie Ste Anne ouswa Grand Anse, a bann moman done, bann peak hours.

Sertennman Gouvernman i annan plan an term nou bann proze ki nou fer toulezan, nou bann capital projects, nou pou kontinnyen envestir dan bann lezot landrwa, non selman lo Mahe me lo Praslin e La Digue osi e sa mon donn zot sa reasirans ki nou pou kontinnyen envestir dan amelyorasyon nou bann semen ki egziste ozordi, nou pou kontinnyen fer bann proze agrandisman kot i neseser, nou pou kontinnyen fer bann proze ki pou met semen pli an sekirite pou bann pyeton kot i neseser e nou pou kontinnyen osi konstrir bann nouvo semen dan bann kominote e dan bann distrik, otan ki nesesite i demande, natirelman tout an tenan kont nou bann kontrent ki nou annan lo kote Bidze.

Nou progranm debaz fondamantal Departman Transpor e nou Gouvernman i reste la pou tou nou distrik dan nou pei.  Sa ki sa plan i fer li, i prezant en eleman spesifik sa ki nou pe fer pou ede amelyor sa sitiasyon konzesyon ki nou pe fer fas avek.  E zis en keksoz ki teknisyen pa’n prezante la se nou north/south bypass.  Nou’n vwar en pe depi kot erport kot i pran, Mr Speaker nou’n vwar sa bout la, nou’n vwar li ziska kot i vin par deryer Oceangate pou al anmontan ver Ile Du Port anmontan, me sa ki nou kapab petet vwar se ki i osi annan en bypass, en highway ki’n ganny deza konsevwar e pe ganny prezante pou sorti depi Ile Du Port pou al ziska Anse Etoile, zis avan ou pran sa bout ki al lo North East Point, lapwent Anse Etoile, petet teknisyen i kapab prezant sa pti bout la e sa osi ava ede pou tir en pe sa presyon ki nou annan ozordi, setadir semen ki pran depi Anse Etoile ki desann toudilon ziska kot Union Vale kot Lavil i komanse.

Alor, nou annan sa plan pou sa proze e zot pou kapab vwar bann detay la kot nou al lo Ile Perseverance, nou answit mont lo Ile Oror e nou finalman end up lo sa seksyon semen Anse Etoile.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, mon ti a kontan demann Minis, mon pa’n tann bokou ganny dir lo bann overpass oubyen underpass dan Victoria, ki ava ede retir konzesyon sirtou bann pyeton e osi Minis si ou ti a kapab klarifye pozisyon ou Minister an sa ki konsern konstriksyon fors bann batiman dan Lavil pou annan zot prop underground parking, ki sa osi ava ede retir en pe problenm parking dan Victoria.  Mersi.

 

MINISTER JOEL MORGAN

Mersi Mr Speaker.  Mr Speaker, annefe sa plan ki nou’n prezante la i annan tout en progranm pou enplimant bann underpass pou bann dimoun kapab pase, sirtou kot i konsern Lavenir Senk Zen e osi enn de lezot landrwa ankor kot i pou annan sa doubling up avek nou semen aktyel e i pou annan sa bypass ki pou pas an paralel avek.  Sa i pou neseser e nou pe plito regard bann underpass akoz avek en underpass ou kapab osi, i pli fasil pou bann dimoun aze e bann dimoun andikape pou servi en underpass ki en overpass akoz overpass ou annan sa issue peron, ou annan sa issue sag radiant pou ou kapab monte, ou annan sa oter 3.5 met minimum pou allow bann gro transpor pas anba la, so i plito en progranm lo nivo underpass ki nou pe konsidere dan sa bann landrwa ki nou pe koz lo la.

Mr Speaker, sa kestyon underground parking i enn ki tre enportan.  Avek sa proze ki nou’n deza met lo tender pou bann lekspresyon lentere atraver SIB, mon krwar bann Manm Lasanble zot in sirman vwar sa lo Nasyon.  Nou annan sa proze multi-storey carpark kot Stad Popiler i ete ozordi e sa proze multi-storey carpark, nou pe viz prensipalman a en proze probableman 3 letaz pou allow bann loto vin park la, ki pou combine avek non selman zis en carpark me osi pou annan bann laboutik, bann lespas komersyal ki ava fer sa proze bokou pli viab lo en pwennvi komersyal pou envestiser envestir ladan.

Alor nou pe atann bann lekspresyon lentere e sa i ava osi ede donn plis lespas pou parking dan nou Kapital.  Me pou bann proze ki pe vini dan lavenir, mon krwar i en keksoz ki nou’n deza take up avek Lotorite Planning, pou asire ki sa bann proze i provide pou underground parking e nou’n mank sa loportinite malerezman avek nouvo Unity House, malgre serten demann ki nou ti’n fer, i pa’n pase me i annan par egzanp en proze ki en envestiser i pe propoze la a se moman done, lo sa lespas ki annan bann vye batiman lot kote kordgard, opposite kordgard lo Lari Larevolisyon e la i annan en propozisyon deza ki li in fer, ki nou’n demande pou fer en underground parking la pou en senkantenn a 75 loto e sa i ava ede.  E mon krwar ofir e anmezir ki nou redevlop nou Lavil, nou Kapital, nou bezwen vwar bann opsyon kot i apropriye e kot nou kapab fer li pou provide pou underground parking koman en regilasyon dan nouvo regilasyon Planning ki pe vini dan lavenir.  Mersi.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, mon panse ki i annan en bout ki’n manke depi erport ziska Roche Caiman ki pa’n ganny eksplike parey ti’n promet, me apard ki sa ki’n ganny prezante, souvandfwa problenm trafik dan Lavil i lie osi avek bann transpor ki dousman parey bann gran trailer pe anmenn disel dan letan peak hours.  Bann lezot transpor pe al 10 kilomet a ler dan milye semen pe dray ensidswit.  Ki lezot mezir dan sa direksyon ki Minister pe antisipe pran or pou pran vizavi sa plan pou amelyor davantaz sa kestyon sirkilasyon trafik dan Lavil ki kekfwa dan bann keksoz en pe imedyat ki kapab ganny deal avek?  Mersi.

 

MINISTER JOEL MORGAN

Mersi Mr Speaker.  Mr Speaker wi, pou rezon letan nou’n zis tous lo sa eleman sa highway sorti erport ki pou ariv Roche Caiman e mon a donn leksplikasyon lo la.  Esansyelman nou pou kontinnyen sa highway ki fini Providance kot Providance Industrial Estate roundabout i ete ozordi e nou pou kontinny li toudilon ziska kot ou ariv kot Maison Du Peuple, la kot ou pou pran sa bypass ki pou al nor ouswa ou pou deside pou pran sa direksyon pou al dan Lavil.  Setadir nou pou annan en highway, en dual carriage way toudilon, ki pou ariv ziska kot roundabout Le Chantier e sa i ava bokou ede pou amelyor nou sitiasyon konzesyon trafik ki annan en tail back depi kot Eden Island dan bomaten, menm ava Eden Island, toudilon ziska dan Lavil.  Sa i a en mezir ki nou pou enplimante me mon a revin lo sa kestyon bann mezir dan limedya ki nou kapab pran.  Nou bezwen en Bidze apepre R22.5 milyon Mr Speaker, pou nou fer le swivan.  Pou nou met bann lalimyer trafik dan bann landrwa kot nou’n endike avek Lasanble Nasyonal nou pou mete, pou nou annan sa proze one-way traffic flow dan Victoria par adisyonn en trwazyenm lane lo Francis Rachel, en trwazyenm lane lo Senk Zen, pou nou kapab step up bann mezir enforcement dan Lavil, pou nou fer nou proze park and ride ki nou’n koz lo la, par SPTC, pou nou extend bann bus laybys pou asire ki bann bis i annan ase landrwa pou park, dan bomaten sirtou e dan apre midi pou zot pa koz sa konzesyon lo main road e pou nou fer bann improvement lo sa round about Roche Caiman, pou kapab fer li vin 2 lane olye en sel lane ki i ete konmela e pou nou enplimant sa nouvo roundabout kot erport.  Sertennman ozordi mon ti a kontan dir avek Lasanble ki nou annan deza bann mezir an plas ki pe ganny met an fors dan Lavil.  Zot a vwar poudir nou bann traffic warden i tre aktiv, i koz serten mekontantman parmi bann motoris me zot pe fer en travay enportan pou asire ki Lavil i reste ositan kler ki posib, an term konzesyon, me osi sa bann gran trailers ki pe anmenn disel zot in ganny restrikte lo bann ler off peak e si zot ganny detekte ki zot pe servi semen pandan bann peak hours, zot annan en fine ki zot peye anba Road Transport Act ki nou enforce lo zot.

Vwala en pe bann mezir ki nou pe fer dan limedya Mr Speaker, avek sa R22.5 milyon ki nou pe demande, epi nou annan nou natirelman bann proze en pe pli lon term e la nou pe regard sirtou sa bypass pou Victoria limenm.  Mon pa pe koz bypass nor/sid me mon pe koz sa bypass Victoria kot i ava ede pou tir sa trafik ki ozordi neseserman i bezwen pas lo Senk Zen, ouswa neseserman i bezwen al dan direksyon Lari Francis Rachel ler i sorti dan sid dan bomaten ouswa dan opposite direction dan apre midi e nou bypass tousala avek sa bypass ki nou pe propoze, an paralel avek Senk Zen ouswa lo sa pon ki nou’n koz lo la.  E sa pon limenm i en proze mon krwar ki annan bokou merit.  I pou kout en pti pe pli ser ki en bypass an paralel avek Lavenir Senk Zen me kantmenm sa i annan bokou merit akoz i pou kree en landmark pou Victoria.  I pou entrodwir en nouvo feature, en nouvo landmark pou Victoria, kot ou pou annan sa zoli pon ki sorti depi kot Oceangate House i ete la dan carpark, i pou monte e i pou redesann zis par deryer carpark ICCS, annefe kot carpark ICCS i ete e pas atraver la par deryer kot Flamboyant ti ete pou al lo Bois De Rose.  E nou’n deza vwar detrwa design ki’n ganny propoze pou sa e nou krwar ki avek devlopman waterfront Victoria limenm li, sa proze kot devlopman waterfront, i pou ede pou anmenn bokou plis latraksyon pou devlopman ekonomik nou Kapital limenm li me osi pou ede amelyor sa zimaz waterfront Victoria e fer li pli zoli atraver sa landmark. So, si nou fer en pon la dan lavenir, i pou tre enportan ki nou fer en lavaler artistik e estetik enportan pou ede fer nou Lavil vin pli zoli.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker, bonzour Minis ek son delegasyon.  Mr Speaker, an term finansman, eski Minis i kapab dir avek sa Lasanble, nou pe koz semen avek carpark, eski Minis i kapab dir avek sa Lasanble how much ki bann lakonpannyen prive pou involve dan sa plan e ki lenpakt sa pou annan lo lamenazman trafik alavenir, an term kou pour bann konsomater, vedir bann vehicle owners par egzanp, eski zot annan plan pou entrodwir bann fees lo serten seksyon semen ki pou ganny servi, oubyen revwar bann fees, bann sa ki ki ou bezwen peye pou parking, e mon annan en pti klarifikasyon an term sa ki Minis in donn nou lo parking ride la.  Minis mon pa vwar okenn kou asosye avek parking ride, mon pe rode akoz e mon anvi konnen ki pou kapasite sa carpark silvouple?  Mersi Mr Speaker.

 

MINISTER JOEL MORGAN

Mersi Mr Speaker.  Mr Speaker, sa kestyon i focus prensipalman lo bann kou ki en eleman enportan dan nenport ki proze ki nou fer, nenport ki plan zestyon ki nou met devan.  Finansman sa bann proze limenm pou prensipalman sorti kot Gouvernman Sesel atraver parey mon’n eksplike avan, bann diferan lenstitrisyon enternasyonal ki ede avek bann grants pou lenfrastriktir semen dan Lafrik e nou pe apros zot avek nou plan, nou deza soumet, nou deza soumet plizyer konponan sa plan ver sa bann bayer de fon e nou pe demann zot pou konsidere pou asiste nou akoz klerman en Bidze R1 bilyon lo en peryod 5an anmontan i vreman tre, tre lour lo nou Gouvernman e i en keksoz ki nou tousel nou pa pour kapab afford pou fer li, avek nou sitiasyon ki nou vwar nou lekor ladan, an term Bidze.

Lo bann lakonpannyen prive Mr Speaker, bann lakonpannyen prive, zot kontribisyon ki zot pou fer se prensipalman atraver bann proze ler zot fer redevlopman zot lespas komersyal dan Victoria e la sa eleman underground carpark in ganny mansyonnen me osi i annan bann lezot travay ki zot bezwen fer, par egzanp ler zot pou fer bann nouvo batiman dan lavenir, zot pou bezwen set back en pe plis e petet mont en pe pli o pou ganny menm kantite square metre, lespas pou zot bann biro, zot pou bezwen set back en pe plis pou donn sa bataz pou kapab agrandir bann semen ki nou’n koz lo la ozordi e osi pou kapab donn bann fasilite pou bann pedestrian, bann dimoun ki servi semen e ki servi bann trotwar, bann dimoun ki bezwen sirkile dan Lavil.  Zot kontribisyon i vin atraver sa lespas ki zot donnen.  Nou napa lentansyon a sa moman done pou met okenn tax, okenn lezot lenstriman fiskal lo zot, apard ki zot business tax ki zot pe peye pou lemoman.  Me an term konsomater limenm li, nou napa okenn lentansyon pou entrodwir okenn nouvo eleman tax a sa moman done lo bann konsomater pou finans sa bann proze ki nou pe koz lo la e neseserman nou pou bezwen vwar larzan ofir e anmezir parey mon’n eksplike pou nou kapab fer li.

Si nou annan lentansyon pou ogmant parking fees, wi Mr Speaker, nou annan lentansyon pou nou ogmant parking fees akoz in ler pou nou osi kapab annan en pti pe plis reveni ki vin dan kont Gouvernman pou ede finans bann proze mentenans lenfrastriktir dan Lavil limenm e pou nou osi ede finans bann proze devlopman ki nou’n propoze devan zot bomaten pou sistenm management nou bann semen.

Kou parking ride, i pe ganny determinen par SPTC a sa moman done e SPTC pou travay sa lo en baz cost recovery.  Zot napa lentansyon fer en tro gran margin, en tro gran profi lo la akoz i en servis, plito ki en undertaking, en proze ki vize ver fer larzan.  SPTC in envestir deza dan bann bis ki sorti Lasin, bann low ride buses parey nou dir sa, bann bis ki ba, pou fasilit dimoun anbarke/debarke e i pou annan 2 eleman sa parking ride project.  I pou annan sa eleman kot ou ale ou park ou loto, ou pey sa fee e ou pou annan ou tiket ki pou ed ou sirkil dan Lavil pou lazournen, mon krwar SPTC pe propoze ki ou annan 6 posibilite anbarke/debarke dan en lazournen avek sa tiket e sa pri zot pe regarde, zot pankor finalize me sa ki mon’n vwar i en pri tre rezonnab e dezyenm eleman se ki si ou dan Lavil oumenm ou e ou pa’n aste en tiket parking ride, ou pa’n al park en landrwa me ou en dimoun ki dan Lavil, ou anvi sirkile dan Lavil, ou pou osi kapab anbark lo sa bis, ou pey en tiket e ou debark en lot landrwa.  Par egzanp ou kapab anbarke lo Independence Avenue e debark kot Lari Kensi pou al bazar.  Bann keksoz koumsa, ou kapab anbarke kot bazar e al kot Lari Kensi sorti bazar e debark en lot landrwa, meton lo stenn bis pou ou pran ou bis pou al se ou.  So, sa proze park and ride i konpri tou sa bann eleman.

Kapasite loto, mon napa sa lenformasyon Mr Speaker, me dapre sa ki mon konpran i pou kapab cater, akoz lespas i gran, i pou kapab cater sertennman pou plizyer santenn transpor toulezour.  Mersi.

 

MR SPEAKER

Onorab Jeannevol

 

HON BEGITTA JEANNEVOL

Mersi Mr Speaker.  Minis bonzour.  Minis, ou’n dir nou ki serten keksoz dan sa plan pou pran apepre 5an avan ki i kapab ganny enplimante.  Me eski ou Minister i annan okenn plan imedya pou semen Mont Fleuri, sirtou sa bout kot Lopital Sesel i ete, sirtou se la kot nou servis dirzans i ete e plen fwa sa semen i bloke, menm si i annan sa box ki’n ganny mete ater.  Mon krwar i vreman enportan vi ki nou servis dirzans i la parey mon’n dir.  Mersi.

 

MINISTER JOEL MORGAN

Mr Speaker, sa junction kot Lopital Sesel i ete, ansanm avek semen Mont Fleuri i deza annan bann bwat zonn parey ou’n dir MNA, pou asire ki transpor pa arete dan sa landrwa, dan sa junction ler i annan konzesyon trafik me i en kestyon enforcement akoz i neseser pou asire ki a tou moman sa junction i reste lib e nou pou bezwen ranforsi lo kote nou bann lazans ki responsab pou enforcement, setadir lapolis limenm li, Traffic Police, epi Land Transport Agency avek bann Traffic Warden, pou asire ki bann dimoun i respekte sa e zot obzerv sa.  En keksoz ki nou pe fer Mr Speaker se nou pe ogmant lakantite camera ki nou annan dan Lavil e dan bann zalantour Lavil, bann landrwa parey Mont Fleuri e e lezot landrwa ankor, pou nou kapa obzerv sitiasyon trafik, pa selman sitiasyon krim ouswa bann problenm ki devlope, me osi sitiasyon trafik dan sa bann landrwa kot nou annan camera. E avek sa proze pou ogmant lakantite camera ki nou annan, nou pou monitor sa bann keksoz ki pe arive e swit a sa, pran bann aksyon neseser pou dispatch en gard lo en moter ouswa pou dispatch en zofisye trafik pou al entervenir pou kapab dekonzesyonn sa bann landrwa.  Me la ankor mon oule fer en lapel avek tou motoris, silvouple obzerv bann sinny e bann road markings ki ganny mete lo semen e sa i ganny mete pou zot konfor, pou zot sekirite e pou ed sirkilasyon trafik lo bann semen prensipal dan Lavil e silvouple obzerv sa, pou ed nou kapab amelyor e dekonzesyonn nou bann semen kot i neseser.  Mersi.

 

MR SPEAKER

Onorab Murielle Marie.

 

HON MURIELLE MARIE

Mersi Mr Speaker.  Mr Speaker, eski Minis i kapab enform sa Lasanble si son Minister i ganny finansman, kan ki sa proze short term i ekspekte ganny demare?  Mersi.

 

MINISTER JOEL MORGAN

Mr Speaker, mon pa’n swiv sa kestyon byen, eski ou kapab repete silvouple?

 

HON MURIELLE MARIE

Eski Minis i kapab enform sa Lasanble si son Minister i ganny finansman, kan ki sa proze short term i ekspekte ganny demare?  Mersi.

 

MR SPEAKER

Si ou ganny sa larzan, kan ki sa proze short term pou ganny demare?  Ok.

 

 

 

MINISTER JOEL MORGAN

Mersi Onorab, Mr Speaker sorry. Mersi Mr Speaker.  Ekskiz mwan, mon pa’n ganny sa kestyon byen.  Sa proze, bann short term projects nou annan en lespas 1 a 2an.  Idealman nou kapab fer li vitman.  I bann keksoz ki pa pou kout nou tro bokou, R22.5 milyon e nou kapab fer li dan en lespas 6 a 9 mwan si finansman i disponib.  Si finansman i pou ganny mete lo en peryod 2an, nou pou kapab enplimant tousala e konplet li dan en peryod 2an me idealman Mr Speaker, mwan mon ti a kontan personnelman vwar, dan lentere tou nou bann dimoun ki servi larout, nou bann pyeton, nou bann motoris, mon ti a kontan vwar ki nou fer sa dan lannan 2013 e fini avek osito posib akoz si non, nou pou kontinnyen vwar nou dan sa sitiasyon kot nou annan sa bann konzesyon.  Nou annan nou en plan, nou pa pe kapab enplimant li, nou kontinnyen fer fas avek konzesyon e fristrasyon an zeneral pou touzour la e i pou annan en lenpakt osi ekonomik parey mon’n dir oparavan lo nou National Fuel Bill e lo nou pert prodiktivite nasyonal.  Mersi.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.  Eski Minis i kapab dir ek sa Lasanble, prenan kon lokasyon lekol La Rosiere, pli gran lekol primer dan Lavil e dan pei, sa sanzman two way traffic par anba ki pou reste parey e sa one way traffic anler par lao Lari Angar.  Eski sa i meyer fason pou amelyor solisyon pou sa bann etidyan e nivo tapaz dan sa rezyon e ki SLTA pe fer ek bann lezot partener konsernen pou deblok bann pti semen dan bann distrik, par egzanp Mont Signal ki zwenn ek Ma Joie, Mont Signal/Mare Anglaise, pou deblok osi sa konzesyon trafik pou annan bann fast track semen alavenir?  Mersi.

