::
Home » Verbatim » Verbatim -First Term 2011 » Tuesday 15th March 2011

Tuesday 15th March 2011

Download PDF


 

NATIONAL ASSEMBLY OF SEYCHELLES

Tuesday 15 March 2011

The Assembly met at 9 am

National Anthem

Moment of Reflection

Speaker in the Chair

MR DEPUTY SPEAKER

Mon a dir bonzour tou Manm Lonorab, bonzour Minis avek delegasyon, bonzour bann zanfan lekol dan galeri e lezot dimoun ki dan galeri, tou dimoun ki  pe a lekout dan lakour, bonzour.

 

Ozordi nou annan nou Minis Vincent Meriton pou reponn 4 kestyon lo son Minister e Minis Peter Sinon pou reponn 5 kestyon lo son Minister, zot pou swivi par Vis Prezidan ki pou reponn en PNQ ki’n table par Lider Lopozisyon lo sitiasyon Air Seychelles. Vis Prezidan pou osi fer en statement lo  New Public Service Order, PSO e travay Lasanble pou terminen par en mosyon ki pou prezante par Leader of Government Business.  Avek nou ozordi nou osi annan nou 30 zanfan segonder sorti lekol Belonie, English River ek Mont Fleuri ki pou swiv sesyon Lasanble koman parti progranm, Commonwealth Day ki ti yer e Lasanble in organiz en progranm pour zot. Ozordi zot pou reste en lazournen avek nou e zot pou osi dezenn isi, en dezennen ki Lasanble in organize pou zot. Alors mon’n ganny demande pou les bann Manm konnen ki the dining place pou enpe occupy pandan lunch time. Nou ava al toudswit dapre nou Order Paper avek kestyon Nimero 1 pou Minis Sinon.  Onorab Nicholas Prea.

 

HON NICHOLAS PREA

Mr Deputy Speaker, Minis Meriton, Minis Sinon, Koleg Manm Lasanble, bann teknisyen ki akonpanny Minis, bann etidyan e tou dimoun ki a lekout bonzour. Mon kestyon pou Minis responsab pour Lapes ek Lagrikiltir i lir konmsa:

 

Eski Minis i kapab dir avek sa Lasanble konbyen bato etranze ki’n ganny Licence pou lapes ofon lo bann plato Mahe e ki bann kondisyon ki atase avek sa bann Licence.  Mersi.

 

MINISTER PETER SINON

Mr Speaker, Onorab, bann etidyan, Manm piblik.  Mersi pour ou kestyon e felisitasyon. Larepons ou kestyon i koumsa, si pa bato etranze nou oule dir bato ki’n konstrir a letranze, alors mon pou dir larepons i en bon pe nou bann bato i konstrir a letranze ki pe lapes ofon dan nou delo. Si pa bato etranze, ki mon krwar i sa ki ou pe demann mwan, i bato ki own mazoriterman par etranze. Alors larepons ou kestyon se ki napa okenn bato etranze ki own mazoriterman par etranze ki’n ganny licence pou lapes fon dan nou delo.  Tou bato ki lamazorite share holding i dan lanmen etranze, i zis annan licence isi pou fer swa longline, pou fer purse seining, pou lapes ton ek lezot, sword fish par egzanp dan nou delo. Zot Licence i spesifye klerman kote e ki kalite lapes zot ganny drwa fer dan nou delo.

 

An dizan tou sa fodre nou pa konfize ant Seselwa ne Sesel avek Seselwa natiralize Seselwa. Tou sala i Seselwa. I annan osi bann bato ki tonm dan kategori semi endistriyel e zot zot lapes swa ton, ouswa pwason-d-fon.  Zot fer tou le 2, swa zot fer enn, zot fer en lot oubyen tou le 2.  Zot propriyeter i usually Seselwa me  nou annan osi bann joint venture avek lamazorite shareholding ki tonm dan lanmen Seselwa, etranze ou natiralize. Zot zot anrezistre sa bann bato direkteman avek SFA e zot pey en Licence 150  roupi par an.

 

Tou bato etranze own par etranze mazoriterman zot zot pran licence e ganny permisyon pou lapes parey mon’n dir taler, zot lapes ton e sa bann bato nou klasifye zot koman bann bato endistriyel,  fer industrial fishing. Zot sa lannen zot swa longline parey mon’n dir oubyen purse seiner – sa lannen bann licence in ganny peye, bann seiners i pey 61 mil ero par an e bann longliners i pey 24 mil dolar par an ouswa si zot oule licence pou 6 mwan zot pey 17 mil dolar.   An lannen 2010 ti annan 29 seiners ki’n pran licence e 42 longliners ki’n pran Licence. Mersi Msye Speaker.

 

DEPUTY SPEAKER

Siplemanter Onorab?

 

HON PREA

Mr Deputy Speaker mon ti a kontan demann Minis anvi serten rapor ki’n ganny fer par bann peser lokal, ki mwayen sirveyans ki lotorite in met a’n aplikasyon e ki aksyon ki ganny pran anka enn sa bann bato i totalman own par etranze e pa sipoze tonm dan sa bann kategori ki Minis in vin dir e osi atraver bann ki natiralize, konbyen bann Seselwa natiralize ki annan sa licence e ki pe fer sa travay either anba zot licence koman Seselwa natiralize oubyen atraver en joint venture avek en Seselwa.  Mersi.

 

MINISTER PETER SINON

Mersi Mr Speaker. Onorab, premye ki bann mezir ki nou pe kontrol sa ki napa en bato, parey mon’n dir dan mon larepons, napa en bato ki konpletman etranze ki pe lapes fon. Sa nou mekanizm ki nou annan i marse akoz ou bezwen al kot
SFA, SFA i enspekte ou bato, i enspekte papye e bann peser ki ou pou met lo sa bato.  Sa nou annan en prosedir ki nou swiv, nou swiv routin, i pa nouvo.   Menm dan nou pe reanaliz nou fason ki nou manage por, nou pe mazin menm donn nou bann peser ki lo nou lalis en idantite, en kart ki nou pou konnen poudir, sa i entel, i en fisherman lo bato, i kapab montre sa pou li ganny akse por akoz nou pe fer por en landrwa – nou anvizaze fer li en landrwa pli sekirize akoz  bann vandaliz lo bann bato etc, nou ganny sa bann konplent.

 

Anterm konbyen Seselwa ki’n natiralize ki pe partisip ladan, mon ti a kontan annan en letan pour mwan pas  sa larepons avek ou akoz mon napa sa figure egzakt avek mwan. Mon panse ki i annan detrwa. Parkont mon annan avek mwan lalis, si oule, tou bato ki lapes fon e zot nasyonalite. Paregzanp lo mon lalis la mon kapab dir ou si sa i kapab ede, nou annan nou; Anastazia, Seselwa natiralize, lapes ton, dernyen lapes ti Desanm 2010.

Nou annan lo sa menm lalis, malerezman i annan en lot Aquarius II, lapes melanze,  mon pa konnen si sa lapes melanze i vedir ki i melanze ant Seselwa, ne Seselwa e Seselwa natiralize me lo mon lalis – oubyen diferan pwason egzakteman, me parey mon’n dir ou mon pa’n prepare pour sa kestyon egzakt. Mon kontan donn ou bann figure egzak ki mon krwar nou annan, nou pou kapab donn ou sa bann figures e sa bann bato ki annan sa melanz. Mersi.

 

DEPUTY SPEAKER

Parey Minis in dir i ava fer provide sa lalis avek Onorab.  Onorab Dyer.

 

HON COLIN DYER

Anvi repons Minis, mon ti a kontan demann Minis sa rimer e bann lenformasyon ki bann peser ti pe donnen ki ti annan bann bato Sinwanr ki ti pe lapes dan fon e i annan ki ti pe pran pwason vivan. Ki pe arive avek sa, ki’n arive avek sa, eski i ankor pe kontinyen, in fini?  E dan sa bann Seselwa natiralize ki pe lapes ofon, konbyen bato zot annan pe fer sa kalite aktivite e ki bann  nasyonalite ki lo sa bann bato pe lapes dan sa kalite aktivite. Mersi bokou.

 

MINISTER SINON

Ankor ennfwa mon krwar dan sa lalis ki mon’n promet Onorab, pou ou dernyen kestyon, ki mon’n promet Onorab Prea, tou sa bann kestyon k’n ou’n demann mwan lo  dernyenrer la i pou ganny adrese dan sa lalis, si ou permet mwan.  E sa rimer ki i annan Sinwanr pe lapes pwason vivan pou eksporte mon pa okouran sa. Me selman mon kapab garanti ou poudir ozordi menm yer, napa dimoun ki pe eksport pwason vivan sorti Sesel ki pe lapes fon pou fer sa. In annan mon konpran demann pour sa, in annan lentere dan sa kalite lapes me Sesel toultan in dir non akoz nou menm nou SFA nou pa ekipe pou monitor e konn sa fason lapes. I posib ki nou pou entertain sa fason lapes dan le fitir me toultan nou napa sa kapasite pour nou monitor li, nou pa pour entertain sa request.

 

HON MARIE-LOUISE POTTER

Mersi Mr Deputy Speaker, bonzour tou dimoun ki pe ekoute. Mr Deputy Speaker mon ti a kontan demann Minis pou evite ki i annan konfizyon dan sa size ki nou pe koz lo la e pou anmenn plis klarite  lo vre sitiasyon an sa ki konsern sa kalite lapes, eski Minis i kapab eksplik nou Lasanble klerman ki polisi e pozisyon gouvernman an sa ki konsern drwa lapes lo bann plato Mahe e sa ki nou apel bann lapes pwason-d-fon. Ki pozisyon gouvernman e ki son polisi aktyel e eski gouvernman i satisfe ki SFA i annan mekanizm neseser pou anpese ki nou polisi i ganny abize oubyen i ganny vyole par bann eleman alien. Mersi bokou.

 

MINISTER SINON

Mersi Onorab, mon pou repete, polisi gouvernman kot i konsern lapes fon, pou lapes fon i rezerve pou Seselwa. Ki nou ti fer, dan nou
Fisheries Incentives Act
ki nou ti annan se nou ti oule redinamiz lapes, nou ti  ankouraz joint venture; enn, dezyenm nou ti les enn pti konponan pou bann dimoun ki annan bato allow 25% zot lekipaz ert etranze.  Sa i dan Fisheries Incentives Act. So si en Seselwa ki mazoriter dan en konpanni bato pe lapes fon, i posib ki i annan lo son bato etranze as long ki i 25% parmi bann peser ki pe lapes lo son bato.  Vedir si i annan 4 peser, i ava annan en etranze. Lo kote lapes endistriyel kot en bato, parey nou dir purse seiner i vini pou vin lapes i entirely own 100%, i kapab 100% own by Lespanny, en konpanni, en konpanni Franse, konpanni Taylande, zot zot lapes pa lo nou plato,  zot lapes an deor nou plato pou zot lapes ton, parler zot ganny swordfish, byensir zot ganny bycatch, en keksoz ki vreman nou pe fer mannyer pou nou fer sir ki sa bann bycatch pa ganny gate me i ganny servi e i annan Seselwa ki enterese dan sa bann bycatch akoz zot in vwar serten marse overseas ki taler mon ava eksplike parmi sa bann lot kestyon ki ou’n demande.

 

E se sa sa 2 vreman kategori industrial. Ler  ou vwar industrial ou vwar en purse seiner, semi industrial ou vwar nou bann bato ki al lapes lwen, ki al detrwa zour deor e nou bann  bato artizanal fisheries, vwar nou bann pti bato ki ale bomaten, i tournen aswar, i tranp son kazye, ki anmenn bouyon pour nou.  Vwala sa 3 gran kategori ki nou annan e sa 3 gran kategori zot annan zot lalwa oubyen zot baz distenk, kler kote zot ganny drwa lapes, koman zot lapes. E si zot fer bann enfraksyon, vedir nou tyonbo zot, zot pe lapes kot zot pa devret,  swa nou anmenn zot ankour, swa nou settle out of court. Zot pey en penalti akoz zot in fer sa. Sa i aplik pou tou le 2, nou bann bato semi-industrial e nou bann bato industrial e menm  nou bann bato artizanal, si i lapes dan marine park, la deryer kot Ste Anne. Si Marine park i vwar li i pey en lenfraksyon. So nou lanmer pe vin plizoumwen parey nou transpor piblik lo later e deplizanpli sirtou avek sa threat piratri ki nou’n annan, nou’ n vwar ki nou bann bato mentnan i pe demann en VMS, Vessel monitoring system akoz sa i form parti zot sekirite. Si en problenm i arive anmer pour  nou vwar zot.

 

Tradisyonnelman parey zot tou  zot konnen en peser pa dir kot i al lapes, tradisyonnelman en peser pa anvi konnen kot ou al lapes. Mon ti kontan dir ek dimoun, peser pa dir menm son fanm kot i pe al lapes. I dir ou i pe al lapes. Ozordi avek sa piratri, kot i al lapes i enportan  ki nou nou konnen, e li i konnen ki nou nou konnen e nou pe etablir sa VMS lo tou bann bato. I fer nou monitoring of sa bann bato pli efikas. Bann purse seiners, ti annan en zour, mwan mon ti dan negosiasyon kot zot ti pe refize met sa tracking device lo zot bato. Me ozordi zot tou zot annan e zot aksepte menm Linyon Eropeen i dir fodre zot annan, fodre nou vwar kot zot pe lapes. So Onorab nou annan bann garfour, lalwa i tre, tre kler e nou pou kontinyen si oule improve lo sa bann lenplimantasyon, sa bann regilasyon pou fer nou lapes soustenab e efikas. Mersi.

 

HON CLIFFORD ANDRE

Bonzour Minis, bonzour tou Manm Onorab, bonzour tou bann zanfan ki prezan.  Minis mon ti a kontan demann ou pou dir nou Lasanble si SFA i annan serten mekanizm anplas ki permet bann peser avek licence lokal si zot vwar en aktivite ilegal oubyen en aktivite kot en bato i pa sipoze lo plato i lo plato, pour zot raporte, si i annan serten incentives ki SFA i met anplas. Dezyenm, eski SFA atraver ou Minister pe ankouraz plis Seselwa pou zwenn dan sa kalite lapes fon ki size premye kestyon. Mersi.

 

MINISTER SINON

Mersi Onorab, mon a pran ou dernyen kestyon premye.   Definitivman nou, SFA e gouvernan Sesel an zeneral i pe ankouraz  Seselwa pou al dan lapes, lapes semi endistriyel si oule, lapes artizanal osi dan sa lendistri.  Nou’n met fasilite  dispozisyon en fon dan labank devlopman spesifikman pou bann antreprener ki enterese dan longlining. Nou vwar i annan bokou lavenir dan longlining, i pa en travay ki fasil akoz si ou ater ou bato i kit por pe ale, ou pa konnen avek  tou sa bann threat ki annan, apre nou annan bokou zil osi, si ou bato pou tournen, si i tourn premye fwa kot ou, ouswa si i tourn dezyenm fwa. Tou sa bann konstrent i la. Me mon garanti ou ki nou pe met tou bann enfrastriktir posib. Parey ou’n vwar Bel Ombre pe devlope, Providans nou’n vini, lo por nou pe improve pour ki nou annan nou bann bon fasilite ki nou pou ankouraz sa lendistri pou devlope.

 

Ou dezyenm kestyon eski nou annan nou en incentive scheme pou fer bann peser zot menm partisipe dan sirveyans nou delo e nou resours. Nou welcome peser ki go out of their way pou dir be la nou annan en bato, nou pa konnen kot i sorti. Nou annan bokou sa ek sa nou’n travay tre pros avek Coast Guard akoz i en travay lekip. Nou’n travay tre pros avek Coast Guard pour nou kapab  – menm Coast Guard avek  airforce, menm ek IDC parfwa akoz parfwa i sifi ki ou tir portre en bato, lo sa portre ou annan son lokasyon e son lokasyon i dir ou poudir i pa devret kot i ete e lo sa baz ou kapab fer li face justice. E in annan lokazyon nou’n fer sa kot nou’n annan levidans kler e sa peser si in licensed dan nou delo i aksepte e i pare pou li pey en lanmann oubyen nou anmenn li ankour.

 

In annan ka osi kot peser pa’n lapes dan nou delo, i pa licensed ek nou alors i annan tou lensitasyon pour li taye. Parfwa in taye nou pa’n kapab tay deryer li akoz petet Coast Guard i devret sorti isi pou al kot li laba, e i pa pour zwenn li. Parfwa nou’n annan peser ki’n pran risk, in sey al deryer li me dezour anzour peser i enn pti pe pli efranyan pou fer sa kalite chasing si oule. I raporte e les sa dan lanmen bann profesyonnel pou manage. E parey ou vwar akoz sa problenm piratri nou pe ganny pli byen ekipe Coast Guard pou kapab fer sa travay e lo kote ensitasyon pou nou peser fer sa, nou napa si oule en lensitasyon anplas ozordi pour nou dir peser si ou raporte ou a ganny sa oubyen sa. Nou napa sa sistenm ki nou’n met la anplas ki la me ziska prezan nou ankor ankouraz peser pou fer li.  I en keksoz ki nou’n met lo latab pour nou diskite e mon minister i pe diskit lo la aprezan akoz parey si en peser i dir ou be mon’n asiz ek li, ouswa mon’n swiv li, in perdi son bennzin, in perdi son letan, e si oule i kontinyen fer sa petet sa lide annan en lensitasyon oubyen en sibvansyon pour zot ki’n fer sa travay sirtou si ou’n tyonbo sa bato apre, petet nou devret regard ladan. Me ziska prezan nou napa sa  koman en sistenm dan nou loperasyon. Mersi.

 

MR DEPUTY SPEAKER

Kestyon nimero 2 Lonorab Prea.  Minister please go straight to the point.

 

HON NICHOLAS PREA

Mon dezyenm kestyon pour Minis; pou demann Minis si son Minister i annan en plan redevlopman por lapes Victoria ek bann lenfrastriktir asosye avek sa lendistri.  Mersi.

 

MINISTER SINON

Mersi Mr Speaker, mon a go straight to the point. Wi nou annan en plan devlopman depi 2007, i en plan devlopman ki la, i en plan devlopman parey tou bann plan devlopman ki’n soufer e in bezwen ganny reaziste akoz bann fakter ki andeor nou kontrol paregzanp kriz finansyer 2008, paregzanp antre dan reform, nou’n reaziste me i en plan devlopman ki la.  Mersi.

 

HON PREA

Mersi Mr Speaker, mersi Minis pour ert fran. Minis si ou kapab dir nou between 2007 ziska la si i annan okenn bout dan sa plan ki’n ganny realize e si Minis osi i kapab dir nou atraver nou bann partener paregzanp Linyon Eropeen, si i annan okenn fon ki’n ganny allocate pou ede, lefe ki zot osi zot pe benefisye atraver nou lendistri lapes, okenn fon ki’n rantre pou ed gouvernman pou realiz enn pti pe sa plan redevlopman por lapes.

 

MINISTER SINON

Mersi Onorab.  Wi nou plan 2007 parey mon’n dir i ti ganny enpe retar 2008 avek sa kriz finansyer. Avek reform parey ou konnen nou’n annan nou en lenflasyon zis pou nou fer nou reform ler nou roupi ti ganny devalye nou ti vwar lenflasyon monte plis ki – egzakteman.  Alors i pa ti en letan pou nou fer gro lenvestisman dan lenfrastriktir. Ozordi Fevriye, apre ki nou’n fer nou reform, apre ki konfidans in retournen dan lekonomi, Linyon Eropeen parey zot rapel ti vini an Fevriye e en delegasyon sorti SFA ti al finaliz en  nouvo Protokol Lapes antre Linyon Eropeen ek Sesel pou 2011/2013.  Linyon Eropeen in aksepte pou pey Sesel 5.8 milyon Ero. Ladan an prenan kont 2.2 milyon koman en grant, development grant, e 3.4 ekivalan pou referans tonnaz 52 mil tonn pwason par an, konsideran diminisyon lapes dan nou delo ki’n arive avek sa bann problenm pirat.

 

Dan sa dernyen protokol sa 2 delegasyon ti osi bezwen prepar en matrix ki endik tou detay lo kwa sa bann larzan pou ganny servi pandan sa lannen e osi sa 93 milyon roupi ki’n akimile pandan sa 2 dernyen lannen prenan kont sitiasyon ekonomik pei ki mon’n fek mansyonn ou taler.  Mersi.

 

HON POTTER

Mr Deputy Speaker, eski Minis i kapab partaz enn pti pe avek Lasanble an bref, ki detay sa plan, ki bann konponan e kan, dan ki time frame i ekspekte sa redevlopman komanse. Mersi.

 

MINISTER SINON

Pou detay nou plan, nou annan devan nou e sirtou sa matrix avek nou partenarya avek Linyon Eropeen ki nou pe fer. Mon ava dir brievman enpe sa bann konponan ki nou annan.   Nou annan paregzanp deza zot in vwar sa bout por ekstansyon devan Sea Harvest ki nou pe konstrir, sa i en  progranm ki pe on going, i form parti dan nou plan, nou annan pour nou fini Bel Ombre, sa i en lot konponan nou plan devlopman, nou annan tou lezot lenfrastriktir..

 

(Technical problem)

 

MINISTER PETER SINON

…eksetera.  Pri fuel, nouvo laponp Bel Ombre e Praslin e nou annan osi pou La Digue en plan pou elev zot bann fasilite enfrastiktir Por Lapes.  Odela de sa nou annan en plan ki pou antre enpe maintenant mon repons dan lot kestyon ki pe al demande par Onorab Prea, plan devlopman pou Zone 14.  Sa zone ki’n ganny idantifye koman zone lapes endistriyel pou nou add valer azoute e kree lizin pou nou met valer azoute avek nou resours natirel.  E sa pou ganny fer lo zone 14.  I pou ganny fer lo sa bann later ki reste Providence e osi pou ganny fer Bel Ombre.  Mersi.

 

HON. DAVID PIERRE

Mersi Mr Deputy.  Bonzour Minis, bonzour tou manm, bonzour bann zanfan e tou bann ki alekout.  Mr Deputy eski Minis i kapab dir nou ki kalite negosyasyon in annan ant gouvernman Sesel e gouvernman Zaponnen an relasyon avek redevlopman Por e kwa ki gouvernman Zaponnen i ekspekte gannyen an retour?  E dezyenmman si dan sa plan pou redevlop Por Victoria, eski zot annan plan pou fer en dry dock?  E anvi ki Sesel i kapital pou lapes ton, eski i kapab donn nou en assessment lo ki kantite gouvernman Sesel in perdi par lefe ki nou anretar avek konstriksyon sa dry dock?  Mersi Mr Deputy.

