::
Home » Verbatim » Verbatim - Third Term 2012 » Thursday 13th December, 2012

Thursday 13th December, 2012

NATIONAL ASSEMBLY OF SEYCHELLES

Thursday 13th December 2012

The Assembly met at 9.05am

Moment of Reflection

Mr Speaker in the Chair

MR SPEAKER

Bonzour, bonzour tou bann Manm Onorab, bonzour Minis e son delegasyon, tou bann ki pe ekout nou bonzour.  Ozordi nou annan 3 Bills devan nou, ki pe ganny pran par Minis pour Finans, Minis Pierre Laporte.  Avan nou al dan bann Second Readings bann diferan Bills nou annan nou en First Reading pou fer lo Supplimentary Appropriation.

 

THE CLERK

This Act may be cited as a Supplementary Appropriation number 2 Act 2012.

MR SPEAKER

Ok, nou ava pran premye Bill ki lo Order Paper e sa se Value Added Bill e avan ki nou kapab pran sa Bill i pou neseser ki nou waive the 7 days requirements ki ant first ek second reading, e pour sa arive fodre mon ganny en Mosyon.

HON MARIE-ANTOINETTE ROSE

Mr Speaker anba Order 64(1) mon move ki nou waive sa 7 days requirements pou nou kapab pran Second Reading of the Bill prior to the…….

MR SPEAKER

Ok.  Okenn ki segonde?

HON CHARLES DE COMMARMOND

Mosyon i ganny segonde Mr Speaker.

MR SPEAKER

Bon, bann ki an faver ki sa i ganny waive lev zot lanmen?  Okenn ki kont?  Bon nou a pran sa Value Added Tax. Mon ava ganny en Motion for Second Reading.

HON MARIE-ANTOINETTE ROSE

Mr Speaker anba Order mon move ki nou lir sa Bill en dezyenm fwa.

MR SPEAKER

Mon ava envit Onorab De Commarmond pou segonn sa Mosyon.

HON CHARLES DE COMMARMOND

Mr Speaker mersi, mon segonn sa Mosyon.

 

MR SPEAKER

Bon mon a envit Minis aprezan pou entrodwir son Bill.

MINISTER PIERRE LAPORTE

Mr Speaker, Leader Gouvernment Business, Leader Lopozisyon, Onorab Manm Lasanble Nasyonal, parey nou tou nou okouran an Zanvye 2013 nouvo sistenm tax VAT pou ganny enplimante.  An preparasyon pou son lansman e dan bann diskisyon ki nou’n annan enkli avek bann stakeholders nou’n vwar li neseser pou fer detrwa lamannman dan Lalwa VAT pou pran kont parmi lezot fakter serten spesifisite nou lekonomi.

Bann lamannman ki pe ganny propoze ozordi dan VAT Amendment Act 2012 i annan pou bi prensipal anmenn serten benefis an se ki konsern fason peyman VAT pou bann biznes letan zot enport bann komodite kapital ouswa capital goods an Angle e osi enkli bann biznes ki fer lanrezistreman volonter pou pey VAT.

Value Added Tax Amendment Bill 2012 i propoze pou fer lamannman dan bann seksyon swivan, seksyon 2, 13, 15, 33, 35, e 37 e fer provizyon konm swivan: dabor entrodiksyon konsept capital goods ki bann byen kapital lie plito avek lenvestisman e osi minor operating equipment ouswa bann byen lekipman plito ki al dan loperasyon biznes.  I enportan pou fer distenksyon dan sa de definisyon Mr Speaker akoz regman ler biznes i pey taxVAT pa pou bezwen ganny peye deswit letan biznes i enport bann tel komodite e sa tax i kapab ganny peye par morso e sa i ava ede pou serten biznes fer fas avek zot cash flow.

An sa ki konsern definisyon minor capital equipment sa i pou retir tou bann biznes ki servi bann tel lekipman tel ki bann fermye, peser e bann biznes tourizm ki zot pa bezwen pey VAT.

Dezyenmman Mr Speaker retir definisyon Customs Director General of Customs e Trades Tax Act e ranplas zot par Assistant Commissioner of Customs e Customs Management Act respektivman.  Sa de lamannman i senpleman reflekte lentrodiksyon nouvo Lalwa Customs Management Act kot Director General of Customs i ganny ranplase par Assistant Commissioner of Customs e Trades Tax Act i ganny ranplase par Customs Management Act.

Trwazyenmman, tax ki ti inisyalman ganny tire lo bann komodite ki pa’n ganny servi ouswa ganny dispoze i ganny remet avek Komisyoner Reveni.  Si kondisyon ou dediksyon i sanze, Mr Speaker par egzanp en lekipman ki’n ganny aste par en konpannyen ki pey VAT ki’n ganny ranbourse demen i ganny vann avek en biznes ki pa dan VAT sa biznes pou bezwen ranbours sa larzan ki limenm li in ganny ranbourse e sa i ava ganny remet avek SRC.

En lot provizyon se en provizyon ki defini kad legal oubyen servis in ganny legalman konsidere koman in ganny ofer.  Sa i ki legalman en byen ou servis i ganny konsidere ki’n ganny ofer letan ki Invoice i ganny fer.

En lot lamannman Mr Speaker, se en seksyon ki senpleman demande ki mon leavy i ganny ranplase par mo charge.

Mr Speaker seksyon F e seksyon G i propoz serten lamannman dan lafason ki filing bann VAT return par bann dimoun ki ganny takse ki’n file en lanrezistreman volonter.  Sa de seksyon i dabor senpleman demande ki provizyon i ganny kouver dan bann biznes ki fer lanrezistreman volonter pou pey VAT ki zot return i ganny rikorde avek SRC.  An plis i osi annan en definisyon ki pou fer li posib pou bann biznes ki fer lanrezistreman volonter i kapab fer peyman VAT lo en baz trimestriyel tou le trwa mwan olye ki zot fer li tou le mwan.  Sa osi i a fer ki bann ki anrezistre volonterman i kapab ganny sa privilez pou pey son bann obligasyon VAT dan en peryod difere.

Seksyon H Mr Speaker i anmenn provizyon konsernan refund dan bann ka kot tax lo input tax i plis ki total output tax pou nenport peryod VAT.  Sa enn i fer provizyon pou fasilit ranboursman VAT letan bann input parey mon’n dir i plis ki output.

Mr Speaker mon demann Lasanble Nasyonal pou aprouv sa Value Added Tax Amendment 2012 e mon remersi Lasanble.

 

MR SPEAKER

Bon deba i ouver Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker mon pou tre kourt lo sa Proze De Lwa devan nou e sirtou ki i straight forward.  I bon sa bann sanzman ki Minis pe anmennen dan sa Proze De Lwa akoz i permet sirtou pti biznes, sirtou par egzanp peser, fermye konmsi kapab osi benefisye sa ki nou apel TIA avan bann lo kote touris zot ti pe gannyen prezan la par egzanp si en bann biznes ti pe benefisye sa aprezan en nouvo biznes pe antre i pou perdi li i pa pou benefisye si ou pa fer sa bann sanzman.  Kimannyer i pe fer la alors en pti biznes osi ki pe antre dan sa kalite lendistri, kalite biznes i ava kapab osi benefisye dan sa fason.  Prezan i met tou dimoun lo menm kalite keksoz, akoz avan enn ler bann ki TIA, en bann sepakwa, konmsi en bann kalite konsesyon, an brit an bann, en bann i benefisye plis ki lezot.  La kimannyer mon vwar pe fer tou i ava lo menm level.

Selman mon annan en kestyon ki Minis ti ava bon i esplik nou operater touris akoz in dir letan par egzanp en businessman la or en biznes, en fermye, en peser dizon ouswa dir operater touris in aste en minor operating equipment prezan la i oule vann, si ou pa fer atansyon la sa pou vin en biznes andeor lezot biznes sa, en boug i aste apre i vann, e ou’n dir ou ki pou annan charges lo la letan i pou vann zis parey en dimoun ki ganny loto duty free i aste sa loto letan i pou vann si sa peryod letan ki sa duty pankor efas net i vann sa loto, sa transpor sa dimoun ki aste pou bezwen pey sa bout duty ki reste lo la.  Mon ti oule ou eksplik nou sa kler akoz konmsi ki lavi sa lekipman ki i pe gannyen anba sa – avek sa benefis la?  E ki kantite depresiasyon i ganny mete lo la?  Pandan konbyen letan ziska ler ki sa lekipman, sa minor operating equipment la i ava fini net e la sa peser ouswa sa fermye, sa pti biznes i kapab petet discard sa keksoz ouswa vann then i pou napa charges or i pou annan charges ziska sa lekipman i fini konpletman son lavi.  Mon krwar ou konpran ki mon pe sey dir me i demann en lesplikasyon lo la pou ki dimoun i konpran kimannyer pou kapab servi sa benefis korekteman e non pa abiz lo la e fer li avek lentelizans.

Dezyenmman sa kestyon VAT la, sa kestyon ki en biznes i kapab pey li toule trwa mwan si i pey davans, i byen i permet cash flow.  Akoz enn ler dan biznes i annan bann businessmen son larzan i la deswit kan sa prodwi i pa ankor an realite ganny vann akoz larzan pankor antre, i afekte son cash flow.  Alor mon krwar ki i byen e si ou a pe konsider, si Minister ek lezot sanzman nou’n sanz Lalwa avan zafer custom mon a les lezot dimoun koz lo lezot keksoz.  Mon krwar sa ki sa Bill pe anmennen i byen i a permet businessmen konmsi en pti pe pli, mars pli byen tou keksoz i ava lo menm lalinny konmsi ou met en pti pe disiplin, en pti pe lord dan sa bann zafer e mwan mon krwar i ok mon ti ava demann Lasanble nou vot lo la enpe vitman.  Mersi.

 

MR SPEAKER

Onorab Vidot.

 

HON KEVIN VIDOT

Mersi, bonzour Mr Speaker, koleg Onorab e Minis.  Mr Speaker parey Onorab avan mwan in dir mon krwar ki sa bann amannman ki pe anmennen lo sa Bill i straight forward e pa nesesit gran deba lo la a mon avi ouswa gran lentervenans lo la.  Me toudmenm mon krwar i enportan pou note ki vreman sa bann amannman ki pe ganny fer lo sa Bill i bann amannman ki enportan a mon avi e sirtou Mr Speaker ler nou pe koz lo sa bann sanzman – entrodiksyon kot nou pe koz capital goods e a mon avi pou mwan i pou redwir kou loperasyon pou en biznes e sa kou i ava ganny incurred plitar dan son loperasyon parey nou dir ouswa dan en accrual basis.

Mr Speaker mon krwar sa i neseser ozordi vi ki nou ankor pe tann bann dimoun pe dir, nou ankor pe vwar bann zournal pe dir ki entrodiksyon VAT i pou neseser ki i annan en logmantasyon dan kou loperasyon en biznes.  Mon krwar Minis dan son reply ti ava neseser pou eksplik nou osi si sa bann lentrodiksyon VAT ouswa sa bann amannman ki pe ganny fer la i pou nesesit annan plis mendev dan sa lakonpannyen.  Eski i pou nesesit enpe plis larzan osi pou kapab fer sa VAT marse dan en lakonpannyen swa gran, swa mwayen, swa bann pti biznes parey nou pe koz lo la.

Mr Speaker mon pli enportan mon pli krwar e mon pli enterese avek bann pti biznes akoz vreman bann pti biznes i bann biznes ki nou oule zot bouze zot marse e zot ede dan lekonomi Sesel, zot ede ver devlopman ekonomik ek sosyal nou pei e vreman anmenn kwasans ekonomik.  Mon krwar sa ki enportan dan tou keksoz depi dan Bidze nou pe koz lo la se kwasans ekonomik me i enportan ki nou annan kwasans ekonomik ki nou kapab soutenir ki pa enn ki nou vwar en plus ozordi me demn nou dan en minus.

So pou mwan Mr Speaker sa bann lamannman mon krwar i neseser e mon krwar i enportan e mon swete i ava ed nou bann pti biznes pou vwar li ki i pa en kou an plis pou zot loperasyon me toudmenm koman en benefis pou zot ki kekfwa ler zot in fer vini en lekipman whatever biznes zot ladan e zot in fer vini en lekipman ki sa lekipman zot ava komans fer li travay e once zot in komans fer li travay i a zer reveni e from then on zot kapab inccur sa cost plitar kot zot kapab peye prezan akoz zot pou napa en problenm cash flow parey nou’n dir.

E osi pou parey in dir osi Mr Speaker, pou bann minor operating equipment mon krwar i neseser ki nou soutenir nou bann pti biznes e nou ed zot fason ki nou kapab – nou konnen i pa touzour fasil pou zot andeor nou pa pou fer okenn ilizyon pou krwar ki i fasil pou zot operate dan en lekonomi parey Sesel en, kot nou vwar dan serten area i annan bokou cartel e sa bann pti biznes i vwar zot zot ganny kit akote, zot ganny kit lo sideline parey nou dir e difisil pou zot zwe dan premiere league.

Mr Speaker mon krwar sa i ava en fason kot vreman nou pe dir nou bann pti biznes vwala, nou Gouvernman nou en Gouvernman malgre nou pe entrodwir VAT, la nou fek entrodwir, nou pe entrodwir VAT 2013 pou note i annan en bon pe pei ki’n entrodwir li avan nou Mr Speaker.  I annan menm depi an 1986 in entrodwir VAT dan bann pei Lafrik mon pe koz lo la la menm depi 1986 e nou vwar bann poursantaz VAT i varye depi menm 5 poursan ziska 20 poursan.  So Sesel nou’n agree lo en 15 poursan e pou note ankor enn fwa i nesesit mon krwar Mr Speaker ki nou koz ek nou dimoun ki VAT i pa en tax an plis me i zis en ranplasman GST – i zis tir GST remet VAT e poursantaz i reste parey 15 poursan, la nou pe koz lo bann pti amannman me i enportan pou nou note koman bann konsomater ki i annan serten prodwi nou pa pou pey VAT lo la e sa bann marsan fodre pa fer nou krwar ki nou bezwen pey an plis akoz VAT in vini en nouvo keksoz, en gro bebet ki pe vini ki nou pa pou kapab tenir ouswa ki pou nesesit fer pri lavi monte parey i annan serten zournal i dir.  Mon krwar Mr Speaker nou bezwen ledikasyon, nou bezwen koz kler en langaz ki nou Seselwa i konpran ki nou tou nou kapab aziste nou lavi e konpran ler nou al dan en laboutik ki i annan serten ouswa okenn servis ki nou pou oule al servi kot nou pou dir a in dir nou ki nou pou bezwen pey VAT lo tel lekipman sanmenm sa i pe fer sa pri monte akoz in bezwen pey VAT e ki sa pa korek.  Mon krwar nou bezwen koz ek nou bann dimoun e Minis mon krwar i bezwen vin lo medya en pti pe pli souvan pou eksplik serten dimoun kestyon VAT.