 

MINISTER JOEL MORGAN

Mersi Mr Speaker.  Mr Speaker, sa plan ki nou’n prezante, nou konvenki poudir i pou ed sirkilasyon trafik e ed sirkilasyon bann pyeton dan Lavil.  I en plan ki’n ganny fer avek bokou konsiltasyon ki ozordi pe ganny prezante devan zot pou zot input osi me nou santi poudir i annan bokou lavantaz dan lenplimantasyon sa plan.  Lo bann landrwa spesifik ki Manm Onorab in mansyonnen, par egzanp Larozyer ensidswit, nou krwar ki avek bann fasilite pyeton ki nou pou met anplas avek sa bann propozisyon pou nou kapab annan sa sistenm one way e osi avek bann lezot proze ki nou pe fer pou agrandir serten seksyon semen, i annan en proze ki mon ti koze osi dernyen fwa lo la kot nou pe koz lo semen Olivier Maradan, kot nou annan sa nouvo pavement ki nou pou konstrir pou bann pyeton.  Mon krwar tousala i pou definitivman ede, dan en fason pozitiv atraver bann letid ki nou’n fer.

Pa oubliye ki sa ki nou’n vin avek devan Lasanble Nasyonal ozordi, i pa zis propozisyon Departman Transpor.  I rezilta e kilminasyon en kantite travay avek en kantite Lazans nasyonal e osi avek en pe Lazans enternasyonal ki’n donn input e ki’n donn zot pwennvi lo kimannyer nou kapab kontinnyen travay pou amelyore.  I annan lezot propozisyon ki ankor pe ganny diskite, ki nou pa’n prezante dan sa plan bomaten.  i annan par egzanp sa propozisyon pou nou relye semen Kensi, atraver Lari Bazar avek Church Street, Semen Lari Legliz, pou rekonekte avek Olivier Maradan pou bann trafik komersyal, inikman ki pou ede tir en pe sa konzesyon ki nou pe fer fas avek ozordi dan Lari Bazar akoz tou transpor i bezwen desann dan Lari Bazar e retourn lo menm bor pou zot retournen ler zot pe sorti Lari Bazar ler zot in fini delivre zot bann prodwir legim ensidswit.

Pou retourn lo sa dezyenm parti kestyon, bann lezot proze ki nou annan dan bann distrik, pou konekte par egzanp Mont Buxton avek Ma Joie, sa i en proze ki mon konn byen, mon’n al vizite mwan menm mwan, i annan travay ki pe ganny fer deza lo kote Ma Joie pou agrandir semen e donn bann nouvo fasilite parey bann drenaz ensidswit.  I reste en pti bout pou nou kapab konekte Ma Joie avek Mont Bixton e mon’n pas sa semen.  I en keksoz ki nou anvi fer osi lannen prosenn si nou Bidze i permet nou pou fer li, pou nou kapab annan ankor en lot fasilite, en lot koneksyon pou ede amelyor konektivite bann diferan rezyon Lavil avek lezot rezyon e sa i enportan.  I enportan akoz i retir trafik lo nou bann main road e si en dimoun i oule al Mont Buxton ozordi, i neseserman bezwen pas lo semen ki sorti Ma Joie e desann i antre dan Union Vale, i pas kot SBC ouswa i pran Lari Kastor ouswa i pran Senk Zen pou li refer dan Lavil e al ver direksyon Mont Buxton.  Me avek sa link ki nou oule fer, i pou ed nou pou konpletman elimin sa bezwen.  Si en dimoun i oule al Mont Buxton sorti dan nor, i pou fasilman kapab pas atraver sa semen e monte al Mont Buxton alavenir e bann proze koumsa ki nou bezwen kontinnyen konsantre lo la Mr Speaker, dan en fason entelizan, dan en fason smart, pou kapab ed nou achieve nou bann lobzektiv dan nou plan nasyonal pou amelyor sirkilasyon trafik dan nou pei.  Mersi.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker. Mr Speaker, etan donnen ki Minis in koz lo bann sanzman ki pou arive dan Lavil Victoria, eski son Minister in antre an konsiltasyon avek Lotorite Planning pou vwar ki bann regilasyon konkret ki bezwen ganny sanze pou asire ki apre ki nou’n fer tou sa bann lenvestisman avek sa bann semen, nou pa retrouv nou dan menm sitiasyon kot i annan konzesyon, atraver bann konstriksyon kot ki pa fer provizyon pou parking e dezyenmman, an vi lenvestisman sibstansyel ki sa proze i anmennen, ki lenpakt sa pou annan lo bann proze road maintenance dan bann sou distrik e dan bann distrik lo Mahe?  Mersi.

 

MINISTER JOEL MORGAN

Mr Speaker, lenformasyon ki mon annan i montre poudir Planning Authority pe travay lo en new Town and Country Planning Act e lo en nouvo set regilasyon ki pou konplemant sa lenstriman de lwen.  E baze lo la, nou’n deza annan diskisyon aprofondi avek Lotorite Planning pour asire ki dan lavenir, bann devlopman dan Lavil i donn plizyer konponan neseser pou ed nou kontinnyen amelyor sitiasyon trafik e manage e zestyonn sa problenm pli byen.  Enn se ki sa bann lespas, sa bann setback avek bann building komersyal i pou bezwen en pe plis ki i ete ozordi, pou nou kapab annan sa posibilite agrandir dan lavenir.  En landrwa ki nou’n koz lo la bomaten se Lari Larevolisyon.  I en landrwa me i annan lezot landrwa ankor kot nou pou bezwen fer sa.

Dezyenm se sa eleman underground parking ki nou’n deza koz lo la.

Trwazyenm se donn bokou plis lespas pou bann pyeton sirkile e menm dan lavenir, komans regard posibilite pou serten zone dan Victoria vin en landrwa kot trafik pa pou kapab sirkile a serten ler lazournen e i pou dedye plito avek sirkilasyon pyeton, ki en kantite Lavil dan lemonn i fer.  Bann high street normalman zot ganny dedye pandan serten letan lazournen pou sirkilasyon pyeton e trafik napa drwa pase pandan sa bann ler.  Sa i en keksoz ki nou bezwen fer plis travay lo la, nou pankor pare avek akoz i annan konsekans osi lo konzesyon trafik si nou fer li.

E lezot keksoz ankor ki nou pe demann zot pou vwar dan sa nouvo regilasyon e sa nouvo lenstriman Lwa ki zot pe propoze ki pou ed nou annan sa lespas pou nou kapab manouvre dan Lavil e kontinnyen amelyor nou sistenm one way ki ed en kantite pou dekonzesyonn bann landrwa ki deza annan bokou poblenm ozordi e pou fer ki sa flow sirkilasyon trafik dan Lavil i bokou pli annord.  So, i tou sa bann eleman ki nou pe koz avek e Road Transport Comissioner i en manm Planning Authority, i asiz lo Planning Authority, set atraver li ki nou pe fer sa bann demars pou met sa bann keksoz an plas.  Mersi.

 

MR SPEAKER

Onorab Valmont.

 

HON SYLVIANNE VALMONT

Mersi Mr Speaker, bonzour Minis.  Etan donnen ki konzesyon trafik i pou kontinnyen vin en konsern pou Gouvernman, mon’n tann Minis mansyonnen poudir pou annan devlopman water front eksetera, eski Minis pa krwar ki in ler pou ankouraz bann devlopman tel ki bann enn de biro Gouvernman, lezot bann devlopman ki pe arive ki deza dan plan lavil pou konsider lezot alternative.  Petet move dan distrik pou kapab retir enpe sa lenpak trafik dan lavil.  Mersi Mr Speaker.

 

MINISTER JOEL MORGAN

Mr Speaker, dan bann lezot pei, nou pran legzanp bann lezot pe, in annan plizyer move, plizyer linisyativ par Gouvernman limenm li dan sa bann pei pou tir bann keksoz administrativ dan kapital e bouz li en pti pe an deor.  Bann Minister, bann biro ki pa ganny frekante souvan par manm piblik and so on, met zot plito an deor lavil e les bann fasilite dan lavil konsantre lo bann laspe komersyal e bann laspe itilite.  Kot ou bezwen al pey ou bill, ouswa ou bezwen labank, bann servis labank, bann keksoz koumsa.

E pou nou, an term nou plan pou devlopman Victoria lo mwayen e lon term, se sa ki Gouvernman pe vize e se pou sa rezon ki zot ava rapel ansanm avek Abu Dhabi nou ti inisye, i annan deza plis ki 1an, nou ti inisye en proze pou regard redevlopman lavil Victoria.  E sa proze i anba Minister Litilizasyon Later e Labita e zot pe travay lo en plan, en Master Plan pou devlopman Victoria kot i ava annan tou sa bann eleman ki nou pe koz lo la la.  Enkli son bann lezot laspe kiltirel, estitik, vye lavil, nouvo lavil prenan kont devlopman lo Perseverance, prenan kont bann lespas komersyal ki pou annan lo Perseverance.  Prenan kont tou sa ki nou annan an term bann distrik ki pe antour Victoria, ki otour Victoria ozordi, tousala i pe ganny pran an kont dan sa plan e mon espere ki Gouvernman ava kapab prezant en keksoz ki byen, ki tre byen e ki ava anmenn sa ki Manm Onorab pe demande pou lavenir, mersi.

 

MR SPEAKER

Onorab Ghislain.

 

HON CHANTAL GHISLAIN

Mr Speaker, lefet ki nou konnen dan lavil aktyelman i annan en bon pe bann semen kot i bezwen kase, kot laplipar bann itilite piblik parey delo, telefonn, elektrisite i pas anba semen e lefet ki sa redevlopman semen lavil Victoria pa involve zis SLTA, eski Minis i kapab enform sa Lasanble si sa bann lazans, services, i osi in ganny involve on board la letan zot pe fer sa planning pou lefet ki apre letan zot in fini fer sa bann dimoun pa pe kas semen ankor pou zot refer, mersi.

 

MINISTER JOEL MORGAN

Mersi Mr Speaker.  Mr Speaker, sa kestyon bann itilite piblik e osi bann keksoz parey telekominikasyon, bann kab telekominikasyon, i poz en gro problenm pou nou dan lavil ozordi.

Premyerman, i difisil konnen kote i annan bann kab telekominikasyon, i difisil konnen kote i annan bann tiyo, bann tiyo par egzanp tiyo delo ou sa bann kab elektrik sirtou dan sant lavil akoz fir an mezir ki lavil in devlope avek bann lannen ki’n pase depi lepok kolonyal menm, i pa’n zanmen annan a sa moman en plan konpreansiv ki ti’n ganny prepare pou montre kote tou sa bann network kab i ete, bann network tiyo and so on i ete.  Aprezan i pe ganny fer, me i vedir ki sak fwa i annan en problenm, nou bezwen fouy semen, nou bezwen kas en trotwar or en keksoz koumsa.  I annan sa danze ki nou koup en kab, ki bann lazans ki pe travay i koup en kab ou sa ki en tiyo i ganny kase and so on.

I annan en nesesite pou nou kontinnyen amelyor nou bann plan, pou konnen kote tou sa bann vye kab i pase e pou konnen kote tou sa bann lenfrastriktir i ete dan lavil.  Sa i enn, me pou lavenir, sa ki nou pe met devan avek bann lorganizasyon parey PUC, se ki zot pa kontinnyen sa pratik met kab anba semen ouswa met tiyo delo anba semen.  Akoz mon krwar nou’n bezwen aprann by now ki i pa en bon keksoz pou nou fer li.

Zot lapros se, ou met en tiyo anba semen ouswa ou met en kab anba semen, ou bliye si i la e ou pa zanmen annan problenm avek.  Me la pratik i montre nou, ki malgre en tiyo i ase nef, ou still annan de tanzaot bann landrwa kot tiyo i kase.  I kas semen e Gouvernman i bezwen kontinnyen peye e peye pou repar bann semen e enn fwa ki ou’n andomaz fondasyon en semen, i pa zis en kestyon vin met en kouvertir ……. ouswa koltar lo sa semen.  I annan en lot travay ki ou bezwen fer pou repar fondasyon.  Se pou sa rezon ki souvannfwa ler en semen i kase, nou vini nou vin met en kours koltar lo la, de trwa semenn, de trwa mwan apre ou vwar in fini ganny trou ankor akoz fondasyon in fini afekte.  Fondasyon in fini afekte depi de trwa met pli ba e sa travay reparasyon ki nou bezwen fer dan lavenir se en travay entansiv pou nou al ziska kot fondasyon i komanse, kot sa tiyo in kase e repar li all the way up avek nouvo konpaksyon, nouvo danmen pou asire ki sa baz i solid.

E la nou annan enpe problenm Mr Speaker, lo kote Lazans Transport lo Later e Departman Transpor lo Later akoz PUC a son tour i dir nou be regarde, si nou sanz tiyo nou oule repas li kot sa vye tiyo ti ete akoz i pli fasil pou nou.  Me mon dakor i pli fasil me i pa solisyon pli bon pou nou sistenm semen pou lavenir.  Alor ki nou pe dir avek PUC ozordi, nou nou pe dir avek zot regarde, ou annan bann rigol, ou annan bann dren.  Met zot bann lenfrastriktir kab, tiyo par anba sa bann dren, dan en fason ki ler i annan problenm, ler i kase i dan dren.  I pa afekte semen, i pa afekte trafik lo semen e son kou reparasyon akoz ou pa bezwen al fer sa bann fondasyon bokou pli for ki nou pe regarde ozordi.  Son kou reparasyon i bokou mwens e nou annan de trwa landrwa kot nou’n pare pou remet en nouvo sirfas semen.

Ma donn zot en legzanp, depi kontour zig zag la Plezans ziska an montan kot View Point i ete an montan La Misere, La Louise la.  Nou pankor kapab fer li akoz nou pankor kapab tonm dakor avek PUC lo sa prensip pa pas zot tiyo anba semen.  E sa i koz nou bann kontren, be dimoun i konplent zot dir, be regarde, semen pa bon me semen pa bon me nou pa kapab antre pou nou al refer en semen tan ki i annan bann vye tiyo anba sa semen ki kontinnyen kase sak fwa delo i ganny ouver ler i annan problenm mank delo, sa presyon i kas sa tiyo e i mont anba semen.  Me osi akoz nou pankor kapab tonm dakor lo sa prensip, so, mon mon ti ava apresye ki Lasanble Nasyonal osi i donn en sipor, si zot dakor avek sa, zot donn en sipor ki nou kapab push sa through an term nou prensip pou lavenir, mersi bokou.

 

MR SPEAKER

Onorab Joevanna Charles.

 

HON JOEVANNA CHARLES

Mersi Mr Speaker.  Mr Speaker, eski Minis i kapab dir nou si sa link Roche Caiman pe mars byen e si non, ki problenm apre, etan donnen ki sa landrwa ti en landrwa ki ti ganny frekante par bokou dimoun, sirtou aswar, e bokou zanfan Roche Caiman, si SLTA napa lentansyon ferm sa link aswar, mersi.

 

MINISTER JOEL MORGAN

Mersi Mr Speaker.  Mr Speaker, sa link ki nou’n mete sorti semen St Therese ki al lo Bois de Rose, ki pas par deryer sa park la Roche Caiman i enn ki’n bokou amelyore e i montre ki si nou focus lo bann pti keksoz ki kapab anmenn sa amelyorasyon imedya e signifikatif i pou bokou ede pou kontinnyen amelyor nou sistenm management trafik an atandan ki nou pe fer nou bann pli gro proze.

Sa link limenm li in ede pou tir sa blokaz en kantite ki nou annan lo sa round about Roche Caiman ki al lo kote Stad Linite e bann trafik ki sorti dan sid dan bomaten.  E i pe servi son fonksyon ki nou’n met li la pou fer.  Pou ferm li aswar, i en keksoz ki nou pa’n konsidere akoz kot i ete i en landrwa ki in ganny byen demarke, i en landrwa ki deza annan byen ekleraz an term lalimyer aswar e nou pa oule ferm li anka ki bann aktivite anti sosyal i pran plas la aswar.

Lefe ki sa semen in ouver in ede pou retir bokou aktivite anti sosyal ki ti pe pase dan lepase.  I annan motoris prezan ki pas la aswar, sa ki ti pe fer whatever i ganny klere, gard i pase zot fer patrol e mon krwar ler ou balans keksoz mon lopinnyon pou mwan, natirelman an konsiltasyon, nou pou bezwen konsilte, me mon lopinnyon pou mwan se ki, plito nou kit li ouver pou le moman, mersi.

 

MR SPEAKER

Onorab Barbe.

HON NICHOLE BARBE

Mersi Mr Speaker.  Mr Speaker, eski Minis i kapab dir ek sa Lasanble si i dan son plan osi dan le fitir pou konsider petet en proze shuttle bus dan bann lekol espesyalman par egzanp Independent School osi byen ki Lekol Bel Eau kot bokou bann lezot paran dan bann lezot distrik i vin lekol Bel Eau e la i vin en konzesyon, mersi.

 

MINISTER JOEL MORGAN

Mersi Mr Speaker.  Mr Speaker ti annan, annefe i annan 2 propozisyon pou annan en shuttle bus sorti komansman kot Stad Linite, Roche Caiman pou bann paran ki sorti dan sid pou anmenn zot zanfan Independent School dan bomaten.  Menm ti annan enn ki ti ganny komanse mon krwar apepre en 4an a 4an edmi pase e sa ti fail akoz mazorite bann paran ti osi pe vin travay anvil.  So, zot ti bezwen neseserman annan en landrwa dan lavil pou zot park pou zot al travay e zot ti natirelman kontinnyen drop zot zanfan lekol epi vin dan lavil vin park.

Mon krwar avek sa park and ride, i annan nouvo merit pou rekonsider sa propozisyon dan en fason ki sa bann paran i ava kapab kit zot transport la, bann zanfan i ava kapab anbark dan sa shuttle service pou lekol ki pou diferan avek sa park and ride e anmenn zot ver lekol epi retournen dan apre midi.

Lot eleman lekol Bel Eau, mon krwar i en pwen kit re valab.  Nou konnen la Bel Eau i annan en kantite konzesyon dan bomaten e dan apre midi ler lekol i large e i en keksoz ki nou’n toultan pe fer fas avek an term sa kontrent kimanyer pou manage sa area, sa landrwa la an term trafik.  E sertennman mon krwar i vo fer en letid ansanm avek Minister ledikasyon, vwar avek sa Minister kote bann zanfan i sorti.  Kote sa mouvman i ete, epi travay lo en progranm annan petet en servis prive ki Minister i kapab met an plas pou en omni bus operator fer sat raze, sa shuttle, pou anmenn zanfan lekol e retourn avek zot toulezour.

Mon krwar i en pwen ki tre valab Mr Speaker e mon ava sertennman pran sa an men ansanm avek Minister Ledikasyon.  Mersi.

 

MR SPEAKER

Bon, nou’n ariv alafen Statement.  Mon ava remersi Minis e son delegasyon pou vin prezant sa Statement avek nou, e nou nou pou adjourn ziska (technical problem)

 

(LUNCH)

Mr Deputy Speaker in the Chair

MR DEPUTY SPEAKER

Bon mon a dir bonn apre midi e nou a kontinnyen nou travay lo Order Paper.  Nou lot item se Mosyon, Mosyon nimero 1 par Onorab Melval Dugasse, Manm Elekte pou Anse Etoile.  E mon ti ava envit li pou prezant son Mosyon.

 

HON MELVAL DUGASSE

Mersi Mr Deputy.  Mosyon i lir koumsa:- Demann Gouvernman pou met an plas polisi pou reoriant nou Labour Force pou ki bann pozisyon pli o i ganny okipe par Seselwa olye etranze e ki Gouvernman i entrodwir scheme apropriye pou fer sir ki nou bann zenn ki konplet pos segonder i ganny abzorbe dan lemonn travay.

Pep Seselwa, travay pe esper ou.  Sa ti parol Prezidan Michel dan son diskour Lafet Nasyonal le 18 Zen.  Dan son bann lezot ladres in abord sa size travay, sirtou bout ki konsern rediksyon lo lakantite travayer etranze dan pei.  En size ki’n ganny koz lo la isi menm dan sa Lasanble.  E mwan, mon krwar ki in plis ki ler pou nou adopte en polisi konpreansiv lo sa size lanplwa e travayer etranze enn fwa pou tou.

