::
Home » Verbatim » Verbatim - Second Term 2012 » Tuesday 31st July 2012

Tuesday 31st July 2012

 

Download PDF

 

________________________________________________________________________________________

 

NATIONAL ASSEMBLY OF SEYCHELLES

Tuesday 31st July 2012

The Assembly met at 9.00 am

National Anthem

Moment of Reflection

Mr Speaker in the Chair

 

MR SPEAKER

Bonzour tou bann Manm Lasanble Nasyonal, bonzour Minis ek son delegasyon.  Ozordi nou bezwen konport nou en pti pe pli byen ki labitid akoz nou annan bann Police Young Leaders anler.  Nou a swet zot labyenveni parmi nou e nou ava komanse ozordi avek Minis Peter Sinon, ki Minis pou Resours Natirel e Lendistri ki pe vin reponn plizyer kestyon konsernan son Minister.  Nou a komans avek kestyon 63, Onorab Arnephy.

 

HON BERNARD ARNEPHY

Mersi Mr Speaker.  Bonzour Mr Speaker, bonzour Minis avek ou delegasyon, bonzour tou bann koleg Manm Onorab e bonzour tou bann envite dan galeri.  Bonzour tou dimoun ki alekout.  Mr Speaker eski Minis ki responsab pou Resours Natirel e Lendistri I kapab enform zabitan Anse Boileau si son Minister I annan okenn plan pou konstri serten fasilite pou ed peser Anse Boileau ler zot sarz e desarz zot bato e osi pou store zot lekipman lapes.  Mersi.

 

MINISTER PETER SINON

Bonzour Mr Speaker, Onorab, tou prezan, envite dan galeri e tou ki alekout.  Mr Speaker dan son progranm pou sa lannen SFA napa en plan pou devlop fasilite Anse Boileau e mon dir pou sa lannen.

Distrik Anse Boileau in fek zwenn avek bann responsab lotorite lapes pou diskit lo devlopman fasilite pou son bann peser e SFA in met mwan okouran ki in konsey distrik Anse Boileau pou enn, fer zot demann ofisyel atraver en plan konsansyel avek tou parti prenan lo bann fasilite ki zot trouve zot bezwen pou amelyor fasilite pou lapes artizanal dan sa distrik.  De, propozisyon I ava ganny diskite e agree.  Sa ki le de kote I tonm dakor lo la I ava ganny konsidere par SFA pou ganny entegre dan son progranm devlopman pou lannen prosen.

Leksperyans Mr Speaker, in montre nou ki desizyon pou fer okenn lenfrastriktir pou peser fodre I enkli dan son letan konsepsyon bann peser e bann parti prenan zot menm.  Nou’n vwar dan lepase bazar ki’n fer e zanmen peser in servi.  Nou pa oule repet menm fot, alor pou Anse Boileau parey partou dan lezot distrik, SFA pou konsider en plan ki’n ganny formile e prenan kont bann akter ki pou servi sa bann lenfrastriktir.  Anse Boileau in ganny konseye pou pas atraver sa prosesis konsiltativ pou arive annan e finaliz en plan detaye lo kwa ki zot oule?  Kote zot oule sa bann lenfrastriktir? E prezant sa avek SFA.

Mr Speaker en distrik kot sa prosesis konsiltativ in deza ariv alafen I distrik Roche Caiman ki mwan menm mwan koman Minis ti pran par dan sa bann negosiasyon e ti pran detrwa meeting iteretiv avan ler nou’n arive lo en konsansis pou nou devlop sa landrwa, bann fasilite, store avek bazar avek lezot fasilite neseser.  Mersi Mr Speaker.

 

MR SPEAKER

Okenn siplemanter?

 

HON BERNARD ARNEPHY

Mersi Mr Speaker.  Mr Speaker an relasyon avek larepons ki Minis in donnen, apre ki sa plan ki Lotorite Distrik pou soumet avek son Minister, eski Minis I kapab dir nou kote finansman pou sorti pou realiz en tel proze?  E kimannyer bann zabitan direkteman pou benfisye atraver bann tel proze?  Mersi.

 

MINISTER PETER SINON

Mersi Mr Speaker.  Mr Speaker finansman pou bann devlopman artizanal, lapes artizanal pou sorti enn dan sa – en bout nou apel development fund ler nou’n negosye avek Linyon Eropeen, I annan en fon ki nou apel sa fon devlopman e sa I al pou lapes artizinal oubyen lapes semi-endistriyel ki fer par Seselwa.  E sa larzan pou sorti dan sa fon.  Mersi Mr Speaker

 

MR SPEAKER

Onorab Bresson.

 

HON GALEN BRESSON

Mersi Mr Speaker.  Bonzour tou dimoun alekout, bonzour tou bann Manm Onorab, Minis ek ou delegasyon e bann envite se bomaten dan Lasanble.  Minis vizavi ou larepons, eski ou kapab eksplik sa Lasanble, master plan ki Gouvernman I annan akoz apre tou domenn laspes I osi supply nou demann lokal e la ou’n dir klerman ki zot pe esper distrik Anse Boileau dir ki zot bezwen me mon krwar Gouvernman I bezwen annan en master plan.

 

MR SPEAKER

Kestyon Onorab, kestyon.

 

HON GALEN BRESSON

Eski ou kapab eksplike kimannyer sa I kapab fit dan zot master plan e si zot annan enn ki kapab fit ladan?  Mersi.

 

MINISTER PETER SINON

Mersi Mr Speaker.  Mr Speaker master plan SFA se pou annan konsiltasyon avek zot lo kot I konsern lapes artizanal pou nou devlop bann plan konkret kot nou’n diskite avek bann parti prenan ki pou servi sa bann lenfrastriktir parey mon’n dir tout aler nou’n pase dan lespase, nou’n annan master plan dan lepase, nou’n vini nou’n konstri bazar dan sak distrik, pti por ki swa in ganny servi ouswa pa pe ganny servi.  Dan master plan se pou e mon ensiste lo la se pou kot nou ale nou konsilte avek zot menm, avek District Administration, avek zot bann peser e lezot bann bazardye ki servi bazar pou ki ler nou fer en lenfrastriktir nou fer lenfrastriktir ki nou servi e nou ganny valer pou larzan ki nou met dan sa bann lenfrastriktir.  Mersi Mr Speaker.

 

MR SPEAKER

Onorab Bristol.

 

HON ALDERIC BRISTOL

Bonzour Mr Speaker, bonzour Minis ek ou delegasyon, bonzour tou bann Manm Onorab prezan e tou bann envite.  Vi ki sa problenm I reponn enpe partou dan Sesel apard ki Anse Boileau.  Eski Minis I kapab dir nou si son Minsiter I kapab speed up sa bann prosesis pou fer ki Anse Boileau I kapab benefisye avek sa bann fasilite e an retour bann lezot distrik ki ava vini apre.  Mersi bokou.

 

MINISTER PETER SINON

Mersi Mr Speaker.  Wi nou kapab speed up.  Nou bann teknisyen I kapab vin a lasistans bann distrik, bann Ladministrater Distrik, bann MNAs, bann dimoun parti prenan parey nou’n fer.  Par egzanp nou ape esey fer partou pou annan bann lasosiasyon fermye, I annan bann distrik parey Anse Boileau, Anse Royale, Bel Ombre, Anse Aux Pins kot mwan, kot I annan en kominote peser ki al lapes e ki annan detrwa bato e dan sa bann kominote nou oule enterakte pou nou improve fasilite artizanal e sa se bi sa development grant ki nou annan pou fer sa.  So I dan nou plan e mon krwar pou facilitate li mon remersye Onorab pou sa sizesyon pou nou osi olye esper ki zot zot vin kot nou petet nou osi fer sa zefor vin anver zot sa bann kominote e nou deza Bel Ombre, nou deza Roche Caiman, nou’n ale, nou’n koze, nou’n fer meeting apre meeting e Anse Royale li osi in apros SFA so sa dyalog konsiltativ in deza komanse me selman nou kapab definitivman speed it up. Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Bonzour Minis ek ou delegasyon.  Bonzour tou bann Manm koleg e bonzour bann zenn.  Minis mon ti a kontan demann ou sa kestyon swivan:  En pe plis ki 7an pase ti annan sa bann demann ki Onorab in demann ou ozordi par bann peser Anse Boileau.  Eski Minis I kapab dir avek sa Lasanble ki’n arive avek sa bann demann e akoz sa gran retar.

Dezyenmman, ki’n arive ki ozordi Minis pe demande ki I annan en diferan lapros vizavi sa size dan lesans ki I pe demande ki demann aprezan I vin ofisyel.  Mersi Mr Speaker.

 

MINISTER PETER SINON

Mersi Mr Speaker.  Mersi Onorab pou kestyon.  Premye larepons se sa retar ki’n arive.  Parfwa keksoz pli difisil selman ki paret tre fasil se pou nou asize e konnen e deisde kwa egzankteman ki nou oule?  Kote sa ki nou oule pou ete?  Ki lenpakt sa ki nou oule pou annan lo nou lanvironnman?  Tou sa bann keksoz, petet enn ler nou vini nou dir nou oule fasilite me kwa egzakteman nou bezwen al an detay pou get tou sa bann laspe, mon krwar se sa ki’n pas enpe retar e osi sa demann parler I ganny slide, I ganny met akote.  Ou annan ou en lentere apre sa follow up pa kontinnyen.

Dezyenmman parey ou konnen SFA limenm in pas dan en sanzman.  In annan dan son management en sanzman personnel, sanzman lapros, sanzman fer keksoz akoz I ti annan problenm dan SFA. Ozordi SFA I en diferan SFA ki 6an, 5an, 4an pase.  Mon krwar ki nou’n rekonnet sa bann fakter e ler nou pran sa bann fakter nou pou vwar ki I rezon ki sa bann demann pa zis pou Anse Royale, I pou en pe lezot mon krwar i kapab demann menm kestyon, I enpe partou.  Me sa development grant ti la e larzan I la e mon pou fer sir ki sa larzan I ganny depanse kot I devret ganny depanse.  Me Linyon Eropeen osi I get nou.  Nou pa pou kapab depans ankor son larzan ki nou larzan akoz in met a nou dispozisyon, apre li I vin gete I vwar bazar in vin laboutik, bazar I zwe domino lo la, bazar nou asize nou zwenn lo la parey Sant Kominoter.  Nou pa pou kapab akoz ler nou pou al negosye ankor zot pou vwar poudir nou pa serye.  Sa voyaz nou bezwen vreman serye.  Mersi Onorab.

 

MR SPEAKER

Kestyon 64.  Dan labsans Onorab Lucas mon demann Onorab Fideria pou demann kestyon.

 

HON EMMAUNUEL FIDERIA

Mersi Mr Speaker.  Bonzour Minis, bonzour tou envite dan galeri, bonzour mon bann koleg Manm Lasanble, bonzour Les Mamelles.  Kestyon, pou demann Minis lekel lazans ou Minister ki responsab pou mentenir bann semen, feeder road ki donn akse avek bann laferm pou bann fermye Val d’en Dor.

 

MINISTER PETER SINON

Mersi Mr Speaker.  Mr Speaker zeneralman, konstriksyon nouvo feeder roads I tonm anba mon Minister.  Me mon Minister an se moman ki mon ape koz avek ou pa responsab pou maintain oubyen maintenance okenn semen, menm bann semen feeder roads pou fermye.  Mon Minister I oule pli – oubyen pli presizeman Lazans Lagrikiltir pa ganny okenn Bidze pou mentenir e repar bann semen feeder roads ki deza egziste.

Dan distrik Baie Lazare Mr Speaker I annan apepre 4 kilomet semen ki deservi bann later ki’n ganny mete a dispozisyon fermye.  Ladan apepre 1.2 kilomet ti ganny fer anba proze ADB dan lannen 1995, 1996.  Nou kantmenm rekonnet ki maintenance feeder roads I bezwen ganny fer pou fasilit e kontinnyelman fasilit akse fermye pou zot vann zot prodwir e anmenn sa bann prodwir kot I neseser.  Ozordi, diferan lazans I pran par dan sa maintenance ki ganny fer.  Ladministrasyon Distrik, Minister Lanvironnman, Land Transport I zwe sakenn en pti rol, me selman I pa neseserman dan sa fason kordinen.  Mon pe propoze alor pou le fitir Lazans Lagrikiltir I travay direkteman avek Lazans Transpor lo later e Ladministrater Distrik pou arive idantifye kote maintenance I neseser, determin kou anyel pou mentenir sa bann semen e sa I a servi koman en baz pou demann en Bidze spesifik pou sa travay enportan.  Sa larzan I a swa ganny mete dan Bidze Lazans Lagrikiltir ouswa dan Lazans Transpor me I ganny spesifikman re-infence pou mentenir ouswa fer nouvo semen lagrikiltir.  Pou sa nou demann SLTA pou asiste avek evaliasyon bann travay ki neseser pou finalman annan en kou reel pou kapab permet nou met en demann dan prosen Bidze pou sa louvraz spesifik.

Mr Speaker si ou permet mwan, mon Minister pe travay lo en plan lenvestiman pou lagrikiltir.  Nou pe fer sa atraver CAADP ki Comprehensive Africa Agriculture Development Programme, ki form parti en progranm Linyon Afriken pou devlopman lagrikiltir dan Lafrik.  Sesel dan larezyon Losean Endyen I premye pei pou sinny sa compact avek CAADP.  Dan sa progranm mon’n deza dan mon bann parkour annan konsiltasyon e demann ki’n ganny fer avek bann lorganizasyon rezyonnal e enternasyonal.  Parmi I annan COMESA, I annan NEPAD, I annan FAO, I annan IFAD, I annan ADB.  Mon’n fer sa akoz ler mon ti al meeting avek mon bann koleg Minis Agrikiltir Afriken, zot in dir poudir zot in sinnyen progranm CAADP me problenm ki zot remarke se ki ler zot in fini fer progranm, ler zot in fini fer plan lenvestisman, ler zot fer tab-de-ronn pou rod finansman, zot vwar poudir tou dimoun I dir ou annan en zoli plan, we will get back to you. Mon pa dan sa zwe.  Dan sa plan nou pe enkli renovasyon e konstriksyon nouvo feeder roads pou fermye.  Mersi Mr Speaker.

 

MR SPEAKER

Okenn siplemanter.

 

HON EMMAUNEL FIDERIA

Wi Mr Speaker.  Mr Speaker, ek larepons ki Minis in donn nou, antretan ki sa bann plan ler I pare, eski Minis I kapab dir nou dan limedya si I annan serten travay ki kapab ganny fer pou maintain sa bann semen?  Mersi.

MINISTER PETER SINON

Mersi Mr Speaker.  Mr Speaker pou le moman pou kapab devlop – nou annan bezwen pou envestir dan konstriksyon apepre 2.5 kilomet semen ki si nou pou met en kou avek apre ki nou’n konsilte avek Land Transport pou kout nou apepre R10.2 milyon.  E pou mentenir sa bann semen pou kout nou apepre R375 mil tou le 3 mwan.  Sa se advise Land Transport.

Dan Bidze ki Lazans Lagrikiltir in gannyen sa lannen, napa en kantite larzan pou fer sa bann semen ki mon pe dir.  Pou lannen pase, nou ti ganny R600 mil anba Capital Projects pou konstriksyon semen e mazorite sa larzan in ganny servi pou fer semen dan Anse Boileau ki ti a se moman la en priyorite.  Sa lannen nou’n ganny R150 mil e nou pe al fer 68 met semen dan Val d’en Dor pou ki I deservi 6 laferm.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker eski Minis I kapab enform sa Lasanble ki kriter ki zot servi pou determinen lekel priyorite pou swa fer nouvo semen ouswa pou amelyor existing road, an vi ki I annan bokou laferm ki pe ganny administre par Lazans Lagrikiltir me ki ziska ozordi napa en proper access e nou, nou pe koz lo sekirite alimanter, pe demann fermye pou prodwir plis manze me zot napa fasilite adekwa tel ki bann semen pou permet zot kapab fer zot bann aktivite.  Mersi.

 

MINISTER PETER SINON

Mersi bokou Mr Speaker.  Ki kriter nou servi pou determin priyorite?  Kriter I enn baze lo ki kantite resours nou annan pou nou kapab fer semen.  Sa I kriter limero enn.  I annan ki lontan I la pe esper en semen, me selman pou ou ariv kot li ou pou bezwen kas ros, ou pou bezwen fer en pon parey en laferm mon fek vizite, ou pou bezwen fer en pon, ou bezwen dan lot ka argue konpansasyon akoz ou oule access lo later en lot dimoun, ou bezwen annan sa konpansasyon pou peye.  So kriter I toultan baze lo ki mwan mon vwar se lo resours ki nou annan.  Ou dir be ok, annou fer semen pou sa 6 fermye akoz nou kapab fer sa semen pou sa Bidze ki nou annan, annou ed sa 6 fermye.  I annan ki I annan de zan e de zan I pe espere.  Parey mon fek dir taler.  Si nou pou fer sa 2.5 kilomet semen ki nou bezwen e sa 2.5 kilomet semen I tonm dan sa bann ki ou pe dir, nou bezwen R10.2 milyon.  Sa R10.2 milyon mon pe ekspekte kapab mobiliz li dan sa plan lenvestisman ki nou annan pou lagrikiltir e travay pe ganny fer, travay dir pe ganny fer ler mon pe koz sa mon pa pe koz en rev ki mon pe reve mon pe koz ou en misyon EFAD ki pe vini le 7 Out ziska le 14 Out.  Mon pe koz ou en misyon ADB ki pe vini le 12 Out ziska le 21 Out.  Travay in fer e zot in aksepte pou vin ed nou pou fer sa plan lenvestimsan.

Mr Speaker mon ti pou dir sa taler me selman mon bezwen dir la ki mon pou vin devan sa Lasanble avek en Statement pou detaye lo sa bann lenvestiman ki mon pe koz lo la akoz I pa pe reponn okenn kestyon me selman mon krwar ki mon pou bezwen met li pou reponn bann kestyon siplemanter, en travay ki nou pe fer ki pou reponn sa bann keksoz ki nou pa kapab, ki nou pa ti ankor kapab fer ziska ozordi dan sekter lagrikiltir.  Mersi Mr Speaker.

 

MR SPEAKER

Onorab Samson.

 

HON DERECK SAMSON

Mersi Mr Speaker e bonzour, Minis ek ou delegasyon.  Tou koleg Manm Lasanble, bonzour e bann envite Young Police Leaders, bonzour.  Mr Speaker, eski Minis i kapab sit devan nou Lasanble, apard kas ros, topografi teren, ki bann lezot kalite problenm ki egziste kot i konsern semen pou bann fermye?  Mersi.

 

MINISTER PETER SINON

Mersi Mr Speaker.  Mr Speaker, i annan en kantite problenm, enn parmi ki mon’n mansyonnen se akse, way leave. Parler ou ganny fer en laferm ki par deryer en propriyete, sa propriyete i en propriyete prive e pa tou dimoun ki oule semen i pas lo son later, menm ki sa dimoun devan li osi in ganny en later avek Gouvernman menm.  Alors i en negosiasyon ki prolonge.

Dezyenmman, resours parey mon’n dir ou.

Trwazyenmman lezot ki nou gannyen se aktyelman, nou annan Praslin, nou annan La Digue, nou annan partou Mahe, e pou kordin en lekip, nou resours i en pe limite dan Minister Lagrikiltir limenm.  Kordin en lekip, se pourkwa nou sey travay avek Land Transport pou nou kapab determinen akoz pou ou kapab demarke kot semen pou pase eksetera, i pran en pe ekspertiz ki petet an deor nou Minister.  E nou bezwen al rod sa bann ekspertiz e parfwa ou oule al dan prive, me i koute.  E Land Transport li osi son bann ezenyer i annan en kantite travay pou fer.  Me selman zot seye, zot sey ed nou maksimonm ki zot kapab.  mersi.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, mon ti a kontan demann Minis.  Eski Minis i kapab donn en garanti konkret bann fermye Val d’en Dor ki napa pou le moman en access road ki ariv kot zot, ki ou Minister i rekonnet sa e i pe pran li o serye e i pou rezourd sa problenm o pli vit posib.

E dezyenmman, eski Minis i kapab egalman donn en garanti ki bann semen ki deza egziste, ki zot in evalye e vwar ki son kondisyon i pa bon, ki ou Minister pou fer tou sa ki i kapab pou li met sa bann semen a en kondisyon rezonnab pou sa bann fermye kapab servi dan en pli kourt dele letan.  Mersi Mr Speaker.

 

MINISTER PETER SINON

Mersi Mr Speaker.  Mr Speaker, sa bann zafer garanti la, sa ki mon kapab donn garanti Onorab se ki mon Minister i pran sa issue feeder roads e access to farms, nou bann laferm koman tre tre enportan.  Si en dimoun pe prodwir, i bezwen fer sawa pou anmenn son fimyen kot li, i bezwen fer sawa pou anmenn son legim borlanmer, i perdi en kantite letan, i perdi en kantite lenerzi e en zour i pou aret plante.  Sa garanti mon kapab donn ou ki nou lo teren, sa plan ki nou pe fer, sa plan lenvestisman in anmenn nou lo teren, diskit ek fermye e vwar sa bann problenm pou nou menm.  Sa semenn menm mon ti lo teren kot ti annan en ka kot en fermye, en msye avek son manman akote kanmarad, toulede napa semen.  E i ti eksplik mwan kimannyer sa travay i dir e kimannyer i santi i ti kapab progres bokou pli lwen si son bann keksoz ti kapab ariv kot son farm gate pou li kapab travay.  Dan sa plan ki mon’n dir mon pou revin kot ou, kekfwa ou a kapab vwar ki kantite serye nou serye lo sa issue e i vre nou pou definitivman fer sir ki nou fer sa bann travay dan en dele pli kourt term posib.  Nou’n ariv en gran zistans me i ankor annan en pti parkour pou nou ale avan ler nou vwar sa sou, sa bann dolar vin Sesel pou nou fer sa bann kontribisyon.  E mon ti a kontan pran sa lokazyon Mr Speaker, avek ou permisyon pou remersye Minister Finans akoz in fasilit nou dyalog avek sa bann lorganizasyon enternasyonal ki tonm anba son lanmen, par egzanp ADB, par egzanp IFAD e lezot.  Mon ti a kontan remersye mon koleg Minis Laporte e son bann teknisyen ki’n ed nou.  Mersi bokou.

 

MR SPEAKER

Kestyon 65, Onorab Fideria.

 

HON EMMANUEL FIDERIA

Mersi Mr Speaker.  Mr Speaker, eski Minis pou Resours Natirel e Lendistri i kapab eksplik sa Lasanble ki bann nouvo devlopman ki pe arive an sa ki konsern Feed Factory. Mersi.

 

MINISTER PETER SINON

Mersi Mr Speaker.  Parey nou konnen, sa fasilite prodiksyon manze zannimo ki ti propriyete Gouvernman ti ganny pase avek Seychelles Farmers Marketing Co-operative SFMC an lannen 2009 pou R1.  Malerazman, ver lafen lannen pase, SFMC ti deklare ki zot pe ganny difikilte e zot pa pou kapab kontinnyen fer marse lizin manze.  Dan sa lagreman, atraver ki sa fasilite ti pase avek SFMC, ti annan en kondisyon ki ti spesifye ki si SFMC pa kapab fer marse sa bann fasilite, Gouvernman ti pou annan opsyon ouswa pou repran sa fasilite.  Par konsekans, Gouvernman in repran sa bann fasilite e in met zot lo tender avek bi ganny sa dimoun oubyen sa lakonpannyen pli kapab pou fer fonksyonnen sa lizin dan en fason pli efikas.  Apre ki Gouvernman in repran e lans sa tender ver lafen lannen pase, zis 2 bid ti kalifye e ti ganny soumet pou konsiderasyon e evalyasyon.  Sa ti menm apre ki Gouvernman ti prolonz dat pou sa ki enterese pou soumet zot bid.  Parmi sa 2 bid, enn ti par en etranze ki ti selman enterese avek sa lizin manze e li i ti oule fer lezot aktivite dan sa landrwa e manze zannimo pa ti paret son premye lentere.  Dezyenm bid ti sorti kot en Seselwa Mr Neville Adeline e li in propoz fer fonksyonnen tou le 3 fasilite ki ti met lo tender, savedir lizin manze, labatwar avek hatchery. Lo baz sa 2 bid, e lobzektiv Gouvernman pou asir sipor meyer posib pou sekter agrikol, Gouvernman in deside donn sa tender Mr Adeline.  Mr Adeline ki’n fini ganny enformen lo sa desizyon in dakor e i pe pran posesyon sa fasilite le 1 Out 2012.  E de la, i pou responsab pou fer renovasyon neseser e fer fonksyonnen sa lizin.

