::
Home » Archives » Verbatims - First Term 1997 » Tuesday 8th April 1997

Tuesday 8th April 1997

NATIONAL ASSEMBLY OF SEYCHELLES

 

Tuesday 8th April 1997

 

The Assembly met at 9 am

 

The National Anthem was played

 

Mr Speaker in the Chair

 

 

 MR SPEAKER

Bonjour tou onorab, Minis avek piblik ki pe ekoute.  Nou komans direk avek question time.  Kestyon 34 in ganny deferred.   Nou al direk lo kestyon 35.  Onorab Figaro pou Minis pou le moman ki pe ansarz zafer etranzer,  planning  e lanvironnman. 

 

MRS MONICA FIGARO

Msye Speaker mon ti a voudre demann minis si sa dumping site La Digue pou ganny fer e si i pou ganny fer, kan silvouple.  Mersi.

 

MINISTER JOSEPH BELMONT

Bonjour tou manm onorab.  Msye Speaker wi la Digue pou ganny en dumping site,  sa site  i sitiye lo  l’Union Estate i apepre en oter 30 met altitid e i annan anviron 100 met ek lanmar soupap.  UCPS in ganny kontra pou konstri sa site  e travay i pou komanse milye Avril set a dir  dan ankor apepre en 10 zour.  Mersi Msye Speaker.

 

MR MICHAEL RENE

Eski Minis i kapab dir nou ki metod koleksyon salte lo La Digue an se moman.

 

MINISTER

Konmela bann salte i ganny kolekte e pe servi pou konble en miray, en landrwa Anse Severe.  Sa i en mezir ki tanporer e byento letan avek konstriksyon dumping site  sa pou arete konpletman.

 

MR WAVEL RAMKALAWAN

Mon ti a kontan konnen ki  management pou sa dumping site eski i pou management prive oubyen eski i pou tonm anba kek agency gouvernman oubyen i pou ganny run by the ministry itself. 

 

MINISTER

Mon krwar ki pou komanse i pou anba management agency SWAC ki li apre i deside si pou donn kontra ki mannyer i pou fer me SWAC  ki annan responsabilite pou tou bann koleksyon salte e cleaning dan pei.

 

MR DANIEL BELLE

Msye Speaker mon ti a kontan   demann Minis kan ki gouvernman ti deside pou fer en site,  en dumping site La Digue e ki difikilte ki ti annan avan pou li  pa fer sa avan. 

 

MINISTER

Mon krwar ki i toultan annan dan proze gouvernman pou nobou fer en site  ki saniter pou, bann zet bann salte e in annan problenm pou bezwen fer en impact study pou lanvironnman avan kapab deside lo en site  epi i bezwen vwar si i aksesib e pran bann mezir neseser e sa ti annan en konsiltan lokal pou enviro  ki ti fer sa impact study apre keksoz in marse e bann tenders  in ganny called  e la byento  travay pe al komanse. 

 

MR CHRISTOPHER GILL

Ki metod zot pou servi pou dumping  bann vye batri, bann toxic chemical apre bann vye delwil La Digue a la venir, Msye Speaker.

 

MINISTER

Mon krwar tou mezir neseser pou ganny pran ki sa bann keksoz ki toksik i pou ganny separe e pou ki a ganny trete dan en diferan fason e met li dan landrwa apropriye e non pa si oule dump tou keksoz dan en sel fason ki pou afekte lanvironnman.

 

MRS FIGARO

Eski Minis ti a kapab  eksplik nou ki sistenm proteksyon pou ganny servi paregzanp pou fer sir ki water level  ki anba later konmsi pa pe ganny afekte avek bann salte ki pou ganny dump dan sa landrwa.

 

MINISTER

Mon krwar kot site  ki sa konsiltan lokal letan ti fer son letid lenpak lo lanvironnman in al swazir site  ki zisteman i sitiye en pe pli o e zot pou pran bann lezot prekosyon tel ki redwir la kantite déchet toksik, redwir la kantite kontenir dan keksoz ki kapab desarz delo ou les delo desann pou al kontamin lezot delo ki lo La digue.  Mon krwar sa bann keksoz in fini ganny pran en konsiderasyon, e parey nou konnen divizyon lanvironnman atraver son seksyon ki konsern bann keksoz lo polisyon toultan pe verifye, e monitor ki mannyer sitiasyon pe ale.

 

MR SPEAKER

Kestyon 36, onorab Larue.

 

MRS MITCY LARUE

Mon ti a kontan demann Minis si i kapab enform sa Lasanble lo pozisyon son minister kot i konsern bann lakaz Fond Boffay, mersi.

 

MINISTER

Antou i annan 13 lakaz sitiye Fond Boffay dan National Park Praslin i anba kontrol minister zafer etranzer plan ek lanvironnman.  En bann sa bann lakaz i annan 2 lasanm, en bann i annan 3 lasanm.  2 parmi sa bann lakaz pe okipe par dimoun 2 ansyen travayer minister, ki prezan i laz pou resevwar pansyon sekirite sosyal.  E sa 2 dimoun i ankor pe reste ladan, e minister pa pe met presyon lo zot pou zot sorti.  Senk sa bann lakaz pe okipe par bann travayer minister limenm.  Enn parmi sa bann lakaz minister in pret Seychelles Island Foundation pou li servi pou son dimoun ki okip Vallée de Mai.  Enn bann lakaz pe repare e kat parmi sa bann lakaz pe okipe par bann dimoun ki ti travay avek minister, me ki pou en rezon ou enn ot zot in kite.  E minister pe demann zot pou zot sorti dan lakaz e met zot an relasyon avek housing division e ensi ki SHDC, parske minister i bezwen sa bann lakaz pou li house le zot travayer ki pou pran pou travay avek minister pou okip lafore.  E minister i servi sa bann lakaz pou met bann dimoun la akoz dan ka nesesite, ki swa pou serten ka bandisism dan national Park ou byen an ka dife pou obou ganny en lekip travayer ase vitman pou obou pran ka avek okenn bann sitiasyon parey.

 

MRS LARUE

Mon ti a kontan demann minis si zot in donn en serten limit letan sa bann travayer pou zot sorti dan sa bann lakaz, anvi bann problenm aktyel ki annan lo Praslin kot i konsern lakaz.

 

 

MINISTER

Msye Speaker, pann donn zot en limit letan e prezyon i ganny met lo zot pou zot  nobou sorti.  Minister i konsyen bann difikilte ki annan, me i bezwen toultan osi remind zot ki zot i nepli travay la, lakaz i ganny bezwen e zot bezwen osi fer le neseser pou zot kapab ganny lakaz atraver bann sistenm ki etabliy pou zot nobou sorti pou sa bann lakaz ganny libere.

 

MR DANNY FAURE

Eski minis pe dir ki sa bann sitwayen pou ganny re-house par gouvernman.

 

MINISTER

Minister limenm i pann fer demars pou re-house sa ban travayer kin kite travay avekl li.  Me i dir zot, zot bezwen sorti e in dir zot kote zo pou ale.  Par egzanp kot divisyon lakaz  fer laplikasyon avek housing, epi si zot ganny lakaz avek prive osi pa neseserman ki gouvernman ki bezwen re-house zot.  Akoz enn fwa ki zot in sorti zot in arete travay avek minister i zot devwar osi pou zot rod zot lakaz piske zot konnen ki sa lakaz i pou bann dimoun i travay avek sa minister.  E minister in met zot an relasyon avek bann konstitisyon gouvernman ki kapab ed zot nobou ganny en lakaz.

 

MRS LARUE

Mon ti a kontan demann minis si son minister pa ti kapab prevwar pou re-house sa bann dimoun en prenan konsiderasyon serten dimoun kin reste plis ki, kin reste dan sa bann lakaz plis ki 20 an e menm sa 2 pansyonner ki minis in nonmen.

 

 

MINISTER

Parey monn fer remarke sa 2 pansyonner pa ganny okenn presyon pou dir zot sorti dan lakaz.  Se sa bann dimoun ki swa zot in komet en fot e ki nepli travay avek minister i ganny arete, oubyen ki zot menm in deside arete pou travay ek en lot minister e ki dan sa ka parey mon dir minister pa kapab si oule al re-house dimoun kin kite travay avek li.  Me i fer le neseser pou dir sa dimoun be i annan tel organisasyon ki okip bann ka kot dimoun pe rod lakaz akoz prezan ki ou ne pli travay oun deside kite ou pa pou kapab kontinyen reste dan sa lakaz ki minister i bezwen pou met le zot dimoun.  Zisteman parey nou pe dir ki pou servi pou kapab konbat okenn dezas ki arive dan National Park.

 

MR RAMKALAWAN

Pou fasilit mouvman sa bann dimoun sorti dan sa bann lakaz pou al dan bann le zot  lakaz la popriyete, eski minister zafer etranzer pa konsidere ti ava bon pou zot fer serten konsiderasyon avek minister lakaz afen ki sa bann dimoun i ganny en serten priorite pou zot nobou antre dan le zot landrwa reste.

 

MINISTER

Mon pa konnen, mon krwar i napa rekomandasyon kin fer, me mon krwar minister devlopman kominoter e bann lorganisazyon distrik ki okouran sa sitiasyon e bann dimoun mon krwar zot in deza zot menm ale.  E alor degre priyorite ki zot gannyen i pou depan avek minister konsernnen ki donn bann priyorite pou en dimoun ganny lasistans avek lakaz.  Byen sir minister ti a oule ki sa problenm ti a ganny rezourd o pli vit posib an tenan kot ki minister osi ganny lakaz pou nobou ganny nouvo travayer, mersi.

 

MRS MARIE LOUISE POTTER

Minis eske ou kapab eksplik nou, etan donne ki sa problenm re-housing of bann dimoun ki travay avek lafore, lanvironnman i sanble mwan ki en problenm ki enpe partou.  Par egzanp Le Niol nou arive sa ka, etan donne ki i annan ka dan le pase serten dimoun i ganny lotorizasyon pou aste  sa bann later e dot pann ganny lotorizasyon pou aste.  E etan donne ki prezan nou pe vwar nou pe vwar en sitiasyon Praslin kot sa bann dimoun kin reste pou en pe letan zot in ganny demande pou sorti, san okenn petet garanti kan e kote zot pou ale.  Eske ou pa krwar ki ou minister ki minister zafer etranzer i revwar polisi itilizasyon sa bann lakaz dan lavenir.  Probableman mer sa bann travayer lo en kontra fix e de fason ki zot a konnen o komansman kan zot antre dan sa lakaz ki zot pa pe reste la tou zot lavi e ki zot ka i ganny revwar apre de twa lannen.  Donk mon, mon kestyon se eske minister i a konsider revwar polisi an sa ki konsern sa issue pou nou vit sak bann ka.  Sitou dan bann ka kot bann travayer i ariv zot laz retret e zot pe ganny demande pou sorti e al rekomans zot lavi dan en lot landrwa, mersi. 

 

MINISTER

Polisi in deza ganny konsidere plizer repriz. M ka lo Mahe ek ka lo Praslin i 2 sitiasyon diferan.  Le Niol in annan plizyer pa zis travayer minister ki ti pe reste si oule dan National Park i en lot sitiasyon ki tandi laba i annan sa ka Praslin Vallée de Mai kot bann lakaz i sitie ki ou bezwen annan en lekip i annan sa reserv, nou annan reserv tou coco de mer prensidir ki sorti laba.  Ou bezwen annan en lekip ki la sirplas kot ou kapab konnen pou dir zot reste la a en moman ou kapab kot lo zot donk i diferan.  E mon repete ki bann dimoun ki ariv laz sekirite minister pa pe met gran presyon lo zot, si tou ka ti bann dimoun sekirite petet minister ti a vwar en lot fason pou obou house ansanm sa ki le zot lorganisazyon bann dimoun ki ariv laz sekirite.  Me bann dimoun kin aret travay zot ankor zenn zot tou zot konnen ki letan zot antre travay  ki sa bann i pa en keksoz ki pou zot pou lavi.  Zot pa pey okenn rent pou sa lakaz, i donnen akoz zot pe travay la.  Donk pou Praslin ziska prezan akoz napa en lekip tenny dife lo Praslin e avan bann dimoun sorti Mahe pou vin donn en kou-d-men Praslin i bezwen annan en lekip ki minister i kapab kont lo la.

 

MRS LARUE

Mon  annan 2 kestyon, mon ti a kontan demann minis si petet oparavan sa minister tin deza pe sey revwar son polisi parske sa bann kare later kot sa bann lakaz i ete in deza ganny sub-divide e se sa ki bann dimoun i annan lespwar kot zot ti pou bezwen kapab aste sa kare later ek son lakaz.

E dezyenm pwen eske minis ti a pran konsiderasyon anvi ki sa bann dimoun i pa lo lalis priyorite pou lakaz dan distrik.  Pou pran konsiderasyon pou zot kapb reste dan sa bann lakaz ziska ki distrik i met zot lo son priyorite, mersi.

 

 

MINISTER

Bon pou le moman mon pa kapab dir si ki mannyer si i ti annan avek sa sub-division kin fer si ti pou sa, mon pa kapab dir sa.  Me byensir parey nou dir si fodre minister donn en kou-d-men pou kapab ganny sa bann dimoun lo en serten lalis priyorite, minister i ava donn sa kou-d-men ki neseser e byensir parey minister i deza okouran problenm ki i annan pou donn bann dimoun lasistans pou lakaz, e se pou sela i pann aplik en presyon enorm lo sa bann dimoun akoz nou konnen ki mannyer bann sitiasyon, e mon krwar ki minister ansanm avek lorganizasyon distrik i kapab travay ansanm pou obou rezourd sa problenm, mersi Msye Speaker.

 

MR SPEAKER

Kestyon 37.

 

MRS LARUE

Mon ti a kontan demann minis pou enform sa Lasanble lo bann aktivite ki pe pran par dan marine park Curieuse, mersi.

 

MINISTER

Marine park Curieuse i konpran 2 vole. I annan en vole lo later ki konpri lil Curieuse limenm epi i annan en vole lanmer ki marine park limenm.  E sa marine park i ganny managed par marine park authority e i annan en plan management kin met an plas pou marine park Curieuse.  Son parti Nor i en reserv depi Roche Canon ziska la Pointe Rouge i en reserv.  Son parti sid enkli Baie Lare i ouver pou eco Tourism, e la i annnan plonze soumarin ki fer i annan bann promenad dan mangroove, i annan visit nursery torti e bann operater i anmenn repa kot zot bann visiter i kapab pran en repa laba. 

Byento osi pou ouver bann trails pou lo lil Curieuse e osi pou ouver lakaz dokter pou visit par bann touris e viziter.  Pou annan en lekspozisyon parmanan  dan lakaz dokter, e osi i annan en aktivite avek en antreprener ki fer zwit, pearl oysters ki prodwi zwit dan marine park Curieuse.  E i annan en fee  pou antre ki peye par bann touris.  Sa fee  i R50 par personn e i annan anviron 12,000 viziter peyan touris ki vizit Curieuse marine park par an.  E konm tout aktivite ki tonm dan en marine park,  lotorite marine park ensi ki divizyon lanvironnman i konsyan ki i bezwen swiv de tre pre okenn aktivite ki kapab detri sa ki nou oule proteze, detri sa leritaz sa ki pe ganny prezerve dan marine park.

 

MRS LARUE

Mon ti a kontan demann Minis si sa aktivite pou zwit la si sa i pou anmenn bokou benefis pou nou pei e si wi donn en pti pe plis eksplikasyon.  Mersi.

 

MINISTER

Mon krwar ki sa i en aktivite nouvo avek letid kin ganny fer ansanm avek Seychelles Fishing Authority zot krwar ki dan marine park  Curieuse  zot kapab lelevaz sa zwit ki fourni bann perl, i en keksoz ki kapab vin tre rantab pou pei.  Me ziska prezan i ankor boner akoz sa lelevaz zwit i annan zis 2 an e i pran anviron 7 an pou kapab rekolte perl donk i annan ankor anviron 5 an pou sa kontinnyen avan ki nou kapab vwar bann premye rezilta me parey mon dir bann ekspert dan Seychelles Fishing Authority zot krwar ki sa i pou rantab, i en nouvo, si oule antrepriz donk nou bezwen swiv li e vwar ki mannyer son rezilta ekonomik i ava ete.

 

MR JAMES MANCHAM

Eski le minis i a kapab eksplike donn nou detay koman sa R600,000 pou ganny kolekte a la rezon de 12,000 viziter a R50 par viziter i gannyen ou pou gannyen depanse dan lavenir. 

 

MINISTER

Sa reveni i al pou marine park authority.   Mon pa konnen egzakteman ki mannyer zot pou aporsyonn depans lo la,  me mon krwar enn ki zot bezwen kontinnyen mentenir bann lenfrastriktir ki egziste paregzanp maintain  sa bann trails, maintain en  sirveyans osi ki zot bezwen kontinnyen fer pou vwar ki napa okenn aktivite ki pa legal pou fer dan marine park.   Me mon a kapab sey rod bann detay spesifik pou fer lonorab lider lopozisyon gannyen.  Tiket pou al laba i vann par tour operators epi zot livre avek marine park authority. 

 

MR MICHEL GARDETTE

Mon ti a voudre konnen si Minis i kapab dir nou ki lyen i annan ant marine park Curieuse avek lil Koko, eski lil Koko i form par marine park Curieuse oubyen i pe ganny administre ansanm ek rezerv otour lil Koko.  Mersi.

 

MINISTER

Ekskize mon pa tin anmenn zafer pou lik koko me mon krwar lil Koko i separe ek marine park  me i ganny manage par marine park authority. 

 

MR CHRISTOPHER GILL

Zis en pti konfirmasyon.  Eski le Minis pe dir nou ki larzan ki ganny anmase  pou entrance fee,  i al kot marine park authority  e ki i pa telman ganny servi pou Curieuse park absoliman.  I kapab pe ganny servi pou bann lezot proze.

 

MINISTER

Parey monn dir mon pa konnen egzakteman ki kantite dan sa larzan ki kolekte lo Curieuse ki depanse lo Curieuse menm.  Pou mwan reponn, mon krwar ki i bezwen depans enpe lo Curieuse.  Si i anplis definitivman marine park aurhority  ki pe manage plizyer marine park  i pou bezwen si i ganny en larzan an plis dan en landrwa e ki napa nesesite depans sa larzan dan sa menm landwa pou bezwen fer ki i servi li lot landrwa.  Mon napa bann detay fodre mon kapab rode pou donnen.

 

MR DANIEL BELLE

Mon ti a kontan demann Minis si bann Seselwa e bann zanfan lekol i peye pou zot al Curieuse.

 

MINISTER

Non Msye Speaker.

 

MR BELLE

I free of charge?

 

MINISTER

I free of charge pou residents. 

 

MR MANCHAM

Eski le minis i a kapab donn nou enpe detay lo sa proze de oysters eski sa set en proze ki amount to a joint venture  avek marine park authority,  avek bann investors konserne e si en joint venture,  i ti a kapab donn nou detay lo sa joint venture.   Tout fason i kapab dir nou ki laranzman i annan avek marine park authority, gouvernman e bann investors  konserne dan sa domenn.

 

MINISTER

Mon konnen ki sa lantrepriz i en lantrepriz antyerman prive.  I pa en joint venture.   Laranzman ki in annan ant si oule gouvernman atraver Seychelles Fishing Authority e divizyon lanvironnman, fodre mon al vwar pou mwan konnen byen ki laranzman, agreement  i annan ant sa bann lenstitisyon e sa konpannyen prive.  Epi mon a kapab fer lonorab lider lopozisyon gannyen.

 

MR RAMKALAWAN

Vi ki Curieuse i sel landwa kot torti ter pe ganny prodwir lo en nivo ase bokou, eski i annan okenn plan pou met a la dispozisyon pep Seselwa posibilite pou li aste bann pti torti a lavenir.

 

MINISTER

Wi Msye Speaker i annan sa lentansyon pou fer sa.

 

MR RAMKALAWAN

Zot pankor komanse

 

MINISTER

Mon krwar pa si in komanse, mon krwar ti deza fer enpe detrwa lannen pase me la petet pankor fer tou resaman.

 

MR SPEAKER

Kestyon 38.  Onorab Azemia.

 

MRS MARIE NELLA AZEMIA

Eski Minis responsab pou lanvironnman i kapab donn nou en leksplikasyon pou bann mezir ki pe ganny pran par sa minister pou konbat kont destriksyon lanmar?

 

MINISTER

Minister i rekonnet seryezman lenportans biolozik bann lanmar e osi bann sistenm delo ki egziste.  E bann mezir ki pe ganny pran spesifikman pou aret destriksyon lanmar e enkli en travay pou anpes lanvaisman bann lanmar par bann plan egzoktik ki dimoun in anmennen, in vin larg dan bann sistenm delo tel ki leti lanmar ki en problenm partikilyerman e osi travay se mentenir bann drenaz natirel pou anpes linondasyon eksesiv e met tou bann lanmar dan en plan management e proteksyon lanvironnman e partikilyerman lo La Digue e sey agrandir Vev, rezerv Vev pou ki a kapab nobou manage  li enpe pli byen e Grand Anse Mahe pou annan en proze ki i entegre li dan sa integrated coastal zone management  kot i annan lanmar epi mont enpe dan sistenm delo, larivyer kot i annan bann plan andemik, vakwa maron, e sey manage sa sistenm lanmar Grand Anse koman en proze pilot.  An zeneral Msye Speaker lanmar i ganny proteze anba Environment Protection Act  e dan polisi gouvernman pou en devlopman dirab  e proteksyon lanvironnman lanmar parey monn dir i atir latansyon e sirtou bann lanmar ki reprezant kot i annan bann plan andemik e osi bann zannimo ki nou merit prezerve.  E sak ka kot lanmar kot i annan devlopman ki pe fer lo en lanmar i annan sa environment impact study  ki ganny fer e desizyon pou fer okenn devlopman kot en lanmar i ganny pran lo en baz ka par ka depandan sa environment impact study  e a lavenir gouvernman e minister lanvironnman pou annan sa national biodiversity action plan  ki Sesel pou swiv parske Sesel in sinny en konvansyon enternasyonal lo biological diversity e sa i ava donn minister lanvironnman son gid ki mannyer i pou kontinnyen protez bann lanmar e fer sir ki nou pa perdi bann plant e zannimo andemik e mentenir sa  biodiversity  ki nou annan isi Sesel.

 

MRS AZEMIA

Apard Grand Anse Mahe avek La Digue ki Minis in mansyonnen, eski i kapab nonm osi lezot lanmar kin ganny afekte.  E dapre sa plan ki i mansyonnen ki frekans eski sa minister i pou antreprann travay neseser lo sa bann lanmar.

 

MINISTER

Parey monn dir proze Grand-Anse Mahe lo lanmar i en proze pilot e aktyelman i pe ganny met an plas e frekans travay vizit e monitoring pou kontinnyel e i osi annan lentansyon servi li pou echo tourism  pou fer touris vizit lanmar, mangrove epi bann parey monn dir i annan bann pye dibwa andemik ki monte dan sa sistenm larivyer Grand Anse.  Lo La Digue proze agrandisman veuve reserve  i deza dan lanmen minister devlopman kominoter pou nobou tir bann balizaz,     nouvo balizaz epi dan lezot  parey Anse Aux Pins in annan ouvertir lanmar pou fer drenaz natirel e North East Point travay in komanse pou tir leti lanmar, e osi bann travayer lanvironman i kontinnyelman pe pase kot i annan bann sistenm lanmar pou verifye si i bezwen drenaz, si i annan okenn zanmino ou plant egzotik ki pe anvai sa lanmar e osi i annan sa latas edikasyonnel pou edik piblik e osi bann zanfan lekol lo rol lanmar, rol sistenm delo natirel e ki fodre pa fer pou ki lanmar pa a ganny afekte.  Mersi Msye Speaker.