Mr Deputy Speaker, annou regard sitiasyon lanplwa dan pei aktyelman.  Mr Deputy, nou annan en popilsyon 8,300 dimoun dan pei aktyelman e ladan dimoun ki kapab travay depi 15 ziska 62an i annan 57,422.  E ladan, kantite dimoun ki dan lanplwa formel, enkli travayer etranze, i annan 49,891 dimoun.  E kantite etranze ki pe travay dan nou pei aktyelman i annan 12,695.  E sa, i fer 25 poursan nou total labour force.  E kantite dimoun ki anrezistre pou ganny en louvraz i 11,061 e kantite vacancy ki ganny pibliye i 1,712 e kantite plasmaln i 1,218.

Mr Deputy, letan ou analiz sa figure, ou kapab remarke ki nou annan defi pou sa ki konsern lanplwa dan Sesel.  E baze lo sa bann sif depi 2008 ziska 2011, nou’n annan en logmantasyon plis ki 9,000 dimoun dan lanplwa formel e 72 poursan ladan i dan sekter prive e 28 dan sekter Gouvernman.

Mr Deputy, nou polisi lanplwa ki ti ganny adopte an 1999, ti met lanfaz lo kreasyon lanplwa pou elimin mank lanplwa ki ti egziste sa letan kot to somaz ti 3.1 poursan.  En pwen ki nou devret pran an kont se menm si nou’n annan reform ekonomik an 2008, polisi lanplwa in reste stagnant.

Mr Deputy, sa polisi ti devret ganny revize pou pran an kont bann devlopman rapid ki ti pe arive an relasyon ekonomik e lanvironnman nasyonal, rezyonnal e enternasyonal.  E osi pou pran kont bann laspe ki konsern lanplwa e relasyon avek ledikasyon, servis lanplwa prive, devlopman litilizasyon resours imen, relasyon endistriyel e devlopman lekonomi.

Sa size lafors travayer etranze dan pei, i pa en size ki inik pou zis Sesel.  Tou pei i annan en pwen dan zot devlopman kot in bezwen led mendev etranze.  Nou tou nou fyer letan nou tande ki i annan en Seselwa ki travay dan Labank Mondyal oubyen i annan en Seselwa ki travay dan Nasyon Ini, i annan enn ki pe travay koman pilot, enzenyer, cabin crew dan bann laliny aeryen a letranze.  I annan en Seselwa ki dokter an Sengapour, Larenyon e Lafrans, Langleter e lezot pei.  I annan menm Seselwa ki annan son prop biznes dan bann pei etranze.

Sesel i pti, me Seselwa pa’n zanmen per pou sezi loportinite dan nenport ki domenn e dan nenport ki kwen lemonn.

Sesel i annan en bon pe lannen ki nou pe enport lafors travayer etranze e sa rezon prensipal sete ti pou konplemant sa shortage skill ki ti annan dan nou resours imen e nou sistenm ledikasyon ki ti osi annan son limit, pa ti kapab antrenn ase Seselwa, ase travayer pou satisfer demann labour market.  Nou bezwen annan en polisi kler kot i konsern rekritman sa bann travayer dan nou pei.  Mon konstate ki pou lemoman se Minister Lanplwa e Imigrasyon ki pe antreprann prosesis.

Mr Deputy Speaker, ler in arive pou nou deside lekel lotorite ki annan manda pou diriz prosedir lo kontrol lakantite travayer etranze ki annan dan pei.  Pou lemoman, nou rekonnet ki Imigrasyon ki pe administre seksyon 18(1) dan Lalwa Lanplwa.  Sa se ki avan ler ki i donn laprouvasyon pou en post pou en etranze, i bezwen asire ki napa Seselwa ki konpetan e kalifye pou sa post e an menm tan protez lentere lokal.

Me nou osi rekonnet ki Imigrasyon anba Immigration Decree 17(2), zot osi annan serten kriter spesifik ki zot donn GOP e ladan i parey sa ki pou lanplwa.

Mr Deputy Speaker, alor in plis ki ler pou nou armoniz sa sistenm.  I osi ler pou nou evalye sa sistenm pou regarde si i enn ki efikas.  Eski i annan sa bezwen pou ranforsi serten prosedir e mekanizm?  Eski i neseser pou nou revwar rol sa 2 Minister kot i konsern sa size travayer etranze?

Mr Deputy Speaker, lo sa ki konsern sa bout monitoring, in plis ki ler pou met plis zefor.  Zefor i devret ganny mete pou ki napa labi.  Parey Mosyon pe demande, se ki nou bezwen met plis lanfaz ki nou bann post pli o kot i konsern top e middle management i devret ganny rezerve pou Seselwa.  Bann post tel koman Human Resources Manager, Supervisor, Manager Public Relations eksetera.  Mon konnen ki i annan en bon pe nou bann travayer Seselwa ki fristre pou vwar ki laplipar sa bann post i ganny okipe par etranze.  Par egzanp, en Supervisor Landscape kot en lotel i en etranze.  Eski nou napa nou bann zenn ki’n sorti FTC ki ganny train pou kapab fer sa louvraz?

Mr Deputy Speaker, la mon pe propoze ki Gouvernman i regard posibilite atraver bann lenstitisyon zesyon parey SIM, Liniversite Sesel pou antrenn plis dimoun li nivo management pou pran sa bann pos middle management parey dan servis lospitalite.  Osi regard dan bann kou pou swiv sa bann kour, ki ava ankouraz plis dimoun pou swiv bann kour management.

Mon osi rekomande ki Gouvernman, ki Departman Lanplwa, Imigrasyon e lezot partener i etabli serten kategori travay ki pli difisil pou ganny dimoun lo marse lanplwa lokal, ki sa i ganny fast track pou GOP anba prosedir aktyel.  E sa osi i merit ganny revize regilyerman e lezot pozisyon i merit ganny sanksyonnen avek Minister Lanplwa.  Mon osi propoze ki Gouvernman i reviz e revwar bann Lalwa ki gouvern bann aktivite bann lazans lanplwa prive.  Ki zot osi i ava annan sa kontribisyon pli efektiv dan rediksyon lakantite travayer etranze dan nou pei.

Mr Deputy Speaker, letan nou pe koz lo reoriantasyon nou labour force, en laspe enportan ki nou devret osi touse se ledikasyon.  Nou sistenm ledikasyon i merit an konformite avek demann lo marse lokal.  Alors, mon pe demande ki i annan en travay pli entansiv ant Minister Ledikasyon, Lanplwa, NHRDC, pou ki i annan en sinerzi pou nou annan en labour force ki egal demann lo marse lanplwa.

Lenportans ki i annan bann linkage ant bann Minister konsernan sa size lanplwa, i en laspe ki fodre pa ganny neglize.  Mon osi propoze ki Gouvernman i form en task force pou vwar bann loop holes dan bann polisi ek Lalwa ki pe fasilit bann anplwayer pou favoriz travayer etranze.  Nou annan tro bokou lenstans dan sa pei kot nou vwar bann shop assistant etranze  I vre ki zot dir ki zot advertise sa bann post, me sa lapey ki zot pe ofer i enn ki pli ba dan pei, ki nou Seselwa pa santi li satisfe avek, zot sirviv avek e sa rezon  ki zot pa pran sa post e la zot profite pou fer vini travayer etranze.

Mon pou osi propoze koman en mwayen pou ki bann travayer i ankouraze pou anploy Seselwa, ki Gouvernman atraver Minister Finans i regard dan posibilite si sitiasyon finansyel i permet pou ofer tax rebate pou bann lakonpannyen ki anploy en serten poursantaz Seselwa dan serten pozisyon kle.

Mr Deputy, parey Minis pou Lanplwa ti admet boner sa lannen dan sa Lasanble, ki pou lemoman, localization plan pa pe marse.  Alors, sa i montre nou en nesesite pou sa Minister fer en zefor o pli vit posib, pou met sa seksyon an mars.  I pou bezwen rekrit bann nouvo staff konpetan pou met bann prosedir an plas.  Pou kapab konplemant sa localization plan, mezir pou bezwen ganny met an plas pou en succession plan.  Nou pou bezwen regard lekel ki pou ranplas sa etranze e ki fason nou pou fer li.  La, mon pe profite pou propoz avek NHRDC pou fer en survey nasyonal, pou regarde ki demann e supply mendev Seselwa lo marse e ki bann areas ki nou bezwen Seselwa.  Ki kalite formasyon ki nou bezwen, apre sa, Gouvernman i ava kapab formil en National Human Resources Plan pou sa prosen 5 a 10an.

Mr Deputy, en lot laspe sa Mosyon i kouver bann zenn ki konplet post segonder e pou zot mon annan en lapel spesyal.  Annou profit loportinite ki nou sistenm ledikasyon i ofer nou.  Parey nou Vis Prezidan ti fer resorti resaman dan Lasanble, annou konn nou priyorite.  Gouvernman pe fer son mye pou met resours adekwat pou zot kapab ganny bann skills neseser pou zot ganny en metye demen.  La, mon oule profite pou lans en lapel avek Minister Ledikasyon pou ranforsi sa size Careers Guidance dan lekol.  Donn li plis valer e fer li enteresan pou nou bann zenn kapab konn son lenportans e ki dan zot progranm zot focus en pti pe dan sa bann field travay ki pe ganny okipe par etranze konmela.  En mannyer ki nou diriz nou bann etidyan pou zot kapab swazir en karyer dan sa bann domenn.  Nou bezwen osi konstate ki pa nou tou zenn ki pou fer byen atraver sa sistenm ledikasyon.  Nou pou annan en minorite, pou en rezon ou en lot ki sorti san en skill.  E la ki nou pou bezwen lentervansyon Gouvernman atraver Lanplwa e sekter prive, pou met bann scheme e progranm apropriye avek bi devlop skill sa bann zenn pou zot kapab ganny abzorbe dan lanplwa formel.

Enn bann defi ozordi ki nou fer fas avek Mr Deputy, se bann graduate ki parfwa pa al travay dan domenn ki zot in ganny train ou ganny formen ladan.  Survey ki’n ganny fer in demontre ki en bon nonm etidyan, sirtou bann ki sorti dan Lekol Tourizm ek lotel, Maritim, ITC e Lekol Lagrikiltir parfwa pa zwenn lemonn travay dan bann sekter kot zot in resevwar training ladan.  E sa i parfwa nou vwar etranze dan sa bann pozisyon e sa i met defi lo nou marse lanplwa.

Mr Deputy Speaker, mon osi propoze ki Gouvernman i met an plas en polisi ou mekanizm pou ki attachment pou bann etidyan post segonder i vin en konponan legzanmen final.  Mon pe propoz sa pou ki sa size work attachment i ganny pran koman en faz tre enportan ki ganny pran dan training sa bann etidyan.  Konbyen nou bann zenn ki’n al attachment zis pou kill time?  Konbyen anplwayer ki vwar sa koman en staz preparasyon?  Mon konn zenn ki sorti dan Business Studies ki’n al attachment dan en serten lenstitisyon pou zis reponn telefonn e shred papye.  Sanmenm ki nou apel gat letan, sa zenn ti’n kapab benefisye pli byen si ti annan pli bon sistenm monitoring e si i ti santi ki sa assessment ti pou adopte en latitid kot i ti pou anvi aprann plis e i ti pou pli serye.  La mon osi propoze ki bann incentive apropriye i ganny donnen pou bann anplwayer ki pran etidyan pou attachment, ki Minister Lanplwa, Departman Lazenes e Minister Ledikasyon i osi met lanfaz lo holiday job program pou pli konpreansiv.  Sa i ava ankouraz bann lakonpannyen e bann zenn ava ganny ekspoze ek bann diferan leksperyans ki pou prepar zot pou lemonn travay demen.

An konklizyon Mr Deputy Speaker, travay i annan pou dimoun ki oule travay e pou menm plis ankor anmenmtan mon rekonnet ki nou annan osi bokou pou fer akoz nou annan defi pou sirmonte.  Nou bezwen plis Seselwa pou pran bann pozisyon kle travay dan sekter tourizm, manufacturing e konstriksyon.  Nou bezwen dekouraz nou bann zenn pou pa tonm anba bann move lenfliyans e ankouraz zot pou travay.  Plis formasyon byensir i neseser pou ki zot kapab pran sa bann travay ki ozordi pe ganny pran par etranze.

Avek sa lentervansyon Mr Deputy, mon ti ava kontan envit bann lezot entervenan lo sa Mosyon.  Mersi.

 

MR DEPUTY SPEAKER

Bon, Mosyon in ganny prezante, okenn Manm ki oule segonde?  Onorab Vangadasamy.

 

HON SHERYL VANGADASAMY

Mr Deputy Speaker, mon segonn Mosyon e mon ti a kontan dir de pti mo.

 

MR DEPUTY SPEAKER

Proceed.

 

HON SHERYL VANGADASAMY

Mr Deputy Speaker, an 1964 Prezidan France Albert Rene ti etabli premye pa lalit pou nou Seselwa.  Nou premye pa ver vre laliberte, fraternite e egalite.  Nou premye pa, kot Seselwa ti ganny son dignite, nou vre plas.  Nou premye pa ver menm sans, menm loportinite e menm drwa.

Mr Deputy Speaker, sa lalit pa’n anven.  Ozordi, nou pe rezouir fri nou lalit, nou Gouvernman, nou Lasanble, nou Pep i rezilta vre fri sa lalit.  Laliberte, fraternite e egalite, SPUP, SPPF, Parti Lepep.  Se sa vre masin deryer nou bann travayer Seselwa.  Depi lepok anmas koko, bat kannel e la ozordi pou nou bann profesyonnel, zenn post segonder, nou bann Seselwa ordiner.

Avek bokou devlopman, bokou sanzman, nou’n osi vwar e nesesit vwar sanzman dan nou Labour Force, dan konportman nou bann travayer, avek lemonn modern, lavansman teknolozi, profesyon pli spesyalize.  Nou’n osi konstate nesesite annan en labour force ki kontinnyelman sanze, progrese e adapte.

Mr Deputy Speaker, mon pe segonn e siport loter Mosyon, akoz koman en zenn aktivis Lepep en fri sa lalit, en zenn profesyonnel ki krwar ki sanzman i komans ek nou.  Ki responsabilite primordyal pou efektye vre sanzman, dan Gouvernman, dan nou Gouvernman i reste lo nou zepol bann Manm Parti Lepep.  En vre demokrasi, responsabilite kritik, korekteman e pozitivman i merit sorti kot sa enn premye ki’n ede siport, tenir e met nou Gouvernman la.  Kritik pozitiv se sa ki anmenn progre, lanfransiz e fer keksoz drwat, se sa ki pou nesesit e fer serten pa lo sa bon sanzman ki nou anvi vwar e kontan koz lo la.

Mr Deputy Speaker, loter Mosyon pe koz lo 2 keksoz, enn, se pou met an plas polisi pou reoriant nou bann labour force, pou ki bann pozisyon pli o i ganny okipe par Seselwa olye etranze.  De, ki Gouvernman i entrodwir scheme apropriye pou fer sir ki nou bann zenn ki konplet post segonder i ganny abzorbe dan lemonn travay.

Mr Deputy Speaker, permet mon pou elabor zis lo premye pwen.  Mr Deputy Speaker, in deza annan serten polisi konsernan bann etranze ki vin travay dan pei e ki i merit annan Seselwa ki understudy li.  I annan polisi lokalizasyon ki sipoze asire ki sa i ganny fer.  Me kestyon ki nou pe poze ozordi e kestyon ki loter Mosyon pe poze se eski sa polisi i efektiv?  Eski i en bon polisi?  Eski i pe ganny enplimante?  Mon krwar dapre loter Mosyon e dapre deryen lentervansyon ki Minis ti fer devan sa Lasanble sa larepons se non.  Minis ti koz lo en localization plan e en succession plan ki pli efektiv, pli determinan e ki meet bezwen Lepep Seselwa.

Mr Deputy Speaker, sa Lasanble pa pe dir ki nou pa bezwen etranze e tir tou etranze dan o pozisyon e ranplas zot ek Seselwa.  Sa Lasanble pe demande ki dan bann post ki nou annan nou Seselwa kalifye, kosto, kapab e konpetan, silvouple annou met nou Seselwa.  Sa Lasanble pe demande ki letan en Departman gouvernmantal, en Lenstitisyon i anploy en etranze, ki i annan en gidans kler lo dele letan ki sa etranze i reste pou travay.  Son kondisyon e ki i mandatwar, wi Mr Speaker, i mandatwar pou li annan enn ou de oubyen plis Seselwa pou understudy li e train e ki apre son dele letan nou dir li mersi pou son servis e retourn dan son pei.  Kot nou limit son lekspektasyon sa etranze, pou li rezouir sa post endefinitivman, pou li reste isi, bar plas enn nou pti Seselwa e annan lanvi pou apply pou citizenship.

Par egzanp Mr Deputy Speaker, kestyon ki mon poze, eski kot Minister Lasante oule dir mon napa en dokter Seselwa ki ase kalifye pou vin en konsiltan?  Kestyon ki mon pe poze se, nou’n fer lalit pou donn dignite e meyer deal nou Seselwa.  Nou’n donn zot en good deal depi 1964.  Me annou donn en pli meyer deal ozordi nou Seselwa avek sanzman e modernizasyon ki pe arive dan nou pei.  Annou donn valer nou bann zenn profesyonnel.  Annou donn serten nou bann Seselwa sa sans pou demontre zot kapabilite.

Ozordi nou vwar bann bon package ki nou donn nou etranze.  Housing assistance, transport allowance, bann gro, gro saler, provizyon pou al lekol eksetera, eksetera.  Nou tou nou konnen ki letan ou tir en dimoun dan son pei, ou bezwen donn li en bon deal pou atir li pou vin travay kot ou.  Me kestyon ki mon pe poze, eski pa’n ariv ler pou nou aranz kondisyon, aranz package e donn en pli meyer deal nou Seselwa ki zot ava reste dan nou pei?  Sa pei, sa Gouvernman, nou Parti, nou’n donn loportinite bokou Seselwa.  Nou’n train bokou Seselwa.  Konbyen Seselwa ozordi ki annan sertifika dan tou field?  Konbyen Seselwa ozordi ki annan degre?  Konbyen Seselwa ozordi ki annan Masters, ki annan Doktora, PHD eksetera, eksetera?  Me kestyon ki nou poze, se konbyen ankor ki ankor la dan nou pei pe travay e konbyen ki ankor la pe donn nou en koudmen dan sa lalit?

Nou tou nou konsyan ki nou annan en fenomenn brain drainl dan pei e sa i renonmen atraver lemonn.  Nou tou nou konnen e nou konsyan poudir sa filozofi nou al rod greener pastures.  Me eski si nou ti’n ekip en pti pe pli byen nou bann zenn, nou bann Seselwa profesyonnel, eski pa ti a annan en gran posibilite ki serten zot ti pou reste e donn nou en koudmen?

Mon felisit bann ki ankor la, ki pe tenir sa parkour e pa pe large, me mon osi pe lans en lapel ek mon Gouvernman pou silvouple annou get dan nou bann deal pou nou bann Seselwa.  Konbyen bann bon, bon dokter ki pe travay deor, Sengapour, Germany?  Konbyen enzenyer ki nou annan dan sa pei?  Konbyen ki’n kit nou?     Nou pa pou kapab kontinnyelman train e train e train e les ale.  Annou eseye pou amelyor sa package ki nou donn nou Seselwa.  Eski nou’n fer en comparative analysis a lon term ant sa bon package ki nou donn sa etranze pou travay dan nou pei e enn ki nou kapab donn nou Seselwa, ki fer li pli favorab e pou fer li reste e travay dan nou pei?  Keksoz ki pli preokip mwan Mr Deputy Speaker, se ziska prezan nou pankor vwar.  Nou tann dir par Minis, nou pankor vwar e met an plas sa bon succession plan e sa bon localization plan, ki merit ganny met an plas pou asire ki nou Seselwa i ganny byen get ladan e ki i merit ganny enplimante o pli vit posib e seryezman.

Si i merit vin Lalwa Mr Deputy Speaker, annou fer li vin Lalwa.  Eski pa’n ariv ler pou reviz sa Lalwa Lanplwa ki date depi 1995 e dernyen Lamannman ti ganny fer an 2008?  Eski pa in ler pou sa Lalwa reprezant vre larealite ozordi Lepep Seselwa e modernizasyon e devlopman ki pe arive dan nou pei?  Minis pou Lanplwa i annan sa latas pou asire ki nou lalit depi 1964 i kontinnyen.  I annan sa latas pou fer sir ki nou lalit pa’n anven.  I merit annan sa latas pou fer sir ki sa lalit i aport plis fri ki depi ler nou’n komanse an 1964 e ki nou Seselwa i kontinnyelman rezouir nou diginite e fyerte koman en Pep, koman en nasyon, koman en Seselwa.