Dapre diskisyon ki’n ganny fer avek Mr Adeline, i pou bezwen en pe letan pou repar sa landrwa e son lekipman avan i komans prodwi manze zannimo.  Alor nou ekspekte ki sa lizin i komans fonksyonnen ver lafen sa lannen ou boner lannen 2013.  La nou espere ki byento, avek demars Mr Adeline, nou bann fermye pa pou bezwen fer fas avek bann difikilte manze zannimo, ki zot ti pe fer fas avek e zot in fer fas avek pandan preski 1an.  Mersi Mr Speaker.

 

MR SPEAKER

Okenn siplemanter?

 

 

 

HON EMMANUEL FIDERIA

Wi Mr Speaker.  Mr Speaker, an repons ki Minis in donn nou, eski i kapab enform sa Lasanble si i pli bon marse pou enport manze zannimo ou prodwi li lokalman.  E ki pe arive ek bann travayer ki kot Feed Factory? Mersi.

 

MINISTER PETER SINON

Mersi Mr Speaker.  Mr Speaker, Minister pa’n asize.  Pandan sa bann letan, Minister in fer 2 letid lo sitiasyon livestock dan pei.  Enn in ganny fer par konsiltan FAO, akonpannyen par en Seselwa e lot in ganny fer par en konpannyen Sid Afriken.  Toulede letid, a se moman ki zot ti’n fer li in montre nou ki i koute pou fer manze zannimo isi.  I pli koute ki enporte.  Me ki nou’n vwar, leksperyans ki nou’n gannyen e leksperyans teren ki mon’n personnelman, mon’n ale avek mon bann dimoun e leksperyans osi ki nou’n vwar dan lekonomi.  Mon a komans ek dan lekonomi, ki nou’n vwar.  Nou’n vwar ki freight ek insurance cost in preski double depi sa bann letid in fer.  Nou’n vwar serten iregilarite dan larive bann bato ki anmenn manze zannimo e bato ki anmenn lezot keksoz osi.  Parey en fermye ti dir ek mwan.  Ler i ti dir ek mwan Mr Sinon, Minis, napa manze zannimo.  Mon dir li, nou pe adrese sa, nou pe al fer en meeting.  I dir mwan, kan ou pe al fer ou meeting? Mon dir demen.  I dir mwan, mon koson i bezwen manze tanto, apre midi.  Mon napa letan pou esper ou Minis.  Ki montre ki sa zafer letan e delay dan larive manze zannimo i en problenm.

Dezyenm problenm se manze zannimo pou stor li dan nou klima imid ki nou annan, ou pa kapab stor li lontan, si oule stor li lontan fodre ou regle ou tanperatir.  Sa pou kout ser.  Sa pou kout tro ser, se poukwa ler nou ti apros STC pou zot fer vini manze zannimo pandan bann letan ki masin ti’n aret net.  STC ki konn tre byen problenm manze zannimo pa ti tro, tro excited si oule avek sa prospe, dir zot ti a prefere lezot dimoun fer li, me selman finalman zot ti ed nou.

Avek tou sa bann fakter, mon’n al osi lo teren pou demann fermye koman manze, kalite manze e mon annan en msye parey Msye Corgat, en fermye byen eksperyanse ki ti dir avek mwan kler Minis, dan tou sa bann manze ki’n pas dan mon lanmen, ki mon’n donn mon bann zannimo, napa pli bon manze ek pli bon rannman ki nou’n gannyen avek nou zannimo ki sa manze ki ti fer isi Sesel ler nou lizin ti ankor pe fer manze e ti napa mankman resours pou met dan sa bann manze.  Avek tousala, mon krwar ki i kler ki lensekirite avek larive manze, son problenm storage, problenm cost ek freight ki pe monte, nou larzan menm, Central Bank in bezwen entervenir, i ti ape decline, vedir kou lenportasyon pe vin pli ser, an dolar, an roupi, ouswa ou pou al rod sa dolar.  Ki wi, ler sa bann letid in fer, nou’n vwar poudir i cheaper to import e nou pa anpese personn import, me bann rezon pou nou annan sa lizin prodwi manze li osi i debout tre for.  I debout tre for si nou oule annan sekirite alimanter e prodiksyon konstan dan nou pei.  Mersi Mr Speaker.

 

MR SPEAKER

Onorab Lebon.  Hold on Onorab.

 

HON EMMANUEL FIDERIA

Mr Speaker, Minis in mank en bout mon kestyon.

 

MR SPEAKER

Pardon?

HON EMMANUEL FIDERIA

Minis in mank en bout, ki pe arive ek bann travayer Feed Factory.

MR SPEAKER

Eksepsyonnelman nou ava les sa pase, parey ou konnen Minis i deside……..  Yes Minister.

 

MINISTER PETER SINON

Mersi Mr Speaker.  Travayer, parey ou konnen, lizin pou pase le 1 Out dan lanmen Mr Adeline, sa bann travayer pe ganny diskite avek Msye Adeline me selman, lefe ki zot ti travay avan avek SFMC e nou Gouvernman ti annan en lakor avek SFMC, nou pou sey annan en laranzman kimannyer, Mr Adeline a deside lekel ki pou garde, lekel ki nou pou bezwen pey zot bann tann servis pou zot rod en lot louvraz si dapre li kimannyer i pou organiz son travay.  Mersi Mr Speaker.

 

MR SPEAKER

Onorab Hoareau.

 

HON HERBERT HOAREAU

Bonzour Mr Speaker, bonzour e bonzour tou dimoun ki a lekout.  Eski Minis i kapab dir ek sa Lasanble ki kondisyon son Minister in donn sa tender pou Animal Feed Factory lo pwen later e lenfrastriktir e si Gouvernman pou met ankor larzan dan sa Factory pou fer li marse e profitab?  Mersi.

MINISTER PETER SINON

Bon Mr Speaker, mersi.  Gouvernman pe lease sa faktori at R75 par met kare e Gouvernman pa anvizaze met larzan dan sa lizin, me Gouvernman pou fasilit si ou oule akse avek sa nouvo lakonpannyen pou li pran en loan pou li devlop sa bann lizin, remet zot anform.  Deza nou’n annan en negosiasyon –  nou annan dan DBS (Development Bank of Seychelles) i annan en Agriculture Development Fund ki nou pe ankouraz Gouvernman – Gouvernman ek Minister Finans in dakor pou met en serten larzan dan sa ADF pou ki zot pret larzan atraver sa Agriculture Development Fund pou si ou oule remet sa lizin azour.  Me selman lamazorite se lo zot fre pou remet li an mars.  Me selman nou, nou annan tou lentere pou vwar sa lizin an mars pou le rezon ki mon’n site toutaler.  Mersi Mr Speaker.

 

MR SPEAKER

Onorab Lebon.

HON LENNY LEBON

Mersi Mr Speaker.  Mr Speaker, Minis ek ou delegasyon, tou Manm Onorab e bann envite dan galeri e tou bann dimoun a lekout, bonzour.  Mr Speaker, eski Minis i kapab enform sa Lasanble si son Minister pe donn en garanti konsomater, bann prodwi Feed Factory ki dezormen pou napa problenm supply ankor dan nou pei ki pou a en pri ki abordab.  Mersi.

 

MINISTER PETER SINON

Mersi Mr Speaker.  Mr Speaker, pou nou kapab annan lagrikiltir Sesel, pou nou kapab annan en livestock sector, parey ou konnen nou lekonomi i en lekonomi ouver.  Dimoun i enport lavyann e poul par egzanp, lezot lavyann nou pa restrikte lenportasyon.  Nou pa ni menm restrikte lenportasyon manze zannimo par nenport ki ki oule anmennen e nou’n vwar problenm.  Nou krwar ki nou Minister i kapab, i pe fer tou sa ki i kapab pou improve sa sitiasyon ki nou’n vwar nou e ki nou ankor ladan.  In improve en pe.  Nou krwar ki avek sa Feed Factory e parkont mon konnen poudir i annan lentere avek en lot Seselwa pou fer en lot pti lizin prodiksyon manze zannimo, nou pe vwar poudir i posib ki nou pou annan otan manze e plis ki i annan manze, petet son pri i a kapab reste omwen stab pou ki ler lavyann in ariv lo marse i pa neseserman tro eleve pou ki lensitasyon pou nou Seselwa consume lavyann enporte i en fakter zis akoz pri, neamwen ki si nou kalite lavyann ki nou prodwi Sesel e mwan mon konvenki lo sa ka, i pli meyer.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble si son Minister in fer en letid pou vwar akoz e kwa ki’n arive ki’n fer ki SFMC in fail.

E dezyenmman, eski Minis i okouran ki pri manze zannimo lo market in ariv ziska R500 par bal e sa i en problenm e kwa ki son Minister pe fer pou li mitigate sa sitiasyon?  Mersi Mr Speaker.

 

MINISTER PETER SINON

Mersi Mr Speaker.  Mr Speaker, mon ti a kontan enform sa Lasanble ki bann management, sirtou chairman SFMC ki egziste konmela, ki’n dizourd in demann Minister Finans ki I annan en investigation oubyen en audit zot travay pou determinen egzakteman kwa ki’n al mal e kote ki’n al mal e sa nou Minister nou welcome sa demann ki mon krwar pou ganny fer byento.

Dezyenm se ki nou pe fer, eski mon konnen poudir pri manze in ariv R500?  Wi, mon ganny remind sa tanzaot ler mon vizit bann fermye, sirtou bann fermye, sa bann ki ankor brav mon kapab dir e mon salye zot, ki ankor pe persiste dan sa domenn.  I annan enpe ki’n arete akoz zot in nepli kapab.  Mon Minister, se poukwa ki’n ensit nou vreman pou travay tre dir me tre dousman petet, dousman ler mon dir, ler dousman se pa dousman, travay dousman, me dousman pa fer bokou tapaz lo la ziska ler nou ganny bann rezilta pou annan en plan lenvestisman dan lagrikiltir, pou lagrikiltir e al kot tou bann lenstitisyon ki petet nou pa ti’n aret interface avek koman EFAD, koman FAO, koman lezot ki pa ti pe envestir dan lagrikiltir pou revini e revin get lagrikiltir Sesel akoz nou annan bokou pwen spesifik pou nou kapab annan en sekirite alimanter, i bezwen annan en minimum nivo prodiksyon manze ki nou annan dan sa pei e lo la mon konvenki avek tou mon leker.  Alors, wi nou pe travay dir e nou larepons pou sitiasyon ki nou ladan se ki lagrikiltir i bezwen bokou plis resours.  Envestir dan sa sekter, dezyenmman ki nou pa pou vwar sa bann resours neseser isi.  Kan i annan sa bann resours ki ganny met a dispozisyon bann lezot pei, a letranze ki enterface avek sa bann agency ki si ou oule siport lagrikiltir e se sa ki louvraz poudir sa bann premye, dezyenm lannen ki mon’n fer san relache e san ses.  So vwala, ler mon a vin devan Lasanble avek en Statement lo sa bann travay, ou a kapab vwar li tre kler kimannyer nou pe travay.  Mersi.

 

MR SPEAKER

Kestyon 66, Onorab Samson.

 

HON DEREK SAMSON

Mersi Mr Speaker.  Eski Minis responsab pou Resours Natirel i kapab enform fermye Anse Royale ki difikilte son Minister pe gannyen pou ofer zot en Lease Agreement ki spesifikman determin letan ki zot kapab okip sa morso plato Anse Royale?  Mersi.

 

MINISTER PETER SINON

Mersi Mr Speaker.  Mr Speaker, dan distrik Anse Royale i annan 10 fermye ki pe okip apepre en total 29 ektar later lagrikiltir e ladan 3 fermye ki pe okip 16 ektar later i deza annan en Lease Agreement. Sa 7 lezot napa lease pou sa bann rezon swivan.

I annan en fermye avek lanmwatye ektar later, i lo probasyon akoz son performans lo later pa a la oter e son later i mwens ki 50 poursan anba prodiksyon. Ankor sa 6 lezot fermye avek 13 ektar later, rezon ki zot napa en Lease Agreement set akoz zot later pa ti ankor ganny demarke.

Mr Speaker, ozordi mon annan plezir pou enform e reasir Onorab Samson ki sa bann fermye ki lo plato Anse Royale, zot bann morso later in fek fini ganny demarke e zot plan pe ganny aktyelman konsidere par Planning Authority avan ki zot lease agreement i ganny finalize pou zot sinnyen.

Mr Speaker avek ou permisyon, mon osi pran sa loportinite pou enform sa Lasanble ki Gouvernman, atraver Minister Finans in bidzet R2.7 milyon pou ki Lazans Lagrikiltir i fer sir ki tou later leta, okipe par bann fermye i ganny demarke e ki prosesis pou finaliz Lease Agreement i kapab ganny en nouvo lelan e nou bann fermye, sirtou bann ki serye i kapab envestir avek bokou plis sekirite, avek bokou plis konfyans, avek bokou plis konfor.  Demarkasyon sa bann later i vreman enportan avan ki lazans i kapab ofer sa bann fermye en Lease Agreement.  Sa prosesis pou nou i pou osi kontribye pou protez later lagrikiltir anba Land Use Plan.  Mersi Mr Speaker.

 

MR SPEAKER

Okenn siplemanter Onorab?

 

HON DERECK SAMSON

Mersi Mr Speaker, mon annan kestyon siplemanter.  An vi move performans serten sa bann fermye, eski Minis i kapab dir nou ki kriter ki egziste pou en dimoun ganny akse avek en morso later lagrikiltir e ki kriter ki egziste osi pou finalman deklare ki en morso bout later i finalman kapab ganny determinen koman en later lagrikiltir?  Enn pou kapab fer elevaz zannimo e de pou kapab fer prodiksyon fri ek legim.  Mersi.

 

MINISTER PETER SINON

Mersi Mr Speaker.  Mr Speaker, mon a pran ou kestyon dernyen avan.  Pou nou deklar later koman later lagrikiltir, sa i ganny fer anba Land Use Plan.  I annan en prosesis ki ganny fer kot bann later lagrikiltir pe ganny demarke, sa louvraz i ganny fer atraver Mahe, Praslin, La Digue e ptitapti, par rezyon, sa bann demarkasyon, sa bann Land Use Plan pe vin kot Cabinet e nou pe aprouve distrik par distrik.  Dernyen distrik ki ti vin kot Cabinet mon krwar ti aktyelman Anse Royale.

Kriter ki nou servi pou allocate later lagrikiltir avek en prospective farmer oubyen en farmer, nou evalye lentere sa kandida ki propoz ek nou,i bezwen annan en plan travay, si i vin kot nou, nou donn li lanmen idantifye e li i a eksplik nou dan son proze ki i oule fer.  Zannimo, fri, legim, en konbinezon e nou nou a sey advise li lo en landrwa apropriye pou li kapab fer sa.  E byensir nou pou regard son leksperyans dan sa domenn, oubyen leksperyans, i annan ki vin avek partner, i annan dimoun pa neseserman dan lagrikiltir, me i annan li sa mwayen, i vwar son bann partner pou li kapab fer lagrikiltir.  Dabitid nou’n annan en unit ki spesifikman regard bann issues ki konsernen avek later.  So, i sa unit ki prezant sa kot PS, e finalman kot mwan menm pou propoz sa proze, proze en envestiser ki oule al antre dan lagrikiltir e nou konsidere.  Swa nou aprouve, swa nou demann modifikasyon oubyen swa nou decline, si nou vwar i vreman pa meet bann kriter lagrikiltir e kriter teknik ki nou pe servi, oubyen i oule fer en aktivite ki pa pou posib dan sa landrwa kot li i pe spesifikman demande.  Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker bonzour, bonzour Minis e tou dimoun ki alekout.  Mr Speaker, eski Minis dan son larepons i kapab osi eksplik nou Lasanble kan sa proze demarkasyon later lagrikiltir pou komanse e konplete, e eski son Minister pou servi bann arpanter prive pou akseler sa proze.  E akoz Lotorite Distrik pa’n ganny konsilte dan sa prosesis?  Mersi bokou.

 

MINISTER PETER SINON

Mersi Mr Speaker.  Mr Speaker, sa 2.7 milyon ti’n met a dispozisyon SAA, Agriculture Agency lannen pase.  E nou’n komans travay depi lannen pase.  Sa travay i en travay teknik.  Mon pa konnen si i konplike me selman i pran lontan, parfwa i kapab pran lontan.  E alafen lannen nou ti krwar nou ti kapab fini fer sa travay, me nou pa ti’n fini e nou ti annan en negosiasyon avek Minister Finans pou roll over sa larzan pou nou kapab kontinnyen fer sa bann travay sa lannen.  Travay pe kontinnyen me parey mon’n eksplike, sa travay taler zot pou annan en lide apepre kimannyer i kapab al dousman ler nou koz lo labatwar Praslin.  I en travay ase dousman e parey ou’n dir, nou pe osi angaz prensipalman bann surveyors prive pou nou kapab fer li pli vit e travay pe kontinnyen e mon espere ki lafen lannen, sa travay a konplete me mon pa pou donn ou en garanti.  Mon pa pou kapab la donn en garanti poudir lafen sa lannen sa travay pou konplete.  Mersi Mr Speaker.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan demann Minis si i ti kapab eksplik nou Lasanble si pandan letan ki sa bann lease pe ganny prepare, zot pou fer provizyon pou zot demark bann area ki semen pou ganny fer, oubyen lezot lenfrastriktir e si sa bann lease pou kapab ganny servi avek labank pou raise kapital kot nou bann fermye i kapab kontinny zot biznes.  Mersi Mr Speaker.

 

MINISTER PETER SINON

Mr Speaker, se pourkwa nou pran sa legzersis koman tre, tre kritik pou nou.  Si nou oule devlop lagrikiltir e en dimoun i napa en lease, savedir i napa en asset.  I pa kapab servi son lease koman en kolateral pou li al demann pret en larzan pou li devlop sa later.  E se pourkwa sa i enportan.  E i enportan osi ki bann lenfrastriktir koman semen, dan sa nouvo legzersis i ganny fer.  Pou lemoman, sa bann later pe ganny divize an kare.  Apre, avan ler nou pou surrender sa bann lease, definitivman nou pou fer sir ki tou sa bann kare ki pe ganny survey i ganny akse semen.  Sa i et, nou pa oule repet menm fot ki nou’n vwar dan lepase, kot ou pou al met en fermye dan milye en landrwa kot i napa akse semen.  Apre i pou vin kot nou menm.  So, definitivman wi, nou oule ki sa legzersis i enkli semen, menm ki la i pa egziste pou lemoman.  Me i ava enn dan nou progranm lenvestisman pou nou fer sa bann semen, si oule menm avan ki nou allocate sa bann later avek bann fermye.  Mersi Mr Speaker.

 

MR SPEAKER

Kestyon 67, Onorab Jacqueline.

 

HON SULTANNE JACQUELINE

Mersi e bonzour Mr Speaker, Minis ek ou delegasyon, koleg Onorab e nou envite dan galeri.  Eski Minis i kapab enform fermye Port Glaud ki annan zot laferm Des Arpents lo plan son Minister pou annan en bon sistenm stokaz e distribisyon delo?

 

MINISTER PETER SINON

Mersi Mr Speaker.  Mr Speaker, i annan 27 fermye ki anrezistre avek lazans lagrikiltir dan distrik Port Glaud e i annan 8 fermye ki pe ganny delo irigasyon atraver koneksyon lo sistenm delo lazans lagrikiltir.  Sa bann fermye, zot angaze dan prodiksyon zannimo e fri, legim, gro manze.  E zot pe plant dan plato, lo lakot e osi en pe lo montanny Port Glaud.

Bann fermye Port Glaud dan rezyon Des Arpents in progresivman eksperyans mankman delo, sirtou dan serten peryod pandan lannen dan sezon lasesres.

Mr Speaker, avek devlopman ki’n arive Port Glaud, in annan en logmantasyon dan demann pou delo.  Rezervwar delo pou irigasyon in progresivman vin tro pti.  Keksoz in vin pli grav par lefe ki en lot baraz delo in ganny fer par lao sa baraz lagrikiltir, ki fer ki mwens delo i antre dan nou baraz lagrikiltir pou irigasyon.  Lazans lagrikiltir i okouran sa sitiasyon tre byen.  Antretan i annan bann demars pou amelyor sitiasyon dan limedyat, par egzanp vizit routin ki ganny fer par zofisye lazans lagrikiltir.  Bann travay netwayaz kontinnyel pou kit baraz ek rezervwar prop e maksimiz son kapabilite pou kolekte delo.  Travay netwayaz lo tiyo ki fourni delo dan rezervwar e ki sorti pou al kot fermye.  Reparasyon lo serten tiyo ki ti ape perdi delo lo lalinny distribisyon.

Mr Speaker, rezervwar Port Glaud ki mon pe koz lo la ti ganny devide e netwaye le 13 e 14 Fevriye 2012.  Ler travay ti an progre, nou ti vwar ki rezervwar i ranpli avek salte e debri organik, fey ek dibwa pouri in tonm ladan ki ti pe blok flow en pe delo.  Lazans Lagrikiltir alor i annan en plan pou konstrir en twa pou sa rezervwar.  Sa i fer ki mwens salte ek bann debri organik i a tonm dan rezervwar pou blok sistenm e blok flow delo.  I osi annan plan pou sanz lokasyon lalinny tiyo distribisyon pou fer ki i pas par lao semen.  Sa i a fer ki bann fermye ki pe rankontre problenm, zot a ganny en pe plis delo par gravite.  Lalinny tiyo pou distribisyon delo i an semoman pas anba lo plato e sa i fer ki ler rezervwar i en kar plen, i annan fermye ki pa ganny delo ditou akoz napa ase presyon.  Lazans Lagrikiltir I pe fer tou sa ki i kapab e tou sa ki posib avek resours ki a son dispozisyon pou adres problenm irigasyon dan distrik Port Glaud.  Demann pou ganny fon in ganny met devan pou ki bann travay irzan i ganny materyalize.  I annan en Bidze ki’n ganny fer pou ki sistenm irigasyon Port Glaud i vin bokou pli fonksyonnel.  Lazans Lagrikiltir i annan serten limitasyon osi dan son resours imen ki okip irigasyon e sa i fer ki laplipar bann travay pou ganny fer par kontrakter prive.  La i annan parfwa prosedir ki vin en pe long.

En lot pwen konsern ki nou annan e ki nou fer fas avek i osi vandalizm kot tiyo i ganny koupe, ou menm i ganny vole.  I annan dimoun osi ki pran delo ilegalman lo sa sistenm irigasyon e ki pa neseserman bon sa delo pou konsonmasyon.

Mr Speaker, mon ti a kontan enform sa Lasanble ki nou progranm pou formaliz e mobiliz fon ankor enn fwa pou en lenvestisman konpreansiv dan lagrikiltir, parey mon’n dir pou feeder road i enn pou irigasyon, i enn bann lenfrastriktir ki pou ganny enkorpere dan sa plan ki mon’n nonmen taler.  Mon pou vin devan sa Lasanble ankor enn fwa pou mwan eksplik detay sa plan lenvestisman pou lagrikiltir, sirtou lenfrastriktir pou lagrikiltir.  Mersi Mr Speaker.

MR SPEAKER

Onorab Jacqueline.

HON SULTANNE JACQUELINE

Mersi Mr Speaker.  Eski Minis i kapab enform sa Lasanble ki sipor spesifik son Minister i anvizaze donn sa bann fermye konsernen ki’n pas dan bokou sitiasyon difisil pou re-etablir zot sistenm irigasyon pou fer delo ariv kot zot?  Mersi.

 

MINISTER PETER SINON

Mersi Mr Speaker.  Mon krwar tou sa bann keksoz ki nou pe fer, lev tiyo anler, netway basen, netway tiyo, kouver basen, pou lemoman i bann keksoz imedya ki nou kapab fer e ki nou pe fer e ki nou pou kontinnyen fer ziska ler nou kapab annan resours pou nou kapab annan en pli gran rezervwar, pou nou kapab anmas pli bokou delo e distribye bokou plis delo.  Akoz demann in ogmante, parey mon’n dir, delo ki koul dan nou basen i sorti maintenant overflow en lot basen ki’n ganny fer par lao nou.  Sa i montre ki PUC pe ganny demann delo e li osi i pe anmas delo.  Konsomasyon imen i toultan en priyorite, alors nou dan sa sitiasyon e mon krwar ki ler nou’n ganny sa bann resours kot nou kapab improve nou kapasite kolekte, e osi distribisyon, petet nou a kapab ed bann fermye bokou plis.  Me la pou lemoman nou pe focus lo sa ki nou kapab fer avek resours ki nou annan.  Mersi Onorab.

