::
Home » Verbatim » Verbatim - Third Term 2012 » Tuesday 9th October 2012

Tuesday 9th October 2012

 

Download PDF

___________________________________________________________________________________________

 

NATIONAL ASSEMBLY OF SEYCHELLES

Tuesday 9th October 2012

The Assembly met at 9 am

National Anthem

Moment of Reflection

Mr. Speaker in the Chair

 

MR SPEAKER

Bonzour tou bann Manm Lasanble Nasyonal.  Bonzour Vis Prezidan e son delegasyon.  Bonzour tou bann dimoun ki pe ekout nou dan lakour.  Mon oule osi, o non Lasanble Nasyonal swet labyenveni parmi nou bann zanfan ki pe fer zot A Level, ki ozordi pe attend nou sesyon, osi byen ki bann zenn trwazyenm lannen fakilte Law Liniversite Sesel.

Parey zot in remarke, monn fer sa labyenveni o non Lasanble Nasyonal, pou nou kapab proceed direkteman lo bann kestyon, olye ki sak Manm avan i demann kestyon, nek i welcome tou dimoun e nou run out of time dan sa fason.  So, mon ekspekte bann Manm al direkteman lo zot kestyon akoz ozordi nou annan 10 kestyon ki pe ganny pran par Vis Prezidan e bokou i konsern bann Departman ki li ouswa Prezidan Larepiblik i annan portfolio responsibility.

So, nou ava komans avek kestyon 92.  Mon konpran dan labsans Onorab Lucas, se Onorab De Commarmond ki pou demann sa bann kestyon.  Onorab De Commarmond, 92.

 

HON CHARLES DE COMMARMOND

Mersi Mr Speaker, bonzour Mr Speaker, bonzour Vis Prezidan e tou dimoun ki alekout.  Mr Speaker, lo non Manm Lasanble pou distrik Baie Lazare Onorab Lucas, mon pe demann sa bann kestyon swivan.

Pou demann Minis si Gouvernman i annan plan pou met anplas en Law Reform Commission, la ki bokou nou bann Lalwa pa pe reponn legzizans nou sosyete?  Mersi Mr Speaker.

 

VICE PRESIDENT DANNY FAURE

Mr Speaker, tou bann Manm Onorab Lasanble Nasyonal.  Kestyon annan en Komisyon lo Reform Lalwa pe ganny egzaminen de pre par Biro Atorni Zeneral e nou panse ki sa set en bon keksoz.  Aktyelman mannyer keksoz pe deroule, Lalwa i ganny egzaminen par bann Minister e bann Minister i regard polisi, anmenmtan soumet pou konsiderasyon cabinet e cabinet apre i donn lenstriksyon pou Biro Atorni Zeneral drafte sa bann Lalwa.  E la nou pe koz lo en keksoz ki pli konpreansiv olye ki sak bann Minister pe fer e an Septanm 2008, Gouvernman ti apwent en komisyoner pou revizyon Lalwa.  Sa se Ziz Perera ki’n komans en travay pou fer bann revizyon lo Lalwa e Gouvernman i rekonnet, parey Lasanble i rekonnet, atraver sa kestyon ki pei i bezwen bann nouvo Lalwa.  Pa zis nouvo Lalwa pou ranplas bann Lalwa ki egziste, me nouvo Lalwa akoz nesesite devlopman pei an zeneral kot nou’n vwar pandan sa bann dernyen lannen, plizyer nouvo Lalwa in ganny aprouve par Lasanble Nasyonal.

Donk bref Mr Speaker, sa kestyon pe ganny egzaminen de pre par Biro Atorni Zeneral.  Mersi Mr Speaker.

 

MR SPEAKER

Bon, Onorab De Commarmond, okenn siplemanter?

 

HON CHARLES DE COMMARMOND

Wi Mr Speaker, eski dan larepons Minis, eski Minis i kapab eksplik nou Lasanble si in etablir en dele letan pou met azour sa bann Lalwa e ki mekanizm vreman ki Gouvernman pe servi pou nou al pli vit pou met sa anmars?  Mersi.

 

VICE PRESIDENT DANNY FAURE

Mr Speaker, i annan plizyer Proze de Lwa ki ozordi i ankor avek biro Atorni Zeneral.  Enn bann kontrent se kontrent mendev e i annan plizyer keksoz ki’n ganny fer par Gouvernman, par Prezidan e osi par Atorni Zeneral limenm.  E bann bon keksoz ki’n ganny fer se en egzaminasyon bann kondisyon travay, en nouvo scheme of service e 2 semenn pase in annan en recruitment pou bann personnel, pou kapab vin travay avek sa biro pou kapab fer bann travay ki pei i bezwen.

Donk i annan en kantite travay, en kantite pending Proze de Lwa ki bezwen ganny fini drafte e ganny soumet devan Lasanble Nasyonal.  Me kestyon en Komisyon se pou revwar bann Lalwa ki egziste, ki’n ganny pase plizyer lannen pase.  E pou kapab etablir sa Komisyon, se pou sela mon’n dir ki i bezwen ganny egzaminen de pre e Gouvernman i anvi ki sa bann kestyon i ganny reponn.  Eski nou bezwen kree en lot Komisyon ki pou endepandan?  Konbyen i pou kout tax payers sa Komisyon?  En seri bann kestyon.  Lekel bann dimoun ki pou travay ladan?  Donk, nou panse ki enn fwa ki sa legzersis, sa legzaminasyon in ganny fer, Gouvernman i kapab pran en desizyon baze lo bann donnen ki solid, avek bi ki nou kapab avans devan.  Mersi.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Bonzour Minis ek son delegasyon, bonzour tou Manm.  Mr Speaker, eski Vis Prezidan i kapab enform sa Lasanble si olye apwent en Komisyoner, parey dan ka Justice Perera, eski i kapab dir nou si Gouvernman i pare pou li anmenn en Bill devan Lasanble Nasyonal pou nou fer li vin Lalwa, en Lalwa ki ava diriz sa Law Reform Commission, oubyen Law Commission, pou donn li en baz legal?  Mersi Mr Speaker.

 

VICE PRESIDENT DANNY FAURE

Mr Speaker, si en Komisyon Reform Lalwa i annan en striktir legal, avan ki nou tonm dakor lo la, fodre sa prosesis egzaminasyon par Biro Atorni Zeneral i ganny finalize avan e ki son modalite, si i pou en striktir administrativ, si i pou bezwen annan en striktir ki administrativ me selman i annan pouvwar legal, sa Gouvernman i ava pronons son lekor lo la, enn fwa ki Biro Atorni Zeneral i fer.  En apwentman Komisyoner lo revizyon Lalwa ti ganny fer anba en lot Lalwa.  Ok.  E sa ti ganny fer an Septanm 2008 pou li kapab reviz bann Lalwa e met zot azour, i 2 keksoz ki diferan, me dan Gouvernman nou dir les Biro Atorni Zeneral kontinnyen ek son prose, fer son egzaminasyon, soumet son rekomandasyon devan Prezidan ki Minis Legal Affairs, apre Gouvernman i ava deside.  Mersi.

 

MR SPEAKER

Onorab Pillay.

 

 

 

HON SEBASTIEN PILLAY

Mersi Mr Speaker.  Mr Speaker, eski Minis i kapab dir nou ki pandan sa letan ki Gouvernman pe revwar sa plan pou entrodwir sa Law Reform Commission, ki mezir nou pe met anplas pou nou kapab revwar serten Lalwa ki pa pe reponn legzizans sa sosyete ozordi tel koman Matrimonial Closes Act e lezot ankor e si sa Law Reform Commission pou osi annan manda pou fer Law Revision? Mersi Mr Speaker.

 

VICE PRESIDENT DANNY FAURE

Mr Speaker, dan labsans en Komisyon ki nou pe koz lo la i pa vedir keksoz pa pe marse me the Commission, parey pe ganny diskite, pe ganny egzaminen, bezwen vwar bann Lalwa, i pou bezwen vwar bann Lalwa dan tou son konpleksite.  Nou pe koz en reform.  Me i annan bann Lalwa, ki’n ganny mete devan Gouvernman, in pase devan Lasanble Nasyonal, dan labsans en Komisyon akoz premyerman e prensipalman manda lofis biro Atorni Zeneral se pou drafte sa bann Lalwa.  Me i ganny lenstriksyon pou drafte sa bann Lalwa baze lo bann polisi ki bann Minister i met devan li.  I pa pou move si napa sa.  Oubyen si napa bann Mosyon ki lebra leta lezislasyon, i pas en Mosyon ki demann Gouvernman pou kapab speed up e sa i ganny diskit dan Gouvernman e i vin en priyorite.  Dan son bann priyorite i sanze.  Me la ki nou pe diskite, sa kestyon i dir be fodre nou bezwen regard sa size avek en lot perspektiv.  Donn li en lot perspektiv akoz napa zis bann nouvo Lalwa ki pe vini.  Be i annan bann Lalwa ki nou annan pou plizyer lannen ki devret ganny regarde.  E se sa dan konteks ki nou pe reponn sa kestyon.

 

MR SPEAKER

Kestyon 93, Onorab De Commarmond ankor pou demann dan plas Onorab Lucas.

 

HON CHARLES DE COMMARMOND

Mersi Mr Speaker.  Mr Speaker, lo behalf Manm elekte pou distrik Baie Lazare, Onorab Wilby Lucas, mon demann sa kestyon swivan.  Pou demann Minis pou enform sa Lasanble kan ki Biro Atorni Zeneral pou met a dispozisyon piblik versyon revize bann Lalwa ki pa’n pibliye depi 2005?  Mersi Mr Speaker.

 

VICE PRESIDENT DANNY FAURE

Mr Speaker, anba the Act ki apel Statute Law Revision, Gouvernman ti apwent Ziz Perera an Septanm 2008 koman Komisyoner pou fer revizyon lo bann Lalwa.  E in egzamin bann Lalwa depi 1995 ziska sa lannen.  I annan plizyer travay ki’n ganny fer.  En kantite travay entans.  I pa en travay ki fasil me in fer sa travay e mon ti a kontan enform nou Lasanble kalandriye etablir par biro Atorni Zeneral i dir ki tou son travay pou vin ofisyel e pibliye avan Out 2013.  Mersi Mr Speaker.

 

MR SPEAKER

Bon, Onorab De Commarmond okenn siplemanter?

 

HON CHARLES DE COMMARMOND

Mersi Mr Speaker.  Mr Speaker, eski Vis Prezidan i kapab konsider ki Biro Atorni Zeneral i met osi sa bann Lalwa ki pe ganny revize online pou benefis bann zenn e bann ki pe fer resers dan domenn Lalwa dan nou pei?  Mersi.

 

 

 

VICE PRESIDENT DANNY FAURE

Mr Speaker, wi, i annan provizyon pou sa ganny fer.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, eski Minis i kapab enform sa Lasanble si biro Atorni Zeneral pou osi lyez avek bann lekol dan pei, oubyen avek Minister Ledikasyon pou fer sir ki i annan en progranm oubyen en fason pou fer nou bann zanfan e nou bann etidyan ganny akse avek sa bann dokiman e ki sa bann dokiman i vedir, savedir enstrir zot ki sa bann dokiman i vedir alavenir?  Mersi Mr Speaker.

 

VICE PRESIDENT DANNY FAURE

Mr Speaker, Gouvernman avek biro Atorni Zeneral i enterese pou fer travay aksesib.  Aksesib atraver fasilite modern internet, hard copy i bezwen ganny aste, donk si lekol i bezwen, fodre Lasanble i vot lo en Bidze pou kapab met sa bann gro dokiman a dispozisyon bann lekol, me sak lenstitisyon i fer son responsabilite.  La, Biro Atorni Zeneral li son responsabilite se fer son travay e pibliye.  Kwa ki ganny fer avek, ki zot anvi ganny fer avek, sa set en lot kestyon Mr Speaker.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mr Speaker eski Minis i kapab dir nou Lasanble si an relasyon avek sa bann Lalwa ki devret ganny met a dispozisyon piblik, si bann Minister e Departman Gouvernman osi i annan plan lo zot sit web met bann stati legal ki Gouvernman zot bann aktivite e zot bann fonksyon?  Mersi Mr Speaker.

 

VICE PRESIDENT DANNY FAURE

Mr Speaker, sa ki pou pli byen se ki ou annan en sel sit kot ou annan access avek tou bann Lalwa.

 

MR SPEAKER

Kestyon 94, Onorab Arnephy.

 

HON BERNARD ARNEPHY

Mersi Mr Speaker, bonzour tou dimoun.  Mr Speaker, kestyon se pou demann Vis Prezidan ki bann mekanizm ki annan anplas, pou ankouraz plis zenn avek potansyel neseser pou zwenn lafors defans Sesel, pou ki an retour pei i annan plis sa kapasite neseser pou mye sirvey e defann son teritwar?  Mersi.

 

VICE PRESIDENT DANNY FAURE

Mr Speaker, en nouvo kondisyon travay, amelyorasyon dan lanvironnman travay, scheme of service ki montre en kad progresyon sorti lo en nivo pou al lo lot nivo e ki bann kors ki ou bezwen fer.  Legzistans en lakademi militer pou train bann nouvo recruit ki antre, ki zwenn Lafors Defans.  Brefman, i annan mekanizm anplas Mr Speaker.

 

MR SPEAKER

Okenn siplemanter?

 

HON BERNARD ARNEPHY

Mersi Mr Speaker.  Mr Speaker, eski Minis i kapab enform Lasanble si Departman Ladefans i annan plan travay an etrwat kolaborasyon avek lekol S5, enpe parey pou Seychelles Police Academy, kot nou ganny manrmay sorti direk dan S5 ki zwenn Lafors Defans.  Mersi.

 

 

VICE PRESIDENT DANNY FAURE

Mr Speaker wi.

 

MR SPEAKER

Onorab Valmont.

 

HON SYLVIANNE VALMONT

Mersi Mr Speaker, bnzour Mr Speaker.  Bonzour Vis Prezidan.  Mr Speaker, eski Minis i kapab dir sa Lasanble ki bann incentives, in koz lo training programs, schemes, of service, petet ankor nouvo incentives ki Minister Ladefans pou met anplas ki pou spesifikman atrakte bann zenn madanm ki annan potansyel silvouple.  Mersi Minis.  Mersi Mr Speaker.

 

VICE PRESIDENT DANNY FAURE

Mr Speaker, Lafors Defans i pa diskriminatwar.  I krwar dan en sistenm ki kouver bann zenn fiy e zenn garson.  E dan bann scheme of service, in ganny etablir tre byen kwa ki zot bezwen, an term bann incentives pou join Lafors Defans.  Me mon ti a kontan repete, kondisyon travay in amelyore, lanvironnman in amelyore, en nouvo lekol pou zot, en career path ki byen kler, tousala se bann bon eleman pou join me pli gran defi se defi sa travay ki pa fasil.  Apard kalifikasyon, ou bezwen egzamin leker ek tenasite nou bann zenn.  Zenn garson, zenn fiy pou kapab sirviv dan sa nouvo lanvironnman.  Mersi Mr Speaker.

 

MR SPEAKER

95, Onorab Arnephy.

 

HON BERNARD ARNEPHY

Mersi Mr Speaker.  Mr Speaker, kestyon se pou demann Vis Prezidan si Lakademi Militer Ile Du Suete i annan ase kapasite resours e personnel o nivo, pou zwenn bezwen training bann nouvo rekrit, pou ki zot ganny otan bagaz neseser pou fer fas avek bann latas e defi ekspekte de zot apre zot training? Mersi.

 

VICE PRESIDENT DANNY FAURE

Polisi Lafors Defans i kler.  Vizyon i kler.  In ganny ekrir, in byen etablir, ou annan en lakademi, ou annan nouvo defi.  Ou annan en lakademi ki i 100 poursan enstrikter Seselwa.  Apard bann bilateral, korperasyon ki nou annan avek nou bann zanmi, ki tousala i bann bon reset pou kapab donn en formasyon avanse pou bann recruit e osi bann zofisye ki travay dan lakademi.  E parey Lasanble i konnen, zot in ganny en nouvo enfrastriktir, zot pe esper lezot enfrastriktir ganny fer, me nou devret santi nou annan sa Lenstitisyon ozordi, dan pei ki pe deservi Lafors Defans Sesel.  Mersi Mr Speaker.

 

MR SPEAKER

Onorab Arnephy, okenn siplemanter?

 

HON BERNARD ARNEPHY

Mersi Mr Speaker.  Mr Speaker, eski Vis Prezidan i kapab enform sa Lasanble si apre zot training, bann solda i ganny sans pou zot further devlop zot kapasite e aprofondir sa atraver bann ekspoze rezyonnal ou enternasyonal, par egzanp, partisip dan bann peace keeping mission e bann lezot misyon similer?  Mersi.

 

VICE PRESIDENT DANNY FAURE

Wi Mr Speaker, i annan tout en loportinite, me par kont osi, nou bezwen solda osi dan pei.  Me ekspoze i annan gran posibilite e SPDF in vreman ekspoz laplipar son bann zofisye ozordi, in al dan plizyer landrwa pou ganny en training. Swa zot in al Lenn, swa zot in al Langleter, swa zot in al La Tanzani, swa zot in al Lanmerik.  Donk, set en lorganizasyon ki ekspoz son bann kad.  Mersi.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker eski Minis i kapab enform sa Lasanble, dan zot plan dizon 5an, konbyen larzan Gouvernman i anvizaze envestir oubyen depanse, avek sa Lakademi, vizavi training, pou fer sir ki nou bann zenn i vin pli for e pli profesyonnel dan zot travay, pou ki zot pli mye kapab reponn a bezwen pei dan domenn Ladefans alavenir?  Mersi Mr Speaker.

 

VICE PRESIDENT DANNY FAURE

Mr Speaker, Bidze Lafors Ladefans i parey tou bann Manm Lasanble i okouran, i ganny pase par Lasanble, in desot apepre R99 milyon.  Me lo en prozeksyon 5an, i pou baze lo progranm medium term ki Gouvernman i annan e lo polisi fiskal ki Minis Finans in met devan Lasanble, mon pou fer en erer si mon donn zot en sif e tou sif i bezwen tonm dakor dan sa pannyen.  Me mon kapab donn garanti, Onorab Leader Lopozisyon ki Lafors Ladefans Sesel pou fer sir ki son Lakademi i pa zis annan larzan pou kouver recurrent cost, me i annan sifizan larzan pou met dan progranm pou enstrir e form nou bann kad.  Mersi.

 

MR SPEAKER

Kestyon 96, Onorab Lebon.

 

HON LENNY LEBON

Bonzour Mr Speaker, bonzour Vis Prezidan.  Eski Vis Prezidan i kapab enform sa Lasanble si Departman Lazenes pe revwar youth policy pou byen reflekte demann Prezidan Michel pou ki sa konsey travay pou empower nou lazenes avek skill neseser pou lavenir?

 

VICE PRESIDENT DANNY FAURE

Mr Speaker, larepons i wi e sa pou ganny fer lannen prosenn.  Pou ganny fer lannen prosenn akoz son prosedir se ki tou le 5an i annan en revizyon lo bann polisi.  An sa ki konsern lobzektif final dan sa kestyon, sa i osi tous ledikasyon, atraver formasyon, atraver training, nou revwar bann skills ki nou bann zenn i devret annan.  Nou pa bezwen esper revizyon dan polisi pou fer sir ki sa ki Prezidan pe demande i arive.  Me skills development i en prose sistenm ledikasyon dan son lansanm.  Mersi Mr Speaker.

 

MR SPEAKER

Onorab Lebon, okenn siplemanter?

 

HON LENNY LEBON

Mr Speaker, Mersi.  Eski Vis Prezidan i kapab enform nou Lasanble si i egziste provizyon pou bann zenn ki dan pozisyon leadership lazenes al fer training pli avanse aletranze?  Mersi.

 

VICE PRESIDENT DANNY FAURE

Mr Speaker, lotorite ki annan manda lo Human Resource Development dan Sesel pe fer en travay pou regard ki bann demand e supply mendev Seselwa lo marse.  Ki bann areas nou bezwen fer ki nou bann Seselwa i ganny formasyon pli aprofondi.  Ki kantite ki nou bezwen?  Enn fwa ki sa i ganny fer, then nou ava dir ki pou Departman Lazenes, nou annan tan ki pe ganny fer.  Nou bezwen esper sa legzersis mazer ganny fer.

Me pou lenformasyon Lasanble, depi an 2006, Commonwealth Youth Department avek Gouvernman Sesel ti entrodwir en diplonm avanse pou bann Youth Workers. Premye batch in ganny zot diplonm 2 mwan pase e i annan en lot cohort ki pe pourswiv sa training.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Mersi Mr Speaker.  Mr Speaker, eski Vis Prezidan i kapab dir sa Lasanble si Departman Lazenes in fer en letid aprofondi e vwar bann konsern reel avanler sa youth policy pou ganny revwar e enplimante lannen prosenn ki pou son senkyenm lannen?  Mersi.

 

VICE PRESIDENT DANNY FAURE

Non, natir Departman Lazenes e natir sa parasol ki anglob tou bann striktir lazenes dan pei se reste soude ek lazenes e se atraver sa mekanizm ki Departman Lazenes e Youth Council zot vin met okouran bann problenm.  Sa i enn.  Me anmenmtan i annan striktir Gouvernman.  Ou annan ledikasyon, ou annan Minister Lasante ki konn bann problenm.  I annan bann done ki pe sorti, bann lenformasyon ki pe sorti atraver Minister Lasante ki montre vre leta lasante Sesel.  Donk i annan tou sa bann eleman.  Savedir Gouvernman pa travay an izolasyon avek lazenes.  E pou zot lenformasyon, 57 poursan popilasyon Sesel ozordi i tonm anba 35an.  Donk nou pe koz lo en progranm konpreansiv lo devlopman nou lazenes.  E i pa en keksoz artifisyel, i pa en keksoz leze, i en keksoz de sibstans.  E okenn sanzman dan polisi i bezwen ganny fer, prenan kont ki sa popilasyon zot menm zot ki pou la demen.  Me ou pa esper zot vin la demen pou fer en travay bann zenn.  Ou fer en travay lo lazenes ozordi e lazenes i bezwen konnen kote i met son lenerzi ler ou ankor zenn.  E ou bezwen konnen ki ou priyorite.  Serten keksoz ki ou anvi fer, ou postpone.  Ou konsantre lo bann keksoz ki nimero 1 pou ou.  Paregzanp, si ou annan 15an, ou dan lekol segonder, ou nimero 1 se ou letid.  Ou nimero 1 pa kapab zwe toulezour.  Ou nimero 1 se ou letid, ou priyorite.  Ou konsantre ou lenerzi ladan.  Sa i bann keksoz ki nou bezwen dir, pou nou kapab oriyant nou bann zenes avek bi ki zot kapab viv dan en sosyete ki pli meyer ki pou nou.  Savedir definisyon karakter e profil lazenes i pa komans ler sa zenn i desot 35an.  Ok.  I bezwen komans ozordi, dan lakour, dan fanmiy, dan lekol, dan son lanvironnman toulezour.  E sa mesaz ki bezwen pase sistematikman san ki sa mesaz i ganny perdi son kouler, si nou anvi vreman edik nou lazenes dan sa monn ki vin pli global e son bann defi i plis ki bann defi ki nou ler nou ti zenn nou ti pe pas ladan.  E sa se realite ozordi.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, Minis in koz lo en letid basically, pou vwar ki kalite training nou bezwen donn nou lazenes an relasyon avek marse lanplwa, ki mon santi i ekstrememan enportan.  Eski Minis i kapab donn sa Lasanble lenformasyon lo kan ekzakteman ki sa letid ti komanse e kan ki i ekspekte terminen pou nou kapab ganny en rapor lo la?  Mersi Mr Speaker.

 

 

VICE PRESIDENT DANNY FAURE

Mr Speaker, pa pou ganny en rapor, pou ganny en plan konkret.  E dan sa plan konkret i ava dir dan ki sekter ki nou bezwen fer.  Donk son bann done, Onorab Leader Lopozisyon pe ganny met ansanm akoz nou apel sa en plan lo Human Resource Development pou pei akoz striktir lekonomi Sesel in sanze.  Ok.  7/8 an pase, pli gran anplwayer dan Sesel ti Gouvernman.  Ozordi Mr Speaker, ler mon pe pran laparol anba ou lotorite, pli gran anplwayer dan Sesel se sekter prive.  Donk se lekonomi in sanze.  Ler lekonomi in sanze, ou bezwen prepar ou pou ou kapab devlop lezot keksoz.  E dan sa konteks set en Human Resource Development, pou regarde si vreman nou striktir ledikasyon pe prepar bann mendev pou sa nouvo lekonomi.  Oubyen, i ankor pe prepar mendev on the old economy.  Nou pe fer fas avek en nouvo lekonomi an tout transformasyon.  Pankor fini son transformasyon e travay i la Mr Speaker.

 

MR SPEAKER

Onorab Lebon, kestyon 97.

 

HON LENNY LEBON

Mersi Mr Speaker.  Eski Minis i kapab enform nou Lasanble si son Minister pe mazin fer en youth study pou ede detekte nouvo defi nou lazenes e pou vin pli ofe a larealite sitiasyon lazenes dan nou kominote e sa ava ede pou gid Gouvernman lo nouvo stratezi progranm lazenes?  Mersi.

 

VICE PRESIDENT DANNY FAURE

Mr Speaker, tou bann lenformasyon pe ganny anmase.  Striktir in fini ganny trase.  Pou zot lenformasyon, rezilta lo census ki ti ganny fer an 2010 pou sorti lannen.  Sa tousala se bann done, bann lenformasyon.  Nouvo lenformasyon lo household survey dan pei, pou regarde si vreman e ki degre i annan en kestyon kout lavi dan pei.  Tou sa bann lenformasyon nou pou gannyen lannen prosen.  Ler tou sa bann lenformasyon in ganny compiled e lenformasyon i sorti dan ledikasyon, lenformasyon i sorti dan lasante.  Ler tou sa bann lenformasyon i ariv kot Departman Lazenes, anplis avek zot prop enteraksyon avek bann zenn, then lotorite Departman Lazenes e National Youth Council i ava dir regarde, nou krwar i annan serten keksoz ki zot pa pe donn nou.  Lo nou radar i mank sa lenformasyon, nou krwar ki nou bezwen pe fer.  Nou bezwen evit duplication. Diplikasyon i anmenn depans initil e osi mendev ki pe fer en travay ki lezot pe ganny fer.  Donk mon krwar set en desizyon byen entelizan delapar Departman Lazenes e son konsey, pou esper tou sa bann lenformasyon vini avan zot deside what is the next move.  Mersi Mr Speaker.

 

MR SPEAKER

Onorab Samson.  Oh ya, ou annan rezon.  En siplemanter ankor.  Onorab Lebon.

 

HON LENNY LEBON

Eski Vis Prezidan i kapab enform nou Lasanble ki bann metod i ekspekte ganny servi pou ki finalman nou ganny en youth strategic program ki reflekte lopinyon mazorite bann lorganizasyon, group oubyen endividi konsernen?  Mersi.

 

VICE PRESIDENT DANNY FAURE

Mon krwar sa ki enportan se i bezwen rely fortman lo bann levidans.  Empirical evidence. Ok.  I pa kapab en dokiman ki ganny drafte par detrwa dimoun, asize dan en biro 24 lo 24 e nou dir sa pou lazenes.  Pa marse koumsa.  Ok.  E nou krwar ki prose ki pe ganny swiv ozordi set enn ki bon.  I pe swiv en metodolozi syantifik e okenn proze ki swiv sa lalinny i bann proze ki reisir.  Donk mon krwar, dan Gouvernman nou dir ki bann travay ki pe ganny fer ozordi se bann travay ki byen.  Donk nou esper bann lezot lenformasyon sorti enpe partou ok, bann dokiman serye pou kapab ganny met ansanm, apre decide lo next move ki sa Departman i bezwen ganny fer.  Mersi.

 

MR SPEAKER

Onorab Samson.

 

HON DEREK SAMSON

Mersi Mr Speaker.  Vis Prezidan, koleg MNA bonzour.  Mr Speaker, eski Vis Prezidan i kapab enform sa Lasanble si Departman Lazenes, ansanm avek Minister Lasante i anvizaze etablir mekanizm pou mezir lentansite problenm lasante ki nou bann zenn pe fer fas avek dan sa nouvo lekonomi ki nou pe viv?  Mersi.

 

 

VICE PRESIDENT DANNY FAURE

Mr Speaker, ozordi Minister Lasante i annan en seksyon ki dedye pirman pou sirvey bann maladi dan pei.  Set en striktir avanse e ki toulezour i annan lenformasyon.  Me son problenm se ki sa bann lenformasyon i bezwen ganny partaze pou ki bann policy makers e bann dirizan, parey nou Lasanble Nasyonal zot okouran e sa bann lenformasyon la, i bezwen ganny passed on.  Dan Gouvernman, ler nou pe koz lo lazenes, nou konn bann kategori e nou konn bann patern disease ki nou annan e mon krwar se ou annan lenformasyon enpe partou.  Me sa ki bezwen ganny fer, apard sa surveillance seksyon ki dan Minister Lasante, lo bann lezot problenm ki annan pou fer avek lasante, nou annan en lot seksyon ki ansarz promosyon lasante.  Pli gran defi ozordi dan pei se prevansyon e pattern disease ozordi i pa parey 30an pase.  Nou pattern disease ozordi dan Sesel i parey bann pei OECD, bann pei endistriyalize.  Donk, i tout en travay ki bezwen ganny fer vizavi nou zenn e nou, nou dakor avek sa ki Minister Lasante pe dir, nou bezwen met aksan lo lifestyle.  Positive lifestyle nou bann zenes.  Si nou pa fer sa, nou pou vwar nou dan difikilte kot tou le lannen, Minis Finans i bezwen vin isi e demann bokou plis larzan pou kapab soutenir en sistenm lasante.  Brefman, tou sa bann travay pe ganny fer ansanm Onorab.  Mersi.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, Minis in reponn kestyon lo en Youth Stretgic Program, eski Minis alors i kapab donn lenformasyon sa Lasanble lo ki plan ki Gouvernman i annan pou garanti ki sa Youth Strategic Program i ganny entegre dan nou sistenm ledikasyon pou benefis lazenes Seselwa?  Mersi Mr Speaker.

 

VICE PRESIDENT DANNY FAURE

Mr Speaker, lefe ki bann konsern lazenes i santral e ki lazenes Sesel i pa’n ganny marginalised, vedir in ganny mete dekote, me ki i form parti plan global Gouvernman on people centered development. Tou lezot stratezi, tou lezot plan, ki se swa dan ledikasyon, ki se swa dan lasante i bezwen apir sa vizyon.  E i pa kapab kontradwir sa vizyon.  Par egzanp, si lo nivo lazenes, nou bezwen fer sir ki i annan new skills, oubyen multi-skills. Striktir ledikasyon i bezwen fer sir ki lazenes ki pe sorti i bezwen en zenes ki annan tou sa bann bezwen, sa bann kalite.  Mersi.

 

MR SPEAKER

Kestyon 98, Onorab Melval Dugasse.

 

HON MELVAL DUGASSE

Mersi Mr Speaker.  Eski Minis i kapab enform sa Lasanble ki bann diferan kategori scheme of service ki egziste dan servis piblik konmela?  Mersi.

 

VICE PRESIDENT DANNY FAURE

Mr Speaker, nou pe koz lo en scheme of service.  En scheme of service set en kad e dan sa kad, i dir ou ki bann nivo, ki bann steps e i dir osi, pou ou sorti lo step one pou al lo step two, ki kalifye ki ou bezwen.  Anmenmtan i dir ou ki striktir saler ki ou bezwen.  Fondamantalman, en scheme of service i la pou kapab amelyor kondisyon travayer.  Dezyenmman, se to retain bann staff.  Me pli fondamantalman, i montre ou en semen progresyon ki ou osi ou, koman travayer ou bezwen fer.  Se pou sa rezon nou pe koz langaz professional development.

Mr Speaker, nou Gouvernman in fer en kantite li.  In fer en kantite.  E avek ou permisyon, akoz kestyon i tre spesifik, i dir kategori.  Dan legal, nou annan en kad pou Avoka, kad pou Prosekiter.  Dan Zidisyer ou annan kad sekreter Zidisyer, ou annan kad pou kontab.  Dan Ledikasyon, nou annan kad pou arsitek.  Ler mon dir kad, mon pe dir schemes of service.  Kad pou arpanter, zofisye evaliasyon e zestyon later, zofisye teknik.  Kad pou enterpret Lakour, nou annan en scheme of service osi laba.  Raporter Lakour.  Kad pou prizon, savedir bann zofisye ki travay laba osi i annan en scheme of service.  Divizyon planifikasyon ek kontrol finansyel.  Minister Finans zot osi zot annan en kad.  Bann odit entern, dan Minister Finans.  Nou annan en kad medikal e danter.  Kad pou ners.  Kad siport ogzilyer dan klinik.  Kad profesyoner lasante.  Kad lenspeksyon dan lotorite Licensing.  Kad drayver sinyor, kad pou bann ansennyan, kad zofisye ladministrasyon dan departman ladministrasyon piblik.  Kad pou lotorite pou kalifikasyon Sesel.  Kad pou bann zofisye ki travay dan departman lenformasyon ek kominikasyon teknolozik.  Kad sipor pou sistenm kominikasyon.  Ler mon dir kad, mon pe dir scheme of service Mr Speaker.  Kad lapolis lanvironnman, kad zofisye meterolozi, kad zofisye teknik meterolozi, kad servis tenny dife, kad dan lapolis, kad pou Imigrasyon, kad pou drayver protokol, kad relasyon eksteryer, kad diplomatik, kad servis veteriner, kad travayer sosyal, kad pou bann councellers e kot mon dir kad, mon pe koz lo schemes of service Mr Speaker.  Kad pou ladministrasyon sekirite maritim Sesel, kad Arsiv ek Mize, kad pou resours imen, kad administrativ, kad pou office management, kad pou procurement, kad pou bibliotek skoler, kad dan departman lanplwa.  Kad pou zofisye sipor dan ledikasyon e dan biro Standar Sesel, nou annan kad pou lenspesksyon pwason, kad pou servis enzenyer e meterolozi.  Kad pou servis standardizasyon e lenformasyon.  Kad pou servis sertifikasyon.  Kad pou servis tes biosimik.  Kad pou Biro Statistik Nasyonal.  Kad pou bann dimoun ki travay dan Biro Lenvestisman Sesel.  Nou apel sa kad servis promosyon e fasilitasyon lenvestisman dan Lotorite Lapes Sesel.  Kad pou bann siantis.  Kad pou sipor teknik.  Kad pou asistan pou sipor.  Kad pou bann Head Teachers e kot mon dir kad, mon pe koz lo schemes of service Mr Speaker.  Kad pou divizyon lanrezistreman.  Kad pou license lazans lagrikiltir Sesel e la nou annan pou unit livestock, devlopman, resers e laboratwar.  Zofisye ekstansyon e lagrikiltir, zofisye later ek lagrikiltir.  Kad pou lenplimantasyon proze e kad pou lasistans personnel.

E Mr Speaker, pou ou devlop en kad ou pa devlop li ozour pou demen.  I annan en kantite travay ki ganny fer avek sa.  I annan evaliasyon lo bann post, regard bann konpetans, lenformasyon ki sorti dan en Minister ek en Minister e en Departman ki al kot Departman Public Administration. Nou kapab travay lo en kad me fodre nou annan larzan pou annan dan bann kad.  E tou sa 51 ki monn mansyonnen, enkli kad pou Defans in ganny bidzete e pe ganny enplimante par Gouvernman Sesel.  Mersi.

