::
Home » Verbatim » Verbatim - Second Term 2012 » Tuesday 14th August 2012

Tuesday 14th August 2012

 

Download PDF

________________________________________________________________________________________


NATIONAL ASSEMBLY OF SEYCHELLES

Tuesday 14th August 2012

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal, tou bann dimoun ki alekout.  Nou pou komans avek premye item lo nou Order Paper, e sa se swivan eleksyon parsyel ki’n ganny fer dan distrik Anse Aux Pins e ki ti ganny ranporte par Msye Meggy Sodie Marie.  Nou pou fer premye keksoz ozordi administrasyon Oath of Allegiance.  E parey I leka, nou pou demann Clerk pou fer le neseser.

 

THE CLERK

Mr Meggy Marie.

 

MR SPEAKER

So, nou ava envit Mr Marie e parey in tradisyon tou dimoun I ava debout.

 

MR MEGGY MARIE

I Meggy Sodie Marie do swear that I will be faithful and bear true allegiance to the Constitution of the Republic of Seychelles and that I will preserve, protect and defend the Constitution of Seychelles, so help me God.

 

MR SPEAKER

O non Lasanble Nasyonal, nou swet labyenveni Onorab Marie parmi nou.  Nou annan en kantite Onorab Marie dan Lasanble Nasyonal, mon krwar mon pou konmans apel zot Onorab Marie 1, 2, 3, 4.  E mon swet li bonn sans dan son travay, I pa en travay fasil en Manm Lasanble Nasyonal.  I annan en bout ki fer dan Lasanble Nasyonal, en bout ki ganny fer dan distrik.  E pou ou etre successful, ou bezwen pran toulede laspe tre serye e dan ou travay ou bezwen montre en kantite imilite e respe pou ou bann Koleg, ou Siperyer e pou ou bann dimoun dan ou distrik.  Mon swet ou ankor enn fwa, bonn sans e bon kouraz.

Nou ava esper en pti moman pou Minis antre pou nou kontinnyen avek nou bann Bills.  Nou ava pran premye Bill ki lo Order Paper e sa pou ganny prezante par Minis ki ek nou ozordi, e sa se Minis Morgan.  Mon ava ganny mwan en Mosyon for second reading lo The Computer Misuse Amendment Bill 2012.  Onorab.

 

HON MARIE-ANTOINETTE ROSE

Mersi Mr Speaker, bonzour tou dimoun.  Mr Speaker anba Lord 64(2) mon move ki sa Bill I ganny lir en dezyenm fwa.

 

MR SPEAKER

Okenn ki segonde?

 

HON CHARLES DE COMMARMOND

Mr Speaker, mon segonn sa Mosyon.

 

MR SPEAKER

Mon ava envit Minis alor pou entrodwir sa Bill.

 

MINISTER JOEL MORGAN

Mersi Mr Speaker, bonzour Speaker, tou Manm Lasanble Nasyonal.  Mon ti a kontan pran sa lokazyon pou mwan felisit nouvo MNA Meggy Marie lo son eleksyon dan distrik Anse Aux Pins e swet li bon kouraz dan son travay devan nou.

Mr Speaker nou’n ganny en pti retar deor akoz nou’n ganny take, nou pa’n kapab sorti dan lasanm anndan, so, eskiz nou pou sa.

 

 

MR SPEAKER

Sa I tre serye.

 

MINISTER JOEL MORGAN

Alor mon zis dir sa pou montre ki mon pa’n an retar.

Bon, Mr Speaker, Manm Lasanble Nasyonal bonzour.  Sa Proze-de-Lwa ki mon pe prezante ozordi I fer Lamannman lo Lalwa Computer Misuse 1998.  Lamannman in ganny fer dan seksyon 2 sa Lalwa ki seksyon prensipal definisyon.  Sa Lamannman I propoze ki definisyon mo computer anba sa seksyon I sanze pou enkli lezot lekipman data processing ki perform bann fonksyon logical, arithmetic ouswa storage, atraver lekel, en lofans anba sa Lalwa I kapab ganny komet.

Pou lemoman, definisyon computer anba sa Lalwa I vedir okenn device ki kapab ganny servi avek lentasyon pou process lenformasyon e osi enkli apard ki en sel computer okenn device, peripheral ou lekipman ki kapab ganny servi konzwentman avek en computer, en sistenm computer, ouswa en computer network.

Anba seksyon 3 sa Lalwa, en dimoun I komet en lofans ler I ganny akse san lotorizasyon lo en computer ouswa lo en progranm lo en computer.  Nouvo definisyon computer anba sa Lamannman ki mon pe prezante ozordi, I avek bi pou elarzi definisyon sa ki konsern sa mo computer anlinny avek nouvo devlopman teknolozi, espesyalman kot storage lenformasyon I konsernen.

Lentrodiksyon bann storage devices ki kapab pa neseserman en computer, tel parey bann external hard drives, pendrives, telefonn portab 3G e lezot lekipman parey kot en endividi I kapab ganny akse san lotorizasyon avek lenformasyon, in fer li neseser ki sa bann devices osi I ganny kouver anba sa Lalwa.

Anlinny avek sa bann nouvo devlopman teknolozik, sa nouvo definisyon ki’n ganny propoze I konm swivan.  Ki en computer, I vedir okenn device elektronik, manyetik, optic ouswa elektrokemikal, ouswa okenn lezot data processing device, ouswa okenn group bann tel interconnected or related devices ki pe perform logical arithmetic ouswa fonksyon storage e ki enkli okenn fasilite store lenformasyon relye avek ouswa operating konzwentman avek en tel device ouswa en group bann tel interconnected related devices.

Mr Speaker, I lopinyon Gouvernman ki avek sa Lamannman, lenformasyon ki ganny trouve lo sa bann lekipman ki’n ganny definir dan sa Lamannman I ava pli byen ganny proteze e aksyon Legal I ava kapab ganny pran avek okenn dimoun ki obternir akse avek sa bann lekipman san lotorizasyon, ouswa ganny akse san lotorizasyon avek data lo sa bann lekipman, avek bi pou komet en lofans kriminel.  Mon rekomann son laprouvasyon par Lasanble Nasyonal.  Mersi Mr Speaker.

 

MR SPEAKER

Bon, deba I ouver, okenn ki oule entervenir?  Onorab Hoareau.

 

HON HERBERT HOAREAU

Bonzour Mr Speaker, bonzour tou bann Onorab e en bonzour spesyal pou tou zabitan St Louis.  Mr Speaker, teknolozi dan sa monn pe devlope, pe devlop tre vit e pe vin deplizanpli pti e la mon komans krwar ki bann ekstrateres pe vizit nou later e zonm pe kopi zot teknolozi isi lo later.

Premye computer ti ganny envante an 1822 par Charles Babage e sa zonm ti kontinnyen travay dir pou amelyor son masin e vi fot finansman pandan sa letan la, I pa ti nobou termin son konsept.  An 1906 son pli zenn garson Henry Babage ti konplet en bon porsyon son masin ki ozordi dan mize Lonn a lekspozisyon.  E apre sa, diferan dimoun in travay dir ankor e ankor pou amelyor computer pou fasilit devlopman imen lo sa later.

Isi Sesel, nou ti met an plas en Act pou computer e sa ti an 1998.  E pandan sa lepok ti napa Ipad e ti napa Blackberry.  Dan sa Act, mo computer ti ganny definir dapre sa lepok e computer sa lepok ti ankor gro avek en gro screen tre lour e tre ser.  Mon rapel sa lepok mon ti menm pran prekosyon ekstra pou transport en computer.  Anba sa Act I osi annan lanmann e santans anprizonnman pou bann diferan lofans e lapolis I annan pouvwar avek en warant pou antre dan en landrwa e sezi en computer pou rezon lanket, pou rod lenformasyon konsernan sa lanket dan sa computer e sezi data kan I neseser.

Mr Speaker, nou lepok in evolye e ozordi Gouvernman I vwar li tre neseser pou anmenn serten amelyorasyon dan sa Act e definir le mo computer azour avek nou lepok e la nnen ki nou pe viv ladan, e sa se 2012.

Azour mon dir Mr Speaker akoz ozordi data pe ganny transmet par Ipad, Iphone, 3G phone e tou sa fodre ki leta I pran kont e pran an konsiderasyon.  E la mon demann bann dimoun ki travay avek computer pou santi zot tre konsernen pou fer sir ki bann data lo bann computer, espesyalman bann landrwa ki ganny aranze zot pran swen avek e pa kopi e distribye.  Mon dir sa Mr Speaker akoz 2 semenn pase, en madanm Belombre I dir mwan son computer ti kase, I anmenn aranze e I ti vwar li avek data son konpannyen pe ganny flote enpe partou.  Sa pou mwan I pa normal e I enkyetan, sa bann dimoun ki repar computer fodre zot onnet e respekte bann code ki Licensing e Lalwa I met an plas e si zot pa respekte fodre zot ganny deal avek seryezman.

Nou pei I bezwen devlope, nou pei I bezwen avanse, nou pei I bezwen bouze.  Alor mon pou dir avek tou Seselwa, wi ou computer, wi ou bann reparater onnet e annou al an avan avek teknolozi.

Avek sa, mon pou aport mon sipor pou sa Lamannman e mon pou vot avek fyerte, dignite e fraternite pou byennet mon pei e mon pep.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker, bonzour Mr Speaker, bonzour tou dimoun.  Mr Speaker si ou permet mwan, avan mon komanse lo non kote mazoriter dan Lasanble Nasyonal mon ti a kontan felisit nou nouvo Koleg, Onorab Meggy Marie pou son eleksyon Anse Aux Pins.  Mon krwar son eleksyon I demontre konfyans ki Lepep Anse Aux Pins I ankor annan dan Parti Lepep e ki zot pa les zot ganny dirize par bann lezot kalomni ki ganny fer.  So, mon dir li felisitasyon e mon dir li welcome on board e I annan en kantite travay dir devan li.

Mr Speaker, sa Proze-de-Lwa ki devan nou, sa Lamannman I enn ki straight forward, I kler, son lentansyon se pou redefinir ki savedir en computer.  An 1998, parey Onorab Hoareau in fer resorti, an 1998 ler sa Proze-de-Lwa ti vin devan nou, nou konnen kimannyer computer ti ete.  Nou konnen ki zistans Sesel ti ete avek teknolozi lenformasyon.  A sa lepok en computer ti selman kapab fer serten fonksyon e 1998 is a long time ziska ozordi e nou konnen avek devlopman teknolozi lenformasyon, en kantite I ganny fer.  I enn bann lendistri ki sanz tre, tre rapidman.  Menm si nou aste en computer lannen pase, ozordi I demann ou re-aste en lot akoz sa lendistri e devlopman dan sa lendistri I al sitan vit ki en computer ozordi I kapab fer en kantite keksoz.  En computer ozordi I anvoy zonm lo lalin e sa I montre ou kapasite teknolozi lenformasyon e sa I enportan alors ki nou osi nou lalwa I vin azour avek tou sa bann devlopman ki’n arive e akoz computer in sanze, bann dimoun ki servi computer zot aktivite in sanze.  Ozordi ou kapab fer bokou, bokou plis keksoz avek en computer.  Me pa zis en computer me lezot device ki kapab fer fonksyon en computer.  Parey in ganny fer resorti, ozordi tou dimoun ki annan en telefonn portab, dimoun ki annan en Ipad, dimoun ki annan en senp pti device I kapab osi fer serten aktivite kriminel avek teknolozi computer.  Nou vwar par egzanp en dimoun avek en pti device, I kapab petet trigger en leksplozyon par la.  I kapab servi li a labaz en computer me sa ki pe afekte nou plis ozordi Sesel se the Misuse of Computers, se bann dimoun ki ganny trusted avek computer zot prosen, pou aranze me ler zot fer sa zot osi tir lenformasyon lo la.  E pou nou sa I grav akoz ler en dimoun I donn ou son computer, I parey in donn ou son sak ki I al travay avek, i parey in donn ou son biro akoz ozordi en computer I fer esansyelman travay en biro.  Lo en computer nou fer tou sa ki nou kapab fer dan nou biro.  Nou stok leformasyon, nou stok nou file, nou anvoy e-mail, nou ekrir nou bann let eksetera eksetera.  So, ler en dimoun I donn ou son computer, I pe donn ou son lakour, I pe ouver son lakour avek ou, son bann fonksyon prive ki I fer kot son lakour, I pe ouver son lofis avek ou.  I pe ouver son lavi sosyal avek ou akoz ozordi tousala bann aktivite ki bann dimoun I fer I ganny stoke lo en computer.  Alors en computer I parey en album ki en dimoun I stok tou son fonksyon piblik e prive.  I stok tou son bann aktivite sosyal e piblik e petet nou pa realize, nou vwar li zis en bout lekipman ki devan nou, me ozordi lenplikasyon annan en computer ou prosen dan ou lanmen I bokou, bokou plis.  E bann dimoun ki ganny en computer zot prosen dan zot lanmen, dan zot responsabilite travay, pou desarz zot responsabilite travay, pou desarz zot responsabilite zot bezwen fer li byen.  Zot bezwen annan lentegrite, zot bezwen kapab montre ki zot bann profesyonnel e nou annan en kantite levidans, laprev devan nou isi Sesel kot I annan serten dimoun ki olye aranz computer zot prosen, zot rode ki i annan lo la.  Savedir zot pe antre dan domenn prive bann endividi ki pa byen e zot pe fer li san lotorizasyon sa bann endividi.  Si mon’n donn ou mon computer pou aranze, ou aranz li.  Si ou ganny akse avek serten lenformasyon, sa lenformasyon I reste konfidansyel.

