::
Home » Verbatim » Verbatim -First Term 2011 » Thursday 3rd March 2011

Thursday 3rd March 2011

Download PDF


NATIONAL ASSEMBLY OF SEYCHELLES

Thursday 3rd March 2011

The Assembly met at 9 am

National Anthem

Moment of Reflection

Mr Speaker in the Chair

MR SPEAKER

Avan nou komans deba pou ozordi mon krwar Whip mon’n deza koz ek ou lo kestyon sante dan Lasanble Nasyonal. Mon remarke ki zot in deside rekomans avek, mon pe donn en ruling ki nou National Anthem dan Lasanble Nasyonal i en moman solanel e non pa en moman dan Lasanble Nasyonal pour nou vin sant li. Nou zwe, nou debout atantif me nou pa pe get en match volleyball. So sa i en ruling..,

 

(Interruption)

 

..non, non nou’n dir, mon’n koz ek ou Whip lo la avan, ti’n arete, right? Onorab mon’n koz ek ou Whip, nou’n diskite e se sa en ruling. Mersi.

 

Lo mon lalis mon annan Onorab Charles.

 

HON JEOVANA CHARLES

Mr Speaker, Onorab Manm Lasanble, tou dimoun a lekout, ser zabitan Roche Caiman bonzour. Mr Speaker avan mon komans mon lentervansyon mon ti a kontan fer enn pti remark lo lentervansyon fer par Onorab Prea Mardi. Onorab i konn tre byen ki mwan osi mon vreman konsernen avek nenport size ki konsern zanfan, paran e vye paran e sirtou sa problenm welfare. Me parkont mon anvi fer enn pti remark ki sa allowance ki bann fanmiy ki pe ganny sipor la fanmiy in ogmante pou sorti Rs1700 pou vin Rs2030 a plentan e bann lo demi zournen pou sorti Rs1100 pou al Rs1400 e sa in pran lefe depi le 1er Zanvye. Tou sa bann dimoun in ganny back date mwan pase e si i annan okenn dimoun ki pa’n ganny zot logmantasyon oubyen zot back date mon ti a kontan zot al tyeke kot sekirite sosyal.

 

Mr Speaker e la mon pe koz pour sa 693 dimoun an tou ki preski tou zot bann madanm ki pe okip enn zot fanmiy e sa pa enkli bann home carers.

 

Mr Speaker ler ou fer kado en dimoun ou fer li avek ou leker. E si sa dimoun i kontan, ki sa ki mal avek? Fer kado en revey souvenir ki annan portre Lepap e Prezidan Michel lo la, ki annan mal avek sa? Les sa bann dimoun zot menm fer zot swa si zot pou pran oubyen non. Konbyen dimoun dan lopozisyon ki’n apros nou, ki’n telefonn nou pou demann en revey. Mwan mon’n donn preski tou sa ki’n demann mwan ziska ler in fini. Si en revey i fatig en parti politik, dir mwan kwa ki pa pou fatig zot alors? Eksa zot dir pa donn Lepap, me vann li. Quel contradictoire? En revey donnen koman en kado nwel pe lev kestyon ant legliz e leta, ant larelizyon e politik. Sa i montre ou kwa ki kapab arive lavey en eleksyon. Sa ki anvi fer politik avek revey go ahead lepep pe note.

 

Mr Speaker ozordi en lot kado ki mon ti a kontan demann Prezidan Michel se pou esey fer en demars pou demann enn son bann zanmi pou regarde si zot pa kapab fer nou ganny kado enpe televizyon. Pour nou fer kado sa bann dimoun ki pe lager ek revey pour zot kapab esey vwar ki sa ki pe pase atraver lemonn espesyalman dan bann pei mwayenn oriyan. Mr Speaker akoz ler mon ekout lopozisyon koze depi Mardi mon ganny lenpresyon ki zot pa get televizyon oubyen zot visye, zot dannen, e zot pran plezir pou anbet e boufonn dimoun.

 

Mr Speaker depi ler lopozisyon in komans koze Mardi e o moman zot pronons zot bann premye mo dan sa Lasanble nou ti nepli pe koz lo leta nou nasyon, nou ti pe plito koz lo leta lopozisyon limenm. Laverite se ki leta lopozisyon set en dezapwentman, zot en dezapwentman pour zot lekor e dezapwentman pour zot siporter parey enn zot siporter ti dir mwan semen pase, konmsi en pti garson ti dir mwan semenn pase, ‘be zot lespri pa text zot pou dir zot sa bann vye rikord in ler pou aret zwe?’

 

Mr Speaker laverite se ki sak fwa Prezidan Michel i koze lopozisyon i grense akoz zot pa kontan laverite. Ladres Prezidan lo leta la nasyon in enn ranpli avek sikse lepase, e bokou bann bon keksoz pou lavenir son pep e son pei. Be ki nou’n tande, sanmenm sa vye rikord reye par lopozisyon. Telman napa keksoz pour zot koz lo la kanpanny pou ganny fer lo size later ki pe ganny vann avek etranze, napa problenm. Anmennen zot, parey in ganny dir dimoun a konnen ki pe pase, ki’n pase dan sa bann zafer later vann avek etranze.

 

Mr Speaker Mardi swar lo SBC nou ti kapab ekout lopinyon en lot zonm saz, lo sa size later pour Sheikh Khalifa. Sa interview ti enn vreman enteresan fer par ansyen Prezidan Mancham, se pour sa rezon osi ki mon pe rod enpe televizyon pou mwan fer bann dimoun dan lopozisyon vwar ki pe pase lo lasenn enternasyonal osi byen ki nasyonal. Mr Speaker konmdir Jonah, ‘sa bann diskour, en bann diskour en bann dimoun desesperate, too much’. En Onorab i ganny lodas pou dir ki dimoun pa kontan Prezidan Michel, be mon zenn Onorab, lekel ki ti vot pou Prezidan Michel an 2006, pa lepep Seselwa avek en poursantaz. 53.73%? E zis apre ki rezilta ti’n fini anonse dan son ladres avek lepep Seselwa Prezidan ti dir mon quote ‘Mon pou vin en Prezidan pour tou Seselwa’ e se sa ki in pratike depi sa. E la mon anvi dir sa zenn Onorab ki yer, ozordi e demen lepep Seselwa i kontan e pour kontinyen kontan Prezidan Michel e plitar mon pou dir li akoz. Me la mon anvi dir zot ki le 21 Me 2011 prepar zot fler doranz akoz i annan ki pou tonm sek ler rezilta pou anonse.

 

Mr Speaker sel Onorab fanm dan lopozisyon yer ti fer son diskour lo Prezidan Michel.  I ti pe lager avek portre Prezidan dan bann landrwa piblik e ler SNP pou ganny eleksyon pou napa portre Onorab Ramkalawan dan okenn landrwa piblik. Be sa ou annan parfetman rezon, dan sa pei ki apel Sesel, sel dimoun ki pou reste Prezidan apre eleksyon se pa lot ki Prezidan Michel. Onorab in koz lo Prezidan koman en ero me wi Prezidan Michel i nou ero, ero bann fanm dan Parti Lepep. Onorab in osi vin koz lo diferan size yer enkli koripsyon. Koman en fanm Mr Speaker ti a bon ki nou siport fanm e mon konsey pou Onorab se pa zanmen koz lo bann size ki i pa krwar ladan. I annan en ta keksoz ki mon ti a kapab dir me mon krwar mon pa devret pe fer li akoz ou pou met mon deor Mr Speaker.

 

Mr Speaker ler nou koze dan sa Lasanble nou bezwen get our facts right. Yer mon’n ekout mon koleg, i pa la, Onorab Derjacques atantivman. E ler in fini mon ti bezwen dir li Roche Caiman lopozisyon pa pou zanmen ganny eleksyon. Be Mr Speaker mwan ler mon fer vizit mon pas partou, kote Onorab Derjacques in pase li? Zis dan sa lakaz ki annan 3 fanmiy ki pe reste? Eski enn sa bann fanmiy pa’n dir li akoz i annan 3 fanmiy dan sa lakaz? Kote Onorab Derjacques ti zwenn bann first time voters. Onorab Derjacques, zot bann kanmarad dir li, atansyon akoz i pe donn fo lenformasyon son lider. Son lider pou fou li deor ler i pou konnen poudir i pa’n pas kot personn e i pan zwenn okenn first time voters eksepte bann zanfan ki pe zwe boul obor semen. Mr Speaker Onorab in vin avek en litani problenm e in dir nou ki si SNP i ganny eleksyon, tou sa bann problenm pou rezourd. Me sa problenm kot avoka i pran larzan kliyan apre i pa fer zot travay sa mon pa’n tann li nonm ditou. Onorab sa osi nou bezwen adrese akoz tro bokou dimoun pe koz lo la e mon napa en solisyon pour sa mwan.

 

Mr Speaker Onorab Derjacques i dir nou ki Seselwa nepli al fancy fair. Onorab sa pa akoz Parti Lepep me akoz ler zot kanpanny avek ou ou pa pey zot. Zot napa larzan pou aste burger, ni limonnad e kwa? Sa ki nou bezwen fer se pey nou bann dimoun…

 

MR SPEAKER

Onorab Charles retourn lo leta la nasyon.

 

HON JEOVANA CHARLES

Leta la nasyon Mr Speaker.

 

MR SPEAKER

Proceed Onorab.

 

HON JEOVANA CHARLES

Ler ou pa pey dimoun Mr Speaker i apel leta la nasyon sa. Mr Speaker zabitan Roche Caiman in dir mwan yer swar pou dir ek Onorab Derjacques ki sa eleksyon ki pe vini i en eleksyon Prezidansyel e non pa en eleksyon parlmanter. Akoz ler i pas kot zot i dir zot fodre – dir li poudir fodre i vann son Prezidan e non pa son lekor akoz ler i pase i dir zot napa problenm avek Prezidan me i ti a kontan enn pti sanzman dan Lasanble.

 

Mr Speaker devan mwan la i annan en verbatim en meeting ki lopozisyon ti fer Roche Caiman le 16 Novanm 2008 e tou sa ki’n ganny dir dan sa meeting i ankor pe ganny repete dan tou bann diskour dan sa Lasanble depi Mardi. Dan tou bann diskour lopozisyon nou tann koz lo sitiasyon semen, delo malpropte, security clearance, koripsyon, prostitisyon, eski sanmenm tou ki annan pou koz lo la pandan sa 5an kin pase?

 

Mr Speaker lopozisyon ozordi zot pe koz lo lapey travayer, lo bann dimoun pli vilnerab konmsi sa bann dimoun pa devret pe form parti nou sosyete. Si nou anvi nou pei annan en lekonomi solid, a en moman donnen nou bezwen annan serten sakrifis ki nou bezwen fer me pli enportan se ki dan sa prosesis gouvernman pa’n kit personn deryer, se pour sa rezon ki gouvernman ti revwar lasistans welfare pou kapab asiste tou bann fanmiy ki ti pou ganny afekte dan sa prosesis. En fon pour bann zanfan dan tou lekol osi ti ganny entrodwir pourki bann zanfan ki vilnerab i ganny son goute pour li kapab kontinny son lazournen lekol. Sa in toultan vizyon nou dirizan, premye Mr France Albert Rene, e kontinyen e konsolide par Prezidan Michel. Tan ki zot kontinyen koz lo sa bann zafer, mwan mon bezwen remet keksoz an perspektiv, mon bezwen a mon tour pe kontinyelman dir bann zenn Manm Parlman lopozisyon kote nou sorti e lekel sa vizyonner ki ti vwar lwen? I malere Mr Speaker, non mon pa’n zanmen demokratik. I malere Mr Speaker ki zonm dan son natir imen ler i pli konfortab, ekout sa Onorab Ferrari, i bliye kot i sorti, pli i annan, i anvi plis, i bliy bann lezot valer ki fer li pli dir e ki dimoun son lavi pli valer e profon.

 

An Desanm 2007 ler mon ti fer mon prezantasyon lo bidze, mon ti dir, sa mon site ‘I sitan fasil pou perdi devi sa senp fe ki sa lemonn, i en vye mon’n e ki napa nanryen vreman nouvo dan sa mon’n, espesyalman pa problenm ek difikilte. Sa de zafer i osi vye ki later e nou osi bliye ki sa i en gran mon’n e sa ki pe arive avek nou ozordi i pou arive ek en lot demen. E sa ki pe pas kot nou ozordi yer ti rann vizit nou vwazen. Problenm pa konn ni frontyer, ni miray, ni balizaz, ni ras. Sa monte ki pri lavi pe monte pe ariv partou dan lemonn antye’. Mr Speaker mon ti byen ler mon ti dir sa, gete ki pe arive dan bann pei mwayenn oriyan pourtan zot annan resours, zot annan delwil, zot annan lor, zot annan dyanman, zot annan larzan konm dir Mr Mancham. Me nou isi Sesel nou napa nanryen, me gouvernman parey mon’n dir taler in amelyor lasistans ki i donn bann ki pli vilnerab in kree fon pou zanfan dan lekol, tou dernyenman in kree fon pou pti anfans e gouvernman pe kontinyelman reget tou lezot progranm.

 

Mr Speaker Prezidan in vin dan sa Lasanble Vandredi pase e in adres tou nasyon Seselwa lo leta nou nasyon. In donn nou en lide koman i vwar nou pei pe ale, in permet li donn nou en kont randi ki bann gran pa ki nou fer e ki sa ki nou bezwen fer anplis pour nou al a’n avan pandan sa nouvo lannen ki devan nou. Mr Speaker pou mwan sa ladres fer par Prezidan Vandredi pase lo leta la nasyon in enn ranpli avek sazes, en zonm nob. Prezidan in annan sa determinasyon, sa lantousiazm e en vizyon kler pour son pep e son pei. Striktir son diskour Mr Speaker lo leta la nasyon in enn kalm, dou, fran e senp ki tou dimoun in kapab konpran.

 

Mr Speaker Prezidan in komans son diskour avek en plan zeneral. In swiv par nou tenm nasyonal e answit par en regar lo diferan laspe nou lavi ek travay son gouvernman. In koz lo size pli enportan tel ki nou lekonomi e bann fakter nasyonal osi byen enternasyonal ki konsern nou ki’n anpes nou ariv kot nou ete ozordi. Mr Speaker pour nou ki’n asiste ladres lo leta la nasyon 2011 nou’n ganny loner pou temwanny en moman istorik dan nou listwar. Ladres Prezidan Michel in en lapel pour tou Seselwa pou inifye nou zefor, koste ansanm e pou al konbat bann defi reel ki nou pei pe fer fas avek. Mr Speaker vizyon Prezidan Michel se pou kree en nouvo Sesel, en Sesel modern ki ekipe pou navig dan sa monn globalize. Se pour sa rezon Mr Speaker ki ozordi mon pe dir ki sel dirizan i kapab diriz sa pei se pa lot ki Prezidan Michel.

 

Prezidan dan son premye manda in fer sir ki in protez tou nou bann aki sosyal. In dedye son letan debat pou zentere son pei. Lo nivo lokal osi byen ki enternasyonal. In annan en lapros konsiltativ anver son pep e kominote. In demontre konpasyon e imilite. In annan konfyans dan son lazenes, in vin en sours lenspirasyon pour son pep. In fer ki nou bann trwazyenm az i zouir en nivo lavi ase eze. In angaz tou sekter kle dan prosesis desizyon e devlopman pei. Sa ki pa’n partisipe napa rezon pour zot konplent. Se sa prensip sa zonm ki mon pou rekomande avek lepep Seselwa pour sa prosen eleksyon. Se sa bann prensip ki fer lepep ganny konfyans dan son gouvernman, se sa prensip ki’n ankadre tou kous popilasyon. Se sa bann prensip ki’n ede fer nou sa ki nou ete ozordi. Se sa bann prensip ki’n fer nou vin en pep ere e dinny. Se sa bann prensip ki donn nou lespwar e enspir nou, se sa bann prensip ki nou pou fer nou vin en pep. E finalman se sa bann prensip ki pou donn Sesel laviktwar dan eleksyon dan de mwan.

 

Mr Speaker prezan avan mon terminen mon annan sa pou dir avek mon elektora ki’n elekte mwan pou 4 manda. Zabitan Roche Caiman dan sa letap ki nou’n sorti, sa prosesis globalizasyon vizavi devlopman ekonomik nou pei ti reprezant pli gran defi pou Sesel e nou dan distrik nou pa ti ganny eparnye. Kot nou’n reisir arive ozordi pa’n ariv par azar. Se rezilta en vizyoner avek en lekip solid ki’n travay dir nwit e zour e sa se pa lot ki nou dirizan Prezidan Michel. En dirizan eksepsyonnel, kouraze pou diriz nou pei dan moman difisil ki pa ni per ni lasaler, ni lanmans pwalon so. In fer sanzman ler ti fodre, in fer reform ler ti fodre, in fer azisteman ler ti fodre, in vin lo teren ler ti fodre, in vin kot ou pou zwenn ou e koz ek ou e ekout ou, in fer tou pou ou. Mon ti a kontan alor demann zot tou pou etre onnet avek zot lekor e demann zot lekor enn pti kestyon senpe e reponn onnetman. Eski ou krwar ki i annan okenn lezot dimoun ki pou kapab fer pli byen ki Prezidan Michel? Si pa Prezidan Michel, dir mwan lekel?

 

Mwan Mr Speaker avek tou zabitan Roche Caiman mwan anvi salye kouraz, lonnekte e konfyans ki Prezidan Michel in met dan sa pep, sa pep Seselwa. Mwan ek zabitan Roche Caiman nou pou renouvle nou determinasyon e nou sipor pou Prezidan Michel nou pa pou kapab les perdi tou nou sikse, tou nou bann zefor e sakrifis ki atraver bann lannen nou’n reisir akonplir ansanm. Nou pou reste angaze e nou pou kontinyen tenir pour nou donn Sesel en laviktwar.

 

An terminan Mr Speaker mon ti a kontan swet tou bann madanm dan Sesel en bon lafet le 8 Mars. Kontribisyon bann madanm dan Sesel in enn enorm e in ganny demontre dan tou sekter e tou kous nou sosyete. Bann madanm, bonn fet, mon anvi dir zot ki en viktwar pou Prezidan Sesel i en viktwar pour tou fanm Seselwa. Mersi Mr Speaker.

 

HON ANSLEY CONSTANCE

Mr Speaker, Manm Lasanble Nasyonal, ser ek frer Digwa e zabitan zil pros sa pep beni bonzour. Lanbyans karnaval in pare, latroup Digwa osi in pare. Frer ek ser Seselwa avek Prezidan Michel nou desten i asire, pep Seselwa seryezman pran konsyan sa e annou gard nou lespwar vivan.

 

Vandredi pase Prezidan James Michel in pronons son diskour avek son pep. E son diskour in ganny delivre dan en langaz ki lepep Seselwa in konpran tre klerman e kot lepep pe analiz li dan en fason konpreansiv sakenn dan son manyer. An dot mo Prezidan Michel in demontre ki ankor ennfwa i pe toultan reste konekte avek son pep ki swa dan botan ou dan movetan. Mesaz Prezidan Michel i tre kler ki lepep Seselwa dan son gran mazorite i trouve e i pe viv li toulezour. Letan en dirizan i reste konekte avek son pep sa i demontre en tre gran kalite ki nou apel bon leadership.

 

Wi Mr Speaker, wi mon bann fer ek ser Seselwa, sa kalite dan en dirizan i tre rar. Laktyalite lemonn enternasyonal pe tristeman, mon repete, tristeman fer nou realiz sa. Alor nou merit a tou pri apresye e siport leadership Prezidan Michel e lev nou lavwa e dir tre for wi nou Sesel sa, wi nou zonm sa.

 

Mr Speaker Prezidan Michel ti promet Seselwa en nouvo stil leadership apre son eleksyon. Tonalite e konteni son diskour Vandredi pase in demontre klerman ki anba leadership Prezidan Michel, Sesel in kapab anmenn bokou progre dan sa prosesis modernizasyon atraver son vizyon pou Sesel. Dan son diskour Prezidan in osi portre en lot promes ki i ti fer letan i ti vin Prezidan, la i ti demann lepep Seselwa pou ziz li par son aksyon. Wi ser, fre Seselwa, pep Digwa, atraver son diskour Prezidan in etal rezilta son bann desizyon brav e bann aksyon konkret ki in pran depi ki in ganny elekte par son pep an 2010. Vre sanzman in arive dan sa pei, e vre sanzman pe kontinyelman arive toulezour par bon travay en zonm serye ki krwar dan laviktwar pour son pep a tou pri.

 

Depi 2006 ziska 2010 ti napa eleksyon, me zis lopozisyon ki vwar kosmar eleksyon. Pour sa 5an Prezidan pa’n asize lo State House e konplent. Vey tou difikilte son pep e kritike me in donn tou dirizan sa pei legzanp, in leve, in fer tou sa ki dan son pouvwar pou siport son pep partou. San fanmiy ki son lakaz ti brile La Digue, sa pti fermye Anse Reunion, sa pti peser Bel Ombre, sa zanfan dan liniversite Anse Royale, sa vye paran lo son lili Anse Nord Est, sa pti zanfan dan fwaye Ste Elizabeth, sa ners lopital Sesel, sa teacher lekol au Cap, sa pti biznes dan tou kwen Sesel, anfen lalis i long.

 

Lekel sa dirizan lemonn ki’n annan en tel tenasite, kouraz e determinasyon pou afront en tel legzizans. Wi, avek Prezidan Michel desten Sesel e progre tou Seselwa i asire. 5an in ekoule, en manda donnen par Lepep e son travay ensesab ki in akonpli in retourn ver son pep. En bilan tre sarze me son lakonplisman in tous son pep dan tou sekter lavi. Lekonomi Sesel, sa lakonplisman in ganny mezire anterm sa revirman konplet dan sitiasyon lekonomi pei. Sesel in sorti dan en sitiasyon ensoutenab an 2008 pou zis 2an plitar pran leskalye stabilite ekonomik ki nou pep pe rezouir, mon dir nou pep pe rezouir konpare avek bokou bann gran pei endistriyalize ki nou. Malgre sa wi i ankor annan bokou pour nou travay koman en pep. Me nou bezwen kontinyen fer li ansanm avek sa dirizan serye pourki nou kontinyen fer desann lenflasyon, redwir nou bann det eksteryer, ogmant nou rezerv deviz etranzer, soutenir nou lekonomi lo en bon semen, e pli enportan kontinyen adres, wi Seselwa nou kontinyen travay ansanm pour nou adres pri lavi Sesel.

 

Mr Speaker an zeneral lepep Seselwa i viv sa retablisman dan nou lekonomi atraver pri dan magazen ki pa pe tous plafon parey avan. Nepli annan sa problenm napa, napa latet fermal foreks pou vwayaze, napa leskiz ki lopozisyon i dir ki nou zanfan napa pou al lekol. Wi Mr Speaker anba direksyon Prezidan Michel tou sekter nou lekonomi pe ganny latansyon neseser pourki nou pei e nou pep Seselwa i ranport laviktwar, mon repete, lepep Seselwa i ranport laviktwar lo bann nwizans lopozisyon.

 

Vwala vre sanzman ki lepep Seselwa pe fer. E ki zot oule kontinyelman fer pou laviktwar sa pei. Vizaz Sesel lo lasenn enternasyonal. Mr Speaker lonekte lavi i demande ki en zonm onnet pa pran sa ki pa pou li, i demande kan i napa e i dir mersi ler i gannyen. Yer malgre ki lopozisyon in oule penn Sesel avek black ink e fer nou pa ganny sipor kominote lemonn, ozordi pep Seselwa lonnekte, respe in ganny laviktwar lo mansonz, bat latet, e lanbisyon pouvwar.

 

Mr Speaker nouvo stil leadership Prezidan Michel in redonn konfyans dirizan lemonn dan pep Seselwa. In demontre lemonn malgre nou pti, kwa ki nou annan e kwa ki nou kapab fer koman en pep. E osi i fer Sesel ganny respe menm avek pli gran pei. Rezilta i la se plis sipor pou Sesel, rezilta i la plis progre pour tou Seselwa. Me lopozisyon i kontinyen vir an ron. Ler lemonn pe apresye progre Sesel, kan bann etranze pe demontre en gran lapresiasyon pour nou pep, kan nou prop profesyonnel Seselwa, mon repete, nou prop profesyonnel Seselwa, pe vwar rezilta zot travay e pour sa Sesel, Lopozisyon i divage e sanz tune.

 

Mr Speaker menm nou dalon Morisyen ki konmela zot pa koz ditou lo la, dan son edisyon on line Express, pli gran zournal Moris in fer komanter pozitiv dan en lartik e in dir Sesel i oule vin kapital ekolozik lemonn. Alor mon demande eski i en pese pou rod sa ki bon pour Sesel? Eski nou devret les nou pep sikonbe oubyen donn nou pep sipor? Me ki kantite lopozisyon i benefisye dan tou sa ki Prezidan Michel pe fer? Mr Speaker nou annan enn de swadizan bann lider dan lopozisyon ki bliy tro vit. Atraver zot prop lenvansyon yer ozordi zot vir an ron san realize ki zot pe detriy sa menm pep, sali repitasyon sa menm Sesel kot sa pep i viv. Mwan mon annan lespwar pour sa Sesel akoz napa en pei ki’n ekout lenvansyon lopozisyon. Se pour sa rezon ki ozordi Linyon Eropeen pe devers de bilyon dan nou sekter lapes malgre ki lopozisyon ti pe marye pike pour Sesel pa ganny ede. Bokou pei in vwar Sesel koman en model, en pei ki’n fer reform ekonomik anbisye san menm andomaz son fabrik sosyal. Plizyer pei i sirprann pou konnen ki pli pti pei dan Losean Endyen pe zwe en rol pli aktiv dan lalit kont pirat e proteksyon lanvironnman. Frer ek ser Seselwa, Sesel sa, avek Prezidan Michel nou desten i asire.

 

Lo kote lozman Mr Speaker i ankourazan konnen ki plizyer proze lakaz pe konplete malgre nou difikilte. Lezot pe al komanse sa avek bi kontinyen ed nou dimoun ganny en twa konvenab. Me sepandan nou pa kapab repoze koman en pep ziska ki sak fanmiy Seselwa i annan en twa konvenab lo son latet. Mr Speaker koman mon lo sa size mon ti a kontan redonn lespwar mon bann frer ek ser Seselwa ki ankor pe espere. Annou pa dekouraze avek Prezidan Michel, annou annan konfyans parski tro souvan ou tann en lopozisyon pran plezir pou fer politik bon marse lo sa size. Me annou demann nou lekor en kestyon, me tou sa letan ki lopozisyon i la ki in fer pour ou, konbyen lakaz Sesel ki lopozisyon in mete ki in konstriy, demann ou lekor? Avek tou sa larzan ki lopozisyon i gannyen konbyen fanmiy Seselwa in kapab annan en lakle, in ganny en lakle avek lopozisyon? Akoz zot pa montre lapresiasyon ler nou dimoun i ganny son prop lakaz. Bus shelter i ankor lanmenm.

 

Mr Speaker i dir ou, term i dir ou ‘zwazo pa fer son nik dan en zour’. Me dir mwan lekel sa gouvernman dan lemonn ki annan en polisi kler, kler lo size lakaz si pa isi Sesel. Eski Langleter i fasil ganny en lakaz, Lanmerik, Lafrans, e menm lot kote la Moris? Frer ek ser Seselwa annou get byen, annou analiz byen, annou pa vin lesklav nou prop lentelizans akoz en lopozisyon fatige.

 

Mr Speaker dan sekter lapes ek lagrikiltir i byen ki gouvernman pe ede finans lanmwatye lasirans ki bann peser ek lagrikilter pou gannyen atraver en lasirans, me sepandan mon osi krwar ki fodre ki nou etidye pli profon sa de sekter. Peser ek fermye i de group Seselwa ki travay bokou erd tan par zour e plis zour par semenn, e zot osi travay dan sitiasyon dir. E si nou get byen sa de group travayer i perdi zot lafors travay pli boner ki lezot Seselwa. Alor mon pe demande ki gouvernman i rekonnet sa bon travay ki sa de group dimoun pe fer dan lavansman nou lekonomi. E pour sa, mon propoze ki nou gouvernman i get dan posibilite donn nou bann peser ek fermye en pansyon spesyal ki zot ava touse avan zot ganny zot laz retret reglemanter.

 

Mr Speaker tenm nasyonal sa lannen i ‘Laviktwar pou Sesel’, a mon’n avi i devret fer nou pran konsyans nou legzistans koman en endividi, en fanmiy, en kominote, en sosyete. Mon dir sa akoz napa en paran ki kontan kan son zanfan i fail dan lavi. Tou paran i fer tou pourki son zanfan i reisir, sa dan limenm i en laviktwar pou sa paran e i en laviktwar pour sa zanfan. Temwannyaz fer par Tann Fernande Ladouce, lo televizyon yer swar in penn sa vre portre laviktwar, vre determinasyon en fanm Seselwa.

 

Bann operater bisiklet La Digue, kan i fer sir ki kondisyon son bisiklet i ganny byen antretenir pou satisfaksyon son kliyan. Wi Onorab i en laviktwar pour sa promoter, i en laviktwar pour La Digue, i en laviktwar osi pour Sesel. Letan nou analiz a fon nou vwar ki sa tenm laviktwar pour Sesel i pa telman difisil. Pour met li an pratik akoz i senpleman vedir vin pli konsyan nou bann aksyon e desizyon e azir avek responsabilite.

 

Mr Speaker me le kontrer laviktwar se defet. Sa ki kont laviktwar pour Sesel i bezwen sa bann menm group dimoun ki pe swet defet pour Sesel me erezman fer e ser Seselwa pour Sesel sa ki’n swet son defet pa pou zanmen e pa pou zanmen sorti viktorye lo later Sesel.

 

Pep Digwa e zabitan bann zil pros i konpran tre byen ki laviktwar pour Sesel i en laviktwar pou Prezidan Michel dan prosen eleksyon. E en defet sever pour sa bann ki’n toultan oule anmenn defet pour Sesel. Mr Speaker leta nou nasyon pour bokou Seselwa ki annan lespwar nou kapab dir ki ankor an bonn sante. Malgre ki i ankor annan bokou pour nou fer me ozordi Sesel i vibran, i annan bokou keksoz ki pe arive, bokou proze ki pe ganny realize, bann zenn ki pe pran loportinite dan tou laspe lavi sa i tre pozitiv pour en pti nasyon avek pe resours. Biznes pe esper koneksyon kab soumaren pou ogmant lavites internet, sa byensir pou ed kominikasyon avek lemonn pli vit. Wi, bann Onorab lopozisyon pti Sesel sa avek Prezidan Michel, pep Seselwa nou lavenir i asire.

 

Mr Speaker koman en batize, koman en kretyen pratikan mon santi mwan tre tris pou mwan vwar ki nou bann zenn pe ganny tourmante e afekte zot lavi presye ki Bondye in donn zot. Me mon osi sagren pou note ki dan lepase kan gouvernman ti pe esey lager kont sa fleo, serten lider dan sa menm lopozisyon ti pe ankouraz e menm dir avek nou bann zenn ki zot pou legaliz drog si en zour zot vin opouvwar.

 

(Interruption)

 

 

 

MR SPEAKER

Order, ou pa ankor koze ou ava take up sa issue apre.

