::
Home » Archives » Verbatims - First Term 1997 » Tuesday 18th March 1997

Tuesday 18th March 1997

NATIONAL ASSEMBLY OF SEYCHELLES

 

Tuesday 18th March 1997

 

The Assembly met at 9 a.m

 

The National Anthem was  played

 

Mr Speaker in the Chair

 

 

MR SPEAKER

Mesdames, Messieurs  les Députés, Monsieur le  Ministre, les membres du public, bonjour.  Comme vous le savez la francophonie est à l’honneur cette semaine,  aussi je pensais qu’il était non seulement normal  mais aussi souhaitable de vous acceuillir aujourd’hui en français puisque cette langue  est une de nos richesses.  C’est la raison pour laquelle je pense que nous ne  pouvons que soutenir la semaine de la francophonie.  Dans le  même esprit  j’aimerai demander  à deux députés d’exprimer chacun à sa manière l’interet et le soutien de notre assemblée.  Je donne donc la parole à Madame Benstrong.

 

MRS BENSTRONG

Merci, Monsieur le Président. Si 49 pays, dont  les Seychelles, ont le français en partage, c’est  bien la preuve que la francophonie est une force.  Parler français, aimer le français pour sa précision, ses nuances, sa clarté,  cela n’a rien à voir avec une quelconque nostalgie.  Se servir du francais aujourd’hui,  dans un monde certes dominé par la communication en anglais, c’est refuser le discours unique, c’est affirmer le droit de se reconnaître dans le bilinguisme ou dans le trilinguisme,  comme aux Seychelles.  C’est donc  se sentir plus fort, capable de mieux affronter les défis de notre époque, car la langue francaise est aussi un outil de développement. 

J’ajouterai  que pour nous Seychellois, c’est toute une partie de notre patrimoine et que notre sensibilité gagne souvent à s’exprimer en français.  Enfin, je rappelerai  que pour nous députés, la francophonie, c’est aussi un réseau, utile et précieux, celui des parlementaires de langue française. Alors, je ne vois que de bonnes raisons d’encourager dans notre pays l’usage et la pratique du  français. 

Merci, Monsieur le Président, de m’avoir donné l’occasion d’exprimer des réflexions que partagent, j’en suis sûre, tous mes collègues de l’assemblée nationale.

 

MR SPEAKER

Merci Madame BenstrongMaintenant je donne la parole à Monsieur Belle.

 

MR DANIEL BELLE

Monsieur le Président de l’assemblée nationale, aujourd’hui nous sommes en train de vouloir redonner à la langue française à travers la semaine de la francophonie la place qui lui revient dans notre société.  Je me rejouis et je suis en mésure de traduire   le soutien, la joie de mes collègues de l’opposition  ainsi que le premier des nôtres qui est aujourd’hui absent, l’honorable James Mancham, officier de la legion d’honneur, eu égard à la semaine de la francophonie. Je profiterai de cette occasion pour rappeler et recommander l’initiative du gouvernement de re-introduire l’enseignement du français dans les classes primaires de nos écoles.  La langue française est la première; en terme de chronologie, c’est la première de nos langues nationale, bien avant le creole et bien avant l’anglais.  Et c’est pour cette raison que de revoir  qu’il y a aujourd’hui une volonté  politique unanime de redonner à la langue française la place qui lui revient au sein de notre société, ne fait que rejouir les francophones et tous les Seychellois.   

Je ne peux terminer sans rappeler, qu’il est aussi  de notre devoir, nous les parlementaires de veiller à ce que le patrimoine linguistique de notre pays continue à se maintenir à un niveau pour le plein developpement, le plein epanouissement de chacun de nos con-citoyens.  Et sur ce, Monsieur le Président j’aimerais bien vous remercier d’avoir initié cette journée en français et j’espère que ceux parmi nous qui pourrons le faire au courant de la journée ne trouvera aucune gêne d’addresser la salle en français.  Merci Monsieur le Président.

 

MR SPEAKER

Mersi Msye Belle.  E la nou antre dan nou question time.  Nou pou pran kestyon nimero 16 avan kestyon nimero 15 alors mon envit Onorab Esparon pou prezant son kestyon.

 

 

MR DICK ESPARON

Msye Speaker mon ti oule demann Minis pou lasante si i kapab enform lasanble lo bann mezir pran par son minister pou amelyor kalite servis ki pe ganny donnen kot casualty lopital Victoria.  Mersi.

 

MINISTER DUGASSE

Mersi Msye Speaker.  Bonzour tou manm onorab.  Msye Speaker Casualty lopital Victoria ti ganny konsevwar koman en sant pou aksidan e emergency  i konmela annan  2 fonksyon prensipal.  Premyerman i en landrwa kot ka aksidan e emergency  i ganny tretman irzan.  Dezyenmman i fonksyonn koman en klinik apre ler travay kan bann sant lasante an partikilye dan rezyon nor Mahé i fermen.  Akoz son dezyenm fonksyon Msye Speaker?  Casualty  i en landrwa ki vwar bokou dimoun spesyalman aswar e dan weekend.  Pandan sa bann dernyen lannen, Msye Speaker, 3 dernyen lannen la kantite dimoun kin vin Casualty in ogmante sorti 27,342 an  1994 pou vin 29,019 an 1995, in vin 32,821 an 1996.  Dan nou zefor Msye Speaker pou amelyor kalite servis ki nou donn piblik kot Casualty, mon minister in pandan sa bann dernyen lannen entrodwir sa bann mezir swivan.  Premyerman noun ogmant la kantite ners ek dokter ki lo duty Casualty.   Dezyenmman noun fer sir ki ners ek dokter  ki ganny plase Casualty  i annan konpetans teknik e leksperyans apropriye.  E enn sa bann leksperyans ki nou fer sir ki nou dokter i annan se ki nou apel an term medikal QED, quick early diagnosis.  Trwazyenmman Msye Speaker noun osi pran mezir neseser pou fer li pli fasil pou staf Casualty ganny akse avek spesyalis e pou fasilit admisyon dan ward lopital kan i neseser. 

Dan sak departman lopital nou annan en dokter siporte par son spesyalis ki lo duty  tou le swar e ki reste dan lopital pandan lannwit.  Alors i fer li pli fasil pou dokter dan Casualty kapab ganny led imedya bann spesyalis kan i neseser. 

Katriyenmman Msye Speaker noun entrodwir en  servis  dispanser kot dispanser kalifye i prezan pou distribye latizann ant 4 er a 11 er diswar pandan la semenn e ant 1 er a 11 er diswar pandan weekend.   Oparavan Msye Speaker sete ners ki ti pe dispense  latizann. 

Senkyenmman Msye Speaker noun ouver sa ki nou apel en 24 hour observation unit kot dokter i admit pasyan ki zot santi i devret ganny admet pou lobzervasyon.  E osi bann pasyan ki bezwen repo tanporer oubyen sa ki nou apel bann day cases sa vedir bann dimoun ki bezwen admisyon selman en zour.

Sizyenmman Msye Speaker noun plas komann pou bann lekipman medikal  pou en valer ape pre 250,000 roupi pou ranplas bann vye lekipman e osi bann nouvo lekipman ki nou panse i neseser pou amelyor servis ki nou donnen kot Casualty.  Sepandan Msye Speaker tou sa bann amelyorasyon dan servis Casualty  i annan en lefe limite akoz logmantasyon kontinnyel parey monn dir pli boner dan la kantite dimoun ki servi Casualty,  de pli-zan-pli Msye Speaker noun eksperyans problenm konzesyon kot Casualty  e parfwa dimoun i bezwen esper en kantite letan avan zot kapab vwar dokter. 

Sa logmantasyon Msye Speaker i nesesit en  analiz aprofondi lo sityasyon e refleksyon lo rol sa unit  dan nou sistenm lasante.  Atraver sa analiz Msye Speaker noun osi konsider bann diferan opsyon enkli posibilite ouver serten sant lasante apre 4 er.

Swivan sa analiz  noun ariv lo konklizyon ki i neseser en sanzman lorganizasyon e rol Unit Casualty.  Minister in alors deside Msye Speaker ki i annan nesesite  pou reorganiz sa ki ozordi nou apel Casualty, pou fer li vin en unit spesyalize kot bann ka aksidan ek bann ka emergency i raporte pou ganny tretman irzan.  Pou realiz sa lobzektif, minister pou kree en nouvo sant, sa ki nou apel accident and  emergency unit, ki en konsep ki ganny pratike dan plizyer pei, kot lopital Victoria ki pou adapte pou donn swen irzans. 

An menm tan Msye Speaker avek bi pou nou redwir konzesyon e la kantite letan ki en dimoun i bezwen espere pou li ganny swen medikal mon minister in deside pou reorganiz servis e ler ouvertir bann sant lasante dan distrik.  Serten pou a lavenir bezwen ganny ouver ziska tar dan lannwit e serten menm pou bezwen ganny ouver 24 er lo 24 er.  Lobzektif minister a lon term se pou ankouraz dimoun servi sant lasante dan zot distrik e vin Casualty selman pou bann ka emergency  e bann ka aksidan.  Sa Msye Speaker a monn avi ava permet sant Casualty nouvo sant aksidan,  emergency, fonksyonn koman i devret fonksyonnen.  E sa lapros nou panse i ava san dout benefisye nou bann dimoun dan nou bann kominote e osi benefisye  minister. 

Premyer faz sa lapros Msye Speaker kot nou pou ouver sant lasante ziska plitar pou komanse tre byento. Pou nouvo sant accident and emergency centre  plan in deza preske konplete e nou pe anvizaze ki sa proze ava komanse plitar sa lannen.  Mersi Msye Speaker.

 

MR SPEAKER

Okenn siplemanter?

 

MR ESPARON

Wi Msye Speaker.  Eski Minis pou kapab atraver son minister pou kapab, atraver medya e lezot sours enformasyon piblik pou kapab ede eksplik dimoun ki si sa emergency pou ki tou ka pa vin emergency,  e kot sityasyon i retourn menm parey i ti ete oparavan kot pou en dimoun en i en emergency me kan i pou konnen pou dir en emergency.   Dezyenm, eski minis e son minister pe konsider met a dispozisyon piblik en hotline  kot dimoun i kapab atraver telefonn pran konsiltasyon avek en dokter pou li kapab ganny serten avi, serten endikasyon si i ganny serten maladi oubyen serten sentonm pou ki sa dimoun pa neseserman i taye i vin kot Casualty oubyen kot en health centre, me i kapab atraver en koud telefonn ed li ki kapab fer serten keksoz ki kapab anpes li deplase kan pa neseser.  Mersi.

