::
Home » Verbatim » Verbatim - First Term 2012 » Tuesday 3rd April 2012

Tuesday 3rd April 2012

Download PDF


NATIONAL ASSEMBLY OF SEYCHELLES

Tuesday 3rd April 2012

The Assembly met at 9 am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal.

 

(Interruption)

MR SPEAKER

Onorab, Onorab mon ava konsey ou to refrain from sa.  Ok.

Bonzour tou bann Manm Lasanble Nasyonal.  Bonzour Minis, bonzour tou bann ki pe ekoute a lekout.  Ozordi nou pe zwenn avek Minis pou Zafer Etranzer pou reponn plizyer kestyon, e an vi ki sa i premye Question Time pou sa lannen avek nouvo Lasanble, lafason ki i konpoze ozordi.  Sa bann lareg swivan pou aplike.  Loter kestyon pou annan drwa demann 2 supplementary, Lopozisyon pou annan drwa annan 2 e parti mazoriter ankor 2.  Ok, savedir formil in sanze.  Ok.  Loter kestyon i annan drwa demann 2 siplemanter, lopozisyon i annan drwa demann 2 siplemanter, e Parti Lepep lo son kote li i pou annan drwa 2 dimoun demann siplemanter.  I kler?  Zot pa ganny en konpran?

 

HON MARIE-ANTOINETTE ROSE

Mr Speaker, point of clarification. Eski Leader of Government Business i annan menm drwa avek Leader Lopozisyon pou li osi demann 2 supplementary over and above, ouswa 2 supplementary ki lezot Manm i kapab demande?  Mersi.  Eski le 2 Leaders i annan drwa demann 2 supplementary over and above sa 2 supplementary ki ou’n dir kote mazoriter i annan?

 

MR SPEAKER

Sa ti ganny aboli depi lannen pase, sa right pou le 2 Leaders, me sa i en keksoz ki nou kapab take up dan Business Committee a lavenir, me pou ozordi, vi ki annan 9 kestyon par Minis lo Order Paper, e mon bezwen manage time, right, anplis i annan en question, en PNQ ki pe vini apre.  Sa ki mon’n dir se sa ki pou aplike.  Si pou annan nesesite pou donn privilez le 2 Leaders, nou ava diskite apre e si nou tonm dakor ki wi, then nou pou bezwen neseserman redwir lakantite kestyon ki aparet lo Order Paper.  Rezon ki nou ti tir sa privilez pou sa 2 Leaders, se zisteman pou permet annan plis kestyon orizinal lo Order Paper.  Me nou kapab diskit sa, ozordi se sa ki pour aplike.  So, mon ava envit Onorab Pillay pou demann son kestyon.

 

HON SEBASTIEN PILLAY

Mersi Mr Speaker.  Bonzour tou Manm Onorab, bonzour Minis.  Minis, premye kestyon i koumsa.  Eski Minis i kapab eksplik nou Lasanble ki bann kriter ki son Minister i servi letan i negosye legzanpsyon viza avek bann pei etranze?

 

MINISTER JEAN-PAUL ADAM

Mersi bokou Onorab.  Mr Speaker, tou bann Manm Onorab, bonzour e mon remersye zot pou sa loportinite pou reponn bann kestyon ki zot met devan mwan.  Lo sa kestyon ki bann kriter ki nou servi, mon krwar i enportan tou dabor ki nou note ki Sesel, swa koman en destinasyon touristik, nou nou’n etablir en sistenm kot tou viziter isi Sesel i kapab antre dan nou pei e zot pa bezwen ganny en viza an avans.  Savedir letan zot antre dan nou teritwar, zot ganny en viza, zot ganny en tanpon dan zot paspor o moman larive, e sa i san en viza, me i annan serten kriter kantmenm ki tou viziter i bezwen respekte, par egzanp zot bezwen annan en tiket pou zot retourn dan zot pei eksetera.

Alor enn bann premye keksoz ki nou fer, se antan ki en pei ki pa enpoz viza lo lezot pei nou dir avek tou nou bann partener, san eksepsyon ki vi ki nou nou pa enpoz okenn viza lo la baz resiprosite, konsidere pou fer menm keksoz avek nou.  E mon fyer pou dir ki Seselwa 72 pei dan lemonn pa enpoz viza lo nou.  E pou en pti pei sa pa nanryen, konsideran ki i annan 193 manm dan Nasyon Ini, savedir preski lanmwatye lemonn Seselwa i kapab voyaze san viza.  Nou Minister i fer li en priyorite pou nou angaz tou nou bann partener pou tir okenn viza avek nou, me nou bezwen realize osi ki serten pei, sak pei i souveren, sak pei i fer son desizyon dapre sa ki dan son lentere, e serten pei, deswit zot dir ou, mon polisi se pa pou permet okenn nasyonalite vin kot mwan san viza.  En legzanp se Lostrali.  Tou nasyonalite, san leksepsyon i bezwen en viza pour al Lostrali.

Nou kontinnyen demann tou nou bann partener e nou servi menm kriter pou nou regard bann priyorite par egzanp bann ki nou annan relasyon diplomatik tre pros avek, bann avek ki nou annan korperasyon teknik, ki nou annan relasyon ekonomik tre for, kot bokou Seselwa i voyaze, kot bokou Seselwa i fer biznes, e osi bann pei avek ki nou partaz bann lyen bann lorganizasyon rezyonnal par egzanp SADC ek COMESA. I annan osi serten pei ki enterese pou fer en tre bon lakor avek nou e se zot ki apros nou.  Alor, se en pe sa bann kriter ki nou servi.  Mersi Mr Speaker, mersi Onorab.

 

MR SPEAKER

Onorab Pillay.  Request.

 

HON SEBASTIEN PILLAY

Thank you Mr Speaker.  Mon ti a kontan demann Minis si i ti kapab enform nou Lasanble lo konbyen Konsil Onorer Sesel i annan a letranze?

 

MR SPEAKER,

Non, non.  Onorab, ou sipoze pe demann siplemanter.

HON SEBASTIEN PILLAY

Eskize Mr Speaker.  My apologies.

 

MR SPEAKER

Ou annan – ou’n sipoze fer induction.

 

(Interruption)

 

HON SEBASTIEN PILLAY

Minis in koz lo bann pei ki nou annan korperasyon teknik e bann pei ki nou annan lezot lagreman avek.  Eski nou pe osi antam negosiasyon avek bann pei kot nou annan bokou bann resortisan Seselwa parey Canada e lezot pei ankor?  Thank you Mr Speaker.

MINISTER JEAN-PAUL ADAM

Mersi Onorab.  Nou fer li en priyorite dan tou nou bann negosiasyon avek tou partener.  Mon kapab dir, koman Minis Zafer Etranzer premye kestyon mon demann en Lanbasader letan i vini se eski nou kapab antre dan en lakor pou viza?  E sa i enkli sirtou bann pei kot nou annan bokou resortisan, Canada en legzanp me parey mon’n dir serten pei pou bann rezon ki zot prop sitiasyon, zot enpoz serten kriter lo zot viza.  Parfwa sa bann kriter i teknik, savedir ou koman en pei partener ou bezwen annan serten sistenm an plas, ou sistenm paspor i bezwen a serten nivo eksetera.  Me lezot konsiderasyon, se osi ki zot pa anvi annan okenn sistenm kot dimoun i kapab zis vini.  Pou bann rezon ki prop pou zot.  I menm parey Sesel nou mete serten kondisyon.  Sesel si ou vini avek en tiket ki ou napa en dat depar, ou pa pou gannyen drwa antre.  Si ou vini ou napa en booking dan en lotel, ou pa pou kapab antre dan nou pei.  E si ou napa ase fon pou soutenir ou sezour, ou pa pou kapab antre dan nou pei.  Alor, diferan pei zot annan zot diferan sistenm.  Nou, nou negosye otan ki posib pou ganny meyer akse pou Seselwa dan lemonn partou.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Bonzour tou dimoun, bonzour Minis e bonzour tou bann ki a lekout.  Mr Speaker, eski Minis i kapab dir avek nou si letan i pe fer bann negosiasyon i annan bann lespas pou son Minister fer bann negosiasyon spesyal avek serten pei ki nou santi nou annan en relasyon vreman pros?  Si sa i leka eski Minis i kapab donn nou legzanp e dezyennman, eski i annan en lekip spesyal dan son Minister ki antreprann sa bann negosiasyon e eski Minis i satisfe ki sa lekip in ganny well trained e i annan sa kapasite pou zot negosye pou anmenn sa ki meyer pou Sesel.  Mersi Mr Speaker.

 

MINISTER JEAN-PAUL ADAM

Mersi Manm Onorab, Leader pou Lopozisyon.  Lo kestyon si i annan lespas pou nou kapab demann serten keksoz pou lavantaz nou sitwayen, absoliman.  En legzanp ki nou annan, resaman nou’n antre an negosiasyon avek Lemirat Arab Ini pou negosiasyon pou retir viza konpletman pou Sesel.  Sa nou konnen i en destinasyon ki Seselwa i voyaz bokou osi, laplipar vol sorti Sesel pe pas atraver sa pei an se moman, alor i tre enportan pou annan sa.  Me sa ki mon bezwen klarifye se sak pei i souveren e sak pei i anan son sistenm partikilye ki i servi, alor sak negosiasyon i deferan.  Alor si mon kapab sit sa legzanp Lemirat Arab Ini, zot annan en divizyon ant Minister Zafer Etranzer ki okip par egzanp paspor diplomatik e ofisyel e Minister Lenteryer ki okip tou lezot paspor.  Alor zot osi fer li en pre kondisyon pou antre dan negosiasyon pou tou paspor, ki ou bezwen annan en lagreman ki konsern paspor diplomatik e ofisyel.  Alor nou Minister, nou’n bouz an avan, nou’n sinny sa lakor lo paspor diplomatik e ofisyel ki permet nou prezan antre dan sa negosiasyon pli profondi lo kot i konsern paspor normal pou tou Seselwa.  E nou konfyan ki nou pou kapab ganny sa lagreman a lavenir akoz nou’n annan diskisyon lo sa size a tre o nivo e Gouvernman Lemirat Arab Ini i ouver lo sa kestyon.  Nou bezwen lo nou kote osi met an plas serten keksoz.  Nou bezwen fer sir ki nou sistenm paspor i koresponn par egzanp avek zot sistenm pour bann pei ki ganny sa drwa antre san viza.  Alor sa i bann keksoz ki nou nou bezwen fer.  Alor dan sak pei, nou komans negosiasyon avek en refleksyon senp.  Nou dir, nou Sesel nou pa enpoz viza, alor annou antre dan en negosiasyon resipok.  Sa pei i reponn nou an dizan, be nou, nou kondisyon i tel.  E alor nou, nou prezan fer negosiasyon avek zot baze lo sa ki nou kapab ofer e sa ki nou ekspekte osi an retour e nou ariv kot en rezilta final, e mon ti a dir osi ki sa bann negosiasyon i pa en keksoz ki ou fer dan en zour.  Bokou sa bann pei i annan bann prosedir entern ki zot bezwen fer, i enkli parfwa dan serten pei, zot bezwen pas dan Parlman par egzanp.  Nou’n sinnyen resaman avek Brasil e i pankor vin an fors akoz i bezwen ganny ratifye par Parlman.  Alor nou konfyan ki sa pou arive me i tou bann prosedir ki bezwen ganny swiv.  Fotespere mon’n reponn sa kestyon byen, si ou annan ankor kestyon, mon asire pou vini.

Lo kestyon lo si nou lekip dan Minister Zafer Etranzer i a la oter.  Mon ti a dir, premye levidans ki nou pe byen fer se ki nou annan avek 72 pei e i annan en kantite pei pli gro ki nou ki napa sa lavantaz ki nou, nou annan.  Mon pa pou dir i parfe akoz touzour koman en pti pei, nou touzour annan kontrent dimoun.  Lakantite dimoun, lakantite konpetans.  Nou annan en pti lekip pou Zafer Etranzer, relativman e resaman nou’n sey, kimannyer mon kapab dir, ranforsi sa lekip akoz nou’n apwent en Direkter pou bann zafer Konsiler ki pe regard sirtou sa bann kestyon, nou’n osi ranforsi nou Divizyon Legal dan nou Minister ki permet nou annan pli bon lenformasyon lo bann kalite lagreman ki kapab annan e enform nou lo diferan sistenm bann diferan Gouvernman.  Alor, mon tre satisfe avek mon lekip, sa i pa vedir ki nou krwar i ase.  Nou touzour anvi ranforsi nou kapasite pou nou ganny pli bon posibilite pou nou antre dan sa bann lagreman pou benefis tou Seselwa.  Mersi.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker, bonzour Minis.  Bonzour tou dimoun ki a lekout.  Mr Speaker, mon ti a kontan demann Minis si kapasite Sesel pou ganny viza i osi depan lo status Sesel koman en pei souveren ki annan stabilite politik, ekonomik e tou bann rikord lakonplisman Sesel, e si wi, si sa i fer li bokou pli fasil pou Sesel kapab negosye avek bann pei pou nou bann sitwayen e bann resortisan Seselwa kapab ganny viza.  Mersi.

 

MINISTER JEAN-PAUL ADAM

Mersi Manm Onorab Leader pou Zafer Gouvernman.  Definitivman, tou bann pei dan lemonn ki enpoz viza, zot fer bann analiz lo eski bann dimoun ki pe sorti dan tel ou tel pei i poz en risk e letan zot pe koz en risk, zot pe regard li dan plizyer fason.  Zot bezwen regarde, eski sa pei son bann paspor i a la oter lo nivo sekirite?  Alor Sesel enn bann keksoz ki mon fyer ki nou pe fer li byen, se nou sistenm paspor i a la oter pou bokou pei.  Par egzanp, lespas Shengen an Erop i estimen ki Sesel nou annan en zestyon nou bann zafer entern ki konvenab, ki permet nou bann resortisan antre dan lespas Shengen san en viza.  Zot osi definitivman regarde si sa pei i en pei stab kot i annan en nivo lavi ki konvenab, ki sa bann dimoun letan zot pour voyaz dan zot lespas, se bann dimoun ki vreman pe vin vizite, pe vin swa vakans oubyen pou rezon medikal oubyen pe vin vizit zot fanmiy, me ki pa pou vini e reste laba ilegalman.  E Sesel i ganny konsidere koman enn sa bann pei ki zot kapab dir i pa en risk aprofondi.  Me toulezour nou bezwen kontinnyen fer bann travay pou nou montre nou bann partener kimannyer nou serye dan nou louvraz e kimannyer nou, nou en pei stab, nou en pei ki efikas.  Malerezman mon bezwen dir dan sa Lasanble ki i annan serten sitiasyon kot konportman serten Seselwa dan lezot pei, i fer nou ganny demande serten kestyon.  Alor, nou touzour nou bezwen travay koman nou Minister pou nou enform nou bann partener ki nou pe fer, ki nou stratezi e nou osi bezwen travay avek tou Seselwa e nou demann tou Seselwa osi pou respekte lalwa lezot pei e konport zot dan en fason ki konvenab, akoz sak fwa ki i annan en Seselwa ki met son lekor dan en sitiasyon ki kont lalwa dan en lot pei, Minister Zafer Etranzer Sesel i ganny demande serten kestyon lo sa bann size, alor i enportan ki Sesel nou kontinnyen montre ki nou en pei stab, nou en pei efikas e nou en pei kot nou konnen bann dimoun ki sorti laba i serye.  E annou pa krwar ki si ou annan en stati kot ou pa bezwen ganny viza, sa i permanan, akoz bann pei i kontinnyelman fer bann revi lo zot sistenm.  I annan plizyer pei ki ti deza benefisye dan lepase avek serten lagreman san viza, ki apre sa pei in les tonbe pou diferan rezon.  Parfwa zot santi ki sa pei i annan en risk teroris par egzanp.  Mon tre fyer ki Sesel, nou en pei ki stab, nou en pei ki an pe e nou napa sa bann kontrent, me nou touzour bezwen vizilan pou fer sir ki nou ofer a nou bann partener bann posibilite e ofer a nou bann resortisan sa bann posibilite pou voyaz osi libreman ki posib.  Mersi.

 

MR SPEAKER

Kestyon nimero 2, Onorab Pillay.

 

HON SEBASTIEN PILLAY

Thank you Mr Speaker. Mr Speaker eski Minis i kapab enform nou Lasanble lo konbyen Konsil Onorer Sesel i annan a letranze?

 

MINISTER JEAN-PAUL ADAM

Mersi Manm Onorab.  Mon ti a kontan zis komans avek en pti klarifikasyon.  Se ki en Konsil Onorer i pa en diplomat me i plito en volonter ki’n pare pou ed Sesel.  Nou bezwen pran kont ki nou en pti pei, nou napa sa mwayen pou nou annan ni 100 Lanbasad, ni 200 Lanbasad, ni 15 lanbasad nou napa mwayen.  Nou bezwen reste dan nou mwayen e nou bezwen osi kantmenm kapab konnen ki pe pase dan diferan pei, e annan en bon rezo dilimatik.  E se pou sa, bokou bann pti pei, enkli Sesel nou servi bokou sa ki apel en Konsil Onorer, e sa se en Konsil ki en volonter, i en Konsil ki pa ganny peye par Gouvernman Sesel me ki nou nou demann sa dimoun pou reprezant nou lentere a en serten pwen.

Pou sa ki konsern nonm Konsil ki nou annan, nou annan en total 86 Konsil ki sitie dan 62 pei atraver lemonn.  I annan serten pei kot nou annan plis ki en Konsil akoz pei i gran e osi an rezon lenportans ekonomik sa bann pei, dan plizyer gran lavil, nou annan en Konsil Onorer.  Parmi sa bann Konsil Onorer, i annan ki annan stati zis Konsil Onorer. Bann ki’n servi en pe plis letan e ki’n prouv zot lekor atraver led ki zot in anmennen pou Sesel, nou’n donn zot en promosyon pou fer zot vin Konsil Zeneral e nou annan 25 parmi sa 86 ki bann Konsil Zeneral.  Nou Minister i kontinnyelman revwar performans nou bann Konsil e nou demann zot pou fer bann rapor avek en zofisye spesifik dan nou Minister, ki sa Diplomatic Attachee.  Se en zofisye ki monitor e ki verifye tou travay ki nou bann Konsil Onorer i fer e zot ganny demande pou fer bann rapor regilye tou le 3 mwan pou donn en bilan zot bann aktivite e kimannyer zot pe byen reprezant Sesel.  Mon rapele ki bann Konsil i pa bann azan diplomatik e ki pa ganny pey par nou Minister e pou sa rezon nou evalye zot performans e zot travay, byensir lo en baz ki zot bann volonter.  Lo sa size mon kapab dir nou tre satisfe ki Sesel i byen ganny reprezante atraver nou bann Konsil. Byensir, i pa toultan ki nou pou dir zot travay i parfe, me nou santi ki Sesel i ganny en kantite atraver sa rezo.  Mersi.

 

MR SPEAKER

Onorab Pillay, yes.

 

HON SEBASTIEN PILLAY

Thank you Mr Speaker.  Mr Speaker, eski Minis i kapab klarifye en pti pe kriter, prosedir ki son Minister i servi pou apwent en Konsil Onorer pou Sesel dan en lot pei e eksplik nou en pti pe ki bann prosedir ki’n ganny met an plas pour evalye, pou ki nou asire ki nou satisfe avek zot performans?  Mersi Mr Speaker.

MINISTER JEAN-PAUL ADAM

Mersi Onorab.  Nou lo kote nou Minister, nou annan en polisi tre ferm lo lafason ki nou apwent Konsil e ki al ase an detay.  Alor pou lapwentman Konsil, parfwa i annan serten pei kot nou konnen nou napa Lanbasad koman en Minister e nou santi nou bezwen reprezantasyon e alor nou fer 2 keksoz.  Nou demann sa Gouvernman limenm, eski zot konn en dimoun of good standing ki ti ava enterese pou vin Konsil Onorer pou Sesel?  En lot laspe ki nou kapab pran se en dimoun ki nou deza konnen ki dan sa pei, enn ler i kapab en Seselwa oubyen i kapab en dimoun ki deza pe fer en biznes avek Sesel e ki konn Sesel byen e nou apros li pou vin nou Konsil.  I annan osi serten endividi ki zot fer laplikasyon direkteman akoz zot santi ki zot kapab anmenn en keksoz pou Sesel.  Sak laplikasyon ki nou gannyen, nou fer en verifikasyon entern Sesel avek Departman Lapolis ki verifye avek Enterpol, nou osi anvoy kot Financial Intelligience Unit pou fer bann verifikasyon e nou osi demande ki sa dimoun, avan ki i ganny apwente i voyaz Sesel akoz dan serten ka, dan bann pei ki lwen, sa bann dimoun pa’n deza vizit Sesel, me nou demann zot ki zot vizit Sesel e zot rankontre avek tou bann departman konsernen isi Sesel pou nou kapab fer en bon analiz lo zot konpetans pou kapab reprezant Sesel.  Alor tousala i vedir ki nou fer otan ki posib pou nou kapab verifye ki nou bann Konsil i bann dimoun ki kapab byen reprezant nou.  Mon ti a kontan dir osi ki enn fwa ki nou annan en kandida e ki nou’n pas dan tou sa bann prosedir, nou bezwen osi demann konsantman sa leta kot i pou baze e sa leta limenm li i bezwen dir, wi mon dakor, oubyen mon pa dakor.  Me vi ki Sesel nou fer en travay mon kapab dir tre aprofondi avan menm ki nou demande, i tre rar ki en Konsil i ganny refize akoz nou vreman fer sir ki nou swazir bann dimoun ki annan sa kalib pour reprezant Sesel dan en fason konvenab.

Mon krwar lo kestyon revi e analiz zot performans, mon’n reponn sa en pe deza ki nou annan en Diplomatic Attachee dan nou Minister ki kontinnyelman analiz travay bann Konsil e dan serten ka kot bann Konsil pa performen, nou remersye zot pou zot travay e nou bouze pou nou apwent en lot.  In annan plizyer ka kot bann Konsil, apre en serten letan, nou’n evalye zot performans, nou’n remersye zot, nou touzour bezwen remersye zot akoz zot pe fer sa volonter.  E apre nou bouze pou nou ranplas zot avek en lot kandida.  Mersi.

 

MR SPEAKER

Onorab Ghislain.

 

HON CHANTAL GHISLAIN

Eski Minis i kapab eksplik sa Lasanble lo lenportans la diplomasi e ki lefe sa i kapab annan lo Sesel, an vi lakantite move kritik direk dan serten zournal e lo internet lo serten pei ek zot dirizan tel ki Sheik Kalipha ek bann Arab an zeneral?  Mersi.

 

MR SPEAKER

Out of Order, Onorab Pierre.  Kestyon lo Konsil Onorer, please.  Time is of essance. Nou pe run 30 minit nou ankor lo dezyenm kestyon.  Onorab Pierre.

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble, apard ki fer en Konsil Onorer arete akoz son performans, eski in annan lenstans kot en Konsil in bezwen ganny demande pou li arete akoz son behavior rather than performans e dezyenmman, Minis in mansyonn bokou pei kot nou annan Konsil Onorer e in menm dir nou poudir i annan bann ki annan lenportans ekonomik pou nou e zot in met 2 Konsil.  Eski Minis i kapab dir nou si i annan demars dan sa bann pei kot i annan gran lenportans pou nou, eski i annan demars pou nou ranplas sa bann Konsil par en Lanbasad?  Mersi Mr Speaker.

MINISTER JEAN-PAUL ADAM

Mersi Onorab Leader Lopozisyon.  Lo kote si i annan lenstans ki en Konsil in ganny retire akoz son konportman dan son travay, mon ti a kontan dir ki i enportan osi ki vi ki sa bann dimoun i onorer, nou pa taye oubyen degaze pou fer en desizyon san laprev.  Alor, mon Minis depi 2010, depi ki mon Minis, napa ki nou’n ranplas li akoz son konportman.  Mon ti pou bezwen verifye dan lepase avan ki monn vini si nou’n deza ranplas serten pour rezon zot konportman.  Parey monn dir, i annan ki nou’n ranplas zot ki lo la baz performans, petet ti annan bann eleman konportman ladan osi ki mon ti ava bezwen verifye avan ki mon kapab dir ou a san poursan eski sa i leka, me antouka nou annan sa mwayen pou nou tir zot akoz konportman.  Mon ti a kontan dir ki i annan serten ka kot nou ganny bann alegasyon kont nou bann Konsil e kot i annan bann alegasyon nou fer bann lenvestigasyon entern e nou osi regarde ki sa lenpak sa i annan lo Sesel e eski i annan en baz laverite dan sa bann alegazyon.  Si i annan en baz laverite dan sa bann alegasyon, e la mon bezwen dir kot absoliman nou annan laprev, absoliman nou pran bann mezir neseser pou nou ranplas zot, e sa i en prosedir ase senp.  Me nou pa pou – mon kapab dir, bokou sa bann Konsil zot in fer en kantite travay pour nou e nou pou ganny konsidere koman annan movez fwa osi si nou ranplase san vreman regard dan fon sa bann keksoz.  Mon krwar i enportan osi dan lemonn modern, i fasil fer alegasyon.  En dimoun i al lo internet demen e dir sa dimoun in fer tel, tel keksoz.  I enportan ki nou al pli profon ki sa e nou vreman konnen, eski in annan en move konportman oubyen non, selon lalwa e pa zis en kritik, akoz nou tou nou kapab ganny kritike, me i bezwen annan en konportman ki vreman kont lalwa, oubyen ki pa dan lentere Sesel e la nou pa pou ezite pou nou pran en desizyon.  Mon ava revin en pti kou lo sa kestyon si ti annan dan lepase ki’n ganny sorti pou zot move konportman.  Mon krwar in annan serten ka kot nou pa’n satisfe avek zot konportman, e pou sa zot in ganny sorti.

Lo kestyon kot i annan lenportans ekonomik, si nou annan lentansyon pou ouver bann Lanbasad?  Mon krwar koman en pti pei nou bezwen reste realis ki nou pa pou kapab zanmen annan en rezo parey bann gran pei.  Nou bezwen realis ki nou pa pou kapab annan en Lanbasad dan sak pei.  Dan nou plan stratezik ki nou Minister in fer depi ler monn vin Minis, nou ti’n etablir en plan lo 3an kot nou ti pou ouver en Lanbasad sak lannen.  E enn sa lanbasad ti dan Mwayen Orian ki nou’n fini ouver, se Abu Dhabi, ankor pou bann rezon ekonomik.  Enn ki nou pe al ouver plitar sa lannen se Addis Ababa e sa se pou rezon, akoz ki nou en manm Linyon Afriken nou pe annan en langazman bokou pli for atraver Linyon Afriken e bokou nou bann partener pe fer bokou plis korperasyon atraver Linyon Afriken.  Alor son premye rezon se plito diplomatik e pa ekonomik.  Alor i annan diferan rezon e nou ti anvi dan nou plan stratezik annan en trwazyenm Lanbasad osi pou regard sirtou Lanmerik Latin akoz sa i en landrwa ki pe devlop plis dan lemonn, me mon bezwen dir, tou nou plan koman en Minister i depan osi lo sitiasyon pei ekonomikman.  Nou pa pou kapab zanmen fer en Lanbasad ki nou pa pe kapab soutenir apre finansyelman.  Alor tou nou desizyon i baze lo nou Bidze ki ganny met a nou dispozisyon e osi posibilite pou nou mentenir sa bann Lanbasad a lon term.  Nou pa anvi ouver en Lanbasad ozordi e ferm li demen.  Alor nou plan stratezik se vreman pou antre dan bann landrwa ki nou santi nou kapab premyerman anmenn en benefis konkret pou Sesel dan limedyat, e kot nou bezwen sa ranforsman ki al pli lwen ki zis en Konsil Onorer e kot osi nou santi ki ekonomikman i viab pou nou pei.  Alors se sa en pe kriter ki nou servi.  Mersi.

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker eski Minis i kapab dir nou ki lenpak bidzeter sa bann Konsil i annan lo Bidze Sesel e si zot fer resers aprofondi lo sa bann Konsil avanler reelman zot ganny konsidere koman en Konsil pou fer sir ki zot vreman byen reprezant Sesel?  Mersi.

 

MINISTER JEAN-PAUL ADAM

Mersi Onorab Leader Zafer Gouvernman.  Parey monn deza eksplike, nou fer en resers vreman aprofondi e nou ensiste ki sa dimoun i vin isi Sesel.  I annan lezot pei ki apwent Konsil ki zot nonm li san ki sa dimoun i vizit son pei.  Par egzanp i annan Konsil ki baze Sesel, pa tou ki’n vizit sa pei ki i reprezante, me nou, nou ensiste ki zot vizit isi, zot zwenn avek bann dimoun isi e nou osi fer bann resers, nou demann bann referans.  Osi nou fer bann verifikasyon atraver lapolis pou fer sir ki sa dimoun napa okenn rikord kriminel par egzanp.  Alor, mwan mon santi ki nou fer otan ki posib pou nou verifye ki sa bann dimoun, zot rikord i tre, tre pozitif.

Lo kote lenpak bidzeter, nou Konsil napa okenn lenpak bidzeter lo nou, akoz nou pa pey zot nanryen.  Nou pa donn zot okenn kontribisyon.  Se en travay ki zot, zot anvi fer akoz zot annan en lentere dan Sesel, zot regard sa ki Sesel pe fer e zot annan en lanmour pou Sesel akoz sa i enportan, e se pou sa osi nou swazir bann dimoun ki souvan i annan en lyen avek Sesel.  En lyen avek Sesel ki aprofondi.  E se enpe lo sa la baz ki nou santi ki nou bezwen annan en dimoun ki vreman pour regard nou lentere.  Lo kote son lenpak bidzeter, i enportan ki pou note ki dan sa bann pei kot zot ganny poste osi, napa sitan kantite lavantaz ki zot gannyen.  I annan serten lavantaz ki zot gannyen akoz serten pei i pou donn zot par egzanp en loto lo en baz duty free. Zot touzour bezwen pey sa loto zot menm, me petet pa bezwen pey tax lo la.  Me dan laplipar pei, setou ki zot gannyen.  Zot pa ganny okenn lavantaz tax, kot i konsern income tax oubyen business tax. Zot pa ganny lavantaz pou zot biznes.  Byensir i annan en serten stati, zot ganny lenvitasyon pou diferan fonksyon koman Konsil Onorer e zot ganny serten kontak atraver sa, me nou fer kler kote zot rol biznes i fini e kote zot rol koman Konsil Onorer i komanse.  E la kot nou travay ki nou fer kote nou Minister pou verifye ki zot tou zot travay byen, i en travay kontinnyel ki nou demann zot pou donn en rapor regilye e nou osi analiz sa travay ki zot fer e mon krwar nou fer otan ki posib ki nenport ki pei dan lemonn i fer pou verifye ki zot Konsil i travay byen e efikasman.  Mersi.

