::
Home » Archives » Verbatims - First Term 1997 » Tuesday 25th March 1997

Tuesday 25th March 1997

NATIONAL ASSEMBLY OF SEYCHELLES

 

Tuesday 25th March 1997

 

The Assembly met at 9 a.m

 

Mr Speaker in the Chair

 

The National Anthem was played

 

 

MR SPEAKER

Bonjour tou onorab, Minis e piblik ki pe ekoute.  Dan kominikasyon ozordi  mon annan en konplent anba lartik 102 paragraf 6 konstitisyon, repons in ganny sirkile.  En konplent fer par Msye Phillip Boulle.  Dan son repons bout ki relevan in dir; exercise my right of reply under article 102, paragraph 6 of the Constitution due to the fact that the Honourable nominated Member Mr Hugh Payet,  has misinformed the public that I am retired. 

Lesansyel se i pe dir onorab Payet in dir ki li in pran son retret politik.    Msye Boulle i dir sa i pa le ka.  Avek sa nou vin lo question time.   Kestyon ozordi tou pou minis tourizm e transpor.  Kestyon nimero 17, onorab Christopher Gill.

 

MR CHRISTOPHER GILL

Thank you Mr Speaker.  I would like to ask the Minister of Tourism and Transport whether she can inform the House the progress on such developing markets as the Indian, Singaporian, Malaysian and Japanese markets.

 

 

MINISTER DE COMARMOND

Mersi Msye Speaker.  Bonjour tout le monde.  Msye Speaker pou reponn kestyon onorab Gill, mon oule dir ki performans rezyon Lazi, an term logmantasyon kantite nonm viziter ki ti ariv Sesel an 1996 in pli byen ki nou bann lezot marse tradisyonnel.  I ti rikord en to logmantasyon 75% lo lannen 1995. 

Dapre lorganizasyon mondyal touris, rezyon les Lazi e Pasifik  i annan pli gran potansyel pou outbound travel parmi tou bann rezyon dan lemonn.  Par egzanp nonm Zaponnen ki  sipoze vwayaze an deor Zapon sa lannen i estimen i pou ape pre 10 milyon, set a dir 12% son popilasyon.  An sa ki konsern marse Endyen, sa i konpri 3 milyon dimoun ki vwayaz an deor sa pei pandan sak lannen.  Bann endikasyon i osi montre ki sa bann marse swivan i annan gran potansyel pou outbound travel  set a dir Sid Kore, Sengapour, Malezi, Endonezi, Thailand,  e osi provens Taiwan. 

An sa ki konsern La Chine, li osi i kapab zwe en rol enportan dan international travel industry.  Swivan devlopman ekonomik rapid sa pei dan bann dernyen lannen, swivi par liberasyon outbound travel,  i fer ki sa pei pou zwe en rol dominan e enfliyansyel lo lasenn travel and tourism  dan sa rezyon. 

Marse bann pei les Lerop i osi annan gran potansyel, tou spesyalman Czech Republic, Slovania Republic, Hungary, Poland  e sirtou Russia. Pli pre avek Sesel La Reunion osi pe montre en potansyel.  Pou le moman nou resevwar preski 3% nou marse sorti La Reunion.  En tel marse ki nou apel sa short haul,  osi kapab enteresan pou nou dan lavenir.  Me sa i nesesit ankor enpe plis resers dan sa marse pou determin son vre potansyel. 

Mon minister i voudre akord en pli gran priyorite lo marse Lazi ki annan en gran potansyel high spending power.   Me pou mwan kapab fer sa mon bezwen en bidze apropriye e sipor tou dimoun konsernen pou nou kapab penetre sa bann marse e profit enpe sa biznes ki lezot destinasyon pe retir bokou profi deza.  Mersi Msye Speaker.

 

MR SPEAKER

Siplemanter.

 

MR C. GILL

Wi mon ti a kontan demann Minis si i ti kapab  donn nou en lide konmsi ki bann progranm ki anvizyonnen ki petet sa lannen e a lavenir zot pou enplimante pou atir sa bann touris dan sa bann lezot pei ki ziska konmela nou konnen i annan ankor en gran potansyel pou Sesel.  Mersi Mr Speaker.

 

MINISTER

Parey monn dir i nesesit avwar en bidze  apopriye pou ou kapab fer nenport kwa, ki travay ki ou anvi fer sirtou an sa ki konsern travay marketing  e promosyon i demann sifizaman resours pou ou kapab fer li.  Pou sa lannen noun kapab allocate ape pre en demi milyon roupi pou serten sa bann marse, set a dir Lenn, Japon, Sengapour akoz deza laba an Japon e Lenn, nou  annan reprezantan, nou espere byento  apwent en reprezantan an Sengapour e mon pa ti a voudre al dan detay nou marketing plan  akoz sa normalman nou evite fer li akoz pou de rezon ki obvious akoz ou annan ou ou bann konpetiter otour ou. Me si  nou ti kapab ganny plis resours evidaman ti annan bokou plis travay ki nou ti a fer.  Mwan prosen nou pou annan sa ki nou apel en gran Indian Ocean Tourism Fair Jakarka, Lendonezi ki tonm dan kad progranm Indian Ocean Tourism Organisation  e apre bokou negosyasyon sa lannen Sesel son tour pou fer lansman Indian Ocean Tourism Fair.   Mwan menm personnelman mon pou reprezant Sesel laba pou nou fer sa lansman e nou pou annan en delegasyon sorti Sesel pou nou kapab si oule fer konnen legzistans Sesel dan Lendonezi limenm e pou annan bokou lezot  tour operater, lezot dimoun enterese ki pou vin sa fair  e byensir deza i ava en lokazyon pou  nou konsyantiz dimoun.  Zis pou donn ou en lide, minimum cost  ki pe kout nou pou sa partisipasyon i ariv US$60,000 e la ankor i pa en gran zafer ki nou pe fer.  Nou pe fer li minimum posib me zis pou donn ou en lide konbyen i koute ler ou bezwen fer serten promosyon kot ou bezwen anmenn bann latroup kiltirel, ou bezwen anmenn bann chefs,  bann cooks kot ou pe al prezant ou lakwizin, ou kiltir, ou ladans ensi-d-swit, kot ou bezwen anmenn ou director marketing,  kot i bezwen al fer prezantasyon, ou bezwen annan films,  ou bezwen annan,  you name it,  tou kalite lenformasyon, ou bezwen anmenn tou ou bann CD rom, ou bezwen sifizaman brochures pou prezante  ensi-d-swit i kout pa mal larzan.  Sa zis pou donn ou en lide.  Dan marse Lenn i deza annan travay ki noun fer.  Mon krwar deza Sesel  si oule i ase koni, noun fer en kantite zefor an Lenn pandan sa 2 dernyen lannen.  Mwan menm monn ale an plizyer repriz. 

Sengapour parey mon pe dir ou tre byento nou pou apwent en reprezantan an Sengapour e sa tou sala i liye osi fodre fer rapel avek vol ki nou annan dan sa bann pei.  Pou le moman Air Seychelles  i annan en vol ver Sengapour.  I pe remet son 2 vol pandan mwan mai e mon espere nou a kapab kapitaliz lo la e  Air Seychelles osi i annan son progranm.  Evidaman nou bezwen travay tre pros avek nou lalinny aeryenn pou asire ki nou maximise e nou tir otan profi dan nou bann travay promosyon ki nou fer.  Mersi Msye Speaker.

 

MR GEORGES BIBI

Msye Speaker mon ti a demann Minis ki ti pozisyon marse lazi an 1996 kot i konsern touris isi, lefe ki Minis in dir nou ki an 1995 ti annan en ogmantasyon 75% e dezyenmman ki kantite larzan e zefor kin ganny mete dan sa bann marse.  Si i kapab donn nou en sif silvouple. Mersi.

 

MINISTER

Lo 130,955 touris ki nou ti gannyen lannen pase ladan nou ti annan 11,255 ki ti sorti Lazi e parey monn dir ziska la nou pann envestir a monn avi sifizaman dan marse Lazi.  I nou lentansyon si oule dousman pou nou kapab reverse  sa sityasyon.  Noun konsantre bokou dan nou bann marse tradisyonnel me la ankor i vin en kestyon resours.  Nou annan son problenm byensir resours an term larzan, e fodre nou pa osi bliye ki lannen pase sirtou noun ganny kan menm pa mal problenm deviz etranzer pou nou kapab si oule satisfer nou bann marse tradisyonnel e noun ganny bokou difikilte pou kapab fer sa e pou al dan lezot marse i pann fasil vreman pou nou.

 

MR BIBI

Msye Speaker Minis i dir mwan zot pann envestir bokou.  Mon ti pe demann Minis si i ti kapab donn en lendikasyon konbyen son minister in depanse avek marse Lazi ziska prezan.

 

MINISTER

Noun depans ape pre R200,000 lo marse Japon e ape pre R200,000 lo marse Lenn lannen pase.  Kant a Sengapour nou pann envestir naryen ensi ki bann lezot.  Menm lo marse Israel mon devret dir ki pou le moman statistik i kont Israel dan marse Lazi.  E menm Israel   malgre nou ti annan en reprezantan laba lannen pase nou pann donn li okenn larzan pou li kapab fer travay me ti menm reprezantan ki ti pe reprezant Air Seychelles me nou ti donn si oule bann serten sipor in kind,  me pa neseserman direkteman in money terms ou  kapab dir.  Mersi.

 

MR C. GILL

Aparaman i annan en  gran ogmantasyon dan bann touris sorti dan Lenn.  Eski le Minis i kapab dir nou ki stratezi zot in servi pou aport sa sikse ki ozordi nou annan bokou sitwayen sorti dan Lenn pe pey bann vizit isi Sesel.

 

MINISTER

Msye Speaker an sa ki konsern marse Lenn lannen pase noun ganny nou 1540 viziter sorti Lenn kin donn nou en logmantasyon ape pre  103% lo 1995. Parey ou konnen film industry in zwe en rol   primordyal dan sa konteks.  Nou ti ganny bokou dimoun ki ti vin fer filming isi lannen pase.  E enn bann stratezi ki nou ti adopte se travay bokou avek medya.  Noun envit bann zournalis Endyen kin vin isi lo en baz regilye e ler zot in tournen zot in ekri byensir dan medya laba.   Sa mon santi in osi ede e noun apwent en reprezantan New Delhi.   Li osi si oule in fer serten travay kin ede dan sa domenn.  Noun annan bann tourism fairs  dan ki Sesel in reprezante.  Mwan menm personnelman monn ale e noun donn bokou entervi avek lapres.  Ou vwar pou sak marse diferan metod i ganny servi e efektiv.  Kant a Lenn paregzanp son medya i zwe en gran rol.  En marse parey Lalmanny li osi medya i zwe en gran rol paregzanp.  Si oule vwala en pti pe dan Lenn travay ki noun fer e nou espere nou a kapab fer enpe plis dan lavenir.  Mersi.

 

MR SPEAKER

Dernyen kestyon.  Onorab Chow.

 

MR PAUL CHOW

Eski Minis i kapab dir nou si son minister in fer okenn demars oubyen i pe sey fer okenn demars pou ganny en airline  ki sorti dan enn bann pei Lazi pou vin apoz Sesel ki petet i a kapab ogmant kantite touris ki nou gannyen sorti laba.

 

MINISTER

I annan serten demars kin ganny fer.  Par egzanp personnelman ler mon ti  an Lenn mon ti ganny diskisyon avek management Air India.  I annan petet en posibilite fer en stop over Sesel en zour nou pa konnen.  Me an sa ki konsern lezot linny aeryenn mon konnen i annan serten demars dan le pase kin fer viz-a-vi Singapore Airline me pou zot i pa ase si oule lucrative,  zot pa enterese me i plito Air Seychelles kin fer demars par egzanp pandan en bann lannen pou sey al Japon e i pann fasil pou zot ganny en slot ki zot ti ann voudre pou al Japon,  e parey nou konnen osi Japon bann kou pou avyon al laba pou apoz laba e pou reste serten kantite nonm erd-tan i kout pa mal larzan.  Nou pe al Lendonezi, nou konnen ki Air Mauritius apre sa tourism fair lannen pase, Air Mauritius ti fer bann demars pou al Endonezi e soon after in al Endonezi e i pe fer en bon sikse lo sa marse.  Sa i en posibilite ki nou pe eksplore.  Monn deza fer bann travay debaz pou sa.  Mon krwar i pou napa en problenm si Air Seychelles  i oule al Jakarta.  Kant a  Malezi osi i kapab ganny traffic rights.   Mon krwar sa i pa en problenm me pou lezot sa bann lalinny aeryenn vin isi nou pann fer sa bann demars vreman ase agresiv.  Petet sa i en keksoz ki nou devret eksplore me selman vi ki Air Seychelles  i deza annan sa 2 vol Sengapour mon krwar tou le 2  vol i ti kapab konsidere konekte avek en lot destinasyon apre turn around pou Sesel.  Sa i en gran posibilite  e 2 flights ver Sengapour ki kapab connect avek lezot pwen an-n Azi mon krwar i ti a sifizaman pou nou, depandan lo byensir son yield,  e ki kantite poursantaz nou kapab ranpli sa aircraft. 

 

MR SPEAKER

Kestyon 18.

 

MR C.GILL

Wi mon ti a kontan demann Minis pou tourizm e transpor ki son minister pe fer pou koup pri oswa redwir pri bann car hire fees isi Sesel konmela.  Mersi.

 

MINISTER

Msye Speaker bann operater car  hire  in toultan lib pou regle zot car hire fees. Ler gouvernman in esey entervenir dan lepase pou regle pri dan serten aktivite ekonomik pei, in souvann fwa ganny kritike.  An 1995 gouvernman ti deregulate set a dir i ti anlev sa quota 30 car hire operators  ki ti annan dan le pase e i ti les marse lib.  Ver lafen 1996 gouvernman ti osi redwir nonm minimum loto ki en car hire operator  i kapab annan dan son fleet sorti 15 pou vin 5.  Maximum loto dan fleet  i reste 28 plis 2 luxury VIP cars.  Maximum laz loto dan fleet  i reste touzour 5 an.  Depi ki sa bann sanzman in arive, 2 nouvo operators  in apply e zot in ganny zot license.   E nou annan 10 zisteman yer swar monn fek vwar en laplikasyon, i fer 11 nouvo aplikan kin fer demann.  Sa ki mon minister i anvi vwar se ki servis ki ganny ofer bann kliyan i vin depli-zan-pli meyer an relasyon avek pri ki ganny sarze.  Sa vedir sa gran prensip value for money ki nou pe kontinnyelman promouvwar.   Mon espere avek sa bann sanzman polisi, avek sa bann fleksibilite kin ganny entrodwir dan sa biznes, bann operater i ava pli konsyan zot rol e zot responsabilite pou donn en pli bon servis a en pri konpetitif.  Mersi Msye Speaker.

 

MR C GILL

Eski le Minis i kapab dir avek lasanble nasyonal ki en konsomater i kapab fer dan bann ka kot i santi en car hire pe viktimiz li.  Apard ki rann sa loto, dan bann ka kot zot pe ganny sarz bann pri enorm dizon R350 par zour pou en loto fermen ki aircon pa marse, lapo lo volan in pouri, petet son fren pa marse, son larou in bannann, bann keksoz konmsa.  Eski Minis i kapab donn nou en pti leksplikasyon parske mon krwar sa bann ka i egziste.  Mersi.

 

MINISTER

Msye Speaker sa dimoun i kapab fer en appeal  avek Licensing Authority eksplike.  I osi kapab fer son konplent.  Ler mon dir appeal si oule konplent avek Licensing Authority e osi avek mon minister.  I annan en seksyon responsab pou sa ki kapab investigate  e pran aksyon neseser ki fodre avek sa car hire operator  an partikilye.  I annan de ka kot in arive kot aksyon in ganny pran an kolaborasyon avek minister avek SLA kot paregzanp license  sa dimoun in ganny sispann.  Pa neseserman pou en rezon ki oun donnen an partikilye me pou lezot rezon.  Sa vedir si oule i annan sa mwayen kot sa dimoun i kapab fer son konplent e kot aksyon neseser i kapab ganny pran baze lo validite sa konplent.  Mersi Msye Speaker.

 

MR  DANIEL BELLE

Msye Speaker mon ti a kontan demann Minis si i panse ki logmantasyon taks lo car hire  e logmantasyon taks osi parfwa lo bann pyes detase si sa pa fer ki loto pa kapab vin pli bon marse me i a vin pli ser, car hire fees. 

 

MINISTER

Msye Speaker sa i depan lo sak biznes ki mannyer zot operate zot business ki mannyer zot overhead cost i ete, ki mannyer zot kontrol zot cost,  ki mannyer zot operate  zot aktivite.  Evidaman tou sala i bezwen ganny pran an konsiderasyon ki lapey travayer, ki taks, ensi-de-swit.  Me mon krwar leksperyans in montre ki malgre in annan tou sala, car hire operators  an zeneral zot in nobou survive.   Mersi Msye Speaker.

 

MR PAUL CHOW

Msye Speaker mon ti a voudre demann Minis ki rasyonal ki gouvernman i servi pou met en maksimonm   kantite loto ki en car hire firm  i kapab annan a 28   e ki si gouvernman pa konsidere ki petet i neseser pou les bann car hire  ki pli efficient  ki nobou kapab donn en bon servis, annan loportinite pou zot ogmant kantite loto, plis ki sa 28 pou zot nobou kapab petet i ava menm fer pri car hire desann.

 

 

 

MINISTER

Sa i en issue  kin annan pa mal deba lo la pandan letan ki nou ti pe revwar nou tourism policy  an 1994.  I en issue osi ki si oule tan-za-ot i monte dan bann meeting ki mon gannyen avek car hire operators association  me sa ki etonan se ki an zeneral bann car hire operators zot menm pa neseserman sa ki zot oule.  E i annan sa lespri, sa pwennvi kot gro pwason pou manz pti pwason kot bann ki kapab afford  bann ki annan kontak, ki kapab ganny sa resours i pou ogmant son fleet  to the detriment of bann ki pli pti ki pa pou kapab sirviv.  Sa i en school of thought  i en largiman ki ganny anmenn devan.  Mon pran not ou lot argiman, sa osi i en largiman ki serten lezot i anmenn devan.  Me pou le moman dan konteks nou devlopman gouvernman in vwar li neseser pou lenstan pou kapab, pou gard sa koman i ete me olye annan menm kantite car hire operators  ki annan plis loto, les li ouver.  Parey monn dir avan nou tin limit osi lo serten nonm car hire operators in les li ouver kot plis dimoun i kapab partisipe e kot in les minimum vin 5 olye 15 pou donn bann pti antreprener sans kapab zot osi partisipe, dizon kan menm komans par 6, 5 loto.  Gouvernman in prefer sa opsyon rather  ki lot opsyon les serten annan nenport kantite loto ki zot oule.  Akoz gouvernman i santi ki sa ti a pli benefisye nou pep an zeneral.  Mersi Msye Speaker.

 

MR SPEAKER

Kestyon 19.

 

MR C. GILL

To ask the Minister of Tourism what are her detailed plans to make Seychelles a more affordable destination, in the near future.

 

MINISTER

Msye Speaker sa kestyon i en pti pe si oule  anbigye me mon prezimen onorab Gill pe demande koman nou fer Sesel vin en destinasyon pli bon marse.  Ofet..

 

MR C GILL

Pa bon marse, koman en  cheap destination  me selman, you know,  affordable. Pri rezonnab.

 

MINISTER

Well  ki rezonnab in your eyes,  ki rezonnab dan lizye lot, it’s arguable.

 

MR C GILL

Dan lizye touris.

 

MINISTER

Bon depan ki kalite touris.  Kot i sorti.  Ki son nivo.

 

MR C GILL

Bann touris rezonab.

 

MINISTER

Bon petet sa ki mwan mon oule dir se ki ofet nou polisi pou gard Sesel koman en destinasyon egzotik, en destinasyon de rev kot, i pa kout bon marse pou vizit Sesel, set a dir kot nou pa oule cheapen  nou destinasyon  parey ou menm mon krwar oun tenir kont oun dir.  Selman sa ki nou bezwen asire se ki nou donn valer pou larzan, sa mon krwar i kler. Tou nou managers  ler nou zwenn tou le-zan i kontinnyelman fer nou rapel, tou nou  tour operater i dir nou menm zafer.  Nou bezwen asire ki nou donn bann viziter valer pou zot larzan ler zot vin isi avek bi ki nou ti a kapag ogmant nou sif repeat visitors.   Anfen si sa i kestyon mon ti a kontan zis fer ou rapel ki apre bokou diskisyon ki mon minister ti fer an 1994 avek tourism trade  e osi avek minister finans, nou ti reviz nou politik tourism  dan son lansanm e an 1995 konsesyon IPA pou sekter tourism osi byen pou lezot sekter ekonomik nou pei ti ganny entrodwir.  Sa lalwa ti ganny aprouve par lasanble isi e in ganny met an-n aplikasyon depi 1995.  Apard bann operater ki kalifye pou IPA status  i annan osi lezot konsesyon ki ganny akorde dan diferan ka.  E ou a  rapel   osi ki mon krwar bokou zefor in ganny fer par gouvernman pou kapab redwir depi social security, pri manze diferan kalite ensi-d-swit, tou sala ti ganny fer dan en lespri global pou benefisye nou pep, osi byen lendistri tourism akoz mon rapel ler nou ti pe fer sa bann diskisyon ti annan bokou largiman ki ti anmenn devan, konbyen sa bann keksoz i koute. Par egzanp mon rapel tre byen ti en issue tre so si oule konsernan pri prawns, paregzanp.  Apre pri prawns  ti desann konsiderableman me mon krwar si mon pa tronpe bann pri dan restoran ti reste parey.  Msye Confait i konn byen sa.  E nou pann vwar bokou sanzman.  Sa vedir mon pa konnen ki sa ki nou pou bezwen fer ankor pou kapab fer sa destinasyon vin pli affordable parey ou pe dir akoz mon krwar i relativ finalman.  E mon ti a zis oule azoute osi ki sa bann etablisman kin fer sa zefor pou amelyore, in benefisye sa bann konsesyon, zot in ogmant zot to lokipasyon dan zot lotel, zot in amelyor zot pri e zot pe pey zot license,  e zot business tax, so vwala Msye Speaker ki mon ti oule dir lo sa kestyon.  Parey mon dir i en kestyon ki nou kapab diskit bokou lo la.  Mersi Msye Speaker.

 

MR C. GILL

Dan bann ka kot noun fer pri serten komodite desann ou pas sa savings on avek bann touris, bann konsomater, eski minis i kapab dir nou ki son minister i anvizyonnen petet pou fer a lavenir dan bann ka kot paregzanp dan bann lotel kot pri depi zanvye in monte par 30% pou manze, pou beverages,  bann keksoz konmsa.  Aparaman progranm pa pe tro marse.

 

MINISTER

Msye Speaker i anann en lot kestyon plitar lo beverages,  petet nou ti a pran sa tou ansanm apre..

 

MR C. GILL

Kestyon 20 i lo labyer aktyelman me selman par egzanp lo nivo parey manze, mon konnen noun fer bokou bann pasta desann, fromaz, me selman nou vwar pri sa bann keksoz i pe monte li, i pa desann.

 

MINISTER

Wi, si ou demann mwan, wi petet mon ti devret throw it back to you akoz vreman konmsi ki ou fer?  En mwayen, ou etabli pri kontrol?  E koman ou posibleman fer sa an sa ki konsern nouritir dan en lotel, vreman.  I a menm ase difisil avek labwason, nou a vin lo la plitar me ek manze ki ou fer.  Si pa demann ou konsyans, bonn volonte, lentere tou dimoun, sa understanding antre nou pou nou kapab mentenir pri dan en tel fason, ki i akseptab pou dimoun e zot santi zot pe ganny sa valer pou zot larzan.  Mon krwar i vreman sa.  Mon krwar sa ki nou bezwen note osi, nou bezwen vwar osi ki pe pase otour nou dan lezot destinasyon.  Mon krwar bann ki ganny sans vwayaze, resaman par egzanp Lendonezi mon rapel, Mme Potter e mwan menm nou ti pe konsyaman pran tou keksoz note e konpare.  Si ou pran par egzanp bann mini bars, pri manze, mon sipoze mwan menm monn vin konsyan sak fwa mon order  en keksoz otomatikman mon pe convert,  mon pe konpare e krwar mwan en bon pe sa bann landrwa konmela ou ale, byensir ou pe bezwen compare like with like,  nivo sa lotel ensi-d-swit, mon pa kapab dir mwan pou dir Sesel i bokou pli ser.  E sirtou ler ou pran dan ka Sesel kot parey monn dir taler i relativ dan le sans ke kot nou bezwen enport laplipar nou nouritir, kot kou travayer relativman parle i ase o konparab dan la rezyon e ler ou met tou sala ansanm mwan mon pou dir ki i pa telman sa ser pou kriye.  Mon krwar sa ki dimoun pe rode se ki zot bezwen ganny sa valer.  Se sa service ki sa i ganny donnen ensi-d-swit ki nou pe fer sa zefor pou nou kapab kontinnyelman amelyore.  Mon krwar in annan serten progre dan sa domenn me mon krwar i sa lefor konzwent ki nou bezwen pou tou dimoun kapab fer li dan sa lespri pou nou promouvwar nou destinasyon e i annan defwa mon krwar in tro, mon krwar in en keksoz kin anzandre dan nou, ki zis nou dir Sesel i ser, Sesel i ser kan nou bezwen konpar li vreman avek lezot.

Si ou pran en pei dan Karaib par egzanp, resaman en dimoun pe donn mwan en legzanp, en lasanm lotel i kout $200 par zour, ler ou regarde ki sa travayer pe gannyen, kekfwa i pe ganny li lavaler 3, 4, 5 dolar par zour son lapey lo en lasanm $200.  Si ou pou konpar sa ek Sesel egzakteman ki mannyer i vini, ki mannyer i tonbe, ler ou pran son social security,   ou azout lo la ensi-d-swit,  you know  i annan tou sala, i annan defwa ou bezwen balanse gete.  I annan serten pei ki tir en kantite profi, serten operater dan serten destinasyon ki tir en kantite profi pou son gen personel, pa neseserman sa  wealth  i ganny partaze parmi lepep.  Si oule dan konteks Sesel mon krwar i diferan e vwala.  Mon krwar sa ki arive osi avek bann lotel souvann fwa restoran lotel zot ganny met anba serten presyon avek bann  tour operators pou redwir zot lasanm lotel, pou redwir zot pri lasanm.  Sa narive.  E prezan zot sey  make up  pou sa lo food and beverage.   Mon konnen  serten lotel par egzanp kin fer sa  dan le pase. Pou li kapab atir kliyan in tant pou redwir en pe lasanm lotel e in ogmant son  food and beverage.   Nou pe sey fer fason   reverse  sa sitiasyon kot nou pa bezwen depan tro bokou lo  tour operators.  Si nou ti kapab ogmant nou sif  direct clients,  nou santi nou tia kapab benefisye  petet en pe plis avek nou lendistri.

MR CHOW

Msye Speaker, mon tia senpleman voudre demann minis si i a konsidere pran en proporsyon bidze son minister pou apwent en  consultant  pou fer  en  micro economic study  lo ki fason, ki mannyer bann servis  provided  dan touris isi, restoran, tou bann zafer i nobou ki mannyer zot  economics  i marse, par egzanp mon krwar ki i annan en bon levidans  komkwa ki bann restoran kantite letan ki en dimoun i pran pou nobou ganny bann provizyon, bann zafer, tou sala i fer en lefe lo sa pri ki finalman i sarze lo son kliyan.  Eski pa tia en bon lide pou fer en  micro economic study  pou vwar kote ki annan sa bann  bottlenecks  ki petet ki pe kree sa kondisyon komkwa ki  nou annan en persepsyon, pri i o akoz dimoun i bezwen mete pou li kapab ganny en reveni alafen son biznes.