 

MINISTER  

Msye Speaker premye kestyon lonorab definitivman mon krwar i pou annan nesesite pou nou atraver medya e an servan nou unit ledikasyon lasante dan minister ki tou resaman noun reorganiz li pou fer li vin pli efektiv e pli efikas, mon panse i pou neseser pou nou annan sa progranm ledikasyon kot nou enform dimoun kontinnyelman ki si sa ki emergency,  ki bann ka ki devret al dan sant lasante, ki bann ka ki devret ganny refere lo nivo santral, me osi mon krwar sa ki enportan Msye Speaker, lo nivo nou sistenm sant lasante distrik, i annan bann dokter ki ase konpetan, ki konpetan e nou pe pli-zan-pli dan nou polisi ogmant la kantite dokter Seselwa ki nou plas dan bann sant lasante e nou panse ki sa bann dokter i kapab zize kan en ka i prezant devan zot si zot  santi ki i en ka emergency then mon krwar san perdi letan i annan striktir ki an plas pou refer sa bann dimoun kot sant  accident and emergency centre  baze lopital Victoria.

Dezyenm kestyon Msye Speaker,  mon panse ki i en tre bon propozisyon ki lonorab in sizere e i en size ki nou ava konsidere an linny avek nou bann devlopman e byensir dan nou sistenm ledikasyon lasante ki monn fek koz lo la.  Mersi Msye Speaker.

 

MR DE COMARMOND

Msye Speaker eski Minis i kapab dir nou si bann ners ki pe travay kot Casualty  an se moman eski zot pe travay lo bann long shifts  ki fek ganny entrodwir.   Dezyenmman, avek sa reorganizasyon ki in eksplike son minister pe al fer lo nivo bann klinik dan bann distrik, dan bann rezyon  eski la osi minister pa pou bezwen plis ners ek dokter oubyen eski i  pou fer bann ners ek dokter ki deza dan sa bann klinik travay lo bann long shifts.  Mersi.

MINISTER 

Msye Speaker letan mon koz lo dezyenm kestyon ki mon sipoze i liye avek sa premye kestyon, mon ava eksplike ki mannyer nou pou pran sa lapros desantralizasyon kot nou ouver sant lasante apre ler e mon ava petet reponn kestyon onorab kan mon reponn sa kestyon.  Dezyenmman Msye Speaker kestyon long shifts  i en sistenm ki nou pe fer li lo en trial basis  kot nou pe revwar nou shift pattern e dan sa new shift pattern  i annan sa ki nou apel long shift  e  sa sistenm i aplik pou tou ners dan nou sistenm e parey monn dir i pa en keksoz defini i  en keksoz ki nou pe try pou 6 mwan  e apre 6 mwan nou pou fer en evalyasyon e si nou vwar ki i en sistenm ki nou kapab enplimant li lo en baz lonterm i ava kontinnyen e si nou santi ki i annan nesesite pou nou sanze, revwar li, nou ava revwar li.  E letan nou  pe fer sa analiz nou bezwen pran tou bann diferan konsern, diferan problenm ki nou rankontre pou nou kapab si oule vin ek en sistenm pli apopriye pou nou sistenm lasante.   Mersi Msye Speaker.

 

MR SIMON GILL

Msye Speaker mon ti oule demann Minis konbyen pou kout li pou enplimant sa bann sanzman ki in koz lo la e lot kestyon se dan en lespas konbyen letan i panse ki sa bann sanzman  avann fini ganny enplimante.  Mon trwazyenm kestyon..

 

MINISTER 

Msye Speaker mon krwar tou le 2 kestyon mon ava adres li letan mon adres dezyenm kestyon.  Mon krwar  sel sanzman  ki nou pe koze lo nivo santral se kreasyon sa nouvo sant aksidan e emergency  e pou lenformasyon manm lonorab, noun deza konsevwar en proze kot nou panse i pou  annan en nesesite pou nou konstri landrwa apopriye akoz landrwa kot nou ete ozordi i ase kwense e  nou pe anvizaze ki sa proze pou kout nou ant 1.3 a  2 milyon roupi – ki noun deza fer provizyon lo  proze kapital pou sa lannen kin ganny aprouve par sa lasanble pou sa bout sanzman ki monn koz lo la.  Me ler mon ariv, mon reponn dezyenm kestyon Msye Speaker mon a donn lonorab sif lo  konbyen i pou kout nou pou enplimant sa ki nou anvi fer  dan premye faz e peryod letan over ki nou pe panse nou pou konplet nou progranm pou ouver nou bann health centres  apre ler oubyen 24 lo 24.

 

MR PAUL CHOW

Msye Speaker Minis pe reponn kestyon 15 oubyen 16?

 

MR SPEAKER

16.

 

MR CHOW

16.  Eski Minis i kapab dir nou konbyen ners ki pe travay dan Casualty kin ganny training spesyal  deor dan bann, pou handle casualties. 

 

MINISTER 

Msye Speaker parey monn dir dan mon larepons noun pran mezir.  Enn bann mezir ki noun pran se pou fer sir ki bann staf ki ganny assign lo casualty i bann dimoun kin ganny serten formasyon dan domenn casualty avek  emergency e  mon napa okenn dout ki mon divizyon ki allocate  bann ners lo Casualty in pran sa koman en fakter e zot in fer sir ki bann ners ki ganny allocate Casualty i  bann ners kin ganny formasyon dan domenn casualty  e emergency.  Mersi Msye Speaker.

 

MR SIMON GILL

Msye Speaker mon kestyon pou Minis se ki kantite staf aktyelman ki pe ganny prepare pou rantre dan sa nouvo striktir.

 

MINISTER 

Msye Speaker kreasyon sa sant aksidan e emergency pou san dout nesesit serten formasyon enpe plis ki nou annan aktyelman e byen sir bann detay i a ganny travay anmenm tan ki nou pe prepar sa proze e byensir avan ki nou konplet proze, avan ki nou lans nou dan sa nouvo lapros, mon krwar i pou neseser pou fer sir ki tou bann staf ki pou ganny assigned  dan sa unit  i ganny formasyon neseser. 

 

MR CHRISTOPHER GILL

Mon ti a kontan demann Minis a ler aktyel pou deservi Casualty konbyen lanbilans nou annan, konbyen lo semen, konbyen dan garaz e si wi, si non nou annan en problenm mank pyes pou sa bann lanbilans e ki mannyer Minis i mazinen i kapab rezourd sa problenm si i egziste.

 

MINISTER 

Msye Speaker, dapre mon lenformasyon lanbilans ki baze kot Casualty  i annan 2 aktyelman e byensir nou annan lezot lanbilans ki baze lezot landrwa paregzanp Beoliere, Anse Royale and so on .  I vre Msye Speaker ki nou annan ankor en shortage lanbilans.  Monn vin dan lasanble lannen pase, monn dir nou ti annan en shortage,  nou ankor annan en shortage.  Rezon se ki noun plas komann pou 3 nouvo lanbilans me  in annan serten retar akoz sa bann lanbilans pe ganny finanse anba fon Abu Dhabi e in annan serten retar.  E lenformasyon ki mon annan se ki sa bann problenm in ganny rezourd, komann in ganny plase e nou anvizaze ki sa 3 nouvo lanbilans i ava rantre dan nou sistenm pli tar sa lannen ki ava donn nou enpe plis kapasite an term lanbilans pou nou kapab deservi bezwen nou bann dimoun.  Mersi Msye Speaker.

 

MR BIBI

Msye Speaker mon ti zis anvi demann Minis pou konfirm ek lasanble si i annan okenn ners konmela dan   Casualty kin ganny training overseas.   Mersi.

 

MINISTER 

Msye Speaker parey monn dir taler, petet mon a repet mon lekor se ki nou annan en ladministrasyon ki fer alokasyon ners avek tou bann diferan wards, diferan units e mon plis ki sir ki ler zot met en ners Casualty zot pou met en ners ki annan konpetans dan domenn Casualty.  Mersi Msye Speaker.

 

MR SPEAKER

Kestyon nimero 15

 

MR ESPARON

Msye Speaker mon ti oule demann Minis…

 

(interruption)

 

MR SPEAKER

Mon’n pran kestyon 16 avan.  La mon pe pran kestyon 15.  Onorab Esparon.

 

MR  ESPARON

Msye Speaker mon ti oule demann Minis pou lasante si i pe konsider ouver bann sant lasante, bann klinik apre ler travay normal e dan weekend.   Mersi.

 

MINISTER 

Msye Speaker pandan sa dernyen 20 an gouvernman in san dout met an mars en polisi desantralizasyon lo servis lasante kot noun sey fer nou mye pou nou anmenn servis lasante dan la plipar distrik dan Sesel.  Noun fer bokou progre pou konstri sant lasante oubyen elarzi, moderniz bann ki egziste lo Mahe, Praslin, La Digue e osi Silhouette.  Nou progranm i pa zis fer nouvo batiman Msye Speaker me nou osi met lanfaz lo devlopman e amelyorasyon diferan servis dan nou bann sant lasante.  Lenplimantasyon nou progranm lasante Msye Speaker, i fer dapre en polisi e en plan a lonterm.  Se dan sa perspektiv desantralizasyon e devlopman servis lasante Msye Speaker ki nou annan en vizyon e sa vizyon se fer sir ki a lavenir tou nou bann sant lasante dan tou nou distrik i devret ouver ziska tar aswar e serten osi i devret ouver 24 er lo 24 er.  Se dan sa fason Msye Speaker ki nou pou anmenn servis lasante pli pros avek nou kominote.

Msye Speaker la ki noun ariv a en staz dan nou devlopman lasante  kot nou kapab  anmenn swen lasante primer dan tou bann diferan distrik, nou krwar ki ler in arive pou nou ogmant letan ki nou bann sant lasante i reste ouver.  Sa i ava anmenn nou enn ou 2 pa pli pre ver nou vizyon.  Parey monn fek eksplike Msye Speaker dan premye kestyon, nou krwar ki i neseser pou nou ouver serten sant lasante dan distrik ziska tar akoz premyerman i annan en bezwen e dezyenmman pou nesesit servis aksidan e emergency lo nivo santral fonksyonn fason ki nou ti a oule i fonksyonnen. 

