::
Home » Archives » Verbatims - First Term 1997 » Tuesday 11th March 1997

Tuesday 11th March 1997

NATIONAL ASSEMBLY OF SEYCHELLES

 

Tuesday 11th March 1997

The Assembly met at 9.am

Mr Speaker in the Chair

National Anthem is played

 

 

MR SPEAKER

Bonjour tou onorab, minis e piblik ki pe ekoute.  Dan kominikasyon mon annan en lanons.  Dan deba lo diskour prezidan lo leta la nasyon ler lider lopozisyon ti pran parol le 28 fevriye sa lannen i ti pas en remark ki bann minis pa ti la pou ekout son diskour.  Mon oule fer sorti ki bann minis pa ti la akoz zot pa ti sipoze la.  Normalman akoz bann minis zot pa manm lasanble, zot pou la zis akoz mon envitasyon, eksepte ler zot vin isi pou kestyon, pou bil si i konsern zot minister.  Nou dan 4enm lannen lasanble, zanmen in deza annan en request pou zot prezans apre ki prezidan in  fini prezant  son diskour.  Alors mon oule fer kler ki zot absans sa zour pa ti en mank respe ou kourtwazi pou lider lopozisyon. 

Nou al direk lo kestyon pou minis finans, kestyon 9, onorab Gill.

 

MR CHRISTOPHER GILL

Question number 9, to ask the Minister of Finance and Communications if he can inform the National Assembly of the underlying necessity for the government’s bank guarantee for R5m described in the Air Seychelles Limited (Guarantee) (No. 2) Order 1996.  Thank you Mr Speaker.

 

MINISTER JAMES MICHEL

Bonjour Mr Speaker e tou manm lasanble.  Msye Speaker sa order  ti pou garanti bann fasilite normal pou Air Seychelles  avek Nouvobanq.  Sa garanti ti kouver en valer R5 milyon pou kouver overdrafts, letters of credit, documentary credits  e pou kouver pri karbiran ki  Air Seychelles  i bezwen aste lo bann airport  a letranze.  Mersi.

 

MR SPEAKER

Siplemanter.

 

MR C. GILL

Wi senpleman en klarifikasyon.  Eski le minis i panse ki a lavenir gouvernman Sesel i a kontinnyen garanti bann loans  pou Air Seychelles pou ed li fer son biznes marse, etan donnen ki i sanble ki i pa kapab soutenir son prop lekor.

 

MINISTER

Msye Speaker Air Seychelles  i pou gouvernman Sesel e gouvernman Sesel i shareholders Air Seychelles.   I toutafe normal ki shareholders  i donn garanti pou nenport ki keksoz ki sa lakonpanni i bezwen pou fonksyonnen.  Paregzanp si i bezwen en overdraft avek labank oubyen i bezwen en loan  i toutafe normal ki si i ganny demann en garanti ki shareholder  ki garanti sa bann loans  e sa i en keksoz normal pou nenport ki lakonpanni e si i neseser i ava kontinnyen a lavenir.

 

 

MR SPEAKER

Kestyon nimero 10.

 

MR C. GILL

Mon ti a kontan demann minis pou finans e kominikasyon son estimate total sa lenpak ekonomik ki baz lo closure US tracking station.   E si minis i kapab eksprim sa an dolar ek roupi depi le premye zanvye 1997 ziska le 31 desanm sanmenm sa lannen.

 

MINISTER

Msye Speaker napa okenn letid detaye kin fer lo lenpak ekonomik ki fermtir tracking station Ameriken in annan lo lekonomi Sesel.  Me sa ki mon kapab donn lasanble ozordi se lenformasyon ki mon minister i annan e osi lenformasyon ki in gannyen baze lo depans ki tracking station i dir zot in fer pandan sa dernyen 3 an e la nwa vwar en pti pe son mwayenn si oule. Tracking station Ameriken ti pey Sesel $4.5 milyon par an ou R22.5 milyon pou lokasyon site  ki zot ti pe lwe avek pei. An plis tracking station ti depans anviron $3.6 milyon ou R18 milyon par an pou goods and services an kontan saler pou zot staf lokal e lezot depans ki zot fer.  An total donk Sesel ti pe ganny ape pre $8 milyon ou R40.5 milyon par an avek prezans tracking station Ameriken.  Me sa i pa kont si oule bann depans apar ki lezot personel Ameriken ki ti baze isi ti fer.

 

MR SPEAKER

Supplementary.

 

MR C. GILL

Wi eski minis ek son gouvernman ti kalkile ki avan US tracking station   i close  ki petet zot ti ava kapab prevwar sa closure  e prevwar petet en lot sours reveni avek sa sit.

 

MINISTER

Msye Speaker gouvernman Sesel pa kapab prevwar ki gouvernman Ameriken pou deside, ozordi, demen,  lannen prosenn.  Sa i depann antyerman lo gouvernman Ameriken ki zot deside, si zot pou met tracking station  tel landrwa oubyen si zot pou ferm serten fasilite ki deza egziste.  Gouvernman Sesel napa kontrol lo la.  Me ans ki konsern lezot sours reveni, gouvernman Sesel zanmen si oule in reste dormi.  In toultan pe egzamin tou mwayen posib pou kapab kolekte  otan reveni ki posib dan nenport  ki fason e mon krwar manm onorab limenm i ava apresye ki pandan sa bann dernyen 2 an, 3 an gouvernman Sesel in met en kantite si oule bann fasilite, posibilite pou nou kapab devlop nou lekonomi dan en lot fason an krean en offshore centre isi, en international business centre ankor koman en fason alternativ pou nou kapab ganny plis reveni e nou pou kontinnyen regard tou bann posibilite posib pou Sesel kapab kontinnyen devlope e kapab ganny plis reveni posib.  Mersi.

 

MR SPEAKER

Kestyon nimero 11.

 

MR C. GILL

Eski le minis de finans e kominikasyon i kapab enform sa lasanble dapre li son estimate total bann reveni ki nou pei in perdi avek closure US Embassy. 

 

MINISTER

Msye Speaker baze lo lenformasyon ki nou annan lanbasad Ameriken ti pey anviron R100,000 par an sekirite sosyal lo saler son bann travayer Seselwa.  Apard sa mon napa okenn detay depans ki lanbasad Ameriken ti fer isi malgre ki byensir zot in fer lezot  depans normal ki  nenport ki lanbasad i fer letan zot pe operate  dan en pei.  Mersi. 

 

MR C. GILL

Mr Speaker mon ti ava kontan demann minis si etan donnen  ki pou en bon pe letan nou ti konnen ki anbasad Ameriken ti pe fermen si zot ti fer lezot zefor konmsi pou negosye ek zot avan zot ale petet pou extend zot stay.   E ou kapab aplik menm kestyon pou US tracking station.  Mersi.

 

MINISTER

Msye Speaker parey monn dir gouvernman Sesel pa kapab dir gouvernman Ameriken ki pou fer.  Si gouvernman Ameriken i oule ferm son labasad isi, natirelman dan lentere relasyon privilezye ki egziste ant le 2 pei, mon demann zot bon, si napa en posibilite pou zot kapab pa fermen e kontinnyen operate isi.  Me si parey zot in dir, zot desizyon se pou de rezon bidzeter Lanmerik ki pe fer zot ferm non selman lanbasad Sesel me plizyer lanbasad e konsila dan plizyer pei akoz zot annan problenm bidzeter zot osi zot oule koupe e napa naryen ki nou kapab fer pou anpes zot.  Me nou Sesel nou pa devret tonm a zenou devan nenport ki.  Nou devret kontinnyen fer nou zefor pou nou kapab ganny bann reveni alternativ.  Mersi.

 

MR DANIEL BELLE

Msye Speaker mon ti a kontan demann minis si le fet ki Ameriken in pull out, sa in afekte nou reset fiskal e nou lekonomi.

 

MINISTER

Msye Speaker parey monn dir tracking station  ti pe pey R100,000 sekirite sosyal e lezot depans normal ki en lanbasad i fer e natirelman ler ou annan en aktivite si oule ki anmenn serten reveni deviz etranzer, i afekte li dan en fason.  Me nou nou bezwen kontinnyen fer bann demars pou nou kapab ganny lezot mwayen ganny bann reset  deviz etranzer pou kapab kouver sa, e menm fer plis.

 

11 March 1997

 

MR SPEAKER

Kestyon nimero 12. 

 

MR CHRISTOPHER. GILL

Mon ti a kontan demann minis pou finans e kominikasyon  ki kantite larzan kin deza ganny kolekte par children’s fund depi ler i ti ganny kree e si minis i kapab baz sa lo en per yearly basis.

 

MINISTER MICHEL

Msye Speaker ekskiz mwan me pa sa kestyon ki devan mwan.  Si monn konpran byen dan kestyon i dir kolekte e la eski monn antann onorab Gill dir prete oubyen kolekte menm.

 

MR GILL

Monn dir kolekte. 

 

MINISTER  MICHEL

Kolekte, byen.  Msye Speaker an 1979 children’s fund  ti kolekte 6.8 milyon, 1980 12.7m, 1981 10.7m, 1982 10.8m, 1983 9.3 m, 1984 9.1m, 1985 9.6m, 1986 9m, 1987 8m, 1988 8m, 1989 8m, 1990 10m, 1991 10m, 1992 10m, 1993 10m, 1994 5m, 1995 5m, 1996 5m e 1997 5m. An total children’s fund  in ganny 162 milyon depi 1979 ler ki i ti etabli ziska sa provizyon kin ganny fer pou 1997.  Mersi.

 

MR SPEAKER 

Siplemanter

 

MR C. GILL

No supplementary.

 

MR SPEAKER

Kestyon nimero 13.

 

MRS MONICA FIGARO

Msye Speaker mon ti a voudre demann minis pou finans ek kominikasyon si son minister a konsider donn lasistans neseser pou amelyor resepsyon televizyon pou bann dimoun Anse Severe e Grand Anse La Digue silvouple.

 

MINISTER  MICHEL

Msye Speaker i polisi gouvernman pou ogmant e amelyor resepsyon televizyon dan Sesel an antye.  Mon annan plezir pou enform manm onorab pou La Digue e zil pros ki noun deza met provizyon dan bidze SBC pou lannen 1997 pou enstal lekipman pou Anse Severe lo La Digue pou kapab ganny meyer resepsyon televizyon.  Nou pou fer provizyon ankor lannen prosenn an 1998 pou permet SBC amelyor resepsyon televizyon pou Grand Anse La Digue. 

 

MR SPEAKER

Kestyon nimero 14.

 

MR PAUL CHOW

Msye Speaker mon oule demann minis pou lagrikiltir e resours maren ki progre son minister in fer pou vann later bann fermye ki koni koman fermye bann bloker parey ti promet dan en let ki ti anvoy sa bann fermye par son minister  avan eleksyon dernyen.

 

MR SPEAKER

Mon tin bliye anonse kestyon i pou minis agrikiltir e nou ekskiz minis finans.

 

MINISTER ESME JUMEAU

Msye Speaker sa kestyon ki manm in poze la laplipar repons in fini gannyen deza atraver minis devlopman kominoter semenn pase e mon a fer lasanble mazinen egzakteman ki minis ti dir.  Selman petet zis mon al en pti pe pli detaye. 

Minis ti dir dan son alokisyon dernyen fwa ki agricultural plots of land,  bann porsyon kin sub divide  pou kontinyasyon lagrikiltir ki dan distrik Anse Boileau ki konpri, Anse Boileau parti Hermitage 26 morso, Anse Boileau Montagne Posée 53 morso, lezot landrwa Anse Boileau 42 morso ki fer en total 121 morso later.  Pou porsyon later ki vann avek bann blokers  ki ape pre 1000 kare obyen 25,25 acres  i annan en total 71 sa pou Anse Boileau.  Pou blokers Port Glaud  i annan 26 porsyon lagrikiltir, 14 plot  later pou lakaz. Val d’Andore i annan 59 morso later pou lagrikiltir e 38 morso pou lakaz.  Amitye Praslin 60 morso later pou lagrikiltir e 50 morso pou lakaz.  Mersi.

 

MR CHOW

Msye Speaker eski minis ti kapab dir nou si ler pou kalkil valer sa later pou vann, gouvernman pou pran konsiderasyon kantite improvement bann batiman ki bann bloker limenm in mete lo la dan son pri ki pou mete avek zot.

 

MINISTER

Wi Msye Speaker gouvernman in fini pran sa an konsiderasyon.  Annou fer  en pti analiz.  Si en dimoun ti pou aste en morso later pou fer son lakaz, zeneralman services elektrisite, delo, semen e lezot i preski R40,000.  De lot kote sa later petet i vann pou R40,000 sa  pou nou fer lakaz.  E la aprezan nou pou retourn direk lo kestyon onorab si noun pran konsiderasyon bann amelyorasyon kin ganny fer lo later bloker  an zeneral.  Anvi ki noun servi 2 porsyon son kote lagrikiltir, i pou lwe son kote kot pou vann.  Sa later kot pou vann la ki 1,000 met kare pou vann zot outright  san rezerv R5,000 as opposed si ou ti pou fer lakaz vo 40, 60 mil roupi i depan son pozisyon komann, vwala.  E otan ki konsern lo kote lagrikiltir gouvernman egalman i pran konsiderasyon ki zot in devlope lo la, dan en fason i enklir dan pri ki zot pou lwe, mersi.

 

MR GILBERT BARBIER

Msye Speaker, eski minis i kapab dir lasanble konbyen son minister i lwe en arpan later lagrikiltir. Dezyenm ki diferans i annan ant later lagrikiltir avek later lendistri e osi diferans ant pri ki zot lwe.

 

MINISTER

Later lagrikiltir i kout, nouvo an kontan konsiderasyon ki noun pran anba kestyon lonorab Chow, i R108 roupi par arpan later.  Sa i tradwir 27 sou en met kare par mwan.  Later lendistri i en later pliz-ou mwen later konble  ki lo nou lakot.  I difere dan plizyer konteks avek later lagrikiltir. Later lagrikiltir parey mon dir i R108 roupi par arpan par mwan tandi ki later pou lendistri ki pliz-ou mwen lo konblaz i kout plis ki R80,000 par arpan par an.  Otreman sa pre R7,000 par arpan par mwan. 

Si nou al en pti pe pli lwen nou fer en analiz nwa trouve ler nwa pe dir later lagrikiltir i kout 27 sou par met kare par mwan, bann dimoun dan lendistri pe pey R20 par met kare par mwan.  Ou a trouve dan sa analiz ki gouvernman i pran tou keksoz an konsiderasyon, in met tou sa ki i annan posib a dispozisyon bann fermye, mersi.

 

MR DANNY FAURE

Msye Speaker, en promes set en det, eski minis pe met on record ki sa promes pe  ganny rezourd.

 

MINISTER

Mon pa tro, tro sezi kestyon.

 

MR D. FAURE

Msye Speaker, en promes set en det, eski minis pe met on record ki sa promes ki lonorab Chow in dir pe ganny rezourd.

 

 

MINISTER

Well, si nwa pe dir sa promes ki nou ti fer pandan le-z ane 92 e 93 in pran nou en pti pe letan e nwa dir wi nwa pe tenir sa promes.  Me nou promes in depas en pti pe sa ki, nou repons in depas en pti pe sa promes ki nou ti fer.  Mentnan aprezan nou trouv nou avek an plis ki annan 300 registered agricultural lease, mentnan nou annan 266 morso later ki pou reponn sa promes, sa pou lagrikiltir e 173 pou bloker ki pou reste lo sa porsyon later ki nou pou vann zot.  Anfet ou kestyon, wi in rezourd.

 

MR MICHEL GARDETTE

Msye Speaker, eski minis i kapab dir nou si sa let ki bann bloker ti gannyen apepre enn an pase, ki ti dir zot ladan ki ti enform zot ki zot pou ganny drwa aste zot kare lakaz pou R5,000 si  i ankor still stand parey i ti ete.  

 

MINISTER

173 morso wi.

 

MR WALTER CONFAIT

Mon ti a kontan demann minis kwa kin ankouraz gouvernman pou sanz son polisi lo vann later avek fermye pou fer lagrikiltir e ki konmela i prefere  lwe sa later avek bann fermye, osi si bann fermye pe pey zot lokasyon konmela mersi.