MINISTER

Mon pran not sizesyon onorab Chow.  I annan diferan fason fer li mon sipoze, me i en  sizesyon ki mon a  take note  mon a regarde posibilite.

 

MR SPEAKER

Dernyen kestyon onorab Belle?

Dan sa ka mwa donn ou, Onorab Gill?

MR C. GILL

Wi, eski le minis i kapab dir nou ki aktyelman konmela pou sa lannen ki bann lokasyon, ki bann destinasyon ki bann touris i frekante ki  i annan en  entry fee swa en  tax  pou antre, bann lokasyon pou gouvernman,  dan park nasyonal, bann rezyon koumsa.

MINISTER

Msye Speaker, si mon konpran onorab Gill, dan Sesel ki  bann diferan landrwa kot ou bezwen pey en  fee  pou ou kapab antre.

MR C. GILL

Wi, kot konmela gouvernman pe demann en  fee  pou la rantre, pou touris vizit sa bann landrwa.

MINISTER

Mon realize sa i en pti pe an deor kestyon, me mwa sey reponn bann ki mon kapab rapel an tet, i annan paregzanp  Vallée de Mai, National Park, i annan l’Union Estate La Digue, Curieuse, Couzen  mon pa tro sir, Aldrabra mon krwar pa si i annan en  landing fee  just yet, Jardin du Roi.  Annefe sa ki mon kapab fer Msye Speaker, rod sa lalis avek pri ki zot sarze e anvoy kot Msye Gill disi demen. 

 

MR SPEAKER

Kestyon 20.

 

MR C. GILL

Mon tia kontan demann Minis si i annan okenn keksoz son minister pe fer pou esey redwir pri labyer avek bann lezot bwar, lezot beverages dan bann letablisman lotel.  Mersi.

 

MINISTER

Msye Speaker normalman se minister finans ki responsab pou fikse pri e regle sa bann pri dapre regilasyon pri kontrol. Me dan ka ki sa bann regilasyon i konsern lendistri  tourism,  noun fer li an-n-etrwat kolaborasyon.  Fodre note osi ki ler gouvernman en  letan pase ti endrodwir  pri kontrol lo labwason dan lotel, se-t-a-dir an 1987 i ti annan bokou mekontantman parmi bann  hoteliers   ki ti dir ki zot pa pe fer ase profi. 

An 1993, minister  tourism  ti rekomande ki pri kontrol i ganny retire ler ki i ti ganny lasirans bann  hoteliers  ki pri pou ganny stabilize e kontrole par zot menm.  Sa ki noun vwar depi sa, bann pri pann neseserman redwir, me okontrer zot in ogmante enkli delo mineral.  Mon minister pe etidye sa sitiasyon tre pros afen ki i a kapab fer rekomandasyon apropriye avek gouvernman dan lavenir.  Me Msye Speaker, mon tia kontan antann komanter ou sizesyon lasanble  lo sa size ozordi.

 

MR SPEAKER

Lide i bon, komanter, selman avek respe nou dan  question time alors..   Supplementary?

 

MR C. GILL

Eski le Minis ti ava konsidere ou rekomande ki petet pri labyer i ava nobou desann avan prosenn eleksyon.

 

MR SPEAKER

Kestyon 21.

 

MR BELLE

Msye Speaker..

 

MR SPEAKER

Tyonbo en kou.  Konpran byen pa lanmen ki leve ki deside si ou ganny kestyon siplementer, sa i a diskresyon  Speaker.

 

MR BELLE

Me mon tia kontan  poz en kestyon.

 

MR SPEAKER

A diskresyon Speaker.

 

MR BELLE

A la diskresyon de Speaker, mersi. Msye Speaker, mon ti a kontan demann Minis si i realize ki dan Sesel bann beverage, delo ki a la baz sa bann beverage i deza li menm ser e delo pa ni delo mineral.  Ou pran par egzanp Val Riche, nou tou nou konnen ki si minis i konnen ki en sopin limonad i kout, ladan i annan delo, disik e  tou sord keksoz ki zot enporte, i kout pli bonmarse ki en boutey delo Val Riche menm kantite.  Dan sa ka mon demande si gouvernman  ki limenm li ki kontrol sa delo i pa kapab fer sa vin pli bon marse pou letablisman touristik e pou Sesel osi.

 

MR DE COMMARMOND

Bwar delo tiyo.

 

MR SPEAKER

Kestyon 21, onorab Larue.

 

MRS MITCY LARUE

Msye Speaker, mon kestyon lannen pase in fer ki travay lo semen Anse la Blague in komanse, donk mon oule retir sa kestyon. Mersi.

 

MR SPEAKER

Kestyon 22, onorab Figaro

 

MRS MONICA FIGARO

Msye Speaker, mon tia voudre demann minis pou tourizm e transpor si i tia kapab donn nou en rapor lo progre renovasyon e reabilitasyon lo travay ki pe ganny fer lo lasose La Digue silvouple.

 

MINISTER

Koman nou konnen renovasyon e reabilitasyon lasose La Digue i relye avek progranm  devlopman lasose  Baie Ste Anne.  Apre negosiasyon final ki nou tin fer avek labank Afriken de devlopman e apre ki kontrakter Vijay ti ganny selekte lo baz ki son kotasyon ti pli ba, kontrakter pou pran posesyon  site Baie Ste Anne  a partir le premye avril sa lannen. Zisteman swivan mon vizit semenn pase Praslin in  deza fer en bon pe travay mobilizasyon lo lasose Baie Ste Anne.  An sa ki konsern La Digue, i depan kan bann, ki nou apel sa, bann  ship piling kin ganny  order  i arive ensi ki lezot materyo, nou estimen ki travay i ava komanse dan letan vann swet e nou panse ki si tou i al byen sa i ava ver mwa zen 1997.

 

MR SPEAKER

Okenn siplemanter. Kestyon  23. 

 

MRS FIGARO

Msye Speaker, mon ti a voudre demann minis pou tourizm e transpor si son minister i annan lentansyon pou reabilit sa 3 semen lo La Digue, Grand Anse, Belle Vue e Anse Gros Roche.

 

MINISTER

Mon oule enform manm onorab pou La Digue ki tou le 2 morso semen Grand Anse ek Belle Vue pou ganny repare sa lannen dan nou progranm road maintenance.  Zisteman semen Grand Anse i pou kout apepre R125,000 e semen Belle Vue apepre R50,000.  An sa ki konsern semen Anse Gros Roche, sa i annan en pli gro travay pou nou fer, nou estimen ki sa travay pou kout apepre R800,000 e noun fer en demann avek fon devlopman linyon Européen pou finansman neseser e nou ankor pe atann larepons.  Dapre nou progranm travay maintenance, nou estimen ki travay i ava komanse lo Grande Anse e Belle Vue pandan mwan avril 1997.

 

MR SPEAKER

Okenn siplemanter.  Kestyon 24

 

MR BELLE

Ou pa get mwan ditou.

 

MR SPEAKER

Onorab Belle,  monn fer kler supplementary questions are  at the discretion of the Speaker.  Pa vedir mon pann vwar ou e mon pe fer kler monn vwar ou.  Kestyon nimero 24.

 

(Intervention off mic by Mr Bibi)

 

MR BELLE

Ki mannyer. Nou annan enn er-d-tan edmi pou  question time.

 

 

MR BIBI

Onorab Faure pa ou ki Speaker, mon pe demann en kestyon Speaker.

 

MR SPEAKER

Onorab Bibi sa esanz ….

 

MR HUGH PAYET

Met lord ek zot, met lord ek zot.

 

MR SPEAKER

Kestyon 24

 

MR BELLE

Mon pa konnen. Be pa vo lapenn nou poz kestyon alor.

 

MR SPEAKER

Onorab Belle ou pou demann eskiz  oubyen ou al deor la deswit.

 

MR BELLE

Mon demann ou eskiz akoz mon krwar pa vo lapenn nou poz kestyon, sanmenm mon demann eskiz.

 

MR SPEAKER

Be mon pe demann ou sorti la konmela.  Ou mank respe

 

MR BELLE

Anfen, si nou pa kapab poz kestyon, mon sorti.

 

MR DE COMMARMOND

Pou en dirizan ou malelve.

 

MR D. FAURE

…. Mancham ler i vini.

 

MR SPEAKER

Kestyon 24.

 

MR ROGER TOUSSAINT

Mon kestyon se pou demann Minis pou touris ek transpor si i kapab enform lasanble akoz proze  pou elarzi sirfas semen dan leo Maldive avek La Gogue pankor deza komanse. 

 

MINISTER

Onorab Toussaint, parey ou konnen nou tin fer provizyon dan bidze pou larzi sa semen depi 1996.  Avan ki travay ti kapab komanse, ti neseser pou ganny permisyon bann proprieter tout olon kot  alignment  semen ti pou tous lo zot propriete.   Land Transport Division  ti deside fer sa travay an-n etrwat kolaborasyon avek administrasyon distrik Anse Etoile evidaman pou ganny permisyon sa bann proprieter.  Ti annan en total 5 proprieter.  Bann plan e bann form neseser ti ganny donnen avek administrasyon distrik pou fer negosiasyon neseser, me malerezman in annan rezistans lo lapar serten sa bann propriyeter e alor nou pann kapab fer plis progre avek sa proze.  En dernyen  attempt pe ganny fer e si sa pa marse nou pou bezwen fer en demann avek minister devlopman kominoter e demann zot pou  take over e kontinyen negosiasyon ou si non i pou bezwen, mon panse, fer le neseser pou fer en  compulsory acquisition si pou nesesit arive dan sa zistans.  Mon espere ki non.   Si tou keksoz i al vit, nou a kapab fer sa proze sa lannen 1997 akoz noun fer provizyon  ankor dan bidze sa lannen.

 

 

MR SPEAKER

Okenn siplemanter

 

MR TOUSSAINT

Wi, msye  Speaker.  Lefet ki minis in esplik nou ki i annan en posibilite ki proprieter pa tro dakor, eski minis i kapab donn nou en serten  dele konbyen si oule, konbyen letan i espekte pran pou ki dizon bann dimoun ki reste dan leo Maldive avek La Gogue a kapab ganny zot en servis transpor piblik apropriye.

 

MINISTER

Msye Speaker si monn konpran manm onorab byen, ou pe demann mwan pou donn en endikasyon apepre kan nou tia kapab fer sa semen, si apre ki negosiasyon in fini.  Bon sa semen limenm i pou kout nou apepre R800,000 i enkli 150  met kare an tou kantite later ki nou pe rode e nou panse  osi pou  resurface sa semen antye finalman ler ki noun fini elarzi li,  resurface  li.  I pa en travay evidaman ki pou pran en kantite letan, me nou, nou tia voudre fer li sa lannen akoz noun fer provizyon dan bidze sa lannen.  Me parey mon dir ou i difisil pou nou konnen kan negosiasyon final in fini fer,  whereby  later i kapab ganny  hand over  avek Land Transport Division pou li kapab rantre fer sa travay.  Si sa i ganny fer sa lannen, evidaman nou pou fer li sa lannen, me osito ki tou le neseser i ganny fer  Land Transport Division  i ganny posesyon later i rantre i fer son travay zis apre. 

 

MR C. GILL

Msye Speaker, mon tia kontan demann le minis eski i pa krwar ki sa bann proprieter zot devret azir zot dan en fason en pe pli rezonnab e donn permisyon pou  Land Transport  antre e fer zot semen e pran legzanp avek sa proprieter Anse La Blague kin donn plis ki 10 arpan pou zot fer zot semen.

 

MINISTER

Mersi lonorab Gill.  Mon note, me malerezman i pa koumsa dan lavi.

 

MR DE COMMARMOND

Msye Speaker mon ti oule zis demann minis si i ti pou pare pou dir lasanble lekel proprieter ki pa pe pare pou korpere pou donn li leave.

 

MINISTER

Msye Speaker, non mon pa dan en pozisyon pou mwan kapab sit non sa bann dimoun konserne dan lasanble ozordi.

 

MR SPEAKER

Bon, avek sa nou fini nou kestyon pou minis tourizm e transpor e nou a eskiz li parmi nou.

Nou komans pran nou bann mosyon.  Premye pou onorab Ange Morel, si ou ti kapab prezant ou mosyon.

 

MR ANGE MOREL

Msye Speaker, mosyon devan lasanble se pou demann gouvernman pou entrodwir letid  computer  lo nivo segonder dan tou lekol.  Msye Speaker, pouvwar  computer e teknolozi in anmenn en lenpak mazer lo en kantite aktivite dan lemonn e dan Sesel, e  computer  in deza pran en plas enportan dan lavi tou le zour en kantite Seselwa.  Alor  i evidan ki si nou oule pran par e fer konpetisyon dan lekonomi global, i kler ki nou napa bokou swa, me pou  master  bann nouvo teknolozi ki egziste.  Pou nou kapab fer sa nou  bezwen alor entegre ledikasyon  computer  dan nou sistenm ledikasyon.

Msye Speaker, sa lavites ki sosyete Seselwa pe devlope i kler ki i pe anmenn avek li en kantite defi pou nou bann zenn ki pe etidye ozordi e san menm sa bann zenn ki demen pou pe antre dan lemonn travay e dan en monn travay kot zot pou antre dan bann travay ki pou diferan avek sa ki zot konnen ozordi.  Alor, nou bann zenn i bezwen devlop sa kapasite pou kapab adapte zot dan en lanvironnman travay ki pe kontinyelman evolye e an plis ki sa zot bezwen devlop  sa volonte e konfidans dan zot menm pou aprann bann nouvo fason panse e nouvo fason travay tou dilon zot lavi. Alor lentrodiksyon computer  dan lekol pou san dout ed nou bann zenn pou devlop sa kalite latitid ki pou definitivman prepar zot pou adapte avek bann  sanzman ki inevitab pou frap devan zot laport dan le fitir. Computer  i san dout en mwayen lansennyman dan lekol kot i kapab permet bann etidyan ganny akse avek diferan progranm edikasyonel ki kapab agrandir zot abilite entelektyel e menm ed zot pou entegre pli byen dan lezot size dan zot aktivite skoler.  Dan sa lalinny ledikasyon  computer  i a kapab vin en zouti tre prodiktiv pandan moman letid kot bann zouti koman  word processor, spread sheet, drawing programme e lezot ankor i a kapab vin tre itil pou nou bann zenn etidyan e kot i a  kapab ed zot par egzanp pou prodwi en proze oubyen lezot travay lekol ki pli byen e menm pli avanse.  An menm tan lentrodiksyon  computer  dan lekol i a osi ede pou devlop sa ki nou apel en computer culture  dan nou bann lekol kot etidyan i a kapab ganny ede pou ranmas bann abilite ki zot pou bezwen konmela e plitar dan zot lavi edikasyonel.  Anplis ki sa, i a osi ed zot pou pli  byen konpran lenpak ki bann sistenm lenformasyon an-n itilizan  computer i annan dan diferan sekter lekonomi dan lemonn e dan Sesel.  Gouvernman in lannen pase lans ledikasyon  computer dan S1 e S4  lekol Grand Anse Praslin koman en proze pilot e sa lannen menm proze i sipoze ganny entrodwir dan lekol Plaisance, Belonie, Pointe Larue e English River e sa i en sinny tre ankourazan. Me sa ki mon pe demande se ki sa menm progranm i ganny entrodwir dan S1, S2, S3, S4  dan tou lekol.   Alor pou nou fer zistis a tou bann zenn etidyan segonder dan Sesel mon pe formelman move ki sa lasanble i demann gouvernman pou entrodwir ledikasyon computer  lo nivo segonder dan tou lekol.  E pou fini Msye Speaker, mon  ti a demann tou mon bann koleg pou vot an faver sa mosyon.  Mersi.

 

MR SPEAKER

Okenn ki segonn sa mosyon

 

MR DICK ESPARON

Mon segonn sa mosyon.

 

MR SPEAKER

Deba i ouver.  Okenn entervansyon

 

MR ESPARON

Msye Speaker, mon krwar mosyon anmennen devan par onorab Ange Morel i fer bokou sans, la byensir avek la rantre Internet ki permet osi bann marmay a en laz tre zenn kapab devlop zot plis edikasyonelman e kiltirelman osi.  Mon krwar mon pa pou dir plis lo la, e mon krwar lasanble an-n-antye i dakor ki en mosyon ki fer sans e mon tia demande ki nou pran en vot lo sa mosyon.

 

MR C. GILL

Msye Speaker, mersi pou la parol. Mwan osi mon pa pou tro tarde avek sa mosyon parske i en mosyon ki mon krwar nou pe atann pou bokou letan e ann efe mon kapab dir ki onorab Morel i in step with reality,  in  step with the world  e mon mazinen ki tou dimoun dan lasanble i bezwen aport son sipor pou sa mosyon.  Selman mon ti a kontan tous lo enn de pti detay, petet mon kapab kontribye enn de keksoz  ki a lavenir sa ki pran sa mosyon pou enplimant li i ava konsider enn de pwen. 

Pandan sa detrwa lannen, sak fwa i annan en leta de nasyon ki ganny prezante par Prezidan Rene, Prezidan i enform nou ki sa lannen i pou antre dan  information  super highway.   Lot lannen i dir nou deza Seselwa pe surf the net.  I mean  sa bann keksoz en kantite dimoun pa konpran egzakteman ki son  phraseology,  ki son sans. Kantite Seselwa pa konpran ki prezidan pe dir nou ler i pe dir nou ki noun antre  or we’ve joined the information   super highway e bokou Seselwa deza pe  surf the  net. 

Msye Speaker, ler nou pe koz lo  information super highway,  ou kapab konpar li avek  industrial revolution  150 an pase kot feray ti ganny dekouver pou ganny servi dan en fason pou endistrialize dan bann pei Lerop avek Lanmerik e oun komans devlop bann nouvo lendistri pa tou le lannen me tou le zour e ler ou pe devlop bann nouvo lendistri an menm tan ou pe kree bann nouvo oportinite ekonomik e etan donnen ki Sesel ozordi in konekte avek sa  information super highway  nou isi Sesel nou kapab  surf the net,  i vedir ki nou kapab servi en  computer  dan nou lakour, dan en lasanm, dan en biro pou ganny enformasyon ki egziste partou lemonn.  Etan donnen ki nou kapab fer sa ozordi, en nouvo laport in ouver, en nouvo lafnet ekonomik in ouver pou nou isi.  Nou nepli bezwen fye selman  lo touris, nou nepli bezwen atann en konpannyen  oil exploration  pou dekouver nou delwil.  Nou annan en nouvo pilye ekonomik ki nou kapab komans servi e devlop li.  E sa i egziste ozordi menm, me le problenm selman nou konnnen bann ki swiv sa bann devlopman, nou konnen enn an lo internet, i vedir son progre, son lavansman, son devlopman dan  lespas enn an, 365 zour, enn an lo internet i fer 3 an nou lavi, dan bann pei modern, dan bann pei endistrialize.  Isi Sesel enn an lo internet i kapab fer nou 10an Sesel, konmsi lo nivo progre, lavansman, devlopman lo sa information super highway.  Rezon mon dir sa, nou napa sa kontak esansyel, nou napa sa kontak kritikal an pratik pou nou servi sa zouti kin ganny mete a dispozisyon lemonn antye preski.  Rezon nou napa sa zouti menm si nou kapab konnekte nou  computer, pou  surf the net,  menm tan ou bezwen annan en  understanding,  en rezonnman ki mannyer ou pou servi sa zouti e se sa kot  mosyon pou onorab Morel in prezante ozordi i apropriye. Le sel keksoz ki mon tia swete se plito ki nou komans li dan lekol segonder S4, nou komans li pli boner, parske nou konnen ki deor i en keksoz standar kot bann marmay 5an, 6an pe aprann zot bann leson lo  computer  konmela.  Zot pe servi sa zouti pou devlop zot lespri, zot pe servi li pou aprann bann lezot langaz, zot pe servi li pou aprann lir, ekrir, servi li pou fer zot  maths,  servi li pou fer resers lo nenport ki size e i komans sitan boner konmela dan laz en zanfan ki mon mazinen petet i en bon  lide pou komans li avek S4, i en komansman me selman mon krwar nou bezwen servi li bokou pli boner.  Pour ki si nou enterese kree sa  computer culture  nou komans li boner kot nou bann zanfan i abitye avek li, nou bann zanfan i devlop vitman avek li, avek menm lavites ki bann zanfan dan bann lezot pei.  Mwa donn ou la en legzanp Msye Speaker, ou konnen   computer  i kapab sanz lavi en zanfan.  Dizon baz lo sa teknolozi ki nou annan ozordi, dizon nou annan en zanfan sorti li dan en fanmir ki mizer, i napa akse avek bokou liv, me selman i annan sa lanbisyon, i anvi devlop li, i anvi avanse.  I al dan bibiliotek la anba, nou konnen i mank en bon pe  volumes.  Nou tia voudre annan bokou plis liv pou  bann zanfan isi servi, pou met a  zot dispozisyon.  Ozordi konmela en zanfan sorti Corgat Estate, i kapab desann la dan bibliotek nasyonal, konekte si ou ti annan sa teknolozi, konekte avek  Library of Congress United States  e ganny menm akse avek menm liv, menm materyo ki en zanfan Lamerik ki annan son larzan ki sorti dan en fanmir byen ere finansyelman ganny menm akse avek menm lenformasyon.  Ozordi sa i en realite, i posib.  Nou annan teknolozi ki nou kapab  apply  li e fer sa.  Alor nou tonm nou lo en lokazyon kot mon krwar i en mosyon tre-z-enportan.  I en mosyon ki pe pran an tet lavenir nou pei.  I pe pran an tet lavenir nou resours imen.  I pe pran an tet petet serten konsiderasyon ekonomik kot nou konnen nou bezwen  compete  pa selman avek  Maurice, pa selman avek Madagascar, ou bezwen  compete  la avek lemonn antye, parske de-pli-z-an-plis tou bann pei i ganny akse avek bann  computers  e  pli-z-an-pli en popilasyon i komans servi sa bann zouti, lemonn limenm li i vin pli pti, parske ou ganny akse ek enformasyon partou.  Alor mon felisit onorab Morel pou son mosyon e mon pou vot an  faver son mosyon e  donn li tou mon sipor.

 

MR CHOW

Msye Speaker, mwan osi mon oule anmenn mon sipor pou sa mosyon.  Prensipalman akoz mon krwar ki petet noun en pe an retar dan sa domenn.  Mon en pe sirprann par lentansyon gouvernman paregzanp pou fer en  pilot study  lo kestyon  computers. Sa adopsyon computer  dan bann lekol konmela preski tou pei sirtou bann  kin devlope in fini deza fer. Napa naryen anplis ki nou bezwen al aprann dan en  pilot study.   I annan en kantite levidans ki lenportans, ki lavantaz  computer  i annan dan bann lekol.  E ki nou devret fer se vreman rod loportinite pou ogmant sa kantite  computer  dan tou bann lekol ki posib avek resours ki nou annan.  Msye Speaker,  computers par limenm i  useless,  nou bezwen annan en serten lentelizans par deryer  pou servi sa computer. Ler nou anmenn   computers  dan lekol, nou bezwen osi devlop sa konesans bann etidyan pou zot servi sa  computer  dan en fason ki avantaze e benefis pou zot menm pou lasosyete. 

Msye Speaker,  computer  i en teknolozi limenm.  Lekol ou pa zis  devret nobou servi  computer,  ou devret osi konnen ki mannyer sa  computer  in ganny fer. Akoz sa i enportan.  Parske nou nou apel   paregzanp en  computer  sa ki nou vwar lo en biro, en  screen  avek en zafer ki asiz lo la, me i annan  computer  dan preski tou domenn aplikasyon konmela. Obor nou i annan en  computer, dan sa pti lenstriman ki kontrol tou sa bann  microphones ki la. I bezwen  annan sa baz ki en  computer  i bezwen se son  chip  teknolozi ki kontrol tou sa bann keksoz.  Tou le zour ler nou antre dan en loto, ler nou start   sa loto i annan en  chip  teknolozi ladan ki fer marse serten keksoz ki prezan nou nou pa bezwen al fer li mekanikalman.  E se sa ki nou bezwen entrodwi  computer  dan ledikasyon pou nobou kapab donn sa konesans sa  teknolozi, pou ed nou demen aplik sa teknolozi pou benefis pei.  Nou kapab devlop bann lenstriman atraver  servi  chip  teknolozi pou fer eksport.  Konmela i pa demann bokou, en dimoun avek en serten kantite lentelizans, met 2 keksoz ansanm e nobou envant en keksoz ki lemonn i bezwen  e lemonn i aste. 

Msye Speaker mon krwar nou tou noun antann koze lo  microsoft  e sa boug ki ti envant tou sa bann sistenm ki  computer  i servi konmela, Bill Gates. Bill Gates  ti kit lekol en zenn boug, i pa ti fini liniversite.  Ozordi li ki  responsab pou fer marse preski 90%  computer  dan lemonn, sa ki li i ti fer ki responsab pou sa.  Byensir i enn bann zonm pli ris dan lemonn konmela, a laz de 38 an e i ti vin en milyoner a laz de 23 an.  Msye Speaker  computer i osi donn nou pouvwar lo lenformasyon.  Internet  par egzanp i donn nou akse avek lenformasyon ki zanmen nou ti a kapab kalkile pou nou fer.  An preparasyon enn bann mosyon ki pe vini dan lasanble plitar  e pa annan drwa koz lo la, monn nobou akse preski dan tou pei dan lemonn ki annan sistenm sekirite sosyal e ki nobou  advertise  ki mannyer zot sistenm i marse pou gete ki mannyer nou kapab konpare par egzanp avek Sesel.  Sa monn nobou fer dan en lespas en demi er-d-tan.  Zis en demi er-d-tan monn nobou konnen ki mannyer sistenm sekirite sosyal i marse l’Amerique, Canada, l’Angleterre, La France, tou bann pei ki annan, kin pare pou zot met lo internet  nobou ganny akse.  Sa pouvwar pou annan lenformasyon i enportan pou en sosyete, i enportan pou en sitwayen  nobou kapab fer en desizyon valab.  Si i napa lenformasyon i pa kapab fer en bon desizyon. Ou  a dir en sitwayen vot lo en propozisyon, si i napa lenformasyon, i pa kapab fer en zizman pou konnen si i kapab vot wi oubyen non.  Sa i enportan pou nou donn nou sitwayen e  computer  i ede pou donn sa pouvwar lo lenformasyon.

Msye Speaker, byensir enn eleman  computer  se son  programming  e mwan mon krwar nou annan en kantite  zenn dimoun entelizan dan nou pei ki kapab vin en  pioneer  dan  programming  demen pou nobou fer marse   computer  dan en fason ki kapab, tou dimoun i ava aksepte pou dir  sa i en nouvo fason ki benefis bann pei e pou nou kapab dekouver sa bann dimoun, pou donn zot sa loportinite, nou bezwen donn zot en sans dan lekol de le komansman.  Nou bezwen pare pou nou met resours deryer sa pou siport annan plis  computers  dan bann lekol, donn akse nou bann zenn pou zot nobou servi sa bann  computers  e osi Msye Speaker, nou vwar par egzanp resaman politeknik in pran en bon pe letan avan in nobou sanz son kalite progranm ki i montre bann etidyan.  Mwan monn ganny akse avek en zenn ki vin fer en work experience, fek sorti dan politeknik, me i dir mwan pou dir dan politeknik zot  spread sheet  ki zot servi i pa ni    Excel,  i pa ni Lotus.  E nou konnen dan lemonn konmela,  spread sheet  ki pli akseptab, anfen ki pli fasil pou gannyen e ki tou biznes i servi se swa  Excel  oubyen  Lotus.   E mon demann mon lekor ki politeknik pe fer pou li pa konnen pou dir sanmenm sa ki egziste, pe montre zot en  spread sheet ki ler zot, zot pe vin dan lemonn travay, personn pa pe servi e petet an dekoulan ek sa mosyon, nou devret menm demann prezidan pou met en   task force  pou determinen  lekel bann  software  ki nou devret ankouraz bann lekol servi, rekomann bann ki annan plis aplikasyon konmela, plito ki nou zis pran enn, nou montre sa bann etidyan, ler zot vin dan lemonn travay, zot pa zwenn sa bann kalite  software  ki egziste.