 

HON ANSLEY CONSTANCE

..Arpent Vert alor ti vin zot refiz. Eski lopozisyon in sanz son tune? Ozordi i regretab Mr Speaker pou konstate ki ozordi ennfwa e pour tou si nou swiv sa move semen ki lopozisyon i oule anmenn nou ladan, wi mon kapab dir mon per pou sa Sesel akoz nou pou vwar frer ek ser ki’n trouble, manman pou pli plere akoz son zanfan, fanmiy pou dan problenm, e la sosyete pou devir plis dan dekadans. Wi Mr Speaker mon per sa lopozisyon ki mon vwar devan mwan. I domaz ki nou pti kominote Mr Speaker La Digue dan son trankilite pa’n ganny eparnye avek sa fleo. Me a sa pwen mon oule enplor tou Digwa pour nou reste solider dan sa lalit, annou siport kanmarad pourki nou evite ki en lot nou zenn, en manm nou fanmiy i ganny touse.

 

Mon mesaz alor a tou bann zenn Digwa ennfwa e pour tou rezet sa move latitid. Lavi i gou annou lager kont sa devaster ki touye. Mr Speaker, frer e ser Seselwa si nou oule konn vre leta en dirizan ki kapab anmenn plis progre pour sa pei, nou devret konpar tonnalite diskour Prezidan Michel avek sa enn ki Lider Lopozisyon ti fer. Lo en kote nou’n antann en Prezidan tre kalm e fer vre sanzman neseser pou lavansman nou pei, tre pozitiv ver vizyon lavenir e kot pe ankouraz nasyon Seselwa pou ralye dan en menm zefor pou laviktwar Sesel dan tou sa ki nou fer koman en nasyon. Me de lot kote nou vwar en Lider Lopozisyon fatige, kot i pe kontinyen tap son lestoman, kot in perdi son sanfwa, kot in perdi konfyans dan son prop mansonz, kot in perdi konfyans dan nou bann polisye, dan nou bann zenn profesyonnel, dan nou bann teachers, dan nou bann zofisye piblik ki pe travay. Wi ki konfyans nou kapab met dan en zonm ki donn nou bann polisye malgre zot mankman bann non barok parey cowboy, oli ou respe Onorab? Eski ozordi degre ki nou bann zenn profesyonnel pe gannyen napa valer? Lekel ki parfe la anndan dan lopozisyon? Lekel sa dokter konn tou? Annou sanze sa bann kalite mantalite parey toultan ou dir.

 

Mr Speaker, frer ek ser Seselwa pou mwan mon vwar en Lider Lopozisyon fatige ki pe kontinyen lager tousel dan son lanpayaz gran prometer pti doner me pa pe fer nanryen pour sa pei. Mon pou fer Sesel briye dan lemonn Lider Lopozisyon i dir, me anmenmtan i pou pous tou bann etranze ki swa Arab, Endyen, Sinwanr, Larisi, Alman e lezot. Be kote Sesel pou briye lo planet Mars? Kote Sesel pou briye lo planet Mars? Seselwa Sesel pe deza briye ozordi. Tou sa reisi ki nou’n fer Sesel pe briye Onorab Wavel Ramkalawan. Ou pa vwar? Vre ou’n fatige, be pran en sabbatical leave.

 

Mr Speaker kan mon lo sa size mon oule salye zefor gouvernman pou siport Legliz Katolik e pou siport tou nominasyon Legliz Sesel. Me mon oule fer kler ki Legliz in toultan ganny sipor gouvernman Sesel Onorab Henrie. Me koman en batize, en krwayan pratikan mon pa kapab konpran ki rezondet ki serten dirizan legliz i pran plezir fer konpozisyon lo en revey olye servi nou lentelizans pou enstrir moralite dan nou pep. Eski rol legliz pe sanze? Oubyen sanmenm sa ki nou apel flatri Onorab Henrie.

 

Sesel pa aparti zis pou mwan, Sesel pa aparti zis pou Prezidan Michel, Sesel i apartenir pour tou Seselwa ki angaz zot lekor kor e am dan lavansman sa pei. Mr Speaker eski nou lavenir pou kapab asire avek en dirizan ki vwar tou keksoz negative? Eski nou pei pou asire avek en dirizan ki pa donn lespwar son pep? Eski nou pei i asire avek dirizan ki abes lentelizans son pep an dizan nenport e kwa lannen apre lannen. I bliye sa ki i dir yer e petet menm in fini bliye sa ki in fek dir avantyer.

 

Mr Speaker, ki konfyans nou kapab donn en tel dimoun? Frer ek ser Seselwa granmoun in toultan dir ki ler en dimoun i koz lo later sa menm dimoun pe esey sov son prop nanm dan sa zafer. E ozordi mon oule poz sa serten Onorab kestyon pourki nou dimoun i analize. Nou dimoun i reflesir lo sa size later, sa Onorab in oule donn nou lenpresyon ki i pa konn nanryen lo la. Me lekel sa avoka dan lopozisyon ki’n fer tou tranzaksyon vann later Sesel avek bann etranze? Konbyen li sa avoka in gannyen dan sa zafer later? Akoz i pa ti refize fer sa bann move tranzaksyon? Si vreman i ti oule ki nou zanfan, nou gran zanfan parey Onorab Wavel Ramkalawan i dir I devret ganny en morso later.

 

Mr Speaker mwan mon pozisyon lo sa zafer later i tre senp, i tre senp. Aparti ozordi mon demann mon gouvernman anba direksyon Prezidan Michel i devret met tou tranzaksyon later dan sa pei anba en mikroskop e si oule nou sipor sa Lasanble Nasyonal nou’n pare pou ekler sa gro tors.

(Interruption)

 

MR SPEAKER

Order, order.

 

HON ANSLEY CONSTANCE

Mr Speaker, Manm Lasanble Nasyonal, frer e ser Seselwa, konfyans i anmenn lespwar. Zonm pa merit met konfyans dan zis parol ki en lot zonm i dir, me zonm i apresye konfyans e i fer konfyans dan en lot zonm kan i travay, Onorab Ramkalawan e i anmenn rezilta konkret pour son sitiasyon lavi ozordi. Wi, avek Prezidan Michel, pa bar sa Sesel e sa Seselwa. Avek Prezidan Michel laviktwar Sesel, laviktwar pour tou Seselwa enkli pou lopozisyon i asire. Mersi Mr Speaker.

 

 

HON NORBERT LOIZEAU

Mr Speaker, Manm Onorab, pep Seselwa, zabitan Bel-Air bonzour. Mr Speaker ler mon’n get Onorab Constance koze bomaten mon’n ganny lenpresyon ki karnaval pa pe komans demen me i pou komans ozordi.

 

MR SPEAKER

Onorab lo ou speech. Proceed.

(Interruption)

Order. Onorab Loizeau proceed, Onorab Loizeau has the floor. Proceed Onorab.

 

HON NORBET LOIZEAU

Mr Speaker ki vre leta nou nasyon ozordi. Apre ki mon’n ekout diskour leta lanasyon Vandredi pase e koz avek laplipar dimoun i konfirmen ankor ki nou bann dirizan swadizan Parti Lepep in dekonekte avek la realite e ki nou pe viv dan 2 Sesel. Pandan sa deba MNA, apre MNA Parti Lepep in vin koz lo zot dirizan koman en gran larsitek. Zot in koz lo krwasans ekonomik e dir ki lannen pase en gran  – i annan en rezilta pozitiv lo reform ekonomik. Zot in osi koz labous plen lo eliminasyon marse nwanr e lezot reform. Se sa ki zot apel bat latet dimoun e donn zot pikir an morti. Zot in devret premyerman avan reklanm laviktwar rode kote tou sa bann problenm ti sorti. Eski zot ti zis tonbe ater sorti dan lesyel lo lepep Seselwa en zour gran maten? Oubyen eski lepep Seselwa in pas dan tou sa bann soufrans atraver aksyon sa menm swadizan gran larsitek ki’n ganny baton avek Per Fondater.

 

Koman Minis Finans sa pei pandan tou sa bann lannen, konbyen bidze defisiter ki’n donn lepep Seselwa. Sak fwa ki i ti prezant en bidze, i ti dir nou ki i pou prezant nou en sirplis e ti menm ganny dir ki son bidze i merit ganny pri nobel me selman son lannen answit letan i ti vin koz lo bidze nou ti vwar defisit enorm, parfwa ziska anviron 25% bidze total. E zisteman se tou sa bann aksyon ki’n anmenn nou pei kont sa miray ki finalman in anmenn sa menm larsitek ki ti dir avek lepep Seselwa ki i pa pou devalye roupi, e ki IMF i en monst pou ale e tonm an zenou devan sa menm IMF pou vin sekour Sesel, e demann li vin sekour Sesel. Sanmenm sa ki zot dir i merit meday lor?

 

Lekel ki ti anmenn nou devan Lehman Brothers dan en fason aveg, donn zot IOT e tonm dan fo promes sa bann cowboy ki Sesel ti pou konstriy son prop bato ton. I malere pou dir ki si nou det ti’n ariv 800 milyon e nou pei ti’n fait se akoz en sel zonm ki pa ti konnen manyer pou manage nou lekonomi. Sa zonm se pa lot ki Mr Michel. Alor letan zot esey fer nou krwar lizour pou aswar mon dir annan enpe plis respe pour sa pep. Annou pa bliye ki ozordi se IMF ki ankor pe diriz sa pei, se IMF ki dir Sesel ki kalite lalwa pou pase e souvan zot vin dan Lasanble konmdir kreol nennen ouver avek en bann morso lalwa ranpli avek fot ki’n mal ekrir pou esey fer pase zis pou satisfer sa ki bann sef Sesel kot IMF i demande. Zot menm kas tou prensip Standing Orders nou Lasanble pou esey fors sa dan nou lagorz parey Onorab Georges ti dir zot, se byen SNP ki netway sa bann menm lalwa pour sa pei akoz nou kontan nou pei. Tan ka zot swadizan bann vre patriyot zot zis pare pou vot wi e siport tou keksoz avek son fot kontradiksyon ek konfizyon.

 

Mon kontan vwar ki apre tou sa bann teat yer apremidi Onorab De Commarmond ti konfirmen ki se byen IMF ki ansarz sa pei, akoz dapre li si SNP i vin opouvwar e nou sanz okenn keksoz zot pou ale. Mon pa konnen kwa ki i ti servi yer ki’n kapab afekte li.

 

MR SPEAKER

Order, non Onorab retract sa. Onorab ou dir, I retract.

 

HON NORBERT LOIZEAU

Oke mon retract.

MR SPEAKER

Onorab ou bezwen retract sa bout ki in servi en keksoz.

 

HON NORBERT LOIZEAU

Oke mon retract. I fer 3 fwa mon dir ou la, retract. Me eski atraver son parol mon’n ganny en konpran ki se sa pli gran lafreyer Mr Michel ek son parti se pour sa rezon ki menm si lepep Seselwa pe soufer atraver sa bann mezir dir zot bezwen zis reste trankil e les lepep Seselwa manz margoz anmer. Antou ka mon bezwen dir li ki sa i pa stil SNP ditou. Kot i tro lour pour nou pep anmennen nou pou dir avek sa bann dimoun dan IMF e fer zot konpran byen menm ki zot senpleman nou bann partener me ki nou lentere se lepep Seselwa.

 

Mr Speaker nou pa kapab kontinyen zis ponp en dimoun kan ofet son rikord i montre en lakras lerer e soufrans pour lepep Seselwa e la mon krwar in vreman ler pou koriz enpe bann fot par egzanp pou demann pardon tou sa bann dimoun ki’’n ganny kondannen akoz foreks me kan ofete gouvernman Msye Michel limenm ti a pe fer tranzaksyon black market. Letan sitwayen ordiner ti forse debourye, deboury en lot fason pou ganny dolar zot ti apel sa black, me letan gouvernman ti servi menm prensip Minis ti vin dir nou sa se bann tranzaksyon back to back. Eski i pa ti fer en fot e i ti devret dir black to black. E zis sa enn dil ki zot in vin anonse in kout nou pei e nou pep 37 milyon zis atraver to lesanz. Ladan Mr Siva in benefisye 25 milyon roupi e Mr Sulliman e Arab Plantation Club in ganny 12 milyon roupi. Sa i en laviktwar pou Sesel? Alor akoz ki gouvernman pa rann bann dimoun zot larzan e koriz sa bann lenzistis ennfwa pour tou. La nou a dir ki i en laviktwar pou Sesel.

 

Eski ankor enn fwa zot pe kit sa responsabilite lo sa nouvo gouvernman SNP ki pou ganny formen an Me 2011? Lo nou kote nou dir wi nou pou koriz tou sa bann lenzistis e nou pou demande ki sa bann swadizan lofans i ganny efase lo rikord bann dimoun e ki zot ganny rann zot larzan. Nou konnen ki i annan en kantite lezot lenzistis ki zot in komet ki nou pou bezwen korize, tel ki pey serten vye dimoun zot larzan tarmak, pey travayer Coetivy zot overtime, rektifye size larzan Sanmdi e plizyer lezot. Nou pou fer li dan sa lespri rod linite nou pep. SNP pou met rikord prop pour nou kapab vreman tourn en nouvo paz dan listwar nou pei, sa i nou langazman e nou pou fer li.

 

Ler zot vin koz labous plen ki nou annan 3600 Seselwa ki dan travay e ki pe anmenmtan ganny asiste avek lazans byennet sosyal, eski sa i en laviktwar pou Sesel? Zot pa vwar ki sa i en gro problenm. Konbyen ankor ki pa pe travay ki pe ganny asiste. SNP i krwar dan en saler ki reflekte travay sa bann dimoun e osi pri lavi. Aret anmar bann dimoun e liber zot pourki zot pa vin en fardo lo gouvernman. Alor avek sa kalite rikord zot pa kapab vin koz labous plen lo Mr Michel.

 

Ozordi nou kontinyen vwar bann landrwa kot olye anmenn laviktwar pou Sesel i anmenn defet. Letan mon regard montanny La Misere e mon vwar ki lo pli o pwen ki vir lo Viktorya kot i annan en gro batiman e se paviyon Abu Dhabi ki flote mon konsider sa koman en afron e en laont pour nou pep. E pourtan ankor ennfwa se sa menm Mr Michel ki ti kas tou bann regilasyon planning zis pou fer plezir enn son dalon ki anvway jet prive pou li al get paryaz loto tandi ki lepep Seselwa pe fer paryaz sarye seo delo 2er bomaten. Sa i en laviktwar pou Sesel? Ki kalite leker i annan pour son pep?

 

Letan ozordi zot koz lo sa krwasans ekonomik sa ki zot pa dir nou lefe ki Sesel i kapab ganny sa 6% se pa atraver zot prop zefor me atraver en kalite prostitisyon avek nou pei, atraver Sheikh Khalifa. Zis parey letan en prostitye i rantre dan lakour avek 1000 roupi sa larzan pa vin atraver..

 

MR SPEAKER

Onorab mon krwar nou kapab servi en lot mo apart ki prostitisyon. Prostitisyon, fanm devi, unparliamentary terms.

 

(Interruption)

 

..Order.

 

HON NORBERT LOIZEAU

I parey letan en dimoun i vann son lekor..

 

MR SPEAKER

Proceed.

 

HON NORBERT LOIZEAU

i rantre dan lakour avek 1000 roupi, sa larzan pa vin atraver vre travay pourki lafanmiy i devret fyer. Malerezman Sesel osi i enpe parey. Zot vann Sesel e apre zot koz labous plen. Annou aranz nou enpe e annou aret zis kriy laviktwar kan ofet nou devret onte pour sa bann kalite keksoz ki arive dan nou pei.

 

Mr Speaker i pa volapenn fer vantar kan IMF ki pe diriz nou lekonomi, kan nou pep i ankor pe soufer avek bann lefe reform ekonomik, kan nou pep i bezwen esper 26an pour li ganny en lakaz. Kan nou pep i bezwen esper eleksyon pour li ganny de fey tol pou rekouver son lakaz. Kan nou pep i bezwen apply pou ganny lasistans welfare pou kapab fer de bout zwenn. Konbyen fanmiy ki pe soufer kan nou bann dirizan pe koz lo bann gran sikse ki pa rantre dan vant Seselwa. I oke pour bann ki pe byen pase avek zot gro saler e zot privilez me pour lamazorite fanmiy Seselwa lavi i ankor dir. Nou nasyon ozordi pe ekspersyans bokou defi e lavi an 2011 anba gouvernman Mr Michel pa fasil. In ler pou vin reel e aret fer krwar ki tou keksoz i oke dan nou pei. Sa i donn move persepsyon popilasyon.

 

Mr Speaker Prezidan limenm in rekonnet ki pri lavi dan Sesel pe kontinyen ogmante e keksoz i difisil pour bokou fanmiy Seselwa. Vol, labi drog, ek lalkol pe kontinyen ogmante. Krim ek prostitisyon in ariv lo en lot nivo, nou pti pei Sesel i nepli en paradi parey nou ti konnen. E tou sa bann keksoz pi arive anba Prezidan Michel ek son gouvernman ki’n la pou plis ki 34an me pa’n zanmen enterese pou rod solisyon sa bann problenm boner me zot in plito les keksoz agrave. Parey sa msye ki reste anler Curio ti dir mwan i paret ki Mr Michel in pri dan le vilaz dan le nyaz, parey sa progranm zanfan ki ti pase lo SBC dan bann lannen 80. Konm dir manrmay lavi i an roz pour li. I pa vwar sa soufrans ki Seselwa pe pas ladan, in vreman dekonnekte avek lepep.

 

Ozordi dan Sesel nou annan en gouvernman ki enterese avek son pep zis 6 mwan avan eleksyon. Pandan 4an edmi zot pa’n enterese avek byennet sa pep, me 6 mwan avan eleksyon dimyel i koule. Napa de kalite promes ki zot pa pe fer. Pti semen ek peron ki ti ganny promet depi 5an pase pe ganny fer, zot pou ganny tol pou kouver lakaz e lanmizman e labwason pou fer ou bliy ou soufrans pa pou manke partou dan tou kwen distrik. Sanmenm sa ki nou apel politik bon marse. Les mon a fer zot rapel dernyen eleksyon 2006 kot sa detrwa mwan avan tou keksoz ti roz, me zis apre eleksyon nou ti vwar tou keksoz sanze. Pri lavi ti ogmante, elektrisite ek delo ti monte, roupi ti devalye, zot ti enpoz sa fame reform ekonomik lo nou pei, fer atansyon sa vineg apre sa detrwa mwan lanmizman. Si zot fer sa fot zot pou tonm dan sa latrap. Mazinen ki pwason osi letan i dan lanmson i dir ki fot mon’n fer me malerezman in tro tar.

 

Dan lavi Mr Speaker napa bouton rewind oubyen en gear reverse. Prezidan Michel ek son parti in zis pas letan anbet nou bann zenn. Zot ti fer bann zenn fer en gro travay an 2003 apele laspirasyon 2013? Ki’n arive avek sa? Oli tou bann konsern ki bann zenn ti fer sorti? Plitar nou’n antann stratezi 2017 sa osi zot in aret koz lo la. E la ozordi nou pe ganny promet vizyon 2020, annou reel dan sa pei, annou donn nou bann zenn en lavenir kot zot a kapab debourye e partisip dan devlopman zot pei. Dan sa ka si i pe koz 2020 zot pa devret dir donn li 5 me plito donn li 9, zis ladan i montre nou ki manyer zot pe bat latet Seselwa.

 

Ozordi en zenn ki napa gran kalifikasyon me ki annan lanvi pou travay i ganny dir ki i bezwen annan 25an pour li fer travay louvraz carer. Me pour son vot zot vin rod li avan 18an, zenn ouver zot lizye e get byen lekel ki pe fer politik bon marse. Zot dir ou leve debourye me apre zot met en baryer dan ou semen.

 

Dan son diskour Mr Michel in atak nou lo politik bon marse me anmenmtan Seselwa in ekout li ler in anons bokou sa bann menm politik ki SNP in anmennen. Zot ti riy nou e kritik nou ler nou ti prezant en polisi liberal pou sov nou pei. La ozordi se zot ki pe esey met an mars polisi liberal. Sanmenm sa bon politik bon marse. Zot in vin pli liberal ki nou, oubyen parey lekspresyon i dir zot in vin pli Katolik ki Lepap e petet se pour sa rezon ki zot pe fer kado revey lepap avek Mr Michel petet li osi in vin en sef dan Vatikan. Me malgre tou sa bann latak nou lo sa kote latab nou pou kontinyen travay pour nou anmenn Sesel devan. Nou fyer nou kontribisyon ki nou fer dan devlopman nou pei, nou pou kontinyen anmenn bann bon propozisyon pour nou pei menm si zot pa aksepte deswit nou konnen ki plitar zot pou fer li. Ozordi bann travayer IOT pe al ganny gratwite e en lot scheme of service.

 

Onorab Lucas in rekonnet byen for yer ki sete Onorab Prea en manm SNP ki ti lager pour sa bann travayer lannen pase. Me li dan plas donn en koudmen i ti retir en kestyon ki ti’n table pou adres sa lenzistis. La la koman Parti Lepep i travay, zot mazin zis zot lekor e les ou debourye dan en lanpayaz ki gouvernman i responsab.

 

Lo sa menm nivo mon espere ki parey gouvernman in finalman antann bann travayer IOT ki zot ava osi antann sa lapel ki mon’n fer depi en kantite letan pou fer ki kondisyon tonaz pou tou stevedores lo por i ava parey. Gouvernman i annan sa pouvwar pou fer sa bann negosiasyon. La i en bon moman pou fer li, me selman zis en pti konsey pa fer parey Onorab Herminie ti fer letan i ti ankor en Manm e anmenn en mosyon pou ogmant tonaz zis pou bat latet stevedores avan eleksyon, i oubliye apre.

 

 

 

 

MR SPEAKER

Onorab ou pe set the Speaker into a debate. This is why dan protokol parlmanter sa ki ou fek dir pa zanmen ganny fer. Mon kapab reponn ou lo kestyon tonaz anvi ki ou’n set mwan ladan. So I don’t know, lekel ki advise ou me sa bann direksyon ou pa zanmen fer dan en parlman.

 

HON NORBERT LOIZEAU

Tir taks lo gratwite par anba 10 mil roupi ti en lot parti dan nou progranm ki Onorab Ramkalawan ti anonse lannen pase ler i ti pe reponn bidze. Manm Parti Lepep ti gognard li, nou pa perdi lespwar akoz nou konnen sa ki nou’n anmennen i bon pour nou pep. Nou nou mazin en plan long term pour nou pei me Parti Lepep i fer li zis avan eleksyon. Letan Prezidan i koz lo sa envestisman 150 milyon ki Abu Dhabi in fer atraver diferan don nou ti a kontan rapel ou ki pe ekout mwan ki sa ti sa sonm larzan ki Onorab Ramkalawan ti dir ki nou ti pou gannyen atraver taks ek GST lo bann materyo ki’n konstriy pale Sheikh Khalifa La Misere e pour son frer Barbarons si ti napa konstriksyon ki diferans ant Mr Michel avek Mr Ramkalawan?

 

Dirizan SNP ti a voudre vwar leta Sesel kolekte sa larzan atraver taks e apre depans li dan fason ou dan proze ki fer nou plezir koman en leta souvren. Tandi ki Mr Michel i prefer rann faver atraver konsesyon e apre al anba latab Sheikh Khalifa pou vey kwa ki tonm ater. Plizyer keksoz ki Abu Dhabi

 

MR SPEAKER

Onorab You cannot be disrespectful to a President. Lir ou Standing Order. Ou pa kapab dir en Prezidan i al anba latab. Ou pe ouver en laport ki apre nou pou mal fini lazournen a’n antye. Lo Standing Order i dir avek ou ou pa kapab disrespectful ek en Prezidan, ou pa kapab dir en Prezidan i al anba latab pou esper bann bout manze.

 

HON NOBERT LOIZEAU

Sa i zis en lekspresyon Mr Speaker. Mon pe koz kreol mwan.

 

MR SPEAKER

Non, ou konpran mwan. E mon krwar ou bann koleg i annan en responsabilite pou donn ou bon gidans dan sa direksyon. Proceed.

 

HON NORBERT LOIZEAU

Plizyer keksoz ki Abbu Dhabi pe swadizan fer nou kado pou senpleman protez ouswa benefis son prop lentere. Baz naval pour zot osi stasyonn zot prop solda, radar pou sirvey osi zot lentere ekonomik, zenerater pou fourni pale ek elektrisite, nouvo sistenm distribisyon delo La Misere pou supply pale, e la mon’n konfirmen avek sa Lasanble ki anmenmtan ki bann dimoun La Misere i ankor pe soufer esper proze nouvo tiyo ariv kot zot, delo trete dan nouvo sistenm in fini ariv kot pale lerwa. Anplis Mr Speaker ler en pei i ofer ou en lekol, lopital e lezot batiman e apre se kontrakter etranze ki fer tou travay. Ki kantite larzan ki rantre dan nou lekonomi?

 

Mr Michel in dir nou ki dan son diskour lo leta la nasyon 2010 i ti dir nou ki nou’n komans grenp en montanny. Me ozordi an 2011 ler nou tou nou sot la deor nou vwar en gro pale, pou  en gro msye ki’n fini asize lo latet enn nou pli zoli montanny, sanmenm sa laviktwar pou Sesel.

 

Anmenmtan…

 

(Technical problem).

(Break)

MR SPEAKER

Nou ava kontinyen avek deba. Lo mon lalis se Onorab Terence Francoise.

HON TERENCE FRANCOISE

Mr Speaker, koleg MNA, zabitan Anse Royale, e pep Seselwa. Mr Speaker lo nou kote nou pa pou reazir lo diskour ki Onorab Loizeau fek fer. Nou konnen lekel vre met sa diskour, par kont nou atriste avek en tel sitiasyon akoz deza nou pe vwar ki anba en gouvernman SNP soubalter pou retournen Sesel. Sa ki pli fer lapenn son met ti a pe nod in approval e pe dir dan son leker ‘ale mon boy’. Sa menm Onorab i esey skandaliz Onorab De Commarmond, vre teat se ler ou vin resit en text par ker ki ou pa’n ekrir.

 

Mr Speaker i sanble ki stil De Commarmond i fatig zot lo lot kote. An 1994 en zenn politisyen ti asiz dan nou Lasanble e dan son diskour repons lo leta la nasyon ti deklare ki fodre pa ki ou kree bann nanm dan politik. Sa politisyen ti eksplike ki i konpran ki defwa dan politik bann politisyen i kree en nanm e apre zot koz kont sa nanm. Sa politisyen i kree en nanm zis pour zot shoot down sa nanm ki zot in kree e ki fodre pa ki dimoun i pratik politik nanm. Sa zenn politisyen ti pa lot ki Onorab Wavel Ramkalawan.

 

Mr Speaker mon’n al re vizit sa sitasyon senpleman akoz mon santi ki sa i tre byen konsey. i en konsey ki Onorab e kson bann koleg tin devret gard an tet letan ki zot ti ape prepar zot diskour repons. Depi Mardi nou pe tann bann menm keksoz ki zot in toultan depi 1993, zot kontinyen kree nanm apre zot koz kont sa nanm. Mr Speaker Sesel i bezwen bouze pou vin en pei solisyon. Solisyon i pa zis en keksoz pratik ki ganny livre a la demann me solisyon i osi en leta lespri. Solisyon i en mantalite, solisyon set en fason fonksyonnen, solisyon i kapab ganny vwar koman en form best practice par lekel ki en dimoun i viv son lavi. Ekler mwan lafason ki bann endividi i viv zot lavi i ganny plitar reflekte dan tou bann demars sosyete. En Sesel solisyon i pou fasilman sa meyer Sesel pour nou tou viv ladan. Me sa Sesel solisyon ki mon pe propoze i konsern en travay kolektiv, i konsern en zefor nasyonal e i osi konsern travay ansanm dan linite parey ki Prezidan Michel in fer resorti. Si nou anvi kree en pei ki oriyante ver solisyon sa i en legzersis ki pou konsern nou tou koman Seselwa e non pa zis bann politisyen ouswa bann dirizan pei. Annou komans par fer en senp lergzersis koman en endividi lekel ki ou meyer solisyon. Larepons se ou menm. Sak endividi i tenir lakle son bann meyer solisyon dan son prop lanmen, se sa latitid ki nou pou bezwen enstriy dan nou bann zanfan. Se sa kredo ki nou pou bezwen adopte koman en pei. Le zour ki nou koman en pep nou leve e nou realize ki se nou menm nou le meyer solisyon pour lamazorite nou problenm sa zour pou en vre laviktwar pou Sesel.

 

Dan en Sesel solisyon i napa okenn endividi ki pou kapab vin sedwir son kanmarad avek bann zoli parol pou en solisyon sibit. Solisyon pour sak endividi pour dan lanmen sa bann endividi zot menm. E kot zot pan reisi akonplir lo zot menm se la kot bann mekanizm leta i rantre pou raport serten soulazman.

 

Dan sa lobtik solisyon sak endividi I gard son dignite entak a tou moman avek en ferm konesans ki pe viv dan en sosyete ki pe oriyante ver solisyon. Toud menm mon santi ki i pou enpe difisil pou fer pase sa mesaz solisyon letan ki serten dimoun pe ensiste pou kree bann nanm politik lo en kote apre prezant bann solisyon baton mazik pour zot prop nanm lo lot kote. Me laprev in montre klerman ki letan tin ariv ler pou travay sa bann menm dimoun pa ti kapab tenir lasaler dan lakwizin, e sa parol i pa mon lenvansyon. Se zot menm ki ti dir konm kwa ki zot kontan ki zot pan ganny eleksyon e ki lanmans pwalon ti tro so. E bann levennman kin swiv in demontre klerman ki zot ti annan rezon letan ki zot ti dir sa parol. Zot ti seryezman pa ekipe pou fer fas avek sa nivo travay ki ti annan pou fer. Otan ki mon senpatiz avek zot, otan ki mon respe zot bann limitasyon apre tou ou pa kapab fors en dimoun pou fer en keksoz ki i pa kapab fer.

 

Me la aprezan mon vwar ki zot in retournen e ki byen for zot pe demann pou form gouvernman, sa menm melimelo konfizyon melanze avek mansonz pe resirfas ankor.

 

Lo sa size later Mr Speaker wi I vre ki gouvernman I bezwen donn sanksyon pou en etranze aste en later avek en Seselwa me I osi egalman vre ki dan en sistenm marse lib gouvernman pa enterfer san okenn bon rezon dan en tranzaksyon komers ant en willing buyer avek en willing seller, e zot devret konn sa tre byen parski sa set en prensip liberal. Eski zot pe demande ki gouvernman i enpoz en sanksyon ki defann ki Seselwa, sitwayen prive i kapab vann son later avek nenport ki ki li i anvi. Si zot pe fer en tel propozisyon kominis radikal fer kler, dir for pour tou dimoun tande e dimoun ava konpran ki ozordi dan Sesel annan en parti kominis radikal ki oule enterfer dan tou tranzaksyon domenn prive. Me si zot konnen ki sa pa leka alor pa bezwen lans okenn lakizasyon mal fonde kont Prezidan Michel. Gouvernman Sesel napa okenn polisi ki fors li enterfer dan bann tranzaksyon later prive ant de endividi e zot si vreman zot en parti liberal zot pa pou zanmen fer li non plis. Alors annou annan kouraz pou debout ferm akote zot bann prop konviksyon si vreman zot annan. Mr Speaker Onorab Georges pan zis fer son diskour adye parey Onorab Payet ti fer resorti yer, me in osi fer en case pour SNP. I parey sa bon avoka ki menm si i konnen ki son kliyan i koupab i pou defann ziska lafen erezman pour nou pep Seselwa i konnsa tre byen lekel sa bann avoka ki dir zoli parol me apre zot pa delivre lo naryen, ni menm larzan zot kliyan.