 

MINISTER

Msye Speaker sa kestyon i tre inosan en repons en miraz. Me onorab in met son pwen, ki mon ti oule dir pou evit vwar en fo portre fodre mon eksplik en pti pe deryer rasyonal pou pa vann later, lwe.  Sa in komans an 1989 ler mwan mon ti minis responsab pou vann later, dyob ki minis Ernesta i responsab, 89 a 93 mon ti minis responsab.  Nou tin dakor avek minis lagrikiltir pou vann later swivan en mas presyon enpoze lo gouvernman par bann dimoun ki ti sorti dan systenm, lontan ki mannyer ou ti lwe en bout later, mon lwe ou en bout later pou plante ou byen mon donn ou en bout later pou plante ou partaz de mwatye, ler ou viv in pare mon pous ou oubyen partaz pa ekitab.  Prezan sa in enkilke dan nou bann  fermye pou dir pa fye propriyeter later.  Dan en fason si oule noun devlope, vann nou sa morso later.  Ti annan en rezonnman ase akseptab ladan, donn zot konfyans e vann zot sa morso later.  Sa letan la 89 ti annan en gran presyon osi pou later  pou lakaz, landrwa parey  St Antoine, Maldive, La Gogue, Grand Anse, Anse Poules Bleues, Barbarons, dan en fason ti napa ase  surveyors. Nou ti a pe koz sa letan la apepre 1500 morso later ki bezwen  sub divide,  ti napa ase  surveyor.  I pran tou sa letan pou survey kapab met li drwat pou  nou konnen egzakteman si nou pou vann ki nou pou vann.  Se sa an me 1992 ki en  bann let ti komans sorti pou dir wi, nwa vann ou sa morso later.  Toud swit, mwan ki ti minis, dimoun ti vin vwar mwan, msye mon annan mwan 3 arpan later la, monn vye, mon piti i le travay sa later, me selman lezot i le  sub-divide,  enn i oule lakaz pou li reste ladan ek son menazer, lot i le fer en garaz, lot i le fer nenport kwa. I ti komans kler an  1992 pou dir si nou vann sa bann later ki  sub divide, pou servi pou tou purpose sof lagrikiltir limenm, i ti annan sa danze.  Pandan sa letan nou pann pran okenn mezir lo la, nou dir be announ atann lavwa di pep pou regarde si zot annan en konsansis dan zot krwayans pou dir later ti fodre divize.  93 in arive, dan en fason 93, 94 gouvernman ti fer en desizyon pou dir later nou pa vann.  Parkont nou ti bezwen tourn kot sa bann dimoun par group, al eksplike akoz ki nou pa kapab vann later lagrikiltir e nwa koup en kare 1,000 met kare, vann zot sa bout ki a toultan pou zot.   I konmsa, vwala kin devwale.

Val D’en Dor 44 bloker ti ganny avize le 10 ek le 11 novanm 1994 pou dir gouvernman pa pe vann later lagrikiltir, i a pe vann kare later pou met zot lakaz, larestan zot kapab lwe.  5 desanm, 23 bloker Port Glaud in ganny avize e 83 bloker Anse Boileau dan son totalite, vedir 3 sou distrik, le 6, le 7 e le 14 desanm ti ganny avize e Praslin le 5 novanm, 70 bloker ti ganny avize pou dir zot pa pou vann zot later, i ava vann zot zis porsyon kot zot lakaz i ete e lanmenm la pri R5000 in deza dir zot pou dir i pou koute pour sa 1,000 met kare e vwala en pti pe rasyonal deryer sanzman sa lide vann olye ki lwe.  Parski si nou tin vann, ozordi nou ti ann perdi 600 arpan later atraver vann e ki mon annan en dout atraver zistwar ki monn ranmase, leksperyans ki monn gannyen letan mon ti minis laba, i ti pou koz en  mass disruption  dan fanmir Seselwa.  Papa in ganny 6  arpan later 3 arpan later 2 arpan later, nou divize sakenn piti i oule en bout, zot ti pou napa lagrikiltir lo la.  La rasyonal deryer sa sanzman.

 

 

 

MR C.GILL

Msye Speaker, eski minis i kapab esplik nou en pe ki bann prosedir zot servi avan zot execute en agricultural lease parske aparaman i annan en serten peryod probasyon kot zot fer sir ki sa fermye pe aktyelman travay. 

 

MINISTER

Msye Speaker, prosedir pou ganny en morso later ki annan pa mal, i annan de santenn dimoun ki pe esper later e prosedir tou dabor ou ekri en let oubyen ou al Union Vale kot departman lagrikiltir laba, ou al diskit ek zot posibilite ganny en morso later.  Laba i annan en zofisye  extension division  ki asize ki esplik ou an detay. Prezan si  vreman ou oule en morso later, ou montre ki ou sorti dan en fanmir ki annan sa konesans dan morso later, sinon oun sorti  NYS or politeknik ki oun deza pas atraver sistenm agrikol, i montre pou dir ou en dimoun ki viable pou pran morso later lagrikiltir, la zot fer asize ansanm, fer en plan, ou oule en morso later ki ou pou fer avek.  Pou met koson, bef.  Ki ou pou plante lo la.  La en serten seri kestyon i demande ki bezwen repons ki pou montre ki sa dimoun i konnen ki i pe al fer, ki i pou plante, ki son reveni e finalman si sa bout later ki i pou pran pou kapab soutenir li ek son fanmir e osi pey sa lokasyon ki i devret fer. Sa i ganny swiv,  i en plan dan limenm.  Baze lo sa plan en desizyon i ganny fer si en morso later i available, kote sa morso later i ete, parske si sa boug i dir i oule plant bann feyaz, legim feyaz parey bred, sou, i pa donn li en  porsyon dan montanny, la en desizyon i ganny fer si i gannyen oubyen i pa gannyen  e an menm enstan ler li in montre son de kote, son credit ek debit i montre pou dir i pou plante, konbyen i pou gannyen, konbyen i pou rekolte, ki kantite larzan i pou bezwen, si i bezwen en loan, tousala fodre i dir lanmenm la oubyen i ale i anmenn sa papye kot li, i fer plan i anmennen, i montre kot pou dir ki i pou gannyen, konbyen i kout li e si i bezwen en loan. Vwala fason ki si dan en fason si nou vwar i viable, si sa boug i konnen ki i a pe dir, i konnen ki i a  pe fer, normalman zot ekri li zot dir li be bon i annan tel morso later par la, nou al vizite, zot al vizit ansanm.  La i annan en  konesans sa later ki dakor, si i pran, si i pa pran.  Vwala prosedir.

 

MR WAVEN WILLIAM

Msye Speaker, swivan larepons minis mon tia kontan demann li si en nenport bloker kin lo en later lontan pe fer lagrikiltir e si i demann pou ganny vann son kare kot son lakaz i ete, eski sa pri R5,000 pou ganny mentenir dan tou bann ka.

 

MINISTER

Mentenir wi, sa pri R5,000.

 

MR SPEAKER

Bon, avek sa nou fini kestyon pou minis lagrikiltir.  Nou eskiz li parmi nou.

 

MR C.GILL

Msye Speaker  clarification from the Chair, en kestyon.  Msye Speaker mon remarke detrwa sesyon lasanble nasyonal swivan bann lalis kestyon kin prezante, question time pe al ase vit.  Mon pa  mind zot pa depans en kantite letan lo en sel kestyon me eski ou pa mazinen tia en bon lide petet nou ogmant sa tan kantite kestyon pou sa 1½ erdtan ki nou annan question time.

 

MR SPEAKER

An mezir ki nou fer progre pou sa nouvo lapros, nou pou annan plis kestyon e souvann fwa nou ganny  en pe limite par kestyon  prezans sa minis, me  i vre ki bi se pou ganny plis kestyon e finalman nou le evite ki en kestyon i vin fre, i vin stale. So, si nou kapab pran plis kestyon, mon krwar nou kapab atenn sa bi. 

Bon, nou vin lo lot item pou nou travay ozordi.  Lo motions, premye prezante par onorab Charles e mon envit ou pou  prezant ou mosyon.

 

MRS JOEVANA CHARLES

Msye Speaker, mon mosyon pe senpleman demann gouvernman  pou konsider ogmant allowance bann home carers e  pou organiz en progranm training pou bann home carers aktyel e pou bann ki tia kontan vin home carers plitar.  Avan mon prezant lobzektif mon mosyon, mon tia kontan pas en pti pe lo polisi gouvernman dizour ans ki konsern dimoun aze dan sa pei. Msye Speaker, minister lanplwa e zafer sosyal i responsab pou  enplimant sa polisi konm swivan. Landrwa pli apropriye pou bann dimoun aze se sirman i devre pe reste dan lakour, dan lanvironnman son fanmir, i pa devre pe reste lwen avek sa kominote kin pas  mazorite son letan ler i ti aktiv.  Latansyon, lamour e respe pou bann dimoun aze i en priorite  gouvernman dizour.  Konsiltasyon e lide sorti kot bann dimoun aze i neseser dan devlopman polisi sa pei. Sa polisi i rekonnet lasante e bezwen rekreasyonel oubyen ki latansyon spesyalize pou byennet nou bann dimoun aze. Sa polisi i osi enkli en lapros entegre avek bann minister ki  travay pre avek bann lorganizasyon non-gouvernmantal e bann lazans volonter. 

Msye Speaker prezan mwa dir ki mannyer sa polisi i ganny enplimante. Konmela nou annan lakaz bann vye dimoun dan distrik.  Plizyer distrik in benefisye avek bann lakaz ki zot met bann dimoun aze, ki menm aze me zot endepandan, oubyen zot napa fanmir, oubyen zot pa kapab reste avek zot fanmir pou diferan rezon, oubyen  zot pa kapab tann tro byen.  Sa bann kalite lanvironnman i donn tou bezwen neseser e sa Msye Speaker, napa naryen ki zot bezwen peye pou zot ganny sa bann lakaz.  Noun osi tande ki premye regional home pou bann dimoun aze pou al komanse byento pou ranplas Fiennes Institute e sa nou konnen i donn nou bann dimoun aze tou swen e latansyon neseser anndan menm.

Trwazyenmman mwa vin lo mon mosyon home care.  Msye Speaker, se latansyon e swen dan fanmir kot sa bann dimoun aze pe reste avek son fanmir ki okip li e sa i tre aparan dan Sesel kot mazorite fanmir i  okip zot dimoun aze.  Sa i tre byen.  Kot en fanmir pa kapab donn latansyon neseser son vye paran, kominote i devre donn sa swen neseser e se la ki sa zefor konzwent ant bann diferan minister i zwe son rol.  Pou kapab fer sa posib se la ki bann fasilite e bezwen i ganny met a zot dispozisyon parey monn fek dir  lakaz dimoun aze dan distrik, fasilite swen medikal, regional home e byensir home care.  Konmela, home carers i en servis ki donnen pou ed vye dimoun ki zot fanmir pa kapab donn zot sa swen neseser akoz zot sitiasyon ekonomik pa permet, oubyen akoz zot fanmir  napa pou kapab ed zot, zot napa fanmir pou kapab ed zot. Sa servis se sa ki mon pe al koz lo la.  Sa servis pe aktyelman benefisye en total 2163 dimoun aze.  En total 1713 home carers i ganny anploye e ladan i annan 52 supervisors.  Mon krwar ki tou dimoun i a dakor avek mwan ler mon dir ki sa servis i en fason donn lanplwa bann madanm ki pa travay oubyen bann madanm ki napa ase skills.  Akoz se sa bann madanm ki souvan pe donn swen e latansyon, se bann madanm ki anvi ganny en travay, i kapab komans en karyer dan sa domenn.  Konmela, selman bann  supervisors  home carers ki ganny training e an retour zot ed lezot home carers.  Sa i pa sifi akoz se bann home carers zot menm ki bezwen bann formasyon de baz.  Se pou sa rezon ki mon pe demann gouvernman pou konsider en logmantasyon dan zot allowance e an retour ed zot pou donn zot bann pli bon formasyon pou zot kapab perform pli byen. Osi an linny avek ogmantasyon saler ki bann travayer gouvernman in benefisye sa lannen i tou zis ki allowance bann home carers osi i ganny ogmante.  En home carer se li ki la avek sa dimoun aze pandan lazournen.  Avek mank formasyon oubyen training parler zot fer sa bann dimoun aze an koler. Pa vedir ki zot pe fer ekspre me zot pa konnen egzakteman ki zot bezwen fer.  Parler en home carer i bezwen zis la pou reste avek en dimoun kot avek  li napa personn pandan lazournen, montre li ki i kontan li, ki i kontan travay avek li.   En home carer i bezwen annan pasyans, tolerans e  lanmour pou kapab fer sa travay.  Mon konnen ki pou annan bokou deba enteresan lo sa mosyon me mon senserman krwar ki bann manm onorab a donn zot sipor e vot an faver sa mosyon pou donn nou bann dimoun aze en pli bon konfor pandan zot bann dernyen zour e osi pou ed bann home carers  pou apresye plis zot travay. Mersi. 

 

MR SPEAKER

Okenn ki segonn sa mosyon.

 

MRS MARIE NELLA AZEMIA

Msye Speaker, mon segonn sa mosyon e mon tia kontan dir 2 mo. Mon pou komanse par donn mon sipor total sa mosyon kin ganny prezante par onorab Charles, sa mosyon ki pe demann en ogmantasyon larzan pou bann home carers. Parey in eksplik nesesite sa logmantasyon mon osi zwenn li pou dir ki i annan plizyer home carers zot menm kin deza eksprim sa dezir.  Mon krwar senserman ki sa mosyon i enn ki annan merit, menm si i annan dimoun ki krwar ki sa travay carer i zis en pti travay senp.  Premyerman sa  mosyon i koz lo en ogmantasyon saler.  Parey nou konnen i annan home carers ki travay demi zournen, tandi ki lezot zot travay ziska 3er, ziska 4er apremidi e dot nou osi konnen  napa ler fini.  Paregzanp nou annan en fiy oubyen en manman ki travay home carer  avek  son vye papa ki bezwen reste avek li, oubyen en madanm ki bezwen travay koman en home carer avek son vye bonnonm ki paralize.  Li i napa letan pou fini travay.  Sa ki enportan pou konnen se ki parey son non i dir home carer savedir se ou ki annan responsabilite pou fer sir ki sa vye, ki sa andikape oubyen ki sa  malad ki ou ansarz i ganny sa bon care, i ganny sa bon swen zis parey prezantater sa mosyon in dir.  Paregzanp se ou ki bezwen fer sir ki sa ki ou ansarz i ganny en bon ben, se ou ki bezwen fer sir ki i manze  oubyen i bwar a ler, se ou ki bezwen fer sir ki sa ki i manze,  oubyen ki sa ki i bwar in byen ganny prepare i prop e se ou ki bezwen fer sir ki son lili ki i dormi lo la, menm si i vye, i toultan prop.  Se ou ki bezwen fer sir ki sa malad i servi latizann byen parey dokter in preskrir.  Sa travay Msye Speaker, pa nou tou ki kapab fer li byen parey i devre ganny fer.  In annan nou konnen,  home carers  kin seye, in bezwen kit dan semen.  I lo sa laspe responsabilite ki sa  carer  i annan ki mon krwar gouvernman i devre konsider sa logmantasyon ki nou pe demande pou bann  carers.  Pou le moman nou konnen ki home carers  zot saler oubyen zot  allowance  i varye.  Zot ganny  ant depi R500 a R1600 .

Dezyenm laspe mosyon madanm Charles, nou devret konsider osi ki laplipar sa bann carers se nou travayer, se nou dimoun ki mwen fortinen.  Se zot ki annan zanfan lekol, se zot ki annan bokou det pou peye parey  nou tou.  Parey  sa bann  carers  zot menm zot dir, sa pti larzan pa ase, alors nou bezwen pe siport zot pou ki gouvernman i konsidere donn zot en pti logmantasyon.  An menm tan i nou responsabilite osi pou fer resorti ki annan  home carers  ki tre responsab, me enn de osi ki pa tro ase responsab.  Serten i abiz en pti pe lo bann ki zot travay avek.  Serten i vin en pti pe tar travay parler, me osi zot kit travay en pti pe boner san ki zot konplet zot travay.  Sa se bann ka ki nou konnen, i pa tro byen.   Nou ti a kontan ki bann   home carers  zot ti a kapab amelyor en pti pe lo la.  Si nou lasanble ozordi, nou pe apiye pou donn bann  home carers en pti logmantasyon dan zot allowance, dan zot lapey, nou pe osi espere ki zot bann carers zot fer mye, zot fer byen zot travay.  Sa lapel i pou zot tou, menm bann supervisors.