Msye Speaker, nou pa oule retard vot lo sa mosyon, me selman mon krwar i enportan pou nou  underline lenportans  computer  technology   e akoz ki nou bezwen fer tou fason ki posib pou rod resours pou nou kapab entrodwir  computer  dan bann lekol.

 

MR DANNY FAURE

Msye Speaker se zisteman lapros ki minister ledikasyon in deside servi, se-t-a-dir pou kapab fer lentrodiksyon  computer studies   dan bann lekol segonder pou komans avek en pilot study  parey lonorab Ange Morel in dir nou. Mon krwar i annan, sirtou pou bann, sa de manm dan lopozisyon kin pran la parol i annan en kantite keksoz ki zot in dir.  Me mon tia kontan retourn lo perspektiv ki  lonorab Ange Morel in met sa mosyon devan.  Mon krwar i pe koz lo  access,  posibilite ki bann zanfan Seselwa ki dan lekol segonder i kapab annan en zouti pou zot kapab aprann  computer.   La nou pe koz lo en  curriculum.   Mon krwar dan sitiasyon e  dan konteks Sesel, i tre tre enportan lefe ki  curriculum  in ganny  designed dan en tel fason e ki mannyer ou entrodwir en lot eleman.  E mon krwar son lapros i enportan e ti a va byen osi pou nou konn rezilta sa  pilot study  ki pe ganny fer lo Praslin e lide fer sa  pilot  parey Ange in dir se pou kapab  spread it.   Me sa ki lonorab Ange pe dir se ki ou pa  restrict  computer studies  zis dan en nivo oubyen S4 ouswa S3.  I dir ou dan segonder savedir from S1 up to S4 e se mon krwar sa menm sa merit pli enportan ki annan dan mosyon lonorab Ange Morel.  E pou sela mon ti anvi remersi ou, lonorab Ange pou anmenn sa mosyon la e pou donn nou lokazyon pou koz lo la.  E an menm tan mon ti a kontan  reply  lonorab Christopher Gill, i  annan en resers pe ganny fer la ozordi dan lemonn sirtou en  institute  dan l’Amerique ek l’Angleterre pe gete le fe  computer  parmi bann zanfan ki pli zenn e mon krwar sa osi tia bon ki Sesel nou ekoute pou ki pa tou keksoz ki ganny fer  dan bann  pei industrial countries  otomatikman  nou pran sa koman en lanmod e nou komans imite.  Mon krwar nou bezwen  get bann keksoz  pozitiv, tir bann zafer negativ e gete ki mannyer nou kapab adapte dan nou sistenm edikasyonel.  E dezyenm repons pou lonorab Christopher Gill i vre ki sef deta la repiblik, dan 2 lokazyon in vin isi, in dir nou koumsa nou pe antre dan information super highway me pa vedir ki pep Seselwa pa konpran sa langaz. En pep ki annan plis ki 80% radyo se li, plis ki 60% televizyon in ganny konekte avek son lakaz, eski i pa kapab konpran kote nou ale.  Son diferans se donn posibilite annan en  computer  sak sitwayen.  Me pa vedir Seselwa pann konpran sa ki son sef deta in dir.  Se sa ki oun le dir nou, ki nou pa konnen – pep pa konnen egzakteman ki son sef deta pe dir.  In dir ou, in fini dir kot nou pe ale, i konpran li.  En lepok kot i ti napa radyo, dan lepok kot ti napa televizyon la ou a dir mwan i pa konnen, i pa vwar kler.   En pep ki  vwar CNN  tou le zour i pa konpran, i pa konnen egzakteman ki direksyon kot nou pe ale?  Mon krwar se sa ki nou devret esplike e ki nou devret dir nou pep se ki posibilite annan access avek sa bann zouti, me direksyon in fini konnen li.  I pa bet nou pep.  Mersi.

 

MR SIMON GILL

Msye Speaker mon krwar mosyon i an-n-ord e lonorab Morel in prezant en bon mosyon.  I enn bann meyer mosyon kin ganny prezante dan sa lasanble depi ler noun komanse e mon pe demande pou nou vot lo la.  Mersi.

 

MR SPEAKER

Bon, nou vote.  Tou sa ki an faver lev zot lanmen.  Inanim. Alors sa mosyon in ganny aprouve. 

Nou al lo lot mosyon prezante par Onorab Confait e mon envit ou pou prezant ou mosyon.

 

MR WALTER CONFAIT

Msye Speaker 3 zour pase dimans le 22 mars ti  the world day for water.   Sa i en rezolisyon ki lasanble zeneral  United Nations  dan son  47enm sesyon ti deklare ki le 22 Mars sak lannen i vin  the world’s day for water.   Slogan pou sa lannen se  the world’s water – is there enough? Dan nou konstitisyon drwa endividyel pou en  safe environment  i ganny rekonnet par leta kot sak dimoun i annan son drwa pou viv e  enjoy a clean, healthy and ecologically balanced environment.    World water day  i donn nou tou en loportinite pou tir latansyon gouvernman, sak zonm, madanm, zanfan lo lenportans delo.  I osi tir latansyon lo  nesesite pou gouvernman donn son departman ki responsab resours delo, larzan neseser pou li kapab kontrol sa resours tre presye pou nou.  Msye Speaker, sa mosyon devan nou i demann gouvernman pou enplimant en progranm ki  a garanti ki tou lakaz a ganny konekte avek delo trete par lannen 2000.  Mwa va esplike plitar ki mannyer sa progranm i kapab ganny fer atraver PUC, lezot minister gouvernman, departman e osi bann proprieter bann lakaz zot menm.  Sa kin vreman pous mwan pou met sa mosyon devan lasanble, se kondisyon anviron 30 fanmir oubyen anviron 200 dimoun ki reste dan  upper  Capucins.  Pou zot ganny zot bezwen delo tou le zour, zot ganny rakor fer en pti baraz kot en larivyer, e anmenn  sa delo direkteman kot zot lakaz.  An rezilta delo pa trete, i pa  safe  pou bwar e i pa  reliable.   Ler zot ouver tiyo kot zot, zot pa tro asire  si zot pou ganny sevret oubyen labou, oubyen ki sa ki pou sorti dan sa rakor.  Sak lakaz  vreman zot in met zot prop rakor e vreman sa sistenm delo anler laba i en pe  chaotic.  I en sitiasyon ki pa kapab kontinyen e ki bezwen ganny korize.  Apre konsiltasyon ek bann rezidan sa landrwa, bann teknisyen PUC, en solisyon ti ganny vwar e sa se pou konstrir en sistenm distribisyon delo trete tre modern.  2 pti dam pe ganny konstrir la konmela kot pe pran delo  dan 2 larivyer sa delo i ganny ramase i al dan en sedimentation tank, tou bann labou, bann salte i ganny depoze dan fon. Sa delo i al dan en pressure filter i ganny sterilize avek klorin, stor dan en gran basen epi distribye.  Anviron 100 fanmiy i kapab benefisye, oubyen anviron 500 dimoun a kapab benefisye ler sa i pou ganny met an fonksyon ver lafen sa lannen. 

Msye Speaker sa proze pe kout anviron R750,000 ki en gro investment  e en kantite larzan.  Souvan mon tann dimoun demande akoz delo fodre peye, akoz delo i ser.  Me fodre pa nou oubliye menm si delo i sorti dan larivyer oubyen i tonbe koman lapli i annan en kantite depans.  Par egzanp ou bezwen purify  sa delo pou fer li safe pou dimoun pou bwar.  Delo i abzorb bann kemikal bann prodwi pou lagrikiltir par egzanp, i annan bann suspended solids tou sala i bezwen ganny retire avan i vin safe pou dimoun bwar.   I bezwen osi ganny sterilize pou tir tou bann bakteri ladan.  Ou bezwen store  sa delo, par egzanp pandan letan ki i annan lapli, ou bezwen anmas sa delo ki ou kapab gannyen pandan letan lasesres.  Par egzanp Mahe i annan 2 gran dam ki noun fer, i annan dam Rochon avek La Gogue. 

Ler ou regard per capita, kou delo Sesel i ser.  Sa ou kapab konpran akoz Mahe i vreman tipti.  Menm si nou annan zis 2 dam Sesel nou bezwen anviron 20 treatment plants  e sa ou bezwen annan bann travayer pou fer, tou sala i ede pou fer delo vin ser Sesel.  Grander pei osi  pa ede paregzanp kantite tiyo, letan ou konpar avek en lot pei, ki ou bezwen Sesel i tipti e sa ou pa ganny benefis letan ou aste en pti git. 

Msye Speaker sityasyon ozordi 83% popilasyon Sesel i ganny access to treated water, balans zot ganny untreated water.  Mission statement PUC  i dir par lafen sa century 95% total population Sesel pou ganny en reliable source of potable water e zot pou retourn dan lanvironnman dan en fason safe  bann delo kin fini ganny servi.  PUC i confident  ki zot kapab achieve zot target 95% menm si zot pa pou konstri sa dam Grand Anse, par servi parey zot propozisyon sa water lagoon Le Rocher e Providence e ler zot fer sa zot pou fer en saving anviron R120 milyon.  

Pou ganny 100% delo trete, progranm ki gouvernman i kapab implement pou garanti sa i kapab swivan.  Pou 95% monn mansyonnen ki sa dan mission statement PUC zot confident,  kapab fer sa.  Sa 5% i kapab par egzanp ankouraz, fer bann tipti devlopman parey noun mansyonnen Capucins,  mon konpran ki Bougainville ek Baie Lazare osi i annan en proze konmsa.  Osi atraver en sistenm ledikasyon, atraver minister lasante, PUC, petet menm planning authority osi ou kapab ankouraz e fer available teknolozi pou tret delo bann lakaz ki enpe elwanye ou menm bann outer islands.   Sa lontan ti fasil, mon rapel nou ti kapab aste sa bann teknolozi oubyen sa bann lekipman kot  Temooljee ti anvant e sa mon krwar ki bann dimoun i kapab pran zot responsabilite pou fer sir ki zot ganny delo trete.

Delo trete Msye Speaker parey ler ki nou respire is a basic human right pou nou viv e mon krwar gouvernman e osi nou tou bann endividyel nou dwatet pran nou responsabilite pou fer sa vin en realite.  Msye Speaker I beg to move.

 

MR CHARLES DE COMARMOND

Msye Speaker mon segonn mosyon Msye Confait.

 

MR SPEAKER

Deba i ouver.  Okenn kontribisyon.

 

MR PATRICK HERMINIE

Parey labitid mon pou ekstrememan bref.  Mon a dabor aport mon sipor pou sa mosyon kin ganny avanse par onorab Confait.  Mon krwar i dezir tou gouvernman o monn pou donn delo trete a zot sitwayen.  Msye Confait dan son lentervansyon in met plizyer rezon akoz i neseser akoz sirtou in vwar soufrans bann dimoun Capucins pou donn delo trete en popilasyon. Personnelman mon profesyon i tel ki mon vwar en lot lenportans delo trete se son lenportans pou garanti en bon lasante parmi en popilasyon.  Nou konn tre byen, menm WHO tou dernyerman in deklare ki son theme pou sa lannen i deal  avek bann maladi ki pe re-emerge  e nou konnen enn bann kalite maladi ki pe re-emerge ozordi partou dan lemonn se bann maladi ki nou apel sa bann maladi ki water borne par egzanp kolera etsetera pou la senp rezon ki de-pli-zan-pli en gran popilasyon partou o monn pa pe ganny akse avek bann delo ki trete.  E pou sa rezon ki mon pou siport demann Msye Confait ki par lannen 2000 tou household  dan Sesel i bezwen ganny konekte avek delo trete.

Msye Confait dan son lentervansyon in osi koz lo sa kou lenvestisman, fodre pa ki nou les sa deter nou, lon term nou pou vwar ki i pou toultan cost effective  an term sirtou mwens larzan ki nou pou bezwen depanse pou sonny bann dimoun avek sa bann maladi ki rezilta en delo ki pa trete. Msye Confait in koz lo misyon PUC, mwan mon ti oule fer enpe referans lo la.  Mon krwar ki i en zafer pou nou koz lo misyon, lo statement  etsetera, an menm tan nou bezwen vwar enpe plis lorganizasyon pou fer sir ki sa bi ou demann Msye Confait i ganny realize par lannen 2000.  Nou bezwen vwar a sa moman bokou plis lenvestisman, non pa selman dan bann keksoz nouvo me osi dan bann ki deza an-n egzistans, maintenance nou sistenm distribisyon delo ki an-n egzistans dan Sesel ozordi.  Tou dilon sa mwan pandan 24 erd-tan, parfwa 48 erd-tan, Majoie par egzanp zanmen i annan delo trete pou lasenp rezon ki en nouvo vilaz in ganny ouver e  PUC pann planifye avan, i pann kapab predir konsekans ki en vilaz pou annan lo lot e konsekans se ki aprezan ou vwar 80 fanmiy i ganny delo trete e 200 fanmiy pa kapab ganny akse parfwa menm pou 48, 72 erd-tan avek delo trete.  E son konsekans parey monn deza eksplike i kapab serye e i pou neseser ki PUC i revwar konpletman son sistenm travay, son sistenm planifikasyon e fer sir ki by the time  i ariv lannen 2000 i vre nou pou annan lagoon Roche Caiman me an menm tan Majoie, Quincy dimoun pa kapab ganny akse avek delo ki trete.  E mon krwar ki petet avek sa lentervansyon e kestyon ki pe vin devan lasanble nou ava vwar en solisyon pou sa problenm Majoie ki pe al pou enpe tro bokou letan.

Msye Speaker mon ava terminen an donnan mon sipor pou Msye  Confait e nou zis swete ki PUC i ava kapab realiz son misyon, son rev ki par lannen 2000 tou Seselwa i ava ganny akse 24 erd-tan san problenm avek delo ki byen trete.  Mersi Msye Speaker.

 

MR SPEAKER

Bon avek sa nou a pran en break ziska 11 er.

 

(Sitting suspended until 11 a.m.)  

 

MR SPEAKER

Non a kontinnyen nou deba lo mosyon lo delo trete.  Onorab Bibi

 

MR GEORGES BIBI

Msye Speaker mwan osi mon pou anmenn mon sipor pou sa mosyon ki lonorab Confait in met devan lasanble e mon krwar pou dir sa mosyon i en mosyon ki lontan tin devret ariv devan sa lasanble.  Mon dir sa akoz si nou gete apre 18 an ki progranm gouvernman in fer pou bann devlopman kot i konsern tou bann devlopman lenfrastriktir tel ki lekol, klinik, lakaz me noun rekonnet osi ki tou sa bann lenfrastriktir dan tou bann distrik noun napa en progranm konpreansif pou enstal bann enfrastriktir pou fer sir ki delo i zwenn sa bann lakaz, lekol oswa sa bann klinik.  Nou kapab gete ki dan tou kwen Mahe, Praslin in annan bann nouvo lakaz, nouvo flats  kin ganny leve, kin ganny met an plas me malerezman si nou retourn an aryer nou pou vwar ki depi 1979/80, ki dernyen dam dan Sesel ti ganny konstrir.  Noun tann lonorab kin koz pli boner avan mwan in dir Majoie par egzanp i annan lakaz ki bezwen esper delo 48 er, 24 er, 72 er.  Sa i fer mwan realize ki progranm devlopman kin ganny fer i zis parey, lafason kin ganny fer i mank serten planifikasyon.  Lonorab in dir ki PUC i devret planifye son progranm pli byen.  E mon krwar pou dir ler en devlopman pe ganny fer parey par minister kominote devlopman i esansyel osi ki i annan serten kordinasyon ant sa bann departman tel parey PUC, tel parey elektrisite san kwa si nou get sityasyon ozordi nou a vwar ki dan Sesel la fason ki devlopman in ganny fer i parey ki noun fer vin nou en ta loto me nou pann enport bennzin alors ki mannyer nou pou kapab fer marse loto.  Sityasyon Sesel ozordi i egziste parey. Ozordi dan Pointe Larue par egzanp, dan lekol Pointe Larue, nou vwar nou pe koz lizyenn parey lonorab avan mwan in koze delo par ler 5 er ki head teacher  i bezwen release.   Akoz – akoz napa ase.  Napa ase delo e i annan tro bokou landrwa ki pou bezwen distribye sa bann delo.  E alors mon ti a kapab demande ki olye ki nou fer bann gran dam parey enn ki tin ganny planifye pou fer Grand Anse ki pou kout sepa konbyen milyon, monn deza tann manager PUC kot in dir akoz nou pa fer plis bann catchment  ki kout pli bon marse.  E an menm tan an term maintenance  i pou kout nou pli bon marse, ler pou nou kapab lay son bann tiyo, si nou fer li pou en serten sekter mon asir ou i pou redwir kou ki i pou kout gouvernman olye ki nou fer bann gro dam ki pou kout sepa konbyen milyon e ou pou bezwen lay bann pipes  pou sepa konbyen distans.  Petet mon a sizere Msye Speaker ki dan progranm ki a vini a lavenir gouvernman i devret vwar ki olye nou fer zis lakaz, nou kontinnyen fer klinik, nou kontinnyen fer lekol, ki tou bann nesesite ki al avek sa bann lenfrastriktir i ganny devlope ansanm e mon a sizere ki par egzanp pou delo ki en nesesite de baz ki tou dimoun i bezwen, mon krwar nou tou nou a konpran ki si en dimoun pe esper delo pou 12 er, 24 er, 48 er, 72 er i en keksoz fristran e  napa personn antre nou isi dan sa lasanble ki ti a kontan ki en sityasyon konmsa i arive.  E alors mwan mon ti a demande ki gouvernman i revwar son plan ansanm ek PUC pou annan serten sistenm kot nou pa fer bann gran, gran dam me nou fer serten rezervwar ki kapab deservi lo en nivo, mon a dir rezyonnal, oswa en nivo distrik me en nivo kominoter ki en mannyer ki i kapab deservi sa bann dimoun dan en fason efikas me dan en fason osi ki pli ekonomik pou nou kapab mentenir.

Alor se pou se rezon ki mon krwar pou dir  sa mosyon tin devret vin pli boner parski i annan en kantite letan ki bann lakaz, lekol, klinik in ganny fer me delo ek elektrisite i enn de keksoz esansyel kin ganny enpe neglize, si nou kalkile depi ler 17 an, 18 an pase tou sa bann progranm devlopman enfrastriktir in fer zot zot pann ganny touse ditou.  E mon krwar ki i esansyel ki gouvernman i vwar ki delo sirtou i ganny en serten priorite  dan bann devlopman ki a pe vini.  Alors mon pou donn mon sipor sa mosyon.  Mersi Msye Speaker.

 

MR MICHEL GARDETTE

Msye Speaker mosyon lonorab Confait i en mosyon ki annan en kantite byennet, i annan en kantite sans e i en mosyon ki vin a en ler tre apropriye.  I vin a en ler kot Sesel pe devlope, nou pe koz  hi-tech, bomaten menm noun koz lo computer pou marmay lekol, lo CNN and so what not.  Me pou nou ki annan distrik, pou nou ki marse, pou nou ki pas devan laport dimoun, pou nou ki al gete ki problenm ki annan vreman dan nou distrik, nou konstate ki sa problenm i grav, sa problenm i serye e sa problenm fodre ganny rezourd par lannen 2000 definitivman, pli tar par lannen 2000. 

Msye Speaker dan mon distrik, enpe lwen ek semen i annan plizyer dimoun, parey Msye Confait taler ti nonm en ventenn sepa en trentenn  fanmiy kot mwan i annan plis ki pa ganny delo ditou.  I annan bann ki pran son bann lasyet, son bann kwiyer ki bezwen anmenn detrwa kilomet kot zanmi pou al lave tou lezour dan en sak.  Son zanfan i bezwen benny kot son zanmi avan al lekol.  Sa problenm in pous nou dan distrik pou nou pa fye  selman lo PUC me pou nou komans fer en keksoz nou menm.  E la mon pou felisit en ventenn, mon krwar i annan 22 fanmiy ki ansanm pe kontribye en sonm larzan sibstansyel pou nou kapab aste tiyo ansanm pou kapab fer zot ganny morso delo devan zot laport. 

Me ankor enn fwa sa delo pa pou delo trete malerezman, i pou delo ki sorti dan   en trapment parey Msye Bibi fek koz lo la en catchment ki pou nobou anmenn delo devan laport sa bann dimoun.  Sa definitivman i en lesey pou nou kapab ede lo en short term,  ed li deswit la pou annan delo.  Me lon term PUC i bezwen ganny revitalize, i bezwen son bann lobzektiv vin pli kler, PUC i bezwen konnen ki se li lotorite responsab ki bezwen fer sir ki Seselwa dan sa hi-tech era  ki nwa pe viv ladan nou pa kapab annan en dekalaz dan nou devlopman kot i annan dimoun pa pe ganny delo e lot dimoun si oule pe enjoy Internet. 

Msye Speaker noun sey fer tou sord fason pou nou ed dimoun dan nou distrik ek delo ki nou apel delo irigasyon, delo ki servi normalman pou planter plante e la osi in ariv lo en tel nivo ki presyon dan sa tiyo lagrikiltir in tonbe, i ba.  I pa ase menm pou fermye kapab servi sprinkler, ki vedir en kote ou annan fermye ki pe demann delo ek presyon pou son travay, lot kote i annan dimoun ki napa delo ditou.  E ler ou al kot minister lagrikiltir ou sey demann en ed lo humanitarian grounds,  sa dimoun ki napa delo, sa minister i vwar li osi dan lenpas i pa kapab ede menm ki i ti ava anvi ede.  Msye Speaker delo mon krwar mwan personnelman i en basic human necessity ki dan sa staz devlopman Sesel nou bezwen osito ki posib fer sir ki son mankman delo bon kalite, byen trete i en keksoz of the past.   Mersi Msye Speaker.

 

MR BARRY FAURE

Msye Speaker sa mosyon kin ganny anmennen par Msye Walter Confait pou Anse Aux Pins i en mosyon ki met en target  devan PUC e devan gouvernman.  En target pou garanti ki tou lakaz i ganny konekte avek delo trete avan lannen 2000.  Si nou get byen pou le moman Msye Confait in dir nou ki i annan 83% bann lakaz, bann fanmiy kin ganny konekte ek delo trete.  Noun sorti 83% noun ariv 100% dan en lespas 3 an, i en gran defi.  E pou kapab arive rezourd sa, pou kapab meet  sa target,  pou kapab akonpli sa lobzektif i pou neseser vreman ki i annan en bon progranm ki ganny met an plas.  Parmi bann distrik ki ganny bokou afekte par sa mank delo trete se distrik Anse Royale.  E zeneralman bann distrik dan sid Mahe i ganny bokou afekte.  E i annan menm lokazyon kot napa zis konplent mank delo trete me mank delo limenm li.  Sa defi alors i gran e se pou sa ki bann reprezantan Anse Royale an konsiltasyon avek pep enpe parey tou bann dimoun responsab pe fer dan pei, nou pe travay seryezman pou nou gete ansanm avek gouvernman e PUC sirtou, ki mannyer nou pou kapab anmenn delo e an plis delo trete pou nou bann fanmiy ki dan sa sityasyon grav. Serten keksoz ki nou pe fer par egzanp se avek PUC nou pe sey gete ki mannyer nou pou kapab met an plas en proze delo trete dan distrik, dan vilaz Bougainville.  I annan plizyer zefor ki ganny fer ansanm avek minister gouvernman lokal e finansman, costing  in fini ganny fer e an efe i annan en lapros pou nou kapab konbin finansman ki ava sorti kot PUC, kot gouvernman lokal e an menm tan kot en devloper prive pou kapab fer sir ki sa proze delo trete i ganny met an plas.  Pou fer sa osi i pou neseser ki landrwa ki sours delo kot nou pou ganny sa delo finalman ki i ganny prezerve, i ganny konserve e ki tou polisyon i ganny bare.  Si i pou neseser dan sa sans pou nou demann gouvernman pou re allocate  dimoun ki pe polye delo dan landrwa konserne, mon krwar mwan mon enn bann dimoun ki pou demann gouvernman pou fer li e pou fer li o pli vit posib akoz son konsekans i pou grav pou sa  santenn fanmiy ki pe viv dan sa lokalite Bougainville.

Dokter Herminie ki en manm lasanble isi avek nou i konn byen sa sityasyon.  Li menm li in vizit sa landrwa e i okouran.  I annan letid kin ganny fer dan lekol Anse Royale ki montre ki nivo lafektasyon, nivo maladi koze  par bann water borne diseases parey li menm in dir i pli o dan rezyon sid ki dan lezot landrwa akoz mank delo trete. Alors sa i en bann keksoz ki nou pe travay for lo la.  E mon espere ki avan lannen fini, pa avan lannen 2000 me ki avan lannen fini bann fanmiy dan rezyon Bougainville zot problenm i ganny rezourd. Nou dir ki pou kapab rezourd sa problenm pou demann nou en bon progranm.  Mon ti byen kontan pou antann Msye Rousseau, Managing Director pou delo PUC, kot i ti anons nou lo televizyon serten plan ki PUC i annan pou met anplas ki probableman i ava kapab permet nou kapab ariv lo sa lobzektiv ki mosyon ki Msye Walter Confait in met devan nou.  Donn delo trete  tou bann fanmiy avan lannen  2000. E sa i enkli sa proze delo, fer en basen delo dan lagon isi  lo east coast Providence pou konbin sa avek en proze desalinasyon ki a ganny servi sirtou pandan sa 4 mwan lasesres ant Me avek septanm ki nou konnen.  Mon mazinen si nou combine sa osi avek bann pti proze, bann water catchment  ki serten manm isi dan lasanble in dir, dan serten landrwa ki en pti pe pli o ki par zot oter i pou enpe pli difisil pou zot benefisye par bann nouvo devlopman petet bann water catchment ansanm avek tou sala i ava kapab fer nou rezourd sa lobzektif ki la. 

Se pou sa ki mon krwar ki i annan serten lespwar ki nou arive akonpli sa lobzektif ki la e nou lo nou kote nou pou fer tou nou posib  ki nou pa zis demann PUC pou fer li me ki nou travay pros avek PUC e gouvernman pou  fer sir ki sa target, sa lobzektif i ganny akonpli e se pou sa ki byento ankor ennfwa dan lasanble nou pou reanmenn en lot mosyon ki pou koz en pti pe pli an detay lo sa bann kestyon.  Mersi bokou Msye Speaker.

