::
Home » Verbatim » Verbatim -Second Term 2011 » Tuesday 28th June 2011

Tuesday 28th June 2011

Download PDF


 

NATIONAL ASSEMBLY OF SEYCHELLES

Tuesday 28th June 2011

The Assembly met at 9am

National Anthem

Moment of Reflection

Mr. Speaker in the Chair

MR SPEAKER

Bonzour Vis Prezidan, bonzour tou bann Manm Lasanble Nasyonal, bonzour bann zanfan segonder Pointe Larue, byenvenir parmi nou. Ozordi lo nou Order Paper nou annan nou en amannman pour nou Konstitisyon e Revenue Administration (Amendment) Bill 2011, toulede i sipoze ganny pran par Vis Prezidan me Leader of Government Business in endik mwan ki i annan serten nouvo devlopman lo sa amannman, sixth Amendment. Mon ti a demann ou pour entervenir. Ou pe fer li on behalf of the Leader of Government Business.

HON ANDRE POOL

Mr Speaker, bonzour Vis Prezidan, bonzour tou mon bann koleg MNAs.  Mr Speaker anba lotorite Leader of Government Business mon pe move ki anba Order 72 nou Standing Orders, Bill Constitution of the Republic Of Seychelles (Sixth Amendment) Bill 2011 i ganny withdrawn. Mersi.

MR SPEAKER

Okenn ki segonn sa mosyon? I en Procedural motion. Mosyon i ganny segonde. Tou bann ki anfaver? Okenn ki kont?  Bon basically ozordi nou pa pou pran sa sixth Amendment akoz in ganny withdrawn par Gouvernman, donk alor nou pour al lo Revenue Administration (Amendment) Bill 2011. Nou a ganny nou en motion for Second Reading.

HON ANDRE POOL

Mr Speaker mon move ki Revenue Administration (Amendment) Bill 2011 i ganny lir pour en dezyenm fwa. Mersi.

MR SPEAKER

Okenn ki segonde?

HON MARIE-LOUISE POTTER

Mon segonde Mr Speaker.

(Technical Problem)

VICE PRESIDENT

Mersi Msye Speaker, bonzour tou bann Manm Onorab Lasanble Nasyonal e osi bann etidyan lekol Pointe Larue segonder.  Mr Speaker nou Lasanble i ava rapel ki an Desanm 2009, Lasanble ti aprouv lalwa ki diriz Ladministrasyon Reveni e ki sa lalwa ti antre anfors an Zanvye 2010 e lotorite ki gouvern Komisyon Reveni in pas enpe letan pour kapab fer serten lanaliz lo serten bann provizyon sa lalwa ki anfors e ki gouvernman atraver mwan ozordi nou pe prezant sa bann lamannman pour laprouvasyon nou Lasanble Nasyonal.

 

Serten sa bann lamannman i annan pour fer avek nivo lanmann ki dan lalwa e rasyonal pour kapab redwir se ki Lotorite Komisyon Reveni in vwar ki sa bann lanmann i tre o e ki nou devret vin realis avek sitiasyon isi Sesel.

 

Dezyenmman se osi en thinking ki annan pour fer lafason ki Tribinal Reveni i ganny set.  Lalwa ozordi i demande ki Sef Ziz i apwent en Ziz e limenm li ki vin Chairperson Tribinal Reveni e ki Minis Finans i apwent toulede.  An diskisyon ki nou’n ganny fer avek Sef Ziz, avek lezot bann fonksyonner dan Minister Finans e osi Reveni. Gouvernman in tonm dakor ki nou bezwen fer serten bann sanzman la kot i egziste e ki dezormen rekomandasyon ki pe ganny met devan zot se ki Minis Finans i apwent bann dimoun ki pou Chair e osi konpoz Tribinal Reveni e napa nanryen pour fer avek Zidisyer. E si zanmen bann ka i devret ganny met devan Lakour Siprenm i ava swiv son – parey nou pe dir, son normal course e sa bann case i ava al laba.

 

Donk pour mwan Mr Speaker i bann lamannman ki straight forward e mon rekonmann laprouvasyon Lasanble Nayonal. Mersi.

MR SPEAKER

Deba i ouver, okenn ki oule entervenir lo sa Bill devan nou.

 

(Technical Problem)

HON MARC VOLCERE

Mersi Msye Speaker, bonzour Vis Prezidan, bonzour toulmonn alekout.  Msye Speaker mon ti a kontan dir de mo lo sa lamannman parey Minis in eksplike, i pa en gran lamannman.

 

Mr Speaker nou pei pe bouz ver en klima kot nou pe elev sekter biznes e donn li son vre plas koman moter ekonomik nou sosyete.  Natirelman avek en tel demars i osi annan en kote respe ki bezwen ganny donnen avek bann akter ki aktiv dan biznes.  Sa bann lamannman ki devan nou ozordi pe fer bokou pour anvoy en mesaz kler pour bann Businessmen ki gouvernman i tre serye dan son demars pour li aport en latmosfer ki favorab pour lagrandisman biznes dan nou pei.

 

A la menm enstan i enportan ki nou rekonnet vre valer kontribisyon ki koleksyon reveni i aporte dan nou lekonomi. En gran parti nou progranm reform i direkteman liye avek abilite gouvernman pour kolekte reveni pour met dan kof leta.  I menm vre poudir ki sikse nou reform i an gran parti ganny definir par sa kapasite koleksyon reveni e pour sa rezon ki sa size i bezwen kontinyelman ganny revwar e revize.  Koleksyon reveni pei i devret ganny antreprann dan en fason ki tou bann partener i kapab santi ki sa pe ganny fer dan en fason pli ekitab posib.

 

Mr Speaker provizyon pour bes bann penalti ki ganny peye lo bann lofans vyolasyon peyman reveni i en mezir ki lontan pe ganny demande par lakominote biznes.  I annan enpe letan ki’n ganny fer sorti ki pa tou dimoun ki komet sa bann lofans ki fer li entansyonnelman ouswa avek move lentansyon.  Sa provizyon i demontre en fason travay kot Minister Finans i pare pour met a’n aksyon bann meyer pratik ki pour finalman benefisye tou dimoun.

 

Mr Speaker bann lamannman i osi re-definir kwa ki en lofans e koreksyon dan teks sa lalwa e dan fason ki keksoz i ganny prezante avek fasilite avek lenterpretasyon kwa en lofans.  La ankor gouvernman pe demontre abilite pour adopte meyer pratik kar avek sa bann lamannman i evite ki en endividi i kapab otomatikman ganny kategorize koman koupab pour en lofans senpleman atraver en lenterpretasyon lalwa ki tro strikt e rezid.  Parmi sa bann lamannman nou osi vwar bann provizyon administrativ ki pe fer ki lalwa i vin azour avek bann lezot provizyon egzistan ki deza pe ganny servi tel parey ki nimero idantifikasyon tax.

 

Mr Speaker challenge pou nou pei se pour ogmant larises dan en fason pour ede lev nivo lavi nou pep. Dan sa demars i enportan ki lakominote biznes i avans devan e pran zot vre plas e lenportans dan devlopman lekonomi nou pei.  Pour sa arrive, i vreman enportan ki nou aranz sa ki apel ease of doing business isi dan Sesel.  Nou bezwen fer li pli fasil posib pour en endividi ouswa lakonpani fer zot bann aktivite dan en latmosfer ekonomik stab kot zot ganny garanti tou proteksyon anba lalwa e avek sa antet ki mon pe siport sa bann lamannman ki la devan nou, bann provizyon ki devan nou Lasanble pe ede pous nou pei dan bann direksyon kot size kree en latmosfer ki biznes i friendly.

 

Mr Speaker avek sa mon remersye ou.

 

MR SPEAKER

Okenn lezot entervenan?  Si napa okenn lezot entervennan mon a demann Vis Prezidan pou reply.

 

VICE PRESIDENT FAURE

Mr Speaker mon ti a kontan remersye Onorab Volcere pour son kontribisyon lo sa proze delwa e ankor enn fwa mon ti a rekonmann avek Lasanble ki nou donn nou sipor lo sa proze delwa. Mersi

MR SPEAKER

nou ava pran en vot lo merit zeneral sa Bill.  Tou bann ki anfaver?  Okenn ki kont? Bill in pase.  Mon a ganny mwan en Formal Second Reading.

CLERK

A Bill of an Act to amend the Revenue Administration Act.

MR SPEAKER

mon prezimen ki zot oule sot Committee Stage.  Mon ava ganny en mosyon pou sa, silvouple.

HON ANDRE POOL

Mr Speaker, avanler mon fer sa mon pe zis rod ou gidans konsernan sa detrwa amannman ki mon ti’n anvoye pour konsiderasyon Lasanble.

MR SPEAKER

Mon pa’n ganny okenn lamannman.

 

HON ANDRE POOL

Mr Speaker, lamannman in ganny sirkile avek Order Paper tou zafer.  Revised Order Paper.

