::
Home » Verbatim » Verbatim -Second Term 2011 » Tuesday 31st May 2011

Tuesday 31st May 2011

Download PDF


 

NATIONAL ASSEMBLY OF SEYCHELLES

Tuesday 31 May 2011

The Assembly met at 9 am

National Anthem

Moment of Reflection

Mr Speaker in the Chair

(Technical Problem)

HON. MARIE-LOUISE POTTER

…Mon pou lir sa 2 mosyon separeman me avek ou permisyon nou ti a kontan fer deba lo zot ensel.  Premye mosyon pe demann nou Lasanble pou aprouv lapwentman Msye Vincent Meriton koman Minis Dezinyen par Prezidan Larepiblik a’n akor avek lartik 75(1) nou Konstitisyon.

 

MR SPEAKER

Okenn ki segonde?

 

HON. ANDRE POOL

Msye Speaker mon pou segonn sa mosyon.

 

MR SPEAKER

Bon nou a ganny dezyenm mosyon.

 

HON. MARIE-LOUISE POTTER

Dezyenm mosyon pe demann nou Lasanble pou aprouv lapwentman Msye Joel Morgan, Madanm Macsuzy Mondon, Msye Bernard Shamlaye, Msye Jean-Paul Adam, Msye Peter Sinon e Dokter Erna Athanasius koman Minis par Prezidan Larepiblik a’n akor avek lartik 69(2) nou Konstitisyon.

 

MR SPEAKER

Okenn ki segonde?

 

HON. MITCY LARUE

Mon segonde Msye Speaker.

 

MR SPEAKER

Onorab Potter prezant ou 2 mosyon.

 

HON. MARIE-LOUISE POTTER

Msye Speaker dabor mon ti a kontan remersye lepep Seselwa pou sa nouvo manda ki’n donn Prezidan Michel ek son lekip pou kontinyen diriz nou pei e pou kontinyen kree en nouvo Sesel dan lape, dan stabilite e dan progre pou tou Seselwa.  Dezyenmman mon ti a kontan fer rapel nou Lasanble ki dan nou lademokrasi se lepep ki Met, e lavwa lepep se lavwa Bondye – Vox populi, vox Dei. Menm si serten swadizan port parol Bondye lo later e isi Sesel pa kontan sa ki mon fek dir, se Bondye ki Met e se Bondye ki gid lepep dan tou son desizyon ki i pran.  E se Bondye ki’n gid lepep dan sa gran desizyon ki’n bezwen pran le 21 Me kot in re-elekte Prezidan James, Alix Michel e Parti Lepep pou diriz nou pei pou ankor 5an.

 

Malgre lepep i kontinyen ganny maltrete iletre, ki annan malpropte dan latet, atansyon, lenbesil parfwa ki donn malen lafyev.  Malgre lepep in ganny akize ki zot in vann zot nanm, nou nou dir, lepep is not for sale e sa lepep Seselwa ozordi cannot be bought.

 

Le 21 Me en nouvo sapit travay pli dir e pli for in ouver dan listwar nou pei.  Nou pep i demande avek bokou rezon ki nou, son bann dirizan, nou travay pli dir, nou travay pli byen, nou travay pli onnet e nou travay avek plis transparans e ferver dan tou sa ki nou fer.

 

Nou pep in vin egzizan, in vin pli sofistike e in vin pli matir, e nou pep i anvi vwar en meyer Sesel pou ki zot osi zot fanmiy i ava viv en lavi meyer e zot pei i a kontinyen progrese dan lape e dan stabilite.  E se dan sa konteks ki mon pe propoz avek nou Lasanble pou aprouv lapwentman par Prezidan Larepiblik, sa lekip ki’n swazir pou kontinyen ed li dan sa nouvo latas ki annan devan nou.  Mr Speaker, I beg to move.

 

MR SPEAKER

Deba i ouver.  Okenn ki ti oule entervenir lo le 2 mosyon ansanm?

Madanm Charles.

 

HON. JEOVANA CHARLES

Msye Speaker mersi.  Bonzour Msye Speaker, bonzour tou koleg MNA, bonzour tou dimoun alekout.

 

Msye Speaker, fyer, for ek lazwa dan mon leker, mon anvi dir de pti mo lo sa mosyon ki devan nou. Me avan mon ti a kontan dir sa de mo.  Dan sa gran demonstrasyon lademokrasi, le 21 Me 2011, Sesel in ganny son viktwar. Laviktwar pou tou Seselwa; laviktwar pou sa vye paran dan son fotey akoz son pansyon i ankor garanti, laviktwar pou sa paran ki son travay i ankor garanti, ki son saler i ankor garanti lafen dimwan pou li kapab onor son komitman lafanmiy ki son zanfan i ankor garanti en sistenm ledikasyon gratwit.  Laviktwar pou en pli bon lavenir Sesel.  Wi Msye Speaker, limanite i ankor ennfwa konfye sa zoli pti pei avek Parti Lepep pou dirize.  Lepep Seselwa dan son mazorite in konfye ankor ennfwa sa manda sa zonm travayer, Prezidan Michel, pou konstrir sa nouvo Sesel.

 

Msye Speaker, listwar li in montre nou ki pou en pep avanse i bezwen annan linite, i bezwen koste ansanm, i bezwen reste solider, e pli enportan, i bezwen annan konfyans dan son dirizan malgre tou defi.  Msye Speaker, lepep in donn Prezidan Michel ankor 5an e Prezidan a son tour pe demann nou ozordi pou aprouv nominasyon son bann Minis ki pou donn li lanmen pou konstrir sa nouvo Sesel.  E ler mon get sa bann dimoun, mon vwar ki Prezidan pe mentenir bann menm Minis ki ti la.  Pou mwan sa i en bon sinny, i en bon sinny akoz sa pou mwan i montre sa kontinite dan bann travay dan sa klima ki nou ladan ozordi.

 

Msye Speaker wi, gouvernman i bezwen reget nou servis piblik.  Nou bann travayer servis piblik i bezwen efisyan, zot bezwen donn dimoun en bon servis, zot ganny peye pou donn nou en bon servis.  Msye Speaker dan sa nouvo Sesel ki Prezidan Michel pe al konstrir, pa kapab annan sa ki mon krwar en latitid lesefer.