Mr Speaker Sesel in ariv en ler kot nou vreman armoniz nou bann Lalwa e pou mwan ozordi mon kontan pou vwar ki sa pe ganny fer at least lo kote VAT kot nou vwar kot avan nou ti pe dir Director General of Customs, apre nou ti pe dir Trades Tax Act kot i annan lamannman ki pe ganny fer la prezan nou pou annan Assistant Commissioner of Customs anlinny avek Customs Management Act 2011 ki nou’n pase dan sa Lasanble.  So i nesesit armonizasyon nou bann Lalwa Sesel pou fer li mars pli byen e mars an paralel parey nou dir e pa zis dan domenn VAT la zis an pasan nou pou dir i annan bann lezot Lalwa kekfwa ki nou bezwen armonize osi isi Sesel, dan lezot Departman, dan lezot landrwa.  Me ozordi nou pe koz lo VAT larestan nou ava koz lo la plitar.

Mr Speaker i enportan osi a sa lenstans pou mon fer en remark ankor enn fwa ki vreman sa peyman volonter pou bann lakonpannyen, bann biznes ki pou pey tax volonter e ki zot kapab annan sa opsyon kot zot pou ganny dir pou pey tou le trwa mwan mon krwar i en bon zafer.  I pa pou konplik zot lavi kot zot pou bezwen al fer tou sa kalkilasyon apre 1 an me zot a fer li dan en fason tou le trwa mwan i a pli fasil, i a pli pti gin kont pou zot balanse, pou zot aziste, pou zot kapab fer zot peyman.  Mon krwar this is a good idea ki nou welcome lo sa kote latab Mr Speaker.

Mr Speaker lavantaz pou fer pti biznes i annan Sesel i pe ganny demontre atraver sa bann lamannman la e mon swete ki Minis i kontinnyen vwar sa Lalwa anmezir nou ale this is not a done deal parey nou dir.  Nou kontinnyen vwar sa Lalwa e nou kontinnyen vwar landrwa kot nou kapab aranze, amelyore e moderniz li pou nou vreman nou osi vin parey bann pei ki vreman in fini fonde ozordi VAT dan zot sistenm ki ou pa tann mirmirasyon, ou pa tann oken koze so i montre mwan ankor enn fwa i annan bann gran pei menm Lafrik Mr Speaker ki VAT pe marse so it’s a good thing mon krwar e i annan dimoun pe dir osi Mr Speaker ki biznes pe ganny demande pou kolekte tax lo par Gouvernman.  Pou mwan sa Gouvernman pa demann biznes pou kolekte tax lo son behalf li.  En biznes i operate lo later Sesel e nou dimoun, nou Seselwa ki konsonm zot prodwi ouswa zot servis so i nesesit si zot pe fer larzan ek nou prop dimoun i nesesit osi ki zot pey zot tax, pey zot dues parey nou dir.  E sa i ede pou nou kontinnyen nou Gouvernman asire ki lenfrastriktir neseser pou zot servi parey semen lezot keksoz ankor delo ou elektrisite nou bezwen moderniz tousala i asire, so zot pa pe fer nou en faver Mr Speaker akoz annefe zot pe fer gro, gro larzan dan nou pei e pou mwan mon kontan 5 milyon turn over i neseser ouswa i obligatwar ki zot anrezistre pou VAT mwan mon krwar i bon Mr Speaker, i a vreman ed sa bann biznes pou pli konsyan.

E i annan ki pe dir ki zot pa pou vreman ganny en lavantaz atraver sa pou fer sa louvraz pou Gouvernman me zot lavantaz zot larzan ki zot gannyen alafen lannen, zot turn over zot loperasyon ki zot fer.  Mr Speeaker avek sa mon pou aport mon sipor pou sa amannman lo sa Bill.  Mersi bokou.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker Sesel i vwar li dan en sitiasyon kot nou pe sanz en sistenm tax konpletman e nou pe ranplas li par enn ki nouvo, malgre mon konnen ki nou pe ranplas li par en sistenm ki’n ganny practice all over the world pou en kantite lannen e mon panse ki si Sesel in deside ki nou pou tir en sistenm GST e ranplas li par en sistenm VAT i devret enn ki pli bon pou pei, e devret enn ki pro-biznes e non pa anti-biznes.

Ozordi Sesel lamazorite Seselwa pa pe konpran ki VAT i all about.  Ou pase dan semen ou koz avek nenport ki Seselwa 9 dan sak 10, 90 poursan Seselwa pou dir ou nou enkyet.  Enn nou krwar ki pri lavi pe al monte, 90 poursan bann pti pti biznes i krwar pou dir sa sistenm VAT pou anmenn en dezavantaz pou zot olye ki en lavantaz.  Gouvernman li i dir nou non sa sistenm VAT pou pli bon pou biznes akoz i pro-biznes, i pou pli bon pou konsomater akoz pou napa en double tax parey lo GST ti annan en double tax.  Sa i bann question marks ki ankor egziste dan latet Lepep Seselwa e mon krwar i responsabilite Minister Finans, i responsabilite Minis Finans antan ki se li ki diriz sa Minister pou li klarifye, pou li fer kler, sansibiliz dimoun, eksplik Lepep Seselwa vreman kwa VAT, kimannyer i fonksyonnen e kimannyer sa pou marse.  Si Minis i vini i dir ek nou par egzanp pou dir VAT pe anmenn plizyer benefis.  Eksplik Seselwa dan en term pli senp pou li konpran kimannyer sa pou anmenn benefis pou Seselwa, eksplik sa pti businessmen dan en fason pli senp pou li konpran kimannyer sa pou anmenn benefis pou son biznes, donn tou dimoun, kominote biznes, konsomater konfyans dan nou lekonomi ki sa pou en add on, pou en keksoz pozitiv pou nou lekonomi.

Onorab avan mwan in koz lo zenerasyon larises basically, so nou anvi en sistenm ki pou kontinnyen ed Sesel kree larises nou pa en sistenm ki pou en barrier oubyen en impediment an relasyon avek sa kreasyon larises, sa kreasyon prosperite pou Lepep Seselwa.  Mwan mon anvi ki Minis i eksplik sa kler e mon pou donn Minis en legzanp.  Letan nou ti annan GST en pti businessman i fer vini son marsandiz, marsandiz i ariv lo por, Customs i verifye son bann marsandiz dapre son bill ki in forward e Customs i fer li pey bann taxes ki i bezwen peye, e parmi sa bann taxes sa businessman i pey son GST, rightNow eksplik nou ki pou arive an relasyon avek VAT?  Eski o moman ki sa marsandiz i ariv dan por sa businessman i bezwen pey son VAT?  Eksplik nou kimannyer sa pou marse an relasyon oubyen eksplik nou ki son lavantaz an relasyon avek GST.

Now dezyenm keksoz dizon mwan mon en businessman ki fer vini raw materials, right.  Mon fer vini raw materials, mon raw materials i ariv dan por e mon pey en VAT lo mon raw materialsNow plitar mon pran sa raw materials mon vann li avek en lot businessman ki li i pe al servi sa raw materials dizon latwal pou li koud, pou li fer konnson, pou li fer rob, pou li fer semiz, eksetera ki plitar aprezan i pou vann as parti koman son biznes rightNow mwan mon’n pey VAT mwan lo sa raw materials, letan sa businessman i vann son semiz, eski konsomater pou bezwen pey en lot VAT lo sa semiz?  E eski sa VAT ki sa konsomater pou peye pou pran an konsiderasyon kou ki sa businessman in bezwen peye pou son materials ki anretour ti annan VAT lo la?  Vwar so si i pe pran sa koman en poursantaz e i pe pran an konsiderasyon sa VAT ki mwan mon’n mete lo la akoz mwan mon’n pey sa VAT lo sa raw materials.  Eski prezan pou annan en double VAT?  Sa i bann kestyon ki dimoun pe demande e mon krwar Minis i annan en loportinite today pou li eksplik avek konsomater, pou li eksplik avek the business community kimannyer sa pou marse.

Now en lot keksoz ki Minis in koz lo la se ki i pou annan sa ki nou apel en VAT network rightNow pou annan bann biznes ki pou opt pou li pa be part of the VAT network.  Now kestyon ki mon pe demande se ki bann businesses ki swa dan sa network oubyen andeor sa network, ki kalite lavantaz par egzanp pou annan pou bann ki dan network oubyen ki dezavantaz pou annan pou bann ki dan network?  E menm kestyon pou ganny demande pou bann businesses ki andeor sa network.  Ki lavantaz pou annan pou en biznes, si pou annan, ki andeor sa network oubyen ki dezavantaz pou annan pou en biznes ki andeor the VAT network? Mwan mon krwar pou dir bann businesses i anvi konnen pou zot kapab, pou bann ki ganny sa opsyon pou deside si zot pou rantre dan sa network oubyen non pou zot pran en desizyon as to whether they will oubyen not zot bezwen plis klarifikasyon e mon krwar Minis i bezwen donn nou sa lesplikasyon.

Lot size ki konsern mwan se letan nou ti annan GST, letan nou ti annan en sistenm GST ti annan en lalis bann komodite ki pa ti annan GST lo la, e sa bann komodite ti bann komodite debaz e la nou pe koz pou tou Seselwa.  Now, eski Minis i kapab donn nou en garanti ki omwen pou komans avek tou sa bann komodite ki ti napa GST lo la pou napa VAT lo la.  Oubyen eski Minis i kapab donn nou even better news ki pou annan bann ekstra komodite, bann komodite debaz ki Lepep Seselwa i servi on a daily basis eski pou annan en additional list ki oparavan ti annan GST lo la ki aprezan Minis avek Gouvernman in rekonnet ki kout lavi i o e i annan bann additional goods ki nou pou met anba sa lalis kot napa VAT?  Mon krwar enn donn nou garanti ki sa lalis ki ti la oparavan i egziste, e dir nou si pou annan bann goods ki pou additional lo sa lalis ki bann bezwen debaz ki Minis in met lo sa lalis kot pou napa VAT.

Lot kestyon ki mon pou demande, se eski Minis i kapab eksplik sa Lasanble si pou annan en lavantaz pou Gouvernman an relasyon avek koleksyon tax.  Mon’n tann dir a plizyer repriz ki nou annan en sistenm koleksyon tax ki ase ser kanmenm, ki kout tax payers money quite en kantite larzan pou nou kolekte tax.  Eski pou annan en improvement lo la?  Eski letan nou pou annan VAT, lafason ki Gouvernman pou kolekte tax enn i pou pli fasil pou Gouvernman, de i pou pli fasil pou sa businessmen e trwa i pou anmenn en rediksyon dan lakantite larzan ki nou depanse pou nou kapab kolekte sa tax.

Lot keksoz ki mon bezwen klarifikasyon lo la se the filing of returns pou bann businesses. Eski i en sistenm ki vreman pli fasil e si i en sistenm ki vreman pli fasil, eski Minis i kapab eksplik nou kimannyer ki sa pou vin pli fasil.  So antan ki sa i plito en lamannman mon napa keksoz an plis pou mwan dir lo sa lamannman e mon ti ava kontan ki Minis i adres sa bann size ki mon’n koz lo la e donn konfyans dan nou lekonomi, donn konfyans nou bann businessmen e donn konfyans Lepep Seselwa ki zot pa pou trouv en logmantsyon dan pri marsandiz sirtou bann komodite debaz lo ki ti annan GST dan lannen 2013 akoz lavi pou Seselwa i difisil e pri lavi i deza vreman tro o.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Bonzour tou dimoun.  Mr Speaker mon pa pou pran bokou letan akoz mon krwar tou bann konsern in deza ganny met devan Minis e i annan pa mal deba lo VAT dan deba Bidze.  Toudmenm mon pou komanse par dir i annan en dikton ki dir i annan de keksoz ki nou pa kapab evite e sa se debts and taxes.  Sa dikton i koumsa akoz i de keksoz ki nou toultan anvi evite dan lavi.

 

MR SPEAKER

Onorab koz en pti pe pli for.  Met micro en pti pe, mon pa tann ou preski ditou.

