::
Home » Verbatim » Verbatim - Third Term 2012 » Monday 10th December, 2012

Monday 10th December, 2012

NATIONAL ASSEMBLY OF SEYCHELLES

Monday 10th December 2012

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bon, nou a kontinnyen avek nou deba lo Bidze.  Avan nou komanse, mon a dir bonzour tou bann Manm Onorab, Minis ek son delegasyon e mon a envit osi bann dan lakour ki pe ekout nou e mon a envit Onorab Kevin Vidot pou donn son reaksyon.

 

HON KEVIN VIDOT

Mersi Mr Speaker.  Egalite e efikasite.  Mr Speaker, Minis, koleg Onorab, lepep Seselwa, espesyalman zabitan Larivyer Anglez, bonzour.  Egalite e efikasite i 2 mo ki annan bokou lenportans pou mwan vizavi sa Bidze pou lannen 2013.  Bidze en pei i la pou deservi lepep sa menm pei.  I sipoze ganny servi pou siport bann diferan striktir ou progranm sa pei.  An dot mo, i la pou amelyor lavi e kondisyon en endividi.  Diferan group dan lasosyete e prensipalman bann fanmir.  San okenn dout alors, en Bidze i neseser e enportan pou direksyon ekonomik e sosyal en pei e son pep.  Listwar in prouv avek nou ki en demars ver egalite pou en nasyon, pou en pep in aport bokou fri e rezilta pozitiv an sa ki konsern devlopman ekonomik e sosyal en pei.

Mr Speaker, se sanmenm sa lalit ki SPUP ti anbark lo la an 1964.  En lalit ver egalite pou en nasyon ki ti pe ganny afekte e abize par bann ki ti annan larzan e lenfliyans.  Par bann ki ti annan loportinite pou ganny en bon ledikasyon e bann non fanmir ki ti’n anzandre dan nou pei.  Lalit 1964, swivan par levennman 1977 in aport bokou pou nou pei e lepep Seselwa an gran mazorite.  I annan Mr Speaker, ki kestyonn mon sipor pou sa lepok, akoz mon pa ti ankor ne e menm eksperyans zot.  Me parey Labib i dir e ki mon reponn zot.  Beni sa enn ki pa’n vwar me ki krwar.

Mr Speaker, nou’n progrese e nou’n ariv lwen depi 1964.  Nou’n ariv sa lepok kot Prezidan Michel i apel “En Nouvo Sesel”.  En Sesel kot lepep Seselwa i annan loportinite pou epanouir, sezi bann loportinite dan diferan laspe pou limenm kree son prop loportinite e sans progrese e ede ver devlopman ekonomik e sosyal pou li, son fanmir e evantyelman son pei.  Sa lepok pe evok lapartenans kot nou merit pe vwar nou koman enn bann kontribiter enportan ver nou lekonomi.

Mr Speaker, en sanzman lepok i merit en sanzman dan konportman, fason fer, fason panse e mantalite.  Koman en endividi dan lasosyete, nou merit konpran sa e azir dan en fason pozitiv me plis ki sa osi, nou Gouvernman i merit pe konpran sa e li osi a son tour, reoriant son lekor pou reponn a bann nouvo defi ki sa lepok in e pou anmennen.  E nou dirizan Mr Speaker in konpran sa byen e in bouz dan sa direksyon e in osi demann son Gouvernman pou fer parey e sa lepok i envok sa ki nou apel efikasite.

Efikasite i primordyal dan nou lekonomi ozordi, si nou oule vreman vin en Gouvernman ki la pou amelyor e fasilit lavi son pep.  Dan en lemonn ki ranpli ek bann defi e problenm ekonomik ki Sesel pa’n ganny eparnye.  Avek resours ki pe vin deplizanpli limite e sitan enportan pou devlopman ekonomik e sosyal en pei, i neseser ki en Gouvernman i vin pli efikas dan son loperasyon e pli efikas dan fason ki i zer larzan piblik.

Mr Speaker, napa lot fason fer.  Dan sa Nouvo Sesel avek nouvo defi, i nesesit nouvo lespri.  En nouvo fason fer keksoz.  Nouvo lespri pa pe neseserman adres direkteman sa laspe laz, me en nouvo mindset.

Mr Speaker, i fasil bliy lepase e fikse zis lo lavenir.  En lepase kot nou ti koz lo egalite e en lavenir ki nou pe koz lo lefikasite, me mwan mon pe koz lo en prezan kot egalite i mars lanmen dan lanmen avek efikasite.  Se sa 2 ansanm i zengredyen enportan pou promouvwar e soutenir krwasans ekonomik ki pou anmenn sa demen pli briyan, avek plis prosperite e loportinite pou tou Seselwa.  Egalite dan efikasite.

Mr Speaker prezantasyon Bidze 2013 par Minis Finans in donn mwan en loportinite parfe pou adres serten konsern ki dan mon bann vizit devan laport, mon zabitan in souleve.  E bann ki’n osi vin vwar mwan dan mon lofis e serten mon bann frer ek ser Seselwa ki mon’n zwenn lo mon larout toulezour.  Parmi bann diferan konsern, i annan bann ki reel e ki mon partaze.

Mr Speaker, mon’n ganny elekte par zabitan Larivyer Anglez pou vin zot lavwa e pou koz pou sa bann ki pa kapab koz pou zot menm.  Ozordi ankor enn fwa, mon pou fer sa ki mon’n fer lannen antye dan sa Lasanble.  Koz pou ou, mon zabitan, pou ki ou lavwa e ou konsern i a osi ganny tande e swete, ganny ekoute.  Se mon responsabilite e determinasyon anver ou e osi nou distrik.

Pou komanse, mon oule adres Minister Lasante.  Sa Minister Mr Speaker, i ankor annan en plas enportan dan mon leker, pa zis akoz mon’n deza en travayer sa Minister, me osi akoz bokou mon zabitan i ganny touse par sa Minister dan en fason ou en lot.  San okenn sirpriz, mon ti ekspekte annan en logmantasyon dan Bidze sa Minister.  Le pwen se pa sa logmantasyon ki alarman pou lemoman, me si sa Minister i efikas dan fason i zer larzan Leta e si i annan egalite dan reminerasyon pou bann diferan profesyonnel dan diferan Departman e osi an sa ki konsern profesyonnel etranze.

Mr Speaker, mon kontan pou note ki en nouvo scheme pe al ganny enplimante pou bann ners e osi bann health care assistants.  Dapre ki mon’n ganny fer okouran, i annan en bon scheme pou bann ners, ki mon swete ava ankouraz zot pou perform en pe plis ankor e kontinnyen pran byen swen ek bann pasyan e osi gard zot dan sa profesyon e mon swete avek sa, nou ava vwar en logmantasyon dan kantite ners ki okip bann diferan ward dan Lopital.  Mon konsern i konsern serten lezot profesyonnel sa Minister.  Se ki sa i kapab anmenn en gran lekar diferans ant reminerasyon lezot profesyonnel sa Minister ki’n antre avek menm kalifikasyon.  En legzanp farmasi parmi lezot, ki a zot tour, a ganny dekouraze e kit zot profesyon.  Tou travayer e profesyonnel sa Minister i konte e annan en rol kle pou zwe.  Alors, mon demann Minis konsernen pou azir lo la.

Mr Speaker, mon pe koz lo egalite dan lefikasite.  Sa i anmenn mwan lo klinik Larivyer Anglez.  Mon seryezman pa kapab konpran kimannyer en klinik parey Larivyer Anglez, ki’n ganny konstrir plizyer lannen pase e ki pa’n zanmen ofisyelman ganny ouver osi pe ganny en alokasyon R200 mil pou renovasyon ouswa agrandisman.  Menm sonm ki klinik Beau Vallon, ki’n fek ouver son laport le 18 Avril 2011 pe gannyen.

Mr Speaker, pa bezwen en expert pou eksplik nou ki en vye batiman pou bezwen plis finans pou renovasyon ki en batiman ki nef.  E menm plis ankor.  Pa dir mwan pou lagrandisman akoz i en vye batiman, kekfwa avek nouvo demann e fasilite ki pa ti’n prevwar sa bann lannen pase, prezan i neseser.  Me en batiman ki’n fek ganny konsevwar, kimannyer i kapab deswit la annan nesesite lagrandisman?  Mon swete Minis Finans i kapab reponn mon konsern dan son reply.  Kekfwa akoz mwan avek mon zabitan, nou servi sa klinik, nou vwar en bezwen pou en bon renovasyon, ki sa bann ki pa servi sa klinik pa vwar.  Me toudmenm mon swete zot ekout nou konsern e azir dan en fason efikas akoz zabitan Larivyer Anglez e sa bann distrik ki servi sa klinik i oule vwar egalite dan lefikasite.

En lot Minister ki mon konsider koman vreman enportan pou mwan ek mon zabitan se Minister Litilizasyon Later ek Lakaz akoz i konsern en labri, en twa lo latet lepep Seselwa.  Vreman, nou vwar komitman sa Gouvernman pou kontinnyen asire ki lepep Seselwa i ganny en twa lo zot latet, malgre i pa touzour fasil.  Sa i ganny konfirmen par bann proze lakaz Zil Perseverans e osi dan detrwa distrik, malgre Lariver Anglez in napa okenn konstriksyon pou detrwa lannen la.  E dapre Bidze 2013 osi, pou napa okenn proze lakaz.

Alors Mr Speaker, sa plis ki 500 zabitan ki lo lalis espere pou bezwen esper bann diferan alokasyon lakaz lo Zil Perseverans.  Pou plizyer parmi zot, ki zot sitiasyon i vreman difisil, mon santi zot soufrans.  Sanmenm mon pou kontinnyen koz for lo sa size, ki nou a omwen vwar en laklerte dan tou sa fernwanr.  Mon pe fortman sizere ki sa Minister i vin lo medya lokal boner lannen prosen e eksplik lepep Seselwa lo sitiasyon lakaz dan nou pei.  Mersi davans pou ekoute.

Ki anmenn mwan lo mon lot pwen konsernan alokasyon lakaz lo sa Zil ki dan mon ladres lo Bidze 2012 mon ti demann sa Minister pou revwar zot polisi konsernan alokasyon lakaz pou bann distrik, baze lo lakantite dimoun lo lalis espere sak distrik.  Pran konsiderasyon bann distrik ki napa okenn proze lakaz e osi konsiderasyon an sa ki konsern later ki kapab ganny devlope e ki sa ava anmenn en pe plis fairness.  Malerezman 2012, sa pa’n arive.  Me toudmenm, mon kontan pou note ki Minis konsernen ti dan moman Question Time dir ki zot pe al revwar polisi alokasyon lakaz lannen prosenn.  Mr Speaker, mon ava esper avek pasyans sa nouvo polisi e ki avek sa nou a swete vwar egalite dan lefikasite dan alokasyon lakaz.

Mr Speaker, later Land Bank i en konsern ki mwan osi partaze e swete sa Minister i azir vit lo la lannen prosen.  Mon pou siport alokasyon Bidze pou sa Minister me espesyalman alokasyon kot Departman Survey.  Mon oule a sa moman felisit bann travayer kot Survey. Malgre napa bokou zot, avek bokou responsabilite lo zot ledo e resours ki limite, zot in arive donn tou ki zot ti kapab.  Avek en alokasyon dan Bidze pou kapab survey plis later an 2013, mon swete ki sa Minister i a kapab osi rod plis resours imen pou delivre lo bann komitman.  Avek plis later ganny survey e pare pou Seselwa ganny en pti morso, mon swete ki i ava annan en pe plis egalite e lefikasite dan alokasyon bann morso.  Premyerman, mon oule ki sa Minister i vin pli serye an sa ki konsern en dimoun ki’n deza ganny vann en morso later e si sa endividi i vann sa later avek prive, ki i pa imedyatman ou menm ganny konsidere pou en lot lasistans.

Dezyenmman, si en endividi in ganny en bout later e ki san okenn rezon valab i pa pe devlop sa later e les dormi pou 7an e pe konsider vann, ki sa Minister i entervenir dan sa sitiasyon e oblize ki sa later i ganny revann avek Gouvernman lo pri ki ti ganny vann e apre vann avek en senp travayer Seselwa ki lo lalis espere.

Trwazyenmman, mon swete ki en dimoun ki deza annan en bout later Land Bank pa devret ganny en lot bout, eksepte si zis en pti bout an adisyon avek son later orizinal.  Sa a fer ki priyorite a ganny donnen pou en dimoun ki napa ditou en bout later Land Bank e ki i pa pou zanmen kapab al aste en morso later lo marse prive ki pe kout pre R1 milyon e plis.  Sa i a fer sir Mr Speaker, ki lalit ki mon bann gran paran ti anmennen, kot pa zis sa bann ki annan bokou larzan ki kapab aste later dan sa pei, me mon bann senp frer ek ser Seselwa, parey mwan menm osi i a ganny en bout, ava reste entak e vreman egalite dan lefikasite a ganny vwar e aplodir dan sa domenn.

Mr Speaker, mon swete ki mon mesaz i ganny byen konpran me pa ganny mal enterprete.  En gran mazorite nou sitwayen i bann senp endividi ki travay dir e ki gard nou la pou defann zot drwa e fer avanse zot lentere.  Alors, i nou drwa e devwar pou fer egzakteman sa.  Me toudmenm, mon rekonnet zefor ki mon dirizan, mon Prezidan, Prezidan James Michel pe fer pou ed sa senp sitwayen pou li ganny en twa lo son latet, ou menm en bout later ki i a kapab apel pou li.  Prezidan, mon pou la pou siport ou anver sa demars akoz mon asire ki ou krwar dan egalite dan lefikasite.

Ledikasyon i lakle sikse.  Alors pou mwan Mr Speaker, mon pa kapab mank en loportinite pou adres serten konsern mon zabitan e mon konsern.  San okenn dout, nou konnen ki Minister Ledikasyon in zwe son rol anver devlopman entelektyel nou zabitan.  Sa pa an kestyon.  Kestyon ki nou pou bezwen demann ou lekor se si sa Minister pe reponn ou azir dan en fason efikas anver bann nouvo defi dan Sesel e lemonn ozordi.  Si bann standar minimonm pe ganny zwenn e si zot pe adres bann defi e konsern dan lekol, si dyalog e analiz profon in ganny fer pou vwar bezwen sak Lekol dan sak rezyon e vreman adres bann kot sitiasyon i alarman e bezwen latansyon imedyat.

Lekol Primer Larozyer i merit en Lekol ki ganny latansyon imedyat par sa Minister Mr Speaker.  Ankor en lot lannen planifikasyon pa normal e pa akseptab.  Ler mwan avek Onorab Vangadasamy, koman 2 MNA konsernen ti al vwar en zofisye sa Minister konsernan Lekol Larozyer, i ti eksplik nou problenm e konsern e menm montre nou serten plan e prosedir ki pe ganny fer.  Alors mon swete sa Minister i vin devan e eksplik bann paran e menm travayer sa menm Lekol ki pe arive e ki retar zot pe gannyen anver solisyon.

Malgre defi lo sa kote, mon oule remersye sa Minister pou azir lo konsern ki mon ti leve lo Lekol Segonder Larivyer Anglez.  Ki Lekol i merit ganny agrandir e amelyor bann fasilite neseser pou ed etidyan e ansennyan etidye e ansennyen respektivman.  Dan Question Time anver Minis konsernen e mon kontan pou vwar en alokasyon R2 milyon akoz vreman sa Lekol i en vye Lekol e la mon vwar e aplodir kot egalite dan lefikasite in prevele.

Mon oule osi felisit bann teachers e tou travayer ki ede dan en fason ou en lot pou donn nou zanfan sa ledikasyon ki neseser, pou zot osi fer sikse.  Me toudmenm, mon oule lans en lapel anver bann paran pou kan nou ganny en loportinite, annou al zet en regar lo travay nou zanfan lekol.  Me pa bezwen al lekol pou al ensilte bann teachers devan bann lezot zanfan, ki pe donn tou pou nou zanfan.  Sa pa akseptab ditou.  Annou ede konstrir me pa detrir.

Mr Speaker, mon ti’n swete vwar logmantasyon dan alokasyon pou bann pti proze distrik me malerezman pa’n arive.  Sa bann proze i tous direkteman nou kominote, nou zabitan.  Malerezman ankor enn fwa, nou pou bezwen anvoy serten ki nou ti’n planifye pou 2014.  A mon avi, i annan proze ki’n ganny bidzete, ki pa neseser ganny enplimante deswit e sa finansman ti devret ganny partaze pou lenplimantasyon proze dan nou 25 distrik.  Me toudmenm, nou a fer sa ki nou kapab avek sa ki nou annan.  Mon oule dir mersi pou bann proze ki nou’n akonplir pou 2012 e mon konnen ki sa Nwel Jim Reeves pou kontan e parmi lezot fanmir e sou distrik ki’n ganny touse.

Mon oule remersye SLTA e son Acting CEO pou zot korperasyon pou nou agrandir semen Ma Joie ki byento i pou kado sa langazman ki mon pou donn zabitan Ma Joie.

Mr Speaker, avek en logmantasyon R200, anonse par Prezidan Michel alokazyon lanniverser Prezidan Rene, mon konnen ki Madanm Laboudallon i en pe pli kontan la ler i pe ekout mwan e pe frot son zenou ki’n fatige, apre donn bokou pou son pei, parmi lezot nou bann dimoun aze.  Me toudmenm, mon konnen ki serten mon zabitan i en pe mekontan ki en logmantasyon saler pou pran lefe an Zilyet, kantmenm mon’n konpran byen leksplikasyon Minis akoz pou koumsa.  Mon oule toudmenm demann li lo non egalite dan lefikasite, ki i eksplik nou, koman Minis Finans, ki pou ganny fer dan sa 6 mwan ki pe vini, pou adres bann gro saler ineksplikab ki serten bann super CEO, parey in ganny dir pe obtenir.

Mr Speaker, Minis i konn byen, pou economic growth e osi economic development arive, nou bezwen partaz larises.  Nou bezwen rakoursi lekar ant sa ki ganny mwens avek sa ki ganny plis.  Bokou nou i travay dir dan sa pei.  Alors, nou tou nou merit ganny byen rekonpanse pou nou travay.

Mr Speaker, ler bann Manm Lasanble Nasyonal i koze konmela, bokou dimoun, Departman Gouvernman, Zidisyer e sekter prive i komans ekoute akoz se nou lavwa lepep e nou adres konsern lepep.  Alors, i dan zot lentere pou ekoute.  Se dan sa loptik ki mon kontan pou dir ki ler nou ti fer demann pou sekter prive ogmant saler zot travayer, ki ede par zot travay dir, pou anmenn profi pou sa lakonpannyen.  Minis Lanplwa osi in bouz avek menm viger e annan bann dyalog avek bann responsab lakonpannyen IOT. Mon kontan pou antann e dir ozordi ki sa lakonpannyen pe al ogmant saler zot travayer lannen prosenn.

 

(Applaud)

 

HON KEVIN VIDOT

Mersi pou azir pozitivman e mon lans en lapel avek lezot lakonpannyen prive pou swiv sa bon legzanp, pou ogmant saler zot travayer.  Avek en logmantasyon dan kou lavi, i neseser ki bann travayer Seselwa i ganny en pe plis larzan dan zot pos, pou asire ki zot bann bezwen de baz i ganny zwenn e si posib, met en pti larzan dekote.  Me mon admet, pou bokou Seselwa, sa pa touzour fasil.  E alors mon swete ki Lazans Proteksyon Sosyal i zwe son rol e asir lepep Seselwa egalite dan lefikasite.

Prezidan Michel avek Vis Prezidan Faure pe kontinnyen diriz sa bis progre lo highway prosperite.  Bann kontroler dan bis i bezwen vin pli konsyan lo destinasyon sa bis.  Nou destinasyon i ver “En Nouvo Sesel” kot egalite dan lefikasite i rennyen.

Mon oule sezi sa loportinite pou swet Prezidan Michel, Vis Prezidan Faure, Speaker Lasanble, tou koleg Onorab, Minis avek tou zot fanmiy, tou dimoun alekout, espesyalman zabitan Larivyer Anglez, en Zwaye Noel e ki Bondye i beni nou lepa ver 2013.  Mersi.

 

(Applaud)

 

MR SPEAKER

Onorab Jacqueline

HON SULTANNE JACQUELINE

Mersi Mr Speaker.  Mr Speaker, Minis ek ou delegasyon, pep Seselwa, koleg Onorab, sirtou zabitan Port Glaud, bonzour.  Mr Speaker, malgre to krwasans ekonomik global in kontinnyen montre enstabilite pandan lannen 2012, kot bokou pei in kontinnyen ganny afekte remarkableman par sa ki’n apel kriz ekonomik, spesyalman bann dan zone Ero e Lanmerik osi in trouv li dan bokou difikilte, menm si in montre siny progre pou redres son lekonomi.  Minis Finanas in donn nou lasirans ki nou pti pei Sesel in reisir mentenir en to krwasans ekonomik ki asir plis devlopman pou nou nasyon Seselwa an 2013.

Sa Bidze i tre ankourazan Mr Speaker, akoz dan en letan kot sanzman dinamik pe anmenn bokou defi e lensertitid ekonomik dan tou kwen lemonn, ki bann gran biznesmenn parey Mr. Bill Gates i koz lo la koman, “A New Era of economic uncertainty in the dynamic global environment”, Gouvernman Parti Lepep in reste touzour angaze pou onor sa bon prensip fondamantal, pou met son pep o sant devlopman.  En prensip nob ki bokou pei pe adopte e promouvwar, akoz i sel stratezi pou asir devlopman ekitab pou en nasyon prospere.  Reveni kolekte dan nou pei i ganny envestir dan devlopman nou pep, san fer okenn diskriminasyon.

Mon pou vot an faver sa Bidze Mr Speaker, akoz sa prensip nob i garanti nou nasyon pou kontinnyen ganny akse avek en bon swen lasante e ledikasyon gratwit.  En swen lasante garanti zis apre ki en zanfan in ganny konsevwar, letan in ne, garanti ki i pran tou son vaksen e annan swivi tre o nivo letan i pe grandir, kot lekol e plitar dan son lavi antye.

Lasante danter in vin pli entansif.  Minister Lasante i menm annan en pti bis ki vin sers e retourn avek zanfan, pou fer sir ki zot kit zot apwentman.  Ledikasyon depi 3an edmi ziska omwen 16an, ziska Liniversite pou serten ki annan sa abilite e kapasite kontinnyen.

Devlopman lozman e mentenir en bon sistenm Byennet Sosyal, Lasistans Welfare pou siport bann ki mwen fortinen, pou anpese ki zot viv dan lamizer.  En pei ki bokou dimoun i reve pou zot viv ladan.

Mr Speaker, tou Seselwa i benefisye dan en fason ou en lot anba progranm Parti Lepep.

En pep an bonn sante byen edike, ki viv dan en bon lizyenn i devret kapab travay dir, pran bon desizyon, fer bon swa pou elev nivo lavi son fanmiy ekonomikman, fizikman, moralman e spirityelman.

I evidan Mr Speaker ki sa bann lensertitid i fer nou bann defi vin pli difisil, akoz lo en baz ekonomik, nou pe konstate ki nou napa kontrol lo pri fuel ki kontinnyen ogmante.  Ki rezon prensipal pou logmantasyon pri lavi an zeneral e besman dan lakantite touris ki ti a anvi vin vakans Sesel.  I annan osi konfli lager dan bann pei, ki koz bokou enstabilite dan fer good business e menas latak pirat ki malerezman i ankor tre prezan e ki met otaz bann peser e kontinnyen afekte pilye nou nou lekonomi.

Mr Speaker, Seselwa i konpran tre byen larealite sa monn ki nou pe viv ladan.  Napa personn ozordi ki pa konnen ki nou annan en sistenm marse lib dan nou pei e ki marsan i enport zot marsandiz e osi fikse zot pri, apre ki zot in kalkil depans e fre sorti dan pei enportater pou ariv sesel e finalman dan zot laboutik.  Seselwa i konn tre byen ki i annan bann marsan egois ki a tou pri oule fer profi egzorbitan, san pran konsiderasyon soufrans en fanmir ki pe esey tre dir pou fer 2 bout zwenn.

Mr Speaker, letan nou asize dan nou salon trankilman, nou get bann levantyalite e bann sitiasyon mondyal lo nou televizyon, en senp pti konparezon pou kapab konstate ki nou ankor byen isi Sesel, malgre i vre lavi i ser.  Me kote dan sa monn ozordi nou pou ale ki lavi pa ser?  Malgre parfwa i annan ki rankontre difikilte pou ganny en lanplwa son swa, travay i annan e tou dimoun i kapab ganny en travay dan nou pei.

Mon’n vwar Seselwa ki’n kit Sesel pou al viv aletranze Mr Speaker, akoz dapre zot lavi i tro ser, pe vreman travay dir pou fer 2 bout zwenn, kot zot ete dan pei zot kanmarad.  Apre ki in fini fer son travay lemwan, i vwar li byen oblize pou al fer en lot louvraz, en lot shift, menm parey al mop dan bann Restoran Mac Donald oubyen menm dan lopital.  Sa ki enportan pa sa travay ki i al fer, me sa larzan ki pou ed li akoz tou i peye laba.  I bezwen pey road tax, tax pou tir son salte, i bezwen larzan pou pey lasante son fanmir e ledikasyon son zanfan.  Sa bon disiplin e prensip travay, nou kapab fer li fasilman dan nou pei isi Sesel.  Mon pou kontinnyen dir ki avek perseverans, i pa enposib pou tou dimoun ganny travay e asir enn oubyen de saler lafen dimwan.  En paran i annan en lobligasyon pou li travay e travay dir pou li kapab siport son fanmir e fer son zanfan grandir dan dignite e lafyerte.  Demen a son tour, i ava adopte sa bon prensip pou li kontinny dan sa menm lepa.  Paran kimannyer zot ti a kontan zot zanfan mazin e onor zot demen?  Nou ti mizer, menm si nou ti ganny en pti sipor Welfare, me mon paran ti debrouye pou sonny nou e mon fyer pou sa ki mon ete ozordi.  Oubyen, nou ti mizer, menm si Welfare ti siport nou, mon paran ti pares pa oule travay, bwar e fimen, tanzantan monte desann dan prizon.  Gras a zot ki mon dan mal konmela.  Mon demann bann paran pou annan en konsyans pou rod en lanplwa stab, pou zot kontribye pou zot zanfan.  Mon propoze ki lannen prosen nou kontinnyen promouvwar sa tenm “Travay dir pou nou Sesel,” akoz i reste ankor bokou pou nou fer pou motiv dimoun pou travay dir e reste dan zot lanplwa pou kontribye ekonomikman pou zot fanmir e pou nou pei.

A sa staz Mr Speaker, mon swete ki bann ki’n fer laplikasyon oubyen pe re-apply Welfare, ki vreman dan bezwen pa ganny en move nouvel, en sok zis lavey Nwel, pou dir zot ki zot pa’n kalifye.  I enportan pandan lannen 2013, pou ranforsi pouvwar FTC ki promouvwar e ankouraz konpetisyon ki healthy e met bann pli bon mekanizm e striktir an plas, pou protez drwa konsomater, dekouraz bann profiter, pourswiv e vreman pini bann ki koupab.  En lorganizasyon parey FTC, si in ganny ekipe avek tou son bann staff pou form en lekip konplet, i merit pa selman ganny tande i egziste, me plito vwar ki i pe fer aksyon depi kot debarkasyon containers ziska dan laboutik.  Mon sizere ki ansanm avek NATCOF e SBS zot team up pandan lannen 2013, pou ede ki nou popilasyon i vreman pey komodite, valer pou zot larzan e ki i annan Fair Trading ek vre konpetisyon.  Mr Speaker, sa sinerzi travay, mon asire pou donn nou pep en fair deal pou zot larzan.

Dan bann landrwa kle nou lekonomi Mr Speaker, parey FTC, Seksyon Audit dan Minister Finans, SBS, nou bezwen biff up sa bann Departman avek profesyonnel, ki annan bagaz ekspertiz ki sa bann job i demande, pou zot donn loksizenn e akseler travay ki nou pe fer pou curb kou lavi.

Mr Speaker, i neseser pou revwar Bidze ki ganny donnen avek bann pti kontrakter sekirite, bann ki pe fer en travay formidab pou kit nou semen prop, oubyen bann ki annan responsabilite pou netway lekol, lezot Departman Minister.  Avek defi ki ganny antrennen par logmantasyon pri lavi, i pa fasil ditou pou sa bann pti kontrakter kontinnyen anploy tou sa enn de mer oubyen perd fanmiy si zot Bidze pa ganny aziste e get ladan lannen prosen.  Mon annan zabitan Port Glaud Mr Speaker ki dan sa bann pti biznes.  Dan en lenstans i difisil pou anploy lakantite travayer ki zot ti a voudre e mon vwar zot soufrans kot zot bezwen travay de fwa pli dir ki zot travayer pou reisi donn en bon servis ek kapab annan en reveni rezonnab letan i ariv lafen dimwan.

Mr Speaker, dan sa monn kot sanzman klimatik i vin enprevizib e dinamik, kot bann defi pou soutenir nou bann fermye i vin deplizanpli difisil, nou pe vwar nou fas a en dilenm kot i konsern sekirite alimanter atraver lemonn.  Bokou maladi ki atak plant, isi Sesel nou’n trouv white flies, mous fri, mous melon e zannimo i ganny afekte.  Dan Sesel i kler Mr Speaker, in annan en mank pro-activeness e bann aksyon e proze inovativ pou elev devlopman lagrikiltir lo en nivo nasyonal.  I annan bokou pou fer pou redres abilite bann fermye pou prodwir ase lavyann pou satisfer demann lo marse lokal.  Minister i bezwen travay lo en plan stratezik dan sa klima, en sistenm marse lib, pou redonn fermye konfyans pou zot re-envestir oubyen kontinnyen envestir dan prodiksyon lavyann.  Fermye in soufer tro bokou atraver fait, kot bokou zot zannimo in mor akoz problenm napa sifizaman manze zannimo.  Kalite e varyete pa konsistan avek demann.  Napa latizann e vaksen pti koson e lavyann enporte ki pe vann pli bon marse ki sa ki prodwir lokal de lot kote bouse i fikse pri e fermye parfwa napa swa e parfwa zot bezwen vann zot lavyann a en pri telman ba ki tou zot profi i al kot bouse.  En pti koson i ser e en bal manze i kout 2 fwa pli ser.

Mr Speaker, ansemoman, bann pti fermye i struggle bokou pou zot kapab met keksoz dan later e ganny en bon reveni apre.  I annan en mank fertilizer e pwazon kourpa, oubyen bann ki annan larzan i aste tou dan stor lagrikiltir e apre vann pli ser, an detay avek bann pti fermye.  San sa bann keksoz i difisil pou zot kontrol e mentenir zot prodwi.  Pti fermye i santi zot ganny neglize e pa ganny sipor pou ed zot sirmont zot bann defi.  Pti fermye Port Glaud osi pe pas atraver bokou difikilte, kot i annan bokou pe mazin arete akoz sa mank sipor.

Fermye Des Arpents i ankor still annan problenm irigasyon akoz napa en bon stokaz delo.  Zot pe vwar li difisil pou soutenir zot fanmir e pey zot bill lafen dimwan akoz zot laferm pa pe prodwir ase.  I annan problem voler, kot ou vwar zis sa ki antre e kas lakaz e vole ki ganny pini.  Ou pa tann personn pe al dan prizon akoz in vol lo laferm son kanmarad.  Sa osi i dekouraz fermye.  Mon demande ki bann pti fermye i osi ganny asiste dan sa Bidze Lagikiltir ki mon pe al vot an faver, ensi ki avek lezot led ki Sesel i gannyen avek lorganizasyon parey FAO, IFAD, COMESA eksetera. Nou pti fermye Mr Speaker, i bezwen plis empowerment e lasistans teknik pou ed zot prodwir plis e redwir kou lavi.

Dan sa letan kot sanzman i dinamik Mr Speaker, Ledikasyon i enn parmi sa bann Minister ki vwar li avek bokou challenges pou li angaz son bann ansenyan dan sa prosesis reste azour avek nouvo devlopman e sanzman, pou ki zot reisi dan zot misyon pou prepar bann etidyan avek bann konesans e skills ki apropriye e efektif, pou zot kapab devlope e fer sikse dan sa sosyete demen, ki demann bokou abilite adaptasyon e fer bann bon swa pou ou reisi anplis ki zis konesans.  Zot bezwen prepar nou bann zanfan pou demen, en lafors travay dan sa lemonn teknolozi.  Disiplin zanfan pou zot annan sa bon konportman e latitid, pou zot vin bann bon sitwayen demen.

Mr Speaker, rezon akoz sa Minister in ganny dezyenm pli gro parti Bidze, apre Minister Lasante i akoz nou anvi ki Sesel i kontinnyen fer progre dan son devlopman.  En pep edike i enn ki kapab fer bon swa e pran desisyon byen enformen, pou li, pou son fanmir e pou son pei.  Mr Speaker, nou bezwen en lafors travay demen ki an bonn sante e byen edike pou asir devlopman soutenab nou nasyon, mentenir en lekonomi ki soutenab pou nou kapab kontinnyen elev kalite lavi nou pep, nou nasyon Seselwa, pou ki zot kontinnyen viv dan dignite.

Mon pou donn mon sipor sa Bidze Mr Speaker akoz nou bann zanfan Lekol Port Glaud pou benefisye avek bann nouvo lekipman e materyel pou ed zot laprantisaz.  I neseser pou revwar bokou sa bann resours ki pa azour avek larealite ki nou pe viv ladan.  Dan sa lepok ki nou pe viv, i pa akseptab Mr Speaker, ki apre tou sa progre ki nou’n fer dan ledikasyon, donn bokou training, batir nouvo batiman.  Appraisal ansennyan in ganny revwar, laptop in ganny donnen pou self-empowerment pou bann ansennyan, pou zot kapab reste azour avek resers, browse lo en topik pou lenformasyon olye fye zis sa ki dan nou progranm pou gid, scheme of service, zis pou nonm enn de, pou en paran konstate ler i antre dan en laklas e realize ki napa gran keksoz ki’n sanze depi ler i ti lekol.  Serten, depi ler mon ti lekol.  Laranzman laklas dan bokou ka i ankor parey, pti bife, shelf i ankor dan menm plas e lanvironnman laklas i vreman dull, ankonbran, pa motivan pou laprantisaz e pou lansennyman.

Dan primer i ankor annan progranm malerezman ki pe ganny servi avek lenformasyon ki’n outdated, sirtou dan konteks matematik e size bann lasyans.  Mon swete Mr Speaker ki Minister Ledikasyon i priyoritiz e aprovizyonn lekol selon zot bezwen, avek materyo e lekipman pli de kalite, tre atiran, sirtou dan lekol primer, pou vreman stimil e siport bann zanfan dan zot laprantisaz.

Dan son lentervansyon letan i ti pe reponn kestyon dan Lasanble resaman, Minis pou ledikasyon ti souliny konsern pou retenir teachers dan zot lanplwa e fer resorti ki en attractive scheme of service i pa sel keksoz, oubyen mwayen pou motiv en ansennyan pou li reste dan zot dyob, me aksepte ki job satisfaction ki antrenn lezot kondisyon i kapab lakoz.

Mr Speaker, dan serten letan kot sanzman i dinamik, i demann tou dimoun pou adopte en lapros pli fleksib e inovatif, pou pli byen kapab atenn nou lobzektif.  Letan defi i vin pli difisil, i egzize ki desizyon tough i merit ganny pran.  Ler in arive pou donn teachers en pe plis satisfaksyon pou zot reste e fer en pli bon travay pou edik nou fitir ki pilye nou sosyete demen.  Menm si a kour term i antrenn bokou konsern, me annou mazin son lefe lonterm.  Avek sa konsern teacher burn out, class size i bezwen ganny revwar, ensi ki teaching load. Promosyon an term saler oubyen pozisyon, i bezwen ganny baze lo en bon appraisal system ki just and fair e sa osi Minister in fer sorti ki travay pe ganny fer lo la.  The core business of teachers se pou teach e kwa ki afekte quality contact time en ansennyan avek son zanfan, oubyen pou li byen manage son laklas i bezwen ganny adrese.  I annan ansennyan ki santi zot vreman fatige e tre malere akoz zistans kot zot reste i lwen avek zot landrwa travay.  Sa osi i bezwen ganny adrese.

 

Mr Speaker, resers in demontre, zanfan ki’n reisi lekol i toultan annan son paran ki’n zwe en rol pozitif dan parkour son laprantizaz.  E pou ede donn bann ansennyan plis job satisfaction, mon pe enplor tou paran pou ralye deryer nou zanfan, pou siport li dan son letid e siport lekol e bann ansennyan dan zot demars pou edik zot zanfan.  Mon lans en lapel pli partikilye pou bann paran Port Glaud pou pledge pandan sa lannen 2013 e lezot lannen avenir, pou zwe en rol pli pozitiv e efektiv dan laprantisaz zot zanfan.  Koman Lotorite Distrik, nou’n deza pledge pou donn sa sipor lekol e asir en standar pli o dan laprantisaz nou bann zanfan.

Mr Speaker, menm si nou swe oubyen rev se pou annan ansennyan avek kalifikasyon nivo Liniversiter pou ansenny dan tou nou laklas, lakres ziska segonder, pou asire ki nou zanfan pe ganny  an prensip en letid de kalite, nou konsyan poudir sa i en far fetched dream, an tenan kont lakantite etidyan ki kapab konplet sa letid a sa nivo.  I malere Mr Speaker, ki bokou zenn ki ti annan sa laspirasyon, komitman e swa personnel pou vin en ansenyan, me ti napa sa konpetans e lekspektasyon pou fer li lo nivo Liniversite, en sel kou in bezwen abandonn son rev e nou’n perdi bann bon fitir ansennyan.

Par kont, mon felisit Minister Ledikasyon pou desizyon ki mon krwar i tre saz pour re entrodwir Teacher Training lo en nivo sertifika e diplonm, pou asire ki pei pa tonm dan en crisis mank ansennyan, menm dan lekol primer.  Avek bon planifikasyon sa 413 milyon ki mon pou vot lo la a komans ede pou soutenir nou bann teachers e alavenir prodwir bann bon ansennyan, ki pou ede elev nivo ledikasyon dan nou pei.  Avek sa lespri pou fer keksoz diferaman, mon swete ki laplikasyon pou zwenn profesyon teaching i enn ki ouver.  Pa pou target zis bann zenn etidyan ki fini S5, me osi lezot ki pli matir, ki’n realiz en pe tro tar ki se teaching ki zot vokasyon e kapab vin bann fitir ansennyan avek bon potansyel.

Teachers Council, parey Minis ti soulinyen, i bezwen ganny promouvwar e set up o pli vit posib, akoz sa i pou ed Minister pou annan pli bon polisi lo ki bann kriter ki i vin en must pou en dimoun annan pou kalifye li koman en teacher, e osi pou etablir standar lekel ki en good teacher, quality teacher, oubyen master teachers ki ava fasilman ede pou deploy teachers dan bann lekol, pou asir en bon balans dan kalite lansennyman e byensir asir en pli o nivo standar laprantisaz.

Mr Speaker, mon pou donn mon sipor sa Bidze, akoz i ankor enn fwa fer provizyon pou kontinnyen realiz bann pti proze, pou amelyor lavi zabitan dan mon distrik.  Sa i vedir plis devlopman pou zabitan distrik Port Glaud.  Zis sa lannen, bokou in ganny fer, zis pou nonm enn de bus shelters ki ti an gran demann Beoliere, Des Arpents e Morne Blanc, repar semen dan Kan Per, kontinnyen avek travay amelyorasyon Sant e koup pye dibwa kot enn de lakour.

Bidze 2013 pou pti proze distrik i ankor enn fwa donn garanti pou pou nou konstrir drenaz Morne Blanc ki a ede pou amelyor semen e protez propriyete enn de fanmiy.  Semen beton oubyen peron pou ganny fer pou sa enn de fanmiy Port Launay, Foret Noire e Kan Per, distrik a kapab kontinnyen koup ankor pye dibwa ki en menas pou  propriyete e menm lavi zabitan, pou nonm enn de.

SLTA in kontinnyen enstal lalimyer lo semen Port Glaud, e Belle Vue.  Semen Port Launay in komans ganny amelyore, apre ki miray in ganny konplete e semen elarzi obor Vilaz Prezidan.  SLTA in osi ede pou koup pye dibwa obor semen e konstrir drenaz dan serten landrwa.