Dezyenm laspe mosyon madanm Charles i pe koz lo en training pou bann carers  ki pe travay e pou bann ki pou vin  carers  pli tar.  Msye Speaker, mon get sa pwen koman en pwen tre, tre enportan.   Training  mon krwar i bezwen ganny donnen.  Pli boner nou ti koz lo kisisa sa swen.  Mon mazinen ki sa training i devret tret bann pwen tel ki pasyans, konprenezon, ki fason fodre lev en malad, latizann, ki mannyer ou pou swiv preskripsyon dokter.  Par egzanp i neseser pou bann ki malad ki mannyer fodre gard lapwentman avek dokter.  Alor dan sa ka, parey madanm Charles in dir, mwan mon pe osi propoze ki sa  training i en  training  ki kategorize, en  training  pou bann  carers ordiner e pi en training pou bann carers spesyalize.  Bann carers ordiner se bann carers ki zis kwi manze, netway lakaz, lav lenz e pi zot ale swa akoz zot annan en dimoun ki fer leres oubyen zot ganny fanmir ki ed zot apre.  En training pou bann ki fer travay pli spesyalize, savedir pou bann carers ki bezwen reste, dormi ek sa vye, avek sa malad, ou bezwen donn li ben, bann ki bezwen donn latizann parey dokter in preskrir, bann ki bezwen abiye, dezabiy sa bann dimoun.  Se sa ki mon apel bann training en pe pli spesyalize.  Mon krwar osi ki dapre travay ki zot a fer e dapre  training ki zot ava gannyen ki ava determinen ki logmantasyon i devre gannyen.  Savedir mon pe propoze ki  en carer ordiner son lapey i pou diferan aven en carer  spesyalize. Msye Speaker, mon tia oule terminen an dizan ankor enn fwa ki mon donn mon sipor total sa mosyon.  Mon plis ki krwar ki bann dimoun, bann home carers  zot menm ki pe ekoute, pou byen kontan tande ki lasanble pe koz lo sa  size e nou espere vwar dan le fitir en logmantasyon dan zot  allowance, dan zot saler e en bon progranm training pou tou bann home carers. Mersi.

 

MR  DANIEL BELLE

Msye Speaker, mosyon ki lonorab Charles in amennen bomaten i byen entendu rezouir nou dan lopozisyon akoz mon krwar ki serten mosyon ki dan en serten fason i annan son merit.  I bon akoz i en pe bann keksoz ki souvan nou demande dan lasanble, premye parti son mosyon kot i dir ogmant allowance sa bann home carers. Souvan nou koze nou dir ogmant saler travayer e souvan larepons ki zot donn nou se ki gouvernman napa  mwayen fer li.  Mon tia kontan ki sa mosyon i ganny pase.  Mon pou  vot an faver sa mosyon e mon krwar ki bann manm dan lopozisyon nou tou nou pou vot an faver sa mosyon akoz sa mosyon i anmenm  2 keksoz ki enportan. Premye keksoz, i pran konsiderasyon ki  lavi dan Sesel i ser e ki i neseser dan sa ka pou  ogmant allowance ki en home carer i gannyen.  Sa travay home carer i pa en travay fasil.  Sa travay home carer i en travay parey nou tou nou konnen ki difisil dan la mezir ki ou pe travay ek en bann dimoun ki ou bezwen lev zot parfwa, okip zot parfwa en pe plis ki lezot dimoun ki ou travay avek.  Nou tou nou konnen i annan bann dimoun ki travay avek bann zanfan, bann pti zanfan dan  lakres. I annan dimoun ki travay avek bann youth epi i annan sa bann dimoun ki travay avek bann dimoun aze.  Tou sa 3 kalite travay i demann latansyon, i demann tolerans, i demann konpreansyon, i demann en serten fason fer, en fason ki sa bann dimoun ki pe ganny sa lasistans, ki pe ganny asistans en home carer i santi li dan lanmen en dimoun dan lakel i annan konfyans. Lafer ki enportan ozordi se ki dan Sesel bann dimoun aze zot gannyen en allowance avek gouvernman ki tou le-z-an i ogmante e mon espere i ava ogmante kontinyelman e mon krwar i ava ogmante kontinyelman tou le-z-an e son home carer sa dimoun ki i travay avek, i toutafe normal ki ler sennla ki pe travay avek son larzan i ogmante, ki li osi sa home carer son larzan i ogmante.  Li ki pe asiste sa lot, lot i ganny en allowance R50 tou le-z-an, mwan mon krwar  i toutafe normal ki sa home carer ki pe asiste sa lot, li osi son larzan i ogmante, en fason ki napa zalou.  I vre ki dan sa ka lo kestyon vye dimoun, gouvernman i fer bokou zefor e nou osi nou pou kontinyen dir ki plis ou kapab fer pou sa bann vye dimoun, pli bon.  Menm a la riger mwa va al  pli lwen.  I annan home carer ki petet i pa reste en pe pre. I annan vye dimoun osi ki, i pa vreman topik sa mosyon me fodre nou mazinen osi ki petet menm transpor,  zot merit ganny pou naryen.  Me sa i a fer lobze en lot deba.  Sa ki enportan ankor e ki  pourkwa nou pou siport sa mosyon, se ki nou vwar ki dan sa mosyon i annan en keksoz kot gouvernman, kot manm lasanble i pann dir rekomann gouvernman pou ogmante.  Madanm lonorab Charles dan son fason in met son mosyon i dir  that this Assembly calls on the government to increase.   Souvan ler nou met bann mosyon vizavi  gouvernman nou dan lopozisyon, zot dir nou gouvernman pe fer, zot rekomande dir li kontinyen fer.  La ozordi en mosyon i sorti kot parti mazorite e zot dir  that this Assembly calls on government.   Mon vwar li byen mwan.  Zot pa dir gouvernman, zot  pa demann okenn rekomandasyon, zot forceful, very forceful  pou donn larzan, ogmantasyon sa home carer.  Nou osi nou siporte sa, akoz souvan ler ou dir gouvernman rekomande oubyen gouvernman konsidere, sa bann dimoun pa ganny larzan ditou.  Mon espere ler nou ava  siport sa mosyon nou tou ansanm, ki i ava pase avek linanimite dan lasanble, gouvernman i a dir lasanble nasyonal in  call   pou fer sa keksoz e mon krwar ki nou ava ganny en rezilta satisfezan pou sa bann dimoun. 

Msye Speaker i enportan ki nou donn training sa bann dimoun.  I enportan ki nou donn training dimoun ki travay avek bann vye dimoun akoz depli-z an pli nou sosyete i komans vin en pe pli spesyalize.  Tou dimoun ki fer louvraz nou oule ki i vin, i fer louvraz parey in ganny dir, par ekselans.  Aim for  ekselans.  Si ou pe  aim pou ekselans fodre ou donn sa dimoun en posibilite mwayen pou li kapab ganny training.  I annan dimoun ki ozordi pe lekol, ki travay e ki  tia kapab travay avek bann vye dimoun.  Lafer napa louvraz se le moman la.  Letan dimoun napa louvraz, ou train zot, donk i  annan aktyelman en posibilite ganny sa bann zenn dimoun ki pe rod louvraz, prepar zot  pou dan 1 an, 2 an, komans train zot pou zot travay avek bann vye dimoun, en fason ki sa bann vye dimoun zot a kapab ganny en dimoun kin ganny training lo tou kote, koman  social worker, koman ners, koman asistan e menm dimoun ki kapab ede pou egey sa bann vye dimoun letan zot la se zot, diskit avek zot, esplik zot en pe keksoz mannyer i pase deor, akoz i annan en bann ki pa kapab sorti sa bann vye dimoun, zot bezwen reste anndan.  Donk mon krwar Msye Speaker, mosyon madanm Charles i merit latansyon e mon krwar i en bon keksoz.  Ozordi mannyer mon konpran, home carer i ganny R800  pou la mwatye zournen  travay.  Sa i vin apepre, 800, 850, sa i vin apepre R1600 par mwan si ou ti met li lo en zour plen e nou konnen, noun tann dir dan diskour minis finans ki tou travayer ki ganny mwens ki 1800, zot ogmant 100, 200, 300 roupi.  Avek sa menm lozik, mon krwar ki gouvernman avan menm lasanble ti demann li fer, tin merit pran sa menm lozik an konsiderasyon e dir  konm sa bann dimoun si zot ti  travay en tan plen,zot ti pou ganny mwens ki sa bann ogmantasyon ki noun donnen, organize ki zot osi zot ganny en  ogmantasyon e mon krwar ki la matematikman  tou keksoz ti pou byen fasil.  Me mon pa konnen, en sel keksoz, sa manm lasanble, madanm Charles pann dir ki kantite larzan i tia kontan vwar ki home carer i gannyen. Mwan, mon tia dir konm zot ganny mwens ki 1600, donn zot R300 ogmantasyon.  Ti ava en bon keksoz e petet si nou dir R300 ogmantasyon, omwen nou konnen, 500 si oule, si zot annan mwayen met 500 akoz i vre ki sa bann dimoun zot fer en louvraz spesyal.  Si zot le met 500, met 500, ti a va byen.  Si ou met 500 mwan mon pou dir 500.  Msye Speaker, mon krwar  ki parey lonorab laba in dir R500, esperon ki ler zot a met mosyon kot gouvernman, zot ava fer en fason ki sa bann dimoun kapab ganny en saler desan.

 

MR BARRY FAURE

Letan mon ekout msye Belle koz lo sa mosyon, i apresye ki mannyer madanm Charles in formil son mosyon,  that this Assembly calls on the government konmsi en pti pe for e forceful, i fer mwan riye trankilman e selman sa ki nou devret realize se ki sa mosyon i sorti dan kote SPPF.  Sa mosyon ki sorti dan kote SPPF pe koz lo en logmantasyon e lo training pou bann home carers.  I pa sorti dan kote lopozisyon dan lasanble.  Sa ki  enteresan selman, deza i bon note se ki msye Belle in dir nou i pou vot an faver.  Sa i korek.  Semenn prosenn osi pou annan en lot mosyon ki pou ankor enn fwa sorti dan kote SPPF dan lasanble e pa dan kote lopozisyon ki pou demann ogmantasyon pou Unemployment Relief Scheme.   Lo sa mon pa pou koze mwa esper semenn prosenn.  Me sa i sorti dan kote SPPF dan lasanble e nou pe koz lo size home carers.  Madanm Charles mon felisit ou oun anmenn sa mosyon dan lasanble, madanm Azemia mon felisit ou, oun segonn sa mosyon.  Zot tou le de zot in dekri ki sisa home carers. Home carers Msye Speaker, parey ou konnen ou menm i en kreasyon SPPF.  Se SPPF dan son filozofi, dan son krwayans ki bezwen donn swen tou dimoun dan la sosyete, kin vwar nesesite donn sa swen pou nou bann dimoun bokou pli aze dan lasosyete.  Nou bann dimoun ki e de menm  andikape, ki pa pou kapab fer keksoz lo zot menm. An menm tan i kree travay, en nouvo travay pou serten nou bann dimoun dan la sosyete.  Alor pep Seselwa mwan koman reprezantan pep osi, mon dir ki pep Seselwa i apresye sa bokou.  E sanmenm sa ki pep Seselwa toultan pou kontinyen vot pou SPPF.  Sa mosyon annou note i ganny mete dan en lepok kot nou pe koz nou lannen  share  and care,  lespri partaze e lespri swen. Alors sa i en lot keksoz ki enportan pou note e  dernyen keksoz mon pou dir se ki nou vwar ki sa progranm Home Care pe antre dan en lot faz.  Nou konnen ki gouvernman i kapab donn li rekonesans sa mosyon e si sa i ganny fer, i pou antre dan en lot faz bokou pli avanse, en faz bokou pli organize, en faz kot pou demann  training  e konsekaman bokou plis larzan pou nou bann dimoun. Msye Speaker, mon pou siport sa mosyon, mersi bokou.

 

MR  PAUL CHOW

Msye Speaker, parol i dir ler botan i vini, parler ou vwar son bann sinny.  Mon demann mon lekor si botan pe vini parske nou vwar bann mosyon pe komans aparet pou demann  ogmantasyon pou bann dimoun.  Natirelman napa bokou politisyen dan Sesel ki kapab debout dan lasanble e obzekte si pou donn en logmantasyon okenn dimoun, sirtou  si nou konnen pou dir finalman sa larzan pa pou sorti dan nou pos.  Kestyon home carer noun antann dir se-t-en kreasyon SPPF oubyen petet monn mal servi term parske home carer pa egziste zis dan Sesel. I annan en kantite pei e prensipalman tou pei ki annan sistenm sekirite sosyal i annan en fasilite home carer, me home carer pa neseserman sorti dan sistenm sekirite sosyal, i osi sorti dan sistenm kot i annan bann pansyon prive, bann savings ki dimoun in fer kot zot kapab pey pou zot fasilite ler zot bezwen.  Me nou, Sesel pou lenstan i annan zis en sours pou kapab pey home carers e sa  sours se sekirite sosyal.  Tre resaman Msye Speaker, mon krwar oun bezwen war ou menm, noun ganny rapor sekirite sosyal pou lannen 1995. Enteresan pou vwar ki an 1995 home carer scheme ti kout sekirite sosyal 11 milyon 153 mil roupi e sa i  R100,000 ogmantasyon par lao depans ki ti fer an 1994.  Sa menm lannen osi sekirite sosyal ti fer en defisit de R30 milyon e avek en rezerv R300 milyon si sekirite sosyal pa kapab fer  en sirpli lo son depans konpare ek son reveni, dan mwens ki 10 an fon sekirite sosyal poun faid.  Dan mwens ki 10 an swa nou pou ogmant kontribisyon sekirite sosyal lo tou bann dimoun ki travay e tou bann anplwayer pou nou kapab pey pansyon bann dimoun ki pou ganny laz pansyon, pey benefis bann ki envalid, pey benefis bann ki dan difikilite, pey benefis bann ki malad, si nou pa ogmant taks lo tou Seselwa, nou pa pou kapab, nou pou sa bann ki pou ariv sa laz, ganny benefis.  Mon krwar i neseser Msye Speaker, pou met sitiasyon home carer  dan konteks kot sa larzan i sorti, e mon ti a voudre profit lokazyon osi pou met home carer  en pe dan konteks zistwar. Mon rapel dan lepok  tranzisyon pou eleksyon, nou ti vwar ki ti annan en gran ogmantasyon dan kantite   home carers  e ki tanzantan bann pti not ti sorti kot bann minister pou al kot bann dimoun,  sa ou kapab donn li en dyob koman en  home carer.  Tou dimoun ki ti oule   home carer  ti nobou gannyen. Fot espere dan prosen eleksyon sa sitiasyon pa pou koumsa. 

Sa  issue home carer  byensir i konsern  tou dimoun pa senpleman bann ki ganny anploye me osi bann ki pou resevwar sa lasistans.  Mon krwar i osi neseser pou nou fer en  rewiew  endepandan profesyonel lo vreman ki nou pe donnen pou sa larzan ki pe ganny depanse.  Eski i annan dimoun ki pe ganny  home carer assistance  i vreman dezerve pou gannyen e eski bann serten dimoun ki pa pe gannyen ti devret gannyen.  Mon pa krwar ki nou konnen egzakteman si ler nou pe donn lasistans, nou pe vreman fer li donn sa benefis ki nou dir nou pe donnen ou ki nou krwar nou pe donnen, oubyen eski dan sitiasyon, i annan serten sitiasyon kot sa lasistans i vreman pa arive kot sa bann dimoun e ki benefis i senpleman zis pou  home carers. 

Lonorab dan son prezantasyon pann fer kler ki  son priorite. I dir donn logmantasyon  apre donn  training.   Eski i anvi ki ogmantasyon i ariv avan  training  oubyen ki  training i ariv avan logmantasyon, oubyen i oule tou le de an menm tan. Lonorab dan  son prezantasyon in osi dir ki, in servi le mo donn swen neseser, eski sa i vedir swen lo kestyon medikal.  Konbyen bann home carers  ki vreman kalifye pou donn swen medikal.  Mwan mon annan leksperyans personel kot monn vwar  home carers pe rekomann latizann pou bann dimoun e mon pa krwar sa i en keksoz tre satisfezan.  Sepandan mon tir mon sapo pou sa bann  home carers  ki menm ek sa pti git larzan ki zot gannyen, zot vreman annan lanmour pou sa bann dimoun ki zot pe okipe.  Louvraz  home carers  i pa zis al netway lakaz, i pa zis al fer konmisyon, i pa zis donn lasistans vye dimoun.  Monn  vwar sitiasyon kot  home carers  i tonm li dan en landrwa kot sa dimoun i bezwen serten lasistans medikal i bezwen plis ki senpleman netway lakaz.  I annan i devoue, i vin menm aswar menm ki i pa ganny plis ki sa R800 me i nobou vini aswar zis pou donn sa lasistans me i annan ki pa enterese osi, i vini 8er midi, 11er i ale e i pa enterese ki pase.  Me eski ou kapab vreman blanm tou le de kote.  Ou kapab blanm sa  home carer.  Apre tou pou R800 ki kantite lefor ou pare pou mete. Me osi si ou napa konesans ki ou ekspekte avek en dimoun ki pou vin ver sa louvraz. E sa mon krwar i leksperyans ki preski tou nou ki la dan sa lasanble nasyonal i konnen ki arive.  Nou ti a kontan ki avek sa demann pou logmantasyon, nou osi fer fason  rewiew  an realite, an detay ki lefektif ki bann   home carers  pe anmennen, ki vreman demann i ete, ki nesesite i ete e si nou pe donn, nou pe met sa nesesite par sa ki nou pe fer konmela. 