 

MR MANCHAM

Le minis in kouver dan son elaborasyon sibstans de mon kestyon.  Mersi.

 

MR DICK ESPARON

Mon ti a kontan demann Minis si i annan en relasyon travay ant dirizan lanvironnman avek planning authority ans ki konsern proteksyon bann lanmar.  E dezyenmman eski minis i annan en lalis oubyen endivizyon, minister, sa minister i annan en lalis tou bann lanmar ki bezwen ganny proteze pou fer sir ki bann diferan problenm ki kapab koze pa arive.  Mersi.

 

MINISTER

Wi i annan en relasyon ant divizyon lanvironnman e planning authority.   I annan en reprezantan divizyon lanvironnman ki osi manm planning authority.   E an se ki konsern wi minister i annan en lalis tou bann lanmar lo Mahe kin ganny si oule enimere e dan minister zot konnen ape pre ki degre si oule i annan lanvaisman ou ki degre afekte sa bann lanmar i ete.

 

MR RAMKALAWAN

Vi ki lalwa i dir ki nou pa annan drwa enport en pest dan pei, e vi ki minis in deklare ki leti lanmar i en pes, eski son minister i annan okenn plan ou eradicate leti lanmar dan pei parey ki zot annan menmplan pou elimin pye albizya. 

 

 

MINISTER

Parey monn dir minister pe travay lo retir bann leti lanmar kot zot pe blok sistenm drenaz natirel kot pe afekte lanmar.  Nou pe sey retir li e pe sey vwar osi diferan metod pou nobou sey elimin li e nou travay i ankor pe kontinnyen lo la.  E parey monn deza dir se nou manm piblik ki bezwen osi ganny sa ledikasyon me pa enport.  I annan lalwa i anpes lenportasyon bann plan egzotik ki ou bezwen deklare, demann permisyon. Donk se sa ki fodre tou sitwayen i vin osi konsyan e i pa fer pou enport bann plan ki apre i esape oubyen i annan dimoun petet entansyonnelman i zet li en landwa ki apre i vin en pest pou nou pei.

 

MR  GARDETTE

Eski minis ti kapab dir nou ki polisi ek aksyon son minister dan sa ki konsern lanmar kin ganny fer par zonm lo bann sit endistriyen kot en kantite delo i reste e i annan en kantite moustik ki pe breed  dan sa bann landrwa.  La anvi ki noun ganny dir par lasante ki i annan en gran ris pou lasante dan sa ki konsern moustik.  Mersi.

 

MINISTER

Mon krwar ki minister definitivman i pa an faver kreasyon sa bann lanmar ki vin en pest ki gard bann pest.  Donk ansanm avek lezot organizasyon tel ki divizyon lasante lanvironnman e divizyon planning authority,  zot travay ansanm pou nobou fer retir sa bann keksoz ki pa egziste.

 

MR  BELLE

Eski minis i kapab dir nou si i dan plan gouvernman pou idantifye en plant, en ligim ki pous byen dan lanmar en fason ki si ler oun retir leti lanmar ki pa bon, ki en pest nou a kapab met en keksoz ki dimoun i a kapab benefisye dan lanmar, parey bred lanmar.  Si i annan en lot plant keksoz parey.  Eski i dan plan gouvernman sa.  Mersi.

 

MINISTER

Minister lanvironnman pa pe fer en travay spesifik lo la  si pou, sa travay petet minister lagrikiltir ki kapab fer me  parey in ganny dir i annan serten plant ki deza pouse dan bann lanmar ki dimoun i itilize, tel ki bred lanmar, i annan tel ki larouy, ki kapab pouse lo bor e sa mon krwar bann fermye i kapab fer.

 

MR ANDRE POOL

Eski le Minis i kapab donn sa lasanble en lide a lavenir konbyen letan apre ki zot in vizite parey in eksplike taler e diskit avek lotorite distrik ans ki konsern bann proze netwayaz lanmar sirtou kot i annan bann inondasyon koze par gro lapli.  Konbyen letan son minister pou kapab pran aksyon neseser pou anpes plis dezas arive.  Mersi.

 

MINISTER

I depan sityasyon ki mannyer sa ka spesifik i ete pou nobou donn en lide zeneral lo letan.  Me sa ki minister pe fer konmela, apre letan lapli menm letan lapli pe tonbe zot annan dimoun ki pase, sey fer letour pou vwar kot bann lanmar, kot bann drenaz in bloke pou sey nobou deblok li enpe rapidman pou ki i pa ava anpes sa bann inondasyon arive e si i annan okenn ka ki msye lonorab i oule atir latansyon mon minister oubyen pare pou ekoute e petet pran bann mezir neseser.  Mersi Msye Speaker.

MRS AZEMIA

Minis in dir ki i annan plan pou eradicate bann leti lanmar, eski son minister i annan okenn plan pou protez bann lespes zannimon ki an disparisyon ki reste dan lanmar tel ki torti soupap avek poul do.

 

MINISTER

Wi se an  retiran sa bann plan ki pe anvair lanmar paregzanp leti lanmar ki pou reles torti soupap nobou kontinnyen ganny ase leksizenn pou ki kapab viv e osi an retiran sa ki bann poul do a kapab renobou kontinnyen viv dan lanmar. 

 

MR CHRISTOPHER GILL

Mon ti a kontan demann minis si i annan kenn plan pou son minister konsidere promot en proze pou ki nou kapab farm grab ble,  parey nou pe fer avek kanmaron konmela.  Mersi.

 

MINISTER

Pou le moman minister napa sa proze pou konsider sa farm.  Pou le moman minister napa sa proze pou konsider sa. 

 

MR SPEAKER

Dernye kestyon, onorab Mancham.

 

MR MANCHAM

Eski minis i kapab dir nou si i vre ki aktyelman tilapya in manz tou gourzon e makanbale pe disparet.

 

MINISTER

Mon pankor ganny sa lenformasyon ki tilapya pe manz tou gourzon me…

 

MR SPEAKER

Kestyon 39.

 

MRS AZEMIA

Eski minis i kapab dir nou ki kantite koko-d-mer kin ganny rikorde par son minister depi Septanm ziska ozordi.  Konbyen koko-d-mer ki dan posesyon manm piblik e konbyen pye koko-d-mer ti ganny rikorde dan sa menm peryod.

 

MINISTER

Se avan Septanm 1995 an Mars, Avril 1995, minister ti fer en lapel pou ki bann manm piblik i vin deklar bann koko-d-mer e ti annan 1276 koko-d-mer ki ti ganny deklare.  69 ti dan lanmen bann dealers,  e 1207 ti dan lanmen bann manm piblik.  Depi Septanm 1995 lo propriyete gouvernman propreman dir in annan anviron 1,450 koko-d-mer kin ganny ranmase.  Lo propriyete SIS ki Vallée de Mai in annan 825 e bann sorti kot prive, propriyeter prive  kin vann avek gouvernman in annan 135, ki donn en total 2,410 koko-d-mer dan sa peryod  Septanm 95 ziska lafen Fevriye. 

Pou dezyenm kestyon Msye Speaker lo bann pye koko-d-mer kin ganny rikorde depi Septanm 1995, an Zen 1995 ki ti fer en demann pou tou dimoun anrezistre zot bann pye koko-d-mer, an tou i annan en total 29,441 pye koko-d-mer ki ganny anrezistre e ladan i annan 3,327 pye ki femel, 5869 pye ki mal e ti annan 20,245 pye ki pa ti ankor ariv dan matirite pou kapab desifre  zot sex.  E lo propriyete prive,  ti annan, sirtou lo Praslin ti annan 898 pye femel e 1,030 pye mal e ti annan 1,770 pye ki pa ti ankor ariv dan matirite pou kapab disifre zot sex.   E i montre ki la plipar bann pey, bann pey koko-d-mer i trouve lo propriyete gouvernman olye dan lanmen …

MRS AZEMIA

…  e lezot zil kin ganny kouver dan sa legzersis. 

 

MINISTER

Mon pa tro sir si ti annan bokou problenm pou ler ti fer sa legzersis.  I annan petet en de dimoun ki petet ti ezite avan vin deklare.  E osi tou-le-z-an letan i demande pou bann propriyeter prive vin deklar bann pye koko-d-mer akoz sa zot bezwen fer li tou-le-z-an akoz bann ki pankor ariv laz matirite i kapab ariv laz matirite.  I annan serten ezitasyon e an sa ki konsern si tou landrwa in ganny kouver, tou landrwa kot i annan pye koko-d-mer ti ganny kouver, Praslin, Curieuse Mahe, Silhouette, La Digue, St Anne, Ile Moyenne, tou landrwa tin ganny kouver.

 

MR BELLE

Mon ti a kontan demann minis si gouvernman in fer en letid pou konnen  market value  en koko-d-mer.  Si wi, konbyen i koute, si non, eski gouvernman pa konsider sa koman en keksoz enportan?

 

MINISTER

Gouvernman pann fer en letid pou konnen ki  market value  en koko-d-mer, me gouvernman in deside lo en pri ki i vann koko-d-mer.

 

MR BELLE

Ki sa pri

 

MINISTER

R400 en koko-d-mer.

 

MR ESPARON

Eski sa minister pa krwar pou dir i annan en pti problenm an sa ki konsern lakantite koko-d-mer kin ganny rikorde, akoz si i annan 3 mil pye femel, annou dir zot tou zot prodwir koko, nou anmas zis 2410 pou en peryod plis ki enn an, eski minis e son minister pa krwar i annan koko ki pa ganny deklare oubyen ki ganny fer kek  deal  par la?

 

MINISTER

Wi, Msye Speaker, zis pou dir lo en kestyon ki ti ganny poze.  R400 dimoun i vann avek bann  dealers,  e bann  dealers   zot kapab vann li plis pri e pou reponn kestyon lonorab Esparon, koko-d-mer i pran 2 an pou son fri ariv a matirite e bann syantis zot krwar ki an prensip en koko-d-mer en pye femel i donn donk en koko oubyen en pti pe plis tou le  2 an.  Minister i satisfe avek sa sif, sa ki in gannyen la, i kapab annan ankor en serten pousantaz, me pa bokou, petet ant 10, 15% koko-d-mer ki ankor pe pas andeor, me definitivman in annan  en gran amelyorasyon lo sa ki ti pe pase avan.

 

MR MANCHAM

Eski le minis i kapab dir nou si i a dakor pou apor en select committee to look into giving to the coco-de-mer its’ full value  pou nou kapab ganny maksimom  foreign exchange  dan lespri paregzanp sa mosyon ki mon ti deza table  national assembly  konsernan en  auction sale  de koko-de-mer pou ki nou kapab fer plis larzan pou lentere nasyonal.

 

MINISTER

Select committee  mon krwar i pou dan  purview  lasanble e minister i deza note mosyon ki ti pase dan lasanble e mon krwar ki annan serten keksoz demars ki pe ganny fer pou konsider bann propozisyon dan sa mosyon.

 

MRS LARUE

Minis pa ti a konsider petet ogmant pri koko-d-mer ki zot vann  ek bann  dealers  lefe ki  dealers  pe vann li a en pri tre o dan lavenir

 

MINISTER

Mon not sa propozisyon e minister a kapab konsidere.

 

MR RAMKALAWAN

Vi ki koko-d-mer i annan sitan lenportans pou nou pei, i annan  lalwa ki gouvernm koko-d-mer, i annan resansman ki ganny fer pou koko-d-mer, eski minister konsernen in sey envok bann prosedir syantifik pou zot kapab detekte  sex  sa anviron 20 mil pye koko-d-mer pou ki nou kapab fer serten  projections lo sa kantite koko-d-mer ki nou kapab prodwir, olye nek zis atann li letan tou son bann keksoz in devlope avek li ki deza menm nou kapab konnen ki kantite mal, e ki kantite femel ki annan.

 

MINISTER

Minister Lanvironnman pa ankor fer sa letid, me mon mazinen ki i pou en letid ki pou  kout en pe, me petet pou lavenir i a kapab annan serten konsiderasyon si annan  lezot organizasyon ki oule sey fer sa letid, minister a kapab konsidere.

 

MRS  AZEMIA

Minis in donn nou en nonm bann koko-d-mer kin ganny rikorde. I paret en bon nonm koko-d-mer i ganny donnen koman bann  kado enm pti pe ofisyelman apre ki en dimoun, oubyen en spesyalis in vin isi Sesel, in fer en kou, oubyen en seminar, i ganny sa kado pou li al se li, mon ti a kontan konnen si sa minister i gard en lalis sa bann koko-d-mer ki ganny kit pei dan sa fason?

 

MINISTER

Pou koko-d-mer nobou kite, tou koko-d-mer i ganny en tag, i bezwen annan en permi, sa i ganny fer, me i pa neseserman ki sa koko-d-mer ki  donn an kado i sorti kot minister lanvironnman. I kapab sa dimoun naste avek en  dealer  ki la osi i annan son permi pou nobou fer sa, pou nobou  deal  dan koko-d-mer.

 

MR BIBI

Mon ti a demann minis ki metod  paregzanp minister pe servi – nou konnen nou deklare pou lakantite pye koko ki annan, me ki metod zot servi pou  monitor  paregzanp si i annan bann ka diminisyon, ki fason  zot konnen pou  monitor  pou dir sa bann pye koko i la ouswa si nou pou bezwen pran mezir pou replante. 

 

MINISTER

Parey monn dir dapre management coco-de-mer act la, i bezwen tou-le-z-an i obligatwar pou proprieter de fer en deklarasyon, si nonm pye koko-d-mer  i ankor parey oubyen nogmante oubyen si i annan en sanzman, i bezwen fer sa deklarasyon avek minister. E kot i konsern replante, e byensir lo propriete gouvernman dan bann park nasyon lo Praslen, e lo Curieuse  i annan replantasyon kin fer e ki kontinyelman  pe ganny fer.

 

 

 

MR MANCHAM

Eski le minis i kapab dir nou konteni nou dezir de gard  koko-d-mer konm enn  eksklizivite de Sesel, si i annan okenn lalwa  to stop eksportasyon  germinating  koko-d-mer

 

MINISTER

I napa lalwa pou  stop li.   Ordinerman  germinating coco-de-mer  ziska prezan i fer ant bann lenstitisyon syantifik oubyen bann mize, me i pa en gran kantite ki sa lenstitisyon pou nobou si oule al ver reprodiksyon lo la, e si ou pou poz okenn difikilte kot Sesel i kapab perdi sa keksoz ki i annan zis Sesel, mon krwar nou a bezwen pran le mezir neseser atraver bann lorganizasyon tel ki ki sa  bio-diversity  ki noun sinnyen pou kapab fer sir ki sa i en keksoz ki apartyen a nou pei. 

 

MR RAMKALAWAN

Mon ti a kontan minis fit nou ki posibilite pou en Seselwa aste en  germinating  coco-de-mer  pou li plant seli e si sa posibilite i la, konbyen i koute sa, letan zot vann sa bann ki koumsa.

 

MINISTER

Mon konnen pou dir i annan sa posibilite pou en Seselwa aste en koko-d-mer pou li nobou plante lo son propriyete, e selman egzakteman mon pa kapab dir ou konbyen i koute la.  Fodre mwa demande e fer konnen.

 

MR SPEAKER

Kestyon 40.

 

MR RAMKALAWAN

Eski Minis  pou Lanvironnman,  Foreign Affairs   e  Planning  i kapab enform lasanble kan eski  central Victoria sewerage system  pou vin an-n operasyon.

 

MINISTER

Gouvernman e minister i tre konsernen e pe swiv sitiasyon   central sewerage system  dan Victoria de tre pre  e i annan bann diskisyon ki ankor pe pran plas avek bann lorganizasyon, bann sosyete ki nobou fer sa sistenm e osi bann lorganizasyon finansman e gouvernman i optimis ki baze lo bann diskisyon avek sa bann lorganizasyon ki avan lafen lannen prosenn sa proze pou nobou komanse e i pou pran anviron 2½ an a 3 an pou nobou vin operasyonel.

 

MR SPEAKER

Supplementary.

 

MR RAMKALAWAN

Eski minis ti ava kapab dir nou konbyen in kout gouvernman ziska aprezan pou sa proze e dezyenmman eski minis i kapab dir avek nou, si zot in finalman idantifye kote son landrwa son treatment work, si zot in fini idantifye, kote son  treatment plant  pou ete.

 

MINISTER

Ziska aprezan i annan depans kin ganny fer parey tou manm i okouran ki bann tiyo dan serten porsyon Victoria in ganny mete e in annan depans lo letid fezabilite kin deza ganny fer, donk ziska prezan lo tiyo in kout anviron 80 milyon kin deza fini depanse e zisteman enn bann keksoz ki preokip gouvernman se la grander landrwa ki neseser pou bann zafer  treatment.   Premye letan tiyo ti ganny mete, ti dir pou fer en  aerated  lagon, kot pou nobou fer sa e sa ti pou pran 40 arpan later anviron ki ti en gran sirfas e donk gouvernman finalman pann al de lavan avek sa e bann proze la in vin en pe pli modest ki pe demann anviron petet anviron 3 ektar ki kapab pe etidye egzakteman kote pou nobou met sa e finalize.

 

MR RAMKALAWAN

Pankor konnen kot pou mete.

 

MINISTER

I plis ki sir ki pou al lo Providence.

 

MRS BELLA HENDERSON

Eski minis i kapab dir nou si i okouran ki depi ler sa bann tiyo in ganny mete, serten sa bann tiyo in fini kase ouswa ganny andomaze akoz dimoun i enterfer avek, sa ki napa landrwa pou refouy en trou, i refouy dan sa tiyo.  Dezyenm si son minister i annan en plan pou antreprann travay neseser lo sa bann tiyo kase ouswa sa bann kin ganny enterfer avek.

 

MINISTER

Dapre lenformasyon ki nou annan se ki bann tiyo dan la mazorite i ankor entak, me si i annan serten ka spesifik kot in annan andomazman byensir zot pou ganny re-etablir, remet an pozisyon ler proze pou al komanse.

 

MR MANCHAM

Eski minis i a kapab dir nou si kont teni mannyer i vwar zafer pe marse i panse i pou ganny konfirmen konm minis de zafer etranzer, planning e lanvironnman.

 

(Laughter)

 

MR SPEAKER

Sa i pa dan kestyon. 

 

MR RENE

Eski minis i kapab konfirmen si tou lakaz dan Victoria santral in ganny konekte lo sa sistenm desarz.

 

MINISTER

Ziska prezan petet pa tou lakaz kin ganny konekte, me a lavenir tou lakaz ki dan Victoria santral pou ganny konekte avek sa sistenm e i kapab desann ankor en pe pli o sid osi pou nobou ganny konekte lo sa sistenm.

 

MR RAMKALAWAN

Eski minis ava kapab dir nou kote egzakteman lo Providence ki zot mazin met sa, vi ki en gran bout pe al fer lotel, lot bout pe al fer industrial estate  ki letan ti komans sa proze ti napa zafer  industrial estate, konmsi kote egzakteman zot pou  ganny sa 4 ektar pou met sa  treatment plant e dezyenmman eski minis i kapab donn nou en lide son kou final sa proze e si tou bann depans zot in fer ziska aprezan i an linny avek zot bann prozeksyon.

 

MINISTER

Lo Providence i pa pou anba isi kot pou fer lotel, i pou lo Providence kot  dump site apepre i ete komela, kot i annan  coral fill laba, i pou laba.  Sa proze pou kout plis ki R100m e an tou ziska aprezan bann depans i ankor si oule vi ki i annan letan kin pase, i ankor an linny avek en pe lestimasyon ki gouvernman in fer, me pou son dernyen faz, ki  treatment plant  pankor fini finalize pou nou kapab dir egzakteman vwala konbyen sa pe al koute, sa bout dernyen ki reste.

MR RAMKALAWAN

Eski minis i kapab dir nou si zot bann plan lo la kantite lannen ki ti pou pran pou sa proze, si la pou le moman sa proze i an-n aryer son prozeksyon, oubyen si zot an-n avans son dat ki zot in sipoze fini li, konmsi ki pozisyon zot ete la an se moman an relasyon avek sa proze.

 

MINISTER

Ou kapab dir dan en fason noun ganny retar lo  si ou pran sa premye ki ti pou fer ler tin dir pou fer en gran lagon ki apre avek bokou refleksyon pann fer, akoz bann tiyo in ganny mete depi lontan, me dan en lot kote, i vin nou ankor zis dan le moman ki bon akoz i annan en kantite petet lendistri, petet keksoz ki pe ganny fer dan e o zalantour  central Victoria,  lekspansyon lizin ton, plizyer lezot lakaz kin monte ki prezan nou kapab ziz byen egzakteman ki keksoz ki byen bezwen e ki fason pou kapab fer li e mon krwar ki la i le moman vreman apropriye pou nobou finaliz bann detay avek sa proze   sewerage e fer li al de lavan.

 

MR SPEAKER

Bon, avek sa nou fini nou   question time  e nou ekskiz  minis parmi nou. Nou vin lo bann  motions e mon enform zot ki mosyon onorab Ramkalawan in ganny  withdrawn,  pou ganny remete koman en  question statement  anba  order 26  e avek sa nou al lo lot mosyon ki devan nou prezante par onorab Mancham e mon envit ou pou  prezant ou mosyon.

 

 

 

MR MANCHAM

Msye Speaker,  I beg to move ki mosyon parey lo  order paper, that government considers as a measure of acquiring additional foreign exchange while at the same time marketing the beauty of our country to organize a lottery mostly for visitors to Seychelles where tickets are sold in foreign currency with the 1st prize being a  plot of land with permission to build a residence.

An’n efe sa mosyon ki mon propoze se ki nou organiz en lotri kot nou vann bann tiket.  Tou dimoun ki oule aste e sirtou bann viziter tiket pou ganny aste dan deviz etranzer e premye pri i kapab ganny en morso later ko-ensid osi avek en permisyon pou batir en  rezidans isi Sesel.  E ki sa mosyon i ganny table dan lespri de  fer ki nou kapab ganny en ogmantasyon de deviz etranzer. 