Mr Speaker, sa letan kot sanzman i dinamik, i egziz nou parfwa pou prevwar en lapros pli fleksib pou tackle serten challenges ki nou fer fas avek dan distrik.  Mon sizer avek Minis Finans, pou revwar e minimiz donn kontra pou bann proze distrik, akoz aktyelman i pran tro bokou letan.  Mon pe osi demann Minister ki bann pti proze kominoter anba R25 mil i ganny donnen avek distrik pou enplimante.  Distrik pou byen kapab zer lenplimantasyon son plan proze dan en dele letan pli favorab e an retour lakominote i benefisye.  Sa Mr Speaker, pou osi ede kree travay pou bann pti zouvriye kalifye, ki annan licence, me pa en kontrakter.

Mr Speaker, lannen 2013, mon vwar bann defi i kontinnyen vin pli difisil pou nou paran, spesyalman bann manman tousel pou mon distrik Port Glaud, ki bezwen travay e napa en Day Care pou kit zot zanfan.  Dan konteks proze kapital, mon pe propoze ki Gouvernman i konsider konstrir en Day Care ki en servis ki an gran demann dan distrik.

Port Glaud i en distrik ki tre fortinen Mr Speaker, kot i konsern annan akse ek delo dan son bann gran larivyer ki sorti anler dan bann montanny Morne Blanc, Lanmar Koson e Kas Dan pou son konsomasyon.  E mon pe demann PUC pou amelyor son sistenm distribisyon delo Morne Blanc, la ki Bidze 2013 i fer provizyon pou li kontinnyen avek son proze pou enstal tiyo e amelyor distribisyon delo.  Zabitan Morne Blanc pe eksperyans koupir delo en pe tro souvan e koneksyon pa ganny fer deswit.  Ler kontak i ganny fer, lofis personn pa pe reponn.  Nou demann PUC pou vin en pti pe pli proaktiv dan service delivery.

Lakour oubyen propriyete enn de fanmiy Des Arpents e Beoliere ankor pe ganny afekte avek delo ki sorti dan laponp.  Delo i kontinnyen lo en baz regilye, andomaz semen e inond lakour.  Nou demann PUC pou get dan sa problenm e amelyor kondisyon sa bann fanmir.

Dan sa letan kot defi i vin pli difisil, kot sanzman i dinamik Mr Speaker, i annan en gran demann lo bann Minister pou vin pli azour avek zot plan stratezik pou lannen 2013.  Pou ranforsi e met azour zot bann prosedir e polisi, pou fer li pli relevan e fasil pou tou Departman, tou travayer a tou nivo pou pli byen focus letan zot desarz zot responsabilite.  Pou reste relevan dan sa konteks devlopman ki sanzman pe anmennen Mr Speaker, i egzize ki en lapros pli fleksib i ganny adopte pou enplimant bokou sa bann plan e proze ki Lasanble pou siporte letan nou pou vot an faver sa Bidze 2013.

Laspe monitoring e accountability dan sa bann plan i bezwen ganny met plis lanfaz lo la, akoz zot 2 eleman kle ki pou ede fer ki larzan ki nou pe vot lo la Mr Speaker i vreman ganny servi pou akonplir …..…

 

MR SPEAKER

Ankor 3 minit Onorab.

 

HON SULTANE JACQUELINE

……… proze devlopman lannen prosen.

La ki travayer pe ganny ankouraze pou vin pli inovativ e proaktiv, i touzour reste focus pou zot kapab atenn lobzektiv e enplimant zot plan efektivman.  I annan en demann pou serten Minister pou restriktir zot lafors travay, sirtou dan seksyon management, leadership e administrativ, bann ki pran desisyon kimannyer pou priyoritiz proze e zer Bidze Gouvernman.  En legzergzis Mr Speaker ki’n komans fer sa lannen e bezwen kontinnyen.  Nou pe bezwen leaders pa zis azour avek sanzman, me ki osi antisip sanzman, empower staff, update polisi e kree bon kondisyon dan son lorganizasyon pou anmenn tou dimoun on board.  Nou bezwen leaders ki konpran vizyon manifesto Prezidan Michel pou nou asir bon kontinite dan devlopman nou nasyon.  Letan nou dir nou bezwen onor nou prensip Parti Lepep, nou met nou dimoun o sant nou devlopman.

Laprev i la pou vwar dan bokou demarkman oubyen Minister ki annan en bon balans zenn profesyonnel, avek bann ki mwen zenn i annan plis lenerzi, dinamiz e inovasyon dan lapros oubyen stratezi travay.  Rannman dan travay i pli pozitiv.  Lasanble, Minister Finans, SLTA, i bann legzanp ki koz pou limenm.  Mwan mon krwar senserman dan abilite e kapasite nou bann zenn profesyonnel motive e mon krwar Mr Speaker, ki nou pa pe fer ase pou rekonnet potansyel zot kapasite koman lafors travay dinamik pou fer bouze nou moter lekonomi pou ………..

 

MR SPEAKER

Ankor 1 minit Onorab.

 

HON SULTANE JACQUELINE

A sa pwen Mr Speaker, mon remersi Minis Finans avek son lekip ki pe fer en travay formidab koman gardyen nou lekonomi, sikse sa lannen ki pe terminen, i en rezilta travay dir e zefor travay civil servants, civil society, Lekip Zidisyer, Ekzekitif e Manm Lasanble Nasyonal e tou bann ki dan en fason ou en lot pe leve, debrouye e travay dir pou Sesel.  Mon napa okenn dout ki nou pou double nou zefor lannen 2013, pou nou reisir sirmont bann defi e ansanm kontinnyen pou kree “Sa Nouvo Sesel.”

Mon pou vot pou sa Bidze 2013 Mr Speaker, akoz mon anvi vwar Sesel e zabitan mon distrik Port Glaud kontinnyen fer progre dan son devlopman.

Pou terminen Mr Speaker, mon pe sezi sa moman pou mwan swet Prezidan Michel ek son fanmir, Mr Speaker ek son fanmir, Minis Finans e tou lezot Minis ek son fanmir, mon bann Koleg Onorab ek zot fanmir, pep Seselwa, spesyalman zabitan Port Glaud, en Zwaye Noel e en Bon Lannen 2013. Mersi Mr Speaker.

 

(Applaud)

MR SPEAKER

Onorab Volcere.

 

HON MARC VOLCERE

Mersi Mr Speaker.  Mr Speaker, Minis, koleg Manm Onorab, pep Seselwa, zabitan Grand Anse Praslin, bonzour.  Mr Speaker, tou bon planifikasyon i anmenn sikse.  Si zanmen ou anvi fer sikse dan lavi, ou bezwen annan en plan.  En plan detaye, kalkile, ki sers a donn ou bann bon rezilta.  An 2008, ler nou ti pran desizyon pou antre dan en reform ekonomik, nou ti fer sir ki nou annan en plan ki’n ganny byen prepare e nou ti met li devan lepep Seselwa pou zot laprouvasyon.  Nou pep, anba direksyon Prezidan Michel ti dakor e aprouv sa plan.  An 2009, 2010, 2011 e 2012, nou’n fer nou traze lo sa plan aprouve e nou’n anmenn li e fer bann sanzman anmezir ki nou ti pe navige.  Ozordi, ver lafen 2012, Minis Finans in vin devan nou e tal kontinnyasyon sa plan pou 2013.

Mr Speaker, Bidze 2013 in ganny dekrir par Minis Finans koman en Bidze ki pou tous lavi tou Seselwa.  Ler mon’n ekout li Mardi pase e apre fer en analiz, mon’n realize ki wi, sa Bidze i pou tous tou Seselwa.  Mon analiz i baze lo sa sonm plis ki R4.5 bilyon ki’n ganny propoze koman depans Gouvernman pou lannen ki pe vini.  Mon analiz i anmenn mwan pou fer refleksyon e poz mon lekor kestyon, be kote sa larzan pe ale?  Kote sa plis ki R5.4 bilyon pe al ganny depanse?  Ler mon relir diskour Minis, mon vwar ki dan gran linny sa sonm larzan pe ganny envestir dan plizyer sekter nou kominote, par egzanp sa sonm ki pe ganny propoze se pou ranforsi nou kwasans ekonomik, asire ki bezwen sosyo ekonomik nou pep pa ganny konpromet e asire ki klima lenvestisman dan sekter prive i ganny modernize.

Mr Speaker, sa sonm plis ki R5.4 bilyon se pou asire ki tou travayer dan sekter piblik i ganny en saler lafen dimwan.  Sa Bidze, i pou asire ki tou pansyoner i ganny en pansyon lafen dimwan.  Sa Bidze, i pou asire ki tou zanfan Seselwa pou ganny en ledikasyon primer pou nanryen.  Sa Bidze, i pou asire ki pep Seselwa i ganny en lasante pou nanryen.  Sa Bidze, i pou asire ki pou annan ase larzan pou enplimant bann nouvo scheme of service dan bann diferan Minister ek Departman ki Minis Finans in koz lo la.

Mr Speaker, sa Bidze pe fer sir ki bann ki pli vilnerab pa ganny kit deryer.  Sa Bidze, pou fer sir ki nou fermye ek bann peser pa ganny kit deryer.  Bann biznes, pti e gro i kontinnyen vwar lespas pou epanouir.

Mr Speaker, lavenir en nasyon, lavenir en fanmiy, lavenir sakenn de nou i depan lo bon planifikasyon.  Si nou oule avanse e progrese dan lavi, nou pou bezwen annan en vizyon.  E pou nou kapab arive ver sa vizyon, nou bezwen met nou lobzektiv devan nou.

Mr Speaker, an gro Bidze 2013 pe fer provizyon ki tou pep Seselwa ki anvi e sezi loportinite i kontinnyen zouir en lavi prospere e ranpli ek boner, ki kapab anmenn plis larises pou zot e pou zot fanmir.

Mr Speaker, kou lavi dan Sesel i reste en konsern pou Prezidan Michel ek son Gouvernman.  Nou konnen ki Gouvernman pe fer tou sa ki i kapab pou kapab adres sa lo en plan nasyonal, me parey in ganny dir dan sa Lasanble en kantite fwa, bokou keksoz i andeor nou kontrol.  Mr Speaker, koman Manm Elekte pou Grand Anse Praslin, sa size pri lavi lo Praslin i san dout reste en latas mazer pou mwan ek bann lotorite konsernen pou nou deal avek.  Mon konnen ki sa i osi aplik pou mon 2 koleg Manm Elekte pou Baie St Anne ek La Digue.

Mr Speaker, nou konnen ki lozik pou bann dimou ki fer biznes met en poursantaz mark up lo sa ki zot pe vann pou kapab kouver zot depans e sorti avek en profi.  Nou konnen ki zot annan bokou fre pou zot kouver tel ki kou transportasyon e i annan ki bezwen pey en landrwa lwe.  Me parfwa, ler ou fer en pti kalkil, ou vwar ki i annan serten marsan ki pe vreman abize.  Parfwa ler ou fer en pti analiz, ou pa vwar kimannyer sa pri ki ou pe peye in ganny kalkile.  Alors, mon pe lans en lapel avek tou bann marsan pou vin en pe pli konsyan e pa mazin zis zot profi ek zot pos.  Annou osi mazin nou frer ek ser ki li osi i bezwen trimouse pou ganny sa 2 kas pou fer sa 2 bout zwenn.

Mr Speaker, mon pou kantmenm felisit e ankouraz sa enn de marsan ek enportater ki’n vwar e konpran difikilte ki zot frer ek ser pe pas ladan e zot in vin devan pou sey donn en koudmen pou redres sa sitiasyon.  La kot nou pe vwar bann komodite ki pe ariv alaport nou popilasyon a en pri vreman rezonnab, an konparezon avek sa ki nou ti ganny akse avek avan.  Mon swete ki sa lapros i kontinnyen pou benefis tou dimoun.

Mr Speaker, la ki VAT pe vin an operasyon Zanvye, mon ti a kontan osi lans en lapel e sipliy avek tou biznesmenn pou silvouple, pa servi sa nouvo tax koman en fason pou abiz konsomater akoz souvandfwa sa i leka.  Ler en nouvo polisi i ganny entrodwir, setaki i rod tou sord fason pou esey trangle konsomater e apre zot larg sa lo ledo Gouvernman.

Mr Speaker, an relasyon ek pri lavi, mon pou demann Gouvernman pou revwar oubyen ensiste ki STC i zwe sa vre rol ki i ti ganny kree pou zwe.  Sa se pou fer sir ki i mentenir pri bann komodite esansyel ki i vann e fer zot vin pli abordab ki menm komodite ki trouve dan lezot magazen.

Mr Speaker, pou plizyer lannen, zabitan Praslin pe demande ki STC i ouver en supermarket lo nou zil, pou ki zabitan Praslin osi a kapab ganny akse e a kapab benefisye avek bann komodite a en pri ki zabitan Mae pe benefisye avek, ki an prensip i devret meyer marse.  Tou diskisyon ki mon’n annan avek bann dimoun konsernen, i endike ki STC in pare pou en tel proze, me problenm ki zot pe gannyen se ki zot ankor pe esper en morso later ki zot in ganny promet lo Eve Island.  Mr Speaker, STC pe rankontre problenm avek Departman Lasante Lanvironnman akoz zot bann warehouse i dan en move leta e kot zot pe ganny demande pou fermen si nanryen pa ganny fer lo la.  Mon konpran largiman STC ki dir ou ki okenn renovasyon lo sa bann warehouse pou kout zot en sonm larzan e apre ki zot in fer sa bann depans e bouz lo Eve Island, sa bann warehouse pou bezwen ganny demolir e sa pou vin koman en depans initil ki pou ganny vwar koman en gaspiyaz resours.  Alors, STC pe demande ki olye envestir dan sa bann vye warehouse, zot envestir dan bann nouvo ki sipoze baze lo Eve Island.  A sa pwen Mr Speaker, mon pou demann MLUH pou akseler zot zefor pou alokasyon sa morso later lo Eve Island avek STC, pou ki zot a kapab o pli vit posib, amelyor bann fasilite stokaz ki vreman dan en leta degradan e pe koz danze pou lasante piblik.

Mr Speaker, an relasyon avek pri lavi, mon pou ankor enn fwa lans en lapel avek Lazans Proteksyon Sosyal.  Mon’n deza demande dan Lasanble dan plizyer diskour ki mon’n fer e mon pou profite pou fer en lot demann ankor.  Mr Speaker, parey mon’n dir, pri lavi lo Praslin ek La Digue i ant 15 a 20 poursan pli eleve ki lo Mae.  I swe zabitan sa 2 zil ki konsiderasyon i ganny pran par Lazans Proteksyon Sosyal pou reflekte sa.  Mezir oubyen weights ki zot pe servi pou kalkil pri konsomasyon en fanmir i devret ganny aziste pou bann zil pros, pou pran an konsiderasyon en kou lavi pli eleve.

An dot mo Mr Speaker, an vi ki pri lavi lo Praslin ek La Digue i pli ser, i bezwen annan en diferans dan lasistans ki en dimoun lo Praslin i gannyen, an konparezon avek en dimoun lo Mae.

Nivo kontribisyon bann fanmiy lo Praslin ek La Digue i parey pou sa bann ki lo Mae, me letan ki ou kalkil zot bann benefis an relasyon avek pri lavi, i tre kler ki bann fanmir lo sa 2 zil pa neseserman kapab sirviv fasilman avek menm nivo lasistans ki sifizan pou en fanmir lo Mae.  Sa i en demann ki mon pou met en kantite lanfaz ase for lo la e mon ti a kontan ki bann ki konsernen i vreman get dan nou ka.

Mr Speaker, mon pou siport sa Bidze akoz zabitan Grand Anse Praslin pou osi benefisye avek sa sonm plis ki R413 milyon ki Gouvernman pe met avek Minister Ledikasyon, pou kapab donn en meyer ledikasyon nou zanfan.  Mr Speaker, i enportan note ki sa sonm i konpri en logmantasyon R43 milyon anplis lo depans sa Minister pou lannen 2012.  Savedir Gouvernman pe met en sonm R43 milyon anplis avek sa Minister pou kontinnyen donn ledikasyon pou nanryen nou zanfan.  Mr Speaker, koman en paran e mon konnen ki mazorite paran, si pa tou, i vreman apresye sa.  Nou’n ganny demande pou travay dir e ozordi nou vwar nou zefor pe aport fri.  Me kestyon ki mon ti ava demande.  Eski sa kantite larzan tax ki sa Gouvernman pe met dan sa Minister pe vreman aport fri?  Eski nou bann zanfan, sa bann etidyan pe vreman donn zot maximum, pou ki zot donn valer sa kantite larzan ki pe ganny envestir dan sa Minister?  Eski Minister Ledikasyon lo son par i osi pe zwe son rol pou asire ki napa gaspiyaz e ki i annan en vre valer pou sa larzan ki pe ganny met a zot dispozisyon?  Eski bann teachers i vreman annan kontrol e kapab egzers lotorite lo ledikasyon nou bann etidyan?  Mr Speaker, i annan en ta konsern deor.  Koman en paran, mon vreman konsernen sa ki mon trouve.  Mon pe demann serten sa bann kestyon akoz mon konsernen ler mon vwar sa kantite etidyan dan uniform ki pe monte desann lo semen, depi bomaten ziska apre midi.  Sa i aparan, sirtou pou bann etidyan ki dan Lekol Post Segonder, tel ki SIT ek MTC.  Mr Speaker, eski mankman teachers dan sa bann lekol ki pe fer sa?  Souvandfwa, etidyan i zis tir figir kot lekol e apre zot tourn lo menm bor.  Eski bann ansennyan, bann responsab i konsyan sa?  Eski zot konsyan ki zot pe ganny en saler oubyen allowance ki sorti dan larzan tax ki sa pep i travay dir pou kontribye?  Mr Speaker, mon ti a lans en lapel avek Minister Ledikasyon pou fer en analiz profon lo sa size kot zanfan i kit lakour lekol e parwaze lo semen.  Eski sa allowance ki zot pe gannyen pe vreman al dan zot letid?  Annou asire ki sak sou ki sa Gouvernman i met dan Bidze sa Minister e nou Lasanble i aprouve i ganny byen depanse.

Mr Speaker, an vi ki mon pe abord sa size ledikasyon, mon ti a kontan dir 2 mo lo Youth Hostel, sa letablisman kot bann zanfan Praslin ek La Digue i reste ler zot pe fer zot letid Post Segonder lo Mae.  Lanvironnman dan ki nou bann zanfan i etidye i vreman enportan pou zot ledikasyon e pou garanti bon laprantisaz e bon rezilta.  Mon soulaze pou vwar ki dan Bidze 2013, Gouvernman pe met ankor en sonm R700 mil pou reparasyon Hostel.  Pandan bann dernyen lannen, port ouver k’in ganny fer kot sa Hostel, nou’n vwar nesesite pou plizyer travay renovasyon ganny fer.  Pou lannen 2011 ek 2012, Gouvernman in kontribye en sonm R500 toulezan e in osi annan plizyer lorganizasyon ek endividi ki’n fer serten kontribisyon.  Avek sa sonm R700 mil ki dan Bidze, ki Bidze pe propoze pou sa lannen, nou bann zanfan ki sorti Praslin ek La Digue ava ganny zot en landrwa pli konvenab, kot zot a santi zot pli konfortab pou antreprann zot letid.  Me Mr Speaker, mon ti a kantmenm profite pou lans en lapel avek sa bann zenn ki reste Hostel pou kontinnyen pran swen avek zot fwaye e donn tou dan zot letid.  Fer sa sakrifis ki zot ek zot paran pe fer ozordi vin en sikse ek en lafyerte pou tou bann ki otour zot.

Mr Speaker, mon pou siport Bidze pou lannen 2013 akoz mon vwar ki dan sa sonm 496 milyon ki’n ganny allocate avek Minister Lasante, zabitan Grand Anse Praslin pou osi benefisye.  Zabitan mon distrik i asire ki zot pou kontinnyen ganny serten tretman medikal pou nanryen.  Bann pasyan ki pe swiv tretman pou dyaliz i garanti ki zot pou kontinnyen ganny zot tretman avek sa sonm R19.3 milyon ki Gouvernman pe met avek sa Minister pou swen dyaliz.

Mr Speaker, mon pou kantmenm demande ki Minister Lasante i kontinnyen rod fason pou amelyor servis lasante lo Praslin.  An vi nou zistans avek bann servis spesyalize, mon pou ankor enplor Minister pou asire ki nou annan bann dokter vreman kalifye e eksperyanse ki travay dan nou klinik ek lopital.  Sa i ava ede ki maladi bann pasyan a ganny diagnose en pe pli vit e sa a ede ki zot a kapab ganny refer avek bann tretman apropriye o pli vit posib.  Souvandfwa, i annan konplent par bann pasyan ki i pran tro bokou letan pou zot ganny refer avek swen pli avanse lo Mae, akoz in pran tro bokou letan pou zot maladi ganny detekte.

Mr Speaker, i osi annan konplent ki i pran tro bokou letan pou en pasyan ganny en apwentman pou vwar en spesyalis.  I annan bokou dimoun, sirtou bann dimoun aze ki pe esper pou plizyer lannen pou kapab vwar spesyalis lizye e ganny tretman neseser tel ki loperasyon pou tir katarak.  Mr Speaker, nou konpran konstrent Minister ki i parfwa rankontre.  Me la avek nouvo Bidze ki sa Minister pe gannyen, mon ti a demande ki en zefor ekstra i ganny fer pou kapab deal avek sa lalis pasyan ki pe atann pou en bon pe letan.  Mr Speaker, zabitan Praslin i santi zot dezavantaze ler zot bezwen desann Mae pou kek rezon lasante.  Zot santi ki sa i anmenn serten kou finansyel adisyonnel lo zot.  Ler en pasyan i ganny refer pou kek tretman lo Mae, Minister i asiste sa pasyan avek zis en pasaz.  Me Mr Speaker, sa i aplik menm si sa dimoun i bezwen ganny akonpannyen par en lot dimoun, ki dan bokou ka i leka.  Ou annan zanfan, dimoun aze ki bezwen ganny akonpannyen par en lot manm fanmir.  Mon ti a demande ki Minister i revwar son polisi e get dan posibilite pou osi asiste sa dimoun ki bezwen akonpanny son pros.  Souvandfwa, sa traze i al pou en lazournen, kot lezot depans i vini, tel ki manze ek transpor.  Mr Speaker, mon ti a sizere ki en fon i ganny kree, ki ava take care ek sa kalite depans oubyen lasistans.

Mr Speaker, mon welcome lide Gouvernman atraver Minis Finans, pou met an plas sa tax lo social responsibility.  A sa pwen, mon a profit sa lokazyon pou remersye tou bann biznes ek lorganizasyon dan mon distrik ki’n toultan pare e reponn nou lapel ler zot ganny aprose pou kek lasistans oubyen kontribisyon anver nou kominote.  Me i malere Mr Speaker, ki i annan serten biznes ki pa vwar sa nesesite pou kontribye en par dan sa menm kominote kot zot pe fer milyon profi toulezan.  Zot rod tou sord rezon akoz ki zot pa kapab kontribye.  En kominote ki pe kontinnyen devlope i kree bokou plis larises e an retour tou dimoun ki pe viv dan sa kominote, swa koman en endividi, oubyen en businessmen i ranmas serten benefis.  E domaz ki Gouvernman in bezwen vin avek en tel Lalwa pou fer bann biznes pran zot responsabilite e zwe zot rol dan lakominote.  Me parfwa, ou napa swa.

Mr Speaker, mon ti a kontan remersye Gouvernman pou kontinnyen met a disposizyon distrik sa sonm R1.2 milyon pou lenplimantasyon bann pti proze.  Sa larzan pou kontinnyen ede anmenn bokou devlopman kominoter dan bann sou distrik ki ava ede amelyor lavi nou bann dimoun.  La, mon ti a profite pou lans en lapel avek nou bann dimoun dan distrik pou avans devan, vin donn zot propozisyon e lide lo kwa ki zot ti a kontan vwar pou ganny enplimante dan zot kominote ki pou amelyor zot lavi.

Mon pou osi demande ki apard ki sa sonm R1.2 milyon, Gouvernman atraver bann lezot lazans ek lotorite konsernen i kontinnyen envestir dan bann lezot proze dan distrik, tel ki bann proze semen ki kout bokou pli ser, ki si nou depan selman lo sa sonm R1.2 milyon, i pou pran bokou lannen pou kapab enplimant zot.

Mr Speaker, nou annan bann dimoun ki pe esper plizyer lannen pou ganny akse avek en semen pli konvenab pou zot kapab ariv kot zot.  La mon pe refer avek semen Land Bank Consolation, semen Cherimont e Grand Fond.  Mr Speaker, mon pou lans en lapel avek lotorite konsernen pou redonn lespwar nou bann dimoun dan sa bann sou distrik ki mon’n mansyonnen.

Mr Speaker, nou bezwen rekonnesan pou bann bon keksoz ki ganny fer.  Mon santi ki moman i apropriye pou mwan, lo non zabitan Grand Anse Praslin remersye Departman Lazans Transpor lo Later, pou bann bon travay ki zot in fer dan mon distrik pou sa lannen.  Nou vreman apresey zefor ek resours ki zot in mete pou kapab realiz serten nou bann demann ki’n ede amelyor lavi nou bann dimoun dan lakominote.  Ankor enn fwa, nou dir zot mersi e nou swete ki zot a kontinnyen lo sa bon semen.

Mr Speaker, sel swe ki nou pe atann se promes ki nou ti’n gannyen sa lannen pou resirfas semen primer, depi kot ti’n arete sorti Consolation ziska dan krwaze Vallee de Mai e sa morso ki reste Anse Kerlan, akoz sa ti’n fini ganny bidzete dan Bidze 2012.  Mr Speaker, sa 2 morso semen i vreman dan en move leta.  Nou konpran ki Lazans ti annan en mankman koltar, me sa ti sipoze ganny rezourd ver lafen mwan pase.  Mon pe alor demande ki travay i komanse lo sa 2 morso semen, osito ki bann materyo neseser i ariv lo Praslin, akoz pou plizyer lannen nou’n enpasyante e bann propriyeter transpor i kontinnyen konplent depans ki zot kontinnyelman bezwen fer pou ranplas bann pyes zot transpor.  Mon pou demann lotorite pou get dan nou welfare e asire ki pou lannen 2013 nou roul lo en bon semen.

Mr Speaker, bokou in ganny dir lo sekter lagrikiltir.  I pa mon lentansyon pou repet sa ki’n ganny dir.  Me koman Manm Elekte pou Grand Anse Praslin, en distrik ki ti vreman renonmen pou lagrikiltir dan lepase, mon pou enplor Gouvernman pou fer tou sa ki posib pou re-organize sa sekter.  Mon ti a demande ki nou fer sa re-organizasyon dan bann faz konsantre, kot nou retourn ver labaz pou donn konfyans nou bann dimoun.  Legzanp se ki nou bezwen asire ki bann fermye i ganny akse avek inputs, bann materyo debaz ki pou permet zot prodwir.  Nou pa kapab ensiste e demann zot pou prodwir 80 poursan si napa materyo lo stor, me mon kantmenm konstate ki i annan serten volonte lo lapar nouvo Minister e mon swete ki sa i kontinnyen.

An pasan, mon ti a kontan demann Minis Finans pou donn nou en leksplikasyon lo ki zistans zot in arive avek sa scheme lasirans pou bann fermye.

Mr Speaker, apre plizyer demann ki mon’n fer dan Lasanble lo size konstriksyon lakaz dan mon distrik, mon pa satisfe avek letan ki’n ganny mete dan Bidze pou konplet proze lakaz Ex-Teachers Quarters. Mr Speaker, pou konplet sa 2 blok flats 6 unit sakenn, Minister in planifye dapre Bidze pou konplet sa proze dan 3an.  Dapre estimasyon sa proze, i ekspekte kout R7.8 milyon.  R1 milyon in ganny bidzete pou 2013, R5 milyon an 2014 e R1.7 milyon an 2015.  Mr Speaker, mon ti a kontan demann MLUH pou silvouple revwar peryod letan ki zot oule konplet sa proze pou bann plizyer rezon ki mon’n deza eksplike.

Pou plizyer lannen, Praslin in prouv son lekor dan plizyer aktivite ki’n ganny organize lo Mae dan diferan domenn, ki swa dan domenn spor e kiltir.  Nou bann zenn in fer nou fyer.  Lannen 2012 pa’n en leksepsyon.  Nou annan plizyer legzanp ki nou kapab koz lo la, me nou annan potansyel e kapab fer bokou plis ankor si i annan bann bon planifikasyon, sirtou lo kote finansyel.  Bann Departman ek Lorganizasyon i bezwen mazin Praslin dan planifikasyon bidzeter zot Minister pou bann aktivite ki zot pe organize lo Mae.  Praslin i bezwen ganny menm sans partisipasyon pou bann aktivite ki ganny organize.  Tro souvan, Praslin pa kapab partisipe akoz ou ganny dir napa larzan pou zot vin Mae.  Mr Speaker, alors mon ti a demann tou Minister ek Departman pou fer sir ki zot fer provizyon finansyel pou partisipasyon Praslin dan bann aktivite lo Mae.

Mr Speaker, mon ti a profite a sa moman pou felisit Ambitious pou son sikse ki in fer dan lasenn lanmizik.

Mr Speaker, delo i sours lavi.  Lannen 2011 ek 2012 in enn de lannen kot mon distrik in vreman ganny afekte avek mankman delo.  Pandan son vizit ki i ti fer Praslin 2 semenn pase, Minis pou Lanvironnman, Minis Rolph Payet ti ganny met okouran nou problenm.  Mon kontan pou aprann ki i annan serten travay ki pe ganny fer pou stok plis delo, ki zabitan mon distrik a kapab benefisye.  Me Mr Speaker, dan Bidze, anba Minister respektiv, mon pa vwar okenn alokasyon pou PUC pou kapab enplimant sa bann proze.  Mon ti a kontan demann Minis si i kapab donn en pe detay dan son reply lo Bidze PUC pou lannen 2013.

Mr Speaker, lannen 2012 pe al terminen.  Lo komansman lannen, nou ti ganny demande pou nou travay dir pou nou pei.  Mon santi ki la i sa moman kot sakenn de nou i bezwen komans fer serten refleksyon pou vwar ki kalite kontribisyon ki nou’n fer pou nou pei, nou kominote, nou lakour e pou nou menm.  Eski nou’n vreman reponn lapel nou dirizan e travay vreman dir pou nou Sesel?  Pou ou ki’n fer li, mon dir ou felisitasyon.  Ou deserve en bon rekonpans.  Pou ou ki pa’n kapab fer li, mon dir ou ki ou annan ankor en sans pou fer li.  Sezi sa loportinite ki devan ou dan Bidze 2013 pou ou fer li.  Met ou lafyerte dekote e azir brav e kouraze.  Lavi pa’n zanmen fasil e i pa pou zanmen fasil.  Alors, pran konsyan ki ou bezwen toultan determinen e annan lespwar.  Lespwar pou en meyer demen.

Mr Speaker, mon ti a kontan profit sa lokazyon pou swet tou nou bann dirizan, lepep Seselwa, zabitan Grand Anse Praslin, en Zwaye Noel e en bon komansman lannen 2013.  Ki Bondye i beni e protez nou pandan sa moman lavan.  Mersi Mr Speaker e mon byensir donn sipor Bidze 2013.

(Applaud)

 

MR SPEAKER

Onorab Jeannevol.

 

 

 

HON BEGITTA JEANNEVOL.

Mersi Mr Speaker.  Mr Speaker, koleg Manm Onorab, tou dimoun alekout, espesyalman zabitan Mont Fleuri, bonzour.  Lannen pase, dan sa menm Lasanble, Minis Finans ti pronons son diskour pou Bidze 2012, kot nou ti ganny demande pou soutenir nou krwasans ekonomik.  En lekonomi ki sa letan nou ti ankor pe bezwen fer bokou sakrifis apre 3an reform.  Ozordi, 4an apre reform, Minis Finans ti demann nou pou akseler nou krwasans ekonomik.

Mr Speaker, sa i en sinny byen pozitiv.  Zis 1an apre ki nou’n ganny demande pou soutenir nou lekonomi, nou’n montre ki nou kapab fer li e la nou pe ganny demande pou fer li agrandir ankor.  Pep Seselwa, sa pti refleksyon i montre nou ki wi.  Nou lekonomi i ankor lo bon semen.  Se sa mesaz diskour Minis Finans lo Bidze 2013.  Akseler krwasans ekonomik, ki montre ankor en lekonomi solid e rezilyan.  Akseler krwasans ekonmik, par ankouraz sekter prive e ankouraz konpetisyon.  Akseler nou krwasans ekonomik par asire ki sekter prive i sa moter dan devlopman lenfrastriktir.  Akseler krwasans ekonomik dan tou sekter.

Mr Speaker en lekonomi ki pa stab pa kapab ganny akselere.  Me kantmenm sa, i pa vedir ki nou napa ankor serten sakrifis pou nou fer.  Nou pa oule retourn ankor dan en reform parey nou ti ete avan 2008.  Se pou sa rezon ki nou bezwen reste ferm dan nou bann desizyon.

Mr Speaker, sa i zis parey en fanmiy ki’n kalkil son Bidze lemwan.  I vwar ki menm si i ti a anvi aste plis ankor sa mwan, petet resanz sa set sofa, al en vakans aletranze, aste sa gro soulye ki son garson i oule, me ler i get larzan dan son lanmen, son priyorite se pou aste manze pou li e son fanmir.  Byensir, tou sa apre ki labank e HFC in fini tir repeyman pou son bann loan. I parey pou Bidze en pei.

Minis Finans in prezant ek nou en Bidze ki met an konsiderasyon repeyman bann det ki pei i annan, priyorite pei e menm si nou ti a kontan fer plis, nou mwayen pa permet nou, san oubliy konsiderasyon ki nou ankor anba progranm avek IMF.  Fodre pa ki nou oubliye ki lemonn i ankor dan en kriz.  Lerop i ankor dan en resesyon terib, kot son pep i fer lagrev.  Sa ki pa ganny peye lafen dimwan.  Kot laz pansyon i ogmante, sa ki saler i reste flat depi 2008.  Me nou isi Sesel, nou ankor sanse.  Malgre difikilte, sa Gouvernman ki opourvwar i fer sir i get son dimoun.  En Bidze ki defann prensip Parti Lepep ki zonm i reste o sant devlopman.  Nou’n asire ki sa Bidze ki pou akseler economic growth, me anmenmtan i pa pou anmenn gran difikilte pou son pep, parey en bann pe fer dimoun krwar.  Sa Bidze, ki reflekte sa ki nou’n pas ladan an 2012, en lannen kot nou’n kontinnyen fer fas ek lenpakt piratri, R50 milyon in ganny depanse dan sa lalit ki’n kontinnyen ronny nou lekonomi, an vi ki i afekte lendistri lapes e tourizm ki nou pli gran resours.  En Gouvernman ki pa per pou depans pou son pep.  En kominote peser ki malerezman dan pe rod lavi, zot pas atraver bann move leksperyans.  Mon profit sa lokazyon pou dir ankor en welcome back Msye Tambara e Msye Songoire.  Ki pli gro kado Nwel pou zot fanmiy, ki Gouvernman in kapab asire ki zot la e fini sa soufrans ki zot pa ni ti merit pase laba Somali.  Me ki pli fer lapenn ankor Mr Speaker, se ki ler bann Somalyen pe fer nou frer pas martir, zot pti frer Somalyen isi Sesel, zot pe byen manze, byen bwar, byen sanze, koz ek zot fanmiy lo telefonn e anplis, aprann Angle dan prizon.  Mon vwar sa i pa akseptab.  Nou pa kapab depans sa kantite larzan Bidze lo sa bann kriminel.

2012 in osi vwar restriktirasyon dan Air Seychelles, ki ti nepli kapab anvol pli o e sa in byensir afekte nou marse Lerop, kot nou pli gran lakantite touris i sorti.  Sa i dir pou limenm, ki ler nou nepli ganny sa kantite touris dan pei, larzan i nepli antre parey avan.  Me ti en lazwa pou vwar ki osi dan sa menm lannen, Air Seychelles in kapab fer lagreman ek en lot lakonpannyen aeryen e sa in sov nou airline.  Malgre sa ta kritik ki en bann ti pe swete ki Air Seychelles pa al enternasyonal ankor.  Avek sa, i ekspekte ki nou lendistri tourizm i kontinnyelman agrandir e donk plis reveni pou nou ankor.  Mon swete ki Air Seychelles i mazin ver retourn Lerop ankor omwen 2 fwa par semenn.

Mr Speaker, lannen 2012 in anmenn ankor en logmantasyon dan pri lavi, ki pou reste ankor en konsern an 2013.  Nou koman bann reprezantan lepep, nou konsyan sa.  I reste ankor en konsern pou nou e mon pa pou oze met konsern mon bann dimoun devan, ler zot dir ki pri lavi i ankor tro ser e ki zot ti pe ekspekte en pli gran logmantasyon dan saler.

Mr Speaker, mon osi krwar ki nou Gouvernman i merit lans en lager ankor en pe pli serye lo lafason ki nou konbat lenflasyon dan pei.  Anmenmtan Mr Speaker, bann marsan i devret pli onnet ek nou dimoun, ek zot bann pri egzorbitan.  Nou dimoun osi i bezwen konpran ki se pa Gouvernman ki responsab pou pri marsandiz dan laboutik.  Liberalizasyon in fer ki aprezan nou annan nou plis swa lo nou marsandiz e se osi la ki NATCOF e Fair Trading Commission i merit antre.  Ankor larzan in ganny bidzete dan sa Bidze pou zot.

STC osi ki sipoze sa market pou nou Seselwa me plen fwa dan lezot laboutik, keksoz i pli bon marse ki dan Supermarket STC. I byen sa resers ki pe al ganny fer lo marse STC i trade avek.  Petet par sa, Minis Finans, nou a kapab trouv en pli meyer marse me mon priye ki sa pa fer nou Seselwa pey bon marse pou kout ser.

Letan ki pri lavi i bokou, bann servis telecom zot osi zot pe ganny demande pou donn en pli bon servis pou nou dimoun.  Nou pa kapab konpran Mr Speaker, ki dimoun i kontinnyelman ganny dir napa network, napa sinyal ou senpleman servis pa marse, menm parfwa en lazournen an antye, sa i malgre ki Gouvernman in envestir en ta larzan dan fibre optic.  Me zot, zot pa zanmen annan problenm network dan anvoy bill. Si lapli i tonm en semenn antye, Intelvision pa marse en semenn antye.  Me ler pou koup koneksyon, zot pa konsidere ki en semenn antye ou pa ti pe ganny sa servis me ou’n peye menm.  I parey zis en larzan ki ou’n zete koumsanmenm e sa i pa byen dan letan ki dimoun pe lager pou fer 2 bout zwenn.  Donn konsomater valer pou zot larzan.  Pa akoz dimoun napa lot swa ki nou donn zot en servis ki pa alaoter.

Mr Speaker, sa lannen menm nou’n koz lo en Mosyon lo kanser e nou vwar ki sa i akoz nou lifestyle e kalite keksoz ki nou manze.  Me sa i kontinnyen ganny ankouraze par lakantite keksoz enporte dan laboutik ki napa ni en label konpreansif e san oubliy sa bann ki dan laboutik ki prodwir isi menm e ki pa lo standar.  Nou dimoun i kontinnyen gaspiy larzan dan sa bann zafer e osi zot lasante i ganny afekte.  E la ki bann pti biznes pe al ganny oblize pey en Corporate Social Responsibility Tax ki byen.  Depi lontan ti’n ler pou fors zot rann en pe ek kominote sa ki zot gannyen.  Nou pa kapab en semen kase obor en gro lotel, Gouvernman ki oblize fer.  Rigol bouse obor sa gro lakonpannyen konstriksyon, Gouvernman ki oblize fer.  I byen ki la aprezan nou annan en fason ki a obliz zot depans en pe sa larzan dan pei, ki permet zot operate zot biznes.  Me Mr Speaker, mon zis espere ki sa pa ankouraz zot pou ogmant zot pri e sa i pas lo konsomater.

Mr Speaker, permet mwan demann Minis Finans en lasirans lo lafason ki zot pou monitor e enplimant sa tax ki asire ki sa rigol pa sanmenm sa pti Seselwa ki pe peye pou fer.  In ler pou ki sa bann gro biznesmenn i konnen ki zot pa zis fer larzan me osi les sa pas ek lakominote.  Anmenmtan, mon osi espere ki sa tax i ankouraze ki bann distrik ki napa gro, gro biznes i osi kapab benefisye ek sa tax, an vi ki laplipar ditan konmela, nou vwar ki gro biznes pe sponsor selman dan distrik kot i baze.