Sanzman Mr Deputy Speaker, i komans ek nou e se nou ki merit fer sanzman.  Se Parti Lepep.  Mr Deputy Speaker, me o menm moman i osi mon responsabilite pou sekwe nou Seselwa.  Statistik i montre ki i annan louvraz dan sa pei.  I annan ase louvraz pou tou nou Seselwa.  Eski dan nou lalit nou’n tro fyer, nou’n tro donnen, nou’n tro fer tou pou nou Seselwa, ki ozordi nou fyer ki serten nou, nou pa oule travay.  Nou swazir louvraz.  Eski nou’n sitan donn tou ki serten nou Seselwa pe perdi konsept travay dir e travay pou ganny ou dipen.

Mr Deputy Speaker, pou annan en lekonomi progresiv e prodiktiv fodre tou dimoun i fer son bout.  Nou train Seselwa pou travay e Seselwa i merit travay.  En biznes prive i depan lo profi, Departman Gouvernman i depan lo servis efikas e a la oter.  I annan en group Seselwa ozordi ki tou le Lend i lo ban klinik.  Sak Nwel e lannen i malad.  Ki napa en ler antre e en ler sorti dan landrwa travay.  I pa konn reponn son telefonn.  I pa konn annan en move konportman.  Sa lakonpannyen prive i bezwen marse, i bezwen travay e Seselwa i bezwen travay.  Gouvernman i bezwen marse, i bezwen delivre e travayer dan sekter piblik i bezwen debrouye, i bezwen travay.

Mr Deputy Speaker, parey mon Koleg Onorab in dir, Onorab Anse Etoile, i bezwen annan en kordinasyon ek en sinerzi ant Minister Entern ek Minister pou Lanplwa pou asire ki kantite etranze ki pe antre dan nou pei pou travay, i reprezant en vre nesesite e ki i annan swivi monitoring e ki localization plan e succession plan i ganny byen kordinen ant sa 2 Minister.  Ki kantite etranze ki pe antre i ekivalan sa mank travayer Seselwa dan serten landrwa travay.  Kot mezir neseser i ganny pran, ki Minister entern i kontrol influx etranze ki pe ganny anmennen pou travay dan sa pei e Minis pou Lanplwa i asire ki Seselwa i ganny sans pou travay e train par sa bann etranze pou ranplase.  E ki Seselwa ki pa travay i ganny met dan en lanplwa.  E Seselwa ki pa oule travay i pa benefisye larzan tax bann ki pe travay.

Me anmenmtan Mr Deputy Speaker, nou Seselwa, annou donn sans nou lezot Seselwa.  Annou aret may kanmarad zanbek.  Sanzman latitid i nesesit en sanzman mindset e i koman ek nou.  Natir imen i fer nou pa fye lezot, sirtou lezot avek serten, nivo kalifikasyon pli o ki nou.  Ki annan potansyel pou monte e serten nou, nou lager antre nou.  Nou anpes nou frer e ser Seselwa monte.

Mr Deputy Speaker, sanzman i komans ek nou, annou valoriz nou dimoun, annou valorize nou Seselwa, annou reasir nou fraternite, nou laliberte e egalite.  Donn nou Seselwa ki kapab menm sans.  In ler pou nou aranze.  Sa bout wi Mr Deputy Speaker, nou bezwen aranze and now is the time e annou fer li pou nou Seselwa e pou kontinnyasyon nou lalit.  Mersi Mr Deputy Speaker.

 

MR DEPUTY SPEAKER

Onorab Jeannevol.

 

HON BEGITTA JEANNEVOL

Mersi Mr Deputy.  Mosyon devan nou Lasanble ozordi pe demann ek nou Gouvernman pou met an plas polisi pou reoriant nou lafors travayer, pou ki bann pozisyon pli o i ganny okipe par bann Seselwa olye etranze e ki Gouvernman i entrodwir scheme apropriye pou fer sir ki nou bann zenn ki konplet post segonder i ganny abzorbe dan lemonn travay.

Mr Deputy Speaker, loter Mosyon in fer byen kler ki nou pa pe dir ki nou pa bezwen etranze pou travay pou nou.  I kler, ki pa tou sa ki etranze i fer dan pei nou annan Seselwa pou ranplase.  Me sa ki nou pe dir, se ki nou annan kantmenm serten travay kot nou dimoun i kapab fer, petet i zis demann e reoriantasyon, reedikasyon pou nou Pep e nou bann anplwayer, se sa ki Mosyon pe demande ozordi.

Par egzanp, en Human Resource Manager dan en lotel, kot laplipar son bann staff i Seselwa, se byensir en Seselwa ki pou pli byen konpran bezwen son bann dimoun.  I pa en kestyon sa etranze i konn koz Kreol ouswa non, i zis en kalite dan nou.  Se nou ki pli byen konn nou kiltir, se nou ki pli byen kapab konn nou dimoun e donk travay avek zot.

Nou pe demande, ki sirtou dan nou bann pozisyon pli o, Gouvernman i asire ki se en Seselwa ki okipe.  Anmenmtan, sa Mosyon pa pe dir ki nanryen pa’n ganny fer sa bann letan pou reoriant nou lafors travayer.  Depi enpe letan, i egziste en prospectus ki gid etidyan segonder letan ki zot pe swazir zot plas dan pos segonder.  NHRDC in osi pibliy enn sa booklet ki ladan i annan tou training ki ganny ofer dan Sesel, depi School of Advance Studies ziska lekol Maritim e osi pli lwen pou fer letid SIM.  Avek bi pou oriant zot ver louvraz ki bezwen dan pei e osi gid zot byen lo ki kalifikasyon ou bezwen pou al dan sa lekol e alafen, ki kalifikasyon an plis ou pou sorti avek.  NHRDC in osi pibliye an Me sa lannen, en information booklet ki ladan i liste bann priority fields of study, en gid pou ed etidyan post segonder swazir zot overseas training.  Ankor, dapre zot kalifikasyon k zot annan, e ki kalifikasyon zot pou gannyen alafen.  Sa enn, pli spesifikman ek demann lanplwa ki annan dan pei aktyelman.  Sa booklet ki sipoze ganny update tou le lannen an konsiltasyon ek diferan sekter prive pou konn bann vacancies dan pei.  Enteresan note ki premye lo sa lalis, i servis biznes e finans, kot nou vwar i annan demann pou plis Seselwa annan kalifikasyon ACCA, kontab, finans, economics, statistik, ladministrasyon e zesyon biznes.  I bon note osi ki sa booklet i osi fer konnen ki pou lemoman, zot pa pe anvoy training dan tel ou tel domenn, ki swa i annan sifizaman travayer ladan ouswa i pa an demann pou lemoman.  E sa i par egzanp, servis banker, financial information system ouswa Lalwa biznes.  Avek bi pou oriant nou labour force par gid nou bann zenn post segonder e osi bann ki mazin al fer overseas training sa booklet i osi enform etidyan ki dan ledikasyon, loportinite training i egziste plennman, an gran mazorite bann ansennyan pou segonder e post segonder.  Byen ankourazan osi i fer konnen ki sa loportinite i permet ou edik bann future leaders of the country.

Lasante i osi swiv lo sa lalis e wi, lalis i long ziska enzenyer lanvironnman.  Sa i vedir ki avan en etidyan i swazir son course overseas, nou zenn i konnen davans kwa ki vreman bezwen dan pei e donk zot pa kapab swazir pou al fer en studies 4 ou 5an apre retourn dan pei pou dir i napa lanplwa.

Me, ki vre sitiasyon Sesel ozordi?  Bokou parmi sa bann zenn pa retourn dan pei apre ki zot i fer zot studies.  Dapre lenformasyon kolekte ek NHRDC, dan sa dernyen 5an, bokou in ganny envestir dan anvoy en etidyan etidye aletranze.  An 2007, 125 etidyan ti al study overseas, an 2008, 138, an 2009, 153, an 2010, 142 e an 2011, 89 etidyan ti ganny anvoye a letranze pou study.  Me ki nou pa vwar se son lekivalans dan lakantite ki retournen pou vin servi zot pei e rann en pe sa ki’n ganny envestir dan zot.

Mr Deputy, an 2007, 139 ti retournen, an 2008, 107 etidyan ti retournen, an 2009, 119 etidyan ti retournen e an 2010, 88 e selman 63 an 2011 ki ti retournen.  Byensir sa bann sif pa egzakteman reflekte bann ki pa ankor fini zot studies.  Osi dapre NHRDC, etidyan ki pa retourn dan pei i ganny demande pou rann sa larzan ki’n pey zot training, atraver sa bond ki zot in sinnyen avan zot kit pei.        Me, eski sa larzan i vreman kapab ranplas zot si zot ti pou la dan pei pe travay?  Petet polisi ki nou pe koz lo la ozordi i merit osi pran kont sa.

Mr Deputy, en lot group zot, zot demann permisyon pou reste ankor en pe plis letan akoz zot anvi fer further studies e la zot pey zot menm e zot osi ganny permisyon pou reste.  Legzanp i sa gran kantite dokter ki aktyelman an New Zealand e osi bann ki pe fer training psychologist an Ostrali.

Pou konkli Mr Deputy, i byen fer remarke ki nou osi bezwen kapab atrakte nou bann dimoun zis parey sa bann pei i atrakte zot.  Par egzanp, pou ankouraz nou bann zenn retourn dan pei.  Sa polisi i merit osi konsider amelyor kondisyon nou bann graduate.  Par egzanp, sa housing allowance R2,000, i nepli valab ozordi.  Napa en lakaz ki ou kapab lwe pou R2,000 me, i enteresan note ki sa etranze li son lakaz i ganny peye e i pa kout R2,000.  Alors, nou demande ki sa scheme pou bann graduates i ganny revize li osi ki a petet ankouraz nou Seselwa pou retournen e ki zot kapab ranplas bann etranze dan bann pozisyon o dan pei.

Felisitasyon pou ou sa enn ki’n retournen e met ou pei avan sa lapey pou vin servi ou pei.  Avek sa Mr Deputy, mon pou donn tou mon sipor pou sa Mosyon.  Mersi.

 

MR DEPUTY SPEAKER

Onorab Fideria.

 

HON EMMANUEL FIDERIA

Mr Deputy mersi.  Ser kanmarab Koleg MNA bonn apre midi.  Mr Deputy, sa Mosyon ki devan pe adres 2 size.  Enn ki annan pou fer avek nou lafors mendev, lo en lot kote sa Mosyon pe demann Gouvernman pou met an plas en polisi pou reoriant nou labour force pou ki bann pozisyon pli o i ganny okipe par Seselwa olye etranze.  Lo lot kote, pe demande ki Gouvernman i entrodwi en scheme apropriye ki fer ki nou bann zenn ki konplet post segonder i ganny abzorbe dan lemonn travay.

Mr Deputy, sa Mosyon i tous en size rezon det deryer kreasyon nou Parti an 1964.  Enn bann prensip fondamantal parti SPUP, se dignite travayer Seselwa.  Lalit SPUP in esansyelman en lalit pou fer ki bann travayer i ganny zot drwa, ki enkli drwa ganny byen trete, resevwar en saler konvenab, ganny konze, laliberte pou zwenn en linyon ou pou reprezant zot.  Lo sa pwen Mr Deputy, i malere pou note ki konmela nou pa vwar en linyon vibran e aktiv pou zwe sa rol linyon ki ti zwe lontan.  Konmela dan serten sirkonstans, ou vwar bann travayer zot tousel letan in ariv ler pou deal avek size ki afekte zot.  Mon swete ki alavenir keksoz i ava sanze e vin pou le meyer, pou travayer ler pe rod linyon, linyon i la pou defann zot e defann zot drwa.

Mr Deputy Speaker, dan son demars devlopman e diversifikasyon ekonomik, Sesel in fer fas avek en mankman travayer.  Sa i dan diferan sekter, swa dan sekter medikal kot nou mank dokter, ners, konstriksyon kot nou mank enzenyer, ledikasyon, ansennyan e plizyer lezot ankor.  Menm si Gouvernman i met an plas en politik lokalizasyon pou ranplas mendev etranze par Seselwa e bokou resours in ganny mete dan training nou bann sitwayen, sa mankman resours imen in kontinnyen persiste.  Ozordi enn nou pli gran challenge i reste sa size ranplas travayer etranze par travayer Seselwa.  Mr Deputy, Gouvernman pe kontinnyen rod nouvo fason pou relev sa defi.  Prezidan Michel in fer sa vin enn son proyorite lo son azandan e in fer plizyer mezir dan sa direksyon.  Zisteman, dan son vizyon pou transform Sesel pou fer li vin en knowledge based society, Prezidan in lans Liniversite Sesel.

Sa Lensititsyon i en gran pa dan ou demars pou annan mendev kalifye pou soutenir nou devlopman.  La ki nou annan nou prop liniversite, bokou nou bann zenn pe ganny sans fer zot degre pou pli tar okip bann pozisyon kle dan nou pei.  Menm bann dimoun ki deza dan lanplwa, dan travay, pe mazin avans pli devan oubyen pran en lot karyer, ozordi i kapab realiz zot rev.  Liniversite i la pou donn sa bann dimoun loportinite ganny bann training e kalifikasyon neseser pou zot avanse dan lavi.  Liniversite Sesel i ofer nou pei bann sans pou nou relev sa bann defi ranplas travayer etranze par bann Seselwa.

Mr Deputy, Sesel i en pei omonn kot tou son bann zanfan i ganny akse avek ledikasyon, san regard son ras, kouler e stati sosyal.  Zefor Gouvernman pou soutenir sa prensip legalite dan loportinite e ganny reflekte par lefe ki Minister Ledikasyon i ganny dezyenm pli gran alokasyon dan Bidze nasyonal.  Ledikasyon i permet sak zanfan ganny labaz neseser pou li pli tar kapab debrouy son lavi.  Sepandan, si pei i envestir dan nou bann zenn atraver ledikasyon, nou ekspekte an retour ki nou ganny bon rezilta.  Zanfan Seselwa i annan en lobligasyon anver Lepep Seselwa ki’n envestir dan zot ledikasyon.  Sa lobligasyon se pou aprann e plitar ganny en bon metye ki a ede redwir depandans pei lo mendev etranze.

Mr Deputy, sa size travayer etranze i en size ki tous tou Seselwa.  Ler ou koz avek plizyer dimoun ki dan biznes, zot eksplik ou akoz ki zot bezwen travayer etranze.  Parmi bann leksplikasyon ki zot donnen se pou asir stabilite dan zot servis.  Sa i larepons bann ki dan sekter servis.  Bann ki dan domenn konstriksyon i dir, zot pou faid si napa travayer etranze.  Bokou osi i dir ki pei pa ti pou zanmen kapab soutenir lavites sa devlopman rapid ki nou ladan san travayer etranze.

Mr Deputy, Sesel ozordi, enn dan sak 4 travayer i etranze.  Sa sif pou ogmante la ki Minis semenn pase in anons plan pou recruit teachers.  Lapolis pe recruit Gurkhas e plizyer lezot biznes pe met bokou presyon pou anmenn travayer etranze kot napa ozordi.  Parey bann lazans sekirite prive pe met presyon.  Menm serten dimoun ou endividi pe rod bann travayer domestik pou vin travay dan nou pei e parfwa menm ou vwar bann drayver pickup se bann etranze ki pe fer.  Sa Mr Deputy i sagrinan.  Menm si nou annan presyon lo kote demann pou plis travayer etranze, sitiasyon lo kote lof mendev lokal pa pe neseserman amelyore.  Par egzanp, bokou profesyonnel Seselwa in kit nou pei pou al travay aletranze swa pou en nouvo challenge, swa pou son devlopman personnel, swa pou plis larzan.  Menm i annan ki al training andeor peye par Gouvernman, i deside pou pa retournen.  I annan plizyer fakter ki fer ki Seselwa i prefere al travay ou reste aletranze.  Nivo pri lavi dan nou pei i enn.  Serten bann graduate ler zot fini zot training pou zot retourn dan Sesel pou zot ganny en lozman i en kosmar.  Pou ganny en bout later i en lot.  Sa i bann fakter ki fer zot pa retournen.  Sa bann Seselwa Mr Deputy i annan drwa al travay aletranze e dan sa monn globalize kot pe annan mwens baryer dan sirkilasyon kapital ek mendev, nou pou vwar plis dimoun, travay andeor zot pei alavenir.

Sa pa neseserman en move keksoz si bann Seselwa ki al travay aletranze i plitar retournen ler zot in ganny bokou leksperyans e vin donn en koudmen pou batir e kree “Sa Nouvo Sesel”.

Mr Deputy, nou osi rekonnnet serten difikilte ki nou bann travayer Seselwa i rankontre dan zot travay.  Mon sit legzanp en konversasyon ki mon ti gannyen avek 2 madanm lo sa size.  Zot dir mwan, Onorab nou pe travay dan dezyenm sekter pilye nou lekonomi, me sa ki nou pe resevwar i pa reprezant zefors ki nou donnen.  Apre 20an travay nou pe ganny zis R3,600 par mwan, tandis ki bann manager pe ganny bann gro lapey.  Nou pe debout lo nou lipye depi bomaten ziska aswar.  Be get dan nou welfare.

Mr Deputy Speaker, mon dakor avek zot ki avek 20an travay ou plis ki en dimoun in travay pou en lorganizasyon, sa travayer i bezwen ganny byen rekonpanse.  Minister Lanplwa i bezwen adres sa size par diskit avek management sa bann lorganizasyon pou ki kondisyon ek lapey sa bann travayer i kontinnyelman amelyore.

Mr Deputy, dan Gouvernman, ka bann travayer i ganny deal avek anba PSO.  Sitiasyon i diferan dan sekter Parastatal kot serten i fer mannyer zot oule avek travayer.  I menm annan ka kot travayer i resign apre ki in travay pou en pe letan pa ganny peye zot konpansasyon.  Fodre Lalwa i vin tre kler lo sa size Mr Deputy, akoz sa pa normal.

Mr Deputy, i annan bann ka kot travayer ki travay dan korperatif, regilasyon ki zot travay anba la i devret revwar pou fer ki apre serten kantite letan travay, sa bann travayer a ganny en rekonpans.  Sitiasyon parey i ete konmela, i ganny resanti koman en gran lenzistis akoz lamazorite sa bann travayer i bann manman tousel ki lavi i vreman dir pou zot.

Mr Deputy, sa kestyon gratite osi dan Gouvernman, in ler pou get ladan.  R20,000 apre 15an travay, sa i pa relevan avek sitiasyon ozordi.  Mr Deputy, loter Mosyon in fer referans avek plizyer statistik lo lakantite dimoun ki dan lanplwa e ki pe rod lanplwa.  Sa bann sif i osi reflekte zefor Gouvernman pou adres sa size.  Nou bezwen fran avek nou lekor.  Dan sa pei i annan bokou loportinite e bokou anplwayer pe rod dimoun pou anploye.  Malerezman serten i refize travay.  Nou pa kapab soutir sa bann tel latitid akoz menm Labib i dir, lapares i en pese.

Mr Deputy, nou vwar plizyer scheme ki Gouvernman in met an plas dan lepase pou fer sir ki bann zenn ki graduate dan bann lekol post segonder i ganny en travay.  I annan ki’n mars, serten in tonm dan delo.  Lo sa size, mon ti a kontan fer 3 sizesyon.

Premyerman, ki Gouvernman i fer en resers lo tou sa bann lenstitisyon post segonder, gete konbyen zanfan ki’n ganny training, training dan sa domenn ki ankor pe fer sa travay.

Dezyenmman, pou fer en deba nasyonal pou ki i anmenn bann akter kle ansanm pou nou annan en diskisyon kler dan sa domenn travayer etranze ki devret travay e kalite travay zot devret fer dan nou pei.

Trwazyenmman, ki nou rode ki problenm mazer ki bann zenn ki’n train dan Hotel Management ki pa pe ganny en plas o dan lotel.

Mr Deputy, sa Mosyon i tre enportan.  Pe demann bann lazans neseser pou ekout byen bann propozisyon sorti kot nou Lasanble, pou rezourd sor nou dimoun.  Avek sa, mon pou siport sa Mosyon.  Mersi Mr Deputy.

 

MR DEPUTY SPEAKER

Onorab Bresson.

 

HON GALEN BRESSON

Mersi Mr Deputy Speaker.  Mr Deputy, ler mon regard sa Mosyon devan nou cet apre midi, en mo ki frap mon deswit i globalizasyon.