 

HON MARIE-ANTOINETTE ROSE

Nou anvi viv pli lontan so nou avoid debts e nou anvi annan plis larzan dan nou pos so nou tant pou avoid taxes. E sa i rezon akoz inherently when it comes to tax o moman ki i annan en size lo tax i annan en rezistans a sanzman e akseptans a tax akoz i en sistenm ki tir larzan dan pos biznes oubyen i tir larzan dan pos lendividi.  Me kantmenm Mr Speaker mon pou dezagree en pti pe avek Leader Lopozisyon sa ki konsern ledikasyon.  Mon ti a kontan felisit SRC, in annan pa mal demars pou eksplik piblik depi Zen mon konnen in annan meeting dan 25 distrik e avek tou sekter biznes ki’n ganny fer pou eksplik zot ki savedir VAT.  E koman en dimoun ki konn enpe kominikasyon en sistenm tax ou pa neseserman kapab met li lo televizyon eksplik dimoun. I bezwen en one-on-one, i bezwen annan en sistenm kominikasyon kot ou asiz avek dimoun dan en meeting e ou eksplik ou zot.  Zisteman bann kestyon ki Leader Lopozisyon in demande i bann kestyon ki’n ganny leve dan sa bann meeting e se la kot ou ganny sans annan en enteraksyon avek bann endividi e eksplik zot.  Tou sekter biznes in ganny sans, in ganny envite rankont pou zot ganny lesplikasyon.  Me turn out pa’n osi o ki ti ekspekte me nou osi koman en endividi, koman en biznes nou bezwen pran en responsbilite pou nou edik nou lekor lo en sistenm tax ki pou enpakte lo nou e pa zis lo lavey ki sa sistenm pou ganny enplimante nou kriye nou dir nou pa konn ase isi, nou pa konn ase laba, nou pa’n ganny eksplike.  Otan in annan en bon pe petet pou piblik an zeneral, pou manm lendividi an zeneral petet sa i merit annan plis pou eksplik sa endividi, me mon konnen e mon okouran ki depi Zen in annan en kantite rankont ki’n ganny fer avek sekter biznes.  Si nou rapel en Zen Gouvernman ti pran en desizyon pou pa enplimant VAT zisteman pou annan ankor rankont avek sekter biznes pou eksplik zot ankor, pou annan si oule konsansis lo lafason ki sa sistenm pou marse mon krwar at some point i bezwen annan en finalite e Gouvernman i bezwen pran en desizyon whether nou enplimant sa sistenm VAT oubyen non.  E mon dakor avek Leader Lopozisyon ki wi nou pe sanz nou sistenm tax konpletman.

Mon pa tro krwar ki piblik pa konpran sa sistenm VAT akoz ler nou al lezot pei nou aste nou komodite sa sistenm a aplike a nou, e nou nou konnen ki bann landrwa kot touris pa pey tax ki nou fer?  Nou al claim li lo Airport.  Seselwa i konpran sa tre byen e zis selman ler i ariv isi Sesel nou refize, nou annan rezistans a en sistenm ki de tout fason nou aksepte dan en lot pei e nou konpran kimannyer i marse.

Sa ki mon ava demann Minis selman se pou annou komans en sistenm dan laboutik kot ler nou ganny nou resi nou vwar poursantaz VAT.  Manm piblik i konnen konbyen sa komodite e konbyen son poursantaz VAT e sa ki mon krwar diferans i annan ant Sesel kot sa resi pa neseserman montre ki kantite tax ou pe peye lo sa komodite e kantite tax – deor ou vwar ou konnen mon’n aste sa komodite a sa pri e sa tax a sa pri.

Lavantaz avek VAT pou Sesel se lentegrasyon Sesel dan lekonomi mondyal.  Mon krwar nou bezwen get pli larz ki zis annou al dan laboutik e nou aste.  Nou bezwen get lentegrasyon Sesel dan lekonomi mondyal e nou konnen i annan WTO, i annan COMESA markets ki pe rantre e nou bezwen annan en sistenm tax entegre e konpartib avek bann lezot lekonomi pou nou biznes zisteman kapab fer plis biznes avek sa bann lezot marse.  Si VAT i an faver biznes ouswa non mon a les Minis eksplike akoz li i en eksper dan lekonomi.  Me tou lendikasyon i montre ki nou ti deza dan en sistenm tax GST e nou pe rantre dan en sistenm tax VAT.  Nou pe zis sanz en sistenm tax e son poursantaz e mon rapel ler sa deba ti komanse 2an pase isi dan sa Lasanble ti annan en commitment ki Gouvernman ti fer ki son poursantaz tax pa pou plis ki GST.  Ti en demann Lasanble Nasyonal e zisteman se sa ki’n arive.  Pa plis e GST kot ti en tax lo lekipman e bann capital goodsVAT is not a tax on that e mon krwar wi nou bezwen eksplik dimoun me ler i annan en zefor par Gouvernman pou eksplike nou nou bezwen annan en responsabilite pou fer zefor pou nou konpran.  Nou pa kapab kontinnyen dir pou dir i konpleks, i difisil, nou pa konpran, nou pa pou zanmen konpran, nou bezwen pran en zefor and the business community i bezwen pran en zefor pou li konpran kimannyer sa sistenm i marse, demann kestyon si i annan en hotline i ava ganny etablir, demann kestyon akoz whether we like it or not we cannot avoid debts and taxes and its coming e nou pou bezwen entegre ladan.

Nou konnen ki tax limenm is a complex system e dimoun pa kontan figures, en kantite dimoun pa kontan deal avek mon bezwen al pey ou tel pourasantaz eksetera, eksetera.  Tre pe dimoun i kontan sa domenn e tradisyonnelman nou vwar tax koman en burden lo nou e sa mindset osi nou bezwen konmans sanze.  I en sistenm ki ed nou anmas larzan pou ed lezot, e nou bezwen komans konpran sa.

Mon kontan ki i annan a simple tax return system ki pe ganny etablir akoz son konpleksite e mon kontan osi, mon welcome lamannman dan sa Proze de Lwa pou annan a flexible tax repayment system.  Sa osi i bann demann ki’n sorti kot biznes e ki Gouvernman in ekoute sa.  So business sector i bezwen apresye ki in annan en kantite demann ki’n sorti kot zot e ki Gouvernman in aksepte e ki sa tax system i pa en sistenm ki Gouvernman ki pe enpoz lo pep Seselwa me in annan en kantite konsiltasyon avan ler ki sa sistenm i ganny met an plas e nou bezwen prepar nou pou sa.

Mr Speaker mon dernyen pwen se ki sa sistenm VAT i form parti tou sa bann reform ki pe ganny fer dan Sesel sa ki nou apel dezyenm zenerasyon reform pou nou annan en lekonomi ki performan, pou nou annan sa ki nou’n koz lo la pandan sa bann dernyen zour economic growth, pou nou annan en Sesel ki al bokou, bokou pli devan.  Mon pa konnen si nou realize, si nou pran en pti pe letan nou pas anvil oubyen nou pas dan bann commercial complex oubyen nou pas Providence Sesel pe bouze e i annan en kantite keksoz pe arive dan sa pei, en kantite biznes, en kantite servis.  Nou koz lo pourvwar aste nou pou soke pourvwar aste serten lendividi dan nou pei.  Sa osi i en refleksyon ki nou bezwen pran koman en pei e regarde ki direksyon pei pe ale e ki bann lezislasyon ki nou bezwen met an plas pou tenir sa devlopman.  Si napa lezislasyon an plas ki korek, ki byen, ki armoniz avek lezot pei mwan mon krwar pep Seselwa ki pou kit nou e nou bann Lalwa pou reste annaryer e nou sistenm zesyon lekonomi pou reste annaryer e sa i en rezon akoz mon pe welcome sa Proze de Lwa e tou bann Lalwa ki parey Onorab Vidot in dir ki bezwen ganny armonize pou nou annan en sistenm ki fair me ki donn sans nou Seselwa pou epanouir.

Lo sa not Mr Speaker mon ti a kontan demann Lasanble pou siport sa Proze de Lwa.  Mersi.

 

MR SPEAKER

Minister right of reply.

 

MINISTER PIERRE LAPORTE

Mr Speaker mon remersi tou bann Manm Onorab ki’n kontribye ozordi e bann osi ki’n ekoute.  Mr Speaker mon pou tous rapidman lo bann pwen ki’n fer leve.

Lo kote labi Onorab De Commarmond, wi toultan annan risk pou fer labi even ozordi dan plizyer sistenm bann lezot tax, nou nou bezwen fer sir pou dir SRC i kontinnyen son travay pou fer sir kot i annan bann ka labi i deal avek.  Parfwa i malere ki menm ler SRC i war i annan labi i pran ka dimoun i ekrir Prezidan, i ekrir lot, parey labitid tou sa ki nou fer ki pabon zot ekrir partou e SRC i bezwen fer son travay.

Lo kote si i annan en limit pou sa bann re-imbursement Onorab De Commarmond, normalman diferan kalite byen, diferan kalite keksoz i annan son diferan lifespan.  Par egzanp bann gro lekipman i kapab annan en lifespan 10, 20, 30 an.  Ki arive normalman se ki ler i annan bann demann ou bann ka ki sa bann lekipman i ganny vann, par egzanp ek en non-VAT business SRC i annan sistenm ki ganny pibliye annefe i annan sistenm dan guidelines ki dir kimannyer  metodolozi i ete pou fer kalkilasyon valer sa lekipman.  Parey ozordi si mon vann en loto ki en Lanbasad in aste par egzanp ki demen i vann i annan metodolozi ki dir ou konbyen lannen, konbyen i ete ki kalkile degre sa tax ou pou bezwen peye so i annan serten transparans ladan.  Ki nou bezwen veye parey nou’n dir se ki napa labi demen ki bann biznes ki annan VAT ki registered zot aste keksoz apre zot pas anba zot al revann ki apre i vin bokou sa set en keksoz ki nou bezwen fer sir me mon krwar ki anmezir ki sa treshold redwir parey nou’n dir 2014, 2015 sa bann keksoz pou redwir.

Tous vitman pwen ki Onorab Vidot in fer.  Mr Speaker, souvan dan lavi en pei, dan lavi en pep i annan bann loportinite pou en pep vin ansanm, par egzanp nou ti vwar dan Indian Ocean Games, Seselwa ti vin ansanm koman en pep, whether nou Lopozisyon, whether nou siport Parti Lepep, ou nou siport nenport ki.  I malere ki avek sa sistenm VAT ki nou pe entrodwir ti en loportinite pou business community vin ansanm, rekonnet ki zeneralman menm si ti annan konsern – mon osi a en moman mon ti annan serten konsern lo VAT ler mon ti fek vini pa tro asire si pe ale mon pe al finans, be ler nou’n fer mon travay mon pe eksplike ou pou vwar pou dir zeneralman i tre kler ki VAT i anmenn bokou plis lavantaz ki dezavantaz parey Onorab Rose in dir.  Lefe ki ozordi plis ki 150 pei in adopte VAT ti pou bezwen vreman annan en problenm si zot ti kontinnyen reste avek ansyen system.  I malere ki sa ki Onorab Vidot in koz lo la ki’n fer per malerezman serten zournal, serten politisyen pou zot rezon personnel or i don’t know what, zot kontinnyen fer per Seselwa ki VAT parey ou’n dir i en monst.  VAT i en senp tax ki pe ranplas enn ki la avek menm rate.

Onorab Pierre pou donn ou garanti tou sa ki ti annan konsesyon lo non peyman GST pou kontinnyen anba VAT e pou annan menm bann lezot par egzanp lo dipen, ki ti annan GST lo dipen pou napa VAT lo dipen, serten keksoz parey bann input pou serten animal feed ki parfwa i annan serten keksoz ki ti annan nou pou tire.  So garanti i la ki tou sa ki ti anba GST pou reste anba VAT exemption, tou basic goods, tou basic service pou napa VAT lo la.  I malere ki olye sey vini ankouraze pou dir sa en bon keksoz pou nou pei pou nou rezon personnel nou fer per pti dimoun, nou fer per Seselwa, nou fer dimoun krwar pou dir en sel kou i annan keksoz ki pou sorti dan lesyel ki pou tonm lo nou pou fer nou sitan bokou dimal.

Konsernan ou konsern ki i annan plis sensitization.  Mon bezwen dakor avek Onorab Rose to be fair to SRC depi ler nou’n vini an Zen, mwan personnelman koman Minis Finans mon’n zwenn tou sa group operater eksepte group accountants ki sa zour mon ti bezwen kot Foreign Affairs lo apremidi ki mon pa ti kapab make it.  Tou, tou, tou napa en meeting ki nou’n fer avek operater, enkli bann fermye, bann peser ki mwan mon kapab dir koman Minis ek tou mon lekip nou pa’n la.  Nou’n seye, nou’n fer meeting dan distrik, nou’n arête akoz pa’n tro marse, nou’n fer tou, bann teknisyen in kontinnyen zwenn ziska ozordi nou zwenn, nou zwenn, nou zwenn.  Konmsi enn ler ou demande ki i annan pou fer plis.  Selman mon rekonnet osi parey Onorab Rose in dir ki petet when it comes to dimoun endividyel i anann en bon pe dimoun Onorab Pierre ki petet pa tro asire.  Zot pa tro konnen pa akoz zot pa’n seye, akoz i bokou, i difisil pou ou al kot 90 mil dimoun rather ki ou al par group biznes e bokou sa bann dimoun dan 9, dan 10 ki ou dir zot pa konpran la se akoz sak fwa nou monte nou eksplike par deryer demen zot lir en landrwa ki konfiz zot, ki fer zot krwar pou dir i annan en problenm.  Sa nou problenm dan sa pei.

Mon dakor ek Onorab Vidot ki nou bezwen armoniz pa zis VAT tou bann Lalwa ki pe vini e nou pou bezwen kontinnyen fer li.  Parey nou’n dir reform i en prosesis kontinnyel.

