::
Home » Verbatim » Verbatim - Second Term 2012 » Tuesday 26th June 2012

Tuesday 26th June 2012

 

Download PDF

________________________________________________________________________

 

 

NATIONAL ASSEMBLY OF SEYCHELLES

Tuesday 26th June 2012

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bon, nou ava komans nou travay pou ozordi.  Tou bann Manm Lasanble Nasyonal, Minis ek son delegasyon, tou bann ki pe ekout nou, bonzour.  Prezan avek nou ozordi se Minis pou Tourizm e Kiltir, Mr Allain St Ange ki pe vin reponn kestyon konsernan son Minister.  E nou pou komans avek en kestyon par Leader Lopozisyon.  Annefe kestyon 28 ek kestyon 29 pe tous menm size.  Enn i par Onorab Pierre ki Leader Lopozisyon e lot par Onorab Marie ki Manm pou Au Cap.  So, prosedir se ki nou pou pran kestyon Onorab Pierre, apre nou pou pran kestyon Onorab Marie e Minis ava reponn toulede ansanm.  Onorab Pierre.

 

 

HON DAVID PIERRE

Mersi Mr Speaker.  Bonzour Minis, bonzour tou Manm Onorab.  Bonzour tou bann ki alekout.  Mr Speaker, mon kestyon pou Minis i lir koumsa.

Eski Minis pou Tourizm ek Kiltir i kapab dir avek sa Lasanble ki zistans son Minister in arive avek sa proze vilaz artizanal dan distrik Au Cap?  Mersi Mr Speaker.

 

MR SPEAKER

Ok, Onorab Marie.

 

HON MURIELLE MARIE

Mersi Mr Speaker.  Mr Speaker bonzour, bonzour Minis ek ou delegasyon, bonzour koleg Onorab e tou dimoun ki alekout.

Mr Speaker, an vi ki pou plizyer lannen Domaine Val Des Pres in en sours reveni pou plizyer fanmiy e zabitan Au Cap.  Eski Minis i kapab eksplik sa Lasanble lo plan son Minister pou redevlopman Domaine De Val Des Pres?  Mersi.

 

MINISTER ALLAIN ST ANGE

Mersi Mr Speaker.  Mersi bann Manm Onorab, bonzour tou dimoun.

Mr Speaker, sit Domaine De Val Des Pres ti ganny ofisyelman transfer avek Fondasyon Leritaz Sesel an Novanm 2006.  An Out 2010 kan Prezidan Michel ti lans vizyon Seychelles Brand of Tourism, Management sa sit ti ganny transfer avek bord Touris Sesel.  Sa vizyon Seychelles Brand of Tourism i fer provizyon pou Sesel e pour Seselwa claim back zot lendistri touris.  Sa vizyon in met baz neseser pou enplik Seselwa e pou enplik kiltir Seselwa dan devlopman lendistri touris nou pei.  Vizyon in set en plan kler pou ki Sesel i revwar li dan pa zis devlopman me osi dan bann fasilite ki met Sesel a lavan koman en destinasyon touristik.  Bord Touris pe fer preparasyon neseser pou kapab fer sa sit istorik Domaine De Val Des Pres vin en vre vilaz kiltirel kot nou viziter, osi byen kot piblik Seselwa a kapab apresye sa gou e tradisyon Sesel.  Nou pe travay pou fer sa sit vin en zarden tropikal e en vilaz tradisyonnel vivan.  Me, Mr Speaker, me nou pou bezwen o menm moman asire ki sa proze i vin viable.  Sa proze Domaine De Val Des Pres pou nou i bezwen soutenab e komersyalman viab pou nou pa bezwen fer lapel kontinnyel a sibvansyon leta.

Ozordi nou annan plezir enform nou Lasanble, atraver repons kestyon poze par Leader Lopozisyon, Onorab David Pierre pou eksplike ki dan bann semenn ki pe vini, nou pou envit Seselwa ki involve dan lartizana e bann pti lendistri ki fer prodwi ki nou pei i kapab vann avek nou bann viziter pou zot vin a lavan e diskit zot entegrasyon dan sa vilaz kiltirel.  Minister Touris ek Kiltir pe al envit bann ki enterese pou zwenn nou fer sa proze vin en vre asset pou nou pei.

Pou repons Onorab Pierre, dan mwan Out ou plitar, bann advert pou’n komans paret pou ganny lekspresyon lentere pou bann ki pe rod en pti latelye swa pou fer marse restoran sa vilaz, swa en mize, swa son tea room eksetera.  Minister Touris e Kiltir i konsyan osi Mr Speaker lenportans sa sit Domaine De Val Des Pres pou distrik e pou pep Au Cap.  E Minister Touris e Kiltir i oule asir Manm Elekte pou distrik Au Cap ki plan re-amenazman sa sit se pou asire ki sa sit i kapab zwe en par enportan dan lekonomi Au Cap.  Ozordi i kler ki sa ki’n pase kot Domaine De Val Des Pres pandan plizyer dernyen lannen pa’n arive fer sa sit kiltirel paret lo the tourism root nou pei.  Sa sit pa’n arive vin sa must stop point pou bann touris dan nou pei.  Se sa mank a gannyen ler sa sit pa lo en must stop point ki’n dikte enpe nou lapros re-amenazman sa sit akoz bann kip e lwe en kyosk ouswa bann ki’n set up en biznes la, ou ki pe enterese set up zot biznes dan sa vilaz kiltirel dan fitir, zot bezwen vwar potansyel ekonomik pou zot.

Alor pou reponn kestyon poze par Onorab Murielle Marie, Manm Elekte pou distrik Au Cap, plan re-amenazman Domaine de Val Des Pres se pou donn lavi dan sa sit kiltirel pou atir viziter ek Seselwa alike pou vizit sa sit e pou zot pas letan detant laba.  Baz i la e sa sit i reste en sit istorik.  Alor tou sa ki Minister Touris e Kiltir pe antreprann, kot Domaine De Val Des Pres, i reste dan konteks gard sa vilaz istorik e kiltirel, sa ki pei i ekspekte avek nou.  Pou annan sanzman kot sa sit pou fer li mye.  Son mize, son restoran, son tea room, son zarden tropikal.  E pou annan bezwen anmenn plis debousman pou met an avan lartizana e prodwi nou pei.  Sa i kler.

Dan dezyenm faz sa proze Mr Speaker, enn fwa ki sa later kot laferm ki form parti sa sit in ganny retournen a Domaine De Val Des Pres, provizyon pe ganny etidye pou kapab get kote artistik plis an detay.  Pou nou kapab provide fasilite neseser pou met an valer nou bann atou kiltirel e nou bann atou artistik.  Mersi Mr Speaker.

 

MR SPEAKER

Bon, Onorab Pierre, siplemanter.

 

HON DAVID PIERRE

Mersi Mr Speaker.  Mr Speaker, mon annan 2 kestyon siplemanter.  Enn …..

 

MR SPEAKER

Onorab, nou’n tonm dakor en siplemanter.

 

HON DAVID PIERRE

Anr, mon ti krwar 1 pou sak kestyon.

 

MR SPEAKER

Ale, proceed.

 

HON DAVID PIERRE

Ok mersi.  Mon ti a kontan demann Minis si dan zot plan zot pou donn bann artisan sa loportinite pou zot prodwi on site pou ki letan bann touris i vin aste zot prodwi i a vwar kimannyer sa prodiksyon i ganny fer e dezyennman, lo non la transparans, eski Minis i kapab donn garanti sa Lasanble ki pou annan bann kriter kler an relasyon avek alokasyon sa bann sit oubyen sa bann kyosk dan sa vilaz?  Mersi Mr Speaker.

 

MINISTER ALLAIN ST ANGE

Mersi Mr Speaker.  Pou reponn kestyon poze par Onorab Pierre, Mr Speaker.  Son premye kestyon siplemanter i ganny kouver par prosen kestyon Onorab Marie e la i tre kler, nou pe ankouraz dimoun, pa zis vin vann keksoz ……

 

MR SPEAKER

Minister mon a gid ou la, si ou pe abord sa kestyon dan lot larepons, then, ou koman en former Manm Parlman ou konnen tradisyon se you don’t anticipateSo ler ou ava pran lot kestyon ou a reponn.  So, you can move on to the second question.

 

MINISTER ALLAIN ST ANGE

Akoz i ganny kouver klerman par lot kestyon.  Me lo kote la transparans, mon oule asir Onorab Pierre ki Departman ki pe konsern avek lwe bann fasilite ki egziste, nou pe pas dan en faz anmenn tou lespri lentere ki annan dan Sesel.  So, nou pou advertise li tre kler pou asire ki tou dimoun ki annan en lentere pou antre dan vilaz artizanal, pou zot vin set up bann pti factory ouswa set up bann pti laboutik, ouswa eksprim lentere pou get sa restoran, son mize, son pti tea room a laryer.  Tou dimoun pou ganny fer dan en fason tre ouver e tre piblik.  Sa ki nou ti a kontan servi sa loportinite Mr Speaker se envit bann Manm Lasanble, zot reprezant lepep.  E la Madanm Marie ki reprezant Au Cap, nou envit ou travay avek nou dan sa prose.  Nou napa nanryen pou kasyet, nou transparan dan fason ki nou operate koman en Minister, kot Touris e Kiltir i reprezante e nou envit bann reprezantan lepep pou travay avek nou pou asire ki zot vwar Seselwa ki zot reprezante, vwar zot dan sa proze laba kot Domaine De Val Des Pres.  Mersi Mr Speaker.

 

MR SPEAKER

Kestyon Siplemanter dabor pou Onorab Marie.

 

HON MURIELLE MARIE

Mersi Mr Speaker, mon annan 2 kestyon siplemanter.

Mr Speaker, eski Minis i kapab enform sa Lasanble si plan final sa redevlopman pou ganny prezante avek zabitan Au Cap avan ki okenn konstriksyon i komanse e kan eski sa proze an antye i ekspekte konplete?  Sa mon premye kestyon.

Mon dezyenm Mr Speaker, eski Minis i kapab enform sa Lasanble si popilasyon pou kontinnyen ganny akse avek sa restoran pou zot kapab fer zot bann fonksyon prive?  Mersi.

 

MINISTER ALLAIN ST ANGE

Mersi Mr Speaker.  Lo premye kestyon Onorab Murielle Marie, lide se ki nou pou prezant li avek Ladministrasyon Distrik Au Cap.  Sa i kler akoz nou panse ki zot ki la, zot in ganny elekte dan sa distrik e zot merit vwar li.  Pou nou, nou pran li koman en proze.  I en proze ki ouver e la tou dimoun i annan drwa vin vwar son lekor ladan.  Mon panse ki si nou pou tourn dan en peryod konsiltasyon, nou pou pran ankor 1 an avan ki nou bouze.  So, annou travay, mon sizer avek Onorab Murielle Marie ki nou travay ek ladministrasyon, nou travay avek ou koman Manm Elekte pou sa distrik, ki reprezant distrik, pou nou soumet avek ou, pou nou diskit ansanm, PS kiltir, mwan menm e bann dimoun ki involve dan sa proze e en fwa ki ou, mon asire ou a vwar son plan e ou a satisfe poudir i pe donn valer sa propriyete ki asiz la Au Cap e ansanm nou a kapab bouz an avan pou fer sa vin en realite.

Lo ou dezyenm kestyon, eski tou dimoun pou annan sans vwar li kapab servi sa restoran wi, son management i tre kler.  Se nou koman Minister ki pou dikte ki nou vwar avek sa restoran.  Enn i bezwen reste en asset pou nou pei.  En asset se nou koman pep Seselwa, nou bezwen kapab servi li.  I pa vo lapenn annan asset ki nou vwar dan liv me nou pa kapab servi.  Alor nou koman Minister nou pou fer sir ki pep Seselwa ki bezwen lwe en restoran, swa en fasilite pou en fonksyon prive, swa servi sa restoran, zot pou ganny full access avek.  Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Bonzour Minis, bonzour tou bann koleg Onorab.  Bozour tou bann dimoun ki a lekout, spesyalman bann dimoun Les Mamelles.

Mr Speaker, eski Minis i kapab enform sa Lasanble si son Minister i annan plan konstri bann lezot vilaz artizanal dan lezot distrik?  Mersi.

 

MINISTER ALLAIN ST ANGE

Premyerman nou oule bouz step by step.  Nou oule remet sa enn Au Cap ki deza propriyete Gouvernman, ki deza en proze artizanal, nou oule fini met sa an eta e fer li marse e fer li vin soutenab par limenm.  De la nou pe regard avek Praslin e la nou’n komans diskisyon avek Mr Gardette pou regarde si nou kapab set up en keksoz Praslin, akoz i enportan osi ki kiltir pa zis ganny vwar par nou viziter Mae, me osi dan lezot zil.  E la nou pe regarde kimannyer nou pou kapab set en dezyenm progresivman lo Praslin, i a pli pti, me nou panse i neseser pou fer.

Si bann Manm Lasanble i annan okenn lide, okenn sizesyon, Minister i reste ouver pou pran zot sizesyon e travay avek zot pou asire ki zot lanbisyon swa promes ki nou fer dan nou distrik, swa aspirasyon nou pep dan distrik i ganny met a lavan.  Mersi Mr Speaker.

 

MR SPEAKER

Kestyon 30, Onorab Marie.  Onorab Murielle Marie, kestyon nimero 30.

 

HON MURIELLE MARIE

Mersi Mr Speaker.  Mr Speaker, an vi ki kantite dimoun pe demann plis kyosk artizanal, eski Minis i kapab enform zabitan Au Cap si son Minister pe mazin konstri plis kyosk ki pou permet zabitan Au Cap ki ankor pe espere, kapab ganny enn pou zot kapab debrouye zot osi?  Mersi.

 

MINISTER ALLAIN ST ANGE

Mersi Mr Speaker.  Mr Speaker, sa douzenn kyosk ki Domaine De Val Des Pres ki i annan e pe provide ozordi i klerman pa ase.  E sa i reste enn bann deficiency kot sa sit istorik e kot sa sit kiltirel.  Dimoun i anmenn dimoun.  E si nou oule ki Domaine De Val Des Pres i vin sa must stop point pou touris, nou bezwen annan en vre vilaz artizanal.  Plan alor se pou annan plis pti lizin cum-kiosk kot bann artizan a travay e prodwi sa ki zot oule ofer pou vann.  Sa lespri vwar prodiksyon pe pran plas.  Anmenn plis lentere pou viziter vwar e apresye sa ki pe ganny prodwi Sesel par Seselwa pou vann dan en vilaz kiltirel Seselwa.  Sa i kapab en outfit tie and die, swa en loperasyon ki fer maket bato, swa en pti prodiksyon ki fer nouga koko ouswa konfitir lokal, swa bann ki pe travay ek kafoul koko ouswa koray eksetera.  Sa ki nou Mr Speaker, kot Departman Kiltir pa pou aksepte.  Se sa kiltir al aste prodwi Madagascar, Philipines, Kenya eksetera e zis met en pti label Sesel lo la.  Nou enplor MNA Au Cap pou ed nou pas sa mesaz avek bann ki pou vin rod fasilite kot sa vilaz artizanal Sesel, pou zot travay avek nou pei pou met a lavan prodwi Sesel.

Pou reponn kestyon Manm Elekte popu distrik Au Cap, nou espere omwen double bann fasilite kyosk dan bann pti lizin ki egziste ozordi e la zabitan Au Cap a ganny sa sans ki zot MNA pe rode pou zot kapab debrouye zot osi.  Mersi Mr Speaker.

 

MR SPEAKER

Onorab Marie.

 

HON MURIELLE MARIE

Mersi Mr Speaker.  Mr Speaker, eski Minis i kapab enform sa Lasanble ki mekanizm ki pou ganny met an plas pou permet sa bann artizan Au Cap akse avek en loan pou zot konstri zot kyosk?  Mersi.

 

MINISTER ALLAIN ST ANGE

Mr Speaker, mon ti a kontan kapab eksplik Onorab Marie kimannyer pou ganny loan, me i pa tro mon portfey.  Mon panse ki avek Minister Finans, i annan bann striktir ki pe ganny met an plas pou ed bann pti Seselwa kapab debrouye.  E mon panse ki byento ler mon a vin zwenn Onorab Marie avek nou lekip kot Departman Kiltir, nou a kapab avek li, vwar bann prosesis ki nou devret pe met an plas, sirtou avek bann labank ki Gouvernman i annan par ladan, pou nou kapab ed Seselwa pou zot kapab debrouye.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, an vi repons Minis, mon ti a kontan si Minis i kapab dir avek sa Lasanble ki zot stratezi spesifik, an relasyon ek kontrol lo kalite keksoz ki kapab ganny vann, kalite keksoz lokal ki devret e ki kapab ganny vann dan sa bann kyosk dan sa vilaz.  Mersi Mr Speaker.

 

MINISTER ALLAIN ST ANGE

Mr Speaker, mersi.  Repons pou Onorab Pierre i tre kler.  Bann nouvo dimoun ki pou lwe en laboutik, swa en kyosk, swa en pti lizin kot Domaine De Val Des Pres, i pou enn zot bann kondisyon ki nou pou met dan sa lease ki zot pou gannyen.  Sa i pou tre kler.  Bann ki egziste ozordi, i malere i annan ki viv, swa ki fer tou zot trade lo bann keksoz enporte, e la nou lanvi avek Manm pou Au Cap, travay avek li pou nou dekouraz dimoun zis vin bann reseler bann keksoz ki sorti deor.  Mon krwar in ler, dan en vilaz artizanal nou pei, ki belong pou nou, ki nou vreman esey devlop sa kiltir prodwi keksoz e ankouraz nou bann zenn dimoun antre dan sa kiltir prodwi zot osi e vwar zot prodwi ganny met a lavan.  Sel garanti mon kapab donn Onorab Pierre se ki pou bann nouvo laboutik, i kler i pou en kondisyon zot lokasyon ki zot pou gannyen e nou pe travay pou met presyon lo bann ki egziste deza, pou zot kapab osi bouze pou ganny en made in Seychelles label kot Domaine De Val Des Pres i paret e donn plis valer sa ki zot pe vann dan zot laboutik.  Mersi Mr Speaker.

 

MR SPEAKER

Onorab Valmont.

 

HON SYLVIANNE VALMONT

Mersi Mr Speaker.  Bonzour Mr Speaker, bonzour Minis, bann Onorab osi ozordi bomaten.  Eski Minis i kapab dir nou ki garanti i annan pou sa bann artizan ki deza dan vilaz Domaine De Val Des Pres, dan redevlopman sa proze?

 

MINISTER ALLAIN ST ANGE

Mersi Mr Speaker.  Mersi Onorab Valmont.  Sa ki mon kapab asir Onorab se ki nou pou travay avek bann ki egziste an premye linny.  I kler ki ozordi vilaz, i annan ki pli pti, i annan dimoun ki pe rod landrwa ki en pe pli gran e sa ki dan nou plan re-amenazman Domaine De Val Des Pres, pou annan bann kyosk ki pli gran ki sa.  Mon pran par egzanp sa dimoun ki fer maket bato, i napa ase plas pou li kapab met son bann bato an valer, so i a ganny ofer enn e tou bann ki egziste ozordi, a lenteryer Domaine De Val Des Pres, pou bann premye pou ganny envite pou zot al pran en landrwa ki en pe pli gran, ouswa devlop avek nou en sit ki en pe pli gran pou zot.  Pou nou se met opsyon ouver pou bann dimoun ki e travay dan Domaine De Val Des Pres.  Nou oule donn zot sa loportinite grandi e vwar zot biznes grandi.  Alors, se pa anmenn nouvo dimoun ki primordyal pou nou kapab vin devlop sa, me travay avek bann ki anndan e ler nou a’n fini, then nou a kapab repar sa bann kyosk ki egziste, met li dan menm theme ki Domaine De Val Des Pres i annan e bouz bann nouvo dimoun, fer zot antre dan Domaine De Val Des Pres.  Mersi Mr Speaker.

 

MR SPEAKER

Onorab Barbe.  Kestyon 31.

 

HON NICOLE BARBE

Mersi Mr Speaker.  Mr Speaker, Minis ek son delegasyon, koleg Onorab e tou dimoun ki a lekout, bonzour.  Eski Minis responsab pou Tourizm e Kiltir i kapab eksplik nou Lasanble plan son Minister pou asire ki tou bann sit istorik i ganny byen servi e mentenir?  Mersi Mr Speaker.

 

MINISTER ALLAIN ST ANGE

Mersi Mr Speaker, mersi Onorab Barbe.  Kestyon anmennen par Onorab Nicole Barbe, Manm Elekte pou distrik Bel Air pe tous en laspe enportan, responsabilite e travay Departman Kiltir dan Minister Touris e Kiltir.  Nou zenn pei i bezwen son bann sit e tou son bann atou kiltirel pou nou apresye sa ki nou ete an premye linny e dezyenmman e anmenmtan anmenn plis latraksyon pou nou lendistri touris.  Pou sa arive, nou’n deza annan en lenvanter kler tou nou bann sit istorik.  Prezan nou bezwen en plan daksyon pou re-amenaz bann sit k’in ganny run down e anmenmtan, prepar kontinyasyon plan maintenance pou asire ki nou pei i byen maintain tou sa bann sit istorik e gard zot an bonn eta.  Enportan pou nou, koman Seselwa se pou nou vin pli konsyan ki sa bann sit i reste nou leritaz e ki i reste assets nou pei.  Onorab Barbe, distrik Bel Air i annan par egzanp simityer Bel Air, State House limenm, lavwar Bel Air, Katedral Sen Paul, lorloz eksetera.  Me tou distrik i annan zot sit istorik respektif.  E se an travayan ansanm ki nou pou arive met an valer, swa plis an valer sa bann sit.  Departman Kiltir pou bezwen reget Bidze neseser pou mentenir bann sit istorik nou pei.  Bann ki annan en valer komersyal, nou a bezwen rod fer zot debout par zot menm, me bann ki zis bann moniman istorik, nou bezwen kapab arive planifye zot progranm maintenance ki akseptab pou asire ki nou bann assets istorik i ganny toultan byen mentenir.  Departman Kiltir pe travay lo en plan pou devlop nou bann sit, pou arive met zot plis an valer.  Sa i osi kouver bann moman istorik enportan.  Nou Departman Kiltir pou kontinnyen reste proaktif dan lapros met an valer sa ki atas nou avek nou pase.  Nou kapab anonse ki kot Departman Kiltir, i annan son seksyon resers k’in ganny met an plas e en seksyon sit maintenance pou asire ki nou konnen sa nou merit konnen e pou arive mentenir sa ki nou annan.  Mersi Mr Speaker.

 

MR SPEAKER

Onorab Barbe.

 

HON NICOLE BARBE

Mersi Mr Speaker.  Minis dan son larepons in nonm progranm maintenance.  Petet mon ti ava demann Minis si i kapab eksplik nou Lasanble en pti pe, elabor en pti pe kimannyer i pou kapab antreprann sa bann travay maintenance e kote i ekspekte ganny sa larzan?  Mersi Mr Speaker.

 

MINISTER ALLAIN ST ANGE

Mr Speaker, se sa ki ler mon ti pe reponn kestyon, i annan 2 diferan kategori.  I annan bann sit touristik istorik.  Bann sit istorik ki osi touristik ki kapab anmenn en valer ou en return lo la e fer li vin viab an limenm.  Lot malerezman i pou bezwen paret dan Bidze Minister tou le an.  Mon a donn zot en legzanp kler.  Lorloz i en moniman istorik nou pei e nou bezwen tou le an annan en sonm larzan ki maintain lorloz.  Tou bann atou istorik, tou bann moniman istorik ki tonm lo sa lalis ki nou annan ozordi i bezwen ganny maintain.  Pa tou ki pou vin komersyal e vin viab komersyalman.  Sa i tre kler.  I annan i pou nou, nou bezwen prezerv zot, me i annan lezot, mon pran laplenn St Andre kot Bord Leritaz in arive met an plas, an konbinezon avek en manm sekter prive, pou ki ozordi nou ganny returns sorti kot sa fasilite ki ti pou nou, e la nou ganny sa larzan pou kapab ede mentenir en lot progranm istorik, en lot moniman istorik nou pei.

De la, dezyenm faz, mon krwar zot in antann, resaman mon ti anmenn Lanbasader Franse vizit simityer Bel Air.  I en wild card ki nou’n sey zwe akoz nou panse poudir i en simityer parmi bann premye, kot bann Franse ki ti isi dan sa peryod in ganny antere.  Alor, avek bann Gouvernman etranze, nou pe rode kimannyer nou kapab devlop korperasyon neseser pou nou kapab ganny finansman pou nou 1, se repar li e met li an eta, e dela manage li pli byen ki nou it fer dan lepase.  I pa akseptab e la mon aksepte ki Minister Kiltir ek Touris i annan en responsabilite anver zot koman bann Manm Lasanble e osi anver pep Seselwa e nou pei, pou mentenir sa ki nou annan ki pou nou e pou asire ki sa i reste en valer istorik ki nou pei i annan.  Mersi Mr Speaker.

 

MR SPEAKER

Onorab De Commarmond.

HON CHARLES DE COMMARMOND

Mersi Mr Speaker, bonzour tou dimoun, bonzour Minis, bonzour tou dimoun ki a lekout.  Mr Speaker eski Minis i kapab eksplik nou Lasanble ki son Minister pe antisipe fer konkretman pou re-valoriz bann sit istorik e bann nature trail ki al kot sa bann sit e ki son Minister pa okouran.  E ki anmenmtan, National Heritage, ki son rol li etan donnen sa ki ou’n fek reponn avan, dan sa progranm tourism culture.  Mersi.

 

MINISTER ALLAIN ST ANGE

Mersi Mr Speaker.  Heritage Foudation i en body Gouvernman ki ti ganny kree anba Minister Kiltir pou administre 4 sit prensipalman e zot annan zis 4 ozordi.  La dan re-amenazman sa ki nou pe sey fer avek PS e nou Bord kot Minister, se pou nou senplifye en fason ki nou operate.  Heritage Foundation i annan Domaine De Val Des Pres, i annan laplenn St Andre, i annan kot pirat Bel Ombre e de la, Mission Lodge.  Me nou panse ki sa an limenm i pa ase, nou bezwen get tou nou bann assets avek en blok.  Nou pa kapab get bann pti bout en pe partou.

Sa ki mon ti a kontan reponn Onorab De Commarmond se ki la sa ki nou pe gete, se bann ki paret lo nou lalis deza.  Nou bezwen met zot an eta.  Nou annan Mission Lodge ki en dezas, en atou kiltirel, en atou istorik nou pei ki nou pa aksepte poudir i zis la avek de trwa ruins ki personn pa tro, tro konpran si ou pa’n lir zistwar Sesel, ou pa pou tro, tro konpran kisasa ki ou pe mars ladan.  I annan plen sa bann keksoz ki nou bezwen fini.  Ler nou a’n fini, mon ti a kontan kapab asize avek Onorab De Commarmond, akoz ou’n mansyonn mwan dan montanny, en pe dan leo dan Cascade, i annan en sit istorik ki son semen limenm pou ariv kot li i istorik.  Alor mon ti a kontan kapab travay avek ou pou nou kapab devlop li ansanm, me annou – mon krwar, les nou travay lo sa ki nou annan deza, met li an avan, fer li vin en realite e dela ouver lezot sit ki egziste.

I annan de trwa e sak fwa mon diskit avek bann Manm Elekte, ou realize ki zot konn zot distrik pli byen ki nenport lekel.  E la ki mon ti a kontan kapab travay ek zot, par egzanp enn in dir mwan i annan en gro kannon lo Ste Anne.  Nou bezwen pran tou sa bann keksoz ki egziste, travay avek zot, met li an valer e fer nou pei annan plis bann assets kiltirel.  E mon enplor zot, pasyans avek nou kot Minister, les nou fini met sa bann an eta e dela nou a travay avek zot.  Mersi bokou Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble, eski son Minister i annan okenn plan, petet an kolaborasyon avek Minister Ledikasyon pou organiz bann progranm edikasyonnel pou donn zanfan Seselwa sa loportinite pou zot petet apresye, respekte e valoriz nou bann sit istorik isi Sesel.  Mersi Mr Speaker.

 

MINISTER ALLAIN ST ANGE

Mersi Mr Speaker.  I en bon kestyon ki Onorab Pierre in leve.  I annan bann heritage clubs dan bann lekol e sa ki nou, nou pe regarde se kapab devlop sa pli devan pou fer li vreman konpran listwar Sesel.  Mon krwar se la nou deficiency, se annan vreman sa listwar e kote sa bann sit istorik in antre dan nou listwar.  Nou pa kapab annan listwar li tousel e sit istorik li tousel lo lot kote.  Kot Bord Touris, vi ki ozordi i en Minister, Touris avek Kiltir, nou pe regard met an plas de trwa nouvo liv ki nou servi, nou dan promosyon, parey la nou pe fer enn lo koko-de-mer, nou oule fer enn lo zistwar Sesel, anmenmtan anmenn bann sit istorik ladan pou deza kapab vwar, ler en touris i vi nisi, i deza kler si i annan sa kannon lo zil Ste Anne, swa i annan sa baz militer ki North East Point.  Tou sa bann atou i bezwen antre ladan akoz si i la koman en bout istorik, i bezwen la akoz in dan listwar nou pei.  So, nou oule kapab met zot avek portre kot i tonbe dan nou listwar pou li vin pli vizib e pou ki nou dimoun ki vin Sesel i al rod sa bann atou kiltirel swa istorik ki nou annan.

Par limenm i difisil pou vann en keksoz, dir lala sa i egziste laba, me ou pa vwar kote i zwe dan listwar.  Alor nou pe fer en travay ozordi, vi ki i Minister Touris ek Kiltir ansanm, nou pe servi lafors Bord Touris e konesans Departman Kiltir, ansanm fer sa maryaz pou nou kapab vreman bouze e met vizyelman nou bann atou kiltirel e istorik dan nou listwar.  Mersi Mr Speaker.

 

MR SPEAKER

Bon, dan labsans Onorab Galen Bresson, kestyon 32 pou ganny pran par Onorab Fideria.  Onorab.

 

HON EMMANUEL FIDERIA

Mersi Mr Speaker.  Minis, eski ou kapab dir sa Lasanble ki plan ou Minister pou devlop sekter kiltirel ansanm avek Touris, prenan kont ki touris i reste enn pilye prensipal nou lekonomi Sesel, la ki sa sekter in vin en Minister?  Mersi.

 

MINISTER ALLAIN ST ANGE

Mersi Onorab Fideria.  Mr Speaker, kestyon anvoye par Onorab Bresson, Manm Elekte pou Bel Ombre pe rod plan Minister Touris e Kiltir pou devlop sekter kiltirel ansanm avek touris, prenan kont ki touris i reste enn bann pilye prensipal lekonomi Sesel.

Mr Speaker, plan Minister Touris ek Kiltir i kler e pou kontinnyen ganny gide par vizyon lanse par Prezidan larepiblik, ler i ti’n deside pou upgrade lendistri touris, sorti en Departman pou vin en Minister.  Lenportans touris pou Sesel, pou Seselwa e pou lekonomi Sesel in fer li neseser pou kree sa nouvo Minister Touris e Kiltir.  Me pou kontinnyen konsolid touris Seselwa, nou pei i bezwen plis ki zis son labote natirel.  Plis ki zis son lanmer avek son bann lans.  Pou Gouvernman Sesel, konsolidasyon lendistri touris pou arive ler nou bann atou kiltirel ek istorik i ganny met a lavan pou nou donn plis dept a sa ki nou dir Sesel i ete e sa ki Sesel pe ofer.  Avek Minister Touris e Kiltir, nou pe prepar pou unlock cultural potential nou pei e cultural potential tou nou dimoun.  Koman en Minister ki vizib, nou pou asosye kiltir a tou demars touris.  Sa pou ed nou met kiltir a lavan e sa i devre anmenn plis benefis pou bann ki konsider zot koman artis e bann ki konsider zot koman group, manm sa group, zanmi, sekter kiltirel nou pei.  Nou annan, anba sa nouvo Minister, mazorite events nou pei e tou events i bezwen sekter kiltirel pou fer sa bann levennman vin en vre levennman nou pei.  Nou annan National Arts Council, osi byen ki nou annan Heritage Foundation. Ansanm nou pe revwar sa maryaz touris ek kiltir.  Pou anmenn benefis a sekter kiltirel dan devlopman touris.

Mr Speaker, plan nou pa kapab fer di zour a lannmen.  Nou bezwen travay avek bann profesyonnel dan sa sekter pou fer evolye nou sitiasyon kiltirel vizavi nou sitiasyon touris.  De la nou a dan en sitiasyon pou tras en plan lon term.  Mersi Mr Speaker.

 

MR SPEAKER

Onorab, siplemanter?

 

HON EMMANUEL FIDERIA

Mersi Mr Speaker.  Mr Speaker, eski Minis i kapab enform sa Lasanble ki son Minister pe fer pou atir bann touris ki vin par cruise ship e osi.  Eski Departman Kiltir i annan lentansyon travay avek bann group kiltir dan distrik pou devlop ouswa pou nou kapab dekouver bann zenn talan?  Mersi.

 

MINISTER ALLAIN ST ANGE

Mersi Mr Speaker.  Minister Touris e Kiltir i responsab marketing pei koman en destinasyon.  Me nou marketing sa pei, i annan plis in dept parey mon dir ki zis nou bann latraksyon natirel.  Nou bezwen zwe sa kote kiltirel.  E se sa ki ti gid Minister ler Departman ti ankor Departman anba biro Prezidan pou li antre dan the world of events pou nou pei.  Prezidan Michel ti annan rezon ler i ti dir, pou nou kapab konsolid nou lendistri touris, nou bezwen anmenn sa kote kiltirel e se la ki sa Carnavale International de Victoria ti vwar lizour.  Ozordi, Minister in ganny donnen akoz in marye avek Departman Kiltir, tou lezot levennman sa pei.  Alor nou annan Festival Kreol ki nou pe zwenn sa semenn pou gete kimannyer nou pou kapab remet li an eta e fer li bouz an avan, nou annan Fet Afrik, nou annan Francophonie, nou annan Commonwealth, byento nou pou ganny en dat pou nou kapab remet osi nou 2 lot brans nou bann atou istorik, se Lasin avek Lenn, kimannyer nou kapab osi selebre zot larive dan Sesel.  Tousala ansanm pou ed tou dimoun ki involved dan kiltir pou vin a lavan e devlop son lekor.  Kimannyer nou travay avek bann distrik i en pwen enportan ki mwan avek PS, nou pe regarde kimannyer nou pou 1, zwenn bann komite distrik premyerman akoz se zot ki dan distrik e se zot ki vwar larealite zot bann zenn talan.  Nou pe osi remet, parey mon ti dir pli boner, remodle nou lekol drama, nou lekol ladans e nou lekol lanmizik pou kapab envit bann zenn 1, vin sey zot talan e si zot annan en forte ladan, devlop zot lekor.  Plitar ler mon pe reponn kestyon ki pou vin en pe plitar, ou pou tande lo nouvo mouvman ki nou pe fer lo sa arts village dan sa pei.  E sa i pou unlock bann potansyel nou bann zenn dimoun.

Me ankor, parey mon ti dir pli boner, si i annan Manm Lasanble ki reprezant distrik, ki ganny elekte pou reprezant lepep i vwar en talan enportan dan zot prop distrik, mon krwar i enportan ki kot nou dan Minister, nou ganny enformen ki i annan en dimoun ki spektakiler, ki annan en talan enkrwayab, pou nou kapab travay avek zot koman sa reprezantan lepep, pou met sa zenn dimoun a lavan e les li epanouir dan sa ki i annan koman en don.  Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.  Bonzour Minis, bonzour tou dimoun e bonzour tou bann ki a lekout.  Mr Speaker, eski Minis, swivan son larepons i kapab enform sa Lasanble ki son Minister pe osi fer pou non selman diversifye bann aktivite, me pou plito desantraliz bann aktivite dan bann lezot distrik?  Mersi.

 

MINISTER ALLAIN ST ANGE

Mersi Mr Speaker e mersi Onorab Ghislain, Manm pou La Digue.  Departman Kiltir e Touris pa krwar ki nou kapab kontinnyen annan zis levennman dan en bout Sesel.  Nou teritwar i gran e enn nou asset ki nou servi bokou dan promouvwar Sesel se diversite ki Sesel i annan.  Nou koz lo diversite nou zil osi byen ki nou koz lo diversite nou pep e lo diversite nou kiltir.  Nou pa kapab koz lo diversite si nou gard tou keksoz lo Mae.  Se sa ki avek ou e avek Ladministrasyon Distrik La Digue nou pe met an valer lafet La Digue le 15 Out.  E sa lannen i pa pou en leksepsyon kot Bord Touris pou desann La Digue avek sipor lezot manm prive sa lendistri pou nou kapab met sa lafet La Digue plis an valer.  Sa i paret ozordi lo nou calendar of events ki nou distribye partou.  Wi, nou annan en limit lakantite lasanm ki kapab viab La Digue, me nou bezwen travay ansanm avek ladministrasyon La Digue e ou, pou kapab travay avek Praslin e kot nou annan bann navet bato ki a ogmant lakantite bato ki a mont La Digue dan sa peryod lafet e reste ase tar dan lannwit pou dimoun kapab then tourn Praslin e dormi Praslin.

Avek 2 Manm ki reprezant Praslin, nou’n anvoy lide deza pou nou kapab devlop ansanm en lafet Sesel, en lafet nasyonal ki a pran plas lo Praslin.  Nou konsyan ki Praslin i dezyenm zil pli enportan dan Sesel e enn bann zil pli enportan dan lendistri touris i bezwen annan en katalis koman en levennman ki deroule lo Praslin.  En levennman i anmenn biznes, i anmenn deroulman larzan dan en distrik e nou, nou lanvi kapab travay avek toulede Manm Onorab pou Praslin, pou nou vreman met sa an plas, en fason ki nou (-) sa lannen i paret lo kalandriye of events, en fason lannen prosenn i komans tonm an plas.

Nou krwar dan sa ki ou dir, nou krwar dan diversite sorti dan Mae pou kapab osi fer bann levennman dan Praslin, La Digue otan ki pou posib e osi al dan lezot par.  SUBIOS i pran par dan nor, dan Beau Vallon, nou bezwen enn kekfwa dan west to ou tar, me la ankor se zot koman reprezantan lepep silvouple, zwenn ansanm bann ki tonm par rezyon e travay avek nou pou nou kapab ed zot, ed zot distrik.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble ki kalite sanzman, koman nouvo Minis i santi i devret annan dan polisi Minister e Gouvernman e ki nivo lenvestisman ki pei ek son Minister i bezwen pou nou kapab donn kiltir sa striktir ki pou permet plis Seselwa ganny zot lavi atraver kiltir e anmenmtan permet nou koman en pei ganny plis from lendistri touris pou ki Sesel ek lepep Seselwa i a benefisye plis ankor?  Mersi Mr Speaker.

 

MINISTER ALLAIN ST ANGE

Mr Speaker mersi e mon remersye Onorab Pierre pou son kestyon.  Mon panse ki ler Prezidan Michel in fer sa maryaz ant touris ek kiltir, son lobzektivite sete pou met plis valer lo nou atou kiltirel, lo nou bann assets kiltirel pou kapab ganny vwar pou li vin en asset lendistri touris, me osi pou kapab ankouraz dimoun depans larzan an reget kiltir e an reget sa ki kiltir i ofer.

Creative industries i en keksoz ki nou’n travay lo la en pe avek SENPA dan lepase e nou bezwen kontinnyen ed kree keksoz.  Ou pa pou kapab annan kiltir si nou pa pe kree e nou pa pou kapab vann si nou pa’n kree keksoz.  Alor, nou pou kontinnyen dan sa lapros lo creative industries.  Me ler ou koz lo policy limenm, sa ki kler se ki nou pa kapab kit kiltir deryer.  Nou bezwen devlop li, nou bezwen fer li al an avan.

Mon krwar enn mon bann premye interview e ler mon ti pe fer vizit Departman Kiltir, avek PS mon ti al vizit sa sit ki Gouvernman in allocate koman en arts village nou pei.  Enportan pou nou pei se annan en landrwa santral.  Nou tro pti pou nou annan bann pti bout en pe partou, so nou pe regarde pou nou kapab annan en arts village ki konsekan e dan sa arts village nou a ganny en banquet hall, nou a ganny tou lezot fasilite pou lekol lanmizik, lekol ladans, lekol drama e osi kot bann artis e bann artis ki fer lapentir a kapab vwar zot bann travay pe ganny egzibite.

Nou pe osi regarde Mr Speaker, pou nou remet mize Sesel an eta.  Nou’n komans fer en travay deza kot i ete e nou’n re-modle avek en Franse, avek led Lanbasad de France, kote Franse, nou listwar Franse, la avek Mr Macetti nou pe travay lo seksyon Angle, nou mize e dela avek bann istoryen lokal, nou pou travay lo seksyon Sesel.  Nou peryod ki nou, depi ler nou’n vin endepandan.

I enportan pou nou pa pran mize e met li dan en pti bout en building e dir lala, sa i nou mize, reste trankil lanmenm, pa bouze.  E nou’n fer propozisyon avek Gouvernman prezan pou nou kapab dir annou met sa an valer.  Se la kot nou sorti, se la ki nou konpran akoz nou sa ki nou ete ozordi.  E mon propozisyon ki PS ek mwan avek management kot Minister nou’n fer se ki nou pou bouz La Bastille e fer La Bastille vin sa blok istorik e sa blok vreman kot nou vwar nou listwar.  Me listwar i plis ki zis mize limenm, sa bout kot nou vwar en paviyon, kot nou vwar de trwa peryod nou listwar.  Nou bezwen re anmenn La Bastille dan ki i ti ete dan lepase kot nou kapab vwar depi en seksyon medisinal, nou kapab vwar en lakaz tradisyonnel k’in ganny fer, nou kapab ale, viv li e la, pou repran pwen Onorab Pierre, en tourist bus ki pe rod vizit Victoria i kapab antre dan sa domenn e vreman pas en demi zournen an peyan pou li kapab antre ladan akoz i a ganny valer, i a ganny ase pou li vwar.  Ozordi nou annan en pti bout mize anvil obor Lapos, nou annan en mize anba dan Minister limenm, nou annan en pe pti bout patou partou.  E nou pa kapab, nou pe sey sarz R15 ek enn, R5 ek lot.  I enposib pou nou vreman vann li e fer li vin en vre asset.  Prezidan Larepiblik in aksepte sa lide e prezan nou pe regarde kimannyer nou kapab fer sa move, nou’n demann bann led neseser avek enn de bann manm kor diplomatik pou ed nou pou nou kapab reget La Bastille ki en building enpresyonnan an limenm, i en building istorik an limenm e donn sa valer neseser, sa ki nou annan ki anmar nou avek lepase, ki atas nou e fer li vin vivan e osi kot nou pou kapab met bann nouvo bout istorik as and when sa bann keksos i arive.

Listwar zanmen reste statik.  I pou kontinnyen bouze e nou bezwen annan en plas kot demen, par egzanp nou kapab annan bann Speaker Lasanble ki paret ladan zot menm koman la, listwar nou pei ti ganny kree, to ou tar dan sa pei e lala sa de trwa Speaker k’in egziste.  I bann bout ki pa egziste ozordi dan mize.  Napa nanryen ki repran kote zot Lezilsativ nou pei, zot pa antre dan mize nou pei.  Enn i tro pti, de i cramp, la ankor i annan en flow ozordi, me avan i it enn lo lot.  PS avek Special Advisor in travay etrwatman avek mwan pou nou kapab redonn en nouvo figir e mon espere, si nou ganny sipor neseser pou kapab bouz sa La Bastille, zot koman Lezislativ, Zidisyer nou pei, tousala i bezwen paret avek en brans ki tourn kot zot, me ki nou vwar omwen devlopman ki sa pei in pran plas pou nou ariv kot nou ete ozordi.  Mersi Mr Speaker.

 

MR SPEAKER

Kestyon 33, Onorab Maria Payet-Marie.

 

HON MARIA PAYET-MARIE

Mersi Mr Speaker, bonzour Mr Speaker, bonzour Minis avek ou lekip, bonzour tou Manm kolet Onorab, bonzour tou mon bann frer e ser Seselwa ki a lekout.

Eski Minis i kapab enform nou Lasanble ki demars ki son Minister pe fer pou ankouraz plis zenn Seselwa pou pran en karyer dan domenn kiltirel par egzanp antropolozi, lenstrikter ladans tradisyonnel?  Mon redemande Mr Speaker?

(Interruption)

MR SPEAKER

Demann kestyon ki ou’n soumet.

 

HON MARIA PAYET-MARIE

Ok, yes Mr Speaker.  Eski Minis i kapab enform nou Lasanble ki demars ki son Minister pe fer pou ankouraz plis zenn Seselwa pou pran en karyer dan domenn kiltirel?  Mersi.

 

MINISTER ALLAIN ST ANGE

Mersi Mr Speaker, mersi Onorab Payet-Marie.  Kreasyon nouvo Minister Touris e Kiltir i annan koman manda, unlocking cultural potential nou pep e cultural potential nou pei.  Pou sa arive Mr Speaker, nou bezwen enplik lazenes Seselwa.  Nou bezwen enplik lazenes pou asire ki sa ki nou dir nou ete e sa ki nou dir nou annan i egziste, pa zis ozordi me osi pou egziste dan fitir.  Kimannyer nou pou ankouraz sa zenn Seselwa pou get en karyer dan domenn kiltirel, Onorab Payet-Marie pe demann nou ozordi.  Vizibilite Mr Speaker.  Vizibilite Departman Kiltir pou entansifye son progranm relasyon piblik pou ki nou zenn i vwar sa ki sa domenn kiltirel i kouver.  Nou pou enplik nou bann success stories kiltirel dan nou bann aktivite e ler nou met sa bann success stories a lavan, nou ava pe kree, swa devlop en lentere dan bann ki annan sa don koman en artis.  Zot bezwen vwar zot profesyon pe ganny met an valer e pe ganny met a lavan.  Nou annan sa responsabilite donn lespwar sa zenn ki son vokasyon, son metye ki li i annan, i annan en vre valer e en valer ki ganny apresye dan nou pei.  Sa i ganny fer resorti byen kler dan plan stratezik Departman Kiltir 2011-2015.  An plis ki sa Mr Speaker, nou pe revwar nou lekol ladans, nou lekol drama e nou lekol lanmizik pou fer li vin pli konvenab.  Sa proze pe ganny embody dan en pli gro proze apele Noarsi Village.  Deza nou’n komans get fizibilite pou kreasyon sa nouvo arts village pou nou pei, ki pou ouswa annan atase avek li en banquet hall, entertainment centre pou zanfan, en lotel e osi en blok ki pou en motel.  Pou annan en fasilite koman en arts village, son viabilite i bezwen en konsiderasyon e se sa k’in pous nou pou met en konponan komersyal atase avek sa proze.

Later, Gouvernman in fini allocate la Roche Caiman.  It en sit ideal e la nou pe fini travay lo konsept pou nou antreprann rod finansman neseser.  Sa arts village a reste sa sant konsolidasyon tou laspe nou lar e tou laspe nou devlopman kiltirel e la asire ki nou zenn, sa zenn Seselwa i vwar li ladan.  Mersi Mr Speaker.

 

MR SPEAKER

Onorab Payet, siplemanter.

 

HON MARIA PAYET-MARIE

Mersi Mr Speaker.  Anlinny avek mon premye kestyon mon annan en siplemanter.  Eski Minis i kapab enform nou Lasanble si son Minister i annan lentansyon pou travay avek Minister konsernen pou re-entrodwir community based tourism avek le bi pou ankouraz plis lanplwa, plis pti biznes dan bann kominote?  Mersi.