 

Mon kontan vwar ki sa tim in reste, mon swete ki zot zet en pli bon koudey lo sa ki pe arive dan zot Minister.  Dimoun i bezwen sibir konsekans pou son aksyon.  Dimoun i bezwen vin pli rezonnab, dimoun i bezwen vin pli disiplinen.  Si Prezidan i kapab reste konekte, akoz nou nou pa kapab?  Nou bezwen a tou pri pe montre ki nou pe swiv legzanp nou dirizan.  Retourn en kout telefonn i fer dibyen pou toulede parti, rann repons en let dan en dele letan i osi fer dibyen toulede parti.  I malere Msye Speaker ki ozordi nou ankor vwar bann travayer dan bann Minister ki pe reste avek en kalite latitid lesefer.  Msye Speaker, Sesel i enn pti pei, pli presizaman, en zoli pti pei, i bezwen nou tou, nou bezwen prezerv li.  Dan sa nouvo Sesel nou tou nou travayer, alor nou tou nou bezwen sanz nou latitid, nou bezwen pe kontinyelman pe ganny vwar pe ranforsi nou valer moral ek nou bon fason viv.  Nou bezwen kontinyelman pe travay dir.  Nou bezwen pe kontinyelman pran nou responsabilite.  Nou bezwen montre ki nou tou nou pe travay pou en sel Sesel.

 

Si ou anvi en Cleaner kontinyen dir ou bonzour, ou bezwen reponn ler i dir ou bonzour.  Si ou anvi en Gard Sekirite ed ou avek ou sak, ou bezwen reponn ler i dir ou bonzour e donn li en pti sourer, sa i aranz son lazournen.  Si ou anvi ou staff ariv aler, i bezwen vwar ou pe ariv aler.  Dan sa nouvo Sesel nou bezwen vin pli amikal, me ferm.  Nou bezwen delivre en servis ki lepep i ekspekte de nou depi anler ziska anba.  Dan en Minister, tou son travayer i annan son rol pou zwe dan son fonksyonnman.

 

Msye Speaker lepep Seselwa pa’n ezite pou donn Prezidan Michel en lot manda e parey mon’n dir, Prezidan in swazir son lekip pou travay avek li.  Mwan, mon pou felisit zot e donn zot tou mon sipor.  Zot bezwen reste konekte parey Prezidan in dir.  Nou bezwen travay ansanm pou sa nouvo Sesel.  Mon pran sa lokazyon pou swet tou bann Minis bonn sans e mon pou donn zot full sipor. Mersi Mr Speaker.

HON. CLIFFORD ANDRE

Mersi Msye Speaker.  Bonzour tou Manm Onorab e tou dimoun ki alekout.  Msye Speaker permet mwan pou komanse par remersye pep Seselwa, e mon swiv Leader Zafer Gouvernman ler i dir ki i annan sazes dan desizyon ki zot in fer.  Mon oule remersye espesyalman zabitan mon distrik, Mont Fleuri pou remet, mon dir pou remet sa kouler rouz dan Mont Fleuri.  Msye Speaker sa i fer tou zabitan sa distrik fyer.  Akoz?  Lontan nou ti annan en pye flanbwayan ki ti fleri rouz e i paret ki i pe repran son souf pou li refleri ankor rouz.

 

Msye Speaker, Prezidan dan son speech linogirasyon i ti dir ki – permet mwan pou quote li – sa ‘laviktwar i pou tou Seselwa’.  E in dir osi, ‘pou nou met dekote nou diferans e pou nou tou travay pou Sesel akoz sa laviktwar i pou Sesel e pou Seselwa’. Msye Speaker mon siport sa e mon demann, parey Onorab Charles in dir, bann dimoun ki dan diferan Minister pou zot travay avek en lizye ouver, zot osi get outside the box, e akomod tou Seselwa parey e donn zot en repons ki zot deserve whether it is en wi, oubyen en non, me senp let i pou donn konfor sa dimoun pou li konnen ki son lot step ki li i pou bezwen pran.

 

Msye Speaker ozordi nou dan Lasanble pou nou aprouv nominasyon Cabinet of Ministers ki Prezidan Larepiblik in prezant avek nou.  Msye Speaker nou vwar ki in gard bann menm Minis, e in eksplike, sa pou kontinite lo sa progranm e travay ki in komanse.  E mon oule felisit Prezidan ek tou bann Minis ki’n ganny re-apwente e demann zot osi pou renouvle zot zefor ki Sesel i ava ganny pran koman sa legzanp.  Yer nou’n vwar ki Minis Finans Maldives in dir zot oule pran legzanp lo Sesel ler zot osi zot pe pas atraver zot reform ekonomik.  Msye Speaker sa i komann bokou respe e mon oule lev chapeau, e mon sinny se sa ki lepep Seselwa in fer le 21 Me letan in lev chapeau à Prezidan Michel ek son gouvernman, Cabinet of Ministers, pou asire ki Sesel i fer fas a bann sitiasyon mondyal e anmenmtan pas atraver nou reform ekonomik ki nou ti pe pas ladan avek sikse ki komann respe enternasyonal e bann pli gran pei ki Sesel. Msye Speaker Seselwa in koze.   E la prezan egzekitiv pe ekoute, lezislativ pe aprouve pou ki Sesel i kontinyen mars a’n avan.

 

Permet mwan Msye Speaker pou mwan fer ennde pti remark lo bann Minis ki’n ganny propoze e ki pe ganny aprouve ozordi.

Minis Dezinyen i en dimoun ki mwan personnelman mon’n konnen pou bokou letan.  Koman en zanfan mon’n konn li e koman en zenn-onm Seselwa e i annan bokou potansyel e in demontre sa dan plizyer respe kot in ansarz bann diferan komite.  La i pe responsab pou Jeux des Iles kot nou vwar bann progre ki pe ganny fer, e i pe responsab dan diferan respe selebrasyon nasyonal kot osi nou vwar bann diferan progre ki pe ganny fer.  E mon pou donn sipor a sa nominasyon avek okenn rezervasyon akoz mon krwar i annan konpetans enorm e ki i en zonm ki delivre letan i bezwen delivre.

 

Mr Speaker permet mwan osi pou dir enn pti mo lo Minis Macsuzy Mondon.  Minis Macsuzy Mondon in mon Head Teacher letan mon ti lekol Mt Fleuri dan primer ek segonder.  Sa lepok nou sistenm manyer ti ete i ti ensel.  E koreksyon oubyen gidans ki’n donn mwan pandan letan ki i ti Head Teacher, mon vwar ki in anmenn mwan, e mon sir bokou lezot etidyan – mon pa sir si i annan ki dan lasanble la, lezot etidyan ki’n ganny sa gidans avek ozordi Minis Mondon.  Sa i montre ki son travay i enn ki egzanpler e saz.