An se ki konsern legzanp Onorab Pierre, pou donn ou de legzanp en.  Lo en dimoun ki zis al dan Por par egzanp pou al tir son marsandiz pou li vann i bezwen pey VAT parey en biznes ale, i pou bezwen pey VAT lo bann keksoz ki pa ganny exempted straight away ou vann, ou pey ou VAT, ou ale ou al vann, si zis pou ou vann ou ale ou met ou VAT ou ale ou vann.  Si pou vann ek en lot dimoun ler li i vann ek ou ou claim back sa valer sanmenm sa pou al lo ou lot pwen.  Pou donn pwen en koudriyez en dimoun ki koud lenz sanmenm sa i apel tax lo valer azoute, setadir sak faz ki ou pas ladan ou pey VAT zis lo sa faz ki ou ou’n met valer lo sa prodwi.  Par egzanp mon a donn ou sa legzanp.  Dizon mon en marsan mon aste en bout latwal mon ale mon pey 15 poursan lo la, mon’n pey 15 poursan lo Por.  Demen ou Onorab Pierre ou vini ou pey sa VAT, sa bout latwal ek son VAT ki mon’n mete lo la, mwan prezan mon sa mark up ki mon’n met lo sa lenz mon ale mon claim ek SRC mon dir sa msye in vini in aste sa bout latwal pou li fer en semiz, mon’n pey tan VAT la la ki li in peye mon diferans mon valer ki mwan mon’n mete rann mwan back mon VATSo mwan koman sa boug ki’n fer vini latwal mon VAT finalman sanmenm sa ou apel input ek output in cancel out zis sa pti bout ki mwan mon’n met sa valer lo la ki mwan mon end up peye lo en baz net.  Ou peye ou ganny ranbourse.  Prezan sa dimoun ki’n ale ki’n fer sa semiz in pey mwan prezan mon latwal ek mon VAT lo la si dizon in pey sa latwal R100, demen i ale i fer son semiz i met dan sa laboutik R150, li in met VAT ki li in pey sa boug laboutik prezan ler li i vann avek mwan koman en konsomater mon pey sa semiz ek sa VAT, prezan li sa msye i re-al kot SRC i dir mon ti pey sepa R15 VAT lo la, prezan sa boug in aste in peye.  Mon oule ou rann mwan back valer lo sa R15 ki mwan mon’n met valer lo la.  So i en keksoz an faz e se pourkwa ki everytime lo faz prodiksyon i annan sa refund pou biznes – ki fer ki finalman teknikman i napa okenn, sa byen pa devret ogmante dan en fason enportan akoz kontrerman a GST ozordi.  Ler mon ale mon pey latwal lo por, mon pey GST mon met valer lo la ou ki vini ou aste sa latwal ou pey mwan ek sa GST ki mwan mon’n mete mon pa ganny refund mwan koman biznes, ou ou ale ou pran sa semiz, ou pey GST ankor, sa boug i ale i pey GST sanmenm sa ki nou apel cascading ki VAT i evite.  Wi i sound enpe pli complex, me selman pou biznes i bon.

Mon a donn ou en lot legzanp Onorab Pierre.  Dizon mon en biznes ozordi, pran sistenm GST.  Mon aste 5 telefonn pou mon bann travayer, mon pey GST lo sa telefonn si mon pa tonm dan sekter tourizm, lagrikiltir ou lot, dizon mon dan lasirans mon pey 5 telefonn i fini mor i ale mon’n pey GST in fini.  Anba sistenm VAT mon pou al kot SRC mon dir sa 5 telefonn i ganny servi koman input pou natir mon travay bann dimoun i bezwen kot zot ale ek zot telefonn aswar so mon pe claim back VAT lo sa telefonn, prezan ou ler ou vann ou servis ou met cost ou servis enkli ou fuel, ou telefonn tou keksoz ki ou’n peye.  So pou biznes ki anmenn mwan lo mon pwen eski pti biznes i annan lavantaz?  Bann ki volonterman – si mon ti en biznes volonterman mon ti pou register pou VAT pa akoz mon Minis Finans mon pe advocate VAT – akoz mwan mon kapab ale ozordi mon pe pey GST, demen si mon’n register pou VAT ouswa otomatikman mon dan treshold 5 milyon mon kapab claim back, be demen si mon pa dan par lao 5 milyon ouswa mon pa kalifye ler mon pey mon telefonn mon pa kapab al okenn par pou reclaim mon GST me anba VAT si mon voluntally registered mon kapab ale dir SRC mon’n pey 5 telefonn pou mon bann dimoun aswar mou oule ki ou donn mwan back sa.  Be sa i only kapab arive si ou register anba VAT.  Mon pou napa letan dan sa Lasanble pou donn bokou plis legzanp.  Mon espere ki mon’n adres enpe sa sitiasyon.

Tout fwa parey labitid mon pa pou vin la pou dir non mon pa dakor nou’n fer tou sa ki nou’n annan pou fer SRC mon a pran kritik ankor, mon ava aksepte ki i annan ankor pou nou fer nou ava retourn kot SRC nou ava kontinyen akselere, nou a war ankor ki nou kapab fer an plis ki nou pe fer.  Mon pa pou dir non tou keksoz i ok, nou nou krwar nou pe fer sa ki nou pe fer.  Nou krwar selman nou pou pran zot pwen nou pou retourn ankor, nou pou kontinnyen revwar kote nou kapab kontinnyen sansibiliz dimoun.  Mon krwar rapidman mon’n reponn preski tou kestyon vitman.

Leader Lopozisyon ou’n demande ki lavantaz pou Gouvernman.  Byensir i annan dezavantaz pou Gouvernman akoz parey mon’n eksplike i en pti pe pli complex ki GST, me Gouvernman pa devret gete ki lavantaz pou li, Gouvernman i devret gete ki lavantaz pou pei, ki lavantaz pou biznes, mon’n eksplike ki lavantaz pou biznes.

 

(Applaud)

 

MINISTER PIERRE LAPORTE

Still petet i kapab annan en pti dezavantaz akoz SRC i a bezwen enn ou de plis dimoun – me lavantaz pou SRC i annan li osi.  Ozordi tou sa marsan partou, tou sa dimoun, tou sa biznes ki pey GST ki nou pa konnen si zot peye, si zot pa peye, nou pou konnen la, akoz sak fwa ki ou pey VAT lo por demen ler ou vin claim ou pou bezwen dir nou lekel sa boug ki ou’n vann sa keksoz avek e nou SRC i pou konn enpe plis sak dimoun ki pe pey VAT ler ou vin claim la ou pou bezwen dir nou eki ou’n peye, si mwan Mr Pierre mon’n enport 100 kilo zonnyon mon’n pey mon VAT, demen ler Mr Pierre nimero 2 i vini i aste zonnyon ek mwan, ler mon al kot SRC pou dir mon’n pey R15 mil VAT mon oule refund.  Ou pou bezwen dir mwan ou’n vann ek li, prezan ler li i vini i annan en chain, i annan en audit trail ladan, sa gran lavantaz SRC.  Mon pa dir ki i pou rezourd tou problenm ki pou anpese, me lavantaz ki SRC pou annan se ki pou annan bokou plis better rikord through the whole trail of VAT, depi tou dimoun ki pe claim depi ler goods i antre dan pei, ou i ganny prodwi ziska ler i ariv kot sa dernyen konsomater.

Nou nou krwar ki menm si i annan serten plis biznes ki ozordi pe ganny exempted lefe ki nou pe grandi labaz VAT pou annan lavantaz pou pei e ler i annan plis tax nou kapab donn plis depans sosyal, ouswa demen nou kapab donn better saler, demen nou kapab ogmant serten depans ki neseser.

Filing of return nou’n dir la dan sa amannman ki pli gran lavantaz filing of returns se sa fleksibilite ki Onorab Rose in koz lo la, ou kapab pey dan 3 mwan olye ki tou le mwan.

Rapidman lo sa kestyon lavantaz SRC mon anvi fer Lasanble konnen ki premye pa i annan en kantite dimoun nou konnen pa pe pey tax sirtou an se ki konsern lavant bann byen dan bann laboutik.  Premye pa se VAT, dezyenm pa ki nou Minister pe konsider seryezman mon pa pou donn en langazman ki nou pou fer successfully akoz mon prefere fer travay avan mon komet mon lekor, selman nou pou al travay avek SRC pou fer ki parey dan bann lezot pei i fer nou ki pou mete bann till dan bann supermarketSRC pou demann bann biznes ek letan pou determin ki kalite bann till, bann counter ki bann magazen i servi e kot neseser nou pou pran kontrol sa bann till nou pou seal zot pou nou kapab fer sir ki pou dir ler zot tap zot bann goods ki pou bann dimoun la, enn resi anba VAT pou bezwen annan resi nou ava regard byen dan sa proposal ki ou’n fer pou dir si sa resi i defini ki kantite VAT si i pa komanse leka la en Zanvye nou ava fer ek letan ki sa i ava leka, e dezyenman parey mon’n dir nou pou rod fason pou met bann till dan laboutik SRC pou kontrole pou minimiz keksoz ki ler dimoun i pran larzan avek piblik apre i pa donn SRC.  Si nou annan en bon sistenm till ki SRC i kontrole, enn nou pou elimin labi par bann dimoun e tax ki zot zot peye olye al dan pos marsan ava vin dan pos leta.

Onorab ou’n koz lentegrasyon dan lekonomi mondyal e sa i senpleman ki nou pe fer atraver VAT parey nou pe dir tou dernyenman, detrwa mwan pase Saint Lousia ki dernyen pei dan Karaib i pa ti ankor met VAT in mete, Swaziland en pti pei parey nou dan Lafrik resaman fek mete.  Ankor Mr Speaker nou nou konfyan ki VAT menm avek bann ensersitid ki nou ti annan premye moman menm avek bann defi ki pou annan ki pou en bon keksoz pou pei e se pourkwa mon apresye ki Lasanble in zwenn nou pou aprouv sa Lalwa in the first place e ozordi mon espere ki zot a vot an faver sa bann lamannman.  Mersi.

 

MR SPEAKER

Bon in ariv ler pou nou pran en vot.  Tou bann ki an faver? Okenn ki kont?  Bon mon a ganny en formal second reading.

THE CLERK

A Bill of an Act to amend the Value Added Tax Act 2010 to provide for matters connected therewith or incidental thereto.

MR SPEAKER

Mon a ganny en Mosyon pou sot Committee Stage.

HON MARIE-ANTOINETTE ROSE

Mr Speaker anba Order 91(1) mon move ki nou sispann Order 65 to 70 pou sot Committee Stage.

MR SPEAKER

Okenn ki segonde?

 

HON CHARLES DE COMMARMOND

Segonde Mr Speaker.

 

MR SPEAKER

Bon nou a pran en vot ki nou tonm dakor ki nou sot Committee Stage.  Okenn ki kont?  Mon a ganny en Motion for Third Reading.

HON MARIE-ANTOINETTE ROSE

Mr Speaker anba Order 71(1) mon move ki sa Bill i ganny lir en trwazyenm fwa.

 

MR SPEAKER

Yes, segonde.

 

HON CHARLES DE COMMARMOND

Motion segonded Mr Speaker.

MR SPEAKER

Ok, nou ava pran en vot.  Tou bann ki an faver?  Okenn ki kont?  Bon mon a ganny en Third Reading.

THE CLERK

This Act may be cited as the Value Added Tax Amendment Act 2012.

MR SPEAKER

Bon Bill in pase.  Aprezan nou ava pran dezyenm Bill lo Order Paper e sa se Business Tax Amendment Bill. Me avan nou kapab fer Second Reading Onorab mon pou bezwen en Mosyon pou waive seven days requirements between First and Second Reading.

HON MARIE-ANTOINETTE ROSE

Mr Speaker anba Order 91(1) mon move ki nou sispann Order 64(1) pou nou waive sa seven days requirements between First and Second Reading.

 

MR SPEAKER

Bon okenn ki segonde.

 

HON CHARLES DE COMMARMOND

Segonde Mr Speaker.

 

MR SPEAKER

Bon, mon mazinen Lasanble an antye i dakor ek sa.  Napa okenn problenm?  Mon a ganny mwan en Motion for Second Reading.

 

HON MARIE-ANTOINETTE ROSE

Mr Speaker anba Order 64(2) mon move ki nou lir sa Bill en dezyenm fwa.

MR SPEAKER

Okenn ki segonde.

 

HON CHARLES DE COMMARMOND

Motion segonded Mr Speaker.

 

MR SPEAKER

Mon ava envit Minis aprezan pou li prezant The Business Tax Amendment Bill 2012.

 

MINISTER PIERRE LAPORTE

Mersi Mr Speaker, Manm Lasanble Nasyonal, mon prezant devan zot ozordi pou konsiderasyon serten lamannman anba Business Tax Act. Mr Speaker pli ki lekonomi Sesel i agrandi e i vin pli entegre avek lekonomi mondyal nou bezwen kontinnyen asire ki nou bann striktir e tou laspe klima lenvestisman enkli nou bann kad legal i anlinny avek standar enternasyonal pou ankouraz plis lenvestisman.  Anmenmtan nou bezwen osi asire ki an fezan sa nou bann striktir legal i osi donn nou lekonomi serten proteksyon kont labi potansyel par biznes ki parfwa i servi bann defayans dan sistenm legal pou tir larzan Sesel pou anvoy deor.

Serten sa bann lamannman ki mon propoze ozordi i osi al dan direksyon minimiz sa bann defayans.

Lamannman ki pe ganny propoze dan form Business Tax Amendment Bill 2012, i konsern seksyon 2, 11, 1 B, seksyon 14, 39, e 78(1), pou fer bann provizyon swivan: premyerman pou fer ladiferans ant royalty e bann fre pou bann servis teknik ouswa technical service fees.  Sa lamannman Mr Speaker, i pou fer definisyon royalty vin anlinny avek definisyon OECD. Sa i anmenn plizyer benefis enkli pou fasilit negosiasyon lo bann double taxation avoidance agreements avek bann pei manm OECD.  Sa lamannman i osi kouver definisyon technical services dan menm fason.

Mr Speaker nou’n osi propoz en cap swa en limit lo sonm ki biznes enternasyonal baze Sesel i pey zot bann fourniser ou aletranze enkli headoffice an term royalties e technical services. Sa limit pou selman 3 poursan ekivalan valer zot lavant swa turnover ki pou ganny konsidere koman allowable deduction par evaliasyon zot peyman tax.  Sa pou osi ede minimiz sa ka sa ki nou apel transfer pricing parey nou dir an Angle kot souvan bann biznes i servi royalties ou management fees ki zot sarz zot lekor pou tir larzan Sesel pou anvoy deor e alor avek sa cap ki nou pe mete nou pou minimiz outflow larzan atraver sa bann metod.

Dezyenmman pran kont bann fre servis teknik ki ganny rezevwar par en dimoun ou biznes Sesel koman en reveni pou zot ler SRC pe fer evaliasyon pou sa ganny konsidere koman en reveni pou zot.

Trwazyenmman Mr Speaker dediksyon bann depans ki en rezidan i kapab fer anba Lalwa parey i ganny preskrir bann nevyenm schedule e par en anplwayer swivan katriyenm schedule of income and Non-Monitary Benefit Tax Act 2010.

Katriyenmman Mr Speaker en provizyon ki pou fer ki tax pou ganny aplike lo partnership koman en biznes annantye en non pa lo partner endividi parey i ete konmela.

