::
Home » Verbatim » Verbatim -Second Term 2011 » Tuesday 7th June 2011

Tuesday 7th June 2011

Download PDF


NATIONAL ASSEMBLY

OF SEYCHELLES

Tuesday 7th June 2011

The Assembly met at 9 am

National Anthem

Moment of Reflection

Mr Speaker in the Chair

 

MR SPEAKER

Bonzour Vis Prezidan, bonzour tou bann Manm Lasanble Nasyonal prezan. Ozordi nou pe rankontre pou nou pran nou Supplementary Appropriation Bill me avan ki nou fer Second Reading nou ava pran 3 premye First Reading.

DPUTY CLERK

This Act may be cited as the Tertiary Education Act 2011.

This Act may be cited as the Revenue Administration (Amendment) Act 2011.

This Act may be cited as the Supplementary Appropriation Act 2011.

MR SPEAKER

Pou nou kapab pran Supplementary Appropriation Bill second reading i pou neseser ki nou sispann 7 days requirement, mon a ganny en mosyon pou sa silvouple.

 

 

 

 

HON MARIE LOUISE POTTER

Mersi Mr Speaker. Bonzour tou manm Onorab e tou bann ki pe ekoute.

 

Mr. Speaker mon move anba Order 91 (1) ki nou suspend order 65 pou allow nou pou pran sa second reading prior to 7 days notice ki sa menm order i preskrir.  Mersi bokou.

 

MR SPEAKER

Okenn ki segonde?

 

HON ANDRE POOL

Mr. Speaker mon pou segonn sa.

 

MR SPEAKER

Bon tou bann ki an faver ki nou sispann sa lev zot lanmen, pase.

Donk mon a ganny en mosyon for second reading.

HON MARIE LOUISE POTTER

Mr Speaker mon move ki Supplementary Appropriation Bill 2011 i ganny lir en 2enm fwa.

 

MR SPEAKER

Okenn ki segonde?

 

HON ANDRE POOL

Mr. Speaker mon pou segonde ki i ganny lir pou en 2enm fwa.

 

MR SPEAKER

Bon mon ava envit Minis pou entrodwir son Bill. Vis Prezidan.

 

 

 

VICE PRESIDENT MR DANNY FAURE

Msye Speaker, tou Manm Lasanble Nasyonal, bonzour. Msye Speaker depi Zanvye ziska mwan Me sa lannen, lanvironnman ekstern in enn ki difisil, nou’n vwar nou kot pri bann komodite debaz lo nivo marse enternasyonal in ogmante e i pe kontinyen ogmante, nou’n sibir lefe pri karbiran ki’n ogmante e ki pe kontinyen ogmante. Tou le de in annan lenpakt lo lekonomi Sesel me parey zot okouran gouvernman Prezidan Michel ti fer li neseser pou met anplas bann mekanizm ki kapab protez lekonomi Sesel e pep Seselwa. Nou’n osi temwany en eleksyon Prezidansyel ki tou dimoun ti konnen pou ganny fer an Me e eleksyon ti ganny fer le 21 Me sa lannen e nou tre kontan ki eleksyon in enn ki’n deroul byen dan lape e ki sa lekonomi Sesel in reste entakt.

 

Mon tre kontan pou mwan anons avek nou Lasanble Nasyonal ozordi ki target ver fen Me lo nivo rezerv pei ti 206 milyon dolar e ki Labank Santral in desot sa target e target ver fen Me i 225 milyon dolar. Mon osi, i fer mwan en plezir pou mwan anons e enform nou Lasanble Nasyonal ki target fiskal primary surplus balance, primer lafen Me ti 1.2% nou GDP e ki lafen Me nou pozisyon fiskal bidzeter i 5.2% GDP. Ki sa i vedir Mr Speaker? I vedir ki malgre ki pei in fer fas avek en levennman enportan parey eleksyon Prezidansyel, gouvernman Prezidan Michel in tenir labar fiscal, lekonomi in kontinyen performen e selwi ki pe dir ki gouvernman in fer bann depans ki pa ti neseser, sa bann sif i la pou demontre ki i pa korek, ki nou’n mentenir sa disiplin dan gouvernman a’n antye e sa mon krwar i tre byen. Ti en promes ki nou ti fer avek tou bann partener enternasyonal ki sa ti pou arive e mon tre kontan ki sa in ariv koumsa.

 

Lot lenformasyon, mon ti a kontan met lo rikord Mr Speaker ki napa okenn larzan piblik ki’n sorti dan bidze piblik ki’n ganny servi dan okenn fason pou enfliyans sa eleksyon ki ti ganny fer le 21 Me mon krwar sa i tre tre enportan pou nou piblik e sirtou sa Lasanble Nasyonal ki annan oversight depans bidze pei pou kapab konpran sa.

 

Donk Msye Speaker se lo en baz kot lekonomi Sesel pe fer byen, se labaz kot nivo target fiskal ki’n ganny attained par  pei pe fer byen, se lo sa baz kot rezerv polisi moneter pe fer byen ki gouvernman i vwar li neseser parey nou ti’n dir an Desanm lannen pase pou nou vin devan nou Lasanble Nasyonal pou nou vin rod laprouvasyon e mon vwar ki ozordi nou annan zis Parti mazoriter ki dan Lasanble Nasyonal, donk mon pe vin rod laprouvasyon avek Parti Mazoriter ki dan Lasanble Nasyonal pou vot ankor ennfwa parey zot abitye vote pou kapab donn nou, donn lepep, donn gouvernman, donn Prezidan Michel ek son gouvernman mwayen neseser, zouti neseser pou kapab kontinyen antreprann progranm pei. E sonm Msye Speaker ki nou pe vin rode se en sonm 235,789,087.39 Msye Speaker. Sa bidze siplemanter pe ganny prezante akoz parey mon’n dir nou’n annan sa lespas fiskal. Ler nou dir lespas fiskal setadir ki nou annan mwayen adisyonnel pou nou kapab servi an fonksyon depans priyoriter pei.

 

Donk sa sonm pou kouver saler, pou kouver parey nou dir bann goods, savedir bann byen ek bann servis pou osi kouver bann transfer dan sekter piblik. Anterm saler i annan en total 12.4 milyon roupi ki vedir ekivalan 5% sonm total ki pe ganny demande ki pou al pou peyman saler bann travayer e sa i koumsa, lapolis anlinny avek Progranm pou kontinyen re-aranz lapolis restriktir lapolis i annan recruitment ki’n ganny fer e la nou’n vwar ki i annan nou bann zenn ki’n fini zot letid ki osi in deside pou join lafors lapolis e ki zot in ganny en formasyon koman cadet e mon krwar sa i byen. E osi i annan 20 lezot ki’n ganny rekrite pou travay dan departman lapolis e ki i fer li en sonm R1,036,240.

 

Apre osi nou annan Departman Zafer Legal e parey zot konnen sa ti en size kot nou ti diskite. Pou zot lenformasyon i annan en kantite bann ka ki devan biro Atorni Zeneral e dan son diskisyon ki’n fer avek Prezidan Larepiblik i annan nesesite pou nou kapab donn li plis resours finansyel pou li kapab rekrit staff profesyonnel adisyonnel pou nou kapab fer sir ki nou annan en Departman Zafer Legal ki vin pli efektif e pli efikas. La i annan en sonm R1,594,998.