MR SPEAKER

Onorab Samson.

 

HON DERECK SAMSON

Mersi Mr Speaker.  Eski Minis i kapab dir nou ki konsey son Minister i kapab donn bann fermye pou ankouraz zot ganny akse avek en meyer sistenm irigasyon lo zot laferm?  Eski bann fermye i ekspekte fer provizyon pou gard zot prop stok delo pou irigasyon zot laferm.  E ki bann opsyon ki zeneralman egziste pou bann fermye kot i konsern sistenm irigasyon lo zot laferm?  Mersi.

 

MINISTER PETER SINON

Mersi Mr Speaker.  En keksoz ki mon’n konstate dan mon bann vizit Praslin, dan leo Val d’en Dor, en pe partou, se ki i annan tre pe fermye ki annan son tenk personnel lo son laferm.  Sa i en pwen ki mon’n realize.  An realizan sa, mon krwar ki i annan par egzanp bann lakonpannyen konmela ki pe fer bann tenk, me pa neseserman tenk pou fermye, pe fer tenk pou konsonmasyon delo pou nou kapab gard nou delo kot nou, nou pou vwar ki konmela in vin en trend Sesel pou nou annan en tenk dan lakour akoz nou konnen poudir sa problenm delo i annan e par annan en tenk dan sak lakaz, nou aktyelman ogmant kapasite koleksyon delo pou konsonmasyon.  E ler napa, nou servi en pe mwens, selman nou konnen nou annan pou lesansyel.  Pou bann fermye, i annan fermye ki pran linisyativ e al rod sa delo e konekte zot rakor kot bann sours delo i ete.  Me sa osi nou bezwen fer avek konsiltasyon PUC. Mon pa pou ankouraz tou fermye, ale met rakor dan bann sours ki menm sours ki PUC pe anmas delo ladan, oubyen menm sours ki desann dan nou danm.

Ki nou pe ankouraze, se pou ankouraz fermye pou envestir dan zot bann tenk delo, nou pou ankouraz fermye pou adopte bann practice konservasyon, par egzanp anploy drip irrigation olye nou les en rakor koule e ler nou santi nou’n fini fer lot louvraz nou vin pran rakor nou met laba ki I en fason pa neseserman byen kot nou pe prezerv delo.  En plan i bezwen en kantite delo e nou’n vwar dan serten laferm ki pe servi drip irrigation, vreman zot servi en tyer delo ki si delo i ganny servi enkontrolableman.  Se sa bann oriantasyon ki nou anvi revin avek e dabor nou pou train nou bann extension officers pou ki nou bann extension officers i kapab al kot bann fermye, me selman nou pou bezwen osi fer sir ki nou annan sa bann lekipman dan nou bann requisition stores. Bann rakor, bann lezot fittings a en pri rezonnab, si nou oule anmenn sa nivo irigasyon lo en different level si ou oule.  E menm pourkwa pa, nou menm, dan nou progranm lenvestisman, annan en sistenm kot nou aste tanks by bulk e nou vann li a en pri abordab.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, Minis dan enn son bann larepons pli boner in dir ki en Bidze in ganny fer pou deal avek sa sitiasyon delo Des Arpents.  Eski Minis i kapab dir avek sa Lasanble konbyen sa Bidze i ete e si in ganny aprouve.

E dezyenmman, eski i dan plan son Minister pou son Minister negosye direkteman avek sa bann fermye spesifik pou zot vwar kolaborativman kwa ki zot kapab fer dan limedya pou ed sa bann fermye pou rezourd sa bann problenm ki zot pe gannyen, sirtou an sa ki konsern bann gro kou ki zot bezwen anmase pou zot kapab anmenn delo kot zot pou zot fer zot travay lagrikiltir?  Mersi Mr Speaker.

 

MINISTER PETER SINON

Mersi Mr Speaker.  Ler mon’n dir en Bidze pou sa bann eleman ki nou pe fer dan limedya, mon Minister in pran ka Port Glaud koman en ka spesifik e priyoriter akoz sitiasyon i vreman move.  E taler, par egzanp in demann mwan lo ki kriter ou servi pou priyoriter.  Sa Bidze ki nou’n deside se pou pran Bidze ki ek nou menm ki ti pou al fer lezot keksoz ki’n deza ganny aprouve pou re-allocate pou fer sa bann travay, met twa lo rezervwar, netway tiyo eksetera.  E repas sa tiyo, fer li pas par lao semen.  So, i en Bidze ki’n deza ganny aprouve, i en pti Bidze, i pa en Bidze enorm e mon krwar ki, ou’n demann mwan konbyen.  I apepre zis en pti pe plis ki R200 mil e nou krwar ki nou kapab fer sa bann travay.  An sa ki konsern dyalog avek bann fermye, sa nou’n sey fer tan ki nou kapab atraver nou bann extension officers ki nou annan dan sak rezyon.  E sa extension officer ki kouver Port Glaud i annan sa, se pou sa ki nou ganny feedback poudir sitiasyon i move, sitiasyon i kritik dan serten landrwa.  Se sa feedback avek sa extension officer ki vini e parey mon’n dir taler, nou resours imen dan irigasyon bann dimoun ki teknisyen, ki manage nou bann rezervwar, nou annan en pti problenm la, nou annan en problenm resours imen, me nou krwar ki nou kapab kolabor avek sekter prive pou nou fer sa bann travay e pou nou fer sitiasyon Port Glaud en pti pe pli meyer.  Mersi Mr Speaker.

 

MR SPEAKER

Kestyon 68, Onorab Ghislain.

 

HON CHANTAL GHISLAIN

Mersi Mr Speaker, bonzour tou dimoun.  Bonzour Minis e bonzour tou dimoun a lekout.  Eski Minis i kapab enform zabitan La Digue lo ki pe arive avek sa proze pou grat dan lapas Magnan, pou permet bann peser antre avek zot bato avek mare ba?  Mersi.

 

MINISTER PETER SINON

Mersi Mr Speaker.  Mr Speaker, depi 2007, i annan omwen 2 letid ki’n ganny fer dan sa landrwa pou fasilit akse peser.  Tou dernyenman, e mon pe koz boner sa lannen, bann lorganizasyon teknik Seychelles Maritime Safety, SFA, Coast Guard presizeman, ti fer en nouvo revi lo nesesite pou fer travay neseser dan sa lapas.  Coast Guard ek SFA ti’n fini pare pou mobiliz bann materyo e lekipman neseser pou komans sa travay.  Malerezman travay pa ti pou kapab fer sa lannen vi ki i annan lezot konsern ki’n leve e nou’n vwar nesesite pou fer plis konsiltasyon avan enplimant sa proze.  Konsiltasyon, nou ekspekte konplete lafen sa lannen.  Si tou konsern i ganny adrese e tou parti prenan i tonm lo en konsansis, nou ekspekte remobilize e komans travay.

Mr Speaker, travay ki mon pe koz lo la i pa vize lo grat lapas Magnan.  Letid ki’n fer, nou’n vwar ki bann koray i vreman dir.  Ler mwan mon ti vizit sa landrwa, ti annan en bato ki ti ater lo lans, ti annan en gro trou ladan.  In sey antre, lanmer ti move, in tap lo koray, koray tre dir ki’n defons son bato.

Neseserman, pou nou fer en travay sibstansyel dan lapas Magnan, nou pou bezwen servi dinamit e servi dinamit, la kot bann lezot konsern i leve ki nou byen gete kimannyer sa travay pou ganny fer, ki minimum domaz i ganny fer pou tou bann parti prenan konsernen.  Mersi Mr Speaker.

 

MR SPEAKER

Yes, okenn siplemanter?

 

HON CHANTAL GHISLAIN

Mr Speaker, eski Minis i kapab enform sa Lasanble si son Minister pa pe kapab omwen komans grate dan limedya la akoz lefe ki sa lapas i deservi apepre en kenzenn peser.  E si son Minister pe aprezan fer en demars pou kapab trouv en lot opsyon par egzanp ouver en lot lapas dan sa menm rezyon pou permet bann peser antre avek zot bann bato avek mare ba?  Mersi.

 

MINISTER PETER SINON

Mr Speaker, ler mon’n dir nou’n arete, nou’n fer konsiltasyon set egzakteman sa ki nou pe fer.  Petet opsyon se regarde si napa en lot lapas ki kapab ganny ouver akoz parey mon’n dir, opsyon grate i pa pou dire, i pa pou efektiv pou sa bann bato ki oule antre e sorti dan lapas Magnan.  I pou en keksoz tre kourt term, i pou en keksoz petet tre ser, me pou valer ki nou pe gannyen pou sa legzersis, plito nou kontinnyen sa konsiltasyon e ler nou fer en travay pou mobiliz tou bann akter konsernen, Coast Guard, SFA, Safety e lezot Ladministrasyon Distrik, pou nou mobiliz tou dimoun e fer sir nou fer en bon travay ki nou ganny nou en bon lapas ki sa bann bato i antre sorti dan sekirite, plito nou fer en bon travay, ki nou vini nou grat grate, apre nou ganny dir e ou, ou ganny dir e mwan, mon ganny dir ki nou pa’n fer en travay ki pou deservi sa kominote 15 peser ki servi sa lapas.  Mersi.

 

MR SPEAKER

Onorab Volcere.

 

HON MARC VOLCERE

Mersi Mr Speaker.  Mr Speaker mon ti a kontan demann Minis, an vi difikilte ki zot pe gannyen, eski zot in apros bann peser La Digue e petet osi bann lezot dimoun ki servi sa lapas, nou konnen i annan osi bann dimoun sorti Praslin.  An vi son proksimite avek lezot fasilite lo La Digue, eski zot in apros sa bann peser pou en konsiltasyon, pou eksplik zot difikilte ki zot pe gannyen pou kapab ouver sa lapas?  Mersi.

MINISTER PETER SINON

Mon ganny dir par mon PS wi ki SFA in fer sa konsiltasyon, me lefe ki mon ti al vizite mwan menm, ler mon ti al vizite mon pa ti fer konsiltasyon.  Mon ti konsilte ek sa bann ki ti la, me mon pa ti call en meeting pou sa bann peser.  Mon krwar ki petet an vi ki nou’n ale nou’n komanse, zot in vwar nou vini, mon krwar petet ler apropriye in arive pou nou call enn sa meeting ek tou parti prenan pou nou fer en konsiltasyon fonde avek led Onorab, nou koleg La Digue.  Mersi.

 

MR SPEAKER

Kestyon 69, Onorab Esther.

 

HON NATASHA ESTHER

Mersi Mr Speaker.  Mr Speaker, Minis ek ou delegasyon, tou Manm Onorab, tou envite dan galeri, tou dimoun a lekout bonzour.  Eski Minis i kapab enform sa Lasanble kwa ki pe ganny fer an kolaborasyon avek Minister Lasante, pou pouse ki sa labatwar lo Praslin i ganny ouver e met an fonksyon pou deservi bann zabitan Praslin o pli vit posib?

MINISTER PETER SINON

Mersi Mr Speaker.  Mr Speaker, nou ava rapel ki sa labatwar ti apartenir a ansyen SMB e i pa’n zanmen vreman ganny servi dan en fason enportan lo Praslin.  A en serten moman, Gouvernman ti deside privatiz sa loperasyon e sa labatwar ti ganny vann avek Mr Eugene Albert an 2006.  Me sa Msye li osi pa ti fer lontan vi ki sa labatwar pa ti profitab.  Finalman in vann sa batiman avek lakonpannyen Hospitality Supplies Limited an 2008.  Parey laplipar nou i konnen, HSL, Hospitality Supplies Limited, i en konpannyen ki spesyalize dan lenportasyon e distribisyon fournitir pou bann lotel.  Alor, fodre fer resorti Mr Speaker ki HSL ki ti aste sa batiman, son lobzektiv ti pou li servi sa landrwa pou stok son bann fournitir vize ver sekter touristik Praslin e pou distribye son bann danre laba.

Se kan mon Minister ti ganny enformen lo lefe ki HSL ti’n aste sa fasilite ki mon Minister ti komans negosye avek sa lakonpannyen pou demann zot pou konsider renouvle sa labatwar e fer li marse o servis bann fermye Praslin.  Mon annan plezir Mr Speaker pou enformen ki san gran difikilte, sa lakonpannyen ti aksepte sa propozisyon pou refer sa labatwar an Desanm 2010.  Mon Minister ti sinny en Memorandum Of Understanding lo sa size avek sa lakonpannyen.

Mr Speaker, vi ki HSL ti pou repar sa labatwar pou fer li fonksyonnen dan sa menm batiman, sa lakonpannyen ti realize ki i ti pou neseser pou li konstrir en lot batiman ki pou permet li fer son lot biznes ki mon’n mansyonnen pli boner.  HSL ti toudswit prepar son plan pou komans sa devlopman, me avan soumet kot Lotorite Planning, zot ti demann mon Minister pou fasilit diskisyon avek bann lotorite konsernen pou asire ki sa plan i ganny aprouve e i respekte bann norm regilasyon pou ki i evit okenn retar dan prosesis laprouvasyon.  La HSL avek sipor mon Minister in rod lasistans Minister Lasante pou konsey li lo bann kriter ki HSL pou bezwen respekte pou kapab fonksyon en labatwar e en stokaz distribisyon dan sa lokasyon.  Bann vizit ti ganny fer kot sa sit par bann parti prenan dan sa proze ki enkli MLUH, Minister Lasante, mon Minister e reprezantan HSL. Rekomandasyon sa vizit sete ki later kot labatwar i ete i tro pti, pou annan tou fasilite neseser, sirtou son pti pi perdi ki vreman enportan pou en labatwar ki servi bokou delo e vi ki i annan en lanmar pa tro lwen avek sa landrwa, i fer sa pi perdi pli enportan ankor.  HSL ti rekonnet ki i pou bezwen aste ankor en pti morso later akote e i ti dakor pou fer li.  Me sa ti nesesit relokasyon en rezerv semen ki ti pas an deor balizaz labatwar.  MLUH ti ganny konsilte e ti donn son laprouvasyon pou sa pti morso later ki en pe plis ki 200 met kare, ganny vann avek HSL.  La ti neseser ki survey i ganny fer pou bouz sa rezerv semen pou fer ki sa 200 met kare i ganny azoute avek sa later ki labatwar i lo la.

Parey nou tou nou konnen, parey mon fek eksplike taler, prosedir pou fer survey i ase long e sa in pran son letan e pe ganny finalize an se moman menm.  Malgre sa, HSL in fini soumet son plan devlopman kot Lotorite Planning e in ganny laprouvasyon neseser.  Me i neseser ki bann taso i ganny mete an plas e sa later i ganny anrezistre avan i kapab komans konstriksyon.  Se la kot nou ete ozordi Mr Speaker konsernan labatwar Praslin.  Enn fwa ki taso i ganny mete, later i ganny anrezistre, HSL i kapab komans travay e labatwar a fonksyonnen.  Mersi Mr Speaker.

 

MR SPEAKER

Onorab Esther.

 

HON NATASHA ESTHER

Mersi Mr Speaker.  Eski Minis i kapab enform sa Lasanble si i annan okenn lagreman ant son Minister avek sa nouvo operater pou fer sir ki pri pou touy zannimo i rezonnab, anmenmtan ki pri lavyann i reste abordab.  E ki progranm son Minister pou met an plas, pou ankouraz maksimonm kliyan pou servi sa labatwar?  Mersi.

 

MINISTER PETER SINON

Mersi Mr Speaker.  Mr Speaker, lagreman ki nou annan avek HSL i pa tous pri oubyen son loperasyon sa labatwar.  Lagreman ki nou annan se ki i pou fer fonksyonnen labatwar Praslin.  Koman ekonomist, mwan mon vwar en labatwar koman en servis oubyen en byen piblik.  I pa drol ki Msye Eugene pa’n fer profi dan labatwar.  En labatwar, pou mwan, en servis ki son fonksyon, son benefis lo sosyete, lo dimoun ki viv lo Praslin i pli gran ki nenport ki endividi oubyen konpani i kapab krwar i kapab resevwar par oper en labatwar.  Se pourkwa labatwar Mahe, Gouvernman i sibvansyonn labatwar, ziska prezan in sibvansyonn labatwar e sa sibvansyon in fer ki tou fermye i prefere servi labatwar.

Onorab, ou konsern lo si en labatwar i sarz en pri ki pa abordab, ki fer ki sa prodwi sa fermye i vin an deor pri ki marse pe vann lezot bann lavyann ki sorti Mahe e ki sorti a letranze, alors en labatwar, lensitasyon pou servi li pa pou la.  Nou pe regarde sa konstriksyon, nou kontan nou pe al step by step, nou kontan ki sa konpannyen in deside fer sa labatwar akoz sa konpannyen, ozordi Praslin dapre mon dernyen vizit ki mon’n fer, napa menm en bouse.  Annou forget labatwar, nou pe koz en bouse.  Sa lakonpannyen pe vini, i pou vann lavyann, i pou aste lavyann.  E sa lensitasyon pou dimoun vin anmenn zot detay pou ganny touye kot sa labatwar set en plus pou Praslin.  Nou pe regard li de pros, mon asire ki sa lakonpannyen pou retourn kot nou lo size loperasyon e fonksyonnman sa labatwar vizavi son lot proze ki li i ti krwar i profitab e son proze inisyal ki i ti vin Praslin se pou fer sa import/export distribution wholesale ki li i ti annan lide fer.

Nou pou gard kontak tre pros e sa lagreman ki ou koz lo la, sa lagreman ki i posib nou anvizaze annan avek sa lakonpannyen pou fer sir ki son servis i abordab, ki probableman en lagreman ki nou pou travay lo la ler sa labatwar i fini ganny konstrir.  Pou lemoman, nou focus i lo konstriksyon e fonksyonnman en labatwar e annan son lot biznes akote ki pou fasilit bann fermye zannimo lo Praslin.  Mersi.

 

MR SPEAKER

Bon, Onorab Volcere.

 

HON MARC VOLCERE

Mersi Mr Speaker.  Mr Speaker, an vi ki Minis in mansyonn profitabilite sa labatwar.  Eski son Minister pe konsidere si zanmen i arive ki sa envestiser i pa pe kapab kontinnyen avek sa biznes akoz parey ou’n koz lo profitabilite.  Eski son Minister pe mazinen pou re-aste sa labatwar avek sa envestiser pou ki bann fermye Praslin a kapab kontinnyen ganny sa servis, petet atraver sibvansyon kot Gouvernman i a kapab mentenir sa labatwar an operasyon?  Mersi.

 

MINISTER PETER SINON

Mersi Mr Speaker.  Mr Speaker, nou leksperyans avek nou kolaborasyon avek HSL in enn ki ankourazan.  I enn ki nou vwar prospe pou annan sa ki nou apel en public private sector partenership. Nou espere, sirtou mwan mon espere ki nou pa pou bezwen repran sa labatwar pou nou fer marse en labatwar.  Mon pa krwar ki Gouvernman i annan sa abilite.  Nou ti a kontan kit li dan lanmen prive, me si fodre join avek sa sekter prive, pou nou fer sir ki sa labatwar i opere e i ofer en servis abordab, sa en kestyon ki nou’n devret asiz lo latab, parey nou’n asiz lo latab pou konvenk zot pou operate en labatwar ki ti deza pa profitab e zot ti pe aste sa labatwar pou tir tou keksoz dan labatwar pou fer en lot biznes.  Me sa konpannyen in ase konpran nou letan nou’n dir li be sirtou si ou pe al deal dan lavyann laba, nou annan sa mankman, i annan en zafer lasante ladan, lasante dimoun Praslin, zot in pare pou revive sa labatwar e dan le fitir, olye anvizaze repran, re-aste sa labatwar, mon anvizaze plito fer en public private sector partnership pou fer sa labatwar vin sa labatwar ki deservi fermye Praslin avek bann pri abordab pou fer li fonksyonn byen.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble si i annan en dosye dan son Minister ki relye avek vreman kwa ki ti’n arive ki Gouvernman ti’n aksepte pou fer sa labatwar oubyen sa servis, oubyen sa byen piblik parey ou’n dir tonm dan lanmen prive pou fer en lot biznes rather than kit sa labatwar alive,

E eski Minis i kapab konfirm ek sa Lasanble ki zot pa’n bezwen pey okenn nanryen pou reganny sa servis labatwar e ki bann steps ki zot pe pran pou fer sir ki sa pa zanmen repet ankor a lavenir?  Mersi Mr Speaker.

 

MINISTER PETER SINON

Mersi Mr Speaker.  Mr Speaker, sa labatwar ki Gouvernman ti’n konstrir, ti anba parey mon’n dir dan mon louvertir, ti anba SMB. E nou’n konnen poudir SMB ler i ti wind up or wind down, pou spesifye sanze vin STC, SMB ti si oule privatise en kantite son bann asset ki i ti annan.  Sa enn bann asset ki ti ganny privatize.  In ganny privatize e nou, nou ti reakte promptly parey Angle i dir pou nou apros si ou oule HSL akoz avan Msye Eugene, i ti pe fer fonksyonnen en labatwar priveman, me i pa’n succeed. Alors li, in vann avek en lot prive ki ti pou al fer en lot keksoz konpletman diferan ki pa ti enkli labatwar.  Nou, an vwayan sa, nou’n sezi sa loportinite pou nou apros sa enn ki’n aste pou dir be non.  Nou’n eksplik tou rezon akoz nou ti met sa labatwwar an plas Praslin, ki bann lenplikasyon mankman en labatwar Praslin e ki kantite lenvestisman nou’n mete dan sa labatwar.  E nou kontan ki sa sekter prive in ekout nou akoz i ti kapab dir nou i pa enterese.  I ti dan son porte, nou pa ti pou kapab fer nanryen, ekspekte fer lide fer en lot labatwar Praslin.  Me nou dan en partenarya ki nou apresye bokou, se pourkwa nou langazman avek sa lakonpannyen i pou kontinnyen, sirtou kot i konsern loperasyon sa labatwar, ofer en servis profesyonnel, ofer en servis efikas e sirtou ofer en servis abordab.  E mon pa pou kapab donn en garanti ki privatizasyon pa pou ariv ankor, akoz ler ti kriye pou privatizasyon ti kriye dimoun.  Me selman nou’n vwar poudir en ler nou’n bezwen retrakte parske pa tou keksoz ki nou kapab privatize dan nou sitiasyon spesifik.  Nou (-) lekonomi i pti pti e enn bann rezon ki i pa ti profitab se ti napa ase zannimo ki pe antre pou touye.  So, i pa ti profitab.  Alors i pou de menm ka, la letan sa lakonpannyen i pran sa pou al operate akoz en kantite dimoun Praslin ki ti pe fer lagrikiltir zannimo zot in arete pou lemoman e i pou pran en pe letan avanler ki sa i pou pran en lelan, i pou en letan kot nou, nou vini nou ed sa bann fermye pou kapab fer sa e zot osi zot met sa a zot dispozisyon, mon krwar pa si zot pe anvizaze fer gran profi oubyen any profit dan sa loperasyon.  Mon krwar i en zafer cover cost in the beginning. Mersi.

 

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.  Mr Speaker, eski Minis i kapab enform sa Lasanble ki son Minister pe fer, ansanm avek Minister Lasante pou ankouraz bann dimoun pou servi labatwar olye touy zot zannimo kot lakour e lefet ki sa labatwar Praslin i pli pros pou zabitan La Digue, ki son Minister pe fer pou fasilit bann Digwa pou vin servi sa labatwar Praslin?  Mersi.

MINISTER PETER SINON

Mersi Mr Speaker.  Sa en kestyon vizyoner ki ou’n demann mwan e mon bezwen avoue poudir mon pankor arive laba pou mwan panse ki mon pou fer pou fer dimoun La Digue vin servi sa labatwar Praslin e pou ankouraz dimoun Praslin pou servi labatwar.  Mon vreman pankor ariv laba.  Mon ti a plivomye focus mon resours ki mon annan lo met sa labatwar an plas, fer li fonksyonnen e an paralel, letan nou konnen poudir la i pe al ouver, nou a komans bann progranm avek nou bann extension officers pou ou edike, menm lo medya, menm atraver nou dyalog avek zot pou servi labatwar.  Me an plis, mon bezwen dir poudir dan lalwa, it’s law.  Ou bezwen servi labatwar, si ou pe touy ou zannimo ou pa pe servi labatwar, ou pe kas lalwa, me si napa labatwar, ou pou demann mwan me Msye Sinon, ki nou fer?  Ou konpran.  La mon focus se pou fer etablir e fer fonksyonnen sa labatwar me selman kestyon ki ou’n demande, nou pou arive laba.  Nou pou annan nou en plan detaye lo kimannyer nou pou reganny dimoun sa labitid servi labatwar, nou konnen poudir dan servi labatwar i annan cost, taler nou’n koz lo feeder road.  I annan dimoun transpor pa arive kot li.  E ler transpor pa ariv kot li, bon kot li i fer sa ki i kapab.  i touy lanmenm kot li i anmenn borlanmer.  So, mon krwar ki mon Minister pou arive laba, nou konnen poudir nou devret fer en sans sensitization, sansibilizasyon profon me selman fodre nou annan sa bann keksoz dan nou lanmen ki pe fonksyonnen.  Menm sa enn ki nou annan Mahe, nou annan en sit deza lot kote, nou’n idantifye pou en nouvo labatwar, alors tousala i bann devlopman ki nou pou anvizaze pou nou kapab apre fer tou fermye fer sir ki zot servi labatwar.  Mersi.