Alors sa Proze-de-Lwa ki’n vin devan nou I bezwen ganny amande pou reflekte 1, ki savedir en computer, pou reflekte lafason ki dimoun I servi en computer ki ozordi I montre lavi dimoun, zot lavi prive, zot lavi piblik,  zot aktivite sosyal e osi pou anvoy en mesaz tre kler avek bann dimoun ki petet serten pa ti realize I en akt kriminel pou pran lenformasyon en dimoun pou regarde, me mon krwar gran parti si en dimoun I en profesyonnel, I travay dan en landrwa ki aranz computer I bezwen realize that this is not on, nou pei pa pou aksepte sa kalite aktivite, nou pei pa pou toler sa kalite aktivite e nou Gouvernman e nou Parlman, nou ralye ansanm deryer sa Proze-de-Lwa pou anvoy en mesaz tre kler ki stop it today, arete, aret fer ozordi akoz lalwa I la e lalwa pou step in si I annan okenn sa bann tel aktivite ki pe ganny komet.

Mr Speaker, nou bezwen osi protez nou zanfan avek Misuse of Computers.  Mon konnen I annan serten lorganizasyon non-Gouvernmantal ki vreman travay ver awareness nou bann zanfan, me ozordi osi Misuse of Computers I annan serten lenformasyon oubyen I annan serten data ki vin a laporte bann zanfan e sa I pa byen.  E sa osi mon krwar anba redefinisyon en computer, I bezwen ganny byen gete akoz nou zanfan pe ganny akse, par egzanp lo internet.  I annan zanfan ki al lo internet, zot ganny akse avek serten data eksetera, so, mon krwar osi, nou bezwen fer sir ki letan nou pe regard sa Lalwa Minis, nou fer sir ki pa zis sa Lamannman ki enportan me ki sa lalwa I ganny byen aplike.  Sa lalwa I la depi 1998 e souvandfwa dan Lasanble nou koz lo bon laplikayon lalwa.  Alors mon rekomande ozordi ki sa lalwa I ganny byen aplike pou protez the privacy of individuals, pou protez nou sosyete me osi pli enportan pou protez nou zanfan.

Mr Speaker avek sa 2 mo mon donn Minis garanti ki lo kote Parti mazoriter nou pou donn li tou sipor lo sa Lamannman akoz nou krwar ladan.  Mersi.

 

MR SPEAKER

Bon, nepli annan okenn entervenan alor mon pou demann Minis pou fer son reply.

 

MINISTER JOEL MORGAN

Mersi Mr Speaker.  Mr Speaker sa bann pwen ki’n ganny fer resorti I bann pwen ki tre valab.  Ozordi, parey bann Manm Onorab in dir dan Lasanble la, in annan sa nesesite pou nou moderniz plizyer lalwa an sa ki konsern devlopman teknolozi dan nou pei e sa I enn parmi sa bann nesesite kot nou’n prezant sa Lamannman bomaten avek sa Lasanble.  I annan en eleman ki mon ti a kontan zis osi azoute dan zot bann keksoz ki zot in fer resorti e sa se espyonnaz dan lenformasyon.  Sa nouvo Lamannman osi in kouver sa dan le sans ki ozordi atraver en Ipad, en Iphone, en Blackberry, nenport ki telefonn ouswa device, (-) nenport ki masin koumsa, ou kapab akse serten lezot lenformasyon lo en database, lo en lot sistenm computer, lo en network, lo en wireless network menm e pran sa lenformasyon ilegalman.  So, sa I ganny kouver osi, sa definisyon I ed nou pou tackle sa laspe espyonnaz lenformasyon.  I kapab lenformasyon komersyal, I kapab lenformasyon leta, I kapab lenformasyon prive.  So, tousala I bann keksoz ki ed nou pou reste azour avek devlopman teknolozi.

In annan serten koze dan Lasanble bomaten la lo bann dimoun ki pe repar computer, mon krwar wi si zot pe repar computer, zot pe osi repar bann lezot keksoz parey telefonn portab, bann telefonn 3G ouswa bann lezot telefonn, kot dan lepase nou’n vwar serten lenformasyon ki’n ganny pran ilegalman lo bann telefonn, be it SMS, be it e-mail, be it bann zimaz, bann portre.  I kapab nenport kwa e mon krwar sa definisyon osi I ede pou kouver sa bann keksoz en pe pli byen.

Dernyen pwen mon ti oule fer resorti Mr Speaker, se laplikasyon Lalwa ki’n ganny fer resorti la bomaten.  Laplikasyon Lalwa I tre enportan e I enn keksoz kot mon krwar nou bezwen met bokou plis lanfaz lo la dan lavenir, lo kote tou bann law enforcement agencies ki konsernen, bann departman ek bann Minister pou ki sa bann Lalwa I aplike.  Nou bezwen bokou pli virzilan, e nou bezwen bokou pli aktiv, fer sir ki nou pe monitor sa bann keksoz e ki nou pe pran aksyon dan en fason preanptiv e non pa dan en fason kot nou reakte neseserman apre ki en lensidan in arive.  E la mon krwar I annan bokou travay pou nou fer dan lavenir pou nou kapab met nou a sa nivo kot nou kapab azir bokou pli efikasman dan bann ka kot I annan bann labi dan bann ka par egzanp lo kote Computer Misuse.  E nou bezwen bokou pli alert, bokou pli proaktiv e bann lenstitisyon Gouvernmantal ki responsab pou bann diferan seksyon bann diferan Lalwa mon krwar nou annan en travay formidab, en travay tre enportan pou nou fer, pou nou kapab annan sa kapasite pou nou met sa bann keksoz an aplikasyon.

Mr Speaker, avek sa summing up mon ti ava kontan demann Manm Lasanble Nasyonal pou donn tou zot sipor sa Lamannman ki mon’n propoze bomaten.  Mersi.

 

MR SPEAKER

Bon, nou ava pran en vot lo merit zeneral.  Tou bann ki an faver.  Okenn ki kont?  Bill in ganny aksepte a son dezyenm staz.  Nou ava ganny en formal second reading.

 

THE CLERK

A Bill of an Act to Amend the Computer Misuse Act 1998.

MR SPEAKER

Ok, nou pran Bill, – si non mon ava ganny en Mosyon pou nou sot Committee Stage.

 

HON MARIE-ANTOINETTE ROSE

Mr Speaker anba Lord 91(1) mon move ki nou sispann Orders 65 to 70 pou nou sot Committee Stage.

 

MR SPEAKER

Okenn ki segonde?

 

HON CHARLES DE COMMARDMOND

Mr Speaker, the Motion is seconded.

MR SPEAKER

Nou a pran en vot lo sa Mosyon pou nou sot Committee Stage.  Tou bann ki an faver?  Okenn ki kont?  Bon, mon a ganny en Motion for a third reading.

 

HON MARIE-ANTOINETTE ROSE

Mr Speaker, anba Lord 71(1) mon move ki sa Bill i ganny lir en trwazyenm fwa.

 

MR SPEAKER

Okenn ki segonde?

 

HON CHARLES DE COMMARMOND

Mr Speaker, Mosyon I ganny segonde.

 

MR SPEAKER

Bon, nou ava pran en vot, tou bann ki an faver lev zot lanmen.  Okenn ki kont?  Bon, mon a ganny mwan en third reading.

 

THE CLERK

This Act may be cited as The Computer Misuse Amendment Act 2012.

 

MR SPEAKER

Bon, premye Bill in pase.  Aprezan nou ava pran dezyenm Bill ki lo Penal Code Amendment Bill 2012.  Mon a ganny en Motion for a second reading.  Onorab Rose.

 

HON MARIE-ANTOINETTE ROSE

Mr Speaker, anba Lord 64(2) mon move ki sa Bill I ganny lir en dezyenm fwa.

 

MR SPEAKER

Okenn ki segonde.

 

HON CHARLES DE COMMARMOND

Mr Speaker the Motion is seconded.

MR SPEAKER

Bon, mon a demann Minis pou entrodwir dezyenm Bill.

 

MINISTER MORGAN

Mersi Mr Speaker.  Mr Speaker, Manm Lasanble Nasyonal, sa Lamannman ki mon pe prezante dan sa dezyenm Bill ozordi I lo nou Kod Penal e I entrodwir 6 nouvo seksyon anba sa Lalwa.  E sa I seksyon 157(a) ziska 157(f).

Anba seksyon 157(a) en dimoun I komet en lofans si I obzerv ouswa vizyelman filmen en lot dimoun, dan bann sirkonstans kot sa dimoun I ekpekte annan son privacy anba bann kondisyon swivan:-

A, San konsantman sa dimoun.

B, kot sa lot dimoun I dan en landrwa prive ouswa I pe angaz li dan en aksyon prive.

E C, kot sa lobzervasyon ouswa recording vizyel I ganny fer avek lentansyon pou obzerv ouswa vizyelman filmen en aksyon prive.

Anba seksyon 157(b), I fer li en lofans pou en dimoun obzerv ouswa vizyelman rikord parti prive en lot dimoun, dan bann sirkonstans kot sa dimoun I ekspekte annan son privacy anba bann kondisyon swivan:-

A, san konsantman sa lot dimoun.

E B, kot sa lobzervasyon ouswa sa recording vizyel I ganny fer avek lentansyon pou obzerv ouswa vizyelman filmen parti prive en lot dimoun.

Anba seksyon 157(c), I en lofans pou en dimoun annan dan son posesyon en recording vizyel ki proibite, san konstantman sa dimoun konsernen.

E anba seksyon 157(d) I en lofans pou okenn dimoun distribye en recording vizyel ki proibite san konsantman sa dimoun konsernen e kot I annan rezon pou krwar ki sa recording I proibite.

Seksyon 157(e) I seksyon enterpretasyon e I definir serten term e lekspresyon servi dan bann seksyon presedan.

Mr Speaker, en dimoun pa komet en lofans anba sa seksyon, si pandan letan sa lofans I ganny komet en zofisye Law Enforcement ki pe desarz son responsabilite anlinny avek son travay e son kondwit I ganny trouve konman enn ki rezonnab dan bann sirkonstans performans son travay.  Setadir, si en Law Enforcement Agent I pe desarz son responsabilite, I pe rikord en tel aksyon I pa ganny trouve ki in komet en lofans anba sa Lamannman ki nou pe propoze ozordi.

Bi sa bann Lamannman ki monn propoze avek Lasanble ozordi Mr Speaker, se pou Lalwa azir pou protez drwa sak dimoun pou annan son lavi prive e pou annan son drwa privacy dan nou pei.  Lopinnyon piblik I montre klerman ki I pa akseptab pou bann endividi vol zimaz prive en lot endividi e sirkil sa atraver plizyer mwayen pou fer lezot dimoun vwar e menm met sa bann zimaz lo bann piblikasyon ouswa lo internet avek bi pou denigre sa viktim e detri son lavi.  Lopinyon piblik se ki sa bann dimoun ki pe vol ouswa ilegalman obtenir sa bann zimaz ouswa recording, ou ki pe ilegalman transmet ou pibliy sa bann keksoz, I devret fer fas avek aksyon legal.  Alor Gouvernman in vwar li dan lentere nou sitwayen pou protez zot kont sa bann aksyon malisye par serten malfeter dan nou pei.  Nou krwar ki I dan lentere tou dimoun ki dan nou pei ki sa bann Lamannman I pase pou donn sa proteksyon e drwa annan privacy a sak endividi dan nou pei.

Mr Speaker, mon alor rekomann laprouvasyon sa Penal Code Amendment No. 2 Bill 2012.  Mersi.

 

MR SPEAKER

Bon, deba I ouver.  Onorab Charles.

 

HON JEOVANA CHARLES

Mersi Mr Speaker.  Mr Speaker, Minis ek ou tim, Koleg Onorab, tou dimoun a lekout bonzour.

Mr Speaker, a mon tour mon ti a kontan swet labyenveni nou nouvo Koleg, Manm Elekte pou distrik Anse Au Pins, Onorab Meggy Marie dan nou Lasanble ozordi.  Mr Speaker, retour en Onorab Lepep dan Lasanble ozordi I laprev konfyans ki Lepep Seselwa I annan dan Gouvernman Lepep e se pou sa rezon ki ozordi nou bezwen nou osi kontinnyen travay dir pou amelyor nou sosyete.  Se pou sa rezon, ki devan nou, Minis in anmenn en Lamannman tre, tre enportan dan Kod Penal pou nou konsiderasyon.