 

Apre nou annan gratwite pou travayer IOT. Parey zot konnen Prezidan ti fer en lanons kot dezormen nou pou annan nou en scheme ki pou fer li neseser ki bann travayer ki travay IOT zot osi pou ganny gratwite lo menm term parey bann travayer ki travay dan sekter gouvernman e pou nou kapab fer sa i enportan ki bann devidends ki sorti IOT, lafason ki nou tret li dan bann bidze i antre koman en reveni apre i ganny peye. E vwala lafason ki Minister Finans pe tret sa e mon tre kontan ki IOT in pey gouvernman son dividend a en sonm 27 milyon roupi e ki nou pe transfer en sonm 4.3 milyon e ki sa pou fer sir ki langazman ki gouvernman ti fer i ganny onore.

 

Biro taks, sa i en ka ki zot ti met dan mon latansyon pandan lannen pase e zot ti annan rezon. Minister Finans ti anvi vwar ki lafason ki nou tret konpansasyon pou bann travayer ki travay dan Customs e osi Departman Reveni i anlinny avek lalwa e lalwa i ganny byen respekte e parey zot konnen lalwa ti antre anfors an lannen 2009 e ki la ozordi Komisyon Reveni lafason i pe ganny fonksyonnen i otononm, donk savedir napa kontinite dan lanplwa tou sa bann staff ki ti travay laba. Savedir nou bezwen annan sa ki nou apel en koupir e lefe sa i ganny fer e lofis Atorni Zeneral i dir nou wi i devret ganny fer i parey zot konnen nou annan toultan en commitment avek travayer Seselwa ki zot bann dues i bezwen ganny byen peye e la i annan en sonm R4,998,749.87 ki pe ganny peye pou bann travayer ki travay dan sa departman.

 

An sa ki konsern Sekretaryat Lasanble Nasyonal, parey nou tou nou konnen i annan en Manm Proporsyonnel ki ti asiz lo kote Lopozisyon, li in deside fer son desizyon e son desizyon se ale me nou nou bezwen respekte bann peyman e nou’n an kontak avek biro Lasanble Nasyonal e i annan en sonm ki bezwen ganny peye an term bann gratwite ki ler okenn Onorab i deside kit Lasanble sa i bezwen ganny fer e la i annan en sonm ki pe ganny mete pou kouver sa e osi i annan en nesesite pou nou beef up parey Speaker i dir Parliamentary Reporting nou Lasanble. Donk tou le 2 ansanm i fer en total R429,321 sa i kouver depans dan saler.

 

La nou pou regard enpe bann depans lo bann byen ek bann servis e mon pe fer referans a en sonm 45.9 milyon roupi ki vedir 19% sa sonm total bidze siplemanter. E la nou pou vwar langazman gouvernman anlinny avek devlopman sports dan nou pei e osi anlinny pou nou kapab host Jeux des Iles ki pe vini e fer sir ki an sa ki konsern larzan nou reste korek Mr Speaker. La i annan en sonm 9.8 milyon roupi ki pe ganny demande. Sa i prensipalman pou bann lekipman, sa osi i kouver bann incentives ki nou bezwen e osi pou nou kapab ogmant incentives me anmenmtan met en scheme allowance ki pou kouver bann travayer ki petet i annan difikilte pou kapab ganny released e ki landrwa kot zot pe ganny anploye pa pou annan sa mwayen ouswa i annan retar pou pey zot e gouvernman i pa oule i annan sa retar. Antou i annan 281 atlet ki enplike dan sa lentrennman entansif Msye Speaker.

 

I annan 66 atlet ki pe ganny anploye par gouvernman e pou lekel gouvernman pou bezwen pey zot saler letan zot lo release. Apre i annan sa nouvo incentive ki la, i annan en logmantasyon e nouvo logmantasyon si nou bann atlet i fer tre, tre, tre byen e zot ganny lor, pou lor i annan R15,000 e si zot ganny silver R6,000 e selwi ki anmenn en bronz pou Sesel i ganny R3,000. Donk sa incentive scheme i enportan pou ankouraz nou bann atlet e nou pe dir avek nou bann atlet fer byen, nou pe back zot e nou pe back zot up avek sa incentives ki annan logmantasyon.

 

Apre Msye Speaker nou annan osi Departman Zafer Legal, la osi i annan nesesite pou nou donn zot 542.9 milyon roupi. Biro Prezidan parey zot konnen i annan bann depans ki liye avek bann depans adisyonnel ki pou kouver bann digniter etranze ki’n alinyen disi Desanm sa lannen e osi enn de bann levennman nasyonal.

 

Departman Lapolis nou pe rod en sonm 4.1 milyon roupi. Parey zot konnen i annan bann depans adisyonnel ki departman lapolis i bezwen ganny fer sa lannen osi e nou bezwen fer sir ki nivo sekirite pandan Zwe De Zil i ganny fer byen e ki lapolis i ganny byen ekipe pou kapab fer sa bann travay. Nou annan en reform zidisyer ki on going e i annan en high level komite ki pe ede e la osi i annan en sonm 4.1 milyon roupi ki’n ganny demande.

 

Lasanble Nasyonal; nou’n ganny enformen par lofis Mr Speaker la osi i annan bann komite ki bezwen enpe larzan adisyonnel.  I annan 274,800 roupi ki pe ganny demande. Servis tenny dife mon krwar zot tou zot ava tonm dakor ki servis tenny dife ozordi set en servis profesyonnel, set en servis ki pe travay anba en kantite risk e zot pe fer en gro travay pou Sesel e pou byennet Sesel. E la zot pe demann en sonm R980,000 pou maintenance e osi lezot lekipman.

 

Lazans Traspor lo later; la ankor nou pe ogmant zot bidze. Nou vwar li neseser pou nou kapab kontinyen avek progranm resurfacing ki nou bezwen fer, osi met lalimyer enpe partou swivan bann konplent ki bann MNAs in fer avek sa lazans.

 

Lazans Lanbelisman e Zestyon Salte la osi en sonm 7.4 milyon pe ganny demande. Parey zot konnen, scope of work e osi bann plizyer kontrakter ki’n ganny demande pou fer sa bann travay, sirtou sa bann travay pe ganny fer lo highway e vwala bann depans ki zistifye. Minister Finans, nou pe demann en sonm 9.8 milyon pou fer provizyon pou kapab kouver bann ayeraz lannen pase ki liye avek responsabilite pou kontinyen reste manm dan bann lorganizasyon milti-lateral tel ki labank mondyal, labank lafrik pou devlopman e fon moneter enternasyonal e osi lezot lazans.

 

Mr Speaker letan mon ti pe prezant bidze pou sa lannen, Minister Zafer Etranzer ti ankor an negosiasyon lo bann sonm ki nou bezwen pey bann membership e se pou sa rezon ki mon bezwen retourn devan zot ozordi pou rod laprouvasyon pou sa bann peyman. Anplis ki sa, en sonm 2,693,702 roupi pe ganny demande pou nou kapab arpant e fer survey lo later lagrikiltir ki zot bann Manm Lonorab mazoriter in koz fortman lo la.

 

Transfer dan sekter piblik; Msye Speaker en sonm 23,375,242 pe ganny demande pou transfer dan sekter piblik oubyen 9.9% sonm total. Konsey Nasyonal pou sport parey zot i konnen bezwen en sonm 4,604,548 roupi.  Sa osi ankor larzan ki pou nou kapab donn parey nou pe dir sa dernyen push dan preparasyon nou bann atlet e nou tou nou pe rod plis meday, plis meday, plis meday me plis meday lor pou Sesel.

 

Fon Sekirite Sosyal; parey zot ti dir mwan dan bidze i enportan ki nou fer sir ki nou diminyen labi ki nou fer sir ki nou annan en bon striktir monitoring e la gouvernman i devan zot pe demande ki nou annan larzan pou nou kapab fer sir ki nou beef up sa secretariat e ki nou anploy bann dimoun pou kapab fer sa travay e fer sir ki nou sistenm Home Care i enn ki bon, pa zis bon me vin pli bon.