MR SPEAKER

I paret amannman in ganny anvoye kot Clerk me sa pa’n ariv kot – Clerk pa’n dan Lofis osi i fek antre yer me ler mon pe get li la vitman mon vwar ki i bann senp amannman. Mon pa vwar okenn problenm avek li nou kapab enkorpor li dan son…

 

Nou prezimen ki sa bann amannman in ganny enkorpore ladan donk nou ava pran en vot lo sa kestyon Committee Stage.

 

HON ANDRE POOL

Mr Speaker mon move ki nou sot Committee Stage pour sa Bill.  Mersi.

 

MR SPEAKER

Okenn ki segonde?

 

HON MARIE-LOUISE POTTER

Mon segonde Mr Speaker.

 

MR SPEAKER

Nou ava pran en vot lo la. Bann ki anfaver? Okenn ki kont? Bill as amended.  Mon a ganny mwan en motion for Third Reading.

HON ANDRE POOL

Mr Speaker, mon move ki Revenue Administration (Amendment) Bill 2011 i ganny lir pou en trwazyenm fwa.

 

MR SPEAKER

Okenn ki segonde?

 

HON MARIE-LOUISE POTTER

Mon segonde Mr Speaker.

 

MR SPEAKER

Sa ki anfaver? Okenn ki kont?  Personn pa kont.  Mon ava ganny mwan en Third Reading.

 

CLERK

This Act may be cited as the Revenue Administration (Amendment) Act 2011.

MR SPEAKER

Bill in pase mon ava eskiz Vis Prezidan e remersye li pour vin la bomaten.

 

Dezyenm item lo Order Paper sa se en mosyon par Onorab Joseph e sa mosyon pour ganny pran par Deputy Speaker, donk nou pour adjourn pou 1 minit.

 

(Adjourment)

 

(Deputy Speaker in the Chair)

 

MR DEPUTY SPEAKER

Mon a dir bonzour tou Manm Onorab e osi bann etidyan ki dan gallery.  Nou ava kontinnyen avek nou sesyon travay pour bomaten.  Lot item lo agenda parey zot konnen se mosyon.  Mon a envit mover Onorab Joseph Francois pour fer son prezantasyon.

 

HON. JOSEPH FRANCOIS

Bonzour Mr Deputy, mon bann koleg e bann etidyan lekol Pointe Larue Segonder.  Mosyon ki devan sa Lasanble ozordi bomaten i lir swivan: Sa Lasanble pe demann gouvernman pour konsider revwar bann balizaz Park Maren dan Sesel avek bi pour pli byen protez bann zone maritim ki sansib e retir bann ki nepli zwenn kriter Park Maren e ki nepli soutenab.

 

Mr Deputy legalite sa mosyon i dekoul direkteman dan Konstitisyon Sesel Lartik 38 ki deklare ki i drwa tou Seselwa san leksepsyon pour viv e rezouir en lanvironnman ki ekolozikman balanse e an bonn sante.  Apre sa gran laviktwar Prezidan Michel an Me 2011, e dan direksyon sa nouvo Sesel ki Parti Lepep pe vizyonnen Mr Deputy, i tre tre apropriye pour nou komans adres bann size ki pour labaz nou vizyon.  Bann size ki fer nou egziste koman en pep fyer e bann size ki nou pei i bezwen aborde dan en fason koeran e pridan.  Sa bann size parfwa i kontroversyel e parfwa i soulinny en kantite defayans e kritik ki egziste dan en sistenm.  Me dan sa lespri kot Prezidan Michel pe dir ki gouvernman i bezwen retourn ver lepep e kot distrik byento pe al ganny son lotonomi ki ti osi baz enn mon mosyon pli boner lannen pase, i egalman enportan pour revwar nou bann polisi mazer, nou bann lalwa ki pe eparpiye enpe partou e nou bann pratik zesyon ki parfwa i tro outdated e irelevan e met nou konsantraksyon pour vin avek bann lide e sizesyon ki get bokou pli lwen ki lentere zis detrwa minorite dimoun.

 

La sa syek ki nou pe viv ladan ozordi Mr Deputy si i ankor annan egziste en dimoun ki pa vwar lenportans donn proteksyon nou lanvironnman ki labaz nou lavi toulezour, nou travay e larises nou zanfan, mon pe demann mon lekor kote nou pei in arive e kote nou ledikasyon pe anmenn nou.  Ankor ennfwa mon konpran akoz toultan nou Prezidan in dir ki li i pa sa dimoun ki travay pour sa lot eleksyon me i plito pe travay pou sa prosen zenerasyon.  Sa mosyon pe demann gouvernman pour adres 2 keksoz Mr Deputy.  Enn, pour pli byen protez nou bann resours lanmer par revwar nou bann balizaz park maren.

 

Dezyenmman, se revwar nou stratezi zesyon dan nou bann zone maritim proteze pour fer ki nou zefor i vin bokou pli soutenab e nou travay i vin pli volapenn e rezilta i ava koz pour limenm.

 

Mr Deputy la mon oule ouver scope sa mosyon en pti pe plis pour kouver tou bann zone maritim proteze dan Sesel.  Sesel i annan li 14 landrwa maritim ki anba proteksyon legal e zot ganny ankadre anba 3 morso rezislasyon ki ganny administre par 3 diferan lazans.  Sa 3 lalwa i konm swivan:

  • National Parks and Nature Conservancy Act (Cap 141),
  • Fisheries Act (Cap 82), e
  • Protected Area Act (Cap 185).

 

Sa 14 zone maritim anba proteksyon i kouver 6 park maren nasyonal ki nou dir Marine Parks, i kouver 3 rezerv natirel spesyal ki nou apel Special Nature Reserve, i kouver 4 rezerv pour proteksyon kokir ki nou apel Shell Reserves e en zone proteze anba lalwa Protected Area.  Sa bann sit zot ganny zere par bann diferan lenstitisyon ki varye depi lenstitisyon gouvernman ziska lenstitisyon non-gouvernmantal e lorganizasyon prive.

 

Bann park maren Mr Deputy:  Tou park maren nasyonal Sesel i ganny zere par lotorite ki nou apel National Park Authority ki ti ganny formen an 2009.  Sa i kouver tou bann park maren ensi byen ki bann park nasyonal ki sitiye lo later tel ki Morne Seychellois National Park.  Ansyen Lotorite Park Maren, MPA, e Sant Resers Maritim ek Teknolozi Sesel, SCMRT, i konmela tonm anba sa lotorite.

 

Park Maren Ste Anne Mr Deputy i apepre mwens ki 4 kilomet avek lakot les Mahe.  En lakot ki annan pli o dansite dimoun ki pe reste dan Sesel, en lakot ki annan pli o nivo polisyon ki egziste a en rezilta bann landrwa endistriyel ki trouve lo lakot e en lakot ki annan pli o trafik bato ki pe sirkile a en moman dizour dan Sesel.

 

Park Maren Port Laurnay li i trouve lo lakot Was Mahe kot li dan sa dernyen en lannen in vwar en onivo tourizm ki’n ogmante e ki pe servi sa landwar.  Cap Ternay li i enn pti pe pli lwen, i ankor enpe pli byen proteze me nou pe vwar alavenir ki li osi i pour ganny presyon par en nouvo devlopman ki pour trouve laba e sa se pour lotel Emirates.

 

Mr Speaker Park Maren Silhouette, i annan en pti popilasyon me i annan en devlopman tourizm ki pe bouz tre tre vit e i osi presyon pe vize dan son direksyon.  Park Maren Curieuse li i enpe pli lwen avek Mahe me pli pros avek Praslin kot i trouve direkteman an konfli avek en popilasyon ki sitiye Anse Possession e Pasqueur.  E li i kouver Curieuse a’n antye e i adres en bout lo Praslin.  E answit i annan Park Maren Ile Coco ki li i enpe pli pros ek La Digue e li i pa tro abite.

 

Mr Deputy sa bann park Maren ki mon’n mansyonnen, tousala i tonm anba lotorite Nasyonal ki zer park Sesel.  Me i osi annan bann lezot Park ki pa neseserman tonm anba sa lotorite me i tonm anba proteksyon dan nou pei.  Par egzanp i annan Fondasyon Zil Sesel ki nou dir SIF.  Li i ti ganny formen atraver en Presidential Decree pour zer rezerv spesyal Aldabra e Vallee de Mai.  E Aldabra laba i osi enkli en delimitasyon lanmer ki apepre en kilomet ek lakot Aldabra e i osi kouver sa zone maritim dan son lagon.

 

An 1991 proteksyon lo Aldabra ti’n komanse par sosyete Rwayal.  Lot NGO lokal se konzervasyon bann zil Sesel ki nou dir ICS.  Li, avek permisyon propriyeter Zil Arid, ki nou konnen i pour bann gran fanmiy Cadbury Langleter i zer lanmer otour Ile Arid pour ziska 200 met ek son lakot.  Sa rezerv ti ganny etablir an 1993 dan lepok kolonyal e sa lepok se sosyete Rwayal pour konservasyon lanatir Langleter ki ti pe zer sa rezerv.