 

MR SPEAKER

Okenn siplemanter, Onorab Dugasse?

 

HON MELVAL DUGASSE

Wi Mr Speaker, Mersi.  Eski i egziste en metod oubyen en mekanizm dan ou Minister ki kapab toultan asire ki bann diferan Departman Gouvernman zot pe swiv sa bann scheme of service ki deza ganny aprouve e si eleman performance appraisal i ganny konsidere dan sa bann scheme?  Mersi Mr Speaker.

 

VICE PRESIDENT DANNY FAURE

Mr Speaker, enn fwa ki ou annan en kad, sa kad i bezwen ganny administre.  Defayans annandeler ki nou rankontre se nivo bann dimoun ki travay pou met anplas sa scheme of service. E sa in bann weakness, parey nou pe dir, Gouvernman i konsyan, pou nou fer sir ki nou bezwen siport bann travayer, swa ki zot ganny formasyon pou kapab enplimant sa.  Donk, nou annan bann sistenm anmars.

E dezyenmman, tou travayer ki travay i bezwen annan en performance appraisal. Souvannfwa sa pa ganny fer e la i responsabilite sa Minister, sa Departman, sa Supervisor ansarz pou fer sir ki sistenm i ganny mete.  Sa enn.  Me si dan en scheme of service i dir ou pou sorti lo pwen nimero 1, pwen nimero 2, ou bezwen annan formasyon.  Ou bezwen fer sir koman en sistenm, ou fer plas pou sa travayer ganny sa formasyon.  Oubyen i annan serten ki dir ki ou, ou bezwen annan sa professional development.  Donk, i en kestyon Minister, i en kestyon sa seksyon, i osi en kestyon sa endividi.  Mersi.

 

MR SPEAKER

Onorab Payet.

 

HON DAVID PAYET

Mersi Mr Speaker, bonzour tou dimoun.  Mr Speaker, eski Vis Prezidan i kapab enform sa Lasanle lefikasite sa bann scheme of service e si son Minister in remarke ki swivan lentrodisyon sa bann scheme of service, plis travayer in zwenn e menm ganny retenir dan serten profesyon, konpare avek sitiasyon avan?  Mersi Mr Speaker.

 

 

VICE PRESIDENT DANNY FAURE

Mr Speaker, larepons i ekzakteman wi, ki sa bann schemes of service in adres bann problenm.  I riske ki i ti annan gran lekspektasyon me vwala responsabilite Minister avek travayer, se pou agree.  I riske i annan serten bann schemes nou pa’n kapab meet tou bann lekspektasyon ki’n sorti kot bann travayer, me omwen nou’n improve lo bann baz.  E Gouvernman in toultan dir, mon ti a kontan repete, ofir e anmezir ki mwayen i permet, kondisyon travayer osi i amelyore – me vwala konteks ki schemes i ganny fer e ki schemes i ganny enplimante.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, pou bokou lannen in annan bann leokri sorti kot travayer 2 gran Minister.  Minister Ledikasyon avek Minister Lasante, la mon pe koz bann supporting staff parey bann Ogzilyer ek bann Lab Tecs.  Eski Minis i kapab dir avek sa Lasanble ki lanfaz spesyal ki zot pe mete lo schemes of service pou sa 2 group travayer dan sa 2 Minister pou amelyor zot kondisyon travay?  Mersi Mr Speaker.

 

VICE PRESIDENT DANNY FAURE

Mr Speaker, spesifikman pou scheme of service laboratwar lekol, larzan i dan Bidze e Departman Ladministrasyon Piblik i pe atann lenformasyon sorti kot sa Minister pou finalize.  Me enn fwa sa i ganny fer, scheme i ganny enplimante akoz larzan ti ganny bidzete lannen pase.  Sa i spesifik akoz kestyon Onorab ti osi spesifik.  Me i responsabilite e sa i pre ek nou sa.  Ledikasyon avek lasante i pre avek Gouvernman dizour.  In toultan pre ek nou e in toultan pre avek dirizan.  E ler en keksoz i pre avek ou, ou konsernen avek.  Nou konsernen.  Gouvernman i konsernen avek ledikasyon, i konsernen avek lasante.  E se pou sela ki depi 1991, bann kondisyon bann ansennyan, lannen apre lannen, kot ler Gouvernman in kapab, in amelyore e dernyen scheme of service in fer bann pa ekstraordiner.  I riske ganny dir i pa ase me pou disqualify latansyon commitment, i pa fer zistis.  Donk i travay e pou toultan, Onorab Leader Lopozisyon, pou toultan annan demann akoz dan toulede sekter zot kondisyon travay, bann defi i nepli bann defi ki ou ler ou ti annan ler ou ti en ansennyan matematik dan lekol Anse Royale.  Oubyen ler Onorab De Commarmond ti en ansennyan dan lekol Cascade plis ki 25an pase.  Defi in sanze.  Ler defi i sanze, i met en kantite stress, presyon e se pou sela nou bezwen annan sa veykil pou egzaminen.  Nurse ozordi, nou konnen ki i annan dyalog ki pe ganny fer.  I annan koze lo la.  Me selman, sa ki pli enportan se pou vwar rezilta bann dyalog, rezilta bann koze.  Me ziska prezan, sa pankor ariv kot Departman Piblik.  Brefman, i 2 sekter ki reste enportan pou pei e pou dirizan nou pei.  Mersi.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.  Mr Speaker, mon ti pe al demann Vis Prezidan ki pe arive avek scheme of service bann lab technician ki ti’n anonse ti pou pran lefe depi le 1 Zilyet, apre bann librarian?  Mersi.

 

 

VICE PRESIDENT DANNY FAURE

Scheme of service pou bann teknisyen laboratwar, parey mon pe dir, Lasanble in aprouv Bidze, nou pe atann bann dernyen rekomandasyon final sorti kot Minister Ledikasyon e enn fwa sa in ganny fer, bann travayer laboratwar ava ganny peye e sa will be backdated parey nou abitye fer.  Mersi.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, mon note enta scheme of service, zis Lasanble ki napa pou li.

 

MR SPEAKER

Monn fer menm remark ki ou.

 

HON CHARLES DE COMMARMOND

Mr Speaker, eski Vis Prezidan i kapab eksplik nou Lasanble ki benefis e lavantaz bann tel scheme of service dan en servis piblik e eski pou annan ankor dan le fitir, etan donnen sa kantite ki deza annan?  Mersi.

 

 

 

VICE PRESIDENT DANNY FAURE

Mr Speaker, si mon’n mansyonn 51, i ankor annan 8 ki pou vini.  Pe travay lo la me sa nou bezwen diskite avek Minister Finans, Lasanble aprouve ensidswit.  Me la ozordi nou annan en baz.  Konpran mwan?  Lontan ler nou ti komanse, nou ti annan en scheme of service for teachers, apre ners, apre lapolis.  Be sanmenm sa mon dir ki en kantite travay in ganny fer e mon krwar sa i ankourazan ki pei e Gouvernman an antye i pe regard dan travayer sekter piblik e i annan en kantite room pou nou improve me set en bon baz ki nou annan ozordi e pa bliye, sa scheme of service i diferan avek sa grid ki nou ti tonm dakor ansanm.  Nou annan en wage grid konmela dan Gouvernman.  Ok.  Ki montre ou bann diferan steps.  Ou vwar?  E ler nou pe dir responsabilite, i annan responsabilite Minister e Departman e responsabilite endividi pou ou progrese, pou ou avanse.  Ah, sa ki osi enportan, responsabilite bann ki ansarz, pou fer zistis a travayer.  Pou met mesanste dekote.  Pou travay dan en fason onnet.  La drwatir, supervise.  Ler en dimoun i annan en problenm, ou apel li.  Ou dir regarde, ou’n fer problenm.  Ou pa esper li akonplir 13 problenm, apre ou dir li i annan en problenm.  Sa i bann skills supervision e sa travayer i osi bezwen onnet.  Ler i ganny apele, i pa kestyon akoz mon pa kontan ou.  Set akoz mon kontan ou ki monn apel ou.  Pou mwan ed ou pou ou vin en meyer travayer.

Me sa la, dan serten landrwa i annan me dan lezot landrwa i napa.  Zis file ki monte desann.  E nou bezwen etablir konversasyon ek travayer akoz se travayer ki prodwir, ki travay.  Ki kree, ki donn servis.  E dan bann landrwa kot i annan sa Mr Speaker, keksoz i mars byen.

Lot, fodre pa en scheme of service i reste dan en tirwar, oubyen, travayer i tande ler Minis i koze enn fwa.  Travayer i bezwen konnen, i bezwen annan akse avek son scheme of service. Apre tou, lekel ki’n lite pou travayer dan Sesel?  Mersi.

 

MR SPEAKER

Kestyon 99, Onorab Arnephy.

 

HON BERNARD ARNEPHY

Mersi Mr Speaker.  Mr Speaker, kestyon se pou demann Minis ki responsab pou Lenformasyon Teknolozi ki plan son Minister i annan pou asire ki tou Departman Gouvernman i annan en sit web ki fonksyonnel e ki aksesib, kot manm piblik i kapab ganny bann lenformasyon de baz vizavi travay e loperasyon toulezour sa bann Minister ou Departman e kot plis tranzaksyon online i kapab vin posib?  Mersi.

 

VICE PRESIDENT DANNY FAURE

Mr Speaker, portel ofisyel Gouvernman Sesel i www.gov.sc.  Sa i Gouvernman Sesel.  Atraver sa, ou kree bann diferan link pou bann Minister.  Ok.  Kot nou devret pe ale, se fer sir ki tou bann Minister ek tou bann Departman, pou rezon loperasyonnel, zot annan en sit.  Me sa sit, ou bezwen fer sir ki sa sit i ganny maintain.  Ou bezwen fer sir ki sa bann sit i annan input lenformasyon.  Lala bann difikilte ki nou rankontre akoz par nou prop lanbisyon, ki bon, pou etablir en website, nou’n ganny problenm enternman pou annan mendev kalifye dan bann diferan Minister ek Departman, pou fer sir ki sa website i toultan relevan e i toultan ganny updated.  Donk, sa i en travay ki bezwen ganny fer avek tou bann website.

Ozordi nou annan 46 ki pe marse e nou annan 24 ki napa e i pa byen.  Donk nou pe devlop en protokol e standar neseser pou fer sir ki bann website i ganny fer byen e si fodre train bann dimoun, nou fer li.  Ok.

Lot lenformasyon, se Gouvernman in pran en desizyon ki apartir lannen prosen, i pa zis en kestyon annan en website kot ou kapab annan lenformasyon lo loperasyon me nou demokrasi pe evolye, nou koz bokou lo bon gouvernans, nou koz bokou lo accountability e nou relasyon leta, striktir avek sitwayen pe vin deplizanpli pre, nou pe koz lo en nouvo lespas lenformasyon, Gouvernman in deside ki apartir lannen prosenn, bann rapor ofisyel Gouvernman i bezwen ganny mete lo sa portel kot dimoun i kapab annan access avek lenformasyon.

Parey zot konnen, an Mars sa lannen, ler Prezidan ti restriktir Gouvernman, in demann tou bann Minister ek Departman pou travay lo zot plans and targets. E tu bann Minister ek Departman in travay lo plans and targets e tou le quarterly, bann Minister pe submit kot Cabinet, kote zot in arive ek bann plans and target.  Sa se lenformasyon Gouvernman.  Savedir Gouvernman dizour pe travay, me lenformasyon lo travay e aktivite ki Gouvernman pe fer i bezwen osi ganny anmennen dan domenn piblik.  Donk i annan tou sa travay, tou sa bann lareg ki bezwen ganny fer.  Parey zot okouran, i annan plizyer Lalwa ki Lasanble in aprouve ki demande ki bann lenstitisyon i submit rapor lo zot aktivite.  Me ozordi zis Lasanble ki annan access avek sa bann rapor lo bann aktivite.  Apartir lannen prosenn, ler sa Minis ou sa Minister i anvoy kot Speaker rapor lo aktivite en tel lazans, menm rapor i ganny mete lo sistenm kominikasyon pou nou Seselwa ki anvi edik son lekor, oubyen sa etidyan ki pe etidye dan Liniversite Sesel, oubyen sa etidyan ki dan pos segonder oubyen segonder ki anvi fer son resers, i annan akse avek lenformasyon.  Donk sa set en devlopman.  Oubyen bann zournal ki anvi lenformasyon pou zot kapab ekrir, pou zot ede edik lepep, i annan lenformasyon.  Donk tousala set en travay ki pe ganny fer.

Trwazyenmman Mr Speaker, se ki tou sa bann travay ki pe ganny fer avek teknolozi modern i annan pou bi fer lavi Seselwa pli fasil.  En lepok nou ti pe dir tir bann lanpayaz, pa vre?  Sa i pe al tir bann lanpayaz.  Olye ou kapab ganny laplikasyon ki pran ou 3 mwan, nou pe koz ou kapab ganny rezilta sa laplikasyon dan mwens ki 72 erdtan, me pou nou ariv lo la, fodre sak Minister i design son bann prosedir ek fonksyon pou teknolozi fer li.  Teknolozi pa pou fer li pou ou.  Fodre tou dimoun i travay lo son sistenm entern.  I design son bann fonksyon, son bann prosedir.  Enn fwa sa i fer, manda i reste pou Department of DICT met li anform.  Teknolozi modern pou fer li pli fasil.  Donk tousala set en travay ki pe ganny fer, o servis nou pei, o servis nou Seselwa.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker, mon krwar Minis in devlop byen larepons, me mon ti a zis kontan demann li si dan tre prosenn avenir, Gouvernman e son bann Departman i annan plan pou anploy zot prop website manager koman en fason pou fer sir ki bann Departman ki annan bann website ki outdated zot update e azour, olye depan selman lo DICT?  Mersi.

 

VICE PRESIDENT DANNY FAURE

Mr Speaker, sa nouvo protokol ki nou pou design avek son bann standar pou pe viz ver efikasite.  Nou pa la pou nou kree en lot striktir ki pou demann plis depans, plis larzan delapar Gouvernman.  Se fer bann striktir ki kapab marse.  E sa i bezwen ganny fer an konversasyon ant DICT avek sak Minister.  Ok.  E mon krwar ou ve i enn ki onnet e i drwat.  Se fer sir ki sa bann website i pa zis la, me ki i marse, i annan bann lenformasyon ki relevan pou travay nou bann Onorab e pou travay lezot bann akter dan Sesel.  Mersi Mr Speaker.

 

MR SPEAKER

Onorab Aglae.

 

HON ROMA AGLAE

Mr Speaker, etan donnen pozisyon Sesel parmi pei pli avanse dan Lafrik an term e-Government, eski Minis i kapab enform sa Lasanble plan son Minister pou fer sir ki sa ranking i efektivman ganny enplimante pou ki nou a vwar nou bann Minister i konekte byen via internet e diferan servis a laporte piblik lo en baz elektronik?  Mersi.

 

VICE PRESIDENT DANNY FAURE

Mr Speaker, Sesel i devret fyer pou son ranking me nou pa kapab zis satisfe avek sa.  Nou osi konnen ki nou annan bann defayans.  Donk nou pe travay for lo nou bann defayans e nou anvi compete avek lezot parti lemonn.  Lazi paregzanp.  Bann pei OECD.  Donk mon krwar i annan en kantite bann travay ki Departman in geer up pou nou fer.  Ozordi dan pei nou annan 140 poursan penetrasyon.  I annan plis ki 133 mil subscriptions mobile dan pei.  Set en pei ki son popilasyon i annan access.  Pli gran penetrasyon dan larezyon, 148 poursan penetrasyon.  E sa i montre ou en keksoz.  I montre ki si ou annan en bon baz, kot ou dimoun i annan akse avek telefonn mobil, atraver telefonn mobil i annan bann lezot prodwir, lezot software, lezot devlopman ki ou kapab kontinnyen amelyor lavi ou popilasyon e sa se direksyon ki pei pe ale.  Mersi.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker e Mr Speaker, eski Vis Prezidan i kapab eksplik nou bann polisi ki son Departman i annan pou fer sir ki napa labi avek bann travayer servis piblik ler zot ganny akse avek bann servis ki online, par egzanp bann download oubyen abiz letan Gouvernman?  Mersi.

 

VICE PRESIDENT DANNY FAURE

Enn fwa ki sa protokol i ganny defined, i pou en baz pou ou edik tou bann travayer bi annan responsabilite.  Akoz ou kapab annan en travayer, i deryer en computer li.  E lo sa computer i annan plizyer keksoz.  Me tou travayer i bezwen konnen, ler i clock in son travay 8er – 4er, i clock in pou fer en travay e i bezwen prodiktiv dan sa travay.  Me ou bezwen edik li, ou bezwen kapab dir li ki i devret fer.  E ou bezwen annan en bon sistenm monitoring and supervision.  Kot i annan sa, nou napa problenm.  Donk, lapros set enn ki very friendly.  Etablir bann paramet ki kler pou tou dimoun.  E of course i annan serten bann sit ki ganny kontrole par departman DICT.  I annan serten sit ki ganny kontrole akoz i ganny dir, be regarde, ou koman en Departman ou, konmsi natir ou travay, fonksyon ou travay, ou pa bezwen sa.  Me i annan serten ki ganny open akoz natir zot travay.  Donk mon krwar i vwala la fason ki sa pe ganny adrese e hopefully nou ava’n pare avek sa pou lannen prosenn.  Mersi Onorab.

 

MR SPEAKER

Kestyon nimero 100, Onorab Arnephy.

 

HON BERNARD ARNEPHY

Mersi Mr Speaker.  Mr Speaker, eski Minis responsab ppour Lenformasyon Teknolozi i kapab enform sa Lasanble si avek lenstalasyon kab optik, manm piblik ki servi bann servis relye avek en tel teknolozi pou resevwar en servis pli o kalite e osi vwar en rediksyon dan kou servis ki zot resevwar?  Mersi.

 

VICE PRESIDENT DANNY FAURE

Mr Speaker, fibre optic set en bon nouvel pou Sesel.  I en lenvestisman enportan, i en nouvo lenfrastriktir.  Son rezilta, nou pou vwar li.  I pa pou vin ozordi pou ozordi, me nou pou vwar son bann benefis.  I pou kree plis kapasite, i pou increase volumeOk e i pe konekte nou avek lemonn eksternel e ou pou annan plis lavites pou ou lenformasyon.  An prensip, si ou ti avek Cable e ou ti pey tan e ou lenformasyon ler ou pe download, i pran bokou letan.  Ou deza pe benefisye akoz ou pe ganny sa volim, ou pe ganny sa kapasite e ou pe ganny sa lavites.

Me nou krwar ki sa pri i bezwen bese.  Nou krwar i bezwen bese.  Me nou osi realis ki pou nou vwar ki sa pri pa kapab ganny bese la, baze lo lenvestisman ki’n ganny mete, delapar Gouvernman Sesel e delapar bann envestiser.  Me selman set en nouvo striktir ki pou benefisye nou tou e nou pe travay avek bann operater pou gradyelman, vreman ogmant kalite e fer bese bann pri.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker, eski Minis i kapab enform sa Lasanble si Gouvernman i annan okenn kontribisyon finansyel anyel pou fer lo loperasyon e maintenance en tel servis, ouswa si tou bann depans pou ganny bear selman par bann lakonpannyen prive ki enplike dan sa proze e si wi, konbyen sa pou kout Gouvernman annyelman?  Mersi.

 

VICE PRESIDENT DANNY FAURE

Mr Speaker, parey zot konnen, nou’n kree en model devlopman finansman.  Savedir Gouvernman li, in kree en lakonpannyen i apel Cease.  E Gouvernman in met larzan ladan.  Gouvernman in met 4 milyon Ero dan sa lenvestisman pou nou kapab ganny sa fibre opticCable and Wireless 5 milyon Dolar, Airtel 3.9 milyon Dolar.  An vi nou bon relasyon avek labank pou Lafrik, i annan 8 milyon Ero e European Investment Bank i annan 8 milyon Ero.  Donk set en lenvestisman dan sa lakonpannyen pou kapab anmenn, fer anmennen sa kab.  Prezan, Cable and Wireless i bezwen aste kapasite avek Cease pou kapab annan kapasite e volim pou li kapab servi.  Ok.  Donk, set en bon model ki’n ganny fer.  Gouvernman limenm li, Gouvernman dizour, atraver recurrent Budget, napa okenn Bidze ki ganny mete.  Okontrer, okenn dividends ki Gouvernman i anmase ok, atraver sa devlopman, nou ti dir tre boner, i bezwen retourn dan envestisman bann sekter sosyal tel ki ledikasyon, lasante, akoz nou pe koz lo ledikasyon, fasilite pou nou bann zenes, ensi-d-swit.  Vwala sa striktir ki’n ganny anmennen.  Mersi.

 

MR SPEAKER

Onorab Bristol.

 

HON ALDERIC BRISTOL

Mersi Mr Speaker.  Eski Vis Prezidan i kapab enform sa Lasanble si i annan sifizaman progranm ki pe pase pou edik dimoun lo meyer fason pou ganny akse avek son servis optik e dan en fason pli efikas e cost effective?  Mersi.

 

VICE PRESIDENT DANNY FAURE

Mr Speaker, nou panse ki bann operater, zot ava zwe zot rol pou zot vann sa prodwir e mon krwar touleswar mon vwar lo televizyon, i annan ki pli agresiv ki lot, i annan zot annan zot prop stratezi, me i annan travay ki pe ganny fer.  I annan en progranm ki pe ganny fer pou sansibiliz nou bann dimoun.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, an tan ki Gouvernman in envestir dan sa proze, eski Vis Prezidan i kapab dir nou ki rol ki Gouvernman i annan dan ladministrasyon sa servis?  Mersi Mr Speaker.

 

VICE PRESIDENT DANNY FAURE

Mr Speaker nou, nou ansarz, nou form parti Cease, ok.  Chairmanship i anba kontrol Gouvernman e set atraver sa ki nou’n ganny sa larzan e ozordi nou annan en fibre optic.  Ok.  Prezan biznes, bann operater zot, zot bezwen buy in pou zot kapab servi fibre optic.  Ok, sa set en lot relasyon me relasyon nimero 1 ki Gouvernman i annan se Gouvernman li i the regulator.  I regle e se pour sela ki lannen prosenn i annan en nouvo Lalwa pe ganny mete devan Lasanble.  Enn ki tre modern ki pou kapab etablir bann kondisyon ok, dan lafason ki bann operater i travay.  Mersi Mr Speaker.

 

MR SPEAKER

Onorab Bresson.

 

HON GALEN BRESSON

Mersi Mr Speaker.  Eski Vis Prezidan i kapab eksplik Lasanble e dir Lasanble silvouple, si avek sa bann nouvo loportinite teknolozi ki nou pe gannyen, Gouvernman, ou’n fek mansyonn zafer nouvo regilasyon, mon kontan ou’n mansyonn sa akoz ozordi nou regilasyon pa azour e ki fason zot pe adopte pou regard bann nouvo regilasyon ki regard bann nouvo loportinite biznes ki pe antre avek loportinite teknolozi ki’n ozordi a nou dispozisyon e osi ki asire ………

 

(Interruption)

 

MR SPEAKER

Kestyon Onorab.  Kestyon.  Ou pe demann kestyon?

 

HON GALEN BRESSON

Wi, wi.  A en bann nouvo biznes……

 

MR SPEAKER

Tonasyon i bezwen dan tone en kestyon.

 

 

HON GALEN BRESSON

Ok.  Ki asir bann nouvo biznes e osi ki bann kliyan ki deservi sa bann fasilite, zot ganny valer pou zot larzan.  Mersi.

 

VICE PRESIDENT DANNY FAURE

Ler ou ranforsi rol regilatwar, me rol regilatwar i baze lo en Lalwa modern, ki ganny diskite, ki pran kont osi konsern ou popilasyon ki konsonmen, i anmenn nou lo sa wish.  Pou nepli en wish.  Bann keksoz ki pou ganny akonplir akoz ou pran bann aksyon konkret ki viz ver sa.  Donk, sa i donn nou hope.  Mersi Mr Speaker.

 

MR SPEAKER

Kestyon 101, Onorab Jeannevol.

 

HON BEGITTA JEANNEVOL

Mersi Mr Speaker.  Eski Minis i kapab enform sa Lasanble ki son Minister pe fer pou asire ki bann lakonpannyen telekominikasyon pou amelyor zot servis a en pri rezonnab?  Mersi.

 

VICE PRESIDENT DANNY FAURE

Mr Speaker, premye keksoz ki bezwen ganny fer e ki pe al ganny fer se pou determin bann nivo paramet ki reflekte quality of service, 1 e ki sa i vin bann kondisyon pou licence.  Ozordi napa.  Enn fwa sa i ganny fer, i pou ed en kantite keksoz.  Donk, pou sa ganny fer, nou bezwen en nouvo Lalwa.  Sa nouvo Lalwa pe ganny fer avek sipor nou bann partener.  E si tou keksoz i al byen, avan Zen lannen prosenn, sa Lalwa i ava vin devan nou Lasanble Nasyonal.  Nou pe kree en nouvo framework pou adres sa bann problenm ki nou pe rankontre ozordi e zot kapab realize ki i en sekter ki zanmen Gouvernman in involve ladan.  Cable and Wireless i annan plis ki 100 ekek lannen dan pei.  Zanmen Gouvernman in involve.  Ok. Me okontrer Gouvernman in open.  In kontinnyen ouver, me nou bezwen annan en regulation.  Properly regulated pou fer sir ki sa kliyan i benefisye, ki sa dimoun ki pe fer biznes osi i ganny benefisye e ki nou ankouraz konpetisyon e nou panse Onorab, ki an fezan sa, nou ekspekte vwar ki bann pri i a kontinnyen desann.  Me Gouvernman i toultan vwar devlopman dan teknolozi koman en zouti pou devlopman.  Se Gouvernman li.  Gouvernman i dir ICT set en zouti devlopman.  Biznes li i vwar li koman en zouti pou li fer biznes e rol Gouvernman se pou balans sa.  E Gouvernman toultan li, son lobzektiv primordial se toultan se son dimoun.  Mersi Mr Speaker.

 

MR SPEAKER

Onorab Jeannevol.

 

HON BEGITTA JEANNEVOL

Eski Vis Prezidan i kapab enform sa Lasanble ki son Minister pe fer pou asire ki sa bann lakonpannyen telekominikasyon i enform zot kliyan a sak fwa ki zot servis pa pe fonksyonnen, atraver en lot mwayen kominikasyon e ki zot osi enform zot kliyan dan ki dele letan sa problenm pou ganny rezourd e asire ki zot gard sa dele letan?  Mersi.

 

VICE PRESIDENT DANNY FAURE

Mr Speaker, nou annan bann international benchmarks.  Once nou komans tonm dakor lo nivo bann paramet ki reflekte quality of service, in ganny agree e sa i reflekte nouvo Lalwa ki vin anform, operater i bezwen operate baze lo sa bann rules and regulations ki ganny met devan.  E mon krwar i enportan ki operater toultan ler Departman i rankontre zot, i kontinnyen ensiste sa bann zafer.  Me nou rekonnet ki nou pe zis koze, koze e i annan en ler ki keksoz i ganny fer me sa ki pli enportan se met tou sa bann striktir ki mon’n koz lo la anmars.  Sa ki pou anmenn en diferans dan nou fason fer keksoz.  Mersi Mr Speaker.

 

MR SPEAKER

Onorab Souris.

 

HON MIRENA SOURIS

Mersi Mr Speaker.  Mr Speaker, eski Vis Prezidan i kapab enform sa Lasanble si lakonpannyen telekominikasyon i annan plan alavenir pou fer en survey pou determinen kwa ki koz sa lenteripsyon dan diferan servis?  Mersi.

 

VICE PRESIDENT DANNY FAURE

Non, ou konnen ki’n arive dernyenman se nou pe entrodwir nouvo teknolozi.  Ler ou entrodwir nouvo teknolozi, i anmenn lenteripsyon me si ou ti sorti ou ti eksplike ki ou pe al fer, ou dimoun i konpran.  Konmsi si nou entrodwir e enplimant a very good customer care, parey lezot lorganizasyon i fer, napa problenm.  Mon krwar sa lannen in en lannen partikilye akoz volim dan bann lenfrastriktir ki’n ganny fer, ki’n kree sa bann major disturbance e mon pans pa si nou pou vwar menm nivo enteripsyon lannen prosenn.  Mon pa pe dir ki pa pou annan, me sa lannen in enn spesyal an partikilye.  Me selman, annou gard antet.  Okenn lorganizasyon ki pe anmenn major change dan son loperasyon pou annan sa.  Me si ou koz avek nou dimoun, nou eksplik nou dimoun byen ok, nou anvoy en pti let, parey zot anvoy nou bill, i dir regarde, ser madanm entel ok, ankor dan 6 mwan nou pou annan en major keksoz ki pou ganny fer.  Nou konpran sa.  Ler nou eksplike, nou konpran.  Ler nou pa eksplike, keksoz i arive, nou pa konpran, lala kot keksoz i ganny fer e tousala nou bann regulators in pas sa lenformasyon avek zot.  Mersi Mr Speaker.

 

MR SPEAKER.

Onorab Fideria.

 

HON EMMANUEL FIDERIA

Mersi Mr Speaker.  Bonzour VP.  Mr Speaker eski VP i kapab dir nou si son Minister i annan plan antre an negosiasyon avek bann konpannyen telekominikasyon pou entrodwir en student package ouswa en student rate pou segonder ek pos segonder?  Mersi.

 

VICE PRESIDENT DANNY FAURE

Mr Speaker, mon ava transmet sa avek bann operater e ler nou transmet, fodre pa sa i vin en cost to the Government of Seychelles. Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, dan sa nouvo striktir ki Vis Prezidan in koz lo la, eski Vis Prezidan i santi ki Gouvernman pou kapab met lanmen lo sa problenm kot souvandfwa bann kliyan, bann Seselwa ordiner i ganny demande pou zot pey bann gro bill, anplis ki pa reflekte sa servis ki zot in gannyen?  Mersi Mr Speaker.

 

VICE PRESIDENT DANNY FAURE

Mr Speaker, parey mon’n dir nou pe pran tou bann mezir lo nivo polisi, lo nivo Lalwa, nou pou ranforsi nou rol koman regilatwar pou evite ki sa problenm i persiste.  Ok e nou panse ki bann akter osi zot pe fer sa travay, zot pa pe zis anmas larzan, me si zot envestir zot larzan ki zot pe anmase, zot ava amelyor servis.  So, i bann keksoz ki pe ganny diskite e Gouvernman i pa zis la pe debout pe regarde, Gouvernman i anvi ki bann keksoz i ganny fer pou vreman amelyor servis an zeneral dan pei.  Mersi Mr Speaker.

 

MR SPEAKER

Bon, nou’n ariv alafen Question Time.  Mon ava remersye Vis Prezidan e ekskiz li parmi nou e nou pou pran lot item lo Order Paper e sa se Mosyon konsernan akse piblik avek lans.  E sa nou pou pran li letan nou rezwenn 11.05 e i pou ganny Chair par Deputy Speaker.

 

(Break)

 

MR DEPUTY SPEAKER

Bon, nou a dir bonzour tou Manm e tou dimoun ki alekout e nou a kontinnyen nou travay.  Nou prosen item lo Order Paper, Mosyon par Onorab Meggy Marie, Manm elekte pou Anse Aux Pins.  E mon ava envit Onorab Marie pou prezant son Mosyon.

 

HON MEGGY MARIE

Mersi Mr Deputy Speaker.  Bonzour Mr Deputy Speaker, bonzour tou Onorab.  Bonzour tou zabitan Anse Aux Pins ki alekout.

Mr Deputy Speaker, mon santi mwan fyer pou reprezant mon distrik dan nou Lasanble ozordi.  Sa i mon premye diskour ki mon fer devan nou Lasanble.  Mon senserman krwar i mon devwar pou anmenn laspirasyon mon distrik ek son bann zabitan.  Pou mwan, mon vwar li koman en devwar pou ede amelyor lavi Seselwa, espesyalman zabitan Anse Aux Pins.

Mr Deputy Speaker, nou tou nou konnen kwa ki fer nou en Seselwa.  Nou annan tou sa ki etranze i vin apresye, paregzanp nou soley, nou lanmer, nou lans, labote lanatir e plis ankor.  Lendistri touris dan nou pei i pran en nouvo dimansyon.  Dan sa dernyen 10an, pa mwens ki 10 nouvo gran lotel in ouver zot laport e an konsekans anmenn bokou plis touris ankor dan nou pei.  Avek sa polisi atir touris o-de-garm, Sesel ozordi i ganny konsidere koman en pti pei ki akey bann gran vedet mondyal ki bezwen proteksyon e privacy.  Sa i nou brand.  Sa i sel fason pou nou pei kapab navig sa kriz ekonomik mondyal ki pe osi poz en gran danze pou nou lendistri touris.  Anmenmtan ki nou pei i vin pli atiran pou lendistri touris, nou pep osi pe vin pli sofistike e devlope.  Se la kot zesyon later ek bann landrwa piblik ki nou annan i vin primordyal, afen ki nou kapab trouv sa bon balans ant devlopman nou lendistri kle e osi lepanwisman nou pep.

Mr Deputy Speaker, dan tou sa bann devlopman ki pe arive dan nou pei, nou bezwen pran kont ki Seselwa osi i merit annan sa drwa pou li osi zouir labote son pei e plis ki sa, zouir son lazwa de viv.  Pou mwan vin pli presi, Seselwa apre en bon lasemenn travay i kontan sosyalize, pas en letan ek zanmi lo lans pou detann, oubyen en pti piknik ki ede ini bann manm fanmiy.  Sa in toultan en labitid Seselwa pou al en piknik an fanmiy.  Nou bezwen aksepte poudir in fini vin en kiltir nou nasyon ozordi.  Sa kiltir in osi vin en nesesite pou bokou fanmiy ki reste dan flat, ki napa sa ki nou apel en open space.  Isi Sesel, nou napa bokou bann public park, me sa lespas piblik ki nou annan plennman, se nou lans.  I alors nou devwar pou nou mentenir sa drwa ki nou sitwayen i annan pou apresye nou lans ek son lanmer.

Mosyon ki nou pe anmenn devan, i egzakteman sa, pour ki bann ki anpes Seselwa ouswa etranze zouir nou lans i ganny pinisyon pli sever.  Mon Mosyon i lir koumsa akoz mon rekonnet ki nou Konstitisyon ek bann Lalwa ki dekoul dan nou Konstitisyon i garanti sa drwa, me la pratik i diferan.  E sa ki manke se monitoring e osi pinisyon sever pou bann ki vyol sa drwa.

Mr Deputy Speaker, mon konnen i annan Lalwa ki fer kler ki tou sitwayen e viziter i merit ganny akse ek lans, me mon konstate ki i annan devloper ek endividi ki pe anpes viziter ek Seselwa ganny akse ek lans.  Lartik 39(1) dan nou Konstitisyon i annan provizyon ki dir Leta i rekonnet sa drwa ki tou dimoun i pran par dan lavi kiltirel, promot, apresye e protez zot kiltir e valer zot lavi toulezour, an prenan kont bann restriksyon, valer moral, lasante piblik, napa krim, proteksyon ou drwa e laliberte lezot.