Bokou i ganny dir lo sa lemonn global ki nou viv ladan, the global village e nou Sesel nou pa ganny eparnye.  Nou reste e nou viv ladan.  Me i sagrinan ki ler nou pe regard keksoz parey ki nou pe get labour force.  Nou oubliye ki nou vin dan en lemonn global e ki nou bezwen anmenn nou lo par.  Ler mon dir lo par, si isi Sesel nou annan en dokter, wi nou pa pou kapab akoz mannyer nou sistenm medikal i ete, ofer li menm saler ki i ti pou gannyen aletranze, me par kont, non bezwen bridge the gap.  Ofer li bann percs, savedir si i en Seselwa, i annan menm kapasite ki en lot etranze, nou bezwen kapab bridge sa gap ki nou Seselwa i reste la.  Akoz nou’n envestir bokou dan nou Seselwa.  I anmenn mwan lo en pwen ler nou pe koz lo dokter Mr Deputy, pou fer sa pwen pou montre ki nou viv dan sa lemonn global e ki nou bezwen mentenir nou bann dimoun e bridge sa gap.  Ki ozordi nou annan en dokter Seselwa ki de tanzaot i vin Sesel e i ofer bann konsey avek nou sistenm medikal.  I Seselwa.  Zour i demann pou li vin a plen tan, i ganny rezete.  En etranze ki demann plis ki li i ti pe demande, plis ki li i ti pe demande mon repete, i vin a plen tan e li deza, apard ki i pa’n konn fer son louvraz, in kout nou en pe konpansasyon ki mon krwar byento nou pou vwar dan sa Lasanble.

Me Mr Deputy, nou bezwen komans kalifye sa bann louvraz e nou bezwen met nou labour market azour e sa ki pe ariv letour nou.  Nou pa kapab reste zis nou pti Sesel nou menm e krwar sa ki ariv andeor pa pou detri nou labour market.  I pou detri nou e oparavan en koleg in mansyonn brain drainBrain drain pou kontinnyen egziste si nou pa bridge sa gap.

I retourn lo sistenm ledikasyon.  Nou annan en sistenm ledikasyon, nou annan lekol peye, nou annan lekol Gouvernman ki la pou tou.  E la mon retourn en kou largiman lo nou, lo bann etidyan, bann ki pe grandi, ki pe servi nou sistenm ledikasyon.  Silvouple, pran zot responsabilite.  Lekol i la.  Servi sa sans.  I pa kapab, mwan koman mon’n aret fer lekol dan lannen 2000, me koman en dimoun ki en teacher par profesyon, ki ler ou ariv dan S1 ou ankor pe lager pou ekrir ou non.  Ou pankor konn ekrir ou non, savedir swa ou menm ki pa serye depi P1 ziska P6 pou ou aprann at least ekrir ou non, ouswa nou annan en problenm dan nou sistenm formasyon.  Dan sistenm formasyon, ler en dimoun ki nou apel en pti pe pli weak dan laklas, gidans pa kapab pran sa dimoun e gid li lo labour market e dir ou, mon piti ou pou vin en fermye ouswa ou pou vin en peser.  Non, in ler pou sanze sa bann prensip dan gidans ledikasyon pou nou labour market.  E la, nou’n byen fer resorti, schemeScheme i bezwen koman debi nou ledikasyon ek bann zanfan, gid zot byen toudilon ziska zot segonder kot la zot komans pran en formasyon pli formel e pli gide dan louvraz ki zot pe fer.  Ozordi nou bezwen annan bann peser ki annan a level akoz li ki bezwen pran bato pou anmenn pli deor.  Nou bezwen annan en peser ki kapab ozordi limenm rod lenvestisman pou anmenn en tonyer isi, komans lapes endistriyel lo sa nivo.  Alor nou bezwen komans gid nou bann dimoun byen e nou pa kapab toultan kalifye sa.  Ler nou’n sanz sistenm ledikasyon pou al en pti pe pli avanse, gidans i bezwen kontinnyen e scheme i kontinnyen.

Ozordi, Sesel, nou anvoy etidyan etidye, ler nou’n fini envestir 3an dan son ledikasyon aletranze ki kout bokou larzan, etidyan pa kalifye pou ganny en sertifika e travay okenn par dan lemonn.  Akoz?  La i montre ki nou pa’n kapab fer nou home work e nou pa’n regarde depi o debi ler nou pe al peye pou sa etidyan.  E sa i en fe ozordi ki etidyan nou’n fini depans 3an lo li e la Gouvernman i bezwen re rod ankor larzan pou sa etidyan kapab re kalifye.  Savedir sa etidyan ki ti kapab antre dan labour market apre 3an i bezwen prezan al travay or lekol ankor 2an a 3an pou li re antre dan labour market Sesel.  E menm la ler in fer 5an 6an letid, si nou pa pe ofer li sa saler preski o valer ki aletranze, i reste aletranze e i pa retourn Sesel.

Nou pa pe kapab ozordi Mr Deputy Speaker dan sa lemonn globalize, pa regarde letan nou pe regard sa Mosyon, mazinen ki dan Sesel koman en Seselwa nou tou nou annan loportinite nou kapab al an deor Sesel pou travay.  Me par kont, se dan sa pei respektiv kot nou al travay, ki li ki met son gidans lanplwa, kimannyer nou pou operate koman en etranze?  E si nou pe al train serten dimoun dan sa pei, se zot ki bezwen gide.  Egalman Sesel nou bezwen annan sa kalite scheme.  E la i anmenn mwan lo en lot scheme ki mon’n dekouver resaman, ki pe port fri dan enn nou bann pilye lekonomi e sa se tourizm.  In bokou lo televizyon, lo radio, nou scheme pou train bann Managers dan bann Lotel.  E kot nou’n vwar bann managers in dir zot in donn zot korporasyon, kot bann zenn pou antre dan zot Lotel i pou vin pran zot plas koman bann etranze.  Me kestyon ki mon demande ozordi.  Bokou sa bann managers ki pe asiz lo sa panel pou STA, zot travay pou bann chains of hotels parey Hilton and so on.  Eski zot, zot kalifye pou kapab dir ki ozordi ou pe train en etidyan Seselwa e li i pou vin pran ou plas?  Akoz mannyer mwan mon konpran sa loperasyon se ki bann pool of Managers Hilton, zot ganny shift lemonn antye.  Mon pou servi en legzanp.  Zot ganny shift lemonn antye sorti en pei pou en lot, se sa main organization ki deside.  Alor ou isi Sesel ou pe kalifye lo STA, kimannyer ou kapab gid en scheme koumsa akoz demen, akoz deza i pe arive premye cohort sa bann manrmay ki deza dan Lotel, scheme in fini kit zot dan lotel an krwayan keksoz pe mars byen.  Zot napa en landrwa lokal pou zot kapab al dir, be nou dan problenm akoz sanmenm sa bann Managers ki pe kalifye nou i dir nou pou vin pran zot plas, ozordi pe fer nou lavi malere.  Nou anvi menm kit sa lendistri.  Alor lendistri i perdi, lekonomi i perdi, nou pei i perdi dan sa letan ki in envesti pou sa etidyan pran sa plas.

Mr Deputy, nou vin en pti moman lo teknolozi e formasyon, ankor pou gid dan sa labour force ki nou pe regarde.  Oparavan enn mon bann koleg in mansyonn lo reponn telefonn e shred papye.  Wi, ozordi nou kapab kalifye.  Avek lemonn teknolozi ki pe ouver, nou kapab dir i annan bann call centres ki kapab devlope, ki sa bann dimoun i bezwen, si ler li i pe lekol konn reponn telefonn.  Akoz konbyen nou isi anndan ki call en Departman:- “Alo, wi ki mon kapab fer pou ou?”  I pa pe kalifye byen, i pa konn reponn.  E ozordi call centres lemonn antye i en gro, gro biznes.  Si ou al dan lekonomi Lenn kot i annan fib optik ki pe konekte li, call centres pe anmenn zot lekonomi de milyon e kimannyer i marse i senp.  Barclays Bank ki son main branch, en legzanp mon pe donnen ankor, ki Langleter, tou call ki ou fer 24 lo 7 i toultan annan en dimoun ki reponn ou ki dir ou, “Yes sir how can I help you, your account”.  Me sa dimoun i asiz dan Lenn, set en Endyen ki’n ganny train avek lemonn teknolozi ki pe antre, kimannyer pou reponn en telefonn e pou donn en servis en gro lakonpannyen ki lemonn antye pe servi.

Alor, eski nou labour market egzakteman parey loter Mosyon in dir, nou pe kalifye, eski nou pe regard loportinite ki pe vini, eski nou pe form nou bann Seselwa pou pran loportinite ki pe vini, akoz deza fib optik in fini konekte Sesel.  E call centres nou pa pe kapab met Seselwam napa personn ki’n ganny train, nou pe dir pou reponn telefonn, me nou pa ni pe menm montre sa dimoun kimannyer pou reponn en telefonn.  Alor call centres i vini, nou pou still annan etranze ki pou antre dan nou pei e i pou servi nou fib optik ki nou nou’n depans larzan ladan pou li fer larzan lo nou.  Alor menm la, eski nou labour market pe kalifye avek teknolozi?  En kestyon.

Mr Deputy, mwan osi anvi regard en lot pilye lekonomi e sa se lapes.  Dan tou sa lannen ki nou’n devlop lapes artisanal, nou’n ariv endistriel.  Koriz mwan si mon mal bann Koleg ki la, ouswa bann dimoun ki ava ekout nou, i a koriz mwan ler i vwar mwan si mon mal.  Eski i annan okenn scheme dan sa pei ki’n ganny devlope ozordi ki nou kapab kalifye pou met nou bann prop dimoun lo en bato ton, ki kapab redi lasenn sanpyon parey bann Franse.  Ozordi 50% a 60% se bann west Africans ki vini e ki zot ki travay lo bann bato Franse, bann tonyer Franze e Espanyol.  Akoz nou napa en scheme dan sa pei ki pe met Seselwa lo sa bato?  By tou sa lannen nou ti’n devlop en labour force enkrwayab e mon asire Sesel ti pou annan son prop tonye ki ti pe operate pe anmenn ton.  Wi, i lor ble, me eski vreman nou’n fer sa lor konte totalite pou nou lekonomi, ouswa zis zot pou vini nek tir nou lor ble e ale?

Mr Deputy, mon pou siport sa Mosyon e avek sa, mon dir mersi.

 

MR DEPUTY SPEAKER

Onorab Aglae.

 

HON ROMA AGLAE

Mr Deputy Speaker, size succession planning i enn ki’n diran sa bann dernyen lannen preokip nou pei e kree en nivo mekontantman e dezakor parmi serten group nou popilasyon, ensi ki serten nonm kritik ki pozitiv.

Mr Deputy, enn parmi bann mekanizm kle pou asir bonn kontinite e survival en biznes, lenstitisyon e nenport sekter, me ki souvandfwa ganny inyore se en progranm planifikasyon e devlopman pou sikseser.  Par definisyon Mr Deputy, succession plan i en prosesis sistematik pou idantifye, asses, devlop talan e kapabilite bann endividi avek potansyel pou siksed bann pozisyon kle pou asir kontinite leadership.

Pou kree e enplimant en succession plan Mr Deputy, i en keksoz ki pran letan, ki demann resours an term devlopman e i sagrinan ki i en size ki pa ganny sa latansyon ki i vreman merite.  Mankman en tel plan, parfwa i fer ki biznes, lenstitisyon e menm pei i ganny konfronte avek sa ki nou apel brain drainBrain drain akoz endividi avek potansyel ki anvi ganny devlope, ki anvi ganny aspire pou pli o responsabilite dan zot domenn pa ganny lespwar pou progrese e zot plivomye swa kit zot lanplwa e menm pei.

Dan kad Sesel Mr Deputy, a mon avi, i zistifyab pou mansyonnen ki vreman nou annan en gran bezwen pou donn latansyon neseser dan lilmedyat pou sa size an term en polisi.  E se sa rezon mon sipor anver sa Mosyon, omwen Gouvernman i kapab take the lead e asir en tel progranm avek tout la transparans dan son bann diferan Minister, ensi ki bann lenstitisyon Parastatal.

Mr Deputy, pa bezwen mon fer gran mansyon lo lakantite Seselwa kalilfye ki’n deside kit pei akoz mankman en tel progranm dan pei.  Wi, serten in deside kit pei pou rezon ki pa relye avek en tel progranm.  Me i sirman annan en group ki’n kite akoz fristrasyon apropo en mank prospect an term zot devlopman e anplwayman expat apre expat dan bann pozisyon kle.

Sa i anmenn mwan lo sa size sansib expatriate.  Nou tou nou ava dakor ki i vreman koute pou anploy expat e dan tou sirkonstans en expat pe zouir en saler bokou pli eleve ki zot Koleg Seselwa.  E vwala Mr Deputy kote fristrasyon nou Seselwa i vini.  Si ti annan an plas en progranm kadre dan tou sekter, ki enkli idantifikasyon en endividi avek potansyel e en progranm mentoring ensi ki lantrennman, mon asire Mr Deputy ki sa pou sirman en motivasyon e evantyelman ogmant prodiktivite nou Seselwa pou deliver dan zot travay.  I domaz ki se ozordi ki en tel polisi pe ganny propoze me an menm tan i anmenn en rekonfor akoz i ava demontre avek nou popilasyon ki loportinite lokalizasyon bann pozisyon kle i a zot porte.

Mr Deputy, brefman lo size lanplwayman pou etidyan ki’n fini post segonder.  A mon avi, nou bezwen revwar curriculum letid e evalye kot ki annan en mankman, ki fer parfwa i pa fasil pou en etidyan sorti direk post segonder pou al dan lanplwa.  Dan mon prop distrik Mr Deputy mon’n annan e mon ankor annan zenn ki’n fini post segonder e ki vreman anvi leve debrouye, domaz zot kontinnyelman ganny dir ki i mank zot bagaz.  Lo sa pwen, mon ti ava rekomande ki an partenarya avek Minister Lanplwa ensi ki sekter prive, Minister Ledikasyon i reinisye en konsiltasyon apropo demann e lekspektasyon bann lenstitisyon travay.  In ler pou revwar e reaziste serten konponan devlopman e letid bann etidyan tout an oriant ver demann sekter lanplwa.

Senpleman Mr Deputy, Minister Ledikasyon i bezwen vin en pe plis a laporte e demann sekter lanplwa.  Zot ki bezwen al anver sa bann sekter e regard bezwen, kwa ki pe sanze e ki nouvo lekspektasyon.  E de la, ankadre en progranm devlopman e letid vize a sa bann demann.

Pa bezwen al pli lwen Mr Deputy, Lakademi Tourizm pe enplimant sa avek sikse.  I ase fasil pou etidyan ouswa graduate ganny abzorbe dan lemonn travay.  Sa i akoz sa laplikasyon e abilite pratik ki enkli dan zot curriculum. Petet in plis ki ler pou bann leres lenstitisyon segonder adopte en tel pratik.  Wi, i pa pou lo en tel nivo enteraksyon e devlopman me omwen etidyan a ganny posibilite ekspoze enpe plis e devlop en lapresiasyon e laspirasyon pou en metye, olye ki i zis sorti avek en mindset e bagaz akademik.

Pou konklir Mr Deputy, vi ki i de size vreman enportan pou soutenabilite e devlopman pei, mon pou aport mon sipor anver sa Mosyon.  Mersi.

 

MR DEPUTY SPEAKER

Bon, avek sa nou a pran en break, nou a rezwenn 4.05pm.

 

(BREAK)

MR DEPUTY SPEAKER

Bon, nou a kontinnyen nou deba lo sa Mosyon e mon envit Onorab Arnephy.

HON BERNARD ARNEPHY

Mersi Mr Deputy.  Bonn apre midi tou dimoun.  Mr Deputy, mon krwar bokou in ganny dir me mon ti a kontan kantmenm dir de trwa mo lo Mosyon ki Onorab Dugasse in prezante.

Mr Deputy, si ozordi legzistans imen i kontinnyel e fanmiy ki sa pli vye lenstitisyon omonn i kontinnyen set akoz travay.

Nou bann zanset in travay e travay dir, e ozordi koman en sosyete ki pe evolye, se sa ki nou anvi vwar.  Nou anvi vwar dimoun dan lanplwa pou donn sa kontribisyon pou anmenn nou pei bokou pli lwen ki i ete ozordi.  Me pou nou kapab fer sa, nou bezwen annan, devlop bann sitwayen ki responsab.  Nou bezwen kapab devlop bann endividi ki responsab e ledikasyon i lakle.  Ler mon pe koz lo ledikasyon mon anvi met lanfaz en pti pe lo kwa ki nou ofer nou bann zenn depi en tre zenn az.  Lekol i annan en curriculum e sa curriculum i vize zisteman ver transformasyon sak endividi pou an retour fer li vin sa zenn sitwayen responsab ki nou anvi.

E dan sa curriculum i annan diferan size, me malerezman ki nou vwar parfwa se ki serten size i ganny bokou plis lenportans ki lezot e serten size i ganny met dekote.  Si nou anvi adres problenm ki loter Mosyon, Onorab Dugasse in prezant devan nou, nou bezwen fer sir ki nou byen oriyant nou bann zenn pou ki atraver zot staz ledikasyon, zot kapab pran bann desizyon e bann desizyon ki byen, byen enformen.

Me i malere ki parfwa parey mon’n dir i annan serten lack e kot ler nou bann zenn i ariv ler pou zot pran sa desizyon ki nou ekspekte zot pran, zot tant pou perdi.  E la mon ti a kontan fer en mansyon spesyal pou nou size careers guidance ki egziste dan curriculum.

Dan mon pti resers ki monn fer e apre ki mon’n koz avek serten dimoun, serten teachers ki pe ansenny sa size e menm serten personnel kot Minister Ledikasyon, for so many years nou pe koz lo sa size pou ki sa size i ganny bokou plis sipor, me malerezman i pa toultan le ka.

Ler nou pe koz lo diriz nou bann zenn, oriyant zot, i pa toultan leka ki sa i ganny fer.  I malere par egzanp kot nou vwar bokou lanfaz i ganny mete, se ki ler nou bann zenn i ariv dan S4, S5 ok,se la ki nou tant pou ekspoz zot plis avek lemonn travay.  E se la kot bezwen i ete, ok.  Se bann lorganizasyon travay kot sa bann zenn zot pou bezwen deside kote zot pou ale apre ki zot fini zot letid.  So, la mon pe lans en lapel par egzanp avek Minister Ledikasyon pou revwar nou curriculum.  Fer nou curriculum pli fleksib.  Pli fleksib dan le sans kot nou meet needs nou bann manrmay.  Nou bezwen invest plis dan bann resours pou ki nou bann zenn i kapab oriyant zot ver sa ki zot santi zot abilite, ki swa akademik, ki swa zot bann skills i a ed zot pou zot kapab oriyant zot ladan.  So, par egzanp ozordi dan lekol mon panse poudir nou merit, zisteman semenn pase Minis Ledikasyon ti vin devan Lasanble e nou ti pe demann en counselor.  Me sa counselor ki nou ti pe demande se en counselor ki pou viz ver bann issues plis, ok, bann issues sosyal and so on.  Me mon panse ki nou bezwen osi annan en counselor ouswa en careers teacher, well trained ki kapab oriyant nou bann manrmay depi dan S1 onwards.  Malgre sa pti gin ki ganny fer i pa sifi dan primer, me at least from S1 manrmay i bezwen kapab ganny sa bon oriyantasyon.  E ankor lo lenformasyon ki mon annan, dernyen training ki ti ganny fer pou en pti group careers teacher ti an 2006, me sa ti en training a la lezer, a la sirfas.  Ok, i pa ti en in in-depth training kot sa bann teachers zot menm zot, zot kapab annan sa konpetans pou zot kapab filtre dan sa bann diferan lorganizasyon, landrwa travay e kot la zot kapab ganny bann lenformasyon apropriye pou zot kapab ed zot bann zenn pou fer sa bann desizyon.

Dan lekol i mank en information par egzanp resource room, spesifikman pou ledikasyon karyer, ok.  So, la ankor en area kot mon santi malgre nou dir ozordi i annan teknolozi, manrmay i kapab al lo internet fer resers, me still sa bann zenn zot bezwen dimoun kalifye ki pou kapab oriyant zot.     So, la petet dan bann plan fitir Minister Ledikasyon mon ti ava demande ki sa i ganny pran an konsiderasyon.

En lot issue se ki mon panse, Minis pou Lanplwa mon krwar in koz lo la bokou, nou bezwen met lanmen seryezman lo sa zafer market analysis.  Ok.  Non bezwen met lanmen lo la e nou bezwen asire ki nou bann progranm understudy ki nou koz lo la i vin en progranm realite.  Ok.  Tro souvandfwa nou tann dir poudir i annan understudy, i annan understudy me still nou tande poudir bann pozisyon parey loter Mosyon in met devan i pe kontinnyelman ganny taken up par bann etranze.