Mr Speaker, set avek sa sitiasyon pri lavi o e ki difisil pou sa pep ki Gouvernman Parti Lepep i mazin son dimoun e kontinnyen sibvansyonn serten servis esansyel.  Nou dimoun in sertennman kontan pou tande ki pou napa logmantasyon dan pri bis, malgre logmantasyon dan fuel sa bann dernyen lannen.  Nou a rapel Mr Speaker, pri bis in reste R5.  Sa lot bout, sa Bidze pe fer provizyon pou sa.  Ankor, sa Gouvernman Parti Lepep i reste touzour senser ek son prensip ki zonm i reste o sant devlopman.

Mr Speaker, sa Bidze in montre nou ki provizyon in ganny fer pou met ankor plis larzan dan Welfare Agency.  Nou bezwen ed sa manman tousel ki malgre i fer 2 louvraz, me i ankor vwar li difisil pou fer 2 bout zwenn.  Nou bezwen ed sa paran ki annan 3 zanfan ki ankor pe lekol e ki lapey manman e papa azout ansanm i zis R6 mil.  Me pour ou sa zenn, anplis ou sa zenn fiy ek en zanfan ki papa in ale e ki ankor oule depan lo lasistans sosyal.  Ou menm ou, ou pou bezwen en pansyon demen.  Welfare Agency pa peye pansyon pou ou.  Alors, kimannyer ou pou viv dan ou vye zour?  Ariv ou en aksidan, en maladi.  Kimannyer ou pou viv?  Kimannyer ou pou kontinnyen sonny sa zanfan?  Ou bezwen aret depan lo lasistans Welfare.  Mazin plito al ver travay e Welfare i a ed ou ek sa lot bout.

Mr Speaker, i enteresan note ki depi ki servis lanplwa in bouz dan distrik, selman en dizenn ki’n vizit sa lofis e 4 in fini ganny plase dan lanplwa ek lezot ki ankor pe swazir kote zot anvi ale.  Malgre sa gran kantite ki pa dan lanplwa dan distrik Mont Fleuri e ler ou met sa akote lakantite demann pou lasistans sosyal, i sagrinan pou vwar ki bokou i plito mazin al ver lasistans sosyal, olye al ver en travay, kot laba i annan bokou plis benefis parey mon’n site oparavan.  Tre bon linisyativ alors par Minister Lanplwa pou anmenn sa servis pli pres ek nou dimoun, ki’n kapab benefisye ek en plasman an 2012.  Nou swete alors ki sa i kontinnyen an 2013 e ki bokou plis i kapab ganny en travay.  Me anmenmtan, annou pa oubliy nou bann Seselwa ki sirtou dan lendistri tourizm, kot sa etranze pe pas pli byen ki zot e sa pa ankouraz nou Seselwa pou al ver sa.  Mon ti dir dan mon speech ler mon ti koz lo travayer etranze dan pei.  Nou bezwen zot wi.  En ta lekspertiz zot annan ki nou frer Seselwa, nou pa ankor kapab arive fer.  Me eski aroz fler dan zarden, en etranze ki bezwen fer sa?  Departman Lanplwa i merit al get en pe pli o profon lo sa bann problenm.

Mr Speaker, permet mwan dir en gran mersi Prezidan Michel pou gard son promes pou reste konekte ek son dimoun.  Ti en gran lazwa pou zabitan Mont Fleuri, ler ou ti vizit zot sa lannen e pou mwan osi koman zot reprezantan ki ou’n pli byen kapab vwar vre sitiasyon pou ou menm.  Par ou vizit Mr Prezidan, ou ti asir zabitan Corgat Estate ki proze dezyenm faz lakaz i bezwen al pli vit.  Mon ganny plis lankourazman ankor pou vot pou sa Bidze ki pou asire ki proze lakaz Corgat Estate i kontinnyen e premye group zabitan pou antre dan zot lakaz an Mars 2013.  Lespwar ankor pou lezot zabitan ki pe esper en nouvo lakaz akoz Prezidan Michel i en zonm ki gard son promes pou akseler proze lakaz Corgat Estate e alors, pandan ki 9 lakaz pe konplete, i demande e fer provizyon osi dan sa Bidze ki sa sif i double pou vin 18 lakaz ki pou komans konstrir lannen prosenn.  En fason ki olye pran 5an parey ti’n ganny propoze oparavan, sa proze pou konplete dan pli pti gin letan.  Vwala zabitan Corgat Estate.  Ankor en lannen ki sa Bidze pa kit zot ater.  Zot annan zot en MNA ki koz pou zot dan sa Lasanble.  Enn ki’n met devan zot demann parey zot ti anvoy li fer e asire ki sa i ganny materyalize.

Lespwar osi pou lezot zabitan dan Mont Fleuri.  Nou ki nepli annan later pou konstriksyon lakaz e ki sa i reste ankor en gro konsern dan distrik.  Alors, nou pe bezwen benefisye ek proze lakaz Perseverance.  Sa Bidze i asire ki ankor lakaz i kontinnyen konstrir laba.  Ziska prezan, en trantenn fanmiy sorti Mont Fleuri in benefisye e la ankor 6 pe al antre.  Me ankor en lapel ek nou bann dimoun.  Pou bann ki’n fini benefisye.  Sa i pa zis dan Perseverance me partou dan distrik dan bann lakaz Gouvernman.  Pa akoz ou’n fini benefisye ki aprezan ou bezwen retard ou kanmarad ki ankor lo lalis espere.  Ou bezwen pey ou lakaz.  Kimannyer ou ekspekte Gouvernman rekonstrir lakaz si larzan pa pe anmase pou konstrir pou ou lot kanmarad?

A sak fwa ki en delegasyon etranze i vizit proze Perseverance, zot reste ebete par la kalite lakaz ki Gouvernman Sesel i fer pou son pep.  Seselwa, annou aret krwar ki akoz Konstitisyon i dir ki nou annan nou right to shelter, sa i vedir ki Gouvernman i oblize fer zoli lakaz, apre nou pa peye.  Pa egziste dan en pei sa.  Pourtan, dan laplipar pei zot Konstitisyon i state right to shelter. Me eski nou vwar zoli housing estate parey nou vwar isi Sesel?  Alors annou apresye sa ki nou gannyen e fer nou devwar.

Mr Speaker, nou ekspekte ki avek separasyon Housing Finance Company ki li osi pou sa lenstitisyon ki pou finans e anmas larzan pou lozman e later e Property Management Corporation, sa 2 lakonpannyen i ekspekte vin pli efikas dan lannen 2013, kot aprezan responsabilite i a partaze.  Separasyon sa 2 i osi ekspekte kree plis lanplwa ankor.  En lot benefis ki sa Bidze i anmennen.  E ou ki deza dan ou nouvo flat e pe fer byen ou repeyman.  Ankor enn fwa mon lans en lapel pou ou konport ou byen lo housing estate.  Property Management Company pou aprezan li osi annan plis sa letan pou li zer bann housing estate.  Plis letan pou deal ek dimoun ki fer son lakaz en laboutik drog ouswa sa enn ki fer discotheque, menm pandan lasemenn.

Mr Speaker, parey nou Leader ti dir Vandredi dan son speech, i enportan note ki sa Bidze i enn ki’n ekout laspirasyon nou dimoun, lavwa nou bann Manm Lasanble ler nou ti demande ki tou dimoun i bezwen kapab viv an pe dan zot lakaz.  En Mosyon ki mwan menm mon ti prezant dan Lasanble sa lannen.

En sonm R413 milyon in ganny envestir dan ledikasyon en pep san en pri ki zot, zot bezwen peye.  Dezyenm pli gro parti sa Bidze, ki asire ki nou annan nou en pep ki edike.  Dezyenm priyorite apre lasante pou son pep.  Semenn pase menm, mon’n swiv en konversasyon en zenn fiy politeknik ki vwar ki allowance post Segonder ti merit ogmante.  Sa fiy pa realize ki nou granmoun i vwar li merit pe plito apresye sa ki i gannyen akoz zot, zot dir ki konmela zenn i ganny peye pou al lekol e menm i annan ki pa ale, zot konplent ki sa larzan pa ase.  Difikilte wi i egziste.  Napa en pei omonn ki napa problenm e Sesel, ledikasyon pa en leksepsyon.  Retenir son bann ansennyan i reste ankor en gro defi.  Minis pou Ledikasyon ti dir isi menm dan sa Lasanble ki dan en lespas 2an, 86 teachers in kite.  Lakoz pli komen se pa sa larzan byen evidaman, parske sa trend kot teachers i kite par gran kantite i egziste depi byen avan ki nouvo scheme ti entrodwir e menm apre.  Motiv teachers ek larzan, sa pa ase pou zot.  Teahers i plito fristre ek sitiasyon dan lekol, kot zot nepli annan kontrol lo etidyan.  Nou bezwen fer en keksoz pou nou bann zenn ki en pti group pe deroute e zot pe gat lezot.  E ankor nou vwar ki sa Bidze pe konsider sa Juvenile Centre ki byen, akoz nou pa kapab bes lebra lo zot.  Annou pa oubliye ki se zot nou lavenir.

Mr Speaker, sa Bidze pou ledikasyon i osi fer provizyon pou maintain bann lekol nef tel ki Au Cap, Baie Lazare, Mont Fleuri limenm ki fek konplete.  Mon profit sa lokazyon osi pou dir lo non dimoun Mont Fleuri en gran mersi Gouvernman pou sa zoli lekol.  Sa bann lekol pou ganny maintain par menm lakonpannyen ki’n konstrir zot, pou asire ki sa bann travay i ganny fer byen, dapre kimannyer i ti ganny konstrir.  Tro bokou fwa larzan i ganny gaspiye dan lekol nef ki ganny kase pou aranze e i ganny fer dan en lot fason ki andomaz son striktir plis ki avan.  Problenm sez manke dan lekol, tousala nou nepli tann koz lo la parske Bidze 2012 in rezourd sa problenm par met sez plastik dan 6 lekol segonder e sa Bidze 2013 pe al fer provizyon pou larestan lekol me ki pou lemoman, zot annan zot sez an dibwa.

Mr Speaker, mon profit sa lokazyon pou felisit sa bann zanfan ki’n ganny sa bann sez depi Fevriye sa lannen e napa okenn gran rikord sez kase parey avan.  Sa i montre en gran rediksyon dan vandalizm dan lekol segonder.  Parey nou Prezidan i dir, kot i mal nou aranze, kot i byen nou anbelir.  Kot zanfan osi pe fer byen, nou bezwen dir zot.  Lannen pase dan nou reaksyon lo Bidze, nou ti sipliy ek sa bann etidyan lo sa size kas sez e i byen pou note ki sa lannen zot in kapab konport zot byen, ki’n fer ki Bidze pou School Furniture sa lannen in redwir e i enkli zis pou bann lekol nef.

Mr Speaker, napa en paran ozordi ki kapab dir ki i pa pe anvoy son zanfan lekol akoz napa larzan.  Apard Macarius Fund, Gouvernman i osi met dispozisyon tou lekol en Dedicated Fund.  En larzan ki soutenir bann zanfan ki mwen fortinen, ou si non, ki paran i vwar li dan difikilte pou en pe letan.  Ankor sa lannen, R3 milyon pe ganny mete dan Bidze pou asire ki sa paran ki ankor vwar li difisil pou fer 2 bout zwenn.  Son latet i anpe.  I konnen ki son zanfan pe ganny son goute, son manze midi e menm si i dan gran difikilte pou ganny son liniform, son sak lekol, son soulye, provizyon pe ganny fer pou li gannyen.

Me Mr Speaker, anba Bidze Ledikasyon, napa pli gran lazwa pou mon vwar ki mon demann lannen pase pou konstrir en miray otour Lekol Segonder Mont Fleuri pe ganny akorde dan Bidze pou 2013.  Apard servi sa lekol koman en semen piblik, lezot i osi swazir lanmenm pou fer zot biznes ilegal, kot sa ki pli vilnerab i tonm dan zot pyez e ganny afekte.  Droger i swazir la pou vin fer zot marse e nou zanfan i soufer.  Sa pou osi anpes zanfan sove pandan ler lekol e nou ava aret vwar sa kantite zot dan liniform pandan ki zot sipoze dan laklas.  En miray ki pou kout R1.2 milyon pou benefis nou zanfan e ou sa paran, ou lespri i a pli anpe dan travay, ler ou konnen ki ou zanfan i an sekirite dan lekol.

Bidze 2012 in osi benefisye zabitan Mont Fleuri ek bann pti proze tel ki semen Rideau anler Foret Noire, pon Hermitage, konstriksyon miray pou anpes degradasyon semen, zis pou nonm enn de.

Ankor dan Bidze 2013, provizyon pe ganny fer pou fer ankor proze dan distrik.  Zanfan lekol ki pas par Foret Noire, nou konnen ki zot bezwen en pavement depi anler kot court ziska anba.  I nepli letan pou zot kontinnyen sot labou e sa gro rasin pye dibwa pou ariv lekol.  Sa Bidze pe fer provizyon pou zot an konfor a lekol e osi an sekirite lo semen.

Zabitan Ex-Kan Gard.  Zot MNA pou asire ki zot pou nepli bezwen antre kot zot dan en labou a sak fwa ki lapli i tonbe.

Foret Noire, teren i ankor danzere kot plizyer lakaz, kot nou bezwen fer miray pou anpese ki en kominote an antye i ganny afekte par en deboulir later.

Vwala zabitan Mont Fleuri.  Zot annan zot par dan sa Bidze.  Annou pa zis rode si sa logmantasyon larzan i ase ouswa non.  Annou apresye ki nou annan nou lot par nou osi ladan.

Mr Speaker, Prezidan in demann nou dimoun pou leve, debrouye.  I annan nou dimoun ki’n fer li e mon krwar ki dan Gouvernman, nou osi nou merit pe fer parey.  I pa akseptab ki depi sa ta lannen ki later endistriyel pe ganny distribye Providance, ki i ankor annan morso later ki napa okenn koneksyon servis esansyel.  Mont Fleuri i en landrwa kot i annan plizyer garaz obor landrwa rezidansyel.  Sa i pa ideal.  Zot oule retire apre plizyer warning ek Zofisye Lanvironnman.  Vwazen i ganny afekte, sa bann emisyon kemikal dan ler pa bon pou lasante.  Me malgre sa, ki nou vwar?  Later pou garaz i annan lo zone endistriyel Providance me napa okenn koneksyon servis PUC.  Kimannyer sa msye pou operate son garaz san elektrisite?  I pou aret son servis dan distrik?  Ki i pou fer apre?  Nou pou met li lo Welfare? Pou vin plis depans ankor lo pei akoz li osi i annan en fanmir pou li sonnyen.

Planning Authority.  Zot osi zot bezwen ekout lavwa nou dimoun en pe dan distrik, avan ki zot zis aprouv en plan.  Vizit sa site e asire ki kominote pa pou ganny afekte ek en proze, avan ki zot aprouve.  Pou nou, i pa kestyon Lalwa.  Nou’n fatige dir isi dan sa Lasanble.  Si Lalwa i manke, se pou sa rezon ki nou annan nou en bon Konstitisyon isi Sesel.  Se nou dimoun ki fer Lalwa.  Alors, anmenn isi kot nou la dan sa Lasanble e nou ava aprouve.  Nou bezwen protez nou dimoun.  Nou bezwen asir akse pou nou dimoun.  Pou mwan, se sa rezon ki mon la.  Pou vin lager pou sa mazorite ki’n met mwan la.

Pou konklir Mr Speaker, mon oule zis azoute ki sa Bidze i enn ki’n tous tou nou Seselwa.  Se sa alors ki lo lapar tou zabitan Mont Fleuri, ki’n elekte mwan pou vot pou sa Bidze, pou asire ki Gouvernman i kontinnyen annan sa resours finansyel ki i bezwen pou pran swen ek son pep.  Tre bon travay Minis Finans ek ou lekip, pou asire ki prensip Parti Lepep i kontinnyen.  Sa Bidze i montre legal dan partaz larises pei.

Permet mwan Mr Speaker, pou profit sa lokazyon pou remersye zabitan Mont Fleuri pou zot sipor pandan sa lannen 2012.  I pa’n en lannen fasil pou nou me nou’n osi partaz bokou moman lazwa ansanm.

Avek sa Mr Speaker, mon oule swet Prezidan Michel ek son fanmir, ou ek ou fanmir, tou mon bann koleg Manm Onorab ek zot fanmiy, tou bann staff Lasanble Nasyonal ek zot fanmir, tou Seselwa, espesyalman zabitan Mont Fleuri en Zwaye Noel e en Bonn Ane 2013.  Ansanm, nou pou kontinnyen travay dan sa Nouvo Lannen pou asire ki Mont Fleuri i kontinnyen bouze dan “Sa Nouvo Sesel”.  Mersi Mr Speaker.

 

(Applaud)

 

MR SPEAKER

Bon, avek sa nou adjourn ziska 11.05.

(Break)

MR SPEAKER

Bon, nou ava kontinnyen avek deba.  Onorab Barbe.

 

HON NICHOLE BARBE

Mersi Mr Speaker.  Minis Finans, koleg Onorab, tou dimoun ki alekout, espesyalman zabitan Bel Air, bonzour.  Mr Speaker, i fer deza 1an ki zabitan Bel Air in fer konfyans Parti Lepep e elekte mwan koman zot reprezantan dan Lasanble Nasyonal.  Mon resanti zot konfyans koman en lafyerte, me anmenmtan koman en responsabilite pou toultan deservi zot, an akzyon koman an parol pou reste reprezantan Bel Air e mon swete ki zatiban Bel Air i vwar zot lekor dan sa ki mon pou dir, an reaksyon diskour Bidze fer par Minis Finans Mardi pase dan nou Lasanble.

Mr Speaker, Minis Finans in fer resorti 2 pwen santral dan son diskour lo Bidze 2013.  Premyerman, in dir ki sa Bidze i batir lo labaz bann lakonplisman son predeseser Vis Prezidan Danny Faure.  Sa i montre ki Bidze 2013 i en Bidze sanzman dan kontinnyite.  Dezyenmman, i ti dir ki tenm sa Bidze se anmenn ankor plis krwasans ekonomik.

Mr Speaker, lekonomi Sesel i perform byen dan sa 2 dernyen lannen.  Nou lekonomi in rikord en to krwasans o dan en konteks global tre difisil avek resesyon dan lekonomi enternasyonal.  Krwasans ekonomik i sours plis larises ki ganny distribye avek tou Seselwa.  Zisteman, i annan dimoun ki dir akoz Gouvernman pou donn logmantasyon zis 3 e 6 poursan lannen prosenn, alor ki lekonomi i rikord krwasans sa 2 dernyen lannen.  Sa largiman i paret fer sans, sirtou letan ou realize ki pri lavi i deza tre o e i kontinnyelman vin pli o ankor.  Par kont, nou bezwen abord sa deba lo krwasans ekonomik ek logmantasyon saler dan en lespri responsabilite.

Mr Speaker, krwasans ekonomik i vedir plis larises me sa larises i ganny kree dan 2 fason.  Swa an form plis lenvestisman oubyen an form plis konsomasyon par popilasyon.  Sa larises i osi ganny distribye an form reveni parey saler pou travayer, oubyen dividend pou bann lakonpannyen.  Krwasans ekonomik Sesel sa dernyen 2an in vin sirtou an form lenvestisman ki limenm li i en baz pou distribisyon larises an form plis transfer sosyal ek logmantasyon saler alavenir.  Alor, sa desizyon Minister Finans pou donn en logmantasyon saler bann ki tous saler minimonm e bann ki ganny mwens i montre ki Gouvernman pe servi sa krwasans ekonomik pou distribye larises avek popilasyon.  I vre ki sa logmantasyon saler pa ase.  I preski menm nivo ki lenflasyon me nou bezwen vwar li koman en sinny ki Gouvernman i serye, ki krwasans ekonomik i la koman en masin pou kree larises ki answit ganny partaze avek lepep.  Pou lemoman, mwayen pa permet donn plis logmantasyon saler.  Sa ki’n ganny saler minimonm e bann ki ganny saler ba.  Sa set akoz ki nou pran tou larises ki nou’n kree e redistribye an form logmantasyon saler, nou pou touy lenvestisman e nou pou redwir krwasans alavenir.

Mr Speaker, mon konpran dezapwentman dimoun letan zot dir ki logmantasyon saler pa ase.  Me mon dir zot, annou apresye ki nou bann frer ki ganny mwens pou omwen ganny en soulazman.  Mon dir zot annou get sa logmantasyon saler koman en sinny lespwar ki alavenir, nou tou nou pou benefisye.

Mr Speaker, Minis Finans pa zis koze me i osi azir.  Nou devret vwar bann mezir ki in mete dan Bidze 2013 koman bann aksyon konkret ki pou permet sa Bidze atenn son lobzektiv plis krwasans.  Lo sa pwen, mon kontan pou vwar ki Minis Finans in met bann mezir ki pa pou zis anmenn plis krwasans me pou asire ki krwasans i al kot tou Seselwa, an term plis benefis.

Mr Speaker, enn sa bann mezir se lentrodiksyon sa Corporate Social Responsibility TaxCorporate Social Responsibility i en konsept ki’n anmenn bokou sanzman pozitiv dan lavi plizyer milyon dimoun e osi amelyor limaz piblik, bokou biznes dan lemonn.  Corporate Social Responsibility i vedir ki en biznes i vwar byennet son bann anplwaye e osi byennet lakominote kot i ete e lasosyete an zeneral koman sours son prop prosperite.  Letan i fer sa, en biznes i adopte bann valer parey proteksyon lanvironnman e amelyorasyon lavi bann ki mwen fortinen oubyen pli vilnerab.  Atraver sa polisi, en biznes i met anplas plizyer progranm oubyen i kontribye ver Bidze dan bann group ki annan sa bann progranm.  An dot mo, atraver Corporate Social Responsibility, biznes e lasosyete i form en partenarya pou benefis lapopilasyon.  Anba bann tel progranm, bann proze lakominote e bann fer par bann NGO’s i ganny finanse e biznes i pran plis lentere dan byennet son travayer e zot fanmir.  Mr Speaker, atraver konsept Corporate Social Responsibility, biznes i kapab par egzanp ed son anplwaye par finans en Day Care Centre pou bann travayer ki annan zanfan anba laz.  Atraver Corporate Social Responsibility, biznes i kapab finans plizyer pti proze dan distrik e ede empower bann NGO’s. Sa pli gran rol par biznes dan byennet zot travayer e lakominote i vedir ki olye retenir tou zot profi e distribye li an form dividend avek zot bann shareholders, bann biznes i partaz en pti pe sa profi avek zot travayer e lakominote.  Sa i en fason ki travayer e lakominote pou benefisye krwasans ki nou lekonomi pe prodwir.

Mr Speaker, dan sa Bidze, Minis Finans in osi entrodwir bann mezir pou amelyor lanvironnman biznes dan pei, par pli fasil pou fer biznes.  Mon akeir sa desizyon akoz i en lot fason pou asire ki popilasyon an zeneral i benefisye avek krwasans ekonomik.  Letan plis Seselwa i mont zot prop biznes, sa i en fason pou kree plis lentere e partaz larises avek plis dimoun.

Mr Speaker, lo sa size mon ti a kontan fer resorti ki dimoun dan mon distrik in met a mon latansyon ki parfwa, letan zot pe fer demars pou kree en biznes, zot ganny bokou difikilte dan bann biro Gouvernman.  I annan ki dir ki serten proze biznes i menm mor an nesans, telman zot in rankontre difikilte.  Mon ti a kontan ki Minis Finans i etidye byen sa kestyon e anmenmtan, met an plas mekanizm ki monitor kreasyon biznes dan Sesel.  Par egzanp, zot devret fer bann test cases pou vwar konbyen letan i pran pou en dimoun pou mont son prop pti biznes.

Mr Speaker, letan nou reflesir lo bann difikilte ki biznes i fer fas avek, nou vwar ki 2 gran problenm se latitid bann civil servants e konpetans bann biznesmenn zot menm.  Civil servant i annan en fason panse ki totalman diferan avek biznesmenn e sa ki fer ki zot azir dan fason ki rann lavi biznesmenn parfwa difisil.  Fodre Gouvernman i get dan fason pou fer civil servant azir koman en vre fasilitater anver bann biznesmenn.  Nou koz bokou lo the facilitator state e lo en enabling business environment, me sa 2 fakter i depann bokou lo annan en civil service ki osi azir koman en fasilitater.  Bokou Seselwa i reponn lapel pou zot leve debrouye par deside pou kree zot prop biznes, me bokou i ganny dekouraze par birokrasi.  Gouvernman, atraver bann polisi apropriye i donn en lanmen bann ki leve me serten civil servants i apre anvoy en lot lanmen ki anpes zot debrouye.  Fodre ki bann civil servants i pous dan menm direksyon ki Gouvernman.

Mr Speaker, dezyenm difikilte ki bokou biznesmenn, sirtou bann ki fek komanse i fer fas avek se mank leksperyans e lekspertiz.  Serten pti biznes pa fer diferans ant zot lekor e zot biznes e zot servi kapital zot biznes koman zot prop larises e sa i fer ki zot tonm dan difikilte plitar.

Mr Speaker, lemonn biznes i tre difisil, avek konpetisyon e lezot defi.  Pourtan, serten pei in reisir devlop bann teknik e model ki asire ki pti biznes, sa ki nou apel start ups i mars byen.  Bann pei parey Lanmerik, sirtou dan leta California, in devlop model parey business angels, tandis ki lezot pei parey Langleter in devlop bann biznes incubators ki mars byen.  I enportan ki Gouvernman i etidye e enport sa bann model, me fodre ki sekter prive i osi donn lanmen.  Par egzanp, Seychelles Chamber of Commerse and Industry i fasilman kapab devlop sa model biznes, business angels kot serten son bann manm ki’n fer sikse koman biznesmenn i vin koman bann mentors pou bann pti biznesmenn ki’n fek komanse e ed zot rezourd zot bann problenm.

Touzour dan sa lespri ankouraz plis Seselwa fer biznes, mon osi akey lanons ki Minis Finans in fer konsernan elev stati Small Business Financing Agency ki’n ranplas CCA. Mon vwar sa avek tou lezot laspe ki Minis Finans in anonse, parey logmantasyon fon ki pou disponib e sa lapwi ki SENPA pou anmennen pou ogmant konpetans dan domenn marketing, kontabilite eksetera.  Mr Speaker, mon vwar sa koman en soulazman e en porter lespwar.  Mon pli gran soulazman se ki i port lespwar pou nou bann dirizan ouswa adilt responsab ki pa oule vwar nou zenn tonm dan dekadans, dan drog, dan vol, dan prostitisyon, ouswa vin en lot sif ki pou ogmant statistik ki pe depann lo Lazans Proteksyon Sosyal.  Annou alor profite, avek sa lanvironnman ki kapab amelyore, avek plis sipor ki pe vini pou bann pti biznes, pou donn en loportinite spesyal nou lazenes.  I annan en kantite dan nou kominote ki nou kapab fer koman bann pti biznes, i kapab anmenn ase pou nou bann zabitan, an partikilye nou bann zenn ganny en lavi desan.  I bles mwan profonnman ler mon vwar telman zenn ki pe fer semen Montanny Poze.  Mr Speaker, zot pe al poze avan menm ki zot komans travay.  Sa i tousan.  Mon lapel se ki nou tou, annou debout pou anmenn en batay asarne, pou devlop en kiltir travay, en kiltir leve debrouye dan nou bann zenn, an komansman dan nou kominote menm.  A mon avi, sa i ava konplet sa progranm Renesans Sosyal ki nou pei in anbark lo la.

Mr Speaker, mon osi akey sa lide higher purchase. Me mon pou demann avek lotorite pou asire ki sa bann biznes i fer vin prodwir de kalite e ki zot ofer garanti zot kliyan.

Mr Speaker, pli gro alokasyon dan Bidze in al pou Minister Lasante e Minister Ledikasyon.  Sa i tre bon nouvel akoz i vedir ki nou pep i asire, zot pou ganny en swen de kalite e gratwit dan sistenm lasante piblik e nou zanfan pou kontinnyen benefisye en ledikasyon de bon kalite ki osi gratwit.  Me Mr Speaker, mon oule fer resorti 2 pwen lo size lasante e ledikasyon.  En Gouvernman i asir son pep akse avek en bon swen lasante set en Gouvernman ki caring. E se sa ki sa Gouvernman Parti Lepep, dirize par Prezidan Michel i reprezante me fodre ki sa pep an retour i montre ki i apresye zefor ki son Gouvernman in fer e i pa abiz lo sa sistenm lasante.  Pa zis al rod konze dokter ki en form labi lo sistenm lasante, bann konportman a risk e iresponsab osi i en form labi lo sistenm lasante akoz zot ti’n kapab ganny evite e sov pei bokou resours.  Annou pran swen ek nou lasante dan en fason ki nou pa ava bezwen en swen lasante.  Mr Speaker, en Gouvernman ki ofer son pep akse avek en ledikasyon de kalite set en Gouvernman ki valoriz lentelizans, me i enportan ki son pep an retour i montre gratitid anver zefor ki son Gouvernman in fer, par vreman servi sa ledikasyon ki i pe gannyen.  Nou zanfan i fer sa letan zot aprann byen e pa gaspiy letan bann teachers. Lespri leve debrouye i osi aplik pou bann zanfan lekol ki devret leve pou pran sa bann loportinite ki zot pe gannyen e debrouye pou aprann byen.

Mr Speaker, pri lavi i reste problenm nimero 1 ki Seselwa pe fer fas avek.  Me mon osi konsyan ki nou pa kapab zis ogmant saler e krwar ki sa i pou en baget mazik ki pou fer disparet sa problenm lavi ser.  Byen okontrer.  Si nou zis ogmant saler, nou kapab fer sa problenm vin pli grav akoz dan en pei kot 90 poursan komodite ki nou servi nou enporte.  Logmantasyon saler i riske fer lenflasyon ogmant ankor plis.  Alor, mon apresye sa latitid pridan ki Minis Finans in adopte e mon felisit Gouvernman pou kontinnyen met zefor pou asire ki bann ki pli vilnerab i kontinnyelman ganny asiste.

A sa pwen Mr Speaker, mon ti a sizere ki en mekanizm kler i ganny met an plas an sa ki konsern sa tarif sosyal ki pou ganny entrodwir pou peyman elektrisite.  Mon swe se ki i napa labi par bann ki pa bezwen e i pa anmenn fristrasyon pou bann ki pli dan bezwen.  Mon osi apresye ki dan Bidze i annan plizyer mezir ki vin koman bann loportinite ki Seselwa pou kapab sezi pou zot menm ganny plis larzan.  Pa zis Gouvernman ki kapab ogmant saler.  Nou osi nou kapab ogmant nou saler atraver nou bann linisyativ ki enkli ogmant nou prodiktivite oubyen vin pli kreativ.

Mr Speaker, mon oule eksprim gratitid distrik Bel Air anver Gouvernman akoz an 2012, nou’n benefisye plizer proze tel ki konstriksyon en pavement depi Biro Ladministrasyon Distrik ziska Lekol Bel Eau ki’n preski konplete.  Sa proze in amelyor sekirite nou bann pyeton, sirtou bann zanfan lekol.  Bel Air in osi benefisye avek lezot pti proze tel ki resirfas drenaz lo car park Rock Lane.  Konstriksyon en shelter lo court basket ball, konstriksyon retaining walls kot rezidans serten zabitan, resirfas semen e drenaz kot flat Sans Soucis, konstriksyon peron pou fasilit akse serten zabitan Bel Eau, koup pye dibwa ki ti pe menas lakaz bann zabitan, konstriksyon railings pou bann dimoun aze en pe partou dan distrik parmi lezot.  Nou’n osi konstrir en bus shelter Curio Road e a sa pwen, mon ti a voudre remersye sa fanmiy ki’n pare pou donn permisyon pou met sa bus shelter lo zot propriyete.  Sa i bann tel zes ki nou ti a kontan vwar plis ankor dan lavenir par nou bann zabitan, pou ede dan lenplimantasyon nou bann pti proze kominoter.  A sa pwen, mon ti a kontan osi remersi tou bann partener fidel ki’n kontinnyelman donn lotorite distrik en koudmen dan lepanouisman nou distrik.

Mr Speaker, parey lezot distrik, dan Bidze 2013, Bel Air pou osi benefisye avek sa alokasyon R1.2 milyon ki a permet nou realiz pti proze ki a benefisye bann fanmir ki dan bezwen, osi byen ki ava benefisye tou zabitan an zeneral.

Mr Speaker, tes fondamantal en Bidze i baze lo lafason ki sa Bidze i amelyor byennet sitwayen son pep.  Rol en Gouvernman i pou asiste son pep servi o maksimonm bann loportinite ki ganny met a zot dispozisyon e pou asire ki bann lenstitisyon piblik i reponn pli byen a demann sa pep ki zot deservi.  Se sa le pwen ki mon’n esey fer resorti ozordi akoz mon santi ki dan sa Bidze 2013, sa pe anvizaze fer sa.  Avek sa Mr Spoeaker, mon pou aport mon sipor pou Appropriation Bill 2013.

Mr Speaker pou terminen, mon ti a kontan swet ou ek ou fanmir, tou Manm Sekretaryat Lasanble, Minis Finans ek son fanmir, bann manm son lekip, tou Seselwa, espesyalman zabitan Bel Air en Zwaye Noel e en Bon Lannen 2013.  Mon kont lo zot sipor kontinnyel dan lannen 2013 pou ki nou a kontinnyen travay ansanm dan sa lespri en meyer Bel Air pou progre nou distrik e nou pei.  Mersi Mr Speaker.

 

(Applaud)

MR SPEAKER

Onorab Lucas.  Request Onorab Wilby Lucas.

 

HON WILBY LUCAS

Mr Speaker, Minis, zabitan Baie Lazare, pep Seselwa.  Mon pe donn mon reaksyon lo diskour Bidze par premyerman felisit Minis Finans, lo lapar nou Gouvernman pou prezant pep Seselwa avek en Bidze ki pe tous tou kous nou popilasyon, a en moman kot lekonomi mondyal i dan en leta tirbilan e nou isi Sesel, nou pa’n ganny eparnye ki parey nou tou nou konnen nou ti bezwen antre dan en progranm reform an 2008.

Sa Bidze pe angaz Gouvernman pou fer keksoz pou son pep selon son mwayen, kot bokou lezot pei lo tou kontinan pa pe kapab arive fer e sa i en realite ki nou vwar toulezour lo televizyon, tel ki lagrev, demonstrasyon politik, ekonomik e lezot ankor.

Mr Speaker, mon’n tann Leader Lopozisyon dan son lentervansyon in dir ki sa Bidze ki Minis in prezante i pa adres lapovrete dan Sesel.  Mwan mon pou dir wi, dan Sesel i annan en group dimoun ki pli vilnerab.  Me annou pa get zis sa konponan plis larzan pou travayer ki solisyon sa group ki pli vilnerab.  I annan osi plizyer soutyen direkteman e endirekteman ki donn sipor sa bann dimoun.  Ler nou get sa alokasyon ki Bidze pe donn Minister Lasante e Minister Ledikasyon, i en kontribisyon ki pe soulaz sa group pli vilnerab akoz par egzanp, zot pa pe bezwen peye pou ganny akse avek lasante e zot zanfan pa ganny neglize oubyen ganny kit deryer, zis akoz nou sistenm ledikasyon.

Mr Speaker, mon ti a kontan tir latansyon sa Lasanble.  Parmi sa 146 fiy ek garson ki’n graduate Vandredi pase, mon konn enn parmi ki son paran in mor pou plizyer lannen me in touzour ganny sipor atraver progranm sosyal ki Gouvernman in met an plas, ki’n permet li kontinny son letid e anmenn li ver sa achievement ozordi.

Egalman, Bidze pe osi fer provizyon pou en alokasyon sibstansyel dan fon Lazans Proteksyon Sosyal, zisteman, pou soulaz bann ki pli vilnerab.  Me par kont, serten nou bann dimoun ki dan bann sitiasyon, zot osi mon pou dir zot responsab pou met zot dan sa tel sitiasyon pou 2 rezon.  Swa zot oule depans plis ki sa ki zot gannyen, san tenir kont ki sa ki zot priyorite, oubyen dezyenmman, serten zot pa oule rod en travay plen tan.  Zot plivomye tyake.

Wi Mr Speaker, lavi i ser.  Mon ti a kontan ganny okenn sizesyon lo sa bann konsern swivan, ki Gouvernman i kapab fer pou kontrol mantalite oubyen latitid serten lendividi ki get zis zot profi, kot zot aktivite i annan lenpakt negativ lo kapasite depans nou bann dimoun, ki osi kontribye pou fer lavi ser.  Ler SFA i donn en peser konsesyon lo fuel e li sa peser i kontinnyen vann son pwason ser, menm parfwa pli ser ki bann ki pa ganny konsesyon.  Ler en marsan i kontinnyen vann son bann marsandiz 4 fwa pli ser ki in aste, la ki pri kontrol i nepli egziste, ler serten biznes ki ganny konsesyon pou pa pey license me li i kontinnyen fer monte pri pou servis ki i donnen.  Ler middleman i pe vann prodwi ki son met in donn li pou vann e li i pe fer 2 fwa plis profi ki son met.  Ler en dimoun i lwe en loto, i fer pirat ladan tou lannwit pandan weekend e i sarz bann kliyan menm pri parfwa plis ki en Taxi normal.  Eski sa bann kalite konportman i posib pou Gouvernman kontrole pou bes pri lavi?  Oubyen i depann bokou lo konsyans sa bann lendividi zot menm, ki zot annan en devwar moral pou pas en pe sa bann benefis, ki loportinite in ed zot pou gannyen avek zot kliyan e konsomater.  Sa ki nou pe eksperyanse ozordi, annou pa bliye ki i konsekans liberalizasyon e marse lib.

Mr Speaker, i kler ki dan okenn sosyete, i pa pou zanmen egziste ki tou dimoun pou kapab viv menm nivo lavi.  Me dan ka Sesel, bann ki pli feb, progranm sosyal Gouvernman wi i soutenir zot.  Alor mon pe rezet okenn sizesyon ki sa Bidze pa’n fer okenn provizyon pou adres sa swadizan lapovrete.

Mr Speaker, dan mon bann lentervansyon presedan lo Diskour Bidze, mon’n toultan mezir reveni ki Biro Rezistra Zeneral i anmase lo lavant later, rezistrasyon bann konpannyen e lezot sevis ki sa lofis i donnen koman en sonm vreman signifikan ki al dan kof leta e mon’n toultan kritik kalite servis ki manm piblik i resevwar avek sa lofis e parfwa i pran plis ki 1an pou en lavant later ganny anrezistre.  Wi Minis, Mr Speaker, ozordi mon pe eksprim mon lapresiasyon ki Gouvernman in ekout nou bann konsern lo leta Lofis Rezistrar Zeneral, kot nou’n vwar en gran amelyorasyon dan kalite e dele letan ki bann servis pe ganny delivre, sirtou la avek lapwentman en nouvo Rezistrar e en Depite Rezistrar Zeneral.  Nou’n vwar en restriktirasyon dan son ladministrasyon e osi plan pou parti sa lofis bouz dan en lot batiman, avek bi kree plis lespas e kree kondisyon pou bann staff fonksyonn pli an konfor.

Mr Speaker, mon pou aprezan dir enn de mo lo nou bann lotorite piblik, oubyen sa ki nou apel the public body. Minis dan son lentervansyon, dan son ladres in fer remaake ki bann Minister e Departman Gouvernman i bezwen pli performan, ki vedir zot bezwen pe perform anlinny avek bann lareg e protokol ki dan PSO e an akor avek bann prosedir ek lareg finansyer.  Napa okenn zofisye servis piblik ki kapab fer sa ki li i anvi dan Gouvernman.  Mon siport lapel Leader Zafer Gouvernman kot in demann bann middle management pou zwe zot rol pou delivre en servis de kalite ki piblik pe ekspekte de zot e sirtou pou sa responsabilite ki zot pe ganny anploye.  Mwan lo mon kote, mon pe demann bann lotorite piblik pou desarz zot responsabilite an akor avek Lalwa ladministrasyon, oubyen sa ki nou apel The Public Law.  Sa brans Lalwa Mr Speaker, i dekoul direkteman anba nou Konstitisyon, Lartik 136, ki fer provizyon pou Lakour Siprenm egzers sipervizyon atraver The Judicial Review lo desizyon bann public body ki ganny kategorize koman adjudicating authority.  La mon pe fer referans lo Lotorite Planning, Lotorite Licensing, Departman Lanvironnman ki par natir zot fonksyon zot desizyon i afekte en lendividi oubyen en lakonpannyen oubyen menm en lenvestiser.  Desizyon ki zot pran Mr Speaker, pa kapab baze lo ni faver ouswa malis, ouswa kapris, ouswa bias.  Lalwa i egzize ki bann public body i bezwen aplik sa bann prensip swivan ler zot pe fer en desizyon.