Finalman Mr Speaker sa lamannman i annan provizyon pou entrodwir bann nouvo schedule.

Mr Speaker mon alor demann Lasanble Nasyonal pou aprouv sa Business Tax Amendment Bill 2012 e mon remersi zot.

 

MR SPEAKER

Deba i ouver.  Onorab Vel.

 

HON JENNIFER VEL

Mersi Mr Speaker.  Bonzour tou dimoun.  Mr Speaker sa seri lamannman ki pe ganny propoze dan Business Tax atraver sa Proze De Lwa, pe esesyalman fer keksoz vin pli kler an sa ki konsern Business Tax. Premye laspe sa lamannman se ki i etablir en distenksyon kler ant sa ki nou apel royalties parey sa ki Minis fek dir nou ek sa ki ganny kategorize koman bann technical services fee.  Sa distenksyon i answit ganny servi koman en baz pou fer sa nouvo kategori reveni ki nou apel technical fee vin en item ki Business Tax i kapab ganny enpoze lo la.

Dezyenm laspe sa lamannman i konsern partnership ki parey Minis fek eksplik nou ki en form biznes ant ou plis dimoun, e sa lamannman i ranforsi responsabilite ki bann partener dan sa partnership akoz i fer zot vin responsab pou tax ki sa partnership i sipoze peye.

Mr Speaker sa lamannman dan Business Tax i fer nou realiz lenportans annan en bon sistenm tax e lenportans ki tou dimoun ki merit pey tax i fer li san okenn lesepsyon e en sistenm tax i zis letan sa ki ganny plis i pey plis e dan en pei bann reveni parey profi, dividence, royalties e sa ki nou pou prezan pe apel technical fees i zeneralman bokou pli o ki reveni parey saler.  Alor i normal ki sa bann reveni i pey tax e technical fees ki parfwa i enderive.  Bann royalties i merit ganny idantifye separeman e sa pou fer travay lazans ki kolekte tax efektivman Seychelles Revenue Commission i vin pli fasil.

A mon avi Mr Speaker technical fees i enn bann kategori reveni ki pe ogmante isi Sesel e sa in vin akoz liberalizasyon ekonomik ki’n kree nouvo loportinite pou bann profesyonnel ki’n efektivman sezi sa bann loportinite pou vin bann konsiltan, e alors i toutafe normal ki nou sistenm tax i idantifye byen sa kategori dimoun e reveni.

Mr Speaker en sistenm tax i devret zis, e sa lazistis i ganny reflekte atraver en rezim progresis ki fer ki sa ki ganny plis i kontribye plis, me lazisits fiskal i osi ganny reflekte par serten prensip.  Enn sa bann prensip Mr Speaker fodre pa ki i annan sa ki nou apel bann free riders ki vedir bann dimoun ki benefisye avek en sistenm me zot pa fer okenn kontribisyon anver son finansman zis parey bann dimoun ki fer tou fason pou pa pey tax, e efektivman tax i mwayen ki prensipal ki Gouvernman i annan pou li ganny reveni ki answit servi pou finans son progranm.

Mr Speaker nou fek vot lo en Bidze pou lannen prosenn e sa bann depans ki pou ganny fer anba sa Bidze i ganny finanse par reveni Gouvernman ki son sours prensipal reveni i atraver larzan tax e nou tou nou benefisye avek depans Gouvernman, ki Gouvernman i fer nou tou nou bezwen pey tax.  Alors bann ki napa zanfan par egzanp ki lekol dan lekol Leta ki gratwit i annan en loto e i bezwen en sistenm semen pibik ki an bonn eta e sa ki pa servi sistenm lasante piblik ki gratwit i benefisye avek sistenm sekirite ki ofer par lapolis ek lafors defans.

E Mr Speaker tax i telman enportan dan lavi en nasyon ki i form prensipal pou diferansyan bann idieolozi e osi bann parti politik.  Bann parti progresis parey nou dan Parti Lepep, nou annan en progranm devlopman ki anbisye e nou souvandfwa ganny akize ki nou met tro bokou tax lo keksoz e reveni piblik.

Tandis ki bann parti Liberal lo lot kote zot zot dir zot anvi redwir nivo tax me efektivman zot pa dir nou ki letan ou redwir tax i vedir mwens depans par Gouvernman e osi finansman mwens progranm, e aktyelman sa size tax Mr Speaker pe menm domin aktyalite enternasyonal.  Par egzanp Lanmerik Prezidan Barrack Obama ek Parti Repibliken ki annan mazorite dan Kongre, zot pe lager lo sa ki nou pe apel en fiscal cliff oubyen lo size logmantasyon tax lo bann Ameriken ki pli ris.

Lafrans i menm size, sa size logmantasyon tax lo bann dimoun ki pli ris i osi pe domin aktyalite.  E sa gran deba lo tax i montre nou ki i reste en size enportan dan lopinyon piblik.

Alor Mr Speaker mon pou siport desizyon Gouvernman pou anmenn sa lamannman dan Business Tax akoz i pe permet nou sistenm tax pou swiv levolisyon lasosyete ek nou lekonomi e alors mon pou demann mon bann lezot Manm koleg Onorab pou siport sa lamannman dan Business Tax Act. Mersi.

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker ankor vreman bref dan lalinny ki mon koleg in koze.  Mon krwar sa bann sanzman dan Business Tax i bon li, akoz nou menm nou tanzantan nou konplent la la tax i get zis lo sa pti dimoun, i annan en bann ki sove, i bann ki pa ganny zanmen takse, ensidswit.  Prezan i annan bann gro biznes, i annan bann biznes ki par natir zot tre profesyonnel prezan menm pli profesyonnel si kalkile ki sa bann dimoun ki pe kolekte tax e prezan ou pa ni fasil pou al vwar vreman kote ou pou takse zot ennler.  Some people are really smart so sa bann biznes parey mon koleg in dir bann free riders la be avek sa ki nou pe fer la mon krwar nou a bezwen tyonbo zot dan gran kontour.  Pa pou pini dimoun me selman pou fer ki omwen tou sa ki fer son benefis i ava donn son kontribisyon dan sa form tax ki i a permet ki alafen dizour enn Revenue Commission i pa a toultan pe tay lo bann pti dimoun e si tou dimoun i fer son keksoz byen alor i a permet sa koleksyon reveni tax mars pli efikasman, e son lot pwen se ki i a fer ki larzan tax ki nou kolekte i ava ogmante.  Si i ogmante i bon pou nou, nou bann progranm a ganny get pli byen, nou a kapab fer plis keksoz, plis lakaz petet nou bezwen sa en gro problenm, bann problenm mazer i kapab ganny adrese sewage, lot, lot so i enportan mon krwar alor ki sa bann keksoz i ganny fer.

Apre letan nou pe koz lo kestyon royalty la i bon sa, i bon akoz menm demen ou konnen i annan lafason ki devlopman ekonomik pe pran dan pei, yer mazinen nou’n fek pas sa Bill lo Energy Commission la, Energy Bill, e sa osi i annan keksoz si nou pa fer sa bann definisyon kler la i annan bann dimoun pou kapab vin zwe avek bann resours ki nou annan.  Par egzanp pou dir ou larivyer letan i pas lo later menm lo later prive, larivyer i reste pou Leta me selman i lo ou later be si en dimoun i vini i kapab fer son baraz e i ganny son delo konmsi ou konpran i generate enpe kouran, enpe elektrisite, enpe lenerzi be apre ou bezwen gete ki kalite lagreman, laranzman pou gannyen ek li.

Sa boug ki vini ki pou al dan ou lanmer, ensidswit si i al tap ou delo sale la pou li fer lenerzi kimannyer laranzman, sa bann zafer royalty i vreman crucial ladan, delwil, petrol la nou pe, mon krwar nou pe al en pti pe pli pros dan sa direksyon tou sa i bezwen ganny gete akoz i konsern sa issue royalty e sa issue royalty la diferan pei en serten letan, zot aranz sa diferaman e zot servi diferan definisyon e ki fer ki si ou definisyon pa annord en konpannyen i kapab benefisye e ki Gouvernman li i kapab perdi.  Se sa ki ou vwar, mon kontan letan ou pou sa definisyon royalty i vin anlinny avek definisyon OECD.  Dan tou laspe Sesel i on par, i lo sa nivo ki akseptab dan biznes mondyal e ki napa zwe, napa kouk kasyet ladan e then si i annan konpannyen ki sey abiz lo la then ou annan sa bann lorganizasyon parey osi pou siport ou pei, pou dir nou tyonbo enkou, Sesel i byen ou ki mal or whatever.

Epi mon pe gete kestyon Double Taxation Agreement me pa mal kantite nou pe sinnyen la.  I annan ankor pou vini mon krwar sa lannen ki vini la, lannen prosenn, be letan ou pe al dan sa direksyon osi mon krwar i enportan ki keksoz i ganny fer byen sansan serten pei sirtou bann pei OECD zot mark ou byen zot, zot ki dir si ou en bon pei ouswa non, kantmenm nou nou kapab desid nou pei si i bon ouswa non zot parfwa ki dir sa pei i korek.  Be ek sa zafer la Double Taxation Agreement la si nou pa aranz tousala i fer ki zot krwar ki sa pe ganny servi par serten bann gran konpannyen enternasyonal pou kasyet tou son bann zafer tax.  Se sa ki bezwen annan sa transparans dan en serten fason kot i konsern peyman tax.

Vwala Mr Speaker, mwan mon krwar ki lo kestyon partner mon ti anvi tous en pti pwen la, dernyen pwen lo kestyon sa zafer partnership lot fwa.  Lot fwa en pti boug Cascade in vini partner avek en lot zanmi zot in aste en soz, i annan en pti biznes zot pe fer ansanm.  Prezan laba kot Revenue Commission in donn sakenn de form tax, prezan mon dir be akfer de, i dir non non mon pa konnen sanmenm sa mon’n vin kot ou, mon dir be mwan mon pa tax agent, i dir non ou en MNA ou bezwen kapab konpran tou sa, mon ekspekte ou kapab konpran tou sa bann mirak nou.  Anyway mwan mon’n bezwen al kot Revenue Commission prezan mon demann li, sa madanm eksplik mwan i dir mwan ou vwar mon pa ti devret donn li de.  Mon dir enn ou pe fer Gouvernman depans de keksoz, ti’n devret donn zis en form ou’n fer donn de form, i dir be msye ekoute – problenm se nou Lalwa, Lalwa i dir i bezwen takse sa partnership e sa partner, ou bezwen donn li de form, enn pou li enn pou son biznes akoz kimannyer Lalwa i ete.  La la kimannyer ou pe fer ou a takse zis sa partnership.  Mon krwar i enportan sa, i bon, mon santi i vin en pe konfizyon.  Aprezan sa pti boug la i konfize, mon osi tou mon’n konfize, fransman dir ou e la mon vwar konmsi kot nou pe ale i ava ganny zis en form prezan Minis non.  Mersi bokou Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker mon pou vreman bref.  Mon vwar ki Minis pe anmenn sa lamannman devan Lasanble pou nou kapab tighten up.  Nou pe revwar the legal structure pou nou basically kapab tighten up nou sistenm tax.  Nou pe tighten up, Gouvernman pe tighten up byensir pou li fer si ki i anmas tou bann taxes ki i devret anmase e tou bann dimoun ki devret pe pey tax zot basically pey zot tax.  Fantastik.

I annan en pwen enportan ki’n ganny refer resorti par en Onorab ki’n pran laparol avan mwan e sa se ki si Gouvernman pe fer sir ki i anmas tou tax ki devret anamse ki byen, i kapab vedir ki alavenir si the business environment is right biznes i fer profi, Gouvernman i anmas tou son bann taxes then Gouvernman i anmas plis larzan ki i ti pe anmase dan lepase.

Si Gouvernman pe tighten up pou li anmas plis larzan nou ekspekte oubyen Lepep Seselwa i ekspekte an retour ki Gouvernman i servi sa larzan dan en fason pli byen, dan en fason pli transparan, dan en fason ki anmenn benefis, dan en fason pli kler e pli bon pou tou Seselwa.  So petet sa ki mon ava egalman demann Minis Finans se ki pandan ki zot pe fer sa legzersis zot pe vwar bann defayans ki annan dan sistenm tax pou zot anmas plis larzan zot bezwen egalman vwar dan en fason transparan, dan en fason for, dan en faspn kler bann defayans ki annan dan lafason ki sa bann larzan i ganny spent pou fer sir ki at then end of the day se Lepep Seselwa ki benefisye avek sa bann sanzman dan striktir tax ki Gouvernman pe fer.  Sa i premye demann.

Dezyenm keksoz i se ki mon kontan vwar pou dir nou pe fer sir ki bann businesses ki earn plis at the end of the day zot zwe zot rol e zot donn en pti pe plis pou ki Lepep Seselwa i kapab benefisye en pti pe plis.

Trwazyenm pwen ki mon ti ava kontan Minis i klarifye lo la e pou mwan sa i pa’n tro kler Minis to be honest avek ou i the issue of royalties e Minis in dir nou klerman pou dir zot pe fer sir ki zot minimiz outflow e Minis in donn en poursantaz si mon’n ganny li kler of 3 percent. Byen Minis?  Ok, now kestyon ki mon pou demann Minis se ki eski sa poursantaz internationally – eski i en poursantaz ki en pti pe lo nonm enternasyonal e eski sa poursantaz pa pou azir koman en impediment pou lenvestisman sirtou FDISo mon ti ava kontan konnen, si sa i leka e ki lenpakt i kapab Minis avek son lekip in assess i kapab annan lo investment be it local oubyen international oubyen sa ki nou apel FDI.  Mersi Mr Speaker.

 

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker.  Mr Speaker mwan osi mon pa pou long.  Mon annan zis en pwen pou met a latansyon Minis.  Nou konnen ki sa bann lamannman pou fer nou anlinny avek OECD standards e pou nou kapab pli byen zer bann DTAs Double Taxation Agreements ki vin devan nou ki parey Onorab De Commarmond in fer resorti i annan pa mal.  Tanzantan nou tande i annan nou pe sinny Double Taxation Agreements avek tel ou tel pei e i kontinnyen agrandi.