 

SBC; SBC in apros Minister Finans, la ki Zwe De Zil pa tro lwen avek nou e zot bezwen komans prepar zot pou kapab kouver Zwe De Zil, zot ava rapel ki an Desanm nou ti vin devan Lasanble, la nou’n fini ganny bann lekipman me zot bezwen ankor enpe larzan pou kapab fer sir ki tou keksoz i a’n ord e parey zot konnen nou’n deside pou nou antre dan en nouvo Sesel me nou bezwen antre dan en nouvo Sesel in style, pa vre?

 

NDEA; NDEA set en lazans ki pe fer en bon travay e nou bezwen kontinyen donn li bann resours neseser pou li kapab fer sa travay ki pei pe demann li e Prezidan ti fer en promes avek pep Seselwa pou li ranforsi son travay, pou nou anmenn en konba avek problenm drog dan pei. Parey zot konnen nou annan en lazans e sa lazans i bezwen ganny ekipe, i bezwen ganny asiste pli byen e se pou sela ki nou pe rod en sonm 7,432,459 roupi.

 

Unit Lentelizans Finansyel, FIU, pe demann en sonm 5 milyon roupi, sa pou ed li dan preparasyon bann case sirtou i annan bann case isi lokal e osi bann case enternasyonal.

 

Lezot depans Mr Speaker; Konsey Nasyonal pou Lar 131,175 roupi. National Tender Board ki’n ganny en nouvo landrwa e nou bezwen pey bann rent 412,735 roupi. Procurement Oversight osi in sanz landrwa, i dan en lot biro dan Victoria, sa osi i annan 586,800 roupi. Konsey Nasyonal pou Zanfan 57 mil roupi. Biro Lenvestisman Sesel; parey zot konnen Sesel in fer expo 2020 ki set en bon proze pou pei e gouvernman in deside ki son Sekretaryat i ganny abzorbe par Biro Lenvestisman Sesel e ki nou fer sir ki napa diplikasyon par lezot lazans dan Sesel. E la nou annan ne sonm 200 mil roupi pou kapab ekip sa Sekretaryat pou ki zot kapab fer zot travay. La osi nou annan konsey Nasyonal Lazenes, nou pe rod en sonm 230 mil roupi e osi nou annan Fon Devlopman Praslin ki’n pran bann kontrakter ekstra pou kapab fer zot travay. I annan 675 mil roupi.

 

Lezot bann depans se en sonm 2,489,669.37 ki pe ganny demande pou donn gouvernman abilite pou ogmant son par dan bann labank. Parey zot konnen gouvernman i annan par dan Labank Lafrik pou Devlopman e osi nou aktif ozordi an sa ki konsern labank PTA. Sa pou donn gouvernman sa bagaz neseser letan i demann finansman pou son bann proze oubyen pou fasilit biznes prive isi optenir bann loans. Parey zot konnen Msye Speaker Lasanble Nasyonal ti aprouv 2.5 milyon roupi pou nou fer e organiz selebrasyon Lazournen Nasyonal e osi 35enm Laniverser Lendepandans me osi sa komite ti ganny demande pou li organiz Expo. Enpe sa larzan in al dan lorganizasyon Expo e nou pe vin devan zot la ozordi pou nou kapab ganny en sonm adisyonnel 1.5 milyon pou ki nou kapab fer nou 2 levennman. Nou osi pe rod en sonm 100 mil roupi pou nou kapab kouver en manm ki pe ganny anploye koman en konsiltan pou li ed Sesel dan bann reform dan sekter piblik.

 

Air Seychelles Msye Speaker parey zot tou zot konnen, Air Seychelles i annan en rol enportan. I annan ki ti dir ki le 22 May Air Seychelles pe ganny vann. Mon kontan ki mon’n retourn devan Lasanble Nasyonal. Mon ti ganny dir mon pa pou retournen be mon’n ganny dir, be mon kontan mon’n retournen pou mwan kapab donn zot bon nouvel ki Air Seychelles i ankor la e ki i pa zis ankor la me nou pe vin kot zot, kot Parti Lepep, parti mazoriter dan Lasanble. I enportan sa, retourn kot parti mazoriter, Parti Lepep pou nou trouv 100 milyon roupi pou nou kapab kontinyen ed nou Airine Air Seychelles e sa larzan apartir zilyet pou ganny servi pou kapab komans pey loan. Parey zot konnen nou ti pran en loan 225 milyon roupi pou kapab remet Air Seychelles lo sa laliny e mon kontan pou mwan dir ki i annan bann desizyon ki’n ganny fer, i annan bann negosiasyon, renegosiasyon ki’n ganny fer e tousala pou ed nou Air Seychelles. Donk sonm total ki pe ganny demande lo Air Seychelles i reprezant 42% sonm total ki nou pe demande isi.

 

E Mr Speaker ler nou ti prezant bidze pei nou ti dir ki i annan en sonm 100 milyon roupi ki pei i bezwen anterm fon stabilizasyon. Donk ler nou ti prezant bidze nou pa ti appropriate legalman. Savedir legalman nou pa kapab fer okenn spending me sa sonm in ganny entegre dan bidze pei e nou’n tonm dakor avek Fon Moneter Enternasyonal ki olye nou servi sa 100 milyon, nou rezerv 50 milyon e se sa 50 milyon ki mon pe vin devan Lasanble Nasyonal pou nou appropriate. E sa sonm i neseser pou nou kapab kouver bann depans. Parey mon pe dir i annan bann depans ki anvi bann sitiasyon ekstern, gas, pri karbiran ki enpakte lo PUC malgre ki PUC pa’n fer logmantasyon lo son bann pri delo, pri elektrisite, malgre ki’n napa okenn logmantasyon lo pri SPTC, malgre ki napa logmantasyon lo boutey gas ki nou bann dimoun i servi set en planifikasyon ki gouvernman Prezidan Michel in fer e ki ozordi nou pe demann avek Lasanble pou nou appropriate legalman 50 milyon ki sa pou ganny mete dan fon stabilizasyon avek bi fer bann depans.

 

Mr Speaker anvi ki progranm ekonomik Sesel i on track e ler mon pe dir sa mwan osi mon mindful ki Fon Moneter Enternasyonal zis yer in fer en press release e ki nou pou fer li piblik aparti ozordi ki konfirmen ki nou progranm i lo bon semen. Mon pe konfirm avek Lasanble Nasyonal ki nou bann target, nou’n meet nou bann target, i annan lespas fiscal, nou pe depans byen larzan leta Sesel, napa gaspiyaz Lonorab mazoriter. Nou ganny akize ki nou pe fer gaspiyaz, nou ganny akize ki nou pe donn bal dan larzan piblik.

Mon kapab konfirmen ki napa okenn bal, ok? Si i annan en bal se lepep ki ankor pe fete Msye Speaker. Lo sa not, mersi.

 

MR SPEAKER

Deba i ouver.  Okenn..? Onorab Potter.

 

HON. MARIE-LOUISE POTTER

Msye Speaker mersi bokou. Msye Speaker parey ou konnen semenn pase nou ti pas en mosyon pou aprouve ki Minis i vin devan Lasanble pou prezant en Proze delwa pou nou kapab apropriye 235.7 milyon roupi pou sa lannen koman parti midyear review ki limenm li i ti eksplike ler i ti prezant bidze Desanm lannen pase.