 

MR SPEAKER

Bon, kestyon 70, akoz nou’n depas letan ki Standing Order i donn nou pou kouver Question Time. So kestyon 70 par Onorab Maria Payet-Marie, will be the subject of a written answer e Minis i ava anvoy larepons kot Onorab Payet-Marie.

Avek sa nou’n ariv alafen Question Time.  Mon ava remersye Minis ek son delegasyon e ekskiz zot parmi nou.

Lot pwen ki nou pou pran set en Mosyon procedurial par Leader of Government Business e mon’n oule fer sorti ki i en Mosyon prosedir, savedir napa okenn largiman e sa i konsern second reading Legal Practitioner’s Amendment Bill. Onorab.

 

HON MARIE-ANTOINETTE ROSE

Mersi Mr Speaker.  Mr Speaker anba Lord 72 nou Standing Orders mon ti a kontan retir The Legal Practitioner’s Amendment Bill lo latab.  Mersi.

 

MR SPEAKER

Okenn ki segonde?

HON CHARLES DE COMMARMOND

Mr Speaker, the Motion is seconded.

MR SPEAKER

Ok.

(Technical problems.)

(Break)

Mr Deputy Speaker in the Chair.

 

MR DEPUTY SPEAKER

Bon, mon a dir bonzour tou bann Manm Onorab.  E nou a kontinnyen nou travay parey lo Order Paper e nou a pran nou Mosyon ki pou ganny prezante par Onorab Valmont e mon a demann Manm Onorab pou prezant son Mosyon.

 

HON SYLVIANNE VALMONT

Mersi Deputy Speaker.  Bonzour Mr Deputy Speaker, bonzour tou dimoun a lekout.  Mr Deputy Speaker Mosyon ki mon pe prezant devan Lasanble I lir koumsa:- Ki sa Lasanble I demann Gouvernman pou konsider etabli en sistenm pwen ki ava gid license dray lo semen e ava ganny servi koman en penalti kont drayver ki neglizan lo semen.

Mr Deputy Speaker, rezon ki mon pe anmenn sa Mosyon devan Lasanble se ki dan nou pei pe annan en logmantasyon lo lakantite askidan lo semen, sirtou bann koze par neglizans e kot en bon nonm dimoun pe perdi zot lavi oubyen pe vin andikape.  Evidaman sa anmenmtan, I pe met bokou presyon lo resours bann Lenstitisyon Gouvernman e lezot ki konsernen tel ki lopital, lapolis, Land Transport, san kont osi limenm sa drayver oubyen viktim aksidan.

Mr Deputy Speaker, nou konnen litilizasyon semen I neseser pou diferan rezon e diferan mwayen.  Nou bezwen drayver bis, nou bezwen vwar loto, taxi, pick up eksetera, bann ki mont bisiklet e menm pyeton.  I evidan ki i annan en logmantasyon konsiderab dan lakantite veykil e mwayen transpor dan pei lo semen ozordi, me anmenmtan I esansyel ki bann drayver I vin pli konsyan zot responsabilite.

I osi evidan Mr Deputy Speaker, ki depi sa dernyen 5 a 10an in annan bokou aksidan lo semen koze par bann drayver akoz diferan rezon.  Neglizans, napa respe pou speed limit, koze lo telefonn, fer vites, fer paryaz lo highway, dray anba lenfliyans lalkol oubyen drog, parey nou dir bann fason iresponsab.  Par konsekans, nou pei pe fer fas avek bokou bann ka fatal.  Plizyer zanfan e adilt in vwar zot lanmor e bokou nou bann zenn in andikape par aksidan ki’n kout swa zot paran oubyen Gouvernman en bon sonm larzan.

Parey sa Lasanble ti koz lo sa Bill semenn pase, kot lamannman ti pe ganny propoze pou kondannasyon pli serye pou bann krim, la osi mon pe demande ki nou osi donn merit sa Mosyon en lot size ki riske vin en fleo parey nou dir, si mekanizm apropriye pa pe ganny met an plas pou kontrol aksidan par neglizans.

Mr Deputy Speaker, lentrodiksyon en sistenm demerit points I ava ede non selman vin en mwayen ledikasyon pou bann drayver, me pli presizeman I ava dekouraz sa bann move latitid e labitid iresponsab ki pe kontinnyen ogmante lo nou semen piblik.  En sistenm pwen ki ava baze lo diferan kriter pou sanksyonn oubyen diskalifye bann offenders, a konsekaman vin en deterrent pou sa bann ki koupab e evantyelman nou ava kapab vwar bann drayver pli responsab lo semen.

Mr Deputy Speaker sa sistenm demerit points in ganny entrodwir dan plizyer pei, dapre zot prop kriter, tel ki Dubai, Lasin, Irlann, Lafrans e lezot pei Lerop.  Sa I enn de ki mon’n kapab ganny referans avek.  Par egzanp, en sistenm Lerop, presizeman Lafrans I koumsa.  En drayver I annan li 10 pwen e si I fer en lofans lo lalimyer rouz, I ganny tire 1 ou 2 pwen depandan sa pei osi.  Anmezir ki I komet lezot lofans sa bann pwen I ganny anleve ziska I perdi tou e I vin zero.  La sa drayver I annan posibilite perdi son license e I pou bezwen al lekol dapre lofans ki in fer pou ki I rekiper son license.  Bann lofans I ganny mete par kategori e lakantite pwen ki ou’n perdi dapre lofans.  Savedir, pa met seat belt – dizon, ou perdi 2 pwen, negligent driving kot I annan excess, si ou oule, exceed speed limit ou perdi 5 pwen, aksidan par neglizans ki ase grav ou perdi tou le 10 pwen avek anmenmtan en rekomandasyon Lakour ki apre santans, sa drayver I bezwen al refer tes pou li kapab reganny son license e reganny pwen.

Mr Deputy Speaker, dapre lenformasyon prodwir par biro SLA I annan en logmantasyon konsiderab lo lakantite e kalite veykil ki pe antre dan pei.  Me anmenmtan nou bezwen pran kont bann lezot veykil ki’n osi ganny write-off par egzanp pou diferan rezon tel ki aksidan oubyen laz sa transpor limenm, napa pyes eksetera.  Mon oule anmenn sa devan Mr Speaker, pou donn nou en lide bann sif ki mon pou mansyonnen la, konbyen anviron bann veykil oubyen mwayen transpor nou annan pou lemoman.  So, resers ki monn fer lo lakantite Road Fund License, sirtou lo Mahe ek Praslin ki nou 2 zil prensipal, I donn nou sa bann statistics swivan.  An 2009 en total 11,389 mwayen transpor ti renew zot license e en total 765 nouvo license ti ganny donnen oubyen anrezistre lo Mahe, tandis ki lo Praslin zis 7 nouvo license ti anrezistre e 1,411 ti renew.  Ler nou azout nonm license mwayen transpor antou pou sa 2 zil, I fer 13,572.  Bann sif ki ase remarkab.

An 2010 1,688 nouvo license ti ganny anrezistre lo Mahe e 12,535 ti renew.  Praslin, 51 nouvo license ti ganny anrezistre e 1,024 ti renew e sa ti donn nou en total 15,300 antou, ki nou dir bann veykil lo semen oubyen transpor.

An 2011, en total 2,091 nouvo license ti ganny anrezistre e 12, 494 ti renew lo Mahe, 82 nouvo license ti anrezistre Praslin e 1,164 ti renew.  Sa I fer nou antou 15,631 antou.

Mr Deputy Speaker, zis sa lannen 2012, depi Zanvye ziska Zen SLA in anrezistre li 953 nouvo Road License e in renew 5,907 lo Mahe, tandis ki lo Praslin 16 nouvo license e in renew 370, ki fer en total 7,336 antou pou lanmwatye sa lannen.

En pti analiz Mr Deputy Speaker an relasyon avek sa statistik, i montre klerman ki lanrezistreman nouvo veykil Road Fund License in preski triple, pou sorti 765 an 2009 pou vin 2,091 alafen 2011.

Mr Deputy Speaker, sa en sif konsiderab an relasyon avek nou kondisyon semen an zeneral.  Me, en lot lapse ki mon ti a kontan koz lo la e sa I pli enportan ankor, ki merit latansyon konsiderab ki pou anmenn si oule en sibstans ase enportan an relasyon pros avek sa Mosyon I konsern bann driving license. Parey nou konnen, bann aksidan lo semen pa ariv zot tousel.  San al dan bann gran detay, mon pou senpleman mansyonn statistics Licensing lo bann nouvo driving license ki’n anrezistre osi depi 2009 ziska 2012 lo sa 2 zil.

An 2009, la mon pe met lanfaz, sa nouvo license ki’n ganny anrezistre.  1,631 lo Mahe e 49 lo Praslin.  An 2010 2,056 lo Mahe e 89 lo Praslin.  An 2011 2,031 lo Mahe, 154 lo Praslin.  Mr Deputy Speaker, nou vwar poudir logmantasyon bann nouvo license I osi kontinnyelman ogmante.  Depi Zanvye ziska Zen 2012 Mr Deputy Speaker, nou’n anrezistre 1,436 nouvo driving license lo Mahe e 55 lo Praslin.  I fer nou en total 7,501 ki’n ganny anrezistre e I evidan ki bokou adilt ek zenn pe rod en driving license. Parey nou konnen Mr Deputy Speaker, deplizanpli driving in vin en zouti ki’n tre enportan, san dout pou travay oubyen deplasman bann diferan dimoun e I nepli en lux parey driving ti ganny konsidere lontan.

Mr Deputy Speaker Mosyon ki devan nou Lasanble I enn ki relevan e tre apropriye ler nou get li dan konteks sa bann statistics ki mon’n prezante, espesyalman avek driving license ki pe kontinnyelman ogmante e sirtou avek lakantite aksidan ki pe ganny okazyonnen dan nou pei.  Dan sa konteks Mr Deputy, I pou neseser ki SLA ek lapolis I fer en survey lo lakantite aksidan ki pe ganny komet par bann drayver ki’n ganny license pandan sa 2 ou 3an, pou determinen si pa bann ki fek ganny license ki pe fer plis aksidan lo semen.  E I osi kler Mr Deputy Speaker, ki Road Transport Act 1991, I fer provizyon pou diferan prosedir e bann mezir dapre lalwa konsernan Road License e gidans pou diferan laspe pou litilizasyon transpor lo semen.  Bann penalti parey Seksyon 19 ki donn Transport Commissioner avek laprouvasyon Minis pou mentenir bann traffic signs.  Seksyon 20 par egzanp, I gid lapolis pou enplimant bann penalti avek neglizans ki ganny komet anver bann sinny trafik.  E nou espere ki ler nou pou demande ki sa demerit points par egzanp en sistenm ki pou gid en pe bann drayver lo semen, sa bann penalti osi ki ganny dekrir dan sa Act, I pou ganny enplimante enpe pli efektivman.  Seksyon 22 sa Act I donn power oubyen pouvwar osi Transport Commissioner pou enpoz bann speed limit lo semen kot I ganny konsidere neseser e menm pou en travay oubyen anpes en aksidan arive.  E Seksyon 24 I dekrir tou bann lofans ki kapab ganny komet anba sa Act.  I evidan ki bann lalwa e gidans neseser I la, me parey nou konnen souvandfwa, nou kestyonn lenplimantasyon efektiv sa bann regilasyon.

Seksyon 25 sa menm Act I dekrir presizeman size ki preokip nou bokou e sa se pa lot ki causing death by reckless driving or dangerous driving.  Sa lartik I lir konm swivan:- ‘A person who causes the death of another person by the driving of a motor vehicle on road recklessly or at a speed or in any manner which is dangerous to the public, having regard to all the circumstances of the case including the nature, condition and use of the road and the amount of traffic which is actually at the time of which might reasonably be expected to be on the road, shall be liable on conviction to imprisonment for a term not exceeding 5 years’.

Mr Deputy Speaker I dan sa konteks ki sa Mosyon ki mon pe met devan Lasanble ozordi, pou kapab demann Gouvernman pou anmenn en lamannman dan sa Road Transport Act pou enkli sa Demerit Points System dan en pli kourt dele letan ki posib.

Byensir Mr Deputy Speaker, bann teknikalite sa bann lamannman I ava depan lo bann teknisyen lapolis, Licensing ek transpor pou fer bann propozisyon apropriye lo sa sistenm.  Sa ki mon pe fer referans la se sa term on conviction to imprisonment. Petet I osi la I merit ganny revize sorti not exceeding 5 years pou vin not exceeding 10 years.  Mon personnelman krwar ki sa dire letan I tro kourt kot lanmor I konsernnen, sirtou lanmor ki ariv par sa bann aksidan ki ganny koze par sa bann drayver ki tre neglizan lo nou semen.

Mr Deputy Speaker, aksidan dan Sesel pe tro ogmante, malgre bann zefor kordinen par bann Lenstitisyon konsernen, tel ki lapolis, SLA ek SLTA. I demann en zefor kordinen par bann Lenstitisyon konsernen tel ki sa bann ki mon’n mansyonnen, pou kapab redwir oubyen menm met lezot lozistik pou anpes aksidan arive.  Dapre Licensing Authority, an 2011 12 drayver antou in ganny zot driving license suspended par Lakour.  E depi Zanvye sa lannen ziska Zen, 2 in ganny sispann zot license e nou konnen bokou plis aksidan I arive e en kantite ka I deza Ankour e sa ki mwan mon krwar se ki ler sa demerit points I ava ganny entrodwir, sa bann drayver neglizans I ava si oule get enpe zot pangar parey nou dir an Kreol.

Resers ki mon’n fer kot seksyon Traffic lapolis ki mon ti ava kontan koz lo la, I donn nou en lendikasyon osi aprofondi lo size tre enkyetan la.  Lapolis I normalman rikord bann statistics par mwan e osi par distrik.  Pou rezon letan, mon pou donn lenformasyon pli enportan pou sa bann lannen ki mon pou mansyonnen.  Pou lannen 2007 en total 1,400 aksidan ti raporte.  Sif pli o ti dan mwan Zanvye ki ti 31 e sa ti ganny raporte kot Police Santral Headquarters e an Desanm menm lannen, 47 aksidan ti ganny raporte.  An total nou ti vwar nou bann ka ki’n raport lopital, 77.  E ti annan 12 lanmor pou sa lannen.  Pou lannen 2008, 1,350 aksidan Mr Deputy Speaker ti raporte e sa ki ti trakasan, lanmor ankor bann case ki’n ganny rikorde par sa bann aksidan ti annan 10 lanmor an total.  Pou lannen 2009 1,410 aksidan ti ganny raporte lo semen e an total ka lanmor 3, me 314 dimoun ti ganny raporte lopital.  Pou lannen 2010, 1,531 aksidan lo semen e zis pou nonmen, 69 aksidan zis dan mwan Desanm lannen 2010.

An total 56 ka ti ganny admet lopital e antou 150 – ler mon pe dir admet se reste lopital akoz zot blesir eksetera. me an total 150 ti ganny raporte lopital e nou ti annan nou 11 ka lanmor.  An 2011 ti annan en pti bes, 615 ka ki ti ganny raporte konman aksidan e ase grav.  Ti annan nou 10 ka lanmor ankor dan sa lannen.  Pli presizeman an 2010 depi Zanvye ziska Zen nou annan nou antou 525 aksidan me mon ti a kontan dir konbyen aksidan par mwan la akoz sa mon krvwar I bann ka ki vreman nou bezwen konsyan e fer nou refleksyon lo la.  Zanvye ti annan 126 aksidan e 28 ladan ti raport lopital casualty e ti annan nou 1 lanmor.  Fevriye ankor 2012 ti annan nou 120 aksidan e 32 casualty e 1 lanmor ankor ti ganny okazyonnen. Mars sa lannen ankor, 156 aksidan lo nou semen, 40 casualty, 1 ka lanmor.  Avril sa lannen 123 aksidan, 47 casualty, erezman ti napa lanmor an Avril.  An Me 106 aksidan, 21 casualty, ankor 1 ka lanmor.

Mr Deputy Speaker mon pan go back pou mwan al rod bann case aksidan ki’n arive resaman me pou dir ki dan mon distrik over sa weekend ki fek pase la nou’n annan nou en total 4 a 5 aksidan.  So, ou vwar koman si oule, ler nou pe regard sa bann sif par egzanp nou pe regard nou dan mwan Fevriye avek 28 zour oubyen 29 zour nou pe vwar nou 120 aksidan, an Mars 156 aksidan.  So, mon krwar sa I en pti pe tro bokou e nou pou bezwen fer zefor pou vwar en solisyon avek sa bann aksidan ki pe ariv tro souvan.

Mr Deputy Speaker dapre statistics lapolis I kler ki plis sa bann aksidan pe ganny okazyonnen sirtou par neglizans.  Lenfliyans lalkol e vites, sirtou kot parfwa blesir grav oubyen lanmor I arive.  Nou osi okouran ki lapolis I fer bann par egzanp bann breathalyzer test pou dekouraz bann drayver servi lalkol e pou zot pa drive anba lenfliyans lalkol.  Sa breathalyzer test I dekouraz zot pou drive ler zot in bwar.  Be depi Zanvye ziska Avril 2012 anviron 50 ka in raporte kot bann tes in ganny fer e sa I plis kot Kord Gard Santral.  Sa zis enn, de ou trwa lezot distrik tel koman Anse Royale oubyen Beau Vallon e Mont Fleuri kot bann tes in ganny rikorde.  Sa I montre ki sa legzersis pa ase e pa konparab avek sa kantite aksidan ki pe ganny okazyonnen si oule bann case ki pe arive avek bann dimoun ki pe drive anba lenfliyans lalkol.

A sa pwen Mr Deputy Speaker lapolis li osi I bezwen realize ki charity begins at home.  E parey nou dir, lead by example.  Zis mwan pase pou donn en legzanp, zot ti fek ganny en fleet nouvo transpor e parey nou konnen nou ti vwar enn dan labou dan distrik Pointe Larue kot son drayver sa lapolis ti sou.  So, sa ki nou pe dir isi Mr Deputy Speaker ki fofisye lapolis osi I bezwen de tanzantan bann ki dray sirtou fer sa bann tes breathalyzer pou zot osi eparnye fer bann aksidan grav lo nou semen.

Mr Speaker, mon krwar ki en sistenm parey nou pe demande I pou donn pwen bann drayver pou zot si oule pou ganny dekouraze oubyen ganny ankouraze dan en fason pou pa fer aksidan I pou en keksoz ki neseser e sa mon pe demande ki petet I ganny fer tre vit.

A sa pwen mon pou arête Mr Speaker pou mwan osi demann lezot koleg Onorab pou anmenn zot kontribisyon anver sa mosyon.  Mersi.

 

MR. DEPUTY SPEAKER

Bon, Mosyon in ganny prezante devan nou Lasanble, okenn manm ki segonn sa Mosyon?  Onorab De Commarmond.

 

HON CHARLES DE COMMARDMOND

Mr Deputy Speaker mon segonn sa Mosyon me mon ava koz en pti pe plitar.

 

MR DEPUTY SPEAKER

Onorab Fideria?

 

HON EMMANUEL FIDERIA

Mersi Mr Deputy.  Mr Deputy sa Mosyon devan nou Lasanble ozordi a mon avi I tre enportan.  Avek devlopman rapid ki’n arive e ki pe arive dan nou pei I neseser ki nou met tou nou bann lalwa ki gid sirkilasyon trafik a zour.  Nou bezwen ganny armonize e vin pli serye.  Konman rezilta, sa I ava permet nou annan en bon sistenm sekirite pou drayver osi byen pou bann pyeton ki servi larout piblik.

Aksidan ki okazyonn gran pert finansyel, lavi imen I met bokou presyon lo nou sistenm lasante e nou sistenm lasante e nou sistenm welfare.  Dan sirkonstans kot enn nou sitwayen I vin andikape akoz aksidan, swa en paran ki kit en gran fanmiy deryer e lasosyete I bezwen pran ka avek.

Mr Deputy parfwa osi nou vwar ki bann zanfan i vin orfelen e sa osi I met bann gro fardo lo nou lasosyete.  Mr Deputy, pou deal avek bann drayver ki dray dan en fason tre neglizan kot zot fer vites dan bann landrwa kot pa neseser.  Overtake dan kontour kot vizibilite pa bon, zot negliz bann sinny trafik ki annan lo nou semen e souvandfwa swa I fini par aksidan ki nou ti kapab evite.

Mr Deputy, isi Sesel nou bezwen rod en fason ki nou tou sa bann loto ki lo semen I annan son patant ki azour e neseser e asire ki son sistenm lalimyer I mars byen, fren I dan bon kondisyon, ki son masin pe mars byen e I pa pe polye lanvironnman.  Sesel konman en pti pei nou’n fer bokou sakrifis pou nou prezerv nou zoli lanvironnman.  Nenport transpor ki pe polye nou pei pa devret pe roule lo nou semen.

Lo kestyon lasante, nou oule note an pasan ki nou bann sitwayen ki annan bann kondisyon asthma ki pa kapab viv dan en lanvironnman ki annan en nivo polisyon ki pa akseptab.  Mr Deputy, lot keksoz ki nou bezwen deal avek serye sa se bann transpor ki pe servi semen piblik san en lasirans ki valid.  Dan plizyer sirkonstans ler sa bann transpor I enplike dan aksidan bann viktim I vwar zot dan gro difikilte avek en tel sitiasyon.  Mon resers I endike ki I annan en kantite case Ankour zis akor transpor ki napa lasirans e sa I fer sitiasyon vin konplike pou bann dimoun ganny zot konpansasyon.

Mr Deputy, nou la pou nou anmennn solisyon pou nou sitwayen.  Ozordi bokou bann konpanyen lasirans I fer serten laranzman ki propriyeter transpor I kapab pey zot lasirans par morso e mon krwar ki I en bon keksoz si en dimoun I annan sa difikilte finansyel I kapab ganny en pti laranzman.

Mr Deputy, nou bezwen reste osi virzilan kot plis camera I ganny enstale enpe partou ki ler nou sitiasyon ekonomik I amelyore en tel mezir I ava azir konman en deterrent e bann drayver lo semen I ava pran plis swen e zot responsabilite ler zot pe dray.

Mr Deputy, en lot sirkonstans akoz plizyer aksidan I kout drayver ki fer gran konversasyon lo mobile, pa pe konsantre lo sa ki pe pase lo semen.  Nou bezwen kontinnyen fer bann kanpanny sansibilizasyon lo radyo ek televizyon e dan sa fason kontinnyen edik nou bann dimoun.  Dan ki meyer fason pou evite ki aksidan I arive.

Mr Deputy pli gro problenm I dray anba lenfliyans sibstans, ouswa en dimoun ki pa’n byen dormi aswar ki pe dray nou rapel tre byen sa sitiasyon trazik ki ti arive tou dernyenman kot lavi ti ganny perdi, soufrans pa neseser ti ganny mete lo serten fanmiy.  Mr Deputy, mon reste konvenki ki avek en tel sistenm I ava ede met sa sitiasyon anba kontrol.

Mr Deputy, pou kontinnyen mon oule dir en keksoz lo bann bis Tata.  Bann bis Tata zot bezwen rekonnet ki zot bann transpor piblik, I pa en transpor prive ki konsern en endividi.  Nou demann SPTC pou edik byen zot bann drayver ki sa bann bis I pa’n fer pou zot fer speed ladan.  Semen pa zis pou bis Tata, pa zis zot tousel ki lo semen.  Ankor enn fwa, mon oule note an pasan ki si 80 pasaze I ganny enplike dan en aksidan en sel kou ki fardo ki nou pe met lo nou sistenm lasante en sel kou?  E an plis, pran plis prekosyon pou nou evit en bann sitiasyon ki pa neseser.