 

An sa ki konsern sa size later mon konnen ki Onorab Georges in fer sa ki i fer pli byen, fer en zoli diskour pou esey detourn latet dimoun me la realite i reste ki sa menm avoka ki kontan koz lo size later se li menm li ki responsab pou fer plis tranzaksyon later avek etranze. Mr Speaker mon ti ava kontan si Onorab Georges tin dir nou konbyen dan sa bann later avek etranze ki in nonmen ki in met presyon lo gouvernman pou ganny sanksyon. Ankor enn fwa zot pe kree nanm zis pou zot apre shoot down sa Onorab ki ti dir ki fodre pa ki dimoun I fer politik nanm, ti annan bokou rezon e in byen dir.

 

Mr Speaker i annan dimoun ki pandan tre lontan pe koz gro lebra lo sa size koripsyon dan sa pei, e zot ankor pe koz gro lebra. Me zis parey bann farizyen dan labib zot kriy byen for, zot fer zot bann proklamasyon a ot vwa, me zot bann aksyon sa i deroul toultan dan bourya, dan kasyet, deryer rido, maske kot personn pa pou vwar. Me dimoun i konnen sa nasyon Seselwa i napa okenn fason ki i pa pou dekouver ou, esey bat son latet manyer ki ou anvi avan lontan tou sekre pou deor, fannen lo street e travay pou la.

 

Pandan sa dernyen 18an a sak fwa kin ariv ler pour nou revwar leta la nasyon en vre lavalas negativite i ganny devie partou dan nou Lasanble. Bann nanm kin deza ganny fabrike espesyalman i ganny met lo display akoz ki zot pa swiv zot prop konsey sa mon pa konnen.

 

Mr Speaker depi letan ki in pran pouvwar e ganny elekte an lannen 2006 Prezidan Michel in lans li lo en veritab misyon pou elev nivo bann zenn Seselwa. Premye proze konsekan ki Prezidan Michel ti anbark lo la ti enn direkteman liye avek bann zenn. Sa ti kreasyon liniversite Sesel. Sa proze malgre lopozisyon sorti kot nou bann zanmi labitid in arive ozordi pou materialize. Unisey pe donn bokou lespwar nou bann zenn Seselwa. Reform konpreansiv dan ledikasyon en proze ki pe ganny enplimante avek nou bann partener milti lateral pe fer ki ozordi i annan bokou plsi partisipasyon paran dan zestyon bann lekol. Plis larzan e resours in ganny mete a dispozisyon bann lekol. Revi dan scheme saler bann teachers in fer ki ozordi rekonpans ki bann ansennyan i gannyen i bokou pli pre avek sa zefor ki zot envestir dan zot travay. Progranm young leaders pe ede pous nivo konpetans nou bann zenn Seselwa bokou pli o ankor, e la fodre osi note ki malgre difikilte ekonomik Sesel pan rekile lo son bann langazman pou edik lazenes son pei.

 

Pandan sa de dernyen semen kin pase nou’n vwar kot bokou lanfaz pe ganny mete lo ledikasyon e swen bann pti anfans. Tou sa i bann komitman ki Prezidan Michel ti pran opre lazenes Seselwa. E tou sa bann proze ti ganny realize san lasistans e ni menm sipor lopozisyon. Zot ti menm opoz kreasyon en konsey lazenes endepandan. Lopozisyon dan sa pei pan zanmen reponn prezan letan ki in ariv ler pou fer keksoz pou lazenes Seselwa. Par kont Prezidan Michel in touzour sa enn kin la prezan touzour pare pou sanpyonn lakoz bann zenn. Sa ki kler se ki laviktwar Prezidan Michel se laviktwar lazenes Seselwa. Zot oule ziz Prezidan Michel par son aksyon, mon krwar ki zis liniversite Sesel e tou sa ki i reprezante i plis ki ase pou fer zot fremir.

 

Mr Speaker i annan en evolisyon ase danzere ki pe devlope lo lasenn politik dan nou pei. Dan plizyer lannen i annan serten dimoun dan politik ki ti konvenki ki lamazorite lazenes Seselwa ti siport zot. Malgre ki sa konviksyon ti mal fonde akoz sa bann dimoun pa tin zanmen fer okenn travay serye ni pou konsilte, ni pou apros lazenes pou esey ganny zo tlopinyon politik. Me sa lopinyon mal fonde ti zot lopinyon e lopinyon en dimoun i bezwen ganny respekte. I ti pran eleksyon 2006 avek 2007 pou fer sa bann dimoun konpran e realize ki sipor lazenes Seselwa pa ti en keksoz ki ou zis reve aswar e ki lannmen bomaten I tonm dan ou lanmen. An 2006 e 2007 egalman en gran poursantaz bann zenn Seselwa ti vot an faver Parti Lepep e se la a sa moman ki serten dimoun ti reveye e realize ki zot it pou bezwen si zot ti anvi ganny sipor bann zenn. Me sa ki domaz pou dir se ki sa bann dimoun pa konnen ki manyer pou fer en travay pozitiv. Zot toultan bezwen pe proteste, zot toultan bezwen pe rebel kont kelken ou kek nanm, zot toultan bezwen annan langazman negativ dan sa ki zot fer, e zot toultan bezwen annan langazman negativ dan sa ki zot dir. Lamazorite bann zenn dan nou pei I napa letan avek en tel kalite keksoz. Lazenes Seselwa I anvi avanse, zot anvi kontribye, zot anvi solisyon bann zenn I non selman anvi viv dan en Sesel solisyon me zot osi anvi vin en Sesel solisyon. Zot anvi vin sa vre solisyon pour Sesel, e atraver sa vin sa vre laviktwar pou Sesel. E sa bann dimoun avek tou zot negativite in fail pou enpresyonn bann zenn. Zot in fail dan zot misyon pou reisir konvenk lazenes Seselwa pou zwenn avek zot. Zot trade mark se failure, e dan sa eleksyon ki pe vini zot in fini vwar ki zot pou al fail ankor. Se la kot nou komans vwar en evolisyon danzere kot bann zenn pe ganny akize konm kwa ki zot pe vann zot lekor, kot lazenes i ganny maltrete ki zot pe fer keksoz pou larzan e pozisyon. La kot en zenn Seselwa ki limenm li in benefisye avek tou fasilite ki pei i annan pou ofer i vin akiz son bann koleg zenn konm kwa ki zot bann zwer rol e ki zwe rol in vin en talan dan Sesel. Ler oun gannyen, ler oun benefisye les lezot zenn osi benefisye parey ou.

 

Mr Speaker permet mwan pou refer sa sitasyon sa Onorab an 1994. Pa bezwen kree nanm pour zot apre koz kont sa nanm. Se zisteman sa ki mon apel bann melimelo konfizyon melanze avek mansonz. Prezidan Michel i annan en rikord solid kot in debout fermeman akote lazenes sa pei. Mon challenge zot a nenport ki moman pou ziz Prezidan Michel par son aksyon lo sa dosye lazenes. Zis konpar son rikord avek pour zot, zot en parti politik ki pa ni menm posed en mouvman lazenes aktiv. Apre zot vin koz lo security clearance. Be tousala se bann nanm, tou sa bann zenn ki pe les zot lekor ganny anbete avek sa zafer security clearance demande ki manyer serten dimoun zot zanfan i fer pou travay trankilman kot airwing IDC. Petet sa i sistenm class ki serten dimoun dan lopozisyon ti ape koz lo la. Swa i annan en sistenm class dan SNP ouswa i zis en lot nanm.

 

Ozordi dan plizyer Minister lenstitisyon gouvernmantal enkli Lasanble Nasyonal i annan siporter SNP ki pe travay e nou konnen lekel zot. Alors sa largiman Onorab Henrie i en lot politik bon marse. Sa ki zot pe kasyet zot siporter se vre rezon akoz i annan sa security clearance enkli dan bann pei liberal. Sa i en mwayen pou determin karakter en travayer. Eski ou met en voler ey larzan. Alors lefe ki i annan en kantite siporter SNP ki pe travay dan gouvernman i montre ki zot pan ganny zize par zot afiliasyon politik me senpleman par zot karakter e konpetans parey i leka pou siporter Parti Lepep. Mon seryezman konvenki ki sa dimoun ti dir sa parol nanm ti annan rezon akoz depi yer sanmenm tou ki noun tande dan sa Lasanble zis bann lenvansyon e fabrikasyon.

 

Permet mwan pou fer en senp legzersis. Si mon dir zot liniversite Sesel zot repons se security clearance, si mon dir zot progranm young leaders zot repons I ankor security clearance. Mr Speaker me liniversite fek vwar son nesans dan sa de dernyen lannen e progranm young leaders osi 3an pase. Tandis ki sa zafer security clearance i en nanm ki zot pe trennen depi 1991. Se sa le vre rezon ki lazenes pa oule zot, senpleman zot en group dimoun fatige kip e trenn bann vye largiman démodé. Mr Speaker nanm I out of fashion Sesel.

 

Largiman ki monn swazir pou avanse se ki ozordi tou bann etidyan post segonder pe ganny peye en allowance tou le mwan, sa allowance kin vin an rezilta direk sa progranm reform ekonomik kin ganny enplimante par gouvernman Prezidan Michel. Benefis direk ki nou bann zenn pe rekolte an rezilta bon performans nou lekonomi sa i en realite e non pa en nanm. Letan ki progranm reform ti komanse i annan dimoun ki ti mont lo laplenn Roche Caiman pou proteste. Ozordi an rezilta direk sa progranm reform 30 milyon roupi pe ganny envestir anver en progranm reform konpreansiv dan nou sistenm lasante. Letan ki progranm reform ti lanse i annan serten ki ti koz en kalite parol avek lapres etranze, en lot avek son prop siporter e finalman zot ti lager parol avek anbasader Alman letan ki i ti demaske zot bann melimelo mansonz lo televizyon. Ozordi bann bon rezilta reform pe reisir soutenir tou nou bann divers progranm sosyal e malgre tou bann diferan menas e boulvers ki lekonomi lemonn pe pas atraver sa pa pe afekte nou pei dan en fason ki tro signifikan. Lo komansman sa semen noun kapab vwar kot sa fon stabilizasyon sa 150 milyon roupi in kick in pou stabiliz pri elektrik, gas avek pr ibis. E la fodre ki dimoun i note ki lopozisyon pa ti vote pou aprouv sa fon stabilizasyon.

 

Mr Speaker koman en kretyen katolik krwayan e pratikan mon oule dir senpleman ki mon pa vwar naryen pou fer polemic avek bann lasistans ki gouvernman in avans ver legliz katolik. Sa i pa fer premye fwa, mon pa pou ekspekte ki zot ni konnen, ni konpran kwa ki mon pe koz lo la, vi ki zot en group dimoun ki pan zanmen siport bidze alors I pa adonab si zot pa realize ki tou le lannen gouvernman i met serten sonm larzan dekote pou asiste legliz avek. Travay lo legliz katolik e protestan dan mon distrik Anse Royale ti ganny plis ki 2 milyon roupi sakenn avek gouvernman pou ede konplet zot renovasyon. E plizyer legliz osi dan lezot distrik in ganny asiste.

 

Prezidan in fer son lanons dan son kapasite koman sef deta sa lanons in ganny fer senpleman koman par stratezi pei dan son lalit kont drog. Ozordi I annan bokou kretyen ki santi zot ofanse par lafason ki sa size pe ganny servi pou trenn legliz dan en kalite politik. Ki zis sa bann dimoun laba ki kapab konpran. Sa ki zot pe fer lo non legliz i pa byen, i pa elev sitiasyon nou pep pou fer li vin meyer. E I napa okenn sans dan zot bann largiman. Zot pe koz lo kree divizyon, zot pe koz lo tir presyon politik, akoz ki zot pa fe rlaprev zot bann zoli parol e donn zorey bann krwayan en lape enn fwa pour tou lo sa size.

 

Prezidan Michel in fer en propozisyon, les legliz pronons son lekor lo sa ki Prezidan Michel in dir sis a I neseser mwan mon pa pou trenn sa deba pli lwen.

 

Mr Speaker bokou in ganny dir lo sa size aste vot pou eleksyon. Prezidan pe ganny akize, Parti Lepep pe ganny akize, aparaman bann sel inosan dan sa demars se nou bann zanmi laba lot kote. Be permet mwan en tre senp analiz lo lavey en eleksyon lider lopzosiyon I vin promet avek lepep Seselwa en logmantasyon Rs500 minimanm pour tou dimoun. Les mwan repet sa lo lavey en eleksyon lider lopozisyon i promet nasyon Seselwa annantye en logmantasyon Rs500 par personn pour tou dimoun, me selman zot pa kapab pey pansyon bann dimoun ki travay avek zot. E sa bann menm dimoun i annan lodas pour zot kestyonn de fey tol e kat bout blok ki nou donn nou bann siporter avek nou prop larzan ki nou kontribye dan fon nou parti. Kan lider lopozisyon dan son kote kin ganny apiye par Onorab Henrie pe angaz son lekor pou depans plis ki Rs20 milyon dank of leta tou le mwan zis pou dan en mannev pour li ganny eleksyon sa I vedir ki nou bezwen 240 milyon dank of gouvernman pou donn tou travayer sa minimanm logmantasyon Rs500 ki I pe promet.

 

Mr Speaker dan son prezantasyon lider lopozisyon in fer sir ki in ensiste ki son gouvernman pou aport en sanzman imedyat dan konfisyon lavi tou Seselwa, e le sel mekanizm ki in propoze pou siport sa largiman se son propozisyon dan taks. Sa swadizan reform dan reform ki I pe avanse.

 

Lepep Seselwa pa les zot lekor ganny sedwir par en tel largiman. Sa kado ki lopozisyon pe ofer i enn ki anpwazonnen, e sel keksoz valer ladan se sa papye klate ki pe kouver sa mansonz. Mon dir mansonz akoz ki swa lopozisyon pe deliberaman mal enform nou pep, ouswa i pa konnen kwa ki zot ape propoze. Posibilite i touzour egziste ki serten dimoun i prefere zis rabase ou zis dir nenport kwa, ki pou fer en zefor pou verifye zot bann fe. Me les mwan dir avek lepep Seselwa ki sa  ki lopozisyon pe propoze i en keksoz enposib e I pa pou zanmen arive. Swa sa bann dimoun i naïve e ozt pa konnen kwa ki zot pe koz lo la ouswa zot senpleman malisye e zot oule kree ditor a tou pri. Progranm reform makro ekonomik Sesel i en keksoz kin fini ganny agree lo la. Tou bann lagreman in fini ganny diskite e sinnyen e pour lenformasyon bann dimoun IMF in konsilte avek tou bann stake holders e menm si serten dimoun i fer tapaz an piblik dan prive zot in dir avek IMF ki zot dakor an prensip.

 

Rezim taks Sesel i size en lakor ant Sesel e son bann partener enternasyonal ki konpri nou bann krediter. Reveni pei in fini ganny prozekte dan bidze e bidze i komans fer bann prozeksyon 2an parey ki Minis Finans ti eksplike. I napa okenn fason ki okenn dimoun pou nobou kapab sanz sa bann lagreman demen bomaten. Pey enports i ganny elekte ou non, i napa okenn fason ki Lider lopozisyon pou kapab al defann e zistifye son bann depans eleksyon devan nou bann partener enternasyonal.

 

Mr Speaker parey Onorab De Commarmond ti fer resorti Onorab Loizeau rezilta okenn dimoun ki par maler ouswa malediksyon i ganny elekte lo en tel fo promes pou bezwen back down. E la kot sa proze eleksyon i vin en mansonz ouswa sa dimoun i ensiste pou onor son promes fou e la kot tou bann partener i pull out zis parey ti arive Larzantin. E nou pei i retourn pli pir ki I ti ete avan reform.

 

Sa promes lopozisyon i zis en promes dezespere sorti kot en perdan pli dezespere ankor. La i le moman pour bann siporter lopozisyon fer en vre sanzman. Vot pour Prezidan Michel e sa boul feray otour lipye lopozisyon ava tonbe enn fwa pour tou.

 

Siporter lopozisyon vot pou vre sanzman, vot pou Prezidan Michel e sa ava anvoy en mesaz pour sa dirizan nanm, konm kwa ki nanm napa plas parmi vivan.

 

Mr Speaker avek sa mon ti a kontan demann tou lepep Seselwa pou fer konfyans Prezidan Michel. Mersi Mr Speaker.

 

 

HON TERENCE MONDON

Mersi Mr Speaker,

 

Mr Speaker, Koleg Manm Lasanble Ser /Frer Seselwa.

 

Diskour prezidan Michel i en vre diskour leta lanasyon akoz in fer sa 3 keksoz swivan.

I donn lepep Seselwa en tre bon apersi lo nou sitiasyon ozordi ler in koz lo nou lakonplisman e nou bann defi.

I prezant en vizyon kler kote I anvi anmenn Sesel e lepep Seselwa dan sa prosen 10 zan.

In retras sa semen ki nou bezwen pran ansanm koman en nasyon pou nou realiz sa vizyon.

 

Mr Speaker,

Monn apresye bann pwen for diskour  Prezidan Michel e dan mon lentervansyon mon pou donn mon reaksyon  lo sa bann pwen swivan:

Sa nesesite anmenn plis lefikasite dan ladministrasyon e servis piblik.

Sa nesesite annan  en lopozisyon pli onet dan nou pei.

Sa volonte politik pou kree plis pouvwar ekonomik pou nou bann fanmiy Seselwa.

Se bann lekspektasyon zabitan mon distrik e lafason ki pe ganny adrese ozordi.

 

Mr Speaker,

Monn touzour apresye sa privilez pou mon fer mon kontribisyon dan sa lasanble avek en lespri kler e en leker senser pou lepep Seselwa e an partikilye tou zabitan mon distrik Takamaka.

……….. Nesesite anmenn plis lefikasite Ladministrasyon e servis piblik

Mr Speaker,

Lapel Prezidan Michel pour anmenn plis lefikasite dan ladministrasyon e servis piblik i en lapel enportan e neseser. Menm si noun temwann serten progre enportan dan plizyer departman piblik o kour sa dernyen lannen, sekter  piblik i reste en landrwa  kot i ankor annan mediokrite, labi e lendiferans. Nivo servis dan sekter piblik i pa osi a la oter pour en menm servis ki pe ganny ofer dan sekter prive.  Mesaz Prezidan i enn ki tre apropriye ler i dir ki nou bezwen met plis lanfaz lo solisyon pour nou dimoun.

Wi Mr Speaker, in ler pou nou sekter piblik revisit lafason ki zot ofer zot bann servis. Nou  sitwayen  i anvi vwar nouvo fason fer, avek plis konpasyon e dedikasyon. Me, sa nouvo oriantasyon i osi ekziz en sanzman mindset.  Bokou ka i ganny retarde zisteman akoz bann zofisye dan servis piblik pa pran ase letan pou eksplor bann solisyon pou zot klian. Zot plito reazir lo bann pti problenm otour sak ka aparet devan zot.  Sa dimoun i bezwen monte desann, kont tou biro gouvernman enkli lofis prezidan larepiblik avek lespwar trouv en senp solisyon pou son problenm.

 

Wi Mr Speaker, lapel Prezidan Michel pou anmenm nou sekter piblik o servis lepep avek en latansyon partikilye pou trouv solisyon pou nou sitwayen, i sa  lakle  sanzman dan sa sekter ki nou pep i bezwen ozordi. Mon konvenki ki selman en servis ki met lanfaz lo solisyon ki pou anmenn sa vre transformasyon dan nou sekter piblik.

 

Nou konn tre byen ki en servis piblik ki pa efektiv i annan en reperkisyon non-selman lo sa endividi ki bezwen sa servis, me osi lo son lorganizasyon ki pe anploy li.  Ozordi, nou sitwayen i bokou pli sansib avek sa bann retard akoz sak erd-tan perdi i kapab ganny tradwir en term larzan. Nou pe kree en sosyete  antreprener, alor nou bezwen en sekter piblik ki atantiv a sa konsep kot letan i osi vedir larzan.

Mr Speaker, mon partaz sa konviksyon ki nou sekter piblik i kapab e devret pe fonksyonn avek sa nouvo oriantasyon. Mon swete ki mesaz prezidan i ganny entegre dan en plan konkret avek formasyon apropriye pou bann travayer servis piblik…..en formasyon kontinnyel ki pou kapab garanti sa sanzman neseser dan mindset nou bann travayer dan sa sekter  piblik.

 

 

Mr Speaker,

 

Malgre plizyer linisyativ kin ganny entrodwir pou kree en servis piblik pli efikas e pli zis, mon plito dezapwente avek minister responsab pou amenazman later leta. Mon pe adres sa size later akoz mon oule anvoy en mesaz kler pou sa minister pou respekte lotorite dan distrik.

Premyerman, minister responsab pou later i ignore konpletman lotorite mon distrik dan 2 tranzaksyon later leta dan rezyon Anse Forbans e Anse Marie-Louise.  Alor, kestyon fondamantal ki mon demande, akoz ki sa Minister in swazir pou pa enform lotorite distrik lo sa 2 tranzaksyon later leta? Eski sa minister I annan lentere zabitan Takamaka  aker ler I deside pou pa enform lotorite distrik lo sa 2 tranzaksyon. Saki pli trist, seki lotorite distrik tin deza fer en demann avek sa minister pou fasilit en landrwa lo sa morso later Ans Forban pou konstrir en bus-stop pou zabitan sa rezyon e sa demann ti ganny rezete.  Mr Speaker,  lotorite distrik pann ganny okenn loportinite fer serten kontribisyon viz-avi sa 2 tranzaksyon, e sa I al kont lespri sa nouvo lanvironman ki nou pe kree dan sa pei ozordi e mwan koman reprezantan lepep , mon kondann sa move pratik.

Dezyenmman: mon konsern viz-avi sa minister i relye avek sa swe enportan ki nou prezidan in eksprimen lo sa size later, e sa se pou met plis kare later a dispozisyon nou sitwayen ordiner. Wi Mr Speaker, si prezidan Michel in fer sa lanons dan son diskour lo leta lanasyon se akoz sa minister pa pe fer ase pou nou bann sitwayen ordiner. Zot pa pe fer ase pou sa bann profesyonel ki ankor pe esper en morso later leta pou etabli zot e permet zot fer en pli gran kontribisyon dan zot pei.  Mon tia swete vwar plis profesyonel pe etablir zot dan mon distrik e me malerezman, ozordi i pran sa minister apepre 2  a 3 zan pou kapab donn 4 morso later nou zabitan.

Wi, Mr Speaker, mon en dimoun ki kwar ki nou bezwen dimoun onet, senser e zis pou zer bann resours leta. Mon mesaz I enn ki kler e tre senp: Mon pa pou toler sa kalite pratik dan nou gouvernman e sirtou ler sa bann pratik i met an-koz byenet mon zabitan.

Mr Speaker, sa size later I osi anmenn mwan lo en lot pwen pertinan e sa se sa gran diskresyon ki en Minis annan viz-avi alokasyon later. Wi Mr Speaker, en minis I bezwen annan serten diskresyon, me diskresyon san okenn paramet ki kler e transparan, I en keksoz danzere dan limenm e ki kapab anmenn labi pouvwar. Ozordi, dan minister amenazman later, diskresyon pe ganny servi pou donn dimoun kin deza ganny asiste avek en morso later. Alor, mon pe lans en lapel avek gouvernman pou revwar sa diskresyon ki zot donn minis e sa i avar kree sa kondisyon neseser pou pli bon zesyon sa resours sitan enportan pou nou fitir zenerasyon.

 

 

 

………………………. Nesesite annan en  lopozisyon pli onet dan nou pei

Mr Speaker,

Lannen 2011 in ganny dedye pou laviktwar Sesel e tou seselwa.  Bann gran levennman ki pou mark sa lannen pou san dout tous nou tou, dan en fason ou lot. Me pli gran laviktwar pou sesel pou vinn atraver en mesaz sorti kot lepep seselwa.  En mesaz kler dan bwat vote kot lepep seselwa pou dir avek SNP, nou ganny ase avek ou. Nou oule en lopozisyon onet e serye dan nou pei.

Wi Mr Speaker, Sesel i bezwen en lopozisyon ki opoze me ki reste lwayal anver nou konstitisyon, en lopozisyon ki pran par dan bann progranm nasyonal pou ranforsir konfidans bann envestiser. En lopozisyon ki met zepol ansanm dan nou lager kont bann fleo nasyonal. En lopozisyon ki travay dan lentere sesel. En lopozisyon ki travay onet.

 

Malerezman, SNP I demontre a plizyer repriz ki zot pa pare pour travay pour en sel Sesel … (zot pa pare pou travay avek parti lepep e ni menm parti demokratik).  Zot koz lo lademokrasi, me zot refize rantre an dialog avek nou Prezidan.  Zot napa sa matirite politik ki nou pei i bezwen. Nou dan parti lepep nou kwar ki matirite politik i en eleman esansyel e primordyal dan developman nou demokrasi…e en dialog onet e senser i devret labaz nou demokrasi.

Mr Speaker, I kler ki lopozisyon  pe mank en lot  lokazyon pou anmenn sa eleman matirite dan nou bann deba e ede kree en meyer klima dialog.

Wi Mr Speaker, Sesel I tro pti pou nou reste divize. In ler pou nou aret met politik avan tou keksoz. Nou annan sitan bokou keksoz pou fer dan sa pei.   Mon sipliy avek lopozisyon,  pou kit deryer sa bann keksoz ki fer nou pep ditor, lannen apre lannen. Silvouple, kit deryer sa lanmertim, sa bann demagozi e tou sa bann politik bon marse.

 

 

 

Mr Speaker,

Avek bann defi ki nou pei pe fer fas avek toulezour…. i pa akseptab ki nou annan en lopozisyon ki pa pare pou vinn onet avek sa pep. Zot pran plezir profit lo ou difikilte e lo ou febles, zot fer tou ki zot kapab pou kit  ou dan niaz avek bann lideal.  Lider lopozisyon i koz lo plizyer  keksoz ki dan son vizyon pou sesel, bann keksoz ki limenm avek son parti in rezete dan lepase. Par ekzanp:

Ler Lider lopozisyon i dir nou ki li i oule en Sesel kot son pep i viv an sekirite….. kestyon ki nou bezwen demann li se: akoz ki ti rezet sa lalwa ki nou ti entrodwir pou lager kont pirat? Sa pli gro menas ki nou pei in fer fas avek pandan dernyen deseni e ki ankor pe met an-koz nou lekzistans.

Lider lopozisyon I dir ki nou dan parti lepep nou kwar ki zis nou ki annan lide, …. me plitar dan son diskour i sant laklwar an dizan ki ti son lide ki gouvernman in adopte pou retir taks lo gratwite anba R10,000.  I kler ki Lider lopozisyon i konfize akoz nou dan parti lepep nou apresye kontribisyon tou seselwa, enkli lider lopozisyon.

I annan plizyer lekzanp sa bann kontradiksyon ki osi refkete en politik bonmarse. Mr Speaker, si i annan en keksoz ki mon apresye bokou avek Prezidan Michel se zisteman sa latansyon partikilye ki donn bann nouvo lide. I kler ki Prezidan Michel i kwar dan konsiltasyon e valoriz ou kontribisyon pe enport nivo ki ou ete dan lasosyete. Lapros Prezidan Michel pe anmenn en revolisyon dan lafason ki son gouvernman i entrakte avek son pep. Alor, lakizasyon lider lopozisyon ki nou kwar ki zis nou dan parti lepep ki annan lide i en statement ki pa fonde e konpletman fo.

 

 

…….. Sa volonte politik pou kree plis pouvwar ekonomik pou sak seselwa

Wi Mr speaker,

 

Lemonn pe regard Sesel avek bokou ladmirasyon…..akoz larealite seki nou lekonomi pe kontinnyen grandi…larealite seki bann endikater fondamantal nou lekonomi tel ki kreasyon lanplwa, lenvestisman, pe kontinnyen ogmante. Larealite seki nou lakonplisman  in depas lekspektasyon bokou pei.

Mr Speaker, onorab Henri I oule fer lepep Seselwa kwar ki tou sala I en lenvansyon parti lepep. Me pourtan tou dimoun pe swiv sa bann temwanaz positiv lo nou pei  preski tou le semen lo nou televizyon nasyonal.. Saki pli trist se ki lopozisyon i ankor kwar ki zot kapab anbet lepep seselwa.

 

Avek Prezidan Michel koman nou dirizan,  bann sekous ekonomik in nepli fer nou per. Lenvestisman pe kontinyen rantre dan nou pei … pandan ki gouvernman i kontinnyen kree nouvo loportinite e fer keksoz posib pour tou Seselwa…. Nouvo kare later lo zil Aurore, il soley parmi lezot, ki nou gouvernman pe met a dispozisyon bann antreprener Seselwa pou permet en pli gran debousman pou plizyer famiy.  Sa I en lekzanp konkret ki sa gouvernman lepep I non-selman kwar dan kapasite son pep, me i osi annan sa volonte pou kontinnyen met pouvwar ekonomik dan lanmen sak fanmiy Seselwa.

Nou dan parti lepep nou pou kontinnyen met ou o-sant nou developman. Nou pa pou les okenn dimoun kiswa dan gouvernman ou an deor, zwe avek nou prensip fondamantal.

 

Wi Mr Speaker, sak endividi i bezwen pe met konfyans dan son  pei…..dan en sel sesel…. sak seselwa i bezwen pe vwar bann nouvo loportinite e sezir sa bann louvertir  pour kree nouvo posibilite pour zot fanmiy.

 

I mon swe ki zabitan mon distrik Takamaka i sezir byen sa bann loportinite.  Mon konnen ki zot osi zot annan bokou pou ofer dan kreasyon larises pour nou pei. I touzour en plezir pour nou dan parti lepep ler dimoun i  pran linisyativ, i leve e komans debrouye.

 

Mr Speaker,

 

La ki nou dan en lanvironman konpetitiv e kot nou bezwen kit nou lekonomi ouver..nou bezwen pe kontinyelman ranforsir nou pozisyon konpetitiv….. Sa I vedir ki nou bezwen kontinnyelman amelyor skills nou travayer, ankouraz entreprenarya,  promouvwar kreativite ek linovasyon dan tou sekter nou lekonomi. Mon reste konvenki ki ansanm koman en pep nou kapab sirmont nenport ki defi.

Lentegrasyon rezyonal atraver KOMESA e SADC pou anmenn ankor nouvo defi pou nou popilasyon.  Nou aksesyon avek WTO I osi vinn avek serten kondisyon, e I kler ki tou sa pou anmenn de nouvo defi pour nou pep. Malgre nou groser, malgre nou limitasyon koman en pti leta zil, sesel pou bezwen navig dan sa kouran globalizasyon. I kler ki  Sesel i bezwen tou son zanfan pou tenir li lo sa larout.

 

 

Mr Speaker,

Parmi nou popilasyon, nou annan bokou fanmiy  ki pe viv en lavi ranpli avek defi me malgre zot difikilte, zot pe kontinnyen debout for.  Nou annan bokou paran tousel ki pe fer grandir zot zanfan dan en fason ekzanpler. Se sa menm fanmiy ki vwar letan pou ed zot frer e ser ki dan bezwen, e se manm fanmiy ki touzour pare pou donn en pti koudmen dan zot kominote. Mr Speaker, nou annan bokou plis pou aprann avek sa bann fanmiy ordiner e koman reprezantan lepep, mon fyer ki  monn ganny sa privilez pou travay avek bann dimoun parey.

 

 

Wi Mr Speaker,

Ozordi, nou tou nou konsernen avek sa gran degradasyon dan nou fabrik sosyal…….. lekzanp i partou ….. me larealite seki tou i komans kot lakour, dan nou fanmiy. Lafors en fanmiy i labaz nou sosyete alor I enportan pour nou rod tou mwayen pou protez li. Nou bezwen konsantre plis nou zefor pou kapab ranforsir koezyon e rezilyans dan bann fanmiy Seselwa. Se lo sa not, ki mon akey sipor ki Prezidan pe aport legliz katolik  dan sa demars pou pli byen ankadre bann bon valer dan nou zanfan.

