::
Home » Verbatim » Verbatim - Second Term 2012 » Tuesday 12th June 2012

Tuesday 12th June 2012

 

Download PDF

_____________________________________________________________________________________

 

NATIONAL ASSEMBLY OF SEYCHELLES

Tuesday 12th June 2012

The Assembly met at 9.30am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon.  Mon oule osi swet labyenveni parmi nou bann zabitan trwazyenm-az distrik Mont Fleuri, bonzour.  E ozordi avek nou nou annan Minis pou Zafer Sosyal, Devlopman Kominoter e Sport, Minis Meriton ki pe vin reponn plizyer kestyon e nou pou komans par kestyon nimero 19.  Onorab Wilby Lucas.

 

HON WILBY LUCAS

Mersi Mr Speaker.  Bonzour tou Manm Onorab, bonzour Minis ek ou delegasyon, bonzour tou dimoun ki a lekout dan lakour.  Mon premye kestyon i lir koumsa.  Pou demann Minis si Gouvernman i annan plan pou reviz kondisyon travay ek lapey sa scheme Family Support? Mersi.

 

MINISTER VINCENT MERITON

Mersi Mr Speaker.  Bonzour Mr Speaker e tou Manm Lasanble Nasyonal e tou bann dimoun ki pe ekoute.  Mr Speaker, en sosyete i ganny zize par lafason i tret son dimoun aze.  Si ozordi nou’n ariv kot nou ete, se gras a travay dir e tre dir bann dimoun ki’n vin avan nou.  Zot merit tou sa sipor e sa swen e soutyen ki nou kapab afford pou donn zot.  E dan sa konteks, mon ti a kontan swet labyenveni tou bann dimoun trwazyenm az sorti Mont Fleuri.  Se dan menm konteks ki Gouvernman i annan li enn bann sistenm proteksyon sosyal pli konpreansiv dan lemonn.  Sa in ganny determinen 2 semenn pase ler mon ti fer en prezantasyon dan en forum sosyal pou bann Minis Devlopman Sosyal ki ti fer Brasil.

Mr Speaker, kot i konsern kestyon poze par Onorab Lucas.  An se moman nou annan nou 618 dimoun anba Family Support.  Ladan i annan 355 a plen tan e 263 demi zournen.  Dimoun ki anba Family Support zot ganny en allowance, me pa en lapey, konpare avek bann dimoun ki travay koman carer.  Sa i akoz bann dimoun ki anba swen lafanmiy oubyen Family Support, zot deza en manm fanmiy, pe reste anba menm twa lo en baz 24er.  Par kont Mr Speaker, an Zanvye 2012, Gouvernman ti pran en desizyon pou pey bann manman ki pe okip zot zanfan avek dezabilite, en lapey carer akoz ki sa bann manman zot souvannfwa bezwen kit zot travay pou okip zot zanfan ki zot dezabilite i tre delika e zot bezwen la preski a plen tan.  Lasistans pou en dimoun anba Family Support i R2030 lo en baz a plen tan e R1400 pou en baz demi zournen.  Laplikasyon pou lasistans anba Family Support i fer lo sa dimoun ki bezwen ganny asiste.  Se li ki deside lekel ki i oule pou asiste li.  Anmenmtan, bann zofisye i fer en bartel test pou desid son degre lenkapasite.  Dan preski tou ka, sa dimoun ki’n fer laplikasyon i deza pe ganny en serten form benefis anba lazans.  Mersi Mr Speaker.

 

MR SPEAKER

Okenn siplemanter Onorab?

 

 

HON WILBY LUCAS

Mersi Mr Speaker.  Minis, baze lo ou larepons, eski ou Minister pe mentenir sa polisi kot en manm fanmiy ki pe reste anba menm twa pa pou zanmen kalifye pou ganny anploye koman en carer?

 

MR SPEAKER

Request Minis.

 

MINISTER VINCENT MERITON

Mersi Mr Speaker.  Mr Speaker, sa dimoun ki pe deza anrezistre anba Family Support ti deza la kot lakour avanler sa desizyon ti ganny pran.  Ki nou, nou’n fer, nou’n donn li en allowance R2030 lo en baz a plen tan e parey mon’n dir, R1400 lo en baz demi zournen.  Mersi Mr Speaker.

 

MR SPEAKER

Onorab Pierre.  Request Onorab.

 

HON DAVID PIERRE

Mersi Mr Speaker.  Bonzour Minis, bonzour tou Manm Onorab, bonzour bann dimoun aze from Mont Fleuri e bonzour tou bann ki a lekout.  Mr Speaker, mon ti a kontan demann Minis en kestyon.  Minis, an vi ki bann dimoun ki pe travay anba Family Support zot pe fer fas avek menm kondisyon lavi ki tou lezot dimoun, zot al dan menm laboutik e lefe ki zot pe donn sa sipor zot bann dimoun aze, sa i fors zot reste dan lakour e pa al rod en lot travay, akoz alors ki Minis pa vwar li neseser pou fer sir ki sa bann dimoun osi i ganny menm kalite kondisyon ki bann lezot carer i gannyen?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, mon a reiter pozisyon ki Gouvernman in pran, se ki sa bann dimoun, zot ti deza la pe aport en swen dan lafanmiy pou sa dimoun ki an bezwen.  Ki nou’n formalize se ki i donn sa dimoun en allowance, parey mon’n dir, me si sa dimoun i santi ki i annan serten difikilte, i kapab fer laplikasyon kot Lazans Proteksyon Sosyal.  Mersi Mr Speaker.

 

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker.  Bonzour Minis, bonzour tou dimoun, bonzour bann trwazyenm-az sorti Mont Fleuri e tou dimoun ki a lekout.  Minis, etan donnen ki i annan gran demann dan distrik pou ki sa bann dimoun ki ofer sa servis ki Family Support i ganny sipor ekstra atraver sa allowance, mon pe demann Minis si i pa kapab konsider revwar sa polisi a lavenir, etan donnen ki kou lavi pe ogmante e i annan en kantite presyon finansyel lo sa bann fanmiy?  Mersi.

 

MINISTER VINCENT MERITON

Mersi Mr Speaker.  Mr Speaker, nou dan en sitiasyon dinamik kot keksoz i evolye e sanze.  E mon satisfe ki bann demann dan distrik I pe ganny adrese dan en fason pli efikas posib pou asire ki bann dimoun ki bezwen sipor, ki bezwen led, ki bezen lasistans i ganny lasistans e kot i annan labi, nou elimin labi e kot bann dimoun i kapab travay a plen tan me selman, o fir e anmezir ki Lazans i fer son travay, sa i kapab osi ganny konsidere, o fir e anmezir ki bann devlopman i pran plas.  Mersi Mr Speaker.

 

MR SPEAKER

Kestyon nimero 20, Onorab Lucas.

 

 

HON WILBY LUCAS

Mersi Mr Speaker.  Kestyon pou demann Minis, si son Minister i annan plan pou re-entrodwir supervisors pou bann Home Carer? Mersi.

 

MINISTER VINCENT MERITON

Mersi Mr Speaker.  Lazans pou Proteksyon Sosyal napa plan pou remet supervisor dan bann distrik.  Lazans pe plito met bann Monitoring Officers ki pour travay a plen tan.  Laplipar zot, zot annan en background medikal.  Enn sa bann zofisye pou baze dan sak rezyon.  Zot pou ganny asiste par en Zofisye Welfare ki baze dan sak distrik.  I annan zour ki Zofisye Welfare pou asiste dimoun ki vin fer laplikasyon e lezot zour lo teren.  Bann Monitoring Officers zot pou travay tre pros avek bann zofisye dan distrik.  Ners, Travayer Sosyal, Zofisye Welfare e Lotorite Distrik pou fer sir ki bann carer i donn en bon servis e kot i annan labi, aksyon imedya i ganny pran.  Mersi Mr Speaker.

 

MR SPEAKER

Onorab Arnephy.  Wi, Onorab Lucas, ou ti annan en siplemanter?

HON WILBY LUCAS

Mersi Mr Speaker.  Minis, baze lo sa nouvo devlopman ki ou’n enform sa Lasanble, eski ou kapab enform sa Lasanble kan sa progranm pe ganny demare?  Mersi.

 

MINISTER VINCENT MERITON

Mersi Mr Speaker.  Mr Speaker, deza i annan serten, lo nivo pilot, nou’n komanse, be nou pe fini recruit tou bann zofisye pou nou kapab komanse tre byento e nou kapab donn plis piblisite lo la ler nou komanse a plen tan.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Bonzour tou dimoun.  Mr Speaker, eski Minis i kapab enform sa Lasanble ki mezir son departman i pran avek bann carers ki pa onor zot lobligasyon e negliz sa ki anba zot swen e si son Minister i annan rikord lo kantite sa bann carers ki pa pe onor zot lobligasyon e responsabilite?  Mersi.

 

MINISTER VINCENT MERITON

Mersi Mr Speaker.  Mr Speaker, ler nou ganny serten konplent e konplent nou gannyen, konsernan dimoun ki pe ganny abize, mon pe dir bann trwazyenm az oubyen bann resipyan lasistans home care, oubyen bann dimoun ki pa pe vin travay, oubyen bann dimoun ki pe al travay a letranze, ki pa pe desarz zot responsabilite, nou fer nurse avek Travayer Sosyal oubyen lezot partener dan distrik ki al fer investigation, e nou pran aksyon imedya parey mon’n dir.  Deza la nou’n tir 40 dimoun kot ti annan ka labi e kot i neseser nou pe ranplas li par lezot dimoun.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab donn sa Lasanble, si i annan avek li, detay en pe pli presi e en pti gin lo scheme of service sa bann Monitoring Officers ki Minis in koz lo la?  Mersi.

 

 

 

MINISTER VINCENT MERITON

Mersi Mr Speaker.  Sa bann Monitoring Officers I pe ganny anploye Onorab, pou kapab ranforsi sa travay ki nou pe fer dan pei, pou nou kapab kontrol depans fiskal ki Gouvernman in pran en langazman lo la e ki Lasanble lannen pase dan Bidze in siporte e zot ti koz fortman lo la.  Bann Monitoring Officers pou asire ki sa bann servis ki bann carer i donn bann resipyan i a la oter e i pran plas.  Mon napa detay spesifik lo bann schemes of service be nou kapab, mon a demann Lazans ASP pou fourni sa bann lenformasyon, me selman, reste asire ki tou zefor pe ganny fer pou asire ki nou donn en bon servis bann dimoun ki dan bezwen dan distrik, anba progranm Home Care. Mersi Mr Speaker.

 

MR SPEAKER

Kestyon 21, Onorab Wilby Lucas.

 

HON WILBY LUCAS

Mersi Mr Speaker.  Kestyon pou demann Minis, ki plan son Minister pou enplimant nouvo proze de lwa Lazans Proteksyon Sosyal 2011?  Mersi.

MINISTER VINCENT MERITON

Mersi Mr Speaker.  Mr Speaker, si mon la bomaten pou reponn sa bann kestyon, se sirman en temwannyaz ki lalwa Lazans Proteksyon Sosyal pe marse e i pe mars byen.

I ti vin an fors le 22 Desanm 2011, apre ki i ti ganny diskite isi dan Lasanble e sinnyen par Prezidan.  I fer provizyon pou donn lasistans Welfare ki oparavan ti tonm anba Lazans Byennet Sosyal.  Board anba lalwa i reviz bann benefis tou le 3 mwan.  E dernyen fwa ki i ti fer li ti an Avril.  Enn bann nouvo eleman sa lalwa se Review Panel ki ti ganny apwente an Avril sa lannen.  Review Panel i zwenn regilyerman en fwa par semenn.  An tou, 24 ka in ganny met devan li pou li ganny konsidere.  Vwala Mr Speaker an gro ki mon annan pou sa kestyon.  Mersi Mr Speaker.

 

MR SPEAKER

Okenn siplemanter, Onorab?

 

HON WILBY LUCAS

Mersi Mr Speaker.  Minis, baze lo sa premye regilasyon ki an Avril ti vin an viger, ti annan allowance pou adilt dan utilities, transpor avek housing.  Eski ou kapab enform sa Lasanble, ki bann kriter ki board in gete pou zot kapab konsider sa bann rates dan sa regilasyon?  Mersi.

 

MINISTER VINCENT MERITON

Mersi Mr Speaker.  Mr Speaker, dapre revizyon ki ti fer an Avril, bann rates i swivan:-

Siplemanter pou adilt R1903, utilities R444, transpor R250 avek loan R500.

Mr Speaker, bann kriter ki servi pou etablir sa bann rates i konm swivan:-

Adult supplementation.  Sa i ganny kalkile baze lo en ladyet balanse, fourni par Minister Lasante e pri komodite neseser pou kapab annan sa ladyet balanse, fourni par biro statistik.  En larzan siplemanter i ganny konsidere pou lezot item, par egzanp savon, dantifris eksetera.

Utilities. Inisyalman, kalkilasyon ti fer lo konsonmasyon mwayen elektrisite dapre statistik ki ti anmase dan 24 mil lakour.  okenn logmantasyon i baze lo logmantasyon dan pri ki PUC i etablir.

Transpor.  Sa i ganny kalkile baze lo en dimoun ki fer 2 voyaz par zour, 25 zour par mwan.  Vwala Mr Speaker, mersi.

MR SPEAKER

Onorab Jeannevol.

HON BEGITTA JEANNEVOL

Mersi Mr Speaker, bonzour.  Bonzour tou dimoun ki a lekout.  Mr Speaker, eski Minis i kapab eksplik ek sa Lasanble ki arive ek en dimoun ki refize pou fer travay kominoter pou ganny lasistans sosyal, an vi ki i pa travay?  Mersi.

 

MINISTER VINCENT MERITON

Mr Speaker, Lazans pou Proteksyon Sosyal pe diskit serten mezir ki nou pou met an aplikasyon pou asire ki bann dimoun ki bezwen lasistans i ganny lasistans, me antretan ki i ganny en travay, i annan serten pti travay ki i kapab fer dan kominote.  Sa i ganny diskite avek bann dimoun ler zot fer laplikasyon e once nou’n tonm dakor, zour ki sa benefis in aprouve, i annan serten kondisyon ki par egzanp, enn ki ou’n sitie se ki i annan serten travay ki fer dan kominote.  Me si sa dimoun i refize, dapre bann form ki nou’n mete avek lekel sa dimoun pou atase, then allowance pou ganny discontinued. Mersi Mr Speaker.  Ekskiz mwan.  Nou pa pe kit okenn sans pou bann dimoun ki vin sey zot sans.  Ki nou pe fer, ed dimoun ki dan bezwen antretan, ansanm avek Minister Lanplwa, nou pe ed bann dimoun ganny plase dan lanplwa, me antretan i annan serten laranzman tanporer ki nou pe fer e nou pe demann korperasyon tou bann dimoun pou zot osi konpran nou parey nou pe konpran zot.  Mersi Mr Speaker.

 

MR SPEAKER

Bon, an vi bon progre ki nou pe fer lo letan, mon pou egzers en pe diskresyon lo supplementary I reste la baz 3 parey mon ti’n enform zot dan en sirkiler me mon pou egzers mon – ou osi Minis, pa trakase, enpe mon diskresyon pou permet parfwa, en katriyenm Supplementary. Onorab Pierre.

 

HON DAVID PIERRE

Mersi Mr Speaker.  Mr Speaker, an vi ki i annan bokou konplent par manm piblik ki zot monte desann dan Ladministrasyon Distrik avan ki zot bezwen ganny lasistans, eski Minis i kapab dir avek sa Lasanble ki zot fer pou sansibiliz sa Seselwa lo kwa vreman ki i bezwen annan e anmenn dan Ladministrasyon Distrik pou garanti ki ler i fer son laplikasyon pou la premyer fwa, son laplikasyon i konplet e ki an retour i resevwar sa lasistans dan en fason aler?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, 3 semenn pase, Ms Pierre limenm ti mont lo televizyon ti eksplike.  I annan en nouvo PR ki kot Lazans Proteksyon Sosyal, i pe travay lo bann kanpanny sansibilizasyon pou edik dimoun lo ki kalite lenformasyon zot bezwen vin avek, pou ki zot laplikasyon i ganny deal avek vitman.  An plis ki sa, i annan bann feye ki nou kit kot Biro Ladministrasyon Distrik pou ki bann dimoun ki vin fer laplikasyon i kapab vwar e kapab konnen ki bann dokiman ki i bezwen soumet pou fer en laplikasyon e pou ki i mars vit.  So, vwala bann mezir ki nou pe pran pou kapab sansibiliz dimoun lo bann prosedir anba Lazans Proteksyon Sosyal kot i konsern sipor.  Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Minis, bonzour tou dimoun, espesyalman bann trwazyenm az.  Mr Speaker, eski Minis i kapab eksplik nou Lasanble, anba sa lalwa, ki zefor konkret, mon repete, ki zefor konkret ki son Minister pe fer pou kapab met bann ki kapab travay e ki pe demann Welfare dan en lanplwa permanant e redwir depandans lo Welfare.  Si ou kapab menm donn nou konbyen ka konmsi zot in met dan lanplwa permanan?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, malgre tou lanvi ki mon annan pou mwan kapab donn Onorab De Commarmond tou bann detay, me nou ankor dan staz diskisyon avek Minister Lanplwa lo ki bann mezir e mezir i annan ki nou pou fer, ki nou pe komans kalkile fer pou kapab vreman tir dimoun lo Welfare e met zot dan travay, parey Minister Alexander ti vin isi pou dir, me selman donn nou en pti gin letan ankor, nou tourn isi pou donn tou bann detay.  Nou annan tout en progranm, en gam, en valiz keksoz ki nou kapab met devan pou tir dimoun lo Welfare pou anmenn dan travay.  Onorab, reste asire ki nou pe travay lo la, nou oule kapab vin brief zot apre an detay lo ki sa ki nou pe fer.  Mersi Mr Speaker.

 

MR SPEAKER

Onorab Vel.

 

HON JENIFFER VEL

Mersi Mr Speaker.  Bonzour Minis, bonzour tou dimoun prezan e tou dimoun ki a lekout.  Mr Speaker, mon ti a kontan demann Minis, anvi ki nou reprezantan lepep ki tre konekte avek nou bann zabitan, nou vwar ki sistenm aktyel i parfwa, olye ed nou pep i penalize zot.  Mon pe demann Minis si i annan en sistenm kot en common sense i ganny servi dan determinasyon sa lasistans ki nou dimoun i resevwar, par egzanp nou pe ankouraz nou dimoun pou sorti lo Welfare pou al dan Workfare, me i annan sa group dimoun ki pe travay me ler i fer laplikasyon, i pa pe successful. Par egzanp, en legzanp Minis kot en dimoun ki pe travay home carer, pe ganny R3000 e lo son pay slip i vwar i pe tir R2600 pou en lakaz Perseverance e i pe ganny dir i pa kalifye pou ganny lasistans sosyal?  Mersi.

 

MINISTER VINCENT MERITON

Mersi Mr Speaker.  Mr Speaker, nou pa penaliz nou pep.  Board anba Lazans Proteksyon Sosyal i annan 3 fonksyon.  Enn ladan se determin metodolozi, kimannyer bann weights pou ganny fer.  Dezyenm i reviz bann weights.  E trwazyenm i desid bann prosedir pou fer sir ki Lazans i mars byen.  Dan determinasyon metodolozi pou bann weights, dan lalwa ki nou ti aprouve nou isi menm, reveni, i enkli bann reveni gross. Tou bann larzan ki antre e enn bann fakter ki nou’n mete nou kot i konsern weights, se loan.  I annan en sealing maximum R500 ki’n mete.  Ki ou kestyon pe vize, ki nou kapab permet sa pli ouver pou konsider lezot loan.  Be mazinen, si nou kontinnyelman fer sa, an vi ki nou, larzan ki ASP i gannyen, i gannyen par larzan tax, pli nou pou peye, pli ki pou vin en fardo lo sistenm tax.  E pli en dimoun ki pe resevwar, nou pou oule kree en depandans, si en dimoun ki pa anvi travay, me i pou oule depann lo leta.  Ki nou oule fer sepandan, annan en minimum ki nou kapab konsidere, me anmenmtan avek sa, bouz dimoun dan travay.  Ler mon a vini lot voyaz nou a ganny sans eksplik sa.  Me selman, nou pa la pou penalize dimoun.  Mon konpran poudir bann MNA i annan bon kontak e zot travay byen avek Ms Pierre pou fer sir ki otan ki posib nou deblok keksoz pou nou pa penalize nou dimoun, pou nou kapab ed zot.  Nou polisi Sesel i enn ki baze lo dimoun, zonm, fanm, zanfan, trwazyenm az i lo sant devlopman.  Nou pran ka avek dimoun depi konsepsyon ziska lanmor.  Me par kont, nou bezwen annan pou nou kapab donnen, pa i vre?  So, nou bezwen fer sir ki dan en kote, nou kapab kree larises pou nou kapab donn ki napa.  E i bezwen annan serten barenm ki mete.  Be barenm ozordi pa permet nou mont pli o akoz nou ava pe ouver en laport ki ava pe kre – ouver Pandora box ki nou pa pou kapab apre kontrole.  So, o fir e anmezir ki keksoz i amelyore, ki nou sitiasyon ekonomik i permet nou kapab re-aranz bann weights, se pou sa rezon si nou met li tou le 3 mwan, nou ava fer li.  Me selman otan ki posib, CEO i annan serten diskresyon kot i santi, dan bann ka eksepsyonnel, i bezwen fer one off payment i fer li.  Me selman, nou ganny gide par bann reglemantasyon ki zot ti diskit fortman e zot ti dir zot pa pou aprouv okenn bidze siplemanter.  Mon pa oule fer sa e zot osi zot pa oule fer sa.  Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.  Bonzour tou dimoun.  Eski Minis i kapab enform sa Lasanble si napa en mwayen pli fasil pou kapab donn lasistans bann dimoun ki’n swa sibir en gran loperasyon ouswa koup lipye, ki vin pli fasil pou sa bann dimoun ganny zot lasistans, pou evite ki zot monte desann, avan ki zot kapab ganny asiste.  Mersi.

 

MINISTER VINCENT MERITON

Mersi Mr Speaker.  Mr Speaker dan nou travay, nou pe kontinnyelman gete kimannyer pou trouv meyer fason pou nou kapab administre bann benefis anba lalwa, e nou pe travay avek bann lezot lazans pou kapab gete kimannyer nou fasilit sa.  Nou ava pran sa konsiderasyon.  Mersi Mr Speaker.

 

MR SPEAKER

Kestyon 22, Onorab Volcere.

 

HON MARC VOLCERE

Mersi Mr Speaker.  Bonzour Minis, bonzour tou Manm, tou dimoun ki alekout.  Mr Speaker, eski Minis i kapab dir avek sa Lasanble ki pe arive avek proze pou re-devlop ansyen sit YRTC, Amitie?  Mersi.

 

MINISTER VINCENT MERITON

Mersi Mr Speaker.  Mr Speaker, Gouvernman ti’n aprouve pou servi sa fasilite koman dortwar avek restoran pou konpleks sportif L’Amitie.  An vi ki in annan nouvo devlopman konsernan dortwar, NSC ansanm avek son partener Federasyon Foutbol, zot nepli bezwen sa fasilite.  Sa propriyete alor in ganny transfer avek MLUH. Gouvernman i ava konsilte avek Lotorite Distrik avan servi sa fasilite pou okenn lezot keksoz.  Mersi Mr Speaker.

MR SPEAKER

Onorab Volcere.

HON MARC VOLCERE

Mersi Mr Speaker.  Mr Speaker mon ti a kontan demann Minis, an vi ki in dir nou sa in ganny re-transfer avek MLUH, mon prezimen ki se MLUH i responsab pou met en pe lapropte kot sa landrwa, mon ti a kontan demande e osi pou laspe sekirite ki i annan, i annan en housing estate obor, ki sa landrwa i ganny servi, I ganny servi byen, i pa kree lenkonvenyans pou sa bann dimoun…

 

(Interruption)

 

MR SPEAKER

Kestyon Onorab.

 

MINISTER VINCENT MERITON

Mersi Mr Speaker, mon’n konpran ou kestyon Onorab, mon ava transmet sa avek MLUH pou fer le neseser.  Mersi.

 

MR SPEAKER

Onorab Vangadasamy.

HON SHERYL VANGADASAMY

Mersi Mr Speaker.  Mr Speaker, eski Minis i kapab enform sa Lasanble, an prenan kont ki YRTC in fermen lo Praslin, ki nouvo proze son Minister i annan pou en lot sant YRTC? Mersi.

 

MR SPEAKER

Out of order. Kestyon siplemanter si pou ranforsi kesyton orizinal.  Sa en nouvo kestyon altogether.  Yes Onorab Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble, eski in annan demann par zabitan L’Amitie pou annan redevlopman spesifik, sirtou pou lazenes dan sa sou distrik, an relasyon avek sa sit YRTC? Si wi, eski Minis i kapab dir nou kwa ekzakteman?  Mersi.

 

MINISTER VINCENT MERITON

Mersi Mr Speaker.  Mr Speaker, mon napa lenformasyon spesifik, me sirman bann demann ki Lotorite distrik i ava fer avek Gouvernman i ava ganny pran an konsiderasyon, once diskisyon i pran plas lo sa size.  Mersi Mr Speaker.

MR SPEAKER

Kestyon 23, Onorab Volcere.

HON MARC VOLCERE

Mersi Mr Speaker.  Mr Speaker mon ti a kontan demann Minis si son Minister i annan okenn plan pou met en lot morso baraz avek fil ki bar Amitie Stadium?

 

MINISTER VINCENT MERITON

Mersi Mr Speaker.  Mr Speaker, nou ki’n deza al stad L’Amitie, nou vwar poudir lannen pase nou’n debrouye pou fer sir ki nou konplet premye 2 faz sa proze pou nou kapab abrit serten match Zwe De Zil e Pralinwa in fyer pou premye fwa lo later Sesel ki nou ti annan match organize dan ankadreman Zwe De Zil ki ti fer lo later Praslin.  Nou ti napa tou resours pou nou kapab konplet sa proze e en laspe se ki nou ti bar stadium avek chain link e pou anpes dimoun ki deor get anndan san peye, nou’n met en bout tol plat larzer en met toultour.  Me ki dimoun i fer, zot koule zot asiz anningning e get bann match, sirtou bann match peye.  E antretan ki nou antreprann en lot proze, en lot faz sa proze devlopman, mon’n demann NSC pou enplimant en proze bill board ki ava bar sa lespas vid e permet ki Federasyon i kapab ganny en pti larzan, ziska ler nou kapab antreprann trwazyenm faz sa proze.  Mersi Mr Speaker.

 

MR SPEAKER

Okenn siplemanter?

 

HON MARC VOLCERE

Mr Speaker, parey Minis in dir, sa i pe anmenn en pe pert pou foutbol premye divizyon, bann tim premye divizyon sirtou ki tiket i ganny vann.  Mon ti a kontan demann Minis si i kapab antre an negosiasyon avek Federasyon Foutbol pou fer ki nou ganny en rediksyon lo tiket ki nou aste pou nou kapab revann.  I ava ed en pti pe nou reveni ki nou kolekte.  Akoz petet pou eklersi Mr Speaker….

(Interruption)

 

MR SPEAKER

Point made. Minsister.

 

MINISTER VINCENT MERITON

Mr Speaker, mon demann ou pardon, si Onorab ti kapab repete akoz mon’n perdi en pti kou la.

 

MR SPEAKER

Demann kestyon presiz.

HON MARC VOLCERE

Mr Speaker mon ti a kontan demann Minis si i ti kapab negosye avek Federasyon Foutbol pou redwir sa fee ki nou bezwen peye ler nou aste tiket avek zot?  I en kar lo valer tiket.  Par egzanp en tiket i kout R25, nou pey Federasyon Foutbol R6.25.  Si i ti kapab waive sa pandan lenstans ki travay i ganny fer pou fini konplet sa baraz.

 

MR SPEAKER

Pou zot ganny plis larzan.

 

HON MARC VOLCERE

Yes.

 

MINISTER VINCENT MERITON

Ok Mr Speaker, mon a koz ek NSC pou diskit ek Federasyon.

 

MR SPEAKER

Yes, Onorab Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab dir nou konbyen trwazyenm faz sa proze i sipoze koute e ki bann difikilte finansyel ki zot pe rankontre an relasyon avek fini trwazyenm faz sa proze e si zot annan plan pou met provizyon dan Bidze ki pe vini, pou garanti ki trwazyenm faz sa proze i ganny konplete.  Mersi Mr Speaker.

MINISTER VINCENT MERITON

Mersi Mr Speaker.  Mr Speaker, si mon reponn ou sa kestyon, mon pou ganny problenm avek Onorab Volcere akoz lot kestyon i lo la.  Mersi Mr Speaker.

 

MR SPEAKER

Ok, kestyon 24, Onorab Volcere.

 

HON MARC VOLCERE

Mersi Mr Speaker.  Eski Minis i kapab dir avek sa Lasanble kan ki trwazyenm faz proze lo Amitie Stadium i ekspekte komanse?  Mersi.

 

MINISTER VINCENT MERITON

Mr Speaker, i enportan pou fer sorti ki premye 2 faz sa proze ki ti enkli bann konponan pli enportan, setadir en laplenn foutbol lo standar enternasyonal, 4 poto lalimyer pou lekleraz laplenn, osi byen ki en gran graden in fini konplete.  E deza a dispozisyon bann sportif lo Praslin.  E i enportan ki la ki mon lo sa size pou mwan mansyonnen ki premye 2 faz sa proze ki ti en priyorite in vin posib atraver kontribisyon e kolaborasyon tre pros ant Gouvernman, Federasyon Foutbol lokal e enternasyonal e lakonpannyen Vijay Construction. Parey i evidan, en lenvestisman konsiderab in ganny fer pou realiz premye 2 faz sa proze a en kou R13 milyon.

An se ki konsern trwazyenm e dernyen faz sa proze, sa pou enplik konblaz adisyonnel, en track pou lakours atletik, en miray permanan toultour stadium pou aret sa zafer get an deor e lezot lenfrastriktir koman car park ek drenaz.  Sa i dan plan mon Minister.  Parey nou tou nou konnen e sirtou dan sa peryod reform ekonomik ki pei pe pas atraver, i pa toultan posib pou Minister ganny lakantite larzan pou finans bann proze ki lo son plan.  Bidze i ganny distribye selon priyorite Gouvernman, apre ki tou in ganny evalye atraver sekter piblik.  Alors pou le moman i pa posib pou mwan angaz mon Minister lo en time frame ekzakt pou konplet trwazyenm faz sa proze.  Selman bann demann i ava ganny fer o fir e anmezir ki Gouvernman i kapab, then nou ava konsider trwazyenm faz proze.  Mersi Mr Speaker.

MR SPEAKER

Onorab Volcere.

HON MARC VOLCERE

Mersi Mr Speaker.  Mr Speaker mon ti a kontan demann Minis si avek sa lalis ki in dir nou i annan pou fer, eski tousala pou ganny fer dan sa trwazyenm faz, oubyen i pou ganny kase ankor par diferan faz.  E si i annan en lide konbyen an total tou sa bann faz pou kout Gouvernman?  Mersi.

 

MINISTER VINCENT MERITON

Mersi Mr Speaker.  Mr Speaker, tousala pou ganny fer dan trwazyenm faz proze.  Mon napa en kou deza determinen, me selman nou pe travay lo la pou kapab vin avek en keksoz pli konkret.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Bonzour Mr Speaker, Minis, tou Manm Onorab e tou dimoun ki a lekout.  Mr Speaker, anlinny avek devlopman ki Minis pe koz lo la lo stad Amitie Praslin, eski Minis i kapab dir si son Minister i annan plan osi pou devlop bann pti laplenn par egzanp lo Mae, par egzanp laplenn Rivyer Anglez?  Mersi.

 

MR SPEAKER

Onorab, ou pe vreman gaspiy nou letan.  Ok, time is of essence and I’m calling you to orderOk, Onorab De Commarmond.

 

HON CHARLES DE COMMARMOND

Mr Speaker, mersi.  Mr Speaker, eski Minis i kapab eksplik nou Lasanble ki letan ki trwazyenm faz sa proze pe ganny konsidere fer, lekel ki pe zer sa stad L’Amitie Praslin?  Mersi.

 

MINISTER VINCENT MERITON

Mersi Mr Speaker.  Mersi Onorab pour sa kestyon ki enportan.  I montre lo nesesite, pa zis fer bann gro proze, me osi annan en proze tre detaye an se ki konsern son amenazman e son mentenans.  NSC avek Federasyon Foutbol i travay an etrwat kolaborasyon pou asire ki sa proze i reste la ziska ler nou kapab ganny larzan pou mentenir trwazyenm faz e ki ganny servi byen e anpes bann aksyon negativ ki kapab afekte.  Mersi Mr Speaker.

 

MR SPEAKER

Onorab Marie, kestyon 25.

 

HON MURIEL MARIE

Mersi Mr Speaker.  Mr Speaker, Minis, Manm Onorab, manm trwazyenm az Mont Fleuri e tou dimoun ki a lekout, bonzour.  Mr Speaker, eski Minis i kapab enform zabitan Au Cap si son Minister i annan plan pou enstal lalimyer e osi en changing room lo nou nouvo laplenn pou benefis nou bann zenn?  Mersi.

 

MINISTER VINCENT MERITON

Mersi Mr Speaker.  Mr Speaker wi, Departman Spor i annan plan pour enstal lalimyer lo laplenn Au Cap.  Annefe, lalimyer ti lo plan pou ganny enstale anmenmtan ki laplenn ti fini an 2011.  Lentansyon sete pou rann sa laplenn tel ekel, parey nou ti pran li ler sa landrwa ti ganny pran pou fer lekol.  Sa i pa’n posib an vi ki nou ti konsantre depans lo renovasyon bann lenfrastriktir pou Zwe De Zil, lannen pase.  Pou menm rezon sa lannen osi, nou pa’n ganny en gran larzan dan Bidze pou sports.  Neamwen, nou’n fer en demann kot Finans e nou’n ganny demande pou rod kotasyon.  Nou pe fer nou mye pou ki sa bann lalimyer i ganny enstale sa lannen menm.  Mersi Mr Speaker.

 

MR SPEAKER

Onorab Marie.

 

HON MURIEL MARIE

Mersi Mr Speaker.  Mr Speaker baze lo larepons Minister, mon ti a kontan demann li pou enform zabitan Au Cap kan eski sa fasilite pou ganny enstale e osi si avek sa lalimyer pou annan en mekanizm ouswa en meter ki pou kapab ed nou partaz fre bill elektrisite?  Mersi.