 

 

 

MR SIMON GILL

Msye Speaker koz lo konneksyon delo trete kot bann lakaz ki pankor ganny delo trete ziska plitar bann lannen 2000 mon krwar i fer nou abord en size ki annan aktyalite.  En size ki enteres bokou nou dan sa lasanble me an menm tan i enteres plis bann fanmiy  deor ki reste enpe dan leo, dan montanny kot sours delo i pre obor zot, i pas obor zot lakaz me malerezman i pa trete me selman kanmenm serten i ganny en sans konsonmen.  Sa i ti mon premye pwen Msye Speaker.   Me koman en dezyenm pwen mon partaz tou bann pwen, mon donn sipor tou bann pwen kin ganny souleve par mon bann koleg manm lasanble, kot zot in fer resorti bann problenm reel ki zot distrik pe fer  fas avek be mwan mon krwar ki nou bezwen pous sa refleksyon enpe pli lwen ankor.  Ler mon dir nou pous sa refleksyon enpe pli lwen, mon oule dir senpleman ki nou bezwen aksepte dan nou menm nou ki problenm delo Sesel, problenm fourni delo trete ek bann fanmiy Sesel i pa en problenm kin aparet an 1977.  Mon dir i pa en problenm kin aparet an 1977 pou la senp rezon akoz ozordi an 1997 bokou bann landrwa kot ozordi nou pe dir donn delo trete, sa bann fanmiy in la pou plis ki 50 an en parti, en parti plis ki 40 an, en parti pou plis ki 30 an.  Prezan ler nou get sa sityasyon devan nou, nou poz nou lekor en kestyon.  Avan 77 lekel ki ti responsab  pou donn delo trete sa bann dimoun.  Eski gouvernman a sa lepok pa ti realize pou dir dan Crève Coeur laba dan leo Mont Buxton, Danlenn anler laba dan Mont Buxton bann dimoun ti la ti pe viv e zot pa ti pe ganny delo trete.  Lekel ki ti responsab pou donn delo trete sa bann dimoun avan 77.  Mon papa pe al ganny li 80 zan, mwan mon plis ki 30 an, monn ne dan sa landrwa, monn grandi dan sa landrwa, se nek an 1992, 1993 ki bann dimoun dan mon lokalite anler laba in nobou konnen ki sa vedir delo trete.  E lekel gouvernman kin donn zot, asire ki delo trete i ariv kot zot, lekel kin donn zot.  Partou dan bann distrik kot delo trete in arive, in mont lao dan montanny, lekel kin responsab pou anmenn delo trete laba.  Lot kestyon Msye Speaker, ki kalite tretman bann dimoun ti gannyen dan moman avan 77 an sa ki konsern delo trete.  Ki mannyer ti ganny distribye delo trete dan sa pei avan 77, ki kote delo trete ti arive dan sa pei avan 77, ki kote ti arive.  Sa i enportan ki nou fer resers.  Ozordi ler serten i monte, i dir napa plan, pann ganny fer isi, pann ganny fer laba, konmsi prezan zot met tou sa fordo pa ganny delo trete avek gouvernman kin aparet 77.  Me sa problenm in la pou plis ki 160 an kolonizasyon. Msye Speaker ler mwa va koz koumsa, i annan i ava dir ki toultan nou pe defann, me non i pa sa.  Mon rekonnet pou dir i annan kantite fanmir ozordi dan sa pei ki bezwen ganny delo trete e nou demann gouvernman pou  asire ki dan son progranm, dan son bann priorite sa bann fanmir ki bezwen ganny delo trete i ganny akse avek delo trete. Sa nou rekonnet, me lefe osi i reste ki nou bezwen rekonnet ki apre 77 i annan en pli gran poursantaz nou popilasyon ozordi ki ganny kouver kot delo trete i arive  kot zot.  Kestyon i a ganny poze, eski nou pa ti  ann kapab fer tou fanmir  ganny delo trete ozordi.  Byensir i non, nou pa pou kapab dir pou dir ozordi apre 20 an oubyen 30 an apre tou fanmir tin devret kapab kouver ek delo trete.  Sa i senp akoz  nou dir i pa kapab ganny rezourd ozordi pou demen.  Akoz, akoz ozordi ler nou gete devlopman pe depas lavil, pe depas Victoria, ozordi kot nou pa ti espekte lakaz i ganny fer dan leo Ma Pavillon, dan leo Capucins, dan leo Majoie, lakaz pe ganny fer, mon tann manmi i dir dan Mangroo  partou laba nou pa ti espekte ki lakaz i ganny fer. Tou sala, bann landrwa, lakaz in ganny fer dimoun in al reste. E prezan nou problenm se kwa, nou problenm se fer fason ki kot sa sours delo kin ganny ranmase ozordi, kin ariv kot sepa 60 lakaz, sa menm sa sours i bezwen limenm li reganny distribye ankor avek en senkantenn nouvo fanmir tel parey mon koleg Herminie in dir.  Laba  Union Vale nou annan nou 80 fanmir kin vin reste dan nouvo lakaz ki sa gouvernman in fer.  E zot bezwen delo, me problenm se  Majoie in ganny fer en gro kominote laba avan  Union Vale  me nou problenm se ki nou bezwen tir lo sa menm tiyo ki sorti  anler laba Rochon pran donn Majoie, pran donn Union Vale,  pran donn  Mont Buxton leo, donn Danlenn me nou problenm se kote nou al fer  ankor en rezervwar lonorab Herminie. Sa nou bezwen vwar e lonorab Herminie i ava dir ki kote ki nou fer en rezervwar e nou demann gouvernman pou fer en rezervwar ankor pou kapab redistribye sa delo e tret sa delo.  Me mwan Msye Speaker, endepandaman tou bann kritik kin annan oubyen bann obzervasyon kin kapab annan lo PUC an sa ki konsern redefinir en stratezi, re-etablir zot lobzektif pli kler, mwan  mwa dir menm klopi-klopan si an 77 nou ti annan nou 40% fanmir ki ti ganny kouver ek delo trete, ozordi an 97 mannyer mon konpran statistik i dir nou annan nou 83% fanmir ozordi dan sa pei ki ganny kouver avek delo trete.  E mwan ozordi mwa profite pou remersi PUC endepandaman ek tou bann defayans ki zot kapab annan, remersi zot pou ki zot in rekonnet pou zot kapab donn delo nou bann dimoun anler Danlenn laba.  Plis ki 80 fanmir in benefisye avek delo trete par rapor avek zefor ki PUC, ki gouvernman i fer.  Nouvo laponp in ganny enstale sorti lwen laba, mon tande  Germany , bann nouvo fasilite in ganny fer, ozordi ou trouv basen, gro rezervwar in ganny konstrir, laponp i tir dan enn i anvoy dan lot, i tir dan lot basen i anvoy anler lo montanny laba, i kouver tou bann lakaz e sa i en progre remarkab.  I en progre ki mon bann dimoun Danlenn dan leo Mont Buxton, Greenwich i aport zot remersiman pou PUC, pou gouvernman e dan bann lezot distrik osi in arive sa.  Me ankor zefor i bezwen kontinyen akoz popilasyon pe ogmante parey monn dir e kantite lakaz pe ganny konstrir dan bann leo partou e nou bezwen kontinyelman vwar ki mannyer nou kapab swiv sa devlopman  kot bann fanmir pe reste, anmennen se sa finalman sa ki SPPF i krwar ladan.  Se fer sir ki nou dimoun, ki nou pep i ganny akse avek bann pli bon kondisyon lavi posib.  E mon krwar ki nou pou kontinyen lo sa semen e nou ava vot an faver mosyon lonorab Confait an lansan en lapel avek nou bann koleg dan PUC ki travay dir mon konnen dan serten moman ler zot annan bann gro proze devan zot, pou dir zot annou kontinyen travay pou ki tou dimoun i ganny delo trete parey mon koleg in dir pa plitar ki bann lannen 2000.

 

MR DE COMMARMOND

I annan bokou kin ganny dir Msye Speaker lo sa mosyon. Mosyon ki lonorab Walter Confait in avanse i en tre bon mosyon nou bezwen rekonnet me an menm tan mon krwar lonorab Gill in fer en pti pe en apersi avan e apre e pou mwan pa repete, sa i tre enportan akoz nou bezwen vwar osi ki gouvernman aktyel in fer bokou e PUC malgre bokou konplent in toultan sey son mye e tre efikas pou sey fer ki dan Sesel mazorite dimoun i ganny delo trete.  Malgre alor  nou pankor  atenn  sa 100%, mon krwar ki ek sa mosyon ki lonorab Confait in anmennen, gouvernman si oule dir i bezwen fer li koman en  commitment  pou li e sirtou dan le sans ki nou vwar aktyelman, nou konnen e bann dimoun ki marse partou kin vizit nou pei anba lao, nou vwar ki i annan bann tre bon  water catchment  partou dan serten distrik sirtou lo kote was Mahe, sid e was Mahe kot sa problenm i en pti pe pli pertinan. I annan alors bann landrwa ki ou kapab fer dam menm pli gran dam ki La Gogue, alors mon krwar ki gouvernman i devret a se pwen la reflesir seryezman e ekspsoze si oule dir, envestir dan sa domenn si vreman nou anvi atenn lobzektif sa mosyon.  Mwan mon lide i koumsa e alors avek sa nou rezourd en problenm enn fwa pou tou e nou kapab alors letan nou antre dan lot syek, antre avek plis konfidans, konnen pou dir enn bann drwa enportan imen e en sours lavi si oule dir i nou isi Sesel noun arive atenn sa lobzektif byen.  An dizan sa, Msye speaker, mon pa ti oule tro tarde, mon ti a sizere ki nou vot lo sa mosyon e mosyon i bon.

 

MR CHOW

Msye Speaker, mon pa ti kapab reste trankil lo sa mosyon apre ki monn antann sa ki lonorab Simon Gill, sa zistwar kin rakont nou lo kestyon delo.

 

MR SIMON GILL

Mon pa vin rakont zistwar isi mwan.

 

MR CHOW

Msye Speaker, lonorab in rakont nou ki mannyer problenm delo ti komanse, kote ti ete, e kot in arive.

 

MR  GILL

Sa mon pa..

 

MR SPEAKER

Onorab Gill oun ganny ou sans koze.

 

MR CHOW

Lonorab i dir nou ki i annan plis ki 30 an, mon pa konn egzakteman ki laz i annan, me mwan mon ti ne an 1951 e mon krwar dediksyon i donn ou byen kler ki laz ki mon annan. E i paret mwan an 77 lonorab ti annan en pti pe plis ki 15an. Mwan mon ti annan en pti pe plis ki 30an.  Alor ant nou 2 petet mon kapab rapel en pe plis keksoz ki ti annan avan 77 ki lonorab.  E mwan mwa dir ki mwan mon ti konnen sitiasyon ti ete avan 77.  Lonorab Confait ti dir nou 83% dimoun i ganny delo trete, i pann dir nou an 77 konbyen poursan dimoun ti ganny delo trete e i pann dir nou an 60 paregzanp konbyen poursan dimoun ti ganny delo trete.  Me sel keksoz ki mon konnen se ki dan Sesel nou annan 2 dam prensipal e nou konnen kan sa bann dam ti ganny konstrir.  Avan nou ti annan dam Rochon, bokou dimoun ti ganny delo sorti Le Niol e larivyer Cascade. Apre dam Rochon nou ti ganny dam La Gogue e sa ti vini, mon krwar nou tou nou rekonnet avan 77, prensipalman desizyon e resours pou fer sa dam ti fer avan 77. Me ant 1977 ziskan 1997 konbyen dam in ganny fer dan nou pei.  Noun ganny dir ki i kout ser pou fer en dam.  Grand Anse pou kout 300 milyon sepa 200 milyon  roupi.  Msye Speaker depi 1977 ziskan ozordi gouvernman Sesel in met dan parastatal plis ki 2 mil 600 milyon de roupi ki ozordi okenn sa bann parastatal pa kapab rann gouvernman.  Nou pe blanm sa kin pase pou problenm delo e mon ti napa lentansyon vin dan sa deba ou menm blanm okenn dimoun pou problenm delo.  Be selman ler mon vwar en serten kantite parol ki ganny dir, mon ti bezwen pran pozisyon pou dir lekel ki responsab ozordi an 1997 pou nou problenm delo.  Gouvernman SPPF in o pourvwar depi an 1977.  Ant 1977 ziska ozordi, si nou azoute i fer plis ki 20an.  Depi an 1985, nou bidze gouvernman in depas mil milyon par an.  Zis sa 85 ziska 97 annou azout ansanm pou gete kantite  larzan ki noun depanse koman en gouvernman e nou pankor ni menm azout bann ki noun depanse ant 77 ziska 1985.  Msye speaker, resours in la, ki noun fer avek.  Me sepandan ozordi nou annan en problenm.  Lonorab Gill i  praise  son parti pou anmenn delo Crève Coeur an 1992, Msye Speaker mwan personelman mon pa ti pou anvi les  dimoun konnen pou dir sa ti en sitiasyon koumsa.  Depi an 1977…

 

MR S. GILL

Msye Speaker sa i en fo  statement  ki Onorab Chow pe fer.

 

MR CHOW

son parti in vin o pouvwar, an 1992 ki zot nobou ganny delo Danlenn sepa Crève Coeur, Msye Speaker sa pa en bon rikord.  Me sepandan problenm delo nou bezwen get li petet an deor politik  partizann.   Mosyon devan nou i lo kestyon delo trete.  Mon krwar delo trete dan limenm i pa devret  en gro problenm pou anmenn pou preski tou dimoun. Nou pli gran  problenm devan nou se eski nou pou kapab soutenir delo pou tou dimoun dan Sesel 24 er-d-tan par zour, 365 zour dan en lannen.  Sa ki nou popilasyon i espekte pou nobou ganny delo pou li servi 24 er-d-tan par zour, 365 zour dan en lannen.  En gouvernman responsab i bezwen nobou kapab donn son garanti sa pep ki ler mon donn ou delo trete, mon bezwen nobou soutenir li pou 365 zour e 24 er-d-tan par zour.  Msye Speaker problenm delo natirelman i pa fasil.  Delo i ganny servi pa zis pou bwar.  Si nou get byen, nou vwar ler tiyo delo in konekte ki en lakaz paregzanp i fer. Sa menm delo trete i servi pou  flush son twalet, trete pa ti trete, pa ti enportan me selman sel landrwa, sel sours i kapab gannyen se delo trete pou li fer son twalet prop, pou li bennyen, pou pran son  shower,  pou lav son lenz, swa son washing machine  oubyen lo son basen deor, pou li kwi son manze, lav son diri, pou li…

 

(laughter)

 

dan sans literal, pa dan sans – pou li aroz son zarden, Msye Speaker tousala i bezwen delo.  E keksoz ki pli enportan pou li, delo bwar sanmen sa pli pti git delo ki li i konsonmen dan son lakour.  Msye Speaker, nou pe blanm PUC pou  bad planning  ki en lakaz, group lakaz i ganny konstrir napa delo.  PUC i en lazans, PUC i zis la, in  ganny donn sa responsabilite koman en lazans pou li  provide  delo pou la popilasyon e soutenir sa delo ki i pe donnen, sa i enportan pou konsidere.  Ozordi si en lakonpannyen i vin fer en faktori lo SITZ, i pou ganny gran difikilte pou li garanti ki i kapab ganny ase delo pou li servi.  Sa ki konsiltan in remarke.  Alor nou vwar pou dir sa problenm delo se-t-en problenm ki annan en pli gran lenportans ki senpleman delo trete.  Wi, i devret annan sa drwa pou ganny delo trete, tou popilasyon i devret ganny sa drwa pou ganny delo trete, me i enportan osi pou konsidere ki tou popilasyon i ganny delo tou le zour dan son lavi, toultan ler i bezwen.  En pei parey  Sesel ki tonm sa kantite lapli e ozordi nou vwar nou annan en problenm pou anmenn delo kot dimoun i reste, i fer ou pans sa ekspresyon ki dir  water, water everywhere, but not a drop to drink.   I parey en dimoun ki lo en bato dan milye lanmer, e i mor laswaf.  Msye Speaker, in ler pou nou konsidere kote nou pou ganny sa resours pou nobou mete, pou nou soutenir delo dan nou pei pou kapab donn tou la popilasyon, pa zis bann lakaz, me osi bann lendistri ki posibleman i kapab etabli akoz nou pe ankouraz lendistri vin Sesel pou donn plis job nou popilasyon. Parey monn fer sorti, nou problenm delo i pa zis kantite delo, pa zis anmas delo, i osi en problenm finansyel.  Ozordi nou pe kalkil lot fason ki fer en dam Grand Anse akoz nou dir nou napa larzan oubyen nou pa kapab  raise  sa larzan. Sa pa ti devret en sitiasyon ki noun trouv nou ladan ler nou konsidere ki kantite resours kin pas dan nou lanmen pandan sa dernyen 20an, resours kin al dan bann direksyon ki petet pa ti devret ale, olye al dan bann keksoz esansyel  parey provizyon delo, soutenir provizyon delo pou la popilasyon an-n-antye.  Sepandan nou pou bezwen rod sa larzan pou nou kapab fer sir ki la popilasyon antye i kapab ganny delo.  E nou pou bezwen pey sa pri ki neseser si nou oule ganny delo.  Napa okenn leskiz e napa okenn politik ki nou devret fer lo la.  Nou devret dir nou popilasyon laverite.  Nou pou bezwen peye pou nou nobou ganny sa delo an kantite ki nou bezwen e kalite ki nou bezwen. Mersi .  

MR DANNY  FAURE

Mon krwar mosyon lonorab Confait in donn nou lespwar.  I donn nou lespwar akoz i annan lespwar dan son parti, i annan lespwar dan progranm politik son parti.  Si i ti napa lespwar dan progranm e politik son parti, i pa ti pou la e i pa ti pou kapab pe pronons bann parol lo non pep ki i reprezante dan distrik Anse Aux Pins.  Ozordi nou tou ki la e la plipar nou ki la dan lasanble, nou konn tre byen ki distans nou sorti e ki kote noun arive ozordi e an plis ki sa nou konnen ki direksyon nou pe ale e nou konpran ki direksyon ki nou parti i anvi anmenn Sesel.

Msye Speaker, nou pa ti pou en nasyon dan sa lannen, si nou parti pa ti lite pou anpese ki  pti Sesel i vin parey en  departman La Reunion kin ganny anekse avek La France.  Nou parti ti premyerman debout pou ki nou vin en pei endepandan e nou bezwen konnen lekel kin fer nou vin en pei endepandan.  An menm tan nou ti fer sa, nou ti konn tre tre byen difikilite pou fer en pei antre dan sa ki nou apel  process of nation building. Ozordi 20 an i fasil pou nou koz lo kantite keksoz, me i enportan  ki dimoun ki pe ekout nou e sirtou apre lentervansyon lonorab Paul Chow pou nou kapab met keksoz drwat on record.   En kestyon ki nou devret demann sa zenn, ki lonorab Ange Morel ti a kontan ki i aprann  computer  ozordi, se ki ti pou arive an 1977 nou ti deside  build  bann  dam  e pa fer bann provizyon neseser pou en pei devlope.  Ti kestyon priorite.  Ti en kestyon priorite, ti en kestyon balans lo popilasyon, kwa ki ti neseser pou nou fer avan.  Listwar in montre, annou get Lafrik, annou get Lazi, Lonorab Bibi ki mannyer bann progranm priorite pann anmenn bann pei kot zot ete ozordi.  I annan, i annan serten gouvernman dan  Lafrik, dan Lazi kin anvi ki zot pei i devlope zis pou satisfer serten dimoun.  E koman la mazorite  dimoun i pa ganny okenn sa gou devlopman.  Nou, nou pa ti fer sa, nou.  Noun anvi etablir en sosyete ki la plipar dimoun i gannyen.  Nou pa ti dir tou dimoun pou ganny tou-de-swit nou.  Nou ti dir ki noun met en semen la, e lo sa semen nou tou nou pou bezwen pase.  Sakenn pou annan son letan.  Si an 1992 PUC in kapab anmenn delo anler  Danlenn, ti neseser osi pou kapab balans fakter popilasyon kote in annan bann konstriksyon, ki priorite me sa ki lonorab Confait in anmennen se ki  finalman i zis malere ki lonorab  on your marks, get set go, pa la ozordi, ki finalman dan lannen 2000, sa problenm  treated water  in ganny rezourd.  E mwan mon apresye bokou merit mosyon lonorab Confait.  Parey lonorab Barry Faure fek dir se ki donn nou en target pou nou ariv laba, savedir i annan en kantite keksoz ki nou fer, nou rekonnet sa nou e nou tou koman en lasanble nou pe angaz nou lekor pou nou kapab fer li akoz selwi li ki tonm dan sa 83% ki pe ganny delo, i bezwen osi pe mazinen si vreman i pe servi sa delo ki pe gannyen byen, kan i annan son prop ser ki pankor ganny delo e i pankor ganny delo trete.  E dan sa lannen  sharing and caring, ki nou fer pou ki zot osi, zot kapab ganny sa gou parey lonorab Gill in esplike, sa gou pou kapab ganny sa delo trete.  E mon krwar sa en  target  ki kler e mon krwar lonorab Confait in esplik klerman kote nou devret arive avek sa kestyon delo trete.  Me an menm tan  mon tia kontan tous lo en lot pwen.  I annan plizyer nou kin koz lo PUC, be mwan mon tia kontan apiy PUC lo sa lide ki tou bann lazans dan pei, bann minister dan pei nou komans asiz ansanm e koz lo sa ki nou apel en  integrated approach pou bann devlopman ki pe ganny fer, ki mannyer PUC i ganny konsilte, ki zistans PUC i vini, pou ki si oule ler nou fer bann proze, nou kapab dir ki tel mwan, ou tel lazans ou pou vini, ou annan sa nesesite pou fer sa pou kapab  deliver  sa bann servis, akoz PUC osi resaman ler monn tann zot koze, zot menm dir ki annan serten landrwa kot delo pann vini, zot pann ganny konsilte e ler ou tann lezot dimoun dir o.k. be noun konsilte zot me zot pann pare, sa bann zafer ant konsiltasyon la i afekte lepep li ki anvi ganny son delo.  E mon krwar nou devret  cut down  lo birokrasi, lo sa  bottleneck  ki petet i vin en baryer pou kapab  speed up  avek swe ki lonorab Confait avek lasanble nou annan pou ki nou kapab donn delo trete tou nou bann dimoun. Mersi.

 

MR SPEAKER

Avek sa mon envit onorab Confait pou fer son rezime.  

 

MR CONFAIT

Msye Speaker sa ki nou pe rode vreman se delo trete pou tou Seselwa ki dan mon lopinyon i en  basic human right  parey ler ki nou respire en keksoz esansyel pou lavi.  Mon sel regre bomaten la se petet latitid Msye Chow.  Li ki enterese vreman kot larzan  parastatal  i ete, kot nou pou ganny resours pou peye wastage  eksetera.  En latitid koumsa pa pou anmenn Sesel okenn landrwa.  Si paregzanp i ti desid keksoz pou nou, petet nou tou nou ti pe saroy delo ozordi dan seo parey an 1951 ler i ti ne.

Msye Speaker mon annan tre pe pou azoute ki  mon bann koleg in dir an sipor sa mosyon, mon krwar i en mosyon ki vreman enteres tou Seselwa e nou tou, nou pe  look forward  pou vwar li ganny  implemented.   Avek sa mon demann tou mon bann koleg pou vot an faver sa mosyon. Mersi.

 

MR SPEAKER

Tou sa ki an faver, lev zot lanmen.  Inanim, alor sa mosyon in ganny aprouve.  E avek sa nou rezwenn 2 er apremidi.

 

(Sitting suspended until 2 p.m.)

 

 

 

Extract of verbatim report  of 25 March 1997

 

MR SPEAKER

Nou a kontinyen avek nou bann mosyon e la i tour onorab Bibi pou son mosyon.  Mon envit ou pou prezante.

 

MR GEORGES BIBI

Msye Speaker, mon mosyon i demande ki lasanble nasyonal i pran en rezolisyon, i demann gouvernman pou pran mezir pou reviz pansyon, gratwite, sekirite sosyal dan en fason ki i ava anmenn plis benefis pou bann travayer. Ozordi dan Sesel i annan apepre 2 loportinite ki ganny rekonnet dan fason ki en dimoun i kapab ganny pansyon ler zot pran zot retret.  Enn sa fason se sa pansyon ineversel ki nou  tou nou konnen koman sekirite sosyal e dezyenm se sa pansyon ki obliz tou enplwayer pey en sonm fiks R50 pou tou zot travayer ler zot dan lanplwa, me sa sistenm pa obliz travayer kontribye si zot pa oule e zot kontribye lo en baz volonter. 

Msye Speaker pou komanse parey mon mosyon in dir mon pou get sa 3 topik savedir pansyon, gratwite ek sekirite sosyal enn par enn. Premyerman mwa komans avek sekirite sosyal. Sistenm sekirite sosyal i sipoze en lasirans pou tou dimoun, menm si ou travay ouswa non.  Bann ki travay, zot kontribye 5% zot saler e zot anplwayer i kontribye en serten kantite dapre saler zot travayer.  Sa larzan i al dan en fon pou benefisye bann dimoun ki dan bezwen e kan zot bezwen.  Sa larzan i osi la pou benefis bann ki pe travay ki en fason ler zot perdi zot travay  ouswa zot malad e pa kapab travay ouswa ler in ariv ler pou zot pran zot pansyon, zot a kapab benefisye.  Pou le moman tou benefis ki konsern pansyon i ganny fikse e determinen par leta.  Ler mon dir bann  pansyon, mon pe koz pansyon sekirite sosyal pou le moman.  Aparti la kestyon ki mon pe demande se si lafason  ki sa sistenm i ete konmela i donn si oule nou tou garanti ki ler, pou nou ki pe  travay ozordi, in ariv ler pou zot pran zot pansyon, si sa fon pou annan ase larzan pou soutenir bezwen sa bann dimoun dan sa lepok ler zot bezwen zot pansyon..  Ler mon dir sa mon dir sa avek en lespri ki toultan viz ver lavenir.  Si nou gete, nou a get en kou sitiasyon ki egziste konmela.  Konmela i annan  apepre, mon redir konmela i annan apepre 26,000 dimoun ki dan lanplwa formel e lapey total sa 26,000 dimoun i apepre R78 milyon par mwan e kontribisyon ki gouvernman i anmase avek sekirite sosyal tou le mwan i apepre, mon redir, apepre R23m ouswa R300m par an, sa  dan limenm i en gro sonm.  Sekirite sosyal i pe pey li konmela apepre R10m par mwan e balans ki reste dan sa fon  gouvernman i pran pou li ouswa i met dan sa ki nou apel  Consolidated Revenue System.