Lezot Manm osi in koz lo brain drain.  Mon krwar sa i enn nou bann pli gro defi, ok, e nou, nou wish se ki tou bann zenn ki’n ganny sans ganny ekspoze avek lemonn eksteryer ki’n al fer zot training i retourn dan pei.  Me malerezman sa i pa leka.  So, mwan mon rapel ler mon ti al study ti annan en cohort apepre 18 nou ok, e forse 5 nou ki’n retournen.  Larestan in reste, so nou bezwen fer sir nou met lanmen lo la e vwar kote zot ete.  Rod fason pou nou fer zot retournen pou vin donn en koudmen.  Malgre nou dir i annan bonding agreement zot rann larzan.  Me rann larzan i pa neseserman parey akoz nou, nou bezwen sa mendev, sa skilled worker ki pou donn en koudmen pou nou kapab devlop sa lekonomi.

Ankor pli boner Mr Deputy, mon’n tann bann Koleg koz lo rol Liniversite Sesel.  Fantastik.  Liniversite Sesel i la e sa i pou donn plis sans nou bann zenn pou zot kapab ganny zot degre locally.  Me ankor la mon panse poudir i annan serten defi ki mon pa pou tro koz longman lo la, me si nou dir ozordi ler ou koz ek en zenn i dir ou lekel dimoun pli enfliyansyel dan ou lavi in terms of ou karyer ki ou ladan?  E larepons ki ou gannyen se mon teacher.  Ok.  Petet sa zenn i annan en teacher dan son lavi ki’n mark son lavi significantly ok.  Me ozordi ki nou vwar, nou annan en gro problenm teachers ok.  Nou annan en kantite teachers etranze e ler ou koz ek sa bann zenn souvandfwa sa bann teachers etranze i pa neseserman enfliyans zot lavi dan sa fason parey en teacher Seselwa in fer.

So, la mon ti a kontan lans en lapel avek Minister Ledikasyon, avek Gouvernman, avek Liniversite Sesel.  Si i bezwen met nou on board bann Manm Lasanble pou nou asize pou nou diskit sa problenm teacher e teacher training e teacher retention.  Ok, akoz Mr Deputy, si nou pa fer atansyon dan sa 5an ki vini nou pou dan en gro, gro problenm.

Mon pti resers ki mon’n fer in montre poudir dan sa prosen 4an ki pe vini nou pa pe kapab vid teachers dan sistenm.  E nou bezwen teachers pou kapab oriyant nou bann zenn, pou ankouraz nou bann zenn pou take up bann lanplwa ki egziste dan pei.

Mr Deputy, en lot pti pwen mon ti a kontan fer se valorize.  Nou annan en kantite nou bann dimoun ki dan lanplwa ok e la mon pe koz spesifikman anploye avek Gouvernman.  Ki annan so many years of experience ok e ki zot pe fer en travay fantastik, me souvandfwa zot ganny dekouraze akoz zot ganny dir poudir la ou pou bezwen al fer upgrading ki mon totalman dakor avek, ou pou bezwen al fer en upgrading akademik, me petet sa dimoun pou son laz ki in arive i pa toultan fasil pou li fer sa.  Me selman sa dimoun i deliver e i travay dir e tre, tre dir.  So, petet la ankor, i en area kot nou bezwen konsidere e regard ladan, pou nou kapab retenir sa bann dimoun.

Mr Deputy, en lot keksoz ki mon ti a kontan koz lo la se ki nou met en pe lanfaz lo life skills education e ler nou koz lo life skills education nou pe koz lo ekip nou bann zenn pou zot kapab fer bann bon desizyon.  Ekip nou bann zenn pou zot kapab negosye e ozordi si nou vwar poudir serten dimoun i komans en travay apre i fasilman kit dan semen, se akoz i pa kapab negosye son kondisyon travay.  E mon krwar sa i en eleman tre, tre enportan si nou kapab met lanmen lo la, i pou ed nou adres problenm ki Onorab Dugasse in prezante.

En zenn i fini son training e nou dakor poudir souvandfwa i mank li bokou sa skills akoz petet son training in vize en pe plis ver sa kote akademik me ler nou pe get bann field ok bann field teknikal, vokasyonnel, souvandfwa bann anplwayer zot rod sa kote skills ok.  Eski sa dimoun, ou kapab vin avek en dizenn sertifika, en ventenn sertifika me si ou napa skills pou ou kapab deliver i difisil pou ou kapab ganny anploye ok.  So, la petet kot sa zenn li nou bezwen ed li pou li kapab negosye son terms and conditions avek son anplwayer pou li montre poudir yes, mon napa petet sa kantite skills ki ou pe demande, me, mon prepare pou mon kapab fer sa zefor pou mon meet sa demann ki ou pe fer ok.  E la ankor en lot pti pwen ki mon santi i annan en mankman se monitoring Ok, sipervizyon.  Bann lenstitisyon nou pran nou bann zenn nou anvoy zot dan industry e souvandfwa laba sa bann zenn pa pe neseserman aprann akoz sa bann zenn i ganny servi koman bann soubalter ok.  Zot ganny dir ki pou fer me zot pa ganny montre kimannyer pou fer sa ki merit ganny fer, ok.  So, la mon krwar i en lot issue ki nou merit met lanmen lo la.

So, Mr Deputy, parey mon ti dir mon pa pou tro long me mon santi poudir sa de trwa pwen ki mon’n fer i bann pwen konsiderasyon ki Minister Lanplwa, ansanm avek bann lezot partners i merit pran an kont e fer sir ki nou devlop sa kiltir kot nou ankouraz nou bann dimoun pou travay e travay tre, tre dir.  E sa se sel fason ki nou kapab ede pou nou ankouraz nou bann zenn pou zot take up employment apre zot training e anmenmtan ankouraze pou fer ki bann pozisyon ki Onorab in koz lo la i kapab evantyelman, gradyelman ganny ranplase par bann Seselwa kalifye e bann Seselwa ki pare pou travay e ede dan devlopman nou pei.  Mersi bokou Mr Deputy.

 

MR DEPUTY SPEAKER

Onorab Meggy Marie.

 

HON MEGGY MARIE

Mersi Mr Deputy Speaker, bonn apre midi tou koleg Onorab.  Mr Deputy Speaker, Mosyon ki devan nou pe demande ki Gouvernman i met an plas polisi pou reoriyant nou labour forc,e pou ki bann pozisyon pli o i ganny okipe par Seselwa olye etranze e ki Gouvernman i entrodwir scheme apropriye pou fer sir ki nou bann zenn ki konplet post segonder i ganny abzorbe dan lemonn travay.

Mr Deputy Speaker, travay i en devwar enportan pou tou imen ki ankor kapab e byensir, en sitwayen ki pa travay son lavenir i dan sonm, menm si i asire ki sistenm in fer provizyon pou li ganny en sekirite sosyal dan son vye zour.  Ler en sitwayen pa travay, i pa pe met zis son lavenir dan sonm me lavenir son zanfan, son lantouraz e son pei alafen.  Nou pei i bezwen nou tou pou fer li avanse, nou pa pou kapab toultan pe depan lo etranze pou fer tou bann desizyon kle e osi manage tou nou bann devlopman.  Pou nou kapab arive realiz tousala, nou bezwen annan en Pep ki annan sa kiltir travay e nou osi servi bann loportinite ki annan devan nou.  Nou bezwen travay ansanm kot nou kree bann mekanizm ki pou fer sir ki nou bann zenn ki nou pe train i ganny abzorbe dan lanplwa kot plitar ek leksperyans, zot ava kapab progrese e osi pran bann pozisyon kle dan bann lantrepriz ki pe ganny okipe par bann etranze.

Mr Deputy Speaker, mon konstate ki in ler pou nou etabli en kiltir travay dan nou bann zenn.  Edik zot sa vre valer travay.  Ed zot pou fer bon swa kot apre ki zot in swiv en training ki kout nou Gouvernman bokou e plitar pa kit sa metye pou al retrain ouswa asize, pa fer nanryen.  Entrodwir scheme ki pou enteres zenn pou antre dan lanplwa.  Kree bann mechanism ki pou fer sir ki bann zenn ki fini post segonder i antre dan lanplwa.  Edik nou zenes dan en fason ki i prepar li boner pou swazir en metye e ed li pou aprofondir ladan.  E finalman, keksoz ki pli enportan, etablir en bon baz disiplin dan nou bann zenn pou zot kapab tenir dan lanplwa.  Bokou i zis pas en pe letan apre i kite.  Sa i en fason ki mon krwar plitar zot ava kapab pran bann pozisyon kle.

Mr Deputy Speaker, ler nou gete, nou bann defayans i konm swivan.  Bokou nou bann zenn pa ganny sa bon gidans pou fer zot swa travay, depi ler zot pe antre dan segonder e an plis ki sa, ler zot pe vreman swazir zot karyer pou al pos segonder.  I annan zanfan ki menm dir ou ki li i pa ni ti anvi fer sa swa li, be son Careers Guidance Teacher ki dir li, poudir ou, ou nivo ledikasyon i sitan o, menm si i kontan mason i anvoy li fer a level.  I pa vedir ki toultan nou bezwen annan bann karyer pratik ki annan bann dimoun ki nivo ledikasyon i merit ba. Sa mon pa zanmen krwar ladan.

La, i napa swa, i ekout son teacher e plitar si i pa’n kapab persuade sa teacher, i fini sa training kot ler i fini sa training, i pa kontinnyen sa metye li, i deside rekomanse.  Apre ki Gouvernman in depans e train sa zenn pou 3 ou 2an ou menm plis, i konplet son letid e vwar li i pa anvi fer sa metye akoz i pa’n zanmen kontan sa.  La i trouv li swa vin en zenn ki pa travay oubyen i bezwen al travay koman labourer akoz i napa skill apropriye.  La nou bezwen rod etranze pou okip bann plas kle.  An plis ki sa, nou vwar ki sa zenn si i vreman anvi travay e pran bann pozisyon kle, sa konpannyen oubyen Gouvernman i bezwen retrain sa zenn pou li kapab byen delivre.  Tousala i en lot depans lo nou Gouvernman ankor.

Mr Deputy Speaker, mon krwar ki en zenn i merit swazir ki kalite metye i anvi pran lo nivo post segonder, regardless son nivo ledikasyon, si i santi i kapab fer li e i zwenn kriter.  Oubyen son nivo i pli o, sa pa en problenm.  Se son lanmour pou sa travay ki pou gard li ladan e ki pou kapab anmenn li pli devan pou li kapab pran bann pozisyon kle.

Tou metye i annan son valer, menm si pa tou dimoun ki kapab pratik li lo menm nivo.  I nepli tan pou nou dir ki ou pa kapab swiv en course lo nivo post segonder akoz ou ledikasyon i tro o.  Nepli son letan sa.  Keksoz ki pli enportan se ki sa dimoun i annan en lanmour pou sa metye, ki mon krwar sel fason pou li fer li byen e osi devlope e vin en sitwayen ki pou ede anmenn enovasyon e kapab osi pran bann pozisyon parey mon’n dir oparavan.  Sa ki pou ede anmenn devlopman dan nou pei osi.  Sa ki pou ede natiraliz bann pozisyon o dan nou pei.  I annan bokou lenstans kot i annan Seselwa ki ganny mete dan bann pozisyon kot etranze ki pli o plase i sipoze train sa Seselwa pou li okip sa pozisyon dan le fitir, me sa pa leka.  Sa etranze pa menm donn sa latansyon e ni kree sa lanvironnman neseser pou ki sa Seselwa i okip sa pozisyon, me keksoz i mars dan en lot dimansyon kot ou vwar sa etranze limenm li i natiraliz son lekor epi i pran sa menm pozisyon i reste ladan li.  Sa Seselwa i reste toultan par anba li.

Dan lot sans ki nou vwar pe arive, bann konpannyen ki rod travayer zot pa pare pou pey en Seselwa en saler kot i kapab viv dan son prop pei.  I pa kapab viv dan son prop pei, i bezwen zis parey en dimoun ki egziste dan son pei.  Ki nou pe vwar?  Olye anploy en Seselwa ek en bon saler, zot fer vini en etranze ki zot stil lavi pa parey nou, pa parey pou Seselwa akoz zot bi se selman fer en saving akoz ler zot retourn dan zot pei, sa larzan i vo bokou plis akoz zot larzan i pli ba.  La nou rod tou sord rezon pou nou pa anploy en Seselwa.  Si nou kontinnyen avek sa latitid, mon pa krwar nou pei pou al an avan.

Mr Deputy Speaker, annou ede pou kit nou pei dan lanmen nou pep, annou aret dir ki nou Seselwa napa leksperyans kan se nou dan nou pei ki bezwen kree sa lanvironnman ideal pou ed bann zenn pou zot ganny leksperyans.  Napa dimoun ki annan leksperyans si i pa’n pratik oubyen pas atraver okenn sitiasyon oubyen kondisyon.  Nou pa kapab train nou prop dimoun e apre les zot lo semen konmsi nou pa’n depans nanryen pou fer zot vin sa ki zot ete ozordi.  Apre en bon letan training, nou’n perdi en bon pe larzan osi.  Tou sa etranze ki vin kot nou, zot in ganny leksperyans se zot oubyen aletranze.  Be nou dimoun kote pou ganny leksperyans?  Se nou ki bezwen siport nou zenn.  Annou pa les etranze okip tou bann plas kle e les etranze ki Manager oubyen ansarz bann pozisyon kle dan nou pei dir, napa Seselwa ki kapab okip serten pozisyon zis pou zot kapab fer vini etranze, kan ler nou travel, nou vwar sa bann menm Seselwa ki zot dir pa kapab travay isi in okip bann pozisyon kle dan lezot konpannyen deor.  Be kwa ki fer sa ki i pli kontan al laba deor?  In ler pou nou rode tousala.

Si nou tret nou pep byen, sa i son pei i pou bezwen donn valer son travay e travay byen.  Sel keksoz ki nou annan pou fer se tret li byen, pey li byen, fer li santi li konfortab se li.  Mon krwar i vreman enportan ki Gouvernman i met plis polisi an plas pou ed nou bann zenn ki fini post segonder, ganny abzorbe dan lemonn travay e ki bann pozisyon kle i ganny okipe par nou Seselwa.  Kree meyer kondisyon pou Seselwa, espesyalman scheme ki attractive an mentenir sa bann regilasyon ki ankor pe fonksyonn byen.  Mon pa vwar li ideal pou donn permisyon en konpannyen pou fer vini en etranze dan en serten domenn ki i annan Seselwa ki kapab fer sa metye.  Par egzanp nou pase en ler nou vwar en etranze i watchmen.  Eski Seselwa pa kapab vin en watchmen?  Mon pa vwar li byen pou nou pa anploy en zenn ki’n fini post segonder e dir ki i napa leksperyans akoz se nou ki bezwen ed nou pep pou li pran relev dan le fitir.  Si i pa ganny leksperyans kot nou dan travay isi Sesel, kote i pou al rod leksperyans?  Si nou pa anploy zot ozordi, demen nou menm nou ki pou dir sa zenn napa leksperyans e nou pou napa Seselwa ki pou progrese pou kapab pran pozisyon kle, si i pa komans byen zenn.  Fodre pa nou adopte sa latitid quick fix kot nou enport etranze e negliz nou bann zenn.  Eski nou Seselwa pou reste toultan boy akoz bann gran konpannyen pa oule met bann scheme ki pou atir Seselwa?  Epi zot fer krwar ki napa Seselwa ki konpetan zis pou zot kapab fer vini zot bann dalon.

Mon pe demann tou Manm Onorab pou siport sa Mosyon.  Mersi Mr Speaker.

 

MR DEPUTY SPEAKER

Onorab David Pierre.

 

HON DAVID PIERRE

Mersi Mr Deputy.  Mr Deputy, Mosyon ki devan nou i abord en size ki devret ganny latansyon sa Lasanble Nasyonal.  Anmenmtan i en size kot i bezwen annan en volonte politik serye pou nou kapab adres li.  Mon dakor avek konteni sa Mosyon e mon pou dir de trwa mo ki a mon avi i enportan pou nou fer refleksyon lo la.  Isi Sesel ozordi in ler pou nou annan en plan lokalizasyon ki kler e ki viab e ki rasyonnal e ki kapab ganny aplike.  Mon pou fer sorti 7 ti pti pwen an relasyon avek sa Mosyon.

Premyerman, isi dan Sesel moman in arive pou nou nou revwar serten bann Lalwa ki annan pou fer avek lanplwa.  Kot i annan nesesite pou nou fer lamannman nou fer sa bann lamannman.  Ler nou’n fini fer li, nou fer sir ki nou adopte bann polisi, bann polisi ki kler e ki kapab ganny enplimante an servan egalman bann ethics ki strikt e ki ganny swiv, ki ganny evalye e ki ganny monitor.  Fodre ki nou annan en plan lokalizasyon kot i annan avek li bann kondisyon atase, avan ki nou kapab anploy en etranze isi dan nou pei.  Annou deside ki par egzanp dan tou bann post kot bann etranze pe okipe, me ki i annan en Seselwa ki kapab ranplas sa etranze, annou fer en levanter nasyonal, annou idantifye sa bann post, annou idantifye sa bann Seselwa e annou pran bann aksyon imedyat e serye e annou ranplas sa bann etranze par bann Seselwa.

La nou pe koz Mr Deputy, lo tou nivo travay.  Mon pe koz depi bann travay pli senp ki ou kapab mazinen, kot ou pa bezwen bann gran skills parey bann travay labourer, drayver, zardinyen eksetera, kot ozordi dan sa pei ou vwar etranze pe fer li e ou vwar Seselwa pe asize e pe depan lo Welfare.

Mr Deputy, nou’n koz bokou lo latitid Seselwa, nou dir ki Seselwa pa oule travay, taler pli tar dan mon lentervansyon mon pou abord sa size.  In ler Mr Deputy pou nou egalman vwar bann pozisyon kot nou kapab idantifye bann Seselwa ki kapab ganny train pou ranplas sa bann etranze, annou train sa bann Seselwa e annou ranplas sa bann etranze.  I annan en entervenan avan mwan taler in fer sorti kler e in dir sa parol, ki letan i annan en etranze ki pe travay dan en pozisyon kot nou kapab met en Seselwa pou understudy li, annou met sa Seselwa.  Sa Seselwa i understudy sa etranze apre en peryod letan, 2an ou 3an par egzanp, nou dir avek sa etranze mersi bokou pou sa ki ou’n fer pou nou e sa Seselwa i pran son plas.  Mon krwar in ler pou nou donn Seselwa sa ki i deserve dan son pei.

Mr Deputy, annou egalman idantidye bann landrwa lo marse lanplwa kot i annan mankman Seselwa.  Par egzanp, ozordi si nou get the Financial Sector, nou get kalite letid ki nou pe ofer lazenes Seselwa today, nou demann nou lekor en kestyon.  In 3, 4, 5, 10 years time, kimannyer nou pou deal avek nou Financial Sector, unless nou pran etranze.  Annou pa les sa arive.  Annou reorganiz nou sistenm ledikasyon e annou provide capacity building avek skills pou nou Seselwa, pou nou Seselwa kapab ranplas oubyen ranpli sa bann pozisyon alavenir.

Mon krwar Mr Deputy, i annan en lot entervenan ki’n koz lo market study.  Mon krwar i enportan pou nou liaise nou sistenm ledikasyon avek demann marse lanplwa today.  Si nou fer market study nou pou vwar bann trends e nou pou kapab therefore reorganiz oubyen kontinnyelman revwar nou sistenm ledikasyon pou li kapab reponn a bezwen marse lanplwa alavenir.  Mon krwar sa i en size ki vreman, vreman enportan.  Curriculum i devret ganny fer avek bi pou nou reponn bezwen marse lanplwa.  Si i annan nesesite pou nou get par egzanp, pou nou entrodwir oubyen vwar posibilite entrodwir dan nou sistenm ledikasyon, akademik avek technical centres annou fer li.  Me annou fer sa letid aprofondi e apropriye, pou ki nou train nou bann lazenes Seselwa pou fer sir ki zot kapab oubyen se zot ki reponn a marse lanplwa dan nou pei.

I enportan Mr Deputy pou nou konpran e pou nou mazinen poudir bann primary avenues pou preparasyon lanplwa pou lazenes Seselwa i ganny fer atraver 3 fason.

Enn, atraver nou sistenm ledikasyon segonder ki formel, savedir nou bezwen kontinnyelman pe revwar nou sistenm ledikasyon segonder e armoniz kalite progranm lekol ek bezwen marse lanplwa.

Dezyenm fason fer li, se atraver ledikasyon post segonder ki formel.  La osi nou bezwen revwar nou bann lenstitisyon ki pe provide sa ledikasyon post segonder pou lazenes Seselwa.  Nou bezwen fer sir ki nou revwar bann progranm ki sa bann lenstitisyon i donn lazenes Seselwa, bann progranm training par egzanp.