Mr Speaker, ozordi dan nou sosyete, nou trouv en group dimoun ki pe esey fer tou, tou pou destabiliz nou sosyete, pou kree lafreyer, kree laenn, ensit vyolans e anmenn en bann krim endezirab pou afekte nou bann zanfan, nou fanmiy e nou sosyete, an servan teknolozi e kominikasyon modern.

Mr Speaker, Gouvernman Lepep in etablir en Gouvernman kot tou dimoun zot drwa fondamantal I garanti anba Konstitisyon.  Legalite devan Lalwa, laliberte spirityel, laliberte lekspresyon, drwa travay e mouvman partou dan nou pei, I montre nou dignite imen I ganny respekte.  Me ki nou’n komans vwar depi lannen pase, plizyer dimoun, enkli nou Prezidan, en Prezidan ki pe fer tou pou aranz son lekonomi e pe fer son mye pou kontinnyen devlop nou bann sekter ki pou donn plis larises nou pep, en pti group dimoun olye donn nou koudmen zot oule senm laenn parmi nou pep an servan internet e facebook pou denigre, pou ensilte, pou fer kankan, pou kase e esey deparpir bann fanmiy e sa I donn zot satisfaksyon.

Ozordi Mr Speaker, keksoz in vin pli grav.  En dimoun I kapab mont lo Facebook e fer tou kalite menas, ekspoz lavi personnel en dimoun, servi bann portre e met ansanm pou fer film mannyer I oule e krwar ki I kapab annan drwa pou fer tousala.  Ozordi, dimoun nepli annan ni laont, ni respe, ni tolerans, ni lanmour e ni menm linite pou son prosen.

Mr Speaker, Gouvernman I dir, enough is enough.  Dimoun in ganny ase alor in anmenn sa Lamannman Lalwa ki devan nou ozordi pou adres sa bann sityasyon.  Sa Lalwa pe dir ki filmen oubyen tir portre parti prive e ekspoz sa dimoun an piblik, san son konsantman, rikord en dimoun dan en landrwa prive san son konsantman, an posesyon portre parti prive en dimoun san son konsantman avek lentansyon sirkile oubyen poste lo internet san son konsantman, I bann lofans e bann lofans byen grav ki kapab fer ou kondann ziska 20an prizon.

In plis ki ler ki Lalwa I ganny servi pou responsabiliz sa bann dimoun ki pa responsab e fer zot pey konsekans pou zot bann move aksyon, pou zot bann move lofans akoz pa gou, pa zoli e parey mon’n dir taler I fer dimoun soufer.  I afekte zanfan, I afekte fanmiy, I afekte kominote e mon kontan alor ki sa Lalwa pe fer bann provizyon e deside ki pou fer avek bann sitiasyon parey.

Sa Lalwa Mr Speaker, parey Minis in eksplike, I en Lalwa tre senp, I dir ou tou sa ki ou pa devret fer e son bann konsekans si ou fer li.

Mr Speaker, kan en dimoun I kas lakaz e vole, kan kriminel I touy en dimoun ki pre ek ou, kan en zanfan I ganny vyole dan ou vwazinaz, kan en dimoun I kontinnyen fer bann tranzaksyon drog e ou per pangar ou zanfan a tonm ladan, kan en touris I ganny atake nou kriy oli Lalwa?  Ki Lalwa pe fer?  Nou pa’n tann nanryen.  Me sa bann aksyon demoralizan parey mon’n mansyonnen taler I osi grav e fer lapenn ler I ariv kot nenport ki e si nou les li I pou kontinnyen.

Mr Speaker Sesel I pou nou tou.  Ozordi, malgre avek lasesres, teknolozi I permet nou kapab ouver tiyo e delo trete malgre azoute avek delo desalinasyon I koule.  Nou tou nou servi, nou tou nou pez bouton pou ganny elektrisite, nou tou nou al dan frizider pou ganny delo fre oubyen pou met nou manze pou prezerve.  Nou kwi nou manze lo cooker gas oubyen elektrik, nou servi microwave pou sofe, nou get televizyon toulazournen.  Swa dan salon, swa dan lasanm aircon.  Menm bokou landrwa I annan DSTV oubyen Intelvision.  Preski sak lakour I annan en dimoun ki annan en telefonn mobil, bokou lakour I annan en computer.  Ozordi, lamazorite zanfan, si pa tou, I annan akse avek swa computer oubyen en telefonn mobil ki tre, tre byen e montre nou ki zistans nou’n arive avek teknolozi e devlopman.

Wi Mr Speaker, mon fer sa remark pou montre ki gras a Lepep nou pei in devlope e parey nou tou nou konnen devlopman dan teknolozi e kominikasyon in vin tre vitman isi Sesel.  I annan son bon kote e I osi annan son move kote.  Son bon kote se ki in met nou azour avek larealite dizour, lanmizman, resers avek larestan lemonn.  E son move kote se sa bann tirbilans teknolozi e kominikasyon ki nou bezwen fer fas avek, fas a en bann dimoun malonnet, egois e gro ker.  Se pou sa rezon ki mon bezwen donn tou mon sipor sa Proze de Lwa ki devan nou pou fer sir ki aksyon sever I ganny pran avek sa bann koupab san lespri, pou kapab eparny mon zanfan, ou zanfan, kont sa vilen fleo ki pe afekte zot.

Pou ki sa Proze de Lwa I ava ganny vwar konman en deteran e fer sa bann dimoun mazin 2 fwa avan ki zot komet sa bann lofans.  Nou bann dimoun I bezwen kontinnyen viv dan en lanvironnman kot I gou viv, kot napa en presyon lo li, menm kot son lakour pou li verifye si napa dimoun ki pe maske pou vey li, pou vey son lokipayon, pou vey son zaksyon, oubyen pou tir son portre e pibliy partou.  Sa ki en dimoun I fer se li, I konsern li, I annan drwa annan son privacy e son liberte se li.

Mr Speaker, mon pou siport sa Proze de Lwa ki devan nou e mon annan sa pou mwan dir.  Pandan ki en pti group dimoun pe zwe avek lavenir nou zanfan, akoz mon dir lavenir nou zanfan se akoz nou bann zanfan I telman ofe avek teknolozi ozordi, ki zot pa pe ganny eparnye avek sa bann keksoz ki an sirkilasyon.  Alor nou bann dirizan Parti Lepep dan sa Lasanble nou pou siport tou bann Proze de Lwa ki pou kas sa bann baryer e konfront tou defi.  Nou pou swiv sa Lalwa depre e nou pou donn sa Lalwa son letan.  Sa bann dimoun ki mazin ankor pou anvair lavi prive en dimoun, Lakour byento pou trouv en solisyon pou zot.  E la mon anvi dir zot, silvouple in ler pou zot arete.  Mersi Mr Speaker.

 

MR SPEAKER

Onorab Samson.

 

HON DEREK SAMSON

Mr Speaker mersi.  Koleg Onorab e tou dimoun alekout bonzour.  E byenveni spesyal pou Koleg Onorab Meggy Marie, felisitasyon.

Alor le de Bill ki nou pe ekout lo la ozordi Mr Speaker, I somehow mars ansanm.  Zot annan serten lyen.  Toulede I demontre ki letan in sanze, lespri dimoun in sanze, zonm pe definitivman ganny bigger brains e anmenmtan pe fer bann gadgets ki bokou pli pti e pli vit dan zot fonksyon.

Dizon dan en kourt dele letan Mr Speaker, nou’n eksperimant en evolisyon enorm dan devlopman teknolozi.  E enn ki pe enkyet nou se evolisyon ki’n pran plas dan kalite labitid e konportman serten nou bann dimoun, adilt konman zanfan.

Lemonn in vin bokou pli pti an term lesanz lenformasyon e son bann sitwayen in vin deplizanpli pli gran an espri e an pratik.

Mr Speaker, fas a tou sa bann realite ki Lamannman sa Lalwa devan nou pe fer nou reflesir lo la ozordi, par lefe ki nou bezwen respekte serk prive nou vwazen, nou koleg travay, nou zanmi e menm bann ki paret etranze parmi nou.  Mon santi ki nou tou nou annan en devwar e en responsabilite moral kot I konsern lavi prive lezot otour nou.

Dan sa lavi ki nou pe viv ozordi Mr Speaker, nou dezorme bezwen viv avek dimoun.  Nou bezwen viv avek imen parey I ganny dir an Angle, no man is an island.  Krwayans relizye, lonnekte, respe e egalite I bann kalite konsept lavi ki ti pou byen si tou dimoun ti kapab adopte e na retour anmenn benefis pou lezot par lafason ki nou ti pou servi sa bann tel konsept lavi.

Me par kont, sa I pa toultan leka Mr Speaker.  Napa personn ki’n ganny fer pou pans, azir e menm resanti dan en sel fason spesifik.  Liberte pou fer nou prop swa ti ganny donnen avek zonm depi tre lontan e ozordi dimoun I santi zot bokou pli lib ankor.  En liberte ki dimoun pe tant pou pli enjoy ozordi e tir bokou plezir ladan se liberte lekspresyon, sirtou an ekrir.  En mode popiler sa bann tel liberte se bann social networks ki preski pli efektiv ki sistenm email konmela.  Ler sa Bill pe koz lo lavi prive lezot otour nou, nou bezwen osi fer tre atansyon lo nivo lesanz lenformasyon ki pase atraver bann tel social networks parey facebook, parey in fek ganny mansyonnen par mon Koleg Onorab.

Mr Speaker, si enn pa careful,l dimoun I kapab ganny ou lavi an antye atraver en tel evolisyon kominikasyon.  I annan lenstans kot ou lavi I kapab ganny manipile atraver mansonz ki swadizan ou bann friends I kapab poste lo ou lo facebook.  Ozordi nou pe vwar e konpran ki tro bokou tou keksoz I kapab move pou nou, ki tro bokou liberte lekspresyon, egzerse par en endividi I kapab briz lavi en lot.  Alor I pa normal Mr Speaker pou enn dir ki I kapab devwale, ekrir e menm montre lavi prive en lot lo non liberte lekspresyon e dir ki sa I son drwa Konstitisyonnel e ki I pe viv dan en free country.

Malgre nou pe viv dan en free country Mr Speaker, nou liberte toutfwa I fini kot liberte lot otour nou I komanse, sirtou kot son lakour prive avek son fanmiy.  Sa Lamannman pe fer nou rapel ki nou tou nou bezwen serten nivo privacy.  Me la ankor nou bezwen note en keksoz ase sansib.  Malgre ki nou tou nou annan nou en lavi prive e menm en landrwa prive, nou lakour parey mon’n fek mansyonnen, sa I pa vedir ki dimoun I kapab fer nenport kwa dan en tel lanvironnman.

Annou rapel byen bann krim ki nou pei in pas ladan tou dernyenman.  Sete dan bann lenstans e lanvironnman prive ki bokou sa bann krim ti pase.

Mr Speaker nou bezwen annan en devwar e en responsabilite moral anver tousala, anver nou lavi prive e anver lavi prive lezot otour nou.  Panse en dimoun I souvannfwa ganny demontre par son aksyon, oubyen ou kapab met li kouma Mr Speaker.  Aksyon en dimoun I souvandfwa eksplik son panse.  Tou I komans dan nou latet, oubyen dan nou leker.  Nou kapab annan pli bon Lalwa ki nou oule Mr Speaker, me si leker zonm I ankor ranpli avek toutsord kalite move santiman, nou pou bezwen rod bann lezot alternativ pou bann ki pe trouv zot kwense dan bann tel kalite aktivite.

Evolisyon teknolozi ki inevitab Mr Speaker e anmenmtan nou lavi prive, nou landrwa prive pe vin deplizanpli pli pti avek evolisyon teknolozi.  Nou bezwen aksepte ki I pli fasil pou antre dan lavi prive en lot akoz tou sa bann fasilite kominikasyon ki nou annan konmela.  I enpe difisil pou anpes dimoun obzerv nou konmela, alor sa ki pli fasil pou fer se pou ofer zot en bon show, par lafason ki nou viv nou lavi be it dan prive be it dan piblik.  Nou nasyon I kontan nouvel, nou nasyon I kontan gossip e nou menm parfwa annan lazwa pou dekouver maler nou kanmarad e sa I en move latitid Mr Speaker.

Finalman, ankor tou I komans dan lakour kot nou’n grandi.  I malere me bokou nou bann paran napa en sou lide lo kapasite bann lekipman teknolizik ki zot zanfan I annan akse avek, tel ki en senp mobile ki ozordi I kapab annan en camera osi avek.  Serten nou bann zenn I zis cannot be bothered lo lekel ki pe tir son portre oubyen pe filmen li, ziska ler I vwar tou lo facebook.  Parfwa nou konfiz landrwa piblik avek landrwa prive.  Nou bliye ki sa ki pas dan fernwanr, dan kasyet en zour pou ganny devwale lo twatir an piblik.