 

MINISTER ALLAIN ST ANGE

Mersi Mr Speaker.  Wi, Onorab Payet, ou pwen i valab, i en keksoz ki nou ti a kontan kapab kontinnyen fer e se sa lapel ki mon’n fer pli boner avek bann Manm Lasanble, zot ki isi dan sa lasal Lezislatif nou pei.  Se zot ki bezwen rod bann lide ki nou kapab tourn dan bann assets touris e kiltirel nou pei.  I difisil pou nou dan Minister asize e planifye antye tou bann nouvo done ki nou kapab pe servi e met zot an valer.  Nou lapel kot Minister i reste, ed nou.  Si nou vwar en keksoz dan en distrik ki nou panse i en atou kiltirel, parey Onorab De Commarmond in eksplik nou ki i annan en montanny avek en pti santye, i annan en atou kiltirel laba, sa i kapab anmenn devlopman dan Cascade.  Me pa zis kot sa sit i ete, me an montan ver sa sit.  Lezot dimoun i kapab devlop lezot lentere komersyal an montan ver sa sit pou zot kapab vann keksoz, pou zot kapab anler kot sa sit limenm vin en pti vilaz dan limenm ki ouver ler touris pe vin gete e i fer li pli enteresan pou anmenn bann bus tours, bann krwazyer ler i vin isi pou fer zot kapab al delivre sa.

Me mon enplor zot, kekfwa atraver biro Leader of Government Business, annou kekfwa en ler fer en sesyon informal kot nou get tou bann assets ki nou annan, ki ozordi pa lo map kiltirel, ni touristik nou pei.  Annou asize dan en informal award, 2 erdtan e dir anmenn tou keksoz.  I annan ki pou kekfwa en pe bann rev, i annan ki pou realite e ansanm nou a dir, vwala.  E i annan en kantite.  Sak fwa ou marse, nou vwar poudir i annan plis an plis e menm letan nou pei i annan en shortage e la mon soulinnyen, en shortage landrwa pou bann fasilite kot touris i kapab depans zot larzan.  E se sa ki yield nou pei i reste ba, touris, tou survey ki nou fer Airport i demontre klerman ki zot sorti dan nou pei ek larzan akoz napa ase landrwa pou zot aste keksoz, swa al vizit keksoz.  I ouver lakantite keksoz ki nou kapab fer e plis i annan, plis larzan ki zot, bann proze ki sorti dan zot kominote i fer larzan rested an kominote e filtre dan lanmen e dan pos lepep Seselwa.

Mwan, mon vreman ankouraz e Minister antye, Touris e Kiltir i ankouraz sa lapros ki ou’n demande pou nou annan sa bes tourism dan bann distrik, akoz se sa ki pou konsolid nou lendistri touris e osi se sa ki pou fer pep Seselwa claim back son lendistri.  I pou nou, nou bezwen vwar pep pe benefisye avek e napa meyer landrwa pou sot benefisye ki dan distrik limenm.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker mon supplementary question i an relevans avek kestyon 33.  Eski Minis i kapab dir nou ki travay i pe fer avek sekter prive, etan donnen ki domenn kiltirel i vreman domenn sekter prive, ki travay i pe fer avek sekter prive pou annan bann dimoun ki byen ganny train dan domenn kiltirel e ki annan lenvestisman dan training pou sa bann dimoun?  Mersi.

 

MINISTER ALLAIN ST ANGE

Mersi Mr Speaker.  Atraver National Arts Council i sa body ki ant Minister avek sekter prive akoz i en konsey an limenm, li i kontinnyen travay avek sekter prive etrwatman, osi byen ki i travay avek tou bann asosiasyo bann diferan konponan lar e kiltir nou pei.  Nou bezwen, enn se met lefor nou koman Bord Touris e Minister Touris e Kiltir pou ankouraz sekter prive pou konpran sa ki nou dir i kiltir e sa cultural asset nou pei.  I pa fasil.  I annan bann kou a tanzantan e dimoun i retisan ler i annan kou, me nou bezwen fer zot vwar son kote pozitif.  Kimannyer nou pou kapab anmenn sa plis a lavan dan fitir, se nou panse ler nou pou annan nou prop Arts Council e la nou pou annan nou landrwa kot nou pou kapab met an valer sa ki nou pe dir nou ete, i pou komans devlop en lentere nasyonal dan sa pei.  E se sa ki nou pa’n arive met an plas, kekfwa dan lepase, me la vi ki touris i siport kiltir, i pou pli fasil pou nou fer sa bouze.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble ki input ki son Minister i annan dan bann progranm lekol, an relasyon ek devlopman kapasite e an relasyon avek bann kalite lankourazman ki lekol i kapab donn bann zenn Seselwa pou zot pran en lanplwa dan domenn kiltir?  Mersi Mr Speaker.

 

MINISTER ALLAIN ST ANGE

Mr Speaker, nou pa’n fer ase.  I ase kler nou bezwen remet bokou plis lefor dan travay avek Minister Ledikasyon pou nou kapab ankouraz nou bann zenn pou zot antre dan sa domenn kiltir pou nou pei.

Nou krwar ki fitir Sesel, son konsolidasyon son lendistri touris se an metan kiltir a lavan.  Me pou nou met sa, nou pou bezwen travay avek Minister Ledikasyon.  Ozordi nou, nou annan nou 3 lekol ki tonm anba nou, drama, ladans, lanmizik, me sa pa ase limenm pou embody sa lanvi antre dan kiltir e sa lanvi devlop kiltir.  Wi, ou pwen i kler, nou pou travay avek Minister Ledikasyon e wi, nou pou ede ansanm avek li devlop kekfwa en fason sistenm dan lekol pou met sa plis a lavan.  Mersi Mr Speaker.

 

MR SPEAKER

Kestyon 34, Onorab Payet-Marie.

 

HON MARIA PAYET-MARIE

Mersi Mr Speaker.  Eski Minis i kapab enform nou Lasanble ki benefis son Minister i krwar pou anmenn nou pei, la ki Sesel i form par Vanilla Island Group? Mersi.

 

MR SPEAKER

Onorab Payet, ou bezwen toultan pe demann kestyon ki ou’n soumet ok.  Relir ou kestyon parey ou’n soumet li.  Ok.  Kestyon 34.

HON MARIA PAYET-MARIE

Eski Minis i kapab enform nou Lasanble ki benefis son Minister i krwar pou anmenn nou pei, la ki Sesel i manm?  Mersi.

 

MINISTER ALLAIN ST ANGE

Mersi Mr Speaker.  Mr Speaker, sa konsept Vanilla Islands, se nou Sesel ki’n ede kree.  Nou’n toultan krwar ki travay ansanm avek bann zil nou rezyon, nou ava arive met nou rezyon Losean Endyen a lavan.  Nou Misyon Mr Speaker i kler.  Ler en dimoun pe al vakans dan Karaib, personn pa dir mon pe al Sent Barts, ni en lot bann zil par son non.  Zot dir senpleman ki zot pe al dan Karaib, me dan nou rezyon, zafer i diferan.  Sa touris ki pe vin Sesel i dir mon pe al Sesel, parey pou Moris eksetera.  Rezyon Losean Endyen pa en konsiderasyon ditou.  Sa i fer ki sakenn pe lager pou rod son kliyan e bann atou ki obor nou pa arive ed nou akoz nou rezyon pa egziste dan konteks lendistri travel e touris me se bann zil endividyel ki ganny vwar e ganny met a lavan.  Nou kapab anmenn twin centre avek La Reunion kot montanny La Reunion i ganny vann avek lans ek lanmer Sesel, parey pou volkan La Reunion.  Sa osi i reste en asset enportan nou rezyon.  Swa Safarri dan Madagascar, swa Golf ou Shopping Fiesta Moris.  Kan rezyon i ganny met a lavan, assets tou bann zil i vin assets larezyon.  An plis ki sa, lafors vann an group i zwe en kart pli enportan e sa i atrakte plis lapres e lentere zeneral.  Linyon i fer lafors, Mr Speaker.

I pa’n fasil pou ariv kot nou ete, menm ki nou pa ankor ariv vreman lwen dan sa demars travay ansanm.  Nou koman Sesel nou’n pouse akoz nou krwar dan travay ansanm.  Ozordi kominote Eropeen in osi aksepte sa lespri, e zot pe pare pou ed pey sekretaryat sa lorganizasyon e ed peye bann depans marketing sa rezyon.  Prezidan Michel ti dir ler i it lans son vizyon Seychelles Brand of Tourism, ki nou bezwen vin en leader nou rezyon dan domenn touris.  Sa misyon nou pe mars avek.  Nou pe pran nou plas koman en leader dan sa formasyon Vanilla Islands Region e nou reste konvenki ki sa move a anmenn benefis pou tou zil nou rezyon e an fezan sa, anmenn benefis a nou rezyon limenm.  Mersi Mr Speaker.

MR SPEAKER

Onorab Payet-Marie.

HON MARIA PAYET-MARIE

Mersi Mr Speaker.  Eski Minis i kapab enform nou Lasanble si zot annan lentansyon pou zwenn avek Ile Vanille pou organiz bann diferan latelye, lesanz aktivite a lavenir?  Mersi.

 

MINISTER ALLAIN ST ANGE

Mr Speaker, premye keksoz ki Zil Vanil pe fer e la nou pou annan en meeting bann Minis ki dan Zil Vanil e bann Sef Ekzekitif bann departman touris sa bann zil, isi Sesel le 7 Zilyet.  Sa ki pli enportan avan pou nou se travay ansanm dan domenn marketing, pou asire ki sa rezyon i ganny met a lavan.  De la, nou pe fer en kalandriye events dan sa bann zil e zot in swiv deroulman en konfli avek zil Moris lo nou prezerv sa ki pou nou, se Carnaval Internationale de Victoria ki pou reste lo kalandriye bann Zil Vanil koman karnaval bann Zil Vanil reste Sesel.

Dan lepase, i tro fasil pou en zil pran lide en lot e fer li vin pou li si i pli for ekonomikman.  Malerezman Festival Kreol in vin enn sa dilenm e sa ki Onorab Payet-Marie pe demann nou i dan dezyenm faz.  Wi nou pou annan bann lesanz, wi nou pou annan bann latelye ansanm, me i enportan ki enn, nou apwent en Direkter Zeneral pou bann Zil Vanil e dela, met an plas en stratezi marketing e konsolid sa calendar of events nou 6 zil ansanm.  Mersi Mr Speaker.

 

MR SPEAKER

Kestyon 35, Onorab Maria Payet-Marie.

 

HON MARIA PAYET-MARIE

Eski Minis i kapab enform nou Lasanble si son Minister i annan lentansyon a lavenir pou konstri en cultural tourism library and centre dan sant lavil anba en sel twa avek tou lenfrastriktir neseser e kot nou viziter, reserser, etidyan e tou Seselwa i a pli ankouraze pou vin vizite e kot sa batiman i a vin en sant pou resers, latraksyon e lwazir pou tou sa ki enterese?  Mersi Mr Speaker.

 

MINISTER ALLAIN ST ANGE

Mersi Mr Speaker.  Mr Speaker, sa propozisyon i annan son merit.  Me i pa en lide ki’n ganny avanse a sa moman.  Me sa lide avanse par Onorab Payet-Marie i reste en lide ki nou kapab eksplore, an tenan kont ki pou lemoman, dan kad nou bann proze ekspo 2020, bokou lanfaz pe ganny mete lo touris kiltirel dan lavil Victoria.  Dabor Mr Speaker, nou annan en proze ki byen avanse e ki pe propoz konserv e ki pe propoz amenaz sant lavil Victoria koman en landrwa istorik.  Bann resers e bann lid resers neseser an koneksyon ek sa proze i deza byen avanse e i enportan pou dir avek zot, bann Manm Elekte nou pei ki nou lo bon direksyon pou fer en kontribisyon signifikan dan master plan redevelopment Victoria.  I osi enportan pou enform Onorab Payet-Marie ek Lasanble ki nou pe osi etidye kree en vilaz kiltirel La Bastille.  Sa vilaz nou espere pou kapab ofer sifizaman lenfrastriktir kot nou bann viziter, nou bann reserser, nou bann etidyan ek tou Seselwa a santi zot pli ankouraze pou vizite.  San bliye osi Mr Speaker, parey mon’n koz lo la pli boner, mon bezwen remansyonn ankor proze Arts Village ki pou anmenn a lavan bokou bann rekomandasyon leve par Onorab Payet-Marie.

Ozordi Mr Speaker, Arsiv nasyonal i la pou resers.  Latraksyon dan menm batiman e bann mize ek bann exhibition centres e National Arts Gallery.  E dan fitir, Arts Village a anmas tou sa.  Mersi Mr Speaker.

 

MR SPEAKER

Onorab Payet-Marie, siplemanter.

 

HON MARIA PAYET-MARIE

Mersi Mr Speaker.  Eski Minis i kapab enform nou Lasanble, avek le bi pou desantraliz en pti pe bann aktivite isi lo Mae, eski Minis i kapab enform nou si i annan lentansyon pou son Minister konstri en cultural tourism library and centre lo petet Praslin ki a benefisye zabitan Praslin e La Digue anmenmtan?  Mersi Mr Speaker.

 

MINISTER ALLAIN ST ANGE

Mr Speaker, Propozisyon fer par Onorab Payet-Marie i en bon propozisyon.  E parey mon’n dir, ed nou mars par pti pa pou nou kapab vreman devlope e anmenn otan benefis lo tou zil.  Si nou anmenn plis Bidze isi kot zot e reklanm Bidze, zot pa pou kapab aprouv li pou nou akoz pei pa pou kapab sustain li.  Mon demande vreman ki tou manm, i annan sa bann wish list, me annou reste dan konteks kot pei i ete ozordi e devlop li pa par pa.  Mersi Mr Speaker.

 

MR SPEAKER

Bon, nou’n ariv alafen Question Time.  E nou annan en Kestyon Dirzans par Onorab Leader of Government Business ki nou pou pran.

Nou pou demann Minis pou reste parmi nou akoz en bout sa kestyon i konsern son Minister e PS i ava bouz lot kote.  E Minis Morgan, yes Please.

Bon, pou nou etre efektiv, gidans i koumsa.  Sa ki konsern tourizm nou ekspekte Minis Touris pe reponn e sa bout ki deal avek kriminalite, Lakour, Minis pou Zafer Entern i ava reponn.  So, mon ava envit Onorab Leader of Government Business pou demann son kestyon.

 

HON MARIE-ANTOINETTE ROSE

Mersi Mr Speaker.  Bonzour Minis, bonzour tou dimoun.  Eski, Mr Speaker, swivan statement Minis Touris e Kiltir e osi Minis Zafer Entern lo menas ki bann aktivite kriminel pe annan lo lendistri tourizm, eski Minis i kapab dir avek sa Lasanble ki mesaz ki i pe anvoy avek pep Seselwa pou dekouraz sa bann kalite bandisite?  Ki lenpakt bann tel akt i annan lo nou lendistri tourizm e ki pe ganny fer pou ki bann ki koupab i ganny deal avek dan en pli kourt dele letan posib?  Mersi Mr Speaker.

MR SPEAKER

Bon, ok.  Minis Tourizm ou komans avan.  Yes.

MINISTER ALLAIN ST ANGE

Mersi Mr Speaker.  Onorab Marie-Antoinette Rose pe demande Mr Speaker ki koman Minis responsab pou Touris ek Kiltir, mon donn leksplikasyon swivan statement ki mon it fer ansanm avek Minis Joel Morgan, Minis responsab pou Home Affairs ek Transpor, lo menas ki bann aktivite kriminel pe annan lo lendistri touris, sa lendistri ki reste pilye lekonomi nou pei.

Onorab Marie-Antoinette Rose, Leader Government Business pe demande ki mesaz ki mon pe anvoy avek lepep Seselwa pou dekouraz sa bann kalite bandisite ki nou ti adrese dan en press conference lafen semenn pase.  Mr Speaker, zis 2 semenn avan, mon ti adres AGM 2012 Lasanm Komers ek Lendistri Sesel, kot mon ti fer kler ki nou tou, tou Seselwa ti devret konpran nou lendistri touris e mon ti sipliy avek tou dimoun pou apresye lenpakt posib ler nou deside detri sa lendistri.  Mon ti dir, ler nou deside pou detri kredibilite lendistri ki reste pilye nou lekonomi, nou kapab enpakte e probableman nou pou enpakte lo lekonomi nou pei e ki ler sa i arive, sa aksyon detri kredibilite lendistri touris pou enpakte lo sakenn, lo sak manm kominote biznes nou pei e dela, lo tou businessmen ek women isi Sesel, avan ki sa lenpakt i tous tou, san leksepsyon, tou Seselwa endividyelman.  Touris Mr Speaker i reste everyone’s business. I pou nou.  i pou nou pei.

Dan mon lentervansyon kot Chamber of Commerce ek Lendistri, mon ti fer resorti ki tou Minis dan Gouvernman i annan responsabilite pou touris dan en fason ou en lot.  Sa mon ti dir ler mon it eksplike ki touris i kapab ganny promoted, ganny met a lavan, swa ganny detrir par sakenn antre nou isi Sesel.  Sa i posib akoz sa lendistri i e sa lendistri touris pou reste everyone’s business.

Mr Speaker, Sesel ti’n mentenir son safety label.  Sa konotasyon ki dir lemonn ki Sesel, ki dan Sesel zot safety i asire.  Sa konfidans ki nou ti’n arive annan lo sa size, nou’n ganny li apre ki nou’n travay ansanm, sekter prive, nou Gouvernman e tou Seselwa endividyelman, ki nou welcome nou bann viziter sorti dan kat kwen lemonn.  Kan mon ti dir ki nou’n fer sa ansanm, mon bezwen dir mersi a tou sa Seselwa ki’n kontinnyen travay avek nou pou fer ki Sesel i reste sa pei ki welcoming, ki kontan son touris e ki apresye ki sa lendistri touris i pilye lekonomi nou pei.  Sa wi Mr Speaker, sa ti yer, sa ti avan yer.  Ozordi sitiasyon pe sanze e in sanze.

Ler Minis Morgan ek mwan menm nou ti adres sa press conference, nou lenformasyon ki nou ti’n tande sete ki de pei ti pe consider enpoz en travel advisory lo Sesel akoz sitiasyon bandisite ti’n vin alarman.  Touris ti pe ganny tro vole, touris nepli safe ler zot lo en ekskirsyon pou admir labote Sesel.  Lasanm lotel ti pe ganny kase e bann propriyete bann touris, enkli zot paspor it pe ganny vole.  Minis Jean-Paul Adam, nou Minis Zafer Etranzer in mele pou esey menaz sa sitiasyon avek son bann koleg dan 2 pei.  Son lentervansyon in annan en soulazman me Mr Speaker, menm letan ki nou ti pe fini koze, en Seselwa ki pa kontan son Nasyon e ki vreman pa kontan son pei ti atak ankor en Alman e en Angle sorti Trwa Frer e sa Seselwa ti menm al osi lwen pou obliz sa touris pou retir son bag maryaz e donn li.  Sa, parey dikton i dir, ti dernyen straw ki ti kas sa camel’s back.  Dan Lonn an Angleter, en travel advisory in imedyatman ganny pibliye.  Ki laont pou Sesel e ki laont pou Seselwa?

Dan travel section anba Sesel, prezan in ganny poste, the FCO is warning of reports of recent incidents of treckers on marked and unmark trails being robbed and encourage people to stay in organized groups. I pa en keksoz ki ou panse i kapab arive Sesel kot prezan nou dir ek touris reste an group, pa sorti enn par enn.

En dezyenm pei Eropeen pe konsider zot osi en travel advisory akoz pou zot 9 zot paspor i dan lanmen bann bandi isi Sesel.  Sa i en notice pou nou, en notice pou nou pei e pou tou Seselwa.  Nou’n ganny dir pran konsyans sitiasyon ki pe ariv kot nou e Mr Speaker, nou bezwen pran konsyans akoz nou pe zwe avek dife e nou pou bril nou prop frer, nou prop ser, nou manman e alafen nou pou detri nou pei si nou pa deside koman en pei pou deklar en lager kont sa fleo apele kriminalite.  Ler en pei Lerop i vwar nou unsafe, napa garanti ki lezot pa pou swiv parey.

Mr Speaker, Onorab Marie-Antoinette Rose, Leader of Governmant Business pe osi demande ki lenpakt ki sa bann akt ek sitiasyon pe e pou annan lo lendistri touris?  Lenpakt i ozordi everyone’s guest.  Sa ki kler, sa ki de trwa endividi ki pa kontan son pei ek son nasyon pou anmenn mizer pou popilasyon Seselwa si zot pa ganny arete.

Ozordi Lerop pe fer fas avek en kriz ekonomik grav.  Sa sitiasyon pe deza afekte nonm touris sorti an Erop ki debark isi.  E lide ki Sesel nepli safe pou anmenn imedyatman lensertitid pou viziter ki pe plan en vakans.  Nou pa ti bezwen sa, dan sa moman pli difisil ki nou bann parteners dan Lendistri touris dan Lerop pe fer fas avek.

Mr Speaker, Manm Lasanble.  Zot ki reprezantan pep Seselwa.  Zot ki ganny elekte e ki la pou defann sa pep Seselwa.  Mon enplor zot lo non tou dimoun ki direkteman, swa endirekteman pe viv akoz nou resevwar touris isi Sesel.  Mon enplor zot lo non Goouvernman ki bezwen ki sa lendistri ki reste pilye lekonomi nou pei i marse.  Mon enplor zot lo non tou Seselwa ki pou soufer akoz aksyon detrwa dimoun ki napa okenn konsiderasyon pou dega ki zot aksyon lo tourizm e lo bann lotel pe anmennen.  Annou pas mesaz pou tou Seselwa.  Mars avek nou lo semen konsolidasyon lendistri touris nou pei.  Annou pran sa semen ki pou anmenn prosperite e kit deryer destriksyon sa lendistri ki pe les nou pei bouze.  Se sa lenpak Mr Speaker.  Vol e latak lo touris pou anmenn destriksyon pou pilye nou lekonomi e anmenn soufrans pou tou Seselwa.  Mersi Mr Speaker.

 

MR SPEAKER

Bon, Minis Morgan i ava pran trwazyenm parti.  Minister.

 

MINISTER JOEL MORGAN

Mersi Mr Speaker.  Bonzour Speaker, bonzour tou Manm Lasanble e tou dimoun ki a lekout.

Mr Speaker, mon koleg Minis in koz en pe lo lenpakt ki sa bann aktivite kriminel i pou annan lo lekonomi Sesel, atraver lekonomi tourizm dan nou pei.  E trwazyenm parti sa kestyon ki pe ganny demande ozordi se ki pe ganny fer pou bann ki koupab i ganny deal avek dan pli kourt dele letan posib.  Dan mon prezantasyon avek zot, pou reponn sa kestyon, mon ava fer en pti pe en apersi lo bann travay ki lapolis pe fer, epi mon ava al en pti pe pli lwen ki sa, mon ava koz en pti pe lo sistenm lazistis, sistenm kriminel an zeneral ki deal avek sa sitiasyon e ki bann defayans ki nou annan ozordi ki nou bezwen fer fas avek e ki nou bezwen adrese dan lavenir pou kapab rektifye sa sitiasyon pou nou kapab asire ki bann touris ki vin dan nou pei, e nou bann sitwayen ordiner ki ozordi pe viv dan laterer, dan lafreyer dan zot bann kominote, i ganny sa safety, sa sekirite ler zot vin dan nou pei e dan zot bann lakaz dan zot bann kominote.

Mr Speaker, mon kapab fer resorti ki lapolis i deza annan an plas en mekanizm pou deal avek bann case ki ganny raporte pou asire ki bann sispe i ganny anmennen devan Lakour dan pli kourt dele letan posib.  Pou bann ka ki priyorite, tel parey bann ka ki annan lyen avek touris e kot i annan levidans, lapolis i fer sir ki sa bann tel ka i ganny anmennen devan Lakour avan 24 erdtan.  Amwen ki i en weekend oubyen konze piblik, ouswa an ka fors mazer e la normalman, pa plis ki en dele 2 zour letan i ganny pran.  I menm annan ka ki’n ganny anmennen Ankour menm zour ki’n ganny raporte, si lapolis i annan en sispe e si in kapab aret li.  Dan ka kot i annan en sispe, me levidans pankor fini ganny anmase pou sarz sa dimoun, lapolis i demann Lakour pou met sa sispe lo rimann, anmezir ki i kontinnyen fer son lanket.  I bon note osi ki dek ki en sispe i ganny sarze avek en lofans ki serye, lapolis i kapab demande pou sa sispe ganny rimann pou bann peryod konsekitiv 14 zour, ziska ki ler son case in fini ganny determinen par Lakour.  Sepandan, mon oule fer resorti ki pa toultan ki demann lapolis pou met en sispe lo rimann i ganny pran an konsiderasyon e souvann fwa, sa sispe i ganny large lo en senp bail.  Menm si parfwa sa bail i lo serten kondisyon, dan bokou ka sa bann kondisyon pa ganny respekte.

Mr Speaker, i pa posib pou lapolis dan nou pei siperviz tou bann kriminel ki ganny large lo bail.  Lapolis pe sistematikman kontinnyen restriktir e devlop son plan pou vin pli efikas e rann en servis pli profesyonnel pou piblik.  Mon krwar ki zot a dakor ek mwan ki ozordi nou vwar plis lapolis enpe partou.  Setadir, i annan plis vizibilite lapolis atraver bann patrol ki zot pe fer.  Pou fer sir ki sa bann patrol i mars byen, lapolis in entrodwir en sistenm met zofisye sinyor dan Sant Komann anvil, e zot rol se pou fer sir ki sa bann patrol i efektiv, ki piblik i ganny lasistans pli vit e ki resours i ganny allocate dan en fason pli efikas pou sa bann patrol.

Dan son devlopman kontinnyel, lapolis in kree en nouvo divizyon ki apel National Crime Serices Division, NCSD.  NCSD i responsab pou patrol, fer prevansyon e lenvestigasyon krim, target bann hot spots e bann black spots, fouy dan bann veykil e rod bann kriminel ki lo wanted list, osi byen ki asiste bann stasyon pou reponn lapel piblik.  Anmezir ki lapolis i ganny plis resours imen, plis patrol pou osi ganny mete dan bann kominote e bann distrik.  Depi enpe letan, NCSD pe devlop son biro lentelizans kriminel ki permet bann detektiv osi byen ki lezot polisye konsernen pou servi sa bann lenformasyon pou pli byen target bann bandi e bann delenkan dan lasosyete.  Lapolis in osi komans en sistenm case management avek bi pou asire ki bann case i pas pli vitman Ankour, pou vwar ki pe arive ek sa bann case, donn lenformasyon sa konplenan lo son case osi byen pou asire ki bann file ki ariv kot Biro Atorni Zeneral i pli solid an term levidans.  Lapolis pe fer bokou aktyelman me i annan ankor lezot landrwa kot i bezwen devlope pou asire ki piblik i bokou pli an sekirite.  Par egzanp, lapolis i bezwen fer pli bon recruitment bann dimoun ki i pran dan lafors.  Fer plis lantrennman spesyalize pou bann zofisye dan lafors.  Train polisye pou annan pli bon lapros avek piblik.  Deal ek bann ka dan en fason pli profesyonnel e vin pli konbatif e proaktif kont krim dan nou pei.

Mr Speaker, mon ti a kontan fer resorti osi serten defayans ki lapolis i rankontre anlinny avek son travay pou anmenn bann case devan lazistis.  Premyerman dan bann ka kot i annan en repeat offender e li i pas an Kour, i ganny large lo bail, nou vwar ki de ki sa sispe i ganny large, i kontinnyen komet sa menm lofans pou ki in ganny arete par lapolis oparavan.  An se moman, lapolis i annan serten bann ka ki zot pe fer fas avek akoz sa problenm.  Tou dernyenman, i annan kriminel dan distrik Anse Aux Pins, Sans Soucis, Saint Louis e Port Launay, zis pou donn enn de legzanp kot demann pou rimann bann sispe pa’n ganny aksepte.

Lo kestyon bail, mon krwar ki cash bail ki Lakour i enpoze lo sa bann sispe i tro ba.  Mon ti a kontan lans en lapel avek Zidisyer pou revwar sonm ki zot mete pou bail, espesyalman pou bann ka sever parey omisid envolonter, vol avek vyolans, vol arme, vol touris, kas lakaz ouswa dan bann ka kot bann sispe i bann repeat offenders.  Sa i ava ede Mr Speaker, redwir lakantite kriminel ki deor, antretan ki zot pe esper zot case zize an Kour.  I bon note ki souvannfwa ler bann kriminel i ganny large lo cash bail, sa menm kriminel i al vole ankor enn fwa pou li kapab repey sa bann dimoun ki’n pey son bail.

Dapre leksperyans, lapolis in vwar ki ler serten kriminel i anny detenir, nivo krim dan sa bann landrwa i redwir konsiderableman, konpare ek ler sa bann kriminel i deor.  Nou’n osi note ki i pran bokou letan pou en case ganny finalize devan Lakour e nou krwar ki i pa devret pran plis ki 3 ou 4 mwan pou sa ganny fer dan nou sistenm aktyel.  Sepandan, mon ti a kontan note ki Sef Ziz in donn en commitment ki i pe revwar lafason ki Zidisyer pe travay pou ki bann case kriminel i kapab al pli vit devan son bann Lakour.  Nou’n osi vwar ki dan serten ka kot en case i devan Lakour pou en pe letan, sa akize i demann plea bargain pou en lofans mwen grav, konpare avek son sarz inisyel ki ti ganny mete kont li.  Menm si plea bargain i en bon fason pou fast track en case, nou krwar ki i devret ganny revwar akoz souvann fwa sa sarz pli serye ki’n ganny anmennen kont sa akize i ganny retire e i resevwar en santans ki konsiderableman redwir, konpare avek sa ki ti’n ganny prosekite pou son sarz inisyel.  Setadir plea bargaining pa toultan mars dan nou faver, Mr Speaker.

Mon ti a kontan fer resorti ki an Zilyet 2010, mon ti prezant avek Lasanble Nasyonal lamannman lo serten seksyon nou Kod Penal pou asire ki bann dimoun ki komet bann lofans i ganny deal avek bokou pli severman.  Lapolis, Biro Atorni Zeneral e Zidisyer i bezwen zwe zot rol pou asire ki sa bann lamannman dan lalwa i ganny enplimante e ganny respekte.  Pou nou annan en pei kot i annan lord e kot nou pep i santi zot an sekirite, nou bezwen annan en lafors lapolis, en sistenm lazistis ki nou sitwayen i kapab annan konfyans ladan.  Parey mon’n fer resorti dan mon interview avek lapres, ansanm avek mon koleg pou Tourizm, nou pa kapab annan en dimoun ki pe fer krim e ganny large lo bail pou zot kontinnyen fer sa bann menm krim.  Severite krim dan nou pei in ariv en nivo ki alarman.  Nou pa kapab kontinnyen toler sa bann dimoun pou detri nou lekonomi tourizm e met lafreyer dan nou bann touris e nou bann sitwayen an zeneral dan nou pei, Mr Speaker.  In ler pou nou pran aksyon pli sever e pou sa kapab materyalize, fodre ki tou bann akter dan sistenm lazistis i annan sa menm langazman pou met krim anba kontrol.  Mersi Mr Speaker.

 

MR SPEAKER

Bon, nou a pran enn de siplemanter.  Onorab Leader of Government Business.  Mon oule fer zot konnen ki mon pou manage time akoz nou annan Bills ki bezwen pase ozordi e apre i annan en Mosyon lo apre midi.  So, Onorab Leader of Government Business.

HON MARIE-ANTOINETTE ROSE

Mersi Mr Speaker.  Mr Speaker eski Minis pou Zafer Entern i kapab konfirmen si zot in deza mont en loperasyon pou reelman met sa sitiasyon anba kontrol e ki mesaz i annan pou ganny sipor piblik dan sa demars.  E eski Minis pou Tourizm i kapab dir nou si sekter prive pe travay avek zot dan sa demars?  Mersi Mr Speaker.

 

MINISTER JOEL MORGAN

Mr Speaker, mon kapab konfirmen ki lapolis, atraver son bann diferan seksyon me espesyalman atraver National Crime Services Division in deza mont en loperasyon entansif pou kapab met sa sitiasyon anba kontrol.  Mr Speaker, sitiasyon pary mon’n dir i alarman.  Ler nou get to krim kont bann touris pou premye 6 mwan sa lannen ziska yer, i annan 107 ka ki’n ganny raporte avek lapolis kont bann touris.  E ler nou get totalite bann krim kont touris pou lannen 2011, ti annan 165 ka antou.  Ki vedir ki si nou kontinnyen lo sa menm trend pou sa lannen, nou pou depas sa limit ki ti’n ganny etablir lannen pase pou bann krim kont bann touris.  E sa pou mwan Mr Speaker i en keksoz ki alarman, me sa ki pli alarman osi se ki nou’n vwar ki bann vol dan bann letablisman in ogmante, nou’n vwar ki bann vol lo bann trails in ogmante, nou’n vwar ki bann vol lo bann lans in ogmante e zot osi target bann veykil ki park obor bann lans partou, ki bann touris i park obor bann lans pou vol zot bann keksoz.

Mr Speaker, osi alarman se ki lefe ki bann vol avek vyolans kont bann touris i osi pe ogmante.  Setadir, severite bann aksyon kriminel kont bann touris pe ogmante dan nou pei ozordi, e nou bezwen travay parey mon’n dir, nou bezwen met tou nou resours disponib pou nou kapab deal avek sa sitiasyon.  Mersi Mr Speaker.

 

MR SPEAKER

Minis Tourizm.

 

MINISTER ALLAIN ST ANGE

Mersi Mr Speaker.  Brevman mon krwar pwen ki Onorab Marie-Antoinette Rose in fer, i demande si sekter prive i enplike avek nou?  Wi.  Mon krwar i enportan pou nou fer resorti ki Gouvernman avek sekter prive i travay lanmen dan lanmen e zot in travay ansanm depi ler ki Prezidan Michel in anmenn sa partenarya Public Private Sector Partnership.  Sekter Prive i kontrol Bord Touris Sesel.  Se zot ki annan 4 manm dan 7 lo sa Bord.  Alor zot gid deroulman Gouvernman atraver Bord Touris e se sekter prive ki in control Ozordi sekter prive in organize ki point of co-ordination pou sa bann aksyon ki pe pran plas i reste kot Bord Touris.  E CEO kot Bord Touris, Madanm Grandcourt i sa enn ki resevwar otan bann ensidan ki pe pase dan bann lotel, pou nou kapab de la fer Minis Zafer Entern ek lapolis konsyan sa ki pe pase e parfwa nou menm ganny nouvel vitman akoz nou on call avek zot permanantman.

Me pou reponn ou kestyon Onorab Rose, wi, nou travay etrwatman avek sekter prive e sa nou pou kontinnyen fer, menm avek bann nouvo demars ki zot in propoz avek nou pou reget en pe striktir STB e Minister Touris.  Mersi.

 

MR SPEAKER

Onorab Pierre.

HON DAVID PIERRE

Mersi Mr Speaker.  Mr Speaker, premye siplemanter pou Minis Touris, apre mon annan enn pou Minister Morgan.  Pou Minis Touris.

Eski Minis i kapab dir avek sa Lasanble ki son Minister pe fer pou sansibiliz tou Seselwa lo lenportans zot kontribisyon dan donn lanmen konbat sa fleo, akoz sa potansyel ki sa fleo i annan pou detri nou lendistri touris e donk detri nou lekonomi?

Dezyenm kestyon.

 

MR SPEAKER

Ou dezyenm kestyon pou ki?

 

HON DAVID PIERRE

Pou Minis Morgan.

 

MR SPEAKER

Anr, pou Minis Morgan.  Ok.

 

HON DAVID PIERRE

Eski Minis Morgan i kapab dir avek sa Lasanble, an vi bann gran defayans dan dan Departman Lapolis, eski i kapab dir nou ki son Minister pe fer pou garanti ki sa Departman i ganny kalite training pou fer bann polisye vin profesyonnel e efektiv.  E dezyenmman, ki kalite resours an plis i anvizaze rode e donn sa Departman pou garanti ki zot kapab konbat sa bann krim lo pli o nivo posib pou benefis Sesel ek tou Seselwa?  Mersi Mr Speaker.

 

MINISTER ALLAIN ST ANGE

Mersi Mr Speaker e mersi Onorab Pierre.  Kimannyer nou sansibiliz tou Seselwa, mon panse avek led Minis Morgan, nou ti fer en joint-press conference pou nou alert Seselwa.  Pa ti ankor ni ariv sa problenm ki nou ladan ozordi ki’n vin en dezyenm faz.  Nou’n sorti a lavan e nou’n al alert Seselwa poudir i annan en problenm ki riske arive si nou pa atrap nou lekor.  Minis Morgan in met an plas bann striktir neseser kimannyer I pou konbat sa, me nou ti anvi ki Seselwa i vin realis.  Si lendistri touris ti ganny afekte, tou Seselwa pou ganny afekte.  Me kimannyer nou pa kapab osi overblow sa sitiasyon pou ki de la lemonn i komans dir, Sesel limenm i dir i annan en problenm e zot pe kriy avek zot prop problenm.  Nou bezwen manage sa byen.  E se sa, mon lapel pou tou lapres Sesel.  Regarde kimannyer nou report lo sa bann lensidan ki pe pase akoz sa osi i annan son move kote.  E fodre pa ki nou dir nou menm, nou’n fini tonbe, lebra in kase e ki la nou annan en problenm terib dan sa pei.  Mon panse zafer entern anba Minis Morgan pe met an plas bann mezir neseser.  Akoz nou’n travay ansanm, mon prevy pou konn enpe son bann demars ki i pe fer, e mon krwar nou pou bezwen les li annan sa mannev pou li kapab travay.  Annou pran bann aksyon nou dan bann distrik.  Annou dir ek dimoun nou bann frer, nou bann ser poudir si i kontinnyen annan sa problenm nou tou nou pou soufer.  Me annou osi pa komans fer sanson lo la akoz sa pou donn nou en lot problenm e nou pou vin insecure e nou pou dir lemonn ki nou insecure.

Mon’n fer sorti yer en kominike ki’n sorti bomaten lo google alert e la mon dir ki Minis Morgan ek mwan nou pe asire ki Sesel i gard son safety label.  Nou pa dir nou annan en lensidan ki pe afekte nou safety label.  Nou bezwen gete kimannyer nou kominik sa akoz sa osi pou afekte nou e mon enplor Manm Lasanble, konpran poudir nou pa kapab osi overblow sa sitiasyon.  Mersi bokou Mr Speaker.

 

MR SPEAKER

Minis Morgan.  Depi bomaten mon pe apel ou Onorab, tro vwar ou dan Lasanble souvan.  Yes Minister.

MINISTER JOEL MORGAN

I ok Mr Speaker, mersi.  Mr Speaker pou reponn kestyon Leader Lopozisyon, ki lapolis pe fer pou profesyonnalizm lafors pou rann en pli bon servis e pou konbat kriminalite?  I annan bokou keksoz ki pe ganny fer ozordi dan lapolis pou moderniz sa lafors ki pandan sitan lannen ti bezwen, ti demande ganny modernize.  Bann prosedir, bann sistenm travay, lafason ki lapolis i organiz li, lafason ki bann training i ganny fer e osi lafason ki career progression dan lapolis i gany met an plas i bann eleman enportan pou annan en lafors ki dinamik, en lafors ki profesyonnel, en lafors ki konpetan.  Mr Speaker, lapolis in vwar li pandan en bon pe letan avek en problenm mank resours pou li kapab desarz son bann responsabilite.  Resours imen, resours materyel.  E mon kontan pou dir ki Gouvernman in fer en zefor konsiderab pou ede adres sa problenm resours lekipman ki lapolis ti manke pandan plizyer lannen pou li kapab travay.  Ozordi lapolis i kapab dir avek fyerte poudir mazorite bann keksoz ki i bezwen pou li desarz son bann fonksyon an term lekipman, an term lozistik, transpor ensidswit i la e Gouvernman in donn finansman atraver Bidze ki sa Lasanble Nasyonal in pase pou lapolis kapab ekip li.

Ozordi nou annan en sistenm dan lapolis, en sistenm kominikasyon, nou annan en sistenm transpor, nou annan sistenm computer, database, networking ki dan lapolis ozordi, ki nou kapab dir i a nivo ki nou bezwen pou fer travay ki lapolis i bezwen fer dan nou pei.  Me par kont Mr Speaker, kot i reste nou bokou ankor pou fer, se lo kote devlopman nou lafors pou fer li vin pli profesyonnel.  E la parey mon’n dir Mr Speaker, i annan plizyer problenm ki nou fer fas avek.  I annan problenm mank formasyon, mank lantrennman, i annan problenm devlopman karyer dan lapolis limenm li, i annan problenm ase resours imen pou tackle sa nivo kriminalite ki lapolis ozordi i fer fas avek dan nou pei, e i mank osi i annan sa problenm mankman bann nouvo dimoun ki kapab antre dan lapolis o fir e anmezir ki sa lafors i devlope pou zot kapab pran rele e pran sa responsabilite dan bann pozisyon pli senior.  Setadir lo nivo career progression, lo nivo bann dimoun ki pli ba, nou annan bokou pou nou fer pou nou kapab train zot pou zot monte e pou zot vin bann zofisye pli senior dan lapolis ozordi.

Me Mr Speaker, mon ti a kontan dir avek sa Lasanble ki sa i an men.  Byento, swit a vizit ki Prezidan Michel ti fer Langleter pli boner sa lannen, zot kapab rapel, i ti annan diskisyon laba avek Premye Minis e i ti annan en lakor pou Gouvernman Angle ed Sesel lo kestyon reform resours imen, lapolis pou fer li vin pli profesyonnel.  E byento nou pou vwar larive 2 Sef Sirentandan sorti lapolis Langleter, sorti kot National Polising Improvement Agency Langleter, pou vin travay isi pandan en serten peryod letan, probableman 2an, pou zot ed nou re-profesyonnalizm e re-develop nou resours imen dan lafors lapolis Sesel.

Mr Speaker, mon krwar avek zot kontribisyon ki zot pou fer isi, zot in deza fer serten lenvanter nou bann problenm, zot in deza fer serten resers e zot in prodwi en rapor ki mon’n soumet avek Gouvernman e ki Gouvernman in aksepte bann rekomandasyon kimannyer nou pou travay dan sa prosen 2 an, pou nou ranforsi konpetans ek kapasite lapolis.  Sa bann dimoun nou ekspekte zot vini dan bann mwan ki swiv, petet dan prosen 2 mwan, sa pe ganny finalize e avek zot lasistans, nou pou annan prezan sa lyen direk avek Langleter e avek lapolis Angle atraver National Police Improvement Agency pou run bann courses avek finansman Gouvernman Angle, avek finansman EU e finansman UNODC, me osi avek finansman Gouvernman Sesel.  Pou kapab annan bann course isi Sesel e a letranze pou asire ki nou bann zofisye dan lapolis i ganny met azour avek bann sistenm policing ki profesyonnel, ki modern e ki nou al de lavan o pli vit letan posib.

Mr Speaker, mon ti a kontan fer resorti osi, pou termin sa premye parti sa kestyon.  Mon ti a kontan fer resorti osi ki nou annan en problenm resours imen.  Parey mon’n dir, nou napa ase dimoun pou konbat sa bann sitiasyon kriminel ki annan dan nou pei ozordi.  Nou bezwen plis dimoun.  E Mr Speaker, se la kot Gouvernman in pran en desizyon oparavan pou fer vin bann Gurca sorti a letranze pou vin travay dan lapolis pou en serten peryod letan pou ed nou.  i annan posibilite ki nou pou bezwen ankor enpe dan lavenir pou kontinnyen annan sa prezans dan bann distrik e dan bann kominote pou konbat kriminalite.  Me anmenmtan Mr Speaker, Gouvernman pe travay avek bann zenn.  Ozordi nou annan nou en karantenn zenn kadet kot Lakademi Lapolis e lannen prosenn nou annan plan pou pran ankor en swasantenn pou kapab ed nou pou ranpli bann ran dan lapolis pou kapab annan plis lapolis Seselwa dan lavenir, ler zot in fini ganny formen.

Mr Speaker, mon tre ankouraze par nou bann zenn ki dan nou Police Cadets ozordi akoz zot pe demontre bokou motivayon, bokou determinasyon pou zot kapab pran responsabilite koman en polisye dan lavenir.  E la byento nou ava annan en group ki pou graduate, ki pou antre dan lapolis e sa i ava ede pou ranforsi konpetans e kapasite lapolis an zeneral.  Zot in swiv en kour 1an edmi kot Lakademi Lapolis e mon tre fyer ki zot pou graduate byento pou kapab ed nou konbat kriminalite dan nou pei.

Mr Speaker, dezyenm parti sa kestyon, ki resours ki nou pe rode?  Parey mon’n dir, Gouvernman in fer bokou pou donn lapolis dan sa bann dernyen lannen, sa dernyen 2an sirtou, bann resours neseser pou nou kapab konbat problenm krim e mentenir lord ek lape dan nou pei.  Dan bidze ki pe vini, i annan en Bidze siplemanter ki nou pe espere met devan Lasanble Nasyonal atraver Minister Finans byento, nou pe demann zot ankor en pti pe plis.  Silvouple.  Nou pe demann zot pou zot kapab ed nou ganny en pe plis resours pou nou kapab ranforsi nou kapasite resours imen, e ranforsi bann keksoz ki nou bezwen fer parey bann kour formasyon, bann lezot training ki nou bezwen fer pou lapolis dan sa lanmwatye lannen ki devan nou, ziska lafen lannen.  Atraver sa bann resours Mr Speaker, nou pou kapab fer bokou plis ankor, nou pou kapab recruit en pe plis dimoun, nou pou kapab met plis zofisye lo patrol, nou pou kapab met plis zofisye dan CID pou zot kapab detekte e deal avek bann krim ki pe arive dan nou pei ozordi.  Alor mon a demann zot sipor pou sa Bidze ki nou pe al met devan zot byento Mr Speaker.  Mersi.

 

MR SPEAKER

Onorab Pool.

 

HON ANDRE POOL

Mr Speaker, mersi.  Mr Speaker, mon kestyon i al pou Minis pou Zafer Entern.  Mon ti a kontan demann li, eski i kapab enform sa Lasanble e lepep Seselwa byensir, eski vre alegasyon ki serten zofisye lapolis zot osi zot enplike dan sa bann vol e krim e si i vre, kwa ki pe ganny fer pou aret sa sitiasyon?  Mersi.

 

MINISTER JOEL MORGAN

Mr Speaker, okenn zofisye lapolis ki involve dan okenn aksyon kriminel, ler lapolis i detekte poudir sa i leka, i ganny deal avek dan en fason pli sever posib.  Sa i ganny fer atraver en prosesis lenvestigasyon kot Internal Affairs dan lapolis.  I annan en unit ki apel Unit Internal Affairs ki deal avek sa bann case, epi sa bann case osi i ganny handle par CID pou gete si i annan okenn zofisye ki pe fer bann aksyon kriminel ki kapab enkli pran bribes, ki kapab enkli fer frod avek bann kriminel, an konivans avek bann kriminel ouswa menm detri levidans.  Sa i bann keksoz ki mon pa pou dir pa’n arive.  In deza arive dan lepase, me sa ki lapolis pe fer se ki nou pe clamp down dan en fason tre, tre sever kont sa bann aksyon e mon kontan pou note Mr Speaker ki pandan sa bann dernyen letan ki nou pe koze la, sa bann aksyon in preski ganny dir eliminen dan lapolis ozordi.  Pandan lannen 2011, i annan bokou polisye ki aksyon in ganny pran kont zot pou bann tel lofans.  I annan menm k’in al an kour e in kondannen pou bann tel lofans.

Mr Speaker, nou annan en polisi zero tolerans kont okenn zofisye lapolis ki fer bann tel aksyon akoz i pa kapab annan en sistenm polisye dan nou pei, kot lapolis napa konfyans manm piblik.  Nou bezwen travay tre for pou asire ki lapolis i annan sa respe, i annan sa konfyans e i annan sa bon regar par manm piblik dan nou sosyete e koman Minis responsab pou lapolis, ansanm avek Komisyonner lapolis, nou’n pran en lapros tre strikt kont sa bann dimoun ki pe fer bann tel aksyon e mon ti a kontan reasir sa Lasanble ki nou pa pou toler okenn aksyon par okenn polisye ki fer bann aksyon kriminel ouswa ki an konivans avek bann kriminel dan nou pei.  Mersi.