 

Mon oule osi dan sa kad Mr Speaker, pou mwan pa tarde, felisit tou bann Minis ki’n ganny reapwente e ankor ennfwa demann zot pou delivre a la ekspektasyon pep Seselwa akoz lekspektasyon la apre sa eleksyon i tre, tre o.  Avek sa Msye Speaker mon pou donn tou mon sipor sa 2 mosyon. Mersi.

 

MR SPEAKER

Onorab Potter, Right of Reply.  Ti napa okenn lezot?  Ou ti’n lev lanmen?  I ok, nou ava les Onorab Vel.

 

HON. JENIFFER VEL

Mersi Mr Speaker. Mr Speaker Sesel pe viv anba lizye lemonn, sa i tre kler.  Ozordi tou sa ki nou fer koman en pei i ganny obzerve e analize dan tou son detay pli fen.  Reform ekonomik Sesel in apel en kantite latansyon lo nou pei me sikse sa menm reform in kree plis lentere ankor.  Bann lensidan piratri in osi kree en gran kantite latansyon pou nou pei, me sa sikse avek ki Sesel pe anmenn son konba in kree ankor bokou plis lentere.  Sesel in nepli en zil perdi lo milye en losean, oubliye par larestan lemonn.  Sesel ozordi i bezwen stabilite e i osi bezwen kontinite.  Me pli enportan ankor, nou pei i bezwen sanzman.

 

Avek sa Cabinet Minis, Prezidan Michel i prezant nou sa menm lekip ki’n anmenn en sanzman fenomenal dan nou pei pandan sa dernyen 2an.  Latas devan zot se pou delivre lo bann sanzman neseser, delivre lo bann lekspektasyon nou pep e inisye sa nouvo Sesel avek lekel sa pep Seselwa in ganny promet.  E responsabilite pou inisye sa nouvo Sesel i repoz lo nou tou, me i travay sa bann dimoun ki zot non i la devan nou pou ede e gid larive sa nouvo lepok dan nou pei.  Sesel pe apros en moman dan son listwar ki pou ganny marke par la prosperite e sa pou form en konponan enportan dan sa nouvo Sesel.

 

Dan lizye lemonn Sesel i bezwen stabilite, me isi lokalman nou pli bezwen li ankor akoz sa lepok ki nou pe pas ladan i ganny marke par sa sanzman, me sanzman dan lape e stabilite.  Dan en zefor pou anmenn plis progre e prosperite pou nou pep, i annan ankor bokou sanzman ki pou bezwen ganny fer dan nou pei e se la kot nou bezwen en lekip ki byen eksperyanse pou tenir direksyon pei.

I annan en kantite sanzman fondamantal e serye ki pou bezwen ganny kalkile, propoze, diskite, aksepte ouswa rezete dan en zefor pou amelyor nou sosyete.  Me sa ki nou bezwen aksepte se ki nou pei, nou sosyete e nou pep menm i bezwen serten sanzman radikal dan en kantite keksoz ki nou konsider koman business as usual.  Sa propozisyon Cabinet ki Prezidan Michel in avanse se en cabinet bann gardyen la stabilite dan nou pei.  Me letan ki ou annan en cabinet ki pe azir pou mentenir stabilite, se la kot tou loportinite i ganny kree pou ki bann teknisyen i kapab vin bann vre moter pou inovasyon.  Si nou pe koz fer en revolisyon dan nou sosyete, si nou pe koz sekwe sa ki nou apel business as usual dan nou pei, se la kot bann teknisyen gouvernman i devret pe sezi tou loportinite ki prezante pou zot demontre zot talan e zot konpetans.  Mr Speaker nou tou nou konnen ki bann resours nou pei i limite, me si i annan en komodite ki pa limite Sesel, sa se bann travayer ek teknisyen konpetan e kapab.  E la nou pe koz osi bann dimoun ki’n ganny tre byen formen dan zot domenn.  Si i annan en moman kot tou nou dimoun i devret avans devan pou montre zot konpetans, sa moman i la koman nou pei pe pas atraver tou sa kalite tranzisyon.  I annan en kantite keksoz ki pa pe mars byen parey i devret dan nou pei, me sa pa devret fer nou negativ dan okenn fason akoz i zis vedir ki i annan en kantite keksoz pou nou korize.  E Seselwa i en nasyon ki kapab aport mezir korektiv dan son pei.  Sesel i depan lo sa kad profesyonnel ki in formen pou tras en larout kler ver lavenir.  Otan ki Prezidan Michel pe tras son vizyon, se nou bann profesyonnel ki ganny sarze pou enplimant sa vizyon.  Bann proze relevan i bezwen ganny propoze e bann dosye i bezwen ganny pouse pou ariv ziska  devan lizye Minis.  E sa se en travay ki ganny entreprann par bann teknisyen e non pa par Minis limenm.  Si en Minis i resevwar bann bon proze e bann bon propozisyon ki i kapab avanse e defann, keksoz pou bokou pli fasil dan nou pei.  Kot striktir en lorganizasyon i fay e i bezwen ganny ranforsi, sa i bezwen ganny fer san dele.  Sak lorganizasyon i bezwen kontinyelman revwar zot bann prop bezwen e adapte zot lekor dapre lekspektasyon servis ki piblik i annan.

 

Si nou pran sa slogan Lepep ki lopozisyon in vole e zot in fer vin negativ, ‘Sesel i pou Seselwa’, e si nou pran sa menm slogan dan sa lespri pozitiv sa lepok ki’n ganny kree e nou reflekte li dan parol sanson nou gran artis lokal David Philoe: ‘Sesel i apel nou pei e i nou devwar pou travay pou li’.  Sa i ava fer nou konpran ki sikse Sesel i pa depan zis lo en Cabinet of Ministers, me lo nou tou koman Seselwa fyer e Lwayal anver nou pei.  Prezidan Michel letan ki in propoz sa Cabinet ki la devan nou, in fer li avek en konesans kler ki Sesel pe al pas atraver bokou sanzman.  E sa lekip ki in swazir pou avans devan i enn ki’n mir dan lenplimantasyon sanzman.  Mon krwar ki obout sa manda 5an ki lepep Seselwa in donn Prezidan Michel lamazorite nou pou satisfe e personn pa pou demann sanzman ankor.