 

Mon kontan ki Minis in fer kler dan son prezantasyon ki sa apropriasyon napa okenn lyen, okenn koneksyon, e napa nanryen pou fer avek eleksyon ki’n fek ganny fer.  E bann depans e bann detay i demontre klerman.  Mon pankor vwar en Head la dan sa lalis ki devan mwan ki met depans eleksyon.  Mon vwar 4 gro Head prensipal, enn i al pou Wages and Salaries, e Wages and Salaries se larzan ki al dan pos travayer Seselwa e larzan ki al dan lekonomi.  Mon nwar en dezyenm Head; Goods and Services e Goods and Services sa se larzan ki retourn dan lekonomi, ki retourn dan sekter prive atraver bann servis ki gouvernman i aste avek sekter prive pou li kapab kontinyen fonksyonnen.  Mon vwar Transfers to Public Sector, e sa osi i larzan ki direkteman ou endirekteman i retourn dan lekonomi.  E mon vwar Head Others ki kouver plizyer Minister.  Sa osi, mon vwar Air Seychelles, Stabilisation Fund, Ministry of Finance. Mon pa vwar kote ki annan okenn Head ki pe koz lo depans eleksyon.  E menm si nou ti krwar le 21 Me nou ti pe dir byebye politik karya, politik karya i ankor pe sey debat pou kapab fann bann propagann e bann mansonz lo larzan lepep Seselwa.

 

Mr Speaker mon kontan ki Minis in osi enform nou Lasanble ki nou pe pas sa bidze siplemanter malgre ki end of May, tou lede nou target rezerv pei e nou target bidzeter i parlao, in depas sa ki ti’n ganny orizinalman targete.  E sa i montre ki nou pe fer sa laprouvasyon dan en lanvironnman ki above board, dan en lanvironnman kot i kler pou tou dimoun ki konn konte pou vwar ki napa okenn aryer panse, okenn rezon pou krwar ki nou pe fer anything ki pa a’nnord avek lalwa.

 

Msye Speaker si ou permet mwan mon a pas lo ennde selected items pou mwan eksprim mon sipor me anmenmtan pou mwan osi eksprim serten konsern.   Anba Wages and Salaries, nou kote, mazorite nou welcome sa 4.3 milyon roupi ki pe ganny apropriye pou pey bann travayer IOT zot gratwite.  Mon krwar sa size in ganny bokou debat dan sa Lasanble e a plizyer repriz nou’n tann en kantite komanter sorti lo kote lopozisyon.  E mon kontan ki ozordi se zis nou kote ki pe ganny sa responsabilite oubyen sa loner pou met an pratik en promes, en komitman ki nou nou ti demann gouvernman atraver plizyer mosyon e ki gouvernman in pran e ki ozordi nou pe a’n efe aprouv sa 4.3 milyon roupi pou permet bann travayer oubyen pou kouver bann gratwite ki bann travayer in gannyen.

 

Anba Goods and Services nou welcome sa apropriasyon ki pe ganny fer pou Indian Ocean Games.  Sa total preski 9 milyon roupi ki pe al pou an sipor pou preparasyon sa zwe.  E nou annan bokou lespwar e nou met tou nou swe, nou swete ki nou bann zenn atlet pou fer loner Sesel e pou vreman anmenn laviktwar pou Sesel pandan devlopman sa zwe.

 

E ankor ennfwa se nou lo kote mazorite ki pe aprouve, ki pe give effect to sa bann sipor ki nou demande e ki menm si lot kote osi i kontan koz lo sa bann size me ankor ennfwa zot pa la pou zot kapab demontre an pratik, a’n aksyon zot sipor pou sa zwe e pou nou bann zenn.

 

Anba Land Transport ki nou pe apropriye ankor 5.5 milyon roupi, nou konstate ki an Desanm nou ti donn Land Transport 54 milyon roupi pou fer bann reparasyon semen.  Mon krwar street lights tou ti enkli e mon kontan ki nou pe donn zot ankor 5.5 milyon roupi la pou ziska lafen lannen.  Menm si nou konstate ki dan tou nou bann distrik i ankor annan bann gro problenm semen, nou ankor annan problenm avek kalite, pa zis nou bann main roads me an partikilye bann semen segonder, bann semen ki al dan bann Housing Estates, bann feeder roads, bann semen ki petet pa tou dimoun ki vwar me i zis bann dimoun ki reste dan sa bann pti kominote, enn pti pe partou ki monte lo montanny oubyen ki desann.  Donk mon ti a kontan demann Land Transport pou dedye sa dezyenm 6 mwan lannen, antre dan sa bann pti semen e esey repare.  I annan bann ki vreman si nou pa fer nanryen la desito i pou ariv en staz kot zot vin beyond repair e nou bezwen refer zot antye.  E asosye avek problenm semen i annan en gro problenm drenaz.  Enpe partou, mon asire ki sa i afekte tou lezot distrik, me distrik ki mwan mon’n travay avek pli pre mon’n konstate ki nou annan en gro problenm drenaz e sa menm si malerezman nou pa pe ganny lapli pou le moman e ki pe koz en lot problenm, ler lapli i vini, sa bann mank drenaz i koz en lot kalite problenm avek bann dimoun ki sibir konsekans bann semen ki napa drenaz.

 

Alor mon ti a kontan demann Land Transport pou redouble zot zefor e ogmant zot kapasite akoz i kler ki Land Transport ozordi i pa vreman kapab fer fas avek sa kantite presyon lakantite demann ki sorti kot sa 25 distrik pou al lo en sel lazans.  E la ankor petet dan sa konteks, mon welcome lanons Prezidan pou desantraliz, pou donn plis lotonomi bann distrik, pou ki sa bann travay lokal, bann travay Kominoter i ava ganny desantralize e olye annan en sel lazans ki pe repar 2000 semen i ava annan bann desantralizasyon kot sak lotorite distrik i ava responsab, i ava ganny son bidze, i ava rod son kontrakter, i ava fer tou sa ki bezwen ganny fer pou kapab ennfwa pou tou maintain sa bann semen, bann pti semen segonder, bann feeder roads, bann estate roads, bann housing estate roads ki nou menm nou nou’n batir pou zot.

 

Mr Speaker anba National Tender Board e Procurement Oversight Unit, mon kontan konstate ki ankor ennfwa nou pe apropriye 412,000 e 586,000 respektivman pou sa 2 unit.  Me la ankor mon ti a kontan fer en pledwari pou ki sa bann prosedir tender, procurement, i ganny fer dan en lespas letan rezonnab e bann dimoun ki tender i ganny enformen ki pe arive ek zot tender e ki dan en lespas letan rezonnab la osi, akoz la osi nou annan pa mal konplent kot dimoun i dir ou in tender, sa ki tender toultan i menm dimoun ki gannyen, sepa kisisa, i annan trik ki pe pase.  Mwan mon ti a kontan demande ki sa prosedir parey nou nou’n aprouve, parey nou nou anvi i marse i ganny fer dan latransparans e ki tou bann pti kontrakter sakenn i ganny menm sans pou zot kapab obtain en kontra avek gouvernman.

 

Prezidan Michel in larg lanmen bann antreprener, in dir zot leve debourye, nou’n met a zot dispozisyon bann loan, zot in etablir zot pti konpani, zot pti kontra, zot pti isi, zot pti laba.  Alor annou fer sir ki nou pa anmar zot lanmen dan sa bann zafer tender board ek kontra, e annou evite ki bann menm menm dimoun – si sa i vre – annou evite ki bann kontra menm menm dimoun ki gannyen.