Msye Speaker, finalman parey ler mon ti komans mon prezantasyon monn dir se kestyon ki mannyer nou pou peye.  Nou kapab an dezir en bon pe keksoz, me finalman nou bezwen gete si nou dezir i kapab ganny satisfe par la realite.   Home carer  lapey i bezwen sorti dan en landrwa e nou konnen ki la sekirite sosyal ki pe peye e nou konnen ki sekirite sosyal i deza dan en defisit e ki si nou kontinyen koumsa nou pou ariv dan en sitiasyon kot pou napa larzan, napa ase larzan pou donn sa bann ki pou ariv laz pou pran retret e pou sa bann ki pe vini dan lavenir.  E avek sa, Msye Speaker, mwan osi mon pare pou donn mon sipor sa mosyon me mon krwar ki sa  mosyon i devret osi ganny kalifye par demann en revizyon sa servis  home carers  ki petet nou a kapab donn ogmantasyon bann ki travay, bon  training e pa neseserman bezwen depans en kantite plis larzan.  Mersi Msye Speaker.

 

MR MICHEL GARDETTE

Msye Speaker, sa mosyon par Madanm Charles ki pe demande ki gouvernman i donn en ogmantasyon dan  allowance  bann home carer e osi donn zot training, i en bon mosyon e i vin a en bon moman. I donn mwan personelman loportinite koz lo en keksoz ki depi 3 a 4 an mon pe sey anmenm devan pou sey rezourd.  I pa zis sa problenm, anfen sa saler ki zot pe gannyen, me osi zot kondisyon travay an zeneral.  Mon krwar ki apard ogmantasyon  sa  allowance  ki zot pe gannyen, zot kondisyon travay an zeneral i bezwen reganny get ladan. 

Msye Speaker, gro problenm mon asire en kantite nou ki responsab pou bann distrikt, bann manm onorab dan sa lasanble, kin ganny elekte pou en distrik, en moman ou a lot, in bezwen fer fas ek sa problenm, se paregzanp ler en home carer i malad limenm li ou son lepok, son peryod malad, menm si i ganny sertifika medikal i pa ganny peye.  Konbin sa ek sa pti  allowance  ki i pe gannyen, i anmenn  parfwa dan serten mwan  gran difikilte pou sa bann home carer.   I annan en lot problenm Msye Speaker,  ou war ki i annan  home carer  ki pe travay  5 er-d-tan avek en dimoun aze oubyen en dimoun ki en pe  disabled   si oule, en dimoun ki annan serten problenm, e en lot ki travay 5 er-d-tan ek en lot dimoun e sa de dimoun i ganny diferan lapey.  Sa diferans i kapab ant R565 e R850.  Mon krwar ki in ler ki sa  allowance  bann  home carer  si nou oule apel li en  allowance  i ganny standarize baze lo er-d-tan ki sa  home carer  i pase avek sa dimoun aze oubyen ek sa  dimoun ki envalid.  Sa kantite er-d-tan, mon krwar, lafason  ki mon kapab konpran li, dapre kestyon ki monn poze dan le pase, i pli-z-ou-mwen ganny baze par rapor medikal lo leta sa dimoun limenm.  E en lot problenm osi sa bann dimoun, la mon pe koz lo bann dimoun ki resevwar sa  care,  ki fer fas avek, se ler sa  home carer  i malad limenm li, dan bokou ka, napa personn ki vin ranplase sa  home carer,  sennla ki pe donn  care.  Vedir sennla ki pe reservwar, annann ler i pa gannyen, akoz sa dimoun ki okip li  i malad.  Mwan mon krwar dan sak distrik ti devret annan 3 a 4 dimoun parey nou dir sa lo  standby oubyen bann dimoun ki ganny anploye pou ranplas lezot ler i malad.  Ki nou vwar?  Monn deza pase, mwan menm personelman, en dimoun ki pe reservwar  home care,  son  carer  i malad, kot i pe reste zot in anpes marmay al lekol, dan sa ka ti en fiy 13 an, ozordi i pa al lekol akoz  home carer  pa kapab vini pou reste ek granmer.  Mon krwar nou devret si oule otan ki nou mwayen i permet nou sey avans sa dan en lot konsept kot dan bann distrik i annan 3 ou 4 dimoun ki  stand-by,  osito ki nou konnen ki enn i malad, i anmenn son papye medikal ki i malad, i ganny ranplase par en lot e osi ki sa dimoun ki annan son papye medikal, i kontinyen ganny son larzan akoz alafen si i malad, i pa egzakteman li ki responsab.  Mon krwar an-n antye sa bann benefis oubyen sa fason travay, oubyen sa kondisyon travay sa bann  home carer  i annan i devret ganny reanalize e   ganny update si oule pou fer li vin plis an linny avek en sitiasyon lanplwa kot en dimoun i anploye.  Mersi Msye Speaker.

 

MR CHRISTOPHER GILL

Msye Speaker mwa komanse me selman si i neseser pou kontinnyen plitar mon swete ou permet mwan.

 

MR SPEAKER

Nou annan letan.

 

MR  GILL

Mr Speaker dakor mon ti a kontan premyerman remersi Mme Charles pou son sazes pou prezant sa mosyon se maten.  Mon krwar i annan serten konsern kin leve ki i annan bokou validite e apre ler monn ekout li monn santi ki vreman Mme Charles pe sey al dan en direksyon pozitiv e ler Mme Charles i fer sa prezantasyon mwan menm mwan mon pann regarde si Mme Charles i SPPF, si Mme Charles i Mauricien si kwa.  Konmsi mon pran li pou en manm lasanble ki pe prezant en mosyon.  Mon pann get li avek en lizye pou dir sa i en mosyon politik kin ganny prezante par SPPF e SPPF pou prezant li, SPPF pou defann li e a lafen SPPF pou vot an faver li e pou la rezon ki mwan mon dan lopozisyon mon pou bezwen vot kont.  Mon krwar si nou swiv nou bann deba ki ganny fer lo leta la nasyon, si nou swiv sa ki prezidan Rene in dir dan sa lasanble, si nou swiv sa ki onorab leader of the opposition, James Mancham in dir dan sa lasanble, nou konn byen ki nou bezwen esey depolitiz nou bann deba enpe e nou vizyon parske nou konnen si toultan nou repolitiz li pou dir sa i SPPF, sa i UO, sa i DP a lafen ou pou kree plis friksyon.  E i pa pou byen servi ni nou pep e ni sa lenstitisyon ki nou apel lasanble nasyonal.

Dezyenmman Mr Speaker onorab Azemia in fer en prezantasyon lo sa mosyon, mwan menm mwan mon toultan apresye bann prezantasyon ki onorab Azemia i fer lo plizyer sa bann size sosyal.  Sak fwa nou bezwen en lavwa ki sansib, sak vwa nou bezwen en lavwa ki konpran sa bann ka sosyal i toultan la pou eksprim en lopinyon ki pozitiv e mon ti ava kontan profite, servi sa lokazyon pou felisit li pou en prezantasyon ki vreman eklersi nou enpe, met en laklerte lo sa issue  ki nou pe debat ozordi. 

Mr Speaker ler nou pe koz lo allowance pou nou bann home carers,  ler nou pe koz lo training  en programme training pou nou home carers, nou antre nou dan en sityasyon, dan en issue ki parey nenport issue sosyal ki ou bezwen deal avek,  ki ou bezwen fer fas avek,  nou bezwen konnen egzakteman ki nou pe fer.  Mwan menm mwan personelman mon pa krwar ki i responsab, ki lavey en eleksyon, swa 1 an avan eleksyon, pou la rezon ki en gouvernman i bezwen rod li en lot manda, en manm lasanble i bezwen rod li en lot manda, zot vin avek bann mosyon ki is not well thought out.

Onorab Belle i ti kapab vin la avek en mosyon pou dir demann lasanble  to call on government to increase the salary of all home carers by R300, by R500, by R1,000 .  Zot dan SPPF zot ti pou kriye zot ti pou dir be eski sa i responsab.  Nou konnen ki bann home carers  i fer en kantite sakrifis, nou konnen bann home carers  i travay dir pou sa pti larzan, nou menm konnen ki sa larzan i pa ase.  Napa bokou travayer Seselwa ozordi ki pou dir ou ki zot satisfe avek zot saler.  Paske an menm tan ki nou konnen bokou dimoun pa satisfe avek zot saler partou Sesel nou konnen ki pri lavi i telman o ki lafen dimwan ler oun ganny sa pti larzan ki oun atann pou en semenn arive dan ou pos, ou bezwen depans li en sel kou pou kouver ou bann fre.  Menm si prezidan i dir nou annou kree en sosyete kot nou annan plis  savings,  nou konnen an realite i difisil fer li. 

Onorab Chow in prezant nou avek en kestyon mon krwar ki tre valab e mon swete ki mover of the motion  i ava donn li son la repons ler i fer son closure.   Onorab Chow in dir nou ki sa larzan pou sorti dan fon sekirite sosyal, in demande be kote i pou sorti.  Eski sa larzan i la, eski i egziste sa, eski nou annan sa larzan pou donn sa bann home carers  en ogmantasyon.  Mon krwar the mover of the motion de ki in prezant son mosyon i dir nou ogmant allowance pou bann home carers, mover of the motion  i annan en reponsabilite pou dir nou dan sa lasanble ki bor nou pou gannyen.  Eski nou pou ogmant nou koleksyon sekirite sosyal, eski nou pou ogmant taks lo en lasanm lotel, eski nou pou ogmant nou taks airport, swa nou pou komans  sarz dimoun pou al bennyen Beau Vallon parey la noun komans sarz en landing fee pou Curieuse, landing fee  pou La Digue, landing fee pou national park ensidsiwt.  Kote nou pou ganny sa larzan.  Nou sarz dimoun pou al dan Vallée de Mai, i annan plizyer bann fees ki nou kolekte isi.  Be kote ki nou pou ganny sa larzan. 

 

MR DANNY FAURE

Point of Order Mr Speaker.  Eski lonorab i kapab dir kote  ti annan landing fee pou La Digue.

 

MR C.  GILL

Non ti annan en propozisyon pou kree en landing fee  La Digue.    I pann zanmen enplimante.

 

MR D. FAURE

Be aret koz manti dan sa lasanble.

 

MR C. GILL

Non i pa manti sa. I en sipozisyon.  Parey monn dir en fee pou al bennyen Beau Vallon.  I dekri zot stil, zot stil pou gouvernen, zot anvi depanse, zot kree  en taks sa zot style.Mon kapab kontinnyen Mr Speaker.

Yes Mr Speaker, kote nou pou ganny sa larzan, sa i en kestyon mon prezante.  Mon lot pwen ki mon oule soulinnyen, de ki noun ganny sa larzan, noun allocate  sa larzan pou sa ogmantasyon dan allowance,  ki mannyer ou pou disburse  sa larzan.  Onorab Chow ankor in lev en pwen ki mon krwar i tre valab e mwan osi mon ti a kontan tous lo la.   E onorab Barry Faure osi mon krwar in tous lo la en pti pe selman i pann al dan detay. Annou komans avek sa pwen kin ganny leve par onorab Faure.  Onorab Faure in dir nou sistenm home carers  se sistenm kin ganny kree par SPPF.  I dir ou en kreasyon SPPF. 

 

(Interruption)

 

I sanble mwan i annan plizyer onorab Faure isi, plis ki 2.  Parske sa ki mwan mon rapel byen pa ti dir dan Sesel.

 

MR BARRY FAURE

Mon ti oule dir isi dan Sesel Msye Speaker.  SPPF ki ti kree home carers  isi Sesel.  Sistenm home carers  isi Sesel, SPPF  ki ti kree, pa Msye Gill.

 

MR C. GILL

E SPPF in kree Maison Du Peuple, SPPF in kree konblaz, SPPF pe al fer reclamation.

 

MR D. FAURE

Lo konblaz in met Roche Caiman.

 

MR SPEAKER

Relevance.  Nou lo  home carers.

 

MR C. GILL

Le pwen i senp Mr Speaker, nou konnen dan Sesel SPPF kin kree sa parske tou sa letan ti annan selman SPPF.  Fodre pa mon mazin zot ki noun sorti dan en sistenm parti inik kot nou ti annan en sel parti.  Le pwen se kwa Mr Speaker.  Le pwen se nou konnen ki sistenm home carers i en sistenm ki tou pei parey onorab Chow in dir nou i annan, ki annan en sistenm sekirite sosyal.

 

MR D. FAURE

Order Mr Speaker donn mwan 2 pei, zis nonm 2 pei.

 

MR C. GILL

I sanble  mwan onorab Danny Faure i annan mous dan son kannson.  I pa kapab reste li trankil.

 

MR D. FAURE

Msye Speaker mon demann li pou aplogize sil vou ple.  Isi nou pa dan jungle   nou dan en lasanble nasyonal.  Monn demann ou zis 2 legzanp e napa zafer mous.  Mr Speaker i bezwen apologize.mon demann li pou apologize Mr Speaker, isi nou pa dan en jungle.

 

MR SPEAKER

Selman lotorite pou demann sa apology  i sorti kot mwan.

 

MR D. FAURE

Yes Msye Speaker mon konpran sa.

 

MR SPEAKER

Bon si ou ti kapab apologize  apre ou kontinnyen.

 

MR C. GILL

Yes  mon ti a kontan apologize.   Si mon ti kapab kontinnyen.

 

MR D. FAURE

Mersi bokou Msye Speaker.

 

MR C. GILL

Very good Mr Speaker.  Mr Speaker le pwen se kwa.  Sa sistenm home carers  i egziste dan plizyer pei.  I annan de pei kin enplimant li dan en fason telman efikas kot sa bann vye dimoun, sa bann dimoun malad i ganny bon swen medikal e an menm tan bon swen sosyal avek sa bann home carers  e larzan i ganny depanse dan en fason efikas.  Mon krwar en problenm ki nou nou annan isi, petet menm si nou bann home carers  i annan sa leker pou fer en meyer travay ki posib, fer sakrifis  zot letan, sakrifis zot lanmour, zot tou pou fer sa louvraz, nou konnen Mr Speaker ki bokou nou bann home carers  zot pa pas zot atraver en training programme  ki efikas.    Pou ki ler i annan en bezwen pou donn asistans sa dimoun aze, petet menm si zot pou fer zot mye, zot mank enpe training  dan sa domenn.  Parske nou konnen i en keksoz ki telman konplike, i en keksoz ki parey, i menm sistenm ki, i parey en avoka i bezwen pas anba serten training,  en enzenyer i bezwen pas li anba serten training,  bann home carers  osi zot annan zot kors training. E mwan menm mwan mon ti a kontan vwar ki sa i ganny enplimante.  I ganny enplimante dan en fason ki efikas, sa home carer,  sa potential   home carer i antre li dan en seminar, en konferans, en training course, fodre pas li en 6 semenn, en 3 mwan, 2 an, 3 an si fodre i ganny son training pou li aprann ki mannyer pou fer sa. Parske ler noun ariv dan sa staz, nou pa distenge ant en home carer ordiner ek en home carer spesyal.  Nou dir i annan bann home carer  ki kalifye.  Nou dir ki annan bann home carer  kin pas zot course, ki konnen ki zot pe fer.  E la Mr Speaker bidze i permet parey onorab Paul Chow in eksplik nou byen kler taler, bidze i permet.  La nou pa trouv okenn rezon akoz nou pa kapab pey zot R2,000, R3000 par mwan parski nou konnen zot in fini ganny zot training,  zot vo sa larzan, e nou pa pe zis fer cheap politics  avek en pti allowance R50, R100, R200 parske mwan mon mazinen, mannyer mon pe kalkil SPPF, mannyer zot fonksyonnen, tanzantan zot vini avek bann pti ogmantasyon R50, R100, R200, R300. Selman nou konnen pa sa ki Seselwa pe rode ozordi.  Seselwa pe rod en bon larzan pou li viv byen konfortab.  Noun tann msye Mancham dan son rebuttal to the state of the nation address.  Nou annan en problenm Sesel, nenport ki gouvernman ki vin o pouvwar pou fer fas avek rising expectations   Yer ler ou ti donn en ogmantasyon R50 ou ti mazinnen be sa i a cool  sa travayer pou 2an, 3 an.  Ozordi travayer Seselwa ne pli enterese avek R50.  Petet sa rezon zot bann konpannyen pe enport bokou bann malbar pou fer zot travay.  Nou konnen i annan serten manm dan lasanble ki for lo enportasyon bann travayer malbar.  Me selman Seselwa li i oule vwar li en bon larzan li.  Swa son home carer,  swa son dokter, nenport ki.  E mon swete ler zot enplimant zot bon training programme  zot a vwar en zistifikasyon pou fer sa.  Alors Mr Speaker aktyelman mon pa pou bezwen plis letan.  Mon ti a kontan terminen….