Mr Deputy Speaker, lapel ki mon pe lanse ozordi, se non pa pou nou, koman Seselwa fer sa ki nou anvi lo lans, me plito pou nou zouir nou patrimwanny e nou kiltir plennman, tout an prenan kont ki serten move konportman lo lans pou bezwen arete.

Mr Deputy Speaker, mon konpran tre byen lannwiy en devloper ouswa en endividi, ler en dimoun i vin met en gro lanmizik lo lans, Dimans apremidi e disturb lezot ki osi annan menm drwa pou zouir sa lans.  Mon konpran tre byen lannwiy serten letablisman touristik ki merit pe protez privacy zot kliyan e pa tro konfortab ler en bato i debark lo lans e komans tir portre.  Sa i rezon akoz i merit annan regilasyon tre kler lo ki kalite aktivite ki akseptab lo lans, pou ki tou bann parti prenan i santi zot konfortab pou zouir labote nou zil, me osi lape e trankilite ki i ofer nou.

Mr Deputy Speaker, nou bezwen osi pran kont ki sa bann devloper etranze pa konn nou kiltir.  Zot napa en gran konesans nou fason viv.  Zot annan zot prop persepsyon kimannyer zot krwar nou viv, paregzanp, zot pe mazinen ki nou annan lezot lwazir, annan bann bar, al resotran me sa i pa leka pou mazorite Seselwa.  Annou pran kont ki serten nou pa afford en lot stil lavi.  Nou bezwen osi pran kont ki ler en etranze i vin dan nou pei, i annan ki kontan konn enpe nou fason viv.

Mr Deputy Speaker, mon osi pran kont ki donn akse ek lans i annan son konsekans ki vin avek li, paregzanp bann dimoun dezonnet ki kapab kree serten nwizans pou sa propriyeter.  Sesel konmela, nou annan pa mal problenm voler lo lans ki non selman vol touris, me anmenn avek li en tre move repitasyon pou Sesel.  Lo serten lans lo zil, i annan bann dimoun ki tir portre bann vedet e vann pou milyon Roupi aletranze.  I osi annan bann Seselwa ki zwe lanmizik tre for, osi ziska tre tar dan lannwit e disturb larestan ki lo lans e sa ki reste pros.

I enportan alors Mr Deputy Speaker, ki nou etablir enpe lord dan tou sa gran malantandi ki i annan konsernan sa size akse avek lans.  Regilasyon neseser i bezwen antre anba sa bann regilasyon.  Mon pe fer sa bann propozisyon swivan.  Met Lalwa pli sever ki kapab elimin kalite pratik par, en lanmann i bezwen ganny peye si okenn konpannyen, devloper ek endividi ki anpes sitwayen Seselwa e viziter akse lo lans.  Annan bann landrwa dezinnyen ki Seselwa ek viziter i kapab fer bann picnic parties, parey bann lanniverser kot lanmizik i kapab ganny zwe.  Demark byen bann semen ki donn akse piblik lo lans e fer ki kot i posib, sa akse i en semen kot transpor i kapab servi.  Ranforsi Lalwa ki pou kontrol konportman sitwayen ler zot pe servi lans.  Ranforsi patrol lo lans pou anpes bann akt bandisite.  Fer li tre kler ek okenn devloper ki lans i reste en landrwa piblik e sa i bezwen ganny mentenir a tou pri par okenn dimoun.

Mr Deputy Speaker, mon senserman krwar i nou devwar pou nou protez, defann e promot sa bann valer, me sa zafer akse lo lans i pa zis en kestyon ranforsi Lalwa, me realizasyon en nouvo lepok kot nou pe viv ladan e ki nesesite alors, en nouvo fason fer par tou parti prenan.  Seselwa, nou merit realize ki ozordi nou pe viv dan en monn globalize e ki nou nepli kapab fer keksoz parey lontan.  Nou bezwen viv kot a kot avek devlopman rapid ki pe pran plas dan nou pei e sa i enkli sa volim touris ki non selman oule vin pas en bon letan dan nou pei, oule aprann nou kiltir, pe osi trouv li dan en pei ki ofer li otan proteksyon posib.  An retour i pour gard son Dolar dan nou pei, Dolar ki pe vin deplizanpli rar e i merit alor bokou zefor pou retenir li dan nou lekonomi.  Bann ki osi anvi vin envestir dan nou pei, merit pran kont ki Sesel i annan en demokrasi tre avanse e ki pep Seselwa se en pep modern e sofistike.  Me osi, nou tradisyon e kiltir ki nou valorize e viv li dan nou lavi toulezour.  Sa bann envestiser i merit fer en zefor pou entegre zot byen e viv kot a kot sa pep, non pa an izolasyon avek sa pep.  Sa latitid izolasyon pe selman ede kree plis lanmertim e fristrasyon.

Mr Deputy Speaker, Anse Aux Pins i en distrik ki annan zoli lans e kot tou son zabitan i zouir son lans.  Napa gran diskisyon an sa ki konsern akse lo lans dan mon distrik.  In ganny anonse, ki byento devlopman Ile Soleil pou pran en nouvo dimansyon.  Ler i annan devlopman dan okenn kominote, i enportan ki bann zabitan i santi zot, parti prenan sa devlopman e mon salye alor lanons Gouvernman dan sa direksyon.

Mon Mosyon se pou nou, zabitan Anse Aux Pins ganny servi koman en legzanp kot nou mentenir sa larmoni ki egziste e ki nou fer tou sa ki nou kapab pour protez nou leritaz.

Mr Deputy Speaker, mon oule remersi nou Lasanble pou son latansyon e mon demann sa Lasanble pou vot lo sa Mosyon.  Mersi Mr Deputy Speaker.

 

MR DEPUTY SPEAKER

Bon, Mosyon parey in ganny table in ganny prezante, okenn Manm ki oule segonn sa Mosyon?  Onorab Pillay e ou ti oule ……

 

HON SEBASTIEN PILLAY

Mersi Mr Deputy Speaker, mon ti oule segonn sa Mosyon me avan mon entervenir, mon ti a kontan propoz en pti lamannman an akor avek Order 41 nou Standing Orders.

 

MR DEPUTY SPEAKER

Proceed nou a ekout ou.

 

HON SEBASTIEN PILLAY

Mon ti pe propoze ki nou insert dan sa Mosyon, parey i lir la konmela, ki nou dir “Lalwa pli sever kont bann biznes e endividi kirefiz akse lo lans avek Seselwa e lezot viziter.”  Propozisyon i pou nou insert sa mo “e endividi” apre sa mo “biznes”.  Ki Mosyon i aprezan lir, “Sa Lasanble i demann Gouvernman pou met anplas Lalwa pli sever kont bann biznes e endividi ki refiz akse lo lans avek Seselwa e lezot viziter”.

 

MR DEPUTY SPEAKER

Bon, mon pa vwar okenn difikilte pou aksepte sa lamannman, i en senp lamannman.  Mon pa konnen si i annan ki annan lobzeksyon.  Bon, lamannman in ganny aksepte e Onorab Pillay ou oule proceed ek ou lentervansyon.

 

HON SEBASTIEN PILLAY

Mersi Mr Deputy Speaker.

 

MR DEPUTY SPEAKER

Proceed.

 

HON SEBASTIEN PILLAY

Pou komanse mon oule dir ki enjoyment nou bann lans i reste en eleman enportan dan lavi tou Seselwa.  Tradisyonnelman, akse avek nou bann lans i en keksoz ki nou tou nou’n pran for granted, me resaman piblik Seselwa e osi lezot viziter in eksprim serten konsern ki akse avek serten lans in vin deplizanpli konplike.  Mon servi sa term konplike akoz mon krwar i definir oubyen i karakteriz en pti pe pli byen sa sitiasyon, akoz dan mon lopinyon, sa konplikasyon i vin par en mank lapresiasyon sa konsern lo lapar bann viziter ki oule al lo lans, e menm piblik, lo lapar propriyeter bann biznes oubyen endividi ki zot propriyete i bord ek lans e petet osi avek lezot, par egzanp koman peser ki tradisyonnelman in zouir serten akse avek lans.

Ou a permet mwan pou elabor en pti pe, Mr Deputy Speaker akoz mon krwar the issue, la ki nou pe diskite, it’s not about the beach being private, akoz mon krwar Lalwa i kler ki dir ki up to the high water mark, tou lans i public domain, me plito i lo lafason ki nou konfigir tou sa bann konsern ant diferan group dimoun e lafason ki nou met sa bann konsern pli devan pou nou vwar ki sa i egzakteman natir sa problenm.

Premyerman, lo kote en piblik, en dimoun ki oule ganny akse ek en lans, i annan sertan aktivite ki i oule al fer lo lans.  I oule al bennyen lo lans, i oule al pas en letan detann lo lans, i oule al fer piknik, i oule al fer en parti lo lans eksetera.  Lo en lot kote, ou kapab annan en dimoun ki oule al lapes lo lans oubyen menm peser ki oule antre lo en lans, parey in ariv en problenm ek zot bato oubyen dan lezot sirkonstans.  Osi i annan bann viziter ki’n visit Sesel ki pe vizit toultour nou bann zil e la zot in vwar en zoli lans e zot oule al lo sa lans pou zot pas en letan detann oubyen pran en bennyard.  Me osi i annan bann propriyeter ki zot, zot propriyete i bord ek sa bann lans e la sa bann propriyeter petet par egzanp zot santi poudir akse avek sa lans, lafason ki akse i ganny mentenir ek sa lans parfwa i nouir zot aktivite komersyal, i petet anpes zot zouir valer zot propriyete parey zot ti a devret e la kot bann problenm i komans anpire e keksoz i komans vin en pti pe pli konplike.

Mr Deputy Speaker, mon oule soulinnyen neamwen ki Sesel i pa le sel pei ki fer fas avek sa problenm, mon resers in montre mwan ki bokou bann pti leta zil, par egzanp La Zamaik, Trinidad and Tobago e lezot pei par egzanp dan Karaib i osi pe fer fas ozordi avek sa problenm kot i annan bokou devlopman e kestyon ki bokou pe ganny demande se kimannyer nou balans devlopman avek lentere piblik avek bann leritaz kiltirel e tradisyonnel ki bann popilasyon in toultan enjoy.

Dan larezyon Mr Deputy Speaker, Moris i osi en lot legzanp kot sa problenm in vin deplizanpli pli grav, kot i annan menm de lenstans kot serten gran devloper lotel pe deny akse avek lans avek serten eleman popilasyon Morisyen.  So, alors mon krwar, sa ki reini tou sa bann problenm ansanm se sa balans ant public e private interest kot i konsern akse ek bann lans, tout an prenan kont nesesite ki nou bezwen kontinnyelman annan devlopman akoz nou tou nou konnen ki nou lendistri touris i enn bann pilye nou lekonomi, me moreover, nou bezwen osi pran kontlentere sa endividi kot i konsern son propriyete e drwa Konstitisyon ki i donn li anba Lartik 26 pou li zouir son propriyete.

Ezisteman Mr Deputy Speaker, avek ou permisyon, mon ti a kontan konsider serteb framework legal e lezislatif ki nou annan anplas, an relasyon avek sa size beach access. Ler nou regard bann framework legal ki i annan anplas, mon krwar sa ki kler se ki regilasyon ki pli enportan dan tousala se sa Beach Control Act.  E Beach Control Act i definir en lans kot i dir a beach means any part of the seashore e la ankor i donn ou bann definisyon anba Beach Control Act, kote en lans i komanse e kote i sipoze fini.  So la, parey mon ti dir lo komansman, napa kestyon lo lefe ki lans i en domenn piblik.  Lo lot kote, sa Beach Control Act i osi koz lo ki bann regilasyon ki nou bezwen ganny met anplas pou regulate bann aktivite ki pase lo bann lans, si pou annan piknik, si pou annan bennyard, si pou annan lapes, si pou annan bann aktivite pleasure crafts parey jetskis, windsurfing eksetera.  Me i osi annan provizyon anba sa Act, ler nou regard li byen, anba sa regilasyon, ki definir kote akse i kapab antre.  Akoz i dir klerman ki okenn obstruction or annoyance to persons using the seashore or bathing in the sea, i vin en issue anba sa Act.  E alors kot nou annan de sirkonstans kot en endividi ouswa en biznes pe deny akse avek manm piblik oubyen en lot viziter avek en lans, i kler ki i pa an akor avek bann provizyon sa Act.  Me mwan mon konsern ki mon annan an relasyon avek sa Act se son enforcement e bann lotorite ki sipoze pe met sa Act an aplikasyon.  E se la mon krwar ki nou bezwen fer serten travay pou met keksoz pli azour e pou rezourd sa problenm dan en fason pli apropriye, tout an prenan kont negosiasyon ki bezwen annan ant bann dimoun ki propriyeter, bann propriyete obor lans e bann dimoun ki bezwen servi lans.

Lo en lot kote Mr Deputy Speaker, nou osi annan Land Registration Act.  E li i koz lo bann easements ki’n ganny anrezistre lo bann later.  Now, mon pa en ekspert legal me dapre sa ki mon’n lir, sa ki mon’n konpran, Seksyon 23 ek Seksyon 25 ki ganny lir ansanm lo Land Registration Act i koz lo si en easement, si i annan en akse ki piblik in deza zouir toultan, then mon krwar sa i devret vin en public access.  Me la konsern i vini se ki si ou annan ou en group endividi ki pe dir poudir par egzanp, developer X oubyen en dimoun X pe deny nou akse avek sa lans, eski i pe blok en public access? Eski i annan en provizyon legal kot lotorite i kapab antre pou dir, par preskripsyon, bann dimoun i devret zouir sa akse akoz tradisyonnelman, zot in toultan servi sa morso semen.  Me tousala i ava en kestyon pou bann eksper legal reponn, me sa ki mon oule dir se ki i annan bann diskisyon, i annan bann provizyon ki deza egziste dan bann Lalwa ki koz lo sa size e ki kapab ede pou met sa size pli kler ki i ete ozordi.

Onorab Marie ler in move son Mosyon in osi koz lo Konstitisyon, Lartik 39 ki koz lo promouvwar nou bann valer kiltirel e nou bann leritaz tradisyonnel me i annan en lot laspe Konstitisyon osi ki Lartik 26 e Lartik 26 i koz drwa propriyeter me sa ki mon oule met lanfaz lo la dan Lartik 26 se bann lezot kalifikasyon ki ganny mete kot ler ou, ou annan en propriyete me i dan lentere piblik, pour ki par egzanp en akse ki deza la i ganny mentenir, then mon krwar lentere piblik i devret pas par lao lentere personnel pou allow sa kominote, pou allow bann endividi dan sa landrwa pou zot kapab kontinnyen zouir akse avek nou bann lans e la mon pe koz pa zis pou bann lans ki lo bann main islands, me osi bann lans par egzanp lo bann zil elwannye oubyen lo tou bann zil.  Mon pe koz annefe tou lans ki ganny trouve lo teritwar Sesel.

En lot pwen fondamantal ki mon oule koz lo la Mr Deputy Speaker, se nou Civil Code.  E ankor enn fwa anba nou Civil Code, nou vwar poudir i annan provizyon kot nou kapab annan sa ou apel bann aksyon par en kominote be la ankor, avek sipor lekel.  Nou bezwen definir ki rol Gouvernman pou zwe koman either fasilitater, oubyen koman regilater, an sa ki konsern bann issues kot i relye avek akse ek lans.  Make no mistake, avek nou polilasyon ki pou kontinnyen agrandir e avek bann presyon ki pou kontinnyen ganny mete lo nou bann zone kotyer, par lefe ki laplipar devlopman i trouve dan bann zone kotyer, nou pou annan sitiasyon ki pou come up dan le fitir kot pou annan bann issue akse avek lans.  Mon konpran tre byen largiman bann propriyeter ki par egzanp i dir, si en semen par egzanp ki donn akse ek lans i koup son propriyete an 2, kimannyer i ekspekte fer son devlopman e vin commercially viable si i gard sa semen?  E la mon dir lo en lot kote, i bezwen annan serten enforcement delapar lotorite konsernen pou dir, ok ou pe tir sa akse, ou bezwen provide alternative access ki reasonable, ki ava still permet dimoun pou al lo lans, me non pa zot bezwen al sot diferan kap ros e la dimoun i kapab al tonbe e ganny aksidan.  So, mon krwar i annan tout en lapros ki bezwen ganny pran pou kapab rod en solisyon pou sa problenm, me en solisyon nou bezwen trouve neamwen, akoz parey mon’n dir, an vi ki devlopman pe kontinnyen arive e an vi ki nou popilasyon pe kontinnyen agrandir, i pou ariv en pwen kot sa 2 pou zwenn ek kanmarad e la nou oule ki ler keksoz i zwenn avek kanmarad, keksoz i ganny fer dan en fason ki byen, ki kler e ki akseptab pou tou dimoun.

Mr Deputy Speaker, mon krwar ki dan nou zefor pou nou balans sa bann various competing demands ant devlopman e valer kiltirel pou nou kontinnyen zouir nou tradisyon, nou bezwen osi regard en pe nou responsabilite.  Par egzanp si mon pou al lo en lans, mon bezwen al lo sa lans, si mon annan en dimoun ki reste obor sa lans, mon’n pas lo son later, mon pa pou kapab ler mon pe al lo lans, pe zwe lanmizik a full volume, kot mon pe disturb sa dimoun 1, dezyenmman mon pa pe kapab retournen sorti lo lans, byen sou pe disturb, pe nouir sa dimoun akoz sa dimoun, son lakour i son sanctity.  I son propriyete e i annan drwa pou li, a sa moman pas en moman pezib avek son fanmiy osi.  Me lo en lot kote, sa dimoun, pa akoz i anvi pas en letan pezib i dir avek tou dimoun dan sa landrwa, sa i en semen prive, ou pa pou kapab al lo lans.  So, parey mon pe dir, nou bezwen strike the balance. Nou bezwen rode kote ki nou kapab trouv common ground, ki nou tou nou kapab trouv bann eleman akseptab ki a permet nou konpran sa problenm e osi ki ava permet nou fer fas avek sa problenm dan en fason pli rezonnab.

Nou bezwen osi konsidere ki nou annan bann aktivite ki nou fer lo lans ki ozordi i ganny fer akoz lakantite landrwa ki available pou nou fer sa bann aktivite in diminnyen.  Bokou nou bann zenn ozordi, zot bezwen al disco me parfwa nou zenn osi i kontan fer bann night picnic, zot kontan al lo bann lans.  E la nou bezwen rod en fason pou nou allow nou bann zenn pou defoule, pou zot enjoy.  Akoz mon krwar nou tou ki’n zenn nou’n sanze, nou’n pas nou letan zenes kot nou’n ganny akse ek lans, nou’n fer bann night picnic eksetera, so mon krwar bann zenn osi i devret ganny sa loportinite pou zot annan en landrwa kot zot kapab enjoy e ki safe.  Me ler nou pe retir sa bann eleman kot zenn i kapab fer serten aktivite e la mon dir aktivite avek kontrol, i pa vedir ki ou pe fer night picnic ki tou keksoz i al andeor kontrol me aktivite avek kontrol, then nou pa pe donn zot loportinite pou epanouir, nou pa pe donn zot loportinite pou zot kapab relax.  E mon krwar koman en pep ki’n toultan valoriz sa bann valer kominoter koumsa, kot annefe al lo lans i ranforsi nou valer kominoter, nou bezwen komans mazin seryezman lo la e ki lenpakt sa pou annan lo nou bann kominote dan le fitir.

Set alor Mr Deputy Speaker ki mwan mon rekomande.  Mon rekomande ki nou annan en plan konpreansiv, oubyen sa ki nou kapab apel en beach access plan.  E sa i a ganny met an aplikasyon an akor avek Beach Control Act.  Nou menm kapab enkorpor li dan Beach Control Act koman en regilasyon.  E la, sa Beach Access Plan i ava annan en inventory ki ganny fer lo tou akse.  Nou fer en inventory lo tou akse, dan distrik Anse Aux Pins, dan distrik Glacis, dan distrik Beau Vallon, vwala bann landrwa ki tradisyonnelman dimoun in zouir bann akse.  E la, once ki nou annan sa lenformasyon ki nou ava konnen tou bann landrwa kot dimoun i zouir bann akse, nou ava kapab then zwenn avek bann devloper e dir ok, lala akse tradisyonnel, devloper i ava dir ou si sa akse i kapab mentenir, oubyen si i krwar poudir alternative access i bezwen ganny provided.  Me sa ki pou pozitiv se ki la nou pou’n deza komans fer en step an avan pou nou kapab antre an negosiasyon avek tou bann dimoun ki parti prenan dan sa sitiasyon.

En lot sizesyon ki mon pe propoze se ki nou fer sa ki nou apel, nou kapab fer visitor survey par egzanp, oubyen en public opinion pole lo kimannyer zot santi ki akse avek lans ozordi i ete.  Mon krwar Jamaica i en pei ki’n deza al dan sa direksyon, in deza fer enn e bokou lezot pei osi in konsidere pou fer sa bann resers kot viziter i ava dir ou, par egzanp en viziter ki pe reste dan en small guest house, i al lo en lans kot i annan en pli gran lotel, i santi poudir i pa’n ganny akse, i ava dir ou poudir i pa’n ganny akse.  Toulede viziter, they are equally important.  Menm sa enn ki dan sa gran lotel, menm sa enn ki’n vin dan sa pti lotel.  Annefe petet sa enn dan sa pti lotel i pou enterakte avek kominote e petet i ava depans plis dan kominote ki petet sa enn ki laba lot kote.  Tousala nou bezwen met an perspektiv ler nou pou konsider sa plan.  Mon krwar poudir sa i pou tre itil pou nou akoz rezon det deryer annan en plan konkret se sa pou permet nou dan le fitir plan nou lekor.  Nou konnen ki popilasyon pou grandi, nou konnen poudir par egzanp lo sa kote la, kot pou annan devlopman, nou’n fini konnen poudir a) beach access pou vin en problenm ler sa devlopman in komanse, alors negosiasyon in komans ganny antreprann avek bann endividi, avek bann kominote dan sa landrwa.  Me par kont ki nou’n vwar par lepase e nou bezwen etre fran pou dir i annan devlopman ki’n ganny fer kot napa ase konsiltasyon ant kominote e bann devloper, oubyen bann lotorite konsernen.  Nou’n vwar bann EIA i ganny fer, ki’n spesifye ki serten akse i devret reste la, me ki apre, nou pa’n vwar ase enforcement, oubyen nou pa’n vwar ase monitoring ki’n kree bann sitiasyon kot bann akse pa’n ganny byen mentenir as it should.  E la kot in vin en problenm kot par egzanp, ou vwar piblik i bezwen petet pas dan propriyete lotel ki neseserman petet pa asiz byen avek bann propriyeter.  So, mon krwar nou bezwen toultan rod en solisyon alagam, me rod en solisyon toudmenm akoz i i en keksoz ki tre enportan pou tou Seselwa.

Mr Deputy, mon krwar mon’n kouver tou bann eleman sa Mosyon ki mon ti anvi kouver e koman en dimoun ki’n reste preski tou mon lavi obor lans, mon ti a kontan osi ki mon zanfan demen i zouir menm akse avek lans ki mwan mon’n zouir.  E ki zanfan lezot dimoun osi i kapab enjoy e zouir menm akse avek lans akoz nou pa kapab under estimate lenpakt ki en lans i annan dan lavi en Seselwa.  E mon krwar sa i en keksoz primordyal ki nou bezwen met o fon nou lespri ler nou pe mazin okenn solisyon pou sa issue.

E avek sa mon ti a kontan demann tou Manm pou donn sipor sa Mosyon.  Annou lans en mesaz kler ki nou Lasanble i konsernan, nou pe aplodi bann zefor ki Gouvernman in fer resaman pou komans met en lord dan sa bann issue beach access e nou dir toultan ki nou Lasanble e nou Gouvernman i toultan pran lentere nou pep a ker e nou toultan note kan nou pep i santi ki i annan serten keksoz ki pe afekte li e se nou ki kapab anmenn sa sanzman pozitiv, parey ki i devret annan.  Thank you Mr Deputy Speaker.

 

MR DEPUTY SPEAKER

Bon, Mosyon parey in ganny amande, mon envit Dokter David Payet.

 

HON DAVID PAYET

Mersi Mr Deputy.  Mr Deputy, sa size akse avek lans i en size bokou pli profon ki i paret.  Pou nou konpran e sezi lenportans akse avek lans pou tou Seselwa, nou devret rapel spesifisite zeografik nou pei e replonz nou dan nou listwar.

Mr Deputy, Sesel i en larsipel, savedir en group zil, nou bann zil i ti pti e i ganny repete koman enn bann pli zoli kwen dan lemonn.  Sa i fer labote nou pei, i atir plizyer milye viziter, se prensipalman nou bann lans avek son disab fen.  Etranze i voyaz de milye kilomet e depans en fortin zis pou li vin dekouver e eksperyans labote nou bann lans.  Nou bann lans, se sa ki fer repitasyon nou pei dan lemonn.  Zot form parti nou patrimwanny.  Si lans i form parti nou patrimwanny, tou Seselwa alor, i enposib pou sa menm pep pa ganny akse avek serten lans.  Nou lans i nepli pou nou letan nou pa ganny akse avek li.

Mr Deputy, pou sa rezon nou devret enterdi restriksyon akse avek okenn lans.  Lalwa i devret ranforsi sa e kot Lalwa pa efektiv, i devret ganny amande pou koriz sa.  En dimoun ki blok akse avek lans i pe komet en lofans.  E the long arms of the Law, i merit met li dan son plas par penaliz li.  Napa personn ki par lao oubyen pli for ki Lalwa e personn napa drwa eksklir okenn sitwayen Sesel avek okenn lans dan sa pei akoz lans i nou patrimwanny kolektiv e i pa propriyete personn.

Mr Deputy, dan listwar nou pei i annan de moman kot serten Seselwa pa ti ganny akse avek lans.  Se an rezilta sa bann moman fermal dan nou listwar ki Lalwa ti ganny amande, pou fer ki tou dimoun i kapab ganny akse avek lans.  Ozordi zour, letan zot blok akse avek lans, serten lendividi pe fer nou retourn ver sa lepok dan letan kolonyal, kot serten ti ganny drwa privatiz lans.

Mr Deputy, sa Lasanble ki reprezant lavolonte lepep Seselwa i annan li en devwar moral pou anpes pei retourn dan sa lepok kot lans pa ti piblik.  Nou annan en devwar moral anver nou bann paran ki’n lite pou sanz sa sistenm e anver nou zanfan ki pa merit zanmen konn soufrans sa lepok.  Fodre ki bann endividi ki konsernen e realize ki letan zot blok akse avek lans, zot pe relev en vye blesir dan memwar lepep Seselwa.  Zot devret napa okenn lekskiz pou blok akse avek lans.

Mr Deputy, sepandan nou bezwen zis.  Lalwa i bezwen sever kont tou dimoun ki mal servi lans e sa i enkli bann ki esey blok akse avek lans, osi byen bann ki profite pou vin vol lezot dimoun lo lans.  Lans i en landrwa kot tou piblik e tou dimoun i vin detann zot lekor.  Napa personn ki annan drwa, ni anpes lezot vin lo lans par met trespas, oubyen konstrir miryay e napa personn osi ki ni merit servi lans koman en landrwa pou vin vol lezot.

Mr Deputy Speaker, mon pou vot an faver sa Mosyon e demann tou mon Manm koleg pou fer parey mwan akoz an fezan sa, nou ava anvoy en mesaz tre kler avek sa detrwa dimoun ki krwar lans i zot propriyete prive.  Mersi Mr Deputy.

MR DEPUTY SPEAKER

Onorab Bristol.  Switch off mic.

 

HON ALDERIC BRISTOL

Mr Deputy, Manm Onorab, lepep Seselwa bonzour.  Sanson i sante, nou zoli verdir, nou lesyel ek nou lanmer ble e nou zoli lans blan.  Se sa nou labote natirel.  Se sa ki fer nou unique by a thousand miles. Se sa ki form parti nou lidantite kreol Seselwa e se sa ki fer nou fyer pou dir ki nou en Seselwa.

Mr Deputy, mon komans mon lentervansyon lo sa ton patriyotik akoz sa size ki devan nou, i zisteman konsern e tous nou tou sitwayen, sa larsipel, bizou Losean Endyen.  Mosyon ki devan nou pe demann Gouvernman pou met an plas, Lalwa pli sever kont bann biznes e endividi ki refiz akse lo lans avek Seselwa ek etranze.

Mr Deputy, pou mwan sa size pa ti devret zanmen vin en size alarman ki ti pou nesesit en Mosyon dan nou Lasanble ozordi.  Pou mwan, si nou tou, setadir Seselwa, etranze, envestiser ek devloper, propriyeter prive e lazans konsernen ti konpran e konn nou rol, drwa e responsabilite vizavi akse e servi tou nou bann lans, sa pa ti pou zanmen vin devan nou Lasanble koman en issue pertinan.  Malerezman, nou bezwen aksepte, se sa ki pe arive vizavi serten lans ki nesesit deba lo sa size akse avek lans ozordi dan nou Lasanble.

Mr Deputy, lekel sa Seselwa ki pou kontan ganny refize akse ek lans piblik pou li fer son piknik an fanmiy, ou zwenn ek enn de zanmi pou detann?  Lekel sa etranze ki pou kontan ganny refize akse avek nou bann zoli lans, apre ki in pey bokou larzan pou egzakteman vin enjoy sa bann menm zoli lans?  Lekel ki donn sa bann biznes ou endividi prive drwa pou blok akse avek lans piblik?  Eski sa bann lans i form parti propriyete sa bann biznes ou endividi prive?  Eski lans ki sipoze reste domenn piblik i ganny vann li osi?  Mon pans pa si sa i leka akoz in stipulate an ekrir ki lans i touzour reste en domenn piblik e a dispozisyon tou dimoun.

I vre Mr Deputy, ki Sesel in devlope enkrwayableman sa bann dernyen lannen.  Zis regard otour nou, laprev i la.  Bokou lanfaz in ganny mete lo tourism ki nou ganny pen prensipal.  I vre ki bokou letablisman touristik, sitie dan lezalantour detrwa nou bann zoli lans in ganny konstrir e bokou sa bann letablisman i ganny finanse e zere par bann etranze ki zot, zot lobzektiv prensipal i zot kliyan e zot biznes.  Nou konpran sa tre byen nou.  Si se lans ki latraksyon prensipal touris, alor zot osi, set otour, ou pre avek nou bann zoli lans ki zot batiman e aktivite pou konsantre.  Malerezman, sa bann envestiser zot inisyalman vin isi dan linyorans ki nou bann lans i form parti nou kiltir e ki Seselwa i byen kontan son bann aktivite lo lans.  Me par kont, i annan menm ki zot okouran sa, zot rod en fason pou inyor sa e fer keksoz dan zot fason.

Mr Deputy, se la ki zot servi diferan metod e taktik pou dekouraz manm piblik al lo serten lans dan visinite zot letablisman ou zot lakaz prive.  Les mwan sit enn de legzanp.  Zot dir zot pa anpes ou vin lo lans, me avan ou ariv lo lans, ou bezwen zwenn en baro ki swa i reste fermen, ou ganny kontrole par serten sekirite.  Zot dir zot pa anpes ou al lo lans, me sa semen ki akse ziska lo lans, zot fer li vin en foot way kot ou bezwen mars apye selman.  Zot dir zot pa anpes ou vin lo lans, me zot met en parking area 1.2 kilomet avek lans e konstrir en foot way ziska lo lans e la Mr Deputy, mon demande lekel ki pou savoy en ice box ou en grill lo son latet pou tou sa zistans.  Zot dir zot pa anpes ou vin lo lans, me ou bat zis avek gro lisyen mesan ki reste larg pou met ou otaz.  Zot dir zot pa anpes ou vin lo lans, me ou vwar en bon nonm sekirite, pe vir vire dan ou lipye, konmsi ou lo sa lans avek move lentansyon.

Mr Deputy, lalis i kontinnyen e sa ti zis detrwa legzanp.  An fezan sa, i dekouraz piblik al lo sa bann lans swa pou evit konfrontasyon, ou bann prosedir ki definitivman pa neseser.  La, mon pou fer mansyon enn parmi nou bann pli zoli lans Sesel, Anse Intendance.  Sa lans ti tre, tre popiler.  Zabitan Takamaka i dir ou, zot pe al Intendance dan Dimans akoz zisteman ti en landrwa kot apard ki detann e naze, bokou zabitan ti zwenn pou sosyalize e dyaloge.  Bann zenn ti grennen sorti partou kote avek zot surf board pou vin ride the waves.  Etranze ek kreol ti melanze dan en latmosfer amikal.  Intendance ti lans kot bokou aktivite sportif ti pran plas, sirtou sa fame annual beach volleyball.  Oli tousala ozordi zour?  I vreman sagrinan e sa in touy sa latmosfer fantastik ki ti egziste lo sa zoli lans.  E la, mon a profite pou lans en lapel avek sa letablisman touristik e lotorite konsernen pou retourn nou lans Intendance parey oparavan.  Zabitan Takamaka e lezot fanatik sa lans pe esper sa avek enpasyans.

Mr Deputy, se bann sitiasyon koumsa ki nou pa ti a voudre i kontinnyen.  Nou ti a byen kontan ki lans i ganny servi byen comme il faut par tou dimoun, dan en fason byen e armonye ki zisteman, i a ankouraz sustainable development dan nou pei.

Mr Deputy, la mon pou siport loter sa Mosyon pou aksyon sever ganny pran kont bann biznes, ou endividi prive ki refiz akse, ou ki fer li tre difisil pou nou frer Seselwa, ou konfrer etranze ganny akse avek serten lans.  Mon panse ki en mesaz byen kler i merit ganny pase pou zisteman dekouraz sa kalite pratik.  Kwa ki donn zot drwa pou anpes akse avek lans?  Eski donimer oubyen linyorans?  Eski zot annan kek problenm partikilye tel ki privacy?  Si wi, eski zot in met a latansyon lotorite konsernen?  Eski bann lenvestiser etranze in byen fer zot homework e met zot azour avek kiltir nou pep, avan ki zot envestir dan nou pei?  Eski lotorite konsernen i met sa bann lenvestiser okouran sitiasyon kiltirel nou pei avan ki zot vin etablir zot Sesel?  Tousala Mr Deputy i bezwen osi ganny adrese.  Annandeler, nou oule konpran zot.  Me dan tousala, nou dir kot i konsern akse lans piblik sa pa devret negosyab.  E la ankor, mon dir sa ki ensiste, fodre lotorite konsernen i komans pran aksyon.  Nou merit osi rekonnet ki deplizanpli, kreol i al lo lans pli souvan e an pli gran nonm konmela.  Parti laniverser, batenm, Premyer Konminnyon eksetera i souvandfwa ganny fer lo lans aprezan.  Night picnic in fini vin en labitid.  Avek sa bon pe devlopman flat enpe partou, dimoun ki reste dan letaz, zot prefere desann borlanmer pou al detann e sosyalize borlanmer.  En landrwa partikilye ki vin dan mon latet la, se Anse Gaulette, Baie Lazare.  Oparavan, mazorite bann lans ti plito bizi dan weekend, sirtou Dimans, me la konmela, napa zour, napa ler.