Nou santi alor Mr Speaker ki nou tou nou annan en devwar e en responsabilite moral kot I konsern nou lavi prive e lavi prive lezot otour nou.

Avek sa enn, de mo Mr Speaker, mon pou definitivman aport mon sipor anver sa Lamannman sa Lalwa.  Mersi.

 

MR SPEAKER

Onorab Valmont.

 

HON SYLVIANNE VALMONT

Bonzour Mr Speaker, bonzour Minis, tou bann Onorab.  Mr Speaker, permet mwan felisit mon Koleg Sodie Marie ki’n zwenn nou.  Felisitasyon Sodie pou zwenn nou dan sa Lasanble apre ou eleksyon.

 

MR SPEAKER

Onorab, ou bezwen adres li.

 

HON SYLVIANNE VALMONT

Yes Mr Speaker mon pou kontinnyen.

MR SPEAKER

Non, non be ou bezwen adres li properly.

HON SYLVIANNE VALMONT

Onorab Marie.

 

MR SPEAKER

Exactly.

HON SYLVIANNE MARIE

Mersi.  Mr Speaker, sa Bill ki devan nou Lasanble ozordi, pe demann nou pou reazir dan en fason serye e pran bann desizyon brav e kouraze pou nou nasyon e pou nou pei an linny avek nou Konstitisyon.  Sesel, parey plizyer pei, pe devlop vit e deplizanpli fason viv nou sitwayen pe vin pli sofistike.  I osi evidan ki koman en nasyon, nou pep in modernize e bokou avanse lo nivo litilizasyon teknolozi e bokou dimoun pou dakor ki telefonn, laptop, ipad, netbook eksetera, in vin bann zouti travay e zouti kominikasyon fondamantal e tre enportan dan lavi kotidyen en gran nonm dimoun, toutfwa ki sa bann keksoz oubyen lekipman I ganny itilize dan fason ki zot merite e parey fodre.

Mr Speaker sa Bill pe demande ki Lamannman neseser i ganny fer avek sa Code Penal pou ki I annan proteksyon lo privacy en dimoun, an linny avek Konstitisyon e Lalwa nou pei.  Sa bann Lamannman, parey Minis in prezante avek nou, I tre kler e mon krwar I ava met bann paramet e sanksyon ki a protez bann dimoun ki vin bann viktim lezot par zot aksyon iresponsab.  Sanksyon oubyen pinisyon sever I a ganny pran avek sa bann ki pa respekte privacy en lot, kot en lot dimoun I rikord oubyen kopi en dokiman konfidansyel oubyen private parey nou dir en lot e sirkile san lotorizasyon son met.

En tel aksyon anba sa Lalwa, parey nou konnen I en krim e sa ki komet en tel aksyon I merit ganny kondannen e parey nou dir toultan, pou en maximum letan.

Nou bezwen rekonnet Mr Speaker, ki bann aksyon parey I bann aksyon imoral e I fodre ganny pini severman.  Si mon anmenn mon computer kot en teknisyen pou aranze akoz mon computer in kase, I responsabilite sa teknisyen pou aranz mon compute, me pa pou kopi oubyen rikorde parey nou dir bann dokiman, mon bann zouti travay oubyen mon bann keksoz konfidansyel ki mwan ki annan sa drwa servi, pou li fer nenport kwa ki I oule avek.  Mon krwar pa si sa teknisyen I merit pran mon bann dokiman oubyen mon bann lenformasyon pou li distribye piblikman.  Si I kopi mon lenformasyon I komet en krim e I bezwen ganny pini.

Sa Bill Mr Speaker, I pou ede dan en fason ou en lot, met en fren avek sa bann aksyon imoral ki pe anpwazonn nou sosyete, sirtou nou bann zenn.

A sa pwen, I neseser ki nou fer lapel avek bann dimoun iresponsab ki pe kontinnyelman propaz sa bann lenformasyon, ki a detriman zot prosen pou fer refleksyon lo zot bann aksyon.  Mazin byen ki sa ki zot pe fer anver zot prosen I riske vir lo zot menm en zour.  Demann zot lekor si I moralman byen pou nou zanfan, pou nou zenn e nou sosyete, pou propaz lenformasyon konfidansyel en lot dimoun, menm si I endesan oubyen dan en lot fason.  Eski ou ki pe komet sa tel aksyon, eski ou krwar an fezan ditor ou dimal en lot sitwayen koman ou menm, kot ou pe ede detri dignite ou prosen ou pe fer en keksoz responsab e moralman byen?

Lamannman sa Lalwa ki Minis in anmenn devan sa Lasanble, I enportan non selman pou ledikasyon nou pep an zeneral me pou asire ki bann ki komet en lofans dan sa konteks I ganny pini parey fodre.  Mon senserman krwar ki sa Lalwa pou ede anmenn en bon refleksyon avek nou tou, tou piblik an zeneral pou nou kapab kontinnyen reazir, pou nou kapab fer bann releksyon ki bon pou nou sitwayen pou nou kapab kontinnyen ede fer sa pei reste dan lape, dan stabilite.  Pou nou kapab kontinnyen annan respe pou bann keksoz nou prosen.

Mr Speaker, mon pa pou long dan mon lentervansyon, mon pou aret isi avek sa 2 pti komanter e mon pou aport mon sipor pou Lamannman sa Penal Kod akoz koman en Manm Lasanble, mon pe ede dan sa lalit pou kree en sosyete ek en Pep moralman for e asire ki sakenn I pran son responsab a tou pri.  Mersi Mr Speaker.

 

MR SPEAKER

Onorab Vangadasamy.

 

HON SHERYL VANGADASAMY

Mr Speaker, Manm Koleg Onorab, lepep Seselwa alekout bonzour.  Mr Speaker, sa Lamannman devan nou Lasanble ozordi I enn ki tre enportan e enn ki nou Lasanble pe seryezman konsidere e pou siporte.  Sa Lamannman dan nou Kod Penal I konsern bann aksyon prive ki ganny fer dan landrwa prive.  Enn, I anpes okenn endividi pou obzerve, filme, menm tir portre okenn endividi ki dan en landrwa prive e pe fer en act prive e san son konsantman.  E sa Lamannman pe fer le neseser ki sak endividi pou ganny seryezman deal avek.

Sa Lamannman osi I pe etablir ki I en lofans pou distribye okenn lenformasyon, portre, film oubyen rikord prive en endividi, sirtou letan nou konnen ki sa rikord, ki sa lenformasyon, ki sa portre oubyen sa film i prive e pa sipoze an sirkilasyon e avek tou konesans ki sa endividi pa’n donn son konsantman pou sa portre, pou sa film, pou sa lenformasyon prive ganny sirkile oubyen distribye e sa i pou ganny seryezman deal avek.

Mr Speaker, sa Lamannman in al pli lwen ankor, pou fer li en lofans pou okenn endividi ki an posesyon okenn sa bann items oubyen lenformasyon, portre, film, ki swa lo son telefonn, lo son computer, lo son ipad, ki konsern en endividi ouswa lavi prive en endividi e ki sa dimoun osi san son konsantman I pou seryezman ganny deal avek.

Mr Speaker, mon’n lir e fer en pe resers lo sa size, lo sa Lamannman devan nou.  Bann lenterpretasyon e definisyon bann term legal anba sa Lamannman e osi ki Lalwa dan bann lezot pei I dir lo sa Lamannman e osi ki lezot nou Lalwa I annan pou dir lo sa size e permet mwan soulev enn de pwen.

Mr Speaker, ozordi nou tou nou oule zwe plizyer rol, ozordi nou tou nou oule vin Ziz, ziri, avoka, Prokirer Zeneral e temwen lo nenport ki size.  Ozordi nou tou nou konn byen montre ledwa.

Mr Speaker, ozordi ki nou pe vwar, nou tou nou konn nou drwa e osi nou merit lans en lapel ki nou tou nou merit konsyan e konn limit nou bann drwa e responsabilite nou bann drwa anver lezot sitwayen Seselwa.  Ozordi sa Lamannman pe garanti ki serten kod etik, kot lenformasyon prive serten endividi I reste lenformasyon prive sa endividi.  Ozordi sa Lamannman I garanti aksyon e pinisyon neseser kot lenformasyon konfidansyel oubyen prive en dimoun san son konsantman I nepli reste en lenformasyon prive oubyen konfidansyel sa menm dimoun.

Mr Speaker, permet mwan pou al pli lwen lo nou Konstitisyon.  Lartik 22 nou Konstitisyon ki koz lo freedom of expression pa donn okenn drwa, pa donn okenn permisyon, pa permet personn oubyen okenn endividi vyol en lot drwa oubyen nou lot drwa anba sa menm Konstitisyon ki lartik 20 I envoke, sa se nou right to privacyFreedom of expression anba nou Konstitisyon Mr Speaker, I ganny restrikte, menm anba Konstitisyon e osi par Lalwa e osi par sa Lamannman ki pe prezante devan nou.

Dan nenport ki sosyete demonkrasi Mr Speaker, sa restriksyon I mars koumsa.  Sa se pou protez repitasyon, drwa e laliberte oubyen lavi prive nou sitwayen.  E se sa ki sa Lamannman per fer ozordi, se sa ki sa Lamannman pe garanti Lepel Seselwa ozordi.

Mr Speaker, sa Lamannman devan nou I tous sak sitwayen Seselwa direkteman.  Sa Lamannman devan nou I enn ki siplemant oubyen konplemant enn de sa drwa fondamantal ki mon’n koz lo la e sa se nou drwa to privacy.

Sa lartik e menm sa drwa I ganny koz bokou lo la dan plizyer gran, gran pei.  Dan bann gran pei demokrasi, sa definisyon privacy I enn ki larz e pou bann gran pei e menm pou Sesel ozordi avan limerzans teknolozi modern, definisyon sa drwa pa ti ganny gran lanpler.  Invasions of Privacy Laws ti ganny trete dan bann ka parey trespas, assault oubyen eavsdropping. Me ozordi ki nou vwar?  Dan bann gran, gran pei demokrasi e osi dan Sesel, nou rekonnet drwa to privacy as a fundamental right espesyalman akoz ozordi I annan nouvo myayen, I annan nouvo metod kot nou privacy oubyen privacy lepep Seselwa I ganny invade par serten endividi.  Me ozordi avek lenvasyon kontinnyel lo computers, laptops, ipads, externals, pendrives, bluetooth lo telefonn portab, iphone, Blackberry e menm avek telefonn wiretabs, mircrophones, electronic amplifiers pou eavsdropping, photographic e video cameras Mr Speaker, sa in presipit bokou bann gran, gran pei demokrasi e I nesesit bokou bann gran, gran pei demokrasi e se sa ki ozordi nou Sesel nou pe fer, i nesesit e in presipit Lalwa modern lo nou Privacy Law e sa ki nou sekyenm Lasanble pe fer ozordi.  Nou pe konplemant nou Lalwa, nou pe konplemant nou bann drwa pou sofgard nou bann drwa fondamantal ki dan nou Konstitisyon.

Mr Speaker, lenformasyon konfidansyel ou prive en endividi parey mon’n dir, I merit reste lenformasyon konfidansyel, prive en endividi unless sa endividi I anvi sa lenformasyon prive I ganny fer piblik.  En rezon akoz Lakour Siprenm Lanmerik ti dir ki the right to privacy I merit ganny enterprete koman the right to be let alone, unless otherwise stated so by the individual.  I ganny rekonnet koman en drwa pli konpreansiv e osi I merit ganny rekonnet konman en drwa ki merit ganny pli valorize par nou bann sitwayen Seselwa.

Mr Speaker, Lalwa Lanmerik in al pli lwen ki sa pou defini privacy koman, enn, en lespektasyon ki lenformasyon personnel e konfidansyel disclosed dan en landrwa prive, I pa merit ganny devwale e I reste disclosed dan sa landrwa prive.

Mr Speaker, alor, pou sa Lamannman I pe senpleman protez drwa fondamantal Lepel Seselwa.  I pe senpleman konplimant Lalwa pou protez e garanti drwa to privacy okenn sitwayen.

Mr Speaker, sa Lasanble pe senpleman e les mwan quote dan nou Konstitisyon, nou pe senpleman “Uphold the Rule of Law based on the recognition of the fundamental human rights and freedoms enthrime in this Constitution and on respect for the equality and dignity of human beings”. E nou pe senpleman egzize ki serten endividi e ki lepep Seselwa I exercise zot drwa endividyel and freedom with due regard to the rights and freedom of others and the common interest.

Mr Speaker, an solidarite, avek respe pou tou drwa e dignite imen lo okenn Lalwa ki siport e promouvwar respe pou tou nou bann drwa e dignite imen, mon pou siport sa Lamannman.  Mersi.