 

MINISTER PETER SINON

Mon fek retournen sorti Zapon.  E i malere sa ki’n arive laba e pou bann dimoun ki mon’n rankontre laba in resevwar nou tre byen.  E i annan bokou kondeleans e bokou lapriyer pou nou fer pou sa bann dimoun ki’n perdi zot lavi inosaman dan en dezas natirel.  Me Zapon ziska ler mon ti al laba – mon pa konn zot kapabilite maintenant – zot in angaze pou ed nou, kontinyen ed nou, zot in toultan ed nou, kontinyen ed nou avek nou zefor dan lapes.

 

Premyerman parey ou konnen, Zapon i ti’n tir tou son bato lapes dan Losean Endyen, pa neseserman Sesel.  Losean Endyen south west akoz problenm piratri.  Sa i zis akoz problenm piratri.  Mon ti al mwan menm vizite bor lanmer en group bato ki ti lapes dan nou delo e zot bann operater zot dir ‘nou anvi vini selman nou pa ganny drwa vini’.  Zot gouvernman i anpes zot vini.  Zapon selman in kontinyen pey zot licence avek nou pou gard sa rapor ki nou’n annan avek zot.  In kontinyen update – pa dir licence si oule, zot lagreman avek nou pou kontinyen ed nou annan en korperasyon dan fisheries avek Sesel.  E ti pe al expire sanmenm sa lannen, zot in demann nou pou renouvle e in dir nou sa voyaz pa bezwen renouvle parey nou ti pe fer avan pou 6 mwan, renouvle pou 1an.

Lizin ton pou fer son dezyenm konferans ton an Zen e mwan laba mon’n envit zot vini – zot enterese vini vin asiste sa konferans.  Trwazyenmman ki kalite lagreman e plan avek Zapon, nou ti pe focus lo sa voyaz devlop bann enfrastriktir lo Praslin avek La Digue me nou pa ti ankor sinny nanryen, nou ti ankor dan anvwa negosyasyon pou gete kwa ki bezwen e vwala sa ki’n arive, in arive.  Mon’n anvoy en let yer plen de kondeleans me mon’n osi dir mon pare pou donn zot enpe letan pou nou kapab kontinny sa negosyasyon ki nou’n komanse a bonn vwa.  Alor si oule la i moman pou donn zot enpe letan pou zot sey regarde, solve zot problenm dan lakour.  Me mon’n envit sa bann zofisye pou vini e mon krwar letan zot ava vin Sesel pou sa konferans nou ava rekontinyen dan nou plan devlopman ki nou’n demann zot pou finanse.

Dry dock i en proze ki lo latab pou en kantite letan Sesel.  Nou pa anretar lo dry dock, nou ankor pe konsidere dry dockDry dock i en proze ki annan bokou eleman anvironnmantal, pou met en bato lo en slip pou tir son delwil, pou grat son lapentir, pou netway li e met li byen ale, i pran bokou konsiderasyon lanvironnman.  Sa konsiderasyon lanvironnman in toultan dan nou latet; kote nou mete en dry dock?  Ou met li Victoria?  Devan ou i annan Marine Park Ste Anne ki konmela ou kapab naze al ladan akoz kot nou ete.  Wi, nou annan en kantite bato ki vin isi.  Wi, nou ti kapab netway, repar en kantite bato.  E pandan sa bann letan ki nou’n konsidere, teknolozi dry dock in vin pli byen, savedir in en lendistri ki’n kapab pran bokou preokipasyon lo nou konsern pri mordyal ki lanvironnman an konmisyonn en dry dock Sesel.  E i sa ki dan nou latet e mon espere ki to ou tar i en proze ki nou kapab konmisyonnen, me avek tou bann konsiderasyon ki mon pe mansyonnen la.  Mersi.

 

MR DEPUTY SPEAKER

Kestyon Nimero 3 Onorab Prea.

MR DEPUTY SPEAKER

Kestyon nimero 3, Onorab Prea.

 

HON NICHOLAS PREA

Mon kestyon pou demann Minis anvi ki konpetisyon pe ogmante dan sekter lapes dan la rezyon eski Minis i kapab enform sa Lasanble ki bann devlopman kin pran plas oubyen pe ganny planifye dan nou lendistri lapes pou azout plis valer avek nou bann prodwir lanmer ki fer ki Sesel i kontinyen lead dan sa domenn. Mersi.

 

MINISTER PETER SINON

Dan nou polisi devlopman lapes dan larezyon Sesel i premye dan sa domenn. Me de zour an zour bann pei dan la rezyon in osi vwar parey ou’n dir benefis dan sa lendistri e zot in komans zot prop devlopman. Nou lanbisyon se pou reste a latet sa lendistri dan la rezyon. Ki bann plan devlopman ki nou pou met an plas nou’n mansyonn enpe me mon ava al en pti pe pli an detay. Mon a komans avek lo zone Ile Du Port zone 14. La i landrwa kot nou’n idantifye koman lapes endistriyel. Nou pou komans avek konstriksyon avek de dolphin quay ki pou kout nou apepre 40 milyon roupi. Dolphin quay i si oule de jetty, i parey en jetty kot ou kapab annan de bato de kote pour zot ler zot vini met bann gran bato alors fodre i a la oter dolphin quay pour li kapab tenir en bato ton e pour zot kapab vini alongside sa bann quay. E lo later nou pe allocate bann plot pour lizin processing pour bann ship chandlers ki egziste konmela me ki pou move laba pou bann dimoun, bann konpanni ki fer lasenn, aranz lasenn pou stokaz disel ki sa bann bato i servi e pour lezot fasilite ankor ki Sesel i deza annan en lavantaz konparativ pou etre por pli profon dan Losean Endyen. Nou oule I vin por lapes avek lozistik pli efikas dan losean endyen, pou nou kapab gard bann bato ki nou annan e ankouraz lezot bato pou vini, byensir nou pou bezwen dil avek sa problenm Pirat lo en fason konstan, sa i lo Ile Du Port. Mon’n koz lo Bel Ombre taler e mon krwar mon pa bezwen repete mon’n koz lo Providence me Bel Ombre avek Provodence nou annan plan fer de gran warehouse kot nou pou separe e nou pou met li a dispozisyon bann antreprener ki le fer lizin processing pou valer azoute ek pwason. Lo Providence lespas in fini, bann antreprener in demande, zot proze in pas SIB e nou dan prosesis allocate. Par kont Lo zone 14 i annan ankor enn de bann plas vacant pour sa bann aktivite.

 

Lo kote nou bann por ou vwar poudir nou’n travay e lo kote artisanal mon krwar zedi mon annan en renyon avek bann peser Roche Caiman ankor pou determin zot marse kote zot oule, annan en lot plan kot zot dir mwan zot oule, mon pou prezant devan zot e zot a fer zot swa avek sa enn ki’n deza prezant devan zot pour nou fer travay konzwent, en travay akseptab en travay kot tou dimoun i own the process. E pour sa bann lezot peser artisanal  nou pe regarde, nou pe travay a’n ekip pros avek Minister Kominoter paregzanp, Minister Transpor in ed nou osi dan sa prosesis pou vwar flow traffic paregzanp dan Roche Caiman pour nou annan en pli bon formil posib e storage osi pour bann peser,  i en keksoz ki dan nou konsern, ler mon dir bann peser, mon dir bann pti peser, so vwala si oule grosomodo bann plan ki nou annan me bann plan ki i nepli plan, in al dan faz prezan lenplimantasyon. Sa 2 dolphin quay ki mon pe koze nou’n fini komisyonn sa konsiltan ki pou sirvey travay, nou’n fini fer son plan pour nou soumet avek lotorite e I bann enplimantasyon ki nou pou vwar sa lannen ki pou pas tre vit akoz in ganny byen planifye. Finalman mon pou dir ki nou annan en high level committee on fisheries and transport development ki ganny co-chair par mwan menm avek Minister Morgan, ki Minister pou transport, ki Minister ki osi get bann issues of piracy. So ki nou travay koman en lekip akoz pwason I osi en .. tranpor e por i son domenn osi.  Alors mersi.

 

MR DEPUTY SPEAKER

Siplemanter?

 

HON NICHOLAS PREA

Minis an bref si ou kapab zis dir nou kote pour tou sa bann proze ki ou’n mansyonnen kote Finans pou vini, kontribisyon Sesel ki annan okenn lenvestiser prive oubyen menm entranze ki enterese pou vin fer bann joint ventures. Thank you.

 

MINISTER PETER SINON

Gouvernman i pe kontinyelman vin en fasilitater. Tou sa bann proze ki mon pe mansyonn ou pou ganny fer par sekter prive. Gouvernman I pou fasilit sa bann proze par provide bann lenfrastriktir apropriye. Pour sa bann enfrastriktir ki mon’n nonmen ozordi, tou sa bann enfrastriktir finansman, i deza la. Taler mon’n dir ti annan nou 92 milyon roupi dan lapes ki ti la, nou ti’n devret depanse dan sa 2an pase, nou pa’n depanse. Answit sa ki nou’n negosye sa 5.8 milyon ero ki nou’n gannyen avek Linyon Eropeen an plis sa matrix ki nou’n met an plas.

 

Nou la pou fer sir ki sa bann private sector i kapab operate dan en lanvironnman apropriye. En louvraz enportan ki nou fer se pou garanti ki nou marse, Linyon Eropeen sirtou i reste ouver. Pour nou fer sa fodre ki nou lenfrastriktir la, fodre ou annan delo lo por, fodre ki ou annan semen, fodre ki ou annan bann bon standar debark pwason, ki manyer pwason i al dan lizin sansan sa pwason pa pou arive dan marse Eropeen akoz i pou ferm nou marse akoz li i vin evalye nou parey zot in fek vini la, si mon pa tronpe zot ankor dan pei, lo ki bann standar ki nou annan. Se sa ki preokip mwan e SFA. Pou fer biznes se sekter prive. So i annan en public private sector partnership ki pe kontinyelman egziste e mon Minister pe kontinyelman dyaloge avek bann lorganizasyon ki FBOA ki i Coast Guard, Ports Authority e i Public Health, SBS Seychelles Bureau of Standards ki nou competent authority dan fisheries konmela e tou sa nou pe fer li pou fer sir ki nou lapes e nou reste a latet dan la rezyon kot i konsern lendistri lapes. Mersi.

 

HON MARIE-LOUISE POTTER

Anvi ki Minis in les nou konpran ki laplipar si pa tou sa bann devlopman ki in mansyonnen i bann devlopman ki pou pran plas lo bann zil konble, eski Minis i kapab eksplik nou ki lenportans e ki lavantaz sa bann zil pou anmennen pou lavenir devlopman lapes Sesel.

 

MINISTER PETER SINON

Onorab pou Sesel nou koneksyon avek lemonn ti komans depi lannen ‘70 avek louvertir nou laeropor e sa limenm ti later konble. Tou nou por lapes e endistriyel, menm lapes komersyal I lo later konble. So later konble in endispansab pour louvertir nou pei avek lemonn e pour lemonn konekte avek nou. Spesifikman pour lapes sa bann later konble in en platform pour nou kapab vin a latet si oule devlopman lapes dan la rezyon e dan la grann rezyon. Sesel ozordi i annan en lizin ton pli gran dan lemonn e i annan en por ki safe 24 lo 24, 12 mwan dan lannen, nou andeor en zone siklonn, menm lo en pwennvi natirel nou sanse. E pour nou kapab devlop sa bann por a sa porfonder I definitivman fodre nou ti annan sa bann later konble. E i endispansab pour nou kapab reste an tet sa devlopman. Mersi.

 

HON WAVEL RAMKALAWAN

Bonzour toulmonn, bonzour bann etidyan. Mr Deputy mon ti ava kontan demann Minis an relasyon avek progranm pour donn valer azoute ensidswit, si i kapab dir avek nou si i annan okenn plan pour nou rantre dan leksportasyon ton fre olye zis met ton dan bwat e frozen ton espesyalman ver Zapon parey ou’n mansyonnen malgre tou zot bann problenm, kot ti ava donn nou. E apre sa mon ti ava kontan si Minis i donn nou en lide lo tou sa bann proze ki nou’n deza tann anonse lontan aquaculture, loins, ensidswit. Konmsi ki pe arive avek tousala zis nou met lo papye e nou pa pe fer nanryen. Mersi bokou.

 

MINISTER PETER SINON

Lo valer azoute parey mon’n eksplike taler gouvernman i pou provide bann fasilite debaz e se the private sector ki pou deside si pou met pwason dan bwat si pou met dan papye, si pou met dan sak plastik, si i pou fer loins. Mon asire selman poudir kot i annan potansyel Seselwa pou ale e mon asire ki loins nou pou fer, si i pou ariv Zapon the private sector will decide, selman definitvman nou nou pou provide sa platform pour zot  kapab fer li lo la.

 

Aqua culture Sesel nou pe fer maintenant ADB in finance son plan ki nou’n fini. Nou pe valide en plan pou aquaculture e mariculture sirtou Sesel i pou plizourmwen focus lo mariculture akoz nou napa bokou teren, pou fer bann gran basen pou sonny pwason ladan, me selman nou annan bokou lanmer. E se pour kwa sa plan si oule in focus zis lo potansyel for mariculture, savedir ou farm ou pwason me dan lanmer. Pa anpes nou osi fer aquaculture lo later pou fer bann basen parey nou ti fer Coetivy avek prawns. Me sa i en devlopman ki a pe vini akoz nou annan en master plan konpreansiv. Nou’n bezwen ale idantifye bann landrwa proteze, kote si en dimoun i vini e in deza vini pou dir nou nou oule fer mariculture, kote ou pou ale? Nou bezwen rod en landrwa. I dir ou i bezwen en landrwa ki safe, ki proteze, nou annan vann swet, nou annan vann nor,  ki bor ki i ale kot toulede pa pou afekte li tou dilon lannen. E ki lenpakt lo lanvironnman ki sa i pou annan si nou pe fer sa obor en resif par egzanp kot i annan bann diferan fonksyon rezinerasyon nou stok pwason. So definitivman i en piste ki nou pe al ladan e byento nou pou definitivman tann bann leko pozitiv e realis lenplimantasyon sa plan aquaculture. Mersi.

 

MR DEPUTY SPEAKER

Kestyon nimero 4, Onorab Terence Francoise.

 

HON  TERENCE FRANCOISE

Bonzour toulmonn ki pe ekoute. Msye Deputy mon kestyon se pou demann Minis responsab pou lapes pou enform bann peser Anse Royale kan ki SFA  i annan lentansyon pou remet sa lalimyer dan lapas Anse Royale ki ti ganny andomaze an 2009.

 

MINISTER SINON

Mersi Onorab e mersi pour sa kestyon pertinan ki’n vreman  donn nou en pti jolt elektrisite pou reget antye kote ki napa lalimyer e mon annan gran plezir pou dir ou ki depi Sanmdi lalimyer pe alimen dan lapas Anse Royale  e pe alimen osi dan lapas Anse Aux Pins e semenn pase in alimen Praslin e pou al alimen kot I pa ankor alimen, Anse Etoile e partou.  Nou’n fer en legzersis konpreansiv apre ou kestyon e ankor ennfwa mersi bokou.

 

MR DEPUTY SPEAKER

Siplemanter Onorab?

 

 

HON. TERRENCE FRANCOISE

Mon byen kontan apre mon kestyon in ganny fer.  Msye Speaker eski Minis i kapab dir nou konbyen in kout gouvernman pou re-enstal sa lalimyer. Mersi?

 

MINISTER PETER SINON

Mersi Onorab.  Spesifikman lo sa lalimyer Anse Royal mon napa sa sif direk avek mwan.  Me nou annan nou en progranm pou nou kouver tou bann lapas e grosomodo sa legzersis ki pe ganny fer  konzwentman avek en partenarya prive i pe kout nou – pou Anse Royal spesifikman in kout nou R28,000 pou remet sa dan lapas Anse Royal.  Mersi.

 

HON. POTTER

Mr Deputy Speaker, mersi. La ki Minis in enform nou ki tou bann lapas prezan pou annan zot lalimyer swivan kestyon ki Onorab Terrence Françoise in demande, eski Minis i kapab dir nou Lasanble ki plan ki prezan SFA pou met anplas pou kapab annan en progranm mentenans kouran pou fer sir ki kan i annan en lalimyer ki etenn, ki kase, ki tonbe, ki ganny vole, i ganny en ranplasman dan en dele rezonnab i ganny fer pou evite ki bann peser i fer fas avek bann mare nwanr ki kapab koz aksidan dan bann lapas.  Mersi.

 

 

 

MINISTER PETER SINON

Mersi Onorab.  Les mwan asir sa lasanble ki dorénavant SFA i kler poudir kit lalimyer alimen dan lapas i definitivman nou responsabilite.  Kit lalimyer alimen dan lapas Victoria i responsabilite Por Sesel.  Nou’n fer sa pti distengsyon.  E maintenant ki nou annan en formil kot nou pa bezwen atann si oule bann lezot partener ki pli bizi par egzanp lontan nou ti fer sa akoz ansanm avek Por oubyen avek Coast Guard me  Coast Guard i bizi parey nou konnen.  La nou’n deside partner avek en sekter prive e legzersis pe ale.  Nou annan plan annan stokaz nou lalimyer.  Nou annan plan fer sa bann tour regilyerman e nou ekspekte korperasyon bann peser sa voyaz.  Fotespere pa bezwen ariv ankor dan Lasanble  pou nou kapab fer sir ki sa louvraz i ganny fer koman en routin e pa en leksepsyon ki arive dan en zour.  Mersi bokou.

 

HON. SANDY ARISSOL

Bonzour Minis, bonzour tou bann etidyan ek zot ansennyan e bann ki alekout dan lakour.  Mon kestyon pou Minis se anvi ki sa ti en konsern anmennen par Onorab Prea dan leta lanasyon mon ti a kontan demann Minis akoz ki menm bann peser ti’n fer plizyer rapor lo la, in pran zot tou sa letan, mwan e lannen, zis detrwa mwan avan eleksyon pou zot kapab enstal tou bann lalimyer ki pa ti alimen dan sa pei?  Mersi.

 

MINISTER PETER SINON

Mersi Onorab.  Mersi pou ou kestyon.  In pran letan akoz parey mon ti pe dir ou, ti annan en tradisyon ki pou fer sa nou ti partner antre nou avek swa Coast Guard swa Por.  Me toulede pandan sa bann lepok ki nou tou nou konnen la anndan, Coast Guard in very busy, si i pa lo alert i deor.  E nou’n atann e finalman nou’n dir nou bezwen sanz formil pou nou kapab fer li.  La nou annan nou en formil.  Nou’n partner, parey mon dir ankor, avek en sekter prive ki nou ti annan dout nou menm si i ti pou kapab fer li akoz i pa tro en louvraz fasil si ou annan lasenn ki’n rouye, eksetera, ou pou bezwen tir tou, remet sa buoy anba, si sa bato pa pou kil over letan ou dan lapas.  Akoz i en louvraz ki ou fer dan lapas.  Me nou’n fer, e fer li avek sikse.  In pran nou enpe letan, mwan personnelman pran responsabilite pou sa.  E mwan demann en apology pou tou nou bann peser ki’n esper tou sa letan e parey mon’n dir, dorénavant sa i pou en louvraz routin ki SFA pou antreprann.  Mersi.

 

HON. ANDRE POOL

Bonzour tou dimoun ki pe ekout mwan.  Msye Deputy Speaker swivan kestyon anmennen par Onorab Terence Françoise e ki lontan i ti’n anvoye pou reponn, mon ti a kontan demann avek Minis si an se ki konsern sa bann lalimyer dan lapas si zot in rikord okenn ka vandalizm e si i annan okenn mekanizm an plas pou anpese ki sa i arive.  Mersi.

 

MINISTER PETER SINON

Mersi Onorab.  Wi, nou’n rikord ka vandalizm.  I malere ki sa i arive.  E malerezman osi nou napa en sirveyans lo tou sa bann lalimyer ki parpiye partou lo Mahe e ki alim Mahe, Praslin e lezot zil, e ki alim aswar.  Nou espere ki parey peser in asize in espere e zot in soufer tou sa letan, zot ti a kapab osi ed nou pou sirvey zot lalimyer, pou take ownership sa lalimyer.  I pou zot, i pa pou SFA.  SFA in mete me se zot ki servi.  Alor I pou benefis zot tou e fotespere nou ganny enpe korperasyon avek zot pou sa.  I pa neseserman ki peser ki fer vandalizm lo son lalimyer.  Me lefe ki zot osi zot lo delo, zot vwayaze, zot vwar, e tou dimoun an zeneral mon demande ki vwar sa bann aksyon i ganny fer pou fer sir ki nou raporte e nou fer sir ki i en practice ki arete.  Akoz i vreman vreman domaz.  I pran en ta resours e i fer en bann dimoun pa kapab fer zot louvraz efikasman e dan sekirite.  Mersi.

 

 

 

 

MR DEPUTY SPEAKER

Kestyon nimero 5, Onorab Terence Francoise.

 

HON TERENCE

Mr Deputy eski Minis I kapab donn zabitan Anse Royale en update lo proze lotel Muska ki ti pou fer Fairy Land. Mersi.

 

MINISTER SINON

Sa proze Muska i pe ganny promote par Msye Sivasankaran e reprezante par Lakonpannyen Fairy Land Venture Limited ki sipoze pran plas Fairy Land lo en sirfas 38 ektar later.  Parey tou proze sa groser, letid lenpakt lo lanvironnman e laprouvasyon outline plan i bezwen ganny fer e pour sa proze letid lenpakt lo lanvironnman e laprouvasyon outline plan par lotorite plan in fini ganny fer. Me domaz avek kriz finansyer 2008 parey nou konnen laplipar gro proze pa’n kapab demare anvi ki klima lenvestisman i pa ti favorab. Dan en meeting ki en zofisye biro lenvestisman ti fer avek reprezantan lokal sa proze in enform sa zofisye ki byento zot pou demare ek sa proze.  Sel lenformasyon konkret ki nou’n arive gannyen avek zot se ki dan ankor petet en mwan ou de zot pou soumet zot plan pou semen lo sa sit pou laprouvasyon kot biro lotorite plan. Anfet zot pe travay lo lezot detay plan e zot in komans diskisyon osi avek detrwa kontakter. Biro lenvestisman pe regarde si petet sa proze, project manager ti a kapab donn leksplikasyon petet enpe piblik lo SBC ler son proze i ganny lanse e se sa lenformasyon ki nou kapab gannyen a se moman mersi.