Premyerman, desizyon i bezwen legal.  Par egzanp, Departman Lanvironnman pa otorize pou zot donn direktiv Lotorite Licensing pou revoke license en dimoun, akoz Lotorite Licensing i pa sipoze pe ganny direktiv avek okenn lezot lotorite.  Me par kont, si zanmen Lotorite Licensing i oule revoke en license en dimoun, zot toultan kapab fer li an konsiltasyon avek lezot Lazans tel ki Lasante.

Dezyenmman, desizyon i bezwen rasyonnal e rezonnab, ki vedir ou bezwen konsistan dan ou bann desizyon ki ou pran.  Ou pa kapab ozordi ou’n deside pou aprouv en sub-division pou en aplikan, demen ou ganny en laplikasyon ki similer avek menm sirfas later, dan menm lokalite, me lo sa enn ou refiz li.  Se pou sa rezon ki dan Sistenm Zidisyer nou vwar sa doktrin presedan ki mars tre byen.  Ki vedir, si yer Lakour in donn en desizyon lo en ka, demen dan bann lezot ka ki parey, Lakour i swiv sa prensip.  I pa kapab annan de pwa de mezir.  Sa kalite practice Lalwa i defann.

(Applaud)

 

HON WILBY LUCAS

Dan en lot sitiasyon Mr Speaker, dan ki lenstans en desizyon i ganny gete koman pa rezonnab.  En aplikan i annan li en kare later ki mezir 2500 met kare.  I fer laplikasyon pou diviz son later e pou donn son zanfan en kare ki mezir 700 met kare, pou li kapab ganny en loan pou fer son lakaz.  Larepons ki i gannyen se ki son laplikasyon pa’n aprouve akoz dan sa lokalite kot i reste, zot selman aprouv en kare later ki pa pli mwens ki 1500 met kare.  Menm si Planning zot menm zot in etablir ki 400 met kare koman standar pou en kare later.  Sa desizyon i pa rezonnab ditou e i kont prensip Lartik 26 nou Konstitisyon, kot tou dimoun i annan drwa pou annan propriyete e pou donn a celui ki li i anvi.  En tel polisi Mr Speaker si i egziste, i bezwen ganny revize akoz i pa an akor avek Konstitisyon e sirtou la, moman kot Gouvernman pa pe kapab asiste bann aplikan avek en kare later akoz proze land bank pa pe ganny materyalize.

Finalman, ler en desizyon i afekte en aplikan, sa ki’n pran sa desizyon i oblize pou donn rezon akoz en tel desizyon in ganny pran.  I pou kont prensip Administrative Law Mr Speaker, pou en aplikan ganny en larepons ki senpleman dir:- “Your application has not been successful.  You may appeal to the Minister within 14 days”. Mr Speaker, tou sa bann legzanp ki mon pe donnen i bann realite ki ariv ase souvan e malerezman i vin fini lo nou pad port koman MNA.  Alor mon soulaze sepandan avek lanons ki Minis in fer ki dan le fitir, lenstans lapel lo desizyon Planning Authority pou sorti anba kontrol Minis me i pou al devan en Tribinal.  Sepandan mon reste konsernen avek desizyon premye lenstans kot souvandfwa la ki i annan bann defayans, kot mon pe rekomann avek Gouvernman ki tou bann zofisye ki ganny apwente koman konpozisyon lo sa bann lotorite piblik, zot devret san leksepsyon swiv en en formasyon dan Administrative Law, pou zot konnen e familye avek sa bann prensip ki mon’n koz lo la.

Mr Speaker, aprezan mon ava adres zabitan mon distrik Baie Lazare.  Lannen 2012 i pa’n en move lannen pou nou distrik.  Nou’n enplimant 13 pti proze anba nou alokasyon pou lannen 2012.  Mon eksprim mon lapresiasyon Mr Speaker pou sa logmantasyon R200 mil lo Bidze pou pti proze pou lannen 2013 ki a permet mon distrik pou enplimant 2 ou 3 proze anplis ki lannen 2012.  Pou bann proze ki nou’n bezwen fer li an faz 2 oubyen faz 3, nou donn nou langazman pou nou konplet sa bann proze pandan lannen 2013.  Mon osi eksprim mon lapresiasyon pou travay ki Minister Ledikasyon pe fer pou level laplenn Lekol Baie Lazare e fencing Lekol ki pou kout preski R2 milyon.  Lo lapar zabitan Baie Lazare e Lekol Baie Lazare, nou dir Gouvernman mersi pou realiz sa proze ki ti lo progranm depi 2009.

Mon osi pe demann bann zabitan Ex-Gondwana Housing Estate e Ex-Pool Housing Estate Anse Gaulette pou annan en pti pe pasyans vizavi sa proze sewage plant ki dan son staz byen avanse.  Dan en meeting ki mon’n gannyen avek Minis ek son bann teknisyen 2 semenn pase, mon satisfe avek zistifikasyon ki mon’n gannyen ki sa proze pa’n kapab komanse e fini an Desanm parey ti’n ganny progranmen.  Me la ki formalite kontra in fini ganny fer avek kontrakter, travay pe al komanse desito.  Mon espere ki i a dernyen fwa ki mon koz lo sa proze isi dan sa Lasanble akoz i annan 4an mon pe koz lo la.

Mr Speaker, mon profit lokazyon pou tir latansyon nou bann rezidan dan Ex-Gondwana Housing Estate ki nou enn parmi bann Housing Estate kot lapolis in rikord pa mal konplent lo konportman anti-sosyal pandan lannen 2012.  Alor mon pe lans en lapel pou bann ki tonm dan sa kategori silvouple, pou zot fer en zefor ekstra pandan lannen 2013.  La ki HFC ek PMC pe entansifye zot zefor pou deal avek konportman anti-sosyal dan tou bann Housing Estate.

Mr Speaker, egalman mon pe lans en lapel ankor avek tou nou dimoun ki’n ganny later dan land banks Karolen, dezyenm faz depi 2006 pou servi bann loportinite ki dan zot dispozisyon pou devlop zot later e fer zot lakaz.  Par kont, si i annan ki ti a voudre rann sa bann kare later an esanz pou en lakaz, nou demann zot pou vin devan.

Me pou bann ki pe esper en lakaz ki’n fini fer, malerezman nou pou bezwen kontinnyen deplas zot pou al Perseverance, ofir e anmezir ki lakaz i pare Perseverance pou alokasyon.

Mr Speaker, an Mars sa lannen, nou ti vwar re-ouvertir ansyen Lotel Plantation Club ki aprezan i Kempinski Resort, ki’n abzorb en bon poursantaz son travayer sorti dan distrik Baie Lazare.  Avek lentrodiksyon Corporate Social Responsibility ki Minis in anonse, si lenplimantasyon son progranm i mars byen, sa pou anmenn benefis adisyonnel pou nou distrik dan lenplimantasyon nou bann proze kominoter, sirtou avek kontribisyon sa 2 gran Lotel dan nou distrik, Four Season Resort e Kempinski Resort.

Leta nou semen.  Mon pe lans lapel avek Land Transport pou enkli semen Anse Gouvernman dan son progranm 2013, ki byen bezwen en nouvo sirfas, ensi ki elarzman semen Val D’en Dor kot Mr Felix Esparon, ki’n paraliz servis bis piblik pou plis ki 1an la.  Mon osi profit lokazyon de lot kote pou felisit Departman Land Transport pou sa travay ekselan ki’n ganny fer lo semen Bougainville/Val D’en Dor, me i devret kantmenm fer provizyon pou enstal crash barriers avek serten porsyon sa semen.

Lenvestisman prive.  Pou lannen 2012, nou’n vwar 3 lenvestiser ki’n anmenn nouvo servis ek fasilite ki ti napa atraver 3 nouvo magazen.  Lannen 2013 nou pe prevwar kontriksyon en commercial complex ki dan faz konsepsyon e en nouvo supermarket dan Baie Lazare santral.  Sa i ava anmenn plis konpetisyon e meyer swa pou konsomater.

En lot proze ki nou pa’n kapab realize pandan lannen 2012 sete nou nouvo sant lasante pou de rezon teknik.  Mon reste konfidan ki sa proze i a ganny materyalize pandan lannen 2013.

Lagrikiltir.  Pou nou bann fermye, sa sitiasyon mank manze parey lezot koleg in dir e mank prodwi lo stor lagrikiltir lo en baz regilye, nou konsyan ki i pa’n en lannen ki’n fasil pou zot.  Dan sesyon Lasanble 2 semenn pase, Minis responsab pou Lagrikiltir in donn son langazman ki sistenm ki son Minister pe al met anplas lannen prosen i pou evite ki stok prodwi lo stor lagrikiltir i manke e sa pou osi anpese ki kot serten gro fermye i kapab aste en gran kantite prodwi e met an stok kot li e plitar ler napa lo stor, li i kapab vann sa bann prodwi avek fermye, avek en profi vreman eleve.  Minis osi in donn son langazman pou finaliz bann lagreman ki ankor pending, enkli konklizyon bann teren ki pankor fini ganny arpante boner lannen prosen.  Bidze in osi fer provizyon Mr Speaker pou plis sipor pou bann fermye pandan lannen 2013, enkli realizasyon sa scheme lasirans ki mon koleg Grand Anse Praslin in demann Minis pou donn leksplikasyon e sa zisteman pou fermye avek peser, sa osi Minis ti koz lo la dan sesyon reponn kestyon dan sesyon Lasanble.

Mr Speaker, mon osi profit lokazyon pou felisit Lasosiasyon Fermye Val D’en Dor pou zot demars ki’n aport zot en finansman sibstansyel par UNDP pou en proze reprodwir bann plan ki pe disparet.  Sa i en achievement pou zot lasosiasyon.

Finalman, mon dir mersi Prezidan Michel ki’n personnelman inisye sa proze pou re-abilitasyon lakot Ans Lanmous ki’n fini konplete.  Me mon lofis in ganny met okouran ki son faz lanbelisman pe finalize pou kontrakter komans sa travay tre byento.

Pou konklir, mon ti a kontan remersye tou dimoun dan distrik ki’n donn mwan sa sipor pandan lannen 2012.  Mon reste konfidan Mr Speaker, ki lannen 2013 pou anmenn plis ankor prosperite pou nou distrik e nou zabitan, me fodre ki nou tou nou travay e fer zefor pou soutenir nou menm ek nou fanmir, avek bann mezir ki Minis in anonse sirtou avek restriktirasyon dan HFC ek PMC, kontribisyon dan Housing Saving Scheme pou nou kapab ganny en lakaz dan lefitir, i en refleksyon serye ki nou bezwen pe fer ler nou pe get priyorite vizavi nou Bidze dan lakour.  Nou bezwen adopte en nouvo sapit ki Gouvernman oubyen distrik pa pou kapab fer tou pou nou.

Mon zwenn avek zot pou swet Prezidan Michel ek son fanmir, ou Mr Speaker avek ou fanmir, konsey Minis avek zot fanmir, tou Manm Onorab avek zot fanmir, staff Sekretaryat Lasanble, tou pep Seselwa en Zwaye Noel e en lannen 2013 avek prosperite.  Tou spesyalman zabitan Baie Lazare.  United in tradition for success, Zwaye Noel e en bon Lannen 2013.

Mr Speaker, mon pou donn mon sipor pou sa Bidze.  Mersi.

(Applaud)

MR SPEAKER

Onorab Esther.  Request Onorab.

HON NATASHA ESTHER

Mersi Mr Speaker.  Bonzour Mr Speaker, Minis ek ou delegasyon, tou keleg Onorab, tou dimoun alekout e en bonzour spesyal pou tou zabitan Baie Ste Anne.  Mr Speaker, lemonn i ankor en fwa prezant nou avek lensertitid dan tou nivo, ki ankor en fwa enpakte nou pti pei Sesel, sitie dan en lanvironnman sansib e vilnerab.  Nou Bidze nasyonal prezante devan nou i osi travers sa moman difisil, kot 4 kwen lemonn i boulverse e kot nou 2 pilye lekonomi, touris ek lapes i ganny menase avek piratri.  Pandan lenstans ki Minis pou Touris avek son delegasyon i anbark lo avyon pou al eksplor plis marse touristik aletranze, pirat li i antre dan nou Losean e koz lafreyer e menas pou sa 2 lendistri.  E konsekaman, depi sa pti bato peser ziska sa gro cruise ship i ganny afekte.

Mr Speaker, Minis i prezant avek lepep Seselwa en Bidze ki reflekte larealite nou sitiasyon ozordi.  Pou mwan, parti sa Bidze in anmenn avek li serten mezir ki pou aport bann benefis long term.  Mr Speaker, set avek plezir koman Manm Elekte mon distrik ki mon aport mon kontribisyon lo sa Bidze 2013.  I fer deza 1an ki mon pe okip sa pozisyon e pandan sa 1an mon’n desarz mon responsabilite avek lafyerte anver mon distrik.  Travay pandan sa 1an in konsantre an 2 parti.  Premye parti se kot mon’n met mwan a dispozisyon mon zabitan pou ansanm partaz zot laspirasyon.  Mon parkour dan distrik in osi permet mwan dekouver vre bezwen mon distrik tel parey lakaz, later rezidansyel, biznes, lagrikiltir, fasilite pou nou bann zenn tel ki bann fasilite sportif, amelyorasyon dan bann servis piblik, parmi plizyer lezot.  Atraver kontak ek bann diferan Minister, mon’n konn lafason ki travay pe ganny antreprann, bann diferan pti proze e proze kapital e osi plan sak Minister pou mon distrik.

Dezyenm parti mon travay in konsantre dan Lasanble kot in permet mwan kapab anmenn konsern e laspirasyon mon zabitan devan Gouvernman atraver kestyon adrese pou bann diferan Minister.  Sa in osi permet mwan konn progresyon e difikilte ki bann Minister pe fer fas avek dan lenplimantasyon zot bann proze e progranm dan mon distrik.

Bidze 2013, parey lezot lannen i konpri en koleksyon bann diferan reveni tel ki Business Tax, tax lo lapey travayer e peyman bann servis ofer par Gouvernman.  Sa menm larzan ki’n ganny kolekte i ganny redistribye atraver bann diferan konponan ki nesesit finansman pou son fonksyonnman ou lenplimantasyon son bann progranm.  Bidze sa lannen pe prevwar en koleksyon R6.3 milyon e sa pe reprezant en logmantasyon 3 poursan ouswa R159 milyon, konpare avek prozeksyon revize pou 2012.  E sa, si i ganny achieve i pou en laprev ki nou pe bouze.

Mr Speaker, mon distrik en fason ou en lot in aport son kontribisyon signifikan anver sa Bidze nasyonal.  Pou sit enn de legzanp, statistik i montre ki dan distrik Baie Ste Anne, i annan 16 biznes anrezistre avek en license import.  14 biznes anrezistre avek license wholesale.  55 biznes anrezistre avek license retail.  9 biznes anrezistre avek license wholesale retail e 20 importer retail.  14 laboutik ki annan drwa vann koko-d-mer, 21 license pou Taxi, 32 transpor komersyal, 61 bato peser lokal, 23 kontrakter konstriksyon avek diferan klas, 11 lotel, 36 self catering e 4 restoran.  E plizyer lezot pti koman gro biznes parey tuck shop, garaz, hair dressers, take away, osi plizyer kategori biznes ki pa nesesit en license me ki pe osi kontribye anver tax.

Tou sa Mr Speaker i bann biznes ki’n angaz zot e pe travay dir dan devlopman distrik Baie Ste Anne e ki pe osi aport zot kontribisyon nasyonal e ki ozordi pe ganny reflekte dan sa Bidze.

Mr Speaker, Bidze pe fer provizyon pou amelyor lanvironnman sa bann group dimoun ki mon’n nonmen e plizyer lezot ki form parti sa lemonn biznes.  Enn parmi sa 5 lobzektif prensipal Bidze 2013 se pou asire ki bezwen sosyo-ekonomik nou pep pa ganny konpromet.  Parey nou Prezidan i toultan ensiste, nou pep i bezwen reste o sant nou devlopman.

Avek sa Mr Speaker, mon pou kontan pou note ki ankor enn fwa, provizyon in ganny fer pou ki Lazans Proteksyon Sosyal i kontinnyen zwenn bezwen bann ki pli vilnerab, pandan ki nou pep pe pas atraver sa moman difisil.  E nou’n osi vwar en logmantasyon dan bann benefis e progranm sosyal tel parey home carers, maternite, envalidite e pou bann pansyoner.  E la mon pou siport koleg Onorab Volcere, pou fer ki Lazans Welfare i revwar kalkilasyon ki ganny fer pou zabitan Praslin.  Mr Speaker, lavi i 2 fwa pli difisil lo Praslin.

Dan lannen 2012, bokou bon keksoz in arive dan nou distrik.  Nou’n selebre nou lafors e lakonplisman atraver bann diferan disiplin sportif.  Lekip foutbol Cote D’or in ralye plizyer zabitan Baie Ste Anne pou selebre zot gran sikse pou mont avek lakoup Airtel lo Praslin e lakoup runner’s up pou Land Marine.  Klib judo in montre kapasite son lazenes dan bann diferan konpetisyon lokal e nou bann atlet in osi frot zepol avek bann gran konpetiter lo lasenn enternasyonal e la, mon pa pou manke pou soulinny sikse Dominic Dugasse, Naddy Jeanne, Brigitte Rose e lezot ki’n fer paviyon Sesel flot tre o.  En dizenn zenn motive Ans La Blague in met linisyativ ansanm pou kree en klib bokse pou Anse La Blague zot menm pou motiv lezot.  Lekol Baie Ste Anne Primer i domin lezot lekol atraver pei e pran lakoup pou meyer lekol dan basketball, netball, handball e osi sorti venker dan kategori endividi pou bann zanfan dan ladans, serso e sot lakord dan bann konpetisyon ki’n organize resaman.  Lekol Praslin Segonder i osi debout ankor en fwa lo podium venker, akote Lekol Anse Royale dan Inter-Sport Competition le 29 Zen sa lannen.

Tou resaman nou ti temwanny en devlopman istorik lo nou Zil kot nou ava rapel parol Prezidan Michel, kot i ti remersi SBC pou reponn anver demann lakominote Praslin e Zil Pros.  Anmenmtan, mon a profit sa lokazyon pou demann SBC pou pa manke pou pibliy bann bon keksoz ki pe arive lo nou Zil.

Mr Speaker, pandan letan ki mon pe fer mon lentervansyon, en proze later land bank Marie-Jeanne Estate pe ganny finalize kot MLUH e byento sa a kapab ed sa trantenn fanmir ki priyorite dan distrik avek en kare later pou konstriksyon zot prop lakaz e permet zot viv an konfor.  Sa i langazman nou Gouvernman pou ki sak fanmir Seselwa i a kapab ganny en twa lo zot latet.  Serten travay survey in osi ganny materyalize lo nivo distrik.  Plizyer fanmir in ganny asiste atraver sa Minister avek en plan pou zot lakaz a en pri afordab, en servis ki’n ganny ofer pou sa dernyen 9an depi desantralizasyon sa servis lo Praslin.

Par kont, mon pa satisfe avek vites ki travay lo lenfrastriktir pe ganny antreprann lo Zil Eve.  Travay de baz pou semen tel ki drenaz in preski konplete me ziska la, koltar pou sirfas sa semen i ankor outstanding.  Mon sizere ki Minister Lamenazman Later ek Lakaz ek Minister responsab pou Land Transport i zwenn ansanm, afen ki zot a kapab finaliz sa proze dan premye kar lannen 2013, en fason ki bann dimoun ki’n ganny allocate ava kapab ganny akse avek zot teren e komans zot devlopman e an retour, kontribye anver devlopman nou pei.

E zis pou fer resorti Mr Speaker, nou ganny bokou konplent avek SEPEC ki deservi sa menm semen pou transportasyon fuel ek gas sorti kot zot stasyon.

Mr Speaker, proze drenaz Salazie i re-aparet ankor dan Bidze 2013.  Lannen pase, sa menm proze ti ganny bidzete e pa’n ganny materyalize, malgre i ti en proze priyorite.  Alor mon swete ki sa lannen, sa sonm larzan i ganny servi pou konplet sa proze, vi ki sa drenaz pe afekte parti sa semen ek sa Estate.

Par kont Mr Speaker, mon pa vwar okennn provizyon ki’n ganny fer pou proze lakaz mon distrik, menm si i annan en gran demann pou lakaz.  Pou note, i annan apepre 300 aplikan ki pe esper en lakaz.

Adisyonnelman, mon ti a kontan osi sizere ki Gouvernman i revwar en serten sonm pou bann proze kapital pou lozman ki ganny donnen Perseverance, ki sa i a ganny redistribye anver devlopman lakaz dan distrik Baie Ste Anne, Grand Anse e La Digue.

Mon osi vwar provizyon ki’n ganny fer pou amelyor sistenm tretman desarz dan serten landrwa e mon swete ki Moulinnyen Housing Estate i ganny priyorite dan lenplimantasyon sa proze.

Mr Speaker, proze Land Bank Fon Azor i tro lontan pending, an vi ki tou arpantaz in fini ganny fer e mon rekomande ki Minister i finaliz alokasyon sa proze pandan lannen 2013, an vi ki distrik pa pe benefisye avek okenn proze lakaz pou lannen prosenn.

E an vi larepons Minis pou Resours Natirel anver mon kestyon, later lagrikiltir 2 semenn pase isi dan sa Lasanble, mon pe sizere ki sa 2 Minister konsernen i adres sa issue semen pou ede akseler sa 2 proze.  Par kont Mr Speaker, mon osi pa vwar okenn provizyon dan sa Bidze ki pou adres sa issue bann later zeritye lo Praslin/La Digue e provizyon en study lo lefe ki querry CCCL i annan lo bann propriyeter prive dan son visinite ki mon’n deza anmenn devan sa Lasanble pli boner.

Pou konplimant zefors e servis ki lofis MLUH lo Praslin i ofer, mon ti ava rekomande ki plis staff i ganny anploye tel koman en Housing Officer permanan e plis teknisyen.  SLTA malgre pa’n antreprann okenn proze mazer in reisir konplet plizyer pti proze parey lenstalasyon crash barriers pou en sonm R144 mil 800 Anse Boudin, Semen Ton Blag ek Orange Tree. 6 laglas trafik dan bann junction ek blind bands in osi ganny enstale dan Baie Ste Anne, Moulinnyen, Ton Blag, Anse la Blague ek semen CCCL. En sonm R27 mil 300 in ganny depanse dan lenstalasyon 28 traffic signs atraver distrik.  I annan osi resirfas semen devan Horizon Complex, semen an fas stasyon petrol ek semen dan zanmerant Lotel Berjaya.  Reparasyon lo semen Marie-Jeanne ek semen plato Cote D’or e semen Anse Lazyo, Ans La Blague e Vilaz Zozef in osi ganny antreprann.

Mr Speaker, konsern mazer Lotorite Distrik, son bann zabitan e bann motoris se pou annan en nouvo sirfas koltar lo nou main road, afen ki nou bann semen ava vin pli an sekirite e konvenab.  Mon kontan pou dir ki provizyon in ganny fer pou proze amelyorasyon semen Anse La Blague e sa i pou anmenn bokou soutyen pou sa bann zabitan dan sa landrwa, apre bokou letan ki sa semen in dan en kondisyon deplorab, sirtou dan letan lapli.  Mon ti ava oule demann avek SLTA pou vreman enplimant sa proze profesyonnelman pou ki i ava reste toultan dan en bon kondisyon.  Osi en sonm R350 mil in ganny bidzete dan reparasyon drenaz, depi kot laboutik Maki ziska kot Lotel Berjaya Praslin Beach.  En proze priyorite pou mon distrik, an vi ki i en danze pou pyeton ki servi sa semen.  La mon ti ava propoze ki slab i ganny mete lo dren e ganny servi koman trotwar.

Mon bezwen mansyonnen Mr Speaker, ki parey lannen pase, nou’n ganny bon korperasyon avek sa team SLTA lo Praslin, alor mon dir zot, keep up the good work.

Dan son zefors pou asir lord ek lape dan nou bann kominote, lapolis i ankor enn fwa ganny en logmantasyon dan son Bidze anyel ki a permet zot desarz zot bann responsabilite efektivman.  Swe mon zabitan ozordi se pou vwar plis patrol par lapolis lo semen, dan kominote e byensir lo nou bann lans kot plizyer tranzaksyon ilegal i ganny deroule.

Mr Speaker, la ki mon pe adres sa Minister, mon oule soulinny en problenm ki bann zenn Praslin i pas atraver pandan letan ki zot vin Mae, pou fer en karyer dan nou lafors militer.  Mr Speaker, mon pe demande ki provizyon i ganny fer pou bann zabitan ki desann konsernan lozman e Mr Speaker, mon pe demande ki provizyon i ganny fer pou lozman pou sa bann zenn, an vi ki ler ou gete, bann dimoun Mae ki vin travay lo Praslin, zot ganny en menm lasistans.

Mr Speaker, mon pa pou sirprann lo sa logmantasyon dan alokasyon Bidze pou NDEA, etan done ki pei pe kontinnyelman lalit kont sa zean drog.  Sanmdi swar, nou ti aprann atraver Nouvel en lot lakonplisman sa Lazans, kot en gro kargezon drog ti ganny sezi lo en bato lapes.  Alor, mon pou kontinnyen demann pep Seselwa zot sipor anver sa travay ki pe ganny fer par Lazans dan sa lalit pou elimin drog dan nou pei.

Lasante i en domenn enportan dan devlopman pep, alor Mr Speaker, mon pa vwar li drol si Minister Lasante e Departman Gouvernman ki’n ganny allocate avek plis larzan pou son fonksyonnman 2013.  Lesansyel i reste ki sa larzan i ganny byen zere pou redonn konfyans nou Seselwa dan nou sistenm lasante.  Serten travay renovasyon in deza konplete lo Lopital Baie Ste Anne, ansemoman i annan en logmantasyon dan nonm dokter ki’n ganny mete a dispozisyon bann pasyan e plis spesyalis i vizit nou bann pasyan lo en baz regilye.  Me i reste ankor plis zefor pou fer, sirtou kot i konsern spesyalis lizye.

Dan Sesyon Demann Kestyon sa lannen, mon ti lev konsern mon zabitan e travayer lasante lo plan Minister pou ankouraz bann ners pou reste dan sa profesyon e pou annan en meyer fason depoz bann clinical waste lo Praslin.

Mr Speaker, mon apresye pou dir ki Minister Lasante in onor son langazman ki in fer devan sa Lasanble, pou fer ki provizyon dan Bidze 2013 pou revizyon bann scheme of service pou nou bann ners ek health care assistants.  Dapre Bidze, i pou kout R2.1 milyon pou sa nouvo scheme, en total 6 milyon pou anploy nouvo travayer, 3.1 milyon pou azisteman saler e 7.3 milyon pe ganny propoze pou elev bann post.  An rezilta bann konsern ki travayer laboratwar ti fer resorti letan ki Minis ek son delegasyon ek lotorite distrik ti vizit Lopital, mon kontan pou vwar ki en sonm R750 mil in ganny mete dan laboratwar Lopital pou amelyor zot servis.  Reparasyon lo sewage treatment plant kot lopital pou osi ganny antreprann atraver en sonm 2.7 milyon.

Mr Speaker, avek sa bann sonm anba Minister Lasante pou Lopital Praslin mon swete vwar amelyorasyon dan nou sistenm lasante.  Tou resaman, en meeting ti ganny organize avek bann boat owners lo Praslin pou fer resorti zot bann pwen konsern vizavi loperasyon toulezour.  Demars pe ganny fer pou elimin bann illegal taxi boats, amelyor fasilite prensipal lo Zil Curieuse, kot bokou touris i vizite e detann dan en pti barbecue e pou osi amelyor fasilite bann lezot zil ekskirsyon.  E pandan sa meeting, plizyer rekomandasyon ti osi ganny mete devan, enkli konsider en pli bon kolekte bann landing fees.  Sa lanmar ki ti pe koz problenm pou sa group zabitan Anse Royale in ganny rektifye e byento anba pti proze, pon pou travers sa lanmar pou byento ganny konstrir pou fasilit lavi sa group dimoun.

Plizyer fanmir dan bann sou-distrik tel parey Fon Bofe, Vilaz Roz, Vilaz Zozef, in ganny lasistans atraver sa linisyativ pti proze pandan lannen 2012.

Mr Speaker, mon ankor enn fwa siport desizyon pou sa alokasyon R1.2 milyon koman en resours enportan ki pou ede amelyor lavi nou kominote.

Langazman nou Gouvernman pou kontinnyelman met bann fasilite a dispozisyon nou pep i evidan atraver konstriksyon en lot proze mazer lo Eve Island.  Kontra in deza fini ganny sinnyen pou konstriksyon en nouvo Fire Station e sa pou kout Gouvernman R21 milyon.  En tel fasilite a ede retir presyon lo sa stasyon ki deza egziste lo Airport, garanti plizyer lanplwa e sa i a osi ekip nou zil e met nou dan en pli bon pozisyon pou konbat divers kalite e ede pandan letan sovtaz.

Mr Speaker, provizyon pe ganny fer pou konstriksyon en swimming pool lo Eve Island, an partenarya avek lakonpannyen Vijay Construction.  En linisyativ ki pe ganny promouvwar avek bann diferan sekter prive, pou ede kontribye dan devlopman bann lenfrastriktir nou distrik.  Vijay Construction ek Allied Builders i 2 lakonpannyen ki mon pa pou ezite pou dir mersi pou zot kontribisyon e led ki zot in kontinnyelman aport anver nou distrik.  E la mon ti a kontan lans en lapel avek bann lezot lakonpannyen pou fer parey.

Mr Speaker, divers lopinnyon in ganny fer resorti konsernan sa swimming pool.  Serten in dir ki sa i en vye demann e ki lontan zot ti pe espere me serten i dir i pa en priyorite.  Mr Speaker, permet mwan partaz mon lopinnyon lo sa size.  I vre ki en swimming pool pa priyorite prensipal distrik e nou pe bezwen vwar lezot alternativ pou konstriksyon bann lenfrastriktir parey dan lefitir.  Mon ti a plifere vwar Mr Speaker, larzan ganny zere dan mon proze lakaz distrik.  Me par kont, mon osi partaz lazwa mon zabitan ki pou benefisye avek en tel fasilite ki nou pe espere pou plis ki 4an.

Pri lavi i reste ankor en defi ozordi pou bokou dimoun dan distrik e lo Praslin an zeneral.  Ler nou antre dan laboutik pou fer en konmisyon e vwar ki pri komodite i kontinnyelman monte.  Mon apresye linisyativ ki Gouvernman pe pran pou revwar bann diferan polisi ki anplas, espesyalman kot Fair Trading Commission e osi zefor ki pe ganny mete pou kontinnyen asire ki bann prodwi de baz i reste a en pri afordab e ki napa VAT lo la.

Mon osi welcome lentrodiksyon higher purchase ek leasing service, en nouvo provizyon anba sa Bidze ki byento pou ariv devan nou Lasanble.  E la mon pou asir Minis mon sipor lo sa kalite pratik.  Mr Speaker, sa pratik i osi pe ganny servi dan plizyer pei tel parey Moris, Sid Afrik, Malezi pou mansyonn enn de.  Atraver sa servis, en dimoun a kapab aste en keksoz par egzanp en fridge, en set pake lo kredi e i pou son responsabilite pou repey sa marsan atraver kondisyon etablir ant le 2 parti.  E sa i a osi ed bann dimoun ki pa kalifye pou ganny en pti loan ek labank.

Dan son ladres, Minis in enform nou ki lannen prosenn, pou annan en revizyon lo tarif PUC.  Mr Speaker, delo ozordi i koze e konsern tou Seselwa.  Dan en peryod kot lapli ti an abondans an Desanm, ozordi i nepli leka.  Praslin ankor pe fer fas avek en restriksyon delo sever.  Sistenm desalinasyon lo Praslin i prodwir 1400 met kib delo par zour e apepre 1100 met kib delo kolekte atraver bann diferan larivyer pandan lasesres.  Mr Speaker, par en senp pti kalkil, sif i montre ki nou 1000 met kib delo an mwens pou ariv lo sa 3500 met kib delo, konsonmen par nou zabitan par zour.  Dan son zefor pou adres sa sitiasyon, Minis responsab pou PUC in anonse ki i pou double stokaz e tretman delo atraver en pli gran basen Fon Bofe e lenstalasyon en nouvo desalination plant.  Sa i ava ede amelyor nou sitiasyon delo, sirtou pandan lasesres.  E la osi, mon pa pou manke pou dir ki mon pa vwar sa proze dan Bidze e mon ti a kontan ki etan done sa i en size priyorite pou Praslin ki i ganny re-konsidere.

De lot kote, plizyer konsern pe ganny met a nou latansyon konsernan logmantasyon dan bill delo, menm si i annan restriksyon delo.  Zot bill i swa monte ou plizoumwen reste parey.  E la mon pe demann PUC pou get dan sa sitiasyon e enform manm piblik.

Dan son zefor pou redres e retenir nou airline, mon propoze ki Air Seychelles pa manke pou donn latansyon nou Airport domestik, sirtou nou Seselwa, la kot i annan en gran mouvman Seselwa ki deplase.

Mr Speaker, bokou in ganny dir pandan sa 1an lo size lanplwa e la mon pa pou fer repetisyon tou sa ki’n ganny dir, me mon rekomande ki en letid serye i ganny fer par Minister Lanplwa pou antre dan tou bann letablisman touristik lo Praslin, kot bokou konsern in ganny fer resorti lo sa size diferans ant kondisyon travay etranze e Seselwa.

Pou konklir Mr Speaker, les mwan dir ki fri sikse sa Bidze i en travay kolektiv ant Gouvernman, sekter prive e lepep limenm.  Kot i annan volonte, keksoz pou ganny realize.  Avek sa Mr Speaker, mon pou aport mon sipor anver sa Bidze.

Mon oule remersi tou dimoun ki dan en fason ou en lot in aport zot sipor e gidans pou fasilit mon travay pandan sa lannen.  Prezidan, Vis Prezidan e tou travayer State House, Mr Speaker ek tou staff Lasanble, Leader of Government Business ek tou Manm koleg Onorab, tou Minis ek tou zot staff, espesyalman reprezantan bann diferan Minister lo Praslin, DA, Kordinater e tou staff Distrik Baie Ste Anne, staff mon lofis e en remersiman spesyal pou zabitan Baie Ste Anne pou zot konprenezon e korporasyon e mon swet zot tou e zot fanmiy e lepep Seselwa an antye en Zwaye Noel e tou le meyer pou 2013.

Pandan sa moman festivite, annou pran en desizyon responsab anver nou lavi e les tou nou desizyon e aksyon pandan sa bann moman ganny gide par bann bon valer moral.  Avan nou angaz nou dan okenn move lenfliyans, annou zis mazinen ki lavi i enn menm.  E pou nasyon Seselwa, mon a kit sa pti refleksyon tire dan Proverb, Sapit 29:18 ki dir, “A nation without God’s guidance is a nation without Order.” Ki Bondye i beni nou pei.  Mersi.

 

(Applaud)

MR SPEAKER

Onorab Lebon.

HON LENNY LEBON

Mersi Mr Speaker.  Mr Speaker, Minis ek ou delegasyon, zabitan Grand Anse Mahe, pep Seselwa, bonzour.  Deza en lot lannen pe koule e sak fwa nou fini parkour sa lannen, sa ki bon pou nou fer se retras en pe semen ki’n anmenn nou la e prepar pou lavenir.  Ozordi, plis ki zanmen i enportan ki nou koman en nasyon, en pep Seselwa beni, nou regarde kwa ki’n fer nou en pep ki sanse e ki beni e devlop en sans apresiasyon pou sa.  Enportan note ki Bidze en pei i baze lo lenplimantasyon progranm sa Gouvernman Lepep.  En progranm ki trouve dan manifesto Prezidan Michel, “Mon plan pou ou”.  Sa manifesto i sa baromet ki permet nou kapab fer refleksyon lo sa Bidze, anmenmtan kot i pe refer lo kot tou dimoun i asim son responsabilite endividyel e kolektif.  Kot nou sezi tou loportinite devan nou.  Kot nou devlop en lespri antreprenarya, kot nou devlop nou savwar fer e kot Seselwa i reste en pep ini e beni.  Konsyan son responsabilite, son valer spirityel, moral e kiltirel.  Wi Mr Speaker, en vizyon kler ki pe bouz dan direksyon progre e prosperite pou Sesel.

I enportan koman reprezantan lepep, nou osi refer lo sa manifesto e vwar ki si sa Bidze ki vin devan nou Lasanble pe ede anmenn sa vizyon progre e prosperite pou nou pep e nou pei.  I osi enportan ki nou echo lavwa nou zabitan akoz se nou ki zot reprezantan e nou, nou bezwen koz pou zot e osi koz ek zot.

Ler nou fer parkour 2012, nou vwar bokou sikse e mon osi vwar ki i annan landrwa kot nou ti kapab pli byen ed nou dimoun.  Ler nou pe vot lo Bidze pou lannen prosen, sak Minister i bezwen demann son lekor si zot in donn sa pep, zabitan Grand Anse Mahe en bon servis, en bon rannman, en bon latansyon.

Wi Mr Speaker, mon pou aport sipor merit sa Bidze me mon pou osi dir kot fodre, nou aranze.  Si nou pe bouz dan en lanvironnman teknolozi, en lanvironnman kot pou annan plis lendistri servis.  En lanvironnman kot nou pe vin pli sofistike.  Servis dan Gouvernman i bezwen adapte.  Vin relevan e vin pli efikas.  Fodre pa ki nou per pou sanz nou fason fer.  Sanz nou mantalite e adopte en lapros dan fer keksoz diferaman.

Mr Speaker, a mon avi, sa Bidze pe fer 4 keksoz.  Premyerman, planifikasyon.  Dezyenmman se lenvestisman.  Trwazyenmman se lenplimantasyon.  Katriyenmman se langazman.  Me sa ki nou pli bezwen dan tousala se latansyon.  Latansyon a planifikasyon.  Latansyon a lenvestisman.  5.4 bilyon ki nou pe fer.  Latansyon a son lenplimantasyon e latansyon anver langazman.  Nepli ler pou nou regard keksoz zis a nivo siperfisyel e reste satisfe lo kwa ki nou’n akonplir.

Bidze ki devan nou i donn nou en lendikasyon kote pou anmas reveni.  Kote pou depanse.  Kimannyer pou akonplir krwasans e ki prozeksyon Bidze pou sa 4an ki devan nou.  I osi donn nou en lide ki bann major capital investments ki pe al ganny fer dan nou pei okour bann lannen ki pe vini.

Sa nouvo devlopman, a mon avi Mr Speaker i apel pli bon planifikasyon.  Moman i osi la pou nou evalye lakonplisman, vwar fason inovativ pou get meyer rezilta e donn nou dimoun valer pou sa R5.4 bilyon ki pe ganny envestir e kimannyer tousala pe dekoul dan sa Bidze ki devan nou.

Par egzanp.  Nou vwar dan Minister Ledikasyon in ganny dezyenm alokasyon pli gran Bidze.  Avan mon kontinnyen Mr Speaker, koman en ex-ansennyan Unisey, mon oule sezi sa loportinite pou felisit tou mon bann past students, student teachers ki’n graduate Vandredi.  I pa’n posib pou asiste zot graduation me mon fyer pou zot akoz zot pe al kontribye dan formasyon nou zanfan ki fondasyon nou pei e tou lezot graduate Liniversite Sesel, felisitasyon.

Ledikasyon i reste leker kot leker sa Gouvernman e i sa sekter kle ki ede dan pei achieve sa krwasans ekonomik.  La baz sa Bidze ki devan nou ozordi.

Mr Speaker, se la kot laplipar mendev sa pei i pase.  Si nou sistenm ledikasyon i annan defi, mon analiz se ki nou pou annan defi dan plizyer sekter nou sosyete.  Dan mon resers, nou’n vwar ki 4an pase an 2008, anba reform progranm reform Gouvernman, Minister Ledikasyon ti ganny demande pou downsize mendev son headquarters par 25 poursan.  Parey nou konnen, sa ti anmenmtan ki Minister Ledikasyon ti pe al anbark lo en progranm reform tre anbisye.  Progranm reform 2009-2010.  Nou kapab konpran defi ki Minister Ledikasyon in bezwen fer fas avek depi 2008, sirtou kot i konsern donn leadership bann linisyativ reform.  La nou pe koz sa 5 priorities area avek sa 13 teams.