 

Nature Seychelles i en lot NGO ki li osi i pe fer son kontribisyon dan proteksyon nou bann landrwa maritim e li i pe travay lo Kouzen.  E Kouzen sa rezerv i kouver 400 met lanmer otour zil Kouzen.  E li osi i ti ganny etablir dan bann lepok kolonyal an 1975 e sa lepok i ti pe ganny zere par Bird Life International ki en NGO enternasyonal.

 

SFA Mr Deputy i osi annan en rol ki i pe zwe dan proteksyon nou bann landrwa maritim e la spesifikman SFA li i pe protez nou bann landrwa pour proteksyon kokiy.  E sa i annan 2 landrwa lo Mahe, se sa morso lanmer ant Anse Faure ziska Pointe Au Sel dan distrik Anse Aux Pins e Au Cap, sa morso lanmer depi Lapwent North East Point ziska lans Carana dan distrik Anse Etoile e Glacis.  Praslin depi Pointe Zangiv ziska Anse Boudin dan distrik Baie Ste Anne.  E La Digue depi La Passe ziska Kap Bagar.

 

Tou bann zone proteksyon kokiy i ganny delimite ziska 400 met ek lakot e zot ti ganny etablir par SFA an 1987 anba lalwa Fisheries Act pour protez sirtou oumar.

 

Ban Afiken i dernyen Mr Deputy ki anba proteksyon nou bann lalwa e li i ganny kontrole par IDC e i ganny proteze anba sa lalwa ki nou dir Protected Area Act 1987.  Tou park maren Sesel i ganny klase enternasyonalman par IUCN koman kategori 1(A), tandi ki tou bann rezerv spesyal Sesel i ganny kategorize par IUCN koman kategori (B).  Rezerv Koray e African Bank pa ganny regle par okenn lenstriman enternasyonal.

 

Zeneralman laplipar balizaz park maren i ganny delimite pour en zistans 200 met avek lakot sa zil kot i sitiye.  E sa i annan 2 leksepsyon pour le moman Sesel.  Nou annan leksepsyon Silhouette ki li letan i ti ganny etablir i ti ganny etablir pour protez sa popilasyon torti-d-mer lola e li i ale ziska 1 kilomet otour zil Silhouette e answit i annan Curieuse ki bout ki vir anfas avek Praslin i ale ziska lo shore Anse Possession ek bay Pasqueur.

 

Mr Deputy Ste Anne i osi annan en pti leksepsyon akoz i pa en zil tousel me i en group zil e alor li i pran 200 met ek tou bann pwen pli lwen ek sak zil otour ki tonm dan sa park.

 

Ki sa mosyon pe targete e akoz Mr Deputy?  Premyerman teritwar lanmer Sesel i ganny sitiye dan en parti lemonn ki annan tre o diversite lamarin.  Dan delo Sesel i annan plis ki 300 kalite koray ki nou apel hermatypic corals.  I anann plis ki 920 kalite pwason e bokou plis pe kontinyelman ganny dekouver zour an zour.  I annan parmi pli gran koloni zwazo lanmer ki vin ponn lo nou bann zil dan Losean Endyen e pli gran popilasyon torti-d-mer e kare dan Losean Endyen ki pe servi nou bann lans pou ponn.

 

Nou lanmer i plis ki mil fwa ris an biodiversite ki nou later isi Sesel.  Me malerezman se limenm li ki mwen ganny proteze Sesel akoz nou later parey nou’n ganny dir, plis ki 50% byento i pour vin anba proteksyon, me nou lanmer i selman 0.5% nou teritwar total ki aktyelman anba proteksyon.

 

Sa mosyon ti kapab aret la akoz zis la i montre sa debalans dan lenportans ki nou donn nou resours lanmer konpare avek lenportans ki nou donn son counterpart lo later.  Me non, mon pa pour aret la, mon pour al bokou pli lwen Mr Deputy.  Nivo proteksyon ki dan nou bann park nasyonal e nou rezerv lo later i ganny konsidere enkonparableman o konpare avek bann nivo proteksyon ki ganny mete lo nou bann park maren.  Mon a donn detrwa legzanp.  I preski enposib pour okenn dimoun oubyen lorganizasyon prive oubyen gouvernmantal pour antreprann konstriksyon dan en park nasyonal lo later tel ki Morne Seychellois National Park e bokou bann ka konstriksyon par bann zabitan ki reste dan sa bann menm park in ganny rezete.  Me dan nou park maren preski partou nou pe vwar konstriksyon e devlopman bann lotel ki trouve right lo shore nou bann park maren.  Nou’n vwar bann lotel 5 zetwal par egzanp ki Port Laurnay e avek Ste Anne.  Nou’n vwar sa lotel Raffles ki preski baliz avek park maren Silhouette e i annan plan pour lotel Emirates e mon aprann plizyer ankor ki pour vini.

 

Pour zot konpran ki lanfaz mon oule mete, mon osi al pli lwen dan mon legzanp.  Otour nou bann park nasyonal sirtou Morne Seychellois i annan en delimitasyon andeor sa ki nou apel bann buffer zone.  Sa i pa trouve dan park nasyonal me bann devlopman ki ganny fer dan sa bann landrwa i ganny strikteman kontrole par gouvernman.  Me dan lot kote letan nou get nou bann park maren e sirtou mon pran legzanp park maren Ste Anne, i tonm squarely dan pasaz bato komersyal e anfas ek li i en zone ki pli ganny frekante dan Sesel par swa rezidans dimoun, swa bann fasilite endistriyel oubyen swa par bann aktivite lwazir.  Mr Deputy sa i kler, montre ou nivo e lenportans ki nou atase, ki nou’n mete avek nou bann landrwa proteze.

 

Mr Deputy si ou koup oubyen ou derasin en plant rar dan en park nasyonal, i annan en penalti tre o pour prohibit sa bann aksyon, me si ou larg lank lo en group koray dan nou park maren, sa i preski arive e personn pa preski pran okenn latansyon lo la.  E son management i dir ou tou, se pa finalman headquarters marine park Msye Deputy.

 

Dan en lespri kot i mal nou devret aranze, leta nou Headquarters National Parks Authority i reflekte nivo zesyon, nivo negle e mank lenportans ki gouvernman in donnen dan sa lenstitisyon.  Ozordi i pa drol ki nou trouv nou zis avek 0.5% nou zone maritim proteze e laplipar nou bann park maren i lo en nivo degradab kontinnyel.

 

Okomansman, headquarters konzervasyon lanmer ti sitiye dan en pti lofis dan Zarden botanik kot biro lanvironnman dan bann lannen 80.  Answit, avek nouvo Lalwa Park Maren ek letan NYS Ste Anne ti fermen, headquarters park maren ti bouze ti vin lo Ste Anne kot ti annan bann laklas arts, carpenter, eksetera.  E laba sa bann landrwa ti ganny renovate e nou ti vwar tou bann fasilite tel ki fasilite laboratwar, fasilite resers siyantifik, plizyer biro administrasyon, store, e plizyer landrwa lozman pour bann travayer ensi byen ki bann dimoun ki pe fer resers.  Avek larive lotel Beach Comber e proze ki’n ganny pran plas lo sa zil, sa park maren ti bezwen bouze e la nou ti vwar zot zot ti abit zot dan en pti kwen kot SWAC kot sa letan ti ganny sitiye lo car park Stad Popiler kot ansyen biro Licensing ti ete.  E answit, son bout resers li i ti bouze i ti al kot ansyen NYS Cap Ternay ti ete kot bann laklas enn pti pe anler lo montanny.

 

Mr Deputy apre nou park maren zot headquarters in kontinyelman bouze e zot in al enkou kot NAC, kot National Arts Council e la i ti baze obor National Library dan en pti biro kot papye, travayer, store, i ganny sitiye dan en sel landwar.  E answit sa headquarters in bouz bokou pli lwen enn pti kou la in tourn pli pros avek por e la in vin preski, mon dir preski dan en store kot legim STC i sitiye.  Sa kot STC Fruits and Vegetable Unit lo vye Por.  E la i preski dan en store kot tou bann pti lofis i sitiye enn lo lot e kot bann travay tou lezour pour manage nou park i ganny trouve.

 

Mr Deputy Management nou park maren in osi sanz lanmen.  In komans avek defen Msye John Collie, in vin Madanm Mary Stravens, in al Msye Ronny Reneau, e la tou dernyenman i annan en zenn, Msye Denis Matatiken.  Me leta nou bann fasilite headquarters i pa’n agrandir, i pa’n ogmante e i pa’n vin pli bon, me plito in sorti one of the best dan losean Endyen pour vin one of the worst la aktyelman.

 

Sant e nivo resers osi in tonbe Mr Deputy.  In komans depi Shoals of Capricorn pour al SCMRT ki Sant Resers Maritim ek Teknolozi Sesel e avek larive lotel Emirates Cap Ternay nou napa gran lespwar ki sa bann fasilite Cap Ternay pou reste laba pour bokou pli lontan.  Sa in fer ki konesans maritim lo kwa ki nou annan e kwa ki nou devret proteze in reste tre limite e sa i nou pli gran defi ki Lotorite Park Nasyonal pe fer fas avek.  E sa in osi ki’n fer nou vre rol zesyon Park Nasyonal ganny neglize.  Me tou-d-menm se sa ki labaz konservasyon biodiversite maren.  Dan sa dernyen 10an bokou resours ek lenerzi in ganny mete dan koleksyon sa 10 a 15 dolar ki viziter pe donnen letan zot vizit park maren e preski zero latansyon i ganny donnen lo resers e konservasyon dan nou bann lespas maritim.