Mon kestyon se ki nou bezwen fer sir ki avek sa bann DTA e nou konnen ki bann lekonomi avanse, bann biznes laba zot konn byen kimannyer pou servi sa DTA.  Mon konsern se eski nou bann biznes lokal pe retir benefis dan sa bann DTA ler zot fer biznes avek sa bann pei?  Sa i enportan akoz i annan en risk ki zot zot pe tir benefis lo nou e nou nou pa pe tir benefis lo zot.  E eski nou bann biznes i konpran tre byen ki sa i en lavantaz pou biznes e plis ki nou annan biznes avek sa bann pei sa i annan en gran lavantaz pou biznes.

Dezyenm kestyon se eski, si wi, si biznes pe tir lavantaz avek sa bann DTAs eski – mon krwar prensip en DTA se to bring down the cost of living in the country.  Eski sa bann biznes an retour pe pas sa avek konsomater oubyen zot pe retir sa benefis zis pou zot parey ou’n dir.  Mon krwar sa i enportan and the next step ki mon ti a kontan demann Minis se nou bezwen re-evalye kantite sa bann DTA pe kontribye dan lekonomi Sesel.  Nou pa kapab kontinnyen pe annan lagreman avek tou sa bann pei san ki nou vwar en rezilta pozitiv dan nou lekonomi e petet i bezwen annan en letid petet avek led OECD pou nou vwar kimannyer nou nou pe benefisye avek sa bann lagreman ki nou pe sinnyen.

Mon pou zwenn Onorab Vel ler i dir the debate of the tax system ozordi i partou akoz tou Gouvernman pe rode kimannyer pou ganny plis lazan pou reteni zot Gouvernman.  I annan pe rod plis larzan pou menm tenir sa pei Lagres, Lespany, eksetera.  So ozordi deba santral dan bann lekonomi se the tax system e si oule lemonn pe demann en tax enpe pli zis a mon avi enpe pli sosyalis.  Kot nou tir avek sa ki annnan plis e nou avek sa ki annan mwens e mon kontan alors ki sa Business Tax Amendment Bill ki li i en tax lo business as opposed ki VAT which is a tax on the consumption li i en tax on business pe target si oule sa bann gran lakonpannyen parey Onorab De Commarmond in dir ki very smart, ki konn tre byen how to beat the tax system e ki nou menm nou nou’n dir isi en kantite dimoun in dir be kote sa bann forex pe ale, zot kit forex deor, forex i ganny sorti atraver bann loop hole dan tax system e ki zot vini, zot benefisye avek TIA, zot dir zot pe anmenn foreign direct investment dan pei eksetera, eksetera.  Me an retour ki kantite zot zot pe kontribye dan lekonomi olye ki sa pti biznes li isi lokal akoz i napa sa bann eksper e i pa tax avi i pe pey son tax li normal be sa gro biznes li i pe repatri son larzan deor oubyen i pe kit son larzan deor san ki the tax system i kapab reelman retir enpe larzan avek zot.

Alors Mr Speaker mon ti a kontan si Minis i eklersi en pti pe sa bann pwen.  Mersi.

 

MR SPEAKER

Bon Minister right of reply.

 

 

 

MINISTER PIERRE LAPORTE

Mr Speaker mon pa pou tre long mwan osi.  Mon pou zis komans ek sa dernyen pwen ki Onorab Rose in fer, debate on taxes.  Mr Speaker sa kestyon tax la i depi avan lepok Zezi Kri.  Ou al dan Labib ou vwar ti annan dimoun pe – taxTax i en keksoz senp, i en prensip lavi ki tou dimoun i kontribye pou lasosyete.  What ki nou bezwen selman nou bezwen en sistenm tax ki parey Onorab in dir i fair, enn ki pa penalize biznes, enn ki alafen dizour i benefisye tou dimoun.  Menm bann pei parey Dubai, Sengapour ki parfwa i dir ou tax i ba.  Tax i ba me al get konbyen fees, konbyen fines par kote ki zot donn dimoun ki nou nou napa.

Menm bann pei ki annan delwil ki dir ou napa tax i danzere Mr Speaker.  Konbyen fwa nou vwar bann pei ki ler zot dekouver delwil zot donn bal detrwa lannen en 20an en 25an apre ler delwil in fini ki zot fer?  Zot vin pli mizer ki zot ti ete avan.  I annan en pti pei i apel Nairo somewhere dan Pacific en letan ti ris ris multi-millionaire zot in donn bal apre ler phosphate in fini ozordi zot menm zot pei pli pov o monn.

Savedir menm si demen nou vwar delwil nou bezwen mazin zenerasyon pli lwen, petet nou a redwir enpe tax pou rann lavi dimoun pli ok.  Be nou pa kapab tir tou tax demen bomaten ler nou leve akoz ler delwil i fini en zour ki ou fer?  Mwan mon krwar sa deba i kler fodre ki nou sansibiliz dimoun ki tax pa la pou penalize nou selman si nou sistenm tax pa fair then i penalize biznes, i penalize sosyete.  E se zisteman sa ki nou pe sey fer atraver sa bann amannman.

Pou tous rapidman konsernan bann pwen ki ganny leve Mr Speaker sa kestyon royalty, technical fees. Wi parey nou’n dir nou anmenn li anlinny avek standar OECD.  Onorab Pierre ou’n demande si 3 poursan i en norm.  Zeneralman i en norm dan bokou juristriction parey pou nou.

Apre en lot pwen ki mon oule fer resorti, sa 3 poursan la i pa vedir ki sa amount ki sorti.  Ki mon’n dir dan mon speech si ou lir byen se ler zot par egzanp zot fer sorti royalties management fees, ler zot fer tax return zot tret sa koman en depans.  Ki nou pe dir ou kapab tir 4, 5 poursan si oule be ler ou fer ou tax return zis 3 poursan ki pou ganny konsidere koman allowable deductions par lao sa ou bezwen pey ou tax lo la.

Kestyon DTAs.  2 Onorab in koz lo kestyon DTA – sa ki enportan pou konpran osi se ki nou model DTA i baze lo standar OECD e se pourkwa ki partou kot nou al negosye nou ganny byen aksepte.  Ki vre Onorab ki petet nou lo kote biznes Seselwa nou napa bokou posibilite pou make advantage of sa DTA akoz napa bokou biznes Sesel ki petet i reprezante, i entegre dan bann lezot pei, be gran lavantaz pou nou se sirtou dan nou offshore jurisdiction kot dimoun menm si kot zot ete by vertue ou annan en DTA avek nou bann ki servi nou zirisdiksyon pou anrezistre ouswa bann CSF ekstera kot zot ete la zot pey nou atraver bann fees, bann servis ki bann CSPs i servi.

Rapidman petet en dernyen pwen ki Onorab Pierre in demand.  Mon totalman dakor avek ou Onorab.  Mon krwar sa Lasanble dan bann deba lo Bidze mon pa bezwen koz lo la i kler pou tou dimoun ki nou tou nou konsansis ki wi nou anmas larzan be selman Gouvernman i bezwen promet dimoun, asir dimoun transparans dan itilizasyon sa bann larzan.  Nou’n koz bokou lo tou bann keksoz ki nou’n fer mon’n dir mon’n redir mon pa pou repete.

Lo kote sa pwen about tax ankor, mon krwar Onorab Vel in fer en pwen enportan.  Ler ou anmas plis larzan avek tax dan lavenir i a permet ou enn annan plis larzan pou depanse, be si demen osi ou pe fer byen akoz tou dimoun pe peye i a ede parey Onorab in dir dan son term en sistenm progresiv i pa dir ou leve demen bomaten takse tou dimoun ouswa i pa dir ou leve demen bomaten redwir tax pou ou fer plezir.  Ki ou bezwen fer ek letan si nou tax system i vin efficient plis dimoun i peye, nou ganny plis larzan then nou kapab donn enpe plis me anmenmtan nou kapab redwir sa burden lo biznes a longer di tan parey nou’n komans fer.  Mon’n redwir biznes, business tax sorti 33 pou vin 30 poursan e mon ganny dir pou dir sa pabon pou biznes.  Alor mon demande ki nou pou fer?  Nou’n dir pou dir ek letan nou pou kontinnyen revwar koman nou kapab redwir tax.  Be pou nou redwir sa tax fodre tou dimoun i peye.  Alafen dizour ou ganny plis dimoun pe pey menm kantite be zot rate a bese.  This is where we have to have a progressive tax ki efficient ki alafen dizour dimoun i bezwen pey zot tax i en lobligasyon moral, i en lobligasyon normal e Mr Speaker mon ava aret lo sa pwen, e mon remersi zot pou siport sa Bill.

MR SPEAKER

Bon, in ariv ler pou nou vote lo merit zeneral Bill.  Bann ki an faver?  Okenn ki kont?  Mon a ganny en formal second reading.

THE CLERK

A Bill of an Act to amend the Business Tax Act 2009.

MR SPEAKER

Ok, mon a ganny en Mosyon pou sot Committee Stage.

HON MARIE-ANTOINETTE ROSE

Mr Speaker anba Order 91(1) mon move ki nou sispann Order 65 to 70 pou nou sot Committee Stage.

 

MR SPEAKER

Okenn ki segonde?

 

HON CHARLES DE COMMARMOND

Mr Speaker avan mon segonde zis petet esperon ki David Esparon i ekrir sa sinyatir pli byen next time, I annan sa pti fot la parey yer mon ti dir so esperon sa i a en pti fot tiprografik ki a kapab ganny sanze letan nou pe sot Committee Stage.  Mon a segonn sa Mosyon.  Mersi.

 

MR SPEAKER

Mon krwar lofis Atorni Zeneral in note.  Mon pa ganny en konpran akoz zot pa kapab ekrir Esparon mwan.  Anyway.  Bon nou a pran en vot.  Tou bann ki an faver?  Okenn ki kont.  Mon a ganny en motion for third reading.

HON MARIE-ANTOINETTE ROSE

Under Order 71(1) mon move ki nou lir sa Bill en trwazyenm fwa.

 

MR SPEAKER

Okenn ki segonde.

 

HON CHARLES DE COMMARMOND

Motion segonded Mr Speaker sir.

MR SPEAKER

Tou bann ki an faver?  Okenn ki kont?  Bon mon a ganny mwan en third reading.

 

THE CLERK

This Act may be cited as the Business Tax Amendment Act 2012.

MR SPEAKER

Ok, Bill in pase nou pou adjourn ziska 11er ki nou pou pran sa Bill Supplementary Estimate.

 

(Break)

 

MR SPEAKER

Bon nou ava pran dernyen Bill ki lo nou Order Paper e sa se Supplimentary Estimates 2012 nimero 2 e ankor i pou neseser avan ki nou pran son second reading ki nou waive the seven days requirementSo mon a ganny en Mosyon.

 

HON MARIE-ANTOINETTE ROSE

Mr Speaker anba Order 91(1) mon move ki nou sispann Order 64(1) pou nou waive sa seven day requirement.

 

MR SPEAKER

Okenn ki segonde?

 

HON CHARLES DE COMMAMRMOND

Mr Speaker Mosyon i ganny segonde.  Mersi.

 

MR SPEAKER

Bon mon a ganny mwan en Motion for second reading.

HON MARIE-ANTOINETTE ROSE

Anba Order 64(2) nou move ki nou lir sa Bill en dezyenm fwa.

 

MR SPEAKER

Okenn ki segonde?

 

HON CHARLES DE COMMARMOND

Seconded Mr Speaker sir.

MR SPEAKER

Bon mon a prezan envit Minis pou prezant Supplementary Estimates Bill.

MINISTER PIERRE LAPORTE

Mr Speaker, Onorab Manm Lasanble Nasyonal, mon pe demann Lasanble Nasyonal ozordi pou aprouv sa Bidze siplemanter pou lannen 2011 pou reglemant bann depans fer par lao Bidze ki ti aprouve pou sa lannen.

Mr Speaker Public Finance Article 53(b) lartik 154(6) i rekonmande ki nenport sonm ki ganny depanse par lao sa sonm aprouve par Lasanble Nasyonal i devret ganny aprouve dan sa prosen lannen fiskal apre ki sa depans in ganny fer.

Mr Speaker sa sonm ki mon pe demann laprouvasyon Lasanble Nasyonal ozordi i R120 milyon, 518 mil, 526 ki ti ganny depanse annekse.  Mon pou aprezan eksplik brefman sa bann depans ki’n ganny fer Mr Speaker.

Dabor pou Minister Zafer Etranzer en sonm R24 milyon, 177 mil, 633 ti’n ganny rikorde dan bann kont pou bann misyon aletranze, sa ti bann kou loperasyon tel ki saler e bann lezot depans pou komodite e servis.  Sa sonm in akimile pou bann lannen oparavan.  Alors nou bezwen regilariz sa bann depans.

Dezyenmman transfer pou sekter piblik en sonm R20 milyon, 480 mil, 787 ti ganny depanse an plis anba Transfer pou sekter piblik prensipalman pou Air Seychelles Limited, pou kouver kou asosye pou bann travayer ki ti ganny fer redundant swivan restriktirasyon Air Seychelles e osi lezot depans operasyonnel ki Air Seychelles ti bezwen fer tel ki karbiran.

Mr Speaker zis pou azoute ki Lasanble ti ganny met okouran ki ti kapab annan ankor lezot depans siplemanter pou Air Seychelles ler Minis pou Finans sa letan ti demann Bidze Siplemanter lannen pase.  Pou tou bann depans ki ti fini deza ganny fer avan ki Gouvernman ti fer lagreman partnership avek Etihad an Fevriye 2012.

Trwazyenmman Mr Speaker, peyman santralize provizyon pe ganny fer pou peyman aryeraz sa i pou en sonm R1 milyon, 270 mil, 539 ki ti ganny depanse plis ki i ti ekspekte e sa ti pou subscription avek bann lorganizasyon enternasyonal tel ki Food and Agricultural Organisation e Commonwealth Telecommunication Organisation.