Lafenn oktob lannen pase ti annan apepre 16,000 dimoun ki ti benefisye anba sa scheme.  Ti annan apepre 6,800 dimoun ki vye, 973 dimoun ki envalid ouswa malad, ti annan apepre 500 etidyan, 1928 bann dimoun ki pe travay dan lezot scheme e 5000 dimoun anba  means testing.  Sa bann sif ki monn donnen, mon  refer resorti ankor en fwa ki monn met li apepre, i kapab annan en fliktiasyon ±  la kantite, mon pa pe dir ki sa sif ki mon pe donnen i egzakt.  Sa sif an menm tan i reprezant 61% dimoun an proporsyon ek popilasyon travayer e sa pou mwan personelman mon krwar i enkyetan akoz si nou popilasyon travayer i desann, sa i vedir ki plis dimoun pou depan lo pli pti gin larzan ki rantre dan fon sekirite sosyal.  Se sa rezon ki mon ti demande ki garanti bann dimoun ki pe travay ozordi i  annan pou ganny en benefis ki kapab fer zot viv dan dignite ler in ariv ler pou zot pran zot pansyon.   Mon lot konsern avek sa sistenm sekirite sosyal se dan la fason ki i ganny enpe distribye.  Sa sistenm parey i ete ozordi i plis en lasirans, pou mwan  personelman,  politik olye en lasirans sosyal.  Bokou dimoun ki bezwen lasistans parfwa pa pe gannyen e sa i aplik pou  means testing  osi. Sa ki mon oule dir se ler en dimoun in tonm dan en sitiasyon deplorab i son drwa pou li ganny  means tested  e i son drwa pou li ganny serten lasistans anba sekirite sosyal.  Me malerezman pa toultan ki sa i leka.  I annan bann sitiasyon kot ou vwar en dimoun avek en zanfan pe ganny R1200 e i annan lot ka kot en dimoun petet i annan 2 ou 3 zanfan, i pe ganny R500 a R800.  Kestyon ki nou demande ki nou poze, se lekel ki determinen lekel ki ganny konbyen.  A mon-n avi means testing pa devret en sitiasyon arbitrer.  Ler mon pe tous sa  means testing  akoz i tonm osi, i servi en pe fon sekirite sosyal.  Pou mwan i annan tro bokou diskresyon lo fason ki larzan i ganny distribye e mon krwar i devret annan en serten fason ki ler en dimoun pa satisfe avek la repons ouswa la fason ki son laplikasyon in ganny teste, menm ki mon konnen i annan zofisye   appeal  me mon demande ki petet ler i annan en sitiasyon kot en kliyan pa satisfe avek la fason ki son aplikasyon in ganny konsidere oubyen antretenir, sa kliyan i annan drwa pou li fer appeal   ouswa annan en  commision of  investigation ki kapab vwar akoz sa sitiasyon i koumsa. Mon lot konsern avek  sekirite sosyal se kalite lasistans ki en travayer i gannyen ler i tonm malad e i pa kapab travay. Zis mazinen koman en travayer, ou travay tou le zour, ou travay dir pou ou mentenir en serten nivo lavi e ou travay dir pou ou kapab anmenn sa serten nivo lavi en mannyer ki ou kapab viv dan en serten ki nou ava dir dignite.  Dizon kekfwa ou pe travay e ou pe ganny ou zis koman en legzanp R3,000 par mwan e ou madanm pe ganny 1800, sa i  fer ki ou kapab  afford  ou en kondisyon lavi parey nou ava apele mwayen.  Me zis en zour par mal sans ou ganny en aksidan ouswa ou malad, ou vin envalid e tou keksoz i sanze.  Ler mon dir tou keksoz i sanze se lasistans ki sekirite sosyal i donn ou ler oun tonm malad, ou pa kapab travay i fer li preski enposib pou ou mentenir sa menm nivo lavi ki ou  tou ou letan ki oun travay oun sey etablir e mentenir.  Ler nou get konsiderasyon, parfwa si ou gete ou koman en travayer ou pe ganny ou, ou pe travay, ou pe kontribye pou bann dimoun ki i annan ki pann zanmen kontribye dan sekirite sosyal, an menm tan ou pe travay ou pe kontribye pou bann dimoun kin ganny zot laz pansyon, zot in travay zot in kontribye sa letan, me ler in arive ki ou ou bezwen, parfwa ou ganny menm pli, i annan travayer ki ganny menm pli pti gin ki sa dimoun ki li in kontribye pou nobou donn lasistans e mon krwar sa personelman i pa en fason.  Personelman mon ti a sizere ki gouvernman petet i vwar ki si en travayer pe kontribye e pou en rezon ou en lot i tonm malad ouswa swa in perdi lanplwa, ki i pa kapab travay, sekirite sosyal i devret pey sa travayer en fason an fonksyon en proporsyon son larzan ki i ti pe gannyen, son dernyen lapey ki i ti pe gannyen ler i ti tonm malad. 

Msye Speaker mon dir sa akoz souvann fwa noun vwar, in arive bann ka, mon pe koz sa koman bann sitiasyon realite, i pa bann keksoz ki nou ramase, dimoun ou vwar, i vini i tonm malad ouswa i pa travay, ler i al kot sekirite sosyal petet i ganny li en R800 ouswa en R1200, ou zis mazin en ka kot en dimoun kin travay, petet i ti pe ganny li en R3,000 a R4,000 e ler oun ariv en sitiasyon, oun etablir  ou lekor pou ou viv en nivo e letan  ou al kot lasistans, definitivman i pa pe ed ou pou ou kapab mentenir sa keksoz ki oun konstrir  over  en kantite peryod letan.  E se pou se rezon ki mon krwar kontribisyon ki anplwayer i gannyen i devret si oule ekitab avek son kontribisyon ki in fer pandan tou sa letan, pardon, lasistans ki sa travayer i gannyen i devret ekitab ek kontribisyson ki in fer tou sa letan ki in travay.  Nou kapab mazinen si zis oun travay 30 an ou 40 an ou lavi petet e zis mazinen sa osi pa  aplik zis pou en travayer ki malad me i aplik osi pou bann dimoun ki al lo pansyon  dan sekirite sosyal. Zis mazinen en dimoun i komans travay zenn e tou son lavi in travay parey nou konnen tou son lavi in travay e i osi in anmenn li en fason, en nivo lavi kot ler dan son vye zour pou li kapab pran son retret,  enjoy  sa dernyen zour  son lavi dan en fason byen, dan en fason konfor e dignite savedir ek en kalite pansyon ki kapab fer li kontinyen sa nivo lavi kin etablir ler i ti pe travay. 

Ozordi Msye Speaker, mon pou al pli lwen pou dir laz pansyon i 63 an.  Mon asir ou  petet i annan dimoun  ki ti a kontan pran zot retret pli boner, me zot  bezwen kontinyen travay ler zot kalkil sa pansyon sekirite sosyal ki zot pou gannyen.  Zot pli  vo mye kontinyen menm si parfwa zot fatige e mon krwar si dimoun ti ganny en pansyon ki ankouraz zot pran zot retret boner, sa ti a ede pou rezourd nou problenm mank lanplwa par egzanp.  Parske ler sa bann dimoun ti ann pran zot retret, sa ti a kit plas pou zenn antre dan lanplwa e ede kontribye pou pey pansyon bann kin kit plas pou zot.  Msye Speaker, mon lot konsern se bann dimoun ant 55 an e 63 an. I annan bokou sa bann dimoun kin ganny konsidere tro vye pou travay e  tro zenn pou ganny sekirite sosyal.  Sa bann dimoun zot osi, zot in kontribye dan fon sekirite sosyal, akoz zot pa ganny naryen eskan ler zot ganny 63 an?  Si sekirite sosyal i en drwa, mon krwar ki gouvernman i devret etablir en serten minimonm lasistans eskan ler ki sa dimoun i ariv son laz  pansyon. 

Msye Speaker, sekirite sosyal i en fon kin ganny etablir dapre mon lopinyon koman en lasirans pou tou dimoun travay ouswa pa travay i ganny serten lasistans e ki ler oun ariv ou laz retret ou annan en garanti ki sa larzan ki ou gannyen pou ase pou fer ou viv dan dignite ziska ou dernyen zour.  Sa kontribisyon i en kontribisyon travayer e anplwayer, alors ou pa devret vin en lasistans politik, sekirite sosyal pa devret vin en taks ki gouvernman i servi pou son bidze.  Konmela, dapre si mon konpran byen, gouvernman i pran apepre 50% sa larzan pou son bidze e si i bezwen plis i prete.  Nou tou nou konnen ki  larzan sekirite i ganny servi pou ledikasyon, la sante e bokou lezot keksoz ankor.  Pou mwan napa naryen mal ki sa larzan i ganny servi pou ledikasyon, pou lasante.  Me i pa devret ganny vwar koman propriete leta me o kontrer koman propriete lepep. Si gouvernman i bezwen larzan pou la sante, pou ledikasyon e lezot proze i bezwen demann prete dan fon me i pou bezwen rod fason pou li rann sa larzan ler in fini pran.  Alor mon konsern Msye Speaker mon pa krwar ki gouvernman ki devret manage larzan sekirite sosyal.  Akoz toultan ki gouvernman pou zer sa larzan, mon krwar en zour nou pou leve e fon sekirite sosyal pou preski napa naryen.  Fodre nou rekonnet ki sa larzan i kontribisyon bann travayer ek bann anplwayer e se dan sa lespri ki mon sizere ki en board of trustees i ganny etablir pou zer larzan fon sekirite sosyal.  Lo sa board i ava annan reprezantan travayer, anplwayer e gouvernman, sa board i ava annan drwa pou re-envestir larzan sa fon dan bann biznes ki zot ava vwar apropriye en fason ki sa fon i a miltipliye pou annan plis benefis pou tou dimoun. 

Msye Speaker lo pension scheme nou konnen ki komela, i annan en pension scheme ki aplikab pou zis dimoun ki dan lanplwa.  Sa scheme i determinen lo la kantite lazan ki ou anplwayer i oblize mete e la kantite ki ou ou mete lo en baz volonter depandan lo letan ki ou travay.  Sa larzan i akimile lo ou non ziska en serten dat ler ou pran ou retret.  Mon konsern se, ki nou fer ek sa larzan tou sa letan ki i pe esper sa travayer pran son retret.  Si demen sa travayer pa travay oswa in perdi lanplwa sa larzan i reste dan sa fon e i pa bouze e sa travayer pa ganny okenn lentere lo la.  Mwan mon krwar sa bann larzan i devret ankor ennfwa ganny envestir dan en pli bon fason posib, en pli bon fason transparan, ki ava dan lentere e benefis bann travayer.  Par egzanp nou kapab envestir larzan dan lasirans.  Annou get Credit Union ozordi.  Ler i ti komanse i ti vreman en tipti organizasyon. Tou sa larzan ki dan credit union nou tou nou konnen i kontribisyon bann dimoun kin mete.  Ozordi credit union in vin li, mon pa pou dir li en gran lorganizason, me si oule i en lorganizasyon mwayen akoz son larzan in ganny zere, in ganny re envestir dan en fason apropriye kot ozordi zot annan building, e sa kapital, zot kapital in ganny miltipliye sepa par konbyen fwa.  Se sa la fason ki nou krwar en pei i devret kree larises.  Lot zour ler mon ti fer mon lentervansyon apre diskour leta de la nasyon, mon ti dir ki noun konstri lekol, lakaz, klinik etsetera me nou bezwen osi fer fason kree larises pou nou kapab mentenir sa bann lenfrastriktir. E mon krwar se dan sa menm sa lespri ki gouvernman i devret rod fason ler nou annan bann fon ki ganny kontribye par prive, par travayer, ki gouvernman i devret re envestir sa bann larzan o fir a mezir ki i kapab miltipliy son lekor e i kapab ed gouvernman dan en fason e an menm tan ler sa bann travayer in ariv zot ler i a benefisye zot.

Pou kontinnyen avek pension scheme mon realize ki si en travayer pa kontribye dan sa scheme  e i fye zis lo son anplwayer dapre mon kalkilasyon, apre 30 an sa travayer pou annan li zis ape pre R18,000 dan sa scheme.   Zis mazinen ki pou valer R18,000 dan ankor 20 a 30 an.  Alors se pou se rezon ki mon demande ki sa larzan ki la i reganny envestir e lentere i ganny mete lo la ki en mannyer i ava benefisye sa bann travayer ler in ler pou zot pran zot retret.  E plis ki sa mwan mon toultan krwar ki en travayer i devret envestir dan son demen.  Lontan en travayer gouvernman, sa mon pe dir ler mwan mon ti pe travay dan bann 1972, ler i pran pansyon i ti ganny en serten  poursantaz oswa en serten proporsyon son dernyen lapey e sa travayer i ti kontribye dan en sistenm ki kapab ler i kit travay ganny li en pansyon ki satisfezan e kapab fer li viv, gard en nivo lavi menm apre ki in kit travay. 

Mwan mon krwar la fason ki travayer i pey sekirite sosyal i devret osi la fason ki petet zot pey sa pension scheme.   En fason ki zot ti ava asire ki ler zot pran zot retret zot pansyon i ti ava en proporsyon zot lapey ki zot kit lo la e sekirite sosyal ti ava en pansyon fiks ki parey gouvernman i donnen. Ankor ennfwa mon pou ensiste, taler monn tann mon bann konleg, ler monn dir fer en board of trustees  zot dir mwan mon malad board, petet wi mon malad board  akoz mwan mon krwar dan transparans e mon krwar i pou toultan enportan ler nou ganny dimoun ki pe reprezant son larzan pou li zer son larzan. Msye Speaker mon ensiste ki i devret annan en pli bon laranzman pou pansyon, pension scheme  e la fason ki kontribisyon i ganny fer.  E an plis ki sa lefe ki sa larzan i konsern travayer ek  anplwayer ankor en fwa mon sizere ki i annan swa en komisyon, swa en board of trustees  ki ganny konstitye pou manage pension scheme.  Lo sa board  i ava annan reprezantan travayer, reprezantan anplwayer ek gouvernman.  Ansanm zot ava vwar ki pli bon fason pou reenvestir sa larzan dan en fason transparan ki pou finalman i ava dan lentere e benefis tou travayer. 

Msye Speaker mon koz prezan lo lafason ki gratwite i ganny donnen isi.  I annan dimoun ki travay dan sekter prive konmela ki pa gannyen gratwite amwen ki sa i en laranzman ki ganny agree par son anplwayer.  Sa dan li menm mon krwar i en keksoz ki devret ganny revwar. An  menm tan mon konnen osi  ki i annan dimoun dan sekter prive ki gannyen gratwite depandan lo son saler ou grander konpannyen ki i pe travay ladan.  Mon konsern lo sa size i senp. Dizon en dimoun i travay tou son lavi e zanmen in deza ganny met deor avek son anplwayer me zis akoz i napa en lagreman spesyal ler i kite i pa pou ganny naryen apard ki pansyon sekirite sosyal ki vye dimoun i touse e oswa sa pansyon ki akimile tou lezour dan pension scheme.  Sa mon krwar i en sityasyon ki devret ganny revwar. Dan sa konteks mon demande ki gouvernman i ankouraz bann sekter prive atraver bann tax incentives tel ki double taxation, pou en mannyer ki zot kapab met en larzan de kote pou donn gratwite zot bann dimoun en fason ki i a vin ekitab ek bann dimoun ki dan gouvernman. Dan bann ka ki sa i ganny fer e bann sekter prive pa fulfill zot obligasyon gouvernman i devret fer zot pey en penalti e an menm tan withdraw tou bann konsesyon ki in donn zot.  Kot i konsern gratwite dan gouvernman, mon demande ki gouvernman i revwar la fason ki sa sityasyon pe  marse.  Konmela en travayer i bezwen travay 15 an pou li ganny son gratwite, mon napa naryen kont sa, me souvann fwa nou vwar ki en travayer kekfwa ki li in travay pou 14 an e pou en senp naryen ditou i ganny met deor e i perdi tou.  Oswa en travayer in travay pou 12 an e tou den kou i tonm malad e i pa kapab kontinnyen travay e ankor enfwa i perdi.  Sa pou mwan i pa zistifye.  Mon pran en legzanp lo mwan koman en manm lasanble ki apre mon term 5 an mon sipoze ganny en gratwite e akoz alors ki en travayer kin trimouse pou 15, pou 12, pou 13 ou 14 an pa devret ganny en serten benefis apre sa bann letan travay.  Lala kot mon krwar nou annan en problenm.  Alors pou nou annan en fason pli zis mon sizere e mon demande ki gouvernman i adopte en sistenm pro rata dan en fason ki i ava plis dan lentere e benefis travayer.  Mon sizere e demande ki gouvernman i etabli en sistenm gratwite ki ava kree serten incentive pou ki tou dimoun i ava kontinnyen travay dan zot job. Par egzanp si apre 5 an gouvernman i etabli en sistenm ki en travayer i ganny li pou son gratwite  R2000 dizon e apre 10 an son gratwite i vin R8000 e apre 15 an son gratwite i R20,000. Dan sa fason sa travayer i a konnen ki si i reste 15 an i pou ganny plis larzan me si par konsekans i malad oubyen i ganny met deor, i a ganny li zis R2000 si in fer zis 5 an oswa i a ganny li R8000 si in fer 10 an.  Sa i en legzanp zis dan fason ki mwan mon ti a sizere ki gouvernman i sey vwar pou donn li lo en pro rata basis.   An plis ki sa, rezon ki gratwite i ganny donnen se pou kit travayer dan lanplwa.  Si en travayer alors i deside resign mon krwar i toutafe normal e sa i en sistenm iniversel kot ou pa ganny naryen.  Me si en travayer pou rezon maladi i bezwen arete e dizon pandan sa letan ki in ganny sa maladi in fer 90% son letan travay, savedir si i tin fer li 13 an a 14 an, mon krwar i devret ganny tou son gratwite pou li aret travay. E si par kont en travayer i ganny met deor apre ki in fer zis 2 tyer son letan, vedir si in fer zis 10 an oubyen 15 an, alors sa travayer i sorti avek sa sonm kin ganny etabli pou sa 10 an. Mwan mon krwar sa i ava en fason ki ava fer li pli ekitab e i ava dan benefis e lentere tou bann travayer e zot a konnen pou dir si i ariv en ka kot zot kite apre 5 an oubyen apre 10 an  still, zot ava annan en keksoz pou zot al avek. 

Alors Msye Speaker mon ti a demande ki tou manm dan lasanble i vot an faver sa mosyon en fason ki nou tou ansanm nou ti  a ed gouvernman pou revwar ki pli bon fason pou distribye  bann  lasistans  pou pli byen benefisye bann travayer.  Mr Speaker, I beg to move.

MR SPEAKER

Okenn ki segonde. 

(Motion seconded by Mr Daniel Belle)

 

MR SPEAKER

Bon deba i ouver, okenn kontribisyon.

 

MR CHARLES DE COMARMOND

Mon ti zis oule lonorab kin koz lo son mosyon i eklersi en keksoz pou nou lo la pou nou kapab kontinny deba.  Eski i pe dir ki isi Sesel si en travayer i bezwen kite apre ki in fer long term service  pou rezon lasante i pa ganny gratwite.  Sa ki oule dir.

 

MR  BIBI

Lo lekel, dan ki sekter ou pe dir.

 

MR DE COMARMOND

Sekter piblik dan gouvernman.  Ou pe sey dir ki dan gouvernman si en travayer pou rezon lasante apre ki in fer en bon pe letan servis i bezwen kite, i pa ganny ditou gratwite. 

 

MR  BIBI

Wi, sa ki monn dir.

 

MR DE COMARMOND

Be i fo sa.  Mon ti a kontan ki lonorab i aksepte ki sa i pa vre..

 

MR  BIBI

Be ou fer ou statement  taler ou a dir..

 

MR DE COMARMOND

Be ou pa kapab vin koz lalang devan lasanble.

 

 

MR   BELLE

Be eksplike ou.

 

MR SPEAKER

Order, order.  Ou premye lobzektiv se  en klarifikasyon lo onorab Bibi lo kwa ki in dir.  Li in konfirmen kwa ki i pe dir.  Dezyenm  pwen, si i vre pa vre, si i fo pa fo sa en lot issue   sa.  Sa ler ou debat ou fer  ou kontribisyon ou kapab fer komanter lo sa.

 

MR BIBI

Msye Speaker…

 

MR SPEAKER

Noun fini avek ..

 

MR BIBI

Non zis mon ti a kontan ki lonorab de Comarmond mon krwar personnelman ki son langaz ki in servi ki i dir mwan mon vin koz lalang mon pa ekspekte, i  pa…

 

(interruption)

 

..mon pe koz ek Msye Speaker.

 

MR SPEAKER

Order, order.   Mwan monn konpran ki i pe dir i fo sa ki ou pe dir..

 

MR  BIBI

In dir mwan mon lalang, mon pa krwar i parliamentary language pou li vin dir mwan mon lalang dan lasanble, akoz mon demann li pou retract  sa ki in dir..,

 

MR PATRICK HERMINIE

..dir li i economical with the truth.

 

 

MR SPEAKER

Order, order.   Mon krwar pou dir       “ i fo” ou kapab dir sa i en fason debat,  pou dir “lalang” i pa akseptab.

 

MR BIBI

Msye Speaker mon demande pou li retract  akoz mon pa krwar i parliamentary language  pou li dir sa.

 

MR DE COMARMOND

Msye Speaker mon napa naryen pou retract  akoz lalang i vedir fo, i vedir manti, koz mansonz, i menm zafer.

 

(interruption)

 

MR  BIBI

Msye Speaker mon annan diskresyon pou demande akoz i vin servi en langaz.  Si demen mon servi en lot langaz apre ou dir mwan pa bon…

 

MR SPEAKER

Mwan monn fer distenksyon ant ler ou dir sa statement  ki oun dir i fo,

 

MR DE COMARMOND

Sa ki in dir i fo Msye Speaker.

 

MR SPEAKER

Me si ou pe dir lalang sa ou bezwen demann li ekskiz.

 

MR DE COMARMOND

Sa ki i pe dir i fo Msye Speaker..

 

MR SPEAKER

Mon napa problenm avek sa. 

 

 

 

MR  BIBI

In dir lalang.  Mon  demande pou li demann lekskiz Msye Speaker…

 

(interruption)

 

MR SPEAKER

Order.  I  bezwen annan 1 dimoun e pa 33 ki pou desid sa lord.  Ou kapab annan ou pwennvi lo kreol oubyen lo son enterpretasyon, sa i ou lopinyon.  Dan konteks ki nou pe koze, dan konteks la konmela sa mo lalang retire, sa mo fo monn fini konpran, i pa en problenm.

 

MR DE COMARMOND

O.K Msye Speaker mon a retir mo lalang be selman fo mon still ensiste, ki i pa  korek son statement. 

 

MR SPEAKER

Bon, order.  Onorab Toussaint

 

MR BARRY FAURE

Eski Msye Bibi pe dir nou ki i aksepte ki sa ki in dir i fo.

 

MR SPEAKER

In fini reponn.  Onorab Toussaint

 

MR  BIBI

I stand to be corrected Mr Faure.

 

MR SPEAKER

La parol i pou  onorab Toussaint.  Lezot ki koze zot pa an-n ord.   

 

MR  ROGER TOUSSAINT

Msye Speaker mosyon prezante par onorab Bibi in montre, in demann plizyer konsern si oule avek lasanble.  Me kestyon pli fondamantal si monn konpran byen Msye Bibi, se eski pou annan ase larzan dan fon sekirite sosyal pou sa bann dimoun ki pe kontribye konmela letan zot ganny laz retret.  Mon kapab reponn Msye Bibi pou dir li wi i pa devret enkyet.

Msye Bibi parey monn dir in koz lo plizyer konsern me ler mon regard la fason ki son mosyon in ganny table i en pti pe diferan ek lafason ki in ganny prezante. Si monn konpran byen son mosyon se i pe demann gouvernman pou pran bann mezir pou revwar sistenm pansyon, gratwite e sekirite sosyal pou ki i vin pli benefisyab pou bann anplwaye. Refleksyon ki monn fer lo mosyon Msye Bibi, si oule sa mosyon in permet mwan reflesir ki kantite gouvernman SPPF in fer pandan sa dernyen 20 an pou promouvwar lasistans sosyal pou pep Seselwa.  Si ou permet mwan Msye Speaker mon ti a kontan fer en pti analiz lo sityasyon ki ti egziste 20 an pase.  Ti touzour fatig mwan koman en zenn  Seselwa letan mon ti pas devan stasyon petrol anvil, oswa kot sa miray otour sa gro pye mang dan bazar kot mon ti vwar en kantite vyeyar pe mandyan.  An plis ki sa mon ti souvann fwa vwar bokou dimoun mwen fortinen pe fouy dan bann konblaz oswa dustbin pou esey rod okenn restan ki zot kapab servi. Pandan sa lepok gouvernman ki ti o pouvwar pa ti fer naryen pou elimin sa sityasyon.  O kontrer zot  polisi ti plito favoriz bann ki ti pli annan. Se gras a gouvernman SPPF ki ozordi nou napa mandyan dan semen.  Sa i en rikord ki tou Seselwa enkli manm lopozisyon i devret fyer,  spesyalman letan nou vwar lo televizyon oswa letan nou vizit lezot pei dan lemonn enkli bann pei Lerop osi byen ki Lamerik kot ou vwar bokou mandyan dan semen partou e sa sityasyon pe miltipliye dan serten pei. 

Msye Speaker prezan mon ti a kontan eksplik rasyonal nou sistenm sekirite sosyal.  Sa sistenm ti ganny entrodwir an 1979 e i baze lo en prensip ki bann ki kapab travay i kontribye pou asiste bann ki pa kapab travay.  Par egzanp bann nou ki la ki pe travay ozordi, nou pe kontribye pou asiste nou vye paran oswa bann ki annan en dezabilite pou permet zot osi viv en lavi konfortab.  Depi ler sistenm sekirite sosyal in entrodwir an 1979 tou le zan in annan en logmantasyon san ki noun bezwen pas okenn mosyon dan lasanble.  Prezidan Rene in tou le zan donn en logmantasyon.  Prezidan tou resaman in reasir lepep Seselwa ki   tou le tan ki sa gouvernman i o pouvwar i pou kontinnyen get dan welfare tou Seselwa.  Sa i vedir ki lasanble i  devret santi li konfortab ki tou letan ki gouvernman SPPF i la nou pou kontinnyen vwar en amelyorasyon dan lavi tou Seselwa.  En legzanp konkret tou resaman, gouvernman ti vwar  ki bann zanfan ki ne andikape, avan ganny laz 15 an i pa ti kapab ganny okenn benefis.  Lefet ki tou letan gouvernman pe review  sistenm sekirite sosyal in trouv li neseser pou amann lalwa, pou permet bann zanfan kin ne avek en dezabilite pou zot ganny benefis envalidite nenport ler ki sa zanfan i dan bezwen.  Sa lamannman ti ganny prezante par vis-prezidan e minis finans an desanm lannen pase.  Fodre ki nou osi rapel ki i annan en kantite zenn ki deza pe ganny asiste atraver youth training scheme avek fon sekirite sosyal e la mon pe  koz sa bann zenn ki pe travay anba youth training scheme, youth apprenticeship scheme  ki zot pe ganny en saler ki gouvernman pe ed zot pou zot ganny en formasyon ziska ler zot kapab nobou ganny zot prop travay si oule en travay permanan.  I osi annan bokou dimoun ki  pe travay koman home carer avek nou bann vye paran ki pe ganny asiste avek fon sekirite sosyal.  Mon pa pou al an detay lo la, tou resaman noun koz longman lo home carer.

Prezan mon ti a kontan koz en pti pe lo sistenm pansyon ki egziste Sesel.  An-n adisyon avek sekirite sosyal ki donn en pansyon tou dimoun, irespektiv si oun travay oswa non, sistenm pansyon Sesel oswa Seychelles Pension Scheme ti ganny kree pou permet travayer pou ganny en pansyon pli eleve baze pirman lo son kontribisyon personnel avek son anplwayer.  Annou pran en legzanp kot en travayer ki tou le mwan i kontribye R100, sa vedir par an sa travayer in kontribye R1200, son anplwayer i otomatikman  kontribye  R50 ki vedir i fer en kontribisyon total pou sa travayer ki ariv R600, an total R1800 i ganny kredite tou lezan dan kont sa travayer.  Si nou miltipliy sa pou par lao en peryod 25 an, an plis en lentere 10% e sa i reponn kestyon Msye Bibi ki larzan pa pe ganny envestir.  Mon oule eksplike ki i pe ganny envesti e la mon pe baz lo en average  10%, i pou ariv anviron R120,000 oswa en pansyon R1000 par mwan depi komansman sa dimoun i pran son retret ziska ler i mor.  Si sa travayer parkont i nobou kontribye dizon R200 sa vedir i pou tous en pansyon anviron R2000.  Msye Speaker sa i aplik zis pou sa travayer kin travay 25 an.  Si i travay pandan en peryod 30 an ou 40 an, i pou neseserman ganny li en zoli pti sonm larzan ler i pran son retret.  E sa i pou an-n adisyon avek son pansyon sekirite sosyal ki parey monn eksplike pli boner ki pe kontinnyelman ogmante tou le zan.