 

MINISTER VINCENT MERITON

Mersi Mr Speaker.  Mr Speaker nou pe debrouye menm avek Finans pou gete kan nou kapab ganny en pti larzan pou kapab enplimant sa proze e mon mazinen nou kapab rod bann metod modern, i annan ki servi kart, i annan ki servi kontrol direk, lock dan bann bwat feray.  Me nou ava gete once nou ganny en pti larzan avek Finans pou enplimant sa proze.

E Mr Speaker pardon, mon ti’n bliye.  Kot i konsern konstriksyon en changing room kot laplenn, sa i pa lo plan.  Mon krwar i en proze ki lotorite distrik i kapab konsidere pou enplimante anba alokasyon son pti proze.  Mersi Mr Speaker.

 

MR SPEAKER

Onorab Fideria.  Request.

 

HON EMMANUEL FIDERIA

Mr Speaker, mersi.  Minis in reponn kestyon changing room.  Mersi.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker eski Minis i kapab enform sa Lasanble konbyen sa pti proze enstal lalimyer i sipoze koute e dir avek sa Lasanble, eski son Minister i konsider rod finansman alternativ pou bann tel proze, olye pirman fye lo finansman sorti direk dan Bidze Gouvernman.  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, nou’n enstimen ki sa travay i pou kout nou mwens ki R1 milyon, me selman an zeneral kot sport i konsernen, nou pe travay an etrwat kolaborasyon avek dimoun dan sekter prive pou kapab konplemant sa pti larzan ki nou mete dan sports akoz lenvestisman dan sports i en keksoz ki pa zis responsabilite Gouvernman, me pei an zeneral e son retonbe i en retonbe pozitiv, ekonomik, sosyal e osi lwazir.  So, nou pe kontinnyelman travay, me la nou’n demann ek Minister finans, mon krwar ki nou kapab ganny en keksoz.  Mersi Mr Speaker.

 

MR SPEAKER

Onorab Marie, kestyon 26.

 

HON MURIEL MARIE

Mersi Mr Speaker.  Mr Speaker, eski Minis i kapab enform sa Lasanble si son Minister i annan plan pou revwar alokasyon lasistans finansyel pou bann tim foutbol ki anrezistre anba distrik?  Mersi.

 

MINISTER VINCENT MERITON

Mersi Mr Speaker.  Mr Speaker, Departman Devlopman Kominoter i ganny li R2 milyon par an pou donn lasistans bann tim e klib sport ki anrezistre anba distrik.  Sa sonm R2 milyon i kouver en varyete sport, pa zis foutbol akoz bi mon Minister se pou ankouraz bann distrik devlop en pli gran varyete sport ki posib pour kontribye pou fer bann zenn depans zot lenerzi dan en bon fason e tir zot dan bann lenfliyans negativ.  Repartisyon sa R2 milyon pou sa lannen i konm swivan:-

En son R523,500 pou ganny depanse dan transportasyon.

R879 mil dan alokasyon larzan pou bann tim.

R100 mil koman lasistans pou bann tim ki voyaz a letranze,

R181, 855 pou pey lasirans pou bann zwer, i annan antou 1829 zwer.

E R50 mil pou pey lanrezistreman.

Si ou adisyonn tou sa bann sif

ansanm, i fer en total R1,734,355.  Sa R265,645 ki reste i pou ganny servi pou fer fas avek lezot keksoz ki arive ki nou pa ti’n planifye.  Pou sa lannen, nou’n osi ganny R200 mil pou fer bann aktivite spor otour progranm renesans sosyal.

Konsernan foutbol Mr Speaker, sak tim premye divizyon i ganny li R13 mil par an e lezot divizyon R8 mil sakenn.  I annan 33 tim foutbol ki’n anrezistre anba distrik.  Sa larzan i pou bezwen bann tim.  I pa enkli transpor, i pa enkli lasirans e fre lanrezistreman ki ganny peye separeman.

Parey nou a remarke, sa larzan par tim par an, pa ase.  Se pou sa rezon ki nou ankouraz bann tim distrik pou fer aktivite fund raising e rod sponsor.

Mr Speaker, avek sa bann sif ki mon’n donnen, nou napa en gran bataz pou ogmant kontribisyon ki nou donn bann tim foutbol across the board sa lannen.  Me si i annan en demann spesifik pou en pti larzan, nou kapab konsidere, me tou pou osi depann lo lezot demann fer par lezot tim anrezistre anba distrik.  Mersi Mr Speaker.

 

MR SPEAKER

Onorab Marie.

 

HON MURIEL MARIE

Mersi Mr Speaker.  Minister, lefe ki konstrent finansyel pe afekte bokou lekip foutbol e menm pe fors serten fermen, eski Minis i kapab enform sa Lasanble ki plan son Minister pou ede promot devlopman spor, sirtou foutbol parmi bann zenn lo nivo distrik?  Mersi.

 

 

 

MINISTER VINCENT MERITON

Mersi Mr Speaker.  Mr Speaker, i annan en seri linisyativ ki pe ganny devlope par diferan lazans pou kapab devlop plis lekip spor lo nivo distrik.  Kot i konsern foutbol, i annan sa progranm grass root ki Federasyon Foutbol pe enplimante, Onorab ou konnen, anmenmtan NSC pe travay avek son seksyon “Spor Pou Tou” pou anmenn dan kominote, pou kapab tous pa zis foutbol, me osi bann lezot disiplin e osi fer spor vin en fason viv dan kominote, permet ki dimoun i kapab viv an bonn sante e an plis ki sa, nou fek sinny en Memorandum Of Understanding avek Minister Ledikasyon pou nou kapab priyoritiz serten sport, kapab rod plis resours e donn plis latansyon devlopman serten sport ki nou santi i kapab fer en lefe e mon krwar foutbol e lezot spor kolektiv i form parti sa.  So vwala Mr Speaker bann progranm ki annan an mars pou kapab fer sir ki nou devlop plis lekip foutbol e lezot spor dan kominote.  Mersi Mr Speaker.

 

MR SPEAKER

Onorab Aglae.

 

HON ROMA AGLAE

Mr Speaker mersi, Minis in fini reponn mon kestyon.

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker eski Minis i kapab eksplik nou Lasanble si i kapab konsider sa larzan fre lanrezistreman pas ansanm ek sa kontribisyon ki zot pe deza donn distrik, akoz i pa toultan ganny servi pou sa purpose e en tim ki’n anrezistre anba distrik i perdi in the process?  Mon swete ou pe ganny mwan byen lo sa kestyon.  Ou azout li akoz i annan de tim i pa benefisye e i pa gannyen.  Alor, si ou ti azout li enn.  E anmenmtan eski …….

(Interruption)

 

MR SPEAKER

Onorab, zis en siplemanter.

 

HON CHARLES DE COMMARMOND

Anlinny ek sa, e anmenmtan, eski tou sa 33 tim ki anba distrik i deside, pou sa bann rezon finansyel fermen, ki ou Minister pe panse fer then?  Mersi.

MINISTER VINCENT MERITON

Mersi Mr Speaker.  Mr Speaker mon pou demann Departman Devlopman Kominoter fer en letid serye lo sa size ki ou’n leve la, mon pa ti okouran.  Lenformasyon ki mwan, mon annan se ki sa larzan fre lanrezistreman i servi pou anrezistre bann lekip, nou ava vwar, epi nou ava gete, nou ava diskit avek lotorite distrik e mon krwar i annan en zafer dan lozik i apel Cinonism.  Mon pa krwar nou pou les 33 tim fermen, me selman si zanmen 33 tim ti pou fermen, nou a partaz sa larzan avek bann lezot tim ki la pou fer sir ki nou balanse.  Me selman foutbol pa pou fermen Sesel, mazinen nou ti ganny lor dan Zwe De Zil e mon krwar nou kapab ride lo sa reforia pou nou kapab devlop li plis.  Se pou sa rezon nou pe fer tou sa bann progranm pou fer sir ki nou anmenn plis spor dan kominote.

Taler en dimoun in oule fer en laplenn kot lekol Larivyer Anglez, Mr Speaker in rule out, me i toultan dan nou polisi, otan ki posib kot i annan resours, pou nou kapab met bann fasilite a dispozisyon bann zenn e parler mon bezwen lager avek lezot lazans akoz zot oule pran en laplenn, zot dir tro bokou laplenn.  I pa zanmen ase laplenn pou zenn kapab servi.  So, i en langazman ki nou pe lager pou kapab gete kimannyer nou servi bann pti larzan ki nou gannyen pli byen.  Mersi Mr Speaker.

 

MR SPEAKER

Koman sa term Minis, Cinonism?  En term kreol ouswa ………  Ki son term, Cinonism?  Ok, kreol i anrisir toulezour.  Onorab Pierre.

 

HON DAVID PIERRE

Mersi Mr Speaker.  Mr Speaker, an vi ki kou lavi in monte e pri materyel e servis i monte tel ki parey kou transport.  Eski Minis i kapab dir ek sa Lasanble si son Minister i annan plan a lavenir pou konsider servi en nouvo formil pou donn allowance bann lekip, kot zot kapab aziste an proporsyon, o fir e anmezir ki bann sanzman dan kou bann servis e bann pri materyel i efektye?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, la mon pa pou al refer lo letid Liniversite, me pou mwan kapab ogmante, mon bezwen ganny plis.  Zour mon ganny sa 2 milyon, sa formil ki mon annan Onorab, tay kot ou oule, i pou reste parey sa pti larzan ki mon partaze.  Me selman, zour mon sak i pli plen la, la mon kapab aranze, mon kapab donn plis dan distrik e ki nou kapab fer sir dimoun i ganny plis.  Me formil i la li, formil i la, sak disiplin i annan son pti sonm, sak divizyon i gannny son pti sonm, i annan en pe ki garde pou lanrezistreman, pou lasirans, pour transportasyon.  Formil i normal li, prezan sa ki nou antre ladan ki bezwen sanze e sa i tou depan lo performans ekonomik pei.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker eski Minis, son Minister i annan plan pou konsider e pe bann distrik ki en pe pli lwen ek lavil, vi ki tou bann match foutbol i zwe anvil e rebalans sa allowance transpor ki zot donn bann distrik lakanpanny en pe plis silvouple?  Mersi.

 

 

MINISTER VINCENT MERITON

Mr Speaker, se pou sa rezon ki nou’n met transportasyon separe pou kapab gete kimannyer nou kapab aroz bann distrik ki pli lwen, en pti pe pli byen ki bann distrik ki anvil.  Me selman, mon ava demann Departman Devlopman Kominoter, met nou azour avek formil ki servi an detay, pou ki nou kapab pli okouran.  Mersi Mr Speaker.

 

MR SPEAKER

Kestyon 27, Onorab Marie.

 

HON MURIEL MARIE

Mersi Mr Speaker.  An vi ki lanrezistreman nouvo zanfan ki ganny aksepte dan Lenstitisyon Pos Segonder i ganny fer tar e sa bann zanfan i rankontre problenm finansyel pou aste zot uniform ek stationaries pou komans lekol, eski Minis i kapab enform sa Lasanble si son Minister i annan plan a lavenir pou donn sa bann zanfan zot premye allowance lekol ler zot anrezistre pou fasilt zot bann depans?  Mersi.

 

MINISTER VINCENT MERITON

Mersi Mr Speaker.  Mr Speaker, demars pou bann etidyan ganny peye allowance i komans osito ki bann lalis bann ki’n ganny aksepte dan bann kour Pos Segonder i ariv kot biro Lazans.  Bann etidyan STA zot, zot en ka separe, zot ganny peye R1000 pou aste zot liniform ek lekipman ki kout tre ser, ki zot bezwen pou komans zot kour.

Swivan ou kestyon Onorab, mon’n demann Lazans Proteksyon Sosyal pou diskit avek Minister Ledikasyon lo posibilite en laranzman pou koud liniform e peye plitar.  Mon’n osi demann Konsey Nasyonal Lazenes avek Departman Lanplwa pou ranforsi progranm holiday job pou bann manrmay S4 avek S5, pou ki zot kapab anmas zot pti larzan pou kapab lans zot dan letid Pos Segonder.  Sa i ava devlop en kiltir travay dir, savings pou zot kapab reponn zot bezwen.  Mersi Mr Speaker.

 

MR SPEAKER

Onorab Marie.

 

HON MURIEL MARIE

Mersi Mr Speaker.  Baze lo larepons Minis, an vi ki selman lekol STA ki an se moman pe ganny zot allowance davans, eski Minis i kapab enform sa Lasanble si son Minister i annan plan pou aplik menm prosedir avek lezot lekol Pos Segonder?  Mersi.

 

MINISTER VINCENT MERITON

Mr Speaker parey mon’n dir, depans STA i bokou plis ki depans ki bann lezot etidyan bann lenstitisyon edikasyonnel Pos Segonder i fer.  Se pou sa rezon, kot i konsern liniform, parey ou’n demande Onorab dan kestyon, mon’n demann Minister Ledikasyon pou komans en diskisyon, serten laranzman, get lo posibilite kimannyer nou kapab fasilit sa.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, etan donnen ki depans i relativ e tou depans i depans ler zanfan Pos Segonder pe komans lekol, eski Minis i kapab rekonsider sa laranzman ki enn fwa, Gouvernman in deza annan, kot ler en zanfan pe anrezistre a S5 pou li al lekol Pos Segonder, i deza met son ka devan pou ki enn fwa i komanse e avan i komanse, i deza ganny konsidere pou sa allowance e sa i fer ki avanler menm i antre dan lekol, in deza ganny sa allowance e mon okouran ki en lannen Gouvernman ti konsider sa.  Mersi.

 

(Interruption)

MR SPEAKER

Onorab, kestyon.

 

MINISTER VINCENT MERITON

Mersi Mr Speaker.  Mr Speaker, mon vwar zot pe ensiste, mon ava remet sa avek Lazans Proteksyon Sosyal pou diskit avek bann lezot partener e apre nou ava gete ki sa ki nou kapab fer.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, an vi ki in annan konplent ki in annan en rediksyon dan allowance bann etidyan, eski Minis i kapab konfirmen si vreman in annan en rediksyon e si wi, eski Minis i kapab eksplik sa rasyonal par deryer sa rediksyon?  Mersi Mr Speaker.

 

 

MINISTER VINCENT MERITON

Mersi Mr Speaker.  Mr Speaker, ler nou pe koze la, mon pa okouran si i annan okenn rediksyon.  Mon’n get Sef Ekzekitiv i dir mwan non.  Mon pa konnen kot ou ganny lenformasyon.  Selman konplent ki mwan, mon’n resevwar ki sa pti larzan ki manrmay i gannyen, i annan let ki mwan mon’n resevwar, CEO in gannyen, se ki sa larzan i ganny mal servi.  Swa pou abiz lalkol oubyen lot keksoz.  So, mon napa sa tel lenformasyon e i pa korek pou dir i annan en rediksyon.  Be bann konplent ki mon’n gannyen, nou pe fer investigation akoz nou santi sa larzan i la pou en bonn koz, ki bann Onorab pe lager pou nou kapab fer sir ki manrmay i ganny asiste pou zot komans lekol e i devret ganny servi dan prosesis aprofondi konnesans an aprann pli byen e aste bann zouti, liniform eksetera, me pa pou ganny servi otreman.  So sa bann konplent pe ganny investigate pou nou kapab pran desizyon.  Mersi Mr Speaker.

 

MR SPEAKER

Ok.  Bon, nou’n ariv alafen Question Time.  Ankor enn fwa mon pou demann bann Manm pour reget zot Standing Order, purpose of a questionOk, i enportan ki kestyon pa ganny servi koman en baz pou fer statement, pou argimante, pour rod lopinyon Minis.  I annan tout bann lareg ki kouver sa.  Kestyon i la, se pou press the Minister for action ouswa pou rod lenformasyon lo son Minister.

Ek sa nou’n ariv lafen Question Time, me nou pou demann Minis pou li reste, akoz i annan en Statement lo Gender ki Minis ti a voudre fer.

 

MINISTER VINCENT MERITON

Mersi Mr Speaker.  Mr Speaker, mon ti a kontan komans mon deklarasyon avek en sitasyon, sorti dan rapor UNDP an 1995.  Sa sitasyon i dir:-

“Development, if not engendered, is endangered.  Only when the potential of all human being is fully realized can we talk of true human development”.

Dan son diskour an Me 2011 zour son linogirasyon, Prezidan James Michel ti dir: “Nou tou ki pe viv Sesel, nou bezwen redres nou sosyete.  Nou bezwen netwaye ansanm.  Sa renesans i demann lenplikasyon nou tou.  I responsabilite nou tou.  Dimoun aze, adilt, lazenes, zanfan.  I pa en konsern zis Gouvernman, i enplik tou lazans e lorganizasyon dan lasosyete.  Ki swa dan sekter piblik ou sekter prive, ki swa legliz e group relizye, lorganizasyon non Gouvernmantal e groupman lo nivo la kominote.  I konsern nou tou.  I nou devwar patriotik.  Nou tou nou dan menm bato e nou bezwen rekalibre nou konpa”.

Mr Speaker, sa deklarasyon Prezidan pe sitie nou lo sa kestyon gender e mon ti a kontan anonse ki Sesel in sinny tou bann trete enternasyonal lo drwa imen e enn sa trete enportan ki tous lo gender se Konvansyon pou elimin diskriminasyon kont madanm, oubyen CEDAW, The Convention Of The Elimination Of Discrimination Against Women. Sesel in prepar son premye rapor ki tous lo tou mezir e progre ki nou’n arive fer pou enplimant sa Konvansyon.  Lo nivo rezyonnal, nou’n osi ratifye protocol SADC lo gender and development.  Ankor, sa protokol i etablir 28 target ki tou pei manm i bezwen atenn ver lannen 2015.

Pandan plizyer lannen, nou Gouvernman in met an plas bann polisi e progranm ki permet nou akonplir egalite ant zonm ek fanm.  Me i annan ankor bokou pou fer pou akonplir tou bann target ki sa 2 Konvansyon pe demande.

Definisyon.  Avan mon al pli lwen, mon oule retourn en pti pa an aryer pou nou fer sir nou tou nou pe koz menm langaz.  Sa term “Gender” ki nou pe komans kreoliz li an servan “Zanr” i vedir bann diferan rol e responsabilite ki en kiltir e en sosyete i tipikman asosye avek zonm, fanm, fiy e garson e rol ki zot zwe dan lavi.  Nou pa pe koz zis lo fanm.  Nou pe koz lo toulede, zonm ek fanm.  Gender mainstreaming i mannyer nou fer sir ki dan tou polisi e progranm, nou promouvwar egalite dan bann relasyon ki egziste ant zonm ek fanm.  Tou resaman nou’n aprann ki Sesel ti ganny klasifye sekyenm dan lemonn an se ki konsern proporsyon madanm dan Parlman.  Sesel i annan 14 madanm parmi sa 32 syez isi dan nou Lasanble Nasyonal.  E sa i reprezant 44 poursan ki zis en pti pe par anba sa 50 poursan ki SADC in etabli.  Sa i konparab avek bann pei tel ki Rwayonm Ini ki klase senkanntrwa zyenm e nou vwazen Moris ki klase swasanndizyenm.  Sa i montre progre remarkab ki nou pti nasyon in kapab fer.

Lannen pase, mon plis ki sir nou tou nou ti fyer pou tande ki en rapor fer par Commonwealth ti montre ki Sesel ti ganny klase katriyenm parmi 54 pei manm, lo landrwa ki pli bon ne koman en fiy.  Sa i montre sikse nou bann polisi e progranm kot tou dimoun, san eksepsyon i ganny akse avek servis lasante e ledikasyon gratwit lo nivo primer e segonder.

Dan son baromet ki i fer tou le an, SADC i plas Sesel premye dan sa 15 pei manm e sa i demontre progre ki’n ganny fer dan nou parkour pou ariv lo sa 28 target ki’n ganny etablir dan protokol SADC. Sa bann lakonplisman i kler pou nou tou.  I en demonstrasyon langazman Gouvernman pou fasilit egalite ant zonm ek fanm e en langazman pou met zonm ek fanm o sant devlopman.  I en loner pou nou pei e lepep Seselwa an antye.

Mr Speaker, prezan nou al en pti kou lo sekretaryat Gender. Sekretaryat Gender dan Departman Devlopman Sosyal pe finaliz premye polisi nasyonal lo Gender e osi son plan daksyon e nou anvizaze lans sa sa lannen menm.  Nou pe travay pou finaliz manual ki pou ed bann lazans ki donn en servis lo Gender based violence. Sa manual i apel Gender based violence, working together manual. Nou pe kordin sansibilizasyon parmi bann Ziz, Mazistra e bann Manm Tribinal lo bann trete enternasyonal lo drwa imen, spesifikaman lo Gender, lo CEDAW avek SADC e Gender protocol.  Nou pe kordin training pou bann politisyen, avoka e bann manm lafors lapolis lo menm size.

Sekretaryat Gender in osi lans kanpanny “Unite for peace to end Gender based violence” ki en konponan nasyonal sa proze rezyonnal, “Africa unite to end violence against women and girls.” Sa ti lanse par Sekreter Zeneral Nasyon Ini anba progranm “Unite to end violence against women.” Pou premye fwa nou pe al defann rapor Sesel lo lenplimantasyon Konvansyon CEDAW lannen prosenn kot biro o komiser drwa imen.  Sa pou fer swa Zenev oubyen New York.  Sa i pou en defi akoz i fer plis ki 20an ki nou’n sinny sa Konvansyon e nou an preparasyon pou sa.

Avek sa bann travay ki pe ganny fer dan sekretaryat, nou pou kapab avek plis kolaborasyon nou bann partener, realiz nou bann lobzektif.  Sa i a permet nou anmenn sa transformasyon neseser ki anlinny avek Renesans Sosyal.  I enportan pou nou promouvwar e viv sa lespri kot relasyon ant zonm ek fanm i baze lo egalite, larmoni, respe e dignite.  Sa i asire ki nou bann zonm ek fanm i empowered pou ansarz zot lavi, zwir zot bann drwa san bliy zot responsabilite.  Se sa larout ver en Sesel pli stab.  Ver en fanmiy pli solid, ver bann vwazinaz pli ini.  Se sa ki nou pe promouvwar ler nou pe koz Renesans Sosyal.

Pou plizyer lannen, nou pe pouse pou entegre Gender dan devlopman nasyonal.  Sa in ganny demontre atraver plizyer lenstans.  Sekretaryat Gender in organiz plizyer kozri e rankont dan bann lannen ki’n pase, depi letablisman divizyon devlopman sosyal an 2001.  Bann striktir in ganny etablir pou siport sa langazman i enkli dan Gouvernman, National Gender Management Team e Gender based violence working group. Nou osi kolabor e donn sipor sosyete sivil, Gender Commission e lezot lorganizasyon non Gouvernmantal dan sa travay.  Lobligasyon anba Trete enternasyonal, nou fer sir ki nou pe onor bann lobligasyon lo nivo rezyonnal e enternasyonal e soumet bann rapor ki sipoze ganny fer.  Nou osi ed bokou lenstitisyon lokal koman an deor Sesel avek bann lenformasyon e statistik e bann analiz an se ki konsern zonm ek fanm dan Sesel.

Sekretaryat Gender pe vin kontinnyelman pli vizib.  Deza zot in etablir en sit enternet e swivan en latelye an Fevriye sa lannen, zot pe devlop konpetans IT e devlop en paz lo facebook pou tous plis zenn.  Nou website i www.genderseychelles.gov.sc e paz facebook i www.facebook.com/gendersex.sc. Nou pe kontinnyelman partaz lenformasyon atraver bann posters, feye, leaflet, pamphlets, progranm televizyon, lartik dan zournal e osi bann forum, seminar, kozri, latelye eksetera.  Nou pe komemor plizyer lazournen enternasyonal tel ki Lazournen Enternasyonal bann Madanm le 8 Mars, Lazournen Enternasyonal bann Zonm, 16 zour kanpanny aktiv kont Gender violence e par bann mesaz e sipor lezot aktivite lo nivo nasyonal.  Sa lannen, nou anvi donn plis sipor Lazournen Enternasyonal bann Zonm e promouvwar limaz pozitiv zonm Seselwa.  An zeneral, fanm Seselwa in fer progre remarkab.  Nou’n vwar langazman bann fanm dan politik e dan tou sekter devlopman nou pei, ensi ki lakonplisman nou bann fiy dan diferan domenn.  Ozordi nou vwar ki nou bann zenn fiy pe fer plis sikse an realizan zot rev pou vin sa ki zot oule, san ganny plase dan serten rol byen fermen.

Anmezir ki nou bann fiy pe reisir dan dan domenn non konvansyonnel, ki pe arive avek nou bann zenn e nou bann garson?  Nou oule ki nou bann zonm e nou bann garson i servi tou loportinite a zot dispozisyon pou kapab fonksyonnen, kontribye e zouir zot drwa e responsabilite dan zot lavi personnel, dan zot lavi fanmiy e dan zot lavi travay.

Mr Speaker, sanzman konportman dan nou bann zenn fiy e fanm e zenn garson e zonm i reste en eleman fondamantal pou realiz sa transformasyon ver en Nouvo Sesel kot tou dimoun i empowered, i responsab e i travay dir pou kapab viv dan dignite avek respe pou son prop byennet personnel ek devlopman sosyal nou pei.  Se pou sa rezon ki ler nou koz lo Gender, nou pa pe koz zis lo zonm ek fanm.  Me nou pe koz lo relasyon imen e personn pa devret ganny kit deryer.  Mersi Mr Speaker.

MR SPEAKER

Bon, mon pou permet en pe kestyon par bann Manm.  Okenn dimoun ki ti oule demann kestyon? Request.  Onorab Valmont.  Request.

 

HON SYLVIANNE VALMONT

Mersi Mr Speaker.  Bonzour tou Onorab, bonzour bann dimoun ki pe ekout nou ozordi, bonzour Minis.  Eski Minis i kapab eksplik nou en pti pe rol sa National Gender Management Team ki in fer referans avek?

 

MINISTER VINCENT MERITON

Mersi Mr Speaker.  Mr Speaker, sa National Gender Management Team i en lenstans kolaborasyon lo nivo Gouvernman, sosyete sivil, sekter prive ki kordin tou bann aktivite, kot i konsern Gender development, Gender mainstreaming dan pei kot nou ganny pwennvi tou bann akter lo tou bann keksoz ki annan pou fer ek Gender, avan ler i ganny soumet a bann landrwa apropriye pou ganny laprouvasyon.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Minis, i ankor egziste en kantite diskriminasyon kont Gender, e anba tenm “Renesans Sosyal”, ki ou Minister per fer pou fer sir ki nou pep i byen edike lo ekitabilite, e en sans respe pou toulede Gender, me sirtou pou bann madanm, etan donnen ki par statistik se bann madanm ki ganny viktimize bokou plis kont zot Gender? Mersi

 

MINISTER VINCENT MERITON

Mersi Mr Speaker, mersi Onorab.  Wi, i annan en kantite pou nou fer.  Sa ki mon’n montre i montre poudir Sesel i en leader dan sa domenn me i reste en kantite milestones ki nou kapab achieve.  Bokou madanm i viktim akoz Gender Based Violence. I annan bann madanm ki per, pou diferan rezon pou vin devan, me o fir e anmezir ki nou travay, o fir e anmezir ki nou bann servis sosyal i vin pli profesyonnel, nou pe kapab, atraver lezot endikasyon, lezot sentonm, pe detekte ki i annan en serten difikilte kot lo en nivo nou pe azir pou deal avek sa sitiasyon lo nivo reaktiv oubyen curative, me anmenmtan lo nivo prevansyon kot nou bezwen kapab travay avek bann diferan group non Gouvernmantal dan kominote pou kapab fer dimoun konpran poudir en madanm, nou devret bers li.  Fanm pa tambour e nou devret kapab respekte madanm parey ou’n dir, e mon krwar sa i bezwen komans depi boner dan lakour, dan lekol, dan kominote.

Se pour sa rezon tou sa bann kanpanny ki nou pe fer nou oule fer li dan kominote, dan landrwa travay, akoz en madanm i devret debout alongside en zonm, obor en zonm akoz san madanm, i annan en kantite keksoz pa kapab reisir.  Zot dir ki deryer sak zonm ki’n vreman fer la reisit i annan en fanm ki pe pous li.  E Sesel sa i vre.  E nou, nou bezwen fer sir ki nou respe sa bann madanm.  Pa akoz Sesel i annan en kantite madanm in fer en kantite keksoz ki nou devret mank respe pou zot.  Mon krwar i annan en nesesite pou ledikasyon, se pou sa rezon, atraver kanpanny Renesans Sosyal, tou le semenn nou bezwen annan en group partikilye pour kapab eksplik bann lobzektiv Renesans Sosyal ki nou’n koz respe, travay dir, respe pou ou lekor, respe pou ou partener, respe pou ou prosen, respe pou ou manman, respe pou ou ser, respe pou ou paran e mon krwar sa i enkli ladan.  Me an plis ki sa i bezwen en mouvman, en vag nasyonal ki dimoun i kapab get madanm dan en lot lalinny.

Ozordi, si ou gete, dan bann lenstitisyon segonder e pos segonder, se bann pti fiy ki pe exceed. Get MTC, get SIT, dan bann landrwa ki yer bann garson ki ti pou ganny the best overall cup, lekel ki gannyen?  Bann fiy ozordi.  E bann garson i reste deryer.  So, nou bezwen travay ek bann garson pou zot osi pull up zot way, me anmenmtan ki zot kapab respekte bann fiy akoz bann ka ki ariv kot nou kot travayer Sosyal i montre, i donn serten lendikasyon ki akoz bann garson pa fer osi byen, i annan en tandans prezan pou kapab tir sa atraver la vyolans lo bann fiy.  So, i annan tout en gam size ki nou bezwen adrese atraver Renesans Sosyal, atraver tou bann lazans ki annan pou fer avek en servis, depi ledikasyon, depi lapolis, depi servis sosyal, depi bann NGO’s pou nou kapab fer sir ki sa i arete dan pei.  Mersi Mr Speaker.  Donn nou en koudmen osi, Lasanble ler zot koz lo bann size.

 

MR SPEAKER

Onorab Arnephy.

HON BERNARD ARNEPHY

Mersi Mr Speaker, Minis in fini reponn mon kestyon.  Mersi.

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.  Eski Minis i kapab enform sa Lasanble ki pe arive avek sa group dimoun ki dapre Servis Sosyal ti prezante lannen pase ki zot pa pe ganny touse par bann metod konvesyonnel pou edik zot lo vyolans domestik.  Eski Minis i kapab enform sa Lasanble ki bann nouvo fason fer, ki son Minister pe vin avek pou asire ki sa bann group dimoun ki pli bezwen sa lasistans ouswa ledikasyon i pe ganny touse?  Mersi.

 

MINISTER VINCENT MERITON

Mersi Mr Speaker.  Wi Mr Speaker, nou realize ki servis konvansyonnel par ler pa tous tou dimoun e nou pe rod bann fason inovativ pou nou ariv kot bann dimoun ki bezwen servis.  E dan sa laspe, nou progranm outreach tete a tete, al kot dimoun dan kominote, dan landrwa travay, dan fanmiy i enn ki annan en plas enportan dan lenplimantasyon proze Renesans Sosyal lo nivo lapolis, lo nivo servis sosyal e osi lo nivo lasistans sosyal, taler nou fek koz lo la.

Anmezir ki nou ganny serten ka ki ariv par egzanp kot Lazans pou Proteksyon Sosyal, serten analiz i osi pran plas an kolaborasyon avek Servis Sosyal kot nou detekte serten keksoz ki pa pe al byen, kot nou bezwen donn en servis pli aprofondi, me pou nou kapab fer sa, nou bezwen kontinnyelman pe form nou bann dimoun.  Se pou sa rezon ki training i enportan, ki nou pe rod sipor avek UNODC, avek lezot lazans Nasyon Ini pou kapab ed nou pour kapab donn training nou bann dimoun san bliy bann lentervansyon training ki nou pe fer avek SIM, avek Liniversite Sesel e osi avek bann lenstitisyon edikasyonnel pos segonder NIHSS, pou nou kapab ganny plis dimoun formen, profesyonnel dan nou servis, pou kapab al lo nivo outreach.  Anmenmtan nou pe travay avek bann dimoun volonter dan kominote, atraver bann diferan progranm ki nou annan pou kapab ede tous sa bann fanmiy ki dan bezwen, ki pa oule vin devan pou kapab aksed bann servis ki annan.  I pa fasil me selman i en travay ki Servis Sosyal an kolaborasyon avek lezot lazans pe kontinnyelman travay lo la.  Me nou bezwen perfeksyonn nou metod pou kapab tous plis dimoun.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker eski Minis i kapab eksplik, oubyen donn detay sa Lasanble lo si i santi ki son Minister, oubyen Sesel in met an plas sa proper instrument lo nivo evaliasyon e rapor an relasyon ek laplikasyon bann demann pou Konvansyon pou elimin diskriminasyon kont bann madanm?

Dezyenmman, eski Minis i kapab eksplik sa Lasanble plan lon term son Minister e ki bann progranm dan sa plan ki zot annan ki viz ver empowerment pou bann madanm pou fer sir ki bann madanm i konpran bann diferan drwa ki zot annan anba bann diferan lalwa ki egziste Sesel, enkli nou Konstitisyon, pou ki sa bann madanm ki enkli bann dimoun aze i kapab servi sa bann drwa, pou ki an retour zot komann respect avek lasosyete Seselwa?  Mersi Mr Speaker.

MINISTER VINCENT MERITON

Mersi Mr Speaker.  Mr Speaker kot i konsern bann Konvansyonm, ordinerman State Party, leta i annan bann Komite ki i met an plas pou kapab evalye bann aksyon, bann servis, bann prosesis ki i annan an plas dan sa pei kot i konsern lenplimantasyon sa Konvansyon.

En Konvansyon i met bann gran lalinny ki demann sa bann pei manm ki in ratifye pou kapab (-) sa, swa dan zot Konstitisyon oubyen dan zot lalwa e apre, lo nivo pei byensir i annan serten lazans kot i kapab operasyonnaliz sa bann gran polisi ki i met dan Konvansyon, dan Konstitisyon apre i dan lalwa.  Sesel i parey, kot i annan bann group travay ki prepar rapor lo sak sekter la dan sa ka spesifik, kot i konsern elininasyon kont diskriminasyon kont bann madanm, kot sak sekter i donn en rapor lo serten aksyon baze lo bann paramet definir, ki sa apre i ganny validate par tou bann sekter lasosyete, Gouvernman, Lasanble, Zidisyer, NGO, apre ki Gouvernman i soumet avek lorganizasyon enternasyonal e si anba sa Konvansyon i annan en zafer ki apel en shadow report, ki serten lorganizasyon i anvoy en lot rapor ki apre sa Gouvernman i anvoy son dimoun, son emiser pou al defann sa e pou kapab dir ki sa ki pe ganny fer kot i konsern en tel size.  Vwala striktir kimannyer i marse.