 

(interruption)

 

ase nerve, relax. Ou vwar Mr Speaker, zot nerve apre mwan ki bezwen apologize, selman monn sitan abitye bese.  An menm tan mon bese mon pa zanmen vann mon prensip, i pa en problenm pou mwan.  Alors Mr Speaker  pou mwan terminen si ou tia demann mwan ki kontribisyon Gill in fer lo sa size, mon tia kontan dir ki lanfaz ki mwan mon oule plase se premye keksoz  training  nou bann home carers. 2enm keksoz en ogmantasyon sibstansyel. 3enm  keksoz, kot ou pou ganny sa larzan. Les mwan demann zot en kestyon, kestyon pli enportan kin ganny demande bomaten isi dan sa lasanble, kot pou ganny sa larzan, in ganny leve par onorab Chow. Mon pou prezant en pti keksoz avan mon terminen ki aplike pou sa, parski i en depans parey tou bann lezot depans sa gouvernman i bezwen fer, kot pou ganny larzan. Mwa dir ou kot pou ganny larzan Msye Speaker, larzan isi Sesel i partou i otour nou tou, selman mon konnen, Prezidan Rene i konnen kot i ete.  Msye Speaker ou konnen i annan plizyer bann tes kin ganny fer, bann letid ki  montre Sesel i annan delwil.  Be selman bann konpannyen pa oule tire, pangar sa gouvernman i ogmant  tax lo zot delwil demen. Alor fason ou ganny sa larzan, ou tir gouvernman SPPF ou met en  gouvernman opozisyon, la ou pou war ou ganny larzan isi. 

 

MR D. FAURE

Dir nou kot i annan delwil omwen.

 

MR SPEAKER

Bon, nwa pran en  break  ziska 11er.

 

BREAK

 

MR SPEAKER

Nwa kontinyen avek deba lo  mosyon lo  home carers.  La parol pou onorab Larue

 

MRS MITCY LARUE

Msye Speaker, mosyon ki lonorab Charles in anmenn devan lasanble bomaten i koz lo en logmantasyon pou bann carers e osi training.  Ler nou koz lo carers, nou pe koz spesyalman lo bann madanm, bann madanm ordiner ki annan zanfan e ki pou en fason ou en lot zot pa dan lanplwa permanan e sa bann madanm zot dedye bokou zot letan pou zot travay avek bann dimoun aze dan sa sosyete.  I annan serten sa bann madanm ki travay pou 5 er-d-tan, 3 er-d-tan oubyen  full time e zot lapey i varye.  Zot  allowance  i varye ant R550, R800 a R1100.   E si nou pe get byen, sa mosyon ki madanm Charles in anmennen i tre apropriye.  Pou en mer-d fanmir pou ganny li en lapey parey i pa sifizan pou li mentenir son fanmir alor i normal ki ler en manm lasanble i anmenn en tel mosyon  pou nou  donn li tou nou sipor.  An menm tan polisi nou gouvernman SPPF i dir ki nou bezwen toultan pe okip nou bann dimoun aze.  Dan sa sosyete nou annan bokou dimoun aze ki bezwen plis latansyon, plis swen e se san menm sa bann vye dimoun ki zot,  zot ganny antretenir par en  carer  e sa i polisi ankor sa gouvernman pou fer sir ki sa bann dimoun aze i ganny antretenir byen.  Zot in kontribye bokou dan sa sosyete e ozordi nou osi nou bezwen get dan sa ki zot in fer e rekonpans zot.  Pou travay avek bann dimoun aze i pa fasil akoz bann dimoun aze i annan ki annan bokou kapris, i annan ki annan diferan dezabilite, i annan ki pa kapab fer naryen, zot dan lili, i annan ki nobou fer serten keksoz e dan sa ka bann  carers  pou travay avek zot, zot bezwen annan bokou pasyans, zot bezwen donn bokou sipor sa bann dimoun e zot bezwen fer bokou keksoz e sa i en travay tre delika e ki demann bokou, bokou lo sa bann  carers.  I annan menm bann  carers  ki zot, zot bezwen al avek bann dimoun aze lopital.  I annan carers ki menm pas plis zot letan ki zot ti devret avek bann dimoun aze akoz zot annan sa lanmour pou zot travay, akoz osi zot napa en lot travay e zot anvi fer sa travay pou zot  osi kapab soutenir zot fanmir. Carers  i pa  senpleman pou bann dimoun aze.  I annan osi bann dimoun avek dezabilite, nou annan bann zanfan tre zenn ki annan dezabilite kot zot osi zot paran pa kapab al dan lanplwa.  Donk sa i en fason kot paran menm i kapab okip zot zanfan e an menm tan zot pe ganny sa allowance.  Tou sala i bann zefor ki sa gouvernman pe fer  pou kapab soutenir bann fanmir ki  mwen fortinen.  Toultan dan sa lasanble, nou tann dan lopozisyon pe demande ki gouvernman  pe fer lo kote lanplwa, mon krwar sa i enn larepons ki mon kapab dir ki gouvernman pe fer.  Set atraver bann carers, gouvernman pe kree lanplwa.  Si ti napa sa 1700 carers, savedir ti pou annan 1700 madanm ki ti pou  san lanplwa e sa 1700 madanm otomatikman zot ti pou bezwen al kot Means Testing.  Alor la i en fason pou zot kapab avek zot lafyerte pou zot travay benefisye en  allowance  e byensir lo lot kote, madanm Charles in koz osi lo training.  Sa i en pwen tre, tre enportan dan laspe travay en  carer.  Parey monn dir oparavan, bann dimoun aze i annan diferan dezabilite, i annan ki lo lili, i annan ki al fer son keksoz e sak carer i bezwen travay avek sa bann dimoun aze according  to son dezabilite ki i  annan e donk  training  i enportan.  I annan defwa nou dir serten  carer  napa ase responsabilite, petet i pa vreman zot napa responsabilite, me zot napa sa  training  ki zot pankor gannyen, ki pa kapab ed zot pou zot al desarz zot responsabilite parey zot tia kontan.  Donk ler zot in ganny en  training, definitivman zot pou konnen ki zot rol koman en  carer,  ki zot responsabilite koman en carer e otomatikman avek swivi zot bann supervisors,  mon sir ki bann  carers  zot pou fer bokou pli byen pou benefisye sa bann dimoun aze.  E sa bann dimoun aze, mon krwar se bann dimoun ki sosyete i get zot tre tre byen e si nou get an gro zot pe benefisye zot lasistans sosyal, plis gouvernman pe donn zot ankor en dimoun pou travay avek zot, pou okip zot, pou fer sir ki zot bann dernyen zour zot viv byen, zot pa regret sa ki zot in donn sa sosyete dan lepase.  E sa i en pwen pou refleksyon.  Mon krwar mon tia kontan demann tou bann dimoun, tou bann fanmir ki annan bann dimoun aze ki dan en fason ou en lot zot pa kapab pran sarz zot bann vye dimoun, zot pa  kapab peye pou donn en  carer  zot bann vye dimoun, donk mon krwar en lapel ki mwa demann zot se reflesir ki mannyer sa gouvernman pe ed sa bann dimoun aze.  Savedir zot responsabilite koman sa bann zenn, koman sa fanmir ki noun pa kapab totalman desarze me gouvernman i la pou pran, pou desarz li, pou benefis tou dimoun e mon pa krwar i en keksoz ki tou gouvernman pou fer.  Menm ki monn tann serten lonorab in dir pou dir sa i egziste dan sepa ki pei.  Mwan mon tia kontan sa onorab petet i dir nou lekel sa enn de pei, nonmen lekel sa enn de pei ki donn  carers  son bann dimoun aze oubyen son bann dimoun avek dezabilite.  Mon tia kontan konnen menm ki bann prosedir, lekel ki peye sa bann  carers.   Mon krwar i enportan akoz mon krwar nou bann dimoun deor i konn byen ki sa gouvernman pe fer, i konn byen tou sa bann benefis ki nou bann vye dimoun aze, ki nou bann dimoun avek dezabilite i resevwar dan sa sosyete e i pa fasil pou  nenport ki gouvernman ki vin o pouvwar zis dir mon pou fer sa, mon fer sa. I bezwen en prensip ki ganny etabli e ki ganny swiv e sa se prensip gouvernman SPPF.  Mon krwar fodre pa e mon sir  ki bann dimoun an deor pa pou zanmen oubliy sa. 

Answit en lot pwen ki onorab Gill in fer resorti, in dir petet nou bann carers pou bezwen al lo en training 3 an. Pou mwan sa mon krwar i en ensilt pou nou bann  carers.  Mon pa krwar nou bann dimoun parey mon fek dir taler, nou bann dimoun, bann mer-d fanmir ki pa kapab al dan  lanplwa permanan, nou pou al met zot 3 an lo  training  pou zot kapab okip nou bann vye e dan en degre dan sikolozi. Sa Msye Speaker se-t en lensilt pou nou bann dimoun.  Mon krwar nou bann dimoun pe note sa Msye Speaker.  En degre 3an, be sa fodre bann, mon pa konnen. Nou bezwen pran tou sa bann  carers  ki nou annan, pran zot  met deor, al rod bann ki annan serten kalifikasyon pou nou met zot asiste sa   training 3 an.

 

MR C.GILL

Misrepresentation Mr Speaker.  Mon pann dir sa.  Monn dir, les mwan klarifye, monn dir nou bezwen annan en serten training….

 

MRS LARUE

Mwan mon pe koze mon krwar lepep, bann  carers  pe ekoute,  tou bann  carers  i annan zorey i ekoute, i tande e mon  sir ki sa i pa ale avek nou bann dimoun ki nou pe koz lo la. 

Answit noun tann nonm osi kote  nou pou ganny larzan pou nou kapab pey nou bann dimoun.  Mon krwar ankor, nou toultan pe kriye e nou pe dir pou dir nou bezwen donn logmantasyon, nou  bezwen war plis larzan pou nou bann dimoun, me la le moman in arive pou nou donn sipor, pou nou fer sir nou bann  carers  i ganny en pti  allowance  an plis pou benefisye zot fanmir.  Tou kou ou pou tann bann biznesmenn pe koz kot nou pou ganny larzan.  Sa mon krwar i normal pou tann biznessmenn pe dir sa me nou bann dimoun deor laba, nou bann  carers  pa pe rode zot kote nou ganny larzan.  Zot, zot anvi tann nou dir nou pe donn zot en ogmantasyon pou ki zot kapab fer zot travay pli byen e pou kapab plis benefisye zot fanmir, akoz zot osi sa bann dimoun zot annan fanmir, zot annan zanfan.  Zot pa bezwen  tou lazournen pe al kot means testing.  Zot anvi annan sa self esteem, zot bezwen war ki zot osi kapab fer keksoz lo zot menm pou zot ganny en larzan pou zot ed zot fanmir.  Mon krwar la, se sa ki nou pe fer ozordi, se sa ki nou pe demande se ki nou kapab donn en ogmant  allowance  bann  carers pou ki zot kapab fer zot travay pli byen.  Zot pe fer li byen, zot pe sey fer tou zot posib pou fer byen, me pou zot kapab fer pli byen avek  training,  avek en pe plis larzan, mon sir ki nou bann  carer  pou fer pli byen e nou bann vye dimoun osi, nou bann dimoun avek dezabilite pou santi zot pli ere.  Zot pou annan sa bann dimoun kalifye,  sa bann dimoun pou annan en pe plis larzan e otomatikman zot pou desarz zot responsabilite bokou pli byen. E mwan alor Msye Speaker, mon pe demann bann  carers  ankor en pti git letan, nou sir ki sa pou arive e  nou isi nou tou nou pou donn nou sipor pou ki sa mosyon i al devan e gouvernman i pran aksyon o pli vit ki posib.  Mersi Msye Speaker.

 

MR SPEAKER

Lo sa pwen misrepresentation, mon pou tyek verbatim, apre midi mwa reponn zot e mon oule tou onorab fer sir ler zot sit zot kanmarad ki zot in tann byen parske ler ou mal sit en dimoun, li osi pou oule  sey defann son lekor.  E nou pa kapab pas nou letan pou dir monn dir, mon pann dir.  Alors monn reponn ou, mon pou verifye sa konplent ki oun fer.

 

 

MR C. GILL

Mon remersi ou pou sa,  parske i annan plizyer enstans kot madanm Larue in  misrepresent  sa ki mwan monn dir e sa ki mwan mon fer..

 

MR SPEAKER

Mon pe koz pou ozordi. Onorab Bibi la parol pou ou. 

 

MR GEORGES BIBI

Msye Speaker, mon krwar bokou keksoz in ganny dir lo sa mosyon e avan ler mon fer mon lentervansyon, mon tia kontan fer konnen onorab Charles ki definitivman mon pou siport son mosyon akoz mon krwar ki i en mosyon ki demande sipor.  Rezon mon siport sa mosyon prensipalman se ki akoz ler onorab Charles in anmenn sa mosyon petet in realize osi ki i pe donn en pe plis lenportans e plis valer sa job ki apel  home carer  e mon krwar ler nou vwar bann job ki bann dimoun ki  dan lakres i fer, bann dimoun ki travay avek bann dimoun dan  exceptional school,   zot ganny serten lantrennman pou zot kapab konnen egzakteman ki zot pe fer.  Mon krwar esansyelman sa kestyon  home carer  petet son konsept ler i ti fer orizinalman ti mal e mon kontan ki  onorab Charles in realize pou dir i annan plis valer e an menm tan i donn sa bann dimoun ki pe fer sa louvraz serten dignite, serten valer pou zot menm e zot apresye sa louvraz.  Petet o komansman ler nou ti nonm  home carer,  ti zis en louvraz en job e nou ti pe zis pran dimoun, tire met ladan e fer zot ganny job.  Me mon krwar la fason ki nou pe anmenn li la se nou pe montre ki i pa zis en job e finalman nou kapab ganny gete koman en profesyon, parske nou konnen dimoun ler i vye, zot annan serten kapris, zot annan tou sord kalite keksoz e ou bezwen annan serten pasyans e ou bezwen ou menm kapab si oule annan sa serten  lantrennman pou ou kapab veye sa bann dimoun.  E definitivman ler noun antrenn sa bann dimoun ki a fer 5 mwan, ki a fer 6 mwan, i pou bezwen al avek en serten responsabilite e responsabilite i vin ek en serten incentive ki sa bann dimoun i kapab gannyen e se sa mon krwar ki i normal osi ki zot allowance osi i ganny revize.

Me apre ki monn koz lo sa mosyon, mon krwar ki lentansyon ouswa motif Mme Charles ti en lentansyon tre byen, me malerezman i annan serten manm sirtou  ler monn ekout lonorab pou Anse Royale, lonorab Barry Faure ler i koze i met serten lanfaz ki sa i en keksoz SPPF.  Mon krwar lide se i montre lo nou kote ki i pa neseserman fodre en mosyon i sorti kot en parti ou en lot.  Mon krwar an plis Msye Speaker, i montre ki nou dan nou kote, nou annan lozik, nou annan rasyonal.  Si en keksoz i bon, mon krwar i napa naryen pou nou si oule dir pou dir, ar, akoz SPPF in anmennen nou bezwen vot kont.  Mon krwar ler en keksoz i dan lentere nasyonal, i dan lentere nou bann dimoun, mon  krwar i normal pou nou vot an faver parske si non, nou pa pe fer sa lasanble dibyen, nou pa pe fer nou lekor koman manm dibyen e mon krwar lonorab Barry Faure ler i fer son bann lentervansyon….