Mr Deputy, annou konsantre en moman lo bann statistics.  Nimero 1, an 2010 ti annan 1531 aksidan e 11 ladan ti fatal.  An 2011 ti annan en bon pe aksidan e 10 ladan ti fatal.  An 2012 ziska la ozordi in annan 3 lanmor ki’n arive.  Mon demande ki kantite soufrans sa bann aksidan pe anmennen dan bann fanmiy ki viktim sa bann aksidan an rezilta neglizans premye grad.  Mr Deputy, mon propoze ki bann gard trafik I vin pli konsistan dan zot travay.  Ki SLTA I met bann crash barrier dan bann landrwa ki danzere.  Ki Gouvernman I garanti agrandi semen dan serten landrwa ki permet trafik sirkil byen.  Ki I annan en bon apersi ant bann seksyon trafik avek SLTA.  Ki SLTA I fer son mye pou gard bann semen dan bon kondisyon.  Ki plis landrwa I ganny propoze pou fer bann parking.  Avek sa Mr Speaker mon pou donn tou mon sipor sa Mosyon, mersi.

 

HON SHERYL VANGADASAMY

Mersi Mr Deputy Speaker.  Mon Koleg Onorab, zabitan Mont Buxton e tou a lekout bouzour.

Mr Deputy Speaker, permet mwan pou dir enn de pti mo lo sa Mosyon.  Lofans trafik parey loter Mosyon in fer sorti I en lofans ki kontinnyelman ogmante.  In annan bokou de ka fatal kot dimoun in perdi zot lavi.  Paralize, oubyen ganny serten dimal grav, oubyen propriyete ganny andomaze.

Mr Deputy Speaker, ozordi nou fek aprann lanmor enn nou koleg, patriyot dan Parti ki’n mor atraver en maladi.  E ozordi nou dan sa Lasanble nou pe koz lo en size ki tous lo lanmor – me en size ki tous lanmor dan en lot fason.  Enn ki pli trazik e ki pli sibit pou sa bann manm fanmiy ki perdi en vitktim en ka fatal.

An zeneral, gran linny lentansyon loter Mosyon I bon e I kler me permet mwan partaz en pti pe mon pwennvi lo nou lalwa.  Ozordi, si nou pou entrodrwir sa sistenm demerit points system parey loter Mosyon in dir, I pou bezwen annan en lamannman radikal en pti pe dan nou lalwa, dan nou Road Transport Act.  Me I osi enportan pou konnen ki lenportans en demerit points system I la pou promouvwar safety lo semen e I pou aplik pou zis serten lofans me pa pou tou lofans trafik.  I la pou akte konman en deterans pou bann parey nou dir bann habitual ou bann repeated road offenders.  E I la konman en fason pou amelyor standar dray lo semen.  I rezilta serten pwen ki pou ganny retire e sa I aplik pou serten lofans trafik ki pou bezwen ganny endike spesifikman dan sa lalwa.  Sa pa pou aplik pou tou lofans trafik, lezot pou nesesit lamannman direkteman lofans trafik dan nou Road Transport Act.

Mr Deputy Speaker nou Road Tranport Act I enn ki date en bon pe letan e in ganny revize enn de trwa fwa.  Me resaman Mr Deputy Speaker sa Lasanble in debat lo plizyer lamannman dan lalwa kriminel tel ki semenn pase nou’n fer lo Kod Penal e Misuse of Drugs Act. Pou permet santans apropriye e santans serye kont serten krim i konsernen.  Mon santi ki sa Act nou Road Transport Act osi I merit ganny revize pou permet li a zour avek sanzman aktel dan nou pei.  Logmantasyon lofans trafik, lanmor okazyonnen par dray danzere ou neglizaman, reckelessly lo semen.  Ozordi, anba sa tel Act okenn dimoun ki ganny trouve koupab pou okenn lofans anba seksyon 24 sa tel Act, I kapab ganny kondannen pou pa plis ki 2an prizon oubyen pou pa plis ki en fine R10, 000.  Mr Deputy Speaker, e ki sa anba lalwa I ganny terminen konman en misdeameanour, savedir en lofans miner.  Sa Mr Deputy Speaker, I menm aplik pou serten ki dray neglizaman oubyen danzerezman lo nou semen.

Lo sa menm nivo Mr Deputy Speaker, road users pa enkli zis drayver.  Mon pou totalman siport mon koleg Onorab Fideria ki’n dir ki nou bezwen osi koz lo nou pyeton.  Pyeton ozordi osi I servi semen.  Mon konsernen ozordi ki lenportans, wi, I merit atase ek drayver.  Ozordi nou pe koz lo demerit points system pou nou drayver, nou pe koz lo lamannman neseser dan lalwa pou annan aksyon pli sever e penalti pli sever pou nou drayver.  Me nou osi bezwen koz lo nou pyeton.  Pyeton osi ozordi I annan en responsabilite kimannyer e en fason fer kimannyer pou servi nou semen.  Nou’n met bann traffic signs byen partou dan bann pozisyon tre kler e kot tou dimoun I merit konnen kimanyer pou servi li.  Ozordi, konbyen drayver ki fer son mye pou dray tre byen e korekteman lo nou semen me ozordi sa menm drayver I bezwen vey transpor e anmenmtan vey pyeton – ki osi akte ase neglizaman e danzerezman lo semen.

Mr Deputy Speaker, Gouvernman atraver SLTA in envestir dan plizyer proze pavement, par egzanp, partou dan lavil e dan plizyer distrik.  Me ki nou vwar ozordi?  Serten I deside mars lo pavement, serten I deside mars lo semen.  Mr Deputy Speaker napa bokou traffic lights isi dan Sesel.  Mon prezimen, e mon konnen ki nou annan zis 2 traffic lights – me ki ou vwar dan sa 2 landrwa?  Kantmenm lalimyer I ver, kantmenm lalimyer in endike ki dir tenir, pa bouze, la I ler pou transpor pase – konbyen nou pyeton ki zis kontinnyelman koupe oubyen taye devan transpor e apre ganny letan zot ganny tape nou montre ledwa lo sa drayver.

Mr Deputy Speaker, ankor enn fwa dan plizyer landrwa I annan zebra crossings.  Lalwa I la anba nou Road Transport Act konsernan nou pyeton.  Konbyen dimoun ki konnen poudir letan I annan en zebra crossing, enn I annan en speed rezonnab ki ou sipoze koup lo sa zebra crossing. Konbyen nou ki konnen ki si I annan en zebra crossing dan serten landrwa ou pa sipoze koup semen plis ki 15 met obor sa zebra crossing?  Me ozordi ki nou vwar, nou vwar nou menm serten Seselwa, nou bann pyeton ki pran nou sweet time, nou donn nouvel lo sa zebra crossing pou nou koupe e apre demen nou ganny tape nou blanm sa drayver.

Mr Deputy Speaker, mon krwar mon’n kontinnyelman dir e sa I pou en dikton ki mon poul toultan dir.  Lalwa I la, nou annan nou lalwa.  I vre, nou bezwen konstate ki I merit annan serten lamannman dan nou lalwa.  Si nou pou entrodwir sa demerit points system I pou en fason pou amelyor safety lo nou semen, me annou osi koz lo nesesite pou enplimant nou lalwa ki deza la.  Enplimant sa lalwa ki ankor bon, ki valab, ki la.

Mr Deputy Speaker, I en lofans parey mon’n dir, pa zis pou drayver mke osi .pou nou pyeton.  Si serten mank I annan dan lalwa parey nou tou ki la nou pe dir, annou fer lamannman neseser, annou endike kote nou bezwen aranze.  Annou fer propozisyon parey Onorab Valmont in dir pou entrodwir en sistenm pwen.  Me osi annou pran kont poudir sa osi I pou vin avek en serten lenplikasyon.  Nou sistenm Lakour osi ki bezwen efektiv pou kapab deal avek serten sitiayon.  Nou Licensing lotorite osi, ki letan pou’n arive ler pou diskalifikasyon bann license e osi pou redonn permi sa bann license I bezwen lo sa nivo pou kapab efektivman deal ek tou sa bann case.

Mr Deputy Speaker, letan mon pe koz lo tousala, nou bezwen annan drayver e pyeton responsab lo nou semen.  Nou bezwen osi revwar sa sonm fixed penalty ki nou donnen letan nou donn en tiket.  Ozordi en fixed penalty I R200 pou en dimoun ki pa met en seat belt, petet osi in ler pou nou revwar sa.  Petet osi in ler pou nou revwar santans paret Onorab Valmont in dir konsernan causing death by dangerous driving.  Eski en maximum imprisonment of 5 years I zistifyab pou en dimoun ki’n perdi son lavi atraver en aksidan, either in koze danzerezman, oubyen reckelessly oubyen menm neglizaman?

Mr Deputy Speaker mon pou osi koz lo lapolis ek Land Transport.  Nou konstate I lapolis I annan serten mank resours imen pou deal avek tou lofans e nou sitiasyon krim dan pei.  Me lofans trafik pa konsern zis seksyon trafik.  Lofans trafik I merit konsern tou zofisye lapolis.  Be it ou dan SSU, be it ou kot CID, be it ou dan Kord Gard Santral, be it ou pe gard sa labank dan lavil.  I konsern tou zofisye lapolis.  Me ozordi ki nou vwar?  Si ou vwar trafik in bloke dan milye semen I annan serten gard ki pase I fer konmsi I pa zofisye lapolis.

E osi Mr Deputy Speaker, letan nou koz tou zofisye I merit kapab deal avek tou sitiasyon zot formasyon osi I merit asire ki zot kapab fer sa.  Konbyen nou zofisye ki kapab deal avek serten sitiasyon trafik ki arive?  En aksidan I arive lo semen nenport ki zofisye lapolis I merit kapab deal avek sa sitiasyon.  Trafik in bloke, nenport ki zofisye I kapab deal avek sa sitiasyon.  En transpor in park lo en double yellow line nenport ki zofisye I merit kapab donn en fixed penalty sa drayver ki’n park lo en double yellow line.  I annan en obstruction dan milye semen, nenport ki zofisye I merit a la oter pou retir en obstruction dan milye semen e pou fer trafik flow.

Mr Deputy Speaker, sa ki nou pe demande se zis en pti pe plis lenerzi, plis pro-aktivite  osi lo lapar lapolis ek Land Transport pou asire pourki nou sitiasyon trafik I amelyore.  I pa zis ki sak fwa nou tann en ka fatal ouswa sak fwa I annan en nouvo loperasyon ki lapolis I mont anler lo televizyon oubyen Land Transport I mont anler nou fer en gran loperasyon pou 1 mwan, 2 mwan, nou atrap plizyer dimoun either pou exceed speed limit e apre nou pa tann nanryen e nou pa vwar lezot keksoz arive.

Mr Deputy Speaker, tou lofans I en lofans, napa lofans ki pli gran, napa lofans ki pli pti.  Tou lofans I lofans e I merit ganny deal avek apropriyeman e seryezman.  Lapolis lo sa laspe I merit vin pli proaktiv pa zis an term aret transport, gete si seat belt, patant, lasirans e license I annan me osi fer breathalyzer test pli souvan.  Rod mezir pou mezir speed ozordi.  Ki dernyen fwa lapolis in servi bann mekanizm ki’n deza an plas, bann resours pou aktyelman mezir speed lo nou highway e partou dan nou semen?

Mr Deputy Speaker, lapolis nou’n toultan annan en tandans konmans en bon loperasyon parey monn dir e apre I mor an nesans.  Nou annan plizyer ka fatal ozordi okazyonnen par speed oubyen dray danzerezman.  Menm anba lenfliyans lalkol ouswa anba lenfliyans drog.  Konbyen drayver ki’n ganny kondannen ozordi pou omisid envolonter oubyen parey nou dir, manslaughter?  Letan I dray danzerezman oubyen neglizaman lo semen e in pran lavi en dimoun.

Mr Deputy Speaker mon’n toultan dir ki nou annan bokou lalwa e mon repet ankor, nou annan bokou lalwa.  Me nou bezwen annan bann bon lalwa ki nou merit pe enplimante efektivman e byen.  Parey Onorab Valmont be dir nou pe demann en lamannman dan nou Road Transport Act pou enkli en demerit points system nou bezwen fer sir ki letan nou pe entrodwir nouvo lamannman ki sa osi I pou ganny byen enplimante e byen ganny servi pou asire ki nou semen, Mr Deputy Speaker I lo sa nivo e lo en standar ki pa pe pran lavi oubyen pa pe koz okenn dimal lezot dimoun.

Mr Deputy Speaker avek sa, mon pou donn mon sipor sa mosyon.

HON ALDERIC BRISTOL

Mr Deputy Speaker, Manm Onorab, lepep a lekout bonzour.  Mosyon ki devan nou pe demann Gouvernman pou konsider etablir en sistenm pwen ki ava gid license dray lo semen e ava ganny servi konman en penalti kont drayver ki neglizan lo semen.

Mr Deputy, larout piblik I sa fasilite piblik ki popilasyon an gran mazorite I servi toulezour, direkteman ou endirekteman pou fasilit mouvman sa pep.  Sa travayer ki monte desann toulezour dan bis pou li al debrouye, sa taxi driver ki servi son loto pou rod son lavi, sa peser ki servi en pickup pou al vann son pwason pli pre avek lakominote, sa touris ki cruise dan son loto lwe pe admir labote nou pei.  Sa tantin ki servi en pirat pou al rod son boutey gas, sa labilans ki demann semen pou ariv lopital a tan avek son ka emergency, sa zennonm ki li I pe fer son sport dan son loto modifye e lalis I kontinnyen.

Tou sa legzanp I demontre ki kantite lenportans larout piblik I annan e ki rol primordyal sa fasilite I zwe dan devlopman nou pei.  Parey ki I tre enportant pou semen reste an bonn eta, I osi tre enportan ki sa ki servi sa semen I servi li byen e avek respe.

Mr Deputy, I vre ki I annan mezir an anplas pou gid e asire ki larout piblik otan ki posib I reste safe pou tou sa ki servi li ki se swa drayver ou pyeton.  E Road Transport Act I enn sa bann mekanizm ki deal avek serten sa bann size.  I osi annan lapolis ek highway traffic officers, sa ki nou apel traffic warden ki zot rol se pou asire ki drayver I met an aplikasyon lalwa trafik.  I osi annan Licensing Authority ki li I dir avek bann issues license e byensir I annan Lakour ki li I dil avek okenn ka ki arive devan li pou ganny en zizman.

Deplizanpli, nou pe remark bokou drayver ireponsab lo semen e deplizanpli dan statistic prezante par loter Mosyon nou vwar en logmantasyon dan lakantite aksidan ki ganny raporte koze an gran mazorite par drayver iresponsab.  Ler sa bann sif I ganny tradwir a term poursantaz par egzanp, nou vwar ki an 2009 I montre en logmantasyon 4.4 poursan lo 2008 e 2010 en logmantasyon 8.6 lo 2009.

Loter Mosyon in osi demontre sa gran logmantasyon dan lakantite veykil lo semen ozordi e osi sa gran logmantasyon dan lakantite dimoun ki ganny issue avek en driving license.  Tou sa konbinezon, logmantasyon ansanm I efektivman fer nou network semen vin pli ankonbre e pli busy.  I osi ogmant risk kontak ant veykil e veykil e ant veykil ek pyeton.  E sa I definitivman ogmant risk aksidan konsiderableman.  Alor sa I kre en demann pou en keksoz ganny met an aplikasyon pou redwir sa bann risk.  Se la kot sa Mosyon pou en demerit points system I antre.  Nide par deryer sa sistenm demerit ki loter Mosyon pe met devan pou reste selman konplimant lezot mezir ki deza an plas.  I bezwen annan en sistenm ki pou ed drayver pou pran zot responsabilite e asire otan ki posib ki larout piblik I reste safe pa zis pou drayver me osi pou tou lezot dimoun ki servi li.  Sa sistenm demerit I ganny aplike dan plizyer pei e statistic I montre ki I fonksyonn tre efektivman.

Mr Deputy mwan mon pe get sa Mosyon dan son lot loptik osi.  Savedir ankouraz drayver pou vin pli responsab lo larout piblik.  Sa sistenm si ler I vin an fors I byen ganny enplimante pou ede redwir aksidan e lensidan ki arive par lafot neglizans drayver pou diferan rezon.  E mon plis ki krwar ki drayver pou konsyan kwa ki a risk dan bann sirkonstans kot zot perdi pwen e sa I ava konman en baromet ki pou ed zot upgrade zot fason azir anba en volan lo larout piblik, pou safety tou dimoun ki servi larout.  Sa sistenm tir pwen I esansyelman kot bann pwen I ganny dedwir lo sa offender, sa drayver an adisyon avek lezot pinisyon ki sa lofans limenm li I anmennen.

Lefe prevantiv sa sistenm demerit I reste dan risk ki en drayver I riske perdi son license si I kontinnyelman repet bann lofans.  Lefe prevantiv I kapab vin dan 2 fason, sa ki apel general preventive effect e lot se special preventive effect.  General preventive effect pou ganny demontre par rediksyon dan lakantite lofans par tou drayver.  Zot dray avek plis prekosyon pou anpese ki pwen I ganny tire lo zot.  Special preventive effect li I ganny demontre par rediksyon dan lakantite lofans koze par en drayver ki li pwen in deza ganny tire lo li, I dray avek plis prekosyon pou anpese ki plis pwen ankor I ganny retire lo li.  E deza la lanmenm la nou vwar ki benefis pozitiv en tel sistenm pou anmennen.  E anfenn kont nou pou vwar bokou plis drayver responsab dan nou pti Sesel.

Mr Deputy pou sa sistenm vin anplas I pou neseser ki I annan en regilasyon pou gid sa bann mezir.  Mon’n fer enpe resers e osi rankontre ekspert dan sa domenn pou aprofondir e form mon lekor enpe plis lo sa size demerit points system.  Sa size I enn ki ase teknik dan limenm e I enkorpor plizyer laspe pou li kapab fonksyonn byen.  Pou sa demerit points system vin efektiv I pou bezwen tonm anba 3 main bodies.  Sa se lezislasyon, lalwa e aplikasyon.  Lezislasyon sa I an tonm anba responsabilite Minis pou transpor.  Se zot ki pou bezwen drafte regilasyon pou gid sa sistenm demerits.  I pou responsabilite Minister pou transpor pou asire ki regilasyon I an plas e a zour avek sitiayon dizour.

Lalwa li, I a tonm anba zirisdiksyon Lakour.  Se la kot bann lofans I a pase pou ganny en zizman.  Se laba ki pou administre cancellation license dray e lezot aksyon anba lalwa aktyel.

Laplikasyon li I a tonm anba SLA.  SLA ki custodian of licenses, savedir li ki donnen ou refiz license – zot ki annan custodian akoz zot ki pou annan bann data lo bann drayver e zot license e I pa pou neseser alors pou annan en lot landrwa pou fer sa menm fonksyon ki zot pe fer.  Alor I a toutafe normal ki zot ki uphold database sa sistenm.  Par egzanp, se zot ki pou ekrir sa drayver son let sispansyon.  Se SLA ki pou endorse en license apre verdict Lakour lo sa case ler sa sistenm I vin an plas.

Mr Deputy, a la pratik ki manyer sa sistenm I devret marse.  Definitivman I pou bezwen annan en formil dan sa regilasyon ki pou gid lo kimannyer sa sistenm pou fonksyonnen an pratik.  Par egzanp Mr Deputy tou drayver ki annan en valid license I ava ganny donnen en serten la kantite pwen ki sa I ava ganny allocate avek li.  Pou sak lofans ki a fer depandan lo gravite lofans en serten lakantite pwen relevan I a ganny retire lo so total.  Ler sa drayver I ariv lanmwatye son pwen I ava bezwen ganny advice an ekrir sorti kot lotorite konsernen pou konsey li pou pran plis prekosyon.  Me malgre sa, si lofans I kontinnyen ganny komet, alafen dizour I pou perdi tou son pwen e la sa drayver pou perdi son licence pou en serten peryod letan kot I pou bezwen swiv serten prosedir partikilye avan ki I re-ganny son license.  Mon ava elabor lo la en pti pe pli anba.

Prezan, lekel ki pou responsab pou enplimant sa regilasyon?  Zot pou esansyelman bann enforcement officers ki’n ganny mandate san dout par Komisyoner Lapolis pou uphold lalwa, tel ki lapolis, highway patrol officers etc.  Sak sa bann lenstitisyon pou bezwen neseserman annan en database ki pou otomatikman link avek main database kot SLA par egzanp.  Okenn lofans ki ganny input ladan pou otomatikman ganny update li dan central database.

Mr Deputy, par egzanp, zour lalimyer rouz I alimen savedir sa drayver in perdi tou son pwen, la sa case I a ganny mete devan Lakour swa par lapolis ouswa par sa Implementation Agency.  Se la kot sa drayver pou aparet pou showcase akoz ki I krwar I pa devret ganny arase son license. Sa dan limenm I a montre fairness dan sa case kot sa dimoun I a kapab defann son lekor.  A note ki anba Road Act aktyel I annan en misdeameanour charge avek lanprizonman R10 mil oubyen ziska 2an prizon oubyen toulede.  Me dan lepase I annan dimoun ki’n kondann zis R100 ki pan menm pey fre Lakour.  Kekfwa mon a demande ki sa I a ganny revwar e ki par egzanp I avan annan en santans mandatwar R1, 000 par egzanp.

Pou retourn back; lo size demerit points sa pa devret neseserman vin avek en kondannasyon lanmann ou santans prizon unless I en aksidan grav ki koz en lanmor ou en blesir grav par egzanp par neglizans.  Dan regilasyon I devret annan diferan lakantite pwen ki sipoze ganny tire baze lo diferan gravite lofans e sa I ava par egzanp 1 a 5 pwen e la ankor sa pa devret enkli bann ka serye tel ki accident causing death, injury koze par negligence driving etc.

Par egzanp, en pwen I a kapab ganny tire lo en senp lofans tel ki kot en drayver, pasaze pa pe met son seatbelt.  Sa I a fer li realize safety son pasaze e asire ki I ava annan en seatbelt ki fonksyonnen dan son veykil.  De lot kote, par egzanp en 5 pwen I a kapab ganny tire lo en drayver ki fail pou li prezan lo scene en aksidan par egzanp dan ka en hit and run kot si I ti la I ti ava kapab ede pou sov lavi son viktim.

En schedule anba sa regilasyon I a permet ki sa sistenm I a ganny enplimante dan serten nonm cycles tel ki par egzanp 5 cycles.  Par egzanp, drayver I ava ganny allocate en serten nonm pwen pou konmanse dizon, 12 pwen.  Cycle 1 si I perdi tou son 12 pwen then I a perdi son license pou 1an kot apre I pou bezwen swiv en Road Safety Course e avan ki I ganny konsidere pou li re-ganny son license ankor.  Sa I ava al lo cycle 2 kot son alokasyon pwen I ava diminyen enpe.  Si I perdi ankor tou son bann pwen dan cycle 2 la son license pou ganny pran, pou 2an kot I pou bezwen refer ankor sa bann prosedir e menm resit ankor pou theory and practical tests avan ki I ganny konsidere pou re-ganny ankor son license.  E sa I ava kontinnyen dan cycle 3 ek 4 kot pinisyon li ava en pti pe pli sever.

E finalman cycle 5 kot la si sa drayver pou bezwen ganny vwar konman I en menas pou lezot drayver e pyeton lo larout piblik e alor son license pou bezwen ganny revoke pou lavi.  I pou napa drwa dray ankor Mr Deputy.  Sa bann cycles pou enteresan akoz I pou donn loportinite en offender refer li san ki I perdi son license permanan apre bann premye lofans ki in fer.  Ziska prezan monn koz lo kote negativ bann drayver.  Me ki pou arive avek bann drayver egzanpler?  Ki benefis zot pou tire anba sa sistenm tir pwen?  Akoz fodre realize ki parmi sa bann drayver neglizan I osi annan en bon pe bon drayver ki responsab, ki konsyan zot responsabilite anver piblik e anver zot menm.  En benefis se ki serten negosiasyon I kapab ganny fer avek bann lakonpanyen lasirans ki apart sa no claim bonus en serten lezot bonus I ganny donnen avek bann drayver ki annan en tre bon rikord.  Apre tou, ler I annan mwens aksidan, se sanmenm sa bann menm lakonpanyen lasirans ki benefisye.

En lot incentive se annan parey en award pou drayver ki egzanpler pandan lannen.  Sa I a ganny fer atraver en formil ki ava ganny etabli par lorganizasyon ou Minister konsernen.