E byensir, bann NGO’s depli-z-an pli, yer nou’n fer en latelye, mon krwar ou’n swiv lo televizyon, lo kimannyer Gouvernman pe travay an etrwat kolaborasyon avek sosyete sivil pou kapab delivre serten servis, pou kapab delivre dan en fason efektiv, pou konplemant serten servis ki Gouvernman i donnen kot i apropriye e bann NGO’s i osi zwe en rol enportan dan sa domenn.

Plan lon term mon krwar i dan prosesis Renesans Sosyal i annan serten enstans ki nou pe propoze pou ganny kree.  Mon pou vin Lasanble pou mwan koz lo la, me selman i demann en kordinasyon efektiv par en serten body pou gete ki sa ki sak lazans i fer, parey angle i dir, i dove tail dan en pli gran progranm devlopman sosyal lo nivo global.  Lo en nivo makro si ou le.  E sa i pou nesesit ki sak departman i annan li son plan defini ki i annan, me ki son lenplimantasyon i ganny vwar pa an izolasyon, me koman en kontribisyon pou annan dan ka ki nou pe koze, en Sesel pli prosper, kot i annan plis respe, plis fraternal, ki fanm pa ganny bate me fanm i ganny respekte e ki i annan plis sa bon relasyon ant lafanmiy, ant vwazinaz e pei i vin pli prosper, pli fraternel an zeneral.  Mersi Mr Speaker.

 

MR SPEAKER

Onorab Samson.

 

HON DEREK SAMSON

Mersi Mr Speaker.  Bonzour tou dimoun.  Mr Speaker, parmi bann size ki Minis in mansyonnen, ki sa Sekretaryat Gender pou deal avek i size Gender Based Violence ki en size fondamantal dan rezyon Lafrik.  Mon ti a kontan demann Minis si i annan lezot size oubyen problenm ki petet in kapab monte dan dyalog Renesans Sosyal, ki sa sekretaryat i osi pe anvizaze trete dan lalinny travay ki devan zot e si wi, lekel parmi sa bann lezot size?  Mersi.

 

MINISTER VINCENT MERITON

Mersi Mr Speaker.  Mr Speaker, Gender Based Violence in ganny highlighted akoz i enn bann keksoz ki pyetin lo devlopman relasyon ant zonm ek fanm dan lasosyete.  Enn bann keksoz ki kapab retourn nou an aryer.  Enn bann keksoz ki latent.  Ou pa vwar li me i la, unless si ou annan en sistenm profesyonnel pou kapab detekte li.  Se pou sa rezon ki nou met lanfaz lo la akoz ou rezourd problenm Gender Based Violence, en kantite keksoz i ganny adrese.  Se pou sa reon ki sa lannen nou oule met bokou plis lanfaz lo sa 16 days of activism, depi le 25 Novanm ziska Desanm e nou oule osi met lanfaz lo Lazournen Zonm le 19 Novanm pou nou kapab, parey mon’n dir taler, prozet en limaz pozitiv lo zonm dan pei.  Zonm i annan en kantite keksoz ki bon ki i fer.  Me i annan serten laspe nou bezwen gete kimannyer nou kapab amelyore an relasyon avek bann madanm, pou permet bataz ki bann madanm i epanouir.  Madanm i zwe en rol pli for ankor dan devlopman lafanmiy, dan devlopman landrwa travay e lasosyete.  So, gender based violence i enn bann size ki nou krwar i kle pou anmenn solisyon kot i konsern sa bann malez, me osi pou permet lepanouisman madanm dan lezot sekter ki sosyete pe deal avek.

Progranm Renesans Sosyal i tous tou keksoz ki nou fer dan en serten sans, si ou konpran ki mon pe dir.  E se pou sa rezon ki nou, nou pe tous tou sa bann gran sekter.  Ledikasyon, lasante, konportman, lafanmiy, lekonomi, lanplwa, ki annan pou fer avek relasyon imen dan sosyete e sak sekter i annan bann targets spesifik.  I annan bann defi spesifik ki in gannyen, nou’n koz lo bann problenm lannen pase, prezan nou pe get bann aksyon, ki sa ki nou kapab fer e Gender Secretariat, I pe konsantre lo sa kestyon Gender Based Violence e anmenmtan ki lezot sekter dan lasosoyete pe travay lo bann keksoz spesifik ki mon a vin isi pou kapab donn en rapor plitar sa lannen.  Mersi Mr Speaker.

 

MR SPEAKER

Onorab Pool.

 

HON ANDRE POOL

Mr Speaker, mersi.  Mr Speaker, ziska prezan an se ki konsern repons Minis, mon’n tann li pe koz lo son bann plan lo nivo nasyonal, son bann progranm konkret vizavi son Minister ek bann lazans.  I pou enplimant bann size an se ki konsern Gender dan nou pei.  Me eski Minis i kapab eksplik nou Lasanble konkretman, ki plan ki zot annan pou desantraliz tou bann travay, tou bann progranm ki zot kapab annan?  Letan mon dir desantraliz, savedir pou anmenn li lo nivo distrik, lo nivo la kominote ki tous bann dimoun vreman kot zot pe reste, kot zot viv toulezour.  Mersi.

 

MINISTER VINCENT MERITON

Mersi Mr Speaker.  Mr Speaker, enn nou bann stratezi pou adres bann defi ki devan nou se zisteman al kot dimoun i ete.  Kot okenn lentervansyon i fer plis lenpakt.  Pou nou kapab fer sa, nou pa kapab zis fye lo sa resours ki santralize akot dimoun i pti git.  Dan, par egzanp kot Sekretaryat Gender, nou annan 3 dimoun ki travay.  E mazin ou, ou annan ou 25 distrik avek Ile Perseverance, kimannyer ou pou diviz sa bann distrik?  Se pou sa rezon nou pe pran lapros form bann formater ki kapab ede e fer nou travay an servan lezot lazans e la NGO i zwen en rol enportan kimannyer pou kapab pas sa mesaz e osi travay avek kominote, avek bann distrik e bann fors viv dan distrik, bann mouvman asosyatif ki konpran mesaz ki nou pe dir e mesaz i senp si ou le.  Kimannyer nou kapab viv byen, kimannyer nou kapab respekte kanmarad, dan progranm sak lazans.  Pou fer sa arive i bezwen volonte, i bezwen konviksyon e ou bezwen lager en lager tou kase.

Nou annan serten defi nou menm lo kimannyer pou fer sa arive me selman i kler dan nou lespri ki formasyon bann dimoun ki travay avek nou, travay an kolaborasyon avek bann distrik, travay an kolaborasyon avek bann lorganizasyon non gouvernmantal e fer sir ki sak lazans i pran ownership sa bann progranm e zot osi anmenn zot dan distrik kot nou kapab fer sa marse.  So, mon ava ganny sans ler mon vin prezant mon rapor isi, donn pllis detay, me selman the way forward mon krwar the way forward, se atraver bann striktir ki deza egziste, empower zot pou nou kapab fer sa arive akoz parti nou solisyon se empowerment bann striktir ki la pou kapab pas bann mesaz.  I form parti makanizm solisyon me i form parti solisyon osi anmenmtan.

E PS pe remind mwan la ki sa kestyon gender pou pli spesifik ki en keksoz ki ganny deal avek lo nivo toulezour.  Lo nivo lekol, lo nivo dan lakour, lo nivo dan kominote so, nou bezwen vin pli agresiv dan lafason ki nou pas lenformasyon.  Onorab, mon kontan ou’n koz distrik, be parler nou fer serten sesyon, pran en fason konvansyonnel ki nou abitye fer.  Ou fer en sesyon dan distrik.  Sa bann dimoun ki vini se zot, zot pa bezwen sa servis zot.  Sa bann ki bezwen sa servis pa la.  So, se pour sa rezon ki mon konpran ki Onorab Vangadasamy in demande taler ki nou bezwen al pli spesifik, men to men, tete a tete, i demann plis resours e letan e lenerzi pou kapab fer li me anmenmtan pa negliz sa laspe kolektiv kot nou anmenn dimoun ansanm.  I en defi ki pou either make or break us.  Mon krwar nou tou nou annan langazman pou kapab zwe en rol.  Dan Lasanble, Gouvernman, Egzekitiv, bann NGO’s mon krwar nou bezwen lager antoure pou adres sa size.  Mersi Mr Speaker.

 

MR SPEAKER

Dernyen kestyon, Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, eski Minis i kapab enform nou Lasanble, dan sa ka gender la ki nou pe koze, si son Minister i annan bann ka gender abuse par lapolis e lotorite prizon ki ou Minister in rikorde, e ki Minister pe fer pou redwir ou anpes sa bann ka.  Mersi bokou.  Thank you.

 

MNISTER VINCENT MERITON

Mr Speaker, non mon napa okenn rapor ki’n ganny fer, mon napa okenn statistik be toutfwa, mon a donn langazman ki mon a verifye avek lotorite lapolis avek lotorite Prizon, apre mon ava rann ou larepons Onorab De Commarmond.  Mersi Mr Speaker.

 

MR SPEAKER

An vi larepons in bref, mon ava permet Onorab Ghislain, I pe konplent laba.  Onorab, e pou en madanm fini sa i pli apropriye.

 

HON CHANTAL GHISLAIN

Mersi Mr Speaker.  Mon kestyon i koumsa.  Eski i pa nou menm ki’n tant pou nou pous nou bann zonm deryer?  Akoz mon dir sa?  Minis par egzanp letan nou regard lazournen madanm, eski pa in ariv en moman pou nou sanz nou fason fer?  Ler nou regard lazournen madanm, olye vwar nou bann zonm ki pe vin onor nou bann madanm, nou vwar madanm ki onor kanmarad antre nou.  La nou pe al koz lo lazournen bann msye, mon asire nou pou vwar nou bann msye pe onor kanmarad.  Konmsi finalman ou pou vwar zot pou toultan reste deryer e nou, nou pe al devan.  Eski pa i annan en nouvo fason fer pou nou komans anmenn nou tou ansanm ler nou koze, nou pa koz zonm, nou pa koz fanm, nou koz zonm, parey dan Labib i koze.  Mersi.

 

MR SPEAKER

Minis.

 

MINISTER VINCENT MERITON

Mersi Mr Speaker.  Mr Speaker, mon dakor avek Onorab Ghislain.  Nou egziste atraver lot.  Savedir ou kapab ganny apresye par ou koleg, ou partner, pa i vre?  E pou pran ou pwen, lannen pase ler ti fer Lazournen Madanm.  Lannen pase oubyen sa lannen?  Ti met bann triko blan ek mov.  Mwan osi mon ti met enn, pourtan mon pa en madanm.  So, mon krwar nou pe move dan sa direksyon ki ou pe dir, ki nou bezwen onor kanmarad, apresye kanmarad e ler lafet i fer pou madanm, i pa zis pour madanm me osi pou bann zonm apresye ki i annan en bon madanm ki donn li sa sipor, apresye zefor ki sa madanm in fer, rol enportan pou elve bann zanfan e mon krwar i vin lenvers ler nou osi onor bann msye zour Lazournen bann Msye.

Pou repet sa ki nou’n dir, mon krwar gender i pe koz lo pa zis msye oubyen madanm, me toulede.  E sa relasyon ki permet sa stabilite antre zot.  Dan en setting lafanmiy, dan en setting landrwa travay e dan en setting lakominote, pou ki nou kapab vreman permet ki sa polisi zonm reste o sant devlopman Sesel i ganny realize e i ganny viv.  So, mon krwar sa diskisyon ki nou’n pran ozordi la, i devret kontinnyen lo nivo landrwa travay, lo nivo kominote, parey Onorab Pool in dir, i enportan ki vreman i al pli ba posib pou ki dimoun i apresye tou bann lenplikasyon ki ladan, me pli enportan ki bann fiy ek bann madanm i ganny respe.  Ki nou termin sa bann kestyon vyolans kont bann madanm e nou donn madanm son plas ki i merite dan sosyete.  Mersi Mr Speaker.

 

MR SPEAKER

Bon, nou’n ariv alafen bann kestyon pou sa Statement e mon ava remersye Minis Meriton e ekskiz li parmi nou e nou, nou adjourn ziska 11.05.

 

(Break)

Mr Deputy Speaker in the Chair

MR DEPUTY SPEAKER

Bon, mon a dir bonzour tou bann Manm e nou a kontinnyen avek nou travay lo nou Order Paper.  Nou a pran bann Motions.  E premye Mosyon lo nou Azanda, mon ava envit Onorab Vidot Manm elekte pou English River pou prezant son Mosyon.  Proceed Onorab.

 

HON KEVIN VIDOT

Thank you Mr Deputy.  Mr Deputy, koleg Onorab, bonzour.  Mr Deputy, dan en lemonn ki vin de pli-z-an pli boulverse par bann atrosite, kalamite, perversite, egoisite e tou sord kalite bandisite ki anvlop nou sak zour nou lavi, dan nou parkour lo sa later, kot bokou nou, nou viv dan lafreyer e lensertitid.  Kot menm pou kit laport ouswa lafnet ou lakaz ouver i vin en kosmar, ki fer bokou nou vin bann prizonnyen nou prop lakaz.  Dan en tel lemonn Mr Deputy, si ou pa for e ferm lo serten prensip ou krwayans, ou kapab ganny anvale ou devore par sa bann perversite e pli grav ankor se ler ou debout lebra krwaze e aksepte tousala.  Mr Deputy, msye fitir pou fer nou rann kont e pas zizman koupab lo nou si nou pa azir konmela menm.

Mr Deputy, ozordi mon debout for e mon dir avek en lavwa for e serye ki mwan mon’n pare pou konbat kont tousala.  E otan dimoun ki pou debout e lalit e reste determinen, Mr Fitir pou dir nou bravo e mersi.  Sa Mosyon devan nou ozordi pe fer egzakteman sa.  In ler pou nou asize, analize e korize kot in al mal e komans tras semen pou en meyer fitir.  En fitir ki ranpli avek lespwar e pozitivite. Pou sovgard nou fitir, i enportan ki nou protez bann zeritye sa menm fitir.  Sa se bann zanfan e bann zenn.  Sa group dan sosyete ki frazil e vilnerab.  Ki kapab ganny anpwazonnen par bann negativite sa lemonn ozordi.  I neseser ki nou ki matir, nou pa soumet ouswa soutir bann atrosite ki ganny aflikte lo nou bann zanfan e zenn an zeneral.

Dan Konstitisyon nou pei, in ganny klerman ekrir anba lartik 31 paragraf c ki the state recognizes the right of children and young persons to special protection in view of their immaturity and vulnerability and to ensure effective exercises of this right, the state undertakes to ensure special protection against social and economic exploitation and physical and moral dangers to which children and young persons are exposed.

Mr Deputy, bann mo pwisan e serye dan nou Konstitisyon i devret kapab gid nou pou vreman asir sekirite nou zanfan, nou trezor, nou fitir.  Napa personn ki pou pran enn son trezor e mal okip li, zet partou kote.  Ni menm pa enterese avek.  Mr Deputy, si en trezor i vo bokou pou nou, ki nou okipe, proteze e menm mank sonmey lo la.  Ki plis ankor, nou devret okip, protez e prezerv nou zanfan, leritaz nou fitir.  Nou lalwa, nou bann lenstitisyon e departman i devret la pou protez nou zanfan.  Mr Deputy, mon pa pe dir ki napa lalwa ou okenn lenstitisyon ki pa pe fer sa, me toudmenm i enportan pou note ki nou lalwa i merit ganny revwar dan en fason pou kapab adres sitiasyon ou gravite ou konpleksite bann ka ozordi.

Mr Deputy, Mosyon devan sa Lasanble pe demann Gouvernman pou revwar lalwa pou pli byen kapab pini bann ki koupab pou labi zanfan.  Labi zanfan limenm i ganny senpleman definir koman labi fizikal, seksyel, emosyonnel e osi negliz en zanfan ou en zenn.  I annan serten definisyon en pe pli detaye parey definisyon dan Federal Law, me tousala pe echo en sel mesaz.  Labi zanfan pa merit ganny tolere.  Le koupab i merit ganny zize e pini apropriyetman.

Souvann fwa Mr Deputy, ou’n tann zistwar bann zanfan ki’n ganny abize dan bann diferan fason e osi neglize pou plizyer lannen e zot ganny marke par sa bann atrosite pou lavi parfwa.  I annan ki menm sey anvoy en lapel pou led, me parfwa nanryen pa ganny fer.  Ouswa lalwa i zis pa kapab kondann sa abizer, ou menm parfwa ni laport lakour sa ka pa arive.  Parfwa sa bann zanfan i bezwen sibir zot soufrans trankil, dan lafreyer ki si zot sey kriy o sekour, sa labi a vin pli grav ankor.  Sa bann abizer Mr Deputy, napa pitye lo sa zanfan inosan.  Akoz lalwa i bezwen pran pitye pou li?

Mr Deputy, Kod Penal i klerman spesifye ki si en dimoun i seksyelman abiz en lot dimoun e menm tous bann lorgan seksyel sa endividi, i koupab e pou komet en lofans e merit ganny anprizonnen pou 20an.  Mr Deputy, a mon avi, 20an i menm tro pti gin letan pou en abizer ki’n abiz lavenir en zanfan.  E par lao tousala, i annan ki ganny kondannen mwens ki 20an osi.  Mr Deputy mon demande, lekel ki lalwa i proteze, viktim ouswa akize?  Kestyon ki sa Lasanble, sistenm Zidisyer e nou Gouvernman i bezwen reponn.  Kod Penal i menm fer resorti ki okenn dimoun ki komet en akt endesan anver en lot dimoun ki anba 15an, li osi i komet en lofans e i kapab ganny anprizonnen pou 20an.  Pou kapab fer nou lalwa pli morde, pa in tous ki fo ler pou entrodwi lalwa mandatwar pou bann ki ganny trouve koupab pou labi zanfan.

Mr Deputy, mon dir labi zanfan an zeneral, me pa zis santans mandatwar pou en pe lofans, me larestan i a diskresyon Ziz pou pas santans ki i vwar i fair pou lofans ki sa akize in komet.  Sa akize pa ti fair lo sa zanfan li.  Akoz Lakour i merit fair lo li?

Mr Deputy, avan ki nou tro ganny antrennen dan zis labi zanfan tousel, i enportan osi pou note ki serten paran, care taker or guardian osi parfwa i bliy zot rol e responsabilite anver sa zanfan e ou vwar zanfan ki’n ganny mal okipe, ou menm pa ganny okipe ditou.  Nivo lizyenn i zero, nouritir zot pa gannyen, parfwa ganny kit an deor en lozman, napa sipervizyon, pa anvoy zanfan lekol, pa pran kont avek laspe emosyonnel sa zanfan e menm permet sa zanfan pou servi bann sibstans parey drog e lalkol.  Dan bann ka neglect osi, nou lalwa i bezwen sever.  Seksyon 163 nou Kod Penal i klerman spesifye ki i annan en lofans ki ganny komet, me nou anvi vwar en revizyon dan lalwa ki fors lanmen bann Ziz ou personnel legal pour azir ferm konsernan neglizans serten paran ou bann ki annan responsabilite legal lo en zanfan.

Nou vwar Sesel ozordi, nou bann fwaye i ranpli avek bann social orphans, bann zanfan ki paran in zis abandonnen, pou en rezon ou en lot.  Eski lalwa pa merit entervenir e dir ek sa bann paran iresponsab regarde, ou annan en responsabilite anver sa zanfan ki ou donn nesans dan sa monn.  Eski se lalwa e Gouvernman ki pou bezwen fors sa bann paran pou donn en pe lanmour avek lafeksyon sa zanfan?  Eski nou Gouvernman pou kapab kontinnyen soutir bann tel akt mal apropos?  Konbyen letan nou pou les en madanm ou en zonm konsevwar en zanfan, apre met li dan fwaye, enn apre lot, san okenn kondisyon, ou ni menm responsabiliz zot?  Vwala kot lalwa i bezwen antre e zwe en pli gran rol pou elimin ou dekouraz bann tel pratik.

Mr Deputy, mon prezantasyon pa pou konplet si mon pa met nou Lasanble o fe avek statistik sorti kot Minister Zafer Sosyal, Devlopman Kominoter ek Spor.  Sa bann lenformasyon i ganny anvoye sak lannen kot Divizyon Servis Sosyal, sorti kot Legal Services And Child Protection Section dan lapolis.  Sa i bann rapor labi fizik avek labi seksyel.  Pou labi fizik in ganny raporte 27 ka an 2010, 29 ka 2011 e ziska Avril sa lannen 20 ka.  Pou labi seksyel, in ganny raporte 72 ka 2010, 116 ka 2011 e ziska Avril sa lannen, 54 ka.  Mr Deputy, pou mwan sa i tre alarman.  I enportan ki tou lazans konsernen avek proteksyon zanfan i met lafors e lavwa ansanm e anvoy en sel mesaz:- Zero tolerans pou labi zanfan.

Mr Deputy, dan en letid lo it ganny fer par Nasyon Ini an 2005 Sesel lo vyolans kont zanfan, ti enteresan pou lir bann repons ki ti’n ganny ekrir, an repons bann kestyon sa kestyoner.  Dan en kestyon ki ti pe regarde si nou annan okenn striktir ou lotorite Gouvernmantal ki pe adres vyolans kont bann zanfan, nou ti fyerman reponn wi e mansyonn sa bann lotorite.  Parmi sa bann lotorite ti annan enn ki ti premye lo lalis.  Sa sete National Commission for Child Protection, NCCP, ki ti anmenn ansanm bann key persons pou adres sa problenm labi zanfan e diskit lo bann polisi pou adres sa problenm.  NCCP ti sipoze responsab osi pou monitor lenpakt bann polisi e progranm dirize anver vyolans kont bann zanfan.  Me i malere pou dir ki depi 2009, NCCP nepli zwenn.  Domaz pou dir me toudmenm, mon’n ganny dir ki i annan en demars pou reactivate li ankor enn fwa, la 3an plitar.  Mon swete seryezman ki sa i ganny fer pli vit posib e dimoun apropriye i ganny mete lo sa Komisyon.

Mr Deputy, en kestyon enportan ki ti ganny demande osi sete si i annan okenn striktir parlmanter, parey en Komite dan Lasanble ki deal ou adres vyolans kont bann zanfan?  Larepons ti non me ki sa lide pe ganny konsidere.  Me parey nou tou dan sa Lasanble nou konnen, napa en tel Komite.

Mr Deputy, avek ou lotorizasyon mon ti a sizere si sa Lasanble as a whole i diskit lo sa size dan en fitir pros e vwar si i annan posibilite pou annan en tel Komite.  Sa Komite ti a revwar bann parti lezislasyon konsernan zanfan an zeneral, me pa zis labi.  Ki nou koman en bann Parlmanter nou a kapab zwe en rol pli avangard osi.  Koman en youth advocate e en manm komite egzekitiv NCC, mon’n devlop en pasyon pou zanfan e lazenes an zeneral e vin pli sansib anver zot bezwen, natir e konsern.  Mon’n antann bokou lo bann labi ki’n ganny komet e mon oule vwar en solisyon pou sa problenm.  Mr Deputy, mon senserman swete e krwar ki nou koman bann Parlmanter, nou kapab vin pli sansib lo sa size e zwe en pli gran rol ankor.

Mr Deputy, en bout enportan dan sa study sete pour vwar kantite ka ki’n ganny raporte e konviksyon obtenir.  An 2004, ti annan 45 ka labi seksyel ki ti ganny raporte, me zis 10 konviksyon.  An tou konsernan labi zanfan, an 2004 ti annan 107 ka ki ti ganny raporte, me zis 21 konviksyon ladan.  Domaz Mr Deputy.  Mon pe zis mazin sa bann viktim la a sa moman.

Mon pou al en pe pli lwen Mr Deputy pou menm koz lo the rights of the unborn.  San okenn prezervasyon, mon konvenki ki nou bezwen protez lavi e debat pou bann ki pa kapab fer li pou zot menm.  Annefe sa in toultan prensip SPUP/SPPF e Parti Lepep osi i krwar dan menm prensip.  Sa baba dan vant sa manman ki napa okenn problenm, ki i inosan lo zour son konsepsyon e pa ni ti demande ou swazir son paran i merit nou proteksyon.  Dan lartik 29 (-) dan nou Konstitisyon i dir ki the state undertakes to take steps to reduce infant mortality and promote the healthy development of the child. Mr Deputy i neseser dir ki devlopman an bonn santé sa zanfan i komans depi konsepsyon.  Mon pa pou al dan detay, dan formasyon e devlopman sa baba dan vant son manman me san ezitasyon mon pou dir ki serten domaz in ganny fer par sa manman, san mazin konsekans lo sa baba.

Mr Deputy, leta i determinen pou redwir infant mortality dan Sesel, me malerezman i annan en vermin danzere ki’n antre dan sa pei e ki pe fer sa sitiasyon vin alarman.  Ki mon pe koz lo la bomaten?  Se bann manman kip e anpwazonn zot lekor avek bann drog danzere e dan prose zot osi anpwazonn e kontamin sa baba.  Lekel ki protez sa baba la, Mr Deputy?  Mr Deputy, ekskize si mon dir koumsa, me sa bann madanm ansent ki lo drog, an gran mazorite pa ni enterese avek anti-natal care.  Zot al lopital zis pou donn nesans, apre desarz zot prop lekor.  Ler bann travayer lasante i sey rod zot pou fer follow up, i paret zot pa’n zanmen egziste akoz zot sanz ladres souvan, parey nou sanz lenz lo nou.  Pli fermal ankor Mr Deputy, se parfwa sa zanfan i mor an nesans e bann ki sirviv i grandi avek en adiksyon dan zot, ki zot pa ti demande e devlop tou sord konplikasyon medikal.  Mon krwar ki ase se ase.  In ler pou nou lalwa entervenir dan sa sitiasyon e protez sa bann baba pou pa komans konn negativite sa monn, ni menm zot pankor ne.  Si i annan neglizans manman dan sa bann ka, in ler pou lalwa deal avek zot.  Me pa zis en pti kalot lo lanmen e dir i ok, ale.  Enough is enough.

Zis pou lenformasyon nou Lasanble, sa ki konsern bann madanm ansent ki lo drog, an 2009 ti annan 36 zot, 2010 25 e 2011 ti annan 13 zot.  2012, nou pa konnen ki kantite pou annan.  I annan pei ki’n pran en lepa ver proteksyon bann ki pankor ne.  Par egzanp, an Avril 2004, Prezidan Bush ti sign into law The Unborn Victims Of Violence Act, osi konnen koman Lacy and Corner’s Law.  Sa lalwa i protez sa baba e permet prosekisyon okenn dimoun ki koz domaz sa manman, ki rezilta osi domaz ou lanmor sa baba.  Dan serten leta Lanmerik, en baba ki pankor ne i annan menm drwa, parey sa ki’n fini ne.  Pou note Mr Deputy, bokou pei atraver lemonn i obzerv the day of the unborn.  Mon pe sizere a sa moman ki Gouvernman anba leadership Prezidan Michel i konsider en zour parey osi.

Mr Deputy, nou zanfan i bezwen tou soutyen neseser ki pou kapab ed zot grandir koman en sitwayen responsab.  I enportan ki nou responsabiliz zot, ansenny zot, gid zot e anmenn zot lo sa bann bon semen dan lavi.  Menm bann ki’n vin viktim en labi ou en lot, nou bezwen pran swen avek zot.  After care ki nou donn sa zanfan i vreman enportan.  Osi parey councelling ki pou ed zot reabilitasyon.  Nou bezwen bann landrwa apopriye ki pou pran byen swen avek zot.  Mon swete ki bann zanfan ki’n ganny abize ou menm bann ki pa’n ganny abize kid an diferan lenstitisyon dan pei pe ganny proteze kont okenn bann evantyel labi.  Nou bezwen annan en landrwa ki pou donn shelter bann zanfan ki ler zot ganny 18an zot bezwen rod lezot alternativ lozman.  Mr Deputy mon repete ki nou bezwen protez zeritye nou fitir.

Avan ki mon konklir mon oule fer detrwa sizesyon ki mon swete ki I a tonm dan bann bon zorey.  Mon propoze ki en bill zero tolerance I merit ganny prezante avek sa Lasanble ki pou anvoy en mesaz kler ki Sesel e Seselwa pa toler labi zanfan ki swa seksyelman, fizikman ou emosyonnelman e ni menm neglizans anver zanfan.  Nou merit annan en lakour pou zanfan, sinon fer bann lakour aktyel vin pli child friendly e tou Ziz I vin child sensitive.  Bann ka labi ankour I merit ganny donnen priyorite avan ki zanfan I ganny swa enfliyanse ou demoralize e pa kapab ou per pou vin testifye.

Mon pe fortman sizere ki santans mandatwar I merit ganny donnen pou okenn dimoun ki ganny trouve koupab pou bann krim ki relye avek labi zanfan.  Mon pe osi demande ki nou aboli plead bargains pou tou krim kont zanfan e osi aboli (-) pou tou krim kont zanfan.  Nou bezwen fer provizyon kont lalwa ki pou pini bann manman ki zot baba I mor an nesans ou dan vant ki pe servi drog e pa’n pran swen neseser dan zot lansentman.  Mon sizere ki dan lavenir bann Manm Parlman osi I ganny plis korperasyon bann lotorite konsernen, ler nou pe rod serten lenformasyon ki pou kapab ed nou devlop bann bon largiman konstriktiv e pozitiv, ki nou osi koman bann kolaborater fidel a kapab aport nou soutyen e kontribisyon anver devlopman ekonomik, sosyal, moral e spirityel nou pei sheri Sesel.  Mersi pou konpran sa mesaz.

An konklizyon Mr Deputy, si nou en nasyon ki ki kontenir plis ki 90 poursan kretyen, i neseser pour mwan quote en parti nou liv sakre, ki gid nou lavi lo later, apar bann lalwa later e sa se Labib.  Psaum 127 3-5 i lir koumsa: “Behold, children are heritage from the Lord.  The fruit of the womb, a reward.  Like arrows in the hand of a warrior are the childrenof once youth.  Blessed is the man who fills his quiver with them.  He shall not be put to shame when he speaks with his enemies in the gate.” Ser, frer, zanmi Seselwa.  Annou protez sa kado ki nou’n ganny donnen koman nou leritaz.  Annou pa fer ditor sa bann pti inosan, sa bann zanfan vilnerab e frazil.  Annou donn zot tou lanmour ki neseser pou zot grandi.  Parfwa pa nesesit bokou larzan pou fer zot grandir, me zot bezwen de baz ganny akonplir e nou lanmour avek lafeksyon ki pa kout ni menm en sou.  Ki Bondye i donn nou kouraz pou fer sa ki byen.  Mersi.

 

MR DEPUTY SPEAKER

Bon, Mosyon i devan nou Lasanble, okenn Manm ki segonde?  Onorab Fideria, ou oule koze tou?  Request.

 

HON EMMANUEL FIDERIA

Mon segonn sa Mosyon Deputy e mon pou entervenir.

Bann frer Manm Lasanble, Deputy, tou bann dimoun dan lakour bonzour.  Mr Deputy, “qu’il soit un demon, qu’il soit noir ou blanc.  Il a le Coeur pur, il est tout innocent.  Qu’il soit ne par d’amour ou par accident, malheur a celui qui blesse un enfant.” Enriquo Mathias, 1975.  Mr Deputy mon komans par sa sanson akoz sa Mosyon devan nou Lasanble i merit pas san okenn rezervasyon.  Pe anvoy en warning serye pou tou bann ki oule kontinnyen bles linosans ek dignite nou bann zanfan.

Mr Deputy, ozordi devan nou dan sa Lasanble i en Mosyon ki pe demann Gouvernman pou met azour nou lalwa pou anmenn pinisyon pli sever pou bann dimoun ki vwar plezir pou fer labi lo nou zanfan ki nou trezor e nou lavenir.

Mr Deputy, nou parti depi son kreasyon an 1964 in toultan promouvwar byennet e sekirite tou zanfan Seselwa.  Sa ti vin aparaman avek kreasyon NCC.  NCC in zwe son rol pou fer sir ki byennet zanfan Seselwa i touzour for lo azanda Gouvernman.  NCC in fer sir ki bann lalwa enportan pou protez nou zanfan in ganny pase.  NCC in protez lavenir zanfan Seselwa.  NCC in sov bokou nou zanfan.  O non nou Lasanble mon oule remersi Madanm Geva Rene pou tou son devouman, letan, konpasyon, lanmour ki in donn bann zanfan Seselwa.  Personn pa kapab kestyonn son senserite dan sa domenn.  Mr Deputy, zanmen mon pou bliye enn fwa mon ti al vwar sa madanm pou diskit vizyon pou bann zanfan Seselwa.  Ler i ti komans koze, sa madanm ti komans plere.  Ti fer mwan realize ki i reste ankor en kantite pou nou fer pou protez nou bann zanfan.

Ozordi sa Mosyon pe kontinnyen al dan sa direksyon.  Travay pou protez nou bann zanfan.  Mon bann ser Manm Lasanble.  Travay i la.

Mr Deputy, nou Gouvernman ek nou parti in fer bokou.  In kree bann lenstitisyon pou fer sir ki nou bann zanfan i ganny proteze e enn parmi bann lenstitisyon i Probasyon, Family Tribunal e osi Children’s Home Foundation e lezot eksetera, eksetera.  Pou nou protez sa kous nou popilasyon ki pli sansib.  Semenn ki’n pase, nou ti selebre lazournen zanfan.  Mwan e bokou nou Manm Lasanble, nou ti fer li nou devwar pou nou pas kot lekol pou nou gete ki nou bann zanfan pe fer.  E o non bann Manm Lasanble, mon oule profite pou remersi tou bann ansenyan ek lezot staff kot lekol ki pe devoue pou enstri nou bann zanfan ek bann bon valer.  Mr Deputy, mon osi oule quote parol Prezidan Michel dan son mesaz ki i ti anvoye pou nou pep a lokazyon lazournen “Nou zanfan, nou trezor e nou lavenir.”  Prezidan ti dir, nou mark sa lazournen pou demontre langazman nou Gouvernman, nou kominote ek nou pei anver byennet sa nouvo zenerasyon.  I en langazman ki bezwen sorti kot sakenn de nou, sirtou nou bann paran.  Wi Mr Deputy, nou Gouvernman in fer son par.  Responsabilite i reste avek bann paran pou fer sir nou zanfan pa sibir okenn labi swa fizik, emosyonnel ek lezot form labi.  Nou bezwen annan bon fason fer.  Mr Deputy, kestyon ki mon poze.  Eski i normal pou en paran fim drog devan son zanfan?  Eski i normal pou en paran fer son zanfan aste lalkol?  Eski i normal pou en paran kit son bann film ek liv pornografik kot zanfan i ganny akse avek?  Eski i normal pou en paran servi langaz obsenn devan ouswa avek son zanfan?  Eski i normal pou en paran pa anvoy son zanfan lekol?  Mr Deputy, eski i normal pou en paran kit manrmay 2an a 3an dan lakaz tousel e al disco? Mr Deputy, bann kestyon ki mon met devan, plitar kekfwa lezot Manm ava koz lo la.