MR SPEAKER

Onorab Vel.

 

HON JENIFFER VEL

Mersi Mr Speaker, bonzour tou dimoun.  Mon kestyon i viz ver Minis pou Zafer Entern.  An prenan kont Minis ki sa fleo kriminalite i pa afekte zis touris, me pou en bon pe letan i pe afekte nou zabitan e sirtou la kot nou annan en partener kle ki ankouraz sa fleo kriminalite e sa se bann reseler.  Ozordi nou annan en sitiasyon kot nou bann Seselwa pe ganny atake Anvil, zot bann lor pe ganny pran e osi menm zot lakaz ………..

 

MR SPEAKER

Kestyon Onorab.

 

HON JENIFFER VEL

………..e sa bann lor pe al ganny vann a letranze.  Eski Minis i kapab dir nou ki bann mekanizm zot pe pran pou kapab deal pli for avek bann reseler, e osi kapab entersed zot avan zot kit pei avek bann bizou, sirtou bann ki annan valer pou nou Seselwa, parey zot bann lalyans?  Mersi Minis.

 

MINISTER JOEL MORGAN

Mr Speaker, i vre ki ozordi i annan en bon pe dimoun dan nou pei ki’n komans en biznes ilegal, reseler.  E zot in etablir dan serten ka, en network bann bandi, bann voler, bann kriminel, pou aste en kantite keksoz, depi laptop, mobile phone, lor, bann bizou an zeneral, bann keksoz koumsa.  E serten sa bann reseler i osi servi sa larzan pou zot finans bann lezot aktivite tel parey deal dan drog.  So, i annan bokou konotasyon atraver biznes reseler ozordi dan nou pei.

Sa ki mon ti a kontan dir pou reponn sa kestyon se ki ler mon’n diskite avek komisyonner lapolis, nou’n pran en desizyon ki nou bezwen target bokou plis bann reseler, konpare ek oparavan.  I vre ki dan lapolis in annan serten defayans dan lepase, kot nou ti pe target plito bann kriminel selman.  E ti napa sa lanfaz, sa focus lo target bann reseler.  Me mon krwar ki bann reseler i osi koupab, menm si pa pli koupab ki bann dimoun ki pe fer bann vol pou vol bann keksoz pou vann avek bann reseler.  Mr Speaker, se pou sa rezon ki National Crime Services Division lo kote CID parmi enn bann reszon in etablir sa Unit Criminal Intelligence.  I annan bokou travay ki pe ganny fer la.  atraver sa Unit Criminal Intelligence, bann reseler pe ganny kategorize, zot pe ganny sirveye e zot pe ganny dan en fason tyeke pou vwar ki bann aksyon zot pe fer, dan en fason ki nou kapab gather en levidans kont zot, nou kapab fer bann raid lo zot bann landrwa kot zot fer sa bann aktivite e nou kapab anmenn zot devan lazistis pou deal avek zot.  Mon oule dir avek Lasanble Nasyonal ki nou pe al met plis lanfaz lo sa kestyon reseler e menm parey ou’n dir Onorab, lo sa kestyon border control.  Ler zot kit pei avek sa bann lor, par egzanp pou al Dubai ouswa pou al dan bann lezot pei pou vann sa bann lor, kot zot in menm etablir, dapre lenformasyon ki nou annan, serten network laba.  Kot i annan bann dimoun ki a zot tour, zot osi zot bann reseler pou aste sa bann keksoz ki’n ganny vole isi.  So, avek bann lazans lafors enternasyonal, lo kote Interpol, nou pe osi etablir lenformasyon lo sa bann dimoun a letranze ki pe aste avek bann dimoun isi pou nou kapab annan en portre konpreansiv pou deal ek sa bann dimoun.  Mon krwar ki in ler pou nou bouz dan en fason sistematik kont zot, e mon espere ki nou kapab fer sa byento.  Mersi.

 

MR SPEAKER

Onorab Samson.

 

HON DERECK SAMSON

Bonzour.  Mersi Mr Speaker, bonzour tou Manm Lasanble, Minis prezan.  Mon annan 2 kestyon Mr Speaker.  Mon ti a kontan demann Minis responsab pou Tourizm si i dan zot plan, Minister pou petet vwar nesesite pou annan bann tour guides ki annan training as rangers pou azir koman sekirite pou bann organized trail visits?

E kestyon pou Minis Morgan.  Eski son Minister pe mazin revwar kapasite oubyen responsabilite nou bann Tourism Police ki gard nou bann lans?  Mersi.

 

MINISTER ALLAIN ST ANGE

Mersi Mr Speaker.  Pou premye kestyon, Onorab.  Mon panse sekirite i en domenn spesyalize e I difisil pou nou kot Lakademi Touris, ler nou train en tour guide pou osi fer li esey vin en manm sekirite.  Sa ki mon ti a sizere se ki nou ankor, avek Minis pou Zafer Entern, se nou kontinnyen devlop sa partenarya travay ansanm, kot nou, nou asire ki kekfwa bann dimoun ki anmenn bann touris lo ekskirsyon i annan bann nimero direk pou nou kapab pas en mesaz vitman si i annan en keksoz ki arive.  Me ziska en degree, sa pe pran plas ozordi.  I mean, nou kot Minister Touris e Bord Touris, nou arive konnen preske imedyatman ler en keksoz in arive, nou alert lapolis imedyatman pou dir i annan en lensidan ki’n pran plas e se sa ki fer ki souvan lapolis i arive detekte lekel ki’n fer sa aksyon e kapab anmenn li devan Lakour pou zistis.  Mon konpran sa ki ou pe sey dir, me bann zenn demwazel ki pe anmenn en dimoun fer en ekskirsyon, mon pa vwar kote Mr Joubert anler kot lekot otelyer pou al montre li prezan fer bann kote sekirite.  Mon prefere ki nou travay etrwatman, ki Departman Zafer Entern i annan kouvertir neseser dan bann landrwa kot bann touris i pase pou nou tenir sa konteks.  I en profesyon sekirite, e ki li i annan sa an men, ki nou asire ki nou bann touris i kontinnyen ganny kouvertir neseser dan sekirite.  Mersi Mr Speaker.

MR SPEAKER

Minister.

 

MINISTER JOEL MORGAN

Mersi Mr Speaker.  Pou reponn sa dezyenm parti sa kestyon lo Tourism Police.  Mr Speaker, Tourism Police i en seksyon dan lapolis ki mon pe revwar, ansanm avek Komisyonner akoz mon krwar ki efikasite Tourism Police ozordi dan nou pei i pa a sa nivo ki mon ti akontan vwar li, fas avek sa logmantasyon, parey mon’n dir, parey mon’n donn statistik pli boner, lo nivo krim ki pe arive kont bann touris dan nou pei.  Bokou sa bann krim i arive lo bann lans e la nou vwar i annan serten defayans lo nivo Tourism Police akoz zot pa kapab metriz sitiasyon lo sa bann lans e zot pa kapab detekte bann dimoun ki bann kriminel, ouswa ki pe al plan bann aksyon kriminel kont bann touris lo bann lans.  Mon pa pe dir ki Tourism Police pa pe fer okenn travay, non.  I annan serten travay ki zot pe fer e i annnan serten dimoun ki’n ganny arete par Tourism Police, pe fer bann aksyon.  Me sa ki mon pe dir se ki lafason ki zot organize ozordi, lafason ki zot travay e lafason ki zot in ganny striktire, a mon avi, i demann revwar akoz nou bezwen nou en lafors, en prezans dan bann landrwa touristik kot nou annan nou en lapolis ki responsab pou tourizm ki bokou pli proaktiv e ki bokou pli aktiv osi, an term zot patrol ki zot fer, an term zot lapros ki zot fer e an term fer sa bann dimoun ki nou konsidere, ouswa ki nou konnen koman bann dimoun ki pou fer bann aksyon kriminel, an term fer zot sorti ouswa deal ek zot la lo sa bann landrwa kot zot ete.  Par egzanp, lo kote Beau Vallon, swit a en logmantasyon bann aksyon kriminel kont bann touris, bann vol, bann agresyon kont bann touris Beau Vallon, nou’n bezwen mobiliz bann lezot lafors lo lans pou ed Tourism Police pou fer sorti e pou retir tou sa bann dimoun ki nou konnen i bann dimoun ki pas zot letan vole ouswa harass bann touris lo lans.  Mon krwar parey mon koleg, Minis pou Tourizm in dir, nou bezwen a sa moman la, vin bokou pli strikt kont sa bann dimoun ki pe fer sa bann aksyon dan bann landrwa e lo bann lans kot zot pe target nou bann touris.  Tourism Police ozordi osi, i mank nonm dimoun pou travay ladan.  Napa ase dimoun pou kapab donn sa servis lo tou bann landrwa kot bann touris i kontan frekante e nou bann Seselwa osi i frekante, a sa nivo ki nou ti a kontan fer li.  So, la nou annan en travay pou fer, mon aksepte ki nou annan defayans ladan e sa ki mon oule dir avek sa Lasanble, se ki nou bezwen travay pou nou rektifye sa bann issues e revwar lafason ki Tourism Police i fonksyonnen.  Mersi.

 

MR SPEAKER

Onorab Vangadasamy.

HON SHERYL VANGADASAMY

Mr Speaker, bonzour.  Minis, bonzour.  Mon kestyon i pou Minis Entern, Minis Morgan.  Eski Minis i kapab enform sa Lasanble kan ki son Departman i anvizaze ganny sa bann nouvo resours imen ki pou asir vizibilite e prevansyon dan kominote e osi ki pe arive avek sa seksyon Community Policing dan lapolis.  Mersi Mr Speaker.

 

MINISTER JOEL MORGAN

Mr Speaker, mon’n deza fer en demann avek Minister Finans pou nou kapab recruit enpe plis dimoun pou anmenn isi pou ed nou dan travay ki nou pe fer.  Mon pe atann pou le moman konfirmasyon sorti kot zot lo kote bidzeter, pou nou kapab annan sa Bidze neseser pou nou kapab anmenn sa bann dimoun.  Sa bann dimoun nou’n fini idantifye zot e zot in pare pou zot desann e zot lo standby, osito ki mon ganny sa laprouvasyon, mon a kapab fer zot vini pou vin join lapolis pou vin ed nou dan sa travay.

Lo kote Community Policing Mr Speaker, ankor enn fwa la, mon krwar i annan bokou defayans lo kote lapolis, lo kote Community Policing.  An prensip, bann zofisye ki dan bann kordgard dan distrik i sipoze pran sa rol Community Policing.  Me sa ki nou vwar an pratik Mr Speaker, se ki sa pa pe marse.  I pa pe marse a sa nivo ouswa a sa degre sikse ki nou ti a kontan vwar li e i annan plizyer rezon pou sa ki mon pa pou al tro bokou an detay ladan, me enn parmi se osi en sistenm lorganizasyon bann kordgard e lorganizasyon bann dimoun ki pe travay dan kordgard, pou zot kapab al dan la kominote e fer patrol.  Ozordi napa kordgard dan Sesel ki kapab dir i napa transpor.  Zot tou zot annan transpor.  Ozordi napa kordgard dan Sesel ki pa kapab dir zot napa lekipman pou travay.  Zot tou zot annan lekipman pou travay.  Par kont, i vre ki dan serten kordgard i annan en mank dimoun, napa ase dimoun pou travay.  Sa i vre.  Me par kont Mr Speaker, malgre sa mon krwar ki bann polisye e bann Station Commander e bann Divisional Commander dan bann diferan rezyon, bann Regional Commander, zot kapab fer bokou plis pou fer ki lapolis i an kontak avek lakominote.  E la i en landrwa kot nou annan ankor serten fait, nou annan serten defayans ankor pou nou fer fas avek e kot nou bezwen revwar kimannyer sistenm Community Policing i pou marse dan lavenir.  Akoz se atraver Community Policing Mr Speaker, ki nou kapab vreman met lanmen lo sa ki pe arive an term krim, an term delenkans e an term bann lezot aksyon dan sa kominote.  Se atraver sa ki nou sistenm Criminal Intelligence pou kapab fonksyonn dan en fason efikas.  Alor Mr Speaker, la ankor enn fwa i annan bokou travay ki nou bezwen fer la e nou pe revwar, atraver bann rekomandasyon ki National Police Improvement Agency in met devan, ki mon’n koz lo la pli boner, i annan ankor travay ki nou bezwen fer pou enplimant sa bann rekomandasyon e fer sa sistenm Community Policing mars bokou pli byen.  Mersi.

 

MR SPEAKER

Onorab De Commarmond.

HON CHARLES DE COMMARMOND

Mersi bokou Mr Speaker.  Mr Speaker, mon kestyon i – sa Minis pou Zafer Entern.  Eski Minis i kapab eksplik nou Lasanble ki amelyorasyon konkret ki’n ganny fer kot lapolis pou fer sir ki zot aret dir lekel ki donn zot lenformasyon, ki zot servi pli byen sa fon information reward e kan lapolis pou vey pli byen nou bann bon zofisye, parey Gurcaz i gannyen pou ki zot reste dan sistenm, pou ede pou nou kapab konbat sa bann krim ek vol.  Mersi bokou.

 

MINISTER JOEL MORGAN

Mr Speaker, parey tou dimoun, mon okouran ki in annan serten ka dan lepase, kot lenformasyon konfidansyel ki en manm piblik i pase avek lapolis in ganny transmet avek sa bann dimoun ki sa manm piblik in fer sa konplent kont.  E sa i pa akseptab e mon kapab dir avek sa Lasanble ki i annan zofisye dan lafors ki’n ganny disiplinen tre severman ler nou’n kapab annan ase levidans pou prouve poudir tel ou tel dimoun dan lafors in al donn sa lenformasyon an deor, atraver en manm piblik ki’n pas sa lenformasyon avek li.

Parkont Mr Speaker, mon krwar ozordi sa sitiasyon pe amelyore.  Nou’n fer kler ki dan lapolis, napa plas pou bann tel keksoz parey breach of confidentiality e nenport ki polisye ki ganny atrape pou breach of confidentiality, otomatikman Mr Speaker, i pou ganny deal avek dan en fason sever, atraver disciplinary committee, menm i pou ganny dismiss si i annan serten gravite dan sa ki in fer.

Mr Speaker, lapolis pe etablir en lalinny ki nou pou donn lenformasyon lo la tre byento.  I pe etablir en lalinny ki pou en lalinny konfidansyel.  Setadir en dimoun pou call, son nimero pa pou ganny anrezistre lo sa lalinny ki i pe call e sa dimoun pou konpletman lib pou reste anonim e donn lenformasyon konfidansyel vizavi nenport ki lensidan ou nenport ki endividi ki’n vwar serten keksoz ki sa dimoun pe fer, ouswa serten aksyon ki pe ganny komet.  Mon krwar sa i ava ede osi pou ranforsi sa eleman donn lenformasyon an konfyans, an konfidans avek lapolis.

Parkont Mr Speaker, i pou osi atraver nou sistenm Criminal Intelligence, i pou osi annan bann zofisye ki dedicated pou anmas lenformasyon avek bann endividi lo en baz totalman konfidansyel.  E la mon konfyan ki sa bann dimoun ki nou pou selekte pou sa travay i bann dimoun ki pou annan sa eleman e sa entegrite.  Sa eleman konfidansyalite e sa entegrite neseser pou zot kapab fer sa travay.

Lo kote renimerasyon, peyman nou bann polisye, Mr Speaker mon ti a kontan fer resorti en keksoz.  Ozordi, scheme of service lapolis i dezyenm, apre scheme of service militer dan nou pei.  Napa en lot scheme of service lo kote bann lafors ki pli bon ki lapolis, apard ki militer.  E menm ler ou regard scheme of service bann lezot lenstitisyon, scheme of service lapolis ozordi dan nou pei, i rank parmi one of the best.  Nou ti fer sir ki ler nou ti pe rod resours pou lapolis, nou ti revised scheme of service, o menm moman ki scheme of service pou militer it ganny revised, e lapolis ozordi, zot annan zot en tre bon scheme.  Mon krwar ki nou pa kapab konpar en scheme of service lokal avek sa ki nou bezwen pey serten etranze pou vin travay dan nou pei lo en baz tanporer.  I pa mars koumsa Mr Speaker.  Nou pa kapab fer li vin lo menm nivo akoz sa bann dimoun zot vin isi pou en kontra lo en peryod fix, apre sa zot ale.  Zot in vin dan en lot pei, sorti dan zot pei pou vin travay kot nou.  I parey serten lezot sekter kot nou annan etranze pe travay Mr Speaker, menm dan sekter piblik, dan sekter prive, kot bann etranze i lo en diferan scheme saler ki nou bann Seselwa i ete.  E sa bann propagann ki pe ganny fannen, ki nou devret pey nou bann polisye a menm nivo ki nou pe pey bann Gurca par egzanp Mr Speaker, mon kapab dir pratikman, i pa posib pou nou fer li, akoz sa bann saler ki nou bezwen peye pou atrakte sa bann dimoun isi, pou vin travay isi e nou pe fer konpetisyon avek lezot pei ki bezwen Gurca osi, parey Sengapour, parey dan United Arab Emirates, parey dan bann pei Gulf, parey Langleter, parey dan bann lezotpei Malezi, Hong Kong partou, ozordi Mr Speaker, nou pa pe kapab compete si nou fer sa saler desann tro ba.  So, nou annan sa bann practical issues pou nou deal avek, ler nou pe sey recruit dimoun pou vin travay isi, pou ed nou.  E pa oubliye Mr Speaker, ki se nou ki bezwen zot led.  Nou ki bezwen zot isi dan nou pei pou kapab vin fer en travay pandan en peryod letan ki determinen, pou zot kapab ed nou tanporiz sa sitiasyon ki nou pe fer fas avek.

Alor Mr Speaker, mon ti a kontan petet met sa an perspektiv pou terminen ki lo sa kestyon saler, lapolis i annan li en tre bon scheme of service ki ti ganny revize i annan 2an pase.  Ozordi mon krwar ki i annan lespas pou kontinnyen improve scheme of service lapolis me a la limit, nou bezwen get resours finansye ki disponib dapre kapasite Gouvernman pou finans sa bann scheme of service.  Me sa ki mon kapab dir se o fir e anmezir ki nou kapasite i ogmante, en keksoz ki mwan, mon determinen pou fer se pou kontinnyen amelyor scheme of service nou bann dimoun pou kapab atrakte pli bon dimoun ankor pou vin travay dan lafors lapolis.  Mersi Mr Speaker.

 

 

 

MR SPEAKER

Ok, bon.  Malgre i pa konvansyon pou Speaker demann kestyon, mon ti oule zis demann Minis Entern, kwa ki i krwar i lakoz prensipal kriminalite parmi bann zenes e an vi ki partou i annan camera konmela, kwa ki pe anpes zot vin avek en progranm parey crime watch ki a permet sitwayen partisip dan deteksyon bann kriminel?

 

MINISTER JOEL MORGAN

Mersi Mr Speaker.  Mon krwar dan tou bann lannen ki mon’n dan sa Lasanble pou vin reponn kestyon, i en loner pou mwan reponn kestyon nou Speaker e mon remersye ou pou sa Mr Speaker.

Mr Speaker, prensipal lakoz kriminalite dan nou pei ozordi i kler.  Son lakoz se drog.  I annan sitan kantite nou bann zenn manrmay ki annan sitan potansyel pou lavenir dan nou pei, pou zot fer kontribisyon valab dan nou pei pou lavenir ki malerezman in tonm dan sa sitiasyon drog.  E ler Prezidan i koz lo vin bokou pli sever kont bann dealer drog, mon krwar nou tou Mr Speaker nou san poursan par deryer li an term bann mezir ki bezwen ganny pran pou deal ek sa bann drug dealers.

Mr Speaker, sa bann zenn manrmay zot in tonm zot dan en sitiasyon kot zot napa lespwar.  Zot napa lavenir devan zot e sel keksoz ki preokip zot depi ler zot leve bomaten ziska ki zot al dormi aswar, se kot mon pou ganny larzan pou mon prosen fix e ler ou fer en analiz Mr Speaker, an mwayenn ou kapab pey Rs300, Rs400, Rs500, Rs600 par fix.  E en dimoun i bezwen, depandan lo son nivo adiksyon, dapre sa ki mon ganny dir.  En dimoun i bezwen petet 2, 3, menm 4 par zour.  So, kimannyer ou finans sa?  Kimannyer ou finans Rs1200, Rs2000 par zour pou ou adiksyon?  E la mon krwar se la i kler.  Kote sa bann kriminalite, sa fleo krim ki pe afliz nou sosyete ozordi i sorti?  E mon krwar Mr Speaker, se la kot nou progranm Renesans Sosyal avek tou bann Lazans konsernen, bann Lazans Sosyal, bann Lazans ki responsab pou lalit kont drog, bann Lazans ki responsab pou lord ek sekirite dan nou pei i bezwen kontinnyen travay tre dir, tre for pou nou kapab ed sa bann dimoun ki’n tonm dan problenm drog, me osi lit kont bann dimoun ki pe deal dan drog.

E Mr Speaker, i en keksoz ki mwan personnelman ler mon regarde, i tre trakasan pou lavenir nou pei e mon ti a kontan, parey ozordi nou konnen i lazournen enternasyonal pou lalit kont drog, mon ti a kontan fer en lapel avek tou bann dimoun ki pe deal dan drog ozordi dan nou pei, silvouple, silvouple re-konsider sa ki zot pe fer e revwar sa bann aksyon ki zot pe fer pou detri nou lasosyete, akoz napa fason ki nou pei i kapab kontinnyen al de lavan si zot kontinnyen fer sa bann keksoz pou detri nou bann zenn, ki dan nou lasosyete ozordi.  Napa lavenir dan sa keksoz ki zot pe fer e napa lavenir pou nou pei, atraver bann keksoz ki zot pe fer.

Mr Speaker, si nou kapab met sa problenm drog anba kontrol, mon garanti zot ki nivo kriminalite dan nou pei pou desann.  Pou desann drastikman e se la kot Prezidan ek Gouvernman, atraver bann diferan linisyativ ki nou pe fer, nou pe target sa bann dimoun ki pe deal dan drog dan en fason, parey mon’n dir tre sever.  E mon pou demann tou dimoun, Manm sa Lasanble e tou nou sitwayen an zeneral pou pran en pozisyon zero tolerans.  Zero tolerans kont bann dimoun ki pe deal dan drog, ouswa ki pe ankouraz bann lezot zenn pou antre dan sa serk visye, kot zot komans konsonm drog atraver, mon a vann ou drog, ale al vann pou mwan, mon a donn ou enpe ou a konsonmen.  Mon krwar se sa lafason ki i pe ganny promouvwar dan nou pei ozordi e en pe partou dan nou bann kominote, nou vwar sa pe arive.  So, nou bezwen nou tou ansanm, parey mon koleg Minis pou Tourizm in dir taler, nou bezwen nou tou ansanm, koman en kominote, koman en pei, tou bann sitwayen, pran en zefor kolektiv pou konbat sa problenm akoz si non sa problenm pou overtake nou.

Mr Speaker, pou reponn ou dezyenm parti kestyon lo kote bann cameras ek crime watch, mon krwar in ler, dan nou pei ozordi, pou nou regard seryezman sa kestyon crime watch dan nou bann kominote.  I pa neseser ki nou al re-envant sa ki bann lezot pei in deza met an plas, e ki pe mars byen.  I annan bann model dan plizyer pei, enkli bann pei ki obor nou dan Losean Endyen kot sa pe marse dan en fason efektiv.  E mon krwar nou bezwen enroll nou bann sitwayen pou ed lapolis e pou ed bann lezot lafors ki pe konbat kont krim.  E atraver sa sistenm crime watch Mr Speaker, mon krwar ki sa linisyativ i pou ed nou lo kote deteksyon, prevansyon e lentelizans bann aksyon kriminalite dan nou pei.

Mr Speaker alor swit a ou kestyon, mon krwar ki en keksoz ki nou bezwen vwar seryezman se kimannyer nou kapab enplimant sa, kimannyer nou kapab fer li marse e kimannyer nou kapab asir sa konfidansyalite lenformasyon atraver bann progranm crime watch dan nou pei.  So, i en keksoz ki mon ava pran an men e mon ava raport a Lasanble a en moman pli tar, lo bann linisyativ e bann aksyon ki nou pe pran dan sa eleman crime watch ki nou pe koz lo la.  Mersi.

 

MR SPEAKER

Bon, mon krwar nou ava pran en break ziska 11.30 kot nou ava rezwenn pou nou pran Bills, e mon ava ekskiz le 2 Minis parmi nou e remersye zot pou zot prezans bomaten.  Mersi bokou.

 

(Break)

MR SPEAKER

Bon apre diskisyon ki’n annan avek le 2 leaders e osi Minis Finans, in ganny met okouran bomaten, nou pou pran sa Bill lo VAT avan sa enn lo Public Debt.  Donk alors mon pou envit Leader of Government Business pou en Motion for second reading.

HON MARIE-ANTOINETTE ROSE

Mr Speaker mon move ki sa Bill i ganny lir en dezyenm fwa.

 

HON ANDRE POOL

Mr Speaker Mosyon i ganny segonde.

 

MR SPEAKER

Mon ava envit Minis pou prezant son Bill lo VAT.

 

MINISTER PIERRE LAPORTE

Mr Speaker, Onorab Leader of Government Business, Onorab Leader Lopozisyon, Onorab, Msye e Madanm.

Dan konteks nou reform makro ekonomik ki nou ti lanse an 2008 enn bann eleman kle sete reform dan nou sistenm tax.  Nou’n deza fer en progre enportan dan sa direksyon, tel ki lentrodiksyon Income Tax ki ti ranplas kontribisyon Sekirite Sosyal e rediksyon dan nivo tax lo profi swa Business Tax.

Dan sa menm koneks Lasanble Nasyonal ti vote an 2011 pou lentrodiksyon Value Added Tax Act ouswa Tax lo Valer Azoute.  Mr Speaker VAT I enn parmi plizyer tax ki ganny aplike lo konsomasyon parey GST menm, me sa 2 sistenm zot kantmenm annan serten diferans enportan e toulede zot annan serten lavantaz e dezavantaz ler nou konpar enn ek lot.

An mezir ki sistenm taksasyon in evolye dan lemonn, deplizanpli bann pei in ranplas GST par VAT.  Enn bann lavantaz enportan ki VAT I annan konpare avek GST e ki sistenm GST I ganny karakterize par sa fenomenn ki an Angle nou apel cascading – set a dir en prodwir I ganny takse plis ki enn fwa.  Parkont sistenm VAT I evid lefe cascading akoz tax I ganny aplike selman enn fwa e a sak staz prodiksyon ou lavant e akoz prodikter I kapab ganny ranbourse pou sa porsyon ki’n deza ganny takse.  Sa I fer ki si I ganny aplike dan son konteks apopriye VAT I an prensip en sistenm ki pli efikas ki GST dan sa sans.  Me an dizan sa Mr Speaker, plizyer pei enkli bann gran pourvwar ekonomik tel ki Leta Ini, Lanmerik in deside pou pa adopte VAT e plito reste avek sistenm GST. Sa I akoz GST I osi annan serten lavantaz konpare avek VAT.

Enn bann gran lavantaz GST I ki en sistenm bokou pli senp pou administre ki VAT. Sirtou dan ka Sesel ki en lekonomi baze prensipalman lo servis e komers, lefe cascading pa sitan enportan parey dan en lekonomi baze plito lo prodiksyon e transformasyon.

Nou leksperyans in demontre ki GST I en sistenm tre bon e tre efikas pou Sesel, par lefe ki GST I ganny kolekte prensipalman lo Por e Airport sa I fer nou sistenm administrativman tre efiskas.  Alor menm si lo en kote VAT I annan son lavantaz lo GST akoz I evit cascading e I permet biznes ganny ranbourse, I osi pli konplike pou administer e I demann plis resours lo lapar biznes ensi ki lotorite ki responsab pou kolekte reveni.

Mr Speaker akoz bann konpleksite ki VAT I annan, Gouvernman ti donn en dele letan plis ki 1an pou son lenplimantasyon avek lide pou donn biznes ensi ki Seychelles Revenue Commision sifizaman letan pou prepare.  Se akoz sa ki lenplimantasyon ti ganny progranmen pou 1 Zilyet sa lannen.  Me menm si bokou preparasyon e sansibilizasyon in ganny fer, en gran parti kominote biznes in dan sa bann dernyen mwan eksprim bokou konsern lo lentrodiksyon VAT.  Sa bann konsernen in ganny eksprimen dan plizyer forum enkli dan National Economic Council kot tou seksyon sekter prive I ganny reprezante e dan bann meeting direk ki Minister Finans in fer ek bann sekter prive.  Dan sa bann meeting tou sekter an zeneral enkli Sekter Tourizm, Telekonm, Konstriksyon, Komers, Servis Profesyonnel, tel ki kontab ek bann oditer, zot tou zot ti eksprim konsern lo VAT. Sa bann konsern I enkli premyerman ki biznes an zeneral pa ankor byen konpran fonksyonnman sistenm VAT e dezyenmman ki operasyonnelman bokou biznes e zot sistenm tel ki sistenm teknolozi lenformasyon pa’n pare.  Me lot konsern mazer ki’n plito ganny eksprimen par piblik an zeneral, se ki lefe lentrodiksyon VAT pou annan lo nivo pri lavi?  I tre probab ki pou annan en serten logmantasyon dan pri lavi, menm si I pa toutafe kler ki nivo logmantasyon pou ete.

Mr Speaker parey Prezidan Michel in eksprimen fortman a plizyer repriz, nou Gouvernman I enn ki pran konsern sekter prive ensi ki konsern nou popilasyon tre serye.  I dan sa lespri solidarite, konsiltasyon e dyalog avek bann stakeholders e prenan kont konsern nou popilasyon lo pri lavi, sirtou bann ki pli vilnerab ki Gouvernman in deside pou postponed lenplimantasyon VAT.  Gouvernman I santi ki I dan lentere tou parti konsernen ki swa biznes, piblik an zeneral, Seychelles Revenue Commission e Gouvernman limenm, ki I pou pli pridan pou nou pran enpe plis letan pou nou pran enpe plis letan e fer analiz aprofondi an konsiltasyon avek nou bann partener avan avek lo en desizyon definitiv lo si nou pou finalman adopte VAT ouswa si nou pou reste avek sistenm GST.  Sa I a fer ki ler sa desizyon I ava ganny pran nou tou nou ava pli konfortab avek konsekans sa mezir e ki tou parti konsernen I a ava ganny ase letan pou byen prepare.

Mr Speaker mon isi ozordi alors pou demann nou Lasanble Nasyonal pou siport sa lamann ki pe ganny propoze pou report lenplimantasyon VAT.  Sa lamannman I a donn Minis Finans pourvwar pou li kakpab otoriz ladopsyon sistenm VAT si dan lavenir Gouvernman I santi ki sa pou dan lentere Sesel e ki I annan en konsansis kler lo sa size.

Mr Speaker mon pou alor termin mon lentervansyon lo sa size an demande Lasanble pou adopte sa Value Added Tax Amendment Bill, 2012. Mersi.

 

MR SPEAKER

Bon deba I ouver.  Okenn?  Onorab Volcere.

 

HON MARC VOLCERE

Mersi Mr Speaker.  Bonozur Minis, bonzour tou Manm.  Mr Speaker mon ti a kontan dir de mo lo sa amannman.  Mr Speaker depi 2008 ler nou ti komans nou reform Gouvernman ti vwar nesesite pou anmenn plizyer lalwa lo tax, ti annan bann lalwa ki ti nouvo e lezot sete bann lamannman pou kapab fer zot vin azour e reponn a sa moman ki nou ti pe antre ladan.  Ti osi en priyorite Gouvernman pou armoniz bann lalwa lo tax e fer zot vin akseptab sirtou parmi lakominote biznes.  Bann diferan lamannman sete pou fer sa ki bokou I kontan dir, fer laplenn vin nivo – kot bann biznes dan menm sekter nou lekonomi pa ti vwar zot pe pey diferan tax. Parey nou tou nou konnen tax I en fason ki Gouvernman I servi pou kapab anmas reveni e I sa fason atraver ki I ganny resours pou li fer marse son bann program sosyal tel ki donn lasante, ledikasyon pou narnyen, fer lakaz, fer semen, donn lasistans finansyel bann ki dan bezwen.

Mr Speaker I osi atraver en bon sistenm tax ki Gouvernman I ganny larzan pou donn nou bann dimoun aze, bann dimoun ki’n pran zot retret en pansyon oubyen sa ki nou apel en sekirite.  Alor I enportan ki bann dimoun ki bezwen kontribye atraver tax I pa vwar zot pe ganny penalize.

Mr Speaker I osi annan serten panik letan ki Gouvernman I anonse ki I pe al entrodwir en nouvo tax. I annan plizyer komanter ki ganny fer parfwa negativman, pou fer senm lafreyer parmi nou pep.  Mr Speaker, si mon pou retourn lo sa nouvo tax ki p e al ganny entrodwir aparti le 1 Zilyet sa lannen, li osi I pou annan en leksepsyon.  En kantite in ganny dir lo konsekans lenplimantasyon sa tax.  Kan sa Bill ti ganny prezante an 2010 dan nou Lasanble, ti annan plizyer konsern ki ti ganny souleve e enn sete – ki poursantaz lentere ki pou ganny aplike e dezyenmman son lenplimantasyon.  Vis Prezidan Faure sa letan ki ti Minis Finans ti donn nou lasirans ki pou annan bann prezantasyon ki pou ganny fer e osi lesplikasyon kontinnyel ki pou ganny donnen par Seychelles Revenue Commission ek son Minister avek bann diferan sekter biznes e pep Seselwa an zeneral pou ki zot a mye konpran sa tax.

Mr Speaker wi, in annan bann tel demars ki’n ganny fer par bann lotorite konsernen me I kantmenm aparan ozordi ki I annan ankor bokou konfizyon lo sirtou lenplimantasyon VAT. Petet bann lorganizasyon konsernen pa ti pe met bokou lenportans lo son lenplikasyon oubyen keksoz, I pou vreman konplike e konfize.  La kot nou’n tande parey Minis in dir nou nou Gouvernman in bezwen pran en dezisyon pou sispann dat son lenplimantasyon.

Lo non pep Seselwa mon ti a kontan remersye Prezidan ek son Gouvernman pou etre brav pou pran sa desizyon.  Sa desizyon in anmenn en gran soulazman pou nou bann konsomater e lakominote biznes.  Sa desizyon Gouvernman in ganny byen akeir par lamazorite pep Seselwa.  La ki nou pe vot lo sispansyon lenplimantasyon sa lalwa mon demande ki bann konsernen I kontinnyen fer bann letid e analiz pou vwar si vreman VAT I neseserman sa tax ki meyer pou nou pei.

Mon sizere ki bann resers I kontinnyen ganny fer pou sirtou avek bann pti lekonomi parey nou pou vwar ki kalite tax ki pou adapte avek nou sirkonstans e ki pou napa problenm pou enplimante.  Bann ki responsab I bezwen kontinnyen edik nou pep pou zot kapab mye konpran lenpakt ki si zanmen VAT I ganny enplimante dan Sesel pou annan lo zot.  I annan ki dir pri komodite dan magazen pou ogmante e Minis in konfirm sa.  Si wi, petet lepep ti ava kontan konnen par konbyen poursantaz.  Ki bann mekanizm ki pou ganny met an plas pou asire ki bann marsan pa profit lo lentrodiksyon sa tax pou fer monte pri lo komodite dan magazen?  Bann diskisyon I bezwen kontinnyen avek lakominote biznes pou kontinnyen eksplik zot lo fason ki VAT pou ganny enplimante e pou osi ganny zot kontribisyon e zot lopinyon.  Diskisyon I bezwen kontinnyen ganny fer avek bann tax agent e accounting firm pou zot osi konpran pli byen kimannyer zot pou antreprann zot travay e kimannyer zot pou advise zot bann dimoun ki zot travay avek.  An dot mo Mr Sepeaker I bezwen annan en sansibilizasyon total pou ki lepep Seselwa I pli byen konpran ki kalite tax ki Gouvernman I annan lentansyon enplimante e ki benefis I pou anmennen pou sak endividi e Sesel an zeneral.

An terminan Mr Speaker mon pou demann nou tou pou nou osi zwe nou rol e donn en koudmen anmenn sa bon mesaz atraver nou kominote.  Avek sa de mo Mr Speaker mon pou siport sa lamannman ki devan nou ozordi ki pe demande pou anvoy dat ki VAT I sipoze komanse, ki ti sipoze le 1 Zilyet sa lannen pou en lot dat ki a ganny determinen plitar par Minis.  Mersi bokou.

 

MR SPEAKER

Onorab Hoareau

 

HON HERBERT HOAREAU

Bonzour Mr Speaker, bonzour tou bann Onorab e en tre bonzour spesyal pou tou bann zabitan St Louis.

Mr Speaker tax e VAT sa se larzan e ankor larzan, larzan ki nou pep pe napa dan son portfey.  Mr Speaker lepok in sanze, divan dan lavwal bato I for e parfwa tro for ki fer nou bato pant enpe plis lo kote e sa I fer nou ganny tro vites, me nou bato I bezwen ariv lo bon por.  Mr Speaker nou kaptenm fodre redres nou bato menm si lafors divan I for ki nou pep a kapab ganny en lavi stab e soutenab.  La koman en mekannisyen lo sa bato, mon pou dir avek nou kaptenn si divan I for pa kanmi pou fer desann fok pou stabiliz nou bato.

Mr Speaker en tax, 2 tax, 3 tax dan diferan laform e non I apel en tax kantmenm e sak tax ki nou azout lo nou pep I en traka an plis pou zot latet.  VAT mon pou koz lo la dan son bon kote e osi dan son move kote e apre mon pou donn mon lopinyon baze lo soufrans mon pep dan mon distrik ki osi form par nou kapital Victoria.  VAT sirtou dan nou pei dapre bann eksper finansye I bon, I anmenn plis revenir tax ki ede fer marse nou lekonomi, I fer nou pei pli byen e rann li pli for.  Me sa laform tax ki nou apel VAT se konsomater ki pou peye avek en to 15 poursan lo tou sa ki zot aste a leksepsyon serten prodwir tel ki pwason, lavyann, legim, fri e lezot keksoz debaz ki ti napa GST lo la.  Dan sa lalinny nou pep pou benefisye me pa gran soz.  Normalman sa tax ki nou apel VAT pou pli konpetan dan son rol e byen etale e Seychelles Revenue Commission pou kapab idantifye plis bann foder tax baze lo VAT ki zot peye e dan sa lalinny zot panse ki zot pou ranmas enpe plis reveni.

Normalman dapre bann eksper finansye pou kapab kontrol plis bann enportater kot bann marsan pou ganny rann GST. Me mon pa konpran ki zot ti pe fer tou sa letan e les bann marsan file.  Mwan sa bann ki dir nou sa, I merit retourn Liniversite Sesel.  Dapre bann eksper finansyel bann marsan pou oblize deklar lo revenue sheet e la Seychelles Revenue Commission pou kapab kalkil zot turn over e vwar si zot in pey tax apopriye alafen lannen.  La mon demann mon lekor si en marsan I deklar ankor sa ki fo, eski nou pou entrodwir en VAT plus ki ava en lot tax ankor?  Pou le moman preski tou marsan pe deklar pert e nou tax rate I reste touzour pli o dan nou rezyon e sa pe fer nou vin pa konpetitiv.

Lo lot kote Mr Speaker, mon pou aret en kou e mon pou tourn mon larou a lanver.  Mon’n aprann en pti keksoz avek enn mon gran tonton ki’n fer lager mondyal e in toultan dir mwan ki letan en keksoz pa bon devan ou, ou pran se qui appartien a Cesar e ou retourn li avek Cesar.  VAT pou mwan set en tax ki pou annan tre pe larzan dan sistenm Gouvernman avek bokou plis papras nou pou bezwen anploy bokou plis dimoun pou gard sa bann rikord.  Avek modernizasyon computer, nou pou vwar nou pe servi plis papye e bokou latet fermal kot taler nou pou demann pou fer vin en eksper etranze.  Avek tou sa zistwar mon pou azout lenflasyon dan pri lavi e la mon pou donn en senp legzanp Mr Speaker.  En marsan ki enport dile ki kout Rs10, I pou pey en GST lo por 15 poursan.  Sa 15 poursan GST pou ganny rann avek sa marsan si I en bon marse, si I pa pey son tax I riske pa gannyen.  Sa marsan pou met en market 20 poursan avek rezerv ki tou marsan I fer menm market ki pou sa dile ariv Rs2.30 an plis.  La sa marsan pou azout 15 poursan VAT lo sa dile e la sa marsandiz pou ariv Rs13.80 dan en magazen normal kot napa cartel e napa trik komers.  Lo sa dile Rs10 lenflasyon pou 0.57 cents ki dan larealite mon senserman krwar ki lenflasyon pou pli o akoz sakenn pou fer son zafer parey nou tou nou konnen e sa pou tap malere pli for dan zot pos e parfwa tir en bar dipen dan labous en zanfan.

Koman mon koz lo lenflasyon Mr Speaker, les mwan rann omaz a en Msye ki’n annan en gran plas dan mon leker.  Mon swete ki bann ki servi calculator pou kalkil sif i ekout mwan tre byen e ki ou lofis Mr Speaker i met tou sa ki mon dir a la porte piblik e bann ki konsernen.  Lenflasyon dan en pei i normal.  Lenflasyon tro o i pa bon e okenn azisteman artifisyel ki ganny fer pou rann lavi nou pep pli dir e lazwa lo zot vizaz pou disparet.  En Msye ki fek kit nou Dimans in anmenn avek li en souvenir byen terib.  In les dan mon leker en portre tre byen fidel e sa portre, mon pa anvi vwar li lo okenn vizaz personn ki apel en Seselwa.  Mon vwar mwan ozordi dan en soufrans terib ki fer mwan realize ki mon pep pe soufer e sa menm soufrans parfwa i a lekstrenm e i dan lakour bokou fanmiy.  Mon dir sa akoz serten mezir pou afekte nou pep plis e pou annan bokou soufrans lo nou pep si nou pa fer atansyon.  I annan bann otelye ki pe demann ki VAT i vin an fors pou zot kapab annan plis benefis.  Mwan mon pou dir sorry, trouv en lot solisyon.  Si i annan sakrifis pou fer, nou tou nou bezwen fer, swa ou blan, ou nwanr, ou ris, ou pov, sakrifis i pou nou tou.  I annan ki dir ki VAT se IMF.  Mwan mon oule dir zot IMF pa en Bondye.  Sesel i nou pei e nou kapab gard GST, annou modifye GST a nou fason pou aziste avek tou biznes.  En legzanp, en GST 19 poursan lo serten prodwi ki ganny enporte e fer tou dimoun pey zot par dan sa pei i pou anmenn en pli bon rezilta ki en VAT ki nou pou annan plis depans lo la.  sa a redwir nou kou birokrasi e permet Gouvernman anmas menm kalite reveni ki VAT, me avek plis rannman.  Alor, avek kouraz e disiplin, annou fer monte nou paviyon.  Mersi Mr Speaker.

 

MR SPEAKER

Onorab Pierre.

 

 

 

HON DAVID PIERRE

Mersi Mr Speaker.  Mr Speaker, an 2008 Sesel ti anbark lo reform ekonomik.  E enn bann pli gran laspe sa reform sete sa laspe tax.  Gouvernman finalman, an konsiltasyon avek son bann partener tel ki IMF ti deside ki nou bezwen entrodwir VAT e ti fer nou kler poudir VAT pou vin an aplikasyon apartir serten dat ki ti Zilyet 2012.  Ozordi Minis i vini i dir avek nou koumsa poudir nou bezwen postpone lenplimantasyon VAT, akoz a sa moman la pankor kler as to ki lenpak vreman VAT pou annan lo lekonomi an zeneral e i egalman kler, baze lo konsiltasyon avek the private sector, i egalman kler ki pei pankor pare pou zot entrodwir VAT.  E ozordi mon lentervansyon pou baze en pti gin lo lefe ki pei pankor pare.

Mon konpran e mon aksepte ki si konsiltasyon in ganny fer avek the private sector ki an prensip i moter nou lekonomi, mon krwar i normal ki Gouvernman i pran an konsiderasyon lavwa the private sector.  Sekter prive in dir, pankor ler, Gouvernman in reazir i dir mon dakor, e alors VAT in ganny postpone.  I enportan pou nou konpran ki VAT i tre konplike.  I require, demann en kantite preparasyon avan ou kapab met li an aplikasyon.  Mon panse poudir sekter prive lo son kote i bezwen fer serten preparasyon e Gouvernman i egalman bezwen fer serten preparasyon an relasyon avek bann prosedir ki devret ganny met an plas pou permet nou koman en pei, manage VAT dan lafason ki i devret ganny manage.  Alors, si sekter prive pe dir poudir zot pankor pare, zot pankor kapab met an plas tou bann prosedir, bann businesses dan Sesel pankor vreman konpran kimannyer pou enplimant, kimannyer pou administre VAT, mon krwar i toutafe normal ki nou postpone li e nou anvoy li pou plitar.  Me mon problenm avek sa Mr Speaker i se ki an tan ki Gouvernman i santi ki i ankor en problenm, mon egalman krwar ki a lavenir, pou nou donn konfyans Seselwa, pou nou donn konfyans bann envedtiser, pou nou donn konfyans tou bann dimoun, tou bann partener ki annan pou fer avek lekonomi sa pei, mon krwar i enportan ki letan Gouvernman i pran en desizyon an relasyon avek nou sitiasyon ekonomik dan sa ka, avek lenplimantasyon tax, mon krwar the Government i bezwen a lavenir ganny li right.  Si Gouvernman in dir avek the business community, in dir avek lepep Seselwa prepar zot, lala sa ki mon annan pou zot e sa pou ganny enplimante tel dat, bann envestiser etranze in ganny anonse zot osi ki lala dat ki VAT pou ganny mete an pratik e Gouvernman i santi poudir, wi mon bezwen met VAT, then i bezwen ganny son timing right a lavenir.

Minis in fer sorti en pwen ki konfiz mwam em pti gin.  Pa ki son pwen pa kler, son pwen i kler li, me pou mwan i eski vreman Gouvernman, apre tou son letid, apre tou sa letan ki in gannyen, apre tou son resers, apre tou son bann negosiasyon ki in fer avek IMF e avek bann lezot partener, eski Gouvernman pou enplimant VAT?  Minis in dir nou poudir GST par egzanp i fasil pou administre, me Selman GST i annan en cascading effect.  Minis in dir avek nou poudir VAT i difisil and therefore i kit dan mon lespri en dout as to whether VAT pou ganny enplimante, oubyen nou pou kontinnyen avek GST?  Mon krwar i pou neseser pou Gouvernman pran sa desizyon, pran li vitman e letan sa desizyon in ganny pran, en keksoz ki Gouvernman pa’n fer ase, si par egzanp i deside dir ok, mon krwar nou pou go ahead avek VAT.  Gouvernman i bezwen fer sir ki tou bann biznes i konpran kisisa VAT, konsomater i konpran kisisa VAT, e sansibilizasyon lo en nivo ki pou permet bann biznes kapab met an plas bann prosedir pou li manage byen son VAT, sa i bezwen ganny fer.  Akoz otherwise nou pou kontinnyelman vwar nou dan en sitiasyon kot nou pou postpone, nou pou postpone, nou pou postpone e nou pou postpone e sa pou annan en lenpakt lo lekonomi akoz i pou annan en lenpakt lo biznes, i pou annan en lenpakt lo bann desizyon ki bann envestiser pou pran an relasyon avek bann lenvestisman dan nou pei.