Nou tou nou konnen ki nou annan dan nou pei aktyelman en problenm de  forex.  Nou konnen ki gouvernman pe fer tout zefor pou ki nou kapab sorti dan sa problenm. Mannyer mon konpran bann solisyon, bann demars ki gouvernman pe pran pe ganny ziska prezan de resiltan signifikativ e fot espere nou kapab sorti dan sa problenm o pli vit posib. Lefe ki nou annan en  forex problem  i sirman reflesir le fe ki ozordi Sesel nou pa kapab viv nou dan en atmosfer  de izolasyon splandid parey oparavan nou ti egziste.  Si  nou annan en  forex problem  sa i vedir ki sa ki nou prodwir nou menm swa atraver eksportasyon ouswa sa ki nou fer antre dan pei atraver touris i pa sifizaman de deviz pou kontre balanse sa ki nou bezwen enporte e larzan ki nou pep i bezwen si zot menm zot pou kapab kontinyen al fer touris a letranze.  Se en realite de nou sitiasyon kan nou konstate ki nou mwayen pou  raise  foreign exchange  i pa tre varyab ki nou napa bokou d’alternatif.  Nou konnen ki meyer parti nou  foreign exchange  i vin atraver touris a par de sa nou annan nou losean e nou pe kapitaliz lo la dan domenn  fisheries  e trwazyenmman sa ki nou annan, nou annan nou later, nou  land  e zot tou zot konnen ki ler mon ti fer en komanter lo ladres prononse par son’n ekselans le prezidan lo leta de la nasyon, mon ti fer sorti enn eleman ki nou bezwen etidye en politik de donne plis valer a nou later.  Anfen sa en politik ki nou bezwen analize  dan tou son konteks, petet prezidan i a konsider dan sa domenn apwent serten   committee  pou etidye bann enplikasyon kont teni sirtou de nou politik sosyal de voulwar donnen a tou nou pep en morso later lo lakel pou batir zot lakaz.  Msye Speaker, vizavi sa  background  de notre sitiasyon, mon panse ki sa pa pou anpes nou detidye si vous voulez le teks de la mosyon ki devan nou e de vwar ki nou kapab fer sa lotri ki mon pe parle.  Sa lotri i pou aport nou en kantite  piblisite, si nou dir paregzanp ki si ou ganny premye pri, ou a ganny ou pa senpleman en morso later dan sa ki nou apel  paradise  me osi le drwa detablir en rezidans isi.  Byensir atraver nou regilasyon ki nou kapab pou annan pouvwar etablir konsernan sa lotri la, nou kapab dir ki konsernan  rezidans, si okenn personn ki ganny sa lotri i annan li de rikord serye dan domenn krim e alor i pa pou otomatikman ganny sa rezidans la e si i ganny sa morso later i a kapab vann li apre ki i kapab gannyen.  Tousala detay.  Sa ki nou enterese aktyelman se konsidere sa lide grosso modo.  Si paregzanp dan en sitiasyon ki nou annan 120 -130 mil de viziter, e ki nou  aim at  vann 50,000 tiket, a $20 en tiket, savedir R100 en tiket, deza nou a kapab sorti avek en sonm de R5m.  Si nou donnen konm pri en morso later de R50,000 avek enn de lezot pti pri e si nou met ankor en pe  cost  paregzanp nou kapab   comme en  enticement  pou vann sa tiket dir vander tiket, pri gannyan i a ganny R50,000, alor sa i a ankouraz bann dimoun vann tiket, bann dimoun dan lotel paregzanp.  Nou a kapab sorti avek en profi pou sak lotri de R8m.  Donk dan sa 4 milyon si nou fer 2 lotri, nou kapab ganny nou 8 milyon dan en lannen. 

Msye Speaker,  marketing value  en lot zafer ankor ki nou pa kapab  quantify me nou kapab servi sa pou promouvwar ler nou fer nou bann piblisite paregzanp nou konnen ki deza gouvernman i  buy  en pake  advertisement   overseas, mon panse dan  an inset dan enn sa advertisman konsernan en lotri parey pou kapab atire bokou latansyon e bokou lentere.  E ki nou kapab fer ek sa larzan, nou konnen ki gouvernman aktyelman i pe rod  larzan  for tourism marketing.   Nou bezwen larzan pou  planning and conservation  e mon panse ki nou a kapab petet donn sa larzan pou sa 2 anfen pou le byennet de sa 2 size.  Ki kapab organiz en lotri koumsa i kapab ganny organize atraver minis du tourism, tiket i kapab ganny vann dan tou bann lotel, lo  Air  Sesel dan tou bann  spot kot bann tourist agents partou ki pe vann e promouvwar Sesel.

Anfen Msye Speaker se pa en mosyon ki mon panse i kontroversyal e mon espere ki tou manm de lasanble i a rekonet lespri de lakel sa mosyon in ganny table e mon panse ki nou bezwen fer tout sa ki nou kapab fer pou nou kapab sorti dan nou problenm de foreign exchange e  ki sa sa tia en bon lotri pou donn piblisite nou pei e se sa pou lemoman – mon pa pou dir plis ki sa mon rezerv mon drwa de repons a tou konmanter ki pou ganny prononse lo sa size.  Mersi.

 

MR SPEAKER

Okenn ki segonn sa mosyon.  Onorab Belle.  Deba i ouver.

 

MR RAMKALAWAN

Mr Speaker on a point of clarification.  Eski prezantater mosyon i kapab dir nou konbyen fwa dan en lannen i ekspekte annan sa lotri.  Mersi. 

 

MR MANCHAM

Byensir le mosyon c’est si vous voulez la prozeksyon den gran nide ki merit ganny konsidere dapre tout le statistik ki egziste sa se konsernan kantite viziter ki ariv isi, statistik de kantite dimoun par egzanp ki a ganny eksite outside Seychelles avek lide de ganny enn pti morso de paradi e se an etidyan sa nwa kapab determinen si nou pou fer sa lotri en fwa par an, si nou pou fer li de fwa par an ou si nou fer li tou le trwa mwan.

 

MR DICK ESPARON

Msye Speaker mon pa oule fer mon entervansyon la konmela akoz mon ti le mwan osi klarifye enn de pti keksoz, me solman akoz Onorab Ramkalawan in ganny laparol avan mwan i pou donn en lenpresyon konmsi ki otreman mon ti le konnen apepre si onorab prezanter mosyon i konnen egzakteman apepre ki nou problenm foreign exchange, ki kantite morso later ki nou pou fer lotri pou nou kapab rezourd nou problenm foreign exchange e si i konnen apepre ki rezerv later pou garanti ki bann, mon zanfan i ganny en morso later ki nou pa fer lotri toultan pou nou kapab vann tou nou later e nou bann fitir zenerasyon pa ganny en morso later.  Konmsi sa de pti leklersisman ki apre mon ti kapab fer mon entervansyon.

 

MR MANCHAM

Msye Speaker sa bann pwen mon panse ki manm onorab i kapab fer dan son repons mon mosyon, se pa de pwen de klarifikasyon.  Mwan lide ki monn aporte se ki later i vann e i ganny vann Sesel.  Si ou kapab ganny en morso later ki vo R200,000 tir R5m mon pa vwar okenn rezon akoz ou pa fer li. 

 

MR SPEAKER

Okenn ki oule koze.  Si napa nou –

 

MR RAMKALAWAN

….i reste zis detrwa minit konmsi mon pa anvi en kasir dan mon…

 

MR SPEAKER

Si napa enn ki pli kourt ki sa nou pran en break la ziska 11 er.

 

(Sitting suspended until 11 a.m)

 

MR SPEAKER

Bon nwa kontinyen nou deba lo mosyon Onorab Mancham.  Onorab Ramkalawan.

MR RAMKALAWAN

Mr Speaker mon panse ki avan mon komans koz spesifikman lo mosyon i pou bon pou mwan nek zis dir ki mon pe regard mosyon parey i ete mon ti ava kontan ki Msye Mancham i konpran sa tre byen.  Mon pa anvi ki bann pwen ki mon pou ganny dir i ganny konsidere lo en nivo personel.  I annan en mosyon ki devan nou e alors mon pe regard konman – annou fer sa legzersis ansanm pou nou kapab balans vreman merit sa mosyon e parey Msye Mancham i kontan dir annou fer li avek en lespri kalm e letan noun fini balans tou keksoz nou ava regarde si sa mosyon i enn ki stand dan en fason tre for, i enn ki pep Seselwa an zeneral i kontan, alors annou met tou bann pwen e alafen nwa ava pran en desizyon.  Alors mon espere ki sa ki mon pou ganny dir i ganny regarde avek sa lespri. 

Mr Speaker letan mon lir sa mosyon mon trouve ki son lide, son linitiativ i enn ki bon.  Akoz i bon, premyerman i idantifye en problenm, en problenm kin ganny dir dan sa lasanble ki egziste, sa set en problenm forex.  Nou pei pe pas dan en problenm forex.  Dezyenmman i bon akoz i mansyonn marketing of Seychelles.  Dan sa menm lasanble noun antann minis pou tourism vini eksplik nou ki gouvernman in depans R15m lannen pase e ki i kontinyen fer sa zefor pou market Sesel pou ki Sesel i vin sa destinasyon touristik parfe e en plis ki sa ki atir bann touris haut de gamme. Problenm forex, marketing Sesel. Prezan mosyon i al pli devan i lead pou en aksyon.  Aksyon se organiz en lotri ki ava ganny vann, ki tiket i ava ganny vann prensipalman avek bann viziter e an plis ki sa i ava ganny vann an forex.  Mwan Mr Speaker se lo sa pwen la ki mon dakor avek sa mosyon.  Son lot bout mon 100% kont. Mon kont avek lide ki son pri se en morso later isi Sesel avek permisyon pou build a residence.  Se lo sa pwen ki mwan avek Msye Mancham nou part company

Mon bezwen eksplike akoz mon kont.  Premyerman nou bezwen toultan pran an konsiderasyon ki nou pei son siperfisi i pa enn ki gran.  An realite nou annan nou 455.3 kilomet kare.  E dan sa 455.3 kilomet kare, ladan ou kapab dir anviron 50% se national park.  Anplis ki sa bann morso ki andeor national park letan ou regarde parey noun etidye dan zeografi letan bann kontinen ti separe Sesel li i ti en latet montanny e alor se pou sa rezon ki nou zis montanye.  E alors sa i fer ki andeor national park nou annan nou en gran poursantaz nou later ki zis enposib pou konstri oubyen i difisil pou konstri e se pou sa rezon ki fer lakaz ozordi i enn bann difikilte, en difikilte nasyonal nou kapab dir.  E se pou sa rezon osi ki, paregzanp nou pa kapab fer farming lo en gran scale parey nou ti ava kontan fer li.  Zisteman se akoz nou later kimanyer i ete.  E sa i pa nou fot, okontrer sa i vin nou lavantaz e se sanmenm sa ki fer nou pei zoli e ki fer li apel paradi.  Mr Speaker, dan sa siperfisi later ki nou kapab konstri, ozordi dan nou pei nou annan nou de milye Seselwa ki pe rod en pti kare later ki ava apel pou li pou li kapab konstri son lakaz.  Me tou sa bann Seselwa zot dan difikilte.  Si nou ti pou regarde konbyen Seselwa ki lo waiting list pou li ganny en kare later swa dan land bank oubyen dan bann lezot landrwa ki gouvernman i annan later pou vann, nou pou trouve ki lalis i long.  E alor mwan mon pa kapab dakor ki nou pou fer en lotri pou donn en kare later en etranze kan i annan en kantite Seselwa ki pe atann pou zot ganny en kare later.  Mr Speaker, an realite letan nou regard lo en nivo politik, polisi SPPF in deza ganny prezante isi dan sa lasanble kot zot dir pa plis ki 5% later isi Sesel i kapab ganny aste par etranze.  SPPF in met sa koman son polisi.  Mwan avek UO nou al en pti git pli lwen pou dir nou bezwen fer li pli difisil posib pou en etranze aste en kare later isi Sesel ki ava apel pou li.  Nou menm krwar ki en etranze petet pa devre ganny sa posibilite pou li aste en bout later isi, me ki i ava annan bann kondisyon favorab pou li kapab lease en bout later e ki letan in lease sa bout later letan i mor sa bout later i retourn pou leta e ki son bann zanfan pa kapab erite.  Sa i en pratik ki ganny fer dan plizyer pei, mon konn Barbados kot sa i leka.  Se parski i tipti e alors otan ki posib ou gard later pou ou prop dimoun.  Alors mon pa konnen ki, mon krwar ti pou bon si Msye Mancham dan son summing up i ti ava dir nou kwa ki polisi later parti demokratik, parski avek en mosyon parey i difisil pou mwan trouve ki son polisi later.  I annan serten kestyon ki Msye Mancham monn demann in pann toutafe reponn mwan lo ki souvan, konbyen fwa nou pou organiz sa lotri.  Ki alors sa i ava donn nou en lide ki kantite morso later nou pou met a la dispozisyon bann etranze pou zot kapab rantre, pou sa bann dimoun ki ganny premye pri pou zot gannyen e mon mazinen ki si nou pou fer en lotri ki pou vivan, ki pou atir dimoun ou bezwen fer li ase regilyerman.  Eski ou fer li tou le semenn, par egzanp l’Angleterre  National Lottery i en loteri ki atir dimoun se parski i de fwa par semenn.  Alors nou isi ki degre souvan eske nou pou fer sa lottery.  Letan ou balans li lo – ok pou le moman la nou pe ganny nou anviron 130,000 viziter par an, eski lakantite larzan ki sa bann viziter zot menm zot zot pou aste, i pou ed nou vreman pou nou sorti dan sa problenm forex.  Msye Mancham letan in fer son prezantasyon in prezant R8m, R8m oubyen R5m i reprezant $1m.  Eski se sa kalite larzan ki nou bezwen pou rezourd nou problenm forex.  Ki mannyer eski sa pou ed nou.  Eski sa ki nou pe donnen sa bout later an relasyon avek sa milyon dolar ki nou pou anmase eski i vreman balanse.  E mwan dan mon lopinyon mon pou dir non, mon pou dir i pa balanse.  Mr Speaker, mwan mon ti ava dir si Msye Mancham tin prezant en msyon e parey i ete e i dir with the first price being a paid holiday in the Seychelles, mon ti ava dir 100% dakor.  Ki sa dimoun wherever, I mean bann menm lide ki Msye Mancham in prezante, vann li dan bann zournal a letranze, vann li isi vann li laba, kot ou dir avek sa dimoun ou premye pri se lakomodasyon free of charge, tiket free of charge, letan ou vin Sesel ou ava osi ganny ou en loto free of charge.  E la ki mon mazinen parski se finalman bann diferan lotel ki benefisye letan i annan touris ki vin isi, byensir si ti pe vann en lotri prensipalman avek sa bann dimoun isi ti ava annan plis larzan pou antre, donk enpe plis larzan pou marketing e lefe ki nou annan nou plis ki 12 lotel, nou annan nou plis ki 12 care hire tou sa bann zafer tia kapab antre zot bann lotel, zot deza annan zot lasosiasyon tonm dakor ki pou dir zanvye Berjaya ki pou donn akomodasyon e Eden’s car i kapab donn loto, Fevriye Plantation avek Kobe, whatever, ki sa ti ava fer ki nou pa ti ava pe vann nou pei, nou pa ti ava pe met nou konmsi pe redwir la kantite posibilite pou en Seselwa ganny li en kare later me an realite nou ti ava pe donn piblisite nou pei e nou ti ava pe atir dimoun.  Parski nou tou nou konnen ki en touris letan i vin isi Sesel apre 2 semenn oubyen apre en semenn, apre 2 zour in fini kontan Sesel, i anvi retourn Sesel ankor e alors mon plis ki sir ki sa dimoun ti pou kontan konnen ki si i aste en tiket lotri ki kout $10 oubyen $50, i ti pou kapab ganny li tou keksoz pou naryen. Apre tou ki si sa $10, ki si sa $20 pou en touris kin depans sepa konbyen  mil dolar pou li vin isi.  I kontan ki pou dir be  I’ll try my luck e posibilite se ki i annan posibilite pou li  retoun isi. 

Alors mwan mon vwar keksoz dan sa fason e se pou sa rezon ki mon pa pou kapab donn sipor sa mosyon parey i ete la.  I pou enposib e mon pou santi li ki dan en serten sans mon pe trai mwan menm si mon donn sipor en tel  mosyon parski nou ava pe vann  bann pti morso nou sovrennte e mwan zis koman i ariv bann zafer vann bann pti morso nou sovrennte, oubyen vann nou nasyonalite parey noun tande yer swar lo televizyon,  I’m sorry mon sot an deor e mon pou kriy lasasen.  Nou pe koz pou acquire additional  forex.   Mwan mon ti ava dir ki en lot fason osi se pou nou ankouraz sa bann artizan pou prodwi sa bann curio.  I annan en kantite touris ki anvi depans plis larzan isi me zot napa naryen pou zot aste.  La mon ava dir ki defen anbasader Carl Stokes en fwa i dir avek mwan; i dir mwan letan bann korvet Ameriken i vin  o por, bann maren zot annan en kantite dolar, zot pe rod en pti keksoz pou zot aste.  Me selman ler zot desann zot pa trouv sa bann keksoz pou zot aste.  African curio,  be zot al Mombasa zot ganny li 10 fwa son pri, oubyen 15 fwa son pri.  I pli bon marse.  Zot pa pe vin rod masay isi Sesel.  Zot pe vin rod en lot keksoz.  Alors Mr Speaker mon ti ava trouve ki annou devlop bann lezot mwayen pou nou ganny sa forex me silvouple, silvouple annou pa komans annan en lotri kot nou pou donn kare later koman premye pri.  Mon krwar ki monn fer mon pwen tre kler Mr Speaker e mon ava aret la.  Mersi bokou.

 

MR DANNY FAURE

Msye Speaker dan ki konteks nou pe diskit mosyon sorti kot lider lopozisyon e former president.   Nou pe diskit mosyon lonorab Mancham dan konteks kot nou annan nou en mazorite SPPF dan lasanble avek en gouvernman SPPF o pouvwar.  E sa gouvernman SPPF ki o pouvwar pandan 20 an pep  Seselwa i konn byen son polisi an sa ki konsern bann devlopman later.  Me annou sey get mosyon lonorab  Mancham avek en lot lizye.  Annou sey gete dan sa mosyon ki Lonorab Mancham in anmenn devan nou kwa eski i annan serten keksoz ki pou ed sa pei oubyen i annan keksoz ki pou anmenn sa pei ann aryer. 

Msye Mancham pe koz lo marketing, sa i en pwen for dan son mosyon e i lide tou dimoun pou nou si oule promot Sesel, pou nou fer marketing  entansif pou kapab market Sesel avek bi ki Sesel i reste en destinasyon enportan pou bann touris haute gamme.  Me mon pans pa si gouvernman o pouvwar pou oule vwar en sityasyon ki ou annan ou en lottery ki pe ganny organize tou le mwan e ki 3000 met kare later pe zis ale avek etranze.  Mon pans pa si gouvernman dizour avek son polisi pou aksepte sa.  Mon krwar e mon panse ki lonorab Mancham i a partaz sa ki mon pe dir, mon krwar ki gouvernman pou balans sityasyon.  Premyerman ki frekans ki devret annan en lotri pou kapab si oule atir plis touris pou vin isi avek en lobzektif ki son premye pri i en morso later.  Ozordi dan Sesel avek R60,000 en sitwayen  Seselwa i kapab ganny li 1000 met kare later, dizon, nou pa pe dir nou anvi vann bout later avek etranze pou 5,000 a 6,000 met kare.  Dizon gouvernman i dir ki ou kapab annan, met dekote 1,000 met kare, o.k 1,000 met kare  ou kapab fer en lakaz 3 lasanm.  Sa se son laspe marketing.  Dezyenmman mwan mon pou kont, mon senser ladan,  mon pou kont si apre sa lanaliz cost figures  ki sa lotri i anmenn nou mwens ki R5 mil milyon, nou pou fou si nou fer sa.  Ki nou devret fer nou bezwen fer sir ki si sa i ale nou bezwen at least pei pe bezwen ganny an retour pou en bout later 1000 met kare R10m dan kof gouvernman.  Avek R10m dan kof gouvernman nou a kapab fer nou 50 lakaz pou Seselwa.  Avek R1m nou a fer nou 5 lakaz ki kout R200,000, 3 bedroom house pou Seselwa e ou donn en etranze ki ganny sa pri lo tiket en bout later 1000 met kare.  Ou pa fer li tou le 5 an, ou pa fer li toultan, me ou kapab fer li enn fwa, gouvernman i tenir, i mezire, i gete e ou a kapab ganny larzan, larzan in addition pou kapab speed up pou rezourd problenm lakaz pou bann Seselwa ki ozordi pe rod en bout later e en twa pou met lo zot latet.  Dan sa perspektiv ki mwan mon welcome mosyon Msye Mancham, avek lespwar e garanti ki gouvernman o pouvwar  ava pran bann mezir  prekosyon ki sa mosyon la pa devlop dan en keksoz ki zis bann bout later 1000 met kare pe ale tou le mwan.  Avek trust ki mon annan dan nou gouvernman mon krwar sa i bann garanti for e mon repete ki sa mosyon pe ganny debat dan lasanble nasyonal avek en mazorite SPPF dan lasanble e avek en gouvernman solid dan gouvernman pou evite ki en tel linisyativ i zis ale konm sa menm e pli bon keksoz ki i annan ladan Msye Mancham se ki enn, nou ava ede fer marketing pou Sesel e sa larzan ki nou kapab gannyen i ava revenue in addition  ki a kapab finans bann lezot proze.  E mon krwar nou les sa konmsa.  Mon vwar li konmsa, mon vwar li avek en lespri innovative, lo baz ki gouvernman SPPF, son polisi vizavi later i kler e Seselwa ozordi i konnen ki de tanz’a ot gouvernman atraver MCD i organiz tender pou bann plot later ki dan bann landrwa zoli e nou tender  en bout later i kapab kout R300,000 e sa later, ki gouvernman i fer li.  I repran sa  larzan pou finans bann enfrastriktir dan land bank oubyen pou finans bann proze lakaz.  Lala Msye Speaker, monn state klerman ki mannyer mwan mon welcome mosyon Lonorab Mancham.  Mon pa vwar li koman en keksoz ki nou pe zis vann later konm samenm.  Ki tou bann later Sesel pou al dan lanmen etranze.  E mon krwar gouvernman pou sezi sa, sezi sa mesaz ki nou bezwen en lottery  ki kapab anmenn nou son ceiling above R10m pou kapab finans bann lezot progranm, pou ede avek devlopman ekonomik e sosyal pep Seselwa.  Mersi Msye Speaker.

 

MR  DANIEL BELLE

Msye Speaker mon apresye diskour kin ganny fer par lonorab Faure kin zis koze avan mwan lo mosyon ki lonorab Mancham in mete ans ki konsern, fer en lotri nasyonal pou ki i ava ed nou pei pou fer son marketing  e osi aporte forex  ki nou pou bezwen, menm si en zour nou arive trouv en solisyon, i ava toultan byen annan forex  pou nou pei. 

Monn ekoute avan lonorab Faure, diskour ki lonorab Ramkalawan in fer e personnelman mon enpe deçu  ki  lonorab lider parti Seselwa,  United Opposition in pran en trend  ki vreman pa modern ditou, in get keksoz avek en lespri ansyen e ki i pa vwar sa dan modernite avek bann challenge ekonomik e bann konkirans ki pe ganny fer dan lemonn antye e ki dan en serten fason in enpe mislead dimoun lo ki ler ou aste en bout later dan Sesel si ou en etranze ou pe aste en bout souvrennte.  Me taler mon ava eksplik sa byen akoz mon krwar i mon devwar pou osi dan lopozisyon eksplik keksoz pou ki dimoun i konpran byen, ki sa ki pe ganny fer, ki sa ki nou pe demande, ki sa ki pe ganny aksepte. 

Nou annan nou dan nou pei, nou tou nou dir en problenm forex.   Bokou parmi nou nou marse nou dir napa forex,  i annan black market pou forex  e sa keksoz in ariv ziska en pwen kot byensir en politisyen responsab i bezwen de tan-zan-tan  pa zis monte campaign,  fer enpe tapaz, me i bezwen asize reflesir, ki mannyer, ki sa ki nou merit fer pou nou kapab ede fer nou pei benefisye le maksimonm, ki sa ki nou bezwen fer pou nou kapab arive obtenir sa forex, obtenir sa marketing pou ki sa pei i kapab dan lan 2000 vin en siperb pei dan losean endyen.  I annan konkirans partou e mon krwar ki tou dimoun ki asize, ki rode lide, ki annan sa limazinasyon fertil e ki aporte bann solisyon, i annan solisyon ki ou aporte i pa adekwat, i annan solisyon ki ou aporte i bon pou en serten tan e i annan solisyon ki ou aporte ki i bon pou pli lontan.  La kestyon se ki ou bezwen viv avek trend  dan ou pei.   Mon a dir zot en keksoz si ti 20 an pase oubyen menm 15 an pase ou ti pe koz lo en national lottery ou ti pe koz gambling  dan Sesel,   ou ti pe koz lo kazino dan Sesel, dimoun ti pou dir ou, pa dir sa, nou pa oule sa dan pei, nou pa oule kazino, nou pa oule dimoun gamble dan nou pei akoz trend ti kont gambling,  trend  ti kont sa bann keksoz.  Ozordi nou viv nou dan en Sesel kot mon pa pou al ziska sa ekstrenm pou mwan dir me nou viv dan en monn kot nou gamble  dan en serten fason.  I annan dimoun koman i ganny lanmwatye son saler, i gamble.   