 

(interruption)

 

Msye Speaker

MR SPEAKER

Order

 

MR BIBI

Msye Speaker apre en keksoz  mon  krwar mon oule fer resorti ankor.  Monn tann onorab Larue ler in koze in dir , si mon mal  quote  li ou a get verbatim apre midi akoz mon le fer sir ki..

 

MR SPEAKER

Non, ekoute.  Mwan mon pa pou pas mon letan zis dan  verbatim. Monn fer sa akoz ti annan en  konplent formel.  Sa enn la mon pou tyeke.

 

MR C. GILL

Parske i arive plizyer fwa sa Msye Speaker.

 

MR BIBI

Sa ki mon ti oule fer resorti la fason ki ti fer son, mon pa pou  quote  alor Msye Speaker, la fason ki, lenpresyon ki mon gannyen se ki  sa ki i kontan se ler i tann dimoun dir zot pe donn logmantasyon, zot pe pran ka avek zot dimoun e lenpresyon ankor ki monn gannyen se i pa enterese kot larzan i sorti, si i annan, si napa e pou mwan ler monn tann en  onorab donn sa lenpresyon, i fer mwan mazin 2 fwa.  Eske ler nou pe  mazin nou dan en lasanble, eske nou pe anploy  home carers for the sake  pou nou donn zot en job ouswa nou pe donn lasistans bann vye dimoun.  Sa ki mon pe demande, akoz lenpresyon ki monn gannyen.  An menm tan la fason ler monn tann li mwan personelman monn tann li ler in dir si konmela ti  napa  home carers  petet nou ti pou annan nou en kantite dimoun dan  unemployment, ti pou donn   means testing.   Ankor en fwa se pou se rezon ki donn mwan sa lenpresyon ki noun kree sa job zis pou nou kapab, ki mannyer mon kapab dir, bous trou parski si mwan mon demande, mon sey  go back  mon pou vwar ki   home carers  ti komanse petet rafal ki FES ti komans phase out e home carers  ti komans vin an-n operasyon. An menm tan avek le bi, avek lide pou kree serten job e la ankor rezon  prensipal ki mon siport lonorab Charles se akoz prezan nou pe donn li en valer pli dinny.  Avan sa nou ti pe kree job avek FES, me la i en keksoz ki pe vin pli valer, i plito pe ganny gete koman en profesyon.  An menm tan ler nou get sa kreasyon  home carers,  lenpresyon ankor ki lonorab kin koz avan mwan in koze, se nou pa kapab dir zis nou pe donn en dimoun en job  home carer  parski ler nou dir sa dan lasanble nou pa pe donn sa bann dimoun ki travay koman  home carers  zot dignite.   Either  zot pa ti pou dan  home carer  ouswa zot ti pou lo  means testing. E mon krwar lesansyel si ki si nou pe koz li koumsa   therefore  nou pe zis fail dan nou fason pou nou kree job.  E se pou se rezon ki mon krwar ler nou pe get sa mosyon, nou bezwen get li, i vre nou pe fer en pe politik avek, me mon krwar nou devret get li dan son-n ansanm dan son totalite ki nou pe donn sa mosyon e  home carer  an zeneral en valer. 

Monn deza koze isi menm zafer lo kestyon SPTC, bann kondikter, kot nou ti dir akoz en  conductor  pa kapab ganny menm  training  pou li ganny antrennen e ki i kapab fer son louvraz parske son job ki i fer i parey nenport ki dimoun, o.k. ozordi nou annan bann stewards,  apre nou annan  air hostess,  zot ganny trained  pou zot asiste ou pou fer sir ki ou konfortab, pou fer sir ki kot ou pe arive dan ou destinasyon ou byen.  Me en kondikter osi son louvraz se fer menm zafer me malerezman ozordi son valer pa pe ganny gete parey.  E mon krwar ler nou pe get  home carers  se menm zafer. En dimoun ki travay dan en lakres ek  en  home carer  i annan menm responsabilite parski i annan serten responsabilite pou li kapab donn swen medikal, fer sir ki son ladyet i byen, i konnen ki dokter in dir si en dimoun i malad.  E an menm tan i konn bann kapris bann vye dimoun ler zot sa, sirtou si i annan  ki reste dan bann lakaz ki ou bezwen mont anler, anba, en vye dimoun i kapab dir ou met mwan anler apre 5 minit plitar i pe dir ou desann ek mwan anba, akoz sa i son kalite, i koumsa e ou bezwen  train sa dimoun pou dir sa  i bann whims ki sa bann dimoun i annan  e ou bezwen konpran, ou bezwen annan sa pasyans.  E se pou se rezon ki mon krwar ki,  I mean  pwen sa mosyon, valer sa mosyon se ki pou donn sa bann  home carers  en serten dignite e en  serten valer pou zot travay e mon krwar an fezan sa, zot a donn Sesel en louvraz pli efektiv e zot a donn sa bann vye dimoun en louvraz pli byen e nou espere ki ler zot in ganny  trained  zot a ganny en  allowance  ki vo pou sa  training  ek sa responsabilite e definitivman parey monn dir o komansman, mon pou donn sipor sa mosyon.

 

 

MRS BELLA HENDERSON

Msye Speaker, rol enportan dan enplimantasyon polisi  gouvernman anver bann dimoun aze ki en  home carer  i zwe in ganny esplike par Mme Charles prezantater sa mosyon. Me i osi enportan pou nou note ki sa group dimoun parey serten in fer resorti zot zwe en rol osi enportan an sa ki konsern ed en fanmir okip enn zot manm ki swa i malad, ouswa i soufer avek en kondisyon ki anpes li fer son travay abityel oubyen okip son lekor. 

Msye Speaker, fodre nou regard en pe osi lafason ki nou sosyete in evolye.  I fer ki prezan bokou nou bann dimoun aze e dimoun ki malad e ki pa nesesit rantre dan en lopital, reste kot lakour, bokou sa bann dimoun i reste tousel kot lakour. Avek sistenm kominikasyon rapid i fer ki nou devlop bokou kontak e osi bokou dimoun i vwayaze.  Depli-z-anpli ou vwar bokou zanfan i ale kot lakour, zot al a letranze e  pli-z oumwen ou pa vwar fanmir pros la pou okip zot bann vye paran ouswa okip enn ki malad. Avek alokasyon lakaz sa osi i kree en serten sitiasyon kot ou vwar dimoun i pa neseserman ganny en lakaz dan sa distrikt kot son vye paran i reste, me i bezwen al reste ayer e i osi kree en problenm ki  son vye paran i ganny reste deryer dan son lanvironnman abityel e napa personn pou okip li ankor.  En lot keksoz ki nou pe vwar dan sosyete ki prezan kot lakour bokou plis dimoun i ale kot lakour dan bomaten e zot rantre tar dan aswar e sa i definitivman en pratik ki fer ki vye dimoun e bann ki malad kot lakour ankor i reste tousel.  E la kot nou pe dir servis en home carer i enportan.  Dan diskisyon nou ti pe demande lekel kin vin avan si mank travay ouswa si ti annan en bezwen.  Mon krwar i vin en case the chicken or the egg akoz otherwise si ti napa en bezwen pou sa servis mon pa  krwar ti pou annan devlopman sa servis limenm.  Si nou pe dir ler nou pe regard dan nou sosyete nou pe annan sa 2,163 vye dimoun, nou pa pe kont la bann ki malad e ki annan serten bezwen, serten latansyon spesifik kot lakour an sa ki  konsern son kondisyon. Be i neseser, mon krwar si pou napa personn pou okip sa bann vye dimoun e nou bezwen mentenir swen nou vye dimoun e nou bezwen donn swen sa bann ki annan en serten kondisyon fizik, mantal ou nenport kot lakour, nou ti bezwen entrodwir en sistenm oubyen en servis kot i ava annan sa group dimoun ki i ava pe pran ka avek sa bann ki dan sa bezwen kot lakour. 

Mosyon Mme Charles i pe demann ki sa bann  home carer  i ganny en serten lantrennman.  Mon krwar sa i en laspe enportan.  Bokou bann entervenan in fer resorti lefe ki i pa fasil travay avek vye dimoun ouswa dimoun ki soufer avek en kondisyon kelkonk, zot annan bann bezwen spesifik. I annan touzour sa kapris e i demann en kantite pasyans, i demann en kantite  tolerans.   Mon tia voudre fer resorti ki kontrerman avek serten dimoun dan sosyete petet i krwar i fasil pou okip en dimoun malad ouswa en vye dimoun kot lakour i pa li.  Ou bezwen devlop en serten keksoz dan ou pou ou kapab fer li, ou bezwen annan sa lanmour pou sa keksoz ki ou pe fer.  E mon pa krwar i en keksoz ki nenport ki i kapab zis antre ladan.  Mon krwar Mme Azemia in dir pou dir i annan dimoun ki par lepase in komans pran sa lokipasyon, me dan milye semen in vwar ki i pa kapab.  Petet in vwar dan li i  napa sa pasyans, i napa sa tolerans, i pa kapab kontinyen fer sa keksoz, alors i osi enportan pou nou vwar lo kote seleksyon sa bann dimoun ki ganny antrennen pou fer sa  lokipasyon.  Be mon krwar, tout an desarzan sa responsabilite, si ou vreman serye avek ou lekor, en  home carer i  en responsabilite ki i bezwen fer sir i fer li avek en serten konesans.  Ou pa kapab zis vini, netway lakaz, kwi manze ensidswit.   Ou bezwen annan en konesans pou ou kapab konpran la diferans  dan sa dimoun ki ou pe vini pou ou vin fer sa keksoz avek ozordi.  Alors en lantrennman mon krwar i pou ed sa bann dimoun desarz sa responsabilite avek bokou plis swen e i pou osi ekip zot pou zot kapab remark la diferans tout an servan sa konesans, fer zot rekonnet sanzman, swa sanzman pozitif si kondisyon sa dimoun ki zot pe okipe i amelyore, ouswa si i en  sanzman negatif si kondisyon sa dimoun ki zot pe okipe i deteryore e i nesesit en swen en pti pe pli avanse.  Osi mon krwar ler oun ganny en bon lantrennman e ou pe desarz ou responsabilite avek en pti pe plis efikasite, i tou normal ki ou ganny en rekonpans en pti pe plis.  E vi ki gouvernman i touzour entrodwir serten mezir pou elev standar lavi dimoun atraver parfwa en ogmantasyon saler, mon krwar i normal ki  home carers  zot osi zot ganny en serten ogmantasyon o fir e a mezir ki zot pran anplis responsibilite e o fir a mezir ki zot ganny en pe plis lantrennman pou sa lokipasyon    Alors mon krwar mon toutafe dakor avek Mme Charles ki i annan sa nesesite pou nou donn sa lantrennman   home carer  e avek en bon lantrennman anmezir ki zot pran plis sa responsabilite i tou normal ki nou regard dan ogmant en pti pe sa rekonpans osi ki zot gannyen pou sa servis ki zot pe donnen.  E pou sa mon pou dir ki mon pou donn tou mon sipor.   Mersi.

 

MR SIMON GILL

Msye Speaker mosyon prezante par onorab Jeovana Charles i fer sorti 2 keksoz prensipal ladan, se enn pe demann lasanble pou demann gouvernman pou konsider serten logmantasyon dan allowance ki bann carers i gannyen e an menm tan pou devlop en progranm lantrennman formasyon pou bann dimoun ki nou apel zot bann homecarers, bann dimoun ki donn latansyon bann dimoun aze e menm bann dimoun avek serten dezabilite.  Mon krwar sa mosyon depi ler nou pe debat lo la bomaten, in donn nou loportinite pou tann bokou keksoz an menm tan in fer serten onorab fer serten statement ki mon krwar i enportan nou refer lo la dan en fason ou en lot zis pou fer sir ki nou dimoun ki pe ekout nou ozordi lo sa mosyon i konpran en pe pli kler serten sitiasyon kin ganny prezante dan sa lasanble ozordi, e mon ava koz lo sa en pe pli tar. Mon fer referans avek en statement ki lonorab Christopher Gill in fer swivi par lezot onorab dan lopozisyon.  Msye Speaker, noun ganny demande si homecarer in aparet akoz gouvernman ti antre dan en peryod eleksyon oubyen parti politik SPPF ti antre dan en peryod eleksyon 92, 93 e sa ki ti fer ki homecarer ti aparet zis pou fer sir ki nou kalme enpe bann dimoun ki ti pe rod travay oubyen tir zot lo means testing.  Mwan mon krwar Msye Speaker, parey lonorab Henderson in dir mon krwar sa kestyon homecarer in aparet aparti en nesesite sosyal.  En nesesite nou sosyete. Anplis ki en nesesite sosyete, mon krwar sa kestyon homecarer son lorizin se atraver nou trouv li filozofi SPPF.  Filozofi ki serten parti politik i prese.  Menm si mon pa oule tro fer en entervansyon politik, me mon pou bezwen dir sa pwen, akoz filozofi en parti i kont en kantite dan lafason ki sosyete limenm li i ganny dirize, e non selman ganny dirize me lafason ki sosyete limenm li i pran ka avek son bann dimoun. Mon krwar sa i enportan ki nou sezi li byen akoz si detrwa bann dimoun, detrwa bann dirizan politik pa pres serten keksoz epi enplimant li, i riske ki nou pa trouv son enplimantasyon.  E lafason ki ganny prese, lafason ki ganny enplimante, i lafason ki son parti politik atraver son gouvernman i krwar ladan, e etan donnen ki SPUP, SPPF in toultan krwar, in toultan konvenki ki en sosyete i bezwen pran ka avek son bann vye dimoun ler zot nepli kapab soutenir zot lekor zot menm pou de rezon ou en lot, oubyen pou bann dimoun, bann zanfan avek serten dezabilite fizik ou mantal, nou krwar ladan e se sa ki fer nou aport en soutyen pou sa bann dimoun ki tonm dan sa kategori.

 

MR PAUL CHOW

Pwen klarifikasyon Msye Speaker.

MR SPEAKER

Si i pe sede.

 

MR S. GILL

Ok pa problenm sa.

 

MR CHOW

Msye Speaker mon ti zis oule en klarifikasyon si depi an 1977 ziska 91 ti napa okenn nesesite konmsi pou ed vye dimoun, parski mannyer lonorab pe dir konmsi sa ti touzour filozofi.  Mon ti oule zis konnen si pandan tou sa letan ti napa nesesite, zis 92 ki nesesite in arive.

 

MR S. GILL

Msye Speaker oun vwar en legzanp tipik en dimoun ki pa konpran filozofi SPUP, SPPF.

 

MR SPEAKER

Zisteman, la ou kapab fer li konpran.

 

(laughter)

 

MR S. GILL

Msye Speaker si ou donn mwan permisyon mwa ava koz pou enn-erd-tan lo sa size.

 

MR SPEAKER

Non sa i enpe tro nou lo mosyon lo homecarers, son relevans avek polisi, sa i fer sans, ou pe eksplike ki mannyer sa aplikasyon i an linny avek polisi. 

 

MR S. GILL

Mwa fer en rezime pou msye Chow

 

MR SPEAKER

Selman son pwen i baze lo sa serten lalinny.

MR S. GILL

Msye Speaker, i ok.  Mon annan enn mon koleg la i dir mwan donn lonorab Chow sa, Partnership to beyond 2000, mon konnen ladan i koze lo sa filozofi e mon krwar nou kapab fer letour sa pas kot lonorab Chow laba i a gannyen. 