 

HON. BERNARD GEORGES

Mersi Mr Deputy Speaker.  Mr Deputy Speaker mon kesyon pou Minis se eski Minis i kapab donn nou enpe plis presizyon lo sa proze?  Eski an efe i en proze lotel oubyen eski i en proze villa deluxe pou ganny vann avek etranze?  E dezyenmman eski Minis i kapab donn nou son garanti ki i pa pou – parey in arive dan plizyer sa bann proze les en serten kantite konstriksyon ganny fer apre zis sa proze i sezi dan semen e ki i pa ni al devan e ni kapab retourn deryer akoz serten konstriksyon in ganny fer parey nou’n vwar Anse La Mouche avek fence ki’n ganny mete apre zis i mor dan semen.  Mersi.

 

MINISTER PETER SINON

Mersi Onorab.  Sa proze, detay i en proze ki pou konpri 18 villa double-room resort, en Presidential villa, 17 doublebedroom resort suites. Mon krwar sa i bann lasanm.  50 seaview residential villas ki pou dan bann lopsyon 2 lasanm 300 met kare e 3 lasanm 350 met kare.  Devlopman pou osi konpri 5 Food and Beverage areas.  Par egzanp restoran, en speciality restoran, en lot restoran destinater, en bar, avek en main kitchen.  I pou osi konpri landwar reste pou son staff, akomodasyon pour son staff. I pou annan li apepre 100 staff.

 

E lo ou dezyenm kestyon lo garanti ki i kontinyen, mon krwar ki sa bann letan ki zot in espere se egzakteman pou anpes sa.  Pou anpes komans konstrir, ezite akoz marse i pa lucrative e apre pou sey vann oubyen rekomanse.  Mon krwar ki sa bann envestiser prezan zot in kalkil sityasyon, zot pe vwar poudir destinasyon i annan ogmantasyon e i annan potansyel. E mon napa avek mwan en garanti pou mwan dir poudir  i pa pou arete ditou akoz i annan en bann fakter ki pa dan nou lanmen.  Me selman mon krwar poudir lefe ki zot in kalkile e zot in esper tou sa letan, ler zot pou vini zot pou vin avek sa konviksyon e zot pou fer en travay pou fini.  Mersi.

 

HON. MARIE-LOUISE POTTER

Msye Speaker, eski Minis i kapab dir nou si promoter sa proze ti aste sa teren avek leta oubyen i ti aste avek en propriyeter prive?

 

MINISTER PETER SINON

Mersi Onorab.  Mon krwar sa propriyete ti en propriyete prive.  Mersi.

 

MR DEPUTY SPEAKER

Nou’n ariv alafen kestyon pou Minis Sinon, nou a remersi li ek son delegasyon.  Aprezan nou ava pran kestyon nimero 6 pour Minis Meriton.  Onorab Norbert Loizeau.

 

 

HON NORBERT LOIZEAU

Mersi Mr Deputy, bonzour Minis. Bonzour tou manm bonzour tou etidyan prezan. Mr Deputy mon kestyon ki mon anvi demann Minis se eski Minis pour spor I kapab dir sa Lasanble ki vreman sa seksyon sports medicine pou ganny privatize e kan sa pou arive. Mersi.

 

MINISTER VINCENT MERITON

Bonzour Msye Deputy, bonzour tou Manm Onorab, e tou bann zanfan ki isi pe partisipe, pe ekoute aktivman lo bann deba ki pase dan Lasanble e byensir tou bann dimoun ki pe ekout nou lo radyo.  Msye Deputy pou pran ou direksyon taler, mon a vin direk lo larepons. Non  nou pa pe privatiz sant medikal sportiv kot NSC. Mersi Msye Speaker.

 

DEPUTY SPEAKER

Siplemanter.

HON NORBERT LOIZEAU

Mr Deputy Speaker mon anvi demann Minis vi ki zot pa pe privatiz sa seksyon, eski ou kapab dir nou ki nouvo lenvestisman zot anvizavi fer pour sa seksyon anvi ki zwe de zil i pros, si i annan okenn nouvo lekipman ki zot anvizaze mete vi ki i annan serten lekipman ki pa pe fonksyonnen pour en bon pe letan e osi si zot pe mazin ogmant lakantite travayer dan sa seksyon avek zwe de zil ki pe arive mon krwar demann pour enpe plis. E osi nouvo training pour a bann dimoun dan sa seksyon. Mersi.

 

MINISTER VINCENT MERITON

Mr Deputy mon pa konnen lekel lekipman ki pa pe marse, tou bann lekipman pe fonksyonnen be si Onorab i konnen i ti ava les mwan konnen. Dezyenmman nou annan nou 7 manm staff ki travay laba, e wi ler bann gran levennman i pran plas nou ogmant nou kapasite staff e nou travay an etrwat kolaborasyon avek Minister Lasante ki ed nou avek bann dokter, bann dimoun ki fer masaz, bann dimoun ki fer fizio, pou asire ki nou kapab pe deservi dan ka zwe de zil theme Seychelles e osi nou travay an etrwat kolaborasyon avek lezot komisyon medikal sorti dan lezot pei Losean Endyen. Zot pou annan en lespas ki zot pou ganny donnen lo vilaz e osi lo bann sit zwe pou asire ki okenn blesir ki kapab arive i ganny trete vitman o pli vit ki posib. Mersi Mr Deputy.

 

HON GERVAIS HENRIE

Bonzour toulmonn. Mr Deputy Speaker mon ti a kontan demann Minis i annan enpe letan deza ki ti ganny raporte ki piblik i servi servis sa seksyon sports medicine pou bezwen fer serten kontribisyon vizavi servis ki zot ti pe gannyen, mon ti ava kontan demann Minis ki manyer sa pe marse, e reveni ki zot pe kolekte dan ki fason I ganny re-envestir dan sa seksyon. Mersi.

 

MINISTER VINCENT MERITON

Mr Deputy parey ou konnen nou bezwen enn pti kontribisyon pour manm piblik e pour bann sportsmen ot ki bann sportsmen ki dan progranm onivo e osi ot ki bann manm lekip nasyonal Sesel. Nou bezwen pran enn pti kontribisyon akoz en servis ki nou donn avek manm piblik nou bezwen anmas enn pti larzan pour nou re-envestir dan lekipman pou rod bann materyo konsomab e wi i annan serten morso lekipman ki nou bezwen aste, pa ki pa pe fonksyonnen me serten lekipman ki nou pou bezwen pour nou kapab deservi sa gran demann pou serten fasilite ki i annan pou zwe de zile. So sa larzan ki nou gannyen, ki nou kolekte nou servi pou aste bann konsomab e osi bann morso lekipman ki nou bezwen anbelir nou lefektiv. Mersi Mr Deputy.

 

HON MICHEL MARIE

Mersi tou dimoun ki pe ekout nou lo radio. Eski Minis i kapab dir nou si son Minister i annan lentansyon pou upgrade sa servis sirtou la ki nou annan zwe de zil e konbyen I kout son Minister pou run sa service.

 

MINISTER VINCENT MERITON

Wi pour nou kapab donn en bon servis pandan zwe de zil nou pe byensir annan bann formasyon avek nou lefektiv e osi avek bann staff Minister Lasante ki pou ed nou dan sa gran levennman anba gidans komisyon medikal ki’n ganny etablir. Anmenmtan parey mon’n dir nou bezwen pe rod serten lekipman anplis pour nou kapab deservi bann fasilite ki nou bezwen donn bann atlet pandan zwe de zil. Kot i konsern lenvestisman, la pour le moman nou pe konsantre lo bann lekipman ki nou bezwen pou zwe de zil. Nou oule servi sa cycle zwe de zil apre ki i fini pour nou kapab reget enpe dan sport an zeneral. Depi sport dan lekol, sport dan kominote, sport pour tou, sport tourizm, finansman dan sport, partenarya dan sport, ki manyer sport I kapab ganny pratike dan landrwa travay e osi ki manyer nou kapab enplik plis dimoun dan partisipasyon sport e osi sekter prive e osi pou gete ki manyer dimoun i kapab zwenn avek nou pou gete ki manyer nou kapab komans serten biznes dan sport san ki nou bezwen touy dimoun me osi pran enn pti kontribisyon ki pou permet manrmay kapab leve debourye e atraver sport ganny zot ganny pen. Mersi Mr Deputy.

 

MR DEPUTY SPEAKER

Kestyon Nimero 7, Onorab Terence Francoise.

 

 

HON TERENCE FRANCOISE

Mr Deputy eski Minis responsab pour Lazenes i kapab enform Lazenes Anse Royale lo ki’n arive avek plan son minister pou konstrir en Youth Village ek en Youth Centre Anse Royale. Mersi.

 

MINISTER MERITON

Msye Deputy, lenplimantasyon sa 2 proze in ganny retarde pour le moman pour rezon finansyel.  2 bout later ti’n ganny idantifye, enn pou youth village, lo later lagrikiltir e en lot pou youth centre. Gouvernman in deside ki youth village pa pour fer lo later lagrikiltir akoz nou bezwen servi byen sa later, eksplwat li pou sekirite alimanter. Landrwa ki ti’n ganny idantifye pou youth centre a montan Mont Plaisir, apre laplenn pou ganny servi pou bann fasilite relye avek liniversite Sesel. Antretan gouvernman nou pe etidye bann lezot opsyon pou kapab evantyelman ler nou ganny larzan pou enplimant sa 2 proze.  Mersi Msye Deputy.

 

HON FRANCOISE

Eski Minis i kapab dir nou si i annan bann lenvestiser prive ki anvi ede dan realiz sa proze, ki bann prosedir ki zot kapab swiv Msye Speaker.

 

MINISTER MERITON

Msye Deputy si i annan en lenvestiser prive ki enterese, byensir i bezwen liyez avek nou e atraver bann prosedir ki nou’n etablir Minister Litilizasyon Later avek Labita e departman Lenvestisman nou bezwen fer sir ki nenport keksoz ki nou pe fer, nenport proze ki nou antre ladan i tonm anlinny avek bann gran polisi ki gouvernman in mete pou asir latransparans e fair play pou fer sir ki napa okenn favouritism ki ganny..

 

HON POTTER

Mr Deputy Minis i kapab eksplik nou enn pti pe pli kler ki rasyonnel annan sa 2 fasilite, en youth village, ek en youth centre, eski napa fason ki kapab merge sa 2 fonksyon dan en sel fasilite pou optimiz nou bann resours e anmenmtan deservi bezwen lazenes dan sa domenn?

 

MINISTER MERITON

Msye Deputy youth village i ganny prensipalman servi pou permet ki bann gran nonm zenn i vin ansanm atraver bann progranm spesifik dan bann letan partikilye dizon dan vakans kot nou kapab devlop serten valer kot nou kapab pas serten moman ansanm lo nivo lokal me osi permet ki bann lezot zenn dan bann pei larezyon i vini e annan bann progranm lesanz avek nou bann zenn isi Sesel enpe parey vilaz lazenes ti ete Cap Ternay. Me youth centre tanka li, se bann fasilite ki pou permet bann zenn kapab zwenn ansanm lo nivo rekreasyonnel dan pli pti groupm ganny serten skills, servi bann fasilite parey internet counseling, annan bann fasilite fotokopi etc ki donn zot serten skill e donn zot serten fasilite dan zot travay e lavi tou lezour.  Si youth village li i bann gran progranm ki kapab tous manrmay dan bann peryod spesifik, youth centre ki en keksoz tou lezour napa nanryen ki anpese ki nou merge zot ansanm me selman i bezwen annan en delinasyon lespas pou fer sir ki nou  pa pe melanz 2 keksoz ansanm akoz paregzanp I annan serten diskisyon ki nou kapab fer, I annan serten lide ki’n leve avek liniversite Sesel, si i dortwar evantyelman pandan letan

vakans i kapab ganny servi koman vilaz lazenes. Sa i bann lide ki pe ganny met devan pour nou kapab optimiz e anmenn plis rasyonalizasyon dan depans ki gouvernman i servi.  So bann lide lo  latab pe ganny diskite, once ou pran en desizyon final byensir atraver kestyon oubyen bann deklarasyon mon a vin isi pou kapab brief zot. Mersi Msye Deputy.

 

HON RAMKALAWAN

Mersi bokou Mr Deputy.  Mr Deputy vi ki lazenes Seselwa ti deza annan son youth village kot i ti kapab kanpe, Cap Ternay e ki letan zot ti donn Emirates sa teren zot ti kraz tou, eski Minis i kapab dir avek nou kimannyer zot annan problenm finansyel vi ki dan ansyen Lasanble Nasyonal gouvernman ti anonse ki se Emirates ki ti pou donn finansman pou konstrir sa nouvo youth village.

 

MINISTER MERITON

Mr Deputy gouvernman pou donnen lazenes son youth village, diskisyon i ava anplas e ler le moman apropriye nou ava anonse. Pour le moman i annan bann laranzman ki pe fer dan vakans kot bann lekol pe ganny servi me lazenes i reste oker polisi gouvernman e gouvernman pou kontinyen atraver bann mwayen ki i annan la ziska ler nou kapab donn li son vilaz apropriye e pli modern ki Cap Ternay ti ete.

 

(Interruption)

 

DEPUTY SPEAKER

Order, order. Onorab Rose.

 

HON MARIE-ANTOINETTE ROSE

Bonzour toulmonn, bonzour tou bann zenn ki pe ekout nou. Minis etan ki plan pou konstrir en nouvo vilaz lazenes ti demann bann zenn zot menm, menm avan ki
Cap Termay ti kraze, ti annan en demann par bann zenn zot menm pou fer en nouvo vilaz lazenes, eski Minis i kapab konsider ler zot pe fer diskisyon rezwenn bann zenn ki reprezant zot distrik pou ki zot osi zot ava met nouvo lide ater..

 

(Interruption)

 

DEPUTY SPEAKER

Order,order – proceed.

HON ROSE

..eski Minis i kapab rezwenn bann zenn ki reprezant zot distrik pour ki zot osi zot ava met nouvo lide dan sa nouvo vilaz lazenes.  Mersi.

 

MINISTER MERITON

Msye Deputy byensir avek en National Youth Council dinamik, avek en zenn CEO e pe fer travay atraver tou bann lekol, bann lenstitisyon edikasyonnel pos segonder, konsiltasyon pou pran plas, i enkli konsiltasyon avek tou bann zanfan ki pe ganny reprezante la pou fer sir ki sa vilaz lazenes I a reponn tou nou bann bezwen e parey mon’n dir avek bann fasilite modern ki nou kapab reve dan rezyon Losean Endyen. Moman apropriye nou ava dir kan. Mersi Mr Deputy.

MR DEPUTY SPEAKER

Kestyon nimero 8.

 

HON TERENCE FRANCOISE

Mr Deputy eski Minis responsab pour spor i kapab enform bann zenn Anse Royale si son minister atraver NSC i annan lentansyon pou kontinyen redevelop sports complex Anse Royale.  Mersi.

 

MINISTER MERITON

Msye Deputy bann travay ki NSC ti annan pour fer lo serten fasilite spor lo complex Anse Royale in preski konplete.  Sa complex pou deservi non selman sportiv distrik Anse Royale me rezyon Sid dan son totalite.  Serten federasyon, lasosiasyon, etidyan liniversite Sesel e lezot sportif pour kapab servi sa bann fasilite zot osi.  Bann fasilite ki enkli en laplenn foutbol, track, court volley-ball, basket-ball, net-ball e tenis.   I osi annan fasilite indoor ki’n fek konstrir par komite olenpik nasyonal Sesel konzwentman avek gouvernman anba proze Olymp Africa House. Byento ler tou travay in konplete, complex sportiv Anse Royale pou ganny zere par NSC an etwat kolaborasyon avek komite olenpik nasyonal Sesel, Liniversite Sesel e ladministrasyon distrik Anse Royale.  Sa bann partner pou osi travay ansanm pou enplimant bann progranm pou benefis bann sportif ki pou servi sa fasilite.  Konsiltasyon in deza ganny fer avek reprezantan ladministrasyon distrik, liniversite Sesel, bann federasyon ek lasosiasyon ki annan lentansyon servi sa bann fasilite, sa vedir football, basket-ball, volley-ball e tenis.  Sa bann diferan group in ganny demande pou soumet zot plan pour ki nou kapab travay lo en progranm kordinasyon pour litilizasyon sa bann fasilite. Mersi Msye Deputy

 

MR DEPUTY SPEAKER

Siplemanter Onorab.

 

HON TERENCE FRANCOISE

Lefe ki sa nouvo Olympic house i form parti sports complex Anse Royale, eski Minis i kapab enform nou Lasanble kan ki bann zenn Anse Royale e lezot bann zenn dan rezyon Sid Mahe i kapab komans enjoy sa fasilite e ki kalite servis ki i pou ofer e ki bann kondisyon pou servi sa fasilite. Mersi.

 

 

 

MINISTER VINCENT MERITON

Sa proze Olymp Africa House Mr Deputy, mon’n bliye enformen, in kout nou 180 mil dolar. Gouvernman in kontribye 30 mil dolar e komite olenpik in kontribye 150 mil dolar. Bann fasilite indoor pou annan aerobics, weight lifting, laboks, judo e badminton. Si tou bann diskisyon i finalize nou ekspekte komans servi sa fasilite depi le premye Avril. Mersi Mr Deputy.

 

HON WAVEL RAMKALAWAN

Mr Deputy eski Minis i kapab dir avek nou sa bann fasilite ki dapre son larepons in preski terminen si zot lo nivo enternasyonal vi ki nou’n antann bann disiplin sportif avek reparasyon ki pe fer lo Palais de Sport zot pe konplent ki zot napa bann landrwa apropriye pou fer training e alor vi ki sa pe fini eski zot pou kapab fer training byento.

 

E dezyenmman eski Minis i kapab dir avek nou si sa laplenn i lo nivo standar enternasyonal pourki nou kapab osi trouv desantralizasyon nou bann match foutbol olye tou i zwe lo laplenn anvil, i ava osi annan enpe ki zwe dan Nor oubyen eski finalman tou sa bann zafer i zis pa lo nivo lo bann standar enternasyonal e se pour sa rezon ki nou pa kapab desantralize. Mersi bokou.

 

MINISTER VINCENT MERITON

Kestyon zwe de zil pa tonm ladan me selman mon a reponn ou Onorab. Napa atlet ki pe konplent konmkwa napa fasilite apropriye pou train. Bann atlet ki pe train dan bann veni avan nou’n organiz bann fasilite kot NSC multi purpose hall kot zot kapab train e bann fasilite i konvenab. Nou’n diskite avek bann federasyon avek bann antrener e tou dimoun i satisfe ki sa bann fasilite i konvenab.

 

Dezyenmman kot i konsern standar, nou pe travay a’n etrwat kolaborasyon avek bann federasyon pou asire ki bann sit ki nou servi i annan standar enternasyonal. Pti a pti pa anpes arive. Dousman nou bezwen asire ki bann laplenn ki nou fer, bann court ki nou fer evantyelman nou kapab ganny sertifika ki nou kapab zwe bann match lo la. I dan nou lentere e i dan lentere lotorite bann partner ki travay avek nou pou fer sir ki sa larzan ki nou mete i bann larzan ki ava byen itil e ki nou kapab servi li pa zis lo bann match lokal oubyen lantrennman me osi evantyelman i kapab ganny sa standar enternasyonal.

 

Mr Deputy kot i konsern bann diferan sit ki mon’n nonmen ofir e anmezir ler nou resours in permet nou avek partisipasyon sekter prive nou a kapab anmenn li lo sa nivo pourki nou a kapab atenn bann gran lobzektiv ki mon’n dir oparavan. Mersi.

 

HON VICKY THERESINE

Mr Deputy anvi ki Minis in fer mansyon avek bann diferan partner afilye avek sa proze, eski Minis i kapab klarifye avek Lasanble Nasyonal lekel ki pou responsab ou ki responsab pou asire ki sa sports complex an kestyon i ganny byen mentenir pourki nou bann zenn i kapab servi li a toultan. Mersi.

 

MINISTER VINCENT MERITON

Sanmenm sa taler mon’n dir ek Onorab Loizeau mon pa pe privatiz sant sports medicine akoz ler ou me li dan sekter prive totalman la i annan serten dimoun ki pa pou kapab partisipe. Se pour sa rezon nou pe antre an partenarya ki pou permet tou zenn Seselwa kapab vini e partisipe. Se NSC prensipalman ki pran sa responsabilite me an kolaborasyon …

 

(Technical problem)

..nou oule ki i annan en partenarya pou fer sir ki tou bann partner i okouran zot osi zot kapab servi e osi ki bann zenn sa sou distrik e sa sou rezyon i kapab osi benefisye.  Mersi Msye Deputy.

MR DEPUTY SPEAKER

Kestyon nimero 9, Onorab Arissol.

HON SANDY ARISSOL

Mr Speaker mersi. Mon kestyon pou Minis i lir konmsa: eski Minis pou Lazenes i kapab eksplik zabitan St Louis konbyen ti kout gouvernman pou konstrir sa sant rekreasyonnel Belonie pour lazenes.  Mersi.

 

MINISTER MERITON

Msye Deputy a la demann kominote Belonie mon minister in deza asiste fer renovasyon en langar ki ti deza egziste. Kou sa renovasyon ki ti fer an 2006 ti ariv R50,000.  Sa landrwa pa’n ganny byen zere e an konsekans in annan bann lensidan vandalism.  I annan serten dimoun ki’n montre lentere dan sa landrwa e ansanm avek MLUH, nou pe konsider bann demann e nou a pran en desizyon omoman apropriye.  Nenport ki desizyon ki nou pou pran nou oule asire ki i annan en fasilite ki pou deservi lazenes.

 

DEPUTY SPEAKER

Siplemanter.

 

HON ARISSOL

Mon siplemanter mon ti a kontan demann Minis pour sa sant ki ti ganny konstrir 2006   lavaler R50,000, mon ti a kontan demann Minis lekel ki ti sipoze responsab sa sant, sa vedir pou mentenir li, okip li e fer li marse e non pa vin en bus stop parey I ete ozordi. Dezyenmman depi sa sant ti ganny konstrir, konbyen aktivite ki’n materialize dan sa sant, swa atraver sa sant, anba gidans lekel sa letan e ki aktivite ki ti ganny fer laba.