Prezan mon ti a kontan koz en pti pe lo sistenm gratwite.  Lo sa size mon krwar ki gouvernman i deza pe kontinnyelman review.  Parey nou konnen gouvernman in entrodwir en sistenm gratwite pou bann travayer piblik an 1992 e mon ti a swete parey onorab Bibi in swete, ki travayer dan sekter prive i osi benefisye avek zot anplwayer.  Tou resaman gouvernman in revwar gratwite bann zofisye lapolis, travayer lasante e san dout gouvernman pou kontinnyen sa legzersis pou vwar kondisyon saler osi byen ki gratwite pou bann travayer dan lezot sekter piblik. Tou sa bann legzanp ki monn koz lo la i demontre ki napa nesesite pou pas okenn  mosyon pou demann gouvernman revwar sistenm sekirite sosyal, pansyon e gratwite akoz tou sala i form parti prensip fondamantal gouvernman SPPF.  Tou letan ki sa gouvernman i reste o pouvwar i pou kontinnyen revwar  sistenm  welfare sosyal pou benefis tou Seselwa.  Mwan mon pare pou vot pou mosyon onorab Bibi si i demann gouvernman pou kontinnyen revwar sistenm welfare sosyal parey i pe fer konmela.  Mersi.

MR DANIEL BELLE

Msye Speaker mon bezwen riye ler mon tann lonorab kin koz avan mwan dir ki gouvernman i kontinnyen revwar.  Sak fwa ki nou dan parti demokratik nou met en mosyon dan lasanble nasyonal kot nou demande ki gouvernman i get sityasyon bann travayer e bann dimoun mwen fortinen dan nou pei, ler mon tann dimoun dan mazorite dir ki nou nou bezwen ler nou nou koze konmsi pliy lanmen dir ki gouvernman li i bezwen konsidere fer, me zot ler zot met en mosyon devan lasanble, zot zot la pou call on government pou fer.  I vedir konmsi ki nou koman en lopozisyon nou bezwen mou ler nou demande me zot..(interruptions) egzakteman,  mon krwar zot pe viv dan en lot syek. 

Msye Speaker, mosyon ki lonorab Bibi in anmennen ozordi set en mosyon ki demontre ankor en fwa lentere ki parti demokratik e lopozisyon i annan pou fer sir ki dimoun dan Sesel, dimoun mwen fortinen dan Sesel, ki zot viv dan en fason desant, dan en fason kot zot garanti zot lavenir ler zot in travay.  Problenm ki poze ozordi se ki mosyon ki lonorab Bibi in anmennen set en mosyon ki mon krwar nenport ki dan la mazorite  ti a kapab anmennen e ler mon gete mon vwar ki sa mosyon ti a kapab sorti lo figir ou lo kreyon nenport ki manm dan  la mazorite.  Zot pann krwar ki fodre fer li, dan lopozisyon noun krwar ki i neseser e ler nou anmennen zot oule tap kalot ladan.  Sa pa premye fwa ki zot fer e mon konnen i pa dernyen fwa ki zot fer me i reste kan menm ki pep Seselwa i vwar deor lekel dimoun ki sak fwa ler nou pe fer en keksoz pou fer avanse sa pei pou ki sa pep i benefisye, i annan dimoun ki vini avek en bann mosyon i dir ou, dir ki ou ti a kontan gouvernman i konsidere, dir gouvernman kontinnyen fer. 

Msye Speaker monn ekout lonorab Toussaint kin koz avan mwan, in fer enpe politik pou li eksplike ki  20 an pase sityasyon dan nou Sesel ti en sityasyon kot dimoun pa ti okipe, bann dimoun ki ti napa….  (interruptions)… ler zot ava fini koze mon ava eksplik zot ki ti pase sa lenterval akoz mwan mon konn byen zistwar mon pei akoz si dan archives  serten dokiman in ganny detri, nou nou annan ankor kot nou, zot kapab pase vin gete. Ti annan en komite, ti annan 3 komite dan Sesel letan Angle ti isi, en komite lo lakel ti prezide par Msye France Albert Rene, en komite ti prezide par Mme Stevenson-Delhomme, en komite ti prezide par Msye James Mancham.  Msye  James Mancham li son komite ki i ti prezide sete pou okip tourism, devlopman Sesel.  Lafer ki enteresan se ki ti annan bann dimoun ki ti la pou okip travayer e ki zot in fer sa ki zot ti kapab fer anba gouvernman Angle.  Apre nou pei in vin endepandan.  E menm avan lendepandans ti annan en gouvernman de koalisyon kot  sityasyon travay ti dan lanmen vis prezidan SPUP, sa lepok dokter Ferrari.  Alors ki zot kapab vin dir nou ozordi ki pandan sa peryod ti en lot gouvernman, zot ti ladan zot osi.  Zot ti ladan zot osi.  Si parmi zot serten i ankor tro zenn pou konnen al dan archives,  gete bann dokiman ki reste e fer sir ki ler zot vin isi zot vin isi e zot konnen ki zot pe dir.

 

MR DANNY FAURE

Eski ou pe dir ki Maxime Ferrari in entrodwir mandyan dan pei.

 

MR  BELLE

Gouvernman SPUP in vin apre gouvernman SPPF parey en lonorab ti dir, ler i ti ganny lokazyon pou li vin lo pouvwar, zot tou zot konnen par ki fason, me ler i ti ganny lokazyon pou li vin o pouvwar parey en lonorab SPPF ti dir, ler i ti vin lo pouvwar i seye parey tou gouvernman akoz ler oun pran pouvwar ou bezwen fer sir ki sa pep i vin ere.  Si ou pa fer li, sa pep pou tay ek ou.  Dan sa ka gouvernman SPPF in dan bezwen fer lesansyel pou ki keksoz i marse.  E mon a dir zot, zot in fer bokou zefor, wi me zot pann fer ase e set akoz zot pann fer ase ki nou ozordi nou vin dir zot wi, oun fer, ou pann fer ase, fodre fer ankor.  E fodre pa ki ler nou pe dir zot sa, zot santi zot dan en sityasyon denferyorite e ki zot atake, zot tape, akoz nou pe dir zot en keksoz ki vre.

Msye Speaker sa mosyon ki mon pou vin lo la byensir, ler monn fini pran sityasyon ki lonorab Toussaint in dir an sa ki konsern sityasyon ki egziste avan, mon bezwen dir ki avek SPUP gouvernman demokratik sa lepok ti enstore dan sa pei avek Angle, ti enstore dan sa pei en keksoz ki ti apel  national provident fund kot travayer ler i travay i kontribye en poursantaz, la son anplwayer i kontribye en lot poursantaz e ki sa larzan i al dan en fon pou lentere sa travayer. Kin arive avek, en bon kestyon mon pe vin lo la.  Sa keksoz i mars byen, ti pe mars byen, in marse dan lezot pei.  Mon rapel lo sa komite ki ti annan, ti annan en reprezantan gouvernman e pandan lepok ki mon rapel, ti chair par en dimoun ki ti dan SPUP akoz i ti minis.  Ti annan reprezantan travayer, epi ti annan reprezantan anplwayer.  Akoz?  Sa bann dimoun i kontribye pou fer sir ki sa travayer ler in ariv en serten laz kot i bezwen pran son pansyon, ki i annan ase larzan ki limenm avek son anplwayer in kontribye. Nou tou nou konnen ki sa fon national provident fund  ti ganny, dan en serten fason larzan sa bann dimoun, ti ganny freeze,  bann ki ti deor, bann ki ti kapab al tir zot larzan ti tire, e lezot mon pa konnen kin arive avek sa bann larzan, mon krwar in distribye partou, bann kin al claim in gannyen.  Epi kin arive, gouvernman i dir zot donn pansyon, i byen, apre la ozordi nou pe repran nou pe dir travayer kontribye nou pe dir anplwayer kontribye.  I byen, nou fer parey i dir, en pa an-n avan e si i neseser nou fer en pa an-n aryer, apre nou avanse.  Sa ki mon oule dir se ki ler nou fer bann erer dan le pase e nou tou nou fer lerer, nou pa kapab vini ozordi vin kritik zis en parti pou dir in fer erer.  Lesansyel se ki ozordi nou tou dan Sesel, i parti SPPF e parti Demokratik e parti UO, nou dan en pei kot nou pe travay pou lavenir sa pei.  Alors pa vin dir mwan bann keksoz dan le pase ki donn lenpresyon ki dimoun ti ganny R250 pou pansyon, wi zot ti ganny R250 pou pansyon, wi zot ti gannyen.  Akoz, akoz en pake pwason sa lepok ti kout 75 sou.

MR DE COMARMOND

Be zis detrwa ki ti gannyen.

 

MR BELLE

Wi, egzakteman… (interruptions)….

Msye Speaker ozordi nou annan dimoun dan Sesel ki gouvernman i defann mandyan dan Sesel, me ozordi si ou desann obor  Oceangate House,  ou pou vwar li sa bann dimoun ozordi ki abiy li prop e i dir ou Msye mon pe kouver mon mizer e sa dimoun i bezwen ale la kot gouvernman i dir bann dimoun ki bezwen i vin sers son larzan kot means testing.  Dan sa ka, kot means testing  parey nou tou nou konnen sa bann dimoun ki al laba zot al rod sa larzan, bann ki gannyen i pa bezwen al fouy dan dustbin.   Be bann ki pa gannyen, kot i pou al fouye li, dan dustbin, oun demann mwan, dan dustbin.  Msye Speaker  i vre ki sak fwa nou tous en problenm ki konsern travayer, dimoun dan Sesel e ki gouvernman pann fer ase e ki i rekonnet i pann fer ase, akoz lopozisyon in anmenn en mosyon, zot sote parey dyab dan delo beni..

 

MR DANNY FAURE

Speaker oli dyab, oun vwar dyab la

 

MR SIMON GILL

Sa fodre retract  sa statement Msye Speaker.

 

MR SPEAKER

Onorab Belle..

 

MR MICHEL GARDETTE

Bomaten ki nou ti vwar dyab,  bomaten ki ti annan dyab dan delo beni.

MR SIMON GILL

Dyab tin ganny met deor bomaten.

 

MR DANNY FAURE

Nou ankor dan karenm ou pe rod dyab.

 

MR SPEAKER

Eski ou pe ensiste ki zot dyab?

 

MR BELLE

Msye Speaker set enn ekspresyon Seselwa, an kreol dan diksyonner Mme de St Jorre avek tou respe ki vedir  en dimoun ki pa konnen kot i pou taye.

 

MR DANNY FAURE

Nou dan la semenn sent ou vin rod dyab.

 

MR SPEAKER

Bon si ou kapab kalme enpe, epi  pran enpe bann ekspresyon pli akseptab.

 

MR BELLE

Mon pa pou servi term pti pisar mwan akoz i pa bon sa.

 

MR DANNY FAURE

Akoz i pa la, i pa la ozordi.

 

MR BELLE

Bon, Msye Speaker akoz ki sak fwa ki nou koz lo en matyer serye ki bann dimoun dan mazorite toultan zot gognarde e ki zot pa ekoute sa ki nou annan pou dir dan en serten fason ki nou kapab ede pou fer avanse sa pei.

 

MR DANNY FAURE

Akoz nou annan problenm ek son matyer premye.

MR BELLE

Me si zot krwar ki..

 

MR SPEAKER

Order, order.  Annou vin lo mosyon

 

MR BELLE

Msye Speaker mon dir ki si bann manm dan la mazorite i enpe pli kalm i tout a fe normal ki ler mon a vwar zot kalm mwa konpran ki lasanble i merit en serten serenite e ki mwan dan mon pozisyon mon ava vin enpe pli kalm.  Me mon bezwen koz enpe pli for akoz zot pe koze an menm tan ki mwan.  Si ou demann zot pou aret koze ler mon koze, mwa koz enpe pli kalm e mon pa a bezwen kriye.

 

MR SPEAKER

Mon pa ziz keksoz avek kondisyon sorti kot en manm asanble.  Me selman kontinnyen vin lo mosyon.

 

MR BELLE

Mon lo mosyon, lonorab Toussaint osi ti lo mosyon.

 

MR SPEAKER

Non, non.  Oun met en kondisyon devan mwan, ou dir ou pou kalme si mon dir zot kalme.

 

MR BELLE

Dir zot kalme, mon vini.

 

MR SPEAKER

Sa ki mon pa aksepte.  Silvouple tourn lo mosyon.

 

MR BELLE

Bon dan sa pei, parey monn deza dir e ki nou pou redir ankor,  e ki lonorab Bibi in dir ozordi se ki i annan dan sa pei en group dimoun ant 50 ziska 63 z-an se bann dimoun ki zot tro zenn pou zot ganny sekirite sosyal e ki zot tro vye pou zot ganny en nouvo lanplwa.  Sa bann dimoun i annan en kantite dan Mahe.  Bann ki zot in nobou abzorb anba home carer ki ganny zis R800, i o.k me i annan ankor.  E sa bann dimoun zot, zot ti a kontan ki gouvernman i get dan zot ka.  Ki mannyer ki en dimoun ki annan 60 an, ki dan en sityasyon ki napa lanplwa, i bezwen li dan en serten fason pa ganny okenn drwa whatsoever  e ki sa dimoun, sa msye 60 an oubyen sa madanm 60 an i bezwen osi al queue up kot means testing pou li gannyen en pti lasarite, pou li al mandyan kot means testing.  Si ou dir mwan i en drwa donn li son drwa.  Si ou dir mwan i pa en drwa aranze pou fer li vin en drwa pou li.   Me nou konstitisyon in dir nou ki sekirite sosyal  est en drwa pou tou nou sitwayen.  E mwan mon ti ava propoz la chose suivante,  mwan mon propoze, mon parti i propoze ki nou fer li, si en dimoun 63 an i ganny li R1250, ki sa ki anpes en dimoun ki annan 62 an, 61 an, 60 an ganny li osi en serten sonm larzan ler i bezwen, dan en serten sonm larzan o pro rata sa keksoz.   Nou konnen i annan dimoun 63 an dan pei ki bann dimoun ki annan mwayen, kin travay i annan biznes, bann dimoun ki ris, i annan 63 an, i osi i gannyen R1250.  Si ou donn li i pou pran.  Si ou pa donn li i pa pou claim.  Me i entitled,  ou donn li.  Me i annan nou kon-sitwayen ki napa naryen, i annan 62 an, 61 an, 58 an e li i pa benefisye dan naryen.  Mwan mon demann zot parske la mazorite i dan zot lanmen, nou  nou a met mosyon pa pou pase, mon demann enn parmi zot met en mosyon, nou a vot lo la pou dir ki gouvernman i pran konsiderasyon pou donn bann travayer e bann dimoun dan Sesel ki pa travay e ki annan sa laz, en pansyon dofis outright.  Ou pa a dir mwan ki ler mwan mon demande ou dir mwan i pa bon.  Selman i annan en seri mosyon pe vini, Mme lonorab Plaisance in anmenn enn pou home carer, lonorab Danny Faure pou anmenn enn pou bann youth unemployment scheme, i annan ankor ki pe vini, mwan mon dir be annou gete nou donn tou dimoun, tou dimoun ki bezwen i gannyen konmsa zot a vwar zefor ki parti SPPF pe fer.  Me pa vini ler nou pe anmenn en keksoz pou vin tap kalot ladan e ki ou ler ou reanmenn li 2 an apre ou ekspekte nou vot lo la.  Me wi nou pou vot lo la.

Msye Speaker dezyenm keksoz.  Ler monn koz dan ka sa bann dimoun ki monn dir zot laz, dezyenm keksoz ki mon anvi koz lo la se kestyon ki mannyer pou zer sa larzan ki sorti kot bann dimoun, lafors viv dan la nasyon, dimoun ki kontribye dan sa sekirite sosyal.  I vre ki fodre annan en poursantaz  ki ou met dekote pou sa bann dimoun ki dan en sityasyon zot pann travay, zot pa travay, zot malad, zot andikape, i vre ki fodre i annan en solidarite lo sa keksoz.  E sa nenport ki gouvernman ki pou vini demen, menm en gouvernman parti demokratik pou fer sir ki sa keksoz i ganny mentenir. Akoz sa parey ou dir parti demokratik avek SPPF in fer sir ki i antre dan konstitisyon. Mersi Msye Faure ki oun rapel mwan sa.

 

MR GARDETTE

National provident fund ti napa selman

 

MR BARRY FAURE

Diferans se ki filozofi SPPF.

 

MR BELLE

Koz filozofi ziska ler ou fatige.  Filozofi i parey ozordi.  Filozofi SPPF, filozofi Ameriken i parey, filozofi DP i parey…… 

 

MR B. FAURE

Filozofi ki zot in forse aksepte

 

MR BELLE

…sel keksoz ozordi se ki nou kanmi pou nou dir ki nou pe swivre menm filozofi ki noun etabli depi 1963 (interruptions) e ki DP ti forse large akoz an 1977 zot in ganny lokazyon pou vin o pouvwar, sans pou vin o pouvwar parey lonorab i dir e ki otomatikman nou nou ti bezwen les tonbe nou filozofi e zot zot ti bezwen pran e kontinnyen avek. Msye Speaker i vre ki ler noun fini riy lo keksoz enportan nou ava  ofon de nou aksepte nou tou isi dan lasanble ki in ler pou nou fer sir ki dimoun ki travay dan Sesel, pa nou kin envante lasirans sosyal pou bann travayer, pa nou dan Sesel kin envant pansyon pou travayer, pa ni filozofi SPPF, ni filozofi DP kin envant pansyon pou travayer, kin envant gratwite pou travayer, me sa ki enportan se ki nou sey fer li pou li vin en fason ki tou nou travayer i benefisye, tou dimoun dan Sesel i benefisye e ki nou reget ladan de tan-zan-tan akoz i neseser e ki nou fer sir ki en gouvernman ler i la pandan 5 an i pa la pou li pran sa larzan ki travayer, larzan travayer avek son anplwayer, larzan kot travayer in kontribye e ki son anplwayer in met osi lo la parey dan Sesel ozordi, ki sa gouvernman i pran sa i met a kote, li ki deside ki pou fer avek e ki ler i pre eleksyon, fon i fini, ler nouvo eleksyon i vini nou rekonmans ramas ankor e ki sa dimoun li parey Msye Toussaint i dir ki ava asire i ava annan larzan.  Mwan mon krwar ki in ariv en ler parey onorab Bibi in propoze e ki mwan osi mon krwar mon ava segonde sa propozisyon, ki nou get en sitiasyon kot sitiasyon travayer zot larzan, larzan ki lepep i travay i ganny mete separeman dan en fon kot lanplwayer ou son reprezantan akoz lanplwayer osi i kontribye, travayer ou son reprezantan son bann union, se sa reprezantan travayer, union se sa son louvraz, veye ki larzan travayer i ganny byen depanse dan lentere sa travayer e ki gouvernman, i normal ki gouvernman ki opouvwar i ede pou manage sa fon i pran desizyon adekwat ki permet ki sa larzan i ganny envestir pou ki i fer pti piti kantite pti larzan ankor pou kapab re-envestir e ki en poursantaz ladan parey monn dir i ganny donnen pou bann dimoun andikape, pou bann dimoun ki ganny afekte, pou banny dimoun ki pli napa, bann dimoun ki pa travay.  E ler nwa fer sa e ki gouvernman ler i bezwen pret larzan dan sa fon i prete.  Nou pann envant narnyen, nou pa pe envant larou isi i ganny fer dan bokou pei – taler i annan enn pou demann mwan dan ki pei, Lafrans par egzanp e i mars tre byen, sekirite sosyal laba i mars byen.  Lafer ki enteresan se ki nou nou bezwen osi annan lezot pei, bann nouvo pei ann Afrique pe sey antre ladan sa keksoz, Gabon pe seye e nou nou  bezwen esey fer en fason kot i ava marse dan nou pei osi. 

En lot keksoz akoz sa larzan ler noun dir ki i annan lentere ki al avek, nou bezwen fer sir ki ler travayer i met son larzan dan en fon ki sa larzan i degaz bann lentere.  Ozordi en roupi i vo en roupi me demen en roupi pa vo en roupi.  Ler ou met li dan labank i fer pti piti i ganny lentere.  Akoz sa larzan travayer ki son anplwayer i met ansanm nou pa met li dan en fon ki fer ganny lentere pou sa travayer, en fason ki sa travayer i kapab pret son prop larzan pou li aste son lakaz.  Be wi, ler en dimoun in kontribye pandan 10 zan, dan en fon, en fon sekirite sosyal parey nenport ki fon lasirans, i merit nobou ale demann pret en larzan pou li aste son lakaz. Dan sa ka zot a pret li enpe larzan i ava ed li pou li finans son lakaz.  Sa bann keksoz koumsa i posib.  L’affaire se ki nou sanz nou mantalite nou get li dan en fason kot larzan sa travayer belongs to the worker

 

MR DE COMMARMOND

Msye Speaker, point of order, klarifikasyon.

 

MR SPEAKER

Ou dakor Msye Belle.

 

 

MR  DE COMMARMOND

Eski Msye Belle i kapab esplike koman or klarifye plito koman en travayer ki met son larzan dan tel fon ki i pe dir ki dan 10 zan i pou ganny loan pret en larzan, sa travayer at the moment ki i komans travay la i annan son bezwen lakaz koman dan 10 zan ki i ou pou ganny prete larzan pou fer lakaz.

 

MR  BELLE

Msye Speaker, i annan dimoun ozordi kin komans aste lakaz san en roupi dan son lanmen parey prezidan in dir.  Me i annan dimoun ki tia kontan annan son larzan dan son lanmen ler i aste son lakaz pou ou pa fatig li apre.

 

MR DE COMMARMOND

Ou bezwen i la e ou pe koz dan 10 z-an, koman ou gannyen la.

 

MR  BELLE

I annan dimoun ozordi ki pe lwe lakaz me i pe travay e i pe kontribye dan sekirite sosyal e sa dimoun dan 5 an 10 zan akoz i annan lafors i pe travay tou keksoz i pou fer mannyer kot i ava ganny pret en larzan pou li kapab met dan sa fon pou son lakaz.  Byensir mon konpran lonorab de Commarmond pa war sa keksoz e i pa etonn mwan ki si li i pa war son bann koleg i riye.  Me mon krwar petet nou bezwen en konsiltan pou vin eksplik zot ki mannyer bann keksoz i kapab marse pou Sesel. 

 

MR DE COMMARMOND

Si pa reel ou pa kapab war li.

 

 

MR  BELLE

Msye Toussaint in dir dan son speech eski gouvernman pou annan ase larzan dan quelques années e in reponn wi malerezman ler bann travayer pou la dan quelques années dan 20 ou 30 an petet Msye Toussaint pa ava la pou li reponn kestyon.  Akoz i fasil ozordi ler nou asize nou dir pou annan larzan, pou annan larzan.  Larzan en keksoz kot ou bezwen kontribye, ou bezwen ramase pou li annan.  Mon krwar ki lesansyel lo sa mosyon, monn dir sa 2 pwen ki mon pli enterese avek.  Msye Bibi in fer li en bon prezantasyon.  Sa mosyon i en mosyon ki dimoun ki pe ekout nou zot war son lentere, bann zenn dimoun ki pe ekout nou i a konpran ki ler i pe travay nou pe mazin lavenir, sa bann dimoun ler i ava ekoute bann diskisyon ki pou ganny fer par lezot manm SPPF zot ava vwar dan en serten fason ki mannyer dan en lasanble parey nou ete i annan dimoun ki expert ki mannyer pou noy pwason.  Akoz nou noun anmennen en mosyon pou diskit lo la, mon espere ki dan lentere sa travayer nou pa ganny dimoun ki vin konfiz sitiasyon e pran Msye Bibi ozordi kin anmenn mosyon koman en akize olye pran li koman en dimoun kin avanse keksoz pou byennet sa pep.  Mersi Msye Speaker. 

 

MR PATRICK HERMINIE

Onorab Belle ozordi in vin pli SPPF ki SPPF ……

 

MR BELLE

Sa ou kanmi la ler ou dir sa.

 

MR DANNY FAURE

Ou bezwen manz margoz ozordi.

 

MR HERMINIE

e mon tia konseye a lavenir nou enterdi bann manm al bwar diven dan midi.

 

MR  BELLE

Msye Speaker mon tia kontan ou demann….

 

MR SPEAKER

Order.

 

MR  BELLE

Msye Speaker ou annan pou dir li tire akoz sa se en keksoz ki vreman mechant e

 

MR DANNY FAURE

Anmenn breathalizer nwa vwar

 

MR BELLE

…. pou sa mon ale dan lasanble akoz mon pa kapab ler mon koze en dimoun swadizan en dokter ki respektab ou vin dir en keksoz parey.

 

MR PATRICK HERMINIE

Ah come on dir li …..

 

MR SPEAKER

Onorab Belle.

 

MR  BELLE

Mon demann en apology

 

MR HERMINIE

Mon kapab kontinyen Msye Speaker.

 

MR SPEAKER

Tyonbo en kou.

MR BELLE

Msye Speaker mon demann manm apologise.

 

MR SPEAKER

Onorab Belle monn demann ou tyonbo en kou.  Zot tou relax enpe la.  Premyerman mon domenn lotorite i dan precincts lasanble.  Kot ou al manze kot ou al bwar, sa en lot zafer.  Dezyenmman en remark in ganny fer i pann ganny mete avek okenn fason personel ni ofansiv, sa mon ruling.  Ou napa okenn rezon ni pou ofanse ni pou pran li personel.  Vwala.  Onorab Herminie si ou ti kapab kontinyen.

 

MR BELLE

Lonorab ou bwar ou osi.  Ou bwar en kantite ou.

 

MR SPEAKER

Be la mannyer ou pe vini ou pe dir konmsi ou ki sa dimoun ki fer sa.

 

MR DANNY FAURE

Pa fodre ou ale, reste …

 

MR HERMINIE

Childish sa boug, pti marmay.  Msye Speaker, mon kapab kontinyen.  Bon dabor mon tia komanse par met serten alegasyon kin ganny fer dan sa lasanble apremidi met lo rikord drwat egzakteman nou sitiasyon ki mannyer ti ete, souvann fwa ler nou koz lo 20 an 30 an pase e letan noun koz lo sa 55 a 63 zan sa group dimoun ki nou dir pa pe ganny travay.  Nou konn tre byen, boulgor onorab Faure in koz lo la, nou konn tre byen ki ti housing policy DP an 76, caravan site dan mon distrik, nou konn tre byen ki son lider ti mont lo radyo e dir avek nou ozordi Seselwa i en pep ere i kapab mars partou dan son lakaz e sa ti zot polisi.  Mon pa bezwen al dan bann detay le pep Seselwa i annan ase konesans ase lentelizans pou rapel sa bann letan ki onorab Toussaint in koz lo la an detay.  Zot koz lo bann dimoun ki ozordi ki annan 55 an ziska 63 z-an ki napa travay, si zot ti donn en bon formasyon sa bann dimoun 20 an pase, 30 an pase, se zot ozordi ki ti pe fer louvraz ki sa kantite etranze pe fer dan sa pei.  Set akoz zot pann ganny en bon ledikasyon then ki ozordi nou problenm mank lanplwa pou sa kategori dimoun se sirtou bann dimoun ki napa serten skill.  Sa homecarer i napa en skill, me si ou tin train li donn li en formasyon koman en nurse i ti ava pe travay koman en nurse ozordi, koman en teacher i ti ava pe travay koman en teacher ozordi e rezilta sa sistenm ki SPPF in inherit an 1977.  E erezman nou ti bezwen move an 1977 sansan nou ti pou war sa bracket pli gran ankor probableman 25 ziska 63 zan. 