Mon profite pou salye e remersye bann goup legliz ki pe donn bokou zot letan dan preparasyon lavi spirityel nou zanfan. Menm si nou koman paran nou pa fer otan ki neseser, nou toultan apresye sa zes spirityel ek lanmour  ki zot met a dispozisyon lakominote. Mon rekonet ki nou bezwen fer plis e donn zot plis lankourazman dan sa travay enportan ki zot pe fer pour nou zanfan.

 

 

……………………………………………………………….

Mr Speaker,

Pour en paran oubyen en manm fanmiy, napa keksoz pli tousan ler zot vwar en zanfan vinn viktim sa fleo drog e perdi zot sans dan lasosyete….tou zot travay, tou sa zefor e latansyon in al anven. Dan en fason ou lot…nou kominote osi i ganny touse…. Tro bokou fanmiy dan nou pei pe soufer an silans akoz bann fleo sosyal.

Dan en fason ou lot, nou bezwen protez nou zanfan kont sa fleo drog.  I pa zis en kestyon pinisyon me osi en kestyon rehabitasyon apre ki zot fer zot santans. Nou  bezwen pare pou resevwar zot dan lasosyete e donn zot en dezyenm sans dan lavi.

 

I enportan ki nou bann zenn (ki souvan viktim sa bann fleo),  realize ki zot dan en lanvironman loportinite,  zot bezwen pare pour sezir lokazyon. Nou dan parti lepep nou oule ki nou lazenes i vinn pli smart posib ……. e Sesel, anba direksyon parti lepep, pou reste touzour en landrwa loportinite pour ou ….  pe enport ou desandans oubyen fot ki oun fer dan lavi ……. parti lepep i kwar ki ou merit en dezyenm sans.

 

…… swe bann zabitan mon distrik e fason ki pe ganny adrese

Mr Speaker,

Dan mon lentervansyon lo leta lanasyon pou lannen 2010, mon ti fer sa bann remark swivan lo mon distrik:

Mon ti fer resorti ki dan mon distrik, sak fanmiy i annan son prop defi e ki sakenn i esey mannye dan lafason ki i kapab….. zot pa demann bokou me zot ekspekte kantmenn plis sipor dan zot travay e en pli bon servis piblik.

Mon ti dir ki:

zabitan Takamaka i ekspekte ki bann departman gouvernman i vinn pli efektiv dan lafason ki zot reponn a zot bann demann e bezwen.

Mr Speaker, monn vreman apresye ki Prezidan i abord sa size lefikasite dan ladministrasyon piblik dan son diskour sa lannen e rekonet ki nou bezwen en nouvo oriantasyon dan servis piblik.

 

Mon ti osi dir ki zabitan mon distrik i anvi vwar departman later pran en lapros pli efektiv pou met bann morso later leta ki trouve dan distrik a dispozisyon bann aplikan..dan sa fason zot osi zot kapab bouz pli devan. I ti en gran plezir pour mwan antann Prezidan Michel pronons son langazman lo sa size e demann sa Minister responsab pou met plis kare later a dispozisyon bann fanmiy e zenn profesyonel ki pe ankor pe espere.

 

Mon ti osi fer remarke: ki bann kin pran loan pou fer lakaz, i ekspekte ki gouvernman i revwar zot bann kondisyon apre sa logmantasyon dan kou konstriksyonMr Speaker, monn apresye vwar dan sa dernyen lannen, en gran amelyorasyon dan servis loan ki HFC pe ofer son bann klian. Zot pe ekzers plis fleksibilite dan lafason ki zot tret bann aplikan e pli enportan ankor, seki in annan rediksyon enportan lo lentere ki zot ti pe sarze. Se sa bann zefor parey ki ede amelyor leta fanmiy seselwa e kre en latmosfer pli positiv dan nou pei.

 

Mon ti fer resorti ki zabitan mon distrik i ekspekte ki bann provizyon neseser i ganny fer pour reserv sa bann morso later ki bord avek lans ki gouvernman in met a dispozisyon piblik

Mr Speaker, pandan son dernyen vizit dan mon distrik, Prezidan Michel i ganny sans apresye demann nou zabitan pou ki Anse Marie Louise i reste en landrwa piblik e an mezir, i pou  ganny transformen koman en park kiltirel . Lo nom tou zabitan Takamaka, mon profite pou remersye Prezidan Michel pou tou son sipor dan sa demars.   

 

……………………………………………………. An konklizyon…

Mr Speaker,

 

Nou bezwen kontinnyen adapte avek sanzman, sirmont adversite e konfront bann defi dan en fason kouraze e kreativ.

Nepli tan pour espere… i nepli tan pour zis reve …i nepli tan pou kwar dan bann largiman lidealizm….. in ler pour ou leve, fonse e fer ou mark dan ou pei. Loportinite i la, travay i la.  E saki pli enteresan SNP pou nepli la pou anpay ou.

Mr Speaker, sakenn de nou i annan en bout pour fer dan sa pei…. Sakenn de nou i bezwen pe fer son bout…. Pour ki dan lansanm nou ganny nou en sosyete bokou pli for e resilyan ki ete ozordi.  

I mon swe pour sa lannen 2011 ki nou refer viv sa vre lamitye Seselwa malgre nou diferans lopinyon….., kot nou tou nou kapab partisipe e ansanm trouv solisyon pou nou bann difikilte.

Dan nenport ki deba, nou bezwen touzour kapab akomod nouvo lide e respekte lopinyon lezot.  Tro souvan nou les lanmertim pran kontrol nou sans rezonnman. Pour tro bokou letan, nou tann menm sanson avek menm rythm.

Ou kin siport  SNP, ou devret realize ki sa bann dimoun pe rankont en menm zistwar lannen apre lannen. Zot in fer ou vinn negativ avek zot slogan pa pou zanmen les tonbe. Saki pli trist zot in fer ou vinn lenmi ou prop lekor, oun nepli konnen kwa ki byen e kwa ki mal. Parti lepep i envit ou pou vinn respir sa ler fre e lanvironman dinamik ki nou nou ofer nou siporter.

 

Wi Mr Speaker, Parti lepep pe touzour regard ver lavenir son pep. Nou dan parti lepep nou anvi vwar ou bouze, nou anvi vwar ou reganny sa plezir pou ansarz ou prop lavi.  

Mr Speaker,

Nou parkour pour kree sa sesel ki nou vwar ozordi i pann zanmen enn kin fasil…  noun konn plizyer defi ek bann lannen difisil … me malgre tou defi noun touzour sorti pli for koman en pep…. Noun aprann atraver leksperyans e noun azir avek bokou pridans. Noun pran sak etap nou developman dan en fason kalkile e otan ki posib nou protez nou popilasyon, sirtou bann ki pli vilnerab. Dan bann moman difisil, noun kont lo sakrifis bann ki pli for pou kapab soulaz bann pli feb. Noun batir nou sosyete lo bann prensib nob e donn tou nou zanfan menm sans reisir.  Mon napa okenn dout ozordi ki lazenes Seselwa I konsyan zot responsabilite pou gard nou pei lo sa bon semen. Byento, Lazenes seselwa pou montre lopozisyon ki zot matir, entelizan e ki zot annan konfyans dan leadership prezidan Michel. Lazenes Seselwa in pare pou donn en lanmen diriz nou pei ver plis progre.

Mr Speaker,

Nou aprann atraver bann defi lavi nou konnen ki tou problem i anmenn nouvo loportinite. Nou travers sa period reform tre dir avek en determinasyon pour vir sa sitiasyon dan nou lavantaz,  Nou konn valer sakrifis e nou konnen ki lazenes Seselwa pe aprann atraver nou aksyon kouraze e determinen.  Nou dan parti lepep, nou reste konvenki ki napa naryen ki fer nou per.

Mon remersi zot pour ekout mwan.

Mersi Mr Speaker…

 

HON DAVID PIERRE

Mr Speaker, koleg MNA, lepep Seselwa bonzour. Ser frer Seselwa I mon gran plezir pou mwan reponn diskour prezante par James Michel Prezidan nou pti nasyon Sesel. En nasyon ranpli ek kouler, en pep ranpli ek talan, me ki depi 77 in trouv li ek en parti politik opouvwar, parti SPPF, Parti Lepep e avek de Prezidan, France Albert Rene e James Alix Michel.

 

Pou preski 27an pandan sa 34an Mr Rene in diriz Sesel koman en diktater e pandan sa dernyen 7an apre ki I ti pran labar an 2004 Mr Michel in montre nou son lenkonpetans komen en Prezidan e son lenkapasite pour li trouv bann solisyon dirab e efektiv pour bann febles, bann problenm, e bann challenges ki sa 20enm syek I anmennen pour Sesel e pour tou Seselwa.

 

Dan lot kote Mardi dan son ladres Lider Lopozisyon Mr Wavel Ramkalawan in tal tou kart lo latab. In eksplik son vizyon e in donn Sesel en direksyon. En vizyon ki donn lespwar en pep, en vizyon ki donn nou en plan ek en solisyon kler lo kwa ki nou bezwen fer koman en nasyon pou tir Sesel dan sa boulvers e anmenn li ver prosperite kot tou Seselwa I a viv dan lafyerte, dan dignite, dan larmoni, e dan la liberte. E fodre zot ganny li kler Seselwa zis en sanzman ki pou kapab anmenn sa realite lo peron tou Seselwa.

 

Me Mr Speaker malgre zot lenkonpetans I annan tro bokou zot kin sitan vin konfortab ek pouvwar, I annan sitan zot kin kree zot pti lanpiy, I annan sitan zot kin abiz pouvwar, e I annan sitan krim ekonomik kin ganny komet e alor zot pe fer tou ki Mr Michel I reste opouvwar. E pour zot achieve sa lobzektif zot in fini deklare ki zot pou fer sa ki zot fer byen parey zot ti fer an 2006, zot pou rod ankor en manda pirman baze lo debaz. Premye baz se aste dimoun, e dezyenm baz se anbet dimoun.

 

Ser frer Seselwa les mwan ilistre de legzanp lo kwa ki zot abitye fer. Dan eleksyon 2007 dan en serten distrik zot ti propzoe pou pey en boug Rs50 000 pou li fer en PPB pour zot akoz sa boug ti siport lopozisyon. Rs10 000 ti ganny donnen avan PPB, Rs10 000 apre. PPB ti ganny fer me ziska ozordi zot ankor dwa sa boug Rs30 000. La la ki zistans zot pare pour zot ale pour zot retenir pouvwar apre zot ava dir nou ki nou nou swaf pouvwar. Toufason zot ti ganny bate dan sa distrik e zot pou ganny bate ankor.

 

Dezyenm legzanp an 2007 Mont Buxton zot pas kot 3 vyeyar san okenn laont e promet zot an lavarang pou 3 vot. En lavarang ki zot in met 4 pilye ki ankor pe debout I fer 4an deza. Ozordi parey zot labitid larzan lepep, tol, dibwa, materyo, fridge, cooker, washing machine pe ganny donnen dan tou kwen Sesel zis pour zot kapab reste opouvwar. Me fer sa ki zot oule zot pa pou reisir akoz dan leker sa pep I annan en revolt silansye e zot konnen ki sa revolt pou manifeste son lekor dan en sanzman dan bwat vote le 21 Me 2011.

 

Mr Speaker les mwan prezan tour dorizon lo speech Mr Michel. Premyerman Mr Michel I dir nou ki sa reform ekonomik pou anmenn renesans pour sa pti nasyon Seselwa, me lepep Seselwa dmann Mr Michel zis en kestyon. Lekel kin touy sa pti nasyon, kin fer ki nou bezwen en renesans ki konsekaman ti anmenn IMF devan nou laport an 2008 kot devaliasyon plis ki 100% ti ganny enpoze lo nou. Lekel ki responsab, lekel dan sa pei ki pan empower leker Seselwa pou fer ki nou bann lenstitisyon enportan I ganny mete dan lanmen bann travayer etranze, tel ki bann Franse kot PUC, bann Irlande kot NDEA, bann Gerkaz kot nou prizon, e en lepok bann Ostralyen kot ladwann e kot taks, apre I ganny kouraz pou dir nou ki sa I en laviktwar pour Sesel.

 

Parey Mr Rene in deza dir nou ki nou lekonomi solid. Mr Michel in vin dir nou menm zafer dan son diskour. Me mon anvi ki Seselwa I demann Mr Michel en kestyon, si nou lekonomi I solid e Sesel pe fer byen akoz ki lamazorite Seselwa pa kapab fer fas ek koud lavi kin mont par lao zot latet. Eksplik lepep Seselwa kote ki sa larises, ki sa swadizan bon lekonomi pe kree, pre vreman ale. Eksplik nou akoz anba son direksyon bokou Seselwa ki pe travay dir pe ganny en saler debaz ki pa permet zot sonny zot fanmiy e zot bezwen monte desann kot welfare agency pour zot kapab fer de bout zwenn. E ki manyer ki li koman Prezidan La Repiblik I kapab ganny sa kouraz pou dir nou ki sa I reprezant en laviktwar pour Sesel.

 

Mr Michel oun dir nou ki en laviktwar pou Sesel kan ou trouv en zanfan Seselwa in ne e grandi dan en lanvironnman ideal pou son devlopman fizik e moral, me dir nou Mr Michel lekel ki responsab pour sa degradasyon moral dan nou pei. Lekel ki depi 77 ti anpes bann diferan larelizyon zwe zot rol pou lev e mentenir moralite dan sa pei. Dir nou dan sa lepok lekel ki ti cancel larelizyon dan lekol e ferm nou bann lasapel dan sa pei, tel ki lasapel Regina Mundi e dir nou lekel ki ti anpes bann prêt mont menm NYS pour zot al delivre bann servis relizyez. Konsekaman zoordi anba ou direksyon noun vwar en logmantasyon dan labi sibstans tel ki drgo ek lalkol osi byen ki en logmantasyon dan prositisyon parmi bann zenn Seselwa. Krim vol ek vyolan in ogmant par plis ki 75% pandan ou manda, e lazenes e lepep Seselwa pa pe trouv en solisyon anba ou direksyon. Eski sa pa I en sinny ki the time has come pour Sesel annan en sanzman.

 

Mr Speaker dan tousala Mr Michel in profite e in esey koz lo lon lalit kont drog e in dir nou ki I pe fer en reisit. Me Mr Speaker si nou pei I anvi reisir dan son lalit kont drog lider lopozisyon in fini dir ek Mr Michel dan sa Lasanble Mardi kin fek pase kwa ki I bezwen fer pou met en lafen ek sa problenm drog.

 

MR SPEAKER

Hold on, kin arive. In tonbe, hold on. Oke nou pou adjourn. Oke mon krwar meeting I adjourn ziska 2er.

 

(Break)

 

3rd March 2011

Last session

 

HON. DAVID PIERRE

…E se ou gouvernman ki responsab.  E les mwan donn ou en warning; i bann dernyen Seselwa ki zot viktimize dan sa pei akoz zot letan pe terminen.  Mr Speaker ler en profesyonel Seselwa i ganny pini akoz son kwayans politik, sertennman i pa en viktwar ni pou Sesel, ni pou nou dan SNP.  Ler en etranze i pran plas en profesyonnel Seselwa dan en travay ki sa Seselwa i kapab fer pli byen ki li, sa i pa en viktwar pou Sesel.  E Msye Michel i pa en viktwar pou Sesel pou sa plis ki 2,500 fanmiy Seselwa ki ou ladministrasyon ti pouse dan zot travay ler zot ti antreprann reform ekonomik enpoze lo nou par IMF.

 

Mr Speaker Msye Michel in koz lo en laviktwar pou Sesel ler en fanmiy i pran posesyon son prop lakaz.  Mon konpran li lo sa enn, e mon konpran tou sa lemosyon ki i atase avek en tel levennman.  Me i pa en viktwar pou Sesel ler en fanmiy i bezwen esper plis ki 25an pou li pran posesyon son prop lakaz.  An efe, enn bann rezon prensipal lo akoz gouvernman SPPF/Parti Lepep i toultan fail pou delivre lo son promes lakaz i akoz lakantite koripsyon dan sa domenn ilistre par sa disparisyon sa 4.5 milyon dolar, anviron 57 milyon roupi dan proze Zil Perseverans.  En sonm larzan ki ti’n kapab ganny servi pou konstrir 143 lakaz pou bann Seselwa lo en kou R400,000 par lakaz.  Antretan lepep Seselwa i a pe rode akoz ki lanket pa pe ganny fer dan sa zafer e sa larzan pa ganny rekipere e retourn dan kof leta.

 

Mr Speaker Msye Michel in koz lo en laviktwar pou Sesel ler en pasyan i reisi ganny son lasante apre swen medikal.  Me Msye Michel i bezwen egalman konnen ki i pa en lazistis pou sa fanmiy ki son byenneme in perdi son lavi apre ki’n esper en lanbilans pou plizyer erdtan akoz napa lanbilans.  E sertennman i pa en laviktwar pou Sesel ler plis ki R7,000,000 larzan lepep ki’n ganny dezinyen pou aste latizann i disparet san ki son ladministrasyon i fer okenn gran zefor pou rekiper sa larzan e retourn li dan kof leta.

 

Mr Speaker i kas mon leker ler mon antann Msye Michel pe koz lo en laviktwar pou Sesel ler i vwar nou bann vye paran pe zouir zot konfor dan dignite e antoure par lafeksyon.  Me pou mwan sa i anmenn en santiman lipokrizi akoz lepep Seselwa, pa bliye sete ou e ou ladministrasyon ki ti aras sa bann menm vyeyar zot carer e fer zot viv dan lapenn, dan soufrans e san dignite.

 

E Mr Speaker, ler Msye Michel i koz lo en laviktwar pou Sesel ler i vwar en atlet fer monte ou paviyon lo lasenn enternasyonal mon tante pou mwan fer li rapel ki i pa fer lazistis sa bann menm atlet ler zot refize oubyen tarde pey sa bann atlet zot rekonpans ki zot in ganny promete avan ki zot al pran par dan bann tel konpetisyon.  E sertennman i pa en laviktwar pou Sesel e i pa anmenn loner me plito laont pou nou pti pei ler en atlet i ganny ban pou rantre dan en serten pei akoz son gouvernman in refize pey outstanding fees anrelasyon ek zot VISA.

 

Mr Speaker mwan mon kontan mon zoli pti pei e mon konpran ler Msye Michel i koz lo en laviktwar pou Sesel sak fwa ki en touris i debark lo nou zil.  Mon anvi dir ek Msye Michel ki i pa en laviktwar me en laont e non Sesel i ganny sali ler en gouvernman SPPF i vann plizyer paspor Seselwa pou 25 mil dolar pou sak paspor ek bann etranze kot dan serten ka i annan ki zanmen in depoz son lipye isi Sesel e ki nou paspor i senpleman ganny servi koman en kouvertir pou kasyet malfe serten sa bann etranze.

 

Mr Speaker Msye Michel in koz lo Vizyon 2020.  En lepok zot ti annan en vizyon pou ranpli La Digue ek loto elektrik, apre zot ti dir nou ki zot pou fer semen tren depi la kot les ziska dan Nor.  An 2003 ti annan Laspirasyon 2013, en vizyon pou lazenes Seselwa ki ozordi i lo en shelf e pe ranmas lapousyer.  Apre ti annan stratezi 2017; en vizyon lo ki direksyon nou pei pou pran pou ki nou kapab double nou larises dan 10an.  Si ti annan pri nobel pou vizyon ki pa’n zanmen ganny akonplir, mon napa okenn dout ki premye pri ti pou al pou Prezidan Michel.

 

Vandredi i ti vin donn nou Vizyon 2020; en vizyon dapre zot, ki fonde lo en meyer kalite lavi pou tou Seselwa.  Me lepep Seselwa in fini reveye.  Zot rapel sa menm zistwar avan eleksyon 2006.  Zot ti pou met larzan dan pos Seselwa, zot ti pou donn nou en roupi ki for, zot ti pou garanti tou vyeyar en carer e tou Seselwa ki anvi travay ti pou travay.  E rezilta zot vizyon zis apre eleksyon, sete devalyasyon.  Seselwa ti ganny pouse travay, vyeyar ti ganny arase zot carer e pri marsandiz ti defons plafon. Seselwa pe soufer e dan tou kwen Sesel zot pe rod sanzman.

 

Ozordi bann pei dan lemonn Arab pe osi demann sanzman.  Nou nou pe ganny sa loportinite pou nou fer li dan bwat vote dan mwens ki 3 mwan.  Annou fer tande nou lavwa e annou fer krake sa bwat vote pou ki ennfwa pou tou nou a ganny nou en gouvernman ki krwar dan son nasyon, enn ki respekte laliberte son pep kot nou Konstitisyon dan ki tou nou bann drwa fondamantal i ganny enskrir i a ganny respekte.  Laliberte ek lazistis i a renye, e Seselwa ennfwa pou tou i ava aret viv dan lafreyer, e parey Leader Lopozisyon ti dir dan son diskour, politik i a ganny tire dan travay.  Anba SNP en travayer Seselwa i a garanti ki i pou zouir valer son talan e son kouraz ek son devosyon atraver bann striktir saler ki rezonnab e atraver bann striktir pou promosyon ki pou anmenn lazistis pou tou travayer Seselwa.  Anplis, dan sa nouvo Sesel, tou eleksyon pou lib e zis.  SBC pou aret ganny kontrole e manipile par parti opouvwar.  Mr Speaker, nou lafors lapolis e lafors defans i a 2 lafors ki tre profesyonnel e tre kapab.  Nou a vwar en Komisyon Elektoral ki endepandan.  E pou satisfer Onorab Marie, nou a fer sir ki dimoun mor pa pou ganny zanmen met lo lalis voter ankor dan sa pei.

 

Wi Mr Speaker, Seselwa pou fer sanzman, James Michel in fail lepep.  Pran legzanp lakaz.  James Michel in dir nou ki …..

 

MR SPEAKER

Onorab!

 

HON. DAVID PIERRE

Msye Michel in dir nou ki 1,404 lakaz pandan 5an dan en lobzektif 5,000 lakaz in ganny akonplir.  I en lakonplisman kot zis 28% son lobzektif dan en manda.  28% Mr Speaker i en failure.  Dan sa loptik i enportan pou note ki en senp pti kalkil i demontre ki baze lo kalite travay ki Prezidan Michel in fer an relasyon ek konstriksyon lakaz, i pou pran son gouvernman 4 manda 5an pou li kapab delivre lo en promes ki i fer ek son pep pou en manda.  An dot mo, i pou pran SPPF/Parti Lepep 20an pou zot kapab azir lo zot promes pou delivre sa kantite lakaz ki zot in dir zot pou delivre.  Sa i eksplik sa fenomenn kot en dimoun i bezwen esper 26an pou li kapab ganny en lakaz anba SPPF/Parti Lepep.  Dan sa konteks mon kontan pou bann ki’n ganny zot lakaz me mon regrete pou dir ek Msye Michel in fail 72% lezot Seselwa ki ti pe aspire pou ganny zot lakaz pandan sa dernyen 5an.  Sa i pa en laviktwar pou Sesel.

 

Mr Speaker, reform dan lasante i en lot size ki’n ganny aborde dan diskour Prezidan semenn pase.  Plizyer kestyon i kapab ganny demande lo sa size.  Eski i vreman annan proper financing dan nou sistenm lasante?  Larepons i kler.  Non, napa.  Mon challenge nenport ki zot lo lot kote latab pou vin dir mwan ki mon pa korek.  Msye Michel i konnen ki sa ki mon pe dir i korek.  Gouvernman alors in fer en lodit.  Me kestyon ki nou pou demande i akoz i pa donn nou rezilta a’n antye?  Akoz i pa dir nou ki son plan pou adres sa bann problenm?  Ozordi nou annan en sistenm lasante ki pa enspir konfyans.  Anba SPPF nou sistenm lasante pa’n evolye ek menm akselerasyon ki teknolozi dan lemonn medikal in akselere.  Nou annan en departman lasante kot tanzantan plizyer milyon roupi i disparet.  Nou annan en sistenm lasante kot gouvernman pa’n met ase resours a dispozisyon bann pasyan.  Latizann i manke de tanzantan.  Nou annan en sistenm lasante ki pa’n met ase resours a dispozisyon bann travayer.  Nou par deryer dan teknolozi modern par plizyer lannen.  Nou a’n aryer ek devlopman profesyonnel bann travayer lasante par plizyer lannen e nou a’n aryer ek lenfrastiktir modern par plizyer lannen e domaz pou dir ki ler nou reisi ganny enn sa sant modern i pa enspir sa kalite lafyerte dan nou pep parey i ti pou enspire si i ti’n ganny konstrir atraver lasyer e kouraz sa pep.

 

Mr Speaker reform dan ledikasyon in osi ganny aborde e ledikasyon sivik in monte koman en lide mazik sorti kot Parti Lepep e Prezidan Larepiblik.  Ser frer Seselwa, SNP ti pe demann ledikasyon sivik dan lekol depi 1994.  E anplis ledikasyon sivik tousel pa ase pou rezourd bann defi ki nou bann etidyan e bann zenn Seselwa pe fer fas avek.  Anba SNP nou kapab efektivman koup lo lakantite zanfan ki rantre dan drog, dan lalkol, dan prostitisyon, dan delenkans dan sa prosen 5, 10 a 15an zis par fer sir ki nou annan dan nou bann lekol bann diferan progranm ki reflekte diferan nivo kapasite nou bann etidyan.  Ou donn en etidyan Seselwa en bon progranm ki lo son nivo i idantifye li avek, i enterese, i devlop son talan, e i vin en zenn ki responsab.  Krwar mwan Mr Speaker, drog ek lalkol pa pou zanmen vin en opsyon.  Personn pa pou kapab bar sa etidyan.  E ler i fini lekol, en gouvernman SNP i garanti li son premye dyob.

 

Mr Speaker, anba SPPF ozordi dan sak 1,500 zanfan ki ne dan sak lannen isi Sesel, zis anviron 5% ki vwar figir Liniversite.  Vizyon SNP se pou met resours dan tou nou bann lekol, donn nou bann zanfan sa kalite progranm, kontinyelman ogmant kapasite nou bann ansennyan, kit zot azour ek devlopman teknolozik e nou ava fer sa poursantaz ogmante sorti 5% e vin omwen 20%.  Se sa vizyon SNP pou lazenes Seselwa.

 

Mr Speaker en lot size adrese par Msye Michel se politik bon marse.  Mon’n enpe soke kanmenm pou antann Prezidan Larepiblik pe koz lo politik bon marse dan en diskour lo leta lanasyon.  Mon konpran in esey fer serten pwen politik e in esey defann son gouvernman an relasyon ek later leta ki gouvernman in vann a plizyer repriz ek plizyer etranze sirtou ek bann dan Mwayen Oriyan.  Seselwa i bezwen konpran en keksoz.  Nou koman en pep nou napa swa, nou bezwen protez nou patrimwann.  Nou bezwen protez nou later pou fitir zenerasyon zis parey plizyer zenerasyon avan nou in fer pou ki nou kapab zouir nou later, nou lans e nou lanvironnman.

Prezidan Michel i kapab ankoler si i anvi me i bezwen aksepte en keksoz; anba son direksyon in vann tro bokou nou teritwar ek bann etranze.  Pwen, fini. E mwan mon anvi fer lepep Seselwa konnen, menm serten Onorab lo lot kote latab dan prive zot in dir ki zot pa dakor me zot napa swa, zot zis bezwen aksepte.  Akoz zot zot zis bann rubber stamp pou sa gouvernman.  E mwan Onorab Pierre, koman en patriyot, mon siport propozisyon Onorab Wavel Ramkalawan ler i dir ki later Sesel pa pou ganny vann ek etranze me plito pou annan en bay 25an renouvlab kot bann mezir anti-koripsyon strikt i a ganny mete pou anpes labi.

 

Annou vwar 2 ka lavant later ki tris.  Gouvernman in donn 53.7 arpan later ki ekivalan 217,317met kare later ek en Msye Arab pou 99an pou R1 par lannen.  Gouvernman in fer li pey en premium R6.9 milyon roupi pou sa later.  Ler ou fer en pti kalkil, sa etranze ki en milti-milyonner pe ganny sa later pou R108 par mwan pou 99an.  Savedir sa later pou dan posesyon sa etranze pou 1188 mwan pandan ki i pou pey gouvernman zis R108 par mwan.  Sa i mal, sa nou pa kapab aksepte.  Seselwa i ankoler, Seselwa pa pou tolere e Seselwa pa pou tolere e Seselwa pou fer en sanzman.

 

Le 21 Me 2011 Seselwa pou desann, zot pou fer krake sa bwat vote e pou tir Parti Lepep opouvwar pou ki ennfwa pou tou nou a kapab prezerv nou patrimwann pou ki bann zenerasyon ki pe monte i a kapab benefisye.  Dezyenm ka Mr Speaker, gouvernman in osi deside pou vann en lot bout later Ros Kopra grander 4.6 arpan anviron 18,616met kare later ek sa menm milyonner pou zis R3.9 milyon.  E sa dimoun i osi annan Plantation Club.  Ki kalite gouvernman?  Ki kalite Prezidan?  Mr Speaker, ser, frer Seselwa, ouver zot lizye.  Laplipar sa bann morso later ki sa gouvernman pe vann ek sa bann etranze i bann zoli zoli morso later lo latet montanny parey pou Sheikh Khalifa oubyen lo bor lanmer tel ki Ros Kopra.  Msye Michel i dir ki i pli kontan son Seselwa ki etranze me demann ou lekor en kestyon, eski i vreman annan en Seselwa ki Msye Michel ti pou les li konstrir en lakaz lo sa latet montanny La Misere?  Larepons i non.  Pwen, fini.

 

Pou terminen Mr Speaker les mwan met devan sor bann travayer Nouvbanq; en lakonpanyen ki gouvernman i annan par ladan.  Msye Michel i dir nou ki i kontan e i siport travayer, akoz i pa get dan sor sa bann travayer?  Kondisyon travay i move.  Labank i koule e en gratwite sa bann travayer pa gannyen.

 

Dezyenm sor: akoz ki en serten nonmen PB pe monopoliz serten nou resours natirel ki i pe vann dan Lazi e kot in fer plis ki 2 milyon dolar pandan sa dernyen 4an.  Akoz ki napa en tender lo sa size e eski akoz sa serten nonmen PB pe sponsor serten parti politik?  Seselwa rode.  Antretan, toulezour nou tann SPPF/Parti Lepep pe dir ki zot for, zot dirizan i kosto, kapab e konpetan.  Si zot krwar ki Msye Michel i pli kapab ki Onorab Ramkalawan, nou challenge li ozordi dan sa Lasanble pou Msye Michel vin fer en deba nasyonal lo televizyon live e nou a war lekel ant sa 2 leader ki pli kapab, ki pli konpetan…

 

MR SPEAKER

Time’s up. Onorab Francois.

 

(Applause)

 

HON JOSEPH FRANCOIS

Mr Speaker, koleg MNA, zabitan Anse Aux Pins e pep Seselwa.  Mr Speaker permet mwan lo non mon bann koleg e Parti Lepep pou eksprim nou latristes anver sa pti lensidan ki’n ariv Onorab Derjacques e nou swete i reganny son lasante opli vit posib.

 

Mr Speaker permet mwan komans mon lentervansyon avek enn pti sitasyon sorti kot Martin Luther King i ti dir e mon site ‘the ultimate measure of a man is not where he stands in moments of comfort and convenience but where he stands at time of challenge and controversy’. Sa sitasyon i en rezime mon diskour e i labaz mon mesaz pou tou bann ki pe ekout mwan isi dan sa Lasanble oubyen nenport ki landrwa kot ou ete.  Mr Speaker i pa pour posib pour mwan reakte lo diskour Prezidan Michel san donn en bilan son travay e personnalite nou bann leaders ki pe diriz nou pandan sa detrwa lannen.