Byensir Msye Speaker menm si nou plan a lonterm  se pou ouver tou sant lasante ziska tar aswar menm ouver serten 24 er lo 24 er anvi ou lezot priorite e byensir serten konstren ki nou annan i pa posib pou nou realiz  sa lobzektif imedyatman.  Nou bezwen progranmen dapre bezwen distrik e dapre resours  imen e pli enportan resours finansyel ki a nou dispozisyon.  E nou panse i pou pli pridan pou nou adopte en lapros gradyel, sa vedir nou fer li faz par faz.  Koman en premye faz Msye Speaker nou pou ouver 2 sant lasante lo Mahe ziska 8 er diswar pou dimoun kapab ganny servis dokter olye al kot Casualty.  A parti premye Avril Msye Speaker sa vedir mwan prosen, sant lasante English River en Anse Aux Pins pou reste ouver depi 8 er bomaten ziska 8 er diswar tou lezour. 

Noun deside Msye Speaker ouver sa 2 sant lasante ziska 8 er pandan sa premye faz akoz swivan en analiz ki noun fer, noun konstate ki 69% bann ka ki raport Casualty  i fer li ant 4 er avek 8 er diswar.  Se sa peryod ki nou krwar i annan plis presyon lo sistenm Casualty.   Dapre sa menm analiz Msye Speaker noun konstate ki 64% dimoun i sorti dan rezyon English River, Beau Vallon e Nor Mahe an zeneral tandis ki ape pre 30% i sorti dan rezyon Anse Aux Pins, Pointe Larue, Cascade e byensir balans se bann dimoun ki al kot sant lasante  Anse Royale ki deza ouver 24 er lo 24 er e osi sant lasante Beoliere ki ouver 24 lo 24.  Apre sa premye faz Msye Speaker, nou pou etidye fonksyonnman sa servis tre pre e pou vwar si nou pou ouver lezot sant lasante koman en dezyenm faz. 

Noun osi planifye pou nou dezyenm faz Msye Speaker e ladan nou pe mazinen ouver sant lasante Beau Vallon, Anse Boileau avek Les Mamelles ziska 8 er.  Nou pou osi mazin posibilite ouver sant lasante English River  e Anse Aux Pins, 24 er lo 24 er.

Nou pe anvizaze Msye Speaker akoz i pou involve kou finansyel, ki  si tou keksoz i mars byen nou oule enplimant sa dezyenm faz ver Avril 1998.  Koman en trwazyenm faz Msye Speaker nou annan plan pou nou ouver  sant lasante 24 er lo 24 dan tou le 4 rezyon lo Mahe.  Nou oule adopte sa konsep sant lasante rezyonal, e la nou pe konsider nouvo sant lasante English River ler i konplete pou deservi rezyon santral, sant lasante Beau Vallon kan nou ranplas li avek nouvo sant ki dan nou plan pou deservi rezyon nor, Anse Aux Pins pou deservi rezyon les, pou konplemant sant lasante Beoliere ki deservi rezyon was ki deza ouver 24 lo 24 e Anse Royale pou rezyon sid ki osi ouver 24 lo 24.  Apard sa bann sanzman Msye Speaker mon minister pe met an mars en progranm amelyorasyon bann sant lasante ki deza ouver 24 er lo 24 er.  Sa i enkli Anse Royale kot bokou travay in deza ganny fer, Praslin kot byento nou pou ouver en nouvo lopital e sant lasante e Beoliere kot nou annan plan pou ranplas sant lasante aktyel kin ganny konstri dan bann lannen 40 avek en nouvo sant lasante pli modern e  Beau Vallon parey monn deza anonse  pou ranplas sant lasante aktyel kin deza tro pti pou deservi  bezwen Beau Vallon.  Mersi Msye Speaker.

 

MR SPEAKER

Okenn siplemanter? 

 

MR ESPARON

Msye Speaker dabor mon lapresyasyon pou lefe ki klinik Anse Aux Pins pe ganny ouver ziska 8 er diswar  koman en premye faz.  Mon ti a kontan demann Minis si dan louvertir bann klinik e health centres  dan premye faz i vedir ki louvertir tou bann servis ki kolateralman i al avek sa servis bann dimoun pou vwar dokter eksetera paregzanp  farmasi, pansman eksetera.

E dezyenm, dapre letid kin fer, konbyen pou koute dan premye faz paregzanp pou ouver klinik, paregzanp klinik Anse Aux Pins, 8 erd-tan depi 8 er  bomaten ziska 8 er diswar, ki bann laranzman an sa ki konsern administratif pou bann staf eksetera e dokter, konbyen dokter an plis ki pou bezwen met a dispozisyon klinik Anse Aux Pins paregzanp.  Mersi.

 

MINISTER 

Msye Speaker mon krwar nou plan a lonterm ler nou pe koz ouver nou bann sant lasante apre ler, nou plan se donn tou servis ou laplipar servis  ki pe ganny donnen lizour.  Me byensir pou nou kapab fer sa Msye Speaker i pou annan nesesite pou nou petet recruit additional staff diferan kad staff me nou panse koman sa premye faz nou pou donn bann servis debaz, bann servis ki normalman dimoun ti pou raport Casualty, sa vedir vwar dokter, ganny latizann, oubyen konsey.  Nou panse osi ki menm bann servis parey family planning nou pou kapab fer li ant sa letan.  Nou annan en lalis bann diferan fonksyon ki pou nou komanse nou pou donnen dan tou sa bann sant lasante ki pou ouver apre 4 er e osi dan weekend me parey mon dir nou plan a lavenir se donn tou sa ape pre 12 kalite servis ki ozordi nou pe donnen dan bann sant lasante lo Mahe Praslin e La Digue menm apre 4 er.  Me parey mon dir i pou en nesesite pou nou recruit additional staff  e osito ki nou kapab fer sa nou ava si oule donn sa bann servis  ki monn fek koz lo la.  An term kou Msye Speaker, noun fer analiz pou ouver sa 2 sant lasante English River,  avek Anse Aux Pins.  Nou panse nou pou bezwen 2 additional nurses over and above sa ki nou annan e byensir i annan serten servis parey dokter, ki nou servi menm dokter me nou pou bezwen petet pey li enpe overtime e nou pou bezwen lezot kad travayer parey records  clerk,  parey skilled worker pou netwayaz and so on.   Tou sala noun cost  li out,  e nou estimen ki pou nou enplimant sa premye faz, English River i pou kout nou ape pre 225,000 roupi sa lannen e pou enplimant li Anse Aux Pins ki pli pti ki English River e ki pe servi en smaller catchment area,  i pou kout nou ape pre 154,000 roupi e nou sonm total i a pe pre 377,000 si mon rapel byen pou sa premye faz e sa i sorti dan nou bidze sa lannen.  Nou pa pou bezwen additional bidze pou nou kapab enplimant sa premye faz.  Mersi Msye Speaker.

 

MR WALTER CONFAIT

Msye Speaker la koman klinik Anse Aux Pins pou ouver ziska 8 er mon   ti pou demann Minis ki bann fasilite ki sa klinik pou donnen me mon krwar in reponn sa kestyon deza.  Mersi. 

 

MR DE COMARMOND

Msye Speaker premyerman mon ti ava voudre remersi Minis pou eksplik sa reorganizasyon ki paret tre, tre enteresan, pou vwar si i mars byen…

 

MR SPEAKER

Annou pa tonm dan labitid.

 

MR DE COMARMOND

kestyon Msye Speaker eski avek sa reorganizasyon  bann travayer lasante ki pou enplike anvi ki pou ganny ogmantasyon dan zot duty, eski zot pou ganny en ogmantasyon osi dan zot lapey. E dezyenmman eski minister pe konsidere reorganiz en sistenm transpor pou bann travayer lasante ki fini tar e an menm tan en sistenm sekirite pou sa bann dimoun akoz dan serten petet sa bann distrik i pa parey dan Victoria, alors i enportan e an menm tan eski i pou annan en lanbilans atase kot sak sa bann klinik ki pou ouver ziska plitar.  Mersi Msye Speaker.

 

MINISTER

Msye Speaker ogmantasyon saler larepons i non.  Parey monn dir noun work out nou manpower requirement  pou sa bann dimoun,  additional staff  ki nou pou bezwen e nou pou bezwen retir parey monn dir nou bezwen 2 additonal nurses paregzanp English River,  nou pou bezwen retir 2 ners dan nou sistenm dan  en lot landwa pou nou kapab meet bezwen sa sant  lasante.  Me parkont Msye Speaker i posib ki pou arive ki serten staf i pou bezwen travay  overtime.   Paregzanp mon pa krwar i neseser pou nou recruit  en addtional cleaner.   Me nou kapab demann sa cleaner pou fer sa detrwa erd-tan an plis kot nou pey li son overtime.   E sa i an ord.  Epi nou bezwen fer sir koman en minister se ki sa dimoun pa travay over and above, even  ek son overtime  limit ki lalwa i permet nou ki mon krwar nou tou nou okouran e nou a fer sir ki sa pa ganny fer. 

Transpor Msye Speaker, i deza pratik dan nou sistenm lasante kot nou transport nou bann travayer apre ler.  Paregzanp bann ners ki travay aswar, ler zot sanz shift  7 er edmi diswar nou anmenn zot se zot e mon krwar menm lapros i bezwen ganny adopte pou bann staf ki pou deservi sa bann nouvo sant lasante kot nou pe extend opening hours e in fact dan costing  ki monn donnen i enkli transportasyon bann staf.

Trwazyenmman Msye Speaker mon pa tro konnen ki sekirite onorab ti a kontan nou donnen me mon krwar ti a bon onorab i realize ki pou annan en kou ki pou atas avek sa akoz mon krwar sekirite ki nou kapab donnen se met national guards.  Me sa i expensive.  Me pou le moman i pa lapratik ki nou donn sekirite nou bann travayer e i pa en keksoz ki noun konsidere dan sa reorganizasyon.

Lanbilans Msye Speaker, English River i deza annan en lanbilans ki atase avek li aktyelman e i pou tou normal ki sa lanbilans i kontinnyen ganny atase ziska ler ki health centre  i fermen 8 er.  E kan nou pou move  lo nou dezyenm faz, si nou pou ouver li 24 er then  i pou bezwen annan en lanbilans ki atase avek sa health centre 24 lo 24, akoz si i annan en ka ki dokter i santi i en ka emergency then  nou pou bezwen annan fasilite pou nou kapab transport sa pasyan o pli vit posib pou anmenn li lopital Victoria pou li ganny swen dirzans. 