 

MR SPEAKER

Bon avan, mon oule port a latansyon Onorab ki i in violation of the dress code. Mon pou les ou pou sa sitting but next time probab, lir zot kod.  Sleeveless, spaghetti straps, all banned dan Lasanble Nasyonal.  Ok.  E next time mon pou pran aksyon disipliner ler sa bann keksoz I arive.  Onorab Leader Lopozisyon.

HON DAVID PIERRE

Mersi Mr Speaker.  Minis avek ou delegasyon, bonzour, bonzour tou bann Manm.  Ler mon pran laparol, mon oule felisit Onorab Marie e mon swete ki i ava anmenn ankor bann gran kontribisyon pozitiv anver bann deba ki pase e ki deroule dan nou Lasanble Nasyonal e mon santi poudir ki dimoun Anse Aux Pins pe koze e mwan koman en demokrat, mon respekte lavwa lepep.  Si se sa ki zot in swazir, mwan koman dirizan Lopozisyon dan sa Lasanble Nasyonal, mon pou respekte sa, alors mon dir ou welcome e parey mon’n dir, mon swete ki ou anmenn bann bon kontribisyon pozitiv pou fer nou Lasanble Nasyonal bouz ankor pli devan.

Mr Speaker, sa lamannman ki devan nou i en lamannman ki a mon avi i enportan me selman lo en pwen, mon pa pou donn sipor sa lamannman, akoz mon santi poudir, malgre ki nou bezwen anvoy en mesaz kler pou bann dimoun ki pe komet bann tel lofans ki mon pe al koz lo la dan mon lentervansyon, mon egalman krwar ki letan ou pas en santans ou en lofans, sa santans i bezwen enn ki ganny mezire an relasyon avek bann lezot lofans e bann lezot santans ki ganny donnen pou bann lezot lofans avek ki nou pe mezir sa kalite lofans anba sa lamannman ki nou pe koz lo la.

Mr Speaker, mon konnen poudir lemonn pe evolye.  Teknolozi pe vin pli modern, me selman lemonn pe fer fas ek bann difikilte pou deal ek bann laspe negativ ki teknolozi modern i anmennen dan nou sosyete ozordi, dan lemonn ozordi.  Lemonn i bezwen teknolozi pli modern.  Lemonn i bezwen bouze, lemonn i bezwen avanse.  Me parey nou konnen, koman imen, sak morso teknolozi modern ki ganny devlope e an vi ki i vin en laspe pozitiv avek, nou egalman konnen ki avek sa nouvo teknolozi, i touzour annan en laspe negativ.  Ozordi si nou get otour nou, si nou pran legzanp internet par egzanp, lemonn pe ganny pa mal difikilte pou deal avek bann laspe negativ ki internet i vin avek.  As much ki nou bezwen internet, as much ki internet i pozitiv pou en devlopman pozitiv lemonn, internet i vin avek son laspe negativ.  Par egzanp, nou konn tre byen kimannyer lemonn pe sey deal avek sa laspe pornografi, sirtou avek bann zanfan atraver internet, mon krwar from time to time nou tande poudir i annan en rezo ki’n ganny dekouver e ki’n ganny detri e dimoun pe ganny prosekite e kondannen pou bann tel akt.  Alors, as much ki imen i servi sa morso pozitiv dan teknolozi modern, imen i egalman profite e servi sa laspe negativ ki teknolozi modern i kapab anmennen.  E Sesel i pa en leksepsyon.  Mon ti ava kontan vwar ki bann dimoun responsab dan sosyete, bann politisyen par egzanp, i servi zot pozisyon pou promot en nivo moralite dan pei ki akseptab e ki nou zanfan e fitir zenerasyon i kapab swiv.  I sagrinab ki akoz souvandfwa nou anvi pouvwar politik, nou servi tou mwayen a nou dispozisyon pou nou kapab sey ganny sa pouvwar politik e dan sa prosesis, nou pa fatig nou avek lekel ki ganny afekte, kimannyer i ganny afekte e pli enportan, ki lenpakt sa bann akt i annan lo sosyete e sirtou lo nou bann zanfan.  Mon krwar poudir akoz sa pe arive, wi nou warant, nou demann en lalwa modern pou deal avek bann tel sitiasyon, me par kont son lot kote, mon egalman krwar ki nou bezwen vwar, as much ki nou anvi deal e dekouraz bann tel akt, mon krwar nou bezwen egalman vwar ki kalite santans aparopriye ki nou bezwen anvoy avek.

Mr Speaker, mwan mon’n personnelman fer fas avek serten sitiasyon, mon krwar tou dimoun ava rapel kimannyer portre mon zanfan, ki li i ti annan 13an letan sa portre ti ganny tire, mon zanfan ti pe display serten biye, en dolar, kot sa ti ganny pran e fer politik avek dan papye, regardless of whether mon zanfan ti annan 13an, me sa bann dimoun ti servi sa akoz zot ti krwar poudir ti en fason pou zot kapab retenir pouvwar politik.  Mon krwar moman in arive pou nou met en fren avek bann tel akt.  Bann ki pe fer sa, nou bezwen demann nou lekor serten kestyon.  Letan nou propaz en portre oubyen en video en dimoun ki pe fer serten akt, oubyen en dimoun ki nude, letan nou propaz sa san permisyon sa dimoun, ler nou propaz sa apre ki nou konnen poudir sa dimoun ti pe fer sa akt dan en fason prive, koman en imen, koman en endividi, i ganny sa right anba Konstitisyon pou li fer, ler i dan son lakour, i bezwen enjoy bann privilez ki privacy son lakour i donn li.  Letan nou pe fer sa, kwa vreman ki nou pe sey achieve from sa? Kwa ki nou gannyen?  Kwa ki nou pe donn nou sosyete from sa?  Ki kontribisyon pozitiv ki nou pe fer ver lavansman nou sosyete?  Ki kalite kontribisyon pozitiv ki nou pe fer ver lafason ki nou anvi nou zanfan i panse a lavenir?  An dot mo, dan ki direksyon ki nou pe bouz the trend of thinking nou lazenes e nou bann zanfan?  Letan nou pe fer en keksoz, eski nou pa mazinen, sirtou parey sa lalwa, sa lamannman pe deal avek, letan nou pe pran en keksoz, en propriyete prive en endividi, ki li sa dimoun i pa’n zanmen anvi ki sa i vin prive e nou pe met sa a dispozisyon piblik, letan sa dimoun ki involve ladan i annan zanfan, i annan frer, i annan ser, i annan kouzen, i annan kouzin, i annan en manman i annan en papa.  Ler nou pe fer sa, kwa vreman pozitiv ki lasosyete i gannyen ladan e akoz ki nou koman bann dimoun responsab, nou krwar i enportan pou nou pous sa avek sosyete pou zot konsiderasyon?

Mr Speaker, mon krwar poudir wi, moman in arive pou nou deal avek me selman nou bezwen deal avek dan en fason apropriye.  Mon krwar ki nou bezwen konpran ki nou tou nou annan nou diferans plitik.  Nou tou nou devret gard nou lendepandans politik.  Sak Parti i baze lo serten prensip, me sosyete i devret egzize ki menm si en Parti politik oubyen en politisyen, oubyen en endividi dan sosyete i annan son diferans politik, i devret konnen kimannyer i pou konport li koman en politisyen.  I devret konnen kwa ki i bezwen servi e kwa ki i kapab servi koman en zouti pou li ganny pouvwar politik.  Kwa ki i kapab servi koman en zouti pou li kapab ganny sa nivo sipor ki li i anvi gannyen pou li ariv kot i krwar i devret arive oubyen kot i krwar i anvi arive.  So, mon krwar sosyete an zeneral i devret anvoy en mesaz kler, sirtou avek bann tel politisyen e dir avek zot, politik lo sa nivo rigol, politik dan labou i pa en fason pou nou fer pou nou attain pouvwar.  Si nou anvi pouvwar, nou fer en politik ki annan moral par deryer.  En politik ki baze lo prensip.  En politik ki letan nou zanfan pe ekout nou, letan bann lezot adilt ki pe desann pou al fer zot devwar pou al vote i ekout nou, zot santi ki nou pe fer en kontribisyon pozitiv ver devlopman nou pei.  Apre tou, nou devret pe kontribye pou nou protez lazenes Seselwa e pou nou diriz zot dan en direksyon kot demen zot kapab vin bann leaders ki pozitiv e ki annan en moral.

Mr Speaker, mon krwar i egalman enportan pou nou anvoy en mesaz pou bann teknisyen ki aranz oubyen ki repar bann gadgets elektronik tel ki computer oubyen mobile phones. Mon krwar en endividi by rights i annan sa drwa pou li gard dan son posesyon serten dokiman ki li i santi i enportan pou li pou en rezon ou en lot.  Nou, nou pa la pou nou zize kwa ki enportan pou en endividi garde koman en dokiman prive oubyen non.  Sa i desizyon sa endividi.  Nou, nou pa la pou nou montre ledrwa lo sa boug pou dir ek li poudir ou konnen, sa portre ki la, ou pa devret garde koman en posesyon prive, sa enn ki la ou kapab garde.  Non.  Sak endividi i gran, zot bann adilt e zot devret kapab fer sa desizyon.  Me ler en endividi in pran en desizyon pou li gard serten keksoz an prive pou li, pou son rezon ki li i konnen, en dimoun ki pe aranz en gadget lo ki sa dokiman in ganny stored lo la, ki’n ganny sa privilez e ki’n ganny konfyans sa dimoun ki ok, Mr X pou aranz son computer, akoz mon annan konfyans dan li e li Mr X i pa kapab, i napa drwa e i pa devret zanmen, ni menm konsidere pou pran propriyete prive sa dimoun e komans partaze avek bi pou denigre oubyen pou afekte sa endividi.  Mon toutafe dakor ki en mesaz kler e tre kler i devret ganny anvoye pou sa bann endividi.  Nou bezwen toultan mazinen poudir nou tou koman bann endividi, koman bann dimoun dan sosyete, nou kapab pas atrever en tel sitiasyon.  E letan nou pas atraver bann sitiasyon, nou pou realize poudir i pa gou e i pa ti neseser.  Alors mon krwar Mr Speaker, ki wi, i neseser pou nou anvoy en mesaz pou sa bann teknisyen osi.  Mon krwar zot devret respekte propriyete lezot e mon krwar zot devret konpran poudir ler zot in ganny sa latas pou fer en travay, fer sa travay dan en fason profesyonnel.  Mon konnen Mr Speaker, akoz mon’n viv parmi serten sa bann dimoun e mon konnen kimannyer, si mon kapab servi sa term, zot lafen bann tel lenformasyon akoz kekfwa pou zot i sel semen, i sel fason ki zot kapab fer pou zot attain sa ki zot anvi attain. Me mon krwar poudir la, i annan en mesaz e sa mesaz i enn ki kler.

Mr Speaker, mon egalman anvi port latansyon Minis lo en seksyon dan sa lamannman.  Sa i 157(F) ki baze lo immunity.  Mr Speaker, mon krwar avek lespri profesyonnalizm, avek lespri respe, avek lespri moralite.  Mon krwar i enportan ki bann dimoun ki pe fer en travay, dan konteks sa lamannman, nou pe koz la lo bann law enforcement officers.  Mon krwar i enportan as much ki zot pe ganny serten limilite, an relasyon avek sa lamannman, mon krwar i enportan pou nou anvoy en mesaz pou zot e dir avek zot poudir zot pa kapab abiz pouvwar ki sa i donn zot.  Letan zot pe fer zot travay, zot osi i annan serten fine line ki zot bezwen swiv.  Zot bezwen desarz zot responsabilite avek respe e zot bezwen desarz zot responsabilite avek profesyonnalizm.  Zot pa kapab servi sa pou zot an retour sey servi lenformasyon ki zot in gannyen pou zot afekte lezot akoz zot krwar ki zot kapab ganny limilite.  E dan sa konteks, Mr Speaker, mon krwar i pou enportan ki Minis i konsidere ki sa bann dimoun ki pe fer sa travay, ki kapab ganny akse avek serten lenformasayon letan zot pe desarz zot responsabilite, mon krwar i enportan ki zot ganny proper training pou zot kapab fer zot travay san ki zot servi sa limilite pou zot afekte bann fanmiy, oubyen pou zot afekte lezot.