 

An 2006 Prezidan Michel ti prezan avek lepep Seselwa son plan 5 an e i ti pe demann zot pou vot lo la. Sa ti son manifesto. Son plan ti enn ki ti baze lo en vizyon kler ki’n refer resorti dan stratezi 2017 pour kontinyen lo nou semen progre ekonomik san konpromi nou bann aki sosyal ki nou’n travay dir pou gannyen.  Nou lazenes ti’n ganny sans met zot kontribisyon dan sa travay atraver laspirasyon 2013, wi e se sa ki’n gid nou pei dan sa lelan pou met lazenes devan dan bann desizyon kler dan nou gouvernman.

 

Prezidan Michel pa ti’n enport, ni kopye lo okenn plan sorti dan okenn pei, ni avek okenn parti politik alye me i ti desid lo son prop plan lo kwa ki bon pour Sesel e demann lazenes pou azout bann detay ladan.  E byento i pou fer 5 an e pep Seselwa pe met li pare pou ziz li lo sa plan.

 

Dan lot kote i osi annan en lot group dimoun, bann sitwayen ordiner ki zot zot ti’n toultan siport lopozisyon, dan lepase zot in mekontan avek zot parti e tou resaman zot in dir zot osi zot in met zot pare pou zot al vote dan prosen eleksyon, zot zot pou al vot lo 2 satisfaksyon dan fason ki zot in ganny anbete, abize e mal gide par zot dirizan sirtou bann ki’n donn zot konfans e ti pe vot lo en lopozisyon ini dan dernyen eleksyon. Me zot zot in plito vwar bann promes kase, en diktasyon total, en vyol konfyans son siporter e zot pe kestyonn lefikasite sa lopozisyon ki la devan nou. E bokou zot zot pe reapros Parti Lepep e zot pe dir ki SNP in met zot retar e zot non ankor. Zot pe dir ki sanzman ki zot ti pe rode in fini ganny arive avek Jj e aprezan zot pe al les SNP tonbe.

 

Mr Speaker pandan sa 5 an, Prezidan Michel in vin avek son prop stil leadership e in pa’n kopi lo son predeseser ni lo okenn son omolog a letranze, in vin avek son stil ki li i santi i apropriye pou lepok ki Seselwa pe viv ladan.  E parey i ti dir dan son sermantasyon an 2006 mon annan mon prop stil e mon pou travay pou tou Seselwa.  Laprev son prop stil e travay pour tou Seselwa i la pour nou tou vwar.  Prezidan Michel avek son prop stil e travay pou tou Seselwa in reini nou nasyon koman en sel pep menm dan bann letan difisil.  I pa’n get ou kouler politik e in apwent teknisyen kalifye e eksperyanse dan serten pos kle dan son gouvernman. In envit sekter prive pou travay etwatman avek son gouvernman, in ranplas bokou latet bann lazans gouvernman, avek bann lazenes pou donn plis soupir e zenn determinasyon e konpetan dan bann louvraz ki gouvernman i anvi antreprann. In apwent nouvo Minis dan son lekip pou donn nouvo lide e fason pou fer marse son gouvernman, in relans Sesel lo platform enternasyonal e dan lemonn atraver en prezans konsistan, e akseler en politik diplomati aktiv ek bann pei zanmi. In revwar travay politik nou Parti e re-brand nou parti, pou fer fas a bann nouvo defi ki devan nou, in relans nou lekonomi dan en letan kot bokou nou nou ti krwar sa pa pour posib. Wi, sa i sa zonm kouraze ki’n dir nou ziz li par son aksyon e ki i annan en leker pou tou Seselwa.

 

Prezidan Michel pa’n pran tou kredi pour li menm si li ki’n moter tou sa bann sikse me i pe dedye sa sikse pou tou Seselwa atraver tenm sa lannen ki in dir viktwar pou Sesel.

 

Me dan lot kote i annan en leader ki li i pa zis anvi selebre laviktwar avek sa pep me i anvi hijack sa laviktwar. Sa laviktwar ki dan plas kontribye, i ti pe esey saboule a tou moman dan sa dernyen 5 an. I ti sey saboul nou reform ekonomik menm si apre i ti dir poudir sa i son lide ki nou’n kopye.  In sey saboul bann diplomat etranze letan kominote enternasyonal ti dakor avek nou reform e i ti dir ki zot osi zot bann siporter Parti Lepep. In sey saboul rankont konsiltatif State House e i dir sa ti zis en mannev pou met li dan en latrap.  In sey saboul apwentman nou bann nouvo Minis e i ti dir ki serten sa bann Minis i tro zenn e zot mank sinyorite.  In sey saboul diplomasi ekonomik aktiv an dizan ki nou pe vann nou pei e nou Prezidan pe negliz son pep pou al vwayaze. In menm saboul nou letan nou ti relans nou parti koman en parti politik pli modern  e avangar e i ti dir sa i zis en sanblans kanmeleon.

 

Mr Speaker me la zis detrwa mwan avan eleksyon Prezidansyel, SNP pe proklanm sa laviktwar koman son laviktwar e Onorab Arissol in dir nou se gras a SNP ki en kantite keksoz in avanse dan sa pei.  I kler ki apre 5 an labsans SNP e aprezan ki zot in reveye e zot pe vin avek swadizan bann bon lide e zot pe demann lepep pou elekte en ladministrasyon SNP pou  kapab diriz sa pei.  Mr Speaker vizyon SNP ki Lider Lopozisyon in koz lo la e answit in ganny glorifye par Onorab Pierre.  SNP atraver son lider in prezant nou en vizyon, i pe demann Seselwa pou elekte zot lo la.  En vizyon ki bokou nou ki’n fer management avek economics nou pe zize koman en vizyon ki shortsighted. En Lider ki pa get lwen e bann mezir e stratezi ki piecemeal e pa azoute.

 

Bann zenn pe get sa koman bann sweet talks ki pa realizab menm avek sa nouvo lepok ki nou antre ladan.  Mr Speaker sa i zis en bouyon ki Lopozisyon in resofe. Depi 1997 zot in resofe, zot in resof li 2001, 2006 e la zot pe sey revin avek ankor an 2011. Sel keksoz anplis ki zot in fer se met enn pti pe plis vineg ladan avek en polisi, lease later ek etranze, ogmantasyon saler e incremental tax. Nou’n deza tande lo fason ki Seselwa pou viv pli byen, pli ris anba en nouvo Ladministrasyon SNP, nou’n deza tande lo fason ki zot pou fer zot gouvernman vin pli transparan lo fason ki dimoun pou vin pli lib e pli egal e bokou lezot keksoz ankor me sa ki’n sok nou sa semenn se sa bann zepis enkrwayab ki zot in vin avek tel ki fason ki zot pou ogmant saler Seselwa, fason ki zot pou ankouraz lenvestisman, nivo sekirite ki pou annan dan gouvernman, fason ki zot pou kontrol sekter prive pou anploy travayer, kantite taks ki zot pou anmase pou fer marse sa pei e fason ki zot pou rezet etranze e fer zot retourn dan zot prop pei.

 

Me sa ki tris e sa ki lider lopozisyon in oubliye koz lo la sa se CV sa bann dimoun ki pou fer marse ladministrasyon SNP. Pour nou kapab analiz zot rikord dan promosyon lademokrasi, pour nou kapab get zot leksperyans dan ladministrasyon e pour nou kapab get zot kalifikasyon pou enplimant en tel progranm.  Mr Speaker sa lekel i tre enportan akoz se sa lakle bon gouvernans.

 

Bon gouvernans pa zis ganny ekrir lo en bout papye, accountability pa zis ganny promote par en rapor oditer e rann kont pa zis en showcase televizyon monte par zournalis me i plito demann konfyans e efikasite bann dimoun ki annan bann bon tract record, dimoun drwat e bann dimoun onnet. SNP in fatige dir nou ki nou pa devret aste kabri dan sak.  E la mon mesaz pour bann zenn Seselwa se pa zanmen les zot ganny anbete par sa bann sweet talk, par zis en lalis ki zot apel en plan san okenn lekel sa bann dimoun ki pou al enplimant sa plan.

 

Mr Speaker eski zot pou dir mwan mon pe akiz zot si mon dir ki bon demokrasi i ganny promote par bann dimoun ki pe deza pratik la demokrasi.  Eski zot pou dir mwan mon mal si mon dir ki accountability i ganny promote selman par bann dimoun ki annan bon rikord gard kont e bann ki respekte bann norm kontabilite.  Eski zot pou dir mwan mon pe atak lopozisyon si mon dir ki donn loportinite nou lazenes i komans par plas ki ou donn sa zenn dan ou parti e valer ki ou donn li pou reprezant ou. Eski mon pe byen dir pou dir ki en diktater i en dimoun ki refize pas pouvwar avek en lot menm si i annan bann lezot manm dan son prop parti ki pe egzize ki i fer li pou sov zot parti.  Eski zot pou dir i en latak personnel si mon dir ki 18 an koman en Lider ki pe byen ganny peye dan Lopozisyon pa reflekte byen lo zot slogan ‘Years, Powers, and Corruption’. Mr Speaker mon kontan sa lartik ki ti aparet lo premye paz Regar le 18 Fevriye 2011 e ki nou’n retann rezonnen isi dan sa Lasanble par tou manm lopozisyon ki’n koze, e mon site; Rulers who stay in power for long years turn out to be corrupt, not only them but their relatives and close friends have collected businesses and property for themselves often at the expense of ordinary people. Eski i pou mal si mon dir ki sa osi i kapab aplik pou en lider lopozisyon ki ganny en gro saler ek larzan piblik, gro gratwite avek sa pep e ki oule reste in opposition power for long years. Eski li osi i kapab turn out to be corrupt? Eski li osi i posib pour son fanmiy ek zanmi kapab kolekte biznes ek propriyete anba sa menm sistenm ki i pe dir son siporter pa bon?  Sa lartik i kontinyen e i dir, It is the corruption that prevents them from letting go in a democratic fashion. Eski sa pa pe osi koz lo realite politik dan parti lopozisyon?

 

Mr Speaker lemonn i an kriz, la aktyelman dan lemonn i annan tou lendikasyon ki lenflasyon ki nou pe vwar ki enkli kou lavi an zeneral pou kontinyen monte e menm pli o ki lemonn i kapab ekspekte oubyen cope avek.  Tou lendikasyon i montre ki lakwizin sak pei pou vin pli so e sa lanmans pwalon pou komans sofe.  Pou deal avek en tel sitiasyon alors i kler ki nou pou bezwen bann kwizinyen eksperyanse e ki kapab tyonbo lanmas pwalon letan i so, en kwizinyen ki pou garanti nou en repa tou lezour, menm sitiasyon lemonn pe sanze dezour anzour, pa enn ki pou tay lakwizin e sak fwa nou demann li en repa i pou fer nou mor lafen.  Mr Speaker, mon konn tre byen ki i swe tou politisyen dan nenport ki pei lemonn pou mentenir lenflasyon pli ba posib pour son pep e nou tou nou konnen ki lenflasyon o ki rezon prensipal ki pe kree bann revolt dan bann pei mwayenn oriyan, nor Lafrik, Lenn eksetera.  Me ki vre lakoz lenflasyon, oubyen ki lenpakt lenflasyon i annan dan en pti pei parey Sesel. Eski fitir ladministrasyon SNP i kapab dir nou kimannyer i pou kontrol pri karbiran enternasyonalman? Oubyen kontrol pri transportasyon marsandiz pou vin Sesel oubyen kontrol linondasyon lo bann laferm Lenn, Pakistann ek Sri Lanka, oubyen kontrol lasesres, oubyen menm kontrol bann latak piratri ki pe fer pri lasirans transportasyon monte?  Dir mwan lekel parti politik Sesel ki pou annan kontrol lo tou sa bann fakter.  Si non, alors nou pou agree ki en politik ki tou Seselwa pou viv happily for ever and after i pa reel e i pa pour marse.

 

Onorab Lider Lopozisyon eski dan ou vizyon ou pe vin ek en plan lo kimannyer lapli pou tonbe Sid Afrik, anpes tro bokou lapli tonbe Ostrali, Lenn Pakistan ek Sri Lanka, kimannyer ou pou fer pri bato ki pe anmenn marsandiz Sesel tonbe e kimannyer ou pou fer pri lasirans kont piratri desann avek bi pou tou Seselwa viv happily for ever and after. Larepons i senp, zot pou napa kontrol lo sa bann fakter ki mon’n nonmen e rediksyon dan koleksyon taks pou senpleman anpes sa 2 bout zwenn.   Sa vedir zot depans vizavi zot reveni pa pou azoute.  Zot polisi lo fer desann pri marsandiz par tir tak e fer monte lapey travayer i en politik bon marse e ki tou ekonomis pe monke akoz lannmen bomaten menm zot pou napa ase larzan taks ki zot pou’n ranmase pou fer marse zot zoli progranm ledikasyon, zot zoli plan lasante oubyen donn tou sa ki bezwen lasistans sosyal anba zot ladaministrasyon gannyen. E sa ki pli gou ankor se ki lefe ki pou annan tax reclaim lo income tax i vedir poudir ou Seselwa ou pou bezwen pey tou sa bann servis ki zot in koz lo la. Ledikasyon pou nepli gratwit, lasante pou nepli gratwit, akoz sa pou sel fason pou zot kapab finans sa bann servis se fer ou peye. Dan nou parti, Parti Lepep nou bann realis, nou pa bann idealis. Pou deal ek bann problenm kou lavi ki’n vin ser dan bann lannen la la ki nou’n fer, nou’n met anplas en sistenm welfare, nou’n  fer desann lentere lo loan lakaz, nou’n fer desann kantite deposit ki ou ti bezwen pou pran en loan ek DBS, nou’n ogmant plis loan pou pti biznes. Nou’n met anplas bann lalwa pou protez konsomater, nou’n met anplas bann lalwa pou regle konpetisyon ant marsan, nou’n met en dedicated fund kot bann lekol pou ed ou zanfan, nou’n fer sir ki ledikasyon gratwit lasante ek sekirite sosyal ek lezot benefis i garanti atraver en bidze nasyonal tou le lannen. Nou’n met en fon stabilizasyon pour ou anka pri fuel i monte egzorbitman. Eski tou sala i laprev ki Prezidan Michel pa’n fer nanryen, eski pour zot  sa i laprev ki Prezidan Michel pa’n ekout son pep? Eski pour zot sa i laprev ki Prezidan pa’n gard son promes?  Si i annan ki pa pe mars byen i normal e i devwar sak gouvernman pou fer sir pou aranz son bann sistenm e fer li marse ziska son pep i satisfe.

 

Eski zot pe dir nou demen anba en gouvernman SNP pri lavi pa pour zanmen monte? Eski zot pou donn welfare ek lanplwa tou dimoun menm bann ki pa anvi oubyen refize travay? Eski zot pou fors sekter prive pran bann travayer e retenir zot menm si zot pa efektif ek prodiktif? Mr Speaker kwa ki vre vizyon pou Sesel?  Ki vizyon ki Sesel i bezwen Mr Speaker?  Parti Lepep dan le pase, parti SPPF in toultan annan en vizyon pour sa pei e mon senserman krwar ki se sa ki’n toultan fer sa diferans ant parti ki’n opouvwar e parti ki’n toultan dan lopozisyon.

 

Les mwan eksplike kwa ki mon pe koz lo la Mr Speaker. Tar dan bann lannen 1980 vizyon Parti SPPF ti pou agrandi nou baz ekonomik e akseler devlopman enfratriktir dan nou pei pou ankor 10 a 20 an e la nou pe koz lo konblaz ki ozordi nou annan nou sports complex, nou annan son sant endistriyel Providans, vilaz rezidansyel Roche Caiman, zenerater PUC e plizyer lezot ankor.  SPPF ti annan en vre vizyon lontern pou Sesel me lopozisyon ki’n toultan annan en plan ki pa al pli lwen ki 5 mwan ti konplent e i ti kestyonn sa bann devlopman e i ti dekrir sa bann proze koman proze ki pe gat larzan e i pe met det lo ledo Seselwa.  Parti SPPF pa ti aret la, i ti kontrir nouvo fasilite sportif tel ki stad ek pale de spor an 1992 e i ti fer li avek en plan pou devlop spor dan Sesel pou prosen 20 a 30 an e la ankor lopozisyon ki avek son progranm zis 5 mwan, i ti vwar poudir ki tou sala pa ti neseser e tou sala ti larzan gate ki ti’n kapab ganny pli byen servi.

 

Parti SPPF pa ti ekout zot, i ti kontinyen e i ti konble ankor later pou fer Ile Perseverance, Ile Du Port, Ile Aurore, Ile Soleil, Ile Eve eksetera.  E la i ti anons son plan pou pli gran proze lakaz lo zil Perseverance koman en lenvestisman pli lonterm ankor pou son pep e ankor lopozisyon ek zot plan 5 mwan ti demande akfer tou sala.  Sa proze lakaz ti tro gran pour nou pti pei parey Sesel, e i pou andet nou plis ankor e Seselwa pa bezwen sa.  E la ki nou’n tande sorti kot Onorab Henrie i dir nou zabitan La Riviere Anglaise pe esper lakaz avek pasyans e sa bann lakaz pa ase pour zot.  Mr Speaker lalis i kontinyen.  Avek nou 5 tankers ki pe flot nou paviyon, ozordi ki pe kontribye sibstansyelman dan nou lekonomi, lopozisyon dan zot plan 5 mwan pa ti vwar li neseser e zot ti dir nou e zot ankor pe dir nou akoz nou pa ti konstrir bato ton plito.  Zot in dir menm zafer lo nou proze liniversite Sesel, fibre optic, young leaders e lezot ankor senpleman akoz zot pa vwar lwen e zot vwar zis pour 5 mwan.

 

Mr Speaker i kler ki nou vizyon lonterm in toultan gid nou dan nou devlopman e devlopman nou nasyon e la ankor nou Prezidan in met devan nou vizyon 2020 lo latab kot nou bann konblaz pou ganny kontinyen ganny devlope. Ile Aurore pou ganny en sant biznes, e Ile Soleil Anse Aux Pins osi parey.  Nou pou annan nouvo lekol e lopital e lakaz ek biznes ankor lo zil Soleil Anse Aux Pins.  La la plan e vizyon parti Lepep ki’n pare pou prosen lannen ki devan nou e ki’n pare pou sa eleksyon ki pe vini an Me. Byensir parey nou ti pe ekspekte lopozisyon avek zot plan 5 mwan pou demande akfer tou sala.  Prezidan pa kalifye pou koz lo la e dapre zot Prezidan Michel i devret akoursi son vizyon pou zis en manda. Zot pa krwar dan long term planning. Zot pa pe get pli lwen ki 5 mwan e la nou konpran akoz zot lager letan etranze i deside ed nou pou enplimant nou plan e zot dir sa bann etranze zot osi zot SPPF. Se sa ki parti Lepep i reprezante Mr Speaker, tenasite en pep ki annan en vre vizyon pou kontinyen devlope, modernize e sa pep pou ekout nou an Me akoz se nou ki annan plan pour zot.

 

Lala diferans ant Parti Lepep ki annan en gran vizyon pour son pep e Parti SNP ki en parti reaktiv e vin selman avek en plan 5 mwan e dir nou met nou lavenir dan son lanmen.  Pep Seselwa pa zis enterese si i ganny en lakaz ozordi me i osi enterese pou konnen si son zanfan demen pou ganny en lakaz li osi. Nou Seselwa pa zis enterese konnen si i pou annan en travay ozordi me i osi anvi en biznes ki demen son zanfan li osi i a kapab travay ladan e anmenn larises dan fanmiy.  Alors nou dan parti Lepep nou osi pe travay pour sa lot zenerasyon tandis ki zot SNP zot in reste fikse lo sa prosen eleksyon.

 

Mr Speaker zot in koz lo kwasans ekonomik. Zis detrwa mwan avan eleksyon Prezidansyel SNP olye amelyor lo zot performans koman en lopozisyon responsab e vin pour omwen enfwa dan zot listwar avek en plan byen konkret, byen kalkile e ki fer sans zot in resof sa bann menm bouyon e zot in zis azout ennde pti zepis.  Leta nou nasyon i ganny reflekte par kwasans ekonomik Mr Speaker.   Avek Prezidan Michel nou’n pran semen kwasans ekonomik, nou ti bezwen moderniz nou lekonomi, repozisyonn nou pou pli byen entegre dan lekonomi mondyal. Nou ti bezwen en kwasans ekonomik pou soutenir nou bann aki sosyal ki ansanm nou’n travay dir pou gannyen. Nou ti bezwen kwasans ekonomik pou kree plis travay pour nou dimoun, nou ti bezwen kwasans ekonomik pour nou kapab redistribye larises ek tou nou bann dimoun, e nou pou bezwen sa kwasans ekonomik alavenir pour nou kapab ogmant saler e fer lezot benefis ki nou bann dimoun i bezwen.  Annou pa les lopozisyon fer nou krwar ki si i ti opouvwar i pa ti pou enterese avek kwasans ekonomik e i ti pou plito ogmant ou saler e saler tou Seselwa. Sa i bann politik bon marse akoz san en lekonomi stab nou pou napa larises, nou pou napa bann progranm sosyal  e kou lavi pa pou zanmen amelyore ni pou ou, ki en zabitan Anse Aux Pins, ni pour sa madanm avek son 4 zanfan dan leo Cascade ki Onorab Prea in koze, in al vizite.

 

La Mr Speaker mon pe demann gouvernman pou fer sir ki bann zabitan Anse Aux Pins, Pointe Larue e Au Cap i ganny priyorite lo devlopman Ile Soleil ki sitiye Anse Aux Pins koz se zabitan sa 3 distrik ki bezwen sa bann lenvestisman pour zot kapab devlope akoz zot distrik i deza ankonbre e en bon pe letan zot pe esper bann tel posibilite.

 

Loportinite pour Seselwa se Parti Lepep ki’n prevwar par met platform konkret pour plis devlopman. Bann vizyon ki zot pa ti kontan, pa ti zis akoz zot pa ti konpran, me zot pa konpran bann model ekonomik lo lekel sa bann vizyon ti baze e zot pa konpran labaz ki loportinite i baze lo la. Zot pa konpran ki sa loportinite ki zot pe rode lo la pa sorti dan lesyel me i vin atraver travay dir e en vizyon ki al pli lwen ki en manda prezidansyel.  Lider Lopozisyon in dir dan son diskour ki Sesel pa bezwen en baton mazik me i bezwen plis travay dir. Me par mazik in prezant nou avek tou solisyon ki Sesel i bezwen en sel kou konmsi i vin en mazisyen.  Ozordi se zot ki pe koz langaz sibvansyon.  Apre 5 an dan profon sonmey i paret ki aprezan lopozisyon in leve.  Aprezan ki zot mazinen ki mannyer pou annan plan pou elimin drog, aranz NDEA, aranz lofis Oditer Zeneral e aranz Lasanble.  Mon bann frer ek Ser dan lopozisyon, pep Seselwa le 21 Me pou dir zot zis 4 mo, zot too little too late. Seselwa ozordi pe demande kote zot ti ete avek zot bann bon bon lide letan lalwa drog ti pase oubyen lalwa pou form NDEA ti pase, kote zot ti ete letan lalwa pou sezi bann byen malaki ti pase, lalwa pou deal avek pirat.  I kler ki sa bann letan zot ti pe ronfle sonmey e parey zot lider ti deza dir, zot ti napa presyon e zot ti pe dormi byen aswar.

 

Mr Speaker sweet talk; sweet talk i egzakteman sa ki nou’n tande sorti dan labous lopozisyon.  Annou regard enpe kwa sa bann sweet talk ki zot ti pe koze. Premyerman lopozisyon in dir ki sak fwa kou lavi pou ogmante zot pou ogmant saler travayer Seselwa lo menm rate. Me nou tou nou konnen e nou tou ki annan enn pti git ledikasyon dan nou latet nou konnen ki sa pou kree en positive feedback. Sa i vedir ki anmezir ou ogmant saler, pri lavi pou ogmante e i pou kontintyen monte koman en serk visye.

 

Pas bay 25 lo later pa pou atir lenvestiser, akoz sekirite en proze pou plizyer milyon dolar pa baze lo renouvlabilite sa bout later.  Onorab Georges ki labank ki pou donn en envestiser prive de santenn milyon dolar si son bann asset pa pour garanti oubyen pa pour ganny secure menm si ou pou met bann mezir anti koripsyon strikt sa pa pour marse. I parey ou pe vann en dimoun en bout later, pou li fer en lakaz e ou dir li dan 25 an mon ava gete si ou pou kontinyen reste dan sa Lakaz oubyen si mon pou tir ou. I kler ki zot mank en ekonomis dan zot kote pou kalkile, i kler zot mank en ekonomis pou kalkil zot returns on investment ek zot payback period pou okenn gran proze mazer.  Me sa i pa sel keksoz ki enkyetan Mr Speaker ki zot in dir.  Petet sa ki pli enkyetan akor se zot menm zot zot pa ni menm krwar dan sa prop plan ki zot in prezante, zot napa konsistans dan zot prop plan ki zot oule met devan lepep, e zot konfize lo la. Mr Speaker mon a eksplike akoz. Lider Lopozisyon in dir ki fodre anim lavil Victoria kiltirelman e artistikman e Onorab Arissol in dir ki animasyon pou fer Seselwa bwar e anmize e apre pa pey zot bil elektrisite ek delo.

 

Lider opozisyon in dir ki DA i fodre reste sa liyezon ant gouvernman ek son kominote e MNA ki devret kontrol son kominote, tandis ki Onorab Henrie I dir DA fodre ganny elekte pour li diriz son kominote.  Lider Lopozisyon in dir ki fodre ki Prezidan pa zis get travayer gouvernman me i osi get bann travayer prive letan gouvernman i ogmant lapey, tandi ki Onorab Henrie i konfirmen ki travayer gouvernman i devret ganny byen peye e travayer prive zot lapey i depan lo profi ki zot fer e non pa ganny determinen par gouvernman.

 

Alors Mr Speaker mon ti a kontan dekrir sa progranm ki SNP pe met devan bann dimoun pou al vot lo la, parey en dimoun ki’n mank lapel. Dan son prese in al pran son ben me in bliye bros son ledan, in al raze me in bliye pennyen. In met soulye me in bliye met soset se sa kalite plan ki SNP pe met devan nou e pe dir nou al vot lo la.  I reflekte vre leta lopozisyon e zot nivo konpetans. Dan zot mank lepel letan zot in sot deor, zot in vwar Parti Lepep in anbark dimoun, in anbark lepep Seselwa dan en bato e zot pe kriye esper zot e bann Seselwa abor sa bato i pe dir zot too little too late. E zot in fini donn zot en walkover e Seselwa pe al donn Prezidan Michel 5.  Mersi pou ekout mwan. Mersi.

 

HON. GINETTE GAMATIS

Mersi Msye Speaker.   Msye Speaker, manm lasanble Nasyonal, pep Port Glaud e tou pep Seselwa.

 

Ankor ennfwa dan sa lasanble mon pou fer mon parkour pou anmenn pep Seselwa ver laverite e kredibilite lo nou leta.  Msye Speaker an analizan tou sa ki’n pase dan sa pei mon rekonnet ki pep Seselwa in en pep ki konnen kote i sorti e kote i pe ale.  Ozordi nou’n ariv dan en monn tre difisil kot nou bezwen anmenn en lalit tre ekstraordiner pou kontinyen met Seselwa lo en direksyon kot zot pou kapab tenir presyon enternasyonal.  Si ti napa en parti ki’n persevere parey SPUP SPPF e ozordi Parti Lepep, nou ti pou’n fini.  Mon dir sa Msye Speaker akoz laplipar sa bann parti ki’n egziste apre ’64 in mor an nesan e se zis Parti Lepep ki ankor pe tenir labar.  Zot konnen, akoz se zis sa parti ki’n kontinyen annan sa bon leker pou pep Seselwa e Seselwa i konn sa tre byen.

 

 

 

Onorab Pierre in dir ki diskour Onorab Ramkalawan in enspir pep Seselwa.  Me les mwan dir li ki sa diskour in konfiz pep Seselwa plis ankor akoz tou sa ki zot dir apre zot kontradir zot menm.  Onorab Pierre aret anbet Seselwa.  Si ti annan en revolt silansye dan leker bann dimoun pou zot ganny eleksyon ou ti ann gard sa koman en sekre ou pa ti ann vin dir sa la an piblik.  Se ou lafreyer ki fer ou dir sa.  E Onorab Pierre vey laroul dan ou pirog olye dan pirog ou kanmarad, tardera viendraQui vivera viendra.  Msye Speaker letan ki nou ti komanse an 1964 nou ti konnen ki lalit devan nou ti pou enn ki ti pou tre long e ki ti pou tre tre dir.  Nou ti pran sa defi akoz an Zen ti annan devlopman nou pei avek lavansman nou pep ki ti dan balans.  E zis parey ki Prezidan Obama ti fer an lannen 2008 letan ki i ti ankor en kandida Prezidansyel, nou osi an 1964 nou ti adopte en latitid ‘yes we can’.  Nou osi nou ti ganny dir ki nou pa ti pou zanmen kapab arive fer li.  Nou osi nou ti ganny dir ki en pti pei parey Sesel pa ti pou zanmen kapab pran lendepandans, ki nou ti napa larises, napa resours, napa konnesans e napa leksperyans.  Me nou isi lo sa kote depi 47an pase nou’n adopte nou en filozofi nou kapab fer li e nou pou fer li.  Yes we can do it.  Lo sa larout ki nou’n trase zot in touzour la pou dir avek nou kwa ki nou pa kapab fer.  Zot in touzour la pou limit nou parkour.  Zot in touzour pare pou reponn prezan letan pou kritike, kraze e konplent.  Depi ’64 zot ek zot bann parey zot in anlinnyen pou dir avek sa pep Seselwa konmkwa ki nou pa kapab fer ouswa ki nou pa devret ni menm seye.  Zot in mars kot a kot avek nou pou soufle dan nou zorey ki sa ki nou pe rode pa bon, ki sa ki nou pe rode i enposib e ki nou pa pou zanmen kapab arive fer li.  Me touzour lepep Seselwa in reponn zot avek menm latitid, menm panse e menm lespwar ki Prezidan Obama ti annan pou lepep Ameriken an lannen 2008.  Yes we can.  Nou kapab fer li e nou pou fer li.  En laviktwar pou Sesel.

 

Nou ti komans avek en lalit pou lendepandans sa pei ki apel Sesel.  Nou ti lite pandan 13 long lannen pou nou reisi.  Koman parti sa menm lalit, nou ti lite pou dwa e lavansman bann fanm Seselwa.  Mon konnen akoz mon ti parmi.  Ozordi mon fyer pou dir ki i fer 47an depi ki nou pe lite pou fanm ganny rekonnet e ganny so vre plas dan sa pei.  E i fer mwan fyer letan ki mon vwar sa sel reprezantan madanm lo lot kote; le sel fanm dan en parti zis zonm.  Nou lalit i kontinyen.  Nou’n lite pou nou zanfan ganny edike e ganny en bon zwen lasante, nou’n lite pou met anplas dwa travayer.  Zot ava rapel ki premye saler minimanm Sesel ti ganny etabli apre le 5 Zen 1977 dan en dekre sinnyen par Prezidan France Albert Rene.  Nou’n lite pou tou Seselwa ganny dwa vote isi Sesel.  Nou’n lite pou ki Seselwa i ganny akse avek en morso later pou batir son prop lakaz dan son prop pei.  E lo sa size krwar mwan ki mon kapab ranpli en liv.  Avan 1977 75 poursan later dan sa pei ti pou zis 30 fanmiy, e la ankor zot ti dir avek nou ki nou pa pou kapab zanmen arive sanz sa.  Nou’n lite pou ki sak fanmiy i kapab manz son vant plen isi dan sa pei.  E la ozordi malgre difikilte, nou’n met bann mekanizm anplas pou permet bann fanmiy an difikilte kontinyen manz vant plen.  E atraver tou sa bann lalit enposib, atraver tou sa bann parkour, zot in touzour la akote nou pou dekouraz nou.  Si pa zot me bann egzakteman parey zot.  Me larepons sorti kot nou in touzour parey: nou kapab fer li e nou pou fer li.  Yes we can.  En laviktwar pou Sesel.