 

MINISTER MERITON

Msye Deputy parey mon’n dir sa ti en shed ki nou ti bare, se pour sa rezon i pa ti kout nou en gran larzan.  I pa en sant konmtel me enn pti hall. Ou’n vwar grander ki i ete Onorab.  Depi ler sa travay in ganny fer, in annan en kantite aktivite ki’n pran plas anba diferan group zenn.  Se pour sa rezon ozordi e mazin byen ki Prezidan Larepiblik ti dir isi dan diskour leta lanasyon, nou bezwen ranforsi kapasite nou bann lorganizasyon non gouvernmantal e nou bann striktir volonter dan distrik pour nou kapab pran anmen bann enfrastriktir ki nou konstrir dan distrik.  Gouvernman i konstrir e nou nou bezwen rod sa volonte, rod sa bann dimoun ki doue, ki annan pasyon, ki annan letan, ki oule fer en diferans dan lavi  en lot, ki oule fer en diferans dan lavi kominote e donn zot training. Nou fek kontrer la finaliz en leadership training manual pou permet ki ler nou idantifye sa bann dimoun, train zot kimannyer pou zer landrwa, kimannyer pou zer larzan, kimannyer pou kapab mentenir bann aktivite, ki mannyer pou kapab organiz bann aktivite ki gouvernman pa tou keksoz i tonm lo son ledo me ki bann NGO avek bann mouvman sosyete sivil i kapab donn en koudmen pou konplemant zefor gouvernman pour nou kapab adres bann defi sosyal ki devan nou pou permet ki bann zenn atraver bann, taler nou’n koz lo bann sant lazenes I kapab enplik zot dan bann aktivite rekreasyonnel, edikasyonnel, counseling e permet ki nou bann zenn I sorti dan bann malez sosyal. Vwala lekel ki responsab e mon krwar ansanm dan kominote nou pa montre ledwa me nou travay ansanm, nou lager antoure, nou koste zepol ansanm, enkli ou osi dan DCC dan distrik, Msye, Madanm, dan  DCC dan distrik i annan bann – la la bann landrwa kot nou kapab koze. Manrmay mon krwar i devret annan isi, i devret annan laba, i annan detrwa zenn ki mon konnen, envit zot pour nou fer travay. La la ki mon vwar kimannyer nou pou kapab zer bann fasilite ki nou met dan distrik pou tou kominote servi.  Mersi Msye Deputy.

 

HON RAMKALAWAN

Mr Speaker eski Minis premyerman i realize ki poudir grander sa sant i bokou pli pti pti ki sa deskripsyon ki in donn nou ki poudir sa ki i pe apel en sant, en langar i aktyelman grander en bus stop e ki ou pa kapab organiz okenn aktivite, premyerman.

 

MR DEPUTY SPEAKER

Kestyon.

 

HON RAMKALAWAN

Dezyenmman eski Minis dan son planifikasyon dan son minister i ava fer sir ki alavenir letan zot pe kree, letan zot pe konstrir en sant pour bann zenn zot ava konstrir en keksoz apropriye e non  pa zis en bat latet avan en eleksyon.

 

MINISTER MERITON

Msye Deputy permet mwan demann Onorab, ou devret annan en mo serye avek Onorab Arissol, li ki’n nonm sant e mwan mon koriz li, mon’n dir li enn pti lespas, so ou bezwen deal avek li.

 

(Interruption)

 

DEPUTY SPEAKER

Order, order.

 

MINISTER MERITON

An 2006 nou’n vini pou fer serten amelyorasyon Onorab, byen koze i fer byen konpran, mal koze ki fer diskisyon. Mon’n vin isi pou eklersi keksoz annou get dan lavenir kimannyer nou pou fer. Dan nou planifikasyon nou toultan fer li apropriye konvenab e pran konsiderasyon demann e swe dimoun. Mersi Msye Deputy.

 

DEPUTY SPEAKER

Nou a remersi Minis, nou ava ekskiz li parmi nou ek son delegasyon.

 

Anvi lenportans sa PNQ ki I riske pa al an direk lo radio, nou’n deside pour nou pran li la e mon pe servi mon diskresyon anba Order 33(4) pour nou extend question time. E nou swet labyenveni Vis Prezidan e Lider Lopozisyon, ou PNQ.

 

HON RAMKALAWAN

Bonzour Vis Prezidan.  Mr Speaker eski Vis Prezidan ki responsab pour Finans i kapab dir avek Lasanble;

 

Premyerman; ki sitiasyon finansyel lakonpannyen Air Seychelles,

 

Dezyenmman; ki sipor finansyel eski sa lakonpannyen in gannyen sa dernyen 3 mwan avek gouvernman avek lezot sours,

 

Trwazyenmman; ki nouvo mezir  ladministrasyon finansyel ki’n ganny met anplas depi dernyen reorganizasyon sa lakonpannyen e

 

Katriyenmman; ki negosiasyon ki pe ganny fer avek okenn lezot  lakonpannyen aviasyon etranze pou aste bann par dan lakonpannyen Air Seychelles. Mersi bokou.

 

VP FAURE

Mersi Msye Deputy Speaker e mersi Onorab Lider Lopozisyon.  Sitiasyon finansyel Air Seychelles ozordi i kapab ganny dekrir koman en sitiasyon sever.   Nou dekrir li koman en sitiasyon sever parski parey zot okouran kalandriye finansyel Air Seychelles i komans apartir premye Avril e i fini lafen Mars son lannen answit.  Donk ler nou regard sitiasyon finansyel Air Seychelles depi Avril 2010 ziska Zanvye 2011, malgre ki bann kont pankor fini ganny odite, i bann sif finansyel provizwar, mon kapab enform nou Lasanble ki Air Seychelles deza in fer en pert a la valer 10 milyon ero ki ekivalan 170 milyon roupi.  An repons pour kestyon nimero 2, anvi sa sitiasyon, gouvernman atraver Minister Finans nou’n bezwen intervene.

Parey zot konnen an lannen 2009 lasanble nasyonal ti aprouv en bidze siplemanter, 30 milyon e ki Air Seychelles in demann Minister Finans an Out lannen pase pou fer ki sa 30 milyon i vin efektif. Donk Air Seychelles pe benefisye atraver son premye loan 30 milyon. An Desanm lannen pase gouvernman  in negosye on behalf Air Seychelles pour en loan 75 milyon roupi e term sa loan i en to lentere 4.5%, en grace period 6 mwan e repeyman sa loan i lo en peryod enn an.  E dernyen e trwazyenm loan I ekivalan 150 milyon roupi e son bann term i swivan;

To lentere 4.5%, son period gras i enn an, e repeyman sa loan i lo en period 5 an.  I vedir an total Air Seychelles pe benefisye avek 255 milyon roupi ekivalan 2% GDP Sesel.

 

An repons trwazyenm kestyon. Anvi sitiasyon Air Seychelles e anvi bann laranzman atraver bann fasilite loan ki Air Seychelles pe benefisye, gouvernman in apwent en nouvo board parey zot konnen e gouvernman in mandat sa nouvo board pour tou le semenn fer en revi lo zot sitiasyon finansyel e mon kapab dan mon kapasite koman Minis Finans dir mon satisfe avek travay ki sa nouvo board pe fer. Dezyenm travay ki zot annan se pou definir bann nouvo stratezi e gouvernman in demann sa board ki zot bezwen met anplas en stratezi ki a kapab retir Air Seychelles dan pozisyon ki i ete. Nou nou tre konfidan ki ozordi Air Seychelles, dan sa 891 travayer ki i annan i annan bann Seselwa tre konpetan, tre eksperyanse, profesyonnel ki zot leker i pour zot lorganizasyon e ki zot ava donn tou pou remet Air Seychelles lo en semen ki I ava en semen ki profitab pour sa lakonpannyen.

 

I pa kestyon ki gouvernman pe vann okenn par dan Air Seychelles.  Kestyon se ki dan sa sitiasyon finansyel ki Air Seychelles in trouv li, gouvernman in fer vini dan Sesel plizyer bann ekspert, enkli lakonpannyen rezyonnal Air Austral kot nou’n annan en diskisyon lo bann leksperyans ensidswit e as I speak ozordi Msye Deputy Speaker, i pa kestyon ki okenn par dan nou lakonpannyen Air Seychelles ki pou nou tou pe ganny vann. I swe gouvernman ki dan en fason kolektif nou ava trouv bann solisyon pour nou remet airline lo son semen.

 

Air Seychelles i annan en rol enportan pour nou devlopman tourism e Air Seychelles i ede kontribye dan lekonomi Sesel.  Dan sa mil set san, san swasann dis mil touris ki ti debarke lannen pase, 90 mil ti ganny anmennen isi Sesel par Air Seychelles. Sa vedir dan 4 mil touris ki isi par zour, lamwatye i isi akoz Air Seychelles. Donk Air Seychelles i annan en rol enportan, en rol stratezik pou lekonomi Sesel e Air Seychelles nou bezwen fer tou pou fer sir ki an sa ki konsern son plan finansyel i enportan ki i reste touzour viable. E se sa ki sa nouvo tim avek sipor Minister Finans pe travay dir pour ki nou kapab atenn.  Mersi Msye Deputy Speaker.

 

HON RAMKALAWAN

Mersi Mr Deputy.  Mr Deputy vi ki Air Seychelles i konsern nou tou, eski Minis i kapab dir avek nou spesyalman ki in dekrir  sitiasyon Air Seychelles koman sever, eski Minis I kapab dir avek nou dan sa nouvo plan aktyel kot nou trouv Emirates pe ogmant son flight par 14, Condor par 2, Qatar ziska 7, kimannyer eski pti Air Seychelles pou kapab kontinnyen fer konpetisyon avek sa bann gran airlines pour ki i kapab reste soutenab e i kapab kontinyen grandi e dan sa konteks, si Minis ti ava kapab dir avek nou be si dan sitiasyon aktyel Air Seycelles pe fer sa kantite pert, e I bezwen pran tou sa kantite loans, alor kote eski Air Seychelles in go wrong pour li dan sa sitiasyon.

 

Dezyenmman avek sa sitiasyon sever ki Minis  in dekrir e avek sa plan ki i pe mansyonnen, eski Minis i kapab dan sa Lasanble donn okenn garanti sa preski 900 travayer Seselwa ki pou dir dan sa prozeksyon ki zot pe fer Air Seychelles pou nobou sirviv e ki sa bann travayer pou annan garanti pour zot lanplwa.  Mersi bokou.

 

VP FAURE

Msye Deputy Speaker e Lonorab Lider Lopozisyon, si gouvernman atraver Minister Finans pa ti entervenir, ki ti pou arive?  Lefe ki gouvernman atraver Minister Finans in entervenir, i vedir ki ofon in annan 2 keksoz, in annan lentere nou airline e dezyenmman in annan lentere bann travayer ki travay dan sa airline. Me parey zot konnen bann external factors i or kontrol e nouvo board Air Seychelles e gouvernman pe fer tou pou kapab prezerv lanplwa bann travayer ki travay dan Air Seychelles.

 

Lot pwen ki mon vwar li i en pwen enportan, enportan pour Lasanble, i enportan pou piblik Seselwa, nou apel sa the load factor. Sa vedir ki load factor Air Seychelles sorti Lerop pou vin Sesel?  Eski i 50%, eski i 60%? Non I pa ni 50%, i pa ni 60%, load factor Air Seychelles sorti lerop i 88% malgre nou annan Emirates, Qatar. Ki i vedir?  E se sa lespwar pou nou ek Air Seychelles.  I vedir ki touris ki sorti Lerop i prefere anbark Air Seychelles lannwit, dormi lo avyon e enn erdtan avan avyon i land I sanz son resanz pour li kapab debarke isi Sesel. Ki nou pe dir?  Nou pe dir ki sa la ou pa kapab compete avek sa ki nou annan, pa kapab compete ek sa akoz polisi Emirates se ki ou bezwen pas atraver Dubai pour vin Sesel. E vwala kwa ki sa nouvo board i bezwen pe fer. I annan the product ki bezwen ganny envestir, nou bezwen envestir dan product me selman ki nou pe dir, the market is there, 88% load factor, 88%.

Now kwa ki bezwen ganny fer?  Sa ki enportan, sa ki bezwen ganny fer se bann kontra; bann kontra ki ozordi nou pe swiv, bann kontra i bezwen ganny renegosye.  E sa bann premye mezir ki nouvo board ek tim  pe al adrese. Nou fer sa, nou annan laklerte, nou fer lezot keksoz, nou konfidan nou a sorti dan sa sitiasyon ki nou ladan. Sa vedir lespwar se the market. The market is there.

 

Now parey zot konnen, what is the core business?  Akoz nou ti kree Air Seychelles 25 an pase?  What is the core business e ozordi kestyon ki bann policy makers, nou koman policy maker nou demann nou lekor se what is the core business of Air Seychelles e ki son rol stratezik?  Now dan en moman evolisyon Air Seychelles, Air Seychelles ti deside fer bann sa ki nou apel bann chartered flight. Paregzanp ozordi lo Falklands, Air Seychelles osi i al laba, Air Seychelles ti pe perdi larzan. Me sa ki mon pe dir se ki nouvo tim in renegosye avek sa bann dimoun semenn pase e zot in conclude lo en nouvo lagreman pou fer sir ki Sesel i arete perdi larzan.

 

Donk mon krwar I enportan ki nou, dan en fason tre kalm Msye Deputy Speaker e zot vwar ki mannyer travay pe ganny fer kot ou perdi larzan ou antre, si ou kontinyen perdi ou sorti, ou pa reste, ou negosye e ou fer sir ki ou aret perdi. Vwala manda ki gouvernman in donn sa nouvo tim pou kapab fer. E nou ekspekte ki sa nouvo tim, sa nouvo board nou tou nou donn zot sa sipor pou kapab fer sa bann travay. E vwala pozisyon kot nou ete anlinny avek bann kestyon tre konkret ki Lider Lopozisyon in met devan mwan. Mersi.

 

DEPUTY SPEAKER

Nou a pran enn de kestyon Onorab Potter.

 

HON POTTER

Mr Deputy Speaker pou apez enn pti pe bann spekilasyon enneseser ki kapab devlope oubyen eksplwate dan sa sitiasyon, eski Vis Prezidan ti kapab eksplik nou Lasanble bann lakoz prensipal ki’n anmenn Air Seychelles dan sa bann difikilte ki i trouv li ozordi. Dezyenmman anvi ki lannen pase gouvernman ti conduct en strategic assessment lo sa airline, eski sa assessment in fini ganny fer? Si wi, eski I kapab partaz ennpti pe bann findings sa assessment e trwazyenmman, finalman ki lespwar ki bann nouvo mezir ki gouvernman atraver board pou pran pou kapab donn pep Seselwa e sa 850 travayer Seselwa ki travay ek Air Seychelles ki Air Seychelles pou reste e Air Seychelles pou sorti dan sa sitiasyon ki i ladan dan en dele letan rezonnab. Mersi bokou.

 

VP FAURE

Msye Deputy Speaker, bann sif ki mon’n anmenn avek mwan pour ki nou kapab pli byen konpran sa sitiasyon se ki ler lannen finansyel Air Seychelles ti terminen an Mars 2009, Air Seychelles ti fer en pert 5.3 milyon ero.   Me an Mars 2010 Air Seychelles ti fer enn pti profi 708 mil ero.  Ki i vedir? I vedir ki i annan plizyer fakter ki board, lanaliz ki board in fer e in soumet devan Minister Finans. Me apard bann fakter – enn pti fakter petet i exchange rate, en pti fakter, apard fakter fuel, me enn bann fakter ki sorti kler lo lanaliz finansyel ki devan lotorite gouvernman, labaz bann losses ki Air Seychelles in gannyen se ki kontra ki ziska ozordi pe ganny enplimante, pa ti pe ed nou pou kapab fer profi e se pour sela ki enn bann premye mezir se nou renegosye bann kontra e se sa bann mezir ki pe ganny pran e demars pe ganny fer pou kapab renegosye.

 

Dezyenmman parey zot konnen I annan plizyer assessment ki’n ganny fer lo Air Seychelles, i annan bann rapor ki’n ganny soumet devan Lasanble nasyonal. Tou dernyenman i annan en strategic assessment ki’n ganny fer lo nou Airline, lo Air Seychelles pou montre whether Air Seychelles i annan en rol stratezik. Donk sa bann rapor i bann rapor ki korek, i montre ki wi, Air Seychelles i annan en gro rol dan lekonomi e dan devlopman nou sekter tourism, i annan en rol enportan.

 

E trwazyenmman mon krwar i enportan pour nou konnen ki bann desizyon resan ki gouvernman in pran i vize fondamantalman dan prezervasyon lanplwa pou nou bann travayer e dezyenmman son rol koman kontribiter dan lekonomi Sesel. I bann moman difisil ki mon krwar nou bezwen apresye e dan sa bann moman difisil latet poze, tim pe fer zot travay avek bi ki Air Seychelles i sorti dan sa sitiasyon e ki nou pran en semen kot nou lakonpannyen i profitab e i ava annan mwayen pou kapab envestir dan bann prodwir e ki kapab kontinyen desarz sa rol stratezik ki leta Sesel in donn li. Mersi.

 

HON HENRIE

Mon apresye ki problenm Air Seychelles pe ganny diskite ouvertman finalman. Mon ti a kontan demann Vis Prezidan lo 2 areas ki in koz lo la, dabor lo size konkra. I enportan nou ganny leklersisman lo lekel sa bann kontra, konbyen ki Air Seychelles ti annan e ki kalite pert nou’n fer. Sa i lo kestyon kontra. E dezyenmman lo size pert Air Seychelles, son pert 170 milyon ki Vis Prezidan in mansyonnen, ki bann mezir enpe imedya board ek sa lakonpannyen pou pran pou sey koup enpe son bann kalite depans ki i fer paregzanp vizavi bann etranze ki travay dan sa lakonpannyen ek sa bann perks ki zot pe gannyen paregzanp menm mon aprann i  annan ki reste Eden Island peye par lakonpannyen Air Seychelles. Mersi.

 

 

 

VP FAURE

Msye Deputy si size Air Seychelles pe ganny diskite la set en bon landrwa kot i ganny diskite.  Mon apresye sa en bon landrwa me parey zot konnen nou’n etablir bann prosedir avan ki gouvernman i sinny okenn approval pou kapab annan en guarantee i bezwen al devan national komite ki desid lo nivo borrowing, Minis Finans i bezwen sinny bann SI e ki mon ekspekte bann SI in vin devan Lasanble ouswa pre pou vin kot zot. Tou bann prosedir in ganny respekte dan sa demars. Me selman i en loportinite pour nou kapab donn plis lenformasyon.

 

I annan 2 size la, i annan bann size operasyonnel, i annan en nouvo management, sa vedir napa zis board ki’n sanze ou annan en nouvo management e sa nouvo management li i bezwen adres size kote bezwen koupe, kote ki ou bezwen tenir anterm bann depans e zot napa okenn manda pour zot koup oubyen napa okenn manda pour fer okenn redundancy, zot napa manda pour fer sa. Zot annan en manda pour dir, i kler sa. Si i annan etranze dan Air Seychelles kot nou konnen i annan Seselwa ki kapab fer sa bann travay, Seselwa i bezwen antre dan sa bann pos.  Sa zot annan en manda kler me nou koman gouvernman nou pa pe rush, nou anvi ki management i fer son travay e fer li dan en fason ki byen. E dernyen kestyon Lonorab Henrie se ki i responsabilite board pou fer en assessment detaye lo konteni bann kontra e sa pe ganny fer avek bann legal experts.

Me lenformasyon ki mon pe dir ou la ozordi se ki lo larout Sid Afrik, Air Seychelles i fer larzan. Lo larout Moris, Air Seychelles i fer larzan, lo larout Sengapour/Lenn nou fer en pti pert larzan. Lo larout lerop nou perdi larzan. E lo Falklands nou ti pe perdi me la nou’n pran bann mezir pou nou donn li top priority, negosye fer bann expert legal vini, nou pe sort out. Donk nou pe travay depre avek zot pour nou kapab sorti dan sa bann sitiasyon.

 

HON FERRARI

Msye Speaker mon ti a kontan avek respe pour sa nouvo board ki’n ganny apwente e avek tou sipor pour Air Seychelles ki nou kapab donnen ki Minis i dir avek nou si management Air Seychelles dan sa detrwa dernyen lannen, sirtou sa dernyen lannen finansyel, in fer sitan move desizyon lo kontra, serten move desizyon management akoz eski Msye Savy ti ganny re-apwente koman Chairman, mon krwar an Zanvye? E akoz eski Msye Maurice Lalanne in ganny apwente Chairman e CEO dan menm sitiasyon ki ti fer nou ariv ladan kot napa distenksyon ant CEO avek Chairman of the Board. Eski nou pa pe retourn ankor dan menm lanpayaz ki pou fer nou koul ankor enpe pli vit.

 

E dezyenmman eski Minis i kapab dir avek sa Lasanble si en size sitan enportan konmsa i pa ti krwar i ti’n devret kanmenm enform swa komite finans e pa esper Lider Lopozisyon e en ta keksoz pase dan bann zournal e en ta lenkyetid kot bann travayer pour li kapab vin fer sa.  Eski nou kapab gannyen en gouvernman enpe pli proaktiv e ki sa management ki’n ganny apwente pou 3 mwan ki zis apre eleksyon i pou debarke li sa management. Dir nou ki bann desizyon terib pa pe vin zis apre eleksyon, dir nou silvouple Minis ki zot pa’n met sa zis 3 mwan pour ki apre, parey forex, devaliasyon pou dir nou zis apre eleksyon. Mersi.

 

VP FAURE

Lonorab ou konnen mon ti a kontan donn garanti pep Seselwa e osi bann travayer Seselwa, ou konnen premyerman lefe ki mon pe adres Lasanble Nasyonal mon anvi dir lepep Seselwa pou fer son swa li an Me. Annou ganny li kler nou I pou fer son swa me sa ki mon kapab dir ozordi as I speak now, apre Me Air Seychelles pou kontinyen reste en top priority pou gouvernman. E lefe ki se Onorab Ferrari ki pe demann mwan se en gouvernman Lepep, pour Lepep e par Lepep.   Now en gouvernman Lepep, Pour Lepep e par Lepep i pa kapab zis apre eleksyon dir be nou pou fer lotreman. Mon krwar sa i enportan ki nou konpran.  E anmenmtan mon krwar Lonorab in lev lezot pwen ki enportan pou adrese. Ou konnen ler i annan bann sitiasyon kritik koumsa la, napa letan pou al fer meeting parti meeting, ek meeting parti meeting. Dan sa bann moman kritik kot Lasanble li i lo recess, pa bliye an Desanm Lasanble i an recess, nou nou bezwen travay over Christmas nou..