 

MR SPEAKER

Avan nou al lo kestyon nimero 3 mon oule aport a latansyon bann Manm, anba Order 33(2) ki dan en Supplementary Question, ou pa kapab entrodwir okenn matters not arising from the original question. Mon krwar sa lalwa debaz Kestyon Siplemanter.  I la pou ou rod leklersisman lo sa ki Minis in dir dan son kestyon orizinal.  Ou pa kapab servi kestyon siplemanter pou entrodwir bann nouvo size.  Kestyon nimero 3, Onorab De Commarmond.

 

HON CHARLES DE COMMARMOND

Mr Speaker, mersi bokou.  Bonzour Minis, bonzour tou Onorab e tou dimoun ki a lekout.  Mr Speaker mon kestyon i lir koumsa.  Eski Minis i kapab enform nou Lasanble ki zistans Sesel in arive vizavi ratifikasyon bann Konvansyon lo drwa imen anba Nasyon Ini?  Mersi.

MINISTER JEAN-PAUL ADAM

Mersi bokou Onorab.  Aktyelman i annan 9 trete prensipal ki egziste lo drwa imen ki’n ganny etablir par Nasyon Ini.  Lo total sa 9 trete, Sesel in sinny 8, e in ratifye osi tou le 8.  Alor i annan zis 1 Konvansyon ki nou pankor sinnyen, ni ratifye.  Sa i pa vedir ki nou pa pou sinny sa oubyen ratifye sa Konvansyon, me nou anvi parey monn deza dir dan lapres nasyonnal ki nou anvi vreman fer sa travay aprofondi lo bann Konvansyon ki nou’n deza ratifye e asire ki nou bann rapor i azour, e nou’n met en bi pou nou fer sa o plitar 2013.  Ki nou vreman vin azour avek tou bann rapor ki bezwen ganny fer, me kot i konsern sinnyatir e ratifikasyon, mon kapab dir Sesel i dan en pozisyon tre for akoz nou’n sinny e ratifye 8 lo 9 sa bann Konvansyon.  Mersi.

 

MR SPEAKER

Onorab De Commarmond.

 

HON CHARLER DE COMMARMOND

Mersi Mr Speaker.  Mr Speaker, eski Minis i kapab dir nou lekel sa Konvansyon ki pankor ratifye, pankor sinnyen e dezyenmman, eski Minis i kapab met nou Lasanble azour avek demars ki son Minister pe fer pou ki Sesel i kapab enplimant bann diferan lobligasyon anba bann Konvansyon Drwa Imen ki Sesel in fini sinnyen e ratifye?  Mersi.

 

MINISTER JEAN-PAUL ADAM

Mersi Onorab.  Sel Konvansyon ki nou pankor sinnyen oubyen ratifye se Konvansyon lo proteksyon bann dimoun kont disparasyon sa ki apel an Angle, The international Convention for the protection of all persons from enforced disappearance. Sa Konvansyon ti vin an fors enternasyonalman le 20 Desanm 2006.  Alor i en Konvansyon ki tre resan.  Si ou regard tou le 8, sa bann lot Konvansyon, zot tou, sa enn pli tar parmi bann lot Konvansyon se 1990 e sa se Konvansyon enternasyonnal lo proteksyon drwa bann travayer ki’n imigre ek bann manm zot fanmiy.  Alor sa Konvansyon, vi ki in fek vin an fors enternasyonnalman an 2006 parey mon’n dir, i pa vedir ki nou pa pou sinnyen oubyen ratifye li, me nou pe priyoritiz bann ki nou’n deza sinnyen e ratifye, fer zot byen e a en moman a lavenir, nou ava al dan sa direksyon.

An se ki konsern travay ki nou pe fer pou asire ki nou bann rapor i azour e ki i lo nivo, nou Minister pe travay avek bann lezot Minister pou etablir en Komite lo drwa imen, pou nou fer sir ki pa selman nou pe fer bann rapor azour, me ki nou annan en tre bon kordinasyon ant bann Minister.  Akoz drwa imen i pa zis en kestyon en Minister oubyen en lot, i en kestyon tou dimoun, enkli Lasanble, alor nou pe fer en travay entans pou nou annan sa Komite.  Nou Minister in osi apros plizyer lorganizasyon enternasyonnal pou demann lasistans pou ed nou fer sa bann rapor dan en fason konvenab akoz bokou sa bann rapor i tre teknik.  I tre teknik, i tre aprofondi e parey monn dir, i kouver plizyer sekter.  I pa parey en rapor par egzanp lo drwa zanfan ki Sesel in touzour azour avek son bann rapor, Konvansyon lo drwa zanfan akoz nou en pei ki’n touzour priyoritiz sa devlopman sosyal, sa proteksyon pou nou bann zenn, pou nou bann zanfan.  E nou annan eksper dan sa domenn e alor, touzour nou azour.  Me kot i konsern drwa imen, i en kestyon ki bokou pli larz.  E fransman dan pei Sesel nou napa forseman en eksper ki annan sa leksperyans pou fer tousala.  Alor bann nouvo devlopman ki nou’n demande se en eksper sorti kot Commonwealth pou ed nou, nou’n osi demann nou partener Lenn ki’n fini met en Konseye Legal dan nou Minister e nou pe osi demann led, par egzanp avek Commonwealth osi, kot i konsern ratifikasyon trete lo Lakour Kriminel Enternasyonal, (International Criminal Court) e ki bann lenpak i pou annan lo nou bann lezislasyon entern.  Alor nou pe travay en kantite avek bann partener a letranze, bann diferan lorganizasyon, pou donn nou plis sipor akoz koman en pti leta zil, se i pa fasil pou annan tou sa bann rapor pou sa bann Konvansyon e menm pou bann gran pei, i pa fasil.  Letan Kofi Anan ti touzour Sekreter Zeneral Nasyon Ini, i ti dir ki mank rapor lo bann Konvansyon i kronik.  E i ti pe koz sa, pa zis akoz bann pti pei, me akoz tou bann gran pei, menm bann pei parey Lanmerik, bann pei mon kapab dir ki konsidere bann pli gran pei dan lemonn, zot tou zot an retar lo zot rapor.  Alor en pei parey Sesel nou pe met bokou zefor ladan akoz i annan en kantite bon keksoz pe ganny fer Sesel.  I vre akoz sa bann rapor petet pa pe ganny rekonnet ase.  Me misyon nou Minister atraver ou plitar 2013 se nou pou reponn a sa bann kestyon, nou pou fer sir bann rapor i azour e ki tou bann bon keksoz, bann best practice menm ki nou pe fer Sesel i ganny rekonnet enternasyonalman.  Mersi.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker eski Minis i kapab dir avek nou, eski an term bann Konvansyon ki vin kot son Minister, eski zot priyoritiz sa bann Konvansyon depandan lo son lenportans vizavi devlopman nou demokrasi e dezyenmman, eski Minis i kapab dir avek sa Lasanble si dan sa enn Konvansyon ki nou pankor sinnyen, eski i santi ki i annan serten konteni, oubyen serten lartik within sa Konvansyon ki nou Sesel koman en pei nou pankor pare pou aksepte, and therefore, se sa rezon akoz nou pa pe sinny sa Konvansyon?  Mersi Mr Speaker.

 

MIINISTER JEAN-PAUL ADAM

Mersi.  Kot i konsern bann diferan trete oubyen lagreman ki nou ratifye, lo kote nou Minister, nou fer en serten travay kot nou analize 2 keksoz.  Ki degree son lenportans vizavi nou devlopman koman en pei, e sa i en – mon ava met dan nou devlopman osi bann kestyon pou nou demokrasi, akoz nou devlopman nou demokrasi i al men-an-men avek nou devlopman ekonomik e sosyal, alor nou analiz ki son lenportans lo nou devlopman, apre dezyenmman, ki nou nou bezwen fer pour nou an linny avek sa trete.  Mon fyer pou dir ki Sesel souvann fwa, letan nou sinny en Konvansyon, bokou fwa, sa ki nou deza pe fer i menm pli lwen ki sa Konvansyon.  En legzanp se Konvansyon lo bann drwa ekonomik e sosyal e kiltirel ki an se moman nou pe travay pou nou fer premye rapor pou nou anvoye, malerezman nou rapor i an retar akoz ankor, nou pa’n annan sa kapasite, sa lekspertiz pou forseman fer sa dan en fason efikas, me nou pe adres sa, me si nou regard sa Konvansyon par egzanp, tou bann keksoz ki ganny demande ladan, nou Konstitisyon Sesel i menm al pli lwen ki sa.  Alor, nou difikilte avek sa bann Konvansyon se plis zis son rapor ki nou bezwen fer e se sa sa kontrent ki i met lo nou, me lo kote son lenplimantasyon, nou for e nou menm pli lwen.  Nou Konstitisyon par egzanp i garanti lasante gratwit e primer pou tou Seselwa.  I garanti ledikasyon, i garanti akse a lozman e tousala i bann keksoz ki met Sesel menm a lavangard sa bann Konvansyon.  Alor mon tre fyer ki bokou sa bann Konvansyon.  Annefe nou deza pe aplik bann meyer pratik.

Lo sa Konvansyon spesifik ki ou’n demande, eski i annan okenn kontrent pou Sesel?  Mon pa pour kapab donn ou en larepons definitiv akoz i depan osi lo bann konsey bann diferan departman, sirtou Departman Atorni Zeneral akoz okenn keksoz ki annan laspe legal, mon pa kapab pronons mon lekor san fer sa konsiltasyon.  Me baze lo sa ki mwan mon konnen, lo sa Konvansyon, napa okenn lobzeksyon pou Sesel antre pou sinny li.  Napa okenn konsern lo sa size e sel rezon ki nou pankor antre pou nou sinny li se rezon ki sa Konvansyon fek antre an fors e parey nou’n dir, nou priyorite se pou fer byen sa ki nou’n deza angaz nou lekor e dan en dezyenm tan nou ava antre dan sa bann nouvo langazman, letan nou santi osi sa kapasite i la pou nou kapab byen fer son bann rapor osi.  Akoz si nou pran ankor en langazman i vin ankor en rapor e nou bezwen rod ankor plis resours pou nou kapab adres sa bann kestyon.  Mersi bokou.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Eski Minis i kapab dir nou si atraver son polisi diplomatik aktif i pe angaz li dan en travay aktiv pou promouvwar tou sa demars ki son Minister pe fer an sa ki konsern drwa imen, pou ki nou bann rikord lo nivo enternasyonal i korek e i ganny met azour avek bann demars ki pe arive lokal?

E dezyenmman, eski Minis i kapab dir nou, enn fwa ratifye sa bann Konvansyon lo drwa imen, eski Sesel i met an plas bann mekanizm, pa zis bann rapor e pa zis en Komite, me bann mekanizm dan Gouvernman e osi byen ki avek sosyete sivil, pou fer sir ki sa bann Konvansyon i ganny pratike byen and to the letter.  Mersi.

 

MINISTER JEAN-PAUL ADAM

Mersi Onorab Leader zafer Gouvernman.  Mr Speaker, si ou permet mon ti a zis klarifye en dernyen pwen akoz mon’n fer en pti lerer dan mon deklarasyon avan, kot mon’n dir sa Konvansyon lo proteksyon bann dimoun kont disparisyon ti vin an fors an 2006, annefe ti sinnyen an 2006 enternasyonalman, me in selman vin an fors an 2010.  Alor ankor i montre ki sa Konvansyon i ase nouvo.  Ekskiz mwan pou sa pti lerer lo mon par.

Mersi bokou Onorab pou ou kestyon.  Lo kote nou diplomasi aktiv, definitivman nou fer tou nou zefor pour nou touzour eksplik nou bann partener ki Sesel pe fer e kwa ki pozitif dan Sesel.  E sa in ganny rekonnet.  Se pa pou nanryen ki Sesel i klase tre o par Nasyon Ini, annefe parmi bann pei kot i annan en o nivo devlopman.  I osi ganny klasifye par more ebrahim index koman enn bann pei ki annan pli bon gouvernans dan Lafrik.  Alor sa ki nou pe fer pe ganny rekonnet.  Anmenmtan, i vre ki i annan en kantite fo lenformasyon, akoz nou dan en lemonn kot lenformasyon i ganny anvoye enstantaneman.  Tou dimoun, nenport ki i kapab dir nenport keksoz lo internet.  I annan en kantite diferan fason ki dimoun i anmas lenformasyon lo en pei e malerezman i annan bann fo lenformasyon ki ganny propaze, serten dimoun i fer li pou bann rezon politik.  Diferan kalite rezon.  E ki nou, nou pe fer lo kote nou Minister, se nou pe ranforsi nou kapasite pou nou kominik ofisyelman atraver sa bann rapor, sa i enkli dan nou Minister annan serten zofisye ki nou pe met zot pou regard sa bokou pli seryezman, larealite grander nou pei se mon napa en dimoun ki kapab fer sa a plen tan.  I annan byensir bann gro pei ki annan dimoun ki anploye zis pou fer sa.  Sesel mon pa kapab permet sa akoz i annan tro bokou lezot travay pour fer, me si ou ti a anvi, si ou ti annan sa kapasite pou annan en dimoun pou fer sa a plen tan, pa pou manke louvraz pour sa dimoun.  Me nou, nou eseye etablir osi bann mekanizm, e la kot mon ti a dir i annan keksoz ki Sesel i fer tre byen e i annan keksoz kot nou touzour annan defi.  Serten bann Konvansyon, Konvansyon par egzanp lo drwa zanfan, Konvansyon lo drwa bann madanm, bann mekanizm in fini ganny etablir Sesel dan bann diferan Minister kot rapor i ganny fer, azour, aler e nou annan bann Komite, bann diferan group enternelman ki pe kontinnyelman fer sa travay.  Serten lezot nou’n bezwen adres sa bann defi.  Kot i konsern drwa imen, sa se en landrwa ki nou Minister pe met bokou lenportans lo la e sa Komite pou ede, me sa Komite tousel byensir pa pou adres sa solisyon.  Se sak Minister osi, pran en langazman pou zot dan zot travay toulezour, pou regarde kimannyer zot kapab promouvwar drwa imen, pa selman promouvwar, me kominik sa ki zot pe fer, akoz i annan en kantite keksoz ki nou fer Sesel me lemonn pa konnen.  Me nou Minister pe pran li koman enn nou bann travay fondamantal pou nou fer sa.  Mersi bokou.

 

MR SPEAKER

Kestyon limero 4, Onroab Fideria.

 

HON EMMAUNEL FIDERIA

Mersi Mr Speaker, bonzour Minis, bonzour tou mon bann frer koleg Onorab. Kestyon, Eski Minis i kapab enform nou Lasanble si Sesel i annan lentansnyon ouver okenn nouvo Lanbasad a letranze, sirtou la ki sa 3 nouvo Anbasader in ganny apwente?  Mersi.

 

MINISTER JEAN-PAUL ADAM

Mersi bokou Onorab.  Sesel parey monn deza dir nou’n etablir dan nou plan statezik pou nou ouver 3 nouvo Lanbasad lo 3an byensir depandan lo nou kapasite ekonomik e finansyel pou nou kapab siport sa.  Lannen pase nou’n ouver nou nouvo Lanbasad Abu Dhabi e an 2012 nou lantansyon se pou ouver en Lanbasab Addis Ababa sirtou pou pli byen reprezant lentere Sesel opre Linyon Afriken, me osi avek bann pei Lafrik avek ki nou bann relasyon pe kontinnyen ranforsi.  Bann diferan lanbasader ki’n ganny annonse resaman zis pou repet sa ki petet in deza ganny dir me Labasader Marie-Louise Potter pou ganny nonmen New York kot i pou nou reprezantan kot Nasyon Ini e osi avek bann pei Nor Lanmerik, Anbasader Ronny Jumeau ki ti pe okip sa pozisyon avan in ganny nonmen koman nouvo Anbasader pou sanzman klima e bann pti leta zil e i pou baze New York akoz bokou sa bann meeting, sa bann konferans ki ganny fer ki konsern sa bann size i ganny fer New York oubyen kot i kout mwen ser pou vwayaze sorti New York pou al dan sa bann diferan landrwa.  E sa pou ranforsi leadership Sesel lo sa bann kestyon ki bann ki vreman primordyal pou nou diplomasi.  Nouvo Anbasader Msye Bernard Shamlaye pou ganny nonmen Paris pou ranplas Anbasader Claude Morel e i pou osi akredibilite avek UNESCO e lorganizasyon enternasyonal Francophonie e osi bann pei plizyer pei dan Lerop ki baliz avek Lafrans,.  Anbasader Claude Morel pou ganny nonmen Pretoria pou ranplas Anbasader Joseph Nourrice e li byensir i pou akredibilite avek Sid Afrik e avek bann pei ki baliz Lafrik di side k bann pei SADC.  Anbasader Joseph Nourrice pe ganny nonmen pou al dan nou nouvo – pou etablir nou nouvo Lanbasad ki baze Addis Ababa Ethopia ki pou ouver plitar sa lannen e nou pe fer prosedir pou fer li.  Anbasader Dokter Erna Athanasius pou vin Anbasader pou bann Madanm ek zanfan i pe ranpals Anbasader Marie-Pierre Llyod dan sa rol.  Anbasader Marie-Pierre Llyod pe parey nou’n deza anonse pe konteste sa dan Linyon Afrikenn me nou pe regarde kimannyer sa pe ale e i depandan lo kimannyer sa posesis i ale i pou kapab pran lezot fonksyon.

Mon ti ava osi profit sa lokazyon kot i konsern louvertir nouvo Lanbasad pou osi eksplik bann manm Lasanble ki avek lasistans Commonwealth avek lasistans Sesel pe osi ouver en lofis Geneve, e sa se Commonwealth ki pe donn nou sa siport, pe donn nou sa a en pri vreman pa ser e sa pou ede sirtou avek nou bann negosiasyon WTO parey nou tou nou konnen nou pe negosye pou aksesyon a sa lorganizasyon e sa biro pou ganny, pou an operasyon konzwentman ant mon Minister ek Minister Finans. Mersi bokou pou sa kestyon.

 

MR SEPAKER

Onorab Fideria.

 

HON EMMAUNEL FIDERIA

Mr Speaker mersi, eski Minis i kapab enform nou Lasanble konbyen I kout nou Gouvernman pou fer marse en Lanbasad aletranze. Mersi.

 

 

MINISTER JEAN PAUL ADAM

Konbyen i koute pou fer marse en Lanbasad aletranze, mon napa sa lenformasyon egzakt an semoman me sak Lanbasad pou anannen kou diferan akoz pri loperasyon dan sa bann diferan pei i depan lo pri bann servis, pri lozman dan sa bann pei.  Me zis pou sit en legzanp nou pe etablir nou Lanbasad Addis Ababa e pou etablir sa Lanbasad nou estimen pou kout nou anviron R3 milyon.  Byensir en kou letablisman i pete enpe plis ki son letan in fini fonksyonnen alor i reprezant en sonm larzan byensir enportan me mon krwar si ou regard si ou regard lavantaz ki nou ganyen atraver bann diferan Lanbasad ki nou’n etablir i annan en vre lavantaz atraver nou bann reprezantasyon zis par egzanp nou annan en Lanbasad Lasinn e zis atraver Lanbasad Lasin lagreman ki nou’n resaman sinnyen pou lasistans pou Sesel i plis ki R90 milyon.  Byensir nou pa pou dir i kout 3 milyon nou ganny 90 milyon oubyen kwa, nou pa fer sa bann kalite kalkil me an zeneral sa ki enportan se nou bezwen ranforsi kapasite Sesel pou angaz son lekor dan en diplomasi aktiv, akoz nou bezwen koz for pou Sesel, nou bezwen fer nou lavwa tande.  Si nou pa prezan nou pa pou kapab zis fye lo lezot pou koz pou nou, nou bezwen koz pou Sesel, nou bezwen defann nou lentere e si nou pa la napa byen byen dimoun ki pou koz pou nou.  Mersi.

 

MR SPEAKER

Onorab Pool.

HON ANDRE POOL

Mr Speaker mersi.  Mr Speaker mon ti a kontan demann Minis si dan son plan pou lavenir an sa ki konsern son Minister i ape regard dan posibilite pou donn Seselwa sirtou bann zenn Seselwa loportinite pou travay e devlop zot dan nou bann Lanbasad aletranze.  Mersi.

MINISTER JEAN PAUL ADAM

Mersi bokou Onorab.  I annan absoliman nou met en kantite lenportans lo kestyon devlopman bann zenn dan nou Minsiter e mon fyer annefe ki i en Minister ki zenn, i annan en kantite – e nou en Minister ki pe grandi akoz rol Sesel lo lasenn enternasyonal e lenportans osi nou diplomasi aktiv pe kontinnyen ogmante.  Letan i annan en kriz dan lemonn nou bezwen kapab koz pli for e mon fyer ki i annan en kantite zenn pe monte dan nou Minister e ki pe deza okip bann post responsabilite.  Nou annan 4 divizyon dan  nou Minister sa i divizyon administrasyon ek finans apre nou annan divizyon protokol, trete ek zafer konsiler kot i en zenn.  Nou annan divizyon relasyon enternasyonal la ankor kot i en zenn, en former young leader e divizyon devlopman e entegrasyon rezyonal ankor en former young leader annefet tou le 3 post sa post protokol ek zafer konsiler i osi en young leader.  Alor nou annan en kantite posibilite dan nou Minister.

Lot keksoz ki nou pe fer se menm depi avan monn vin Minis in annan en plan etabli pou nou poste nou bann zenn dan nou Minister koman en parti zot formasyon dan bann diferan Lanbasad.  E mon tre fyer ki dan tou bann Lanbasad ki’n deza ganny etabli nou annan en zenn oubyen en  diplomat-de-karyer dan Minister pa tou ki zenn me laplipar i zenn ki’n ganny poste dan sak Lanbasad e sel pou le moman ki nou pankor poste se Adu Dhabi, me sa nou pe al fer li dan bann mwan ki pe vini e alor nou tre fyer annefe ki nou annan sa bann posibilite e sa pe vreman anmenn en nouvo dimansyon dan nou diplomasi akoz nou tou nou rapel dan bann lepok kot ti napa – pa ti fasil pou ganny deviz dan Sesel e sa ti anpes nou vreman kapab par egzanp met, poste nou bann dimoun aletranze me sa in sanze e i annan bokou perspektiv pe vini gras a sa plan ki nou’n met anplas depi detrwa lannen la. Mersi.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr. Speaker mon ti a kontan ki an vi ki i kout Sesel bokou larzan pou ouver e pou maintain sa bann Lanbasad aletranze, mon ti a kontan ki Minis i konfirm avek sa Lasanble ki apre ki zot weight tou bann lavantaz e tou bann dezavantaz ki annan pou Sesel vizavi sak Lanbasad, eski Minis i kapab konfirmen ki tou bann Lanbasad ki nou’n ouver i bann Lanbasad ki pou anmenn benefis e non pa dezavantaz pou Sesel e ki zot in ganny fer pou bann rezon pirman akoz i anmenn benefis pou Sesel e non pa bann lezot rezon.  Mersi Mr Speaker.

MINISTER JEAN PAUL ADAM

Mersi bokou Onorab Leader Lopozisyon. Absoliman, mon kapab konfirmen san okenn kontrent ki tou nou bann Lanbasad i anmenn en kantite benefis pou Sesel.  Mon kapab zis sit sa bidze ki nou nou bidze total nou Minister i dan apepre R55 milyon total savedir tou sa ki nou depanse dan nou Minister enkli tou nou bann Lanbasad e zis avek en pei avek Lasin nou’n ganny lasistans sa lannen pou R90 milyon, sa enkli osi sa ki bann lezot pei i anmennen par egzanp Lemirat Arab Ini e lezot.  Osi ki nou fer se nou regard tre tre avek bokou latansyon lyen avek nou statezik koman en pei.  Nou nou konsyan ki nou pa kapab partou, nou Minister nou pa pou zanmen annan 40 Lanbasad, 50 Lanbasad.  Nou pou bezwen reste vreman lo nou bann konpetans kle.  E la nou balanse parey nou dir ant bann lenportans ekonomik e la osi mon ti a kontan profit lokazyon pou eksplike ki nou bann Lanbasad i bann baz pou tou Sesel, i pa zis mon Minister.  Nou bann Anbasader pe zwe sa rol pou reprezant tou Seselwa dan tou son lapse.  Alor dan nou bann Lanbasad nou osi annan reprezantan STB, nou anann posibilite evantyelman pou annan reprezantan Minister Finans kot i konsern bann landrwa konsernen pou aksesyon bann diferan lakor komers.  Nou annan osi posibilit annan bann dimoun Departman Lenvestivman.  Alor nou bann Lanbasad i bann baz ki nou servi pou nou reprezant lentere Sesel dan tou son laspe.  Alor i annan serten pei kot definitivman son, i annan bokou plis lentere ekonomik ki atraver lenvestivman, atraver bann relasyon korperasyon ki egziste e la nou kapab dir par egzanp Lasinn, Lenn, Lemirat Arab Ini kot nou tou nou konnen sa i bann pei ki’n asiste Sesel en kantite dan bann peryod tre difisil ki nou’n pas ladan, bann peryod kriz ekonomik mondyal e sa bann pei in la in pare pou ed nou e sa se gras osi a lefet ki nou’n montre zot ki nou serye dan nou diplomasi atraver kreasyon bann Lanbasad dan zot pei.  Depi ki nou’n kre par egzanp Lenn ek Lasinn i date depi aprepre 2007 nou pe vwar en gran ranforsman dan sa kreasyon alor mon napa okenn ezitasyon pou mwan dir ki sa bann Lanbasad i anmenn keksoz pozitif.

Osi nou nou en pei kot nou met bokou lenportans sa rol ki nou zwe dan lemonn koman en pei responsab, alor i enportan par egzanp ki nou Nasyon Ini, i enportan ki nou defann bann keksoz fondamantal pou devlopman nou pei e la kot bann kestyon pti leta zil i sorti.  Nou bezwen koman Seselwa nenport ki si nou en Seselwa nou bezwen defann nou pei, nou bezwen defann lentere nou pei kont sanzman klimatik, kont lefet ki par egzanp ki bann pti pei I ganny en dezavantaz kot i konsern finansman enternasyonal.  Nou bezwen pa per pou nou koz lo sa bann keksoz e pou nou fer li nou bezwen prezan dan bann lorganizasyon milti-nasyonal dan bann lorganizasyon milti-lateral e dan bann lorganzisyon rezyonal.  Alor lenportans Nasyon Ini nou pa kapab sou enstimen.  Nou baze Lonn e Commonwealth pa kapab ganny sou-estimen, Commonwealth par egzanp i en lorganizasyon ki rekonnet lenportans bann pti letan zil e i tre enportan ki nou travay tre profondeman avek zot e nou Lanbasad Lonn par egzanp i permet sa.  Paris, UNESCO osi i en lorganziasyon tre enportan avek nou e osi nou relasyon istorik avek toulede avek Lafrans avek Langleter.  Briksel nou annan Linyon Eropeen nou ankor en partener ki tre enportan lo plan statezik lager kont piratri e osi lo plan komersyal kot nou annan tou lekplwatasyon ton i al ver Linyon Eropeen.  Linyon Afriken nou anvi etablir nou lekor laba akoz en kantite keksoz pe pase dan kontinan Afriken atraver Linyon Afriken.  Pandan plizyer lannen nou pa’n tro servi sa semen me ler in arive kot nou bezwen vreman koz for pou Sesel dan sa bann lenstans pou nou anmenn plis benefis pou Sesel. Mersi.

 

MR SPEAKER

Onorab Vidot

 

HON KEVIN VIDOT

Mersi Mr Speaker, bonzour tou dimoun ki alekout.  Mr Speaker anvi ki lekonomi Sesel ankor enpe frazil, eski Minis i kapab konfirm avek sa lasanble ki bann Lanbasad ki nou’n ouver e ki nou pou ouver nou kapab soutenir zot travayer Lanbasader enpe travayer dan le fitir. Mersi.

 

MINISTER JEAN-PAUL ADAN

Mersi bokou Onorab.  En tre bon kestyon.  Mon tre konfyan ki lafason ki nou’n etablir nou bann Lanbasad i vedir ki i soutenab alavenir.  Parey monn dir nou bidze i apepre en R55 milyon tou le lannen e mon santi sa lenpak ki nou fer i toutafe vo sa larzan, byensir i pa vedir ki napa kontrent mon tre fyer travay ki mon bann Lanbasader, ki mon bann kad diplomatik pe fer aletranze, e souvan zot tre inovatif pou zot kapab vreman reprezant Sesel tre byen.  Nou bezwen rod bann fason pou ranforsi, pou donn zot plis kapasite e sa i enkli par egzanp revwar scheme of service nou fek fer enn an 2010 ki’n vin an aplikasyon an Zanvye 2011 e nou, me toutafe – nou bezwen revwar sa dan en fason kontinnyel e nou annan lentansyon revwar li pou fer sir ki nou bann Lanbasad i annan tou sa bann zouti a zot dispozisyon pou kapab byen reprezant nou.  Mersi.

 

MR SPEAKER

Avan nou al lo kestyon limero 5, Minis lekel ki nouvo Lanbasader pou London, zis pou nou rikord Lonn ou’n dir nouvo Lanbasader? Non.

 

MINISTER JEAN PAUL ADAM

Pardon Mr Speaker pou Lonn nou Lanbasader an post se anbasader Patrik Pillay.  Sa lannen i lannen kot i ganny 63an alor i pou retournen, me nou pankor nonm en ranplasan e vi  ki i touzour an post avan ki nou nonm sa ranplasan se touzour li ki pou okip sa post. Mersi.

 

MR SPEAKER

Ok, mersi.  Kestyon limero 5, Onorab Arnephy.

 

HON BERNARD ARNEPHY

Mersi Mr Speaker, bonzour toul monde.  Mr Speaker eski Minis i kapab enform nou Lasanble si Sesel in sinny okenn lakor lesanz prizonyen ek en lot pei.  Mersi.

 

MINISTER JEAN PAUL ADAM

Mersi Onorab.  Mon ti a kontan klarifye ki i annan en diferans ant bann lakor lesanz prizonyen e bann lakor transfer prizonyen.  Sesel nou pa’n angaz nou dan okenn lakor lesanz prizonyen me parey bann manm Onorab sirman i okouran an 2010 nou ti pas en lalwa ki ti apel Transfer Of Prisoners Act 2010 e atraver sa lezislasyon ki egziste nou kapab antre an akor avek diferan pei pou nou transfer prizonyen sorti dan nou prizon pou nou al dan sa bann pei, si sa pei i osi annan sa lezislasyon similer zot kapab osi transfer zot prizonyen dan nou prizon.  Me tousala i pou depan lo lezislasyon ki anplas dan sa bann diferan pei sak pei i diferan.  Sa lezislasyon Transfer Of Prisoners Act 2010 e seksyon 13 I dir ki nou kapab sinny swa en lagreman oubyen nou kapab annan en memorandum of understanding oubyen menm en lesanz let si nou anvi fer li zis en fwa i kapab zis en lesanz let pou nou fer en transfer e dan serten ka nou’n fer en transfer prizonyen baze lo sa seksyon, baze lo en lesanz let e nou’n fer li avek Lalmany en fwa e nou’n fer li avek Pakistan anba sa provizyon.  Parey mon’n dir i enportan pou nou regard lagreman transfer prizonyen dan en lot optik.  Nou osi nou’n sir bann lagreman, bann memorandum of understanding spesifik avek an se ki konsern bann transfer pirat ki dan nou prizon, e sa nou’n sir 3 memorandum lantant memorandum of understanding enn an t Gouvernman Sesel ek Somali Land ki ti ganny sinyen le 16 ek le 18 Avril 2011 e ki’n ganny ranforse par lagreman ki Prezidan ti sinnyen Lonn avek Prezidan Somali Land kot zot ti aksepte pou pran 19 nou bann pirate me finalman 17 ki ti ganny transfere semenn pase.