 

Pou bann ki pa konnen, sa lalit ki nou’n anmennen pandan sa dernyen 47an, sa lalit ki nou ankor pe anmennen ozordi se en lalit pou anmenn lespwar pou nou pep, se en lalit pou gard lespwar vivan pou sak fanmiy Seselwa pe enport son difikilte.  Pandan 47an nou isi lo sa kote nou’n toultan krwar dan en meyer lavi pou tou nou pep.  Nou’n toultan krwar dan en meyer distribisyon larises.  Travay Prezidan Michel in ganny gide par en prensip egalite, loportinite pou tou pep.  Me nou’n osi rekonnet ki resours i limite e ki ou pa pe kapab reisi fer tou keksoz o menm moman e sa i rezon pou lekel nou isi lo sa kote nou’n toultan lite pou gard lespwar vivan dan tou kwen nou pei e dan leker tou nou pep.  E sa malgre tou sa bann mesaz dezespwar ki ganny soufle dan nou zorey toulezour nou lalit.  Bann ki senm doutans, bann ki pa krwar dan kapasite sa nasyon, bann ki la pou kritike, konplent e dekouraze, ozordi an lannen 2011 nou reponn zot avek sa menm latitid pozitiv ki’n gid nou reisit depi 1964 ziska ozordi; nou kapab fer li e nou pou fer li.  Yes we can.  Laviktwar pou Sesel.

 

A sa moman mon oule felisit Prezidan Michel pou lafason dan lekel in diriz nou pei pandan sa dernyen 5 lannen, sirtou pandan sa dernyen 3 lannen tirbilans ki lemonn in pas atraver.  Msye Speaker i arive ki souvan bann zanfan ki pa konn listwar i apros ou e demann leklersisman lo keksoz ki zot pa konnen.  Ouswa parey ki i leka avek serten dimoun, zot zis koz avek en serten dominer ki fer ou per.  E la ou ava krwar ki zot dominn bann size ki zot pa konn nanryen lola.

Letan ki en zanfan i demande ki manyer ki en parti politik i arive faid en pei Msye Speaker, eski sa zenn zanfan i demande kote tousala ti komanse e konbyen eski nou komans avek?  Letan ki nou ti lans lo sa lavantir fantastik ki appel Repiblik Sesel nou ti napa resours, nou ti napa larzan, nou ti napa akse avek kredi, nou ti napa fasilite e ti napa posibilite.  Le sel keksoz ki nou ti annan sete nou dignite.  Apard sa, ti napa, nou ti napa.  Letan ki ozordi 34an pli tar bann zanfan i vin koz avek lotorite lo bann size ki zot fransman pa konn nanryen lola, mwan osi zis parey zot mon demande kote eski nou’n al mal?  Ler nou ti pran sa pei ti napa nanryen, kof ti vid, touris ti fek lanse, ton pa ti ankor egziste e angle dan son bonte ti’n kit nou avek en gro sonm det.  Pou lenformasyon bann ki pa konnen, depi premye zour nou lendepandans nou ti dir bonzour det.  Repiblik Sesel ti ne avek son det.  Aprezan sa ki pe koz faid en pei a ot vwa, mon kestyon pou ou se faid kwa egzakteman?  Faid det?  Nou dwa lo sa ki nou ti dwa.  Det lo det.  Depi premye zour sa nasyon Seselwa ti andete, det nou ti erite.  Sa ki nou’n fer par kont se batir en nasyon, en sosyete, en sivilizasyon.  Sa ki nou’n fer se pou etablir premye sistenm lasante iniversel dan larezyon, premye sistenm ledikasyon iniversel dan larezyon.  Nou’n reisi pou met anplas saler de baz minimanm depi 34an pase.  Ozordi al lev sa menm size avek serten pei ki annan bokou plis resours ki nou e gete ki zot dir ou.

 

 

Anvi ki zot koz faid pei, demann avek Prezidan Obama ki pe arive avek son proze pou donn lepep Ameriken en sistenm lasante iniversel dan sa lekonomi liberal Ameriken.  34an pase, en latitid nou kapab fer li, ‘yes we can’ ti aport en transformasyon signifikan Sesel.  Ozordi sa menm propo lo kontinan Lanmerik in ganny bouyante par bann lafors liberal e pe fletri e perdi kouler.  Dan en klima liberal zanmen Seselwa ti pou’n ganny lasante ek ledikasyon iniversel.  Zanmen i ti pou’n ganny akse avek lakaz konvenab.  Laprev i dan sa ki pe pase Lanmerik.  Sa revolisyon ki nou ti anmenn Sesel 34an pase pa ti pou’n zanmen arive dan en klima ekonomik liberal.  Prezidan Obama in fail e lamazorite pei ki’n pran lendepandans ansanm avek nou in osi fail.  Letan ki SNP i pas devan ou laport e dir avek ou ki en nenport parti politik ti pou’n fer sa ki Parti Lepep in fer, demande akoz ki prezan Obama pann reisi pou fer en senp keksoz ki Parti Lepep ti fer 34an pase.  Laverite se ki bann liberal in touy zefor Obama, zot in bouyant li e zot in anter li.  E ozordi dan Sesel ou annan ou en parti SNP ki pe adopte en menm prensip liberal.

 

Sorti lo sa size det Msye Speaker.  Mon oule eklersi sa size Sesel pou Seselwa.  Mon oule fer sa sirtou pou bann ki zot zanset kolon in kit zot pou gard balans e larmoni.  Mwan Ginette Gamatis kontrerman avek serten dimoun, mon napa okenn zanset kolon me mon’n plito lite e mon’n limen pou ganny balans e larmoni.  Mon’n lite pou vin en Seselwa.  Mon’n lite pou ganny mon dignite e mon idantite Seselwa, mon’n antrenn en lalit 13 long lannen avek ki mon’n kapab ofisyelman apel mon lekor en Seselwa.  Pou lenformasyon sa bann zanfan ki ozordi pe vol sa slogan ‘Sesel pou Seselwa’ zis pou zot rezon politik bon marse e zenefobik.  E la mon pou siport Prezidan Michel letan in appel zot bann zenefob.  Mon mesaz pou sa bann zanfan ki’n vol sa slogan: byen malaki pa prospere.  Akoz zot napa ni respe, ni konprenezon pou sa ki ti pe pase e pou sa lalit ki nou ti pe anmennen.  Avan 1976 ti napa okenn Seselwa dan sa pei Sesel alors letan ki nou ti pe kriye Sesel pou Seselwa avek tou leker, nou ti pe reklanm nou later, me nou ti pe osi reklanm nou lidantite.  Nou ti pe donn nesans sa nasyon Seselwa.  Avan 1976 Sesel ti annan zis bann British subjects, bann size sa Mazeste Larenn.  Be nou isi lo sa kote nou ti konvenki ki en pei denonmen Sesel i bezwen konteni en nasyon Seselwa.  Se pou sa rezon ki nou ti demann lendepandans avek Angle e pou sa rezon ki nou ti kriy Sesel pou Seselwa.  Pou nou ti kler, Sesel pa ti pou Angle ki ti nou bann met kolonyal e Sesel pa ti pou Yanki ki ti pe detas 5 nou zil san nou permisyon pou fer baz militer.  Pa zanmen esey pou konpar sa lalit ki nou ti anmennen avek bann politik fasil ki zot pe sey fer ozordi.

 

Msye Speaker, mon’n swiv atantivman letan ki serten dimoun in sey vin aste vot Seselwa avek son bann propozisyon tax tou tord e traver.  Zis avan eleksyon i vin promet tou travayer R500 logmantasyon lapey san vreman eksplike ki fason ki i pou ranplas sa larzan tax.  Dan son diskour bidze i ti propoz en tax rasis e zenefobik ki ti aplik zis pou etranze me savoyaz in trankil lo sa size.  Msye Speaker permet mwan en senp kestyon; letan ki ou depans larzan dan eleksyon san kalkil son konsekans, san ni konte, san ni kalkile kote sa larzan pou sorti, eski sa i en bon keksoz?  Eski sa i bon pou pei?  Eski sa aksyon en dirizan responsab? Sa Prezidan fantonm in fini depans larzan piblik dan en zefor dezespere pour li ganny elekte. I pa ni ankor ganny eleksyon in fini montre nou ki lapant i pou pran avek larzan piblik. Disiplin fiskal mon bann zanmi i en kondisyon reform me zot lespri pa dir zot.

 

Ankor enn fwa mon pou demande, eski son lespri pa ganny network isi anndan ? Son lespri pa pe dir li ni en text pa anvoy li. En gran parti nou progranm reform in fini ganny agree lo la, sa bann lakor in fini sinnyen, Sesel in negosye e in pran serten komitman anver son bann kerditer, e koleksyon reveni i form en gran parti sa bann lagreman. Propozisyon en taks mansonz zis avan eleksyon dan en zefor pou aste vot Rs500 par latet pa pou marse.

 

Seselwa i en nasyon ki posed son dignite e i pa pe vann son vot lo bazar Rs500 enn. Zot pa onte ! Zot pe fer kankan avek enn de bout fey tol kan zot in fini deside ki zot pou aste vot Rs500 enn dan lot, apre zot oule vin donn lektir zot kanmarad lo valer la demokrasi, latransparans, lo koripsyon e tou sa bann lezot zoli sanson ki zot kontan sante. Selman par deryer zot lespri in fini ekriy ki Seselwa pou vann son vot lavaler Rs500 enn. Mwan mon pou tir leson lo sa ki zot pe fer akoz dan listwar politik Sesel i annan zis en sel zonm kin esey pas son lekor pou en sen. Me tanzantan i ganny atranpe pe fer keksoz ki okenn sen pa ti zanmen pou mazinen fer.

 

Mr Speaker koman mon lo sa size led avek lasistand pou dimoun. Nou tou isi anndan noun ganny mandate koman bann servi lepep Seselwa. Nou tou nou posed en devwar pou ede e pou asiste nou dimoun kot nou kapab. Mon konnen ki nou lo sa kote nou toultan pe fer li menm si apre bann lezot dimoun ki refize asiste zot prosen i akiz nou ki nou pe aste vot.

 

Mon mesaz i pou sa granmanman dan leo Cascade ki pe sonny 4 piti trezor sa bann dimoun i annan en fon dan lekel ki zot met Rs700 e sef i met Rs1400 par mwan pour zot asiste dimoun. Mon konn sa tre byen akoz ki lanons ti fer dan Lasanble e in lo rikor Lasanble.

 

Sa bann dimoun i posed en devwar moral pou ede e asiste zot ser ki dan bezwen. I pa imen pou les 4 zanfan mor lafen pandan 6 mwan. Zis apre pou vin glorifye dan Lasanble. Mon demann mon lekor ki manyer ki zot dormi aswar.

 

Ankor pou sa granmanman mon ser desann e vin vwar Onorab Charles De Commarmond. Si li i pa kapab ed ou i konnen lekel ki pou fer ou dosye marse. Gran posibilite se ki ou dosye in pri dan en gran lanpayaz karya. Sa bann dimoun i posed en stratezi tre senp, premyerman zot anpay ou, apre zot les ou soufer. E letan ki zot in fini glorifye ou soufrans la zot trankilman kolekte ou sipor. Be ki manyer zot fer pou dormi aswar.

 

Mr Speaker le 8 Mars mon dir zot travay pou la. Le 8 Mars marke lo zot Blackberry travay pou la dan lavil Viktorya. Tou bann ki ti boycott ki nou selebre mouvman emansipasyon fanm apre 100an lalit letan ki nou demann en zour konze zis en zour konze en parti politik ki konpri 99% zonm pou met nou obzeksyon. Le 8 Mars zot pou vwar lafors fanm dan sa pei, fanm Seselwa pou fer tranble sa kapital karnaval. Apre 100an lalit pou emansipasyon ozordi en zonm ava ganny lodas pou asize kontre ek bann madanm ki travay IOT. Avek sa kalite latitid nou pe retourn 100an an aryer lo sa dosye fanm. Fanm in ase sibir lensilt dan sa lemonn e nou pa pou sibir li dan sa Lasanble. Sa kalite konportman i pa akseptab dan en pei sivilize e modern. Zot menm zot pa kapab ganny kouraz pou avans en bon reprezantasyon fanm devan pour zot met en fanm fodre ki zot sakrifye en lot fanm. Zot annan zis en sez kin ekriy fanm lo la, akoz zot pa kapab tir en zonm pou met en fanm. Mon challenge zot pou met de fanm asiz la devan nou. Zis ankor enn mon konnen ki zot pa pou fer li. Mon pou dir avek zot pa trakase an Me zot pou ganny en sans pou kont vot fanm dan bwat vote. En laviktwar pou Prezidan Michel i en gran laviktwar pou tou fanm Seselwa.

 

Mr Speaker deba lo leta nou nasyon i devret normalman deroul otour la realite e laverite nou sitiasyon. Deba i devret reflekte Sesel ozordi son bann lakonplisman e son bann defi. Defi nou annan sa i kler nou annan tro bokou menm. Nou tou ki la ki reprezant distrik pou konnen sa realite, nou tou enkli zot laba lo lot kote nou okouran tre byen bann febles ki nou pei pe fer fas avek. Tou MNA elekte i ganny deborde avek demann pou lasistans. Lavi i dir dan Sesel an se moman. Lavi i ser nou pei pe fer fas avek bann enorm defi. Bann fanmiy pe sibir presyon e korezyon sosyal. Nou pei pe komans desire, drog pe komans enfeste no sosyete. Prostitisyon in komans poz lanmen lo nou bann zanfan e avek sa i vin Sida e lezot maladi ankor. Me sa i pa le sel fason pou get realite Sesel. Sa i pa le sel pwen vi i pa le sel lobtik pou zis asize e zwe dan boubou pandan 18an i pa en fason pou ganny ou lavi. Ou pa kapab form parti problenm pandan plis ki 18 lannen san zanmen en zour kontribye anver sa solisyon. Lo lasenn enternasyonal pri manze pe ogmante, pri karbiran pe ogmante e avan lontan pri bann lezot resours pou swiv. Sa i partou dan lemonn, e lo televizyon si ou gete ou a trouve, Sesel pe sibir en kantite presyon kin ne a letranze. Sa bann problenm lemonn pa kapab ganny adrese avek en politik fasil ni avek en latitid gran mazisyen. Sa gran mazisyen ki pou rezourd tou problenm lemonn i pa ankor ne. Pri diri pe ogmante, pri dible pe ogmante, pri dile pe ogmante, e letan ki pri mai in monte ankro sa pou ganny reflekte dan pri manze zannimo e pou annan en lenpakt imedyat lo pri lavyann. Realite Sesel se ki ozordi nou en vitkim sirkonstans lemonn e mon pa tann sa pe ganny reflekte dan deba serten dimoun. Zot refize aksepte sa senp realite, zot ankor pe ensiste ki dan lemonn tou keksoz i oke me problenm i Sesel. Me i tre kler pou Seselwa ki lemonn i dan problenm. Mon krwar zis zot ki pa get CNN. Zot refize pou rekonnet okenn nou bann lakonplisman e dan plas zot retourn avek zot bann menm vye largiman demode ki la depi lepok lerwa erod. SNP pe refize prepar li pou fer fas avek problenm ekonomik mondyal, zot pa pe ni kalkile, ni ofer, ni prezant okenn solisyon pour sa bann nouvo defi. Lemonn partou otour nou pe brile. Oli zot solisyon pour sa, oli zot baton mazik, zot solisyon i tre senp zot kasyet zot latet anba zorye e zot fr krwar ki naryen pa pe arive les lemonn brile dan zot lizye tou problenm i Sesel. Ozordi Sesel nou pe kree en nouvo Sesel pour nou bann zenn avek swen e ledikasyon pti anfans progranm Young Leaders, Liniversite Sesel, allowance pour tou etidyan post segonder, progranm after school care, fon lasistans dan lekol pour zanfan ki dan bezwen, nouvo konsey bann lekol. Meyer saler pour bann ansennyan, dedicated funds pou aste materyo pou lekol. Sa osi i realite Sesel ozordi, sa i pa defi me i form parti nou lakonplisman. Apre zot ava annan lodas vin dir nou pa koz zis lo liniversite Sesel me koz osi lo Independence House.

 

Mr Speaker mwan mon rekonnet problenm prostitisyon dan nou pei e koman en manman e koman en fanm sa i desir mon leker. Me mon refize donn plis lenportans nou bann problenm ki nou bann lakonplisman. Mon pa pou pini nou bann zanfan kip e travay dir zis pou mwan pas letan pe glorifye Independence House parey serten i fer. Mwan mon pou selebre liniversite Sesel e lakonplisman nou bann zenn Seselwa. Mon fyer pou zot e mon dir bravo. Mwan kin lalit 47an pour sa liniversite ozordi les mwan selebre fri mon lalit.

 

Zot kontinyen selebre maler zot frer ek ser. Mr Speaker devan nou i annan en bann dimoun ki ankor pe fer bann menm largiman ki zot ti pe fer an 1991. Koripsyon, bato ton Moris, security clearance, e apart sa mansonz lo taks ki zot in vin sey bat latet dimoun avek zot napa naryen nouvo pour zot ofer, zot pe zis sekwe maler.

 

MR SPEAKER

3 minit Onorab.

 

HON GINETTE GAMATIS

Mr Speaker sa lannen nou pep pe al vote, koman en dimoun kin lite tou mon lavi mon annan en mesaz pour bann siporter SNP. Zot pa fatige anba sa bann menm vye sistenm diktatir, demode, i pe detriy lopozisyon dan sa pei. Zot pa fatige antann bann menm vye largiman resofe. Eski zot pa fatige avek sa latitid politik fasil kin anzandre dan SNP. Dir mwan eski siporter SNP i ankor pe lager kont gro loto, gro lakaz, privilez kin ganny asosye avek post bann ozofisye. La ki sa ki ti fer zot anmenn sa konba in limenm li surrender, dan sa konba pour sanzman ki zot pe anmennen, zot pas santi ki sanzman i devret komans devan zot prop laport. Si zot anvi vwar en vre sanzman dan lopozisyon, si zot anvi sov nanm lopozisyon vot kont Ramkalawan dan sa prosen eleksyon, Onorab Ramkalawan sorry.

 

Laviktwar Prezidan Michel i en laviktwar pou siporter lopozisyon osi. Mon ti a kontan demann avek tou pep Seselwa pou fer byeb zot home work, e les Prezidan Michel kontinyen fer sa bon travay pou anmenn nou pei ver laviktwar pour tou pep Seselwa e ou laba Port Glaud ki pe ekoute donn Prezidan Michel ankor 5. Mersi Mr Speaker.

 

HON JEAN-FRANCOIS FERRARI

Onorab Loizeau ti annan rezon karnaval in komans en zour davans. Ser manm Lasanble, zabitan Mont Fleuri e pep Seselwa. Si i annan en keksoz kin arive dan nou nasyon sa detrwa dernyen lannen e ki fer mwan vreman fyer ki nou travay koman politisyen se ki Mr Wavel Ramkalawan e SNP in reisi met bondye o sant lavi nou pei.

 

Mon rapel mon ti annan apepre 13an e mon ti akonpanny mon papa dan en meeting politik Anse Louis e mon ti tann en zenn politisyen pe demann avek bann dimoun prezan, ‘lekel sa boug ki apel bondye, zot in deza vwar li, mwan mon pa konn li ?’ Ozordi sa menm dimoun plizyer lannen apre i koz lo bondye dan tou son diskour bravo, nou tou nou bezwen kontan ler ….i retournen, nou zis priye ki sa i fer dan senserite. Si Vandredi pase ti ankor annan bokou dimoun isi Sesel ki pa ti ankor fer zot lide lo si nou nasyon i bezwen nouvo direksyon oubyen non Prezidan Michel in donn nou larepons. Sa msye in montre ki leta nou pei se enn kot napa vre direksyon. Enn kot sa ki enportan ozordi i ganny anvoye pour 2013, 2017 e 2020. Enn kot son dirizan i swazir pou gognarde plito ki rasanble. Enn kot serten group ki benefisye, enn kot etranze i pas avan Seselwa, enn kot bann ki opouvwar i pli enterese avek sa ki zot kapab gannyen plito ki re rod en meyer lavi pour tou Seselwa. An plis ki sa noun vwar en Prezidan ki pe senm divizyon ek laenn parey Ghaddafi dan son diskour, sa i en move sinny.

 

Pour enn fwa mon vreman kontan ki SBC in pas speech Mr Michel omwen 4 fwa akoz mon konnen ki sak fwa zot rezwe sa speech en lot group Seselwa i deside pou vire. Apre 34 long lannen opouvwar Mr Michel in montre nou ki i nepli vreman o servis sa pep kin elekte li me ki i plito o servis bann gro milyonner etranze ki anvi servi nou pei koman en playground. Mr Michel monn deza dir pou ganny rapel koman sa zonm kin vann nou pei ek Arab parey sa lot James ki ti vann avan li. E la sa msye pe demann ankor 5an e in menm met son leker lo 2020 kan i pou ariv 77an e i pou kas rikord Ghaddafi.

 

Wi Mr Speaker pour bann ki ti ankor dan dout Mr Michel in donn zot larepons. Zis get li e ekout li e zot ava realize ki degre in dekonnekte avek la realite lavi son pep. Mon pa pe dir sa ek lakoler me avek latristes. Mon kontan mon pei, mon kontan mon frer ek ser Seselwa e mon konnen ki meyer keksoz ki kapab arive pour zot ganny en meyer lavi se pou Mr Michel sed son plas. Pli vit i fer sa pli meyer i ava pou Sesel.

 

Mon deza dir e mon repete ki pli gran lennmi Sesel se sa bann ki zis aplodi ler sa msye i fer fot. Depi Mardi pase noun vwar apepre 20 antre zot dan nou Lasanble kin aplodi tou katasrof gouvernman lepep, si zot ti kontan Sesel zot ti pou debout e refize aksepte sa soufrans ki nou pep pe pas ladan. Okontrer zot kriy viktwar. Viktwar pour lekel ? Pour zabitan dan gale ki ankor pe esper semen pou zot mont kot zot, zabitan Corgate ki zot lakaz i koule e desarz pe koul devan zot laport, zabitan Rochon kin ganny zis en kote semen e louvraz in arete, viktwar pou zabitan La Misere ki pe soufer. Pour zabitan dan leo Glacis ki pan ganny delo dan tiyo pou plizyer mwan, viktwar pou travayer Air Seychelles ki pa konnen kot zot debout, viktwar pour sa 3600 Seselwa ki lo welfare. Wi mon vreman dezapwente tann nou Prezidan vin devan sa Lasanble Vandredi pase e gognard bann parey mwan ki annan en lot lide lo ki fason pou gouvern nou pei. I tris me ki ou ekspekte avek en zonm ki nou pou vwar 34an. In fini krwar ki i en lerwa, in menm oze vin isi e dir parey son dalon Ghadaffi mon pep i kontan mwan. Dan sa sitiasyon tris mon mazin lapriyer St Francois ….ki ansenny nou kwa ki nou vre misyon lo sa later, kot Mr Michel in senm divizyon nou bezwen met linite. Kot in senm laenn nou bezwen met lanmour, kot in met lenzitis nou bezwen remet lazistis e kot in met dezespwar nou bezwen anmenn lesperans. Wi in ler pou aret sa politik divizyon e fer per Seselwa. Annou rod sa ki ini nou, e ler gouvernman i fer keksoz i fer li pour tou dimoun e pour tou lorganizasyon san diskriminasyon san diferans. Mon kontan ki finalman sa gouvernman pe rekonnet travay enportan ki larelizyon i fer toulezour pou tenir fabrik nou sosyete ansanm. Koman en katolik mon kontan ki mon legliz i pe ganny rekonnet dan son travay sosyal tin ler. Me nou bezwen osi rekonnet tou travay ki tou lezot larelizyon i fer. Dan mon distrik i annan en moske kot bokou zefor i ganny mete pou tir nou zenn dan labi sibstans e remet zot lo semen drwat. I annan bann legliz evanzelik ki fer otan e nou merit ankouraz zot. I annan prete paster tou larelizyon ki donn zot lavi e zot letan pour nou pep. Sesel i alors bezwen en leadership ki regard tou bann lafors pozitiv dan nou pei e non pa zis reakte akoz zot anba presyon. Tou Seselwa i enportan, tou larelizyon i enportan nou tou zanfan bondye e nou tou nou pe kontribye dan kreasyon son rwayonm. Byensir i annan detrwa sikse dan nou nasyon me sa pti gin ler ou get sa gro montanny failure, letan nou nasyon se enn kot en pti group pe benefisye fortman me mazorite pe kontinyen soufer e lite pou fer sa de bout zwenn.

 

Vandredi pase Mr Michel in vin donn nou son lalis sikse, me tre pe Seselwa in kapab dir ki zot in ganny en par dan sa sikse. Annou get enpe sa lalis. Nou coast guard wi nou fyer nou coast guard e tou dimoun i konnen ki manyer nou dan lopozisyon noun lite, noun ensiste, pourki plis resours i ganny donnen avek nou coast guard pou protez nou teritwar e devlop zot prezans lo serten lezot zil. Nou fyer pou trouve ki SPDF nepli en larmi ki zis vey detrwa dirizan politik Barbarons e Sans Souci e nou nou pare pou fer plis ankor pou donn formasyon e respe e resours sa bann zofisye brav ki merite. Progranm lakaz pli gran failure gouvernman SPPF lepep i vin son pli gran lafyerte.

 

Prezidan Michel ti promet nou nasyon 2056 lakaz, Perseverance an 2010 e ziska prezan zis 50 fanmiy in ganny zot lakle. Dan tou distrik dan nou pei tro bokou zabitan pe viv dan bann kondisyon deplorab e plizyer in mor pe esper lakaz, tandi ki serten in fini perdi lespwar.

 

Mon kontan pou lafanmiy Salomon ki apre 26an espere finalman zot in ganny en lakle, malerezman mon leker i fermal pour sa 280 lezot fanmiy dan Mont Fleuri e sa 7000 lezot atraver Sesel kin zis ganny servi, abize, bat latet, promet en lakaz avan tou eleksyon ki zanmen zot in gannyen. Ozordi sitiasyon lakaz dan Sesel pa en laviktwar, i menm pli pir ki ler en msye ti pran baton Prezidan an 2004. Lalis i pli long e bann vye lakaz i pli vye e pli koule. Gouvernman i konnen ki problenm i grav e i kontinyen kasyet problenm. Get Corgate Estate plito ki aranz lakaz ki pe koule e pe grennen zot donn zabitan detrwa fey tol avan eleksyon. Me lakaz i sitan vye ki detrwa fey tol pa fer okenn diferans akoz si ou pa sanz dibwa kin fini pouri ou pa pou kapab klout tol nef lo la. Apre zot dir pa pou pey lakaz, me sa i tou zis, depi lontan mon MNA Mont Fleuri monn dir ki en krim fer dimoun pey lakaz ki sitan anvarye. Me parey tou dimoun i konnen ler nou dan SNP nou donn lide zot fou en gran koud pye ladan e apre zot anmas sa menm lide avek labous lavey eleksyon. Parey gratite pou travayer IOT, SNP i determinen pou reisir la kot Parti Lepep in fail. Nou pou fer sir ki tou aplikan i konnen kot zot été lo lalis lakaz, e an retiran politik dan alokasyon tou dimoun pou trouv lazistis avek en meyer saler tou fanmiy pou kapab fer en saving e pey son lakaz.

 

Lo kestyon ekonomik ki mon konnen i fer zot ankoler les mon a dir zot detrwa mo. Ler Mr Michel ti pran baton nou ti bezwen zis Rs5.50 pou aste en dolar, ozordi avek son gran laviktwar nou bezwen plis ki Rs12.50 pou aste sa menm dolar. Ler Mr Michel ti pran baton noud et ti par anba Rs4 milyon me apre ki in devalye nou larzan nou det in aprezan vin plsi ki Rs10 bilyon. Sa msye ti pou double larises nou pei dan 10an e sel keksoz ki in reisi fer se double nou det dan zis 5an. Ler Mr Michel ti pran baton en lit benzin ti Rs8 e la ozordi nou pey en lit benzin Rs18.50, en lot gran laviktwar. Sa msye ti pous plis ki Rs6 mil travayer dan gouvernman e met zot lo welfare. Sanmenm sa ki i kontan, met dimoun lo welfare dan en fason ki zot pou bezwen tonm azenou devan li ek son gouvernman pou ganny sa pti lasarite tou le mwan. Lotrezour en vye SPUP in eksplik mwan politik welfare sa zans. Zot fer sir ki ou lapey i reste ba, dan en fason ki ou pou toultan bezwen vin rod en pti lasistans an plis. Se la kot zot tenir ou e fer ou krwar ki si napa zot ou pou mor lafen. Alors kontinyen donn zot en vot. Eski zot realize ki ozordi i annan plis ki 3500 dimoun ki dan lanplwa me ki osi bezwen raport kot welfare. Eski sanmenm sa madanm Gamatis ki apel en lavi dan dignite.

 

Ler nou pei ti ganny lendepandans SPUP ti dir i pou larg lasenn lesklavaz dan likou Seselwa. I pan fer li me okontrer in zis donn enpe longer lo sa lasenn. E Seselwa in still anmare ek pye mang, parey zonm lib i boulonnen dan beton. Sa i en politik degradan ki nou dan SNP nou oule aboli. Se pour sa ki dan nou reform taks ki Mr Wavel Ramkalawan in propoze nou pou fer sir ki tou travayer ki ganny par anba Rs5000 par mwan pa pou pey sa income tax 15% ki zot pe peye ozordi. Nou pe propoz en lesel 0-20% dan plas sa 15% pour tou dimoun. Malere koman milyonner, wi premye pa pou tir dimoun lo welfare se pour donn zot en meyer lapey e en gouvernman SNP pou aplik sa mezir imedyatman ler i vin opouvwar. E dan sa progranm tou Seselwa i benefisye. Ekout byen travayer i ganny enpe plis pour li depanse, rezila direk se ki bann ki vann marsandiz e servis i vann plis, ler biznes i marse larzan i roule, gouvernman i anmas plis taks pou depanse dan bidze. Avek SNP tou dimoun, tou kategori i benefisye, me travayer an premye apre biznes men, apre gouvernman limenm sa pa rezilta en baton mazik me i en lozik ekonomik ki fer sans.

 

Pour bann ki pe rode kote nou pou ganny larzan Onorab Lider Lopozisyon in dir ki bann etranze pou peye taks lo lakaz e lo later. E sa pou ede tir enpe soulazman, tir enpe douler lo bann dimoun ki pli dan problenm. Ser frer ek ser Seselwa pa krwar sa bann dimoun ki dir zot ki i pa posib fer travayer ganny plis larzan akoz sa i vreman e reelman posib. Nou pei in ganny ase pou sonny tou son zanfan problenm se ki i annan en pti group dan sa parti opouvwar ki voras e ki gro ker, zot pa oule partaze e pour bnan parey Onorab Francois kin sey donn nou leson nou nou pa pran leson ek bann kin fer pei fayid.