 

Mr Speaker, Pointe Larue, sa distrik ki mon annan loner reprezante isi dan sa Lasanble, in pronons son lekor klerman an faver eleksyon Prezidan Michel.  Kontribisyon Pointe Larue anver nouvo manda Prezidan Michel kot Prezidan in termin parmi bann meyer score, kot mon bann zabitan in klerman dir avek mwan pou donn Prezidan Michel tou sipor pou li kontinyen amelyor kalite lavi tou Seselwa.  Alors lo non tou zabitan distrik Pointe Larue, mon pe met mon konfyans antyerman dan lasazes Prezidan Michel e mon pe avans mon sipor personnel e sipor mon distrik pou sa bann non ki’n ganny propoze ozordi.  Mersi Mr Speaker.

 

HON MARIE-LOUISE POTTER

Mon ti a kontan dabor remersye tou mon bann koleg ki’n entervenir an sipor mon de mosyon, e mon ti a kontan egalman felisit bann Minis ki’n ganny re-apwente dan zot bann portfolio respektiv e sa i en sinny rekonesans par Prezidan La Repiblik dan zot travay e konfyans ki annan dan travay ki i anvi zot fer pou lavenir dan sa prosen 5an.

 

Lo non nou parti mazoriter dan Lasanble mon swet zot plis kouraz pour sa nouvo sapit travay ki’n ouver devan nou. Wi, parey nou slogan ti dir, ‘travay i la’, travay i la fas a bann nouvo defi ki nou bezwen sirmonte. Defi problenm delo, defi avans nou progranm lakaz, defi donn nou pep en meyer servis lasante, defi pou kontinyen lit kont piratri, defi pou soutenir nou bann mwen fortinen e pou adres pri lavi ki pe kontinyen ogmante lo nivo enternasyonal.

 

Mr Speaker me par deryer tou defi i annan nouvo loportinite, e pli gran loportinite ki annan devan nou ozordi se lepep, akoz avek lepep nou pa kapab fail dan sa ki nou fer, e avek lepep Sesel pou touzour sorti venker e nou pou touzour reisi.

 

Mon pa kapab konklir Msye Speaker san annan en mo remersiman spesyal pour Minis Dugasse ki parey nou’n aprann lo nouvel yerswar in deside pran son retret dan servis piblik pour li zwenn sekter prive. Minis Dugasse in servi nou pei dan son kapasite koman Minis depi ler nou’n antre dan trwazyenm repiblik, in responsab pou plizyer Minister. In fer en kantite sirtou dan sa dernyen 5an ki in Minis lakaz e later, e mwan osi mon zwenn Prezidan La Repiblik e lo non tou nou bann MNAs isi dan sa Lasanble pou dir li mersi pou travay ki in rann nou pei, e nou swet li kouraz e bonn sans dan sa ki i deside fer pou lavenir akoz nou konnen ki tou sa ki i pou fer, i pou fer li dan lentere Sesel irespektiv kote i ete.

 

Avek sa Mr Speaker mon a demann nou Lasanble pou aprouv mon 2 mosyon. Mersi bokou.

 

MR SPEAKER

In ariv ler pour nou vote. Parey mon’n eksplik Leader of Government Business taler dan nou diskisyon i pou neseser ki nou apwent Minis par Minis, nou pa pou kapab pran Minis in bulk, me nou vot lo sak Minis.

 

Nou ava komans avek Minis dezinyen, tou bann ki an faver ki Minis Meriton i vin Minis dezinyen Repiblik Sesel lev zot lanmen, okenn ki kont.

 

Tou bann ki an faver ki Mr Joel Morgan i vin en Minis anba lartik 69(2) nou Konstitisyon, bann ki an faver? Okenn ki kont? Ki Madanm Macsuzy Mondon i vin Minis Repiblik Sesel, bann ki an faver? Lev zot lanmen. Okenn ki kont? Ki Msye Bernard Shamlaye i vin en Minis Repiblik Sesel anba lartik 69(2) nou Konstitisyon, sa ki an faver lev zot lanmen. Okenn ki kont? Ki Msye Jean-Paul Adam i vin en Minis Repiblik Sesel anlinny avek lartik 69(2) nou Konstitisyon, bann ki an faver lev zot lanmen. Okenn ki kont? Ki Msye Peter Sinon i vin en Minis Repiblik Sesel anlinny avek lartik 69(2) nou Konstitisyon. Tou bann ki an faver? Okenn ki kont? Ki Dokter Erna Athanasius i vin en Minis Repiblik Sesel, tou bann ki an faver lev zot lanmen. Okenn ki kont? Nouvo Cabinet propoze par Prezidan Michel in ganny aprouve par Lasanble Nasyonal.

 

(Applause)

 

Avan nou pran trwazyenm mosyon mon oule enform zot ki anvi mon annan en delegasyon Koreen ki mon bezwen zwenn la 9.45, trwazyenm mosyon lo Supplementary Estimates pou ganny pran par Deputy Speaker. Donk mon ava adjourn pou 2 minit.

 

(Break)

 

MR DEPUTY SPEAKER

Bonzour a tous, nou ava kontinyen avek travay lo nou Order Paper. Lot item lo nou Order Paper se mosyon lo Supplementary Estimates. Mon ava envit Leader of Government Business pou prezant son mosyon. Onorab Potter.

 

HON MARIE-LOUISE POTTER

Mr Deputy Speaker a’n akor avek lartik 154(6) nou Konstitisyon mon pe demann nou Lasanble pou aprouv mosyon Supplementary Estimates, bidze siplemanter pou en sonm R235,789,087.39 pour sa lannen anplis ki nou’n aprouve pour sa lannen bidzeter.

 

MR DEPUTY SPEAKER

Okenn ki segonn mosyon.

 

HON ANDRE POOL

Mr Deputy Speaker mon pou segonn sa mosyon e mon oule dir de pti mo lo la.

 

MR DEPUTY SPEAKER

Ale proceed.

 

HON MARIE-LOUISE POTTER

Mr Deputy Speaker parey ou’n vwar mon’n sirkil detay sa bidze siplemanter ki mon pe propoz avek nou Lasanble, e mon ti a kontan brefman pas lo sa bann detay ki devan nou Lasanble ozordi.