I osi annan MOU ant Puntland ki en lot leta otononm dan Somali avek Gouvernman Sesel pou transfer pirat e sa ti ganny sinnyen le 15 Mars 2011 e nou osi annan en lagreman ant Gouvernman Sesel ek Gouvernman Lasomali santralize, savedir Gouvernman Federal pou transfer pirat ki’n ganny kondannen e sa ti sinnyen le 9 Fevriye 2012.  Non eskiz mwan avek Gouvernman Lasomali ti osi ganny sinnyen apepre menm letan avek Puntland avek Somali Land.  Mon napa sa dat egzakt la e tou sa bann lagreman transfer pirat i permet nou bann pirat ki’n ganny kondannen dan nou prizon pou nou anvoy zot dan zot pei lorizin pou zot servi zot suntans.  Me pou klarifye kestyon Onorab parey monn dir nou napa okenn lagreman lesanz me nou fer serten lagreman ek MOU kot I konsern transfer prizonyen. Mersi.

 

MR SPEAKER

Onorab Arnephy.

 

HON BERNARD ARNEPHY

Baze lo sa Transfer Of Prisoners Act 2010 ki Minis in koz lo la e sa MOU, eski ou Minister pe rankontre okenn problenm dan sa demars.

 

 

MINISTER JEAN-PAUL ADAM

Mon krwar i kler ki letan par egzanp nou pe negosye avek en pei ki napa en vre Gouvernman akoz sitiasyon Somali i tre delika menm si in annan en amelyorasyon resaman, alor i annan bokou kontrent e bokou defi ki nou fer fas letan nou pe negosye avek sa bann lenstans.  Kot i konsern Somali Land par egzanp in pran nou en kantite letan, in pran nou preski 1an pou ariv a sa staz ki vreman nou ti kapab transfer pirat me nou tre konfyan ki prezan nou pe al lo sa bon semen e sa in ganny ilistre semenn pase letan nou’n transfer 17 pirat setadir ki nou’n montre ki sa i posib, ki sa i fezab e sa i tir enpe sa fardo lo Sesel.  Setadir ki nou koman en leta ki parey nou dir an Angle is on the front line of piracy nou pran nou responsabilite, nou annan pirat ki vin dan nou delo alor nou prosekit zot, nou fer zot pas devan lazistis me sa fardo pou nou met zot an prizon pa devret tonm lo nou.  Alor nou’n touzour dir nou bezwen transfer sa bann prizonyen ver Somali.

En lot kontrent ki’n ganny rankontre se bann prizon ki konvenab akoz nou pa anvi met zot dan en prizon ki pa pe ganny byen manage e ki apre i annan lezot problenm e in annan en zefor konsiderab atraver osi lapel ki Prezidan Michel in fer a la komite enternasyonal pou annan en vre lenvestivman dan bann prizon Somali e sa i enkli dan bann rezyon parey Somali Land, Hageza par egzanp kot nou’n anvoy sa bann prizonyen ki sorti Sesel me osi Puntland kot pou annan posibilite anvoy en dezyenm batch prizonyen e evantyelman osi Mogadishu.  Alor in annan e gran lenvestivman, en gran zefor ki’n ganny fer dan lakominote enternasyonal pou fer sir ki nou kapab fer sa sistenm marse e mon kapab dir Sesel i premye pei pou fer sa e se akoz nou’n determinen ki nou pa pou zis viv oubyen aksepte piratri ki afekte nou lavi toulezour me ki nou anvi anmenn en vre solisyon kont sa problenm.  Mersi bokou.

 

MR SPEAKER

Onorab Pool.

 

HON ANDRE POOL

Mr Speaker mersi.  Mr Speaker eski Minis ti a kapab donn nou Lasanble lo sif konbyen Seselwa ki dan bann prizon aletranze e si son Minister i annan tou detay lo zot sitiasyon.  Mersi.

 

MINIDTER JEAN-PAUL ADAM

Mersi Onorab mon eskize ki mon napa sa sif absoliman a mon dispozisyon, me an zeneral mon ti a dir ki mon Minister nou absoliman okouran bann diferan ka kot bann Seselwa i ganny met dan prizon akoz laplipar ditan nou Minsiter i ganny enformen swa ofisyelman, swa non-ofisyelman, serten ka ki nou okouran i annan detrwa ki dan prizon Moris, nou annan detrwa ki Dubai, nou annan 3 mon krwar ki zot konnen ki Lezip, nou annan atraver lemonn serten nou bann resortisan malerezman ki’n angaz zot dan bann aktivite ilegal e nou Minister i touzour fer sir ki nou ofer zot sa siport konsiler, par sa ki mon oule dir se ki nou fer sir ki zot kondisyon i bon, savedir ki zot pe ganny manze, zot pe ganny delo, ki zot pe ganny trete dan en fason ki konvenab parey nou ti ape ekspekte  ki nenport ki prizonyen ganny trete par egzanp isi Sesel.  An menm tan nou bezwen rekonnet ki sak letap i annan son lalwa, e si sa lalwa i ganny kase dan nenport ki pei nou bezwen respekte sa lalwa.  Alor nou Gouvernman si en dimoun in kas lalwa dan enn nou bann pei vwazen oubyen dan enn nou partener nou bezwen respekte drwa sa pei pou anmenn sa dimoun devan lazistis.  I menm parey si en etranze i konmet en krim isi nou ekspekte ki zot pas devan lazistis.

Alor nou koman en Minister dan sa bann diferan ka ki mon’n site par egzanp nou pe pran kontak avek sa bann diferan dimoun pou asire ki zot dan bon kondisyon e nou konsyan parfwa serten defi me nou fer sa zefor pou fer sir otan ki posib kot nou kapab nou donn sipor tout an respektan sistenm Zidisyer sa pei e sa bann prosesis legal ki bezwen ganny swiv.  Mersi.

 

MR SPEAKER

Onorab Rose.

 

HON MARIE ANTOINETTE ROSE

Mersi Mr Speaker.  Mr Speaker Eski Minis i kapab dir nou si dan sa bann lakor lesanz prizonyen i osi annan en lakor pou esanz prizonyen avek nou bann otaz Seselwa ki trouv zot Lasomali.  E si Minis i kapab dir nou akoz ziska prezan nou pa pe tann bokou lo ki pe arive avek nou 2 otaz Seselwa ki trouv zot Lasomali.  Mersi.

MINISTER JEAN PAUL ADAM

Eskiz mwan en pti moman.  Mersi bokou pou ou kestyon.  Mon krwar ki lo kote lesanz prizonyen kot i konsern otaz sa i en keksoz ki nou pa kapab antre ladan.  Nou pei i pran son responsabilite tre o serye e menm parey ki nou pa negosye ranson, nou pa en pei ki krwar ki nou devret al dan sa direksyon, nou osi pa kapab annan en sitiasyon kot en dimoun ki’n kas lalwa i krwar ki i kapab ganny servi koman en bargening cheap parey nou dir.

Lo kestyon nou 2 konpatriot Marc Songoire e Rolly Tanbara, mon ti a kontan asir sa Lasanble ki sak meeting ki Preizdan i fer aletranze avek nenport ki partener oubyen sak meeting ki mwan mon fer oubyen ki nenport ki Minis i fer premye pwen ki nou leve se pou nou rod sipor pou nou kapab ed nou 2 konpatriot.  Anmenmtan nou bezwen tre serye dan sa prosesis pou negosye pou fer zot kapab ganny large, i pa en keksoz senp, i pa en keksoz imedya e Sesel nou’n deza fer li, nou’n deza kapab reisi fer li gras a nou determinasyon e gras a sa travay serye ki nou pe fer.  Me si a sak fwa ki nou zwenn en dirizan aletranze, nou fer en press release kot nou dir nou’n demann tel ou tel keksoz sel rezilta se bannla laba Somali i krwar zot kapab ogmant larzan ki zot pe demande.  Mon krwar ki nou bezwen respekte sa prosesis, nou bezwen travay dir, les sa tim negosiasyon travay e mon kapab asir zot ki Gouvernman pe fer tou sa ki i kapab pou liber nou bann konpatriot.  Mersi.

 

MR SPEAKER

Onorab Pierre

 

HON DAVID PIERRE

Mersi Mr Speaker.  Mr Speaker eski Minis i kapab dir avek sa Lasanble si i satisfe ki Gouvernman i kapab sustain e deal avek sa bann prepsyon ki sa bann prizonyen pirat pe mete lo nou prizon enkli presyon bidzeter.  E dezyenmman eski Minis i kapab dir avek nou dan ka kot zot in sinny bann lakor si sa bann lakor pa pe ganny respekte e bann led ki nou sipoze gannyen an relasyon ek sa bann lakor pa pe ganny respekte, eski son Minister i annan en plan kler lo kimanyer Sesel pou sorti dan sa bann lakor e sorti dan en fason venker.  Mersi.

 

 

MINISTER JEANPAUL ADAN

Mersi. Premye klarifikasyon mon ti a dir ki tou bann prensip e nou bann lakor ki nou’n fer pe ganny respekte e nou koman Sesel nou pran li tre o serye ki nou bezwen adres sa kestyon piratri, me en klarifikasyon ki mon ava anmennen lo la se eski nou pe ganny ase sipor?  Non.  Nou pa pe gannya se sipor me dan bann lakor ki nou annan annefe Sesel in montre kimannyer nou kapab fer sa bann sistenm marse. Piratri i en defi pou lemon, si nou pe koz pri komodite partou dan lemonn pe monte, si nou pe koz pri petrol pe monte byensir i annan en kriz mondyal ekonomik me se pa zis sa akoz 2 tyer petrol ki ganny vann dan lemonn i pas atraver Losean Endyen e tou bato ki pas dan Losean Endyen pe pey en prim akoz piratri.  Savedir en kantite bann pri dan lemonn ki pe ogmante i lye a fenomenn piratri.

Sesel i enn bann pei ki’n dir sa pa akseptab alor nou pa kapab zis dir ki nou pa pou fer narnyen akoz i annan ki dir annou pa pran pirate, annou pa pas zot devan lazistis, annou zis larg zot laba, letan nou larg zot laba zot retroun ankor e sa ki Sesel – mesaz kler ki Sesel in anvoye se nou pa pe aksepte ki sa zis en problenm ki’n anvoye ziska demen e ki demen nou koz ankor lo la, nou koz menm keksoz, nou koz menm keksoz.  Sesel in montre atraver son determinasyon ki i kapab protez son delo, ki I kapab osi pas bann pirat devan lazistis e kondann zot e letan zot ganny kondannen osi nou’n dir ki nou pa pou kapab anmenn sa – gard sa problenm zis li nou e ki evantyelman zot bezwen ganny transfer. In pran nou enpe letan me nou’n fer sir ki bann prensip sa bann lakor i ganny respekte e la nou’n vwar premye group ki’n ganny anvoye Somali e sa i montre pou dir nou diplomasi i efektiv, ki nou bann zefor lo piratri pe marse e menm ki tou dimoun pe regard nou koman sa fason se koumsa ki pou fer marse.

Definitivman nou pou touzour dir letan nou regard lanpler sa problenm sa ki nou pe gannyen pa ase, definitivman I pa ase.  Nou bezwen plis bato, nou bezwen plis larzan me pou dir nou pa pe ganny narnyen osi pou fo akoz atraver lapel ki Prezidan Michel in fer nou annan en kantite partener ki’n pare par egzanp pou met avyon lo nou teritwar.  Nou annan en kantite partener ki anmenn bato lo en baz regilye pou vin patrol nou delo an partenarya avek nou prop lafors. Nou’n kapab mobiliz sipor pou nou ganny nouvo kos gard, pou nou ganny nouvo bato si pou ranforsi nou kapasite dan sa lalit.

Lo kestyon kou bann pirat lo nou sistenm prizon definitivman i en gro problenm e i en – nou tou nou konnen sa fardo ki i mete lo nou me mon krwar nou bezwen mazinnen poudir piratri i en krim e si demen nenport ki par egzanp in komet en mert oubyen in komet en vol nou pa pou ekspekte sa dimoun i ganny large zis akoz prizon i plen, nou pa pou ekspekte ki nou pa pe adres sa kestyon zis akoz nou annan kontrent.  Wi nou anann kontrent me i annan serten sipor ki nou pe gannyen par egzanp atraver Nasyon Ini nou’n kapab konstri en nouvo wing lo nou prison, nou osi pe rantre pou nou konstri anplis ki sa ki nou pe gannyen avek Lasinn nou pe ganny nouvo Lakour Mazistra ankor sorti kot Nasyon Ini.  Nou’n ganny sipor sorti Langleter pou siport nou prizon plis ki 3mil dolar.  Larepons i pa ase me nou pe gannyen en serten keksoz, nou pe ganny otan e menm plis ki lezot pei ki pe lager kont pirat e zefor ki nou pe fer ozordi pou fer sir ki demen nou annan en serten sekirite.  Si nou pa ti pe fer sa ki nou ti pe fer nou ti pou annan bokou plis problenm ozordi mon kapab garanti sa.  Petet mon ti a osi zis klarifye lo bann lakor transfer akoz nou’n touzour dir nou lantansyon se transfer bann prizonyen ki’n fini kondannen Somali bann pirat e mon bezwen klarifye se selman letan zot in ganny kondannen ki nou kapab transfer zot.  Nou pa kapab transfer en sispe, nou bezwen transfer en dimoun ki’n fini ganny kondanen e menm keksoz pou lezot krim nou Transfer Of Prisoner Act I konsern bann prizonyen ki ganny kondannen.  Mersi.

 

MR SPEAKER

Ankor kalrifikasyon, konbyen pirat pe demande pou sa 2 otaz?

 

MINISTER JEANPAUL ADAM.

Sorry Mr Speaker.

 

MR SPEAKER

Konbyen pirat pe demande ou’n dir ransyon ou pa’n mansyonnen sif pou sa 2 otaz.

 

 

MINSIETR JEAN-PAUL ADAM

Mon pa konnen Mr Speaker eskiz mwan e sa i an deor mon konpetans.  Mersi.

 

MR SPEAKER

Kestyon limero 6, Onorab Arnephy.

 

HON BERNARD ARNEPHY

Mersi Mr Speaker.  Mr Speaker eski Minis i kapab enform nou Lasanble si Gouvernman i annan plan pou fer ki tou Seselwa ki vwayaz Lemirat Arab Ini pa pou bezwen en viza pou vwayaz dan sa pei.  Mersi.

 

MINISTER JEAN-PAUL ADAN

Mersi bokou Onorab absoliman.  Nou’n deza an diskisyon aprofondi avek Gouvernman Lemirat Arab Ini pou nou kapab ganny en lakor ki kouver tou Seselwa.  Parey monn dir sa lagrmean ki nou’n sinnyen kot i konsern passport diplomatik e ofisyel i premye pa ki anmenn nou dan sa negosiasyon aprezan avek Minsiet Azfer Entern laba kot nou Lanbasader pe zwenn avek zot lo en baz regilye pou nou ariv lo en staz ki nou kapab sinny en tel lagreman.  Byensir i annan serten keksoz ki nou bezwen fer lo nou kote, nou bezwen kapab zistifye e montre ki nou sistenm i konpatib avek zot sistenm zot sistenm passport ki en sistenm biometric.  Nou anann deza dan nou plan isi Sesel pou nou annan en sitenm biometric isi petet pou pran nou enpe letan me nou pe sey zistifye an atandan ki nou pe fer ki kapab garanti ki nou sistenm i konpatib avek pou zot.  Zot osi annan zot bann prosedir entern par egznap lo kote bann deba ki bezwen ganny fer lo bann diferan konsey, alor i annan bann prosedir entern ki nou bezwen swiv me mon tre konfyan ki nou pou kapab anmenn sa pou pep Seselwa akoz nou deza annan sa langazman tre o nivo par Gouvernman Lemirat Arab Ini. Mersi.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker Mr Speaker eski Minsi i kapab donn nou Lasanble en lendikasyon kan sa negosiasyon pou materyalize e ki benefis direk sa pou anmennen sirtou pou nou bann dimoun ki travel dan sa pei pou biznes mersi.

 

MINISTER JEANPAUL ADAM

Mersi bokou Onorab, mon naap en dat egzakt me mon konfyan ki nou pou kapab fer li sa lannen setadir okour  2012.  I mon Lanbasader baze Abu Dhabi pe zwenn avek sa departman konsernen lo en baz regilye e nou pe esper osi ki anann en misyon teknik pou evalye nou sistenm e sa pou donn nou en pli bon lide lo kantite letan i pou pran pou nou kapab antre dan sa lagreman.  Mon profit lokazyon pou mon osi dir ki dan tou pei akoz mon konsyan ki avek Lemirat Arab Ini se pa zis ki nou bezwen en viza laba me ki petet enkonveyan pou nou bann pasaze me se osi prosedir.  Alor nou pe osi anmenmtan travay pou nou senplifye prosedir e nou fer sa avek tou pei, menm bann pei ki dir nou ki zot pa kapab par egzanp donn nou viza free me nou demande ki zot sey senplifye sa bann sistenm e nou prosennman nou espere ki nou pou ganny serten amelyorasyon par egzanp kot i konsern bann etidyan ki bezwen al Lostrali kot nou krwar nou pou kapab ganny en sistenm bokou pli fasil pou zot zot pou touzour bezwen en viza parey monn Lostrali tou dimoun i bezwen viza me nou kapab senplifye sistenm pou fer sa e nou fer sa avek tou pei. Mersi.

MR SPEAKER

Onorab Vidot.

 

HON KEVIN VIDOT

Mersi Mr Speaker.  Mr Speaker eski Minis i kapab dir sa Lasanble enn fwa ki en lagreman i ganny etablir ant 2 pei pou retir viza parey letan Sesel ek Lemirat Arab Ini. Konbyen letan i pran pou en tel lagreman vin an realite. Mersi.

 

MINISTER JEAN PAUL ADAM

Mersi Onorab.  I vreman depan lo sitiasyon sak pei.  Lo serten pei – si nou pran legzanp Sesel akoz nou annan en rezim non-enpoz viza pou nou nou kapab met sa lakor anplas imedyatman, pou sa pei konsernen souvann fwa I annan bann kestyon ki bezwen ganny adrese dan parlman akoz i ganny konsider koman en lagreman, koman en trete an pei e alor i bezwen pas devan parlman pou ratifikasyon.  Serten pei i annan plis fleksibilite zot kapab met li anfors rapidman alor larepons se i vreman depan lo sirkonstans sak pei me touzour nou noy esey fer sir ki nou fer li opli vit posib. Mersi.

 

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker eski Minis i kapab dir avek nou anatandan pandan ki sa negosiayon pe ganny fer eski i annan posibilite anvi ki kou viza pe kontinnyelman monte eski i annan posibilite pou koz en pti gin lo labesman sa kou anatandan sa lakor final.  E dezyenmman eski Minis i kapab donn nou en garanti ki nou pa pou bezwen espere ziska Sesel i kapab met an plas sa issue passport biometrik avan ki Seselwa i ganny sa posibilite pou rantre Lemirat Arab Ini san ki zot bezwen en viza.  Mersi Mr Speaker.

 

MINISTER JEAN-PAUL ADAM

Mersi Onorab Leader Lopozisyon, a sa staz mon pa pou kapab garanti ki nou pou bezwen atann, mon pa pou kapab garanti ki nou kapab fer li dan en serten letan oubyen non.  I pou depan lo bokou keksoz.  I depan lo bann travay ki nou bezwen fer entern.  Kot mon kapab garanti se ki nou annan en komitman politik a tre o nivo ki nou pou gannyen a sa larkor.

Lo kestyon egzakteman akoz par egzanp pou nou fer en sistenm biometrik nou menm i pou pran en serten letan, I pou pran en serten resours.  Pozisyon ki nou pe met devan zot se ki annou refer li atraver en fason senplifye vizan evatyelman en sistenm biometrik e se sa lo labaz nou negosiasyon, e se lo sa labaz ki mon konfyan ki nou pou kapab fer li sa lannen menm.  Me pou donn nou en garanti ki evantyleman nou pou annan mon a dir ou wi, poudir ou, pou garanti tel ou tel dat oubyen apre tel ou tel prosedir I touzour annan bokou keksoz ki an negosiasyon e nou bezwen respekte sa ban diferan prensip ki sak pei i annan.

Kot i konsern kou viza mwan mon ti a dir ki nou Minister nou fer en kantite pou nou sey fasilit vwayaz Seselwa menm mon kapab dir mon bann anplwaye souvan try go to extra miles, zot in menm dan serten ka konmsi vreman call bann Anbasader tir zot lo lili pou sey fer bann keksoz an deor ler pou nou kapab fasilit keksoz pou Seselwa, pou bann delegasyon eksetera.  E tou bann konsern ki Seselwa i met devan Minsiter enkli bann kou viza nou met devan nou bann partener.  Me nenport ki pei ki met en kou pou viza i pa etablir en kou zis pou Sesel i etablir li pou tou pei e alor i pa en kestyon zis pou nou dir li pa met sa kou akoz i tro ser pou nou Seselwa se ki nou tonm anba en sistenm viza ki sa pei in etabli e negosiasyon ki nou fer se pou fasilt sa sistenm kot posib e ankor pli byen annan en sistenm kot nou pa bezwen viza ditou. Mersi.

 

MR SPEAKER

Kestyon limero 7. Onorab Lebon.

 

HON LENNY LEBON

Mersi Mr Speaker, bonzour Minis e out dimoun ki alekout.  Eski Minis i kapab en form nou Lasanble ki polisi etranzer Sesel an sa ki konsern climate change la ki in deside apwent en Anbasader aplen tan pou sa dosye.

 

MINISTER JEAN PAUL ADAM

Mersi bokou.  An se ki kosern  sanzman klimatik sa i en size avek en lenportans fondamantal pou nou pei, I tre enportan ki nou annan en diplomasi pa zis aktiv me en diplomasi aktivist lo sa size, nou bezwen militan kot i konsern sanzman klimatik e sa i pa zis mon Minister se tou lepep Seselwa, se tou manm Lasanble, se tou diferan Minister nou bezwen koz ek en sel lavwa pou nou defann lentere Sesel kont sanzman kliamtik.  Nou pozisyon in touzour enn an solidarite avek lalyans bann pti leta zil e sa i baze lo lefe ki bann pti leta zil i souvann fwa ganny afekte bokou plis par bann kestyon sanzman kliamtik ki bann gran pei.

Nou pozisyon nou pe demande ki en lagreman ki absoliman anmenn tou pei ansanm, en lagreman ki binding i ganny fer pou ranplas protokol KIOTO, e sa i touzour nou pozisyon.  Nou lentansyon letan nou’n apwent en Lanbasader spesyalize dan kestyon sanzman kliamtik e kestyon bann pti leta zil se ki depi negosiasyon Copenhegen ki’n fer an 2009 in annan en bas kot i konsern bann negosiasyon sanzman kliamtik e nou bezwen ranforsi nou kapasite pou nou kapab adres sa size e nou bezwen ranforsi sa korperasyon ant bann diferan Minister.  Akoz I pa konsern zis en Minister i konsern Minister Zafer etranzer, Minister Lanvironman byensir an premye lye me i konsern osi bann lezot Minister e nou Lanbasader ki vreman deza Anbasader Ronny Jumeau in deza ganny rekonnet koman en dimoun New York ki pe zwe sa rol koman en militant koman, en militant kont sanzman kliamtik e nou’n anvi ranforsi son pozisyon pou li kapab koz pou Sesel e tou bann pti leta zil kot I konsern sanzman klimatik.

Nou pozisyon bann pti leta zil i enn tre for, dernyen negosiasyon ki’n fer Dirban in anmenn en serten progre me menm si nou lwen avek en lagreman final.  Nou pozisyon parey bann pti leta zil parey monn dir I tre onn dir I tre ferm e I baze lo bann levidans siantifik ki bann serser, bann siantis in met a dispozisyon Nasyon Ini byensir nou bezwen annan sa baz negosiasyon e nou bezwen pare osi pou travay avek bann partener e nou pozisyon osi se ki si i annan en posibilite ganny en lagreman ki binding nou pou bezwen osi adapte nou pozisyon pou nou kapab adres sa, me pou lemoman nou pozisyon I tre for e sa i dir ki nou pa pou aksepte en logmantasyon dan tanperatir mondyal pa plis ki 1.5 degre e en konsantrasyon karbonn dan latmosfer pa plis ki 350 par milyon.  E sa i koresponn avek pozisyon bann pti leta zil me parey nou’n dir nou pe rod osi serten lalyans pou nou vreman par egzanp avek Linyon Eropeen pou nou vreman anmenn en lakor ki pou kapab permet nou anmenn en vre pa an avan kot i konsern konbat kont sanzman klimatik.  Sesel pe osi diriz zefor pou fer sir ki resours par bann pei devlope i ganny met a dispozisyon sirtou bann pti letan zil akoz ziska prezan bann resours ki disponib pa aksepetab e i pa ase.  Alor nou pe kontinnyen fer sa pledwaye, nou pe kontinnyen zwe sa rol koman militant e sa nouvo Lanbasader, sa nouvo rol Lanbasader pou permet nou fer sa avek plis lefikasite e bokou plis vizibilite.  Mersi.

 

MR SPEAKER

Onroab Lebon.

 

HON LENNY LEBON

Mon napa siplemanter.

 

(Technical problems)

 

(Break)

(Technical problems)

HON LENNY LEBON

Mersi Mr Speaker.  Minis i kapab eksplik nou Lasanble ki bann benefis BIPPA, Bilaterral Investment Promotion and Protection Agreement pou Sesel e kimannyer bann biznes Seselwa i kapab ganny empower pou tir benefis bann tel lagraman.  Mersi.

 

MINISTER JEAN-PAUL ADAM

Mersi bokou Onorab.  En BIPPA oubyen en Bilaterral Investment Promotion Protection Agreement i an prensip premyerman en lagraman ki ganny sinnyen ant 2 pei pou sa 2 pei promouvwar lenvestisman ant kanmarad.  E i reprezant en lenstriman ki sa 2 pei i servi pou endike ki zot annan konfyans dan sistenm politik, ekonomik pei kanmarad e ki alor zot rekomann ki zot bann resortisan, zot bann biznes, zot bann dimoun ki pe fer biznes kot zot i konsider sa lot pei koman en landrwa preferansyel pou zot bann lenvestisman a letranze.

I annan plizyer BIPPA atraver lemonn, annefe i annan plis ki 2600 BIPPA ki’n ganny sinnyen ant 186 pei.  Zis pou sit en legzanp la, Lenn en pei tousel i annan plis ki 80 BIPPA avek diferan pei atraver lemonn e bokou lenvestiser souvan, letan zot pe regarde kote zot pou envestir, zot regarde osi si zot pei kot zot baze i annan enn tel lakor avek sa lot pei.  Enn BIPPA i kapab alor amelyor sa klima fer biznes dan en pei e atir plis lenvestiser atraver letranze e i osi donn bokou plis perspektiv sa pei, alors si nou pran Sesel, i donn plis perspektiv biznes Seselwa ki ti ava anvi etablir zot lekor a letranze oubyen envestir a letranze.  Mon krwar nou kapab konsidere ki en BIPPA i en lenstriman ki kapab ganny servi sirtou pou marketing en pei.  Savedir i met nou lo radar.  I met Sesel lo radar bann lenvestiser e osi vis versa, letan nou bann envestiser i al deor zot ganny vwar koman sorti dan en pei ki annan en kad legal e en kad ekonomik ki koresponn avek bezwen sa pei avek ki nou’n sinnyen.

Nou Sesel, nou napa bokou BIPPA ki nou’n sinnyen, nou’n sinny avek Lafrans, avek Lenn e avek Lasin.  Pou le moman, zis sa enn avek Lafrans ki’n ratifye me kot i konsern bann lavantaz ki bann pti biznes oubyen bann biznes Seselwa i kapab servi dan sa bann lagreman, mon krwar nou bezwen rekonnet osi ki ziska 2008, akoz bann kontrent deviz, nou pa’n kapab servi sa bann lagreman parey nou ti ava swete, me malgre sa, annou pa sou estim bann biznes Seselwa.  I deza annan bokou biznes Seselwa ki pe fer biznes a letranze e si nou byen servi sa bann lakor, nou kapab ganny bokou plis pou zot, bokou plis lavantaz pou zot e plis rekonnesans dan bann marse.  Kot mon ete dan Minister Zafer Etranzer monn kapab vwar serten biznesmenn menm ki’n apros nou letan zot pe al dan serten pei.  Savedir Seselwa pe fer bokou plis ki menm zot ti ava ekspekte.  Mersi.

 

MR SPEAKER

Onorab Lebon, okenn Siplemanter?

 

HON LENNY LEBON

Mr Speaker mon napa okenn kestyon siplemanter.  Mersi.

 

MR SPEAKER

Onorab Hoareau.

 

HON HERBERT HOAREAU

Mr Speaker, mon pe demande si Minnis i kapab eksplik sa Lasanble si son Minister ou Gouvernman pe pran bann mezir ekstra, azour lo bann wording ki ganny servi dan bann trete lenvestisman ou lagreman.  Mon pe fer referans tel ki sa trete lenvestisman ki nou’n sinnyen avek Lafrans lartik 6 kot nou’n donn full and complete protection and safety lo nou teritwar, enkli nou teritwar maritim, envestiser Franse ki envestir dan nou pei, e si ziska ozordi nou kapab kontrol nou teritwar maritim 100 poursan lo size la piratri, nou pou trouv nou dan en problenm mazer si nou pa adres sa enpe.  Mersi.