 

Lo sitiasyon delo mon zis anvi demann Mr Michel ek dokter Payet pou al vizit bann zabitan dan leo Glasi e Makabe ki depi plis ki 6 mwan pe esper delo dan bowser. Ki oun fer msye pou soulaz douler ou pep ki pe esper dan bor semen ziska gran maten pou ganny enpe delo. En Prezidan ki pa konnen akfer nou bezwen konstriy en danm se en Prezidan ki pe dir nou ki in ler pour li ale e les plas pou en lot ki konnen. SNP in dir klerman ki repmye pa pou rezourd problenm delo se pou konstriy en danm e sa pou ganny fer lo larivyer Grand Anse Mahe.

 

Dan lasante Mr Michel in koz lo viktwar san realize ki se enn bann domenn kot Seselwa i pli fistre. En kantite i bezwen al deor pou ganny en tretman akoz servis lokalman pal o nivo. Bann travayer lasante i donn tou me malerezman zot pa kapab fer mirak ler lekipman e resours pa la. Nou bann dokter ek ners i kontinyen kite e se nou pei ki perdi. Se pa larzan Arab ki pou fer diferans akoz lasante pa mars zis lo lekipman me i mars sirtou lo dimoun devoue e konpetan parey nou bann dokter ek nou bann ners. Sak fwa ki mon ganny lokazyon pou mwan koz pour bann travayer lasante ki bezwen meyer kondisyon travay e sa lannen ankor mon pou demande ki bann teknisyen bann terapist e travayer ladministrasyon dan Minister i osi ganny gete silvouple akoz i osi enportan.

 

Dan ledikasyon Mr Michel in dir nou Vandredi pase ki nou sistenm ledikasyon i ekselan. Malerezman sa msye pa ni tande ler son zofisye ti vin lo televizyon pou dir nou ki rezilta IGCSE lannen pase ti pli move dan listwar nou pei. Wi Mr Michel in fyer sa ki in akonplir pou etidyan dan liniversite me antretan in fail sa milye lezot etidyan dan sistenm primer e segonder. In ler pou Sesel ganny en Prezidan ki annan sa kapasite e sa lentelizans pou regard difikilte e defi dan en fason antye pa zis par bout parey Prezidan Michel i fer. Antretan bann teachers i fer li konnen ki sa bann promes meyer lapey e kondisyon travay i ankor dan nyaz. Dan lagrikiltir listwar pou fer nou rapel ki sa dirizan kin fer plis pou detriy lagrikiltir dan nou pei se en nonmen Mr James Michel. Anba son direksyon prodiksyon lavyann zannimo in preski tennyen, plizyer fermye in bezwen ferm zot laferm, e nou sekirite alimanter i dan mal. Pandan sa bann lannen ki in opouvwar gro biznes in manz pti fermye. Bann prodikter Anse Boileau ek Val d’en d’or in ganny neglize e zot ankor pe fer lapriyer pou ganny enpe delo pou plante. Koman en mezir imedyat nou pou tir enpe fardo lo fermye. SNP pe propoz en tarif elektrisite ki pli bon marse pou fermye akoz nou konnen ki se kou prodiksyon ki tre eleve e ki pe dekouraz prodiksyon. Si Lanmerik i ed son fermye akoz nou nou pa kapab fer li. Mr Michel i dir i pa posib nou nou dir i posib, e wi Madanm Gamatis yes we can and we will do it.

 

MR SPEAKER

Address the chair.

HON JEAN-FRANCOIS FERRARI

Sitiasyon Air Seychelles. Mr Michel i koz lo paviyon Sesel ki flote. A letranze me i kit Air Seychelles trankil ater. Nou laninny Ayerien nasyonal i dan boulvers e plis ki 600 travayer i dan lenkyetid. Ki gouvernman pe fer pou sov Air Seychelles. Akoz Mr David Savy in resign en sel kou, ki vre problenm. Dapre lenformasyon gouvernman i annan lentansyon zis apre eleksyon si byensir zot gannyen ki mon pa tro krwar vann Air Seychelles avek Emirates. Zot annan lentansyon vann Air Seychelles avek Emirates, sanmenm sa zot in apwent en Chairman zis pou 3 mwan. Si zot perdi ki nou tou pe vwar pe vini zot pou kit sa problenm avek SNP pou sort out. SNP ioule dir avek tou travayer Air Seychelles ki nou pa pou abandonn zot. E ki si SPPF nepli krwar dan zot koman nou National Airlines nou nou krwar e nou pou fer le neseser pou fer sir ki nou avyon i kontinyen anvole. Nou pep me sirtou travayer Air Seychelles i merit en leksplikasyon imedyatman lo sa ki pe pase dan sa konpannyen. Mr Michel in sant viktwar devan nou semenn pase, me i pe kasyet tou bann endikater sosyal ki son prop biro statistik in pibliye. Tou bann fleo tel ki drog, labi lalkol, vyol, vol avek vyolans, kas lakaz, aksidan fatal, mert prostitisyon, sida, epatit c e lezot ankor in ogmante under his watch. Napa naryen pou kriy viktwar ni aleluya ladan. Me dan milye tou sa boulvers mwan ek mon parti nou anvi regard lavenir avek lespwar.

 

Parey Onorab Ramkalawan in fer mon osi mon anvi koz lo sa lavenir kot tou Seselwa i kapab ganny en meye lavi. Wi i posib pou ariv laba san esper 2020. Yes we can ! Onorab Gamatis atraver ou Mr Speaker. Isi dan sa Lasanble noun dir bokou keksoz, noun kontredir kanmarad noun atake me malgre sa nou tou nou reste frer ek ser Seselwa.

 

Mon pa kontan ler mon tann Mr Michel dir ki i annan ki pa kontan Sesel akoz se sanmenm sa politik bon marse ki son dalon Ghadafi pe fer konmela Lalibi. Si mwan mon ankor isi Sesel apre sa ta martir ki Mr Michel limenm in fer mwan se zisteman akoz mon kontan Sesel e mon anvi vwar li vin en pei kot i annan plas pour tou lide e tou krwayans politik. Mwan mon kapab dir monn fini pardonn li pou fer bat mwan e anmenn mwan lopital. Prezan i a gete ek Bondye ki i annan pour li fer laba. Mwan mon pe regard devan e mon pe konsantre lo sa ki mon kapab fer lo sa pei ki mon kontan. Travay pour nou pep se osi sa ki nou bann manm lopozisyon in fer dan sa Lasanble tou sa bann lannen. Ler difikilte lavi travayer IOT in finalman ganny rekonnet se akoz nou travay. Ozordi mon anvi dir tou travayer IOT ki zot bezwen dir mersi en dimoun kin anmenn zot konsern devan e sa se pa lot ki madanm Sylvette Vidot. Wi se akoz Sylvette in anmenn zot problenm kot mwan lannen pase. Apre 15an travay ki ou ti ganny en check Rs800. Mwan koman son serviter dan plas son MNA ki pan fer naryen monn met sa problenm devan lepep Seselwa e ozordi noun ganny en solisyon. Mersi Sylvette e nou ekspekte ki ou ka parey ka tou bann kin vin avan ou IOT e kin kite avek en naryen ditou ki zot ka i ava reganny konsidere. Si Mr Michel i dir i pa posib nou apre le 21 Me nou pou fer li posib. Yes we can ! Onorab Gamatis atraver ou Speaker. Si Mr Michel i dir pa posib nou nou dir i posib. Si Sesel ti annan plis dimoun parey ou Sylvette nou pei ti pou en meyer landrwa pou viv, Sesel i dir ou mersi, nou osi demann avek gouvernman pou savoyaz pa get zis en sel group travayer dan SITZ, i osi annan lezot travayer impress ki merit ganny menm tretman ki bann travayer IOT akoz zot manz dan menm kantin e zot pran zot lapey dan menm landrwa. Sa bann dimoun pe demann lazistis i osi neseser pou get dan sitiasyon travayer Nouvobanq parey Onorab Pierre in dir akoz zot osi zot travay dan en konpannyen kot gouvernman i annan par. Alors si ou demann avek Prezidan aret zis get en group dimoun alafwa. Tou Seselwa i enportan e nou bezwen tret zot tou dan en menm fason.

 

Mon fer rapel gouvernman ki in aksepte ki i ti pe fer black market li osi. Alors in promet pou rann bann endividi prive zot larzan ki zot in sezi, sey fer li enpe vit silvouple, akoz apre le 21 Me si zot pa ankor fer li nouvo ladministrasyon SNP pou rann sa lazistis, yes we can ! Annou osi pran en rezolisyon pou vreman lager kont koripsyon. Pa zis koze Mr Michel walk the talk. Si ou senser akoz ou pe anpes nou manm SNP lo komite Finans Lasanble pou fer nou travay. Akoz ou pez nou par met en ou prop SPPF pou kontrol nou, tan ki se ou dimoun ki ansarz voler e koronpi pou kontinyen dan sa pei. Seselwa pe demande oli rezilta tou sa bann lanket kin ganny fer. Lo vann later, lot ou sa bann larzan kin disparet, oli rezilta. Se si ou ou pa larg sa bann rezilta savedir ou pe condone pou kasyet laverite avek pep Seselwa Prezidan Michel.

 

Lo vann later ek etranze nou tande ki Khalifa pe al aste ankor 17 arpan. Si ou kontan Sesel Mr Michel e ou prop manm in aksepte ki ou ki sinny bann lavant ek etranze refize sinny sa lavant silvouple. Ozordi en sanzman gouvernman i non selman posib me i neseser e fodre ki sa i en sanzman dan lape. Si nou fer sa sanzman boner pou napa problenm. Difikilte pou vini si nou esper tro lontan. E Seselwa i komans krwar ki i pa pou zanmen annan sanzman atraver bwat vote. Se la kot fistrasyon e lakoler i monte. Lezip, Tinizi ek Libi in montre ki 30an, 42an oubyen 34an parey isi Sesel i tro lontan. Tou bann pei ki sanz gouvernman  regilyerman se bann kot i annan lape progre e wi stabilite.

 

MR SPEAKER

3 minit Onorab.

 

HON JEAN-FRANCOIS FERRARI

Antouka les mwan dir zot ki si en zour Sesel Seselwa i desann dan semen i pou zot prop siporter akoz nou nou konnen poudir nou travay i dan bwat vote, e nou konnen ki Sesel pou ganny sa laviktwar le 21 Me.

 

Respe pour tou Seselwa ki swa i SNP, Parti Lepep oubyen lot krwayans pou lakle nou politik. Sa ki enportan se ki sanzman i fer nou avans devan. Mr Wavel Ramkalawan mwan menm ek mon bann koleg noun travay 20an e nou pou kontinyen. Sesel i merit en gouvernman ki respe son adverser e ki krwar ki menm si ou pa dakor avek li ou still kapab fer ou kontribisyon.

 

Alors mon asir Mr Michel e Mr Faure ki zot plas isi si zot anvi vin Lider Lopozisyon nou pou respe zot. Sa respe ki mon pe koz lo la pou komans dan sa kanpanny eleksyon. I fer preski 20an ki noun retourn dan miltiparti e mon krwar ki in ler pour nou kit bann politik welele parey zot zot pe fer ater, e fer kanpanny matir. Nou pou montre respe pour tou dimoun par fer kanpanny port a port pou eksplik nou progranm e nou plan pou Sesel. Nou pou osi protez nou siporter ki zot zot targete avan eleksyon. Sa ki anvi fer parti bwar donn tol welele fri poul, anmenn dimoun pou maltret nou partou partou fer li, nou nou annan konfyans dan bwat vote le 21 Me. Me pli enportan ankor se ki avek en ladministrasyon SNP Mr Ramkalawan dan State House okenn travayer dan gouvernman pa pou bezwen per perdi son louvraz. Pou napa en group ki apel solda Rene e en group ki apel lennmi larevolisyon. Politisyen Parti Lepep mon bann frer ek ser pou sorti trankil e pou ganny ranplase par politisyen SNP, me travayer dan servis sivil pou reste. Nou pou ouver laport biro gouvernman e nou pou dir deor politik, antre laliberte, welcome tolerans, asize respe annou travay pour Sesel. Se zisteman sa ki nou anvi vwar dan nou pei e mon konvenki ki en ladministrasyon SNP anba Leadership Prezidan Wavel Ramkalawan ki pou remet sa bann bon prensip dan nou pei.

 

Nou en parti ki reprezant tou lopinyon. I annan tou sa kalite rasin dan nou parti e nou aksepte tou dimoun. Mon sirtou ozordi anvi ankouraz tou bann siporter ki ankor krwar ki dan parti Mr Michel Parti Lepep sirtou bann SPUP ki santi zot trair abandonnen pou annan sa lodas ek sa kouraz pou rezwenn bann ki anvi travay pour sa meyer Sesel.

 

MR SPEAKER

Oke warp up Onorab 15 segonn.

 

HON JEAN-FRANCOIS FERRARI

Mwan mon bezwen sanz mon pa bezwen enkyet mon konnen ki in ler e sa sanzman pou vini. Pour zabitan Mont Fleuri mwan zot tou zot konnen ki kantite e ki kalite travay noun fer ansanm. I annan kot noun reisi me i annan pour nou fer. pour sa lokazyon Parti Lepep in anmenn son pli gro kannon pou fer bokou tapaz.

 

MR SPEAKER

Time’s up. Non 3.55 Onorab. Kannon in fini pete ou pan realize. Onorab oun komans 3.23 i 3.53 i fer ou 30 minit. Wi la la, oke Onorab Vel.

 

 

 

 

 

3rd March 2011

 

 

HON JENIFFER VEL

Mr Speaker, Koleg Manm Lasanble, zabitan Pointe Larue, fer, ser  pep Seselwa. Mr Speaker diskour lo leta nou nasyon ki Prezidan James Michel ti fer Vandredi pase ti en diskour laviktwar, en diskour ki  ti fer en rezime lo son term koman Prezidan e osi met an perspektiv son plan pour sa prosenn 5 an la ki Sesel pe sorti dan sa kriz ekonomik ki ti’n frap lemonn 2 an pase. I ti en diskour responsab e serye kot Prezidan ti ofer lepep Seselwa sa ki ti posib fer prenan kont nou sitiasyon ekonomik e kot i ti reziste tou tantasyon pou fer cheap politics.

Si Prezidan Michel ti oule fer politik bon marse, i ti ava kapab promet tou travayer R500 anplis apre Me.  Si Prezidan Michel ti en dirizan iresponsab i ti ava kapab promet pou tir tou taks e promet pou fer  gran logmantasyon dan depans gouvernman lo lasante ek ledikasyon.

 

Prezidan ti fasilman kapab dir avek pep Seselwa vot pour mwan  mon ava donn ou sa. imedyatman la Mr Speaker nou vwar diferans ant Prezidan Michel e Lider Lopozisyon Msye Ramkalawan, en tenm ki mon pou retourn lo la plitar dan mon diskour. Mr Speaker tenm Nasyonal pour sa lannen, ‘Laviktwar pou Sesel’ i enn ki tre apropriye pou 2 rezon, premyeman sa tenm i adres en karakter fondamantal pep Seselwa. Laviktwar pou Sesel i koz avek en keksoz ki sak Seselwa i annan anndan li e  ki defini nou, sa tenm i tous en tret ki disteng Seselwa parmi lezot pep e nasyon e sa se nou lanvi pou toultan reisir. Dezyenmman tenm nasyonal Laviktwar pou Sesel i koresponn egzakteman avek demann nou lepok, nou pa’n zis bouz beyond 2000 e nou dan trwazyenm milener me nou pe bouz dan en nouvo lepok. Parey granmoun i dir syek pe sanze e pour nou pa dormi ek pei nou bezwen sanz avek li.

 

Sa tenm nasyonal Laviktwar pou Sesel i parey en tors ki kler Seselwa lo loportinite istorik e enorm ki sa sanzman dan lord mondyal i reprezante.  Se dan sa loptik ki mon get diskour Prezidan Michel.   Prezidan in dir tre for, e in demontre ek nou ki malgre difikilte nenport ki moman, nou bezwen kontinyen ert rezilyan e kit lespwar vivan, en zonm ki’n toultan ganny enspire par travay dir.  Prezidan pe dir ek son pep ki sak viktwar personnel dan nou lavi toulezour atraver disiplin e travay dir i en laviktwar pour nou pei.  Letan son diplomasi enternasyonal i ranport laviktwar e nou vwar led sorti kot bann partener tel ki Sheikh Khalifa, Lasin, Lenn e Linyon Eropeen a en valer plizyer milyon dolar Ameriken, i vwar sa koman en laviktwar pour Seselwa. Parkont lopozisyon anba direksyon Msye Ramkalawan pe anmenn en politik zenofobik kont sa bann dimoun zis akoz zot oule Sesel fail.

Ler lemonn enkli lerop pe esey flat Sheikh Khalifa pou vin envestir se zot, isi lopozisyon pe rod tou fason pou fer sa msye ale akoz zot oule Sesel fail akoz zot zot pa krwar dan laviktwar pour Sesel.  Msye Speaker tou sa bann kalonmni kont Msye Khalifa pou aret en sel kou si zis sa msye i donn zot en kopo parey nou’n vwar dan ka Msye Siva.

 

Ler lemonn enkli Lanmerik pe rod led Sinwanr pou devlop zot lekonomi, isi lopozisyon pe fer tou sord kalite malelve kont sa pwisans mondyal pou dekouraz zot pou ed nou.  Louvertir Lasanble Nasyonal zot ti boycott me ozordi get zot pe asize la anndan pe fer tou sord kalite demagozi e promet lesyel ek later.  Mr Speaker i ironik ki ozordi SNP pe fer son dernyen soupir dan sa menm batiman, zot boycott led Lasin akoz zot oule Sesel i fail, akoz zot pa krwar dan laviktwar pou Sesel. Zot kritik nou ler nou devlop en relasyon avek Lenn, sirtou dan domenn Lasante e dir ki nou fer sa akoz nou bann ozofisye dan gouvernman pa oule al lopital Victoria.  Pourtan semenn pase nou konn tre byen lekel ki’n rann lapel Lenn pou tretman, kras anler apre i tonm lo zot nennen. Kot Linyon Eropeen Onorab Ferrari ti dir ‘hit us where it hurts the most’, an dot mo boycott nou lendistri lapes. Zot dir sa akoz zot oule Sesel i fail, akoz zot pa krwar dan laviktwar pou Sesel.

Antretan sa enn de siporter ki reste zot i pri dan konfizyon. Bann gro sef pe kit sa katyolo SNP par grap, sitan bokou ki menm Onorab Arissol i dir fodre al fer en bon gete pou rod lakoz.  E bann ki reste in fer pli bel e pli gro lakaz dan lavil, mars dan pli gro loto, e travel lo zil pou pass weekend. I zot labitik boycott e apre zot pas par deryer pou zouir fri travay parti Lepep. Se sa pwen ki Onorab Larue ti fer  ler i ti koz lo sa msye Praslin, sa Msye Mr Speaker ti vir son siporter kont en envestiser etranze, the Raffles atraver en petisyon me apre i ti pas par deryer e al kot sa menm envestiser pour li ganny gro biznes.  Pa ki nou pa oule siporter SNP manze me nou oule ki zot aret ipokrik e profit lo lafebles zot siporter.

 

Kan a sa bann pov siporter SNP zot ankor pe esper en pti led la ki eleksyon in arive. Konfizyon total dan larzan, larzan liberal, pesonn pa konnen kot i ete, larzan Sid Afrik, larzan radio, larzan kas latet tou sala siporter pe rode ki’n arive avek.  Larzan in vin Bondye Arpent Vert e Msye Lider Lopozisyon i annan lodans vin kesyonn led ki nou donn nou siporter ek larzan ki nou menm nou nou kontribye pandan 5 an koman bann MNA parti Lepep.  I pe rod lodit dan nou kont kan kot li tou Trezorye i resign akoz bann manboulouk e pansyon travayer pankor ganny peye. Kestyon alors, kimannyer en parti ki pa kapab kontrol son prop finans dan lopozisyon e met lord dan son prop lakaz pou kapab diriz en gouvernman.

 

Mr Speaker lopozisyon pe fer son dernyen sekous e dan zot dezespwar napa simagri ki zot pa’n rakont nou. Pou bidze sef ti komander an Sef e la pour leta lanasyon in vin Prezidan. Mon ava dir Mr Speaker ki dan Lafrik i annan zis 2 zonm ki pa’n ganny elekte Prezidan me ki apel zot lekor Prezidan, sa se Prezidan Ramkalawan e Prezidan Laurent Gbagbo. E i promet tou, pou esey zwe lo sa size emosyonnel ki apel later, i dir ki i pa pour donn lease plis ki 25 an ek envestiser. Be eski sa Msye i kapab dir nou lekel sa envestiser ki pou vin envestir 200 milyon dolar lo en lease 25 an. Mank leksperyans Mr Speaker, en komander konmsa pou zet bann danser dan kalorifer.  Me apre ki in realiz son gaf, zot ti anvoy Onorab Carpin dan en lesey desespere pou dir ki bay pou renouvlab. Onorab Carpin ki mon konpran pou Minis Envestisman dan Gouvernman SNP, Bondye beni nou pei, i dir nou i pou renouvlab pou fer ki bann kondisyon envestisman i ganny respekte. Be Onorab menm dan en bay 60 an i annan sa ki ou apel conditions of lease, ou pa bezwen fer en bay 25 an pou fer sa, conditions of lease i la pou fer sir ki bann kondisyon bay i ganny touzour respekte. Dir nou Onorab, ler ou dir bay pou renouvlab, eski i pou otomatik ou non? Si wi, akfer fer li renouvlab.  Si non, mon pou dir zot, ki zot ti pou dir nou si nou nou ti’n fer li konmsa, nou pe esey kontrol envestiser. Me mon konpran akoz Onorab in dir sa, ler ou asiz lo en sez 3 lapat ou dir nenport kwa ki zot dir ou dir. Non Onorab?

 

Mr Speaker les mwan dir ek SNP tre for, anka zot pa’n tande sa ki Prezidan Michel in dir. Later ki pe ganny vann ek etranze pe prensipalman ganny fer par dimoun prive.  Ler Minis Dugasse ti anmenn lalis dimoun ki’n vann later ek Msye Siva dan sa Lasanble, ki nou ti vwar? Laplipar dimoun lo sa lalis se bann siporter SNP. E la Mr Speaker petet zot ti a kapab dir nou akoz zot in rekomans maltret sa msye, pourtan ler i ti anvoy lanvlop ek drayver tou ti ok. Ler zot dir ki later pou pwen santral dan sa prosen eleksyon nou nou dir zot atansyon.  Sa ki Onorab Volcere in dir yer ti zis bouton, nou file lo zot i epe. La zis enn.

 

Lekel ki’n pran later rezidansyel Anse Royale pou fer biznes lo la?  E Onorab Georges ou ki sitan kontan statistic,  akoz ou pa dir avek lazenes Seselwa ki an 1977 ler SPPF ti detri sa sistenm pouri ki ti a’n egzistans sa lepok e pran labar ki 99% later dan Sesel ti dan lanmen zis 3% Seselwa ki ti enkli ou fanmiy. Mr Speaker ziska ozordi zot oule met Msye Rene dan prizon akoz i ti acquire sa bann later e redistribye ek malere, pourtan preski zot tou dan lopozisyon in benefisye anba sa scheme.

 

Dan son dezespwar napa promes ki Lider Lopozisyon pa’n fer, saler; R500 anplis tou dimoun an servan en mekanizm enteresan. Taks, ki taks? Anba en gouvernman SNP taks pou preski ganny eliminen atraver en makanizm serye. Pri lavi nou pou met anplas en mekanizm pou fer li konsiderableman bon marse, ler Lider lopozisyon i dir nou, pri kontrol, nou pou rod en mekanizm pou enplimant li. Spesyaliz, imedyatman dimoun pou vwar spesyalis ler zot malad atraver en makanizm ki pe fer nou reflesir lo la. NDEA pou nepli cowboy me plito en group entelizan ki pou servi bann mekanizm serye pou tyonbo droger. Drog, mekanizm pou ganny met anplas  pour ki sa fleo i ganny eliminen anba en gouvernman SNP. Term Prezidan, zis 2 term sa pou atraver en nouvo mekanizm konstitisyonnel.  Mr Speaker konmsi Gripounyet, sa kanizm, kanizm ki SNP pe koz lo la, sa pa en kannif pou pik nou par deryer nou ledo avek?

 

Me Mr Speaker annou get enpe pros sa bann promes. Kimannyer i kapab ogmant depans gouvernman ler ou fer desann taks. Apre 18 an dan politik SNP pankor kapab konpran sa. Onorab i pa posib, menm ou dalon Liberal laba Langleter pe esey redwir taks par koup depans gouvernman. Konmsi Mamime ek Fanife ‘this boy is totally retarded’.

 

Onorab Henrie i demande kimannyer keksoz Sesel i pli ser ki Moris ler tou le 2 pei i fer vini komodite sorti Sid Afrik. Premyerman si Onorab Henrie ti’n fer sa statement Moris konmkwa Moris i bon marse, Morisyen ti’n saboul li ek dalpouri.

 

Dezyenmman zisteman enn bann rezon akoz Sesel i pli ser, se akoz Seselwa zot saler i pli o ki pou Morisyen. Pou mendev i pli o e sa i fer ki pri komodite i pli o.  Onorab sa i lalwa debaz dan lekonomi. E i tris ki apre 18 an SNP pankor konpran sa. Fason pou kit Sesel bon marse fas a sa gran logmantasyon dan bann pri komodite lo marse enternasyonal e dan pri delwil se zisteman parey Gouvernman Lepep fek fer atraver sa fon stabilizasyon pou asire ki pri elektrisite, delo bis parmi lezot pa monte se sa bon planifikasyon Onorab Ramkalawan.

Onorab Lider Lopozisyon ou R500 pou sak travayer kote ou pou gannyen, sirtou la ki ou dir ou pou tir tou taks. Apre ki SNP in demann liberalizasyon lekonomi e zot dir nou ki zot dalon marsan pou fer vini diri basmati ek sa bon loder, pli bon marse akoz pou annan konpetisyon. Ozordi sa menm parti i demande ki nou re-entrodwir en pratik parti inik e sa se pri kontrol.  Ki nou pou konpran ek sa parti sipay. Kwa ki zot oule fer ek sa pei, ouswa zis zot talk, talk pou zistifye zot gro saler ki zot gannyen ek sa Lasanble. Mon plis ki kwar se sa Mr Speaker.

 

Pran Onorab Prea, li i dir nou ki pandan 7 mwan,  4 pti trezor in manz zis swe ek pasyans.  Eski zot in mor ek malnitrisyon sa bann pti trezor?  Eski zot in admet lopital ek malnitrisyon?  Ki ou koman en dirizan ou’n fer pou soulaz zot soufrans?   Mr Speaker se sa problenm SNP, zis zot dramatiz tou pti problenm dan Sesel e apre fer nou krwar ki sak fwa nou ganny en latet fermal i en kanser. I zis pa posib pou 4 zanfan viv san manze pou 7 mwan, zot pa anvi konn laverite Mr Speaker.

 

Prezidan i dir ki pou rezourd problenm delo son gouvernman pou osi moderniz desalinasyon e rezourd problenm tiyo kase anplis ki fer monte danm La Gogue. Me Onorab Carpin i dir nou ki Prezidan in finalman tonm dakor ek SNP akoz i pou zis fer danm La Gogue vin pli o pou rezourd problenm delo e apre sa Onorab ti deklare ki en gouvernman SNP pou imedyatman konstrir en danm lo larivyer Grand Anse, ki bann ekspert  i dir pou kout 800 milyon dolar Ameriken.  Kot pou ganny larzan?  Sa pa son problenm si  zis i kapab anbet sa pep pou ganny ennde vot.

 

Mr Speaker sa Onorab de tout fason i dir nenport kwa, koman en fanm i dwatet onte pou vin ensilte fanm dan sa Lasanble. Pour li tou fanm ki’n ganny promote dan sa pei in bezwen dormi ek sef.  En sou lapresiasyon pou sa plizyer santenn fanm ki’n travay dir e trimouse pou earn zot plas koman direkter, managers, PS, MNA, Minis.  Menm dan lekol ‘A’ level ozordi Onorab se nou bann zenn fiy ki pe sorti avek straight ‘As’. e la i fer  mwan demann mon lekor en kestyon. Ki mannyer li in arive vin en dirizan ek en MNA dan SNP? Akoz sa kalite panse lo son kote.  Onorab ler ou montre en ledwa ou prosen, pa bliye ki 4 pe vir lo ou.  SNP Mr Speaker ek son dirizan i obsede avek sa bann zafer zonm fanm me nou nou dir zot atansyon devan zot laport i ranpli avek lokipasyon.

 

E yer Mr Speaker, sa ki Onorab Dyer in dir zot pou fer imedyatman si zot vin opouwwar, ni menm Bondye pa pour kapab fer dan 7 zour. Me Mr Speaker les mwan retourn lo demagozi fer par Lider Lopozisyon. In dir nou NDEA i en von zafer me tro cowboy me pourtan son parti ti refize siport letablisman NDEA dan Sesel. I dir nou zot bezwen travay lo lentelizans. Me ler NDEA i al fouy dan ber pti baba ouswa dan lasanm benn akoz zot in ganny lenformasyon ki drog pe ganny kasyet laba, i konplent e dir ki NDEA i teoriz sitwayen e madanm dan lasanmben. Si zis Onorab ti konn lanpler sa problenm drog zanmen i ti pou dir sa bann gonaz. E si nou’n ekout li byen, akoz i pa’n pran en pozisyon kont hashish ek marijuana, eski i ankor pe anbet nou bann zenn pou fer zot krwar ki sa bann kalite drog pou ganny legalize?  Kan eski i pou konpran ki drog parey eroin i swiv hashish parey larivyer i swiv kolin. Eski i napa en remord konsyans ki in pran son parti plis ki 15 an pou kondann drog, pandan ki nou bann zenn ek fo lespwar ti pe eksperimante.

 

En lot kannif konmsi Gripounyet ki in koz lo la se fodre ki Prezidan i fer zis 2 term. Pourtan Langleter kot son dalon Liberal pe fer dega napa okenn limit lo term en premye Minis, e laplipar  pei omonn limit i zis 3 term parey Sesel.  I dir Prezidan i la tro lontan me eski li i pa santi ki in la pour tro lontan?  Eski i pa krwar ki term lider lopozisyon i dwatet redwir pou vin pa 2 me 3 term?  I pe koz lo santiman lepep me eski i tat santiman son prop siporter? Lobor li i ranpli ek bann ki oule vwar en lafen avek son leadership.

 

Dan sa Lasanble Onorab Carpin i dir ki SNP ek Msye Ramkalawan i kapab fer li me an prive i dir sankwa gro tonton ki ti la. Msye Speaker ozordi mon annan sa pour dir avek Onorab Ramkalawan, apre eleksyon le 21 Me, Onorab ou pou disparet net lo lasenn politik Sesel. E son dalon Onorab Ferrari nou dir ou kontinyen sotaye, ou labitid fer komedi e dir nenport kwa dan sa Lasanble. Le 21 Me premye klou pou ganny mete dan ou serkey Mont Fleuri, ou defet i la.

 

Msye Speaker laviktwar pou Sesel i dan bann sif ki Prezidan Michel in site devan sa Lasanble, sa reisit eksepsyonnel ki’n fer lemonn antye koz nou koze, laviktwar i dan nou sirplis e dan nou rezerv dan labank santral. Nouvo konpansasyon pou travayer IOT ki Onorab Lucas ti premye pou sizere apre ki gouvernman ti’n komans negosiasyon avek management IOT. Wi apre ki gouvernman ti komans negosiasyon ek Management  IOT. I en laviktwar pour travayer sa lakonpannyen.