Mr Deputy, en keksoz fasinan se ki ou vwar sa bann aktivite konsantre dan bann lokasyon partikilye e dan rezyon Sid i plito dan visinite Fairyland, kot Beach Park Anse Royale, Anse Marie-Louise, Anse Gaulette ek Ros Kopra e Anse La Mouche.  E deplizanpli, ou vwar dimoun pe fouy trou lo bann pti lans ki oparavan pa ti ganny frekante e sa pe met presyon lo nou lanvironnman.  I annan enn de landrwa ou pase e ou vwar lotorite i met gro, gro ros pou sey anpes dimoun antre avek transport, zisteman pou protez nou lanvironnman.  Mon mazinen ki avek logmantasyon lakantite dimoun ki al lo lans e avek bann lans kot dimoun pa pe ganny akse avek, pe ede kree sa kalite sitiasyon.

Mr Deputy, Sanmdi pase, mon pas lo sa morso semen an kitan Fairy Land.  Sa pti seksyon zis avan sa nouvo laboutik i fek ouver e ti enkrwayab pou vwar ki zis dan sa pti stretch anviron 50 met, ti annan 4 group piknik enn lo lot.  E pli enteresan ankor, mon ti remark 3 gro set lanmizik.  Mr Speaker, mon riy tousel ler mon mazinen ki kalite remix tapaz ki pe pase laba.  E sa i anmenn mwan lo responsabilite nou bann pikniker e dimoun ki frekant lans an zeneral.  Si nou pe lev sa size kot nou tou nou ganny akse avek nou bann lans, me de lot kote zot pa pe servi sa bann lans dan fason apropriye e byen, sa pa pe ed nou sitiasyon ditou.  E la mon a tous sa bann sitiasyon swivan.

Tapaz eksesiv lanmizik.  Oparavan, ti annan en pti tape 6 batri ki ti anvoy Lafen Dimwan Fek Peye par Joseph Louise e tapaz domino lo latab ti menm pli for ki sa tune.  Denozour, bann speaker 800 watt anmontan pe Chop My Money.  Si i ariv en maler, menm osekour i noye dan tapaz lanmizik.  I pa anpese blast en music, me ler i dan en fason ki akseptab, tou dimoun i mazin bann vwazen dan zalantour ki pe esey repoze, sirtou aswar.  Mon konpran dan lenstans kot i annan en aktivite popiler, ki li i pa ariv souvan, e i pa ariv tou le wikenn.  Sound pollution i en problenm, so frer ek ser Seselwa, ed nou pou ed zot.

Lot polisyon ankor Mr Deputy Speaker i salte e debri ki ganny lese partou apre ki piknik in fini.  Mon tre ankouraze e felisit bann ki konsyan nou lanvironnman e al avek tou zot salte se zot.  Mon ti a demann lezot pou swiv parey.

Dezord e respe pou propriyete lezot.  Nou al lo lans pou have fun, anpe e detann nou, san ki nou kree dezord e andomaz propriyete lezot dimoun.  En pe respe silvouple.  E la ankor, mon felisit bann dimoun ek bann fanmiy ki konport zot tre byen.  Mon espere ki zot vin en legzanp pou lezot.

Vol propriyete lezot.  Sa i malerezman en vilen manni ki’n fini komans montre son vilen figir, ziska lo nou bann lans.  E sa pe donn rezon bann letablisman e biznes pou dekouraz piblik lo serten bann lans.  Annou aret sa vilen manni.

Mr Deputy, si nou, koman bann bon sitwayen nou fer nou bout byen, then pou napa okenn rezon whatsoever pou bann letablisman biznes ou propriyete prive pou vin avek serten largiman pou sey zistifye lanpesman akse avek serten lans.  Devlopman pei e epanwisman nou pep i 2 keksoz ki devret mars lanmen dan lanmen.  Nou pa kapab reste dan nou pti kwen e dir non, pa fer devlopman.  De lot kote, nou pa kapab les devlopman depas nou e anpes nou zouir nou zoli pti pei cheri.  Si tou dimoun i konpran son rol e mon krwar ki nou tou nou konpran nou rol, me i zis ki i annan serten, zot oule fer keksoz dan zot fason, dan zot lavantaz.  Alors, mon lans en lapel avek tou lotorite konsernen e lezot stakeholders pou zwenn ansanm, non pa selman pou pini sa ki koupab, me pou osi regard the way forward, pou fer sir ki sa bann tel pratik i arete o pli vit posib e ki napa lezot nouvo ki remonte dan lefitir.

Mr Deputy, mon pou fini mon lentervansyon par donn loter sa Mosyon mon full sipor lo son Mosyon.  Mersi bokou.

 

MR DEPUTY SPEAKER

Onorab Valmont.

 

HON SYLVIANNE VALMONT

Mersi Mr Deputy Speaker, bonzour.  Bonzour tou Onorab alekout.  Mr Deputy Speaker, mon pou komans mon lentervansyon par fer referans avek sa meeting ki’n ganny fer semenn pase par sa 4 Minis, Home Affairs and Transport, Environment and Energy, Tourism and Culture, Land Use and Habitat, ki mon krwar i en gran pa an avan me anmenmtan, nou bezwen dir en pti pe koumsa, better late than never.  Mon senserman krwar ki entel konsiltasyon a sa nivo, avek bann operators hotel, bann owners, bann biznes prive eksetera, ti’n merit ganny fer en pti pe byen lontan.  Sa lapros ki pe ganny konsidere par sa tim, mon sir ki i ava ganny byen balanse pou benefis tou dimoun konsernen.  Sa zefor e sinerzi i merit kontinnyen pou ki i anmenn bon rezilta, menm mon kapab dir, rezilta efektif lo nivo nasyonal.  Sa linisyativ i relevan avek sa Mosyon ki nou pe koz lo la ozordi.

Mr Deputy Speaker, Mosyon Onorab Marie, pe demande ki Lalwa pli sever i ganny mete anplas kont bann biznes ou endividi ki refiz akse lo lans avek Seselwa e lezot viziter.  En Mosyon ki pe met lanfaz lo aksyon apropriye.  I evidan ki Lalwa i la.  I annan ki merit revize me parey i arive souvandfwa dan nou pei, menm si i annan Lalwa, son lenplimantasyon nou dir, leaves much to be desired.  I aparan ki bokou fwa dan lepase, kot bann promoter biznes prive, sirtou kot lotel i konsernen, ler zot prezant zot proze pou ganny konsidere par Gouvernman oubyen sa Minister konsernen, tou sa laspe neseser i dan zot plan tel parey akse pou lans, nonm travayer etranze ek Seselwa, lafason ki zot pou travay avek lakominote kot lotel pou ganny batir, eksetera.  Me alafen dizour, sa ki nou remarke, tou sa bann plan, sa bann zoli promes si oule i ganny met lo papye, parfwa zis pou sa proze ganny aprouve me pa ganny swiv ditou, oubyen rarman parey i merite.  Nou konnen sitiasyon detrwa gran lotel, nou’n pas mon konnen dan lepase, kot Lemuria i konsernen, Banyan Tree, nou kanmarad Onorab Takamaka in koz lo la, lezot ki mon pa pou mansyonnen, Kempinski, la i en lot problenm e lezot staz ankor kot akse pou piblik zouir lans in en problenm.

Dan konteks sa size Mr Deputy Speaker, i kler ki malgre legzistans Lalwa oubyen polisi, tre pe – pe ganny fer pou asire ki bann parti konsernen i fer sa ki fodre.  Lentervansyon bann lotorite konsernen i bezwen zwe en rol enportan dan sa demars akse ek lans.  Menm si pou revwar bann regilasyon i deza la, oubyen menm pou fer met anplas lezot regilasyon neseser, anlinny avek polisi Gouvernman.  Mon pa pou al dan detay, Onorab Pillay in fer en lentervansyon tre spesifik, tre si oule efektiv lo sa size bann Act ki nou bezwen vwar, oubyen si oule re-travay lo la.

Mr Deputy, in toultan nou koutim e dan nou kiltir pou al pas en pe letan lo lans.  Ankor, bann lezot ki’n koz avan mwan in koz lo la.  Me pli souvandfwa dan wikenn kot nou bann fanmiy i al si oule pas en pti pe letan swa pou en birthday, swa pou en parti, parey nou konnen osi i enpe mwens koute, si pou nou al lwe en lasal pou al fer bann parti ladan, nou lans i form parti nou kiltir, nou anmiz lo la parey nou kontan me selman i vreman si oule en konsern deplizanpli kot i konsern akse, oubyen bann fasilite ki merit open a nou bann dimoun Seselwa, oubyen menm nou bann viziter.  Pou pran en pti legzanp, mon konnen par egzanp Anse Royal, sa osi in deza ganny mansyonnen, mon krwar parfwa dan Dimans ler nou oule al laba, nou bezwen al gran maten.  Ou bezwen al debout akoz deplizanpli landrwa i komans limite.  Ou bezwen ale, al swa met en gard sekirite avan pou ou ganny lespas.  Mon krwar dan sa konteks, petet i a rekomandab ki lezot landrwa osi i ganny ekipe avek lozistik neseser pou ki bann aktivite parey mon’n mansyonnen oparavan i ganny fer.

Anmenmtan, i pou osi neseser Mr Deputy Speaker, ki ler nou bann group dimoun, par egzanp oubyen fanmiy i al lo lans, oubyen i pas obor bann lotel, pre avek bann lotel pou zot al servi sa landrwa prive, zot fer sir zot fer li dan en fason armonye, kot i annan en nivo respe mityel, savedir sa ki pe servi lans i bezwen konpran e rekonnet son drwa ek responsabilite anver sa ki osi pe viv dan sa landrwa.  Souvandfwa, i kapab annan bann group ou endividi ki annan tandans abiz zot drwa, kot problenm i leve.  E par konsekans, tou lezot i ganny pini.  En moman agreab lo en lans obor lotel kot nou touris i osi vin zouir en bon moman dan trankilite i bezwen ganny respekte.  I pa pou byen pou zwe lanmizik for a tou kase pou annwiy lezot ki bezwen enpe lape e trankilite ziska parfwa tar dan lannwit.  Dan sa konteks osi, aksyon i merit pran, oubyen ganny pran avek bann ki komet en tel lofans.  Lalwa i bezwen ganny ranforsi dan sa konteks.  Si fodre annan spot fine pou bann tel lofans.  Sa i bezwen ganny ekzekite konm fodre.

Pou terminen Mr Deputy Speaker, mon ti a kontan rekomande ki mekanizm apropriye i ganny met anplas, non selman pou ranforsi Lalwa ki egziste, me osi pou fer bann swivi neseser kan i merite dan en fason proaktiv e soutenab.  Avek sa 2 pti mo Mr Deputy Speaker, mon aport mon sipor pou sa Mosyon.  Mersi.

 

MR DEPUTY SPEAKER

Bon, avek sa nou ava pran en break e nou a rezwenn 2er.

 

(Lunch)

 

MR DEPUTY SPEAKER

Bon, mon ava dir bonn apre midi zot tou.  Nou ava kontinnyen avek nou deba lo Mosyon table par Onorab Meggy Marie e lo mon lalis mon envit Onorab Souris.

 

HON MIRENA SOURIS

Mersi Mr Deputy, bonn apre midi Mr Deputy e tou Koleg.  Mr Deputy, Mosyon devan nou Lasanble i demann Gouvernman pou met an plas lalwa pli sever kont bann biznes ki refiz akse lo lans avek Seselwa e lezot viziter.

Sa Mosyon i abord en size ki tous fonnman menm tou sosyete modern enkli sa “Nouvo Sesel” ki nou pe kree.  Sa size se lalwa an fors ki kontrol regilasyon avek akse ek lans.  Ki vedir, ki dan tou sosyete modern se lalwa ki rennyen, se lalwa ki dir kwa ki pou fer e kwa ki pa pou fer.  Napa lot keksoz ni lot dimoun apart ki lalwa e zonm i la pou fer aplike e respekte lalwa.  E sa kestyon akse avek lans i merit ganny deside par sa ki lalwa i dir.

Dapre lalwa, tou lans dan Sesel i domenn piblik e alor person napa drwa anpes en lot dimoun ganny akse avek lans.  Sa i merit kler pou tou dimoun enkli sa bann ki annan propriyete ki bord ek lans.  Fodre ki sa bann dimoun i konpran ki zot propriyete i selman bord avek lans e i pa enkli lans.

Mr Deputy Speaker, sa size i enn ki tre sansib akoz lans i pou tou Seselwa e si en dimoun i kapab anpes lezot annan akse avek lans ki piblik sa dimoun pe an efe azir pa lao lalwa e i pe anpes lezot annan zot drwa.  Sepandan, nou pa oule ki serten propriyeter later oubyen lotel ki bord ek lans privatiz sa bann lans par anpes lezot manm piblik ganny akse avek li.  Fodre nou osi asire ki bann dimoun ki ganny akse ek lans pa servi sa drwa konman en fasilite pou komet bann akt parey zwe lanmizik for ki disturb souvannfwa bann zabitan dan vwazinaz e osi al vol kliyan lo lans e dan lotel oubyen annwir bann viziter e anpes zot pas en vakans dan trankilite dan nou pei.  Fodre ki pa serten endividi i servi sa drwa annan akse avek lans pou anpes lezot byen servi lans.  Lans i piblik pou tou e i devret annan akse avek lans me personn napa drwa abiz lo sa drwa.

En dimoun ki al lo lans zis pou vol lezot, i pe abiz lo son drwa zis parey enn ki deside blok akse ek lans.  En dimoun ki al fer nwizans lo lans pa pe azir dapre lalwa i zis parey enn ki deside lo li menm met trespas lo lans.  Lans i pou tou me pa pou bann ki abiz lo sa drwa akse avek lans.

Mr Deputy, letan mon dir ki tou lans i domenn piblik e lalwa i rekonnet sa, mon osi realize e mon konnen ki menm lalwa i fer serten leksepsyon.  Par egzanp, pou de rezon sekirite nasyonal, serten lans dimoun napa drwa ale.  Dan sa konteks, mon propoze ki kan en dimoun i anpes piblik ganny akse avek okenn lans, mon sizere ki Gouvernman i konsider entrodwir en spot fine pou bann propriyeter oubyen biznes ki refiz dimoun ek akse.

Mr Deputy, sa Mosyon i reste kle pou dimoun Beau Vallon etan donnen ki mazorite propriyete ki bord ek lans i prive.  Par egzanp, kot Regatta i fer anyel e osi kot bann piknik i ganny fer.  Antretan Mr Deputy, mon pou felisit sa linisyativ pran par sekter prive, zabitan e diferan lazans enkli Minis Tourizm e Home Affairs pou revwar sa devlopman o nivo distrik Beau Vallon tout an prenan kont akse ek lans pou Seselwa e lezot viziter.

Mon osi propoze ki Gouvernman i etabli en gidans kler lo okenn devlopman ki baliz ek lans atraver lotorite Planning.  Mon pou osi lans en lapel avek manm piblik ki servi lans pou diferan fonksyon pou pran an konsiderasyon e annan respe pou lezot dan lantouraz.

Mr Deputy, avek sa 2 pti mo mon pou aport mon sipor pou sa Mosyon e mon pou osi demann mon bann koleg pou fer parey.  Mersi.

 

MR DEPUTY SPEAKER

Onorab Samson.

 

HON DEREK SAMSON

Mersi Mr Deputy.  Mr Deputy, Mosyon ki devan nou pou sa apre midi, depi bomaten, i ava petet gard nou dan en leta repozan.  Mon dir sa akoz zisteman parey nou pe antann, Mosyon pe anmenn nou lo en parti nou bann zil kot nou sitwayen e menm touris i kapab rezouir plezir ki konfor e labote Sesel i prezante.  I en landrwa ki nou kapab deklar li konman en landrwa sakre pou nasyon Seselwa e sa se nou bann lans Mr Deputy.

Apart ki labote nou verdir, nou bann lans ti osi parmi nou bann latraksyon ki ti enpresyonn nou bann premye viziter ki ti apros Sainte Anne an 1770, detrwa lannen pase.  Depi sa dat, nou’n vwar en serten nivo zesyon lo detrwa bout nou lakot.  Plitar ti annan otomatikman en landrwa spesifik kot bato kargo ti kapab koste pou debarkasyon.  E byensir ti annan osi enn, de lokasyon spesifik kot pirog avek son bann pasaze ti kapab anbarke oubyen debark dimoun pou transportasyon.  Ou pa ti pou ekspekte vwar en bato kargo pe antre lo lans Beau Vallon pou fer debarkasyon akoz por ti’n ganny dezinyen, Victoria e Onorab Souris i ava osi dakor avek mwan ki i ti pou plito normal pou vwar en pirog pe antre avek gran kantite makro byen fre.

Mr Deputy, mon konmanter e sipor anver sa Mosyon ozordi i tourn otour sa pwen prensipal ki en sistenm zesyon pou nou bann lans i kapab ganny etabli.  Byensir parey loter Mosyon pe demande si nou pou bezwen etabli lalwa pli sever pou determin akse avek nou bann zoli lans, nou pou bezwen fer li.  Permet mwan soulinnyen ki nou annan nou en lalwa spesifik ki kapab permet nou met an plas en sistenm zesyon pou nou bann lans.  Sa se Beach Control Act ki date depi Zilyet 1971.  Sa lalwa, parey bokou lalwa ki nou annan Sesel i donn sa Minis responsab pouvwar pou met an fors plizyer regilasyon anba sa menm lalwa.  Zisteman Mr Deputy, mon krwar i byen note a sa pwen ki zis semenn pase nou ti antann ki 4 parmi nou bann Minis in zwenn e pou rezwenn ankor byento avek bann dimoun konsernen avek nou bann zil, sirtou bann met bato, bann kaptenn bato e bann manager bann zil sirtou IDC.  Sa bann rankont i annan plizyer bi e enn parmi se pou vwar en way forward kot i konsern en nouvo lapros lo size akse pou nou bann sitwayen e touris ki a kapab debark lo nou bann zil, lo zot bann lans byensir e si i posib vizit sa bann tel zil.

Mr Deputy mon ti ava kontan felisit Gouvernman e sa 4 Minis pou langazman ki zot in pran dan sa lentere.  Avan mon al pli lwen Mr Deputy, mon krwar i osi enportan ki nou sey vwar akoz serten biznes e endividi i refiz Seselwa e menm parfwa ek touris, akse lo serten nou bann lans.  Ti annan en letan ki Dimans en fanmiy Seselwa ti pou desann apye oubyen ganny transporte lo en lans avek normalman en kastrol min, ansanm avek enn, de lezot bouyon akonpanyen avek limonnad e menm parfwa en pti diven oubyen labyer.  Pou egey sa fanmiy zot ti menm parfwa anmenn avek zot en pti tape e en boul pou zanfan kapab zwe lo lans e finalman apel sa levennman piknik.  Ozordi dan nenport ki zour dan lasemenn nou kapab vwar plizyer fanmiy oubyen group zanmi reinir lo en lans oubyen pros obor en lans avek zot transpor ki’n park bokou pli pros avek sa lans posib pou en rather parti lo lans.  Birthday party, premyer konmiyon oubyen la konfirmasyon ek batenm, end of year gathering e plizyer lezot lokazyon ankor i ganny selebre lo lans konmela.  Souvanndfwa, bann repa i ganny prepare an plas lo lans menm, pli popiler I barbeque antoure avek tou sord kalite labwason alkolize.  Pou kre lanbyans, se en Dj avek tou son sistenm lanmizik enkli bann very loud speakers.

Mr Deputy, dan toulede lenstans, yer avek ozordi, piknik ouswa parti lo lans nou byensir vwar nou dimoun pe sosyalize e anmize e sa i en parti nou kiltir oubyen labitid Seselwa.  I napa neseserman nanryen mal Mr Deputy me nou pou bezwen agree ki serten pratik dan lafason lki nou anmiz nou lekor fodre ganny revwar lo nou bann lans.

Lo en lot nivo, touris ti kapab lontan al pran en bon benn mer e kit son bann propriyete personnel lo lans san okenn lenkyetid e lot opsyon pou en touris sete reste lo disab pou en bon tan soler avek son lizye fermen.  Ozordi malgre prezans Tourism Police touris nepli kapab fer ni enn, ni lot lo serten nou bann lans.  Akoz?  Akoz menas voler.

En trwazyenm legzanp se sa biznesmen ki ti konmans avek en pti restoran obor lans e ozordi in arive fer son biznes agrandi pou vin en pti lotel.  Pou trankilite son kliyan, li i pou fer tou sa ki posib pou kontrol kalite dimoun ki kontrol son restoran e son lotel e i pou menm parfwa refiz akse lo lans devan son letablisman.  E dapre li e son leksperyans se avek bon lentansyon ki i pe pratik sa bann tel mezir.

Mr Deputy, dan sa 3 portre ki monn brefman dekrir, i annan e fenomenn ase enportan pou nou sezi.  Sa se liberte.  Liberte en sitwayen oubyen en group sitwayen enkli touris pou kapab rezouir plezir ki konfor e labote Sesel i prezante.  Liberte dan en landrwa kot nou kapab deklar li sakre pou nou nasyon e sa se liberte lo nou bann lans Mr Deputy.

Si nou pou agree ki wi, nou bann lans i ekstraordinerman spesyal par son labote e ki i pou normal ki dan nou liberte nou pou rezouir konfor sa labote, eski nou osi kapab oubyen parfwa disturb oubyen enterfer dan konfor lezot dimoun dan lantouraz nou lans?  Eski i normal pou sa touris ki pe pran son tan lo lans pou li osi bezwen vey voler oubyen en boul foutbol pangar enn i atak li e lot i tap?  Eski i normal pou sa koup touris ki’n fek fini marye taler e ki pe aprezan fete kot zot lotel dan restoran, vwar 2 boug sou antre par lo lans e crash zot respesyon an fezan divers kalite dezord par bann move konportman.  Eski i osi normal ki ler en kliyan pe dormi dan son chalet obor lanmer son sonmey i ganny deranze avek dimoun ki pe zwe avek son laport lasanm ki vir bor lo lans.

Non, i pa normal Mr Deputy.  I pa normal non pa akoz nou bezwen annan kontrol lo tou aktivite ki nou sitwayen i angaz li ladan, non pa ditou Mr Deputy.  Rezon akoz i pa normal se akoz malgre nou annan tou sord kalite lalwa an plas still napa en direksyon kler dan tou sa bann zafer ki konsern akse lo nou bann lans.  Dan en lot mo, i konmsi ki tou nou lalwa in ganny arase zot ledan e zot nepli kapab morde ozordi.  Lalwa Beach Control Act i fer provizyon pou ki en Beach Warden i ganny apwente pou sirvey aktivite lo lans.  En Beach Warden i sipoze la pou asire ki lalwa i ganny aplike an ka okenn lofans I ganny komet lo nou bann lans oubyen pou ankouraz lezot pou swiv lalwa Beach Control Act.

Eski pa in plis ki ler Mr Deputy ki nou mandat nou bann Life Guards pou vin bann Beach Wardens oubyen apwent osi nou bann Tourism Police konman bann Beach Wardens?  Tousala i bann pwen rekonmandasyon ki nou pou bezwen eksplore letan nou pe mazin met an plas en sistenm zesyon pou nou bann lans.

Mr Deputy, nou bann dimoun ankor pe demann serten kestyon kot i konsern akse lo nou lans e larepons i a mon avi kler, e tre senp.  Kote nou pou kapab al fer en piknik an fanmiy lo en lans Sesel?  En sistenm zesyon pou nou bann lans i kapab determinen kote.  Anse Royale?  Petet wi Mr Deputy.  Kote ki nou kapab al fer en parti birthday lo lans Sesel?  En sistenm zesyon pou nou bann lans ankor enn fwa i devret kapab determinen kote.  Anse Royale petet wi me avek serten kondisyon.  Kote ki en touris i kapab al pran en bon benn mer obor en lans Sesel?  Byensir ankor enn fwa Mr Deputy, en sistenm zesyon pou nou bann lans i devret kapab determinen kote.  Anse Royale petet wi me avek garanti ki tourism policing i efektiv lo nou bann lans.

Mr Deputy, mon krwar monn fer ase pwen me mon ti ava kontan termin avek detrwa pwen rekonmandasyon.  Nou pou bezwen servi byen lalwa ki egziste pou organiz nou bann lans pli byen posib Sesel.  E si nou bezwen parey mon’n dir pli boner, Lalwa ki pli morde nou pou bezwen pran letan pou etabli sa bann Lalwa e donn zot ledan pou zot kapab morde.  Nou pou bezwen demark bann designated areas pou serten aktivite lo nou lans, parey Lalwa i donn nou sa pouvwar pou fer li.  Bann aktivite tel ki water sports, beach sports, landrwa kot nou kapab fer bann gran, gran piknik popiler eksetera nou pou bezwen kapab determinen Mr Deputy.  Nou pou bezwen garanti ki nou annan bann fit and proper toilets aksesib avek nou bann lans.  Nou pou bezwen osi endike kote transpor i kapab park san ki i vin en danze pou lanvironnman oubyen imen limenm obor nou bann lans.  Nou pou bezwen ankouraz bann lotel pou fer bann aktivite popiler kot Seselwa i kapab zwenn ansanm avek touris si posib dan en lamosfer sosyal e san fer okenn dezord e move konportman.  Zis parey Reef Hotel ti ete en letan Mr Deputy.

Nou pou bezwen osi anmenmtan dezorme ranforsi lalwa e an aksyon deklare ki vreman tou nou bann lans i reste en landrwa pilik ki si serten sitwayen oubyen endividi i bezwen privacy oubyen proteksyon kot son lakour ki trouve obor lans ki anba en sistenm zesyon pou nou bann lans sa bann tel endividi i ava annan drwa pou etabli mezir ki sof gard zot propriyete oubyen zot lekor me san refiz akse lo lans par Seselwa oubyen lezot viziter.

Mr Deputy, i vre ki sa Mosyon pe adres Gouvernman spesifikman me malgre tou lalwa ki egziste e osi bann ki nou pou petet bezwen anmennen plitar dan sa Lasanble, nou nasyon, nou nasyon Seselwa, si nou nasyon Seselwa pa vin ansanm avek nou, nou pou vwar nou dan en lager perdi.  Se finalman lafason ki nou rezouir plezir ki konfor e labote Sesel i prezant nou ki pou determinen ki kalite nasyon nou ete, ki pou finalman determinen si vreman nou annan nou bann lans, bann lans ki sakre.

Mr Deputy, mon pou definitivman vot an faver sa Mosyon e mon osi parey mon bann lezot Koleg, mon espere ki personn pa zanmen refiz nou akse lo nou bann lans.  Mersi Mr Deputy.

 

MR DEPUTY SPEAKER

Bon, dernyen lo mon lalis, Onorab Volcere.

 

HON MARC VOLCERE

Mersi Mr Deputy Speaker.  Mr Deputy Speaker, mon osi mon ti ava kontan dir 2 mo lo sa Mosyon akoz i en size ki osi konsern Praslin.  Alor mon oule enform Onorab Marie ki mon pou san dout donn li mon sipor.

Mr Deputy Speaker, sa size akse avek lans in en size ki’n la pou enpe letan.  Pou plizyer lannen sa size akse avek lans in en size kontrovers.  Seselwa konman etranze in ganny problenm pou akse serten lans dan nou pei.  Me pourtan nou annan lalwa parey lezot koleg in dir ki donn gidans kler lo sa size.  Mr Deputy Speaker, sa problenm in konmans vin pli grav sirtou avek bann nouvo devlopman ki’n pran plas dan nou pei sirtou avek konstriksyon lotel.  Mon bann Koleg ki’n koz avan mwan, in koz klerman lo kwa ki nou devret fer lo en lans e ki nou pa devret fer.

Parey Onorab Payet in fer sorti dan son lentervansyon, bann viziter i pey en kantite larzan pou zot vin vizit nou zoli zil e byensir en laspe ki zot vreman enterese avek se nou bann lans.  Bokou nou bann viziter zot pa kapab sanpans nou lans avek son zoli zalantour, son disab blan, sa delo kler san oubliy sa verdir ki antour li.

Mr Deputy Speaker, si nou bann viziter i kontan al pas en letan lo lans nou bezwen rod tou mwayen posib pou fer sa arive.  La mon pe osi koz lo nou Seselwa, zot osi zot fer letan pou zouir sa labote ki limanite in donn nou.

Mr Deputy Speaker, pou bokou sa bann viziter ki retourn Sesel zot anvi petet revwar sa lans oubyen al repas enpe letan lo sa lans ki zot in deza vizite.  I annan ki ganny anvoye oubyen ganny advice avek zot zanmi pou al vizit en tel lans.  Ozordi avek sistenm teknolozi bann viziter i fasilman vwar kote ki nou bann zoli lans i trouve.  Bann magazin ki osi pibliy nou bann pli zoli lans ki egziste dan lemonn e la byensir non Sesel i ganny mansyonnen.  Alors sa bann viziter ler zot arive Sesel zot look forward pou al vwar pou zot menm tou sa ki zot in lir oubyen ki zot in tande.  Me dan enn, de ka sa pa vreman fasil, dan enn de ka zot vreman ganny difikilte.  A sa pwen Mr Deputy Speaker, mon ti ava kontan pran en legzanp lo Praslin ki bokou dimoun i koz lo la.

Anse Georgette i enn parmi bann pli zoli lans ki egziste dan Sesel.  I en lans ki’n toultan ase difisil pou ariv laba akoz son lokasyon.  Konman en dimoun ki’n grandi Anse Kerlan, mon konn byen sa landrwa.  Lontan pou ou kapab ariv lo sa lans ou ti bezwen pran bann pti santye, pas lo bann pon dibwa e travers bann lanmar ki bann dilmoun ti reste dan sa rezyon ti fer e tie d zot pou ariv kot zot.  Avek lapli, lanmar ti plen, ti annan bokou labou e souvannfwa ti annan risk ki ou tonbe.  Me kantmenm sa Mr Deputy Speaker, sa pa ti anpes touris osi byen ki Seselwa pou al vizit sa lans.  Akoz ler ou ti ariv laba ou ti bliy tou sa difikilte ki ou ti’n pas ladan.  Plitar, avek konstriksyon lotel keksoz ti vin enpe pli konplike pou ganny akse avek sa lans kot mon ti a krwar ki keksoz ti ava vin pli fasil me sa pa ti leka.  Ou ti souvanndfwa rankontre bann touris dan semen e la zot ti kestyonn ou lo kote zot kapab pase pou zot ariv Anse Georgette akoz zot ti ganny refize akse par lotel.  I annan ki pran risk e esey tras nenport ki santye ki zot vwar me souvanndfwa zot pa ariv dan zot destinasyon, zot bezwen retourn lo menm pa.  I annan menm ki perdi semen e i annan menm ki tonbe e ganny dimal.

Mr Deputy Speaker, ozordi mon santi ki in annan enpe amelyorasyon menm si i pankor ganny rezourd konpletman.  Dan en antretyen ki monn fer avek lotorite lotel, zot in fer resorti ki zot problenm prensipal se laspe sekirite.  Zot fer resorti ki kliyan i bezwen koup golf course pou ariv lo lans, la i annan sa risk ki kliyan I kapab ganny tape avek boul golf.  Zot demann mwan sa kestyon, lekel ki responsab, si zanmen en ka koumsa i arrive?  Ou kapab ki en gran group dimoun ler i pe koup golf course pou al lo lans e i annan en lot group dimoun ki pe zwe golf.  Me kantmenm sa, pou amelyor keksoz zot in entrodwir en sistenm kot bann lotel i telefonnen e donn non zot kliyan ki montre sa lentere pou vizit Anse Georgette.  E la zot non i ganny donnen kot baro kot lotel me pou rezon sa ki zot in dekrir ki zot in dekrir konman kontrol zot let selman 25 kliyan antre a la fwa.  An mezir enn ou de i sorti lezot i kapab antre.  Sa sif i pa enkli zot kliyan, ni Seselwa, dapre zot, napa kontrol lo Seselwa.

Mr Deputy Speaker, me menm sa mon santi ki plis i devret ganny fer pou asire ki napa okenn difikilte pou nenport ki ki anvi al lo en lans.  Par egzanp, ki arive avek bann touris ki pa konnen si zot devret telefonnen avan?  Bann ki pe mars, marse e vwar sa zoli lans e ti a kontan al pas en moman laba.  Alors mon propoze ki dan bann ka kot i annan bann tel difikilte, bann partner konsernen i zwenn ansanm pou rod fason pou remedye sityasyon o pli vit posib.

Mosyon pe koz lo lalwa pli sever ki mon siporte me mon osi krwar ki si i annan sa volonte lo lapar tou sa ki konsernen keksoz a kapab ganny rezourd pou benefis tou dimoun san ki lalwa i bezwen ganny aplike.  Mr Deputy Speaker, mon sizere dan ka Lemuria ki en lot semen akote golf course i ganny fer ki a donn en lot akse bann dimoun ki ti a kontan al lo sa lans.  E osi bann sinny i ganny mete pou endik dimoun lo danze e risk si zot zis koup dan milye golf course.

Mr Deputy, nou bezwen les nou bann viziter osi byen ki nou Seselwa zouir labote pou ki an retour sa touris i ava kontinnyen vin vizit nou e i ava ankouraz lezot bann zanmi pou zot osi vini.  I pa depan dan ki lotel sa bann dimoun i sorti, tou dimoun enkli tou touris i devret ganny akse avek nou lans.  Fodre pa ki nou bliye ki nou tou nou depan lo touris.  Avek sa de, trwa mo Mr Deputy Speaker, mon pou byensir aport mon sipor pou sa Mosyon.  Mersi.

 

MR DEPUTY SPEAKER

Bon si napa lot mon a …… Onorab David Pierre. Switch off mic.

 

HON DAVID PIERRE

Mersi Mr Deputy.  Mr Deputy, Mosyon ki devan nou i se ki sa Lasanble i demann Gouvernman pou met an plas lalwa pli sever kont bann biznes ki refiz akse lo lans avek Seselwa e lezot viziter.  Si i annan en keksoz ki kler about nou bann lans Sesel se ki Kod Sivil i fer kler ki lans i domenn piblik.  Si i domenn piblik therefore piblik i devret kapab ganny akse avek bann lans a nenport ki ler, ki moman ki zot anvi rezouir labote sa bann lans.  Lontan Mr Deputy, sa size akse ek lans pan zanmen en problem.  Rezon pou sa i kler.  Rezon i se ki ozordi konpare avek lontan, i annan en kantite devlopman ki arive tou otopur oubyen dan rezyon kot i annan bann lans, e byensir, bann zoli lans.  Letan sa bann devlopman i arive, sirtou bann devlopman touristik, i fer ki kontrol i konmans ganny mete avek lekel ki ganny akse avek lans e lekel ki pa ganny akse avek lans.  E sa i konmans vin en problem.  Ozordi Seselwa pe demande ki zot tou, tou Seselwa san leksepsyon i ganny akse avek tou nou bann lans a nenport ki moman.  E Gouvernman i bezwen get sa size konman en size ki enportan.

I kler ki lafason ki Seselwa oubyen bann dimoun i rezouir oubyen i zouir nou bann lans ozordi i diferan avek lontan.  Lontan parey serten Onorab in dir, dimoun ti desann ti fer en pti piknik avek en pti tape kekfwa 6 batri, ozordi nou vwar sitiasyon in sanze e letan sityasyon i sanze, nou vwar poudir i devret annan en revizyon lo lafason ki dimoun i rezouir lans.  Akse avek lans pa devret en problenm, akse avek lans i devret la pou tou dimoun, toultan.  Me lafason ki dimoun i rezouir nou lans i en size ki diferan.  Se la kot nou annan en problenm.  Alors, mon krwar i kler ki antan ki nou konnen ki Sesel i en pei ki son lekonomi i depan a en gran proporsyon lo lendistri tourism.  E touris i vin Sesel prensipalman akoz son labote natirel, touris i vin Sesel prensipalman pou vin zouir nou labote natirel.  Pou zot vin lo lans, pou zot vin enjoy sa zoli lanmer ble, pou zot vin enjoy sa lanmer kalm.