E dan kote Anse Aux Pins ozordi mon  pans pa si i annan en lanbilans ki atase avek li me noun deza realize ki i annan nesesite pou met en lanbilans avek health centre l’Anse Aux Pins.  Nou tin kapab fer li parey monn dir si nou tin ganny sa bann lanbilans ki lo komann me osito ki nou ouver sa sant lasante ziska 8 er nou pou bezwen rod fason, menm si sa 3 lanbilans pankor arive pou nou atas en lanbilans avek sant lasante Anse Aux Pins.  Mersi Msye Speaker.

 

MRS MARIE LOUISE POTTER

Mon ti a kontan komann Minis pou plan ki zot annan pou amelyor nou servis lasante avan mon komanse…

 

MR SPEAKER

Order, order.

Tyonbo en kou.  Nou pe komans antre dan labitid fer en statement avan. Question time ou vin lo ou kestyon.  Mon konpran ou santiman me prosedir i konmsa.  Onorab Potter.

 

MRS POTTER

Mon kestyon se eski anlinny avek lentansyon minister pou amelyor son kalite servis ki i pou donnen a lavenir, eski minis i kapab dir nou kan i ekspekte ki en masin ki detekte kanser breast cancer,  en mamogram i  sipoze ganny met a servis pli partikilyerman bann madanm isi.

Dezyenm, in nonmen ki dan sa trwazyenm faz reorganizasyon sa nouvo health centre Beau Vallon  pou vin enn bann sant rezyonal ki pou ouver 24 er.  Eski Minis i kapab dir nou ape-pre kan nou ekspekte vwar komansman konstriksyon sa sant.  Mersi.

 

MINISTER

Msye Speaker lentrodiksyon en mamogram pou detekte breast cancer parey Lonorab in mansyonnen i enn parmi bann morso lekipman ki noun idantifye koman en nesesite dan nou sistenm lasante anlinny avek nou progranm pou kontinnyelman amelyor e devlop nou sistenm lasante avek plizyer lezot morso lekipman.  Sa lekipman noun deza plas komann pou li e si oule i parmi plizyer morso lekipman ki pe ganny finanse anba en pre ki Abu dhabi in donn nou.  Parey monn eksplike in annan serten problenm pou deblok serten fon avek sa fon kin donn nou serten retar me lenformasyon ki mon annan se ki tou bann problenm administratif in ganny rezourd e ki komann in ganny plase.  E nou ekspekte ki sa lekipman avek plizyer lezot i ava antre dan nou sistenm saniter  plitar sa lannen.

Konstriksyon sant lasante Beau Vallon Msye Speaker, si mon memwar i bon, letan mon ti vin la mon ti eksplike lannen pase pou dir ti nou priyorite nimero 2 an term nouvo sant lasante ki pou ganny konstri apre English River  ki noun deza komanse, Beau Vallon i the next one me mon krwar parey mon ti eksplike Msye Speaker sa 2 sant lasante avek, si mon rapel byen sant lasante Anse Etoile nou ti pe anvizaze finans li atraver en pre sorti  kot labank afriken, labank devlopman afriken.  Noun ganny enpe retar dan le sans ki noun bezwen revwar package  sa proze.  Nou annan 2 appraisal missions  sorti ADB.  Ti annan enn ki ti isi an zanvye sa lannen e noun fer diskisyon e  appraisal mission in retourn Abidjan e nou annan lendikasyon ki proze pou ganny met devan board ADB sometimes  in May, June  sa lannen e si tou keksoz i mars byen, sa package  i ava ganny aprouve.

Si nou rankontre okenn retar Msye Speaker, mon krwar gouvernman in fer en commitment avek dimoun Beau Vallon ki pou konstri en nouvo health centre pou ranplas sa ki nou annan ozordi ki ti en lakaz, kin ganny convert into a health centre,   byensir in deservi nou bezwen pandan sa dernyen 20 an, anvi ki i annan devlopman dan distrik Beau Vallon, nonm dimoun in increase ozordi in ariv ape pre 4,000 e kek, mon krwar gouvernman, sa gouvernman ki la in fer en commitment ki nou pou donn zot dan Beau Vallon en health centre.   The worst comes to the worse i avan rantre dan nou bidze pou lannen prosenn e ki  i ava ganny finanse par gouvernman. Me antre tan nou kontinnyen nou demars avek external funding nou swete ki tou i ava mars byen, ki nou ava komanse me si non parey monn dir plitar ki pou komanse se lannen prosenn si nou pa ganny funding  sa lannen.

 

MR DANIEL BELLE

Merci Monsieur le Président.  Monsieur le Président ‘etant donné que le ministre nous a exposé la situation de Mahé, Praslin et La Digue, est-ce-qu’il pourra nous élaboré de la situation des gens qui vivent sur les autres îles de notre archipel.  Merci.

 

MINISTER

Msye Speaker pou lezot zil sel landrwa ki nou annan sant lasante se Silhouette.  E la osi nou panse ki i annan nesesite pou nou fer serten pti amelyorasyon avek sa sant lasante paregzanp refer son twatir e sa i ava ganny fer fir a mezir ki nou bouze.  Pou lezot zil Msye Speaker nou annan laranzman avek IDC kot an ka i annan okenn difikilte, okenn ka irzan, okenn nesesite medikal pou sa bann zil, premyerman bann managers,  i annan serten staf lo zil ki ganny train dan domenn first aid  e nou travay tre pre avek IDC pou nou donn sa bann formasyon me si i annan en ka kot pa kapab ganny deal avek o nivo sa zil then  nou annan en sistenm call si oule, 24 lo 24 kot en demann i kapab ganny fer avek lopital kot nou dispatch led apopriye pou kapab deal  avek nenport sityasyon ki nesesit lentervansyon medikal lo nenport zil depandan lokasyon sa zil, parfwa nou servi elikopter, depandan ki ler in arive si dan lizour oubyen aswar e nou annan sa kolaborasyon si oule ant nou menm, Air Seychelles avek IDC pou zisteman deal avek sa bann tel sityasyon.  Mersi Msye Speaker.

 

MR WAVEN WILLIAM

Msye Speaker mon ti a kontan demann  Minis si parmi sa 12 servis ki bann klinik dan distrik pe ofer, eski servis danter osi pou ganny prolonze kot bann klinik i annan ziska plitar.  Dezyenmman swivan larepons Minis, eski i kapab donn nou en lendikasyon kan eski klinik Beoliere pou ganny sa nouvo sant.

 

MINISTER 

Msye Speaker pou sa premye faz, i pa nou lentansyon pou nou extend servis danter akoz son bezwen ou son demann i pa sitan o parey pou lezot servis me i dan nou plan a lavenir pou nou extend servis danter osi  e fir an mezir ki nou mwayen i permet nou ki nou annan ase resours imen e finansyel pou nou kapab extend   sa servis nou ava fer li.

Nouvo sant lasante Beoliere Msye Speaker i en size ki nou pe analize pandan plizyer mwan e noun defini koman enn bann sant priyorite  ki bezwen ganny rekonstri.  Parey monn dir sa health centre  in ganny konstri dan bann lannen 40, in ganny konstri si mon konpran byen avek laso e  Msye Speaker mon krwar nou tou ki la nou realize ki en vye loto i touzour en vye loto menm si ou re spray  li, ou repenn li i retourn ankor vye.  Mon krwar sa health centre in servi son purpose bearing in mind depi ler in ganny konstri e nou panse in ler pou nou ranplas li.  Sel problenm ki nou annan  se ki nou pankor kapab idantifye pou ganny en site apropriye transfer avek nou.  I annan enn de sizezyon in ganny met devan Msye Speaker.  Nou ankor pe diskite avek minister devlopman kominoter.  E osito ki nou kapab finaliz site then nou a kapab komans planifye li, komans prepar plan neseser e apre idantifye funding sources pou nou kapab refer sa sant lasante.  Mersi Msye Speaker.

 

MR ANDRE POOL

Msye Speaker an’n atandan lenplimantasyon dezyenm faz ki Minis in eksplik nou kot health centre  Anse Boileau pou donn en servis plitar ki pe donnen konmela an Avril 1998 mon ti a kontan demann li si an’n atandan sa lenplimantasyon si son minister ti a kapab fer bann laranzman neseser pou ki ler i annan bann emergency apre 4 er oubyen dan weekend sa dimoun konsernen i kapab vwar dokter sirplas e non pa parey konmela kot ners i bezwen telefonnen pou rod dokter kot i ete e souvann fwa ki i pas plis ki 30 minit pou sa arive.  Mersi.

 

 

MINISTER

Msye Speaker konsern lonorab in ganny fer resorti o paravan, pe ganny get ladan parey nou dir an kreol e mon a fer li mon devwar pou mwan regard ankor e fer sir ki son konsern ki in fer resorti i ganny attended to  e ki son bann zabitan i a kapab ganny en servis dirzans en pti pe pli vitman ki leka aktyelman.  Mersi Msye Speaker.

 

MR PAUL CHOW

Msye Speaker an vi repons ki Minis in donn lonorab Decomarmond lo kestyon ogmantasyon lapey, eski Minis i oule dir nou ki son gouvernman i konsidere ki sa bann travayer pa dezerve sa ogmantasyon.

 

MR SPEAKER

Non, non.  Onorab Simon Gill

 

MR SIMON GILL

Msye Speaker mon ti oule demann Minis si i satisfe ozordi avek servis transportasyon bann staf e si non si i kapab promet nou ki i ava kapab etidye sa sityasyon.  Mersi.

Dezyenm kestyon mon ti oule demann Minis ki kantite staf i pe mazinen i pou bezwen avek sa reorganizasyon, e ki mannyer i pe met an aplikasyon son travay, legzersis rekritman bann dimoun e progranm training pou zot.  Mersi.

 

MINISTER

Msye Speaker mon krwar dan tou sistenm nou pe koz transportasyon i touzour annan room for improvement parey nou dir an angle.  Mon pa pou dir sa ki nou annan i parfe ozordi.   Mon krwar i annan touzour posibilite pou nou amelyore me  mon krwar nou koup nou palto dapre latwal ki nou annan parey nou dir an kreol.  Pou le moman se tou ki nou annan. Nou kapab afford  sa detrwa bis ki nou annan pou transport nou bann staf o fir a mezir ki nou annan plis resours a nou dispozisyon mon krwar nou a fer li nou devwar koman en minister, ki nou annan responsabilite premyerman anver piblik me mon krwar pli enportan se annan responsabilite anver nou staf.   Nou staff welfare  i tre enportan i tre enportan.  Nou bezwen fer sir si oule ki zot  perform  byen ki nou okip zot byen.  E sa mon kapab donn onorab lasirans ki i enn nou polisi, i en keksoz ki ganny fer toulezour pou nou sey rod fason ki mannyer ki nou amelyor kondisyon nou bann staf.  E parey monn dir ler nou a ganny plis resours, nou ava  rod  fason pou nou amelyor nou sistenm transportasyon ki nou annan ozordi.  I pa parfe, me i touzour pe ede. 