Frer, ser Seselwa, annou get sa Mosyon avek en lespri pozitiv.  Aksidan I met bokou presyon lo nou lekonomi, ki swa atraver nou sistenm lasante, pyes loto ki nou bezwen aste, letan e fre Lakour e plizyer lezot.  Alors zis mazinen si ti annan en gran rediksyon dan aksidan koze par drayver neglizan ki kantite benefis nou pei ti pou tire.  Mazin bann dekoulman pozitiv lo nou lekonomi ki sa I kapab anmennen.

Alors Mr Deputy se avek sa menm lespri ouver e pozitiv ki mon pou siport sa Mosyon.  Mersi.

 

MR. DEPUTY SPEAKER

Bon, avek sa bann bon konsey sorti kot en ekspert dan transpor nou ava pran en break nou a rezwenn 2er.

 

(Break)

MR DEPUTY SPEAKER

Bon nou a kontinnyen nou travay lo Order Paper e nou deba lo Mosyon prezante par Onorab Valmont e mon ava envit Onorab Pillay.

 

HON SEBASTIEN PILLAY

Mersi Mr Deputy Speaker.  Mr Deputy Speaker ler mon’n ekout bann lezot entervenan lo sa Mosyon mon krwar I kler ki nou annan en problenm, mon krwar I kler ki nou annan en konsern lo lafason ki nou pe regilariz kondwit lo semen e mon krwar parey lezot entervenan in fer resorti oparavan sa I pa zis en issue ki konsern drayver me osi I konsern lezot dimoun ki servi semen.  Mon krwar avan mon kontinnyen I annan serten kestyon fondamantal ki nou bezwen demann nou lekor tel koman, eski bann mezir ki nou annan ozordi an plas I ala oter?  Sertennman apre ki mon’n ekout bann entervenan e mon regard lalinny ki sa Mosyon pe al ladan, I kler ki I annan serten keksoz ki nou bezwen aranze e pou mwan sa ki sa Mosyon pe avanse petet I ava an parti en morso sa solisyon pou ki nou annan, nou improve en pti pe sa kondwit lo semen.  Me avan mon kontinnyen mon krwar parey Onorab Fideria dan son lentervansyon in fer resorti osi Onorab Vangadasamy in fer resorti se ki I annan lezot fakter ki konekte avek sa problenm e mon krwar ti ava bon ki mon osi mon aport en serten kontribisyon e anmenn serten eleman pertinan sa deba devan nou Lasanble ozordi.

Mon krwar I enportan note ki sa zefor pou nou kapab improve lafason ki bann drayver e tou dimoun ki servi semen I korport zot ozordi I pou bezwen en zefor ki ganny fer an partenarya ant lapolis e bann lezot lazans tel koman SLTA e lezot lazans ankor ki konsernen avek sa problenm.  Mon dir sa Mr Deputy Speaker akoz menm si par egzanp nou entrodwir en mezir kot nou annan demerit points nou pou vwar nou dan en sitiasyon kot ler pou nou enforce sa mezir nou pou dan difikilte akoz I pou mank nou petet resours oubyen I pou mank nou mendev.  Se pou sa rezon ki mon krwar poudir dan sa lobtik regard keksoz an travayan an partenarya nou bezwen osi ranforsi bann lezot striktir ki asosye avek sa problenm ki nou pe zis diskite ozordi.

Parey mon’n dir lenportans parey in ganny soulinnyen I pa zis lo drayver ki servi semen.  Mon krwar I kler ki avek lapanouisman ekonomik ozordi nou annan plis transpor ki lo semen, avek bann sanzman konportman dan nou sosyete ozordi I osi kler ki plis dimoun I oule drive, plis dimoun I oule annan en transpor kot oparavan petet en transpor ti en luxury, ozordi en transpor in vin en nesesite akoz I ed en dimoun pou li commute from son landrwa travay ziska kot li.  E mon krwar ki letan ou annan sa bann sanzman fondamantal dan lafason ki dimoun I viv ou bezwen osi annan bann sanzman dan bann regilasyon e dan bann framework ki ganny met an plas pou protez e asire ki lafason ki nou behave sirtou an sa ki konsern nou kondwit lo semen I reste a la oter e I pa koz bann sitiasyon parey loter Mosyon in fer resorti kot nou annan aksidan e nou annan perd lavi.

E se la kot mon krwar poudir I annan en eleman ki petet mon pa’n tann bann lezot Manm tous lo la se sa eleman ledikasyon.  Mon krwar I annan en lenportans primordyal ki bann lekol, ki bann lenstitisyon edikasyonnel I bezwen zwe sirtou depi en tre zenn az avek bann zanfan ki zot ganny eksplike kimannyer zot konport zot lo semen e sa bann zanfan demen zot vin bann fitir drayver e esansyelman e mon krwar a priyori se la ki nou bezwen komanse.  Mon krwar dan son lentervansyon Onorab Fideria in mansyonn sa kot osi dimoun, pyeton ki servi semen parfwa I koz en problenm, I koz en danze pou zot prop lekor, I koz en danze pou lezot drayver.  Mon kapab sit detrwa legzanp kot dan pe pase monn vwar zanfan lekol par egzanp lafason ki zot ape konport zot lo semen, lafason ki zot marse zot mars an gran group lo semen e sa I koz en danze pa zis pou zot me pou drayver e bann transpor ki pe pase lo semen a sa moman.  E dan lepase ti annan lanfaz ki ti ganny mete lo serten progranm edikasyonnel pou edik bann znafan kimannyer pou konport zot lo semen e mon krwar petet nou devret ranforsi sa bann zefor e anmenn nouvo eleman ki ava konpartib avek konteks ki nou trouv nou lekor ladan ozordi.  Sa I en pwen fondamantal akoz si nou pa koman edik nou bann zenn marmay, nou bann zenn dimoun depi boner lo lafason ki zot konport zot, demen ler zot vin en drayver oubyen ler zot lo semen se la kot nou pou vwar poudir sa move konportanman pou sorti e pou napa sa respe pou en fason fer ki normal ler zot pe servi semen.

En lot pwen enportan I relye, I konnekte avek sa pwen demerit points osi par egzanp I annan aksidan ki ganny koze par bann obstiksyon ki ganny koze lo semen, I osi annan aksidan ki ganny koze par egzanp ler en drayver I bezwen say en trou ki ganny trouve dan milye semen.  Tousala mon krwar I relye avek lafason parey mon ti dir ki nou ranforsi lezot striktir ki konnekte avek sa problenm.  Par egzanp la nou kapab koz lo bann lazans spesifik ki annan travay pou fer avek semen par egzanp SLTA I devret annan en mekanizm kot I asire ki bann semen I devret ganny well-maintained kot bann drayver zot pa an danze ler zot ape servi semen.  I osi devret annan bann mekanizm kot I klarifye ki kantite tonaz serten transpor ki kapab pas dan bann semen segonder.  Tousala I bann eleman ki bezwen ganny konekte ler ou pou entrodwi en sistenm demerit points ki mon krwar I en sistenm ki pou anmenn bokou benefis me alafwa nou bezwen osi ranforsi bann striktir ki pou permet nou annan en lenplimantasyon efektiv sa kalite mezir.

Dan bann pei pli avanse I annan bokou camera ki ganny servi par egzanp pou bann traffic lights kot camera I tir portre e otomatikman I annan en sistenm enformatik ki konekte e si sa drayver I dan sistenm sa drayver I ganny son let petet 1 semenn ou 2 semenn plitar kot I dir a tel moman, tel ler ou ti bril en red light e la ou pou ganny sa kosyon ki ou pe ganny perdi ou pwen.  I pa neseser ki lapolis ki pou annan en prosedir legal Ankour ki sa I bezwen ganny fer.  Mon krwar isi Sesel nou annan nou pou le moman nou annan mon krwar 2 set traffic light e met 2 camera avek en sistenm enformatik ki konenkte avek en database Licensing mon krwar I kapab dan nou posibilite, oubyen si pa posib la nou devret eksplor posibilite fer li ki ava ede dan lavil – sirtou en landrwa dan lavil ki annan bokou konzesyon trafik e parfwa ou vwar bokou bann enfraksyon vizavi kondwit lo semen I ava ede pou anpes sa ariv en pti pe.

En lot eleman enportan ler nou pou entrodwir sa, si nou deside pou entrowdir en tel mezir ki neseser pou entrodwir akoz I kler ki mezir ki nou annan ozordi pou kontrol lafason ki bann drayver e bann dimoun ki servi semen I konport zot petet pa alaoter se ki nou bezwen ranforsi kapasite bann enforcement agencies ki pou fer enforcement lo en tel lalwa.  Par egzanp, lapolis son kapasite ozordi i annan serten travay ki pe ganny fer, la mon oule felisit bann zofisye lapolis kot i annan en serten monitoring ki pe ganny ranforsi, but at the same time i annan lezot keksoz ki nou bezwen fer ankor, par egzanp entrodwi bann speed guns dan bann landrwa kle, parey lo bann highways kot i annan en demarkasyon e why not komans entrodwir dan bann build up areas parey lavil, a very strict speed limit, parey dan lezot pei in fer ki ou annan tou en lezot seri mezir ki konplemant en mezir tel koumsa.

Mr Deputy Speaker, mon krwar ki avek lafason ki nou pei pe devlope ozordi, nou pa kapab afford pou reste avek bann mezir ki ti la ler nou kwasans ekonomik, oubyen ler nou abilite ekonomik ti pli ba.  Nou bezwen rod bann mezir ki konpatib avek kot nou trouv nou lekor ozordi e ozordi i kler ki dimoun i pli kapab aste transpor e i annan plis dimoun ki pe servi semen e sa presyon, sa volim trafik ki annan lo semen, pyeton e trafik veykil, i kler ki pou annan en kolizyon at some point.  E se pou sa rezon ki nou bezwen vin avangard e nou fer sir ki sa pa arive.  Mon krwar nou’n deza debat dan sa Lasanble lo Planning Authority kot ler nou konstri bann building nou met bann parking, sa i en mezir similer kot ler nou pe servi semen, nou bezwen kalkile volim trafik ki pou annan lo semen, kot bann housing estates volim pyeton ki pou annan lo sa bann landrwa ki pe servi bann pasaz pyeton eksetera.  Ki pou servi bann pavement, tousala i bezwen met an perspektiv.  E pou mwan ler nou annan en tel mezir koumsa e si nou kapab ranforsi tou bann striktir ki konekte avek, napa okenn dout ki ler en drayver ki’n deside pou li komet en lofans, i pou vwar li pe perdi son pwen, i pou fer li mazin 2 fwa avan ki i al deside komet en lot lofans.  Me ozordi ki nou vwar, en dimoun i kapab fer en lofans, i pa neseserman kler ki sa dimoun pou ganny en kosyon akoz souvandfwa ou pa kapab kas sa lofans ki in fer.  Mon krwar nou tou nou kapab apresye sa, akoz dan bokou distrik par egzanp ou kapab remarke poudir obor en lekol, en drayver i pase full speed e napa personn ki pe catch sa enfraksyon la a sa moman.  I en lofans sa akoz i pe pas dan en landrwa, en zone kot i annan en delinated speed limit, kot i annan zanfan lekol ki pe koup semen, kot i annan pti zanfan ki pe koup semen e i danzere.

E en lot eleman par egzanp, kot en drayver ki li i pe anmenn en load, en gro kanminyon kot napa kouvertir lo sa load.  Par egzanp kot son bann gravye pe anvole dan divan e pe tonm lo sa transpor par deryer, ki kapab ankor enn fwa koz en lot aksidan.  Me nou pa kapab catch sa bann keksoz akoz nou kapasite pou nou enforce bann lalwa ki deza an plas i limite.  So, se pou sa rezon ki mon ti dir oparavan ki si nou kapab ranforsi nou bann striktir ki nou annan, nou bann framework an plas, then en mezir koumsa i pou vin en mezir tre enportan akoz i pou ed nou kontrol efektivman konportman drayver lo semen.

E pou mwan, mon pou siport en tel Mosyon e mon krwar dan le fitir nou devret anmenn lezot Mosyon ki relye avek sa problenm, ki konekte avek sa problenm akoz i osi enportan, an vi ki volim trafik lo nou semen pe ogmante e lensidans aksidan osi i kapab ogmante.  Mersi bokou Mr Deputy Speaker.

 

MR DEPUTY SPEAKER

Onorab Bresson.

HON GALEN BRESSON

Mersi Mr Deputy Speaker.  Ler nou regard sa Mosyon ki’n ganny prezante, depi ce matin Mr Deputy, i enportan pou nou konpran ki ozordi i annan bokou fakter ki’n sanze e nou bezwen port a latansyon.  Sa sistenm pwen kimannyer in ganny prezante, ki mwan personnelman mon krwar i en bon keksoz ki pou ganny enplimante, si i pou ganny enplimante i siport, akoz nou deza annan dan Road Transport Act ki la, ki diriz lalwa transpor trafik e li i la pou siport sa sistenm legal, i en sistenm pwen ki kapab idantifye e osi dekouraze e fer vin personnel bann dimoun ki kontinnyelman fer lofans.  E nou bezwen pran kont ki bokou keksoz in sanze dan nou letan modern e en keksoz ki pa’n vreman sanze se enfrastriktir e sa i plito nou bann semen ki deservi bann transpor.  Bann endividi ozordi i annan bon bind power, bokou plis dimoun pe aste en transpor akoz zot vwar zot bezwen en transpor, zot bezwen sirkile pou al travay, pou anmenn zot zanfan lekol ensi-d-swit, nou annan domenn konstriksyon.  Bokou konstriksyon ki pe monte en pe partou lo zil Mae, lo tou bann zil e la tou kalite transpor pe vini pick-up, Ayab and so on, i ogmant kantite transpor lo semen e nou annan fakter transpor piblik ki’n bezwen vwar en logmantasyon akoz senpleman nou popilasyon in ogmante, in ogmant bokou e la i bezwen deservi tou bann dimoun ki pe al travay, i pe al deservi nou menm, nou lekonomi pou fer li avanse.  Avek tou sa an zwe, sa sistenm lenfrastriktir, menm avek lalwa ki egziste, Land Transport i la, menm yerswar nou’n vwar Roche Caiman, Plaisance zot in met en nouvo semen an plas, me dan sa pti limitasyon ki nou annan lo nou lenfrastriktir, posibilite pou ogmant sa bann lenfrastriktir, nou kapab sey fer pli byen pou manye trafik ki pe kontinnyelman ogmante, me si bann dimoun ki pe servi semen pa pe itiliz li byen, i pa pou redwir problenm ki nou gannyen lo semen.

E la Mr Deputy, mon ti a kontan zis port latansyon en pti pe sa kantite presyon ki kekfwa nou pe gannyen lo nou semen ozordi, ler nou mazin sa kantite dimoun ki pe servi semen ozordi, dan sa 3 dernyen lannen, nou’n vwar an 2010 par egzanp, lo semen limenm, dimoun ki annan licence veykil, bann veykil lo semen, 13,559.  E zis pandan sa lannen, nouvo dimoun ki’n ganny licence transpor lo semen i 1739.  Deza sa i en kantite.  E nou vin an 2011, 13,658 e 2173 nouvo licence lo semen.  E la nou vwar en logmantasyon wi, 100 dimoun, santenn loto lo kote bann ki’n renouvle.  Renouvle me i pa desann.  Alor presyon i ogmant lo menm grander e kantite lenfrastriktir ki deza la.  E osi nou vwar apepre en 40 poursan logmantasyon dan bann nouvo licence bann transpor lo semen e sa i double ankor presyon, dan zis en lannen statistik i montre e sa bann lenfrastriktir pa sanze, me bann dimoun i bezwen zot menm ki pe servi sa bann semen, konpran.

E la Mr Deputy, kekfwa i esansyel ki nou pas en pti pe lo bann sitiasyon ki egziste.  Lo bann lenfrastriktir ki egziste e akoz ki nou pe demande ki en point system i merit ganny met an plas.  Ozordi Land Transport in monte in dir i annan serten zone dan Victoria ki nou bezwen pa park ki pou allow sa flow of traffic, me konbyen dimoun ki kontinnyelman park?  E ler i park, i vin en konzesyon trafik.  Dezavantaz i vin en kantite dimoun ki pe sey sirkile dan Victoria e ou vwar zis bann trafik ki akimile.  Traffic warden i pase, i met 200, sa dimoun i dir ok, zis 200 sa e i kontinnyen.  Alor i konnen, i al pey son 200, lannmen i vin fer menm zafer.  Alor sa i merit en keksoz ki dekouraz sa bann practice koumsa.

En lot keksoz ki bezwen regarde se sitiasyon aktyel la kot bann roundabout, kot i annan bokou bann ledikasyon e Onorab in mansyonn ledikasyon, kimannyer pou servi semen byen, itilizasyon, pou deblok en pe sa sirkilasyon trafik sirtou ankor dan Victoria e la nou vwar bann dimoun, depandaman kot zot vini, kot zot pe apros roundabout, zot fer zot queue trafik lo roundabout ki aprezan i blok trafik dan tou bann lot semen ki pe feed lo sa roundabout, ki en dimoun ti kapab pase, ale.  E ankor i bann move practice ki ozordi nou pe vwar arive vizavi en Act ki egziste e bann lalwa ki egzise.

Nou’n koz lo seat belt.  Wi, i egziste.  Dernyenman mon ti Moris e laba koman ou antre dan transpor i dir ou met seat belt akoz i per, fine i R1000.  Be R1000 i en kantite larzan e bann drayver i konnen e i fer sir ki tou bann dimoun ki anbark ek li e limenm i annan son seat belt.  Osi byen, ou vwar speed limit 40 kilimet, 50 kilomet.  Deswit drayver pe onor sa.  E mon demann li, ou pe onor bann speed limit?  I dir wi akoz si ou kas speed limit i R2000.  Alor nou vwar ki lanmann limenm i bokou aplike, i bokou plis ki menm isi Sesel e sa i fer sans.  Sa sistenm pwen limenm i a vin en deterrent pou bann dimoun ki kontinnyelman kas sa bann lalwa trafik e koz bann lensidan lo semen.

E mon menm personnelman, mon’n enplike dan en aksidan pa tro lontan kot en drayver i kit semen ki i pe drive ladan e i tap avek mon transpor.  E ler mon demande, i ti dan en transpor sa lakonpannyen ki i ti pe travay avek, sa dimoun responsab ki vini i vin vwar mwan, i dir be i fer dezyenm transpor sa msye i kraze dan 2 mwan.  Mon dir be sorry, be ou annan en problenm.  2 mwan sa boug i kraz 2 transpor?  E la mwan i fer trwazyenm.  I vin ankor en lot transpor kraze?  I dir be nou bezwen li dan lakonpannyen.  E li sa msye ler i tap lo mwan i lo textMobile phone, mon vwar li klerman, mon aret loto, i vini menm i tap lo mwan e la sa msye pe drive menm li.  I pa ganny nanryen, son transpor lasirans i kouver kot son lakonpannyen, li i kontinnyen drive.  Alor dan 3 mwan in fer 3 aksidan, pa’n grav pou mwan, mon pa konn sa lot 2 aksidan si ti grav, me i kapab kout lavi dimoun akoz lo en semen i annan en kantite keksoz, konsekans ki vin avek.  E bann drayver koumsa, sorry pou dir, lalwa i merit aplike e licence i ganny pran ek zot.  Dan 3 mwan ou pe fer 3 aksidan?  I en pti pe tro bokou.  E sa merit system, sa point system ki Onorab in prezante, mon krwar i merit aplike Sesel e la bann kondisyon ki nou pe dir i fer sans ki i egziste ozordi e ki pe arive ozordi.

Drive vit.  Pa tro lontan, nou annan semen menm la ki al Perseverance, mon’n tande byento bezwen sey met speed bumps akoz dimoun pe tro drive vit.  E la nou vwar ki Land Transport i sey devlop bann semen, lenfrastriktir i vini, me dimoun i deservi li mal e dan deservi mal i kapab koz en dezavantaz, i kapab koz en lanmor, aksidan e bokou problenm.  E sa sistenm limenm, ler nou regard li i pa la pou dekouraz dimoun pou drive, me i la pou ankouraz dimoun plito akoz i annan son bon kote, Onorab Bristol in dir sa pli boner.  I annan son bon kote ki ozordi si ou pe servi semen byen pou en serten peryod letan, Insurance Company i kapab antre ladan e i dir vwala, ou lasirans, nou dakor ki i desann akoz ou pa’n fer okenn aksidan.  So sa en merit lo sa point system.  I demerit wi, pou bann dimoun ki kontinnyelman parey mon’n dir fer bann lofans trafik, me i en merit osi.  E son demerit limenm Mr Deputy Speaker, pou mwan mon krwar sa demerit system i merit mars dan en serten fason ki limenm i vin en ledikasyon parey Onorab in dir oparavan, i edike anmezir i dekouraze.

Ozordi bokou nou Seselwa nou travel.  Nou annan bokou zanmi a letranze e nou konnen, dan bokou pei a letranze in enplimant sa sistenm.  E bokou nou bann zanmi, mon bann zanmi, mon al deor e nou pe al out, zot dir mwan be ou si ou pa pou enjoy en pti drink, lot bann dimoun enjoy, mon pa pe tous nanryen akoz nenport ler mon kapab perdi pwen lo mon licence e sa pou en dezavantaz pou mwan akoz mon bezwen al travay.  Wi i annan sistenm transpor piblik, be i deza annan en load ase lour, ou bezwen ariv atan travay e i annan zanfan pou anmenn lekol, i dir mwan mon pa pe tous nanryen akoz mon bezwen onor lalwa.  I mars tre byen, ozordi li ki pa bwar, lannmen en lot ki pa bwar, zot pe al out, zot pe al enjoy.  Deor ou ganny atrape, depandaman kot ou ete, zot pa demande what, si ou’n kas lalwa, pwen i ganny tire lo ou licence e la ou menm ki pey la konsekans.  Akoz ou annan drwa perdi sa privilez pou servi semen ki’n ganny met a ou dispozisyon, kantmenm ou annan ou prop transpor.  E ou menm prezan ou bezwen al depan lo en transpor piblik.

Mr Deputy, pou mwan i annan en serten propozisyon ki mon ti a kontan ki loter Mosyon i met devan ler i pe prezant son Mosyon, san mansyonn bann ki’n ganny dir avan lo sa point system.  Sa point system limenm, prenan kont tou bann sitiasyon ki en dimoun i kapab ganny bann pwen retire lo son licence, personnelman mon krwar i ti merit ganny met an 2 faz.  E ler mon dir 2 faz, i merit enn pou bann dimoun ki fek ganny licence 1an, depi ler i ganny licence ziska 2an.  La zot, zot ganny mete anba en nouvo.  Zot ganny mete anba en nouvo sistenm e sa sistenm li mannyer i pase, i point system menm, la sa kategori, akoz nou konnen ler en dimoun i pas son driving test, ou ganny ou licence wi, in donn ou sa, i pa vedir in dir ou al fer sport.  I vedir ki la ou kapab al ou tousel dan en loto, kontrol ou transpor lo en semen, pa fer aksidan e onor tou bann lalwa trafik ki egziste.  Me isi koman ou ganny licence, bokou dimoun, minorite mon kapab dir, akoz ler nou get to aksidan pou sa dernyen 5an par egzanp, i 10 poursan kantite transpor, bann dimoun ki annan licence lo semen e la sa sistenm i donn ou sa permisyon pou ou ale 2an, nou pou regarde ankor wi, ou pe drive ou tousel, napa en dimoun ki asiz obor ou, me annou gete si ou kalifye pou ou kontinnyen, apre ou ogmante pou al lo sa lot scheme, still anba point system e la i kree sa disiplin lo sa dimoun pandan sa premye 2an ki i annan son licence akoz i konnen keksoz i strikt, si mon fer aksidan, si mon drive vit, si mon pa met seat belt, sa dimoun ki ek mwan pa met seat belt, you name it, mon pou ganny arase mon licence deswit or i annan serten keksoz me sa disiplin ki ganny kree e deswit si li i fer serten sistenm pandan sa serten kategori premye 2an ki i annan son licence, nou merit re-anvoy li, probableman lalwa i merit mete ki i al bann keksoz parey bann safety classes, kimannyer ou kondwir, ou regard bann sinny lo larout, kimannyer ou merit onor tou sa bann sinny e la speed limit i koumsa, isi ou pa merit fer speed la.  Re-driver training i repey ankor pou al ankor pou al son re-driver training, depandan konbyen pwen ki in perdi akoz i son premye 2an ki i annan licenceRe-examination, gete si in byen swiv son lalwa trafik, son liv lalwa rafik ki ler i ti pe aprann pou drive e li si i kontinnyelman pandan sa 2an fer lofans trafik, i perdi son driving priviledges altogether e la probableman ou’n kapab retir en dimoun ki ti pou kontinnyelman pandan son lavi fer bann lofans trafik e sa point system i la zisteman pou fer sa.