Mr Speaker, malgre tou sa bann defi, mendev lo nivo leadership, Minister in fer son mye pou delivre vizavi son azanda reform.  I kler ki si Minister Ledikasyon i pou reisi dan sa misyon, i pou bezwen adres sa challenge leadership lo nivo headquarters. Dan sa konteks, resours finansyel adekwat i pou endispansab pou ed Minister kapab recruit e mentenir bann profesyonnel neseser.  Sa ki nou konnen se ki pli ale ansennyan pe kit sa profesyon nob.

Enportan note se ki ozordi i annan plizyer Minister tel ki Minister Finans e Minister Zafer Etranzer ki zot profesyonnel i ganny pli byen peye ki bann profesyonnel dan Minister Ledikasyon, menm si se gras a en bon sistenm ledikasyon ki sa bann profesyonnel in ganny formen.  I enportan alors ki koman en nasyon, nou kontinnyelman envestir dan en fason sibstansyel dan nou sistenm ledikasyon.

Mr Speaker, apre tou, en lenvestisman dan nou ledikasyon i en lenvestisman dan fitir e prosperite nou nasyon.  Se la kot sa vizyon progre e prosperite i sitie.  Osi, sa ki enportan note, kantmenm nou kontinnyen envestir dan en fason sibstansyel dan nou sistenm ledikasyon, ozordi nou zanfan pa pe servi tou sa loportinite ki nou’n met a zot dispozisyon.  I annan en mank motivasyon par nou bann zanfan, nou bann zenn pou devlop e epanouir.

I enportan ki si nou pe koz plis resours, ki en letid i ganny fer pou vwar kwa ki pe demotiv nou zanfan pou aprann e ki pe anpes zot sezi tou sa loportinite ki sa pei pe met a zot dispozisyon.  Se la Mr Speaker kot i annan parfwa en mank planifikasyon dan lafason nou enplimant Bidze lo nivo bann Minister.

De lot kote Mr Speaker, nou koman en pep, nou pe ganny demande pou anvoy nou zanfan lekol e edik li pou li aprann.  Pran son sans dan lavi.  Grandir e ofer Sesel en zonm ouswa en fanm for, solid e an bonn sante.  Nou pei i bezwen tou son zanfan.

Mr Speaker, dan sa loptik mon krwar in plis ki ler pou Minister Ledikasyon devlop en polisi zero tolerans kot lekol pou ki en zanfan i apresye ki lekol i en landrwa ki ofer li laprantisaz e non pa en landrwa pou li al disturb e fer dezord.

Lo size bann profesyonnel dan sa pei, mon pou aport mon sipor.  Parey mon bann koleg in fer resorti oparavan, ki nou pa kapab, koman en pei, annan en sistenm kot i annan gran gap saler ant bann etranze ki annan menm kalifikasyon ki nou Seselwa.

 

(Applaud)

HON LENNY LEBON

Mr Speaker, parastatal i rod bann diferan incentive pou retenir zot profesyonnel par ofer zot bann pli bon incentive.  Zot osi pran profesyonnel dan sekter kle tel parey teaching.  Gouvernman, in plis ki ler pou reget bann incentive ki donn bann profesyonnel pou ki i pli byen kapab retenir zot.  Pou pli byen ilistre mon pwen Mr Speaker, se ki nou tou nou konnen ki Gouvernman ti annan en scheme loto kot bann profesyonnel ouswa travayer ki anvi annan en loto ti gannyen.  Sa scheme in ganny tire e transfer kot labank e nou tou nou konnen ki lentere i o.  Me tandi, i annan landrwa kot pou retenir zot profesyonnel, zot annan en tel scheme.

 

(Applaud)

HON LENNY LEBON

Si Gouvernman rekonsider entrodwir en tel scheme ek bann labank dan ki Gouvernman i annan par, sa ava ede retenir sa bann profesyonnel dan Gouvernman, espesyalman si zot konnen zot annan en loan pou peye.  Ankor enn fwa, nou merit annan en planifikasyon dan en plan stratezik byen kalkile pou retenir bann profesyonnel dan servis piblik e donn plis latansyon a sa problenm.

Mr Speaker, dernyen Mosyon devan nou Lasanble pou sa lannen, nou ti pe koz lo nou bann zenn ki ozordi, statistic i montre ki 57 poursan nou popilasyon i bann zenn aze ant 0 a 35an.  Sa i reprezant en pe plis ki 50 mil dimoun.  En sif enportan e signifikan pou Sesel dan sa prosen deseni.

Ler mon get Bidze National Youth Council, sa ki nou apel SNYC, mon vwar en alokasyon R14 milyon ki son Bidze pou 2 lezot lannen pase in preski plizoumwen parey.  Sa i fer mwan demann kestyon.  Si nou pe depans apepre R9 milyon dan Goods and Services, i reste sa Konsey zis R5 milyon pou depans dan progranm.  Nou konnen ki sa Konsey i annan bann diferan progranm tel parey Youth Assembly, President Award, Youth Festival, Youth Awards.  Kestyon ki ganny poze, konbyen ki nou mete dan progranm sak distrik dan en lannen pou ede devlop talan nou bann zenn e ed zot sorti dan bann fleo sosyal?

Mr Speaker, pou mwan, larzan ki nou mete dan progranm kominote i pa ase.  Les mwan ilistre mon pwen.  Nou fer Sanpyona Atletik.  Kote sa bann zenn i sorti?  Kominote.  Sware Kreativite.  Sa bann zenn i sorti dan kominote.  Youth Festival, kominote.  Sesel i annan Talan, kominote.  Me kwa ki nou pe fer pou ankadre sa bann talan ki nou vwar tou le lannen?  Enn fwa ki sa bann zenn in fini demon tre zot talan e retourn dan lakour, ki kantite larzan nou pe aktyelman mete dan kominote?  E la kot sa zenn i reste e viv toulezour.  Pe fer sir ki sa zenn i ganny sans devlope e pa tonm dan move lenfliyans.  Ki nou pe fer pou rekonpans bann zenn egzanpler e performan lo nivo kominote?  Si nou pa met larzan dan progranm kominote, nou pou annan plis social ills e perdi bann zenn ki kapab ganny sove.  Sa osi Mr Speaker, i al avek bon planifikasyon e latansyon a sa bann detay ki mon’n mansyonnen.  A mon avi, lo sa nivo, i annan en mank planifikasyon e osi en mank lenvestisman.

Mr Speaker, Sanmdi dan mon konversasyon avek en biznesmenn, mon pe koz lo sa Bidze, i dir mwan ki si sak dimoun i get byen e lir byen sa Bidze, zot pou vwar ki i annan en ta loportinite dan sa Bidze.  Sa i anmenn mwan lo pwen Corporate Social Responsibility.  Mon welcome sa linisyativ pou bann biznes kontribye dan en fason zenere ver kominote e pou donn lezot bonn koz swa atraver finansman direk pou bann proze sosyal ou atraver donasyon e sponsorship.  Pou bann biznes ki pe ed nou distrik, mon oule dir zot mersi.  Me mesaz i al pou bann ki annan mwayen e ki ziska prezan pankor fer nanryen.  Ler in arive pou zot osi kontribye anver sa lekonomi ki soutenir zot Bidze.

Lantrepriz piblik.  Mr Speaker, Minis in koz lo mezir pou ranforsi sistenm swivi bann lantrepriz piblik e fer referans avek PFM Law ki ti devan nou Lasanble tou resaman kot in fer provizyon pou tou bann lantrepriz piblik pou adopte standar enternasyonal lo kontabilite pandan sa peryod 3an.  Koman en Manm lo Komite FPAC, sa i byen me sa ki mon pa konpran ler Minis i dir ki i tre konsernen par leta kont serten lantrepriz piblik.  En evalyasyon ki’n resaman ganny fer par Minister Finans i montre ki kont omwen 13 lantrepriz piblik pa annord e menm dir ki sa i senpleman pa akseptab.  Kestyon alors mon oule demande.  Ki zefor ki Public Contract Commission pe fer avek bann CEO ouswa Chairman bann lantrepriz piblik ki zot kont pa up to date? Eski nou kontinnyen renouvle zot kontra e donn sinyal ki en tel pratik i akseptab?  La Mr Speaker, i kler ki i annan en mank kordinasyon e lenplimantasyon a bann polisi ki nou annan e ki nou devret pe met an aplikasyon.  Anba sa performance based budgeting system, sa i ava en keksoz pou pran an konsiderasyon.

Mr Speaker, mon soulaze ler mon tann Minis koz lo bann regilasyon ki osi ganny pibliye, ki liste bann komodite e servis lo ki pou napa VAT. Sa i byen akoz sanmenm sa lannen, mon ti demann Minis kwa ki pe ganny fer pou ede fer desann pri lavi Sesel?  Sa ki vre se ki pri komodite i toultan monte e zanmen desann kantmenm dolar i abese.  Tou resaman, nou’n vwar en abesman dan pri juice, apre ki trade tax in ganny tire.  Nou dimoun e zabitan Grand Anse Mahe i santi pri lavi e lanmod manrmay lo street, “Parfwa i tough deor”.  Ozordi dan sa pei, i annan stabilite.  Nou dimoun e lepep Seselwa i anvi vwar pri komodite dan laboutik desann.  Zot anvi ler zot al dan laboutik, sa R100 dan zot pos, dan zot lanmen i annan valer.

Minis, ou’n koz lo lamannman Trade Tax lo serten bann komodite ki pou napa VAT tel ki lavyann, fri, legim, pou asire ki nivo proteksyon i ganny mentenir lo bann prodwi lokal.  Lo non mon zabitan, mon ti a kontan ou eksplik nou si nou pou vwar en abesman lo pri sa bann komodite ki Trade Tax pe al ganny amande e si zabitan mon distrik pou vwar en diferans lo pri ler zot al fer zot shopping. Mon ti a kontan osi propoze ki nou annan en deba ouver, ouswa en forum kot tou bann akter prensipal i zwenn e vwar kimannyer ansanm, koman en pei, nou kapab ede redwir pri lavi, anmenmtan ki nou pe bouz ver krwasans ekonomik e an antisipasyon plis langazman WTO e COMESA dan nou lekonomi.  Tou Minister san eksepsyon pou bezwen annan sans responsabilite.

Mr Speaker, in plis ki ler, kan nou pe dir lepep aziste, pou nou dan Gouvernman osi pou redwir labi lo fuel. Resers ki mon’n fer i montre ki Gouvernman 2011 in depans R29.5 milyon e an 2012, R35.3 milyon.  Sa dan limenm i tro bokou.  Gouvernman i bezwen met en sistenm anplas pou adres sa sitiasyon.

Dan mon diskour Bidze 2012, mon ti osi dir, “Si nou anvi ogmant proze kapital dan lefitir, Gouvernman i bezwen redwir lo son depans recurrent, savedir Goods and Services”.  Nou bezwen ede redwir gaspiyaz dan Gouvernman e sa ki enportan note se ki si Gouvernman i koup lo depans Goods and Services par zis 5 poursan lo sa alokasyon R1.2 bilyon dan Bidze, i kapab fer en saving R60.6 milyon e sa i kapab servi dan lezot proze kominoter.  Lopital, lekol, osi dan progranm sosyal dan kominote.

Overseas travel.  Mr Speaker, lannen pase dan mon repons Bidze, mon ti koz lo overseas travel.  I enportan fer resorti ki mon pa kont okenn dimoun, okenn travel ki nou dimoun i fer, sirtou anplwaye Gouvernman.  Me si nou pe koz lo koup depans, mon krwar ki nou kapab enplimant en polisi serye pou koup depans dan sa fason.  Sa lannen, Sesel in ganny plis Lanbasader ki zanmen e nou devret kapab servi nou bann Lanbasader pou reprezant nou bokou plis lo lasenn enternasyonal.  Ankor enn fwa, la i neseser ki nou vin pli stratezik dan fason ki nou enplimant nou polisi zafer etranzer pou kontinnyen promouvwar nou pei, espesyalman la ki nou’n anons lentansyon pou vin en manm konsey sekirite Nasyon Ini.  Sesel pe kontinnyen epanouir Mr Speaker.

Grand Anse Mahe.  Mr Speaker, mon distrik Grand Anse Mahe, ler nou get parkour 2012, zabitan in vwar en distrik ki pe bouze.  Wi.  Ler mon ti pe koz lo bouze Grand Anse Mahe, mon ti pe koz lo en distrik ki vin pli vivan e kot zabitan i sezi tou loportinite devan zot.  Se dan sa loptik ki nou ti inisye Tonbola Lagrikiltir.  In enn premye.  I ti en sikse me nou’n aprann e boner lannen prosen nou pou anons dezyenm edisyon Tonbola Lagrikiltir.  Sa i fason pou bann fermye market zot prodwi avek bann letablisman touristik e marse lokal.

Ler nou fer letour distrik e fer en revi proze ki’n konplete an 2012, koman Manm Elekte pou sa distrik, mon kontan vwar ki proze stasyon SEPEC dan krwaze semen Lanmizer in konplete e avek sa stasyon SEPEC, mon’n pouse ki zabitan sa distrik i ganny en ATM machine e kot zot pa bezwen deplas lwen pou ganny sa servis.  Sa i mark komansman en letap devlopman dan sa distrik.

Nou’n osi pe vwar travay ki pe konplete lo court Souvenir e bann diferan pti proze par egzanp semen, peron, miray, drenaz eksetera, dan bann diferan zone ki tous lavi tou nou dimoun.  Ler mon ti pe koz lo bouze Grand Anse Mahe, mon ti pe koz lo en distrik kot nou devlop lenfrastriktir pou ankouraz zabitan fer biznes.  Biznes i ede dan devlopman krwasans ekonomik dan sa pei.

Mr Speaker, se lo sa not ki mon ti a kontan ki Minis i eksplik zabitan kimannyer napa larzan pou finans cottage industry dan sa distrik me selman, mwan koman Manm Elekte pou sa distrik, nou’n al vizit kot landrwa e ganny montre pou annan devlopman, ganny dir i annan larzan e nou’n osi pibliy sa dan zournal an Mars sa lannen.  Selman, dan Bidze napa larzann pou en tel devlopman.  Sa a mon avi, i ankor enn fwa legzanp kot nou mank planifikasyon serye e en langazman pou onor bann promes ki nou’n fer.  Mon apresye en logmantasyon dan alokasyon Bidze pou proze dan distrik ki nou pou kapab kontinnyen amelyor lavi nou pep.

Mr Speaker, lo sa not mon ti a kontan koz avek zabitan, pou nou annan en sans partaz e partaz responsabilite.  Sa Bidze ki vin dan distrik i pou proze distrik, pou benefisye zabitan pou amelyor zot lavi.  Si nou kapab ed nou lekor, nou merit fer li.  I nepli tan pou nou fye lo zis nou Gouvernman pou fer keksoz.  E la Mr Speaker, mon salye bann fanmir ki ed zot prop lekor e ki’n vin rod en led selman ler zot pa kapab ed zot lekor.  Se sa spirit ki nou bezwen dan nou pei.

En reprezantan distrik i la pou ed son pep e koz pou li e mwan mon angaze dan sa misyon.  Mon osi annan en rol pou edik e ed mon zabitan.  E sa mon osi egalman angaze dan sa misyon.  Kot mon kapab mon pou fer li ek grann ker, me kot mon pa kapab mon pou koze, dyaloge e eksplike.

Ozordi, bann zabitan mon distrik i oule konnen kwa ki i annan pou zot dan sa Bidze.  I annan bokou e plis.  I annan en logmantasyon saler pou plizyer travayer sekter piblik, swa atraver wage grid, ouswa scheme of service. Bann carer pa’n ganny oubliye.  Nou zanfan i la, nou dimoun aze i la.  Sa ki lo Welfare osi i la.

Lo kote proze, mon welcome desizyon Gouvernman pou devlop Ex-ION dan en proze regional housing ki pe ganny finanse anba en grant UAE. Sa pou vwar konstriksyon 84 younit lakaz e sa dan limenm i montre kontinnyasyon en lot letap devlopman dan sa distrik.  I osi montre komitman sa Gouvernman Lepep pou fer sir ki sak fanmir i ganny son prop lakaz.  I osi bon fer remarke ki plan pou en nouvo day care in fini finalize e byento zabitan sa distrik pou vwar konstriksyon sa Day Care.  Kan nou bann zanfan ki en pe pli gran….

 

MR SPEAKER

3 minit Onorab.

 

HON LENNY LEBON

…. I osi satisfe ki en demi milyon Roupi in osi ganny mete pou renovasyon lekol Grand Anse Mahe.

Mr Speaker, mon swe se ki mon kapab kontinnyen koz pou zabitan Grand Anse Mahe avek en lavwa for e solid e ki Grand Anse Mahe i bouz parey mon ti dir an Oktob 2011.  Mon swe se ki bann fanmir dan distrik e dan Sesel an zeneral i vin pli solider e atrap lanmen enn a lot.

Dan sa moman festivite, mon lans lapel avek tou Seselwa pou nou azir rezonnab e respektab anver lezot e evite bann konportman anti-sosyal.  Mon swe se ki nou tou nou konpran pli byen lespri lapartaz.  La ki nou’n fini antre dan sezon lapartaz, la sezon Nwel.  Mon swe se ki nou annan en langazman serye pou zer sa Bidze byen e donn nou pep bokou plis rannman.

Vwala Mr Speaker, akoz mon’n soulinny sa 4 pwen santral mon diskour.  Mon konvenki, avek meyer planifikasyon, nou kapab save plizyer milyon Roupi.  Sa larzan i kapab al dan bann lezot lenvestisman kot nou pep i pli byen bezwen.  Pou sa arive Mr Speaker, fodre nou adopte en sanzman latitid.  Enn ki egziz meyer lenplimantasyon an sa ki konsern disiplin fiskal.  En langazman serye dan sa demars.  Sa 4 pwen santral mon diskour i mars kot a kot Mr Speaker.  An retour, pep Seselwa i merit konsyan, komans apresye bokou plis ….

 

MR SPEAKER

Komans wrap up Onorab.

 

HON LENNY LEBON

Yes Mr Speaker.

 

MR SPEAKER

In ler pou swet mwan bonn fet.

 

HON LENNY LEBON

Yes. Mr Speaker, lo sa not, mon ti a kontan swet Prezidan, son fanmir e staff, Vis Prezidan e son fanmir e son staff, oumenm ou Mr Speaker, ou fanmir e ou staff, tou mon bann koleg MNA ek zot fanmir, pep Seselwa e pli pros ek mon leker, zabitan Grand Anse Mahe, en Zwaye Noel e en Bon Lannen 2013.  Ki sa Nouvo Lannen i anmenn boner, lape, lasante, prosperite pou nou tou.  Mersi.

 

(Applaud)

 

MR SPEAKER

Bon, avek sa nou adjourn ziska 2er.

 

(Lunch)

MR SPEAKER

Bon nou ava kontinnyen avek nou deba.  Lo lalis la ek mwan i annan Onorab Roma Aglae.

 

HON ROMA AGLAE

Mr Speaker, Minis avek ou lekip, Manm Onorab, pep Seselwa, zabitan Plaisance bonn apre midi.  Mr Speaker Bidze Nasyonal nenport nasyon espesyalman en pei devlope parey Sesel, i sa dezyenm konponan an term gouvernans apre nou Konstitisyon.  En Bidze i reflekte priyorite Gouvernman anver bann diferan sekter nou lekonomi.  I en Bidze ki Gouvernman i itilize pou ankouraz ouswa dekouraz devlopman ensi ki amelyor welfare son sitwayen.  Deba lo Bidze i enn bann moman kle ki donn nou koman bann Manm Parlman loportinite pou pouse anver zentere nou zabitan ensi ki pei an zeneral.  Ki nou’n vwar dan sa Bidze Mr Speaker, i enn ki enkorport tou e i tous tou kous nou popilasyon.  Etandone letan ki nou’n gannyen pou nou reponn apropo sa Bidze mon’n selektivman swazir enn de topik spesifik ensi ki an zeneral koman mon repons.

Lo size proze kapital brefman benefis ki Bidze presedan in anmennen dan mon distrik Mr Speaker se par egzanp alokasyon Bidze pou bann proze kapital.  Apre en long peryod demann, zabitan Copolia pe vin nobou benefisye atraver lagrandisman zot semen ki depi in konstri kree bokou lenkonvenyans pou pyeton e motoris, e in annan pa mal aksidan osi.  Sa lannen nou’n vwar konsepsyon sa proze e progre pe al byen.  Pou sa, lo non zabitan Copolia e distrik Plaisance mon dir mersi Departman Transpor e Gouvernman atraver alokasyon Bidze pou sa proze, ensi ki pou lannen 2013 pou dezyenm faz sa proze.

Mr Speaker pou lannen 2013, in prozekte ki tou distrik pou ganny alokasyon R1.2 milyon anver sa ki nou apel small project ouswa bann pti proze kominoter.  Etandone demann e en long lalis pou bann tel proze ki distrik i anvi enplimante sa alokasyon a ede soulaz serten landrwa otour distrik kot atraver sa bann small project distrik a priyotiz e anvizaze ki zabitan i benefisye par group olye en sel fanmir.  Atraver sa Bidze alors nou welcome sa alokasyon.

Mr Speaker Bidze i enn ki lo en nivo eleve alors i pa’n al vreman sitan an detay.  Mon ti a kontan fer de pti mansyon anver nou lazenes lo size ki pe preokip mwan an semoman.  Mon kontan aprann ki atraver Departman Sosyal i annan plan pou konstrir en nouvo sant reabilitasyon osi en proze pou en sant rezidansyel pou bann zanfan problenmatik.  Sa i ava ede esey rezourd enpe problenm relye avek bann konportman anti-sosyal.  Koman en zenn Mr Speaker mon ase konsernen lo lavenir nou zenes.  Mon distrik pa’n ganny eparnye avek sa fleo drog, lapoud, vol, prostitisyon, eksetera – lalis i long, e mon onnetman enkyet.  Zis fer en letour dan prizon Montanny Poze Mr Speaker ouswa en tournen dan bann sou distrik e menm grann rout ou a ganny en konpran kote mon lenkyetid i vini apropo serten nou zenes.  Wi lopotinite i annan dan pei.  I annan otan a dispozisyon nou zenes, me i domaz ki serten nou bann zenes i bite, zot mank sa gidans neseser ouswa zot zis anvi viv en tel lavi.  Mon swete ki dan lefitir atraver sa progranm renesans sosyal, atraver sa alokasyon Bidze, nou a vwar en amelyorasyon dan konportman e en fitir pli briyan pou nou zenes.  Mon swete ki lanfaz ek depans i ganny fer apropo rod plis solisyon pou sours nou problenm olye ki depans lo en baz reaktiv.

Lo size NDEA Mr Speaker, mon salye zefor ki sa lazans pe fer parey nou vwar.  Plis ki trwa kar ditan se nou zenes ki viktim, i fermal Mr Speaker, ler ou vwar en zenn ki’n viktim labi sibstans ozordi in vin parey en zonbi.  Me ou kapab konpran soufrans son paran.  Tandi ki sa trafiker li i pe zouir en lavi ekstravagans e son viktim en lavenir brize.  Mon alor soulaze par sa logmantasyon Bidze pou sa lazans e sa a fer ki plis zefor a ganny dedye osi dan nou delo teritoryal ensi ki entansifye resours e met o deteksyon lo Airport pou dekouraz enportasyon sa sibstans ilegal e destriktiv.

Touzour lo lazenes Mr Speaker, nou’n vwar en logmantasyon dan alokasyon pou Liniversite Sesel.  Mon swete vwar en progranm ladvertisman pli agresiv e atraktiv, sorti kot sa liniversite.  Lepep i devret ganny plis okouran ki zot kapab fer zot aplikasyon kantmenm zot pa’n pas atraver en progranm scholarship avek Gouvernman.  Konmela tou etidyan pos segonder pe ganny allowance R750 pou premye lannen, R850 pou dezyenm lannen e R950 pou trwazyenm lannen.  Lazenes i devret apresye servi sa allowance dan en fason byen, mon salye sa Bidze akoz i fer provizyon pou bann tel allowance.  Me ki mon ti a kontan propoze a sa pwen Mr Speaker se pour ki bann labank i regard dan posibilite market zot lenstitisyon anver sa bann zenn.  Ofer zot bann benefis ki zot ava ankouraze vin ouver en kont avek zot.  Par egzanp lamazorite sa bann zenn i al kolekte zot larzan kot Lazans Sosyal e en minorite zot, zot deza annan en kont labank.  Petet labank i devret asosye e fer en progranm atraktiv avek en to lentere ki vreman ba pou atrakte e ankouraz bann zenn segonder ouver en kont avek zot.  Sa i pratik lamazorite lenstitisyon banker aletranze anver bann etidyan Mr Speaker, e mon pa vwar akoz Sesel nou bann labank nou pa kapab met en tel fasilite pou nou zenes pou fasilit zot lavi dan sa monn globalizasyon e teknolozi.

Mr Speaker, lo size HFC.  Minis in fer resorti en problenm ki lannen ale lannen vini in la dan nou sistenm.  Malerezman i en problenm ki ki pa tro fasil rezourd amwen Gouvernman in deside vin pli sever e pran bann mezir drastik e sa se repeyman loan par son bann kliyan.  Mon pa konnen ki mekanizm ki Gouvernman pou vin avek me vreman i bezwen annan en legzersis detaye e serye lo sa size.  Tou alokater ki annan aryeraz zot repeyman i bezwen ganny mete anba mikroskop konmdi koze e zot ka ganny evalye enn par enn.  Mon asir ou Mr Speaker pou annan en bon pe sa bann alokater ki zot reveni kolektiv i sifizaman annan en porsyon ki zot kapab asosye e repey zot det ouswa ou pou vwar ki zot pa pe priyoritiz zot depans e zot prefere met keksoz tel ki luxury items koman priyorite par lao zot nesesite debaz.  E byensir Mr Speaker pou annan sa group ki nou apel nou bann vilnerab ki ler ou pou evalye zot sitiasyon o profon vreman zot pe struggle e trimouse pou fer de bout zwenn.  Se sa bann leksepsyon ki devret ganny konsidere pou ki zot benefisye atraver lasistans Welfare.  A Mon avis en tim dedye ouswa en task force pou regard de pros sa bann kategori alokater i devret ganny met an plas pour ki Gouvernman i kapab anmas son reveni e remet dan lekonomi pei pou benefis tou Seselwa.

Mr Speaker apropo logmantasyon saler.  Mon konvenki ki Minis avek son lekip in fer bann kalkilasyon itil e pran konsiderasyon leres laspe pou donn sa logmantasyon saler.  Malgre i pa dan satisfaksyon tou dimoun me toudmenm lentansyon e konsiderasyon Gouvernman i la, malgre defi pou donn en logmantasyon saler wi pri lavi i kontinnyelman ogmante e marsandiz enkli komodite debaz i vin deplizanpli pli ser e mon swete ki atraver bann mekanizm ki Gouvernman pe met an plas, atraver fer klima biznes vin pli fasil pou bann retailers, atraver rediksyon dan nivo biznes taks ki benefis a ganny transmet dan pos konsomater kot pri komodite a kapab redwir.  Me toudmenm mon salye zefor Gouvernman pou omwen konsider sa logmantasyon e swete ki bann lantrepriz prive i osi pran en tel konsiderasyon.

Mr Speaker dan son konklizyon Minis Finans in fer resorti ki tou siny an 2013 i montre ki nou riske fer fas avek en lot lannen difisil.  Enportan mon met lanfaz alors se nesesite en mekanizm anver kontrol dan lafason ki sa bann alokasyon Bidze i ganny depanse.  Pei pa afford labi e bann serviter lepep ki koronpi.  In plis ki ler Mr Speaker, pou redonn sa konfyans lepep atraver Bidze pei e son lankadreman lo fason ki i a ganny zere.  A sa pwen mon pe propoze ki Minis Finans atraver sa Public Finance Management Act i donn en garanti lepep Seselwa ki i pou annan dan sa Act bann mekanizm pli efektiv ek kredib e enn ki kot sa ki koupab ava vreman ganny anmenn devan lazistis e pey son det anver lepep e larzan leta.

Parfwa Mr Speaker, wi nou propoz e vin avek bann bon linisyativ pou anpes gaspiyaz e koripsyon.  Me domaz ki i vre aksyon pa ganny swivi avek bann ki koupab.  Lepep i fatige vwar nou kot nou zis shift en problenm lo en lot landrwa konmdi Angle – in ler pou nou komans walk the talk e donn lepep konfyans ki zot larzan pe ganny byen servi dapre ki’n ganny anonse dan Bidze lafen lannen.

Nou’n ariv a en pwen Mr Speaker, kot Gouvernman pe promouvwar latransparans, bonn gouvernans, ekseter.  Sa Bidze ki nou pe diskit lo la ozordi e ki pou evidaman ganny aprouve i enn ki sibstansyel.  Mon soulaze me anmenmtan en pe enkyet Mr Speaker, ki Minis in fer resorti dan son ladres ki limenm koman Minis pou Finans i konsernen par leta kont serten lantrepriz piblik e ki an semoman 13 lantrepriz piblik zot kont pa annord.  Ler zot kont pa annord se larzan e lasyer lepep Seselwa ki angaz e koman en sitwayen pou mon osi i irit mwan.  Mon swete ki pou annan latransparans dan deliberasyon bann rezilta vizavi evaliasyon ki Minister Finans pe fer avek sa bann lantrepriz piblik, e kot fodre met lord, lord a ganny mete e aksyon neseser a ganny pran e dela senm en mesaz kler pour tou sa ki annan akse avek larzan leta.  I nepli tan Mr Speaker pou roul problenm anba karpet e kontinnyen avek en latitid konpasyon kont sa bann tel pratik e endividi.  Lavi pa pe vin fasil, napa personn ki endispansab nou bezwen komans vin pli sever dan nou praktik.

I tris ke se an 2013 ki Minister Finans pe mazin rekomann aksyon kont bann ki pa an konformite avek lalwa.  Sa ki piblik pe demande Mr Speaker, eski bann dimoun pou zis walk away free konmsi narnyen ditou lo lasyer transparans e kouraz lepep?  En Bidze Mr Speaker, se larzan tax payers.  Annou pa zanmen oubliy sa.  Kan larzan i ganny servi malapropo i egal fristrasyon lepep.

An terminan, swivi lo mon lentrodiksyon ankor enn fwa mon pou fortman met lanfaz lo sa laspe accountaibility, latransparans e gaspiyaz anver larzan piblik.  Yer Mr Speaker, le 9 Desanm ti lazournen enternasyonal kont koripsyon, e parey Vis Prezidan Danny Faure ti fer resorti dan son mesaz, nou bezwen koman en pei e Gouvernman amelyor nou bann mekanizm aktyel pou esey konbat e dekouraz pratik koronpi dan nou pei.  Wi i pa alarman me i bezwen ganny adres avek viger e ki pli bon fason pou fer sa si pa met an plas bann paramet depans e lalwa sever kont mal itilizasyon larzan piblik.

Dapre en rapor World Bank Mr Speaker, enn bann pli gro problenm bann pei devlope i fer fas avek se koripsyon dan Gouvernman ensi ki dan sistenm bidzeter.  Sitan bokou ki World Bank i dir omwen 10 a 20 poursan Bidze en pei i a lanver aktivite koronpi.  Labi e gaspiyaz e ki lamazorite ka i malerezman ganny detekte plizyer semenn, mwan ou menm lannen plitar e sitan tris napa aksyon ki ganny swivi avek sa ki koupab.  Sesel nou napa sifizaman statistik me nou pa’n en leksepsyon.  Ki mon pe senpleman enplore alors Mr Speaker wi mon aprouv sa Bidze, me silvouple in ler pou nou ranforsi avek tou viger son mekanizm pou kontrol lo lafason ki depans bidzeter i ganny zere.  Mon pa pou ezite pou aport mon sipor pou sa Bidze me anmenmtan swete ki i enn ki ganny byen administre.

Mon ti a pran sa loportinite pou swet Prezidan Michel e son lekip, Mr Speaker, tou Manm Onorab, tou fanmiy pep Seselwa espesyalman zabitan Plaisance en Zwaye Noel e Bon Erez Ane.  Mersi

 

MR SPEAKER

Onorab Payet, Dokter.

HON DAVID PAYET

Mersi Mr Speaker.  Mr Speaker, Minis Finans ek ou lekip, Manm koleg Onorab, lepep Seselwa, zabitan Glacis bonn apre midi.  Pou son premye Bidze ki in prezante avek lepep Seselwa koman Minis Finans i annan en konsesis ki Minis Laporte in delivre en bon travay.  In menm benefisye avek serten sirkonstans ki’n fasilit son latas parey lefe ki bann reform makro ekonomik ki’n ganny enplimante pli boner in komans kick in e in anmenn serten lefe pozitiv.  Pou sa Bidze 2013, Minis Laporte ki trwazyenm Minis dan sa trwazyenm repiblik in benefisye ki son predeseser Vis Prezidan Faure ti dekrir koman en fiscal breathing space. Mr Speaker, mon oule remersye Minis Finans pou son limilite akoz in rekonnet bon travay ki son predeseser in fer.  Mon osi remersi li pou rekonnet lasazes Prezidan Michel ki ti pran desizyon pou lans reform ekonomik.  Sa i montre sa team spirit ki egziste dan Gouvernman Parti Lepep.

Mr Speaker nou osi konnen ki sikse reform ekonomik ki’n etablir baz pou bon performans nou lekonomi i rezilta en travay konzwent fer par Minis Finans ek Labank Santral.  Alor menm si nouvo Minis in rekonnet travay fer par son predeseser i ti’n osi devret rekonnet bon travay fer par predeseser nouvo Gouverner Labank ki pa lot ki limenm.  Minis Laporte napa lafoli de grander pou li vant son prop lekor e mon pou remersi li ankor pou son limilite e mon pou dir ki lepep Seselwa i osi remersi li pou son bon travay ki in fer dan Labank Santral avan ki i ti vin Minis Finans.

 

(Applaud)

HON DAVID PAYET

Mr Speaker, Bidze 2013 pe pran nou bezwen konpran ki sa fondasyon ki reform ekonomik in etabli.  Mr Speaker reform ekonomik in koriz bann keksoz abnormal ki ti annan dan nou sistenm, sa ti enkli nivo det ki ti enpe tre o, e serten pratik ki pa ti ganny respekte bann norm.  Sa fondasyon ki nou pe koz lo la se rezilte sa reform ki enkli rediksyon dan det pei, eliminasyon problenm mank foreign exchange e pli bon zesyon Minister Gouvernman e lakonpannyen paraetatik.  Nou kapab dir ki sa fondasyon i solid akoz nou’n deza prodwir fri an term kwasans ekonomik.  Nou menm kapab dir ki sa fondasyon i tre solid akoz lekonomi Sesel in rikord en to kwasans konfortab dan en lanvironnman kot lekonomi i tre difisil.  Pou Sesel reisir anrezistre en to kwasans rezonnab pandan ki lekonomi enternasyonal ti an resesyon sa i montre ki sa fondasyon ki reform ekonomik in konstri i enn ki tre solid.

Mr Speaker, sa fondasyon i an term sa ki nou apel bann economics fundamental i ganny mezire an term par met parey nouvo det rezerv foreign exchange.  Batir lo sa fondasyon i vedir mentenir sa bann paramet a en bon nivo me anmenmtan fer zot vin dirab atraver bann lezot mezir ki adres lezot kestyon ekonomik.  Par egzanp fodre elarzi baz ekonomik e permet Seselwa fer plis larises e a son tour fer plis kwasans ekonomik.  An dot mo kreasyon en lavironnman biznes ki fasilit kreasyon larises e sa se lot letap apre restablisman bann fondamantal ekonomi.  Lo sa pwen Mr Speaker mon konstate ki Minis Finans in fer egzakteman sa depi ki in pran ansarz Minis Finans, Minis Laporte in fer sa koman son priyorite.  Preski tou sa bann deklarasyon ofisyel e son bann gran desizyon in annan pou fer avek amelyor lanvironnman biznes dan nou pei.  Bidze 2013 i ranforsi sa pozisyon.

Mr Speaker lapros ki Minis Finans in pran i enn ki fer sans akoz en bon lanvironnman biznes i lasirans ki larises pou kapab ganny kree e plitar ganny distribye avek popilasyon.  En bon lanvironnman biznes i lasirans ki sa bann fondamantal ekonomik pou reste bon e menm amelyor akoz plis i annan biznes ki kree, larises plis larzan tax pou ganny antre dan sistenm e sa pou redwir nou nivo det.

Mr Speaker menm si en bon fondasyon an term bon fondamantal ekonomik i solid e en bon lanvironnman biznes, i tre neseser en bon lekonomi i bezwen en trwazyenm eleman ki nou apel partisipasyon.  I annan legzanp plizyer pei dan lemonn ki annan tre bon fondamantal ekonomik e tre bon lanvironnman biznes kot pourtan i annan en gro problenm sosyal parey lapovrete.  Sa bann pei i mank sa trwazyenm eleman ki partisipasyon akoz letan ou annan lizye ou vwar ki sa bann problenm sosyal i akoz popilasyon sa pei pa pe partisip dan kreasyon larises ekonomi e an rezilta zot pa benefisye.  Mr Speaker partisipasyon ekonomik i vedir ki popilayon en pei i pran bann loportinite ki ganny kree e i limenm kre larises.  Popilasyon en pei i partisip dan lekonomi son pei letan i trouv li dan en lanplwa ki ale avek son konpetans e laspirasyon e ki ofer li en bon saler.  Partisipasyon i vin osi atraver dimoun dan sa pei ki pe kre biznes.  Byensir en pei touzour i bezwen lasistans etranze an term kapital e lekspertizm.  Me fodre dimoun sa pei i reste koman pli gran benefisyer sa prosesis devlopman ekonomik.

Mr Speaker mon fer resorti sa pwen partisipasyon ekonomik pou mon atir latansyon Minis Finans e dir li ki travay pa ankor fini.  Anmenmtan ki nou pe batir lo sa fondasyon pou etablir en bon lanvironnman biznes fodre nou osi pran an konsiderasyon fakter partisipasyon ekonomik pou asire ki Seselwa i pli benefisye atraver sa kwasans ekonomik.  Mon demann Minis Finans pou konsilte avek son bann koleg dan Cabinet of Ministers e revwar tou bann polisi parey lokalizasyon e kreasyon biznes pou asire ki zot vin koman bann fasilite pou Seselwa al pli devan.

Mr Speaker en model devlopman baze lo partisipasyon ekonomik i annan plizyer lavantaz.  Premyerman i ede pou retenir plas resours finansyel dan en pei.  Dezyenmman i ede transfer teknolozi ek konesans akoz bann etranze i pas zot konesans ek lekspertizm avek dimoun lokal ki zot business partners dan en joint ventures.  Trwazyenmman i ede redwir tansyon, sosyal akoz dimoun lokal pa pe vwar etranze koman bann dimoun ki’n vin vol zot larises me koman bann zanmi ki vin donn zot en koudmen travay.  Mr Speaker Sesel i annan loportininte lekonomi ki depas kapasite nou pti popilasyon, nou annan bann progranm devlopman anbisye ki zanmen nou pou kapab realize zis avek mendev lokal.  Nou annan potansyel ekonomi ki zanmen nou pou kapab eksplwat nou tousel.  Nou bezwen etranze me nou kapab fer li dan en fason kot Seselwa i pli benefisye ki etranze.

Mr Speaker Bidze 2013 in osi entrodwir serten nouvo mezir.  Enn sa bann mezir se logmantasyon saler pou bann ki ganny mwens e entrodiksyon VAT. Mr Speaker mon kontan vwar ki saler minimonm pe ganny ogmante ki bann dimoun ki ganny mwens parey bann home carers pou benefisye.  Mon osi apresye vwar lazisteman dan bann benefis sosyal.  I tre enportan ki bann mwen fortinen i benefisye avek plis okenn zefor fer par Gouvernman.  Zisteman Mr Speaker mon ti a kontan fer resorti en pwen.  Mr Speaker dan lavi i annan plizyer risk enn bann risk se lasante.  En dimoun i kapab byen mon soudennman i aprann ki i annan en maladi ki fors li aret travay.  Parfwa en lot manm fanmir parey son madanm ki pe travay e osi kontibye ver Bidze lafanmir i osi bezwen aret travay pou ed li kot lakour.  Dan nou model devlopman nou annan en lasirans sosyal ki vedir bann risk i ganny kouver par larzan e ganny peye par Agency for Social Protection.  Sa i en bon sistenm me souvan son nouvo kouvertir ki vedir degre ki i ranplas reveni ki en dimoun in perdi i tro feb.  Sa i sours serten problenm sosyal.  Par egzanp dan en lakour kot ou annan en msye ek en madanm ki travay si sa msye i tonm malad e bezwen aret travay e son madanm i bezwen osi aret travay pou reste avek li kot lakour, sa ki fer en sel kou sa de fanmir i perdi de saler.  Sa msye i benefisye an term tretman medikal gratwit e en benefis sosyal tandi ki son madanm li i ganny sa ki nou apel en family support allowance. Sa i byen, me sa de reveni i bokou tro feb par apor a reveni sa fanmiy avan e i fer ki kalite e nivo lavi sa fanmiy i tonm en sel kou.