Dezyenm pwen, Msye Speaker, kestyon ki onorab in souleve, mon krwar i pou  involve  en  manpower planning exercise  en pe detaye, se pou sa rezon ki nou pe fer li par faz, noun fini planifye nou lekor pou sa 2 premye health centres.    Lefe ki nou vizyon i lon term, e nou annan en plan a lavenir, nou pou bezwen asize e sa in deza komanse  already  sa legzersis kot nou pe regard nou  manpower needs  e la nou pe regard tou diferan  manpower  ki nou bezwen pou tou servis e nou bezwen petet alavenir rod lezot fason pou nou kapab entansifye nou  training  pou nou bann diferan kad travayer.  Tousala, Msye Speaker, i pe ganny analize.  Se pou sa rezon ki nou panse, nou pa lans dan sa proze an gran, nou fer li dousman, faz par faz e i a donn nou sans  between la ziska Avril 98 pou nou plann nou dezyenm faz ek nou trwazyenm faz e anmenmtan nobou idantifye ki resours finansyel ki nou bezwen e nou a kapab met li a tan dan bidze 98 pou nou vwar si nou pou kapab ganny sa finansman ki nou pe demande pou nou kapab enplimant sa ki nou anvi enplimante pou nou dimoun.

 

MR SPEAKER

Dernyen kestyon. Onorab  Toussaint.

 

MR ROGER TOUSSAINT

Dapre lesplikasyon ki Minis in donn nou, san dout pou annan en gran amelyorasyon dan nou sistenm lasante e sa pou kout gouvernman, minister lasante bokou plis larzan parey minis in esplik nou.  Eski i kapab dir nou si son minister i annan lentansyon alavenir…

 

MR DANIEL BELLE

Pou donn ogmantasyon bann travayer.

 

MR TOUSSAINT

… pou konsider serten  fee  pou bann ki pe gaspiy sistenm lasante, sirtou bann travayer ki parfwa zis al rod konze dokter e zot gaspiy sa bann medikaman ou latizann ki zot gannyen?

 

MINISTER

Lentrodiksyon   user fee  i pa en size ki nou pe regarde akoz mon krwar dan nou konstitisyon  in ekri tre kler ki lasante primer i ganny  provided   free at the point of use, so  nou bezwen si oule planifye nou lekor e enplimant nou politik lasante an linny avek provizyon konstitisyonel. 

 

MR  BELLE

Bann travayer lopital pou ogmant zot saler.

 

MR SPEAKER

Order.

 

MR SIMON GILL

Nou donn li 9,000.

 

MR SPEAKER

Bon, avek sa nou fini avek kestyon pou Minis Lasante e nou eskiz li parmi nou.

Nou vin lo motions  e premye mosyon prezante par Onorab Bibi.  Mon envit ou pou prezant ou mosyon.

 

MR GEORGES BIBI

Msye Speaker, mon mosyon, mon pe demann lasanble pou pran en rezolisyon pou ki i annan en  tender board  endepandan ki ganny etablir pou antretenir tou bann  tender  piblik.  Msye Speaker, linisyativ pou sa mosyon in vini apre bokou konsern ki manm piblik an zeneral in fer resorti kot i konsern lafason ki  tender  pou si oule dispoz bann propriete piblik – ler mon dir propriete piblik, vedir dan departman gouvernman e bann  parastatals,  lafason ki bann kontra, swa pou donn  supply  pou bann landrwa parey prizon, medikal ou ledikasyon ouswa bann kontra pou konstriksyon dan bann semen e lafason ki i ganny fer  ozordi.

Msye Speaker, i annan bokou legzanp deor ki nou kapab donn serten legzanp kot bann  tender   napa en serten  standard procedure  ki pe ganny swivre.  Si nou gete napa menm serten lareg ki gid bann departman gouvernman konmela dan lafason si oule en  set standard rules dan lafason ki bann  tender  i devret ganny fer.  Ozordi, si oule, Minister Lasante i fer son tender  en fason e son  accounting officer  ki responsab pou sa, li ki  deside e minister dizon minister  devlopman  kominoter i fer son  tender  e ankor enn fwa li pou li i diferan e sa dan limenm i kree serten endisiplin dan lafason ki bann propriete piblik i ganny si oule dispoze ouswa bann kontra limenm i ganny fer e i kree si oule pou mwan personelman, mon krwar serten  unfairness  lo bann dimoun si oule ki anvoy zot bann  tender.

Lobzektiv ki mon pe demande pou ki sa  tender board  i ganny  set up  se akoz anmenmtan Msye Speaker pou nou kapab annan en serten disiplin finansyer.  Vedir kot ler nou annan en prosedir, nou annan en  board,  nou konnen ki tou dimoun i a  focus  lo sa    board  ki egziste e bann departman i ava asiste si oule an term teknik pou donn  lenformasyon sa  board  lo zot bezwen kot i konsern  tender. Anmenmtan, Msye Speaker lesansyel ki sa  board  i devret egziste se anmenmtan pou minimiz bann  collusion  si oule ouswa minimiz  leakages  dan bann departman.  Nou konnen, in arive kot ler i annan en  tender  ouswa nou konnen pou dir se pa i annan tel propriete pou ganny vann, nou konnen pou dir en tel, en tel ki travay dan tel departman i sorti, i dir ek en tel, i annan tel propriete gouvernman pe al vann e bokou dimoun i konn sa, i ganny sa ki nou apel sa  inside information.   Annou pran en legzanp – ki mannyer ozordi dan en  tender  ki i annan propriete piblik en dimoun ki egzekitiv dan sa serten organizasyon, limenm ki nobou ganny drwa pou li aste serten propriete piblik.  E mon krwar si sa i leka, i montre ankor pou dir i annan serten endisiplin dan lafason ki  tender  i ganny fer.  Nou pran en legzanp klinik Larivyer Angle, Msye Speaker.  Klinik Larivyer Angle ti ganny met lo tender  pou 6 milyon roupi.  E sa klinik apre ti ganny deplase pou al fer dan en lot landrwa e son kou dapre nou konpran ti vin  pou 9 milyon roupi.  Me sa   tender  pa ti ganny remete ankor lo  market  me sa  dimoun ki ti gannyen, ti ganny li direkteman san okenn  tender.   Dapre en  set procedure, mon krwar pou dir si en  tender  i annan okenn sanzman, i bezwen ganny remet lo  market  kot tou dimoun i ganny son sans pou li re-apply  e ganny son  tender  rekonsidere.

Msye Speaker, mwan mon krwar personelman pou nou kapab annan en pli bon kordinasyon lafason ki propriete gouvernman, propriete piblik, dan  parastatals  e dan bann leta gouvernman, nou bezwen annan nou si oule en  fason ki nou kapab kontrole pou sirtou pou menm  Auditor  General  pou li kapab kontrole lafason ki bann  tender  i ganny fer.  En  tender board  nou nou pa pe re-envant larou Msye Speaker,  tender board  in egziste depi letan kolonyal. Tender Board in egziste ziska 1975, ozordi dan financial order, nou napa en lareg set fiks ki nou kapab dir en  hard and fast rule  ki mannyer propriete leta i ganny dispoze, ki mannyer kontra ouswa depans leta ler pou donn en kontra i ganny fer.  E mon dir sa akoz koman en  gouvernman ki ganny elekte, i vin parey en  manager,  i ganny elekte pou li zer propriete leta e piblik ki la i konsernen e ler nou vwar pou dir ki propriete leta ki swa i ganny dispoze, ki swa i annan depans leta pou fer, i ganny fer dan en fason ki mal, ki pa apropriye, ki napa kontrol, ki napa disiplin, mon krwar piblik i konsernen.  Sa lannen, Msye Speaker, Prezidan in deklar li lannen  sharing and caring e mon krwar si nou annan nou en  board tender petet i ava vin  fair and square  lafason ki propriete gouvernman i ganny deal.  Msye Speaker, I beg to move.

 

MR SPEAKER

Okenn ki segonn sa mosyon?  Onorab Belle.  Deba i ouver, okenn entervansyon? Si napa … Onorab Belle.

 

MR DANIEL BELLE

Monsieur le Président, bien sûr, j’apporterai mon soutien à la motion que mon honorable collègue vient de mettre devant l’assemblée.

Quant il s’agit de  deniers publics, il est tout à fait normal que les parlémentaires doivent veiller à ce que l’argent, les fonds publics soient bien depansés et qu’il n’y ait  pas de, comment dirais-je, des pots de vin ou des choses pareilles qui discréditent d’une certaine façon notre société.   Je vais pas être très long parce que je vois que cette motion va être adoptée par l’assemblée, mais il va de soit que l’interet que l’honorable Georges Bibi a apporté au sujet de la façon les appels d’offres sont  effectués aux Seychelles, quand même est très intéressant et c’est pour cette raison que je crois étant donné le passé, les évenements qui d’une certaine façon a terni un peu l’image des gouvernements, je  crois qu’il serai de bon temps que nous puissions avoir une commission independante pour gérer et prendre des decisions en ce qui concèrnent les appels d’offres dans le pays. 

Monsieur le Président, je vous remercie.