 

Problenm avek park maren Sesel, mon pour soulinny sa detrwa e zot pour probableman donn mwan ankor enpe sizesyon letan zot entervenir.  Park Maren i annan bokou ki zot groser e design i pa ase pour protez son lekolozi ki trouve ladan.  I annan bokou park maren ki pa pe ganny byen zere isi Sesel.  I annan park maren ki’n fail akoz degradasyon son lanvironnman e mank proteksyon son lantouraz.  I annan park maren ki pe fer plis ditor ki dibyen an rezilta konsekans e lenkonveyans ki pa entansyonnelman dan son zestyon.  I annan park maren ki donn ou en ilizyon ki i en park maren e i fer ou krwar ki i pe proteze me annefe napa proteksyon ki pe pran plas ladan.

 

Mr Deputy timing sa mosyon i tre, tre enportan.  I vin akoz Sesel parey plis ki 150 pei dan lemonn ki form parti sa konvansyon ki nou apel konvansyon biodiversite, oubyen CBD, ki lannen prosen CBD in met en target pour tou pei ki en manm sa konvansyon.  E sa target CBD i dir ki lannen 2010 i pe demann tou pei ki en manm pour dedye 10% son later anba proteksyon e 10% son lanmer osi anba proteksyon.  Sesel pour le moman nou annan 48% nou later ki anba proteksyon so nou par devan sa par en kantite, me nou selman annan 0.5% nou lanmer ki anba proteksyon.  Me letan nou pran en average dan lemonn antye, nou gete ki pe pase otour nou, nou vwar poudir dan lemonn 12.5% later lemonn i anba proteksyon e 5.9% lanmer lemonn i anba proteksyon.  So letan nou get nou ran ki nou rank nou lekor isi Sesel e dan lemonn, nou vwar lo kote later nou premye pei, en pei souveren ki pe met 50% son later anba proteksyon e la nou fyer e nou pour koz lo la labous plen byensir.  Me letan nou get lanmer, dezorme nou pa kapab koz menm zistwar.

 

Annou konpar nivo proteksyon lanmer Sesel ek nou bann pei pli pros avek nou nou ava konpran ki mon pe koz lola.  Sesel 0.5% nou lanmer i proteze.  Kenya, en pei ki bokou pli degrade ki nou i annan 8.7% son lanmer ki’n proteze.  La Tanzani ki li osi i pli degrade ki nou i annan 8.1% son lanmer total in proteze e Mozambique 4.0% son lanmer anba proteksyon.  I vre ki konvansyon biodiversite in etablir bann target anbisye me son lobzektiv pour permet plizyer zenerasyon apre nou rezouir sa lanvironnman sen, i reste touzour nob e i reste touzour relevan pour nou pei e pour lemonn antye.  Mr Deputy mon pa pour koz bokou lo bann aktivite ilegal akoz mon konnen bann koleg ki pour koz apre mwan pou soulinny sa e zot lenportans dan konservasyon maritim.  Me toudmenm mon pour sizer bann rekomandasyon ki pour permet zot reflekte lola e answit partaz bann lide e azout lola.

 

Bann rekomandasyon ki mon pe demann gouvernman Mr Deputy i konm swivan.  Sa mosyon pe anvizaze ki gouvernman pandan lannen 2011 e boner 2012 i revwar balizaz bann park maren nasyonal Sesel e bann lezot rezerv spesyalman maritim e fer li konm swivan:

Premyerman en letid i devret ganny fer lo Park Maren Ste Anne avek bi pour vwar soutenabilite sa park ek relevans ki i annan avek konservasyon sa menm park.

 

I devret revwar son bann itilite e rezon ki sa i egziste koman en park maren pour ki i ava annan en bon buffer ant nou por avek sa park maren.  Pour ki i ava annan en bon buffer ant nou bann konblaz ek bann devlopman lola avek nou park maren e ki i ava osi annan en bon buffer ant pasaz bato komersyal avek nou park maren.

 

Mon pe osi demann gouvernman pour met anplas en management team e sa pour ankouraz bann NGO pour zer pli byen nou bann park nasyonal.  Par egzanp, Silhouette depi ler in ganny kree an 1987 an park maren, pa’n zanmen annan en tim pour zer sa park maren ziska ozordi ki mon pe koz lola.  So alor i enportan ki gouvernman i met anplas en lekip pour zer park maren Silhouette.

 

Mon pe osi demann gouvernman pou revwar balizaz park maren Curieuse pour pran kont sa popilasyon Pasqueur e Anse Possession ki zot pe ganny direkteman afekte par bann mezir strikt me ki nou tou nou konnen i pa soutenab dan sa area.  Pe demann gouvernman osi pour met anplas en Komite Gidans pour tou bann park maren baze lo sa kominote kot zot sitiye ladan.  Par egzanp, sa Komite Gidans pour Park Maren Ste Anne pa devret menm Komite Gidans pour Park Maren pour Baie Ternay oubyen Park Maren Curieuse akoz zot stakeholders i diferan e zot kominote i annan plizyer lezot litilite ki zot servi sa landrwa.  Nou pe osi demann gouvernman pour revwar bann lalwa ki regle nou bann park maren avek bi pour met plis synergy dan nou bann kad legal e marye nou bann resours pour ranforsi pli byen nou bann zone proteze.  Nou pe osi demann gouvernman pour revwar itilite nou bann shelf reserve e pour revwar sa bann tel balizaz e retir bann ki nepli fer sans e azout bann nouvo landrwa ki annan bokou plis keksoz pour nou prezerve.

 

Mon pe osi demann gouvernman pour revwar lenfrastriktir e resours ki zot met a dispozisyon sa lotorite ki pe zer sa travay sitan enportan ki nou lekonomi nou pei i depan lola.  Pour le moman i pa akseptab ni an term resours, ni an term lenfrastriktir pour sa lazans ki pe zer nou proteksyon lanmer kapab travay e kapab fer en louvraz prodiktiv.  E finalman, mon pe demann gouvernman atraver son nouvo deklarasyon kot in met bann nouvo landrwa pour proteze pour rezon teres tel ki Cosmoledo, Farquhar, Resif, ek lezot landrwa, pour osi enkli en poursantaz zone maritim avek sa bann landrwa ki nou a kapab nou osi an lannen 2012 zwenn target lemonn ki 10% nou landrwa proteze.

 

Avek sa Mr Deputy mon pour throw sa motion lo floor pour deba e answit nou a tidy up letan zot fini pour regarde ki package nou kapab anvoy ek gouvernman e ki nou vizyon e swe ki nou kapab donn proteksyon lanvironnman isi Sesel.  Mersi Mr Deputy.

 

MR DEPUTY SPEAKER

Okenn ki segond mosyon?

 

HON. MITCY LARUE

Mon segonn sa mosyon Mr Deputy.

 

MR DEPUTY SPEAKER

Ou ti a kontan fer lentervansyon?

 

HON. MITCY LARUE

Mon ava fer en pti pe plitar.  Mersi.

 

MR DEPUTY SPEAKER

Onorab Theresine.

 

HON. VICKY THERESINE

Mersi Mr Deputy.  Mr Deputy Sesel malgre ki nou pti, poursantaz nou teritwar ki ganny prezerve i signifikan.  Malgre nou pti, nou’n toultan devan an sa ki konsern proteksyon e konservasyon dan lanvironnman e sa in fer ki ozordi nou en legzanp pour lemonn.  Avek sa bote natirel ki nou posede, in anmenn bokou fyerte osi pour nou koman en nasyon.  Nou bann polisi ki egziste anba ki nou pti morso resours natirel ki nou annan i ganny proteze e konserve i kouver bann diferan lespes tel ki plant, zensek, zwazo e osi kokiy.  Me vi ki nou antoure avek lanmer e nou teritwar lanmer i osi imans, mon vwar li normal e osi tre enportan pour nou osi protez nou bann lespes maritim.

 

Bann pei Mr Deputy ki annan bann gran park nasyonal ki trouve lo later dimoun i ganny sans apresye son wildlife, dimoun i ganny sans temwayaz lafason ki lanatir i enterakte e anmenmtan gard en balans dan popilasyon sak lespes.  Dan sa bann park en dimoun i ganny sans vwar en lyon par egzanp pe fer lasas, en lot zannimo kot pe donn nesans son fitir zenerasyon.  Nou isi Sesel mon vwar nou lanmer ki pe plito ofer bann plonzer sa kalite portre kot en reken par egzanp pe fer son lasas, kot en zourit pe defann son lekor, ensidswit.  Nou bezwen alor apresye sa larises.  Nou devret pe konsider nou tre sanse e beni pour nou antoure ek lanmer.  Nou devret pe osi asire ki lavi maritim i ganny proteze e konserve a tou pri.  Dan laplipar ka, nou malerezman bezwen annan regilasyon ki regle enpe aktivite imen ki kapab annan en lefe negativ lo nou lanvironnman e sa i osi aplike atraver lemonn.

