::
Home » Archives » Verbatims - First Term 1997 » Tuesday 1st April 1997

Tuesday 1st April 1997

NATIONAL ASSEMBLY OF SEYCHELLES

 

            Tuesday 1st April 1997

 

The Assembly met 9 a.m

 

Mr Speaker in the Chair

 

The National Anthem was played

 

 

MR SPEAKER

Bonjour tou Onorab, Minis e piblik ki pe ekoute. Nou komans ek question time. Premye kestyon, kestyon 25 pou Minis tourizm e transpor. Onorab Christopher Gill

MR CHRISTOPHER GILL

Mon ti a kotan demann minis pour tourizm si i ti kapab dir nou ki polisi  son gouvernman konsernan mouyaz dan labe Beau Vallon e dezyenmman polisi son gouvernman konsernan bann senner makro dan labe Beau  Vallon.  Mersi bokou Mr Speaker.

 

MINISTER DE COMMARMOND

Mersi Msye Speaker.  Bonjour tout le monde.  Msye Speaker Beau Vallon i pa en  anchorage area,  savedir dapre  Beach Control Regulation Notice  355 date 28 Out 1978 i fer ki  sa i en  area  ki ganny kontrole, me par kont sa menm regilasyon i permet minis responsab pou otoriz mouyaz dan bann ka ou bann lokazyon spesyal par egzanp tou-le-z-an ler nou annan  Regatta.  Dan le pase noun osi par leksepsyon otoriz serten  hire craft  ki baze dan rezyon  Beau Vallon pou mouy zot bato la aswar.  Swivan nou polisi pou kapab amelyor bann fasilite maritim an term aktivite pou touris, gouvernman in dakor resaman pou les met en total 10 bwe mouyaz pou bann  yachts  e  live-aboards  dan labe Beau Vallon. Bann prosedir neseser pou kapab administre sa, pe ganny fer.  An sa ki konsern lapes makro Beau Vallon parey onorab Gill i kapab mazinen, sa i en tradisyon e osi i en latraksyon touristik dan limenm.  Responsabilite lapes i tonm anba sa minister konsernen, me mon konpran ki Beau Vallon i le sel landrwa ki normalman minister responsab pou lapes i les lapes makro avek bann  beach nets  e mon konpran osi ki en tel aktivite i kapab ganny fer selman pandan lazournen e pa plitar ki 4er apremidi.  Vwala an gro en pti pe sa ki mon konpran sa ki konsern sa polisi konsernan lapes makro Beau Vallon.  Mersi Msye Speaker.

MR SPEAKER

Siplemanter.

MR C. GILL

Wi, mon annan 2 siplemanter parske  issue i en pe….  Premye kestyon konsernan mouyaz, minis in dir nou i annan 10 bwe ki zot pou servi alavenir, eski i posib pou ki  nou kapab annan plis ki 10 bato ki pe mouy la aswar parske sa ki mon konpran sa polisi pe restrikte konpetisyon antre bann  hirecrafts  e i pe kree en  unfair advantage  pou bann  hire craft  ki mouy Beau Vallon konpare avek bann ki bezwen mouy  Marine Charter.   Dezyenm siplemanter konsernan bann senner makro, eski le minis i okouran ki i annan serten restriksyon pou ki bann senner i ganny anpese pou senn pou makro dan bann landrwa en pe pli pre avek bann lotel, kot bann kliyan lotel pe naze, si wi, si non.

MINISTER

Msye Speaker pou reponn premye kestyon, parey monn dir avan i annan serten bato kin ganny permisyon pou kapab mouy zot bato dan labe Beau Vallon.  Resaman nou pe fer bann prosedir administrativ pou permet 10 bwe mouyaz pou bann  yachts  ki resaman in vin etablir zot biznes isi.  Parey Msye Speaker i konnen sa labe Beau Vallon i enn nou labe pli zoli, pli inik, pli  prestizyez ki nou annan e  otan ki posib nou bezwen fer en fason pou kapab kit li koumsa e protez li. Nou pa pou kapab les nenport kantite bato, tou son met bato, sa ki oule, vini, vin mouy zot bato.  Nou pou bezwen neseserman fer li avek serten kontrol, menm an lesan 10 nou santi ki si oule i ase bokou e i pou ase difisil pou kapab  monitor  me de tout fason nou pe pran en risk, nou pou vwar koman i ale.  Me son bi prensipal sete pa pou dezavantaz serten dimoun kont lezot.  Nou pe sey fer mannyer rod en,  strike  en   scenario  kot nou kapab sey satisfer mazorite dimoun e an menm tan sey protez sa landrwa, fer li reste en landrwa ase inik kot tou dimoun i kapab  enjoy.  An sa ki konsern ou lot kestyon, noun osi demark bann landrwa Beau Vallon, demark landrwa kot dimoun i kapab naze e sa in demarke i kler, demark landrwa kot bann lezot ki annan biznes  water sports  i kapab  fer zot  water sports me malerezman parey ou konn let imen nenport kwa ki ou fer, nou pare touzour pou kase, pou kas lalwa, pou kas lord.  Sa ki sipoze naz son landrwa annan de fwa i depase i al kot pe fer water sports,  sa ki sipoze pe fer  son  water sports  dan son landrwa kot in restrikte, annan de fwa i depase i al kot dimoun pe naze e i toultan annan sa bann problenm.  Nou si ou kapab dir, noun beni ziska aprezan kot nou napa aksidan mazer kin arive e enn bann rezon osi akoz nou annan  youth brigade  laba Beau Vallon se pou kapab ed nou  monitor  sa sitiasyon en pe pli byen, pou anpese ki i annan aksidan mazer dan sa  area  akoz tou dimoun mon krwar i eksite, i le anmiz zot otan ki posib e an fezan sa i pa fasil pou kapab arive satisfer tou dimoun si ou napa serten restriksyon. 

An sa ki konsern kot zot lapes makro ou non, sa ki oun fer sorti, mon pa konn egzakt, okouran, mon pou bezwen  find out  e vwar avek lotorite minister konsernen pou nou kapab anpese si sa i pe  disturb  kot bann dimoun pe naze.

 

MR MANCHAM

Msye Speaker, kont teni la repitasyon ki Beau Vallon in etablir atraver de zenerasyon  konm en lans ki napa polisyon, kot en lans ki napa reken ki vin atak dimoun, en lans kot dimoun i kapab bennyen e  relax  an-n-antyer konfyans, eski le minis i kapab donn nou lasirans ki son minister pou reziste tou presyon pou fer de devlopman ki kapab prezidisye sa repitasyon de sa lans la. Mersi.

 

MINISTER

Wi, Msye Speaker, mon kapab donn lasirans onorab Mancham ki sa i pou leka, i deza leka kot nou ganny pa mal presyon pou fer diferan keksoz Beau Vallon e noun reziste, nou ankor pe reziste.  Mon asir ou ki dan lavenir nou pou reziste an tenan kont tou bann fakter neseser ki nou bezwen annan serten devlopman dan Beau Vallon, me nou bezwen annan sa bann devlopman ki pa pou o detriman labote sa landrwa e detriman nou bann dimoun e detriman  nou lekonomi an zeneral.

 

MR MANCHAM

Me sa 10 bato ki oun les vin mouye la, pa pou aport polisyon dan sa labe Beau Vallon e atir reken.

 

MINISTER

Msye Speaker, lide se ki sa bann bato ti sipoze zis apre ki zot in fer tou zot travay pandan lazournen aswar pou zot mouy zot bato la apre bomaten si zot kapab resorti.  E parey monn dir noun permet 10 anfen avek konsiltasyon tou dimoun konsernen, nou pe permet sa 10 e si i poz serten problenm grav, serten problenm mazer ki nou vwar nou bezwen  review  sa desizyon,  nou pou fer li dan lentere sa landrwa.

 

MR MANCHAM

10 fakter de polisyon alor.

 

MR MICHEL GARDETTE

An vi polisyon ki anmennen par bann bato  live-aboards  ki nou apele e osi  frazilite lans Beau Vallon li menm, eski minis personelman pa krwar ki anpes bann  live-aboards, ler nou pe koz live-aboards nou pe dir  bann bato ki  anmenn viziter, touris, mon pa pe dir gardyen abor, mon pe dir viziter, mouye Beau Vallon se pa kwa, si  pa tia mye enterdir sa konpletman, premye kestyon.  Dezyenm kestyon, eski minis pa krwar pou dir sa menm lalwa ki afekte pou Beau Vallon, in ler osi pou fer lo lezot lans tel ki Anse Lazio par egzanp.

 

MINISTER

Msye Speaker, parey monn reponn premye kestyon lonorab Mancham, i en lese ki pe ganny fer apre bokou demann kin ganny fer. Noun reziste presyon parey mon dir, me sa i en lese ki nou pe fer akoz sa bann  yachts  parey ou konnen zot annan zot bann  tanks,  zot bann   waste  disposal  e lide sete zis pou met sa bann bato la aswar toule bomaten zot re ale.  Parey monn dir nou pou  monitor,  nou a regarde.  Mon pa dan en pozisyon pou dir non, nou pa pou les fer li.  Sa i en desizyon ki pann ganny fer par mwan inikman, i en  desizyon global ki gouvernman in pran.  An sa ki konsern ou lot kestyon, wi, mon krwar i pou nesesit dan lavenir revwar serten lezot landrwa par egzanp parey oun dir Anse Lazio ou serten lezot landrwa kot nou pou bezwen osi annan serten restriksyon.  Me avek tou sala i vin son kestyon  monitoring,  sa kapasite pou ou kapab  monitor  e asire ki  whatever  lalwa ki oun met an plas i pe kapab ganny enplimante.  Sa osi  nou pou bezwen, tou sala i pou al ek son resours neseser ki pou nou kapab ler noun entrodwir en tel  regilasyon ki nou kapab enplimant li. Mersi.

MR CHOW

Eski minis i kapab dir nou si i annan okenn  fee  ki sa bann yot par egzanp pou peye pou ganny permisyon pou servi sa bann mouyaz kont teni ki si i annan okenn polisyon i pou kout leta pou nobou fer netwayaz.

MINISTER

Letansyon Msye Speaker, wi, i pou annan en serten kontribisyon ki sa bann dimoun pou bezwen fer e la ankor i en kestyon pou nou revwar konbyen nou pe sarze e si fodre sarz plis dan lavenir pou nou kapab kontinyelman mentenir nou landrwa.  Parey i annan  fees  ki ganny sarze kot por e  spesifikman  pou nou ganny sa larzan pou nou kapab mentenir landrwa kont polisyon pou netwaye e gard li prop.  Nou annan pa mal problenm zisteman ozordi kot  marine charter  ki pe nesesit bokou resours mobilize pou nou kapab gard sa landrwa prop. 

MR C. GILL

Etan donnen ki makro i en pwason ki flote e makro limenm i pa konnen i annan okenn demarkasyon pou naze ensidswit, eski ou annan en konsey ou kapab donn nou bann peser ler makro i trouv li dan en sitiasyon kot i pe flote dan en landrwa kin ganny  demark  selman pou naze. 

MINISTER

Msye Speaker, mon pa ansarz ni peser, ni makro, ni an sa ki konsern lapes an zeneral dan sa pei. Mon responsabilite se   tourism  e transpor malerezman mon pa pou kapab donn sa konsey oubyen reponn sa kestyon.

 

MR MANCHAM

Msye Speaker kont teni ki gouvernman i annan plan pou fer ankor konblaz lo kote Pointe Conan, Anse Etoile etsetera, eski le minis i kapab donn nou en garanti ki son minister i a fer tout demann pou ki nou kapab gannyen de bann landrwa la, kot kapab ganny baze bann fasilite pou  diving  e pou met bann bato, pou ki nou kapab finalman ariv en sitiasyon ki nou gard nou bann lans antyerman  excluded  from  eleman de polisyon.

 

MINISTER

Mon krwar sa bann kestyon devlopman maritim an sa ki konsern aktivite touristik in ariv ase vit dan pei kot nou pann ase nou menm nou, nou pankor byen pare pou kapab reservwar.  Par egzanp  mon donn ou en legzanp, sa 2 lakonpanni  Sun Sail  e VPM kin anmenn bann   yachts  isi, zot in demann en serten nonm kantite  yacht e noun bezwen espas li  over a period of time  pou les zot anmenn sa kantite  yachts  parske si zot anmenn tou ansanm nou konnen nou pou annan problenm polisyon pandan letan ki nou pe organiz nou pou kapab evantyelman annan bann fasilite  pou accommodate  tou zot bann bato.  E mon pran ou pwen ki oun souleve onorab Mancham ki dan bann diskisyon ki pe ganny fer pou devlopman sa nouvo  East Coast  lo ki komite mon minister i reprezante, nou a pran kont ou sizesyon e nou ava asire ki dan lavenir nou annan fasilite neseser  bearing in mind  osi ki evantyelman nou pou annan en  yacht marina  ki sa osi i a kapab ede pou permet bann mouyaz neseser e tou bann fasilite dan lavenir.  Me mon panse sa nou pe koz  ankor en lot kategori, en lot devlopman dan limenm.

 

MRS MARIE LOUISE POTTER

Minis, oun dir nou i annan 10 bato ki ganny lotorizasyon pou mouye dan labe Beau Vallon, ou pou dan en pozisyon pou dir nou ki kalite sa bann bato, eski i bann yot, i  enkli bann bato water sports   oubyen bann zabitan Beau Vallon ki annan en bato plezir. Dezyenmman lekel si ou kapab dir nou, lekel sa 10 dimoun ki  licenced pou mouye dan  Beau Vallon silvouple.

 

MINISTER

Msye Speaker, parey monn dir i annan deza en serten nonm bato ki pe mouye Beau Vallon kin ganny permisyon pou zot kapab fer li, sirtou bann dimoun ki reste dan sa rezyon.  Sa 10 bwe mouyaz ki nou ti pe fer mete se vreman pou VPM ek Sun Sail, sa 2 nouvo lakonpannyen kin vin etablir zot biznes isi pou de rezon kot zot vwar zot dan en sitiasyon annan de fwa kot zot pe komans zot travay  annan de fwa dan sa rezyon laba, zot tin demann permisyon pou kapab les en serten nonm  bato                                                                                                                                                                                                                                                          mouye laba e sete spesifikman pou sa 2 lakonpannyen.  E parey monn dir kot nou espekte zot fer serten kontribisyon konsiderab pou ed nou kapab mentenir sa landrwa kont polisyon.

 

MR SPEAKER

Kestyon 26

 

MR C. GILL

Kestyon i pou minis tourizm e transpor. Mon ti a kontan demann li si in deza konsidere pou fer rekomandasyon avek Air Seychelles pou ki zot etabli bann  preferential rates  pou nou bann sitwayen aze,  senior citizens  ki vedir bann ki parlao 55 an e dezyenmman bann  preferential rates osi pou bann etidyan.

 

MINISTER

Non, onorab Gill, ziskan aprezan mon minister pann vwar li neseser pou rekomann avek Air Seychelles pou li etablir bann air fares si oule preferansyel pou bann senior citizens ek bann  etidyan konm tel.

 

MR SPEAKER

Kestyon 27.

 

MR C. GILL

Kestyon 27 i ankor en fwa pou minis tourizm en transport e mon ti a kontan demann li si in konsidere swa in rekomande avek Air Seychelles pou ki zot adopte en  stand by fare  ki ekivalan 50%   the published fare of Air Seychelles ant Mahe e Praslin, pou bann sez lo avyon ki vid ler avyon i anvole, e petet sa i kapab ganny met  available  pou bann sitwayen, petet 15 minit avan  departure,  menm 10 minit.

 

MINISTER

Sa polisi ti egziste dan Air Seychelles pandan bann lannen 1979 a 1981 e vi ki i ti ganny konsiderableman abize byensir par bann dimoun ki ti servi bann fo non, Air Seychelles ti vwar li dan lobligasyon pou li aret sa polisi. E i en keksoz ki petet i  a oule revwar dan lavenir.  Nou vomye les sa avek Air Seychelles koman en lorganizasyon komersyal pou li pran sa desizyon.

 

MR C.GILL

Msye Speaker etan donnen ki nou pep ozordi in vin bokou pli matir eski minis i ava rekonsider sa polisi pou ki nou kapab vann nou bann tiket pou Mahe/Praslin 50% pou bann stand by  aplikan.

 

MINISTER

Msye Speaker parey monn dir, Air Seychelles i en lorganizasyon komersyal, otan ki posib mon minister i les li operate  konm tel e nou selman  come in  interfer ler i neseser an sa ki konsern bann polisi vreman sibstansyel.  Sa en  issue parey mon dir ki Air Seychelles tin pran li dan son loperasyon day to day e i ti vwar li oblize arete e mon a les sa avek Air Seychelles pou li revwar dan konteks son loperasyon komersyal, si i en keksoz ki i kapab konsidere e adopte pou lavenir.  Sa i en opsyon, i annan lezot kalite opsyon ki i kapab konsidere pou asire ki i donn en bon servis e an menm tan pou asire ki son loperasyon domestik i profitab.

 

MR C. GILL

Etan donnen ki gouvernman li menm i en garanti pou Air Seychelles pou plizyer  loans  ki i pran avek labank, etan donnen zot ti ava plito annan en sez lo avyon ki ranpli plito enn ki vid, ki petet minis i kapab aport sa sizesyon avek Air Seychelles.

 

MINISTER

Msye Speaker parey monn dir  point taken, selman osi fodre pa ou annan en sitiasyon kot  at the end of the day  ou vwar avyon antye pe travel avek 50% a.d.  Ou vwar sa son problenm, sa ki ti arive dan lepase.  Ou  better of  avek en avyon pou li profitab i annan en serten poursantaz ki ou bezwen en  load capacity  ki ou bezwen pou profitab, si i 65, 75, 80% dizon i 80%,  ou  better of  avek 80% ou  load  ki oun pey ou  full fare  ki ou avyon i plen avek 50% a.d.  Ou vwar i sa son problenm.  Parey mon dir ou i en keksoz ki Air Seychelles pe revwar, i dan prosesis pe revwar antye son loperasyon domestik, i annan serten  difikilte ki i pe fer fas avek pou le moman.  Sa i en opsyon ki i kapab remet an pratik.  I annan lezot opsyon, i annan en opsyon par egzanp en  shuttle service  ki mon konnen Air Seychelles pe revwar posibilite kot i annan serten  flight  i annan tan kantite  seat,   ou vini, ou  queue  up,  ou boukte, ou ganny en  special rate  ou ale.  Parey  plizyer pei i fer, i annan Sengapour,  Kuala Lumpur  par egzanp ou kapab fer sa.  Sa i en lot posibilite.  Mon konnen zot pe revwar zot sitiasyon an se moman, an sa ki konsern zot loperasyon domestik e mon asire zot pe tenir kont tou bann sizesyon e sa i enn bann  pwen ki zot ava tenir an kont.