 

MR PAUL CHOW

Msye Speaker, mon vwar ki nou’n ganny en konsansis lo sa mosyon e ki sa i tre ankourazan me sepandan problenm ki nou fer fas avek lo kestyon  public tender  i an realite en problenm tre grav parske nou pe koz lo depans larzan piblik.  Ler nou depans larzan piblik nou bezwen rann kont e nou bezwen fer li dan en fason ekitab. Ler larzan piblik i ganny depanse pou fer proze, paregzanp pou met  tender  pou fer proze, tou dimoun i bezwen ganny en menm loportinite.  Ler mon dir tou dimoun, tou bann ki anvi met zot  tender  si zot kalifye pou fer li i devret ganny menm sans, menm loportinite pou zot nobou kapab ganny konsidere e mon krwar deor nou antann bokou ki dir sirtou lo kestyon bann kontra ki keksoz pa mars byen.  I toultan difisil, ou tann dimoun dir ki mannyer en serten kontrakter in ganny  tender.  E gouvernman li i  annan en fraz ki i servi, ki si napa en bon sistenm de  accountability  piblik i pou toultan ganny abize, se sa fraz ki dir  government is not bound to accept highest or lowest offer.   Sa nou toutafe dakor ki gouvernman i bezwen protez le fon piblik e sa osi si ou napa en sistenm ki  transparan e kler i kapab ganny abize.  I annan serten sitiasyon paregzanp ki gouvernman pa devret aksepte   the lowest offer, i annan sitiasyon osi kot gouvernman pa devret aksepte  the highest offer.   Gouvernman i bezwen fer sir ki sa proze ki bezwen ganny fer, ki i ganny fer dan en fason meyer ki posib pou protez lentere piblik.  Me nou osi vwar Msye Speaker ki en kantite depans gouvernmantal pou aste keksoz i ganny fer san en  public tender.  Lontan menm dan lepok kolonyal ti annan bann  public tender system  e ti toultan fer dan en fason kot tou dimoun  ki pran par ladan i satisfe ki sa dimoun kin gannyen in ganny sa tender  lo en plan egalite e i dezerve pou li ganny sa  tender.   Me i toultan annan loportinite pou kestyonnen e ler ou kestyonnen ou nobou ganny en repons.  Ozordi mon krwar ki noun tonm en pe dan le defayans parske par ler repons pa gannyen e piblik pa konnen ki mannyer desizyon in ganny fer.  Tou sa Msye Speaker,  i ede pou anmenn en transparans lo depans piblik e si nou fer en  public tender board, an independent tender board i ava tir loportinite ki okenn  civil servants  oubyen zofisye gouvernman i kapab itilize pou favoriz serten dimoun oubyen fer koripsyon.  Msye Speaker, nou pa pou koz lontan lo sa mosyon e mon antisipe ki tou lonorab de lot kote pou donn zot sipor san pou san.

 

MR ROGER TOUSSAINT

Pou komanse si monn konpran byen pwen eksprimen par Onorab Bibi, in dir klerman ki mosyon in vini atraver konsern piblik lo lafason ki prosedir  tender  i marse e in sit ki napa okenn  standard procedure  e lobzektiv prensipal se ki ou kapab anmenn endisiplin finansyer e an menm tan pou minimiz  collusion.   

An sa ki konsern son kestyon spesifik lo klinik  English River, sa mon krwar, Msye Bibi i kapab anmenn sa dan  Question Time  pou kapab ganny en leklersisman. 

Msye Chow li dan son lentervansyon in plizoumwen dir ki i krwar tou dimoun i devret ganny menm sans e menm loportinite pou kapab si oule an sa ki konsern  tender.   Bon, Msye Speaker, pou ki piblik i kapab konpran egzakteman lo ki size ki nou pe koze, mon ti a kontan esplik en pti pe prosedir ki mannyer sistenm  tender  dan gouvernman i marse.  Tou proze ki parlao 100 mil i devret ganny met lo tender.   Bann lenformasyon konsernan sa proze i ganny pibliye dan zournal pour en peryod letan, normalman i 2 semenn pou permet piblik soumet zot  tender.   Apre  ki  tender  in fermen, tou bann aplikan i ganny kontakte e  tender  i ganny ouver dan zot prezans, savedir sak parti konsernan i konnen klerman kotasyon lezot aplikan.  Prezan Msye Speaker, pa neseserman parey Msye Chow in dir sa dimoun ou kontrakter, ki son kotasyon i pli  ba i ganny aksepte.  I annan plizyer rezon akoz sa i le ka.  Premyerman i tre posib ki sa dimoun in soumet son kotasyon pli ba zis pou li ganny sa proze, me sepandan i pa pou kapab konplet sa travay dapre spesifikasyon.  Dezyenmman i posib sa dimoun napa  kapasite fer sa travay ouswa i napa en bon rikord, oubyen i pa serye, eksetera.

Msye Speaker, mon pa vwar naryen mal avek en tel sistenm, tou dimoun i ganny zot sans pou  tender  e i tre transparan parey monn fek esplike.   Tender  i ganny ouver dan prezans bann aplikan.  En lot prosedir ki osi enportan pou mansyonnen Msye Speaker se tou tender i ganny odite.  Sa bann zofisye gouvernman letan zot prepar  tender,  zot fer sir ki tou prosedir neseser i ganny respekte akoz zot bezwen soumet en rapor detaye avek oditer ki an retour odit e verifye si tou keksoz i mars byen.  Tou fason si i annan okenn anomali sa i ganny reflekte dan rapor oditer zeneral ki ganny soumet devan lasanble nasyonal.  Msye Speaker, mon pa vwar okenn nesesite pou gouvernman apwent okenn  board  endepandan parey  mosyon Msye Bibi pe demann lasanble, akoz sa sistenm ki la i mars byen.  Sa sistenm ki nou annan pe ganny pratike dan plizyer lezot pei paregzanp prosedir  tender  Langleter.  Parfwa gouvernman Langleter i apwent  en konsiltan sorti dan sekter prive, dan bann ka kot i bezwen bann  advice  tre teknik, me rol sa konsiltan se pirman pou fer en rekomandasyon, se gouvernman limenm ki fer desizyon final lo lekel tender ki ganny aksepte.  Mwa donn en lot legzanp, Msye Speaker, dan Lenn, prosedir  tender i preski egzakteman parey isi Sesel, dan serten ka,  tender  i ganny ouver dan prezans piblik, me sepandan desizyon final i ganny fer par gouvernman Endyen.  Alafen-di-zour se gouvernman limenm ki deside ki sennla ki devret ganny tel ou tel   tender.  En lot legzanp ankor Msye Speaker, mon ti a kontan koz lo prosedir Ameriken, menm an’n Amerik kot bokou nou isi dan sa lasanble nou dir ki i annan en pli meyer sistenm la demokrasi, zot prosedir  tender  i parey isi Sesel.  Se gouvernman   Ameriken ki deside lekel ki devret ganny tel ou tel  tender.  Sepandan desizyon ki gouvernman i pran i kapab ganny egzaminen par en komite ki swa dan senat ouswa dan House of Representatives.   Avek en tel prosedir souvann fwa ou ganny bann group ki  lobby  e parfwa i kapab arive kot la koripsyon i vin an kestyon, me finalman Msye Speaker parey mon’n dir desizyon lekel ki ganny  tender  i ganny fer par gouvernman  E mon pa vwar okenn rezon parey mon’n dir pou  nou sanz en sistenm ki pe mars byen. E avek sa mon krwar mon ti a kontan  move  ki nou pran en vot lo sa mosyon.

 

MRS MARIE LOUISE POTTER

Msye Speaker sa mosyon kan ou regard li an premye vi, i donn ou sanblans ki i en bon mosyon, e i donn ou sanblans ki lide i bon.  I vre, lide i kapab bon me en lide i ganny teste bon kan ou ekspoz li dan la pratik dan en kondisyon konkret.  Sa i fer mwan al lo 2 pwen, 2 konsern oubyen 2 rezervasyon, 2 keksoz ki pou fer mwan dir ki sa mosyon i pa pou anmenn nou dan en bon direksyon. 

Sa 2 keksoz ki fer mwan war ki sa mosyon i pa dan en  bon direksyon se premyerman lo son plan pratik e dezyenmman lo son  plan prensip.  Lo son plan pratik noun tande ki lopozisyon pe demann kreasyon en  independent  tender board pou entertain all public tenders.  Donk nou pe koz nou en board avek 10, 15, 20, 5 dimoun lo la ki pou responsab pou entertain tou bann tenders piblik sorti kot gouvernman e sorti kot bann konpannyen paraetatik e ler nou al o profon prezan, nou esey quantify all public tenders.  Ki nou vwar.  Nou vwar devan nou en volim tender ki tou lezour, tou le semenn pe sorti kot gouvernman e kot bann konpannyen paraetatik.          Si nou pran en senp legzanp nou pran MCD, si nou get zis sif lannen pase, nou pou vwar lakantite tender kin sorti swa pou fer lakaz, swa pou fer semen e swa pou petet arpantaz later. Nou al akote kot minister gouvernman lokal ki landrwa ki mon travay e mon annan plis lenformasyon par konsekan, zis lannen pase tousel nou ti pe koz nou en sif 165 proze ki ti an kour, ki ti an diferan staz devlopman konstriksyon e tou sa bann proze byensir tin ganny tender, enternelman aparti sa minister.  Minis lasante bomaten in esplik nou en pti pe bann proze ki son minister in fer e ki anvizaze fer e tou sa bann proze lasante pou end up dan tender.  Lezot minister; lagrikiltir, lezot lorganizasyon, SIDEC toulezour si nou pran nasyon nou pou vwar en tender oubyen diferan tender sorti kot diferan minister pe ganny pibliye.  Prezan mon demann sa kestyon.  Eske en sel tender board pou kapab antreprann, cope avek lakantite volim tender ki nou pe koze  ozordi dan sa pei.  E se lo sa baz ki fer mwan dir ki lo en plan pratik, sa mosyon napa validite e sa mosyon pa aplikab e sa mosyon pa fezab. 

Noun tann lopozisyon bomaten dir nou  ki dan lepok kolonyal ti annan en tender board e i ti mars tre byen.  Mon annan mon dout lo la me sepandan zot pann dir nou ki kantite proze, ki kantite  tender  ki ti annan dan lepok kolonyal.  Eski dan lepok kolonyal ti annan sa kantite semen, sa kantite lakaz, sa kantite lekol, sa kantite klinik, sa kantite proze, ki nou pe vwar ozordi pe ganny fer anba sa gouvernman? Zot osi dir nou ki tender ki ganny fer ozordi napa en standard rule, sakenn i fer pou li.  Sa i pa vre, i pa vre ditou, akoz lonorab Toussaint in fek eksplike ki tou tender ki ganny fer par gouvernman, par bann servis piblik i annan bann regilasyon kin ganny set.  An prensip lalwa ki gid tender en propriyete i en lalwa ki zeneral, ki iniversel, ki aplikab pou tou tender. Sepandan sa i ganny aplike aparti spesifisite sa minister ki pe tender sa issue spesifik.  Paregzanp si minister devlopman kominoter pe tender pou konstriksyon semen a monn avi nou pa pou kapab met en dokter, en ners, en edikater lo sa tender board pou deside si konpanny X ou Y pou ganny sa tender pou konstri sa semen.  E an menm tan osi si paregzanp  minister gouvernman lokal in set up en tender board pou tender management day care centres  i pa pou pran en sarpantye oubyen i pa pou pran speaker petet pou met lo sa tender board pou determinen lekel ki pli aplikab pou run sa day care centre.  I pou annan tandans pou pran dimoun ki annan konesans dan sa domenn.  I ava pran en dimoun ki annan konesans dan management en lenstitisyon, i ava pran en dimoun kot minister lasante pou vwar en pti pe lo kote lizyenn e lasante,  i ava pran en dimoun kot ledikasyon ki  ava vwar en pti pe aktivite progranm ki sa tenderer pe propoze fer dan son day care  donk ki fer ki tou tender i annan son spesifisite lokal ki lye a natir sa proze an kestyon e se pou sa rezon mon dir ki sa tender board endepandan i pa pratik, i pa fezab. 