 

Mr Speaker anba Social Security Fund, sa osi mon siport sa nouvo alokasyon 2 milyon roupi ki pe ganny mete pou beefup sa scheme sipervizyon Homecare.  La osi, mon ti a kontan met en mo osi pou ranforsi lavites, konpasyon avek lekel nou deal avek bann ka lasistans welfare.  Nou ankor ganny konplent avek nou pep ki i annan bann ka ki petet pe sape, i annan bann ka ki pa pe ganny azir dan en dele.  Prezidan Michel in deza dir ki en demann pou welfare pa devret pran plis ki 3 zour pou omwen sa dimoun ganny rezilta.  Me nou ankor annan dimoun ki vin kot nou apre 2 semenn, 3 semenn, i dir ou in apply i pankor tann nanryen, pa isi, pa laba.

 

Msye Speaker sa eleksyon ki nou’n fek pas ladan, lepep in donn Prezidan Michel en mazorite kler.  E Servis Piblik e tou bann lorganizasyon gouvernman i bezwen bear that in mind.  Zot bezwen, enkli mwan, nou tou, nou bezwen realize ki nou nou la pou servi lepep Seselwa, nou nou la pou fer sir ki nou pa fristre nou pep.  Nou ki la dan Lasanble nou konnen kantite larzan ki nou vote tou lezan, tou le 2 fwa par an, sak fwa i annan bidze siplemanter.  Nou konnen.  E ler en manm piblik i vin kot nou i dir nou in al laba i pa’n ganny sa, in dir li sa, sa in anpay li, pou nou i fristre nou.  E mon ti a kontan dir avek Servis Piblik ki isi dan sa Lasanble nou louvraz se met presyon lo zot pou zot delivre pou lepep Seselwa.  E ler zot delivre pou lepep Seselwa, nou pep i viv pli byen, nou pep i avans pli byen, nou pei i devlop pli byen, napa laenn, napa diskord, napa konplikasyon dan lafason ki nou zer nou bann resours e nou zer nou pei.  It’s a win win situation e lepep pa pou konplent kont zot si zot pe delivre lo bann progranm e lo bann finansman ki gouvernman pe met a zot dispozisyon.

 

Finalman Msye Speaker, mon ti koz lo la semenn pase, Air Seychelles; Nou kontan ki ankor ennfwa gouvernman pe finans Air Seychelles pou kapab mentenir li.  Nou kontan ki Air Seychelles pe montre nou ki i pe tenir, i annan sa kapasite pou li kapab sirmont son bann defi avek sa bann sipor ki gouvernman pe donnen, e nou kontan ki se nou ki pe pran sa responsabilite nou tousel pou nou kapab asire ki nou asir sekirite nou bann travayer Air Seychelles.

 

An sa ki konsern Stabilisation Fund, sa osi nou kontan ki malgre i annan bokou koze lo koudlavi, lo pri, lo lenpakt ki bann lefe eksteryer i annan lo nou nivo lavi Sesel, nou kontan ki se nou ki pe pran sa responsabilite pou met sa fon pou kapab mitigate against bann logmantasyon ki’n annan e ki pou kontinyen annan dan pri petrol e ki an retour in met presyon bidzete lo bann fanmiy Seselwa.

 

Mr Speaker parey mon’n dir, nou isi dan sa Lasanble nou annan en louvraz pou nou fer, nou pou reponn, nou pou onor nou responsabilite.  E se pou sa rezon lepep in retourn nou la malgre ti annan bokou koze konmkwa nou pa pou retourn la, me la ozordi lepep Seselwa in vwar lekel ki pa’n retournen, oubyen lekel ki plito ankor pe kasyet.  E mon kontan ki lepep Seselwa in fer sa swa, e mon ti a kontan dir ki malgre nou’n ganny akize ki nou’n aste lepep Seselwa, parey mon ti dir semenn pase e SBC ti conveniently omit sa bout, mon ti a kontan dir ki lepep Seselwa e repete, is not for sale, has never been for sale e lepep Seselwa cannot be bought.  Mersi bokou Msye Speaker.

 

HON CHARLES DE COMMARMOND

Msye Speaker mersi bokou. Bonzour toulmonn ki pe ekout mwan. Bonzour Vis Prezidan.

 

Msye Speaker mon profite mwan pou mwan kapab pas en pwen sipor a sa bidze siplemanter ki pe ganny prezant devan nou. Bokou in ganny dir, e parey labitid mon bezwen osi mwan fer mon pwen ale, avanse. Mon pwen i dan 2 sans, enn siport sa ki gouvernman pe fer, pe met devan nou. Dezyenmman osi pou osi pou met serten kritik ki neseser ganny mete.

 

Mwan atraver sa bidze siplemanter mon vwar ki Sesel pe kontinyen avanse, Sesel pe kontinyen bouze, e dan bon direksyon e sa i ankourazan. Se pour sa rezon ki ou vwar nou parti in ganny retournen dan sa Lasanble, e ki nou Prezidan in ganny elekte avek sa gran mazorite.

 

Letan nou kalkile Mr Speaker, lannen pase, letan bidze lafen lannen ti pe ganny anonse, Vis Prezidan, Minis Finans ti fer kler avek nou Lasanble ki nou pou bezwen retourn dan sa Lasanble pou nou vwar sa ki nou apel son midyear review lo sa bidze.

 

Sa malgre tou bann latak konmsi ki ti pe ganny anmennen par Lopozisyon sa letan pou dir nou pa konnen ki nou pe fer ensidswit, be nou ti byen kalkile nou akoz nou dan en reform, reform pa ankor fini, nou pa kapab zis ale fer bidze bonn a vini, nou bezwen donn sans pou revwar zisteman, aziste kot fodre aziste, sanze kot fodre sanze. Se sa mesaz ki Prezidan an fen kont ti anvoye lannen pase, okomansman lannen osi letan in ouver nou Lasanble.

 

So i kler pour nou ki nou dan sa bon direksyon. Lenformasyon ki nou annan devan nou osi i montre ki nou annan en sirplis bidzeter. Mwan pase, Avril mon oule dir,  2 mwan pase, Avril nou performans ti ape pre 2.4 parlao nou target. Sa mwan la, Me nou ankor plis ki 4% parlao target. Savedir i montre ki nou pe fer progre, e tou sa malgre nou pas dan eleksyon. Si i montre ou ki i annan en kantite sanzman ki’n arive dan nou gouvernman, dan Minister Finans ki pe anmenn sa bon disiplin fiskal. Osi bann dimoun ki pe sirvey nou reform IMF, World Bank, pa krwar i ti pou zis les nou anmenn en bidze siplemanter la, aziste sa ki nou pe fer zis koumsa. Si nou ti pe mal fer i ti pou dir nou. Ti pou dir, kominote enternasyonal. Sa mon pe dir dan le sans pou donn sa konfyans lepep Seselwa, sirtou sa pti boug Cascade la ki pe ekoute mwan pou konpran poudir sa parti, sa Gouvernman i anmenn keksoz dan bon direksyon e ki i enportan ki i osi i swiv ki pe arive pourki i donn son sipor dan sa ki nou pe fer.

 

Mr Speaker mon vwar en kantite pwen, en kantite keksoz dan sa bidze siplemanter ki pou al dan lavantaz en kantite zafer ki in ganny dir ozordi, ki swa kot IOT, mwan plizyer dimoun ki travay kot IOT in apros mwan, Cascade nou annan en bon pe dimoun ki travay IOT, zot kontan sa ki pe arrive. Selman nou demann osi avek IOT la annou vwar – i annan dimoun ki’n travay IOT, mwan mon annan dimoun Cascade ki’n travay IOT in ganny met deor, dizon in ganny met apre ki in travay sepa 5an, 8an, 9an, 10an whatever, in ganny dir aret travay akoz lasante pa bon. I annan dimoun in malad la ki in kot IOT. E nou demande ki bann ka koumsa i osi ganny gete anba sa larzan ki pe bidzete pour konpansasyon lo gratwite bann dimoun kot IOT. I enportan si i annan enn de ka koumsa ki IOT i anmenn on board.