E trwazyenm fason fer li, se atraver bann business supported on the job training.  Sa osi i en laspe preparasyon lazenes Seselwa pou pran lanplwa alavenir ki ekstrememan enportan.  E taler nou’n antann lentervenan Onorab Arnephy refer sorti sa laspe, nou anvoy bann manrmay on the job training me selman nou pa monitor zot, nou pa evalye zot e in the process, bann manrmay i ganny servi koman bann soubalter.  Annou protez zot, annou pa anvoy zot lo on the job training pou zot vin bann soubalter.  Annou anvoy zot pou zot acquire bann skills ki neseser e pou zot kontinnyelman ranplas bann etranze ki pe fer sa bann travay ki se zot ki devret pe fer.  So, avek sa fodre ki i annan en bon sistenm monitoring, en bon sistenm evaliasyon pou nou garanti ki sa training ki nou pe donn sa bann manrmay i devlop dan bann skills ki zot acquire and therefore, zot ganny en travay dan sa domenn, apre ki zot in fer zot on the job training.

Katriyenm keksoz ki enportan ki nou bezwen devlope, se nou bezwen vwar bann areas kot i annan bann manrmay, bann lazenes ki pou zot lanplwa dan limenm i en challenge.  Annou devlop en progranm spesyal imedyatman ki met bokou lanfaz lo youth unemployment e annou target bann zenn ki ekonomikman dezavantaze.  Sa i en problenm mazer dan nou pei Sesel e nou bezwen met li anba microscope e nou bezwen devlop sa progranm imedyatman.

Youth unemployment i en problenm dan sa pei Mr Deputy.  So par egzanp, annou get bann ki vwar lanplwa koman en challenge tel ki bann school dropouts.  Bann manrmay pou en rezon ou en lot, zot kit lekol, zot vin bann dropouts e finalman zot vin bann delenkan ki napa en skill e ou vwar zot pe angaz zot dan bann aktivite anti-sosyal.  Annou fer mannyer nou idantifye sa bann zenn, annou anmas zot, annou annan en progranm ki anmas zot e donn zot sa bann skills ki zot pa’n kapab acquire dan lekol.

Mr Deputy, annou get bann zenn paran, bann paran ki bezwen sorti dan lekol akoz zot pregnant e annou swiv zot.  Annou vwar zot devlopman apre ki zot in ganny zot baba e annou annan sa progranm ki pou anmas zot e donn zot sa bann skills pou fer sir ki zot vin bann manman ki travay e cater pou sa ki zot bann zanfan i bezwen.

Annou get bann zenn avek dezabilite.  Sa osi i en kategori ki a mon avi Mr Deputy, nou bezwen gete.  I annan bann zenn ki annan dezabilite ki wi, i pa kapab fer nanryen.  Me i annan bann zenn avek serten dezabilite, me ki kapab ganny train pou zot acquire serten skills e antre dan sosyete, antre dan marse lanplwa e kontribye pozitivman.  Sa osi mon krwar nou bezwen met anba microscope e vwar kwa ki nou kapab fer pou sa bann zenn.

Annou get bann zenn ki sorti dan prizon, bann ex prizonnyen.  Mr Deputy, mwan mon enn bann dimoun ki krwar ki nou bezwen annan en bon progranm dan tou son laspe, ki pou ede rekonekte sa bann dimoun avek mainstream society.  Annou pa perdi zot akoz zot in fer en fot a laz 18an and therefore 5an plitar letan zot sorti dan prizon zot en nobody.  Nou perdi zot pou leres zot lavi.

Non Mr Deputy, mon krwar poudir Sesel koman en pei i kapab fer en keksoz pou sa bann dimoun e alors annou fer li.  Annou pa fer sa bann dimoun vin en lot statistik kot mank lanplwa i konsernen.  So, sa i bann areas, kot Sesel koman en pei i bezwen egalman focus pou deal avek sa sitiasyon mank lanplwa oubyen mank skills par bann zenn, pou ki finalman zot ganny anploye e ranplas bann travayer etranze ki pe fer bann travay ki nou tou ki la dan sa Lasanble nou konnen se bann Seselwa ki devret pe fer.

Nou bezwen annan en polisi nasyonal lo size kalite lenvestisman ki nou pou mete dan nou lazenes Seselwa, an relasyon avek lanplwa, an relasyon avek capacity building, an relasyon avek skills development, pou nou fer sir ki sa Seselwa ki vwar, oubyen sa lazenes Seselwa ki vwar lanplwa koman en challenge i annan sa skills pou li overcome sa challenge.

Mr Deputy, mon senkyenm pwen.  Enn bann pli gro travay ki nou annan pou fer an relasyon avek lanplwa dan sa pei, se reshape the mindset of bann Seselwa.  Reshape the mindset of lazenes vizavi lenportans travay konpare avek Welfare.  Annou reshape zot thinking pou nou kapab ede devlop en nasyon avek en kiltir travay, avek en kiltir travay dir.  Pou 18an oubyen pou plis ki 18an Mr Deputy, bokou Seselwa in ganny de keksoz, oubyen in mank 2 keksoz.  Enn, zot in mank, oubyen i annan en lack of empowerment kot instead of dir ok, mon en Seselwa, mon bezwen travay, mon bezwen training, mon bezwen capacity building pou mwan debout koman en zonm oubyen en fanm e kontribye dan devlopman nou sosyete, mon opt pou mwan al lo en Welfare.

Non Mr Deputy, sa i bezwen fini dan nou pei.  Welfare i bezwen la li, pou bann dimoun ki vreman pa kapab.  En dimoun avek en dezabilite i bezwen ganny en Welfare.  I annan serten sitiasyon, serten kondisyon, wi, en dimoun i bezwen ganny en Welfare. Me nou pa kapab annan en sosyete kot nou annan en pep oubyen en proporsyon nou pep ki krwar poudir i kapab depi 18an ziska 63an avan i ganny son sekirite depan lo en Welfare.  Non Mr Deputy, e i responsabilite lasosyete pou ed sa dimoun reshape son mindset, reshape son thinking pou li konpran ki savedir travay dir.  So, pou mwan, sa i en laspe ki enportan.

Mr Deputy, sizyenm pwen ki mon oule al lo la se, nasyonalman nou bezwen revwar bann diferan kondisyon travay dan tou domenn pou tou Seselwa.  Mon krwar sa i en legzersis enportan, i en legzersis neseser e to ou tar i pou bezwen ganny fer dan sa pei.  Lo kote saler par egzanp, annou annan konsistans.  Mr Deputy, mon pe demann konsistans dan lafason ki saler i ganny peye dan sa pei, pou fer sir ki nou anmenn fairness e nou anmenn lazistis.  Par egzanp, en legzanp senp ki mon kapab donnen, mon’n travay ek Minister Ledikasyon pou en kantite letan e mon’n eksperyans e monn vwar sa dan mon 2 lizye Mr Deputy.  En ansennyan avek 30an leksperyans, i bezwen kapab ganny en saler ki reflekte son leksperyans e son kouraz ki in donnen, ki in dedye pandan sa 30an ki in travay pou sa pei, menm si sa ansennyan par egzanp, i napa en degre.  Ou ava konpar li avek sa zenn ki’n vini avek son degre, nou konpran wi, me kalite saler ki sa ansennyan i gannyen, i bezwen annan serten lazistis avek, i bezwen annan serten fairness, i bezwen reflekte son 30an leksperyans, i bezwen reflekte son kouraz ki in donnen.  Se pou sa rezon ki mon pe demann en revi dan lafason ki saler i ganny kalkile dan sa pei Mr Deputy.  Dezyenm keksoz, dezyenm legzanp ki mon oule donnen, kondisyon travay en Seselwa ki per fer menm travay ek en etranze dan menm lanvironnman, i pa kapab enormeman diferan.  I pa kapab Mr Deputy, annan en huge gap ant sa ki sa Seselwa pe gannyen e sa ki a etranze pe gannyen.  I enzis Mr Deputy pou nou fer sa arive, nou pa kapab dan en tel sitiasyon vwar en etranze pe ganny de, trwa fwa plis ki sa Seselwa.  Sa nou bezwen revwar e nou bezwen re get ladan.  Nou bezwen egalman Mr Deputy, revwar peyman konpansasyon bann travayer an zeneral.  Anmenn lazistis, anmenn fairness, anmenn ekitabilite dan lafason ki konpansasyon i ganny kalkile.  En serten konpansasyon Mr Deputy ou servi en fixed amount, en serten kantite konpansasyon ou servi en proporsyon saler ki sa dimoun pe gannyen over a period of time.  Mon krwar poudir i annan en lenzistis la ki nou bezwen rearanze.  Ler ou servi en fixed amount, savedir ler sa dimoun li san ki ou pe servi en proporsyon son saler par egzanp, ler sa dimoun son saler i ogmante li, son konpansasyon i reste parey.  This is unjust Mr Deputy e sa i en keksoz ki nou bezwen fikse e nou bezwen aranze.

E setyenm pwen e dernyen pwen ki mon anvi koz lo la.  I bezwen annan en zefor nasyonal, en zefor byen kalkile, en zefor entelizan pou nou kapab fer retournen nou bann Seselwa ki’n ganny trained e ki ozordi pe travay aletranze.  Nou, nou pa la pou nou ziz sa bann dimoun, pou demann zot akoz zot pa ti retournen.  Mon pa krwar poudir sa i en lapros.  Mwan mon krwar poudir kot nou kapab antre an kontak avek sa bann dimoun, nou kapab negosye.  Nou negosye diferan kalite keksoz avek zot, zot kondisyon travay, landrwa reste eksetera, eksetera e nou zantiyman, dan en fason for me selman Mr Deputy, demann zot pou zot retourn dan zot pei.

Mon krwar poudir i annan en kantite, i annan en kantite pozisyon ki pe ganny pran par bann etranze ozordi dan sa pei, kot bann Seselwa napa sa skills oubyen kot i annan en mankman Seselwa avek sa skills, i annan en kantite sa bann pozisyon ki kapab ganny pran par bann Seselwa ki aletranze.  I annan bann pozisyon kle e enportan dan diferan domenn dan sa pei, mon kapab mansyonn plizyer domenn, dan sekter finansyel, dan sekter medikal.  Nou pe koz dokter, nou pe koz ners, nou pe koz bann dimoun ki annan leksperyans e kapasite dan domenn finansyel, ki kapab retourn Sesel e vin ranpli serten pozisyon enportan, me selman zot laba deor e zot pe travay pou en lot pei pou en kantite diferan rezon.  Annou rode akoz, annou vwar si nou kapab meet zot bann demann, mon krwar sa bann dimoun i bann dimoun ki rezonnab, bann ki anvi vini.  I annan bann ki’n ofer pou vini.  Zot in fer serten demann me Gouvernman in dir avek zot non, nou pa pou meet sa bann demann.  Zot reste Mr Deputy.  Annou negosye e annou vwar ki nou kapab fer.  Mon krwar si nou fer refleksyon dan sa direksyon, mon krwar sa i pou ed nou ranplas bokou etranze ki pe travay dan sa pei e i pou ed nou annan en lafors travayer ki vivan, ki for e egalman i pou ed Seselwa konpran poudir, koman en zonm oubyen koman en madanm ki’n ganny ou 16an, 17an, 18an anmontan, i ou responsabilite pou ou travay e travay dir e fer en kontribisyon enportan ver devlopman ou fanmiy e ver devlopman ekonomik ou pei. Mersi Mr Deputy.

 

MR DEPUTY SPEAKER

Bon, avek sa si napa, Onorab De Commarmond.

HON CHARLES DE COMMARMOND

Mersi Mr Deputy Speaker.  Mr Deputy Speaker, lo sa Mosyon ki devan nou, mon ti ava kontan dir de trwa parol.  En bon Mosyon an fen kont.  Set en bon Mosyon ki nou merit siporte.  Ou konnen, dan Sesel letan mon revwar listwar en pti pe, mon note, seryezman note ki lalit pou benefis e amelyorasyon kondisyon travay e devlopman bann travayer in ganny fer par parti SPUP pou komanse, SPPF e ozordi Parti Lepep pe kontinnyen dan sa semen.  Se nou sanpyon bann travayer.  Si ou vwar nou pe koz lo la ozordi, se nou menm nou ki’n anmenn sa devlopman.  Par kont, i ariv en letan kot nou bezwen osi asize reflesir, vwar si tou sa keksoz ki byen, tou sa bann zefor ki nou’n fer napa amelyorasyon pou nou kontinnyen fer avek.  Mon krwar sa Mosyon i permet nou kapab revwar sa e vwar kote ozordi kot nou’n arive, nou kapab fer pli byen ankor pou nou bann travayer.  Savedir, se sa ki nou dir lalit i kontinnyen, lalit pou amelyorasyon kondisyon travay i en lalit san ses, i en lalit ki al pli lwen ki sa.  E nou dan sa parkour nou Lasanble la nou pe diskit lo la pou kapab fer ki Legzekitiv Gouvernman i met an pratik serten keksoz ki nou pe reflesir ansanm la.  Nou swete ki lotorite konsernen i pe ekout nou, ankor ti ava’n anvoy enn de dimoun la I don’t know but selman ti a bon zot pran kontak avek Lasanble, pou gete bann pwen relevan e pertinan ki’n ganny leve dan sa deba, pou zot kapab met an pratik.  Dan sa Mosyon letan mon pe gete, mon’n ekout bann entervenan, en keksoz ki’n ganny sorti.  Travayer etranze versus travayer Seselwa.  Sa, i kapab rezourd demen bomaten sa.  Mon rapel de trwa lannen pase Idi Amin Dada ti fer sa en.  Idi Amin letan i vin opouvwar i fer tou travayer etranze ale non?  Apre ki’n arive avek pei?  Dan en problenm.  Nou isi Sesel byensir nou pa pou al dan sa direksyon.  Mwan mon’n dir sa akoz i enportan nou, nou reflesir seryezman lo la.  Nou popilasyon i tipti, nou responsabilite i gran.  Dan sa tipti popilasyon ou sa tipti pei, tipti pei an term later.  Me gran pei an term teritwar, me ek kantite responsabilite.  E nou travayer Seselwa nou pa kapab fer tousala nou menm, i enposib.  So, la kot nou bezwen absoliman travayer etranze.  Sa en pwen mon dir an pasan.  Me nou bezwen annan en lazistis la.  Bann entervenan mon krwar in tous lo sa pwen kot kondisyon, saler, i bezwen parey.  Kekfwa i ava annan enn de leksepsyon, I don’t know, me selman an zeneral i bezwen parey.  Me nou, nou problenm i pa la nou.  Nou Parti, nou Gouvernman in met preski tou striktir neseser an plas.  Parey mon’n dir, nou’n fer en lalit san ses, nou’n amelyor kondisyon e nou’n met en ta striktir an plas nou.  Preski tou nou keksoz i la.  Problenm nou pe gannyen, ek dimoun, nou prop Seselwa most of the time, mazorite ka, Seselwa ki dan sa bann responsabilite, i pa pe desarz zot responsabilite byen.  Mon a donn legzanp konkret ki mon pe sey dir pou substantiate mon pwen largiman.  Mon pran Ledikasyon.  Ok.  ledikasyon dan progranm ledikasyon dan curriculum, i bezwen osi mars kot a kot avek bezwen lanplwa.  Ou pa kapab dan labour market, ou bezwen teachers selman anmenmtan ou ferm NIE. Be kote ou pou ganny teachers?  Ou konnen poudir dan de trwa an mon pou bezwen tan teachers anplis e i pran 3an pou train en teacherTherefore, lannen prosenn, e la ou annan en mank teachers, lannen prosenn dan ou intake pou NIE i devret ogmante e ou komans fer ou piblisite la pou komans attract bann zenn pou vin dan sa domenn.       I menm zafer pou lapolis, pou nurse, pou travayer lagrikiltir, konstriksyon, you name it, custom officers, la ou pe sanz ou sistenm.  Ou vwar ou pou bezwen plis custom officers e bann ki enpe pli solid be ou bezwen ouver en semen dan sistenm ledikasyon sa.  Nou problenm i la nou.

 

MR DEPUTY SPEAKER

Menm pou MNAs.

 

HON CHARLES DE COMMARMOND

Wi, menm pou MNAs taler pou nepli annan, selman gran mersi napa etranze parmi nou.  Pa mank lwen.  E Mr Deputy Speaker, ladan nou annan en lot striktir la, nou annan NHRDC, li i la pou get sa li.  I la pou advise ledikasyon. Ledikasyon, i pa kapab devin lo la li.  En lot lenstans ki bezwen dir li.  I bezwen annan sa travay ansanm la e i annan en mankman dan nou pei lo la.  Swa, si napa sa mankman, then i annan en problenm volonte.  Nou ganny dir me nou pa fer akoz kekfwa en tel ki’n dir nou.  Be nou problenm alor i la, sa i enn.  Nou annan en lot keksoz akoz sa Mosyon i osi koz lo bann zenn letan in fini zot training prezan i antre dan lanplwa.

Lekel sa travayer kalifye e eksperyanse ozordi ki pa’n komans anba, ki koman in vini in vin sef li?  En dimoun i bezwen komans anba, dousman i monte.  Promosyon apre lot, ensidswit.  Be sa zenn alor letan i antre dan lanplwa, nou pa kapab touy li koman i vini dir li i napa leksperyans alor ou pa pou pran li.  Me sa ki pou fer ou pran li?  Sa ki pou fer ou landrwa travay aksepte sa travayer?  Be i annan Minister Lanplwa la ek tou son striktir on board. Me i bezwen empower.  Napa sa pouse, sa swivi la.  Pou annan en lot problenm.  UnionUnion gro manman problenm.  Union i pa mars ditou, mon pa vwar.  E Union li i sa lakle dan tou sa li.  Me si i pa sakouy li Union, nou pou kontinnyen zis la koze, li osi alor i annan en rol enportan.  Pourtan, Union nou ti komans avek nou.  SPUP, SPPF.  Union in for deryer travayer.  Me la mon vwar Union i pe mor, alor i bezwen relev li, redinamiz li pou kapab ankouraz travayer pou vin on board pou kapab get zot kondisyon.

Me nou annan, anfen kont en lot zafer la Mr Speaker.  Mon’n ekout sa ki’n met Mosyon devan e i dir i annan 1712 vacancies e i annan 1218 aplikan.  Konmsi, si tou sa aplikan i paret i kapab ganny en lanplwa demen bomaten, i pou reste ankor 500 ekek, 400 ekek vacancies.  Me kimannyer konmsi ziska la i ankor koumsa?  E i pe ogmante.  Alor, la i annan en problenm.  Sa kestyon localization, byensir i pa pou marse akoz nou, olye localize sa post, nou’n natiraliz sa dimoun.  Sa en problenm.  Me lot kote, pou annan en lager ant Minister Lanplwa avek Imigrasyon konsernan GOP.  Sa osi i annan lefe lo tou sa.  Minister Lanplwa, ou bezwen travayer nek i donn laprouvasyon.  GOP, la mon aprann i komans annan en pti pe kontrol, be avan, napa.  Minister Lanplwa i dir ok, ou kapab fer vini 50 travayer, GOP i ganny donnen.  Be nou nou bezwen annan en mekanizm ki kontrol sa, ki dir tyanbo, ou pa pe gannyen GOP pou par egzanp cashier dan laboutik ankor.  Napa GOP ankor.  I bezwen annan en lotorite dan nou pei ki dir.  Prezan ou lager, gele, napa.  Ou oule ferm ou biznes, ou laboutik, fermen si ou oule.  I pou annan en lot ki pou ouver.  Nou, nou bezwen strong.  Sa polisi i bezwen marse.  Polisi i la li, me nou pa pe enplimant li.  Letan nou dir napa, prezan ou, ou bezwen ou travayer, ou a bezwen pran sa de trwa Seselwa.  I annan Seselwa dan sa 1218 la, i annan ki kalifye pou vin cashier ladan.  Me lefe ki ou les sa boutikye, ou donn li son ta dimoun ki i oule fer vini, then, i pa pou pran ou Seselwa byensir.  E prezan, letan ou dir li, i dir ou non, mon ti pibliye, Seselwa lot zour mon ti anploy 2, apre mon ti vwar in pran 2 latet zonnyon in met dan sak pe al avek.  Sa i sot anler i kriye, 2 latet zonnyon in pran pou al avek.  Selman, son nasyon ki la ek li, i pa vin konplent letan i pran.  Mwan mon poz mon lekor en kestyon dan sa pei ozordi.  Letan mon gete dan konstriksyon, letan mon gete dan bann biznes laboutik.  Sa bann owner ozordi mazorite zot in vin Seselwa la.  Kote zot in komanse?  Sa mon a les Seselwa reflesir pou limenm, kote in komanse?  Mon pa oule nonm non dimoun, be kote ti komanse sa?  Ok.  Alor, zot i ok, letan ou Seselwa pa ok.  Be nou, lotorite i dan nou lanmen e nou bezwen dir stop it.  Non, pa pe donn ou.  Si nou al koumsa, nou a gannyen travay pou nou bann dimoun.  Son lot pwen ankor, se ki dan sa roulman la, i annan kestyon Welfare ki vin an zwe.  Ou konnen sa kestyon Welfare, li i sipoze la pe kal sa dimoun ki vreman dan bezwen.