Msye Speaker mwa va kontinyen.  Monn dir ki sa i en filozofi en parti politik e i ganny enplimante e monn ganny demande si depi avan ti napa sa nesesite.  Bon lefe i reste ki nou pou al dan listwar la.  Ler nou get 64, parti politik avek en lobzektif kler serye i ganny etablir dan sa pei, nou vwar en lalit politik i antre lo later Sesel e i viz bann diferan sitiasyon dan sosyete Seselwa.  E ler nou pe koz en parti politik sa lepok an 64 i aparet nou pe koz SPUP avek lezot parti politik osi kin antre enpe pli tar.  E sa lepok SPUP ti napa pouvwar dan son lanmen, pa li ki ti o pouvwar.  Me ki i ti fer a sa moman i ti sey koz lo tou sa bann mal sosyal si mon kapab apel li ki ti egziste dan sosyete Seselwa sa lepok.  E enn parmi sa bann mal sosyal ki ti annan sa lepok se zisteman sosyete ki ti la ozordi bann dirizan ki ti la sa lepok pa ti donn latansyon nou bann vye dimoun e se pou sa rezon ki SPUP ti dir ti prese ki nou bann dimoun fodre arete mandyan.  Nou ti komans par la. Nou bann dimoun ler zot in travay, zot in rente, zot in trimouse, zot in kontribye zot lenerzi mantal, fizik, zot in ganny eksplwate dan sa pei ler zot in nepli kapab travay fodre sa sosyete i rekonet kontribisyon ki sa bann dimoun in donnen e an retour pran swen ek zot.  E sa filozofi ki ti ganny prese bann lannen 64 an montan ler SPUP ti ganny sans rantre o pouvwar plitar dan bann lannen 77 i ti eseye pou enplimant en serten polisi ki permet sosyete pran swen ek son bann vye dimoun.  Sa i kler oubyen i devret kler pou nou tou.  Me zot ava dir mwan pou dir ti napa carer an 77.  Mwan mwa dir pou dir ti annan carer an 77 me lafason ki sa ti ganny manifeste i ti dan en fason diferan par rapor ek sa ki egziste ozordi.  Lot pwen Msye Speaker pou kontinyen lo sa lalinny, nwa ava remarke pou dir dan bann lannen boner 77 a sa lepok ki nou pe koze, dan bann fanmiy ou trouve preski tou dimoun ti la kot lakaz apard sa papa ki ti kit lakaz pou ale pou al trimouse.  Ve dir mazorite dimoun ti konsantre dan sa fanmiy e pa tou ki ti kit lakaz pou ale e vwala en pwen ki lonorab Henderson in dir.  Ozordi avek nivo devlopman ekonomik Sesel e avek nivo ekonomik bann fanmiy ozordi i tel kel ki ozordi ou trouve ki preski tou dimoun dan fanmiy i travay.  Menm si i pa al dan en travay a plen tan, i al fer en demi zournen travay e ki i arive prezan, ou trouv sa vye manman, sa vye granmanman, sa vye papa, sa vye gran papa i reste kot lakaz zot tousel.  Akoz, akoz nivo devlopman ekonomik pei, zot dan travay.  Me avan sa zot ti kot lakour e zot ti pran swen ek zot bann dimoun e zis papa ki ti trimouse pou anmenn bezwen oubyen pou garanti bezwen kot lakaz.  E sitiasyon in sanze e se pou sa rezon ki ozordi nou trouv sitiasyon i diferan akoz pei in evolye, sitiasyon in devlope, ekonomi pei i diferan.  Ozordi bokou bann dimoun, bokou bann zenn, bokou bann adilt pe rod sa lendepandans ekonomik. Yer ti en rev ozordi i en realite e demen nou pou kontinyen annan legzizans bann dimoun ki ler zot in fini lekol i dir ou mon bezwen al travay pou mwan rod mon kannson, rod mon underwear, rod mon semiz dan mon stil ki mannyer mwan mon krwar mon devret aste mon bann zafer.  Me yer manman i aste i donn li, papa i aste i donn li oubyen ser i aste i donn li. Ozordi sa agogo sa zenn fiy ki fini lekol i dir ou mwan mon bezwen sanz dan mon stil.  E pou li sanz dan son stil pou li aste bann keksoz ki li i krwar i dan son kapasite pou mete oubyen pou servi i bezwen ganny sa lendepandans ekonomik ki vedir ganny larzan, larzan pou aste keksoz pou li konsonmen. 

Msye Speaker, mon pa oule al tro bokou dan sa me mon prezimen ki lonorab Chow in kapab ganny li en persepsyon lalinny largiman e si mon pou kontinyen ki mannyer sa largiman i kapab kontinyen ale.  Me mwa retourn lo mosyon akoz mon krwar sa i en lesey pou fer mwan pa koz lo sa mosyon osi.  Msye Speaker i reste nou 15 minit avan nou al dezennen me mon krwar lesansyel sa mosyon parey monn dir se 2 keksoz prensipal, se donn en ogmantasyon bann homecarer.  Mon krwar pou dir osi lontan ki pei, lekonomi pei i kapab soutenir en ogmantasyon pou bann home carer, mon krwar swaye la byenveni sa ogmantasyon.  Akoz mwan personelman mon annan en kantite bann homecarer dan mon distrik e zot in deza apros mwan lo sa size demann en ogmantasyon pou zot e mon krwar sa mosyon kin anmennen par Mme Charles in vin dan en moman apropriye e se sa ki pou fer mwan donn sa mosyon en sipor total.  Lot keksoz se en progranm formasyon ki sa osi mon ekstrememan anfaver en progranm formasyon akoz i ava permet ki sa bann dimoun donn en pe plis latansyon sa bann dimoun ki zot pe travay avek dan bann diferan lakour.  I annan taler in dir presizeman lonorab Chow in donn nou en lenpresyon ki lonorab Charles pann kapab definir son priorite ler i ti prezant son lentervansyon. Priorite an term lekel ki pou vin avan,  ogmantasyon oubyen training.  Sa en problenm ki lonorab Chow in prezant lasanble ozordi.  Msye Bibi in reponn me mwan mwa ava eseye pou reponn ankor sa kestyon pou eklersi sitiasyon. Nwa va dir Msye Speaker, ki etan donnen ki sa bann dimoun i dan travay zot pe ganny zot en reveni, lozikman nou pou bezwen fer sa bann dimoun kolateralman travay an menm tan desarz en serten, oubyen donn en serten letan pou zot ganny serten lantrennman, vedir travay en serten peryod epi zot training i vin en serten peryod letan dan en lazournen, dan en wikenn, mon pa konnen sa bann teknisyen i ava deside kimannyer pou fer sa.  Dan lamezir sa zafer pe marse, amezir training pou bann dimoun ki deza lo travay pe marse, gouvernman atraver minister konsernen pou sa bann dimoun, minister lanplwa e servis sosyal, i ava etidye ansanm avek tou bann dimoun dan cabinet ministeryel isi konsidere ki mannyer pou tret sa kestyon logmantasyon.  E la byensir dan sa sans logmantasyon i pou vin apre.  E training i kapab demare deswit la.  E lonorab Chow i konn tre byen si nou dir bon donn ogmantasyon la, i ava dir anmenn en bidze siplemanter dan lasanble pou li aprouve akoz pann fer provizyon dan bidze pou donn sa bann dimoun ogmantasyon, sa mon garanti lonorab Chow pou dir, wi i kler sa, mon konpran ou pou dir, me ou pou dir sa ou, ou pou dir fodre anmenn en bidze siplemanter devan lasanble, mon dir sa ou ki pou dir.  Lot keksoz ki enportan Msye Speaker, se ki la in dir nou pou dir pa bezwen anmenn en bidze siplemanter dan lasanble espre monn lev sa pwen, me an menm tan taler in dir ki kote pou ganny larzan.  La i dir nou pou dir sekirite sosyal i ava finanse, pa bezwen anmenn en bidze akoz dan fon sekirite sosyal i annan larzan pou donn ogmantasyon sa bann dimoun.  Eske lonorab Chow i war kontradiksyon dan son lentervansyon   e i fer nou krwar si menm lelan i kontinyen dan ankor 10 zan, fon sekirite sosyal i fayid.  Me sa ki lonorab Chow pa realize se ki pei ekonomikman pe devlope, popilasyon pe ogmante, ou working population i ogmante, plis biznes i antre, plis kontribisyon finansyel i vini an term tax, kontribisyon sekirite sosyal i antre ou pann fer sa miltiplikasyon pou ou kapab fer en forecast 10 zan ki mannyer lekonomi pei pou ann kapab miltipliy son bann diferan fakter ekonomik.

 

MR PAUL CHOW

Mannyer sekirite sosyal in anmas mwens larzan an 95 ki ti anmase an 94.

 

MR PATRICK HERMINIE

Redwir lo zot businessmen.

 

MR S. GILL

Wi sa i kler sa lonorab Chow, sa i kler akoz in annan en azistaz lo taks i kler, i kler pou nou sa.  Pa fer nou konfize akoz personn pa pou konfize avek sa latrap ki oun met nou ladan.

Msye Speaker, lot keksoz kin fer nou soke la bomaten lo sa mosyon, se par rapor avek en deklarasyon ki lonorab Christopher Gill in fer kot in dir avek Seselwa larzan i annan en kantite larzan nwa kapab ganny en kantite larzan pou kapab finans bann homecarer e donn zot en ogmantasyon R2000, R3000 si fodre e i ava konsider sa li koman en fason favorab, akoz i dir nou i annan delwil, delwil i annan me bann dimoun pa oule tire delwil akoz zot per ki gouvernman i met taks lo zot, e ki i demande i dir ek bann dimoun dan prosen eleksyon fer sir zot vot pou lopozisyon pou tir tou taks. 

 

MR C. GILL

Misrepresentation Mr Speaker.  Mon pa ti dir sa mwan.  Mis-representation.

 

MR SPEAKER

Mwa tyeke.

 

MR S. GILL

Msye Speaker, mwan mon pe dir ki sa i en statement ki serye ler nou pe koz lo en mosyon ki sitan sansib koumsa.  Lonorab Christopher Gill in sey monk sa mosyon atraver sa deklarasyon kin fer. 

 

MR C. GILL

Improper motives Mr Speaker.

 

MR S. GILL

An menm tan kin dir nou pou dir i pou vot anfaver sa mosyon, an menm tan in monk nou i dir nou pou dir i napa larzan pou donn sa bann homecarer logmantasyon…..

 

MR C. GILL

Improper motives.

 

MR S. GILL

…akoz delwil pankor tire se sa ki fer pa pou kapab donn ogmantasyon homecarer, ki kalite betiz sa.

 

MR C. GILL

Msye Speaker, betiz lo ou lopinyon be ki sa sa. Ou dakor oubyen ou  pa dakor…

 

MR S. GILL

Eske ogmantasyon kin ganny donnen kin anonse dan bidze kin pran lefe sa lannen ti bezwen trouv delwil pou donn sa ogmantasyon.  Me mon krwar mwan mwa ava demande ki nou bann dirizan ki pe ekoute e bann dimoun ki pe responsab pou fer resers lo sa size delwil ki annan kontak avek bann lazans etranze pou perforasyon lanmer pou gete si i annan delwil mwa ava demande pou veye si napa okenn lesey pou sabotaz sa zefor par lonorab Christopher Gill.

 

MR C. GILL

Point of Order Mr Speaker.  Improper motives – i pe dir ki mon pe al sabotaz larises lekonomi nou pei, be ki sa sa.  Pa delwil, nou pa pe koz delwil met dan ou seve, nou pe koz en lot kalite delwil …

 

MR SPEAKER

Order.

 

MR C. GILL

Point of Order.  En delwil ki serye sa.  Pa en zwe sa.

 

MR SPEAKER

Order,   onorab Christopher Gill, onorab Simon Gill retourn lo mosyon esansyel, oun fer le pwen lo argiman onorab Christopher Gill.

 

MR S. GILL

Msye Speaker, definitivman nou lo kestyon larzan pou donn logmantasyon bann carer.

 

MR SPEAKER

E pa motivasyon. 

 

MR S. GILL

E son motivasyon se si dimoun i travay nou bezwen garanti ki i ganny serten reveni, e si onorab Christopher Gill i anploy dimoun i bezwen garanti ki i peye lafen dimwan.

Msye Speaker sa  ki mwan mon krwar se ki demann ki sa mosyon pe esey fer i en demann ki korek i en demann ki zistifye e alor se sa ki pou fer mwan donn tou sipor sa mosyon.  Mersi bokou.

 

MR DICK ESPARON

Msye Speaker, mon le envit mover mosyon pou fer rezimen e mon pe move formelman anba order 45 ki that the question be now put

 

MR SPEAKER

Tou sa ki anfaver lev zot lanmen.  Okenn ki kont.  Alors mon envit ou pou fer rezimen.

 

MRS CHARLES

Mersi Speaker, mon krwar rezime napa.  Mon tia kontan kant menm remersi tou bann onorab kin fer entervansyon lo sa mosyon.  Mon kontan lapros ki zot in pran anver sa mosyon, sa mosyon in anmenn bokou deba e mon sir ki bann homecarers deor a swiv byen e zot a tir zot konklizyon pou zot menm.  Msye Speaker parey monn dir tou kestyon in ganny reponn mon tia zis kontan demann tou dimoun pou vot an faver.  Mersi.

 

MR SPEAKER

Bon tou sa ki anfaver lev zot lanmen. Unanim.  Alors mosyon in pase in ganny aprouve. Avek sa nou zwenn 2 zer apremidi.

 

(Assembly adjourned to 2 p.m)

 

MR SPEAKER

Bon nwa vin lo nou dezyenm mosyon pou ozordi, prezante par onorab Belle e mon envit ou pou fer ou prezantasyon.

 

MR DANIEL BELLE

Msye Speaker, mosyon ki mon pe table set en mosyon kot nou demande ki lasanble i rekomann ladministrasyon gouvernman e administrasyon parastatal pou tret zot klian avek enpe plis dignite imenn, e klian e problenm, e demann zot klian dan en serten konfidansyalite strikt.  Sa mosyon dan en serten fason i ganny vwar dan lespri nou konstitisyon kot artik 16 konstitisyon i koz lo drwa rights to dignity, drwa pou le pep annan son dignite, e lartik 20 ki koz lo drwa privacy, drwa en lavi prive.

Mosyon i viz 2 rezilta, premyerman ki nou kontinyen donn en meyer tretman e atansyon nou bann konsitwayen, prensipalman sa ki mwen fortinen, mwen enfliansyel, pli malere ensi fer ki zot santi si zot pli enfortinen, zot form parti nou nasyon e nwa kontinyen donn zot respe partou kot zot a ete dan sosyete e dezyenmman sa mosyon i viz en lot rezilta ki nou kontinyen veye ki problenm ou demann nou konsitwayen i trete avek zofisye gouvernman sa i ganny fer dan respe sa ladministrasyon e avek en serten etik ladministrasyon pou tret keksoz avek en minimonm de konfidansyalite.

Akoz sa mosyon Msye Speaker, set akoz i annan bokou dimoun kin complain e mon krwar bokou parmi nou manm lasanble noun tande sa bann konplent kot serten problenm, serten latitid, serten mers i fer i afekte dimoun dan zot lavi tou lezour, dan zot lavi avek zot vwazen, dan zot lavi avek zot koleg travay e dan zot lavi de fanmiy. Nou sosyete pe evolye e i reste nou mwen de, parey monn dir, mwen de 1000 zour avan lan 2000 e i fodre ki nou fer sir ki ….

 

(2.03 p.m. At this point the fire alarm went off and the sitting was suspended. The Assembly resumed at 2.23 p.m.)

 

MR SPEAKER

Avan nou kontinyen mon tia kontan dir, fer tre kler anka dimoun i fer zistwar, ki ti napa panik ti napa okenn rezon pou panik. En keksoz teknik in arive, natirelman nou konsernen ki pa deranz nou travay e ki pa arive ankor oubyen pa ariv souvan.  An menm tan tapaz ti tro for, mon ti pou zis anonse ki monn sispann nou sesyon pou en pti moman pou gete ki pe arive, me sa tapaz ti tro for. Zis mon le met okler ki mannyer nou sesyon, noun sispann li pou en pti moman e la nou pe repran. 

Bon ti annan apepre 12 minit kin pase, pa ou, ou tin fini koz pou en 5, 6 minit.

 

 

MR HERMINIE

Rekomanse.

 

MR SPEAKER

Napa problenm pou sa.

 

MR BELLE

Msye Speaker, parey mon ti pe kontinyen dir, nou sosyete pe evolye e i reste anviron mwens ki 1000 zour avan ki lan 2000 e nouvo syek i arive.  E mon krwar i nou devwar antan ki manm lasanble fer mannyer ki nou rode ki nou bann sitwayen zot ganny zot drwa e zot ganny trete avek sa dignite imenn ki tou sosyete ki evolye i ekspekte.  Sa mosyon in ganny enflianse egalman par sa lespri share and care ki egziste dan serten sosyete e ki prezidan Rene in donn koman target 1997 pou ki nou dan Sesel nou sey viv dan sa lespri.  Sa mosyon i vize rod solisyon pou serten problenm ki mwa ava ekspoze e si nou tou ansanm nou kapab rod, trouve solisyon i ava ede pou etablir sa bann dignite.