Mr Speaker mon ti a demann Minis Finans pou esey adres sa sitiasyon par fer en levaliasyon ansanm avek Minis Zafer Sosyal, Minis Lasante e Agency for Social Protection.  Atraver sa levaliasyon zot a dekouver sa bann nouvo ka sosyal e rod bann mwayen pou amelyor sitiasyon finansyer sa bann fanmir.

Mr Speaker en bann mezir dan Bidze serten entrodiksyon Value Added Tax VAT pou ranplas GST an Zanvye lannen prosenn.  Bon nouvel se ki sa tax pa pou ganny mete lo bann komodite debaz.  Fodre ki lotorite i fer legzersis kontinnyel pou asire ki sa i vreman leka, vedir ki VAT pa ganny mete lo bann komodite debaz.  Mr Speaker nou kontan dir ki dan nou pei nou annan rule of law. Me i tris pou nou vwar ki parfwa sa prensip pa aplike pou serten group parey marsan.  Tro bokou fwa serten marsan i fer lekontrer avek sa ki lalwa i permet.  Fodre safwasi lalwa i koze e sa ki met VAT lo komodite debaz i pey lekonsekans.

Mr Speaker batir lo fondasyon reform ekonomik i osi vedir mentenir bon keksoz ki ti la avan sa fondasyon ti ganny kree.  Si fondasyon i for set akoz zouvriye in fer en bon travay me set osi akoz materyo ki’n ganny servi i for.  Reform ekonomik in en sikse e in reisi etablir en fondasyon for akoz nou sistenm i baze lo devlopman imen e solid e lede pilye sa sistenm se ledikasyon ek lasante.  Alors Mr Speaker mon tre satisfe pou vwar ki sa Bidze in rekonnet sa par lefe ki in mentenir son pozisyon sa de Minister koman lede premye konsomater Bidze avek pli gran alokasyon.

Mr Speaker Minis Lasante i enn ki inik dan lemonn.  I inik pa selman akoz i en sistenm lasante piblik ki ofer servis gratwit lo en baz iniversel, savedir pou tou dimoun.  I osi inik akoz i annan en kou devlopman ki o e i bezwen deservi en gran lanbisyon ek en gran lekspektasyon.  Mr Speaker nou sistenm lasante i annan en kou devlopman ki tre ser akoz Sesel i en pei ki ser.  Me nou osi annan en tre gran lanbisyon akoz nou oule ofer nou pep meyer swen lasante ki disponib dan lemonn.  An plis ki sa Seselwa i en nasyon sofistike ki fer ki nou annan gran lekspektasyon menm lo nivo swen lasante.  Nou sistenm lasante i annan li en defi ki tre pe sistenm lasante piblik dan lemonn i annan.  Defi nou sistenm lasante se pou delivre lo en gro lanbisyon avek en kou devlopman ki o e ki en pep ki annan gran lekspetasyon.  Par donn Minister Lasante pli gran Bidze mon vwar ki Gouvernman pa’n abandonn sa gran lanbisyon.

Mr Speaker menm si i lezitim pou Seselwa annan li pli gran lanbisyon pou swen lasante son pep e menm si i drwa pep Seselwa pou annan lekspektasyon ki o nou bezwen realis e dir ki nou pa kapab zis met larzan lo problenm.  Nou bezwen komans mazin anterm lefikasite letan nou koz lo nou sistenm lasante piblik.  Nou bezwen komans demann nou lekor si i pa posib pou nou fer plis avek mwens.  Mr Speaker mon konvenki ki nou sertennman kapab mentenir nou sistenm lasante piblik avek mwens larzan.  Sa i posib si Seselwa i adopte en kiltir ki redwir risk ek lensidans bann maladi ki kapab ganny evite.  Sa pou anmenn benefis pou nou pei anterm savings me osi pou popilasyon anterm meyer lasante.

Mr Speaker nou sistenm lasante piblik i baze lo lanbisyon ofer meyer swen pou tou dimoun.  Mon krwar in ler pou nou reviz sa lanbisyon par fer sa responsabilite sorti lo Gouvernman pou vin lo popilasyon.  Nouvo lanbisyon nou sistenm lasante i devret vin en stil lavi ki ofer meyer swen e minimiz bezwen al kot dokter.  Mr Speaker sa i pa en rev me en gran lanbisyon ki nou kapab realize.

Mr Speaker en bon sistenm lasante set en bon sistenm swen.  Sa i vedir ki menm si i ofer bann pasyan meyer latizann, meyer fasilite, meyer lekipman medikal sa servis atraver bann staff i vreman kalifye.  En sistenm lasante pou selman anmenn gerizon pou sa bann pasyan si sa bann staff i delivre swen.  Bann staff lasante se bann care givers e bann pasyan se bann dimoun ki pe rod swen.  Zisteman letan nou dir ki nou annan en bon sistenm lasante piblik isi Sesel, nou koz bokou lo fasilite modern e servis avanse ki nou sistenm i ofer.  E sa parler i fer nou obliye sa fakter kle ki nou sistenm lasante i delivre ki nou apel swen.

Mr Speaker, mon fer sa remark akoz mon krwar in ler pou nou met plis lanfaz lo kalite swen ki nou sistenm lasante piblik i delivre e met an plas bann mezir ki asire ki sa swen i ganny maksimize.  Nou sanse akoz nou bann care givers ki swa bann asistan ners, paramedic, ners, dokter, spesyalis, e lezot i tre kalifye e konpetan.  Bann ners ek dokter Seselwa i annan en nivo konpetans ki ganny rekonnet mondyalman e sa i ganny reflekte atraver lefe ki nou bann ners ek dokter i ganny rekrite dan bann lopital e klinik dan bann pei avanse parey Langleter ek Ostrali.

Mr Speaker, si sa bann pei pe atrakte bann profesyon i admet se ki zot tre bon e nou bezwen rekonnet sa par fer tou ki nou kapab pou nou pa perdi zot.  Ozordi zour pou premye fwa dan nou listwar i annan plis Seselwa ki travay dan nou sistenm lasante piblik ki etranze.  Sa i en loportinite enorm ki nou bezwen eksplwate.  Nou bezwen eksplwat sa loportinite akoz nou sistenm lasante pe fer fas avek bann nouvo defi parey bann maladi kardyonaskiler, kanser ki vin le de premye lakoz lanmor dan nou pei.  Pou nou tret pli efektivman sa bann maladi nou bezwen annan bann spesyalis ki kapab delivre.  Bann spesyalis etranze pe fer en bon travay me Seselwa i anmenn en touch ki kapab fer gran diferans dan nou sistenm lasante piblik e dan lavi nou pep.  Mr Speaker nou bezwen retenir e ankouraz nou bann spesyalis ki deor pou retourn Sesel e donn en koudmen livre en pli bon servis lasante pou nou pep.  Par egzanp nou lalit kont kanser ti a efektiv si nou ti annan en enchologist dan lopital Vicktorya.  Mr Speaker lo sa pwen mon pou fer rapel ki nou annan en enchologist Seselwa ki pe viv e travay en Almany.  Sa dimoun ti deza vin Sesel e travay avek Minister Lasante me i ti kite akoz son package pa ti bon.

Mr Speaker, Minister Lasante i bezwen get package ki i donn sa bann spesyalis Seselwa.

 

(Applaud)

 

HON DAVID PAYET

I devret amelyor sa package e fer li vin osi atraktiv pou Seselwa ki pou bann etranze.  Sa i a fer ki nou bann Seselwa ki deor a retournen e nou bann spesyalis ki konmela pe travay avek bann Minister Lasante i ganny en incentive extra pou zot osi pa kit pei pou ale.  Mr Speaker nou bann spesyalis Seselwa ki konmela pe travay avek Minister Lasante i ekstrememan bon.  I annan ki pa’n kit pei selman akoz zot kontan zot pei, menm si zot package i pa osi bon ki zot pe ganny ofer aletranze.  O non tou Seselwa mon dir avek sa bann spesyalis mersi touzour pou met Sesel avan tou.

 

(Applaud)

 

HON DAVID PAYET

Mr Speaker Minis Lasante i kapab devret fer plis pou nou bann spesyalis Seselwa, i devret fer en pli bon package pou ankouraz bann ki deor pou retournen e retenir bann ki dan pei.  Minister i devret osi reget bann package bann ners pou dekouraz zot pou kit pei.  E osi pou tou travayer lasante.

Mr Speaker Bidze 2013 pa’n obliy Glacis.  Mon kontan vwar ki proze konstriksyon nouvo lekol primer Glacis pe al demare an 2013.  Apre plizyer lannen ki nou’n fer sa demann enpe letan ki zanfan in al lekol Bel Ombre mon soulaze pou vwar ki finalman konstriksyon lekol pe al komanse.  Nouvo lekol Glacis i senboliz langazman Gouvernman Parti Lepep anver lavenir Glacis akoz nou lekol i enn bann high performing school dan Sesel.  Mon pou demann ek zanfan ek paran Glacis pou nou pasyante enpe letan nou nouvo lekol pe ganny konstri e pou nou montre gratitid anver lepep Seselwa par amelyor nou performans akademik ankor plis.  Mon dir avek zot annou fer Glacis vin meyer dan Sesel.

Mr Speaker en bon fason ki Seselwa i vwar klerman kimannyer en dokiman nasyonal parey Bidze i fer en diferans dan son lavi set atraver bann proze kominoter.  Lo sa pwen ankor enn fwa mon pou dir ki distrik Glacis pa’n ganny obliye.  Anba vot Minister Zafer Etranzer Devlopman Kominoter ek Sport, Glacis pou benefisye avek 19 pti proze, ki enkli en lenstalasyon wheelchair ramp, konstriksyon retaining wall access road, tenk delo e proze drenaz.  Distrik pou osi benefisye atraver proze emergency pou koup pye dibwa kot serten lakour.  Anba vot pou Seychelles Land Transport Agency distrik Glacis pou benefisye 8 proze ki enkli konstriksyon pon North East Point, lenstalasyon crash barrier Carana, resirfas semen La Grogue e netwayaz semen.

Anba vot pou Minister Litilizasyon Later ek Lakaz distrik Glacis pou benefisye 4 proze ki enkli konstriksyon 23 lakaz lo Carana housing estate, alokasyon 5 morso later dan proze Land Bank Sainte Helene North East Point, e pou koup dibwa North East Point e dan leo La Gogue.

Anba vot Housing Finance Company zabitan Glacis pou benefisye 5 proze ki enkli retir asbestos lo bann flat Malezyen e resirfas semen Daro Estate.

Anba vot pou DRDM, Divizyon Zesyon e Risk e Dezas zabitan Glacis pou benefisye 3 proze.

Mr Speaker mon ti a kontan rikord mon lapresiasyon pou 13 pti proze ki’n ganny antreprann sa lannen par Departman Devlopman Kominoter dan Minister Zafer Sosyal Devlopman Kominoter ek Sport.  Sa bann proze ki tou in fini apard ki enn ki ankor pe ganny fer in amelyor lavi zabitan Glacis.

Mr Speaker pou terminen mon oule remersi Minis Finans ek son lekip pou sa bon travay Bidze ki in fer.  Mon oule remersi zabitan Glacis e Lotorite Distrik pou sa sipor ki in donn mwan pou sa lannen antye.  E la mon profit sa lokazyon pou swet Prezidan Michel ek son fanmir, Vis Prezidan Faure ek son fanmir, ou Mr Speaker ek ou fanmir, tou Minis ek zot fanmir, Manm koleg Onorab ek zot fanmir, sekretaryat Lasanble, Pep Seselwa, zabitan Glacis, staff klinik Glacis en zwaye noel e en bon lannen 2013.  Mon remersi ou Mr Speaker.

 

MR SPEAKER

Onorab Samson.

 

HON DEREK SAMSON

Mr Speaker mersi.  Mr Speaker, Minis felisitasyon e mersi pour sa Bidze.  Koleg Onorab, tou dimoun ki pe swiv, zabitan Anse Royale mon salye zot tou e mon espere ki lazournen i termin byen.  Mr Speaker nou nepli viv dan lepase malgre nou pa bliy listwar, me nou plito viv dan le prezan e anmenmtan nou antisip en meyer lavenir, menm si lavenir i pa tout fwa apel pou nou, se sa direksyon en Nouvo Sesel Mr Speaker.

Avek Gouvernman Prezidan Michel, Gouvernman Parti Lepep Sesel i reste en forward looking country. Kot en far i reste eklere lo lalinny finisyon e ki drwat obor li en zonm solid i debout byen for avek son paviyon touzour anler pe diriz son bann followers ver en lavenir touzour pli briyan.  Vwala mon resantiman zeneral anver sa Bidze 2013 pou Sesel.

Mr Speaker en Bidze ki revey lodasite tou Seselwa pou annan lespwar vwar en Sesel avek en lekonomi ki pli solid, enn ki pe apel tou fanmir Seselwa pou vin pli travayan espesyalman bann ki pli zenn.  Akoz wi, Sesel i apel nou pei e wi parey Leader Lopozisyon ti dir Vandredi pase dan son interview nou’n viv Sesel e nou konnen, nou konn en ta keksoz, nou konnen ki nou ankor pe viv dan en Sesel kot napa malere pe dormi obor semen, me malerezman sa ki nou pou kapab pe vwar dormi obor semen dan nou pei se en boug ki’n deside ozordi bwar sou enpe son larzan malgre pri lavi.

Zisteman Bidze 2013 i prezant 2 pwen prensipal ki pe kapte latansyon bokou nou isi dan sa Lasanble e ki mon krwar mon merit koz lo la ozordi, e sa se – ki sa Bidze i enn ki baze lo bann mezir ki Gouvernman pou pran pou akseler e ogmant kwasans ekonomik Sesel ki osi tenm sa Bidze 2013.  E ki de sa Bidze i enn ki annan pou bi pou tous lavi tou Seselwa dan en mannyer enportan, depi en senp fanmiy ziska kominote biznes.  Sa i parol Minis dan son ladres lot Mardi pase.  Par kont Mr Speaker nou konn tre byen kwa ki pe preokip nou bann dimoun plis dan sa Bidze.  Sa se kestyon pri lavi enkli komodite debaz si pou monte oubyen pou desann avek entrodiksyon Value Added Tax – VAT, logmantasyon saler, eski sekter prive pou swiv lalwa minimonm wage an Zilyet 2013 e fer monte saler debaz bann travayer?  Loan lakaz avek bann labank.  Kan ki nou pou kapab ganny en loan pou konstrir en lakaz,?  Eski pou vin pli fasil pou ganny welfare lannen prose?  Sa se bann kalite kestyon ki nou pe demande Mr Speaker.

Menm si bokou larepons pou sa bann kestyon pa depann antyerman lo aktivite ekonomik Sesel tousel me osi lo aktivite ekonomik global, erezman Minis in kapab met tou sa bann kart ater e partaz zot enn par enn pou eksplik nou klerman.  Par kont Mr Speaker, lasante e ledikasyon i pa vreman en kestyon oubyen en lenkyetid dan lespri nou pep dan Bidze tou le Desanm.  Sa de domenn i mentenir rikord avek plis larzan toulezan e zot reste endirekteman free dan nou pei.

Mr Speaker, Minis in osi kapab etabli serten forecast lo kimannyer keksoz pou ete dan bann lannen ki pe vini.  Pli enportan dan sa bann prozeksyon pou lannen prosen se ki nou ekspekte vwar nou lekonomi ogmant par 3 poursan, aktivite tourizm i ekspekte ogmant li osi par 3 poursan an 2013, reveni total ki ekspekte ganny anmase an 2013 i R6.3 bilyon, nou ekspekte osi vwar dapre Minis komansman plizyer proze an 2014.  I annan plizyer ankor me mon pa pou refer diskour Minis.

I enteresan alor Mr Speaker i paret ki Gouvernman Prezidan Michel i komans son lakours lo lalinny finisyon.  Vedir i planifye son vizyon an prenon kont longer zistans lakours, afen ki tou keksoz i ganny accounted for pou arive akonplir lalinny finisyon en lot lakours.

Nou’n vwar pandan lannen 2012 Mr Speaker bann polisi moniter e fiskal ki’n ganny mentenir oubyen aziste pou soutenir nouvo lanvironnman ekonomik lokal e global.  Nou’n osi vwar plizyer nouvo lalwa ki’n ganny entrodwir isi menm dan sa Lasanble avek lobzektif pou garanti sikse ekonomik Sesel.  Alafen tou i depann lo volonte kolektif tou Seselwa pou travay ver plis progre.  Si nou dir e aksepte ki sa Bidze 2013 i enn ki pou tous lavi tou Seselwa vedir nou bezwen alor aksepte ki sa Bidze pe apel Lepep Seselwa an antye pou reste ini otour son lakonplisman.

En Bidze i pa zis en zafer Gouvernman Mr Speaker, se larzan piblik tax payers money ki finalman fer li posib ki sak lannen pei i annan larzan pou depanse.  Se mon larzan, ou larzan e nou larzan ki dan sa Bidze ki fer nou bezwen take ownership sikse devlopman nou lekonomi anprenan seryezman nou responsabilite dan sa nouvo lannen 2013.  I annan en lapel pli for pou nou travay pli dir lannen prosen, an komansan par mwan menm Mr Speaker.  Nou tou nou kapab met en pti zefor anplis dan sa Nouvo Sesel.  Letan nou pe demann bann gran biznes pou fer plis kontribisyon nou pe osi demann bann travayer dan sekter piblik pou met plis determinasyon dan zot fonksyon.

Mr Speaker i vre ki loportinite pou komans en biznes ozordi i enplik mwens lanpayaz birokratik, me i reste tre difisil pou en dimoun ganny en morso later pou komans en biznes komersyal Sesel.  Mr Speaker mon reste solider anver bann ki pe espere pou en morso bout later pou komans debrouye dan distrik Anse Royale.  Dezorme lafors nou travayer i trouve dan sekter prive e mon apresye ki Minis in eksplik byen bann mezir ki son Minister pe antreprann pou ankouraz kreasyon bann pti biznes me sa i devret ganny eksprimen atraver e dan tou lezot Minister konsernen.

Pou sekter piblik nou bezwen ganny fer rapel ki malgre bokou nou bann servis i paret free of charge dan sa pei, nou bezwen garanti ki nou kontinnyen delivre bann servis gouvernmantal avek lafyerte, avek lapolites, avek en sourir e avek en lanvi travay.  Se sa renesans sosyal ki nou pe ekspekte vwar dan bann landrwa travay ki se swa prive oubyen Gouvernmantal a better service delivery Mr Speaker.

Logmantasyon saler i pa zis vedir plis pourvwar d’achat oubyen plis motivasyon dan en louvraz.  Logmantasyon saler i osi mars avek plis responsabilite, plis performans.  Plis performans ki ler dan en next appraisal sef i trouv rezon pou ogmant saler son staff oubyen donn li additional incentives i a fer li freely avek lizye fermen.  Malgre sa Mr Speaker, i byen note ki i annan bokou dimoun ki vreman debrouy tre dir dan sa pei.  I malere ki serten zot pa ganny byen rekonpanse pou zot zefor.  Mon admir bann lotel kot ki serten bann travayer Seselwa i perform full kilo knowing ki lafen dimwan i pou ganny rekonpanse avek service charge oubyen bann landrwa prive ki lafen lannen staff i ganny rekonpanse avek bann bonus sibstansyel dapre zot work delivered pandan lannen.

Lo sa pwen nou rekonnet ki dan Bidze i annan provizyon pou 12 nouvo scheme of service ki pou ganny enplimante an lannen 2013 dan serten Departman Gouvernman.  I pli soulazan pou vwar ki parmi sa bann scheme of service i osi annan provizyon pou bann ners.  Nou konn tre byen ki nou bann ners i travay tre dir lizour koman aswar pou garanti proteksyon lasante nou pep.  E pou sa plis ki 15 ners ki sorti dan distrik Anse Royale enkli bann ki travay dan vye lopital Anse Royale osi byen ki tou bann leres ki travay dan nou servis lasante.  Nou espere ki sa nouvo scheme of service i garanti ki zot byen ganny rekonpanse.

Lannen 2012 parey tou larestan lannen depi lannen 2008 i pa’n sitan fasil me in bokou pli meyer ki nou ti pe ekspekte Mr Speaker.  Koud lavi pri petrol lo market enternasyonal osi byen ki lokal in kontinnyen monte e sa in reste en konsern pou tou dimoun enkli nou Gouvernman e Gouvernman in fer tou sa ki i kapab pou soulaz sitiasyon kot in posib.  Me ki nou’n vwar Mr Speaker?  Lakantite dimoun lo lasistans proteksyon sosyal in diminyen sorti 5000 an 2011 pou ariv 3500 sa lannen, lannen 2012.

Savings Mr Speaker, sa servis in ganny etabli zisteman pou cushion bann moman difisil dan fanmiy.  Nou alor demande ki sa servis i pli byen ganny eksplwate dan lannen 2013, ki nou dimoun i vwar li konman en privilez pou kapab resevwar en sipor anplis akoz lamazorite pei ki pe pas dan sa kriz ekonomik parey nou napa e mon repete Mr Speaker lamazorite napa en sistenm proteksyon sosyal parey ki nou nou annan isi Sesel.

Mr Speaker me kan nou pou osi aret vwar vagabondaz me plito en lazenes for e travayan dan sa pei?  Nivo somaz dapre Minis in reste mwens ki 3 poursan ki mwan mon krwar i plis Mr Speaker.  I annan bokou plis dimoun ki pa pe travay dan nou pei e sa i pou plizyer rezon.  Sepourtan i annan en kantite loportinite pou fer bann travay onnet dan nou pei.  Nou bezwen fer zefor ki sa poursantaz i desann ler nou pe planifye e regard lavenir ekonomik nou pei.  E andeor bann fleo ki pe ronz nou sosyete e anpes nou lazenes form parti nou lafors travayer i annan ozordi plizyer aktivite ki sa Bidze – Bidze 2013 pe ankouraz nou bann zenn pou partisip ladan.  Enn parmi se langazman nou bann zenn dan lanmizik.  Par lefe ki pou napa Value Added Tax (VAT) lo lenstriman mizikal i pou fer ki i pou vin enpe pli fasil pou nou bann zenn partisip dan bann proze mizikal olye tonm dan drog avek lalkol.

Mr Speaker depi konmansman sa lannen nou’n depans apepre R50 milyon dan Bidze nasyonal lo bann aktivite kont lalit piratri.  Erezman Msye Rolly Tambara, Msye Marc Songoire in kapab ekout diskour Bidze se zot sa lannen e zot pou kapab pas nwel ek lannen avek zot fanmir gras a zefor Prezidan Michel.  Prezidan Michel in garanti ki pou sa lannen, lannen 2013 i annan ankor R50 milyon ki’n ganny plase dan Bidze pou bann aktivite kont piratri.  Me domaz ki ler pei pe lager kont piratri nou osi kontinnyen vwar kriminel pe anmenn drog atraver nou lanmer dan nou pei.

Nou Lasanble in pandan lannen 2012 mentenir son pozisyon lo problenm drog dan nou pei Mr Speaker.  Nou’n senpleman fatige avek tousala e demande ki lalit i kontinnyen.  Mr Speaker ou konn tre byen ki malgre bon performans nou Lasanble la mon pe koz lo sekretaryat nou Lasanble, sa enn brans nou Gouvernman pe fer fas avek bokou defi, tel ki rekritman plis staff, training e ogmantasyon kapasite bann staff, merit pou plis lesanz avek lezot Parlman, merit pou plis modernizasyon e standar nou Lasanble pou li ariv lo pli o nivo norm enternasyonal.  Nou pe alor demande ki Minis Finans i pran konsiderasyon bezwen pou Lasanble Nasyonal ganny lotonomi son prop Bidze nasyonal pou fer ki sa bann defi a kapab pli byen ganny adrese e tackle.

Mon ti a profite pou felisit ou e ou bann staff Mr Speaker mersi pou bon travay ki nou sekretaryat Lasanble pe fer.

 

(Applaud)

 

HON DEREK SAMSON

En lot pwen enportan dan sa Bidze 2013 Mr Speaker se mentenir nou diplomasi aktiv.  Bidze pe fer provizyon pou konstriksyon Lanbasab Sesel Addis Ababa an Etyopi.  Mon oule zis soulinnyen ki si nou oule ogmant nou lyen avek bann pei Lanmerik Latin parey nou oule fer li avek bann pei Lafrik nou pou bezwen pa tarde pou ouver Lanbasad Sesel an Cuba.  En pei ki nou annan bokou etidyan pe etidye e ki nou rezevwar bokou led avek.

Lokalman Mr Speaker R1.2 milyon pou bann proze Gouvernman Lokal dan bann distrik enkli distrik Anse Royale in ganny rezerve pou lannen 2013.  Mr Speaker Departman Kominoter avek Lotorite Distrik in sanpyonn plizyer proze Anse Royale e dan tou lezot distrik e sa i tre apresyab e san dout i merit kontinnyen.  Mersi.  Me nou osi rekonnet ki serten bann proze distrik i pa komans plito a ler e alor pa arive fini lo dat ki in ganny set pou rann louvraz dan nou distrik.  Konsern prensipal se ki serten sa bann kontrakter ki arive ganny bann tender zot senpleman pa serye e zwe avek proze distrik.  Parkont nou bezwen lev sapo anver bann ki fer li tre byen ki swiv bann norm ki’n ganny mete pou sa bann tel proze, e si proze pa ganny swiv de pros kalite finishing sa bann prozi i kapab met otaz lobzektif sa ta larzan ki distrik i gannyen toulezan.

Community Devlopment i kapab zis senpleman dir avek DA ki in perdi larzan proze si proze pa’n terminen lafen lannen, e sa fodre nou revwar lannen prosen Mr Speaker.

Mon ti ava profite demann Minis pou ekplik nou akoz ki larzan proze distrik ki pa’n ganny servi dan lannen A pa kapab retourn kot distrik dan lannen B.  A sa pwen mon ti ava kontan felisit e dir mersi tou staff Administrasyon Distrik Anse Royale pou travay ki zot pe fer avek lezot lenstitisyon e bann lezot manm fonksyon nou distrik.

Bidze pe osi apel bann biznes prive pou travay ansanm avek distrik e pratik sa ki nou apel Corporate Social Responsibilities. I byen note e osi dir mersi pou bann ki pe deza fer li Mr Speaker.  Bann biznes ki pe ed nou bann zabitan, menm si parfwa se sa bann menm zabitan ki serten i kas e andomaz batiman sa bann biznes ki pe ed nou dan en kote.  E Gouvernman i devret anretour mon krwar Mr Speaker, kontinnyen fer zefor pou ed sa bann tel biznes pou gard zot lenvestisman pli progresiv pou ki zot anretour zot ava kapab kontinnyen ed nou distrik.

En biznes enportan dan Anse Royale se lagrikiltir.  Mon asire Mr Speaker ki nou bann fermye in kontan pou antann zefor finansyer ki Bidze pe anmenn anver lazans lagrikiltir pou asire ki bann fermye i pli byen kapab debourye e prodwir lannen 2013.  Minis ti dir ki pou soutenir prodiksyon bann fermye Minister responsab pou Resours Natirel pou kontinnyen travay tre pros avek bann biznes tel ki bann sekter touris pou ankouraz zot pou aste plis prodwi lokal tel ki lavyann, dizef, fri ek legim.  E pou napa Value Added Tax (VAT) lo bann manze zannimo.  Fantastik Mr Speaker, me parkont nou bann fermye pe still esper bokou plis tel ki zot lease agreement ki Minis Sinon ti dir resaman ki se Atorni Zeneral ki responsab retar sa bann tel dokiman e anplis bann fermye pe osi esper en scheme lasirans pou zot bann prodwi anka dezas.

Ansanm avek lagrikiltir ki lavenir bazar, bazar pwason dan nou bann distrik Mr Speaker?  Konsept lavant bann prodwi lanmer parey pwason in ganny prouve pou prezant plis sekirite e lizyenn si i ganny vann dan lafason ki biznes parey Oceana Fisheries avek Sea Harvest pe fer li ozordi kot peser i ganny ankouraze pou lapes e ler zot antre vann zot pwason an gro avek en lot vander oubyen permet zot bann koleg sa ki nou apel bann peser ater vann zot pwason me selman dan en batiman ki’n ganny konstri e dezinyen pou stoke e vann li byen anba bann kondisyon ideal.  Se sa lavenir bazar dan nou pei Mr Speaker.

Mon bouz lo en lot pwen Mr Speaker sa se kote nou konsonm nou fri ek legim e nou pwason? Kot nou lakour, dan en lakaz.  Me Mr Speaker sey al fer laplikasyon pou en loan lakaz demen bomaten kot enn sa bann labank komersyal.  I annan bokou zabitan dan mon distrik ki pe anvi ganny en loan pou batir zot prop lakaz, me zot labank pa pe fer li fasil pou zot kapab fer li.  Nou pe esper avek pasyans ki Labank Santral i entrodwir bann regilasyon ki pou fors bann labank komersyal pou fasilit loan lakaz pou zot bann kliyan.  E sa Mr Speaker ava ganny siporte par plis konpetisyon lo marse lavant materyo konstriksyon letan STC i a lans li osi dan sa marse.  Letan nou pe koz lo lakaz mon pe osi realize Mr Speaker ki nou bann lakaz i bril fasilman denozour, ki malgre bokou zefor pou edik nou popilasyon lo proteksyon kont dife parkont dan tou Bidze nou pe tann koz lo stasyon tenny dife lo Mae, Pralen e menm lo La Digue.  Lannen pase dan mon premye diskour komanter lo Bidze mon pa ti manke pou demande ki nou pa tarde pou etablir en stasyon tenny dife Anse Royale.  Ozordi mon pa krwar mon devret pe repet mon lekor ankor Mr Speaker akoz statistik dife dan rezyon Les ki pe plito anvoy leko pou en stasyon tenny dife Anse Royale ganny etablir.

Lopital Anse Royale pou mon terminen Mr Speaker, nouvo lopital Anse Royale dan dokiman Bidze in ganny endike ki pou sa lannen ki nou ladan, la ozordi 2012 i annan 3 milyon pou sewerage treatment plant – R3 milyon ki’n ganny endike kot nouvo lopital Anse Royale e en lot R3 milyon pou en lot sewerage treantment plant ankor sa voyaz kot Wellness Centre Les Canelles.  Parkont pou lannen 2013, lannen prosen 3.5 milyon in ganny endike pou renovasyon lopital ki an operasyon ozordi Anse Royale pou fer li vin en Outpatient Clinic.  Mon reganny lespwar Mr Speaker, Onorab Bristol, Lucas e menm Onorab Murielle Marie i devret osi pe resanti en pti soulazman e mon demann zabitan Anse Royale pou osi annan lespwar e pasyans.

Mr Speaker parey bokou distrik, distrik Anse Royale pou benefisye avek plizyer proze pou lannen 2013.  I mon dezir profon pou mansyonn zot tou me sa bann zabitan ava kapab tande boner lannen prosen ler Ladministrasyon Distrik i fer son yearly review.  Pou la mon ava plito wrap up Mr Speaker.  Kontinite konstriksyon en lekonomi en pep, en pei, en lavenir tournen otour sikse pou vwar en Nouvo Sesel i depan lo tou Seselwa, kot nou reste proaktiv e pragmatik dan nou langazman avek sa pep, bann set back teknolozik nepli egziste menm si Intelvision i parfwa fer nou krwar otreman, pei in ganny son kab fiboptik Mr Speaker – pei in ganny speed lavi i devret bokou pli vit.

Diplomasi aktiv Prezidan Michel in fer ki nou’n annan plis bann bon zanmi aktiv dan larezyon e aryer.  Pa setou nou bann zanmi i bokou parfwa bon ker.  Parfwa zot donn nou e parfwa zot pret nou e nou bezwen rann zot ler nou trouv li posib.  Zisteman Mr Speaker mon espere ki dan Bidze 2014 nou a kapab ganny en nide lo leta finansyer sa bann grants ek loan ki nou pei i gannyen sak lannen.  Kote i ganny depanse?  Lekel ki depans zot?  Konbyen i reste? Bann detay parey i enportan pou lepep ki pe ekout nou.

Risk finansyer global i reste en menas pou nou tou e pou bokou pei au monde me ler nou pe fer lakours avek enn de lobstak otour nou bann risk fodre nou gard nou lizye fikse lo lalinny finisyon me anmenmtan atantiv lo kwa ki pe bouze otour nou.  Ou bezwen met anplikasyon bann stratezi fonde lo resers e lenformasyon ki mezire e korek, e fer sir ki lalinny finisyon i reste ou lobzektif e ki ou plan arive i pa negliz ou vizyon.  Lavenir i alor briyan e viktorye pou Sesel.  Mr Speaker nou pa devret vwar sa drol akoz se nou lepep e lepep se nou.

Mon ti ava kontan dir tou dimoun mersi e tou dimoun bonn fet.  Mersi bokou.

 

(Applaud)

 

MR SPEAKER

Onorab Meggy Marie.

 

HON MEGGY MARIE

Mersi Mr Speaker.  Mr Speaker, Minis, koleg MNA e tou dimoun espesyalman zabitan Anse Aux Pins ki alekout bonn apre midi.  Mr Speaker Bidze 2013 in ganny prezante ek lepep Seselwa isi devan nou Lasanble.  E nou pe egzers enn nou responsabilite Kontitisyonnel.  Nou annan sa devwar pou nou donn nou lopinyon e reaksyon avan ki nou donn nou aprouvasyon Bidze pei pou lannen 2013.  Sesel in sibir e menm vin viktim sa problenm ekonomik ki lemonn in pas atraver pou plizyer lannen.  I pa’n ganny eparnye akoz i en pei ki deplizanpli pe devlop rapidman.  Nou’n bezwen fer fas ek sanzman dan pri manze, fuel, e lezot ankor.  Nou Gouvernman in toultan reste sa Gouvernman ki proaktiv, rezilyan e pare pou met an plas bann mezir ki pou kapb ed nou navig sa tanpet ekonomik ki lemonn ti pe fer fas avek.  Nou’n met an plas bann mezir neseser ki pou ed nou stabiliz lekonomi nou pei kot nou kapab reste fonsyonnel, kot personn pa ganny kit ater an dotmo mentenir en bon standar lavi.

Mr Speaker si en Bidze parey sa enn ki’n ganny prezante ozordi i posib set akoz sa bann mekanizm ki’n ganny met an plas par Gouvernman aktyel pou ede ki nou pei i reste en pei kot son lekonomi i reste stab e ki son pep i reste o sant devlopman.  Partipasyon bann sekter prive ki moter nou lekonomi in osi zwe en gran rol tou dernyenman dan devlopman nou pei.  Sa i montre sa vre sans patriyotik ki nou pep i annan pou zot pei menm si i annan en pti minorite ki pa ankor ganny en konpran sa.  Parey koze I dir time will tell.

Mr Speaker bokou in ganny dir e bokou pou ganny dir anndan e andeor nou Lasanble lo Bidze 2013.  Mon santi ki sa Bidze ki’n ganny prezante devan nou Lasanble ozordi i en Bidze ki reflekte zefor en Gouvernman ki responsab e osi sakrifis en pep ki’n toultan annan son pei a ker.  Sa Bidze i enn ki’n tous tou kous nou sosyete.  Langazman nou Prezidan, Gouvernman ek sekter prive nou’n kapab met nou pei lo en nivo ase o lo klasman labank mondyal pou vin en landrwa kot i pli fasil pou fer biznes.  Nou’n envestir bokou pou kapab fer sa posib e nou ekspekte ki nou kapab fer li pli byen si nou mentenir sa bon stratezi e vizyon e sa pou vreman ede akseler devlopman nou pei alavenir.

Bidze 2013 i enn kot nou vwar Gouvernman pe met plis larzan konpare avek lannen pase sa i montre devosyon ki nou Gouvernman i annan pou akseler devlopman nou pei.  Mon vwar en logmantasyon dan Bidze plizyer Minister e Lorganizasyon, sa i en lendikasyon ki Gouvernman in pran kont bann defi ki bann Minister e Lorganizasyon ti pe fer fas avek.  En logmantasyon parey mon krwar ki i pou ede amelyor performans sa bann Minister e Lorganizasyon pou ede mentenir nivo nou performans e donn en meyer servis nou pep.  I annan serten sekter ki pe ganny sipor dan depans santral nou’n osi vwar en logmantasyon dan sa Bidze tel ki Tertiary Education Fund, progranm sipor sosyal, finansman pti biznes, NHRDC training fund, e sibvansyon karbiran pou bann peser – tousala in ganny pran an konsiderasyon par Gouvernman pou ede amelyor lavi pep Seselwa.  Nou welcome sa inisyativ Gouvernman pou aziste saler travayer e amelyor scheme sa bann Minister swivan: ledikasyon, lasante parmi lezot ankor.  Mr Speaker konsiderasyon in ganny pran ler sa Bidze ti pe ganny prepare anprenan kont sa bann Minister.  Mon konvenki ki sa bann Minister a kapab rezourd serten problenm amelyor performans par egzanp rezourd problenm mank teachers dan lekol akoz sa i pa pou asire ki pei i devlop dan en bon direksyon, asire ki graduates ki retourn dan pei pou travay i annan en lanplwa.  Mon demann Gouvernman pou kontinnyen amelyor servis lasante, amelyor scheme bann ners e plis ankor.

Mr Speaker mon osi welcome sa desizyon pou fer desann laz ki permet veykil pou bann dimoun ki dan biznes Taxi, fer desann leavy lo veykil ki ganny enporte pou biznes Taxi aparti Zanvye 2013.  Mon osi krwar ki pou napa gran diferans pou bann dimoun ki servi Taxi si nou pa reviz pri meter ki sarz bann konsomater, bann dimoun ki servi Taxi e si nou aziste sa mon krwar i a ede pou amelyor kou ki en pasaze osi i peye ler i bezwen pran Taxi.  An gro nou kapab dir ki sa benefis a vin pou nou tou.

Annou prezan get en kou problenm lozman dan nou pei ki alafen i afekte sa zabitan ki dan nou distrik.  Mon krwar ki Gouvernman in fer en bon pa pou li pran an konsiderasyon sa problenm lozman dan en lot dimansyon.  Bokou nou zabitan i oule ed zot lekor lo kote fer zot prop lakaz me tou dernyenman i pa’n fasil ditou akoz lentere ki labank ti pe sarze i tro o e mazorite labank pa ti pe donn loan pou lozman.  Me la nou’n trouve ki an Zanvye 2013 Gouvernman pou komans enplimant serten mezir pou limit bann sarz ki labank komersyal i enpoze lo housing loan osi byen ki ogmant kantite larzan ki zot pret sa sekter.  Mon krwar ki sa i en pa vreman esansyel ki Gouvernman in pran sa i a osi ed sa pti dimoun li osi ki anvi ed son lekor, e i a osi ede pou redwir problenm lozman dan pei ki’n toultan en prensip fondamantal nou Parti.

Mon ti a demann Gouvernman pou konsider fer lakaz dan distrik ki annan teren akoz sa i a ede pou kit bann zabitan dan zot prop distrik parey dan mon distrik Anse Aux Pins.  Mon pe osi demann bann ki’n fini ganny asiste pou gard zot langazman pou pey zot lakaz – sa i a ede fer li posib pou Gouvernman kapab ed enn lot zot frer ki dan bezwen.

Mr Speaker ozordi mon oule fer sir ki zabitan mon distrik i rekonnet komitman nou Prezidan ler i ti vizit nou distrik e sa komitman nou trouv li dan Bidze 2013.  In gard son promes e la nou vwar ki en sonm R2.1 milyon in ganny allocate pou konstriksyon semen Nourrice kot pon Berta ki ti en rev nou zabitan pou plizyer lannen.  Ozordi sa zabitan ki ti pe esper sa semen pou plizyer lannen i kapab konstate ki zot pa’n ganny kit ater.  Mon pe demande ki sa semen i ganny fer byen e ler i terminen i en semen ki konplet ek bon sistenm drenaz, lalimyer e fonksyonnen, eksetera.