Prezan la, yer par egzanp i annan 2 fiy Cascade, zot ti pe travay dan lotel.  Be pou serten rezon, enn son met in maltret li apre in bezwen sorti.  Lot, problenm dan lakour, i ti Praslin in bezwen desann Mahe, la toulede i pa travay.  Zot kalifye zot en, zot annan leksperyans zot.  Be ou konnen poudir i annan en bon 6 mwan la zot pe rod en travay dan lotel pankor gannyen?  Pourtan, zot dir mwan pe rod travayer menm dan lotel.  Me mon pa ganny en konpran mwan.  In al kot Welfare akoz napa nanryen dan lakour.  Be letan in al kot Welfare, Welfare i dir non, pa pou ranpli form.  Ou par anba 25an, ou pa pou ranpli form, e la kimannyer zot pou viv?  I bezwen annan en sinerzi la kot letan ou vini, i gete akoz ou pe rod welfare, ou napa travay, sa zofisye travay i la.  I dir ok, donn ou bann dokiman, tyeke.  Me mon krwar pa pou difisil, pa devret pran ni 6 mwan pou plas sa dimoun dan en landrwa.  Antretan, silvouple asiste li ek en Welfare. Me konmsi sa fodre met legan pou fer sa?  E nou dimoun ki la dan sa louvraz la, pa vwar sa ki nou pe sey dir nou?  Pa kapab met an pratik?  I osi senp ki sa, be si nou pa kapab met sa an pratik, then i annan en gro problenm.

Dernyen pwen mon pou met devan Mr Deputy Speaker, nou koz Seselwa kalifye ki retournen, ok.  Nou, nou pa kapab osi al beg konmsi dir Seselwa tousala desann, vini, i annan kondisyon rosy pou ou.  Prezan ou Seselwa ki’n la ater li, in donn ou tou sa koudmen, li, i pa ganny nanryen rosy.  I pa pou balanse la.  Me selman, i annan en lot keksoz.  Nou annan Seselwa ki’n fer letan deor, in etidye, in travay dan serten domenn deor dan pei e i vini, i deside pou antre dan son pei natal, i dir mwan mon vin reste net Sesel, san okenn aryer panse e i vin partaz son leksperyans avek nou e i pe rod en louvraz.  Me menm ek son degre, ek tou son leksperyans parfwa i vin difisil en.  Mon pou donn ou en legzanp konkret.  Kekfwa Minister konsernen i ava take note of that, i al rod sa dimoun ankor.  Nou annan problenm dan sosyal, kantite problenm dan Minister Sosyal, Departman Sosyal, lanmenm la ki nou annan bokou, bokou problenm.  I annan dimoun kalifye ek Masters ek plizyer lannen leksperyans ki’n travay Langleter, mon pa pe koz konmsi dan en lot pei, Langleter after all countries.  Be i komanse, laba i dir be non, avek ou kalifikasyon mon krwar ou a vin zis en Senior Social Officer.  Be i annan degre plis ki sa bann dimoun ki dan Sosyal limenm.  Ou fer li vin zis en Senior Welfare Officer?  Ki saler ou pou donn li pou son degre ek son leksperyans?  E oli ki nou pe koze?  Annou met an pratik silvouple.  E mwan, mon demann Minis, rod sa dimoun.  Nou ava kapab kontakte, mon pa oule nonm non dimoun la zis pou en rezon soz, me mon krwar serten dimoun i konnen ki mon pe koze.  Be nou bezwen, nou annan en Seselwa, en Seselwa ki leker i avek nou.  I oule vin donn en koudmen pou aranze, pou fer pli byen me nou pa ouver lebra ek li.  Nou kondisyon nou pe met devan li, i ale.  En prive pou al pran li pou en lot louvraz e nou along the line nou perdi.

So, avek sa Mr Deputy Speaker, mon krwar ki sa Mosyon i en bon Mosyon.  Ti ava byen bon ki lotorite konsernen i pran bann pwen enportan dan nou bann deliberasyon e sey silvouple, nou beg zot, esey met an pratik pou nou pei al en pe ankor pli devan e rezourd en pe nou bann problenm pou nou bann dimoun, sirtou ki pa pe travay e bann zenn ki pe rod en travay.  Avek sa, mon demann tou dimoun pou siport sa Mosyon.  Mersi.

 

MR DEPUTY SPEAKER

Onorab Rose.

 

HON MARIE-ANTOINETTE ROSE

Mersi Mr Deputy.  Mr Deputy, mon pa pou long akoz en kantite pwen ki mon ti anvi fer resorti Onorab ki’n koz avan mwan, Onorab De Commarmond in fer tre, tre byen alors mon pou sey pa repet sa bann pwen otan ki posib.  Me toudmenm, mon ti a kontan reiterate sa pwen ki in fer sorti e ki serten Manm in fer resorti ki sa lalit pou anmenn status travayer e kondisyon travay dan nou pei in komans avek nou Parti e bann Manm in fer resorti parkour sa lalit.  Mon ti a kontan osi remind The House ki ziska ozordi sa travay i kontinnyen.  Ziska ozordi nou leadership ozordi pe kontinnyen fer tou sa ki posib pou met lanmen lo sa problenm.

Par egzanp, nou annan en kantite progranm travay dan nou pei ozordi.  Nou annan re-skilling program, nou annan youth training program, nou annan localization program, nou annan from welfare to work program.  Nou annan vocational training program, nou annan Young Leaders program.  Nou annan en kantite sa bann progranm ozordi zisteman avek bi sey met lanmen lo sa bann problenm ki nou’n koz lo la apre midi.  Mon krwar alors ki problenm?  Si nou annan tou sa bann progranm ki Gouvernman pe sey met an plas, nou pe sey travay avek, Ledikasyon eksetera.  Ki problenm?  E mon krwar Onorab De Commarmond in met vreman lanmen lo sa problenm e sa se met an plas en sistenm ki marse, me osi annan plis lenerzi ant bann diferan Departman ki pe fer marse sa bann progranm.  E in donn diferan legzanp lo kimannyer, ler en dimoun i sorti dan en lanmen e i al dan en lot, i devret annan sinerzi, i devret annan follow up.  Ler i sorti dan ledikasyon i al dan employment i devret annan follow up, ler i sorti kot Welfare i pe al dan employment i devret annan en sinerzi akoz parey nou kapab apresye e rekonnet, i annan diferan Departman ki sakenn pe sey tyanbo en bout.

Me osi Mr Deputy, ki nou pli gran challenge, employment challenge ozordi.  Enn, se retenir, parey Mosyon i demande, se retenir nou specialized labour force.  Nou preski pa kapab retenir bann qualified labour force, nou bann dimoun ki’n ganny trained, ki kalifye dan diferan domenn.  E sa i akoz petet dimoun i realize ki kondisyon travay isi pa otan satisfezan pou zot kalifikasyon.  Me osi iannan en competitive international labour market.  Onorab Bresson in fer resorti ki Hilton i rotate son bann Managers.  Savedir ozordi nou train en dimoun pa zis pou Sesel me pou lemonn e sa i en defi pou nou.  Me mon pou fer sorti en pwen ki petet pa’n fer resorti.  Nou pli gro problenm ozordi, napa nanryen pou fer avek nou bann stratezi, napa preski nanryen pou fer avek nou Lalwa, menm si i pe revize, napa nanryen pou fer avek sistenm ki an plas parey Onorab De Commarmond in fer resorti.  Me dimoun.  Nou pli gro defi ozordi se dimoun e ozordi mon anvi koz lo middle management.  Ozordi dan landrwa travay i annan en pake problenm avek middle management.  Petet pa top management, petet pa lower management, lower level of bann employees me middle management.  Sa dimoun ki anploy sa travayer, sa dimoun ki donn sa dimoun en appraisal, sa dimoun ki pou fer li ganny en promosyon demen eksetera e la ki problenm mindset i ete.  Mwan mon krwar i la.  Nou annan en problenm mindset avek middle management ki ou a dire enn ler zot per nouvo lide, zot per nouvo dimoun pou antre e zot per fresh blood pou antre e sanz en pe lafason ki travay in toultan ganny fer.  E se la kot en kantite nou bann graduates i ganny pake problenm.  Mon fek vwar en zenn travayer, mon pa pou dir ki Minister semenn pase, en tre bon travayer akoz mon’n a plizyer repriz ganny servis avek li e i anvi kite dan son landrwa travay because of middle management.  Akoz in ganny en let warning pou en keksoz ki in fer, ki si i byen sa ki in dir mwan in fer, he is right.  Sa dimoun i right pou li pa fer sa keksoz akoz Kod Etik i dir li pa fer.  E son middle management i ekrir li en let i dir li, non, you are wrong e tou sa tann servis, tou sa bann bon rekomandasyon ki in gannyen, tou sa bann bon let ki dimoun in ekrir konsernan son travay, i pe met dekote e dir be look, plito mon ale, mon al travay en pti pe aletranze, konmsi mon a refer mon lespri.  E se la kot nou perdi.  Parey Onorab De Commarmond in fer resorti, sa dimoun kalifye, retournen Sesel, i pa’n anmenn son let kot top management li, in anmenn son let kot HR Officer ki ozordi pe vir li an ron.  Alors Mr Deputy, nou vreman bezwen regard middle management, on all levels in the public sector, in the private sector regarde ki sa bann dimoun pe fer e la nou pou vwar en pake problenm mindset e en pake problenm travay avek zot.  Nou osi bezwen annan en training parey in ganny fer resorti, training ki meet the labour force.  In fer resorti.  Nou gat en kantite larzan dan sa pei pou train manrmay pou al dan tourism.  Pa vre?  En kantite.  Me plis ki lanmwatye pa fer sa travay eventually. E nou pei nou kontinnyen train zot e nou train zot pou al fer lezot travay, oubyen zot al dan en lot domenn e zot ganny retraining.  Me nou bezwen vreman regarde, be eski sa ta dimoun ki nou pe train dan tourism zot pe end up. And what is the problem in tourism ki dekouraz zot par egzanp, pou zot kontinny sa travay?

Mr Deputy, Onorab De Commarmond in fer resorti sa pwen, me i en tre bon pwen.  Nou lekonomi, tou lekonomi lemonn ozordi i depan lo travayer etranze e sa matematik i senp.  Nou annan 15 mil travayer etranze e nou pei i kapab prodwir selman 1500 travayer, si tou bann zenn ki antre dan sistenm lekol i evantyelman i pa end up dan prizon eksetera, eksetera, i evantyelman antre dan labour market, 1500 par lannen.  E sa i pran nou, nou kapab kalkile konbyen lannen i pou pran nou si nou anvi ranplas nou travayer etranze par Seselwa.  I pratikman enposib e fodre nou aksepte koman en pei, ki i en realite and it’s a fact of the international labour market ki nou bezwen viv avek travayer etranze.  Problenm se kote, ki zot fer e kimannyer zot enterakte avek nou travayer Seselwa.  Ankor i pa sistenm, ankor i pa Lalwa, ankor i annan pou fer avek dimoun e enteraksyon avek kanmarad.

Mr Deputy, mon kapab donn ou legzanp Lanmerik.  Lekonomi Lanmerik i depan an gran parti lo bann migrant workers.  Dimoun ki antre Lanmerik, pou travay dan lotel travay lo semen eksetera, eksetera e it’s a fact of life.  Nou konnen par egzanp UAE i depan en kantite lo travayer etranze, menm si zot pey zot prop travayer en kantite larzan.  Zot depan en kantite lo travayer etranze.  Sengapour i depan en kantite lo travayer etranze.  So, annou pa fer nou lekor krwar ki isi nou en pti pei, e pti ki nou ete nou pa kapab depan lo travayer etranze.  Me annou regarde ki sa bann pei i annan an plas, ki fer ki zot travayer lokal osi, pa kite pou al dan en lot pei.  Sa osi fodre nou regarde, what do they have in place, what have they done? Kwa ki nou nou kapab fer ki zot osi zot in fer ki fer sir ki nou kapab retenir nou travayer Seselwa?  Mwan, mon pli enterese avek en graduate ki retournen, ki dir be bon mon anvi travay pou Sesel.  Mon pli enterese fer sir ki sa graduate i ganny li en bout later pou komans son fanmiy, mon pli enterese lager pou sa graduate pou ganny li en bon saler.  Mon pli enterese lager pou sa graduate ki’n deside retournen, tan ki mon dakor ki nou bezwen rod bann dimoun ki a letranze pou vin Sesel, me nou bezwen fer sir ki nou pa kree bann kondisyon ki pa normal pou en serten group travayer e non pou bann graduates ki isi Sesel pe travay.  Sa ki sa bann pei i annan Mr Deputy, en kantite zot se en well renumerated public service.  I pa fasil pou nou ariv sa koman en pei, nou konnen akoz nou annan en lokonomi pou balanse anba en progranm IMF, reform eksetera.  Me eventually this is where we should arive, nou devret arive.  A well renumerated public service.  Sengapour ankor en legzanp kot dimoun ki travay dan servis piblik i reste akoz its competitive, akoz i well renumerated, akoz i fer ou fyer ki ou en travayer servis piblik.  So, nou Gouvernman nou bezwen asize etidye e regarde kimannyer nou fer ki nou servis piblik i vin byen, i pey byen.

Me problenm labour i pa zis in the public service, it is also in the private sector e la nou bezwen met lanfaz lo sa localization of post in the private sector, anvi tou sa bann kalite trik ki nou’n koz lo la.  Fer krwar in ganny GOP, fer krwar napa GOP, ranplas lot, ranplas lot e mon totalman dakor avek Onorab De Commarmond.  I annan serten travay ki nou bezwen dir non.  Ou pe rod GOP pou cashier, non.  Ou pe rod GOP pou, mon pa konnen mwan, drayver, non.  Ou pe rod GOP pou middle management in tourism. Annou gete si sa 15 sepa 20 graduate ki’n retournen zot dan travay, zot in gannyen?  Non, non, non, nou annan en dimoun la, tel dimoun ou kapab pran li.  Mon krwar se la kot nou bezwen vreman met lanmen e tonm dakor ki i annan serten travay ki nou fer sir, pou en pe letan omwen, fer sir ki Seselwa ki pe okipe an vi, tou sa bann loop holes, tou sa bann laport par deryer ki zot kapab antre e zisteman donn nou sa challenge.

Mr Deputy, i osi annan e mon refer referans avek Sengapour akoz Sengapour i preski menm grander, menm si son lekonomi i diferan avek pou nou, i preski menm grander avek Sesel, i annan en culture of integrity e mon krwar i enportan ki nou bezwen etablir en culture of public integrity. Sa Lalwa ki nou ti pase semenn pase dan Lasanble, i zisteman al dan sa direksyon.  I annan diferan mekanizm ki nou kapab met an plas, pou fer sir ki ler nou Seselwa i antre dan travay i enteg.  I fer byen son louvraz.  I pe delivre.  I pe fer sir ki i retenir sa travay avek en nivo entegrite ki demande.  E sa i goes back to nou public schools and private schools, me i go back to the public education system kot nou bezwen byen boner komans etablir bann bon fason fer in the future labour force.  Bann dimoun ki pou antre dan landrwa travay, pou ki li i dir ou, ozordi dimoun i dir ou be mwan mon annan O Level alors mon pa pou al waitress.  Me ozordi en O Level i preski rien.  I preski nanryen in the labour force.  Fodre nou komans edik nou bann dimoun.  Pa tou dimoun ki pou kapab fer en A Level.  Let ou’n ganny sa pti bout papye, ou bezwen komans anba.  Wi ou bezwen komans anba akoz nou tou nou ti komans anba.  I annan dimoun osi koman i ganny en pti sertifika i anvi monte, i pli konnen ki son sef.  I annan tou sa bann problenm latitid dimoun ankor, it goes back to the same problem, se latitid dimoun.

Mr Deputy, mon pou refer en pwen ki toultan mon fer resorti e sa se annan en public service school.  Nou bezwen Sesel annan en public service school.  Ler Onorab Bresson in koz lo reponn telefonn, it goes back to annan en lekol ki dir ou lafason fer.  Ozordi nou anploy en dimoun dan Gouvernman oubyen dan prive.  Eski vreman nou’n asize nou’n dir ek sa dimoun manyer pou reponn telefonn?  Nou’n asize nou’n dir li lala ki ou fer, lala ki ou fer, lala ki ou pa sipoze fer?  Non.  E zisteman koman sa dimoun i fer premye fot, nou dir li non, out.  Ou pa sipoze fer sa.  So, nou vreman bezwen gete eski training ki nou pe donnen pe meet bann real needs in the labour market.

E dernyen pwen Mr Deputy, se nou bezwen annan en stratezi ki ankouraz nou travayer ki isi pou reste dan nou pei.  Sa mon krwar i tre, tre enportan.  Reste dan Sesel e travay dan Sesel akoz i en defi e sa bann ki retournen i annan ki kit pei.  Mon annan statistik devan mwan Mr Deputy, dimoun ki kit employment, bann graduate ki ki pei, graduate ki fail to return, bann graduate ki fail to complete the bonding period.  Bann graduate ki pa termin zot letid e depi 2006 ziska 2011 sa in kout nou pei R33 milyon.  plis ki R33 milyon. This is how much it’s costing us e ki nou kapab fer avek R33 milyon?  Nou kapab remet dan Ledikasyon, nou kapab met dan Lasante, nou kapab met dan bann servis piblik dan distrik.  Annou deside koman en Lasanble ki nou anvi fer avek R33 milyon.  Be the problem of the labour market remains a big problem e ozordi petet enn nou bann pli gran challenge ki nou annan koman en lekonomi e en demokrasi modern.

So, mon’n met sa sif la akoz i tre sokan ki dan zis 5an nou’n perdi R33 milyon e bokou plis akoz si nou ti annan sa bann dimoun ki ti’n retournen, nou ti annan sa bann dimoun ki ti pe travay, zot ti pe donn nou bokou plis rannman dan nou lekonomi.

Avek sa Mr Deputy, mon pou siport sa Mosyon, me mon osi ti ava demande ki Minister konsernen e bann diferan Departman i pran konsiderasyon bann rekomandasyon ki nou’n met devan.  Mon pou personnelman take up sa Mosyon avek Minister konsernen akoz mon konsernen avek e mon krwar i annan propozisyon ki’n ganny fer ozordi ki Gouvernman i devret pe take on board e si selman i ti a kapab fer li, nou ti a kapab vreman komans met lanmen lo sa problenm ki ozordi i en problenm e demen i riske eksploz ek nou si nou pa vreman met lanmen lo la.  Mersi Mr Deputy.

 

 

 

MR DEPUTY SPEAKER

Bon, loter Mosyon, right of reply.

 

HON MELVAL DUGASSE

Mersi Mr Deputy.  Premyerman mon ti ava kontan remersi tou Manm ki’n entervenir lo sa Mosyon.  Mon vreman apresye zot bann propozisyon e zot bann largiman, pou pouse ki sa Mosyon i ganny son vre valer e merit.

I annan en kantite keksoz ki’n ganny dir.  I annan en serten keksoz ki merit plis refleksyon profon lo la, me zeneralman nou annan en konsansis ki nou tou nou tonm dakor ki sa Mosyon i annan son merit.  La mon anvi profit sa lokazyon pou enplor avek bann Minister konsernen, tel ki Minister Lanplwa e Resours Imen, Minister Zafer Entern, Minister Ledikasyon, Departman Lazenes, pou konsider bann propozisyon ki’n ganny souleve selon son merit.  Annou pran sa lapros kot nou travay ansanm pou trouv en solisyon ki pou benefis nou pei.

Avek sa enn de mo mon pou demann tou Manm pou donn sipor sa Mosyon.  Mersi.

 

 

 

MR DEPUTY SPEAKER

Bon, in ariv ler pou nou pran en vot lo sa Mosyon.  Tou bann ki an faver lev zot lanmen?  Inanim.  Premye Mosyon in ganny aprouve.

Bon nou annan en dezyenm Mosyon lo Order Paper e pou ler ki’n arive nou ava aret la pou ozordi e nou a rezwenn Mardi le 20 Novanm.

 

(Adjournment)