Me se zis pou eksplik zot ki le trend ki konmsa e ki si i annan touris ki vin dan Sesel e ki nou fer zot osi gamble pou nou kapab benefisye, zot fer en lotri i fodre ki sa premye pri osi i atir dimoun.  Si ou dir li pou li ganny en lot vwayaz pou vin Sesel dakor pou en dezyenm pri, pou en trwazyenm pri.  Me son premye pri set en pri ki bezwen fer li reve.  Ler football  team  isi Sesel i aste, i fer zot peye, zot anmenn zot en pti jeep e i dir premye pri ou ganny sa zoli pti jeep.   Nou konnen nou tou nou reve pou nou gannyen sa pti jeep  me i annan en sel dimoun ki gannyen. 

E se sa dan sa lespri ki nou pe sey fer sa konpran.  E tou pei dan lemonn, tou bann pei avanse modern e bann pei ki reisi zot annan zot, zot national aktivite ki zot fer pou atir touris, pou atir larzan dan zot pei.  Nou konnen paregzanp Dubai e la pe fer aktyelman, i fer li son national sale, son yearly sale, dimoun i monte, i ale, zot kas pri, dimoun i monte i al aste epi zot desann.  Dan lemonn antye zot al Dubai.  Bourkinafaso dan Lafrik i en pei kot li i kapitaliz lo sinema Afrika.  Touris i sorti partou i vin kot li.  Maurice akote de nou i fer li son game fishing,  en serten letan kot dimoun i vini, bann jet set  sorti partou i vini, nou konnen Rio De Janeiro i annan son karnival e si nou dan nou pei nou ti annan nou en national lottery  ki nou ti fer li petet enn an, en fwa ou 2 fwa parey Msye Mancham i dir menm si serten in donn lenpresyon ki nou kapab fer sa tou le semenn, Msye Mancham li in dir dan son prezantasyon in dir petet, in dir en fwa, 2 fwa e petet etidye si kapab fer li ki i mars byen, ou fer li tou le 3 mwan.  E si ou pe fer sa fer krwar ou vini ou pran en bout later Sesel.  Ozordi nou konnen dan nou pei isi, later nou tou nou konnen later i rar me later i annan, i rar pou serten me i annan kanmenm.  Nou konnen isi dan Sesel i annan dimoun ki annan pti bout later, i annan ki annan en kantite pti bout, i annan ki annan en gran bout  e i annan ki pe rod en bout.  Lafer ki enportan se ki ki son pri sa later.  E parey Onorab Faure in dir e mon apresye, in dir si nou kapab nou optimise pri sa later e ki atraver en lotri parey Msye Mancham in propoze, fer ki ou anmas en bon pe larzan an forex pou ki sa boug li ler i ganny en pri i ganny  en bout later en demi arpan kot li avek permisyon pou li konstri en  lakaz.  Ki vedir ki bezwen li i bezwen anmenn larzan ankor pou li vin konstri en rezidans.  Gouvernman pa donn li en rezidans i donn li, si ou ganny en premye pri i donn li en bout later.  E ou ou bezwen vin konstri.  Si ou vin konstri ou bezwen anmenn ankor forex  pou vin konstri.  E sa larzan ki ou gannyen dan sa lotri, ki ou fer avek, Lonorab Faure li in vwar tou de swit lide Msye Mancham, se konstri lakaz, konstri lakaz pou Seselwa.  Msye Faure in  byen vwar lespri Msye Mancham, konstri lakaz pou Seselwa.  E se sa gouvernman i a ganny larzan pou kapab konstri plis lakaz e menm annan posibilite pou aste later avek  lezot dimoun prive ki annan en fason ki land bank  i ava ogmante.  I annan larzan pou aste later, land bank  i ogmante, sa bann dimoun ki lo waiting list a vwar zot ki waiting list  i vin mwens. 

Mon pou dir Msye Mancham in anmenn en mosyon kot in propoze, koman en sef lopozisyon koman en responsab politik i vin propoz en mosyon, gouvernman i la pou dispoze e gete ziska ki degre gouvernman li i kapab abzorb sa lide e fer sa lide travay e pran bann mezir neseser pou ki sa lide i vin rantab pou pep Seselwa. E mwan mon a dir en keksoz, nou pei i resevwar 130,000 touris par an nou pe koz zafer later, 130,000 touris par an ki kit se zot pou vin kot nou.  Ki i kout nou si par an nou annan nou 4 morso later en demi arpan ki nou met a la dispozisyon sa dimoun ki ganny premye pri, sa boug osi i kapab dir ou, monn ganny en premye pri mon oule vann sa later mon pa oule reste Sesel mwan  mon napa larzan pou mwan vin konstri Sesel.  I pa neseserman ki akoz oun met sa pri ki sa boug pou vin Sesel.  I kapab dir ou i oule son larzan gard ou later, fer vann sa later mon a ganny mon larzan.  Donk tou sa senaryo i posib.  E nou pa kapab donn lenpresyon parey lonorab Ramkalawan in donnen se maten kot ler nou pe fer sa nou pe dir vann Sesel avek etranze.  Pa sa ditou, akoz ler nou dir sa nou dir met labwet pou ki pwason, touris i vini i manz labwet.  E nou prezan nou ganny sa gro pwason.  Sa touris, sa kantite larzan pou fer devlopman pou pep Sesel.

Msye Speaker lonorab Ramkalawan in endike ki nou dir nou pou donn sa later, me non nou pa pou donnen mannyer i ete i dir ou vann akoz si dimoun i aste tiket, ou pa kapab dir ou pe donnen ou pe vann e anplis ou pe vann li pli ser ki son valer.  Ler ou met en morso later koman premye pri e  tou dimoun i konnen ki sa later, zot anvi sa later, i vin menm zafer.  I parey ler zot fer lotri isi Sesel e ki ou met en loto ki vo R80,000, ler ou vann tiket, oun vann R200,000 tiket, sa dimoun ki aste sa loto 80,000 li i ganny 80,000 ou vwar ou, ou klib football  i vwar li avek R120,000 profi.  Eski akoz oun vann tiket pou R200,000 sa jeep  i vo R200,000?  Non, i menm zafer pou sa later.

E en lot keksoz, sa tiket lotri pa pou vann zis avek etranze, Seselwa osi i kapab aste sa tiket e Seselwa osi ki annan forex nou tou nou konnen i annan black market  i annan dimoun i annan son forex  i pa konnen ki i pou fer avek, petet i pe sey vann li enpe pli ser, li osi i a kapab zwe si i annan forex pou zwe.  E si i vann e i ganny en bout later atraver en tiket ki in aste pou 20 dolar i pou en happy man  dan son prop pei, i pou kontan.

Mon krwar ki pou enn fwa noun vwar e monn eksplike ki mannyer lespri ki mannyer lonorab Ramkalawan pou enn fwa in anmenn sa mosyon, letan in koz lo la, in eksplike ki i vin tre difisil pou en Seselwa ganny later e i ti a kontan li ki i vin tre difisil pou en etranze aste later Sesel.  Wi nou osi nou dakor avek sa lide.  Pou en etranze aste later ki vin difisil.  Me i deza, sa difikilte ki ou mete i vin lo pri later.  Si ou annan en bout later ki en etranze i oule pey en kantite larzan pou sa e ki ou santi avek sa ou mizer i fini, e si ou kapab vann li i bon.  E en lot keksoz ankor, ozordi dan Sesel i annan etranze ki annan later, i annan etranze ki ti annan later, i annan etranze ki pou annan later.  Ou konnen akoz?  Se pa akoz i etranze, ler i vin dan Sesel i vin koman en etranze, si i difisil pou li aste later, eske i pa pli fasil pou li ganny nasyonalite parfwa?  Me ler oun ganny nasyonalite ou pou kapab aste later fasilman?  E en kantite later i ganny aste par etranze.  E nou Seselwa nou mazin li nou?  Nou mazinen sa Seselwa ki pe rod sa bout later?  Nou pa mazin li nou akoz ler ou al registration  ou demande, ou dir en msye pe al aste later sa dimoun yer ler i ti vini i ti en etranze zour i al aste later in fini annan son passport oubyen son citizenship tou le 2 i parey, i ganny citizenship  apre i ganny passport. Ou ganny passport.

Donk mon krwar ki ler Lonorab Ramkalawan i dir keksoz parey fodre nou dir keksoz byen dan son konteks.  E si ou fer parey i le dir Barbados  ki i annan  dimoun ki ler i mor later i revin pou gouvernman, son zeritye pa benefisye, e i bezwen avan sa, i annan dimoun i dakor, i annan en kantite konsesyon ki i gannyen.  Me ou pa a dir en boug vini, ou donn li en later oswa aste en bout later R400,000 ou R200,000, anfen plis, 400,000 si en etranze i vin aste Sesel fodre i pey pli ser ki en Seselwa.  Otreman pa vo lapenn.  Si i pou met lo la en lakaz en milyon roupi e apre si i mor gouvernman i repran e li i pa ni konnen i annan son piti, i pou dekouraz li, pa pou marse konmsa.  Dimoun ler i met son larzan kelke par, i met son larzan kot i annan en serten garanti, dimoun pa kapab zis met son larzan dan en trou epi ler i vini napa.  En paran, en zonm en madanm i fer mannyer ki ler i met son larzan kelke par i mete osi petet pou son bann zanfan benefisye.  Donk mon krwar ki lo la keksoz in enpe lezerman, deba in enpe leze.  E mon konnen ki nou tou dan nou deba nou pe rod lentere Sesel.  Wi mon krwar Lonorab Ramkalawan in koz lo la  i annan rezon.  Lonorab i annan rezon ler i koz dan lentere Sesel.  Msye Faure li osi in koz dan lentere Sesel. Me mosyon Msye Mancham ki in anmennen eski dapre zot, i pa dan lentere Sesel, i pa dan lentere Seselwa?  Me selman i vre ki si ou get li avek en lide aryer, ou pa get li avek en lide dinamik en keksoz ki pe fer pou le fitir, en keksoz ki pe fer pou avans sa pei ou pou  tonm danm menm deba ki apre ti ganny prouve fo ki ler dimoun i dir parey lontan ler, mon rapel mon ti ankor zenn garson, letan touris ti vin isi pou la premyer fwa ti annan en bann dimoun ki ti kont tourism, i dir ou koumsa pou manz tou nou pwason.  Ti annan campaign kont touris akoz touris ti pou manz tou nou pwason, ozordi ki nou vwar i annan 130 mil ki arive tou le zan e pwason prezan ki annan ameriken in vin fer Heinz lasose parske pwason zanmen pou fini mannyer mon vwar.  Dan sa ka si nou fer lotri e ki nou met en pti bout later en demi arpan pou en touris gannyen dan en lannen, ou 4 touris si nou fer li 4 fwa, sey eksplik mwan kote sa pou fer mal dan lentere Sesel an zeneral.  I kapab fer mal en dimoun, 2 dimoun, i kapab fer mal serten dimoun, me dir mwan lepep Seselwa li kote sa pou fer mal si sa pe anmenn larzan 10 milyon roupi kot i kapab fer batir, konbyen lakaz Msye Faure ou ti dir 10 millyon, 50 lakaz, 500 lakaz ou ti dir, 50 lakaz, 500.  Mon krwar ki sela i eksplike ki mosyon Msye Mancham set en bon mosyon, e i montre farsightedness Msye Mancham, i vwar keksoz lwen e mon krwar pou sa mon bezwen felisit li, mersi.

 

MRS POTTER

Mon ti napa lentansyon koze lo sa mosyon me apre ki monn ekout Msye Belle i fors mwan state mon pozisyon personnel an sa ki konsern sa mosyon.  Premyerman mon pozisyon lo sa mosyon se ki mon pou abstenir pou plizyer rezon.  Enn mon en kalite dimoun ki mon pa pou kontan, mon pa pou ankouraz personn pou kont ti poul avan ler dizef i eklo.  Noun tann plizyer sif pe ganny flote la an sa ki konsern koman sa swadizan lotri pou marse, konbyen larzan i pou anmennen, me nou pann tann ditou koze lo bann difikilte ki souvann fwa i ganny atase avek en lotri, son lorganizasyon, son profitabilite ensi-d-swit.  Mon krwar an fenn kont menm si lentasyon Msye Mancham i bon, petet nou pou vwar nou dan en sitiasyon kot lannen apre lannen ou byen 6 mwan apre 6 mwan, ou 3 mwan apre 3 mwan depandan frekans ki sa lotri i ava ganny fer, nou a vwar nou en etranze kin ganny en bout later Sesel me nou pou vwar nou dan en pozisyon kot ni menm printing cost pou lotri nou pa ankor peye. 

Mon antyerman dakor lo lentansyon ki si nou ti fer sa lotri e si nou ti successful larzan ki nou ti ava anmase ti ava permet nou re envestir dan pei e prensipalman fer lakaz avek.  Me mon osi konstate ki depi 77 gouvernman pe fer en ta lakaz.  Lide vin fer nou krwar ki Msye Mancham in anmenn sa lide  enovativ pou fer plis dimoun ganny lakaz ensi-s-swit   i byen me lakaz in ganny fer e pou ganny fer avan lotri in vin lo lasenn e apre ki lotri i avann fini mor  osi lontan ki sa gouvernman la i o pouvwar.

Msye Belle ozordi in avwe avek Seselwa ki forex  i annan larzan en kantite dan sa pei.  In dir nou ki bokou Seselwa i annan en kantite forex e bokou dimoun i annan en kantite larzan e parkont sa lotri pou tre profitab kar i annan 3 an, 4 an pase,  petet semenn prosenn osi i pou vin redir nou ankor ki oli larzan, napa larzan, gouvernman in faid, larzan tou in gaspiye, Seselwa i mizer, nou napa forex.   Mon krwar omwen sa mosyon in permet nou tann en laverite enkrwayab. 

Lo kestyon legalite oubyen kad legal dan lekel sa lotri pou operate, la osi mon poz serten kestyon.  Si lalwa ozordi i anpes okenn tranzaksyon an deviz etranzer par Seselwa, eski nou pou al amann lalwa pou permet sa Seselwa ki annan en  ta forex  ki i pe kasyet anndan e deor pei pou li vin aste sa lotri.  E si nou ouver sa lotri pou Seselwa ki annan forex,  eski sa pa pou en lenzistis avek sa fermye Labati ki napa forex pou li vin aste sa lotri?  Donk sa i enn bann lenzistis ki mon pe  vwar dan devlopman sa mosyon.

Mwan mon dir,  dezyenmman se lalwa aktyel lo later, lo lavant later, lo akizisyon later, lo posesyon later Sesel, i kler. Eski nou pou al amann lalwa pou nou fer antre sa laspe ki sa etranze kin antre atraver en lotri 10 dolar oubyen 5 dolar pou kapab ganny en bout later Sesel.  Tou sala se bann pwen ki  mon pe met devan pou mwan montre akoz mon pou abstenir lo sa issue.  Mwan mon dir i vre e la mon a partaz lopinyon Onorab Ramkalawan, mwan  mon priyorite se donn later Seselwa avan.  I annan en kantite Seselwa ki deor kin ale 20 an, 25 an pase rafal Sesel ti ankor dan fernwar, ti napa okenn debousman pou zot, zot in ale, i annan kin travay dan factory  tou zot lavi Australie, Angleterre, Canada, partou e zot anvi retourn Sesel ozordi pou zot vin etabli zot dan zot vye zour e ni menm en bout later zot napa Sesel akoz zot gran paran ki tin kite in fini vann oubyen later nepli egziste.  Si nou ti pou donn priyorite pou en swa later Sesel , nou a komans par Seselwa ki isi, Beau Vallon nou annan 125 i ankor lo lalis pe espere nou a donn Seselwa ki deor, zot osi zot annan zot forex petet, vin ganny zot bout later e la apre nou a konsider  ler nou noun fini ed nou bann dimoun, si nou ankor dan sa problenm forex, petet si zot convince mwan lo mekanizm  devlopman sa lotri, la mon a sanz mon pozisyon.  Ler nou pe koz en lotri lo en nivo, mon fini vwar i pe vin lo en nivo enternasyonal akoz mannyer mon konpran i pou ganny market, pou met posters partou dan tou tube station,  dan bann bazar, nou pe koz nou en lorganizasyon avek en kantite lanpler e sela ankor ki fer mwan retourn lo sa kestyon cost.   Si lokalman bokou dimoun kin organiz lotri in pas atraver en kantite difikilte pou zot meet zot cost,  mon demann mwan ki mannyer nou pou pase avek sa enn. 

Pou retourn ankor lo sa kestyon later, grander nou pei ki i ete, mwan mon pa mind si Sesel nou ti annan en kantite milyon kilomet kare, mon ti pou napa okenn problenm ki si sa en 1,000 met kare dan en milyon.  Me nou annan zis delo, nou napa later.  Taler noun tande ki 50% nou later i rezerv mwan mon krwar i bokou plis, i ape pre 70% nou later i rezerv e sa 30 ki reste i annan detrwa montanny, i annan en kantite ros e nou menm pe bezwen, gouvernman in envestir en kantite milyon dan bann dernyen lannen pou fer konblaz, kontinnyen agrandi partou, plati isi, plati laba.  Nou annan en ta presyon lo lakaz orzordi.  Bomaten nou ti tann problenm lanmar, presyon pe ganny mete pou konble lanmar pou rezourd problenm lakaz.  Nou ganny presyon pa kas montanny, pa tir ros, lerozyon, pa fer semen dan montanny i vilenn, lanvironnman, laverdir, tou sala akoz, presyon lakaz. 

Si nou vreman senser pou rezourd  problenm lakaz ek later Sesel, mwan mon dir petet sa ki mwan mon ti ava propoze se si nou pou organiz en lotri pou etranze, annou organiz enn pou Seselwa.    Nou dir tou le mwan, tou le 3 mwan, nou fer Seselwa ki oule aste en bout later anba en lotri i osi i ganny sans aste e sa larzan ki nou raise dan sa lotri, sa osi i a finans semen land bank.   I a finans lakaz.  Donk mon konnen ki sa lotri pou anmenn en kantite gro pwason  me mon osi konnen ki i annan en kantite konplent ki nou deza annan en kantite gro pwason dan pei.  Msye Speaker lo sa bann baz la mwan mon pou abstenir dan sa zafer akoz parey monn dir zot mwan mon pa vwar vreman lorganizasyon dan lekel sa lotri pou ganny organize.  Mon pa konvenki lo viyabilite e mon pa konvenki dan la kantite poul ki zot in fini konte dizef pou eklo.  Mersi.

 

MR DICK ESPARON

Msye Speaker les mwan dezagree avek Msye Mancham e Msye Mancham zis azir parey en demokrat e les mwan dezagree avek li.  Si oule prezant en mosyon e ou mosyon ganny defet, Msye Mancham, dir onorab Belle koz lo la. Ler i fini koze, mwan mon pou defet ou mosyon oubyen nenport manm pou defet ou mosyon.  I enportan dan lasanble e i enportan partou ki parfwa nou pran bann pozisyon pou dezagree zis pou nou fer sir ki bann largiman ki pe ganny anvoye i solid.  Parey dan en benn, Msye Mancham in zwe gitar, onorab Faure in vini in zwe lakonpannyman, Msye Mancham in zwe lead onorab Belle in vini in zwe dezyenm lakonpannyman e dapre onorab Belle largiman onorab Ramkalawan pa tenir debout akoz li in zwe tanbour. Be les mwan vini prezan mwan mon a zwe kongas…

 

(Laughter)

 

..pou nou sey fer sir ki a lafen dizour, tou bann largiman ki ganny anvoye i bezwen debout lo bann baz solid, lo bann argiman solid.  Alors dapre onorab Belle, mon pa pou defann lonorab Ramkalawan akoz ou kapab defann ou lekor plitar, selman zis pou ranmas enpe bann argiman ki onorab Ramkalawan in anmennen ki serten parmi mon partaze be si menm propozisyon ki ganny anmennen son pri i en vakans dan paradi, ou pey 10 liv, oubyen 100 dolar pou ou ganny en vakans dan paradi, i rev konbyen milyon dimoun an deor Sesel, konbyen milyon etranze  an deor Sesel i reve pou ganny en vakans dan paradi.  Msye Speaker ou  konmela ou ti en etranze ou pa ti pou peye 100 dolar pou aste en tiket pou vin Sesel?

 

 

MR SPEAKER

Pa question time la.

 

(Laughter)

 

MR ESPARON

o.k ki vedir ki pri a monn avi, pri ki pe ganny ofer, propozisyon mete par onorab Ramkalawan ki mwan mon partisipe, ki mon partaz antyerman, ki mwan osi monn mazin lo la, mon ti pe mazin menm avan anmenn en amannman dan sa direksyon e mon pann fer li pou de rezon ki mwan menm mwan mon pann kapab konnen akoz, i ti pou fer bokou plis sans.  Mwan mon konpran rezondet deryer mosyon anmennen par onorab Mancham.  I pa fer premye mosyon ki onorab Mancham i anmennen dan sa direksyon byensir avek sa lentansyon pou atir viziter pou anmenm tan apard sa lefe ganny touris, viziter fer kanpanny pou Sesel me osi rezourd en problenm foreign exchange.

Msye Speaker lannen pase noun ganny dir ki backlog foreign exchange  i ape pre 300 milyon roupi. Fer en lotri, konbyen lotri ou pou fer pou ou kapab adres sa problenm foreign exchange lannen pase.  Alors dan bann sityasyon ler ou pe koule la, pa atrap lapay ki pou koul ek ou.  I annan kantite linisyativ ki pe ganny pran, i annan en kantite ki nou kapab ganny pran pou ganny forex,  me silvouple dan sa prosesis Msye Mancham annou pa ale, ale, ale vann nou nanm.  Mwan mon dir sa akoz mon konnen akoz mon pe dir, personnelman mon kont vann later avek etranze.  Sa mon pwennvi personnel.  Mon kont.  Sirtou dan en preteks pou ganny larzan pou rezourd nou problenm foreign exchange  ki swa dizan i egziste.  Si i egziste, ki kantite i egziste e ki kantite later nou pou bezwen vann pou nou rezourd nou problenm foreign exchange.   Nou koz en zafer fer lotri.  Be lozistik fer lotri, konbyen i koute.  Ou pa kapab fer en lotri dan sa dimansyon ekspekte pou ganny en profi, fer li tou le mwan, ni menm tou le 3 mwan.  Parti demokratik i annan leksperyans dan fer lotri parey SPPF i annan leksperyans fer lotri, parey United Opposition  i annan leksperyans fer lotri nou konnen ki pa pase sa zafer la.  En lotri avek sa dimansyon pa fer tou le 3 mwan.  Pou donn li letan pou ou kapab fer marketing,  vann tiket, minimum  enn an.  E ou pa fer tiket Msye Speaker pou en bout later dan paradi tou le 3 mwan, ni tou le mwan.  I perdi son lanpler, i perdi son valer.  E ou pa pe ganny sa reveni ki ou ekspekte pou gannyen.  Ou konnen konbyen i pou koute zis pou fer piblisite pou ou kapab vann ou tiket, en lotri dan sa dimansyon?  Bann lozistik ki enportan ki nou konsidere ler nou pe koz lo sa mosyon. 