 

MR SPEAKER

Kestyon 28

 

MR C. GILL

Mon ti a kontan demann minis pou tourizm e transpor si son minister i annan okenn plan pou amelyor sa semen Danzilles Bel Ombre.

 

MINISTER

Mon minister napa plan pou fer travay mazer pou upgrade  semen Danzilles pandan lannen 1997. Malgre ki semen Danzilles i en pe etrwat me pou le moman i  motorable  tou dilon.  Fir a mezir ki trafik i ava ogmante, aksyon neseser a ganny fer pou nou kapab amelyor sa semen dapre nou bann  progranm travay abityel.

 

MR SPEAKER

Kestyon 29

 

MR GILBERT BARBIER

Msye Speaker, eski minis i kapab dir lasanble akoz ziska ozordi rezidan La Gogue Glacis pa be benefisye avek servi bis

 

MINISTER

Msye Speaker SPTC in donn mwan lasirans ki rezidan La Gogue Glacis i deza pe benefisye avek servis bis swivan lenplimantasyon nouvo  schedule  ki ti ganny entrodwir apartir zanvye 1997.  Me sa ki mon konpran se ki onorab Barbier pe rode se ki sa servis bis i aret a en serten pwen e i ti a voudre ki sa servis i al pli devan kot zot ti pe demande, ki SPTC pou le moman pann vwar li posib pou kapab entrodwir sa, e mon a fer li mon devwar, mon le asir onorab Barbier ki mon a fer li mon devwar pou mon kapab vwar avek SPTC  how soon zot kapab omwen avans sa servis pli devan kot sa bann rezidan ki mon konpran i annan omwen en karentenn lakaz ki bezwen osi sa servis pou kapab anmenn sa servis  ziska kot sa bann dimoun e asire ki i annan sa fasilite pou  bis vire ensi-d-swit.

 

MR  MANCHAM

Eski le minis i  a donn nou lasirans ki tou plan  ki pran pou amelyor la sitiasyon i  a osi benefisye bann rezidan La Gogue/ Maldive.

 

MINISTER

Msye Speaker, wi, nou annan en servis bis deza ki fer Anse Etoile/ La Gogue e i annan osi en servis bis Victoria/Maldive.  Nou annan bann nouvo  schedule  kin ganny pibliye e otan ki posib SPTC i sey met zot an pratik.  Petet mon ti a  pas en kopi avek Msye Mancham apre e  vwala mon krwar i annan serten servis ki pe deza anmennen ver Maldive.

 

MR SPEAKER

Kestyon 30

 

MR BARBIER

Msye Speaker, eski minis i kapab dir lasanble si son minister i annan plan pou demark en zebra crossing kot lekol Glacis.

 

MINISTER

Koman manm onorab i konnen, ti annan en zebra crossing kot lekol Glacis dan le pase.  Apre serten letid ki ti ganny fer par land transport division zot ti retir sa zebra crossing akoz zot ti vwar ki i ti plis en menas pou sekirite bann zanfan ki en mwayen pou amelyor zot sekirite.  Letid in  osi montre kot i annan en kantite crossing ki ganny fer pandan lazournen, i pa rekomande ki i annan en zebra  crossing si i napa en pyeton ou lezot fasilite ki atase avek sa zebra crossing.  Divizyon land transport an se moman pe travay lo en scheme pou kapab amelyor pedestrian safety an zeneral dan sa landrwa, sa i konpri serten pyeton, bus lay by, en turn around, restriksyon parking etsetera.  Divizyon land transport i ekspekte  finaliz e entrodwir sa scheme plitar sa lannen, e mon espere avek tou sa la si oule i ava en mwayen pli efikas pou asir safety bann zanfan dan sa landrwa. 

 

MR SPEAKER

Kestyon 31

 

 

MR BARBIER

Eski minis i kapab dir lasanble, ki son polisi, ki polisi son minister vizavi lotel ki pa lo en bon nivo.

 

MINISTER

Apre ki bann lenspeksyon neseser in ganny fer ki normalman minister  tourism  i fer an pros kolaborasyon avek minister lasante e licensing authority,  sa general manager oubyen proprieter sa lotel i ganny dir ki i bezwen fer an term amelyorasyon son lotel.  Sa i swiv par en let ki minister  tourism  oubyen dan serten ka, minister lasante i ekrir sa dimoun.  Nou donn li en peryod letan konvenab pou li kapab fer sa bann travay neseser e apre en lot lenspeksyon i ganny fer.  Si zot in satisfe i okay, si sa bann keksoz kin ganny demande pou ganny fer pann ganny fer konvenableman, i ganny li en final warning,  ki i ganny ankor en serten peryod letan pou li kapab fer sa travay ki i bezwen fer. Si apre sa final warning tou fason travay neseser pa ganny fer, la licensing authority, pa minister tourism, minister tourism e minister lasante i rekomande avek licensing authority ki swa sa license i ganny suspend oubyen si fodre kot sa lotel i perdi son license konpletman.  So vwala si oule prosedir an gro ki ganny  swiv, me otan ki posib en kantite dan sa bann konsiltasyon i ganny fer e i pa en travay ki minister tourism i fer lo limenm.  I fer li an kolaborasyon tre pros avek prensipalman minister lasante e si fodre lezot azan osi.

 

MR BARBIER

Eski minis i kapab dir nou sa lotel ki mon pe koz lo la ki son grad pou le moman, e si i vre i pe fonksyonn san en licence. Lotel Glacis, Vista Bay.

 

MINISTER

Msye Speaker, Vista Bay Hotel i pe operate avek en licence. I vre ki i ti dir i pou ganny difikilte pou li pey sa nouvo licence, me pou dir ki Vista Bay i pe  peye son licence e Vista Bay ti annan serten problenm dan lepase kot in nesesit sispann son licence, mon rapel lannen pase ti annan serten problenm, me pou le moman i pe operate avek son license e lotel Vista Bay i pankor ganny classify.  I napa en star rating pou le moman.

 

MR MANCHAM

Msye Speaker, eski le minis i kapab dir nou ki proteksyon son minister i kapab afford  bann touris si en zour a lot otorite licensing i sispann licence en lotel e bann touris kin vini  dan package tour i dan sa lotel la.

 

MINISTER

Msye Speaker, mon pa kapab dir pou le moman nou annan okenn polisi tre strik, okenn stratezi, okenn prosedir ki dir nou ki nou fer dan en ka konmsa, me selman parey petet Msye Mancham i konnen, laplipar sa bann touris ki vini i vin lo, ou fek dir ou menm lo en  package tour  e sa normalman i ganny negosye avek sa tour operater, e sa tour operater normalman ki pou ansarz son bann dimoun, in arive de ka kot li in bezwen re-accommodate, re-negosye ek en lot  lotel tou-d-swit pou kapab pran son bann kliyan.  In ariv serten ka ki mon rapel tre pe, enn ou de, kot sa touris in vin kot nou e in vreman met serten presyon kot in esplik son problenm, i napa larzan ensidswit kot minister si oule  out of sympathy, out of good faith,  noun pran sarz serten keksoz pou sa serten endividi.  Me nou napa en fon konm tel kot otomatikman ler sa i arive, nou nou bezwen pran kont.  E mon pa tro sir si i annan okenn lezot pei osi ki normalman i fer sa konm tel, me prensipalman se bann tour operater ki pran sarz zot kliyan e i take care konmsi pou remet zot dan en lot lotel ensidswit.

 

MR BARBIER

Msye Speaker, eski minis i kapab dir nou si son minister i satisfe avek servis ki sa lotel pe donnen depi ler in re ouver.

 

MINISTER

Msye Speaker Vista Bay i enn bann lotel ki  si ou kapab dir in toultan anba careful scrutiny   dan le sans o pwenn vi izyenik e lezot fasilite ki sa lotel i ofer.  An se moman nou napa konplent ki pou dir i pa pe ofer sa servis an zeneral ki i devret ofer.  Mon krwar plis problenm ki nou vwar avek Vista Bay e sa i bann issues ki minister lanplwa i konsernen avek, se prensipalman lafason mon krwar bann travayer laba in ganny si oule in ganny trete. I plis sa, malerezman ler kekfwa ou napa  motivasyon dan ou landrwa travay, parey nenport ki landrwa, sa i reflekte an zeneral lo servis ki ganny donnen, e sa noun kren ki in arive Vista Bay me pou dir noun ganny bann konplent grav sorti kot bann kliyan ensidswit i pann le ka.  Me Vista Bay i annan nouvo devlopman ki sipoze arive ek Vista Bay dan lavenir, mon espere i materyalize e sa i a ed nou tou an zeneral, mon espere.

MR C. GILL

Mon ti a kontan demann le minis ler i ariv en ka kot en letablisman lotel i vin plito en, met sa dan quotes,  i vin plito en fon, en bidze  for bad advertising of Seychelles,  eski ou minister i annan en plan daksyon en pe pli serye ki bann prosedir standar pou met en presyon lo sa etablisman, pou ogmant son kalite servis, pou amelyor son sitiasyon vizavi nou bann touris, parske nou konnen ki en fon  for bad advertising of Seychelles   i pa neseserman en fon larzan.  Me i plito i kapab menm en letablisman ek latitid ki sa management i aporte. 

 

MINISTER

Mon krwar i va san dir  ki nou pou bezwen dan ka spesifik pran bann aksyon pli serye, pli strik ki zis bann prosedir normal ki nou swiv.  Petet i pankor arive en sitiasyon konm tel, me i annan en lotel an partikilye en letan kot nou ti pe vreman annan bokou lenkyetid.  La sa lotel e zisteman i annan pa mal problenm e son licence i an gran kestyon e sa lotel i anplway en bon pe dimoun e i en desizyon ki tre byento nou pou bezwen pran ki nou pou fer ek sa lotel.  Si oule, la i pa dan en ka move piblisite, i en problenm licence ensidswit.  Me dan de ka kot i arive, wi, nou pou bezwen pran aksyon tre strikt e pa les pase, e sa i pa aplik zis pou lotel.  I aplik pou tou larestan.  In arive de ka kot nou sispann licence  plizyer pa zis enn, taxi operators par egzanp zot licence, e apre ou tann tou sord kalite   appeal,  zot al ekri partou ensidswit.  Ler ou pe sey met presyon pou kapab improve service, ou ganny lot kalite keksoz ki rebounce, me nou pa kapab les sa fer nou per, afekte nou.  Nou as long ki nou santi nou pe pran nou responsabilite, nou pe fer nou travay.  Nou ganny problenm ek serten, pa tou, tre pe car hirer operators par egzanp.  Nou annan bann prosedir ki aksyon normalman nou pran e sa nou fer li an kolaborasyon normalman avek zot lasosyasyon konsernen. 

 

MR WAVEN WILLIAM

Msye Speaker mon tia kontan demann madanm minis apard ki rate bann hotels ki bann lezot incentives i annan pou ankouraz bann lotel pou gard sa o standar ki minister i demande.

 

MINISTER

Msye Speaker, mon krwar noun koz bokou lo sa bann kestyon incentives dan le pase an sa ki konsern serten konsesyon ki gouvernman in donnen pou kapab ed bann lotel improve zot standar an term zot enfrastriktir. Noun koz osi lo kestyon training dan lepase kot noun ankouraz, noun donn posibilite bann lotel pou kapab train zot dimoun. Gouvernman in donn konsesyon lo GOP, nenport ki lotel ki oule anmenn en trainer, i pa pey GOP a kondisyon ki i spesifik, i montre klerman ki sa dimoun pe train sa bann dimoun dan lotel.  Vwala serten bann fasilite ki noun kree. Nou travay an pros kolaborasyon avek   Seychelles Hotels Association,  mwan menm mon donn en kantite letan kot mon zwenn avek zot, bann problenm spesifik nou kapab sey adrese ansanm, nou ankouraz zot pou partisip dan devlopman nou lekol otelyer, so  an gro si oule en pti pe vwala sa ki noun sey fer pou ed bann dimoun  amelyor zot landrwa, zot lenfrastriktir e pli-z-enportan ankor  zot servis.  I annan bokou kin respond.  Ozordi nou pe vwar bann rezilta pozitiv, pa tou kin respond parey, i annan kin al pli dousman, zot pankor ariv sa nivo petet, me mon annan lespwar ki tou dousman nou a kapab kontinyelman fer pli byen. 

 

MR SPEAKER

Kestyon 32

 

MR MICHAEL RENE

Eski minis i kapab enform sa lasanble kan semen koltar dan distrik Bel Air  pou ganny remet en sirfas koltar.

 

MINISTER

Msye Speaker normalman travay  resurfacing  i ganny fer dan kad nou travay  periodic maintenance programme  dan en fason kontinyel pandan ki sa semen i egziste.  Bann semen distrikt Bel Air ensi ki lezot distrik i pou ganny resurfaced selon bann kriter kin ganny etablir ki enkli par egzanp volim trafik ki pas lo semen, dat ki  dernyen resurfacing ti ganny fer, kondisyon aktyel sa semen, etsetera.  Par egzanp sa seksyon semen sorti krwaze laveni Revolisyon pou al Bel Air ziska krwaze semen Curio, sa i pou ganny resurface sa lannen.  An sa ki konsern lezot morso semen dan distrik Bel Air, nou pou fer selman bann travay maintenance regilye dapre nou progranm.  Pa neseserman sa bann lezot morso semen pou ganny resurface  sa lannen. 

 

MR RENE

Msye Speaker, eski minis i kapab konfirmen ki ler sa bann maintenance i ganny fer lo semen Bel Air, si rigol ki pas  anba semen, sa bann rigol kin kase, sa osi pou ganny refer.

 

MINISTER

Msye Speaker an prensip wi,  ler travay resurfacing i ganny fer otan ki posib  bann dimoun konsernen i profite pou fer okenn lezot travay  maintenance around the area ki annan pou fer pandan sa letan zot fer li an menm tan. 

 

MR C. GILL

Eski le minis an zeneral i santi li satisfe avek travay ki divizyon land transport pe fer lo nivo reparasyon e maintenance bann semen…

 

MR SPEAKER

Kestyon i zeneral, kestyon ti lo Bel Air..

 

MR C. GILL

dan Bel Air.

 

MINISTER

Msye Speaker kont teni resours ki nou annan e bann mwayen neseser ki nou annan a nou dispozisyon, mon kapab dir wi, mon satisfe avek travay ki land transport division pe fer an zeneral.

 

MR SPEAKER

Kestyon 33.

 

MR RENE

Eski minis i kapab enform sa lasanble kan SPTC pou komans en servis transpor pou zabitan semen Curio. 

 

MINISTER

Msye Speaker, sa servis bis pou  entrodwir plitar sa lannen avek larive bann nouvo bis ki SPTC pe ekspekte reservwar pandan mwa zilyet.  Byen sir fot espere bann bis i arive, nou pa ganny okenn retar e swivan sa zot pou met sa servis bis lo semen Curio.

 

MR RENE

Msye Speaker, eski i annan pti bis kin arive dan pei, eski minis i kapab konfirmen.

 

MR SPEAKER

Pou Bel Air.

 

MR RENE

Dan pei, pou, well SPTC

 

MINISTER

Msye Speaker i annan serten pti bis ki tin vini ver lafen lannen pase me in ganny mete lo serten larout segonder ki dapre nou progranm ti sipoze gannyen  avan e bann ki pe vini la, nou annan nou lot progranm larout segonder ki i pou ganny entrodwir lo la ki enkli Curio.

 

MR SPEAKER

Bon, avek sa nou fini nou kestyon pou minis pou ozordi e nou a eskiz li parmi nou.

Nou vin lo motions.  Premye pou  Onorab Danny Faure e mon envit ou pou prezant ou mosyon.

 

MR DANNY FAURE

Msye Speaker,  bann koleg dan lasanble nasyonal, mosyon ki mon pe prezante ozordi i enn ki viz  a en group spesifik set-a-dir bann partisipan ki pe travay anba Unemployment Relief Scheme,   sa ki konn li koman URS. 

Msye Speaker,  nou sistenm byennet  sosyal pa fer provizyon pou en sitwayen Seselwa ki pa travay pou li kapab ganny lasistans sosyal. Me ki i annan dan pei, nou annan depi 1995, zot ava rapel tre byen ki isi dan nou lasanble nou ti pas en lalwa ki fer li legal pou ki nou annan sa ki nou apel   unemployment relief scheme, en  scheme  ki annan pou lobzektif  kree lanplwa tanporer pou bann sitwayen Seselwa kin anrezistre koman en  job seeker  avek biro lanplwa e sirtou sa bann partisipan ki travay dan bann sekter parey sekter prodiktif lanvironnman,   landscaping  e i pou bann sitwayen ki kapab fer en travay prodiktif.  E an menm tan sa bann partisipan ki ganny anrezistre lo sa  scheme,  zot ganny anrezistre pou en serten dirasyon, normalman zot komans pou 6 mwan avek lentansyon ki zot ganny, i annan en  review  lo zot sitiasyon e mwan monn swiv sa  scheme  depi ler in ganny entrodwir e monn remarke ki an mezir ki i annan bann partisipan lo sa  scheme,  minister lanplwa avek servis sosyal in fer li son devwar pa zis ranpli sa  scheme  avek en serten nonm kantite partisipan ki  tou zot lavi antye zot ganny anrezistre lo sa  scheme,  me fer sir ki dan en sitiasyon gradyel, serten bann partisipan kapab sorti lo sa  scheme  e ganny zot en job permanan. E i annan serten sa bann partisipan lannen pase zot in zwenn IOT pou kapab ganny zot en fixed job   en job permanan.  Se pou sela mon vwar nesesite e rezon det the unemployment relief scheme.  Me ki mon anvi adrese isi ozordi dan nou lasanble, mon anvi adres en sitiasyon lo travay ki sa bann partisipan pe fer e allowance ki sa bann partisipan pe gannyen.  Mon rekonnet zefor ki sirtou laplipar bann madanm kin ganny enrolled lo sa scheme ki bann partisipan lo sa scheme pe fer.  Zot kontribisyon viz-a-vi bann travay ki annan pou fer.  I annan laplipar zot mon krwar zot dan zot middle age parey nou okouran.  Me zot konnen ki bann partisipan lo sa scheme zot travay zot 4 er-d-tan edmi par zour.    E pou en letan pa plis ki 5 er-d-tan sa bann partisipan zot ganny zot R870 par mwan.  Me nou osi okouran Msye Speaker ki o fir a mezir ki nou devlope, o fir a mezir ki pei i fer progre, o fir a mezir ki gouvernman i pran bann desizyon pou amelyor standar lavi tou sitwayen, o fir a mezir ki pei i devlope, gouvernman pe regarde ki mannyer i kapab donn tou Seselwa plis konfor, i reste lobzektif enportan nou gouvernman, gouvernman SPPF o pouvwar pou kapab rezourd problenm lanplwa dan sa pei.  Me antretan ki sa i en lobzektif e ki mon krwar lopozisyon osi i siport sa lobzektif i reste avek nou sa scheme kot i annan dimoun ki pe fer en job tanporer, e an menm tan ki zot pe fer sa job tanporer zot pe resevwar en allowance