 

Mr Deputy pour mwan paralelman koman en ansennyan avek regilasyon e lalwa, mon senserman krwar ki nou bezwen osi annan en konponan ledikasyon ki tous kous diferan dan en sosyete.  Dan nou bann lekol nou’n vwar atraver Eco-School Programme ki bokou plis zanfan ozordi i ganny touse lo sa size lanvironnman dan diferan fason.  Ti annan en letan kot zis bann zanfan ki ti dan Wildlife Club ki ti pe ganny ekspoze avek bann size ki annan relasyon avek lanvironnman.  Mon kapab dir ki in annan en zefor tre remarkab par Minister Ledikasyon pour anmenn ledikasyon lanvironnman dan nou bann lekol.  Mon alor salye tou mon bann koleg ansennyan e lezot Support Staff dan nou bann lekol ki pe kontinyelman travay dir e rod tou bann fason inovativ pour ki nou bann zenn i ganny plis lenformasyon e anmenmtan agrandir zot konesans vizavi nou lanvironnman.  Mon konnen ki i en size ki tre eksitan me ki i osi annan son bann challenges pour zot sirmonte me zot determinasyon bann ansennyan, zot determinasyon bann Support Staff, i anmenn en kontribisyon tre remarkab dan nou sosyete e sa i ganny bokou apresye.   La mon pour osi profite pou tir mon sapo avek bann lakonpannyen prive ki osi zwe zot rol tre enportan dan sa prose.  Si mon pran en senp legzanp;  Par egzanp, nou annan SUBIOS kot nou vreman selebre nou lanmer, nou annan bann Diving Centres ki ofer nou bann etidyan loportinite pou ganny entrodwir avek plonze.

 

Letan nou annan en park maren Mr Deputy, ki an bonn sante, nou kapab dir i anmenn plizyer benefis pour nou sosyete.  Parey nou konnen, en park maren i ganny servi koman en landrwa lwazir, latraksyon, e osi en sours revenir pour serten, kot bann pti biznes tel ki operater Taxi Boat, fotografer, sant plonze enkli nou bann peser i osi benefisye.  Mr Deputy menm si nou bann peser napa drwa lapes dan en marine park, me en marine park i donn sans bann lespes pwason pour zot reprodwir e zot stok i ogmante.  Byensir pwason pa reste zis dan marine park me zot osi al andeor sa demarkasyon kot bann peser i kapab swa lapes ouswa tranp kazye.

 

Nou bann marine park i osi ganny vwar koman sa laboratwar vivan, koman sa mize vivan, kot nou bann zenn Seselwa i kapab kontinyelman ganny sans pour devlop zot lentere tel bann ki enterese pour vin en Marine Biologist.  Nou bezwen osi rekonnet malgre tou bann defi ki loter mosyon in avans devan, ki gouvernman Lepep in toultan krwar dan proteksyon e konservasyon vizavi nou lanvironnman.  Nou gouvernman in toultan fermeman krwar ki zenerasyon an zenerasyon i bezwen ganny sa sans pour zouir en lanvironnman ki an bonn sante.  Me nou dan Parti Lepep ozordi dan Lasanble nou pe dir avek gouvernman fer plis pour protez nou bann lespes maritim, pli presi, nou bann park maren.

 

Nou kapab dir ki ozordi nou pe viv dan en monn kot toulezour nou annan nouvo devlopman, kot toulezour i annan nouvo dekouver ki swa dan medicine ouswa dan lasyans.  Anba nou lanmer i annan ankor bokou pour nou dekouver.  Dan sa nouvo Sesel nou bezwen pe kontinyelman travay ansanm e rod bann nouvo teknolozi neseser e apropriye e osi resours apropriye pour ki nou bann zenn ki enterese dan maritim i kontinyen devlope.  Me nou osi bezwen vin pli inovativ akoz sa ki marse dan en pei i pa neseserman konpletman ideal pour nou pti Sesel.

 

Mr Deputy avek sa bref kontribisyon, mon pour byensir donn mon sipor sa mosyon.  I en mosyon ki annan son merit, i en mosyon ki pe tous diferan akter e sekter dan nou sosyete.  Lepep Seselwa in donn Prezidan Michel ek son gouvernman en lot manda 5 an pour ki ansanm nou kapab kontinyen travay e kree sa nouvo Sesel.  Dan sa nouvo Sesel gouvernman Lepep i bezwen reste li angaze dan proteksyon ek konservasyon nou lanvironnman pour nou pei, nou pep e presizaman pour nou bann zenn.  Mersi Mr Deputy.

 

HON. MITCY LARUE

Mersi Msye Deputy. Bonzour toulmonn.  Apre ki mon’n ekout atantivman prezantater sa mosyon, ozordi menm lot speaker ki’n koze apre mon pour pran en lot dimansyon akoz bokou lenformasyon in ganny donnen e mon pa pour repet menm keksoz.  Msye Speaker me mon santi i mon devwar e mon drwa pour elabor lo serten keksoz enportan ki lotorite konsernen a kapab pran bann mezir neseser pour ede manage sa bann zone pli byen e osi pran kont serten konsern souleve par piblik tou an tenan kont ki nou bezwen a tou pri prezerv e protez nou zone maritim pour fitir zenerasyon e tou Seselwa i bezwen zwenn ansanm pour protez sa bann zone.

 

Msye Deputy Marine National Park i ganny dezinyen anba National Parks and Nature Conservancy Act e okenn dimoun napa drwa lapes, ni anmas kokiy, ni retir okenn lespes ki trouve dan sa bann zone akoz sa zone i ganny konserve.  Donk tou dimoun i bezwen osi respekte sa bann lalwa.  E bann zofisye National Park Authority zot annan pourvwar anba lalwa National Park e Nature Conservancy Act pour zot search, menm arrest e menm sezi propriyete bann dimoun ki fer bann trazaksyon ilegal dan sa bann landrwa.  E bann fee, maximum fee i R2000 lofans e menm 3 mwan prizon.  E sa i al osi avek lezot lofans ki ganny gouvernen par lezot lezislasyon par egzanp Turtles Protection Regulation SI 46, 1994 e lofans komet anba la i kapab ziska R500,000 e menm 15 an prizon.  E menm sa Msye Deputy Speaker, Fish Poaching i reste en problenm dan sa bann zone.  E sa i lev bokou konfli parmi bann dimoun ki reste dan bann landrwa ki baliz avek bann marine park e avek bann zofisye ki travay avek sa bann park.  E sa i koz serten pert dan reveni ler bann park pa ganny byen sirveye.  E ler bann park ranger osi pa fer zot travay avek profesyonalizm.  E sa i kapab retard bokou keksoz ki ganny proteze.

Msye Deputy, e ozordi mon pour koz mwan spesifikman lo Park Maren Curieuse.  Lotorite Park Maren i bezwen parey mosyon in demande pour revizit balizaz kot Park Maren Curieuse i pase pou vwar si i ankor soutenab oubyen i annan nesesite pour revwar balizaz aktyel.  Ozordi balizaz i ariv ek lans e sa i lans Posesyon e Curieuse.  E dan menm landrwa nou annan bokou dimoun ki’n reste la pour plizyer lannen e zot in annan labitid dan lepase tranp en pti kazye oubyen fer lapes ennfwa par semenn pour zot prop konsomasyon.  E 4 an pase sa kalite aktivite in bezwen arete.  Serten konsiltasyon ti ganny fer ant lotorite ek bann zabitan pour trouv en solisyon soutenab pour sa konfli, me sa in anven.  E la bokou problenm i kontinyen akimile.  Bokou dimoun i dir ki balizaz i tro gran e pa devret ariv ziska lans, kote zot pour kapab met zot bato?  Oubyen, kote zot pou kapab fer en pti lapes de tanza-ot?

 

De lot kote zot menm konplent ki napa okenn demarkasyon pour montre kote park maren i pase, zis sa i ganny dir me napa demarkasyon apropriye.  E sa i donn zot bokou rezon pour fer lapes kot zot anvi e menm tranp kazye e menm al pli lwen pour pik torti e menm servi zil Curieuse koman en landrwa ki parey zot prop propriyete.  Sa Msye Deputy pa pou kapab kontinyen dan sa fason.

 

Msye Deputy pour ede rezourd sa problenm mon pour met enn de sizesyon kot lotorite konsernen i kapab konsidere e vwar ki manyer pou amelyor sa sityasyon.  Mon sizere ki Lotorite Park Maren i revwar balizaz dan son totalite e dezyenmman met demarkasyon apropriye.  Once sa in ganny fer, met demarkasyon apropriye pour ki tou dimoun i kapab konnen vwala marine park i pas la e i fini la, mon drwa mon kapab antre la me mon pa kapab antre la.