Mr Speaker, parey mon’n dir, mon pou abstain pou en rezon fondamantal.  Mon krwar ki santans wi, i enportan pou nou anvoy en mesaz kler e pou nou pas en santans ki relativman o, me mon krwar santans i devret ganny mete an relasyon avek bann lezot lofans e kalite santans ki nou met avek sa bann lezot lofans.  Mon konnen poudir par egzanp, i annan bann ka kot en dimoun i kapab pran lavi en lot dimoun, en sarz ki nou apel manslaughter ki involuntary e mon krwar poudir i annan bann lenstans kot en dimoun in kondann kekfwa 7an pou en tel sarz, so mon vwar li 20 years and in fact, lafason – koriz mwan si mon mal, lafason ki bann santans, lafason ki sa in ganny mete i dir poudir ok, the person ki komet en lofans is liable on conviction ti imprisonment for a term of 20 years.  So, nou pa ni pe menm dir for a term of up to 20 years. Nou pe dir, for a term of 20 years.  Pli ba osi 157(b), again i dir commits an offence and is liable on conviction to imprisonment for a term of 20 years. Lot ankor, for a term of 20 years.  So, mon krwar ki kekfwa nou devret revwar e parey mon’n dir, menm si nou anvi anvoy en mesaz kler, ki mon krwar mesaz i kler, for the sentence of 20 years, petet i kapab a mon avi, en pti pe tro o e i pa an balans avek bann lezot sarz e santans ki ganny donnen pou sa bann lezot sarz, sirtou par egzanp dan konteks sa legzanp ki mwan mon’n donnen.  So, mesaz ki mwan mon pou dir, ki mon pou anvoye i wi, nou bezwen arete sa kalite practice, Sesel i bezwen bouz lo en nivo moralite ki rezonnab, ki respektab.  Nou bezwen donn bon legzanp nou bann zenn e la mon pou dir Mr Speaker, mon pou donn en legzanp tou.  Konmela en dimoun i pe fer son akt an prive, ok.  E en dimoun i ganny akse avek serten dokiman, oubyen i filme, i ganny sans pou en rezon ou en lot, i filme sa dimoun e i propaz sa video oubyen sa portre.  Now, napa okenn leson ki pou ganny aprann par bann endividi ki zot, zot fer zot akt an prive.  Personn dan lakour pa pou aret fer zot akt avek zot partner akoz en dimoun in ganny filmen.  Sa dimoun i santi i annan son privacy e i pou kontinnyen li, fer son akt akoz i se li e i an prive.  Me par kont, letan sa video i ganny pase an piblik, ki vreman keksoz pozitiv ki nou pe donn nou lazenes par egzanp?  Ki nou pe donn en zanfan – ozordi nou konnen ki manrmay 12an, 13an, 14an ki zot, anba lalwa, zot napa drwa fer okenn aksyon seksyel, me anba lalwa zot annan drwa annan en telefonn mobil, sa bann manrmay i kapab ganny akse avek sa bann portre.  So, letan nou, nou pe fer sa e nou pe propaz sa bann portre, what positive ki nou ekspekte gannyen from en tel aksyon?  Absoliman nanryen.  Lo en kote nou pa pe anpes sa dimoun ki pe fer son akt kontinnyen fer, akoz i an prive e i pe fer li an prive, so nou pa pe anpes li fer e lo lot kote nou pe donn akse avek nou zanfan, serten portre, oubyen serten zimaz, oubyen serten video ki totalman bann video ki zot pa devret pe vwar a sa laz.  So, nou ki pe fer sa, sa endividi ki pe fer sa i bezwen konpran ki i pa pe fer okenn nanryen pozitiv pou lasosyete.  Par kont, si en dimoun pe fer en aksyon seksyel in public, me sa dan limenm i deza en lofans.  So anybody ki ganny trouve pe fer aksyon seksyel in public, i deza en lofans anba lalwa.  Therefore mon pa vwar anything positive at all pou en dimoun al fer en tel keksoz such as pran posesyon prive en dimoun, met li a dispozisyon piblik, pirman zis pou denigre oubyen pou abes nivo moralite en sosyete, tel ki en sosyete parey sosyete Sesel.  So, mon dakor ki wi, i devret annan aksyon ki ganny pran sever, me mon santi poudir dan sa konteks, 20 years is a bit too much. Mersi Mr Speaker.

 

MR SPEAKER

Onorab Pillay.

 

HON SEBASTIEN PILLAY

Mersi bokou Mr Speaker e bonzour Mr Speaker, bonzour Minis e bonzour tou bann Manm Onorab.  Bonzour tou dimoun ki a lekout.  Mr Speaker, mon’n ekout atantivman tou bann entervenan lo sa lamannman e mon krwar si i annan en mesaz kler ki nou pe lanse ozordi se ki nou sosyete in sanze, latitid bann dimoun dan nou sosyete in osi sanze e sa i fer ki nou bezwen revwar bann framework legal ki protez e gid nou sosyete.  Mon krwar ki i en devwar leta, i en devwar Gouvernman pou protez tou son sitwayen kont tou form lagresyon oubyen tou form kriminalite ki kapab arive e mon krwar poudir, ler nou pe anmenn bann lamannman koumsa, nou pe montre poudir sa i en krim serye, pou mwan i en krim ki serye, i en felony, i pa en misdeaminour, i en krim ki serye.  I pa en victimous crime akoz premyerman i afekte – i annan en emotional scaring ki arive pou sa dimoun ki son propriyete prive i ganny pase dan gran piblik, premyerman 1, dezyenmman i annan en scaring ki pou son zanfan, son fanmiy e trwazyenmman par egzanp ou kapab vwar de lenstans kot en dimoun i anvoy ou en email e i dir ou get sa, ou osi ou vin en viktim la kot ler ou resevwar sa email e i annan sa bann lenformasyon, oubyen i annan sa bann portre oubyen recording ladan.  So, mon krwar i tre serye e lafason ki nou pe adres li dan sa lamannman i montre ki nou konsider li koman tre serye.  Ler nou regard Kod Penal oparavan, ti napa okenn provizyon dan Kod Penal pou protez enn nou sitwayen kont en tel lofans.  E nou vwar poudir ti annan par egzanp Seksyon 151 e 152, me pa ti ase.  Sa ki ti la avan, petet pa ti ase pou protez nou sitwayen e se pou sa rezon ki mon krwar nou’n bezwen vwar nou dan en sitiasyon kot nou bezwen anmenn – mon pe koz Seksyon 152 e 153, nou bezwen anmenn lamannman, nou bezwen anmenn bann bann provizyon dan nou Kod Penal pou asire ki nou kapab protez nou sitwayen, protez nou dimoun, bann nouvo form krim ki kapab arive.  Mon dir sa Mr Speaker, akoz i kler ki ozordi, par lepase par egzanp, ler nou ti dekrir poudir se ou latitid ki ed ou avans pli devan, ozordi bokou fwa nou latitid pe fer nou avans pli deryer e mon dir sa akoz i kler poudir ozordi, i vin en fe kot bokou dimoun pe rod tou sa ki i kapab rode, every dirt ki i kapab rode lo en lot dimoun pou li kapab met sa azour e devan piblik e souvandfwa nou vwar poudir zot pe fer sa kan en dimoun i ganny en …….. responsabilite, i kapab en dimoun ki o dan en lantrepriz, en dimoun ki own en konpannyen e pou mwan, pou travay dir ki sa bann dimoun in fer pou avans pli devan e pou en lot dimoun mars deryer dan zot lepa e rod tou fason pou nouir e afekte zot i pa normal, i pa Konstitisyonnel e i pa legal.  E se pou sa rezon ki nou bezwen lans en mesaz kler e for e dir poudir si ou pe komet en tel akt, ou pe fer en lofans ki serye, ou pe fer en lofans ki grav e ou bezwen ganny pini severman.  Mon apresye lentervansyon Leader Lopozisyon ler in koz lo privilez privacy lakour ouswa lakour ki en dimoun i annan, mon krwar ki ou lakour i ou sanctuary, i annan en saintity avek ou lakour ki personn pa kapab konpromet e napa personn ki annan drwa antre dan ou lakour akoz i pe komet en lofans.  Me ler en dimoun i osi pran mon krwar parey in eksplike, en keksoz ki ou’n fer dan ou lakour, mon krwar sa osi i en lofans, i tend to amount to sa dimoun in antre dan ou lakour pou pran sa keksoz akoz sa ti pas dan ou privacy.  E bann entervenan ki’n koz avan mwan in koz bokou lo sa issue moralite e mon krwar se la kot sa lamannman ki nou pe anmennen dan Kod Penal i situate son lekor.  Me osi mon krwar poudir sa ki pe arive osi ozordi se ki i annan bann instigators, bann dimoun ki pou – avek levolisyon dan lafason ki nou pran keksoz, avek sa sanzman latitid ki nou’n koz lo la, i annan dimoun ki pou instigate, ki pou sey fors son kanmarad pou al rod lenformasyon lo en lot dimoun.  E la osi sa dimoun i pe komet en lofans.  Mon krwar dan nou Kod Penal si mon pa tronpe, Seksyon 22 i koz lo party to offences. So, ou bezwen annan en pinisyon pou sa dimoun ki li osi i pe akt koman sa instigator, ki pe dir ok, ou ale rod sa lenformasyon ek tel dimoun, anmennen.  Par egzanp nou’n koz lo en dimoun ki pe repar computer en dimoun, i vwar tel lenformasyon.  Ok, petet li in vwar i pa’n fer nanryen avek.  Me en lot dimoun i dir, “en ou annan sa, vini ou a donn mwan, mon a gete ki nou kapab fer avek”.  So, sa dimoun ki’n pran sa lenformasyon osi, i osi guilty.  Me oparavan dan nou Kod Penal, pou tel kalite lofans, ou pa ti pe vwar en pinisyon ki adekwat akoz pou mwan, ler ou pe emosyonnelman afekte en dimoun e sa i pa zis emosyonnelman me profesyonnelman osi, afekte en dimoun, i fer en dimoun fer en kantite pa an aryer e pou en pti sosyete 90 mil dimoun apepre, mon krwar ki i pa akseptab.  I pa akseptab pou nou ki pe al dan sa direksyon e nou bezwen lans en mesaz kler.  Zis parey nou’n lans en mesaz kler kont bann akt kriminalite kot i konsern burglary e vandalizm, nou bezwen osi fer parey kot i konsern bann tel aksyon.

Ou a permet mwan Mr Speaker pou koz lo serten pwen ki mon konnen i serten pwen kontansyon lo sa lamannman.  Premye issue ki mon annan se sa issue avek sa santans.  Mon krwar ki i en santans ki for akoz nou pe mezir degre serye sa krim.  Be at the same time, nou bezwen konpran poudir this is not a mandatory sentence e Ziz i en diskresyon pou li konsider tou bann mitigating factors letan i pe pas sa santans.  Sa i enn, dezyenmman mon krwar dan term legal ouswa ki ou apel en custodian sentence ki kapab ganny avanse, sirtou baze lo gravite e lafason ki sa dimoun in komet sa lofans.  E pou mwan sa ki mon tire – en pozitiv enportan ki mon tire ladan se ki sa lamannman pa retir nanryen from diskresyon Lakour pou li pas en santans.  Sa ki enportan.  Sa Ziz, i pou ekout sa case, i pou regard sa levidans e i pou dir whether or not sa dimoun i merite al dan prizon pou tel kantite letan.  Me selman ou bezwen donn sa mesaz kler.  Si par egzanp ou ti’n dir poudir ok, sa i en lofans pou 5an, me ler ou kalkile par egzanp, en dimoun i en head of a household, i en head of a family, sa in afekte li, in afekte son madanm, in afekte son zanfan, in afekte okenn dimoun ki depan lo li par son travay, si i en dimoun ki anploy lezot dimoun, so ou vwar ou i kapab annan ou 15 a 20 dimoun.  So, kimannyer ou pou ziz degre lenpakt ki en tel lensidan pou’n annan lo en dimoun, si ou pa met en santans ki o pou dir nou sosyete is against sa bann form kriminalite?  Now, parey Onorab Samson in koz lo la oparavan, an tout fwa, an bonn fwa, sak dimoun osi i bezwen osi pran zot responsabilite pou realiz sa ki zot kapab fer an piblik e an prive e sa ki pas an prive, zot bezwen osi realize poudir i annan serten prekosyon ki zot menm zot, zot bezwen pran.  Sa it goes without saying.

En lot pwen ki mon ti oule koz lo la Mr Speaker, se sa pwen kot nou pe donn sa immunity to police officers, bann enforcement officers.  Mon krwar en keksoz ki nou bezwen fer se ki nou bezwen met byen bann checks and balances la.  Nou bezwen asire ki sa zofisye lapolis i annan en framework byen kler ki permet zot – e mon krwar par egzanp la, si i pe fer en under cover operation kot i pe rode lekel ki pe komet tel lofans, mon krwar ou bezwen protez li, donn li serten imilite pou li kapab fer son louvraz.

E pou fini Mr Speaker, mon ti annan 2 pti rekomandasyon.  Mon premye rekomandasyon i relye en pti pe avek sa ki nou pe diskite.  Mon krwar ki Gouvernman i bezwen osi revwar e petet regard Data Protection Act. Regarde si i azour ozordi akoz i relye avek sa bann keksoz ki nou pe diskite e regarde kimannyer nou kapab osi asire lezot pei parey Langleter i annan en Data Protection Act e son sistenm kriminel – son sistenm legal i similar to ours e petet sa osi ti ava en fason pou nou regarde kimannyer nou kapab aranz keksoz en pti pe pli byen.