Mwan mon krwar e mon krwar senserman, napa okenn rezon konmela pou nou fer lotri pou en morso later isi pou kapab sey adres nou problenm forex.   Nou nou bezwen rod bann mezir ki pli adekwa ki pou rezourd nou problenm a lonterm non pa pran bann short cuts,  akoz bann short cuts  nou pou al dan presipis.  Noun bezwen pran bann mezir ekonomik ki pou anmenn nou a lonterm rezourd nou problenm foreign exchange.  E mwan sa mosyon mannyer i debout la mwan mon a dir si vre msye Mancham i annan tou sa lentansyon, i annan tou sa lentere pou fer keksoz pou pei zis tir sa dernyen pti bout ek sa mosyon.  Zis tir sa zafer son pri en morso later, fer li en vakans dan paradi.  En vakans deza i kout ou tiket, i kout ou lotel, i kout ou onorab Ramkalawan in koz lo la, en car hire,  i kout ou en ta larzan.  E an plis ki sa konbyen letan en dimoun pou save  pou li kapab vin en vakans isi. Avek 100 dolar oubyen 10 liv sa dimoun i pe ganny li en vakans ki pou kout li sepa konbyen mil roupi, konbyen mil liv.  Mon krwar mwan dan sa lalinny i pli fasil me krwar mwan deor dimoun pou dir pou dir sa zafer vann nou later pa anmennen e pa diskit li ankor, avek etranze.  E mwan mon dir msye Mancham, dan ou labsans, onorab Belle in koz kantite lo kont bann expatriate isi e ozordi i drol i pran en lapros kot i oule anmenn etranze pou zis 10 liv, 100 liv en boug i ganny en permisyon pou li ganny en bout later dan paradi, i en expatriate  osi sa.

 

MR BELLE

Msye Speaker mon pann dir sa mwan, ki ganny en bout later dan paradi?

 

MR  ESPARON

Mon a montre msye Mancham dezyenm pwen.  Dezyenm pwen onorab Belle i dir konmsa, i dir sa boug ki nou pe vann li en bout later, i kapab pa oule sa bout later, i kapab vann nou.  Mon demann li si nou pou pey sa boug prezan an roupi.  Si pa sa menm forex  ki noun anmase pou vann sa tiket nou bezwen rerann sa boug akoz sa morso later.  Sanmenm mon dir, si ou anmenn ou mosyon msye Mancham les onorab Belle koz lo la apre nou ava koze.

Nou pran nou apepre 300 ekek milyon roupi pou nou fer en konblaz.  Nou fer konblaz pou kwa, e dan sa prosesis la ki kantite lefe i annan lo nou lanvironman.  Akoz nou fer ? akoz nou napa later, ki pou fer ? pou fer lakaz pou fer lezot devlopman, pou ki ? Seselwa.  Sa pti morso ki nou annan, dan sa menm dan sa pti morso kot nou bezwen al rod 300 milyon ankor pou nou fer konblaz, nou ava tir dan sa pti ginn morso ki reste ki nou kapab build lo la pou donn en etranze pou en tiket £10.  Eski i fer sans.  I fer sans pou mwan pankor fer.  Ketfwa sa bann largiman ki ava vini plitar msye Speaker i a convince mwan lotreman.  Selman mwan personelman, mwan mon kont sa.  Mwan mon krwar ki nou annan plis keksoz pou gannyen si ok, premye bout mosyon msye Mancham i tonm normal ler i dir ki son pri i vin konman en vakans olye ki en morso later pou fer en rezidans.  Si mon ti annan plis letan mon tia esplike ki kantite bagaz sa pou anmenen ler nou donn en dimoun permisyon avek en bout later isi Sesel pou fer en rezidans, ki son konsekans prezan.  Ki son konsekans plitar pou sa dimoun, ki son bann lezot lanmennman ki pou bezwen anmenen avek lo la.  Ki kantite pei msye Speaker, ki kantite pei kin les ouver, etranze pou aste later.  Kin arive. Sesel dan sa pti listwar later si nou regarde i annan en kantite later ki ti pou etranze.  Ki zot ti fer avek.  I annan menm pa ni menm ti reve si ti annan later.  Tandi ki Seselwa pe reste kote, dan lakaz baton koko, ozordi i ganny pouse, demen i anmas son pake i leve i bouze i ale.  Mwan mon pa ladan sa mwan.  Mon pa le demen apred-men zour mon piti i al rod en bout morso later kot minis sa letan mon pa pou konnen lekel, i a dir li koumsa pou dir ou konnen, al demann ou papa ki ti dan lasanble sepa konbyen letan pase ki ti aprouv en mosyon pou donn later bann etranze.  Sa mon pa pou ladan sa mwan. 

Se pou sanmenm rezon mon dir, mwan ozordi mon tia kapab kekfwa debout lo kote kekfwa parti demokratik, me si i annan en keksoz dan zot politik ki zot koze e ki fatig mwan, se sanmenm sa.  Les zot zot a vann nou.  Me sa mwan mon pa la dan, mon pa ladan.  Mon pa ladan pou montre akoz sa mosyon i serye Msye Speaker, sa mosyon i serye e mon krwar ki i ouver tro bokou laport, mon pa krwar ki avek sa pti gin later ki nou pou kapab vann, nou pou tir nou problenm 300 milyon lannen pase.  Si nou ekout lozistik konbyen lotri nou pou fer Msye Speaker, ki kantite tiket nou pou vann pou nou ganny R300 milyon ki backlog foreign exchange lannen pase.  Kekfwa mover tia kapab prepar sa, prezantater mosyon tia prepar sa e tia dir mwan konbyen morso later nou pou bezwen donnen.  Sa ti pou lannen pase, la ozordi mon pa konnen konbyen i debout mwan, kekfwa 400 milyon, kekfwa 500 milyon.  Me si in desann vedir i pe desann napa nesesite pou nou vann nou nanm.  Donn nou letan, donn sa bann mezir ki gouvernman pe pran letan kekfwa sa problenm foreign exchange i ava diminye enpe, i pa sa acute parey prezantater mosyon in le dir. 

E msye Speaker lo la mon tia kontan dir sa mon kontribisyon e mwan definitivman si annan en premye keksoz ki mon pou vot kont se lo sa mosyon byensir.

 

MR SPEAKER

Bon avek sa nwa ava break ziska 2 zer apremidi.

 

(Sitting adjourned to 2 p.m)

 

MR SPEAKER

Nou vin lo Bills, Fisheries Amendment Bill, 1997.  Eski mon annan en motion for second reading.

 

MR DICK ESPARON

Msye Speaker mon oule move ki Fisheries Amendment Bill, 1997 i ganny lir en dezyenm fwa.

 

MR SPEAKER

Okenn ki segonn sa. 

(Seconded by Mr Barry Faure)

Avek sa mon envit minis pou prezant sa bil.

 

MINISTER ESME JUMEAU

Msye Speaker, onorab manm lasanble, telespektater bonjour.  I mon plezir pou entrodwir sa lamannman ki devan zot entitile Fisheries Amendment Bill, 1997. Sa lamannman i a koriz febles ki annan dan Fisheries Act, 1986 sapit 82 seksyon 24 (1) a (9) dan lakel nou pe diskite ozordi e ki la pou zot konsiderasyon.  Avan sa mon tia kontan fer sorti msye Speaker, oubyen fer rapel lasanble ki sa lalwa Fisheries Act 1986 in  ganny enstitye ou vin an fors an Out 1986 ki ti zis 2 zan apre letablisman commercial fishery.  Mon krwar noun ganny lokazyon dan lepase pou mansyonnen 79 avek 81 ki kalite bato ti ganny entrodwir pou lapes dan delo Sesel fason endistriyel.  Nou tia pe koz a se moman bato avek en jaugement 400 a 600 ton.  E mentnan ler an 86 ler premye lalwa i sorti pou kontrol menagement sa bann fishing act, nou ti napa sa gran leksperyans ki noun annan  10 zan apre.  Se pou sa rezon ki nou war li oporten pou nou demann enn amannman dan lamann levy lo bann dimoun ki trouv koupab ki ler i antre dan nou delo.  Ki nou trouve 10 zan plitar.  Nou war i annan plis bato ki antre, pli gro bato ki antre ek plis tonaz e nou war antraver statistik les années 95, 96 nwa pe koz 300,000 tonn, 200,000 tonn pwason ki travers swa dan nou larad oubyen kin atrape dan southwest Indian Ocean region.  E nou war osi sa bann bato ler zot antre i annan en keksoz ki pa manke dan zot, lodasite, lodasite pou antre dan nou delo san en licence lodasite pou zot pran en licence anba section 7, zot kas section 7 kot zot pann ganny otorizasyon anba section 17(2) e se pou sa rezon ki nou krwar i, nou bezwen ozordi konsider sa bann pwen swivan ki mwa pe met devan zot.

Petet si ti fer en pti pe sa act devan zot kin table, in konmans seksyon 24(a) in servi (a) ziska (i) tandis ki mwan mon pou servi 1 ziska 9 ki menm zafer si nou fer li vin an alphabetical order

Seksyon 24(1) dan sapit 82 i dir kot nenport bato lapes etranze ki pann pran en licence konformeman avek seksyon 7, seksyon 7 i dir ou bezwen pran en licence pou antre dan nou delo, ou ki pann ganny otorizasyon anba seksyon 17(2) – ki dir ki en bato etranze i kapab ganny permisyon pou lapes pwason’n fon dan nou delo si i pou rezon siantifik ou survey  otreman sa i pa kapab, seksyon 17(2) e ki pe ganny servi pou lapes dan lanmer Sesel ou pe lapes pwason’n fon lo plato kontinantal, sa operater ensi ki kaptenn sa bato i koupab pou sa lofans.  Lanmann ki ti R10,000 nwa pe demann en ogmantasyon pou al 2,500,000.

Seksyon 24(2), 2(b) lo zot lalis, i lir konm tel, kot nenport bato lapes kin ganny laysens an’n akor avek seksyon 7 ou en bato lapes etranze otorize anba seksyon 17, ki ganny servi kont nenport kondisyon son laysens ou otorizasyon ou standar preskri pou sa bato, operater ensi ki kaptenn i koupab pou sa lofans.  Lanmann 10,000 i monte i vin R500,000.

Seksyon 24(3) (c) ki dir kot nenport bato lapes lokal ki bezwen en laysens an’n akor avek seksyon 9(3), seksyon 9(3) i dir, a local fishing vessel, fishing boat, must have a licence,  ki pann pran en laysens e ki pe ganny servi pou lapes dan lanmer Sesel, operater ensi ki son kaptenn i koupab pou sa lofans.  Lamann R10,000 i monte i vin R50,000.

Seksyon 24(4) oubyen (d) kot nenport bato kin ganny laysens an’n akor avek seksyon 9 ou ki en bato lokal otorize anba seksyon 17, ki ganny servi an kontravansyon son laysens ou otorizasyon, operater ensi ki kaptenn i koupab pou sa lofans.  Fine i sorti 10,000 i al R50,000.

Seksyon 24(5) (e), kot nenport dimoun dan Sesel ou dan lanmer Sesel, ki angaz dan lapes ou aktivite relatif i bezwen en laysens anba regilasyon sa lalwa ki spesifye term, kondisyon e validite son laysens, lanmann si i trouv koupab sorti 10,000 i al R20,000.

Seksyon 24(6) (f), kot nenport bato lapes etranze ki pann pran laysens an’n akor avek seksyon 7 ou otorize anba seksyon 17, ki ganny trouve dan lanmer Sesel san ki laparey lapes in propreman stoke ou konm preskri, operater ensi ki kaptenn i koupab pou sa lofans.  Lanmann R5,000 i vin R250,000.  Petet la mon tia presize ki sa pti bout la en bato lapes etranze ki antre dan nou delo lalwa i demande si i pann pran en laysens tou son lapareyaz, son lanmson, son lasenn, tou, i stoke propreman ki sertennman si en vizit i ganny mont abor pou verifye, zot apareyman i pa devret pare pou lapes.  Si i pare pou lapes vedir ou ti annan lentansyon lapes san en laysens. 

Seksyon 24 (7) (g), kot nenport dimoun ki servi pwazon ou sibstans pwazon ou eksploziv pou imobiliz pwason afen ki zot kapab mye atrape, zot koupab pou sa lofans.  Lamann R50,000 i monte i vin R100,000.

Seksyon 24 (8) (h), kot nenport dimoun ki lapes an kontravansyon system mezir e kontrol ki an plas anba sa seksyon 4, i a koupab pou sa lofans.  Lanmann 10,000 i mont R50,000.

Seksyon 24 (9) (i), kot nenport dimoun ki, kontrerman avek seksyon 19(2) ou  ki dan nenport fason, anpes ou enterfer avek pouvwar an authorised officer dan legzersis son travay anba sa lalwa i a touv koupab ki lofans R5,000 i monte i vin R20,000.

Msye Speaker, monn lir apepre ki noun demann zot pou konsidere.  Sa seksyon 24(1) ziska (9) mon les li devan zot pou konsidere.  I beg to move.

 

MR SPEAKER

Deba i ouver, okenn ki oule koze.

 

MR BARRY FAURE

Msye Speaker, mon krwar ki sa proze de lwa ki minis in anmenn devan nou i enn ki tre kler, minis i esplik nou ki sa ki pe ganny fer dan konteks bann devlopman kin arive depi 1987, depi ki lapes komersyal in ganny entrodwir dan Sesel in annan bokou plis bato ki pe lapes dan nou bann lanmer, bann bato pli gro, zot annan pli gro kapasite e zot pe vin bokou pli odasye.  In osi annan dan sa lepok leksperyans ki gouvernman e lotorite lapes Sesel SFA in annan viz a vi plizyer ka kin arive kot i annan bato kin ganny atrape e noun vwar ki lalwa ki egziste konmela in anmar lanmen gouvernman dan bann negosiasyon e fer li difisil menm pou lakour kapab pran bann desizyon.  Ki fer ki sa proze de lwa i pe demande ki annan en pli gro sonm pou bann lofans ki ganny konmet e sa i pli kler dan ka ki en bato ki napa laysens ki pe lapes ilegalman dan nou delo i sorti en sonm R10,000 pou vin R2.5 milyon I fer ki napa zis en laspe deterrence pou met en gro sonm pou fer ki bann dimoun i dekouraze pou kas bann lalwa me osi i annan en lot laspe, en laspe pli soupl, en laspe fleksibilite ki fer ki gouvernman e menm posibilite lakour, mon dir gouvernman byensir SFA sirtou, i kapab annan plis posibilite, plis loportinite pou kapab negosye avek bann operater e bann met bato ki vyol sa bann lalwa.  Pou donn en legzanp tre tipik, letan en bato ki napa laysens i ganny atrape pe lapes ilegalman dan nou delo, lakour ki i pou bezwen fer, i bezwen met sa fine R10,000 epi konfiske, sezi bato.  Finalman letan ou get dan serten ka laz sa bann bato, zot in vin dan en leta ki nepli bon, nepli annan valer pou gouvernman Sesel.  E i petet meyer si sa fine limenm li en pli gro fine ti posib pou ganny servi pou ki Sesel, gouvernman Sesel tia benefisye plis. Mon krwar ki sa proze de lwa an gro i pozitif e ki nou bezwen siport li.  Mersi bokou.

 

MR RAMKALAWAN

Mr Speaker letan mon regard lobzektif ki minis in prezante atraver sa bil, byensir nou krwar ki i bon, i enportan e i esansyel pou montre bann dimoun ki vin lapes dan nou lanmer ki nou serye e byensir letan ou pe met bann lanmann ki tre o, letan i ariv bann sitiasyon kot lalwa i kase, mon krwar i vin definitivman en bon mwayen pou dekouraz zot pou zot fer tou sala.  Mon trouve ki mentnan avek sa amanman bann sif i varye.  Avan sa ti pli’z ou mwen en konviksyon R10,000 pou laplipar bann lofans e petet minis ti ava kapab dan son rezime petet eksplik mwan en pti git akoz ki dan seksyon 24(7) kot oparavan en dimoun ki ti servi eksploziv oubyen bann pwazon pou touy pwason pou lapes kot oparavan sa sete parti sa lalwa ki ti ganny konsidere konman tre serye e son lamann sete R50,000 tandi ki en dimoun ki ti ganny atrape pe lapes san en laysens son lamann ti tonm R10,000. E la prezan in dekouver ki sa 50,000 i mont R100,000 tandi ki pou en dimoun ki pe lapes san laysens i sorti 10,000 e i vin 2.5 milyon ki en logmantasyon sibstansyel letan ou pe konpar li avek sa seksyon 7. 

Mon mansyonn sa akoz si mon pa tronpe tou dernyerman in annan serten levidans ki probableman in annan serten dimoun kin servi leksploziv pou lapes dan nou lanmer.  Mon krwar ki in annan serten levidans e parey nou konnen sa i enn bann fason lapes ki tre danzere akoz spesyalman dan bann koray parske laplipar ditan ou senpleman bann star fish i ganny eksploze dan mil morso e sak morso i vin en nouvo starfish e sa dan limenm li, parski starfish i viv lo polyps ki alors i ede pou detri ou koray.  Alors mon ti ava kontan ganny en pti lesplikasyon lo sa.

Me byensir letan nou pe koz bann lamann pou bann dimoun ki ganny atrape i annan en keksoz la ki enportan, fodre ki premyerman ou atrap sa dimoun.  Parske ou kapab annan ou lanmann 50 milyon, 175 milyon, tou kalite milyon, me selman si ou pa kapab atrap sa dimoun ou pa kapab anmenn li ankour.  Ou pa kapab gannyen sa bann keksoz ki lalwa i demande.  Alors mon krwar i enportan pou nou letan nou pe koz lo sa bann ogmantasyon ki mon krwar ki nou tou nou pou donn full sipor, mon krwar ki enportan pou nou osi koz lo sirveyans nou zone.  E letan nou pe koz lo  sirveyans nou zone nou konnen ki Sesel i annan li en gran siperfisi e nou annan nou national coast guards ki sipoze annan sa responsabilite.  E alor mon krwar ki ozordi nou bezwen osi demande ki degre efektif national coast guards i ete pou li nobou sirvey sa gran siperfisi losean ki nou annan. 

Paregzanp nou konnen ki oparavan coast guard ti annan en avyon ki ti apel defender e la defender mon krwar in sanz kouler e i nepli zwe sa rol sirveyans.  Nou konnen ki zot ti annan serten bato.  Anler kot mon reste St Louis mon trouv byen o por tanzantan mon ti trouv bann bato pe sorti, in fact ti annan enn avan ou ti war li ou ti tann li, la konmela mon nepli ni tann li ni war li.  Ki alors konmsi mon ti pou kontan konnen konbyen bato aktyelman coast guard i annan la pou li nobou al fer sa travay sirveyans.  E mwan mon ti ava dir ti pou bon si nou ti ava kapab servi enpe sa bann larzan ki ganny ranmase letan nou sezi sa bann bato, letan  nou trouve pou dir i annan sa bann aktivite ilegal e ki i annan sa bann lamann petet ganny servi pou al enpe spesifikman anver coast guard pou kapab renouvle zot bann bato, fer zot vin pli efektiv pou ki zot kapab fer pli gran travay.  Parski lo en lot nivo osi mon sipoze i enpe difisil pou ou sirvey dan rezyon Poivre laba anba kimannyer mon konpran in deza annan bann bato kin ganny apprehended pe fer bann aktivite ilegal bor laba.  Mon sipoze parfwa i enpe difisil pou ou sirvey dan rezyon Poivre from Victoria.  Alors dan limenm li mon krwar ki anmezir ki nou pe regard sa size, i osi pous nou pou regarde kimannyer nou pe sirvey sa landrwa.  E mon ti ava dir ki petet ti ava bon si nou ti annan en stasyon oubyen en sant bor kote laba deor dan zanmerant whatever, wherever it is, ki petet ti ava enpe pli pre avek bann landrwa kot bann bato i al lapes e alors pou nou kapab atrap zot  e parey nou dir pou nou fine zot tou sa bann zafer parske apre tou se nou resours natirel ki pe ganny afekte.

Alor mwan mon krwar ki i tre bon ki nou renforsi sa bann lanmann ki nou mete me mon krwar osi ki i pou tre enportan pou nou kapab met lanfaz lo sirveyans.  Parske si nou met bon sirveyans, non selman ki premyerman sa osi i ava deter i ava anpes sa bann bato vin fer bann aktivite ilegal parske zot konnen ki pou dir zot pou annan posibilite pou zot ganny atrape e dezyenmman si i annan bann ki pe fer bann aktivite ilegal zot ava ganny atrape.  E mon krwar ki at the end of the day sa ki nou anvi se pou nou kapab reap the maximum benefit avek nou bann resours ki nou annan.  E alor pou nou fer sa mon krwar ki fodre nou vreman blende. Avek sa Mr Speaker, parey mon dir mon napa okenn problenm avek sa Bill e mon swete ki bann ki annan responsabilite pou sirvey nou losean nou zone ki nou annan, nou economic zone e bann osi ki annan sa responsabilite pou pourswiv bann ki kas lalwa, zot desarz zot responsabilite plennman.  Mersi bokou.

 

MR MICHEL GARDETTE

Msye Speaker, sa Fisheries Amendment Bill ki devan nou pou ganny tou  mon sipor.  Pou ganny tou mon sipor akoz sa lamannman pe amend sa ki mwan mon apel bann fines ki vreman token si oule ki vreman feb, ki vreman minim par bann sonm ki pli realist, bann sonm ki pli an linny avek la realite des choses aujourd’hui. Fodre nou realize ki si en bato ozordi pe lapes dizon dan Providence dan Farqhuar oubyen dan group Cosmoledo, Aldabra, i pou kout gouvernman par lao 200 a 300 mil roupi zis pou anvoy en bato sorti isi pou al aret sa bato laba.  Dizon ki en avyon i pase i pe al lo zil, avyon IDC, i war en bato pe lapes, i etabli son lonzitid, latitid e i war pou dir sa bato i dan nou zone maritim e ki sa bato evidaman napa laysens.  Nou tir en bato coast guard isi, nou anvoy li tou sa zistans 300, 400 mil pou aret sa bato ek lapes, i pou kout en kantite larzan ki menm si i ganny war koupab an kour, sa konviksyon sa pri ki i ti pou peye avan pa ti pou ni menm pey 5% sa kou pou al aret li.  Alor i fer toutafe normal, lozik ki sa bann sonm pe ogmante. 

Lot keksoz ki mon ti pou le tous lo la, se parey nou konnen nou zone ekonomik i gran, i ale ziska pre en bout dan Mozambique Channel, i al ziska pre Salla de Maya i enorm.  Kimannyer alor pou kapab patrol tou sa bann zone dan en sans avek en pti kit resours ki Sesel i annan.  I evidan ki sa pou en kantite lannen ankor ki pe vini sa pa pou posib.  Ti annan quelques années pase serten louvraz ki tin konmans ganny fer lo zil  Assomption pou met an permanans en bato coast guard laba, me ek sa bann problenm finans ozordi ki nou war nou fas avek sa bann konzektir enternasyonal ozordi ki ase sere nou war li ki sa proze i bezwen ganny defer ki vedir in ganny anvoye pou pli tar.  E a mon’n avi i absoliman neseser plito ki nou nobou annan en bato an permanans dan nou bann zone sid was, mon pe dir dan Aldabra, Cosmoledo, Assomption, pou kapab si oule deter e osi kapab aret bann bato ki kas lalwa.  Menm avek nou bann bato coast guard ki al pli vit ki lonorab Ramkalawan in dir i tande avan i war, i pou pran omwen 24 er 30 er-d-tan avan sorti Mahé pou al aret sa bann bato laba e natirelman si en dimoun ti pe lapes in ganny sans anmas son lalinny, son lasenn e sorti dan ou EEZ.  Alor i vin i annan en lenportans vreman serye ki ou annan en bato pli pre ek sa bann landrwa anvi ki nou  konnen en kantite lapes sirtou lapes ton i ganny fer dan Mozambique Channel ki pre avek Aldabra.  Resaman osi ti annan diskisyon ki monn tande ki ti pe ganny fer par bann management Aldabra, SIF, pou met en stasyon radar, ganny en radar ki a kapab dekouver en distans ki mon krwar ti pe koz en zafer 36mil otour Aldabra, premyerman pou protez Aldabra limenm kont poachers e dezyenmman sa ti ava ede osi kontrol otour Aldabra kot parey nou konnen i annan en zone ki pas zis anpes lapes, me ki anpes menm bato sirkile. Natirelman mon pe dir bann bato ki napa permisyon pas dan delo teritoryal limenm. 