Now, avek sa, nou annan bann lotel alors ki’n ganny konstrir obor nou bann lans e propriyeter bann lotel i anvi ki bann touris ki pey zot larzan, ki vin dan sa bann lotel i kapab pas en bon sezour dan Sesel.  En bon sezour pa vedir ki Seselwa pa devret ganny akse ek lans, en bon sezour i kapab vedir ki nou restrikte kalite aktivite ki Seselwa e lezot touris i kapab fer lo lans.  Nou bezwen tonm dakor par egzanp, e mon krwar Seselwa i ava konpran, nou bezwen tonm dakor poudir par egzanp devan en lotel ou pa kapab vini aswar vin fer en night picnic drwat devan en lotel avek en gro tape oubyen avek bann gro, gro loud speakers ki pou fer tapaz e ki pou anpes bann touris dormi.  Mon krwar nenport ki Seselwa ki ou koz avek e ou met sa devan li i pou konpra poudir sa i pa rezonnab.  Akoz?  Akoz menm dan en lakour prive ozordi, menm si demen enn antre nou la i anvi fer en pti parti kot nou, pou en laniverser par egzanp, i annan serten restriksyon.  Nou pa kapab zis zwe lanmizik ziska 1er, 2er bomaten, fer tapaz e disturb the peace dan sa landrwa kot nou pe reste.

Therefore, mon krwar parey menm si nou annan sa laliberte, nou annan sa right pou nou fer en parti dan lakour, nou right i aret serten landrwa.  Nou right i aret kot right lezot i konmanse e i dir avek nou koumsa poudir dapre lalwa ou napa drwa fer tapaz apre 11er diswar e nou bezwen respekte sa.  So, sa i mwayen kontrol ki nou mete dan bann lakour prive pou garanti ki lezot vwazen i ganny lape dan bann moman ki devret napa tapaz.  Alors, kwa premyerman ki anpes nou revwar Beach Control Act e fer sir ki avek devlopman modern, avek nouvo teknolizi ki’n vreman avanse ozordi, nou revwar lalwa pou met li azour avek sa pou garanti ki nou kapab kontrole e kontinnyen kontrole ki kalite aktivite ki nou fer lo lans.  So, mwan mon pa vwar ki i en problenm ki nou pa kapab rezourd.  I en problenm ki a mon avi, i fasil pou rezourd.  Nimero 1, nou fer sir ki tou dimoun, tou biznesmenn oubyen tou dimoun prive ki pe konstrir obor lans i konpran tre klerman poudir lans i domenn piblik.  Dezyenmman, letan sa dimoun i fer son plan i met devan pou laprouvasyon enn bann kondisyon, enn bann kondisyon ki nou bezwen mete se ki piblik i bezwen ganny akse oubyen i bezwen annan en fason reasonable pou piblik ganny akse avek lans.

Lo lot kote, dapre Beach Control Act nou fer antre, nou fer serten lamannman pou garanti poudir bann nwizans ki ganny koze par bann dimoun ki servi lans ozordi i nepli vin en nwizans, i ganny kontrole dapre lalwa.  Mon krwar poudir si sa i ganny fer, mon krwar nou ava vwar en, parey nou dir sa an Kreol, nou ava vwar en lizour dan sa problenm.  Akoz nou pa kapab Mr Deputy, there is absolutely no way pou nou kapab anpes en Seselwa oubyen for that matter en lot etranze vin rezouir en lans ki en domenn piblik.  Si i en domenn piblik i bezwen reste konman en domenn piblik e nou bezwen kapab ganny akse avek pou nou kapapb enjoy li.

Mr Deputy, ozordi Sesel nou vwar poudir avek bann devlopman ki pe arive avek sa sitiasyon, nou vwar poudir ki lakantite landrwa kot Seselwa ti freely kapab ganny access avek in redwir konsiderableman.  E sa prezan ki i fer i met presyon lo bann lezot lans, i met presyon lo bann lezot landrwa e mon krwar sa i en size ki nou bezwen egalman kapab adrese.  So, tou bann entervenan ki’n koze avan mwan in fer sorti en keksoz kler.  Zot in fer sorti ki zot tonm dakor ki napa okenn rezon akoz Seselwa pa kapab rezouir son bann lans, son labote natirel.

Mr Deputy, mon konnen poudir ozordi Sesel ki se swa lo nivo bann lotel oubyen lo nivo bann landrwa, bann lakaz prive ki ganny trouve obor en lans, i toultan annan bann impediments ki ganny mete pou anpes nou al lo nou lans.  Mon pa pe dir ki tou landrwa i koumsa me sa ki mon pe dir i se ki i egziste bann landrwa ki zot pe met sa bann baryer pou anpes nou – Seselwa antre lo lans.  Mon krwar poudir en mesaz kler i devret ganny anvoye avek sa bann letablisman e sa bann propriyeter prive ki non, zot pa kapab fer sa.  Seselwa i bezwen ganny akse avek son lans, Seselwa i bezwen kapab al lo lans e rezouir son lans.

Now, lo lot kote i annan en lot size enportan ki’n leve e sa se size sekirite letan ki en dimoun pe zouir nou labote natirel, sa lans, sa zoli lanmer.  i vre Mr Deputy poudir ozordi i annan dimoun ki al lo lans e zot al fer en bann aksyon nwizans oubyen en bann aksyon ki anmenn discomfort pou bann dimoun ki pe servi lans.  Me parey monn dir oparavan sa i kapab ganny kontrole according to lalwa.  Napa nanryen ki anpes nou fer bann lamannman ki rezonnab, ki lozik, ki obzektiv an relasyon par egzanp avek Beach Control Act.  Mon krwar poudir tou bann akter, tou bann stake holders i devret zwenn ansanm e vwar kimannyer sa problenm i ava ganny rezourd dan en pli kourt dele letan, dan en fason pli efektiv posib.  Nou pa kapab Mr Deputy, pran en solisyon oubyen rod en solisyon san ki nou pran kont, oubyen san ki nou konsilte avek bann stake holders.  Nou bezwen konsilte avek sa bann dimoun, diskit la lozik, met keksoz devan e vwar ansanm kimannyer nou kapab fer li dan en fason efektiv.  E mwan parey mon’n dir mon 100 poursan siport tou Seselwa oubyen tou bann Manm Parlman ki la ozordi ki’n koze e ki dir poudir akse avek nou lans fodre zanmen i ganny restrikte, tou Seselwa i bezwen kapab al lo lans.

Alors mon ava fer en propozisyon senp e mon ava demande ki 1, akse ki Gouvernman i fer kler ki akse lo lans piblik i pa devret zanmen vin en problenm, napa person ki devret ganny anpese pou al lo lans.  E lo lot kote pou protez bann lenvestisman ki bann dimoun in fer, pou protez sa bann sekirite bann dimoun ki servi lans, pou protez nou lendistri tourizm, mon krwar ki i pou enportan ki i annan en revizyon lo Beach Control Act e i enportan ki nou met sa lalwa a zour avek realite lavi ozordi e fer sir ki sa problenm nwizans, sa problenm vol eksetera ki pe ravaz nou pei today an relasyon avek lans piblik, an relasyon avek the tourism industry i ganny deal avek dan en fason vitman e dan en fason efficient.

Alors Mr Deputy, avek sa 2 pti mo mon ava dir poudir wi, nou devret ganny akse me selman lafason ki lans i ganny servi ozordi i devret ganny revwar e lalwa apropriye i devret ganny amande pou fer sir ki tou keksoz i ganny mete anba kontrol.  Mersi Mr Deputy.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mr Deputy Speaker mersi, bon apremidi tou dimoun.  Mr Deputy Speaker, sa Mosyon ki devan nou en Mosyon enportan e en Mosyon enteresan.  Wi, mon pou siport sa Mosyon, mon krwar i byen pou nou anvoy en mesaz for devan.  Selman an pasan, i enportan ki nou e nou pep ki ekout nou i fer enpe refleksyon lo sa issue akse ek lans.  Monn ekout tou bann entervenan e nou koz lontan.  Wi, lontan ti napa bokou nou, popilasyon ti ti pti, ti napa preski ditou devlopman ki ti al ek lans e bann lans ti plizoumwen lib alor ou ti vwar en group sorti Cascade, nou ti napa lans nou, marse dizon pou al North East Point ouswa pou al Beau Vallon.  Nou marse kit nou fit osi, en group nou, en fanmiy, 2 fanmiy i zwenn ansanm e ou al lo lans, ou al piknik apre ou monte.  Me i annan 2 kalite lans ki mon pe gete la, i annan lans ki bord avek propriyete prive apre ou annan lans ki bord avek propriyete Gouvernman.  Lo son kote anndan sa, akoz lo kote deor i bord avek delo sale, mon ava vin li la en pti moman.  E depi toultan in koumsa, dimoun i annan free akse lo lans me selman letan i ariv kot propriyete entel i prive i bezwen demann permisyon pou li pase.  Si i pa fer sa i komet en lofans limenm, trespassing.  Ou pa kapab antre lo propriyete prive san permisyon en dimoun – sa dimoun.  E lontan nou bann dimoun mazorite letan si i konnen sa propriyete i pou en prive, en Msye isi, en Madanm laba i ale i demande.  Sirtou sa enn pli gran, i ale i demande, Madanm permet nou pou pas la pou al en pti kou lo lans sepa kwa.  Parfwa i annan detrwa kestyon ki ganny demande, konbyen zot i annan ensidswit, ki zot pe al fer whatever.  Letan sa bann keksoz i ganny satisfer sa dimoun i les ou pase akoz ou pa pou al fer dezord laba, ou pa ni pou al vole ni nanryen.

Lo kote bann lans ki baliz avek later Gouvernman sa most of the time i napa okenn kontrol, mon krwar Gouvernman i dir i ok e nek dimoun i antre sorti.  Prezan son lot problenm se ki lalwa i dir wi, tou dimoun i annan akse avek lans.  Tou dimoun dapre lalwa i annan akse avek lans from the sea.  Par delo sale nenport ki i anbark lo bato, in naze i vin lo lans ziska high water mark.  La devan lalwa napa personn ki devret anpes en piblik, en viziter vin lo lans si in fer akse atraver delo sale ki Gouvernman i les li.  I dir i kapab vini ziska high water mark.  I ok ziska konmela, me problenm ki nou pe koze nou i pa sa nou.  Problenm i al an deor sa li akoz ziska high water mark. Taler lanmer i plen ou bezwen ale akoz apre sa i vin prive.  E si oule vreman enjoy lans ou pou bezwen enjoy li lo sa bout ki plizoumwen apre high water mark e ki ou tonm lo propriyete prive.  Nou problem alor i la e prezan letan nou get, – avan nou al lo lalwa, e prezan nou get en lot keksoz ki arive.  Gouvernman i deside vann serten son propriyete ki bord avek lans a en serten developer ouswa serten endividi, swa i vann, swa i lwe Mr Deputy Speaker.  E aprezan fot ki Gouvernman i fer la, la en fot la, Gouvernman i pa rezerv sa right pou son pep al lo son lans.  E mon krwar lalwa egzistan i bezwen ganny revwar irzaman, mon dir irzaman pou ki serten keksoz i ganny met an perspektiv an tenir kont devlopman e zisteman sa bann gran lepa ki nou’n fer dan nou parkour devlopman dan Sesel.

Lot zour la sa zafer zil Daros, ok, en ler ou poz lekor kestyon, sa ki’n fer i byen, pa byen?  I annan dimoun i dir i byen, i annan dimoun i dir pa byen still I dir nou ti merit pran nou zil antye kantmenm les li si nou ti ava perdi enpe larzan me nou zil ti ava pou nou.  Akoz still la i depan, pankor konnen si 100 poursan nou pou ganny akse akoz zisteman sa 4 Minis pe diskit sa bann zafer enpe parey sa.  Kot serten bato i al lo serten zil prive e i dir sorry, ou pa kapab debarke.  Ou dir ou ariv ziska ou high water mark i ok ou, vin ziska high water mark me i annan i telman bay i kas lalwa i dir ni mouy ou bato la ou pa devret mouye e ki sa ankor i mal.  Me prezan, letan Gouvernman i fer sa kalite keksoz, la mon dir i bezwen rektifye sa lalwa o pli vit posib.  Me an plis ki sa, bann devlopman ki arive ki bord ek lans, pa pas kot nou Lasanble sa.  I al laba kot biro Planning laba, savedir i annan Minister Devlopman, Later ensi deswit MLUH laba Gouvernman, Egzekitiv laba, zot ki aprouv sa bann proze.  Sa bann proze most of the time en bann i vin kot distrik e la mon lans lapel avek tou dimoun ki la dan sa Lasanble la, tou sa bann Manm Elekte la ki letan sa bann plan i vin dan zot distrik pa bezwen aprouve otan ki sa akse pa kler pou nou pep al lo lans, ganny akse.  E la mon pe dir akse i dezwen ganny demarcate byen lo la kot pou pase, pa bezwen aprouve.  Pa per personn nanryen, en lapel mon lans avek nou tou isi e Lider Lopozisyon ou osi mon lans en lapel avek ou, ou ki Lider Lopozisyon ou bezwen fer sir letan i annan sa bann keksoz koumsa ou anvoy en lavwa pli for ki ou pe anvoye.  Akoz nou pep i bezwen sa.

Now, si Gouvernman an plis ki sa li i anvoy nou pronmnen i dir i ava still aprouve, nou nou bezwen revwar lafason pou nou kapab lit kont sa.  Savedir nou bezwen zwenn ansanm, la nou pe anvoy Mosyon, pa obliz Gouvernman ekout Mosyon.  Pa obliz li, si i pa obliz li e nou nou vwar poudir le pwen i zistifye, nou bezwen zwenn ansanm pou fer lezot demars akoz akse lo lans i enportan.   Now, sa nou pe koz alor lo devlopman ki en devloper in anmennen e Gouvernman li i aprouve e i aprouve akoz i annan plizyer lezot kalite rezon par deryer.  Mon pa pou koz lo la ozordi, semenn pase nou ti koz enpe lo la ekspre mon pa ti koze me la nou nou dir vwala bann keksoz, nou pe ouver lizye Gouvernman osi poudir si sa pa enkli dan sa devlopman pa aprouve osi sa devlopman.  Prezan, eksa i annan en lot keksoz ki Gouvernman i bezwen sanze dan lalwa, i annan en keksoz toultan monn dir sak fwa nou’n koz lo bann zafer lans dan sa Lasanble e la mon repet ankor, mon pa konnen si pou vin ankor dan Lasanble pou nou dir ankor.  I annan en keksoz ki apel pazeometrik.  Pazeometrik se egzakteman sa ki mon pe sey eksplike ki Gouvernman ki swa en lans i prive, i piblik, letan i annan en devlopman lo sa lans Gouvernman li i annan en bordaz an plis ki sa high water mark i annan en bout anndan savedir depi high water mark ki enkli son lans menm avek en bout sa later otan ki posib, i devret ganny rezerve sa avek son access pou piblik ariv la.  I devret ganny rezerve, si i transfere I vin lo Gouvernman i ok, so much the better, me i pa neseserman ki i transfere i vin lo Gouvernman me i bezwen ganny rezerve konman en bout ki napa devlopman ki arive.  Devlopman ki sa dimoun i fer la i ava anndan sa e sa I annan plizyer rezon akoz mon pe dir sa.  1, ki a permet sa akse lo lans e lo sa bordaz ki mon pe dir ki i devret permet dimoun enjoy e lot se ki souvanndfwa ki swa en lans i prive, ki swa i piblik, well, i dir tou lans i piblik sanmenm mon dir ziska high water mark apre sa i annan en lot bout lans ankor.  Mon apel li lans menm mwan, mon pa konnen zot kimannyer zot apel li, mwan mon apel li lans menm akoz i lans.  Teknikman wi, legalman nou konnen i vin high water mark me selman mon pe koz sa lot bout tou e nou pe dir la le problenm se ki konman i ariv en lerozyon, en problenm lo sa bout lans la, pa gete si i prive, si kwa.  Tou dimoun i tay kot Gouvernman pou rezourd, se sa rezon ki mon dir, si ou pou tay kot Gouvernman pou rezourd letan i annan en lerozyon, i annan en problem ki ariv la konmsi Gouvernman son ledo i pli gran be therefore, donn sa bout permisyon Gouvernman pou li zouir lo la pou li kapab donn akse avek son piblik.

Trwazyenm keksoz ki mon oule avanse dan sa Mosyon la, alor nou’n vwar lekel ki aprouv plan, lekel ki swiv sa bann plan letan in aprouve.  Letan en plan in aprouve.  Letan en plan in aprouve, en devlopman i konmanse, mon krwar i annan en serten lenstans Gouvernman, lazans ki swiv pou dir ki sa devlopman pe ganny fer korekteman.  I pa zis les sa dimoun fer apre in fini.  Alor, nou bezwen gete lekel ki swiv sa bann devlopman, eski i pe ganny swiv byen.  La osi i annan aksyon ki bezwen ganny pran e osi son lot pwen, letan alor lalwa i ganny kase lekel ki deal avek.  Oli lapolis, lapolis i bezwen la, i annan Minister Lanvironnman, Minister Land Use e lapolis zot bezwen pe aksyonn lo bann keksoz.  Sa nou problenm dan nou pei, problenm se ki en kantite keksoz i ganny fer e lalwa konmsi nou annan en ta la me i pa ganny aplike akoz i ganny kase par sa ki i anvi prezan bann lotorite i vini i deal avek si zot anvi e si zot pa anvi i les al koumsanmenm.

Lot zour anler laba Baie Lazare zot in met bann gro, gro ros pou anpes dimoun pase e nou pa’n tann okenn aksyon apart mon krwar ti annan en phone call in dir prezan mon krwar zot ti ekart enpe sa bann ros me apart sa nou pa tann nanryen.  E se sa ki sa Mosyon pe dir, nou pa kapab kontinnyen koumsa e mon dakor avek sa Lasanble, nou bezwen anvoy en lavwa for pou dir nou pa kapab kontinnyen les sa bann keksoz arive dan nou pei san ki nou dir nanryen e san ki aksyon i ganny pran.  E nou pe ensiste ki aksyon i bezwen ganny pran e mon dakor avek mover Mosyon e nou tou nou devret siport sa Mosyon la pou ki aksyon vreman i ganny pran pou ki i permet en akse korek, mon dir akse korek akoz osi la i annan bann pwen ki’n ganny touse ki ou pa kapab vini vin lo lans e fer sa ki ou anvi nenport fason.  I annan en serten kontrol, en serten lord osi ki bezwen ganny mete.  Se la kot sa bann dimoun – mwan pou mwan, voler i vin lo lans?  Napa problenm, i pa kestyon pe soutir voler la, i en piblik li ou pa kapab deny li son akse.  Problenm i vin sa ki ranforsi lalwa, konman i vole, la ou deal avek li e ou deal avek li apropriyeman ki i pa vol ankor.  Ou sezi?  Me ou pa kapab dir ou a deny lezot dimoun ki pa vole akse lo lans akoz voler i frekant sa lans.  Sa pa normal sa, ou vwar, se la ki mon pe dir bann lenstans ki Gouvernman i bezwen azir pli byen e deal avek sa bann case apropriyeman e la nou pe demande irzaman lalwa i bezwen ganny anmennen dan nou Lasanble e mon demande si Gouvernman pa anmenn sa bann lalwa nou Lasanble nou bezwen osi rod fason, swa rod konsiltan par la dan Bidze ki pe vini, nou bezwen lans en lapel avek Speaker, si Gouvernman pa kapab delivre nou nou bezwen rod fason pou delivre, nou nou ave rod dimoun pou fer vwar sa bann lalwa la, anmenn bann amannman neseser e nou nou ava prouv sa bann lamannman pou ki keksoz i mars pli byen dan nou pei.  Nou pei pou nou, i pa pou zis en bout group dimoun, nou pei i pou nou tou e nou bezwen fer keksoz ki korek pou nou pep e pou developer e pou dimoun ki pe enjoy akoz sansan nou zoli pei pa nou tou ki pou enjoy li pareyman.

Vwala mon krwar Mr Deputy Speaker, monn dir lesansyel kot i konsern sa bann zafer akse avek lans.  Pou le moman tou dimoun i annan akse par bato me pa tou dimoun ki annan bato osi.  E i annan alor ki bay e ki anpes ou menm mouy ou bato lo bor lans so tousala i bezwen ganny revwar e nou bezwen revwar sa lalwa parey mon’n dir en fason ki nou pei i ava fonksyonn pli byen e nou tou nou ava pli happy.  Mersi bokou, mon pou siport sa Mosyon e mon ava demann tou dimoun osi pou donn koudmen siport sa Mosyon strongly. Mersi bokou Mr Deputy.

 

MR DEPUTY SPEAKER

Bon, avan ler mon pas laparol avek dernyen entervenan mon oule zis enform Onorab De Commarmond ki Sekretaryat Lasanble nou annan en Konsiltan Legal e a okenn moman si i oule fer okenn Proze-de-Lwa pou anvoy devan nou Lasanble i kapab kontakte nou Konsiltan Legal.  Onorab Rose, dernyen entervenan.

 

HON MARIE-ANTOINETTE ROSE

Mersi Mr Deputy.  Mr Deputy, mon krwar en kantite keksoz in ganny dir an sa ki konsern sa Mosyon ki devan nou e le pwen in ganny fer ki i bezwen annan serten keksoz ki ganny fer pou rezourd sa problenm ki’n leve e ki la avek nou i annan enpe letan.  Mon annan zis en pwen pou mon fer an sa ki konsern sa Mosyon ki devan nou me mon pou pran en pti pe letan pou mon fer li Mr Deputy akoz mon anvi nou pep i rekonnet devlopman ki’n ganny fer dan sa pei dan sa preski dernyen 20an ki’n arive e ki i lakoz problenm ki nou annan devan nou.

Mr Deputy, nou bezwen rekonnet premyerman ki devlopman lozman dan nou pei in pran en nouvo dimansyon dan sa dernyen 30 a 20an ki’n arive dan nou pei e in annan en kantite lakaz prive ki’n ganny fer otour bann lans.  In annan e kantite flat ki’n ganny fer, plizyer mil flat ki’n ganny fer dan nou pei.  E sa i fer ki lafason ki Seselwa ti viv 30an pase efektivman avek lafason ki Seselwa i viv ozordi.  Nou’n sorti dan bann fanmiy ki ti extended families nou ti reste avek gran manman, pti zanfan, en kantite zanfan, manman avek papa pou vin bann pti household manman, papa, 2 zanfan e ki sorti dan bann lakaz ki en kantite ti lokater vreman pou vin dan bann lakaz ki dimoun i zot propriyete prive ozordi oubyen dan bann flatSo, in annan bann displacements si oule e sa in sanz enpe landscape and the family unit e osi lafason ki nou viv.  So, nou lifestyle in sanze dan sa direksyon.

Mr Deputy osi dan sa dernyen 30 a 20an dan nou pei nou lekonomi in sanze, in annan lemerzans sekter prive.  In annan en kantite devlopman an sa ki konsern sekter prive e Gouvernman in take a back seat dan biznes, i pa fer biznes anymore me se sekter prive e sa osi in anmenn en kantite devlopman lo toultour lakot nou bann zil e in give rise pou en kantite propriyete prive ki ganny trouve avek lans.  Me sa osi in fer Mr Deputy ki en kantite dimoun ki lontan ti dan lower class in bouz dan middle class.  Nou’n annan en logmantasyon dan middle class e ler e dimoun i dan middle class i pli kapab fer bokou plis keksoz avek son larzan ki parey Onorab Samson in dir lontan nou ti al piknik zis avek detrwa pti keksoz me ozordi piknik i diferan, i bann gro parti, bann zenn ki dan weekend i get together, zot fer isi, patati patata.  So, nou lifestyle dan sa direksyon in sanze.  Nou’n sorti dan lakaz lokater nou’n antre flat oubyen bann lakaz prive e nou osi en kantite nou nou’n sorti dan low income earners pou vin bann middle income earnersSo, sa vye sosyete ki nou ti viv ladan in sanze e nou pe viv dan en nouvo sosyete e ladan in annan diferan fason fer.

Mr Deputy, in osi annan okour bann lannen ki’n pase logmantasyon dan nou popilasyon e logmantasyon dan lakantite touris ki vin Sesel tou le an sa sif i ogmante.  E sa i met presyon en kantite lo bann lespas piblik ki nou bezwen partaze.  An efe, i annan mwens lespas piblik pou partaz avek plis dimoun, 1, akoz bann propriyete prive ki’n ganny vann sa i vedir in annan mwens lespas piblik e dezyenm popilasyon savedir nou day population, nou popilasyon a nenport ki zour dan nou pei i bokou plis ki 80, 000 akoz i annan en kantite viziter ki dan nou pei.

Savedir Mr Deputy nou bezwen konman en pep revwar the management of public space e sa i pwen ki mon oule fer.  Nou bezwen revwar bann parks, bann lans, bann diferan lespas piblik ki nou bezwen servi konman en nasyon e konman bann viziter ki nou akeir dan nou pei.  Problenm avek sa Mr Deputy se ki nou napa bann park parey deor kot dimoun i dir ou deor en dimoun i reste flat alor I al jog dan park oubyen I anmenn son lisyen marse.  Nou napa en gran kantite park e nou napa en park culture Sesel, nou napa en kiltit park.  Menm si nou annan en pti park nou napa en kiltir pou al ladan.  Kiltir ki nou annan Mr Deputy e ki nou annan an abondans, lespas piblik ki nou annan an abondans se nou lans e nou annan en kiltir ki vin avek.  So, nou bezwen vwar aprezan kimannyer nou partaz sa sel lespas piblik ki nou annan pou ki dimoun i zouir son drwa tou dimoun i zouir son drwa dan sa lespas piblik.  E se sa deba ki devan nou Mr Deputy.

Pwen ki mon anvi fer resorti se sa ki nou bezwen Sesel se lalwa, regilasyon e polisi kler lo the management of public spaces enkli lans.  Mr Deputy i annan plizyer lalwa ki vin an ze dan sa ki nou pe rode.  Bokou entervenan in koz lo bann lalwa ki an plas e si mon’n ekout mover Mosyon byen i pa pe rod zis lalwa me i pe rod regilasyon neseser pou met an plas tou sa ki nou bezwen.  Me premyerman nou’n koz lo Beach Control Act ki i en lalwa ki an plas e wi tou dimoun i ganny akse lo lans up to the high water mark.  Apre i annan Environment Protection Act, ki si oule deal avek tou bann lofans ki ganny komet anba proteksyon lanvironnman e sa i enkli bann dimoun ki al lo lans, ki zet salte, bann dimoun ki fer noise pollution lo lans e i annan lalwa ozordi ki anpes sa bann kalite behavior.  E osi i annan lord piblik ki adres bann issues, public nudity, disorderly conduct, public indecensy, theft tou sa bann dezordonnen ki ganny fer lo lans.  So, bann lalwa Sesel i kler lo la, lo diferan aktivite ki ganny fer lo lans, lalwa i kler, lo akse lo lans lalwa i kler me sa ki nou Mosyon pe demande se regilasyon tre kler lo ki ganny fer e lo ki lans e anba Beach Control Act mon krwar nou kapab entrodwir serten regilasyon e mon siport demann Lasanble entervenan Onorab Pillay in koz lo en beach development plan.  Nou bezwen annan parey nou pe koz lo bann master plan dan bann distrik nou bezwen annan en beach development plan.  Nou bezwen anba sa plan, nou bezwen annan en stratezi public education ki swiv avek sa beach development plan pou ki tou dimoun i konnen, be bon lans Anse Royale ou kapab ale fer ou ta tapaz ki ou anvi akoz i ou drwa ale al lo lans, fer en pti piknik e fer serten aktivite akoz lans Anse Royale ou pa pou pe disturb personn.  Nou pa kapab fer sa lo en la lot lans par egzanp.

So, i bezwen annan en plan devlopman tre kler pou sak lans Sesel e nou bezwen tonm dakor ki pa akoz nou annan en lespas ozordi kot en lotel i kapab ganny fer, ki nou bezwen fer li.  Konman en nasyon nou bezwen tonm dakor poudir be annou rezerv sa pou prosen zenerasyon pou zot deside ki zot pou fer avek.  Mon pa dakor avek nide ki fodre ki nou servi tou later ki nou annan.  I pa korek sa fodre nou anmas serten later e sa i ava tonm dan sa beach development plan ki nou pe propoze.  Sa ki nou anvi dan sa sityasyon se win, win ki tou dimoun ki en parti prenan a lans, ki annan lentere a lans swa en devloper, swa en manm piblik, swa en touris i santi ki son drwa i ganny proteze e ki i santi ki I konfortab pou antre lo nenport lans a okenn pwen.  E sa i rezon akoz mon pou siport bann propozisyon ki’n ganny met devan par mover Mosyon Onorab Marie.

Onorab Samson, in fer en pwen tre enportan, ki mon krwar mon anvi remet lanfaz lo la.  It is not about control, it is about management.  Nou pa bezwen annan kontrol la, mon krwar nou bezwen annan en plan zesyon tre kale, tre byen e ki manm piblik i santi zot osi responsab, mon pa anvi ki nou tonm dan en sityasyon kot manm piblik i dir be bon, mon annan mon drwa pou al lo lans alor mon kapab fer sa ki mon anvi.  E nou pa anvi en sityasyon kot en devloper i dir non, napa akse lo lans akoz sa i mon propriyete prive, mon annan en lease lo la alors mon tak baro.  I en tre move sitiasyon pou nou trouv nou ladan alors i bezwen annan en bon zesyon bann lespas piblik ki nou annan isi.

Dernyen pwen mon anvi fer Mr Deputy se enforcement.  Mon krwar sa ki manke enn fwa ki nou’n etabli ban regilasyon sa ki manke se enforcement, follow up, se swivi, se fer sir ki sa bann regilasyon pe reelman ganny met an pratik e mon propoze ki enn fwa ki sa bann regilasyon i ganny met an plas e ki tou dimoun i konnen ki ou kapab fer e dan ki lespas i annan prezan bann dimoun ki swiv.  Nou’n koz lo gard lans, nou’n koz lo bann beach patrol, beach wardens eksetera.  Nou’n koz lo tousala e ler nou regard bidze nou vwar pa mal lenvestisman ki pe ganny fer dan sa direksyon.  Me tou sa bann dimoun i annan en travay serye pou fer, enn pou fer sir ki nou lans i prop.  I annan bann dimoun ki netway lans, ki annan kontra netway lans.  Dezyenmman ki i annan sekirite lo lans e trwazyenmman why not fer sir ki akse lo lans i ganny mentenir a tou pri e sa pwen ki mon’n anvi fer se nou bezwen annan en beach development plan, mon siport propozisyon ki’n ganny met devan e nou bezwen annan en proper management strategy an sa ki konsern bann lespas piblik e ki nou pep i santi li konfortab.  Nou bezwen fer sa akoz letan in sanze Mr Deputy.  Nou’n sorti kot nou ti ete 30an pase e ozordi i diferan.  E tou bann gran, gran lavil dan lemonn, bann gran, gran kapital dan lemonn zot annan sa, zot annan management of public space e Sesel nou lepok in arive pou nou pran legzizans nou popilasyon, nou demann, nou lekonomi, bann nouvo laklas ki nou annan, kapasite nou pep pou zouir bokou plis bann income ki zot annan.  Lefe ki nou bann fanmiy an gran parti pe reste dan flat alors zot napa open space e nou bann zenn i bezwen lespas pou epanouir, pou anmize, pou zouir.  Nou ban fanmiy i bezwen lespas, devloper i bezwen lespas e nou tou nou pe rod en bout dan sa lespas alors sa ki nou bezwenn se en plan zesyon tre kale pou ki tou dimoun i konpran tre byen kimannyer sa i marse e sa i rezon Mr Deputy akoz mon pou siport sa Mosyon ki devan nou.  Mersi.

 

 

 

MR DEPUTY SPEAKER

Right of reply Onorab Meggy Marie.

 

HON MEGGY MARIE

Mersi Mr Deputy Speaker.  Mr Deupty Speaker, letan mon’n ekout lentervansyon e sizesyon lezot ban Koleg Onorab, mon santi ki sa Mosyon ki mon’n anmenn devan sa Lasanble pou demann Gouvernman pou met lalwa pli sever kont bann devloper e bann endividi ki refiz akse lo lans avek Seselwa e lezot viziter, i enn ki mon krwar ki nou tou nou vwar son nesesite pou adres sa size pli vit posib e fer li efektiv pou benefis lepep Seselwa e devloper.

Mon’n konstate ki i vreman enportan pou nou kapab eklersi bann keksoz ki pe kre sa lanmertin konsernan sa size e osi adres lezot size ki pou kapab retir sa fristrasyon ki akoz mank kominikasyon pe anpes sa konprenezon neseser antre nou.  I neseser ki nou fer bann rekonmandasyon kot nou tou nou konpran son prosesis.  Par egzanp, swiv lalwa ki ganny mete an plas pou protez toulede sa propriyeter ek devloper ki zot propriyete i baliz avek lans e lepep Seselwa ki servi lans.

Mr Deputy Speaker, sa bann rekonmandasyon ki mon’n fer e sa ki mon bann Koleg Onorab in site, sa i rezon akoz nou merit met lalwa pli sever ki kapab elimin sa kalite pratik par, en lanmann i bezwen ganny peye si okenn konpanyen, devloper ek endividi ki apes sitwayen Seselwa e viziter akse so lans.  Sa i ava dekouraz bann devloper malisye, dekouraz bann dimoun ki anvi al lo lans akoz zot anvi monopoliz sa bout lans.  Sa i en mekanizm prevansyon me pou dimoun osi konnen ki i annan en rekour si zot drwa i ganny abize.  Annan ban landrwa dezinyen ki Seselwa ek viziter i kapab fer bann picnic parties parey bann laniverser kot lanmizik i kapab ganny zwe.  Sa i ava fer ki tou dimoun i ava konn egzakteman kwa ki merit ganny fer lo ki lans e ki Seselwa i ava santi ki bann laspe kiltirel nou lavi pa pe ganny afekte par bann devlopman rapid ki pe antre dan nou pei.  Nou ava osi konmans devlop plis respe pou lezot dimoun ki servi lans.  Demark byen bann semen ki donn akse piblik lo lans e fer ki kot i annan posibilite sa akse i en semen kot transpor i kapab servi.  Sa i ava anpes ki bann propriyer prive pa ava annan krentif ki nenport ki endividi pe travers zot propriyete ouswa lotel pou al lo lans me osi ran tou dimoun konfortab ki omwen i annan en akse ofisyel e akseptab pou ariv lo lans.  Ranforsi lalwa ki pou kontrol konportman sitwayen ler zot pe servi lans.  Sa i ava donn tou dimoun en sans responsabilite e anpes e dekouraz bann aktivite kriminel ki ganny pran plas lo lans e ki dekouraz akse lo lans.  Fodre nou tou nou realize ki nou konportman dan en landrwa piblik i afekte lezot dimoun ki pe osi servi menm laspe piblik.