Mon konnen ki i annan zefor i neseser pou en meyer management bann administre, vedir bann dimoun ki apply kot administrasyon, me parfwa zefor i pa ase, fodre nou fer plis.  Kalite dignite en pep i ogmante avek son devlopman avek son achievements e avek rising expectations nou espekte, e serviter lepep serten parmi nou parey bann parmi nou, fodre toultan ki nou revwar e nou aziste sa kalite dignite avek devlopman sosyal, ekonomik ek teknolozi  dan pei.  An realite nou viv nou dan en sosyete modern isi Sesel, en pei kot i annan devlopman avek en standard of  living ki ase eleve e en cost of living ki osi enportan. E nou realize ki Sesel i enn bann pei pli ser dan lemonn.  Isi Sesel i annan en bon network telefonn, i annan semen ki byen, i annan servis lapos ki fonksyonnen, i annan transpor e dan sak distrik i annan en administrasyon.  Seki vedir se ki den serten fason zot in etablir en sitiasyon kot normalman ladministrasyon i pli pre avek lepep dan bann distrik kot zot ete.  Mentnan annou get ansanm kote ki annan problenm ki ganny poze e ki selon mwan ki dignite nou konsitwayen i ganny afekte.  Parey monn dir i annan zefor ki ganny fer me petet i pa sifizan.  Nou ava gete si i annan mwayen pou kapab fer keksoz ganny fer.  Nou get dan ka PUC paregzanp, annou get dan legzekisyon zistis en desizyon zistis ki mannyer i ganny egzekite.  Annou get means testing, annou get bann randevou ek apwentman, e annou get osi bann sitiasyon transpor.  Lo legzekisyon lazistis, an matyer ekspilsyon ou eviksyon.  En desizyon zistis in ganny pran, en zizman in ganny pran kont en dimoun par egzanp e ki sa dimoun li ziz in kondannen ki i bezwen kit sa lakaz i pou ganny met deor.  Set en desizyon lazistis, ki mannyer sa dezisyon i ganny egzekite pou ki dignite sa dimoun pa ganny afekte.  Lisye i ariv kot li avek gard, gard i la pou mentenir lord, zot tir dimoun dan lakaz zot met deor san konnen si sa dimoun i annan en landrwa pou li reste.  E ler i fer sa, souvann fwa ou vwar ki en fanmiy, papa, zanfan ki lekol i ganny met deor.  Pake ou met kot en dimoun, e sitiasyon se ki minister responsab pou lakaz pann prevwar e petet pann ganny enforme ki i annan en sitiasyon parey.  Mwan mon demande dan sa ka ki nou merit fer, se ki ler i annan en desizyon zistis ki ganny pran pou tir dimoun dan lakaz avan ler ziz in donn son zizman avan ki sa desizyon i ganny egzekite, ki lapolis oubyen lisye i pran kontak avek district administration ou avek minister pou fer sir pou gete dan sa sitiasyon ki sitiasyon sosyal sa dimoun, si i annan en mwayen donn li en lakaz kelke par, pou ki an 1997 ler en dimoun i ganny met deor pou en rezon nou pa war li lo gran semen.  Sa set en keksoz ki enportan e mon krwar ki nou merit dan en serten fason tret sa avek bokou de serye. 

Dezyenm keksoz osi kot mon war ki i annan serten keksoz ki pa fonksyonn byen, se sitiasyon bann bills elektrisite avek delo ki pa ganny peye.  Isi Sesel noun remarke ki delo i ser, delo bwar paregzanp dan boutey, delo Val Riche en lit i kout pli ser ki en lit bennzinn.  Bennzinn ou enporte, delo i isi, sa en lit bennzinn i kout pli bonmarse ki en lit delo.  Sa se delo bwar, mentnan mon pe koz delo tiyo. Nou pe viv nou dan en sosyete kot tou bann nouvo lakaz ki pe ganny fer, sitiasyon twalet i ganny fer avek delo, nou bezwen servi delo.  Ler en bill delo pa ganny peye par en dimoun ki petet i napa mwayen e ki zot bezwen koup son delo, avan sa delo i ganny koupe, mon krwar ki i vin enportan ki avan ki PUC i koup delo kot en fanmiy ki zot pran kontak avek district administration, oubyen les sa dimoun al kot means testing e petet son sitiasyon pa permet li i pa kapab peye.  Sa ki fodre nou fer sir ki pa arive ki nou war ozordi an 97, dimoun dan Sesel dan en sitiasyon kot zot pann pey zot bill delo pou de rezon zot pa travay zot napa ase ki sa dimoun i war li dan en sitiasyon kot i ganny pini.  Donk mon pa dir i annan dimoun ki refize peye i annan dimoun ki petet i abiz son larzan i pa fer li. Me fodre nou rode en ka, rode rezondet avan ou koupe delo ou elektrisite kot dimoun ozordi. 

Msye Speaker, i annan ankor en lot keksoz ki enportan se respe ladministrasyon pou bann sitwayen.  Souvan lo radyo ou tann nonmen bann mesaz aswar kot i dir sa bann dimoun swivan raport tel minister, tel zour e tel ler, avek zot ID card, zot pay-slip e si zot annan msye oubyen madanm vin avek apre i donn ou non detrwa dimoun, en kantite dimoun.  La ankor akoz ki ou bezwen pran en dimoun ou apel li lo radyo aswar tou dimoun i konnen kot i pe ale demen ou tel zour, tel ler kote i pou ete.  Tou dimoun i konnen in ganny apele ki biznes i pe al fer.  Sa dimoun i antre dan bis, tou dimoun ki dan bis i get li, konnen ou, yer swar in tonm nonm ou non avek ou madanm ou pe al tel landrwa, ou pe al swa kot later oubyen kot means testing oubyen ou pe al rod en louvraz.  Keksoz konfidansyel en dimoun i ganny ekspoze lo radyo, sa ankor pou diginite nou pep mon krwar fodre nou get ladan.  Akoz ozordi dan Sesel i pa parey yer kot letan ti napa telefonn pou lezot zil kot ou ti anvoy mesaz par radyo e mon rapel lontan – mon war Madanm Potter i riye, lontan ti dir Potter Coetivy, St Louis arrivera demain, preparer cargaison, Harry.

Ozordi nou viv nou dan en sitasyon kot i annan telefonn, kot servis lapos i mars tre byen, kot fakter i anmenn let byen, kot i annan administrasyon distrik e kot dan administrasyon distrik zot konnen kot bann dimoun i ete.  Donk si i annan en mesaz, si i annan en lapwentman pou serten dimoun pou lakaz ou pou travay, fer mannyer ki nou pa bezwen ekpoz sa lo radyo akoz, mwa dir zot akoz,  i annan en problenm ler zot fer sa ki parfwa en bon voler ki i fer, i ekoute, i konnen demen bomaten tel ler, tel dimoun ek son bonnonm pe al tel landrwa, e ler i fer sa i konnen lakaz i riske napa personn ladan.  E i annan dimoun kin ganny afekte koumsa, letan li i anvil kot minister, deryer dimoun i pas kot li. 

Msye Speaker, noun ariv nou – nou viv nou dan en sosyete parey nou dir ki vin pli-zan-pli modern.  I annan dimoun i annan telefonn, e sa ki enteresan se pa toultan menm dimoun ki ganny apele lo radyo.  I annan en bann dimoun zot apel zot non lo radyo, me nou nou konnen dan ladministrasyon, i annan bokou dimoun ki deal avek administrasyon zanmen ou tann son non lo radyo, i fer biznes ek administrasyon, i pe monte desann dan minister, zanmen son non i gannyen mansyonnen lo radyo pou dir desann pou son miting.  Me i annan en bann dimoun zot zot bezwen ganny apele lo radyo.  Mon krwar sa distenksyon i enportan e ki nou tret tou nou sitwayen parey, anvoy en let, minister i la pou anvoy let, fer sir ki keksoz i ganny trete avek en serten konfidansyalite e ki sa dimoun osi i ganny trete avek en serten dignite.  Ler mon koz lo la, mon mazinen osi lo kestyon SPTC, ozordi mon konnen ki nouvo schedule SPTC in ganny fer dan en serten fason kot drayver i travay enpe pli lontan e zot travay zot parfwa 7 zour enn deryer lot. 7 zour lasemenn e o bout setyenm zour zot ganny zot 2 zour off.  E zot travay zot lazournen i long, 9 er-d-tan parfwa – 9 er-d-tan travay.  Sa ki enportan ladan se ki nou bezwen realize ki dignite sa bann drayver efektivman me dignite sa bann dimoun ki servi bis, akoz ler ou annan en drayver ki over-tired i kree en risk aksidan pou sa bann dimoun ki dan bis.  Donk i enportan sa bann keksoz.  Fodre nou asize nou reflesir lo la, nou pa vin fer politik la nou, nou vin dir ki i pa normal ki nou fer en sitiasyon kot i annan drayver bis ki pe responsab en kantite dimoun, monte desann, ki zot sitiasyon i tel kot zot pe dray e i annan en risk pou sa bann pasaze ki zot pe transporte.  Mon krwar nwa bezwen fer mannyer get solisyon kot i ete ladan. 

Pou en pti pei dan Sesel, mon krwar ki rikord meetings ki bann zofisye i gannyen, i bann meetings toultan i dir ou bann dimoun i dan meeting, dan meeting, mon krwar nou kas rikord lo la sa.  Konman ou telefonnen i dir ou en tel i dan miting.  Sa bann keksoz i fer ki parfwa dimoun in gannyen apwentman, i vini pou son apwentman, i espere sa dimoun, e ki i arive se ki zis sa dimoun i pa la, oubyen en sekreter i vini i dir ou koumsa i pa pe war dimoun ozordi, ale i ava pran kontak avek ou plitar, i ava apel ou e lanmenm ler ou ganny apele lo radyo parfwa.  Prezidan Rene dan son diskour in koze lo sa bann zafer, in apel sa enpe gaspiyaz, se mank de prodiktivite epi i fer ki dimoun i pa dan zot travay.  Akoz zot al pou en meeting sa dimoun pa la, zot bezwen retournen, i boulvers travay, i boulvers prodiktivite.  Mon krwar ki  nou rod en solisyon fodre nou fer mannyer nou rod en solisyon, nou bezwen dir administrasyon rod en solisyon pou ki sa bann keksoz i vin de mwen-z-an mwen.  I annan detrwa ka par egzanp, ka gratwite serten bann dimoun ase aze kin travay dan tarmak.  La chose enteresan la, se ki administrasyon i napa dokiman lo sa bann dimoun.  I dir ou rod 2 temwen e ler oun rod 2 temwen a kapab sertifye pou dir ou ti travay.  I annan ka bann dimoun ki plis ki 60 an, zot pe claim e mon konn ka enn de madanm ki pe claim e mannyer mon war ki ladministrasyon par mank de serten respe dignite sa dimoun, i fer sa keksoz, fer 2 zan, 3 zan, sa pov vye madanm pe rode menm e en ler i dir mwan, msye mannyer zot pe fer zot tia kontan mon mor pou ki sa dosye i ganny antere avek mwan.  Donk mon krwar set osi la en mank de respe et de dignite pou sa bann dimoun aze.

Msye Speaker, lo kestyon means testing,  nou konnen ki dan Sesel i annan anviron 13 mil dimoun ki apply pou means testing e i annan apepre 9 mil ki gannyen.  Se bann dimoun ki bezwen e zot gannyen.  Me sa ki enportan parey monn dir taler konstitisyon lartik 37, i dir ki ou annan en drwa ganny social security e sa drwa i merit osi ganny opere dan en serten fason kot sa dimoun ler i al rod sa lasistans, i pa ganny mal trete akoz in vin la in vin rode.  Anba Oceangate House nou konnen nou pase nou war sa bann dimoun ki pe al rod sa lasistans.  E sa bann dimoun parfwa zot napa, zot la, zot get ou ou get zot, ou war zot.  Akoz zot pa fer sa avek enpe plis de diskresyon ki sa dimoun – i vre i pe vin rod en larzan i bezwen me ou tret li avek en serten dignite kot i dan en lasal ki sa ki pas deor pa bezwen war li.  I enteresan akoz i annan 1½ an i annan en manm lasanble kin koz lo sa size isi, 1½ an pase ti annan en madanm dan SPPF, dan parti mazoriter, kin koz lo la, 1½ an apre i ankor parey.  Se ki vedir se ki fodre nou fer,fodre nou pa zis koze, nou fer met aksyon avek nou bann parol pou ki keksoz i avanse pou ki nou sitwayen ler i al rod sa led ki konstitisyon i dir ki fodre nou donn zot ler zot bezwen anka de bezwen ki zot osi zot gannyen sa konsiderasyon.  E i annan menm dimoun ale ler i ariv la zot dir li ranpli form.  Ler i fini ranpli form anvil dan biro means testing, serten zot pran form i annan serten dimoun zot dir li monte al dan ou distrik, al anmenn dan ou distrik.  I annan en biro means testing anvil.  Akoz ou bezwen pran sa dimoun re-anvoy li dan son distrik alor kin ariv kot ou in fini ranpli son form.  Si efektivman sa form ou merit anvoy dan distrik, ladministrasyon i la pou li fer sir ki sa form i remont dan distrik, me ou pa demann avek enn ou administre ou konsitwayen, ler ou annan en serten dignite pou li, ler ou panse ki i annan en serten dignite, ou pa demann li pou li al anmenn li menm.  Du moman in ranpli son form ou dir li byen, ou pran sa ou met dan ladministrasyon santral.  Mon krwar ki annan de ler nou fer tro, sitiasyon i vini ki nou fer dimoun parey yoyo monte desann.  E mon krwar si dan lepase sa ti ganny fer, pli nou pe avanse, pli nou pe vin enpe pli modern annou zisteman mon pe sey dir, annou tret dimoun avek serten respe ki zot pa bezwen pas dan sa bann tromatism parey. 

En lot kestyon lo pwen konfidansyalite, i annan dimoun ki ale, i annan son pti proze i al diskite, swa avek ozofisye labank, Development Bank ou lezot labank ki annan, mon pe koz bann labank piblik pa bann labank prive la, mon pe demann gouvernman, donk labank piblik, swa zot al war bann zofisye dan bann organizasyon YES scheme e tou bann zafer. Ler zot ale zot anmenn zot pti proze ki zot in reflesir, zot in mazinen, vreman zot pti proze pou zot pou fer, ki parfwa dimoun i vin avek bann proze pli gro, napa konfidansyalite e ki zot dir ek sa dimoun, ou file i la pa trakase, nwa ava ekri ou. I pran letan i pran letan, selman en pti kou ki ou tande i annan en lot boug i pe al fer menm biznes 2, 3, 4 semenn apre en lot dimoun pe al fer menm biznes, li son file i al pli vit.  Ler sa boug li i mazinen i vin get son file i tande i annan en lot boug, sa lide ki li i ti annan i al war avek en lot boug.  E menm son prezantasyon dan en serten fason i trouv avek en lot dimoun ki pe al fer menm biznes prezan li i fistre, si en biznes kot pa kapab annan konpetisyon parey isi dan serten sekter ou pa kapab fer tro bokou menm proze, sa dimoun li i war son biznes i ganny avorte akoz i annan dimoun ki pann tret son keksoz avek konfidansyalite e zot in al donn sa en lot dimoun.  Mon krwar ki ler monn dir sa bann keksoz, sa bann problenm reel ki egziste, annou sey rod en fason pou ki nou apros ladministrasyon pou ki sa bann keksoz pa ganny repete. Noun erite avek gouvernman kolonyal en bon ladministrasyon.  Son mantalite ladministrasyon mon krwar i merit dan en serten fason ganny met au bout du jour.  Dan sa ka si nou fer li e ki nou fer li ansanm nwa kapab arive gannyen keksoz de meyer pour la dignite pep Seselwa e osi gannyen ki bann keksoz i ganny trete avek konfidansyalite den fason ki tou dimoun i ava santi zot dan en serten fason an sekirite.  Mersi.

 

MR SPEAKER

Okenn ki segonn sa mosyon.  Onorab Chow.  Deba i ouver.  Okenn lentervansyon. 

Si napa mon demann ou, be napa naryen pou rezimen.  Be dan sa ka nou al vote.  Tou sa ki an faver lev zot lanmen.  22.  Okenn ki kont.  Personn. Alors sa mosyon in ganny aprouve, in ganny pase e sa i fini nou travay pou ozordi. Nwa rezwenn lot mardi 9 er bomaten.

 

 

At 2.45 pm, the Assembly was on its rising, adjourned to Tuesday 18th March, 1997 at 9 a.m.