Msye Speaker, ler nou ti pe diskit bidze lannen pase, minis finans ti anons logmantasyon saler pou bann low income workers.  Mon konnen ki annan manm dan mazorite, dan parti mazorite e mon konnen ki annan detrwa manm osi dan lopozisyon ki ti pe donn zot sipor pou ki allowance lezot partisipan lo bann diferan scheme i ganny adrese.  Dezyenm speaker pou pran laparol ler nou ti pe diskit bidze se lonorab Andre Pool manm elekte pou Anse Boileau.  Dan en verbatim ki mon annan, lonorab Pool ti dir “dan sa menm lalinny mon tia kontan demann minis si gouvernman osi annan plan pou revwar peyman ki konmela bann travayer ki dan unemployment relief scheme pe resevwar.  Parey nou konnen bokou sa bann dimoun ki anba sa scheme se bann madanm ki pe rod travay me zot pankor gannyen.  Alors antretan zot partisip dan URS pou ganny en reveni pou zot ek zot fanmiy.”  Msye Speaker, mon pann le ki bann parol i zis al dan lezer.  Se pou sela ki boner an zanvye mon ti fer li mon lobligasyon e mon responsabilite pou follow up lo en lanvi ki enn mon koleg dan parti mazoriter ti pe met devan e monn etidye sa konsern e mon krwar i annan bokou merit e mon krwar osi manm piblik ki pe ekout nou mon krwar zot pli enterese avek nou dan lafason ki nou fer keksoz, dan lafason ki nou dir keksoz, dan lafason ki nou fer nou propozisyon.  Ou konnen tre byen Msye Speaker, souvann fwa oun koup enn detrwa nou ler noun pran laparol akoz nou ti anvi profite ler en keksoz ki bon i vin devan, nou osi azout serten disik lo la pou fer li pli bon.  Me sa ki enportan dan lapolitik parey lonorab Mancham i konn tre byen se ki mannyer ou follow up lo bann size, ki degre ou pous bann size pli devan e ozordi monn table en mosyon ki kler, kler devan lasanble nasyonal, i kler akoz i pe demande ki egzakteman nou anvi. Ki nou anvi e ki nou tia kontan ki lasanble nasyonal i aprouve, se ki gouvernman i konsider, mon swazir sa mo konsider lonorab Belle, akoz mon konsyan ki mon pa pe demann gouvernman dir ki kantite e mon krwar ki lonorab Belle pe zwenn mwan dan sa refleksyon akoz i pre pou li pran la parol.  Dan sa refleksyon ki mannyer nou adres sa size allowance ki nou pa kapab dir ki sif egzakt, me nou pe prezant en case devan gouvernman pou konsider.  Me pou konsider lo baz en largiman solid.  Pou konsider kwa, pou konsider logmantasyon sa allowance pou kapab sorti lo sa R870 par mwan pou ogmante, gouvernman zot zot konnen i dan kapasite pou zize ki kantite.   Mosyon i kler Msye Speaker akoz nou pe dir lekel, ki group, ki scheme.  Nou pe adres the unemployment relief scheme.  E mon krwar tou mon bann koleg lonorab dan lasanble nasyonal i a kapab back sa mosyon. 

Msye Speaker, I beg to move ki lasanble i rekonmann avek gouvernman pou konsider logmantasyon allowance bann travayer bann ki tonm anba unemployment relief scheme.  Mersi. 

 

MR SPEAKER

Okenn ki segonn sa.

 

MR WAVEN WILLIAM

Msye Speaker mon segonn sa mosyon.

 

MR SPEAKER

Deba i ouver, Onorab Mancham.

 

MR JAMES MANCHAM

Msye Speaker, mon panse ki nou tou ki dan sa lasanble aujourd’hui nou pou napa okenn obzeksyon pou siport sa mosyon ki demann gouvernman konsidere donn plis allowance workers under unemployment relief scheme.  Sepandan monn ekout avek bokou entere diskour ki Leader Government Business onorab Danny Faure in prononse an sipor de son mosyon ki devan nou aujourd’hui e mon tia kontan profit sa lokazyon pou fer kelke komanter pou ki nou kapab aborde sa size dan son pli gran dimansyon. Lonorab lider Government Business  avek zistifikasyon i donn kredi pou sa linitiativ a lonorab Pool de parti SPPF e in sezi lokazyon de son prezantasyon pou fer sorti par son verbatim parol prononse dan lepok diskisyon nou bidze par lonorab Pool lo size.  Sa i aport mwan la kestyon.  Si bann komanter ki nou manm lasanble nasyonal i fer dan lepok de bidze i vreman pran konsiderasyon seryezman par le gouvernman.  Lonorab Pool ti pe koze lo bidze e minis ti la.  Se en pwen ki mon le fer sorti akoz ziskan prezan gouvernman pa ti ekoute sa ki lonorab Pool ti dir e trouv en fason amelyore la sitiasyon de sa bann pov personn ki pe travay under unemployment relief scheme.  Eske mon pou enterprete par lefe ki aujourd’hui lonorab lider de government business in met sa mosyon, ki enplisitman i pe kritik son gouvernman SPPF ki ziska prezan pann ekoute, pann pran linitiatif lo parol prononse par lonorab Pool. 

Msye Speaker, parey monn dir mwan mon panse ki nou tou nou bezwen siporte sa mosyon, me senpleman i annan en konstantasyon ki nou pe fer se  to consider increase allowance of workers.   E sa konm nou tou nou konnen set en kestyon ki annan en bugetary implication    e se pou set rezon  nou ti a panse ki menm apre ki lonorab Pool tin fer son lentervansyon etan donnen son sipor total pou son senpati avek entervansyon lonorab  Pool ki petet dan son diskour fer komanter lo bidze ki minis ti aporte devan nou, sa pwen la ti a kapab gannyen spesifikman souleve.  Anfen sa bann komanter la mon oule fer li senpleman avek le dezir de demande a nou bann konfrer de lasanble nasyonal annou aport bann mosyon san eseye daporte enplikasyon partizann konsernan le byennet de nou la popilasyon an zeneral.  Si ti napa sa lanfaz lo parti ki aport sa linisyativ, mon krwar nou komanter pa ti pou ganny merite me akoz sa bann lanfaz alors mon demann mwan la kestyon si le rezondet de sa mosyon se in fact pointing finger a le gouvernman akoz ziska aujourd’hui 4 mwan, noun ariv an avril, mon krwar menm 5 mwan parske komanter lonorab Pool ti ganny fer an novanm ou komansman desanm, tou sa letan okenn linisyativ pann pran pou konsider le ka e donn sa bann dimoun la en ogmantasyon.  An se ki konsern zistifikasyon for unemployment relief scheme sa mon panse ki nou tou nou siport sa totalman parske napa en keksoz ki si vous voulez i aport en serten santiman de isolation,  ou santi ou perdi si en dimoun napa en lokipasyon pou fer e ki nou tou nou konnen menm ki nou ganny dir pou dir lwazivte  se la mere de tous les vices alors dan le ka de napa travay nou dwatet ankouraz e siport gouvernman totalman dan tout fason ki in kapab adopte to provide employment facilities  menm lo en temporary basis  a sa bann dimoun ki napa lokipasyon e kont teni ki sa bann dimoun osi i bezwen viv, nou bezwen fer sir ki zot gannyen en rekonpans ki commensurate  avek travay ki zot pe fer.  Se ki nou pa abiz lo lefe ki zot napa travay e ki zot ti anvi travay, pou pous zot dan en travay e pa pou donn zot sa, anfen kantite larzan ki zot travay i zistifye.  Mersi Msye Speaker.

 

MR WAVEL RAMKALAWAN

Mr Speaker en mosyon parey in ganny prezante, i en mosyon ki devret ganny bokou praise,  i en mosyon ki bon, i en mosyon ki tous en sityasyon aktyel.  I tous en sityasyon aktyel akoz bann dimoun ki dan unemployment relief scheme letan minis ti anonse ki pou annan bann lezot logmantasyon zot ti pe aktyelman demande ki pou arive avek zot.  Letan minis ti prezant son bidze e mon kontan ki onorab Faure in mansyonn onorab Andre Pool parski ti annan bokou manm ki ti fer referans avek sa size.  An realite mwan menm mwan mon pe fouy dan mon bann dokiman e letan mon fouy dan mon dokiman mon trouve ki mon ti pe demande e la mon ava sit egzakteman sa ki mon ti dir dan sa diskour letan mon ti pe reponn bidze.  “…kestyon ki mon demande atraver sa logmantasyon se ki pou arive avek sa bann  dizenn dimoun, sa bann dimoun ki lo training scheme,  bann home carers,  bann lo unemployment relief scheme   sa bann ki pe ganny mwens ki R1600 par mwan eski zot pou ganny en logmantasyon pou zot kapab fer fas avek pri lavi ki o e pou zot nouri zot fanmiy.  Si R1600 pa ase, mon krwar ki R1000 i menm pir e si mon swiv lozik prezante dan bidze, mon krwar ki zot devret ganny en logmantasyon.  E la mon fer en demann avek minis pou konsider sa seryezman e pou regard dan welfare  sa bann dimoun.” 

Mr Speaker sa demann ti ganny fer letan bidze  pe ganny prezante e mon apresye komanter ki Msye Mancham in fer parski enn bann pwen ki mon annan la se lo size bidze limenm e mon krwar ki i enportan pou tou dimoun konpran sa kin ganny prezante an relasyon avek bidze, an relasyon avek son enplimantasyon.  Letan bidze i ganny prezante, gouvernman i a pe dir avek lasanble, se sa la kantite larzan ki mon bezwen pou fer ban diferan schemes marse, pou fer bann minister marse, pou fer pei marse.  Alors i dir avek lasanble aprouve sa.  E letan bidze in ganny prezante, letan lasanble i aprouv sa bidze, se sa larzan ki gouvernman i ganny drwa legalman pou li depanse pandan sa lannen.  Lalwa i dir e  konstitisyon menm i fer referans lo la ki si gouvernman aprezan i bezwen depans plis i bezwen retourn ankor devan lasanble pou dir, be get sa mon ti demann zot sepa R300m be mon krwar mon pou bezwen depans R400m alors aprouv ankor R100m pou mwan depanse.

E mon fer resorti sa Mr Speaker parski dan bidze pou sa lannen 1997 i napa provizyon pou ki i annan en ogmantasyon sa allowance.   I napa en provizyon pou dir be la i la bann dimoun ki lo sa bann diferan schemes  nou annan sa larzan pou zot, pou tir zot lo R870 par mwan pou anmenn zot lo R1600 par egzanp.  Me parkont dan bidze ki lasanble in aprouve pou sa lannen i annan provizyon pou ki bann lezot civil servants,  bann ki pe ganny R1600 an montan ziska R2000 whatever, 2700 mon krwar, pou zot ganny en ogmantasyon.  Alors i enportan pou regarde ki pe arive la aprezan.  Lasanble i aprouv sa propozisyon dizon, i al kot gouvernman e aprezan gouvernman  li i bezwen reflesir lo la.  Sa vedir rezon ki mon pe dir sa Mr Speaker se pou ki bann dimoun ki dan unemployment relief scheme, zot realize ki sa ogmantasyon ki pe ganny demande ozordi le premye avril 3 mwan apre ki bidze pou sa lannen in ganny aprouve, menm si lasanble i aprouv li, i pa neseser ki zot pou ganny li deswit.  Pa krwar ki letan sa i pase zot pou ganny li mwan prosen.  Si zot krwar sa zot ava pe manz en gro pwason davril.

Mr Speaker sa mosyon ki la devan nou e osi mosyon ki onorab Joevana Charles ki monn aprann pandan mon labsans in prezante in ganny pase pou bann home carers pou mwan mon konsidere ki se bann mosyon ki pa ti devret aparet devan lasanble 3 mwan apre bidze ti ganny prezante.  Akoz?  Parey nou dir se bann mosyon, se bann pwen ki ti ganny fer resorti letan nou ti a pe diskit bidze e nou pa ti ankor ni menm rantre dan son detay.  Sa vedir ti still annan letan pou fer bann amannman.  Me aprezan pou mwan mon trouv mwan dan en pozisyon en pe drol parski sa mosyon letan in ganny aprouve, in ganny anmennen kot gouvernman e sa set en keksoz pou minis finans regarde.  E letan nou kalkile kwa ki minis finans ti dir desanm 1996.  E la minis pa ti fer referans avek sa ki onorab Pool ti dir, minis ti fer referans avek sa ki mwan Ramkalawan mon ti dir.  E la mon mazin son verbatim byen, zot kapab al tyeke, mon mazin byen son parol, i dir “konsernan ogmantasyon allowance pou bann home carers ek bann dimoun ki unemployment relief scheme sa i politik”.  Se sa ki minis ti dir.  Alors aprezan, parski sa pou al devan minis finans mon demann mwan eski i pou dir sa se politik ki pe ganny zwe oubyen ki pou arive.  E la prezan mon demann mwan, si mwan mon ti pe fer politik letan mon ti demann sa dapre minis finans, la ozordi onorab Joevana Charles in vin prezant mosyon in ganny aprouve e ozordi onorab Danny Faure ki parey in remind nou SPPF i o pouvwar, onorab Danny Faure ki en manm komite santral SPPF, onorab Danny Faure ki diriz bann manm SPPF dan lasanble son tit se leader of government business,   eski i pe vin fer politik, kwa ki i pe fer.  Eski aprezan i pe swiv Ramkalawan, i pe swiv politik Ramkalawan, ki i pe fer.  Alors parey mon pe dir mon reste enpe dan en sans mon pa konnen mwan, kekfwa taler i ava… e i kler ki lafason ki onorab Faure in prezant son prezantasyon mon krwar i fer premye fwa ki mon trouv li, non pa premye fwa plizyer fwa monn trouv li, dan en fason prezant en keksoz dan en fason defensive.   “Mr Speaker nou nou swiv, nou swiv keksoz, nou isi, nou laba.  Onorab Pool ti dir sa desanm avan ki bidze ti ganny aprouve, ti napa letan pou li swiv, pou li zwenn minis dan koridor pou li dir be minis be i vre, oun mank en pti keksoz dan ou la priyer, oun mank en parol dan ou lapriyer ki petet i vre ki nou bezwen donn en pti keksoz bann home carers ensi-d-swit “.

Alors Mr Speaker mwan mon trouv tou sala parey mon pe dir dan en fason whether  i politik, whether  i serye, me selman mon dir annou fer en keksoz byen, sela kot mon dir annou osi ekoute letan serten keksoz i ganny prezante e aprezan nou pa ava bezwen retournen parski parey mon pe dir sa bann dimoun ti ann kapab ganny zot zafer sa lannen si senpleman dan bidze tin fer sa provizyon.   Apre sa parski pa ni ti pou bezwen en lalwa ou donn sa ogmantasyon, gouvernman i annan tou lotorite pou li fer sa. Alors mwan mon krwar ki si nou pe koz an term devlop pei, fer pei mars pli devan, tou sa bann zoli parol, mon krwar ki in ler pou nou kapab komans ekoute e pou nou regarde ki serten parol ki ganny dir dan sa lasanble i pa ganny dir senpleman akoz bann dimoun ki dan parti Demokratik oubyen bann dimoun ki dan parti United Opposition,  me ki bokou keksoz i ganny dir akoz sa pei, sa pei.  E parey nou pe dir annou  aret koz zis an term SPPF, an term pouvwar, an term bann parol konmsa, parski apre tou sa bann dimoun ki pou benefisye i pa zis bann dimoun ki dan en parti se tou dimoun ki benefisye letan i annan en allowance e an plis ki sa i pli zoli letan tou dimoun i kapab santi pou dir be wi sa set en disizyon lasanble nasyonal.  Parski apre tou par egzanp letan en lalwa i ganny pase i pa ganny pase koman en lalwa kin ganny aprouve par bann manm SPPF, i ganny pase koman en lalwa kin ganny aprouve par lasanble nasyonal.

Alors mwan mon krwar ki si nou ti ekout enpe plis, si nou ti pare pou nou regarde ki dan sa partnership  e la onorab Faure dernyen fwa ti fer nou mazinen ki li avek onorab Chow, i ti apresye onorab Chow dan sa meeting  ki ti ganny fer Botswana mon krwar, la fason ki lopozisyon avek gouvernman tou i annan en rol pou zwe e mwan osi tou dan sa seminar lo commonwealth  ki mon fek asiste, ankor enn fwa i annan tou sa bann zafer lopozisyon avek gouvernman ki mannyer zot kapab.. e sa se enn bann keksoz kot lopozisyon avek gouvernman i kapab travay ansanm, kot gouvernman i kapab ekout lopozisyon e kot lopozisyon pou apresye sa ki gouvernman i dir.  Alors mon krwar ki pou bon annan sa lespri enpe pli ouver parski la aprezan sa ki noun gannyen la se enn lo home carers,  enn lo unemployment relief scheme,  nou bezwen mazinen ki pou dir i annan bann zenn osi ki lo training scheme  e zot osi tou zot allowance  ki zot gannyen i tonm anba R1600.  Alors eski nou pou ganny en lot mosyon ki pou vin koz lo, en lot mosyon ki pou demann gouvernman pou konsider ogmant allowance ki bann dimoun lo youth scheme pe gannyen. Mon krwar ki i pou bet pou en mosyon konmsa vin devan lasanble akoz nou tou nou dakor, nou tou nou dakor ki sa bann keksoz parey i bezwen arive akoz pri lavi isi Sesel i o en kantite.  Alors Mr Speaker mon siporte sa mosyon.  Mon pa siport li ozordi, monn siport en tel lide depi desanm letan mon ti fer mon ladres lo bidze e monn siport li depi avan menm.  Alors onorab Faure i kapab garanti ki pou dir son mosyon si pe ganny sipor lopozisyon sa vedir i pou ganny sipor mazorite alors sa mosyon pou pase.  E mwan mon ti ava kontan si petet, mon pa konnen ki mannyer i pou fer, si letan gouvernman i trouv sa mosyon e i konsidere e i ti ava konsider li dan en fason favorab parski an menm tan osi nou bezwen toultan bear in mind  ki pa akoz en mosyon i ganny pase dan lasanble ki apre sa keksoz i pase parski gouvernman li i annan en lot,  gouvernman ki annan sa final say as to  si i pou fer li oubyen non.  Alors mon ti ava kontan osi dir avek bann dimoun lo unemployment relief scheme  pa bezwen krwar ki akoz sa mosyon i pase ozordi  zot pou ganny en ogmantasyon avan lannen i fini.  I posib ki aprezan letan i al lo dezyenm nivo sa i ganny bloke.  I posib ki tou zot manm dan lasanble i dir avek zot wi nou siport zot me ki i posib osi, mon pa konnen i posib ki i annan en desizyon kin fini ganny pran pli devan.  Sa osi tou i dan politik.  I posib desizyon in fini ganny pran alors i dir be anvoy sa boul laba goal  in fini marke lao.  Sa i politik.