Apre en dernyen pwen ki mon ti oule fer sorti se ki nou bezwen protez bann ki pli vilnerab.  Nou bezwen protez nou bann zanfan, mon krwar nou tou nou konsernen avek sa ki pe arive dan nou pei e si nou tou nou fer en zefor, si nou tou nou met lanmen ansanm, mon krwar nou kapab ede pou anmenn sa renesans moral parey nou anvi anmennen.  E avek sa mon ti a kontan termin mon lentervansyon e mon pou donn mon sipor pou sa lamannman.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker mon pa pou long akoz mon krwar bokou keksoz in ganny dir lo sa lamannman ki devan nou, kantmenm mon krwar i neseser ki mon aport mon sipor a sa lamannman akoz zisteman la i dezyenm lamannman dan Penal Code ki vin devan nou Lasanble e dernyen fwa ler Minis ti anmenn lamannman dan Penal Code nou Lasanble ti fer rekomandasyon ki zisteman Gouvernman i konbat e i regard sa bann nouvo kalite lofans ki pe ganny fer e i retourn kot e i anmenn sa nouvo lamannman devan nou.  E set egzakteman ki Gouvernman in fer atraver Minis e pou sa 1, mon remersye li pou ekout nou e dezyenm pa pou zis ekout nou, me pou aksyonn lo la.  E sa i montre en Lasanble ki travay e osi Gouvernman ki ekout Lasanble e ki travay an sinerzi avek Parlman ler i annan sa nesesite pou fer li e pou sa nou happy Minis.  Sa lamannman ki devan nou alors i ganny nou sipor akoz i ti en demann ler ou ti vin Lasanble dernyen fwa, i osi en demann pou pep Seselwa.  I en demann ki tou dimoun ki lespri i ouver, ki lespri i byen, ki lespri i fonksyonnel, ki pa malad an espri, i dakor avek sa lamannman ki pe ganny fer e i dakor avek bann nouvo provizyon ki pe ganny mete dan nou Penal Code.  Parey in ganny dir, sa bann lamannman ki devan nou i protez endividi.  Tou endividi Seselwa.  Pa serten endividi, pa en group dimoun.  Pa en group dimoun ki ganny konsidere koman ellit. Pa en group dimoun ki ganny konsidere koman zot ganny plis proteksyon dan sa sosyete.  Me i pou protez tou endividi ki ler i ferm son laport, sa ki i fer deryer son laport i konsern li ek son fanmiy ek son partner, ek son zanmi e osi okenn endividi ki i envite deryer son laport.  E parey Onorab Vangadasamy in fer tre kler, the right to privacy i pa zis en right koumsa.  It is a fundamental right entrime in the Constitution a Lartik 20 e i enportan pou dimoun konnen poudir the right to privacy i en drwa fondamantal ki nou sosyete i bezwen proteze a tou pri.  Si nou pa protez sa endividi dan son confiance ki i dekri koman son privacy, nou pa pe protez li pou bann lezot drwa.  Pou li zouir son fanmiy an prive.  Bann lezot drwa pou li annan serten laliberte mouvman dan son confiance prive.  Pou li annan lezot laliberte, the right to dignity ki another fundamental right akoz dimoun i bezwen viv dan a certain level of dignity.  So the right to privacy i anmenn avek li lezot drwa, me osi nou pe dir avek nou sosyete ki ou annan tou drwa fer sa ki ou fer, si i pa ilegal, fer sa ki ou fer an prive e napa okenn dimoun ki annan en drwa vini, antre dan sa confiance. E mon krwar i enportan ki pep Seselwa i konpran sa tre byen.  Sa lalwa i cross cutting, i pou tou dimoun ki ler i deside ferm son laport e menm si i dan son lakour prive.  Sa ki i pe fer i konsern li e i annan tou drwa anba nou Konstitisyon e nou Gouvernman ek Parlman ozordi i zwenn ansanm pou anvoy sa mesaz tre kler, fer sa ki ou anvi, pourvi ou pa pe kas lalwa e ou pa pe disturb ou vwazen, oubyen ou pa pe fer lezot lofans.  E sa i tre, tre enportan dan en sosyete demokratik, dan en sosyete ki krwar ki lendividi i annan drwa epanouir dan nenport ki fason ki i ganny drwa epanouir.  I malere – mon pou zwenn Leader Lopozisyon, i malere ki i annan serten group dimoun ki koz lo drwa endividi, ki koz lo tou bann gran laliberte dan sosyete, ki koz tou bann drwa laliberte dan en pei demokratik, ki pa krwar dan laplikasyon bann lalwa.  Ki pa krwar in the right to privacy.  Ki krwar ki ler i servi serten lafors politik, ler i servi serten bezwen politik, la alors i ok pou zot kas lalwa.  Non, it is not ok, it is not right. Nenport ki dimoun dan nou sosyete, pa above lalwa e sertennman politisyon pa above lalwa me tou dimoun i ganny drwa, i annan en drwa pou ganny proteze par lalwa e par nou Konstitisyon dan ki bann lalwa i dekoule.

E ankor, mesaz se ki i napa nanryen mal pou fer sa ki zot fer, pou bann endividi fer sa ki zot fer, pourvi zot osi zot pe fer li byen.  Zot pa pe violate the right of other individuals, napa nanryen mal.  Fodre pa ki nou vin en sosyete ki komans krwar ki i annan serten aksyon ki mal, ki immoral akoz i ganny fer in the confinement of privacy.  There’s nothing wrong with that e the minute nou komans annan okenn nosyon ki sa i mal, then nou pe dir avek prosen zenerasyon ki ou napa drwa fer serten aksyon ki natirel pou et imen.

Mr Speaker, sa lalwa pe osi protez nou zanfan e mwan mon pli konsernen avek sa.  Sa bann lamannman pe protez nou zanfan.  Bann levennman ki nou’n eksperyanse i montre nou osi ki nou zanfan i merit bokou plis proteksyon a bann aksyon ki ganny konsidere koman adilt e pou ki zot pankor pare pou antre ladan.  Bann aksyon seksyel, bann portre, bann zimaz aksyon seksyel ki mannyer mon ganny en konpran, i annan serten lakour zanfan i ganny akse avek.  I annan serten adilt ki montre, ki regarde devan zanfan e sirtou ler nou pe koz lo internet. I annan zanfan ki al lo bann blogs, lo bann website e ki pa neseserman zis zimaz me bann parol ki ganny dir.  Zot ganny akse avek e zot komans demann zot lekor kestyon.  E sa pou nou – pou mwan a mon avi i very, very bad pou en sosyete ki krwar en kantite dan proteksyon zanfan.

Mr Speaker, mon ti a kontan koz lo 22 issues ki si nou pa met en fren avek sa bann aksyon ki pe arive i pou danzere pou nou.  e sa se 1, the emergence of a rumour culture. I annan ozordi, nou konnen nou en pti pei, a small island culture, nou en pti pei, nou konn zaksyon tou dimounl, nou konn tou dimoun e i si ou oule, striktire dan en serten fason.  Me sa ki pa normal e sa ki pa natural dan sa bann kiltir se ki avek sirkilasyon bann keksoz prive, sa osi i anmenn en kiltir rimer lo bann endividi.  E rimer is just as bad as pibliy en portre lo en endividi, oubyen pibliy en zimaz video lo en endividi oubyen dir en keksoz lo bann blog.  It is just as bad akoz parey nou konnen, nou en sosyete ki prone to – nou konn tou dimoun dan sosyete e sa i en tre move kalite pou annan dan en sosyete.  Sirtou ler nou pei pe avans devan.  Sirtou ler nou anvi bouz devan avek teknolozi lenformasyon, sirtou ler nou anvi moderniz tou sa ki nou pe fer, sirtou ler nou lekonomi pe open upThe rumour culture i en vye, vye kiltir ki nou ti annan e i pa byen, i pa normal, i en move mantalite pou nou annan e nou bezwen osi fer sir ki okenn dimoun ki sirkil – mon konnen i annan serten provizyon dan lalwa.  Okenn dimoun ki sirkil lenformasyon malisye lo zot prosen, sa osi lalwa i bezwen pran ka avek.  Nou pa pou toler en kiltir kot i annan serten dimoun kot nek koman i leve bomaten, premye keksoz ki i mazinen, kimannyer pou fabrik en mansonz lo son prosen, pou detri lavi son prosen.  E sa osi i annan serten groupman politik ki krwar ladan.  Ki krwar dan sirkil rimer, ki krwar dan anvoy rimer parmi sosyete zis pou destabiliz the moral fabric of nou sosyete e ki dezyenm pwen ki mon anvi koz lo la.

Sa bann lamannman se pou protez moralite nou sosyete e sa osi i osi enportan.  Ki kalite sosyetenou anvi viv ladan?  Ki kalite sosyete nou anvi nou zanfan grandi ladan?  Eski nou anvi en sosyete kot demen, tou dimoun, koman nou leve nou ferm nou laport akoz nou per, nenport ki dimoun i kapab filmen, i kapab tir portre oubyen i kapab fer en rimer lo nou.  Eski nou anvi sa kalite sosyete?  E krwar mwan dan rimer napa personn ki ganny eparnye.  Napa personn.  Ki kalite sosyete nou anvi, kot nou zanfan deza pti, zot pe grandi e zot osi zot pe form rimer lo zot zanmi, zot pe form rimer lo lezot dimoun.  Eski nou anvi en sosyete koumsa?  Eski Sesel i anvi vin en sosyete kot koman 6er i sonnen tou dimoun i ferm zot laport?  Eski nou anvi vin en sosyete, koman nou antre dan nou transpor, koman en dimoun i knock pou vin koz ek nou, nou fer monte nou vit e nou pa koz ek personn?  Eski nou anvi vin en sosyete kot en endividi pa kapab al konfese, pa kapab al konfye li, pa kapab annan serten dimoun ki i kapab koz avek?  Eski nou anvi tou dimoun mars ek zot laptop anba zot lebra e per dimoun i ava vole?  This is a kind of society nou pou gannyen si nou pa met en fren avek sa bann kalite mantalite.  E sa lalwa i zisteman fer sir ki nou protez lavenir nou pei e nou fer sir ki sa kalite sosyete ki nou fyer nou annan, en sosyete lib e zis e friendly e Seselwa i friendly antre Seselwa e avek etranze, nou mentenir.  Pou ozordi, nou mentenir li pou demen e sa i rezon akoz nou lo sa kote, nou pe siport sa bann lamannman.

Mr Speaker, in annan serten lentervansyon lo kantite letan, maximum sentencing of 20 years e mon konpran largiman Leader Lopozisyon e mon ti a kontan Mr Speaker, ki Minis i donn nou en direksyon kler lo la, if it is up to 20 years.  Mon’n ganny en konpran ki Moris, anba zot Computer Misuse and Ciber Attack Act 2003, sa osi i carry a maximum sentence of 20 years. E i annan plizyer lezot zirisdiksyon ki osi carry a maximum sentence of 20 years. So, mon ti a kontan ki Minis i donn nou en direksyon kler, me ozordi nou pe osi dir avek Zidisyer:- Nou kit sa lalwa dan ou lanmen e servi li byen.  Nou konnen in annan serten group Zidisyer ki konplent nou anmar zot lanmen lo minimum mandatory, me ozordi nou pe dir ek zot, napa problenm.  Nou trust zot, nou kit sa lalwa dan zot lanmen me servi li byen.  I annan en diferans ant 2 zenn par lao 18an ki pe fool around e ki’n fer en senp pti lofans.  I annan en diferans avek en dimoun ki purposely i swiv Onorab David Pierre, i swiv li partou kot i ale, i rod tou mwayen posib pou tir son portre e ler i tir son portre, purposely i pibliye pou detri repitasyon e karyer Onorab David Pierre.  E fini, bang, i fini tou sa ki in pas son lavi in achieve.  Me pa zis sa, i osi detri fanmiy Onorab David Pierre.  Son zanfan i ganny afekte kot i pe lekol.  Tou son lantouraz i ganny afekte, si i annan en biznes, son biznes i tonbe.  It is as bad as detri lavi en dimoun.  A mon avi, repitasyon ki en dimoun i annan ki ler i mor i reste avek, son good name.  I kapab i kit larises deryer, i kit tou keksoz deryer.  Me i mor, fini.  I kit nou later avek son good name e mon krwar sa i enportan.  It is about protecting the good name of individuals e pou mwan sa i osi enportan ki sa lavi ki sa dimoun in viv lo later, si in byen fer nou ava dir li in byen fer ler i mor e nou pa pou les okenn endividi step in e fer krwar poudir sa dimoun in en malfeter.