Enn i pa pou kapab cope avek volim kantite tender, (2) i pa pou kapab entertain spesifisite ki sa tender  an kestyon pe demande e lo sa baz mon pa vwar koman sa lide i kapab ganny aplike.  Lopozisyon in osi dir nou ki sa independent tender board pou minimiz leakage, collusion eksetera.  Msye Speaker, be ki garanti sa onorab i donn nou ki sa tender board zot osi zot pa pou leak zot pou napa konfli lentere.  Msye Speaker a monn avi i bokou pli fasil pou annan en sel tender board ki annan tou pouvwar resevwar tou sa tender, i annan plis tandans pou li vin pli koripte ki bann diferan tenders ki bann minister i organize lo zot nivo zot minister e ki met bann dimoun ki napa naryen a fer avek sa minister, me ki bann dimoun ki annan serten konpetans dan sa field.  Nou annan tandans dan sa fason annan tenders ki en pti pe plis liye, bann tender board ki en pti pe plis liye avek tandans, konpetans, profesyonaliz sa dimoun lo sa board ki en tender board zeneral ki pou sey asize desifre tou tenders  depi A ziskan Z ki sorti dan pei.  Donk sa pwen ki pou minimiz leakage ek collusion sa mon pa krwar ladan ditou e mon pa krwar ki mon bann koleg la pou  les zot ganny antrennen par sa lide.    Lo en plan prensip Msye Speaker, nou pa krwar ki ozordi lopozisyon pou vin fer nou krwar ki zot in sanz zot lide e zot lapros lo lendepandans legzistans bann board dan Sesel. Msye Speaker, mon pa krwar ki ozordi lopozisyon pou vin fer nou krwar ki zot vreman krwar ki si nou annan en board tender, i pou vreman endepandan akoz  depi 73 nou’n tann ase kritik, kalomni lo bann diferan board ki’n egziste Sesel.  Nou’n tande koman SBC son board pa ti endepandan, i pa endepandan.  Nou’n tande ki mannyer PSAB oubyen board ki apwent bann ziz pa endepandan. No’un tande ki mannyer lezot board, lezot komite ki ganny etablir dan sa pei e pli enportan si sa komite i ganny apwente par Prezidan Rene.  Donk pou lopozisyon ziska ozordi zanmen in annan e zanmen ti pou kapab annan en board endepandan dan sa pei.  Ki mannyer alor ozordi zot vin propoz nou sa menm lide ki zot in toultan kritike e toultan rezete.  Se pou sa rezon mon dir  lo en pwenn vi pratik mon pa krwar ki lopozisyon in sanz zot leker oubyen zot posizyon lo sa kestyon tender e par konsekan, mon pa krwar zot vreman serye ler zot vin met sa mosyon devan nou.

Msye Speaker lo sa de pwen, ki monn fek elabore, se selon sa de pwen ki monn fek elabore ki pou fer mwan pa siport sa mosyon ki zot in amennen menm si parey monn dir kan ou get li san analiz li o fon, bokou dimoun a ganny tandans pou tonm dan pyez ki sa i en bon lide, tou dimoun a ganny menm sans, tou dimoun i a benefisye, tou dimoun i a profite, eksetera.  I pa vre, dan lapratik i pa marse, i pa fezab e lo en pwenn vi prensip lopozisyon pe mislead nou.

Mersi.

 

 

MR SIMON GILL

Msye Speaker, mwa va vot an faver mosyon Lonorab Bibi ler Msye Bibi i kapab dir mwan baze lo konklizyon Lonorab Potter se ler Msye Bibi i kapab dir mwan ki kote pou sorti sa bann dimoun ki pou al lo sa board?  Pou sorti dan lespas, pou sorti Langleter, pou sorti Lanmerik, pou sorti Lalmanny, Lafrans, ki kote zot pou sorti? 

Mon vin avek sa lentrodiksyon Msye Speaker an sipor konklizyon Lonorab Potter akoz zanmen in deza egziste en board endepandan dan sa pei pou lopozisyon.  Se sa ki fer mwan demande, ki dimoun zot pou anmennen pou met lo sa board pou deal ek tender.  Si i kapab convince mwan, konvenk mwan, konvenk la nasyon Seselwa ki lo sa board i pou annan bann dimoun ki endepandan 100%, la mwa donn li mon sipor total.  Mwa dir bravo Lonorab Bibi, ozordi ou’n anmenn en mosyon dan sa lasanble kot ou’n demann lasanble pou pran en rezolisyon e demande ki en board endepandan i ganny etablir pou deal oubyen pou fer tranzaksyon avek bann proze piblik ki gouvernman i anvi antreprann dan sa pei.  I zis sa en kondisyon ki mon annan.

Dezyenm pwen Msye Speaker, se mon oule demann Lonorab Bibi pou dir nou sa bann dimoun ki pou lo sa board, si i pe dir nou zot pou ganny peye en saler e zot pou ganny anploye a plen tan.  Akoz Lonorab Potter in dir, i anan apepre 156 proze ki Local Government in deal avek lannen pase an 1996 e sa lannen i annan en pti pe plis ki 156 mon krwar byen, me mwan personelman mon krwar Msye Speaker ki annan serten moman letan sa bann dimoun petet zot pou asize naryen fer osi.  E sa i ava vin en gaspiyaz resours ki tre limite dan sa pei.  E sirtou si nou bezwen bann dimoun vreman endepandan, Lonorab Bibi pou dir nou, nou bezwen anmenn expatriates dan sa pei ki dernyen fwa i ti dir nou i pa oule expatriates isi

 

MR BELLE

Ki  expatriates, i a pran dimoun Mont Buxton.

 

MR GILL

e si i pou pran expatriates pou anmenn isi, Msye Speaker, mon prezimen pou annan en bon saler ki pou bezwen donn sa bann dimoun.  E dan sa ka si nou pou kit sa board vreman endepandan, pa pou kapab annan enn understudy sa bann expatriates ki Onorab Bibi i ensiste ki i annan understudy.  Alor dan sa kategori board endepandan, toultan nou pou annan expatriates isi, akoz nou oule bann dimoun ki extrememan endepandan dapre lopozisyon.  Ki sa zot in prese dan nou zorey depi ler in anons milti parti ziska la ozordi. 

Mon 3enm pwen, Msye Speaker, mwa demann Lonorab Bibi ki provizyon i pe fer pou bann tender ki ler nou ganny serten lasistans finansyel a leksteryer nou bezwen osi pibliy li dan bann lezot pei kot bann lezot lorganizasyon i bezwen osi anvoy  zot kotasyon pou gete si zot kapab pran par dan sa bann proze devlopman, ki provizyon i pe fer lo la.  Mon lot pwen pou Lonorab Bibi, Msye Speaker se mon oule ki Lonorab Bibi i eklersi nou ki nivo kalifikasyon i pe rode pou sa bann dimoun ki pou al lo sa board.

Lot pwen mon ti a va kontan osi konnen ki kantite dimoun i propoze pou annan lo sa board e dan sa ka i ava donn nou en sif ki kantite expatriates i pou anmennen dan sa pei avek son mosyon.

Lot pwen ki mon ti annan pou Lonorab Bibi, Msye Speaker se finalman apre kin anmenn sa bann dimoun isi, sa lapwentman lekel ki pou fer.  Eske ou anmenn expatriates anndan isi, zot vini – mon pa konnen ki degre i pou dir nou taler zot devret annan, lekel ki pou apwent zot.  Par mal sans, si i al dir nou Prezidan Rene, mon pou dir non pa donn li akoz i riske soufle dan zorey sa bann dimoun e board i annan en gran sans ki i pa vin endepandan.  Akoz zanmen zot in annan konfyans parey Lonorab Potter in dir dan board ki Prezidan Rene i apwente.  Menm si sa bann dimoun zot annan bann ot kalifikasyon, donnen travay ki zot pou al fer.  Msye Speaker, lo se detrwa pwen ki monn dir, mon war en lesey kanmoufle par deryer sa mosyon pou retard proze devlopman dan sa pei.  Sa i kanmoufle sa, ou pa trouve. Zafer pou gou ler nou anvi al devlop tel proze, nou dir sa i bezwen al vit, anvoy lo sa board pou konsidere, ladan i ava dir ou konpozisyon sa board annan isi, annan laba oubyen parey mon bann koleg pe dir la, enn ler napa  quorum letan pou pran en desizyon, me sa ki pli danzere se kwa,  se ler sa bann agogo ki pou lo sa board i zwe ping pong lo board. Olye  diskit lo proze, zot pou zwe ping pong.  Ki mon oule dir par ping pong Msye Speaker se sa ki angle i dir, en nespes delaying tactics.  Ler gouvernman i anvi enplimant son proze, avek en serten lavites,  dan  en serten time frame,  dan en serten peryod letan, zot akoz petet zot pa kontan ek  sa gouvernman ki la, petet zot pa kontan avek tel dimoun, oubyen zot pa dakor avek isi laba, oubyen petet akoz zot santi zot dalon petet anba bol pa pou gannyen, la zot pou zwe avek sa proze, sa ki pli danzere sa. E bann dimoun ki ava pe esper son pon pou ganny fer anler laba dan Cap Lelefan, pa va ganny fer,  dimoun ki ava pe esper son semen pou ganny pa ava ganny fer,  dimoun ki ava pe esper lakaz pou li antre ladan pa pou gannyen pou antre ladan, akoz? board pe zwe ping pong avek proze.  Sa se sa ki mon dir en lesey kanmoufle par deryer sa mosyon pou retard devlopman dan sa pei e Msye Speaker lo sa pwen, mon pe demann mon bann koleg pou vot kont sa mosyon.  Mersi.

 

MR SPEAKER

Bon avek sa, nou a pran en break ziska 11 er.

 

(Break)

 

MR SPEAKER

Bon mon krwar kot nou’n arive dan deba tou  le 2 kote in prezant lesansyel zot argiman e avek sa mon envit Onorab Bibi pou prezant son rezime.