Mon swete ki zot ganny zot keksoz o pli vit posib pou zot kapab nouri zot fanmiy e pou zot kapab fer fas avek pri lavi ki tre o isi.  Mersi bokou Mr Speaker.

 

MR DICK ESPARON

Msye Speaker letan monn lev mon lanmen pou koz sa mosyon mon demann mwan ki lapant mon pou pran.  Si mwan osi mon pou antre dan sa lager pou gete lekel ki pou ganny kredi pou sa mosyon, lekel kin premyerman dir sa dan lasanble, ti lide orizinal lekel e lekel ki merit ganny meday sa lakours.  Mwan mon pa anvi sa meday.  Les mwan mon a reste lo ban koman spektater, donn mon senp kontribisyon lo ki mon krwar merit sa mosyon. 

Napa en politisyen Msye Speaker lo en mosyon parey ki pa pou sey fer mannyer tir profi ladan.  Sirtou si ou dan lopozisyon.  Dan labsans onorab Ramkalawan ti annan onorab Belle ki dan bann mosyon kin pase, ki onorab Ramkalawan i fer referans avek, ti annan onorab Belle kin travay bokou, kin tay en kantite pou tir profi politik dan bann mosyon prezante.  Sa zis pou update onorab Ramkalawan e mon pa ti a kontan ki sa lasanble nou kontinnyen lo sa dimansyon.  Ki mon ti a kontan, fer en kontribisyon senser zistifye akoz mon krwar ki bann dimoun, bann partisipan dan sa kategori unemployment relief scheme zot ganny en ogmantasyon. Pou mwan si ti ganny vwar dan bidze, si pa ti ganny vwar dan bidze pou mwan pa enportan pou mwan.  Sa ki enportan pou mwan e sa ki en realite se ki ozordi dan ou konsiltasyon, dan ou kontak, dan ou dyalog tou lezour avek tou dimoun ou vwar ki i en nesesite kin vini e kin ganny egzize sirtou avek sa ogmantasyon kin ganny donnen avek bann travayer ki ti pe ganny pli mwens peye.  Zot dir ou pou dir be regarde sa bann dimoun, kout lavi i aplik parey, zot osi zot al dan menm laboutik e sa bann dimoun anba sa scheme,  i pa bann dimoun ki dan sa scheme akoz zot anvi lo sa scheme.   I bann dimoun ki pou plizyer rezon zot vwar zot lo sa sheme  ki zot ti a kontan zot osi ganny zot en travay normal kot zot osi zot kapab ganny tou sa dignite.  Mon pa pe dir ki zot napa dignite me zot osi zot kapab ganny tou sa lanpler en travayer plen tan, permanant avek tou sa sans sekirite ki en nenport de nou la dan sa lasanble nou annan.  Sa bann dimoun   lo sa scheme  zot napa sa.  Koz avek nenport dimoun lo sa scheme zot pa santi sa sekirite, zot pa santi ki parey en travayer zot kapab garanti ki lafen dimwan zot pou ganny sa sonm larzan si zot pa travay, zot pa rekonnet, zot pa ganny sa bann menm benefis ki en travayer ki a plen tan permanant.

Alors ki bann kalite dimoun ki lo sa scheme.  Si nou fer en revi, nou fer analiz nou trouve ki la mazorite bann dimoun lo sa scheme en gran poursantaz i bann dimoun bann mer-d-fanmiy bann madanm ki annan 3, 4 zanfan, bann madanm ki parlao 30 an, 40 an an montan ki pou rezon ekonomik e pou rezon sosyal, lefe ki zot pa neseserman atraver zot zenes ganny serten formasyon akademik oubyen ganny devlope pou zot kapab acquire serten skill zot vwar zot dan bann sitiasyon kot zot bezwen al lo sa scheme.  Msye Speaker sitiasyon sa bann dimoun ki dan sa kategori ki tonm dan sa scheme unemployment relief  scheme, sikolozikman zot pa parey bann travayer normal. Nou ki an kontak avek tou dimoun, zot tou ki dan en moman ou dan en lot zot kontak avek sa bann dimoun, koz ek zot lo zot travay, lo travay ki zot fer ou trouve sa sans ensekirite e an menm tan sa sans si oule zot pa met zot lo menm lanpler lo pwenn vi sikolozik ki nou ki dan travay permanen.  Mon krwar zot konpran ki mon pe sey dir.  Apard lefe ki zot annan en sitiasyon sosyal ki pa parey neseserman pou nou e ki ekonomikman zot pa ganny parey nou ki fer ki met zot dan definitivman dan en pozisyon dezavantaze.  Ler ou annan ou en fanmiy ki en papa ketfwa li i ganny en saler normal R1900 avek ogmantasyon, en madanm ki lo unemployment relief scheme ki ganny li R800 ekek , ki 1 zour 2 zour ketfwa i pa kapab al travay i pa pou ganny peye ki si son zanfan i malad ki bokou fwa i pa pou kapab ganny sa larzan pou kouver, i ase tough, i fermal i met zot dan bann pozisyon difisil.  Alor si nou kapab koze, si nou kapab konvenk gouvernman, nesesite donn ogmantasyon sa bann dimoun, nou pa pe fer nou lekor koman politisyen dibyen la anndan, nou pe fer sa bann dimoun deor dibyen, sa bann dimoun anba sa scheme.  E se pou sa rezon mon pa le tir meday politik lekel ki pou gannyen lekel ki pa pou gannyen.

Ti annan en dezyenm keksoz ki mon tia kontan koz lo bann dimoun, bann partisipan dan sa scheme, se neseserman bann dimoun ki avan ti dan sa scheme ki en kout lasans oubyen par lyezon ki ganny fer atraver minister lanplwa zot ganny mete dan bann lanplwa permanen.  Bokou sa bann dimoun zot devlop en bann sans responsabilite ki al pli profon ki ketfwa nou bann travayer, nou menm nou oubyen travayer kin toultan lo en scheme lo en travay permanen.  Akoz sa bann dimoun zot konnen ki savedir ensekirite dan travay, zot konnen ki savedir travay ou pe ale la, demen si ou pa kapab be ou pa kapab ganny peye, ou napa sickness benefit, ou napa maternity leave, ou napa konze, ou pa ganny peye ou weekend, sa bann dimoun zot konnen sa zot.  E se pou sa rezon bokou fwa, bokou zot ki ler zot ganny mete dan lanplwa permanen la, i keksoz ki zot atrape avek de lanmen konmsi pa fasil pou zot les sape.  Mon pe dir sa akoz mon konn serten ka serten dimoun dan mon distrik.  E Msye Speaker si i annan en keksoz ki nou devret demande an menm tan ki gouvernman i vwar sa ogmantasyon allowance pou sa dimoun anba sa scheme se neseserman kontinyen entansifye zefor pou regarde dan bann ki landrwa, dan bann diferan landrwa travay kot kapab permet sa bann dimoun plas zot pou ki zot kapab santi zot koman en travayer normal. Akoz pou mwan, konversasyon avek zot i montre zot pa konsider zot koman en travayer normal.  E ladan krwar  mwan i napa okenn ensilt, napa naryen, zis keksoz ki mon santi ki nou tou nou santi, ki bokou nou nou santi ler nou koz avek sa bann dimoun.  I en zefor ki gouvernman i fer dan en direksyon pou sey ed serten group dimoun.  Wi nou osi annan son bann lezot konsekans ki sa nou pa kapab dir ki i pa egziste. 

I annan en lot problenm Msye Speaker avek serten travayer ki tonm anba sa scheme, sirtou mon pe koz serten bann zenn marmay.  Ou konnen parfwa i fatigan e i iritan pou vwar serten dimoun ganny mete pou acquire, pou akerir serten skills  ki i napa pov dyab, koman en zenn in kit lekol, i napa, in bezwen al anba URS pou li kapab ganny en fason en pti larzan pou li kapab sey debrouye i ganny mete atase avek minister lasante par egzanp kot pou li acquire serten konesans, sa dimoun sa partisipan i ale, lannen apre lannen,  lannen apre lannen, si i annan en dimoun pou ganny anplwaye ki sa dimoun ki la kin ganny mete la, URS ti kapab fer, zot anploy en lot dimoun ki plito anploy sa dimoun ki la anba sa scheme. Monn vwar sitiasyon konmsa, i egziste annou pa dir pou dir pa egziste.  E se pou sa rezon ler nou koz lo unemployment relief scheme, ler nou koz lo ogmantasyon, allowance i enportan ki nou regard sa scheme byen e nou fer sir ki bann partisipan ladan, nou pa regard zis benefis ekonomik sa ki zot kapab gannyen annou get osi zot laspe, zot dimansyon sosyal, dimansyon sikolozi osi ki enportan en partisipan anba sa scheme.  E lo sa unemployment relief scheme, mon dir i en scheme ki gouvernman in mete pou en rezon ekonomik, sosyal, siton osi sikolozik, fer sir ki en dimoun i santi li osi ki i kapab koman en imen annan serten dignite osi, me selman annou regard osi ki bann travay sa bann group dimoun i fer.  Annou vwar ki zot ganny serten travay ki kapab vin benefis pou zot, pou zot kapab devlop zot an menm tan ki zot kapab tir satisfaksyon dan sa bann louvraz ki zot fer.  Tro bokou fwa sa bann dimoun bann louvraz ki zot fer pa neseserman i bann louvraz ki vreman donn zot sa lanpler koman en travayer, en partisipan ki zot pe fer serten keksoz ki vo lapenn sa saler oubyen sa allowance  ki zot pe gannyen.  Tou sa la i kestyon ki nou bezwen regard byen, adrese, fer sir ki ler bann scheme konmsa i ganny mete, i annan monitor nou bezwen kontinyelman, monn dir sa dan lepase, mon kontinyen dir, nou bezwen kontinyelman monitor byen sa bann scheme fer sir ki bann lobzektif ki inityalman noun set pou achieve, nou achieve.  Si nou pa achieve nou bezwen kapab annan sa lodas pou fer bann azisteman kot i neseser pou fer sir ki bann partisipan dan sa scheme zot ganny benefis maximum avek sa sa scheme.  Parey mon dir, mon pa met lanpler selman, mon pa met lanfaz selman lo sa ogmantasyon saler, mon tia kontan ki sa bann partisipan lo sa scheme zot ganny revwar en pti pe pli byen zot bann travay ki zot ganny donnen pou fer, bann travay ki zot menm zot zot ganny serten satisfaksyon e ki an menm tan alafen dizour gouvernman i gannyen, bann dimoun i gannyen, sosyete an zeneral i gannyen. 

Mon pou donn mon sipor total sa mosyon, parey mon dir mon pa enterese lekel kin dir sa dan bidze, lekel ki pann dir, lekel ki pou ganny meday, lekel ki pou ganny profi sa mosyon kin ganny anmenen, zis keksoz ki mon enterese se ki ozordi la, i zistifye en demann pou en ogmantasyon allowance pou bann dimoun anba sa scheme.  Msye Speaker, mersi.

 

MR SPEAKER

Avek sa nwa pran en break ziska 11 er.

 

(Sitting suspended until 11 a.m)

 

MR SPEAKER

Nou kontinyen nou deba lo mosyon lo URS.  Onorab Herminie, la parol pou ou.

 

MR PATRICK HERMINIE

Msye Speaker, mon krwar mosyon kin ganny prezante par onorab Faure set en mosyon kin vin a en moman apropriye e mon napa okenn dout apre bann diskisyon personel ki monn annan avek oter mosyon ki bi pa ti pou sey vin fer bann gen politik, me si oule parey tou bann lezot mosyon kin ganny mete avan, kalkile e vwar ki la moman kot sa mosyon son demann i kapab ganny enplimante.  Mon krwar i enportan pou refer sorti depi o komansman, ki logmantasyon pou bann dimoun ki lo sa  unemployment relief scheme, i pa en keksoz nouvo. Nou ava rapel ki sa scheme li menm oparavan ti apel FES e la kantite ki zot ti pe gannyen dan en demi zournen ti bokou pli ba ki zot pe gannyen ozordi.  Donk sa i montre ki gouvernman in toultan ogmant sa scheme, ogmant allowance lo sa scheme kan in santi i neseser e kan i santi i kapab fer li.  E antraver mosyon onorab Faure ozordi, ankor en fwa nou vwar ki gouvernman i santi i dan en pozisyon pou li kapab ogmant sa scheme e i pou fer e i pou toultan fer li.  Osi lontan ki kapab fer li pou fer sir ki lepep Seselwa i viv en meyer lavi, parey in toultan polisi sa gouvernman o pouvwar. 

Sa scheme, si nou pou pran en paralel avek bann lezot pei, dizon nou pran Langleter, sa scheme i tonm enpe parey zot sistenm dol.  Diferans ant nou scheme avek pou zot, se ki zot si en dimoun pa travay i ganny en serten sipor finansyel.  I form parti sa social welfare system ki an-n egzistans an Grande Bretagne.  Isi Sesel nou dir, nou pa krwar ki en boug pa travay ditou ler i kapab fer serten kontribisyon e an menm tan i ganny peye.  Donk sa scheme ti ganny etablir konman FES an 82, efektivman pou dir ek sa boug, be bon si ou seryezman pe rod en travay, ou napa travay nwa met ou lo sa scheme an menm tan ou a ganny sans pou aprann oswa ou kapab kontribye dan bann lezot travay ki par egzanp netway semen, koup bann zerb etsetera e an konsekans e rezilta sa nou nou ava donn ou en serten sonm larzan pou sa.  Si oule this is what the scheme is all about.  Se pou fer sir ki bann dimoun ki tanporerman napa en job me ki anvi travay zot ganny en serten lokipasyon pou fer pandan en demi zournen e pou sa zot ganny en serten sonm larzan.

Onorab Faure mon konpran in koz pli an detay lo son bann prensip, mon napa tro gran lentansyon pou al ladan, me mon ti oule senpleman eklersi enn de bann pwen, bann krentif, bann lafreyer ki toultan nou vwar enn de bann endividi zot in fer a sak fwa zot koz lo en keksoz dan sa lasanble.  Si nou ti get byen, nou bann lalwa ki diriz bidze, ki diriz nou pei, nou konstitisyon, si nou ti get byen nou  standing orders  e tou lezot keksoz, si nou ti get byen bann lalwa an-n-egzistans, nou ti lir zot tre byen, nou ti pou vwar ki larzan pou URS i sorti anba  social security.   E ler en larzan i sorti anba  social security,  gouvernman letan i oule fer en depans ladan, menm si en depans an-n-ekse, i pa bezwen vin kot  lasanble.  Mon krwar i enportan ki nou ganny sa kler.  Annou pa sey konfiz dimoun, dir bezwen vin kot lasanble, ou riske pa gannyen etsetera.  Larzan ki sorti anba  social security,  nou fatige dir dan lasanble i pa   consolidated fund.    Social security  i kapab kontribye dan  Consolidated Fund me sa larzan anba  social security,  minis pa bezwen vin dan lasanble pou li rod sa larzan.  Largiman kin ganny avanse kin dir bidze pa ganny fer i fo.  Si ankor enn fwa nou ti get tre byen nou bidze 97, nou ava vwar ki R5m ti ganny mete de kote efektivman pou  URS.  Me ki nou vwar pe arive ozordi.  Ozordi gouvernman in met an plas plizyer lalwa.  Nou konnen i annan ITZ, i annan IPA, i annan lezot  incentives  avek bi pou ouver nou lekonomi,  expand  nou lekonomi e an menm tan  promote employment  dan Sesel e sa onorab Dick in koz en pe lo la bomaten, sa pe raport serten sikse ozordi i annan en kantite dimoun ki pe sorti dan sa   unemployment relief scheme  ki pe al  dan  full employment.   I montre ou sikse progranm ekonomik ki sa gouvernman in met an plas pandan sa detrwa lannen.  E sa osi par konsekans i permet gouvernman pou ganny a son dispozisyon en pe plis larzan ki kapab redistribye avek sa bann dimoun ki reste lo URS.  Sa i eksplike akoz ozordi onorab Faure apre ki in fer son analiz, apre ki in fer son kalkilasyon, apre ki in pran son  calculator  i vwar ki gouvernman i dan en pozisyon pou  finans en logmantasyon pou bann dimoun lo URS.  I pa politik, i en keksoz ki ganny fer kan i apropriye.  Politik i vin ler  ou antre dan lasanble akoz ou krwar ou kapab detrwa vot an plis nek ou dir ogmant isi, ogmant laba.  Politik i vin ler ou antre dan sa lasanble, ou dir nou fer rediksyon dan kontribisyon ki serten kategori anplwayer i fer dan social security.  Apre demen ou vini, ou dir ek nou bann dimoun ki benefisye avek  social security  zot, zot bezwen ganny plis. Si ou redwir R100 ki ou ti pe donn mwan, mwan mon pa kapab al aste en kannson R110.  Si avan ou ti pe donn mwan R90 apre ou dir mwan depi ozordi mon pou donn ou zis R60, mon pa kapab fer en depans ki ariv R80. Sa se lalwa ekonomik pli   basic  ki egziste lo later.  E letan ou tann bann endividi ki vini, ki vin dir ek ou, bon fer redwir isi, me fer monte laba, la i vin politik.  Onorab Faure son mosyon pa politik akoz se-t-en mosyon kin baze lo kalkil e pou gouvernman  absorb  sa i pa pou en problenm.  E mwan mon konnen ki pa pe vin apre lannen, me sa lannen menm deza, gouvernman pou dan en pozisyon pou fer sir ki sa logmantasyon i vin en realite.  Donk mon ava terminen an donan mon sipor total pou mosyon kin ganny anmennen par onorab Faure, ankor enn fwa i demontre bon letansyon sa gouvernman o pouvwar pou fer sir ki bann ki ganny en pe  mwens, bann ki petet pann ganny sa formasyon ki zot ti gannyen letan zot ti fodre gannyen, letan zot ti ankor zenn, 20, 30 an pase, zot pann gannyen e ozordi zot vwar zot san serten  skill,  ozordi gouvernman i pe anmenn en mosyon, ozordi   leader  pe anmenn en mosyon pou demann ek gouvernman pou donn sa bann dimoun en logmantasyon, mon krwar sa i en bon keksoz e mwa va terminen an demandan tou bann dimoun dan sa lasanble pou donn sa mosyon zot siport total.

 

MR RAMKALAWAN

Msye Speaker,  on a point of order  lo en klarifikasyon si ou ava permet mwan.  The fact  ki manm kin fek koze la in mansyonnen ki pou dir li i konnen ki pe al donn en ogmantasyon, mon demann mwan  why the motion.  

 

MR SPEAKER

 Okay  deba i pa lo son konesans, konnen pa konnen.