MINISTER JEAN-PAUL ADAM

Mersi Onorab.  Premye keksoz mon ti a dir i se ki BIPPA i senpleman en lenstriman ki reflekte bann lalwa ki an fors deza dan en pei.  I enportan ki nou vwar li dan sa konteks akoz i vre souvannfwa, en BIPPA i annan en langaz petet en pe vag akoz i anvi kree en latmosfer ki enteresan pou lenvestisman e pou li fer sa an 2 sistenm diferan parfwa sa bann keksoz i reste ase vag.  Sa ki nou bezwen regard byen se en BIPPA dan limenm pa pou anmennen lenvestisman.  En BIPPA i kree sa, parey monn dir i en lenstriman marketing, i en lenstriman ki met nou lo radar en lot pei, e sa ki pli enportan se bann lalwa ki ou annan entern dan ou pei ki vreman protez e promouvwar lenvestisman pou bann nasyonal Seselwa ensi ki pou bann envestiser etranze ki vini.  Lo sa kestyon par egzanp pou asire ki tou bann biznes ki bezwen fer biznes lo lanmer i annan sa sekirite.  I annan en prensip dan bann trete e dan bann negosiasyon ki sa ki apel sa ki rezonnab, alor par egzanp ou kapab dir ki byensir ou ti ava swete ki tou biznes i reste sen e sof.  Ou pa pou kapab, koman en nenport ki Gouvernman, nenport landrwa dan lemonn kapab anpes par egzanp en dimoun kas lakaz oubyen kas en biznes.  Alor sa nesesite pou nou garanti sekirite, en biznes etranze isi i zis lo menm mezir ki nou kapab garanti sekirite en biznes Seselwa.  Nou pa bezwen al pli lwen ki sa, nou pa bezwen garanti en keksoz ki nou pa pe deza fer anba nou bann lalwa ki deza egziste.

En BIPPA i zis respekte bann lalwa ki nou, nou pe fer, me lo sizesyon Onorab ki byen labyenveni, Minister Finans an kolaborasyon avek nou Minister, annefe nou pe travay lo en nouvo format pou nou bann lagreman a lavenir, ki reflekte bann meyer pratik ki egziste o monn, e ki petet ava adres enn de sa bann konsern ki ou annan lo langaz ki ganny servi.  Me mon kapab asir tou bann Manm Lasanble ki tou bann lakor ki nou’n sinnyen kot i konsern proteksyon lenvestisman i toutafe reflekte e an akor avek nou bann lalwa egzistan ki nou annan Sesel.  Mersi.

 

MR SPEAKER

Onorab Barbe.

 

HON NICHOLE BARBE

Mr Speaker, eski Minis i kapab eksplik nou Lasanble kimannyer sa bann BIPPA ki Sesel in sinnyen, sirtou atraver sa 3 pei i ede ranforsi relasyon ki Sesel i annan avek sa ban pei?  Mersi.

 

MINISTER JEAN-PAUL ADAM

Mersi bokou.  Parey mon’n dir, enn bann pwen enportan ki nou bezwen mazinen se ki Sesel koman en pti pei, parfwa menm nou pa ni ganny koni par bokou dimoun ki pe fer biznes e souvannfwa si zot konn nou, zot konn nou koman en landrwa touristik selman.  Alor i annan en kantite travay pou nou fer pou nou vreman fer dimoun vwar ki Sesel i annan en kantite loportinite, me osi pou nou kree loportinite pou nou bann biznes a letranze.  E pou mwan kapab dir absoliman en BIPPA in anmenn tel ou tel proze oubyen lot proze, ou pa pou kapab fer sa lyen direk a sa staz, me nou bezwen mazinen ziska 2008 ti annan en kantite persepsyon lo Sesel, menm serten persepsyon ki pa ti neseserman vre, e menm ozordi, i annan serten persepsyon ki kontinnyen ganny propaze par serten ki fer dimoun krwar ki Sesel i pa en landrwa stab oubyen ki pa en landrwa konvenab pou fer biznes.  Alor, en BIPPA ki i fer, i ranforsi sa konfyans, e ou pa kapab vreman mezire konfyans dan le sans en aktivite spesifik.  Sa ki enportan dan konfyans se sa batir sa rekonnesans ant 2 Gouvernman ki wi, nou anvi priyoritiz lenvesman nou 2 pei e nou anvi fasilit sa lenvestisman otan ki posib.  En BIPPA i en premye lepa pou nou fasilit sa me apre ou bezwen fer sir ki nou prop lalwa i a la oter e nou ankor annan travay pou nou fer isi pour fer sir ki sa i ganny amelyore e letan mon pe koz klima lenvestisman mon pa pe koz zis pou etranze, mon pe koz pour Seselwa menm ki mon krwar nou tou nou okouran i annan keksoz ki nou bezwen amelyore, me i annan en gran volonte pou nou fer sa e en BIPPA ki i fer, i donn nou en laport ki permet nou vreman ranforsi sa.  Mersi.

 

 

MR SPEAKER

Kestyon nimero 9, Onorab Lucas.

 

HON WILBY LUCAS

Mersi Mr Speaker.  Mon kestyon pou Minis.  Eski Minis i kapab enform sa Lasanble lo konbyen trete, Konvansyon ek protokol ki Sesel in retifye e ki son lavantaz pou Sesel?  Mersi.

MINISTER JEAN-PAUL ADAM

Mersi bokou Onorab.  Antou Sesel in sinnyen e ratifye 217 trete enternasyonal e lagreman milti lateral.  Sa i kouver plizyer sekter enkli drwa imen, lalwa maritim, lanvironnman, komers, finans, lalwa imaniter, lape ek sekirite, drog ek krim.  I annan aviasyon, lazenes, ledikasyon, vreman dan tou bann sekter.  E letan nou sinny en Konvansyon oubyen en trete, i annan plizyer eleman ki nou regarde, premyerman eski sa trete i en kestyon drwa enternasyonal, akoz par egzanp si ou anvi vin en manm Nasyon Ini, i annan serten konvansyon ki ou bezwen sinnyen.  Menm parey si ou vin en manm SADC, COMESA eksetera i annan serten konvansyon ki ou bezwen sinnyen e apre i annan serten lezot Konvansyon ki letan ou partisip ladan i permet ou partisip plennman dan bann diferan lorganizasyon enternasyonal ki konsern diferan sekter.  Alor touzour nou fer en evalyasyon, ki bann benefis i anmennen pour Sesel e letan nou pe koz benefis, nou pa pe koz zis benefis dan le sans devlopman oubyen amelyorasyon sa sekter, me osi vizibilite Sesel, akoz enn ler si ou pa manm en Konvansyon ou ganny demande akoz ou pa manm, e alor i en lenstriman ki nou nou servi pou montre klerman poudir Sesel pe bouz dan en bon direksyon e ki nou en manm serye e responsab dan Nasyon Ini.

Sa nimero ki mon’n site 217 i pa kouver tou bann trete ki nou annan lo en baz bilateral kot nou annan bokou plis e mon pa pou kapab donn zot antye lalis akoz i telman gran, me ki nou fer lo tou sa bann Konvansyon otan ki posib nou sey etablir en baz swivi me lakantite, i annan ki serten zis ou bezwen sinnyen, ou bezwen ratifye me i annan bokou ki ou bezwen swiv e sa kapasite nou bezwen ranforsi kontinnyelman.  Mersi.

 

MR SPEAKER

Onorab Lucas.

HON WILBY LUCAS

Minis eski ou kapab dir sa Lasanble, apard Sesel koman en pei, eski sa bann Konvansyon ou trete osi i aport benefis pour bann group endividi oubyen lenstitisyon dan pei, e ki mekanizm i annan dan ou Minister pou donn sa bann dimoun avek lentere akse avek sa bann lavantaz?  Mersi.

 

MINISTER JEAN-PAUL ADAM

Mersi bokou.  Wi annefe i annan bokou sa bann diferan trete ki adres serten sekter spesifik dan nou sosyete, par egzanp kot i konsern lalwa maritim, en kantite nou bann lalwa ki nou’n met an plas isi i ganny fer an lyezon avek nou bann Konvansyon ki nou’n sinnyen lo kote international maritime organization, oubyen Nasyon Ini, e sa i permet nou pli byen asir sekirite peser, asir bann meyer pratik an se ki konsern lenplimantasyon lalwa lanmer.  I annan serten lezot par egzanp dan laviasyon sivil kot bann norm ki nou servi isi i permet nou ganny rekonnesans enternasyonal, e menm nou bann voyaz entern ant nou bann zil i ganny sertifye enternasyonalman, e i annan lezot ankor pli bazik, par egzanp nou’n sinny protokol SADC lo ledikasyon ki pou permet nou benefisye serten keksoz enkli bann kou redwir pou nou bann etidyan ki al etidye dan bann lezot pei SADC, alor i annan plizyer sa bann trete e Konvansyon ki anmenn bann benefis direk a bann sekter nou popilasyon.  Mersi.

 

HON DAVID PIERRE

Mersi Mr Speaker.  Mr Speaker, eski Minis i kapab dir sa Lasanble si i santi ki Sesel koman en pei i annan sa kapasite pou li met an aplikasyon tou sa bann lagreman protokol ekstera ki nou’n ratifye, e dir avek sa Lasanble osi si i annan bann ka kot Sesel i bezwen revwar son bann lalwa lokalman, met li azour pou ki i kapab efektivman met serten sa bann protokol oubyen Konvansyon an aplikasyon.  Si sa i leka, Minis dir sa Lasanble ki zot pe fer about it.  Mersi Mr Speaker.

 

MINISTER JEAN-PAUL ADAM

Mersi Onorab Leader Lopozisyon.  Definitivman pou en pti leta zil, bann kestyon kapasite imen i touzour en defi e letan nou pe koz sa nonm Konvansyon, i byensir en kantite travay, me mon krwar i enportan nou get dan konteks global ki laplipar pei zot annan retar e difikilte pou zot vreman kapab fer sa bann rapor parey i fodre.  Alor, lo kote nou kapasite, i annan en kantite ranforsman ki bezwen ganny fer me anmenmtan nou’n fini met lanmen lo la akoz dan nou Minister, nou’n etablir en plan daksyon ki permet nou adres laplipar bann Konvansyon ki nou touzour an retar e nou pe vize pou fer sir ki tou bann rapor ki bezwen ganny fer i ganny fer, i ganny soumet.  Dan bokou ka, i vre, mon kapab konstate ki petet nou’n souzestimen lakantite travay ki sa bann rapor i fer, e parfwa ki arive?  Se bokou bann Konvansyon, an efe, Sesel i ratifye zot, i sinny zot akoz sa bann Konvansyon i deza an akor, i deza reprezant sa ki nou nou deza pe enplimante Sesel, nou deza annan bann lalwa souvan tre modern, souvan tre progresis e ki ofer bann meyer pratik, menm pou lezot pei.  Bann pei souvan ki bezwen refer zot Konstitisyon bann dernyen lannen souvann fwa zot in apir zot lekor lo nou menm, nou nou Konstitisyon e bokou sa bann Konvansyon, mon a pran bann legzanp bann trete drwa imen, bokou bann trete drwa imen i deza ganny reflekte dan nou Konstitisyon.  Setadir napa vreman en gran travay pour nou fer pour nou adapte nou lezislasyon nasyonal avek sa bann Konvansyon.  I annan lezot Konvansyon ki i vre, nou bezwen fer en travay pour nou met nou lezislasyon an konformite.  En legzanp sa se Konvansyon lo Lakour Enternasyonal Kriminel ki nou ti ratifye si mon pa tronpe an 2009 oubyen boner 2010 e sa Konvansyon i nesesit serten sanzman dan nou prop lezislasyon pou nou kapab met li an egzersis.  E pour sa nou pe ganny lasistans Commonwealth atraver en eksper pour fer sa travay pou nou e otan ki posib letan nou annan sa bann sanzman pou nou fer dan nou lezislasyon nou sey demann led nou bann partener pou fer li.  Me dan laplipar leka nou defi se plito pour nou fer sir ki nou bann rapor i azour.  E sa parey mon’n dir nou’n met lanmen lo la.  Mersi.

 

MR SPEAKER

Bon, nou’n ariv alafen question time.  Nou ava remersye Minis ek son delegasyon e nou a eskiz li parmi nou.  Nou annan en PNQ aprezan.  Pou PNQ nou annan 2 Minis ki pou vin reponn kestyon akoz – e sa se Minis Alexander e Minis Morgan.  Silvouple asize, ki pou reponn kestyon lo Air Seychelles e sa kestyon i annan plizyer konponan, monn permet li akoz mon zize ki i en size ase irzan e i annan lenportans nasyonnal e sa bann diferan konponan i bord en pe diferan Minister.  E vwala rezon akoz le 2 Minis i la ozordi.  Kimannyer nou pou proceed, Onorab Pierre ava demann son kestyon, Minis Morgan i a reponn son morso pou li, Minis Alexander i a reponn pou li e apre nou ava annan parey labitid nou ava permet bann kestyon siplemanter.  Nou pe allocate apepre enn erdtan pou sa sesyon.  So, Onorab Pierre.

 

HON DAVID PIERRE

Mersi Mr Speaker.  Bonzour sa 2 Minis ki’n fek vin zwenn nou la konmela.  Mr Speaker an vi ki bokou Seselwa in perdi zot travay apre ki Air Seychelles in bezwen restriktire, apre ki in fer bokou pert finansyel, eski Minis i kapab dir ek sa Lasanble premyerman, kote ki Air Seychelles in al mal, e eski ti napa en alternatif apard ki antre an partenarya avek Etihad?

Dezyenmman, konbyen travayer antou ki’n fini perdi e ki pou perdi zot travay a lavenir e ki lenpak sosyo ekonomik ki pou annan lo sa bann dimoun ek zot fanmiy?

Trwazyenmman, ki plan Gouvernman i annan pou fer sir ki tou bann ki pe ganny met a laport i ganny replase dan travay dan pli kourt dele letan avek bi pou minimiz lenpak sosyal, ekonomik e moral lo sa bann dimoun ek zot fanmiy?

Katriyenmman, ki baz ki son Minister in servi pou kalkil konpansasyon pou bann travayer ki’n ganny fer arete e kan ki zot pou fini ganny peye zot konpansasyon?

E senkyenmman edan son plan stratezik, kan eski Air Seychelles koman en brand pou reganny son vre idantite pou nou kapab kontinnyen fly the Creole Spirit?  Mersi Mr Speaker.

 

MR SPEAKER

Ok, mon ava envit Minis Morgan pou reponn kestyon premye, dezyenm, trwazyenm A, B, E.

 

MINISTER JOEL MORGAN

Mersi Mr Speaker.  Bonzour Mr Speaker e tou Manm Lasanble e bonzour tou dimoun ki a lekout lo radyo dan lakour.  Mr Speaker premye parti kestyon, kote ki Air Seychelles in al mal e eski ti napa en alternativ apard ki antre dan partenarya avek Etihad?  Mon pou reponn li konm swivan.  Mr Speaker, sa bann difikilte ki Air Seychelles pe fer fas avek i pa enn ki inik.  Lendistri aviasyon in enn ki vilnerab avek bann diferan fakter tel parey bann fakter ekonomik ki kapab fer en gran lenpak lo soutenabilite komersyal en airlineAir Seychelles in ganny evalye par bann oditer lokal osi byen ki enternasyonnal e tou bann fe i montre ki Air Seychelles in soufer bann pert finansyel an rezilta logmantasyon dan pri karbiran, bann kou mentenans ki ti tre o, flauctuations dan to lesanz e rediksyon lo profitabilite vizavi reveni, konpare avek bann lannen avan kan Air Seychelles ti profitab e pa ti bezwen soutyen avek Gouvernman.

Gouvernman in esey asiste Air Seychelles pandan sa bann dernyen 2an me an vi nou bann kontrent vizavi nou bann target fiskal ki’n bezwen ganny akonplir akoz nou anba en progranm IMF, i pa’n posib pou kontinnyen soutenir demann pou finansman par Air Seychelles.  Gouvernman ti alor pran en desizyon pou rod en partener stratezik pou mitigate lefe negativ sa bann defi e osi donn Air Seychelles sa finansman e bann economies of scale ki sa partener stratezik ti pou kapab anmennen.  Sa ti ganny trouve pli bon alternativ pou esey tir Air Seychelles dan sa kriz grav ki i ti vwar son lekor ladan ver lafen lannen pase.

Avek sa partenarya avek Etihad, Air Seychelles pa pe selman benefisye avek finansman me osi avek nouvo avyon.  Maintenance pou sa bann avyon, kot sharing lo mazorite bann larout global Etihad, formasyon a tou nivo pou bann staff, loportinite pou devlop zot karyer dan Air Seychelles osi byen ki loportinite pou staff swazir pou al travay dan Etihad a letranze.  Air Seychelles i osi ganny lavantaz met en biro Air Seychelles kot sak Sales Office Etihad partou dan lemonn kot zot annan en tel biro.  Sa i donn nou akse avek sa network global Etihad pou vann nou tiket avyon partou dan lemonn e alors atrakte plis biznes pou nou lalinny aeryen nasyonal.

An sa ki konsern dezyenm parti kestyon Mr Speaker, konbyen travayer antou ki’n fini perdi ou ki pou perdi zot travay alavenir e ki lenpak sosyo ekonomik i pou annan lo sa bann dimoun ek zot fanmiy?  Mr Speaker, an Zanvye sa lannen ti annan 166 travayer ki ti ganny fer redundant koman en premye faz restriktirasyon.  Sa ti enkli 146 travayer isi Sesel e osi 20 aletranze.  Pou sa dezyenm faz restriktirasyon, Air Seychelles i annan plan down size ankor apepre 250 travayer e sa i ekspekte ganny fer progresivman ziska lafen sa lannen 2012.  Sa i form parti legersis right sizing pou asire ki nou airline nasyonal i reste viab e konpetitif.  Air Seychelles pe ofer sa 250 travayer opsyon depar volonter, ouswa reste avek lakonpannyen e ganny redeplwaye lo bann pos ki available dan Etihad, pourvi ki zot kalifye pou sa bann pos.  Pou bann ki pa pou kapab ganny redeplwaye zot pou bezwen ganny fer redundant avek tou zot benefis.  Sa 250 travayer Mr Speaker, ki monn fek koz lo la i enkli bann ki’n deside met zot resignation deza.  Ziska prezan i annan apepre 50 travayer ki’n resign.  Bann ki pa pou ganny redeplwaye dan Etihad.  E trwazyenmman bann ki’n swazir ou ki pou swazir zot depar volonter.

Ziska le 30 Mars sa lannen, i annan 24 travayer ki’n deside pou pran depar volonter anba sa opsyon.  Balans staff ki reste apare sa legzersis pou ganny fer redundant dapre Lalwa Lanplwa.  Fodre note ki menm formil ki ti ganny met an plas pour premye group ki ti ganny fer redundant an Zanvye pou ganny aplike pou toulede group ki aprezan pou al lo depar volonter ouswa lo redundancy.  Setadir zot pou ganny tou zot benefis anba Lalwa Lanplwa e zot kondisyon lanplwa dan Air Seychelles.  An plis ki sa, zot pou ganny le swivan:- en mwan lapey avek Gouvernman pou bann ki lo kontra, e 2 mwan lapey avek Gouvernman pou bann ki lo lanplwa normal.  Air Seychelles pe travay konzwentman avek Minister Travay e Devlopman Resours Imen pou asire ki to bann travayer ki ganny fer redundant i ganny redeplwaye dan en lot louvraz otan ki sa i posib.  Mon ti a kontan osi fer resorti ki Air Seychelles in deza komans son progranm retraining e i annan 25 pilot larout enternasyonnal ki pou retrain koman pilot pou bann avyon air bus.  Zis 3 ki pa’n swazir pou reste.  I pou osi annan apepre 72 cabin crew ki pou ganny formasyon tre byento pou travay lo sa bann nouvo avyon air bus.  Sa retraining pe inisyelman ganny finanse antyerman par Etihad.

An se moman Mr Speaker, i annan 93 cabin crew lo larout enternasyonal Air Seychelles.  Lantrennman pou sa bann pilot pou ganny fer an 2 faz e i ekspekte konplete dan 6 a 9 mwan, by the time ki zot in convert pou sorti 767 pou al A320 e A330, tandis ki pou bann cabin crew, lantrennman i pou 6 semenn e sa pou ganny fer an 4 faz.  Tou staff ki ganny retrain pou ganny repran par Air Seychelles.  Antretan ki zot pe fer sa training, servis pilot ek cabin crew pou ganny fer lo en baz tanporer par bann travayer Etihad akoz nou bezwen bann travayer ki adapte avek sa bann avyon ki nou pe gannyen byento.

An sa ki konsern lenpak sosyo ekonomik lo sa bann travayer ki pe ale e zot fanmiy osi, Mr Speaker mon pa dan en pozisyon pou donn en larepons direk lo la pou le moma, vi ki sa i en kestyon pou bezwen ganny adrese par Minister pou Finans e par Minister pou Devlopman Sosyal.  Mersi Mr Speaker.

 

MR SPEAKER

Mon zis ort ou latansyon plan stratezik, kestyon E si ou le pran li la.

 

MINISTER JOEL MORGAN

Mr Speaker, avek ou pemisyon mon a pran li apre.

 

MR SPEAKER

So, Minis Alexander ou a pran C ek D.

 

MINISTER IDITH ALEXANDER

Bonzour Mr Speaker, Manm Onorab bonzour.  Mon pou reponn kestyon C ek D.  Sa i konm swivan.  Ki plan Gouvernman i annan pou fer sir ki tou bann ki pe ganny met a laport i ganny ranplase dan travay pli kour dele letan avek bi pou minimize lenpak sosyal, ekonomik e moral lo sa bann dimoun ek zot fanmiy?

Mr Speaker, an se moman i annan en legzersis entern ki pe ganny antreprann par Air Seychelles pou down size son lafors travayer.  Kan sa legzersis i fini ganny fer, mon Minister i ava ganny notifye lo lakantite travayer ki pou ganny fer redundant e la bann prosedir neseser, an linny avek Lalwa Lanplwa i a ganng fer.  Mon Minister pou met a servis a dispozisyon sa bann travayer pou ki zot kapab ganny plase dan bann lanplwa o pli vit posib.  Sa bann servis i konm swivan.  En biro spesyal pou ganny etablir an partenarya avek bann lazans lanplwa prive pou fasilit lanplasman pli vit.  Employment Fair an partenarya avek bann lorganizasyon Gouvernmantal e prive.

Konsernan kestyon D.  Ki baz ki son Minister in servi pou kalkil konpansasyon pou bann travayer ki ganny fer arete, e kan zot pou fini pey konpansasyon?  Formil kalkilasyon konpansasyon pou tann servis i ganny ganny etablir anba regilasyon 24 dan Lalwa Lanplwa.  E konpansasyon bann travayer Air Seychelles in ganny kalkile lo sa formil, e tou bann travayer ki ti ganny fer redundant, zot tou zot in fini ganny peye an Fevriye.  Mersi.

 

 

 

MR SPEAKER

Bon, nou a kontinnyen, Minis Morgan.

 

MINISTER JOEL MORGAN

Mersi Mr Speaker.  Mon a pran dernyen parti sa kestyon, part E ki lir konm swivan.  E dan son plan stratezik, kan eski Air Seychelles koman en brand pour regany son vre lidantite pour nou kapab kontinnyen fly the Creole Spirit?  Mr Speaker, Air Seychelles i pa Etihad.  I reste touzour Air SeychellesEtihad i en shareholder dan Air Seychelles e en partener.  Mon oule fer resorti ki menm si Air Seychelles pe ganny manage par management Etihad anba sa lagreman, son brand Flying the Creole Spirit i still reste parey.  Air Seychelles i nou lalinny aeryen nasyonal.  I pou touzour asire ki i reprezant nou lidantite kreol e fer li dan en fason ki sak viziter ki anbark lo nou avyon i imedyatman annan sa lanbyans e sa lakey kreol.  Me avek en diferans kot sa prezan i pou a en tre o standar servis ki pou fer nou pli spesyal, an konparezon avek nou bann konpetiter.  Se sa ki nou for pwen, se sa ki nou annan pou ofer Mr Speaker.  Nou nouvo avyon air bus A330-200 ki pou livre an Zen pou anvol avek kouler Air Seychelles e pou ganny servi lo kod Air Seychelles.  Menm keksoz pou aplike pou tou nouvo avyon ki Air Seychelles i acquire dan lavenir.  Pandan peryod en mwan, ant le 1 Me ziska ki i resevwar son nouvo avyon A330-200 le 1 Zen 2012, i pou lease en avyon air bus A330 e en lot A320 tanporerman avek Etihad.  Apre sa i pou kontinnyen lease sa pli pti avyon A320 pou sak vol ki al Moris akoz i pa fer sans pou Air Seychelles gard en avyon dan son fleet, en pti avyon koman en A320 zis pou fer en sel vol dan en pei pou le moman.

Air Seychelles pou resevwar son dezyenm avyon Mr Speaker ki en lot A330-200 an Zanvye 2013.  Orders in fini ganny konfirmen e peyman pe ganny fer.  Avek sa dezyenm avyon, i anvizaze komans bann vol pli lwen, par egzanp pou al Beijing an Zanvye 2013 osi byen ki konekte Beijing avek Johanesburg atraver Sesel.  I pe osi regard an kolaborasyon avek departman pou transpor bann larout lo nivo larezyon.  E la mon oule sit legzanp Comores kot nou an negosiasyon pou vwar si i annan en posibilite pou Air Seychelles pran sa larout Comores e konekte Comore avek Lerop, prensipalman Lafrans e donn sa servis e anmenn plis rannman pou Air Seychelles.  Mersi Mr Speaker.

 

MR SPEAKER

Bon, nou ava pran siplemanter, nou a komans avek Onorab Pierre.  2, ou annan ankor 1.  2 an zeneral. 2 pou sak Minis.  Pa 2 pou sak Minis me 2 an zeneral.

 

HON DAVID PIERRE

Mr Speaker eski Minis i kapab eksplik avek sa Lasanble akoz ki Seselwa pa’n ganny sa sans pou aste shares dan Air Seychelles pou ki bann owners i vin bann Seselwa?  Dezyenm kestyon, an vi ki Minis in deza dir ki Etihad pou run Management Air Seychelles apre en peryod 5an, eski Minis i kapab klarifye ek sa Lasanble si sa partenarya i vreman en joint venture oubyen eski in en fasilite kot Sesel in kapab prêt larzan avek Etihad pou nou rezourd problenm Air Seychelles e si wi, kan ki nou pou komans peye, e par konbyen ki nou pou komans pey sa larzan e ki fardo total det ki sa pe mete lo Air Seychelles e lo Gouvernman Sesel an zeneral?  Mersi Mr Speaker.

 

 

 

MINISTER JOEL MORGAN

Mersi Mr Speaker.  Mersi Onorab pou kestyon.  Mr Speaker, Air Seychelles ozordi i own a 40 poursan par Etihad e a 60 poursan par Gouvernman Sesel.  Setadir Gouvernman Sesel i reste shareholder mazoriter dan nou lakonpannyen aeryen nasyonal.  E Mr Speaker, savedir ki mazorite par nou lakonpannyen aeryen nasyonnal i pou lepep Seselwa.  Gouvernman i pe hold sa bann shares lo behalf nasyon Seselwa dan nou airline.  Lo sa kestyon eski Seselwa li i devret kapab purchase bann shares dan nou lalinny aeryen nasyonal Mr Speaker, sa i en desizyon polisi ki Gouvernman a en moman done apropriye i kapab pran.  Sa laport i pa en laport ki’n fermen, me pou lemoman lenportans se sov nou airline.  Remet li lo son lipye, remet li azour e fer li rantab, profitab e viab so that dan lavenir, ler piblik Seselwa i ganny sa loportinite pou envestir dan sa airline, i pa pou al envestir dan en keksoz kot i pou perdi son larzan me okontrer, i pou annan en bon return lo son lenvestisman dan lavenir.  Mon krwar Mr Speaker, a sa moman done, sa kantite sonm larzan ki bezwen ganny enzekte dan nou airline pou remet li azour, pou remet li debout lo son lipye in fer ki Gouvernman in bezwen travay sa tranzaksyon dan lafason ki nou’n fer li san anmenn sa konplikasyon pou al vann shares lo marse lokal avek Seselwa a sa moman done.  Dayer, a sa moman done, dayer a sa moman done i pa neseserman en lenvestisman ki attractive akoz rannman i pa neseserman la e rannman i pou en pe lo pli lon term.

Dan nou plan stratezik pou Air Seychelles Mr Speaker, nou oule asire ki dan sa prosen 24 mwan, parey management Air Seychelles in dir, dan sa prosen 24 mwan, Air Seychelles i break even e i retourn a en pozisyon profitab.  Apre sa ler profi in komans antre i pou sanz konpletman lafason ki Air Seychelles i fer biznes akoz enn fwa ki ou’n lo en pozisyon solid finansyerman, lakonpannyen prezan son outlook, par egzanp son lespansyon, son bann nouvo larout ki i pou bezwen deservi, son bann nouvo fason fer keksoz i pou bokou pli for, i pou annan bokou plis pwisans pou li sanz lafason ki i fer keksoz e menm a sa moman, pou kwa pa ofer serten par avek Seselwa, parey nou’n fer avek nou bann lezot lakonpannyen dan lepase.

An sa ki konsern sa management contract Mr Speaker, i en management contract ki dir parey Onorab in dir, 5an.  Me dan sa 5an Mr Speaker, i annan provizyon dan nou management agreement ki la kler, ki nou pour idantifye bann Seselwa ki annan sa talan, ki annan sa kapasite, ki annan sa abilite pou zot ganny sa training e sa devlopman zot prop lekor.  Nou pou idantifye sa bann dimoun pour progresivman take over management nou lakonpannyen aeryen nasyonal.  Sa bann dimoun zot la pou en peryod letan spesifik, zot la pou en peryod letan pou asire ki Air Seychelles i ganny remet a nivo, zot la pou asire ki nou kapab fer nou lakonpannyen nasyonal aeryen profitab, me anmenmtan mon oule reasir sa Lasanble e tou dimoun ki a lekout ki dan Air Seychelles e polisi Gouvernman e polisi sa board Air Seychelles se pou fer sir ki nou idantifye bann dimoun kle ki nou kapab train e met zot dan bann pozisyon kle pou take over dan lavenir.  Eski i en joint venture?  Non, i pa en joint venture.  I en partenershipEtihad in dir sa klerman ler zot ti vin isi dan zot press conference ki zot ti fer, zot in dir klerman poudir zot in antre dan Air Seychelles koman en partenarya stratezik e pou zot, zot vwar li klerman ki Air Seychelles i annan bokou potansyel dan lavenir koman en platform rezyonnal pou ed Etihad osi devlop zot lafors dan sa rezyon.  Me osi atraver sa partenarya ki nou annan avek Etihad, sa shares ki Etihad i annan dan nou airline, i ouver lemonn pou Air Seychelles e i pa relegate nou, i pa limit nou tou zis en lalinny aeryen rezyonnal, me i donn nou sa kapasite pou nou al bokou pli lwen ki sa dan lavenir.

Mr Speaker, Etihad in met 20 milyon dolar koman share capital dan Air Seychelles.  Gouvernman osi pe met 20 milyon dolar pou rekapitaliz nou airline nasyonal.  Deza nou’n met 10 milyon dolar e plitar nou pourmet ankor 10 milyon dolar, me osi Mr Speaker, konm parti sa laranzman nou annan akse avek en lalinny kredi, en shareholder’s loan sorti kot Etihad pou 25 milyon dolar over and above.  Setadir, i pour fer nou en total 65 milyon dolaar kapital ki Air Seychelles i imedyatman annan akse avek.  Kondisyon sa loan 25 milyon dolar i nou pey 5 poursantaz lentere flat rate.  5 poursan lo sa amount ki nou servi, setadir below en balance basis, si nou draw down 10 milyon dolar, nou pey 5 poursan lo la par an, si nou fer desan sa 10 milyon dolar pou vin 7 milyon, nou pey lo sa 7 milyon, so i lo en balance basis.  Me upper limit se 25 milyon dolar.  E kimannyer sa i pou ganny repeye?  Sa i pa pou ganny repeye par Gouvernman Sesel e tax payer Seselwa.  Sa i pou ganny repeye atraver finansman dan business plan Air Seychelles, lefe ki Air Seychelles pe retourn ver profitabilite dan sa prosen 2an.