Sa i anmenn nou a en pwen ki mon krwar tou dimoun i devret realize ki gouvernman limenm pa pou nobou finalman kontrol tou nou zone maritim Sesel amwen ki nou tou nou donn en koudmen.  Onorab Ramkalawan in koz lo la e mwan mwa demande e mon dir ki peser Seselwa limenm li, i annan en rol pou li zwe ladan.  Li ki lo delo, li ki al lapes e sa bann resours ki nou pe sey proteze se pou limenm li se pou son byen limenm li.  E la mwan mwa demande e mwa dir mwa sizere ki gouvernman e mon tia war li byen si gouvernman tia kapab ankouraz sa bann peser zot menm pou raporte si zot war nenport ki keksoz ki annan serten suspicion ki annan sispe ki pe ganny fer dan delo Sesel.  Nou konnen ki laplipar bann bato ki konzele, bann bato ki al lapes dan Zamirant, zot al menm dan Providans, ozordi zot ekipe avek bann GPS global provision system e anplis ki sa laplipar sa bann bato ozordi i annan SSB on board.  Nou pa pe demande sa bann peser natirelman i al aret sa bann bato, me si zot war nenport kwar ki sispe, zot call lotorite port, e zot dir ekoute, mon annan tel lonztitid, latitid e mon war en bato ki pe lapes eski i annan en bato kin raporte ki pe lapes dan sa zone ki annan en laysens pou lapes.  Mon krwar si nou tou nou al dan sa lalinny e nou tou nou ede bann maren ki servi delo, nou ede nou konpran e nou asiste gouvernman nou ava al en gran distans pou kapab ede protez nou bann resours ki ase limite menm ki parfwa nou krwar i annan en kantite.  Mwan mon pou siport sa lamannman wholeheartedly.  Mersi.

 

MR JAMES MANCHAM

Msye Speaker, mon’n etidye sa bil to amend Fisheries Act Cap 82  e mon vwar ki objects and reasons i stipulate ki sa bann mezir ki pe ganny fer grossly intended pou fer it more effective as a detterent savedir pou dekouraz bann ki parfwa ti ankouraze vin lapes dan territorial waters eksetera.  An vi de nou lobzektif de fer sa lalwa vin en detterent, mon tia sizere ki le minister de zafer etranzer sees it fit and proper to give maximum publicity to this legislation e osi aport spesifikman a latansyon de bann nasyon ki annan bato ki patroniz nou delo, ki lapes dan losean endyen pou ki demen zot pa kapab pled inyorans.  Mon panse ki sa i neseser kont teni de la politik osi de bonn relasyon, bon devlopman enternasyonal.  Bann nasyon konsernen i ann ganny spesifikman enformen zot pa pou kapab demen kriye, fer tapaz. 

Mon napa devan mwan the Act ki sa Bill seeks to amend, mon tia kontan si minis tia kapab dir mwan si provizyon in ganny fer pou ki i annan en automatic lien ki ganny, ki nou kapab si vous voulez ganny effected ler en bato paregzanp in ganny penalti de peye 2.5 million rupees.  Si sa bann lanmann sa bann penalti i en penalti which is imposed statutorily oubyen si le ziz i annan okenn diskresyon de fikse okenn sonm ziska sa bann sonm la konm en nivo maksimonm.  E trwazyenmman mon tia kontan osi en leklersisman si i annan okenn provizo, si napa akoz ou pa konsidere mete, ki donn lotorite automatic confiscation of the catch ki annan abor sa bann bato. Si en bato i dan nou delo teritoryal e i annan li deza 100 tonn, 200 tonn, 300 tonn de ton paregzanp, fodre nou kapab osi pli vit ki posib pou ganny maksimonm sekirite lo sa valer de fine enpoze par lalwa, alors si nou tia kapab ganny konfiskasyon bann pwason ki deza dan bato.  Mersi Msye Speaker. 

 

MRS MARIE LOUISE  POTTER

Mersi Msye Speaker, mwan osi mon pa pou long lo la, akoz mon krwar nou annan en konsansis, mwan osi mon pou donn mon sipor sa proze de lwa akoz pou mwan i evidan ki sa proze pe aktializ nou lalwa lapes e met li an’n akor avek realite ki egziste ozordi 11 an apre ki premye lalwa ti ganny met an viger.  I osi evidan ki fines ki pe ganny propoze i an’n akor avek standar e pratik enternasyonal akoz si ou konpar bann fines ki egziste dan  sa lalwa ki nou pe repeal i pa ditou konparab avek sa ki lezot pei pe fine pou lofans similer.  Mon pou siport tou mezir ki gouvernman ou kek lotorite i pran pou penaliz oubyen okenn dimoun ki vyol oubyen ki tante pou vyol nou souvrennte otan plis kot i konsern nou bann resours maritim ki parey nou tou nou konnen i enn nou bann pli gran resours nasyonal. 

Bann fines ki pe ganny propoze parey in ganny fer resorti avan mwan i pou definitivman act konman en deterrent akoz i pou vreman pey fre e vo lapenn kan nou arive atrap zis enn, menm si petet i ava annan plizyer ki nou pann kapab atrape.  I pou osi a mon’n avi ankouraz bann dimoun ki sipoze sirveye, bann patrol, bann lotorite sirveyans, pou donn zot en pti pe plis lankourazman akoz zot a konnen ki enn i pou cost effective zot zefor, i pou kout zot an retour pou zot al atrap sa dimoun oubyen sa malfeter, i ava pey fre pei e pey zot fre e donn zot sa satisfaksyon e dezyenmman i pou donn en serten a mon’n avi fleksibilite lakour kan i ariv enpoz bann desizyon lo sa bann dimoun.  Mon dir sa akoz i bokou pli fasil pou fine en boug R2.5 milyon ki ou bezwen revert to opsyon sezi son lakaz, son bato, son catch, akoz nou war ki dan lepase noun sey atrap bann bato epi ler nou gete fine maximum ti R10,000 e nou war ki pa ti vo lapenn pou tou sa zefor zis fine zot R10,000 epi dir zot ale.  E nou ti napa swa, dan sa ka lakour ti pran opsyon pou sezi bato, sezi catch, sezi lekipman etetera.  E sa i parey nou konnen i kapab poz serten difikilte diplomatik, i annan bann difikilte ki asosye avek, politik e osi i plito met en fardo lo nou, nou sezi en bato nou met la epi nou pa konnen ki pou fer avek.  I pouri la, i pran dife la, i vin plito en fardo pu pei.  Donk mon krwar sa bann fine ki pe  ganny propoze atraver sa lalwa i ava rezourd sa bann problenm e parey monn dir mon pou donn mon sipor sa proze.  Mersi.  

 

MR GEORGES BIBI

Msye Speaker en kantite deliberasyon in ganny fer lo sa bil e personnelman mwan osi, i sanble mwan lenpresyon ki monn gannyen se ki nou tou, menm gouvernman pe sey rod en fason kimannyer nou pou kapab anforsi lalwa pou nou kapab anpes bann dimoun ki vin lapes dan delo Sesel dan delo teritoryal sirtou, pou kapab anpes zot vin vol nou pwason e an menm tan fer en fason ki nou kapab si zot vini pou kapab dan en fason ratrap zot e ganny en reveni avek zot.  Ler nou get Sesel, parey lonorab Gardette in fer resorti e bokou avan li in fer resorti, nou exclusive economic zone i sitan gran e Sesel konman en pei kot lapes i vreman enportan,i pa pou fasil pou nou kapab sirvey nou delo ekonomik zone akoz i tro gran pou nou kapab veye.  Me parey nou tou manm ki la, mon krwar i annan, minis in fer resorti ki bann bato konmela i pli sofistike, i pli vit e zot fasil pou ganny pwason zot annan tou kalite teknolozi. Me nou prezan ki nou konman gouvernman Sesel i kapab fer pou nou kapab fer sir ki nou nobou o plis posib fer sa bann bato ki vin lapes pa vin dan nou delo oswa nou kapab detekte.

Ankor parey monn dir avan i pa pou tro fasil avek resours ki noun annan i pou pran nou de lannen e de lannen.  Me en keksoz ki mon konnen ki resers in deza ganny fer  ki i marse dan pasifik se i annan bokou bann zil ansanm kot zot kapab fer nou apel sa en concerted effort kot zot fer en group parey nou konnen i annan en kantite zil parey Sri Lanka ki pwason, ton as a migratory species i sa ki sorti la i bezwen tonm dan Sri Lanka e sel, personnelman sizesyon ki mon krwar, se sel fason ki nou kapab fer se, nou annan COI, se get bann zil dan larezyon bann parey La Reunion ki osi i lapes, Madagascar ki nou tou ansanm, Maurice, nou fer li konman en concerted effort ki i ganny diskite e ki tou sa bann zil sa bann pei ki lapes zot tenir en rezis.  Paregzanp bato ki anrezistre Sesel, La Reunion i annan en rezis, Mombasa i kapab annan en rezis, Sri Lanka i kapab annan en rezis, e partou dan bann zil zot annan en rezis e nou osi nou annan pou zot.  Vedir ki si demen nou annan nou bato pou nou pe parwaz dan delo Maurice nou war en bato ki pa anrezistre dan Maurice nou kapab fer li konnen pou dir i annan en bato ki pe poach dan ou delo, e pareyman si en bato Maurice oswa en bato Madagascar i war, en bato sirveyan i war en bato ki pa anrezistre dan Sesel dan delo exclusive economic zone Sesel i kapab enform Sesel e i menm kapab arete sa bato e enform Sesel pou dir noun tyobo en bato ki pe lapes dan ou delo.  E mon krwar i pa pou posib napa menm en pei la rezyon, lafason e grander ki nou zone i ete pou nou kapab kouver sa zone antan ki sirveyans.  Mon krwar sel fason ki nou pou kapab fer se i bezwen annan en concerted effort kot tou bann zil ki lapes, zot zwenn ansanm e zot sey rod fason pou zot sirvey delo kanmanrad akoz nou tou ansanm sirtou la nou annan sa bann sityasyon kot nou annan COI nou kapab vey delo kanmarad e mon asire petet ansanm, ek tou sa resours ansanm i a pli fasil pou nou kapab anforsi sa bout lalwa ki devan nou e nou nwa fer nou rol me mon krwar avek led lezot pei, lezot zil otour petet i a pli fasil pou nou tou ed kanmarad e petet nwa ganny en rannman ki pli bon.  Mersi Msye Speaker.

 

MR MICHAEL RENE

Msye Speaker proze delwa ki devan nou i bon me selman mon pann antann minis eksplike ki pou arive avek bann pwason ki ganny an otaz par sener.  Petet dan son wrapping up,  dan summing up  i a kapab eksplik enpe lo la.

 

MR DANIEL BELLE

Msye Speaker mon ti a kontan remersye minis ki responsab pou lapes pou li anmenn en amannman, en bil  ki amann sa Act pou rann li bokou pli efektif parske a kwa bon i annan lalwa si ler in ariv pou pran mezir pou anpes lalwa ganny kase, sa bann mezir i pa solid, mezir i pa, dan en serten fason, efektif.  Parey nou tou nou konnen pou ou rann en lalwa dan en serten fason aplikab, fodre ki sanksyon ki tonm anba sak sapit, anba sak clause  se bann sanksyon ki efektif e mon krwar mon bezwen remersye minis Jumeau ki montre ki i pa pe dormi ler i update  sa bann sanksyon e fer li vin au bout du jour pou ki en serten fason dekouraze dimoun vin poach, dekouraz dimoun vin vyol nou zone ekonomik, nou resours e nou rises.

Dezyenm keksoz ki enteresan avek sa bil  se i pa dan sa bil li menm me atraver deba lasanble i permet  ki la nasyon Seselwa, lepep Seselwa deor i ganny konsyantize par sa problenm ki dan en serten fason nou krwar i lwen ek nou akoz pa nou tou ki vwar ki pase dan zone ekonomik akoz ler nou nou Mahé, La Digue ou Praslin nou pa vwar sa.  Me sa ki enportan se ki atraver sa legzersis i permet dimoun konnen e prensipalman bann peser konnen ki zot annan en rol pou zot zwe e bann avyon osi ki fly sorti Mahe pou al lo bann lezot zil zot osi zot annan posibilite kot zot kapab detekte keksoz ki pase e raporte avek santral pou permet a se ki coast guard  i kapab rann zot travay bokou pli efikas. 

En trwazyenm pwen ki enportan se ki i vre ki dan bann kontrol ki pou ganny fer e mon krwar pwen in ganny souleve par msye Bibi, in montre koman korperasyon rezyonal i enportan pou permet parske sirveyans nou zone ekonomik i en keksoz ki kapital.  E se pou sa rezon ki mon krwar ki ozordi nou pe viv dan lemonn de satelit ou kontrol i ganny fer par satelit e i annan bann proze dan lezot pei osi kin ganny fer kot avek en satelit e monitor dan sak pei, zot arive vwar egzakteman ki pe pase lo en pwen done dan sa zone.  E petet COI si i annan mwayen, si bann manm COI  i annan mwayen zot kapab met en satelit pou permet deteksyon bann poaching ou deteksyon dimoun ki vin dan sa zone ilegalman e sa i ava permet nou Sesel koman en nasyon avek nou teritwar ki telman larz, menm pou de rezon de sekirite nasyonal ler i ava annan pou kontrol pwason e kontrol bato lapes i ava osi permet nou pou nou kapab kontrol e annan en serten sekirite nou zone, nou teritwar, pa nou zone teritoryal me nou teritwar nasyonal, nou lezot zil.  I ava permet nou konnen lekel bato ki pe antre lo nou zil, pa neseserman pou lapes ou en avyon ki vini, pa neseserman pou anmenn pasaze e ki kapab land  lo en sa, donk i a permet nou konnen ki pe pase dan nou zone nasyonal an zeneral. Msye Speaker mon krwar sa bil i bon e mon pou donn li mon sipor.  Mersi.

 

MR SPEAKER

Avek sa mon envit minis pou fer son rezime.

 

MINISTER JUMEAU

Monn vreman apresye sa deba ki bann manm in fer sorti rasyonal deryer sa bil  e pou mon sum up mon oule asir manm lasanble antye ki malgre in pran nou 10 an pou nou kapab reviz lamann, nou pann tout a fe dormi, an’n atandan in annan plizyer keksoz ki noun travay lo la.  Tel konm onorab Ramkalawan in mansyonnen nou sirveyans i dir pou dir lontan i ti tann bato sorti apre i ti vwar bato.   I resanble ki sa bann bato ki  nou annan konmela i pli silansye, sanmenm i pa tande.  Egalman i resanm mon annan en dout ki petet pye dibwa in grandi devan son laport i pa vwar dan larad…

 

MR RAMKALAWAN

Oubyen napa bato.  Topaz in anmare, i nepli kapab sorti.

 

MINISTER

be mon oule asir onorab Ramkalawan pou dir egzakteman sa ki nwa pe fer. E lezot osi in lev menm lenkyetid, zot in servi sa mo satelit, lot manm in servi mo avyon be ki nwa pe fer pandan sa letan ki nou ti pe esper sanzman dan lanmann.  Mwa donn zot en pti , fer en pti pe referans la ki  zilyet, out 1994 en bato Taywannen nimero 16 Tuwan in ganny atrape par rapor en peser ki ti vwar li pe lapes lo ban.  Kondannasyon ti 150,000 dolar.  E ladan onorab Mancham in demande si ziz i annan fleksibilite pou kondann lamann oubyen sezi pwason parey onorab Barry Faure in leve. Wi lakour i annan sa fleksibilite.  Sa sonm mansyonnen isi i maksimonm me i annan fleksibilite pou li fer, pronons okenn lamann ki i krwar i a konpatib avek lofans kin ganny fer e sa i enkli sezi pwason abor, sezi gear kin servi pou komet sa lofans e egalman sezi bato.  Me i swetab de nou kote ki otan ki posib ki zafer pa al ankour, i ganny deal  ant minister avek propriyeter bato ou atraver son lazans e sa in anmenn nou pa mal larzan.

Sa bato Taywannen 1994 kin anmenn 150,000 dolar.  An septanm 1996 en bato Koreen in ganny atrape in kondann R400,000 in pey an deviz etranzer, sa ankor en fwa dimoun ki’n raporte pou dir sa bato ti pe lapes.  An desanm 1996 en lot bato Seselwa in raporte pou dir zot in vwar 2 bato Taywannnen pe lapes lo ban Sesel, tou le 2 bato in ganny fine san al ankour 100,000 dolar sak.  E avan sa zil IDC ki nou onorab Barry Faure ti pe mansyonnen bann dimoun dan zil i kapab raporte, in deza arive ki bato Espanyol in lapes pre zil Daros ek Alfons, administrater ater in vwar in raport isi.  Nou bato in nobou ale al zwenn tou le 6 bato pe komet sa fot e tou sa bato ti ganny R250,000 fine par bato, plis 5 tonn pwason, surrender  avek gouvernman, plis vann 10,000 tonn pwason avek tuna factory isi lo pri lokal.  Sa bann kondannasyon in arive.

I pli fasil parey onorab pou  Grand Anse Praslin in mansyonnen, ki  mwen de mwen en bato in ganny  atrape ki se swa atraver rapor par en bato lokal ki dir pou dir tel tel bato, nimero tel bato i pe lapes dan tel tel zone, tel longitude, latitude dan en fason nou konnen pou dir i dan nou delo.  Sa bato navy  i ale i apreann li i anmenn li anndan.  I zis fale en lakor avek kaptenn pou dir in lapes dan nou delo ilegalman i rekonnet ki in komet en fot.  Baze lo sa minis i kapab compound the fine, i vedir si maksimonm dan leka ki i pe vini si i pann pran en license pou li lapes dan nou delo oubyen i annan en license pou lapes dan nou delo dan EEZ in vin dan zonn restrikte, i ganny fine 2.5 milyon.  Prezan si li sa kaptenn e propriyeter bato in dakor zot oule settle out of court  ki pa pran en gran zafer, bato i reste dan larad, la i annan en diskisyon ki pase ant li, Attorney General’s Office, SFA ki fer rekomandasyon ek minis, i fine  li tan, ki pa plis ki maksimonm ki lalwa in prevwar isi.  Sa souvan i arive kanmenm nou vwar pou dir detrwa dernyen lannan la en total 7 bato in ganny apreande dan sa fason.  Alors i annan peser lokal ki pe raporte pou dir i annan malfeter dan nou delo, ki nou krwar i mye kapab fer li si tou bato i konnen zot pou ganny en rekonpans ki byento sa semenn nou pe al konsey de minis pou met sa devan konsey de minis pou dir vwala sa bann dimoun, bann peser pe fer en bon travay pe raporte, tou ka ki ganny pourswiv ki successful  ki sa peser i entitled to a reward.   Sa nwa pe ganny fer.  E otan ki konsern sirveyans zone maritim ki onorab Belle in mansyonnen pou dir i annan satelit, sa ankor mon krwar i annan enn an nou pe travay lo la.  Wi i annan satelit ki kapab detekte bato, tel parey dan zone Pacific, Solomon islands  son group, i annan dan sid Langleter ki pe sirvey bato EEC, zot satelit i kapab detekte ziska 10,000 bato.  Be pou ou kapab met en satelit i kout larzan, pou ganny en frequency  lo zot satelit i kout larzan.  Me pa sa solisyon.  Solisyon se ki sak bato ki antre dan ou delo avek en lizans, ou poz en kondisyon lo li ki pou ou ganny licence pou lapes dan nou delo ou bezwen met en resepter otomatik abor pou idantifye son nimero.  I tel parey mentnan nou pe travay lo IPURB, ki ler en bato anba kad safety at sea ki IPURB i ganny mete lo en bato ki si i ariv zot en kase, en kasaz kelkonk  en masin en pann ki switch on IPURB  i met en sinnyal ki konpatib avek son nimero bato ki swa en tug oubyen avyon lokal i ale i rod li.  Sa osi nwa pe fer.  Retournan lo sa bann satelit surveillance e sa nou en pti pe an avan avek sa.  Ki ou bezwen apard ki ou’n ganny sa, enn lekipman limenm, dezyenm sinyal sorti a en pozisyon dan rezyon sorti kot satelit, trwazyenm resepter abor ki pou idantifye sa bato tel tel landrwa e pa oubliye satelit surveillance  i vwar de santenn bato, lekel ki ennmi, lekel ki annan license,  lekel ki napa license, dan en fason ki ou bezwen resepter abor.  Sa nwa pe travay lo la egalman dan kad safety at sea  nwa pe fer menm keksoz.  Se zisteman  mon annan mon sekreter zeneral pou SFA ki deryer mwan la, tanto i a pe kit Mahé pou Londres ki i enn dan sa bann meeting ki zot pe diskite ek gouvernman Angle lo regional surveillance, sa i en bann keksoz ki pou ganny souleve mon ekspekte pandan sa semenn. 

E onorab Ramkalawan in fer mansyon ki dir i annan en diferans ant lapes ilegal par peser lokal ou blow pwason ilegal e tou le 2 fines in dir menm parey.  Monn konpran ou sa pti bout la?

 

MR RAMKALAWAN

Minis monn demann ou ki sa fine  anba seksyon 24(7) pou servi bann zafer eksploziv ek pwazon son fine  pou le moman ti R50,000 in mont R100,000 e li i ti fine  ki ti pli o dan bann fines  ki oun prezante, konmsi in mont zis par 50,000 tandi ki zafer license in sorti 10,000 e in mont 2.5 milyon. Konmsi zis pou regard enpe son rezonnman deryer sa.

 

MINISTER

Mr Speaker mon kontan oun donn mwan sa sans pou mwan eklersi sa pti pwen.  Anba 24(1) ki premye lo nou lalis la, 2.5 milyon i pirman bato etranze tandis ki 24(2), 24(3) i bato lokal.  Petet ki enn nou santi li ki en pli bon fine pou fer li vin plis si ou servi pwazon avek eksploziv parey oun byen dir ki eksploziv i detri lanvironnman pa zis sa pwason.

Apre onorab René in demande ki arive avek otaz pwason anba seksyon 4(2).  Ou bezwen en licence pou ou lapes pwason, spesifye.  Ou pran en licence pou sene, ladan i dir ou pou dir ou may lasenn i bezwen   tel tel grander si pou sardin, si pou makro tel tel grander son mesh  me malerezman i pa dir, lalwa i silans lo otaz pwason.  Nou okouran i pe vin pli-zan-pli, dimoun pe fer en leokri, ki annan peser i serkle pwason i tir sa ki i bezwen i al vann i kit larestan dan file.  I annan levidans devan nou ki i annan pwason ler in vini in mor zot in anmas zis pwason vivan zot in al avek apre pwason mor i flote.  Be anvi ki sa lalwa i silans lo la, anvi ki nwa pe ferm sa deba i malere ki mon pa ti ganny sans pou diskit sa boner, pou regard zot pwennvi anvi ki zot reprezant lepep la, dir nou ki lepep tia kontan nou fer. 

 

(addressing Mr Speaker)

Nou pa kapab fer li la? I tro tar pou nou demann zot lopinyon.

 

MR SPEAKER

Wi si i eklersi enpe bann pwen ki oun dir.

 

MINISTER

Leklersisman mon oule avek zot koman reprezantan lepep, ler oun pran otaz pwason, oun serkle li ek ou lalinny, ou lanmson, ou lasenn apre ou met en pli pti anndan pou fer sir ki i reste ziska zour ou bezwen li, detrwa zour, ki zot panse lo la?  Eski nou dir non dan kondisyon ler nou donn zot en license oubyen nou revoke  license nou donn zot en kondisyon? 