 

MR HERMINIE

I en  issue  ki bezwen ganny debat. E lasanble i en landrwa kot nou debat bann  issues.  Msye Faure i anmenn sa ki i anvi, nou anmennen.  Ozordi nou vwar ki i annan en posibilite atraver kalkilasyon manm dan lasanble lo nou kote.  Nou pa bann dimoun ki fer politik, an menm tan nou gete ki mannyer gouvernman i  kapab marse, e letan ou pran ou  calculator   ou kalkile ou dir ki gouvernman la i kapab fer logmantasyon, la prezan nou ava anmenn mosyon.  Koumsa nou fonksyonnen.  E sa bokou dimoun i vwar difisil pou konpran.

 

MR DANIEL BELLE

Msye Speaker, mon krwar ki keksoz ki enteresan dan nou deba se ki depi ler lasanble in ouver an 93 tou deba i ganny pase lo televizyon e ki tou keksoz ki ganny dir dan lasanble, si  nou bann manm lasanble parfwa nou tant pou bliye, dimoun ki ekoute, dimoun ki swiv lasanble e nou konnen en kantite dimoun i ekoute deba lasanble lo televizyon, sa bann dimoun zot dan zot memwar, zot pa bliye keksoz kin ganny demande, kan ti ganny demande, akoz ti ganny demande, ki difikilte manm ki demande i gannyen.  Donk si  i annan en keksoz,  si i annan  dimoun ki ziz nou, i pa ni Msye Speaker limenm, se lepep deor, sa pep Seselwa kin  mature  politikman, li menm  i reste trankil, li i fer son lopinyon lo keksoz ki ganny deside dan lasanble.  Ki nou vin isi nou vin dir ki nou pa pe vin fer politik, lepep li i konnen ler i ti anvoy dimoun dan lasanble i konnen akfer i ti anvoy nou isi dan lasanble.  Pou dir ki nou vin dan lasanble pou vin rod meday, le pep i konnen lekel ki merit gannyen e ki si bann ki vin rode i merit gannyen oubyen pa. 

Sa mosyon ki lonorab Faure in amennen lo sa  unemployment relief scheme   pou ogmant  allowance  sa bann malere dimoun ki pe malerezman ganny sa pti  allowance se-t-en mosyon ki bon, se-t-en mosyon ki tradwir vreman sa ki bokou manm lasanble in demande pandan  sa 4 dernyen lannen.  E i annan defwa i annan mosyon, si ou pas  dan  verbatim  ou a vwar, i annan mosyon kin ganny  defeated.   I annan manm lasanble kin anmenn mosyon en pe dan sa zanr, ki son mosyon in ganny tap kalot.  I annan defwa manm lasanble in koze, in dir pa ti moman anmennen, gouvernman napa larzan.  La kestyon ki nou dir o.k.  pann fer tapaz, i dir gouvernman napa larzan, eski la gouvernman i annan larzan.  Parske si gouvernman i annan larzan, akoz serten i benefisye, serten i merit ganny ogmantasyon e lezot pa gannyen.  Napa zis  unemployment relief scheme,  dimoun ki travay anba sa  scheme, ki merit annan, ki merit benefisye, ki merit  ganny ogmantasyon. E noun vwar, get ki noun vwar, noun vwar ki menm bann  home carers  ti merit ganny ogmantasyon.  I annan en mosyon kin  pas dan lasanbe e  home carers  fot espere zot ava ganny ogmantasyon.  I  annan bann travayer ki ganny en saler  bokou pli ba ki minis lannen pase ti vwar larzan  pou donn zot.  Mwan mon kestyon mon oule dir se ki si i annan larzan, si gouvernman ozordi in vwar ki i annan larzan, fer sir ki tou dimoun i benefisye dan Sesel, pa zis bann piecemeal bout par  bout ki ou fer avanse keksoz.  Pri manze i menm pri pou tou dimoun e si i zistifye, donn tou dimoun. 

Mentnan anba sa unemployment relief scheme  lekel sa bann dimoun ki anba la, lekel sa bann dimoun ki travay 4 er-d-tan edmi par zour e ki ganny R870 pou zot anmenn se zot pou en fanmir.  Sa se bann dimoun ki si ti napa sa   unemployment relief scheme  zot ti pou bezwen al  means testing  e petet laba pou serten, ler i ti a ganny  means tested  i annan ki tia kapab ganny plis akoz i annan dimoun ozordi ki pa travay e ki anba  means testing  i ganny li akoz i annan zanfan, i ganny li en saler, i ganny li en  allowance  ki pli o ki R870.  Nou konn bokou ka.  Donk dan sa sitiasyon, si ou dir mwan sa bann dimoun ki parey lonorab Faure i dir bann  middle aged women  la mazorite se bann manman ki al travay 4 er-d-tan edmi par zour, zot al koup zerb, parey lonorab Herminie in dir e ki sa travay parey lonorab Dick in dir, sa bann travayer i pa bann travayer normal, me lonorab  Danny Faure i dir ou se bann travay prodiktif.  La dan Sesel i annan en kategori travayer ki pa bann travayer normal me ki fer bann travay prodiktif e zot ganny peye R870 pou 4 er-d-tan edmi par zour, ki  si ou pran ou double i  vin ou R1700 anviron, R1800 par zour e  pe demann en ogmantasyon pou zot, monn vwar personelman ozordi dan Sesel   aujourd’hui   ki sa sa R870, ou anmenn kot ou pou fer viv en fanmir.  Msye Speaker  unemployment relief scheme  i annan osi bann zenn dimoun anba la.  I annan bann zenn ki sorti lekol, ki pandan ki i ti pe lekol zot ti dir li lavenir i  bright,  li travay dir e i ava ganny li en lanplwa a la oter son esperans. Zour laport lekol i fermen i vwar li dan en koulwar kot laport travay pankor ouver pou li.  Sa  unemployment relief scheme  i vin parey en  parking  kot ou met li en pti pe letan pou li kapab benefisye en pti  allowance  pou en pe kalme son fristrasyon devan en sitiasyon kot sosyete pann prepar pou li.  I annan dimoun in dir nou ki si dimoun tin ganny trained  depi lontan, ozordi pa ti pou annan sa bann problenm, tou dimoun ti ann ganny en metye. Me annou reflesir sitiasyon sa boug ki ti annan li 17 an, 17 an pase ki ozordi i annan li 34 an. Si ou dir mwan ki i ti merit ganny  trained,  lekel ki ti merit donn li  training.   Sa gouvernman ki ti la 17 an pase.  Sennla ki annan 32 an, sennla ki annan 31 an, sennla ki ozordi i annan 28 an, sennla ki annan 25 an, e petet si i ti annan li en metye dan son lanmen, ozordi i pa ti pou bezwen anba  unemployment relief scheme  me i ti ava pe egzers son metye artizan ou son profesyon trankilman.  I pa ti pou bezwen depann lo sa  relief   ki ou pe donnen.  I ti pou travay, i ti pou ganny li son travay a la syer de son fron dan son ponnyen.  Ozordi dan Sesel, i annan tro bokou dimoun  ki pe fer sa bann louvraz tanporer.  E dan menm sitiasyon i annan bokou dimoun ki ganny enporte, ki sorti deor, ki vini pou vin fer bann louvraz permanan.  Ki mannyer nou sosyete in arive ozordi ki nou prop Seselwa pe fer louvraz tanporer, pe ganny  allowance,  e i annan etranze ki vin travay a tor ou a rezon, ki zot, zot pe ganny zot en saler e zot donn  en kontra determinen alor ki lonorab Faure in dir nou sa bann dimoun anba  unemployment relief scheme  zot la pou 6 mwan apre nou gete ki mannyer zot pase, i  renew,  i  review.  Renew, review, la personn i reste touzour dan en sitiasyon preker, dan en sitiasyon frazil, dan en sitiasyon kot i pa kapab progranm naryen pou lavenir.  Donk mon krwar ki in arive e se ki i neseser ki nou tou nou get sa keksoz, si nou vin la pou fer politik, me ki nou get sa keksoz pa avek en lespri politik, nou get li avek en lespri nasyonal, pou dir kote  problenm i ete, e  fer mannyer ki sa keksoz i ava avanse.  Akoz sa bann dimoun anba  unemployment relief scheme,  zot poz zot lekor kestyon.

Parey ti annan sa zenn garson ti vin vwar mwan, i demande, me en ler mon poz mon lekor kestyon, Msye Belle mon oule konnen eski se mon lafot ki mon pa ganny sa louvraz?  Se mon lafot ki mon pann ganny sa kalifikasyon?  Se mon lafot ki mon anba  unemployment relief scheme?  Enn ler ou sey poz ou kestyon, eske se lasosyete ki fer sa oubyen ki zefor ki gouvernman i fer pa ase e ki dan sa ka nou merit met nou zepol ansanm.  Nou merit anpes keksoz diviz nou e fer avanse keksoz  pou ki sa bann dimoun i benefisye, e se pou sa rezon ki nou konnen ki sa larzan ki sa bann dimoun pe gannyen aktyelman i pa ase. 

In ganny dir dan lasanble, mon rezouir, mon kontan ki ozordi lonorab Danny Faure in anmenn en mosyon, menm si sa mosyon depi avan lonorab Pool in koz lo la  parey lonorab Mancham bomaten in fer sorti en bon pwen lo la, me ki i pe fer pou ki sa keksoz i ganny donnen pli vit posib.  Si ou esper 4 mwan, ler ou pran en lot desizyon, i a esper ankor 4 mwan, be nou ava ariv an 1998 an zilyet e keksoz petet pankor ganny fer.  Mwan mon dir si i annan larzan fer sir ki sa bann dimoun zot ganny zot larzan o pli vit posib. Zot in deza perdi  pou serten 4 an, pou dot 4 mwan, fer sir zot gannyen. E se pou sa rezon kot mwan mon pou siport sa mosyon. Me ler mon siport sa mosyon mon bezwen an menm tan parey monn dir boner, realize ki i annan lezot kategori travayer, lezot dimoun ki bezwen benefisye.  Akoz ler ou pran pou 4 er-d-tan edmi par zour R870 ou miltipliy li par 2 i vin ou R1740.  R1740 se saler ki en dimoun ki travay   full time  i gannyen.    Dimoun ki travay en zournen antye i ganny R1740, R1800.   Si  nou ogmant saler sa bann ki anba  unemployment relief scheme  nou bezwen mazinen pou nou ogmant saler sa bann osi ki pe travay  full time  e ki pe ganny sa larzan ki mon fek nonmen.  Nou bezwen get globalman tou travayer dan Sesel, ki mannyer pe marse, si nou pei pou kapab   sustain  en sitiasyon dogmantasyon de saler e sete pou sa rezon ki parfwa ler ou asize dan lasanble ou poz ou lekor en kestyon, ou dir me eski i pa ti a bon nou anmenn en amannman lo sa mosyon  pou ki nou  demande ki gouvernman i konsidere ogmant saler e  allowance  tou travayer dan  Sesel enkli sa bann ….

 

MR SPEAKER

Onorab Belle ou andeor ou paramet la

 

MR BELLE

Mon dir enkli Msye Speaker…

 

MR SPEAKER

Oun fini ganny prononse lo ou amannman.  Paramet sa mosyon i lo travayer URS.

 

MR BELLE

Mon pe dir en sizesyon, Msye Speaker, si ou permet mwan…

 

 

 

MR SPEAKER

Oun komans koz lo son amannman.

 

MR BELLE

Mon pa pe koz lo amannman Msye Speaker, napa amannman la.

 

MR SPEAKER

Oun komans nonm sa mo amannman.

 

MR BELLE

Msye Speaker, mon dir si ti annan en amannman pou anmennen, ti ava byen anmenn en amannman par egzanp  kot nou dir ki lasanble i   request  gouvernman pou konsidere ogmant saler e  allowance  tou travayer dan Sesel enkli sa bann ki anba  unemployment relief scheme.   Sa, ler dimoun deor i tande i dir be la vwala, i en mosyon, i en amannman ki anmennen pou dir pran an konsiderasyon tou dimoun enkli sa bann ki anba  unemployment relief scheme.  Mannyer mon konpran sa amannman si ti ganny anmennen, pa vo lapenn i ti pou vini akoz manm kin sey anmenn sa amannman dan lasanble in ganny dir par biro Speaker ki en lamannman parey..

 

MR SPEAKER

Onorab Belle, ou konpletman an deor.  Monn fer sorti lalinny e oun fer antre  endirekteman menm keksoz ki ou ti oule fer avan.

 

MR BELLE

Bon, dan sa ka Msye Speaker, zot ava rekonnet, ou ava rekonnet, Msye Speaker….

 

 

MR SPEAKER

Ou pe fer menm zafer ankor. Now I’m calling you to order.   Paramet mosyon i lo travayer URS, amannman i pa devan nou.

 

MR BELLE

Eski mon kapab petet fer en amannman,  simple amendment.

 

MR SPEAKER

Ou pe fer li ankor, monn fini koz avek ou.

 

MR D. FAURE

Point of order, Mr Speaker. Matter of Privilege.  Mon krwar i mon privilez pou mwan, mon ti a kontan, mon annan en lentere pou mwan konnen lo ki nou pe koze, i paret mwan ou pe dir en keksoz, li i pe dir en keksoz ki nou, nou pa konn ditou kin arive.  Konmsi nou pa konnen  what is the problem.

 

MR SPEAKER

Sa ki arive ler ou sot balizaz ou paramet.  Ou paramet mosyon i lo travayer URS.  Ou pe sey fer rantre ou lot lobzektif endirekteman.  Ou konn byen ki ou pe fer.

 

MR BELLE

Msye Speaker i vin regretab ki mon pa kapab kontinyen dan le sans ki mon pe demande, mon pe reflesir, mon pe fer en refleksyon lo tou travayer dan Sesel..

 

MR SPEAKER

Onorab Belle, dernyen fwa mon pe dir ou sa.

 

MR BELLE

Msye Speaker, mon aret koze.  Mersi.

 

 

MR CHARLES DE COMARMOND

Msye Speaker, sa mosyon i devan nou, mwan mon enn ki pou siport sa mosyon zisteman akoz mon konn pli-z-ou-mwen sa bann dimoun ki dan sa kategori, ki dan sa kondisyon e les mwan dir lasanble ki la grann mazorite bann dimoun ki anba sa  scheme, unemployment relief scheme  se vreman bann dimoun ki parlao en serten laz, parlao  45 an an mazorite e sa i vedir se plito bann dimoun ki sistenm ledikasyon avan, mon oule dir avan 77 pann dan zot zentere, i pann dan zot faver e ki zot trouv zot ozordi dan en sitiasyon mazorite zot zot unskilled  e sitiasyon sosyal i fors zot, si oule dir adopte sa kondisyon, savedir vin travay anba sa  sheme.   I normal alor ki sa bann dimoun i gannyen en serten ogmantasyon, gouvernman i devre vwar sa e zisteman i pou ede mon panse an fezan sa, tir serten presyon ki i annan lo kote  means testing  ki serten menm sa bann dimoun i demande.  Lo lot kote, nou vwar ki sa bann dimoun anba sa  scheme  zot pa  enjoy  sa ki vreman en travayer normal i  enjoy.  Savedir, paregzanp si zot, zot mank travay pou rezon malad oubyen lezot rezon, zot zournen pe ganny koupe, zot pa ganny peye pou  weekend   e osi zot pa gannyen konze anyel parey lezot travayer i gannyen e plizyer lezot pwen ankor ki sa bann zans zot pa gannyen.  E pou sa rezon alors zot dan en sitiasyon bokou pli enferyer ki travayer normal e gouvernman alors i devret vwar posibilite amelyor zot sitiasyon finansyel.  Dan sa sans osi, gouvernman mon krwar i devret pa zis kestyon ogmant sa bann dimoun  left, right and centre, me osi regard posibilite reorganiz zot, remet en serten dinamiz, en serten moral dan sa bann dimoun ki anba sa  scheme,  dan le sans pou fer zot sorti anba sa  scheme  o pli vit posib.  Par egzanp fer ki letan dimoun i anba sa  scheme  zot ganny swiv de pros par lotorite ki  manage  sa  scheme pou vwar si okenn devlopman enportan i arive ek serten.  Par egzanp si nou vwar pou dir, akoz anba sa  scheme  ou kapab arive ki serten dimoun i devlop serten lanvi travay, serten  skill  ki petet avan nou pa tin vwar dan sa dimoun, par le sans ki kot oun met li pou travay.  E la mon krwar nou devret swiv de pros e dek ki nou vwar i annan sa amelyorasyon lo par serten zot, met zot dan  full employment  o pli vit posib.  E lot kote mon krwar osi ki mon pou lans en lapel osi pou bann dimoun ki trouv zot dan sa sitiasyon, dan le sans ki zot pa devret santi zot vreman konmsi ki lefet ki zot anba sa scheme  i dernyen solisyon pou zot, napa okenn lot swa, konmsi zot in fini, apre sa napa lavenir.  Mon krwar zot devret petet tir sa mantalite dan zot e okontrer esey profite letan zot anba sa  scheme  pou prouv zot lekor  otherwise  savedir pou prouve  ki zot zot pa  belong to  sa  scheme as such.   Konmsi ki zot devret montre ki zot depas sa, montre ki zot pa devret petet kale dan sa travay ki i donn zot, zot devret prouv zot lekor byen e la osi lotorite ki responsab zot paregzanp dizon ki serten sa bann dimoun i anba, fer krwar i atase avek en landrwa partikilye, en distrik oubyen en lot lorganizasyon, mon krwar la sa lorganizasyon i devret  deplway zot, savedir donn zot travay ki donn sa dimoun en sans montre sa ki i kapab fer.  Olye par egzanp zis dan kwen rigol, anmas salte  or whatever,  sa i pa toultan petet ed en dimoun pou devlope.  Me petet vwar dan en serten lot oriantasyon, mon pa konnen mwan, petet fer zot plant pye dibwa dan en serten ka kot i neseser, fer zot atase avek en dimoun si dan sa lorganizasyon travay ki annan, si i annan en sarpantye oubyen si i en dimoun ki pe koup bann pye dibwa an servan  bann masin, ou atas ek sa bann dimoun ki en fason ki i devlop sa bann dimoun ki dan sa scheme.  Mon krwar ou sezi ki pwen ki mon pe sey avanse e anfen kont mon panse ki avek sa i ava amelyor sa sitiasyon sa bann dimoun an zeneral.  Vwala Msye Speaker, mon krwar monn tous pwen esansyel ki mon ti oule fer resorti mwan e mon krwar ki an menm tan sa logmantasyon si gouvernman i aksepte sa mosyon letan in aprouve isi dan sa lasanble, i a fer ki sa logmantasyon i a vin osi en  incentive  pou sa bann dimoun.  Mersi bokou.

 

MR MANCHAM

Should we close debate on the issue?  Tou dimoun pe repet menm zafer.