Mr Speaker mon ti a kontan osi eksplik avek sa Lasanble ki sa bann nouvo avyon ki Air Seychelles pe al gannyen, sa bann A330-200 i bann avyon ki pou ganny aste par Etihad.  Se zot ki pou finans sa bann avyon lo behalf Air Seychelles. E sa bann avyon konsekaman i pou ganny lwe at cost lo en baz etandi avek Air Seychelles.  E bann pyes pou sa bann avyon pa pour ganny aste e pa pou ganny stoke par Air Seychelles.  Tou sa bann fre pyes e maintenance pou ganny pran par Etihad, lefe ki zot deza annan en gran network avyon 320, 330, 340 e plis ankor dan zot stok.  Setadir nou pou avail of sa sinerzi ant Etihad e Air Seychelles e i pou benefisye nou atraver bann tel laranzman.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker mon ti a kontan demann Minis eski – Mr Speaker mon a demann bann Minis direk?  Konmsi mon a dir Minis Morgan e Minis Alexander?

 

MR SPEAKER

Yes.  Ti ava fer li fasil.

HON MARIE-ANTOINETTE ROSE

Wi, mersi.  Mr Speaker mon ti a kontan demann Minis pou Transpor, Minis Morgan si i kapab dir sa Lasanble si Air Seychelles, ti annan en posibilite si Air Seychelles ti deklar fait e si wi, ki lenpak sa ti pou annan lo lekonomi, lo Bidze Gouvernman e osi lo lanplwa e bann lendistri ki nou lekonomi i soutenir?

Mr Speaker mon it a kontan demann Minis pou Lanplwa si i annan latansyon partikilye ki pe ganny donnen pou ki bann travayer Seselwa dan Air Seychelles i santi ki zot bann drwa pe ganny byen respekte e ki sipor Minister pe gannyen avek sekter prive pou ed bann dimoun ki pou perdi zot lanplwa pou retrouv en lanplwa dan limedyat.  Mersi Mr Speaker.

 

MINISTER JOEL MORGAN

Mersi Mr Speaker, mersi Onorab pour ou kestyon.  Mr Speaker, larealite keksoz se ki wi, Air Seychelles ti annan sa posibilte deklar fait akoz Gouvernman ti nepli annan sa mwayen pou kontinnyen finans Air Seychelles e sa bann pert ki Air Seychelles ti pe fer.  si nou pa ti’n bouz vit pou rod en partener stratezik avek bann resours e mwayen finansye a zot dispozisyon pou met dan Air Seychelles, sitiasyon Air Seychelles ti pou vin deplizanpli pir e ti kapab ariv en pwen kot lalinny nasyonal aeryen pa ti pourkapab kontinnyen reste an egzistans.

Lenpak sa Mr Speaker lo lekonomi ti pou drastik.  I ti riske met nou progranm reform ekonomik ater.  I ti riske afekte nou lendistri tourizm a en nivo e a en pwen ki reveni e reset nasyonnal an term deviz etranzer dan nou pei ti pou ganny severman afekte, kot prezan nou ti pour vwar to lesanz akoz ti pou annan mwens deviz etranzer dan lekonomi ki pe antre dan sistenm banker atraver bann tour operators, bann BMC’s, bann lotel ensi-d-swit, ti pou napa ase deviz etranzer vizavi demann nasyonnal par egzanp pour fer vini karbiran pou elektrisite, pou fer vin manze, pour fer vin tou bann servis ek bann komodite ki nou servi isi dan nou pei.  Rezilta sa se ki to lesanz ti pou kontinnyen slide.  Dolar, Ero, Liv Sterlen ti pou kontinnyen slide e kou lavi ti pou shoot up en sel kou Mr Speaker, e la Gouvernman ti pou bezwen entervenir avek bann mezir emergency pou stabiliz sitiasyon.

Mr Speaker, lo kote lanplwa nou ti pou’n perdi plis ki 800, pre 900 travay en sel kou, san annan sa loportinite, parey nou pe fer li dan en fason planifye, progresiv, ordonnen e donn bann sans bann dimoun ganny bann nouvo lanplwa, nouvo louvraz, repozisyonn zot parey Minister Alexander in eksplike, nou pa ti pou’n kapab fer tousala e I ti pou kree bokou problenm dan bann fanmiy isi dan nou pei.  900 fanmiy annefe Mr Speaker, preski 900 fanmiy.  Bann lendistri ki siport Air Seychelles, bann lotel, bann dimoun ki fer catering, bann dimoun ki donn bann lezot servis dan tourism sector, tousala it pou ganny afekte severman akoz si Air Seychelles ti deklar fait Mr Speaker.  So Mr Speaker, pou reponn sa kestyon direkteman, wi ti annan sa posibilite, ti annan sa danze e se pou sa rezon ki Gouvernman in bouz vreman vit e atraver bann kontak ki Prezidan in annan avek son koleg Emirat Arab Ini, atraver bann diferan kontak ki Prezidan in fer e atraver travay ki mwan koman son Minis e lezot Minister in fer, nou’n kapab anmenn en solisyon e en formil ki mon kapab dir ozordi in sov Air Seychelles e in remet nou lo sa bon larout.  Mersi.

 

MR SPEAKER

Minis Alexander.

 

MINISTER EDITH ALEXANDER

Mersi Mr Speaker.  Konsernam premye kestyon, ki lentansyon Minister ki pe donnen pou fer sir ki bann drwa travayer pe ganny byen respekte.  Mon Minister pe fer sir ki parey tou lakonpannyen, Air Seychelles i respe lalwa nasyonnal pour lanplwa.  E pou sa si i annan ki santi, travayer ki santi kekfwa son drwa oubyen i santi i annan diskriminasyon, i annan seksyon dan lalwa lanplwa ki fer ki pou protez zot drwa pou sa.

Konsernan sipor ki nou pe gannyen ek prive, mon Minister i konstate ki dan sa premye legzersis, sipor avek prive pou dekrir i pa ti ase sa for.  E avek sa i enn vizyon mon Minister pou nou travay ansanm tre for, ranforsi avek prive pou nou kapab plas sa bann dimoun pou ganny sipor.  Me ozordi, mon a pran sa loportinite osi pou mwan dir avek lorganizasyon prive ki si i annan en pos ki nou dekrir parey vacant pou konsider donn priyorite sa bann Seselwa ki annan sa skills e sa kalifikasyon pou okenn plas dan zot lorganizasyon.  Mersi.

 

MR SPEAKER

Onorab Vidot.  Request.

 

HON KEVIN VIDOT

Mersi Mr Speaker.  Mr Speaker eski Minis Alexander i kapab eksplik sa Lasanble si Employment Act i ankor relevan dan sa Nouvo Sesel ki nou’n antre ladan avek bann demars ver liberalizasyon e privatizasyon kot aprezan i ant en anplwayer prive ek son anplwaye e osi pou Minis Morgan, eski i kapab dir sa Lasanble si i annan en plan stratezik par deryer en minority share holder ki pe call all the shots.  Mersi.

 

MR SPEAKER

Eski Employment Act i ankor relevan?  Yes.

 

MINISTER EDITH ALEXANDER

Wi Mr Onorab, Employment Act i ankor relevan pou sa e i annan bnan prosedir akoz si i pe liberalize, en lorganizasyon i annan bann prosedir faz ki fer sa e dan lanplwa travay pou Employment Act i annan bann seksyon ki dirize kimannyer pou fer sa e nou kote Minister nou bezwen fer sir ki bann lorganizasyon pe abide to sa bann regilasyon, sa bann prosedir.  Mersi.

 

MR SPEAKER

Minis Morgan.

MINISTER JOEL MORGAN

Mersi Mr Speaker, mersi Onorab pou ou kestyon.  Mr Speaker, plan stratezik Air Seychelles i ganny definir e aprouve par board Air Seychelles non pa par EtihadEtihad li son responsabilite se pou manage sa plan stratezik e enplimant li dapre direksyon ki board i donnen.  Board Air Seychelles i an mazorite reprezantasyon Gouvernman avek 60 poursan par ki Gouvernman i annan.  Nou annan 4 manm lo board Air Seychelles e Etihad i annan 3 manm lo board Air Seychelles.  E dapre bann lagreman, shareholder’s agreement, investment agreement e management agreement ki Gouvernman in sinnyen avek Etihad, se board ki annan desizyon lo definisyon plan stratezik, se board ki annan oversight lenplimantasyon plan stratezik e se board ki donn direksyon management pou fer lakonpannyen marse.  Setadir ki malgre ki Etihad i minority shareholder, se touzour Gouvernman atraver board, natirelman an konsiltasyon avek Etihad, ki pran bann desizyon stratezik lo kimannyer nou airline nasyonnal pou ganny zere e ki direksyon i pran.  Mersi.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Mon annan en kestyon pou Minister Alexander.  Minis, eski ou kapab enform nou Lasanble avek premye redundancy ki Air Seychelles ti fer, konbyen travayer ki’n reganny anploye, e konbyen ki pankor ganny en lanplwa e ki Gouvernman pe fer pou ed sa bann ansyen travayer ki pankor ganny en lanplwa?  Mersi.

 

MR SPEAKER

Ou’n fini?  Ok.

 

MINISTER EDITH ALEXANDER

Ok.  Mr Onorab, dan premye legzersis, parey Minis in dir 166 dimoun ti ganny fer redundant.  E apre sa, Departman Lanplwa ti fer 2 Employment Fair.  Zot ti fer enn an Zanvye ki ti pran le 10 a le13 Zanvye e apre en lot ki ti fer le 2 a 3 e 6 Fevriye.  Dan sa premye fair, ti annan 480 dimoun ki ti attend sa Employment Fair.  Ladan ti annan enpe ki ti’n fer redundant ek bann ki ti enterese.  E dan Fevriye ladan nou annan 22.  Dan sa 22 ki nou’n fini, nou annan 14 nou’n fini ranplase, 4 ki nou pe travay avek e nou annan en lot 4 ki akoz nou ankor pe travay vreman for avek zot i konsernan ki laz e nou pou sa, pou Minister, ki nou pe al fer, nou pe al ranforsi ankor lo nou Employment Fair ki nou pou organize e nou pou travay tre for avek bann prive.  Mersi.

 

MR SPEAKER

Onorab Barbe.

 

HON NICHOLE BARBE

Mersi Mr Speaker.  Eski Minis responsab pou Lanplwa i kapab enform nou Lasanble ki leson son Minister in aprann avek premye redundancy avek Air Seychelles, e kwa ki pe ganny fer pou amelyor dezyenm faz pou down size sa menm lorganizasyon?  Mersi Mr Speaker.

 

MINISTER EDITH ALEXANDER

Mersi.  Parey mon’n eksplike, lo premye legzersis, ki nou’n konstate ki sa partenarya avek prive i pa ti ase sa for.  Nou ti napa, leson ki nou’n vwar, nou kominikasyon, ti annan en mank kominikasyon.  Avek nou bann Employment Private Agency osi i ti en pti pe parey nou pou dekri, i ti en pti pe feb e pou sa nou pe travay ansanm avek en plan mon Minister stratezik, kimannyer nou pou al koriz lo la pou nou travay pli for avek prive pou nou kapab deal avek sa bann problenm.  Mersi.

 

MR SPEAKER

Onorab Bresson.

 

HON GALEN BRESSON

Mersi Mr Speaker.  Kestyon adrese a Minis Morgan.  Minis, dan ou lentervansyon pli boner ou’n mansyonn en posibilite bann lofis ki ganny plase a letranze e mon ti a kontan si ou dir ek Lasanble lekel ki pou bear the cost of running sa bann lofis, e si bann Seselwa ki pou ganny en sans pou travay dan sa bann lofis a letranze.

 

MINISTER JOEL MORGAN

Mersi Mr Speaker.  Mersi Onorab.  Mr Speaker, dan lagreman ki nou annan avek Etihad, tou zot fasilite biro, lokasyon, tousala pe ganny bear antyerman par EtihadAir Seychelles napa okenn kou pour peye lo la.  Air Seychelles li i ava pey bann kou son staff.  Setadir son saler son staff e posibleman bann kou akomodasyon bann staff dan bann ka kot Etihad li i napa sa rekomandasyon ki disponib pou ed Air Seychelles avek.  Me apard sa, tou bann lezot kou, bann kou administrativ, elektrisite, bann kou stationery tousala pe ganny bear par Etihad anba sa legraman.

E wi, Air Seychelles kot i vwar li neseser e dan nou lavantaz pou nou annan en point of sale, par egzanp nou oule met en point of sale dizon Hamburg, Lalmanny, nou oule met enn Beijing, nou oule met enn petet Lostrali, Melbourn, nou oule met enn Paris dan biro Etihad.  Tou sa bann landrwa, Langleter.  Tou sa bann landrwa i pourprensipalman pou bann Seselwa akoz se Air Seychelles e nou pe vann the creole spirit.  I tre enportan, e nou pa kapab neseserman pran tro bokou etranze pour vann en keksoz ki zot pa pou neseserman konpran e sa se nou lespri kreol, nou creole spirit parey nou’n dir, ki monn koz lo la e se pou sa rezon kot nou bezwen ganny nou bann dimoun ki profesyonnel, ki byen formen me ki osi konpran nou kiltir e nou pei.  Mersi Mr Speaker.

 

MR SPEAKER

Onorab Bristol.

 

HON ALDERIC BRISTOL

Mersi Mr Speaker, bonzour.  Bonzour Minis.  Kestyon pou Minis Alexander.  Eski Minis i kapab enform sa Lasanble ki pozisyon bann travayer ki anvi kit sa lorganizasyon lo zot menm?  Mersi.

 

MINISTER EDITH ALEXANDER

Ou kapab repet ou kestyon, mon pa’n ………

 

HON ALDERIC BRISTOL

Ki pozisyon bann travayer Air Seychelles ki anvi kit sa lorganizasyon lo zot menm?

 

 

MINISTER EDITH ALEXANDER

Sa parey nou’n dir i annan en travay entern ki Air Seychelles i pe fer avek zot staff.  Lemoman ki Air Seychelles zot in tonm lo lagreman avek zot pour zot entern, la ki zot pou vin kot nou kot biro lanplwa pou dir ki lakantite ki zot.  Sa i en keksoz ki enternally ki Air Seychelles i fer avek zot staff.  I le moman ki zot, zot tonm lagreman ki kantite ki fer redundant, ki la ki vin ek lanplwa.  Mersi.

 

MR SPEAKER

Onorab Hoareau.

 

HON HERBERT HOAREAU

Bonzour tou dimoun, bonzour toulede Minis e zot lekip.  Kestyon pou Minis Transpor.  Eski Minis i kapab eksplik nou Lasanble si pandan negosiasyon ant Air Seychelles e Etihad lannen pase, si serten poursantaz travayer Seselwa pou ganny garde e garanti dan sa nouvo devlopman ki pe arive e osi si Minis pou Lanplwa i kapab dir nou, en zabitan St Louis, en zenn pilot in perdi son louvraz, si Minis i kapab asir nou ki nou kapab ed li pou li al devan, trouv en louvraz akoz i pa fasil trouv en louvraz pilot isi.  Mersi.

 

MINISTER JOEL MORGAN

Mersi Mr Speaker.  Mersi Onorab.  Mr Speaker, mon krwar i neseser ki mon eksplik en pe polisi Gouvernman an sa ki konsern lokalizasyon bann travay dan Air Seychelles.  Air Seychelles in vwar li parey monn eksplike dan en pozisyon tre difisil finansyerman, kot nou’n bezwen pran bann mezir ase sever pou redres nou airline e asire ki i survive.  Dan bann diskisyon ki nou’n fer avek Etihad, i pa’n zanmen annan sa kestyon ki nou pou ranplas Seselwa dan nou airline par etranze an mazorite.  Sa mon kler e mon kategorik lo la akoz nou nou krwar ki Seselwa i annan konpetans, i annan sa abilite e sa kapasite pou li al pran bann pozisyon a menm nivo ki i ganny demande dan sa nouvo airline pli profesyonnel, pli performan ki nou oule vwar dan lavenir.  Sa ki enportan se ki nou manage sa prosesis byen.  E ler mon dir sa prosesis, nou bezwen konpran poudir ozordi nou en serten nivo, demen nou oule ariv bokou pli o ki sa e i bezwen annan en tranzisyon kot nou ariv kot nou oule ale.  E pou nou annan sa tranzisyon Mr Speaker, nou pou bezwen anmenn dan serten pozisyon serten dimoun sorti Etihad pou ed nou reform sa ki nou anvi fer, restriktire, repozisyonnen e remet nou ver profitabilite.  Sa i toutafe normal dan nenport ki sirkonstans ler en lakonpannyen in pas atraver en kriz parey Air Seychelles in pase.  Me osi dan sa prosesis, nou bezwen asire ki nou idantifye bann talan dan Air Seychelles me osi an deor Air Seychelles, lokalman isi dan nou pei ki kapab ganny recruit, ki kapab ganny train e ki kapab ganny prepare dan en peryod letan pou pran sa bann plas dan lavenir.  Nou annan sa konpetans, nou krwar fermeman ladan e se sa ki pour arive Mr Speaker.  Fodre pa nou tonm dan sa pyez ki serten zournal pe pibliye tou le semenn isi dan nou pei, Mr Speaker.  Fodre pa ki nou krwar poudir Gouvernman i annan en plan sekre pou nou tir tou nou bann bon dimoun dan Air Seychelles, met zot a laport e ranplas zot par etranze.  Mr Speaker, mon repete kategorikman, sa i pa vre, sa bann zournal pe dir bann keksoz ki pa korek e i pa plan nou Gouvernman pou nou fer en tel keksoz.  Sa ki plan nou Gouvernman se ki nou bezwen idantifye bann bon dimoun, train zot, prepar zot e met zot a la bar demen.

Par kont, dan sa peryod, i bezwen annan en tranzisyon kot ou osi anmenman achieve sa lobzektiv fer nou airline profitab o pli vit posib pou nou pa annan sa problenm finansye ki nou ti annan dan lepase, e in so doing, nou pou bezwen anmenn enpe dimoun pou travay avek nou.  Pou fer sa travay marse.  Bann dimoun ki annan sa konpetans, ki konn airline industry, ki bann eksper dan sa sekter e Etihad i fer sa byen akoz zot enn bann leading airlines e enn bann airlines pli profitab dan lemonn ozordi.  Me, dan sa prosen 1an, 2an, 3an Mr Speaker, sa tranzisyon i ava arive e nou ava met nou bann dimoun a la bar nou lalinny aeryen nasyonal.  Mersi.

 

 

MR SPEAKER

Bon, kestyon pour Minis Alexander.

 

MINISTER EDITH ALEXANDER

Mersi Mr Speaker.  Konsernan kestyon pou training, Air Seychelles in deza fini antre dan son progranm pou retraining.  Pou pilot pou lemoman zot annan 12 ki’n fini ale.  Cabin crew i annan 18 e parey Minis in dir, zot pe anvizaze antou pou annan 24 pilot ki pou al ganny train e 72 cabin crew.  Mersi.

 

MR SPEAKER

Onorab Marie.  Onorab Volcere.

 

HON MARC VOLCERE

Mersi Mr Speaker, bouzour Minis.  Mr Speaker, an linny avek sa patenarya stratezik, nou’n vwar ki lalinny demestik in osi ganny afekte severman.  Mon ti a kontan demann Minis pou Transpor, avek sa 60 poursan par ki Gouvernman i annan avek sa patenarya, eski zot pe revwar schedule flight lo lalinny demostik, e osi pri, pou fer li en pri pe pli afordab pou nou bann dimoun lokal kapab voyaz lo avyon?  Mersi.

 

 

MINISTER JOEL MORGAN

Mersi Mr Speaker.  Mr Speaker, mon konstate ki in annan en pe konfizyon lo sa kestyon tarif domestik ki Air Seychelles ti’n entrodwir, e mon konstate osi ki Air Seychelles pa’n fer ase travay pou zot al devan e eksplik lafason ki nouvo tarif i aplike avek piblik Seselwa ki servi avyon Mae/Pralen lo en baz regilye, ouswa lo en baz okazyonnel.  Annefe Mr Speaker, ozordi nou annan bann tarif ki komans lo apepre R256 e i mont ziska R1800-R2000, depandan lo sa ler ki sa dimoun i pran sa avyon.  I annan bann peryod, mon annan sa lenformasyon la ki mon kapab partaz avek bann Manm Onorab sa Lasanble, i annan bann peryod par egzanp bann low periods, sa ki nou apel bann low periods, off peak ki komans depi 5.15 bomaten, premye vol e ki ale ziska 6.45 bomaten.   Apre i repran 3.15 apre midi e i ale ziska 10.15 aswar.  I annan bann peryod entermedyer ki pran depi 10.30 bomaten, i ale ziska 2.15 apre midi epi i annan bann peryod entermedyer ki repran 5.15 apre midi e i ale ziska 10er diswar.  Par kont, i annan bann peak period ki komans 7.15 bomaten e ki ale ziska 10.15 bomaten e answit i repran 2.30 apre midi e i ale ziska 4.45 apre midi.  Pou tou sa bann peryod ki mon’n koze i annan diferan tarif.  E la monn demann Air Seychelles Mr Speaker, pou met sa dokiman koman en advertisement dan Nasyon , pibliy sa so that dimoun i kapab konpran e zot kapab plan zot ler ki zot oule travel vizavi zot bidze ki zot annan.  Sa bann tarif off peak i annan bann tarif ki ou pe pey 256, 512 an montan e bann tarif ki lo peak ou pe pey R1800, R2000 an montan.  Depandan lo sa ler ki ou travel e depandan osi Mr Speaker lo seat availability.  Par egzanp, pandan bann low off peak period, ou annan 91 percent seat availability pou sa tarif 13 Ero ouswa R256.  Ou annan 91 percent availability si ou travel avan 6.45 bomaten.  Si ou travel par egzanp pandan en pe plitar ler ou dan sa mid period, ou kapab pey R512 ouswa ou kapab ganny R800 ekek, depandan lo son timeSo mon krwar Mr Speaker, travay ki nou bezwen fer se nou bezwen eksplik dimoun e dimoun i bezwen kapab annan sa lenformasyon pou plan zot travel.

Mr Speaker, mon ti a kontan fer remarke osi ki kou en seat i bokou plis ki R256.  Pou met en dimoun lo en seat avyon pou sorti Mae pou al Pralen, ouswa pour sorti Pralen pou vin Mae, i of the order of 46 Ero, non pa 13 Ero.  Se sa kou, e lafason ki Air Seychelles i compensate pou sa, se zot annan bann off peak tariffs avek bann peak tariffs kot low peak zot sarz bokou plis ki kapab ede pou fer desann pri below cost, off peak.  Lenportans la se ki no matter what, Air Seychelles i bezwen break even lo larout domestik.  Napa sours finansman pou kapab subsidise Air Seychelles lo larout domestik.  So nou bezwen rod en formil ki marse, anmenmtan ki permet dimoun dapre son mwayen si i anvi fly lo avyon, servi en vol a en ler apropriye, dapre mwayen ki i annan.

Mr Speaker, alor mon donn en committment ki Air Seychelles pou pibliy sa bann lenformasyon e pou eksplik sa byen lo nou zournal Nation accordingly.  Mersi.

 

MR PEAKER

Onorab Payet.  Ti Onorab Payet ki it’n lev lanmen pa – lekel Madanm ki’n lev lanmen bor laba?  Onorab Payet.

 

ONORAB MARIA PAYET-MARIE

Mersi Mr Speaker.  Bonzour Minis Morgan, bonzour Minis Alexander.  Eski Minis pou Lanplwa i kapab enform nou Lasanble ki garanti ki son Minister i annan, petet avek diskisyon avek Air Seychelles pou ki bann benefis travayer ki’n ganny fer ou pou ganny fer redundant pa ganny sezi par bann labank, sirtou pou benefis bann ki ti lo kontra e petet bann ki annan loan ou annan lentansyon pou pran en pti loan, antretan ki zot pe fer demars pou zot ganny en lot travay.  Mersi Mr Speaker.

 

MINISTER IDITH ALEXANDER

Mersi Onorab.  Konsernan benefis pou dimoun ki ganny fer redundant, Minister Lanplwa i napa kontrol as such lo la, akoz ki ler en dimoun in antre dan son kontra, i annan en clause ki zot annan zot bann lagreman ki fer.  Me dan sa ka, ki nou kapab ankouraze fer ki Air Seychelles i a kapab negosye lo behalf pou sa travayer pou li kapab kekfwa ler pe fer son benefis ki i annan en serten poursantaz, me Minister Lanplwa i napa kontrol lo la e konsernan zot benefis, tou dimoun in fini gannyen peye bann premye legzersis ki ti ganny fer.  Mersi.

 

MR SPEAKER

Onorab Jacqueline.

 

HON SULTANNE JACQUELINE

Mersi Mr Speaker.  Eski Minis Alexander i kapab enform sa Lasanble ki lenformasyon i annan lo ki pe ganny fer pou bann travayer ki zot saler oubyen benefis in ganny mal kalkile?

 

MINISTER ALEXANDER

Mersi Onorab.  Benefis tou bann travayer, nou pran partikilye konpansasyon.  Konpansasyon i annan en formil pou sa, e sa i state klerman dan lalwa lanplwa.  Nou annan ka kot nou’n ganny 8 ka ki’n vin fer zot konplent kot lanplwa, me mon pa pou dan en pozisyon pou kapab al sa an detay akoz pou lemoman sa i devan Competent Officer ki pe travay lo la, me i annan 8 ka ki’n antre.  Mersi.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mon kestyon i adrese a Minis responsab pou Transpor.  Minis in fer referans avek en retraining programme pou pilot e cabin crew e ki pandan sa peryod ki zot lo retraining i annan bann staff Ethihad ki pou pran zot fonksyon.  Kestyon ki mon pe demande se eski sa bann dimoun i reste bann anplwayer Air Seychelles pandan sa retraining programme e alors ganny en saler pandan letan ki zot lo retraining e eski zot garanti apre sa retraining ki zot pou ganny reabzorbe dan Air Seychelles pou zot repran zot fonksyon ki bann staff Etihad pe pran dan lentere?  Mersi Mr Speaker.

 

MINISTER JOEL MORGAN

Mersi Mr Speaker, mersi Onorab.  Mr Speaker wi, mon konfirm avek Lasanble ki sa bann dimoun i reste bann anplwayer Air Seychelles pandan zot peryod retaining e ler zot fini zot retraining zot pass zot retraining zot reganny zot lanplwa dan sa bann nouvo pozisyon dan Air Seychelles dapre ki zot bann nouvo konpetans ki zot pe gannyen.  Par eganzp pou bann kaptenn e pou bann first officer zot pou annan nouvo konpetans lo A330-A320 so zot pou annan sa nouvo employment dan sa domenn.  Pou bann cabin crew osi I aplike e I aplik pou bann lezot travay osi ki pe al ganny retaining lo kote IT, lo kote ladministrasyon, lo kote ground services ensidswit fi e an mezir ki sa pe ganny fer.  So zot garanti, pou reponn dezyenm parti sa kestyon, zot garanti zot lanplwa ler zot retourn isi provided ki zot pass zot bann legzanmen, pilot, kaptenm ensidswit e zot konplet zot formasyon, zot training dan en fason satisfactory.

Mr Speaker mon ava osi profite pou dir ki Etihad pe fer ofer bann scholarship lo kote engeeniring, lo kote management, lo kote cadet pilots e lo kote bann teknisyen, bann aircraft technicians.  E sa progranm in ganny advertise lokalman, i annan 6 dan sak seksyon ki’n ganny ofer koman scholarships, 6 scholarships dan sak seksyon e so far annan plis ki 120 dimoun dan Air Seychelles e an deor Air Seychelles ki’n apply pou bann scholarshipsSo mon krwar i en keksoz tre pozitiv e sa pe ganny finanse antyerman par Etihad.

An plis ki sa Mr Speaker, nou konnen ki nou bann aircraft engineers ek technicians it pe ganny train Perth, Lacos.  E sa i en kou tre ser pou Gouvernman Sesel.  Si mon pa tronpe, enn sa bann training i kout plis ki R1 milyon pandan sa peryod ki zot pe trainEtihad in ofer pou zot take sa on board e provide sa gratwit pou nou dan lavenir pour ed nou alezer en pe sa kou lo Gouvernman Sesel.  Mersi.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.  Mr Speaker, taler Minis in fer referans a kod Air Seychelles.  Mon kestyon i koumsa.  Eski Minis i kapab dir ek sa Lasanble ki arive avek license S7 ki Air Seychelles ti pe anvol anba la letan i antre an partenarya avek lakonpannyen Etihad?  Mersi.