 

En lot pwen ki mon ti ava kontan touse, mon kontan note ki Departman Legal pe ganny en ogmantasyon ankor dan bidze siplemanter, sa petet pou ganny plis Avoka pou kapab deal ek bann case, akoz mon remarke nou annan en bon pe problenm lo sa nivo. Ennler nou menm nou dan Lasanble kekfwa nou vini nou fer bann kritik, kekfwa pa 100% lo target sa bann keksoz. Par egzanp parfwa nou kritik lapolis, parfwa nou dir kot Ziz. E i enportan la ki nou vwar, lapolis i kapab vini tyonbo sa dimoun li, be si ou napa prosekiter, ki ou fer?  So mon krwar la sa larzan ki pe ganny donnen Legal Affairs Department, AG’s office i a ganny beef up pou kapab zisteman bann case ganny anmenn devan, i a kapab  – konmsi nou kapab vwar en lavi ladan. Konmsi letan ou’n tyonbo i pa zis large prezan akoz napa levidans e ou a tyonbo, ou a kapab pourswiv ou annan dimoun ki pou fer sa bann keksoz.

 

Menm zafer ek La Misere, mon annan dimoun Cascade la ki ti pe travay La Misere, pa dir delo La Misere in vin Cascade, non pa sa, me i annan dimoun Cascade ki pe travay La Misere ki zot case pa pe ganny konsidere. Mon panse la ki nou ogmant sa bann Avoka kot AG’s Office, i ava annan plis dimoun pou kapab swiv. E la mon lans en lapel avek de, trwa dimoun Cascade la ki ti pe travay La Misere e ki in bwar sa bann delo i osi ganny sans pour avans zot case. E an dizan sa bann keksoz note ki mon pe siport zot case ki zot in koz ek mwan yer menm. Yer swar mon ti ganny call lo sanmenm sa issue. So mon pe pourswiv zot bann case devan e mon demann zot osi pou met zot zefor ladan, e i a ganny rezourd par sa gouvernman definitivman.

 

Lot pwen Msye Speaker i konsern dan lalinny Cascade, lalinny letan pe vote dernyenman la, dan lalinny eleksyon la i annan dimoun pe dir ek son kanmarad, mon rapel mwan letan bann dernyen moman nou’n vot sa bann late hours, pe dir ek son kanmarad dan lalinny ki vot pou sanzman, vot pou lopozisyon akoz sa pei la koman eleksyon i fini tou keksoz pou monte, tou keksoz, pa pou kapab viv ankor dan sa pei. Pourtan eleksyon in pase e mon vwar poudir nou ankor stab, mon pa pe dir konmsi tou keksoz i roz mwan, me selman i enportan nou pep, sirtou sa pti dimoun, sa senp dimoun la, i enportan i pa les li tonm dan sa bann demagozi. I enportan ki i focus lo son lavi pourki i vwar li dan sa bidze ki nou lo kote Parti Lepep toultan nou vin aprouve pour li. E ladan i enportan, note Mr Speaker ki nou annan Stabilisation Fund, gro larzan la nou pe vote pou tenir sa pep pou anpes sa bann keksoz ki pe arive dan lemonn afekte li. Savedir ki si nou pa ti fer sa la nou ti pou vwar parey dan tou lezot pei kot pri marsandiz i zis monte an brit an bann akoz sa problenm finansyel, son lefe e osi problenm karbiran ki son lefe i afekte lemonn antye.

 

I enterese, ou koz ek bann etranze ki vin Sesel, koz ek dimoun Seselwa ki annan enpe lentelizans i pou eksplik ou Mr Speaker koman sa pti pei la bann dimoun senp ki nou vwar around me i pe think big, pe think lwen, i annan en vizyon e ki zot vwar koman pou anpes lepep ganny afekte sitan dan tou sa problenm. Sa i montre vizyon, lentelizans, konprenezon nou dirizan nou parti, se sa rezon ki ou vwar i apel Parti Lepep akoz i annan lepep a ker, i pe mazin lepep. Parkont nou osi lans en lapel dan tou sa avek nou pep, nou dir li fodre travay e fodre nou debourye.

 

Mon relans mwan sa lapel konmsi ki nou tou konmsi annou sey fer fason pour nou fer en keksoz pou kapab anplis, konmsi pa kapab zis fye lo gouvernman me anplis, gouvernman a ed ou be selman osi nou bezwen fer nou bout pou kapab vwar dimoun ki pa pe travay dan pei akoz travay i annan. Me selman osi la bann landrwa travay i bezwen osi  annan konpasyon. Ou pa kapab letan sa pti dimoun i vini – en dimoun fek train ou pa ekspekte li annan leksperyans, kontrer ou pran li pou kapab donn li leksperyans. So i bann keksoz ki nou bezwen pouse ankor dan nou pei pou kapab realiz tou sa.

 

Mr Speaker avan mon fini mwan i annan en keksoz ki mon oule fer resorti, e la i konsern Land Transport Agency. Tou dimoun ou rapel dan Lasanble dernyenman ki mwan mon met en ta presyon lo Land Transport Agency e mon kontan note ki mon bann presyon ki mon’n mete i pa’n anven. Mon kontan note ki Land Transport Agency, Minister Transpor, Minis Transpor an personn in ekout mwan, nou’n asize nou’n diskite, e mon vwar poudir in abouti sa keksoz pozitiv pou mon distrik Cascade. La ki mon pe koz ek zot i annan plizyer proze ki pe ganny fer. Land Transport pe aranz nou Cascade ki bann dimoun i a happy dan leo Cascade partou, bis i ava monte koman nou elarzman nou semen i fini, e ki mon’n fini koz avek SPTC osi e SPTC ek gran ker i dir mwan Charles koman i fini elarzi la zafer in bon, ou bis pe vini, i la, nou pe esper ou. Konmsi pou mwan sa i bann keksoz ki pozitiv. Letan mon vot pour en bidze siplemanter mon vwar poudir mon vot i pa’n gate, mon vot in pey fre pour dimoun dan mon distrik pour lepep Seselwa an zeneral, e mon krwar la i vreman enportan ki an retour lepep distrik Cascade i bezwen note sa e fer sir ki letan eleksyon i arrive, i donn mwan sa sipor, sa vot pou kontinyen travay pour zot dan sa bon direksyon.

 

Mr Speaker i annan keksoz la anmenmtan, mazinen Land Transport nou annan ankor meeting, ozordi dan break Lasanble, mon pa pe zis break mon pou zwenn Land Transport ankor pour nou get lavantaz bann keksoz ki bezwen ganny fer. Akoz? Sanmenm sa problenm ou vwar ek sa bann zafer tender ki nou pe dir. I annan semen ki pe ganny mete lo tender i annan plis ki 1an, be konbyen i pran sa bann zafer tender? I menm zafer ek lekol Cascade, tender i annan plis ki 9 mwan pou renovate lekol, Minister Finans lannen pase in dir i annan sa larzan la. Be ziska ozordi napa renovasyon ki’n fer Msye Vis Prezidan, savedir i montre i annan en problenm somewhere la ek sa bann zafer tender e Madanm Potter Leader of Government Business i annan parfetman rezon dan pwen e argiman ki in avanse.