 

Dezyenmman zot bezwen recruit bokou plis rangers.  E ler zot fer recruitment zot bezwen rod dimoun ki annan serten kalite pour travay dan sa landrwa e anmenmtan zot bezwen revwar osi renimerasyon sa bann travayer anvi lakalite travay ki zot bezwen fer dan sa landrwa.  Answit, apre ki zot annan zot sa tim kalifye, e profesyonnel zot pour kapab fer en meyer sirveyans dan landrwa ki’n ganny demarcate byen.

 

Trwazyenmman, nou bezwen annan en progranm lo medya nasyonal pour donn ledikasyon piblik lo akoz sa landrwa i ganny prezerve, son lavantaz e kwa ki nou koman bann dimoun ki reste, ki andeor zil nou bezwen fer, kwa ki nou kapab fer e kwa ki nou pa kapab fer.  E trwazyenmman Lotorite serten Park Rangers i bezwen aret soutir serten group dimoun ki zot zot pou kontinyen detri sa park maren an fezan tou sa bann aktivite ilegal.  Nou bezwen si nou’n met en lalwa anfors, nou bezwen fer sir ki personn pa kas sa lalwa e non pa en group i fer sa me dot li i ganny retire ler i pe fer son pti lapes.  Sa i bezwen arete, i bezwen napa de pwa, de mezir, i bezwen fair avek tou dimoun.  E si sa bann keksoz nou kapab met li anfors Msye Deputy anba sa nouvo Sesel ki Prezidan i pe koz lola e nou’n antre ladan, nou bezwen asire ki tou dimoun i lo menm wave line e tou dimoun i bezwen abide avek bann regilasyon pour ki nou kapab kontinyen protez sa resours ki nou apel nou park maren pou nou fitir zenerasyon.  Mersi Msye Deputy.

 

HON. ROY NIBOURETTE

Mersi Msye Deputy.  Manm Lasanble Nasyonal, tou dimoun alekout, bonzour.  Msye Deputy mosyon prezante par Onorab Joseph Francois i tonm a en moman apropriye akoz bokou mezir e desizyon pe ganny pran ki montre ki Sesel i serye dan demars pour li vin kapital lekolozi lemonn.  Koman en sanpyon lanvironnman, Sesel in akonplir bokou.  Nou enn pti pei lemonn ki annan pli gran porsyon son teritwar ki ganny proteze.  Resaman, Konsey Minis ti aprouv desizyon ki fer ki byento 50.59% later Sesel pour vin bann landrwa proteze.  Nou’n akonplir bokou dan proteksyon nou bann lespes menase.  Msye Deputy Speaker nou’n osi depas staz proteksyon e konservasyon pour nou antre dan en faz teknolozi lanvironnman ki nou pei in adopte en kiltir Environmental Friendly.

 

Msye Deputy Lotorite Park Maren ti ganny formen an 1996 avek en pli gran responsabilite pour protez e zer bann park maren nasyonal isi Sesel.  5 an plitar, Sant pour Rezerv Maritim e Teknolozi ti ganny formen an 2001 anba en progranm ki ti pran plas dan Losean Endyen ki Sesel ti annan loner pour akeir.  An Avril 2003 nou ti osi vwar kreasyon en almagasyon ant Sant Resers Maritim ek Teknolozi avek Lotorite Park Maren avek bi promot resers maritim, ledikasyon piblik e soutenabilite ver zesyon bann park maren isi Sesel.  Sa lorganizasyon ti annan koman komitman pour atenn son bann lobzektif par bann aktivite swivan: proteksyon bann marine park e zestyon resers koralyenn, resers lakot e resers son lanvironnman, zestyon lenformasyon maritim, ledikasyon maritim, parmi lezot Msye Deputy.

 

Nou Sant Resers in osi ganny vwar dan Komite Siyantifik Global koman enn ki inik dan nou rezyon e ki dan milye proteksyon maritim e terestral.  Msye Deputy lavantaz nou sant resers i annan lo bann lezot sant dan nou rezyon se ki i annan en laboratwar vivan parey Onorab Theresine fek enform nou e lezot fasilite travay ki trouve lo nou peron e nou Eco System Maritim i ganny strikteman proteze.  Msye Deputy Speaker konservasyon maritim i en letid ki ganny fer pou konserv leta fizik biolozik e biolozik resours maritim e fonksyon son bann eco-system.  Sa i en realite e i en nouvo prensip disiplin.

 

Msye Deputy menm si Sesel in akonplir bokou i annan ankor bokou plis pour nou akonplir pour ki nou reisi vin kapital lekolozi lemonn.  Parmi bann keksoz ki reste pour nou akonplir se pour nou zer byen nou bann resours natirel dan en fason ki pli entelizan.  Se la kot mosyon Onorab Francois i antre.  Sa mosyon pe demande ki nou reviz balizaz nou bann park maren pour reflekte larealite ozordi.  Bann park maren set en metod proteksyon nou bann resours maritim.  Fodre ki proteksyon sa bann resours i efektiv Msye Deputy e fodre ki i ganny fer dan en fason tre, tre entelizan.  Savedir fodre pa ki nou dezekilib lekosistenm sa bann landrwa.

 

Msye Deputy i kler ki i annan nesesite pour revwar balizaz park maren akoz larealite ozordi i byen diferan avek larealite 30 an pase.  Ozordi nou bann siyantis e travayer lanvironnman i annan plis bokou konesans lo sa bann lespes.  Fodre ki balizaz park maren i ganny fer an prenan kont sa bann konesans sa bann travayer Seselwa.

 

Msye Deputy i annan bokou ki’n ganny dir lo nivo teknolozi, fason fer par mover mosyon e mwan mon pour siport lide Onorab e mon pour donn tou mon sipor sa mosyon.  Mersi.

 

HON WAVEN WILLIAM

Mersi Msye Deputy Speaker.  Msye Deputy Speaker mon ti a kontan dir de pti mo an sinny sipor sa mosyon e san fer bokou repetisyon mon ava osi dir ki sa mosyon in vin dan en moman ki apropriye. Apropriye akoz o nivo global i annan en ta diskisyon viz-a-vi laspe lanvironnman sirtou letan nou pe koz lo devlopman soutenab, nou pe koz global green economy e osi nou pe koz lo blue economy en size ki ti ganny leve par Anbasader Jumeau kot UN Genaral Assembly letan i ti pe koz lo lefe ki letan nou pe koz lo green economy nou pa kapab oubliy sa laspe blue economy ki form parti bann resours maritime, zone kotyer e osi bann sirfas anba lanmer akoz se sa bann sirfas e sa bann landrwa ki protez serten nou bann lespes maritim e letan ou pe regarde ki konmela i annan bann aktivite lapes ki pe detri en bon pe nou bann lavi maritim e sa mosyon parey mon dir i vin a en moman apropriye kot pe demande ki serten sa bann balizaz maritim e osi balizaz si oule balizaz fore i ganny revwar e demarke.

 

Mr Deputy Speaker mon ti a kontan osi met devan loter mosyon ki petet ti a bon ki letan ki in anmennn sa mosyon i konsider osi kominik avek Departman Lanvironnman e pour demande ki zot enkli osi lo zot komite – mon konnen ki poudir i annan en komite lo sanzman klimatik e viz-a-vi sa size ki loter pe mansyonnen mon krwar ti a byen si Manm Parlman osi ti a ganny enkli li sa komite pour kapab met devan serten sa bann konsern. Akoz ki arrive? Mon konnen poudir Linyon Eropeen zot pe finans bokou bann proze parey e mon konnen poudir size ki sa mosyon pe touse i kapab ganny serten finansman par egzanp lannen pase mon konnen ki i annan apepre 2 milyon ero ki ti ganny sinnyen dan en lakor avek gouvernman Sesel e ki deza an 2010, lannen pase ti annan apepre 600 mil ero koman en premye parti sa peyman ti ganny fer e ki zot pe koz devlop en lalyans kominikasyon ant pei Linyon Eropeen avek bann pei ki pe devlope. Epi osi pour enn, siport bann pti proze adaptasyon avek mitigasyon ki mon santi poudir sa mosyon i tonm byen ladan e parey mon dir se ki mon santi poudir Manm Parlman, nou lenstitisyon i bezwen ganny enkli dan sa bann komite e mon rekomandasyon ki mon ti a kontan fer avek loter mosyon e pou swivi lo la se ki enn, nou demande ki Divizyon Lanvironnman i enkli Manm Parlman lo zot komite ki annan pou fer avek adaptasyon avek mitigasyon ki a fer ki sa bann rekomandasyon ki loter mosyon in met devan i a ganny pran an konsiderasyon.

 

E Mr. Deputy an dizan sa de pti mo mon ti a kontan demann tou bann Manm pour siport sa mosyon. Mersi bokou.

 

HON CHARLES DE COMMARMOND

Mr. Deputy Speaker mersi bokou.  Premyerman bonzour toulmonn, tou bann zanfan Pointe Larue Segonder. Mon krwar i byen ki zot la akoz sa mosyon i en mosyon tre, tre enportan.