Katriyenmman Mr Speaker, i bann balans reveni zeneral en sonm R45 milyon, 543 mil, i ganny demande pou reglemant sonm ki ti ganny peye atraver tranzaksyon Treasury Bills pou Chiva sa envestiser Endyen, sa Mr Speaker i lye avek propriyete ki ti ganny lease out Grand Anse Mahe Chiva ti depoz en sonm an premye $7.5 milyon an 2007.  Swivan diskisyon Gouvernman ti apre deside repran sa later an 2011 e alors ti neseser ki i pey konpansasyon pou sa sonm ki ti’n ganny depoze inisyalman e lezot kou asosye.

Avek to lesanz an 2011 kot roupi in depresye konpar avek 2007 sa i fer ki Gouvernman in bezwen rann roupi ekivalan $7.5 milyon.

Senkyenmman davans zeneral Mr Speaker, en sonm R29 milyon, 29 mil, 567 ti ganny donnen koman loan loto pou lannen 2011 ki pa ti’n ganny pibliye e prezan pe ganny rektifye.  Sa i bann loan loto Trezor ki ti donnen pou travay ek Gouvernman.

Mr Speaker, mon demann Lasanble Nasyonal pou aprouv sa Estimasyon Siplemanter a en sonm R120 milyon, 518 mil, 526.  Mon remersi zot.

 

MR SPEAKER

Bon deba i ouver.

 

HON DAVID PIERRE

Mersi Mr Speaker.  Mr Speaker Minis in anmenn devan sa Lasanble en Bidze Siplemanter pou lannen 2011 e mon pou komans mon reaksyon an relasyon avek sa Bidze Siplemanter an fer remarkan pou dir pandan lannen 2011 in annan plizyer Bidze Siplemanter ki’n vin devan Parlman.  Annefe i annan 5 diferan Bidze Siplemanter ki’n vin devan Parlman pou lannen 2011 e ozordi Minis in anmenn enn ki mon mazinen zot in met ansanm apre ki the accounts of Gouvernment in ganny audited towards lafen lannen 2011.

Mr Speaker i regretan pou vwar ki i annan sitan kantite Bidze Siplemanter ki vin devan Parlman pou en lannen an partikilye.  Me sa ki pli enportan pou nou refer sorti ankor i se ki mwan mon ti ava vreman apresye si Minis i fer li parti son devwar koman Minis Finans pou practice an relasyon avek Bidze Siplemanter pou fer sir ki the Gouvernment oubyen Minister Finans i vin devan Lasanble Nasyonal e request pou Lasanble Nasyonal aprouv en Bidze an plis ki i pa ti’n prevwar pou sa Bidze ganny depanse olye ki sa Bidze i ganny depanse apre preski 1an plitar oubyen 1an edmi plitar Minis i vin devan sa Lasanble e demann Manm Lasanble pou regilariz sa depans ki Gouvernman in deza fini fer.  Mon krwar it is good practice si the Gouvernment, si the Minister, Minis Finans i vin request ek Lasanble, demann lotorizasyon and then spend rather than depanse apre 1an oubyen 1an edmi plitar vin devan Parlman e demann Parlman pou regilarize.  Sa i pwen limero enn.

Dezyenm pwen i se ki sa Bidze Siplemanter i annan pou fer avek lannen 2011 right.   Now rapor Oditer Zeneral pou lannen 2011 i vin devan sa Lasanble an Desanm 2012 apre ki nou’n fini diskit Bidze pou lannen 2013, e lo la mon annan en pwen pou mon refer sorti, e mon ti a kontan ki Minis i pran sa an konsiderasyon.  Nou nou anvi, mwan koman Leader Lopozisyon dan Lasanble Nasyonal mon ti ava voudre vwar en sitiasyon kot premyerman rapor Oditer Zeneral e la nou pou pran sa lannen an kestyon, rapor Oditer Zeneral pou 2011 ti a vin devan sa Lasanble Nasyonal bokou pli boner ki in vini sa lannen.  Now si sa ti arive then sa ti pou vedir ki kont Gouvernman an relasyon avek 2011 ti pou annord pli boner e Minis ti a kapab anmenn en Bidze Siplemanter an relasyon avek lannen 2011 bokou pli boner ki in anmennen la.  La Minis in bezwen esper kont Gouvernman ganny mete annord, esper kont Gouvernman ganny odite, esper rapor Oditer Zeneral sorti and then anmenn sa Bidze Siplemanter ki annan pou fer avek 2011 final apre ki tou sa tranzaksyon in bezwen fini ganny fer.  Akoz kont Gouvernman in bezwen fini ganny odite, fini ganny mete annord avan ki Minis i kapab vin donn nou detay konkret lo the final Bidze Siplemanter an relasyon avek lannen 2011.

Mwan mon krwar pou dir nou bezwen adopte en practice e mon kontan ki i annan sa nouvo Public Finance Management Bill ki’n sorti e nou bezwen abide e adopte en practice kot kont Gouvernman an relasyon avek depans larzan piblik i bezwen ganny mete annord pou en lannen dizon pou 2012, i bezwen ganny mete annord avan premye 3 mwan 2013.  Now letan sa kont in ganny mete annord Oditer Zeneral i ava odit sa kont dizon in the next 3 months so savedir kont 2012 i ava ganny mete annord by lafen Mars 2013, Oditer Zeneral i ava odit, fer en odit final lo sa kont Gouvernman pou 2012 by Zen 2013 e letan Oditer Zeneral in fini odit kont Gouvernman by Zen 2013, sa rapor Oditer Zeneral i ava sorti akoz i a fer son rapor dizon by end of Juillet Oditer Zeneral i a fer son rapor an relasyon avek lafason ki Gouvernman in depans larzan ki’n ganny bidzete pou 2012, i a fer son rapor par lafen Juillet 2013 e letan i a fini fer son rapor then FPAC li prezan i a kapab deliber lo sa rapor e li an retour fer son rapor pour ki: enn Lepep Seselwa i a ganny en rapor odite lo lafason ki Gouvernman in depans son larzan an 2012 avan lafen lannen 2013 e sa rapor i ava kapab ganny servi par FPAC pou nou vwar ki bann defayans ki’n annan dan lafason ki Gouvernman i depans larzan piblik.  Mon krwar nou bezwen bouze, nou bezwen bouze e Gouvernman i bezwen komans aplik fer sir ki i annan bon practice e fer sir ki i abide avek tou bann Lalwa ki egziste e fer sir ki i egalman abide avek tou bann financial instructions ki Minister Finans limenm li in met an plas.

Mon krwar pou dir nou bezwen fer sir ki alavenir nou abide to bann good practices kot i annan bon accountability e pou fer sir ki i annan transparency dan lafason ki larzan Lepep i ganny depanse e annefe Minis mon krwar pou dir ou menm ou ava dakor avek mwan pou nou la pe fini lannen 2012 nou pe rantre dan lannen 2013 apre ki nou’n fini diskit Bidze pou 2013 nou vwar nou dan en sitiasyon kot nou pe ganny demande pou nou aprouv en Bidze Siplemanter ki’n ganny servi pandan lannen 2011.  Mon krwar sa i pa akseptab e mon krwar Sesel koman en pei i bezwen bouz in the right direction as far as larzan piblik i konsernen.

Now Minis in donn nou detay lo sa bann depans ki’n ganny fer an 2011 right. Minis in koz lo Air Seychelles par egzanp right.  Minis in koz lo Air Seychelles mon krwar pou dir sa larzan ki Minis in donn Air Seychelles mon krwar i bann larzan ki ti’n kapab ganny prevwar akoz sitiasyon ki Air Seychelles ti pe fer fas avek in la pou en kantite letan e in annan negosiasyon pou en kantite letan an relasyon avek sa size Air Seychelles. I pa’n en keksoz ki’n vin dizour a landmen, in en keksoz ki’n ganny negosye over a long period of time e sa ti ganny fer kler boner lannen 2012.

Dezyenm keksoz ki Minis in koz lo la in koz lo settlement pou Chiva right.  Mon krwar pou dir Minis in mansyonn en sonm si mon pa tronpe $7.5 milyon and then Minis in dir nou pou dir son final settlement ti R45 million.  Now R45 million i zis en final settlement dan sa total of $7.5 milyon ki vedir i annan bann larzan ki ti’n ganny peye depi avan an relasyon avek sa sitiasyon.  Alors petet Minis i kapab eksplik nou akoz si i annan larzan ki’n ganny peye depi avan savedir ti annan en lagreman ki ti’n fini ganny fer depi avan ki sa settlement i ganny fer.  Akoz ki zot in bezwen therefore en supplementary pou zot kapab pey sa final settlement akoz ki zot pa ti’n prevwar sa depi avan o moman ki sa lagreman final ti’n ganny sinnyen ler zot ti negosye pou repran sa morso later avek Mr Chiva.

Lot larzan ki Minis in dir nou aprouve la i sa 1.278 milyon ki i annan pou fer avek arrears of subscription to international organizations such as FAO, eksetera, eksetera.  Mon krwar pou dir Sesel in form parti lorganizasyon FAO for a very long time now.  Akoz ki nou’n bezwen en larzan siplemanter pou nou kapab pey sibskripsyon pou en lorganizasyon ki nou nou’n form parti pou en kantite letan mon krwar Minis i bezwen reponn nou kestyon lo sa size.

Menm zafer avek car loansHonestly speaking Mr Speaker, mon pa’n ganny en konpran lesplikasyon ki Minis in donn Lasanble Nasyonal an relasyon avek the issue of car loans.  Mon oule personnelman en pti pe plis lesplikasyon lo kimannyer sa bann car loans in vin atraver en Bidze Siplemanter.  Mon krwar pou dir si serten Minister ti pe donn car loans then ti bezwen annan serten provizyon pou sa dan Budget akoz sa i en polisi en Minister, i pa en keksoz ki ganny fer la pou la.  Si i en policy then nou bezwen fer sir ki i annan provizyon ki ganny fer dan Budget.  Akoz ki nou bezwen demann en siplemanter pou sa?  Sa i bann larzan ki zot in depanse e Minis in vin demann Lasanble pou aprouve.  Mon oule bokou plis leklersisman lo sa size sa bann size ki Minis in dir nou.

Me selman pwen lesansyel mwan koman Chairperson FPAC dan Lasanble Nasyonal, mon senserman Minis anvi vwar Gouvernman, Minister Finans sertennman bouz dan en direksyon kot nou demontre plis latransparans e plis accountability dan lafason ki tax payers money i ganny depanse e mon anvi ki Minis i pran an konsiderasyon sa ki mon’n dir an relasyon avek kont piblik kot i ganny met annord boner, Oditer i kapab, annefe Mr Speaker, Oditer menm avan ki kont i ganny mete annord dan bann Oktob, Novanm Oditer i fer en lodit – en interim audit.  So Oditer i deza prepar li pou li odit final kont Gouvernman pou sa lannen, so si nou bouz dan sa direksyon kot Gouvernman i fer sir ki i donn son bann accounts on time and that would be at least plitar lafen Mars 2013, Oditer Zeneral pou kapab finaliz son lodit lo kont Gouvernman within 3 months akoz in fini fer en audit enterim oparavan.  Now letan i pou kapab fer sa i pou egalman kapab fini fer son report within avek resours ki i annan within a month.  So rapor Oditer Zeneral pou’n fini sorti par milye lannen 2013 e nou nou a kapab deliber lo la e piblik an zeneral i a vwar pou dir i annan en improvement, i annan en huge improvement dan sa direksyon and furthermore Mr Speaker i pou egalman bon pou Sesel konman en pei an relasyon avek bann zefor ki Sesel pe fer pou li fight against corruption.  E sa i pou ed nou lo transparency international i pou ed nou lo sa index pou nou sorti kot nou ete ozordi pou nou mont enpe pli o pou lemonn konnen omwen pou dir Sesel pe fer en zefor ekstraordiner, en zefor solid pou li fight against corruption, pou li anmenn latransparans e pou li anmenn accountability lo sa nivo ki i devret anmennen an relasyon avek tax payers money e an relasyon avek lafason ki larzan piblik i ganny depanse.  Ler – nou konnen pou ler nou pe bidze en larzan pou en depans pou en Minister sa larzan i ganny servi pou sa purpose for which it was budgeted.

Sa i mon swe e sa i mon lanvi pou Sesel e pou sa Lasanble Nasyonal.  Mersi Mr Speaker.

 

HON MARIE-ANTOINETTE ROSE

Mr Speaker sa Proze De Lwa ki devan nou i dernyen Proze De Lwa ki nou Lasanble i pran pou sa lannen e a mon avi i malere ki dernyen Proze De Lwa ki nou pe pran set en Proze De Lwa ki nou Lasanble nou pa happy avek.  Nou konpran ki Gouvernman i bezwen fonksyonnen, Parti mazoriter nou konpran sa tre byen me mon pou zwenn lapel ki’n ganny fer pou ki i annan en meyer pratik dan lafason ki bann larzan i ganny apropriye e ki nou pa vwar nou retrospectively pe aprouv larzan ki Gouvernman in fini depanse.  Nou pou regularize sa depans, i pa fer sans pou nou pa fer li me nou pa happy ki nou pe ganny demande pou regularize en depans ki’n ganny fer an 2011.

Bann pratik parey Mr Speaker, i selman anbaras nou Gouvernman e i anbaras nou isi dan Lasanble e i pa fer personn okenn dibyen.

Mon krwar ozordi i moman pou Gouvernman ek Parlman pran en desizyon lo lafason ki nou adres sa problenm.  I en problenm ki’n la detrwa lannen e mon rapel mon predeseser in dir menm parol ki mon pe dir ozordi pou ki nou met lanmen lo sa problenm e ki nou fer sir ki lannen prosenn ler Minis Finans i vin devan nou Parlman nou osi nou pe met an pratik bann good practices ki nou’n demann Gouvernman pou fer, ki nou’n demann sekter prive pou fer.  Nou bezwen met an pratik bann bon pratik e nou bezwen fer sir ki Parlman pe vreman zwe son rol oversight an sa ki konsern depans piblik.  Mon pa pe dir ki sa bann depans pa merite ganny fer, i merite.  Si nou drwa nou bezwen peye, si nou bezwen larzan nou bezwen rode, me nou pe demande ki i ganny fer dan en fason ki akseptab e nou pe demande ki i annan en standar dan lafason ki bann Supplementary Estimate i vin devan nou Lasanble pou nou aprouve.