 

Zero tax lo gratwite anba 10,000 i en laviktwar pour travayer Seselwa e sa in selman posib akoz reform ekonomik gouvernman Lepep, en reform ki SNP ti kont. E ler nou rapel ki mannyer SNP ti kont? Nou ava osi rapel ki mannyer zot ti esey organiz demonstrasyon vyolan kont sa reform Roche Caiman. 2000 lakaz dan sa prosen 2 an i osi en viktwar pou pep Seselwa.  Mr Speaker ozordi dan lemonn plis ki 2 bilyon dimoun napa en twa lo zot latet. E menm kantite pa ni  menm reve ganny en lakaz en zour. Sa rev annan en lakaz se nou dan Parti Pepep ki’n enstile dan nou pei. Wi nou pou kontinyen fer plis lakaz.  Pa zis Perseverans me osi Les Mamelles, Corgat Estate e partou lo Sesel.

 

E la mon ti ava remind Lopozisyon e Onorab ki tou file lo sa zafer 4.5 milyon dolar Ameriken in ganny donnen ek zot atraver komite Lasanble  lo Finans, akoz zot pa fer en investigation pou vwar si ti annan koripsyon.  Ki zot pe espere? Mr Speaker mwan si mon ti zot mon ti pou reste trankil lo size lakaz Perseverans akoz se zot ki ti kont proze Perseverans. Si nou ti’n ekout zot, ki lakaz ki ti pou’n ganny konstrir laba? Vreman zot en parti ki vey dan gob. Zis parey ozordi fas a  laviktwar nou larme kont piratri zot in komans koz lo nou coastguard e nou larme kan yer se zot ki ti dir akfer larme, ferm larme, i en gaspiyaz larzan.  E ler zot dir nou lo sa kote latab nou vyolan, les mwan dir avek zot ki napa okenn antre nou ki’n deza bate e kas lizye enn nou koleg dan sa Lasanble.

 

Mr Speaker dan son diskour lo leta lanasyon ki i ti prononse Vandredi pase, Prezidan Michel in plas lepep Seselwa devan son responsabilite e fer nou realize ki pou Sesel al pli devan fodre sakenn i fer son bout.  Letan sakenn i fer son bout dan en fason responsab, Sesel i ava al pli devan e tou Seselwa i a boug avek li. Se sa signifikasyon tenm nasyonal laviktwar pou Sesel.

 

Mr Speaker fidel a son labitid, mon distrik Pointe Larue pou kontribye ver sa gran laviktwar pou Prezidan Michel e Mr Speaker nou dan Pointe Larue le 21 Me nou dir personn pa pour bar nou.  Mersi.

 

(Applause)

 

HON MARIE-ANTOINETTE ROSE

Mr Speaker, pep Seselwa bonn apremidi. Ankor 5, ankor 5 an pou Prezidan Michel pour li kontinny sa travay ki in komanse e met nou pti pei Sesel an rout ver plis progre e prosperite. En lot manda 5an an gran mazorite nou pou donn li akoz ozordi plis ki zanmen nou non selman kapab ziz li par son aksyon me konpran pli byen kote nou pei i sorti, ki semen in traverse e ki lorizon Parti Lepep i promet nou. Nou pou donn li 5 akoz ozordi plis ki zanmen nou kapab konpar karakter e personalite Prezidan Michel avek son oponan prensipal Mr Wavel Ramkalawan e konnen avek leker kler lekel ki meyer pou diriz nou pei.

 

5 lannen devan nou anba direksyon Prezidan Michel pour li apre ki in redres nou lekonomi, redres nou servis piblik e ofer lepep Seselwa en nouvo Sesel. Sete sa tenm dan ki Prezidan Michel ti adres nou Vandredi pase e son sel promes se ofer nou pei e nou pep en nouvo Sesel. En nouvo Sesel kotSeselwa ki lo sant devlopman polisi Parti Lepep pou aprezan vin o sant devlopman nou lekonomi. Plan i konkret e kler, bann plan fiskal e polisi moneter in fini etablir e la loportinite in donnen pou plis ki 400 bout later lo nou bann zil konble pour ou sa envestiser Seselwa met ou larzan dan ou pei, fer marse nou lekonomi e ou osi zouir sakrifis ki ou’n fer. En nouvo Sesel si ou anvi vwar ou fanmiy e ou lavi bouz lo en lot letap ou bezwen annan en vizyon o dela sa enn ki ou annan ozordi. Annan ou prop pti biznes e pourkwa pa annan ou prop gro biznes. Sesel i pour ou, i pou tou Seselwa e pa les personn fer ou krwar otreman.

 

En nouvo Sesel pour ou ki anvi kontinny ou letid si ou anvi vin en avoka liniversite Sesel i ofer ou loportinite. Si ou anvi vin en enzenyer travay e ou a ganny en scholarship, si ou anvi al travay lo zil ou loportinite i la. Sesel i pour ou e ou annan par ladan. En nouvo Sesel kot servis lopital gouvernman pour enn dan sa bann swa ki pou devan ou. En lopital prive i en lot swa ki ou kapab annan anba sa nouvo Sesel, tou kondisyon ekonomik e striktirel i la pou sa arive. En nouvo Sesel kot ou osi ou non selman kapab ganny ou prop lakaz me vin enn sa bann partener ki pe konstrir lakaz pour ou prop frer ek ser Seselwa.

 

En nouvo Sesel kot bann politisyen i kapab dyaloge e koz avek kanmarad san maltrete me plito en lapros konstriktiv e vize ver devlopman sak Seselwa. Ki politik i ava annan son plas me politik saboule napa okenn plas dan sa pei. En nouvo Sesel kot Seselwa pou rekonnet lenportans lenvestiser etranze, enn kot etranze pa ganny maltrete pli ba ki later e son krim se kontan Sesel me plito enn kot i annan respe mityel pour Seselwa e etranze parey. Nou rev pour sa Sesel set en rev partaze. Parti Lepep i en parti politik ki annan en vizyon e travay ver enplimant sa vizyon.

 

Mr Speaker leta nou nasyon i divize an trwa group prensipal. I annan en group dimoun dan nou pei ki rekonnet ki progre in ganny fer. Zot konnen ki direksyon ki sa pei in pran i enn ki ofer zot stabilite pour zot biznes, sekirite pour zot fanmiy, lape e lanmour en Sesel ki gou pou viv. Sa i bann dimoun ki krwar dan direksyon Parti Lepep e sa nouvo Sesel ki i pe ofer. I annan en lot group dimoun ki pour zot leta nou nasyon i tou sa ki mal avek nou pei. Parey Onorab Henrie in vin sey dekrir nou pei Mardi, pour zot sa bann dimoun Sesel in regrese. Nou bann lenstitisyon pa bon, nou pei pa pe marse.

 

Mr Speaker bann tel latitid pou vwar li difisil pou adapte dan sa nouvo Sesel akoz en nouvo direksyon i vedir en nouvo fason panse. Sa i bann cynic ki nanryen pa bon pour zot e nanryen pa pou zanmen bon pour zot. Bann dimoun parey ser frer i Seselwa nou tou senpleman les zot koze.

 

Ekriven Ameriken Samuel Beckett dan son liv ‘Waiting for Godot’ i dekrir bann tel dimoun koman bann dimoun ki pe esper sa ki pa pou zanmen arive. Dan sa strazi komedi enpe parey sa menm trazi konmedi ki SNP pe fer fas avek Godot i reprezant bann zonm fou e divage. Mon konsey pour sa bann gran koneser se avan ki zot al dan eleksyon al rod en kopi sa liv e rode ki arive alafen sa zistwar e le 22 Me nou a koze.

 

Mr Speaker i annan dan nou pei en trwazyenm group dimoun ki pe regard leta nou nasyon avek en nouvo lizye. Sa bann dimoun ennfwa letan ti krwar dan sanzman, pour zot sa sanzman ki zot ti a pe rode set en sanzman pour le meyer, zot ti anvi vwar plis foreks dan labank, e pour zot sa sanzman in arive. Zot ti anvi vwar en sanzman dan lafason ki gouvernman i zwe son rol koman fasilitater pour zot Parti Lepep in fer sa sanzman. Zot ti anvi vwar e sanzman dan lafason ki nou gouvernman i dil avek koripsyon e pour zot sa pe arive. Zot ti anvi vwar plis loportinite biznes dan nou pei e ozordi zot vwar zot pe partisip plennman dan nou lekonomi. Zot ti anvi vwar en lafen avek problenm napa ozordi swa pou annan bwat bef, kari poul dan bwat, diri tou kalite, tousala Mr Speaker sa sanzman in arive. Sa bann dimoun ti pe rod sanzman e pour zot ozordi Parti Lepep i fer sa sanzman. E sa rezon akoz zot krwar dan sa nouvo Sesel. Zot krwar dan direksyon ki Prezidan Michel in pran. Set alors avek latristes ki zot in realize ki sanzman in vin pa avek sa parti ki zot ti siporte dernyen eleksyon me plito avek sa parti ki zot ti krwar zanmen ti pou annan kouraz fer sanzman.

 

Mr Speaker i touzour en lazwa pou dekouver ki sa dimoun ki ou pa ti tro tro fye i annefe en bon zans e enn ki ou kapab fer biznes avek. Me kel dezapwentman ler ou dekouver ki sa enn ki ou ti’n kont lo la in vyol ou konfyans e les ou tat tate dan fernwanr.

 

Mr Speaker nou’n toultan dir ki nou pep i en pep matir e enn ki’n touzour pare pou pran la relev e fer fas avek defi. Ozordi mon oule dir avek lopozisyon ki nou pep in fini desot staz petit enfance, nou nepli dan remedial, nou’n fini desot laz P6, nou nepli laz adolesan, nou’n vin bann zonm ek fanm mir, nou parti i en parti ki eksperyanse nou gouvernman i enn ki pa per travay. I annan rezon senp akoz Parti Lepep i touzour ganny eleksyon dan sa pei. Eski SNP in deza demann son lekor akoz malgre tou sa propagann e tou sa bravado zanmen in reisir ganny eleksyon dan sa pei? Larepons i senp Mr Speaker nou pa pli bet ki zot.

 

Sa madanm ki reste trankil e esper son bis i pa pli bet ki sa zonm ki gaspiy son letan maltret gouvernman. Sa profesyonnel ki travay dir e rann son pei en bon servis i pa pli bet ki son sef ki gaspiy son letan asiz lo file son prosen. Sa peser bor lanmer pa pli bet ki sa pti menn lapoud ki pe rod sanzman. Sa fanm Seselwa ki leve e debourye i pa pli bet ki sa enn ki refize travay ziska zour sanzman i arive vini. Siporter Parti Lepep pa pli bet ki siporter SNP Mr Speaker.

 

Onorab Marie pa pli bet ki Onorab David Pierre menm si Onorab Pierre i ale vini dan Mont Buxton. Onorab Gamatis pa’n zanmen pli bet ki Onorab Pierre e vwala rezon akoz in toultan raport laviktwar dan son distrik. En lider Parti Lepep i pli smart ki Lider SNP. Vwala rezon akoz nou pou toultan ganny eleksyon dan sa pei, e vwala akoz le 21 Me sa lannen nou pou ankor ennfwa donn zot en bon leson dan politik.

 

Aprezan redemann ou lekor sa menm kestyon eski Parti Lepep ti bet ler i ti deside fer sanzman politik an ‘92? e si wi akoz in ganny eleksyon ‘93, ‘98, 2001, e 2002. Eski Parti Lepep ti bet ler i ti deside fer sanzman an 2004? E si wi akoz nou ti ranport eleksyon 2006 e 2007? Eski zot krwar Parti Lepep ti bet ler ti fer reform ekonomik an 2008 e demann tou Seselwa pou koste. Eski Parti Lepep ti bet ler i ti averti pep Seselwa ki sa lemonn ekonomik ki nou pe viv ladan i enn ki pa pou fasil. SNP ti riye ler Onorab Potter ti dir ki lavi i tough, tough, tough. Ozordi lemonn pe koz sa menm koze. Dimoun sorti Langleter i rakonte ki manyer laba i tough, tough, tough. Nou isi Sesel nou’n desot sa leta. SNP ti refize koste ler Prezidan Michel ti anons reform anba IMF. E avek zot imatirite politik zot ti demann Prezidan Michel pou demisyonnen. Ozordi eski SNP pa pe regrete zot pa ti koste? Eski nou Vis Prezidan Danny Faure ti bet ler i ti deside zwenn kominote biznes e eksplik zot kwa sa reform ki nou pe fer e fer zot ganny en sans lapartenans dan sa reform. Eski i ti bet ler i ti vin dan sa Lasanble e travay ansanm avek nou ver bann lalwa ki pou met fondasyon pour sa nouvo Sesel? Ler gouvernman ti eksplik avek pep Seselwa ki sa reform ekonomik ti neseser anvi kriz ekonomik mondyal, eski SNP pa ti riy nou e dir ki sa ti en lenvansyon Parti Lepep. Eski gouvernman ti bet ler i ti deside met en fon stabilizasyon dan bidze lannen pase akoz nou ti’n prevwar ki lemonn i riske fer fas avek en logmantasyon dan pri manze.

 

Akoz SNP ti refize donn zot sipor sa bidze. Eski Prezidan Michel ti bet ler i ti al ver lepep e koz avek zot dan 25 distrik e eksplik zot pour li menm akoz i ti’n deside fer sanzman. Eski Parti Lepep ti bet ler i ti deside fer konblaz e kree 6 nouvo zil artifisyel, eski Parti Lepep ti pe gat larzan ler ti antreprann proze zil Perseverance malgre tou kritik lopozisyon? Eski Prezidan Michel ti bet ler i ti al ver bann pei zanmi e demann led pour son pei? Non, ser frer Seselwa SPUP/ SPPF, e Parti Lepep pa’n zanmen pli bet ki lopozisyon.

 

Zis regard sa ki pe pase an mwayenn oriyan, zis regard sa tirbilan ki pe pase dan lemonn e la zot ava realize ki nou dan Parti Lepep nou pa bet nou, nou smart. Nou konnen ki nou pe fer, nou konnen kote nou anvi ale dan 2, 3, 5 ouswa 10an e nou travay ver sa.

 

Mon mesaz avek tou siporter lepep, bann ki’n toultan la e bann ki fek zwenn nou. Ler SNP i pas devan nou laport e vin rod en vot fer li konnen ki nou pa bet, dir Msye Ferrari ki nou siport Parti Lepep akoz nou pa pli bet ki li. Dir Msye Georges ki nou osi nou trouv son bann zes Greyboy Mr Grey dan kler. Dir Mr Henrie ki Seselwa nepli malere boufon e dir Mr Ramkalawan ki lepok politik R25 dan lanvlop in fini.

 

Ozordi Seselwa pe demann en nouvo kalite politik. Enn kot zot ganny respe avek politisyen e an retour donn zot politisyen sa menm respe. En politisyen ki al kot lakaz bann madanm apre 8er diswar merit deklar son lentansyon fer kanpanny devan laport dimoun apre 8er. Krwar mwan sa zonm pa ganny respe okenn madanm dan sa distrik. En politisyen ki refize mont dan son loto nef Mont Buxton zabitan sa distrik pe demann en gro kestyon, ou a dir mwan akoz? En politisyen ki met Rs25 dan en lanvlop e ofer li avek en let pour bann zenn ki pe al vote pour premye fwa bann zenn i ofanse akoz zot vot i presye i pakout R25. Lazenes Seselwa pa sitan bon marse ki sa, parey en zenn Belonie ti dir mwn Miss sanmenm sa ki mon apel politik bon marse sa. En politisyen ki met son non e i sey fer trik avek biro lanrezistreman voter par anrezistre e sey anrezistre enn ki pros ek li lo fo preteks e servi bil elektrisite en dimoun ki’n mor koman laprev son landrwa reste i pe non selman komet en lofans me in fini dir ki i pa krwar dan sa menm demokrasi ki pe promot i pou respekte. En politisyen ki servi biro zofisye lanrezistreman voter koman son azan politik zis pou esey manipil lalis voter, nou oule dir li ki nou’n dekouver li ek son karya e dezormen 10an i tou senpleman too long in failure Onorab. Nou dan Parti Lepep nou pa pli bet ki ou. En politisyen ki dir avek zabitan Larivyer Anglez ki bann dimoun Corgat Estate sete bann san konpran ki pa konn dir bonzour zis mon oule dir li zabitan Corgat Estate pa pli bet ki li. En politisyen ki al dan lakanbiz baka Anse Boileau e ofer tou dimoun R50 pou aste baka, les mwan dir li ki sa bann bwarer baka pa pli bet ki li. An tou leka bann la ti byen pase sa weekend me zot konnen kote zot vot i ete.

 

Finalman Mr Speaker en parti politik i rekolte sa ki i senmen. Sa enn ki’n travay, travay, e travay lepep i ziz li par son aksyon. Sa enn ki’n montre Seselwa ki manyer i fer politik karya ozordi sa menm Seselwa pe koul karya avek li.

 

Mr Speaker mon’n ekout lopozisyon koz lo tou sa ki mal avek Parti Lepep e tou sa ki zot krwar i mal avek nou gouvernman. I normal pour en parti politik met tou nou defo deor, apre tou pandan 18an sa i sel keksoz ki zot in aprann fer. Nou dan Parti Lepep nou’n deside met nou lafors, kouraz, e disiplin dan en sel keksoz e sa se travay, travay e travay. Me sa parti ki’n pas son letan esper sa ki pa pou zanmen arive li in vwar li pe ganny sa menm saboule ki Gaddafi pe gannyen. Si sa Msye in ganny dekriy koman en dirizan ki divage e mank direksyon isi Sesel nou annan nou prop pti revolisyon ki pe arive, sa revolisyon pe ariv dan kan bann ver.

 

Ler aktivis SNP i kit son parti e zwenn Parti Lepep petet ou a argye ki sa aktivis i engra e pe rod loportinite. Me ler 2, ler 6, ler 15, ler 30, e ler plizyer santenn siporter sa menm parti i deside sanz bor la ou merit realize ki i annan en keksoz ki gravman mal avek sa parti. Dan management i dir ou si en keksoz i mal avek en lorganizasyon pa get lwen me regarde lekel ki an tet sa lorganzasyon e ou a trouv sa problenm. Mwan mon konnen ki plizyer Manm lo lot kote latab i konn tre byen ki i annan en keksoz ki gravman mal avek leta lopozisyon an Mars 2011, zis detrwa mwan avan en eleksyon Prezidansyel.

 

Si zot pa bann yes men parey zot toultan dir annan sa kouraz pou rode kwa ki mal avek zot parti e fer li vin byen. Si zot demande oli larzan perdi dan gouvernman annan sa kouraz pou demann menm kestyon antre zot. Si zot demande oli bidze pour tel ou tel keksoz aplik sa menm lalwa antre zot, si zot dir ki selman enn pti group dimoun ki ganny privilez, regard dan koridor Arpent Vert e rode lekel sa trio ki pli privilezye ki lezot. Apre tou si zot en bann yes men opre zot prop dirizan ki manyer zot pou dir li kot i mal si i ti dan gouvernman.

 

Si Mardi Lider lopozisyon in dir nou ki i pou donn tou son travayer R500 lo zot lapey si i ganny eleksyon akoz alors i pa ti kapab donn son prop travayer ki ti’n rwayal avek li pandan 18an enn pti larzan pandan letan nwel. Si SNP in dir nou ennfwa elekte zot pou aboli security clearance, kestyon ki mon demann mon lekor, eski en gouvernman SNP alors pou les voler vin gardyen nou kof dan labank santral? Si SNP i dir nou ki zot pou met divan anba lezel zenn Seselwa kestyon ki mon demande se akoz zot ipokrit akoz ler Minis Adam ti vin Minis zot ti kritike e dir i tro zenn. Si Onorab Ferrari in vin koz lo Bondye dan nou Lasanble set akoz i krwar nou pli bet ki li e i krwar ki serten dan lopozisyon i pli pros avek Bondye ki nou isi lo sa kote latab.

 

Mr Speaker mon ti a kontan dir 2 pti mo pour zabitan sa de distrik ki pli pros avek mon leker. Sa i Bel Ombre kot mon reste e Mont Buxton kot mon’n grandi. Msye Speaker Bel Ombre i enn pti kominote, en zoli melanz tou dimoun ki an mazorite viv a’n armoni e respe. Pandan 10an i annan en Onorab ki’n fer nou krwar ki i ti pou kapab fer mirak. Ozordi 10an apre in komans koz lo tou keksoz ki Bel Ombre pa’n fer e in koz tou sa problenm lo ledo Administrater Distrik. Mon kestyon koman en zabitan Bel Ombre se ki sa Onorab in fer pandan 10an, ki in fer pour nou distrik, kote in fail, kote in al mal, zabitan Bel Ombre in fini deside Onorab Prea. Ou’n pas tou ou letan La Misere e bann peser Bel Ombre in dir mwan dir ou ou too little too late, mersi, 10an Bel Ombre too long in failure ou 2 manda ki ou sef ti koz lo la Mardi in fini.

 

Mont Buxton i sa distrik ki’n bers mwan dan mon lanfans donn mwan ledikasyon, fer mwan loportinite fer mwan grandi. Mon oule dir zabitan mont Buxton mon bann ansennyan adilt bann gran moun, mon bann koleg lekol mersi. Nou distrik i ankor annan bokou defi, mon letan koman en politisyen dan mon distrik i fer mwan realize ki mont Buxton i en distrik inik avek dimoun milti talante. Mr Speaker zabitan Mont Buxton i oule respe e dignite. I pa kontan ki dimoun i fer zot bet, e nou mesaz i kler sa ki zans Port Glaud in rezete zabitan Mont Buxton pa pou anvale. Si i annan en kok maron ki pe fer letour nou distrik nou bann madanm dan Mont Buxton nou bezwen mars nou latet anler. I pa pou fer letour nou lakaz ankor, i pa pou pas apre 8er, nou pou fer li retourn laba dan Port Glaud kot i sorti. Mon repete sa ki zans Port Glaud in zete nou dan lavil nou pa pou anvale. En dimoun in dir mwan dir dan sa Lasanble ler Onorab Pierre i koz lo valer moral donn li sa pti konsey. I dir mwan dir li demen bomaten ler i leve regard son lekor byen dan laglas e aret anvoy ros ler nou reste dan lakaz an vit.

 

Mr Speaker in annan en kantite koze resaman lo sa zafer larzan. I annan ki dir ki Parti Lepep pe donn larzan dimoun pou eleksyon. Mr Speaker Parti Lepep i konn valer son siporter e parey nou Lider Zafer gouvernman ti dir Mardi nou dan nou parti nou annan en disiplin kot tou le mwan nou kontribye anver en fon ki nou ed nou dimoun. Nou dir nou ed nou dimoun wi nou fer li, nou fer li avek lafyerte, nou fer li avek grannker, nou fer li kot nou kapab avek resours ki nou annan, nou travay se rod tou mwayen pou rann lavi nou siporter pli konfortab. Nou siporter i mars latet anler akoz i konnen ki malgre tou nou defo e tou sa kritik dan son moman pli fernwar Parti Lepep i la devan son laport, kot son lakour pe atrap son lanmen pou ed li. E les mwan fer keksoz byen kler avek Onorab David Pierre, Parti Lepep pa servi larzan gouvernman pou fer kanpanny avek. Nou servi nou larzan, larzan ki nou’n kontribye anver nou parti.

 

Aprezan Mr Speaker i annan en group dimoun ki pe vin devan nou e pe vin rod enn pti led avek nou. Me selman zot napa okenn lentansyon siport nou parti. Sa pti group dimoun se bann siporter lopozisyon ki krwar ki nou pli bet ki zot. Mwan mon annan en sel mesaz pour sa bann dimoun. Lepok fer krwar in fini. Fer krwar, zwe rol napa plas dan politik nou pei. Akoz ou pou fer krwar ou en Lepep e donn sipor SNP kan SNP pa fer namryen pour ou an retour. Ankor ennfwa mon mesaz i kler si ou siport SNP pandan sa eleksyon ki devan nou ou devret ekspekte ki SNP i ed ou. Mont Arpent Vert e al reklanm ou drwa. Al rod enpe sa larzan ki SNP in gannyen pou fer eleksyon avek, demande oli sa larzan. Akoz okenn larzan, akoz okenn larzan ki ou parti politik i gannyen i pa larzan personn me plito larzan pour sa parti e son sipoter.

 

Par kont Mr Speaker i annan en group dimoun ki pe obzerv SNP. Sa group dimoun in fini santi ki zafer pa tro bon dan kan ver. Sa bann dimoun i dedye 18an zot lanmour, kouraz, e krwayans dan en parti politik ki zot ti krwar ti pou anmenn vre sanzman. Ozordi lo lavey en eleksyon zot in reveye pou realize ki zot pe viv en kosmar. Mr Speaker dan sa kosmar i annan zis 3 mo pou dekrir leta SNP an Mars 2011. SNP i en parti ki’n fail, ki’n fayit e ki fatige. SNP i en parti ki’n fail, in fail son siporter akoz i refize fer sa sanzman entern ki okenn parti politik responsab i fer anver son siporter. Okenn parti politik ki serye ti’n devret apre 18an rod en sikseser pour zot lider. Si lider lopozisyon in vin dir nou ki li i pou redwir mandan en Prezidan pou de term menm si i pa’n dir personn ki sa pou merit en referendum e pa pou zanmen depan antyerman lo li keksoz moral pou li fer alors apre 4 defet se rod en dimoun ki kapab fer pli byen ki li. A mon’n avi en lider ki refize ale menm ler parti pe pran fon set enn avek tou bann kalite pou vin en diktater. Problenm ozordi se lekel ki pou erit en parti ki’n fait?

 

Mr Speaker Mardi apre ki mon’n ekout Lider Lopozisyon koze mon’n vit realize ki SNP i en parti ki’n fait, en parti ki’n fait lide e linisyativ pou fer vre sanzman, pou fer sa ki bon ek sa ki byen. Diskour Lider Lopozisyon i preski menm diskour ki i ti lir an Desanm 2007. Menm retorik, menm parol, menm promes kase. SNP in fait aktivis e siporter akoz tou lezour zot bann ansyen siporter pe realize ki SNP in zis bat zot latet avek promes sanzman, zot ti pe esper sa ki pa pou zanmen arive. SNP in fait e ler SNP i dir ou ki i pou fer kanpanny an silans pangar vyolans, pangar viktimizasyon zis riye e les li krwar ou pli bet ki li. Larepons pour sa kanpanny trankil i enn ki tou kourt SNP in fait. Apre tou akoz envestir dan en kanpanny normal e byen ler ou konnen ou pe al perdi. Ler ou konnen ki ou’n fatige, ler ou konnen ki siporter in kit ou e ou laplenn pou vid. La ozordi Onorab Ferrari in vin dir nou i pou fer kanpanny silans mwan mon apel sa en kanpanny fait. Zot mank linisyativ. Mr Speaker SNP i en parti ki’n fatige, zot mank linisyativ, zot mank lanvi travay, zot pa anvi travay dir. Apre 18an dan lopozisyon SNP in epwize fatige e nepli konnen ki manyer pou anmenn en politik ki fre inove e relevan avek son bann siporter. Sa i fer ki bann siporter SNP pe perdi konfyans, e set avek lakoler ki zot pe komans realize ki pandan tou sa letan zot ti pe ganny servi. E pour ou sa enn ki san direksyon, ki’n perdi konfyans, ki’n perdi lanvi pou kontinyen avek sa konba lavi pa devret konplike pour ou. Les tonbe.

 

Msye Speaker enn pti zistwar pou ilistre mon pwen; Lider Lopzosiyon, MNA Anse Etoile in fer en bus stop dan leo La Gogue e siding ki dapre li ti pli ideal pou esper bis. Byensir konfizyon ti leve ler bann siporter SNP ti deside esper bis lo sa siding, e bann siporter lepep ti esper bis lo bus stop normal. Se la kot kankan ti leve ler bis SPTC ti pase e pran bann dimoun lo bus stop normal. Siporter SNP ti vit realize ki Mr Ramkalawan ti’n met zot debout lo en bus stop kot bis pa pase. Zabitan Anse Etoile, Lepep Seselwa sanmenm ki Mr Ramkalawan i fer avek dimoun, i fer zot debout lo en bus stop kot bis pa pase. 18an ou’n siport li, 18an ou’n viv dan en rev avek bokou promes, 18an ou ek ou fanmiy ou’n fer sakrifis, 18 long lannen ou’n siport SNP, ou’n esper sa bis laviktwar ki pa’n zanmen arive. Eski pa’n ler pou ou aret debout lo sa bus stop kot bis pa pase e bouz lo sa enn kot SPTC i pase? Wi i riske ki bis i pran 5, i pran 10, oubyen i pran 30 minit pou pase me en keksoz i serten avek nou parti, nou bis i pase e i anmas tou dimoun ki debout lo bus stop ki’n fer. Alors mon mesaz pour tou siporter SNP ki parey sa bann brebi egare, sorti lo sa kote semen kot bis pa pase, aret fer sakrifis pou Mr Ramkalawan. Sa lepok ki nou pe viv ladan i en nouvo lepok, i en lepok loportinite e progre, pa les sa bis kit tou deryer. Sa lepok ki nou pe viv ladan i lepok leve e debourye. Pran ou sans dan lavi e les tonbe sa enn ki’n pran ou pou en fou bet. Sa lepok ki nou pe viv ladan i en moman pou sezi e servi byen, bouz lo sa kote semen kot bis i pase e bis loportinite i ava anmenn ou lwen dan lavi.

 

Prezidan Michel pa pe promet ou lesyel, later, liniver li, parey Prezidan Michel ti dir Vandredi pase i annan en diferans ant lidealizm e realizm. Nou dan Parti Lepep zanmen nou pou dir ki ennfwa elekte nou pou fer sa, sa ek sa. Sa bann politisyen lontan ki ti dir sa, bann politisyen modern i met ater en plan kot ou kapab trouv ou ladan. Yer zot ti ridikiliz plan gouvernman pou fer Ile Perseverance, me nou nou ti konnen kote sa pou anmenn nou. Bann ki’n esper zot lakaz anfen en bo zour ti arive ki zot a zot tour zot bis ti pase. Ozordi zot pe ridikiliz plan 2020 pour Sesel, me nou nou konnen kote sa pou anmenn nou. Kot nou kapab fer nou pou fer li, kot nou pa kapab nou pou eksplike akoz. Se sa ki politik modern i egzize. En sans realizm, en plan, en lanvi profon pou travay ver sa plan. Ler ou zwenn Parti Lepep ou pou bezwen travay dir, ou pou bezwen debourye, ou pou bezwen donn en koudmen, me ou pou dekouver a new sense of purpose, en nouvo direksyon, en nouvo fason fer. Bokou dimoun ki’n zwenn nou i dir ki zot pa ti realize si Parti Lepep ti ofer sitan son dimoun, nou ofer lide, nou ofer rekonfor, nou ofer direksyon e ozordi nou pe ofer en nouvo Sesel.

 

Alors sa i rezon akoz an Me sa lannen Seselwa dan son gran mazorite pou donn Prezidan Michel ankor 5, ler zot konpar Prezidan Michel avek Mr Ramkalawan zot konnen ofon zot leker ki SNP i en parti ki’n fail, ki’n fait e ki’n fatige. E lo lot kote semen Parti Lepep i reste sa parti ki kapab, ki konpetan e ki kosto. Mersi Mr Speaker.

 

MR SPEAKER

Bon nou’n ariv alafen deba lo leta lanasyon. Anvi ki Mardi prosen i en konze piblik nou pou rankontre isi Mardi 9er bomaten le 15 Mars. Meeting adjourn.