 

(Interruption)

 

..non, non nou pa pour disturb, nou bezwen respekte bann Lonorab. Nou nou bezwen nou fer nou louvraz, fer nou travay me selman nou konnen prosedir. Donk nou bezwen antre fer le neseser travay, nou pou kontinyen travay e mon krwar sa I lalinny ki’n ganny pran.  Lot kestyon se apwentman Msye Maurice Loustau Lalanne, set en lapwentman tanporer mon repete. E avan sa apwentman in ganny fer par Prezidan se en assessment leta kot nou ete, nou’n fer avek Prezidan, nou santi li nou devwar, Minis ki responsab pou transport, Minis Morgan e Minis Finans pou nou kapab eksplik leta transpor e leta finansyel. E bann keksoz ki imedyatman devan Air Seychelles ek gouvernman se negosiasyon e bann negosiasyon i bezwen ganny fer par en tim ki annan leksperyans, ki konpran bann dosye bilateral e sa Msye ti ennfwa en PS dan transport, in ede negosye bann bilateral e si nou annan Falklands agreement i an rezilta en bilateral ki nou annan avek gouvernman Angle. Donk nou pa’n anvi perd letan la, nou’n bezwen rod bann dimoun met zot ansanm, se pour sela ki ou annan PS Finans ki I en direkter lo board me osi en Vice Chairperson lo board, donk nou bezwen met en tim pou kapab travay lo bann size irzan devan gouvernman. Se pour sela ki Msye Maurice  in ganny mete la e ki nou pa’n apwent en CEO. Non nou pa’n apwent en CEO nou. Ki nou annan? Nou annan en Deputy CEO e mon kapab dir zot la demars pe ganny fer par tou dimoun konsernen, pou rod sa CEO ideal pour sa staz ki Air Seychelles i ladan e direksyon ki Air Seychelles i bezwen antre ladan.

 

MR DEPUTY SPEAKER

Nou a pran 2 dernyen kestyon, Lonorab Pool apre Lonorab Prea.

 

HON ANDRE POOL

Msye Deputy Speaker mersi.  Mon ti kontan demann Vis Prezidan premyerman si sa kriz ekonomik mondyal ki nou ti traverse in kontribye oubyen in annan serten lefe pou anmenn sa bann problenm ki Air Seychelles in vwar li ladan tou resaman e dezyenmman eski dan en lavenir pros gouvernman oubyen atraver Minister Finans pou permet komite Finans e kont piblik dan nou Lasanble ganny sa loportinite pou konnen ki’n pase dan Air Seychelles e satisfer nou lekor ki bon desizyon in ganny pran pou remet Air Seychelles dan en nouvo sitiasyon. Mersi.

 

VP FAURE

Msye Deputy, Lonorab Pool ennfwa ki tou bann travay i ganny fer par board, par management e in annan sa ki nou apel validation zot travay nou ava fer li parey nou abitye fer pour nou kapab refer to komite. Me parey mon pe dir lo premye kestyon set en kestyon ki annan plizyer fakter. E vreman lanvironnman – nou pe viv ozordi dan en lanvironnman kot bann fakter ekster i pa dan nou faver e ant 2009, 2008 onwards sitiasyon osi pa’n amelyore. Lemonn i ankor dan en resesyon annou pa bliye. I vedir i annan plizyer bann fakter parey mon’n eksplike.

 

HON NICHOLAS PREA

Mon kestyon pou Vis Prezidan i al koumsa; anvi ki Air Seychelles ti pe perdi a pe pre anviron en milyon ero par mwan e levidans ti la e Minister Finans ti annan sa mwayen pou rantre e menm vin demann laprouvasyon Lasanble pou ede me vi atraver febles the old board, sa pa’n ganny fer, petet pa’n ganny raporte a latansyon Minister Finans, ki rezon petet, gouvernman in pran sa kantite letan pou entervenir la pou anpes problenm vin sever parey Vis Prezidan in dir. Mon anvi osi demann Vis Prezidan, anvi ki depi plis ki 25 an pase tou ground handling ti pe ganny fer par sa lepok ASL, Aviation Seychelles Limited even before Air Seychelles ti komans annan en fleet avyon e sa ti pe ganny fer tre byen, antyerman par en lekip Seselwa, kwa ki ozordi in arive 25 an dan listwar Air Seychelles ki i annan 4 expat ki pe ans avek bann gro package, ki pe ansarz sa seksyon ground handling ki travayer Seselwa ti pe fer e ground handling i osi konpri handle tou bann lezot foreign airlines, Emirates, Qatar, Condor e Cargo.

 

E osi petet Vis Prezidan i kapab eklersi nou si dan bann deroulman dan management Air Seychelles in annan konfli lentere, Onorab Pool in mansyonn kekfwa FPAC i devret rantre ladan, konfli lentere, frod e ki lotorite pe fer. Mersi.

 

VP FAURE

Msye Deputy ground handling i fer larzan, i pa perdi larzan li, i fer larzan. Now si management i vwar ki i annan bann etranze ki la e ki management i krwar ki i annan Seselwa ki annan konpetans e lekspertiz pou fer travay ki sa bann etranze pe fer nou sanze. Napa rezon pou kapab kontinyen, nou lapros i kler lo la. E dan sa bann zafer nou pa negosye.  Osi lontan ki i annan en Seselwa ki annan lekspertiz e konpetans neseser, sa Seselwa i bezwen la ganny anploye pou fer sa bann travay.  Sa i lalinny ki nou pran. Now dezyenmman non, nou pa’n trenn lipye pou pran en desizyon, mon krwar ki parey zot konnen depi 2009, sa 30 milyon ti ganny aprouve e basically nou ti met li dan nou kont Central Bank e nou ti dir avek lotorite Air Seychelles in fini aprouve, ler ou bezwen enform nou. Donk lotorite Air Seychelles in ganny kontak avek nou e sa loan in vin efektif an Out 2010. Me antretan management ek board in kontinyen fer zot travay e nou nou’n osi an kontak avek zot e mon krwar sitiasyon in agrav sitan vit kot Oktob, Novanm diskisyon in komanse pou kapab regarde e ki desizyon pour kapab donn sa 75 milyon ti ganny fer an Desanm epi an Zanvye. Donk mon krwar in annan en reaksyon ase vit delapar gouvernman lo sa konpannyen.  Now si i annan kestyon conflict of interest ensidswit, nou’n demann nouvo board pou fer son travay e fer rekomandasyon a’n ekrir kot Minister Finans. Mersi.

 

MR DEPUTY SPEAKER

Nou ava adjourn nou tournen dan 15 minit pou Vis Prezidan fer son statement.

(Break)

MR DEPUTY SPEAKER

Nou ava kontinyen avek nou sesyon travay. Lot item lo nou order paper se statement, nou ava envit Vis Prezidan pou fer son prezantasyon.

 

VP FAURE

Mr Deputy Speaker, Onorab Manm Lasanble Nasyonal, brans egzekitif i annan plezir prezant avek nou Lasanble Nasyonal nouvo lord servis piblik pour zot lenformasyon e latansyon.

 

Lord servis piblik parey nou konnen PSO i an egzistans depi 1985, son dezyenm versyon ti ganny revize an 1996 pandan sa dernyen 15an. Parey nou tou nou konstate lekspektasyon nou sitwayen in kontinyen ogmante. Sanzman ki enkli dan teknolozi, sanzman ekonomik, politik ek bann striktir sosyal dan nou pei in osi akselere a en nivo remarkab. Parfwa menm in depas nou bann lekspektasyon. Se pour sa rezon alor ki i annan sa nesesite pour nou reviz lord servis piblik pou en trwazyenm fwa.

 

Lord servis piblik i en dokiman ki sanpyonn prensip bon gouvernans tel ki la transparans, efikasite, entegrite, merit, rann kont, ek lonnekte.

 

Plizyer lorganizasyon dan gouvernman ti ganny konsilte e enplike letan travay revizyon ti ganny fer. Aprezan ki nouvo lord in antre an fors, tou lorganizasyon gouvernman avek serten lorganizasyon piblik ki resaman in ganny rekalifye, klasifye, zot bezwen swiv lord servis piblik pou mentenir kondisyon travay, tretman egal travayer dan servis piblik. Lord servis piblik i en dokiman amikal ki lezot organ gouvernman ek lorganizasyon sekter piblik tel ki bann paraetatik i kapab servi a zot diskresyon.

 

Mr Deputy Speaker PSO i baze lo lalwa, lo regilasyon, lo polisi e direktiv ki ganny met an plas par gouvernman. Sa nouvo versyon i annan 10 sapit ki kouver en levantay polisi lo term e kondisyon servis, bann benefis, reminerasyon, devlopman, kod kondwit, etik, disiplin bann zofisye piblik. I osi kouver striktir e lorganizasyon gouvernman. Setadir brans egzekitif e striktir saler eksetera.

 

Dan sa nouvo versyon in osi anmenn plizyer sanzman dan sa bann domenn swivan; Par egzanp drwa travayer pou annan rekour avek revi zidisyer, leksplikasyon lo striktir egzekitif, bann fonksyon bann Minis, klasifikasyon bann lorganizasyon paraetatik, rol board bann lorganizasyon piblik, bann lobligasyon pou tou zofisye piblik sinny secrets declaration, lo sa ki nou apel plis clearance, valer servis piblik ki tou sef egzekitif i bezwen swiv, donn pouvwar bann sef egzekitif parey nou dir delegation authority, odit administratif bann lorganizasyon piblik, polisi lo lanplwa, kad servis piblik, rol komisyon servis piblik, polisi travayer etranze dan gouvernman, egalite de sans pou travayer fanm koman zonm sa ki nou apel gender equality, revizyon ant 25-40% lo tou bann allowance ki ranbousab, e osi devlopman resours imen.

 

An plis ki sa nou osi annan sa ki nou apel en nouvo procedures manual ki donn gidans ki manyer bann diferan prose tel ki rekritman, promosyon, transfer i devret ganny antreprann. Dan en milye sosyal kot gouvernman i angaze pou anmenn sanzman e osi fer bann sanzman sosyal, servis piblik i inevitableman fer fas avek en defi ki pous sa servis pou oblize adopte bann teknik e etik en servis piblik ki tre modern ki pou fer li posib pou realiz byennet tou nou sitwayen e anmenn sa legalite sosyal. Servis piblik i annan en rol enportan pou zwe dan la sosyete, servis piblik i egziste pou promouvwar e enplimant polisi e progranm gouvernman, tou biznes gouvernman i bezwen ganny antreprann avek efikasite, entegrite, transparans e lonnekte pourki tou anplwaye servis piblik i kapab antreprann zot rol avek sikse, zot bezwen krwar dan sa bann prensip e valer ki mon’n mansyonnen. Anba direksyon Prezidan La Repiblik ki osi sef brans egzekitif e osi anba gidans bann Minis, anplwayer servis piblik i transmet sa bann polisi dan desizyon ki afekte tou kous la sosyete. Alor i pa sifizan pou zis azir, zot bezwen azir avek konviksyon. Sa dedikasyon i devret aplik a tou nivo.

 

Anplwaye servis piblik i devret azir dan en fason onnet e protez lentere piblik a tou pri kont bann ki pe rod zot gen personnel par egzanp, retar, lendiferans e gaspiyaz. Napa plas dan sa nouvo servis piblik ki nou pe kontinyen devlope. Se pour sa rezon ki gouvernman pe met an plas en sistenm administratif, ki tou adminitrater i bezwen swiv. Sa sistenm administratif i regle par public service orders PSO, ki’n ganny revize pour anmenn li azour avek bann sanzman ki’n arive lo nivo servis piblik lokal osi byen entegre bann nouvo devlopman lo nivo enternasyonal. La nou pe koz lo bann international best practice.

 

Alor i responsabilite e devwar sak sef egzekitif pou fer sir ki lord servis piblik i ganny byen aplike e ki tou anplwaye i kapab ganny akse fasilman avek sa dokiman. Lord servis piblik i devret ganny vwar koman en gid pou ranforsi la transparans e pou travay mars pli byen. I pa devret zanmen ganny servi koman en zouti pou met retar an bann proze administrativ. I en dokiman vivan ki reste ouver pou sanzman kot i neseser.

 

Alor Mr Deputy Speaker lo lapar brans egzekitif mon annan gran plezir pou mwan prezant 3 kopi sa trwazyenm PSO. Enn pou Speaker Lasanble Nasyonal, dezyenm pou Leader Government Business, trwazyenm pou Lider Lopozisyon. Mersi

 

MR DEPUTY SPEAKER

Nou pa pe ekspekte bokou deba me nou a pran enn de kestyon avek klarifikasyon. Mon vwar de lanmen anler. Onorab Pool.

 

HON ANDRE POOL

Kestyon pou Vis Prezidan i straight forward. Mon ti a kontan demann Vis Prezidan si kot i annan en ka en travayer dan servis piblik, dan sa lespri leve E debourye in demann permisyon avek son lorganizasyon pour li kapab antreprann en biznes prive apre son ler travay, an deor son ler travay, e son lorganizasyon i refiz li sa permisyon. Ki rekour sa travayer i annan pour son ka kapab ganny konsiderasyon neseser pour li kapab leve debourye parey Prezidan i dir. Mersi.

 

VP FAURE

Dan sa ka spesifik sa endividi i devret fer en appeal kot PS ki ansarz ladministrasyon e sa se Mademoiselle Jessie Esparon.

 

HON ANTONY DERJACQUES

Bonzour tou dimoun. Mr Deputy eski mon kapab demann Vis Prezidan anvi eski i ava aksepte ki malgre ki Vis Prezidan in dir ki sa PSO son bann amannman i anlinny avek bann devlopman i pa tro neseserman up to date akoz nou pe koz lo dRwa e sa i ankor reste koman administrative guidelines parey Minis in dir ek bann polisi. E parey Minis in dir i subject to judicial review be I pa neseserman bann drwa legal ki nou pe koz lo la.

 

E Minis eski i kapab klarifye akoz napa bann kondisyon spesifik pour bann apwentman par egzanp pour bann CEO’s bann kondisyon kler kot en dimoun ler i annan en vacancy i pe apply e anba ki kondisyon ki en dimoun i ganny apwente CEO’s ki Minis i a dakor avek mwan ki i annan de ler dan en sel lorganizasyon ou vwar 3 CEOs dan 4 mwan ki vini, e nou’n fek koz lo enn Mr Lalanne sorti enn, vin Anbasader, la in vin Chairman Air Seychelles.

 

E finalman eski Vis Prezidan i kapab dir nou eski i kler prezan avek sa mouvman dan sa bann PSO orders ki sa nosyon e sa administrasyon ki nou apel security clearance pou ganny e pe ganny resorti, tire dan lanplwa vizavi public service dan Sesel. Mersi.

 

VP FAURE

Non, sa ki mon kapab dir ek Lasanble, ozordi sa ki nou annan an fors se en police clearance, e dan PSO ler zot ava vwar lobzektif prensipal police clearance ou regard lentegrite sa dimoun ki ou pe anploye, ou regard son karakter apre regard son conduct. Ou pa regard – mon pa konnen ki nou regarde be nou bezwen regard sa.

 

Now nou kapab dir ki i annan en kantite pour nou improve dan nou prop ladministrasyon. E sa resaman in en size diskisyon dan gouvernman e i annan serten lorganizasyon osi ki’n met devan nou ki pli ou pou anretar pou ou kapab ganny en larepons ou perdi sa talan akoz ozordi dimoun pa pou esper ou – ou konpran mwan. Donk I enportan ki nou nou bezwen pli vit dan larepons, e basically nou pe dir fodre i annan en time frame of two weeks kot dimoun i ganny en larepons. Nou pa kapab fer dimoun espere, espere, espere. In annan enpe weakness sa mon kapab avoue.

 

I annan en nesesite re-edik nou lekor lo fonksyon plis clearance, se pour se la ki komansman sa lannen lotorite ladministrasyon piblik in fer plizyer workshop avek nou bann HR dan Minister pour zot kapab konpran purpose sa prosedir ki egziste. Mon krwar osi dan serten landrwa in annan osi en mank kominikasyon, serten landrwa osi petet in mank lafransiz. Mon krwar si nou met tou sa bann zafer nou ava minimiz konplent ki egziste. Me lobzektif plis clearance parey mon pe dir ou regard sa post, dimoun ki apply pour sa post, ou regard zot kondwit, ou regard zot karakter, ou regard zot entegrite e dimoun i compete e lorganizasyon i bezwen take the best talent baze lo konpetans pou fer lorganizasyon marse.

 

Lot size se rekour an deor bann prose gouvernman, mon krwar sa i en bon keksoz. Parey zot konnen an 1985 nou ti napa PSAB, PSAB was established apre 1993 nou annan dimoun ki kapab al laba e dimoun osi i kapab al pli lwen.

 

Donk mon krwar sa set en devlopman ki nou nou anvi met dan servis piblik kot dimoun i kapab annan rekour anba lalwa me ki nou bezwen respekte bann prosedir PSO e lalwa lanplwa dan pei. Mersi.

 

HON MARIE-ANTOINETTE ROSE

Mr Deputy tou dabor les mwan felisit departman ladministrasyon piblik, i tonm direkteman anba port folio Vis Prezidan pour sa travay ki zot in fer.

 

Minis mon ti a kontan demann ou eski ou pe revwar departman ladministrasyon piblik osi pou fer sir ki i annan kapasite pour delivre lo bann egzizans ki i annan dan sa nouvo PSO. Parey ou’n fer resorti i annan bann nouvo legzizans, nouvo legzizans ki departman ladministrasyon piblik i met lo diferan departman, lo diferan Minister me i en pti departman dan limenm ki i bezwen dil avek tou bann travayer gouvernman.

 

So eski ou Minister pe revwar departman ladministrasyon piblik pou fer sir i annan sa kapasite pou delivre. Mersi.

 

VP FAURE

Non sa set en travay ki’n ganny fer, i annan apepre detrwa lannen ki i annan bann travay ki pe ganny fer par departman ladministrasyon piblik. Zot in fer en evaliasyon lo bann pwen for ki zot annan, bann febles ki zot bezwen improve, kritik ki lezot lorganizasyon in annan lo departman, serten moman osi in annan bann move persepsyon e mon krwar sa nouvo kad kot nou pe ganny sans edik bann dimoun i repozisyonn departman pour li kapab fer son bann travay e osi rod bann dimoun ki annan sa lekspertiz e konpetans pou fer lezot travay stratezik pou improve lo nivo makro performans ki ladministrasyon piblik i bezwen annan. Ozordi defayans ki nou annan dan bann Minister ek bann epartman se ki nou annan sa ki nou apel en aging HR. Dezyenm, nou’n osi perdi bann bon HR avek devlopman ki’n annan dan sekter prive.

 

Se pour se la ki ozordi nou’n repozisyonn SIM pour li osi zwe sa rol pour li kapab upgrade e train bann zenn ki pe monte lo nivo bann middle management.

 

Trwazyenman avek IT nou bann dimoun i bezwen pli kapab entegre IT dan bann prose pou fer sir ki nou kapab deliver en meyer servis piblik pour Sesel.

 

Wi, departman i aware e wi departman in pran bann mezir pou kapab fer en travay ki pli byen pourki an zeneral gouvernman across bann Minister ek departman nou vreman a la oter lekspektasyon nou popilasyon. Mersi.

HON WAVEL RAMKALAWAN

Mr Speaker vi ki Minis i konn byen ki enn bann prensip ki SNP i debout for lo la se kimannyer pour nou tir politik dan Civil Service. Eski Minis i kapab dir avek nou dan sa PSO, ki bann provizyon ki zot in fer pou ki en travayer gouvernman parey en Ladministrater Distrikt, parey bann lezot zofisye zot pa ganny drwa anmenn okenn senbol politik dan zot landrwa travay e ki zot pa ganny drwa osi fer okenn politik dan zot travay e alors ki mezir disipliner ki’n ganny pran pour ki sa i arete.

 

Dezyenmman lo kote lenformasyon ek konfidansyalite ki mezir ki annan dan bann PSO, parski mon’n fek ganny en kopi la mon pankor ganny sans fouy ladan, ki bann mezir ki annan pou asire ki poudir lenformasyon ki sipoze dan servis piblik par egzanp, lalis dimoun ki’n fer laplikasyon pour en lakaz, apre sa, en lot legzanp, letan en manm piblik i ekrir Prezidan antan ki Sef Egzekitiv e alors Sef PSO, pour ki sa bann let e sa bann lenformasyon se pa bann politisyen ki dan parti ki opouvwar ki pe mars avek e pe dir piblik lekel ki sipoze ganny en lakaz, e lo lot kote, ki sa let ki sa manm piblik in ekrir Sef Egzekitiv ki sipoze ansarz sa PSO i pa dan lanmen bann politisyen ordiner ki zot aprezan zot pe servi sa pour zot al fer politik. Ki bann mezir ki’n ganny pran dan sa nouvo PSO pou adres sa bann tel size. Mersi bokou.

 

VP FAURE

Mon welcome sa kestyon, en kestyon tre enportan. Larepons se compliance. Si nou tou nou konn lareg ek standar e nou comply avek lareg ek standar nou pa pour annan bann komanter e kestyon ki Lider Lopozisyon in met devan nou. Sa i enn. Paregzanp nou annan en sirkiler ki’n antre an fors depi 1994, i dir ki nou pa annan drwa anmenn okenn senbol partisan ni dan lekol, ni dan travay. Menm mwan mon pa kapab anmenn en senbol dan travay ensidswit.  I en lareg, i en sirkiler anfors.  Ou bezwen respekte, tou le 2 kote, ki se swa parti Msye Boulle, mon pa konnen oubyn en lot parti ki anvi vini i pa kapab konmsi defy sa bann basic rule.  The moment ki nou fer sa, nou menm nou nou  enkonsyaman pe kontribye pour sa sitiasyon. Nou nou dir silvouple pran responsabilite e konpan. E ler ou ganny dir, ou pa kapab dir be –

 

(Interruption)

 

..non, non i annan en moman kot dimoun i fer politik dan sa pei, e moman pou fer politik dan sa pei pe vini – ou konnen moman ler pou fer politik i vini, sanmenm sa i annan en moman kan ou fer politik e i donn ou 18 zour pou fer tou ta tapaz ki ou anvi fer. Be ler ou fini, nou zwe nou rol, nou fer nou travay. E sa nou fer li koumsa, napa problenm sa.  Pa pour annan okenn problenm.