Mr Speaker, mon pou profite pou mwan koz en kou lo pri lavi.  E mon anvi demann Minis son leksplikasyon lo la.  Mwan, mon pa en dimoun ki annan gran konesans lo bann sistenm tax.  Me mon konpran en pti gin matematik, so mon pou demann Minis enpe leklersisman.  Si Minis i vini i dir avek nou i riske annan logmantasyon dan kou lavi, i riske annan logmantasyon par egzanp dan bann komodite de baz, si nou enplimant VAT as compared to si nou kit GST an plas.  Kekfwa kestyon ki mon ti ava kontan demann Minis se ki premyerman, mwan mon pa anvi vwar Seselwa soufer plis ki i deza pe soufer.  Deza nou konnen poudir mwayenn saler i pa permet en fanmiy de baz, en fanmiy 4, 5 dimoun pou zot kapab fer 2 bout zwenn, nou konnen ki difikilte ki lafanmiy Seselwa pe fer fas avek, nou konnen ki difikilte ki bokou bann dimoun ki pe fer biznes pe fer fas avek e alor mon pa anvi ki nou entrodwir en keksoz ki pou burden Seselwa e burden biznes plis ankor.  So, kestyon i se ki si nou pou entrodwir VAT a en serten to, a en serten nivo, a en serten poursantaz konpare avek poursantaz ki GST i mete lo bann biznes e lo bann dimoun an zeneral, eski i annan en posibilite ki si demen nou deside met VAT, eski i annan en posibilite pou nou entrodwir sa nivo VAT, kot at the end of the day, letan ou get lenpakt ki i pou annan lo komodite, lo biznes, son lenpakt basically, to start with pou cancel out sa lenpakt ki GST i annan.  Mon pa krwar ki si nou pou met VAT nou bezwen absoliman met li at a rate, oubyen a en poursantaz ki nou GST i lo la ozordi.  So, basically pou mwan i se ki si Gouvernman i deside e go ahead avek VAT ek tou son konplikasyon, akoz Gouvernman i santi poudir malgre son konplikasyon i annan serten benefis, kekfwa mon a demann Minis pou zot rod the right rate pou komans avek, pou ki son lenpakt ki i annan lo biznes e lo konsomater i pa negativ.  An dot mo, son lenpakt i cancel out sa lenpak ki GST i deza annan lo bann biznes e lo bann dimoun.

Dezyenm keksoz kekfwa ki Gouvernman i bezwen fer, se ki pou anpese ki lenpakt VAT i vin negativ lo biznes e lo konsomater e la mon vreman enterese avek konsomater, mon krwar i neseser pou Gouvernman vwar bann lezot areas kot nou kapab servi pou nou mitigate lenpakt negativ ki sa tax i kapab annan lo pri lavi e lo Seselwa an zeneral.  Mon krwar at the end of the day, sa ki pou enportan pou Gouvernman i se ki zot vwar the big picture, get li dan son totalite, aziste pou garanti ki silvouple, nou pa met ankor en burden ekstra lo Seselwa.

So, pou mwan konklir mon ava dir avek Minis poudir wi, si sekter prive i santi poudir zot pankor pare, si sekter prive i santi poudir pou annan plis benefis pou sa sekter e pou Sesel an zeneral si sa i ganny postpone, mon satisfe e mon pou siporte ki sa i ganny postpone.  Si egalman Gouvernam i santi poudir wi, nou osi koman en pei, Minister Finans e bann lezot lazans ki pou administre sa tax lo non Gouvernman, zot santi zot pankor pare e zot bezwen anvoye, wi mon aksepte e mon dakor e mon pou siporte.  Me lo lot kote mon pe demann zot pou ki avan zot vin avek, revwar the big picture, revwar the whole sistenm ekonomik e vwar kimannyer nou kapab mitigate in the event ki zot santi ki sa to ki zot pou mete pou annan en lenpakt negativ lo Seselwa, lo biznes, lo konsomater, mon krwar poudir zot devret asize, reflesir e come up with the right rate e byensir vin avek bann mezir korektiv dan bann lezot areas pou ensure ki nou mitigate e nou egate sa lefe ekstra negativ ki sa tax pou annan lo Seselwa and on the business community.  Mersi Mr Speaker.

 

MR SPEAKER

Onorab Vangadasamy.

 

 

HON SHERYL VANGADASAMY

Mr Speaker, Manm Koleg Onorab, lepep Seselwa, bonn apre midi.  Sa lamannman deva nou ozordi i enn ki senp.  I enn ki pe demann sa Lasanble pou anvoy sa dat lenplimantasyon lalwa VAT ki ti pase an 2010, ziska moman letan apropriye, determinen par Minister Finans.  Pou bokou nou Seselwa ki’n swiv e ki pe swiv prosesis reform depi 2008, nou bann progranm IMF e lobligasyon ekonomik, sa lanons i en soulazman.  Pou bokou nou Seselwa ordiner, sa reform dan sistenm tax i enn ki vreman konpleks.  I demann bokou leksplikasyon e bokou ledikasyon.  Mon konsyan ki i annan bokou ki’n ganny fer lo sa nivo me i reste ankor bokou ki merit ganny fer.  Nou sekter prive i merit o fe e konfortab letan lenplimantasyon sa reform, dapre nou sistenm tax e dapre nou proze de lwa.  Nou bann Seselwa ordiner i pankor konpran la baz e rezon det deryer sa reform dan nou sistenm tax.  Nou lepep i bezwen o fe lo ki fason ki sa reform dan sistenm tax pou fonksyonnen.  Nou lepep Seselwa i bezwen konsyan praktikalite annan VAT si i neseser e kan i neseser e lenpakt lo pri lavi e lavi kotidyen nou pep.  Sanzman dan nou lekonomi i presipit sanzman dan nou proze de lwa.  Sanzman dan nou fason fer.  Pou asir en lekonomi viab, dinamik e en sekter prive pli partisipativ.

Mr Speaker, keksoz i sanz de zour an zour.  Sitiasyon 2010 e sitiasyon 2012 in anmenn en kantite sanzman e tou keksoz i relativ.  Napa en sistenm ki parfe.  Tou keksoz i annan son letan e i merit bezwen ganny adapte e nou Gouvernman i bezwen adapte avek sanzman e modifye nou plan inisyalman.  Mon pe lans en lapel avek nou sekter prive.  Annou sezi sa letan pou nou organiz nou, pou prepar nou byen pou nenport ki envantyalite ki kapab arive.  Annou sezi sa loportinite pou vin sa vre moter nou lekonomi.  Nou Gouvernman pe fer bokou pou ki nou sekter prive i annan bann kondisyon e en lanvironnman sen pou lentere biznes pou drive lekonomi nou pei.  E retardasyon lenplimantasyon VAT i enn sa legzanp.

Mon pe osi lans en lapel avek lepep Seselwa, en Gouvernman responsab i bezwen kolekte tax.  Tax i en metod ki Gouvernman i ganny son reveni.  Sa menm reveni ki ganny distribye dan Bidze lafen lannen pou asir kontinnyel ledikasyon gratwit, lasante de baz, en rezerv dan Labank Santral, konstriksyon lakaz e plizyer lezot keksoz ankor.  Ozordi lepep Seselwa osi i bezwen pran nou responsabilite koman sitwayen pou edik nou lekor lo kwa ki pe arive dan nou pei, lo bann sanzman dan lekonomi nou pei e zot konsekans e bann mezir ki Gouvernman i bezwen met an plas.  Nou pe lans en lapel ek nou pep pou konpran e analiz bann lobligasyon Gouvernman anver IMF, anver nou reform ekonomik ki nou ankor pe swiv e bezwen pe kontinnyelman swiv.  Bann sanzman e mezir ki bezwen ganny pran pou kit nou lo sa larout.  Mon pe osi lans en lapel ek SBC e bann lezot zournalis responsab.  I annan en kantite sanzman e bon keksoz ki pe arive dan nou pei.  Nou dan en staz reform ekonomik ki istorik e ki pou sanz direksyon lekonomi nou pei.  Annou sezi sa bann loportinite pou zwenn ek bann akter prensipal pou eksplike e montre lepep Seselwa litilite serten sa bann sanzman, par egzanp sa lamannman dan time frame lenplimantasyon lalwa VAT.  Son lenplikasyon, son lenportans pou nou Gouvernman, son lenportans pou nou sekter prive e pou nou pep Seselwa.

Mr Speaker, mon pou siport sa lamannman.  En tel sanzman i nesesit en sekter prive ki konfortab, azour e byen prepare pou fer fas avek nenport sanzman e evantyalite.  En tel sanzman i nesesit en pep konfortab e byen enformen pou fer fas avek en tel reform dan nou sistenm tax ki pou annan en lenpakt enorm lo nou pos e lo pri lavi.  Mon senserman krwar ki Minister Finans in pran en bon desizyon pou retard lenplimantasyon VAT pou benefis en lanvironnman ekonomik sen e stab pou nou tou e dan lentere lepep Seselwa e nou pti pei Sesel.  Mr Speaker, mon pou siport sa lamannman.  Mersi.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, sa lamannman ki devan nou i zis en seksyon, i tre senp e i pe esasyelman demande ki Gouvernman i ganny bokou plis letan pou li revwar son sistenm tax, me i osi tre profon, ler nou regard lenplikasyon sa lamannman.  Enn, a mon avi mon krwar Gouvernman i anvi ki nou annan en sistenm tax ki marse pou pep Seselwa.  Mesaz se ki nou’n zwe avek GST pou plizyer lannen e apre nou’n deside ki VAT i petet meyer sistenm tax e la Minis Finans ozordi i vin kot nou i dir be regard en kou.  Mon krwar nou bezwen bokou plis letan ki nou ti’n antisipe pou nou revwar nou sistenm tax e donn pep Seselwa meyer sistenm tax.  E mon pou siport sa lamannman akoz son mesaz ki i pe anvoye i enn ki kler.  E a mon avi i annan 3 mesaz kler dan sa lamannman as simple as it is. I annan 3 mesaz kler.  Enn se ki Gouvernman i anvi ki tou dimoun i on board on the tax system e sa i tre, tre enportan.  Angle i dir ou i annan de sertennte dan lavi.  I annan death and taxes.  So, si ozordi nou pe koz lo tax se ki enn nou konnen i en sertennte, nou tou nou bezwen pey nou tax me osi ki si ou annan en sistenm tax alor i enportan e esansyel ki tou dimoun i on board, ki tou dimoun i konpran, ki tou dimoun i kapab ranpli son form tax byen akoz i enpakte lo tou dimoun across the board ki annan kapasite pey tax. So mesaz ki mon mazinen sekter prive e bokou endividi in anvoye avek Gouvernman se ki we are not yet ready to be on board.  Nou pankor pare, mon pa tro sir si menm serten zofisye dan Gouvernman i pare to be on board e nou pa kapab, koman bann law makers nou, nou pa kapab fors en lalwa dan lagorz nou pep, ki si nou pep an gran parti pa on board, pa konpran, pa pare, i ezite e dan son pratikalite, i pa pou efikas.  So, premye mesaz se ki nou bezwen annan tou dimoun on board e Gouvernman pe demann nou bokou plis letan pou fer sir ki i ganny tou dimoun on board.

Mon krwar dezyenm mesaz se ki nou annan en Gouvernman ki ekoute.  In annan en kantite reform ki’n ariv devan nou Lasanble, en kantite lalwa ki’n ariv devan nou Lasanble e in annan en kantite lamannman e en lamannman i retourn devan en Lasanble akoz zisteman dan son pratikalite nou vwar poudir me sa lalwa ki nou ti pase en pe letan pase pa pe neseserman marse at this point in time e kimannyer nou konnen i pa pe marse se ler bann dimoun ki sa lalwa pe enpakte lo zot i realize poudir i annan serten defayans.  E mon konnen Gouvernman in ekout sekter prive tre for e Gouvernman in ekout son bann zofisye tre for e Gouvernman in ekout nou isi dan sa Lasanble tre for e nou’n dir be tyonbo en kou, eski sa VAT i en lalwa ki pou pase, ki la e ki pou byen deservi nou pep a sa moman ki nou ladan la.  I kapab plitar in pare, me si en sistenm pankor pare a son letan, i pa pou marse.  So mesaz se ki wi, menm si nou annan lalwa ki nou bezwen pase, menm si nou annan bann bench mark ki bezwen ganny etablir, me Gouvernman, en pe parey son sistenm ki i tenir for lo la, sistenm Welfare, i osi konsernen avek son son sistenm tax e i pou dir be non, mon pare pou mwan ekout real concerns e sa i rezon akoz ki nou annan sa lamannman devan nou.

Trwazyenm mesaz ki mon krwar i en gran viktwar pou pep Seselwa se ki nou oule en tax regime ki pou Seselwa e par Seselwa.  E mon krwar i enportan sa akoz i annan lenpakt lo Seselwa.  Lo Seselwa ki travay, lo Seselwa ordiner, lo Seselwa ki pe sibir en logmantasyon dan pri lavi, me Seselwa i dir ou sa mon larzan tax.  Ler Seselwa i dir ou be sa ver ki’n ganny aste par Lasanble Nasyonal i mon larzan tax.  I vedir i konsyan ki i annan en kontribisyon ki i fer anver son pei e i anvi ki sa larzan i ganny byen zere.  E sa i rezon akoz mon krwar ki nou bezwen annan en sistenm tax ki reflekte the local realities.  I reflekte nou fason fer Sesel, zis parey sa package reform ki wi, nou it ganny sipor IMF me i ti en package ki ti annan lenpakt lokal, ki ti annan refleksyon Seselwa e in annan sikse akoz in ganny embrace par Seselwa, akoz sa Seselwa ti vwar li ladan, malgre ti difisil, malgre ti bezwen esper sakrifis, me Seselwa ti vwar li ladan.

Mon krwar trwazyenm mesaz se ki nou bezwen annan en tax regime ki ganny fer par Seselwa pou Seselwa, menm si nou bezwen pwennvi IMF e menm si nou bezwen pwennvi serten eksper.  Napa problenm avek annan zot pwennvi, me sa ki enportan se ki nou pa kapab enport en tax system into a local system e dan en lekonomi osi pti ki pou nou.  So, mesaz i kler.

Mr Speaker mon pou reiterate pwen ki Leader Lopozisyon in fer lo cost of living.  Mon pa oule al an deor Standing Orders pou mwan antisip deba lo sa prosen amendment ki devan nou, me toulede amendment ki devan nou i pe esansyelman annan lenpakt on the cost of living.  E nou pa devret mank loportinite isi dan nou Lasanble pou fer resanti bezwen nou pep lo sa kou lavi ki pe kontinnyelman ogmante.  E nou konnen okenn sistenm tax ki ganny met devan nou pep i annan en bearing lo kou lavi akoz i kapab ganny demande pou pey plis tax oubyen mwens tax e i kapab annan serten tax ki double, sa ki nou apel i en tax lo tax.  E sa osi i fer kou lavi ogmante.  I kapab annan en sistenm kot serten dimoun i benefisye e serten pa benefisye.  E ou kapab annan en tax sistenm kot serten pti biznes i rezouir en break e leres pa rezouir sa break e sa i ed li gard serten dimoun dan travay ki otreman i ti pou ganny met deor si nou ti annan en sistenm tax ki otreman.  E nou pep ozordi i bokou pli konsyan lo la akoz depi ler Social Security i ganny reflekte e i vin Income Tax, nou pep tou le lafen di mwan i get son pay slip e i konnen ki kantite tax i pe peye.  Menm si i pa dan biznes i konnen tou le lafen di mwan kantite larzan Gouvernman pe anmase lo li e sa i si oule in en ledikasyon pou nou pep e i fer li bokou pli konsyan kantite larzan ki pe anmase, me osi i fer li konsyan ler i al laboutik.  Ki sa pri pa fair, sa pri i unfair e whether the tax system i annan en bearing on the cost of living.  So, mon reponn lapel mon osi ki ler nou annan en tax system, annou pran konsiderasyon tou parti prenan me osi annou pran konsiderasyon dimoun ki enn, pe zer sa lekonomi, pou nou pa touf nou lekonomi, pou dimoun pa ganny met deor dan zot landrwa travay, bann pti e mwayenn antrepriz e osi bann endividi ki pou ganny plis afekte.  Bann dimoun ki zis par lao, mon toultan koz lo sa group dimoun ki zis par lao subsistence level e a mon avis a i group dimoun ki pe ganny plis afekte dan nou lekonomi ozordi, zisteman akoz li i pa lo Welfare, dimoun ki lo Welfare pa pey tax, me li i zis par lao subsistence level, savedir i pey tax, i pey bis, i pey tou keksoz e i bann dimoun ki annan gran potansyel ozordi to fall through the cracks e okenn tax system i bezwen fer sir ki sa bann dimoun i ganny pran an konsiderasyon.

Mr Speaker en lot pwen mon ti anvi fer resorti i ki sa lamannman i open handed. Minis pe demann nou pou aprouv en lamannman ki open handed.  I pa definir, i dir ou until such time ki Gouvernman i pare pou enplimant sa.  E mon ti a met en pe legzizans lo Minis pou fer sir ki en desizyon i ganny pran.  A decision has to be made especially about the tax system, a decision has to be made.  We go ahead with VAT.  Do we keep GSTHow long is ti going to take? Akoz dimoun ozordi dan biznes pe prozekte lannen prosenn, i pe prozekte son depans dan 2an.  I annan envestiser ki pe vin dan nou pei ki anvi envestir.  I annan dimoun ki anvi anmas son pti larzan dekote pou li fer son lakaz.  Dimoun pe viv ozordi dan sa 2an, 3an ki pe vini, zot pe planifye zot lavi.  So, we cannot be in limbo.  Nou pa kapab pe asize ozordi, pe dir be kan VAT pou vini, kan i pou vini, kan i pou vini.  Mon krwar, menm si nou pe donn Gouvernman sa way, sa sans pou li travay lo en tax system ki bon pou nou, sa pa devret ganny abize, i en trust ki nou pe met dan nou Gouvernman, me i pa devret ganny abize.  It is an open handed amendment but at some point, Government will have to come back and say look, this is when we’re ready to do ti, by hook or by crook nou pou go ahead avek li.

Avek sa enn de parol ki mon dir Mr Speaker, pou siport sa lamannman, i en lamannman ki bezwen ganny pase ozordi akoz nou konnen ki le 1 Zilyet i Dimans e si i pa ganny pase then Gouvernman pou an defo avek lalwa.  I annan en eleman urgency avek sa lamannman e sa i rezon prensipal akoz nou santi ki nou bezwen siport sa lamannman, me osi akoz i reponn lapel nou pep a en lepok kot lekonomi i size prensipal pli top lo agenda nou Gouvernman.  Mersi Mr Speaker.

 

MR SPEAKER

Right of Reply, Minister.

 

MINISTER PIERRE LAPORTE

Mr Speaker, mersi.  Mersi bann Manm Onorab ki’n entervenir.  Mon pou tou enn de pwen kot mon krwar i enportan pou klarifye serten kestyon ki’n ganny leve.  Premyerman par Onorab Volcere, lo kote ki poursantaz ki nou ekspekte i ogmante, sa i pou varye dapre diferan prodwi akoz par egzanp i annan serten prodwi ki ozordi pa pe pey GST ki nou ekspekte pou pey VAT tel ki par egzanp labyer Seybrew, tel ki serten materyo konstriksyon.  Me selman ler nou’n fer bann, an mwayenn, nou’n average out, figure ki’n come up avek kot Minister Finans se nou pe koz en logmantasyon apepre 4 poursan ki ase enportan.  En to lenflasyon par lao 4 poursan ki deza annan la, e i pa en keksoz ki parey nou dir an angle, in significant.

Alor pou petet link up avek lezot Manm ki’n entervenir.  en lot issue se timing akoz parey nou tou nou konnen, ozordi deza lenflasyon in grenpe pou apepre 7 a 8 poursan avek depresyasyon (-) grid avek logmantasyon pri petrol, pri manze lo nivo enternasyonal, e resaman nou’n vwar osi ki nou’n bezwen ogman pri fuel lo laponp ki sipoze ed SEYPEC soutenir son finansye, nou’n bezwen ogmant tarif elektrisite pou ed PUC tenir li lo en baz soutenab.  Alor ler nou met tousala ansanm, nou feel poudir wi, lo kote kou lavi, parey nou’n dir i deza difisil pou lepep e alor petet timing osi pou ozordi entrodwir sa tax ki pou azout ankor lo sa lenflasyon ki deza enportan, in enfliyans enpe sa desizyon osi, petet timing pa byen, annou atann ankor enpe.

Lo kote en pwen ki Onorab Hoareau in koz lo la, i en keksoz ki mwan menm mwan koman Minis Finans mon krwar i enportan ki nou tackle e mon’n deza demann bann dimoun pou komans regard sa avek Minister Finans.  I enportan ki nou regard en pe bann marsan, akoz i pa zis marsan.  Mwan mon annan en problenm ler en biznes, apre 3, 4, 5an, tou le an i pe run loss.  Selman i pe operate, i pe pey dimoun, i pe viv.  Selman lo son papye i pe perdi.  Mwan, mon annan en problenm ek sa.  I pa zis marsan, i lezot biznes ki tonm dan sa kategori.  Alor nou kote Minister Finans nou pe osi evalye sa 2 travay intern ki nou pe fer avan nou come out an piblik, kimannyer osi nou kapab ede ki serten kategori dan sosyete ki pe benefisye tel ki marsan i osi fer kontribisyon dan nou Bidze, akoz parey Onorab Vangadasamy in dir, tax i en lobligasyon moral.  Tou dimoun i bezwen pey tax.  I en lobligasyon moral akoz depi avan Zezi Kri ti annan taxOk, e i enportan ki parey in dir, nou anmas tax ki al pou en bonn koz, ki pou al pou lekol, ki pou al pou lasante ki nou tou isi nou benefisye avek lo semen ki nou dray toulezour.  So, i enportan ki tou dimoun i pran zot lobligasyon e pey tax ki enkli nou lo kote Minister Finans, nou pou fer nou travay pou vwar kote, ki bann areas ki pa pe petet perform byen pou nou vwar kote nou kapab tir en pti pe, nou pou vwar avek zot.

Pou reponn kestyon Onorab Pierre, pwen ki’n ganny touse osi par Leader of Government Business. I enportan vre ki nou pran en desizyon ase vit, wi, nou’n demann en pe letan akoz pou diferan rezon ki nou’n koz lo la, mon dakor avek zot ki the sooner ki nou kapab ariv lo en pozisyon kler, i pou pli bon pou tou dimoun, i pou pli bon pou Gouvernman kot nou bezwen predikte Bidze eksetera, parey ou’n dir i pli bon pou biznes, ozordi ou pe fer en multi-year budgeting e ou bezwen konnen, ou en envestiser ou pe vin invest e ou bezwen konnen ki sistenm ki pou devan ou.  E nou, nou ti aktyelman even kontan si nou kapab pran en desizyon definitiv avan lafen lannen, by the time ki nou vin avek Bidze 2013, mon krwar i pou enportan ki nou agree lo sa pwen whether or not nou pou kontinnyen avek VAT.

Mon’n reponn enpe lentervansyon Onorab Vangadasamy dan sans ki wi, an 2010 avek 2012 konteks ti diferan.  Parey zot rapel an 2010 avek success ki nou ti annan dan reform ekonomik, lenflasyon it preski zero, ozordi nou annan lenflasyon 8 poursan i kantmenm tre enportan e sa i mon krwar desizyon pou nou postpone sa, i pou ede osi pou apez en pe difikilte ki tou dimoun pe pas ladan avek lenflasyon.

En pwen enportan ki Onorab Rose in koz lo la ki mwan osi mon dakor, parey nou’n dir, i enportan ki tou dimoun i on board e ou vin on board atraver en meyer konprenezon kwa ki devan nou, e pou sa ki nou kontinnyen nou travay avek Revenue Commission pou nou vwar kote petet bann areas ki nou linisyativ pou edike, sansibiliz biznes avek piblik petet pa neseserman mars tro byen e pou nou deal ek sa defayans.

En lot pwen ki Onorab Rose in fer ki mon krwar i very important se ki nou bezwen fer sa ki pli byen pou Sesel.  Parey mon’n dir dan mon lentervansyon, Lanmerik osi in gard GST akoz i feel poudir i pli bon pou li, akoz dan en sistenm federal ki sak leta i diferan e pli fasil pou zot annan en senp sistenm GST.  E demen si nou kontinnyen gard GST, ouswa apre nou bann analiz, nou bann diskisyon ki dimoun i pli konpran bann benefis, nou feel poudir VAT i pli bon ki GST finalman, i ava en keksoz ki nou koman en pep, koman en kominote biznes, sekter prive, nou ava desid ansanm.  Mwan, mon totalman dakor lo sa pwen ki en pei i bezwen fer sa ki pli bon pou li.  Wi IMF in ed nou en kantite, IMF in prêt nou larzan pou fer nou progranm en sikse, IMF in donn nou en kantite lasistans teknik pou ogmant kapasite bann staff, Minister Finans, Labank Santral, menm zot isi Parlman ki’n ganny bann enteraksyon, be mon krwar a lafen di zour en pei i bezwen fer sa ki pli byen pou li, nou en manm IMF, nou annan en ownership, nou annan en shareholding dan sa lenstitisyon, i enportan ki dimoun i konpran, alor i pa vedir ki nou toultan bezwen fer sa ki IMF i dir nou, mon krwar i en deba ki nou pou kontinnyen annan akoz definitivman nou konnen ki IMF i anvi VAT me selman nou bezwen fer sir ki si nou al VAT, i akoz nou Sesel nou krwar i bon pou nou, pa akoz IMF pe dir nou, parey ler nou ti fer reform e Onorab Rose in dir, nou ti fer reform akoz sa letan nou ti feel poudir nou’n ariv en zistans kot pei ti pli kapab soutenir sistenm ekonomik ki nou ti annan, e nou ti fer li avek led IMF me selman akoz nou it krwar i bon pou Sesel.  So, Mr Speaker avek sa mon a termin mon reply.  Mersi.

 

MR SPEAKER

Bon in ariv ler pou nou pran en vot lo merit zeneral sa Bill.  Tou bann ki an faver.  Okenn ki kont?  Bon, mon a ganny mwan en formal second reading.

THE CLERK

A Bill of an Act to amend the Value Added Tax Act 2010, to provide for the amendment of the commencement date.

 

MR SPEAKER

Bon, nou oule al dan Committee Stage.  Bon, mon a ganny en Mosyon alor pou nou sot Committee Stage.

HON MARIE-ANTOINETTE ROSE

Mr Speaker i kler ki napa merit pou nou al Committee Stage.  Savedir anba Order 91(1), mon move ki nou sot Order 65 – 70 e nou sot Committee Stage.

 

MR SPEAKER

Ok, okenn ki segonn sa Mosyon?

 

HON CHARLES DE COMMARMOND

Mr Speaker mon segonn sa Mosyon.

 

MR SPEAKER

Bon, nou an faver ki nou sot Committee Stage.  Si nou an faver, then nou a ganny nou en Motion for third reading.

 

HON MARIE-ANTOINETTE ROSE

Mr Speaker anba Order 71(1) mon move ki nou lir sa Bill en trwazyenm fwa.

 

MR SPEAKER

Okenn ki segonde?

 

HON CHARLES DE COMMARMOND

Mr Speaker, mon segonde.

 

MR SPEAKER

Nou pran en vot lo la.  Tou bann ki an faver lev zot lanmen?  Okenn ki kont?  Bon, nou a ganny en third reading.

 

 

 

THE CLERK

This Act may be cited as the Value Added Tax Amendment Act 2012.

 

MR SPEAKER

Ok, Bill in pase, 12.34pm.  Nou bezwen pran en desizyon la.  1.30pm nou annan ABC meeting, si nou pou al ziska 1er ouswa nou break ziska 2er akoz mon bezwen zwenn sa 2 Leaders, nou annan meeting 1.30pm.  So, nou break ziska 2er.

 

 

MR DEPUTY SPEAKER IN THE CHAIR.

MR DEPUTY SPEAKER

Bon mon a dir bonn apremidi tou bann manm Onorab, bonn apremidi Minis avek ou delegasyon e tou bann dimoun ki pe ekout nou.  Nou a kontinnyen nou Order Paper, e nou ava pran Public Debt Management (Amendment) Bill 2012.  Mon a ganny en Motion for second Reading.

HON MARIE-ANTOINETTE ROSE

Mr Deputy anba Order 64(2) mon move ki sa Bill i ganny lir en dezyenm fwa.

 

MR DEPUTY SPEAKER

Okenn ki segonde?

 

HON CHARLES DECOMMARMOND

Mr Deputy Speaker mon segonn sa Mosyon. Mersi.

 

MINISTER PIERRE LAPORTE

Mersi Mr Deputy Speaker, Onorab Leader of Government Business, Onorab Leader Lopozisyon Manm Onorab Msye Madanm.  Apre lentrodiksyon reform ekonomik ver lafen 2008, Gouvernman ti pe depans, pardon avan lentrodiksyon reform an 2008 Gouvernman ti pe depans plis ki lakantite larzan ki i ti pe anmase e sa ti koz en bann deficit ki ti pe ganny finanse an parti par det domestik laplipar ditan atraver bann labank komersyal.  Depi langazman Gouvernman dan reform nou’n vwar plis disiplin fiskal ki demontre sa commitment lo lapar Gouvernman pou redwir det piblik e fer li vin lo en nivo pli soutenab.  An rezilta Gouvernman dan sa bann dernyen lannen depi lansman reform in rikord sirplis bidzeter, ki’n permet gard rediksyon dan det domestic.  Anplis ki disiplin fiskal Gouvernman in osi met an plas bann mekanizm legal ki pou kontrol det piblik e dan sa konteks nou ti vwar ladopsyon Public Debt Management Act an 2008.  Ozordi Mr Speaker Minister Finans pe propoz en lamannman dan sa lalwa ki pou ede dan kordinasyon polisi fiskal ek polisi moniter.  Ler Gouvernman i repey son det domestik espesyalman det ek bann labank komersyal sa bann roupi i retourn dan sistenm banker.  Likidite ki an ekse i met presyon lo pri komodite ki vedir i koz lenflasyon, anplis i osi annan en lenpakt negativ lo to lesanz.  Pou ekilibre sitiasyon atraver som lobzektif prensipal ki stabilizasyon pri dan lekonomi, Labank Santral i aktivman retir sa bann likidite anplis dan sistenm – parey nou dir souvan mop up excess liquidity.  Sa i ganny fer atraver bann lenstriman moneter ki Labank Santral in met anplas dan sa bann dernyen lannen.  Enn bann tel lestriman ki ganny servi dan plizyer pei se bann Government Securities parey nou apele tel ki Treasury Bills. Menm si Treasury Bills i ganny vann pou polisi moneter, sa i reprezant en det lo Gouvernman me ler Public Debt Management Act ti ganny adopte an 2008 Labank Santral pa ti ankor entrodwir Treasury Bills koman enn son bann lenstriman pou retir likidite dan sistenm dan en mannyer sistematik, akoz sa Public Debt Management Act pa ti reflekte sa.

Mr Speaker logmantasyon dan pri komodite lo marse enternasyonal, azisteman dan serten pri servis komodite dan pei e osi depresiasyon roupi resaman in ogmant lenflasyon dan Sesel – pou sa rezon Labank Santral in adopte en polisi moneter ki pli sere.  Labank Santral i ekspekte mentenir sa pozisyon pou omwen ziska lafen 2012.  Sa i enkli retir ankor plis likidite dan sistenm e sa pou ogmant kou polisi moneter konsiderableman ki alafen Labank Santral pe nepli kapab zer li tousel san fer en gran perd finansyel.

Seksyon 42 dan lalwa ki gouvern Labank Santral i donn li sa pourvwar pou retir likidite par ofer securities a kour term tel ki Treasury Bills dan kard son polisi moneter, se pandan Labank Santral pa’n pran sa koman en opsyon pou de rezon prensipal.  Premyerman Labank Santral pou bezwen pran tou kou ki asosye avek enplimantasyon son polisi moneter akoz anba seksyon 42 sa det pou lo non Labank Santral limenm.  E dezyenmman sa opsyon pou osi anmenn kopetisyon dan marse securities espesyalman akoz sa ki pou ganny ofer par Labank Santral pou definitivman pli atiran akoz son priyorite i pou metenir polisi moneter a tou pri.  Me dan konteks Gouvernman son priyorite si i bezwen prêt larzan se en kou ki rezonnab.

Mr Speaker se pou sa 2 rezon ki atraver bann diskisyon ant Labank Santral, Minister Finans an kolaborasyon avek IMF Gouvernman pe propoz sa lamannman ki se Gouvernman ki ofer securities lo son prop non pou asiste Labank Santral dan son polisi moneter.

Anba seksyon 8 lalwa Public Debt Management Act 2008 ki Gouvernman lafason ki det piblik i ganny zere Minis Finans i annan sa pourvwar pou pran det lo non Gouvernman.  Me vi ki polisi moneter i tonm anba responsabilite Labank Santral pou le moman napa provizyon dan lalwa ki zer bann det piblik pou ki det i ganny pran pou rezon enplimantasyon polisi moneter.  Se pou sa rezon ki nou pe propoz sa lamannman devan Lasanble Nasyonal ozordi.  Dan sa lamannman nou osi propoze ki ler Labank Santral pou bezwen sa lasistans ki sa desizyon pou ofer securities i ganny deside ant Minis Finans e Labank Santral pou li atraver National Debt Management Committee parey i ete pou lezot det, sa i fer ki lendepandans Labank Santral i a ganny sof garde.

Mr Speaker mon ti a kontan reasir bann manm Onorab ki Gouvernman i reste angaze ek son stratezik pou redwir det piblik.  Tou larzan ki pou ganny ranmase pou siport polisi moneter pou ganny mete dan en kont Labank Santral e sa larzan pa pou ganny depanse akoz Minister Finans pou napa akse avek sa larzan.  Sa lamannman i annan lobzektif pou anmenn plis kordinasyon ant polisi fiskal ek polisi moneter, sa kordinasyon i enportan pou fasilit lafason ki likidite i ganny zere dan sistenm e osi fer li posib pou pei ranforsi son bann lobzektiv reform ekonomik.

Avek sa Mr Speaker mon remersye e mon demande propoze ki Lasanble i konsider sa lamannman.  Mersi.

 

MR DEPUTY SPEAKER

Bon deba i ouver, Onorab Fideria.

HON EMMANUEL FIDERIA

Mr Deputy, tou Manm Onorab bonn apremidi.  Mr Deputy mon pe aport mon sipor pou sa Bill akoz depi lentrodiksyon reform ekonomik dan nou pei nou’n fer bokou progre.  Ozordi nou kapab leve e dir ki sa zafer napa i deryer nou, menm nou kapab dir ki i annan tro bokou keksoz ki menm nou sitwayen pa bezwen dan nou lavi toulezour swa lavi kontidyen, partou kot ou pase laboutik i plen.

Mr Deputy forex nou nepli bezwen desann 4er bomaten pou met lalinny pou ganny 400 dolar.  Menm parfwa nou remont dan lakour narnyen nou pa’n gannyen. Sa lepok ti annan bokou businessman ki ti fer tranzaksyon forex kot nou sitwayen ti ganny vole bokou larzan, menm parfwa ganny en kantite fo dolar, fo ero ou menm parfwa liv sterlen kot zafer ti fini lapolis.

Mr Deputy avek en gran lentrodiksyon reform ekonomik nou bann aktivite ekonomik in ganny relanse kot bokou pti biznes in ganny kree avek lentrodiksyon bann scheme met a nou dispozisyon dan nou pei.  Mr Deputy avek tou sa bann polisi moneter ki’n ganny met anplas, Gouvernman in fer plizyer sirplis bidzeter ki’n permet kre rezerv pou repey nou bann det swa domestik, bilateral oubyen milti-lateral.  Swa kit en pti larzan de kote si okenn sok ekonomik i a permet nou ganny lespas pou nou kapab nobou abzorbe.

Mr Deputy Speaker bann nouvo devlopman lo lasenn enternasyonal in osi anmenn serten reperkisyon negativ dan nou zesyon oubyen aktivite ekonomik.  Ozordi nou’n vwar nou to lesanz in sanze nou bezwen plis roupi pou nou aste dolar, ero ouswa liv sterlen.  Konsekaman pri komodite dan laboutik i ogmante e pourvwar nou sitwayen pou aste in ganny afekte.  Sesel koman en pti pei ki enport bokou i osi san leksepsyon en pwen lenflasyon ki egziste dan bann pei ki malerezman ankor pe fer fas avek bann kriz serye lo tou nivo.  Mr Deputy nou napa gran swa, nou pep i bezwen manze, nou pa kapab les nou zanfan soufer e sa i eksplike akoz nou bezwen fer ankor serten sakrifis – ziska ki lekonomi mondyal i repran pozitivman.  Sa i parol nou Prezidan ti dir le 18 Zen.  Mr Deputy, sa se laverite e sa se larealite – parol nou Vis Prezidan ki ti dir nou dan sa Lasanble 2011 an Desanmm

Mr Deputy dan nou pei nou bann lenstitisyon finansyel ouswa Minister Finans i bezwen reste vizilans, Seselwa pe demande ki Labank Santral i entervenir pou stabiliz sitiasyon avan nou perdi kontrol.  Ozordi nou ankor annan serten debalans dan nou tranzaksyon finansyel, nou sistenm moneter i demann serten re-azisteman.  I annan tro bokou likidite dan nou sistenm, savedir tro bokou roupi ki pe sirkile e sa pe met bokou presyon lo lakantite dolar ki nou bezwen met an sirkilasyon.  Lozikman alafen Labank Santral i bezwen pran bann mezir pou remedye sitiasyon.  Nou bann frer ek Seselwa bann mezir ki pe ganny pran i en mezir ki neseser annou pa get bann benefis ki nou krwar nou kapab gannyen oubyen perdi dan limedyat, nou bezwen get son benefis a long term.  Nou bezwen viv avek lespwar ki keksoz pou sanze pou le meyer.

Mr Deputy mon pe aport mon sipor pou sa Bill akoz nou bezwen azir la koman i ankor boner, nou pa kapab les keksoz an deor kontrol apre nou tou nou pou soufer. La i moman kot nou bezwen fer sakrifis, nou bezwen leve e travay pli smart pa neseserman travay pli dir.  Nou bezwen fer gran zefor pou redwir travayer etranze dan nou pei, kot bokou nou reveni i ale.  Annou aste sa ki nou bezwen pa nenport kwa ki pa neseser, annou mazin byen nou priyorite.  Otan ki nou kapab annou met en pti sou dekote.  Nou ekspekte ki avek sa bann mezir ki pe ganny propoze pe entrodwir bann labank a fer monte enpe lentere lo saving.

Mr Deputy mon pou toultan siport bann desizyon ki smart dan nou Nouvo Sesel.  Avek sa mon pou siport sa Bill. Mon remersye ou Mr Deputy. Mersi.

 

HON JENIFFER VEL

Mersi Mr Deputy.  Bonn apremidi toulmonde.  Mr Deputy sa proze de lwa pou amann Public Debt Management Act 2008 i fer bokou sans, prenan kont bann zefor Gouvernman, bann zefor asimisman finans piblik ki Sesel pe atreprann depi enpe letan.  Nou Lasanble Nasyonal limenm in zwe en rol kle dan sa bann zefor par vot pou bann lalwa apropriye.

Mr Deputy permet mwan pou met keksoz an perspektiv e donn background dan sa proze de lwa ki nou pe vot lo la ozordi.  Detrwa lannen pase Lasanble Nasyonal ti aprouv en proze de lwa pou amann lalwa Labank Santral e fer sa lenstitisyon vin endepandan.  Sa ti en moman istorik dan nou listwar ekonomik akoz sa lenstitisyon ti ganny manda pou asir stabilite pri dan nou pei.  Sa ti osi vedir ki Labank Santral ti ganny promouvwar pou deside lo limenm ki kantite larzan i devret annan dan nou lekonomi a nenport moman san sibir okenn presyon sorti kot Gouvernman pou ogmant sa kantite.  Mr Deputy detrwa lannen plitar pli presizeman an Novanm 2008, Gouvernman ti anbark lo en progranm reform ekonomik.  Sa reform ti atak 2 problenm prensipal e sa sete det pei e nivo lenflasyon.  Det Sesel i enkli det eksteryer e det domestic.  Atraver lagreman avek fon moneter enternasyonal e lezot pei ki nou drwa Sesel in reisi redwir sond et eksteryer atraver bann debt forgivness kot bann pei zanmi in senpleman cancel serten pousantaz nou det avek zot e osi atraver debt resceduling kot sa bann pei e lenstitisyon enternasyonal in asoupli kondisyon repeyman det par ofer Sesel bann pli gran peryod gras e repeyman.

Mr Deputy anmenmtan ki lotorite ti pe azir lo kote det eksteryer zot ti pe osi azir lo kote det domestic, par egzanp kot mezir ti pe ganny pran pou redwir lakantite larzan ki Gouvernman ti pe prêt bann lakonpanyen paraytatik par egzanp Air Seychelles.  Mr Deputy se dan sa konteks zefor pou asenir finans piblik e tenir nou det domestik a en nivo ki soutenab e pou donn Labank Santral mwayen pou ranforsi son lendepandans ki sa proze de lwa in ariv devan nou Lasanble ozordi.

Sikse ekonomik en pei i depan lo sa ki nou apel en bon policy mix ant polisi fiskal, polisi moneter e lezot polisi ekonomik parey politik endistriyel.  Fodre ki sa bann polisi i konplemant e ranforsi kanmarad plito e atraver sa proze lwa Gouvernman pou kapab fer sorti bann bonds ek Treasury Bills me sa pou ganny fer strikteman pou servi polisi moneter, sa i vedir ki sa bann bonds ek Treasury Bills pou ganny soumet anba manda Labank Santral ki la pou asire ki i annan stabilite dan pri.

Mr Deputy sa proze de lwa pe ganny fer dan en lespri reform ekonomik, e ranforsi bann laspe sa reform ki nou deza pe antreprann.  Mon pou donn mon sipor sa proze de lwa e mon demann tou mon bann koleg pou fer parey. Mersi Mr Deputy.

HON SEBASTIEN PILLAY

Thank you, Mr Deputy Speaker.  Bonn apremidi Minis, bon apremidi tou manm Onorab.  Mr Deputy Speaker Minis dan son prezantasyon in fer sorti en pwen tre enportan, e sa kot i konsern polisi moneter ozordi ki nou annan isi dan nou pei e rol ki Central Bank i zwe atraver sa polisi.

Mr Deputy Speaker mon pa en ekonomis, nor eksper dan finans me mon kapab zwe en pti pe avek nivo e ler nou regard bann figures anplas e nou regard bann rates of change in term of growth pou nou pei nou vwar poudir i kler ki in the long term sa pa ti pou viable.  I pa ti pou viable akoz CBS ti pou toultan limenm li bezwen bear the cost of military policy e i kapab arive ki si nou kontinnyen sibir bann sok eksteryer Central Bank ti avakapab arive pe run at a lost e si sa i arive Mr Deputy nou kapab konpran ki lenpakt sa pou annan lo nou lekonomi.  Now, mon napa narnyen kont sa e mon krwar poudir sa Bill i vin a en tre bon moman akoz nou deza pe komans sibir serten sok avek bann highly infated food prizes, avek bann rise in the cost and the prices of oil. Me selman bann mekanizm pou sof gard lendepandans Central Bank avek sa bann mezir ki la mon vwar zot lo preventing measures, i vin koman en defensive mechanism e ler nou annan nou bann defensive mechanism e nou kontinnyen annan sa polisi kot nou bezwen mop up excess liquidity in the system sa i kapab kre en problenm pou akse avek likidite, pou akse avek kapital par bann dimoun ki pou al antreprann bann biznes.

So pou mwan sa ki enportan Mr Deputy se ki Sesel i bezwen rod en stronger road path, nou bezwen rod en fason pou nou konsolid progre ki nou’n fer lo kote debt e fiscal sustainability.  Sa ki nou pa pe fer se ki nou pa pe diversifye ase nou economic base pou nou kapab trouv lezot fason ganny reveni.  I enportna ki nou fer sa, because si reveni pa antre dan nou pei nou pou kontinnyen met bann mezir oster anplas e parey bokou diskisyon in ganny fer lo lasenn enternasyonal bann mezir ki pou (-) lo osterite i annan en lenpakt primordyal lo bann dimoun ki oule ganny akse avek kapital apre pou zot kapab fer biznes.

Mr Deputy sorry, mon konnen ki pou dir the honest la lanfaz i lo reduce vulnerability nou lekonomi a sa moman ki la, mon konpran sa e mon konpran pou dir avek sa higher footpath prices and oil prices wi nou pou kontinnyen fer fas avek sa bann sok e lenflasyon pou ogmante.  But at the same time Mr Deputy Speaker Gouvernman i osi bezwen revwar son focus e focus enpe lo konpetitivite pou kre employment, generate income dan nou lekonomi e anlinny avek sa mon krwar ki nou devret komans mazin fer bann public expenditure review, met anplas bann media reviews pou nou konnen egzakteman ki Gouvernman – kantite pe depanse.  Annou adopte bann lapros value for money kot si nou pe depans pou ganny tel keksoz nou kapab asire ki at the end of the day nou pe ganny sa, e non pa nou fer expenditure me apre nou pa vwar rezon det oubyen ki sa ki nou’n gannyen at the expenditure.  Nou osi bezwen rod bann stratezik kot nou kapab konsolid budget management across the board.  Ozordi nou vwar serten konsern kot budget management dan serten areas pa pe ganny fer a la oter. E si sa i kontinnyen nou pou kontinnyen vwar nou pe pey det o fi e an mezir e sa son long term effect se ki ankor ennfwa I retir reveni dan sistenm.

Mon osi mazinnen ki bann bay administratif ki deza egziste kot i konsern lanvironnman biznes osi nou bezwen rod en fason pou nou revwar sa, akoz i pa posib pou nou lekonomi kapab refer si nou pa ankouraz private sector capital growth.  E mon krwar Gouvernman i bezwen met tou mezir anplas pou fer sa, mon welcome linisyativ Prezidan pou met an plas sa Small Business Finance Association, i tre enportan akoz la ki nou pe koz lo en polisi moneter ase rizid i annan gran risk ki bann labank i kapab raise zot to lentere lo bann loans e sa pou fer ki bann dimoun ki oule ganny akse avek sa bann loan pou vwar zot en pti pe pli difisil pou fer li.  E en lot keksoz ki mon mazinen se ki ler nou pe regard sa problenm nou bezwen regarde kimannyer i annan fairness dan trade across the board sirtou pou bann small enterprises e la avek ou permisyon san ki mon al andeor Standing Order Mr Deputy mon ti oule fer sorti en pwen – par egzanp nou pe ankouraz bokou dimoun pou komans zot bann pti biznes par egzanp bann construction companies be ki nou vwar, nou vwar bann gro konpanyen ki zot menm zot fer tou, zot fer depi painter, sarpantye everything else e si ou annan ou en pti konpanyen ki fer zis carpentary i difisil pou ou ganny akse avek bann kontra akoz sa group konpanyen i kapab fer tou.  So nou bezwen rod bann mekanizm ki nou kapab monitor sa bann sekter e asire ki pa zis 1, ou 2, ou 3, ou 4 bann gro gro konpanyen ki benefisye e ki nou kapab kontinnyen annan wealth creation across the board.

Pou konkli Mr Deputy Speaker mon pou siport sa Bill akoz mon konnen son rezon det ozordi kot i vini e lenstans ki nou lekonomi i ladan me selman i annan serten kestyon ki nou bezwen demande viz a vi bann compliance mechanism ki nou annan anplas across the board dan Gouvenrman pou asire ki bann Legislative Requirements kot nou odit bann kont, kot bann diferan lorganizayson i asire ki zot budget expenditures i reste within bann limits ki’n ganny prescribe tousala i bann kestoyn ki nou bezwen reponn sinon nou pou vwar nou parey mon’n dir lo komansman dan en sitiasyon kot nou pe kontinyelman depans larzan me san ki nou vwar value for money at the end of the day. Thank you Mr Deputy.

 

MR DEPUTY SPEAKER

Bon avek sa mon ava envit Minis pou fer son right of reply.