 

MR SPEAKER

Si napa personn mon envit ….

 

MR WAVEN WILLIAM

Msye Speaker, monn segonn sa mosyon akoz mon krwar ki i annan merit sa mosyon e  mon pa pou dir tro bokou e zis mon tia kontan pas enn de pti komanter, se ki dapre mon konpran sa kantite dimoun ki ti annan anba sa  scheme  in diminye.  Pou le moman i annan apepre  en 450 dimoun ki anba sa  scheme  e sa i kouver La Digue, Praslin e Mahe e ki sa minister ki pe okip sa  scheme osi zot annan bann zofisye ase konpetan ki pe fer en bon travay e zot pe sey zot mye osi pou ankouraz e pous bann dimoun dan bann landrwa travay ki pou permanan e pou mwan parey serten manm dan lopozisyon in koze lo sa issue,  mon pa trouv en nesesite pou sa ta tapaz akoz mon krwar ki mosyon i senp e i en  demann ki pe ganny fer a gouvernman e parey tou dimoun i konnen, en gouvernman i annan en plan e parey serten manm dan lopozisyon in dir akoz pa ogmant isi, akoz pa ogmant laba, mon krwar si nou regard li parey dan en fanmir ouswa dan nenport sistenm, tou keksoz pa ganny fer alafwa e Msye Speaker, mon pa pou dir plis ki sa, mosyon i bon, e mon pou donn mon sipor sa mosyon, mersi.

 

MR SPEAKER

Mon envit onorab Faure pou fer son rezimen.

 

MR D. FAURE

Msye Speaker, mon tia kontan  remersi tou dimoun kin koze.  I annan en kantite keksoz kin ganny dir, i annan serten keksoz ki merit plis refleksyon profon lo ki serten mon bann koleg isi in dir e mon krwar nou ava fer li, me zeneralman nou annan en konsansis noun tonm dakor ki mosyon i  bon.  Pou sa mon remersi zot e mon panse ki nou mosyon gouvernman i a kapab ekoute sa ki bann lonorab isi in dir e pran en desizyon lo la e petet mon ti a kontan al en pe pli lwen, si en desizyon pozitiv i ganny pran lo mosyon ki ganny prezante e ganny aprouve par lasanble nasyonal, mon ti a demande ki nou   back date  bann   allowance effective  from 1st January 1997.   Msye  Speaker,   I beg to move.  

 

MR SPEAKER

Tou sa ki an faver lev zot lanmen. Inanim. Alors mosyon in ganny aprouve.  Nou vin lo lot mosyon, oter  lonorab Simon Gill in donn mwan notis ki i tia kontan sa i ganny  defer, i pann kapab vini ozordi.  Prezan nou vin lo lot mosyon, oter onorab Barry Faure e mon envit ou pou prezant ou mosyon.

 

MR BARRY FAURE

Msye Speaker, avan ler ki mon fer li, mon ti a kontan demande ki nou fer li 2er apre midi etan donnen ki mon prezantasyon  i kapab en pe long. 

 

MR SPEAKER

Ou annan en lide apepre

 

MR B. FAURE

30 minit.

 

MR SPEAKER

Nou annan letan.

 

MR B. FAURE

Msye Speaker, mersi pou donn mwan laparol. Semenn pase lasanble nasyonal ti aprouv par linanimite en mosyon table par Msye Walter Confait manm lasanble nasyon pou Anse aux Pins ki ti demann gouvernman pou enplimant en progranm ki pou garanti ki tou fanmir i ganny konekte avek delo trete ver lannen 2000.  Sa pozisyon lasanble nasyonal i  reflekte ki nou tou nou konsernen par sa kestyon sitiasyon delo dan pei.  Ozordi mon prezant avek lasanble en lot mosyon lo sitiasyon delo dan pei e mon atir latansyon lasanble lo sitiasyon dan rezyon sid Mahe ki ganny  partikilyerman afekte par mank delo sirtou dan peryod lasesres.  E mon argye ki gouvernman i devret degaze avek lenplimantasyon bann proze delo dan sa rezyon.  En kestyon evidan ki zot ava demann mwan se ki mannyer sitiasyon delo i ete dan rezyon sid Mahe an detay. 
Msye  Speaker, par rezyon sid Mahe mon oule dir rezyon sid, sid es e sid was  Mahe ki konpoze avek bann distrik, Le Cap nouvo distrik, Anse Royale, Takamaka, Baie Lazare, serten parti Anse Boileau menm si zeneralman Anse Boileau sitiasyon i pli byen, Grand Anse e Port Glaud.  Nou pe koz nou 6 distrik.  Sa rezyon i ganny afekte severman par mank delo.  Sa i provyen par lefet ki bann sistenm stokaz e tretman delo i sitye dan rezyon nor Mahe, ki benefisye prensipalman par dam Rochon e La Gogue.  Rezyon sid e sid was Mahe pa ganny en distribisyon delo ki dirab pandan lasesres.  Sa rezyon i ganny prensipalman deservi par bann pti baraz lo larivyer.  La plipar sa bann pti sistenm distribisyon delo dan sa rezyon i rankontre restriksyon dan la kantite delo ki zot kapab fourni si napa lapli pou bann peryod ki plis ki 3 semenn, pandan lasesres setadir pandan la sezon vann swet. 

Anse Royale ki mon distrik i en distrik tipik kot i  annan sa sitiasyon grav.  Nou kapab koz nou rezyon Bougainville  ki mon ti mansyonnen brievman semenn pase ki ganny afekte non pa par zis en mank delo trete me osi par mank delo.  Mont Plaisir leo, i en lot rezyon ki ganny afekte.  Serten parti Les Canelles ki fek benefisye par en nouvo proze kin ganny enplimante par PUC ki itiliz en konbinezon delo kin ganny eksplwate anba later, en  bore hole system, en proze kin ganny enplimante koman en proze pilot dan distrik  Les Canelles, Anse Royale ansanm avek serten delo ki sorti dan larivyer limenm li, pandan lasesres zot ankor pe ganny afekte par delo.  Vilaz Pointe au Sel  i en lot landrwa ki osi ganny afekte. I annan plizyer   estate dan   land bank  ki pe ganny devlope dan distrik Anse Royale ki pou ogmant la kantite lakaz e an menm tan la popilasyon dimoun  ki bezwen delo e zot osi i annan en nesesite ki i annan en serten sistenm ki ganny met an plas o pli vit posib.   Msye Speaker, nou ti kapab get lezot distrik, Takamaka i en legzanp, kot i annan en problenm mank delo.  Mon konpran ki alavenir i annan en lotel ki pou annan 600 lasanm ki pou ganny konstri Intendance pou osi met serten presyon adisyonnel lo delo.  Baie Lazare i en  distrik ki ganny afekte par sa sitiasyon e erezman i annan en proze ki mon konpran byento pou ganny enplimante ki probableman pou ganny finanse par  World Bank, la bank mondyal  a en to 2.5 milyon ki  kapab rezourd problenm delo Baie Lazare.  

Msye Speaker, semenn pase nou tou nou ti agree ki delo i en nesesite de baz.  San li napa lavi limenm. Mon ti fer referans semenn pase a en letid ki ti ganny fer par minister lasante dan sid Mahe ki ti montre ki nivo maladi koze par bann  water borne microbes i pli o dan rezyon sid Mahe e sa i konsantre sirtou dan  vilaz Bougainville li menm.  San delo nou pa kapab fer en devlopman serye.  Nou pa kapab devlop serten sekter prodiktif ki depann direkteman lo en bon distribisyon delo ki dirab e ki byen trete.  Mon pe koz nou devlopman lapes, devlopman lagrikiltir, devlopman tourizm, devlopman bann pti  biznes, devlopman bann lekol lo kote sosyal, devlopman bann lakaz etablisman bann labitasyon imen, tou bann proze  land bank  ki pe ganny devlope dan bann distrik.  Tou sala i met en presyon lo kapasite ki sa rezyon i annan pou fournir delo pou sa bann diferan bezwen. 
Msye Speaker, monn personelman touse par sa kestyon mank delo dan distrik Anse Royale  e zeneralman dan rezyon sid Mahe.  Se pou sa rezon ki ler mon ti ganny lokazyon pou mwan vizit l’Ethiopie pou en konferans kot mon ti annan loner pou reprezant Sesel, en konferans OAU, mon ti pran lokazyon pou mwan ganny en rankont avek  Msye Layashi Yaker ki sou sekreter zeneral Nasyon-z-Ini e ki ti sekreter egzekitiv pou  United Nations Economic Commission For Africa.   Dan mon  meeting  avek li, sa ti  an zanvye 1994, mon ti anmenn li koman parlmanter dan  sa sans, dan sa ka, mon ti met devan li sitiasyon ki rezyon sid Mahe pe rankontre.  Mon ti fer en demann  ki  United Nations Economic Commission for Africa  i anvoy en misyon ki pou fer en letid, en resers teknik lo ki mannyer sa kestyon devlopman an zeneral dan rezyon sid Mahe e partikilyerman sa kestyon delo i kapab ganny rezourd, dan en fason ki nou ti kapab servi rezilta sa letid ki zot fer pou nou petet rod finansman adisyonnel pou kapab finans bann proze ki  gouvernman i annan ouswa pou anmenn pli gran laklerte lo sa kestyon ki mannyer pou rezourd sa problenm dan rezyon sid Mahe.  Swivan mon retour sorti l’Ethiopie mon ti osi ekri en let Msye Layashi Yaker e mon ti a kontan lir serten paragaf, serten ekstre sa let.  Mon let i date le 17 fevriye 1994 e mon ti dir:

 

May I take the opportunity of this letter to raise one of the issues which  I could only briefly mention to you during our meeting, that is the water problem and other  related development problems of my constituency and the surrounding  Southern region.

The Southern area is largely handicapped by two developmental problems (i)  severe water distribution and (ii)  slow and discriminatory levels of development in rural areas as compared to the urban areas. Clearly the  water problem underlines the difficulty to further develop the productive sectors, principally, fisheries, agriculture and tourism as well as the social sector, particularly housing and proper human settlement and development.

I and other members of the national assembly from the South repeatedly raised this matter in last year’s  National Assembly Session that considered the National Budget for 1994 .  Admittedly government has been considering a massive water project commonly called “ the Mahe water integrated project”, a US$50 to $60 million project whose consultancy study was sponsored by the World Bank and which seeks to solve the water problems on Mahe island for the next 20 to 25 years. However,  government cannot afford to invest in this project for the  moment and  alternative solutions are actively being sought. What we have in mind is a respectable international organization to elaborate a master plan for development of the Southern area which would be realistic and reasonable enough to be able to attract substantial external funding which, as you know, is increasingly on the decrease for a country with a relatively high GNP per capita level. It is in this context that I proposed to you in Addis that you consider sending an ECA mission urgently to the Seychelles to carry out this project.  It would be preferable that the mission comes in early March so that we can have something ready by the end of the first quarter for further action.  The mission would first assess the problems of development in the south with emphasis on the water situation and subsequently draw up a master plan designed to address the water problem and other correlated development problems taking into account the needs and possibilities of the area.  I am pleased to inform you that since my return I have also discussed the matter with top officials of the Ministry of Foreign Affairs, Planning and Environment who have approved of this initiative.  Having thus acquired the tacit support of high ranking government officials, I am further convinced that this proposal has a good chance of being accepted and expediently executed.

 

Sa ti en ekstre sa let ki mon ti ekri Msye Yaker date le 17 fevrye 1994.  Byen sir dan sa let mon kontinyen pou mwan diskit lezot size avek Msye Yaker ki mon pa pou koz lo la la, akoz i pa size mon diskisyon. 

Msye Speaker, mon annan plezir pou dir pou enform lasanble ki le 5 zen 1994, en misyon konpoze avek 2 ekspert nasyon-z-ini ti ariv Sesel pou zot antreprann sa misyon. Nou ti fer plizyer konsiltasyon, letan mon pe dir nou, mon pe dir bann manm lasanble nasyonal pou sa bann distrik konsernen, tel ki Mme Jane Denis, Msye Ange Morel, ansanm avek ladministrasyon distrik avek bann minister konsernen noun akonpanny sa 2 ekspert e noun etidye sitiasyon e swivan sa zot in fer en rapor e zot rekonmandasyon prensipal se ki etan donnen ki gouvernman in met akote pou le moman sa gran proze Mahe integrated water system ki son proze prensipal se konstriksyon en gran dam Grand Anse, ki lezot pti proze o nivo bann pti vilaz, bann sistenm baraz delo i devret ganny konsidere seryezman par gouvernman.  Sa lepok dan PUC limenm li nou ti pe etidye tel opsyon, enkli opsyon bore-holes setadir pou al sers delo anba later dan bann granite fissures, kestyon desalinasyon osi ti pe ganny etidye, me selman lo nivo bann vilaz i ti trouve ki i ti preferab ki bann pti baraz delo i ganny konstri.  Alors ansanm ek PUC noun arive diskit lo sa size plizyer fwa e mon krwar se koman rezilta sa misyon, ki in annan en plis presyon par PUC, plis konsantrasyon pou devlop sa bann pti baraz delo dan plizyer distrik. 

Dan plan gouvernman pou devlop bann proze delo dan sa rezyon sid Mahe, i annan plizyer plan, i annan plizyer proze.  Semenn pase par egzanp mon ti mansyonn proze anmenn delo trete dan vilaz Bougainville e mon ti dir ki i annan en nesesite ki sa proze par egzanp i ganny terminen, i ganny komanse o pli vit posib e ki delo trete i ganny anmennen kot sa sentenn fanmiy dan sa vilaz avan lafen sa lannen.  Yer parey zot menm zot monn antann managing director PUC, son divizyon delo enform piblik an zeneral lo radyo, lo televizyon ki i annan plizyer proze ki gouvernman i annan an tet pou met an mars e pou sa proze Bougainville in dir ki zot annan lentansyon komans li an 1997.  Sa definitivman pou bann dimoun ki pou benefisye i rann zot ere.  Me selman mon personelman krwar ki i devret annan bokou plis zefor, bokou plis presyon, bokou plis latansyon ki ganny anmennen viz a vi bann pti proze konmsa.  Msye Speaker, Mont Plaisir leo mon tin dir ki en landrwa osi ki demann serten proze ki ganny met anplas e san menm landrwa osi ki bann reprezantan lo nivo diskrit Anse Royale pe fer en gran zefors pou eksplor teren pou rod bann sours delo adisyonnel pou kapab fer an sort ki PUC i konsider zot, devlop zot koman proze e mobiliz finans pou kapab egzekit sa bann proze o pli vit posib.  Atraver resers ki monn fer avek konpannyen PUC delo, monn remarke ki i annan en gran lalis proze ki zot annan an tet pou enplimante e i annan plizyer parmi sa bann proze ki efektivman i kapab amelyor sitiasyon dan rezyon sid Mahe. Pou mansyonn enpe sa bann proze, mon kapab dir i annan sa ki nou apel the fresh water lagoon Providence, setadir pou convert, konverti sa lagon ki annan delo sale ladan Providence pou konverti li dan delo dou, ok i pou ganny fourni prensipalman par 2 larivyer, enn sorti Cascade avek lot sorti Les Mamelles li menm li.  Lot proze se proze bore hole, en lot se desalinasyon delo.  I annan proze Baie Lazare li menm li ki monn mansyonnen oparavan.  En lot proze se pou extend pipeline oswa tiyo delo sorti Montagne Posée pou al Anse Royale e mon konpran ki sa pou kout R7m.  En lot proze ki pou kout R3.5m se pou upgrade sistenm tretman delo ki dan distrik Anse Royale, dan rezyon sid, i annan en douzenn pti plant ki tret delo.  Selman ankor enn fwa dan sa rezyon sistenm tretman delo i en sistenm ki ganny parsyelman devlope, pa parey dan rezyon nor e gouvernman i annan lentansyon la pou upgrade sistenm pou par egzanp met bann filter presyon pou ki pou kapab rann sa delo ki nou pe konsonmen bokou pli prop.  E san menm sa ki mon dir ki pou kout R3.5m. 

Me selman letan nou get tou sa bann proze, sa ki pli enportan, sa ki prensipal e ki pou kapab vreman rezourd sa problenm, dan sid Mahe e an zeneral dan pei pou prosen 20 an, oswa 25 an, se sa proze lagon, delo dou Providence e an menm tan pou combine li avek desalinasyon ki PUC pe get posibilite pou konstrir pliyer plant swa dan was oswa dan les Mahe li menm. An realite an se ki konsern sa proze lagon delo dou, monn ganny enformen par PUC li letid fezabilite i deza an progre e ki noun termin li dan detrwa mwan e apre letid fezabilite zot bezwen al enplimante.  Mon konpran ki son peryod lenplimantasyon li menm li i riske pran apepre 2 zan.  Mwan mon lenkyetid personel e mon sipoze lasanble nasyonal li menm li i a konpran sa lenkyetid se kan eski sa bann proze pou ganny enplimante, kan eski zot pou ganny terminen enplimante, donnen sitiasyon ki egziste dan rezyon sid Mahe an zeneral. En rezyon kot i annan en popilasyon ki letan ou konpar li avek rezyon nor i vre ki i mwens me selman en popilasyon ape pre 18,000 dimoun dan en popilasyon Sesel 74,000 oswa 75,000.  Donnen lefet osi si i annan bann devlopman ekonomik ki kapab arive dan sa rezyon ki nou pe koze, i annan en nesesite ki gouvernman alors i enplimant sa bann proze o pli vit posib e se pou sa ki mosyon pe demann gouvernman pou  speed up  avek lenplimantasyon sa bann proze delo. Msye Speaker sa menm sa ki mon annan pou anmenn devan lasanble sa i mon prezantasyon e mon propoze ki sa mosyon i ganny table.  Mersi bokou.

 

MR SPEAKER

Okenn ki segonn sa.

 

(Motion seconded by Hon James Mancham)

 

MR RAMKALAWAN

Nou tou nou an faver Msye Speaker, annou pran en vot.

 

MR SPEAKER

Non mon pann rode lekel ki an faver. Monn rode lekel ki pe segonn sa mosyon.

 

MR BARRY FAURE

I paret mwan ki i annan serten ki oule ridikiliz sa mosyon.  Nou pe koz nou 18,000 dimoun dan sid Mahe.  Mersi.

MR SPEAKER

Sa i en bon moman pou pran en break  nou retournen 2 er.

 

(Sitting suspended until 2 p.m.)

 

MR SPEAKER

Bon nou kontinnyen nou deba lo mosyon proze delo pou rezyon sid Mahe.  Onorab Mancham.