Ranforsi patrol lo lans pou anpes bann akt bandisite.  Parey sa survey ki biro statistik in fek pibliye, sekirite lo lans i en laspe enportan, non pa selman pou viziter me pou tou dimoun ki servi lans.  Annan plis patrol i ava ede annan plis lord lo lans me osi anpes bann akt bandisite.  Fer li tre kler avek okenn devloper ki lans i reste en landrwa piblik e sa i bezwen ganny mentenir a tou pri par okenn dimoun.  Bann devloper i devret konmans devlop en sans lapartenans dan nou pei Sesel e realize ki zot form parti en kominote avek son kiltir e prop fason viv.  Sa i enportan akoz nou bezwen devloper e devloper e devloper i bezwen nou.  Se en lapros respe mityel ki bezwen ganny devlope alors dek o konmansman zot proze bann devloper i merit ganny sa tre kler e si fodre annan en lagreman ki pou fer sa kler.

Sa seri rekonmandasyon a mon avi pe ede anmenn en bon konprenezon antre lepep Seselwa ki servi lans, propriyeter bann morso later ki baliz avek lans e bann viziter e devloper Seselwa e etranzer.  I bann rekonmandasyon ki pou ede mentenir nou kiltir, pou kit sa koneksyon familyal ki en piknik i anmennen, annan en landrwa pou bann ki pa kapab al dan en restoran pou en dialog e bann ki pa kapab al dan en restoran pou en dialog avek en zanmi i kapab annan en lot alternativ.  Fer provizyon pou bann ki kontan asiz lo en lans pou detann apre en bon lasemenn travay e osi rann propriyeter prive konfortab ki zot lape e sekirite i osi ganny pran an konsiderasyon.

Sa Mosyon i enn ki pou osi kre sa larmoni ant bann viziter avek lepep Seselwa.  Mersi Mr Deputy, mon ankor enn fwa demann Lasanble pou vot lo sa Mosyon.  Mersi.

 

 

 

MR DEPUTY SPEAKER

Bon, avek sa nou pran en vot.  Tou bann ki an faver sa Mosyon lev zot lanmen?  Inanim, Mosyon in pase.  Nou pran dezyenm e mon envit Onorab Barbe pou prezant son Mosyon.

 

HON NICOLE BARBE

Mersi Mr Deputy.  Mr Deputy, Mosyon devan nou pe demande ki sa Lasanble i eksprim sipor anver nouvo Plan Statezik 2012/2016 servis prizon Sesel ki favoriz en lapros drwa imen dan zesyon prizon e reabilitasyon bann kondannen.

Mr Deputy, tou sa ki fer son fot dan en sosyete i bezwen evantyelman pran responsabilite pou son aksyon.  Sa i enn bann prensip kler sosyete modern, egalman bann ki komet krim zot ganny loportinite pou repey zot det anver sosyete atraver bann lapenn santans ki ganny enpoze par Lakour.  I osi annan bann moman kot sosyete i bezwen ganny proteze kont bann endividi vyolan ou senpleman danzere la osi zot ganny separe avek larestan sosyete atraver bann lapenn prizon ki reflekte krim ki zot in komet.  Sa bann prensip i ganny siporte par sa Lasanble.  Konviksyon nou Lasanble pou bes to kriminalite dan nou pei in ganny demontre resaman atraver bann lalwa e Mosyon ki nou’n adopte.  Lasanble Nasyonal Sesel i a tou moman ofer son sipor dan konba kont kriminalite e pou ede ranforsi lord avek lape dan nou pei.  Se dan nou Konstitisyon ki tou nou bann drwa fondamantal in ganny enkarne.  Sa i bann drwa ki ou pa kapab ganny arase par bann akt de bandisite ou kriminalite e letan ki drwa en endividi i ganny vyole atraver bann aksyon kriminel, sosyete i bezwen balans sa ki’n arive an servan lazistis e lazistis Sesel i aplik penitans par enkarserasyon dan laform en santans prizon.  I bon osi note, ki zis parey nou bann drwa endividyel i enkarnye dan Konstitisyon Sesel, pouvwar sistenm lazistis kriminel i fer ki pinisyon atraver santans i kapab aras en kondannen son liberte mouvman ki osi dekoul dan sa menm Konstitisyon ki garanti nou liberte mouvman.  E i devwar sa Lasanble e tou son bann Manm pou defann e onor Konstitisyon Sesel.

Mr Deputy, Mosyon ki mon pe prezante ozordi, i annan en sour lenspirasyon senp e i anrasinen dan en zistwar tre imen.  Se atraver mon travay labitid ki mon ti ganny sans pou rankontre en manman soufran.  Sa madanm ti rakont mwan ki son garson 19an in ganny kondannen pou 12an prizon pou en ka vol e 7an prizon pou en lot ka vol separe.  Sa madanm ti eksplik mwan ki son garson pa pou sorti prizon avan laz 38an e ki i ti annan ankor 2 sarz lo li ki pa ti ankor zize.  I ti eksplik mwan ki son garson i annan li en zanfan 2an ki pa konn son papa e bann difikilte ki sa sitiasyon ti pe kree dan son fanmiy.  Me vre konsern e lafreyer sa manman se ki letan son garson ti pou kit prizon a laz 38an i ti pou al re-komet en lot krim e retourn direkteman prizon ankor.  E se aparti sa ki i ti demande si napa nanryen ki kapab ganny fer pou ed sa bann zenn dimoun ki ganny enkarsere dan prizon.

Sa madanm ti ensiste ki son garson pa ti pe aprann nanryen ki bon laba dan prizon, i ti eksplike ki son garson pa ti zanmen tro malen e ki i ti’n ganny antrennen dan sa lavi par move lenfliyans.  Me i ti ensiste ki la ozordi i trouve ki son garson i antoure par zis move lenfliyans dan prizon e ki i pou sorti pli pir ki i ti antre.

Mr Deputy, sa madanm ti renkonnet ki son zanfan in mal fer e ki i ti merit sa pinisyon ki ti’n ganny enpoze lo li.  Me sa ki li i ti pe sey serse sete en fason pou fer sa satans prizon vin en keksoz pozitiv ki ti ava kapab ed son garson e non pa detrir li plis e son lespwar sete ki en zour letan ki son garson i sorti prizon i ti ava reisir pou kontribye pozitivman anver devlopman sosyete e non pa azir konman en parazit ki plito detrir sosyete.  Alor, mon dedye sa Mosyon pou sa manman e pou tou bann lezot paran Seselwa ki ozordi pe pas atraver menm soufrans.  Mon osi lans en lapel pou ganny sipor tou bann Seselwa ki’n deza vin viktim sa vag kriminalite ki pe balye atraver nou pei.  Ansanm annou travay pou anpese ki nou prizon i vin en liniversite kot bann kriminel pli eksperimante i travay pou fer bann zenn kondannen vin bann kriminel kalifye e andirsi.

Mr Deputy, labaz fondamantal sa Mosyon ki monnn anmennen ozordi se nou bann zenn, lazenes Seselwa dan son moman pli feb kot in bite, tap son lipye e tonbe lo semen lavi.  Ozordi, i annan bann defi ase remarkab ki nou zenes Seselwa pe fer fas avek.  Lo en kote, nou annan drog avek maladi kontazyez, lekonomi lemonn ki kontinnyen degrengole e to kriminalite ki pe ogmante dan nou pei.  Laverite, se ki letan nou bann zenn i perdi direksyon, nou devret kapab re-oriant zot e remet zot lo bon semen lavi.  Me tro souvan, sosyete i tant pou vir ledo lo bann kid an prizon e dir ki sa bann dimoun in fini pou zot e napa nanryen ki kapab ganny fer e ki in deza fini tro tar.

Mr Deputy, me fodre ki nou realize ki i pa zanmen tro tar.  Sa bann zenn in tonbe, zot in komet zot fot e atraver en santans prizon zot pe repey zot bann det anver sosyete.  Me en santans prizon pa devret en letan gaspiye, me plito sa i devret ganny servi konman en dezyenm sans dan lavi en dimoun.  En sans pou li refer son lavi, refer son lavi dan en fason ki ava benefisye son fanmiy e sosyete an zeneral.  E se zisteman la ki sa konsept reabilitasyon i fer son larantre.

Konman en sosyete, nou bezwen annan balans dan tou sa ki nou fer.  Middle ground parey ki nou dir an Angle i le sel fason avanse lo bann dosye sansib ki kapab kre divizyon dan sosyete.  En dosye prizon i enn bann dosye pli sansib ki annan dan nou pei an se moman.  Konman en sosyete i enportan ki nou fer laprev lasazes e konpasyon, me i egalman enportan ki nou konpasyon pa ganny abize.  Se pou sa rezon ki letan nou apros sa size prizon, fodre ki pinisyon i ganny tanpere avek konpasyon e le sel fason etabli ki sa i kapab ganny eksprimen pratikman se atraver en bon sistenm reabilitasyon byen reserse, byen kalkile, byen zere dan son lenplimantasyon.  E se selman la a se moman ki nou kapab avek en konsyans kler, dir ki nou annan en sistenm prizon byen balanse.

Mr Deputy, mon pan kapab anmenn en tel Mosyon devan sa Lasanble san en serten poursantaz lenvestisman personnel.  Mon’n angaze dan mon bann resers depi lo konmansman ziska la o moman prezantasyon Mosyon.  Mon’n diskit avek bann lotorite konsernen, mon’n ekout diferan pwennvi bann zabitan mon distrik, mon’n partisip dan diferan rankont organize par bann ki santi zot konsernen.  Tel ki, parents with hope, e mon’n menm al vizit prizon pa akonpanyen pa en delegasyon me plito mwan konman en endividi.  E tou sa parkour ki monn fer in servi pou konvenk mwan 2 keksoz.  Premyerman, keksoz pa pou kapab kontinnyen parey ki i pe ale.  Nou pou bezwen vwar en transformasyon pozitiv dan lafason ki enkarserasyon bann prizonyen i ganny zere.  Dezyenmman, mon konvenki ki avek resours ki limite a nou dispozisyon sa plan stratezik lotorite prizon i le meyer fason pou atenn rezilta pozitiv dan limedya.  Dan tou bann antretyen ki mon’n annan avek lotorite konsernen, mon’n santi ki i annan en bon lentansyon de zot par.  Management prizon i anvi vwar sa lenstitisyon marse e delivre lo tou son bann potansyel.

Mr Deputy, letan ki en dimoun i ganny kondannen e anvoye prizon, se sa son pinisyon.  Prizon limenm i pa en zouti pinisyon e i pa devret ganny servi dan sa fason.  Fonksyon en prizon se konman en fasilite reabilitasyon, en lenstitisyon kot lasosyete i anvoy bann ki’n komet krim pou pey zot det anver sosyete e refer zot lavi pou zot nobou re-entegre dan sosyete.

Mr Deputy, statistik i montre ki an lannen 2006 popilasyon prizon ti 174 endividi, 172 an lannen 2007, 297 an lannen 2008, 317 an lannen 2009, 415 an lannen 2010, 457 an lannen 2011 e le 24 Septanm sa lannen popilasyon prizon ti’n ariv 629 endividi.  Dan sa 629 endividi 476 i dan prizon Montagne Posee, 57 i dan unit spesyal Montagne Posee, 73 i ganny trouve dan prizon spesyal lo Coetivy, 4 i kot Coast Guard police station e 19 i dan prizon spesyal lo zil Marie Louise. Parmi sa 629 dimoun, 157 ki reprezant 25 poursan i lo rimann e larestan 472 ki reprezant 75 poursan i bann ki’n fini ganny kondannen.

Mr Deputy, sa bann sif i montre ki popilasyon prizon pe ogmante drastikman.  En tel sitiasyon i kontribye anver si popilasyon prizon e osi anmenn en kou adisyonnel lo loperasyon prizon.  Sir popilasyon dan prizon i fer ki zesyon prizon i vin preski enposib e sa dan limenm i kontribye pou ogmant to kriminalite ankor plis.  En prizon ki sir peple, kot bann kriminel andirsi e repeated offenders pe melanz avek bann ki fer lans zot karyer e kot bann kriminel vyolan pe frot zepol avek bann ki non vyolan i azir konman en Liniversite pou form bann kriminel profesyonnel.  Prizon i vin en kondwit pou lesanz konesans, leksperyans e osi azir konman en striktir sipor pou bann akt kriminel ki deroul an deor prizon.  Dan bann pei kot krim organize in vreman anrasinen – letid in montre ki en kantite sa bann lorganizasyon kriminel i trouv zot nesans dan bann lenstitisyon penitansyer kot popilasyon i sir peple.

Mr Deputy, en prizon se en lenstitisyon leta, zis parey lekol ouswa lopital ki depan lo Bidze anyel pou son fonksyon.  Nou devret ekspekte ki nou ganny maximum an retour pou sa lenvestisman ki pe ganny fer dan sa lenstitisyon.  E se zisteman sa ki sa nouvo Plan Stratezik pe adrese.  Mon’n pas letan pou lir sa dokiman e se mon santiman personnel ki sa plan i enn ki fran e onnet.  En gran zefor in ganny fer pou met o kler bann difikilte ki lotorite prizon pe rankontre pou delivre en bon travay.  Me pli enportan ankor lotorite prizon atraver sa plan pe rekonnet ki prizon i pa en destinasyon final pou en dimoun.  En santans dan prizon se zis en letap ki sipoze permet en endividi pou re-sezi son lavi e refer son lekor.  Set an sipor pou sa lide ki sak imen i devret ganny loportinite pou esey refer son lavi ki mon pe ofer sipor pou sa plan.  Met a kote tou problem avek defi ki nou pei pe fer fas avek, met a kote mankman dan resours.  Si nou pei pou fer tan annan en prizon nou bezwen annan en bon plan e en vizyon pou al avek e se mon lopinyon ki sa plan stratezik ki lotorite prizon in prezante i sa plan, i sa vizyon ki nou bezwen pou fer en bon prizon.

Mr Deputy, sa plan ki’n lanse le 5 Zilyet 2012 par Lotorite Prizon e ki fer size Mosyon devan Lasanble ozordi, i kapab ganny rezimen dan 7 lobzekstiv stratezik ki trouve dan sa plan limenm.  Premyerman, i fer provizyon adekwa e apropriye pou garanti swen e sekirite bann kondannen.  Lotorite prizon i note ki pinisyon en kondannen se son santans limenm me ki prizon pa la pou aplik okenn form pinisyon.  Sa premye lobzektiv stratezik i ofer provizyon pou amelyor kondisyon bann lenfrastriktir prison, pou elev standar fasilite e swen lasante.  Pou annan fasilite separe par bann juveniles, bann ki lo rimann e bann kondannen.  Pou bann fasilite rekreasyonnel, pou siport prizonyen avek dezabilite ouswa ki pe eksperyans problem mantal.

Dezyenm lobzekstiv sa plan se pou asire ki bann prizonyen i ganny prepare pou zot retourn dan lasosyete e se la kot reabilitasyon e re-entegrasyon dan lakominote pou ganny enplimante.  Mon note, ki avek bokou fransiz, Lotorite prizon in fer kler ki an se moman kot napa en sistenm reabilitasyon an plas pou bann kondannen ki lo drog.  Egalman, prizon pa okipe pou reabilitasyon bann kondannen ki’n komet lofans seksyel.  Lotorite prizon in osi rekonnet ki zot napa okenn kapasite pou okip bann prizonyen ki pe soufer avek maladi mantal.  Sa plan pe menm fer provizyon pou en swivi apre ki bann kondannen in ganny large.

Anlinny avek sa plan stratezik, lotorite prizon pe focus lo 4 gran pwen prensipal dan zot travay reabilitasyon.  Sa i enkli, vocational skills training, educational improvement work, offending behavior programme work, spiritual support and guidanceVocational skills training Mr Deputy tou bann travay vokasyonnel pou bezwen ganny elarzi si i pou annan en lenpakt lo popilasyon prizon aktyel.  An se moman, i annan en pti minorite prizonyen ki pe angaz zot dan bann travay vokasyonnel tel ki mason, penn, koud, sarpantye, elektronik, fer lakwizin netwayaz e plante otour prizon.

Sepandan, fodre note ki i annan bann bon travay ki pe ganny fer dan bann tel aktivite lo Coetivy.  Lotorite prizon i annan plan pou agrandi son aktivite lagrikiltir la ki in ganny en morso later obor prizon.  En lakwizin pou bann prizonyen madanm pe ouver pou ki zot ava kapab fer home economics.  Prizon pe al osi met an mars en laundry pou bann prizonyen servi.

An se moman, i annan en eksper UNODC ki pe asiste lotorite prizon pou donn bann training neseser dan domenn biznes ek skills vokasyonnel pou ki bann prizonyen i kapab ganny en klarifikasyon ki ganny rekonnet e fasilit zot sans ganny en lanplwa letan zot fini zot santans.  La mon swe Mr Deputy Speaker, se ki en dimoun lokal i ganny idantifye pou kontinny sa travay apre depar sa eksper etranze.  Lotorite prizon pe osi anvizaze ogmante lakantite low risk prisoners ki pe travay dan kominote pou ki zot ava kapab aprann bann nouvo skills travay osi pey zot det lasosyete par fer bann louvraz dan bann lanvironnman e dan lentere piblik parey penn e dekorasyon bann batiman piblik.

Educational improvement work, Mr Deputy, an se moman napa okenn teachers ou bann laklas formel dan prizon.  Sa i en domenn ki lotorite prizon ek son bann partener pou adrese.  Dan prizon ozordi, i annan prizonyen ase entelizan ki pou kapab benefisye avek en ledikasyon formel ki ava ed zot ganny en kalifikasyon e reganny rekonnent letan zot fini zot santans.

Offending behavior programme work, Mr Deputy, sa i en eleman esansyel dan progranm reabilitasyon dan en prizon.  I enportan ki nou donn prizonyen bann skills neseser tel ki mekanik ler i dan prizon pou kapab annan e ganny pen ler i sorti.  Me i egalman enportan ki nou adres bann keksoz ki ti motiv li pou fer sa lofans.  Par egzanp, si en dimoun in kondannen pou en ka rape, i kapab sorti prizon konman en bon mekannisyen me si nou pa’n adres bann core motivators ki’n anmenn li pou rape, nou pou vwar ki menm si in vin en bon mekannisyen i annan en gran posibilite ki i pou reste toultan en rapist.

Spiritual support and guidance, Mr Deputy, sa i en size ki parfwa pa ganny donn latansyon dan bann progranm reabilitasyon.  Annan lafwa e bann bon prensip i ed en dimoun pou annan bann bon moral.  An se moman, i annan bann volonter sorti dan bann diferan denominasyon ki’n vin donn sipor e gidans spirityel bann prizonyen.  La mon swe se ki nou annan en lasal multi-faith e en dimoun an plen tan pou kordin sa lapse tre enportan dan en progranm reabilitasyon.

En sant reabilitastyon, Mr Deputy, pandan mon vizit mon ti fer sa remark ki prizon aktyel pa’n ganny konstri avek sa lespri reabilitasyon an tet.  Sepandan, mon ti a kontan note ki lotorite prizon in idantifye en morso later kot prizon pou konstrir en sant reabilitasyon ki pou kontyen bann workshops, counseling rooms e class rooms pou ede fasilit bann aktivite reabilitasyon.

Trwazyenm lobzektiv i adres laspe sekirite bann travayer prizon e piblik an zeneral.

Katriyenm lobzektiv i target bann resours imen servis prizon, bezwen pou rekrite e retenir travayer dan bann kapasite kle.  Refer striktiv lorganizasyon prizon pou permet devlopman loportnite karyer pou bann travayer prizon.

Senkyenm lobzektiv i koz lo bann bezwen lenfrastriktir.  Sa lobzektiv i koz lo amelyorasyon library, lasal computer, bezwen pou bann diferan workshops pou permet bann prizonyen pou aprann en metye.  I koz lo en mank dan lenfrastriktir sekirite me osi lenfrastriktir pou detann e lwazir bann kondannen.  Enn bann bezwen kle idantifye dan sa senkyenm lobzektiv, se nesesite pou annan en perimeter fence ki adekwa.

Lobzektiv nimero 6, i adres lefe ki sikse lenplimantasyon sa plan pou depan lo sipor bann partener kle lotorite prizon.  Servis prizon i bezwen angaz li dan en fason pli efektiv avek son bann partener kle.  A sa pwen, mon ti a kontan enform sa Lasanble ki le 14 Out sa lannen lotorite prizon ansanm avek son bann partener lokal e enternasyonnal ti organiz en partnership workshop pou zisteman diskit lo bann sekter ki relye avek zesyon e reabilitasyon prizon.

Anlinny avek sa stratezi lotorite prizon ek son bann partener i anvizaze reviz e moderniz Prisons Act.

Setyenm e dernyen lobzektiv i koz lo soutenabilite finansyel servis prizon dan Sesel e bann mezir ki bezwen ganny pran pou amelyor sitiasyon finansyel.  Mr Deputy, mon sipor pou sa plan i vin premyerman akoz sa plan i table bann propozisyon pratik e realis ki kapab ganny enplimante dan en dele rezonnab.  I demann sipor resours, e langazman tou sa ki konsernen.  Sa plan i osi siport Gouvernman pou redwir krim dan son progranm renesans sosyal.  Enn bann konponan pli enportan la demonkrasi se latransparans.  Ozordi nou vwar lotorite prizon pe pous pou plis transparans e bon gouvernans e mon demande ki nou Lasanble i siport zot dan sa demars.

Mr Deputy, Sesel ozordi i en akter respekte lo lasenn enternasyonal.  In ganny anonse resaman dan nouvel ki Sesel in vin premye pei dan larezyon pou vin en manm an plen tan sa lafors militer ki pe konbat kont lapiratri.  Sa i vedir ki zefor pe ganny rekonnet lo lasenn enternasyonnal e pti a pti nou pei pe ganny konsidere konman en partener egal par bann kolaborater enternasyonnal.  Letan ki en pei i fer sitan progre dan en kourt moman letan parey ki Sesel in fer, sa i fer ki nou pei I ganny bokou latansyon.  Me i osi oule dir ki i annan serten kondisyon ki ganny atase avek ou sikse.  Ozordi, dan lemonn bon gouvernans e bon zesyon resours piblik i vin en kondisyon absoli pou tou partisipasyon miltilateral e byensir letan ki mon pe dir partisipasyon sa i osi enkli benefis ki dekoul atraver sa bann aktivite.

Drwa imen i enn bann konsern primer lakominote enternasyonnal e sa I fer ki drwa imen i premye kondisyon ki ganny atase avek tou tranzaksyon.  Aplikasyon bann standar e norm drwa imen pou bann prizon Sesel i en keksoz ki pou servi pou ouver en kantite laport loportinite pou nou pei.  Me pli enportan ki sa, sa ki pli feb avek konpasyon e lasarite i en konsept ki tre kretyen.  Respe pou drwa bann prizonyen i en keksoz ki bon pou nou menm konman en pep.  En prizonyen in deza ganny arase lamazorite son bann drwa endividyel par sa santans ki sistenm lazistris in enpoz lo li.  E sad an limenm i devret ase pou servi koman pinisyon.  En nasyon ki posed en vre grander, i devret kapab posed ase lasazes pou respe e onor sa pti git drwa ki reste sa bann kondannen.

Mr Deputy, drwa imen se en keksoz ki iniversel, i aplik pou nou tou.  En Sesel koman e pei responsab i bezwen aplik bann norm drwa imen akseptab pou tou son sitwayen.  En Seselwa ki en prizonyen ou non, I reste en Seselwa e sa set en keksoz ki bezwen ganny respe par leta Sesel.

Mon satisfe ki bann provizyon pou respe drwa imen ki pe ganny fer dan sa plan i adekwa e mon ava osi avanse ki laplikasyon bann bon pratik pou respe drwa imen i ava kontribye anver en latmosfer plen sen e an sekirite dan prizon Sesel.

Mr Deputy, an konklizyon, mon ti ava kontan refer sorti ki reabilitasyon i en kondisyon imen natirel.  Koman en imen nou tou nou fer fot, nou tou nou tonbe a en moman ou en lot me kapasite pou ganny pardonnen i vin avek nou abilite pou refer ou lekor e organiz ou lavi pou le meyer.  Reabilitasyon i pa en kestyon soutir prizonyen, me i plito en legzersis dan bon zwazinaz.  Sa ki sa Mosyon I anvi vwar, se en sitiasyon kot en dimoun i sorti prizon konman en pli bon dimoun.  Kot i vin en bon papa ouswa manman, en bon msye ouswa madanm, en bon zanfan ki pe okip son vye paran, en bon vwazen, en bon imen.

Mr Deputy, i fer lontan ki nou Prezidan pe lans en lapel pou plis enovasyon, pou en knowledged based society, pou en nouvo fason panse ki revolisyonner.  En laplikasyon konesans a la resers solisyon.  Mon senserman kapab dir, ki mon trouv sa ki nou Prezidan pe reserse dan sa lesey lotorite prizon pou transform servis prizon aktyel pou le meyer.

Avek sa Mr Deputy, mon demann bann Koleg Manm pou siport Mosyon ki devan nou Lasanble.  Mersi Mr Deputy.

 

MR DEPUTY SPEAKER

Bon, okenn Manm ki segonn sa Mosyon.

 

HON EMMANUEL FIDERIA

Mr Deputy mon segonn sa Mosyon e mon oule dir 2 pti mo.

 

MR DEPUTY SPEAKER

Bon, Mosyon in ganny segonde par Onorab Fideria e Onorab Fideria ou ava dir ou de pti mon apre break.  Nou ava pran en break la nou ava retournen 4.05, letan nou retournen nou ava pran lalis koze tou e met an tet ki nou pou bezwen fini sa Mosyon avan nou ale.

 

(Break)

 

MR DEPUTY SPEAKER

Bon, nou kontinnyen nou deba lo sa dezyenm Mosyon prezante par Onorab Barbe e mon envit Onorab Fideria pou fer son prezantasyon.

 

HON EMMANUEL FIDERIA

Mr Deputy mersi, bonn apre midi tou nou bann Koleg.  Mr Deputy, mon pe segonn sa Mosyon akoz i en Mosyon tre enportan kot nou pe vwar Minister konsernen ki ansarz prizon zot annan en plan stratezik pou lannen 2012 a 2016.

Mr Deputy, pou fer rapel, nou dan sa Lasanble depi 1an, pandan sa 1an ki’n koule bokou nou bann Mosyon ki nou’n konbat to la i tre pertinan e i annan en koneksyon direk avek byennet ou konfor sak nou sitwayen e sa fason fer e nou devret reste touzour enn parmi nou rezon det.

Mr Deputy, Sesel i en pei ki annan en bon striktir zesyon nou nasyon.  Me parfwa, serten nou bann lenstitisyon pa pe perform a la oter kot nou sitwayen i ekspekte.  Alors konman Manm Lasanble mon pran li konman enn mon responsabilite, mon devwar e osi en lobligasyon pou atir latansyon lotorite lo bann size relevan e dan sa fason fer en kontribisyon modes e avek tou limilite esey kontribye pou ki keksoz i avanse pou le meyer.

Mr Deputy, Lartik Tyart Nasyon Ini i koz lo drwa imen kot i koz lo respe fondamantal an term, ras, sex, langaz, relizyon, kiltir, politik eksetera.  Sa ti ganny adopte par Lasanble Zeneral Nasyon Ini an 1948, Sesel i en manm Nasyon Ini.

Mr Deputy, lofis Commissioner Nasyon Ini pou drwa imen i annan manda pou promot e protez drwa imen dan en fason efektiv e sa bann drwa fondamantal ki’n ganny ekrir dan sa charter, drwa dimoun en dizenn, drwa dimoun an detansyon, drwa pou dimoun pou eksprim zot lopinyon libreman, drwa pou pa ganny tortire, drwa kiltirel e drwa politik.  I osi annan son konteni drwa en sitwayen sa ki nou apel pou ganny en fair trial.

Dan en sosyete normal Mr Deputy, Parlman i enn parmi bann lenstitisyon ki annan sa responsabilite pou asire ki tou drwa nou bann sitwayen i ganny respekte, se sa ki nou Lasanble pe fer.  Pe debat e anmenmtan anmenn serten propozisyon valab ki ava ede amelyor sityasyon kot i annan nesesite.

Mr Deputy, depi laras imen i egziste, toultan i annan en group dimoun dan sak sosyete ki challenge bann lalwa ki gouvern sa nasyon e nou bezwen annan en lenstitisyon ki deal avek bann sitwayen ki kas lalwa.  Sepandan, i lobligasyon sa lenstitisyon pou asire ki bann sitwayen ki laba i ganny byen trete e ki bann sitwayen a zot tour i bezwen annan respe pou bann lareg ki egziste dan lenstitisyon.  Mr Deputy, drwa I mars kot a kot avek responsabilite, mon bann frer, ser Onorab, sa se la realite e sa se laverite.

Mr Deputy dan prison Sesel ozordi nou annan plis ki 600 bann dimoun ki pe servi en santans.  Sa Mr Deputy, i reprezant en sif ase alarman dan zesyon tou sa bann prizonyen.  Dapre mon resers ki mon’n fer, lamazorite sa bann prizonyen ki laba i zenn depi 18an a 35an.  Sa i reprezant bann dimoun ki dan zot laz tre prodiktif e la mazorite zot in ganny kondannen lo baz, drog vole ouswa bann krim ki relye avek drog.

Mr Deputy, nou konnen ki ozordi lafason ki prizon i ete i bezwen amelyore.  Kot prizonyen pe angaz zot dan bann aktivite ki zot pa devret pandan letan ki zot pe servi zot santans.  Wi Mr Deputy, prizon parey lezot lenstitisyon i annan son bann defi ki mon kontan pou aprann ki dan zot plan stratezik ki zot in devlope, bann stratezi pou adres sa bann defi.  Atraver lentrodiksyon bann diferan kalite progranm tel ki training vokasyonnel pou bann kondannen, posibilite reel ava egziste pou zot aprann e devlop plizyer skill pandan zot letan zot pe fer zot santans.  Mon’n osi aprann dan sa plan stratezik, sa sinerzi i ganny defini atraver kolaborasyon etrwat avek plizyer partener kle tel ki Minister ledikasyon, Minister Spor e Sosyal, probasyon e osi bann dominasyon relizyez.  Mon pou aport mon sipor pou sa plan totalman Mr Deputy akoz si en zonm i tonbe, non pa kapab les li ater.  Nou bezwen donn li en koudmen pou leve e re-debout lo son lipye.

Mr Deputy mon konnen ki kot prizon zot pe fer fas avek problenm lespas ki mon konnen latansyon spesyal ki pe ganny donnen lo sa size.  Ki Minister konsernen an kolaborasyon avek UNODC pe travay tre pros pou rezourd sa bann problenm e pou azir en bon fonksyonnman prizon.

Mr Deputy, mon swete ki Minister i met bokou lafaz lo progranm reabilitasyon otan ki posib.  Tou bann kondannen mon’n note an pasan ki bokou kondannen i annan en bon nivo ledikasyon.  Serten i kapab ganny demande pou montre lezot kondannen serten size spesifik.  Mon persyade ki serten parmi bann kondannen i byen kapab ganny sertifika ‘O’ level, ‘A’ level, menm serten posib I al fer letid Liniversite.  Sa i mon swe senser, mon swete trouv serten bann kondannen menm, si pa tou ki reisi me ki zot tou zot ganny transformen e vin en vre lafors prodiktiv ki nou sosyete i byen bezwen.  Mon swete vwar ki zot pe travay pandan ki zot fer zot santans, zot ganny enpe larzan e ki ler zot sorti zot annan serten savings ki ava permet zot viv avek en lavi dignite avek ki zot kapab ganny en louvraz permanan dan sosyete.  I tre enportan note ki ler ou ganny kondannen, sa i pa ou lafen.  Me bokou i depan lo ou pou deside pou fer en vre diferans avek ou lavi, avek ou lavenir.  Mon note osi an pasan ki dan lemonn i annan plizyer bann gran personnaz renonmen ki’n deza fer prizon me avek en bon progranm ler zot in sorti zot in fer en kantite sikse dan lavi.

Mr Deputy, pou fer remarke ki Bidze prizon 2008 zot ti ganny zot en sonm R6.6 milyon e ozordi an 2012 zot in ganny zot en sonm R37.3 milyon e dapre mon resers, Mr Deputy, sa i kout Gouvernman par prizonyen en sonm R72 mil par an pou antretenir en prizonyen.  Sa i reprezant en sif tre o e mon mazinen ki mazorite zot zot depandan osi i lo Welfare.  Savedir, sak dimoun ki ganny kondannen Gouvernman i annan an mwayenn ankor 3 pou fer viv dan nou sosyete.

Mr Deputy, nou pei osi I bezwen met lanfaz lo size travayer sosyal kalifye pou deal avek en tel sityasyon.  Nou bezwen annan en progranm kot nou redwir la mazorite dimoun ki al dan prizon.  Par konsekans, en bon porsyon sa larzan nou ti ava kapab servi pou envestir dan bann lezot progranm.  Mr Deputy, nou bezwen rod bann mwayen kimannyer pou sansibiliz nou bann zenn pou pran en karyer pou travay avek prizonyen parey nou’n fer annan en Police Academy.  Eski sa lakademi pa kapab pran bann zenn pou train, pou desarz fonksyon en Prison Warden.  Mon annan lenpresyon ki sa lapros parey i ganny adopte, i ava kapab ede e adres mankman travayer kot prizon.

Mr Deputy, mon demann nou pep pou zwenn ansanm, ede dan sa proze, aret anmenn bann keksoz parey drog e lezot sibstans danzere pou sa bann dimoun.  Ler nou fer sa, nou pa pe ede dan sitiasyon.  Mon egalman soumet ki lotorite konsernen i get dan size character certificate kot i pran 5an avan ki en sarz i sorti lo en dimoun.  Nou ava dakor si en tel sirkonstans pee de konsilte dan prosesis reabilitasyon letan sa endividi in fini son santans.  Mon vwar sa koman en lobstak reel ki kre fristrasyon dan sa zonm ou fanm ki nou’n reisi redrese e i tre posib ki serten i al komet lofans ankor zis akoz i pa vwar devan li ouswa en loportinite.  I reste en prizonyen menm in fini son santans.  Sepandan, mon okouran ki serten norm ki ganny pratike dan diferan zirisdiksyon.

Mr Deputy, mon pa konnen ki dernyen fwa en prizonyen ti ganny gras.  Mon krwar sa osi i ed bann kondannen, fer zot azir dan en fason pli disiplinen e favorab.  Pa tonm dan bann keksoz negativ pou donn zot lespwar pou zot servi zot santans dan en letan mwens.

Mr Deputy, pou terminen, la ki sitiasyon Somali pe amelyore mon demann Prezidan e lezot bann Leaders konsernen e nou pep an zeneral, annou double nou zefor e ini dan lapriyer ki nou 2 sitwayen Rolly ek Marc i retourn dan nou pei.  Avek sa Mr Deputy, mon remersi ou e tou mon Koleg, mersi.

 

MR DEPUTY SPEAKER

Onorab Jacqueline.