Mon pe osi remersi Minister Lasante pou renovasyon lo klinik Anse Aux Pins me mon toultan ganny dir par zabitan mon distrik ki i vreman neseser ki Minister Lasante i merit pran konsiderasyon pou met en lanbilans permanan kot sant lasante nou distrik.  Alors mon pe pas zot mesaz.  Zabitan Anse Aux Pins i swete ki Bidze pou lapolis i osi pran kont renovasyon kordgard oubyen rekonstrir en lot stasyon lapolis dan distrik vi ki nou deza annan teren.

Lot Minister ki nou zabitan i swete ki dan son Bidze i pran konsiderasyon amelyor bann servis ki zot donn nou distrik i land transport. I annan enpe letan ki zabitan distrik in demann lalimyer dan serten nou bann semen segonder ki ganny servi par bann zabitan ler pe al travay aswar e osi letan zot bezwen deplase kan in ariv aswar e i demann bokou lalimyer lo semen e nou demann zot pou fer li boner avan ki okenn keksoz i arive avek nou zabitan.

Mr Speaker zabitan Anse Aux Pins i swete ki devlopman Ile Soleil i kontinnyen lo en bon semen akoz nou asire ki sa pou anmenn devlopman e osi kre lanplwa pou zabitan nou distrik.  Mon pe demann Gouvernman pou ler pe fer devlopman Ile Soleil pou li pran kont devolpman sa landrwa kot peser i servi pou vann pwason kot zot trouv li difisil akoz napa landrwa pou zot stok zot masin, napa bon laranzman pou servi delo, toilet e lezot problenm ankor.

 

(Applaud)

 

HON MEGGY MARIE

E nou pe demann Gouvernman pou kontinnyen met nou pep o sant devlopman nou distrik ler bann devlopman pe ganny enplimante.

Lo non zabitan distrik Anse Aux Pins e Per laparwas mon pou remersi Gouvernman pou son sipor ki in aporte dan konstriksyon nou zoli legliz e nou swete ki Gouvernman i kontinnyen donn son sipor dan lefitir.  Sa sipor in ganny apresye par tou zabitan mon distrik.  Mon pe demann Minister Ledikasyon pou pran an konsiderasyon problenm fencing kot lekol Anse Aux Pins dan sa Bidze 2013, reparasyon sa fencing kot lekol i bezwen ganny fer o pli vit posib pou rezon sekirite bann zanfan.  Sa i en konsern ki’n ganny anmennen par headteacher e Manm PTA tanzantan sak fwa ki nou’n annan meeting zot in met dan mon latansyon.

Pou terminen mon ti a kontan remersi zabitan Anse Aux Pins pou zot sipor e kontribisyon ki zot in anmennen pou nou distrik pandan lannen 2012, mon osi kont lo zot sipor e kontribisyon pozitiv pou lannen 2013 e ede pou fer nou distrik avanse.  Nou distrik i bezwen sipor nou tou pou li bouze.

Mr Speaker mon swet Per Fondater nou Parti ek son fanmir, Prezidan Michel ek son fanmir, Vis Prezidan ek son fanmir, tou Minis ek zot fanmir, tou Manm Onorab ek zot fanmir, staff sekretaryat Lasanble Nasyonal, zabitan Anse Aux Pins ek Lepep Seselwa en Zwaye Noel e Bonn Ane 2013.  Mersi zabitan Anse Aux Pins pou sa konfyans ki zot in met dan mwan.  Ansanm annou kontinnyen travay dir.  Mon pou siport sa Bidze pou lannen 2013.  Mersi Mr Speaker.

 

(Applaud)

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.  Mr Speaker deza 1an, 1an depi ki mon’n asiz dan sez, 1an depi ki mon reprezant bann zil pros dan sa Lasanble.  En lannen kot mon’n aprann bokou, tann bokou e trouv bokou.  Zabitan zil pros zot ti anvoy mwan la pou koz pou zot.  Bonn apre midi fer zot konfortab e swaye atantiv.  En lannen kot nou’n avans en pa pli devan dan nou devlopman.  Travay reparasyon lo lopital La Digue in konplete, konstriksyon 8 unit pou pros pou terminen, travay konstriksyon lo nou stasyon tenny dife in demare, kiosk pou bann operater bisiklet in konplete, laplipar nou bann pti proze distrik in konplete eksepte semen simityer ki byento pou al konplete.

Silwet osi in benefisye anba proze distrik e sa se multipurpose court an kolaborasyon avek IDC ek lotel Hilton Labriz Silhouette.  Nou dir zot mersi.  Nou pou kontinnyen byen servi nou larzan dan Bidze pou kapab fer lezot pti proze dan distrik.

Mr Speaker Vandredi 9er bomaten nou’n antann en gran lelorz 30 minit lo lot kote latab lo ki Minis ti’n devret met dan Bidze 2013, e ki kantite ti’n devret met dan sa Bidze.  En lelorz ki mon’n ganny lenpresyon mon’n deza tande par la kekfwa taler i a vin dan lespri.  Anyway sa ti antre zot kakatwa menm bar sa en.

Mr Speaker toulezan dan sa Lasanble se menm zafer sorti lo lot kote latab, sa se logmantasyon saler.  Nou tou nou ti a kontan ganny en pti pe plis toulezan dan nou lanmen, enn ler  ou a krwar pou zot Bidze en pei i selman about logmantasyon saler.  Avan mon al pli lwen les mwan dir zot ser pep Seselwa ki malgre nou tousel lo nou pti zil nou pa tousel dan sa monn.  Sa monn ouswa les mon a dir pli byen sa gran vilaz dan ki nou pti zil i form parti i ankor dan kriz.  Pa akoz i annan detrwa zour ki nou’n ris likou deor pou get lo kannal e nou’n vrwar lanmer kalm nou dir tanpet in fini.  Mon konn byen ki mon pe dir akoz 4 fwa par semen mon monte desann lo sa kannal pou vin isi dan sa Lasanble.  Mon konn byen ki pandan vannswet i annan zour ki lanmer i donnen me sa pa vedir ki vannswet in fini – se sa ki mon pe sey dir ler nou koz lo nou pei fas a kriz mondyal.  Mon repete Mr Speaker malgre bon performans ekonomik Sesel i ankor dan reform e koman en Gouvernman responsab nou bezwen reste pridan dan tou nou bann desizyon.  Mon pa en gran matematisyen mwan me menm sa pli pti lespri i konnen sanmenm kalkile ki pran ros La Digue par egzanp met lo en kote balans e lo lot kote pran detrwa gren disab lo lans Beau Vallon i pa pou balanse.  Mon’n fer sa alizyon Mr Speaker akoz i touzour annan en pti group dimoun ki touzour pe esey fer nou pep krwar ki Bidze en pei i devret toulezan fer gran logmantasyon lo saler akoz dapre zot sa pou rezourd tou problenm.  Pa bliye larzan ki pou sorti dan kof Gouvernman.  Sa kof kot tou larzan pou osi sorti pou devlopman pei ki swa progranm sosyal ki afekte tou dimoun, larzan ki pou bezwen fer marse sa sistenm ledikasyon kot ou zanfan, son zanfan e mon zanfan i al lekol, larzan ki nou pou bezwen pou fer fonksyonnen progranm sosyal, progranm lasante osi.  Parfwa mon demann mon lekor ki zot vre lentansyon ler zot fer sa bann demann parey.

Mr Speaker mwan mon konn byen ki zot azanda.  Ler keksoz pou al mal la, ou konnen ki zot pou dir!  Bef dan disab sakenn vey son lizye.  Me nou nou dir wrong number dial again akoz osi lontan ki sa Gouvernman i la, opouvwar zanmen sa pou arive.  Sa zafer bef dan disab sakenn vey son lizye i en zafer ki’n touzour e pou reste touzour reste kont prensip sa Parti e sa Gouvernman.  Nou prensip se ki tou nou dimoun i egal dan tou sa ki nou fer, dan tou nou polisi e desizyon napa personn ki ganny kit deryer.

 

(Applaud)

 

HON CHANTAL GHILSAIN

Mr Speaker nou pep fodre pa zanmen bliye ki apard Gouvernman santral i osi annan sa sekter prive ki pe fer marse sa pei.  Sekter prive i bezwen reste lo balans avek Gouvernman santral parske ler ou tir tro bokou lo en kote la ouswa ogmant plis lo en lot kote sa pou anmenn en debalans total dan lekonomi.  Donn 300 parey mon abitye dir zot ti pou dir ti’n devret donn 500, e si ti’n donn 500 zot ti pou dir ti’n devret donn 1000.  Si sa ti leka zis mazinen ki ti pou arive avek sekter prive.  E nou tou nou konnen ler nou annan anplis dan lanmen ki arive – nou depans plis.  En lot kestyon ki nou kontan demande se ki i annan dan sa Bidze pou nou?  Me tou i pou nou pou – pa akoz i pa larzan ki nou kapab resevwar dan nou lanmen i pa vedir napa pou nou.  Mr Speaker mon konnen ki sa Msye ki li i pe tous R3000 par mwan pe demande be zot la ki sa madanm pe dir ankor.  Msye dizon demen bomaten i arive ki ou trouv ou san en lanplwa kot ou bezwen esper dizon ankor 3 mwan pou ou kapab reganny en lot, mon konpran ou soufrans pandan sa moman me pa akoz ou pa travay a sa moman ki ou zanfan pa pou kontinnyen al lekol, ou malad ou pou kontinnyen ganny sonnyen, tou sa i ganny garanti dan sa Bidze, alors i pa en keksoz ki ou tyanbo dan ou lanmen me selman i la pou ou.

Mr Speaker, Bidze i dokiman lenformasyon pli enportan en Gouvernman, tou sitwayen i reste e devret konsernen avek Bidze akoz i tous tou dimoun.  Sa dokiman ki eksplik performans finansyel Gouvernman pou lannen pase i fer nou konn progranm finansyel e polisi Gouvernman pou lannen ki swiv e i osi permet sitwayen konnen ki fason zot standar lavi pou ganny afekte par bann polisi finansyel Gouvernman pou lannen ki vini.

Bidze 2013 i enn tre enportan pou mon kominote, mon lafyerte ozordi se ki nou dimoun La Digue i travay e i debrouye e mon pou dir zot touzour mersi.  Laplipar zot pe sey fer de louvraz pou zot kapab soutenir zot fanmir e sa standar lavi ki pe viv e se pour sa rezon ki dan sa popilasyon 3000 dimoun selman 15 a 20 dimoun ki lo welfare.  Ladan en dizenn i lo welfare permanan pou rezon malad.  Me Mr Speaker mon pe koz pou sa zenn madanm la ki annan li 40an e i annan 7 zanfan, son premye fek ganny 18an e i travay avek son manman koman carer.  Sa madanm i resevwar li selman en saler R1700 e i annan 7 zanfan anba family support e parey sistenm an plas sa ki son saler lafen dimwan pa kapab fer de bout zwenn se welfare ki zot ale e tou bann Onorab dan sa Lasanble i konnen ki pe pase laba.  Ka sa madanm i vreman konplike.  Mon demande ki apard swiv sa lalwa lo papye pou diferan pwa e mezir pou lasistans – sorti enkou dan sa biro e al vizit sa dimoun akoz malgre ou dir li anmenn son bill parfwa i napa dan ka sa madanm i reste dan lakaz son manman e malgre i ede pey bill sa bill lakaz elektrisite, delo i lo son manman, byensir i pa pou ganny aksepte pou li ganny welfare, me son ka i bezwen.  Onorab Volcere in koz bokou lo la e mwan mon pou donn li 110 poursan.  Donn nou zabitan lo zil en pli meyer deal.

Dapre dernyen statistik lanplwa i anann selman 28 dimoun ki pa pe travay, sa byensir i fer nou osi fyer.  Ou ki lo bann pti zil, ou ki annan ou prop biznes ou kontribisyon dan lekonomi sa pei i enn tre enportan, menm pli enportan parske kekfwa ou pa ti konnen se ou avek ou pti biznes ki ti moter nou lekonomi okour letan difisil ki nou pei ti pe pas ladan.

Bann pli gran pei o monn ozordi in trouve ki se inovasyon dan bann pti biznes ki lakle pou sikse ek kwasans ekonomik.  Ou ozordi ki’n komans lwe 5 bisiklet, demen ou pou annan 10 ou e dousman dousman ou biznes pou agrandi.  Ler biznes i grandi se plis reveni pou ou fanmir e lekonomi osi i agrandi.

Mr Speaker mon’n dir e pour toultan dir ki La Digue son ka i spesyal e a sak fwa ki annan keksoz pou met anplas dan Gouvernman Santral ki annan pti git keksoz anplas pou accommodate nou.  Lenstans gouvernans lokal lo La Digue i devret ganny revwar e bokou pli byen devlope ki ozordi.  Ler mon get mon zil i fer mwan mazin Sesel dan bann lannen kot i ti pe lager pou trouv son plas dan sa lemonn.  Tou ti trouv li koman sa pti dot lo map lemonn e personn pa ti pe mazin son pwisans koman en pei, nou’n debat pou nou lendepandans, nou’n konbat lenzistis sosyal, nou’n liber nou dimoun e fer zot debout koman bann fanm e zonm ki annan dignite.  Nou’n fer foulkan en group mersener ki ti’n fini debark lo nou later, nou’n konbat e pe kontinnyen konbat kont piratri e nou tou nou konnen ki lalis i long e ozordi se La Digue ki pa lager pou trouv son plas koman en zil e kominote egal a lezot kot nou lavi i vin pli eze.

Nou napa privilez pou mars dan en loto parey tou lezot Seselwa, sa i parmi kantite sakrifis ki nou’n bezwen fer pour ki sa zil i reste parey i ete ozordi, e an prezervan son larsitektir e idantite kreol.  Donk nou problenm pa neseserman parey pou Mae ou Pralen oubyen menm lezot zil ki fer son solisyon osi i devret annan en lot fason fer.  Mon konpran ki pa tou servis ki nou bezwen annan en lofis 7 lo 7 lo zil.  Me eski pa i pli fasil pou en zofisye desann omwen en fwa par semenn ouswa par mwan depandan lo servis olye fer nou zabitan depans sa de pti kas ki zot in trimouse pou gannyen monte desann lo sa bato pa konn botan ou movetan pou al Mae ouswa Pralen pou sa servis?

Afors koze e dir nou lopital in anfen repare me ziska ki tan ki nou dimoun pou bezwen espere pou vwar dantis? Ozordi i annan en dantis ki konsilte zis dan Zedi lo zil e si ou malad ledan Vandredi ou a bezwen manz ou douler ziska Zedi prosen pou ou vwar dantis.  E pa fer sa fot pou ou pey ou pasaz mont Pralen, parske laba osi ou pou dir non ou pa’n devret vin la.  Nou ti kapab konpran ki lontan ti annan zis en dantis ki ti pe deservi sa de zil – me la i annan de dantis olye en zour pa kapab fer de ou trwa zour La Digue?

Mon pe demande osi ki Gouvernman i revwar transportasyon bann ka emergency lo zil.  Sa i en keksoz ki pros ek mon leker,.  Helicopter konmela i dir pa vini aswar.  Lot swa se avyon e ou kapab mazin sa bat isi bat laba ki sa pasyan pe sibir dan sa pti bato pou fer sa traze pou ariv Pralen.  Zis mazinen yer swar menm en pti baba dan en ka tre kritik ti bezwen al Mae e dernyen avyon ti pou kit 8.30.  Parfwa mon demande si akoz nou en senp travayer lo en counter nou leker ouswa akoz nou reste endiferan avek soufrans lezot?  Ouswa zis akoz nou pe degaze pou al se nou.  Fer demann pou avyon esper sa pti baba repons ki ners i gannyen se ki non, pa pe kapab olye dir sa ners be les mon al vwar pli o, apre en senp call atraver en lot entervenan avyon ti nobou esper sa pasyan.  Mersi pou sa ki ti ede, mersi ners ki’n travay sa zour pou ede sov lavi sa pti baba, mersi pou tou lezot staff sa lopital ki touzour pe esey fer zot mye pou desarz zot responsabilite koman en ners ki travay pou sa kominote e ki fer li pou lanmour zot vokasyon olye zis koman en karyer ki donn zot en saler tou le mwan.

Mon konnen ki Minis in koz lo Corporate Responsibility.  La en domenn mon asire ki Onorab le de zil pou donn mwan lanmen la.  Bann businessmen lo Pralen, La Digue, Silwet, Fregate, Bird Island, lil Denis e tou lezot businessmen lo lezot zil, eski zot pa kapab met ansanm larzan pou nou kapab ganny en ambulance pou nou kapab transport nou malad silvouple Mae?  Sa i pa pou benefisye zis sa dimoun lo zil – pou deservi nou bann kliyan, travayer e menm fanmir sa bann dimoun.

Mr Speaker La Digue i annan li en popilasyon zenn ase signifikan.  En group zenn ki pa’n viv dan mon lepok ouswa dan ou lepok, me zot la.  Mon demann se ki Gouvernman i get zot enpe pli byen, ozordi sa lazenes napa en landrwa pou al defoule – discotheque in fermen, dan Sant Kominoter pli move zot dir i disturb zot kliyan, lo lasose pa borde, lo lans pli move Linyon baro i fermen 6er diswar, Anse Severe, Grand Anse i lwen 6er e sel landrwa ki reste se Anse Calice – me la zot pe lager a tou kase pou ferm sa landrwa osi.  Me kestyon, se kote sa lazenes pou ale?  Zot pou zis tourn an ron lo zil parey bann poul ki napa latet netonn pa si zot dan bodanmyen toulezour anfen Onorab Charles ti dir dan sa Lasanble pa tou keksoz ki bon koze.

Mr Speaker enn bann prensip fondamantal sa Gouvernman se fer sir ki nou vye paran i vyeir dan dignite.  Me nou kontan konpar nou avek lezot pei, me i touzour annan en group ki kot i bon zot konpare, me kot i pabon zot pa konpare.  Ozordi nenport ki Seselwa ki swa in kontribye ou pa ler i ariv son laz 63an i resevwar li en pansyon.  E toulezan dan Bidze i resevwar li son pti logmantasyon, kontan pa kontan sa ti en lalit Parti Lepep e i pou touzour reste pou nou sa.  Me bokou in kapab trouve dan nouvel kot sa vyeyar ti pe plere laba Lagres akoz i pa pe resevwar en pansyon, pandan ki ou pansyon pe ogmante isi la, laba Lagres sa vye in bezwen al mandyan.  30an servis i dir e ozordi i pa kapab tous son pansyon e isi Sesel napa okenn zonm e fanm ki’n travay 30an ki pa ganny zot pansyon.  Sa i akoz malgre tou pansyon nou bann vye dimoun i tou le lannen ganny garanti dan Bidze.

Mr Speaker tou bann dimoun i konnen ki nou bann zanfan La Digue i annan en kantite talan dan spor.  Me apre le 29 Zen ki arive? Napa swivi e bann talan i perdi koumsanmenm.  Nou annan en group zanfan ki zwe tenis e si zot vwar kondisyon sa kort tenis ou demann ou lekor si se lo sa kort ki sa bann zanfan in train e ozordi zot in kapab ranport meday lord adn konpetisyon enternasyonal.  Minister fer keksoz.  I annan en progranm ki tou zanfan Seselwa i devret konn naze, sa i byen.  Progranm i deroul lo Mae menm e La Digue e Silwet napa.  In konmanse La Digue, konman manrmay i komans bat de pti lanmen i arête.  Pourtan nou bann zanfan sa de zil nou travers kannnal toultan.  Minister fer keksoz.

Nou bann zwer foutbol e volleyball sa kantite larzan ki zot depanse pou mont Mae ler ou konpar avek sa ki NSC i donn zot pa ni menm en kar.  Initil zot dir lekip Mae osi parey – parske desann dan transpor zot e nou sak fwa nou lekip i desann zot desann omwen zis en fwa La Digue zot, be nou bann lekip i bezwen mont pou tou sa fwa ki sa kantite lekip ki i annan pou zwe dan sport.  So Minister fer en pti keksoz.

Mon pli gro demann ozordi devan sa Lasanble se ki Minister konsernen i fer en letid irzan lo sa kalite delo ki nou pe konsonmen.  Mon konpran ki pa delo desalinasyon ki problenm akoz partou Mae i konsonm delo desalinasyon.  Mon’n konsonm sa delo desalinasyon pandan sa dernyen 5an ki mon’n reste Mae, me La Digue sa delo ou zis pa kapab met dan labous, I somad.  Sa ki nou zabitan pa kapab konpran se akoz sa kastrol diri ki ou’n kwi bomaten la taler ler ou pou vini la in fini gate.  La nou pti bouyon bred mouroum ki nou tou nou kontan manze initil konman ou tenny dife anba kastrol manz li parske i pou gate.  Sa ki mon pe demande lo non mon zabitan se senpleman en letid lo sa kalite delo pwi.  Meeting apre meeting menm zafer ki’n leve.  Sa kestyon sewerage nou’n ganny dir ki larzan pou sistenm sewerage La Digue pou gannyen – me ki pou pran 3 a 4an pou konplete akoz ankor letid pou fer pou komanse sa an 2013.  Nou pou espere nou.

Mr Speaker okour tou mon lavi mon’n annan laz konesans mon’n kapab konstat en sel keksoz – sa se ki nou en pep ki konsonm en kantite e ler nou konsonmen i vedir nou depans en kantite.  Konsonmasyon pa vedir zis manze e bwar me tou sa ki nou aste e servi ki nou bezwen peye apre.  Trwakar ditan i bann keksoz ki nou pa vreman bezwen ouswa keksoz ki nou ti kapab esper en lot moman pou nou aste.

Minis koman ou la mon pou fer en pti demann ek ou.  Mon krwar nou tou nou kapab rapel sa moman kot nou tou nou ti komans anmas bann pti 25 sou pou met lo tenm.  Minis mon kapab demann ou, enplor ou si ou kapab koz ankor en kou ek sa bann labank sey re-entrodiksyon ankor sa parske bann manrmay i kapab anmas byen zot pti 25 sou.

 

(Applaud)

 

HON CHANTAL GHISLAIN

Mr Speaker la ki nou pe apros bann moman festivite mon konnen ki nou’n pti kominote lanbyans pa pou parey touletan rezon pou sa se ki sa dernyen mwan e ankor ozordi nou’n bezwen trouv nou pe konsol en lot nou pros, pou en pti kominote parey La Digue perdi 7 dimoun enn deryer lot i bokou.  Les mwan profite pou pas mon senser kondoleans a tou sa bann fanmir.  Ki bondye i beni zot e donn zot lafors pou sa lot lannen ki vini.  Annou kontinnyen reste solider enn a lot, pas en nwel e lannen dan lape.  Pou bann zabitan Silwet, Bird e lil Denis zot osi mon swet zot meyer ve.  Bon swe i al osi pou tou nou bann dirizan sa pei ek zot fanmir, Prezidan Michel ek tou son staff, Vis Prezidan Faure, Minis, Speaker e staff Lasanble Nasyonal, koleg MNA, staff lopital La Digue e Silwet, staff e etidyan lekol La Digue ek Silwet, mon DA e son staff mersi pou sa bon travay e kordinasyon pou lannen ki’n pase.  Ki bondye i kontinnyen beni nou zil e nou pei.  Mersi.

 

(Applaud)

 

MR SPEAKER

Bon mon krwar ki mon pou kontinnyen ek deba, i reste mwan de dimoun lo lalis.  Onorab De Commarmond.  Mon krwar nou a fer en sel fini avan Minister i fer keksoz.

 

HON CHARLES DE COMMARMOND

Mr Speaker mersi bokou.  Mr Speaker, Minis ek ou delegasyon, tou Manm Lasanble, pep Seselwa spesyalman zabitan Cascade bonn apre midi.  Mr Speaker set en plezir pou mwan entervenir lo diskour Bidze 2012 savedir Bidze ki pou anmenn nou dan 2013.  Sa Bidze ki devan nou I en bon Bidze dan plizyer fason set en Bidze ki pou ede mentenir baz ekonomik ki nou’n anmennen ziska prezan e soutenir bann progranm ki Gouvernman i annan devan li, e bann progranm osi ki nou’n etablir depi dan lepase.

Mr Speaker sa Bidze set en Bidze osi ki anmenn kwasans ekonomik savedir economic growth.  E sa i enportan sirtou an 2014 nou pou vwar kot nou pou komans pey nou det dan en fason pli korek.  I enportan ki nou komans, nou grandi aparti konmela e osi sa economic growth i enportan akoz nou vwar pou dir dan lavenir pros nou annan lespwar ki the bag gold i ava osi dan Sesel savedir nou a pe koz delwil e natural gas. Annou priye pou sa arive akoz i ava anmenn nou lo lot nivo.

Mr Speaker Minis Finans in anmenn en nouvo stil dan Bidze sa voyaz.  E mon vwar ki se en Bidze realis, en Bidze si oule ki vize ver performance based budget e pou mwan sa i tre enportan parske dan bann meeting dan bann diskisyon ki nou pe fer dan FPAC se sa direksyon ki nou anvi vwar Gouvernman pran alavenir e mon krwar ki nou annan en Minis Finans la ki azour avek sa ki pe devlope otour li.

Mr Speaker nou konsernen selman avek sa Bidze pou en rezon enportan.  Nou konsernen nou koman reprezantan lepep e mon asire ki lepep osi i konsernen dan sa fason nou oule vwar lenplimantasyon sa Bidze dan en fason korek e efikas.  Nou oule vwar lenplimantasyon sa Bidze si oule bann proze ki annan devan li ki in mete dan Bidze i ganny fer, nou pa oule vwar en Bidze ki zis en kantite keksoz in ganny mete epi lafen lannen i vini trwakar pa’n ganny fer.  Se sa nou konsern vreman nou Lasanble i konsernen bokou avek sa e nou swete ki Minis Finans i onboard pou ki i swiv sa Bidze dan en fason pli byen ansanm avek sistenm ki ou pe met anplas pou zisteman regarde nou osi nou Lasanble nou ava donn ou sipor ladan, akoz nou oule ki larzan piblik dan nou pei i ganny depanse dan en fason korek.

Mr Speaker mon pou siport sa Bidze ki devan nou e mon pou vot pou sa Bidze akoz ladan mon vwar en kantite keksoz sa voyaz pou distrik Cascade e sa i fer mwan en gran plezir.  Par egzanp mon’n apresye ki mon vwar ki dan Bidze nou koz lo nouvo stasyon lapolis pou Cascade en promes ki Msye Prezidan in dir nou Cascade letan I ti vizite – dernyen vizit ki i ti fer Cascade, e set en keksoz osi ki mwan menm lo mon kote nou pe pouse, e mon vwar ki sel keksoz ki pou fer la pou lannen prosenn se ou a krwar fer zis plan.  Sa larzan ki’n mete dan Bidze mon vwar konmsi pou pran 1an pou fer sa plan pou sa stasyon lapolis e mon pa satisfe avek sa.  Mon anvi ki mon vwar stasyon lapolis me i bezwen al pli vit.  Mon demande alor ki en push i ganny fer Minis pou ki Departman konsernen savedir Departman Lapolis i al enpe pli vit omwen nou ti ava vwar fondasyon i komanse, ensidswit.  Dakor i a fini 2014 me selman nou pa kapab vwar zis plan pou sa lannen.

Epi osi ki mon kontan se ki nou vwar en renovasyon vreman ekstansiv pou lekol Cascade, e sa i enportan e mon vwar nouvo batiman ki pou al fer, fencing, nouvo semen, tout en nouvo devlopman avek lekol Cascade, savedir ki ver lafen 2013 e an 2014 nou pou vwar en nouvo lekol Cascade e sa nouvo lekol Cascade i pou anmenn bokou progre pou nou bann zenn, nou bann zanfan e anmenmtan i pou ankouraz lezot dimoun pou donn koudmen pou devlop lekol Cascade, akoz nou nou pe get lwen komite ki pe organiz bann keksoz around lekol nou nou pe get osi e-learning, nou pe get nou bann teachers pa servi zis blackboard me komans osi mazin dan servi whiteboard.  Nou pe al dan sa direksyon alors sa proze devlopman i enportan pou nou zanfan Cascade.

Mon osi kontan vwar ki dan Bidze sa lannen ki pe vin devan nou, nou vwar footpath Anse Dejeuner, savedir la sa trotwar depi Anse Dejeuner ziska Talbot en landrwa ki danzere e vreman bann zanfan Anse Dejeuner letan pou al Cascade i vreman vwar zot dan danze letan zot pas la, mon kontan ki sa pe al ganny fer.  Anmenmtan nou vwar ki osi footpath lo bor Roche Tortue sa osi pe al ganny fer e son drenaz tou lo bor Airport la sa osi i enportan.  Nou vwar ki sa enn osi Petit Paris dan kontour anba kot Madanm Lafortune sa osi pe al ganny fer.  I enportan sa bann proze pou dimoun Cascade, pou nou bann zanfan sirtou.

E anmenmtan ki mon kontan se ki mon vwar dan sa Bidze, proze lakaz Anse Dejeuner kot bann lakaz ti ganny brile detrwa lannen pase sa osi i pe al komanse lannen prosenn.  Nou vwar ki osi bann lalimyer i pe al ganny mete i annan en zefor enkwayab la ki Minis in dir pe al ganny mete pou lalimyer, crash barriers e bann bus shelters osi Cascade, mon vwar tousala pou al fini lannen prosenn.  E anmenmtan nou vwar ki lalimyer lo multi-purpose court avek laplenn dan santral Cascade pe al ganny mete parey Au Cap.  Sa i bon pou nou, nou bann sportsmen i a sorti enpe dan sa drog e i ava kapab kontinnyen fer zot sports ziska en pti pe tar dan lannwit.

E nou vwar ki i annan osi extension DA’s Office en proze ki pe kontinnyen e anmenmtan sa letan i fini i fer nou otomatikman ganny nou IT centre pou bann zenn Cascade en keksoz ki mon ti promet zot depi, en promes eleksyon vedir depi letan nou ti pe fer kanpanny pou eleksyon e nou bann lekipman i deza la nou pe esper zis batiman fini savedir nou vwar ki lannen prosenn sa i pe al ganny met an pratik.

E anmenmtan nou vwar ki bann pti proze nou pe kontinnyen avek lannen prosenn e Cascade nou nou kontinnyen avek sirtou nou bann proze semen an partikilye akoz nou krwar ki lenfrastriktir i enportan pou devlop lezot area dan sans ki nou pep, nou dimoun i epanouir e mon kontan.  Sa pou mansyonn serten parmi lezot.

Mr Speaker nou vwar ki dan Bidze i annan 35 milyon pou SLTA building. Minis mon ti a kontan dan ou larepons ou eksplik nou kisisa sa?  Kote pou fer sa?  Akoz nou dan Cascade nou anvi zisteman ki SLTA savedir kot masin koltar la, i sorti la dan sa landrwa rezidansyel.  I annan en ponnyen letan pase, en ponyen lannen ti’n e-mark landrwa laba kot Providence Industrial Estate pou zot al laba.  Ziska ozordi zot ankor la e la nou bann dimoun pe malad ek sa problenm goudron nou pe malad e taler ki pou arive ou pou tann bann gro gro claim pou ganny mete devan Gouvernman pou vin en nespes zafer parey La Misere.  Mon pa oule ki sa i arive, mon pe dir davans, e mon dir dan sa Lasanble ki sa fodre get ladan seryezman.  E mon ti ava kontan si ou pa kapab fer li dan sa lannen ki la devan nou be dan lot lannen ki vini take note silvouple ki aksyon i bezwen ganny pran pou zot bouze si nou anvi Cascade i devlope akoz nou napa later ankor pou nou fer devlopman si zot kontinnyen reste la.

E anmenmtan mon vwar ki dan Bidze i annan osi larzan pou management landfield.  Fantastik. I byen, en bon pe larzan in ganny mete pou management landfield. Be annou fer li byen, mon enplore la ki Minister Lanvironnman i travay enpe pli byen lo sa kote akoz sa bann loder nou fatige avek Cascade.  Mazinen ou ki landfield i Cascade, dakor.  Nou nou konpran sa.  Be i bezwen ganny manage byen sansan i afekte nou lo kote lanvironnman, i vreman bann loder dezagreab e nou ensiste la ki aksyon i ganny pran pou ki Minister Lanvironnman i zwe son rol pli byen dan sa kote.

Anmenmtan Minister Lanvironnman nou demande osi ki bann pwen ki mon’n deza diskit avek zot, par egzanp pou koup bann pye sed lo bor highway – enn pou anpes degradasyon, lerozyon lo kote semen highway i ganny fer o pli vit posib.  Zot in dakor pou fer me sa i pa kout tro bokou.  Nou demande ki i ganny fer en pti pe vitman pou ki nou amelyor sitiasyon dan sa area.

E nou enplore osi Licensing Authority i regard en lot keksoz la, nou annan bann pti kontrakter ki fer bann netwayaz semen, highway, lezot pti semen segonder, ensidswit epi ou annan osi bann dimoun ki annan license blasting. Be nou pa kapab sa bann dimoun ganny license anmenmtan zot napa en lasirans.  Mon kwar la i annan en problenm.  Akoz mon ensiste mwan ki license avan i ganny donnen i bezwen annan en kondisyon it must be a must sa, i bezwen en must ki zot annan zot lasirans pou kouver zot.  Nou’n ariv bann problenm Cascade zisteman kot in annan claim personn pa oule antre ladan akoz sa dimoun i napa lasirans e se le prop kliyan ki ganny afekte.  So mon ensiste ki lotorite konsernen i regard sa de tre pros pou met lord dan tou sa bann zafer la.

En lot pwen ki mon ti ava kontan met devan ki mon remarke dan Bidze se ki tou bann Minister  e Departman i annan zot en ta rent, zot depans en kantite dan rent.  Be dan sa ka annou pran enpe larzan envestir dan enn de building anvil pou bann Departman Gouvernman, bann Minister.  Annou get sa dan lannen ki pe vini, dan lot Bidze.

An pasan lo sa Mr Speaker mon anvi profite pou felisit NDEA.  NDEA pe fer en bon travay, mon dakor travay ki zot pe fer.  La zot in tyonbo en gro pwason e mwan mon swete mwan ki mon lapel se ki tou lotorite konsernen i bezwen donn koudmen sa NDEA la – si nou anvi vreman fer en lalit serye kont drog.  Nou pa kapab NDEA tyonbo ozordi apre fer large demen, e la mon tande dan sa case la i annan zafer konmsi koneksyon isi koneksyon laba.  Nou a pe vey depros.  Nou a pe veye pou gete si napa lanpayman dan tou sa bann zafer.

 

(Applaud)

 

HON CHARLES DE COMMARMOND

Mr Speaker mon anvi tous an pasan lo scheme of service. Nou annan dan Sesel enta ek en ponnyen scheme of service, i telman annan en kantite enn ler ou oubliy kont.  Mon dakor, be nou nou pa kapab pran sa bann scheme of service les dormi lanmenm la lo letazer pou akonble lapousyer avek.  Sa bann scheme of service la i bezwen transparan, travayer la i bewen konnen ki annan dan sa scheme of service, i bezwen ganny eksplike par son bann dimoun ki ansarz li pou montre ki annan ladan e pou donn li sa sans pou li kapab egzerse pou li al devan.  Ou konpran.  I bezwen ganny training neseser an akondans lo sa scheme of service pou zot kapab vwar en lavenir devan zot, pou zot kapab improve e avans devan.

Dan sa menm direksyon mon ti ava demann osi mon tous en pti gin lo lopital la, lopital an vites mon pa pou koz bokou – zis en senp pti keksoz akoz mon annan tro bokou pou dir zis enn ase.  Mon demande ki bann lapwentman ki zot donn dimoun la pou vwar spesyalis la zot pa fer vwar 5-10 dimoun dan en menm letan.  Ou kapab konmsi perdi letan akoz time is money konmela dan sa Sesel la.  Ou konpran.  Ou pa kapab ou’n vin lopital pou vwar en spesyalis, in donn ou apwentman 1er ladan i annan 10 dimoun toule 10 1er, be demi zournen in fini perdi.  Gouvernman e sa 10 dimoun Gouvernman ki sorti dan travay Gouvernman be perdi la.  Ou konpran?  So mon pe demande ki zot improve laba e ki zot donn lapwentman enpe lot fason pou nou pa perdi bann letan travay.

Mr Speaker mon pou tous enpe lo welfareWelfare mon kontan mon vreman welcome nouvo CEO e mon konnen i en dimoun ki dinamik, ki pou travay, pou fer en kantite sanzman dan amelyorasyon sistenm welfare.  Me selman la mon vwar ki i annan enpe keksoz dan welfare ki pa pe mars byen.  Par egzanp nou pa kapab annan dimoun for, ki kapab travay me i lo welfare e anmenmtan bann ki pe travay parey bann manman tousel, bann paran tousel ki pe vreman trimouse e ki vreman bezwen lasistans pa pe gannyen zis akoz zofisye i get son saler e dir li ki i above subsistence level. Kan avek menm saler sa paran tousel ki annan 2 ou 3 zanfan i annan li en ta commitment ki i ti’n fer depi avan i pa ti’n vwar si keksoz pou vin dan sa direksyon.  E la ozordi ki i vwar?  I vwar swa elektrisite in double, son delo in double, la pe al ogmant son gas la, labank lentere in ogmante, pri dan laboutik in ogmante egzorbitan, konmsi letan ou pe balans ou welfare la ou pa kapab get son gross salary get son net. Ou konpran?  Get letan ou’n fini tir tou sa depans aprezan la ou a gete si i kapab viv ek sa ki reste.  Pa get depi komansman apre ou dir wi i kapab viv apre i annan tou sa depans pou li fer ki i ti’n commit son lekor depi avan e Gouvernman li in fer monte tou son bann zafer.  Ou vwar la mon krwar zot bezwen gete.

Anmenmtan nou pa kapab annan nou dimoun ki lo welfare pou 10, 12, 15an e zis kontinnyen benefisye la – e sa dimoun ki pou arive?  Letan i ganny 63an la be son pansyon i pa pou ganny en pansyon normal.  Pou li ganny en pansyon normal i bezwen travay e sa nou bezwen fer nou dimoun konpran e mon krwar tou sa bann issue la alor i ava ganny aborde avek nouvo CEO.

Mr Speaker an pasan letan nou lo welfare mon tous en pti gin lo zafer prizon.  En prizonnyen ozordi i sorti dan prizon e son lanmen i anmare konpletman.  ID i napa, in fini perdi son ID, swa depi dan prizon swa depi ava in pran ou pa vwar ditou ankor, i napa nanryen pou li okipe, pou li manze ensidswit e welfare pa pe get li la.  La en area kot welfare i devret fer sir sa dimoun koman i sorti son bann basic requirements i gannyen pou li kapab antre dan lavi e re-entegre li dan en fason korek.

En lot keksoz i oule travay li sa dimoun.  Laba prizon kekfwa in sanze – be i oule travay i pa kapab ale akoz police character certificate. Lapolis mon krwar i bezwen sanz son lapros.  Lapros lapolis i, koman mon kapab dir sa, kimannyer i adopte son lapros konsernan sa character certificate la i pa dapre Lalwa Mr Speaker.  Konpran?  Si ou al dapre Rehabilitation of Offenders Act anba sa Lalwa la ou pa kapab esper 5an pou sa rikord efase.  Sa rikord prizon la pou lofans ki ou’n fer la i kapab ganny efase li, i kapab ganny 2an, 1an, whatever, 5an la ti mete sa pou bann lofans tre tre grav, me bann lezot lofans si nou anvi nou bann dimoun i re-entegre dan sosyete nou pa kapab, lapolis i bezwen sanz son mantalite lo la.

En dimoun i anvi al travay lo zil, i sorti prizon li, la mon annan en case la, i anvi al travay li zil be letan in donn li sa zafer 5an be personn pa oule pran li, be lo zil laba donn li en sans i ava re-entregre li come on don.

 

(Applaud)

 

HON CHARLES DE COMMARMOND

Ou konpran?  Alors sa sa bann issue mon krwar bezwen ganny get ladan seryezman.