 

MR MANCHAM

Msye Speaker konm ou konnen bomaten mon pann ganny okenn ezitasyon pou siport mosyon de lonorab Barry Faure konsernan kestyon delo, proze delo sirtou dan rezyon sid Mahe. Akoz mon pann ganny mwan okenn ezitasyon pou fer sa.  Mon pann ganny mwan okenn ezitasyon pou fer sa akoz si lopozisyon ti pe vreman sers en avoka pou kapab demontre ki politik de gouvernman dan domenn delo set en total failure  nou pa ti pou kapab vwar meyer avoka pou sa ki onorab Barry Faure.  E an-n efe lonorab Barry Faure in dir nou ler in koze, i pann koz bonnavini li, in koz lo en baz de resers e nou tou nou konnen e nou tou nou antann kantite demars ki li in fer dan sa domenn e si ozordi i permet li de dir a gouvernman speed up, i vedir pou dir enplisitman i aksepte ki gouvernman pe tro slow down  dan sa domenn.  Monn ekout onorab Barry Faure avek bokou entere, petet i pe anvoy en mesaz pou prezidan pou dir gete prezidan si demen ou pe konsider met en boug ki annan kapasite dan domenn delo koman minis, mwan mon la. 

Msye Speaker nou tou noun ekoute, ler nou koz delo parey onorab Barry Faure i dir, nou pe koz en keksoz tre tre enportan parske parey sa letid ki in dir in fer par minis de lasante i montre, delo i kapab aport plizyer konplikasyon, plizyer problenm.  Sa langaz ki in servi dan son mosyon sepandan,  i poz mwan la kestyon si tou bann manm la mazorite pou prepare siport sa  mosyon  as it is worded,  parske dan en pti term sa i en koze, ou konnen nou pa kapab dir tro for dan lasanble koze c,  vize ver gouvernman ler ou pe dir li speed up parske by implication  i vedir pou dir i annan dimoun la pa pe fer zot travay pou enplimante sa bann project delo ki nou konnen in ganny size de plizyer etid. 

Me ler nou diskite lo tou sa proze, malerezman i annan en quantum, the cost  e lo la mon pann antann lonorab Barry Faure dir nou kote sa ban cost  pou sorti.  Mon dakor in ekri en zoli let sa Msye Ethiopia pou demann enn etid e boug la in vini dapre sa ki nou konpran e annou aksepte, dan bann fwa aksepte, sa 2 boug in vini an rezilta de son linisyatif e zot in fer letid.  Me lonorab Barry Faure ti dwatet pran lot linisyatif fer mannyer ganny  larzan neseser pou ki sa bann etid i kapab vin mete an-n aplikasyon e ki nou a kapab vreman zistifyaman ganny sa gouvernman  to speed up  dan lenplimantasyon sa bann proze delo sirtou dan domenn Mahe sid.   

Mannyer mon konpran si mon ti ekout byen i ti parl lo en proze ki gouvernman mon krwar pe fer dan kote Baie Lazare e mon krwar sa in fer li bokou trist e in met li dan en pozisyon tre difisil viz a vi son constituent  ki mannyer Baie Lazare pe gannyen be nou dan south Mahe nou pa pe gannyen.  Mon senpatiz avek lonorab Barry dan son predikaman e parey monn dir o komansman si nou ti pe rod one advocate to show that the government policy has been a failure, nou pa ti pou kapab vini avek en meyer kandida ki lonorab Barry Faure e mon panse ki gouvernman ti dwatet pran konsiderasyon imedyatman tou sa bann pwen ki in fer sorti pou demontre pou dir fodre fer sa bann pti baraz.  I kapab annan bann gro gro proze ki pou vini me sa bann pti baraz i osi tre enportan parske nou bezwen aksepte ki lonorab Barry Faure i bezwen anba gro presyon avek lepep de Mahe sid pou delivre delo, pou trouv en solisyon a sa bann problenm.  Mersi Msye Speaker.

 

MR SPEAKER

Okenn lot manm, Onorab Esparon.

 

MR ESPARON

Msye Speaker si vre ki Anse Royale e bann distrik sid Mahe i annan problenm anmas delo, Pointe Larue nou nou pe fer mannyer tire akoz nou kot nou nou annan tro bokou.  Ou vwar mannyer enn ler, mon pa konnen mwan, sa zonm la o keksoz i ganny balanse dan tel fason ki kot i annan i annan tro bokou e pa kapab servi, e kot napa napa ditou e dimoun i rode.  Onorab Barry Faure in  sit legzanp dan son constituency  e mwan osi en dimoun kin ne dan sid, grandi enpe dan sid nou konnen ki i annan landrwa kot menm ni delo trete ou pa trete pa arive.  Se pourtan i annan en kantite dimoun delo i pase menm obor zot peron.  Ou konnen i en pti pe malere me selman kan menm sa mon konpran presyon ki onorab Faure e bann lotorite dan distrik sid i pas atraver.  I pa fasil pou ou kapab eksplik dimoun, eksplik zabitan dan ou distrik, zistifye avek zot ki mannyer, avek sa rhythm devlopman ki pe ale zot pe ganny zoli lakaz, partou bann devlopman pe monte me ki mannyer zot avek en rakor, delo pa kapab ariv kot zot.  I pa fasil.  I annan dimoun ki zis ou pa pou kapab convince zot.  E mon konpran dilenm onorab Faure.  Devlopman ki pe arive dan distrik Anse Royale, i get serten par dan son constituency Bougainville par egzanp kot delo pa arive, delo trete pa arive.  I annan menm difikilte, nenport kalite delo pa trete i en problenm.  Dimoun i ankor pe mars kilomet par kilomet avek seo pou al sers delo.  E i enpe difisil.  Me selman sa ki mon krwar nou devret kapab fer se parey atraver resers onorab Faure in prezante, nou devret kapab vwar en mwayen a kour term ki nou kapab fer pou adres sa problenm, sey remedye en pti pe sa problenm, pa neseserman ki nou a rezourd li konpletman dan son totalite me selman pou en letan, en peryod 3 an a 5 an la vwar ki nou kapab fer pou nou kapab an tenir kont sa depans sa kou ki pou koute pou envestisman e posibilite ganny bann donater oubyen serten organizasyon, pei ki enterese pou finanse.  Mon krwar ki nou kapab fer lo pwennvi stratezi en pti pe parey onorab Faure i dir vwar en pti pe a kour term ki nou kapab fer, bann baraz delo, o nivo sak, si i neseser, sak distrik dan sa bann distrik sid la.  Kekfwa dan rezyon Bougainville ou annan ou en baraz ki kapab pran enpe peryod letan tir en pti pe sa presyon ki i annan lo sa bout  Anse Royale e apre a lon term la nou a kapab gradyelman travay  vwar ki mannyer nou kapab enplimant bann gro gro proze ki pou kout de milyon e de milyon roupi ki pou kapab si oule satisfer bezwen tou devlopman aktyel e devlopman ki pe vini.

Msye Speaker i annan en keksoz ki parfwa dan tou sa bann devlopman kekfwa nou pa port atansyon avek, se parfwa bokou fwa ler nou fer planifikasyon swa pou met bann devlopman lakaz, oubyen bann enfrastriktir komersyal oubyen endistriyel nou pa regard son lot konponan osi enportan swa supply  elektrisite, oubyen koman delo.  Nou pa prevwar byen, kekfwa nou pa asize koman en tim pou vwar ki difikilte pou poze, ki mannyer sa pou afekte popilasyon ki reste la dan sa rezyon.  Ki mannyer an menm tan nou pe adres sa proze devlopman nou kapab entegre devlopman sa kominote ki deza la egziste.  Mon krwar tou sa bann eleman i enportan nou tenir kont.  Byen sir bann largiman ki dimoun avan mwan in deza anmennen me zis mon oule refer repete akoz mon krwar ki demann bann distrik sid Mahe i zistifyab e mon krwar ki pli souvan ki nou kapab enplimant serten proze ki pou kapab tir enpe sa problenm lo sa bann dimoun mon krwar i ava pli byen akoz dan term enterpretasyon, sa ki onorab Mancham pe dir  e an linny osi dan bann lalinny ki onorab Faure pe dir, mon krwar research,  in ase ek resers alors kekfwa ase travay papye, ase bokou bann delay,  lezot keksoz ki annan, annou met keksoz konkret ater akoz i annan en kantite dimoun dan sa bann letan pe espere e ki i neseser ki zot problenm i ganny adrese la dan sa moman letan.

Msye Speaker mwan mon oule donn tou mon sipor pou sa mosyon e mwan osi mon ti a demande ki pou en bon pe letan monn tann sa zafer rezourd bann problenm delo dan sid Mahe, ou tann dam ki pou fer, proze isi, proze laba, me selman lo lipye nou pankor vreman vwar  keksoz konkret e mon oule ankor dir ki mon siport konpletman mosyon onorab Faure e mon dir li kont lo mwan pou ganny mon sipor.  Mersi.

 

MR WAVEN WILLIAM

Msye Speaker mwan osi mon pou donn mon sipor sa mosyon anmennen par onorab Barry Faure. Onorab Mancham taler in dir pou dir polisi gouvernman in en failure lo kote delo e petet sa i son lenterpretasyon letan i pe get sityasyon ki pe devlope me selman si nou realize nou get sityasyon lo en nivo devlopman dan pei, mon krwar nou bezwen konstate pou dir devlopman pe vin sitan vit Sesel e difinitivman sa demann pou delo i pou anmenn en serten presyon lo tou nivo.  E mwan mon ti annan  zis en pwen konsern pou pase lo sa bann proze delo la, se ki i annan sa Mahe Integrated  Water Project  ki ti sipoze enplimante Grand Anse Mahe ki mon aprann pou dir in ganny pou le moman focus pa pe ganny mete lo la me mwan mon ti a dir pou dir malgre ki latansyon pe ganny mete lo la nou bezwen, lotorite i bezwen konsyan pou dir malgre sa bann lezot pti proze ki pe vini i pa pou rezourd tou nou bann demann ki nou pou annan o nivo devlopman sosyal avek ekonomik aktyelman la nou annan sa problenm osi ki bann fermye dan serten rezyon osi Sesel pe fer fas avek akoz demann pou delo agrikol osi pe vin limite.  Sa osi en lot konsern ki nou bezwen fer fas avek.  Me mwan mon ti a dir pou dir bann lotorite ki pe deal avek sa bann zafer idantifikasyon bann landrwa pou bann proze delo ki zot fer en pti pe atansyon kot nou pa al fer bann devlopman lakaz oswa bann gran devlopman lo bann sit kot bann proze delo i sipoze ganny enplimante a lon term akoz si nou fer sa nou pou dekouver ki bann sit kin ganny idantifye pou fer sa bann proze plitar letan nou mazin pou fer proze petet sa bann  sit pou nepli kapab, sa bann proze pou nepli kapab ganny enplimante dan sa bann landrwa.  Sa i en konsern ki mon ti annan pou pase.  E parey monn dir mon pou donn tou sipor sa mosyon.  Mersi.

 

MR  GEORGES BIBI

Msye Speaker semenn pase parey nou tou nou konnen ti annan en mosyon ki ti ganny table, kin pase, ki ti demann gouvernman pou fer sir ki tou bann lakaz dan Sesel i ganny delo trete par lannen 2000.  Me ozordi nou pe tret en mosyon kin ganny anmennen par onorab Barry Faure ki dir ki pe demann gouvernman pou speed up  lenplimantasyon bann proze delo dan rezyon sid Mahe.  Mon krwar problenm delo Sesel  i pa zis konsern sid Mahe, i konsern Mahe an zeneral e menm mon krwar nou a dir Praslin e bann lezot zil.  I en problenm ki pe pli-z-an pli vin pli prominan.  O fir a mezir ki bann devlopman i pran plas, sa problenm i vin pli pir, i vin pli difisil.  Mon krwar ler lonorab Mancham lider lopozisyon ti fer resorti ki gouvernman in fer en failure  dan proze delo mon krwar petet nou pa devret get li dan en loptik ki i pe zis kritike.  Mon krwar nou devret get li avek en lizye pou dir wi in en failure kot devlopman delo in ganny neglize over the years.  Si nou pou dir petet dan dernyen 17 a 18 an, nou a vwar nou menm pou dir delo i en size ki pann ganny tret ditou dan bann devlopman kin pase.  Nou tou nou ava aksepte e nou ava dakor ki dernyen dam ki ti fer, dernyen dam sete dam La Gogue e sa ti an 1979 e nou tou nou ava dakor ki pandan sa bann letan noun annan devlopman lagrikiltir  kin fer si oule revolisyon.  Noun annan Indian Ocean Nursery depi 1979.  Noun annan kot i fer ton, tou sala i servi otan kantite delo, i bezwen rezervwar pou delo.  Noun annan divizyon pwason ki servi en kantite delo ankor.  Nou konn Seybrew ozordi pe servi delo, demen nou annan nou en Yatch Marina ki pe sipoze monte, en proze e sa i pou bezwen servi en kantite delo, pa zis pou bann dimoun ki pe vin la me zot pou bezwen servi pou zot swa bennyen, delo pou bwar ensi-d-swit e tou sa devlopman ki nou pe anvizaze, nou pe dir bann offshores and so on ki nou pe demande, bann lendistri lo east coast  e sa i pou met presyon lo resours delo aktyel ki annan unless  ki gouvernman i rekonnet ki problenm delo Sesel i en problenm ki tre tre acute e i devret ganny adrese o pli vit posib.

Msye Speaker nou ava rekonnet pou dir dan tou bann distrik mon ti fer resorti lot zour ki lakaz in ganny fer e nou bezwen rekonnet ki ler i annan plis lakaz i annan plis demann pou delo.  Nou rekonnet ki i annan klinik kin ganny fer dan bann distrik e ler sa bann klinik i ganny fer, nou bezwen plis delo.  I annan lekol kin ganny fer e ler sa bann keksoz i ganny fer nou bezwen plis delo e mwan personnelman mon ti a kontan zis demande akoz ki ziska ozordi naryen, preski naryen pann fer kot i konsern ogmant kapasite amas delo pou kapab deservi sa bann landrwa.  Zis yer Msye Speaker mon ti pe monte letan lapli  pe tonbe, zis ou get sa kantite delo, mon kontan monn tann onorab Esparon pe dir pou dir li annan tro bokou, ou  monte ou get sa kantite wastage, ki kantite delo ki sorti dan montanny menm Cascade, ou vwar sa kantite delo ki pe desann e ou pe demande ki mannyer nou anmase, akoz nou pa pe anmase. 

Lot fwa, semenn pase onorab Chow ti fer resorti en pwen, i ti dir the issue  ki gouvernman i bezwen mazinen se ki i pou bezwen fer fason pou nou donn dimoun delo 24 er lo 24 er 365 zour dan en lannen.  E sa ziska prezan nou pankor kapab achieve.   Mwan menm mon ti fer resorti parfwa ler nou fer bann gro dam, monn tann lonorab William in koz sa dam ki pou fer Grand Anse ki pou kout ape pre R300m e nou pa etone si in ganny shelved pou le moman.  Nou sa ki enportan se i pa kestyon en gro dam ki pou kout son operating cost bokou ser petet nou pou al tal tiyo sepa konbyen zistans, petet mon krwar gouvernman i devret vwar en fason pli efikas, en fason ki pli ekonomik pou nou kapab met bann pli pti rezervwar ki a deservi par egzanp lonorab Faure in koz rezyon sid alors kot ler pou ou pas tiyo i pa pou kout ou tro ser e bann encatchment  bann rezervwar ki a mete  pa pou tro gro e son maintenance cost  pa va tro ser e petet sa i ava ganny fer dan bann diferan rezyon, oswa nou a fer li pou kominote me  se lobzektif se ki a lafenn zournen dimoun dan distrik, dimoun dan rezyon i ganny delo, i ganny delo trete 24 lo 24, 365 zour par lannen.  Mon krwar se sa issue.  Se selo li menm in ganny neglize e in plis ki ler ki gouvernman ler nou koz sustainable development mon krwar in plis ki ler  ki gouvernman ler i pe fer son devlopman i pran tou bann fakter ki al avek bann devlopman pou met ansanm e kordinen ki fer sir ki i annan en devlopman ki sustainable.   Alors Msye Speaker mon krwar sa mosyon i enportan, sa sityasyon delo i en keksoz ki noun koz bokou lo la e mon pou donn mon sipor.  Mersi bokou.

 

MR SPEAKER

Mon ti a kontan fer sorti ki monn permet ziska en serten degre, montre relevans ler ou koz lo en sans zeneral problenm delo.  Selman mosyon li menm  i santre lo rezyon sid Mahe.  Zis pou fer kler.  Onorab Belle.

 

MR DANIEL BELLE

Msye Speaker sa mosyon i tret delo dan sid Mahe i enportan akoz ler ou regard li pareylLonorab kin koze bomaten in dir ki i annan anviron 18,000 dimoun ki ganny afekte par lefet ki napa delo reliable,  adequate  dan le sid i rann lavi sa bann dimoun dan en serten fason pa agreab.  Si nou get enpe en map Mahe nou a vwar ki dimoun dan nor, i ganny delo sorti La Gogue, dimoun dan sant i ganny delo sorti dan dam Rochon parey in ganny dir par bann onorab avan mwan, sa 2 dam ti ganny konstri i annan pres 20 an pase.  E dimoun dan sid zot depi tou sa letan apre konstriksyon dam Rochon, apre konstriksyon dam La Gogue dan en serten fason ti napa okenn proze mazer pou ki zot zot kapab gannyen delo pou zot servi dan en fason parey monn dir adekwat e reliable.   Ozordi gouvernman nou konnen,  gouvernman dizour in set  li en politik ki nou siporte antyerman se donn lakaz tou Seselwa, se konstrir lakaz pou tou dimoun dan Sesel.  En lakaz avek en tiyo delo kot delo pa sorti it’s not a home,  en lakaz san delo i nepli en lakour.  Ou bezwen delo e ozordi sa bann lakaz modern kot son toilet  i servi delo, kot son sink  dan lakwizin pou bezwen delo ki ariv ziska anndan, i neseser ki ou nobou ganny delo koman ou ouver tiyo parey ler pou elektrisite zis ou apiy lo bouton e ou ganny lalimyer.  I montre ki nou pei pe avanse si serten dimoun dan nor e o sant i gannyen i tout a fe normal e mon siport mosyon ki lonorab Faure in anmenen pou dir ki dimoun dan sid zot bezwen zot osi ganny sa fasilite dan en fason bokou reliable e adekwat. 

Problenm delo dan en lansanm se ler ou get li ou bezwen dir eski in annan en proper comprehensive planning an-s ki konsern landrwa kot dimoun i al reste, landrwa kot ou fer semen pou dimoun reste, landrwa kot dimoun i reste epi apre ou fer semen, eski ou panse osi an term sa fakter enportan, delo.  I annan dimoun ki kapab viv san elektrisite.  Dan le pase i annan bokou dimoun in viv san elektrisite.  Me eski nou kapab viv san delo obor nou lakour.  Lontan wi nou ti al rod seo nou ti anmennen, eski ozordi i normal an 1997, non.  Donk i vedir ki fodre ki delo i ariv kot dimoun e fodre pli ki dimoun i al kot delo, i al rode.  Lontan ou ti al rode delo kot i ete kot larivyer ozordi avek devlopman ou ekspekte delo vin kot ou. Lekel ki pou anmenn delo kot ou e ki mannyer ou pou atrap delo pou anmenn kot ou, se sa bann proze kot bann teknisyen dan gouvernman zot ki deside ki mannyer pou fer.  Me dimoun zot zot pa rode ki mannyer.  Sa ki enportan pou zot zot oule ki delo pa vin en problenm e sa nou konpran tre byen. 