 

MR BIBI

Msye Speaker dan mon prezantasyon sa ki monn fer, sa ki mon ti prezante se zisteman mon krwar lesansyel tin ganny met devan pou piblik olarz tande.  E Lonorab Toussaint in fer resorti ki sa sistenm ki egziste i krwar i bon.  Petet pou mwan Msye Speaker rezon ki i dir i bon petet rezon ki li i konn pli byen ki mwan.

Msye Speaker mwan mon pou al enpe pli lwen pou mwan dir pou dir mwan mon ti napa okenn problenm avek si en tender  i ganny met lo  Nasyon oswa non.  Sa ki pou mwan ti enteresan se ki lafason ler desizyon i ganny pran. Nou kapab fer prosedir nou kapab pibliy li lo Nasyon tou sala i ganny fer, me ler desizyon i ganny pran se la ki ti konsern mwan e sela kot piblik i konsernen se ki mannyer desizyon i ganny pran.  Nou kapab swivre, met li lo Nasyon, i ganny pibliye me desizyon final se sa ki nou pe rode kote febles i ete e sesa pwen ki mon ti oule fer resorti. 

Msye Speaker Lonorab Potter in fer resorti in dir pou dir mon mosyon pe mislead piblik.  Les mwan mon a eksplike ki misleading  i vedir.  Noun ganny dir ki i annan accountability akoz tender  i ganny pibliye.  Pou mwan personnelman Msye Speaker accountability  i pa vedir ler tender  in ganny pibliye.  Accountability i vini ler tender  i ganny aksepte e se sa sa problenm sa febles ki i annan dan sa sistenm konmela.  Nou pa kapab fer krwar ler en minis, ler nou annan en minis oswa Prezidan in aksepte en tender  i vedir ki sa sistenm i bon.  Pou mwan en board endepandan i pli bon,  an plis ki sa i en sistenm ki pli transparan.

La noun ganny dir dan sa lasanble par Madanm Potter, Lonorab ki en board endepandan pou annan tro bokou tender,  pou annan tro bokou louvraz akoz sa kantite tender  ki dapre li ti fer lannen pase par son minister i pa vwar kote en independent tender board  i pou kapab cope  avek sa kalite tender. 

An menm tan dan lot kote noun tann lonorab Gill dir nou ki sa bann manm pou napa naryen pou fer.  Lekel ki nou pou krwar?  Personnelman mon pa krwar personn.  Akoz zot per pou admet ki sa sistenm ki egziste konmela i ranpli ek posibilite pou annan koripsyon.  Onorab Toussaint pou mwan retournen, in servi Lenn  koman en legzanp.  Nou tou nou konnen ki Lenn i enn bann pei ki ranpli avek koripsyon lo sa size

alors sa legzanp pa devret ganny servi.

Msye Speaker fodre pa nou kanmi pou nou admet ki noun fer en keksoz mal.   Petet gouvernman SPPF i bezwen viv avek sa, menm ki tou bann lonorab, bann lonorab kin koze dan lot kote pa kontan oswa zot kontan.  Msye Speaker avan mon konklir, Lonorab Gill dan son koze in demann mwan en kantite kestyon.  Personnelman mwan pou mwan menm ki mon ti a kapab rann li repons son kestyon me personnelman mon pa deside  parski mon krwar ki Lonorab Gill i vin ridikil lasanble, i vin fer dimoun riye, i vin fer dimoun kontan me i pa vwar lesansyel en bon mosyon.  E pou mwan  Msye Speaker alors mon napa lentansyon pou mwan reponn lonorab Gill

Me zis pou mwan fer en pwen Msye Speaker ler nou koz lendepandans  tender board  mon oule fer resorti ki ler mon dir lendepandans mon pa pe dir bann dimoun ki ganny apwente lo sa board.  Lendepandans pou mwan i senpleman dir ki nou annan en board  ki endepandan avek civil service, endepandan avek politik.  Sa ki mon pe sey dir,  independent tender board.  I vedir ki sa board  i napa naryen pou fer avek civil service parey le ka i ete ozordi me i en board  ki endepandan avek civil service e endepandan avek politik.  Nou tou nou konnen, nenport ki dimoun  i kapab lo nenport ki board,  se pou se rezon mon ti servi sa term minimiz sans pou annan collusion, akoz mon konnen imen i imen, nou pa pou kapab akoz nou fer en tender board nou pou dir nou pou elimin koripsyon, nou pou elimin collusion.  Mon ti dir minimize e lefe osi ki en board oditer i ava annan en focal point  kot i a vwar, i a get zis sa board.  Pou li si i annan en keksoz pou demande i konnen pou dir sa sa board  ki responsab.  E definitivman osi bann manm lo sa board zot pou konsyan pou dir nenport ki keksoz  ki zot fer dimoun deor pe get zot.  E se sa rezon ki mon ensiste ki en board i pou pli transparan parski sa bann dimoun ki lo la zot pou annan entegrite e zot kredibilite osi pou at stake.   Se pou se rezon ki zot pou bezwen veye parski i pou pli fasil pou fer en louvraz oditer zeneral ler i konnen pou dir i annan zis sa board  pou mwan al veye.  Menm ki Lonorab Toussaint in fer resorti dan son papye lo regilasyon ki egziste konmela, mon pou dir Msye Speaker ki noun vwar, me i pa donn nou okenn prosedir zis in dir pou dir  20,000 roupi en accounting officer i kapab aste, 100,000 i pou met lo public tender.   Me i pa donn nou lezot fason ki mannyer desizyon i ganny pran.  Zis in dir pou dir nou met lo tender.   Me piblikasyon pa neseserman fer sistenm bon.  Sa ki mwan mon pe dir se lafason ki i ganny aksepte, la fason ki desizyon i ganny pran.  E dan financial order,  Msye Speaker,   dan  stores regulation  ankor enfwa i dir nou ki ti annan sistenm tender board,  ki ti annan sistenm ki tin deza ganny etabli, se pou se rezon ki mon dir pou dir nou pa pe reenvant larou.  I dir pou dir en tender board  i annan pouvwar pou li kriy nenport ki zofisye dan sa departman  kot sa tender i pou li pou li vin donn advice teknik.  I al pli lwen ankor i dir pou dir nenport ki manm dan sa minister ki responsab pou sa tender  i kapab vin asiste ler sa board  i meet pou gete ki mannyer son tender pe pase.  Mon pa vwar naryen difisil.  In deza egziste tender board Msye Speaker parey monn dir   boner, si nou pran financial order, stores regulations, 1995  an montan, si nou pran colonial regulations parey si nou get lartik 270 nou pou vwar pou dir ti egziste.  Dan sa letan nou ti annan paregzanp koman chairman  nou ti annan  accountant general ki ti la, nou ti annan direkter lagrikiltir, nou ti annan….

 

(interruption)

 

..Msye Speaker mon pe zis donn ki ti egziste.  Pa neseserman ki si ou pou fer li ozordi…

 

MR SIMON GILL

Sa i outdated sa.

 

MR PATRICK HERMINIE

Sit legzanp lekel ki pou lo board.

 

MR BIBI

ozordi ou annan PSAB, si pou reponn, Msye Gill, ou kapab pran manm dan nenport ki landrwa. Ou kapab pran Ombudsman fer li vin chair.   I pa en civil servant.   Ou kapab pran manm dan PSAB fer zot ansarz tender board.   Ou kapab pran dimoun deor, dan prive fer zot ansarz tender board.  Ki nou pe sey dir se nou oule kree en sistenm ki i la i kler e dimoun i konnen pou si demen en tender i ganny mal marse ou konnen ou annan en landrwa pou ale e tou dimoun i konnen pou dir la la sa ki responsab pou tender.  Ler desizyon i ganny pran  mon ganny drwa kestyonnen.  Sa ki mon pe dir.  Dimoun deor ki pou tande.  Zot zot kapab kontan, pa kontan mwan mon pe dir pou dir sa sistenm ki egziste konmela pa marse.

Msye Speaker mwan mon pare pou mwan get dan Standing Orders lartik 74. Si bokou nou ki la zot pa dakor ki i annan en independent tender board, mwan mon ti a demande Msye Speaker ki mon pare pou met mon mosyon akote e mon demande, rekomande ki lasanble  i move into committee, nou kriy tou sa bann dimoun, tou sa bann kontrakter deor, nou anmenn zot la lo televizyon, nou manm lasanble a demann zot kestyon,  si zot kontan oswa zot pa kontan mannyer sa sistenm pe marse.  Ler noun fini demann kestyon, mon pare pou mwan tir mon mosyon e mon pare pou aksepte desizyon ki ganny pran dan sa lasanble.   I beg to move Mr Speaker. 

 

MR SPEAKER

Bon in ler pou vote..

 

MR DANIEL BELLE

Mon segonn sa ki in dir la.

 

MR SPEAKER

In dir si.

 

MR PATRICK HERMINIE

Nou withdraw the motion or what?   I pe withdraw.  Nou oule kler lo la.  Eski ou pe withdraw the motion.

 

MR BIBI

Non mon pa’n withdraw.  Mon’n dir mon pare apre desizyon komite mon pare pou withdraw mon motion.  Bon ki mon’n demande la, mon’n move avek Msye Speaker pou sa lasanble, anba lartik 74 pou nou form dan en komite, pou nou call tou bann kontrakter pou vin la anndan lo televizyon e komite i a demann zot kestyon si zot dakor ek sa sistenm aktyel oswa non.  E si apre kestyon in ganny demande, i tonm dan faver mon bann koleg dan lot kote, mon pare pou tir mon mosyon akoz zot in dir pou dir i misleading. 

 

MR SPEAKER

Bon i annan okenn dimoun ki segonn ou.

Tou sa ki an faver mosyon Onorab Bibi lo kestyon fer sa asanble vin en komite parey anba 74 zot lib pou dakor ou pa dakor. 

 

MR BELLE

Nwa vwar transparans.

 

MR SPEAKER

4 i an faver.  Okenn ki kont – 11.  Bon mosyon in ganny defet. 

Nou tourn lo ou mosyon orizinal.  Tou sa ki an faver lev zot lanmen – 3.  Okenn ki kont – 11.  Mosyon in ganny defet. E mon les zot konnen ki lot mosyon ki ti sipoze prezante par Onorab Danny Faure, in donn mwan notis an ekri pou defer akoz i malad lizye.  E avek sa nou fini nou travay pou ozordi ziska lot mardi.

 

 

The Assembly was, on its rising, adjourned to Tuesday 25 March, 1997 at 9 a.m.