 

HON SULTANNE JACQUELINE

Mersi e bonn apre midi Mr Deputy Speaker, bonn apre midi Koleg Onorab.  Mr Deputy Speaker, rezon fondamantal pou kondann en dimoun se pou pini li pou en krim oubyen lofans ki in komet par en santans prizon.  Sa kondannasyon dan prizon i aras li son drwa laliberte tanporerman koman en sitwayen e osi son drwa sivil pou li vote.  Sa i vreman pinisyon ki lalwa i egzize, prizon i pa en landrwa ki met lanfaz lo konfor e permet en kondannen okenn privilez ki si i ti pe rezouir en lavi normal.  An lot mo, prizon i en landrwa penitansyel kot ou reste pou dirasyon ou santans apre ki ou’n ganny retire dan lasosyete.  Me i osi reste le ka Mr Deputy Speaker, ki lezot kondisyon e tretman dan prizon pa sipoze pe ganny servi koman pinisyon adisyonnel.  I pou sa rezon ki bann ki milite pou asir drwa imen i veye ki drwa bann prizonyen pa ganny abize.  Dan nou prizon Sesel nou kapab dir ki prizonyen i ganny byen nourir, bon swen lasante e ganny trete avek en serten nivo dignite ki par lao bokou prizon atraver lemonn.  Kot i annan levidans tortir, move nivo lizyenn e kot leta prizon i degradan e napa respe pou dignite imen.  I annan konsern parfwa, i annan sa ki pli oubyen enfliyansyel i abiz sa ki pli feb, sa ki nou apel bullying in prison.  I en realite dan preski tou prizon dan lemonn, sa par kont i reste en konsern ki pe bezwen latansyon lotorite la ki i pe annan plis kondannen ki pe antre dan prizon konpare avek sa ki pe sorti tou le mwan.  Bokou bann back log cases pe ganny deal avek pli efektivman e prizon i vwar son popilasyon pe ogmante gradyelman.  Santans pa pe mars ansanm e kondannasyon pe vin pli long.  Mon pou donn mon sipor pou sa Mosyon Mr Deputy Speaker akoz dan sa plan stratezik 2012 – 2016 i fer provizyon pou amelyor swen e sekirite bann prizonyen.  Sa plan pe osi asire ki pou annan en ankadreman pou reabilitasyon e re-entegrasyon sosyal bann prizonyen.  Sa, i en bon demars pou rod en solisyon pou anpese ki bokou espesyalman bann zenn i re-komet lofans kriminel e retourn dan prizon en pti pe letan apre ki zot in ganny large.  Bokou pei ki’n met en tel progranm reabilitasyon an plas dan zot prizon e ki’n met resours e osi mekanizm pou son lenplimantasyon in obzerv en diminisyon dan bann ka residivzm.

Mr Deputy Speaker, si nou pran ka tipik a ler aktyel en zonm oubyen en fanm ki’n sorti dan prizon a lafen kondannasyon, i annan ki fanmiy pa’n zanmen vin vwar zot, san en sou, san landrwa reste, difisil pou li ganny en travay, difisil pou li ganny aksepte parmi bann bon lantouraz oubyen son fanmiy, i fasil pou li retonbe menm si in konn soufrans son sezour dan prizon.  Zot rankontre bokou difikilte pou re-entegre dan la sosyete e viv en lavi normal akoz latitid lezot anver zot.  Sa i antrenn problenm sosyal e sikolozik grav, zot vwar zot be bezwen lite pou sirviv san en direksyon e retourn koman en bandi avek plis konesans e abilite e vin en pli gran menas pou trankilite e sekirite la kominote.  I fasil tonm dan lalkol ou lezot vis e plitar retourn dan prizon.  Sak prizonyen i inik, ensi ki zot kondannasyon.  I annan diferan degre lofans ki’n ganny komet, dray neglizans, vole, vyol, lofans asosye avek labi drog.  Pou sa progranm reabilitasyon vin efektif, i neseser annan planifikasyon santans kot prizonyen i etabli target ki zot bezwen realize e agree avek lotorite prizon lo bann travay ki bezwen ganny fer pou atenn sa ki in agree dapre son lentere e kapasite.  Sa i en prosedir popiler ki ede pou mezir performans a lafen.  Prizon i bezwen ganny vwar koman en landrwa ki pa ankouraz pares me plito devlop labitid travay dir, travay pou ranbours sa ki ou’n vole, travay pou pey ou det e travay pou pey sa ki ou pe manze.  I bon note ki i deza annan aktivite reabilitasyon ki pe ganny fer dan prizon menm si i pa ase akoz mank resours.  Servis prizon Sesel in deza konmans idantifye e angaz bann prizonyen dan bann aktivite vokasyonnel ki pe ankouraz zot pou travay dir e devlop zot abilite dapre bann lentere parey Onorab Barbe in mansyonnen avan.  Zofisye prizon in fer resorti ki zot annan en serten nivo satisfaksyon avek konportman sa bann prizonyen ki pe ganny ankadre.  I swetab ki a lavenir letan sa progranm i ganny met ater, en tel ankadreman dan bann pti training vokasyonnel i permet zot omwen ganny en rapor an ekrir baze lo zot leksperyans travay si non, pourkwa pa en sertifika.  En tel dokiman pou kapab ed zot ganny en travay letan zot sorti.

I annan bokou kondannen ki pou en rezon ou en lot in negliz zot letid laplipar ditan par zot move konportman e latitid e vwar zot avek bokou difikilte pou lir e ekrir.  Zot a kapab ganny sa sans pou ratrape.  De lot kote parey Onorab Fideria in fer resorti i annan bokou ki dan prizon avek en bon potansyel akademik e nou bezwen donn zot en dezyenm sans pou zot kontinnyen e ler zot sorti avek en pli bon sertifika e vwar li pli fasil pou ganny en lanplwa e kontinny zot lavi.

Dan kad gidans spirityel, i deza annan volonter ki vizit prizon ki pe donn gidans avek en progranm pli spesifik e endividyel selon bezwen sak kondannen, i posib Mr Deputy Speaker, fer zot devlop bann bon prensip e valer moral.  Revwar zot fason panse e motivasyon pou viv, pou sov zot nanm par repanti e demann pardon pou zot bann move aksyon e adopte en laspe pli pozitiv anver zot lavi e annan en rev pou en meyer lavi.  I annan bokou testimony Mr Deputy Speaker ki bokou in sanze avek gidans spirityel, i annan menm ki’n konverti pou vin paster dan prizon.

Mr Deputy Speaker, i annan nesesite pou sansibiliz popilasyon lo sa size progranm reabilitasyon dan prizon.  Prizon i parfwa ganny vwar konman tre kontrovers ler nou koz sa size reabilitasyon.  Akoz bokou dimoun i vwar prizon konman en refiz pou bann malfeter pou protez lakominote e ki tou sa ki ganny fer laba i bezwen lo en baz pinisyon.  Si ou koz lo amelyor kondisyon dan prizon lo en baz imaniter pou pli byen kapab fasilit bann progranm reabilitasyon, bokou lopinyon i ki prizon i tro mou e dekri bann prizonyen konman zot lo kan vakans eksepte kan i ariv lo nou zanfan oubyen en fanmiy pros.

Mr Deputy Speaker, nou deza pe demande pou agrandi e amelyor striktir prizon pou ki i annan en separasyon avek bann ki kondannen e rimann e bann kondannen ki’n komet bann pti lofans mwen grav e danzere pou ki i a pli fasil pou promot e enplimant en progranm reabilitasyon pou zot kapab re entegre pli fasilman dan lasosyete dan plas sa kondisyon aktyel ki fer prizonyen sorti koman en kriminel pli eksperyanse, pli rebel, pli anmer kont bann prensip pozitiv dan lasosyete.  Pou bokou kondannen, letan dan prizon i moman ki’n ed zot reflesir lo zot lavi e pran en bon desizyon.  I annan ki pli feb, i anvi sanze me bezwen sipor pou ed li retrouv son konpa dan sa direksyon boulversan e diriz li dan sa bon direksyon.

Mon konvenki Mr Deputy Speaker ki sanzman i posib pou tou dimoun.  Bokou prizonyen i kapab sanz pou de bon e vin bann bon sitwayen.  En bon progranm reabilitasyon pou anmenn bokou benefis pa zis pou bann prizonyen pou donn zot en dezyenm sans me pou lakominote an zeneral kot pou annan mwens sans pou nou sekirite e trankilite ganny trouble letan sa bann prizonyen i sorti.

Pou garanti en rezilta a lafen sa progranm Mr Deputy Speaker, Minister konsernen i bezwen revwar resours apropriye, pli bon fasilite lenfrastriktir i bezwen met a dispozisyon servis prizon.  Annan en Bidze pou zer sa progranm, annan lenstrikter byen formen pou travay avek bann prizonyen, annan bon swivi menm apre progranm reabilitasyon term prizon letan zot sorti pou dekouraz zot pou retonbe.

Pli enportan, prizon i bezwen gard pli bon statistik pou annan levidans kredib pou montre rezilta pozitiv en tel progranm reabilitasyon.  Pou montre si i pe annan mwens residiviz.

Avek sa Mr Deputy Speaker, mon pou aport mon sipor pou sa Mosyonm mersi.

 

MR DEPUTY SPEAKER

Onorab Vangadasamy.

 

HON SHERYL VANGADASAMY

Mr Deputy Speaker, Manm Koleg Onorab, lepep Seselwa alekout bonn apre midi.  As reprezantan Mont Buxton, nesesite koz lo sa Mosyon i lo 2 nivo, monk oz lo 2 group mon popilasyon mon distrik ki konsernen direkteman ou endirekteman konsernan fonksyonnman nou prizon isi Sesel.  Enn sa group ki viktim krim, viktim nou bann fleo sosyal ki rezilta bann krim ki’n ganny ase avek krim, kriminel e kriminalite dan sa pei.  Mon osi pe koz pou sa group dimoun ki komet sa bann krim, mon bann zenn ki’n osi tonm viktim drog ki ozordi i vwar zot pe komet plizyer krim pou ganny zot drog pou zot ladiksyon e ki fini prizon.  Pou bann paran ki zot zanfan in ganny kondannen, ki’n ganny ase oubyen i nepli konnen ki pou fer avek son zanfan.

Mr Deputy Speaker, bann Lalwa resaman ki pase devan nou Lasanble in egziz Lalwa pli tough, Lalwa pli sever pou serten lofans.  Mr Deputy Speaker, dan nou konbat kont krim, lazistis e pou benefis devlopman nou pei, lalit kont krim i en priyorite e merit reste en priyorite pou mwan, pou mon distrik, pou nou popilasyon.  Nou konbat kont krim in incorporate bann lezot departman kle e enportan apart ki prizon.  Tel ki nou lafors lapolis ki konmans sa premye demars dan lalit kont krim ki spear head e undertake pou fer lanket, apprehend bann offenders ki gather bann levidans e forward bann case accordingly kot biro Atorni Zeneral.  E biro Atorni Zeneral laba kot file laba i ganny peruse, verifye si i annan ase levidans sifizaman pou prouv en case pou prosekisyon e apre i al fini Ankour.

Mr Deputy Speaker, se Lakour ki determinen ki santans pou pase dan en ka, si en akize i koupab oubyen non.  Letan en akize i ganny kondannen, Lakour i kapab enpoz plizyer santans e permet mwan Mr Deputy Speaker pou al en pti pe pli profon ladan.  Kot santans prizon i ganny demande oubyen li i ganny donnen, sa akize i mont prizon pou servi son peryod letan.  Mr Deputy Speaker, lo sa not i enportan pou touse ki prizon tousle, reform dan prizon tousle parey loter Mosyon pe fer sorti pa pou ed nou sitiasyon krim tousel oubyen fer desann popilasyon prizon oubyen reabilit tou nou bann prizonyen.  Dan konbat kont krim i nesesit pa zis en reform dan prizon, i nesesit en reform e en plan stratezik dan nou bann departman konsernen.  En plan stratezik konzwent dan tou nou bann law enforcement agencies parey lapolis, biro Atorni Zeneral, Zidisyer, Prizon, Servis Sosyal.

Mr Deputy Speaker, les mwan retourn lo mon pwen ki konsern santans.  I annan 2 kalite santans ki Lakour i kapab pase, sa se santans mandatwar, meaning santans ki ganny enpoze anba lalwa, statutory sentence parey nou dir.  Sa i santans ki Lakour i merit enpoze, napa okenn kestyon me i osi annan en lot santans a dispozisyon Lakour.  Sa se discretionary sentence, la kot Lakour i annan son diskresyon pou determin ki santans ki pou enpoze lo en akize baze lo ki kalite lofans, sirkonstans ka, mitigating factors ki akize oubyen avoka la defans i met devan e lezot fakter ankor.  Mon problenm avek sa se ki nou Lakour pe servi tou zouti santans a zot dispozisyon pou rezourd en pti pe sa problenm prison?  Eski tou nou bann prizonyen ki prizon in ganny sa santans ki i merite pou le al deservi prizon?  Eski nou popilasyon prizon i reflekte vre santans ki Lakour ti kapab donnen ouswa enpoze lo nou bann akize?  Permet mwan pou elabore Mr Deputy Speaker.  Eski pou serten minor offences, pti lofans pou serten bann first time offenders dan serten ka, Lakour pa ti kapab enpoz parey anba lalwa i permet pou efektye lezot kalite pinisyon?  Lezot kalite sanksyon oubyen lezot kalite santans apart ki prison?

Mr Deputy Speaker, kondann en papa prizon ki’n fel pou pey alimoni pou son zanfan pa neseserman bon pou sa papa e pa neseserman en motivasyon pou fer li pey son alimoni.  Eski sa zanfan in ganny son maintenance apre sa lanprizonnman?  Eski sa pou pous sa papa pou li peye oubyen motiv li pou li kontinnyen pey son kontribisyon?  Oubyen si letan nou ti kondann li 3 mwan travay entansiv, travay kominoter e son rannman ki i anmase nou donn son zanfan sa pa ti pou en metod pli efektiv konman en pinisyon.

Mr Deputy Speaker, lalwa i permet annan community service, probation orders ki kapab ganny enpoze konman bann lezot form pinisyon e bann lezot form sanksyon oubyen reabilitasyon.  Mr Deputy Speaker, sa bann servis, sa bann practice i la, Lakour Tribinal i kapab servi me mon konsern se eski nou Servis Sosyal, nou biro Probasyon nou annan mekanizm an plas pou sa bann servis?  Eski nou sistenm after care ki nou annan eski i efektiv?  Mr Deputy Speaker, ankor enn fwa, lotorite prizon tousel oubyen plan stratezik prizon, reform prizon pa pou stand, i pa pou en sikse si sa bann lezot lorganizasyon, departman e servis pa zwenn ansanm.  Si sa bann lezot departman, sa bann lezot lorganizasyon pa lo sa oter, pa lo sa nivo, si napa en sinerzi ant sa bann lorganizasyon e departman.  Servis sosyal i bezwen lo sa oter pou kapab met an plas, swiv, kordin bann tel lezot servis letan i ganny met an plas biro probasyon osi i bezwen lo sa nivo.

Mr Deputy Speaker, konstrir plis prizon i pa en solisyon, kondann plis dimoun pa en solisyon.  Pli gran defi nou pei ozordi i se ki nou fleo sosyal pe ogmante alarmeman e i en fe ozordi ki nou bezwen met plis zefor pou redres nou.  Ozordi nou bezwen depans plis dan fer prevansyon ki sibir konsekans.  Nou bezwen assize, rode kote e lakoz nou bann fleo sosyal.  Me permet mwan ankor enn fwa pou dir ki yes, wi parey mon ti dir semenn pase, nou problenm se avek nou konpa.  Nou pe perdi nou konpa moral, nou konpa sosyal oubyen nou’n fini perdi li.  Nou kapab annan plan stratezik, reform, resours, lalwa, lekipman me apre tou i pou anven akoz nou pa pe adres la vre koz nou problenm.  Re-edik nou pep lo nou valer moral, lo nou valer sosyal, nou valer imen, lo valer koman en pep, konman en nasyon, respe pou lezot, respe pou nou menm.

Mr Deputy Speaker, mon konman en reprezantan ki konnen e pa krwar dan annan zis en plan i byen pou annan en plan me i bokou pli byen pou annan en plan ki realis, rezonnab e ki nou kapab e wi ki nou bezwen kapab enplimante.  Bokou de fwa nou antann bann gran gran plan, bann gran gran reform polisi targets.  Nou tann son bann konsepsyon bann gran gran plan me mon enn ki krwar ki letan nou fer en plan nou merit delivre e enplimante.  Mon’n lir e analiz The Strategic Plan 2012 – 2016 pou prizon, it is a good plan, bann bon target me as reprezantan zabitan Mont Buxton mon pli konsernen e enterese avek realizasyon sa plan.  Mon krwar ozordi nou bezwen konsyan ki nou pep in fatige avek the talk, the big talk.  Lepep i anvi ki nou walk the talk, annou met sa plan an aksyon.  Polisi, plan dan sa pei i annan en ta, lepep i enterese avek realizasyon sa bann plan.  Zabitan Mont Buxton e lepep Seselwa i ziz nou lo sikse enplimantasyon nou bann plan, lo delivre nou bann plan, komitman e promes.

Mr Deputy Speaker, en kantite i kapab ganny dir konsernan sitiasyon prizon me permet mwan pou fer en kritik ek en analiz.  Priyorite primordyal prizon an se moman se son lefrastriktir.  Nou kapab annan meyer plan lapros, plan reabilitasyon me tousala pa pou marse, pa pou en sikse si nou ti napa en plan konkret lo lenfrastriktir nou prizon.  Si nou napa en plan definir pou en remand centre, si nou napa en plan definir lo en juvenile prison or detention centre.  Pou mwan, se sa 3 lenfrastriktir ki si sa pa aranze, si sa pa met an plas pou determin sikse ou failure sa plan stratezik.

Seksyon 21 nou Prison Act i determin klasifikasyon e separasyon nou bann prizonyen.  Si dan to popilasyon nou prizonyen Montagne Posee en kar i nou bann remandees savedir bann akize ki ankor anba dapre lalwa prezonpsyon linosans ziska ler Lakour i trouv zot koupab ziska ler zot case i pase eski sa pa demontre nesesite annan en remand centre?

Mr Deputy Speaker, annan en lalinny dan sa plan stratezik ki zis dir ouswa i fer provizyon pou annan separasyon prizonyen i pa sifi.  Dan sa plan 4an i nesesit annan en plan definir, detaye pou sa group popilasyon deteni.  Deza la nou striktir prizon aktyel e sa logmantasyon prizonyen pa pe ede.  Letan nou’n separe, klasifye nou popilasyon prizon comme il faut nou pou rezourd en kantite nou problenm prizon.  Annou aret mazin kour term me annou regard a lon term me pa zis en solisyon imedya me en solisyon dirab enn fwa pour tou.

Mr Deputy Speaker, si en demi nou popilasyon prizon i bann zenn kondannen, nou bann zenn ki pou pran la relev, ki nou pou bezwen reabilit zot dan lasosyete, eski pa in ler pou nou annan en Juvenile Detention Centre.  Eski sa pa pou ed en gran mazorite pou favoriz en zesyon pli byen planifye an vi drwa imen, lalwa an plas e meyer sikse plan reabilitasyon.

Mr Deputy Speaker, deza i annan plizyer konsern zistifyab dan sa ki konsern batiman striktir nou prizon aktyel.  Nou problenm e lakoz mazer lamazorite nou problenm e sikse okenn plan stratezik oubyen reform dan nou prizon.  E baze lo mon leksperyans parmi enn bann group zofisye ki ti perform en odit dan operation and implementation unit 4an pase apre pli gran rayot ki ti arive dan prizon ti donn mwan en loportinite pou apresye e valorize travay Minister Zafer Entern.  Letan ou regarde, ou konpran lenormite e dilenm problenm prizon ki sa latas devan sa Minister.  Me annou met lanmen lo sa ki pli enportan lo nou prizon, annou rezourd nou problenm lenfrastriktir, annou met an plas en juvenile centre, annou met an plas en remand centre.

Mr Deputy Speaker, letan sa i ganny fer i pou ed bokou e pou rezourd problenm nou prizon aktyel e okenn plan stratezik, reabilitasyon, sekirite bann travayer e staff prizon pou fer plis sans e en pli o poursantaz sikse sa plan 4an pou prizon.  Mr Deputy Speaker, mon konsern se ki sa plan pa’n al an detay lo reform striktirel, lenfrastriktir ek klasifikasyon bann prizonyen.  Sa 3 pwen dan strategic goal 5, 5 dan san plan i pa sifi, i pa pou rezourd problenm prizon.

Mr Deputy Speaker, mon sipor pou sa Mosyon i baze senpleman ki sa plan i dan lentere nou bann prizonyen e manm piblik?  Me mon partaz mon konsern se ki la realite vre issues ki pertinan pa’n ganny adrese parey mon ti ava swete.  Pou en solisyon lon term e ki ti pou ed sityasyon prizon e dan reabilitasyon prizonyen.

Mon pou vot pou sa Mosyon pou donn en sans sa plan ganny enplimante.  Me Mr Deputy Speaker, les mwan termin lo sa not, making the right choices now, having the right plan now so you do not have to look back and wish you had made different ones.  Mersi.

 

MR DEPUTY SPEAKER

Onorab Lebon.

 

HON LENNY LEBON

Mersi Mr Deputy Speaker.  Mr Deputy Speaker, prizon i en topik ki bokou nou dan sa pei nou kontan koz lo la.  Tou resaman, Sef Sirentandan Prizon ti lo televizyon pou eksplik rayot ki ti annan kot prizon madanm.  Mwan pase dan zournal Le Seychellois ti annan en lartik ki ti fer referans avek bann gard prizonyen ki pa ankor ganny peye zot dues pou dezyenm mwan konsekitiv.  Vizit per Gregoire Sesel osi ti relye avek vizit e sesyon kot prizon.

Larealite Mr Deputy Speaker i reste, se ki en pti pei parey Sesel ler ou annan en logmantasyon dan bann social ills, ogmantasyon krim e bann zenn ki pe servi ouswa vann drog.  Bann sispe pirat ki nou pe ziz zot, kestyon i reste sa ki vre se ki nou polilasyon prizon i kontinnyen ogmante.  E byen alor ki lotorite in vwar li neseser pou annan en plan stratezik ki ofer nouvo metod pli efektiv pou redwir bann repeated offenders e fer nou kominote vin pli an sekirite.  Sa plan osi pe viz pou devlop e enplimant and lapros drwa imen ki servi en lapros ver prison management avek reabilitasyon.  Sa plan osi i permet ki sistenm prizon i lo bann norm e practice enternasyonnal.  I enportan fer resorti Mr Deputy Speaker, ki bann staff prizon zot osi in ganny konsilte lo sa plan stratezik dan en workshop ki ti ganny organize kot SIM an Zen sa lannen.  Pandan sa workshop ti ganny fer resorti ki persepsyon piblik se ki prizon i en landrwa cushy.  Kot bann prizonyen i retournen apre en pti letan deor.  Sa persepsyon, si i reel i bezwen sanze, prizon i annan en rol doub pou zwe kot i bezwen kit bann prizonyen ek kondannen anfermen e reabilit zot e osi prepar zot pou pli byen re-entegre dan sosyete apro zot santans.

Dapre zournal Nasyon, pandan sa workshop bann delege ti fer resorti ki sa dezyenm lobzektiv i bezwen ganny akonpli.  Ti ganny dir ki prizon i konzeste, napa ase enfrastriktir avek en mank resours imen.  Popilasyon prizon pou kontinnyen ogmante, akoz larealite lanvironnman nou pei i montre ki problenm sosyal ki lie avek drog e lalkol pe ogmante.  Bann dimoun ki komet bann labi kont zanfan, sa ki nou apel child molestation, vyolans domestik e lezot malez sosyal.  Nou tou bezwen en dezyenm sans dan lavi.  Ozordi dan sa pei nou vwar ki bokou nou bann zenn pe pran sa semen.  Nou bezwen donn zot en sans ankor akoz zot annan lafors travay pou kontribye dan devlopman sa pei.  Sa plan startezik i fer sa road map pou sistenm prizon annan en lapros entegral e ariv lo standar Nasyon Ini.

Mr Deputy Speaker, nou tou nou konnen ki letan popilasyon prizon i kontinnyen ogmante i nesesit ki en progranm reabilitasyon i vin operasyonnel.  Kestyon ki mon pe demande e resers ki monn fer lo si i annan en fason pli efektiv pou anpes bann kondannen pou retourn dan lavi komet lofans?  Larepons lo sa size i divize.  Statistik i montre ki an mwayen 35 poursan bann prizonyen ki ganny large, i retourn dan prizon.  I vedir ki apepre pli ki 60 poursan bann prizonyen ki ganny large zot vin konman bann repeated offenders.  Si sa i vreman larealite Sesel, ti ava bon ki en resers pli aprofondi i demare.  Si sa i leka Mr Deputy Speaker, sa i danze pou nou pti sosyete e osi i met en presyon lo nou sistenm prizon.

Lot larealite se ki ozordi popilasyon dimoun ki dan prizon i ganny konsidere koman nou lafors ki pli prodikitiv dan sosyete.  Nou bezwen annan en progranm reabilitasyon ki marse.

Dan mon resers ki mon’n fer, monn aprann ki letan prizon ti Ile Long bann prizonyen ti annan workshop sarpantye kot zot ti aprann sa metye.  Ti annan mechanic, ti annan posibilite pou devlop zot dan lagrikiltir e elevaz zannimo.  Si sa ti marse, akoz nou pa relans bann tel progranm e empower sa bann kondannen e fer zot vin pli prodiktiv.  Dan sa konteks, persepsyon piblik ki prizon i en landrwa cushy i ava gradyelman disparet.

Mon salye linisyativ Prezidan Michel pou ouver zil Marie Louise koman en landrwa pou reabilit bann prizonyen.  Sa i bezwen kontinnyen e petet osi avek en progranm, annan en progranm ledikasyon lo 2 nivo.  Premye nivo, edik bann prizonyen e promot sistenm prizon ki parey en revolving door, ki prodwir bann sitwayen dan plas konman en landrwa pou prizonyen.  Dezyenm nivo, kre bann loportinite pou bann prizonyen edik zot lekor.  En morso entegral sa progranm ledikasyon pou reabilitasyon se ki i pou ed prizonyen ogmant zot konesans.  Sa ki nou apel knowledge based.  Pou sa arive, nou bezwen asire ki i annan en module pou literacy pou bann prizonyen ki anvi aprann.  Nou pa kapab donn dimoun en dezyenm sans dan lavi si pe viv en lavi touristik dan prizon.  Nou bezwen annan en progranm reabilitasyon byen detaye e fer sir fodre donn bann prizonyen bann pti incentive koman en fason pou motiv zot.  Annou bouz dan sa direksyon.  Ler en prizonyen i sorti dan prizon pa bezwen ki al kot lazans proteksyon sosyal pou li ganny en pti lasistans ziska ler i ganny en travay.  Si in debrouye dan prizon, e travay sa pti incentive ava kapab ed li ganny en konmansman solid e vwar lavi avek en lot perspektiv.  Nou annan plizyer zil dan teritwar Sesel.  Sistenm prizon i kapab travay avek lotorite zil Sesel e vwar ki bann lezot scheme ki kapab ganny met an plas pou fer prizonyen sanz pou le meyer.  Mon’n toultan dir e mon repete Mr Deputy Speaker, si nou vreman anvi fer keksoz dan sa pei i demann zis en bonn volonte.  En pti pei parey Sesel ki pe devlop sitan vit, en lot defi ki nou tou nou koz lo la e ki nou manke se resours imen.  Nou defi resours imen i reel, pou en bon progranm reabilitasyon marse, e pou prizon kapab donn bann prizonyen en dezyenm sans dan lavi, ou bezwen dimoun kalifye, ou bezwen counselor e osi part time professional mental health.  Pa zis prizon ki mank counselor, nou bann lekol osi i mank sa resours.  Petet in ler pou nou revwar e gete kimannyer nou maksimiz nou resours ki nou annan.  Nou bezwen osi pe get problenm e atak dan son rasin.  Sesel nou bezwen bouz dan en direksyon pou annan en youth rehabilitation centre.  Sa ava ede sov nou bann zenn, se zot nou fitir e nou pa kapab dan sa pti pei ki prodwir zis anvi 1500 zenn par an, parmi ladan i al fer en karyer dan prizon ouswa ki depan lo drog.

Mr Deputy Speaker, nou bezwen rode kote nou pe al mal akoz dan sa pti pei, dan sa Gouvernman lepep i donn ledikasyon en zenn ziska laz 18an e plis.  Savedir sa zenn i pas en kar son lavi kot nou sistenm ledikasyon pe edik li.  Lanmwatye son lazournen dan lekol e larestan dan kominote.  Kestyon ki mon pe demande, eski dan lekol nou napa bann progranm rezilyans kot en zenn i kapab bounce back e osi si sa bann progranm lekol napa link avek progranm distrik, sirtou bann progranm rekreasyonnel ki bann zenn i vwar kontinite e sa I ava ed zot build zot character?

Mr Deputy Speaker, dan mon pti refleksyon ler mon ti pe ekrir repons lo sa Mosyon, refleksyon ki mon’n fer e se ki si nou get lamazorite zenn ki dan prizon e petet si pa tou, se bann zenn ki’n sorti dan lekol piblik.  Koman en ansenyan par profesyon, refleksyon ki mon pe fer semenn pase nou’n dan peryod kot nou’n selebre lafet bann ansenyan.  Si nou koz lo ledikasyon koman the holistic development pou nou bann zanfan, kestyon mon pe demande, eski pa nou kapab detekte lekel ou tel zanfan ki pou en zour rann lapel dan prizon akoz son konportman.  Eski nou pa pe fel nou bann zanfan depi dan lekol?  Eski sa bann zanfan ki nou vwar pe pran sa semen ki en zour zot kapab ariv prison?  Eski nou annan en progranm ki ed zot redinamiz zot karakter?  Aprann devlop gradyelman konfyans ki bouz ver devlopman zot prop disiplin ek responsabilite.  Parey nou konnen, i egziste pastoral care system dan lekol.  Eski bann lekol segonder pe vreman met an aplikasyon sa progranm ouswa zot pe zis sispann bann zanfan ki an retour pe pas zot letan dan semen?  Petet in ler pou revwar fason ki bann lekol i deal avek bann zanfan ki annan problenm disiplin dan lekol.  Mon santi ki i devret annan en komite ki konpri tou lazans sosyal ki pran en desizyon avan ki serten aksyon disipliner i ganny pran avek en zanfan.  Mon pa en expert dan sa domenn me mon vwar lo sa size i demann en deba ouver ouswa en letid aprofondi.

Mr Deputy Speaker, en keksoz pli enportan ki nou pa pe konsidere se fason ki bann prizonyen i ganny re entegre dan kominote.  Parey nou konnen, zot bezwen esper 2an pou ganny en police certificate.  Nou bezwen demann nou lekor ki zot fer san en lanplwa pandan sa letan?  Sa i rann zot fristre e ed zot pou komet ankor bann lofans.  Nou bezwen rod en fason pou ankadre bann prizonyen pandan sa 2an.  Akoz nou pa kapab annan en progranm parey “Les li viv” ki ava anmas sa bann zenn e ed zot devlop bann skills ki zot in gannyen prizon anmenmtan i ava annan bann sesyon counseling ki ava ganny fer ziska sa zenn i kapab ganny son police character certificate pou li al dan lanplwa.  La i en loportinite ideal pou bann NGOs travay an sinerzi avek Gouvernman e lotorite prizon e kot en tel striktir i kapab ganny devlope.

Swivi en prizonyen pou en serten letan apre ki in sorti dan prizon i vreman enportan si nou oule ki i pa retourn ankor pou komet lofans.

Mr Deputy Speaker, mon toultan krwar ki nou kapab adres en bon pe nou bann problenm sosyal si tou lazans konsernen i travay an sinerzi.  Dan sa pei, tou striktir i la, nou bezwen organize me i annan en mankman dan kimannyer tou sa bann lazans pou travay e devlop en sinerzi serye e sistematik ansanm.

Lo menm lalinny Mr Deputy Speaker, bomaten Vis Prezidan dan Lasanble in eksplike ki ozordi zour dan Sesel 57 poursan nou popilasyon se bann zenn.  Mon krwar in ler, ler in arive pou tou parti konsernen avek devlopman, epanouisman nou bann zenn.  Pou zwenn ansanm e vwar konman nou kapab devlop bann progranm entegral pou nou bann zenn.

A sa staz mon lentervansyon, permet mwan fer serten sizesyon avek lotorite konsernen.  Premye, ki nou konsider annan en bon progranm reabilitasyon dan nou sistenm Penal ki ava al pli lwen pou ganny bann repeated offenders pou zot pa refer bann krim ouswa lofans.  Dan plas met zot pou pli long letan dan prizon ki pou bezwen depans plis larzan.

Dezyenm, si nou pe fer en karyer dan lapolis, training pa merit zis santre zis koman en gard regilye me osi koman gard prizonyen avek bi ofer plis opsyon bann gard.

Trwazyenm, bann ex solda ki’n kit lafors i bezwen kapab annan en progranm ki entegre zot dan lapolis ouswa gard prizonyen si zot oule kontinnyen ofer zot servis lafors.

Katriyenm, nou sistenm Zidisyer i merit pe eksplor bann diferan metod ler i kondann en dimoun.  Nou kapab konsider ki en dimoun i ganny anvoye lo zil pou travay anba kondisyon e si i kas serten kondisyon i ganny mete dan prizon.

Senkyenm, bann NGOs e bann dominasyon relizyon i bezwen pe travay plis avek lotorite e board prizon pou ede anmenn en lapros pli entegral dan reabilitasyon bann prizonyen.

Sizyenm, tou bann parti konsernen avek devlopman nou sosyete ler in arive pou ki nou deside met lespri ansanm pou devlop en progranm nasyonnal ki demontre klerman en lapros entegral dan fason ki nou sosyete i ankadre bann endividi ki poz serten problenm dan legzistans dan nou sosyete.  Mersi Mr Deputy Speaker.

 

MR DEPUTY SPEAKER

Bon, dernyen entervenan lo mon lalis, Onorab Arnephy.

 

HON BERNARD ARNEPHY

Mersi Mr Deputy, bonn apre midi tou dimoun.  Mr Deputy, prizon in egziste dan preski tou sosyete pou bokou syek.  Pandan bann lannen ki’n pase, in annan bokou deba lo akoz en dimoun i bezwen ganny kondannyen pou deservi en santans prizon.  Dan bokou pei, in annan bann prosedir kler ki diriz lafason ki loperasyon prizon i merit ganny fer.  E Sesel sa pa en leksepsyon.  Nou annan nou, nou Prison Act ki kouver tou laspe fonksyonnman sa lenstitisyon kot bokou lanfaz i ganny mete lo proteksyon staff sa lenstitisyon e osi byen ki bann kondannen e dan nou ka, bann rimann osi.  Nou Prison Act i kouver bann lezot laspe tre enportan tel ki custody, disiplin, remisyon e osi setting up of special prisons ki nou’n temwannye resaman.

Mr Deputy, alors i kler ki mekanizm neseser lontan i egziste pou asire ki nou prizon i fonksyonn dapre bann norm neseser.  Me avek levolisyon dan kalite krim ki ganny komet dan sosyete e kalite kondannen ki sa Lenstitisyon i bezwen travay avek, definitivman i annan en nesesite pou ki loperasyon prizon li osi i bouz avek letan, pou donn touzour en meyer servis.  Dan en pti sondaz lopinyon ki mon’n fer, serten i argue ki prizon i merit ganny servi pou pini kriminel.  Lezot i krwar ki prizon i merit ganny servi koman en fason pou anpes dimoun komet en lofans, apre ki zot in deservi en premye santans.  En lot bann i krwar ki dimoun ki ganny anvoye prizon pou ganny reformen e reabilite, kot ler zot dan prizon, zot a kapab arive realize ki komet krim i mal e ki zot bezwen vin bann law abiding citizens. De lot kote, serten dimoun i panse ki meyer fason pou reabilit en dimoun e fer li pey pou sa ki in fer mal se pou travay e ganny mwayen pou pey son victim konpansasyon pou bann pert ki in sibir, parey dan ka vol.  Serten i menm argimante ki si en dimoun i komans vin en menas pou sosyete, sel fason se pou met li behind bars kot la i pou nepli threat pou sosyete an zeneral.