Lonorab Faure parey lonorab Mancham in endike in eksplike ki dan sa politik delo, petet gouvernman in en failure.  Msye Faure in dir, in imply  li, Msye Mancham in fer sorti sa pwen akoz i vre.  Dan diskisyon Msye Faure i pann happy  e i pe tradwir li santiman son bann dimoun kin vot pou li dan le sid Mahe e mon krwar nou bezwen respekte sa ki depi ki in ganny elekte i fer 4 an, problenm i ankor la e in ganny kouraz, in vin dan lasanble in vin dir dan en fason ase elegan e onorab Mancham in montre  ledwa pou dir efektivman petet lonorab Faure se sa ki i ti oule dir. 

En gouvernman i bezwen angaze son lekor pou ki tou son sitwayen, tou sitwayen Sesel i ganny delo pe enport pri akoz dimoun ozordi i peye delo.  Byen sir ler oun gannyen apre nou a diskite, si oule fer li pliba, oubyen pli o, son pri me en gouvernman i bezwen angaz son lekor lo en pwen parey delo.  En gouvernman i angaz son lekor  lo ledikasyon, nou vwar i enportan, en gouvernman i angaz son lekor lo bann aspe lekonomi, nou vwar i enportan, lo employment mon vwar i enportan me delo set en keksoz se nesesite de baz e mon krwar ki  e mon apresye ler lonorab Faure i dir fodre speed up  avek e ki i annan en mosyon kin ganny mete avan par lonorab Confait kot i dir fodre avan lannen 2000 tou bann lakaz i ganny konekte ek delo trete, i montre en serten rapidite, en serten presipitasyon ki bann elekter dan Sesel i komans demande, bann Anse Aux Pins, bann sid Mahe e enpe partou dimoun i komans enterese dimoun i komans anvi vwar delo ariv se zot e zot in  nepli anvi al larivyer pou al rod delo.  Mon krwar mon ava aret la e mon a petet dir avan mon terminen ki i ti ava osi en fason enteresan ankouraz dimoun pou annan en pti rezervwar kot li ki ler delo i arive dimoun i kapab anmas sa delo e petet osi PUC i merit edik dimoun lo serten laspe ki ler delo i vini  petet i annan fason fer kot si ou annan en basen delo dan peryod la sesres i ava ede  e petet gouvernman osi ed dimoun pou kapab ganny en loan spesifikman pou zot kapab met en rezervwar kot zot, en keksoz byen spesifik,  pou met en rezervwar kot ou, si i annan posibilite fer sa zot a vwar sa bann zafer teknik ek PUC en fason ki ler i ava annan delo, dimoun ava kapab annan delo kot zot menm pou servi pou lave, menm pa pou bwar, pa delo bwar me delo ki zot kapab servi pou aroz fler, pou zot lav keksoz avek.  Mwan mon krwar ki sa i enportan ki dan sak lakour dan Sesel i merit annan en keksoz ase enportan kot nou sansibiliz dimoun pou ki dimoun e nou ed dimoun pou ki tou dimoun i annan li en rezervwar kot li e ki ou fer sir ki son rezervwar i konekte, ler i annan delo ki dimoun pa kapab plennyen pou dir napa delo.  Ou ava dir napa delo pou ou bwar akoz i annan en problenm lasesres me delo i ava en lot fason me ou pa kapab dir napa delo pou ou kapab servi bann itilite primer koman twalet, bann keksoz parey. Donk mwan mon krwar ki in vin esansyel e mon demann lasanble, mon a demann menm lonorab Faure kin anmenn sa mosyon, ki osi i enkli sa dan son demann  pou dimoun sid akoz konm zot napa bokou delo ti ava petet en fason pou rezourd sa problenm si ti ava annan sa keksoz  pou dimoun konserv delo kot zot.  Avek sa mon ti a kontan dir ki mon pou donn tou mon sipor mosyon lonorab Faure e mon espere ki gouvernman ava pran sa mosyon a la let akoz Msye Faure in dir to speed up.  Ler lasanble pou dir speed up  mon ekspekte avek tou lavwa ki dir speed up,  gouvernman i a konpran ki i annan lirzans kelke par e pa ava dan en serten fason dormi lo la.  Mersi Msye Speaker.

 

MR ANGE MOREL

Msye Speaker mosyon prezante par onorab Barry Faure, mon krwar in tous le problenm ki nou bann zabitan rezyon sid nou resevwar vizavi delo.  Dan le pase toultan noun ganny problenm  vizavi bann devlopman pou sel rezon ki  napa ase delo ki kapab ariv kot sa bann landrwa kot pe fer devlopman.  Me an dizan sa, i fer mwan mazinen  ki Baie Lazare i annan en kantite delo, i annan en kantite delo me selman nou pe tarde pou kapte sa bann delo pou deservir bann dimoun.  Erezman i annan en proze ki  msye Faure in koz lo la ki bann zofisye sorti UN ti vini nou ti al vizite e sa proze i sipoze komanse e petet le mo speed up ki Msye Faure in servi i a esansyel pou li kapab deblok sa proze fer li mars pli vit, pou ki bann dimoun Baie Lazare, lo lakot Anse soleil, Anse a La Mouche e menm Anse Louis, bor lanmer Takamaka e menm dan vilaz Aux Cedes, Dame Le Roi zot a kapab ganny akse ek sa delo a traver sa proze ki pou fer e petet ki a fasilit en pe zot lavi, donn zot en pe plis delo pli prop, delo trete ki parey nou konnen ki dan Sid Mahe i annan en problenm avek bann mikrob ki ti ganny kontaminen par delo. E Msye Speaker delo Baie Lazare nou pa bezwen zis delo trete en kote, en kote nou bezwen delo trete pou bann lakaz, lot kote nou bezwen osi delo pou devlopman lagrikiltir.  Mon krwar la osi i annan en proze ki lagrikiltir i anvizaze fer e la osi petet mon ti a profit sa lokazyon pou demann zot pou akseler en pe sa proze akoz bann fermye parler dan letan lasesres   i vwar li enpe difisil pou kapab donn delo zot bann plant pou ki a ede pou prodwi plis bann legim e bann prodwi vezetab pou lepep Seselwa.   Dan sa lalinny mon krwar mon pou partaz lopinyon Msye Faure e mon pou aport li tou mon sipor e sipor tou dimoun Baie Lazare pou ki bann proze delo dan rezyon sid Mahe i ganny akselere e fer son enplimantasyon enpe pli vit posib.  Mersi.

 

MR WAVEL RAMKALAWAN

Msye Speaker letan mon regard sa mosyon mon krwar ki mosyon i kler, i straight forward, Onorab Faure in fer en prezantasyon formidab, in byen reserse e in fer bann demars tou antan ki manm pou Anse Royale.  Mon krwar ki nou tou ki la dan lasanble noun, depi ki petet avan menm ki nou ti rantre dan sa lasanble, noun tann problenm delo dan sid, basen Dame Le Roi, pou komanse, pou fer pa pou fer, lot laba Takamaka, noun trouv bann progranm lo televizyon.  Ti annan en progranm detaye lo televizyon la fason ki zot ti pe sey regard bann diferan sours delo zisteman dan distrik Takamaka pou regarde kote pou pran, kote ki pa pou pran.  Alors mon krwar ki, e ozordi,  I mean onorab Belle in mansyonnen ki nou bezwen delo vin kot dimoun.  Me i kler ki ozordi i annan bokou dimoun spesyalman dan sid Mahe, ki ankor bezwen al sarye delo, al kot, i annan bokou dimoun dan Baie Lazare ki mwan mon konnen personnelman ki bezwen sarye delo pou li ariv kot li.  Mwan mon dir annou petet la pa sey rod blanm isi, blanm laba, i bezwen annan en rezon akoz sa bann proze pa pe arive e lefe ki tou bann diferan manm dan sid zot osi zot in nobou aport zot problenm ki zot bann dimoun i vin anmenn kot zot e onorab Faure pe dir avek gouvernman speed up  enplimantasyon sa bann proze.  Mon krwar ki mesaz i kler e se pou sa rezon ki boner letan ki mon ti pe dir be annou vote akoz nou tou nou pou an faver en mosyon parey, malgre ki onorab Faure i ti pe panse ki petet dimoun  pe ridikiliz sa mosyon, non, parski si in komanse e dimoun i ankor pe ganny problenm nou annan nou en sel keksoz pou  nou fer, pou nou dir be speed up,  ki bann dimoun Baie Lazare, bann dimoun dan sid, bann dimoun Bougainville, zot ava ganny sa delo kot zot parski i menm ankor annan lager delo kot dimoun i dir monn met mon rakor pou mwan ganny sa sours laba, lot in vini in koup mon rakor.  Lager i ankor pe arive.  Si ou kontakte sid Mahe, kekfwa kord-gard i ava dir avek ou wi parski mon konn serten dimoun ki bezwen al kord-gard akoz in ganny problenm delo.  Alors de sito ki nou kapab rezourd sa problenm, de sito ki sa bann proze i kapab enplimante, tou dimoun i ava happy,  nou tou nou ava ganny nou delo e nou ava happy.  Alors mwan mon dir annou aprouv sa mosyon donn li tou nou sipor e annou bouze menm.  E sa i ava en travay konkret, pozitiv ki lasanble nasyonal i avann fer.  Mersi bokou.

 

MR SPEAKER

Onorab Faure mon envit ou pou ou fer ou rezime.

 

MR BARRY FAURE

Mersi Msye Speaker.  Mon ti a kontan remersi tou bann manm kin koze lo sa size.  Mon ti a kontan montre lapresyasyon bann dimoun ki pe soufer avek sa sityasyon pou bann komanter favorab ki serten manm in fer.  Mon krwar dan tou bann lentervansyon i montre ki zot tou zot konpran sityasyon menm si i annan diferan rezon akoz zot pou siport sa mosyon.

Monn anmenn sa mosyon devan lasanble pa koman en avoka defet total oswa total failure gouvernman.  Mon pann anmenn sa mosyon devan lasanble pou fer en lapel pou mwan vin en minis delo, monn anmenn sa mosyon devan lasanble si oule, si okenn dimoun i kapab dir mon en avoka se pou vin en avoka lespwar, en avoka lespwar ki laspirasyon nou pep i kapab ganny atenir.  Laspirasyon pou ki sak fanmiy i ganny delo e delo trete dan en fason dirab.  24 er par zour 365 zour dan enn an. Mon krwar sipor ki tou bann dimoun in montre, tou bann dimoun kin koze in montre pou sa mosyon i montre ki zot solider, zot solider ver pep ki pe ganny afekte. Zot solider pou devlopman, plis devlopman sosyo ekonomik nou pep.  Atraver zot solidarite mon krwar zot pe efektivman montre ki i annan en nesesite irzan ki problenm delo dan sa rezyon sid i ganny rezourd o pli vit posib e se pou sa ki mosyon pe demande ki o pli vit posib ki gouvernman i enplimant bann proze ki deza dan pipeline.

Monn anmenn sa mosyon pa akoz mon oule promot divizyon oswa la zalouzi ki kapab egziste ant en distrik, en vilaz ou en lot ki pe deza benefisye dan rezyon sid.  Mon krwar i annan en serten manm kin koze, i pann tre konpran sa ki mon ti oule dir oswa petet mwan ki pann kler dan mon leksplikasyon.  Letan nou dir proze Baie Lazare, monn mansyonn li dan konteks en zefor ki gouvernman pe fer pou donn delo bann dimoun  Baie Lazare e sa i en proze ki pou ganny finanse par world bank, labank mondyal ki pou kout R2.5m ki pou benefisye anviron 5,000 oswa plis zabitan dan sa rezyon Baie Lazare e an deor Baie Lazare. 

Monn koz lo proze delo trete pou vilaz Bougainville  parske sa i en proze ki lo lalis priyoriter pou 1997 pou distrik Anse Royale.  Mon ti dir ki Msye Rousseau yer lo radyo e televizyon in anons nou ki sa proze pou komanse an lannen  1997. 

Msye Speaker i annan plizyer fakter ki enfliyans kestyon fourni delo pou en pep.  Isi Sesel parey dan tou pei tyer monn ki annan bann spesifisite ki nou annan sa kestyon delo i enn bann kestyon lalit pou devlopman.  Sesel i en pei kin fer en devlopman rapid dan sa dernyen 20 an.  Sa devlopman in neseserman met presyon lo  kapasite la nasyon pou fourni delo pou tou son pep.  En fakter ki tre enportan ki nou bezwen realize se ki i kout bokou, i kout en kantite pou kapab konstri bann dam e de lot kote annou realize ki sa pri ki konsomater pe pey sa delo i en pri ki tre ba.  I en pri ki tre ba dan Sesel letan ou konpar li avek kou, the cost pou kapab aprovizyonn delo, met delo a dispozisyon nou pep. Letan mon pe dir sa mon pe dir li dan konteks devlop en polisi, devlop en politik devlopman dirab.  Ou pa kapab koz sustainable development e an menm tan dir ou bezwen toultan kree en sityasyon kot the costs are not being met,  kot ou kapab anmenn devlopman pa pe ganny partaze par tou bann akter ki konsernen.  Swa nou pe koz en sityasyon kot gouvernman i antre i subsidize, me si gouvernman i pou subsidize apre annou de lot kote pa dir i annan over borrowing oswa det pe vin unmanageable. 

En lot fakter enportan osi se bann patern konsomasyon.  Mon krwar se Msye Belle kin dir e in dir byen ki nou bezwen sers bann fason pou fer sir ki nou annan en lespri konservasyon, konserv plis sa delo ki pti gin e sak fanmiy i bezwen annan en pti rezervwar par egzanp  kot son lakour parske si delo napa pandan lasesres pou 3 semenn e si oun kapab anmas ou delo byen e si ou konsonm li efektivman petet ou pa pou ganny tro tape par sa mank delo pandan lepok lasesres.  I kout bokou mon ti pe dir pou kapab anmenn delo pou tou pep e sirtou si nou dan lasanble nasyonal noun aprouv en mosyon kot nou pe demande ki ver lannen 2000 ki tou pep, 100% pep, 100% bann fanmiy i ganny delo trete.  I annan menm kin dir 24 er par zour e 365 zour dan enn an.  I annan en cost factor.   Msye Mancham in poz sa kestyon.  Mon pran zis en legzanp.  Sa proze Mahe integrated water system, ki mon ti mansyonnen o paravan e ki monn dir ki gouvernman in demann PUC pou le moman pou met li akote e konsantre lo sa lagon delo dou Providence avek proze desalinasyon delo 2 opsyon ki gouvernman in dir, konsantre lo la PUC e met tou zefors pou kapab o pli vit posib met li an mars.

Mahe integrated water system i en package,  i en pake proze delo ki ti pou benefisye la nasyon pou prosen 20 a 25 an me ki ti pou kout nou R330m. Son dam limenm li ki ti pou Grand Anse, ti pou kout R140m.  Dam, sistenm tretman delo avek son sistenm pipeline  ann antye ti pou kout R270m e son package R330m.  Ki gouvernman in fer, gouvernman in deza depans R15m zis pou etidye kote pou fer dam. Son fezabilite.  Depi bann lannen 80 gouvernman in etidye kestyon fer en dam Baie Lazare.  Apre bann teknisyen menm in vwar pou dir i pa tro fezab, annou fer li Grand Anse Mahe e finalman letan ou get son package  ki pou kout R330m ki gouvernman in dir ki sa i tro ser e pou le moman ki pei pa kapab afford.   Akoz definitivman i ti pou ogmant fardo det par latet abitan ki tou dimoun dan pei tyer monn, tou bann pei tyer monn pe soufer pou le moman.  E se pou sa ki gouvernman in demande ki bann lezot lopsyon i ganny gete, lezot lopsyon i ganny eksplore, i ganny etidye.  E sete pou sa rezon ki in sorti avek sa 2 proze ki noun dir, lagon delo dou kot Providence konbinen avek desalinasyon ki ansanm avek bann pti proze baraz delo dan tou bann vilaz, parey dan sid Mahe i ava kapab rezourd sa problenm delo a en gran nivo.

Akoz gouvernman pe get kestyon lagon delo dou, parske zis lagon delo dou li tousel, son cost  in ganny kalkile pou vin R75m konpare avek dam Grand Anse ki ti pou kout mon ti dir R140m e pourtan lagon delo dou pou provide  plis ki en milyon kilo litres,  kilo lit delo par an, konpare avek Grand Anse ki ti pou donn mwens kilo lit delo dan son basen.  Set a dir nou pe get bann proze ki pou anmenn mwens depans me ki an menm tan plis delo pou pep Seselwa. 

Msye Speaker mwan mon okouran ki gouvernman dan son demars pou li anmenn delo pou tou dimoun ki i pe etidye serten metod finansman ki inovatif, ki pa pou agrav fardo finansyer lo pei an-n antye, par egzanp i pe get sa sistenm boot financing system  ki nou konnen i koman, ou donn en financing organisation pou li konstri proze, operate proze e letan i an mars transfer li avek sa lorganizasyon kin commission li, dan sa ka la avek PUC.  Mon konn gouvernman dan lemonn avek ki nou gouvernman pe negosye, mon pa oule dir lekel, pou kapab fer sa marse e sa i konsern proze lagon delo dou avek proze desalinasyon. Mon pa oule dir akoz mon pa oule afekte negosyasyon ki pe take place  aktyelman.

Mon ti a kontan wrap up,  terminen pou remersye lasanble nasyonal pou zot sipor e zot solidarite pou sa lapel ki nou pe fer vizavi gouvernman ki annan en lirzans ki sa bann proze i ganny enplimante o pli vit posib.  Mersi Msye Speaker.

 

MR SPEAKER

Bon avek sa, tou sa ki an faver lev zot lanmen.  Inanim.  Alors mosyon in ganny aprouve.  Prezan nou a pran en pti first reading.

 

CLERK

This Act may be cited as the Fisheries (Amendment) Act 1997.

 

MR SPEAKER

Non ekskize i pa tipti me nou pe pran en first reading.   Avek sa mon enform zot ki mosyon par onorab Henderson in ganny withdrawn  e i prezant son ekskiz si i annan okenn enkonvenyans kin ganny koze par sa.  E la nou fini nou travay pou ozordi e nou zwenn lot mardi 9 er bomaten.

 

At 2.52 pm the Assembly was on it’s rising adjourned to Tuesday 8th April 1997 at 9 a.m.