 

Mr Deputy Speaker premyerman mon anvi felisit mover mosyon pour sa mosyon tre byen reserse, in fer byen son travay e pour mwan i annan bokou nouvo keksoz ki mon asire nou popilasyon menm nou dan Lasanble isi pa ti telman a-zour avek ki pe arive dan nou lanmer e bann lalwa an egzistan e tou.  Mon vwar ki distrik ki mon reprezante i osi baliz dan en serten fason opoz dan visinite park maren Ste Anne. Mon vwar osi ki i annan en ta aktivite ki pase la. Pli ale Sesel pe devlope, mon krwar mwan ki i annan nouvo aktivite ki ganny fer dan nou lanmer, nouvo aktivite pour Seselwa epanouir menm pour li anans devan menm, lontan i pa ti fer, tel parey banbara ti napa leksplwatasyon banbara lontan to that extent.  Ozordi i en nouvo aktivite aprouve par gouvernman. I normal. Letan alor i annan tou sa, la kantite charter lakantite lotel ki pe devlope parey in ganny dir i annan son bann konsekans, sewage i pour ogmante, tousala i larg lanmenm dan sa lanvironnman lanmer.

 

Anmenmtan nou bezwen vwar konpatibilite sa devlopman ki pe arive ek rezondet ki sa bann park maren oubyen sit proteze dan lanmer ti ganny fer, ti ganny inisye.  Ou al lo bann zil elwaye par egzanp ou pou vwar en lot keksoz.  Nou annan bann sit par egzanp dan zanmerant Farquhar bann nofraz, bann bato ki’n ganny savire, koule ensidswit. Mon demann mon lekor si tousala i ganny proteze?  Pa tou.  Nou annan nouvo zil ki’n formen dan sa pei la, nouvo zil pa zis bann ki nou’n konble, sa nou’n konble en bon pe kantmenm en bann pa ti oule be nou i annan nouvo zil ki’n formen volonterman, ou vwar ankor dan zanmerant Farquhar e tou. Nou bezwen vwar ki sa ki’n fer sa zil formen. I bezwen annan alors sa lanvironnman lanmer otour li mon krwar i devret ganny konsidere dan sa ki mosyon pe dir.

 

Nou annan pa zis sa, tou dernyenman la avek Nasyon Zini nou’n agrandi nou pei, pei in nepli ptipti parey ti ete avan in vin pli gran, letan nou’n revwar nou balizaz nou continental shelf, sa extension la ki’n ganny fer, letan sa in ganny fer anmenmtan nou teritwar in ogmant enpe e anba lanmer prezan nou pa konnen ki pou al arive la. So ek devlopman ki pe annan dan resers pour delwil e tou, mon krwar i enportan nou revwar tou sa bann keksoz, nou revwar petet nou bann zil elwanye. Mon pran en legzanp Desroches lontan ti napa okenn devlopman lotel, Poivre la i annan devlopman ki pe arrive, lezot ankor so ou bezwen vwar. Ti napa lalwa pour protez serten lespes lontan ouswa sa lanvironnman lanmer otour sa bann zil, nou bezwen regete.

 

E dan kad fer sa, mon krwar mwan i ava atenn lobzektif ki mover mosyon pe demande pour ki nou nou osi nou vin on par avek sa ki pe arive dan lemonn ki Nasyon Zini pe demande e tou pour Sesel pou li kontinnyen sonpyonn sa laspe lanvironnman.

 

Mr Deputy Speaker, i annan en lot pwen, mwan mon osi mon pa tro konpran serten keksoz.  I annan serten rezon ki sa bann sit ti ganny proteze. Mon demann mon lekor si sa bann rezon i ankor vreman parey.  I annan serten fleksibilite mon krwar ki devret osi ganny konsidere etan donnen nouvo sitiasyon.  Mon a donn en legzanp ki mon pe sey dir par la.  Ou pran ou National Park Ste Anne. La ou annan ou, napa bokou, i annan detrwa zot bann natif dimoun lo Ile Aux Cerfs, mon krwar i annan 4 ou 5 fanmiy ki li in la, in ne, in grandi, i pe kontinnyen peple sa landrwa, bann Calais, Lafontaine e tou. Sa bann dimoun ozordi – lontan zot ti kapab tranp en kazye pour zot bouyon, pour zot fanmiy pa pour eksplwate pour vann pour desann avek Mahe pour soz, i vin menm parey avek Curieuse sa mon krwar dan zamerant Pasqueur e soz laba, be ou anpes zot, lalwa i anpes zot fer sa, tranp enn pti kazye pour zot menm selman sa nivo over exploitation ilegal ki arive avek menm lespes pwason dan sa area i enkwayab. E souvannfwa bann rangers zot osi koupab dan sa. Konmsi mon pa konpran la mwan So i annan en legzersis al revwar tousala e ladan osi mon krwar gouvernamn i bezwen osi konsider – i annan enn ki’n dir taler pour revwar lapey definitivman.  Me si ou donn sa dimoun nanryen ditou be ki ou eksepte li fer?  Be i pou pran pti gous laba. Aranz son lapey pour deter li from sa.  Mon pa konpran, la nou pe met mosyon la, mosyon dan Lasanble fantastic. Mon swete Lopozisyon, en size enportan zot osi zot bezwen koz lo la, donn sa sipor pour en mosyon parey.

 

Nou Lasanble nou fer nou bout nou, nou piblik i bezwen konpran, sa i en bout ki nou nou fer, nou a met sa mosyon fantastic, aprouve I pa binding on the government.  Mosyon pa bind, pa fors gouvernman fer nanryen. Gouvernman i kapab deside pa ni atann nou, sa lotorite ki sipoze pe gete i kapab zis pran sa ploye met dan bin laba.

 

Nou koman Lasanble mon ensiste ankor, mon’n deza dir dan lepase si sa ki nou pe mete la ki nou santi i byen, i bon pour nou pep gouvernman pa pe tande, i pe zwe sourd-dorey nou bezwen rod lezot mwayen ansanm pour fors keksoz arive akoz sa mosyon mon vwar li bon, nou bezwen fer en keksoz dan sa direksyon. Annou monitor. Mon demann mover mosyon pour zwe en rol ladan e nou tou nou a donn koudmen pour kapab fer ki sa i arive.

 

Mon a donn en lot issue.  Mover mosyon taler in koz lo proteksyon bann kokiy depi dan Anse Faure ziska Fairy Land i en protected area, fantastic. Mon krwar menm area ti pe al konble lotrozour, sa non? Menm area mon krwar ti pe demande pour reclaim en bann dimoun, non? Lonorab Carpin ou bezwen koze lo sa taler.  So i sa konpatibilite ki nou bezwen vwar la, si nou ti les sa arive, eski nou pou les arrive?  Petet wi.  E si wi, kote nouvo sit pour nou protez kokiy pou ete?  Kekfwa pou annan nouvo lespes kokiy ki pli enportan ozordi. I don’t know, i annan tou sa a vwar Mr Deputy Speaker dan lalinny ki sa mosyon pe demann nou.

 

Savedir nou annan nouvo – la paloud Cascade in fini ek konblaz ki’n arrive. Oke, petet pa ti en lespes pour proteze I don’t know, be nou konblaz ti enportan osi be nou bezwen vwar si sa lespes pe al net, si i annan en area ki ankor annan enpe be petet nou bezwen protez li si pa ti anba proteksyon.  Non, i sa bann keksoz ki nou bezwen pe gete prezan avek fas a tou sa devlopman.

 

Mr Deputy Speaker mon krwar mon’n tous ase bann pwen a reflesir lo sa mosyon. Me balizaz, mwan lot fwa mwan menm mwan nou’n al lapes la lo bor Cascade be prezan ou dir –  bann la in al rod 2 madanm beri la obor Ile Aux Cerfs, be tyonbo enkou, mon dir tyonbo be la kote? Be pa pe al dan Marine Park la? Ou pa konnen kot i ete. Prezan ou bezwen fer sir, ou bezwen tyeke, ou bezwen ziz apepre, me come on.  Nou’n antann i annan sa bann finansman dan lemonn mon krwar nou bezwen bouz enpe plis koman en pei, koman sa lotorite bouz enpe plis pour ganny sa bann resours pour nou kapab delimit sa bann landrwa byen, apre oule pini en dimoun.  Be non, ou pa kapab anpes – I mean ou bezwen delimit sa byen, marke byen nou tou nou a konpran. La wi si en boug in antre anndan ou a kapab deal avek li me si ou napa demarkasyon ki manyer ou kapab fer?  Ou pa kapab zis vini apepre. So i annan tou sa Mr Deputy Speaker pour nou vwar dan sa mosyon.

 

Mon ava aret la pour le moman, mon krwar ki sa mosyon i tre, tre bon mosyon. Nou bezwen nou tou dan Lasanble isi montre sa lafors. Mon beg Lopozisyon la pour donn sipor dan sa mosyon la pou siporte akoz i en mosyon ki pour anmenn nou pei pli devan, i anmenn nou nou menm nou pli lwen. So nou bezwen monitor e pourse ki gouvernman i met an egzekisyon sa ki mosyon pe demande. With this Mr Speaker, Sir, mon demande ki tou nou Manm isi i siport sa mosyon. Mersi bokou.