Msye Speaker pou mwan retourn lo kestyon social security.  Mon krwar onorab Bibi dan son lentervansyon in konfiz enpe konsep social securitySocial security parey noun refer sorti a plizyer repriz dan sa lasanble, i form labaz, labaz prensip SPPF, i sa krwayans ekite care and share ki prezidan limenm sa lannen in koz lo la.  Mon pa pou al an detay onorab Toussaint in deza koz lo sa ki annan i ed sa ki napa, sa ki ganny plis i kontribye dan welfare sa enn ki ganny mwens, dan welfare sa andikape, dan welfare sa dimoun aze, sa i form parti en prensip ki SPPF pa pou zanmen abandonnen.  Zot in anmenn plizyer mosyon, zot anmenn mosyon, en prensip ki pe marse, me plizyer mosyon in ganny anmennen pou esey sanz sa prensip.  I annan bann ki dir bann anplwaye pa pey social security, i annan en lot ki dir ki nou vin review.  Be akoz ou bezwen review en sistenm ki son prensip si oule i pe marse e ki ozordi dan sa pei parey in ganny obzerve par plizyer dimoun kin koz avan mwan, nou napa mandyan, nou bann dimoun ki andikape pe viv avek dignite nou bann vyeyar osi pe viv avek dignite.  I montre ou ki sistenm pe marse.  Ozordi dan sa pei okontrer avek sa kin ganny dir, ler en dimoun i tonm malad i fo pou dir ki otomatikman i al lo social security i ganny li R900 or whatever.  Pandan en peryod 3 mwan gouvernman i garanti li en saler plen e apre sa si son maladi i prolonze la i al lo social security.  I posib ki vre ki pa neseserman ki son kantite ki pe gannyen i pou satisfer la fason ki li i tia voudre viv.  Mon konn gouvernman SPPF tre byen, onorab Faure i a konfirm avek mwan, sonm ki ozordi pe gannyen apre eleksyon 98 otomatikman gouvernman SPPF pou regete e ogmante, homecarer in ganny ogmante, onorab Faure pe anmenn enn i pe demande pou ogmante…

 

MR BELLE

Apre eleksyon, fer la konmela avan eleksyon

 

MR HERMINIE

si i neseser nwa fer li menm avan be ki mwan mon pe dir  polisi sa gouvernman in tel ki toultan i pe gete i pe etidye e pe demande eske i ase pou sa boug e si i pa ase nou fer ogmante

 

MR  BELLE

Me la i pa ase la donnen.

 

MR SPEAKER

Order.

 

MR HERMINIE

e mosyon apre mosyon pou ganny anmennen dan nou kote pou ogmante akoz nou nou krwar senserman ladan.  Sa endividi si i ganny difikilte pou li viv, son zanfan, tou son zanfan ki anba 18 an i ganny siporte par social security i fo pou dir ki zis li  ki ganny sa larzan, tou son zanfan anba 18 i osi ganny siporte par gouvernman e si pa ase i kapab al kot means testing laba, Mme Charles a konfirm mwan, gete tou sa la en kantite, e si i pa ase means testing i antre i ed sa fanmiy ankor.  Se sa sa sistenm care and share ki nou nou krwar ladan.  Se sa sa prensip kan menm letan nou nonm sa mo sosyalis ou ankoler, ki SPPF i krwar ladan.  E pou DP ozordi vin dir ki zot zot krwar ladan donk i montre en sanzman radikal dan zot pozisyon sirtou an sa ki konsern zot polisi sosyo-ekonomik.  DP in toultan en parti kin la get lentere bann ki annan plis e i pann en parti pandan letan kin o pouvwar ki swa pandan letan kolonyal  oswa zis apre lendepandans kin si oule redistribye larises lepep pou fer sir ki sa boug ki ti pe mandyan deryer sa miray ti ganny enpe pou li pa al mandyan.  Ozordi menm si i sanze dan en zoli lenz, onorab Belle i dir pou kasyet son mizer, omwen i annan larzan pou aste en zoli lenz omwen en pep ki pe ganny ase larzan pou li viv an dignite.  Me yer i ti napa menm larzan pou aste en kannson e onorab Belle i konn sa tre byen akoz sa letan i ti en manm parlman dan sa sistenm.

 

MR  BELLE

Avek Msye Rene, Msye Philibert Loizeau, Msye Guy Sinon.

 

MR ANDRE POOL

Met sa boug sou deor

 

MR HERMINIE

E monn al dan archives parey i dir e mon pann zanmen war en mosyon par onorab Belle pou elimin la povrete e bann beggars dan Sesel.

 

MR  BELLE

Msye Speaker i annan me i pann vwar. Archives in ganny perdi, in bril tou laba.

 

MR DE COMMARMOND

Zot menm kin donn angle in zete.

 

MR HERMINIE

Msye Speaker, en lot pwen kin ganny fer sorti par onorab Bibi ki mon tia voudre koz lo la se sa kestyon la sonm sekirite sosyal ki dimoun i gannyen ler i ariv 63 zan.  Ankor enn fwa parey mon dir nou kontribisyon a sa moman se si oule en lasirans.Onorab de Comarmond i travay dan lasirans i ava dir ou ki letan ou kontribye dan en lasirans se pou ed ou dan sa moman si ou ganny okenn difikilte, si ou aret kontribye ou pa ganny naryen. Lasirans prive konmsa menm i marse, Kenya e lezot pei avek lorientasyon kapitalis kot i annan en lasirans prive pou siport bann dimoun avek maladi, si sa boug i aret kontribye i pa ganny naryen.  E menm atraver son kontribisyon, son depans dan lopital i ganny kouver parsyelman petet 80%, 50%, 30% baze lo ki kantite li sa endividi i kontribye.  Isi Sesel nou dir non, nou dir irespektiv ki kantite ou kontribye, si demen ou tonm malad ou pou benefisye parey sa boug ki kontribye plis.  Si demen ou annan ou bann zanfan ki bezwen al lekol ou pou benefisye parey sa boug ki kontribye plis.  Sa se prensip SPPF nou krwar ladan e zot kapab anmenn en milyon mosyon SPPF pa pou sanze sa, akoz SPPF i toultan krwar dan care and share, sa ki pli for i bezwen ed sa ki pli fay. Sa endividi letan i ariv laz 63, annou konpar sa boug ki ganny 1900 avek sa boug dizon ki lo kontra.  I annan kant menm en diferans dan la sonm ki sa 2 endividi pandan peryod ki zot pe travay ki zot pe gannyen.  Sa boug ki ganny plis i kapab fer plis savings par egzanp.  I annan en sistenm gratwite ki pli siperyer ki sa boug ki ganny 1900.  I kapab kontribye dan lezot scheme par egzanp life insurance pou li garanti en fitir demen.  Mon pa war alors akoz letan in ariv ler pou retire  a laz 63 zan dan sa scheme i bezwen li si oule benefisye pli byen ki sa boug ki ganny 1900, mon krwar ki sa i pou enzis.  Anplis sa kontribisyon i pa baze lo ki kantite ou pe kontribye se lespri deryer li ki enportan, akoz i posib ki ou pe kontribye plis me akoz ki ou malad plis, akoz ki ou annan plis zanfan ki al dan lekol piblik ou ou pe benefisye plis ki sa boug ki ganny 1900 me ki pe kontribye mwens.  Nou pa gete tou sa la.  Nou pa gete si ou ou annan 5 zanfan, oswa 10 zanfan, oswa ou malad ou bezwen reste lopital pou 6 mwan, 7 mwan.  Nou sistenm i desote tou sa la, i depase.  Nou sistenm i dir ek ou mon frer ou dan en problenm, ou ki pe ganny plis oun kontribye, ou ki pe ganny mwens oun kontribye sa ki ou kapab kontribye e nou tou nou ava benefisye dan en fason apropriye.  An dizan sa i enportan ki mon refer sorti akoz deryer sa mosyon onorab Bibi, deryer sa ki li in entrodwir i pe dir ek ou akoz sa boug in ganny plis, alors ler i ariv laz sekirite i bezwen kontinyen ganny plis ki sa boug ki ganny 900 oswa 2100.  Nou bezwen realiz lenzistis dan en tel propozisyon.  Pou ou dizon kapab al lo en 4800, souvann fwa ou bezwen al en course zis koman en legzanp mon pou donnen.  Souvann fwa, onorab Bibi i konn tre byen ler i ti lo course, ganny anvoye par gouvernman SPPF, ki son saler isi ti pe ganny peye par gouvernman, ti pe al dan labank tou le mwan i konn sa tre byen mon pa pe al personel, mwan osi ler mon ti lo course ti menm zafer, be lekel ki pe fer sa kontribisyon, se sa sarpantye….

 

MR BELLE

Pou li in peye par gouvernman angle…

 

MR SPEAKER

Order.

 

 

 

MR HERMINIE

Lekel ki pe fer sa kontribisyon, se sa sarpantye, se sa mason, se sa boug ki netway semen, se zot ki ti pe fer sa kontribisyon pou ki demen nou ti kapab vin dokter, nou ti kapab vin avoka, nou ti kapab vin economist, nou kapab vin bankers.  E apre ki sa endividi in travay dir ou pe dir ek li zour li i ganny 63 zan, i bezwen ganny mwens ki mwan ankor.  Set en lenzistis ki ankor enn fwa parti SPPF pa pou zanmen aksepte. 

Msye Speaker Pension Scheme, onorab Toussaint in fer en entervansyon formidab, fantastik e in demontre ki mannyer atraver en Pension Scheme ou larzan i ganny envestir.  Mon felisit li lo sa lentervansyon e si oule i met to rest sa bann krentif ki onorab Bibi ti pe koz lo la.  Lo gratwite mon krwar nou tou nou konnen, i fasil  pou nou vin fer politik lo gratwite, donn plis donn mwens, nou kapab kontinyen dir sa, nou kapab dir double triple etsetera gouvernman SPPF ler in ariv ler pou ogmante i pou ogmante.  Nou nou travay si oule an-n ord nou dir la nou ganny 2000 nou donn 1000, zour nou pou ganny 4000 nou pou donn 2000 e zour nou ganny 10,000 nou pou donn 5000, letan nou ganny 20,000 nou pou rann travayer 15,000. Sa i prensip sa parti e nou pa bezwen personn pou vin dir ek nou kan pou ogmante e kan pa pou ogmante.  Gratwite i baze lo en prensip.  Son prensip se ki ou travay, ou ganny en serten lankourazman pou kontinyen deservi dan ou louvraz, pou kontinyen ed gouvernman e i dir ou apre 5 an mon donn ou en gratwite.  Me si ou avan 5 an ou deside lo ou menm pou ou kite, i defet prensip en gratwite.  Prensip sa gratwite efektivman se pou ankouraz ou pou reste 5 an e pou kontinyen kontribye pandan 5 an. Si mwan ki lo kontra apre 1 an mon kite, mon pa kapab espekte gratwite, gratwite ti form parti kontra pou ki a lafen 2 zan mwa ganny en serten nonm larzan me ki osi mon deservi pandan 2 zan.  I sitan senp konmsa e tre malere ki parfwa nou war bann dimoun ki vin la anndan pou fer politik avek bann keksoz parey.  Dernyen pwen ki mon ti le koz lo la Msye Speaker, se sa board of trusteesBoard of trustees in ganny demande pou envestir si mon ti pou demande lekel bann boug ki ti vin lo sa board ankor en fwa zot ti pou dir ek nou bann dimoun dan prive, e dernyen fwa ler nou ti demande lekel ki pou al lo tender board, zot ti dir ek nou pran Ombudsman oswa enn de dimoun dan prive.  Nou konnen lekel sa bann boug dan prive, nou konnen ki zot lafilyasyon e sa i montre nou ki bi sa bann mosyon, pou ki kontrol lo larzan travayer i ganny egzerse par enn de zot dalon dan prive e nou nou bezwen reziste sa a tou moman.  E onorab Bibi osi dan son rezimen mon tia voudre i refer sorti avek nou, dan sa envestisman ki i oule sa bann boug i envestir ki i arive si dizon zot faid.  Onorab Bibi ou dir mwan ou konpran byen lekonomi bann zafer koumsa, mon krwar ou konnen….

 

MR  BIBI

Msye Speaker i pe dir mwan monn dir li la, oswa i pe zis spekile.

 

MR SPEAKER

Ou pou ganny sans dan ou rezime.

 

MR HERMINIE

Dan ou rezime ou ava dir sa.  I bon dir avek nou ki arive si biznes i faid, akoz biznes i kapab faid, biznes pa neseserman ki i marse.  E dan ki fason ki sa board of trustees i accountable.  E pou terminen mon pou dir ki mon pou vot kont mosyon onorab Bibi akoz parey mon le fer sorti i al kont, fondamantalman kont prensip ki mwan konman en endividi mon krwar ladan, endividi ki krwar dan caring and sharing e mon bezwen ed kanmarad pou ki nou tou nou kapab al pli devan.  An menm tan mwa eksprim sipor pou lentervansyon kin ganny fer par mon koleg, mon krwar ti entelizan e formidab e i regretab ki apre noun tann bann entervansyon si oule pou distort laverite e fer en bann alegasyon.  E i annan serten manm dan lasanble ki kanmenm, ou bezwen respe zot pou serten keksoz, zot lanmour pou lanvironnman akoz sak fwa zot vin dan lasanble zot servi bann mo resikle.  Mersi Msye Speaker.

 

MR SPEAKER

Bon avek sa nou pran en break ziska 4 er.

 

(Sitting suspended accordingly)

 

MR SPEAKER

Nwa kontinyen nou deba.  Avan nou komanse mon oule dir detrwa mo san ki mon enterfer dan deba, ni limit deba, mon krwar serten lesansyel in fini ganny fer ant sa de pozisyon sirtou lo filozofi, diferans filozofi, serten analiz istorik e politik, serten lo striktirel e mon tia kontan konsey zot evite antre dan repetisyon, ekspresyon ofansiv e atak personel.  E touzour nou seye i pa toultan fasil nou sey debat dan kalm.  Bon avek sa onorab Faure, la parol pou ou.

 

MR BARRY FAURE

Eskize Msye Speaker mon pankor lev mon lanmen anler. 

 

MR SPEAKER

Be dan sa ka mwa azout ou non.  Onorab Esparon.

 

MR DICK ESPARON

Non Msye Speaker mon pa tia kontan fer entervansyon lo la, mersi.

 

MR SPEAKER

Oule koze?

 

MR PAUL CHOW

Lanmen pe leve laba Msye Speaker.  Ti napa lanmen taler, la prezan en pti kou lanmen i leve.

 

MR SPEAKER

Ok, eski nou annan en deba lo lanmen la.

 

MR PAUL CHOW

I annan ankor lanmen pou leve.

 

MR SPEAKER

Lekel ki oule koze la.  Si napa lanmen akoz nou prosedir pa koz lo apre sa enn oubyen avan sa enn.  Si napa lanmen….

 

MR SIMON GILL

Msye Speaker, mon le move nou close debate lo sa size.

MR PAUL CHOW

Be les mwan koze non.

 

MR SPEAKER

Non, le pwen se si napa lanmen, ou le koze onorab Chow.

 

MR CHOW

Wi, monn lev mon lanmen Msye Speaker mon ti zis oule port ou latansyon akoz mon war bann lev lanmen laba, zis pou fer ou konnen pou dir zot anvi koze.

Msye Speaker zanmen mon ti realize ki en mosyon sitan straightforward i kapab lev sitan lemosyon parey noun war pli boner dan sa deba.  Me sa nou ekspekte parske ler nou koz lo sistenm sekirite sosyal, sistenm pansyon, tou bann fondamantal filozofi ki en pei i kapab swiv byensir nou antre dan domenn pozisyon politik e la nou war ki dan lot kote, la mazorite parti mazoriter i fer kler ki zot filozofi lo bann domenn sosyal e zot in menm dir ki nou filozofi avan nou noun ganny sans dir.  Me sepandan mon krwar ki i en sitiasyon byen healthy sirtou nou konnen pou dir dan preski enn an eleksyon poun arive alor in ler pou nou met nou pozisyon nou marker byen kler kote nou debout pou lepep kapab fer en bon desizyon ler in ariv ler pou fer sa desizyon. 

Msye Speaker sa mosyon i demann pou review pansyon, gratwite e social security scheme pou ki i vin pli benefisiab pou bann anplwaye e noun tous lo sekirite sosyal an zeneral, menm dan sitiasyon kot pa tous anplwaye spesifikman, me sa nou ti ekspekte me selman nou bezwen sey fer en fason pou retournen lo fondamantal sa mosyon ki tous bann anplwaye.  Msye Speaker, ler ou en anplwaye dan Sesel ozordi ou annan posibilite travay dan 3 kalite ou si oule 3 domenn.  Premyerman ou travay direkteman ek gouvernman, savedir ou en civil servant.  Dezyenmman ou kapab travay avek enn bann sosyete ki gouvernman i kree ki gouvernman i kontrole ki son regilasyon i pli-z-ou mwen swiv enpe regilasyon lanplwa dan gouvernman direkteman limenm, sa se bann parastatal.  Nou annan diferan parastatal, nou annan bann ki fer biznes direkteman parey SMB, SCCL apre enn de bann ki mon krwar Island Motors osi, ki part of sa.CCCL.  Apre i annan parastatal ki pe fer en fonksyon spesifik parey PUC, kot in ganny en serten responsabilite met lo li, ki napa okenn sitiasyon biznes par deryer li.  Trwazyenmman ou kapab ganny anploye andeor gouvernman parastatal ki nou dekri konman sekter prive.  Kote ou travay i determinen ki kantite benefis ou gannyen pandan lepok ki ou anplwaye.  Par egzanp ler ti vann Mahe Beach bann travayer ki ti pe ganny fer redundant par sosyete parastal COSPROH ti ganny benefis, gratwite ki pli-z-ou mwen baze lo bann benefis gouvernmantal.  Zot ti osi ganny benefis ki baze lo ki lalwa lanplwa i dir, me i kler ki si sa sosyete pa ti en sosyete parastatal bann travayer pa ti pou neseserman ganny sa bann benefis a sa lepok ler sa lotel pe ganny vann.  Msye Speaker, ler en dimoun i travay son lavi antye i ganny son saler, lo sa saler 5% i ganny tire par-d-fors par regilasyon gouvernman pou met dekote i apel sekirite sosyal kontribisyon.  E par lo la ankor lalwa i fer sa vin en obligasyon, son aplwayer nenport ki son anplwayer ki i ete gouvernman, parastatal oubyen en anplwayer prive i bezwen pey en poursantaz sa saler koman en kontribisyon dan sa fon sekirite sosyal.  An menm tan sa anplwayer i oblize pey ankor R50 par personn, par sak dimoun ki anploye ou ki pe pey en saler dan en fon ki apel Pension Scheme.  Larzan ki antre dan scheme sekirite sosyal sa sa anplwaye napa okenn drwa lo la, me larzan ki antre dan pension scheme sa travayer i ganny tou benefis ki apartyen a li parske sa R50 i al lo son non ler i antre dan sa fon.  Dan gouvernman, dan sekter prive apard ki si en anplwaye in fer en kontra ek ou lo kestyon gratwite sa i pa en obligasyon.  Me par kont dan gouvernman setadir gouvernman ki direkteman responsab pou administrasyon pei, ladan i si ou travay dan gouvernman ou otomatikman ganny sa bann benefis gratwite ki civil service i donnen.  Si ou travay dan parastatal, mon krwar i osi pli-z-ou mwen bann gratwite ki negosye dapre kontra travay.  De lot kote si ou ganny met deor fer redundant ou bezwen ganny peye selon lalwa employment act, en zour lapey pou sak mwan ki oun travay.  Savedir dan sak lannen ki oun travay ou ganny 12 zour lapey e sa benefis si ou apel li en benefis, i baze lo sa dernyen lapey ki oun gannyen ler oun ganny met deor.  Me par kont, si ou kite volonterman sa benefis ou pa gannyen, menm si oun travay 20 an avek en sel anplwayer.  Alor Msye Speaker dan sa konteks nou war en sitiasyon kote bann dimoun ki anploye, bann travayer i ganny benefis pandan zot lepok travay.  Anba sekirite sosyal ler i ariv ler 63 zan ler pou li pran pansyon, ou laz 63 zan ou ganny li en pansyon fikse par leta.  Kestyon nou bezwen demann nou lekor, si sa sitiasyon i ekitab ou pa ekitab.  Noun antann onorab Herminie kin fer en argiman konmkwa ki sa i en sitiasyon byen ekitab akoz i dir sa ki annan plis i ganny menm kantite ki sa ki ganny mwens, ou sa ki ganny plis i ganny menm kantite ki sa ki ganny mwens.  Lo en plan filozofik si nou vir sa lekontrer, par egzanp koman en medsen, lonorab Herminie i annan bokou sans ki son lapey pa pou zanmen desann par anba R8,000 pou son lavi diran toultan ki i pe travay koman en dokter.  E ler li i pou pran son retret i pou ganny li menm kantite larzan ki sa boug ki son lapey in senpleman 1500, 1600 e 2000 roupi par mwan.  Alor lekel ki ekitab ant sa de sitiasyon.  La en dimoun ki pe ganny li 6 fwa, 7 fwa plis i end up ganny menm pansyon ki enn ki ganny 6 fwa, 7 fwa mwens.  Si nou le fer argiman lo filozofi nou war pou dir sa kekstyon ekitab i enpe parey kouto nanm sennon, ki koup de kote.  I fason ki ou get li.  Si ou le get li lo en fason ou a war en serten lalimyer ki vini ler ou get lot kote i vin en lot kalite lalimyer.  Me nou pa le antre dan filozofi nou le viv dan lemonn reel, kot nou le gete ki pli gran benefis nou kapab donn travayer Seselwa ki pou travay pandan tou son lavi 30, 40 an son lavi, pandan son travay e alafen son travay ki sa ki li i pou kapab gannyen pou limenm. Lo kestyon benefis noun osi antann ki nou pa oule al dan bann deba avan 77 me mon krwar i bon mansyonn brefman pou dir avan 77 pa ti ganny naryen en pti pansyon.  Msye Speaker en keksoz ki nou bezwen pran konsiderasyon ozordi e apre 77 gouvernman i pran avek lepep Seselwa 70% ant 60 ek 70% larises nasyonal dan son lanmen.  Avan 77 gouvernman ti pran zis 30% larises nasyonal.  Servi en rasyonal.  Sa boug ki annan zis 30% larises nasyonal dan son lanmen byen entandi i pa kapab donn ou menm kantite ki sa enn ki pran 70%  larises nasyonal.  Alor i toutafe normal e mon ti ava sagren si apre ki nou gouvernman aktyel e ou parti SPPF i pran 70% dan ou larises nasyonal me i pa donn nou menm zafer, i pa donn nou plis ki ler sa lot gouvernman ti pran 30%.  Donk si gouvernman avan 77 ti pran 70% larises nasyonal e i pa ti donn sa kantite larzan la nou tia kapab dir i annan keksoz ki mal.  Be mon krwar i enportan pou konsidere pou dir ler nou donn lepep nou bezwen tir sa dan larises nasyonal.  Alor nou anmenn la filozofi ant le de parti, parti demokratik an zeneral son filozofi i dir nou tia pli kontan ki travayer e lepep i gard pli gran kantite larises ki i fer pou limenm donn zis ase pou okip, pou fer administrasyon  marse pou okip bann ki pa kapab prodwi pou limenm.  De lot kote nou annan filozofi SPPF ki li i dir gouvernman i devret pran 70% larises nasyonal pou partaze.  Mon krwar sa i en filozofi totalman diferan e mon krwar i bon ki dimoun e lepep i konnen ki i annan sa diferans. Parey franse i dir vive la difference.

Msye Speaker, nou pa oule antre dan bann deba lo kestyon kin pase avan.  Si nou pa reviz sistenm pansyon, gratwite e sekirite sosyal, a mon-n avi nou pou toultan perpetye en sistenm ki i paret ekitab me ki dan la pratik pa neseserman ekitab.  Mon krwar ki nou bezwen asize seryezman gete ki mannyer nou kapab donn la pli grann benefis bann travayer Seselwa ou lepep an zeneral avek resours e larises ki sa pep limenm li i prodwi.  Tou sa ki nou pe fer Msye Speaker, se larises ki nou nou prodwi. Napa naryen ki free of charge.  Si ou pa peye ler ou al kot dokter en lot i bezwen peye.  Sa larzan i bezwen sorti dan en landrwa, larzan pa sorti lo pye koko pou tonbe, larzan pa sorti dan pye dibwa, larzan i sorti lo larises ki kree par travay endividyel kolektif.  Donk nou bezwen demann nou lekor, pou bann dimoun ki pa dan gouvernman e li gouvernman si i donn gratwite parey i pe donnen i bezwen tir sa lo tou dimoun ki pe travay pou li kapab donnen.  Eski i ekitab ki bann ki annan privilez travay dan gouvernman i ganny benefis sitan fiks, sitan prediktab alor ki bann ki pa ganny loportinite travay dan gouvernman li i bezwen viv dan en sitiasyon ki i trouv li si i pa kapab negosye en gratwite avek son anplwayer dan son kondisyon travay i pou sorti li finalman zis avek benefis sekirite sosyal.  Bon, nou pa pe antre lo ki fason, ki bann lenstriman nou kapab kree pou kapab ogmant sa benefis, sa potansyel, sa nou al les sa pou ou deba ler noun agree pou dir sa sitiasyon konmela i pa antyerman satisfezan.  Nou kapab kree bann sistenm pension funds, nou kapab kree bann insurance funds ki dimoun i kontribye me i ganny son benefis direkteman. 

En pwen final mon le fer, noun tann dir ki sekirite sosyal ti ganny kree an 1979.  Msye Speaker mon rapel byen ler sekirite sosyal ti ganny kree.  An 1979 mon ti sekreter Seychelles Chamber of Commerce e mon ti ganny demande pou vin lo en komite pou zwenn avek en expert sorti International Labour Organisation pou gete ki fason ki Social Security Fund, National Provident Fund, sorry ti egziste sa lepok i kapab ganny elarzi pou kapab donn en pli gran proteksyon sosyal ki a sa lepok i ti pe donnen.  Sa expert ti vin Sesel an 78, in fer en bon pe meeting avek bann dimoun dan piblik, e la finalman sa propozisyon  sekirite sosyal ti vini.  Donk mon kapab petet fyer dir ki sa pti baba  sekirite sosyal mwan osi mon ti annan en kontribisyon pou fer pou son kreasyon.  I pa neseserman vedir ki sa piti kin kree finalman i antyerman sa ki mon ti a kontan i vini ler in grandi. 