 

MINISTER JOEL MORGAN

Mersi Mr Speaker.  Mr Speaker lenformasyon ki mon annan lo la se ki Air Seychelles, bann nouvo avyon pou kontinnyen fly lo en operator certificate, lo nou AOC.  Nou ankor pe vwar avek Etihad akoz nou pe wetlist sa bann avyon, bann nouvo A330 avek Etihad.  I posibleman pli fasil pou met li anba AOC Etihad, i pou pli ekonomik pou Air Seychelles fer li akoz bann requirements, par egzanp annan serten lekipman isi, bann spares, stokaz spares and so on.  I pou bokou pli ekonomik pou nou fer li, me sa, departman transpor i an diskisyon, SCAA diskisyon avek Etihad pou nou vwar kimannyer pou fer li.  Me sertenn pou nou fleet domestik i pou reste anba nou AOC isi Air Seychelles.  Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  An vi ki sa lenpak Air Seychelles in dekoul ziska Air Seychelles domestic, eski Minis i kapab eksplik nou Lasanble e ki pri pe monte e ki napa plas, dan sa parkour eski Gouvernman pe irzaman konsider permet IDC komeryaliz son bann vol lo nivo domestik pou ede anmenn konpetisyon e rezourd sa problenm pasaz avyon ant Mae ek Pralen e anmenmtan pou reklarifye nou Lasanble lo sa bann pti pwen, akfer ki nou pou bezwen pran en loan 25 milyon pou kapital, e pey shares 20 milyon ankor ?  Be sa 40 poursan ki nou’n vann, konbyen in arive li?  60 poursan ki reste pou Air Seychelles pa kapab servi koman kapital?  E Air Seychelles eski i ti vreman over staff?  Mersi bokou,

 

MINISTER JOEL MORGAN

Mr Speaker, ozordi dan nou pei nou pe operate anba en lekonomi ki’n liberalize.  Napa nanryen ki defann en lakonpannyen, en operator vin kot departman transpor oubyen SCAA e demande pou li fer en servis, rann en servis vol domestik pou fer konpetisyon avek Air Seychelles domestic.  Ozordi ou annan ZilAir, ou annan Helicopter Seychelles pe ofer transfer par elikopter, ou annan ZilAir ki fek envestir dan en pti avyon piston ki pran 6 pasaze ki pe fer bann transfer lo baz charter.  Napa nanryen ki defann sa.  Me par kont Mr Speaker, Gouvernman i propriyeter Air Seychelles e Gouvernman i propriyeter IDC.  I napa okenn sans pou fer Gouvernman antre an konpetisyon avek son lekor.  Mr Speaker, monn eksplike ki en kou par seat pou sorti Mae pou al Pralen ouswa pour sorti Pralen pou vin Mae i depas 46 Ero ozordi lo bann avyon Air Seychelles ki nou annan.  E sa bann avyon Mr Speaker, i bann avyon ki an gran parti in ganny design pou fer bann short hall flights.  Bann avyon IDC i bann avyon ki’n ganny design, i bann presurised aircraft an grann parti, zot in ganny design pou zot fer bann vol en pe pli lwen, setadir zot take off landing cycle in ganny design pou al pli lwen ki zis 46 kilomet ki zistans ant Mae ek Pralen apepre.  Napa okenn lendikasyon ki montre ki bann vol IDC pou pli bon marse an term kou ki bann vol Air Seychelles.  E Mr Speaker, nou bezwen fer atansyon.  Nou bezwen fer atansyon dan lespri asire ki nou protez nou lenvestisman e nou lavenir nou lalinny aeryen nasyonnal.  Si demen, nou pou anmenn nou prop lekor an konpetisyon avek nou menm, sel keksoz ki pou rezilta dan lopinyon departman transpor se ki toulede sa 2 lakonpannyen pou become the loosers.  Ni enn, ni lot pa pou benefisye e toulede pou perdi larzan.  Mon’n eksplike akoz nou annan en sistenm tarif an plas e akoz sa bann tarif i aplike dan lafason ki i aplike.

Mr Speaker, an sa ki konsern share capital.  Si ou regard balance sheet Air Seychelles avan ki Etihad ti enzekte son 40 poursan, balance sheet Air Seychelles ti tre ba.  Annefe ti anviron 15 milyon dolar.  Sete sa net worth Air Seychelles avan ki Etihad ti antre dan nou lalinny aeryen nasyonal.  Lo balance sheet ki external auditor KPMG in fer avanler nou it fer bann tranzaksyon finansye pou lenvestisman dan bann par, sete sa, apepre 15 milyon dolar lavaler Air Seychelles.  15 milyon dolar akoz Mr Speaker, bann avyon pa ti pou nou.  Sa bann boeing ki nou ti pe servi, nou it pe lwe avek ILFC.  E finalman i reste ou bann assets, ou bann avyon ki ou annan dan ou fleet domestik, ki bann avyon ki aze, apard ki sa twin otter ki nou’n fek aste ki’n kout apepre 5 milyon dolar, apre ou annan ou bann lekipman spares, ou annan ou bann groud handling equipment, ou annan ou bann building, setou.  E net worth, sete sa.  Etihad in antre avek 20 milyon dolar, Gouvernman in rekapitaliz avek 20 milyon dolar e Etihad in donn nou tou sa bann fasilite ki mon’n eksplike dan mon lentervansyon la bomaten.  Baz sa, ler nou’n kalkile, i it tonm apepre 40 poursan e se pou sa rezon ki Etihad in ganny 40 poursan Air Seychelles ozordi.  Mersi Mr Speaker.

 

 

MR SPEAKER

Onorab Charles.

 

(Interruption)

 

HON CHARLES DE COMMARMOND

Avek respe Mr Speaker, mon dir Minis pa’n fini reponn kestyon, i annan par egzanp kestyon over staff.

 

MINISTER JOEL MORGAN

Mersi Mr Speaker.  Onorab eskiz mwan, monn mank sa bout kestyon.  Wi, pou sa nivo loperasyon ki Air Seychelles ti pe anmennen, apre ki nou ti perdi sa vol Folklands, sa kontra Folklands akoz departman transpor Langleter ti blok sa, lo baz nou ti pe ganny sibvansyon avek Gouvernman Sesel.  Apre ki nou ti perdi sa vol Folklands ki ti pe anmenn nou en bon pe reveni e ki ti pe tenir an grann parti Air Seychelles, nou ti vwar nou dan en sitiasyon kot nou ti over staff Mr Speaker, e ti neseser dan zefor pou nou tenir Air Seychelles menm avan sa bann negosiasyon avek Etihad ti komanse, pou nou fer en pe redundancies pou asire ki Gouvernman ti kapab kontinnyen soutenir tou le mwan sa kantite larzan ki Air Seychelles ti bezwen pou kontinnyen travay, pou kontinnyen fonksyonnen.  Alor larepons Mr Speaker sete wi, nou ti over staff.  Mersi.

 

MR SPEAKER

Onorab Charles.

JEOVANNA CHARLES

Mersi Mr Speaker.  Mr Speaker mon it a kontan demann Minis pou Lanplwa si i korek pou dir ki tou bann Madanm ansent ki pe travay pe ganny fer arete, si wi ki pozisyon Minister Lanplwa lo sa sitiasyon, e eski Minis pou Lanplwa i kapab rekomann avek Gouvernman atraver Lazans Proteksyon Sosyal pou kapab konsider asiste sa bann travayer ki trouv zot dan problenm finansyer ziska ler zot kapab ganny en lot plas travay.  Mersi Mr Speaker.

 

MINISTER IDITH ALEXANDER

Mersi Madanm Onorab.  Parey monn dir lo premye kou, i annan en legzersis ki ankor pe fer entern kot Air Seychelles.  Biro Lanplwa pankor ganny raporte ki kantite ki pe fer redundant.  Prosedir mannyer i marse, sa lorganizasyon i bezwen entern asize pou diskite, me dan landrwa travay i annan clause ki protez sa bann dimoun, ki si zot santi ki zot drwa pe ganny vyole e i annan diskriminasyon, zot pou kapab appeal pou met devan kot lanplwa e la nou ava adrese le neseser.

Konsernan pou asiste travayer, Minister Lanplwa napa kontrol lo la, me si en travayer i santi ki son baz neseser, parey nou dekrir nou bann basic needs, i pe ganny difikilte pou soutenir li, sa travayer i annan tou drwa, i ava ranpli, fer son laplikasyon kot Lazans Social Welfare, me nou merit mazinen ki Social Welfare osi zot annan zot formil e zot laba ki a get diskresyon si sa dimoun i pou asiste ou non.  Mersi.

 

MR SPEAKER

Onorab Samson.

 

HON DEREK SAMSON

Mersi Mr Speaker.  Minis Morgan, Minis Alexander bonzour.  Bonzour a tous.  Mr Speaker, an vi sa partenarya avek Etihad Airways, lagreman 40-60, eski Minis responsab pou Transpor i kapab enform sa Lasanble lo konbyen travayer Seselwa ki dan management dan sa partenarya, lo nivo management, e ki zot bann pozisyon ki zot tit, me si napa okenn Seselwa, dan sa bann tel pozisyon, eski Minis i kapab eksplik nou stratezi oubyen rezon det sa tel sitiasyon?  Mersi Mr Speaker.

MINISTER JOEL MORGAN

Mr Speaker, mon napa lenformasyon egzakt lo konbyen travayer Seselwa i dan management, me sa ki mon kapab reasir sa Lasanble e tou dimoun ki a lekout se ki i pa polisi ni Gouvernman, ni Etihad dan sa partenarya pou ranplas bann travayer Seselwa avek travayer etranze dan lakonpannyen Air Seychelles.  Polisi se pou retrain nou bann dimoun e met zot azour e a nivo.  Parey monn dir, idantifye bann talan, seleksyonn zot byen , form zot byen e answit, met zot dan lorganizasyon pou zot perform a sa standar ki nou demande.

Fodre nou realize Mr Speaker, ki Air Seychelles aprezan i nepli pe zwe dan trwazyenm lig.  Ozordi Air Seychelles in become a 1st league player atraver sa partenarya avek Etihad.  Standar e fason fer keksoz dan lakonpannyen i bezwen ganny anmennen lo nivo premye lig.  Sa ki ti akseptab yer, nepli akseptab ozordi.  E se la kot sa prosesis formasyon, tranzisyon e ranplas par bann staff Seselwa, parey monn eksplike i antre.  Mon reasir sa Lasanble Mr Speaker ki i pa pou arive kategorikman tou bann pozisyon management pou ganny okipe par bann etranze, non, me sa ki pou arive i pou annan bann dimoun ki pou stand in, ki pou ranplase lo en baz tanporer e kot i neseser, ziska ler ki bann Seselwa i ganny retrain e retournen pou vin travay.  Mersi.

 

MR SPEAKER

Onorab Esther.

 

HON NATASHA ESTHER

Bonzour tou dimoun.  Eski Minis i kapab enform sa Lasanble ki pozisyon travayer Air Seychelles domestik erport lo sa size restriktirasyon?

 

MINISTER JOEL MORGAN

Mersi Mr Speaker, mersi Onorab.  Mr Speaker, an grann parti bann travayer domestik pa pe ganny afekte par sa restriktirasyon akoz an grann parti zot pou bezwen reste pou kontinnyen sa servis e menm expand bann nouvo servis dan lavenir.  Mon pa pe dir ki napa ki pou ganny fer redundant ouswa ki pour ganny ofer depar volonter, ki mon pe dir se an grann parti bann travayer domestik lo kote domestic services i pou reste.  Mersi.

 

MR SPEAKER

Bon, Onorab Valmont.

 

HON SYLVIANNE VALMONT

Mersi Mr Speaker.  Bonzour tou dimoun.  Mon petet mazinen pou dir nou pa pou fer repetisyon kestyon me selman mon kestyon Mr Speaker, i an linny avek trwazyenm gran kestyon ki’n demande e mon oule demann li koumsa.  Ki vreman Air Seychelles pe fer, eski i pe down size, i pe right size oubyen zot pe rod dimoun avek plis kalifikasyon?  Mersi Mr Speaker.

 

MR SPEAKER

Pou ki sa kestyon lo sizes, issues?  Minis Morgan a esey reponn sa enn.

MINISTER JOEL MORGAN

Mr Speaker, larepons kler e senp se ki Air Seychelles pe right size.

 

MR SPEAKER

Bon, avek sa nou ariv lafen question time, mon oule remersye le 2 Minis ek zot bann…

 

(Technical problem)

 

(Lunch)

 

MR DEPUTY SPEAKER IN THE CHAIR

MR DEPUTY SPEAKER

Bon, mon a dir bon apremidi tou manm avek tou dimoun prezan isi, nou ava kontinnyen nou travay e lo nou Order Paper nou a pran bann Motions.  E mon ava envit Onorab Pillay pou prezant nou premye Mosyon.  Onorab.

 

HON SEBASTIEN PILLAY

Mersi Mr Deputy Speaker.  Mr Deputy Speaker sa Mosyon devan Lasanble Ozordi pe demande ki Seychelles Media Commission i met an aplikasyon bann provizyon dan Seychelles Media Act (2010) o pli vit posib an partikilye sa Code Of Conduct preskri anba lartik 13(2c) afen ki nou medya Sesel i konpran pli byen zot rol e zot responsabilite.

Mr Deputy Seychelles Media Commission ti ganny kree avek le bi pou prezerv lendepandans Medya an tou son laform e osi promouvwar en o nivo zournalizm dan Sesel, i ti ganny kree pou zwen en rol enportan an relasyon medya dan tou son laform e promote en culture of good and responsible practice i ti ganny kree avek le bi konsolid lavantaz free press e lendepandans medya.

Mr Deputy Speaker nou Lasanble i konpran tre byen e nou prezant nou pozisyon ki lendepandans medya I sa fondasyon lo ki bann lesanz lide, lopinyon e menm largiran i kapab ganny avanse.  This is very healthy Mr Deputy akoz i ede konsolid nou demokrasi plis ankor.  Me lendepandans medya i bezwen egziste for the benefits of the social good osi, i bezwen annan en kontribisyon pozitiv anver bann lideal ki nou sosyete i konsider enportan.  Lasanble i osi konpran tre byen ki lendepandans medya i egziste gras a sa sindeotic relationship en relasyon avek enn bann drwa pli enportan garanti anba nou Konstitisyon e sa se laliberte lekspresyon.  Laliberte lekpresyon i garanti anba lartik 22 nou Konstitisyon e I fer provizyon pou en dimoun kapab eksprim son lekor e la nou pe koz lo lesanz lopinyon e lide san lenterferans, me nou Lasanble i osi annan en rol sivik pou li zwe e fer konpran ki laliberte lekpresyon e par ekstansyon lendepandans lapres i devret ganny akonpanyen apr en sans responsabilite.

Mr Deputy i pa vedir ki si ou anann drwa eksprim ou lekor ou devret dir nenport kwa, fer li nenport koman san ki ou pran konsiderasyon drwa lezot, san ki ou pran an konsiderasyon lenpak ou bann aksyon lo fabrik moral nou sosyete, san ki ou pran konsiderasyon lenpak ki sa pou annan lo nou zenerasyon fitir.  Mr Deputy si i vre alors ki nou pa inherit sa later avek nou bann zanset me ki nou pret li avek nou zanfan alors eski i pa nou repsonsabilte enkilke dan zot bann valer enportan ki a permet zot osi sof gard sa ki pou zanfan zot tour.  Fondamantalman tou sa ki nou travay pou gannyen ozordi pa pou aboutir dan narnyen si zenerasyon ki vin apre nou napa sans moralite pou kapab servi li byen e osi kontribye plis dan son lavansman.

Meday dan tou son laform i anann en rol santral pou zwe la.  Set alor ki lo sa size pa devret annan okenn lopokrizi, nou pa a kapab servi lendepandans medya atraver laliberte lekspresyon koman en licence pou avans bann propozisyon mal fonde e parfwa kalifye koman immoral.  Nou Konstitisyon i kler lo sa size, i fer provizyon pou bann presenp fondamantal ki nou bezwen respekte dan prosesis garanti drwa lekspresyon, tel ki dan lentere ladefans pei, Public Safety, Public Order i enportan la dan sa konteks Mr Deputy public morality e sa Mr Deputy se sa ki garanti labaz fabrik moral nou sosyete.  Mon dir sa akoz nou Lasanble osi i annan en rol pou sof gard sa fabrik moral e anpese ki nou pa garanti tou bann drwa nou pep tout an pliyan bann lezot ki osi enportan, pou asire ki nou vin en sosyete ki annan bann valer fondamantal.  Pou bann pti pei parey Sesel nou bezwen reste tre vizilan kot sa i konsernen.

Mr Deputy avek tou senserite i kler ki i annan bokou akter dan medya ozordi ki zwe en rol enportan pou anmenn en lesanz lide e lopinyon ki konstriktiv zot fer bokou pou anmenn en heathy debate e zot fer sa dan en fason responsab, la nou kapab vwar bann largirman e lopinyon ki a son baz i asire ki lepep Seselwa i ganny enformen.  Nou vwar bann lesanz lide ki reprezant diferan pwennvi ki swa politik oubyen akademik ou menm sosyal ant lezot, napa problenm avek sa.  Me toultan mon krwar ki nenport Seselwa regardless konviksyon politik ou devret kapab kontribye nou devret fer sa dan en fason ki responsab e la nou bezwen osi aksepte ki i annan ki prefere servi bann metod pou avans zot lopinyon oubyen largirman dan en fason ki nwiy travay sa lot group ki pran prekosyon pou reste responsab.  En tel lapros Mr Speaker pa healthy pou nou demokrasi, i pa healthy pou nou zefor pou kontinyen protez fabrik moral nou sosyete, i pa akseptab Mr Deputy pou servi drwa lekspresyon koman en patant pou fer pase bann propodeogatwar be it lo en endividi ouswa lo en group.  I pa akseptab dan en sosyete sivilize e moral pou servi bann zimaz ki klerman mank tou valer moral pou fer pase en pwen obyen en lopinyon.  Nou bezwen konnen kote nou drwa pou annan laliberte lekpresyon i fini e kote drwa lezot i komanse.  Se la kot sa Mosyon i trouv son relevans.

Mr Deputy monn pran sa lapros pou komans mon lentervansyon pou prezant pozisyon sa Mosyon lafason mon vwar li, an okenn lye kestyon ni lendepandans medya e laliberte lekspresyon, o kontrer si nou konpran byen lideal deryer sa Mosyon se pou promouvwar sa plis ankor.

Mr Deputy Seychelles Media Act 2010 i tre kler lo sa size lenportans i lo partisipasyon aktiv medya akoz sa lartik ki’n ganny fer mansyon i pozisyonn Media Association ki devret vin en regroupman tou medya dan Sesel koman enn bann katalis pli enportan pou anmenn plis responsabilite lo sa ki konsern rol medya.  Dan en lemonn ideal Mr Speaker se lapres, se medya ki devret regulate son prop aksyon me larealite I se ki nou pa viv dan lemonn ideal e souvann fwa nou bezwen met anplas bann sistenm of checks and balances pou protez nou sosyete.

Mr Deputy dan lemonn ozordi deplizanpli pei pe vin konsernen avek sa, Langleter tou resaman in annan en skandal mazer ki’n anmenn bokou kestyon lo pratik ki’n ganny servi par bann akter kle dan medya e parey nou konnen sosyete Angle i enn ki’n toultan protez fermeman laliberte lapres.  Nou’n vwar ki gras a sa enn bann zournal tre enportan in bezwen frenmen.  Lanmerik ozordi nou pe koz lo great freedom must be accompanied by great responsibility.  Kestyon ankor pe ganny poze lo rol lapres e son kontribisyon lo frabrik moral sosyete.

Mr Deputy ou ava osi permet mwan fer en pti analiz enn bann lartik ki’n monn vwar ekrir atraver Freedom House, sa i en lorganizasyon ki al sers freedom of speech e laliberte lapres dan diferan pei.  Enn bann pei ki ganny konsidere koman free press ozordi ki Laswed i dir the right to express an opinion also bring with it responsibility.  Freedom of speech when abuse can be offensive insight discrimination of violence have negative consciences of individual society.  Sa i en pei ki Freedom House limenm li in kalifye koman I annan free press Mr Deputy e nou se sanmenm valer ki nou annan Freedom House in kalifye nou koman en pei ki only partly free kot lapres i konsernen.

Lazanmaik Mr Deputy i osi en pti pei parey nou menm e li osi i enkorpor bann menm valer kot nou dir pou dir i bezwen annan en treshold neseser ki ganny etablir pou konnen kote laliberte lekspresyon e drwa lekspresyon i komanse e kote i fini.  Nou pran kont tousala Mr Deputy Speaker akoz lezislasyon ki permet Social Media Comission egziste I kler.  I pa koz lo (-) lapres, I pa koz lo hyndrones oubyen anpes dimoun ganny akse avek lenformasyon, i pa koz lo kontrol on freedom of expression me plito i koz lo kontribisyon medya dan tou son laform e dan son levolisyon e son kontribisyon ki i anmennen pou nou demokrasi.  I koz lo empowerment medya e se sa lafason ki nou devret swazir pou vwar li, i koz lo repsonsabilite en mo ki tre enportan.

Mr Deputy nou pa kapab obliy en fundamental truthMass Comminication Media i en social institution, zot en prodwir of the social demand nou pei ozordi e sa i enkli alors bann predictable expectation performance ki bezwen toultan ganny monitor.  I ganny karakteralize par en responsabilite sosyal e sa i devret konekte avek drwa piblik pou konn lenformasyon toutfwa egzize ki nou servi bann fason ki moral e responsab pou ganny sa lenformasyon.  E se pou sa rezon ki sa Commission i bezwen fer plas pou moral responsibilities e etablir en lyen avek respnsabilite medya to the overall public good e bann drwa e freedom ki garanti anba nou Konstitisyon.  E se pou sa rezon ki pli boner mon ti dir ki freedom of expression i bezwen fer plas pou lezot drwa anba nou Konstitisyon.  E lefe ki liberty carries avek li bann lobligasyon the greater the freedom accorded to the press Mr Deputy Speaker dan en sistenm demokratik i anmenn avek li repsonsabilite pou li fulfill serten lobligasyon anver sosyete e sa pa devret ganny obliye.  I enportan ki sa komisyon i zwe son rol, i bezwen rod mekanizm oubyen statezi pou anmenn tou stake holders ansanm.  Lanfaz i lo bokou aktivite esey fer keksoz diferaman e byen.  I bezwen kre en community of practice, ou bezwen kapab anmenn en dialog konstriktif lo sa issue e pa les personn lo periphery, se sa ki pou anmenn en sense of belonging avek tou bann dimoun ki partisip dan preparasyon sa code of conduct e osi ki partisip dan promouvwar lendepandans lapres isi ozordi.

Good practice Mr Deputy i egziste e commission i bezwen build lo la.  Se sa ki pou fasilit desire e lenplimantasyon sa code of conduct pou medya.  Mr Deputy lozikman once ki ou’n kapab etablir sa code of conduct i pou vin bokou pli fasil pou evalye bann practices, i a permet Media Commission pou met an aplikasyon lezot provizyon dan sa lezislasyon e sa ki pli enportan i pou fer sa an partenarya avek tou bann akter dan medya ozordi e se sa ki primordial, sa partnership i fondamantal pou ki nou kapab avans bann prensep kot i konsern responsabilite medya.  San sa partnership i pou vreman difisil pou fer li, nou a kapab osi konekte rol medya atraver sa act avek lezot lezislasyon ki annan en lenpak lo lesanz lenformasyon.

Mr Deputy rezon det sa legzistans kot Media Commission i devret ganny vwar koman en kontribisyon parey monn dir pou garanti lendepandans lapres se sa ki pou permet li apart bann lezot keksoz garanti akse a lenformasyon e se atraver sa ki nou pou kapab etablir en cintersied framework pou ki tou medya i a konpran zot rol e responsabilite isi Sesel. Me nou bezwen osi fer tou posib pou ranforsi kapasite sa commission pou li kapab ranpli son bann fonksyon anba son manda.

Mr Deputy nou kapab fer keksoz diferaman e pli byen pou Sesel, tou medya i devret ganny vwar koman performing en public service of a professional kind e ler nou koz lo profesyonnel zot bezwen put the communities objectives koman zot prop lobzektif me mon konvenki ki zot kapab etablir zot prop frame work of rules atraver sa code of conduct e pou asire ki free speech e laliberte medya i ankorformite avek bann lalwa e prensip nou sosyete.

Mr Deputy mon konfidan ki bann akter dan medya i pran sa koman konstriktiv, mon krwar dan zot profesyonalizm fer keksoz diferan epli byen pou nou pei. Mr Deputy I beg to move. Mersi.

 

MR DEPUTY SPEAKER

Bon, okenn ki segonde? Onorab Lebon e ou oule koze?

 

HON LENNY LEBON

Mon segonn sa Mosyon e mon oule dir de pti mo.

 

MR DEPUTY SPEAKER

Proceed.

 

HON LENNY LEBON

Mr Deputy Speaker, ozordi nou pei pe ganny konsidere koman en high middle income country.  En mark devlopman nou pei ki pli o ki nenport ki dan losean endyen e sertennman lo nou kontinan.  Lanons ki nou prop parlman i senkyenm dan lemonn anterm reprezantasyon madanm i montre ki zistans nou pei in arive dan lemonn anterm devlopman imen.  Gouvernman pe koz lo en nouvo mindset e nou Lasanble pe fer bokou demars pou reelman zwe son rol koman gardyen lentere lepep.

Mr Deputy Speaker dan tousala i annan en bout ki nou bezwen port bokou latansyon e sa se katriyenm pilye nou governans e sa se medya.  Mr Deputy Speaker Mosyon ki devan nou Lasanble pe met en kestyon travay Media Commission ki depi son letablisman 1an pase lepep pankor tande ki travay in fer e ki taravy ki i anvizaze fer pou protez en lapres lib e fyer pou osi promouvwar en lapres responsab e drwa endividi.  Dan tousala isi koman lavwa lepep nou pe demande ki avek devlopman nou medya osi i grandi e komans zwe son rol enportan dan nou pei, e labaz en bon medya se en kod kondwit parey tou pei omonn i demande.  Sa i labaz sa Mosyon ki devan nou ki pe fer efektivman ki en lazans ki depan lo larzan taks nou pep i reelman zwe sa rol ki’n ganny mandate pou fer e se sa ki kre sa baz pou devlopman epanouisman medya e madya responsab dan ou pei.

Mr Deputy Speaker a note ki sa Mosyon i pa lo SBC me i lo medya an zeneral dan nou pei i lemerzans bann nouvo kalite medya par egzanp electronic media an kontan bann blogs, en medya kot sitwayen i kapab partisip aktivman i annan en lenpak lo sosyete, medya prive ki pe agrandi dan nou pei, bann piblikasyon endepandan, relizye e politik – en amalganm lopinyon piblik ek lenformasyon ki devret annefe esansyel pou devlop nou demokrasi.  Mwan Mr Deputy Speaker mon napa problenm ek sa, annefe tousala set en devlopman ankourazan kot sitwayen merit santi ki apart medya nasyonnal e bann servis lenformasyon piblik parey SBC e zournal Nation i annan lavwa alternativ pou nou pep eksprim son lopinyon.

Mr Deputy Speaker mon problenm se labsans en refri endepandan e inaktif pou zwe son rol mandate premyerman pou edik nou nasyon lo danze entel sitiasyon e osi responsabilite endividyel pou bann endividi ki deside evok lartik nou Konstitisyon pou pratik son laliberte lekpresyon plennman.

Dezyenmman Mr Deputy Speker mon problenm se mankman en kod etik ki ava ede elev standar nou medya isi Sesel e fer li vin enn ki relman abord bann size enportan pou nou pei avek otan lopinyon divers ki nou kapab annan, san ki nou antre dan bann polemik personnel e distasteful.

Mr Deputy Speaker Sesel i en pti pei e i enportan ki bann zwer enportan dan nou medya nasyonal enkli sa endividi ki enterese avek lenformasyon i bezwen santi li koman non selman en zwer enportan dan transformasyon lendistri lapres me osi en zwer responsab, pou sa ki i dir anver lezot, pou sa ki i deside ekrir e sertennman en sans responsabilite pou respekte drwa sakre lendividi lo ki komanter i ganny fer ouswa adrese. Tou dimoun Sesel i annan drwa, drwa bann ki annan mwayen pou eksprim son lopinyon i osi enportan ki sa enn ki anvi servi son drwa pou protez son zafer prive.

Mr Deputy Speaker mon demann kestyon fran e direk SMA ozordi.  Eski SMA i kapab rann kont lepep ki apre 1an ki in ganny kree vreman kwa ki in fer pou tou senpleman met sa 2 keksoz anplas, en plan ledikasyon detaye e osi en kod kondwit pou gid bann akter medya prensipal lo kwa ki akseptab dan nou sosyete sivik e kwa ki pa akseptab?

Mon pou pe siport san Mosyon plennman akoz mon manda koman reprezantan lepep i anmenn mwan demande ki nou take Government to task e seryezman demande ki ler nou vot lo bann lalwa isi dan nou Lasanble nou osi annan devwar demande kimannyer sa bann lalwa pe ganny met an apliaksyon dan lentere lepep. Mersi.

 

MR DPEUTY SPEAKER

Onorab Fideria.

 

HON EMMANUEL FIDERIA

Mersi Mr Deputy, bon apremidi tou mon bann frer ek ser Onorab.  Mr Deputy pou komanse mon rekonnet lavantaz e lenportans rol ki bann medya i annan dan nou sosyete, sa i komasn par en pti radyo dan pos bann stevedors, bann zournal, televizyon, internet dan lanmen nou lazenes.  Nou tou ozordi dan en fason ou en lot nou viktim lenfliyans medya, nou pa kapab esap sa realite, nou tou nou konnen ki medya i kapab gonfle nou balon en zour me degonfle li son lannmen.  Mwan mon sorti dan sa enn lekol ki krwar dan en medya pli ralis e demokratik me ki son rol fondamantal se pou siport devlopman en nasyon.  Mon krwar dan en medya konstriktif, mon krwar dan en medya ki merit zwe en rol pou prezerv valer kiltirel en nasyon e osi prezerv moralite en pep.  Malgre lenpak globalizasyon nou medya i en kriy for e byen rasinen dan nou listwar, dan nou politik, dan nou lanvironman, dan nou sport, dan nou kiltir, dan nou legliz, dan nou lekonomi e an gro Mr Deputy dan nou dimoun.  Nou medya i bezwen tre sansib avek sansibilite nou pep.  Mr Deputy 2an in pase depi sa lalwa ki gouvern Seychellles Media Commission ti pase dan sa Lasanble.  Nou bezwen salye bann avan nou ki ti annan kouraz pou pas sa mors lalwa ki alafwa istorik e prevwayan.  Ozordi atraver sa Mosyon nou pe revizit sa lalwa kot i ete e nou pe tir lapousyer lo la.  Sa lalwa I tre enportan pou nou kit li dan en kwen, i en lalwa ki annan ase ledan pou li kapab morde.

Mr Deputy sa Mosyon devan nou Lasanble pe demann kreasyon a code of conduct pou tou bann medya dan Sesel.  Moman in arive pou sa.  Ler nou analiz tou sa ki nou tande lo radio, vwar lo televizyon, lir dan bann zournal e osi tou sa ki pase, kwa ki pase lo internet nou demande kote tou sa pou fini si naap code of conduct pou siport bann medya.  I kler ki lenpak serten sa bann keksoz ki pe ganny ekrir dan zournal e ki pe pase dan medya sosyal lo internet pe ede tir kal anba fabrik nou sosyete, nou bann valer kiltirel e moral pe ganny dekranse dan en fason trankil me trakasan.  Mr Deputy en code of conduct i annan devlopman normal e neseser pou bokou bann lenstitisyon enportan dan pei.  Isi Sesel Zidisyer i annan son code of conduct ki bann medya menm ti met presyon pou zot annan.

Nou Lasanble byen lontan i annan sa ki pou li, alors vi ki lenportans medya dan konstriksyon nou demokrasi i normal ki zot osi zot devlope anba en bon code of conduct.  Serten bann eleman ki mon santi i kapab met dan sa code ki par egzanp nou bezwen dekouraz bann medya pou prodwir okenn dokiman ki anmenn laenn ouswa diskriminasyon parmi nou popilasyon e osi respe pou alvi prive nou sitwayen sirtou ler zot dan zot soufrans e detres.  Mon osi krwar ki medya i bezwen oblize koriz bann fo lenformasyon ki zot pibliye e ki fer bokou dimal e ditor nou bann sitwayen inosan avek zot fanmiy sirtou zot bann zanfan.