Mr Deputy, sa Mosyon in ariv dan en moman, devan nou kot nou bezwen fer en refleksyon serye, pou nou met tou bann keksoz ki nou bezwen prezerv nou trezor, nou lavenir.  Kot nou ganny en sosyete ki stab e ki nou annan bann bon valer.  Sa ki sa Mosyon pe dir nou ozordi se met pinisyon sever pou koriz bann labi.  Nou merit vwar ki sa Mosyon i merit dan limenm anpese ki labi kont zanfan pa zanmen arive dan premye lenstans e si i arive, lenpakt pinisyon e lefe reledikasyon i merit anpes bann labi ganny repete.

Mr Deputy, sa Mosyon i bezwen anpes bann viktim reste silans.  Nou sosyete fodre pare pou ouvertman koz e kondann okenn labi kont bann zanfan inosan.  Lalwa i merit osi pini severman okenn dimoun ki soutir bann abizer.  Parey i annan pinisyon pou reseler, i merit osi annan pinisyon pou soutirer sa kalite krim.

Mr Deputy, ozordi nou tou nou pou lev nou lanmen byen o an faver tou nou bann zanfan.  Nou pe fer li akoz nou kontan zot, nou pe fer li akoz zot zanfan lanmour e zot zanfan Bondye.  Nou ava pas sa Mosyon pou zot akoz se zot ki nou lavenir.

Mr Deputy, mon pe osi oule profit sa moman pou rapel nou bann zanfan, touzour mazinen ki zot drwa osi i mars avek responsabilite.  Respe pou nou paran, respe pou nou bann ansennyan e respe pou tou bann keksoz ki met a nou dispozisyon pou byennet zot devlopman.  Zanfan pa kapab kas sez ou latab dan lekol.  Mr Deputy sa i pa korek.  Sosyete i depans en kantite lo son Bidze nasyonal pou protez nou bann zanfan.  Akse avek ledikasyon, akse avek delo potab e bokou lezot plis ankor.  Annou servi byen tou sa keksoz ki Gouvernman i met a zot dispozisyon ozordi.

Mr Deputy, pou mwan terminen, osi krim labi zanfan inosan i parey osi krim kont nou tou e krim kont limanite.  Mr Deputy, mersi, mon pou aport mon sipor a sa Mosyon.

 

MR DEPUTY SPEAKER

Onorab Bristol.

 

HON ALDERIC BRISTOL

Mr Deputy, Manm Onorab e lepep a lekout, bonzour.  Mr Deputy, pli gran lazwa lo mon figir ler mon leve dan bomaten, se pou vwar sa zoli sourir lo figir mon 2 zanfan e mon konnen ki zot in dormi e lev sen e sof, anba proteksyon e gidans zot paran.  E sa i donn mwan kouraz e lespwar pou lavenir.  Set avek sa menm kouraz e lespwar ki mon pou komans mon lentervansyon lo sa Mosyon.

Mon toultan dir e ensiste ki kot mon zanfan i konsernen, mon pa negosye e mon mean sa ki mon dir.  E la ozordi mon pou al pli lwen ankor e mon pour dir ki kot sekirite, kot lanmour, kot proteksyon nou bann zanfan Sesel i konsernen, nou pa sipoze negosye.  I serye sa zafer.  En zanfan i inosan.  En zanfan i pa kapab defann son lekor.  En zanfan, son lespri i ankor feb e i pa toultan ki i kapab fer bon desizyon ant sa ki byen ek sa ki mal.  En zanfan i fasil ganny anbete e pli enportan ankor, en zanfan i toultan rod en role model pou li idantifye li avek pou li swiv e ki pou protez li.

Mr Deputy, en role model i sa adilt ki sipoze la pou ed sa zanfan grandi dan lanmour, donn li lafeksyon e protez li kont tou sa bann kouran negativ e bann lespri dimal ki egziste dan sa lemonn ozordi.  Sa adilt ki sipoze la pou gid li fer sa ki byen, koriz li kot i mal, felisit li ler i fer byen e pou ed li osi vin en adilt responsab dan le fitir.  Se sa nou rol anver nou zanfan e zanfan nou prosen.  En rol ki devret al pli lwen ankor.  Nou bezwen responsabiliz nou zanfan, pa zis nouri e protez zot, me edik zot bann bon valer e fer zot pran zot responsabilite sivik pou zot an retour vin bann bon adilt demen.

Mr Deputy, si nou bann adilt responsab nou la ozordi, fodre pa bliye ki nou ti deza zanfan nou osi.  Erezman, nou pa it senpleman nenport ki zanfan, me bann zanfan ki nou paran in edike, proteze, felisite e fer grandir pou vin sa ki nou ete ozordi dan sosyete.  En kote nou’n sanse akoz dan nou lepok ti napa sa labondans lenfliyans negativ ki ti menas nou legzistans e afekte nou devlopman.  Malerezman nou pa kapab dir sa ler nou get sitiasyon ozordi.  E sa i en gro, gro defi mondyal e otan ki nou pa oule avoue son legzistans, nou pou napa swa me fer fas a son konsekans, si nou pa esey met lanmen lo la konmela menm.

Mr Deputy, dan Sesel nou’n fer bokou pou ariv kot nou ete la ozordi.  Nou’n akonplir en kantite.  Nou bezwen kontinnyen bouz an avan.  Pou fer sa nou bezwen en zenes for e solid pou pran la relev demen.  Nou bezwen bann zanfan edike, responsab, disiplinen, e bonn sante e aktiv pou kontinnyen sa parkour.  Me nou pa pou kapab fer sa si nou bann zenn ki koman zanfan, zot in ganny afekte par labi oubyen soufer par lezot form vyolans.  Se pou sa rezon plis ki zanmen nou bezwen protez nou bann zanfan ozordi.  Bebet ki pe pli ronz nou sosyete e afekte nou bann zanfan ozordi se labi zanfan.  Vyolans kont nou bann pti inosan.  E sa mon dir tre fortman e avek en lakoler.  Malerezman mon pa pe kapab servi sa mo apropriye.  I en krim en pardonab dan nou sosyete.  Labi kont zanfan dan nenport ki form i en krim.  Labi seksyel, labi fizik, labi emosyonnel e tou lezot form labi pa akseptab dan sa “Nouvo Sesel” ki nou pe sey kree e dan okenn sosyete dan lemonn.  Par egzanp, ou pa kapab pran en pti zanfan e met li mars deryer ou lo larout piblik e ler sa pov malere pros pou ganny tape avek transpor, ou dispit avek li e tap li kalot deryer son latet.  Be madanm, msye, ou ki mal la.  Si ou ti’n met li devan ou e gid li mannyer pou marse lo semen, ou pa ti pou bezwen abiz li.  E mon plis ki krwar ki se ou ki merit en kalot deryer ou latet.

Ki i pase dan lespri sa pov pti inosan ler i ganny abize seksyelman?  Kwa ki fer en adilt komet sa tel kalite aksyon atros ki pa imen ditou?  Ki sosyete i fer pou ed sa zanfan dan son soufrans e ed li repar sa domaz grav ki in pas ladan?  Ki pinisyon apropriye e tre sever ki nou lalwa i aplike kont sa bann kriminel san konsyans?  Ki nou pe fer pou redres, minimiz ou elimin sa bann sitiasyon degoutan e alarman?

Wi Mr Deputy, i alarman akoz zisteman bann statistik ki loter Mosyon, apre son bann resers aprofondi in prezant nou la ozordi, i demontre en sitiasyon tre enkyetan.  Pou sa pti popilasyon Sesel, sa bann sif ki’n ganny prezante i sokan.  E sa i zis bann ki nou konnen ouswa ki’n ganny raporte.  Mon asire ki i annan ankor ki pou en rezon ou en lot, nou pa okouran ou pa pe ganny raporte avek lotorite.

Sa bann statistik Mr Deputy, i dir nou en ta keksoz.  I montre nou en ta keksoz.  Me si nou zis asize e krwaz lebra e pa fer nanryen, sitiasyon pou vin pli pir e statistik pou bat dan plafon, pandan ki nou bann malere zanfan inosan pou kontinnyen soufer par sa bann labi kriyel.  Lanmenm ler nou pou vwar nou lavenir, lavenir nou zoli pti pei ganny menase akoz se sa menm bann zanfan ki pou vin adilt demen.  Definitivman, sa move leksperyans pou afekte zot e riske fer zot pa kapab kontribye pozitivman dan sosyete, ou menm fer zot an retour vin en problenm pou lasosyete zot osi.  Alor, mon ensiste ki aksyon serye e imedya i bezwen ganny pran pou protez sa bann pti inosan.  E la nou dir, revwar lalwa, enplimant e entansifye lalwa e pini severman bann ki fer soufer nou bann zanfan.  Abizer pa merit nou konpasyon.  Abizer pa merit vin bann ero.  Abizer napa okenn plas whatsoever dan nou sosyete.

Mr Deputy, mon rekonnet ki i annan en bon pe keksoz ki nou Gouvernman e lezot lorganizasyon in fer e ankor pe fer pou asir proteksyon nou bann pti trezor.  Mon salye tou sa bann zefor e nou tou nou apresye.  I osi annan letid detaye ki zisteman ganny fer dan sa direksyon pou asses nou sitiasyon, pou egzamin gravite vyolans kont zanfan, vwar drwa bann zanfan e konvansyon e framework legal osi.  Mon konvenki ki nou devret al pli lwen e vin pli ferm e proaktiv aprezan.  Annou aplik lalwa parey i devret ganny aplike.  Pinisyon apropriye e tre sever kont bann abizer i a form parti metod pou adres nou sitiasyon aktyel.  Sa framework legal konpreansiv pou ed nou pei bokou e dekouraz bann labi kriminel.

Mr Deputy, nou tou nou konnen ki labi en zanfan i mal e pa akseptab.  Alors nou tou nou bezwen ralye nou zefor kont sa.  Lekel ki ti a kontan son zanfan ganny abize e vin viktim vyolans kont zanfan?  Antouka pa mwan e mon asire ki okenn paran ki vreman kontan son zanfan pa ti a swete ki sa i ariv avek son zanfan.  Me sa danze i reel.  Sa danze i la toulezour e sa i fer nou enkyet.  Alors, annou met zefor ansanm.  Annou zwenn ansanm.  Annou lager lebra kase kont sa fleo.  Annou donn lanmen elimin sa monst dan nou sosyete.  Annou dir non a labi e vyolans kont zanfan.  Annou anvoy en mesaz kler pou tou bann abizer.  Annou donn koudmen nou Gouvernman e lezot partners ki annan nou zanfan a ker.

Pou mwan, tou zanfan i nou zanfan.  Zanfan mon vwazen i osi mon zanfan akoz sa ki mon pa anvi i ariv ek mon zanfan, mon pa ti a voudre i ariv avek zanfan mon vwazen osi.  Tou zanfan i annan en drwa pou grandi byen e an sekirite dan “Nou Nouvo Sesel”.

Mr Deputy, set avek zimaz zoli sourir mon 2 zanfan dan mon lespri ki mon pou konklir mon lentervansyon.  E set avek zot e tou zanfan Seselwa an tet ki mon pou donn sipor total sa Mosyon.  Mersi.

MR DEPUTY SPEAKER

Onorab Jacqueline.

 

HON SULTANE JACQUELINE

Mersi Mr Deputy.  Bonzour tou Manm Onorab e tou dimoun a lekout.  Mr Deputy, labi zanfan parey mon bann koleg in fer resorti i annan plizyer definisyon e i pran plizyer laform.  Labi fizik, emosyonnel, seksyel, mal swen, neglizans eksetera.  Sesel in fer bokou e i ankor pe fer son mye pou asire ki tou zanfan i ganny bann meyer sans dan lavi.  Grandi dan en bon lozman, lasante de baz e asir en bon ledikasyon ki a la porte tou zanfan, pou ki zot grandi e devlop dan dignite e lafyerte koman en sitwayen responsab.  Dan en tel ankadreman sosyal, i reste pou en paran zwe son rol primordial, protez son zanfan, elve, edik li bann bon savwar fer e savwar viv, aplik bann bon disiplin pou li devlop son karakter e bann bon latitid pou li pa vin en lese fer.  Paran i bezwen travay dir pou donn li son bann bezwen parey manze, labiyman, protez li kont tou danze ki kapab fer li dimal e anpes li grandi.  I domaz ki sa menm paran i swazir pou li pa desarz sa responsabilite.

Sesel Mr Deputy, en fanm ouswa en zonm i annan tou mwayen pou li ganny akse avek bann metod kontrol familyal ki ankor i gratwit, pou li deside si i anvi fer en zanfan ou non.  En mwayen e privilez ki bokou napa atraver lemonn.  Mon toutafe dakor avek Onorab Vidot ki Gouvernman, in ler pou revwar lalwa pou pli byen pini bann ki koupab pou labi zanfan.

Mon pou vot pou sa Mosyon akoz mon konvenki ki i pour fer en paran pran byen son responsabilite e mazin 2 fwa avan i komet en labi.  I vre ki pa zis paran ki komet bann akt labi lo zanfan, me i vin pli mal e orib kan en paran ki komet en tel krim.  De no zour, i pran en travayer sosyal e tou bann lazans konsernen tro bokou letan pou azir dan bann fanmiy kot zanfan i ganny abize.  In ler pou revwar lalwa e prosedir kondannasyon.  Menm si in annan enn de kondannasyon, parey Onorab Vidot in fer resorti, dan bokou lenstans, mazorite ka pa ganny anmenn devan Lakour, apre ki zanfan in ganny tire avek sa bann paran pou bokou rezon ki’n donnen.  Sa i leka Mr Deputy, akoz ou vwar menm manman i fer premye, i ganny retire ek li, en dezyenm, en trwazyenm e tousala i fini dan fwaye.  Letan Gouvernman pe pran swen avek son bann zanfan, li i pe viv en lavi an foupanmal.  E parey Direkter vilaz, Mr Hoareau ti fer resorti yer swar dan son interview, ni menm pase pou rann en pti vizit.  Zanfan i fer son premyer kominyon, apre lakonfirmasyon san prezans son paran ki i konnen i kek par.  Sa bann zanfan dan fwaye Mr Deputy, zot soufer bokou.  Zot ganny tou dan fwaye manze, zouzou, plis konfor, zoli lenz, me sa ki mank zot se lanmour en paran ki iranplasab.  En zanfan i toultan pa vwar defo son paran.  Menm apre bokou labi, zot kontinnyen annan sa latasman e mank prezans e lafeksyon zot manman.  Mon’n pas atraver sa leksperyans kot en zanfan i kontinnyen rod rezon pou pardonn son manman akoz i pankor vin vwar li.  Rezon ki zot donnen par ler, akoz mon fer pa bon, in dir mwan ler i ganny lakaz i pou vin sers mwan, mon vwazen ki ti fer sosyal vin sers nou, sosyal ki pe anpes mon manman vin kot mwan e menm annan ki pas zot letan rode kimannyer zot pou sove.  Bokou zot i tonm dan depresyon e pa montre okenn motivasyon dan zot lavi.  Sa i antrenn en move lenpakt lo zot laprantisaz, menm si mis i esey fer zot mye.  I annan de ka kot zot manifeste bann konportman ki pa akseptab dan laklas pou montre zot mekontantman.  E vwar sa diferans ler zot paran ouvyen manm zot fanmiy i vin vwar zot.  A sa staz, mon ti a lans en lapel avek sa bann paran, spesyalman bann manman ki’n soufer pou met zot zanfan lo later, vivan e an bonn santé, pou ekout lapel zot bann zanfan ki zot in neglize.  Omwen, rann zot en vizit pou montre e dir zot ki zot kontan zot.

Mr Deputy, en realite ki nou osi bezwen koz lo la i ki arive avek sa bann zanfan letan zot in ariv adilt dan bann fwaye e zot ganny demande pou kit fwaye pou de bon?  Bokou zot in perdi labitid avek zot fanmiy ki antouka pa’n oule responsab zot ler zot ti pti, i vin pli move ler zot in gran.  I annan ki ganny en travay stab e en bon fanmiy, oubyen en bon msye ou madanm pou reste avek, me laplipar zot i tonm dan drog, lalkol, fer piti tre zenn, pas isi, pas laba.  Napa personn dan zot kote.  Zot santi zot perdi, konfize e tousel.  Bokou i demande, akoz zot ti ganny retire dan zot fanmiy e plitar zot ganny remet lo semen pou debrouy lo zot menm?  Pou laplipar, zot fanmiy pa rekonnet zot e zot ganny konsidere koman etranze.  A zot tour, zot komans met zot zanfan a risk pou li ganny abize, oubyen abiz zot zanfan zot menm akoz zot napa en bon reper e zot pa konnen e napa en bon legzanp kimannyer pou elev en zanfan e sa serk visye i kontinnyen.  Parey resers in prouve, en zanfan ki’n ganny abize i annan tandans vin en abizer ler i gran.

Mr Deputy, i annan lalwa kont lofans labi zanfan.  In ler pou enplimant pinisyon korektif anver bann paran pou zot pran zot responsabilite.  Parey Onorab Fideria in dir, mon dakor avek li.  En kondannasyon ferm avek ankadreman edikasyonnel pou ki ler zot sorti zot sorti pou vin en pli bon paran pou zot pran zot responsabilite.  Mersi Mr Deputy.

 

MR DEPUTY SPEAKER

Onorab Esther.

 

HON NATASHA ESTHER

Mersi Deputy Speaker.  Bonzour tou dimoun a lekout.  Mr Deputy, pou mwan sa Mosyon i enn ki mon pou siporte akoz en zanfan pa kapab defann son lekor.  En adilt i kapab defann son lekor kont en lot adilt, me pou mwan sa ki pli mal, si en adilt pe abiz en zanfan.  En zanfan i lespwar nou fitir e pou mwan sa ki bon pou nou zanfan i bon pou mwan e pou Sesel an zeneral.

Labi zanfan.  Mr Deputy, kan, keler e kimannyer imen in arive ganny lespri e en leker pou abiz lo en inosan parey en zanfan?  Kwa ki fer zot abiz en zanfan?  Levolisyon lavi, lenpakt lekonomi, presyon lavi, manifestasyon move lespri, degradasyon moral e spirityel?  Tou sa i bann larepons posib.  Dapre statistik prezante par Departman Legal ek Child Protection Unit kot Servis Sosyal, ka labi zanfan pe kontinnyelman ogmante.  Zis pou 2011, 7 ka labi seksyel ti raporte lo Praslin e sa ti lo bann fiy anba 15an.  Pou 2012, Zanvye ziska Me, 5 ka labi ki konpri labi seksyel e fizik in ganny raporte ankor lo Praslin.  Sa i selman bann ki’n ganny raporte, Mr Deputy Speaker.  Me konbyen ankor ki per pour apros devan e ki pe soufer dan izolasyon?  Serten paran avek levolisyon lavi i refize pran zot responsabilite e zanfan i ganny neglize e lese fer.  Paran i fail pou fer provizyon bann bezwen neseser pou zot zanfan, tel ki manze, lenz, en landrwa prop pou zot zanfan reste, sipervizyon zot zanfan eksetera.  Serten zanfan i ganny konsevwar dan bann relasyon ki pa stab, anba lenfliyans drog ek lalkol e souvannfwa i se sa menm zanfan ki ganny neglize akoz paran pa oule aksepte zot.  Serten zanfan i ganny bann pinisyon malapropo pou zot laz, parfwa akoz paran limenm i tro sever, in ganny pini koumsanmenm dan lepase e trouv sa kalite pinisyon akseptab.  Serten zanfan i ganny ekspoze avek bann film ou liv pornografi dan zot lakour menm.  Serten i ganny touse malapropo e serten abizer i vyol zanfan.  Serten zanfan i ganny zoure, maltrete e dekri par tou sord kalite mo, pa’n zanmen ganny maye, anbrase e karese.  Lavi serten zanfan ki fek ne i an danze o moman ki i ouver son lizye akoz manman ti lo drog, ou ti pe abiz lezot sibstans pandan lansentman.  Serten zanfan pe ganny servi koman prostitye pou al rod larzan pou anmenn kot lakour.  Serten zanfan pe transport e vann drog pou zanmi e fanmiy.

Mr Deputy Speaker, lalis i long e les mwan adres serten pwen refleksyon.  Konbyen lakour ozordi dan Sesel ki annan en fanmiy konplet e stab?  Konbyen lakour kot fanmiy in kase e nou vwar manman tousel ki pe travay pou sonny son zanfan?  Konbyen lakour ki annan prezans en boper dezonnet e limenm li i en abizer?  Konbyen lakour kot manman pa kapab depler sa menm boper akoz i per pangar i a perdi sa pti larzan lafen di mwan?  Konbyen lakour ki zanfan i asize ek paran pou fimen e bwar ansanm?  Konbyen lakour ki zanfan i antre avek drog e paran pa kapab dir e fer nanryen?  Konbyen paran ki les zot zenn fiy ou pti garson al pas wikenn ou vakans kot en lot lakour, san konnen lekel ki viv dan sa lakour e kwa ki pase kot sa lakour?  Konbyen paran ki en fwa letan i rann vizit kot lekol e get attendance son zanfan?  Konbyen paran ki konn frekantasyon son zanfan?  Konbyen paran ki pran telefonn mobil son zanfan e analiz bann text ki ganny sirkile lo sa telefonn?  Konbyen paran ki asiz ek zot zanfan e eksplik zot ki savedir labi?

Mr Deputy Speaker, atraver mon resers, mon’n dekouver ki i annan plizyer lazans avek en portfolio pou protez zanfan e plizyer lalwa ki pe aktyelman protez bann zanfan kont labi.  Premyerman, plizyer lartik anba nou Konstitisyon i fer provizyon pou drwa e proteksyon tou zanfan, sa leksepsyon.  Nou osi annan Children’s Act, Violence Act, nou annan sa komisyon nasyonal pou proteksyon zanfan, Kod Penal, bann lazans parey Child Protection Unit anba Divizyon Servis Sosyal, NCC, CARE, Tribinal Lafanmiy eksetera.

Mr Deputy Speaker i annan bokou.  Lalwa i la, polisi i la.  Kote eski nou pe al mal?  Avek tousala, mon santi ki ler in arive pou tou sa bann lazans asiz ansanm e revwar kote nou kapab travay ansanm pou byennet nou bann zanfan.  Travay ansanm pou revwar lalwa.

Mr Deputy Speaker, isi Sesel i bezwen annan sa bann bon volonte pou fer keksoz.  Fodre nou pa per pou nou pran bann desizyon brav ki fer ki bann zanfan i kapab ganny proteze dan sa pei.  In plis ki ler pou nou annan en servis ki manage bann zanfan ki for e i bezwen enn ki efikas.  Bann dimoun ki pe travay avek sa servis i bezwen bann profesyonnel kalifye e zot bezwen bann dimoun ki doue e pasyonnen pou sa metye.  Gourvernman i bezwen pe monitor standar sa bann servis e kordin bann polisi e progranm pou asir en lapros pli konpreansiv ki konsern bann issues ki konsern zanfan lo nivo nasyonal, lokal e an partikilye bann mekanizm i ganny finanse adekwaman e siporte par bann lozistik.

I bezwen annan plis training pou bann zofisye lapolis, pou vin pli profesyonnel dan zot lapros, sirtou an sa ki konsern kimannyer zot manye bann case, levidans e lenvestigasyon an sa ki annan pou fer avek labi zanfan.  Bann zofisye lapolis ki oule fer en karyer dan domenn Child Protection i merit kapab fer li e zot pa merit ganny rotate dan lezot seksyon lapolis.  In plis ki ler pou nou annan en servis 24er ki monitor e reakte kan i annan en ka labi ki arive.  In ler pou nou pei fer en evalyasyon lo lakantite larzan e resours ki ganny depanse dan departman Gouvernman, sekter prive e sosyete sivil pou evalye kou, kalite, efikasite ki ganny met a zot dispozisyon koman servis pou nou bann zanfan.  In plis ki ler pou nou annan en sistenm dokimantasyon ki baz lo resers e kot nou annan lenformasyon reel ki permet nou formil e evalye nou bann progranm e polisi pou fer avek servis e enplimantasyon konvansyon drwa zanfan.

Mr Deputy, nou bezwen azour avek lenformasyon e pare pou asiste nou avek konteks reel nou sosyete.  Nou osi bezwen kapab konpran vre definisyon langazman avek zanfan e osi konpran zot bann pwennvi.  Rod fason pou permet zanfan ganny sans fer desizyon, me osi donn en serten limit pou sa.  En Bidze i devret ganny met an plas pou inifye bann tel aktivite.  Met an plas National Co-Ordinating Body avek en fon rezonnab pou formil bann treaty.  Servi teknolozi pli modern parey bann servis internet, tel ki bann network sosyal ki pou kapab enkli en pli gran group zanfan.  Bann Sef Egzekitiv e osi bann civil servants i sipoze ganny lantrennman lo kimannyer pou angaz avek sosyete sivil.  Lekol i devret ankouraz manrmay pou form bann group kot manrmay i etidye ansanm, kot sa ki pli akademikman pli konpetan i a ed sa ki pli feb avek bi pou elev nivo ledikasyon bann zanfan.

En letid baze lo akoz manrmay i kit lekol zenn i devret ganny fer pou vwar sours sa bann kalite problenm e osi rod bann solisyon, tel ki letid vokasyonnel ou lezot loportinite dan lanplwa e ed zot pou entegre dan lasosyete.  Curriculum i devret ganny revwar e nou bezwen rod fason pou enkli ledikasyon lo drwa imen e drwa zanfan dan curriculum. Bann metod lansennyman ki ofer plis enteraksyon ant zanfan ek ansennyan i devret ganny met an plas.  School councellor i devret non selman pe zis fer referral, me ganny empower pou deal avek sa bann problenm.  Nou devret pli konsernen avek lakantite manrmay ki sov lekol e prefere pou marsaye.  E lekol i devret zwe en rol pli enportan pou travay avek en tel group manrmay.  Nou osi bezwen trouv fason pou ed bann zanfan ki ganny sispann e reste kot lakour san okenn sipervizyon en adilt.

Mr Speaker, lo kote Praslin, i neseser pou annan en Family Squad anba seksyon lapolis ki travay spesifikman avek bann ka labi.  Ka i aktyelman pe ganny refer lo Mae e vwala kot retar pou travay lo sa bann ka i okazyonnen.  I annan de ka kot ler zanfan i pare pou fer medical assessment sirtou dan ka labi seksyel, nou napa en gayni a plen tan lo Praslin e zanfan i bezwen deplase pou al Mae, si non, zanfan i bezwen esper letan gayni i monte dan Zedi.  En lot konstrent se ler i annan nesesite pou retir sa zanfan dan sa lanvironnman e met li dan en landrwa safe.  Lo Praslin Mr Deputy Speaker, nou napa sa landrwa konvenab.  Nou bezwen en landrwa pou nou protez nou bann zanfan.

Avek sa Mr Deputy, mon oule dir ki ler in arive pou osi annan en revivman moral e spirityel dan nou pei, kot tou dimoun i a konn son vre valer lo sa later e met an pratik sa ki Bondye pe demann nou pou fer.  Zanfan i en kado Bondye.  E ki kont nou pou rann demen avek sa kado ki’n ganny donnen a nou?  Avek sa Mr Deputy Speaker, mon pou aport mon sipor lo sa Mosyon e mon pou dakor ki nou bezwen anforsi seryezman nou bann lalwa pou pini tou bann abizer.  Lalwa san pitye akoz letan zot abize, zot abiz san pitye.  Lalwa kont paran, lalwa kont bann soutirer.  Mersi Mr Deputy Speaker.

 

MR DEPUTY SPEAKER

Onorab Muriel Marie.

HON MURIEL MARIE

Mersi Mr Deputy.  Mr Deputy, Mosyon anmennen par Onorab Vidot i fer mwan realiz 2 keksoz.  Premyerman se labi zanfan i reste en gro problenm dan nou sosyete.  Dezyenmman, ki lalwa i reste en mwayen pli efikas pou lit kont nenport move pratik, enkli labi kont bann zanfan.  Mr Deputy, labi zanfan i en soufrans lo son bann viktim.  I en douler lo paran sa bann zanfan, i en tromatizm pou sa bann zanfan e i en laont pou lasosyete.  Sak fwa ki en zanfan i tonm viktim labi e lasosyete pa reazir, i fer ki loter sa labi pa ganny pini.  Sak fwa ki sa i arive, i vedir ki lasosyete in azir koman konplis sa dimoun ki’n abiz sa zanfan.  Lasosyete pa kapab reste endiferan oubyen enpwisan letan nou bann zanfan i ganny abize.  E letan lasosyete i reste enpwisan fas a labi zanfan akoz lalwa pa efektiv e efikas kont bann ki’n abiz bann zanfan.  Dan sa ka, se bann ki responsab pou pas lalwa e egzekit li ki konplis avek sa bann ki pe abiz nou bann zanfan.  Se rol Lasanble Nasyonal pou pas lalwa e sa bann lalwa i bezwen byen efektiv.  Se rol lapolis e lezot lenstitisyon parey Servis Sosyal pou egzekit sa bann lalwa e fer li vin efikas.

Mr Deputy, Lasanble Nasyonal se lavwa lepep.  Lepep Seselwa pe dir ki labi zanfan i en doub krim akoz zanfan i ganny abize e sa ki abiz zot i marse lib, byen vantar, akoz i annan trou dan lalwa.  Koman reprezantan lepep, i nou devwar pou fer tande nou lavwa lo sa size e byen for e koriz bann defayans ki annan dan lalwa.  Koman bann reprezantan lepep, i nou devwar moral pou koz lo non lepep e koz for letan i neseser pou defann bann drwa sitwayen ki pli vilnerab, parey nou bann zanfan.  Labi zanfan i egziste dan plizyer form.  Depi labi seksyel ziska labi linosans, an pasan par labi zot bann drwa, akse avek bann byen sosyal parey ledikasyon.  Nou bezwen azir vit e severman kont tou bann adilt ki pe vyol drwa nou bann zanfan, akoz zot aksyon pe fer nou pei ki souvan ganny dekri koman paradi vin en lanfer pou nou bann zanfan.

Mr Deputy, mon pou donn serten legzanp ka labi kont zanfan isi Sesel, pou demontre ki sa size i enn ki tre serye.  I annan en ka kot en adilt in vyol en fiy ki annan serten dezabilite mantal.  Levidans fourni par lapolis, medikal e Servis Sosyal i montre klerman ki sa abizer i koupab.  Me depi 2006, sa zafer pe trennen An Kour akoz Lakour pe demann levidans avek sa fiy ki annan problenm koze e i per swivan sa ki’n ariv li.  Dan sa ka, nou vwar ki viktim sa vyoler i osi vin viktim sistenm lazistis, akoz se prosedir Lakour ki pe gard sa vyoler lib.  Dan serten lezot ka seksyel lo zanfan, paran i santi zot oblize retir zafer An Kour akoz in telman tarde ki zanfan in ganny letan vin adilt e paran pa oule fer zot reviv sa levennman tromatizm.

Konmela dan Sesel, i annan paran ki pe anvoy zot zanfan anba laz vole pou anmenn kot zot.  Konmela dan Sesel, i annan paran ki pe refize anvoy zot zanfan lekol, zis pou fer louvraz dan lakour.  Mr Deputy, sa bann ka labi zanfan ki mon’n site i montre ki sosyete pe komans drive e nou bezwen azir koman i ankor annan letan pou limit dega e degradasyon sosyal.  Mr Deputy, gravite labi zanfan i ganny ilistre par lefe ki Prezidan Michel ti abord sa size dan son dernyen diskour lo Leta Lanasyon.  A sa lokazyon, Prezidan Michel ti dir, en adilt ki tronp konfyans en zanfan, abiz son linosans e abiz li seksyelman i komet en krim, en lofans tre grav ki nou bezwen pini severman e san pitye.  Prezidan ti al pli lwen, i ti osi propoz solisyon, letan i ti demande si sa bann ki’n vyol nou bann zanfan pa devret mont Marie-Louise zot osi.  E letan i ti demande si pa’n devret ler pou nou ranforsi konpetans e pouvwar Tribinal Lafanmiy e pini seryezman sa bann paran iresponsab.  Mr Deputy, Mosyon anmennen par Onorab Vidot i ranforsi mesaz Prezidan Michel ki ti pase pli boner sa lannen.  Sa Mosyon i rapel Gouvernman ki in ler pou azir lo parol ki en Prezidan i dir.

Mr Deputy, mon pa pou long akoz preske tou in fini dir par bann lezot Manm, mon pou aport mon sipor pou sa Mosyon.  Mersi.

 

MR DEPUTY SPEAKER

Bon, avek sa nou a pran en break. Nou a rezwenn 2er apre midi.

 

(Lunch)

 

MR DEPUTY SPEAKER

Mon a dir bonne apremidi tou bann manm Onorab, e nou a kontinnyen nou travay lo Order Paper. Prosen entervenan lo mon lalis nou pe kontinny deba lo Mosyon table par Onorab Vidot.  Aprezan mon ava envit Onroab Vengadasamy pou fer son lentervansyon.

 

HON SHERIL VENGADASAMY

Mr Deputy Speaker, Manm koleg Onorab bonn apremidi.  Apepre 4an pase Mr Deputy Speaker en papa ti pran son pti garson 6an e anmenn li anler dan leo Bel Ombre e ziska ozordi nou pankor vwar sa pti garson.  Premye ka koumsa ti anrezistre dan nou pti pei Sesel.  An 2004 Mr Deputy Speaker 2 zanfan aze 5an e 7an ti raport kot lofis Family Support Squad kot Kord Gard Santral apre ki zot paran ti’n sispekte ki zot ti pe ganny abize seksyelman.  Mr Deputy Speaker lankyet ki ti ganny fer en sispe ti ganny arete e sarze, ozordi nou pe debat lo sa Mosyon pou aksyon pli sever kont labi kont bann zanfan e ozordi menm le 12 Zen 2012 sa 2 zanfan i ankor pe tourn an ron dan zot kosmar.  Nou lakour pankor ganny ase letan pou ekout sa case, sa 2 zanfan pe esper lazistis, sa akize in ganny large, sa 2 zanfan ozordi i aze 13an e 15an an esperan aksyon sever kot nou Zidisyer.