 

MINISTER PIERRE LAPORTE

Mersi Deputy Speaker.  Mr Deputy Speaker i fer mon vreman soulaz en kantite ler mon ekout plizanplis bann Onorab isi, i fer mwan mazin en pti pe parey mon krwar Onorab Rose bomaten ti dir ou konnen ozordi avek sa reform Seselwa nou nivo ledikasyon lo bann kestyon ekonomik e finansyer in vreman ogmante mon kapab dir e mon fyer mon pas partou bor lanmer, lo lans, dan lakour mon tann dimoun kimnanyer pe reazir avek sitiasyon ozordi, akoz sa reform ki’n fer in fer nou apresye en keksoz ler i difisil I fer ou pli apresye ler keksoz in get better.

Pou al enpe lo bann pwen ki’n ganny touse Onorab Fideria in fer sorti en bon pwen dan son lentervansyon se ki i enportan pou nou pa les nou perdi kontrol apre nou bezwen fer plis sakrifis akoz parey nou’n vwar dan lepase menm si en ler ou lentansyon i bon be ou pran bann polisi ki petet avek bon lentansyon i pa the right policy in the end ou soufer plis.  Par egzanp an 2008 avan reform avek en to lesanz ki nou ti annan per capital GDP ti apepre 12 dolar par abitan be avek reform ler in vini, devaliasyon in diviz tou sa bann keksoz nou ti vwar poudir nou per capital ti desann apepre 9 mil dolar setadir menm si nou’n fer progre pandan 30an ennler avek polisi ki pa apropriye pou sa letan i kapab met ou annaryer apre ou bezwen retournen.  Ozordi erezman nou GDP per capital in monte in repas 12 mil dolar par abitan i reflekte sa pwen ki Onorab Fideria in fer, annou pas les keksoz get out of hand apre nou reazir e sa pou kwa i enportan ki Labank Santral avek Minister Finans i pou servi (-) Onroab Vel i get the right policy basedOk akoz se sa right policy mix ki pou vreman donn ou en balans apropriye dan ou mank lekonomi sitiasyon.  Akoz si par egzanp dizon ozordi nou annan en sitiasyon kot lenflasyon pe monte toulede lenstitisyon i bezwen zwe son rol, fiscal policy i bezwen apropriye sere li osi, monitory policy i bezwen sere akoz si par egzanp Minister Finans i deside depans anplis ki i vreman devret pe depanse Labank Santral pou bezwen fer plis zefor pou li ale al mop up be si ou annan en balans, en bon kordinasyon, en bon mix dan polisi i fer ki sa 2 lenstitisyon i balanse e ki parey nou’n vwar dan sa lamannman pa tou kou ki tonm lo Labank Santral akoz ler tou kou i tonm dan Labank Santral parey Onorab Pillay in dir i pou kre en sitiasyon ki vreman pa bon akoz lo trend ki pe ale ozordi si Labank Santral i bezwen kontinnyen mop up, pey bann to lentere ki marse pe demande i definitivman kler ki Labank Santral alafen lannen pou fer en pert finansye e ler ou fer en pert finansye i pa donn ou konfidans, i pa bon menm si anba lalwa Minis Finans, Gouvernman i re-kapitaliz Labank Santral pou issue Treasury Bills, pou re-kapitaliz li be mon krwar i pli apropriye pou evite ki en Labank Santral i run at a lost.  E sepou kwa ki sa propozisyon la i pe demande ki Minister Finans i asiste Labank Santral in the collect of monitory policy e i bear enpe sa bann cost for monitory policy.

E avan mon fini Mr Dpeuty Speaker mon pou zis tous lo detrwa pti pwen ki Onorab Pillay in touse ki mon vwar I tre tre enportan.  Nou’n pas dan en staz kot nou’n stabiliz nou lekonomi, nou’n pas dan en staz kot nou pe fer en bon pe reform striktirel par egzanp nou’n koze bomaten reform sistenm tax eksetera be the next step se growth parey ou’n dir Onorab Pillay kwasans ekonomik.  Akoz pli rapidman ki en lekonomi i kapab grow i pou even permet nou pou nou redwir nou debt lo soutenab pli rapidman akoz det normalman i ganny mezire as en poursantaz pou GDP e parey ou’n dir osi the faster ki lekonomi i kapab annan kwasans i anmenn plis prosperite pou son pep e ou ris pou ou pran bann mezir oster i diminyen.  Mon fek sorti en konferans semenn pase dan Caribbean e mon soulaze pou vwar ki sa bann pei ti envit Sesel ek Moris pou vin partaz nou leksperyans akoz nou ganny vwar koman model bann pti lekonomi ki’n pran bann mezir apropriye ki ozordi nou annan bann nivo kwasans ki pli o ki bann pei Karaib.  Ou’n tous lo bann keksoz parey administrative barears, fairness dan trade policy tousala i bann policy ki pou siport kwasans, akoz si sa bann lezot eleman pa an plas ou pei pa pou efikas, ekonomik pa pou run dan en fason efikas e se pou kwa mwan koman nouvo Minis Finans mon’n pran li enpe – en batay personnel ki dan sa prosen 2 a 3an mon vreman anvi fer tou pou ki nou adres sa kestyon irzan during business e mon konvenki ki nou kapab sorti lo sa rank 103 ki nou ete ozordi lo World Bank index of doing business e mon konvenki ki nou kapab ariv dan 50 menm pli ba ki sa.  Mon konvenki ki si nou fer the right measures, nou ganny sipor business community, Lasanble Nasyonal pou sanz bann lalwa ki neseser nou pou arive, nou kapab arive fasilman akoz Sesel nou en pti pei I fasil pou nou fer sanzman.

Finalman ou’n mansyonn Onorab Pillay sa kestyon Public Expenditure Reviews, Adequate Budget Management sa osi bann eleman tre enportan akoz parey ou’n dir i pa neseserman touzour lakantite depans ki ou fer ouswa nivo ki ou lekonomi i grow i the quality of spending, si ou pe zis spend an donnavini, ou pe spend spend me selman ou pe spend in the wrong areas ou pa pou vreman pe tous sa ki ou sipoze pe touse e kalite ou depans i pa pou efektiv e likewise budget management i enn bann reform ki anba Vis Prezidan Faure, en kantite progre, en kantite travay in ganny fer be i enportan ki nou kontinnyen devlop nou sistenm budget management anplis.  E ankor ou nonm Comprise Mechanism, mon ti dir resaman dan en interview ler mon ti al vizit bann lenstitisyon ki i annan en kantite travay pou fer ozordi, mon bezwen onnet ankor fran pou dir en kantite lazans dan Gouvernman pa pe swiv prosedir, i annan en kantite keksoz ki devret amelyore e i enportan ki bann lotorite enkli Minister Finans, son departman Internal Audit, departman Auditor General ki ler nou ale nou fer Audit Reports nou vwar bann defayans nou pa zis pibliy en rapor nou dir i annan defayans apre nou kit la i bezwen annan en sistenm monitoring pou fer sir ki sa bann witnesses i ganny adrese e even bann dimoun ki responsab i ganny accountable for.  Akoz si ou pa tackle sa bann keksoz demen tou ou laspirasyon pou kwasans ekonomik, prosperite pou en dimoun pa pou materialize.

So avek sa Mr Deputy Speaker mon ti a remersye tou Onorab ki la ozordi pou siport sa 2 amannman ki nou’n anmenn isi e mon demann zot pou kontinnyen zwe en rol tre enportan ki zot zwe pou – akoz zot en parti enportan reform process, zot bann predeseser ki ti la avan zot in zwe – enkli dan lopozisyon ti zwe en rol tre enportan pou pous bann sanzman forward e mon remersye zot ozordi pou siport sa bann lamannman.  Mersi.

 

MR DEPUTY SPEAKER

Bon avek sa nou pran en vot lo prensip e merit zeneral sa Bill Tou bann ki anfaver lev zot lanmen? I inanim.  Mon a ganny en formal second reading.

 

THE CLERK

A Bill of an Act to amend the Public Debt Management Act 2008.

 

MR DEPUTY SPEAKER

Bon eski nou pou al dan staz komite oubyen napa nesesite?

 

HON MARIE-ANTOINETTE ROSE

Mr Deputy sa Bill osi napa gran lamannman alors anba Order 91(1) mon move ki nou suspend orders 65-70 pou nou sot Committee Stage.

 

HON CHARLES DECOMMARMOND

Mr Deputy Speaker mon segonn sa Mosyon.

 

MR DEPUTY SPEAKER

Bon, nou’n aprouv pou nou sot staz komite, mon a ganny en Motion for third Reading.

 

HON MARIE-ANTOINETTE ROSE

Mr Deputy anba Order 71(1) mon move ki nou lir sa Bill en trwazyenm fwa.

 

MR DEPUTY SPEAKER

Okenn ki segonde?

 

HON CHARLES DECOMMARMOND

Mr Deputy Speaker mon segonde me selman nou pa’n vote lo sa premye amannman.  Pou sispann Standing Orders, nou’n segonde me nou pa’n vote.

 

MR DEPUTY SPEAKER

Pardon…

 

HON CHARLES DECOMMARMOND

Nou’n sispann Standing Order nou’n segonde, nou propoze nou’n segonde me nou pa’n vote.

 

MR DEPUTY SPEAKER

Bon nou anord avek nou Standing Orders so, nou proceed, nou a ganny en vote lo sa Bill.  All in favour?  Inanim.

Mon a ganny en third reading.

 

THE CLERK

This Act maybe cited as the Public Debt Management (Amendment) Act 2012.

 

MR DEPUTY SPEAKER

Bon nou Bill in ganny aprouve e nou ava eskiz Minis avek son delegasyon parmi nou.

Bon nou al lo nou Motions e mon va envit Onorab Leader of Government Business Onorab Rose pou prezant son Mosyon.

 

HON MARIE-ANTTOINETTE ROSE

Mersi Mr Deputy.  Mr Deputy  avan ki mon prezant mon Mosyon mon annan en pti lamannman ki mon ti a kontan met devan ou e mon bezwen en pti pe ou gidans lo la. I pa sibstansyel.

MR DEPUTY SPEAKER

Proceed.

 

HON MARIE-ANTOINETTE ROSE

Mr Deputy mon ti a kontan ki sa Mosyon i lir koum swivan: An vi sa nivo vag krim ki pe menas nou pei, sa Lasanble I demande ki Biro Prokirer Zeneral ek Zidisyer savedir mon’n en kli Biro Prokirer Zeneral e Zidisyer i deswit etablir gidans kler lo bann lofans kot dimoun pa merit ganny large lo “bail” e komans met an pratik o pli vit posib pou fer sir ki nou protez viktim e nou anpes menm dimoun kontinnyen repet menm lofans.

 

MR DEPUTY SPEAKER

Bon anba Order 41 mon konsider sa koman en senp lamannman alor in ganny aksepte.  Mon a demann ou pou proceed avek ou Mosyon.

 

HON MARIE-ANTOINETTE ROSE

Mersi Mr Deputy.  Mr Deputy, premyerman mersi pou aksepte sa Mosyon koman en Mosyon dizans, en Mosyon ki enportan akoz i pe abord size sekirite nou popilasyon, nou viziter, nou pei e nou pep.  I met an kestyon kapasite sistenm Zidisyer pou vreman delivre lazistis a bann viktim e pli enportan ankor a sa pep ki pe rod lazistis, ki pe kontinnyelman ganny teorize  par en pti group dimoun ki pe rantre dan lakaz e vole e komet tout sort kalite bandisite anver zot prosen.

Mr Deputy sa Mosyon pe demande ki nou sistenm Zidisyer enkli Biro Prokirer Zeneral, son Ziz, son Mazistra, son Avoka i wake up to the reality of this country e reponn lapel e leokri nou pep pou annan en sistenm lazistis ki fair, just, relevant and law abiding.  Nou pa kapab annan labi e konfli dan nou sistenm lazistis e nou pa pou toler en sistenm ki a mon avi i les en gro trou ouver pou voler ek bandi rantre e sorti dan lakour dimoun e dan zot lakour konmsi zot dan zot salon.  Mon nepli kapab krwar dan en sistenm ki parfwa pou oule fer nou krwar ki en dimoun ki kas lakaz e vole ouswa redi sennon en dimoun i annan plis drwa ki sa vre viktim e sa enn ki nou merit proteze a tou pri.

Mr Deputy nou pep in elekte sa Lasanble pou fer tande zot lavwa, pou kriye si fodre me reelman reprezant zot konsern.  Si ler nou fer li sa i fer sa detrwa dimoun enkorfortab so be it, zot bezwen ekout lavwa Lepep Seselwa.  Si nou fer li, nou pe fer serten dimoun sanz zot fason fer so be it, nou annan en oversight role e nou pou egzers li.  Si ler nou fer li nou pe ede redres en sitiasyon, alors nou konnen ki nou lo nou kote, lo kote Lasanble nou’n zwe nou par.

Mr Deputy ozordi nou pep pe demann en sel keksoz e sa se lazistis, lazistis e lazisti.  Annou rann zistis a sa bann fanmiy ki kontinnyelman ganny terorize par en pti group dimoun ki kontinnyen kas lakaz e vole.  Annou rann zistis bann Madanm ki pe kontinnyelman viv dan lafreyer akoz en sel kou an gran zis enn zot sennon ouswa zot zano i ganny arase lo zot.  Annou rann zistis nou dimoun aze ki ganny arase zot kaba.  Annou rann zistis bann fanmiy ki travay tre dir pou donn zot zanfan en laptop ouswa en mobile e zis detrwa predater i deside vole.  Annou rann zistis bann businessman ki trimouse, ki sakrifye pou fer marse nou lekonomi me zot osi zot ganny atake e vole.  Annou rann zistis bann touris ki pey en kantite larzan pou vizit nou pei e ler zot al fer en pronmenad zot ganny menase ek gran kouto, zot passport i ganny vole, zot camera e tou zot larzan osi i ganny vole.

Mr Deputy sa vag krim ki pe afekte nou pei i pa bann gro, gro krim parey mert – me i en seri petty crimes plito asosye ek drog ek vol e kas lakaz e vole e parfwa grievous bodily harm, se sa kalite krim ki pe afekte nou, menm krim preski toulezour e parfwa par menm dimoun.  Se sa nou realite.  In estimen Mr Deputy ki sa bann lofans pe ganny komet an gran parti par zis en senkantenn bandi ki sirkil partou lo Mahe, serten i Praslin e pe teroriz kominote par kominote.  Ler zot sorti Bel Ombre e dimoun in fini konn zot laba zot bouz Beau Vallon, apre sa zot bouz Glacis, apre zot bouz Anse Etoile en sidswit.  I annan en bann ki zis katern dan lapay e atak touris, i annan menm ki rantre dan lasanm lotel touris e vol tou sa ki zot annan.

Mr Deputy i en bon kwensidans ki ozordi nou pe konmemor lazournen enternasyonal kont labi ek trafik drog ilegal e bomaten Minis in konfirmen ki se zisteman drog ki labaz tou bann kalite anti-sosyal ki nou pe eksperyanse.  Sa i ganny konfirmen par statistik lo krim ek bann larestasyon ki lapolis i fer.  Mr Deputy statistik lo krim i montre ki sa bann petty crimes, sa bann kalite bandisite in kontinnyelman ogmante okour bann dernyen mwan ki’n pase.  Rikord 2012 depi Zanvye ziska la i montre en gran logmantasyon dan petty crime sorti 89, 98 pardon larestasyon an Zanvye, 180 an Fevriye, 244 an Mars, 248 an Avril, 278 an Me e 196 ka pou Zen ziska le 22 Zen sa lannen.  Mr Deputy levidans i kler, lapolis in kontinnyelman fer larestasyon apre larestasyon, me eski sa bann dimoun in kondannen? Eski i annan en bon case kont zot Ankour?  Ouswa eski zot pa menm dimoun ki pe kontinnyelman ganny large lo bail?

Mr Deputy nou pep in nepli kapab tenir en tel sitiasyon e tou bann parti prenan dan devlopman nou pei e sirtou bann lenstitisyon ki’n ganny konfye pou mentenir lord, lape ek lazistis dan nou pei pa merit fer soudorey lo sa gro konsern, pa merit fer krwar zot obliye ki zot viv dan Sesel e lwayote anver Sesel se lwayote anver lazistis pou Seselwa.  Ki nou problenm ozordi ki nou trouv nou dan en sitiasyon kot nou pa kapab efektivman deal avek en group dimoun ki pe met nou otaz dan nou prop pei?  Rezon ki tou dimoun i dir Mr Deputy se lartik 18 dan Konstitisyon.

Mr Deputy ler mon get lartik 18 nou Konstitisyon mon tre atriste par lafason ki sa lartik pe konmela ganny servi koman leskiz akoz nou pa kapab fer sa ki sa Mosyon pe demande.  Sa i fer mwan realize ki lapolis i kapab fer en pli bon travay e Biro Prokirer Zeneral i kapab fer en bon travay, me si nou kontinnyen abiz lenterpretasyon lartik 18 koman lartik enn bann drwa fondamantal bann akize, alors nou pe al kont sa menm Konstitisyon e sa menm laliberte ki nou sipoze pe proteze.  Annefe Mr Deputy lartik 18 i tre kler lo kimannyer en dimoun i kapab ganny garde anndan si lalwa I santi ki sa dimoun larg i koz en danze pou viktim e i koz en danze pou sosyete.

Mr Deputy annou regarde ki lartik 18 pe dir nou.  Lartik 18(1) i koz lo right to liberty -drwa laliberte e I dir every person has a right to liberty and security of the person. Tou dimoun dan sa pei i annan en drwa a laliberte e sekirite – se sa gran linny e lespri lartik 18 e ozordi mon demann Zidisyer pou evok lespri lartik 18 e fer sir ki nou zonm e fanm pa santi zot terorize par sa bann menm dimoun ki kontinnyelman ganny large lo bail dan zot prop Lakour zis pou zot vol ankor pou ganny larzan pou pey sa menm bail lo ki zot in ganny large. Mr Deputy sa se en vicious circle.  Mon krwar ki drwa sa endividi ki ganny vole i osi enportan ki drwa sa voler ki li son Avoka i koz lolartik 18.  Annou pa abiz lespri nou Konstitisyon e fer nou krwar ki drwa en voler i pli enportan ki drwa en viktim.

Mr Deputy annou regard larik 18(7) nou Konstitisyon, ki lesansyel sa Mosyon ki devan nou ozordi, i dir nou a person who is produce before Court shall be release either unconditionnaly or upon reasonable condition for appearance at a later date for trial or for proceeding preliminary to a trial except where the Court having regards to the following circumstences determines otherwise.  Savedir i annan provizyon dan nou Konstitisyon ki tre kler kimannyer en dimoun i devret ganny large lo bail.  Konstitisyon i fer provizyon pou pa larg en dimoun e deny li son right to liberty si sa dimoun i fer lofans grav e sa i 18(7)(b).

Mr Deputy semenn pase nou ti tande lo televizyon ki en dimoun i n ganny large lo bail pou vyol.  Vyol Mr Deputy.  Eski nou Lakour nepli konsider vyol koman en lofans grav e eski nou Lakour I santi laors ki i normal pou en dimoun ki ganny akize pou en tel lofans pou li marse e parfwa harras sa menm victim?  Mr Deputy i vin pli enteresan ankor lartik 18(c) i dir nou ki Lakour i kapab deny bail en dimoun pou sa bann rezon swivan:  18 (7)(c) si i annan “There are substancial grounds for believing that the suspect   will fail to appear for the trial or will interfere with the witnesses or will otherwise obstract the course of justice or will commit an offence while on release” e pli lwen lartik 18 (7)(s) i osi dir ki sa akize pa kapab – Lakour i kapab servi son diskresyon pou pa larg sa akize lo bail si 18(7)(s) “The suspect has been arrested pursuant to a previous breach of the conditions of release for the same offence”. Mr Deputy be akoz alors nou trouv nou dan en sitiasyon ozordi kot serten dimoun i pas ankour e i kontinnyelman ganny release lo bail malgre ki nou Konstitisyon i fer provizyon tre kler pou pa donn li sa laliberte pou repet menm lofans ankor.  Akoz ozordi nou prefere pou lir e aplik zis serten laspe nou Konstitisyon e kot i ariv drwa fondamantal nou pep son drwa a laliberte dan son prop lakaz la nou deny li sa drwa akoz nou larg sa menm voler ki pou kontinnyen teroriz li dan son prop lakour.

Mr Deputy i kler ki lartik 18 lo ki son labaz i prisontion of innocence before being proven guilty i la pou donn tou dimoun en sans pou prove zot case avanler ki zot ganny met dan prizon, e sa se en drwa fondamantal.  I enportan ki Zidisyer i konpran tre klerman ki nou pa la pou pran en drwa ki nou Konstitisyon e ki tou norm enternasyonal i merit preserve.  Se sa mesaz lartik 18, me plito ki en repeated offender ouswa en dimoun ki pe terorizm en vilaz e ki’n vin en threat pou trankilite, lord e lape dan en kominote ouswa ki son aksyon in fini vin en threat pou stabilite ekonomik pei pa merit ganny trete menm parey sa enn ki wi li i bezwen lespas e gard son laliberte ziska ler i ganny prouve ki vreman koupab.  Mannyer mon vwar sistenm lazistis ozordi konmsi i napa okenn triyaz e tou dimoun i ganny trete parey.  Mr Deputy each case should be treated as an individual case.  Pa tou dimoun ki voler zis parey ki pa tou voler ki inosan.

Mr Deputy statistik ki devan mwan e travay resers ki mon’n fer i demontre sa bann defayans swivan dan nou sistenm Zidisyer.  Premyerman i annan en gro problenm an sa ki konsern bann ka devan Lakour pou termin en ka, sa I fer ki zizman i kontinnyelman ganny anvoye e sa akize i kontinnyelman pas son sezour deor pe kontinnyelman vol lezot viktim.  I annan case devan Lakour, senp pti case ki depi 2001 i devan Lakour e sa boug li i an larg.  I annan case Mr Deputy kot sa dimoun limenm li in fini plead guilty e sa case in pran 4 a 5an pou finalize.  I annan case kot menm sa bann akize in mor e case in fini termin koumsanmenm.  In estimen ki sa bann ka bandisite ki nou pe koz lo la e kot laplipar ditan en akize i pled koupab pa devret pran plis ki 6 mwan pou finalize.  Tou dimoun kot Lakour i konn tre byen sa senp term ki dir ‘justice delayed is justive denie’,.  Sa i vedir ki Lakour i merit annan en sistenm pli efikas pou deal avek sa case.

Eski Lakour i fonksyonn a son optimum dan en zour?   Sa i kestyon ki mon pe demande.  Eski Lakour pa merit fer zefor pou retir sa back log ki annan?  Mr Deputy Biro Prokirer Zeneral osi i advise Gouvernman lo bann meyer proze de lwa ki nou pei i kapab annan, merit li a son tour fer serten propozisyon konkret dan sa direksyon, nou Konstitisyon I tre kler e nou kapab parey Langleter propoz en Bail Act dan ki bann kondisyon bail i tre kler pou tou dimoun konnen.  Lavi Ziz ouswa Mazistra ouswa Avoka ki pou kapab lev lartik 18 e komans koz nou bann drwa si nou annan gidans tre kler lo lekel ki merit ganny bail e lekel ki pa merite e ki kalite bail en dimoun i merit peye.  Si nou annan en mors lezislasyon pou fer sa, pou napa labi Mr Deputy.  Mon pe propoze ki si Zidisyer I santi ki sistenm bail pa ase kler – alors nou koman bann law makers nou a fer en lalwa, enn ki konstitisyonnel e enn ki defann lentere tou Seselwa e dan lentere lamazorite lepep Seselwa.  I kler ki nou pa oule sitiasyon kot prizon i pli plen ek dimoun ki lo rimann ki bann ki ganny enkasere e la mon pe propoze ki departman prizon osi i organiz li, me osi ki bann ki lo rimann pa esper plizyer lannen avan ki en ka i finalman trouv son lafen.

Mr Deputy nou bezwen osi siport demars lapolis pou crack down lo sa vag krim ki pe afekte nou pei.  Wi nou pa dakor si en lapolis i abiz drwa fondamantal en dimoun zis parey i pa zis si en dimoun i ganny akize mal apropo.  Drwa en imen i reste drwa en imen, me nou dan sa Lasanble nou siport demars lapolis pou aret sa bann voler enn fwa pou tou e deal avek zot severman e la mon pe demann lepep Seselwa pou zwenn nou dan sa batay.  Wi parfwa i fermal akoz sa bann dimoun i nou prop zanfan, zot menm vol zot prop paran me nou nou pa pou ed zot si nou kontinnyen kit zot larg e kontinnyen protez zot ler zot komet lofans.  Nou pe osi fer ditor nou pei kot i annan sitiasyon kot sitwayen in menm pran lalwa dan zot prop lanmen e zot pe mars ek gran kouto ek mayos anka zot ganny atake.  Bann viziter ki vin pas en vakans kot nou e ki pey en pake larzan i retourn se zot avek en gou anmer dan zot labous e zot santi ki Sesel pe vin en pei danzere.  Bann envestiser pe santi ki zot propriyete biznes i an menas. Eski nou anvi ki Sesel I vin parey Sid Afrik ouswa Jamaica swa Mexico kot non sa bann pei i sinonim avek vyolans e kot lenditri touriszm in preski fini ganny afekte. Eski sa i kalite pei nou anvi batir pou nou pep e nou zanfan?  Larepons i non Mr Deputy non. Nou pa pou toler en tel mantalite e nou siport demars Gouvernman dan tou direksyon pou met en bon lord avek sa bann kalite bandisite.  Nou annan en kantite propozisyon pou fer me kot i mal nou bezwen dir pou nou kapab aranze, e ozordi kimannyer i ete nou sistenm lazistis pa pe fer okenn zistis bokou dimoun.  Ozordi serten nou bann Avoka pe abiz lartik 18 nou Konstitisyon.  Ozordi nou pe ganny met otaz dan nou prop pei par ezis en pti group dimoun ki’n deside atak nou byennet, nou lakour, nou lendistri e nou lavenir.  Krwar mwan Mr Deputy i pa en sekre ki i pran zis en ka, en sel ka mert, en sel ka pou zet nou lendistri touris ater parey in arive dan nou pei vwazen Moris, me nou’n tro envestir dan nou lendistri, nou tro anvi progrese, nou tro anvi protez lavenir nou pep e sekirite nou pei pou les sa arive ek Sesel.  Ler pou pran aksyon, aksyon sever e aksyon ki morde i la e la mon lans en lapel avek tou dimoun ki dir zot annan nou pei a ker – annou travay avek leker me osi pou bann lenstitisyon endepandan annou osi fer nou travay relevan avek bezwen ek laspirasyon nou pep.  En parlman i la pou fer zisteman sa, pou fer tande lavwa son pep e si okenn lenstitisyon parey Zidisyer i refize ekout sa ki nou pe dir e dir ki li i endepandan, alor mon pou dir avek sa bann homme de lwa akfer alors zot zot bezwen sekirite?  Akfer alors zot santi ki zot merit ganny proteze anplis ki popilasyon Seselwa?  Si nou pep pa merit menm kalite proteksyon akoz zot santi ki zot merit proteksyon spesyal?  Mon osi oule dir ki en Zidisyer ki pa ekout sa menm pep ki i deservi i enn ki reste dekonekte avek lasosyete, e sa i pli gran lenzistis nou kapab ran.  Tou lalwa ki ganny fer dan en pei i ganny fer a la baz en bezwen, en bezwen profon sa pep.  Alors enterpret lalwa, enterpret li byen e mazinen ki sa lalwa i dekoul dan bezwen en Nasyon.  Se sa ki nou pe reklanmen ozordi.

Mr Deputy sa Lasanble lavwa Lepep pe reklanm en sel keksoz, lazistis, lazistis e lazistis e mon donn garanti Lepep Seselwa ki nou senpatiz avek zot, bann ki pe soufer e bann viktim krim e mon dir zot ki nou pou fer tou sa ki dan nou pourvwar i permet pou nou met en lafen avek bann tel kalite bandisite e bann eleman ki pe protez sa bann kriminel. Mersi Mr Deputy.

 

MR DEPUTY SPEAKER

Bon, okenn ki segonn Mosyon?

Mosyon i ganny segonde par Onorab Decommarmond. Oule koze oubyen plitar? Request Onorab Decommarmond.

 

HON CHARLES DECOMMARMOND

Mr Deputy Speaker mon segonn sa Mosyon mon a koz plitar. Mersi.

 

MR DEPUTY SPEAKER

Mersi, Onorab Fideria.

 

HON EMMANUEL FIDERIA

Mr Deputy sa Mosyon ki devan nou Lasanble ozordi in vin a en moman tre apropriye.  Sesel Mr Speaker i en pei ki’n pas dan en kantite sanzman e devlopman e tou sa bann devlopman in arive akoz bon planifikasyon, bon prensip determinasyon bann fanm ek zonm ki bann vre patriyot ki’n sakrifye zot lavi pou anmenn en o nivo lavi akspetab pou sa pei e pou sa pep.  Ler nou get lo televizyon Mr Deputy nou pa kapab konpar nou e mezir zistans ek progre ki nou pei in fer.  Sesel koman en pei demokratik i annan e in kre tou bann lenstitisyon tre enportan ki fer en sosyete mars normal.  Malgre tousala nou pei pe fer fas avek menas pirat ki afekte dezyenm pilye nou lekonomi, nou’n perdi en kantite reveni atraver menas reel piratri, nou Prezidan ek son Gouvernman pe fer tou pou rod led.  Seselwa in note ki plizyer pei zanmi swa bann lorganizayson parey NATO pe ed nou konbat sa fleo.  Mon bann frer ek ser Seselwa nou bol diri pe ganny menase.  Bato ton ki pe sanz landrwa pou fer transitment sa pe met bann konpanyen ki fer sa biznes perdi larzan.  Nou bann stevedores i soufer, zot fanmiy e zot zanfan osi i soufer.

Mr Deputy lot keksoz pe ravaz nou pei se sa vag krim ki pe arive dan nou kominote.  Sa Mosyon devan nou Lasanble ozordi ki Zidisyer i etablir gidans kler lo sa bann lofans kont bann dimoun ki ganny large lo bail.  Mr Deputy lartik 18 dan nou Konstitisyon i kler lo sa size ki sitwayen i annan son drwa pou ganny large lo bail.  Kestyon ki mon pe demande – eski pa’n ler pou reviz fason ki bail i ganny aplike?  Eski sa bann bail ki zis en pti bout papye, eski pa’n ler pou nou arete?  Eski pa’n ler pou lev lakantite larzan ki nou met lo bail?  Eski sa bann bail R2000, R3000 pa’n ler pou nou arete Mr Deputy Speaker?

Mr Deputy Speaker mon senserman krwar ki sa sonm ki pe ganny demande pou alrg dimoun lo bail pa reflekte larealite ozordi.  Nou bezwen fer le neseser pou revize ki sa sonm larzan I vin en sonm sibstansyel ki ava azir koman en deterrent e dan sa fason bann ki komet lofans pa ava vwar li fasil zis pou pey en pti sonm larzan e ganny large e alafwa pran sa bann loportinite pou komet plis lofans ankor.

Mr Deputy nou bezwen al pli lwen, nou bezwen osi nou bezwen osi kapab met kondisyon, kondisyon i ganny azoute ki ler en dimoun i lo bail nou kapab donn li ler pou li mouvmante.  Si i kas sa kondisyon i konnen ki mezir pli sever pou ganny pran kont li kot i kapab ganny detenir dan prison.  Mr Deputy mon dir sa – mon pe dir sa bann mezir akoz nou pep dimoun dan nou kominote pe soufer en kantite, serten fanmiy tou resaman ler zot leve 4er bomaten zot vwar dimoun dan zot lakaz – zot pa ni kapab menm defann zot lekor, zot zanfan i ganny tromatize, zot pa kapab aprann lekol, vye dimoun pe ganny atake ganny pran zot sekirite, ganny pran zot larzan, sennon dan zot likou, sa ki lapes sak par lefnet, fer ou tir ou lenz, menas ou ek zouti Mr Deputy lalis i long.  Nou sosyete in ganny ase e nou dir tre for enough is enough.  Sosyete pa kapab asize zis gete, nou bezwen pran bann desizyon ki brav, kouraze e tou bann akter konsernen i bezwen met latet ansanm – rode, serse bann fason pli inovatif ki nou kapab konbat sa kanser ki pe anpwazonn nou laliberte, nou lazwa de viv dan trankilite, dan lape ek larmoni san lafryer.

Mr Dpeuty sa lager kont krim i bezwen transform dan en lager kot nou tou nou met zefors ansanm pou anmenn en solisyon akspetab, kot nou tou nou sitwayen I santi li dan sekirite.  Sesel i bezwen viziter, touris I vin vizit nou zoli pei e depans larzan ki nou vreman bezwen pou nou ganny sa ki nou pa kapab prodwir isi.  Avek kriz Lerop e lezot problenm mondyal ki rin nou pti lekonomi nou tou nou pou soufer si nou pa azir dan en fason serye e responsab.

Mr Deputy ler in arive ki bann lenstitisyon parey lapolis, biro Atorni Zeneral i devlop sa sinerzi pou kapab aplik pinisyon pli sever lo bann ki fer sa bann krim.  Lenvestigasyon i bezwen vin pli efikas kot levidans i kler e kale, case I vin pli for ki sa ki koupab pa ganny sans sape – akoz ler i sape tou dimoun nenk nou blanm enn a lot.  Nou bezwen travay pa neseserman pli bokou me pli smart, nou bezwen devlop en nivo kapasite kot tou nou bann zonm ek fanm ki direkteman lo fron batay sa lalit kont kriminalite i vin pli smart ki sa bann dimoun ki pe komet sa bann lofans oumwen akt kriminalite.

Mr Deputy nou bezwen vin pli serye avek reseler akoz si en dimoun pa kapab prouve ki in aste en keksoz ki dan son prosesyon e ki’n ganny raporte perdi nou bezwen deal ek li dan en fason tre serye.  Ozordi nou pa pe konsider zis kestyon kas lakaz, kas laboutik ouswa transpor, latak direk lo en endividi swa Seselwa ou etranze bann lezot krim osi parey conning, pran larzan lo fo preteks, fer bann dimoun aze sinny bann dokiman ki zot pa konpran e menm vann zot lakaz dan bann fason manboulouk.  Tou sa bann kalite krim osi nou bezwen deal avek seryezman.

Mr Deputy nou sitwayen i bezwen ganny trete byen letan i an detansyon lapolis.  Nou pa kapab met dimoun dan en kaso enpitwayab – kot tou sa zafer i fer lanmenm.  Annou pa detenir en sitwayen ler pa neseser, ler napa levidans pa zis kit li dan kaso weekend apre Lendi bomaten en gard i vini i dir li ale – sa osi Mr Deputy nou bezwen met en lord ladan.

Mr Deputy dan serten sirkonstans lapolis osi i kapab donn bail lo bann lofans miner.  Mon panse ki bann provizyon neseser i kapab ganny fer pou kapab fer sa vin en realite.  Akoz ki nou pa pe fer li?  Wi Mr Deputy sitwayen i annan son drwa anba Konstitisyon me nou drwa pa permet nou vol keksoz ki pa pou nou.  Mr Deputy nou tou nou bezwen lager lebra kase pou nou sov nou pti pei Sesel.  Nou pa kapab les nou ganny terrorize  avek en pti group bandi, dimoun ki pe menas nou sekirite nou pei.

Mr Deputy Speaker avek sa de mo, mon pou siport sa Mosyon e mon remersi ou. Mersi.

 

MR DEPUTY SPEAKER

Onorab Bristol.

 

HON ALDERIC BRISTOL

Mr Deputy Speaker, Manm Onorab e tou dimoun alekout bonn apremidi.  Mon komans mon entervansyon par eksprimen ki kantite mon kontan mon zoli pei Sesel, ki kantite mon admir son labote, ki kantite mon fyer pou form parti sa melanz Nasyon milti-kouler.  Nou en pti Nasyon ki par natir sirtou par nou kiltir nou ti posed bann tre bon kalite fason viv.  Ti anann en tre o nivo lapolites, bon disiplin, bokou respe pou nou prosen e propriyete nou prosen e en tre gran lafyerte.  Se sa bann tre bon mannyer ki ti ganny enkilke dan nou swa par nou paran, swa par lasosyete ouswa par norm ki lavi limenm ti’n etablir sa letan.  Tousala ti ed nou bokou pou gid nou dan en bon semen e sa ti reponn partou dan nou pti konton, dan vilaz, dan tou kwen nou pti pei e ti menm depas nou lafrontyer.  Mr Deputy ozordi zour malerezman i annan en gran bezwen pou al re-rod sa ki nou’n perdi.  Nou’n telman evolye e devlope ki nou pe perdi nou bann tre bon kalite ki ti fer nou fyer.  Nou’n telman vin materyalistik ki fer nou bliy en bon pe lo kote nou valer imen e sa i anmenn mwan pli presizeman lo sa size krim dan nou pei e sirtou latak arme e vol.

Anmenmtan mon oule koz avek mon dimoun dan mon distrik lo sa size osi.  Vol i en vilen vis ki’n toultan egziste omonn e dan nou pei erezman i ti ariv tre rarman me non pa lo sa lanpler degoutan parey ozordi.  E kontrerman avek ozordi sa bann voler ti vitman ganny atrape pas Ankour e mont Ile Long pou al servi zot santans, e mon resers ek legzanp konkret i montre mwan ki en bon pe sa bann bandi ti refer zot lavi.  Mr Deputy dimoun dan kominote ti vizilan e personn pa ti per voler akoz menm voler zot ti annan serten remonn konsyans viz a vi zot victim.  Sa in sanze ozordi.  Voler in nepli per, voler in vin pli agresiv, voler pa swazir ki ler kote zot vole, voler pa ni menm enterese pou kasyet zot idantite ler zot pe vole.  E la prezan bann zabitan pe vwar zot forse pou re-adapte zot fason viv pou fer fas a sa sitiasyon.  Burglars bar, Camera sirveyans, fencing, gro miray, baro, lisyen eksetera e sa i vin avek son kou ekstra ki normalman pa ti pou neseser.  Malerezman bann ki pli kapab protez zot lakour zot vwar zot pli a risk vin viktim sa bann bandi e la prezan i pou en lot dimansyon kot dimoun i bezwen vey zot lekor akoz ataker i atak bann endividi dan semen.  Dan gran kler anvil, devan ou lakour avan menm ki ou ouver ou laport.

Frer, ser pep Seselwa, frer zabitan Takamaka – eski nou pou les sa kontinnyen arive? Eski nou pou les nou ganny tererolize par sa bann vagabond?  Eski nou pou kontinnyelman reste prizonyen dan nou prop lakaz?  Eski nou pou kontinnyelman permet sa bann atrosite dan nou kominote, dan nou distrik?  Zabitan zot konn osi byen ki mwan ki nou distrik ti enn ki ti tre trankil e i ti en landrwa kot normalman gou pou viv.  Nou ti krwar akoz nou enpe retire avek lavil sa viris vol e sirtou latak pa ti pou zanmen montre son vilen figir devan nou laport.  Anfenn kont nou ti krwar nou ti safe me la i pa ditou.  Tre resaman en zenn zonm sorti travay ti ganny atake e ganny arase son mobile e port fey.  Dan vouloutye annarlan bor lanmer Maravi i annan en pervert ki maske pou sey atak bann madanm ki al jog dan pti labrinn.  Voler i vol touris,  i vol dan letablisman touristik, I vol dan lakaz dimoun e ziska ozordi i ankor pe marse freely dan distrik.  Rezinn bannan ki pankor ni menm plen nepli reste dan pye, e sa i zis detrwa legzanp resan.

Mon bann frer zabitan avan i tro tar annou sezi loportinite e met en kontrol lo sa sitiasyon, avan i debord nou konpletman, e la mon le fer sa bann lapel spesyal swivan.  Ou ki pe soutir voler mon pe fer ou realize ki sa i en lofans anba lalwa – demen pa kriy lasasen ler sa menm vwayou i vir lo ou menm.  Ou ki pe aste keksoz vole, mon oule met a ou latansyon ki sa i en lofans ki osi grav ki sa askyon vole limenm.  Ou ki pou serten lentere personnel ou pe enterfer dan bann case mon oule demann ou pou les laplikasyon lalwa determin sa ki koupab e sa ki pa koupab. Ou ki pankor deza ganny afekte par en vol ou en latak , mon ti a voudre ou realize ki sa maler i kapab arive avek ou osi e alors reste vizilan e pa bezwen dir ki sa ki ariv otour ou pa konsern ou.  Ou, mwan e nou tou ki form parti sa kominote annou met zefor ansanm pou sey dekouraz sa bann tel aksyon dan nou lantouraz.  Annou reste ferm, vizilan e solid.  Annou deal avek sa bann bandi dan fason apropriye e zis, annou met lanmen lo sa sitiasyon.  Napa keksoz pli fermal ler en travayer i sorti debourye lazournen i ariv se li aswar e vwar son laport in ganny kase par voler – I fini perdi kouraz, dezespwar i antre, en lakoler terib i pas anndan li e i ganny lanvi fer krim li osi.  Bann ki’n pas dan sa sitiasyon i konpran byen ki mon pe dir.  Alors Mr Deputy pou anpes nou bann bon sitwayen fer krim zot osi, pou dekouraz voler ek ataker, pou anpes ki nou bann dimoun i soufer plis par aksyon sa bann bandi, pinisyon sever i bezwen ganny aplike lo zot.  Santans tre for i neseser e sa pa pou zis en pinisyon pou sa bann kriminel me osi i a vin koman en zistis pou sa bann viktim osi.  En viktim pa gannyen lazistis ler en boug i kas son lakaz, vole e detri son propriyete e kondann zis 3 mwan prizon pandan ki sa viktim i bezwen depans li en bon pe mil roupi pou repar sa ki in kase e re-aziste sa ki’n ganny pran.  E definitivman sa voler pou fer menm lofans ankor apre ki in sorti prizon akoz sa santans I parey en pti vakans konpare avek sa krim ki i komet, e dan 3 mwan napa ni menm ase letan pou sey re-abilit li.  Sa i vreman pa akseptab ditou.  Zidisyer konrpan nou e donn nou koudmen dan sa lager.  Konpran sa bann viktim, sa bann zonm ek fanm ki’n trimouse pou ganny sa ki zot prosede e pou vwar sa ganny vole dan lespas minit.  Konpran sa bann etranze ki’n vin pas zot vakans se nou e depans zot larzan me an retour zot retourn kot zot avek move souvenir zot sezour isi.

Mr Deputy en boug i vole i pas Ankour e i ganny large lo bail, i konn tre byen pou dir i pou kondannen li pou sa lofans, alors ler i deor i profite i kas ankor detrwa lakaz, ou antak dimoun akoz i konn tre byen ki ler i pas Ankour premyerman santans pa pou long e anplis santans pou mars ansanm.  Alors I tre neseser ki sa i arete o pli vit posib.  Kit li anndan ler in ganny atrape e kondann li fermeman si i koupab.

Mon zwenn avek loter sa Mosyon e bann koleg ki pou koze apre mwan pou demann Zidisyer pou etre pli ferm e deal seyezman e efektivman avek bann ka ki vin devan Lakour.  Fodre i annan en mesaz kler ki ganny pase avek sa bann bandi, nou pa soutire sa bann vilen keksoz dan nou pei Sesel.

Mr Deputy avek siport zabitan mon distrik mon pou aport mon sipor pou sa Mosyon.  Mersi.

 

MR DEPUTY SPEAKER

Onorab Volcere.

 

HON MARC VOLCERE

Mersi Mr Deputy Speaker.  Mr Deputy Speaker dapre dernyen resansman e sif pibliye par National Bureau Statistic pou lannen 2011, nou ti annan popilasyon anviron 90 mil dimoun ki reste Sesel, sa i enkli tou dimoun depi zanfan, fanm ek zonm tou sort laz.  Par sa group dimoun dan sa anviron 90 mil i annan apepre 44 ki dan lanplwa, ki ti dan lanplwa an 2010.  Sa Mr Deputy i dapre sif pibliye par sa menm biro ki mon’n koz lo la avan.  Si nou al plis an detay dan sa pti liv i kontinnyen donn plis detay dan sa bann diferan sekter nou lekonomi ki sa anviron 44 mil dimoun i travay ladan pou sa menm lannen.  Sa i enkli plizyer sekter tel ki lapes, touris e lendistri e lezot ankor.

Sa bann diferan sekter travay i bann travay ki ganny aksepte koman bann fason legal pou sa pep ganny son dipen toulezour, i bann travay ki nenport ki Seselwa i kapab angaz li ladan i byensir nenport ki benefis ki i ranmase oubyen i gannyen avek i ganny aksepte par tou lotorite e popilasyon Seselwa an zeneral koman en reveni ki legal.

Mr Deputy Speaker rezon ki mon’n komans mon lentervansyon dan sa fason se zis pou mon demontre ki i annan en kantite travay ki ganny rekonnet oubyen aksepte dan nou pei.  Sa bann sekter travay ki mon’n koz lo la i ganny aksepte dan nou pei akoz i kre larises pou nou sosyete, sa group travayer ki travay dan sa bann sekter mazorite zot i travay onnet e pa koz ditor personn.  Me i malere Mr Deputy Speaker ki dan nou sosyete i annan en lot pti group dimoun ki pou zot sa bann travay ki mon’n koz lo la pa satisfer zot, pou zot fer travay ki ganny akspete par mazorite sa pep pa donn zot satisfaksyon – alors zot plifere angaz zot dan bann aktivite nenport fason ki zi s koz dimal zot prosen pou zot ganny larzan.  Se sanmenm sa pti group ki nou popilasyon I dekri zot koman bann bandi oubyen bann kriminel.  Zot zot pa pare pou angaz zot dan okenn travay ki pou anmenn benefis pou sa pei, parey lamazorite sa pep i fer ki an retour zot ava kontribye dan son lekonomi atraver tax.

Mr Deputy Speaker dezour an zour nou vwar sa pti group pe grosi, wi nou dir sa pti group akoz dapre resers ki’n ganny fer napa bokou zot, parey loter Mosyon in dir ki’n angaz zot dan sa kalite aktivite zot pare pou fer nenport kwa san realize ki soufrans e ki ditor zot pe koz zot viktim.  Me si nou pa pran en lapros pli sever avek zot sa pti group pou kontinnyen ogmante e byento nou pa pou kapab bare.  Mr Deputy Speaker vwala lenportans Onorab Rose – Zidisyer i bezwen rod fason pou anpes sa pti group kontinnyen teroriz e met otaz sa pep.  Sa bann zans zot napa pitye pou person, pou zot i pa enportan lekel ki zot pe atake oubyen kote zot pe al vole.  Sa ki enportan pou zot se kote zot kapab ganny maximum e o pli vit posib.  Pou zot Mr Deputy pran lavi en dimoun, kas en lakaz, kas en lofis, kas en magazen, koz dimal grav en dimoun pou zot pa fer okenn diferans, pou zot sa ki zot enterese avek se zis pou pran tou sa ki zot kapab e tonm dan zot lakoupe pou zot ganny larzan.  Mr Deputy ozordi nou pei, nou kominote, nou distrik, nou lakour, nou landrwa travay, legliz, lekol tousala pe ganny met otaz par sa pti group dimoun ki’n ganny eparpiye partou dan tou nou distrik.  Parey mon’n dir avan zot napa pitye pou personn zot vol depi manman, papa, frer ek ser.  Zot pa gete ki laz ou annan, zot pa get ou abilite fizik.  Ozordi keksoz pe vin pli grav ankor – parey in ganny dir bomaten par Minis zot pe atak nou sours dipen, zot pe fer ditor sa sours ki tou Seselwa i depan lo la pou viv.  Wi Mr Deputy Speaker sa pti group dimoun ki nou mon pe koz lo la ozordi in pran en lot lelan.  Zot pe atak touris partou kote an servan vyolans.  Mr Deputy Speaker zot pe vin pli profesyonnel dan zot lapros, zot pe servi bann sibstans ki fer zot viktim dormi pou zot ganny ase letan pou zot fer zot shopping, zot degiz zot dan diferan kalite labirman zonm i met rob, fos seve e menm met soulye fanm zis pou zot pa ganny rekonnet ler zot lo semen.