Mr Speaker, zis 2 pti minit avan mon terminen.  Mon krwar mesaz nou pep Seselwa avek sa lamannman i klere bomaten nou’n felisit nou koleg pou retourn dan nou Lasanble Nasyonal e mesaz pep Seselwa i kler.  Pep Seselwa dan son mazorite pa toler sa bann kalite aksyon, pa aksepte sa bann kalite aksyon, pa krwar dan sa bann kalite aksyon.  E nou, ozordi nou pe reflekte sa mesaz e nou pe reflekte desizyon lepep Seselwa pou met dekote sa bann zafer e pou move devan e pou nou aranze e pou nou bouze.  Mr Speaker, avek sa nou pou siport demars nou Gouvernman dan sa direksyon e mesaz i kler, bann dimoun ki krwar it’s fun to do it, ozordi it’s criminal. I kriminel, i en akt kriminel ler ou fer sa bann aksyon e mon krwar i enportan ki i annan en sansibilizasyon piblik pou piblik konnen poudir sa ki nou ti pe fer yer e nou ti krwar i gou, ozordi i nepli gou, i en aksyon kriminel e i annan santans ki vin avek si nou fer li dan en fason malisye.  Mersi Mr Speaker.

 

MR SPEAKER

Minister, right of reply.

 

MINISTER JOEL MORGAN

Mersi Mr Speaker.  Mr Speaker, mon’n ekout atantivman avek en lespri tre ouver tou bann largiman ki’n ganny prezante dan Lasanble bomaten lo sa propozisyon pou amann nou Kod Penal an sa ki konsern drwa en endividi pou li annan son lavi prive, dan son lespas prive.  E mon kontan ki tou bann Onorab otour sa latab dan Lasanble in donn sipor sa prensip.  Prensip ki koman en endividi, koman en sitwayen dan nou pei, nou Konstitisyon i donn nou sa drwa fondamantal pou annan en lavi e en lavi prive a sa.  E mon krwar sa i en keksoz ki sakre dan nenport ki prensip lademokrasi en pei tel parey nou pei isi.

Mr Speaker, i annan parey bann Manm Onorab in dir, i annan bann endividi ki’n servi, ki’n abiz sa drwa ki nou annan e zot in servi li pou detri ouswa pou esey detri ou pou denigre, dan en fason ou en lot, serten endividi.  E ler nou’n ekout lopinyon piblik koman en Gouvernman responsab, lamazorite dimoun ki’n eksprim zot lopinyon i tre mekontan, menm ankoler avek aksyon sa bann endividi ki pe fer sirkile, ou sa ki pe vol dan en fason pou vol bann portre, bann recording bann video bann endividi ki pe involve zot dan bann aksyon prive.  Finalman, mazorite lepep Seselwa in montre Mr Speaker, atraver zot vot ki zot in cast Anse Aux Pins dan sa distrik poudir zot pa kontan sa bann keksoz ki sa bann dimoun in fer pou esey denigre ouswa detri lavi lezot dimoun.  E zot in fer sa atraver ballot box, zot in donn en resoundinig rezilta pou kandida Parti Lepep e mon krwar zot in anvoy en mesaz tre kler pou sa bann endividi, sa bann zournalis, bann so called journalists ki pe esey blackmail dimoun.  Ziska ozordi zot ankor pe sey fer sa.  Resaman dan zot bann piblikasyon zot in anvoy bann threats poudir zot pou al pibliy serten portre, serten zimaz bann lezot endividi e ozordi, sa Lasanble e Gouvernman pe anvoy en mesaz tre kler pou zot.  Parey Onorab Rose in dir, i prezan vin en aksyon kriminel.  So Mr Speaker, mon krwar ler ti’n arive pou sa Lasanble, ansanm avek Gouvernman fer pase bann mezir bokou pli konpreansiv e avek en penalite bokou pli sever pou sa bann dimoun ki zot napa prensip, zot panse poudir nenport kwa, nenport ki keksoz ki vin a zot laporte, zot kapab servi li pou detri lavi lezot dimoun.  E mon krwar sa lamannman i anvoy en mesaz tre kler pou tou dimoun ki pe contemplate ouswa ki pe fer bann tel aksyon, ouswa ki dan posesyon bann tel recording, bann portre, bann video and so on, i anvoy en mesaz tre kler pou zot ki as of now, lemoman ki sa lalwa i pase, i ganny assented, i vin ilegal e son konsekans i sever.

Mr Speaker, dan en serten fason, nou ti a ekspekte ki sa bann endividi dan nou lasosyete ti ava’n azir dan en fason bokou pli responsab ki zot ti ava annan sa konsyans pou respekte dignite lezot dimoun dan lasosyete e i montre nou Mr Speaker ki zot lentansyon se pa bann bon lentansyon parey bann Manm Lasanble in dir bomaten, zot lentansyon i pa bann lentansyon ki pozitiv, ki nob, me par kont zot lentansyon i konpletman negativ, i kriyel menm e i vize ver destriksyon.  Alor Mr Speaker, mon osi mon kontan ki nou Gouvernman in propoz sa lalwa avek nou Lasanble Nasyonal e ki nou Gouvernman in ekout lavwa lepep Seselwa pou anmenn en tel lalwa pou protez enn nou bann drwa fondamantal, which is the right to privacy.

Mr Speaker, mon ti a kontan klarifye serten pwen ki Onorab Leader Lopozisyon in fer resorti dan sentencing sa lalwa, kot i dir 20 years imprisonment. Dan mon konsiltasyon avek Atorni Zeneral Mr Speaker, in eksplik mwan poudir lafason ki sa lalwa i ganny word, setadir sa legal jargon ki’n ganny servi i standar e i met sa santans maximum 20an pou en tel lofans.  Me osi anba Seksyon 25 nou Kod Penal e Seksyon 26 nou Kod Penal i dir klerman ki sa i en santans maximum e ki lalwa, Lakour i kapab enterpret severite sa lofans.  Dapre lopinyon sa Ziz, sa Mazistra ki pe ekout sa zafer, i donn diferan kalite santans, depandan lo severite sa lofans.  Parey Onorab Leader Lopozisyon in dir, i annan en diferans ant 2 manmay 18an pe mess around, pe fool around e i annan en diferans kot en lot dimoun i vin vol, ouswa dan en fason delibere vin rikord en lot dimoun pou esey detri li akoz i annan en biznes, i annan en pozisyon dan lasosyete, i annan en pozisyon dan Gouvernman, i annan en pozisyon politik, nenport ki rezon.  E mon krwar en pwen enportan ki zot in fer resorti se ki sa lamannman dan sa lalwa i donn proteksyon legal tou dimoun.  I pa fer okenn distenksyon ant okenn kouler politik, i pa fer okenn distenksyon ant okenn dimoun dan lasosyete ki annan bann pozisyon responsab ouswa non e mon krwar i enportan ki nou fer resorti ki dezorme, enn fwa ki sa lalwa i ganny pase, tou dimoun i annan menm proteksyon anba sa nouvo lalw.

Mr Speaker, rezon ki Gouvernman in propoz li koman en santans maximum 20an se pou anvoy en sinyal tre kler avek sa bann malfeter, avek sa bann dimoun kriyel ki annan zis en lobzektif destriksyon dan zot azanda ki si zot fer bann tel lofans, kategori sa lofans i ganny konsidere anba Kod Penal koman en lofans sever.  E hopefully i ava dekouraz zot e petet menm enstrir zot pou sanz zot bann kalite konportman negativ e anti sosyal e vin bokou pli responsab koman bann dimoun dan sosyete dan lavenir.

Mr Speaker, dan bann ka ki’n pase oparavan ki nou’n vwar in ganny sirkile, in annan bokou dimoun ki’n ganny afekte.  In annan partner sa bann dimoun ki ti involve dan sa bann aktivite ki’n ganny rikorde ki’n ganny afekte, i annan zot bann zanfan, zanfan ki pe lekol, zanfan ki pe fer legzanmen, i annan paran, bann frer ek bann ser, tousala.  E mon krwar ki ozordi, sa Lasanble i pe anvoy en mesaz tre kler ki sa pou nepli ganny aksepte dan nou lasosyete e i pou nepli ganny tolere e sa bann dimoun ki fer bann tel aksyon i ganny konsidere dezorme koman bann kriminel e lalwa i ava pran bann aksyon neseser kont bann kriminel, parey lalwa i pran aksyon neseser kont tou kriminel dan nou lasosyete.

Mr Speaker, en pwen osi ki petet bann Manm Lasanble pa’n pick up me ki mon ti a kontan fer resorti, se ki sa lamannman dan Kod Penal i donn proteksyon bann dimoun inosan ki par egzanp pe antre dan en laboutik, ki pe al antre dan en changing room, ki pe al esey bann lenz ouswa bann underwear, whatever it is, kont bann recording dan bann laboutik, ki dan lepase in annan serten keksoz ki’n arive dan sa bann lalinny.  Alor i donn proteksyon bann fiy, bann garson, bann msye, bann madanm ki osi pe servi en landrwa piblik me ki pe antre dan en changing booth pou zot sanze, pou zot sey bann lenz, kont en recording vizyel ilegal bann tel endividi e kont zot konsantaman, e demen ou vwar sa in ganny sirkile lo internet, i ganny sirkile par email, i ganny sirkile lo facebook, lo bann telefonn portab and so on. En lot pwen Mr Speaker se osi i donn en serten degre proteksyon atraver sa right to privacy kont bann paparatzi.  Si par egzanp demen ou annan en viziter ki vin isi, i al dan lotel, dan son lasanm, dan son cutillage, sa compound e ou annan bann paparatzi ki vin tir bann portre petet sa madanm in cool topless ouswa sa madanm i dan en lenz ase revealing, ou sa msye osi pareyman.  I donn proteksyon sa bann endividi kont bann tel aksyon bann paparatzi dan sa konteks.  E mon krwar sa i enportan osi akoz Sesel osi i pride son lekor.  Nou a kapab ofer nou bann viziter e parmi nou bann viziter enportan, serten proteksyon kont en kantite keksoz, including zot privacy.  Bokou zot i vin Sesel ozordi akoz zot knnen ler zot pou vin Sesel personn pa pou fatig zot.  Zot annan sa drwa a privacy, zot annan sa eleman privacy e mon kontan ki sa lalwa osi, dan son zeneralite i donn en pe proteksyon lo sa bann lalinny.

Mr Speaker, mon ti a kontan terminen par remersye tou bann Manm Onorab ki’n eksprim zot lopinyon e donn zot sipor sa propozisyon lamannman Kod Penal ki devan nou e pou osi dir zot felisitasyon.  Felisitasyon pou stand up to sa ki nou krwar i byen.  Felisitasyon pou osi annan sa bravir, sa kouraz pou dir sa bann tel keksoz ki sa bann dimoun pe fer pou esey detri lavi nou prosen, lavi bann dimoun ki inosan, dayer felisitasyon pou annan sa bravir pou stand up to sa bann prensip e mon ti a kontan pou sum up Mr Speaker, dir ki enn fwa ki sa lalwa i vin an aplikasyon, nenport ki dimoun ki dan posesyon bann tel recording, bann portre, otomatikman i komet en lofans, enn fwa ki sa lalwa i vin an aplikasyon.  Alor, pou bann ki i aplike, ekout sa byen, pou bann ki aplike, fer atansyon akoz sa lalwa i pou aplik pou zot osi.  Mr Speaker, avek sa 2 mo mon ti a kontan ankouraz bann Manm pou donn zot sipor e pou vot pou sa Bill. Mersi bokou.

 

MR SPEAKER

Bon, lo merit e sa deba zeneral, nou pran en vot.  Tou bann ki an faver?  Okenn ki kont?  Mon a ganny mwan en formal second reading.

THE CLERK

A Bill of an Act to amend the Penal Code Cap 158.

 

MR SPEAKER

Bon, mon krwar nou oule sot committee stage, mon a ganny mwan en Mosyon pou sa.

 

HON MARIE-ANTOINETTE ROSE

Mr Speaker, anba Lord 91(1), mon move ki nou sispann Order 65 to 70 pou sispann committee stage.

MR SPEAKER

Okenn ki segonde?

 

HON CHARLES DE COMMARMOND

Mr Speaker, Mosyon i ganny segonde.

 

MR SPEAKER

Ki nou sot committee stage. Tou bann ki an faver?  Okenn ki kont?  Mon a ganny en Motion for third reading.

 

HON MARIE-ANTOINETTE ROSE

Mr Speaker, anba Lord 71(1), mon move ki nou lir sa Bill en trwazyenm fwa.

 

HON CHARLES DE COMMARMOND

Seconded Mr Speaker.

 

MR SPEAKER

Ok, nou a pran en vot lo la.  tou bann ki an faver?  Okenn ki kont?  Mon a ganny mwan en third reading.

 

THE CLERK

This Act may be cited as the Penal Code Amendment number 2 Act 2012.

 

MR SPEAKER

Bon, Bill in pase, nou a remersye Minis ek son delegasyon e ekskiz li parmi nou ozordi bomaten.  E kant a nou, nou annan en lot levennman me an deor Lasanble e nou ava zwenn dan 8 minit, savedir 11.15.  Minis, ou’n ganny ekskize, ou kapab ale.  Nou pankor annan en cell pou lock up nou bann viziter.  Sorry pou sa ki’n arive bomaten ek lakle.  Yes.  Alright.  So, nou nou ava zwenn la deor kot lobby avek bann manrmay lekol segonder, 11.15.  (Technical Problems)