Mr Deputy Speaker an 2003 en zenn fiy aze 13an ti ganny vyole vyolaman par son papa e case in ganny fer e prezant devan Lakour.  Ziska ozordi sa zenn fiy pankor vwar lazistis pou sa vyol, pou sa labi.  Mr Deputy Speaker ozordi sa zenn fiy i annan 20an e i pe travay e i refize a tou pri pou li al Ankour pou al donn lenvidans akoz dapre li i refize senpleman akoz in refer son lavi e apre tou sa ta letan pou li al re-mazin sa soufrans, pou li al re-mazin sa kosmar ankor ennfwa an esperan ki nou Zidisyer i pran aksyon pli sever.

Mr Deputy Speaker an 2004 en leokrir ti tap nou pti pei apre ki en sel zonm ti komet 4 diferan case ek lofans labi seksyel oubyen akt endesan kont 4 zanfan, sa lensidan ti anmenn medya e en lafoul dimoun kot Lakour pou al ekout sa bann case e pou konnen lekel sa akize.  Sa akize ti kondann 21an prizon pou sa 4 case, apre 1an edmi ki Lakour ti ekout zot case.  Eski kestyon ki nou ti pe poze, eski Zidisyer i swazir kan e lekel ka konsernan labi zanfan ki ganny ekoute pli vit?  Eski aksyon sever i zis dan serten ka oubyen eski fodre medya e ou Lepep Seselwa i desann kot Lakour pou demande ki serten ka i ganny ekout pli vit oubyen pou zot al regarde lekel akize ki  ganny enplike?

Mr Speaker lalwa zanfan Children’s Act i definir tre byen bann lofans kont zanfan.  Nou Kod Penal sapit 15 i osi definir bann lofans kont moralite ki enkorpor labi seksysel, fer aksyon seksysel ek en zanfan, komet en akt endesan i serten bann lofans anba sa sapit e nou lalwa i ganny amande pou redefinir serten lofans en serten santans ziska en maximum santans 20an prizon. Mr Deputy Speaker mon lentervansyon se pou partaz vre fe e pou partaz leksperyans difikilte e pou propoz rekomandasyon koman en ex-zofisye lapolis, koman en ex-zofisye Family Support Squad dan Kord Gard Santral.  Pou bann tel ka pou ki aksyon konkret i ganny pran e serten sa bann ka ki monn mansyonnen pli boner i zis serten dan en kantite ka raporte oubyen bann ka ki ziska ozordi pankor ganny raporte.  Lanpler sa problenm i ganny metratize letan i annan en ka espesyonnel parey dan sa enn ka ki monn mansyonnen kot sa Msye in ganny kondannen pou 21an prizon, me apard sa nou pa vwar bokou lo medya e nou pa tann bokou, kan ofe i annan bokou sa bann ka dan nou pti pei Sesel.

Mr Deputy Speaker nou pa pou kapab pran aksyon pli sever si bann ka pa ganny byen deal avek, si sa bann ka pa ganny byen fer lankyet.  Nou Gouvernman in etablir dan 4 departman esansyel bann unit ki nou apel bann Child Protection Unit, sa se dan departman Servis Sosyal, departman Lapolis, departman Ledikasyon e departman Lasante.  Sa bann unit i en nesesite, i bann pti unit spesyalize pou sa bann group dimoun e sa se nou zanfan.  Nou bann zanfan pa kapab ganny menm tretman ek adilt letan nou pe fer lankyet e zot prezant zot sitiasyon, zot labi diferaman e lamazorite sa bann zanfan ki ganny abize i vreman tro matize e lenportans e fason anmas levidans I signifikan.  Bokou defwa letan en tel rapor i antre zofisye lapolis dan sa unit Family Support Squad ek sa zofisye sosyal dan Child Protection Unit i bezwen inisye zot lankyet ansanm.  Tou le de akter i bezwen travay ansanm akoz i neseser pou evite ki sa zanfan i kontinnyelman pe repet zistwar son labi e i kapab afekte levidans.  Kontak i ganny fer kot sa menm unit kot lopital pou fasilit akse ek en gayni pou lasistans medikal ek legzaminasyon ki vreman enportan pou lankyet e esansyel pou prosekisyon.  Mr Deputy Speaker me ki nou vwar ozordi? Apre plizyer lannen ki sa bann pti unit dan tou sa bann departman Gouvernmantal – Gouvernman in ganny set up zot ankor dan menm letap.  Pandan mon moman resers Mr Deputy Speaker, mon’n fer en pti parkour dan Minister Lasante, mon’n fer en pti parkour dan lapolis ek dan ledikasyon e mon vwar poudir zot dan menm letap ki mon ti kit zot.

Ozordi mon koleg Onroab pou Larivyer Anglez in met sif ek fe ater ki sa bann case pe ogmante, me ki nou vwar?  Tou le 4 sa bann unit enkli dan lapolis i ankor parey.  Par egzanp dan lapolis i ankor annan zis 5 zofisye parey ki mon ti’n kite, ki’n komanse pou fer lankyet e ki bezwen fer lankyet dan tou ka ki ganny raporte lo Mahe, Praslin e La Digue.  Mr Deputy Speaker sa i pa en fe posib!

Annou pran par egzanp lo Praslin La Digue Mr Deputy Speaker, akoz ziska ozordi nou pankor kapab reisi donn sa menm servis lo sa 2 zil ki nou okouran dan lapolis, dan Servis Sosyal, dan Lasante, dan ledikasyon ki lo sa 2 zil i annan plizyer ka e ki annan plizyer ka ankour ki ankor pe ogmante e ki pa pe ganny raporte.  Mr Deputy Speaker sa bann unit dan sa bann departman i merit ganny byen regarde, si nou anvi aksyon serye i ganny pran.  Dan lapolis sa unit i zis en pti lofis pou bann ki pankor al regarde, i en pti lofis avek 5 zofisye ek detrwa latab ek detrwa sez kot sa bann zofisye i asize pou fer zot travay.  Letan i annan en interview pou ganny fer sa zofisye ki pe fer sa interview i reste sa bann lezot zofisye i bezwen sorti deor pou allow sa zofisye fer son interview.  Dan sa menm batiman Kord Gard Santral ek tou son lanpler krim ek sispe ki pe monte desann dan minot, kestyon ki mon pe poze se kimannyer nou oule sa bann zanfan santi zot an sekirite, an konfor dan en tel pti lofis dan nou Kord Gard Santral?  Eski sa pa pli efrey zot e tro matiz zot?  Oli sa proze e sa plan pou konstri en landrwa pou sa bann unit ansanm kolektivman lo Perseverance avek fasilite pou ed en zanfan an konfor donn son levidans byen a son fason e dan son letan.  Pou fasilit sa travay ansanm avek bann lezot unit ki bann akter kle pou detekte bann tel labi.

Mr Deputy Speaker lenportans sa Mosyon i bon nou bezwen protez nou zanfan, nou bann pti trezor.  Annou regard sa menm unit dan lopital, in ganny trouve dan en kwen, dan fon batiman Trwa  Zonn avek detrwa pti sez ek plizyer lezot pasyan ki pe ale vini dan koridor.  Kestyon ki mon pe poz mon lekor, eski nou realiz lenportans signifikasyon sa bann unit dan nou departman?  Ki dernyen fwa serten nou konsernen nou’n pas dan sa bann landrwa, nou’n regarde, nou’n konstate e nou sey propoz serten amelyorasyon oubyen nou konn sa bann unit zis letan i ariv en tel gro lensidan ki manm piblik in trouv alarman parey dernyenman sa pti baba 3 mwan ki ti perdi son lavi.

Mr Deputy Speaker tou sa bann ka endividyelman i alarman, i efreyan.  Letan en zanfan 5an i ganny vyole, letan en manman i bril son zanfan avek delo so, letan en paran i get film ponografik avek son zanfan oubyen permet lezot zonm fer serten aksyon seksyel ek son zanfan pou serten byen i alarman e i efreyan.  Si sak lannen dan nou parkour koman en nasyon en poursantaz nou zanfan i perdi zot linosans, zot nanm i ganny vyole se en poursantaz signifikan nou prosen popilasyon, nou fitir sosyete.  Si ziska prezan bann proze ek bann bon plan ki’n ganny detaye, met ater par tou lazans konsernen pe asize lo en shelf silvouple annou retir li.  Nou’n asize a plziyer repriz dan plizyer forum, dan plizyer lazans nou’n diskite, nou’n rekomande, nou’n met ater bann propozisyon – silvouple nou pe dir zot annou retire, annou fer aksyon e sa se aksyon sever ki nou merit pran.  Si nou pe esper ankor letan oubyen nou pa pe donn ase letan pou deal avek sa bann tel sitiasyon – silvouple annou fer li.

Mr Deputy Speaker plizyer forum in ganny fer lo sa size, plizyer proze ki ti pou pe benefisye osi sa 2 zil ser Praslin e La Digue, plizyer rekomandasyon in ganny fer.  Kestyon ankor ki mon pe poze, se eski nou pe esper sa sif ogmant plis? Eski nou pe esper plis nou zanfan soufer? Eski pa sa ki nou pe demande letan nou pe dir aksyon serye e imedyat?  Alor Mr Deputy Speaker mon rekomande ki sa Komisyon ki regroup tou lazans konsernen i revwar tou sa bann proze, rekomandasyon pou amelyor lanvironnman.  Training, bezwen tou bann akter prensipal dan sa lalit.  Nou pe rekomande ki en resers detaye o profon i ganny fer pou determinen ki kantite ka labi devan lapolis, devan biro Atorni Zeneral e devan Lakour ki ankor pending pou ganny ekoute – sa akoz Mr Deputy Speaker i pa’n posib pou kolekte okenn lenformasyon konkret, presiz e vit lo sa topik dan tou sa bann departman e lenstitisyon enportan dan sa lalit, sa se enkli Zidisyer ek biro Atorni Zeneral.

Mr Deputy Speaker mon pe demande ki Sef Ziz i dir ek Lepep Seselwa e ek sa Lasanble ki son plan imedya pou deal ek bann back log case ki i annan plizyer lannen pe espere, pe ale, pe vini pou ganny ekoute.  Nou oule ki Sef Ziz i dir avek Lepep Seselwa ki son plan pou fast track sa bann tel ka devan son Lakour pou asire ki nou bann zanfan, nou bann pti trezor i vwar lazistis me zot pa vin en dezyenm viktim nou prop Zidisyer.  Mon pe rekomande ki lapros ki Zidisyer in adopte pou speed up bann case trafficking devan Lakour i osi oubyen pli byen kapab ganny aplike dan ka nou bann zanfan.  Mon pe rekomande ki tou le 3 departman ki tou le 4 departman Lapolis, Ledikasyon, Servis Sosyal e Lasante i revwar sa bann unit esansyel dan zot lorganizasyon, kot napa resours annou met resours, annou revwar nou lapros, annou revwar nou fason travay.  Mon pe lans en lapel avek Servis Sosyal – silvouple annou tap sa teren, annou al gete, vwar konbyen zanfan ki pe soufer dan silans.  Mon pe lans en lapel avek nou kominote, mon zanfan i ou zanfan, ou zanfan i mon zanfan.  Mon pe rekomande ki Minister konsernen pou relans sa proze en Child Friendly Unit, sa landrwa ki ti’n ganny propoze lo Perseverence pou asire ki sa bann zanfan i annan en landrwa e sa bann unit i annan en landrwa kot zot kapab zwenn kolektivman pou asire ki lanket i ganny fer efektivman e dan byennet e dan lentere nou bann zanfan.

Mr Deputy Speaker aksyon pli sever pou mwan se en determinasyon, en komitman, en kordinasyon, en lavolante tou bann lazans konsernen pou zanfan, enkli en sekousman enorm nou Zidisyer pou asir aksyon sever, pou asir lazistis. Mersi Mr Deputy Speaker.

 

MR DEPUTY SPEAKER

Onorab Aglae.

 

HON ROMA AGLAE.

Mr Deputy, Manm Lasanble, tout monde alekout bonn apremidi.  Mr Deputy labi zanfan limenm i en size ki tre pros avek mon leker, akoz i fermal pou vwar en zanfan grandi dan labi ouswa ki’n viktim labi.  Dan mon traze koman Manm Parlman parfwa mon rankontre bann ki’n viktim labi mon asir ou ki i tris akoz parfwa set en fitir ki’n ganny brize e parfwa se sa bann menm viktim kan zot in vin adilt ki zot retir zot fistraksyon lo zot prosen ensi ki bann zanfan.  Alors i en akt ki tant pou repet son lekor.

An regardan nouvel 8er Dimans swar i annan konsern ki paran pe tant pou anvoy zot zanfan dan bann fwaye.  Mon konpran parfwa ki i annan bann sirkonstans eksepsyonnel e merite me nenport ki sirkonstans Mr Deputy i anmenn en problenm emosyonnel pou bann zanfan ki fer zot pa ganny sa swen, lafeksyon e gidans parantel, sikolozikman i afekte en zanfan.

Mr Deputy sapit 3 lartik 31 nou Konstitisyon i fer referans avek drwa bann zanfan, sou paragraph 2 i fer mansyon ki; leta pou asire anver bann tretman eksepsyonnel e Zidisyer ki en zanfan pa ganny separe avek son paran.  Ki nou pe vwar ozordi Mr Deputy?  I annan en sirkonstans kot paran ki ankor kapab i annan en opsyon ase fasil pou met zot zanfan dan lanmen sosyete, par egzanp dan en fwaye, e sa i lekontrer avek annan anplas en mekanizm efektiv pou gid sa paran lo son responsabilite anver fer grandi son zanfan.  Ensi ki I swe tou zanfan pou grandi avek son vre manman e papa kan lavolante Bondye i permet, sa i enn parmi bann polisi aktyel ki devret ganny revizite pou beynnet nou bann zanfan.

Koman metod proteksyon, si vreman nou anvi manifeste nou mekontantman koman par egzanp bann endividi ki komet lofans seksyel lo en zanfan, lotorite konsernen i devret konsider entrodwir en rezis apele Sex Offenders Register.  Malgre i pa tro popiler Mr Deputy, me sa i en pratik ki ganny enplimante dan plizyer pei koman parmi bann mezir pou dekouraz dimoun komet labi seksyel lo zanfan.  Parey nou’n entrodwir zil Marie-Louise pou bann trafiker drog i en lentrodiksyon kelkonk e devret ganny entrodwir pou bann labi zanfan ki ganny categorize koman en pardonab, tel ki labi seksyel.  Sa bann abizer I bezwen fer fas avek lekonsekanas ki grav.

Mr Deputy pou senpatiz avek bann fitir viktim labi zanfan demars i devret ganny fer pou ki okenn rapor labi zanfan i ganny met devan lotorite e bann lazans konsernen pou lenvestigasyon pli profon.  Mesaz i devret fortman fer resorti ki pou napa okenn sans ouswa senpati avek bann ki komet sa bann labi pou rezon zot repitasyon karyer, kouler politik, ouswa pozisyon dan lasosyete.  Annou fer li pou nou bann zanfan silvouple, si nou pa komans ozordi menm kan eski nou pou anvizaze komanse e konbyen fitir fodre nou kontinnyen les ganny brize avan nou realize pou pan aksyon.

Mr Deputy Speaker an referans avek en rapor Human Rights lo Sesel pibliye an 2010 resers in montre ki malgre i annan lalwa ki protez e promouvwar drwa zanfan i annan bann sirkonstans kot plizyer ka labi pa ganny raporte akoz swa sa zanfan in annan lafreyer viktimizasyon avek son abizer, swa son lot paran pa krwar dan son alegasyon e pli ankyetan kot paran zot menm lamazorite fwa bann manman i deside retir plent pou anpes prosekisyon.  Eski en dimoun ki’n komet en lofans labi zanfan i kapab pa ganny prosekite akoz son partner i deside pou pa fer zafer? Si nou sistenm prosekisyon pou drog i serye akoz lo size labi zanfan i pa osi serye?  Sa a mon avi Mr Deputy Speaker i demontre defayans dan nou sistenm prosekisyon, en pratik ki devret seryezman ganny revizite.  Ler plizyer pei devlope pe ranforsi e sey bous bann trou dan zot polisi aktyel pou protez bann zanfan, Sesel nou pa kapab kontinnyen avek en tel defayans dan nou sistenm prosekisyon, en dimoun ki’n abiz en zanfan i komet en lofans devan lalwa e kan i annan ase lenvidans pou prosekite dezorme lentervansyon emosyonnel e senpati son lot partner i devret fer fas avek son lekonsekans.  Dan bann tel ka nou demande alors oli drwa sa zanfan ki’n ganny abize, eski i normal pou li vwar son abizer pe zouir en lavi normal san ganny reprimande ouswa prosekite devan lalwa.  Alors mon pou rekomande ki sa trwazyenm brans leta i revwar sa bann tel defayans pou li byen protez nou bann zanfan.

Pou konkli Mr Deputy Speaker, mon pou fer resorti ki nou bezwen osi regard laspe ouswa sirkonstans ki fer en adil komet en tel lofans lo labi en zanfan, an dot mo nou bezwen osi kapab etidye sours sa problenm e met anplas bann mekanizm pou minimiz repetisyon bann tel lofans dan nou sosyete, se la kot i devret annan plis sa laspe ledikasyon familial, sa bon kominikasyon antre paran, zanfan e ansennyan e osi enportan laspe responsabilite paran ensi ki zanfan zot menm anver zot bann drwa.  Parey mon’n mansyonnen pli boner sirkonstans pou en paran donn son zanfan dan en fwaye i devret enn ki pli konpleks ki i ete ozordi, akoz i annan son problenm asosye ki i vin avek kot sa zanfan i grandi dan fistraksyon, dan ladetres parfwa i rann li eblouir e i perform bann akt anti-sosyal akoz i demande akoz mwan.  En zanfan ki santi li in ganny rezete Mr Deputy i pas dan bokou soufrans sikolozik.  Nou bezwen koman en pep, en pei e tou bann partner konsernen regard labi zanfan dan son totalite e ansanm esey adres problenm kot son sours e egalman enportan Mr Deputy ranforsi nou sistenm prosekisyon pou ki i annan en lenvestigasyon de pros avan ki bann akize pa ganny trouve koupab devan lalwa, mank resours dan bann tel sirkonstans pa ditou devret en leskiz.

Pou lanmour nou bann fitir zenerasyon Mr Deputy mon aport mon sipor total pou sa Mosyon.  Mersi.

 

MR DEPUTY SPEAKER

Onorab Lucas.

 

HON WILBY LUCAS

Mersi Mr Deputy.  Mosyon devan nou Lasanble pe rekomande ki Gouvernman i konsider revwar lalwa pou pli byen kapab pini bann ki koupab pou labi zanfan.  Mon lentervansyon lo sa Mosyon se pou esansyelman adres en pti pe leta nou lalwa prensipal ki gouvern konsern ki Mosyon pe adrese, idantifye serten defayans dan lafason ki pe ganny enplimante e pou zwenn avek loter Mosyon dan rekomandasyon pou adres bann defayans.

Labi zanfan dan son definisyon iniversel Mr Deputy i fer referans konm swivan parey in ganny site pli boner “Child Abuse is the physical, sexual and emotional mis-treatment or neglect of a child or children”.  Tou nou lalwa ki deza egziste pou protez bann zanfan in osi adopte menm definisyon koman child abuse. Mr Deputy Speaker, Sesel koman en manm Nasyon Ini ti parmi bann premye leta pou ratifye konvenan enternasyonal lo drwa sivil e politik ki protez bann zanfan e sa menm drwa in ganny enkorpore dan nou Konstitisyon anba lartik 33 parey bokou in koz lo la.  Lartik 33 nou Konstitisyon i enpoz en lobligasyon lo Gouvernman dizour pou pran bann mezir neseser e pou met anplas lalwa parmi lezot mezir pou donn proteksyon bann miner akoz zot pa kapab defann zot lekor kont okenn labi.  Par egzanp lartik 31 i defann ki en zanfan ki mwens ki 15an i ganny anploye pou travay.

Mr Deputy resers ki mon’n fer i annan aktyelman 26 morso lalwa dan nou sistenm legal ki pe tous drwa ek proteksyon bann zanfan.  Mosyon pe demande ki Gouvernman i konsider revwar lalwa pou pli byen kapab pini bann ki koupab pou labi lo bann zanfan.  Permet mwan fer en rezime lo leta nou lalwa esansyelman bann ki relevan ek sa Mosyon.  Premyerman annou get Children’s Act.  Sa lalwa ti ganny entrodwir pou la premyer fwa an 1982 e in ganny amande a plizyer reprizm.  Lamannman pli enportan ti vin an 1998 kot ti kre Tribinal Lafanmiy.  Tribinal ti entrodwir en letap enportan dan nou zirisdiksyon kot ti pran tou responsabilite pou determin lo tou bann ka ki annan pou fer avek miner ki avan ti pe ganny determinen par lakour siprenm ek lakour mazistra eksepte adopsyon ki’n reste avek lakour siprenm.  Tribinal i annan pourvwar pou pini bann paran ki pa sonny zot zanfan, pou bann ki negliz zot zanfan e sa i pran diferan dimansyon; par egzanp kot paran ki napa kontrol lo zanfan e zot les zanfan eran sirtou aswar dan semen.  Dan lapratik ler i annan bann ka parey nou vwar servis sosyal ki enterveni e sa zanfan i ganny anvwaye YRTC a sa lepok oubyen Vilaz Prezidan.  Me ti napa lezot travay swivi oubyen lobligasyon ki Tribinal ti fer li son devwar pou enpoz lo sa paran pou fer li pran son responsabilite.  La mon pou dir ki i annan nesesite pou revwar rol Tribinal Lafanmiy ansanm avek Servis Sosyal pou enplik bann paran ki pa’n pran zot responsabilite e ki’n les zot zanfan drive pou zot ganny sa lankadreman neseser anba en sistenm penal ki pou obliz zot partisipe dan sa prosesis reabilitasyon ansanm avek zot zanfan.

Mr Deputy Speaker Tribinal Lafanmiy i osi mandate pou fer lord pou tir en adilt dan lakaz kot en zanfan pe ganny abize swa seksyel oubyen fizik.  Dan lapratik Tribinal in toultan vwar li pli fasil pou retir sa zanfan e plas li dan swen en lenstitisyon me pa tous sa adilt ki normalman i sa boper e souvann fwa zot annan bokou lenfliyans lo sa manman ki menm parfwa ede pou fer case tonbe.

Tribinal i osi mandate pou determin lo bann ka vyolans domestik, sa lalwa ki adres vyolans domestik i ase resan e mon kapab dir i mord byen for.  I ti ganny entrodwir an lannen 2000, li osi i fer provizyon pou protez tou manm lafanmiy ki pe reste anba menm trwa enkli zanfan.  Si en paran oubyen en lot manm fanmiy pe fizikalman oubyen emosyonnelman abiz en zanfan ki’n ganny dekri koman en ka vyolans domestik sa ka i kapab ganny anmennen devan Tribinal swa par sa paran oubyen par Direkter Servis Sosyal ki Children’s Act i donn li pourvwar pou entervenir dan nenport ki sitiasyon kot en zanfan pe ganny abize e pou azir lo lapar sa zanfan.  La osi koman pinisyon oubyen solisyon Tribinal i kapab fer en lord pou retir sa abizer e dan ka kot abizer i sa paran lapros se pou donn sa zanfan en lord proteksyon avek serten kondisyon viz a vi sa abizer.  La osi i annan en problenm dan lapratik, nou kapab vwar 2 ka kot enn menm abizer pe ganny zize a 2 landrwa, i ape ganny zize devan Tribinal pou vyolans domestik e i ape osi ganny zize devan Lakour Mazistra pou en sarz kriminel bat en dimoun e fer dimal.  Sa prosedir fodre revwar.  I mon rekomandasyon si en zanfan pe ganny abize fizikalman oubyen emosyonnelman sa ka i bezwen al devan Tribinal Lafanmiy e non pa devan Lakour Mazistra.  Alor i bezwen annan en laranzman ant lapolis, biro Atorni Zeneral ek Servis Sosyal pou fer sa posib si i neseser pou amann lalwa.  Mr Deputy Speaker pli gro konsern ozordi parey in ganny dir dan bann lezot lentervansyon, se labi seksyel lo en zanfan.

Bann lazans ki responsab pou administre sa lalwa e pou anmenn ka bann ki koupab devan lazistis, malerezman zot fer fas avek bokou konplikasyon, sa nou vwar depi ler lankyet pe komanse ziska ler lankyet case in fini al Ankour kot en bon poursantaz bann ka labi seksyel pa kapab ganny met Ankour oubyen by the time i ariv ankour sa zanfan in fini vin en adilt e sa in fini perdi son lanpler, kot sa viktim koman en adilt i prezan dan en relasyon avek en boyfriend e i vwar li pe ganny demande pou vin fer en temwayaz ki kont son lentere a sa moman.  Se sa bann sitiasyon ki fer bokou bann abizer pa ganny pini.

Mr Deputy avan ki Kod Penal ti ganny amande an 1996 lalwa ti kler e I ti pli fasil enterpret ki la konmela, kot ti annan sa term rape avek definement.  Ozordi avek lamannman 1996 nou vwar en sel konotasyon ki apel sexual assult – ki anmenn en term maximum 20an prison.  Bokou kritik ozordi pe demnade ki i annan en rekonsilyasyon oubyen en amonizasyon ant nou Kod Penal e lezot lalwa kot nou pe dir ki en zanfan i selman vin en adilt ler i ganny son laz mazorite 18an.  Letan ki i ankor en miner anba 18an nou sistenm i bezwen donn li proteksyon, tandis ki nou Kod Penal ki i dir, ki en zanfan 15an i kapab donn konsantman pou laksyon seksyel, selman sa ki par anba 15an ki pa kapab donn konsantman e se zot ki pe ganny ilegalman abize seksyelman.

Mr Deputy Speaker Mosyon pa pe kestyonn rezon det akoz ti pran en desizyon pou fer sa lamannman an 1996 dan nou Kod Penal.  Me Mosyon pe demande ki tou lalwa ki’n ganny entrodwir pou protez bann zanfan i ganny revwar pou permet sa ki koupab ganny pini.  Ki letan nou lalwa ek prosedir lo sa size?  Aktyelman nou proze legal i permet en abizer espesyalman pou labi seksyel kapab ganny arete e ganny detenir ziska ler son ka i ganny ekoute devan Lakour.  Prose legal i osi permet Ziz ki pe ekout sa ka pou ekslir prezans manm piblik dan Lakour ler sa ka pe ekoute, egalman pou prose legal i permet sa viktim donn son temwayaz dan en fason diskre sa ki nou apel incamera kot sa viktim pa vwar sa abizer.  Serten lezot temwen i kapab osi donn levidans dan sa menm fason.  Sa prosedir ti ganny entrodwir par en lamannman dan nou Kod Prosedir Kriminel an 1995.  Aktyelman santans maximum ki nou lalwa i preskri pou labi seksyel i 20an prizon.

Mr Deputy Speaker loter Mosyon dan son prezantasyon in donn statistik pou detrwa lannen pase lo lakantite ka ki’n ganny anrezistre me pa’n arive ganny prosekite Ankour oubyen bann ki’n ariv Ankour pa’n kapab ganny en konviksyon e sa abizer in ganny large.  I annan plizyer lakoz pou sa rezilta, ki mon ava adrese ler mon fer mon rekomandasyon.

Mon senserman krwar Mr Deputy Speaker ki nou lalwa i andonne santé pou adres konsern ki Mosyon pe souleve, me par kont lafason ki i ape ganny enplimante e aplike i bezwen ganny revwar imedyatman.  Byensir i ava neseser pou entrodwir bann prosedir pou siport bann rekomandasyon ki pe sorti atraver bann deba dan sa Mosyon e la mon pe propoz sa bann rekomandasyon swivan:  Premyerman, ki tou bann labi zanfan labi zanfan ki swa fizik, neglizans oubyen emosyonnel i ganny zize devan Tribinal Lafanmiy.

Dezyenmman ki tou bann ka labi seksyel lo en zanfan i ganny zize devan en Ziz dezinyen dan Lakour Siprenm e sa bann ka i bezwen ganny zize dan en dele letan rezonnab apre ki lofans in ganny komet.

Trwazyenmman Mr Deputy Speaker, baze lo bann konsern ki’n eksprimen wi i pa akseptab pou en ka ki’n arive an 2006 e ozordi i ankor devan Lakour ler sa viktim in fini vin en adilt.  Ki sa Lakour kot sa bann ka labi seksyel pe ganny ekoute i okipe avek lekipman ki pou permet sa viktim donn son temwayaz incamera ki mon okouran en proze in deza ganny realize an partenarya avek NCC avek Zidisyer plizyer lannen pase, me akoz ki bann ki responsab pou fer sa proze fonksyonnen zot in plito swazir pou abondonn en konponan enportan ki pou ede anmenn plis lefikasite ver lazistis par sa tel mwayen teknolozi modern ki pe mars tre byen dan bokou zirisdiksyon.  Sa Lasanble pe lans en lapel avek Zidisyer, biro Atorni Zeneral ek BAR Association pou zwenn ansanm pou evalye kote problenm i ete ki pe anpes sa prosesis fonksyonnen ler tou lekipman neseser i la anplas.

Lot rekomandasyon Mr Deputy ki dan bann ka kot sa abizer pe reste dan menm lakaz avek sa viktim – ki prosedir i etablir byen kler pou ki Lakour i retir sa abizer dan sa lakour a en staz byen boner pandan ki lanket pe ganny fer e ziska ler ka i fini ganny ekoute.  Lot rekomandasyon ki biro Attorney General i revwar sa proviyzon lalwa ki fer en manman ki pe kolabor avek sa zonm ki’n abiz son zanfan pou li osi responsab pou en lofans kriminel e konplis akote sa abizer.  Sa normalman Mr Deputy i arive dan bann ka kot sa paran oubyen sa gardyen sa viktim i refize pou korpere avek Lapolis pandan staz lanket oubyen sey fer sabotaz pandan staz prosekisyon oubyen sa ki esey vin devan pou demande pou retir zafer kont sa abizer.

Ki provizyon i ganny entrodwir dan lalwa pou protez sa manman dan bann ka kot  boper ki’n abiz zanfan e pou evite ki sa manman i fer konproni avek bi pou defet lazistis zis pou li kapab protez son landrwa reste.  Akyelman Tribinal Lafanmiy pe donn proteksyon viktim vyolans domestik kot sa abizer menm si lakaz i pou li i kapab ganny ordonnen pou li kit sa fwaye e pou sa en peryod letan spesifik.  Ki bann prosedir kler i ganny etablir dan lalwa lafason ki Lakour i resevwar levidans lo lapar en zanfan byen zenn ki’n ganny abize me ki annan baryer pou li eksprim limenm, sa i osi egalman aplik pou en viktim ki mantalman retarde.

Finalman malgre mon’n fer lobzervasyon lo sa konponan laz konsantman pou laksyon seksyel ki konmela i 15an, mon ti a kontan osi demande ki en resers o profon i ganny fer an tenir kont devlopman rapid bann fiy ozordi avan ler ki nou fer okenn sanzman dan nou lalwa pou evite kot 2 dimoun ki’n tonm anmoure e kontan kanmarad alafen dizour sa garson i vwar li pe fer fas avek en saz kriminel e en santans prison.  Anprenon kont Mr Deputy ki nou lalwa ozordi i permet en fiy anba 18an pou kapab marye avek konsantman paran tandis ki en fiy anba laz 15an li osi i kapab marye avek konsantman en Ziz.

Mr Deputy Speaker sa i mon kontribisyon.  Mon pou donn mon sipor sa Mosyon. Mersi.

 

MR DEPUTY SPEAKER

Onorab Barbe, mic switch off, switch of mic Onorab Lucas.

 

HON NICOLE BARBE

Mersi Mr Deputy.  Mr Deputy koleg Onorab, bonn apremidi.  Mr Deputy devan nou i annan en Mosyon ki pe reflekte dezir e lanvi sosyete Seselwa pou met en lafen avek sa fleo ki apel labi zanfan dan nou pei.  Onorab in anmenn en Mosyon ki pre avek leker tou paran.  Si Mosyon pe demann pou revwar lalwa se senpleman akoz ki nou pep i santi ki sa sitiasyon pe plizanpli vin alarman e ki nou bezwen trouv en solisyon.

Labi zanfan i azir koman en tas lo konsyans en sosyete – si zanfan i fitir nou pei labi zanfan i tarni sa fitir ki normalman ti pou enn ki tre briyan.

Letan ki mon’n ekout Mosyon prezante par Onorab Vidot mon’n vitman konpran ki sa Mosyon set en kri douler ki sorti direkteman dan leker en kantite nou bann zabitan.  Sa Nasyon Seselwa i ranpli avek potansyel, nou pa kapab permet ki nou bann zenerasyon fitir i ganny tro matize menm avan ki zot ganny sans realiz zot potansyel.

Mr Deputy Speaker i annan en kantite ki’n deza ganny dir e ki pou ganny dir pandan bann deliberasyon lo sa size, avek sa antet mon pou plito limit mon prezantasyon pou senpleman konsantre lo bann propozisyon.

Kot sa size labi zanfan i konsernen nou premye zouti konba i devret toultan prevansyon, avan ki nou menm ariv los a nivo pinisyon koman an sosyete kretyen nou devret travay pou anpese ki nou bann pti inosan pa zanmen ganny abize.  La mon propoze ki sipor adisyonnel i ganny donnen pou bann lorganizasyon ki deliver sa servis ledikasyon ek counceling pou bann paran e mon pou osi profite pou remersi sa bann lorganizasyon non-gouvernmantal pou zot bann kontribisyon e lenfliyans pozitiv lo lasosyete.  Me petet konponan pli enportan dan prevansyon se ledikasyon – ki nou pe koz lo ledikasyon formel ouswa konpany lo medya, awareness lo sa problenm i bezwen ganny leve.  Nou pep i bezwen konsyan a tou moman ki bann abizer i en realite e ki serten parmi zot i prefer bann zanfan.  Le pwen ki mon pe sey fer se ki lalit kont labi zanfan i pa zis en konsern Gouvernman, lalwa ouswa bann lafors lord ek lape.  Sa lalit i devret en konsern pou sosyete an antye, si nou pou anvizyonn sikse lo sa dosye nou pou bezwen angaz zefor sosyete an antye.  Nou pe koz lo responsabilite kolektiv lo en size ki konsern nou tou.  Alors dan sa lalinny mon propoze ki Gouvernman i angaz partisipasyon tou bann lorganizasyon ki reprezant ouswa milit pou lafanmiy e tou bann diferan denominasyon relizyez ki pou pare pou donn en koudmen dan sa lalit.