Mr Dpeuty Speaker avek sa Mosyon prezante par Onorab Rose Lepep Seselwa pe dir avek sa pti group dimoun e sirtou Zidisyer ki nou’n ganny ase, lepep Seselwa pe dir avek Zidisyer ki nou’n fatige vin otaz dan nou prop lakaz, lepep Seselwa pe dir avek Zidisyer ki nou’n fatige dormi avek en kote zorey, Lepep Seselwa pe dir avek Zidisyer ki nou oule en lekonomi ki kontinnyen prospere pou nou zanfan kontinnyen zouir lo la.  Lepep Seselwa pe dir avek Zidisyer ki nou oule nou liberte, lepep Seselwa pe ozordi dir avek Zidisyer ki nou oule viv dan lape ek trankilite, lepep Seselwa pe dir avek Zidisyer ki wi in plis ki ler pou pran aksyon pli sever ek konkret avek sa pti group dimoun ki oule menas nou sir vivan koman en Nasyon prospere.  Wi Mr Deputy Speaker lepep Seselwa pe dir avek Zidisyer ki in plis ki ler pou protez viktim e anpes menm dimoun kontinnyen repet menm lofans.

Mr Deputy loter Mosyon pe demann Zidisyer pou etablir bann gidans kler lo bann lofans kot dimoun pa merit ganny large lo bail.  Ozordi pou plizyer kalite lofans ou tande ki sa akize apre ki in pas devan Lakour i ganny large lo bail.  Kestyon ki mon ti a kontan demande, eski i annan en swivi oubyen i annan envestigasyon pou vwar lekel ki pey sa bail pou sa dimoun?  Ki relasyon sa akize ek sa enn ki’n pey sa bail pou li?  Eski i annan envestigasyon pou vwar ki relasyon sa de dimoun?  Akoz ki sa dimoun in bezwen pey sa bail pou sa akize?  Kote sa dimoun ki pe pey sa bail I ganny sa larzan?  Ki laranzman ki annan ant sa de dimoun?  Eski en tel swivi i ganny fer par Zidisyer oubyen kek lotorite konsernen?

Mr Deputy dan mon repons dan Leta Lanasyon mon ti fer sorti enn de pwen konsernan vol dan nou pei.  Bokou konsern ki relye avek bann akize ki ganny large lo bail se bann dimoun ki’n enplike dan vol, sa bann ki’n komet plizyer bann lofans ki mon’n koz lo la pli boner.  Ler sa dimoun i ganny large i retourn dan kominote.  Eski sa pa i donn li loportinite pou deal avek sa bann keksoz ki in vole?  Eski nou pa pe donn li letan ek loportinite ouswa vann sa bann keksoz oubyen kasyet zot.  Mr Deputy mazorite keksoz ki ganny vole i pa ganny konsonmen par sa voler limenm.  99 pousan sa bann keksoz vole i ganny re-vann, me avek ki sa abnn keksoz i ganny revann?  Si i napa en market pou en komodite personn pa pou enport li.  Enportater pa pou enport en keksoz si napa demann lo marse, an dot mo si napa en market pou bann voler vann sa ki zot in vole voler pou bezwen aret vole.  Petet zot ava dir mwan ki i pa re-vann sa larzan ki in vole apart forex mon toutafe dakor avek sa me en voler ler i rantre kot ou i pa pran selman larzan i pran tou sa ki i kapab, i pran tou sa ki dan osn semen akoz i konnen ki i pou ganny en marse pou sa ki i pe pran.

Mr Deputy Speaker ozordi lor in ganny en gran marse dan Sesel, tou lor ki ganny vole i fasil ganny re-vann avek swadizan bann ki fer biznes lor, me selman zot napa en licence.  Ozordi ou pa kapab marse dan semen avek en sennon oubyen en brasle lo ou, son met i sot lo ou e aras ou e deswit i vwar en marse – en dimoun ki atann li pou aste avek li.  Mr Dpeuty kan ki Zidisyer pou met an aplikasyon lalwa kont reseler?  Kan ki en dimoun ki pare pou aste keksoz vole son kanmarad pou ganny pin avek lazistis.  In plis ki ler pou nou met en fren avek sa sitiasyon.  En dimoun ki aste keksoz ki’n prouve in ganny vole i bezwen sibir konsekans e konsekans tre serye.  Nou pa pou kapab kontinnyen annan en group dimoun dan nou sosyete ki kontinnyen soutir bann voler an akseptan e aste keksoz ki zot in vole.  Sa ki pli fermal avek tousala Mr Deputy zot aste sa bann keksoz a en pri byen bon marse swa pou zot prop konsomasyon oubyen zot al re-vann a aen pri kot sa reseler i fer en profi vreman enorm.  Mon konnen ki petet zot ganny tante avek sa pri ki sa bann keksoz pe ganny vann me nou bezwen realize ki voler pa pran pitye pou personn.  Ozordi i vol kot mwan e I vin vann avek ou, e demen i kapab vol kot ou e vin vann avek mwan.  Maler napa balizaz, lakord ki anmar bef nwanr i anmar bef rouz.

Mr Deputy Speaker avek lafason ki keksoz pe ale kot en dimoun i ganny ratrape apre ganny large lo bail, kot i kontinnyen kre panik dan sa kominote, kot i kontinnyen vole i anmenn lafreyer pou son victim.  Seselwa pe dir ki zot pou bezwen pran pourvwar dan zot lanmen.  Lepep pe dir ki zot pa pou kapab kontinnyen reste bann soubalter, zot pou reazir e fer zot prop zizman – tanpi konnen ki arive apre.  Lepep pe demann proteksyon avek bann ki egzers lalwa.  Mr Deputy akoz i fermal pou en dimoun ki’n travay dir pou ganny sa ki i annan e vwar tou ganny vole dan detrwa minit.

Mr Deputy Speaker ki arive avek sa kriminel apre ki lalwa in vwar li koupab e i al prison?  Kimannyer sa viktim i ganny rekonpanse pou son bann keksoz ki’n ganny vole si dan prosesis bann keksoz pa ganny retrouv?  Eski sa kriminel i zis asize Montagne Posee bwar, manze e get televizyon.  Mon krwar ki in plis ki ler ki sa bann kriminel i ganny forse pou travay e avek sa larzan rekonpans son viktim menm si nou konnen i annan keksoz ki pou napa en valer anterm larzan me plito en valer santimantal pou sa dimoun.  Par egzanp Mr Deputy Speaker en dimoun ki’n perdi son lalyans eski i annan valer pou aste avek larzan menm si sa larzan ki i gannyen I kapab aste en lot bag e fer beni si oule i pa leka.

Mr Deputy Speaker tou le zan sa Lasanble i donn Zidisyer ek lapolis en bidze pou zot travay avek, sa i byensir larzan ki nou bann ki onnet nou kontribyen atraver tax, alors mon demande ki zot ekout nou e travay pou donn sa pep son liberte, fer ki sa pep e tou son viziter i viv an pe dan sa pti pei Sesel, ki tou dimoun i dekrir li koman en paradi.  Mon profite pou lans en lapel avek tou pep Seselwa pou nou travay ansanm pou ki nou kapab elimin sa bann move lenfliyans ki annan dan nou pei, annou anpes sa pti group dimoun kontinnyen senm laterer parmi nou popiliasyon.  En lapel spesyal pou bann ki met an aplikasyon bann lalwa ki egziste dan nou pei silvouple annou pa les sa pti git dimoun pran nou otaz, les lamazorite sa pep viv anpe.

Mr Dpeuty Speaker avek sa detrwa mo mon pou byensir donn sipor sa Mosyon e mon demann tou mon bann koleg manm pou zot osi donn zot sipor.  Mersi bokou.

 

MR DEPUTY SPEAKER

Onorab Dugasse.  Annou switch off ler nou fini.

 

HON MELVAL DUGASSE

Mersi Mr Deputy Speaker.  Tou Manm Onorab bonn apremidi.  Sa Mosyon mon krwar nou tou nou a dakor ki i en Mosyon ki apopriye e enportan e en Mosyon ki pe adres en problenm reel e ki annan dan nou pei.  Mon dor tre apropriye e enportan Mr Deputy akoz i osi reponn a bezwen mon kominote.  Eski bann lalwa lo proteksyon akize i ankor relevan la ki kriminalite pe ogmante e pe vin pli sotisfike kot sa ki kas ou lakaz, bles ou, vol ou e menm vyol ou i annan plis proteksyon devan Lakour ki sa vre viktim sa krim.  Ki bezwen esper en pake letan avan lazistis i ganny fer pandan ki kriminel li i ganny Legal Aid pou defann li i ganny large lo bail pnadan ki case i anvoye i ganny tou son letan pou li kontinnyen kas lakaz e vole nou konnen kimannyer tousala i fini – zafer i dismis, swa temwen pa prezan, somonn pa ganny donnen ou pa ganny delivre a tan, temwen i deside sanze, legzibit i perdi e byen sir Avoka i kapitaliz lo tou sa bann febles e kriminel i ganny large.

Mr Deputy 3 semenn pase en zenn garson 19an ranpli avek kouraz ki ti’n fek ganny large lo serten kondisyon Lakour ti antre e atak en vye koup enn 80an e en lot 82an e vol zot larzan Sekirite Sosyal.  Sa latak ti tromatiz zot e fer zot per pou reste tousel kot zot lakour ki zot in travay dir pou gannyen.  Nou kominote fermye La Gogue e Ma Constance pa’n ganny eparnye – prodwir zot travay dir i ganny rekolte dan en nwit par bann zenn parese ki pe profit lo kouraz sa ki pli vye ki zot.  Bann zabitan La Retraite, Maldive, Ma Constance e La Gogue zot per pou kit zot lakour dan bomaten e menm per pou mars lo semen, zot konnen ki i annan en gran probabilite ki zot lakour pou ganny kase e zot propriyete ganny vyole e menm andomaze.  Nou annan sitiasyon kot en sel lakour i ganny kase 7 fwa dan en semen.  Lo semen Maldive pli pir ankor, dimoun i per pou marse – fiy koman garson i pe ganny atake, zano, sennon, mobile, zanfan ou adilt pe ganny arase e mon demande kwa ankor ki zot pou vole?  Nou’n ariv lo en staz kot dimoun I vin dezespere e zot pa vwar lazistis e pli enportan ankor se nou pa santi zot an sekirite.

Ler mon fer mon prop analiz apre ki mon’n osi konsilte mon bann zabitan, nou’n vwar bann defayans ki pe kontribye pou ogmant vol dan distrik.  Sa se efikasite lanket e mankman resours e osi lafason ki Zidisyer i fonksyonnen.  Souvann fwa letan en vol i arive lapolis distrik i ganny mobilize e dan serten ka zot ganny asiste par unit Siantifik me arestasyon i ganny fer i vreman minimal prensipalman akoz mankman levidans.  Legzanp Mr Deputy, Anse Etoile i annan li 9 zofisye ki travay dan Kord Gard – ki enkli en zofisye ansarz, en drayver e enn pou fer lenvestigasyon e 5 zofisye i travay dan 2 shift.  Sa i montre nou bann defayans lo kote mendev sirtou aswar kan i annan en vol pou lasistans, sorry aswar kan i annan bezwen pou lasistans avek 2 zofisye lo duty, 1 i bezwen la dan Kord Gard e en lot rod lasistans avek swa Beau Vallon ouswa Santral pou en distrik avek en popilasyon plis ki 4500 zabitan i kler ki sa striktir pa pou zanmen kapab reponn bezwen sa gran kominote.  Mon ti a kontan vwar ki striktir i ganny revwar pou li vin pli efikas pou byennet sekirite nou kominote.

Mr Deputy konfidansyalite e sipor pou temwen.  Bokou dimoun i per pou vin devan e raport avek lapolis bann aksyon sispe dan kominote akoz i mank konfidansyalite.  Pou en case, ganny persekite i bezwen annan levidans sirkonstansyel e osi levidans direk me souvann fwa toulede i manke i byen rar ki piblik I vin devan koman temwen pou en vol ou en lofans ki’n ganny komet.  Sa Mr Deputy i annan son reperkisyon – sa menm voler ki’n vol kot mwan ki ou ti remark li koman en dimoun sispe dan zanmerant me ki ou ou’n refize donn sa lenformasyon avek lapolis ou pou vin son prosen victim.  In ler pou sak dimoun dan nou kominote pou pran sa sitiasyon voler anmen.  I vre ki lapolis i annan son defi me avek nou korperasyon e nou vizilans dan nou kominote nou kapab asiste zot pou fer en pli bon travay.  En fakter ki pou mwan i ede pou kontribye en kantite lofans vol dan distrik se bann offender ki ti lo rimann me ki ganny large lo serten kondisyon Lakour.  I annan tro bokou lenstans Mr Deputy kot sa kriminel i kontinnyen komet menm lofans par kas sa bann kondisyon Lakour – sa fodre i ganny revwar o pli vit posib.  Mon konstate ki dan nou bann lalwa i annan tro bokou loopholes ki bann Avoka i profit ladan e ki fer sa bann kriminel kapab retourn dan kominote.  I vre ki nou bezwen plis Lakour, plis Ziz, plis profesyonnel e resours dan bann lenstitisyon law enforcement, me parkont fodre zot pran zot responsabilite tre serye par mentenir lord, lape, ek lazistis pou sa pep.

Pou konkli Mr Deputy Speaker mon ti ava enplor avek dimoun dan mon distrik pou pa bes lebra lo sa sitiasyon voler dan distrik.  Annou zwenn ansanm dan nou vwazinaz, annou met latet ansanm, annou travay an partenarya avek lapolis.  Mon ti a osi propoze ki nou revwar nou sistenm lapolis e gete kimannyer nou kapab pli byen zer resours.  Mon apresye ki bokou zefor pe ganny mete dan konba kont piratri me mon osi krwar ki nou devret invest plis dan nou sistenm lapolis e Zidisyer pou kapab konbat sa bann pirat ki pe kas lakaz e troumatiz lavi dimoun.

Mr Deputy lenplimantasyon sa Mosyon i pou vreman neseser pou donn bann viktim aksyon kriminel sa vre lazistis ki zot pe rode.  Sa Mosyon dan lizye zabitan ki mon pe reprezante pou vin en laviktwar anver enplikasyon vre lazistis.  Avek sa mon pou donn mon sipor sa Mosyon. Mersi Mr Deputy.

 

MR DEPUTY SPEAKER

Onorab Souris.

 

HON MIRENA SOURIS

Mersi Mr Deputy. Bonn aparemidi tou dimoun.  Mosyon devan nou Lasanble i vin a en moman tre apropriye akoz i tous en size ki afekte lavi tou Seselwa direkteman ou en direkteman.  Logmantasyon dan krim i konsern viktim sa bann krim me osi fanmiy sa viktim e fanmiy sa dimoun ki’n fer sa krim.  Letan en dimoun i komet kek lofans son viktim i fer fas avek bokou soufrans me fanmiy sa viktim e fanmiy sa dimoun ki fer sa lofans i osi soufer akoz zot santi zot onte lefe ki zot non i ganny sali letan i ganny asosye avek sa dimoun ki’n komet lofans.

Mr Deputy serk soufrans okazyonnen par aktivite kriminel i al bokou pli lwen ki viktim sa bann aksyon kriminel e zot fanmiy.  Sesel en pti pei ki re-ouver avek lemonn eksteryer.  Sa 2 karateristik i fer ki nou pep e nou lekonomi I tre sansib avek bann aktivite negativ parey logmantasyon dan kriminalite.  Sa nouvo vag krim i riske afekte nou lendistri touris sa dan limenm I tre tris akoz lendsitri touris fek sorti dan en peryod difisil e Gouvernman avek sekter prive in fer tou pou remet nou lendistri debout.  La koman sa lendistri in debout e pe perform dan en fason egzanpler kriminalite pe menas li.  La koman lendistri touris Sesel pe fer bokou pli byen ki nou bann konpetiter direk ki Moris ek Maldive nou bann prop frer ek ser pe menas li.

Mr Deputy par menas li i reprezant pou lendistri touris bann dimoun ki pe pran par dan bann aktivite kriminalite pa zis afekte zot viktim me osi pe met otaz nou lenditri tourizm.  Sa bann dimoun pe komet en lot krim ki traizon akoz zot aksyon pe anmenn konsekans grav pou nou pei.

Mr Deputy sa ki pli grav ankor se sa logmantasyon dan aktivite kriminalite ki pe ariv a en moman kot nou pei pe fer fas avek en pli gran menas leksteryer ki pirat Soumalyen.  Pirat Soumalyen pe trangle nou lendistri lapes e la nou bann prop frer ek ser pe oule trangle nou lendistri touris atrever zot bann aktivite kriminel.  Lefe ki zot aksyon i annan menm lefe ki bann pirat fodre ki sa bann dimoun ki pe komet sa bann aksyon kriminel i sibir menm sor ki bann pirat Soumalyen.  Lefe ki zot pe fer aksyon ki fer lasosyete an antye onte sa bann dimoun i merit menm semen e mont Marie-Louise.

Mr Deputy mon distrik Beau Vallon i en sant touristik e se Beau Vallon ki annan pli gran konsantrasyon bann letablisman touris e bann aktivite relye avek sa lendistri i osi pe ogmante.  Beau Vallon i osi en distrik ki annan pli gran poursantaz son popilasyon ki travay dan lendistri touris, sa i vedir ki mon distrik i pli vilnerab si i annan okenn diminasyon dan lakantite touris ki vin Sesel.  Ozordi pli gran menas lo lendistri touris se sa logmantasyon dan kriminalite e sa Mr Deputy Beau Vallon pa en leksepsyon akoz tou resaman nou’n sibir en seri vol dan sa distrik ki plis ki 10 par semen.  Logmantasyon dan kriminalite parey Minis Touris in fer nou rapel bomaten i preske fer nou ganny met lo lalis travel alert e sa dan limenm i kapab prodwir diminisyon dan nou norm touris e sa pou fer afekte nou reveni, lanplwa plizyer Seselwa parmi bokou zabitan Beau Vallon pou ganny afekte.

Mr Deputy nou bezwen vin pli serye e pran aksyon avek sa pti group dimoun ki anvi met nou kominote, nou lakour, nou pei e nou lendistri otaz, e se pou sa alor koman mon reprezantan distrik mon pou zwenn mon lavwa avek sa Mosyon e demande ki nou azir vit kont sa logmantasyon dan kriminalite.  Mersi Mr Deputy.

 

MR DEPUTY SPEAKER

Bon, les mwan remind bann Manm ki mon annan lentansyon fini sa Mosyon pou ozordi.  E avek sa nou a pran en break nou a rezwenn 4er.

 

(Break)

 

MR DEPUTY SPEAKER

Bon, nou kontinnyen nou deba e mon ava envit Onorab Aglae.

 

HON ROMA AGLAE

Mr Deputy Speaker, Manm Onorab, tou dimoun alekout bonn apremidi.  Mr Deputy avek leokri e soufrans nou pep ozordi nou vwar nou pe bezwen fer en demann avek sistenm Zidisyer.  In arive plizyer sirkonstans kot en endividi ki’n ganny akize pou en ka kas lalwa in ganny lo bail domaz ki serten i annan en motiv ki move e kontinnyen komet bann lofans e akt anti-sosyal konpare avek sa serten ki trankilman esper lenvestigasyon e zot zizman.  Mon referans ozordi i annan pou fer avek serten ki’n ganny large lo bail e ki kontinnyen komet lofans e fer soufer Lepep Seselwa.  Mon pa pou al lwen Mr Deputy, mon prop sdistrik Plaisance pa’n ganny eparnye avek sa fleo vol e drog.  Bokou kas lakaz e vole i annan en lyen direk avek konsomasyon drog.  Nou bezwen admet ki lavi pa sitan fasil konmela, nou pep i trimouse pou fer de bout zwenn e batir zot fanmiy ki pli gro dezapwentman kan ou aprann ki lasyer ou travay dir in ganny vole.  Eski pa in ler pou regard enpe nou sistenm lazistis e kot i fodre revizit drwa endividi armande kot i posib tou an protezan nou sosyete?

Mr Deputy an ekoutan dyalog weekend pase kot en kominote St Louis ti pe eksprim zot konsern e soufrans avek lapolis, ti vreman tousan, tousan akoz mon distrik pa’n ganny eparnye e nou pe fer fas avek menm problenm vol ki pe kontinnyelman ogmante e bann voler pe deplizanpli vin pli sofistike e pa pe ganny anprizonnen.  Ler en endividi i ganny reprimande e arete dan bokou fwa apre lenvestigasyon zot ganny trouve koupab me sa ki agasan se ler sa endividi i ganny large lo bail ziska ki lenvestigasyon i fini e son santans i pase.  Mon konpran klerman Mr Deputy ki I annan son dwa koman en imen ki kout leta pou gard li dan kaso e lekonsekans si demen i ganny akite me annou osi regard seryezman nou pep ki pe soufer.

Avek tou respe pou drwa imen Mr Deputy me ler lavwa lepep i telman for ki i ete ozordi mon krwar lotorite konsernen i annan tou sipor pou reviz bann polisi aktyel e balans byen anver desizyon ki malgre i pa enn ki pou popiler me ki pou en soulzman pou nou pep.  Dan mon parkour dan bann sou distrik tel ki Copolia, Rochon, e Belveder mon resevwar menm konplent e fistrasyon avek zabita.  Gouvernman I dir Lepep leve e debourye.  Nou pe ankouraz Lepep pou esey kiltiv zot prop zarden fri e legim – me ki degree ankouraze oule en sitwayen i ankouraze Mr Deputy ler pa li ki fer rekolt son prop travay.  Zabitan i souvann fwa okouran lekel sa bann endividi ki pe komet sa bann krim me i sagrinan ki a plizyer reprizm zot ganny large pou rezon napa ase levidans ouswa i anba laz e lamazorite fwa lo bail.  Wi mon konnen i pa fasil Mr Deputy pou kondann ouswa met en dimoun dan kaso pou en long peryod letan san levidans ki kredib, me toutmenm i annan demann pou ki sistenm akyel i ganny revwar imedyatman akoz nou annan en pep ki’n fatige, ki pe soufer kont voler.  I osi tre tris parfwa Mr Deputy kan en paran limenm i konnen son zanfan i fer sa bann aksyon anti-sosyal, i konnen parfwa ki son zanfan i an posesyon lobze ilegal ouswa vole me zot tant pou soutir zot zanfan.  Nou annan lenstans Mr Deputy kot zanfan in vole e ganny atrape menm si i annan ase levidans sa paran i mars partou e tap tou sa laport Minis, State House, MNA pou esey fer zot zanfan ganny large ouswa fer tir zafer kont li.  Zot pa ni enterese lo soufrans ki sa bann viktim in pas ladan.  A sa pwen Mr Deputy mon pou fer resorti ki drog ek vol i en lalit nou tou san leksepsyon e mwan koman reprezantan distrik mon pa pou mazin 2 fwa pou donn lenformasyon avek lapolis si mon okouran okenn aktivite ilegal e si i annan paran ki pe soutire, pe enport kwa kouler politik akoz Lepep Plaisance in ase soufer e nou pe dir enough is enough – dezorme nou pe ariv nou dan en staz kot zabitan pe perdi lafwa avek lapolis e sistenm prosekisyon, malgre i pli konpleks ki senpleman fer santans lo en dimoun Mr Deputy me Lepep i oule vwar bann akize ganny met devan lazistis e fer zot santans.  Zabitan i fatige vwar dimoun ki’n komet vol e pe esper zot santans me selman pe fofile an long an larz lo bail e kontinnyen komet bann menm lofans kas lakaz e vole.

Wi Mr Deputy nou konpran son konpleksite me Lepep pe kriy osekour a nou sistenm prosekisyon.  Koman rekomandasyon Mr Deputy mon pou rekomande ki provizyon i ganny amande ki en endividi i ganny large selman kan lenvestigasyon i konplete.  Si sa akize i anba laz ki nou sistenm i revwar posibilte santans pli sever ki ava dekouraz nou bann adolesan angaz zot dan bann tel aktivite.  Wi mon siport re-abilitasyon pou bann tel endividi me nou bezwen agalman annan en sistenm ki efektiv anver dekouraz zot komet bann tel aksyon.

Anterm patrol ek sirveyans dan kominote mon’n deza fer resorti oparavan Mr Deputy Speaker e mon pou ankor fer resorti koman en mesaz avek tou zabitan ki nou tou nou bezwen zet en koudey dan nou zalantour.  Lamazorite nou nou bezwen annan kek lenformasyon lo bann aktivite ilegal dan nou kominote annou esey annan konfyans dan nou lafors lapolis e partaz sa bann lenformasyon e anretour mon swete ki lapolis i pli diskre dan lafason ki zot antreprann zot lenvestigasyon.  Partenarya e kominikasyon ant lapolis ek Lotorite Distrik i enn ki bezwen vin pli efektiv anver konbat krim e bann akt anti-sosyal dan kominote.  San ezitasyon alors Mr Deputy mon pou aport mon sipor total pou sa Mosyon.  Mersi.

 

HON KEVIN VIDOT

Thank you Mr Deputy.  Mr Deputy koleg Onorab bonn apremidi.  En leokri bare voler dan konton ti en zafer rar dan lepase ki nou ti menm pran letan pou crack en pti joke lo la.  Me ozordi zour personn pa swete tann en tel leokri akoz Mr Deputy nou koman fatig nou latet lekel ki’n ganny afekte ouswa ganny vole konmdir sanson “kote tou sa botan in ale”.

Mr Deputy sa botan souvann fwa in ganny noye dan bann sibtans danzere parey drog ilegal – kot nou bann zenn ki’n ganny angloutir ou anvale par sa bann sibstans e vin bann ataker e bann kozer dimal lo zot prosen, parfwa zot prop fanmiy.  Mr Deputy sa problenm drog in kontribye signifikaman dan logmantasyon krim dan sa pei Sesel.  Alors ti en gran plezir pou mwan tann Prezidan Michel dan son ladres le 18 Zen prononse ki zot pou al pli tough lo bann trafiker – en lepa ver en bon direksyon a mon avi.

Mr Deputy koman en reprezantan Lepep souvann fwa dan mon bann vizit en pwen konsern mon bann zabitan se ka vol pe ogmante, la zot komans rakont kot swa enn zot fanmiy, zanmi ouswa zot menm in vin en viktim sa ka vol.  Ou kapab santi sa lafreyer dan zot lavwa per pou marse, per pou ouver laport zot lakaz e parfwa zot per e priye kan zot zanfan i ariv lakaz sorti lekol.  Mr Deputy mon telefonn souvann fwa in sonnen e lo lot kote lalinny ti en zabitan konsernen ki komans eksrpim zot lafreyer e sipliye pou nou koman bann dirizan Lepep pou azir e azir seryezman lo sa size.

Mr Deputy Prezidan in lans en lapel e asir Lepep Seselwa ki son Gouvernman pe travay dir pou anmenn bann morso lalwa ki pou pli sever anver bann akter ouswa bann ki koupab, e nou bann reprezantan Lepep nou pe debat lo sa size dan sa Lasanble ozordi e nou pe esper bann morso lezislativ vin dan nou Lasanble pou nou debat lo la, fer amannman e vot anfaver pou donn bann viktim en pli bon deal.  Nou bann MNA, nou bann kolaborater fidel, nou Prezidan pou lalit kont bann fleo dan nou pei ozordi.  Mr Deputy eski Zidisyer li i kapab dir zot bann kolaborater fidel? Eski zot pe donn Lepep Seselwa bann viktim the best deal ouswa bann koupab i antre sorti dan kaso e al komet bann lezot vol e klanm e lot victim?

Mr Deputy mon ti plis ki ankoler pou al klinik Larivyer Anglez en zour pou vwar enn mon zabitan kot lasal dizans tromatize, pe plere e tranble – ler mon sey konsol li e demande ki’n arive, i rakont mwan kimannyer en boug in misouk ek li ler li i sorti debourye pou ganny son dipen e sot dan son likou aras son senon e pous li ater lo koltar.  Gran mersi i kriye e en dimoun ti pe desann e sa voler i taye.  Ler son fanmiy i tann sa move nouvel zot komans fer prosedir legal e fer demars rod sa voler. Mr Deputy en mari, en frer, en tonton, en neve, ouswa en fanmiy ankoler e fistre i kapab fer nenport kwa dan sa sitiasyon.  Mon repete annou pa les lepep Seselwa pran lalwa dan zot prop lanmen.  Anfen kont Mr Deputy nou’n ganny ase avek sa bann sitiasyon, in ler pou Zidisyer, Lakour vin pli serye e vin bnn vre protekter viktim me pa akize.  Mon dan sa zafer Mr Deputy mon pou debout lo kote zabitan English River e Lepep Seselwa ki’n ganny ase e mon pou la pou pled zot case e fer zot lavwa ganny rezonnen dan bann zorey ki neseser.  E premyerman mon swete ki Sef Ziz pou pran letan pou ekout lavwa Lepep paske se nou ki la dan kominote, se nou ki konn soufrans nou pep e se nou ki zot in met la pou pas zot konsern.  Kan-t-a mwan Mr Deputy mon pou kontinnyen fer li otan letan ki mon dan sa Lasanble i mon devwar e mon responsabilite.

Pou terminen mon oule senpatiz avek tou bann viktim ka vol ou latak dan nou pei e mon le lans en mesaz avek bann ki koupab sirtou bann zenn arete avek sa kalite lavi, sanz zot konportman e move fason fer, al rod led kot i neseser, pa les zot kontinnyen vin bann viktim drog, leve al debourye, met zot lafors dan bann keksoz pozitiv.  Pou tou bann ki pou konpran sa mesaz e fer en pa pozitiv bon pou zot.  Me tou ki pou kontinnyen reste teti e kontinnyen lo zot move semen – atansyon pa blanm personn demen sa ki arive avek zot.  Mr Deputy mon remersyse zot pou zot latansyon ansanm nou a travay pou en meyer Sesel. Mersi.

 

MR DEPUTY SPEAKER

Onorab Payet/Marie

 

HON MARIA PAYET/MARIE

Mersi Mr Deputy Speaker.  Mosyon devan nou i en Mosyon ki devret en mesaz kler pou sa pti group zenn, zennonm ek fanm ki pe kontinyelman detri menas lavi mazorite fanmiy Seselwa, sa fanmiy ki pe travay dir pou konfor zot fanmiy, pou ledikasyon zot zanfan e pe fer tou sa ki zot kapab pou fer debout zwenn an prenon kont sa pri lavi ki pe kontinnyelman ogmante.  Mon mesaz pou bann viktim fodre nou kontinnyen determinen pou fer sir ki lazistis i ganny aplike e ki aksyon neseser e pli sever i ganny pran avek sa bann bandi ki pas zot letan fer nou lavi malere.  Fodre ki ler zot anmenn zot case Ankour zot fer sir ki zot met enpe presyon si i neseser pou ki zot case I a ganny deal avek dan en delay letan pri apropriye e pli vit.  Nou konpran par kont ki brans lofis Zidisyer pe operate anba serten konstrent, me in ler sepandan pou zot vin pli proaktiv e travay seryezman dan lentere zot kliyan nou pep Seselwa.  Byento batiman ki pou abrit brans Zidisyer pou konplete, i pou pli gran e pli byen ekipe e mon konvenki ki sa osi i a permet brans Zidisyer delivre en servis pli efikas ankor.  En Seselwa ki napa rikord lapolis, en Seselwa ki serye, en Seselwa ki pe travay dir pou son fanmiy, pou son pei mazin byen ki ou koman en viktim vol ou en viktim latak ou sipoze annan plis drwa ki en bandi, enn ki annan plizyer rikord lapolis.  Alors servi sa bann drwa ki zot annan en donn en koudmen pou met sa bann bandi dan zot plas e kot zot merite.

Mon frer ek ser Seselwa in ler pou nou vin pli vizilan, in ler pou nou zwenn koman en kominote e vey nou distrik, nou vwazen, nou fanmiy.  In plis ki ler pou aret per – apre tou ou draw, mon draw, son drwa koman en sitwayen lekel ki pou protez e prezerve si pa nou menm.  En mesaz pou sa bann zenn fiy ek garson Seselwa.  Mon pa konnen si zot pe ekoute akoz i pa paret ki zot menm get Nouvel, menm konnen ki pe pase dan zot pei me sa ki zot konn tre byen fer se parkont se ki teknik, ki plan zot pou servi ozordi pou zot al kas lakaz en fanmiy ki’n al travay, kimannyer pou atak e vol sennon ou sak en trwazyenmaz ki fek sorti tous son sekirite, kimannyer pou vol e atak en touris ki’n vin Sesel ankwayan ki i pe vin relax dan sa pei kot in ganny dir i en pei ki stab e ki en pei ki I kapab mars an sekirite.  Dir mwan si zot pa onte? Zot konsyans pa repros zot apre ki zot in atak en vye dimoun ki pa ni menm kapab defann son lekor?  Zot leker pa fermal ler zot pe vol zot manman granmanman, papa, granpapa, zot pti frer oubyen zot pti ser? Eski i pa’n plis ki ler pou zot sanz zot lavi?  Eski i pa’n plis ki ler pou zot reflesir byen avan zot mazinn pou al kas lakaz enn zot frer?  Eski i pa’n plis ki ler pou zot realize avan zot mazin pou al atak en vyeyar oubyen en touris?

Ozordi mon deliberasyon I pou plito bann kler e for.  Mon pou anvoy en mesaz kot bann paran ki vwar zot pe soutir zot zanfan, ankouraz zot zanfan pou vole e pou zot bann paran e lezot Seselwa ki kontinnyen zwe sa rol reseler, mazin byen ki boul ranverse parey granmoun i dir i fermal, i de fwa pli fermal ler i retournen.  Pou bokou paran mon konnen ki i pa zot lentansyon pou soutir zot zanfan ki zot in berse, nouir e fer grandi avek lanmour e la sa menm zanfan ki pe fer zot soufer.  Serten paran i sitan per zot zanfan kot zot reste anfermen dan zot soufrans e pa menm annan sa kouraz pou koz ek en lot manm fanmiy ou lotorite.  Fodre zot pa per pou al devan.  Mon krwar ki in plis ki ler pou paran aret soutir zot zanfan pou sa bann ki pe soutire mon pe koz lo la.  Mon konnen i pa fasil parfwa me mon asire ki si zot fer sa premye pa zot lavwa i a ganny tande.  Zis mazinen ki menm si ou garson ou fiy ki’n tonm dan bandisite i ganny trouve koupab e mont prizon i pa pou mor – i pou plito eparnye lanmor dan prizon ki si i kontinnyen vole akoz parey mon’n dir i annan tro bokou viktim e zot in fatige tenir.

Dan sa “Nouvo Sesel” i plis ki zanmen enportan pou tou le 3 brans dan pei sa i Legzekitiv, Lezislativ, e Zidisyer ou menm si nou rol e responsabilite i diferan pou nou konplimant kanmarad.  Pou en pep kontinnyen grandi dan demokrasi i devret annan sa bon Gouvernans, sa legzanp i devret komans avek nou.  Alor mon pa vwar li i devret en problenm kan nou pei i bezwen nou, kan sitiasyon in vin serye pou nou asiz ansanm e met lide ansanm pou le meyer pou Sesel.  I vre ki nou 3 brans i annan sakenn zot rol ek zot responsabilite, mon krwar sepandan ki nou kapab travay ansanm.  En pti pei parey Sesel kwa ki anpes nou fer li?  Ler nou a fer sa nou a retir persepsyon ki annan deor ki par egzanp Lasanble pa kapab travay avek Gouvernman, ou Gouvernman pa kapab travay avek Zidisyer, ou Zidisyer menm si i endepandan i pa kapab travay avek Lasanble e vice versa.  Pwen fondamantal nou latas se pou nou tou mazin lo sa ki nou devret pe fer ansanm pou ki nou sitwayen i santi zot pe viv an sekirite e an pe.  I vre ki menm si nou pou travay ansanm nou pa pou kapab rezourd problenm ozordi pou demen me dan lentere Nasyonal nou ava kapab fer nou mye pou byennet tou Seselwa.

Nou lendistri tourizm in vin enn ki pli frazil ki zanmen, deza nou annan en problenm pirat ki pe ede pou anpes cruise ship par egzanp anmenn touris dan nou pei.  Zis mazinnen ki lavenir pou anmenn nou si nou pa met lanmen ansanm e deal avek sa sitiasyon kriminalite pli vit ki posib.  Si nou perdi nou lendistri touris zis mazinnen kantite nou bann frer ek ser Seselwa pou perdi zot travay?  Kantite fanmiy pou soufer e finalman se nou pei ki pou perdi.  I enportan pou note ki ler touris I vin vakans Sesel i pa menm pe mazin pou al rod en Avoka ou menm pou al Ankour – me dezorme ek sa bann sitiasyon ki zot pe pas ladan zot pou bezwen vwar zot forseman pou rod en Avoka ou menm swazir pou pa vin Sesel ankor.  Erezman ziska konmela napa okenn touris ki’n ganny perdi zot lavi me deza sa bann ka vol, krim ki nou’n anrezistre isi Sesel i too much.  Prezidan ek son Gouvernman I kapab lager lebra kase pou met pli bon sistenm sekirite anplas pou sof gard nou sosyete e nou lendistri tourizm, me i devret a tou pri ganny sipor nou tou, tou le 3 brans nou Gouvernman i devret travay an kolektivite avek en vizyon kler e sa ki pou permet nou kapab konbat kriminalite dan nou pei.

Mon bann koleg Onorab in met plizyer sizesyon e rekomandasyon an sipor pou sa Maoyon table ozordi.  I enportan ki zot ganny konsidere, enplimante e menm aksyonnen o plivit ki posib.  Mon annan ennde pti sizesyon Mr Dpeuty Speaker, mon a met devan petet lazans ou Minister konsernen i devret ankouraz plis Seselwa pou envestir dan sistenm sirveyans ek sekirite kot zot lakour e sa i a devret aplik osi pou bann biznes tel ki bann letablisman touristik.  Lenformasyon lo bann sign board par egzanp dan bann landrwa enportan i devret ganny mete avek bann mesaz serye e menasan pou sa bann bandi.  Minister konsernen i devret petet etablir en fast track system pou nou bann touris ki’n ganny atake avek le bi pou sey solve zot problenm isi menm Sesel akoz si zot al fer li aletraze zot menm zot konnen ki pou kapab arive.  E petet Minister konsernen osi i devret kapab ranforsi training la mon pe koz training fizik pou bann zofisye lapolis pou zot vin pli for, pli solid kot ler bandi i debout devan zot la i a fer serman pou al kas lakaz oubyen atak en lot dimoun ankor.

Mon pou konklir mon lentervansyon par anvoy en mesaz pozitiv pou nou bann zofisye lapolis ki pe travay san ses pou anmenn lape e trankilite dan nou kominote, dan nou pei.  Zot tousel zot pa pou kapab fer li zot bezwen plis sipor, sipor Gouvernman, sipor Lasanble, sipor Zidisyer e sipor kominote.  Mon pou osi siport e remersi tou lezot partners par egzanp bann NGO’s, nou bann dominasyon relizyez ki pe kontinnyelman pas bann bon mesaz e ankouraz plis lape dan nou sosyete.  E pli enportan ankor mon pou remersi nou Prezidan e son Gouvernman ki pe fer tou pou anmenn plis lord ek lape dan nou pei, nou bann Manm Lasanble ki pe kontinnyelman lager pou sa ki pli byen e enportan pou nou pep.

Mr Deputy Speaker mon pou aport mon sipor a sa Mosyon akoz mon krwar ki si toule 3 brans prensipal dan pei pe travay kolektivman ansanm sa vag kriminalite pe menas nou pti pei Sesel pou disparet.  Nou pe senpleman demann ki lazistis i rennyen dan nou pti pei kot Seselwa i a ganny sa bon savwar viv e savwar fer e kot nou viziter i a relax e repoz anpe dan nou pti pei Sesel. Mersi Mr Deputy Speaker.

 

MR DEPUTY SPEAKER

Onorab Valmont.

 

HON SYLVIANNE VALMONT

Mersi Mr Deputy Speaker, bonn apremidi Mr Deputy Speaker bonn apremidi bann Onorab.  Mr Deputy Speaker Prezidan dan son ladres le 5 Zen ti koz enpe lo bann defi e I ti dir mon quote “Sa Nouvo Sesel ki nou pe kree ansanm i egziz en responsabilite partaze dela par tou sitwayen, i egziz sirtou en re-alirman nou bann valer koman en nasyon.  I alaporte nou tou, me I vin avek en pri, avek en langazman, avek en responsabilite, avek travay dir” unquote.

Si sa Mosyon in vin vitman dan Lasanble set akoz i neseser e i pe egzize ki tou lenstitisyon enportan lo kote bann kriminalite i egzers zot responsabilite anver nou Konstitisyon.  Pou mon lentervansyon Mr Speaker les mon a koz en pti pe lo lapolis menm si bomaten Minis in koz enpe lo la, in donn nou enpe lenformasyon.  Nou konnen ki bokou zefor pe ganny fer e pe kontinnyen ganny fer pou asire ki lapolis i fer en travay efikas pou nou sosyete.  Sipor lo nivo resours imen par egzanp, nou konnen ki bann Gerkaz in ganny anmennen pou donn koudmen kot i konsern travay lapolis.  Kot training i konsernen bokou pe ganny fer pou ki lapolis i vin bokou pli profesyonnel.  Dapre lenformasyon sorti kot Head Quarters lantrenman spesyalize pou bann personnel kot CID pe kontinnyen ganny fer sirtou dan konteks kriminalite.

Lo kote laspe kominikasyon osi bokou amelyorasyon pe ganny fer pou konekte pli byen bann stasyon ek santral, e bomaten Minis pou Zafer Entern in koz lo la e in konfirmen.  2011, 2012 training dan Leadership Management in kontinnyen ganny fer avek Liniversite Brown Shield Langleter.  2 zofisye in al swiv en training crime scene osi Langleter ek USA.  Lokalman Cadet Courses pe ganny fer e en group 40 zofisye pou graduate byento dan 2 mwan.  En lot group sa ki mon’n demande mon’n konnen new recruits pou gradute lannen prosenn, san dout sa i demontre ki i annan zefor ki pe ganny fer e mon felisit sa bann demars konkret par lapolis.

Sipor lozistik pou ede kot i konsern deplasman pou lapolis kapab reponn dan bann ka emergency oubyen menm pou ede dan bann ka vol ki pe kontinnyen ravaz nou kominote – zot in ganny mwayen transpor tre resaman en total 20 veykil pou zot kapab reponn pli efektivman lapel piblik kan i neseser.  I osi tre kler ki i annan ankor bokou pou fer pou ki i annan en sistenm parfe dan nou pei kot nou pou kapab dir ki travay lapolis i alaoter ki nou ti a swete.  I kler ki enn bann defi mazer ki pe fer bokou dimoun fistre se sa bann ka vol dan tou distrik an zeneral.  Bokou mon kanmarad Onorab in koz lo la, zot in koz lo bann viktim – mwan menm resaman mon’n en viktim.  A sa moman dimoun in aret koz lo pirat Soumalyen la bonnavini parey avan me sa ki ou tande se voler in kas lakaz madanm entel oubyen msye entel pou la dezyenman fwa pou 4 fwa, pou sizyenm fwa eksetera.  La, la ki nou tande toulezour Mr Deputy Speaker dan bis, dan semen, ler ou anbark dan en taxi se sa ki ou tande avek drayver.  Mon nepli konnen ki mon pou fer, mon pa kapab dormi anpe dan mon prop lakaz, mon parey en prizonyen, mon manze in ganny vole dan mon fridge, mon sak in ganny vole, voler in lapes par lafnet, mon larzan ek tou sa ki ti dan mon pers in ganny vole.  Mon sennon, mon bag eksetera, mon sel brasle lor, lalis i long.  Nou pa pou al dan tou sa detay me sa ki nou pli gro problenm se ki nou pa pe vwar solisyon pou sa bann tel ka ki pe pase. Mon demann mon lekor Mr Deputy Speaker ziska ki tan sa bann tel fleo pou kontinnyen?  E mon demande si par egzanp nou ti en sosyete ki ti annan nou anviron 200 mil dimoun kimannyer nou ti pou ete?  Mon konnen ki en kantite dimoun Sesel pe soufer e la mon pou koz lo soufrans nou bann fanmiy en pti pe.  E nou demande, mon pou demande ki nou sistenm Zidisyer sorry mon oule demande ki nou sistenm Zidisyer pe fer pou ki sa bann ka, sa bann kondisyon ki nou pe viv ladan i sanze.  Eski sa bann voler pou kontinnyen parey mon dir ganny soutire pou zot kontinnyen kas lakaz e ganny santans ki pa merite?  Bann case file ki dan lanmen lapolis e Zidisyer pe tro trennen, i annan menm bann ki bann dimoun i ganny letan oubliye – zot tarde pas Ankour ou a krwar nou dan en serk visye.  Parfwa bann zafer i telman tarde ki sa pov viktim ki’n esper 3an obyen plis ki 5an i dir les tonbe, les koumsanmenm.  Eski pa’n ler pou nou deklar lager lo nou sistenm ki sipoze la pou enplimant bann lalwa ki protez nou sitwayen?  Bokou fanmiy in soufer dan lepase e pe kontinnyen soufer akoz sa bann ka vol kot zot lakour.  I fermal pou nou leve bomaten pou vwar ki nou laptop in ale oubyen nou flat screen ki konmela nou tou nou annan enn ki nou’n travay dir pou anmas en pti larzan pou aste -in disparet.  I fermal pou nou vwar vit nou loto in kase e sa ki ti anvi in antre ladan in pran tou sa ki ti annan.  I fermal pou mwan tann mon papa par egzanp ki annan li la 90an ou plis in fer zefor pou li leve pou sey mye pou plant son de pti pye zironmon deryer lakaz, ler i leve i annan ki’n fini rekolte, in fini anmenn bazaar in al vann.

Mr Deputy Speaker I sa bann soufrans ki bokou fanmiy pe pas ladan e nou bezwen vwar bann solisyon pou sa.  Mwan mon krwar sa bann keksoz koumsa pe vin plito enkwayab dan nou pei.  Souvann fwa se sa voler ki’n deza ganny kondannen pou vole e ki’n fer 3 ou 4 mwan dan prizon se limenm ki retournen pou vin vole ankor, e Anse Aux Pins kot mon reste sa i en case menm Minis in dir sa bomaten, i bann ka vreman – nou pa kapab konpran kot nou pe ale.  Eski pa in ler pou nou annan pinisyon pli sever pou sa bann kriminel ki plizoumwen mon krwar nou pa konnen si Zidisyer oubyen si lapolis i bezwen etre pli senser dan zot bann demars pou bann case vin Ankour.

Bokou fanmiy i fistre avek sa bann sitiasyon ki nou pa vwar bann solisyon efikas. Problenm vol e kas lakaz ou batiman in vin en kosmar pou Sesel an zeneral.  Bann akt vol ozordi pa tous zis nou lekonomi, pa tous zis fanmiy me i tous osi nou lekonomi.  Voler ozordi pa pe swazir oubyen gete lekel ki zot afekte par zot akt malsen parey nou dir oubyen degradan.  Depi zenn dimoun, dimoun ki pe leve e debourye pou ganny zot pti bouse manze, dimoun aze, sa ki malad, bann touris paregzanp ki’n ekonomiz zot larzan pou vin pas en vakans se nou e menm bann planter pe ganny afekte an rezilta en bann endividi ki napa respe pou lezot, menm pou zot lasyer.