Lo kestyon pansyon travayer, Sengapour i enn bann legzanp kot provident fund in vin en gran sikse,  National Provident Fund Singapore. Singapore napa sekirite sosyal parey nou annan me national provident fund Singapore  i en fon piblik ki pli ris dan les Lazi.  An realite i pli ris ki en kantite pei ki menm serten pei dan Lerop.  NPF in responsab an Sengapour pou donn lakaz preski tou dimoun, tou popilasyon Sengapour ki ti bezwen.  A monn avi i ti en mistake pou nou abandonn NPF pou entrodwir senpleman en sekirite sosyal parey nou annan ozordi.  Petet sa problenm lakaz pa ti pou parey nou pe get li ozordi si nou tin gard NPF, national provident fund.   Me sa i en keksoz ki nou bezwen get ladan.  Lo kestyon trustees, en pwen final, mon krwar sa propozisyon ki lonorab Bibi in mete mon krwar i enportan pou nou konsidere.  Akoz mon dir sa. Onorab Bibi in dir sa trustee  i a responsab pou fer sir ki fon sekirite sosyal i ganny envestir pou ganny maksimonm benefis.  Si nou pran rapor sekirite sosyal an 1995, nou vwar ki gouvernman limenm ki pretann, noun antann dir nou bann lonorab isi i dir, ki gouvernman i le travayer pou travayer, limenm li i dwa sekirite sosyal R66m.  Msye Speaker, mon pa krwar sa  i en, si mwan mon ti dwa sekirite sosyal, mon asir ou ti annan surchage ek let ki arive e petet lapolis menm tin arive pou dir ou pey sa sekirite sosyal.  Leroni se ki gouvernman de travayer in retenir sa sitan kantite larzan lo non travayer san met dan sa fon e sa i montre ki petet sa propozisyon onorab Bibi i devret ganny konsidere seryezman pou fer sir ki tou dimoun ki devret kontribye dan sa sekirite sosyal i met sa larzan ler i devret mete, gouvernman enkli.  Parski gouvernman i osi en anplwayer i devret donn son kontribisyon parey lalwa i dir.  Napa personn ki devret ganny konsidere pou dir zot an arrears e sirtou a sa kantite larzan ki gouvernman ti an arrears an 95, mon pa konnen ki sitiasyon ti ete an 96 be nwa ganny lokazyon ler nou ganny kont sekirite sosyal war sa. 

Msye Speaker, mon krwar ki apre sa silans d’ecoute ki monn gannyen mon anmenn deba lo en plan en pti pe plis respektab, nou pann eksite, mon krwar sa apremidi mon krwar letan ou fek fini dezennen i toultan donn ou sa sitiasyon, mon pa krwar i diven kin fer sa, me Msye Speaker I beg to support the motion.

 

MR DANNY FAURE

Msye Speaker, lonorab Bibi in prezant nou en mosyon ki lo son sirfas mon ti annan tandans krwar oparavan ki ti pou annan serten keksoz ki nou nou ti kapab tonm dakor lo la pou ki nou kapab press pou ki gouvernman i akselere.  Me ler monn ekout son bann largiman, largiman sorti kot lonorab Bibi limenm, konklizyon ki mon tire se ki lonorab Bibi i dyagnoz en sitiasyon e i krwar ki remed sa problenm ou bezwen anmenn li dan operating theatre.  Akoz mon dir sa.  Premye keksoz ki onorab Bibi i demann nou koman kestyon, i dir nou koumsa ki garanti nou annan si bann zenerasyon ki pe ne ki pou vini pou kapab benefisye atraver nou sistenm sekirite sosyal.  Si lonorab Bibi i annan en problenm avek sa, mon krwar nou kapab dir nou dir gete, nou nou tia kontan demann gouvernman pou fer sa pou garanti ki bann zenerasyon ozordi ki pe ne e ki pe vini, zot benefisye atraver nou fon sekirite sosyal.  I poz en kestyon i pa prezant stratezi ek mekanizm pou kapab konvenk mwan ki mannyer pou kapab rezourd sa.  Atraver en review ou pa pe reponn ou kestyon.

Deyzenm pwen lonorab Bibi i dir mwan mon annan problenm avek fason ki sa zafer i ganny distribye e onorab Bibi i ouver en laport pou  montre ki i annan problenm, li son problenm se problenm means testing.  I dir ou dan means testing ki mannyer dimoun sa, i obliye parey Mme Coster ek Mme Jolicoeur i dir sa zafer means testing se kestyon pwa.  In eksplike lo televizyon.  Savedir sa i annan en sistenm, sistenm pwa, ki mannyer dimoun i kapab benefisye.  Pou fer distenksyon ant bann statutory regulations ki anba Social Security Act lonorab Bibi kot invalidity benefits, benefits pou maternite, injury benefit, sickness benefit tou sa la in ganny, i annan provizyon legal anba nou social security. Means testing pa pe rezourd sa problenm si en dimoun in ganny aksidan dan travay ensideswit, oubyen si en dimoun in ganny envalid.  Tou sa la i tonm anba nou sistenm social security.  Trwazyenm keksoz ki lonorab Bibi i dir e sa i prezant en erer de fon e osi son konsept, li i dir ou si en dimoun i pe kontribye dan fon social security, i bezwen ler i tous son social security i  ganny la valer bann keksoz ki in kontribye, be sa social security lonorab Bibi,  i pa Savings Bank kot lonorab Roger Toussaint.  I pa en sistenm parey Savings Bank, kot ou mete e ki ler ou gannyen ou bezwen tir otan parey.  Mon krwar lonorab Herminie in eksplik sa konsep kler.  E pou zwenn ou dan sa zafer se lonorab Paul Chow. I dir kestyon of equity, i dir ki lonorab Patrick Herminie, eski i fair si ozordi i pe ganny R8000 e ler i ganny social security i ganny li menm kantite ki sa dimoun ki dan son lavi zanmen in tous 3000.  Ou swiv sa largiman.  Sa son prensip i ganny korize, par kestyon ki la oun ariv en laz kot oun retire.  Me sa dimoun tou dilon son lavi in benefisye li, endepandan ki son travay in ganny fer.  Me  ler nou bezwen tonm dakor lo en prensip e sa se en pilil for sa.  Si pe dir nou fodre nou sanz sa, nou ava argimante.  Akoz i annan tantativ lo lapar onorab Bibi, pou dir i 63 zan annou fer li 61, 62, 60 e antretan i benefisye.  Ou pa kapab annan 2 pwa 2 mezir lo sa zafer.  Ler nou ganny pansyon tou dimoun endepandan i ti kontribye, non, atraver nou lalwa tou dimoun i gannyen.  E son logmantasyon i ganny fer li atraver regulation kin ganny stipulated dan nou act

Lot zafer lonorab Bibi si ou vin avek en mosyon ou prezant nou en mosyon ou dir nou senserman, mon bann koleg dan lasanble ou konnen ki mon problenm, mwan mon problenm mwan konman onorab Bibi mon pa dakor ki  mannyer social security  pe ganny managed,  met sa lo en board of trustees sa i vin en mosyon, mon vot kont. Me pa anmenn nou dan en prosesis review an menm tan ki nou pe review nou pe manz sa sistenm.  Oun anmenn nou dan en prosesis review ou, oun plonz nou ladan, e ler nou pe gete ki nou pe review, noun fini detri baz ki nou pe debout lo la e san menm sa ou vwar mon bann koleg dan parti mazoriter pe debat.  E san menm sa ou vwar onorab Paul Chow e Daniel Belle osi pe debat.  Akoz la nou pe gete finalman lo ki nou pou debout.  Si nou pou debout lo 3 blok, oswa nou pou debout zis nipye lo later. 

Pension.   Ki lonorab Bibi i dir nou lo pension scheme.   I dir nou konmsa ozordi nou annan en sistenm pansyon kot anplwayer i met R50 e sa in byen dir, lonorab Paul Chow, lo en account non sak dimoun ki pe benefisye,  R50.   Aprezan li sa travayer li, i pa kontribye naryen.  Li son swe se fer li compulsory.  Si ou pe dir nou lonorab Bibi ki tou travayer ti devret compulsory kontribye dan fon pension scheme,  spell it out lonorab Bibi e dir nou konbyen ou ti a kontan ki sak travayer i kontribye.  Ou pann dir nou sa.  Me selman ou dir ou ti a kontan i compulsory.   Ozordi i pa konmsa li, anplwayer i met 50 e sak anplwaye li i voluntary.   I annan ki mete, i annan ki pa met ditou.  Prezan si ou anvi ki i korize,  spell it out, annou pa al atraver en sistenm review  ki nou bouy keksoz.  Mwan mon dir sa kler pou evit konfizyon deor ler nou isi apre nou deal avek sa mosyon.  Nou bezwen konnen egzakteman ki nou anvi.  Ki nou ti a kontan sa ki meyer pou sa pep.  Kwa ki mal avek sa sistenm.  Annou koriz li si nou vwar en keksoz ki mal.  Me fer sir ler nou pe donn, ler nou diagnose sityasyon la either  nou pe swazir  pou nou donn li panadol oswa nou met li dan operating theatre.  Se sa ki mon pe dir prosesis review mannyer pe anmenn nou.

Gratuity  lonorab Bibi, ou konnen ki oun dir nou lo gratuity?   Ki lonorab Bibi in dir nou lo gratuity.   I dir gete mwan mon pe fer en rekomandasyon, konm sa i ti dir, mwan mon pe fer en rekomandasyon pou ki gouvernman la, i entrodwir en sistenm gratwite dan sekter prive.  Me ou pa dir nou ki mannyer pou fer.  Nou fer li atraver en lalwa, ki mannyer nou fer li.  Sa reset la ki mannyer nou pou ete, pou en cocktail, ki mannyer pou ete sa, annou dir kwa.  An menm tan i penn  en scenario, i dir mon pa tro tro dakor ki mannyer gratwite i marse pou gouvernman konmela akoz sa zafer compensation  lo letan servis en dimoun in fer 12 lannen e i kite i pa gannyen.  Me nou pa eksplik son prensip nou, nou pe met en presyon politik la.  Nou pa eksplik son prensip ki korek.  Nou nou la pou nou eksplik son prensip.  Mon a dir ou en keksoz lonorab Bibi e sa mon krwar ou konn tre byen.  Prensip eski nou gratwite konmela i mars konmsa.  Oun fer 15 an ou ganny ou 20,000, ou fer ankor 10 an ou ganny ou 20,000, ou fer ankor 5 an ou ganny ou 15,000, ou fer ankor 5 an ou ganny ou 15,000, ou fer ou ankor 5 an ou ganny ou 15,000. 

Dizon ozordi en zenn i komans travay a laz 20 an.  Ler i ganny 36 an, dizon i fer 15 an, ler i ganny 36 an i ganny li R20,000.  I travay ankor 10 an li, mon pe adres sa dimoun ki pe travay la ozordi 20 an kin fek fini lekol i pe vini i pe antre, i fer ankor 10 an ler i ganny 46 an i ganny li ankor R20,000. I fer li ankor 5 an i ganny li 51 an, i ganny li 15,000.  E ler i fer ankor 5 an i ganny li 56 an i ganny ankor R15,000 e si i fer ankor 5 an atraver sa scheme ler i ganny li 61 years old, i tous li 15,000.  Lonorab Bibi i anvi detri sa  sistenm i anvi review  sa sistenm.  E pou bann travayer ki pe travay ozordi si nou pa fer atansyon  sa plis ki 9,000 dimoun ki pe travay ozordi si lonorab Bibi ek son tim i vin o pouvwar annou dir adye sa. 

E mwan mon pe dir lonorab mwan mon pa pe donn mon sipor pou en mosyon ki pe penn en sityasyon ki pe anmenn nou dan en zafer ki finalman gouvernman pa ni konnen egzakteman ki sa bann dimoun laba dan national assembly  in anvi dir.  Si nou anvi anmenn bann keksoz ki kler lo sak scheme  annou prezante.  Annou pa anmenn tou sa 3 zafer ansanm.  Sa triangle  la i pa tro tro korek pou nou.  Si nou anvi sanz pension,  nou anvi  met proposals  annou fer li korekteman nou a konnen ki nou pe dir.  Ler nou pe review nou pe gete, i sanble byen li, SBC pou dir ou konnen, lasanble in rezet sa zafer me finalman pann konn egzakteman ki in dir.  Nou nou pe dir nou pe brod en sityasyon ki nou pe atak son bann fondasyon akoz loter sa mosyon pann anmenn bann keksoz ki konkret lo sak sa bann zafer.  In donn nou  doz par doz, e doz par doz.  Si ou krwar senserman ladan, Lonorab Bibi, mwan mon pare pou mwan tir mon bann mosyon ki monn prezante dan pipeline,  donn ou sans pou prezant ou bann zafer, dir mwan mon ti a kontan sanz social security  akoz mon pa dakor ek son bann management  e mon propoz a board of trustees.  Nou ava debat lo la.  Me pa bouy nou, pa bouy nou lonorab Bibi pa bouy nou dan sa zafer.  Mwan mon state klerman kategorikman pou ki dimoun, pep deor, SBC, Nasyon zot konpran ki nou pozisyon e ki personn pa fer propagann pou senm move propagann lo SPPF.  Nou ti a kontan diskit bann zafer  ki kler ki an-n ord. E si ou krwar ladan prezante nou a diskite.  Mersi Msye Speaker.

 

MR DE COMARMOND

Msye Speaker etan ki mon vwar letan i enpe limite e ki bann pwen an prensip ki mon ti pou servi, bann argiman in fini ganny sorti, mon krwar mon pou les mon sans koze me zis en pti pwen mon ti oule fer resorti lo kestyon sa mosyon akoz mwan mon pou vot kont sa mosyon.  Mon pou vot kont akoz largiman par lopozisyon kin ganny anmennen pour sa mosyon i pa kler.  I pa kler dan le sans ki i fer ki zot menm zot zot pa konnen kwa ki zot pe demande pou sanze.  E dan sa sans zot pe dir osi ki nou annan menm filozofi alors petet nou devret krwar zot ki zot pe dir.  Mon oule zis met en pwen across pou zot al refer lo la. 

Lonorab Mancham i annan en liv ki in ekri, paradise raped.   Mon ti a demande ki lonorab Belle i lir sa liv pou li vwar vreman kote ladan i eksplike diferans ant sa 2 parti depi o komansman ki nou filozofi avek nou pwennvi pa parey.  Mon pa pou al an detay Msye Speaker.   Mon a les letan pase pou petet donn onorab fer son sentez, mersi.

 

MR BARRY FAURE

Msye Speaker mon napa bokou keksoz pou dir apre ki partikilyerman Msye Danny Faure in fer son lentervansyon parske in rezim, si oule in atak, in adres lesansyel prezantasyon mosyon ki Msye Bibi in anmennen set a dir ki menm si mosyon i dir i pe sers pou reviz sa bann sistenm sekirite sosyal, pansyon ek gratwite an realite i pe sers pou detri son baz premyerman.

Me mon ti a kontan kanmenm dir en keksoz lo sa kestyon diferans fondamantal dan la filozofi kin ganny tre byen eksplike par Msye Paul Chow letan in fer sa konparezon ant parti SPPF e parti Demokratik.  I dir ki parti SPPF i pran 70% e i redistribye, parkont parti Demokratik i pran 30% e i redistribye.  Sa i dir ki i en diferans fondamantal en keksoz ki mwan personnelman mon aksepte. 

Prezan annou tourn sa lo son latet.  Annou gete ki Msye Bibi in dir nou letan i koz lo sa mosyon.  Enn bann keksoz ki in dir, akoz i annan plizyer keksoz ki in dir, nou pran zis enn pou montre ki son bann largiman pa debout.  I dir nou ki enn bann konsern fondamantal ki i annan se lo ki mannyer sa anplwayer aktyelman ozordi i benefisye a lavenir.  I pe koz lo sustainability oswa dirabilite  fon aktyelman pou kapab dan 15 an, dan 20 an, dan 25 an, letan sa anplwayer ozordi nepli pe travay se li ki pou benefisye.  Si ou pe pran zis 30%  ki mannyer ou pou redistribye sa.  Eski ou pou kapab konsolid en fon ki pou kapab ganny redistribye apre ekitableman avek la sosyete.  Si ou vreman konsernen avek dirabilite, avek sustainability sa finansman pou benefis travayer, eski ou pa krwar ki ou filozofi i annan en gran problenm avek e ki ou bezwen sanz li fondamantalman.  Nou bezwen get lavantaz e dezavantaz sa 2 filozofi Msye Speaker.  Letan oun pran 30% ki mannyer ou pou kapab satisfer bann demann konstitisyonnel parey drwa fondamantal a ledikasyon, drwa fondamantal a lasante, drwa fondamantal a lanplwa.  Ki mannyer ou kapab fer sa avek zis 30%.  Ou pa krwar pou dir avek filozofi DP i annan en gran problenm  fondamantal avek.  Mon ti a kontan fini lo sa pwen.  Mersi bokou Msye Speaker.

 

MR SPEAKER

Avek sa mon envit onorab Bibi pou fer son rezimen.

 

MR  BIBI

Msye Speaker avan mon al pli devan mon ti a kontan zis refer lo argiman lonorab kin koz avan mwan  kin fer resorti kestyon filozofi SPPF ek filozofi DP.  Mon ti ava zis kalifye sa dan zis detrwa mo.  Diferans ant filozofi SPPF ek pou Demokratik se ki ler filozofi SPPF i krwar ki li i pli kapab depans larzan lepep ki lepep i kapab depanse limenm e filozofi Demokratik i krwar ki lepep i pli kapab depans son larzan ki gouvernman i kapab depanse.  Sa la diferans ant..

 

MR HERMINIE

Priorite kapitalis pa lepep.

 

MR  BIBI

Sa diferans se ki….(interruption)… Msye Speaker monn ekoute, tou dimoun in koze, mon pann ni argimante..

 

 

MR SIMON GILL

Plitar nou pou rann ou repons sa ki oun dir ozordi la.  Pa trakase ou.

 

MR SPEAKER

Order, ziska le moman nou pann mal fer, noun ase kalm, mon ti a kontan nou kontinnyen e fini dan kalm. 

 

MR  BIBI

En lot diferans Msye Speaker se ki la diferans ant filozofi SPPF e filozofi DP se ki SPPF i pa oule ki lepep i vin ekonomikman endepandan e DP i krwar ki dimoun i devret ekonomikman endepandan.  Se pou se rezon mon dir ki sa bann dimoun zot devret annan sans pou zot zer zot larzan la fason ki zot oule.  Alors napa personn pou kontrol zot.  Lala la diferans ant sa 2 filozofi.

Msye Speaker tou bann onorab kin koz avan, kin fer zot bann argiman lo ki konsern sa mosyon, sakenn in donn son  largiman la fason e la mezir ki zot in anvi enterpret li e lefet letan nou gete finalman sakenn in anvi fer krwar, oswa in anvi konvenk piblik deor la fason ki zot zot in vwar li.  Me mwan personnelman monn krwar pou dir sa 3 pwen i sipoze entegre ansanm.  Se pou se rezon ki monn anmenn li ansanm pou nou diskit lo la.

Lonorab Toussaint dan son lentervansyon i pann tous ditou lesansyel mon mosyon me in fer konpran piblik ki li i krwar ki sistenm i bon akoz tou dimoun, gouvernman pe donn tou dimoun keksoz, lasante tou sa ki nou abitye tande kot i konsern sekirite sosyal.  Alors i pe zis repete ankor pou fer dimoun konnen pou dir sa larzan sekirite sosyal i ede pou donn means testing,  i ede pou donn ledikasyon ensi-d-swit me i pann tous lesansyel nou mosyon.  E mon koleg dan lot kote lonorab Herminie, li konm dabitid nou konnen i konnen pou dir i kapab fer byen politik, alors in servi sa loportinite pou li kapab fer pase son mesaz e mon krwar ankor en fwa li osi i pann tous lesansyel mosyon ditou e mon krwar in zis fer son komanter ki li in anvi fer. 

Lonorab Faure li in dir ki mwan monn dyagnoz en sityasyon me mon pann anmenn son remedi.  In fer resorti ki mon problenm sete avek means testing.   Mon ti fer resorti dan mon lentervansyon ki monn tous ki sa ki lonorab Faure pann dir ditou, mon ti fer resorti ki monn tous means testing akoz li osi i ganny larzan kontribisyon social security,  i servi larzan social security e mon ti dir, mon ti fer resorti ki lafason ki means testing  i fer i arbitrer, i annan tro bokou diskresyon la fason ki li means testing  i distribye larzan e mon ankor debout lo sa pwen.  Pa krwar mon pou tire lonorab Faure, mon ankor krwar dan sa ki monn dir e se egzakteman ki mon ti dir pli boner dan mon entervansyon.

Lonorab Faure in dir ki mwan mon dir ki mon oule ki bann dimoun i compulsory kontribye dan pension scheme.   Lonorab Faure, si mon pou servi en term, in fer en fot letan in fer son lentervansyon parski mon ti dir mon ti a kontan vwar ki la fason ki dimoun i kontribye sekirite sosyal i san menm fason ki mon ti a kontan vwar ki pension scheme i marse, i ganny kontribye, ki mon ti dir ki mon dakor, mon krwar ki dan, en travayer i devret envestir dan son lavenir e mon redir ankor ki mon krwar ki en travayer i devret envestir dan son lavenir.  E sa i pa vedir ki mon dir i compulsory mon dir mon krwar ki en travayer i devret envestir dan son lavenir akoz mon ti koz lo pansyon ki ti donnen avan kot dimoun ti ganny en proporsyon zot saler.  Alors mon ankor stand lo mon pwen ki si i neseser pou ki en travayer i kontribye pou li ganny son pansyon e si son larzan pansyon i ganny byen zere, wi mon krwar i neseser ki i kontribye.

Msye Speaker lonorab Faure in koz lo gratwite  ki gouvernman pe donnen konmela, R20,000 apre premye 15 an, premye 15 an 20,000 apre R20,000 apre 10 an, i fer 25.  Dan sa menm lasanble pli boner ler nou ti pe koz lo pansyon ki ti ganny donnen ler bann dimoun, ler mon ti dir dan letan ki mon ti travay pansyon ti donn en proporsyon, tou dimoun dan sa lasanble ti sote ti dir R250.  Ki zot ti pe sey fer resorti, ki valer R250 ti annan 20 an pase.  Sa ki mon anvi met avek onorab Faure, ki valer R20,000 pou annan 25 an plitar.  Mon kit sa pou li lonorab Faure desid lo la.  Se pou se rezon ki mon ensiste ki larzan ki ganny mete pwen esansyel, larzan ki ganny mete dan pension scheme,  pa devret vin en larzan ki ganny kite la, i devret ganny envestir e re envestir.  Mon ti donn legzanp parey Credit Union  ki i ganny re envestir dan en fason.  Mon ti dir, ler mon ti dir the board of trustees  mon ti tann en lonorab ti dir lekel ki pou lo la, mon krwar lonorab Faure menm, Danny kin dir mon ti dir klerman reprezantan anplwaye, reprezantan anplwayer e reprezantan gouvernman.  Mon ti fer kler ki sa bann dimoun ansanm, pli boner noun tann koz sharing and caring,  noun tann dir partnership, lonorab Faure ti dir boner, mon dir ansanm zot a vwar ki pli bon fason pou nou kapab re envestir sa larzan ki mannyer ki i kapab generate plis larzan ankor.   Mon pann dir…

 

MR SIMON GILL

Oun bliye akoz in dir ou pann koz lo lesansyel, se sa oun bliye.

 

MR SPEAKER

Order

 

MR  BIBI

Msye Speaker mon pa trouv i drol si lonorab Gill i pran sa kalite latitid akoz petet, Simon Gill akoz petet kot in ale i annan en maladi kontazyez ki donn li lagresyon toultan e i pa kapab ekoute, asize san…

 

MR SPEAKER

Vin lo ou konklizyon.

 

MR  BIBI

Bon Msye Speaker alor mwan pou social security osi monn dir ki mon ti a kontan en board of trustees  ki bokou nou ki la nou pe ridikile me nou konnen ki bokou larzan ki ganny kontribye par lezot dimoun pou fer en serten oswa pou donn garanti i ganny zere par en board of trustees.  Ankor en fwa monn tann dir pou sorti dan sekter prive.  Mon pann nonm sa ditou, monn dir donn li ankor, reprezantan travayer, reprezantan anplwayer e reprezantan gouvernman i a zer sa larzan.  Monn dir sa larzan si gouvernman i oule, si gouvernman i oule prete pou li kapab kontinnyen avek son bann proze lakaz, son bann proze lekol, i kapab ganny prete, i kapab demann prete e i a ganny prete avek en lentere ki li gouvernman i a bezwen rod fason apre ki mannyer i pou rann sa larzan si li gouvernman i oule generate reveni atraver lezot tax,  i a rod son fason pou li kapab repey son larzan.  Me ki mwan mon pe sey dir, eski sa larzan i ganny zere e ki nou asire i annan en garanti ki ler nou tou noun pare pou nou kapab pran nou retret sa larzan i egziste.  Sa ki mon pe sey dir.  Me Msye Speaker onorab Faure in fer resorti in dir mwan monn dir en dimoun ki kontribye i devret ganny la kantite, menm kantite larzan ki in kontribye. 

Lonorab Faure pe fer lekonomi ek laverite akoz mon ti dir ki si en dimoun ki pe travay ki pe kontribye pou en dimoun ki vye, en dimoun ki pe travay e ki pe kontribye pou en lot dimoun ki pa kontribye ditou li i devret omwen ganny en serten lasistans ki  a baze lo proporsyon son lapey ki i ti pe gannyen.  Sa  egzakteman ki mon ti dir.  Mon ti dir ki ler en travayer swa in malad ki i pa kapab kontinnyen travay, monn tann lonorab Herminie in dir en travayer i bezwen travay 3 mwan sa wi nou konnen.  Be nou pe dir i annan dimoun ki envalid pou 1 an, i annan dimoun ki envalid pou 6 mwan, i annan dimoun ki envalid pou plis.  Bon alors sa ki mon ti pe dir, se benefis ki bann travayer i gannyen e menm bann pansyon ki bann vye dimoun i gannyen ki pou kapab fer zot viv dan dignite. 

 

MR BARRY FAURE

It’s a long winded debate again or is it a summary?

 

MR  BIBI

Mon annan en demi erd-tan dapre Standing Order,  pou mwan fer mon wrapping up, onorab Barry Faure, Mon annan en demi erd tan wi.   Msye Speaker konbyen letan i reste pou mwan koze?

 

MR SPEAKER

Order, bon dan rezime i annan konklizyon, i annan osi reponn bann argiman kin leve ki krwar i dwatet ganny rebut.   Bon lo letan ou annan zis detrwa minit ki reste.

 

MR BIBI

O.k Msye Speaker.  Mon krwar mon ti zis anvi fer resorti lesansyel mon mosyon sete mon ti pe dir parey lonorab Danny Faure in fer resorti ki enn, wi mon ti a kontan mon demande e rekomande ki gouvernman, sizere plito ki gouvernman i etabli en board of trustees,  enn pou manage  sekirite sosyal, pansyon, pou manage pension scheme,  e mon demande ki i annan en sistenm pro rata   ki personn pann tous lo la kot i annan ka kin egziste kot i annan dimoun kin ganny arete travay ki pann ganny en sou, in travay 14 an, in travay 12 an e menm i annan kin ganny fer malis.  Ler in ariv son 14 an in ganny met deor, i pann tous en sou.  E mwan se pou se rezon ki mon demande ki ler sa dimoun i a sorti i a kapab ganny en serten larzan pou li kapab al avek pou lenerzi ki in donnen.  Akoz si nou apre 5 an nou kapab ganny en gratwite mon pa vwar akoz lezot dimoun pa kapab gannyen e se sa largiman ki monn met devan Msye Speaker e alors mon ti a kontan ankor en fwa ki nou konsider sa bann pwen e mon demann zot tou pou vot an faver.  Msye Speaker,  I beg to move. 

 

MR SPEAKER

Bon in ler pou vote. Tou sa ki an faver lev zot lanmen. 3. Non Onorab Belle sa pa vin dan vot sa.  Tou sa ki pa an faver lev zot lanmen. 10.

 

MR BELLE 

I annan detrwa in abstain.    

 

MR SPEAKER

Alors  mosyon pann ganny aprouve.  Noun fini nou travay pou ozordi ziska lot mardi 9er bomaten.

 

At 5 pm the Assembly was on its rising adjourned to Tuesday 1st April 1997 at 9 am.