 

Dezyenmman i pa korek ki okenn lalis gouvernman i sanz lanmen.

 

(Interruption)

 

MR DEPUTY SPEAKER

Order, order.

VP FAURE

Non zanmen ou pou ganny en lalis sorti kot mwan Onorab. Ou pa pour gannyen. Ou pa kapab annan en lalis, ou pa annan drwa fer sa.  Si nou anvi gouvernman mars drwat, si nou anvi tir politik dan travay nou bezwen konn bann boundaries.  Prezan nou anvi annan lenformasyon lo housing, politisyen i vini i demann lenformasyon lo housing, i vin la.

 

(Interruption)

MR DEPUTY SPEAKER

Order, order.

 

VP FAURE

Mwan mon pe dir zot bann keksoz mannyer i devret ete e nou tou nou bezwen rol pou fer sa bann zafer marse. Konfidansyalite; nou bezwen respekte konfidansyalite, konfidansyalite kliyan ki vin kot nou, konfidansyalite lo sa ki sa kliyan in dir nou ki nou pa kapab repet ni avek sa ki reste dan Lakour kot nou oubyen sa parti ki nou siporte, oubyen pour nou kapab anvoy kot en zournal pou repete, mon krwar sa i pa healthy e mon ekspekte ki apre 18 an nou’n grandi, mon pa konnen si nou bezwen ankor 18 an pou nou grandi.

 

Now mwan mon krwar moman in arive apre 18 an setaki in fer en par dan sa bann zafer, mon krwar let us look forward. Mon krwar nou kapab grandi e ou pa pour ganny politik baze lo sa bann zafer, mon pans pa si dimoun i ganny vot lo la mwan.   Wi nou pa pour ganny okenn vot lo la. Non, non ou pa pour ganny okenn vot lo sa zafer, si pe ganny pratike ou pa pou ganny vot lo la, e pa krwar ou pou ganny en vot ler ou donn en dimoun en dokiman ki annan lalis lo la, ou pa pour gannyen okenn vot. Oke nou pe perdi nou letan. Mersi.

 

HON FERRARI

Zis koman en Manm sa Lasanble demann avek Vis Prezidan, reponsab pour Ladministrasyon  Piblik si nou bann Manm Lasanble nou – nou konsernen akoz nou budget dependent, nou ganny larzan dan bidze, si nou osi nou bezwen swiv the basic guidelines of politik e si wi, en dimoun silvouple koz avek nou Speaker ki sipoze en refri…

 

MR DEPUTY SPEAKER

Demann kestyon..

 

HON FERRARI

Donk eski Minis pou pran sa langazman pour li koz avek Speaker pour li pa ler i lo laplenn i pe refri vin tap koudpye en zwer. So mwan se sa ki mon pe demande. Vwala.

 

 

VP FAURE

Msye Speaker mwan sa ki mon konnen se ki Lasanble i annan Standing Orders.  I annan son Standing Orders, son bann lareg, pour li kapab deal avek okenn keksoz ki vin devan li.

 

(Interruption)

 

..non, non bann keksoz ki vin devan li mon krwar Lasanble i deal avek.  Bann keksoz ki vin devan Legzekitiv nou deal avek bann size. Apre nou annan lezot lenstans dan gouvernman ki nou bezwen adres sa bann size si nou krwar sa bann size i zenn nou. Nou annan tou sa bann semen, tou sa bann laport.  Si fodre kree plis laport annou donn lanmen kree plis laport. Mersi

 

HON MARIE-LOUISE POTTER

Mr Deputy dan sa menm lespri pou kapab route out bann malpractice dan public service e anlinny avek revizyon ki’n fer avek PSO, eski Vis Prezidan i kapab donn nou en garanti ki sa bann move pratik par egzanp bann zafer karya leak bann lenformasyon donn bann plan Coast Guard. Eski i annan en provizyon sever pou dil ek sa politik karya e boycott dan gouvernman.

 

MR DEPUTY SPEAKER

Order, order.. Vis Prezidan.

 

VP FAURE

Mon reaksyon lo de. Premyerman parey zot konnen lekonomi in ouver, dimoun ki anvi annan akse avek labank i fer, bann dimoun ki anvi annan en licence pour li vin parey Gill’s Pest Control i kapab fer. Sa i bann karya lezel. Napa problenm, sa zeneral.

 

Mon krwar dezyenmman se pratik akoz move pratik ki pran letan pou kapab tire me selman i bezwen annan en volonte ferm pou ou desarz bann fonksyon dan gouvernman baze lo en set of rules and values. E commitment avek sa bann lareg e sa bann valer. E si ou menm ou pa krwar ladan then ou pa pe donn lanmen fer keksoz marse, i mars lo toulede kote sa e fodre zanmen ki nou ankouraz dimoun pou leak lenformasyon dan gouvernman, fodre zanmen nou ankouraze. E i pa ni bon pou pei me fodre ou realize ki ou pei i form parti sa kominote ki pli gran e en dimoun ki anvi en bon zimaz lo ou pei par egzanp mon a donn en legzanp, mon pans pa si ti korek ki ler nou kanmarad CEO STB i ti pe prepar son progranm lekel bann international guests ki ti pou vini en dimoun dan son biro ti pou leak, mon pans pa mwan. I pa ti pou byen pou en dimoun ki travay dan son biro leak progranm avan menm Foreign Affairs konnen lekel bann dirizan sorti deor ti pou vini. Si Kenyata ti pou vini, ou konpran mwan? Konmsi i enportan ki nou respekte sa bann zafer.  I pa ti vini. En dimoun ti telefonn li ti dir Mon frer pa vini. Non, an pasan sa. Parey zot konnen i annan problenm deza lo li laba. Le pwen i se tou dimoun i bezwen committed, parey toultan Ms Esparon i dir mwan committed to values e lareg.

(Interruption)

 

Non flite en lot landrwa sa, nou’n ouver lekonomi. I annan tousala. Mersi.

 

MR DEPUTY SPEAKER

Nou ava pran de dernyen kestyon. Onorab Adonis ek Onorab Prea.

 

HON BERNARD ADONIS

Mr Speaker mon ti a kontan demann Minis lefe ki PSO i regulate lalwa travay dan sekter piblik, eski I annan okenn mekanizm ki pou ganny met an plas pou permet ki bann travayer sekter piblik zot menm zot ganny familiarize avek sa PSO. E dezyenmman mon ti a kontan demann Minis si sa revizyon in osi pran kont enn pti pe revizyon servis ki public service appeal’s board I pe ofer ozordi.

 

VP FAURE

Wi tousala in ganny pran kont e dezyenmman parey mon’n dir pli boner i responsab bann HR dan bann lorganizasyon pour zot a zot tour apre ki zot in pas dan en progranm SIM anba direksyon PS ladministrasyon se zot a zot tour aprezan organiz sa bann sesyon e fer sir ki tou travayer, anplwaye ki travay dan servis piblik zot okouran ki sa dokiman i demann zot. Ki zot bann devwar, ki zot bann lobligasyon, ki zot bann drwa akoz most of the time ler nou vwar bann let ki ganny ekrir kot nou nou realize i pa’n ganny lenformasyon, oubyen son supervisor pa’n ed li ganny sa bann lenformasyon. E vwala akoz nou pe fer dan sa Lasanble ozordi, nou pe fer bann politisyen konnen ki i annan bann lareg e ki nou donn lanmen pou ed dimoun konpran ki dan gouvernman i annan en set of rules and regulations. Me i pa fini la, parey Onorab Adonis i konnen, nou bezwen prepar dimoun, train dimoun ensideswit.

 

HON NICHOLAS PREA

Mr Deputy Speaker mon anvi demann Vis Prezidan anvi ki dan son prezantasyon in koz lo a en moman ki paraetatik, bann lotorite, bann board and so on i kapab servi sa PSO a zot diskresyon me apre ler i ti pe fer son konklizyon plizoumwen in manysonn sa i bind oke. So ler nou koz a zot diskresyon nou pou kontinyen vwar sa sitiasyon kot par egzanp semenn pase mon’n zwenn en madanm ki in zwenn DA son distrik in dir ek li tel Minister in call mwan pou demann mwan lenformasyon lo ou pou ganny en travay e gran mersi mon konn ou, mon konn ou fanmiy. So si nou annan en lareg kler ladan e petet al enn pti pe pli lwen dan aplikasyon en travay dan public service oubyen dan sa bann paraetatik demann sa dimoun pou state 2 referees ki sa Minister sa departman i a kapab sa.

 

So mon konsern se ki ler Vis Prezidan i dir a zot diskresyon e vwala bann norm ki pou ganny swiv, biro DA ki pou ganny call e apre mon demann Vis Prezidan how strong, mon pa ankor vwar sa dokiman mwan osi, how strong sa bout kot deklarasyon assets i vini ladan, kot nou okouran poudir i annan serten – depi deklarasyon assets in vini i annan serten ozofisye dan bann paraetatik, lotorite, menm dan public service ki refize pou deklar zot assets. How strong sa i ganny fer sorti dan PSO. Mersi.

 

VP FAURE

Mon krwar i en pwen klarifikasyon. Parey zot konnen bann lorganizasyon parastatal serten zot annan zot prop lalwa. I annan serten ki egziste baze lo lalwa lakonpannyen. I annan dot i tonm anba the purview public enterprise monitoring division i annan bann lalwa. Sa PSO i pou ministries, departments avek lezot lorganizasyon ki ganny reclassify parey mon ti pe dir at budget time. Prezan dan PSO ou annan plizyer provision on allowance structure of salary ensideswit. Nou nou pe dir serten lorganizasyon ki anvi servi son template, i kapab servi sa bann template. Par egzanp Air Seychelles son lalwa kontra mon ankor lo Air Seychelles akoz nou fek koz lo Air Seychelles i swiv lalwa lakonpannyen. Donk i kapab servi sa as a guide. Me nou pe al pli lwen, nou nou pe dir avek tou bann lorganizasyon parey zot konnen tou bann konpannyen ozordi zot ti napa en komite ki regard lo larzan, lo saler. Ozordi gouvernman pe met an plas en nouvo polisi ki gid saler, menm saler PSO, saler bann CEO’s dan gouvernman kote ki ganny aprouve ki nivo ki gany aprouve. Donk nou pe travay lo la me nou pe dir sa i kapab as a guide akoz i ranpli avek plizyer provizo ki zot kapab servi zot kapab osi annan zot prop code of conduct, sak lorganiasyon kapab baze lo la. Mon konn serten lorganizasyon prive ki en ler ki ganny kontak avek Ms Esparon ki anvi devlop serten keksoz nou nou dir were open. Vwala pwen.

 

Lot an sa ki konsern declaration of assets sa i tonm anba public ethics lalwa ki nou ti pase ansanm e lobligasyon si tou dimoun i declare parey Prezidan e tou bann constitutional appointees enkli bann dimoun Lasanble Nasyonal enkli bann dimoun dan gouvernman nou okouran ki i annan serten trenn lipye dan sa bann zafer nou nou’n dir ki ler nou annan en lalwa en lalwa i apply pour tou dimoun e lalwa i bezwen ganny ranforsi. Set en size compliance ankor ennfwa. Mersi.

 

MR DEPUTY SPEAKER

Nou ava remersi Vis Prezidan e nou ava eskiz li parmi nou avek son delegasyon. Nou a ganny first reading pour sa 2 Bill avan ler nou adjourn.

 

CLERK

This Act may be cited as the Seychelles Broadcasting Corporation Act, 2011.

This Act may be cited as the National Assembly (Privileges, Immunities and Powers) Act 2011.

MR DEPUTY SPEAKER

Nou ava adjourn, nou ava tournen 2er pour nou pran mosyon.

 

(Break)

 

MR DEPUTY SPEAKER

Bon nou ava kontinyen avek nou sesyon travay apremidi. Nou a pran nou dernyen item lo nou Order Paper, sa se mosyon pou Lasanble aprouv the Statute of the International Renewable Energy Agency e mon a demann mover pou prezant son mosyon.

 

HON ANTONY DERJACQUES

Standing Order 10, the Quorum of the Assembly and of a Committee of the whole Assembly shall consist of one half of the number of Members at the time. Do we have half of 33? Which is 16, we have only 14, nou pa en quorum pou le moman Mr. Speaker.

 

MR DEPUTY SPEAKER

Ki order ou pe fer referans?

 

HON ANTONY DERJACQUES

Order 10(1) and I quote;’ the quorum of the Assembly and of a Committee of the whole of the Assembly shall consist of one half of the number of Members at the time’. There are 34 Members but not including the Speaker there are 33 Members and one half is for our purpose 17 and Mr Deputy Speaker we have only 14.

 

HON ROY NIBOURETTE

Mr. Deputy pou lenformasyon Onorab Derjacques i annan 32 Manm, non pa 34 dan Lasanble.

(Interruption)

 

MR DEPUTY SPEAKER

Proceed, ok we are now in order, let’s proceed.

 

 

HON MARIE LOUISE POTTER

Mr Deputy mon mosyon pe demann nou Lasanble pou aprouv ratifikasyon Statute of International Renewable Energy Agency (IRENA) ki ti ganny etablir an Almann an Zanvye 2009. Lobzektif (IRENA) parey nou konnen, se pou promouvwar devlopman e litilizasyon lenerzi renouvlab a baz natirel tel ki lenerzi soler, lenerzi a baz divan an servan lanmer, laroul, delo, larivyer bio-gas, parmi lezot.

 

Mr Deputy rol prensipal (IRENA) se pou fer resers, devlop bann polisi e promouvwar finansman e korperasyon ant bann pei manm dan domenn devlopman lenerzi renouvlab. Benefis ki Sesel i kapab tire a’n etan parti sa Statute i divers. Premyerman i pou permet nou annan akse avek bann lenformasyon ek teknolozi lo lenerzi renouvlab, i pou permet nou annan akse avek lekspertiz neseser pou devlop nou prop plan nasyonal e nou bann prop polisi dan domenn lenerzi renouvlab, i pou permet nou benefisye atraver bann lantrennman, bann training, capacity building e devlopman nou prop resours dan sa domenn e pou permet akse avek lasistans finansyel pou devlop nou prop proze e annan nou prop plan pou devlop lenerzi renouvlab Sesel.

 

Parey nou konnen nou deza pe benefisye avek led atraver korperasyon avek bann pei zanmi tel ki UAE ki ozordi pe finans sa proze wind farm ki an kour devlopman ki pou kout en sonm 27 milyon dollar. Mr Deputy Speaker head quarters (IRENA) i baze an Abu Dhabi e son sant inovasyon e siantifik ek teknolozi i baze an Bonn l’Allemagne tandis ki son lofis liyezon enternasyonal li i baze Vienna.

 

Ratifikasyon sa Statute i vin a en moman istorik kot isi Sesel e gouvernman pe met en kantite lanfaz e pe met sa size devlopman e itilizasyon lenerzi renouvlab tre o lo son azanda. Letablisman en komisyon nasyonal lo lenerzi ki nou menm nou nou ti aprouv lalwa dan sa Lasanble an 2009 e tou dernyenman laprouvasyon polisi nasyonal lenerzi par cabinet dan gouvernman i etal bann vizyon e target spesifik ki nou oule atenn dan sa domenn.

 

Mr Deputy Speaker avek sanzman klima ki pe agrave ozordi e ki pe koze prensipalman par litilizasyon bann lenerzi konvansyonnel parey nou konnen ozordi e lo gran logmantasyon dan pri petrol ki lemonn pe konnen e pou konn ankor e diminisyon ki’n ganny prevwar  pou annan ki alarman dan rezerv petrol a baz fosil parey nou konnen ozordi, tousala i bann rezon ki zistifye nesesite pou ki alavenir  bann pei enkli Sesel nou eksplwat loportinite pou nou kapab annan sours lenerzi alternativ parey nou pe diskite.

 

Mr Deputy Speaker sa konvansyon, sa statute ki mon pe demann Lasanble pou ratifye i pou en baz, en fondasyon ki pou permet nou achieve sa lobzektif e sa vizyon pou nou osi kapab bouz dan sa direksyon nou’n vwar tou dernyenman enn nou bann zil konble, nou’n aprann Ile de Romainville pou ganny itilize pou kapab fer devlopman lenerzi a baz divan. Sa i pou ede kree en nouvo lendistrir Sesel e pou ede kree nouvo lanplwa sirtou pou lazenes. Sa i en legzanp bann benefis ki sa lendistrir pou anmennen alavenir pou Sesel. E lo sa not alor mon demann Lasanble pou aprouv ratifikasyon sa statute ki devan nou. Mersi bokou.

 

DEPUTY SPEAKER

Okenn ki segonde?

 

HON MARC NAIKEN

Mon segonn sa mosyon Mr Deputy Speaker.

 

MR DEPUTY SPEAKER

Ou ti a kontan koz lo la?

 

HON MARC NAIKEN

Mon ti a kontan dir de mo. Mr Deputy, koleg MNA zabitan Au Cap, tou Seselwa bonzour. Mr Deputy Speaker si i annan en term ki’n vreman ganny asosye avek sa dosye lenerzi renouvlab ki devan nou Lasanble ozordi sa i byen sa size peak oil, i reprezant  sa moman kot lemonn pe prodwir delwil lo en nivo maximum e apre sa moman kot prodiksyon sa komodite i komans deklinen lo en baz terminal. Dan sa loptik en dat ki devret konsern nou se ki resers pe montre ki par bann lannen 2015 apenn 4 an disi, pou premye fwa dan listwar demann pou fuel pou komans depas kapasite prodiksyon mondyal e la lo pwennvi ekonomik nou kapab konpran ki pou arive avek supply e konsekaman pri sa komodite. Sa ki osi kler se ki otan ki bann siantis pa kapab tonm dakor lo en dat egzakt pou sa fenomenn peak oil, tou bann siantis dan lemonn i agree ki sa problenm i enn ki reel e ki peak oil i en danze iminan pou sa lemonn ki nou pe viv ladan ozordi.

 

Mr Deputy Speaker tou prosperite ekonomik lemonn pandan sa dernyen 100 an in ganny baze lo prodiksyon e itilizasyon sa ki nou apel fossil fuel ouswa delwil. Tou nou bann model ekonomik e sivilizasyon modern in ganny konsantre otour sa sel komodite e sa i pli gran andikap ki lemonn i posede an se moman. En keksoz par kont ki bann ekpert pa kapab tonm dakor lo la se ki si itilizasyon sa bann sours karbiran pe koz sa fenomenn resofman later. Bann kestyon ki pa pe ganny reponn se si nou aret servi sa bann sours lenerzi eski sa pou annan en lefe pozitiv lo nou lemonn ozordi? Larepons lozik i ava dir ki wi i annan bokou letid ki montre ki bann lyen direk ant lafason ki lemonn in abiz son bann sours lenerzi ki’n pran de milye e de milye lannen pou li akimile e nou pe deplit li dan en tre kourt letan apenn 100 an en bann problenm klimatik ki sa pe koze e ki nou pe rankontre konsekaman ozordi. Sa ki kler se ki in plis ki tan pou sanz enpe nou model konportman lo sa size, in ler pou nou enplimant bann nouvo fason fer, in ler pou sa lemonn vin pli efikas dan lafason ki i konsonm lenerzi, in ler pou nou diversifye nou sours lenerzi, in ler pou nou servi bann sours lenerzi ki pli prop oubyen bann ki polye mwens nou planet.

 

Resaman bann ekonomis pe dir ki a sak fwa ki i annan en kriz dan logmantasyon pri karbiran son rezilta se ki Lanmerik i ekperyans en resesyon ekonomik. An 2008 rezilta sa kriz se ki lemonn an-antye ti ekperyans en resesyon ekonomik. Avek sa an tet in plis ki tan pou nou komans re-kalkil lafason pou nou obtenir e servi lenerzi lo sa planet. Sa lekonomi mondyal ki baze a 100% lo lenerzi provenan lo karbiran i demontre klerman ki i en model ki pa efikas e sertennman ki pa soutenab. Sa dosye ki devan nou Lasanble pe fer provizyon pou en nouvo komansman, en nouvo dikreksyon e en nouvo fason fer e fason panse lo size lenerzi e karbiran. In ler pou lemonn reveye e komans aziste li avek son prop realite.

 

Devan nou i annan en serten provizyon pou en lemonn pli efikas, pli prop, plis resers e lesanz konesans. Bann model ki’n ganny etablir pou permet lide sirkile e solisyon ganny avanse. Sa konvansyon pe pouse pou en raprosman enternasyonal, en zefor enternasyonal pou aport en solisyon global.  Konvansyon devan nou pe ofer en lapros lozik e ase pratik pou sa problenm lenerzi ki’n enn ki tre konpleks e i napa solisyon senp pou sa problenm. Napa solisyon vitman. Sa ki pe ganny ofer devan nou se en zefor konzwent anver en solisyon entegre.

 

Le de pli gran defi dan sa demars se larzan avek konesans. Sa dosye ki devan nou i deza fer provizyon pou elimin enn sa bann problenm ki lesanz lekspertiz ant bann diferan nasyon. Lo sa baz nou pou personnelman donn sa konvansyon tou mon sipor, i retonm lo nou koman bann reprezantan lepep pou nou defann lentere nou pep, en Sesel kot son demann pou lenerzi pe ganny siporte par bann mwayen soutenab pou kontribye anver en model ekonomik ki pli efikas e pli soutenab.

 

An swivan bann lalinny ki pe ganny tire dapre sa dokiman devan nou Sesel i a kapab avans dan en direksyon ki pou aport en meyer lavi pou son pep. Koman en reprezantan lepep mon pou siport tou demars ek mwayen ki pou bes pri lavi dan nou pei dan en fason soutenab e long term, la ankor mon pou ofer mon sipor akoz mon konvenki ki  sa pou kontribye anver en meyer lavi pou nou pep.

 

An konklizyon, Mr Deputy Speaker sa konvansyon in vin devan nou Lasanble a en moman apropriye, a en moman kot Prezidan Michel in fini eklersi son vizyon lo sa size. Sesel pe komanse, nou’n deza pe lans dan sa lemonn lenerzi renouvlab. Gouvernman Prezidan Michel pe lager avek en size ki tre difisil e ki kout enormeman pou enplimante me sa dosye lenerzi renouvlab i enn lo lekel nou pa kapab annan okenn divizyon. Sesel nou pou bezwen asir nou fitir ansanm, kot Prezidan in komanse nou bezwen travay pou siporte e pou aport sa laviktwar ki nou pep i bezwen. Mersi Mr Deputy Speaker.