Mr Deputy se sa bann lorganizasyon lafanmiy ki byen plase pou edik bann paran lo meyer fason pou kontrol zot bann lemosyon anver zot zanfan e kwa ki egzakteman apropriye, la ankor i bezwen ganny dir ki i deza egziste bann progranm lo parenting ki pe ganny fer e si I neseser nou pou bezwen idantifye resours pou siport sa bann progranm.

Mr Deputy sa i anmenn mwan lo nou bann ansenyan en group dimoun ki souvan nou demann zot pou fer tro bokou e avek tro pti gin resours e formasyon, se nou bann ansenyan e la mon pe enkli bann school counselors ki premye lalinny kontak dan prevansyon labi zanfan.  Se zot ki koz avek bann zanfan, se zot ki annan devwar pou edik e motiv zanfan lo sa size, e se zot ki devret ganny pli byen ekipe pou rekonnet bann sinny labi letan ki i manifeste.  Mon konnen ki sa ki mon pe demande i azout responsabilite lo nou bann ansenyan ki deza ase sarze – me mon oule propoze ki en guideline tre byen definir i ganny pibliye e distribye avek bann ansenyan pou ed zot pli byen fer sa travay.  Prevansyon i ideal me idantifikasyon labi letan i pe arive i osi egalman enportan.  Mon propoze ki bann protokol kler i ganny etablir pou bann ansenyan swiv dan ka kot zot in idantifye en ka labi, i bezwen annan bann protokol ofisyel pou swiv.  En ansenyan pa kapab ganny lese li tousel pou deside ki pou fer e koman pou fer li.

Mr Deputy letan ki ou abor sa size labi zanfan avek bann zabitan distrik parol ki ou pli souvan tande, se oli medya dan tousala?  Ouswa ki medya pe fer?  Mon oule propoze ki medya Sesel i angaz li dan en rol pli aktiv lo sa size se medya ki dan en pli bon pozisyon pou delivre en ledikasyon avek lamas nou popilasyon, bann konpany medyatik i byen plase pou eksplik bann lakoz labi zanfan e pou elabor lo bann mezir prevansyon.  Se medya ki kapab ekip nou sosyete avek bann skills pou idantifye letan ki en predater pe komans abiz en zanfan.

Mr Deputy tou eksper lo sa size i ava dir ou ki i pa pou zanmen kapab konpletman elimin labi zanfan atraver bann metod prevantiv, e se zisteman la kot domenn responsabilite ofisyel Gouvernman i komanse.  E se la osi ki nou pou bezwen komans reget kapasite resours avek mwayen ki dispozisyon Departman Zafer Sosyal pou delivre en travay a la oter lo sa dosye tre sansib.  Letan ki en zanfan i ganny abize souvan i neseser ki sa zanfan i ganny tire imedyatman dan sa lanvironnman fanmiy kot sa labi in ganny komet, sirtou si i annan danze ki sa i ava ganny repete.  Kestyon ki mon pe poze se eski sa departman i posed bann resours neseser pou fer sa travay dan en fason adekwa?  Sa zanfan pou bezwen ganny mete dan en lanvironnman stab, en landrwa ki sen e sof, sa zanfan i ava kapab ganny tou sa bann swen e bezwen neseser.  Eski Departman Zafer Sosyal i annan en tel resours a son dispozisyon la akyelman?  Me si non, kwa ki nou kapab fer pou remedye sa sitiasyon?

Mr Deputy mon’n tourn mon lantansyon lo konsern primer sa Mosyon ki devan nou, e sa se sa laspe pinisyon.  Dan tou bann demars ki annan pou fer avek anmenn en kriminel ver lazistis, premye pwen kontak se lapolis e la ankor mon pou revizit sa menm tenm ki’n prezan atraver mon prezantasyon “Siport e capacity building pou bann lazans e departman ki bezwen travay lo sa bann dosye sansib”.  Kestyon se, eski lapolis pe ganny ase resours pou fer bann travay neseser lo sa dosye labi zanfan?  Premye keksoz ki nou bezwen regarde se resours e kapasite imen limenm.  Eski Family Support Squad dan lapolis pe ganny ase formasyon ek capacity building dan sa domenn sansib ki zot travay avek?  Si non, kwa ki kapab ganny fer pou ogmant kapasite bann zofisye sa unit.  Koleksyon e prezantasyon levidans, ladopsyon bann norm e sandar enternasyonal lo sa dosye, rekomandayson enorm Interpole dan fason pou apros bann ka labi zanfan – tousala se bann keksoz ki nou bezwen met an pratik dan nou konba kont sa felo.  E pou reisi fer sa nou bezwen asire ki Family Support Squad dan lapolis i ganny ekipe avek bann resours neseser komansan par formasyon adekwa pou son bann personnel.

Mr Deputy dan plizyer ka labi zanfan nou’n trouve ki i annan en laspe maladi sikiatrik ki melanz avek kriminalite.  Sa abizer i bezwen ganny pini e la osi nou bezwen asire ki nou ekipe pou bann tel evantyalite ki swa lo kote Zidisyer kot laplikasyon santans i konsernen ouswa lo kote medikal kot sa dimoun pou forseman bezwen swiv son tretman e reabilitasyon.  Nou en sosyete modern e nou pou bezwen komans envestir nou larzan dan bann solisyon modern ki’n deza ganny prouve e adpote koman bann norm aksepte par lakominote enternasyonal.

Mr Deputy kot i konsern lespri Mosyon Onorab Vidot malgre ki personnelman mon en dimoun ki plito ensiste lo reform e reabilitasyon bann kondannen dan plas senpleman pinisyon, dan sa enn ka mon bezwen dir ki mon pou siport antyerman lespri sa Mosyon.  Sa Mosyon i bezwen ganny servi koman en veykil pou aport en mesaz ver nou pep e sa mesaz i enn ki senp enn tre kler.  Labi zanfan pa pou kapab zanmen ganny tolere dan nou pei Sesel, dan nenport ki sirkonstans pe enport ki sitiasyon i napa okenn zistifikasyon ki kapab ganny servi pou eskiz labi lo linosans.

Mr Deputy an terminan mon oule lans en lapel pou tou Seselwa, sak Seselwa ki fyer e kontan son pep avek son pei.  Sanson i dir annou pa zis koze, i pa ase pou nou zis dir ki nou konsernen avek sa problem, i pa ase pou nou toultan pe pase netwaye, kontrol domaz e limit lefe dega bann konsekans labi,.  Nou bezwen deside koman en Nasyon pou nou travay ansanm enn fwa pou tou pou elimin sa fleo labi lo linosans nou later Sesel.  Si nou kapab sov en zanfan mon konsider sa koman en mervey e en bon lenvestisman. Mersi Mr Deputy.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Mr Deputy Mosyon ki devan nou i enn ki enteresan, i enn ki serye e i enn ki enportan pou nou koman en Lasanble deal avek dan en fason pli efektiv posib.  I kler ki loter Mosyon in focus en kantite lo sa laspe lalwa, ki en laspe ki vreman enportan me ki focus lo lafason ki nou pou deal avek bann abizer ki komet bann lofans kont bann zanfan.  I kler, mon napa okenn dout ki bann abizer i bezwen ganny sa kalite pinisyon ki pou fer zot reflesir en en senkantenn fwa avan ki zot repet bann lofans kont bann zanfan.  Me sa ki egalman enportan e ki bokou manm in koz lo la, se ki sosyete i kapab met anplas dan en fason efektiv pou protez nou bann zanfan Seselwa e pou anpese ki en abizer i abiz lo sa bann zanfan.  Sa i en laspe ki egalman enportan ki son laspe lalwa e dezyenm laspe ki enportan an relasyon avek labi zanfan se dan ka kot i annan en labi ki fason ki nou efektivman tyonbo sa abizer, anmenn li Ankour e pini li?  Ki fason ki nou reabilit sa zanfan, akoz nou bezwen konpran ki sa zanfan i pou’n ganny en scar lo li ki kapab reste avek li pou lavi diran e i kapab anpes li devlope lo sa nivo ki potansyelman I ti kapab devlope.  Me i egalman enportan ki letan nou atrap sa abizer nou anmenn li Ankour nou deal ek li, nou pini li atraver lalwa i egalman enportan ki nou vwar kimannyer nou efektivman osi reabilit sa abizer akoz sansan I kapab sorti e repet sa lofans lo en lot zanfan ki kapab trouv koman enn nou manm fanmiy.  So sa problenm ki devan nou i en problenm ki tre konpleks e sosyete i bezwen get li dan son totalite.  Onorab Wilby Lucas in refer sorti a mon avi bann rekomandasyon enportan antan ki i en zonm-de-lwa mon santi in refer sorti bann rekomandasyon enportan viz a vi sa laspe lalwa e viz a vi lafason ki nou devret pe deal e tret bann abizer.  Mon egalman dakor ki santans oubyen pinisyon pou bann abizer i bezwen sever me selman mon osi krwar ki lalwa i bezwen ganny kite dan lanmen bann Ziz e bann Ziz i bezwen touzour annan sa diskresyon lo ki fason zot pou pas santans.  Sa ki enportan ki Onorab Lucas in refer sorti se ti ava mye e i ti ava enportan pou Sesel ganny en Lakour avek son bann Ziz ki spesifikman deal, ki spesifikman spesyaliz dan sa domenn pou ki lasosyete Seselwa i ganny sa konfyans dan kapasite e abilite sa Ziz pou li pas bann santans ki for e ki solid e ki merite an relasyon avek sa labi ki’n arive.

Lo lot kote i enportan pou gete kwa ki sosyete i annan anplas pou protez, pou donn proteksyon nou bann zanfan Seselwa e pou anpese ki labi i pran plas.  Mon 100 poursan dakor avek bann gran lalinny nou Konstitisyon ki donn bann drwa nou zanfan e ki annan bann lalwa ki protez oubyen ki form ki annan bann lartik ki form bann lalwa debaz ki protez nou bann zanfan Seselwa.  Nou kapab komans analize e get enn par enn e vwar koman en Lasanble vwar kote ki nou feb e kote ki nou koman en Lasanble nou kapab fer bann rekomandasyon e demande ki i annan bann amelyorasyon dan bann departman ki konsernen avek proteksyon nou bann zanfan.

Enn bann departman oubyen enn bann lorganizayson oubyen enn bann lenstitisyon premyerman se nou lenstitisyon skoler.  Kimannyer nou kapab fer nou lenstitisyon skoler vin pli efektiv an relasyon avek lafason ki zot pas lenformasyon avek nou bann zanfan avek lafason ki zot edik nou bann zanfan sirtou dan ledikasyon sivik pou ki nou bann zanfan i kapab premyerman zot menm pran bann responsabilite pou anpese ki zot ganny abize par bann abizer.  Ki bann teknik ki lekol i kapab par egzanp donn en zanfan dan P2, dan P3, dan P4, dan P5 pou li kapab komans idantifye letan en sitiasyon labi pe vin dan son direksyon?  Mon krwar pou dir sa i enportan e sa i ava ede pou li sa zanfan premyerman anpese ki i annan en labi par son abizer lo li.  Nou kapab anseny li lo bann teknik lo kimannyer I pou apros son paran depi premye moman ki sa lapros i vin ver li e kimannyer i pou devwal sa lenformasyon avek son paran akoz krwar mwan Mr Deputy i pa en keksoz ki fasil pou en zanfan ki ankor en zanfan inosan ki ankor annan 6an, 7an, 8an, 9an eksetera.

Mon ti al attend en pti konferans kot mon ti ganny en loportinite pou view en pti film an relasyon avek en zanfan sa enn ti en garson ki i pa ti pe ganny abize seksyelman me selman apre ki i ti’n perdi son paran, i ti’n perdi konfyans dan son lekor, i ti’n perdi konfyans dan son kapasite pou li kapab grandi koman en zanfan, e mon pe dir sa akoz i annan pou fer avek lekol e dan lekol kot i ti ete tou bann ansenyan ti mank sa loportinite pou zot idantifye sa perd konfyans ki sa zanfan i perdi dan son lekor e kontinyelman, sa zanfan ti kontinnyen tonbe.  Son rezilta ti kontinnyen desann me sa ti go on noticed, bann teachers pa ti pran konsyan ki pe vreman arive.  Son behavior ti sanze e deswit bann ansenyan ti krwar pou dir son – sa desann ki i pe desann dan son letid i akoz sa behaviour ki’n sanze.  Me toudenkou ti vin en ansenyan ki ti montre lentere dan sa zanfan e apre sa in swiv sa zanfan e sa zanfan in sorti totalman ladan, sa ansenyan in swiv li e finalman sa ansenyan in annan kontak ek sa zanfan ziska ler sa zanfan in ganny son doktora e sa zanfan ti marye e form son fanmiy.  Sa ti vreman tousan akoz i ti montre ou sa laspe lenportans, laspe lekol dan lavi en zanfan, e mon krwar lekol i en landrwa kot zanfan i bezwen kapab ganny tou sa sipor ki pou permet li eparny bann danze tel ki labi fizik oubyen labi seksyel e grandi pou devlop dan en zonm oubyen en fanm ki kapab re-aliz son full potansyel.  Lekol i bezwen fer sir ki zanfan i eparny zot lekor dan bann problenm disiplin akoz se la parfwa ki fer en zanfan rantre dan bann akt ki demen limenm I vin en dimoun ki agresiv e ki abiz lezot.  Mon krwar nou bezwen kapab protez zanfan lo sa nivo.

Striktir lafanmiy.  Ki sosyete i fer pou fer sir ki nou annan bann striktir lafanmiy ki solid?  Bann striktir ki fer grandi bann zanfan dan en lanvironnman ki permet zot epanouir e devlop zot kapasite.  Nou bezwen get dan nou sosyete Sesel, nou bezwen get bann lazans ki deal direkteman avek bann zanfan.  Ki’n arive avek NCC?  Akoz ki in ariv dan sa leta?  Ki sosyete i kapab fer pou relans en tel lenstitisyon?  Tousala i bann kestyon ki lasosyete i bezwen demann son lekor e rod en larepons, akoz se sa ki pou redwir sa kalite statistik ki loter Mosyon in prezant avek nou ozordi bomaten, kot in dir nou poudir an 2010 ti annan 72 ka labi seksyel e fodre nou mazinen poudir sa 72 i pirman bann ka ki’n ganny raporte.  I annan bokou ka ankor ki reste kasyet, ki pa ganny raporte.  72 i tro bokou akoz i mon lopinyon ki enn i deza tro bokou.  Mon krwar i enportan pou nou egalman annan bann lazans e bann lenstitisyon ki abrit bann zanfan dan en ka kot en zanfan in ganny abize e in nepli kapab reste kot sa fanmiy pandan ki i annan en lankyet ki pe ganny fer, sa zanfan i bezwen ganny retire dan harms way e ganny plase kot i ganny tou sa lanmour, tou sa councelling pou fer sir ki i kapab re-abilit son lekor.

Loter Mosyon in koz lo infant mortality an relasyon avek labi drog avek labi lalkol.  Kimannyer sosyete i kapab ede nou tou nenport ki parti politik ki ou swiv, nenport ki prensip politik ki ou adopte, labi kont drog ou bezwen lager avek.  Ou bezwen donn en koudmen lasosyete pou lasosyete rid itself of sa demon e mon krwar se la kot nou tou koman en sosyete nou kapab vin ansanm e vwar kimannyer nou kapab rod fason efektiv pou adres en tel sitiasyon.

Lazans Proteksyon Sosyal.  Ki arive avek lazans Proteksyon Sosyal letan i pa kapab efektivman rezourd en problenm ki kler, en problenm ki’n ganny met a zot latansyon, en problenm ki afekte en zanfa.  Akoz zot pa kapab parfwa rezourd sa problenm efektivman?  Annou etidye e annou vwar.  Eski i mank envolante politik?  Eski napa resours?  Eski i mank lakonpetans?  Mr Deputy mwan mon pa la pou montre ledrwa.  Mon la pou demann kestyon akoz mon anvi nou idantifye kote ki problenm i ete pou nou kapab efektivman rezourd sa bann problem.  Akoz nou bezwen fer li, i nou responsabilite koman bann adilt dan sa sosyete pou nou idantifye rasin bann problenm e pou nou deal avek efektivman si zis i pou nou protez en zanfan Seselwa dan soyete Sesel.

Mr Deputy mon parfwa demann kestyon lo Lazans Welfare.  Lazans Welfare son legzistans sirtou dan sa moman kot nou dan en kriz ekonomik, son legzistans pou mwan wi i enportan.  Me i egalman enportan ki i fonksyonn dan en fason efikas.  Par egzanp letan Lazans Welfare pa donn lasistans en fanmiy ki merit lasistans, kot i annan bann zanfan tre zenn, kot annou dir i annan en fiy dan lafanmiy 10an ki akoz zot in mank sa loportinite pou donn lafanmiy sa lasistans, annou dir sa zanfan i kontinyelman vwar li pe al lekol avek en lestoman vid.  Sa zanfan i come across en adilt ki dakor pou ed li, parfwa sa adilt I fer li an bonn fwa me i malere ki sa adilt i osi egalman kapab fer li avek en bi.  Sa zanfan i ganny abize e i reste en tas lo li pirman akoz enn i pa’n ganny sa training pou li kapab idantifye sa danze ki ti pe vin dan son laporte e dezyenmman in mank sa soutyen lafanmir e Welfare in mank sa loportinite pou donn sa lafanmiy sa soutyen.  E la mon profite pou mwan lans en lapel avek Welfare Agency pou mwan dir zot vin efikas, vin efikas wi anpese ki i annan labi.  Fodre pa ki i annan labi, se tax payers money ki nou pe koz lo la.  Dimoun i travay dir, bann dimoun konsyanse dan sosyete i travay dir, zot pey tax, zot met zot larzan dan en fon ki Leta i administre e i donn en morso Welfare Agency e lepep i anvi ki sa larzan i ganny servi byen.  Me pandan ki ou pe sey fer sir ki napa labi ou bezwen egalman fer sir ki lafanmiy ki bezwen ki genuinely bezwen lasistans – lafanmiy i bezwen ganny lasistans.

Family Tribunal zot annan en rol zot osi pou zot zwe.  Konbyen ka ki Family Tribunal in donn, apre ki en ka in pas devan li i donn sa paran ki merit ganny sa zanfan anba son twa se li ki vreman ganny sa zanfan?  Konbyen fwa ki pou bann lezot rezon again mon pa la pou montre ledwa me selman pou bann lezot rezon Family Tribunal i fer the wrong choice.  E letan zot fer the wrong choice again akoz kot zot in plas sa zanfan i pa en landrwa ki safe, labi i arive e tousala akoz nou pa pe travay dan en fason efikas, son reperkisyon i pa vin lo sa dimoun kot Welfare Agency ki pa’n donn sa lasistans, i pa vin lo sa dimoun kot Family Tribunal ki pa’n fer en bon desizyon, me son reperkisyon i tonm lo sa zanfan inosan ki li i pey le konsekans e i pey le konsekans dan en faosn for e dan en fason vreman terib e penib.

Mr Deputy lalwa, wi mon krwar poudir nou annan bann lalwa ki ase efikas, mon krwar poudir i annan bann areas dan nou bann lalwa kot nou bezwen armonize, nou bezwen fer lamannman.  Mon konnen poudir resours ki Zidisyer i ganyen i merit amelyore, i devret annan en logmantasyon dan resours.  Mon konnen poudir nou bezwen annan bann Ziz spesyalize akoz mon toutafe dakor avek sa ki Onorab Lucas in dir, me mon anvi ki sosyete i reazir vitman,, i reazir vitman pou nou sov sa lot kekfwa 72 oubyen kekfwa plis ki dan sa larestan lannen ki nou ladan pou ganny abize.  Mon anvi ki sosyete i reazir vit e efikasman pou nou kapab sov tou sa zanfan Seselwa ki dan danze, e mon demande ki sosyete i reget tou bann lazans, lafason ki zot travay e vwar ki fason nou kapab amelyor zot pou garanti ki sak zanfan Seselwa ki ne lo later Sesel i ne e nou garanti ki son bann drwa i ganny proteze e nou garanti ki sa zanfan i grandi dan en lanvironnman kot i ganny tou sa proteksyon e i ganny sa posibilite pou li osi parey mon zanfan, parey ou zanfan, parey nou zanfan pou li osi ganny sa posibilite grandi, devlope, fulfill son potansyel e anretour fer en kontribisyon pozitiv ver devlopman sosyete Seselwa alavenir dan sa 18an, dan sa 20an ki pe vini.

Mr Deputy mon pou donn mon full sipor sa Mosyon akoz parey mon’n dir mon santi ki i en Mosyon ki anmenn lemosyon akoz nou pe deal avek labi nou bann zanfan inosan ki pa kapab souvann fwa defann e protez zot lekor.  Nou nou bezwen la pou fer li pou zot e nou bezwen ganny gete koman efikas, rezonab dan sa traze e avek sa mon repete ki mon pou donn mon full sipor sa Mosyon.  Mersi Mr Deputy.

 

MR DEPUTY SPEAKER

Right of reply loter Mosyon.

 

HON KEVIN VIDOT

Thank you Mr Deputy.  Mr Deputy avan ki mon komans avek mon reply, mon avi remersye tou bann manm ki’n entervenir lo Mosyon, e mon osi remersye NCC e tou lazans ki pe debat pou protez nou zanfan e mon swet zot kouraz ansanm ek sa Lasanble ozordi ki nou kontinyen fer li.  Nou fer li pou nou fitir parey mon’n dir pou nou protez bann zeritye nou fitir.  Mr Deputy i enportan pou note ki Sesel in akonpli bokou, Sesel in ariv lwen parey Prezidan in dir nou’n ariv lo some me i annan bokou ankor pou nou kapab fer.  I enportan pou nou protez nou bann aki, ki nou protez sa ki pou demen dan lefitir protez sa aki ki nou annan ozordi e sa se nou bann zenn, nou bann zanfan e nou bezwen fer sir ki zot an bonn santé fizikman, emosyonnelman e spirityelman

Satistik parey nou’n koz lo la bomaten Mr Deputy i alarman e nou bezwen fer keksoz.  Mon zwenn ansanm parey Leader Lopozisyon in dir ki nou bezwen reazir parey lezot manm osi in dir nou bezwen reazir imedyatman, nou bezwen reazir ozordi menm.  Mr Deputy ler mon dir sa mon kontan dan sa group ki lepep in elekte dan sa Lasanble, i montre ki en group ki determinnen e ki anvi vwar keksoz ki pozitiv, ki byen e ki pou progresiv pou sa pep Seselwa.

Mr Deputy san okenn dout abizer a mon avi pa merit okenn konpasyon.  Menm si mon dakor avek Leader Lopozisyon ki i bezwen annan reabilitasyon, vre i pou enportan me selman ler kondann zot pa merit annan okenn konpasyon.

Dan menm lalinny Mr Deputy i enportan pou mwan fer en remark lo sa ki Leader Lopozisyon in dir ki nou donn diskresyon bann Ziz.  Mon napa problenm avek sa, me ler en Ziz i pas en santans 21an lo en zonm ki’n abiz 4 zanfan seksyelman – mon pa krwar i merit okenn diskresyon.  Ler santans maximum pou labi seksyel lo en dimoun i 20an, i 20an mon krwar ki nou bezwen ankor enn fwa mon repete parey dan mon rekomandasyon ki mon’n fer oparavan ki nou bezwen santans mandatwar kont okenn labi zanfan.  Nou bezwen annan en lapros inifye Mr Deputy, en lapros travay ansanm parey i annan lezot manm I dir kot tou bann departman konsernen i met zefor, i met resours, i met lide e nou travay dir pou nou protez nou bann inosans, nou travay dir pou nou protez nou zeritye nou fitir, nou travay dir pou nou protez nou trezor, nou trezor beni ki parfwa zot vilnerab e zot sitan sansib – ki merit pran byen swen avek zot.

Nou lalwa Mr Deputy i merit fer sir ki bann abizer i mazin pa ni menm 50 fwa me en santenn fwa avan ler ki i dir mon pe al abiz en zanfan ouswa avanler i met en lanmen mal apropo lo en zanfan ouswa avanler en paran i deside pou li kontinnyen pran drog kan i ansent avek en zanfan ou menm ler en paran i deside pou negliz son zanfan e kontinnyen abiz sa zanfan e kit sa zanfan dan nenport ki sitiasyon ouswa lanvironnman ki pa apropriye pou sa zanfan.  Mon krwar nou lalwa i bezwen anvoy ensel lavwa, se nou dir non, zero tolerans pou labi zanfan.

Bann zanfan dan fwaye a mon avi Mr Deputy zot ganny tou zot swen marteryel me sa ki pli enportan se sa swen marteryel, se sa lanmour sa paran, se sa lafeksyon ki en paran i bezwen donn li e vwala akoz mon krwar nou lalwa i bezwen osi koz avek sa bann paran e dir zot klerman ou annan en responsabilite, ou’n met sa zanfan lo later, ou merit pran swen e pran ka avek li e nou lalwa i bezwen adres sa e adres li Mr Deputy pli vit ki posib.  In ler pou nou koman bann paran assize, koz avek nou zanfan, fer zot vin pli konfortab pou eksprim zot santiman e konsern ki a fer zot si an ka i annan en keksoz ou en labi zot a vin anver nou e zot ava eksprim zot lekor.  E mon dakor ek bann entervenan osi ki’n dir oparavan nou bezwen bann ansenyan, bann konseye dan lekol ki pli ekipe, ki annan plis kalib pou zot kapab azir efikasman, pou zot idantifye e deal avek bann ka labi dan lekol.

Bann zofisye lapolis Mr Deputy i merit vin pli azour e ganny training apropriye pou zot kapab konbat kont labi zanfan.  Mon dakor avek bann lentervenan ki’n dir, parfwa se fason ki nou anmas levidans ouswa nou entervi sa zanfan ki fer nou mank levidans apropriye pou nou kapab deal avek sa abizer.  Nou bezwen azir dan en fason profesyonnelman pou nou kapab detekte e bouz de lavan e fer en case, en case ki solid, ki napa okenn abizer dan sa pei ki pou sape devan lalwa.

Nou bezwen en Lakour ki serye, nou bezwen en Lakour ki reponn a lapel sa Lasanbl, nou bezwen en Lakour ki reponn a lapel lepep Seselwa, e enn ki pou la pou protez nou zanfan, protez zot moralman, protez zot emosyonelman e pou kapab azir lo zot behalf koman bann dirizan bann dimoun lalwa, zot bezwen kapab azir, azir on behalf of sa zanfan e kondann sa enn ki’n abiz sa zanfan e donn li sa pinisyon ki apropriye ki demen i pa pou zanmen – Mr Deputy mon repete i pa pou zanmen, zanmen repet menm lofans.

Mr Deputy permet mwan pou dir avek tou respe pou nou Konstitisyon, nou Konstitisyon i fer nou, i anpes santans lanmor, capital, punishment dan sa pei i pa enn ki mon pou demande me selman refleksyon.  Prezidan ti dir si in ler pou bann ki abiz bann zanfan, bann abizer osi mont Marie-Louise mon krwar in tout ki fo ler Msye Prezidan.  Bann unit responsab Mr Deputy dan ka lo labi zanfan i merit evolye e progrese parey sa monn pe evolye e progrese.  Si nou anvi efikasite e sikse parey mon’n dir oparavan pou ganny bon case nou bezwen a tout pri improve dan en fason adekwat pou nou kapab entervenir e donn en bon servis nou zanfan, Lepep Seselwa.  Sa se lapolis, ledikasyon, lasante e Servis Sosyal.  Mon swete ki Gouvernman osi I donn sa bann departman resours neseser pou zot kapab fer zot louvraz byen e fer li pli byen posib e pli profesyonnalman ki alafen nou a vwar en rezilta pozitiv pou nou Nasyon.

Mr Deputy san okenn dout nou bezwen travay e travay ansanm. Lasanble, Egzekitiv, Zidisyer i bezwen travay ansanm e parey mon’n dir oparavan anvoy en sel mesaz dan sa pei Sesel – sa se zero tolerans anver labi zanfan.

Medya pou terminen Mr Deputy mon krwar i merit zwe en pli gran rol, enn ki reponn a konsern Lepep Seselwa, enn ki reponn a konsern bann Onorab dan Lasanble ozordi.  Mon swete ki i ava annan en reportaz apropriye lo sa Mosyon e ki parey mon’n vwar yerswar dan en prezantasyon ki sa i ava kontinnyen dan bann zour avenir, dan bann semen avenir, dan bann mwan avenir e bann lannen avenir.

Mr Deputy mon remersyse sa Lasanble pou son letan e mon remersye tou manm ki pou al vot lo sa Mosyon e pou vot san okenn ezitasyon anver sa mosyon. Mersi.

 

MR DEPUTY SPEAKER

Bon, avek sa nou pran en vot.  Tou manm ki anfaver sa Mosyon lev zot lanmen?  I inanim.  Mosyon in pase.

Nou a pran nou dezyenm Mosyon lo Order Paper e mon envit Onorab Pierre pou prezant son Mosyon.

 

HON DAVID PIERRE.

Mersi Mr Deputy.  Mr Deputy mon pe rod reform, ankor reform dan Minister, dan Departman Ledikasyon, reform ki pou anmenn nou dan venteyenm syek.  I enportan Mr Deputy ki nou annan en bon sistenm ledikasyon.  Lekol i leker nenport ki sistenm ledikasyon dan lemonn e lekol i tal sa fondasyon pou lefitir, e byensir se lekol ki form sitwayen pou lavenir.

Prosperite en Nasyon i depan lo kalite skills ki zanfan ozordi i devlope e lo kalite konesans ki zot kapab atrape dan bann lekol kot tou zanfan i pas zot lazournen e en gran proporsyon zot lavi.  E alors Mr Deputy sa ki mon pe rode atraver reform se en sistenm ledikasyon ki prodwir kalite, ki annan kalite mon pe koz Gouvernman met lanfaz lo quality education, nou oule value for money dan Departman Ledikasyon.  Mon egalman anvi the optimal organization of our schools system senpleman pou nou maksimiz performans e pou fer sir ki zanfan Seselwa ler zot kit nou ban lekol zot annan ase skills ki zot a kapab servi pou fer fas ek bann demann ki en sosyete modern i mete e ekspekte lo son sitwayen.  Mon pe rod en sistenm ledikasyon ki delivre ledikasyon de ot kalite pou nou zanfan Seselwa.

Akoz en bon sistenm ledikasyon i enportan?  En bon sistenm ledikasyon i enportan akoz i anmenn plizyer benefis pou en pei ek son pep.  Nou koman bann politisyen i touzour enportan ki tou sa ki nou fer, tou sa ki nou met devan nou bezwen konnen kwa ki i annan ladan pou nou sitwayen, e mwan mon enn sa dimoun ki konvenki ki tou Seselwa in ne ek en talan spesyal e se zisteman la kot en bon sistenm ledikasyon i enportan.  Akoz atraver en bon sistenm Sesel i a trouv li kapab donn tou zanfan Seselwa en loportinite pou zot dekouver zot talan, devlop zot talan e realiz zot full kapasite oubyen zot full potansyel.  An plis zanfan Seselwa i devret kapab atraver en bon sistenm ledikasyon devlop en pasyon pou laprantisaz e kontinyelman devlop konesans dan zot lavi ki anmenn ankor bokou plis pou nou pei.  Fodre nou toultan mazinnen ki en bon sistenm ledikasyon i kapab osi egalman ede a long term adres bann problenm sosyete tel ki bann problenm sosyo-ekonomik, nou’n koz lo labi lalkol, labi drog, vyolans domestic, labi kont bann zanfan, problenm lanplwa ki relye ek devlopman ekonomik en pei e lezot ankor – lalis i long.

En sistenm Ledikasyon ki konplet e ki bon i donn son sitwayen plis konesans dan bokou domenn tel ki dan lademokrasi ki anretour i ede pou amelyor kalite gouvernans dan en pei, dan en soyete demokratik.  Akoz Mr Deputy bon gouvernans i depan lo abilite en pep pou fer desizyon ki byen enformen e pou fer bann swa ki entelizan, e dan lekol ou kapab devlop ou lentelizans.  E pou nou pep ariv lo sa standar atraver nou sistenm ledikasyon nou bezwen fer li posib pou ki sak zanfan Seselwa ki aim high i kapab ganny rezilta.

Minister ledikasyon i bezwen angaz li pou garanti ki nou annan bann lekol ek bann bon kalite ansenyan ki kapab ansenyen, ki’n ganny byen formen, sa i depi lakres ziska  pli o nivo.  Minister i bezwen angaz li dan donn nou bann lekol bann fasilite ki parmi sa ki meyer dan nou rezyon e byensir lo en pli o standar ki sa ki nou annan ozordi.  Pou sa Mr Deputy, Gouvernman i devret donn Minister Ledikasyon en bidze ki rezonnab e ki a mon avi i devret otour 18 a 20 poursan nou bidze nasyonal, dan sa konteks Minsiter i bezwen fer sir ki i amelyor lafason ki larzan piblik i ganny depanse viz a vi sa Minister.  Larzan i bezwen ganny vote pou ki i annan en lenvestisman dan quality teachers pou nou ganny quality teaching. Sesel nou sanse pou annan bann ansenyan ki travay dir e ki devoue.  Minister Ledikasyon i bezwen donn zot sipor dan tou fason posib.  Minister i bezwen fer sa kalite reform ki pou garanti ki bann lekol i set bann very clear achievable high standard, bann lekol i bezwen re-alinny zot curriculum, bann lekol i bezwen annan bann mekanizm e metod pou asses out come dan en fason efektiv e Mr Deputy dan bann tel lekol laprantisaz pou vreman pran plas.

En lot laspe enportan reform dan ledikasyon i teacher retentionthe brain drain en lot size ki pre okip tou Seselwa.  San ansenyan parey mon’n dir napa laprantisaz, san ansenyan kalifye nivo laprantisaz i tonbe, la mon deman Minister pou fer en letid serye e onnet e vwar akoz ki ansenyan i kit sa profesyon ki nob pou zot al swiv en karyer dan en lot domenn, solisyon i bezwen vin dapre sa letid.  Dapre mwan i riske annan divers rezon, ki range depi progranm travay, fleksibilite dan progranm travay or the lack of it, disiplin dan lekol, package bann ansenyan i gannyen ki enkli saler gratite konpansasyon scheme of service, respe ki bann ansenyan i gannyen dan lasosyete oubyen the lack of respect savedir respe ki ansenyan pa gannyen dan lasosyete. I annan en konbinezon fakter e Minsiter i bezwen rantre dan en letid serye e idantifye kwa ki koz sa e adres li efektivman e vitman.