Alors Minis mon ti a vreman kontan ki enn fwa pou tou nou met lanmen lo la e ki nou tonm dakor on the way forward.

Mr Speaker sa lannen ki nou’n pas ladan in en lannen enteresan, in en lannen kot in annan en kantite travay ki’n ganny fer ant Gouvernman ek Parlman e in annan en kantite demann ki Parlman in met devan Gouvernman ki’n ganny aksepte.  Mon remersi Minis par egzanp pou ki bann demann ki nou Parlman nou’n met devan li dan Bidze in ganny aksepte.  Lendikasyon ki i annan zorey ki pe ekoute, e lendikasyon ki’n annan progre ki’n fer an sa ki konsern travay ant Parlman e Gouvernman e mon demann ozordi i al dan sa direksyon pou ki nou kontinnyen, nou pa fini la me ki nou kontinnyen travay e kontinnyen perfeksyonn en sistenm e si Gouvernman in deside al dan dezyenm zenerasyon reform e in ganny sipor Lasanble dan dezyenm zenerasyon reform mon krwar i bezwen osi aplik pou Parlman, i bezwen osi aplik pou serten pratik ki pe ganny fer ki a mon avi i bezwen arête e nou bezwen annan en fason fer ki akseptab.

Mr Speaker lo sa note parey mon’n dir depans in ganny fer i reste pou nou regilariz li me nou demande ki nou tonm dakor, Gouvernman ek Parlman nou tonm dakor lo en fason fer an sa ki konsern bann Supplementary Estimates. Mersi.

 

MR SPEAKER

Minister right of reply.

 

MINISTER PIERRE LAPORTE

Mr Speaker, ser Manm Onorab, ki mon bezwen dir ki mon partaz pwennvi sa 2 Manm Lasanble ki’n koze ki i pa nice pou war ou isi la nou pe tap laport 2013, pe regilariz depans 2011.  Les mon a fer sorti ki aktyelman pe regilariz en bann depans menm avan 2011, par egzanp bann arrears, bann peyman pou Foreign Affairs Ministry ki’n akimile depi menm avan me selman nou met tousala ansanm.

Mon krwar mesaz i kler, mon krwar mesaz Lasanble Nasyonal se ki nou bezwen ler nou koz ki nou en pei modern, transparans, bon gouvernans nou devret pratik li pa zis koz li.  Alor ki mon kapab dir sa Lasanble se mon partaz zot konsern e mon krwar Vis Prezidan avan i ti sorti Finans li osi i ti annan sa konsern, sa lentansyon.

Lo en baz zeneral mon pa pou kapab donn komitman lo lapar Oditer Zeneral vi ki li i en Lenstitisyon endepandan me mon a donn mon komitman Lasanble Nasyonal ki mon pou al vwar li mon pou travay ansanm ek li e mon a sizere ki a en moman lannen prosenn boner nou vin isi Lasanble Nasyonal mwan avek li e nou ava zwenn zot nou ava vwar ansanm sa bann propozisyon ki Onorab Pierre avek Onorab Rose in fer enkli bann timeline.  Mon pa kapab komit lo timeline dan son plas me selman mon krwar in fer sans sa lozik omwen i fer sans nou ava vin vwar zot pou nou koz lo la.

I vre ki parfwa i annan depans ki ou pa kapab anpese.  Mon pa tro dakor ek Onorab Pierre ki nou ti devret prevwar tou bann depans Air Seychelles akoz dan en sans sa problenm Air Seychelles in vin en pti pe, pou en bon pe lannen Air Seychelles ti pe fer son profi, apre keksoz in deteryore dan en fason rapid se pourkwa VP detrwa fwa i ti bezwen vini ler i ti kwar i tin fini parfwa, alor serten depans Air Seychelles i pa neseserman ki mon ti kapab prevwar.

Lo kote FAO Mr Speaker, wi ler nou ti komans reform an 2008 ti annan plizyer, ti annan de milyon de milyon bann arrears ki ti annan avek lorganizasyon enternasyonal.  Nou ti’n clear lamazorite me i annan enn de ankor par egzanp FAO ki ti ankor reste e nou’n bezwen clear li dan arrears selman pou lenstan depi sa lannen nou a term avek nou bann subscription pou bann lorganizasyon eksepte bann ki nou’n koz lo la dan Committee Stage resaman par egzanp EU.

Lo kote car loans Mr Speaker sa mon a eksplike.  Basically car loans oparavan dapre regilasyon sa i anba general advance pa ti bezwen ganny apropriye.  Me anba nouvo practice e diskisyon ki nou’n gannyen avek Oditer Zeneral prezan nou’n bezwen apropriate li akoz sa bann depans in fini ganny fer lannen pase vedir ou get sa kantite larzan ki nou pe koze la R29 milyon petet i eksplike akoz menm si sa mezir ki nou’n pran pou aret car loan Gouvernman i pa tro popiler i senpleman napa sifizaman larzan pou satisfer tou dimoun menm si nou’n dir nou pou revwar kimannyer sa i kapab ganny fer.

Mr Speaker mon pa pou koz pli lontan ki sa mon krwar mesaz i kler mon pa krwar sa ki mon pou dir i pou ed sitiasyon parey mon’n dir i basically aksyon ki devret koze.

Les mon a donn komitman sa Lasanble ki mon partaz zot bann konsern, annou pran kont ki parfwa dan lefitir nou papou zanmen kapab dir ki zanmen nou pou vin avek en Supplementary. Mon krwar Lasanble i ase saz e balanse pou demen si i vreman annan en ka eksepsyonnel, en ka merite Lasanble pou siporte me Lasanble osi pa kapab mwan apre mwan parey Onorab in dir nou pa kapab an 2013 ler nou pe met en lipye an 2013 nou lot lipye i devret dan 2012 pa dan 2011 par deryer.  So mon a donn zot mon komitman ki mon a travay ek zot pou nou amelyor sa sitiasyon.  Mersi Mr Speaker.

 

MR SPEAKER

Bon nou ava pran en vot lo merit Bill.  Tou bann ki an faver?  Okenn ki kont?  Mon a ganny mwan en formal second reading.

THE CLERK

A Bill of an Act to provide for the purposes of a Supplementary Estimate approved by the National Assembly.

MR SPEAKER

Committee stage.

HON MARIE-ANTOINETTE ROSE

Anba Order 91(1) mon move ki nou sispann Order 65 to 70 pou nou sot Committee Stage.

MR SPEAKER

Okenn ki segonde?

 

HON CHARLES DE COMMARMOND

Mosyon ganny segonde Mr Speaker.

 

MR SPEAKER

E Esparon in byen ganny ekri?  Alright.

Bon nou ava pran en vot lo la.  Tou bann ki an faver? Okenn ki kont?  Mon a ganny en Motion for third reading.

 

HON MARIE-ANTOINETTE ROSE

Mr Speaker anba Order 71(1) mon move ki nou lir sa Bill en trwazyenm fwa.

 

 

MR SPEAKER

Okenn ki segonde?

 

HON CHARLES DE COMMARDMOND

Segonded Mr Speaker sir.

 

MR SPEAKER

Ok, nou ava pran en vot.  Tou bann ki an faver?  Okenn ki kont?  Bon mon a ganny mwan en third reading.

THE CLERK

This Act may be cited as a Supplementary Appropriation Number 2 Act 2012.

MR SPEAKER

Bon Bill in pase.  Donk alor nou ava remersi Minis Finans e son delegasyon e eskiz zot parmi nou ozordi.  E Minis demen nou pe rankontre.  So mersi bokou pou zot pasyans e zot korperasyon avek Lasanble Nasyonal e a byento nou ava zwenn.  Minis ki vin pli souvan dan Lasanble se Minis Finans so mon mazinen boner lannen prosenn nou pou vwar ou ankor.  Mersi bokou.

 

MINISTER PIERRE LAPORTE

Zot tou ankor en bonn fet e mon a vwar zot demen. Bye bye.

MR SPEAKER

Bon i reste mwan pou fer mon remark zeneral lo lannen 2012, i pou enn tre kourt e apre sa nou ava adjourn ziska lannen prosenn.

Bon, ser, frer, Manm Onorab nou’n ariv alafen en lannen travay.  En lannen ki’n vwar en nouvo dinamizm dan travay Lasanble Nasyonal.  Tou bann ki’n swiv Lasanble de pros pou admet ki performans Manm e sekretaryat i enn ki’n eksepsyonnel lannen 2012.

Nou’n vwar kreasyon 8 nouvo komite, e bann Manm sanses zot in partisip dan travay sa bann komite pou asir plis transparans dan travay Lasanble limenm e dan travay Gouvernman.  Mon ti kapab koz en zournen lo lakonplisman bann Komite, zot devouman me sifi pou mwan dir ek lafyerte ki la premyer fwa depi son legzistans sa lannen, Lasanble Nasyonal atraver komite Finans e kont Piblik pe prodwir en rapor lo Rapor Oditer Zeneral.

 

(Applaud)

MR SPEAKER

Sa devlopman i reprezant komansman en letap tre enportan dan demars Lasanble Nasyonal pou zwe son rol Konstitisyonnel oversight lo depans Gouvernman.  Esperon ki Linyon Eropeen i ava note sa e aret kritik nou dan zot rapor.

Performans bann Manm dan Lasanble mon bezwen dir in osi enn egzanpler e de ot kalite.  Tou bann ki ti krwar ki Lasanble pou en rubber stamp e boring mon krwar zot in dezapwente.

 

(Applaud)

MR SPEAKER

Nivo deba in an zeneral tre o e deba limenm in tre vibran e plen ek propozisyon.  A sak fwa ki mon obzerv zot, mon konfyans dan zot i ogmante e mon vwar e apresye zot lantouziazm pou moderniz non pa selman nou lenstitisyon me osi byen nou demokrasi.  Mon konvenki ki lavenir Sesel i sen e sof dan zot lanmen.

Lannen 2012 in osi vwar en amelyorasyon konsiderab dan relasyon travay avek Egzekitif e Lezislatif.  En relasyon ki aprezan i baze plis lo respe mityel e lapresiasyon rol Konstitisyonnel sak brans Gouvernman.  Mon oule felisit zefor e travay fomidab antreprann par lofis Dirizan Zafer Gouvernman pou rol ki in zwe pou konsolid sa relasyon ant sa de brans Gouvernman.

Pareyman mon oule remersi sipor aporte par lofis Leader Lopozisyon pou moderniz nou lenstitisyon e pou son Leadership lo Komite Finans e Kont Piblik ki’n vwar prodiksyon premye rapor lo rapor Oditer Zeneral pandan sa 20an nou legzistans.  I evidan pou mwan ki sa de leaders osi byen ki zot bann Manm Onorab zot partaz mon vizyon pou en Lasanble modern e demokratik e mon konfidan ki zot pou donn mwan tou zot sipor pou nou anmenn sa modernizasyon ver son konklizyon lozik ki bezwen osi enkli plis lotonomi finansyer e administratif pou nou lenstitisyon.

 

(Applaud)

MR SPEAKER

Mon oule senserman salye zot zefor pou donn nou lenstitisyon bokou kredibilite e respe e mon swete ki zot ava kontinyen ek sa bon travay pou sa prosen 4an.

Mon oule osi salye travay sekretaryat Lasanble Nasyonal anba direksyon lofis Clerk.  Lannen 2012 pa enn ki’n fasil ditou.  Avek formasyon bann komite, travay in plis ki double me nou sekretaryat avek mwens staf in reisi sirmont tou bann lobstak ki zot in fer fas avek.  Lannen 2012 malgre ki nou’n entansifye training pou staff lokal e enternasyonalman in osi vwar bokou defi dan zesyon resours imen.  Mon’n demande ki nou fer en gap analysis pou gete kot nou ete e kote nou oule arive.  Dan sa demars sepandan nou pa pou zanmen konpromi lo nou kiltir travay.  En kiltir baze lo lonnekte, imilite, respe e travay dir.  Nou pou ensiste lo en standar disiplin o e nou pou ekspekte ki nou bann travayer pou perform toultan par lao sa standar.  Nou pou reste touzour senser ek nou moto ki “Attitude more than Aptitude will take you to Greater Altitude”, savedir met lanfaz lo bon latitid dan travay.

Ser, frer, Manm Onorab mon note ki pandan 2012 in annan en pli gran lentere par manm piblik dan nou travay.  Nou’n resevwar plizyer delegasyon depi zanfan lekol, trwazyenm az, e diferan goup lazenes.  Mon oule felisit rol proaktif fer par nou sekretaryat pou asire ki Lasanble i vin pli pros ek popilasyon.  Anmenmtan mon oule eksprim mon lapresiasyon pou sipor ki SBC in donn nou dan disiminasyon nou travay.

 

(Applaud)

MR SPEAKER

SBC in en partner tre enportan pou edik nou popilasyon lo nou rol e nou lenportans, e 2012 in vwar en gran amelyorasyon dan relasyon nou travay ek sa lorganizasyon.  Mon swete ki SBC i osi komans realize ki antraver nou zot kapab efektivman vin sa katriyenm brans Gouvernman.

I reste mwan aprezan pou remersye mon Depite, pou sipor ki in donn mon lofis dan latas diriz Lasanble Nasyonal sirtou pou ekout sa bann gran gran Mosyon, e mon oule profit sa lokazyon pou swet zot tou bann Manm, Prezidan e son konsey Minis, tou Manm sekretaryat Lasanble, bann travayer SBC ki’n ek nou tou dilon lannen osi byen ki zot bann fanmir Zwaye Noel e Bonn Erez Ane.  Mersi bokou.

 

(Applaud)

MR SPEAKER

Bon, mersi, mersi nou ava adjourn ziska lannen prosenn pou State of the Nation. Mersi bokou zot tou.

(ADJOURNMENT)