An Novanm 2011 en zabitan dan Was Mahe par egzanp ki mon konn byen ti ganny son konpansasyon ek lasirans.  I ti trouv li fas a en sitiasyon kot i ti leve son lanndemen bomaten pou dekouver ki pandan lannwit ki i ti pe dormi voler ti’n tir son vit, rantre e fer shopping e menm annan lodasite kit son laport ouver.  Wi Mr Deputy Speaker sa malere limenm i en dimoun ki pa an bonne santé.  I ti’n rezerv son R10 mil ki i ti’n gannyen ek Lasirans pou li rod son tretman e fer aste pilil pou li aletranze.  Malerezman ti napa redresman pou son douler.  In trouv li akoz en aksyon bar bar en endividi forse akimil plis soufrans.  Erezman i pa’n leve dan letan ki sa voler ti dan lakaz pou rekolte son bann keksoz parske i posib i ti’n ganny touye – la li i ti en lot viktim.  Sa i bann legzanp kler ki nou pe vwar koman bann kriminel pe fer nou popilasyon lev dan lafreyer menm anba zot prop trwa, dan zot prop lakaz.  Dan tousala malgre ki sa sitwayen ti raport son ka ek lapolis, ek fingerprint i swadizan ganny tire par expert i malere ki pou apepre 7 mwan sa pov malere pankor ganny okenn solisyon, i pankor ni tande ki arive avek son case, i napa nouvel lo sa vol ki’n pase se li.  Expert finger print i dir ki in anvoy case kot CID pou lenvestigasyon tandi ki CID zot zot donn lenpresyon ki file sa case pankor ariv kot zot.  La en lot legzanp defayans dan nou sistenm Mr Deputy Speaker.  Voler wi zot koupab pou fer nou popilasyon soufer me akote voler parey nou tou nou konnen i annan en lot group kriminel osi ki koupab, pli koupab ki sa voler – sa se pa lot ki sa bann kolaborater e bann reseler ki pe aksepte pou aste lobze vole avek bann ki’n kas lakaz, atak touris, trangle nou sitwayen e menm al vol legim ek prodwir dan zarden oubyen kot bann lezot fermye.  Nou lager kont kriminel i pa enn ki devret ganny lese zis avek lapolis ouswa Zidisyer.  I en konba ki devret vin konsern popilasyon an zeneral, gard oubyen zofisye lapolis san lenformasyon, san levidans par egzanp pa pou kapab konstri en case file pou anmenn kot i konsernen oubyen kot Atorni Zeneral pou ki a son tour i anmenn dan lakour.  Fodre ki nou koman en sitwayen nou kolabore e avek bann zofisye lalwa nou osi.  Kan nou trouv en voler pe atak en dimoun, kas lakaz ouswa apros nou avek en lobze vole mazinnen ki nou osi oubyen en lot nou vwazen oubyen nou fanmiy i lo lalis viktim sa voler.

Mr Deputy Speaker in ler pou aksyon konkret ganny pran a tou nivo e tou sistenm konsernen i bezwen pran zot responsabilite.  Avek sa mon oule anmenn mon sipor pou sa Mosyon. Mersi Mr Deputy Speaker.

 

MR DEPUTY SPEAKER

Onorab Charles.  Switch off ler nou fini silvouple.

 

HON JEOVANA CHARLES

Mersi Mr Deputy Speaker.  Mr Deputy Speaker, koleg Onorab bonn apremidi.  Dan son diskour alokazyon lafet Nasyonal le 18 Zen Prezidan Michel ti dir sa mon quote “Bokou pe demande ozordi oli nou responsabilite koman paran, koman sitwayen.  Mon ti koz lo la dan mon diskour lo Leta Lanasyon dan kad sa gran mouvman renesans sosyal. Mon ti poz plizyer kestyon.  At what mon ti demande ki aksyon i ganny pran kont paran ki negliz zot zanfan, mon ti demande ki konpetans ek pourvwar Tribinal Lafanmiy i ganny ranforsi, mon ti ensiste ki labi linosans en zanfan i ganny sanksyonnen severman e mon ti demande ki aksyon pli sever i ganny pran kont trafiker drog. Swivan lenstriksyon konsey Minis Biro Prokirer Zeneral in fek drafte 2 Proze De Lwa.  Enn kont labi zanfan e dezyenm kont prodiksyon ek trafik drog.  Toulede i prevwar santans bokou pli sever.  Dan serten ka lavi prizon pou sa 2 krim, tre prosenman Lasanble pou debat lo sa bann size kritik.  Mon espere ki byento nou ava ganny nouvo lezislasyon lo sa bann size ki ava ranforsi nou baz legal ek moral dan nou sosyete” Unquote.  Prezidan Michel sa se en lapel ki i ti pe fer.  Ti en lapel sorti dan leker en zonm, en lapel tre sagrinen fer par en Prezidan ki kontan son pep.  Mr Deputy Lasanble ozordi in al en pa pli lwen e pe demande ki Biro Prokirer Zeneral ek Zidisyer i deswit etablir gidans kler lo bann lofans kot dimoun pa merit ganny large lo bail e komans met li an pratik o pli vit posib pou fer sir ki nou protez viktim e nou anpes menm dimoun kontinnyen repet menm lofans.

Mr Deputy mon pran laparol pou dir 2 mo lo sa Mosyon e sa quote ki mon’n fer akoz sa bann size ler mon koz lo la mon ankoler, mon sagren mon fistre, mon enkyet akoz sa bann fleo pe ravaz nou pti pei, pe ravaz nou bann fanmiy.  Mon dir sa ozordi Mr Deputy akoz mon konnen mon rankontre sa bann dimoun dan mon lavi toulezour.  Mon koz ek sa manman ki viv dan lafreyer akoz son zanfan nenk i vol tou sa ki annan dan lakaz pou al vann pou rod son drog e i pa ni konnen ki i pou fer, ki i pou dir.  Mon rankontre sa viktim labi ki pler avek mwan mon konnen son soufrans, mon koz ek sa vyeyar ki fek al sers son sekirite sosyal e ganny aras son sak.  Mon koz avek sa madanm ki’n travay sanses Berout oubyen Jordan pou ozordi ganny arase son sennon ki’n dan son likou pou en bann lannen – pou ganny atake e vole par enn sa bann parese, sa bann voler.  Mon koz avek mon vwazen ki ganny vole preski toule mwan, mon santi douler sa madanm ki’n sorti en pti moman pou al laboutik ler i retournen napa narnyen dan lakaz.  Mon sagren pou sa manman ki’n al travay ler i rantre kot lakaz tou son keksoz in ganny vole.  Mon koz ek sa madanm ki’n ganny blese akoz in sote dan son sonmey e in vwar en voler dan son lakaz.  Se pou sa rezon ki mon dir fodre ki nou donn plis latansyon sa bann sitiasyon pou nou kapab konstri sa Nouvo Sesel ki stab, anpe e solid.  Dimoun i devret annan en gou pou viv dan son lakaz, dan son kominote.  Dimoun ki travay dir i bezwen zouir fri son travay ki i pa ganny ravaze par sa enn ki pa enterese avek personn ekspete son prop dezir.  Mr Deputy ler in arive pou tou dimoun met lanmen dan lanmen, latet ansanm e dir avek Zidisyer nou’n ganny ase ed nou avek en direksyon kler kot vre lazistis, responsabilite ek dwa i mars ansanm e fer ki sa pep i viv dan vre lape ek sekirite.

Mr Deputy ler mon regard otour mwan mon osi vwar bann paran ki soutir zot zanfan pou vole e avan mon koz lo ennde fe ki’n arive dan mon distrik ozordi mon ti a osi kontan pran sa loportinite pou koz avek bann paran ki soutir zot bann zanfan pou vole, ou nenport akyson kriminel pou dir zot ki sa pa akseptab – ditou!  Nou bezwen donn nou zanfan bann bon konsey pou gid zot, dir zot laverite, koz ek zot lo moralite, lo konesans sa ki byen ek sa ki bon.  Mon ti a kontan poz sa kestyon avek ou sa manman ki pe ekout mwan.  Eski ou ou ti pou kontan ler ou antre kot ou oubyen ou pe dormi aswar e ou sak i ganny vole e lanndemen ou napa narnyen pou donn ou zanfan oubyen ou larzan elektrik in ale e ou napa en sou pou pey ou delo avek ou elektrik?  Se sa bann sitiasyon malere ki ou ou ou pa anvi pas ladan e ki ni ou vwazen, ni en lot dimoun pa devret pas ladan.  Ozordi avek sa lavi difisil kot tou dimoun in ganny demande pou leve e debourye en kominote pa kapab pe kontinnyen soufer avek en tel krim ki ganny soutire.  Ozordi mon enplor ou sa paran ki soutir ou zanfan pou fer okenn bann aksyon kriminel pou dir ou aret soutir li.  Annou konpran ki sa bann konportman pe pran en pli gran lanpler e pe osi afekte nou tourizm – sa lendistri pilye nou lekonomi.

Mr Deputy mon koz lo paran ki soutir zanfan, prezan mon anvi koz avek bann reseler.  Si napa reseler, napa vol.  Ki sa voler pou fer avek en laptop i pa konn servi en laptop?  Ki i pou fer ek en Ipad i pa konn servi en Ipad?  Ki I pou fer avek enn sa bann telefonn sotisfike, i pa konn servi enn sa telefonn sotisfike?  Ki i pou fer avek en lanmizik loto, kan i napa loto?  Ki I pou fer avek en televizyon kan i napa lakaz?  Ki I pou fer avek bann bizou madanm kan limenm li i napa en madanm?  Sa i montre ou alor ki si napa lavant, napa komers pou mwan alor Mr Deputy reseler i osi koupab ki voler.  Reseler osi I devret osi pe ganny menm tretman ki en voler i gannyen.

Mr Deputy Speaker mon pa kapab arete si mon pa met enn de fe ki’n arive dan mon distrik tou resaman.  Enn ki tre resan ki ti arive semenn pase – en vye madanm sorti sers son pansyon envalidite telman per i a ganny vole i pez son sak lo son vant.  En zenn garson ki konn sa madanm tre byen i aras sa madanm son sak, i napa ni repse pou son vwazen, sa madanm i son vwazen.  Sa madanm avek son endikap pa ni konnen ki i pou fer, dimoun ki’n vwar ti telefonn lapolis.  Lapolis i vini, me i dir i pa’n vwar sa garson, erezman bann vwazen ki ti telman ankoler ti al dir DA kote sa garson i ete e zot ti vini zot ti aret li.  Mr Deputy Speaker sa garson i reste Roche Caiman ater lanmenm, in komet plizyer lofans, son paran pa kapab avek li, son ser in raport li avek lapolis a plizyer reprizm, me lapolis pa konnen kot i ete.  Mr Deputy be dir mwan, eski nou kapab kontinnyen toler sa kalite aksyon ki pa akseptab?

Mr Deputy en lot ka ki ti arive Vandredi Sen, en zenn garson i aras en etranze son port fey anba laboutik e tay avek devan en lafoul dimoun ki ti sorti legliz ler mon kriye tou dimoun i get mwan, be akoz zot ti’n soke, erezman mon ti telefonn lapolis, lapolis ti vin vit me anmenmtan en zenn garson ki travay isi kot Lasanble in vwar sa garson pe taye in atrap li e met li avek lapolis.  Sa malfeter erezman ti pas Ankour son Lendi apre Pak e ganny kondannen akoz i ti annan deza en ta zafer.  I ti wanted par lapolis.  Mr Deputy selman Vandredi pase en lot zabitan Roche Caiman sorti travay ver 6er diswar, ti ganny vole son sennon dan son likou zis la kot boulanze, laboutik lanmenm, en semen tre busy e sarze.  En dimoun byen fatige sorti travay pe al rod en dipen pou son zanfan i ganny tromatize koumsa.  Be Mr Deputy kote nou pe ale?

Mr Deputy ozordi Roche Caiman i annan en semen sorti deryer lekol Plaisance Segonder pou al Les Mamelles dimoun pa kapab pase la akoz zot ganny atake e ganny vole swa zot sennon, swa zot sak oubyen okenn keksoz ki zot pe anmennen.  Mr Deputy in ler ki nou bann zenn fiy ek nou bann zenn garson i konpran ki zot bezwen sanze, zot landrwa se pa dan prison, zot landrwa se dan en lanplwa ki pou permet zot annan zot dignite imen e zot pe donn lanmen pou konstri sa Nouvo Sesel.  Nou bann zenn zot annan potansyel, zot annan en lavenir si zot deside sanz zot lavi ozordi.

Mr Deputy latak kont touris dan nou pei parey in ganny dir bomaten in vin pli efreyan e pli grav e pe afekte nou lekonomi.  En loperasyon entansif i bezwen pe kontinnyelman ganny fer pou konbat sa bann krim lo bann touris.  Mr Deputy nou pa kapab les en group dimoun pran nou touris otaz, nou pa kapab les en pti group dimoun met nou lekonomi otaz akoz zot mank lanmour pou zot pei – zot in perdi tou zot bann self esteem.  Latak lo nou touris i tris – lazenes mon mesaz pou zot i kler ozordi, napa lavenir dan kriminalite, napa lavenir dan fer dimoun soufer, napa lavenir si zot kontinnyen detri zot prop pei.  Ki laont zot pe fer nou pei ler zot atak en touris?  Ki laont pou Sesel ki nou’n toultan dir i safe pou touris?  Ki’n arive avek sa konfidans ki nou’n donn nou bann viziter? Touris i pou nou tou.  Ozordi nou bann Manm Parlman nou pe demande tou sa bann dimoun ki pe fer sa bann akt bandisite kont nou bann touris e nou demann e nou bann ser ek frer Seselwa pou arete.

Pou terminen Mr Deputy mon annan sa pou dir, nou pep pe pas atraver en bann leksperyans anmer, nou pei pe pas atraver en moman difisil.  Si ozordi nou pa fer atansyon, si nou kontinnyen dan sa menm direksyon e nou pa fer naryen sa bann kriminel lapolis, Prosekiter e Zidisyer annan zour Lepep pou pran lalwa dan zot lanmen.  Alor nou bezwen dir ki wi nou apresye ki i annan bokou nou zofisye lapolis ki pe travay dir mon anvi felisit zot e la mon demann Gouvernman pou get sa bann ki pe donn tou e donn zot zouti travay pou zot kontinnyen fer pli byen.  Zot annan zot pei e Lepep Seselwa a ker.

Mr Deputy mwan mon pa en dimoun legal me avek plizyer dimoun ki travay avek Zidisyer zot in dir mwan ki wi Zidisyer i kapab fer bokou plis ki zot pe fer la.  In plis ki ler ki nou dir avek Zidisyer ki nou pey zot silvouple donn nou en bon servis.  Mr Deputy tou sa bann kriminalite bandisite ki pe arive ki kontinnyelman pe arive se gras a defayans nou Zidisyer, sa se akoz tro souvan demann pou ki lakour i gard an rimann pa marse, demann pa ganny pran an konsiderasyon e sa bann kriminel i ganny large lo en bail ase rezonnab ki permet zot sorti e kontinnyen avek zot bann bandisite.  Mr Deputy kimannyer ou kapab vwar en dimoun ki’n komet plizyer lofans kot santans in mars ansanm at large ler son viktim i ankor swa pe soufer son douler ki in sibir oubyen pa ankor kapab rekiper sa ki in ganny perdi?  Mr Deputy tro souvan nou vwar ki en case i ganny pran tro bokou letan pou pas devan Lakour, e ler i al devan Lakour bokou fwa son hearing i ganny anvoye parti anvoye akoz Avoka i annan swa en lot case oubyen i anvi retard sa case.  In ler alor ki Zidisyer i reget zot performans e mazinen ki bann viktim deor i soufer, ki zot bann ataker e voler pe kontinnyen fer zot bann bandisite deor.  Mr Deputy Zidisyer i bezwen konpran ki sa problenm Lakour i en gro problenm e ki zot bezwen pran li o serye, e pli onivo posib.

Mr Deputy oli nou Community Policing? Roche Caiman ti ganny fer koman en proze pilot, en keksoz ki ti mars tre byen avek en zofisyse lapolis ki ti’n fini entegre dan kominote e ti’n konn tou son dimoun.  Ler ti vini nou ti fer meeting, zwenn tou bann force viv dan distrik zis en beau zour nou vwar lakaz vid e nou zofisye in ganny transfer, ni menm averti Lotorite Distrik.  Tousala i en bann keksoz ki nou bezwen aranze.  Prezidan in dir nou bezwen reste konekte – koneksyon i bezwen a tou nivo.  Mr Deputy Community Policing i ganny fer dn distrik sa Community Police i bezwen konn tou son dimoun – pou mwan reste dan kord gard e fer patrol pa marse sa.  Nou bann kriminel i 5 fwa pli annavan ki lapolis.  Nou bann kriminel zot annan zot dimoun anndan lapolis ki donn zot lenformasyon.  Vwar Mr Deputy par ler lapolis menm ki fer son problenm, ki assessment zot in fer avan ler zot ti retir sa Community Policing?  Si zot ti fer, zot in fer avek ki?  Mr Deputy mon annan en Avoka etranze ki en zanmi e ki travay isi Sesel, pou enpe letan mon pa’n war li, ler mon zwenn li mwan pase mon dir li mon ti krwar ou’n ale.  Sa Avoka i dir mwan non, mon kontan Sesel in dir mwan Jeovana mwan mon’n travay dan plizyer pei avan mon’n vin Sesel, Sesel i en pei kot i annan bon lalwa me i annan move dimoun ki anfors sa bann lalwa – i ti dir mwan.  Mr Deputy parey sa Avoka in dir mwan ki nou annan bann bon lalwa alor mon konfidan ki Zidisyer i a konpran ki nou pe demann zot pou aplik lalwa e pran zot travay o serye prezan, bal in fini, alor Mr Deputy mwan mon pou donn tou mon sipor sa Mosyon ki devan nou ki pe demande ki Biro Prokirer Zeneral e Zidisyer i deswit etabli gidans kler lo bann lofans kot dimoun pa merit ganny large lo bail e komans met li anpratik o plivit posib pou fer sir ki nou protez viktim e nou anpes menm dimoun kontinnyen repet menm lofans.  Mr Deputy mersi.

 

Mr DEPUTY SPEAKER

Onorab Hoareau e mon pe remind bann Manm ki mon annan lentansyon fini sa Mosyon ozordi. Proceed Onorab.

 

HON HUBERT HOAUREAU

Mersi Mr Deputy Speaker.  Bonn apremidi tou dimoun dan lasal bann Onorab, en bonn apremidi spesyal pou tou zabitan St Louis.  Mr Deputy sa Mosyon mon dakor, sa Mosyon i bon e sa Mosyon mon pou siport li davans pou anvoy en mesaz tre for e kler pou bann vwayou e la mon pou koz……..

 

(Interruption)

 

MR DEPUTY SPEAKER

Onorab mind your language.

 

 

 

HON HUBERT HOAUREAU

E la mon pou koz lo mon distrik akoz mon tre ankoler avek sitiasyon aktyel.  Mwan mon pou dir laklos lekol in sonnen fer atansyon nou pa ganny retar, in ler pou nou inifye deryer nou pep e siport sa lager kont krim dan nou pei.  Mr Deputy zabitan St Louis in ganny ase, zabitan St Louis in demann mwan pou pas zot soufrans e demann lapolis, Biro Atorni Zeneral e Lakour pou konbat krim ansanm lo menm nivo avek menm lavwa.  Aret soutir voler, aret soutir e larg bann ki fer krim e aret soutir reseler.  La mon fer en kalkil senp, en voler i pey en bail limenm R10 mil pou li ganny large e apre i re-kontinnyen ankor.  Nou pa kapab kontinnyen vwar reseler al vann kilo lor Dubai e fer laboutik marse.  Gouvernman i merit al aste sa bann lor vole retourn avek e re-mars lasenn annaryer ziska i ariv kot sa ki’n al vole.  Nou tou nou a konnen alor lekel ki vole e kimannyer pou deal avek zot. Zabitan St Louis i demann mwan osi pou dir avek bann avoka mazinn byen soufrans sa en victim, nou dakor ki zot bezwen defann voler me pa soutir zot.  Anmenmtan ki zot defann voler re-primann li e gid li pou vin en bon sitwayen.  Distrik St Louis i en distrik lavil mal sanse, en zoli kapital kot bann ki adikte avek drog pe marse partou e menas sekirite nou pep.  Lotorite sivouple deal avek sa sitiasyon akoz zabitan St Louis in ganny plis ki ase akoz zot pa kapab plant bannan, zot pa kapab les zot zanfan zwe deor, zot pa kapab les zot laport ouver.  Wi MNA i konpran zot, wi MNA i tann zot, wi MNA pe pas zot konsern avek Gouvernman ki merit met tou keksoz anplas pou fer sir ki sa pa kontinnyen.  Zabitan St Louis in pare pou siport konbat krim dan sa pei.  Lavi i bon Sesel e nou ki bezwen mentenir sekirite pou nou pep e osi pou bann etranze.  Sa pei i bezwen kapab respire ler frek i sorti lo losean par bann ler pouri ki tourn an ron avek nou e afekte nou pep.

Mr Deputy mon demande ki Gouvernman i anmenn en lalwa isi devan sa Lasanble dan limedya pou ki bann fanmiy i a kapab al Ankour e demann Ziz pou ki zot frer, zot ser, zot manman, zot papa ki adikte avek drog i ganny anmase pou en peryod 6 mwan ou plis pou ganny trete lo en zil e fer zot retourn dan lasosyete dan zot leta normal.  Sa pou diminyen ka vol ki pe kontinnyen ogmante akoz drog.  Mr Deputy bann ki’n adikte ek drog zot pe viv dan zot prop monn, zot pe viv dan en sosyete primitive, apar e pe fer touzour lesanz sa ki zot in vole pou drog.  Zot pa azour avek nou alor annou tir zot lo semen.

Pou terminen Mr Deputy mon pa ti a swete ki en zabitan St Louis i ganny anprizonnen zis akoz in defann son propriyete e son fanmiy.  Alor mon demann zot pou travay ansanm avek mwan e fer st Louis vin en legzanp kot voler, droger e reseler i ganny en swa pou arete ouswa zot pa pas St Louis ankor.  Tou sa dan lape. Mersi Mr Deputy.

 

MR DEPUTY SPEAKER

Bon mon pe enform bann manm ki malgre 5er in sonnen mon pou servi mon lotorite anba Order 92 pou nou kontinnyen e termin sa deba. Onorab Jacqueline.

 

HON SULTANNE  JACQUELINE

Mersi Mr Deputy Speaker. Koleg Onorab Mr Speaker bonswar.  Nou nasyon, Mr Deputy Speaker nou pe viv en realite kot nou pe vreman komans santi lenpakt degradasyon sosyal koze par labi drog dan nou pti pei Sesel ki nou toultan dekri koman en paradi ki fer bon viv.  An semoman i annan en leokri parey mon koleg Onorab Larivyer Anglez in soulinyen ki pe sorti dan tou kwen nou pei , dan sak nou kominote dan nou distrik lo sa nivo krim ki pe ganny komet.  En lenpresyon nou piblik i se ki napa ase ki pe ganny fer pou vreman arete e pini bann koupab.  Ozordi Mr Deputy nou nepli kapab koz nou pei labous plen pou dir ki ou kapab mars kot ou oule, nenport ki ler parey ti leka lontan.  Koman en Seselwa ou komans onte akoz ou pa kapab donn garanti en etrazne son sekirite parey avan.  Nou bann viziter pe resanti menm lafreyer ki nou letan nou ti al serten landrwa Nairobi oubyen serten landrwa Sid Afrik.  Nou konn tre byen sa santiman kot ou bezwen alert pe get par deryer ou pou vey ou propriyete.  In ariv ler pou nou pas a aksyon, annou annan en lafors lapolis par egzanp ki pli dinamik e proaktiv, ki a zour vaek lafason ki voler i panse e menm en pa pli devan zot pou anpes zot met an egzibisyon zot bann akt kriminel.  Annou rod resours pou amelyor nou prizon in nepli letan pou dir nou prizon pa lo standar.  Annou annan en sant rimann pou ki personn letan pe al dan prizon pa ganny sa lenpresyon ki zot pe al dan en lotal 3 zetwal me plito en sant penitansyer kot pou ed zot vin en pli bon sitwayen letan zot sorti.  Nou nasyon in fatige tande pou dir en ka pe trennen akoz napa ase levidans Ankour.  Si pa tou lapolis ki kapab mars avek en zarm omwen annou donn zot en pti camera ki ti a ed zot prodwir serten levidans kle filmen oubyen tir portre avan ki lekip siantifik i ariv lo scene krim, ki par ler ler zot arive in tro tar e bokou levidans in ganny refase.  Nou Nasyon pe dir e kriye a ot vwa san pitye pou bann ki pe komet sa bann akt kriminalite. Me zot annan bokou lamertim ler en akize i ganny atrape parey nou dir red handed – an aksyon ler i pe komet sa krim.  I annan ki komans eksprim lakoler e lanvi revanze parey nou’n tann bann Onorab pe eksprimen, i en realite dan nou distrik.  In ganny atrape an prezans temwen e ganny remet dan lanmen lapolis, parfwa pou en voler avek tou levidans vole lo li e ou telefonn gard, temwen sa viktim pare pou donn tou sa levidans on the scen of crime me ki nou vwar enn de zour apre?  Sa akize i ganny large lo bail e ganny ankor 1 mwan an liberte avan ki i pou repas Ankour.  Mon demann sa bann dimoun ki sinnyen pou mazin 2 fwa letan zot sinnyen e peye pou retir en akize oubyen en sispe ki swa en manm fanmiy ou non annou ede pou fer sa dimoun ki’n komet en krim pou sibir konsekans e pinisyon son aksyon pou ki i aprann par son fot o plivit posib parey granmoun i toultan dir ozordi i vol en dizef me demen i vol en bef.  Mon dakor ki sa dimoun pe egzers son drwa Konstitisyonnel me lapolis i bezwen sirvey li de pre.  La lo en baz kontinnyel ziska zour i re-pas Ankour, e mon osi pou siport sa sizesyon pou ogmant pri pou fer li difisil pou en dimoun ganny large lo bail.

Annou nou tou koman en Nasyon plis ki zanmen pou montre nou konsern anver sa vag krim ki pe tous pilye nou lekonomi ki tourizm, annou anpese a tou pri ki sa enn de bandi i sali repitasyon nou pei koman en destinasyon kot nou sistenm pa kapab garanti sekirite son dimoun e bann viziter kriminel i annan pourvwar vole fasilman e lalwa i dousman pou kondann e pini bann ki koupab.  Annou aret enkou pou seryezman reflesir lo sa ki pou arive si demen i annan pei ki demann zot sitwayen pou pa vin Sesel pou sa bann rezon.  Annou prezerv nou pye diri, annou anvoy en mesaz kler san pitye e zero tolerans pou bann ki pe kontinnyen met nou kominote o taz e retard devlopman nou pei.  Nou sistenm lazistis i bezwen montre pep Seselwa plis ki zanmen ki zot pe sey fer zot mye pou servi tou mwayen anba nou Konstitisyon pou fer bouze bann ka kriminel o plivit posib e kondann bann ki devret ganny kondannen pou re-donn lespwar nou pep.  Avek sa mo Mr Deputy Speaker mon pou donn mon sipor sa Mosyon.  Mersi.

 

MR DEPUTY SPEAKER

Onorab Vengadasamy.  Switch off mic.

 

HON SHERIL VENGADASAMY

Mr Deputy Speaker, Manm koleg Onorab, zabitan Mont Buxton e Lepep Seselwa alekout bonn apremidi.  Mr Deputy Speaker kriminalite i pa en size nouvo, avek en karyer 10an koman en zofisye lapolis wi kriminalite pou mwan i pa en size nouvo.  Pou en gran pousantaz mon popilasyon Mont Buxton, pou nou Lepep Seselwa krim pa nouvo ditou.  Alor deba lo sa size krim pa sirprann mwan koman reprezantan zabitan Mont Buxton.  Lanpler sa sitiasyon krim dan nou pei Sesel pa en sok pou nou bann Seselwa ki viv viktimizasyon sa fenomenn.  Sa deba ozordi i enn ki vreman enportan, sa deba ozordi i tous tou lakour nou Seselwa.  Ozordi nou tou nou viktim sa fenomenn ki apel krim.  Konbyen fanmiy ki pe trimouse pe fer enn ek enn azout ansanm, zot lakour pe ganny kase, zot byen entim ek personnel pe ganny vole?  Konbyen Seselwa ki viv dan lafreyer sak fwa ki i ferm son lizye aswar?  Konbyen Seselwa ki pe per mars libreman lo semen aswar?  Konbyen nou ki lesklav nou prop propriyete?  Konbyen nou ki’n degout viv dan nou lakour akoz in nepli apel sa ki pou nou?  Konbyen zenn fiy ki lavenir in brize apre ki zot in ganny atake e vyole?

Mr Deputy Speaker zabitan Mont Buxton ek Lepep Seselwa i dir ase se ase.  Wi ase se ase.  Ziska ki tan ki nou lesklav serten endividi?  Ziska ki tan ki nou pou fer nou pep Seselwa vin prizonyen nou prop propriyete?  Ziska ki tan ki nou pou les sa sitiasyon ale?  Letan nou koz dwa imen Mr Deputy Speaker, letan nou koz drwa dignite imen Mr Deputy Speaker eski i aplik pou zis serten?  Eski i ganny enterprete pou benefis zis serten?  Oli drwa imen?  Oli dignite imen sa fanmiy ki son lakaz in ganny kase, vole, fouye?  Mr Deputy Speaker oli drwa imen?  Oli dignite imen sa zenn fiy ki’n ganny peze, met kouto anba son likou, pas lanmen partou pou fouy lo li?  Oli drwa imen Mr Deputy Speaker?  Oli dignite imen sa trwazyenm az ki ganny atake e zet dan rigol?  Oli drwa imen Mr Deputy Speaker?  Oli dignite imen pou sa zenn madanm tousel ki ganny atake e vyole dan son prop lakour?  Letan nou koz drwa laliberte, letan nou koz drwa to a fair trail, right to bail, Mr Deputy Speaker eski nou ti pe fer li an konformite ki en sispe i inosan ziska Lakour i dir koupab?  Eski letan nou ti pe protez drwa nou bann sispe eski nou’n met alekar sa menm drwa pou nou bann viktim?  Oli drwa laliberte en viktim ki nepli kapab kit son lakour akoz voler in fatige antre sorti?  Oli drwa laliberte en viktim letan i bezwen mars avek tou son propriyete valer?  Oli drwa laliberte?  Oli drwa dignite imen en viktim letan i ganny teorize avek en kouto anba son likou?  Oli drwa laliberte e oli drwa dignite imen en dimoun letan i bezwen anferm li ek buglars bar, security lights alarm system ek security cameras?  Oli drwa laliberte oli drwa dignite nou bann dimoun ki zot keksoz valer ki kout sepa konbyen ki zot in trimouse pou gannyen i ganny vann dan gento pou R50?  Oli sa menm drwa pou nou bann victim?  Lekel ki sipoze protez drwa privacy nou Seselwa kot nou lakour?  Lekel ki sipoze pe protez drwa nou bann Seselwa pou rezouir nou propriyete?  Lekel ki sipoze protez drwa laliberte tou nou Seselwa?  Lekel ki sipoze protez drwa nou bann dimoun aze e bann ek dezabilite?  Lekel ki sipoze protez nou drwa pou nou annan dignite koman en pep Seselwa.

Mr Deputy Speaker zabitan Mont Buxton i kler lo sa size, nou Lasanble i kler lo sa size e Lepep Seselwa i kler lo sa size.  Nou pa bezwen plis lalwa pou deal ek sa size.  Nou bezwen bann ki deal avek lalwa pou met an pratik ek lalwa.  Mr Deputy Speaker in plis ki ler pou Minister konsernen pou lapolis met sa reform konkret ki nou tann koz lo la anplas.  Konbyen letan pou pran pou lapolis reformen e redinamiz?  Konbyuen letan pou pran pou lapolis fer sa sanzman pozitiv ki nou pe espere?  Konbyen letan i pou pran pou lapolis pou donn plis training nou bann zofisye dan lalwa, plis training dan fer lankyet akoz in nepli ler pou fye lo selman en statement anba konfesyon dan en case file pou asir en konviksyon.  Annou donn incentives, overtime allowance e rezourd problenm lakaz e sosyal nou bann zofisye.  In plis ki ler pou revwar nou Community Policing, annou kriy plizyer nou bann zofisye, nou bann ex-solda, nou bann ex-zofisye lapolis dan nou distrik, annou empower zot as special constables anba Police Force Act pou asir nou prop Community Policing e neighbourhood watch dan nou dsitrik.  Mr Deputy Speaker konbyen fwa nou’n koz lo en remend center?  Konbyen fwa nou koz lo en Juvenile Detention Center.  Pou mwan sa i bann proze valab e ki si nou fer li nou lo bon direksyon dan deal avek kriminalite.  Ozordi bann rimann pe rimann dan Kord Gard e dan prizon.  Nou bann zenn delekan i lakoz lamazorite nou bann to kriminalite e in plis ki ler pou zot ganny reabilite e pou zot ganny korize.  Pou mwan se sa reform.  Mon swete ki sa 2 proze i aparet dan Bidze Nasyonal nou pei lafen sa lannen e sa Mr Speaker i en pa dan en bon direksyon e sa Mr Deputy Speaker Lasanble an antye mon asire pou siporte.

Mr Deputy Speaker nou lot akter prensipal dan met lalwa an pratik se Zidisyer.  Ozordi plis ki zanmen ou’n vwar sa renouvleman, sa langazman dan nou Lekgzekitiv, ou vwar sa renouvleman, sa langazman dan nou Parlman me mon zabitan pe demann mwan akoz ki sa menm renouvleman, sa menm lagazman pa egziste dan Zidisyer?  Sa lannen tousel Lasanble ti aprouv pres R19 bilyon Bidze pou nou Zidisyer, plis ki nou aprouve pou Lasanble.  Mr Deputy Speaker sa lenvestivman i en lenvestivman Lepep dan nou Zidisyer.  Sa lenvestisman i lasyer sa bann menm pti Seselwa ki pe leve bomaten pou al trimouse e ki zot menm lakaz i ganny kase.  Sa lenvestisman i en lenvestisman nou sekter prive ki pe sey bouze pou vin moter nou lekonomi.  Eski nou pa protez nou lenvestivman?  Oli rannman nou Tax Payers Money? Oli mekanizm pou evalye servis ki pe ofer pou nou Zidisyer?  Oli lopinyon piblik letan an prenon kont nou santans en lenterpretasyon lalwa?

Mr Deputy Speaker Prezidan Michel in dir ek nou Lepep Seselwa ki son cabinet of Ministers pou travay e zot pou bezwen travay.  Zot pou reste konekte ek nou pep, zot pou tap sa teren parey nou manm parlman nou tap sa teren.  Nou vwar sa sanzman e nou vwar sa nouvo lapros e dinamiz fer par nou bann Minis, e mon felisit zot pou sa.  Mon felisit nou bann Minis akoz mon konnen konbyen zot ki ariv granmaten dan zot biro e sorti tar dan lannwit, menm Sanmdi ek Dimans pou asire ki zot Minister i fonksyonn parey i fodre.  Nou Lasanble osi i fonksyonn lo en tre o nivo, nou Prezidan in osi egzize ki koman Manm Parlman nou reste konekte avek nou pep, be selman Mr Dpeuty Speaker ki nou vwar avek lot brans dan nou pei – Eski zot zot in dekonekte avek Lepep Seselwa?  Eski nou bann o zofisye dan Zidisyer I santi, i vwar e I viv vre douler nou pti Seselwa?  Eski pa akoz nou’n donn zot gro lakaz anler dan leo Fairview Estate antoure ek fence sekirite, larme pou vey zot e body guard ki zot in ganny elwanye e ki zot pa vwar sa ki pe pase e zot pa reste konekte ek nou pep?  Eski letan nou Prezidan, nou Minis i annan en tre bon ler travay eski sa pa aplik pou nou bann Ziz?  Ki sa Lakour ki komans 9er, 9.30, 10 e i fini 11 a 11.30 e ki sa Lakour ki pran en lunch break plis ki 2ertan edmi e apre pou fini 3 er edmi.  Be Mr Deputy Speaker sanmenm sa ozordi nou annan en kantite back log acse e napa letan pou ekout case.  Oli sa lavolante pou komans travay pli boner?  Met plis case e menm fer en zefor pou reste ziska apre ler.  I paret mwan ki sa konsept travay dir i aplik pou zis 2 brans dan nou pei.  Konbyen piblik ki asize anba sa menm ban Lakour pe konplent ki sak fwa i vini napa Ziz, napa Avoka e case i ganny anvoye.  Mr Deputy Speaker Lepep Seselwa pe demann sanzman, nou pe demann sanzman dan nou Zidisyer.  Lepe Seslewa I pe demann reform, reform dan nou Zidisyer.  En reform imedya e deswit.

Mr Dpeuty Speaker letan ler donn kredi nou merit donn kredi.  Mil fwa ozordi ou annan en case devan Lakour Mazistra ki devan Lakour Siprenm. Ozordi nou bann staff Zidisyer i unhappy leta nou Zidisyer.  Nou Lepep Seselwa in ganny ase avek nou Zidisyer. Si nou bann zofisye dan Zidisyer ti fer en pti parkour dan leo Greenwich, dan trou Lari Angar, anler dan Leo Roche Bois zot ti pou antann sa leokri nou pep ki’n ganny ase ek krim dan nou pei.  Annou aret mont lo lipye nou kanmarad oubyen zwe pa tande letan Lepep Seselwa i koze.  Annou met latet ansanm pou nou rezourd sa sitisayon.  Nou bann Ziz i bann dokter dan lalwa annou aplik sa latizann apropriye konvenab pou konbat sa maladi.  Nou Zidisyer i annan sa kapabilite pou asire ki nou lalwa i ganny met an pratik.

Mr Deputy Speaker letan nou bann Minis, letan nou bann Manm Parlman e letan nou bann Ziz nou ti lev nou lanmen drwat pou sermante nou ti prêt serman pou nou servi, pou protez nou Konstitisyon.  Nou ti prêt serman pou servi e protez lepep Seselwa.  Mr Deputy Speaker nou mesaz i kler, Lepep Seslewa in koze, lepep Seselwa pe note, Lepep Seselwa pe esper aksyon. Mersi.

 

 

 

MR DEPUTY SPEAKER

Onorab Samson.

 

HON DERECK SAMSON

Mersi Mr Deputy. Bonn apremidi tou dimoun.  Mr Deputy Speaker Mosyon pe koz direkteman avek Zidisyer ozordi apremidi e souvann fwa i ganny dir ki Lezislativ pa devret tro enterfer dan travay Zidisyer.  Me kestyon se lekel ki annan drwa enterfer dan travay Zidisyer?  Par lefe ki se Onorab Leader Zafer Gouvernman dan nou Lasanble ki loter sa Mosyon i fer ki dan en fason ou en lot se Lasnble Nasyonal Sesel ki pe koze ozordi e zot pe koz lo non Lepep Seselwa e sa Mosyon ozordi i vreman lavwa Lepep Seselwa akoz nou’n ganny ase avek sa size voler, kriminalite dan nou pei.

Mr Deputy nou tou nou’n ganny ase avek sa kantite vol dan nou kominote.  Letan nou get tou sa bann problenm vol ki osi lye avek problenm drog dan nou pei i preski otomatik pou nou vitman blanm travay ki lapolis pe fer pou dir ki sesi i sela.  Petet wi e petet non osi Mr Deputy.  Akoz wi?  Akoz nou lafors lapolis ki nou annan ozordi parey zot menm zot admet, zot konstate pa pe kapab bokou fwa reaksyonn rapidman anver lakantite ka kriminel dan nou kominote oubyen dan nou pei zeneralman.  De rezon prensipal akoz sa i leka Mr Deputy se mankman zonm dan nou bann kord gard, se akoz still lakantite transpor e adispozisyon bann zofisye lapolis pa ase pou kapab fer zot reaksyonn pli vit e sa i menm malgre ki resaman nou’n ganny nou detrwa jeep dan group transpor lapolis.

Avek sa Mr Deputy les mwan eksplike akoz nou pa devret vitman blanm lapolis pou sa vag krim dan nou pei ozordi.  Premyerman lapolis pa li tousel dan sa lager kont kriminel dan nou pei.  Nou tou dan en fason ou en lot nou devret vwar nou responsab e nou devret pe zwe nou rol pou ede.  Nou bann zonm ek fanm dan uniform pe fer sa ki zot kapab avek sa ki zot annan koman resours.  Parfwa nou vwar bann fo rapor oubyen konplent ki ganny leve kont nou bann zofisye lapolis mlagre ki i vre ki serten parmi zot pa pe perform alaoter.  Me Mr Deputy petet nou devret revwar bann incentives ki nou donn nou bann polisye, revwar lafason ki nou motiv zot, lafason ki nou okip zot.  In plis ki ler ki nou bann zofisye lapolis i reklanm sa respe ki zot merite an respektan zot menm tou dabor osi nou bezwen rekonnet zefor ki’n ganny fer pe gannyf er e pou ganny fer pou kontinnyen ranforsi kapasite nou lafors lapolis.  Dan weekend ki’n pase nou’n tann sifizaman lenformasyon lo bann diferan pa ki pe ganny pran pou ede dan sa direksyon.  An gro lapolis li osi in ganny ase avek nivo krim dan nou pei e zot pe ranforsi zot lafors.  Me ki rol nou bann sitwayen anver tou sa bann mezir ki pe ganny ranforsi par nou lafors lapolis? Nou tou nou bezwen konpor avek sistenm lapolis ki egziste ozordi.  Korperasyon lapolis avek nou bann sitwayen oubyen vis versa i pri mordyal dan lalit kont kriminalite dan nou kominote.  Kot nou’n arive ozordi dan sa pei si nou tou nou dir sakenn i konn son konnen e nou pa fer narnyen i pou fer ki nivo vol ek drog dan nou pei pou tarde redwir.  Mr Deputy i vre ki en letan ti annan sa kestyon konfidansyalite avek nou bann zofisye, nou bann zofisye lapolis me avek lentrodiksyon Division Commenders dan lafors lapolis e nouvo sistenm lalinny telefonn konfidansyel i prezan pli konfortab pou fer ki en konplent oubyen en rapor krim i kapab ganny anmase par en zofisye lapolis.

Mr Deputy i preski en lobligasyon pou nenport ki korpor avek lapolis sirtou kot i konsern bann ka ki ariv ziska Lakour.  I domaz ki parfwa apre sitan travay ki’n ganny fer pou anmenn en ka ziska Lakour e apre temwen i deside back down e pa turn up pou case.  Lo lot kote petet fodre ki nou fer en pti pe plis zefor dan proteksyon nou bann kolaborater ki temwen i a kapab santi zot pli alez e konfortab pou korpere dan bann ka ki ariv ziska Ankour.  I enteresan pou konpran Mr Deputy ki bokou fwa se nou bann zabitan, nou bann dimoun menm ki konn byen lamazorite sa bann krim ki retar progresyon dan nou pei se zot ki konn sa bann voler, se zot ki konn sa bann trafiker drog.  Me nou pres pou krwar ki parey ki nou dir ki reseler i osi koupab ki voler en temwen ki witness okenn krim ki pa raporte sa dimoun osi i preski responsab pou ankouraz krim dan son kominote.  Mr Deputy i kler ki nou tou nou bezwen zwe nou rol e ede konbat krim akoz finalman nou tou nou pe ganny afekte.

Pou konkli en lot keksoz ki fodre nou fer atansyon avek dan prosedir pourswiv en akize se bann prosedir avek en ka ki ariv ziska Ankour.  I ankor pe pran tro bokou letan pou en ka kapab ganny ekoute Ankour sirtou bann ka senp parey en voler ki’n ganny arete avek lobze vole zis apre ki in fini vole.  Santans pou bann voler i resanbleman tro kourt Mr Deputy.  Sa tantin dan toryen pankor fini met burglars bar avek son lasanm apre ki voler in fini pase, voler in fini ganny large.  Eski bann Ziz pe annan tro bokou pitye pou voler?  Eski bann viktim pa pe ganny sifizaman konpasyon ler I vwar akize sorti dan prizon 3 mwan apre ki in ganny kondannen?  Eski sa akize pou rann oubyen ranbourse sa bann lobze vole oubyen andomaze apre ki in vole i ganny kondannen?  Mr Deputy nou bann dimoun in ganny ase avek voler e droger.  Zot pe demande ki bann prosekisyon i ganny ranfors, ki sa bann kriminel i ganny deal avek dan an fason vit.  Lakour i devret vin bokou pli responsab dan liberte ki zot manda i prezant zot.

Mr Deputy an dizan sa nou vwar li pa normal ki zis en group Ziz an partikilye ki deal avek bann ka sansib tel parey bann case trafik drog.  Nou nou krwar ki pou redwir sa kantite lake, lakantite load case ki trouve kot Lakour ki bann tel case i devret ganny byen partaze antre bann Ziz.  Anmenmtan i byen ki nou note Mr Deputy ki serten nou bann Ziz pe perform tre byen dan zot fonksyon osi byen ki parfwa zot trouv zot avek zot fanmiy pe ganny menase pou bon louvraz ki zot pe fer, zot lavi i an risk.  E lo sa size nou krwar ki fodre nou garde e mentenir nivo sekirite ki nou bann Ziz i resevwar sirtou bann ki pe byen performen, akoz lentansyon – avek tout lentansyon ki nou kapab ankouraz zot e kondisyonn zot pou kontinnyelman fer en bon louvraz.

Mr Deputy i enportan dan en fason ou en lot ki Zidisyer i kontinnyelman travay ansanm avek Gouvernman pou batir sa Nouvo Sesel, kot i gou pou viv, kot touris i kontinnyelman anmenn foreign exchange dan nou pei, pou bon lasante nou lekonomi e kot i konsern lalwa ki bezwen ganny amande pou fer ki alvi nou tou I vin pli konfortab e pli an sekirite nou Lasanble pe espere byensir nou ava debat lo sa bann tel lalwa e nou ava vwar direksyon ki nou bezwen pran.

Mr Deputy mon terminen.  Nou’n ganny ase avek sa bann voler, i pe vin deplizanpli difisil pou batir nou lakour, nou kominote, nou pei.  Nou bezwen en Sesel kot nou kapab viv dan trankilite.  Alor pou terminen mon demande e mon sipliye Mr Deputy ki zot arête, ki sa bann voler i donn Sesel en lape.  Mon dir ou mersi Mr Deputy.

 

MR DEPUTY SPEAKER

Onorab Jeannevol.