Nou vin li Corporate Social Responsibility.  Fantastik.  Mwan mon apresye sa ki, sa desizyon ki Minis in pran.  Pa kapab dan pei dimoun i anvi zis benefisye me zot pa oule donn nanryen an retour.  Zis en bann ki kontribye, en lot bann li nanryen pa bon pou li, limenm i oule tou later pou li, i oule tou kalite biznes pou li, selman kontribisyon i pa oule fer.  Sa ki ou’n fer Minis mon apresye.  Me les mwan dir en keksoz.  Mon annan 3 pwen la, Minis i bezwen annan en mekanizm pou nou kapab garanti ki kontribisyon i ganny fer, ki konmsi dimoun – akoz la deor mon komans tann koze i annan serten biznes ki oule sa kontribisyon, sa donasyon akoz ou’n dir i kapab fer donasyon, ou kpab fer lezot sponsor, ensidswit, serten biznes i kapab sponsor son lekor li, i fer donasyon ek limenm.  Fodre ou veye, sanmenm sa mon dir bezwen annan mekanizm akoz la ater nou konn tre byen kimannyer keksoz i roule.  I bezwen annan mekanizm korek pou fer sir ki i ganny fer, savedir sa i bezwen transparan, ganny eksplike byen e media i bezwen onboard pou ki nou tou nou konnen kimannyer pou fer sir ki zot kontribye.

Lo lot kote anmenmtan ou’n dir ki 125 poursan pou ganny konsidere anba sa CSR scheme letan i annan sponsorship pou bann artis.  Sanpyon, felisitasyon mon dakor ek sa.  Mon zis demann ou konsider menm parey pou bann sports please, mon krwar i fer sans sa ki mon pe dir e ti a bon sa i ganny fer.

Anmenmtan osi i annan sa desizyon 0.5 poursan turnover pou sa zafer CSR kontribisyon.  Mwan mon krwar sa i en pti pe tro bokou letan ou get natir serten biznes.  Ti a bon sey gete si pa kapab fer desann kantmenm en 0.2, 0.25, 0.3 petet.  Akoz mon pe dir sa, se akoz mon konnen mwan i annan bokou biznes son turnover ek son profit margin i wide, i diferan konmsi, ou pa kapab zis al lo turnover akoz son profit margin osi i pti pti, konmsi mon krwar la sa i devret vreman ganny gete akoz sirtou konmela lanvironnman biznes i osi dan lanvironnman difisil, sitiasyon difisil kot nou vwar sa kriz finansyel mondyal so annou fer desann en pti pe apre ou ava gete over the years la nou a remont li ankor en pti pe.

Mr Speaker sa Bidze ki devan nou en Bidze tre enteresan, vreman mwan mon ti a kontan tous en pti gin la lo investors and service delivery. Nou bann Lalwa nou i bon nou, i azour, fantastic. Nou problenm se nou dimoun, mindset nou dimoun i bezwen sanze.  Nou service delivery i pa mars tro byen.  Dan Sesel ozordi par egzanp tou sa ki Gouvernman i fer i krwar i pe fer ou en faver, kan i dan Lalwa se ou drwa sa, ok.  En legzanp par egzanp – en dimoun i vini ou annan 2 kalite envestiser, ou annan Seselwa ek etranze.  En Seselwa i vini i annan en lide li i anvi devlop tel soz fer krwar dan lenerzi renouvlab.  Alor i anvi vwar Minis pou diskit son proze, sekreter Minis i dir ek li, i dir Minis i dir ou laba fodre ou fer ou plan e anvoye apre a gete si i pou vwar ou si i pa pou vwar ou.  Pou li fer plan ensidswit i bezwen al depanse, napa larzan konmela, i en boug ki enpe mizer li pa en boug konmsi ki annan li en ta larzan e Minis alafen dizour pa vwar li.  Parkont i vin en etranze.  Etranze napa ni plan li, i vini i anvi vwar Minis e son delegasyon akoz i sorti deor laba one time pa ni bezwen gran apwentman nanryen Minis i vwar li, donn li dezennen, dinen, tou zafer, sponsor li tou son bann zafer pou diskite kimannyer pou soz, apre la kimannyer pou fer biznes akoz ou konpran.  La i annan sakenn i ganny son zafer la sepa kwa mon pa konnen kimannyer i marse selman mon konnen kimannyer ou kapab, ou Seselwa ou pa oule vwar ou selman ou bezwen konekte ek ou pep ou.  Prezidan in dir reste konekte ek ou pep ou, savedir annou sanz nou latitid nou mindset.  Annou vwar nou dimoun, diskit ek li, i annan en ta dimoun ki annan en ta lide ater la.

 

(Applaud)

 

HON CHARLES DE COMMARMOND

Mr Speaker sa ki mon pe dir la sa zafer, letan i al partou sa, i wide, i dan lanvironnman, dan Planning Authority, Licensing, you name it – akoz tou sa landrwa ki ou pase, sa semen la i annan en stop, e sa stop la i annan en rezon akoz i fer e letan in aprouve osi i dir ou get sa la in fer ou en faver la en, ou drwa sa i dir ou in fer ou en faver.

Pankor fini ou pou al lo lot step laba osi i dir ou e pe fer ou en faver la, ou drwa sa.  Sa ki nou pe dir dan nou pei se konmsi arete anbet nou lo la annou pli smart silvouple dan Public Service donn nou en pli bon delivery.

Mr Speaker letan nou lo la i fer mwan zis tous en pti pe lo lendistri touris.  Fantastik nou lendistri touris nou, e nou a pe debrouye pa mal debrouye.  Me annou regard sa en pti kou.  En sen pti Seselwa akoz Prezidan in dir leve debrouye, i annan li kot li de pti lasanm.  Lasanm dimoun i kapab reste ladan, i annan son toilet, son pti lavarang avek ensidswit, sel problenm ek sa lasanm set akoz i pa gran sa grander ki Minister Touris, avek soz in dir la, mon krwar i annan en serten grander 18 met kare sepa kwa i pa sa grander li i en pti pe pli pti kekfwa i 15, kekfwa i 14, sepa kwa, en pti pe pli pti li, dimoun i reste ladan epi napa tiles ater, me sa boug i napa larzan pou met tiles li akoz labank i pa kapab gannyen loan li.  Ou konpran?  Pa donnen loan konmela labank, pa fasil pou gannyen, so i pa kapab mete tiles li.  Be selman Seselwa kan i al deor i reste dan bann kalite landrwa koumsa li, napa problenm e touris i annan serten touris ki letan i vin Sesel i pa mind reste dan en landrwa koumsa li, akoz i prop, i izyenik, i konfortab, no problem.  Be nou lotorite i anpes sa devlopman.  Sa pti boug kantmenm i anvi debrouye la i pa kapab debrouye, lotorite i anmar li.  Parkont mon demann Minis avek ou bann kantite dimoun ki annan gran, gran degre ki kapab advice ou byen annou fer en senp kalkilasyon.  Touris i vini lo Airport, gro lotel, ensidswit, tou son zafer in fini peye deor li.  Son gro transpor i vini tinted, pran li lo Airport, anmenn li sepa ki gro lotel, letan i laba si i bezwen car hire sa bann ki annan desk kot lotel ki gannyen, ok, ki kapab lwe son loto, sa pti car hire si i napa desk laba li bliye mizer li, i pa kapab lwe son loto ek sa boug.  Sa taxi driver kantmenm ou’n donn li en pti zafer la dan Bidze mon’n vwar, i nanryen li, i pa’n gannyen sa kours pou anmenn sa touris kot lotel li, ni pou anmenn li back, e par kont manze tou manze kot lotel.  Ou konpran?  Eskirsyon lotel – menm.  Sel zafer la, en sel group.  Ou konpran?  I akpaab annan dalon, fanmir, tousala ansanm.  Be prezan tou sa larzan la i deor lo kont sa lotel e tax napa much tax ki ganny peye isi.  Par kont sa Taxi driver ou ti pou ganny keksoz ek li, sa pti case ki mon ti pe dir avan la, li i pou pey ou son tax li.  E prezan li i pa kwi manze kot li li, sa take away ti pou viv, sa restoran ti pou viv akoz sa touris i ti pou bezwen manze non, i bezwen sorti al deor pou al rod son manze, i a pase dan pti laboutik i aste son pti keksoz – sa boutikye i viv, i ale kot sa pti boug ki vann kokiy – i a viv li osi.  Ou konpran?  Savedir la nou pe vreman pran larzan sa touris met dan nou lekonomi.  Par kont sa lot odegarm touris la ki rod Pierre Cardin ensidswit be nou napa Pierre Cardin isi.  Ou konpran?

 

(Applaud)

 

HON CHARLES DE COMMARMOND

E sa pti touris li i pa kapab aste sa Pierre Cardin akoz napa dan nou laboutik osi i ser, so i, non mon nonm sa akoz…. Ou konpran?  Pa ti’n mazinen ou lot non i Minister Pierre ou non i Pierre, sorry, be nou ou vwar kot i vini, savedir la nou bezwen gete kimannyer si nou pe dir vreman leve debrouye e ou mon konnen ou pa met Pierre Cardin mon konnen.  Nou bezwen tonm dakor kot letan nou pe dir leve debrouye ki sistenm i bezwen siport sa lespri e sa lide ki Prezidan i met devan e ki mon konnen ou Minis ou siporte e ki mon konnen nou pou al enpe pli devan avek.

Pou fini Mr Speaker, mon krwar mwan ki nou vreman apresye kimannyer nou pe fer.  Salary increase.  Salary increase i byen, nou donn en pti larzan.  Me mon pa dakor ek sa mwan.  Mon krwar sa salary increase sa larzan ki’n donnen la i pa reprezant diferans ki’n annan dan sanzman, dan to lentere ensidswit.  Mon krwar letan mon ti pe kalkile lot zour la mon dir get Sesel kimannyer i ete drol pei.  I kontan konpar li parfwa avek standar Eropeen – i dir gete nou nou’n depas lo nivo larezyon, nou’n depas menm lo nivo Lafrik, nou pe konpar nou avek devloped countries, sanpyon.  Be letan nou pe konpar nou bann standar avek European countries ouswa pros ek sa, be nou saler letan i monte, pa kapab konpar li koumsa osi?  Be annou konpar nou saler osi.  Tou lezot zafer ou konpar li koumsa, letan i ariv pou saler non.  Annou konpar pou saler osi.  Mon pa dir ou fer li ariv lo sa nivo mwan, be selman enpe konparab.  Akoz dan laboutik konmela keksoz kimannyer i egzorbitan be sa pti 6 poursan ki ou’n donnen 3 poursan Minis fransman vre i keksoz me i pa nanryen dan lot kote konmsi pou nou dimoun.  Mon zis fer en konparezon e prezan mon konpran mwan, akoz dokter Seselwa, taler nou’n nonm dokter be i pa pou vini sa dokter Seselwa, in al etidye New Zealand epi letan i vini ou oule donn li R25 mil par mwan laba i ganny li R100 mil par mwan.  Be si sa teacher in etidye Ostrali be i vin isi ou pou donn li R12 mil be non Ostrali laba i donn li 50.  Mon pe koz fe mwan.  En senp Insurance Clerk i ganny li R20 mil ekivalan dan sa bann pei parey, isi konbyen i gannyen 3500, 4000, 5000 si i gannyen i byen gannyen.  Ou konpran?  MNA pa kapab kont lo la sa i telman soz.  Non Minis mon pe koz serye e mon krwar i fer sans sa, nou bezwen revwar keksoz dan en fason, vreman, konmsi konpar sa ki kapab konpare ek kanmarad.  Annou pa soz.

Akoz la lo lot kote nou vwar poudir logmantasyon saler i enn be selman nou annan lot problenm, nou lot problenm se ki bann lenstitisyon parey Chamber Of Commerce, NATCOF, Consumer Protection Unit, Fair Trading Commission, Minister Finans zot pa ed sa konsomater, nou pa pe ed sa travayer dan lot kote.  Akoz anmenmtan ki ou pe donn li sa ogmantasyon anmenmtan son gas i pe al monte, lenflasyon i monte, e nou pa kontrole e prezan nou annan en lot gro problenm nou napa Union dan nou pei.  Union i pa marse, i zis egziste lo non.  Si Union ti marse, Union ti a pouse donn li koudmen pouse sa travayer, organiz li…..

 

MR SPEAKER

I reste ou ankor 2 minit Onorab.

 

HON CHARLES DE COMMARMOND

Pou fer ki son saler a monte.  Akoz ki mon dir zot pa ede sa bann lorganizasyon?  Ou pa kapab al kot Krishnamart par egzanp enn pti poban marmit ki fek R58 i vann, ou al STC enn gro ki vre li i R48.  Be i annan en keksoz ki mal ant sa de keksoz sa de pri.  No matter si nou dan liberalizasyon oubyen non, there’s something wrong somewhere la.  Savedir la nou bezwen anmenn sa bann Lalwa Fair Competition Act, anmenn sa bann Lalwa ki sanz responsabilite NATCOF, Consumer Protection, Fair Trading, fe zot pli morde pou nou kapab pran aksyon.  E fodre nou pran bon aksyon, pou fer ki i deter lezot pou fer sa.  Si nou fer sa i a ede pou maintain pri dan laboutik, i a ede pou maintain to lenflasyon, to lenflasyon i a kapab desann osi e la kekfwa sa logmantasyon i a fer enpe plis sans.  Apre ou a ogmant ankor en pti pe, i a fer plis sans.

E mon vwar poudir, sa bann lenstitisyon ki mon’n dir la li i bezwen veye ki sa bann marsandiz, bann marsandiz parey disik, disel, diri, lot la – lafarin, dile, lavyann, ensidswit, i annan en ponnyen zot ki napa VAT lo la nou bezwen fer sir ki dan laboutik pa monte, akoz pri fuel pankor monte la.  E prezan nou letan pri fuel i monte ouswa i desann, Mr Speaker – SBC, nou medya i bezwen dir nou, ozordi in monte, la in desann e i bezwen ale koumsa.  Mwan mon pou pran li koumsa dan en lekonomi liberalize.  Amwen nou bezwen revwar lakalite lekonomi ki nou pe fonksyonn ladan.

 

MR SPEAKER

Rap up e swet mwan Zwaye Noel.

 

HON CHARLES DE COMMARMOND

Mr Speaker mersi bokou.  Mr Speaker mwan mon tre kontan alor ki nou pe al dan en bon direksyon, e mon profite pou mwan swet ou, Msye Minis Finans, le President du pays et tous les presidents, bann former ek zot fanmiy en, e tou bann dirizan, e osi nou pep Seselwa ek zot fanmiy spesyalman dimoun Cascade.  Mon konnen pa’n en lannen fasil, lannen ki vini i pa pou osi tro easy me selman i annan en zefor lo nou tou depi leadership ziska anba ki nou bezwen mete pou nou fer ki lannen ki vini devan nou i en lannen pli bon, i en lannen pli prospere, e mon swet nou tou Zwaye Noel, Bonn Ane e annou travay pli byen e annou travay ansanm lannen prosenn pou nou anmenn nou pei pli devan pou nou tou pli prospere.  Mersi bokou Mr Speaker.

 

(Applaud)

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Bonn apre midi Mr Speaker, bonn apre midi Minis, bonn apre midi tou koleg Manm Onorab e tou zabitan ki pe ekoute sirtou zabitan Anse Boileau.  Mr Speaker we in Gouvernment should learn to look at our country with the eyes of the entrepreneur, seen possibilities where others see only problems.  Mr Speaker sa se parol saz Ronald Reagan en ansyen Prezidan Lanmerik ki mon komans mon lentervansyon.  Wi Mr Speaker nou bann leaders in toultan dedye zot lenerzi, lentelizans e kouraz koman bann antreprener pou vwar posibilite kot serten in kontinnyelman vwar zis problenm, kot serten olye konsantre zot zefor e lenerzi pou promot sa ki meyer pou nou pei zot zis pas zot letan fer bann kritik destriktiv, e zot sezi tou loportinite pou tarnish repitasyon nou pei dan lizye lakominote enternasyonal.

Mr Speaker depi nou liberasyon 1977, Parti SPUP, SPPF e ozordi Gouvernman Parti Lepep in touzour reste determinen pou donn tou Seselwa loportinite neseser pou grandi e epanouir dan dignite koman en pep e kontinnyelman met bann mekanizm an plas pou ankouraz sak Seselwa pou realiz son rev e laspirasyon pou plis prosperite personnel e prosperite anver progre socio-economic nou pei.

Koman en pti nasyon nou reisir akonplir bokou e pe kontinnyen travay dir pou mentenir en lekonomi ki dinamik e ki ankouraz devlopman bann pti e mwayen antrepriz malgre sekter biznes i kontinnyen pas dan bann moman difisil an rezilta tirbilans ekonomik global e menas piratri ki reste enn nou bann gro defi.

Mr Speaker yer mon ti ganny sans attend en seremoni lanmes ki en group NYS 81 ti organize pou remersye Bondye pou liberasyon Msye Rolly Tambara ek Msye Marc Songoire, mon’n ganny sans koz avek zot e zot in partaz enpe zot soufrans, tandis ki isi dan nou prizon bann deteni pirat Somalyen zot pe rod meyer kondisyon, zot pe rod delo mineral, zot pe rod matla spring, zot pe rod pantouf pou dormi ladan, zot pe menm rod boxer Pierre Cardin ki Onorab De Commarmond fek koz lo la taler.  Ler nou get dan sa Bidze nou vwar ki provizyon pe ganny fer pou Minister ki responsab pou prizon e nou konnen pou dir en gran parti sa larzan pou benefisye sa bann dimoun.  Mon pe lans en lapel avek Lotorite Prizon ler mon konn soufrans, mon realiz soufrans ki nou de koleg Seselwa in pas atraver Somali, mon demann lotorite konsernen pou fer sa bann dimoun leve, travay, travay dir e rann lepep sa manze e sa bann bon kondisyon ki zot pe zouir dan prizon.

 

(Applaud)

HON BERNARD ARNEPHY

Mr Speaker nou direksyon koman en nasyon in reste touzour vize anver determinasyon pou kontinnyen travay dir e asir plis prosperite ekonomik e egalman kontinnyen trouv meyer fason pou fer fas avek nou bann defi sosyal ki an gran parti enpakte negativman lo nou dezir senser pou donn nou pep bann meyer kondisyon lavi e fer fas avek pri lavi ki kontinnyen ogmante e ki afekte sirtou bann ki pli vilnerab.

Mr Speaker pou nou kontinnyen konsolid nou sikse e sirmont nou bann defi i demann partisipasyon kolektiv tou bann partener e akter enplike.  Pandan ki nou rantre dan dezyenm zenerasyon nou reform makro ekonomik e komans fer repeyman nou bann det eksteryer, nou bezwen anmenmtan mentenir en bon balans pou arive konsolid nou bann aki e fer plis prosperite ekonomik ankor.  Plis prosperite ekonomik pou selman posib si nou kontinnyen debout ansanm koman en sel nasyon, plis prosperite ekonomik pou selman posib kot sekter piblik ek sekter prive i trouv meyer fason pou travay pli etrwatman ansanm pou anmenn sa ki meyer pou nou pep.  Plis prosperite ekonomik pou selman posib kot bann ki ganny mandate pou zer resours leta i fer li dan en fason transparan e avek accountaibility.  Plis prosperite ekonomik pou selman posib kot larises i reganny distribye dan en fason ekitab e atraver evit gaspiyaz.  Plis prosperite ekonomik Mr Speaker pou selman posib kot sak sitwayen i aprann apresye tou sa ki Leta i met a son dispozisyon pou son lepanouisman.

Mr Speaker pou nou kapab arive achieve en tel prosperite nou bezwen kontinnyen debout ansanm koman en nasyon Seselwa for, determinen e rezilyan.  La mon lapel senser se ki tou bann ki ganny konfye pou zer sa Bidze ki nou Lasanble Nasyonal pou vot lo la, pou fer li zot devwar pou zer byen sa bann alokasyon e asire ki accountaibility, latransparans e fairness i reste zot azanda nimero enn ler zot pe desarz zot responsabilite.  Nou Gouvernman in touzour enn ki la pou deservi son dimoun atraver en vizyon partaze kot lepep i reste o sant tou sa ki ganny fer e ki selman en Gouvernman responsab e determinen pou anmenn sa ki meyer pou son pep ki trouv sa koman enn son rol primordyal.

Ler mon regard bann gran liny e provizyon sa anviron R5.4 bilyon Bidze pou 2013, i fer mon realize ki nou dirizan i annan sa vizyon pou li mentenir son promes e asire ki i kontinnyen kre e distribye plis larises pou son pep dan sa Nouvo Sesel ki nou pe batir.

Mr Speaker dan son konpanny eleksyon 2011, Prezidan Michel ti vin avek en vizyon kler vizavi lot letap devlopman ki i anvi anmenn nou pei.  Mon kontan note ki provizyon tre spesifik pe ankor enn fwa ganny fer dan Bidze 2013 pou kontinnyen realiz prensip sa vizyon pou asire ki nou kontinnyen konsolid e amelyor nou bann gen sosyal.  Kontinnyen ranforsi e diversifye nou lekonomi, kontinnyen promot Sesel koman en leader dan domenn konservasyon lanvironnman e devlopman soutenab, kontinnyen asir nou sekirite, stabilite e repitasyon lo lasenn enternasyonal, kontinnyen promot rule of law, bon gouvernans e latransparans e mentenir Lalwa e lord e osi mentenir nou kouezans sosyal, stabilite e linite nasyonal.  Parti Lepep anba leadership nou Prezidan pe ankor enn fwa asire ki otan ki nou mwayen ekonomik i permet nou fer li provizyon pou finansman e resours adekwat pou kontinnyen ganny mete a dispozisyon bann diferan lenstans ki annan manda pou asir sa transformasyon anver en sosyete bokou pli prosper e kot nou aport plis larises pou sak nou sitwayen.  En Bidze ki pe asir lenvestisman dan sak nou sitwayen.  Sa i alors donn mwan e lepep Seselwa sa lespwar ek konviksyon ki sa Bidze ki pe ganny prezante i enn ki realis e ki pe pouse pou ki plis prosperite i vin a la porte tou Seselwa.  En prosperite ki annan bi benefisye tou Seselwa, en prosperite ki pou permet nou kontinnyen batir lo nou bann sikse lepase, nou bann sikse prezan e travay pli dir dan linite pou plis sikse alavenir.  Malgre bann defi ekonomik ki swa lokal ou enternasyonal ozordi, nou isi Sesel nou’n kapab reste proaktiv e arive mentenir sa transformasyon ekonomik dan en fason byen zere.  Pou sa nou kapab mars fyer e zepol anler akoz bokou bann lekonomi pli for e solid in zis tonbe, perdi direksyon e senpleman pa konnen kot pou rekomanse.  Me nou isi Sesel Minis Finans pe prezant avek lepep ozordi en Bidze pou permet nou kontinnyen fasilit e asire ki nou bann lobligasyon sosyal i kontinnyen ganny mentenir.  En Bidze ki realis e ki son labaz se plis kwasans ekonomik, en Bidze ki pe fer provizyon kler pou asire ki mezir e mekanizm apropriye i ganny met an plas pou asire ki depans piblik i pli byen ganny zere, en Bidze ki pou fasilit biznes e kre bann kondisyon pli favorab pou ed bann biznes agrandir e anmenmtan zwe zot rol Corporate Social Responsibility.  Enn ki pe anmenmtan lans en lapel avek anplwayer e travayer vizazi adopte en latitid pli efektiv pou plis prodiktivite dan travay, enn ki pe fer provizyon pou amelyor sistenm kontribisyon pansyon e ki permet met li anliny avek logmantasyon dan pri lavi.

Mr Speaker sa sistenm VAT ki pou vin efektiv an Zanvye pou asire ki bann ki sipoze pey tax i fer li e Gouvernman an retour i annan plis mwayen pou kontinnyen fer plis lenvestisman dan son progranm sosyal tel ki lozman, progranm byennet sosyal, lasante, ledikasyon, zis pou nonm serten.

An gro sa Bidze pe dir nou ki Gouvernman i apresye ki lepep i anvi vwar value for money e eliminasyon tou bann red tapes dan lafason ki biznes toulezour i ganny fer an relasyon avek servis delivery.

Mr Speaker mon ti a kontan dir detrwa mo partikilye lo sa Corporate Social Responsibility (CSR) ki Minister Laporte in koz lo la.  Mon panse ti’n plis ki ler ki en tel linisyativ i ganny antreprann.  Tro souvan nou dimoun i krwar ki se zis Gouvernman ki bezwen fer tou pou li.  An prensip Gouvernman i la koman fasilitater ki ede pou drive e kree sa larises ki pei i bezwen.  Alors ler sekter biznes i prospere mon panse ki i toutafe normal ki an retour zot envestir enpe sa larises dan bann progranm ki a donn Gouvernman sa koudmen kree sa Sesel meyer.  Mon felisit bann ki deza pe fer li e sa i a vin koman en lakourazman pou lezot swiv dan menm lepa.  Sa konsept CSR si i byen ganny aplike i pou definitivman anmenn benefis direk an term bann progranm e proze lavi kominoter, progranm lasante kominoter, aktivite lwazir rekreasyon e de spor, progranm e proze lanvironnman, progranm renesans sosyal, eksetera.  An fezan bann tel kontribisyon mon asire sa pou kontribye anver en meyer lavi pou sak nou sitwayen dan sa kominote kot zot pe viv.  I primordyal alors ki private business companies i asiste Leta pou reisir attend son lobzektif vizavi son bann progranm sosyal.

Mr Speaker si i annan en Gouvernman ki’n envestir plis dan ledikasyon son pep pandan sa dernyen trantenn lannen se byen Gouvernman Lepep.  Tou sa profesyonnel ki nou koz lo la ozordi se fri lenvestisman dan nou dimoun.  Tou sa ki pe fer sikse dan biznes se rezilta lenvestisman nou Gouvernman dan son dimoun.  Wi nou’n envestir bokou dan nou dimoun aprezan nou merit rod meyer fason pou retir benefis maksimonm atraver bann tel lenvestisman.

Mon siport Onorab Vel ler i dir ler i dir ki nou bezwen rod mekanizm reel pou nou gard nou bann profesyonnel dan pei e permet zot zwe sa rol kle dan re-alizasyon sa Nouvo Sesel ki nou pe kontinnyen batir.  Nou bezwen donn zot en better deal.

Dan son diskour alokazyon remiz diplonm e degre avek premye cohort graduates Liniversite Sesel Vandredi pase Chancellor nou Liniversite Prezidan Michel ti dir e mon quote “Seychelles value it’s teachers but we need more teachers.  Education cannot progress without good devoted teachers.  Education is the foundation of any modern society and university education is the corner stone of this foundation” unquote. Wi Mr Speaker pou nou kapab kontinnyen form bann kard dan diferan domenn nou bezwen ansenyan konpetan e devoue.  Ozordi plis ki zanmen nou problenm mank ansenyan i reste parmi enn nou bann defi mazer sirtou lo nivo segonder.  Mon sepandan soulaze ler mon konstate ki i annan en provizyon dan Bidze e ki en demars serye i ankour pou Minister Ledikasyon ansanm avek son bann partener kle tel ki Liniversite Sesel revwar direksyon e lapros ki formasyon ansenyan i merit ganny fer.  Pour kwa pa rekonpans donn formasyon bann ansenyan lo nivo diplonm parey ti pe ganny fer ler NIE ti an egzistans.  Mwan mon pou donn tou mon sipor en tel demars e mon sir ki evatyelman sa a ede redres sa sitiasyon mank teachers ki pe enpakte negativman lo fonksyonnman nou bann lenstitisyon skoler.

Mr Speaker wi, nou Gouvernman i envestir fortin dan ledikasyon son pep mon alors enplor bann etidyan pou sezi tou bann loportinite ki a zot dispozisyon, respekte e apresye zot ansenyan pou sa travay nob ki zot fer, respekte sa bann fasilite ki Leta i met a zot dispozisyon.  Mon lans en lapel avek paran annou silvouple vin pli konsernen avek letid e lavenir nou zanfan e annou donn bann lenstitisyon skoler tou sipor neseser pou achieve education of better quality.

Gouvernman atraver sa Bidze pou kontinnyen asire ki i mentenir safety net ki egziste pou soulaz bann ki pli vilnerab e permet zot fer fas avek ogmantasyon dan pri lavi, se pour sa rezon ki mon siport logmantsyon dan saler debaz e pli enportan sa 6 poursan ogmantasyon dan bann benefis tel ki envalidite, benefis orfelen, maladi, maternite e pansyon retret.  An sa ki konsern pansyon retret mon lans en lapel avek tou lazans konsernen pou revizit lafason ki en tel benefis i ganny administre pou nou bann dimoun aze.  En sitiasyon pa zoli ditou pe devlope Sesel – kot nou vwar tro bokou nou bann vye dimoun aze lo kat kwen semen pe mandyan, kan zot pe efektivman ganny sa lasistans pou ed zot viv dan konfor zot vye zour.  Alors i enportan ki nou vwar lekel ki tous larzan delapar sa bann dimoun aze e osi kimannyer sa larzan i ganny depanse.  Wi Mr Speaker nou bann dimoun aze in travay dir pou anmenn sa pei kot i ete ozordi i deserve pou zouir zot retret dan en serten nivo konfor ki akseptab.

Mon pou osi aport sipor pou demann ki’n ganny fer par Leader Business Gouvernman, ki Gouvernman i konsidere ki nou bann dimoun ki ganny benefis anba family support i ganny konsidere anba minimum wage grid. Pou bann ki travay dir pou pran swen avek zot pros kontinny sa bon travay.  Pou bann ki enpe letarzi please shape up akoz sa larzan se tax payers money ki nou pe koz lo la.  Sa rediksyon dan Business Tax mon konvenki a osi ede pou anmenn stabilite dan pri serten servis e komodite.

Mr Speaker pou nou kapab annan kwasans ekonomik nou bezwen absoliman soutenir sa menm lekonomi ki’n fer sitan sikse pandan sa 30 dernyen lannen.  Nou bezwen kontinnyen kre plis loportinite pou nou lekonomi agrandi e anmenn plis larises pou nou dimoun, sa Bidze pe fer absoliman sa.  Mon lapel se ki sekter prive i zwe en leading role e siport Gouvernman dan sa demars nob.

An 2013 mon kontan vwar ki serten proze mazer finanse par Gouvernman Sesel limenm atraver foreign loans e bann grants pou kontinnyen ganny enplimante anba Public Sector Investment Programme. Bokou bann inisyativ e proze ki serten bann koleg in fer referans lo la pou definitivman kre meyer loportinite pou plis devlopman e pli enportan anmenn benefis ekonomik e sosyal pou nou dimoun.  Mr Speaker la mon oule lans en lapel avek bann ki annan responsabilite pou negosye e zer sa bann resours delapar Gouvernman pou pa antre dan bann cool off periods me plito asire ki nou benefisye omaksimonm par enplimant bann proze dezinyen dan en timely manner kot nou pa perdi bann tel grants e apre vwar nou pe bezwen al re-negosye.

Mr Speaker les mwan dir de mo lo mon distrik Anse Boileau.  Mr Speaker zabitan mon distrik in benefisye avek serten proze kle lannen 2012 e pour sa mon oule remersye Gouvernman de zot par malgre mon konstate ki i annan serten lezot areas ki nou ti a swete vwar bokou plis reisit.  En morso semen prensipal in ganny nouvo sirfas koltar e sa in soulaz motoris osi byen ki pyeton en kantite anvi ki morso sa semen ti dan en tre move leta.  Mon swete ki kontinnyasyon proze a ganny materyalize boner lannen prosenn pou resirfas semen Montagne Posee ki ansemoman li osi i dan en tre move leta.

Travay konstriksyon pavement depi gran lale ziska Cap Sainte Marie pe progress tre byen.  En proze ki pou kontinnyen lannen prosenn e ki pou ariv ziska kot klinik.  Sa en proze ki zabitan lontan pe demande e ki mon’n pouse pou fer materyalize pou garanti sekirite pyeton e osi motoris anvi ki sa parti semen i tre etrwat.

Mr Speaker distrik in osi benefisye avek proze lalimyer e amelyorasyon bann dren dan serten parti bann sou distrik.  Proze lenstalasyon crash barrier dan rousay pe kontinnyen, larantre semen Le Gravye pe ganny en nouvo sirfas e byento semen pou al ganny elarzi.

Mon oule profite pou remersye bann travayer Lazans Transpor lo Later pou zot korperasyon e sa travay remarkab ki zot pe kontinnyen fer.

Mr Speaker anba bann proze devlopman kominoter nou’n osi arive realiz plizyer pti proze tel ki feeder roads e eliminasyon Pti Payot e lezot ankor ki’n tous lavi lakominote dan en fason direk e mon kontan konstate ki ankor enn fwa en sonm 1.2 milyon pe ganny mete a dispozisyon distrik an 2013 pou realizasyon plis pti proze kominoter ankor.

Mr Speaker way leave i reste ankor en defi ki retard lenplimantasyon serten proze.  Mon alors lans en lapel avek tou proprieter pou donn plis korperasyon Lotorite Distrik e annan enpe plis konpasyon pou nou frer e ser ki dan bezwen sirtou kot proze semen i konsernen.

Lozman e proze alokasyon later i reste kantmenm de parmi bann gro defi ki nou bezwen kontinnyen pouse pou asire ki nou bann dimoun ki pe atann lasistans i ganny asiste dan en dele letan ase rezonnab.  La mon oule lans en lapel avek bann ki’n deza ganny asiste pou onor zot komitman repeyman loan pou ki nou frer e ser ki pe atann a osi kapab ganny sa privilez pou ganny asiste.

Mon swete ki lannen 2013 sa demars pou lakizisyon en morso later Anse Louis a ganny finalize e kot bann ki pe esper en morso later a kapab ganny asiste.

Mr Speaker pou nou bann peser e fermye bann demars neseser pe kontinnyen ganny fer pou trouv meyer fason pou kontinnyen amelyor zot kondisyon biznes.  An sa ki konsern lapes distrik in deza propoz en proze konpreansiv avek lotorite lapes Sesel SFA pou annan plis fasilite lanbarkasyon e debarkasyon pou peser, landrwa pou stor lekipman, en konstriksyon en lot ice plant pou kapab zwenn demann pou sa komodite e lezot fasilite adisyonnel.  Dapre SFA demars negosiasyon pou finansman pe byen progrese e nou swete ki en tel proze a vin en realite.

Mr Speaker distrik i osi an negosiasyon avek Seychelles Agricultural Agency (SAA) atraver Minister responsab pou ki kondisyon e fasilite bann fermye i amelyore.  La pli gro defi pou nou bann fermye se problenm linondasyon ki afekte zot pandan gro lapli e pou bann ki plant lo bann teren ase eleve se problenm motorable access e sa i kout zot bokou anterm sawa.  Alors mon pe lans en lapel avek Minister e Departman konsernen pou konsider sa konman enn zot priyorite pou ede fasilit lavi sa bann fermye pou zot kapab vin plis prodiktiv.

Mr Speaker mon swe senser se ki sa proze donn delo trete zabitan Caiman i ganny materyalize an 2013.  Malgre ki PUC in donn serten komitman ki sa proze ti lo zot plan pou 2013 me mon pa vwar okenn provizyon spesifik anba bann alokasyon pou realizasyon sa proze.  Alors mon ti a kontan ganny lesplikasyon si anba sa gro sonm ki PUC pe gannyen si i osi konpri sa proze ki distrik ti’n ganny dir survey in fini ganny fer e pou kout R1.9 milyon e ki provizyon pou ganny fer pou son lenplimantasyon an 2013.  Mon oule sepandan sezi sa loportinite pou remersye PUC pou realizasyon proze delo trete pou zabitan Hermitage.

Mr Speaker mon reste tout fwa soulaze ki serten provizyon pe kontinyen ganny fer pou amelyor lavi kominoter e ki tous tou zabitan dan mon distrik.  Sa Bidze pe fer provizyon pou upgrade e fer travay renovasyon lo nou health centre e la mon oule lans en lapel avek bann travayer sa sant pou trouv meyer fason pou kontinnyen donn en pli bon servis avek plis konpasyon e en lapel spesyal pou manm piblik ki servi sa bann fasilite e servis pou evit labi e respekte e apresye zefor e korpere avek staff pou sa servis ki zot pe donnen.

Mon oule osi lans en lapel avek serten travayer sa Minister pou aret fer politik bon marse dan klinik e lopital, me plito travay dan en fason senser pou asire ki larzan ki pou ganny vote pou sa Minister i byen ganny servi pou donn tou dimoun en meyer servis.

 

(Applaud)

 

HON BERNARD ARNEPHY

Mon’n osi konstate ki provizyon pe ganny fer pou travay renovasyon lo lekol primer e segonder mon distrik.  Sa dan limenm a ede amelyor lanvironnman lansenyman e laprantisaz kot ansenyan e osi byen ki etidyan a trouv zot dan en lanvironnman bokou pli condusive pou zot travay.

Mr Speaker malgre mon ti a swete vwar plis resours finansyel ganny met a dispozisyon distrik pou realiz lezot proze ki’n la lo plan pou en bon pe letan me ziska ler pankor ganny realize.  Mon apresye ki Gouvernman i reste alekout son dimoun e i kontinyen asire ki en porsyon larises ki pei i zenere i retourn dan lakominote pou kontinnyen benefisye tou dimoun.  E pour sa mon dir mersi.

La mon oule lans en lapel avek bann Minister e Departman pou vin pli proaktiv atraver plis konsiltasyon avek Lotorite Distrik pandan faz preparasyon Bidze.  Sa a permet nou met bann vre konsern nou kominote devan e ed toulede kote pou pli mye reponn bezwen e laspirasyon nou bann sitwayen dan en fason pli direk.

 

(Applaud)

 

Mr Speaker

Ankor 3 minit Onorab.

 

HON BERNARD ARNEPHY

Mr Speaker mon oule salye zefor e travay remarkab ki staff Fire And Rescue Services Sub-Station Anse Boileau pe zwe ou ede dan bann loperasyon rescue dan rezyon Sid Was.  Zot pe ede sov en kantite lavi e propriyete a risk.  Mon kontan note ki provizyon pou konstriksyon en dortwar kot sa stasyon i en lot move dan en direksyon pou amelyor zot welfare e kondisyon travay.

Wi Mr Speaker nou Gouvernman pe kontinyen delivre lo son bann promes.  Chapeau!

Pou konklir Mr Speaker kontrerman avek sa ki Leader Lopozisyon dan sa Lasanble in esey fer Lepep Seselwa krwar Bidze 2013 i plito enn ki anmenn en mesaz lespwar pou pep Seselwa.  Sa Bidze pe dir avek Seselwa ki Gouvernman dizour i enn ki ekoute, annan konpasyon e i delivre.  Se laspirasyon Lepep ki dan sa Bidze, laspirasyon Onorab Pierre e PDM i dan sa Bidze e Mr Speaker laspirasyon Lopozisyon out there i dan sa Bidze.  Mr Speaker tou Seselwa i dan sa Bidze akoz sa Bidze pe dir avek sekter prive pou etre pli proaktiv e zwe en rol pli enportan pou aport ankor plis kontribisyon dan sa transformasyon ekonomik e sosyal ki pei in anbark lo la.  Mon panse ki en bon public e private sector partnership i lakle pou ed nou fokaliz nou resours e osi kontribye dan realizasyon target ek lobzektif nou plan renesans sosyal.

Mr Speaker sa Bidze 2013 pe dir avek Lepep Seselwa ki Gouvernman Lepep pa pou zanmen abandonn son pep, malgre tou defi.

Ogmantasyon dan pri lavi i reste en konsern mazer nou Gouvernman malgre sa nou reste optimis ki bann mezir ki pe ganny pran pou kontinnyen ede soulaz bann dan difikilte e pou ki nou dimoun i kapab fer fas dan en meyer fason avek pri lavi.

Provizyon sa Bidze i laprev ki koman en Gouvernman….

 

MR SPEAKER

Rap up Onorab, rap up.  1 minit en.

 

HON BERNARD ARNEPHY

Provizyon sa Bidze i reste alprev ki nou Gouvernman i reste relevan, determinen e touzour a lekout son pep e pou sa mon dir bravo.

Mr Speaker i reste mwan pou swet Prezidan Michel, Vis Prezidan Michel ek zot fanmiy, ou menm Mr Speaker ek ou fanmiy, tou bann Minis ek zot fanmiy, tou bann Manm koleg Onorab ek zot fanmiy, mon DA e son staff, tou Manm Lasanble e zot fanmiy en Zwaye Noel e en lannen 2013 ranpli avek prosperite ki Bondye i kontinnyen beni nou zoli pei.  Mersi.

 

MR SPEAKER

Bon, nou’n ariv alafen bann reaksyon par bann Manm, nou pou adjourn e nou pou zwenn demen bomaten 9er, kot nou pou ganny sans ekout reply Minis.  So meeting i adjourn ziska demen 9er.

 

 

(Adjournment)