Mr Deputy, baze lo realite e konteks nou sosyete vizavi kantite e kalite krim ki nou vwar e tann parle toulezour, mon partaz sa bann lopinyon ki serten endividi in fer resorti lo rol ki prizon, koman en Lenstitisyon merit zwe koman en partener kle pou ede konbat kriminalite dan nou sosyete.

Mr Deputy, sa plan stratezik ki loter Mosyon in koz lo la i enn ki annan lobzektif kler e serye pou fer ki prizon i vin en vre landrwa reabilitasyon pou bann kondannen, kot zot kapab deservi zot santans dan en fason dir, me anmenmtan ed zot pou refer zot lavi kot pli tar zot kapab byen entegre dan sosyete.  Malerezman sa pa touzour fasil, malgre bokou travay ki lotorite prizon Sesel pe sey fer.  Dan bokou ka, staff prizon i mank bagaz neseser e malgre bokou zot i esey zot mye, dapre zot kapasite.  La, mon panse ki kondannen osi i merit korpere e zwe zot rol dan zot prop transformasyon.

Mr Deputy, ler nou koz lo favoriz en lapros drwa imen dan zesyon prizon, mon krwar ki dan premye lenstans, bann travayer prizon i merit annan en konesans de baz lo nou bann Lalwa lokal e enternasyonal drwa imen, ler zot pe deservi zot fonksyonkoman en zofisye prizon e sa pa merit en leksepsyon pou bann gard prizonnyen.  Bann zofisye prizon i merit ganny sansibilize lo zot rol, pou promot e protez drwa imen dan zot travay toulezour, tout an asiran ki napa latitid lesefer ki ganny devlope dan sa lenstitisyon.  Tou personnel prizon merit ede ranforsi respe pou dinite sa bann kondannen ki fondamantal pou drwa imen.  Zot merit delivre zot fonksyon baze lo bann norm lokal e enternasyonal, pou fer ki sosyete i vin aderan avek bann konvansyon e protokol drwa imen ki nou krwar ladan e ki nou siporte.  Lotorite prizon Sesel i merit santi li responsab a tou moman pou bann detenir ou kondannen ki anba son kontrol.  Alors, i la kot konpetans bann ki travay dan en tel servis i pa kapab ganny konpromi.  Me i osi bon note, ki sa latas pou reabilit prizon pa zis enn pou Gouvernman tousel.  Tou bann lazans enter-Gouvernmantal, non-Gouvernmantal e lezot lenstitisyon i merit donn en koudmen kle pou asire ki nou prizon i vin sa vre landrwa reabilitasyon.

Mr Deputy, malgre bokou defayans ki nou prizon i ankor pe fer fas avek, mon sepandan konstate ki bokou in ganny fer pou asire ki bann prizonnyen i zouir bann servis de baz ki an konformite avek bann norm enternasyonal, rekomande par Nasyon Ini.  Drwa pou akomodasyon apropriye, manze e delo adekwat e labiyman adekwat i bann nesesite ki prizonnyen i zouir isi Sesel.  E la, dapre mon resers, sa i menm lo en standar pli o ki bokou pei pli devlope ki nou.  A sa pwen, i bon note ki responsabilite sa bann kondannen pou servi byen sa bann fasilite e servis ki zot resevwar, si zot pa anvi santi zot, ki zot pe ganny deprive bann tel drwa.  De lot kote, mon santi ki i annan bokou travay pou fer, sirtou kot swen lasante bann prizonnyen i konsernen.  Prizon i merit en landrwa kot servis lasante a plen tan i ganny donnen e kot prizonnyen pa bezwen deplase a sak fwa ki i annan en nesesite pou tretman e ki fer ki presyon i ganny mete lo sa resours limite ki nou prizon i deza annan.  Bokou zefor pe deza ganny fer, pou fer ki prizon i vin sa landrwa safe pou prizonnyen, staff e osi byen ki bann viziter.  Gouvernman pe envestir en kantite resours teknik e finansyel dan sa domenn akoz nou krwar dan lenportans annan bann bon regilasyon sekirite, pinisyon kot fodre pou an retour asire ki bon lord i ganny mentenir dan prizon.  Sa laspe disiplin Mr Deputy, pa kapab ganny konpromi.  Anba Prison Act, seksyon 22 i dir klerman e mon state:- “Every prisoner shall be subject to prison discipline during the whole period of imprisonement, whether he is or is not within the precinct of the prison”. Alors, kot i annan breach of discipline, prosedir regilasyon merit aplike pou prizonnyen e osi byen ki bann zofisye ki kas Lalwa.

Mr Deputy, nou’n touzour en sosyete ki krwar dan donn dimoun en dezyenm sans, malgre son fot ki in komet.  Alor, se pou sa rezon ki lanvironnman prizon i bezwen enn ki donn sa loportinite sa bann endividi pou zot rehabilitate dan en mannyer, kot ler zot santans i terminen, lasosyete i kapab vwar serten bon eleman dan zot e kot zot an retour, zot kapab fer kontribisyon pozitiv dan sosyete.  Prizon i alors merit entansifye en progranm travay pou sa bann kondannen.  Si fodre met en mekanizm anplas, kot sa bann prizonnyen i kapab al fer serten travay andeor prizon, nou merit konsidere, me sa byensir pou nesesit close supervision.  En pwen enportan pou konsiderasyon.  Travay kominoter i merit en lot opsyon.  Pran legzanp en dimoun ki’n kondannen akoz in fail pou pey maintenance son zanfan.  Sa endividi i kondann, fer krwar 1 mwan prizon kot i al relax e ganny tou sa ki i bezwen pandan sa 1 mwan e apre i ganny release byen happy e kontinnyen avek bann menm patwa, kot i pa kontinnyen onor son lobligasyon.  Mwan, mon partaz lopinyon bokou dimoun ki sa kategori kondannen, merit toulezour ganny anmennen lo en site, ou lezot landrwa travay, baze lo zot skills ki zot annan e fer zot travay kot alafen sa 1 mwan, lotorite konsernen i kapab resevwar serten benefis finansyel ki ava al anver maintenance sa bann zanfan ki souvan ganny neglize.  Bann lezot areas kot prizon i merit entansifye son zefor pou anmenn servis, se dan domenn ledikasyon, aktivite kiltirel, spirityalite, parey lezot koleg in fer resorti.  Ankor la, tou pou depan lo bon resours finansyel e personnel apropriye.  Se la en area kot lasosyete sivil i kapab annan en pli gran rol pou zwe.  Mon osi panse ki en bon progranm i merit ganny met anplas, an preparasyon pou release bann prizonnyen.  Lotorite prizon, atraver son bann Welfare Officers merit liaise avek bann diferan lazans pou fer sir ki ler sa prizonnyen i termin son santans, i vwar li pe reganny aksepte par lasosyete, kot sa a permet evite ki i retonm dan bann sitiasyon ki pous li pou komet ankor lofans.  Se la kot, ansanm avek Lazans Lanplwa, sa endividi i merit ganny councelling e asiste ganny en lanplwa ki a ed li refer son lavi.  Souvan, sa bann tel dimoun i trouv li tre difisil pou trouv en lanplwa akoz zot in fini ganny label koman bann kriminel, menm si dan bokou ka, lamazorite ki’n arive fer transformasyon signifikan dan zot lavi.

Mr Deputy, dan prizon Sesel prizonnyen i ganny serten privilez, tel ki vizit regilye manmfanmiy ou pros, me i malere ki souvan sa bann tel privilez i ganny abiz e se la kot Lotorite Prizon i bezwen pran bann mezir serye ou sever.  I annan manm fanmiy ki esey fer antre dan prizon bann sibstans ou materyo ilegal e enterdi e kot sa i ganny detekte e konfiske, aksyon disipliner serye i ganny pran kont bann ki enplike.  I alors enportan ki ler nou pe koz lo sa lapros imen, bann ki enplike i evite komet bann tel aksyon akoz definitivman, bann tel drwa ou privilez pou bezwen ganny denied.  Sa i en rezon, akoz kot prizon i annan en sistenm lenspeksyon ase strict, malgre i annan ankor bokou potansyel pou amelyorasyon.

Mr Deputy, i bon note ki servis prizon i merit fer plis ankor pou cater pou bann diferan kategori prizonnyen.  La mon oule fer mansyon spesyal pou bann prizonnyen madanm, bann juvenile ouswa bann zenn anba laz.  Isi Sesel, nou napa santans lanmor me nou annan prizonnyen ki pe servi bann long santans e menm santans lavi prizon.  I enportan alors ki dan lenplimantasyon e zesyon sa plan stratezik, konsiderasyon serye i ganny pran pou en pli sistenm segeragasyon pou sa bann diferan kategori prizonnyen.  Ozordi, popilasyon prizon i enn ki tre o akoz bann dimoun ki lo remann pe an prensip servi menm fasilite avek bann kondannen.  Dan sa limenm, i kree en problenm konzesyon.  La mon panse ki tou bann partener konsernen i merit entansifye zefor pou ede adres sa sitiasyon.  La mon pe koz lo lotorite prizon limenm, lapolis, lofis prokirer zeneral e menm nou bann Lakour.  En tel sitiasyon, sirtou ler konviksyon i pran en kantite letan, i  met en kantite presyon lo sa resours limite ki prizon i annan.

Mr Deputy pou terminen, mon ti a kontan komann travay ki staff prizon pe fer.  Zot resevwar bann endividi ki legalman in perdi serten zot drwa e privilez.  Zot alors annan sa responsabilite pou gard zot sen e sof, pandan ki zot pe deservi zot santans e evantyelman remet zot dan lakominote.  Zot travay pa enn ki fasil me i enn ki very stressful dan bokou ka.  Nou santi ki i annan en mankman lo kote training bann staff. Sa i en eleman primordyal, loperasyon sa Lenstitisyon.  Malgre tou difikilte ki zot fer fas avek, mon personnelman kontan note ki zot travay tre, tre dir.  I reste en rol fondamantal manm staff prizon pou protez sa bann kondannen.  Respekte zot e asire ki an retour, bann prizonnyen i respekte zot.  Sa i le sel fason ki prizon Sesel i kapab arive realiz sa plan stratezik 2012-2016.  La mon konstate ki capacity building i ganny konsidere koman en rol primordyal lo azanda management prizon e staff sa lenstitisyon.  Kot sa i kapab ganny aplike dan tou konteks lokal pou meyer reabilitasyon nou bann kondannen.  Alors Mr Deputy, si tou bann ki konsernen avek vwar en sosyete sen kot i annan en rediksyon dan to kriminalite e kot bann ki deza kondannen i kapab transform zot lavi pou le meyer, mon senserman konvenki ki sa ki Onorrab Barbe pe demande dan son Mosyon pou gradyelman vin en realite.  Sa pou selman posib si i annan en zefor kolektiv sorti kot tou parteners ki enplike.  Mon swe senser se vwar en sosyete kot nou bann zenn i partisip e zwe en rol kle dan konstriksyon e devlopman nou sosyete, olye vwar zot behind bars.  Mersi Mr Deputy Speaker.

 

MR DEPUTY SPEAKER

Onorab Pierre

 

HON DAVID PIERRE

Mersi Mr Deputy.  Mr Deputy, mon pou komanse an dizan ki mon siport lide sa Mosyon akoz sa Mosyon pe demande ki i enportan ki nou favoriz en lapros drwa imen dan zesyon prizon e reabilitasyon bann kondannen.  Mon san poursan anver sa.  Be Mr Deputy, letan ki mon get sa dokiman, Seychelles Prison Service, strategic plan 2012-2016, mon konstate ki i annan 2 keksoz ki vreman serye about sa dokiman.  Premyerman, ler ou lir li antye e letan ou read between the lines, ou realize poudir i annan problenm serye dan prizon.  Nimero 1.  Dezyenmman, letan ou get sa plan, i pa donn ou ase detay pou krwar ki sa plan i en plan ki realistik pou 4an, pou en lespas 4an.  Mon dir 4an Mr Deputy akoz 2012 in fini koule e sa plan i enn ki pou ale, ki sipoze ganny realize par 2016.  I pa realistik dan le sans ki demann ki sa dokiman pe fer, i sitan bokou, resours ki pou demande pou ki sa dokiman i kapab vin en plan ki ganny realize i larz Mr Deputy.  Mon ti ava kontan toudmenm, ganny asire ki sa bann dimoun ki’n met sa plan debout, mon ti a kontan zot garanti sa Lasanble ki sa i kapab ganny realize dan 4an.  Me i difisil Mr Deputy.  Akoz i difisil?  Letan ou get sa plan, ou realize poudir zot anvi fer en kantite keksoz e ou realize poudir prizon i lack en kantite keksoz fondamantal ki fer en bon prizon.  Premyerman, i demontre ou klerman poudir prizon napa bann staff kalifye, oubyen zot mank bann staff kalifye, oubyen zot mank bann staff ki alaoter pou desarz sa responsabilite difisil ki demande ki sorti kot en prizon.  I kler ladan, i dir ou poudir zot bezwen train en kantite staff. Zot bezwen rode sa bann staff e pou train e pou ganny sa bann staff i require en kantite resours.  I require resours finansyel e i require ki zot devlop bann schemes of service ki pou permet zot kapab retenir sa bann travayer, once ki sa bann travayer in ganny train.

Mr Deputy, sa dokiman i dir nou klerman ki we urgently need to improve human resource capacity of prison service. I pa en keksoz ki fasil.  E i dir ou klerman, this is the …………. of the strategic fourth goal. Zot bezwen, i neseser me i pa fasil akoz i require en kantite financial resources e i require pou rod the right personnel pou ou kapab fer li.

Dezyenm keksoz ki enteresan dan sa dokiman, se there is a need to improve our physical infrastructures.  We lack essential physical infrastructure like the perimeter fence, gate house, even Mr Deputy, exercise yard e menm a fire escape area.  Kimannyer nou kapab fer en prizon, kimannyer plan prizon i kapab ganny aprouve, si i napa ni menm en fire escape area? E pou redres sa sitiasyon, again nou bezwen financial resources.  And the State, the Government i bezwen provide sa bann resours pou nou kapab fer sa arive.

I annan bann lezot problenm Mr Deputy.  I koz lo the international covenant on civil and political rights e i dir klerman poudir all persons deprived of their liberty shall be treated with humanity and with respect for the imparent dignity of the human person. Ozordi dan prizon, letan ou koz avek bann paran, ki al vizit prizon, baze lo sa ki zot bann zanfan in dir zot, i kler ki i annan move tretman prizonnyen.  I annan move tretman prizonnyen, pa akoz bannla i krwar poudir prizonnyen i devret ganny maltrete, me zot pa weltrained pou zot kapab deal avek bann diferan behaviours ki prizonnyen i demontre dan en prizon.  Pou ou kapab fer sa effectively Mr Deputy, ou bezwen bann dimoun ki ganny train pou fer sa travay.  E lanmenm la, sa i reprezant a huge impediment progre e pou lafason ki prizon i ganny administre.  E i kler, i dir an pli ba, the code of conduct for law enforcement officials, Article 2 i dir poudir the performance of their duty, law enforcement officials shall respect and protect human dignity and maintain and uphold the human right of all persons. Kimannyer ou fer sa si ou pa’n ganny train pou ou fer li?

Mr Deputy, i annan en kantite problenm.  Sa i donn mwan the impression poudir wi, sa bann dimoun i konnen ki zot la dan prizon, kwa ki zot bezwen fer, zot in fer en plan me selman pou 2012-2016, sa plan i pa enn ki realistik.  Nou ava trouve Mr Deputy, listwar i ava montre nou, letan 2016 pou’n arive, nou pou rekonstat sa dokiman e nou pou realize poudir en kantite keksoz zot in anvi achieve according to sa dokiman, pa pou’n ganny achieve.

Mr Deputy, i enportan ki sa Lasanble Nasyonal i lans en challenge avek Gouvernman.  Baze lo sa ki mon’n dir, i enportan ki nou lans en challenge avek Gouvernman.  I enportan pou nou demann Gouvernman pou vitman e dan en fason ferm, rekonsider sa bann pwen swivan.

Premyerman, vitman rod funds pou nou revwar lenfrastriktir prizon e pou nou fer bann koreksyon ki nou ti’n devret fer a long time ago, in fact nou devret fer bann koreksyon dan striktir prizon ki pa ti’n devret fer.  Legzanp ki mon’n donnen se ki fer sa koreksyon e fer sir ki i annan en fire escape area.  Sa i enn.  Dezyenm keksoz lo nivo lenfrastriktir, kimannyer tou sa letan Mr Deputy, Sesel koman en pei pankor kapab konstrir en sant rimann?  E ozordi nou vwar ki dan prizon i annan plis ki 100, almost 150, si mon korek, si mon’n tann sa sif byen, almost 150 dimoun, nou pa kapab dir zot prizonnyen, ki lo rimann.  Zot lo rimann me zot dan prizon.  Mr Deputy, this is not acceptable. Sa bann dimoun ki lo rimann, zot pankor ganny kondannen.  Zot case pankor fini Ankour e Lakour pankor trouv zot koupab.  E alors, zot pa devret parmi prizonnyen.  Mon krwar sa i en lapel ki Lasanble Nasyonal ozordi i devret lans avek Gouvernman e demann li pou rod funds pou konstrir en sant rimann.

Dezyenm keksoz lo lenfrastriktir, se en sant juvenile.  Sa osi i egalman enportan.  Ozordi dan prizon Sesel, i sad, nou vwar poudir tou kalite prizonnyen pe frot zepol avek kanmarad e dan labsans en bon progranm reabilitasyon, olye ki sa bann prizonnyen ki pli feb i ganny reabilite, zot plito ganny enfliyanse dan en fason negativ e sorti dan prizon koman bann dimoun ki pa’n ganny reabilite, me bann dimoun ki’n aprann bann nouvo teknik lo kimannyer pou al fer bann krim dan en pli o nivo, kot zot pa pou ganny detekte.  Mr Deputy, sa pou mwan i very sad.

Dezyenm keksoz ki nou ti a kontan lans avek Gouvernman se donn nou prizon, donn Sesel en bon progranm reabilitasyon.  Mr Deputy, prizon Sesel in egziste pou en kantite letan e mon pa pe ganny en konpran as to akoz, up to ozordi, nou pankor kapab annan en bon progranm reabilitasyon dan nou prizon.  Mr Deputy, i require en kantite resours pou nou fer sa, me selman i devret ganny trouve koman en keksoz ki enportan pou lasosyete.  I enportan pou sa bann dimoun ki dan prizon, i enportan pou lasosyete akoz ler en prizonnyen i sorti dan prizon, i devret kapab ganny re-entegre dan lasosyete fasilman akoz in ganny reabilite pandan ki i dan prizon e mon krwar poudir tou Manm Parlman ozordi dan sa Lasanble Nasyonal pou dakor avek mwan poudir nou bezwen en progranm solid, en progranm reabilitasyon solid pou nou bann prizon isi Sesel e pou nou bann prizonnyen.  I egalman enportan ki bann prizonnyen i ganny sa kalite nivo councelling ki zot devret pe gannyen and again, sa i pou require en kantite resours.  Mon konnen, mon’n en ansennyan pou en kantite letan, mon konnen ki kalite problenm ki bann lekol i gannyen an relasyon avek councellors.  A lack of councellors. Si mon kapab servi sa term.  Mon konnen nou napa, me kot nou prizon, i absoliman esansyel ki nou annan en servis councelling ki alaoter akoz sa i pou ede dan sa progranm reabilitasyon ki nou bezwen pou nou prizon e nou bann prizonnyen isi Sesel.

Mr Deputy, i pou enportan ki nou sanz mindset nou bann prizonnyen.  Zot mind set ti vize ver fer bann keksoz ki pa akseptab dan sosyete.  Se pour sa rezon ki zot dan prizon.  Swa zot in vole, i annan ki’n touye, i annan ki’n rape, i annan ki’n abiz bann manrmay anba laz.  This is not the proper mindset pou en endividi.  E letan ki zot dan prizon, nou bezwen ed zot.  Nou bezwen kapab fer zot sanze sa mindset.  Nou bezwen kapab fer zot vwar lavi dan en lot fason.  Pou nou fer sa, nou bezwen bann profesyonnel pou fer li.  Nou bezwen bann dimoun ki’n ganny train dan sa bann areas pou fer sa travay.  Alors, annou donn nou prizon sa bann travayer.  Annou donn nou prizon sa bann dimoun ki pou vreman kapab ed nou bann prizonnyen.  Sa progranm, sa plan stratezik i dir nou sa, me sa ki nou anvi vwar se ki resours i ganny donnen par Gouvernman pou met sa bann progranm an aplikasyon e pou nou kapab vreman realiz sa plan stratezik dan en lespas 4an ant 2012 ek 2016.

Mr Deputy, trwazyenm keksoz ki nou pou demann Gouvernman, trwazyenm challenge i se ki pou fer sir ki i annan en bon progranm training pou nou bann prizonnyen.  Reabilitasyon, nou’n koz lo la, me avek sa i bezwen annan en bon progranm training. Bann prizonnyen i bezwen ganny sa posibilite pou zot ganny train dan en keksoz ki zot kapab fer byen pou ki sa i kapab ganny devlop dan en travay, dan en karyer, apre ki zot in sorti dan prizon.  Nou pa kapab afford Mr Deputy, pou les nou bann zenn ki’n fer en fot dan zot lavi, antre dan en prizon e sorti koman en zenn ki pa’n ganny en posibilite pou li kapab ganny re-entegre dan en fason efektiv dan lasosyete.  E pou li kapab ganny re-entegre, i bezwen kapab ganny serten training pou li devlop serten skill ki i kapab servi letan i reantre dan lasosyete.  Nou bezwen annan en progranm kot bann prizonnyen i kapab ganny en morso ledikasyon.  I kapab devlop sa ki zot in gannyen letan zot ti dan lekol.  Si en prizonnyen par egzanp in sorti lekol nivo S5, nou devret kapab annan en pti progranm dan prizon, depandan lo son letan ki i pe fer, pou li kapab devlop son kapasite even further.  Se sa ki pou ed li, se sa ki pou fer li santi poudir yes, dan prizon mon’n vwar en lot realite lavi.  Dan prizon, mon’n nobou aquire serten skills ki pou fer mwan kapab re-entegre dan sosyete e kot mon a servi sa skill pou mwan kapab ganny mon lavi demen, san ki mon bezwen al vole oubyen al fer bann lezot krim.  Mon krwar i primordyal e i enportan ki nou fer li pou nou bann zenn, ki parey mon’n dir oparavan, ki’n fer en fot oubyen 2 fot dan zot lavi.  Annou pa fer fot fer trwazyenm, bann ki’n fer 2, oubyen annou pa fer zot repet dezyenm, bann ki’n fer en fot.

Katriyenm keksoz ki mon ti a kontan lasosyete i konsidere, mon ti a kontan Gouvernman i konsidere se letan sa bann prizonnyen in sorti dan prizon, kimannyer nou efektivman re-entegre sa bann prizonnyen dan lasosyete?  Mr Deputy, nou tou koman politisyen, nou’n ganny serten prizonnyen, nou’n ganny serten endividi ki’n fini son santans dan prizon e ki’n von kot nou pou rod led, pou rod lasistans.  E letan ou asize ou koz avek sa bann prizonnyen, i sagrinab pou ou vwar bann impediments ki lasosyete i mete devan zot e anpes zot kapab re-entegre zot dan en travay dan lasosyete.  E mwan, mon pe demande ki sa bann impediments ki ganny mete i ganny retire.  So, i en progranm konplet.  Zot dan prizon, zot ganny tou sa lasistans posib, zot ganny councelling, zot ganny train, zot aprann en travay, zot fini zot santans, zot antre dan lososyete, zot ganny re-entegre, zot ganny en travay e zot viv en lavi normal.  Sa i pou en huge benefit for society an zeneral.  Pa zis pou sa prizonnyen, pou lasosyete an zeneral.  E mon dir lasosyete Mr Deputy, akoz si sa pa arive e si nou les sa prizonnyen sorti dan prizon avek en mindset kot i mazinen poudir mon bezwen al fer en lot krim pou mwan survive.  Sa lot krim ki sa prizonnyen i fer i kapab enn ki tonm devan no laport.  So, mon pe dir i pou en benefis pou lasosyete an zeneral.

Sizyenm keksoz ki mon ti a kontan met devan Mr Deputy, se ki mon’n koz lo training dan prizon, mon’n koz lo training akademik.  Nou bezwen annan en progranm vokasyonnel pou bann prizonnyen.  Bokou sa bann prizonnyen ki dan prizon e mon konn sa atraver mon leksperyans dan lekol.  Zot annan, malgre ki zot kapab feb akademikman.  Bokou zot, i kapab feb akademikman, me zot annan bann talan lo nivo teknik oubyen lo nivo vokasyonnel.  E nou, nou bezwen donn zot sa posibilite pou zot devlop sa talan.  Donn zot sa sans pou aprann lagrikiltir.  Lagrikiltir dan son vre sans Mr Deputy.  Son pti bout akademik e son bout pratik.  Donn zot sa kapasite pou zot aprann e devlope pou zot vin en sarpantye, en mason, en mekannisyen.  E Mr Deputy, nou a ganny bann dimoun ki sorti dan prizon avek bann skills ki zot kapab servi pou zot viv dan sosyete, pou zot bouze.

E setyenm keksoz ki mon ti a kontan dir sa Lasanble e sa i en keksoz ki fatig mwan, Mr Deputy, kalite servis lo nivo lasante ki nou donn nou bann prizonnyen.  Bokou bann prizonnyen, swa letan zot dan prizon zot devlop serten kondisyon medikal, oubyen menm avan ki zot ti antre dan prizon, zot ti annan serten kondisyon medikal ki warant serten soz spesyal.  Zot bezwen ganny bann lasistans spesyal, zot bezwen ganny bann tretman spesyal e mon krwar ki bann travayer, bann gard prizonnyen, bann dimoun ki travay ek bann prizonnyen, i devret devlop e annan sa skills pou zot konnen kimannyer pou tret sa bann prizonnyen letan ki zot maladi i devlope, oubyen bann ki devlop serten sitiasyon en sel kou, kimannyer nou pou deal avek sa sitiasyon?  In annan tro bokou konplent dan prizon ki bann prizonnyen i mal ganny trete an relasyon avek zot kondisyon lasante.  So pou mwan, sa i form parti Mr Deputy, dan kalite tretman ki nou bezwen donn nou bann prizonnyen.  Nou pe koz lo tret zot avek human dignity, nou pe koz tretman with humanity, mon krwar poudir moman in arive pou nou kapab omwen elev nou prizon e anmenn li lo sa nivo.  Si Mr Deputy, nou kapab fer sa ki ladan vin en realite, within 4 years, mon krwar i pou en huge leap anver better democracy dan sa pei.  E mon krwar poudir lemonn i ava get Sesel avek en lizye menm pli favorab ki zot pe get li ozordi.

Mr Deputy, mon pa pou koz lo bann lezot pwen ki bann Manm in refer sorti akoz nou napa letan, me toudmenm mon ti ava kontan ki sa 7 pwen ki mon’n met devan i bann pwen ki ganny pran an konsiderasyon, ki ganny pran lo en nivo serye.  Mr Deputy, mon pou siport sa Mosyon.  Mersi.

 

MR DEPUTY SPEAKER

Onorab Rose.

 

HON MARIE-ANTOINETTE ROSE

Mersi Mr Deputy.  Mr Deputy mon pa pou long akoz mon krwar tou sa ki merit ganny dir in ganny dir e plis.  Mon annan zis 2 pwen pou mwan fer.  Enn mon ti a kontan remind the House ki sa Mosyon is about Prison Management. I lo management prizon lo en plan 4an.  I pa lo Management Lekol, avan sa dimoun i vin en prizonnyen e i pa lo Management Welfare Agency, ler sa dimoun in sorti.  It is about what happens pandan prizon, pandan letan ki sa dimoun i en prizonnyen.  E mon krwar nou bezwen focus lo la.  I en plan daksyon on Prison Management e i a 4 year plan on the management of prison. Sa i mon premye pwen.

Dezyenm pwen Mr Deputy, mon pa pou defann en plan ki pa’n marse avan sa plan me mon pou annan tou lentere pou mwan defann en plan ki esey rektifye bann problenm, ki’n fer ki prizon pa marse e mon krwar se sa ki mover Mosyon pe met devan nou.  I pe met devan nou lefe ki ozordi nou annan en plan e Leader Lopozisyon in dir it’s too ambitious for 4 years. I disagree akoz mon vreman en pti pe konfize avek son pozisyon lo it’s too ambitious but we have to implement it. I pe dir nou ki sa progranm pa preski pa kapab ganny enplimante dan 4an.  Me in osi met devan nou plizyer pwen, ki in dir i bezwen vitman ganny enplimante.  E vitman bezwen ganny enplimante….

 

MR DEPUTY SPEAKER

Order.

 

HON MARIE-ANTOINETTE ROSE

Nou napa plis ki 4an.  Nou’n donn 4an e 4an pou nou i vitman.  Ou pa kapab dir nou, annou vitman fer sa 7 pwen me ou pa pou kapab fer li dan 4an.  Mon en pti pe konfize par sa pozisyon.  Mon soulaze kantmenm ki i pe siport lide sa Mosyon.  Mon pa vwar li too ambitious akoz mon vwar li koman bann problenm fondamantal parey tou bann Manm in fer resorti e Leader Lopozisyon in fer resorti, bann problenm fondamantal ki enn, Gouvernman in rekonnet i egziste, management prizon in rekonnet i egziste, sosyete i rekonnet i egziste e nou rekonnet lirzans rektifye sa bann problenm e sa i rezon akoz nou vreman bezwen en plan imedyat e en plan kourt term, pou nou kapab rezourd bann problenm ki’n ganny met ater devan nou.  Problenm Human Resource Management, problenm physical infrastructure.  Tou sa bann problenm e nou dir i bann problenm fondamantal, i bann problenm grav.  Now, ler nou pe koz prizon, nou pa pe koz zis prizonnyen antre sorti.  Nou pe koz lo en Lenstitisyon tre enportan dan nou sosyete e kestyon ki’n ganny poze se whether sa Lenstitisyon i harden bann criminals oubyen i reform zot an preparasyon pou zot kontinny zot lavi dan sosyete e lefe ki en kantite zenn pe antre dan prizon e si sa pou fer zot vin bann pli bon sitwayen alavenir oubyen non.  E ki kou nou mete avek?  Mon krwar nou bezwen a tou pri, fer sir, enn, sa plan i marse e dezyenm rod tou finansman neseser pou fer sir sa plan i marse.  En prizon dan en pei i si oule sa lantonnwanr ki pran tou kriminel i met ansanm, i separ zot, i anmas zot, savedir i fer sir ki i annan lape e stabilite dan sosyete e lavi sivil andeor, i esey anmas tou kriminel e ladan i en lantonnwanr ki fer pase, bann hardened criminals i ganny reste anndan e bann ki kapab reabilite i ganny reabilite.  That’s a point ki Onorab Barbe in met devan.  E mon krwar si Gouvernman in met sa plan ater4an, Gouvernman i bezwen rod finansman pou sa plan.  I bezwen rod finansman e i annan bokou keksoz ki pe ganny fer e annou pa bliy travay konzwent ki Sesel pe fer avek UNODC, kot en kantite sipor pe sorti zisteman avek UNODC, me i en lenvestisman ki bezwen ganny fer e mwan mon pa vwar li ambitious. Koumsanmenm mon ti anvi mete.  Mon pa vwar li ambitious, mon vwar li neseser e bezwen ganny fer imedyat e sa i rezon akoz nou bezwen nou Lasanble, pronons nou lekor lo sa plan e donn li tou sipor neseser e ler Bidze i pas devan nou, nou bezwen fer sir ki bann sipor finansman ki nou’n koz lo la i ganny reflekte dan Bidze.  Nou bezwen deal avek sa problenm imedyatman e imedyatman se 4an.  Mersi.

 

MR DEPUTY SPEAKER

Right of reply, Onorab Barbe.

 

HON NICHOLE BARBE

Mersi Mr Deputy.  Mon ti a kontan premyerman remersye tou bann entervenan lo sa Mosyon.  Mon oule zis re-iterate mon Mosyon.  Mon Mosyon i lir koumsa:- Sa Lasanble i eksprim sipor anver nouvo plan stratezik 2012-2016, servis prizon Sesel ki favoriz en lapros drwa imen dan zesyon prizon e reabilitasyon bann kondannen, non pa son laspe finansyel.

Parey in ganny fer sorti dan bann deliberasyon, en prizon i annan 2 fonksyon prensipal, enn se enkarserayon, parey bann diskisyon in ganny leve e dezyenm fonksyon en prizon se reabilitasyon bann endividi ki’n ganny remet anba kontrol Lotorite Prizon.  I egalman enportan ki nou rapel ki prizon i osi azir koman en form proteksyon pou sosyete, parey Onorab Rose in fer sorti.  Atraver enkarserasyon bann kriminel ki tro danzere pou viv dan kominote e tou bann entervenan lo sa Mosyon in kouver preski tou bann pwen ki das a plan stratezik 2012-2016 e bann pwen pertinan se provizyon i annan pou en juvenile facility separe.  I osi annan provizyon ki bann rimann i ganny separe avek bann kondannen e pwen fondamantal Mr Deputy se ki prizon i bezwen en bon progranm reabilitasyon e premyerman ki vize ver rediksyon popilasyon prizon, avek sa i vin en rediksyon dan kou loperasyon prizon limenm e kou pep Seselwa, tax payer’s money.  E reabilitasyon i vedir mwens repeated offenders, setadir bann kondannen i rekomet krim plizyer fwa pou antre dan prizon e trwazyenmman reabilitasyon i osi servi pou focus e donn direksyon bann kondannen, sa i ava elev zot kalite lavi e zeneralman donn zot en apersi pli pozitiv ki a son tour i amelyor konportman e bes lo nivo vyolans antre zot e benefis zeneral reabilitasyon set en bes dan to kriminalite a en kominote pli sen e an sekirite.

Mr Deputy, lentansyon par deryer sa Mosyon se lespwar.  Sa Mosyon pe target leker e lemosyon nou pep dan en fason ki pou fer nou reveye e realize ki nou annan en vre problenm e ki in plis ki ler ki nou komans sers bann solisyon alternativ pou akonpanny nou bann fason fer labitid e konvansyonnel.  Lespri Mosyon pe evoke ki nou tou nou pran an konsyans ki nou bezwen ede pou pous en solisyon e ki kontribisyon sak endividi i enportan.

Pou terminen, mon ti a kontan demann tou Manm pou donn zot sipor a sa Mosyon akoz en sipor pou sa plan stratezik lotorite prizon i devret kont koman en sipor pou ede ranforsi fabrik nou sosyete.  Mersi Mr Deputy.

 

MR DEPUTY SPEAKER

Bon, in ariv ler pou nou pran en vot lo sa Mosyon.  Tou bann ki an faver lev zot lanmen?  Inanim, Mosyon in aprouve.

(Technical problem)

 

(Ajournment)