 

MR DEPUTY SPEAKER

HonFrancois right of reply.

 

HON JOSEPH FRANCOIS

Mersi Mr Deputy. Mon ti oule remersye tou bann Manm ki’n koz lo sa mosyon, anfaver sa mosyon e byensir zot in realize poudir latas devan nou i bokou imans, travay i kontinyen, nou pa arete e nou pa focus lo serten keksoz ki’n fini pase me nou al devan. E se sa lavantaz dan diriz en pei, se ou bezwen pare pou ou al devan e pare pou ou aranz serten keksoz ki ou santi pe al mal.

 

Nou’n koz bokou lo bann zone maritim ki annan bann konfli Mr Deputy e petet la mon ti a kontan petet partaz enn pti keksoz avek zot. Cousin i petet enn bann zone maritim proteze ki enn pti pe pli pti akoz Cousin limenm li i ennpti zil, i annan zis 400 met toultour li ki proteze e nou vwar laba letan ou konpar bann lenformasyon ki ganny kolekte i petet landrwa proteze ki napa bokou aktivite ilegal ki ganny deroule laba, pourtan i osi baliz avek en landrwa ki peple, Amitie e Anse Kerlan e portan letan ou konpar li avek landrwa kot i annan plis rangers ki supervise park maren tel ki Ste Anne, Ste Anne i annan bokou plis rangers ki pe vey sa park maren me Ste Anne i park maren ki lo rikord i annan pli o nivo aktivite ilegal ki deroule ladan.  So alor management i vreman kapab zwe en rol lo nivo aktivite ilegal ki trouve dan bann park maren.

 

E dan en piblikasyon Mr Deputy en piblikasyon syantifik ki ti ganny pibliye an 2006 par en zenn Biologist Luisa Wood, i en Marine Biologist sorti Liniversite British Columbia an Canada i ti fer en letid isi Sesel e i ti pibliy en papye ki apel Why Fishermen poach in Marine protected areas in Seychelles? Son letid ti konsantre lo kwa ki motiv en peser pou lapes ilegalman dan bann park maren ek lezot landrwa proteze Sesel e i ti sey idantifye bann fason pou ki bann peser i kapab obeir lalwa enn pti pe pli byen.

 

I ti vwar poudir bann fakter ki ankouraz aktivite ilegal dan bann park maren i premyerman lokasyon sa park maren i ete avek sa dimoun.  I ti osi vwar lekonomi peser koman en size lo limenm.  Lekonomi peser i pa parey lekonomi en businessman normal kot ozordi i leve bomaten si serten parti son biznes pa marse i sanze e al fer en lot.  En peser trwakar ditan napa sa gran nivo ledikasyon li, bann peser tradisyonnel nou pe koz lo la, in lekol ziska en serten nivo e in santi poudir lapes i sa ki i anvi e alor pou ou dir li poudir be oke la in ler pour ou arete oubyen dan vann swet sanz ou fason pou li i en gro problenm lo son lekonomi ki li koman en peser i zere e alor bokou fwa nou dan management oubyen bann lezot dimoun dan management pa pe pran kont kwa ki go on dan lavi sa peser.  E 94% dan sa resers, dan sa papye, bann peser i santi, 80% bann peser ki ti ganny interviewed zot dir ou poudir lotorite pa pe enklir zot dan bann desizyon ki zot pran e zot zot anvi ganny enkli.

 

I osi koz enn pti pe lo sosyo ekonomik, enn pti pe pou vwar poudir – e bokou bann peser i dir ou ki regilasyon dan park maren pa ganny byen ranforsi oubyen si i ganny ranforsi i ganny ranforsi enpe dan en fason pour enpe dimoun dan en lot fason pour lot pe e alor i fer ki akoz sa zot pa give a damn parey nou dir e zot pou kas lalwa anyway akoz zot vwar sa disparite ant en group avek lot group.

 

Zot in osi koz lo kominikasyon ki mon rekonnet Lotorite Lanvironnman i devret pe ale e kominik avek dimoun.  Nou kominik ek dimoun, nou dir dimoun vini letan nou pe fer Clean Up The World la kominote i desann ek pyos ek goni, ek tou zafer, i vini nou pe fer Clean Up The World me lo en keksoz ki pou afekte sa kominote ki pe viv ladan, ki depan lo la koman son dipen toulezour nou met li enkote, nou dir sa nou ava anonse lo televizyon, ou ava tande i annan bann lalwa ek bann nouvo amannman lo televizyon. Me sa peser pa kapab koze avek sa televizyon pou donn son pwennvi li. So alor personn pa pe ekout li.  So alor gouvernman limenm li i devret revwar fason ki i angaz dimoun parey Prezidan i dir nou bezwen revwar fason ki nou angaz nou bann kominote.

 

Apre gouvernman osi i devret osi konpran poudir dan sa nouvo fason dirize, lo en baz bon gouvernans fodre gouvernman i aret krwar ki nou kapab fer tou. I annan NGO out there, i annan bann lotorite, bann lakonpanyen prive out there ki kapab pran en bout sa travay e ale fer.  Si Cousin Nature Seychelles i kapab vey son landrwa proteze bokou pli byen ki Lotorite Park Maren Ste Anne, i deza montre nou en serten direksyon.  So alor i kapab ganny fer e gouvernman i devret ale e vwar dan sa bann direksyon sirtou dan nou bann nouvo landrwa ki nou oule al proteze tel ki Cosmoledo, Farquhar eksetera.

 

Apre Hon De Commarmond in lev en zoli pwen IDC, bann zil elwanye ki pe proteze eksetera.  Pou mwan tou nou bann zil koralyenn i devret kapab annan en nivo proteksyon ziska son brizan.  I devret kapab annan e otan ki IDC i annan en prezans lo sa bann zil i devret enn zot manda pou ranforsi sa.  I pa pou afekte zot konsonpsyon akoz zot kapab servi.  Me ki i kapab afekte, se protez sa stok kont dimoun ki sorti andeor ki vin antre dan sa bann landrwa pou vin servi sa bann resours ki zot in konserve.

 

Onorab Larue in koz lo park rangers en legzanp, bezwen recruit plis park rangers ki tre byen.  Park rangers ozordi ou kapab konte. Si ou annan ou 5, 6, 7 ki full time, ki la, ki eksperyanse ou byen annan.  Turnover dan park rangers i ekstrememan o e most sa bann park rangers i fer up to 6 months or 1 year e apre zot ale.  Akoz zot ale?  Petet i en size letid ki sa departman i devret pe regarde me selman byensir i fer avek ledikasyon, i fer avek incentives ki ou donn sa bann dimoun, i fer avek kondisyon travay ek saler ki ou pey sa bann dimoun.

 

E aprezan nou Prezidan in koz dan sa nouvo Sesel napa plas pou koripsyon.  Tre byen, e nou devret pe ankouraz sa me nou bezwen konnen bann fakter ki ankouraz koripsyon e nou rezourd zot, se zot ki pou al rezourd koripsyon.  Lalwa tousel pa pou zanmen kapab rezourd koripsyon si bann kondisyon ki atase avek kot pou fer sa dimoun devlope e i osi epanouir li i pa ganny met anplas egalman pour li ganny deal avek.

 

Alor i mon swe e i swe nou tou Seselwa mon santi ki pou ki lannen prosenn letan Sesel i attend sa konferans biro diversite, i asiz dan sa sez Nasyon Zini i pa zis dir poudir nou annan nou 50% later ki nou proteze, nou tap nou lestoman, nou anmas nou liv nou sorti, me nou osi dir poudir nou’n osi zwenn nou target lanmer, nou’n osi zwe nou rol e nou lanmer osi nou’n ariv lo target. Se sa ki pou fer nou sorti koman en vre venker dan son totalite. Lemonn pour koz lo nou, lemonn pour ed nou, lemonn pour respe nou e nou lavwa pour ganny tande dan lemonn akoz se nou e probableman nou pour sel pei ki pou’n kapab zwenn sa bann target dan en fason efektiv.

 

Wi sa mosyon pa binding, gouvernman i lib pour li swazir si mon pran sa mosyon oubyen si mon pa pran, me mesaz ki mon oule anvoy avek gouvernman se ki ou pa kapab afford pour met en zorey sourd lo la akoz ou langazman anba CBD i binding. So ou pa kapab angaze pou fer en keksoz e apre pa fer.  So sa mosyon pa binding me gouvernman i oblize ekout bann rekomandasyon sa mosyon pou li kapab al zwenn son rekomandasyon anba CBD.  Avek sa mon ti ava demann tou bann Manm isi dan sa Lasanble pou siport sa mosyon. Mersi.

 

MR DEPUTY SPEAKER

In ariv ler pour nou pran en vot lo mosyon.  Tou sa ki anfaver?  Okenn ki kont?   Mosyon in pase, i osi dernyen item lo nou Azanda pou ozordi.  I reste mwan pou swet zot tou bonn fet Lendepandans e adjourn, Mardi prosen.

 

At 10.35 am, the Assembly was, on its rising adjourned  to Tuesday 5 July 2011.