 

(Members speaking off mic)

 

MR SPEAKER

Brievman.

 

MR BARRY FAURE

Mon krwar tia va bon si nou donn mikro Msye Philip Michaud ki expert  dan sa domenn i a dir nou apre reprezantan lepep i a reazir.

 

 

MR SPEAKER

Bon mon krwar zot in ganny sans eksprim zot pwennvi, eklersisman.

 

MR RAMKALAWAN

Non Mr Speaker, in annan en pti konfizyon la avek minis.  Pa sa ki onorab René ti pe demande.  I ti pe demande ki arive ek bann pwason letan en bato i ganny arete e i annan pwason ladan, konmsi pe dir ki arive avek, eski i ganny sezi. Pa sa kalite otaz.

 

MINISTER

Sa i depan lakour.  Devan lakour i annan sa fleksibilite pou fine  li plis sezi pwason.  I kapab sezi son gear osi, son lasenn, ve dir ki normalman zot pa pran gear parski ki ou pou al fer avek, i sezi pwason.

 

MR RENE

Se sa kestyon Mr Speaker ki monn demann minis me la i pli kler prezan ki minis in fek eksplike la.

 

MR SPEAKER

Bon avek sa, in ariv ler pou vote. 

Tou sa ki an faver lev zot lanmen?  Inanim.  Alors la nou pran son formal second Reading.

 

CLERK

A Bill of an Act to amend the Fisheries Act (Cap 82.)

 

MR SPEAKER

Eski zot oule al dan staz komite?  Anmenn prosedir pou sot staz komite silvouple.

 

MR DANNY FAURE

Msye Speaker motion to suspend committee stage order 88,  pou nou sot 60 to 65.

 

MR SPEAKER

Okenn ki segonn sa? 

 

MR JOLICOEUR

Mon segonde Msye Speaker.

 

MR SPEAKER

Tou sa ki an faver lev zot lanmen. (20 votes for)

Okenn ki kont. (No vote against)

Alors noun sot staz komite.  Avan nou pran formal third reading mon tia kontan envit onorab Faure si i oule dir en keksoz lo clause (1) pou le mo fisheries,  si i satisfe avek sa, mon kontinnyen.  Mwa permet ou anba order 66(2) si oule fer sa koreksyon atraver en mosyon. I annan provizyon dan …..

 

MR DANNY FAURE

Msye Speaker nou tir en pti fot.

 

MR RAMKALAWAN

Tro bokou fot dan bann lalwa ki vin devan nou.

 

MR SPEAKER

Well  mon pe koz pou sa enn.  Si onorab Faure i oule anmenn sa.

 

MR DANNY FAURE

Monn fini fer, en pti fot tiprografik,  fisheries dan  short title of the bill.

 

MR SPEAKER

Tou sa ki anvi fer sa koreksyon lev zot lanmen. (20 votes for)

Okenn ki kont. (No vote against)

Alors sa koreksyon in ganny fer.  Nou al formal third reading.

 

CLERK

This Act may be cited as the Fisheries (Amendment) Act 1997.

 

 

 

MR SPEAKER

Petet en pti keksoz.  Motion for third reading.   Nou kler lo la.

 

MR DANNY FAURE

Msye Speaker mon tia kontan move  ki Fisheries (Amendment) Bill 1997  i ganny lir en trwazyenm fwa. 

 

MR SPEAKER

Tou sa ki an faver lev zot lanmen. 23. Personn pa kont alors Bill  in ganny aprouve.  Ekskize noun al en pti pe vit selman nou oule vin pli business like.   Bon avek sa nou fini avek sa bil e nwa ekskiz minis parmi nou.

Prezan nou repran deba lo motion. Onorab de Commarmond, mon annan ou non lo lalis.

 

MR CHARLES DECOMARMOND

Msye Speaker lo sa mosyon mon pa pou long enn e dezyenmman mon pou vot kont sa mosyon pou le senp rezon ki mwan mon enn osi ki kont ki later Sesel i ganny vann tro bokou avek etranze e etan ki nou ankor annan en kantite problenm kot i konsern nou prop Seselwa ki pankor ganny li en pti bout later pou li kapab fer son lakaz.

Mon osi annan detrwa kestyon ki mon oule demann prezantater mosyon.  Kekfwa dan son summing up  i ava eklersi nou, kote later ki mover mosyon i oule nou mete koman pri pou sa lotri.  Eski i oule bann later lo Mahe, lo nou bann zil touristik koman Praslin, La Digue, oubyen lezot zil, oubyen eski i pe dir later gouvernman, oubyen later prive.  Lot kestyon eski Msye Mancham i okouran nou sityasyon problenm foreign exchange  eski sa  lotri limenm letan oun fer li mon pa konnen konbyen fwa, i rezourd totalman nou problenm?  Kestyon ki mon krwar o paravan osi in ganny demande.  Sa vedir ki degre Msye Mancham i konnen sa problenm foreign exchange  i ete.  E en lot pwen ankor se ki garanti ki nou annan pou fer sir ki sa etranze ki ganny sa later dan sa lotri i pa en move dimoun.  Otreman di i pa en dimoun ki letan in aste sa lotri, eski in aste li ek larzan prop, larzan sal.  Dezyenmman letan i pou fer devlopman lo son bout later, eski i pou fer ek larzan prop, larzan sal.  Bann kestyon, mon mazin en pti pe EDA. Lot keksoz, mon poz mon lekor kestyon, eski paradi si oule dir nou vann li an bonn avini konmsa. 

Mon annan osi en amannman mon oule fer ek sa mosyon si vreman nou anvi ki petet lezot dimoun i siport sa mosyon. Me koman i ete mon pou vot non me avek amannman petet mon a kapab rekonsidere.  Mon amannman i konmsa, that government considers as a measure of acquiring additional foreign exchange whilst at the same time marketing the beauty of our country, organising a lottery mostly for visitors to Seychelles where tickets are sold in foreign currency with the first prize being a plot of land offered by Sir James R. Mancham…

 

(laughter)

 

and with permission to build a residence on.  Oubyen  lot amannman letan nariv kot premye pri;  with the first prize being a free holiday in paradise.  Si mover mosyon i pare i aksepte enn ant sa 2 amannman then mon napa problenm pou siport sa mosyon me parey i ete la, sa mosyon mon pa krwar, avek tou bann lentansyon kekfwa ki mover i kapab annan mon pa krwar vreman  ki mosyon parey i ete i dan entere Sesel parey monn eksplike.  Mersi Msye Speaker  mon ava aret la.

 

MR GEORGES BIBI

Msye Speaker mwan osi mon pa pou long lo sa mosyon me selman mon ti a kontan fer premyerman fer resorti enn de pwen lo sa mosyon limenm, paregzanp lide ki lonorab Mancham in anmenn sa mosyon e premyerman nou a get son pwen for sa mosyon e son pwen feb e anmenm tan nou a kapab get petet bann loportinite ki sa mosyon i kapab anmennen e osi bann si oule bann menas ki noun tann pe koz lo la ki bann lefe, bann lenplikasyon negatif ki noun tann bokou manm dan kote mazoriter pe koz lo la me lide se nou gete premyerman ki pwen for sa mosyon e ki ti lide, motif deryer lespri onorab Mancham ler i ti met sa mosyon.  Premyerman mon krwar linisyativ se pa parey monn tann lonorab kin koz avan mwan sirtou, apre pli boner monn tann lonorab Esparon dir pou dir si sa mosyon noun etidye ki kantite problenm forex Sesel i egziste.  Mon krwar si nou pe dir sa nou pe sorti konpletman an deor lide menm sa mosyon parski mon pa krwar pou dir Sesel nou fer zis lotri pou ganny forex.   E  bomaten mon ti tann Lonorab Esparon i dir nou dwa 300 milyon. Dernyen fwa  ki i ti dir ti annan 300 milyon, mon pa krwar pou dir en lotri i pou sel aktivite ki pou anmenn foreign exchange.  Mon krwar yer letan noun ekout rupees and cents  noun vwar bann lezot aktivite ki annan ki pe osi asiste pou anmenn forex.  Mon krwar alors le pwen ki nou pe sey vini pou dir si nou konn sityasyon forex mon krwar i pa en kestyon valid. 

Pwen for sa mosyon se ki enn, linisyativ se ki nou oule ki en fason ou en lot sa mosyon si i vin an pratik, son lide deryer se pou kapab anforsi la kantite forex ki nou gannyen dan Sesel si en tel lotri  i ganny met an plas.  Son pwen for se ki en dimoun letan pe zwe en lotri Sesel e i konnen en fason ou en lot si i pou ganny en bout later Sesel, son pwen for si parey monn tann dezyenm pri oswa son premye pri pou zot ganny en return ticket Sesel se sa son pwen for.  Se i pe promot Sesel dan pei a letranze.  Son pwen for se i pe osi fer dimoun konnen pou dir Sesel i la i egziste e son pwen pli for se sa larzan ki nou pou gannyen, son lesanz, se i pou ed nou menm, nou pep lafason ki nou ganny larzan.  I pa en kestyon nou pou al an detay, ki fason, ki metodolozi nou pou servi e ki kalite fason nou pou met li an pratik.  Pou le moman se lide ki deryer sa mosyon.  Se si nou  krwar i en lide ki nob, si nou krwar i en lide kin ganny fer avek bonn fwa.  Sa mon krwar lespri.  E son febles tou dimoun pe dir nou isi Sesel nou napa later, nou bezwen konble later, konbyen nou peye pou fer konblaz ensi-d-swit.  I vre bomaten mon tann Lonorab Dick in dir nou pa kapab rod larzan an vannan nou nanm.  Sa i en mosyon ki ganny met devan parey monn dir in ganny met devan an bonn fwa e ler nou koz an vannan nou nanm mon krwar en mosyon se gouvernman ki desid lo la e en mosyon se gouvernman ki kapab aplik li.  Alors nou sa ki nou deside, sa ki nou vwar, nou gete se si sa mosyon letan i pou vini ki benefis i pe anmennen, ki loportinite i pou annan e nou ziz li dan son vre sans benefis, oswa dan son vre sans si oule pwen for ki i annan. 

Akoz bomaten ler monn tann Lonorab Dick dir avek Lonorab Belle i si Lonorab Mancham i oule son mosyon ganny defet fer Lonorab Belle koz lo la.  Mon krwar mwan mon pa konnen ki pti friksyon Lonorab Dick i annan avek Lonorab Belle me lesansyel mon krwar Msye Speaker se ki ki diferans i pou fer paregzanp, nou tou nou konnen kot i annan bokou etranze ki antre Sesel ki nou konnen i antre koman etranze, noun vwar lo nasyon i annan dimoun, mwan monn lir lo nasyon, dan gazet ki in fer zis 5 mwan i pe demann citizenship si i gannyen, si i pa gannyen sa mon pa konnen me nou konnen kantite i antre e i aste propriyete.  Nou konnen i antre i ganny en passport,  i pankor fer 5 an, i pankor fer 4 an i aste propriyete e ki diferans i annan si paregzanp nou pe fer en keksoz en fason legal, nou pe fer li dan en fason kler, transparan e nou tou nou konnen pou dir dan Sesel nou pe antre, ler nou kont dimoun ki dan transit  in antre nou ape pre 400, i annan 400 mouvman viziter ki vini e si ou pe dir dan en lespas, mwan personnelman mon lopinyon nou kapab kriye, i annan bomaten Lonorab Belle in fer resorti, i annan dimoun ki annan sitan later Sesel, i vre, i annan dimoun ki pe lager ki napa me i annan dimoun ki annan sitan later Sesel…

 

(interruption)

 

.. mon pa vin nonm non mon pe zis fer resorti en pwen.  Mon kapab fer mon lentervansyon Msye Speaker.

 

MR SPEAKER

Sertennman, kontinnyen.

 

MR BIBI

Mersi.  I annan dimoun ki annan sitan, i annan ki napa bokou, i annan ki napa ditou e sa nou konnen e sa i kler.  Mwan personnelman Msye Speaker nou konnen dan Sesel ozordi, nou pe dir napa later me selman nou vwar bokou dimoun i aste later par 2, 3, 4, 5, 6 arpan e nou vwar i annan ki aste 2, 3 arpan.  Sa ki nou pe sey rode se ki nou nou pa pe vin la pou nou fer en keksoz.. mon krwar Lonorab Mancham ler in met son pwennvi bomaten i pann vin la  pou fer en keksoz politik.  Noun get li dan en fason, en aktivite ekonomik.  E dan tou aktivite ki ou fer li ekonomik i pou bezwen en fason ou en lot annan serten konsekans.  I zis parey ozordi noun pran sa risk pou nou fer lapes Sesel endistriel, demen bomaten nou kapab leve napa ton, ton i en pwason migratwar i al net ki nou fer avek conserverie nou demande ki nou fer avek conserverie de losean endyen.  I pe anploy 600, 800 demen i kapab anploy 1200 dimoun, me i en risk ki nou kapab pran okay.  E dan tou keksoz ki nou fer pou lekonomi i bezwen annan en serten risk ki ou pran.  E mwan, nou ganny drwa difere dan sa Lasanble akoz nou tou nou pa parey, nou tou nou annan diferan lopinyon e tou dimoun i ganny drwa eksprim son lopinyon. 

Msye Speaker en tel lotri i ganny fer, ler i a ganny fer, nou nou pa pou kapab at this point la dir konbyen larzan i pou anmennen parski i pa pou nou a vwar konbyen lazan i pou anmennen se sa la ki gouverman si li i deside organiz li i a vwar.  Me i a gouvernman osi deside lo ki frekans i pou fer sa lotri.  Petet bomaten noun tann febles, petet nou a dir lonorab Mancham pann dir ki frekans ki mannyer i pou fer sa se a gouvernman deside.  Mwan mon krwar lespri, pwen for se ki larzan ki nou pou gannyen en fason ou en lot i la pou ed pou benefis piblik pou benefis Seselwa, se sa lide deryer.  E mon pa krwar personnelman, mon pa krwar ki menm mon tann en kantite nou tou nou pe kriye pou dir nou, nou ti a kontan vwar later pou Seselwa, nou tou nou pe kriye pou dir nou ti a kontan ki tou Seselwa i ganny en ti morso later, mwan napa en dimoun ki pou fer mwan krwar dan lasanble nou kapab lannen ale lannen vini lager.  Napa en dimoun ki pou fer krwar dan lasanble tou Seselwa demen pou ganny en bout later, na pa en dimoun pou fer mwan krwar.  Nou pou ale, i en polisi, i en rev me an realite napa en dimoun pou fer mwan krwar sa.  Napa en dimoun pou fer mwan krwar akoz mwan mon en realist, mon pa en dimoun ki zis krwar dan en rev, napa en dimoun ki pou fer mwan krwar sa.  Mon krwar selman nou devret donnen otan ki posib.  Me an realite i pa en keksoz ki pratikab, alor pa vin fer mwan krwar i koumsa.  Pa fer mwan krwar i koumsa, an realite mon en realist, mon pa krwar ki sak dimoun pou gannyen, akoz popilasyon i kontinyelman monte later pa agrandi, Sesel ki gran distans i pou vini. 

 

MR DE COMMARMOND

A konble

 

MR DANNY FAURE

Pe grandi, pe konble.

 

MR BIBI

Msye Speaker mwan sa ki mon pe fer resorti i en pwen senp.  I en pwen senp ki letranze ki pe aste, i pe kontinyen aste later isi nou konnen pou dir sa gouvernman vin en lot gouvernman toultan etranzer pou aste later.  E mwan rezon ki mon siport sa mosyon parski konbyen, ki kantite nou pou perdi e akoz ki noun pran sa mosyon noun vir li noun fer li vin, pou mwan personnelman mon vwar li nou pe fer li vin zis en issue politik e i regretab.  I regretab, parski mwan mon pann anvi fer en koze politik parske si nou pou fer en koze politik nou kapab anmenn en kantite keksoz,

 

MR DE COMMARMOND

Anmennen

 

MR BIBI

nou fer li vin en keksoz mon krwar ki i annan serten rasyonal deryer e nou koz avek serten rasyonal nou get li dan son loptik parey i ete e nou gete ki ti linisyativ e ki ti lespri deryer sa mosyon e nou tret li dan sa fason.  E se pou sa rezon Msye Speaker ki mon pou donn mon sipor sa mosyon akoz mon krwar in ganny anmennen avek en lespri nob, in ganny anmennen avek en linisyativ ki si nou annan en problenm nou sey vwar fason pou rod solisyon e nou pa pran li pou fer politik avek, alor mon krwar pou bann manm kin koz avan mwan nou pran li noun sey fer li  vin en keksoz pou nou kapab fer serten pti mileage politik fer serten propagann, alor mon pou donn mon sipor sa mosyon ankor enn fwa, mersi.

 

MR GARDETTE

Msye Speaker mon pou sey fer fason abord sa mosyon avek minimonm emosyon posib, menm parey noun vwar dan Lasanble sa mosyon in lev bokou emosyon.  Avan ki mon al direkteman lo sa mosyon limenm, mon pou bezwen natirelman koz lo serten keksoz ki manm lopozisyon, a leksepsyon lonorab Ramkalawan, in dir an faver sa mosyon.  Si i annan enn apar de lonorab Belle kin fer mwan ganny dout en kantite lo sa mosyon se lonorab Bibi limenm. 

Lonorab Bibi in fer mwan ganny en kantite dout lo sa mosyon.  I trakas mwan personnelman la fason ki in koze lo sa mosyon. Mon napa okenn dout ki sa mosyon in ganny fer an bonn fwa me kantmenn in ganny fer an bonn fwa i pa en rezon pou nou siport li, si nou konnen i pa bon pou nou pei.  Msye Speaker si nou vin vot lo en mosyon akoz in ganny fer an bonn fwa, ki nou vot wi lo la, mon krent ki pou ariv Sesel demen. Lonorab Bibi i senble mwan in eksplik en bout polisi parti demokratik lo kestyon later an repons en pti pe lo kestyon ki lonorab Ramkalawan in poze pli boner.  In dir nou li i pa krwar ki Seselwa pou kapab nou tou en zour arive, menm si i en rev ozordi lonorab Bibi, ganny en bout later. 

Lonorab Bibi an 77 ler sa gouvernman, gouvernman ki ankor opouvwar ozordi gouvernman prezidan Rene ti vin opouvwar ti annan zis 40% fanmiy Seselwa ki ti annan son later.  Ozordi lonorab Bibi pou ou lenformasyon i annan 70% ki annan deza.  Lonorab Bibi dan Sesel i annan 17,000 fanmiy apepre ozordi e mon pa vwar okenn rezon akoz ki dan kelke lannen avenir ziska lannen 2000, 2005, 2010 ki tou Seselwa, ziska 20,000 fanmiy, 24,000 fanmiy pa pou nobou annan en bout later.  Me si parti demokratik i vin opouvwar mon asire ki sa sonm 70% pou redesann, akoz i pou ganny ankouraze pou vann son pti bout later ki in pey bonmarse ek sa gouvernman a etranze a en pri pli o, parey ti ete dan le pase.

Prezan mwa tourn lo mosyon limenm.  Lo sa mosyon ki demande ki en lotri i ganny fer pou anmenn foreign exchange marketing dan Sesel mon napa problenm.  Mon asire si marketing i ganny fer pou sa lotri byen ki  i ava anmenn bokou piblisite pou Sesel.   Mon asire e si sa i ganny fer byen an retour i pou anmennen osi foreign exchange pou Sesel.  Me par kont mon annan dout ki sa pou nobou al a long way, al lwen si oule pou kapab rezourd sa problenm ki nou pe fer fas avek ozordi.  Me ziska la mon pare pou siport mosyon lonorab Mancham, mon napa problenm ek sa.

Bout ki trakas mwan, sa bout kot nou pe ofer sa bout later. Later pou Seselwa i en keksoz sakre, mon krwar mover mosyon limenm i konnen ki kantite diskisyon, bagar balizaz i arive dan Sesel dan le pase.  Tou sa la akoz Seselwa i tini son bout later i en keksoz sakre.  Msye Speaker nou dir an kreol, a later les li nou anter anba la, kantite fwa nou dir sa bann parol.  Me ler nou get li an son form pratik nou vwar ki dimoun kanmenn i enterese i oule, i bezwen i krwar ki i bezwen annan en bout later.   Akoz, akoz i limite. Si ti annan en kantite, dimoun pa ti pou rode, akoz i annan en pti git nou pe kalkile ki mannyer si ozordi nou napa, ki mannyer demen nou pou annan.  Se sa ki anmenn sa konzesyon sa presyon lo later dan Sesel ozordi. 

Ler mon analiz mosyon mon vwar ki Msye Mancham pa pe demann, mon repete ankor i pa pe demann en work permit pou sa dimoun ki ganny sa bout later.  Sa i anmenn mwan a krwar ki sa dimoun ki ganny sa bout later, lide Msye Mancham se pou vin en konze Sesel e non pa travay isi Sesel, felisitasyon, tre byen.  Me dimoun ki vin Sesel pou en vakans parey noun vwar dan mon distrik i annan, ki kalite lakaz zot kontan konstri.   Normalman zot fer en pti lakaz 2 lasanm ki pa kout plis ki 140 a 150,000 roupi pou li servi pandan 14 zour ou byen 21 zour par an. Natirelman anba sa bann konstren i pa oule depans en kantite larzan, amwen ki en dimoun i vin Sesel pou li fer en gran lenvestisyon avek nide fer spekilasyon lo sa later plitar.  Ki vedir ganny en bout later fer en lakaz dan 300, 400, 500 mil roupi pou li revann 1.5, 2 milyon roupi demen. I apel spekilasyon later.  Lefe ki sa mosyon pa pe al dan sa direksyon, mon espere i pa pe al dan sa direksyon i anmenn nou a krwar ki sa dimoun pou vin en vakans Sesel e i pou annan son lakaz Sesel.  I anmenn sa argiman ki mwa ava al lo la plitar ki i annan serten propozisyon kin ganny fer ki premye pri i ganny donnen pou en vakans Sesel.  Mwa kit sa pou le moman, mwa tourn lo la plitar.  Sa dimoun ki ganny sa later ek sa lakaz i vin Sesel, evantyelman i fatige avek sa viza touristik ki i gannyen, i demann nou en permi rezidansyel, mon pa pe dir working permit la, nou pe dir donn li en permi rezidans Sesel.  Otomatikman i annan later Sesel i en dimoun ki’n ganny en lotri ki nou nou ofer pou fer marketing, i difisil pou dir li non, ou pou bezwen donn li en permi rezidans menm ki nou pan’n ganny swa konnen ki kalite dimoun i ete.  In ganny pli’z ou mwen forse lo nou kontrerman a sa ki lonorab Bibi in dir ler gouvernman i aksepte pou vann en etranze later, gouvernman i kapab pick and choose i kapab al dan background sa dimoun pou konnen ki kalite dimoun i ete.  Tandi ki ler oun ganny en lotri sa pa kapab ganny fer.  Ler sa dimoun in ganny son later, i vin isi i demann en permi rezidan nou donn li, apre 5 an ki nou war, lo latab konstitisyonel nou rapel byen ki parti  demokratik ti pouse pou ganny sa ki nou apel ozordi, dual citizenship Sesel. Si mon mal koriz mwan.  Me mwan otan ki mon rapel se parti demokratik ki ti pous sa lide.  E ozordi nou pe war nou dan Sesel anba en kantite akoz sa dual citizenship.  Sa dimoun li kin ganny sa bout later i vini i demann en permi rezidan, apre 5 an i  demann citizenship.  Si mosyon ti pou anmenn marketing, foreign exchange Sesel, son dezavantaz ki pou anmenen se i pou anmenn plis etranze pou reste Sesel.  E si mosyon pe dir anmenn fresh blood anmenn nouvo dimoun Sesel, ketfwa i ava atenn son lobzektif, otreman i pou vin en burden pou Sesel. 