Mr Deputy en code of conduct pou vin koman en baro main ki pou garanti standar zournalis e anmenmtan defann zot dwa e zot laliberte pou zot fer zot travay dan lonnekte e osi dan en fason zis.  Mon ti a swete dan en fason ideal ki tou bann medya i kapab asiz ansanm pou ekrir zot prop code of conduct me an realite e leksperyans in dir nou ki sa pa pou posib akoz serten sekter nou medya i annan tandans krwar ki zot drwa pou ekrir i en kad sakre e ki personn napa drwa touse.  Me erezman nou Konstitisyon in donn en finalite tou nou bann drwa, lartik 22 nou Konstitisyon I koz byen lo la e sa menm Konstitisyon i donn nou tou osi limit atraver bann responsabilite.  Si bann medya zot menm pa kapab kontrol zot konportman nou sosyete atraver Lasanble in konfye sa responsabilite avek Seychelles Media Commission pou fer sa travay pou zot.  Alors atraver sa Mosyon pe remind Seychlles Media Commission lo enn zot responsabilite.  Nou sitwayen i oule en devlopman medya ki pli realis e demokratik me ki ganny gide par en code of conduct ki for, serye e ki vreman morde.

Mr Deputy en code of conduct pou vreman ed devlopman medya dan Sesel atraver bann best practices liniversel.  Tou bann medya dan lemonn ki’n sirvi e progrese akoz zot profesyon in ganny soutenir pou en bon code of conduct par egzanp bann zournalis Angle ki ti form parti National Union of Journalism ti kree zot code of conduct depi 1936.  Medya Langleter enn ki ti ganny respekte dan lemonn ziska tou resaman avek skandal news of the world sa skandal in demotre ki’n arive ler zournalis pa respekte son code travay.  En leson ki bokou in aprann.

Mr Deputy mon pou aport mon sipor pou sa Mosyon akoz mon senserman krwar dan en medya ki lib e demokratik, mon oule vwar dan Sesel ki nou medya i devlope e ganny nivo standar profesyonnalizm e ki zot travay avek en bon kod etik travay.  Sa Mosyon pa oule met kontrol lo medya me okontrer i oule garanti zot laliberte travay e en bon code of conduct.

Mr Deputy moman osi in arive pou komans en refleksyon lo lenpak ki internet pou annan lo nou pei.  Avek larive kab soumaren keksoz pa pou zanmen parey avan.  Mon mazinen sa i ava vin en lot deba ki nou Lasanble i a ganny sans fer plitar.  I kler ki avek sipor medya dan nou kote nou pou kapab vreman fer en gran diferans dan lavi nou pep e nou kominote. Mr Deputy mersi.

 

MR DEPUTY SPEAKER

Onorab Gislain.

 

HON CHANTAL GISLAIN

Mersi Mr Deputy , bon apremidi. Mr Deputy Speaker, koleg MNA sa Msoyon ki devan nou i tous en size ki nou tou a en serten pwen nou lavi i kapab afekte nou.  En size ki annan bokou pou dir e debat lo la, me mon pou limit mon lentervansyon lo selman 2 pwen e sa i laliberte lekspresyon vizavi drwa prive e moralite e drwa lapres vizavi responsabilite.  Dan mon dernyen entervansyon ler Lasanble ti pe debat lo formasyon en komite medya dan Lasanble mon ti eksplik fason ki medya dan tou son form ki swa televizyon, lapres ekrir radyo ouswa elektronik tel ki internet i kapab glorifye en dimoun e ki fason osi i kapab fer sa menm dimoun perdi tou kredibilite devan piblik.  E I pli danzere ler sa dimoun i dan lizye dimoun tel ki bann politisyen parey Minis, bann Manm Lasanble, bann profesyonnel parey dokter, ners, ansenyan e lezot gran biznesman lalis i long.  Me pou dir ler mon pe ekout mon bann lezot koleg ki pe koz avan mwan pou dir ki medya ek zounaliz napa en kod kondwit i pa vreman vre sa.  Kod kondwit i annan li me selman letan ou mazinen si – dir par egzanp nou konn bann dokter – en dimoun i kapab donn piker, i konnen kote pou donn pikir li me selman pa neseserman I konnen kimannyer pou donnen parseki i pa en dokter.  Pou en bon pe lannen deza serten politisyen ki’n anvi vin popiler vitman in servi sa lekspresyon defan drwa en sitwayen pou defann zot laliberte pou koze ki garanti dan Konstitisyon Sesel i reprezante koman drwa laliberte lekpresyon.  Bann swadizan politisyen ti’n vin zwe rol zournalis ki fer zot ti napa okenn mosyon lo standar e etik zournalis ki konpri bann prensip tel ki laverite, ladwatir, lobzektivite, enparsyalite lazistis e responsabilite anver piblik ki zot deserve, tou sa i bann etik ki en zournalis i annan.  Bann lezot prensip I osi enkli sa limilizasyon pou fer ditor dimoun pa retenir serten detay tel ki non bann miner, nou bann viktim oubyen serten lenformasyon oubyen detay ki kapab afekte repitasyon en dimoun.  I zis parey en dimoun parey mon ti’n eksplike avan ki pa en profesyonnel lasante me ki i oule donn pikir me selman i pa’n ganny formasyon ladan e se sa ki arive letan ou pa’n swiv en kour zournalizm byensir ou pou napa okenn kod etik e ou kapab ekrir nenport kwa e ou pa ni mazinnen si sa i pou fer ditor lezot.  E se bann dimoun koumsa ki kit sa profesyon ki fer parske i donn en move repitasyon bann zournalis, respe pou santiman e etik sa pep e pei ki zot pe servi e pourvwar pou enfliyanse e zot fer bokou ditor.  Laliberte lekpresyon i en drwa iniversel ki’n donn drwa nenport  dimoun pou eksprim son lekor libreman.  Fodre fer remarke ki sa drwa i mars kot a kot avek responsabilite sa dimoun pou respe drwa lezot sirtou sa enn ki i pe dekri.

Avan al pli lwen les mwan port zot latansyon lo en dikton tre popiler ki leve sak fwa nou koz lo drwa imen.  Your right to swing your fist ends where my nose begins. Tradwir an kreol koman “Tou dimounn i annan drwa balans son lebra dan nenport direksyon ki i anvi me sa drwa I aret kot nennen son vwazen i komanse”.  Sa i en dikton tre pwisan ki dekri responsabilite sak endividi.  Konmela avek lavansman dan teknolozi tel ki internet dimoun i annan plis akse avek lenformasyon, in osi ede dan disimilasyon lenformasyon – deba e kominikasyon an zeneral, en keksoz tre enportan e tre an bonne santé pou en kominote, me problenm I vin avek lafason e keksoz ki ganny dir lo dimoun.  I fasil dir nenport kwa lo nenport ki dimoun as long ki pa lo zot menm, lo zot zanfan oubyen zot pros.  I tre malare ozordi pou dir ki bokou nou nepli annan konpasyon pou sa enn ki pe ganny afekte avek sa nouvel.  Okontrer zot servi li koman en veykil pou larogans zis pou zot vin popiler.  Mon rekonnet e senserman krwar ki en dimoun prive i annan plis drwa pou kontrol lenformasyon lo zot ki en zofisye piblik, politisyen e lezot.  Mon osi argimante ki I pou penetre dan lavi prive sa zofisye i bezwen ganny zistifye selman si i annan en bezwen piblik.

Mon termin mon pti lentervansyon lo sa panse later i ron sa ki fer letour i retournen.  Mersi Mr Deputy Speaker.

 

MR DEPUTY SPEAKER

Onorab Arnephy.

 

HON BERNARD ARNEPHY

Mersi Mr Deputy Speaker, bon apremidi tou sa ki alekout.  Mr Deputy a mon avis a Mosyon pe senpleman demande ki bann prosedir e mezir neseser i ganny aplike pou pratike pou fer ki medya I vin pli responsab e respekte lentegrite e dignite lezot.  Pou edik en pep lenformasyon i souvan lakle me sa lenformasyon i merit ariv kot sa endividi dan en fason byen, kot en lot pa santi li ganny afekte akoz lentansyon malisye par serten endividi ou group zis avek bi denigre en lot.

Lalwa Komisyon medya Sesel ti ganny aprouve par Lasanble Nasyonal an Desanm 2010 plitar le 27 Zanvye 2011 Prezidan Larepiblik Prezidan Michel ti apwent premye komite ki ti pou diriz travay sa komisyon, me nou konstate ki bokou plis ti’n kapab ganny fer me pou serten rezon ou en lot sa pa’n touzour posib.  Alors Mr Deputy lide sa Mosyon se pou zisteman fer ki bann ki’n ganny mandate pou asiz lo sa komisyon i travay ankor plis avek bann diferan lapres dan pei pou promouvwar bann meyer pratik desiminasyon lenformasyon e fer ki lenformasyon ki korek e non pa difarmatwar i ganny propaze.  Parey in ganny fer remarke pli boner enn bann rol prensipal sa komisyon se pou ede protez e prezerv laliberte lapres Sesel, ler ou deside protez laliberte lapres i enportan ki ou promot osi respe pou dignite sak endividi.  Alors Mr Deputy I tre enportan e i ekspekte ki sak zournalis i montre en o nivo profesyonnalizm kot proteksyon drwa e lentegrite sak endividi i konsernen, malerezman sa pa touzour leka Mr Deputy se pou sa rezon ki sa Mosyon pe demande ki komisyon i komans morde e zwe en rol pli proaktiv dan sa demars pou edik bann diferan medya lo zot rol pou promosyon bann lapres ki a la oter.  Mr Deputy sa vre sosyete demokratik ki bokou i kontan koz lo la pa pou egziste si bann ki annan devwar pou donn formasyon zis e ekitab pa fer li dan en fason responsab.  Tro souvan serten endividi ki’n ganny mandate i annan sa responsablite pou met piblik okouran lo sa ki pe pase otour li i fer li dan en fason malisye, ou senpleman pou denigre en lot dimoun.  Alors bann bon kod etik i merit ganny respekte e promouvwar parmi sa group profesyonnel pou ki zot raport dan en fason ki byen sanpans fer ditor lezot dimoun.  La i enportan note ki bann manm ki asiz lo sa Komisyon i annan en latas enportan pou edike e kot fodre pouse pou ki askyon neseser i ganny pran kont bann ki vyol bann regilasyon ki ganny gouvernen par en tel komisyon.

Mr Deputy mon panse ki Sesel i annan en kantite bon keksoz ki pase e ki kapab ganny servi pou edik nou pep e fer ki nou ganny tou lenformasyon apropriye lo sa ki pase dan nou pei pou ede dan epanouisman nou pep.  I malere sepandan pou note ki tro souvan serten nou bann zournalis I tant pou konsantre lo bann keksoz ki negativ e ki anmenn konsekans e lefe negativ lo moral nou pep.  En kantite lezot dimoun ki andeor zournalizm zot osi zot get away avek murder parey nou dir an Angle ler zot ekrir sa ki pa byen lo lezot e deside reste anonim, me zot bann move lentansyon i kontinnyen ganny pibliye akoz napa mezir disipliner ki ganny pran.

Mr Deputy pep Seselwa ti a kontan vwar bokou plis prodiksyon lokal vize ver ledikasyon apropriye dan diferan domenn, tel ki politik kiltirel, artistik e moral.  Nou sepandan osi konstate ki I kout bokou pou fer bann tel realizasyon lokal me sa ki kler se ki nou pep i annan en vre laswaf pou konn bokou plis sa ki pe pase dan son zalantour.  Linisyativ pou reliz bann prodisyon lokal i merit ganny ankouraze e promouvwar e sa a ede pou valoriz plis ankor nou fason viv koman en pep.  Sa i a osi ede dan promouvwar bann valer fondamantal ki nou gran paran in les avek nou.  Tro souvan nou vwar bann progranm ou reportaz ki nou’n aste a leksteryer e ki kout nou bann bon sonm konsiderab e ki dan bokou ka pa neseserman ede pou promot bann bon fason viv e fason fer ki nou ti a swete nou zanfan, nou fanmiy e nou pep i adopte.

Mr Deputy mon oule fer masyon spesyal lo sa travay serye ki nou Lasanble i fer.  Dan tou sa bann deliberasyon i annan en kantite lide, en kantite konsern mazer ki ganny adrese e ki mon senserman krwar ki nou pep i merit ganny met okouran.  Dan bann deliberasyon i annan en kantite rekomandasyon e propozisyon ki ganny fer e ki vize ver bann departman Gouvernman, prive e bann NGO’s, i enportan alors ki lapres i ed nou lenstitisyon plis ankor dan sa demars pou met manm piblik azour avek sa demars serye ki nou pe fer pou anmenn nou lenstitisyon lo en lot oter an sersan sa ki meyer pou nou pep, en bon balans ant reportaz lokal e enternasyonnal alors pou definitivman ede anmenn plis ledikasyon kot nou bann dimoun sa i a permet zot osi aport en pli bon kontribisyon dan travay ki zot reprezantan dan Lasanble pe fer.  La mon demann komisyon pou travay an etrwat kolaborasyon avek bann diferan lapres pou fer sa posib.

Sesel atraver Lasanble in sinnyen e ratifye bokou Konvansyon ki anmenn benefis direk ou endirek pou Sesel me malerezman pa toultan ki nou piblik i konpran sa bann demars ki pe ganny atreprann akoz napa bokou kouvertir par nou bann lapres lo bann tel size.  Pou en pti pei parey Sesel Mr Deputy lenformasyon ki ganny kolekte ozordi par lapres i ganny disiminen dan diferan form.  Ozordi en dimoun i kapab akse lenformasyon swa atraver bann teknolozi modern ou bann fason konvansyonnel – dan nenport ki form ki sa bann lenformasyon i vin aksesib i bezwen ganny fer dan latransparans e avek respe pou laliberte e drwa lekpresyon lezot.  Alors bann lobligasyon legal ki an fors i merit ganny respekte e pratike par medya an zeneral tou an respektan laliberte e lekpresyon sa bann lapres.

Sa Mosyon pe anvoy en lapel kler pou ki tou bann lorgan dan medya i abide avek bann terms and conditions ki zot ganny gouvernnen anba la.  Komisyon medya i bezwen pouse pou ki bann lorganizasyon medya e bann zournalis pa infrigde lo drwa bann endividi e kot sa i leka bann responsab i merit ganny sanksyonnen baze lo lalwa ki deza egziste.  Si lalwa pa azour avek bann evolisyon dan domenn medya vizavi teknolozi mon panse sa komisyon i annan en manda pou fer rekomandasyon apropriye pou met keksoz a zour avek bann realite aktyel.

Mr Deputy mon reitere ki tou dimoun I kontan ganny akse avek lenformasyon lo bann devlopman ki arive dan pei, dan larezyon e lo lasenn enternasyonnal e sa i merit ganny fer danen fason zis e ekitab.  Sa komsiyon i merit fer li son devwar ki ler lenformasyon i ganny donnen sa lenformasyon i ganny donnen dan fason responsab – responsible journalism parey nou dir, i egzize ki medya pa servi sa privilez piblikasyon ki zot annan pou zwe lo moral lezot dan en fason malisye.  Tre souvan Mr Deputy serten group ou endividi I pas zot letan fabrik zistwar ki souvan i sonfonnman zis pou denigre zot prosen, nou kapab konstat sa lo rezo sosyal parey Facebook kot serten endividi i pran plezir zis pou kraz son prosen an pibliyan tou sort materyel difarmatwar, malgre ki sa bann endividi pa neseserman bann zournalis mon panse ki Komisyon i annan en rol pou zwe pou edike e dekouraz bann enplike dan bann pratik parey.  Kot medya e zournalis anrezistre i enplike la lalwa i merit pran bann mezir serye kont zot pou ki bann tel pratik i ganny seryezman kondannen e dekouraze.

En lot pwen enportan Mr Deputy se ki Seychelles Media Commission i merit fer rapel bann zournalis ek bann editer ki latansyon enportan i bezwen ganny mete lo lenformasyon ki zot pibliye e fodre ki sa bann lenformasyon i korek avan piblikasyon final i ganny fer.  Sa i a osi ede ki parey nou’n dir pli boner drwa bann endividi ou group i ganny vyol.  I enportan note ki isi Sesel nou Konstitisyon i fer provizyon pou drwa laliberte lekpresyon me sa ki pli enportan se ki i osi met serten restriksyon lo sa menm drwa pou ki repitasyon e lavi prive sak endividi i ganny respekte e sof garde.  Provizyon neseser i egziste anba lalwa pou proteksyon lentere piblik, sekirite lentere piblik, promouvwar moralite eksetera.  Dan sa demars bann manm komisyon i merit pouse a tout pri pou lareisit bann tel provizyon.  Kot sa bann lentere e drwa pa ganny respekte par bann zournalis e si zot al kont zot lobligasyon moral aksyon disipliner i kapab e merit ganny pran kont zot.  I bon osi fer note ki lalwa Sesel i osi fer provizyon pou ki Minis ki responsab pou lenformasyon i kapab anpes serten piblikasyon okenn marteryo ki annan motiv malisye e ki souvan i al kont lentere nasyonnal.  Ozordi internet access i alaporte en gran poursantaz nou popilasyon me malerezman parey monn dir pli boner pa tou ki servi sa teknolozi dan fason apropriye, i annan ki kontinnyelman servi bann rezo sosyal atraver internet pou fer ditor son prosen, sa mon panse e tou pri i merit ganny kondannen e bann ki enplike i merit ganny deal avek ankor en fwa seryezman.  I malere ozordi ki dan nou pti Sesel i annan serten endividi ou group ki ankor pe pran plezir pou fer sa bann kalite keksoz pou zot gen personnel.

Sa Moson pe lans en lapel avek Komisyon medya pou asire ki bann etik ki gouvern son mandan i ganny byen aplike, eksplike, obzerve e pratike – par egzanp okenn lartik ki ganny pibliye dan okenn zournal merit port non sours e loter sa lartik.  Sa pratik pou bann lartik anonim i ganny pibliye e kot souvan konteni sa bann lartik i viz prensipalman pou atak, pou fer ditor en lot i merit enn fwa pou tou arete.

Media Commission i merit pouse plis ankor pou asire ki tou lenstitisyon medya Sesel i attend en pli o nivo lefikasite dan lafason ki zot delivre zot servis.  Medya e zournalis I merit travay pou ganny konfyans piblik.  Konsern ki zournalis i fer fas avek merit ganny adrese dan en fason enparsyel par Komisyon pou promot lapres pli responsab me sa i selman kapab vin posib ler sa bann menm zournalis ou medya i montre ki zot pe azir dan en fason responsab e profesyonnel.  Dan en zefor pli kordinen avek bann diferan lorganizasyon lapres mon panse ki lezislasyon ki anplas i a ganny pli byen aplike pou protez manm piblik kont labi e leksplwatasyon par bann diferan form lapres.

Mr Deputy permet mwan fer serten rekomandasyon ki a ede ranforsi travay ki sa Media Commission i sipoze pe fer pou asire ki nou ganny en lapres ki onor dan en fason pli profesyonnel zot lobligasyon anver sa pep ki zot deservi.  Tou endividi ki deside konsider li koman en ekriven ou zournalis i merit ganny akredite e ganny formelman rekonnet par sa komisyon medya la zot a ganny sertifye avek en sertifika ki a determin zot konpetans, lotorite legal pou fer lenvestigasyon e demontre zot kredibilite.  Mr Deputy tro souvan nou vwar tro bokou bann swadizan zournalis me ki pa montre okenn kredibilite dan sa ki zot fer.  Tou zournalis ou ekriven ki kouver levennman tir portre, ekrir lartik e fer bann montaz merit montre otantisite zot travay par met non oter sa travay e sa i a fer ki genuity sa travay i ganny reflekte.  I bon note ki serten zournal pe fer serten travay dan sa lalinny, alors i enportan ki serten standar i ganny etablir dan en tel direksyon.  Sa Komsiyon Mr Deputy i merit asire ki sak lorganizasyon medya ou endividi ki ganny akredite par sa Komisyon i fer li zot devwar pou annan bann protokol kler ki gouvern zot loperasyon, sa bann protokol i a osi ede asire ki social media i ganny servi dan en fason desan e apropriye kot i pa ganny trouve koman  n zouti destriktiv me okontrer en fason pou promouvwar lapres responsab. En legzanp kler pou ilestre sa se lapros ki SBC in resaman pran pou met an aplikasyon bann polisi lo lizaz social media vizavi son bann anplwaye.

Social media ler i ganny servi dan en fason responsab I vin en zouti enportan ki ed nou reste an kontak avek zanmi, reste azour avek nouvel e lenformasyon enportan e amelyor nou enteraksyon teknolozi.

Mr Deputy en pep ki byen edike i en pep ki souvan pran bon desizyon e fer bann bon swa, la mon panse ki bann medya lokal i annan en rol kle pou zwe dan sa demars.

Mr Deputy mon pou san dout aport mon sipor total lo sa Mosyon.  Mersi.

 

MR DPEUTY SPEAKER

Onorab Vengadasamy.

 

HON SHERIL VENGADASAMY

Mr Deputy Speaker, manm koleg Onorab bon apremidi.  Mr Deputy mon lentervansyon lo sa Mosyon i pou kourt i pa pou enn ki pou long akoz mon bann manm koleg Onorab in diskit merit e lentansyon sa Mosyon, e alor mon pa pou repet sa ki’n ganny dir.  Me mon annan en lenkyetid Mr Deputy.  Si ozordi nou pe debat lo sa Mosyon i montre klerman ki lareg zwe pa pe ganny respekte, ki nou lalwa pa pe ganny respekte, ki serten de nou pa pe pran nou responsabilite.

Mr Deputy Speaker semenn pase nou ti dan sa menm Lasanble pe diskite, pe debate lo Mosyon Onorab Arnephy konsernan santans mars ansanm en Mosyon ki’n ganny debate par Lasanble presedans, en lalwa ki nou tou nou konnen i an egzistans e ki serten i senpleman pa pe respekte.  Ozordi nou vwar nou ankor dan sa menm Lasanble pe diskite, pe debate ankor lo en mezir, lo en striktir, lo en mekanizm, lo en lalwa ki deza la – ankor enn fwa nou nou bezwen redebate, rekoz lo la.

Mr Deputy Speaker fonksyon Media Commission in ganny byen detaye dan Seychelles Media Commission Act 2010.  Nou Konstitisyon I kler.  Lartik 22 nou Konstitisyon i kler lo sa ki konsern laliberte lekspresyon.  Mon pa vwar ki nou merit.  Me pou serten Mr Deputy mon pwen I kler.  Si lalwa i la, si nou fonksyon i la, si nou responsabilite i la e si nou louvraz i la I kler pou tou dimoun vwar – be akoz ki nou pa pe fer li?  Nou annan en problenm.

Mr Deputy Speaker si sa lalwa ti’n vin an mars depi 2010 e la nou an 2012 nou vwar nou bezwen pe demann sa Komisyon pou akseler son louvraz, mon annan en kestyon pou sa Komsiyon Mr Deputy.  Kestyon mon pe poz ek zot se ki zot in fer pandan sa deryen 1an?  Ki zot pe fer? Nou bezwen regard en pti pe tre pros Mr Deputy Speaker konsernan sa Media Commission akoz ki zot pa pe performen?  Akoz ki zot pa pe reakte?  Akoz alafen dizour Mr Deputy Speaker nou tou nou la nou annan en devwar, nou tou nou annan en responsabilite.  Dapre lalwa si nou bezwen reazir nou bezwen reazir e nou bezwen note pou dir ki larzan ki ganny donnen se larzan taks lepep e larzan lepep ki finans Media Commission.  En Media Commission i bezwen asire ki i pe deliver, i bezwen asir sa Lasanble ki sa ki nou pe demande i pe aplike e si i pa fer li Chairperson FPAC i la i bezwen asire ki nou larzan taks i pe byen ganny servi.

Mr Deputy Speaker, Prezidan in vin dan Lasanble in sekwe nou Gouvernman, in koz ek nou Lasanble, in koz ek tou dimoun, be nou nou a koz ek Media Commission, sekwe ou i kler sa.  Mon bann koleg in dir li pli byen, in aranz li tre byen mwan mon pou dir li tre fran.  Nou tou nou’n ganny dir pran nou responsabilite e nou bezwen pran nou responsabilite.  Nou pa pou kapab ale lannen ale lannen vini met lalwa anplas, met striktir anplas e lannen ale lannen vini nou vwar nou pe koz lo menm lalwa, lo menm striktir.  Mon Prezidan in dir en keksoz ki kler li dsan sa Nouvo Sesel nou tou nou bezwen travay dir e sa i enkli nou Media Commission.

Mr Deputy Speaker sa Lasanble i bezwen fer sir ki sa commission i ganny taken to task.  Mersi e mon pou siport sa Mosyon.

 

MR DEPUTY SPEAKER

Onorab Barbe.

 

HON NICOLE BARBE

Mersi Mr Deputy.  Mr Deputy koleg Onorab bon apremidi.  Mr Deputy pou vreman fer zistis Mosyon Onorab Pillay nou bezwen premyerman met li an konteks, sa bann kalite pratik zournalistik negativ ki pe afekte Sesel ozordi i deza egziste dan plizyer pei lemon.  Zis Langleter tousel i annan plizyer diferan zournal ki spesyalize dan sa bann move fason fer keksoz – largirman ki souvan ganny avanse isi Sesel pou defann sa ban move pratik zournalistik se ki dan bann pei ki zot demokrasi i pli avanse ki nou sa bann tel aktivite i enn ki ganny aksepte andefans sa bann move fason nou pep i ganny dir ki sa i en keksoz ki normal e akseptab, e ki sa i form en parti entegral nou demokrasi.

Sesel i posed li en tre zenn demokrasi, en demikrasi dan lekel laliberte lekspresyon ensi ki en lapres lib i annan en rol kapital pou zwe.  Si koman en nasyon nou oule defann nou lademokrasi nou pou bezwen premyerman komans met bann standar anplas pou bann ki sipoze azir koman defanser lademokrasi.  I bezwen annan bann standar enorm akseptab pou gid travay lapres.  I pa en aksidan ki lapres modern i ganny karegorize koman watch dog ouswa lizye soyete e sof gard kont labi pourvwar, labi resours e bann lezot move pratik dan gouvernans me i egalman enportan ki lapres pa vin en abizer dan limenm, ki lapres pa adopte sa menm pratik ki sipoze pe anpase.

Mr Deputy koman en reprezantan elekte isi dan sa Lasanble mon posed en devwar moral anver bann ki elekte mwan pou kontribye anver deba ki pou ede lev nivo lenformasyon ki nou bann sitwayen i ganny ekspoze avek.  Mr Deputy premyerman mon oule tous lo size en lapres responsab.  I rol medya dan en pei pou deservi sosyete dan en fason ki pozitiv e kosntriktiv, la mon pa pe dir deservi Gouvernman me plito sosyete limenm, sak sitwayen, tou zabitan.  Pou sa nobou ganny fer ou bezwen annan en medya ki responsab e konsyan son bann responsabilite.  Deservi ou pep pa vedir donn li fo lenformasyon, evant zistwar ki san baz e san fondasyon, persekit e detri repitasyon serten endividi, piblir bann fabrikasyon e lopinyon angiz bann fe.  Dan okenn pei ki pe fonksyonn normalman sa bann tel keksoz pa kapab ganny konsidere koman bann keksoz ki bon pou en sosyete me plito ankor tou sa se bann akt iresponsab ki pa kapab ganny konsidere koman bann bon pratik zournalistik.   En zournalis responsab i premyerman en dimoun ki alaresers laverite e se sa ki fer son fonksyon sitan enportan dan nou sosyete.  Me letan ki en zournalis i alaresers laverite i annan li en devwar anver son bann lekter pou verifye son bann fe, tou son bann fe.  I devwar sa zournalis pou asire ki bann keksoz ki bann keksoz ki I pe pibliye i laverite e non pa zis bann alegasyon malisye ki servi pou detri repitasyon dimoun.

Bokou in ganny dir e pe ganny dir lo laliberte lekspresyon, mon pa pou al an detay lo sa size me mon pou zis fer rapel ki lapres i annan en rol enportan vizavi laliberte lekspresyon.  proteksyon aktivite medya dan nou pei i osi egal a proteksyon lentere piblik.

Mr Deputy sa Mosyon ki devan nou pe anvoy en masaz kler i pe demann Seychelles Media Commission pou met an aplikasyon bann provizyon dan Seychelles Media Commission Act 2010 o pli vit posib, an partikliye sa Mosyon pe demande pou formil en kod kondwit an konsiltasyon pou propriyeter bann zournal, radio, televizyon, lazans nouvel, zournalis e bann dimoun ki pibliy zot lartik lo internet.  En tel kod kondwit i a ganny fer an konsiltasyon avek Seychelles Media Commission.  Komisyon medya i ava asire ki i ganny strikteman obzerve osi byen ki pou promouvwar lendepandans medya, Komisyon medya pou bezwen osi fer sir ki napa okenn devlopman ki restrikte piblikasyon lenformasyon e lekpresyon lib lo bann size ki konsern piblik.

Mr Deputy mon senserman krwar ki sa Komisyon medya i annan deza tou pourvwar dan zot lanmen e ennfwa pou tou in ariv ler pou sa komisyon komans morde parey mon bann koleg in dir e fer zot travay parey bann provizyon site dan sa Seychelles Commission Act 2010. Mon swe se ki zot komans par travay pou met anplas sa bann kod kondwit pou lapres e ki ava vin en lankadreman pou tou medya fonksyonn ladan.  Ki sa kondwit i edik klerman ki lapres i devret fer e kwa ki zot pa devret fer – ki osi asire ki bann medya i ganny akse avek lenformasyon korek atan pou pas avek zot lodyans.  Sa kod kondwit i devret osi spesifye ki aksyon sa Komisyon pou pran kont okenn medya ki pibliy bann lenformasyon ki pa korek zis pou fer spekilasyon lo en endividi avek lentansyon pou sali son repitasyon.  Komisyon i la pou fer bann medya konpran ki zot rol e osi pou mentenir e propaz bann bon valer enkli respe pou lezot e non pa pou senm laenn ek discord dan lasosyete.

Mr Deputy mon pou donn mon sipor sa Mosyon akoz mon santi ki en tel kod kondwit pou ede prezerv laliberte medya, i pou ede anmenn plis respe pou dignite imen.  Sa kod kondwit pou osi ede pou mentenir e amelyor standar zournalizm isi Sesel. Mersi Mr Deputy Speaker.

MR DEPUTY SPEAKER

Bon, si napa personn ankor ki anvi koze mon a demann loter Mosyon pou fer son right of reply.  Onorab Bresson.

 

HON GALEN BRESSON

Mersi Mr Deputy Speaker.   Lentervansyon pou vreman kourt lo sa lapse, i en mosyon ki mon siporte.  Mr Deputy Speaker sa Mosyon prezante I vin a en moman kot bokou dan nou lavi i ganny enfliyanse par sa ki nou swiv lo medya enternasyonnal ou lokal swa atraver radyo, televizyon, zournal e sa i gany siplemante ou azoute par lakse enternet ki la sa medya i pran en lanpler pli personnel atraver blogs, twitter, facebook e lezot ankor.  Sa moderntie kominikasyon in ganny devlope dan en lespri pozitiv me bokou fwa bann itilizater i servi li dan laspe negativ.  Dan sa vilaz elektronik globalize kot baryer fizik pa definir en teritwar spesifik lalwa ki diriz itilizasyon sa medya i bezwen ganny definir par lokalite en pei prenann kont norm enternasyonal.  Mr Deputy Speaker parey loter Mosyon in mansyonnen lartik 22 nou Konstitisyon i pran kont laliberte lekspresyon me limitasyon i egziste vizavi moralite e responsabilite nenport ki ganny ekspsrimen.