 

HON BEGITTA JEANNEVOL

Mersi Mr Deputy.  Bonn apremidi.  Bonn apremidi tou mon bann koleg Manm Onorab.  Permet mwan Mr Deputy pou komans mon lentervansyon par rapel nou Lasanble parol Prezidan Michel alokazyon Lafet Nasyonal le 18 Zen sa lannen, e mon quote “Travay dir, se sa ki nou tou nou devret fer koman bann bann vre sitwayen Seselwa, se sa ki nou devret fer koman bann vre patriyot, se sa ki mon toultan demann mon Gouvernman e tou travayer sekter piblik pou fer, se sa ki mon toultan ankouraz sekter prive pou fer, se sa ki tou Seselwa i bezwen fer.  Travay dir pou byennet nou fanmiy e pou nou Sesel e travay pa manke dan nou pei.  Wi travay i annan, travay pe esper travayer”.  Unquote.  Wi nou Prezidan in vwar nesesite pou rapel sa pti group ankor enn fwa ki pankor antann sa lapel pou travay dir ou sinon ki zot zot fason travay dir se pran rekolt son kanmarad.  I sagren pou nou sa pti pei Sesel, sa zoli pti bizou dan Losean Endyen me ki pe ganny ronyen ek en bann kriminel ki mon sorry me zot napa zot plas dan sa Nouvo Sesel.  En pti Sesel kot sa lakantite krim i tro alarman pou nou.  An Mars sa lannen an sipor pou Mosyon prezante par Onorab Arnephy ki ti demande ki lofans i aret mars ansanm pou kondanen, mon ti sit detrwa lofans ki’n pase dan distrik dan en pti lespas 3 mwan.  E la mon pa ni fyer pou dir ki zis 3 mwan plitar in vin pli pir ankor.  Statistik i montre ki tou le semenn swa en lakaz, swa en batiman i ganny kase.  Swa en dimoun i ganny arase son keksoz lo semen.  Mon repet ankor tou le semenn a mwen enn sa ka i ganny raporte ek lapolis e mazin bann ki pa ganny raporte.  E sa bann voler i ankor pe marse deor apre tou sa letan, e deplis dan bokou ka se bann menm voler ki’n fini vin eksper dan sa louvraz degree zot pe practice li detrwa fwa e apre ganny large lo bail.  Mon konpran soufrans sa madanm ki rantre se li pou vwar ki son 20 lannen travay in ale dan zis en zour par en malfeter, me li apre 2 ou 3an ki zot finalman atrap li prezan i al vakans pou 3 mwan lo montany e ler i sorti byen gro, byen gra, byen repoze pou rekomans son metye vole ankor.  I pli dan bon ki en travayer ki’n al konze 21 zour.  Dimoun in nepli kapab dormi aswar, ni lizour ou lespsri pa anpe dan travay.  Zefor pou sanz landrwa reste I vin plis ankor akoz dan zot vwazinaz in nepli gou pou reste.  En lot ki kontan son landrwa kot in grandi i sagren pou vwar sa transformasyon deplorab e i determinen pou ansanm fer sa diferans akoz li i pa anvi sanz son landrwa reste zis avek en bann ki’n vin apre li pou gat sa landrwa.  Ziska fakter dan pe rod son dipen dan sa pti lale semen pou anmenn ou let li osi i ganny arase son sennon dan son likou.  Non be enler ou a krwar napa lalwa dan sa pei ouswa nou le viv san aplik lalwa lo sa bann dimoun.  Nou Konstitisyon i donn dwa toulede viktim, toulede sa viktim e sa voler me parfwa ou a krwar ki zis sa voler ki annan drwa.  Zidisyer, nou pe enplor zot silvouple aplik lalwa – si lalwa pa ase anvoy isi dan nou Lasanble se nou ki pe reprezant lavwa sa pep e nou bezwen pe protez zot me non pa sa voler.  I pa akseptab ki i vol 2, 3 fwa e i kontinnyelman ganny large lo bail akoz son zanmi in al vol en lot inosan ankor pou vin pey larzan pou li sorti dan kaso e li ansortan i al vol en lot ankor pou kapab rann son det.  Sa serk visye i bezwen ganny arete en landrwa e nou nou krwar ki se lalwa ki pou bezwen aret li.  Kimannyer eski li in abiz mon drwa e la aprezan mwan ki plito vin sa abizer e li i vin victim?  Li in annan plis drwa ki mwan e la mwan ki bezwen viv an prizonnen dan mon lakaz akoz li i deor pe marse, in ganny large lo bail.  Voler i marse lib lo semen o kontrere prezan ki i vantar me ou ou pe bezwen pez ou sak for anba lebra, ou pe get isi, get laba pou ou marse, depans plis larzan dan elektrisite akoz ou bezwen kit lalimyer alimen deor, ou pe al rod sa pli gro lock pou met ek ou laport, ou pe depanse dan buglars bar ki zonm i trouv fason kase pou antre se ou.  Me li i vin pli ris ankor, i pe enjoy son drog ek ou zefor pou travay dir.

En lot kestyon ki par ler mon demande, ki kantite levidans ki zot bezwen?  Si camera sirveyans in tir son portre kot i pe aras sennon sa madanm dan son likou – portre i byen kler pou kapab idantifye li.  Son non ek ladres in ganny donnen me sa pti men i ankor lib pe pronmnen dan kominote, e byensir pe fer shopping plis sennon ankor, monte desann Dubai pou al fer fonn pou vann.  Non be ki plis levidans ankor ki zot bezwen ler dimoun in idantifye zot keksoz vole dan kord gard sorti dan lakaz sa madanm me li i kontinnyen marse lib e prezan ki i soutir voler ankor e aste bon marse avek zot sa ki son kanmarad in save detrwa lannen pou kapab aste. Reseler ou merit pe ganny plis pini ankor.

Ser, frer zabitan Mont Fleri zot in vot pou mwan pou vin travay pou zot e pou reprezant zot dan sa Lasanble me mon pa pe tolere sa kalite keksoz ki anpes nou pei bouz devan.  E anplis i annan laba en pli gran group ki fistre ek sa ki pe arive sirtou ler zot vwar ki lalwa pa pe deal avek sa bann voler.  Plen zot i viktim sa bann lensidan malgre i enportan note osi ki dan bokou ka se pa dimoun sa rezyon ki fer sa bann akt.  Voler i sorti lwen e zot vitman aprann tou sa pti semen pou taye e tou sa landrwa kasyet.  Mon annan ankor en pli gran group siporter ki fistre ek sa ki zot vwar pe arive e ki zot krwar ki narnyen pa pe ganny fer.  Se pou sa rezon ankor ki mon pe sipliy ek nou sitenm Zidisyer ankor ennfwa fodre ki sa bann malfeter i ganny pini for, pini zot severman, fer zot santi soufrans sa madanm in santi pou travay e ki zot apre zot al vol li.  Sa voler pa merit pe sorti Ankour all smiling e sa madanm li i ankor pe plere.  Mon sorry pou bann ki annan fanmiy ou zanmi dan sa sitiasyon me okontrer la i letan ki ou merit pe koz avek li.

En lapel pou bann paran, in ler pou ou aret soutir ou piti e nenk pey avoka pou li a sak fwa ki i annan son case vole devan lakour, ouswa menm al peye pou li ganny large lo bail.  Mon profit sa lokazyon osi pou remersi nou Gouvernman ki esey tou zot mye pou met pli resours dan nou kord gard, transpor nef in ganny donnen pou fer plis patrol me problenm gard se ki resours imen i ankor manke.  Nou rekonnet zefor Gouvernman pou rod plis zofisye pou trvay avek lapolis pou aisr plis sekirite dan pei.

Pou konklir Mr Dpeuty Speaker permet mwan lans en lapel ek nou bann dimoun dan kominote, annan konfyans dan sa group Lasanble ki zot in met la pou travay pou zot, annan konfyans ki nou pe travay pou zot pou fer sir ki ou an sekirite dan ou lakaz, lo semen e pou ki sa ki deranz sa I pou ganny pini byen for.  Se pou sa rezon ki mon pou donn tou mon sipor pou sa Mosyon. Mersi Mr Deputy.

 

MR DEPUTY SPEAKER

Onorab Pillay.

 

HON SEBASTIEN PILLAY

Mersi Mr Deputy Speaker. Mr Deputy Speaker I kler ki Lasanble pe re-afirm son konviksyon e son commitment pou ki nou annan bann kominote ki pli safe e kot dimoun I santi zot an sekirite.  Mr Deputy Speaker mon pou limit mon lentervansyon lo konteni sa Mosyon e mon pou limit mon lentervansyon lo sa issue bail ki sa Msoyon pe fer referans avek. Ler Mover Mosyon in prezant son Mosyon in koz lo lartik 18 ki fer mansyon en provizyon anba sub-section 7 ki dir ki si i annan substantial grounds pou deny en dimoun bail nou bezwen met sa an aplikasyon.  Me parkont ler nou regard nou Criminal Procedure Code sa menm provizyon pa egziste e anba nou Criminal Procedure Code i senpleman dir ki bail i kapab ganny donnen subject to conditions e la mon ti a kontan sit en legzanp from Criminal Justice And Imigrationa Act 2008 Langleter.  Mon servi sa legzanp Langleter akoz son similarite, son sistenm Zidisyer avek pou nou e I dir ki “the deffendent may not be granted bail if the court is satisfied that there are substancial grounds for believing the deffendent is release on bail, whether subject to conditions or not will commit an offence while on bail”.  So i kler ki i annan serten provizyon legal ki kapab ganny mete avek nou Current Criminal Procedure Code pou fer ki nou met serten kondisyon avan ki nou enpoz bail.  Pou mwan mon oule fer kler ki an okenn lyen mon pa pe kestyonn lendepandans Zidisyer.  Mon pa pe kestyonn ni enparsyalite bann Ziz, ni zot diskresyon ki zot annan pou zot educate lo en case.  Mon krwar ler en case i vin devan Lakour burden of proof I lo sa 2 dimoun ki pe reprezant sa case dan konteks sa Avoka ki prezant sa akize, dan konteks sa Prosekiter ki pe prosekit sa case, e mon krwar ki si parfwa en Ziz i bezwen larg en akize lo bail se akoz petet napa levidans ki kapab convince li pou dir sa dimoun pa devret ganny large lo bail e mon krwar osi petet sa dimoun pe ganny large lo bail menm si in komet lofans par lepase oubyen en dimoun ki’n komet en serious offence, i kapab osi akoz nou napa sa provizyon kler ki dir ki sa Ziz i kapab servi sa provizyon e deny sa dimoun bail.

Se avek sa Mr Dpeuty ki mwan mon le propoz par egzanp serten revizyon, mon pa en Avoka me ler mon’n fer serten analiz e mon’n regard bann diferan Criminal Justice Codes ki annan en pti pe otour lemonn mon vwar poudir i anann serten provizyon ki nou kapab met an plas.  Par egzanp nou kapab met en sistenm review anplas kot nou kapab demande ki desizyon en Mazistra oubyen en Ziz pou li grant bail i ganny reviewed by the Supreme Court, me selman nou bezwen annan en limitasyon lo lakantite letan ki sa review i devret ganny fer pou ki nou pa pe voilate drwa sa akize deza.  So petet 3 working days or one week mon pa konnen ki modalite bann Avoka oubyen bann Ziz i kapab travay lo la. Sa i kapb permet nou pou regarde wether or not sa dimoun i deserve en bail. En lot provizyon ki nou kapab mete se ki nou kapab donn par egzanp bann Prosekiter sa sans pou contest the granting of the bail. E la zot ava ganny letan par egzanp si sa dimoun in komet en lofans ki serye pou zot reini levidans e vin devan Lakour ankor e prezant zot case.  Byen devinaman si zot levidans pa kler sa dimoun pou ganny large li bail me i fer ki ankor enn fwa nou kapab annan en stay of bail e pandan sa letan ki nou’n annan sa stay of bail sa dimoun li i reste dan custody lapolis e sa i anmenn nou dan en lot pwen kot nou bezwen la aprezan ranforsi striktir lapolis pou ki zot kapab si nou pe met dimoun an custody ki pa pe ganny bail asire ki sa bann dimoun ler zot an detansyon zot pa ganny abize oubyen zot bann drwa i ganny – tou zot bann drwa i ganny respekte.

Mr Deputy nou bezwen osi komans konsider par egzanp lezot fason pas santans par egzanp Lanmerik i annan en free strike system kot si ou komet 3 tip lofans apre sa trwazyenm I ou third strike ou otomatikman ou bezwen al dan prizon, e sa i fer ki ou curve sa incidence of bann krim parey burglary.  Zis pou sit en legzanp mon’n regard en pti statistik Langleter in – nou’n vwar poudir i annan en logmantasyon 24 poursan lo bann krim par egzanp burglary in the past 10 years. So bokou pei pe fer fas avek bann menm sitiasyon e sa bann pei, bann zirisdiskyon ki annan similarite avek nou kot i konsern sistenm Zidisyer pe dir ki zot bezwen met bann mezir pli strik anplas.

En lot kote Mr Deputy ki mon krwar ki bokou Manm in tous lo la me ki mon krwar ki nou bezwen met an perspektiv se ki bokou bann repeat offender zot suffer from bann adiksyon.  E la nou vwar kot nou napa en rehabilitation program ki marse kot ler sa bann repeat offenders ou’n tyonbo zot zot kapab al dan sa bann progranm e i a refer zot ed zot pou zot kapab refer zot lavi tan pou zot pa kapab retourn ankor dan kriminalite.  Me pou mwan osi sa ki enportan Mr Deputy se ki in ler pou bann prosekiter leta komans zwenn ansanm avek lapolis.  Mon krwar parey Onorab Samson in fer resorti i en collective offer sa, e mon rekomande ki as far as possible zot bezwen prezant zot case as comprehensive as possible pou asire ki ler en Ziz i bezwen fer desizyon lo whether to grant bail en dimoun tou levidans i la, i kler e i fer desizyon baze lo pli bon levidans ki annan devan li.  Si non en Ziz pou napa swa, i pa pou kapab voilate drwa en akize ler i pe grant bail.

Me osi Mr Deputy Speaker mon bezwen osi egzers enpe caution ler nou pe koz lo modalite mannyer nou kontrol bann bail akoz nou pa kapab tret bann young offenders, bann marnmay, bann zenn marnmay ki’n fek komet en lofans parey bann adilt ki bann resitivis oubyen bann careers criminals e se la kot par egzanp Gouvernman i bezwen konsidere, eski son youth justice system pe marse?  Akoz esansyelman koman en sosyete demokratik, en sosyete ki anvi vwar nou zenn vin bann pilye nou sosyete demen nou pa oule ki nou bann zenn I vin bann career criminals.

Mon oule fini mon lentervansyon Mr Speaker par retourn dan Konstitisyon e koz en pti pe lo fundamental duties.  Mon’n tann bokou koze lo bann rights bann fundamental rights, me nou Konstitisyon ki nou tou nou fer referans avek I osi dir nou nou annan bann fundamental duties anver nou pei e enn sa se uphold and defence sa Konstitisyon. En lot further to the National interest and foster National unity.  En lot work consenciously in choosen profession, occupational or trade.  En lot e pou mwan sa ki pli enportan contribute towards the well being of the community. So si nou’n apre pou servi provizyon Konstitisyon pou rod fason pou defann en akize nou devret osi pare pou servi Konstitisyon pouf e monte responsabilite ki en dimoun i annan anver son pei. Mersi bokou Mr Deputy.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Mr Deputy mon’n ekout avek bokou latansyon bann diferan deliberasyon an relasyon avek sa Mosyon.  Mosyon ki devan nou, lide par deryer Mosyon ki devan nou pou mwan i kler.  Nou pe sey gete koman en Lasanble kimannyer nou pou donn en koudmen pou konbat sa fleo krim ki’n ravaz Sesel pandan sa bann dernyen moman.  Be Mr Speaker pou mwan i enportan ki sa problenm nou pa sey get sa problenm an relasyon avek bail selman oubyen get sa problenm an relasyon avek nou sistenm Zidisyer.  Pou mwan mon krwar si nou oule efektivman deal avek sa problenm krim ki pe ravaz nou pei nou bezwen annan en whole society approach, nou bezwen annan en lapros kot tou akter i annan, i zwe son rol dan en fason efektiv e mwan mon pou dir poudir i annan en kantite diferan akter ki bezwen zwe zot rol dan en fason for, dan en faon efikas pou ki letan nou met ansanm nou kapab dir wi Sesel in pare pou li deal avek sa fleo krim dan en fason for, dan en fason efikas kot tou bann dimoun kot drwa laliberte bann dimoun, kot drwa pou en dimoun enjoy son propriyete, kot drwa ki en dimoun i annan pou reste se li dan en fason safe i ganny respekte a tou reprizm.  Mon konnen pou dir sa sitiasyon krim in vin enn ki difisil, mwan mon personnelman kont krim, mon santi pou dir wi nou bezwen rod en fason efikas  pou deal avek sa bann dimoun ki involve dan krim, mon konnen wi mon dakor e mon krwar ki nou devret annan en fason pou pini zot dan en fason for, dan en fason kot once ki zot in fer li 1 fwa zot pa ganny lanvi pou repet li dezyenm fwa.  Me mon egalman krwar pou dir bann dimoun ki involve dan krim koman en sosyete letan zot in fini pas zot santans nou devret koman en sosyete vwar kimannyer nou kapab ed sa bann dimoun pou reabilit zot pou zot retourn dan sosyete koman en dimoun responsab e kot zot a kapab fer en kontribisyon pozitiv ver devlopman zot pei rather than en kontribisyon ki negativ.  So mwan mon krwar pou dir i annan en kantite areas ki nou bezwen gete akoz zot pa pe fonksyon parey zot devret fonsyonnen e vwar koman en pei, koman en Nasyon kwa ki devret ganny fer pou fer sir ki sa bann diferan lorganizasyon i fonksyonn efikasman e kontribye alors efikasman dan konbat kont krim.  I kler Mr Deputy ki premye dan sa bann premye dan sa bann diferan lorganizasyon ki mon pou koz lo la i lorganizasyon oubyen departman lapolis.

Mon pa pe vin la pou vin montre ledrwa akoz mon krwar mon dan en pozizsyon pou mwan montre ledwa.  Mon vin koz lo la akoz mon krwar mon kapab fer en kontribisyon pou nou koman en sosyete kapab idantifye kote ki nou feb e aranze.  Mwan sa ki mon anvi vwar se sa departman lapolis i ganny aranze. Mr Deputy mon menm mwan personnelman mon’n en viktim vol.  Pres 1an edmi a 2an pase landrwa kot mon ti pe reste ti ganny kase e en vol ti arive.  Nou’n kontakte lapolis, lapolis in vini e finalman nou’n atrap sa bann dimoun ki ti involve dan sa vol.  Serten lobze vole in ganny retournen, serten lobze vole pankor ganny retournen.  Me domaz ziska ozordi menm si nou annan sa bann dimoun, nou’n atrap zot, zot in dir wi mon’n vini mon ti fer sa malgre tou sa levidans ziska ozordi case pankor ni kapab ariv Ankour.  Nou annan en problenm serye la e in the meantime sa bann dimoun ki’n involve zot free, zot pe marse e zot kapab retournen e komet ankor en tel lofans.  So kote ki annan deficences dan lapolis.  Mwan mon krwar poudir dan lapolis premyerman zot mank resours wi, nou devret donn zot plis resours pou zot kapab fer zot traavy pli efficently.  Me selman mon egalman krwar ki lapolis i mank training.  Mon krwar poudir nou devret donn lapolis sa kalite training ki pou permet zot kapab fonksyonn koman en lafors ki efikas e ki profesyonnel.  Mon egalman krwar ki kalite mon pa pe dir ki bann kalite dimoun dan lapolis pa bon pa ganny mwan mal, me mon egalman krwar ki nou devret elev nivo bann dimoun ki nou pran dan lapolis – pou ki sa bann dimoun i trainable e ler zot trainable sa training ki nou donn zot i ganny anmase e sa bann dimoun i kapab pli byen travay koman bann profesyonnel.  Apartd training e apard resours mon krwar nou devret egalman vwar bann diferan sou departman dan lapolis par egzanp, mon pa krwar ki Scientific Support Unit i ekipe enough pou zot kapab deal avek bann levidans ki zot anmase dan en fason solid pou zot kapab vreman etablir  wether en dimoun dan serten ka wether en dimoun i vreman koupab oubyen non so al devan en Lakour e met sa bann levidans devan Lakour pou Ziz kapab dir wi sa dimoun i  koupab oubyen sa dimoun pa koupab.  Mon krwar ki poudir sa sou departman dan lapolis i devret ganny beef up e ganny tou sa resours e bann personnel i devret ganny tou sa training pouzot kapab fer sa louvraz dan en fason vreman vreman efikas.  Nou bezwen egalman vwar eski i annan parey persepyon i fer nou krwar, eski vreman i annan koripsyon dan lapolis?  Akoz ki levidnas ki ganny anmennen dan kord gard apre en serten letan i disparet?  Kwa ki koz sa?   So tou sa bann difikilte ki nou lafors lapolis oubyen tou sa bann deficiencies ki nou kapab idantifye avek nou departman lapolis mon krwar nou devret koman en pei adres s a bann deficiencies, fer sir ki nou met lapolis lo sa standar ki pou permet li kapab deal avek bann krim ki i fer fas avek ozordi dan nou pei on a daily basis.

Mr Speaker en lot keksoz, eski lapolis i annan par egzanp sa data base modern lo bann print tou bann dimoun ki’n komet en lofans Sesel?  E si zanmen demen in airv en krim e ou pe demann lapolis pou li run through sa data base how efficiently zot kapab fer li?  Tousala i bann problenm ki nou pe rankontre avek en departman, en departman ki annan en rol enportan pou zwe an relasyon avek konbat krim dan sa pei. Mon pa kapab sorti lo departman lapolis san ki mon egalman koz lo zot scheme of service.  Bomaten Minis in vin dan Lasanble, Minis responsab in vin dan Lasanble e in dir ek nou koumsa poudir lapolis i annan en bon scheme.  Mwan mon krwar si nou vreman anvi rod kalite, si nou vreman anvi profesyonnalizm dan lapolis nou bezwen egalman revwar zot scheme. Mon konnen poudir ozordi nou’n ariv lo sa nivo kot nou bezwen al rod etranze pou travay dan nou lafors lapolis, mwan mon pa krwar ki nou ti devret ariv lo sa nivo e mon krwar ki pou dir i annan ase Seselwa ki enterese, mon krwar ki poudir I annan ase Seselwa ki nou kapab train pou fer travay dan nou lafors lapolis me mon egalman krwar pou dir an retour pou nou kapab ganny sa bann Seselwa, anretour mon krwar nou devret donn zot sa kalite incentives ki commensurate avek sa travay ki nou anvi zot fer.  Zis parey nou pey en Ziz byen pou fer sir ki sa Ziz i travay dan lentere lazistis mon krwar nou egalman bezwen kapab pey en polisye byen pou li kapab egalman travay dan lentere protez nou pei e protez nou pep kont krim e fer sir ki nou bann Seselwa e tou dimoun ki viv dan sa pei enkli bann touris i viv dan sa pei dan en fason kot zot santi zot safe e zot dwa laliberte i ganny respsekte a tou reprizm.

Mr Deputy apard ki departman lapolis i annan bann lezot departman ki annan en rol kle dan konbat kont krim e sa se Zidisyer.  Mon pa krwar ki nou devret anmar lanmen en Ziz, mon’n toultan dir poudir sistenm Zidisyer i bezwen gard son lendepandans me mon krwar ki nou bezwen fer sir ki nou annan tre o konpetans dan nou sistenm Zidisyer.  Nou bezwen annan bann Ziz ki kapab, bann Ziz ki endepandan e nou bezwen fer sir ki nou annan ase Ziz pou deal avek the frequency of bann ka krim ki e arive dan sa pei.  Mon deteste mon osi lefe ki en case Ankour i bezwen esper 2an – en senp case i bezwen esper 2an, 3an avan ki i ganny deal avek sa mon pa krwar ladan.  Mon krwar sistenm Zidisyer i devret efikas enough pou li kapab donn lazistis Lepep Seselwa on time, akoz parey koze i dir justice delayed is justice deniedSo mon santi pou dir i annan lespas dan nou sistenm Zidisyer pou nou improve e mon krwar ki poudir nou bezwen donn Zidisyer tou sa resours neseser pou fer sir ki i vin enn ki efikas e ki deal avek nou sitiasyon krim dan en fason for e dan en fason vitman.  Petet nou koman en Lasanble nou devret vwar kimannyer nou kapab garanti ki nou sistenm Zidisyer, nou departman lazistis i ganny sa kalite bidze ki pou fer li kapab mont lo sa nivo ki nou dan sa Lasanble nou pe rode byensir lo sa nivo parey bann Manm in dir ki pou kapab permet zot deal avek krim dan en fason vit e dan en fason efikas.

Lot area ki mon pa’n tann personn mansyonnen se nou sistenm ledikasyon.  Mr Deputy avan en dimoun i rantre, I vin en dimoun ki komet en krim tou Seselwa i pas atraver nou sistenm ledikasyon.  E atraver nou sistenm ledikasyon nou kapab very skilfully shape the trend of thinking, aranz oubyen shape mind set enn sa dimoun ki swadizan pou vin en bandi demen pou ki i pa vini en bandi.  Mon krwar i enportan pou nou ganny sa kler.  Ledikasyon sivik dan lekol i devret retournen e i devret retourn vitman e i devret enn ki efikas.  Mon krwar poudir nou bezwen revwar.  Eski nou sistenm ledikasyon i pe vreman donn nou bann zanfan sa progranm ki reponn a zot bezwen. Akoz letan bann progranm dan lekol pa reponn a bezwen en etidyan se la kot sa etidyan I sorti dan nou sistenm san ki i kapab aprann en skill e letan i pa kapab aprann en skill I vin fasil pou li rantre dan sistenm lanplwa, dan Employment Market san ki ki i kapab trouv lanplwa e letan i pa trouv lanplwa then i annan diferan keksoz ki kapab arive.  So mon krwar poudir nou sistenm ledikasyon i egalman annan en plas, annan en rol pou zwe e mwan mon pe demande ki nou revwar kimannyer nou sistenm i kapab ganny aziste pou fer sir ki bann progranm ki i donn nou bann zanfan i bann progranm ki reponn a bezwen mazorite Seselwa pou ki sa bann dimoun i ganny train koman etidyan e letan zot ganny release from lekol zot kapab rantre lo job market find a job e vin en sitwayen responsab.

En lot sa se SBC.  Ki rol ki SBC i zwe?  Ki fason ki SBC i kapab sansibiliz piblik an relasyon avek par egzanp drog.  Mon krwar poudir SBC i annan en rol pou pas bann progranm edikasyonnel ki kapab ganny servi pou egalman shape the trend of thinking Seselwa.  Mon krwar sa osi i en laspe enportan e nou bezwen vwar ki rol i kapab zwe.

En lot Minister ki kapab zwe en rol se iMinster Community Development.  En Minister ki very powerful an relasyon avek sa ki arive dan nou kominote, me eski i zwe sa rol dan lafason ki i devret zwe?

Minister Community Devlopment i ganny en gro bidze every year. Eski i pe efficiently servi sa bidze pou li kapab donn lanmen zwe sa rol ki i devret zwe e i kapab zwe pou nou donn lanmen konbat kont krim, pou nou fer nou bann zanfan dan nou kominote vin bann zanfan responsab rather than vin bann bandi?

En lot area ki mon’n idantifye se NDEANDEA i annan en rol enportan akoz i kler menm Minis in dir bomaten pou dir lamazorite sa bann dimoun ki involve dan sa bann bandisite, dan sa bann krim se bann dimoun ki pe servi dorg.  Mon panse poudir in annan en fason siantifik pou Gouvernman etablir sa ko-relasyon ant sa bandi avek the use or the abuse of drog avek lalkol.  Now si sa ko-relasyon in ganny tre byen etablir mon krwar i pou enportan pou nou konpran ki be tyonbo enkou, NDEA therefore i annan en rol enportan pou li zwe akoz se li sa lazans ki konbat kont krim dan sosyete, alor nou bezwen met li anba en microscope e vwar.  Eski i pe fer en travay ki efika?  Mr Deputy mon pa pe dir non mwan.  Sa ki mwan mon pe dir se koman en sosyete, koman en pei, koman en Gouvernman nou bezwen vwar ki rol ki sa bann diferan lazans pe zwe.  Eski zot pe fer li dan en fason efikas?  Eski zot pe zwe zot rol dan lafason ki zot devret zwe e donk kontribye efektivman konbat kont krim oubyen non.  Mwan mon’n personnelman gannye n kantite rapor lo NDEA, mon pa kapab prouv sa bann keksoz ki mon’n ganny dir me selman mon’n ganny rapor.  So eski zot vreman efikas?  Eski zot kapab si zot efikas – eski zot kapab vin pli efikas?  Kwa ki pe anpes zot vin pli efikas?  Eski zot annan tou resours?  Eski zot pe ganny sa bann training neseser?  Mr Deputy mon krwar i enportan pou nou koman en Nayson assize, get sa problenm dan son globalite, get tou sa bann lazans ek sa bann departman ki kapab zwe en rol, fer zot vin efikas, fer zot zwe sa rol byen e mon asire ki si nou kapab lalit efektivman kont drog, si lapolis i efikas, si Zidisyer I efikas dan 2an, 3an 4an, 5an nou pou pe viv dan en Pei kot to kriminalite pou redwir konsiderableman.

Nou’n tann dir bomaten lenpakt ki sa i annan lo nou lendistri touris.  Mr Deputy Speaker nou bezwen realize poudir si sa problenm i afekte nou lendistri touris adversman, si son lenpakt lo son lendistri i vin vreman for o pwen kot bann pei i komans anvoy bann travel advisory mon krwar poudir nou dan en problenm serye.  Akoz lendistri touris I sa lendistri ki donn nou lamazorite nou reveni.  E koman en Nasyon si nou pa pe ganny reveni nou pe rantre plis dan bandisite akoz nou pou napa resours pou lager kont sa bann fleo, kont sa bann krim e pli nou napa resours pou lager, pli nou pei i tonm pli ba e pli nou pei i tonm pli ba tou Seselwa, san lekspesyon depi sa Manm Parlman, depi sa Minis, depi sa ezenyer, depi sa dokter, depi sa travayer kot lagrikiltir, depi sa ansenyan, depi sa ners, nou tou, depi sa labourer, nou tou nou ganny afekte.  So i enportan ki nou adopte en whole society approach.  Gouvernman i revwar tou bann areas, tou bann departman ki annan en rol pou zwe e nou fer sir ki sa bann departman i zwe zot rol dan en fason efikas.

En lot departman ki nou bezwen vwar se Biro Prokirer Zeneral.  Eski zot ep ganny tou bann resours?  Eski zot efikas?  Si non, akoz ki Gouvernman pa pe donn zot sa bann resours ki zot devret pe gannyen?  Akoz ki zot pa pe ganny sa training oubyen sa posibilite pou annan personel development akoz pa pe ganny empowered pou zot deal avek bann cases dan en fason for e dan en fason efikas.

Mr Deputy mon konnen poudir 6er in sonnen me mon enplor Gouvernman pou li asize e fer en refleksyon profon, fer en letid serye, remet tou sa diferan departman ansanm, donn zot bann resours neseser, donn zot bann training neseser e les zot zwe zot rol, donn zot sa posibilite pou zot zwe zot rol dan en fason for, dan en fason solid pou ki nou komanen pei, koman en Nasyon nou kapab zwenn ansanm e konbat kont sa fleo.  Mon’n toultan dir pou dir drwa fondamantal en dimoun ou pa kapab zwe avek ou – bezwen respekte a tou reprizm.  Si en dimoun in vole ou pa kapab anpes son paran pey en lawyer pou li – i en keksoz ki enposib, ou pa pou kapab fer.  Menm si ou pou sir avek sa paran pa bezwen pey en lawyer pou son zanfan – disan i pli epe ki delo, santiman ki en paran i annan anver son zanfan i for, i konnen son zanfan i mal I osi deep dan son leker i anvi ki son zanfan i ganny en led me selman pou ou ale dir ek li pa pey en Avoka les son zafan al dan prizon i pa en keksoz ki fasil.  So olye kont lo la pou nou kapab konbat krim nou bezwen kont lo lozik, nou bezwen vwar kimannyer koman en sosyete kimannyer koman en pei nou devret otherwise deal avek sa problenm, fer lapolis vin efikas, donn zot zot bann zouti, fer Zidisyer vin efikas, fer Biro Prokirer Zeneral vin efikas, annan the right progranm ledikasyon dan nou bann lekol pou nou bann zanfan, les Minister Devlopman Kominoter zwe son rol.  Mon krwar poudir ek sa lapros si nou get the big picture nou get enpe partou e nou aranze mon napa okenn dout Mr Deputy ki nou pou kapab koman en pei deal avek sa problenm dan en fason for, dan en fason efikas.

Therefore mon pou dir avek loter Mosyon instead of get zis sa sitiasyon bail, wi dalor annou fer sir ki I difisil pou en dimoun ki’n komet en lofans sirtou en lofans grav ganny en bail – mon dakor avek sa, annou fer li difisil, me selman nou pa kapab deny en dimoun son drwa akoz Konstitisyon i donn li pou li ganny bail.  Si dapre Konstitisyon, si nou met bann kriter ki kler e sa dimoun pa meet sa dimoun ki pe demann en bail pa meet sa bann kriter mon dakor ou pa donn li bail fine, no problenmOk.  Me sleman nou bezwen touzour koman en pei mars anlinny avek nou Konstitsyon e respekte nou Konstitisyon.  So parey mon’n dir nou bezwen fer sa ki nou Konstitisyon I dir nou fer.  Si parkont nou Konstitsyon I dir nou nou kapab pa donn li, nou pa donn li.  Me si nou Konstitisyon I dir nou nou pa kapab deny en dimoun bail a leksepsyon ki si i pa pe meet serten kriter nou gete sa dimoun pa pe meet serten kriter then yes i ganny denied sa bail.

Mr Deputy Speaker avek sa lentervansyon kourt mon ava dir poudir mon pou siport sa Mosyon.  Mersi.

MR DEPUTY SPEAKER

Malgre ki ou’n port a mon latansyon ki 6er in sonnen mon a donn dernyen entervenan lo mon lalis Onorab Decommarmond laparol.

 

HON CHARLES DECOMMARMOND

Mr Deputy Speaker mersi bokou.  Mr Deputy Speaker lasemenn dernyen e pret de la paroisse de Cascade a ete atake e vole e la letan in ariv sa Mr Deptuy Speaker erezman in nobou telefonn lapolis, e la lapolis in arive vitman e zot tyonbo sa dimoun ki’n vin fer sa lagresyon, sa agreser la ek mon pere.  E nou anmenn li anndan kot Kord Gard prezan nou bezwen larg li, ni Ankour pa kapab ale, ni narnyen paseke Mr Deputy Speaker en medical report I dir ki sa dimoun – the above name is a known case to the Psychiatric unit since 1997, he has been admitted to the Psychiatric ward on several occasion on (-) voluntary and unvoluntary basis.  Is poorly compliant to medication and follow obsessions.  He is a history of taking illegal substances such as eroin and cannabis.  Diagnosis, on the basis of information from his notes, case note it is (-) that the patient is suffering from personality and behavioral disorder secondary to multiple drug use and moderate mental retardation. Sa i ale Mr Speaker eskan i dir ki i ganny refer kot son klinik e I dir letan ou kontinnyen ki the patient I pa kapab ganny, I pa kapab zize akoz son sitiasyon mantal.  Alor i ganny retournen dan lakominote e nou nou’n fatige Cascade avek sa ensidan, avek sa tel dimoun e tou dimoun pe konplent.  Mon asire ki dan lezot distrik i annan sa.  E prezan pou substantiate sa ki mon pe dir e pou siport sa Mosyon ki devan nou lartik 18 nou Konstitisyon ki’n byen ganny site oparavan par mover Mosyon lartik 18(2)(d) I dir: en dimoun i an liberte tou sa i restriksyon konmsi ou kapab aret en dimoun e ou deside si ou pou met li devan Lakour ensitswit the arrest or detension for the treatment or rehabilitation of a person who is or reasonability susepected to be an unsound mind or addicted to drugs to prevent harm to that person or to the community. Mon pa konpran mwan letan alor taler dernyen entervenan Onorab Pierre I dir ki i annan lezot lenstitisyon ki osi konpromi dan sa zafer dimoun vole, dimoun I fer krim ensitswit i annan osi lasante.  E la Lasante I dir ou pa kapab pourswiv sa dimoun, ou pa kapab met li devan Lakour me Selman i en menas pou kominote e I dir dan son rapor i en menas to the community as well. So ki nou fer la?  Prezidan mon pe met sa, mon krwar ki Prezidan pou ekout nou sa Mosyon ki nou pe diskite akoz li osi i konsernen in koz lo la le 18 Zen e nou pe vyol Konstitisyon se pirman sa e prezan ou dir be sa boug i fou – ou met li lazily.  Si ou kapab ziz li ou ziz li.  Be la mon krwar i pa ni fou, i pa ni me mon pa ganny en konrpan mwan.  Alors mon les sa pwen an sispans lotorite i a get ladan mon swete ki zot anmenn bann nouvo lalwa ki a permet e menm paran in al kot lopital en – I dir get sa piti pa kapab reste avek dan lakour, i fer bann soz en desan, en bann problenm mon dir ou, kominote in raporte plizyer fwa narnyen pa ganny tande. Sa lartik 18(2)(d) ki pe ganny vyole.

Prezan Mr Deputy Speaker, letan nou gete mwan mon’n al fer en pti pe resers la gete bann zafer Cascade i annan case devan Lakour i annan plis ki 12an, plizyer case devan Lakour preski 12an.  Tou levidans I la, temwen in donn son bann keksoz konmsi zis pou donn en zizman, i annan 12an pankor donnen Lakour.  Mon pa konnen ki problenm mwan.  Anyway prezan mwan mon annan enn de case ki’n kekfwa in fini ganny pase zis pou montre reelman.  Le 14 Mars 2001 date of offence mon pa pou nonm serten detay – stasyon Cascade, lapolis Cascade sa.  Cascade stasyon lapolis sa letan ti ankor ouver, in fermen, dan bidze detrwa lannen pase in met larzan pou refer, sa larzan in disparet pa konnen kot in ale kord gard pa’n ganny refer Cascade e la nou demande atraver mon lentervansyon la refer nou kord gard silvouple. Remet nou larzan ki ti la mon pa konnen kot in ale, remet li dan nou soz kord gard.  Prezan le 14 Mars 2001 prezan case date to the Attorney General kot Prokirer Zeneral laba, le 13 Desanm 2001, 7 mwan apre, 8 mwan apre, 9 mwan apre – le 7 Desanm 2001 I kot Atorni Zeneral.  Date of trial le 8 Zilyet 2010.  2010 konmsi la in pran 9an kot Biro Atorni Zeneral laba Prokirer Zeneral laba. Prezan date file returned le 23 Desanm 2010.

Mon a donn ou en lot case Cascade le 14 Novanm 2001 ok.  Le 18 Zanvye 2005 la lapolis i annan en bout la, i al kot Biro Prokrire Zeneral le 13 Me 2010, i al kot – i al fer trail, date of trial savedir 5an apre e la bannla in pled guilty en guilty zot tou sa letan i pran.  Mon a donn ou en lot le 25 Avril 2003 sa Port Glaud, le 16 Desanm 2003 case I ariv kot Prokier Zeneral complainant i mor pandan sa letan.  Le 25 Fevriye 2011 date of trial.  Date file returned avek son compliant ki’n mor le 18 Mars 2011.

Mr Deputy Speaker mon kapab ale koumsa donn ou sa enn in pran 8an, sa enn ki mon’n fek dir dernyen ou ale 7an, 6an, 8an nonm ou konmsi zis pou montre ou most of the time problenm i pa neseserman lapolis, bokou problenm i kot Biro Prokirer Zeneral e Zidisyer.  E mon osi fer resers bokou ek lapolis alor en lofans i ganny komet, lapolis i vini i tyonbo sa dimoun – in vole e I tyonbo li ek son materyo vole, son levidans i la avek li prezan lapolis i annan 24er pou li fer son sarz i sarze li tou, konmsi – prezan letan in sarze la, ou pa kapab anmenn sa aktyelman kimannyer i ete konmela ou pa kapab anmennen kot Prokirer Zeneral.  I dir ou bezwen konplet file, al tir portre al isi, si i annan en pti keksoz manke dan file i dir non, kantmenm ou’n fini tyonbo li in al pled guilty i dir ou wi I koupab, wi eskiz mwan, pardon – mon koupab i dir ou file i bezwen konplet.  Savedir lapolis ti kapab anmenn sa deswit li in fini sarze me i pa aksepte akoz Lakour pa aksepte osi laba. Akoz si ou anmenn li koumsa prezan la i dir non case i mank lenformasyon dan file, case i pou retournen al fini konplet ou case antretan i larg sa dimoun lo bail.  Ou konpran or i donn li en lot dat plito i pa larg lo bail plito donn li en lot dat pou sa trial.  Pandan sa dat la sa dimoun i ale i vol ankor son ta vole, i fer ankor son tan ensinifyan e sa i ale koumsa. Mon mansyonn sa de pti pwen pou montre kote vreman nou problenm i ete.

Alor otherwise ki lartik 18 nou Konstitisyon 18(7)(c) la osi i ganny abize sa lartik la akoz sa akize i ganny large otherwise i pa devret ganny large li.  Si sa Ziz i servi byen son lespri dan common sense i pou vwar otherwise si sa Lakour i krwar i pa pou re-aparet Ankour sa dimoun konmsi ou pa anvoy li deor ou kit li, ou kit li an soz an koman i dir sa lo rimann, ou pa larg li lo bail ou kit li lo rimann akoz i annan risk e sirtou si lapolis in dir ou poudir sa dimoun i pe fer plizyer ka vol ensitswit, plizyer lofans.

So lot keksoz Mr Deputy Speaker ki mon a dir avan nou fini pou nou pa al tro lwen, se ki nou annan medya, ou annan parfetman rezon Leader Lopozisyon medya i annan en rol pou zwe.  Nou bezwen ankouraz nou medya pou to report on trail.  Bann trails i bezwen ganny plis – medya vin dir, eksplike ki’n arive ensitswit.

Crime watch bomaten ti annan en kestyon ki Speaker ti demande.  Sa osi mon krwar nou bezwen ankouraze, e byensir nou kantmenm nou pou sanz lalwa i enportan ki nou sanz lalwa nou met li a zour ek bann keksoz ki devan nou la ek sitiasyon ki devan nou me anmenmtan nou pa kapab kontinnyen met sa young offender avek sa dimoun ki’n fer lofans 5, 6 fwa ouswa ki’n fer bann gro, gro krim ensitswit. Si nou ale la ou al get sitiasyon kaso dan bann kord gard la osi i en problenm.  Alor kimannyer ou rimann sa bann dimoun?  Kote ou rimann zot?  Tousala nou bezwen improve lo la.  Savedir mon krwar mwan ki Minister Home Affairs i bezwen fer en zefor spesyal e nou nou bezwen veye Lasanble dan bidze ki vini.  Lafen sa lannen la dan bidze ki vini si napa sa bann keksoz pou improve sa ki Prezidan pe demande – Prezidan in demande sa dan son speech, si napa narnyen par son bann Minister pou improve sa sitiasyon nou reprezantan Lepep mon krwar nou a dir toynbo enkou sa bidze al re-kalkil lo la, al re-balanse.  La nou pe anvoy en mesaz boner pou ki bann Minister i pran sa onboard, i pran li onboard pou fer sir ki zot travay anlinny avek sa ki nou nou pe vwar, sa ki sa Lepep i bezwen koumsa nou a kapab dakor wi bidze i a bon e anmenmtan nou vwar poudir ou pa’n demann 50 poursan pou fer zis lanmwatye dan enn me ou a demann 2 proze e ou a konplet ou 2 proze alafen lannen e nou ava avanse dan sa pei.

Avek sa Mr Deputy Speaker mon krwar mwan mon pou siport sa Mosyon i kler e anmenmtan nou demande ki Lakour akoz sansan ki mesaz zot anvoye, i fer nou poz kestyon, nou demande parfwa eski konmsi bann Ziz, Mazistra i annan kek lentere personnel konmsi dan bann case ki fer li drag koumsa?  Nou demann kestyon ankor.  Nou dir i annan kek lentere politik par deryer?  Nou pa konnen nou.  Konmsi i fer ou poz ou lekor en bann kestyon.  Prezan i annan en lot sitiasyon nou dir be nou pa konnen, i paret bann Avoka konmsi ki kontrole laba olye Ziz kot Lakour, kot Zidisyer.  Ou konpran akoz Avoka pa vini nenk case i ganny anvoye. Konmsi be Ziz i devret take pose e fer sir konmsi ki lalwa i aplik byen e ki lentere piblik, safety piblik, sekirite piblik dapre ki Konstitisyon i demande i ganny sof garde a toultan.

Mersi bokou Mr Deputy Speaker mwan mon krwar ki en mesaz i kler nou’n fini lans, anvoy tou bann pwen devan mon krwar ki aksyon i devret prezan ganny pran si non annou re-anmenn bann lalwa ki fodre ganny amande ankor isi dan sa Lasanble e nou a fer sir nou pei i mars en pti pe pli byen ki konmela.  Mersi bokou.

 

MR DEPUTY SPEAKER

Right of reply loter Mosyon.

 

HON MARIE ANTOINETTE ROSE

Mr Deputy mersi.  Mr Deputy 6.26 e mon remersi tou bann Manm pou koze e menm si 5er in fini sonnen nou’n kontinnyen koze e mon remersi ou pou les nou kontinnyen koze akzo mon krwar i enportan ki nou lavwa i ganny tande.  Menm si nou’n reste ziska tar e mon espere ki SBC i a dir ki poudir nou’n reste ziska tar pou nou fini sa Mosyon akoz souvann fwa nou fini ziska tar.

Mr Deputy brefman mon pou met devan serten propozisyon ki nou ti a kontan i ganny konsidere.  Premyerman ki Biro Prokirer Zeneral I vwar lartik 18 nou Konstitisyon i koz lo the right of liberty, i ganny kodifye dan en Proze De Lwa aprey legzanp i annan Langleter ki apel Bail Act ki a donn tou bann Ziz ek Mazistra bann gidans kler lo sa size bail ki dapre resers ki mon’n fer i pli zoumwen pa kler.

Ki seksyon 101 ek seksyon 102 dan Criminal Procedure Code i ganny amande e ganny met li azour avek norm enterasyonal e Konstitisyon nou pei.  Ki bann dimoun ki kontinnyen repet menm lofans zot pa ganny okenn remisyon at all cost.

Ki lapolis i travay an kordinasyon avek Lakour e Biro Prokirer Zeneral ki zot verifye eski sa sispe ki’n ganny met lo bail I pe obzerv kondisyon bail par egzanp si i bezwen raporte kot kord gard?  Eski nou pe enform sa Prosekiter si sa sispe pa pe obzerv lord Lakour?

Nou krwar ki bann sispe pa devret ganny lasistans pou Legal Aid dan bann ka ki pa merite.  Nou krwar e nou pe rekomande ki bann sispe ki lo rimann zot ka i devret pas Ankour dan en dele letan rezonnab.  Mr Deputy mon espere ki Zidisyer i a tann nou lapel anplis ki tou bann rekomandasyon ki’n ganny fer an partikilye bann rekomandasyon ki’n ganny fer par Onorab Pillay, par Leader Lopozisyon ek Onorab Decommarmond e tou bann lezot Manm ki’n met bann propozisyon devan e nou al pli lwen ki sa.  Nou pou propoz lalwa e gidans neseser, lalwa ki kler Mr Deputy, lalwa ki Konstitisyonnel me lalwa ki pou fors zot fer zot travay si zot pa pe fer li e la mon krwar mon difere en pti pe avek Leader Lopozisyon.  Nou bezwen en lalwa si Zidisyer pa pe fer zot travay, si zot pe abiz zot lendepandans, si zot lanmen pa ganny anmare ozordi me zot pa pe servi li e sa Mosyon ki mon’n met devan i an akor avek Konstitisyon, i dekoul dan Konstitisyon.

Mr Deputy nou pou osi propoz e revwar lezot polisi ki gid fonksyonman lapolis ek prizon pou zot osi pli byen reponn lapel nou pep.  Mr Deputy nou pa pou ezite pou kritik sistenm Zidisyer si nou vwar ki zot pa efikas e ki zot nepli relevan.  Mr Deputy dan nou sistenm Zidisyer i annan serten Mazistra e Ziz etranze.  Les mwan remind zot ki se Lasanble ki reprezantan Lepep e ki ler zot dan nou pei zot merit servi sa pep, zot pa viv dan en bubble me zot viv dan larealite Seselwa.  Pou nou bann Seselwa dan sistenm Zidisyer dan zot desizyon ede remet anvaler bann prensip nob ki fer nou Seselwa, ede protez sekirite e lekonomi Nasyonal, ede re-abilit bann zenn ki pa pou ganny ede si zot kontinnyelman reste lo semen e ede ki viktim ava re-ganny konfyans dan lazistis.

Mr Deputy avek sa mon remersi ou e mon remersi tou bann manm pou zot sipor lo sa Mosyon.

 

MR DEPUTY SPEAKER

Bon nou pran en vot lo sa Mosyon.  Tou bann ki anfaver lev zot lanmen?  Mosyon i inanim, savedir Mosyon in ganny aprouve.  E apre sa lazournen tre sarze i reste zis pou mwan swet zot fer en bon lefet lazournen lendepandans e nou ava adjourn ziska Mardi prosen.

 

 

(Ajournment)