 

 

 

HON BERNARD GEORGES

Mr Deputy Speaker, pou kontinyen kot Onorab Naiken in kite, antan ki port parol lopozisyon lo lanvironnman e mon’n an tou lantisipasyon ki aparti le 22 May Minis ki pou ansarz portfey Lanvironnman dan sa pei, mon kapab donn langazman sa ladministrasyon ki pou swiv ladministrasyon Michel pou kontinyen e pou ankor fer bokou plis ki sa ladministrasyon konmela in fer dan sa domenn lenerzi renouvlab.

 

Mr Deputy Speaker 200 kilomet  anviron sidwas avek kot nou pe asize la ozordi i annan en zil ki apel St Joseph e ki annan en lagon, enn pti pe parey lagon Aldabra, e sa zil i annan en fenomenn ase enteresan siantifik, i annan sa ki bann siantis i apel en biomas zero. Mon pa aen siantis lwen-d-sa me dapre sa ki mon konpran ler en landwa i annan en biomas zero savedir i servi tou sa ki i prodwir e i prodwir tou son bezwen setadir i reste statik i pa bezwen depann lo okenn fakter ekstern pou son survival.

 

Nou Sesel nou pei, antan ki en pei, nou annan sa ki nou apel ankor ennfwa se siantis ki dir mwan en zero carbon foot print savedir tou sa ki nou prodwir anterm carbon nou abzorbe par nou lafore, par nou losean, par nou bann lorganizm ki abzorb carbon. Alor nou pa fer okenn lefe negatif an sa ki konsern resofman later e nou kapab dir ki nou nou okay nou akoz nou nou pa pe kontribye pou resofman later.

Me parey detrwa mwan pase ler mon ti anmenn devan sa Lasanble en mosyon lo pou demann gouvernman servi enpe plis mwayen pou entrodwir lenerzi renouvlab dan nou pei, mon mosyon ti fer resorti ki se pa zis prodiksyon carbon ki en problenm dan sa bann zafer lenerzi me se kou lenerzi li menm akoz lenerzi renouvlab avek prodiksyon carbon, avek lenerzi ki pa renouvlab i zis en kote en meday ki annan de fas, lot fas sa meday se son kou prodiksyon lenerzi limenm e si an tan ki en pei nou enpti pe parey lagon St Joseph kot nou annan en footprint ki zero oubyen menm negative, sa i pa met nou a labri ditou, okontrer nou annan still nou bezwen fer fas avek sa logmantasyon dan nou bidze pou  karbiran. Esi donk nou krwaz nou lebra lo kote carbon ki nou met dan latmosfer an dizan ki nou nou ok, nou abzorb tou nou carbon, nou pa kapab krwaz nou lebra lo kou depans ki nou gouvernman, sa enn la e sa enn ki pou vini pou bezwen fer fas avek lo nivo enerzetik pou kontinyasyon nou pei e son devlopman.

 

E se dan sa konteks Mr Speaker ki lopozisyon osi i ralye avek kote mazoriter pou sport sa statute ki devan nou ozordi e pou siport e pou kontribye pou ki i ganny ratifye e ki i ganny met a’n ev osi vit ki posib, sa mon pa bezwen pas atraver sa morso Statute ki devan nou ozordi, sa in ganny fer deza me mon ti a kontan kantmenm souliny enn de keksoz ladan.

 

Dan son chapeau lo paz 2 i annan en lalinny ki mon krwar an kapsil egzakteman tou sa ki pou ganny dir dan sa Lasanble apremidi e sa se sa deklarasyon ki komans avek sa mo Motivated lo paz 2 sa statute ki devan nou e sa se potansyel enorm ki lenerzi renouvlab i annan ki kapab anmenn akse desantralize avek lenerzi sirtou dan bann rezyon ki lwen ek bann zil. Potansyel enorm, akse desantralize sirtou pou bann zil e nou Mr Speaker nou tonm fair and square dan sa lobzektif.

 

Ler nou regard en sekter parey telefonn mobil, telefonn portab nou vwar ki manyer en keksoz desantralize parey en telefonn mobil i kapab sanz en pei, en sosyete, en nasyon konpletman. La kot avan sa ou ti bezwen anmenn lalinny elektrik oubyen lalinny telefonn, telefonn portab i fer ki en vilaz ki napa akse avek en lot morso son teritwar ki swa avek semen oubyen avek lanmer, oubyen avek okenn lezot link i kapab ganny menm akse avek ki ou kapab gannyen New York akoz atraver en rezo desantralize ki nou apel telefonn mobil.  Sa Endyen dan en pti vilaz dan Lenn ki napa okenn resours i kapab tap into menm keksoz ki sa dimoun premye first word New York oubyen Washington, oubyen Lonn, oubyen Bonn, oubyen okenn sa bann landwa i kapab. E lenerzi renouvlab sa statute IRENA ozordi i fer nou konpran ki li osi i a la porte, i kapab anmenn lenerzi a la porte tou dimoun pou vi ki nou pran bann desizyon ki brav e bann desizyon ki long term tel parey ler nou nou ti zenn si dimoun ti dir nou ki dan nou life time ou pou kapab met en bout papye dan en masin Langleter e sa bout papye pou sorti telkel Sesel nou ti pou riye. Si nou ti’n ganny dir ki nou kapab mars avek nou telefonn kot nou anvi ale e fer nou call manyer nou anvi e resevwar en keksoz ki pou apel internet lo la nou pa ti pou kapab konsevwar sa akoz i ti ankor tro lwen dan le fitir.

E ozordi  mon krwar sa statute i donn nou menm defi e sa se si nou kapab dir, si nou kapab anvizaz en sosyete ozordi kot lenerzi pou nepli santralize me pou desantralize e kot lenerzi pou kapab ariv tel parey i ariv ozordi New York oubyen La Louise i pou kapab ariv osi dan en pti vilaz elwanyen dan en landrwa, the back of beyond Australie mon kwar se sa sa defi ki nou bezwen realize i nepli en defi me en keksoz ki pou arive e i pou arive pandan ki nou dan sa Lasanble nou ankor lo sa later.

Mr Deputy Speaker in nepli mon krwar le moman pou nou annan okenn skeptisism lo valer lenerzi renouvlab e si sa statute IRENA i devan nou ozordi se ki bann dimoun ki’n konsevwar sa statute in realiz sa e zot in realize tel parey bann dimoun ki fer telefonn mobile in realize ki zot pli gran market i pa dan bann pei devlope me dan bann pei sou-devlope oubyen anvwa-devlopman, lenerzi renouvlab osi son pli gran market se dan bann landrwa parey sa statute in dir lwenten e bann zil e bann landrwa ki pa kapab annan akse avek lenerzi santralize.

Mr Deputy Speaker en kantite fason pou nou sov nou plannet lo sa zafer servi fossil fuel. Nou’n pas lo la, nou tou nou konnen nou pa bezwen retourn lo la ozordi. Sa ki sa statute pe demann nou pou fer se pa pou regard dan bann carbon trading program kot nou pou met en tax parey nou fek lir la ozordi lo internet lo bann airline ki al dan bann destinasyon Long-haul pou anpes dimoun vwayaze oubyen pou fer ki ler zot vwayaze zot bezwen pey en larzan anplis. Sa set en fason fer. Sa ki IRENA pe demann nou ozordi se pa pou neseserman rod bann mwayen avek gran teknolozi parey nikleer pou redwir en footprint carbon akoz li osi nou vwar son bann problenm ki kapab annan tel parey nou vwar la l la apremidi pe arive Japon. Ipa pe demann nou fer okenn sa bann gran gran lenvansyon. Sa ki IRENA pe demann nou se regard, think locally, regard otour nou servi bann mwayen ki egziste e se sa bann mwayen ki pou vin lenerzi demen.

Ler nou regard lartik 3 sa konvansyon i dir nou ki lenerzi renouvlab i annan 6 sours bio enerzik, lenerzi zero thermal, idro, lenerzi losean, lenerzi soler ek lenerzi divan. Napa plis ki sa. E mon fer an parantez lo la pou mwan dir ki manyer nou tou nou devret zalou en pei parey La Reunion ki li i annan tou le 6. I annan bagasse, kann ki fer bioenergy, i annan geothermal energy akoz i annan en volkan, i annan larivyer ki donn li lenerzi hydro power, i annan ne losean ki sorti tre profon e ki vin ater vit akoz topografi son zil, i annan soley 365 zour par an e i annan vannswet ki zot laba anba zot apel sa bann alize ki zoufle for e konsistaman tou lannen. E se pou sa rezon ki zil La Reunion in kapab ozordi ariv a en nivo 40% lenerzi renouvlab dan tou son sekter e ki annan en lide ki zot pou kapab dan en lavenir ase bref ariv 100%.

Donk se pa bann pei parey Brazil avek Leta-z-ini bann, gran pwisans ekonomik ki pou lead sa lamars dan lenerzi renouvlab se bann pei parey La Reunion ki  ok i annan La France deryer li dakor, me osi bann pei parey Maldives ki son nouvo Prezidan in dir ki li dan 10 an, pa lwen, in manz apepre 18 mwan deza dan sa 10 an, li i pou transform son pei  konpletman pou fer son pei vin ankor ennfwa enn kot lenerzi renouvlab i sibvenir a tou son bann bezwen enerzetik. Nou Mr Speaker annou pa fer politik apre midi, annou pa dir ki nou an retar or what ever, nou tou nou bezwen koste zepol e an rekonesan ki nou ti’n kapab fer bokou plis lavans nou bezwen osi dir ki nou bezwen isi osi fer bann desizyon ki brav e ki malen e ki entelizan. Mwan mon krwar Mr Speaker, personnelman mon pa en siantis me mon koz avek bokou siantis e mon annan en gran lentere dan sa size, mwan mon krwar e mon konvenki parey Onorab Naiken in fer nou konpran ki sa bann problenm ki pe arive e ki pou kontinyen arive dan bann pei prodikter petrol, en flanbe dan bann pri petrol pou fors nou tou rethink sa sitiasyon lenerzetik. Mwan mon pa vwar sa koman en problenm, mon vwar sa koman en challenge, koman en defi e i pou anmenn nou tou pou fer bann desizyon ki enportan e ki entelizan. E la mon krwar akoz nou nou pa La Reunion e nou napa akse a sa 6 diferan sours lenerzi alternatif mon krwar ki nou devret vin bokou pli proaktif lo sa ki nou nou pe fer avek sa ki available pou nou.

Lemonn antye i annan en sours lenerzi ki zanmen pou fini e sa se soley. I byen ki nou pe regard avek Abu Dhabi dan lenerzi divan, i byen. Nou annan en komisyon lenerzi ki’n sorti dan bann deba ki nou ti fer isi dan sa Lasanble ki pe etidye sa keksoz, se zot bann expert pa nou, e nou bezwen enklin nou devan zot ler zot deside dan ki direksyon nou pou ale. Me annou pa envant larou akoz sa bann zafer wind energy la i posib ki i pou ede, i posib ki nou pa pou annan en sours lenerzi. Mon pa krwar ki nou devret annan zis enn, mon krwar ki nou devret etal nou kart osi larz ki posib, me mon krwar Mr Speaker nou pa devret bliy sa sours ki endisponsab a nou lavi e ki nou pa bezwen fer gran keksoz pou nou kapab kapte li e sa se lenezi soler.

Mon’n tande apremidi la ki nou’n depans 27 milyon dollar oubyen roupi? Dollar pou al fer sa bann wind farm, i byen i pa nou larzan, i larzan en lot dimoun me alors ok pa nou i pe depanse me mon krwar ki personnelman kekfwa sa larzan ti ava ganny pli byen depanse dan en sours soler akoz mwan mon annan en gran lantouzyasm dan lenerzi soler ki nou vwar lannen ale, lannen vini i la available dan nou pei parey mon dir preske 365 zour lo 365 dan sak lannen. E alor mon ti ava kontan ki nou servi sa lokazyon apremidi pou nou anvoy en lapel a gouvernman, a komisyon lenerzi pou pran letan sertennman pou etidye bann lezot posibilite me letan ou pa pe fer nou en faver vizavi letan nou anretar deza e nou’n devret pe met an plas bokou bokou plis rezo soler pou nou kapab fer ki lenerzi soler i vin enn nou bann pilye lenerzi renouvlab dan sa pei.

Parey mon’n dir taler se pa bann gran pei ki pou lead lamars dan sa nouvo teknolizi se bann pti pei ki pou fer li akoz se nou ki pli bezwen, se nou ki pli mizer, se nou ki pou ganny plis afekte par sa kriz enerzetik ki pou arive la byento akoz pri benzin, pri petrol pou monte e pou kontinyelman monte. Alor kekfwa nou devret pas a en staz kot en kanmiyon ki mars avek labour nou kapab dir be ok sa ti annan son letan annou met li deryer e annou regard bann keksoz ki pa lo en nivo trial me ki lo en nivo prodiksyon. Mon krwar ki nou devret al a sa nivo e se pou sa rezon ki mon krwar ki anba lartik 4(d), sa statute ki devan nou sa transfer teknolozi ki nou pe vwar pe komans ganny enplimante la atraver sa korperasyon avek Abu Dhabi me mon kewar e konpran mwan byen sa komisyon lenerzi renouvlab Abu Dhabi akoz li osi mon’n koz avek li e mon’n koz avek dimoun ki travay laba Lemirat Arab-Ini, limenm li i a en staz tre boner dan son devlopman, limenm li i pa tro konnen kote i pou ale e pou en senp rezon  akoz zot annan lenerzi fossil pou gard zot ankor pou bokou lannen. Alors zot pa osi proaktif ki zot devret ete e si zot pe fer sa experiment isi se osi pou ed zot en pti pe dan zot prop pei kot zot ankor pe experiment.

Mwan mon lapel ozordi se annou al rod transfer teknolozi ki pou permet nou nou menm devlop en teknolozi ki prop pou nou e en teknolozi ki pou permet nou non selman sibvenir a nou bezwen me atraver nou bann zenn, nou bann dimoun ki performan dan sa pei akoz nou konnen ki bann zenn e mwan mon enterakte avek zot dan en lot mon bann lokipasyon, nou annan konpetans nou annan dimoun ki annan sa konpetans pou devlop e pou kapab menm lead larestan lemonn dan lenerzi renouvlab isi Sesel, annou pa sey rod tro keksoz, annou focus lo sa enn de ki nou konnen i available e ki nou kpab fer, annou servi  tou bann mwayen ki sa statute i donn nou e zot donn nou bokou mwayen, pran teknolozi kot nou kapab gannyen atraver sa komisyon ki sa statute pe set up ki enn pti pe parey IAEA, International Atomic Energy Commission Agency li i en lazans pou lenerzi renouvlab, annou fer ki tel parey anba IAEA nou kapab benefisye avek teknolozi ki pa nikleer me ki ed nou dan nou lopital eksetera, annou servi konpetans bann lezot ek zot kapasite ki zot in kapab devlope ziska prezan e nou’n pran en defi e mwan mon ti a kontan lans sa defi dan lenerzi soler e annou pran en keksoz e lead the world avek akoz mon konnen e mon annan gran konfyans ki Sesel i kapab depar lentelizanas nou pep, depar nou pti groser, depar nou bezwen pou sa lenerzi renouvlab, mwan mon krwar ki nou kapab vin en legzanp pou lemonn dan at least en keksoz an sa ki konsern lenerzi soler. Donk Mr Speaker avek sa detwa mo mon kapab sinyale ki Lopozisyon pou siport ladopsyon e ratifikasyon sa Statute apre midi. Mersi.

HON JOSEPH FRANCOIS

Bon apremidi tou bann koleg. Mon pou pran kot Hon Georges in terminen e par byensir donn mon sipor pou sa trete ki devan nou. Mon pou tous detrwa pwen ki’n ganny met devan avek bi pou montre ennpti pe sitiasyon lenerzi renouvlab dan enn pti pei. Nou okouran e nou konnen ki soley i nou pli gran sof lenerzi ki egziste lo tropik lo equator e dezenm i swiv enn pti pe par divan me selman divan i annan diferan lentansite depandan lo ki letan dan lannen.

 

Bokou fwa petet i pou tant nou petet pou nou dir be soley nou annan en ta why not servi soler pou run tou sa ki nou bezwen anterm lenerzi sirtou lenerzi kot lakour pou prodwir elektrisite. Me kestyon ki ankor lo latab  dan plizyer pei dabor se son kou. Son kou i ankor tro o pou fer sa proze vin viab pou bann pti zil. Bokou bann pei pe fer li zot pe fer li lo en tre tre ba lesel e zot pe servi li pou bann pti pti kominote si oule e menm pou bann pti kominote zot pa pe kouver tou laspe prodiksyon elekrisite ki sa kominote i demande, si oule zot pe konplemant sa ki zot pe servi enn pti pe avek soley e wi i  ankor pli ser ki lenerzi divan, dezorme i ankor pli ser ki lenerzi divan akoz son maintenance factor i akor tro o.

 

Lenn pe fer en kantite letid lo la pou vwar en teknolozi ki kapab adapte dan bann pei tropik e zot ankor pe ganny problenm maintenance akoz abresyon, son membrane i vreman sansib e bokou fwa i ganny afekte par abrezyon par bann particles e en gran proze ki ti pe fer dan nor Sahara in fail pou rezon sa. I en ta soley me abrezyon pe anpes li marse dan son totalite. So alor nou retourn lo en sistenm kot nou dir en mixed energy sources system, savedir ou fer en konbinezon soley, enn pti pe divan, enn pti pe bann lezot ki ou annan avek bi pou ou pa depan lo zis  enn. E se sa lapros ki mon krwar ki Prezidan Michel in dir nou dan son bann diskour tou dernyenman ki nou devret pe vize. I fasil pou ganny tante pou envestir dan en teknolozi me apre letan i pa marse nou vwar nou poudir nou bezwen start from scratch pou nou sey venture dan en lot. E i annan bann komanter ki kontan ganny dir ki nou bezwen met li an perspektiv.

 

I napa en lobligasyon pou Sesel anba UNFCCC ki konvansyon ki diriz climate change oubyen anba Kyoto Protocol pou nou koup lo nou emisyon an carbon. I pa egzize ki  nou fer li me nou bezwen fer li pou rezon kou fuel ki enporte. Nou bezwen fer li akoz par egzanp si nou pran 2008, nou ti pe depans nou apepre 84 milyon dolar zis lo fuel ki nou pe enporte, sa ti apepre 22% nou GDP sa lepok. Alor i pou annan benefis direk pou en pei parey Sesel pou koup lo son lenportasyon lo karbiran ouswa bann delwil brit ki nou servi. E se sa ki Sesel i oule anmenn en lager – i oule anmenn en lager dan kominote enternasyonal pou revwar kou teknolozi ki relye avek lenerzi renouvlab e sa trete devan nou, en legzanp si nou pa ratifye li pa pou en problenm pou lemonn, lemonn pa pe vwar Sesel koman sa pei ki pou sanz bann defi ki sanzman klima pou anmennen. Me nou nou bezwen lemonn selman. Nou nou bezwen lemonn pou nou ganny sa teknolozi pou nou kapab antre dan lenerzi renouvlab. Nou bezwen lemonn pou nou ganny sa bann konesans dan sa domenn, nou bezwen lemonn pou nou ganny resours finasyel. So alor pou nou I dan nou lavantaz direk si nou ratifye sa trete avek e bi pou nou anvoy en mesaz avek lemonn, nou pa bezwen fer li me nou pe fer li akoz en rezon e rezon se ki nou oule zot swiv parey nou e nou oule zot ed nou pou nou kapab enplimant bann diferan mezir isi kot nou.

 

Letan nou get byen sa konvansyon ki Sesel i anvi ratifye i annan apepre 149 pei lemonn ki’n deza fer li e ou ti bezwen 25 ratifikasyon pou li vin anviger e alor in vin anviger e si ou get byen bann provizyon dan sa trete se egzakteman bann provizyon ki Sesel i bezwen la ozordi, bann provizyon par egzanp pou ou ganny gidans pou devlop ou polisi kot ou i sa ki nou bezwen la ozordi e sa trete pe permet nou ganny akse ek sa.

 

Letan nou pe koz lo bann proze pilot par egzanp kot pou teste serten teknolozi debaz i sa bann provizyon ki sa trete pe koz lo la alavenir e se sa ki Sesel i bezwen pou nou kapab antre dan sa bann proze lenerzi renouvlab. Pe koz lo workshop ki pou kapab ekip ou bann dimoun pou kapab pli byen konpran sa bann teknolozi, se sa ki nou bezwen. Pe koz lo monitor lenplimantasyon bann pei ki komet zot lekor pou fer li. Lanmerik in komet son lekor pou fer li me who will monitor Lanmerik pou fer sir i fer li? E se sa ki sa trete pe dir, be nou pou annan en lekip ki si ou’n dir ou pou fer, nou pou al gete pou fer sir ki ou osi ou pe fer. E alor sa enn pti pe lentere Sesel an relasyon avek sa trete. E sa trete limenm li i en lenstriman legal ase konsistan parey bann lezot trete ki nou abitye sinyen me selman i annan 3 keksoz enpe prensipal ki enportan pou nou konnen kwa ladan. I annan 1, en Lasanble, kreasyon en Lasanble, savedir tou bann manm ki ratifye li, letan group i ansanm i vin en Lasanble e zot zot annan bann pourvwar pou zot vot lo bann polisi e vwar enn pti pe ki bann pei i bezwen an relasyon avek lenerzi renouvlab.

 

Apre i annan elekte en konsey ki pou gid e diriz sa trete e sa enn konsey ki zot pe propoze i en konsey pou 2 an, e zot pe rod 11 a 21 manm lo la e petet la kot Sesel an Avril sa lannen i devret pe focus enn pti pe, sey regarde si Sesel parmi bann pti pei leta zil nou pa kapab vin en manm sa konsey e se la kot lavwa pti letan zil i kapab pli antre. E apre byensir parey tou konvansyon oubyen trete se en sekretayat ki pou diriz li e sa sekretayat i annan enn par enterim ki’n deza set up e avek meeting ki pou fer an Avril sa lannen zot ava devlop enn pti pe plis bann mekanizm kot tou bann pei i kapab access lenformasyon enn pti pe pli byen. So alor sa i plito lavantaz ki Sesel i devret vwar letan nou pe get sa trete ki devan nou, IRENA ki devan nou.