Lo sa dezyenm bout kot nou dir bann dimoun ki 2an in fini tonm dan sa kategori, in la, in byen drive son veykil, annefe pou laplipar bann Manm Onorab isi anndan osi kekfwa ki annan son licence, akoz si nou oule enplimant sa, ou’n fini annan ou licence pou en serten kantite lannen, la li sa point system i enplimant en lot fason.  E i merit en pti pe pli serye akoz ou annan bokou lannen plis leksperyans drive, ou merit pe onor bann sinny, allow ki ozordi nou tou nou prese pou ariv kot nou pe arive, me nou bezwen mazinen ki i annan trafik lo semen, semen i pli pti pti, i annan plis loto.  Me kit pli boner pou ou ariv laba aler.  I pa kapab ki ou bezwen vol tou semen, fer tou dimoun dir ou pardon e ou, ou bezwen arive e la ou kapab koz aksidan an alan e mal servi sa bann sinny ki ganny plase lo semen.  Alor, bann dimoun ki annan leksperyans li osi, i merit la en deterent pou zot akoz zot osi zot bezwen ganny bann kontrovansyon si zot mal servi lalwa ki aplike ozordi.

Mr Deputy, parey mon’n dir, sa point system i fer ki i siport lalwa ki deza egziste, i osi idantifye, dekouraze e bann dimoun ki kontinnyelman fer lofans ou konnen lekel e zot ganny note, zot ganny met lo la.  Avek sa Mr Deputy, mon krwar mon pou anmenn mon sipor pou sa Mosyon.  Mersi.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mr Deputy Speaker, mersi bokou.  Apre ki mon’n antann lentervansyon Onorab Bresson Mr Deputy Speaker, ou a krwar nou’n fer resers dan menm liv e nou’n kopye lo kanmarad.  Mon krwar son lentervansyon ti tre, tre byen.  I bann pwen enportan ki mon krwar mwan, lotorite i merit seryezman konsidere.  Mr Deputy Speaker, lo sa Mosyon ki devan nou, mon krwar i en Mosyon ki tre bon.  En Mosyon apropriye.  En Mosyon ki’n deza vin dan nou Lasanble oparavan dan bann lezot Lasanble avan, mwan menm mwan mon’n koz lo la osi a plizyer repriz.

Mr Deputy Speaker, avek logmantasyon transpor pandan bann dernyen lannen dan nou pei, kondisyon semen ki pa’n ganny amelyore preski ditou, bokou plis nouvo e zenn drayver, bokou plis neglizans lo larout piblik par mazorite dimoun ki servi larout piblik e rezilta nou vwar bokou plis traffic jam, lanbouteyaz, sirtou dan nou sel pti lavil, e bokou plis aksidan e aksidan fatal e serye.  Rezilta plis aksidan set osi perd lavi, perd materyel, byen materyel, pert byen finansyel eksetera e tou sa i bokou, sirtou lo kote pert lavi, pert finansyel i bokou.  Alor, se pou sa rezon ki mon krwar mwan, si nou revwar lafason donk drayver son bann kondisyon i fonksyonn ladan, si sa bann kondisyon i ganny regete, mon krwar i ava annan amelyorasyon dan sa ki nou pe koze, par egzanp si nou annan en sistenm pwen, nou annan en sistenm demerit oubyen i kapab osi lezot metod sistenm pwen.  I annan plizyer pei dan lemonn ki servi sa bann sistenm pwen.  I annan Lafrans, Irlann, serten pei Arab, New Zealand, Lostrali, ensidswit.  Plizyer pei i servi e nou vwar poudir dan bokou sans, sa sistenm pwen i marse.  Pourkwa pa alor Sesel i osi etidye posibilite pou servi sa dan son sistenm transpor, drayver e servi larout piblik.  Nou vwar alor poudir rezilta aksidan par bann dimoun ki servi larout piblik, alors bokou plis neglizans parey mon’n dir e letan mon gete, Lostrali par egzanp i annan en sistenm kot zisteman in ganny touse avan, en dimoun i vini pou ganny son licence drayver.  Ok, in fer son training me letan ou donn li son licence, ou donn li en probasyon 2an.  En licence oule dir, limite.  En licence ki pa konplet.  I dray li me ou donn li en probasyon.  Pandan sa 2an, i annan en sistenm pwen ki ale avek e tou fot ki i fer, i ganny minuss, i ganny dedwir ladan, alafen dizour sa dimoun i kapab perdi son licence konpletman, i pa zanmen ganny en licence a plen tan, formel.  Oubyen i ganny demande pou retrain, be de tout fason si i fer byen, savedir i met en disiplin dan sa dimoun.  E si i fer byen e letan i ganny son licence korek, son licence permanan, la osi i annan en sistenm pwen ki al avek li e sa bann sistenm pwen i dedwir a sak fot ki ou fer dan lalwa trafik.  Par egzanp, ou annan pou speed limit, seat belt, si ou mal dray lo semen.  Letan mon dir mal dray lo semen, souvandfwa dimoun i krwar letan ou fer speed ou mal dray.  Ok, speed i enn, letan ou al an tro, speed limit i en fot me selman letan ou al dray tro dousman osi i en fot.  La osi i en problenm li, i kapab koz aksidan.  Ou annan ou dray transpor san patant, dray transpor san lasirans, anba lenfliyans, la konmela ou nepli dir zis lalkol ou annan drog, lezot osi ek mobile, sa pli move ankor, konmela preski tou nenk I lo mobileSo, sa bann keksoz, anplis i annan lezot lalwa ki vwar kimannyer zot kapab dedwir sa bann pwen e sa sistenm pwen la anmenmtan i pa devret vin koman en pinisyon pou drayver.  Sa ki konmsi pwen for sa Mosyon, mesaz ki nou devret anvoye, pangar dimoun i krwar poudir nou pe fer sa sistenm pou afekte drayver, pou pini drayver.  Non.  Mon krwar mwan sa i annan en konplemantalite sa.  1, i met disiplin dan dimoun wi, dan drayver, me lo lot kote, i devret vin osi koman en incentive.  Me letan nou dir i vin koman en incentive, i vin pou 2 keksoz, 1 pou amelyor sekirite lo larout piblik, akoz letan i annan mwens aksidan, definitivman larout piblik pou pli safe.  Me osi, lo bann konpannyen lasirans.  Konpannyen lasirans pou benefisye enormeman letan napa bokou aksidan or preski ditou aksidan lo larout piblik.  Savedir, ou vwar poudir zot pa pou depanse pou bann claims e zot pou fer bokou plis profi.  An rezilta, incentive i devret vin pou sa bann drayver ki respekte byen larout piblik, ki li letan son licence pou renew, son lasirans pou renew, i devret ganny en benefis li.  Ou pa kapab pini li akoz i en bon drayver, akoz son rikord i prop.  Akoz son pwen i korek.  Savedir la, lasirans i bezwen antre an zwe.  Bann konpannyen lasirans i bezwen vin on board e lalwa si i ganny aranze, i ava obliz, akoz si ou zis dir koumsanmenm la, personn pa pran responsabilite.  Letan ou oblize, ou vin on board, la osi savedir premium i tre ser konmela, premium loto, lasirans pou bann transpor i a ganny dedwir e bann bon drayver i a benefisye.  Savedir lasirans i ava kalkil son premium, pa zis lo kapasite loto, lo laz loto, lo leksperyans sa drayver me i a vin osi lo son sitiasyon pwen la.  Si ou pwen i bon savedir ou ganny bon benefis.  Si ou pwen pa bon, ou pa a ganny sa bann benefis.  Anmenmtan, sa i pou ed lapolis akoz lapolis la, bann move drayver lo semen i ava ganny redwir.  E tou sa ki mon pe dir e an gro shomodo sa Mosyon, i tonm lo la kot dimoun ava annan plis disiplin e anmenmtan mwens aksidan, larout piblik I a vin pli safe, sa ki nou, nou pe demande, akoz nou bann semen, kantmenm ou oule agrandi semen dan Sesel la, i annan de landrwa ou pa kapab agrandi.  Nou teritwar i koumsa li.  Nou pei i pti pti, bann montanny, kote ou pou agrandi?  Ou konpran, be nou, nou bezwen kapab annan en responsabilite pou dray pli byen, pou servi pli byen larout piblik.  Be ou konn Seselwa kimannyer i ete, nou nasyon parfwa si ou pa met sa disiplin ek li, parey serten lezot nasyon osi me si ou pa mete, i pa tande.  Mwan mon rapel, dernyen kou la letan nou’n Lostrali ek bann zanmi, be parey in ganny rakonte drayver i dir ou non, non, sorry ozordi i pa pe servi.  Be akoz?  Be i dir non, sa Sesel ki zot fer sa.  Isi non, mon pa oule perdi mon licence mwan.  E an plis, lasirans pou ogmante pou mon transpor e zot servi transpor koman en bon mwayen, zot servi sa savek responsabilite.  Savedir met disiplin.  Si nou pe al out, sa enn ki pa servi ozordi, i pa pe konsonm lalkol or whatever, or son drog li i a safe pou dray.  Lezot enjoy.  Demen tour en lot.  Koumsa mon krwar mwan i a met disiplin dan nou pep, sirtou nou zenn pou nou kapab ariv pli devan.

E pou fini Mr Deputy Speaker, nou tou nou vwar e konpran sa ki nou pe dir la dan sa Lasanble.  Ok, nou Lasanble pe anvoy en mesaz for li.  E nou pe anvoy nou Mosyon, savedir nou, nou konsernen e se Legzekitiv malerezman or erezman ki kapab met tousala an aplikasyon.  Nou, nou rol nou dir nou, be pa nou ki pou met an aplikasyon sa.  Menm lalwa i pas kot nou pou nou fer, pou nou aprouve, me Legzekitiv, akoz sa i tonm laba kot Minister Transpor, lapolis, Licensing, Lasirans.  Laba ki pou bezwen fer sa marse e nou nou konnen osi, nou Lasanble, nou konnen nou.  Nou Prezidan i oule vwar sa bann progre dan nou sistenm semen, dan nou sistenm transpor, dan nou disiplin, dan nou pep.  Nou Prezidan i oule vwar sa li e nou osi nou oule vwar sa.  Alor nou pe anvoy sa mesaz for avek Legzekitiv.  Sirtou la nou demann Minister Transpor pou pran linisyativ e spearhead bann sanzman dan sa direksyon o pli vit posib pou nou kapab annan en semen ki pli safe, pou nou kapab annan plis disiplin parmi bann drayver e pou ki bann drayver i benefisye atraver en pli bon premium pou son lasirans transpor ki i ava redwir e sirtou la dan sitiasyon difisil, i ava ankouraz li pou li kapab pran pli byen responsabilite avek son transpor e larout piblik e lavi lezot dimoun.  E nou demande osi ki bann konpannyen lasirans letan zot ganny aprose par Minister Transpor, i volonterman vin on board e donn zot sipor, zot korporasyon akoz sa osi i dan zot benefis.

Avek sa Mr Deputy Speaker, mon pou siport sa Mosyon e mon demann tou mon lezot koleg pou siport sa Mosyon akoz i bon e depi lontan in devret enplimante sa, me plito tar ki zanmen e i enportan alor ki nou met keksoz an aplikasyon, petet pa bezwen sanz lalwa, petet serten SI, serten nouvo polisi i ganny fer.  I pa tro difisil mon vwar mwan pou kapab met sa an aplikasyon.  I demann zis lavolonte.  Alor nou pe demann Minister Transpor pou take lead ladan, annan sa volonte, fer sa bann sanzman neseser e annou bouz lo la, dizon fer enn plitar komansman lannen prosenn omwen nou a komans lannen en pe pli byen.  Mersi bokou Mr Deputy Speaker.

 

MR DEPUTY SPEAKER

Onorab Manm elekte pou St Louis.

 

HON HERBERT HOAREAU

Bonn apre midi Mr Deputy, bonn apre midi bann Onorab e en bonn apre midi spesyal tou zabitan St Louis.  Mr Deputy, zonm lo sa later in devlope, zonm ti komans par marse, taye, sote dray e anvole, touzour pli vit.  Tou sa ki mon fek dir nou trouve isi dan Sesel.  Nou pei Sesel i devlope, nou pei Sesel i grandi, nou pei Sesel i agrandi e nou pei Sesel in ariv lo menm nivo ki bann pei Was e Seselwa in tre avanse.

Sa Mosyon ki Onorab Valmont in vin avek ozordi i bon, menm tre bon akoz sa i konsern dray lo semen e dan sa lalinny, mon pei va mal e tre mal.  Pandan lepok kolonyal, nou bann gran paran in travay dir avek bouret, pik, pyos, lapel, pou fer preski tou sa bann semen ki egziste ozordi.  Mr Deputy, tou sa semen prensipal lo Mae, Praslin, La Digue i bann travay ki’n ganny fer par nou zanset e nou merit apresye li tre byen.  En demen, sa lepok ki ozordi i nou, nou bezwen osi asire ki i annan en meyer demen pou nou zanfan.  Ki tou sa ki nou fer dan devlopman, nou zanfan a benefisye e mon dir sa akoz lo semen i annan tro bokou vandalizm fer par serten pti group dimoun.  Mon dir sa akoz lo semen i annan tro bokou trou ki pa ganny bouse atan par bann lotorite.  Mon dir sa akoz lo semen napa ase lapolis trafik e mon dir sa akoz lo semen bann drayver bokou pe feel high, so high ki zot pe dray avek vites, neglizans, anba lenfliyans lalkol, anba lenfliyans drog e parfwa avek soufrans e douler lavi, en manman e en papa i dray osi avek lespri lwen e fer aksidan.  Ozordi dan nou pei, serten loto pe servi jet fuel ki bokou pli ser ki bennzin.  E sa jet fuel pe ganny vann dan serten landrwa ki aksesib avek tou dimoun.  Masin pe modifye, loto i pas tes avek en A+ liniversite, maler i arive e nou, nou pa bouze.  Mwan, mon pou dir ozordi ki avek tou sa zistwar, mon’n ganny ase.  Mon fatige vwar lanmor par aksidan dan nou pei, mon’n fatige vwar bann zenn andikape par aksidan dan nou pei, mon’n fatige vwar osi serten konpannyen lasirans ki pa pran son responsabilite letan i annan bann tel aksidan.  Erezman, i annan bann pti konpannyen parey Fidelite ki lager for pou dimoun.

Mr Deputy, driving licence i bon me driving licence i merit ganny donnen avek drayver responsab.  Bokou drayver i park lo lalinny zonn dan bann kontour, lalinny zonn dan bann parking e lalinny zonn tou bann landrwa ki zot pa merit park.  Avek sa sistenm pwen ki Onorab pe vin avek, se pou fer sir ki bann drayver zonm a pran zot responsabilite e zot a ganny pourswiv si zot komet bann lofans anba sa tel sistenm si i vin an aplikasyon.  Sa sistenm pwen, i pou fer sir ki bann ki annan loto pa servi li parey helicopter.  La nou merit fer sir ki SEPEC pa vann jet fuel avek loto.  E ler en loto in anvole e jet fuel i ganny vwar dan tenk, bann responsab SEPEC i merit osi al reponn kestyon dan Lakour.

Mr Deputy, lespri en driving licence ek pwen i bon pou Sesel.  Dan serten pei, sa i mars byen.  En dimoun ki’n perdi serten kantite pwen ouswa tou son pwen, i bezwen peye pou al fer serten staz kot i a konn son fot dan en lazans ki Gouvernman i agree.  En driving licence ek pwen i avan en pedagozi avek lobzektif pou evite ki bann residivis ki komet plis lenfraksyon e i konsyan ki i merit annan en fason dray responsab e en konportman responsab lo volan.  Letan en dimoun i komet en pti lofans trafik ou enn ki pli enportan, en zofisye lapolis i merit enform li ki pwen i ganny tire lo son driving licence.  Sa menm pwen i pou selman ganny retire si sa drayver i rekonnet son lofans pou ganny kondannen devan en Lakour.  Set apre sa kondannasyon ki pwen i a ganny retire pou en drayver kapab rekiper son pwen, bann diferan staz alternativ i kapab ganny propoze par en Ziz, Prosekiter e la kot en lofans trafik in ganny komet.  Dan ka kot en drayver i aksepte fer en staz ofer par Prosekiter, tou bann pourswiv e demars administratif ki lye avek sa lofans trafik i merit ganny arete dan limedya pou ki sa drayver i kapab konplet tou son staz e swiv sa fot ki in komet.  Sa i ava tir pa mal case trafik devan Lakour e drayver koupab a pey le konsekans an term finansyel dan en staz pou li rekiper son pwen.  En staz stabilizasyon i kapab osi ganny demande par en Ziz e bann ka grav ki sa dimoun in komet dan sa lenfraksyon i kapab ganny fer dan en lespas letan kourt.  Tou sa bann staz i relye avek sistenm pwen e tou i ganny fer dan en fason obligatwar pou ki en drayver i kapab rekiper son pwen, san sa i pa zanmen kapab rekipere.

Mr Deputy, neglizans lo semen i soufrans bokou dimoun dan ka aksidan.  Ozordi i en zanfan Praslin, demen i kapab en zanfan La Digue e apredmen i kapab en zanfan St Louis.

Mon pou siport sa Mosyon Mr Deputy akoz mon krwar ki i azour avek larealite lavi e ki lofans trafik i lakoz prensipal lamazorite lofans ki okazyonn lanmor avek lalkol e drog ensidswit.  Sa i pou byennet nou pep, sa i pou byennet nou tou e sa i pou byennet nou zanfan ozordi e demen.  Mersi Mr Deputy.

 

MR DEPUTY SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker mon siport sa Mosyon devan nou Parlman ozordi e I mon lopinyon ki en tel Mosyon ti long overdue.  Mon kwar moman in arive pou nou finalman pran en desizyon lo kwa ki nou kapab fer an plis pou nou kapab donn en koudmen pou deal avek sa problenm trafik dan semen e pou deal avek sa lakantite aksidan ki arive dan nou pti pei Sesel pandan en lannen.

Bann statistics ki’n devan nou pli boner in demontre klerman ki lakantite aksidan ki arive par lannen I apepre egal avek lakantite zanfan ki ne dan en lannen dan sa pei.  Nou pe koz 1400, 1500 a 1600 an mwayenn aksidan par lannen.  E I kler ki bokou sa bann aksidan I bann aksidan ki grav, I bann aksidan ki kout lavi e I bann aksidan ki ganny koze par swa neglizans drayver, swa neglizans pyeton oubyen par lefe ki drayver oubyen pyeton ti anba lenfliyans lalkol oubyen lenfliyans drog.

Isi Sesel I annan en kantite veykil lo nou semen.  Nou semen I ankonbre e I fasil, vreman fasil si nou pa alert pou nou fer oubyen pou en aksidan ganny arive.  Bokou nou bann lalwa trafik I ganny kase on a daily basis e mon kontan ki ozordi dan sa Lasanble nou pe sers fason pou nou fer en kontribisyon pou anmenn en rediksyon dan to aksidan e pou deal efektivman ek konzesyon dan nou bann semen.

Mr Deputy nou tou ki dan sa lasanble nou konnen ki bann fakter prensipal ki koz aksidan I tel ki kondisyon e kalite semen nou bezwen improve lo la.  En lot fakter se neglizans par drayver oubyen move konportman drayver, en lot se mank respe pou lalwa trafik par drayver e par pyeton.  Par egzanp bokou Onorab ki’n koze avan mwan in koz lo en senp keksoz, tel ki parking lo en double yellow line oubyen bann landrwa kot nou pa devret pe park nou vwar bann loto i park.  E lalwa swa I pa ase for oubyen sa bann keksoz I ganny les pase.

Lot problenm ankor se kondisyon transpor.  En lot se mank patrol par gard trafik e tousala I bann areas kot nou bezwen vwar, nou bezwen gete, nou bezwen aranze pou amelyor sitiasyon pou ki lakantite aksidan ki arive dan sa pei par lannen I ganny redwir par en gran poursantaz e kalite aksidan an term gravite osi I ganny redwir.

Nou focus dan sa Lasanble I lo ki fason nou pou deal avek bann drayver oubyen kwa an plis ki nou kapab fer pou deal avek bann drayver ki mank respe pou lalwa trafik.  E par mank respe souvandfwa zot okazyonn en aksidan e letan aksidan I arive I annan son lenplikasyon.  Son bann lenplikasyon I for lo nou lekonomi akoz letan en loto I tape nou bezwen swa al sanz pyes, nou bezwen al refer en porsyon sa loto oubyen sanz en bout avek masin sa loto e sa I kout nou konman en pei.  I kout nou an deviz deza la ki nou roupi pe pran en kantite presyon an relasyon avek son valer vizavi deviz.

I osi anmenn – letan en aksidan I arive, I anmenn en presyon lo nou sistenm lasante.  I anmenn en presyon lo kantite depans ki Gouvernman I bezwen fer akoz sa se tax payer’s money.  Se larzan Lepep ki ganny depanse dan nou sistenm lasante.  Sa I anmenn en presyon lo sa larzan.  I osi annan en presyon an relasyon avek pert imen.  Souvandfwa nou’n tande dan sa lasanble, I annan bann lannen kot 10, 11, 12 dimoun I perdi lavi dan aksidan.  So, letan nou annan pert imen sa I enn nou resours pli enportan dan sa pei alors sa osi I met presyon lo pei, I met presyon lo nou lafors travayer.  Apre I egalman annan pert finansyel ki Onorab Decommarmond in koz longman lo la e sa osi I met presyon lo bann fanmiy e I met presyon lo Leta.

Mr Deputy, alors mon apresye ki en Mosyon in vin devan nou ozordi pou nou konsider en nouvo sistenm ki nou apel en sistenm pwen ki zanmen in ganny fer dan sa pei pou nou vwar kimanyer nou kapab servi sa sistenm efektivman parey monn dir pou nou sey ede pou koup lo lakantite aksidan ki arive dan sa pei e pou nou koup lo lakantite trafik ki annan lo nou bann larout sirtou dan bann midi oubyen apre 4er.

Mr Deputy sa sistenm pwen I en sistenm ki ganny aplike dan plizyer pei e I en sistenm ki marse.  Partou atraver lemonn kot bann pei in adopte sa sistenm in demontre poudir sa sistenm I en sistenm ki vreman marse.  E mon napa okenn dout ki si sa sistenm I ganny apply isi Sesel I pou marse provided Mr Deputy ki I ganny aplike parey I devret ganny aplike e en tel sistenm I pou ed nou, I pou ed lotorite pou idantifye, pou deter e pou penaliz bann repeat offenders, bann dimoun ki fer lofans enn a lot.  Sa sistenm pou allow the authority pou idantifye sa.  E an plis, sa sistenm pou al pli lwen, I pou allow lotorite pou keep track lo tou bann driving records tou bann drayver isi Sesel.  E sa 2 keksoz e sa 2 pwen I 2 pwen fondamantal e I 2 pwen enportan avek sa sistenm ki loter Mosyon I anvi ki Sesel I adopte a lavenir.  E parey Onorab Decommarmond in refer sorti e mon dakor ek li 100 poursan, Legzekitif I bezwen pran sa ki Lasanble pe debat lo la ozordi dan en fason vreman serye e fotespere lannen prosenn zot ava dan en pozisyon pou zot konmans met sa an aplikasyon e mon asire ki nou pou vwar ladiferans dan 6 mwan, dan 1an, dan 2an e a lavenir apre ki nou’n adopte en tel sistenm.

Mr Deputy sa sistenm I en sistenm ki senp, I fasil pou aplike.  I annan bann pei kot letan ou fer en lofans I atas en pwen avek sa lofans e letan ou’n ariv serten pwen ou license I kapab, swa depandan lo lakantite pwen ki ou’n arive premye kou I kapab donn ou en warning, I dir ou vey ou, ou pe mal drive ou pwen I tan e si ou kas en lalwa then sa pou ariv ou.  So, premye keksoz I donn ou warning apre I kapab al lo sispansyon.  Sispansyon I annan plizyer letap.  I kapab donn ou en sispansyon depandan lo kantite pwen ki ou’n akimile si nou pe servi sa sistenm.  Oubyen si I pe servi en sistenm redwir pwen depandan lo nivo kot ou pwen in arive I kapab donn ou en sispansyon.  Sa sispansyon I kapab parey mon’n dir, depan lo ou pwen, I kapab en sispansyon pou 3 mwan, I kapab en sispansyon pou 6 mwan eksetera eksetera.