Seychelles Media Commission ki ganny dirize par Seychelles Media Act 2010 i merit pran kont bann nouvo defi depi 2010 e lefitir, o menm moman ki i met anpratik bann kod etik an egzistans.  Ozordi kontinan Lafrik an partikilye i diskit lo convertion of media and emergence of social media, akoz bokou pei Lafrik pe deza eksperyans konektivite karb fib optik soumaren e byento plis pei enkli Sesel osi.  Sa fasilite dan limenm i prezant en nouvo defi atraver son posibilite ekstansiv teknolozi.

Mr Deputy Speaker permet mwan prezant serten propozisyon avek Media Commission si limnem i pankor pran sa lepa pou aranz e re-afirm sa kod etik ki I ganny dirize anba la an se moman.  Premyerman i konsern ledikasyon, nou bann zenn dan lekol ki ganny montre leson itilizasyon konpiter ek teknolozi afilye i merit ganny dir ki koman en zouti travay teknolozi i merit annan en balans moralite, laverite e respe drwa endividyel.  Esa mesaz i bezwen ganny edike avek nou pep lo diferan medya lokal.

Dezyenmman i merit Media Commission vin sa whistle blower, zwe sa rol mazer kot li i kapab kriy foul si i annan foul lo sa ki ganny dir e ekrir an prenan kont draw konstitisyonnel en Seselwa.

E trwazyenm propozisyon i relye avek dwa Zidisyer, si Media Commission an se moman i vwar ki i pa morde i merit fer propozisyon e propozisyon pozitiv e la i a ganny pourvwar si i merite pou sanksyonnen, donn fine, sispansyan licence ouswa pran licence si zot vwar sa i an defo, me tousala an negosiasyon avek bann partener prensipal dan Gouvernman.

Mr Deputy Speaker sa i senpleman serten propozisyon.  Gard an tet ki Sesel i en zenn demokrasi e nou Konstitisyon i annan freedom of expression.  Avek en lalis limitasyon byen dirize.  Avek sa bref entervansyon Mr Deputy mon rest my case e mon siport sa Mosyon.  Mersi.

 

MR DEPUTY SPEAKER

Onorab Pierre

 

HON DAVID PIERRE

Mersi Mr Deputy. Mr Deputy Speaker sa Mosyon ki devan nou ozordi set en Mosyon ki mon pou definitivman siporte.  Sa Mosyon i annan son merit akoz ozordi dan sa pei i kler ki i annan bokou ki practice sa trade journalism dan en fason ki pa responsab, I annan bann ki deliberaman e malisyezman denigre lezot pou bann rezon personnel, i anann bann ki servi medya koman en zouti pou olye edike, pou olye pas lenformasyon ki korek, pou olye shape the thinking oubyen lopinyon piblik lo en size ki anmenn benefis nasyonnal oubyen benefis pou sa endividi i servi li tou lekontrer pou sey detri, pou sey servi sa endividi, pou sey shape the trend of thinking sa endividi kot i anmenn lamertim, i anmenn bann – I shape zot thinking, i donn zot en lopinyon ki fer ki zot vin anmer vizavi en endividi oubyen vizavi en group endiivdi dan sa pei.

Ler nou koz lo sa size toutmenm nou bezwen fer atansyon.  Mwan mon krwar dan lademokrasi, mon krwar dan laliberte lekpresyon, mon krwar ki nou Konstitisyon in donn nou serten drwa ki nou bezwen rezouir, i bann drwa enportan, i bann drwa ki fer fonksyonnen en demokrasi.  Parmi sa abnn drwa i nou drwa laliberte lapres, i nou drwa laliberte lekpresyon, i nou drwa pou nou ganny aske avek lenformasyon me lenformasyon ki byen, lenformasyon ki bon e lenformasyon ki korek.  So i enportan pou nou kre sa lanvironman kot bann ki practice sa trade i fer li avek responsabilite.  I egalman enportan pou nou koman bann lezislater fer sir ki atou repriz laliberte lekpresyon en endividi i egalman ganny sof garde.  So i annan en very fine line ki nou bezwen swiv se la ki I enportan pou nou annan sa ki nou apel the Seychelles Media Commission.  E si nou pou annan en Seychelles Media Commission i bezwen enn ki for, enn ki responsab e enn ki kapab zwe son rol dan en fason efektif e enn ki lalwa ki anba lalwa i annan sa ledan, i annan sa kapasite pou li mord dan en fason vreman for dan bann lenstans kot i devret pe morde.

Seychelles Media Commission ti ganny kree le 30 Desanm 2010 par en Act ki parlman isi Sesel ti pase.  Sa Komisyon i annan son bann manm an prensip i devret annan 7 manm kot aktyelman i annan zis 6 e i annan en rezon akoz i annan zis 6, infact bann manm sa komisyon ti ganny apwente le 27 Zanvye 2011.  Sa Komisyon in deza komans fer serten travay.  Eski sa bann travay i ase oubyen eski sa bann travay i alaoter?  Sa i en lot size me selman rikord i demontre ki serten travay par sa Komisyon in ganny fer – annefe lannen pase sa Komsiyon dapre sa ki mon konpran in deal avek plizyer konplent, in deal avek 8 konplent ladan ti annan 3 ki verbal e larestan ti bann konplent ekrir.

Mr Deputy Speaker sa Komisyon in etablir son vizyon.  Baze lo son vizyon mon krwar i annan en kantite si vreman i pou swiv son vizyon i annan en kantite ki i devret pe fer.  Son vizyon se mon ava lir to be recognized as the leading body upholding the citizens right to accurate and truthful information and protecting them from malicious and defermatory actions from the press while at the same time championing the cause of press freedom and responsible journalism.  Si sa i son vizyon sa i fantastic.  Alors sa ki nou pe vwar arive dan sa pei ozordi i donn nou en lendikasyon ki sa Komisyon i devret pe travay an relasyon avek son vizyon pou li zisteman kapab deal avek bann tel sitiasyon.  Ler par egzanp ou vwar en papye, ou vwar en zournal ki servi en zanfan anba laz pou denigre en lot endividi sa Mr Deputy Speaker i devret ganny deal avek efektivman e The Media Commission i devret annan sa zouti, i devret annan sa kapasite, i devret annan sa mekanizm pou li kapab deal efektivman avek en tel sitiasyon.

Ler ou vwar en endividi i mont lo internet oubyen i mont lo facebook e i prodwir bann portre ki gannt servi pou denigre portre en endividi, ki ganny servi pou denigre pou zistifye akoz en lot endividi pa devret pe ganny en pozisyon dan sosyete sa Mr Deputy i fer lapenn.  Mon krwar se la kot the Media Commission i devret fleks son muscle e travay e fer sir ki sa bann tel lensidan i ganny deal avek, deal avek efektivman.  Si i santi poudir i napa ase muscle i zot responsabilite pou zot rode e demande, si i santi ki pou li fer son travay lo sa nivo efektiv parey lasosyete i demande, parey lasosyete i egzize then i bezwen anvoy lavwa e rode sa bann resours.

Mr Deputy son misyon parey i ekrir i enn ki enteresan.  The mission of the Seychelles Media Commission is to preserv the freedom of the media, improve and maintain standards of journalism in Seychelles, require publishers of news paper, radio, and television broadcasters, news agencies and journalist to respect human dignity. Freedom from discrimination on any grounds except as are necessary in a democratic society and to maintain high standards of intergrity and good taste. Tou sa bann keksoz ki dan misyon the Seychelles Media Commission i kontrer avek sa ki pe arive e sa ki pe ganny practice par bokou zournalis dan sa pei.  Kote alors ki the Seychelles Media Commission i annan problem?  Akoz ki i pa pe a sa moman letan la act dan lafason ki piblik Seselwa i ekspekte li act?  Akoz i pa pe defann?  Akoz i pa pe fer sir ki respect for human dignity i relye dan sa pei an relasyon avek lafason ki bann zournalis i fonksyonnen?

Mr Deputy Speaker mon krwar ki i pou enportan pou the Seychelles Media Commission defann son lekor, annou donn li sa loportinite pou li defann son lekor, pou li tell us, pou li dir avek nou akoz ki the Commission pa pe reazir lo sa nivo ki nou nou ekspekte li reazir.  Mon konnen Mr Deputy ki an prensip zot ti annan en progranm travay me akoz ki sa progranm travay pa’n ganny realize?  Parey mon pe dir the Seychelles Media Commission ti’n ganny sa manda pou li zisteman fer e propoz en code of conduct ki loter Mosyon pe demande.  Akoz ki sa pa’n arrive?  Omwen i ti’n devret arive.  Mon egalman konpran mon egalman monn tande, monn aprann pou dir ki dapre sa act Mr Deputy les mwan al lo la (2c) in dir ki i devret formulate in consultation with the Seychelles Media Accociation a code of conduct for publishers of news papers, radio and television broadcasters eksetera eksetra.  Monn aprann ki the Seychelles Media Assoiciation pankor ganny constituted legally.  Si i annan en keksoz ki nou dan sa Lasanble nou kapab fer pou fer sir ki sa i ganny constituted tell us nou pou fer li, akoz sa size i en size enportan, i en size ki pe afekte nou sosyete, i en size ki pe allow en kantite dimoun pou practice journalism lo en nivo kot zot zis malisyezman denigre lezot.

Mr Deputy mon repete mon pa en dimoun ki krwar ki lasosyete i devret si oule anpes annan laliberte lapres, laliberte lekspresyon dan sa pei, sa mon pou repete e mon pou dir ankor ki i bezwen ganny sof garde a tou reprizm.  Sa ki nou pe dir sa lavwa ki sa Lasanble pe anvoye i se ki sa i bezwen ganny fer avek respe – respect for human dignity e mwan mon pe dir mon pe lans en challenge avek the Seychelles Media Commission pou li asize e vwar tou bann imperdiments ki pe anpes li fonksyonnen parey i devret fonksyonnen e fer sir ki kot i annan en bout ladan ki Lasanble Nasyonal i kapab zwe en rol pou tir sa impediment anvoy kot nou nou ava tire, akoz nou nou anvi war enn nou anvi vwar en Seychelles Media Commission ki annan ledan.  Si the Seychelles Media Commission i feel par egzanp ki i devret annan plis power pou li fine, pou li sispann licence, pou li revoke licence e I santi pou dir i napa – si sa bann lobstak i egziste e sa Lasanble Naysonal I sa landrwa ki pou tir sa bann lobstak fer proposal anvoy kot nou e nou nou ava fer sir ki Seychelles Media Commission i ganny sa ledan pou li kapab fanksyonnen.

Onorab Vengadasamy in refer sosrti en pwen kle, en pwen kler, in koz lo FPAC, in dir nou poudir se larzan piblik ki ganny servi pou finance the Seychelles Media Commission.  Mwan mon pe dir pou dir a nenport ki moman kot nou santi ki i annan sa nesesite pou nou enquire nou pou fer li akoz nou nou la FPAC i la pou li fer sir ki larzan piblik i ganny byen depanse.  Me sa ki mwan mon pe dir vizavi sa Commission parey Onorab Vengadasamy in dir fodre ki i leve, fodre ki i sekwe li, fodre ki i anvoy lavwa, fodre i dir nou kote ki son lanmen i anmare nou kot nou kapab nou a delarg son lanmen e letan nou delarg son lanmen nou ekspekte vwar e nou pou anvi trouve ki sa Commission I fer en travay ki efektiv – akoz moman in arive pou nou reazir, si nou pa reazir la, si nou pa fer li la, si nou pa met en lord la tout parey monn dir anprezervan nou bann drwa fondamantal vizavi laliberte lekspresyon i pou kapab too little too late.  Mersi Mr Deputy.

 

MR DEPUTY SPEAKER

Onorab Rose.

 

HON MARIE ANTOINETTE ROSE.

Mersi Mr Deputy.  Mr Deputy mon welcome prezans bann manm Media Commission dan gallery e mon apresye lentere partikilye ki zot annan dan sa mosyon apremidi.  En Mosyon ki tou zisteman travay ki zot pe fer, i en Mosyon avek bon lentansyon e osi avek bokou bokou propozisyon ki sorti lo kote mazoriter e osi lo kote Lopozisyon ki zot merit seryezman pran an konsiderasyon.

Mr Deputy sa Msoyon devan nou i pe ganny debat, in ganny table le 3 Avril – 1 mwan zour pou zour pou nou ariv le 3 May e le 3 May lemonn antye i selebre World Press Freedom Day,.  I en moman, i tonm apropriye akoz mon krwar ler le 3 May i arive Sesel koman en pei i devret pronons li tre kler e enn fwa pou tou tir okenn dout Lopozisyon Sesel an sa ki konsern laliberte lekspresyon e prezervasyon laliberte lekspresyon en santiman ki’n ganny echo par bann manm lo kote mazoriter e osi Leader Lopozisyon.

Mr Deputy ki size ki nou pe koz lo la apremidi?  Nou pe kzo lo laliberte lekspresyon dan en pti pei, en pei sivilize e letablisman en kod kondwit ki akseptab e rekomandab pou nenport ki sosyete.  Kestyon ki nou pe demande isi dan sa Lasanble se ki Media Commission in fer depi ki in ganny mandate par sa Lasanble pou komans en demars serye pou omwen etablir en baz pratik ki akseptab pou tou medya dan pei enkli bann nouvo medya setadir bann endividi ki angaz zot dan medya, citizen journalist parey nou apele e osi bann blogs ki difiz bann lenformasyon elekronikman.

Mr Deputy, 1an i fer 1an, en lannen depi ki Media Commission in ganny kree e ziska prezan piblik Seslewa pa ankor konnen a mon avi pa’n trouv okenn dokiman piblik pou nou konnen ki Seychelles Media Commission in fer dan sa direksyon.  Reelman sa Mosyon ki devan nou pe evok drwa Lasanble lo nou rol oversight ki garanti anba nou Standing Orders pou nou fer sir ki bann lazans e lorganizasyon piblik i reelman servi byen nou piblik e nou isi nou defann zisteman lentere piblik dan sa Lasanble, nou pa defann okenn lentere an partikilye me lentere piblik.  Mr Deputy Speaker sa pa vedir ki nou isi dan sa Lasanble nou pa konpran bann kontrent ki okenn lazans enkli Media Commission i annan.  Kontrent bidzeter, kontrent resours imen, revizyon lalwa petet, revizyon bann pourvwar ki Media Commission i bezwen tousala nou konpran tre byen, but that is beside the point of the Motion Mr Deputy.  Sa pa size deba ozordi e dayer tou bann kontrent i bann kontrent ki tou lorganizasyon Gouvernman e prive i fer fas avek lo en baz toulezour, e sa i en keksoz normal.  Larzan zanmen pou ase, resours imen zanmen pou ase me sa pa merit anpes nou pran linisiyativ e komans prepar en baz enportan pou sa pli gro travay ki Media Commission i annan devan li.  Labaz se letablisman en kod etik e ledikasyon nou pep dan sa direksyon e se egzakteman sa ki Msoyon pe demande apremidi.

Mr Deputy i enportan nou fer detrwa pwen tre kler e mon pran zisteman kot Leader Lopozisyon in fini e lezot manm avan li.  Sa Mosyon i anfaver the free press, sa Mosyon i al dan direksyon laliberte lekspresyon, laliberte lapres garanti anba nou Konstitisyon e pratike par bann lalwa dan pei enkli lalwa etablir an Novanm 2010 pou gid Seychelles Media Commission.  Sa Mosyon ozordi pa pe demande ki nou aret dimoun eksprim zot libreman dan sa pei en kekesoz ki’n ganny fer plennman, en keksoz ki ganny fer byen dan Sesel e en pratik ki pe ogmante de zour an zour sirtou avek larive internet e lenformasyon elektronik kot lenformasyoni al bokou pli vit, i ganny difize bokou pli vit, bokou pli efikas e I annan bokou pli gran lenpak avek en popilasyon ki elektronikman entelizan dan Sesel.  E avek larive fiber optic sa lannen sa pou annan en pli gran lanpler dan nou pei e annou mazinnen ki Sesel i zisteman en pti pei so i bezwen annan parey nou fer dan lanvironman en impact assessment lo kimannyer lenformasyon Sesel i ganny difize, kimannyer move lenformasyon i ganny difize e ki potansyel sa i annan pou en pti pei parey Sesel.  So mon krwar lo rikord i bon nou fer tre kler this Motion is not attacking the freepress in fact is very much in favour of the free press me mon krwar ler nou koz lo free press e tou dimoun i konn sa enkli bann manm lo Seychelles Media Commission i bezwen annan en labaz to the free press i parey tou drwa fondamantal ki’n annan dan pei, i parey tou lalwa ki nou annan i bezwen annan en baz fondamantal e sa se en kod etik pou bann zournalis – taler mon a koz en pti pe plis lo la e en kod kondwit ki dir avek tou dimoun, tou bann players dan medya vwala kimannyer game i ganny zwe e Seychelles Media Commission i sa refree ki souffle souflet parey Onorab Bresson in dir, i dir tyonbo en kou la i annan en foul oubyen game kontinnyen en pti tackle pa fer narnyen game i kontinnyen pou allow the game to go on.

Mr Deputy ozordi Sesel in ler pou nou osi koz lo bann dimoun ki napa lavwa pou koz lo zot lekor.  In ler pou nou koz lo non bann dimoun, bann endividi ki napa en portvwa ki napa en zournal par deryer li ki I napa akse avek SBC, ki I napa en blog – ki napa en page spesyal, ki napa internet me sa endividi li i annan detrwa drwa fondamantal, son drwa privacy par egzanp pou nou prezerv drwa lendividi akoz ozordi dan Sesel the free press kantite rights – napa problem, nou napa problem avek sa bann rightsBut what happens to the individual ki li because of irresponsible journalism, bann zournalis ki iresponsab oubyen bann endividi ki pa konpran, bann kod kondwit ki merit ganny mete devan li ki arive avek sa endividi li ki ganny seryezman afekte, ki arive avek bann zanfan ki al lo internet – drwa bann zanfan ki ganny ekspoze avek nenport ki kalite deba.  Ki arive avek bann dimoun parey Onorab Leader Lopozisyon in dir ki lespri i feb e ki ganny manipile negativman atraver move kalite lapres?  I bann drwa fondamantal bann endividi ki nou bezwen seryezman get ladan e dir tyonbo en kou Sesel nou annan 85 mil dimoun, ladan i annan tel kantite zanfan tel kantite madanm e sa bann dimoun i annan bann drwa fondamantal ki nou bezwen proteze mon krwar zisteman ozordi apremidi dan sa Lasanble nou pe remet sa deba devan e parey Onorab Vengadasamy in dir wi nou fatige koz lo la e nou kontinnyen e sa I zisteman evok nou rol oversight ki nou annan pou fer dir ki nou kontinnyen koze, koze e koze e met devan and take certain agencies to task pou zot reelman fer sir ki travay pe ganny fer e ki i annan en lankadreman ki byen, ki of good taste parey nou dir pou bon pratik laliberte lapres.

Mr Deputy mon osi bezwen fer sir ki mon remet sa Mosyon en pti pe lo perspektiv, nou nou konnen ki tou zournalis ki’n al dan lekol zournalis, ki’n ganny byen formen I konnen ki si sa en kod etik, ou zournalis i konnen me ozordi i annan bann dimoun ki pa’n pas dan lekol zournalis ki pe fer sa travay, petet zot pa konnen oubyen petet zot konnen me zot deside pa obzerve me nou osi annan en growing number of citizens ki pe zouir zot drwa laliberte ki fantastik mwan mon napa problenm avek sa, me ki bezwen ganny edike lo en kod etik.  Me aprezan i annan en diferans ant en kod etik ek en kod kondwit.  En kod etik se bann gran prensip etik ki gid lapratik zournalizm, bann gran prensip sakre ki nou pa devret touse me en kod kondwit i dir ou la la kimannyer zwe i ganny zwe lo laplenn e se sa ki Mosyon pe demande, mon krwar i enportan nou fer diferans avek en kod etik en zournalis ki bann gran prensip ki dir ou dan foutbol i annan bann gran prensip i parey me en kod kondwit i zisteman donn sa refri bann guidelines lo kimannyer zwe i ganny zwe.

Mr Deputy mon ti a kontan take detrwa pwen ki Leader Lopozizsyon in met devan.  In dir par egzanp ki Seychelles Media Commission in deal avek detrwa ka.  Fantastik – mon napa problenm me la pou mwan i poz en kestyon fondamantal e kimannyer Seychelles Media Commission i kapab blow the whsitle oubyen pratik 8 ka mon krwar in pronons li lo la san en kod kondwit.  How can this happen?  Lo ki baz en Seychelles Media Commission i kapab ozordi si i dir ou i napa en kod kondwit pou mwan i poz en problenm fondamantal e annfe pou mwan i poz en problenm serye to the free press si i annan serten zournal ki pe ganny sanksyonnen oubyen pe ganny led dan labsans zisteman en kod kondwit.  E pou mwan mon krwar it’s a wrong way to go about dealing with that issue.  E in osi dir ki sa Komisyon i annan en vizyon, in esplik nou vizyon e pou mwan vwala en lot problem.  Si sa Komisyon i annan en vizyon be dir nou, dir piblik Seselwa la la mon vizyon.  Kote sa piblik Seselwa ki nou isi nou prezerv son draw, ki nou isi nou tou nou dakor ki son drwa i sakre e nou koz lo son non, nou koz lo li, nou koz pou li toulezour dan sa Lasanble kote sa piblik li i konnen ki sa vizyon, kote sa piblik i konn en kod kondwit, kote sa piblik i aprann about the Seychelles Media Commission ki zisteman reelman dan lalwa ki ti ganny etablir ti dir zisteman enn son bann rol se pou edik lepep Seselwa lo laliberte lapres, lo zot drwa e osi lo zot responsabilite.

Mr Deputy i parey lalwa Seychelles Media Commission i pa diferan avek nenport ki lezot lalwa e drwa bann endividi e drwa laliberte lapres i pa diferan avek okenn lezot draw.  Parey dan sistenm Zidisyer en keksoz pa selman merit pe ganny fer but to be seen to be done and to be seen to be working. E at the moment is the absence of lenformasyon piblik kot piblik pa konnen ki pe arive e nou nou pe zisteman koz lo non piblik.

Mr Deputy mon konnen sa dokiman ki Leader Lopozisyon i reelman in fer son travay resers, mon osi mon annan sa dokiman me sa dokiman pa devret vin zis pou konsomasyon nou Lasanble, bann manm elekte a privilege few e mon pa krwar ladan.  Mon krwar sa dokiman – i annan en website?  Met li lo sa website.  In kree en website?  Met li pou tou dimoun konnen e mon krwar sa i problenm fondamantal ki nou annan ozordi e Mosyon ki Onorab Pillay in met devan it is not good enough zis pou asize 1an poudir vwala nou’n fer sa, nou’n fer sa, fantastik mon napa problenm avek sa me nou bezwen ariv lo en nivo dan nou pei kot nou pe rann kont nou piblik e sa i sorti tre for parmi tou bann manm ki’n koze – rann kont nou piblik, vin devan.  Si zot annan lezot kontrent mon napa problenm nou dir nou ki nou kapab fer parey Leader Lopzisyon in dir, dir nou ki nou kapab fer pou ede zot but pa asize 1an e piblik pa tann narnyen, nou pa konn narnyen ki pe arive e suddenly i anann en deba dan lo Lasanble lo la e mwan mon krwar ki Seychelles komite medya dan Lasanble i bezwen reelman zwe son rol pou fer sir ki nou non selman ki arive anterm medya dan Lasanble me ede promouvwar the free press in Seychelles an zeneral, ede siport bann lazans ki bezwen nou sipor e ed call bann to task si nou bezwen nou pe fer li dan lentere Sesel, dan lentere Seselwa e nou pe fer li with the best of intentions Mr Deputy e lo sa nivo mon welcome en unified approach par Lasanble lo sa size akoz nou konpran reelman ki sa Mosyon devan nou i pe siport the free press me i pe osi etabli en bon baz pratik, en kod kondwit enportan ki nou pei a sa pozisyon kot in arive dan son staz devlopman nou pa kapab bouz devan dan lapres si nou napa.

Mr Deputy avek sa mon welcome sipor tou bann manm lo sa Mosyon.  Mersi.

 

MR DEPUTY SPEAKER

Right of reply loter Mosyon mon envit Onorab Pillay.

HON SEBASTIEN PILLAY

Mersi bokou.  Mr Deputy Speaker.  Mr Deputy Speaker mon oule avan tou remersi tou bann entervenan lo sa Mosyon e pou welcome lapros ki zot in pran e siport ki zot pe donn sa Msoyon.  Tou an kontinnyen Mr Deputy Speaker mon krwar ki I osi enportan pou ki mon fer le pwen lo serten bann issues e bann konsern e bann diferan lopinyon ki’n ganny avanse, ki’n ganny souleve dan konteks pozisyon byen lentansyon sa Mosyon ozordi devan Lasanble.

Parey Onorab Leader Government Business in dir ki lenportans la i lo promouvwar lavantaz laliberte lekpresyon e lendepandans lapres tout an prenon kont responsabilite ki sa I vin avek, e ler nou koz lo responsabilite, nou koz lo bann fason fer, lo bann keksoz ki nou devret fer pou asire ki nou epanouir bann drwa fondamantal ki lezot sitwayen i annan dan lasosyete.

Mr Deputy Speaker ler mon regard deba lo sa Mosyon in fer masyon bokou bann eleman enportan ki nou bezwen konsidere sirtou par egzanp sa eleman kot i annan sa lenstriman legal, sa act ki vwar travay sa Komisyon, sa act ki regulate travay sa Komsiyon.  Mr Deputy sa act i kler i donn Media Commission provizyon pou li annan bann rekour administartif akoz i kapab attend advisory capacity pou li dir avek Gouvernman look this is what i need to make things work. I annan provizyon anba sa act pou li dir look vwala ki mon bezwen e menm parey Leader Lopozisyon in dir anmenn sa devan sa Lasanble si i neseser.  Me I osi tout an prenon kont Mr Deputy Speaker si nou pou koz lo capacity building nou bezwen osi vwar lafason ki nou’n apros travay ki’n pase depi ler nou’n met anplas Seychelles Media Commission e ozordi.  Nou vwar poudir i annan lapse somewhere e en lapse ki nou bezwen adrese.  Pou nou kapab adres sa i enportan ki nou anmenn tou bann key stakeholders ansanm e sa i kler akoz ozordi i annan lenstans kot lapres pe dir ou i pa ganny akse avek lenformasyon – be sertennman ou pa pou ganny aske avek lenformasyon si apre ou pou mal servi li, si napa en frame work dan ki ou bezwen prezant e dissimulate sa lenformasyon ki byen.  Mr Deputy nou’n vwar lenstans e epanouisman information technology e internet e bann blogs e bann diferan komanter ki ganny fer lo social network tousala nou bezwen regarde tre pros ki arive.  Ozordi nou vwar nou pei lans nou dan en renesans sosyal e renesans moral, nou vwar nou pe fer fas avek bann kalite behavior parmi nou bann zenn ki pe vin deplizanpli pa akseptab, alors kestyon ki nou bezwen demande fondamantalman e senserman se kote nou oule ale avek nou sosyete?  Si ozordi nou pe asize dan sa Lasanble parey Onorab Vengadasamy in fer sorti nou pe ankor enn fwa diskit lo en morso lezislasyon ki nou’n fer pase, ki annan son presep legal then we have a problenm somewhere e nou bezwen adres sa problenm.  Enforcement, lenplimantasyon sa bann presep legal ler in pas devan Lasanble i bezwen ganny fer dan en dele letan ki akseptab e parey Onorab Bresson i fer resorti si i pa akseptab dan konteks ki nou trouv nou lekor ozordi nou bezwen move pli devan e trouv bann mwayen oubyen prezant bann lide lo kimannyer nou kapab fer li marse dan en konteks pli modern.  Me lesansyel i lo nou bezwen fer li marse.

Mr Deputy koman en paran mon konsernen.  Mon konsernen ki demen mon zanfan pou al lo internet i pou ganny aske avek en blog, i pou ouver sa blog e i pou vwar portre, i pou vwar bann propo, i pou vwar bann komanter ki denigatrwar, ki pa apropriye.  Mon krwar menm pa ki sa dimoun ki’n ekrir sa blog limenm li i pa pou les son piti ganny akse avek sa bann keksoz.  Alors pou ki rezon alor ki piti lezot dimoun, ki zanfan lezot dimoun i devret pe ganny akse avek sa bann tel zafer?  Pou ki rezon?  Koman en ansyen ansennyan mon rol dan en lekol sete pou asire ki mon enkilke valer moral bann etidyan e ki ler zot sorti zot sorti plis avek sa ki zot ti antre e nou annan en rol koman Lasanble pou asire ki nou sosyete ozordi ek nou sosyete demen i grandi kot i konsern bann valer fondamantal, annou pa perdi bann keksoz ki fer nou fondamantalman Seselwa, bann valer enportan, respe, moralite akoz this is where we are going now e lapres lefe ki mon krwar parey enn mon koleg in dir i katriyenm pilye nou demokrasi, nou bezwen davantaz garanti son lendepandans, nou bezwen davantaz garanti lakes formasyon nou pep me tou an prenon kont responsabilite ki sa I vin avek e lafason ki nou servi sa lenformasyon, lafason ki nou prezant sa lenformasyon avek nou pep.  E si nou pa fer sa then we seriously have a problenm somewhere.

Ozordi sa Mosyon pe demann met en kod kondwit, mon konnen ki i pou en prosesis, i pa en keksoz ki ariv di zour ou lannmen me nou bezwen angaz li, nou pa kapab esper en lot lenstitisyon ki annan oversight pou dir nou bezwen fer sa, nou bezwen fer sa, nou bezwen fer sa.  Nou bezwen annan en responsabilite entern pou act lo en mandate once nou’n ganny li, si nou pa kapab nou bezwen dir look nou pa kapab fer li akoz vwala ki mon manke, vwala ki mon bezwen.  Se sa lesansyel lefikasite, se sa fer keksoz diferan e pli byen pou Sesel.

Mr Deputy avek sa mon welcome parey monn dir lentervansyon tou bann manm Onorab lo sa Mosyon e mon osi welcome zot sipor.  Mersi bokou.

 

MR DEPUTY SPEAKER

Bon, avek sa in ler pou nou pran en vot.  Tou bann ki anfaver sa Mosyon lev zot lanmen.  Inanim.  Bon nou pou termin la pou ozordi e nou ava rezwenn le 17Avril.

 

(Adjournment)