 

Nou nou bezwen improve lo sa bann keksoz, e nou Lasanble i la pour nou met sa presyon lo gouvernman lo sa bann bout. Fodre pa zot ankoler letan nou nou met sa presyon, nou pe met sa presyon pou aranze, nou konnen nou pa parfe, nou imen nou ki pe travay dan sa pei me selman i enportan ki nou donn lepep a good deal. Lepep in donn nou en bon manda, nou osi an retour nou bezwen donn li a fair deal pour sa sipor ki in donnen. I bezwen vwar son lekol, si larzan in vote e mon pou siport ankor sa bidze, i bezwen vwar li ladan, i bezwen vwar son piti ladan. Ou pa kapab kontinyen konmsi nou aprouv bidze epi pa fer sa ki nou’n dir fer. Crash barriers ensidswit, bann drenaz. La nou dan sesyon lasesres. Korek. Taler lapli pe vini. Annou fer enpe prevansyon, profite la e larzan in vote annou fer li en fason letan gro lapli in vini i pa ava inond nou tou. Nou a kapab bare enpe. Konmsi annou travay avek sa kalite lespri.

 

So vwala mon lapel ki mon pe mete devan nou Lasanble e devan sa bann diferan Minister ki pou annan larzan la dan sa bidze siplemanter pe ganny aprouve pour zot, pou nou avans devan.

 

Mr Speaker mon krwar mon’n dir ase e mon pou siport definitivman sa bidze siplemanter. I pa en kestyon ki konmsi nou bezwen vot wi, konmsi wi – non en keksoz ki bon nou bezwen dir i bon. Mwan si pa ti bon la ou konn mwan tre byen mon ti ava dir pa bon. So i bon nou bezwen vot pour sa bidze. Domaz lopozisyon pa la pou donn sa sipor me apre zot menm zot ki pou benefisye plis dan sa bann zafer. So mon krwar lepep i bezwen note sa bann keksoz ki nou pe met devan e vwar poudir nou nou enn ki bezwen kontinyen ganny sa sipor pou fer nou travay marse. Air Seychelles nou vwar, napa fermen Air Seychelles please. Konpran lepep Seselwa, nou pe siporte, nou ki pe sov Air Seychelles la, napa lopozisyon la. Lopozisyon, oli? Napa, nou ki pe sov Air Seychelles. I enportan nou note sa. E nou kot i annan en keksoz ki mal nou dir tyonbo en kou. Si kontra pa ti ganny byen fer nou revwar sa kontra, e kontra in ganny revwar. Vis Prezidan, Minis Finans in dir nou la e pour nou i byen. Se sa direksyon, se sa fason travay e Vis Prezidan mon donn ou parfetman rezon, mon donn ou tou sa sipor pou sa bon travay ki pe ganny fer dan sa pei anba ou direksyon, direksyon Prezidan Michel. Mersi bokou. Mon demann tou dimoun nou Lasanble pou siport sa bidze siplemanter. Mersi Mr Speaker.

 

 

HON CLIFFORD ANDRE

Bonzour Vis Prezidan, bonzour tou manm Onorab. Mr Speaker mon pou bref e spesifik. Mon lentervansyon i vize prensipalman ver bann lafors ki ganny konsidere koman bann law enforcement oubyen bann prevention agency dan Sesel.

 

Mr Speaker nou’n vwar nivo kriminalite in ogmante isi Sesel e ka bann mert in osi ogmante dan nou pti pei. E avek sa, mwan ki’n pas bokou letan pandan sa bann sitiasyon avek bann zofisye lapolis letan zot pe fer zot bann investigations e osi pandan letan serten case pe ganny pourswiv an kour zot in eksprim bokou difikilte ki zot rankontre. Mon pe anmenn zot konsern enn pti pe devan, departman CID in les mwan konnen ki depi Zanvye zot pe travay konstaman an rezilta sa bann sitiasyon ki nou’n vwar ki nou tou nou okouran.  E sa i met bokou presyon lo sa pti git resours ki zot annan.

 

Mon konnen nou pe travay lo en bidze siplemanter ki pou osi figir lapolis ladan. I ti a bon osi – Onorab De Commarmond in eksprimen ki posibleman tou dimoun ti a kontan vwar li dan en bidze me i pa posib ki nou tou nou ganny figire dan en bidze oubyen dan bidze siplemanter at one go. Me i enportan ki nou vwar sa bann fasilite ki swa imen, ki swa lekipman pourki sa departman i ava kapab desarz zot responsabilite a la oter e ki bann sitiasyon ki ganny prezante devan lakour i ganny fer dan en fason ki annord, ki konkret, ki mon pa pou kapab dir full proof me at least ki annan bokou respe, i komann bokou respe lakour e bann l’homme de loi ki pe deal ek sa sitiasyon.

 

Mr Speaker zot in osi enform mwan ki zot kondisyon saler i enn ki osi merit ganny konsidere akoz i annan diferan laspe, diferan kondisyon ki ganny mete, e mon a met sa devan Minis Finans ki osi Vis Prezidan pou kapab sey gete ki manyer nou incentivize sa bann zofisye pourki zot a fer en travay pli a la oter.

 

Mr Speaker mon dezyenm konsern se an relasyon avek departman, avek sa entity NDEA. Ozordi nou pe met a dispozisyon NDEA oubyen nou pe aprouv en bidze signifikan pour NDEA. NDEA pe fer en travay ki komann respe bokou dimoun. Nou tou Sesel nou ti a kontan vwar nou pei parey Prezidan in dir free of drugs. Me an fezan sa travay mon pou osi demann avek bann zofisye NDEA pou fer sa travay an konformite avek bann lareg ki an plas, akoz mwan menm mwan mon’n witness first hand Vis Prezidan atraver Mr Speaker sitiasyon ki’n arive devan mwan kot in annan zanfan, kot in annan vye dimoun e i sokan pou vwar sa bann sitiasyon e mon’n anmenn a latansyon zot lotorite konsernen kot zot in donn mwan lasirans zot ava get dan sa bann sitiasyon. Mon pe dir sa akoz souvannfwa ou ganny dimoun ki vin fer sa bann rapor avek ou me toultan nou sey rod en fason pour nou eskiz konportman serten zofisye dan NDEA si nou pa’n vwar sa sitiasyon nou menm. Mon’n ganny lasirans ki zot pou fer zot bann training enpe pli for, enpe plis direktiv pour ganny donnen avek sa bann zofisye e dan sa lespri kot nou koman en Lasanble nou pe aprouv en bidze siplemanter pour sa lorganizasyon ki mon’n koz lo sa size e mon’n donn zot first hand notice ki mon pou koz lo sa size me mon pa pou koz lo sa sitiasyon ki mon’n witness mwan menm akoz mon’n fini met a zot latansyon.

 

Mr Speaker trwazyenm entity ki mon ti a kontan tous lo la pandan sa bidze siplemanter se FIU. Mr Speaker i annan parfwa kot en rapor i ganny fer kot sa entity me letan ki i pran pour li initiate sa investigation i tro lontan. Eski sa i;

  1. Mank resours?
  2. Mank finansman?

Si sa i leka mon krwar nou pe fer en legzersis ki sibstansyel la pour nou beefup sa bann entity pour zot kapab desarz zot responsabilite a la oter.

 

Mr Speaker mon pa pou koz lo bann sitiasyon ki bann koleg avan mwan in koz lo la, e avek sa mon pou dir ki mon pou siport sa bidze siplemanter e mon osi oule oule dir avek Minis Finans ki felisitasyon pour sa bon fason ki finans nou pei pe ganny zere e sa pep Seselwa i dir ou mersi e zot vwar e zot donn garanti ki prosen round zot pou donn 25 sipor pour Sesel. Mersi.