 

Premyerman mon ti a kontan fer rapel nou Lasanble ki sa bidze siplemanter i swiv lanons ki Vis Prezidan Faure ki dan son kapasite koman Minis Finans ti prezant bidze 2011 avek nou Lasanble Desanm 2010, e kot i ti dir ki an Zen sa lannen nou pou fer en midyear review lo bann depans ki gouvernman pe fer as part of son bann polisi fiskal e bidzeter ki gouvernman pe pourswiv. E mon ti a osi kontan fer rapel nou Lasanble ki sa bidze siplemanter i a’n akor avek – i below target fiskal, fiscal target pour sa lannen ki parey nou konnen pour sa dezyenm mwatye target fiskal ki gouvernman ti’n set ti 2% nou GDP, me as at Avril sa lannen nou target fiskal ti ankor 4.4% nou GDP ki above sa target inisyal. Donk i annan lespas pour kapab anmenn en bidze siplemanter e sa malgre ki nou fek sorti dan en eleksyon e malgre lakizasyon konmkwa nou’n servi resours leta pou eleksyon ki nou’n fek ranporte. Mr Deputy sif pa kapab koz mansonz.

 

Pli gro porsyon sa bidze siplemanter R235,000,000 i pe al pour Air Seychelles, e Stabilisation Fund ki anba kategori Others. Air Seychelles parey nou konnen komansman sa lannen gouvernman in bezwen entervenir pou kapab tenir li e sov li dan sa sitiasyon ki in vwar li ladan dan defi ki in bezwen sirmonte anvi lanvironnman ki nou tou nou konnen ki in bezwen operate ladan. E pour Air Seychelles, dan sa bidze siplemanter nou pe propoz R100,000,000 koman capital injection pou kapab tenir li e pou kapab sov nou airline e anpese ki i pran en move lapant. E sa nou tou, e lepep Seselwa i dakor avek lide e lentansyon gouvernman e Prezidan Michel pou kapab sov nou airline.

 

Dezyenm pli gro porsyon dan sa bidze i pe al pou Stabilisation Fund pour en sonm R50,000,000. Parey zot a rapel, sa Stabilisation Fund, sa nouvo mezir ti ganny anonse kan Minis ti fer son prezantasyon bidze, me pa ti’n ganny apropriye dan bidze 2011 e se pour sa rezon nou vwar sa sonm la ki dan nou midyear review, e sa sonm R50,000,000 parey zot konnen in ganny met la pou kapab entervenir e mitigate against sa gran logmantasyon ki pe kontinyen annan dan pri petrol, e sa larzan i ganny servi pou kapab subsidize pri ki lepep Seselwa i pey pour elektrisite, savedir i subsidize SEYPEC, subsidize SPTC pou transpor piblik e ede pou gard en stabilite dan sa de sekter.

 

Osi anba others Mr Deputy Speaker i annan en sonm R1.5 milyon pou National Day Celebrations ki pou selebre sa lannen, zot a rapel nou ti bidzet R2.5 milyon dan bidze sa lannen, me R1.5 milyon in ganny servi pou preparasyon expo 2020 e alor sa 1.5 ki nou pe propoze pou kapab kouver sa shortfall ki’n ganny kree.

 

Mr Deputy Speaker prezan mon ava al lo lezot detay parey mon’n anonse. Pour bann Minister e Departman anba wages and salaries i annan lapolis ki pe demann 1 milyon e sa pou al anver 30 nouvo recruits dan lapolis e 20 nouvo personnel pour bann VIPs, i annan 1.5 milyon pou Departman Legal, e sa pou ede ranforsi sa Departman avek bann post ki oparavan ti’n ganny frozen e la prezan sa bann post pe permet sa Departman recruit nouvo Avoka e State Counsel pou kapab ede dan lakantite travay legal ki ozordi sa Departman pe bezwen fer fas avek.  I annan R4.3 milyon ki pe ganny servi koman gratwite pour bann travayer IOT ki’n ariv zot tann-servis e sa nou a rapel ti en komitman ki gouvernman ti fer sa lannen menm e sa R4.3 milyon pe ganny apropriye from dividend 27 milyon ki gouvernman in gannyen avek IOT koman en shareholder.

 

I annan R429,000 pou Lasanble Nasyonal e sa pou al koman gratwite pour ansyen Onorab David Pierre ki’n kit nou Lasanble e osi porsyon ladan in ganny servi pou recruit nouvo Parliamentary Reports.  I annan R4.9 milyon ki pou al pou Seychelles Revenue Commission ki pe ganny servi pou pey konpansasyon e gratwite bann staff ki oparavan ti tonm anba Customs avek Tax Office me ki prezan pe tonm anba sa nouvo lotorite otononm Seychelles Revenue Commission.

 

Anba Goods and Services, Departman Legal pe osi pe ganny ankor en sonm R542,000 pou aste bann lekipman pour sa departman. President’s Office pe ganny 1 milyon roupi pour entertainment ki President’s Office i fer. Minister Zafer Etranzer pe ganny R306,000 pou kapab pey rent pour son biro High Commission an Sid Afrik.

 

Lapolis pe ganny R4,000,000 pou pey bann car hires ki i servi pour bann travay lapolis ek sekirite. Departman Sports pe ganny R9.8 milyon, sa pou kouver bann depans ki annan pou Jeux des Iles. Departman Zidisyer pe ganny R4.1 milyon pou kapab met bann lekipman sekirite pour bann Mazistra e osi pou aste bann nouvo veikil. Lasanble Nasyonal pe ganny R274,000 pou kapab finans travay adisyonnel ki bann komite Lasanble i annan pou fer. Seychelles Fire and Rescue Services Agency pe ganny R530,000 pou aste nouvo liniform, R50,000 pour bann reparasyon ki zot bezwen e R400,000 pour bann lezot minor capital outlays ki donn en total R980,000.

 

Seychelles Land Transport Agency pe ganny R5.5 milyon pou kapab kontinyen fer zot progranm road maintenance e enstalasyon nouvo street lights. Landscape and Waste Management pe ganny R7.4 milyon pou kapab finans netwayaz ki kontinyen ogmante dan bann distrik pour bann nouvo semen segonder, feeder e osi netwayaz lo highway e dan Viktorya. Minister Finans ek Trade R9,000,000 pou kapab pey bann arrears. Osi R2.6 milyon pou koman Professional and Consultancy Services pou al pou Minister Lagrikiltir pou antreprann en progranm pou survey tou bann later lagrikiltir.