Now, si par egzanp ou konmans ek en kantite pwen e ou’n ariv lo 2 par egzanp, la ou kapab arive lo en nivo kot ou license I kapab ganny revoked.  Ou kapab pa ganny ou license ankor.  Oubyen I kapab ariv en sitiasyon kot ou perdi ou license pou 2an, me selman sa ki enteresan, sa ki nou kapab fer isi Sesel se ok, en dimoun in perdi son license pou 2an ou kapab donn li sa loportinite pou li apply pou sa ki nou apel en bonn kondwit.  Ou apply pou bonn kondwit, ok, ou sispansyon pankor fini parey mon’n dir kekfwa I pou 2an, apre 1an ou kapab apply pou bonn kondwit.  Ou apply e dan en lespas annou dir 6 mwan si ou pankor fer okenn lofans then sa lot 6 mwan I ganny retire lo ou.  So, I annan plizyer incentives ki ou kapab donnen.  I annan plizyer fason ki ou kapab aplik li me selman sa ki mon konnen I en sistenm ki marse e I mars dan en fason vreman fantastik.

En lot incentives ki nou kapab donnen ankor Onorab De  Commarmond in koz en pti git lo la se in annan 2 keksoz.  1, pou en drayver ki pa’n komet okenn lofans padan en lannen bann diferan lakonpanyen lasirans I ganny akse avek sa lenformasyon e apre letan ou al pey ou premium pou ou lasirans, ou lasirans I ganny redwir e I ganny redwir kekfwa konsiderableman.  Me son lot kote osi I kapab ganny apply. Si ou’n fer en lofans me ou’n fer en lofans dan en fason ki ou license pankor ganny revoke oubyen pankor ganny sispann, ler ou al pey ou lasirans – konpanyen lasirans I ganny akse avek sa lenformasyon e konpanyen lasirans I raise son premium lo sa drayver an partikilye.  So, tousala I pou ede pou fer sir ki en drayver I konpran lenplikasyon sa sistenm lo li e as a result of sa, sa drayver li prezan I pran tou prekosyon neseser pou fer sir ki sa pa ganny aplike pou li e pou fer sir ki I pa vin an kontrovansyon avek lalwa.  So, sa sistenm I annan en kantite merit e mon krwar sa Lasanble Nasyonal pou vot lo la e mon krwar piblik an deor I bezwen konpran akoz sa parey noun dir pou ede redwir lakantite aksidan e ler ou redwir aksidan I egalman vedir ki ou pe redwir bann lenstans kot bann dimoun I ganny bann gran, gran dimal akoz li in pas dan en aksidan.  So, lo sa kote I pou annan lenportans pou annan en gran sansibilizasyon 1, lo kote sansibiliz bann drayver lo sa sistenm and then secondly sansibiliz piblik pou fer sir ki piblik I egalman okouran poudir nou pe met sa an aplikasyon e kimannyer I marse.

Pou li kapab marse Mr Deputy fodre ki lalwa trafik I ganny aplike.  Ozordi enn bann pli gro problenm Sesel se nou lalwa aktyel ki nou annan, nou lalwa trafik akyel avek tou son mankman ki I kapab annan me I pa pe ganny aplike parey I devret ganny aplike.  So, fodre Mr Deputy ki lalwa trafik I ganny aplike e I ganny aplike byen.  Now, pou lalwa trafik ganny aplike e ganny aplike byen, I annan en kantite zefor ki bezwen ganny fer.  I annan en kantite improvement dan en kantite diferan areas ki bezwen ganny fer e la mon pou donn legzanp.

Lo kote lapolis.  Nou bezwen plis zofisye, bann lapolis ki travay dan departman trafik ki nou apel lapolis trafik.  Nou bezwen donn zot plis training, donn zot plis kapasite pou zot fer zot travay pli byen.  Lapolis an retour, I bezwen plis resours.  Par egzanp nou bezwen plis zofisye lapolis lo semen avek sa kit ki permet zot sa ki nou apel breathalyzer test ki permet zot kapab fer en breathalyzer test a en nenport moman ki zot santi zot bezwen fer avek en drayver.  So, nou’n aret en drayver, nou realize poudir I anba lenfliyans lalkol, nou donn li sa tes nou fer li fer imedyatman e ler I fer rezilta I come out easilyNow, si prezan en drayver I refize pou li fer en test la pwen I ganny redwir lo son license e o fir e a mezir ki letan I pase e I kontinnyen fer bann lofans then I kapab trouv son license I ganny revoked oubyen I ganny suspended.

Now, nou bezwen annan plis respe pou resours ki lapolis I annan.  Lapolis li menm I bezwen respe son bann resours ki I annan.  En entervenan avan mwan in refer sorti en lensidan kot ti annan en aksidan an relasyon avek en veykil lapolis e sa aksidan ti ariv zis par devan mon drayver.  Mon drayver ti pe al anler dan Sid e sa loto lapolis ti zis vitman sorti dan Sid, mon pa konnen kimannyer sa in arive zis I vwar sa loto pas devan li, drayver I pez fren loto I tonm dan lanmar.  So, mon krwar I egalman enportan ki lapolis I respekte resours ki zot annan akoz apre tou sa bann resours I resours Leta e tou resours Leta I apartenir pou Lepep Seselwa e Lepep Seselwa I annan en kontribisyon ki I fer dan sa bann resours.  Lepep I travay, zot pey zot bann taxes e an retour Gouvernman I met a dispozisyon lapolis bann resours ki in aste avek larzan ki lepep I pey tax avek.

So, mon krwar I pou enportan ki lapolis I konpran sa.  I pou enportant, I pou egalman enportan ki pyeton osi I konpran poudir zot osi zot bezwen respekte lalwa trafik.  Plizyer entervenan avan mwan in refer resorti, in refer sorti par egzanp bann lenstans kot dimoun pe mars a 3 dan semen kot zot pa devret pe fer li.  I annan bann landrwa kot I annan trotwar, kot bann dimoun I prefere servi bann morso semen rather than trotwar.  I annan bann lenstans ki bann dimoun pe mars sou dan semen.  Tousala, tou sa bann keksoz I kontribye pou lakoz en aksidan e nou dan sa Lasanble I nou responsabilite pou nou anmenn devan bann pwen ki pou kontribye ver safety lo larout piblik e letan nou kontribye ver safety lo larout piblik nou pe egalman kontribye pou redwir lakantite aksidan ki arive e tir sa kalite presyon lo bann fanmiy, tir presyon lo bann drayver, tir presyon lo bann Minister Lasante e tir presyon basically lo Gouvernman.

So, mon krwar poudir I en bon Mosyon e pou benefis tou Seselwa parey monn toultan dir sa ki bon pou Seselwa, sa ki bon pou Sesel mon pou siporte e sa I en keksoz ki bon pou nou pei.  I bon pou tou Seselwa alors mwan koman Leader Lopozisyon mon pou siport sa Mosyon.  Mersi Mr Deputy.

MR DEPUTY SPEAKER

Onorab Leader Zafer Gouvernman.

 

HON MARIE-ANTOINETTE ROSE

Mersi Mr Deputy.  Mr Deputy mon pa pou long akoz bokou in ganny dir lo sa Mosyon.  Me mon santi kantmenm ki I enportan ki mon anmenn mon sipor akoz I en Mosyon ki tre enportan.

Mr Deputy, mon pou pran bann pwen ki Onorab Bristol in fer resorti akoz mon krwar ki son lentervansyon ti byen plike e li konman en eksper dan road traffic e semen I konn tre byen kimannyer sa bann zafer I ganny zere e in met devan nou diferan lide kimannyer sa I kapab ganny enplimante e osi ki bann bon keksoz ki kapab sorti avek en tel pozisyon ki nou pe demann nou Gouvernman pou pran.

Ozordi nou vwar nou pe met en propozisyon devan nou prop Gouvernman akoz nou konnen ki problenm I annan lo semen, toulezour nou tou nou pas lo semen.  Nou konnen nou pli gro problenm se problenm konzesyon trafik ki pe kontinnyelman ogmante.  Toulezour, tou le mwan I annan en kantite nouvo transpor ki rantre dan nou pei me I pa neseserman vedir ki bann transpor ki enpe pli vye I pe ganny sorti lo semen.  In estimen ki I annan 18 a 20 mil transpor lo semen aktyelman e sa I nesesit e parey Onorab Dec Commarmond in fer resorti nou bann semen pa pe grandi akoz topografi nou pei kimannyer I ete, I pa neseserman vedir ki nou kapab ogmant lakantite semen pou ki nou kapab annan plis semen.  Me I annan plis trafik e parey mover Mosyon in fer resorti I annan plis dimoun ki pe demann license pou drive tou le zan.  Sa I nesesit Mr Deputy a proper management of traffic ki osi I vedir en proper management of road users savedir, bann drayver e bann pedestrians.  Toulede I merit annan bokou plis responsabilite akoz I annan bokou plis probabilite ozordi annan aksidan I bokou plis ki yer akoz zisteman I annan bokou plis transpor.  E sa sistenm pwen I ava si oule ed Gouvernman met enpe lord in the management of drivers me nou pa devret osi bliy bann lezot konponan ki mon pou koz lo la ki osi koz aksidan.  Drayver I pa sel eleman, sel konponan ki responsab lo semen.  E mon reitere pwen ki Onorab De Commarmond in fer resorti ki sa Mosyon pa pe target drayver.  Sa Mosyon pe demann Gouvernman pou met an plas en sistenm ki marse.  E annefe, byen marse I byen dan lentere bann bon drayver me nou bezwen osi rekonnet ki I annan bann drayver ki reckless.  Etandonnen ki I annan en kantite dimoun toulezan ki on the increase ki pe kontinnyen demann license pou vin drayver I neseser ki nou dir be bon a sa pwen la I neseser alors ki bann drayver ki fek antre I pas dan serten training, zot ganny en serten sistenm pwen e bann ki en pti pe pli aze zot ganny en serten sistenm pwen.  Me osi bann bon drayver I ganny rekonpanse pou obzerv lalwa trafik lo semen.

Mr Deputy I reste kantmenm enportan pou nou dir me I annan serten behaviour lo semen ki pa akseptab.  I annan serten fason fer lo semen ki vin de plizanpli en lenkonvenyans pou tou dimoun ki servi semen.  I annan premyerman bann reckless drivers, I annan reckless pedestrians, I annan dimoun ki nepli per loto parey nou dir, zot koup semen zot pa regarde eksetera.  I annan reckless drivers and reckless pedestrians.  Ki i enportan ki nou regard ladan.  I annan en logmantasyon dan road rage ki pe antre dan nou pei.  Parey in ganny fer resorti nou pe vin parey bann pei West, bann pei Eropeen kot nou behaviour I parey e nou pe vwar nou pe fer fas avek bann drayver ki napa pasyans lo volan.  Zot annan mwens pasyans.  I annan bann dimoun parey in ganny fer resorti ki pa obzerv bann senp pti lalwa trafik.  Nou park lo double yellow line, nou park dan disabled parking, nou fer en bann keksoz ki nou konnen I mal me nou still fer.  I annan dimoun Mr Deputy ki dan milye semen I park, I reste lanmenm dan milye semen pou 5, 10 minit e I koz ek son zanmi e I napa okenn regard pou lezot dimoun ki pe servi semen, ki bezwen servi semen.  I annan dimoun ki anvi antre dan semen zot kanmarad, I pli prese ki lezot dimoun.  Menm si parfwa I annan traffic jam ki ou pa pe al okenn par ou pou bezwen zis asize e esper trafik debloke, I annan bann dimoun ki kwar zot zis kapab sot devan zot kanmarad e al pli devan ankor en nesper disregard for public road e bann dimoun ki pe servi semen.  E osi fodre pa nou oubliye ki lo aswar I annan en kantite dimoun ki kas lalwa trafik menm si aswar I annan mwens trafik lo semen mon krwar lalwa trafik I still bezwen ganny obzerve.  I annan par egzanp en kantite, mwan monn deza vwar en polisye aret en transpor e tir 8 zenn fiy ladan e sa polisye in dir zot non zot pa pou antre dan sa transpor pou al nightclub.  4 zot ava ale e 4 call en taxi devan mwan la mon ava espere obor semen mon ava espere pangar zot ganny atake e taxi I ava vin zwenn zot e I ava anmenn zot clubbing.  E pou mwan sa ti tre byen kimanyer sa polisye ti fer, en zenn polisye me ti byen kimannyer I ti fer.  E byensir Mr Deputy I annan drunk driving.

Mon bezwen fer resorti kantmenm Mr Deputy ki seksyon trafik dan lapolis zot esey zot mye.  Mon vwar en zefor par seksyon trafik dan lapolis, I annan en seksyon ki mon krwar napa resours zot osi, pa neseserman toultan annan resours me mon santi ki for the bigger part of their job zot fer zot mye.  Menm si par egzanp, nou pa neseserman apresye zot prezans lo semen pe kontrol trafik me zot la e I enportan.  Mon krwar bann traffic wardens I pase e I donn tiket menm si nou pe dir sa tiket pa ase oubyen eksetera me dimoun ozordi I konsyan e I dir ou mon pa park la mon akoz mon pou ganny en tiket R200.  Lefe ki dimoun I dir sa I vedir ki I annan enpe enforcement, morde enpe sirtou dan rezyon Victoria e ozordi mon vwar en logmantasyon lo bann spot check.  Mon menm vwar zot fer lo sa semen ki diriz ver Lasanble.  Mon menm vwar zot fer par egzanp devan Kord Gard ki osi enportan akoz I fer dimoun aware ki be seksyon trafik lo semen pe marse zot pa absan mon krwar I enportan note ki zot pa absan lo semen.

Mon bezwen dir pou en gran parti zot louvraz se bann polisye ki tre poli.  Mon pa vwar en kantite larogans.  Ou konnen dimoun pa anvi ki ler ou pe dir li sorti dan transpor e montre ou license ou osi arogan avek li.  I annan ki malonnet, me an gran parti mon vwar en zefor ki pe ganny fer kot zot dir bonzour, eskize, montre mwan ou license eksetera e sa nou bezwen felisite menm si I annan enn de ki pa neseserman fer parey lezot.

Mon ti a osi kontan Mr Deputy felisit Land Transport pou bann progranm ki zot kontinnyelman fer lo televizyon pou sansibiliz drayver.  Mon krwar ler I byen nou bezwen dir e tanzantan nou vwar Land Transport lo semen par egzanp recently, zot ti met bann yellow boxes.  Zot in entrodwir sa pou dir avek bann drayver poudir be ou pa kapab dan semen blok sa landrwa akoz I annan en larantre la e mon vwar dimoun I obzerve.  I en sansibilizasyon ki pe kontinnyelman ganny fer, zis yerswar zot in lo televizyon ankor me I tanzantan sa.  Tanzantan nou vwar zot pe eksplik drayver kimannyer e sirtou dan letan festivite nou vwar ki zot sorti e zot eksplike e mwan mon ti a kontan felisit seksyon transpor lo later akoz mon krwar I annan en zefor.  Pa neseserman 100 poursan byen me kot I annan en zefor e kot I annan en zefor nou Lasanble nou bezwen rekonnet.

Mr Deputy mon ti a kontan rekonmande ki an gran parti propozisyon ki ganny fer I ganny aksepte par Gouvernman me mon osi bezwen dir ki sa problenm I pa zis en demerit points system.  En demerit points system I en eleman dan bann lezot eleman ki enportan ki Gouvernman I regard ladan e I fer en zefor pou fer sir ki nou met sa problenm konzesyon trafik me osi violations of road traffic regulations annord.  I annan road management, mon krwar Land Transport avek bann lezot lazans I annan en travay enportan pou fer avek Road Management.  I annan enforcement of law ki serten Onorab in koz lo la apre traffic policing.  Nou bezwen regarde ki nou fer avek the increase in vehicles ki form parti traffic congestion lo semen.  Nou bezwen osi koz lo Vehicle Testing Station ki la mon vwar zot in refer, zot in aranze, I annan nouvo lekipman.  Me nou espere ki zot kontinnyen fer zot travay e ler en loto I no longer road worthy nou dir, nou met dan yard eksetera.  I annan bann insurance companies ki annan osi travay pou fer pou fer sir ki ler sa demerit points system I ganny met an plas zot osi zot antre e donn en koudmen akoz parey in ganny fer resorti I ganny linked.

Mr Deputy I annan public transportation ki osi enportan akoz SPTC I pli gran kliyan ki servi semen, single most important client lo semen oubyen sa lorganizasyon ki servi plis semen mon kapab dir se SPTC.  I desarz apepre 20 mil commuters toulezour, savedir I pran responsabilite apepre 20 mil lavi toulezour.  I annan plis bis lo semen, so, I enportant osi ki bann dimoun ki regard public transportation I fer zot travay e la mon vwar zefor pou zot increase bann diferan kalite bis ki al dan bann pti semen, ki difisil eksetera me osi sansibilizasyon drayver SPTC.  Mon krwar in fer resorti ki I annan serten drayver SPTC ki fer pa mal speed, en ler zot pas obor ou jetSo, mon krwar I enportan ki serten drayver SPTC osi I fer sir ki zot servi byen transpor piblik, pran responsabilite e konsyan ki zot annan responsabilite anver lavi zot bann pasaze e osi lavi bann lezot dimoun ki pe servi semen.

Mr Deputy mon ti ava kontan osi propoz en nouvo keksoz ki nou kapab azout avek sa Mosyon ki devan nou pou ede redwir enpe sa bann problenm ki nou pe fer fas avek.  Pa tro lontan I annan en
ki’n dir be Planning I bezwen regard bann batiman dan lavil e fer sir ki bann batiman dan lavil I annan underground parking facilities.  E mwan mon krwar sa I bezwen vin mandatwar.  Tou batiman dan lavil from now on ki ganny konstrir I bezwen annan underground parking facilities.  Akoz ozordi dan Victoria enn bann pli gro problenm se parking.  Kot dimoun I park, napa parkingSo, mon krwar sa I merit ganny konsidere par Planning Authority.

Land Transport I bezwen konsider en sistenm overpass avek underpass. Tou pei I fer li nou osi nou bezwen fer li.  Taler Onorab Bresson in dir kot I annan bann ron trafik la se lanmenm ler osi la kot dimoun I vini pou koup semen devan drayver.  Me zot fer sa akoz napa zebra crossing, zebra crossing I en pti pe pli lwen.  Me si nou ti osi fer overpass zot ti pou kontinnyelman koupe san bezwen get gos, get drwat e sa ti pou redwir aksidan lo semen.  Mon konnen I annan enpe letan ki Gouvernman pe konsider sa me mon krwar I enportan ki nou seryezman konsider bann lezot eleman.

Plizyer Manm in koz lo sistenm ki annan Lostrali, Lostrali I annan en sistenm fantastik kot I konsern traffic management.  Mon krwar nou bezwen aprann avek Lostrali, me Lostrali I annan en sistenm, dayer, bokou pei I annan ki apel en sistenm park and ride.  I en sistenm kot bann drayver pa antre dan lavil, ou ganny takse bokou plis ler ou antre dan lavil.  Me zot park zot transpor deor e zot servi transportasyon piblik pou antre e sa I redwir kantite aksidan e I redwir konzesyon trafik.  E I demann en kantite lo sa drayver akoz byen bon en dimoun I annan son transpor, I pa anvi kit son transpor Plaisance apre rod en bis.  I demann en bon sistenm public transportation me sirtou ler I annan par egzanp bann lafet mon krwar en sistenm koumsa I mars byen akoz I pa vo lapenn ou vin anvil si ou pa kapab servi ou transpor de tout fason akoz I annan traffic jam.  Ler I annan bann gro festivite en sistenm en pti pe koumsa monk war I ava marse isi.

Apre bann propozisyon, mon siport propozisyon pou servi plis camera pou detect traffic offenders.  Mon krwar sistenm camera I en bon sistenm ki merit ganny met an plas pou detect bann traffic offenders.

Mr Deputy mon ti a kontan termin mon lentervansyon par felisit Gouvernman pou ekout nou Lasanble ler nou koze.  Mon krwar bann Proze-de-Lwa ki’n vin devan nou I montre langazman Gouvernman pou ekout Parlman, ekout lavwa Parlman, ekout bann propozisyon ki Parlman I met devan e mon konnen ki ankor enn fwa nou Gouvernman pou port latansyon a sa size ki’n vin devan nou Parlman akoz I en size ki konsern Legzekitif.  I en size ki Legzekitif I bezwen met lanmen lo la e nou rekonmande ki sa Mosyon I ganny aksepte e adopte par nou Gouvernman.  Mersi Mr Deputy.

 

MR DEPUTY SPEAKER
Bon, mon envit loter Mosyon fer son summing up.

 

HON SYLVIANNE VALMONT

Mersi Deputy Speaker.  Dabor Deputy Speaker mon ti a kontan remersye tou bann Onorab ki’n koz lo sa Mosyon e anmenn bann kontribisyon tre valab e sibstansyel.  Mon pa pou al repet sa ki zot in dir me mon ti ava kontan ankor fer sorti enn de pwen.

Parey in ganny fer resorti, ogmantasyon bann aksidan par bann drayver neglizan I en konsern non selman pou nou Gouvernman me osi pou nou bann piblik an zeneral.  In ler pou rod bann solisyon apropriye pou kapab redres sa sitiasyon.  In ler pou met bann mezir apropriye an plas pou ki bann drayver I vin pli konsyan zot responsabilite.  In ler pou pran ka e mezir avek bann reckeless parey nou dir, negligent drivers ki pe kontinnyelman nwir la kominote.  In ler pou pini bann ki napa respe pou bann sinny trafik par egzanp pre avek lekol e dan bann landrwa rezidansyel nou annan bann Onorab ki’n mansyonn enn de legzanp.  Sirtou la mwan mon pe fer referans ki sirtou parfwa ki nou bliye menm bann ki zwe zot lanmizik konmsi zot dan discotheque.  Nenport kote, nenport ler menm dan lannwit parfwa granmaten ou ganny sa bann nwizans parey.  So, mon kwar nou merit si oule demande ki lapolis I pran bann mezir neseser avek sa bann nwizans parey.

In ler pou ki lalwa I ganny revize kot fodre e enplimante pli efektivman pou curb bann move practice.  Mr Deputy mon ti a kontan fer de trwa propozisyon kot sa Mosyon I konsernen ki ava petet ganny konsidere par bann lenstitisyon responsab.  Ki Gouvernman I konsider met an plas plis camera parey in ganny fer resorti lo semen sirtou kot drayver I annan tandans fer plis vites parey lo highway e lezot landrwa kot plis aksidan I arive.  Mon krwar letid I merit ganny fer par lapolis kot bann aksidan I souvandfwa arive sirtou lo highway.

Ki lapolis I entansifye zefor pou annan bann spot checkl pli regilye e konsistan lo semen lizour koman aswar osi e dan plizyer distrik pa zis dan serten landrwa dan pei.  E sa I ava ede pou si oule dekouraz sa bann drayver ki dray sirtou recklessly de tanz-a-ot.

Ki Gouvernman I fer provizyon pou lapolis ranforsi son progranm breathalyzer e lezot monitoring systems dan bokou plis distrik pa zis kit li santral.  Anlinny avek sa, ki zefor I ganny fer pou ki bann zofisye I ganny empower avek plis training spesyalize e ganny resours apropriye pou enplimant zot progranm.

Ki Lakour, oubyen sistenm Zidisyer I konsider reviz santans pou bann lofans par drayver ki komet aksidan grav ou fatal par neglizans.

Ki lapolis e lezot lenstitisyon konsernen I kolabore pou fer sir ki bann transpor sirtou bann aze I dan bon kondisyon e ki zot license e lasirans I annord.

Ki SLTA I fer sir ki nou semen osi I dan bon kondisyon.

Ki lapolis I entansifye sirveyans lo bann ki pa met seat belt e I osi entansifye zot progranm sansibilizasyon pou kontinnyen edik drayver e osi pyeton lo zot responsabilite.

Mr Deputy, mon senserman krwar ki apart ki bann penalti ki deza egziste, lentrodiksyon en sistenm demerit points I ava ede ankouraz nou bann drayver vo mye ki I dekouraz zot pou vin bokou pli responsab, bokou pli disiplinen e nou semen pli safe.

Avek sa Mr Deputy mon ti a demann tou Onorab pou siport sa Mosyon.  Mersi.

 

MR DEPUTY SPEAKER

Bon, in ariv ler pou nou pran en vot.  Tou bann ki anfaver sa Mosyon lev zot lanmen.  Inanim.  Mosyon in ganny aprouve.  Avek sa, nou ava adjourn e nou a rezwenn Mardi le 7 Out.

(Adjournment)