 

MR SPEAKER

Viz Prezidan right of reply.

 

VICE PRESIDENT DANNY FAURE

Mr Speaker mon ti a kontan remersye tou le 3 entervenan lo sa proze delwa. Mon pou fer li mon responsabilite pou mwan follow up lo serten bann pwen pertinan ki zot in met dan mon latansyon e mon osi mon ti a kontan dir bann pwen ki zot menm zot zot pe follow up, silvouple kontinyen follow up akoz mon krwar se atraver sa team work, ou konnen fri nou travay i rezilta team effort, tou dimoun ki pe kontribye, tou dimoun ki reste angaze pou fer sir ki ler nou dir vwala lafason ki polisi gouvernman i bezwen ganny enplimante, polisi gouvernman i ganny enplimante dan tel fason.

 

Si nou krwar ki i annan serten problenm mon krwar nou sorti e nou kominike, nou koze. Ler nou koze nou eksplike, dimoun i konpran. Be sa ki pli enportan se revwar lafason petet lafason ki nou fer keksoz, akoz Minister Finans i pa oule en repetisyon sa ki’n arive lannen pase. Parey zot konnen lannen pase Desanm nou’n close budget avek larzan, larzan pour bann proze. Pa kapab, Land Transport i enn, pa kapab. Savedir nou vin devan Lasanble nou vot pour larzan, larzan i bezwen ganny depanse, e Leader of Government Business in fer en remark ki byen, i enportan ansanm avek Onorab De Commarmond, i enportan pou nou vwar pa akoz nou en lazans, nou manda se fer li ki vedir ki nou tousel ki bezwen fer li, pa vre? Mon krwar the thinking is se ki nou annan toultan kontrol lo sa ki nou apel specification of sa travay ki devret ganny fer. Par egzanp fodre toultan nou annan kontrol lo lafason lo ki kalite drenaz ki nou bezwen fer, ki kalite grander semen ki nou bezwen ganny fer. Me i pa vedir ki nou ki bezwen fer sa semen.

 

Dan en kote ou annan en Prezidan ki pe dir leve debourye, dan en kote ki ou annan en Minister ki pe train bann zenn Seselwa SIT, mason ensideswit ki ler pe fini zot letid pa pe fer louvraz mason, me ki i anvi fer lezot kalite louvraz. Donk nou devret outsource sa bann travay, ouver, les Seselwa fer, train zot e dir vwala lafason ki nou ti a kontan ki bann drenaz dan distrik Cascade i bezwen ganny fer, vwala lafason ki nou ti a kontan ki semen dan montan Capucin i ganny fer. Vwala ki manyer bann feeder roads, nou apel sa bann semen santye dan distrik Anse Etoile i bezwen ganny fer, Danm Lerwa, Anse Louis, dan tou nou bann distrik.

 

Me nou koman en lazans nou pa pou kapab fer li nou tousel, si nou krwar nou fer nou tousel Desanm sa lannen pou ankor larzan. Donk nou bezwen revwar sa. E sa se the change of the mindset ki bezwen ganny revwar, enpe partou i pa zis lo sa lazans, revwar nou rapor ant en manda spesifik ki nou ganny demande e nou responsabilite pour nou monitor zis parey lalimyer. Ou konpran mwan? Sa zenn fiy dan montanny Bougainville laba ki’n ganny en plas travay dan en lotel, apre ki in fer de semenn li in kit travay. Ou konnen akoz in kit travay? In kit travay akoz son prop sekirite, akoz kot bis i debark li napa lalimyer. Prezan ler nou take up sa dan finans ler nou diskite nou dir, regarde problenm larzan? Nou bezwen pe vwar ki manyer nou pou fer sa. Donk nou nou krwar ki i annan kontrakter dan sa pei ki moman in arive ki zot annan lekipman zot kapab met lalimyer lo bann poto elektrik provided ki PUC i annan kontrol specification, pa vre? Me nou larg lanmen Seselwa, nou fer sir ki bann kontrakter i fer sa travay e nou monitor.

 

Mr Speaker nou en gouvernman lepep, par lepep e pour lepep e nou bezwen fer sir ki ler Prezidan i dir nou koumsa nou bezwen deliver en servis zot konpran ki pe dir? I pe dir nou bezwen regarde sa ki matter pour sa sitwayen ordiner. Pa sa ki matter pour nou koman serviter me sa ki matter pour li. E nou dan biznes amelyor lavi nou sitwayen e sa manda ki Prezidan in gannyen set en manda pour li kontinyen fer la diferans dan lavi nou popilasyon, fer diferans dan sa servis ki nou popilasyon i donnen. E nou pe al travay tre dir pour nou regard, parey Onorab MNA Takamaka Terrence toultan i kontan dir, eskiz mwan Onorab Mondon i kontan dir, nou bewen regard bann process, bann prosedir, bann sistenm enpe partou akoz ler ou annan sa bann prosedir e bann sistenm ki transparan tou dimoun i compete, ou konpran sa? E vwala sa latas enorm ki nou annan pou nou fer li.

 

Me an sa ki konsern larzan nou pe fer byen, nou a fer sir ki larzan i la, me selman nou bezwen fer sir ki larzan i bezwen ganny depanse pou fer sir ki sa sitwayen ordiner i vreman vwar ler zot reprezantan lepep i aprouv en bidze, ki manyer i annan en signifikasyon enportan pour li e ki manyer i vwar ki son lavi i amelyore par sa vot ki nou donnen isi ler nou pe pran en vot lo bidze.

 

Finalman Mr Speaker mon dir ou mersi, e tou bann Manm Lasanble Nasyonal pour sipor ki tim dan Finans pe ganny donnen pour nou kapab kontinyen fer nou travay. E mwan sa ki fer mwan en gran plezir se ki pep Seselwa in deside mentenir son lalinny ekonomik. E pour mwan i sel lalinny ekonomik ki pou annan sa ki nou apel prosperite partaze pour tou Seselwa. Mersi.

 

MR SPEAKER

In ariv ler pour nou pran en vot lo merit sa Bill, tou bann ki an faver? Okenn ki kont? Mon a ganny en formal second reading.

 

DEPUTY CLERK

A Bill of an Act to provide for the purposes of a supplementary estimate approved by the National Assembly.

 

MR SPEAKER

Nou bezwen pran en desizyon si nou pou commit sa Bill to Committee Stage. Mon a ganny en mosyon alors pour nou sot Committee stage.

 

HON MARIE-LOUISE POTTER

Mr Speaker anbar order 91 (1) mon ti a kontan move ki nou suspend order 65 to 70.

 

MR SPEAKER

Okenn ki segonn sa mosyon?

 

HON ANDRE POOL

Msye Speaker mosyon in ganny segonde.

 

MR SPEAKER

Nou a pran en vot lo la. Tou bann ki an faver, okenn ki kont? Mon a ganny en motion for third reading.

 

HON MARIE-LOUISE POTTER

Mr Speaker mon move ki Supplementary Appropriation Bill, 2011 i ganny lir en trwazyenm fwa.

MR SPEAKER

Okenn ki segonde?

 

HON ANDRE POOL

Mr Speaker mosyon in ganny segonde.

 

MR SPEAKER

Bon nou a pran en vot. Bann ki an faver lev zot lanmen. Personn pa kont. Mon a ganny mwan en third reading.

 

DEPUTY CLERK

This Act may be cited as the Supplementary Appropriation Act 2011.

 

MR SPEAKER

Bill in pase e nou pou adjourn ziska Mardi 9er bomaten.

 

(Adjournment)