 

Me letan nou dir ki Sesel, mon pa konnen si nou pou dir i enn pti pe an retar oubyen si kwa, mon largiman lo la mwan i pou lo cost of it. Annou get en legzanp sa wind farm ki byento pou komans vin a’n operasyon Sesel. Zis sa wind farm apepre 27 milyon dolar Ameriken. Me sa 27 milyon dolar Ameriken pou selman donn nou 8% nou konsomasyon elekrisite domestitik ki nou bezwen, zis 8%, pa plis. So si nou pou al 50% zot kapab zis mazinen ki kantite larzan en tel teknolozi pou kout nou. E pou soler i plis ankor li, i bokou plis ankor letan ou pran tou son bann kou maintenance ou met avek.

 

Alor largiman prensipal lo sa issue lenerzi renouvlab i son kou i ankor pa abordab pou en pti pei leta zil ki oule devlope, i fasil en legzanp pou nou dir si nou ti al 16% lenerzi renouvlab ki mnayer i ti pou afekte nou, petet nou ti pou vwar nou proze fibre optic par egzanp petet pa ti pou annan sa lanpler, pa ti pou arive akoz li osi i bezwen apepre 25 milyon dolar pou fer li. E ankor bann lezot proze ki nou pe plannifye Me pou problenm garanti lenerzi sekirite lenerzi nou pou bezwen pran si Prezidan pe koz nou pe get 2020 manyer Sesel pou vini avek bann devlopman, fason pou nou kapab ganny sa e garanti li se atraver sekirite lenerzi e sekirite lenerzi se letan ou pa depan lo fuel ki ou pe enporte. Ou pe prodwir kot ou, ou kapab kontrol kot ou e konnen ki kantite ki ou pe konsonmen. Me nou pa devret ferm lizye lo zis lenerzi renouvlab, nou devret osi pe gete kot nou ki manyer nou kapab konserv plis lenerzi e mwan mon krwar letan nou lo sa topik nou gouvernman i ankor annan lespas pou li ale. I ankor annan lespas pou li met bann kad legal pou Seselwa konserv pli byen lenerzi. Bann building ki ganny konstrir nou kapab fer pli byen pou nou bann building depan mwens lo lenerzi par egzanp pandan laozurnen. So ansanm avek sa nou devret osi al pli lwen. Al pli lwen e regard konservasyon lenerzi, gard par egzanp bann lalimyer.

 

Nou pa pe eksplor ase byen potansyel konservasyon lenerzi dan lalimyer ki nou pe servi, nou ankor pe servi bann glob ki pa dezirab e i fasil pou met en mekanizm pou nou deal avek sa, e fasil pou met en kard legal avek Planning Authority pou bann dimoun met ase vantilasyon natirel dan zot batiman e mon krwar nou devret osi pe al dan sa direksyon on top of sa renewable energy ki nou pe move. Avek sa mon ti a kontan donn mon sipor e mon swete tou Manm i fer parey. Mersi.

 

HON JEAN-FRANCOIS FERRARI

Mon pa pou long me mon ti a kontan dir de mo. Premyerman mon ti a kontan kekfwa sinyal avek ladministrasyon nou Lasanble ki kekfwa ti ava enteresan ler nou pe fer sa bann deba koumsa kot nou pe donn en serten perspektiv lo en direksyon ki nou ti a kontan vwar nou devlopman pe ale ki bann lazans i ganny envite pou ekout enpe sa ki nou nou annan pou dir par egzanp ti ava vreman enteresan ozordi si ti annan reprezantan Seychelles Energy Commission ki ti la e ki ti at least ekout enpe sa ki nou pe dir  e kekfwa capture mood oubyen lespri Lasanble lo sa size. So sa i zis en challenge ki mon ti a kontan donn ladministrasyon nou Lasanble.

 

Bann pwen ki mon ti a kontan fer lo la i annan 4 e i pou ase vit. Mon krwar napa okenn dout ki nou tou nou dakor avek en nesesite pou nou fer tou sa ki posib e menm al parler enpe pli lwen ki sa ki posib pou nou tap dan lenerzi renouvlab e nou annan isi bann potansyel, nou napa tou me selman nou annan me nou devret fer li. So lo la napa okenn deba.

 

Sa ki mon ti a kontan mwan se ki over and beyond sa vizyon ki nou tou nou annan, mon ti a kontan vwar ki sa vizyon i prezan antre dan nou lavi tou lezour e ki nou konsistant avek tou keksoz ki nou fer e i vre ki souvan mwan mon vwar poudir – kekfwa Onorab Leader of Government Business i ava anvi koriz mwan dan son konklizyon, selman mon vwar en gap ant bann dezir, bann laspirasyon, bann vizyon, bann stratezi e sa ki nou fer actually dan larealite. Souvan mon annan lenpresyon ki that we don’t walk the talk, we talk a lot me selman  we don’t walk it e sa i fer ki souvan nou pa konsistan dan sa ki nou pe dir. Par egzanp nou konnen poudir nou annan en problenm lenerzi, en problem kou lenerzi, fuel ki nou bezwen enporte dan Sesel i o me selman nou envestir par egzanp dan desalinasyon ki servi bokou lenerzi e avek son bann problenm asosye avek e nou kontinyen e nou dir ki nou pou kontinyen envestir dan sa very energy intensive form of generating water. Pou mwan sa i en problenm i en mank konsistans akoz parler  nou al dan bann keksoz ki enpe pli fasil, ki enpe pli vit, ki enpe pli imedyat pou reponn en problenm imedyat e nou ale nou rod en faktori nou aste, son kou nou kapab afford a sa moman la me son kou operasyonnel finalman ou vwar ki i enpakte ankor lo nou fuel bill, e i enpakte lo sa dezir e sa vizyon ki nou annan pou nou fer Sesel vin en pei model dan sa ki konsern lenerzi renouvlab.

 

So parler i annan sa mank konsistans e pa zis mank konsistans me osi mank swivi. Mon toutafe dakor avek Onorab Francois ler in dir ler in mansyonn bann planning rules ki nou santi poudir apre tou sa bann lannen ki nou pe koz lo energy efficiency dan bann konstriksyon nou still ankor pe koz lo la, nou ankor pe koz lo la e napa en lazans ki pare prezan pou pran sa ki nou pe koz lo la e anmenn li devan. Pourtan i annan telman keksoz ki devret fasil parey sirkilasyon ler, parey ki kalite vit ki nou servi. Mon krwar SEPEC la in servi enpe bann vit ki refraktiv ki refract enpe bann lenerzi, sa bann keksoz koumsa ki mwan mon santi e nou nou santi lo sa kote latab ki i pa devret zis en linisyativ personnel, oubyen linisyativ en konpanyen,  i devret en lobligasyon ki nou met lo nou, ki nou pei i met lo nou pou nou kapab prezerv enpe nou lanvironnman e pou nou kapab mitigate anpe sa gro cost ki nou annan dan nou fuel bill so. Sa se bann keksoz e mon toutafe dakor avek Onorab Joseph ki se bann keksoz ki nou bezwen fer. Me selman i annan en keksoz ki nou devret al pli lwen. Souvan mon vwar ki nou focus, I pa egzakteman sa me focus nou gouvernman se lo bann gro proze ki vizib. Nou bezwen aksepte, nou gouvernman i kontan bann proze ki ou kapab vwar, ki vizib, ki stand out pou kapab dir poudir la la nou’n fer sa bann keksoz. Me souvan nou bliye ki se bann pti pa ki pou anmenn nou pli devan e nou pa fer sa bann pti pa e  nou a anmenn – mon pros pou mwan dir sa demokrasi dan proteksyon lanvironnman o nivo nou pep. Nou fer bann keksoz, nou pe rod bann gro proze toultan, parey la nou ava annan en wind farm me selman nou bliye ki nou devret kapab ankouraz bann dimoun pou fer enn pti bout, enn pti bout pou li kapab li osi azout avek sa 8.2% pou ki li osi i ava fer son kontribisyon.

 

Mon annan sa lenpresyon ki atraver sa ki zot dir ki this is government’ business se gouvernman ki fer sa bann keksoz koumsa. Gouvernman i zalou sa bann proze konmsi, kit ek li, li ki pou fer akoz li ki pou ganny en benefis ladan. Ler enn pti dimoun i fer en keksoz koumsa nou pa vwar son lenportans e mwan mon ti a kontan atir zot latansyon sirtou lo lot kote latab, zot ki reprezant gouvernman poudir ki i annan bann pti keksoz ki nou kapab fer partou pou kapab ede fer nou kontribisyon dan proteksyon nou lanvironnman, dan devlopman lenerzi renouvlab.

 

Si en dimoun dan leo Val Dandor i santi ki i kapab met enn pti laponp akoz nou konnen i annan en problenm delo laba anler, Deputy Speaker i konn tre byen, nou’n koz lo la bokou – si enn pti fermye Val Dandor i anvi envestir dan en pti laponp e lo la i annan enn pti pano soler ki pou ed li pou li ponp sa delo laba anler nou devret pe regard li, nou devret pe konsider li koman en dimoun ki pe met en blok, en ros dan sa miray pou ede konstrir en lavenir pli sustainable. Me souvan nou bliye, nou pa gete sa bann keksoz koumsa, nou get zis bann gro proze e souvan, in fact taler nou’n fek vwar sa legzanp ler Onorab Georges in dir i pou kout en kantite larzan pou fer sa wind farm, reaksyon sete, i pa nou larzan. Mon dakor i pa nou larzan. Me si en dimoun i anvi donn nou enpe larzan pou nou fer keksoz annou fer keksoz ki nou krwar i devret bon pou nou. Pa akoz en dimoun, en pei i donn nou enpe larzan ki nou fer sa ki li dir nou fer oubyen sa ki li i anvi fer.

 

So annou sey gete ki manyer nou pou tap dan lenerzi endividyel bann Seselwa pou ki zot osi zot kapab fer zot bout. Me ler mon lo sa kestyon devlopman i al pli lwen ki sa. Ozordi nou pe koz lo bann gro lotel ki pe fer isi Sesel, bann 5 star, bann 5 star, zot vini zot fer zot lotel zot konstrir e zot anmenn touris. Zot zot pa invest dan lenerzi zot, zot invest dan zot lotel, i normal. Apre zot aste lenerzi, zot aste delo, zot aste sa bann keksoz. Mwan mon krwar enler nou’n ariv ler pou nou kapab dir avek sa bann devloper poudir be ok vi ki ou pou met en presyon enerzetik anplis lo nou pei, nou ti a kontan vwar ou, ou lakonpanyen pe invest dan enpe sa bann teknolozi. Get parey Ste Anne, ozordi nou pe al met bann wind farms lo bann zil ant Victoria avek Ste Anne, savedir i annan divan la. Be Ste Anne Resort ti’n kapab ganny demande pou li osi gete ki manyer i kapab invest pou li fer apepre 10% oubyen 15% son konsomasyon lenerzi ki li i ava generate e nou konn tre byen ki sa i pa en roten pou li, okontrer bann touris atraver lemonn konmela pe rode kote zot kapab ale dan en pei, dan en lotel ki napa en gran carbon footprint, ki konsyan proteksyon lemonn. Donk i en bout dan envestisman, i en bout dan devlopman ki pou kapab ede avek sa vizyon ki nou pe fer. So mwan mon ti a kontan ki gouvernman i aret zalou enpe pou li gard sa bann keksoz, lir sa bann nouvo teknolozi, li ki pou fer, li ki pou fer, les nou nou a fer. Non lezot dimoun osi i kapab fer. E annou ankouraz zot pou zot fer sa bann keksoz.

 

Lo sa kestyon devlopman kot mon dir par ler bann pti keksoz nou pa fer, zis anfas nou i annan en vilaz ki pe al ganny konstrir e hopefully 5 mil lakaz i ava sorti lo la. Mon ti a kontan poz sa kestyon avek nou menm nou isi avek sa Lasanble. Ki nou’n fer pou nou anmas 1 watt elektrisite oubyen en lanmok delo lapli dan en vilaz 5 mil lakaz, en vilaz nef? Nou pa’n fer nanryen, personn pa’n mazinen. La nou pe fer lakaz. Me ler nou fer lakaz nou bezwen osi mazin sa bann keksoz this is what consistency is all about se ki nou sey entegre e nou sey gete ki manyer atraver tou sa twa lakaz, tou sa surface area ki nou ti kapab fer pou nou ganny enpe lenerzi e anmas enpe delo, se sa en vizyon pou lavenir. E a sa moman la mon ti a kontan kekfwa zis koriz en pti sa persepsyon ki Onorab Francois in fer konmkwa ki ler in koz lo solar energy mon krwar in mazin preske eksklisivman photovoltaic base energy. I annan en kantite lezot lenerzi ki ou kapab pran dan soley atraver bann mirrors, bann reflective mirrors ki focus bann lenerzi ki sof delo, ki apre sa delo i ganny converted into steam, i kapab fer marse serten keksoz. I annan en kantite e sa se bann teknolozi pli basic ki litilizasyon photovoltaic cells. Donk mon mazinen poudir inler kekfwa pou nou aret get gran, zis gran me selman annou get pti pti osi.

 

Dernyen pwen ki mon ti a kontan fer se ki annou konsistan osi dan nou bann relasyon enternasyonal. Mon konnen poudir Sesel i pti pti  e Sesel pa kapab dir avek lasin avek Lanmerik ek lenn poudir zot ki bann pli gro polluters lo planet. Non pa kapab al dan sa lager, toufason zot pa ni pou ekout nou. Me selman ler nou pe angaz nou avek sa bann pei, nou bezwen osi met devan nou bann pwen. Ler nou dan bann forum enternasyonal nou bezwen osi remind zot ki zot annan sa bann devwar pou zot get pli lwen pou zot sanz serten keksoz. Nou pa kapab zis aksepte rezon sa enn ki pli for e dir akoz i pli for i bezwen meyer. Non. I pli for me i pa devret bliye ki i annan bann pti proze la ki pe soufer e ki devret pe ganny gide, ki  pe ganny anmennen zot osi dan sa lalit pou en more sustainable world.

E finalman mon ava dir ki annou osi fer enpe atansyon ki nou pa ganny tro servi tro lontan koman en laboratwar. Nou devret ede, nou devret partisipe dan resers pou bann lenerzi renouvlab me selman mon ti a zis kontan zis dir annou fer atansyon, nou pa pou gannyen absoliman e otomatikman 8% nou lenerzi atraver sa wind farm. Sa i eksperimantal and this is the optimum output dapre bann kalkilasyon. Me menm MASDAR pa konnen si nou pou ganny sa akoz zot osi zot ankor pe experiment avek sa nouvo teknolozi. So it’s not a given fact ki sa pou anmenn nou, zot ankor pe eksperimante e nou nou pe ed zot dan sa eksperimantasyon. So annou get li.

I menm parey petrol oubyen delwil parey zot dir dan nou delo. Mon’n vwar, nou tou nou’n vwar Prezidan pe santi dan en poban. Be santi dan en poban, en keksoz ki parey delwil i pa neseserman delwil akoz si i ti delwil ki nou ti’n vwar lemonn antye ti pou konnen. I annan bokou steps avan nou ariv dan sa direksyon e annou pa anbet nou lekor oubyen annou pa les lezot dimoun anbet nou pou dir tou sa bann solisyon, sa bann keksoz se en given fact. Nou annan bokou distans pou nou avanse, nou annan bokou lenerzi pou nou mete e nou lo sa kote latab parey Onorab Georges in dir nou committed dan sa direksyon me selman annou fer li, annou fer bann pti pa partou kot nou kapab fer, annou angaz nou pep akoz nou pep pou le moman dapre sa ki mon vwar i pa tro tro fatig li. Mwan laplitar ditan si mon pas kot Mohan mon vwar en dimoun pe pran en glob, i pa pep ran en energy saving bulb ki kout R110 li, i pe pran en R5 ki fer lasin. Akoz kefwa nou pa’n konnen ki manyer pou ankouraz li. Kanmenm sa enn ki R5 pou brile dan 2 semenn, i a vini i a rod en lot R5 me selman sa enn R110 i ankor tro ser pou li.

So nou annan en kantite pou nou fer pou nou kapab angaz nou pep e aret zalou sa keksoz, anmenn nou pep ansanm dan sa challenge ki zoli, ki nob e pou nou kapab dir demen dir nou pep in fer sa bann kesoz.  Zot zot kontan dir zot ki’n fer. Zot in mansyonn Prezidan Michel apepre 25 fwa la, konmsi tou sa bann keksoz i sorti kot Prezidan Michel. Non, lepep. Tou dimoun i annan lide e annou ankouraz zot lide e annou fer zot lide vin realite e la nou ava annan en pep ki committed e ki i anvi e ki i konpran akoz nou bezwen fer li. Mersi Mr Deputy.

HON MARIE LOUISE POTTER

Premyerman mon ti a kontan remersye tou bann ki’n entervenir lo sa size e ki’n eksprim zot sipor pou sa mosyon, mon kontan ki lo en tel size nou kapab kantmenm annan serten largreman bipartisan e ki nou rekonnet tou lede kote nesesite pou nou osi bouz dan sa direksyon. Mwan osi kontan ki nou rekonnet bann defi ki en tel proze i antrennen sirtou an sa ki konsern kou pou kapab envestir dan en lendistrir kot nou ava kapab annan e servi lenerzi renouvlab e diminyen nou depandans lo lenerzi a baz fossil fuel pou bann rezon ki nou tou nou rekonnet e nou’n osi rekonnet ki i ankor annan bann gaps ki nou ankor annan, i ankor egziste dan nou bann metod, dan nou bann kiltir, dan nou bann latitid, dan nou bann fason ki nou antreprann sa size, dan bann labitid ki nou’n acquire over time, nou’n grandi avek.

 

Me kantmenm nou bezwen reste touzour realis fas a en tel size. Nou bezwen realis lo vites ki nou kapab avanse dan sa direksyon, vites ki nou kapab ofir amezir ranplas nou sours lenerzi, nou bezwen realis lo resours ki nou annan koman enn pti pei a nou dispozisyon pou nou kapab fer sa transfer, sa switch. Nou bezwen realis lo kapasite, pa zis anterm kapasite imen me kapasite lespas, nou en zil, nou pa osi gran ki La Reunion e Moris, nou annan nou lespas teren par egzanp. Si nou pe koz lo lenerzi par egzanp divan, nou napa bokou lespas pou nou met sa bann lenfrastriktir e li osi i annan son bann konsekans ki antrennen ki son bann konsekans lo lanvironnman, lo lanatir, lo pwennvi estetik, konsekans lo pwennvi noise pollution ki i anmennen. Donk tou sa la i bann defi ki kantmenm nou devret realis kan nou pe debat en size parey lenerzi renouvlab ki en teknolozi ase nouvo ozordi dan lemonn e nou bezwen osi realis lo rol ki nou krwar gouvernman i devret e i kapab zwe dan sa domenn.

 

Mr Deputy mwan mon krwar ki si lemonn oubyen si nou oule reisi fer sa transfer lenerzi lo nivo mondyal e lo nivo lokal si nou anvi win sa battle mon  krwar pa si nou pe bezwen met sa responsabilite squarely zis lo gouvernman, mon pa kwar ki gouvernman pou reisi lo li tousel akoz sa i pou vin pa zis atraver en polisi eksetera oubyen resours me i pou vin atraver en sanzman labitid en mind set e nou tou nou kapab zwe en rol pou anmenn sa transformasyon par egzanp legzanp ki Onorab Ferrari in donnen ki sa endividi ti pe aste en glob R5 laba kot Mohan, mon  krwar in mank en loportinite pou li koz ek sa dimoun ki  pe aste sa glob, ‘be mon Joe akoz ou aste sa enn?’ E petet menm ed li ek en pti diferans si i ti napa ase larzan, rod en glob R110. La Onorab Ferrari ti ava pe fer en kontribisyon dan sa legzersis edik nou pep e re-endik nou lekor lo sa size. Mon krwar mon’n servi sa legzanp pou mwan montre ki nou tou nou kapab ede e pa zis met sa fardo lo gouvernman.

 

En lot legzanp mon kapab servi be lekel ki anpes en endividi oubyen en fanmiy anmas son delo seli ler lapli i tonbe, mon konnen i annan en kantite fanmiy ki deza pe fer li e gouvernman pe zwe son par dan sa sitiasyon kot i pe donn bann kredi, bann fasilite loan san lentere pou kapab ankouraz dimoun pou fer sa transfer harvest zot prop delo, met solar heating eksetera. So mon krwar nou tou nou annan en rol pou zwe dan sa direksyon e mwan osi mon dakor ki nou bann  regilasyon planning i devret pe a la venir ensiste ki bann devlopman, bann gro devlopman ki ganny fer ki zot kapab fer zot prop aprovizyonnman lenerzi e osi delo. Mon konnen, mon kontan pou konstate ki deza i annan serten lotel 5 star ki pe prodwir zot prop delo. Mon konnen Ephelia pe fer li, mon konnen Banyan tree pe fer li, mon konnen ki sa nouvo lotel Praslin laba pe fer li. Mon krwar ki nou devret ensiste parey Prezidan Michel in dir nou dan son diskour leta la nasyon, nou bezwen a la venir fer an sort ki tou bann batiman ki ganny konstrir parey sa nouvo batiman Pension Fund ki zot  ava annan zot fasilite pou anmase e stok e menm resikle zot prop delo alor mon krwar ki nou pe fer serten pa no matter how small me desisiv e bann pa enportan dan sa direksyon. E avek nou aksesyon dan IRENA mon krwar sa i ava donn nou en lot pouse, en lot pa ki ava permet nou atenn nou bann vizyon, bann misyon ki Komisyon Lenerzi parey mon’n dir in fek fini travay lo la e in fek ganny aprouvasyon cabinet pou nou kapab annan en plan pou aprovizyonnman lenerzi Sesel dan sa prosen 10 an, 20 an, 30 an, 50 an e pou bann lezot zenerasyon ki a vini.

Alor lo sa baz Mr Deputy Speaker mon demann nou Lasanble pou siport sa laksesyon. Mersi bokou.

MR DEPUTY SPEAKER

In ariv ler pou nou pran en vot. Tou sa ki anfaver? Okenn ki kont?

Sa mosyon in ganny aprouve. Se lo sa not ki nou ava adjourn nou ava re-zwenn Mardi prosen.

 

(Adjourn to next Tuesday)