Mr Deputy Minister i bezwen anmas levidans siantifik e reazir dan en fason pozitiv pou boust moral ansenyan e fer lansenyman vin en vokasyon ki eksitan, enteresan e ki ganny valorize e ki komann respe parmi nou popilasyon.  Nou bezwen konstri lo sa ki nou annan pou prepar nou bann nouvo zenerasyon Seselwa pou lefitir.  En fitir ki devret anmenn bann gran loportinite pou Sesel e pou lazenes Seselwa.  Nou bezwen toultan pran kont ki lefitir i touzour anmenn bann sanzman ki nou pa kapab predwir, ki nou pa kapab predwir alors mon pe demann Gouvernman pou fer bann sanzman ki pou garanti ki latas nou bann lekol, nou bann lenstitisyon skoler i ava pou vreman donn zanfan e lazenes Seselwa sa kapasite, sa loportinite pou zot devlop bann skills, bann konesans, pou zot devlop karakter e bann values ki pou fer zot kapab anmenn Sesel devan dan le fitir no matter what ki fitir i annan pou zot.

Pou sa nou bezwen Mr Deputy en sistenm ledikasyon ki pli fleksib e ki divers.  Curriculum i bezwen enn ki donn zanfan divers loportinite e la nou demann en revizyon dan Curriculum aktyel – akoz bi Minister Ledikasyon dan sa pei i devret pou donn zanfan e lazenes Seselwa plis swa pou zot zwenn zot bann diferan lentere e pou zwenn bann diferan teknik laprantisaz dan lekol.  Nou bezwen donn zot sa loportinite pou zot pran ownership zot laprantisaz e nou bezwen donn zot en broad base education pou garanti devlopman konplet zanfan e lazenes Seselwa dan laklas e andeor laklas.  Pou sa Mr Deputy, Minister Ledikasyon i devret anmenn plis diversite dan son curriculum an relasyon avek letid akademik, letid vokasyonnel oubyen teknik dan sport e dan lar, sa i a ankouraz nou bann zanfan pou swiv zot pasyon e i a promot diversite talan parmi lazenes Seselwa.  Minister i bezwen revwar e adopte en model curriculum ki meet the needs of tou zanfan Seselwa.  Minister i bezwen donn bann progranm alternativ pou bann zanfan ki pa fit en curriculum ki son baz i akademik.  Minister i bezwen egalman vwar e donn en letid spesyalize pou bann zanfan avek special needs, andot mo en applied vocational program i bezwen egalman ganny met anplas ki enkli sa ki nou apel en work base learning experience sa i bezwen ganny servi koman en opsyon pou bann ki zot potansyel pa kapab ganny devlope atraver sa ki nou apel the mainstream Education.

Mr Deputy teachers zot menm, ansenyan aprey monn dir i vreman enportan dan tou sa ki ganny fer dan ledikasyon.  Minister i bezwen donn ansenyan tou sa sipor sirtou an saki konsern zot zefor pou ansenyen, anmenn quality education dan lekol e bann taktik ki inovativ e ki nouvo kot lansenyman i konsernen, pou sa Mr Deputy i bezwen atraver Minister ledikasyon Gouvernman i bezwen empower bann ansenyan atraver plis capacity building.  Ansenyan i bezwen ganny plis loportinite pou zot devlop zot profesyonnelman.  Ansenyan Seselwa i bezwen ganny plis loportinite pou zot ganny higher professional certification ki enkli undergraduate e post gradute degrees lo tou nivo enkli dan primer, akoz fondasyon sa nivo, lo nivo primer i ekstrememan enportan, pou anseny par egzanp Matematik efikasman en size ki i annan bokou problenm otour li dan sa pei ou bezwen konpran langaz matematik depi son labaz sansan ou pa pou kapab anseny li efikasman.

Mr Deputy Minister i bezwen esey organize plis work attachment opportunities pou ansenyan ek bann lesanz aletranze pou plis konesans, pou diversite dan lansenyman e pou anmenn en pli gran lankadreman leksperyans.  Anplis bann lekol i bezwen ganny plis ansenyan, plis councelors e plis resours e anmenmtan nou bezwen antre, nou bezwen sanz nou mind set e komans mazin plis lotonomi dan lafason ki bann lekol i fonksyonnen.  E lotonomi Mr Deputy i enn bann direksyon ki sa pei i bezwen pran an relasyon ek son bann lekol, lotonomi pou bann lekol i the way forward.  En lekol i devret kapab ganny sa lotonomi pou li devlop son area kot i for pou anmenn lekselans ki se swa i dan en area letid partikilye oubyen i dan cocurricular activities oubyen menm dan character development.  Sa ki enportan e se ki lekol i ganny plis lotonomi pou li kapab meet bann needs son bann etidyan atraver plis progranm letid depandan lo son forte.  En headteacher motive ek son bann ansenyan i kapab par egzanp fer en school base program lo ekselans dan en area kot i santi son bann zanfan dan son lekol i vreman for pou anmenn plis rezilta ankor, san ki i bezwen pas atraver bann birokrasi e san ki i bezwen demann permisyon Minister.  Minister li i bezwen komans adopte en nouvo mindset kot i met plis konfyans dan son bann head teachers ek son management.  En lot legzanp i se ki en lekol i devret kapab egzers plis fleksibilite an sa ki konsern streaming oubyen an sa ki konsern differentiate learning.  Lekol i devret egalman ganny plis fleksibilite pou set zot prop kriter sertennman avek bann bon standar ki rekonnet bann diferan merit dan en zanfan ki ganny admet dan sa lekol, donn nou lekol, donn nou bann head teachers ek son management sa lotonomi pou devlop son lekol.  Lotonomi pou bann lekol i en modern trend dan lemonn ozordi.  Sesel pa kapab ganny kit deryer me lotonomi Mr Deputy pou bann lekol i devret egalman mars avek accountability, annefe resers in demontre ki dan bann lekol kot i annan en bon degree lotonomi lo sa ki zanfan i aprann e lo lafason ki zanfan I ganny assest, zanfan i perform bokou pli byen.

Alor PDM I krwar ki nou sistenm ledikasyon i devret ganny revize pou ki nou kapab anmenn en bon degre lotonomi pou nou bann lekol me anmenmtan nou pou ensiste ki ler nou fer li en tel reform nou bezwen egalman met anplas bann bon mekanizm pou garanti ki i annan accountability e letan nou koz accountabilitysorry, nou pe koz li an relasyon ek premyerman bann paran, nou bezwen pare pou les bann paran konnen ki pe arive dan zot lekol, dan lekol son zanfan, ki bann desizyon ki’n ganny pran an relasyon avek lapratisaz, ki kalite rezilta ki lekol pe donnen e ki kalite performans ki son zanfan pe fer.  Accountability viz a vis manm piblik i en nouvo mindset.  Mr Deputy manm piblik, bann manm, bann menm kalite detay i bezwen ganny donnen ek manm piblik pou ki i annan plis scrutiny.  Lekol i bezwen konsyan ki piblik pe monitor e zot a vwar ki kalite e standar pou monte.  Alors PDM pe demann lotonomi akoz nou konvenki ki lotonomi ki entelizaman ganny marye ek accountability pou anmenn en garanti lo meyer performans e donk meyer rezilta pou nou bann lekol.

Dan koteks plis lotonomi e an relasyon avek planning e management e lorganizasyon lekol sak lekol i devret kapab drwa up, devlope e enplimant son Education e Management Plans san ki i annan gran birokrasi e san gran lenterferans Minister.  Minister li i annan en rol kle ki i kapab zwe ladan e sa i bezwen, Minister i bezwen annan zouti efektiv pou monitor e Minister i bezwen demann rezilta.

Mr Deputy ansenyan avek assessment.  Bann lekol i devret ganny loportinite pou donn zanfan sa kapasite pou devlop zot skills pou innovate. Lansenyeman i devret focus plis lo devlop understanding, lo devlopman sa ki nou apel critical thinking, lo devlopman kapasite zanfan pou demann kestyon e rod larepons ek solisyon.  Metod legzanmen e assessment zanfan i devret ganny revize pou nou redwir reliance lo roat learning.  Lepok roat learning in fini Mr Deputy.

Pou sa nou devret seryezman komans entrodwir digital education.  Minister i bezwen seryezman vreman konpran the power of computers koman en zouti pou laprantisaz e nou bezwen kapab komans get computer koman en asistan pou bann ansenyan e koman en asistan pou nou bann zelev.  En konsept tre senp ki nou napa swa me nou bezwen adopte.  Teknolozi i bezwen rantre vitman dan nou bann lekol, teknolozi i dinamik e nou konnen ki ofir e anmezir ki letan i pase teknolozi pou anmenn en paradime shift ki pou sanz mindset imen.  Nou bezwen komans prepare pou lavenir, nou bezwen konpran ki e nou bezwen rekonnet legzistans sa zenerasyon zenn ansenyan ki’n ne pandan the digital age e ki zot zot tre konfortab ek teknolozi, pou zot nou bezwen entrodwir laprantisaz atraver pli gran use of computers ek teknolozi.  I enportan pou Minister komans get ki fason i pou kre sa kolaborasyon efektiv ant sa bann ansenyan ek leksperyans e bann ki zenn e ki konpran teknolozi, pou nou efektivman melanz leksperyans ek teknolozi e sa pou anmenn rezilta e pou anmenn en meyer lanvironnman travay parmi bann staff tou laz.  Alors PDM i krwar ki Gouvernman i bezwen komans rod fason pou servi teknolozi pou entrodwir sa konsept digital education.  Digital learning e face to face instructions – tousala i bann nouvo konsept laprantisaz ki pou donn lekol e nou bann ansenyan sa kapasite pou entrodwir bann form letid tel ki blended learning dan Sesel, kot zanfan i a ganny akse ek bann materyel ek lecture ahead of time e apre zot a kapab pran letan laklas pou pli koumwen practice, refind e aplik sa bann konsept ki zot pou’n fini ganny akse avek.  Zanfan pou sorti bokou pli byen.

Laprantisaz lasyans modern e matematik Mr Deputy.  Resers in montre ki pou zanfan byen kapab aprann sa bann size zanfan i bezwen kapab pans dan en fason endepandan, lozik e obzektivman.  Alors Minister i bezwen komans devlop en konponan letid kot pou prepar marmay dan sa bann domenn.  Nou egalman bezwen teach e devlop logical thinking sa pou vedir ki nou bezwen revwar e fer lazisteman dan nou curriculum.  Anplis pou elev nivo dan sa domenn lapratisaz nou bezwen fer sir ki nou annan bann ansenyan ki kalifye e konpetan.  Minister i bezwen envestir heavily dan devlopman ansenyan dan sa bann domenn.

Mr Deputy, nou bezwen redefinir SIP pou vin a mon avi SSIPSchool Improvement Program i bezwen ganny tailored according to sa lekol.  I devret vin sa progranm stratezik pou sa lekol spesifik.  Mon pe propoze ki i ganny gete dan sa lalinny e ki ganny apele Strategic School Improvement Program, lekol a servi sa letan pou zot ganny, pou zot enkli dan planifikasyon direksyon ki zot lekol i anvi pran. Ansenyan ek zot management i a konstaman enkli dan sa decision making process an relasyon ek kwa ki lekol i bezwen fer pou li kapab delivre ledikasyon pou nou zanfan pou sa venteyenm syek.  Lekol i a ganny sa loportinite pou kontinyelman evalye zot lapros ki zot in swazir pou ki zot kapab pas High Educational Standard e delivre kalite ledikasyon ki pou ankouraz e siport sa kalite devlopman dan nou bann zanfan ki meet zot laspirasyon e ki pou plitar enhence e anrisir zot lavi e bann loportinite ki zot gannyen dan zot lavi.  SSIP i devret la pou permet ansenyan vin ansanm pou devlop zot plan travay pou zot lekol dan nenport ki area ki zot santi i annan nesesite.  Minister i devret la pou donn sipor e non pa pou dikte.

Problenm disiplin.  Bon disiplin i enportan si zanfan pou fulfill zot potansyel dan laklas.  Move konportman dan laklas i anpes zanfan konsantre, anpes zot abzorb lenformasyon e i fer teachers strese, lekol i bezwen kapab deal ek sa efektivman.  Pou lekol kapab deal ek sa efektivman Minister i bezwen antreprann reform viz a vi desiplin dan lekol, lo sa nivo kot i fer sir ki bann lekol Mr Deputy, i devlop en tre bon polisi viz a vi disiplin e sa i bezwen ganny devlope par lekol ek the support of sa Minister, e non pa Minister Ledikasyon, sak lekol i annan son bann spesifisite.  Sa polisi i bezwen ganny aksepte e byen kominike parmi bann staff, etidyan, ansenyan e paran.  I bezwen annan konsistans dan son lenplimantasyon e i devret ganny servi koman labaz pou en lapros efektiv lo lafason pou manage konportan oubyen disiplin dan lekol.  Lekol i bezwen komans sanz son lapros kot i senpleman e selman get kwa ki mal ek en zanfan ki pe mal konport li, me plito adopte en lapros kot i egalman gete kwa ki mal ek lanvironnman lekol, kwa ki mal ek sa progranm ki pa ganny ansenyen, kwa ki petet mal ek lapros ki pe ganny servi pou li kapab aziste korekteman – savedir nou bezwen annan nou en metod pou deal avek problenm disiplin kot nou pran an konsiderasyon tou bann fakter ki afekte laprantisaz e ki afekte konportman en zanfan dan laklas.  Bann fakter tel ki sa zanfan limenm, bann fakter tel ki kwa ki sa zanfan pe aprann, bann fakter tel ki lanvironnman dan ki sa zanfan pe aprann.  En biznes Mr Deputy Speaker ki pe mal fer pa kapab zis gete kwa ki mal avek son kliyan san ki i gete kwa ki mal ek son servis, si i fer sa i pou fait.

Mr Deputy Speaker en lot laspe kot nou bezwen revwar se class sizes.

 

(Interuption)

 

MR DEPTUY SPEAKER

I reste ou 3 minit Onorab.

 

HON DAVID PIERRE

An rezilta bon lenvestivman dan nou lekol e dan bann ansenyan nou bezwen kapab ganny smaller class sizes ki a improve student teacher ratio en lot lavantaz e se ki sa i a sey donn ansenyan plis letan e lespas pou enterakte avek son zanfan, i a donn zot plis fleksibilite dan lafason ki zot ansenyen, i a donn zot plis fleksibilite dan lafason ki zot organiz zot laklas, i an donn zot plis posibilite pou zot partaz leson ek konesans e i ava anmenn nouvo lapros pou zot enspir e gid zot bann etidyan.  Ansenyan i bezwen ganny mwens paper work posib, mwens form pou ranpli e plis letan pou enterakte ek son bann zanfan.  Tousala i bezwen tonm parmi bann gran lobzektiv Minister Ledikasyon.

Mr Deputy mon’n tous bann gran lalinny kot Minister i bezwen revwar e aziste e fer bann sanzman ki pou anmenn nou bann lekol dan venteyenm syek.  I annan bokou plis ankor e letan i permet mwan pou elabor lo enn dernyen e sa se pou nou venture dan lokalizasyon legzanmen IGCSE.  Minister Ledikasyon avek led Cambridge e lezot partener i bezwen fer sa vin en realite pou Sesel, sak papye ki en zanfan Seselwa i sit i kout larzan e Sesel i kapab avek led Cambridge lokaliz bann papye IGCSE e sa i a ganny validated par Cambridge ki ava ganny zot stamp of aprouval kot nou a gard standar me nou a fer li lokalman par nou ansenyan ki a ganny bon training.  Moman in arive pou nou bouz dan sa direksyon e fer Sesel ek bann ansenyan Seselwa fyer.

Mr Deputy mon demande ki Mosyon i ganny aprouve. Mersi Mr Deputy.

 

MR DEPUTY SPEAKER

Bon Mosyon in ganny prezante.  Okenn manm pou segonn sa Mosyon?  Segonde par Onorab Marc Volcere. E avek sa nou a pran en break nou a rezwen 4.15pm.

(Break)

 

MR DEPUTY SPEAKER

Bon, nou kontinnyen avek nou travay.  Onorab Jeannevol.

 

HON BEGITTA JEANNEVOL

Mersi Mr Deputy, bonn apremidi.  Bonn apremidi tou koleg Manm Onorab e tou dimoun osi ki alekout.  Mosyon devan nou ozordi pe tous nou sistenm ledikasyon, enn nou sekter pli enportan dan nou sosyete ozordi, nou fondasyon pou lavenir.  En bon sistenm ledikasyon se sa ki definir fitir sa pei, i alors enportan ki latansyon spesyal i ganny donnen dan sa domenn pou asir en bon kontinite.

Mosyon devan nou ozordi apremidi pe demande ki reform entans dan ledikasyon i ganny fer e ganny enplimante o pli vit posib.  Reform dan ledikasyon pe ganny fer depi 1978, 1991, 1998 e tou resaman an 2009. Gouvernman opourvwar SPPF ozordi i Parti Lepep in fer sir in debout ferm lo son prensip donn akse ek ledikasyon gratwit e lapratik tou Seselwa e ziska ozordi nou ankor pe asire ki sa i ankor pe ganny fer malgre en mank dan resours imen.  Menm nou granmoun ki pa ti ganny sa sans parey nou pou aprann dan lekol ozordi zot in ganny sa sans pou fer li gratwitman, mon fyer ler mon get sa trwazyenm az ki detrwa lannen pase ti anmenn son let kot mwan pou lir pou li, me la i lir son let limenm. I fyer mars ek son labib pou li al avek legliz akoz aprezan i kapab lir son labib limenm.  Wi ozordi nou annan nou en pep ki pli byen edike ki avan.  Kote o monn ankor ki nou pou vwar sa?  Se pa reform dan ledikasyon sa?  Wi sa Gouvernman in vwar nesesite anbelir lo sa 30an lakonplisman dan ledikasyon avan reform 2009.  Plizyer sanzman ankor depi sa letan in ganny fer dan sistenm ledikasyon tel ki lentrodiksyon lekol segonder, faised out NYS, azout en lot lannen segonder osi byen ki devlopman program profesyonnel pou bann ansenyan.

Plis reform ti annan nesesite ganny fer an 2009 vi ki nou ti vwar ki nou bezwen aziste nou pou ki nou trouv nou plas dan sa vilaz global e donn quality education pou nou pep.  Prezidan ti vwar li neseser pou rod led en konsiltan etranze pou ledikasyon an 2008 ki ti drafte en rapor e prezant avek li, swivan sa nou Prezidan ti met anplas en komite apele National Economic and Training Strategy ki ti ganny chair par sa letan Minis pou ledikasyon Minis Bernard Sham-Laye ki ti ede pou drafte en road map ki pou anmenn sanzman dan sistenm ledikasyon e training dan Sesel. Apre ki sa komite ti’n idantifye bann diferan landrwa kot bezwen annan sanzman en lot komite Education Reform Oversight Committee ti ganny formen.  Sa komite ti prodwir an Novanm 2009 en dokiman apele Education Reform Action Plan, se sa dokiman ki montre reform entans ki ti bezwen gany fer dan ledikasyon depi nivo petite enfants ziska pos segonder, e a plizyer repriz ki sak sanzman ou en nouvo laspe ti pe ganny anmennen dan ledikasyon, lepep ti ganny enformen lo la atraver sa Minister.  Wi Mr Deputy Speaker pou bann ki ti byen eveye pandan sa letan, pou bann ki ti pe swiv byen sistenm ledikasyon a sa letan pou rapel byen ki an 2009 ti annan en revolisyon dan petite enfants, sa nivo ki nou apel lakres ziska dezyenm lannen primer.  Minister Ledikasyon ti vwar nesesite fer gran sanzman dan sistenm sa bout ki apel nou fondasyon.  I enportan ki nou bann pti zanfan i ganny sa labaz e zot benefisyse plis ki zot kapab ladan, akoz se sa ki pou ed zot pou plitar – parey en lakaz Mr Deputy si ou fondasyon pa byen solid ennitil kontinnyen konstri sa lakaz, I vo mye kase e refer akoz plitar i pou tonm lo ou.

Boner 2010 en nouvo sistenm pastoral ti ganny entrodwir dan primer e segonder, sa ti ganny swiv par en nouvo kod kondwit pou etidyan, en nouvo model pou management lekol osi byen ki laparisyon school council ki bokou lekol ankor pe ganny difikilte pou met anplas.  Sa konsey ki sipoze annan koman son chairman en dimoun dan lakominote ki I pa neseserman en ansenyan dan sa lekol ou si non en paran i merit ed lekol pou vin pli otonorm malgre ganny gide par Minister ledikasyon.  Me i enportan ki headteacher sa lekol osi byen ki Ladministrater Distrik kot sa lekol i osi ganny trouve lo sa konsey, me kantmenm se pa sa lekol ki pou desid lo sa curriculum.

Reform dan segonder pe revwar curriculum e sa i on going.  Technical And Vocational Education And Training TEVET pe cater pou bann zanfan ki pou le moman lekol pa pe fer provizyon pou li par egzanp i anvi aprann fer kazye, i anvi practice koman en hairdresser me vi ki lekol pa pe permet li fer sa alor sa reform in fer ki Minister Ledikasyon in fini antre an konsiltasyon avek biznes prive e i fer li posib ki sa bann zanfan i al aprann sa bann keksoz ki pou ed li dan le fitir, se sa diversite dan curriculum ki pou ed zanfan swiv zot pasyon.

De center Cap Ternay pou opearasyonal tre byento, kot bann zanfan ki ansenyan i apel zot enkontrolab, ki annan zis en pti group zot sa dan lekol ou sa bann zanfan ki petet li osi i pa trouv son plas dan laklas akademik pou al laba kot i a ganny sans aprann en nouvo metye.  Annou pa kondann sa bann zanfan e zis anvoy blanm partou dan lasosyete.  Nou pe plito trouv en solisyon pou zot.  Se pa sa reform dan ledikasyon?  Anplis ki sa ozordi en zanfan pa ganny zize alafen son lannen skoler zis avek lakantite pwen academik ki in gannyen.  ROA Record of Achievement i rikord tou lakonplisman sa zanfan depi son premye lannen segonder ziska son lafen lannen lekol, sa i a petet ed li trouv en travay plitar dan lavi.  Minister ledikasyon i okouran ki pandan ler lekol bokou zanfan i lo semen, pe al fer larout pou move lenfliyans ki swa drog ou lalkol ou si non zis I pa anvi dan lekol.  Nou gran paran i a rapel ki dan lepase ti byen rar ki ou ti pou retrouv en zanfan lo semen e anplis dan son liniform pandan letan ki li i sipoze dan lekol.  Koman lontan en granmoun ti kapab dir ek sa zanfan pou retourn dan lekol ou si non raport li ek son paran plitar, me ozordi nou sosyete in vin bef dan disab sakenn vey son lizye.  Personn pa pou oze dir sa zanfan narnyen vi ki pou annan tro bokou problenm plitar, me nou Gouvernman pa kapab reste trankil lo la li osi.

Wi reform i ankor pe ganny fer, provizyon pe ganny fer pou sa, provizyon pe ganny fer pou anploy en zofisye ki pou ede retir zanfan lo semen pandan letan lekol, sa dimoun ki li son louvraz se pou pas lo semen atrap bann zanfan ki napa en papye ou en bon rezon valab ki i lo semen pou ganny re-anmenn dan lekol kot la son paran pou ganny apele deswit e i pou bezwen accountable pou son prezans lo semen saler.

Mr Deputy Speaker assessment dan lekol?  Center For Curriculum And Assessment And Teacher Support mye koni koman CICATS in retournen li osi as part of the reform, i baze dan headquarters Minister Ledikasyon e dan sa departman se bann dimoun ki annan lotorite dan zot size respektiv, se zot ki ansarz curriculum e se zot ki ansarz curriculum pou sa size dan lekol.  Sa departman i ede pa zis dan konteni leson dan lekol me osi dan lafason evalye en etidyan lo sa size.  Citizenship Education in ganny re-entrodwir dan lekol anvi i ti en konponan dan PSE aprezan i en size apar lo time table.  Dan primer sa i ankor pe fer dan PSE, reform a permet plitar ki i a ganny fer separeman.

Tertiary Education en lot reform ankor.  Fek pas dan sanmenm sa senkyem Lasanble kot Liniversite i ganny son lotonomi pou performen, ankor i pa en reform sa?  Lannen prosen Zanvye 2013 nou pou vwar nouvo lenplimantasyon Teacher Appraisal System ki pe ganny finalize sa lannen la.  Konmela tou dimoun dan lekol pe ganny appraise lo en sel kalite form, Minister ledikasyon in oule valorize bann anseyan, montre zot ki zot diferan ek lezot e zot in osi bezwen fer en nouvo appraisal system ki reflekte louvraz en ansenyan ki pa parey ek lezot.  Alors aparti lanenn prosenn sa nouvo form pou dan lekol kot teachers pou ganny evalye lo zot performans e donk zot bonus a ganny deside lo la.

Teachers Scheme of Service.  Lapey teachers in osi deza ganny adrese dan sa reform.  Bokou petet pou dir ki sa scheme pa pe adres li, me fodre pa ki nou obliye ki en teacher kalifye ek Diploma 2 dan ledikasyon ti ganny li zis R3700 7an pase.  Ozordi sa menm ansenyan ek menm kalifikasyon i ganny li R6000 menm plis, se pa en lot reform sa?  Bonus i ankor en problenm pou serten ki zot krwar zot pa pe ganny byen reminere – fodre pa obliye ki bonus I zis en bout dan sak Teacher Scheme Of Service, me pa trakase bann ansenyan TSS i ganny review tou le 5an.

Ki pli gran reform ankor ki nou bezwen fer si nou’n vwar en Liniversite lo nou pti zil Sesel?  En rev ki bokou nou ti krwar ki nou pti zanfan ki pou ganny sans viv sa realite, me apre nou vwar li pe ganny realize drwat devan nou.  Ozordi nou Gouvernman i kapab koup lo en morso sa kou finisyer ki i ti depanse pou al etidye aletranze.

Problenm disiplin wi, nou konnen kote pli gro problenm i ete e se sa pli gran rezon akoz nou vwar bokou nou bann ansenyan kalifye pe kit sa profesyon parmi lezot rezon ankor, me reform dan behavior e itos en lekol pa ganny arive dan 2 zour sa.  Parey mon’n dir pli boner Mr Deputy nouvo kod kondwit i deza dan lekol e reform ladan in deza ganny fer oparavan, son lenplimantasyon i parfwa enpe difisil vi ki pa tou striktir ki anplas par egzanp pa tou lekol primer ki annan li en councellor me pou le moman tou lekol segonder in ganny li son counselor. Problenm se trouv en meyer kandida pou fer sa louvraz, travay ek zanfan de no zour pa en travay fasil e plis ankor pou konsey zot pa nenport ki ki fer sa.  Nou zanfan toulezour i viv avek nouvo menas, nouvo trik dan lekol pou anbet zot ansenyan, i pa fasil se pou sa ki mon profit sa lokazyon pou felisit mon bann ansyen koleg pou sa travay nob ki zot pe fer.  Tou sa bann keksoz ki’n ganny dir pa ti egziste avan Mr Deputy Speaker, pou ki in ganny fer in bezwen annan reform – annou pa fer konmsi narnyen pa’n arive tou sa letan dan ledikasyon.  Nou pa pe dir ki tou keksoz i parfe, bokou i reste ankor pou fer me nou bezwen etre realis.  Napa okenn reform entans ki kapab ganny fer oplivit posib.  Wi sa sistenm ledikasyon ozordi i permet en zanfan pou devlop son talan, tou son potansyel, son karatkter, son values si li sa zanfan i servi byen sa sistenm.  Nou Prezidan ti dir kot i mal nou aranze kot i byen nou anbelir lo la, e anplis Gouvernman se nou me pa zis sa ansenyan, pa zis zofisye Minister ledikasyon nou tou nou bezwen ede pou met sa reform anplas e fer sir ki son enplimantasyon i en sikse.  Me i enportan kantmenm alafen pou poz nou lekor serten kestyon, eski bokou sanzman i anmenn bon rezilta?  Alors eski se reform ki solisyon dan nou sistenm ledikasyon?  Ou si non akote reform nou merit osi annan en sanzman latitid. Mersi Mr Deputy.

 

MR DEPUTY SPEAKER

Onorab Lebon.

 

HON LENNY LEBON

Mersi Mr Deputy Speaker, en bonn apremidi tou bann Onorab.  Mr Deputy Speaker Mosyon Leader Lopozisyon I pe koz lo en reform ki deza pe pran plas, i pe ganny enplimante dan ledikasyon. Mon konpran byen e mon krwar ki Leader Lopozisyon i konnen pou dir sa reform pe pran plas akoz nou deza annan dokiman ki la e i kapab vwar pou limenm pou dir i annan en Education Reform Plan 2009, 2010 e parey Onorab Jeannevol in dir sa Gouvernman in fer 3 reform dan ledikasyon.  Ok.  An 1998, 1991 apre 1998, avek sa bann reform in annan bann sikse e bann sikse ki remarkab e in ganny rikorde e la mon donn legzanp Mr Deputy Speaker.  Nou’n vwar pou dir akse avek ledikasyon e training lo tou nivo in a ganny agrandi, en National Curriculum ek Assessment Frame Work pou tou size dan curriculum in ganny revwar.  A quality assurance mechanism pou tou lekol in ganny entrodwir atraver seksyon quality assurances.  Nou literacy rate parmi bann adilt in amelyore konsiderableman, lalis i long e dan sa dokiman i annan plis ankor.

Mr Deputy Speaker permet mwan desin en protre reform ki’n ganny fer dan ledikasyon pou Leader Lopozisyon.  Ler nou get parkour reform dan ledikasyon nou ti vwar an 2007 kot Sesel ti pe komans repozisyon li pou adapte e sezi loportinite globalizasyon nou ti vwar lentrodiksyon en plan developman pou 10an, e sa nou ti kzo lo sa strategy 2017, ki ti koz lo plis transformasyon dan ledikasyon e en traning system ki reponn efektivman a bann challenges ki donn kalite e kantite resours imen nou bezwen pou nou devlopman soutenab.

An zilyet 2008 Prezidan Michel parey Onorab Jeannevol in dir i ti set up sa ki nou apel en National Education and Training Strategy Committee, sa ki nou apel NETSC, e i ti donn en road map pou nou achieve vziyon e bann target 2017.  Mr Deputy Speaker NETSC ti prezant Prezidan Michel avek son rapor an Desanm 2008, sa raport ti annan en Education Reform Plan avek bann gran rekomandasyon e targets dan 13 crtical areas pou reform.  Apre konsider sa rapor NETSC Prezidan Michel an Zanvye 2009 ti issue en dokiman avek tit “Policy Rocommendation Education Reform in Seychelles.  Sa dokiman ti propoz sa process reform ki merit ganny fer pandan en peryod 2an 2009, 2010 e parey mon’n montre I sa dokiman ki ti ganny pibliye.  Sa Education Policy Recommendation ti bezwen ganny translate koman en dokiman ki nou apel sa Education Reform Action e implementation plan e mon krwar Onorab Jeannevol in koz lo la e kot nou ti annan en komite oversight ki ti ganny etablir.

Avek tou sa reform Mr Deputy Speaker in annan bann challenges, ler nou ti fer reform an 1978, Minister Ledikasyon ti ganny konfronte avek bokou challenges ek presyon tel ki resours e kapasite imen e lezot ankor.  Ozordi zour bann challenges 1978 nepli en challenge pou Minister Ledikasyon me plito bann challenges ki sorti direk atraver parey mon’n dir sa 13th critical areas pou reform ki’n ganny mete pou lenformasyon anba 5 priority area of the Education Reform Program.  En legzanp Mr Deputy Speaker i Minister Ledikasyon in bezwen redwir letan pou enplimant sa reform, sa Education Reform Action Plan, ti pou pran 36 mwan me zot in fer li redwir pou vin 27 mwan kantmenm parey mon’n dir in annan challenges Minister Ledikasyon in rikord bokou lakonplisman remarkab an sa ki konsern bann aksyon ouswa lentervansyon lafen 2010.  I bon refer resorti Mr Deputy Speaker ki ziska prezan sa reform ki’n ganny pran plas in ganny evalye 2 fwa.  1 fwa par en konsiltan sorti aletranze e ler sa evaliasyon ti ganny fer e i ti ganny finanse par Linyon Eropeen.  Bann rezilta sa resers i ganny pibliye.  En dezyenm evaliasyon in ganny fer par bann zofisye Minister Ledikasyon kot seksyon planning dan sa Minister, la zot in servi zot bann zouti ki nou apel bann tools, zot in servi kestyonner e serve, e bann lenformasyon sa ki nou apel bann data pe ganny input e i pou ganny pibliye e byento bann dimoun pou ganny li.

Mr Deputy Speaker an 2011 nou ti vwar Departman Ledikasyon devlop sa ki nou ti apel zot plans and target pou 2011, 2015, an repondan lapel Prezidan Michel pou sak Minister annan zot plan daksyon pou 5an.  Departman Ledikasyon son plan and target 2011, 2015 in ganny compile pou konstri lo bann sa ki nou apel priorities, lo bann priorities reform dan ledikasyon e bann lezot priorities ki pa ti ankor ganny enplimante in ganny enkorpere ladan e osi i bon fer resorti ki dan sa progranm reform in ganny etale 2009, 2010, 2011 e bann nouvo priotities in ganny mete e osi sa ki bon ladan i bon fer resorti se ki I fer provizyon pou mezir e monitor, evalye osi bann progre viz a vi tou sa bann priorities.

Ler mon ekout Leader Lopozisyon koze mon osi mon’n en ansenyan enn ler mon krwar ki Onorab Pierre in koz lo sa lepok ki i ti ankor en ansenyan e in bliye pou dir in annan devlopman dan ledikasyon e devlopman pe kontinnyen.  Reform pe pran plas e sa ki li i pe koz lo la I annan en ta keksoz dan ledikasyon, ICT i dan curriculum, ok.  Ozordi nou pe koz lo teachers, nou pe koz lo retention of teachers, teachers i kite me sa i montre pou dir in annan sa ki nou apel en dynamic economy – savedir bann dimoun i al rod sa ki nou apel greener pastures – kot i pey pli byen.  Me parey Onorab Jeannevol in dir, i annan New Scheme Of Service ki pe ganny revwar e resers in ganny fer pou lenformasyon Leader Lopozisyon, i annan en ta resers ki’n ganny fer dan ledikasyon lo retention ki bann factors ki afekte sa ki nou apel brain drain. Me parey monn dir Mosyon i koz lo annou fer li pli vit posib pou lenformasyon tou manm ki la, reform dan ledikasyon ou pa reve, zis ou leve bomaten ou dir mon fer li.  Sa ki nou’n koz lo la parey mon’n montre i annan en road map apre sak lannen ou evalye e sa road map I dir ou kote ou pou arive, ler nou pe koz lo quality education nou fer li marye avek nou plan devlopman, en plan devlopman soutenab kot nou annan quality education avek quality e quatity resours imen.  E pou sa Mr Deputy mon pa pou long e mon krwar bann lezot manm ki pou koz lo la i ava koz plis. Mersi.