 

Anba Transfers to Public Sector;

  • National Sports Council pe ganny R4.6 milyon pou preparasyon bann atlet e pour bann special events.
  • National Arts Council pou osi ganny R131,000 pou aste nouvo lekipman.
  • National Tender Board e Procurement Oversight Unit pe ganny R412,000 e R586,000 respektivman pou pey rent pour sa nouvo premises ki zot in move ladan, nouvo biro.
  • National Council for Children R57,000 pou pey shortfall wages and salaries pour zot staff.
  • Children’s Home Foundation R124,800 pou recruitment of Social Worker e Child Welfare Officers.
  • Social Security Fund pe ganny R2,000,000 pou kapab ranforsi Monitoring Unit Secretariat homecare e met en monitoring unit pou kapab supervise travay bann homecarers.
  • SBC pe ganny R1.9 milyon pou kapab kouver Indian Ocean Games ki pou ganny fer isi.
  • Seychelles Investment Bureau R200,000 pou run sa nouvo lofis expo 2020 ki pe fonksyonnen swivan sa expo.
  • NDEA pe ganny R7.4 milyon, sa pou kontinyen bann travay lentelizans e spesyalize sirtou la ki problenm drog i ankor enn nou bann pli gro defi.
  • FIU pe ganny R5,000,000 osi dan konteks bann special duties e bann liabilities ki annan pou fer fas avek.
  • National Youth Councils R237,000 pou aste en bis.
  • Praslin Development Fund R675,000 pou cleaning agency.

Ki fer en total R23,375, 42 pou transfers to public sector.

 

E anba others parey mon ti’n dir pli boner apard Air Seychelles e Stabilisation Fund Ministry of Finance and Trade i ganny R2.4 milyon pour capital subscription to International Organizations an partikilye PTA R1.5 milyon e ADB R898,443.37.

 

Mon krwar mon’n fini dir tou bann detay Mr Deputy. Sa 4 major heads savedir Wages and Salaries Goods and Services, Transfers to Public sector e others i donn sa sonm R235,789,087.39 ki mon ti a kontan demann nou Lasanble pou aprouv sa mosyon pou permet lalwa apropriasyon vin dan nou Lasanble pourki Minis Finans i a kapab reponn plis kestyon lo sa bann detay ki mon’n donnen. Mersi bokou.

 

MR DEPUTY SPEAKER

Pou nou koriz sa pti lerer prosedir anba order 2 nou a demann Onorab Pool pou re-segonn mosyon apre pou fer son lentervansyon.

 

HON ANDRE POOL

Msye Speaker mon segonn sa mosyon e parey mon ti’n dir mon ti a kontan dir de pti mo.

MR DEPUTY SPEAKER

Proceed.

HON ANDRE POOL

Mr. Deputy bidze siplemanter ki devan nou prezante par Leader of Government Business pe demande ki nou aprouv sa sonm R235,789,087.39 anplis ki i ti’n ganny bidzete pou sa lannen 2011. Mr Deputy mon pa pou long akoz deza mover mosyon in pas lo laplipar sa bann depans pou donn nou bann detay neseser e eksplik nou sirtou pou ki rezon ki sa bann larzan pe ganny demande pou fer sa depans adisyonnel pou lannen 2011.

 

Mr Deputy i kler ozordi ki sa revi ki Minis Finans ti promet nou pou annan letan i ti prezant bidze nasyonnal pou lannen 2011 i ti dir nou ki pou annan sa revi plitar milye lannen 2011 e se sa legzersis ozordi ki nou a pe fer devan nou Lasanble Nasyonal. Mr Deputy les mwan dir ki ozordi Sesel i bezwen nou. Sesel i bezwen nou pou nou kapab donn finansman bann diferan sekter, bann diferan landrwa kot nou santi nou bezwen donnen e i malere pou dir ki ozordi ankor ennfwa Lopozisyon in abandonn Sesel. Lopozisyon pe abondonn Sesel akoz ler nou get sa bann diferan depans ki pe ganny propoze, i kler ki i pe benefisye tou sekter nou popilasyon. Par egzanp Msye Deputy Speaker ler nou vwar ki Lapolis pe benefisye atraver sa demann pou bidze siplemanter nou’n toultan ganny dir ki nou pa donn ase sipor nou Lapolis, nou pa donn ase larzan nou lapolis pou zot depanse pou zot kapab fer en pli bon louvraz ki zot pe fer ozordi e la ozordi ler nou pe aprouv larzan pou nou donn lapolis pou kapab donn en meyer servis nou popilasyon nou vwar devan nou en bann sez vid e ki nou bezwen fer sa travay nou tousel. Mr Deputy travayer I.O.T 4.3 milyon roupi pe ganny mete dan sa bidze pou donn zot zot gratwite anlinny avek sa ki gouvernman ti promet pli boner sa lannen e ankor ennfwa nou vwar nou pe aprouv gratwite pou bann travayer IOT nou tousle. E nou nou pou kontinyen fer sir ki pa zis travayer IOT me tou travayer Seselwa i benefisye atraver plis oubyen atraver pli meyer kondisyon travay ki nou kapab donn zot.

Nou al pli lwen Msye Deputy Speaker, nou vwar ki gouvernman pe propoze pou donn plis finansman Departman Legal e biro Atorni Zeneral pou zot kapab donn en meyer servis nou popilasyon e la ankor ennfwa nou’n toutan ganny akize ki nou pa donn ase larzan, nou pa donn ase sipor lazistis pou donn en meyer servis nou popilasyon e ankor ennfwa nou vwar nou nou tousel ozordi pou aprouv sa bidze siplemanter pou donn larzan Legal Affairs e pou AG’s Office pou zot kapab donn en meyer servis.

Mr Deputy dan sa bidze nou osi vwar en gro sonm ki pe ganny donnen avek Departman Lazenes ek Sport sirtou pou finans bann atlet pou prosen Jeux des Iles ki pou fer lo later Sesel. I annan larzan pou plis lekipman sport pou donn zot, i annan 1.8 milyon roupi koman incentives pou bann ki fer tre byen, pou bann ki anmenn meday pou Sesel e pou bann ki fer loner nou pep. I osi annan 3.6 milyon roupi parey in ganny eksplike pou kapab kouver saler pou bann atlet ki vwar zot dan problenm akoz zot bezwen sorti pou zot al training e nou nou santi ki nou bann atlet i bezwen sa sipor koman en gouvernman e nou nou pou fer sir ki sa bann atlet i ganny sa bann sipor malgre ankor ennfwa nou bezwen fer li nou tousel.