Lo sa bout ki mon ti le koz lo la, konsernen sa bann dimoun ki ganny en bout later isi…. be burden se en mo angle i vedir i anmenn lanbara pou nou plitar.  Mwan personelman apre ki mon’n antann tou sa bann koze, mon vreman vreman annan dout si Sesel noun ariv dan e sitiasyon kot nou bezwen al fer sa ki sa mosyon pe demande pou nou sirviv.  E personelman mon pa krwar nou la e mon pa war akoz e ki fason nou devret al donn en bout later an pri pou dimoun  vin Sesel.  Mwan mwa fer, Msye Mancham, en lot nide.  Msye Mancham limenm in dir pou dir bi sa se pou les sa dimoun lefe ki pann demann en permi travay vin vakans Sesel. Si en vakans Sesel parey in ganny dir par lonorab Esparon, par lonorab Ramkalawan pa ase, ketfwa sa pri ki Msye Mancham pe mazinen i en pli gro pri, i en pri ki anmenn plis substance annou fer li 5 vankans Sesel, akoz son bi tou le fason se vin vakans Sesel, be donn li 5 vakans, menm ki i kout nou ketfwa plis, me nou  konnen nou pa reste avek en lasting burden lo nou.  Si Msye Mancham i le ofer keksoz plis ki sa, pli inik ki sa, pli valer ki sa, annou ofer sa dimoun en vwayaz pou al dekouver Aldabra konman en atol inik.  Mon dakor ek bann nide parey, me ler nou pe anmenn later pou etranze lonorab Mancham mon krwar oun tous en ner ki sansib, mwan mon pa pou kapab siport sa, mon pou bezwen vot kont ou mosyon zis akoz sa pti bout ki konsern later.  Mersi. 

 

MR PATRICK HERMINIE

En bon burden sa enn.

 

MR SPEAKER

Avek sa nou pran en break ziska 4 er 5.

 

(Sitting adjourned to 4.05 p.m)

 

MR SPEAKER

Bon nou kontinyen avek mosyon Onorab Mancham.  Mon krwar lesansyel in ganny fer sorti tou le de kote e mon envit Onorab Mancham pou fer ou rezimen.

 

MR JAMES MANCHAM

Msye Speaker, mon vreman ganny sirprann aujourd’hui ki en mosyon senp e kler in ganny debat avek sitan lemosyon.  Mon panse an priori i neseser pou mwan fer en elaborasyon lo listwar kestyon later Sesel. Lo komansman later Sesel ti apartyen a bann kayman, bann serpan e bann torti.  Kayman e serpan in mor, torti ajourd’hui pe viv an kaptivite dan kelke pti park, sof dan enn de landrwa konm Aldabra kot zot ankor viv dan zot fason primitif e sovaz.  Premye dimoun ki ti ariv Sesel sete bann settlers franse e ler zot ti arive ti napa personn zis kayman, torti ek serpan e zot ti pran later e zot ti diviz sa later sakenn in pran son morso, sa ki pli for in pran son pli gro gob e zot in gannyen de gran later avek en kantite acreage.  Plitar sa bann settlers la n’aport lesklav Sesel pou vin travay lo zot later.  E en zour ti annan en trete de Paris ki ti rekonet ki bann later, bann Sesel in vini en pei  britanik.  Pandan sa lepok osi nou konnen enternasyonalman bann nasyon ti deklare to put an end to slavery.  Me anba trete de Paris gouvernman Angleter, ti ganny committed pou respekte sitiasyon popriete as it was vested dan letan de bann franse, e angle ti rekonet sa prensip la, bann franse ti kontinyen zouir bann later Sesel.  Sepandan imen i imen i annan ki ti marye ek zot lesklav, avek fiy zot lesklav i annan ki ti pran sa bann fiy an menaz konman metres e la, prosesus de nou kreolizasyon ti konmanse.  Imen i imen ler franse ki ti annan en kantite later in tonm anmoure, in konmans donn kelke morso a bann asosye, swa son madanm, oswa la personn ki vin son metres, oswa la personn ki vin son zanfan e nou konmans vwar diversifikasyon bann gro morso later in konmans tonbe i annan enpe fragmantasyon ki bann dimoun ki zeneralman ti d’origine lesklav tin erite.  E ti vin pou zot.  Zeneralman sa pa ti gran morso, se bann morso ki ganny an kado, menm petet testaman ou siksesyon.  Sa ti ganny kontinyen pandan lepok kolonyal britanik apre nou ti pe viv dan en sistenm marse lib.  I annan bann aziatik kin osi penetre Sesel, vini enpe partou e atraver nou prosesous izolasyon noun kree sa pep melanze, Seselwa kreol ki aujourd’hui nou annan enpe disan sorti enpe partou.  Gouvenrman kolonyal limenm, menm si noun kritik li, petet zot pa konnen, zot pa rapel me mwa dir zot pou dir limenm premye pou proteze, alienation of land parske si angle tin oule pran later Sesel, ti annan li tou pouvwar e tin aport settlers parey ti aporte Kenya, Rodhesia, e later ti ann ganny pran.  Me angle zanmen in le enterfere avek later Sesel, e nou tou nou konn sa konm laverite.  Okontrer ti annan li en prensip to stop alienation i ti dir pou dir sak aplikasyon for alienation of land had to have a sanction of the executive council.  E nou tou nou konnen pou dir an realite tre pe later ti ganny pase a etranze.  E i annan enn de sa bann gran Franse/Seselwa si oule ki ti annan gro later ki ti pe reste a letranze, sirtou bann ki ti annan zil zot in le vann zot zil e zot in vann zot zil e enn de etranze in aste.  Me si nou konsider sa kestyon etranze, mon antann en kantite fwa en pake etranze in vini in pran nou later.  Enn de etranze in vini in aste later, me sa kin aste later zeneralman ti ganny permisyon akoz i ti annan en project to implement.  Tou bann later kin vann, paregzanp kot bann lotel i ete, Reef Hotel, konpani W & C French ti aste pou fer lotel, Holder Brothers ti aste Mahe Beach pou fer lotel.  Apre lekel ankor etranze kin vin aste en kantite later. Kashoggi  ti le vin aste later pou fer proze, me anfen sa pa ti materialize, me solman si ou annan portre Kashoggi, ou konnen ki ti arive zafer later Kashoggi? ler Kashoggi ti vin isi nou problenm, nou fek pe vin endepandan e nou problenm sete problenm ki nou gouvernman ki sa lepok koalizyon tin realize se problenm ki annan nou en nesesite pou donn later maksimom lepep Seselwa.  Me en se tan la, nou aktyel prezidan, Prezidan Rene i ti premye minis e limenm li i ti minis of land development dan nou gouvernman.  Savedir okenn dimoun pa ti pou kapab aste later Sesel si li konm minis pa ti rekonmann sa avek

 

MR DE COMMARMOND

Avek prezidan

 

MR MANCHAM

Avek Cabinet.  Ekoute – ekoute…

 

(laughter)

 

zot pa rapel, zot pa konnen ki nou ti en zour dan avyon Kashoggi anba trwa minis, including Minis Philibert Loizeau, Robert Delorie ti anvoy zot l’Arabie Saoudite pou demann larzan anprent, en donasyon a gouvernman de l’Arabie Saoudite, pou nou kapab – sa lepok Saudi Arabia ti pe donn larzan partou, ti telman ris – pou nou kapab fer nou en devlopman later pou malere, me zis apre sa demars la, ti ariv kou’d’eta.  Dan lepok kou’d’eta, apre kou’d’eta…..

 

(interruptions)

 

ekoute, dan lepok kou’d’eta apre nou ti antre nou dan la domenn de one party State, la ti annan compulsory acquisition of propertyMostly popriete ki’n pran ti propriete bann dimoun ki ti’n erit gran propriete, enn de etranze ki ti’n aste propriete. Mon pa pou antre mwan dan diskisyon konsernan zafer propriete komans acquire aujourd’hui, sa ti size gran deba dan lepok constitutional conference dan lepok de tranzisyon.  E an vi linite nou pei nou ti dakor to agree to disagree nou ti dakor met problenm divizyon lo diferan idyolozi ki ti penetre dan nou pei atraver lager frwad.  Me aujourd’hui noun war nou sitiasyon kot nou Sesel nou bezwen viv selon nou resours.  Il me semble ler monn ekout plizyer manm lasanble parle, ki annan bokou de manm lasanble aujourd’hui they are not in tune with executive thinking.  Zot konnen tou le mwan i arive zot ganny zot cheque selman zot pa konnen mannyer minis i bezwen kas son latet pou fer sa larzan antre pou kapab pey zot sa cheque la.  Zot pa konnen pou dir pei ozordi nou pe pas nou dan de sitiasyon ki bann minis tou zefor nou bezwen fer pou kapab gannyen deviz etranzer.  Ou a dir mwan koumsa i fo pou gouvernman al fer rezistre konpani etranzer vin rezistre isi, akoz ler i vin anrezistre i pey zis 200, 300 dolar.  Alor 200, 300 dolar konbyen konpani ki fodre vin rezistre ladan pou nou kapab sorti dan problenm deviz etranzer.  Non, me sa set en kontribisyon ver la solisyon de sa problenm parey sa mosyon ki monn propoze.  Zanmen monn dir lo mon mosyon pou dir sa mosyon pou trouv solisyon a nou problenm de deviz etranzer.  Sa ki monn dir e i la i kler ki sa mosyon i pou aporte enpe deviz etranzer.

Msye Speaker, mwan aujourd’hui mon trist, trist parske lafason monn vwar kelke reaksyon de manm de lasanble mean kont etranze, mean mean like hell.  Nou pe fer nou en politik e nou depan lo touris etranzer vin isi, nou depan nou lo sa touris sorti kontan, kontan nou konman en pep, e nou osi nou tout dakor pou dir tou dimoun ki vin isi tia kontan aste en pti morso later.  Me nou konnen nou pa kapab vann tou dimoun en pti morso later. Alor   pou fer le pe dimoun konnen pou dir nou pa en tel mean pep, nou pa en pep telman egois, alor nwa donn zot en sans, pa bokou de zot.  Dan 150 mil ki vin isi, kapab demen atraver en lotri a kapab ganny en pti morso.  Se akoz later i difisil e i difisil pou etablir rezidans isi, se pou set rezon ki dimoun pou enterese.  Me wa dir mwan non, pa met later ek lotri, donn li en vakans, en vakans Sesel.  En vakans Sesel i easily quantify. En vakans konbyen, R10,000? ok, 5 vakans R50,000? sa pa pou atir okenn touris.  Later.  Nou pankor isi donn value nou later. Nou pankor konpran what is the value of land.  Ki valer later?  Ok, monn donn ou en zil i apel Cousine, ki son valer?  Keep quiet man ­– ki son valer?  Premyerman, ou papa in donn ou en zil i apel Cousine, right, sanmenm tou in donn ou Cousine, ou pa annan drwa vann Cousine, me ki ou valer pou ou, sanmenm ki oun gannyen.  Lo la i annan li dizon en 100 pye koko, right.  Ou kapab al lapes obor, 100 pye koko.  Ok, petet koko i vann ser ou anmas ou koko ou ale ou vann.  Alafen dimwan ou rantabilite de ou zil se prodiksyon de 100 pye koko.  Ki valer sa zil Cousine.  Ok. Si demen mwan, mon en businessman mon le fer en devlopman lo sa zil Cousine, mon le fer devlopman lo zil Cousine premyerman mon bezwen konnen avek planning ki grander devlopman i pou les mwan fer.  Savedir si planning i dir mwan la ou pou kapab fer senpleman en pti lotel 24 lasanm, mon bezwen vwar pou dir mon invest li, si mon envestisman pou profitab mon pa pou kapab pey li pou sa zil plis ki en serten nivo larzan parske sansan mon pa pou kapab tire sa cost of sa financing ki bezwen gannyen pou fer sa.  Alor sa zil sa lepok la i vo e tou devloper i a dir ou pou dir le fakter de devlopman the land value should not constitute more than 12.5% of the total cost of the project.  Alor a sa lepok la, commercially speaking mon pou kapab pey senpleman en serten sonm ki reprezant 12.5% value of the project e sa valer sa later.  Right.  Lot kote, sa menm pti zil demen i ariv en prens sepa kot i sorti dan pei larzan fasil, li in ganny pake delwil larzan en kantite, in ariv la in tonm anmoure, ki sa valer sa zil pou li.  You ask your price i pou donn ou.  I parey en painting.  Ki valer en Monet ki valer en Gaughin, ki ou kapab gannyen avek en painting ou war li la plen dimoun i dir zot be sa lapentir en boug in pey 5 milyon, be ki i tire ladan zis ou gete 5 milyon.  The value of sa lapentir i value of the extent that somebody is prepared to pay for it.  La isi Sesel dan nou paradi, zoli pei, ki valer nou later.  Si nou pou fer nou en politik demen ki sak nou zabitan Sesel ti annan li en morso later de R50,000, sa later i kapab vin R500,000, me i pa pou zoli pou li?  Demen i kapab al devan labank e look for a loan de R300,000.  Apre’dmen i kapab al Maurice ler i met son valer R500,000 miltipliy par 4, Maurice i en milyoner.  E ler nou nou pe pas nou 10% komisyon lo later ki i vann, sa 10% i pa pou baze lo R50,000, i pou baze 10% lo R500,000.  Give value to our land.  Ler mon ti pas Hong Kong dernyerman headline news en pti morso later Chen Ghen sa billion of Hong Kong dollars.  Lekel ki ti pe fer sa dapre ou Beijing Communist China zot malen zot sa bann socialist laba, zot pe give confidence to the world ki Hong Kong pa pe sanze ki donn antyerman konfidans.  Be si pou nou achieve sa, zot pa kapab achieve sa san take into account bann konsiderasyon sosyal konsiderasyon de nou sirkonstans dan nou pei.  E menm tou sa bann tralalilala, zot in kriye kont mon mosyon, mon mosyon i kler parey Onorab Belle in dir, mwan mon pe propoze, mon pe aport en lide, mon pann dir fer lotri en fwa, mon pann dir fer lotri de fwa, mon pann dir fer lotri trwa fwa.  Mon pann dir ki grander later osi fodre donnen.  Monn aport en lide pou la konsiderasyon de legzekitif, parske mon panse ki aujourd’hui legzekitif i pe bezwen kas zot latet pou vwar mannyer nou pou kapab sorti dan problenm forex.  Nou annan nou 3 atou Sesel.  Premyerman lanmer, nou ganny pwason, dezyenmman nou annan nou touris ki vini, trwazyenmman nou annan la bote de pei.  Pa tou pei ki kapab kapitalize dan valer zot later.  Maurice paregzanp son topografi mannyer son pei i ete i plat i monotonn,i pa pou kapab al zwe en politik ki nou nou tia kapab zwe si demen nou ti annan nou en positive land development policy.   Byensir sa polisi dwa pran an konsiderasyon le byenet de malere ki dwatet osi ganny later.  E si nou fer en lotri koumsa, akoz parey mon ti sizere mwan ki nwa servi sa larzan ki nou gannyen pou fer marketing touris etsetera.  Be pa bezwen, annou dir pran sa larzan aste later pou bann ki napa later aujourd’hui.  Alor ki fer nou annan en sistenm ki a ed ankor plis dimoun ganny en morso later pou kapab fer devlopman.  Msye Speaker, dan lemonn aktyel nou pe viv dan en global village kot nou tou nou interchange.  Dan pei deor nou annan plis ki 20 mil Seselwa – e tou sala de Seselwa ki swa Australie, Canada, partou ler zot in anmas en pti larzan pa zot annan drwa aste later?  Tou sa la pann aste later laba deor.  Nou isi nou pa kapab vann later ek tou dimoun, be pa montre mwan pou dir sa i zistifye en latitid parey mon vwar i demonstre aujourd’hui dan sa lasanm avek meanness, meanness etranze mon pa le war li, etranze pa fodre i ganny morso later kan toulezour nou pe promot en pake bann propagann we are the friendly people, we want to share, we want to care.  Nou oule letranze donn nou tou, nou pou donn en pti morso i tro fermal sa.  Be sa etranze kin vini isi in fer devlopman.  I annan Seselwa pe asize parey nou tou konnen avek de gro gro morso later e ki tia bon sa later parfwa tia ganny sanze, tia kapab atire enpe plis devlopman.  I annan dimoun i servi le term Seselwa pou fer krwar zis ler i dan son lentere, i pa give a hoot a care bann malere ki anba li, i servi Seselwa ou le kreasyon sa pov Seselwa li kot i pou ganny larzan pou aste later li, si nou pa fer en  sistenm ki kapab zenere enpe larzan pou donn li sa posibilite. 

Wi Msye Speaker, anfen zot in aporte le kestyon sovereignty, nou pe vann nou souvrente, mon pa konnen lekel kin dir sa, be nou pa pe vann nou sovereignty nou, Reveran Ramkalawan wi, apre mon pa konnen lekel le zot in swiv li zot in siport li. Sovereignty  nou pa vann sovereignty.  Bann zil isi, konbyen zil, ou aste en zil i pa vedir oun aste sovereignty, pa vedir osi ki demen ou kapab pran sa zil met lo ou zepol al avek.  Dezyenmman si okenn devlopman ki ou bezwen fer, ou bezwen ganny permisyon gouvernman.  Si gouvernman pa donn ou permisyon i dir ou pou dir oun aste sa zil be sa you’re going to use it for farming, ki ou pou fer.  Ou pa aste, ou pann aste sovereignty, so ou pa dir ler oun vann en morso later oun donn atraver en lotri en pti morso later ki sa in amount to an abuse of our sovereignty.  Oun pas lozistik fer lotri, pa difisil fer en lotri, ou print bann tiket, ou fer tou bann lotel, tou bann konsernen dan tou lotel donn zot tiket pou vann e sa boug ki vann sa tiket ki dimoun i ganny premye pri, ou donn li R50,000 ankor pou li, ou vwar, pa pe donn li pri, son motivasyon.  Alor pa pou – partou – donn li R50,000.  Annou fer fason servi bann fason transparan pou nou solve nou bann problenm foreign exchange

Anfen Msye Speaker, mwan monn ekoute, les zot vot kont bann ki vot kont, solman si zot vot kont, mon pe dir zot that they are not attuned with executive thinking.  Si zot le vot kont, mon napa okenn obzeksyon parske zot abitye fer politik avek en pake bann zafer e la zot pe fer politik avek sa mosyon, mon tia demann zot plito ekoute sa ki lider Government Business in dir parske mwan mon panse ki petet li i pli an kontak avek executive thinking e mon fer lapel o non la repitasyon nou pep retir sa bann meanness kont etranze ankor enn fwa. Seselwa deor an mazorite pou napa okenn obzeksyon parske nou tou nou etranze Sesel nou tou swa nou annan en morso franse, swa nou annan en morso angle, swa nou annan en morso sa.  Pou en meanness koumsa ganny demonstre atraver serten atitid is not commensurate avek politik ki en pei i le zwe demen pou dir pou dir nou en friendly country

Msye Speaker, I beg to move.  Mersi.

 

MR DE COMMARMOND

Point of order Msye Speaker.

 

MR SPEAKER

In ler pou vote.

 

MR  DE COMMARMOND

Klarifikasyon.

 

MR SPEAKER

Ekoute, tyonbo en kou.  Mon krwar fodre nou serye.  Ou konmans avek en point of order, apre ou dir klarifikasyon.

 

MR DE COMMARMOND

Klarifikasyon.

 

MR SPEAKER

Ou serye lo sa.  E klarifikasyon i pa argiman, savedir ou klarifikasyon i en kestyon.  Pardon…

 

MR WAVEN WILLIAM

Matter of privilege pa lese.

 

MR MANCHAM

Mwa donn li son klarifikasyon vini mon piti.  Mon tia kontan donn li klarifikasyon si i oule, demande.

 

MR SPEAKER

Order.  Bon, si zot pe kontinyen zot pe konvenki mwan ki mon pou al direk dan vot.  Onorab de Commarmond ou kestyon.

 

MR DE COMMARMOND

Msye Speaker mon ti le ki mover mosyon i klarifiye ek lasanble lekel ki ti premye vann zil Cousine kin nonmen, dezyenmman mon le klarifikasyon lo kwa ki nou pou vote prezan apre ki noun tann li koze, lo later, oswa lo sa mosyon, oswa lo etranze.

 

MR SPEAKER

Dezyenm kestyon i deor. Premye  kestyon.

 

MR MANCHAM

Msye Speaker, eske sa boug i konnen pou dir…

 

MR WILLIAM

Matter of privilege

MR SPEAKER

Annou swiv en lord les mwa fini ek li.

 

MR MANCHAM

… pou dir lonorab, le gran msye reprezantan Cascade i konnen pou dir Soleil d’Or kot mon ti reste la, Larisi fek aste, ile Therese Larisi fek aste…

 

MR DE COMMARMOND

Cousine mon demann ou.

 

MR MANCHAM

avan ou  rod mwan Cousine, annou pa rod sa ki’n pas 20 an, 50 an, annou koz sa kin fek pase la.  Larisi pa fek aste Ile Therese e Soleil d’Or pa en lot Larisi ki fek aste sa.  Mwan ki ti donn permisyon sa? E ou la.   

 

MR SPEAKER

Order.  Nwa vote apre mwa ava ekout ou pwen si ou le anmennen.  In ler pou vote tou sa ki anfaver lev zot lanmen. (3 votes for)

Okenn ki kont.  (7 votes against). Alors mosyon in ganny defet.  Nou fini avek sa mosyon.

Onorab William ou ti annan en matter of privilege brievman, fer sorti ki pwen ki ou pe dir konsern privilege

 

MR WAVEN WILLIAM

Mr Speaker, mon ti lev mon lanmen pou koze e mon pann ganny sans pou koze e prezan letan monn ekout onorab Mancham fer son wrapping up, me la fason ki in enterpret serten issue dan son wrapping up i pe donn lenpresyon pou dir mazorite manm kin koze ki pe dir pou vot kont sa mosyon ki enkli mwan kin vot kont, komkwa ki nou annan serten meanness kont bann etranze, nou kont bann etranze e sa mon tia kontan fer sorti pou dir sa i fo, akoz nou mekontantman se konsernan sa bout later ki issueIssue se ki nou pe dir nou dakor linitiatif ki pe pran, me sa issue bout later se sa ki nou kont, se sa ki mon ti anvi raise.

 

MR SPEAKER

Ok, petet brievman mwa fer sorti.  Letan nou dan politik nou dan en parlman nou pe zwe sa zwe deba, sakenn pou vin avek son argiman, sakenn pou sey met en enterpretasyon, enn pou krwar ou mean lot pou krwar ou pa mean, lot pou krwar ou pe lager zis lo later, lot i pou enterprete, ou pou gannyen sa.  Vwala.  Argiman i annan trwa kalite, i annan i pou sey zistifye son pozisyon, defann son pozisyon, dezyenmman i pou sey konvenki ou ver son argiman e trwazyenmman nou pe sey argye pou konvenki lezot ki pe ekoute.  Bon nou fini avek sa, nou vin lo lot mosyon devan nou.  Mosyon prezante par onorab Barry Faure.

 

MR BARRY FAURE

Msye Speaker, i 4.35 lo mon mont la.  Sipoze fini 5 er.

 

MR SPEAKER

Ou pou pli long ki sa.

 

MR BARRY FAURE

Mon pou apepre 30 minit.

 

MR SPEAKER

Dan sa ka nou pou break nwa ava zwenn lot mardi.

 

 

At 4.35 p.m. the Assembly was on its rising, adjourned to Tuesday 15th April 1997 at 9 a.m.