MR DEPUTY SPEAKER

Onorab Arnephy.

 

HON BERNARD ARNEPHY

Bonn apremidi, mersi Mr Deputy Speaker.  Mr Deputy Speaker mon pa pou long akoz mon panse tou bann pwen teknik ki ti dwatet fer resorti in fini ganny fer resorti e mon panse ki Onorab Pierre pa’n fer ase resers pou li vwar pou dir nou Gouvernman, Gouvernman Lepep atraver direksyon Prezidan Michel e Minister Ledikasyon in toultan annan en vizyon konkret pou devlopman ledikasyon dan nou pei, e i malere pou Leader Lopozisyon donn nou lenpresyon pou dir ki en kantite keksoz ki in dir i konmsi i non-existent dan nou sistenm Ledikasyon.  Parey mon dir pou mwan sa i malere.

Mon panse si i annan en Gouvernman ki invest plis dan son dimoun se Gouvernman Lepep, Gouvernman dizour – ki ledikasyon parey bann lezot sekter i pa’n en leksepsyon, petet zis mon ava fer sorti detrwa pwen zis pou re-ranforsi lo sa ki mon 2 koleg in dir.  Nou en sistenm, sistenm ledikasyon ki’n invest en kantite dan training pou nou bann ansenyan e ozordi mon krwar lemonn antye i kapab tir sapo avek nou pou dir nou en pei ki’n prodwir ansenyan dekalite.  Me parey nou konnen dan en lekonomi ki vibran i pa toultan fasil pou ou retenir tou ou bann ansenyan ki ou’n train, malgre ou ti a swete fer li – akoz dimoun i bouze, i rod bann leot avenues pou zot venture ladan.  Zis pou lenformasyon bann manm Onorab e piblik an zeneral Liniversite ki’n komans run bann course avek leozt Liniversite partners par egzanp ECULast year ti run en course ki ti ganny run par nou bann teachers lokal isi ki’n ganny training par nou sistenm, dan nou Liniversite e parmi tou bann pei ki afilye avek ECU ki ti sit sa menm leganzanmen Sesel ti sorti pli byen, avek 100 poursan pass, ok e Sesel – Liniversite Sesel ti ganny felisite malgre nou fek komanse, malgre nou nouvo sa i montre dan ki direksyon nou pe bouze e parey mon’n dir i sad pou Leader Lopozisyon fer ou krwar pou dir petet dan sa domenn nou lack sitan.

Ozordi dan lekol nou pe entrodwir nou en nouvo Pastoral Care System.  Onorab Lebon fek dir poudir reform dan sistenm ledikasyon i pa vin dizour ou landmen.  Reform dan ledikasyon i en prosesis ki pran letan e mon asire ki si tou bann partners konsernen enkli Minister Ledikasyon, lekol limenm, bann ansenyan, paran, etidyan, nou tou nou met sa zefor ansanm sa Pastoral Care System ki egziste dan lekol e ki mwan mon’n vwar en pti pe lafason ki nou dwatet operate zot pou transform nou lekol petet pli vit ki nou nou panse.

Ankor dan lekol ozordi Gouvernman avek linisyativ baze lo bann rekomandasyon ti ganny fer par Mr Naulan e ki Prezidan ti take onboard nou annan sa ki nou apel nou School Counsil e ozordi mon fyer pou dir ki dan lamazorite lekol sa counsil pe fer en tre bon travay,e ankor avek tou bann sipor neseser ki zot a gannyen mon asire sa pou ede adres enn de bann defayans ki nou sistenm ledikasyon i annan parey nenport ki sistenm ledikasyon omonn ki pa toultan parfe, me keksoz dan sa direksyon pe ganny fer e keksoz pe arive.

Minister in osi vwar li neseser par egzanp pou re-entrodwir en student council dan lekol, e sa student council i pou akt koman en body ki pou donn bann etidyan en say dan lafason ki zot run zot lekol.  Onorab Pierre pe koz lo lotonomi lekol – vwala en fason kot lotonomi i antre.  Ler etidyan i annan sa sense of belonging pou son lekol sa i ed zot pou zot annan sa lapartenans e pou zot kapab travay ver achievement dan diferan domenn – ki swa akademik, ki swa sportive, ki swa kiltirel zis parey Onorab Pierre in mansyonnen.  So tou sa bann keksoz i deza egziste dan nou lekol.  Sa ki nou nou pe demande se ki tou dimoun i get onboard e i donn sa koudmen.  E la mon pe lans en lapel avek lakominote, sa zafer lekol la pa zafer zis Gouvernman sa, pa zafer zis Minister Ledikasyon, i zafer tou dimoun akoz nou tou ki anvoy nou zanfan lekol mon krwar nou annan responsabilite sivik, en responsabilite moral pou nou ede pou fer sa lenstitisyon avanse.  Apre tou ler sa bann etidyan ki nou’n formen zot konplet zot primer, zot segonder, zot ledikasyon tersyer zot pa vin travay zis pou Gouvernman zot – zot travay osi pou bann sekter prive.  Alors mon panse ki bann sekter prive osi I dwatet get onboard e donn en koudmen dan sa direksyon.

E finalman petet Mr Deputy Speaker en pwen mon ti a kontan fer ankor se lo konsern ledikasyon sivik.  Mon krwar sa ti en domenn ki ti pe ganny en pti pe neglize menm si i ti feature dan curriculum PSE me pa tout fwa ki tou bann teachers ti pe entegre sa size byen dan timetable lekol.  Depi Zanvye sa lannen Minister in fer li son lobligasyon pou asire ki sak lekol dan primer, dan segonder i teach size ledikasyon sivik pou 40 minit lo zot timetable, e in menm annan plan pou ki sa tel ledikasyon i vann dan bann pos segonder.

Mr Deputy Speaker content ledikasyon sivik i pou ed nou pei bouze, i pou ed nou pei pou adres sa bann issues sosyal, fleo sosyal ki nou koz lo la ozordi.  Ozordi nou pe koz lo renesans moral tousala i pou ede adrese e petet la mwan mon ti a lans en lapel pou ki 40 minit i menm pa ase.  Akoz?  Sa ledikasyon i ed bann etidyan pou zot dekouver zot lekor koman en endividi.  I ed zot pou zot apresye sa ki sistenm i fer pou zot, i ed zot pou zot apresye sa ki zot paran I fer pou zot, i ed zot apresye sa ki lakominote i fer pou zot e i ed zot apresye sa ki sosyete i fer pou zot.  I fer zot ganny en apersi zeneral lo sa bann keksoz ki deroule otour nou, nou bann issues sosyal, ekonomik, politik ensideswit, e mwan mon panse pou dir sa i healthy pou hollystick development sak endividi.  Alors ankor ennfwa mon ti a demande ki Minister Ledikasyon i kontinyelman entansifye son zefor atraver son Curriculum Development Section pou li kontinyelman train nou bann teachers pou ki sa ledikasyon sivik I vin en reisit total dan nou bann lekol.

Alors avek sa detrwa mo Mr Deputy Speaker mon panse ki Mosyon Onorab Pierre pa stand much ground akoz sa ki i pe demann nou i egzakteman sa ki nou sistenm pe fer, i egzakteman sa ki Gouvernman pe fer, i egzakteman sa ki Parti Lepep i anvizaze fer dan lefitir pou byennet son zanfan, byenet son kominote, byennet lasosyete an zeneral.  Mersi Mr Deputy Speaker.

 

MR DEPUTY SPEAKER

Onorab Pillay.

 

HON SEBASTIEN PILLAY

Mersi Mr Deputy Speaker.  Mr Deputy Speaker mon’n ekout byen atantivman bann entervenan lo sa Mosyon e mon’n ekout prezantasyon loter Mosyon e mon pe fer en analiz e mon krwar poudir afen kont nou pou pas nou letan zis fer reform, nou pou koz lo reforming, lo reforms me sa ki pli enportan se formasyon e nou pa pe donn li ase lenportans.

Mr Deputy Speaker nou pe fer reform e nou koz ankor lo fer reform e nou pa mazin lenpakt ki sa i annan lo bann dimoun ki bezwen delivre lo sa bann reform.  Teachers dan laklas ozordi sa ki enportan pou li I oule konnen poudir ki sa reform pou anmennen pou sanz son practice pou li kapab enstri sa zanfan pli byen. Pou mwan sa ki enportan se ki, ki reform i anmennen pou ki sa zanfan ki dan son laklas i benefisye, i aprann pli byen, i aprann plis e i devlop pli byen.  Nou pe koz lo en bann gro, gro term, nou pe koz Paradam Shift dan ledikasyon, nou pe koz lo Curriculum Reform, nou pe koz lo autonomy for schools – me ki kantite term nou pou koz lo la kan finalman the issue of concern is what is happening dan sa laklas, dan sa lekol avek sa teacher.  Pou mwan sa ki pli enportan se ki annou koz lo bann sanzman mazer ki nou bezwen fer me non pa reform pou anmenn sekirite pou teachers dan lekol, pou fer ki teachers ler I vin travay i dan en lanvironnman ki safe, pou ki ler sa etidyan i antre dan laklas i asiz lo son sez e i ganny lanvi aprann.

Nou koz lo reform nou pran larzan nou met dan Bidze pou nou fer reform, nou anmenn dokiman ki nou dir Education Reform Action Plan. Lonorab Leader Lopozisyon dan son prezantasyon in koz lo Curriculum Reform mazer ki nou bezwen fer – me i la, i la, in ekrir la – an nwar ek blan.  Nou koz lo autonomy for schools – i la li in ekrir an nwar ek blan.  Sa ki nou devret pe koz lo la se evalye sa ki nou pe fer e feed li dan reform.  Nou pa fer evaliasyon sa ki nou pe fer e nou dir fer ankor reform.  Be kot nou pe ale ek reform?  Ki kantite reform ki nou pou fer?  Finalman en zanfan pou bouz en sez, lot pou fer an zafer nou pou fer reform.  Nou pa kapab kontinnyen fer reform san ki nou evalye sa ki nou’n fer e feed sa ki nou ganny from sa bann evaliasyon dan sa bann reform ki nou pe fer konmela.  Eski nou’n achieve sa bann mild stone ek bann reform ki nou deza pe fer?  Eski nou’n pran letan pou regard bann reform ki nou’n komanse e vwar si sa bann key performance indicator ki nou dir nou pou achieve, nou’n achieve?   Eski nou’n fer sa? E ankor enn fwa nou vini nou koz lo reform sistenm Ledikasyon.  Finalman ou konenn ki nou pou end up avek?  En sistenm Ledikasyon ki ranpli avek reform, depi anba ziska anler ki pou napa okenn koneksyon, ki pou confusing e ki pou afekte performans nou bann etidyan.  A sak lannen ki nou entrodwir reform Mr Deputy Speaker mon’n en ansenyan, monn travay koman en school leader e mon’n travay koman en dimoun lo nivo Minister ledikasyon ou vwar pou dir i annan en lenpakt mazer lo sa group etidyan ki pas anba lenfliyans sa reform.  I enportan pou nou mazin sa e mazinnen pou dir sa bann zanfan ki pou ganny afekte par sa reform i piti en lot dimoun, i piti sa msye, i piti sa madanm e zot zot anvi ki zot zanfan i fini lekol, i fini zot letid e demen zot kapab achieve something dan zot lavi.  Sa ki enportan pou nou mazinen.

Sa bann term curriculum reform, lontan nou pe koz lo curriculum reform.  Nou konnen sa, nou konnen nou bezwen fer li – be sa i pa en keksoz ki nou bezwen fer dizour ou landmen sa.  Nou pa kapab sanz en progranm letid dezour ou landmen e mon krwar en fot ki nou fer en kantite dan sa pei e sa i enkli pou Gouvernman e pou lezot dimoun andeor se ki nou pa donn letan bann reform ki nou met anplas pou annan okenn lenpakt.  Nou dir nou oule fer reform e dan 1an nou’n fer sa reform dan 1an nou oule vwar rezilta dan 1an be ledikasyon pa marse koumsa.  Lenstriksyon pa marse koumsa.  We have to allow time for the reforms to take place pou zot kapab settle e komans marse.  The more we push the Ministry of Education to make reforms, the more we constrain li, the more nou bann teachers I vin fistre because reform agenda pe vin left right and center, dan zorey gos dan zorey dwat e zot menm zot zot pa kler lo la.  Mon a donn ou en legzanp Mr Deputy.  Nou’n entrodwir defrentiated instruction, I enportan akoz nou bezwen donn valer tou zanfan dan en laklas, me ozordi bokou teachers pe struggle avek sa konsept akoz nou bezwen les li adapte.  Bann sistenm ki’n swadizan fer sikse parey Langleter i ankor pe fer reform zot osi.  Napa en pei omonn ki’n achieve sa ki nou apel en optimum performer of their education system akoz i napa optimum performance akoz ledikasyon de natir i dinamik, i bezwen evolye e i bezwen fer fas avek bann kontrent e sanzman ki pe pase.  Alors i counter productive sak fwa nou angaz nou dan en progranm reform ki mon pou apel li en progranm reform entans ki nou’n fini komanse pou nou ankor ennfwa pe koz e pe ensit lopinyon piblik lo reform ankor dan nou sistenm ledikasyon.  Sak sanzman ki arive pa vedir en reform dan sistenm ledikasyon, si nou mank sez annou rod provizyon pou rod sez, pa bezwen en reform pou met sez dan nou sistenm ledikasyon.  Si nou mank tablo annou rod fason pou nou met tablo- pa bezwen en reform.  Si nou get dan Bidze par egzanp nou vwar poudir Minister Ledikasyon in komans met white boards, 10an pase ti napa white boards nou bezwen konpran poudir devlopman pou ariv avek paste ki nou kapab afford pou li arive.  Nou pa viv dan en utopia kot nou annan tou resours pou nou kapab fer tou kan nou anvi, kan nou oule, kimannyer nou anvi fer li.  And this is fundamental e sa pa aplik zis pou lopinyon piblik me i aplik pou sa bann dimoun ki pe travay lo sa bann reform.  Mon vwar bokou dan sa bann reform la e mwan dan bann konversasyon ki mon’n gannyen avek bann teachers e koman en former teachers mon demande konbyen teachers ki very clear about sa bann reform agendas.  Se zot sa bann pov dimoun ki bezwen enplimant sa bann reform, se zot ki bezwen aswar prepar leson, prepar legzanmen, fer tou sa bann keksoz.  Annou annan en panse pou zot, annou donn zot en clear direction e nou pe seye donn zot sa.  Lenportans Mr Deputy i lo fer sa ki nou kapab fer la pli byen posib.  Annou go for the low lying fruits, low hanging fruits – se sa ki enportan.  Annou achieve bann keksoz ki achievable, annou met bann performance indicators ki nou kapab gannyen, ki realistic.  The more we talk about reforms, the more we create confusion avek nou system ledikasyon.

I annan en lot pwen ki mon oule koz lo la se sa optimizing the use of resources.  Mon dakor avek Leader lopozisyon.  Nou bezwen fer pli byen pou optimize the use of resources.  Mon asire ki poudir dan bokou lekol ozordi, dan zot Resource Room i annan liv, i annan resours ki pa pe ganny servi, e lannen ale, lannen vini nou buy more text books.  This is not about the reform. Nou pa bezwen reform pou dir teachers servi text books.  Nou bezwen kre en lanvironnman ek en kondisyon pou zot kapab servi sa bann resours.  Sa ki mon per se ki sak sanzman ki nou oule fer avek ledikasyon annou anmenn en reform.  Be i worring sa – akoz si nou kontinnyen koumsa nou pou end up parey mon’n dir ek tro bokou reform ki nou pa pou zanmen kapab manage e ki pou kout nou an arm and a leg pou nou kapab afford e finalman sa ki pli grav ankor nou pa pou konnen kote nou ete kot nou sistenm lediksyon i konsernen.  And this is fundamental.

E en lot pwen ki mon oule koz ankor lo la se mon oule retourn lo sa pwen evaliasyon.  Mon’n vwar ladan i annan bann mild stones ki nou’n dir dan sa Education Action Plan ki nou bezwen achieve.  Mwan mon pa anvi ankor reform mwan – sa bann mild stones ki nou’n met la la, dir nou akoz nou pa ankor achieve li?  Konbyen letan nou bezwen fer pou nou achieve li?  Ki nou pou fer pou nou achieve li?  Ki nou bezwen amande avek pou nou kapab achevie li?  Akoz zot byen zot, napa narnyen ki mal avek, zot current e zot modern tou.

Sa bann dokiman i la. Ou pli zoli dokiman ki ou ekrir lo reform i pou napa okenn sans si nou pa kapab enplimant e ou pa kapab inform the chance where it is most important e sa se dan sa class room.  E finalman i anmenn mwan lo en pwen ki pou mwan i tre enportan i koman en former teacher, koman en Former Deputy Headteacher e koman en Former Education Officer mon krwar ki fondamantalman this is where we are going wrong in this country, e Onorab Arnephy in koz lo la en pti pe.  Nou konnen nou pran sa zafer ledikasyon la nou dir sa en problenm Minister Ledikasyon i en problenm lekol, i en problenm teachers, teachers ki bezwen deal avek sa.  I annan paran ou vwar lo kot lekol zour zot zanfan in fer en keksoz ki mal, me ler son zanfan i fer sa ki byen limenm li i pa vini pou felisit son zanfan.  Lekol i zis en moman dan lavi en zanfan okour en lazournen.  Me tou sa ki ou fer kot lekol i kapab ganny undone kot lakaz si paran pa pe swiv zot zanfan, pe enport si ou anvoy ou piti dan lekol Gouvernman oubyen ou anvoy ou piti dan lekol prive deman sa zanfan ki’n lekol dan lekol Gouvernman e ou piti ki’n lekol dan lekol prive pou dan menm sosyete.  Savedir la sa ki arive dan Minister Ledikasyon i konsern ou osi so annou arete fer sa bann polemik about Gouvernman ek ledikasyon.  Ledikasyon pa devret en deba politize, i devret en deba zeneral ki konsern nou tou akoz ledikasyon nou zanfan i pa en keksoz ki nou devret zwe avek.  Bomaten nou’n koz lo labi zanfan, nou’n koz lo sa ki (-) nou zanfan ledikasyon i zis parey.

E finalman mon’n dir finalman taler mon krwar ki lapeti i vinn anmanzan mon komans mazin lezot keksoz pou mwan dir, i annan en issue kot I konsern larzan ki nou envestir – e pou mwan i annan en lenportans mazer ki nou bezwen atase avek sa akoz bokou zanfan pa realize sa.  Mon’n fer en pti analiz bomaten mon’n regarde konbyen i koute pou en zanfan pey en legzanmen Angle par egzanp.  E si nou dir on average par lekol i annan 30 zanfan i tonm apepre R372 mil zis pou en legzanmen ki Gouvernman i peye e ladanmenm ou ganny en zanfan ki deside pou li pa attend laklas, so nou bezwen en reform pou adres sa?  Non, tou senpleman pran nou responsabilite.  In ler dan sa pei pou nou pran nou responsabilite e fer keksoz ki nou devret fer byen, keksoz ki la.

So avek sa Mr Deputy mon oule zis dir ki parey mon oule retourn lo mon pwen fondamantal se ki annou aret koz lo reform, annou focus lo moving forward in nou sistenm ledikasyon, annou focus lo evalye sa ki nou’n fer, feed sa bann evaliasyon dan sa ki nou pou fer apre koumsa nou a konnen, nou a ganny en clear picture kote nou ete, kote nou pe ale e ki sa ki nou anvi fer. Thank you.

 

 

MR DEPUTY SPEAKER

Bon, napa personn lo mon lalis ankor. Onorab Decommarmond.

 

HON CHARLES DECOMMARMOND

Mr Deputy Speaker, mersi tre bref en – mon pa pou long ditou.  Mwan lo sa Mosyon fransman mon letan en keksoz ledikasyon i ganny mete mon toultan rod fason pou mwan kapab sey siporte, be mon pe rode la mon pa pe trouve.  Sa ki fer en problenm – akoz Mosyon pou mwan i pa spesifik ase e i pa to the point konmsi.

Nou pe koz, mover Mosyon in koz lo Quality Education.  Lalwa nou fek pase ki tous zisteman sa.  Bann koleg in koze avan ankor pou ranforsi sa pwen ki pe ganny fer.  Tou sa ki li in met devan pe sey demande, mon vwar i pe ganny fer.  Nou annan lalwa ki nou’n fek pase dan sanmenm sa Lasanble lo Tertiary Education Bill ki nou’n pase, be sa i tous ankor lo Quality Education ki Nasyon Ini osi pe demande sa bann zafer la e nou pe fer keksoz an konformite avek sa bann demann lo nivo enternasyonal.  E prezan si petet mover Mosyon ti pe dir nou ki fodre sanz enn de dimoun, enn de lenfrastriktir pou permet enplimantasyon reform ki nou deza pe fer lo sa reform la, pou mars pli byen – mon ti ava konpran li e mon ti ava 100 poursan dakor avek li.  Me i pa pe dir nou sa.  Parkont dan bann deliberasyon ki’n ganny fer mon panse ki Minister Ledikasyon i devret pe ekoute ki’n pase dan sa Lasanble ozordi pou zisteman vwar kote i annan sa bann mankman pou lenplimantasyon sa reform ki pe deza ganny fer pou mars pli byen.  Par egzanp i annan serten dimoun ki pou bezwen kekfwa ganny bouze, serten lenfrastriktir.  Par egzanp pe koz IT dan lekol, lekol Cascade lekol Primer i annan IT problem, problenm petet sa lasal kot sa IT center i ete la ki pa konvenab, petet la ki devret ganny bouze – sa lasal.

Ou koz lo lotonomi.  Be mon konnen la i annan School Council.  Cascade nou ti annan sa problenm avan e pa zis Cascade, tou lekol lontan, enpe letan pase letan en dimoun par egzanp i oule fer en donasyon a en lekol ti pran tout en bann prosedir birokratik ensitswit.  Mon rapel menm son koleg dan Lasanble avan Onorab, ex-Onorab St Louis, Onorab Arissol ti fer en problenm dan nou Lasanble la akoz kestyon donasyon lekol La Rosiere ki pa ti pe ganny aksepte par Minister Ledikasyon.  Minister ti’n at one stage menm refize serten donasyon ki en endividi, la ozordi nou pe dir ek sa reform nou pe dir vin kontribyen vin partisip avek leko.  Sa letan ti annan problenm ek sa reform sa in sanze.  Nou’n fek vwar la detrwa semenn pase le 1 Zen, Cascade in ganny dimoun ki’n vin fer donasyon, e avek counsil la i annan plis sa keksoz ki pe marse la.  So ou vwar, mwan mon krwar en keksoz ki nou bezwen met antet kekfwa nou bezwen swiv pli byen Bidze.  Letan Bidze i vin devan nou lafen lannen, annou swiv byen dan Bidze pou vwar ki Minister Ledikasyon in fer sir ki in tous bann pwen ki nou pe vwar, bann mankman pou lenplimantasyon korek e pli vit si nou le dir – reform ki deza nou’n anbark lo la pou fer sir ki sa i ganny fer korekteman, ki nou vwar ki Bidze in ganny apportion, in ganny allocate dan sa bann areas kot nou pe dir kekfwa i annan mankman.  Anmenmtan mon krwar nou Lasanble, i nou devwar osi Manm Lasanble pou met bann kestyon spesifik a Minis Ledikasyon pou vin dan nou Lasanble, pou vin reponn kestyon lo kote bann pwen bann mankman dan reform ki nou’n deza anbark lo la kot i annan sa bann mankman, kot i annan keksoz ki nou devret pe akseler plis akoz i annan keksoz ki pa pe marse ensidswit.  Sa bann keksoz en fason ki reform entans mon kapab dir, ki nou’n deza pe fer, reform konplet, en gran reform ki deza pe ganny fer i al pli vit e pli byen pou satisfer nou demann.

Mon vwar keksoz koumsa mwan, e se sa ki mon’n fer sa pti entervansyon pou ki Minister Lediaksyon i ekout nou, nou konpran konsern ki Onorab in met devan, Onorab Leader Lopozisyon me Selman pa dan form sa Mosyon dan sa fason ki in mete. Se lo sa pwen la teknik la si oule ki mon pa pou vote lo sa Mosyon, mon pa pou siporte otherwise mon konpran son pwen I oule ki nou reform ki nou deza pe fer la i al pli byen, pli vit e se sa alor si i koumsa i annan sa bann pwen ki nou’n fer sorti lezot koleg osi in fer sorti ki sa i devret ganny ekoute par lotorite konsernen e nou nou swiv li ansanm avek li dan nou Bidze e nou a donn lanmen osi poz bann kestyon kot i konsernen nou pou fer sir ki nou reform ki nou’n anbark lo, sag ran reform I ale, i al vit pou benefis nou pep, nou nasyon, nou zanfan demen. Mersi bokou Mr Deputy Speaker.

 

MR DEPUTY SPEAKER

Bon si napa lot, right of reply Onorab Pierre.

 

HON DAVID PIERRE

Mersi Mr Deputy.  Mr Deputy sad day, very sad day akoz monn fer 20 pwen.  Monn fer 20 pwen la ki mon pe al refer sorti avek zot ki mon’n demann zot pou zot konsidere, e 20 pwen ki enportan pou nou sistenm ledikasyon alavenir.  Me avan mon al lo sa 20 pwen mon pli sagren ankor pou vwar en ex-ansenyan ki ti pe dispit, Onorab Pillay in vin dispit e mon pou pran 3 pwen ki Onorab Pillay in refer sorti dan son dispit ki i ti pe dispit pou mwan montre ki …

 

MR DEPUTY SPEAKER

Disipt is unparliamentary. Servi en lot mo.

 

HON DAVID PIERRE

Dan son largiman ki in anmenn devan pou mwan montre ki petet i en pti pe konfize.  Dan mon deliberasyon dan prezantasyon mo Mosyon mon’n koz lo en nouvo lapros viz a vi accountability, viz a vi lefe ki lekol i bezwen accountable ek bann paran e bann etidyan.  Onorab Pillay i dir avek nou koumsa pou dir kote nou al mal se ki nou pa pe involve paran, nou pa pe involve paran e sa zafer ledikasyon i pa en zafer zis Minister Ledikasyon sa i en zafer paran osi, me selman i pa dakor i pa pou vot pou sa Mosyon akoz sa Mosyon pe demande ki lekol i accountable to the parents kontradiksyon.

Limero 2.  Onorab Pillay in koz lo differentiated learning.  In dir ek nou koumsa ……

 

(Interruption)

 

MR DEPUTY SPEAKER

Order, order.  Right of reply.

 

HON DAVID PIERRE

Thank you Mr Deputy. In dir ek nou koumsa pou dir lekol in adapte en sistenm teaching ki nou apel differenciated learning e se pa e bann teachers pa pankor kapab adapte avek.  Me selman mon pe dir poudir be pou fer differentciated learning nou kapab fer li fodre i annan reform e fodre ki nou donn lekol sa kalite resours akoz differentciated learning okenn dimoun ki konpran li i konnen ki pou dir I vin avek en kantite resours li Mr Deputy.  So annou annan sa political will pou nou fer li, annou donn sa kalite resours pou ki differentciated learning I vin en realite.  Li i dir avek nou koumsa poudir then les teachers ava al adapte, be teachers pa pou kapab adapte si ou pa donn li sa resours pou li kapab fer sa travay avek.  So, mon pe dir poudir fodre nou donn sa resours, be la i dir avek mwan i pa pe vot pou sa Mosyon akoz i pa dakor avek sa li, selman i anvi vwar differentciated learning vin en sikse dan lekol.

Mr Deputy Speaker pli gro problenm ki mon annan avek lentervansyon Onorab i se ki i dir poudir Gouvernman pe deza fer reform, right!  Me selman, me selman i pa menm krwar annefe mon’n sagren ki in dir sa, i pa menm krwar ki bann teachers i konpran sa bann performance indicators ki Minister in met an plas.  Be Mr Deputy ki mannyer Gouvernman i kapab krwar ki i kapab fer reform efektivman si i pa pe kapab ganny bann ansenyan pou konpran sa reform ki i pe fer e pou bring them onboard, ou pa kapab fer reform si ou ansenyan pa onboard.  Ansenyan i bezwen onboardThis is where mon pe dir avek zot, reform fodre i ganny revwar, sa ki mwan mon pe propoze i 20 infact i annan plis ki 20 pwen.  Mon pou nonm zis 20 mwan, mon pou nonm zis 20 e ler mon nonm sa 20 pwen la mon le ki zot tou lo lot kote latab i rekonsidere, ok zot rekonsidere.

Nimero 1.  Si i annan okenn manm lo lot kote latab ki believe ki nou bezwen quality education.  Donn sipor sa Mosyon.  Si zot krwar ki prosperite en Nasyon i depan lo kalite skills ki nou kapab donn nou zanfan pou li devlope, then donn sipor mon Mosyon.  Akoz sa Mosyon pe demande ki nou annan en sistenm ki pou donn zanfan sa skills. Si nou believe dan en sistenm ledikasyon ki konplet e ki bon e ki donn konesans baze lo forte en zanfan then mon pa konpran akoz zot pa pou vot pou sa Mosyon.

Katriyenm pwen.  Si zot krwar ki nou bezwen donn en bon Bidze Minister Ledikasyon e fer sir ki sa Bidze i pli byen ganny zere parey Onorab Pillay in dir then donn sipor sa Mosyon.  Napa okenn rezon akoz zot devret vot against sa Mosyon.

Senkyenm pwen.  Si zot krwar Mr Deputy ki nou devret donn ansenyan Seselwa plis loportinite pou devlope profeysonnelman, donn zot sa posibilite pou zot ganny zot degree, then donn sipor sa Mosyon.  Akoz se sa ki sa Mosyon pe demande.  Si zot krwar ki nou bezwen rod en fason pli efektiv pou rezourd problenm disiplin dan lekol, akoz problenm disiplin dan lekol i en issue.  Si zot krwar dan sa lapros a whole school approach then donn sipor sa Mosyon.  Si zot krwar ki nou bezwen fer tou pou nou sey retenir nou ansenyan Seselwa, si zot krwar ki nou bezwen fer en letid pli aprofondi pou vwar kwa vreman ki pe fer nou bann Seselwa kit lansenyman isi Sesel then donn sipor sa Mosyon.

Si zot krwar Mr Deputy Speaker, nimero 8, ki nou devret adopte teknolozi, si zot krwar.

 

(Interruption)

 

MR DEPUTY SPEAKER

Mon pe konte konmsi in ariv 15 non?

 

HON DAVID PIERRE

Non, non, i fer 8 la.  Si zot krwar ki nou devret adopte teknolozi pou ansenyen, Mr Deputy parey Onorab Decommarmond in dir donn sipor sa Mosyon.

Limero 9.  Si zot krwar ki nou devret adopte en curriculum ki pli fleksib, ki adres bezwen tou nou bann zanfan Seselwa, then donn sipor sa Mosyon.

Limero 10.  Si zot believe dan apply Vocational Program, si zot krwar ki nou devret adopte sa dan nou sistenm ledikasyon then donn sipor sa Mosyon.

Limero 11.  Si zot believe dan empowerment pou nou bann ansenyan, si zot kwar ki nou bann ansenyan i devret sers pli gran leksperyans, then donn sipor sa Mosyon.

Limero 12.  Si zot vreman konpran benefis plis lotonomi pou nou lekol, real lotonomi not just on paper – lotonomi pou nou lekol, si nou konpran son mervey, si nou konpran fleksibilite, ki i anmennen dan lansenyman then donn sipor sa Mosyon.

Limero 13.  Si zot believe dan plis accountability parey mon’n dir taler viz a vi manm piblik e viz a vi nou bann etidyan then donn sipor sa Mosyon.  Si ou en Manm ki konpran ki konpran benefis ki en lekol i kapab gannyen ler son bann manm, ler son staff i own planifikasyon lo kimannyer sa lekol pou deroule pandan 1an, si zot believe ladan, si zot believe ki bann staff i devret own sa, i devret ganny devlope par lekol then donn sipor sa Mosyon.  Si zot believe ki nou bezwen parey Onorab Pillay in dir, revwar fason ki nou asses sa ki pe pase dan nou bann lekol, revwar fason ki nou asses nou bann zanfan parey Onorab Pillay in dir, then donn sipor sa Mosyon.  Si Mr Deputy si bann manm lotkote latab i believe the power ki the internet, ki teknolozi, ki computer i kapab anmenen dan lansenyman, si zot believe dan digital education, dan blended learning then silvouple donn sipor sa Mosyon.

Si zot believe ki nou bezwen revwar lapros lansenyman matematik dan lekol.  Si zot krwar letan Minister Ledikasyon i dir ki nou annan en problenm dan lansenyamn matematik dan lekol, si zot believe ladan e si zot believe ki nou devret revwar lapros lansenyanm matematik dan lekol pou elev nivo, pou elev standar then donn sipor sa Mosyon.

Si zot believe, si zot krwar ki nou bezwen revwar e re-evalye SIP – mon pa pe dir abolir SIP mwan Mr Deputy mon pe dir re-evalye, fer li vin en sesyon ki pli statezik, si zot believe ladan e zot krwar dan son bann lavantaz ki i pou anmennen pou bann lekol then donn sipor sa Mosyon.

E finalman si zot krwar dan kapasite nou bann ansenyan Seselwa e zot krwar parey plizyer pei in fer ki nou kapab lokaliz legzanmen IGCSE avek sipor Cambridge pou nou kapab save en kantite larzan an relasyon avek sa Minister, si zot really believe ladan e zot really believe dan nou bann ansenyan Seselwa e ki zot krwar ki nou bann ansenyan i vreman kapab e zot deserve sa loportinite then donn sipor sa Mosyon.

Mr Deputy avek sa mon dir avek bann manm Parti Lepep zot napa okenn rezon pou vot against.  Donn sipor sa Mosyon. Mersi.

 

MR DEPUTY SPEAKER

Bon, loter Mosyon in fer son summing up e in demann zot pou donn sipor son Mosyon.  Avek sa nou a pran en vot lo sa Mosyon.  Tou bann ki anfaver lev zot lanmen.  1 vot.  Tou bann ki kont sa Mosyon lev zot lanmen?  Bon i kler ki Mosyon in ganny rezete.  E nou fini nou travay pou ozordi.  Nou pou rezwenn Mardi le 19, 9er bomaten.

 

(Adjournment)