Mr Deputy lalimyer, street lights, en kantite fwa dan sa Lasanble nou’n ganny akize konmkwa nou pa pe fer ase zefor pou nou donn plis lalimyer dan nou bann distrik pou ede permet nou bann sitwayen viv an plis sekirite e la ozordi nou pe fer provizyon pou donn Land Transport Agency 2.5 milyon roupi pou kapab rod plis lalimyer pou met dan tou nou bann distrik e ankor ennfwa nou pe fer li nou tousel e nou pou fer li nou tousle. Mr Deputy mon apresye, lo non mon distrik Anse Boileau ki gouvernman pe met sa sonm 2.7 milyon roupi pou kapab finaliz travay arpant bann later lagrikiltir pou permet bann dimoun ganny zot bann dokiman legal dan zot lanmen. I en legzersis ki gouvernman ti’n deza komanse detrwa lannen pase e malerezman i pa ti ankor terminen zisteman akoz ti annan difikilte ekonomik e la ozordi avek sa bon performans parey Leader of Government Business ti eksplike gouvernman i dan en pozisyon pou met plis larzan dan sa travay e mon swete ki sa lannen ennfwa pou tou pandan 2011 sa travay i ava konplete, byensir pa zis Anse Boileau me dan lezot distrik pou  permet nou bann dimoun ki pe esper zot dokiman legal an sa ki konsern later lagrikiltir pou zot ganny li pou zot kapab bouz pli devan.

Mr Deputy mon pa pou al dan tou bann detay akoz deza sa in ganny donnen par mover mosyon me i kler ki ler nou fer en tour lorizon, demann ki pe ganny fer ozordi pou nou ganny plis larzan, pou gouvernman ganny plis larzan dan sa bidze siplemanter i kler ki nou sitiasyon finansyel, nou sitiasyon ekonomik i dan bon lanmen. Serten sa bann demann ki pe ganny aprouve ozordi ti’n deza ganny fer pandan letan ti pe fer preparasyon bidze pou lannen 2011 me malerezman a sa moman sitiasyon ekonomik pa ti permet e alor sa bann demann in ganny tenir e la ozordi nou kontan pou vwar ki gouvernman ler in dan sa pozisyon finansyel pou fer li e nou pe fer li tandis ki larestan bann demann i nouvo me i en bann demann ki esansysel pou permet nou pei bouz pli devan pou permet nou pei fer plis progre ankor.

Mr Deputy pou mwan sa bann depans ki pe ganny propoze i kler e transparan savedir nou pa pe ganny zis bann sif e lekel ki pe ganny sa bann larzan me osi nou pe ganny tou bann detay lo kote sa bann depans pe ale e ki sa bann larzan pe al ganny fer avek. E alor mon pa pou ezite pou donn mon sipor sa mosyon parey in ganny dir ki ava permet Minis responsab pou Finans anmenn proze delwa neseser devan nou Lasanble pou nou kapab ganny plis detay, leklersisman si i neseser e pou nou kapab donn nou laprouvasyon pou son proze delwa. Alors Mr Deputy mon pou siport sa mosyon. Mersi.

MR DEPUTY SPEAKER

Okenn lezot entervenan? Onorab Vel.

HON JENIFFER VEL

Mr Deputy fodre etablir klerman depi boner, byen boner ki diran son ladres bidze ki ti fer an Desanm lannen pase Minis ti dir ki sa bidze pou ganny revwar ver milye lannen mon prezimen i se sa legzersis ki nou pe fer atraver sa bidze siplemanter ozordi. Me pou ede etablir konteks dan lekel ki sa bidze siplemanter pe ganny prezante, mon ti ava osi kontan fer resorti ki pei an se moman pe pas atraver progranm reform ekonomik strikt ki pe ganny administre par IMF. I tre enportan pou dir e pou repete ki nou pei pe ganny swiv de tre pre par en kantite nou bann partener enternasyonnal. Zot pe envestir en kantite dan Sesel e zot pe mize ki nou pei i ava kapab vin en sikse lo lasenn ekonomik enternasyonal, en legzanp par lekel bann lezot pei larezyon e lezot pti leta zil ava kapab swiv. I napa okenn sa bann partener enternasyonal ki pe envestir dan Sesel ki anvi vwar nou pei fail ouswa nou lekonomi vin en dezas. pou zot lesel fason pou zot retir benefis zot larzan se pou ki lekonomi Sesel i kapab vin en vre sikse e pou ki nou pei i finalman reisi debout lo son prop lipye. Se pou sa rezon ki IMF i isi Sesel, zot misyon primer se pou sofgard lentegrite lekonomi Sesel dan en zefor pou garanti ki Sesel i fer tou sikse ekonomik ki i kapab fer e sa anretour i protez lenvestisman ki nou bann partener enternasyonnal pe fer dan Sesel.

 

Alors Mr Deputy i dan sa loptik ki mon pe demande lo non bann zabitan Pointe Larue, eski sa bidze siplemanter i anliny avek bann norm, nou bann progranm reform ki’n ganny etablir konzwentman avek gouvernman Sesel avek IMF. I enportan pou konn sa lenformasyon akoz letan ki mon pas devan laport mon bann zabitan mon pou bezwen kapab defann apropriasyon ki pe vin devan nou Lasanble e premye defans se ki nou eksplik nou dimoun ki sa i pa en keksoz ki gouvernman Sesel pe fer li tousel me ki sa legzersis i enn ki’n ganny diskite e teste ansanm avek nou bann partener aletranze e ki nou bann partener enternasyonal pa’n vwar okenn bon rezon pou obzekte e anpes sa tranzaksyon deroule.

Mon dezyenm pwen konsern Mr Deputy se Air Seychelles. Vi ki Airport i zis lanmenm lot kote ek mon biro i tre fasil pour ki bann staff Air Seychelles i ganny akse avek mwan koman en MNA e sa bann staff pe poz bokou kestyon ozordi lo lavenir zot konpanyen. Me i pa zis zot ki pe kestyonnen, mon krwar ki ozordi tou sitwayen Sesel i santi zot konsernen  par sa ki pe arive avek Air Seychelles e kestyon ki pe ganny leve se ki nivo komitman gouvernman lepep anver sa lorganizasyon? Eski nou vreman serye letan nou pe dir ki nou anvi gard Air Seychelles dan lezer? Ouswa eski nou pe zis koze? Eski gouvernman lepep i pare pou fer tou sa ki neseser pou fer lafyerte sa pep kontinyen an vol anler, ouswa eski nou pou abandonnen e kit dan milye semen.

Ozordi Mr Deputy sa size i konsern primer, sa i en konsern pou tou nou bann zabitan. Seselwa i santi li konsernen e vreman enterese par sa ki pe pase avek Air Seychelles. La osi lo non zabitan mon distrik mon pe demande ki Vis Prezidan i vin donn nou en leksplikasyon ki kler e tre detaye lo sa size. Mr Deputy mon 3eme e dernyen pwen konsern se lo sa size disiplin fiskal. Mon’n asiz isi dan sa Lasanble depi lontan, depi letan ki nou progranm reform ekonomik ti komanse. Si i annan en keksoz ki Vis Prezidan Faure in ensiste lo la depi lo komansman sa progranm se disiplin fiskal.

Depi lo komansman nou progranm reform, Vis Prezidan in met son loner e a’n ensistan ki i pou mentenir e defann sa nouvo klima disiplin fiscal. In deza eksplik nou ki sa ti enn bann pilye nou reform e ki sikse nou lekonomi i pou depan en kantite lo sa si nou gouvernman i kapab mentenir en kontrol strikt lo nou depans. Nou ti ganny eksplike an tre gran detay konmkwa ki polisi moneter tousel pa pou zanmen garanti sikse ekonomik Sesel me ki tou ti depann lo mentenir en polisi disiplin fiskal strikt me lo lannmen en eleksyon nou pe antann en kantite keksoz ki alarman, i annan en kantite alegasyon ki pe ganny sirkile konmkwa ki resours letan in ganny servi e ki en kantite gaspiyaz in ganny deroule. in menm annan alegasyon ki en kantite milyon roupi in ganny envestir zis pou aste vot dan sa eleksyon. Mr Deputy Speaker bann parol koumsa letan ki i pe ganny dir i efrey nou dimoun. Letan ki bann tel alegasyon i ganny repete san ses e san okenn pozman dan zorey dimoun sa i kapab kree serten kondisyon malady. Sa bann keksoz koumsa i pa fer dibyen personn, i pa fer okenn dibyen sa ki pe koz mansonz e i sertennman pa fer dibyen nou bann zabitan ki lape zot lespri pe ganny trouble par bann tel sotiz.

Mr Deputy dan mon lopinyon i tre, tre enportan ki Vis Prezidan i vin klarifye sa size disiplin fiskal e si wi ou non okenn vyolasyon in ganny komet. I enportan ki Vis Prezidan i prezant son case e an retour bann lezot dimoun ki pe zis soufle move keksoz dan zorey dimoun ava bezwen zot osi aret rabase e komans prezant zot bann fe. Mr Deputy sa i le 3 gran linny esansyel ki mon ti anvi tous lo la pou ozordi. Mon ava rezerv en prezantasyon bokou pli detaye pou letan ki Vis Prezidan i vin prezant sa lenstriman legal ki pou permet li fer sa bann lapropriasyon ki dan sa bidze siplemanter. Mon remersi ou Mr Deputy.

MR DEPUTY SPEAKER

Mon napa okenn lentervenan, mon ava demann Lonorab Potter pou konklir.

HON MARIE-LOUISE POTTER Mersi Mr Deputy Speaker e mersi tou bann entervenan lo sa mosyon ki devan nou Lasanble ozordi. Parey mon’n dir dan mon prezantasyon Mr Deputy Speaker sa bidze siplemanter pe ganny propoze as part of stratezi Minister Finans pou annan en midyear review ki ti anonse Desanm lannen pase e sa mosyon i pe ganny fer dan en sitiasyon fiskal e bidzeter ki an bonn sante e i pe ganny fer dan latransparans e tou detay i la devan nou Lasanble e pou medya.

Mr Deputy Speaker kan nou koz lo bidze gouvernman oubyen bidze siplemanter, nou pe koz lo larzan ki gouvernman pe remet dan lekonomi oubyen gouvernman pe remet dan nou pep atraver bann progranm e bann proze, bann peyman ki mon’n eksplike pli boner. Par egzanp letan nou koz lo 12.3 milyon roupi ki pou al anterm Wages and Salaries nou pe koz lo larzan ki pe al ganny mete dan pos travayer Seselwa e sa larzan an retour pou retourn dan lekonomi pou lwil lekonomi.

 

Letan nou koz lo 45.9 milyon roupi anba Goods and Services nou pe koz lo larzan ki gouvernman pe met dan sirkilasyon pou aste servis avek sekter prive e sekter prive se lepep Seselwa, sekter prive i anploy lepep Seselwa. Letan nou pe koz lo Transfers to Public Sector pou en sonm 23.3 milyon roupi, sa osi nou pe koz lo larzan ki pe ganny mete dan nou pep, ki pe ganny mete an sirkilasyon atraver bann diferan schemes e progranm.

 

E parey mon’n dir pli boner, pli gro morso sa Supplementary Appropriation pe al pou Air Seychelles e Stabilisation Fund. Mon kontan ki ozordi nou Lasanble i ganny sa loner pou aprouv sa Stabilisation Funds 50 milyon roupi akoz sa Stabilisation Fund se limenm li ki pou ede cushion, mitigate kou lavi dan Sesel. Nou dan Parti Lepep e dan sa kote, nou pa zis koz lo pri lavi e fer en kantite promes dan vid. Me nou azir, nou pran bann mezir konkret e nou azir avek responsabilite pou nou asire ki pri lavi i reste stab e i pa ogmant a en nivo ensoutenab e se pou sa rezon ki ozordi nou annan sa privilez nou tousle, pou aprouv sa 50 milyon roupi e nou ti a kontan ki lepep Seselwa i konpran tre byen diferans ant nou ek lopozisyon. Zot zot dir, zot koze me nou nou fer e nou azir. Vwala diferans avek sa de kote. 100 milyon roupi pou al pou nou Airline – diferans, zot koz lo Air Seychelles, zot koz anfaver Air Seychelles, zot koz swadizan pou defann bann travayer Air Seychelles me sa ki vreman an realite, a’n aksyon azir pou defann Air Seychelles e pou defann lentere sak travayer Air Seychelles se nou isi dan sa Lasanble e se nou isi lo kote Parti Lepep e mon ti a kontan ki travayer Air Seychelles i ekout sa tre byen e i konpran sa tre byen.

 

Alor Msye Deputy Speaker parey mon’n dir plitar laprouvasyon sa mosyon i ava permet Minis Finans vin devan nou Lasanble e kot nou ava ganny en nouvo loportinite pou nou eklersi okenn keksoz ki nou santi petet pa’n ase kler oubyen pa’n ase detaye e avek sa mon demann nou Lasanble pou aprouv sa mosyon. Mersi.

MR DEPUTY SPEAKER

In ler pou nou pran en vot lo Mosyon. Tou sa ki anfaver? Okenn ki kont?

Mosyon in aprouve e se la osi ki nou konplet nou travay pou ozordi. Nou ava adjourn ziska Mardi Prosen.

(Adjournment)